བོད་ཡིག

e-texts based on the ACIP/ALL Input

/ (//rim gyis 'jug pa'i sgom don slob dpon bi ma la mi tras mdzad pa//) // rim gyis 'jug pa'i sgom don/ 'jam dpal gzhon nur gyur ba la phyag 'tshal lo/ /gang dag sgrib pa mdza' dag spang bar 'dod pa dang/ thams cad mkhyen pa nyid myur du thob par 'dod pa des zhi gnas dang lhag mthong bsgom pa dang/ byang chub tu sems bskyed bar 'bad bar bya'o/ /de yang dmus lang dang 'dra ba bdag gis bstan bar mi nus mod kyis/ 'on kyang lung dang bstan bcos gzhan dag la yang brten nas brjod par bgyi'o// zhi gnas lhag mthong gnyis la tshul bzhin du bsgoms nas rnam bar mi rtog ba'i ye shes 'byung ste/ de 'byung bas sgrib pa mdza' dag spangs nas thams cad mkhyen pa nyid thob ba ni/ zhi gnas dang lhag mthong gnyis la yun ring du nan tan byas pa las 'gyur te/ de bas na zhi gnas dang lhag mthong gnyis la 'bad bar bya'o/ /rgyu ma bsgrubs na 'bras bu mi 'byung ste/ sa bon dang myu gu bzhin no/ /rgyu nor ba las kyang mi 'byung ste/ rwa las 'o ma bzhi ba bzhin no/ /rgyu mdza' dag ma spyad ba las kyang 'bras bu thams cad mkhyen ba mi 'byung ste/ sa bon la sogs pa gang yang rung ba zhig med na/ 'bras bu mi 'byung ba bzhin no/ /'phags pa chos thams cad yang dag bar bsdus ba las kyang/ gang dag nga yis rjes su slob 'dod des/ /zhi gnas lhag mthong dag la 'bad bar bya'o/ /zhes gsungs so/ /de bas na rnal 'byor ba gang zhig zhig nas dang/ lhag mthong dang byang chub tu sems bskyed par bya'o/ /dper na rin po che bai DUrya'i khang pa na 'dug bas ni phyi nang kun gsal bar mthong ngo/ /de bzhin du rnam par mi rtog pa 'di la gnas na/ chos thams cad kyi dngos po'i mdza' rtogs te/ sgrib pa mdza' dag byang nas thams cad mkhyen pa thob pa ni/ rgyu la rag las par nges so/ /de bas na rnam par mi rtog pa la bsgom par bya'o/ /dper na ri bo mthon pa'o khar phyin na phal cher gsal bar mthong ngo/ /de bzhin du rnam par mi rtog pa 'di la gnas na shes bya thams cad la chags pa med pa dang thogs pa med par 'gyur ro/ /de bas na zhi gnas dang lhag mthong la bsgom bar bya'o/ /slob dpon klu sgrub kyis zhal snga nas kyang/ gang blo yod dang med ba las/ /rnam bar 'das shing mi gnas ba/ /de dag zab mo dmigs med pa'i/ /rkyen gyi don la rnam par bsgom/ /zhes bstan to/ /'phags pa ting nge 'dzin gyi rgyal po las kyang/ gang de chos la bdag med so sor rtog /so sor de rtogs gal te bsgom pa ni/ /de nyid mya ngan 'das 'thob 'bras bu'i rgyu/ /rgyu gzhan gang yin de ni zhing mi 'gyur/ /zhes gsungs so/ /bcom ldan 'das kyis kyang bka' stsal ba/ skye ba po yis lhag mthong dang/ /zhi gnas goms bar byas na ni/ /gnas ngan len gyi 'ching ba dang/ /mtshan ma'i 'chid las rnam grol 'gyur/ /zhe'o/ 'phags pa dgongs ba nges par 'grel ba las kyang/ bsam gtan gyis ni nyon mongs pa rnams 'jil lo/ shes rab kyis ni bag la nyal rab tu spong ngo/ /zhes gsungs so/ /de bas na sgrib pa mdza' dag spang bar 'dod pas zhi gnas dang lhag mthong bsgom par bya'o/ /zhi gnas kyi stobs kyis ni/ mar me rlung med pa na gsal ba bzhin du dmigs pa la sems mi g.yo bar 'gyur ro/ /lhag mthong gis ni mun par nyi ma shar bzhin du chos kyi de kho na nyid ji lta ba bzhin du rab tu rtogs pas/ yang dag pa'i snang ba 'byung ste/ sgrib pa mdza' dag spong bar gyur to/ /zhi gnas tsam 'ba' zhig goms par byas pas na rnal 'byor pa rnams kyi sgrib pa mi spong gi / re zhig nyon mongs pa rnam par gnon pa tsam du zad de/ /shes rab kyi snang ba byung ba med par bag la nyal lags par choms mi srid pa'i phyir/ bag la nyal legs par choms par mi 'gyur ro/ /de bas na 'phags pa dgongs pa nges par 'grel pa de nyid las/ bsam gtan gyis ni nyon mongs pa rnams rnam par gnon to/ /shes rab kyis ni bag la nyal legs par 'joms par byed do/ /zhes bka' stsal to/ /'phags pa ting 'dzin rgyal po las kyang/ /ting nge 'dzin de bsgom par byed mod kyi/ /de ni bdag tu 'du shes 'jug mi byed/ /de ni nyon mongs phyir zhing rab 'khrugs te/ /lhag spyod 'di ni ting 'dzin bsgom pa bzhin/ /gal te chos la bdag med so sor rtog /so sor de brtags gal te bsgom pa ni/ /de nyid mya ngan 'das thob 'bras bu'i rgyu/ /rgyu gzhan gang yin gyis ni zhir mi 'gyur zhes gsungs so/ /byang chub sems dpa' i sde snod las kyang/ gang dag byang chub sems dpa' i sde snod kyi chos kyi rnam grangs 'di ma thos/ 'phags pa'i chos 'dul ba ma thos par ting nge 'dzin tsam gyis chog par 'dzin pa ni/ nga rgyal gyi dbang gis 'khor bar ltung zhing skye ba dang/ rga ba dang/ na ba dang/ 'chi ba dang/ mya ngan dang/ smre sngags 'don pa dang/ sdug bsngal ba dang/ yid mi bde ba dang/ 'khrug pa las yongs su mi 'grol/ /'gro ba drug gi 'khor ba las yongs su mi 'grol/ /sdug bsngal gyi phung po las kyang yongs su mi 'grol te/ de la dgongs nas de bzhin gshegs pas 'di skad ces/ gzhan las rjes su mthun pas thos pa ni/ rga she las grol bar 'gyur ro/ /zhes bka' stsal to/ /de lta bas na sgrib pa mdza' dag spangs pas yongs su dag pa'i ye shes thob par 'dod pas zhi gnas la gnas shing shes rab bsgom par bya'o/ /de skad du 'phags pa dkon mchog brtsegs pa las kyang bka' stsal te/ tshul khrims la ni gnas nas ting nge 'dzin thob ste/ /ting nge 'dzin thob nas kyang shes rab bsgom par byed/ /shes rab kyis ni ye shes rnam par dag pa thog /ye shes rnam par dag par tshul khrims phun sum tshogs/ /zhes bka' stsal to/ /'phags pa theg pa chen po la dad pa bsgom pa'i mdo las kyang rigs kyi bu shes rab la nye bar mi gnas na/ byang chub sems dpa' rnams kyi theg pa chen po la dad pa dang/ theg pa chen po la ji ltar yang 'byung bar mi smra'o/ /rigs kyi bu rnam grangs 'dis kyang 'di ltar byang chub sems dpa' rnams kyi theg pa chen po la dad pa theg pa chen po las 'byung ba ci yang rung de thams cad ni/ rnam par ma g.yengs pa'i sems kyi don dang chos la yang dag par bsam pa las 'byung bar rig par bya'o/ /zhes bka' stsal te/ zhi gnas dang bral ba'i lhag mthong 'ba' zhig gis ni rnal 'byor pa'i sems yul rnams la rnam par g.yeng bar 'gyur gyi rlung gi nang na 'dug pa'i mar me bzhin du brtan par mi 'gyur ro/ /de bas na ye shes kyi snang ba shin tu gsal bar mi 'byung ste/ de lta bas na gnyi ga 'dra bar bsten par bya'o/ /de'i phyir 'phags pa yongs su mya ngan las 'das pa chen po'i mdo las kyang/ nyan thos rnams kyis ni/ de bzhin gshegs pa'i rigs ma mthong ste/ ting nge 'dzin gyi shas che ba'i phyir dang/ shes rab chung ba'i phyir ro/ /byang chub sems dpa' rnams kyis ni mthong mod kyi mi gsal te/ shes rab kyi shas che ba'i phyir dang/ ting nge 'dzin chung ba'i phyir ro/ /de bzhin gshegs pas ni thams cad gzigs te/ zhi gnas dang lhag mthong mtshungs par ldan pa'i phyir zhes bka' stsal te/ zhi gnas kyi stobs kyis ni mar me rlung med par bzhag pa bzhin du/ rnam par rtog pa'i rlung rnams kyis sems g.yos par mi 'gyur ro/ /lhag mthong gis ni lta ba ngan pa'i dra ba mdza' dag spangs pas/ gzhan dag gis mi phyed de/ zla ba sgron ma'i mdo las ji skad du/ zhi gnas stobs kyis g.yo ba med par 'gyur/ /lhag mthong stobs kyis ri dang 'dra bar 'gyur/ /zhes gsungs so/ /de bas na rnal 'byor pas nyon mongs pas/ rigs thams cad shes shing zil gyis gnon par 'dod pas/ zhi gnas dang lhag mthong gnyis la brtson par bya ste/ de skad bden pa gnyis bstan pa'i mdo las gsungs te/ 'jam dpal ji ltar nyon mongs pa rnams zil gyis gnon par 'gyur ji ltar nyon mongs pa rnams yongs su shes pa yin/ 'jam dpal gyi smras pa/ lha'i bu gang gi tshe nyon mongs pa rnams snang ba med pa'i yi shes kyis don dam par shin tu stong pa dang/ shin tu mtshan ma med pa dang/ shin tu dngos po med pa dang/ shin tu rang bzhin med par shes pa de'i tshe/ lha'i bu nyon mongs pa rnams rab tu shes pa yin no/ /lha'i bu 'di lta ste/ dper na gang sprul gdug pa'i rigs 'don pa des/ sprul gdug pa de'i dug zhi bar 'gyur ro/ /lha'i bu de bzhin du nyon mongs pa rnams kyi rigs rab tu shes pa de'i nyon mongs pa rnams rab tu zhi bar 'gyur ro/ /lha'i bus smras pa/ 'jam dpal nyon mongs par gyur pa rnams kyi rigs gang/ 'jam dpal gyis smras pa/ lha'i bu don dam par shin tu ma skyes pa dang/ ma byung b dang/ dngos po med pa dang/ mtshan nyid med pa'i chos thams cad la kun tu rtog pa gang yin pa de ni/ nyon mongs pa rnams kyi rigs yin no zhes rgya cher 'byung ngo/ /de bas na shes bya'i yul thams cad la ma rmongs pa/ chos thams cad kyi dngos po nyid kyi mdza' rtogs pas sgrib pa mdza' dag zil gyis gnon par byed pa dang/ spong ba ni zhi gnas dang lhag mthong gnyis la brten pas yin gyis gzhan gyis ni ma yin par nges so/ /de lta bas na gnyi ga la rnal 'byor du 'bad par bya'o/ /de la byang chub tu sems bskyed bar bya'o/ /byang chub kyi sems de yang rnam pa gnyis te/ kun rdzob dang/ don dam pa'o// de la kun rdzob ni snying rjes sems can mdza' dag mngon par gdon par dam bcas nas/ 'gro ba la phan pa'i phyir sangs rgyas su gyur cig snyam du bla na med pa yang dag par rdzogs pa'i byang chub 'dod pa'i rnam pa'i sems dang po skye ba'o/ /de yang byang chub sems dpa' i tshul khrims kyi le'u las bstan pa'i cho ga bzhin du/ byang chub sems dpa' i sdom pa la gnas pa/ mkhas pa pha rol po las mnod par bya'o/ /mthun pa med na sangs rgyas dang byang chub sems dpa' rnams mngon du byas la/ 'phags pa 'jam dpal rgyal po nam mkha' zhes bya bar gyur pa na/ byang chub tu sems bskyed pa bzhin du bskyed par bya'o? de nas don dam pa'i byang chub kyi sems bskyed pa'i phyir 'bad par bya'o/ /don dam pa'i byang chub kyi sems de ni/ 'jig rten las 'das pa spros pa'i mdza' dang bral ba/ shin tu gsal ba/ don dam pa'i spyod yul ba/ dri ma med pa mi g.yo ba/ rlung med pa'i mar me'i rgyun ltar mi g.yo ba'o/ /rnam par snang mdzad mngon par byang chub pa'i gtan tra las kyang/ byang chub nam mkha' i mtshan nyid de/ /rtog pa thams cad spangs pa yin/ /zhes gsungs so/ /yang gsungs pa/ gsang ba'i bdag po de shin tu phra ba'i chos kyang yod pa ma yin zhing/ dmigs su med do/ /des na bla na med pa yang dag par rdzogs pa'i byang chub ces bya'o/ /zhes gsungs so/ /de skad du zla ba sgron ma'i ting nge 'dzin las kyang/ bcom ldan 'das kyis byang chub kyi rang gi ngo bo bstan pa/ shin tu phra ba'i chos kyang yod ma yin/ /shin tu phra zhes bya ba'ang yod ma yin/ /zhes gsungs so/ /don dam pa'i byang chub ni chos kyi sku yin no/ /de 'grub pa ni rtag tu gus par yun ring du zhi gnas dang lhag mthong gi rnal 'byor la goms par byas pa las 'gyur te/ 'phags pa dgongs pa nges par 'grel pa las ji skad du/ bya bas pa yang nyan thos rnams kyi 'am byang chub sems dpa' rnams kyi 'am/ de bzhin gshegs pa rnams kyi dge ba'i chos dang/ 'jig rten pa'i bde ba dang/ 'jig rten las 'das pa thams cad kyang/ zhi gnas dang lhag mthong gi 'bras bu yin par rig par bya'o/ /zhes gsungs pa lta bu'o/ /de gnyis kyis ting nge 'dzin thams cad bsdus pa'i phyir rnal 'byor pa thams cad kyis dus thams cad du/ nges par zhi gnas dang lhag mthong bsten par bya ste/ 'phags pa dgongs pa nges par 'grel ba de nyid las/ bcom ldan 'das kyis ji skad du/ ngas nyan thos rnams dang/ byang chub sems dpa' rnams dang/ de bzhin gshegs pa rnams kyi ting nge 'dzin rnam pa du ma bstan pa gang yin pa de dag thams cad zhi gnas dang lhag mthong gis bsdus par rig par bya'o/ /zhes gsungs so/ /byang chub tu sems bskyed pa bsod nams che bar 'phags pa dpas byin gyis zhus pa las/ byang chub sems kyi bsod nams gang/ /de la gal te gzugs mchis ngan/ /nam mkha' i khams ni kun gang ste/ /de ni de bas lhag par 'gyur/ /zhes gsungs so/ /sdong po bkod pa las kyang bsngags te/ rigs kyi bu byang chub kyi sems ni sangs rgyas kyi chos thams cad kyi sa bon lta bu'o/ /zhes gsungs so/ /byang chub kyi sems de sgrub pa mi ldan yang/ 'khor ba'i nang na 'bras chen 'bar/ /byams pa'i rnam par thar pa las bka' stsal te/ rigs kyi bu 'di lta ste/ dper na rdo rje rin po che chag kyang gser gyi rgyan khyad par du 'phags pa thams cad zil gyis gnon to/ /rdo rje rin po che'i ming yang mi 'dor zhing dbul ba thams cad bzlog go /rigs kyi bu de bzhin du thams cad mkhyen pa nyid du sems bskyed pa'i rdo rje rin po che sgrub pa dang mi ldan yang/ nyan thos dang/ rang sangs rgyas kyi gser gyi rgyan thams cad zil gyis gnon to/ /byang chub sems dpa' i ming yang mi 'dor zhing 'khor ba'i dbul ba yang bzlog par byed do/ /zhes 'byung ngo/ /'phags pa rgyal po la gdams pa'i mdo las kyang/ rgyal po chen po khyod bya ba mang ba byed pa mang ste/ thams cad kyis thams cad rnam pa thams cad kyi thams cad du/ sbyin pa'i pha rol tu phyin pa la bslab pa nas/ shes rab kyi pha rol tu phyin pa'i bar la slob mi bzod na/ rgyal po chen po rdzogs pa'i byang chub la 'dun pa dang/ smon pa dang/ dad pa dang/ don du gnyer ba dus thams cad du/ 'gro yang rung/ 'greng yang rung/ 'dug kyang rung/ nyal yang rung/ sad kyang rung/ za yang rung/ 'thung yang rung/ rtag tu rgyun mi 'chad par dran par gyis shig /yid la gyis shig / bsgoms shig sangs rgyas dang/ byang chub sems dpa' dang/ nyan thos dang/ so so'i skye bo thams cad dang/ bdag gis 'das pa dang/ ma 'ongs pa dang/ da ltar byung ba'i dge ba'i rtsa ba ci byas pa thams cad bsdus pa la rjes su yi rang bar gyis shig ces 'byung ngo/ /de bas na thams cad mkhyen pa de thob par 'dod pa nges byang chub tu sems bskyed par bya'o/ /de la thog mar re zhig rnal 'byor pa gang zhig gis/ zhi gnas dang lhag mthong 'grub par 'gyur ba'i rgyu zhi gnas dang lhag mthong gi tshogs la ja brten par bya'o/ /de la zhi gnas kyi tshogs gang zhe na/ mthun pa'i yul la gnas pa dang/ 'dod pa chung ba dang tshogs shes pa dang/ bya ba mang po yongs su spangs pa dang/ tshul khrims rnam par dag pa dang 'dod pa la sogs pa'i rnam par rtog pas yongs su spangs pa'o/ /de la yon tan lnga dang ldan pa ni mthun pa'i yul yin par shes par bya ste gos dang zas la sogs pa tshogs med par rnyed pa'i phyir rnyed sla ba dang/ skye bo mi srun pa dang/ dgra la sogs pa mi gnas pa'i phyir gnas bzang ba dang/ nang med pa'i sa yin pa'i sa bzang ba dang/ grogs tshul khrims dang ldan pa mtshungs pa yin pas/ grogs bzang ba dang/ nyin mo skye bo mang po dag gis ma gang ba'i phyir dang/ mtshan mo sgra chung ba'i phyir legs par ldan pa'o/ /'dod pa chung ba gang zhan chos gos la sogs pa bzang po 'am mar po la lhag par chags pa med pa'o/ /chog shes pa gang zhe na/ chos gos la sogs pa ngan don tsam rnyed pas rtag tu cho ga shes pa gang yin pa'o/ /bya ba mang po yongs su spangs pa gang zhe na/ nyo chod la sogs pa bya ba ngan pa yongs su spangs pa dang/ khyim pa dang/ rab tu byung ba dag dang/ ha cang smon 'drin byed pa yongs su spangs pa dang/ sman byed pa dang/ skar ma brtsi ba la sogs pa yongs su spangs pa gang yin pa'o/ /tshul khrims rnam par dag pa gang zhe na/ sdom pa gnyis la yang rang bzhin dang bcas pa'i kha na ma thos dang bcas pa'i bslab pa'i gzhi mi 'dral ba dang bag med par ral na yang skyen pa skyen par 'gyod pas chos bzhin byed pa dang/ nyan thos kyi sdom pa la pham pa bcos su mi rung bar gsungs pa gang yin pa de la yang 'gyod pa dang ldan pa dang/ phyis mi bya ba'i sems dang ldan pa yin/ sems gang gis las de byas pa'i sems de la yang ngo bo nyid med par so sor brtag pa'i phyir ram/ chos thams cad ngo bo nyid med par bsgom pa goms par byas na de nyid tshul khrims rnam par dag pa kho na yin par brjod par bya'o/ /de ni 'phags pa ma skyes dgras 'gyod pa bsal ba las/ khong du chud par bya'o/ /de bas na des 'gyod pa med par byas la bsgom pa la brtson par bya'o/ /'dod pa rnams la yang tshe 'di dang tshe phyi ma la nyes dmigs rnam pa mang por 'gyur bar yid la byas la/ de dag la rnam par rtog pa spong par bya'o/ /rnam pa gcig tu na 'khor ba pa'i dngos po sdug pa 'am/ mi sdug pa yang rung ste/ /de dag thams cad ni rnam par 'jig pa'i chos can mi rtag pa ste/ gdon mi za bar de dag thams cad dang/ bdag ring po mi thog par 'bral bar 'gyur na/ bdag la ci zhig lhag par chags pa la sogs pas 'gyur snyam du bsgom pas/ rnam par rtog pa thams cad spangs pa'o/ /lhag mthong gi tshogs gang zhe na/ skyes bu dam pa la brten pa dang/ mang du thos pa yongs su btsal ba dang/ tshul bzhin sems pa'o/ /de la skyes bu dam pa la brten pa gang zhe na/ mang du thos pa dang/ tshig gsal pa dang snying rje dang ldan pa dang/ skyo ba bzod pa'o/ /de la mang du thos pa yongs su btsal ba dang/ tshul bzhin gang sangs rgyas bcom ldan 'das kyi gsung rab yan lag bcu gnyis po'i nges pa'i don dang drang ba'i don las gus par bya ba shin tu gnyan pa ste/ 'di ltar 'phags pa dgongs pa nges par 'grel pa las/ 'phags pa'i gtam 'dod pa bzhin ma thos pa ni lhag mthong gi gegs yin no zhes bka' stsal to/ /de gnyis las/ lhag mthong ni thos pa dang bsam pa las byung ba'i lta ba rnam par dag pa'i rgyu las byung ba yin no/ zhes gsungs so/ /'phags pa sred med kyi bus zhus pa las kyang/ thos pa dang ldan pa ni shes rab 'byung bar 'gyur ro/ /shes rab dang ldan pa nyon mongs pa rab tu zhi bar 'gyur ro/ /zhes bka' stsal to/ /tshul bzhin sems pa gang zhe na/ gang nges pa'i don dang drang ba'i don gyi mdo la sogs pa legs par gtan la 'bebs pa ste/ de ltar byang chub sems dpa' the tshom med pa na/ bsgom pa la gcig tu nges par 'gyur ro/ /de lta ma yin na the tshom gyi 'phyang mo cug pa'i thag pa la 'dug pa ni/ lam kha dpag gi mdor phyin pa'i mi ltar/ gang du yang gcig tu nges par mi 'gyur ro/ /rnal 'byor pas ni dus thams cad nya ba dang sha la sogs pa spang zhing/ mi mthun pa ma yin pa dang/ zas tshod zin par bza' bar bya'o/ /de la rnal 'byor pas bsgom pa'i dus na thog mar bya ba ci yod pa thams cad rdzogs par byas la bshang gci byas na dga' i tshar ma med par yid du 'ong ba'i phyogs su/ bdag gis sems can thams cad byang chub kyi snying po la dgod par bya'o snyam nga bsam zhing/ 'gro ba mdza' dag mngon par gdon pa'i bsam pa can gyis/ /snying rje chen po mngon du byas la phyogs bcu na bzhugs pa'i sangs rgyas dang byang chub sems dpa' thams cad la yan lag lngas phyag byas nas/ sangs rgyas dang byang chub sems dpa' i sku gzugs ri mo la sogs pa mdun du bzhag gam/ gzhan du yang rung ste/ de dag la ci nus kyi mchod pa dang bstod pa byas la/ rang gi sdig pa bshags nas 'gro ba mdza' dag gi don bsod nams la rjes su yi rang bar byas la/ stan shin tu 'jam po bde ba la rje btsun rnam par snang mdzad kyi skyil mo dkrung lta bu 'am/ skyil mo dkrung byed du yang rung/ yang na spyod lam ji ltar gnas kyang rung ste/ mig ha cang yang mi zum/ ha cang yang mi dbye bar sna'i rtse mor gtad cing lus ha cang yang mi sgu ha cang yang mi sgye ba drang por bsrang la dran pa nang du bzhag ste/ 'dug par bya'o/ /de nas phrag pa mnyam par gzhag pa la mgo mi mtho mi dma' zhing/ phyogs gcig tu ma yo bar bzhag ste/ sna nas lte bar drang por bzhag go /so dang mchu yang tho mal bar bzhag go /lce yang so'i drung du bzhag go /dbugs phyi nang du rgyu ba yang sgra can dang rngam pa can dang/ dbugs rgod pa can du mi gtang gi/ ci nas kyang mi tshor bar dal bu dal bus lhun gyis grub pa'i tshul gyis dbugs nang du rdub pa dang/ phyir 'byung ba de ltar bya'o/ /de la thog mar re zhig zhi gnas bsgrub par bya ste/ phyi rol gyi yul la rnam par g.yeng ba zhi gnas nang du dmigs pas rgyun du rang gi ngang gis 'jug la dga' ba dang/ shin tu sbyangs pa dang ldan pa'i sems nyid la gnas pa ni zhi gnas zhes bya'o/ /zhi gnas de nyid la dmigs pa'i tshe/ de kho na la rnam par spyod pa gang yin pa de ni/ lhag mthong yin te/ 'phags pa dkon mchog sprin las ji skad du/ zhi gnas ni sems rtse gcig pa nyid do/ /lhag mthong ni yang dag par so sor rtog go / zhes gsungs pa lta bu'o/ /de bas na bcom ldan 'das kyis rnal 'byor pa rnams kyi dmigs pa'i dngos po bzhi bstan te/ rnam par mi rtog pa'i gzugs brnyan dang/ rnam par rtog pa dang bcas pa'i gzugs brnyan dang/ dngos po'i mdza' dang/ dgos pa yongs su grub pa'o/ /de la zhi gnas kyis ni chos thams cad kyi gzugs brnyan gang yin pa dang/ sangs rgyas kyi sku gzugs la sogs pa la mos pa ste/ de ni rnam par mi rtog pa'i gzugs brnyan zhes bya'o/ /de la yang dag pa'i don la rnam par rtog pa med pas na/ de rnam pa mi rtog pa zhes bya'o/ /ji ltar thos pa dang/ ji ltar zin pa'i chos rnams kyi gzugs brnyan la mos te dmigs pas na gzugs brnyan zhes bya'o/ /rnal 'byor pa de kho na'i don rtogs par bya ba'i phyir/ gang gi tshe lhag mthong gis gzugs brnyan de nyid la spyod pa de'i tshe/ lhag mthong gi mtshan nyid de kho na la rtog pa'i rnam par rtog pa de kho na yod pas na/ rnam par rtog pa dang bcas pa'i gzugs brnyan zhes bya'o/ /rnal 'byor pa gzugs brnyan de nyid kyi ngo bo nyid ji lta ba bzhin du khong du chud de/ bdag gi bzhin gyi gzugs brnyan me long gi nang du byung ba la brtags na/ bdag gi bzhin la mi sdug pa la sogs pa mngon pa bzhin no/ /gang gi tshe dngos po'i mtshan nyid kyis de bzhin nyid rtogs par 'gyur ba de'i tshe/ dngos po'i mdza' khong du chud pas na/ sa dang po la dngos po'i mdza' la dmigs pa zhes bya'o/ /des na sman bcud kyis len pa za ba bzhin du/ bsgoms pa'i lam gyis sa lhag ma rnams su rim gyis shin tu rab tu rnam par dag pas skad cig pas gnas gyur nas gang gi tshe sgribs pa ma lus pa spangs pa'i mtshan nyid dgos pa yongs su rdzogs par gyur pa de'i tshe/ sangs rgyas kyi sa la ye shes de nyid dgos pa yongs su grub pa la dmigs pa zhes bya'o/ /de lta bu 'dis ci bstan pa yin zhe na/ zhi gnas dang lhag mthong goms par byas pas dngos po'i mdza' rtogs par 'gyur te/ des sgrib pa mdza' dag spong ba'i mtshan nyid dgos pa yongs su grub pa 'thob po/ /de nyid sangs rgyas nyid yin te/ de bas na sangs rgyas nyid thob par 'dod pas zhi gnas dang lhag mthong bsgom par bya'o/ /gang de gnyis la mi bsgom pa de ni dngos po'i mdza' yang mi rtogs/ dgos pa yongs su grub par yang mi 'gyur ro/ zhes bstan par 'gyur ro/ /de la rnal 'byor pas thog mar de bzhin gshegs pa'i sku gzugs ji ltar mthong ba dang/ ji ltar thos pa la sems bzhag nas zhi gnas bsgrub par bya ste/ de bzhin gshegs pa'i sku gzugs de yang gser btso ma bzhin du ser la/ mtshan dang dpe byad bzang pos brgyan pa/ 'khor gyi nang na bzhugs shing thabs rnam pa sna tshogs kyis sems can gyi don mdzad pa/ rgyun tu yid la byed pas/ de'i yon tan la 'dod pa bskyed cing/ bying ba dang/ rgod pa la sogs pa zhi bar byas pa ji srid du me mdun du bzhugs pa bzhin du gsal bar mthong bar gyur pa de srid du bsam gtan bya'o/ /'phags pa ting nge 'dzin gyi rgyal po las/ gser gyi kha dog lta bu'i sku lus kyis/ /'jig rten mgon po kun tu mdzes pa ste/ /dmigs pa de la gang gi sems 'jog pa/ /byang chub sems dpa' sems mnyam gzhag ces bya/ zhes gsungs so/ /de nas lhag mthong bsgom par bya ste/ ji ltar de bzhin gshegs pa'i sku'i gzugs brnyan 'di gang nas kyang ma gshegs/ gang du yang mi bzhud bzhugs pa bzhin du yang ngo bo nyid kyis stong la/ bdag dang bdag gi dang bral ba de bzhin du/ chos thams cad ngo bo nyid kyis stong zhing/ 'ong ba dang 'gro ba dang/ bral ba gzugs brnyan lta bu ste/ yod pa la sogs pa'i ngo bo dang bral ba'o/ /zhes spyad nas rnam par rtog pa med cing brjod pa med pa dang gcig tu 'gyur ba'i yid kyis de kho na bsgom zhing ji srid 'dod par 'dug par bya'o/ /ting nge 'dzin 'di ni/ da ltar gyi sangs rgyas mngon du bzhugs pa zhes bya ba'i ting nge 'dzin las bstan te/ ting nge 'dzin 'di'i phan yon ni zhib tu mdo de nyid las rig par bya'o/ /yang na 'di ltar dpyad par bya ste/ ci dmigs pa legs par 'dzin tam/ 'on te bying ngam/ 'on te phyi'i yul la sems g.yengs sam snyam du dpyad par bya'o/ /rmugs pa dang gnyid kyis non par gyur na/ mchog tu dga' ba'i dngos po sangs rgyas kyi sku gzugs ci 'dra ba yid la bya'o/ /yang mdzad pa bcu gnyis sam/ rten cing 'brel par 'byung ba yid la byas la/ bying ba dang rmugs pa bsal bar bya'o/ /sngon myong ba'i yul la sems rgod pa 'am/ rgod du dogs pa'am/ yang dag pa'i don la sems gtad du mi btub pa 'dra na 'du byed thams cad mi rtag pa dang/ sdug bsngal ba la sogs pa dang/ nang gi la mi gtsang ba sna tshogs dang/ phyi'i dngos po rnams la yang myur du 'bral ba dang/ yid brtan du mi rung ba dang/ gtan du mi 'grogs pa'i mtshan nyid yid la byas la rgod pa zhi bar bya'o/ /gang gi tshe bying ba dang rgod pa med par gyur te/ dmigs pa la sems rnal du 'jug pa de'i tshe/ rtsol ba glod la btang snyoms su bya'o/ /mdor na dran pa dang shes bzhin gyi thag pas yid kyi glang po che/ dmigs pa'i sdong po la gdags par bya'o/ /de nas rnal 'byor pas zhi gnas nas shes rab kyis de kho na btsal bar bya'o/ /zhi gnas 'ba' zhig gis ni chog par mi bya'o snyam du bsam mo/ /de kho na ji lta bu zhe na/ don dam par dngos po thams cad rang bzhin med pa dang/ gang zag dang phung po lnga dang/ chos su btags pa mdza' dag ni stong pa kho na ste/ de yang gang gis rtogs na shes rab kyis rtogs par 'gyur gyi gzhan gyis ni ma yin te/ 'phags pa dgongs pa nges par 'grel pa las/ bcom ldan 'das byang chub sems dpa' chos rnams kyi ngo bo nyid ma mchis par gang gi 'dzin lags/ spyan ras gzigs dbang phyug shes rab kyi pha rol tu phyin pas 'dzin to/ /zhes gsungs pa lta bu'o/ /de bas na zhi gnas la gnas te/ shes rab bsgom par bya'o/ de la rnal 'byor pas 'di ltar rnam par dpyad par bya ste/ gang zag ni phung po dang khams dang/ skye mched las gud na mi dmigs so/ /gang zag ni phung po la sogs pa'i ngo bo nyid kyang ma yin te/ phung po la sogs pa de dag ni/ mi rtag pa dang du ma'i ngo bo yin pa'i phyir dang/ gang zag ni rtag pa dang/ gcig pu'i ngo bo yin pas gzhan dag gis brtags pa'i phyir ro/ /de nyid dam gzhan nyid du mi rung ba'i gang zag gi dngos po yod par mi rung ste/ yang dngos po yod pa'i rnam pa gzhan med pa'i phyir ro// de bas na 'jig rten gyi nga dang nga'i zhes bya ba 'di ni 'khrul pa kho na'o/ /zhes dpyad par bya'o/ /chos la bdag med pa yang 'di ltar bsgom par bya ste/ chos shes pa ni mdor bsdu na phung po lnga dang/ skye mched bcu gnyis dang/ khams bco brgyad do/ /de la phung po dang/ skye mched dang/ khams gzugs can gang yin pa de dag ni/ don dam par na sems kyi rnam pa las gud na med de/ de dag rdul phra rab tu bshig la/ rdul phra rab rnams kyang cha shas kyi ngo bo nyid so sor brtags na/ ngo bo nyid nges par gzung du med pa'i phyir ro/ /de skad du 'phags pa lang kar gshegs pa las kyang bka' stsal te/ rdzas ni rdul du rnam gzhig cing/ /gzugs la rnam par mi rtog cig / sems tsam rnam par bzhag pa ni/ /lta ba ngan pa mi rtogs so/ /zhes 'byung ngo/ /de lta bas na thog ma med pa'i dus nas gzugs la yang dag pa ma yin pa la mngon par zhen pa'i dbang gis rmi lam na dmigs p a'i gzugs la sogs pa snang ba bzhin du byis pa rnams la sems nyid gzugs la sogs par phyi rol tu chad pa bzhin du snang gi don dam par na 'di la gzugs la sogs pa ni sems kyi rnam pa las gud na med do zhes dpyad par bya'o/ /lang kar gshegs pa las kyang/ phyi rol gzugs ni yod ma yin/ /rang gi sems nyid phyi rol snang/ /zhes gsungs so/ /yang langkar gshegs pa las kyang/ sems tsam la ni brten nas su/ phyi rol don la mi rtog go / de bzhin nyid du dmigs nas ni/ /sems tsam las kyang bzla bar bya/ /sems tsam las kyang bzlas nas su/ /snang ba med la bzla bar bya/ /snang med gnas pa'i rnal 'byor pa/ /de yis theg pa chen po mthong/ /zhes gsungs pa lta bu ste/ phyi'i yul don dam par med pa de bzhin du/ sems kyang 'di ltar snang du mi rung ste/ ji lta bu zhe na/ yul rnam par shes pa'i rang bzhin yin par yul yang shes pa can du 'gyur ro/ /yang na ni rnam par shes pa nyid gzugs yin pas sems kyang shes pa med par 'gyur ro/ /yang na ni yul rnam pa mang po sna tshogs yod pa bzhin du sems kyang sna tshogs du mar 'gyur ro// yang na ni sems bzhin du yul yang sna tshogs su mi 'gyur ro/ /yang na ni sems kyang gzugs can du 'gyur ro/ /yang na ni gzugs kyang sems bzhin du bltar mi mthong bar 'gyur ro/ /rnam pa gcig tu na yul med kyi sems nyid yul snang na ni/ gzugs dang kha dog gi rnam pa ji lta bur bsam pa dang/ ji ltar 'dod pa bzhin du thams cad du yul de nyid 'byung zhing snang ba'i rigs so/ /yang rnam pa gcig tu gzugs rdul gzhig ste/ rdul phra rab kyang cha shas kyis bshig na med pa bzhin du/ sems kyang med par 'gyur te/ de ltar sems nyid yul du snang du yang mi rung ste/ de lta bas na yul dang yul can dang/ rnam par rtog pa mdza' dag rmi lam dang mtshungs so/ /thog ma med pa nas gzugs su rtog pa'i bag chags smin pas gzugs la sogs pa'i rnam par snang ngo/ /zhe na de yang mi rung ste/ yul gzod ma nas med pas de'i bag chags kyang yod par mi rung ngo/ /'phags pa sa bcu pa las/ khams gsum pa ni sems tsam mo zhes 'byung ba dang/ 'phags pa langkar gshegs pa las kyang phyi rol don ni yod min te/ /rang gi sems ni phyi rol snang/ zhes 'byung ba yang sems tsam du bshad pas/ dngos po don dam par yod par 'dod pa dgag pa dang/ gdul bya la phan gdags pa'i phyir ro/ /de bas na gzugs la sogs pa brdzun pa de bzhin du/ sems kyang de las gud na med pas brdzun pa nyid do/ / ji ltar na gzugs la sogs pa sna tshogs kyi rnam pa yin pas/ gcig dang du ma'i ngo bo nyid ma yin pa de bzhin du/ sems kyang de las gud na med pa'i phyir gcig dang du ma'i ngo bo nyid ma yin no/ /de lta bas na sems ni rten cing 'brel par 'byung ba dang/ sgyu ma la sogs pa'i ngo bo nyid kho na'o/ /sems ji lta ba de bzhin du chos thams cad kyang rten cing 'brel par 'byung ba dang/ sgyu ma la sogs pa'i ngo bo nyid lta bu kho na'o/ /zhes dpyad par bya'o/ /des de ltar shes rab kyi pha rol tu phyin pas chos thams cad kyi ngo bo nyid la so sor brtags na/ don dam par chos thams cad 'das pa'i chos kyang dmigs su med/ ma 'ongs pa'i chos kyang dmigs su med/ de ltar byung ba yang dmigs su med do/ /'phags pa dkon mchog sprin las kyang bka' stsal te/ de ltar skyon la mkhas pa des/ spros pa thams cad dang bral ba'i phyir stong pa nyid bsgom pa la rnal 'byor du byed do/ /de stong pa nyid bsgom pa mang pas/ gnas gang dang gang dag tu/ sems 'phro zhing sems mngon par dga' ba'i gnas de dang de dag gi ngo bo nyid yongs su btsal na stong par rtogs so/ /sems gang yin pa de yang brtags na stong par rtogs so/ /sems gang gis rtogs pa de yang ngo bo nyid kun tu btsal na stong par rtogs so/ /de de ltar rtogs pas mtshan ma med pa'i rnal 'byor la 'jug ces 'byung ngo/ /de bas na yul dang yul can la sogs pa'i dngos po rnams ni/ smig rgyu'i chu la sogs pa bzhin du rang gi ngo bos stong pa yin no/ /de dag la yang de dang de dag la brten nas 'byung ba zhes rtog pa gang yin pa de ni kun rdzob yin no/ /de nyid kyi phyir 'phags pa langkar gshegs pa las/ dngos po skye ba kun rdzob tu/ /dam pa'i don du rang bzhin med/ ces gsungs so/ /'phags pa rgya cher rol pa las kyang/ shAkya'i sras pos rten cing 'brel 'byung chos/ /rang bzhin ngo bo nyid med mthong nas ni/ /nam mkha' lta bu'i sems dang rab ldan pa/ /g.yon can dpung bcas mthong bas g.yo ba med/ /ces 'byung ba dang/ dkon mchog ta la la las kyang/ /rkyen las skyes pa rang gi dngos ma skyes/ /chos kyi lus ni rgyal ba rnams kyi sku/ /mchog nyid rtag tu gnas pa nam mkha' bzhin/ /bstan na chos rnams sbyor ba 'thob par 'gyur/ /zhes 'byung ba dang/ sangs rgyas thams cad kyi yul la 'jug pa ye shes snang ba'i rgyan las kyang/ chos thams cad kyi rang bzhin thob pa ni cung zad kyang spros par mi byed do/ /ci'i phyir zhe na/ rgyu dang rkyen gyis bskyed pa'i phyir ro/ /gang rgyu dang rkyen gyis bskyang pa de ni/ shin tu ma skyes pa'o zhes 'byung ba dang/ 'phags pa klu sgrub kyi zhal snga nas kyang/ /rten cing 'brel par gang 'byung ba/ rang bzhin gyis ni de ma skyes/ /rang bzhin gyi ni gang ma skyes/ /de la skyes zhes ji skad bya/ /shin tu phra ba'i dngos la yang/ /gang gis skye bar rnam brtags pa/ /rnam par mi mkhas de yis ni/ /rkyen las byung ba'i don ma mthong/ /zhes 'byung ba ni/ don dam par rang bzhin med kyi kun rdzob tu ni rten cing 'brel par 'byung ba sgyu ma tsam du zad de/ 'phags pa langkar gshegs pa las kyang/ dngos rnams skye ba kun rdzob tu/ /dam pa'i don du rang bzhin med/ /rang bzhin med la 'khrul pa gang/ /de ni yang dag kun rdzob 'dod/ /ces 'byung ba ni/ don dam par rang bzhin med par dgongs pa'o/ /de bas na dngos po rnams don dam par bdag dang gzhan dang/ gnyis ka dang/ rgyu med pa las skye bar mi rung ste/ ji ltar bdag dang gzhan las mi skye ba ni/ bdag rang las mi skye ba'o/ /ci ste dngos po rnams bdag las skye na bdag skyes zin pa skye 'am/ ma skyes pa skyes/ skyes zin pa skye zhes bya bar ni/ bdag nyid grub pas skyed du mi rung ngo/ / rnam pa gcig tu na skyes pa skye na ni/ nam yang mi skye bar mi 'gyur ro/ /thug pa med par 'gyur ro/ /ma skyes pa skye na ni/ /ri bong gi rwa dang/ mo gsham gyi bu dang nam mkha' i me tog kyang skye bar 'gyur te/ de bas na bdag las mi skye'o/ /gzhan las kyang skyer mi rung ste/ thams cad las thams cad skye ba'i skyon du 'gyur ba'i phyir ro/ /bdag dang gzhan gnyis las kyang mi skye ste/ gong du smos pa'i skyon gnyi ga 'du bar 'gyur ba'i phyir ro/ /rgyu med pa las kyang mi skya ste/ ci la yang rag ma lus pas rtag tu 'byung ba dang/ dus thams cad du 'byung ba na/ rgyu la rag ma lus pas/ 'dus byas ma yin pas rtag pa'i skyon du 'gyur ro/ /don du bsgrub pa'i brtson pa thams cad don med pa'i nyes par 'gyur ba'i phyir ro/ /de ltar na dngos po thams cad skye ba mi 'thad pa de'i phyir skye ba mi srid de/ skye ba brjod pa ni tha snyad gdags pa tsam du zad de/ don dam par na sangs rgyas dang/ mya ngan las 'das pa yang med na/ gzhan lta smos kyang ci dgos snyam du dpyad par bya'o/ /'phags pa shes rab kyi pha rol tu phyin pa las/ rab 'byor sangs rgyas kyang rmi lam lta bu sgyu ma lta bu'o/ /mya ngan las 'das pa yang rmi lam lta bu sgyu ma lta bu'o/ /mya ngan las 'das pa'i chos las lhag pa zhig yod na yang/ de yang rmi lam lta bu sgyu ma lta bu'o/ zhes gsungs so/ /de bas na 'dus byas dang 'dus ma byas pa'i chos thams cad ni/ yang dag par med pa kho na yin no/ /snyam du bsgom par bya'o/ /de ltar chos su btags pa mdza' dag med pa kho na la zhugs pa de/ yongs su brtag par bya ba gzhan med pas/ rtog pa dang dpyod pa dang bral ba brjod pa med pa/ dad gcig tu 'gyur ba'i mi rtog pa'i yid la byed pa rang gi ngang gis 'jug pa mngon par 'du byed pa med pas/ de kho na nyid la shin tu gsal bar bsgom zhing 'dug par bya'o/ /de ltar gnas nas sems kyi rgyud rnam par mi g.yeng bar bya'o/ /de ltar gyur na spros pa rnam par mi rtog pa nyid la zhugs pa yin no/ /gzugs la sogs pa la mi gnas pa yin no/ /shes rab kyis brtags na dngos po mdza' dag gi ngo bo nyid ma dmigs pa'i phyir/ shes rab mchog gi bsam gtan pa yang yin no/ /gang gi tshe bar skabs su sems phyi rol tu rnam par g.yengs ba mthong pa de'i tshe/ de'i ngo bo nyid la brtags nas rnam par g.yeng ba zhi bar byas pa/ yang de nyid du sems bzhag par bya'o/ /gang gi tshe de la sems mngon par mi dga' bar mthong ba de'i tshe/ ting nge 'dzin gyi yon tan mthong ba'i phyir de la dga' ba bsgom par bya'o/ /rnam par g.yeng ba la nyes par mthong ba'i phyir/ mi dga' ba rab tu zhi bar bya'o/ /ci ste/ rmugs pa dang gnyid kyis non pas gyur pa mi gsal pa'i phyir sems bying ba'am bying du dogs par mthong pa de'i tshe mchog tu dga' ba'i dngos po sangs rgyas kyi sku gzugs la sogs pa 'am rten cing 'brel par 'byung ba 'am/ mdzad pa bcu gnyis la sogs pa yid la byas la bying ba zhi bar byas la de kho na nyid de shin tu brtan pa gzung bar bya'o/ /ci ste gang gi tshe sngon myong ba'i yul la 'dod pas bar skabs su sems rgod pa 'am/ rgod du dogs par mthong ba de'i tshe/ mi rtag pa la sogs pa'i skyo ba'i dngos po yid la byas la dgod pa zhi bar bya'o/ /de nas yang da kho na nyid la sems mngon par 'du bya ba med par 'jug par 'bad par bya'o/ /gang gi tshe sems yang dag pa'i don la mi gnas na rgod pa dang bying ba yin pas zhi gnas med pa yin par rig par bya'o/ /ci ste gang gi tshe bying ba dang rgod pa las dben pa'i phyir/ mnyam par bzhugs shing rang gi ngang gis 'jug pas de kho na nyid la sems shin tu gsal ba byung bar gyur pa de'i tshe/ rtsol ba glod la btang snyoms su bya ste/ de'i tshe zhi gnas dang lhag mthong zung du 'brel ba'i lam grub pa yin par rig par bya'o/ /yang gang gi tshe lhag mthong bsgoms pas shes rab shin tu che bar gyur pa de'i tshe zhi gnas tshungs pa'i phyir mar me rlur la bzhag pa bzhin du sems g.yo bas de kho na shin tu gsal par mi mthong bar 'gyur te/ de'i phyir de'i tshe zhi gnas bsgom par bya'o/ /zhi gnas kyi shas chen yang gnyid kyis log pa bzhin du de kho na shin tu gsal bar mthong bar mi 'gyur te/ de lta bas na de'i tshe yang shes rab bsgom par bya'o/ /gang gi tshe glang gnyis zung du 'brel te/ mnyam du 'jug pa bzhin du/ gnyis ka mnyam du zhugs bar gyur pa de'i tshe/ ji srid du lus dang sems la gnod pa ma gyur pa de srid du/ mngon par 'du bya ba med par gnas par bya'o/ /mdor na ting nge 'dzin thams cad la nye bar gnas pa drug yod de/ le lo dang/ dmigs pa brjed pa dang/ bying ba dang/ rgod pa dang/ mi rtsol ba dang rtsol ba'o/ /de dag gi gnyen por spong ba'i 'du byed ba rgyang bsgom par bya ste/ /'di lta ste dad pa dang 'dun pa dang/ rtsol ba dang/ shin tu sbyangs pa dang/ dran pa dang/ shes bzhin dang/ sems pa dang/ btang snyoms so/ /de la dang po bzhi ni le lo'i gnyen po ste/ 'di ltar ting nge 'dzin gyi yon tan rnams la/ mngon par yid ches pa'i mtshan nyid kyis dad pas rnal 'byor pa 'dod pa skyed par 'gyur ro/ /de nas 'dod par gyur pas brtson 'grus rtsom mo/ /de nas brtson 'grus la rten nas lus dang sems las su rung ba nyid du byed do/ /de nas lus dang sems shin tu sbyangs pas le lo ldog par 'gyur ro/ /de bas na dad pa la sogs pas le lo spong bar 'gyur ro/ /de'i phyir de dag bsgom par bya'o/ /dran ba ni dmigs pa brjed pa'i gnyen po'o/ /shes bzhin ni bying ba dang rgod pa gnyis kyi gnyen po ste/ des de gnyis rtogs nas spong ba'i phyir ro/ /bying ba dang rgod pa ma zhi ba'i dus na mi rtsol ba nyes pa ste/ de'i phyir de'i gnyen por sems pa bsgom par bya'o/ /gang gi tshe bying ba dang rgod pa rab tu zhi ste/ sems rnal du 'jug pa de'i tshe/ rtsol ba nyes pa ste/ de'i gnyen por btang snyoms bsgom par bya'o/ /sems mnyam par bzhag pa'i tshe gal te rtsol ba byas na/ de'i tshe rnam par g.yengs par 'gyur ro/ /sems bying bar gyur ba la gal te rtsol ba ma byas na/ de'i tshe lhag mthong med pa'i phyir mig long pa bzhin du sems bying bar 'gyur ro/ /de lta bas na sems zhum pa bsal ba'i phyir dang rgod ba zhi bar byas la mnyam par gyur pa la btang snyoms su bya'o de nas rnal 'byor pa ji srid du dga' ba de srid du mngon par 'du bya ba med pa kho nar de go na bsgom zhing 'dug par bya'o/ /lus dang sems la gnod par gyur na/ skabs skabs su 'jig rten mdza' dag la bltas la/ sgyu ma lta bu dang/ rmi lam lta bu dang/ chu zla lta bu dang/ mi g.yor lta bur rtogs par bya'o/ /de skad rnam par mi rtog par 'jug pa las kyang bka' stsal te/ 'jig rten las 'das pa'i ye shes kyis chos thams cad nam mkha' i dkyil dang 'dra bar mnyam par mthong ngo/ /de'i rjes la thob pas ni sgyu ma dang/ smig rgyu dang/ chu zla bzhin du mthong ngo zhes 'byung ngo/ /de ltar 'gro ba sgyu ma lta bur rtogs nas sems can thams cad la snying rje chen po mngon du byas la/ 'di snyam du bsam par bya ste/ byis pa'i blo can de dag gis chos zab mo 'di lta bu ma rtogs na/ gzod ma nas zhi ba'i chos rnams la yang yod pa la sogs par sgro btags de/ phyin ci log tu gyur nas las dang nyon mongs pa rnam pa sna tshogs sogs te/ de'i phyir 'khor bar yongs su 'khyams pas na/ bdag gi ci nas kyang 'di dag chos zab mo 'di lta bu khong du chud par bya'o snyam du bsam par bya'o/ /de nas dal pas ste yang de bzhin du chos thams cad mi snang pa'i ting nge 'dzin la 'jug par bya'o/ /yang sems skyo bar gyur na yang bso ste/ de bzhin du 'jug par bya'o/ /de lta bu'i rim pa 'dis chu tshod gcig gam/ mel tshe thun phyed dam/ thung gcig gam/ ji srid du nus pa de srid du 'dug par bya'o/ de nas 'dod na ting nge 'dzin de las langs la skyil mo krung ma bshig par 'di snyam du bsam bar bya ste/ chos 'di dag thams cad don dam par na ma skyes pa yin yang/ sgyu ma bzhin du rgyu rkyen so sor nges pa sna tshogs 'dus pa'i dbang gis ma brtags na nyams dga' ba sna tshogs kho na dag 'byung ste/ des na chad par lta bar yang mi 'gyur ro/ /sgro 'dogs pa'i mthar yang mi 'gyur te/ 'di ltar shes rab kyis rnam par dpyad na mi dmigs te/ des na rtag pa nyid dang sgra 'dogs pa'i mthar yang mi 'gyur ro/ /de lta ma yin na las dang 'bras bur 'brel ba la sogs par ji ltar rnam par gnas par 'gyur/ bcom ldan 'das kyis kyang/ dngos po skye ba kun rdzob tu/ /dam pa'i don du rang bzhin med/ ces bka' mi stsol to/ /de la gang dag shes rab kyi mig dang bral bas phyin ci log gi blo can du gyur cing/ bdag tu mngon par zhen nas las sna tshogs byed pa de dag ni 'khor ba na yongs su 'khyam mo/ /gang dag 'khor ba las gcig tu mi phyogs shing/ snying rje chen po dang bral ba dang/ sems can gyi don du sbyin pa la sogs pa pha rol tu phyin pa rdzogs par mi byed kyi/ bdag dul ba 'ba' zhig byed pa'i sems can thabs med pa'i phyir nyan thos sam rang sangs rgyas su ltung ngo/ /gang dag 'gro ba ngo bo nyid med pa khong du chud nas kyang snying rje chen po'i stobs kyis 'gro ba mdza' dag gdon par dam bcas nas/ sgyu ma mkhan bzhin du blo phyin ci log tu ma gyur pas/ bsod nams dang ye shes kyi tshogs rgya chen po bsgrub pa de dag ni/ de bzhin gshegs pa'i go 'phang brnyes nas 'khor ba na 'gro ba ma lus pa la/ phan pa dang bde ba'i rnam pa thams cad yang dag par bsgrub cing bzhugs so/ /de dag kyang ye shes kyi tshogs kyi stobs kyis nyon mongs pa mdza' dag spangs pas 'khor bar yang mi ltung la sems can thams cad la lta bas bsod nams kyi tshogs rgya che zhing tshad med pa bsags pa'i dbang gis ni/ mya ngan las 'das par yang mi ltung ngo/ /sems can thams cad kyi nye bar 'tsho bar yang 'gyur ro/ /de lta bas na sems can mdza' dag la phan pa dang/ bde ba bskyed par 'dod pas/ mi gnas pa'i mya ngan las 'das pa thob par 'dod pa dag gis/ bsod nams dang ye shes kyi tshogs rgya chen po grub pa la/ dus thams cad du mngon par brtson par bya'o/ snyam du bsam mo/ /de skad de bzhin gshegs pa'i gsang ba'i mdo las kyang bka' stsal te/ ye shes kyi tshogs kyis ni/ nyon mongs pa thams cad spong bar 'gyur lags so/ /bsod nams kyi tshogs kyis ni sems can thams cad nye bar 'tsho bar 'gyur lags so/ /bcom ldan 'das de ltar lags pas/ byang chub sems dpa' sems dpa' chen po bsod nams kyi tshogs dang ye shes kyi tshogs la brtson par bgyi'o/ /zhes 'byung ngo/ /'phags pa de bzhin gshegs pa'i skye ba 'byung ba'i mdo las kyang bka' stsal te/ gang de bzhin gshegs pa rnams 'byung ba de ni rgyu gcig bu ma yin no/ /de ci'i phyir zhe na/ kye rgyal ba'i sras de bzhin gshegs pa rnams ni yang dag par 'grub pa'i rgyu tshad med pa 'bum phrag bcus yang dag par 'grub ste/ bcu gang zhe na/ 'di lta ste/ bsod nams dang ye shes tshad med pas mi ngoms pa yang dag par 'grub pa'i rgyud dang zhes bya ba la sogs pa rgyas par 'byung ngo/ /'phags pa dri ma med par grags pas bstan pa las kyang bka' stsal te/ kye grogs po dag de bzhin gshegs pa'i sku ni bsod nams brgya las nges par skyes pa'o/ /dge ba'i chos thams cad las nges par skyes pa'o/ /zhes bya ba la sogs pa rgya cher 'byung ngo/ /de ltar byas nas dal gyis skyil mo krung bshig ste/ phyogs bcu na bzhugs pa'i sangs rgyas dang byang chub sems dpa' thams cad la phyag 'tshal nas/ de dag la mchod pa dang bstod pa byas la/ 'phags pa bzang po spyod pa la sogs pa'i smon lam gdab bo// de nas stong pa nyid dang/ snying rje chen po bla na med pa'i byang chub tu yongs su bsngo ba'i sbyin pa la sogs pa bsod nams kyi tshogs sgrub pa la mngon par brtson par bya'o/ /de la gang dag chos zab mo thos pa tsam gyis byang chub 'thob ste/ 'phags pa dkon mchog 'byung gnas kyi mdo las/ mdo 'di thos pa dang/ mthong ba dang/ lag tu blangs pa/ tsam gyis byang chub thob po zhes gsungs pas/ de bas na bsgom mi dgos so zhes zer ro/ /de la bshad pa de ni/ gzhugs pa dang ldem por re? dgongs pa yin gyi yang dag pa'i don ma yin te/ ma bsgrubs ma bsgoms par sgrib pa mdza' dag mi spong la/ thams cad mkhyen pa yang mi thob ste/ 'phags pa phal po che las/ byang chub sems dpa' chos dpal gyis byang chub sems dpa' 'jam dpal la lan smras pa/ gang gi don du dris pa rnams/ /sangs rgyas sras po nga la nyon/ /yang dag sangs rgyas bstan ba 'di/ /thos pa tsam gyis mi 'grub bo/ /la la stobs med chu klung gis/ /nam gyis khyer bar gyur pa dag/ skom bzhin shi bar gyur pa bzhin/ /ma bsgom chos kyang de bzhin no/ /ji ltar 'gro ba mang po la/ /zas dang skom dag sbyin nas kyang/ /bdag nyid bkres bas shi ba ltar/ /de bzhin chos la ma bsgoms pa'o/ ji ltar sman pa la la zhig /sman rnams thams cad bdog bzhin du/ /lto ba'i nad kyi shi ba bzhin/ /chos la ma bsgoms de bzhin no/ /ji ltar dbyig gi mdzod dag tu/ /rin chen mang po bgrang byed kyang/ /nam phyed tsam yang mi thob pa/ /chos la ma bsgoms de bzhin no/ /ji ltar bde ba kun ldan pa'i/ /rgyal po'i pho brang 'khor skyes kyang/ /zas dang skom dag mi gtang ba/ /de bzhin chos la ma bsgoms pa'o/ /ji ltar 'on pa rol mo yi/ /sil snyan glu la mkhas pa zhig / gzhan dag de yi dga' byed pa/ /chos la ma bsgoms de bzhin no/ /ji ltar dmus long ri mo bzhin/ /tshong dus dbus su bris gyur kyang/ /bdag nyid kyis ni mi mthong ba/ /chos la ma bsgoms de bzhin no ji ltar mtsho chen mnyan pa zhig / skye bo mang po sgrol byed kyang/ /bdag nyid de nang 'chi bar 'gyur/ /chos la ma bsgoms de bzhin no/ /zhes gsungs so /bka' de ni dus gzhan la dgongs pas 'bras bu yang dus ring la/ ma bsgoms par thams cad mkhyen pa mi 'grub par gsungs so/ /kha cig na re sbyin pa byas pa dang/ dkon mchog gsum la mchod pa byas pas/ byang chub 'thob pas dgon pa bsten cing bsgom mi dgos so/ zhes zer ro/ /de bshad pa/ dgon pa la ma brten ma bsgoms par thams cad mkhyen pa nyid mi thob ste/ 'di ltar 'phags pa byams pa seng ge sgra chen po'i mdo las/ bka' stsal pa/ 'od srungs gang gis stong gsum gyi stong chen po'i 'jig rten gyi khams 'di/ chu'i phung po nas bzung ste/ tshangs pa'i 'jig rten gyi mthar thug pa'i bar du/ 'bru mar gyis yongs su bkang ste/ mar me'i snying po ri rab tsam btsugs nas de bzhin gshegs pa la ma chad pa dang/ gzhan yang stong gsum gyi stong chen po'i 'jig rten gyi khams 'dir/ me tog dang bdug pa dang/ bye ma dang/ spos dang/ rgyal mtshan dang/ bla re dang/ 'phan gdugs la sogs pas rab tu bkang ste/ de bzhin gshegs pa la mchod pa'i las kyi phyir lo 'bum gyi bar du nyin lan gsum mtshan lan gsum du phul ba bas ni/ gang gis byang chub don du gter zhing tshul khrims kyi phung po la gnas pa des/ mkhan po 'am slob dpon la lung mnos te/ kha ton tu byed cing tha na tshig bzhi pa'i don yid la byed pa dang/ 'du 'dzi'i gtam gyis 'jigs shing skrag /khams gsum thams cad kyis 'jigs shing skrag / sems can gyi don mngon par bsgrub pa na dgon pa la mngon par phyogs de gom pa bdun 'dor bar byed pa de/ de bas bsod nams mang du bskyed par 'gyur ro/ zhes gsungs so/ /gzhan yang rgyal po mu khyud 'dzin gyis/ de bzhin gshegs pa me tog sna tshogs la lo brgyad khri bzhi stong gi bar du/ mchod pa'i rnam pa zhal zas dang/ na bza' dang/ gzims cha dang/ bsnyun gsos dang/ me tog dang/ bdug pa dang/ spos dang/ rgyal mtshan dang/ bla re dang 'phan gdugs dang/ rgyal srid dang/ rin po che sna bdun la sogs pa sbyin pa byas pa bas/ gang gis dgon pa'i gnas su gnas nas chos thams cad ma skyes pa'o/ zhes bsgoms nas/ tha na se gol gtogs pa tsam du bsgoms nas/ snga ma de ba stong gi cha dang/ 'bum gyi cha dang/ bye ba'i cha dang/ bye ba phrag brgya'i cha dang/ bye ba phrag 'bum gi cha dang/ bye ba khrag khrig phrag 'bum gyi cha dang/ grangs dang/ cha dang/ bgrang ba dang/ dpe dang/ nye bar 'jal ba dang/ rgyu'i bar du yang nye bar mi 'gro'o zhes gsungs pas/ sbyin pa ni don chung bar gsungs la/ dgon pa la brten te/ bsgoms pas ni don che bar mdo sde du ma las kyang gsungs so/ /'phags pa chos bzhi pa'i mdo las/ dge slong dag byang chub sems dpa' chen po ji srid 'tsho'i bar du/ dgon pa la gnas pa srog gi phyir yongs su btang bar mi bya'o/ /zhes gsungs so/ /'phags pa dkon mchog brtsegs pa las/ sngon gyi sangs rgyas 'jig rten mgon/ /gang du mya ngan 'das gyur pa/ /kun gyis dgon pa rab dgon tu/ /bla med byang chub brnyes par 'gyur/ /myur du dgon par ngas byed na/ /'dod pa'i srid pa spong 'gyur zhing/ /nyes pa ji bzhin rnam rig nas/ de dag las ni sems ldog 'gyur/ /khyim ni myur du spangs nas su/ /dgon pa la ni gnas gyur pa/ /mkhas pa yang dag mthong ba rnams/ /sangs rgyas rnams kyi rjes su slob/ /gang dag byang chub phyir brtson pa/ /de dag dben pa bsten byed cing/ /de dag dgon pa dga' 'gyur gyi/ /de dag khyim la dga' mi 'gyur/ /de dag sangs rgyas rnam dag gi /spyod yul rnams dang spyod pa ste/ /gang zhig lam 'dir 'jug 'gyur ba/ /de la byang chub rnyed dka' min// zhes gsungs te/ de bas na dgon pa la brten te/ zhi gnas dang lhag mthong la brtson par bya'o/ /'phags pa 'jam dpal gyi zhing gi yon tan bkod pa las/ yang shA ri'i bu byang chub sems dpa' khyim pa gang gis/ gang+gA'i klung gi bye ma snyed kyi de bzhin gshegs pa dge slong gi dge 'dun 'khor dang bcas pa rnams la/ gang+gA'i klung gi bye ma snyed kyi bskal par/ bde bar sbyar ba thams cad kyis bsti stang du byas pa bas/ byang chub sems dpa' rab tu byung nas sam/ rab tu byung bar 'dod bas dgon pa logs su phyogs te/ gom pa bdun por na 'di ni de bas bsod nams kyi tshogs mang du bskyed do/ /ches myur du byang chub thob par 'gyur ro/ /zhes gsungs te/ de bas na dgon pa la brtson par bya'o/ /kha cig na re 'dri klog byas bas las dang nyon mongs pa thams cad byang bar 'gyur bas/ tshul bzhin yid la bya mi dgos so zhes zer ro/ /de la bshad pa/ 'phags pa dkon mchog brtsegs pa las/ 'od srungs 'di lta ste/ dper na/ khyim mam khang pa lo 'bum 'das par gyur kyang lan 'ga' yang mar me ma bus pa der/ mi la la zhig gis mar me bus na/ 'od srungs 'di ji snyam du sems/ mun pa mun nag de 'di snyam du bdag ni lo 'bum du bsags pa'i yin te/ bdag ni 'di nas mi 'gro'o snyam du sems sam/ gsol pa bcom ldan 'das de ni mi sems lags te/ mar me bus pas mun pa mun nag la mchis pa'i mthu ma mchis kyi gdon mi 'tshal bar ma mchis par 'gyur lags so/ /bcom ldan 'das kyis bka' stsal pa/ 'od srungs de bzhin du/ las dang nyon mongs par gyur pa lo 'bum du bsags pa yang/ tshul bzhin du yid la byed pa'i so sor rtog pa cig gis med par 'gyur ro/ /'od srungs mar me zhes bya ba de ni/ 'phags pa shes rab kyi dbang po'i tshig bla dags so/ /'od srungs mun pa mun nag ces bya ba de ni las dang nyon mongs pa'i tshig bla dags so/ /zhes 'byung ngo/ /yang de nyid las gsungs pa/ 'od srungs tshul bzhin yid la byed pa so sor rtog pa gcig gis bskal pa 'bum du bsags pa'i las dang nyon mongs par gyur pa rnams byang bar 'gyur ro/ /zhes gsungs pas/ de bas na 'dri klog ni don chung bas gsungs so/ /kha cig na re khyim na gnas shing dge ba byas pas byang chub thob pas/ dgon pa la brten te/ zhi gnas dang lhag mthong bsgom mi dgos so zhes zer re/ /de la bshad pa/ zla ba sgron ma'i mdo las gsungs pa/ 'dod pa dag ni rab tu bsten byed cing/ /bu dang chung ma dag la sred bskyed nas// smad par bya ba'i khyim la brten pa de/ /bla med byang chub dam pa gzhar mi 'thob/ /gang dag 'dod pa'i lci skam me bzhin spong/ /bu dang chung ma dag la sred spangs nas/ /khyim gyi skra ste khyim nas mngon byung ba/ /de dag byang chub mchog 'di rnyed di ma dka' / /gang dag khyim na gnas par byed bzhin du/ /byang chub dam pa mchog 'di thob pa yi/ /sangs rgyas yang sngon chad ma byung ste/ /ma 'ongs pa'ang mi 'byung gnas pa med/ /rgyal srid mchil ma'i thal ba bzhin spangs nas/ /dben pa 'dod te dgon par gnas byed pa/ /nyon mongs spangs te bdud kyi dpung bcom nas/ /byang chub rdul med 'dus ma byas 'tshang rgya/ /gang zhig byang chub rab tu 'dod byed cing/ /'dus byas ngan las yid byung sems can gyi/ /don du phyogs te dgon par gom bdun bor/ /'di ni de bas bsod nams khyad par 'phags/ /gang dag dga' dang mi dga' cung zad med/ /de dag mi yi 'jig rten rtag rab bde/ /gang dag gnas dang ri su la dga' ba ni/ /dge sbyong nyid kyi rab bde myong bar 'gyur/ /gang dag bdag ri byed pa ca yang med/ /gang dag yongs 'dzin rnam pa kun tu med/ /bse ru lta bur 'jig rten 'dir gnas pa/ /de dag nam mkha' la ni rlung ltar 'gro/ /gang dag 'jig rten la ni yid ma tshigs/ /de dag mi yi 'jig rten rab tu bde/ /dga' dang mi dga' la ni chags med pa/ /de dag 'di na rtag tu sems rlung 'dra/ /gang dag sdug bsngal mdza' dang bral ba dang/ /gang dag sdug bsngal gnas pa mi dga' ba/ /mdza' de gnyi ka rab tu spangs nas su/ /mi gang chos la dga' ba de dag bde/ /yang gsungs pa/ nyes pa'i tshogs mang thams cad spangs nas su/ /rnal 'byor can ni rtag tu byed pa nyid pa nyung/ /rnal 'byor can brtson nam yang rtsod ba med/ / dgon par gnas pa de yi phan yon 'di/ /de ni rtag tu 'dus byas yid byung 'gyur/ /de ni 'jig rten ci la'ang 'dod pa med/ /zag pa dag ni rnam par 'phel mi 'gyur/ /nags na gnas pa de yi phan yon ni/ /de ni nam yang rtsod par mi 'gyur te/ / rtag tu zhi zhing dga' la dben par 'gyur/ /lus dang ngag dang yid ni rab bsngams pa/ /dgon par gnas pa 'di la yon tan mang/ /de ni thar pa'i rjes su mthun pa yin/ /de ni rnam grol zhi ba myur rtogs byed/ /nags na gnas shing rnam grol brten byed na/ /dgon gnas de la yon tan 'di kun 'byung/ /zhes gsungs so/ /yang de nyid las gsungs ba/ grong dang grong khyer dag la dga' spangs la/ /rtag tu dben zhing nags khrod bsten par gyis/ /bse ru lta bur rtag tu mnyam med byos/ /ring por mi thogs ting 'dzin mchog 'di thob/ ces gsungs so/ /'phags pa yul 'khor skyong gis zhus pa'i mdo las kyang gsungs te/ rkyen gyis gzings pa'i mdza' yas ldan par khyim spangs rtag tu nor mi lta/ /yon tan ldan pa de dag dgon par dga' zhing dbang po dul/ /de dag gang duAng bud med rnams dang 'dris mi byed/ /bse ltar gcig pur gnas shing bsam pa dri med dag la dri ma bral/ /de dag thob pa rnams kyis dga' bar mi 'gyur ma thob yid zhum med/ 'dod pa chung ste ngan song tsam la dga' zhing rgyu dang tshul 'chos spang/ /sems can don byed brtson 'grus yid ldan sbyin dang dul ba la yang nas/ /sangs rgyas ye shes don gnyer bsam gtan brtson 'grus yon tan pha rol phyin lus dang de bzhin srog la mi lta sdug pa'i rtsa lag rnam spangs te/ /bsam pa rdo rje lta bur rab brten rtag tu byang chub lam la sbyor/ /lus ni dum bu dum bur bcad kyang de dag sems la g.yo ba med/ /thams cad mkhyen nyid re ba med phyir brtson 'grus shin tu brtan 'dir brtsom/ /zhes 'byung ngo/ /gal te thob pa dang ldan pa dal ba phun sum tshogs pa 'di rnyed nas/ rnyed pa dang bkur sti dang/ chags pa la sogs pa'i sems mi sbyong na/ de ni lha dang bcas pa'i 'jig rten la bslus pa gcig pur 'gyur ro/ /de bas na khyim nas mngon par rab tu byung la dgon pa la bston te/ zhi gnas dang lhag mthong la brtson par bya'o/ /'phags pa dkon mchog brtsegs pa las kyang gsungs te/ 'od srungs 'di lta ste/ dper na/ mi la la zhig rgya mtsho chen pos khyer la/ chus skom bzhin du 'chi ba'i dus byed pa de bzhin du/ 'od srungs 'di la dge sbyong dang/ bram ze kha cig chos mang po blangs te/ kun chub par byas kyang/ 'dod ba'i chags pa'i sred pa mi sel zhe sdang la sred pa mi sel/ gti mug la sred pa ni sel ba dag chos kyi rgya mtshos khyer la/ nyon mongs pa'i skom pas 'chi ba'i dus byed par 'gyur te/ ngan 'gror 'gro bar 'gyur ro/ /zhes 'byung ngo/ /de bas na rnal 'byor pa sred pa dang nyon mongs pa kun la/ sems skad cig tsam yang bskyed par mi bya'o/ /khyim bdag drag shul can gyis zhus pa'i mdo las kyang gsungs te/ khyim bdag gzhan yang/ byang chub sems dpa' rab tu byung ba/ dgon pa la gnas pas 'di ltar bdag ci'i phyir dgon par gnas dgon pa la gnas pa 'ba' zhig ni/ dge sbyong ma yin te/ 'di ni ma byang pa dang/ ma spas pa dang/ ma zhi ba dang/ ma dul ba dang/ mi 'grus pa/ rab tu mi brtson pa 'di lta ste/ ri dags dang/ spre'u dang/ bya mang po dang tshom rkun dang/ gdol pa dang kyang mang du gnas te/ de dag kyang dge sbyong gi yon tan dang ldan pa ma yin pas/ bdag gang gi phyir bdag dgon pa la gnas pa 'di lta ste/ dge sbyong gi don de yongs su rdzogs par bya'o snyam du brtag par bya'o khyim bdag gzhan yang byang chub sems dpa' rab tu byung ba dgon pa na gnas pas/ bdag ci'i phyir dgon par 'ongs snyams du brtag par bya ste/ 'di ltar bdag ni 'jigs shing skrag pa'i phyir dgon par 'ongs so/ /ci zhig gis 'jigs shing skrag cen 'du 'jigs 'jigs shing skrag go/ 'grogs pas 'jigs shing skrag go /'dod chags dang/ zhe sdang dang/ gti mug gis 'jigs shing skrag go/ rgyags pa dang/ 'chab pas 'jigs shing skrag go /chags pa dang/ phrag dog dang/ ser snas 'jigs shing skrag go/ gzugs dang/ sgra dang/ dri dang/ ro dang/ reg byas 'jigs shing skrag go /phung po'i bdud kyis 'jigs shing skrag go /nyon mongs pa'i bdud kyis 'jigs shing skrag go /'chi bdag gi bdud kyis 'jigs shing skrag go/ lha'i bu'i bdud kyis 'jigs shing skrag go /mi rtag pa la rtag pa phyin ci log pas 'jigs shing skrag go / sdug bsngal ba la bde bas phyin ci log pas 'jigs shing skrag go /bdag med pa la bdag tu phyin ci log pas 'jigs shing skrag go/ mi gtsang ba la gtsang bas phyin ci log pas 'jigs shing skrag go /sems dang yid dang/ rnam par shes pas 'jigs shing skrag go / srid pas 'jigs shing skrag go /'khor bas 'jigs shing skrag go/ 'jig tshogs la lta bas 'jigs shing skrag go /bdag tu 'dzin pa dang bdag gir 'dzin pas 'jigs shing skrag/ rgod pas 'jigs shing skrag go/ 'gyod pa dang the tshom gyis 'jigs shing skrag go /sdig pa'i grogs pos 'jigs shing skrag go/ rnyed pa dang bkur stis 'jigs shing skrag go/ mi dge ba'i bshes gnyen gyis 'jigs shing skrag go/ dge sbyong gi dri mas 'jigs shing skrag go / gcig gnod par sems pas 'jigs shing skrag go/ /'dod pa'i khams dang/ gzugs kyi khams dang/ gzugs med pa'i khams kyis 'jigs shing skrag go /srid pa'i 'gro ba thams cad du 'chi 'pho ba dang skye bas 'jigs shing skrag go/ sems can dmyal ba dang dud 'gro'i skye gnas dang/ yi dags kyi yul du 'gro bas 'jigs shing skrag go /mi khom pas 'jigs shing skrag go/ mdor na mi dge ba'i chos thams cad yid la byed pas 'jigs shing skrag ste/ bdag de lta bu'i 'jigs shing skrag pas 'jigs nas dgon par 'ongs so zhes 'byung ngo/ /de lta bas na rnal 'byor du byas pas kyang mdo de dang mthun par dgon par gnas par bya'i/ bsam pa gzhan gyis ni gnas par mi bya'o/ /yang gsungs pa khyim bdag gzhan byang chub sems dpa' rab tu 'byung ba 'jigs shing skrag nas dgon pa la gnas pa 'di la gang cung zad 'jigs pa skye ba de dag thams cad ni bdag tu 'dzin pa las skyes so/ /bdag tu mngon par chags pa dang/ bdag tu 'dzin pa dang/ bdag gi gzhi dang/ bdag tu 'du shes pa dang/ bdag tu smra ba nye bar len pa dang/ bdag tu lta ba dang/ bdag gi gnas dang/ bdag yongs su rtog pa dang/ bdag bsrung ba las skyes te/ gal te bdag dgon pa la gnas la/ bdag tu 'dzin pa yongs su ma spangs/ bdag tu mngon par chags pa dang/ bdag tu yongs su 'dzin pa dang/ bdag gi gzhi dang/ bdag la srid pa dang/ bdag tu 'du shes pa dang/ bdag tu smra ba nye bar len pa dang/ bdag tu lta ba dang/ bdag gi gnas dang/ bdag tu yongs su rtog pa dang/ bdag bsrung ba yongs su ma spangs na ni/ bdag dgon pa la gnas pa don med par 'gyur ro/ /snyam du bslab par bya ste/ bdag tu 'du shes pa la ni dgon pa la gnas pa med do/ /gzhan du 'du shes pa la yang med do snyam du bsam mo/ /khyim bdag dgon pa la gnas zhes bya ba ni/ chos thams cad la mi brten par gnas ba'o/ /chos thams cad la mi 'dzin par gnas pa'o/ /mtshan ma thams cad la mi chags par gnas pa'o/ /gzugs thams cad la mi rten par gnas pa'o/ /sgra dang dri dang/ ro dang/ reg bya thams cad la mi brten par gnas pa'o/ /chos thams cad mnyam pa nyid dang mi 'gal bar gnas pa'o/ /sems shin tu zhi bas shin tu sbyang bar gnas pa'o/ /'jigs pa thams cad spangs pas mi 'jigs par gnas pa'o/ /nyon mongs pa thams cad las rnam par grol bas chu bo las brgal bar gnas pa'o/ brtan par gnas pa'o/ /ngan don gyis chog shes par 'dzin cing 'dod pa chung bas 'phags pa'i rigs rnam la rab tu dga' bar gnas pa'o/ /dgang bla zhing gso bla bar cho par 'dzin par gnas pa'o/ /shes rab kyi phyir tshul khrims la sbyor ba thob ba la gnas pa'o/ /rnam par thar pa'i sgo stong pa nyid dang/ mtshan ma med pa dang/ smon pa med par gnas pa dang/ so sor thar par gnas pa'o/ /bcings pa thams cad bcad pas rnam par grol bar gnas pa'o/ /rten cing 'brel par 'byung ba dang mthun pas/ ma dul ba rnams nye bar zhi bar gnas pa'o/ /shin tu rnam par dag pas/ bya ba byas par gnas pa'o/ /zhes gsungs pas/ rnal 'byor pas kyang de ltar bsams te/ dgon pa la gnas par bya'o/ /yang gsungs pa/ khyim bdag 'di lta ste/ dper na dgon pa na rtsa dang shing gel pa dang/ nags tshal gnas kyang/ 'jigs pa med cing mi skrag skrag par mi 'gyur ro/ /khyim bdag de bzhin du byang chub sems dpa' rab tu byung ba dgon pa la gnas pas kyang/ /lus la rtswa dang/ shing gel pa dang/ sman dang/ rtsig pa dang/ shing dang/ mig yor lta bu dang/ sgyu ma dang mtshungs pa'i 'du shes bskyed par bya ste/ 'di la su zhig 'jigs par 'gyur/ 'di la su zhig skrag par 'gyur snyam pa'i 'du shes bskyed par bya'o/ /zhes gsungs pas dgon pa bas de ltar sems bskyed par bya'o/ yang gsungs pa khyim bdag gzhan yang byang chub sems dpa' rab tu byung bas sangs rgyas kyis dgon pa la gnas par bka' stsal bar shes nas dgon pa la gnas par bya ste/ de la dge ba'i chos thams cad yongs su rdzogs par 'gyur ro/ /dge ba'i bshes gnyen la brten nas/ phyis grong dang/ grong khyer dang/ grong rdal dang/ ljongs dang yul dang/ pho brang 'khor dag tu zhugs te chos bstan par bya'o/ /khyim bdag gal te/ byang chub sems dpa' rab tu byung ba lung dang/ kha ton nod pa'i phyir/ tshogs kyi nang du 'jug 'dod nas/ des der gus pa dang bcas par bya ste/ slob dpon dang mkhan po rnams dang/ gnas brtan dang/ bar ma dang/ dge slong gsar bu rnams la zhes dang bcas par bya/ tshul la mkhas par bya'o/ /snyoms las med par rang gis bya ba dang/ gzhan la gdung ba med par bya'o /des bsnyen bkur la gdung bar mi bya'o/ /des de ltar de bzhin gshegs pa dgra bcom pa yang dag par rdzogs pa'i sangs rgyas lha dang bcas pa'i 'jig rten dang/ bdud dang bcas pa dang/ tshangs pa dang bcas pa dang/ dge sbyong dang bram ze'i skye dgu dang bcas pa dang/ lha dang/ mi dang lha ma yin du bcas pas mchod pa sbyin gnas su gyur pa de yang/ sems can thams cad la gang las kyang/ rim gror bya ba dag gis mi mdzad na/ bdag cag ma bslabs pa slob 'dod pa rnams lta ci smos te/ bdag gis sems can thams cad la bsnyen bkur bya'i/ gang las kyang bsnyen bkur bya ba bdag gis ni mi bya'o/ /snyam du brtag par bya'o/ /de ci'i phyir zhe na khyim bdag dge slong bsnyen bkur la 'du ba ni/ yon bdag gi chos rjes su bzung ba chung gzon pa yin te/ des gang dag sdug pa de dag kyang 'di snyam du sems te/ bdag cag ni bsnyen bkur gyi phyir sdud kyi/ chos kyi phyir ma yin no/ /snyam zhes 'byung ngo/ /yang de las gsungs pa/ khyim bdag gal te byang chub sems dpa' dgon pa po chos nyan pa 'dod dam/ mkhan po dang slob dpon lta bar 'dod dam/ nad dri ba'i phyir grong gi gnas su 'gro na/ des rgongs ni slar ldog par bya ba'i phyir 'gro ba'i sems bskyed par bya'o/ /gal te lung mnod pa dang/ kha ton bya ba gzhan la rag las te/ gtsug lag khang na gnas na yang/ des dgon pa la gzhol pa'i sems kyis/ gang dngos po thams cad la dgon par 'du shes pa dang chos tshol bas mi ngoms pa de nyid dgon pa la gnas pa yin no snyam du bsam par bya'o/ /zhes 'byung ngo/ /de bas na dgon pa pas kyang mdo de dang mthun par sems bskyed par bya'o/ /dgon pa pa'i ?? gdams pa ni/ 'phags pa dkon mchog sprin las kyang gsungs te/ gnas gang dag nas bsod snyoms blangs pa'i spyod yul dang ha cang yang mi ring/ ha cang yang mi nye ba dang/ gnas gang dag na chu dang zhing rnyog pa med pa gtsang zhing dri ma ched pa tshegs chung ba yod pa dang/ gnas gang na shing phun sum tshogs pa/ me tog phun sum tshogs pa/ 'bras bu phun sum tshogs pa/ lo ma phun sum tshogs pa/ gcan gzan khro bo med pa/ phug dang ldan pa/ sman gshong dang ldan pa/ thag thug dag med pa/ 'gro na bde ba/ zhi ba/ gnyis su med pa'i gnas de 'dra ba dag tu gnas so zhes gsungs so/ /yang gsungs pa/ gal te/ dge slong dgon ba pa'i drung du/ rgyal po 'am/ blon po 'am/ de ma yin pa gzhan bram ze 'am rgyal rigs sam grong ngam/ yul mi dag 'ongs nas/ des de dag la gus par legs par 'ongs so/ /zhes brjod par bya ste/ des rgyal po chen po ci ltar gdan bting ba la bzhugs shig ces de skad byas nas gal te 'dug na gnyi ka 'dug par bya'o/ /de ste mi 'dug na gnyi ka yang mi 'dug par bya'o/ /de ste bstan zhing dul la dbang po rab tu zhi ba zhig yin te/ chos bstan par rung na de la chos sna tshogs bstan par bya'o/ /de ste chos sna tshogs bstan pa la mi dga' na/ de la skyo ba dang mthun pa'i chos bstan par bya'o/ /de la de bzhin gshegs pa'i che ba dag bstan par bya'o/ /bram ze dang rgyal rigs dang/ grong pa dang/ yul mi dag 'ongs na ci rigs par chos bshad par bya'o/ /de de ltar mang du thos pas chos nyan pa rnams kyi sems mgu bar byed mi nus na yang/ sems can de dag kyang de la dga' ba dang/ dad pa dang/ rangs pa thob par 'gyur ro/ /zhes gsungs so/ /'phags pa rin po che'i phung po'i mdo las kyang gsungs te/ gal te dge slong dgon pa pa 'bras bu ma thob pa so so skye bo'i drung du/ sbrul dang/ gcan gzan gtum po 'ongs nas/ des de la 'jigs pa dang skrag par mi bya'i/ /des 'di snyam du bdag thog ma nyid nas/ lus dang srog por te dgon pa'i gnas su 'ongs kyis/ 'di la bdag gis 'jigs par mi bya/ skrag par mi bya'i/ byams pa'i sems bskyed par bya/ zhe sdang rnam par spang par bya/ 'jigs pa rnam par spang bar bya'o/ /snyam du sems bskyed bar bya'o/ /gal te sbrul dang gcan gzan dag gis srog gcod cing zan yang/ des 'di snyam du gcan gzan 'di dag la bdag gis zang zing tsam gyis tshim par byed mi nus kyis/ de dag gis bdag gi sha zos na bde ba la reg par gnas par 'gyur la/ bdag gis kyang snying po med pa'i lus las snying po blangs par 'gyur ba ni/ bdag gis rnyed pa legs par rnyed do snyam du bsam par bya'o/ /gal te dgon pa'i gnas de na gnas ba na/ mi ma yin pa 'ongs pa na/ mdog sdug kyang rung/ mdog mi sdug kyang rung/ de la chags bar mi bya/ khong khro bar mi bya'o/ /gal te sngon ston pa sangs rgyas mthong ba'i lha dag dge slong dgon pa ba'i gan du 'ongs te/ dri ba yongs su dri na/ de la dge slong dgon pa pa des ji ltar thob pa bzhin du lha de la chos bshad par bya'o/ /ci ste lha de dag zab mo'i dri ba yongs su 'dri ste/ dge slong dgon pa pa des lan mi thebs pa lta na/ des nga rgyal med par byas la 'di skad ces ma bslabs pa la brnyas par mi bya ste/ sangs rgyas kyi bstan pa la lung mnod nas 'bad de khong du ma chud pa'i chos rnams khong du chud par gyur pa de'i tshe de'i dus nas/ dris pa thams cad kyi lan gdab par bya'o/ /bdag ni chos nyan pa yin gyis/ /khyod spobs par gyis shig ces brjod par bya ste/ 'od srungs dge slong dgon pa pas de ltar lha de dag la go bar bya'o/ /yang gsungs pa de dgon pa'i gnas don gnas pa na/ 'di ltar sems bskyed bar bya ste/ 'di ltar bdag ni lam ring po nas 'dir 'ongs la gcig pu gnyis su med pa ste/ legs par byas pa 'am/ nyes par byas pa la bskul ba'i grogs po ni gang yang med kyi/ lha dang/ klu dang/ gnod sbyin dang/ dri za dang/ sangs rgyas bcom ldan 'das gang dag bdag gi sems kyi bsam pa shes pa dag yod de/ bdag dgon pa'i gnas na gnas la mi dge ba'i sems kyi dbang du song na/ de dag dbang du 'gyur ro/ zhes gsungs so/ /de bas na dgon pa pas kyang de ltar sems bskyed par bya'o/ /de ltar na gang dag sgrib pa mdza' dag spang bar 'dod pa dang/ thams cad mkhyen pa nyid myur du thob par 'dod pa des/ dgon pa la gnas la zhi gnas dang lhag mthong bsgom pa dang/ byang chub tu sems bskyed bar bya'o/ /mi rtog rim gyis 'jug pa'i bsgom don 'di/ /byang chub don du gnyer ba'i gang zag gi / don du bsam pa bzang po bskyed nas ni/ /yang dag don 'di bi ma mi tras byas/ /de yi bsod nams bdag gis ci thob des/ /khams gsum sems can mdza' yas ji snyed kun/ shes rab mig thob dbu ma'i don rtogs nas/ /thams cad mkhyen pa myur du thob par shog /rim gyis 'jug pa'i sgom don/ slob dpon bi ma la mi tras mdzad pa rdzogs so/

CLOSE WINDOW