Input 
| བོད་ཡིག | e-texts based on the ACIP/ALL Input |
/gang zhig sgom stobs kyis yongs rdzogs/ /tshogs gnyis kyi ni rgyur gyur pa/ /sangs rgyas nyid la yang dag
brten sgom ba'i skal dang mi ldan pa/ /de'i phyir 'gro ba'i mgon po yis/ /shes rab zhi gnas sgom pa gsungs/ /de ni rtse mo rdzogs byang chub/ /'gro ba'i brgyud la skyed byed yin/ /gang yang sgom pa'i stobs las nges par 'byung ba'i
bsod nams dang ye shes gnyis kyi rgyu/ kun tu bzang po nyid la rgyun mi chad par mngon par brtson ba'i rnal 'byor pas dus yun ring po mi thogs par rdzogs pa mngon sum du byed la/ de byed pa'i skal pa med ba de rnams kyi phyir/ thugs
rje chen po dang ldan pa'i mgon pos gnas dang lhag mthong zung du 'jug pa'i lam nye bar bstan pa mdzad pa yin te/ de ltar na de bsgoms pas bcom ldan 'das yum shes rab mngon sum du byas nas/ de'i
rang bzhin gyi sbyin pa la sogs pa'i bya ba'i dngos po'i thabs la bslab pa las sangs rgyas nyid du mngon par 'grub par 'gyur ro/ /zhes dgongs pa yin no/ /de yang snying rje chen po skyes nas byang chub kyi sems skyed la/ de nyid gong
nas gong du rnam par rtog pa spangs pa'i tshul gyis rnam par rtog pa spong bas yongs su dag pa bskyed par bya ba'i phyir sgom par byed de/ snying rje chen po dang ldan pa ni gzhan gyi sdug bsngal gyi sdug bsngal ba nyid kyis 'di dag thams cad
nyid sdug bsngal rnams las ston pa sangs rgyas nyid la nges par sbyar ba bya'o/ /zhes byang chub kyi sems skyed par byed kyang ci 'di rnams kyang dam bcas pa'i gnyis su med pa'i ye shes kyi ngo bo dang sbyin pa la sogs pa'i bya ba'i dngos
po'i thabs la bslab pa med par de gong nas gong du yongs su dag pa med par rdzogs par mi 'gyur ro snyam du dgongs nas/ gnyis su med pa'i ye shes rdzogs par bya ba'i phyir zhi gnas dang lhag mthong zung du 'jug pa'i lam yang
bsgom par mdzad do zhes bya ba ni mdor bsdus te de ni bstan pa yin no/ /byang chub kyi sems de yang rnam pa du zhig ce na/ smras ba/ byang chub sems gang gzhan don du/ /yang dag byang chub 'dod pa yin/ /de ni dbye ba gnyis kyi gnyis
de nyid nyi shu gnyis su 'gyur/ /byang chub sems ni smon pa'i sems dang 'jug pa'i sems so/ /de yang sdong po bkod pa las/ rigs kyi bu sems can gyi tshogs ni gang bla na med pa yang dag par rdzogs pa'i byang chub kyi sems rnyed
par dka' ba'o/ /de bas na sems can bla na med pa yang dag par rdzogs pa'i byang chub la mngon par zhugs pa de ni ches rnyed par dka' o zhes gsungs pa yin no/ /gnyis po de dag kyang rnam pa nyi shu rtsa gnyis su dbye ba bya ste/ de yang 'phags
pa byams pas/ de yang sa gser zla ba med/ /gter dang rin chen 'byung gnas mtsho/ /rdo rje ri sman bshes gnyen dang/ /yid bzhin nor bu nyi ma klu/ rgyal po mdzod dang lam po che/ /bzhon pa bkod ma'i chu dang ni/ /sgra snyan chu po sprin rnams
kyis/ rnam pa nyi shu rtsa gnyis so/ /zhes bshad pa yin no/ /de la yang 'di ltar lta bar bya ste/ 'dun pa'i gnas skabs sogs dbye bas/ /smon pa'i sems ni rnam pa gsum/ /'jug pa zhes ni bya ba'i sems/ /rnam pa bcu dgu dag tu
'dod/ de la smon pa'i sems rnam pa gsum du dbye ste/ 'dun pa dang lhan cig 'dros pa'i chos thams cad mngon par byang chub par 'dod pa'i mtshan nyid can ni sa lta bu yin no/ /bsam pa dang lhan cig tu 'dres pa ni pha rol tu phyin pa
drug gi mtshan nyid de/ phyis 'byung ba dang da ltar gyi 'gyur ba med pa'i phyir gser bzang po lta bu yin no/ /lhag pa'i sems dang 'dres pa ni byang chub kyi phyogs kyi chos sum cu rtsa bdun bsgom par 'dod pa'i mtshan nyid can de/ dkar po'i
phyogs thams cad 'phel bar 'dod pa'i tshul gyis zla ba tshes pa lta bu yin no/ /'jug pa'i sems kyis dbye ba rnam pa bcu dgu ste/ sbyong ba dang 'dres pa cig dang/ sbyin pa la sogs pa pha rol tu phyin pa bcu dang/ mngon par shes pa dang
ldan pa dang/ bsod nams dang ye shes dang ldan pa dang/ byang chub kyi phyogs dang ldan pa dang zhi gnas dang/ lhag mthong dang ldan pa dang/ gzungs dang spobs pa dang ldan pa dang/ chos kyi skyed mos tshal dang ldan pa dang/ bgrod pa cig pa'i
lam dang ldan pa dang/ chos kyi sku dang ldan pa'o/ /'di yis de dag ma lus khyab/ /de bas gnas skabs rnam bzhi ste/ /'bras bu rgyu dang sbyor sogs dang/ /lam gyi gnas skabs dbye bas so/ /de la gsum ni las
dang po ba'i gnas skabs so/ /bzhi ba ni nges par 'byed pa'i cha'i gnas skabs so/ /sbyin pa la sogs pa'i pha rol tu phyin pa'i sems ni rgyu'i gnas skabs so/ /mngon par shes pa la sogs pa'i gnas skabs dang lhan cig gnas pa brgyad kyi
ni 'bras bu'i gnas skabs khyab ba yin no/ /de la dang po mgon po yi/ /gsol ba'i rnam pa yang dag bshad/ /gnyis pa sbyin sogs la 'jug pa/ /'jug pa'i rnam pa rab tu bsgrags/ /gsol ba'i sems kyi rnam pa ni gsum ste/ /de
yang sngar bshad ba yin no/ /'jug ba'i rnam ba ni gang nas brtsams te/ sdom ba 'dzin ba sngon du 'gro bas sbyin pa la sogs pa'i tshogs la 'jug pa ni 'jug ba'i sems so/ /sdom ba yang bla ma sdom pa la gnas shing ma las pa
nus pa dang ldan pa las blang bar bya'o/ /de med na sangs rgyas dang byang chub sems dpa' rnams mdun du bzhugs par yid la byas la blang bar bya'o/ /de yang sbyin sogs shes rab dang bral ba/ /thabs ma yin zhing sa ma yin/ /de
bas shes rab bskyed bya zhing/ /zhi gnas kyang ni bskyed bar bya/ /shes rab med ba ni sbyin ba la sogs pha rol tu phyin pa'i ming mi thob cing thabs kyang ma yin no/ /de bas na shes rab bskyed ba'i phyir dang/ zhi gnas skyed par bya ba'i
phyir 'bad par bya'o/ /de la gang zhig khrims ldan sdug bsngal bzod nus dang/ /gang la brtson dang bag yod brtan ba 'chad/ /gang tshe yang dag dang yang ldan 'gyur te/ /nga yi ting 'dzin myur du yongs su rdzogs par 'gyur/ /zhi gnas kyi
tshogs tshul khrims la sregs ba gsum la gnas pas/ yid dang rjes su mthun pa'i phyogs su stan pa bde ba la 'dug ste/ lus drang por bzhag ste/ snying rje chen po mngon sum du byas te/ sems can ma lus pa gdon bar 'dod pa'i bsam pas sems
rtse gcig pa'i mtshan nyid can ting nge 'dzin bskyed par bya'o/ /de la man ngag ni 'di yin te/ khams sogs dbye ba dngos po thams cad la/ /yang dag dmigs de ji srid mnyam gzhag thob/ /de srid yid ni skad cig re re gzhug /dang por re zhig rnal
'byor pas/ /khams la sogs pa'i rnam pa'i dbye ba yis dngos po ma lus pa rgya cher rnam par dpyad la/ chos thams cad ni 'di tsam du zad de/ /zhes de ltar nges bar bya ste/ yang sems kyi rgyun gyi skad cig mas de nyid du gtang bar bya'o/
gal te yid ni chags sogs kyi g.yeng 'gyur/ /mi gtsang la sogs gnyen por bsgom pa yis/ /ji srid de ni brtan pa ma thob pa/ /de srid blo dang ldan pas de zhi bya/ /yang gang gi tshe bar skabs su 'dod chags la sogs pas sems
g.yangs par gyur pa de'i tshe mi gtsang bsgom pa la sogs pas rnam par g.yeng ba zhi bar byas la sems yang nas yang du de la gong nas gong du gtang bar bya'o/ /de nas yang bcom ldan 'das kyi yum shes rab kyi pha rol tu phyin pa
chen po las 'dod chags rnam pa dgu ni chen po nyid du bstan te/ 'di lta ste/ dbyibs la chags pa dang/ reg pa la chags pa dang/ tsandan la sogs pas skus pa la ma byung ba'i lus kyi dri ma la chags pa dang/ rgyan gyis brgyan pa
las byung ba'i lus mdzes pa la chags pa dang/ lus kyi kha dog la chags ba dang/ sha rgyas pa la chags pa dang/ lus dang yan lag gi rtsed 'jo la chags pa dang/ so mdzes pa las byung pa'i chags pa dang/ kha dog dang
dbyibs la chags pa'o/ /de'i gnyen por gyur pa'i mi gtsang ba yang rnam ba dgu ste/ de ni 'di lta ste/ dbyibs la chags pa rnams kyi gnyen por ni rnam par bam pa'i 'du shes so/ /lus kyi reg pa la chags
pa'i ni 'bus gzhigs pa'i 'du shes so/ /lus kyi dri la chags pa'i ni rnam par rul pa'i 'du shes so/ /lus mdzes pa la chags pa'i ni rnam par dmar ba'i 'du shes so/ /lus kyi kha dog la chags pa'i ni rnam par sngos pa'i 'du
shes so/ /shi rgyas pa la chags pa'i na rnam par zos pa'i 'du shes so/ /lus dang yan lag gi rtsed 'jo la chags pa'i ni rnam par 'thor ba'i 'du shes so/ /so mdzes pa la chags pa'i ni rus gong gi 'du shes so/ /kha dog dang
dbyibs la chags pa'i ni rnam par tshig pa'i 'du shes so/ /zhes sdang las byung ba'i rnam par g.yeng pa'i gnyen por ni byams pa bsgom pa'o/ /gti mug las byung ba'i rnam par g.yeng ba'i gnyen por ni rten cing 'brel
par 'byung ba bsgom pa'o/ /gang gi sems de mngon par mi dga' ba mthong ba de'i tshe ting nge 'dzin gyi yon tan la bsam pa dang/ mi dge pa'i skyon la bsam pa de yang zhi bar bya'o/ /yang gang gi gnyid dang mun pa la sems zhum
par mthong ba de'i tshe/ snang ba'i 'du shes sgom pa dang/ rab tu dga' ba yid la byed pas sangs rgyas la sogs pa'i yon tan yid la byed pas zhum pa de yang zhi bar bya'o/ /yang gang gi tshe sngon rgod pa dang rtse zhing dga' bar rjes su dran
pas sems par skabs su rgod par mthong ba de'i tshe/ mi rtag pa yid la byed pas de yang zhi bar bya'o/ /yang gang gi tshe zhum pa dang rgod pa dag dang bral ba nyid kyi cha mnyam par 'jug cing sems rang gi mtshan nyid kyi gnas par mthong
pa de'i tshe/ bsgrims pa dang glod pa btang snyoms su byas te/ gal te sems mnyam par 'jug du sgrims pa byas na/ de'i tshe sems rnam par g.yeng bar 'gyur ro/ /le lo dang ni dmigs pa brjed pa dang/ /de bzhin zhum rgod mi rtsol ba dang rtsol/ /ting nge 'dzin
la thams cad nyes bar 'gyur/ /dang sogs sems nyid de yi gnyen po yin/ /mdor na ting nge 'dzin thams cad kyi nye pa nyid ni rnam pa drug yod de/ 'di lta ste/ le lo dang/ dmigs pa brjed pa dang zhum pa dang rgod pa dang/ bsgrims pa dang/
ma bsgrims pa'o/ /de rnams kyi gnyen por spong ba'i 'du byed brgyad bsgom por bya'o zhes bcom ldan 'das kyis gsungs te/ 'di lta ste/ dad ba dang/ 'dun ba dang/ rtsol ba dang/ shin tu sbyangs pa dang/ dran pa dang/ shes bzhin dang/
btang snyoms dang/ sems pa'o/ /de la dang po bzhi ni le lo'i gnyen po yin te/ de yang ting 'dzin gyi yon tan rnams la yid ches pa'i mtshan nyid kyi dad pas rnal 'byor pa rnams de la mngon par 'dod pa'i sems skye bar 'gyur la
mngon par 'dod pa de las rtsol ba rtsom par 'gyur ro/ /de las kyang lus dang sems las su rung ba nyid thob bar 'gyur ro/ /shin tu sbyangs pa de las lus dang sems le lo las zlog bar 'gyur ro/ /de bas na dad ba la sogs pa ni le lo
spangs pa'i phyir bsgom par bya'o/ /dran pa ni dmigs ba brjed pa'i gnyen po'o/ /shes bzhin ni zhum pa dang rgod pa'i gnyen po yin te/ des zhum ba dang rgod pa dag nye bar shes pa yin pa'i phyir ro/ /zhum pa dang rgod pa ma zhi ba'i dus su
ni mi rtsol ba nyes ba yin te/ de'i gnyen po ni sems pa bsgom par bya'o/ /zhum pa dang rgod pa de dag nye bar zhi bar gyur nas/ gang gi sems rang gi rgyun gyi 'jug pa de'i tshe ni/ rtsol ba nyes pa yin pas de'i gnyen por btang snyoms
bsgom par bya'o/ /spong ba'i 'du byed brgyad po dang/ yang dag par ldan pa'i ting nge 'dzin ni gang gi rdzu 'phrul la sogs pa yon tan rdzogs par byed par mchog tu las su rung bar 'gyur ro/ /de bas na mdo las ?
ba'i 'du byed brgyad dang ldan pa'i rdzu 'phrul gyi rkang pa sgom par byed do/ /zhes gsungs pa yin no/ /bsgom pa'i rim pa 'di nyid la dgongs nas bcom ldan 'das yum de nyid las de la sems mnyam par gzhag par bya'o/ /yang dag par
'jog par byed/ rnam par 'jog par byed nye bar 'jog par byed dul bar byed/ zhi bar byed/ nye bar zhi bar byed/ cig pa nyid du byed/ ting nge 'dzin du byed do zhes gsungs pa yin no/ /yang dag par 'jog par byed pa ni dmigs pa de nyid la
rgyun gyis 'jug par byed pa'o/ /rnam par 'jog pa ni rnam par g.yeng bar shes par bya ste/ de nye bar zhi bar byed pa'o/ /nye bar 'jog par byed pa ni rnam par g.yeng ba nye bar zhi bar byas nas de nyid la gong nas gong du gtod par
byed pa'o/ /dul bar byed pa ni dga' ba skyed par byed pa'o/ /zhi bar byed pa ni mi dga' ba zhi bar byed pa'o/ /nye bar zhi bar byed pa ni gnyid dang rmugs pa la sogs pa byung ba sel bar byed pa'o/ /cig pa nyid du byed pa ni dmigs
pa la mngon par 'du byed pa med par 'jug pa la 'bad par byed pa'o/ /ting nge 'dzin du mnyam par 'jog pa ni sems mnyam pa nyid thob pa la btang snyoms su byed pas yang dag par 'dzin par
byed do zhes bya ba'i don to/ /tshig dgu po 'di dag gi bshad pa ni slob dpon thogs med kyi mdzad pa las bris pa yin no/ /yang rim pa ni ting nge 'dzin rdzogs par gang gi tshe 'gyur zhe na/ de'i tshe smras pa/ gang gi sems ni rtsol ba
med pas ni/ /rang gi ngang gi /'jug par 'gyur ba na/ de'i tshe sangs rgyas mnyam 'jog la brten te/ 'di ni ting nge 'dzin gyi tshul yin no/ /gang gi tshe dmigs pa de la mngon par 'du byed pa med par/ 'jug pas sems gnas par 'gyur ba de'i tshe/
zhi gnas rdzogs pa yin par shes par bya'o/ /de ltar mnyam 'jog shes nas ni/ /de nas shes par bskyed bya ste/ /gzugs dang gzugs med dbye ba yi/ /don de nyid ni rnam par bya/ /de nas rnam par dpyad pa 'dis spros pa med pa nyid yin pa'i
phyir 'gro ba rnams chos sku'i bdag nyid du shes par byas la sems tsam las yongs su bzlas pa cig dang du ma nyid la sogs pa'i tshul de kho na nyid kyang snang ba med pa'i tshul gyis bzla bar bya'o/ /de kho na nyid mthong ba 'di nyid ni gang shes rab kyis rnam
par brtags na yang dag pa'i ye shes mthong bas chos thams cad mi mthong ba yin no/ /de yang bcom ldan 'das kyi yum bar ma las/ sangs rgyas bcom ldan 'das rnams kyis ye shes kyi spyan gang zhe na/ gang gis ci yang ma gzigs
pa'i don ni gzigs pa'o zhes bya ba dang/ de bzhin du don dam par mthong ba gang zhe na/ gang chos thams cad mthong ba med pa'o zhes ji skad gsungs pa yin no/ /de bas na kho na nyid kyi rnal 'byor pa rnams kyang spyod lam thams cad la gnas
pa na/ chos thams cad mthong du zin kyang ma mthong ba yin no/ /de lta bu nyid mthong ba med pa zhes bya bar mngon par 'dod kyi gnyid kyi log pa 'am/ mig btsum pa dang 'dra bar gang yid la mi byed pa ni ma yin no/ /de ltar na ni bag chags ma sdangs
pas 'du shes med pa'i snyoms par 'jug pa la sogs pa las ldang ba bzhin du slar yang gzugs la sogs pa la mngon par zhen pa'i bag chags kyi rtsa ba can gyi 'dod chags la sogs pa skye ba nyid kyis rnal 'byor par mi 'gyur te/ thog ma
med pa'i dus can gyi gzugs la sogs par mngon par zhen pa yid la mi byed pa tsam gyis yongs su spangs par mi 'gyur te/ 'du shes med pa'i snyoms par 'jug pa la sogs pas kyang de spangs par 'gyur ro/ /gang
gzugs la sogs pa'i yul rnams kyi the tshom spangs pas de yid la byed pa yongs su spangs par yang nus pa ma yin te/ me yongs su spang bas che ba spong mi nus pa dang 'dra'o/ /de bas na the tshom gyi sa bon dang bral ba nyid kyi gzugs la sogs pa
la mngon bar zhen pa bsal bar bya'i/ tsher ma 'byin pa lta bur bya ba ma yin no/ /zhes bya bar nges so/ /the tshom gyi sa bon dang bral ba yang zhi gnas dang lhag mthong phan tshun rjes su mthun par 'jug par bya'o/ /de yang sems rtse gcig pa'i
mtshan nyid can gyi zhi gnas skye bar gyur na/ shes rab kyi mig gis rnam par dpyod pa'i rnal 'byor pa'i the tshom dang bral bar 'gyur ro/ /de dang bral bas gzugs la sogs pa la mngon par zhen ba dang bral lo/ /de dang bral nas kyang chos
thams cad dngos po med par rtogs te/ de nyid ni shes rab kyi pha rol tu phyin ba'o/ /yang de'i tshe zhi gnas dang lhag mthong dag de'i bdag nyid can yin te/ de nyid ni mchog tu rnam par mi rtog pa'i rnal 'byor de yang kun rtog thams cad spangs pa ste/
'di ni rnal 'byor dam pa yin/ /rnal 'byor pa gang mngon sum du/ /gnas pa kun mkhyen bcom ldan 'gyur/ /de ltar rim pa 'dis zhi gnas dang lhag mthong bdag gis sam/ bla ma'i man ngag gi bcom ldan 'das yum shes rab skyed la/
byang chub sems dpa' dbang po rab dang ldan pa yin na/ de nges ba'i rgyud nyid kyi phyir mi ldog pa nyid yin par rtog par byas la/ shes rab kyi pha rol tu phyin pa'i ngo bo nyid dang/ sbyin pa la sogs pas la 'jug go /de yang 'phags pa
ga ya go ri las gnyis po 'di dag ni byang chub sems dpa' rnams kyi lam gyis sgribs pa ste/ 'di lta ste thabs dang shes rab po zhes gsungs pa yin te/ thabs ni sbyin pa la sogs pa'i pha rol tu phyin ba dang/ tshad med pa dang/ bsdu ba'i dngos po
la sogs pa'i dbye bas phye pa ste/ de nyid kyang 'phags pa blo gros mi bzad pa dang/ dkon mchog sprin la sogs pa'i mdo las gsungs so/ /shes rab ni thabs de nyid phyin ci ma log par yongs su gcod pa'i rgyu'o/ /des kyang thabs yang dag par brtags
nas phyin ci ma log pas bdag dang gzhan gyi don ji lta ba bzhin nyams su len pa sngags kyi zin pa'i dug spyod pa dang 'dra ba kun nas nyon mongs par mi 'gyur ro/ /de yang mdo de nyid las thabs ni bsdu pa shes rab ni yongs su spyod par shes pa'o/ /zhes
gsungs pa dang/ 'phags pa dad pa'i stobs bskyed ba las/ thab la mkhas pa gang zhe na/ gang chos thams cad kyi bsdu ba shes pa la mkhas pa'o shes rab gang zhe na/ gang chos thams cad dbyer med pa shes pa la mkhas pa'o zhes
gsungs pa'o/ /'di dag la ni sa la gnas bas kyang rten par bya'i/ shes rab tsam 'ba' zhig ni ma yin no/ /gang gi phyir sa bcu ba la sogs pa'i mdo las pha rol tu phyin pa lhag ma rnams la yang mi spyod pa ma yin no/ /zhes gsungs pas/ byang chub
sems dpa' sa bcu thams cad du pha rol tu phyin pa thams cad la kun tu dpyad par bya'o zhes bshad do/ /de bzhin du yang shes rab kyi pha rol phyin pa la cig tu dga' ba'i byang chub sems dpa' rnams kyi dbang du mdzad nas/ yongs su rgyas pa'i mdo chos
thams cad bsdus pa las/ byams pa gang yang byang chub sems dpa' rnams kyi byang chub kyi phyir pha rol tu phyin pa drug char bzung bar bya ba de la skyes bu blun po rnams/ 'di ltar byang chub sems dpa' rnams kyi shes rab kyi pha rol tu phyin pa
'ba' zhig la bslab par bya'i/ pha rol tu phyin pa lhag ma rnams kyis ci zhig bya zhes zer zhing/ des pha rol tu phyin pa gzhan dag la smod pa nyid du sems par 'gyur ro/ zhes bya ba la sogs rgya cher gsungs pa dang/
'phags pa rnam par snang mdzad mngon par rdzogs par byang chub pa'i rgyud las kyang/ thams cad mkhyen pa'i ye shes 'di ni snying rje chen po'i rtsa ba can/ byang chub kyi rgyud dang ldan ba/ thabs kyi mthar phyin pa'o zhes gsungs pa yin no/ /de
bas na gnyis ka yang dus thams cad du sten par byed do/ /de ltar na bcom ldan 'das mi gnas pa'i mya ngan las 'das pa 'grub pa yin no/ /de yang sbyin pa la sogs pa'i thabs kyi gzugs kyi sku dang zhing dang 'khor la sogs pa longs
spyod chen po'i 'bras bu phun sum tshogs pa yongs su 'dzin par mdzad pas/ bcom ldan 'das mya ngan 'das pa la gnas par mi mdzad do/ /shes rab kyi phyin ci log ma lus bar spangs pas 'khor bar gnas par mi mdzad do/ /'khor ba ni
phyin ci log gi bdag nyid can yin pa'i phyir ro/ /de yang chos kyi rnam grangs gzing lta bur shes pa rnams kyis ni chos rnams kyang spang bar byas na chos ma yin pa lta ci smos zhes ji skad du gsungs pa lta bu yin/ de la phyin ci log tu
mngon par zhen pa spang bar bya'o zhes gsungs kyi/ dgos pa'i don rdzogs par bya ba'i don du yang gnas par mi bya'o zhes gsungs pa ma yin no/ /de yang chos su gzung bar bya'i/ mi gzung bar mi bya'o zhes gsungs te lam log par gzung
bar mi bya'o zhes bya ba'i don to/ /de bas na dngos po thams cad de ltar gzigs te gsungs ba ni/ dus kun tu ni thabs dang ni/ /shes rab pha rol phyin bdag can/ /bsten bya gang phyir de las ni/ /mi gnas mya ngan 'das par 'gyur
zhes bya ba yin no/ /pha rol tu phyin pa'i theg pa sgom pa'i rim pa'i man ngag slob dpon chen po dpal ye shes grags pa'i zhal snga nas mdzad pa rdzogs so// //rgya gar gyi mkhan po pad+ma ka ra warma dang/ zhu chen gyi
lo tsA ba dge slong rin chen bzang pos sgyur cing zhus te gtan la phab pa/ / //rgya gar skad du/ bud+d+hA nu smri tyut+ta ra b+hA ba na nA ma/ bod skad du/ sangs rgyas rjes su dran pa bla na med pa'i sgom ba zhes bya ba/ sangs rgyas
dang byang chub sems dpa' thams cad la phyag 'tshal lo/
CLOSE WINDOW