བོད་ཡིག

e-texts based on the ACIP/ALL Input

) //cig car 'jug pa rnam par mi rtog pa'i bsgom don/ 'jam dpal gzhon nur gyur pa la phyag 'tshal lo/ /'di la yang dag pa'i mdza' btsan par byas na/ bdag gi gzhung gzugs shing pha rol sun dbyung du med/ mya ngan las 'das pa bsgrib tu med la/ 'khor ba spang du med de/ mgo lan gnyis su bcad du med pa bzhin no/ /'on kyang dmus long dang 'dra ba bdag gis gsal bar 'byed mi nus mod kyang/ yang dag pa'i don la 'dud pa'i don du lung la brten te mdo tsam zhig brjod par bya'o/ /gang dag thams cad mkhyen pa nyid myur du thob par 'dod pa des/ rnam par mi rtog pa'i ting nge 'dzin bsgom bar bya'o/ /dngos su gang zhe na/ zhi gnas dang lhag mthong ngo/ /mtshan ma la mi gnas pa ni zhi gnas kyi ting nge 'dzin to/ /mtshan ma gang dang yang ma bral ba ni lhag mthong gi ting nge 'dzin to/ /mtshan ma mi skye ba ni zhi gnas so/ /mtshan ma mi 'gag pa ni lhag mthong ngo/ /dngos po'i mdza' ni zhi gnas so/ /dngos po'i mthar ma lhung ba ni lhag mthong ngo/ /dper na ri mthon po'i khar phyin te bltas na/ thams cad gsal bar mthong ba bzhin du/ ting nge 'dzin 'di gnyis kyi nang du ting nge 'dzin thams cad snang ngo/ /'di gnyis la gnas pa ni rin po che bai DUrya'i khang pa'i nang na 'dug pa'i mi dang 'dra ste/ phyi nang kun gsal bar mthong ngo/ /de bzhin du dngos po thams cad kyi mdza' mthong bar 'gyur te/ de nyid sangs rgyas yin par lang kar gshegs pa las/ /bya ba dang ni mtshan nyid dang/ /dngos por mya ngan nga mi 'da' / / rnam rtog rnam par shes pa las/ /bzlog pas mya ngan nga 'das so/ /rnam par rtog pa mi mthong zhing/ /gang tshe sangs rgyas mi mthong la/ /'jug med sangs rgyas yin par ni/ /gal te mthong na de sangs rgyas zhes 'byung ba dang/ dri ma med par grags pa'i mdo las/ mi rtog pa dang mi dmigs pa ni byang chub po zhes gsungs pas de bas na rnam par mi rtog pa'i ting nge 'dzin 'di la bsgom par bya'o/ /rnal 'byor pas zhi gnas dang lhag mthong gi tshogs la ji brtan par bya'o/ /de la zhi gnas kyi tshogs gang zhe na/ gos dang zas la sogs pa rnyed sla ba dang/ skye bo mi srun pa dang dgra la sogs med pa'i gnas dang/ nad med pa'i yul dang/ grogs tshul khrims dang ldan pa'i lta ba mtshungs pa dang/ nyin mo mi nyung la mtshan mo sgra chung ba dang/ chos gos la sogs pa bzang po dang mang po la lhag par chags pa med pa dang/ ngan don? tsam rnyed pas rtag tu chog shes pa dang/ nyo tshong la sogs pa las ngan pa yongs su spangs pa dang/ khyim pa dang rab tu byung ba dag dang ha cang smos 'drin chung ba dang/ sman byed pa dang/ skar ma brtsi ba la sogs pa bya ba thams cad spangs pa dang/ sdom pa gnyis ka la yang rang bzhin dang bcas pa'i bslab pa'i gzhi mi 'dral ba dang bag med pas ral na yang myur du chos bzhin du byed ba dang/ nyan thos dag gi sdom pa la pham pa bcos su mi rung bar gsungs pa yang 'gyod pa dang ldan pa dang/ phyis mi bya ba'i sems dang ldan pa yin/ sems gang gis las des bya ba'i sems de la ngo bo nyid med par so sor rtogs pa'i phyir ram chos thams cad ngo bo nyid med par bsgoms na/ de'i tshul khrims rnam par dag pa kho na yin par rig par bya'o/ /de nas 'gyod pa med par byas la bsgom pa la brtson par bya'o/ /'dod pa rnams la yang tshe 'di dang tshe phyi ma la nyes dmigs rnam pa mang por 'gyur ba yid la byas la/ de dag la rnam par rtog pa spang bar bya'o/ /rnam pa gcig tu na dngos po sdug ba 'am mi sdug pa yang rung ste/ de dag thams cad ni rnam par 'jig pa'i chos can mi brtan pas brtan du mi 'grogs gdon mi za bar de dag thams cad dang bdag ring por mi thogs bar 'bral bar 'gyur na/ bdag de la ci zhig chags par 'gyur ci zhig chags par 'gyur snyam du bsams la rnam par rtog pa thams cad spang bar bya'o/ / lhag mthong gi tshogs gang zhe na/ skyes bu dam pa la brten pa dang/ mang du thos pa yongs su tshol ba dang/ tshul bzhin sems pa'o/ /de la skyes bu dam pa la brten pa gang zhe na/ gang mang du thos pa dang/ tshig gsal ba dang/ snying rje ldan pa dang skyo ba bzod pa'o/ de la mang du thos pa yongs su tshol ba gang zhe na/ bcom ldan 'das kyi gsung rab yan lag bcu gnyis po/ nges pa'i don dang drang ba'i don la mkhas pa la brten nas/ shes rab rnam pa gsum bskyed par bya'o/ /tshul bzhin sems pa gang zhe na yang dag pa'i don la ma nor bar bsgom pa'o/ /de lta ma yin na rgyus med lam kha brag gi mdor phyin pa'i mi bzhin du/ gang du yang gcig tu nges par mi 'gyur ro/ /rnal 'byor bas ni dus thams cad du/ nya dang sha la sogs pa spang zhing/ mi mthun pa ma yin pa dang/ zas tshod zin pa bza' bar bya'o/ /mkhas pa nyams can dag la yang skabs skabs su don dri zhing/ nga rgyal spangs la don ma nor bar bya'o/ /de ltar byang chub sems dpa' zhi gnas dang lhag mthong gi tshogs mdza' dag bsags pas de bsgom pa 'jug par bya'o/ /de la rnal 'byor pas bsgom pa'i dus na thog mar bya ba thams cad yongs su rdzogs par byas la/ bshang gci byas nas sgra'i tsher ma med pa yid du 'ong ba'i sa phyogs su bag gis sems can thams cad byang chub kyi snying po la dgod par bya'o snyam du bsam zhing/ 'gro ba mdza' dag mngon par gdon par 'dod pa'i bsam pa can gyis snying rje chen po mngon du byas la/ phyogs bcu na bzhugs pa'i sangs rgyas dang byang chub sems dpa' thams cad la yan lag lngas phyag byas nas/ sangs rgyas dang byang chub sems dpa' i sku gzugs ri mo la sogs pa mdun du gzhag gam/ gzhan du yang rung ste/ de dag la ci nus kyi mchod pa dang/ bstod pa byas la/ rang gi sdig pa bshags nas 'gro ba mdza' dag gi bsod nams la rjes su yi rang bar byas la stan shin tu 'jam po bde ba rje btsun rnam par snang mdzad kyi skyil mo krung lta buAm/ skyil mo krung phyed du yang rung ste/ mig ha cang mi dbye/ ha cang mi zum par sna'i rtse mor bstad cing/ lus ha cang yang mi sgu ha cang yang mi dgye bar drang por bsrangs te/ dran pa nang du gzhag ste/ 'dug par bya'o/ /pag ba mnyam par dgag la mgo mi mtho mi dma' zhing phyogs gcig tu mi g.yo bar gzhag ste/ sna nas lte ba drang por bzhag go /lte yang so'i drung du gzhag go /dbugs phyi nang du rgyu ba yang sgra can dang bsdam? pa dang/ dbugs rgod pa can du mi gtang gi ci nas kyang mi tshor bar ngal bu ngal bus lhun gyis grub pa'i tshul gyis dbugs nang du rngub pa dang phyir 'byung bar 'gyur ba de ltar bya'o/ /de la rnal 'byor pas thog mar de bzhin gshegs pa'i sku gzugs ji ltar mthong ba dang/ ji ltar thos pa la sems gzhag nas zhi gnas bsgrub par bya ste/ sku gzugs de yang gsar btsom? bzhin du ser la/ mtshan dang dpe byad bzang pos brgyan pa 'khor gyis dbus na bzhugs pa thabs sna tshogs kyis 'gro ba'i don mdzad pa'o/ /snyam du bsams la/ rgyun du yid la byas la de'i yon tan la 'dod ba bskyed cing/ bying ba dang rgod pa zhi bar byas la ji srid du de mdun na bzhugs pa bzhin du gsal bar mthong bar gyur pa de bzhin du bsam gtan bya'o/ /'phags pa ting nge 'dzin gyi rgyal po'i mdo las kyang/ gser gyi kha dog lta bu'i sku lus kyis/ 'jig rten mgon po kun tu mdzes pa ste/ dmigs pa de la gang gis sems 'jog pa/ /byang chub sems dpa' de mnyam bzhag ces bya/ /zhes gsungs so/ /yang na dngos po gzugs can nam gzugs med dam/ rnal 'byor ba'i dmigs pa'i yul gang la bde ba de la sems bstad la zhi gnas bsgrub par bya'i/ sems yul la bstad la/ bstad pa de la bying ba dang rgod par mi 'gyur bar shin du gsal bar gyur pa de srid du bsam gtan bya'o/ /'phags pa ting nge 'dzin rgyal po'i mdo? las/ ting nge 'dzin ni snyoms pa'i sa/ /zhi la phra ste blta dka' ba/ /'du shes thams cad bcom pas na/ de phyir ting nge 'dzin zhes gsungs so/ /zhi gnas nyams su len na/ /rnal 'byor pas lhag mthong bsgom par bya'o/ /zhi gnas la gnas pas shes rab kyi de kho na nyid yongs su btsal bar bya zhing zhi gnas 'ba' zhig gis chog bar mi bya'o snyam du bsam mo/ /de kho na nyid ji lta bu zhe na/ don dam par na gang zag dang phung po lnga dang/ skye mched dang khams dang/ sangs rgyas kyi sku dang/ ye shes man chad dang/ sems can dmyal ba yan chad/ rgya mtsho dang ri rab dang/ dngos po chos su btags pa dang/ tha snyad du btags pa thams cad blos zhib tu brtags shing dpyad la/ rang bzhin med pa stong pa nyid du bsam zhing rang bzhin gyis rnam par byang ba/ gdod ma nas stong pa/ bsam pa dang brjod pa thams cad kyi yul las 'das pa/ mya ngan las 'das pa ni blang du med/ 'khor ba ni spang du med/ nam mkha' i rang bzhin lta bu'o/ /snyam du bsams la/ sems kyi rgyun mi g.yeng bar bya'o/ /'phags pa las kyi sgrib pa rnam par dag pa'i mdo las/ byis pa dngos por 'dzin pas dpyad cing brtags/ /sgyu ma'i gsog ste med cing stong pa yin/ /'di ni 'dod chags zhe sdang gti mug med/ /chos 'di thams cad mtshan nyid med pa ste/ /rtsa ba mi dmigs gzod nas rab tu zhi/ /mdza' ma gzugs med dben zhing snying po med/ /'dod chags 'od gsal gti mug rab tu zhi/ /zhes gsungs so/ /'phags pa tshul brgya lnga bcu pa las/ thams cad nam mkha' i mtshan nyid de/ /nam mkha' la yang mtshan nyid med/ /nam mkhar mtshan nyid sbyor pas na/ /kun mchog mnyam nyid rdzogs pa'o zhes gsungs so/ /'jam dpal gnas pa'i mdo las/ /de bzhin nyid ni bri ba ma yin/ 'phel ba ma yin/ sems can gyi khams kyang bri ba ma yin/ 'phel ba ma yin no/ /kun nas nyon mongs pa ma yin te/ rnam par byang ba ma yin no/ zhes gsungs so/ /yang gsungs pa/ rtog pa rnams ni g.yo bar 'gyur/ /rtog pa med na mya ngan 'da' / /gang gi rang bzhin de shes pa/ /de ni ye shes ldan zhes bya/ /zhes gsungs so/ /par ner pan gyi mdo las/ lam dbu ma ni sangs rgyas kyi ngo bo nyid ces bgyi'o/ /tshangs pa kun 'dris kyis mdo las/ ji ltar lam bsgom par bgyi/ bka' stsal pa/ chos dang chos ma yin pa rnam par mi rtog /mtshan nyid dang bral ba ni lam bsgom pa'o/ /zhes gsungs pa ni/ dengs po'i ngo bo mi dmigs pa la dgongs pa'o/ /de ltar na 'dus byas dang/ 'dus ma byas pa'i chos thams cad ni yang dag par med pa kho na yin no snyam du bsgom par bya'o/ /de ltar chos su btags pa mdza' dag med pa kho na la zhugs pa de yongs su btags par bya ba gzhan med pas rtog pa dang dpyod pa dang bral ba brjod pa med pa dang gcig tu gyur pa'i yid la byed pa rang gi dang gis 'jug pa/ mngon par 'du byed pa med pas/ de kho na nyid de la shin tu gsal bar bsgom zhing 'dug par bya'o/ /de ltar gnas nas sems kyi rgyun rnam par mi g.yeng bar bya'o/ /de ltar gyur na spros pa med pa rnam par mi rtog pa nyid la zhugs pa yin no/ /gzugs la sogs pa la mi gnas pa yin no/ /shes rab kyis brtags na dngos po mdza' dag gi ngo bo nyid ma dmigs pa'i phyir shes rab mchog gi bsam gtan pa yang yin no/ /gang gi tshe de la sems mngon par mi dga' ba mthong ba de'i tshe/ ting nge 'dzin gyi yon tan mthong ba'i phyir/ de la dga' ba bsgom par bya'o// ci ste rmugs pa dang gnyid kyis non pas rgyu ba mi gsal ba'i phyir/ sems bying ba 'am bying du dogs par mthong ba de'i tshe/ mchog tu dga' ba'i dngos po sangs rgyas kyi sku gzugs la sogs pa 'am/ /rten cing 'brel par 'byung ba 'am/ mdzad pa bcu gnyis la sogs pa yid la byas la bying bzhi par byas nas de kho na nyid la shin tu brtan par bzung bar bya'o/ /ci ste gang gi tshe mngon du byung ba'i yul la 'dod pas bar skabs su sems rgod pa 'am/ rgod du dogs par mthong ba de'i tshe mi rtag pa dang tshe 'di dang/ tshe phyi ma'i nyes dmigs dang/ gtan du mi 'grogs pas ci'i phyir 'di la lhag par chags par bya snyam du bsam la rgod pa zhi bar bya'o/ /de nas yang de kho na nyid la sems mngon par 'du bya ba med par 'jug par 'bad par bya'o/ /ci ste gang gi tshe bying ba dang rgod pa las dben ba'i phyir mnyam par zhugs shing rang gi dang gis 'jug pas/ de kho na nyid de la sems shin tu gsal bar byung bar gyur pa de'i tshe/ rtsol ba glong la btang snyoms su gzhag ste/ de'i tshe zhi gnas dang lhag mthong zung du 'brel pa'i lam grub pa yin par rig par bya'o/ /de nas rnal 'byor pas ji srid du dga' ba de srid du/ mngon par 'du bya ba med pa kho nar de kho na la bsgom zhing 'dug par bya'o/ /tshul de lta bus mel tshe thun gcig gam thun phyed dam/ chu tshod gcig gam/ ji srid nus nus su 'am/ tha na se gol gtog pa'i bar du yang bsgom zhing 'dug par bya'o/ /lus dang sems gnod par gyur na skabs skabs su 'jig rten mdza' dag la bltas la/ sgyu ma lta bu dang/ rmi lam lta bu dang/ chu zla lta bu dang/ mig yor lta bur rtogs par bya'o/ /de skad du rnam par mi rtog par 'jug pa'i gzungs las kyang/ 'jig rten las 'das pa'i ye shes kyis chos thams cad nam mkha' i dkyil dang mtshungs par mthong ngo/ /de'i rjes la thob pa ni sgyu ma dang/ smig rgyu dang/ chu zla bzhin du mthong ngo/ /zhes gsungs so/ /de nas yang rnam par mi rtog pa la bsgom par bya'o/ /de yang lus sems la gnod par gyur na/ sems gtang la/ 'jig rten mdza' dag la gong du bshad pa ltar/ bsams la 'phags pa bzang po spyod pa la sogs pa'i smon lam yang dag par gdab bo/ /pha rol tu phyin pa rnams kyang rdzogs par bya'o/ /de ltar byas na don dam par chos thams cad ma skyes pa yin yang/ sgyu ma bzhin du rgyu dang rkyen so sor nges pa sna tshogs pa 'dus pa'i dbang gis ma brtags na nyams dga' ba sna tshogs dag kho na 'byung ste/ des na chad par lta bar yang mi 'gyur ro/ /sgro 'dogs pa'i mthar yang mi 'gyur te/ 'di ltar shes rab kyis rnam par brtags na mi dmigs te/ des na brtag pa nyid dang sgro 'dogs pa'i mthar yang mi 'gyur ro/ /rnam par mi rtog pa'i bsgom pa'i nang du/ 'dus ma byas kyi chos dge ba dang/ 'dus ma byas kyi chos thams cad 'dus par yang gsungs te/ theg pa chen po'i chos rnam par mi rtag pa'i nang du byang chub tu sems bskyed pa 'dus pa ji lta bu zhe na rdo rje gcod pa'i mdo las/ 'du shes thams cad rnam par spangs te/ bla na med pa'i byang chub tu sems bskyed do/ zhes gsungs so/ /mi rtog pa'i nang du theg pa chen po 'dus pa ji lta bu zhe na/ rdo rje'i ting nge 'dzin gyi mdo las/ bsam zhing mno ba med na ldang dub mi skye ste/ yang dag pa ji lta ba bzhin du mi g.yo ba'o/ /de ni theg pa chen po'o zhes gsungs so/ /rnam par mi rtog pa'i nang du lam bsgom pa 'dus pa ji lta bu zhe na/ shes rab kyi pha rol tu phyin pa las/ mi dmigs pa ni lam mo/ /mir migs pa ni 'bras bu'o zhes gsungs so/ /mi rtog pa'i nang du lam dbu ma 'dus pa ji lta bu zhe na/ lang kar gshegs pa las/ sems tsam du ni mi rtog dang/ /phyi rol dngos po rnams bsal bas/ /rnam par rtog pa rnams ldog ste/ /lam de nyid ni dbu ma'o/ sems tsam yin te snang ba med/ /snang ba med pas mi skye bas/ /dbu ma yi ni lam 'di yang/ /nga dang sangs rgyas rnams kyis bshad ces gsungs so/ /mi rtag pa'i nang du shes rab kyi pha rol tu phyin pa 'dus pa ji lta bu zhe na/ sdud? pa las/ gang tshe 'dus byas 'dus ma byas dang dkar nag chos/ /shes rab rnam par bshag nas rdul tsam mi gnas tshe/ /'jig rten dag na shes rab pha rol phyin grangs 'gro /nam mkha' gang la'ang cung zad mi dmigs de dang 'dra zhes gsungs so/ /mi rtog pa'i nang du mnyam pa nyid dang mi g.yo ba 'dus ba ji lta bu zhe na/ ye shes snang ba'i rgyan gyi mdo las/ chos thams cad kyi mtshan nyid dmigs su med pa gang yin pa de ni mnyam pa nyid yin no/ /mnyam pa nyid gang yin pa de ni gnas pa nyid do/ /gnas pa nyid gang yin pa de ni mi g.yo ba nyid yin mo mi g.yo ba gang yin pa de ni mi rtog pa nyid yin no/ /chos thams cad la brten pa'i sems kyi gnas pa med do/ /sems mi gnas pa de ni skye ba med par 'gyur te/ de ltar mthong ba'i sems dang sems las byung ba'i rnam pa ni/ phyin ci ma log par 'gyur ro zhes gsungs so mi rtog pa'i nang du tshul khrims bla na med pa 'dus pa ji lta bu zhe na/ glang po dang mtshungs pa'i mdo las/ tshul khrims can du gang rtog pa/ /tshul khrims log par rtog pa yang/ /gnyis ka tshul khrims log par bshad/ /gnyis med tshul khrims ma log pa'o zhes 'byung ngo// mi rtog pa'i nang du mtshan ma spong ba 'dus pa ji lta bu zhe na/ rnam par mi rtog pa'i gzungs las/ /ji ltar yang mtshan ma de dag yongs su spong zhe na/ mngon du snang ba yid la ma byed pas spong ngo zhes gsungs so/ /mi rtog par bsgom pa'i sems kyi chos nyid mthong ba ji lta bu zhe na/ stug po bkod pa'i mdo las/ /ji ltar shin tu bzang po'i gser/ /gser gyi dbye bas la mi snang ste/ /brtsal bas shin tu zhib btags nas/ /yongs su sbyangs na snang bar 'gyur/ /de bzhin kun gzhi rnam par shes/ /rnam shes bdun dang bcas pa yang/ /ting 'dzin gyis yongs sbyangs pa yi/ /rnal 'byor can gyis rtag tu mthong/ /zhes gsungs so/ /mi rtogs pa'i nang du rang gi rig pa 'dus pa ji lta bu zhe na/ dkon mchog sprin gyi mdo las/ gsol pa de kho na zhes bgyi ba ci lags/ bka' stsal pa/ de kho na zhes bya ba ni yang dag pa'i don gyi tshig bla dags so 'di ni so so rang rig pa yin te/ tshig dang yi ge dag gis gdags par mi nus so/ /ci'i phyir zhe na smra ba dang brjod pa dang/ rtog pa thams cad kyi yul las 'das pa/ 'phags pa'i ye shes kyi yul te/ ye nas ji bzhin du 'dug pa'o/ zhes gsungs pas/ cig char 'jug pa'i bsgom pa'i don 'di ni/ /de ltar mdo mang po'i lung dang yang mi 'gal la/ mkhas pa dag gi man ngag dang yang mthun pa nyid de/ slob dpon nA gArdzu nas rten 'brel gyi snying po mdzad pa las kyang/ 'di la gsal ba gang yang med/ /gzhag par bya ba ci yang med// yang dag nyid la yang dag lta/ /yang dag mthong nas rnam par gol zhes gsungs so/ /yang slob dpon gyis rigs pa drug cus mdzad pa las kyang/ gang dag rnam par dben pa la/ /g.yo ba'i yid kyang mi g.yo ste/ /nyon mongs sprul gyis dkrugs ba yi/ /mi bzang srid pa'i rgya mtsho brgal zhes gsungs so/ /slob dpon Arya de bas mdzad pa'i lag ba'i tshad kyi 'brel pa las kyang/ kun nas nyon mongs spong 'dod pas/ /dam pa'i don gyis 'tshal bar bya zhes gsungs so/ /nges pa'i lung dang bstan bcos thams cad las kyang/ mdza' gnyis dang mtshan ma la mi gnas pa ni mya ngan las 'das pa'i rgyu yin la/ mtshan ma la gnas pa ni 'khor ba'i nyes dmigs su gsungs pas/ rnam par mi rtog pa'i don la cig car 'jug pa ni mya ngan las 'das pa'i lam gyi mchog yin par gsungs so/ /rnam par mi rtog pa'i nang du chos thams cad 'dus par gsungs te/ shing then wa gi'i mdo las/ chos gcig brlabs shing bsgoms na/ chos thams cad grol bar 'gyur ro zhes gsungs so/ /zla ba sgron ma'i mdo las/ /gang zhig chos gcig dang nyams su ldan na/ yon tan gyi chos thams cad rdzogs par 'gyur ro/ /gcig gang zhe na/ de bzhin nyid du rig na chos thams cad la grags pa med pa yin/ sgra kun spangs pa yin no zhes gsungs so/ /chos kyi rgyal po'i mdo las/ chos gcig shes par nus na chos gcig kyang mi shes pa med do/ /chos gcig mi shes na chos gcig kyang shes pa med do zhes gsungs so/ /zla ba mar me'i mdo las/ 'jig rten khams ni stong dag du/ /ngas ni mdo sde gang bshad pa/ /sna tshogs tshig 'bru don gcig ste/ /thams cad brjod par yod mi nus/ /tshig gcig goms par byas pas na/ de dag thams cad goms par 'gyur zhes gsungs so/ /slob dpon seng ge bzang pos mdzad pa'i mngon par rtogs pa'i rgyan gyi 'brel pa las kyang/ chos gcig chos kun nyid kyi ngo bo nyid/ /gang gis chos gcig de bzhin nyid rtogs pas/ /de yis chos kun de bzhin nyid du rtogs zhes gsungs pas/ /lung dang bstan bcos dang yang mi 'gal la/ kun rdzob du yang don gyis yod de/ shes rab kyi pha rol tu phyin pa las/ de ni shA ri'i bu gzugs stong pa nyid do/ /stong pa nyid kyang gzugs so/ /gzugs dang stong pa nyid tha dad pa ma yin no/ /de bzhin du tshor ba nas chos thams cad kyi bar du stong pa nyid kyi mtshan nyid de/ mi skye mi 'gag mi 'phel mi 'grib bo zhes gsungs pas/ don dam par rang bzhin med kyang/ kun rdzob tu sgyu ma tsam du stong pa nyid gzugs su snang bas chad par mi 'gyur ba ni dbu ma'i gzhung ngo snyam mo/ /ye shes snang ba'i rgyan gyi mdo las/ rgyu rkyen rten 'brel bshad pa dang/ /rims kyis 'jug pa bstan pa ni/ /rmongs pa rnams la thabs su gsungs/ /lhun gyis grub pa'i chos de la/ /rims su sbyar ba ci zhig yod/ /mdza' las 'das pa'i rang bzhin la/ /gong bur 'du shes su zhig lta/ /cung zad du yang khas blangs med/ /de tshe sems ni nam mkha' ste/ /sangs rgyas dang ni spyod yul gcig /ces gsungs pa ni dbu ma'i gzhung ngo snyam mo// lang kar gshegs pa las/ dngos rnams skye ba kun rdzob tu/ /dam pa'i don du rang bzhin med/ /rang bzhin med la gang nor ba/ /de ni yang dag kun rdzob 'dod ces gsungs pa dang/ sangs rgyas phal po che las kyang/ yid bzhin nor bu'i rgyal po ni/ /ci yid bsam pa rdzogs byed pa/ /de bzhin sangs rgyas chos nyid dang/ /rtag tu smon lam rdzogs par 'grub/ /mdza' dang dbus med 'jig rten der/ /'jig rten pa yi 'dren par gyur/ /de yi smon lam de dag gis/ /phyogs bcu de dag rgyal bas gang/ /ji ltar zla ba shar gyur ba/ /tshad med pa yi gzugs brnyan rnams/ /chu yi snod du shes gyur kyang/ /zla ba gnyis su gyur pa med/ /de bzhin chags med mkhyen ldan rnams/ /chags med rnam par 'tshang rgya ba/ /zhing rnams kun na'ang rab tu snang/ /sangs rgyas la ni gnyis kyang med/ /ces gsungs pa ni don dam par gnyis su med kyang/ tha snyad tsam du yang tha dad de/ de ni dbu ma'i gzhung du bcom ldan 'das kyis don dam pa'i bka' mdza' dag las rgyas par gsungs so/ /bden pa'i le'u'i mdo las/ 'jam dpal ngas nyan thos dang rang sangs rgyas kyi theg pa la bkod pa med do/ /'jam dpal theg pa la rnam par bkod pa zhes bya ba ni kun rdzob tu zad do/ /don dam par theg pa gcig dang gnyis su med do/ /zhes gsungs so/ /yod ni chos nyid kyi mdza' btsan par byas na/ rnal 'byor chen po'i lam yang smra bsam las 'das pa yin te/ gzhung bshad du med kyi/ 'on kyang so so'i skye bo ma rabs drang ba'i chos nyid la gzung ba'i phyir tha snyad tsam gyi sgo nas bshad par zad do/ /de la gang dag rnam par mi rtog pa'i bya ba thams cad spangs pa yin na/ sems pa dge bas bskyed pa'i las thams cad kyang spang ngam ci/ dkon mchog gsum la mchod pa la sogs pa yang 'gal lo zhe na/ de la bshad pa dkon mchog brtsegs pa las/ sangs rgyas kyi 'du shes med/ chos kyi 'du shes med na dge 'dun gyi 'du shes med yang dag pa'i mchod pa'o zhes gsungs so/ /blo gros rgya mtshos zhus pa'i mdo las kyang/ /blo gros rgya mtsho gsum po 'di dag ni de bzhin gshegs pa la mchod pa dang/ rim gro bla na med pa'o/ /gsum gang zhe na/ byang chub tu sems bskyed pa dang/ de bzhin gshegs pa rnams kyi dam pa'i chos 'dzin pa dang/ sems can rnams la snying rje chen po bskyed pa'o zhes gsungs so/ /kha cig na re thos pa mang po dang bshad par bya dgos so zhe na/ de la bshad pa gtsug gtor chen po'i mdo las/ mdza' yas 'dzin par yid gzhungs kyang/ /ldog par bsams pas mdza' mar ltung/ /rjes su 'khor ba ma yin nam zhes gsungs so/ /zla ba'i snying po'i mdo las/ dper na me stag gang gis kyang/ /rgya mtsho chen po skems mi nus/ /de bzhin kun rdzob bden pas ni/ /rang gi nyon mongs skems mi nus/ /sems can gzhan lta ci zhig smos/ /zhes gsungs so/ /lang kar gshegs pa las/ ji bzhin sgra ru brtags nas su/ /gang gis de ltar bsgrubs na ni/ /shi nas sems can dmyal bar ltung/ /ma rabs sgyu ma 'chad la dad/ /yang dag shes rab ming thob po/ /smra ba sdug bsngal gsum nyid de/ /sdug bsngal 'gag pa yang dag nyid ces gsungs so/ /yang de nyid las bshad pa dag kyang 'khrul pa ste/ yang dag nyid la yi ge med cis gsungs so/ /yang de nyid las mang du thos pa zhes bya ba ni don la mkhas pa yin gyi/ tshig la mkhas pa ma yin no zhes gsungs so/ /'byung ba med pa'i mdo las/ chos kyi rang bzhin yongs su mi shes na/ tshig gi dam pas byang chub sangs mi rgya zhes gsungs so/ /dgongs pa nges par 'grel ba las/ yun ring dus nas smra ba la mos shing smra ba la mngon par dga' pas nang gi 'phags pa'i mi smra bar gyur pa'i bden pa la brtags pa 'am/ rjes su dpag pa'am/ mos par mi nus so zhes gsungs so/ /'jam dpal gnas pa las/ 'dus byas la ni gang rtog dang/ /'dus ma byas la gang rtog pa/ /gnyis ka bdud kyi las yin zhes/ /de dag mkhas pas rab tu bshad ces gsungs so/ /nam mkha' mdzod kyi mdo las/ ji snyed du smra ba de snyed du bdud kyi las so/ /smra ba med cing mtshan ma med pa la bdud kyis ci zhig bya zhes gsungs so/ /tshangs pa kun 'dris kyi mdo las/ chos dang chos ma yin pa rnam par mi rtog /mtshan ma gnyis dang bral ba ni lam bsgom pa'o zhes gsungs so/ /chos kyi rgyal po'i mdo las/ rigs kyi bu grol thar par 'dod na/ 'dod pa'i yan lag bcad la/ sems kyis gnyis su mi bsam/ /cig tu bsam ste yod pa dang med pa'i sems gtang ngo/ /sems kyi ngo bo nyid kyi tshul ni stong pa ste/ sems kyi ngo bo nyid ni 'gro ba yang med/ 'ong ba yang med blang ba yang med dor ba yang med de/ ci yang med pa 'di'i ming ni byang chub po zhes gsungs so/ /gser 'od dam pa'i mdo las kun rdzob kyi tshul du bstan cing bshad mod kyi/ yang dag pa'i don la blos btags na de lta ma yin no/ /tshig sgyu mas yang dag pa'i gzhung mngon par byang ba'i phyir ro zhes gsungs so/ /shes rab 'bum gyi mdo las/ chos kyi dbyings shes na chos thams cad kyi mdo dang rgyas pa yang yin no zhes gsungs pas/ don la mkhas pa ni thos pa'i mchog yin par mngon la/ gal te sgra phyir 'brangs na rnam par mi rtog pa'i bar chad du yang 'gyur la/ thos bshad ni don mi che bar gsungs so/ /kha cig na re pha rol tu phyin pa drug la sogs pa dpyad dgos so zhes zer ro/ /de la bshad pa rdo rje ting nge 'dzin gyi mdo las/ sems stong pa nyid du mi g.yon pha rol tu phyin pa drug 'dus so zhes gsungs so/ tshangs pa khyad par sems kyi zhus pa'i mdo las/ mi sems pa ni sbyin pa/ mi gnas pa ni tshul khrims/ ci yang bye brag mi phyed pa ni bzod pa'o/ /blang dor med pa ni brtson 'grus/ ma chags pa ni ting nge 'dzin/ mi gnyis pa ni shes rab ces gsungs so/ /lang kar gshegs pa'i mdo las/ ji srid sems ni 'jug gi bar/ /de srid 'jig rten rgyang phan pa zhes gsungs pas/ sbyin pa la sogs pa tsam ni mu stegs pa la yang yod pas/ mtshan ma'i rjes su 'brangs na 'khor ba las mi 'da' ba' i skyon du 'gyur ro/ /kha cig na re kha ton dang 'dri klog las bsod nams che ba med do/ /zhes zer ro/ /de la bshad pa ting nge 'dzin gyi rgyal po'i mdo las/ gang zhig byang chub rab tu dad pa ni/ /'dus byas skyo nas sems can don gyi phyir dgon par phyogs te gom pa bdun por nas/ /de ni de bas bsod nams mchog tu 'gyur zhes gsungs so/ /gtsug tor chen po'i mdo las/ rdul snyed kyi bskal par dam pa'i chos kyi mdo sde klog cing kha ton byed pa bas/ nyin cig gam mtshan gcig zag pa med pa'i shes rab bsgoms na bsod nams tshe'o/ /dpag tu med par che 'o/ /de ci'i phyir zhe na/ skye shi las ring du gyur pa'i phyir ro zhes gsungs pas/ mdo sde kha ton byed pa dang 'dri ba ni don mi che bar gsungs so/ /kha cig na re rnam par mi rtog pa la sems can gyi don bya ba'i thabs med do zhes zer ro/ /de la bshad pa shes rab kyi pha rol tu phyin pa'i mdo las/ rab 'byor 'di la byang chub sems dpa' sems dpa' chen po'i ting nge 'dzin gsum la gnas shing/ sems can gang rnam par rtog pa la dpyod pa de dag ni stong pa nyid la rab tu 'god do/ /sems can gang mtshan ma la spyod pa de dag ni mtshan ma la sbyar ro/ //sems can gang 'bras bu la smon pa de dag ni smon pa la sbyar ro/ /rab 'byor de ltar byang chub sems dpa' sems dpa' chen po shes rab kyi pha rol tu phyin pa la spyod cing ting nge 'dzin gsum la gnas shing/ sems can yongs su smin par byed do zhes gsungs pas/ rnam par mi rtog pa nyid kyis sems can gyi don byed de/ mtshan ma'i sgo nas chos ston pa ni bdud kyi las dang sdig pa'i grogs po yin no/ /sangs rgyas mdzod kyi mdo las/ rang gi chos mi shes par gzhan la chos ston pa ni sems can dmyal bar skye bar 'gyur ro/ /de ci'i phyir zhe na/ chos log pa bstan pa'i phyir ro/ /chos log par bshad ces bya ba ni dngos po dang mtshan mar bstan pa'o/ /zhes gsungs pas/ mi dmigs par sems can gyi don byed pa ni mchog tu gsungs so/ /kha cig na re mi rtag pa la sdig pa bshags pa med do zhes zer na/ de la bshad pa phyogs su rgyas pa'i mdo las/ gang zhig 'gyod tshangs byed 'dod na/ /drang por 'dug las yang dag ltos/ /yang dag nyid la yang dag lta/ /yang dag mthong nas rnam par grol/ /'di ni 'gyod tshangs mchog ces bya zhes gsungs pas/ sems mi g.yo bar 'dug pa nyid ni 'gyod tshangs kyi mchog yin par gsungs so/ /de yan chad ni rgol ba'i lan du yang gsungs so/ /rnal 'byor pa'i gzhung du yang bshad pa yin no/ /de bas na thams cad mkhyen pa nyid myur du thob par 'dod pa des/ rnam par mi rtog pa'i ting nge 'dzin la bsgom par bya'o/ /mi rtog cig car 'jug pa 'dir bshad pas/ /khams gsum sems can mdza' yas ji snyed kun/ /shes rab mig thob dbu ma'i don rtogs nas/ /thams cad mkhyen pa myur du thob par shog /cig car 'jug pa'i rnam par mi rtog pa'i bsgom don/ slob dpon chen po'i bi ma la mi tras mdzad pa rdzogs so// //rgya gar gyi mkhan po d+harma tA shI la dang/ zhu chen gyi lots+tsha ba bande ye shes sdes bsgyur cing zhus te gtan la phab pa'o// (kun rdzob byang chub kyi sems bsgom pa'i man ngag yi ger bris ba slob dpon rta dbyangs kyis so/

CLOSE WINDOW