བོད་ཡིག

e-texts based on the ACIP/ALL Input

/gzu bor byos la dpyad par rigs/ /yi ge pa ni bla ma'i ming can dag gis bris bkra shis// (` dbu ma la 'jug pa zhugs) // */ /rgya gar skad du/ ma d+hya mA ba tA ra kA ri kA nA ma/ bod skad du/ dbu ma la 'jug pa'i tshig le'ur byas pa/ 'phags pa 'jam dpal gzhon nur gyur pa la phyag 'tshal lo/ /nyan thos sangs rgyas 'bring rnams thub dbang skyes/ /sangs rgyas byang chub sems dpa' las 'khrungs shing// snying rje'i sems dang gnyis su med blo dang/ /byang chub sems ni rgyal sras rnams kyi rgyu/ /gang phyir brtse nyid rgyal ba'i lo thog 'di'i/ /sa bon dang ni chu dang yun ring du/ /longs spyod gnas la smin pa ltar gyur pa/ /de phyir thog mar snying rje bstod par bgyi/ /dang por bdag tu mngon bar zhen gyur cing/ /dngos po rnams la bdag gis zhes bzung bas/ /zo chun rgyud ltar rang dbang med pa yi/ /'gro la snying rjer gyur gang de la 'dud/ /'gro ba g.yo ba'i chu nang zla ba ltar/ /g.yo dang rang bzhin stong par mthong ba yi/ /'gro ba dgrol phyir snying rje'i gzhan dbang gis/ /kun tu bzang po'i smon pas rab smon zhing/ /gang gis sems ni rab dga' la gnas pa/ /de ni rgyal ba'i sras kyi dang por brjod/ /de nas bzung ste de thob gyur pas de/ /byang chub sems dpa' zhes bya ba'i sgras bsnyad do/ /'di ni de bzhin gshegs pa'i rigs skyes te/ /'di yis kun sbyor gsum pa spangs par 'gyur/ /de ni dga' ba mchog tu gyur 'chang zhing/ /'jig rten khams brgya g.yo bar nus pa'ang yin/ /sa nas sar gnon gong du 'gro bar 'gyur/ /de tshe 'di yi ngan 'gro'i lam 'gag cing/ /so so skye bo'i sa rnams zad 'gyur te/ 'di ni 'phags pa brgyad pa bzhin du bstan/ /rdzogs pa'i byang chub sems bskyed dang pes kyang/ /thub dbang gsung skyes rang rgyal bcas pa rnams/ /bsod nams stobs kyis pham byas rnams 'phel zhing/ /ring du song ba'i blo yang lhag par 'gyur/ /de tshe de la rdzogs sangs byang chub rgyur/ /dang po sbyin pa nyid ni lhag par 'gyur/ /rang sha gtong la'ang gus par byas pa yis/ /nang du mi rung dpog pa'i rgyur yang 'gyur/ /skye bo 'di kun bde ba mngon 'dod cing/ /mi rnams bde ba'ang longs spyod med min la/ /longs spyod kyang ni sbyin las byung mkhyen nas/ thub pas dang por sbyin pa'i gtam mdzad do/ /snying rje dman zhing shin tu rtsub sems can/ /rang don lhur len nyid du gyur ba gang/ /de dag gi yang 'dod pa'i longs spyod rnams/ /sdug bsngal nyer zhi'i rgyur gyur sbyin las byung/ /'di yang sbyin pa'i skabs kyi nam zhig tshe/ /'phags pa'i skye bo dang phrad myur du thob/ /de nas srid rgyun yang dag bcad byas te/ de yi rgyu can zhi bar 'gro bar 'gyur// 'gro la phan par dam bcas yid can rnams/ /sbyin pas ring por mi thogs dga' ba thob/ /snying rje can dang snying rje med la yang/ /de phyir sbyin pa'i gtam nyid rtsa bar 'dod/ /ji ltar byin cig ces sgra thos sems las/ /rgyal sras bde 'byung de ltar thub rnams la/ /zhi bar zhugs pas bde ba byed min na/ /thams cad btang bas lta zhig smos ci dgos/ /lus bcad ster zhing bdag gi sdug bsngal gyis/ /gzhan dag rnams kyis dmyal ba la sogs pa'i/ /sdug bsngal rang rig nyid du mthong nas de/ /bcad par bya phyir de ni brtson par byed/ /sbyin pa sbyin bya len po gtong pos gtong/ /'jig rten 'das pa'i pha rol phyin ces bya/ /gsum po dag la chags skyes gyur pas de/ /'jig rten pa yi pha rol phyin ces bstan/ /de ltar rgyal sras yid la rab gnas shing/ /dam pa'i rten la 'od chags mdzes gyur pa'i/ /dga' ba 'di ni nor bu chu shel bzhin/ /mun stug thams cad rnam par bsal nas rgyal// dbu ma la 'jug pa las rab tu dga' ba zhes bya ba byang chub sems dpa' i sems bskyed pa dang po'o/ / //de tshul phun tshogs yon tan dag ldan phyir/ /rmi lam du yang 'tshul 'khrims dri ma spangs/ /lus ngag yid kyi rgyu ba dag gyur pas/ /dam pa'i las lam bcu car gsog par byed/ /dge ba'i lam 'di lta zhig bcu char yang/ /de la klags te shin tu dag par 'gyur/ /ston ka'i zla ltar rtag tu rnam dag ste/ zhi 'od chags par de dag gis rnam mdzes/ /gal te 'di ni khrims dag rang bzhin lta/ /de phyir de ni tshul khrims dag mi 'gyur/ /de phyir de ni rtag tu gsum char la'ang/ /gnyis blo'i rgyu ba yang dag bral bar 'gyur/ /skye po tshul khrims rkang pa chag gyur na/ /sbyin pas longs spyod ldan yang ngan 'gror ltung/ /bskyed bcas rtsa ba yongs su zad pas na/ phyin chad de la longs spyod 'byung mi 'gyur/ /rang dbang 'jug cing mthun pa'i yul gnas pa/ de tshe 'di dag 'dzin par mi byed na/ /g.yang sar lhung bas gzhan dbang 'jug 'gyur ba/ /de tshe de nas gang gis 'byin par 'gyur/ /de phyir rgyal bas sbyin pa'i gtam mdzad nas/ /tshul khrims rjes 'gro'i gtam nyid mdzad pa yin/ /yon tan tshul khrims zhing du rnam 'phel na/ 'bras bu nyer spyod chad pa med par 'gyur// so so'i skye bo rnams dang gsung skyes dang/ /rang sangs rgyas la nges pa'i bdag nyid dang/ /rgyal sras rnams kyi mngon par mtho ba dang/ /nges legs rgyu ni tshul khrims las gzhan med/ /ji ltar rgya mtsho ro dang lhan cig dang/ /bkra shis sna nag ma dang lhan cig bzhin/ /de ltar tshul khrims dbang byas bdag nyid che/ de 'chal ba dang lhan cig gnas mi 'dod/ /gang gis gang zhig gang la spong byed pa/ /gsum du dmigs pa yod na tshul khrims de/ /'jig rten pa yi pha rol phyin zhes bshad gsum la chags pas stong de 'jig rten 'das/ /srid min srid pa'i dpal gyur rgyal sras kyi/ /zla ba las byung dri bral dri med pa/ /'di yang ston ka'i zla 'od ji bzhin du/ /'gro ba yid kyi gdung ba sel byed yin/ /dbu ma la 'jug pa las dri ma med pa zhes bya ba byang chub sems dpa' i sems bskyed pa gnyis pa'o/ / //shes bya'i bud shing ma lus sreg pa'i me/ /'od 'byung phyir na gsum pa'i sa 'di ni/ /'ong byang pa de bde gshegs sras po la/ /de tshe nyi 'od zangs 'dra'i snang ba 'byung/ /gal te gnas min 'khrug pa 'ga' zhig gis/ /da yi lus la rus pa dang bcas sha/ srang re yun ring dus su gcod byed kyang/ /gcod byed de la bzod pa lhag par skye/ /bdag med lta ba'i byang chub sems dpa' yis/ /gang gis gang la gang tshe ci bcad pas/ /gang phyir de yis chos kun gzugs brnyan ltar/ /mthong ba'i phyir yang de yis bzod par 'gyur/ /gnod pa byas pas gal te der dkon na/ /de la dkon pas byas zin ldog gam ci/ /de phyir de dkon nges par 'dir don med/ /'jig rten pha rol yang ni 'gal bar 'gyur/ /sngon byas mi dge'i las kyi 'bras bu gang/ /zad byed brjod par 'dod pa de nyid ko/ gzhan la gnod dang khro bas sdug bsngal phyir/ /sa bon nyid du ji ltar khrid par byed/ /gang phyir rgyal sras rnams la khros pa yis/ /sbyin dang tshul khrims bskal pa bye ba brgyar/ /bsags pa skad cig gis 'joms de yi phyir/ /mi bzod las gzhan sdig pa yod ma yin/ /mi sdug gzugs byed dam pa min par khrid/ /rigs dang mi rigs rnam dpyod 'phrog byed cing/ /mi bzod pa yis myur du ngan 'gror sgyur/ /bzod pas bshad zin dang 'gal yon tan byed/ /mdzes shing dam pa'i skye bos 'dod pa dang/ /rigs dang mi rigs shes la mkhas 'gyur zhing/ /'di las gzhan du lha mi dag tu skye/ /so so'i skye bo dang ni rgyal sras kyi/ /khro dang bzod pa'i skyon yon rig byas te/ /mi bzod spangs pas 'phags pa'i skye bo yis/ /bsngags pa'i bzod pa rtag tu bsten par bya/ /rdzogs sangs rgyas kyis byang chub phyir bsngos kyang/ /gsum dmigs yod na de ni 'jig rten pa'o/ /dmigs pa med na de nyid sangs rgyas kyis/ /'jig rten 'das pa'i pha rol phyin ces gsungs/ /sa der bsam gtan mngon shes 'byung 'gyur dang/ 'dod chags zhe sdang yongs su zad par 'gyur/ /des kyang rtag tu 'jig rten pa yi ni/ /'dod pa'i 'dod chags 'joms par nus par 'gyur/ /sbyin sogs chos gsum de dag phal mo cher/ /bde bar gshegs pas khyim pa rnams la bsngags/ /bsod nams zhes bya'i tshogs kyang de dag nyid/ /sangs rgyas gzugs kyi bdag nyid sku yi rgyu/ /rgyal sras nyi ma la gnas 'ong byed 'di/ /rang rgyud mun pa dang por bsal byas nas/ /'gro ba'i mun pa sel bar 'dod pa yin/ /sa 'dir rno bar gyur kyang khro mi 'gyur/ /dbu ma la 'jug pa las 'ong byed pa zhes bya ba byang chub sems dpa' i sems bskyed pa gsum pa'o// //yon tan thams cad brtson 'grus rjes 'gro zhing/ /bsod nams blo gros tshogs ni gnyis kyi rgyu/ /brtson 'grus gang du 'bar bar gyur pa yi/ /sa de 'od 'phro bzhi pa zhes bya'o/ /der ni bde gshegs sras la rdzogs pa yi/ /byang chub phyogs lhag bsgoms pa las skyes pa'i/ /snang ba zangs kyi 'od pas lhag 'byung zhing/ /bdag tu lta ba dang 'brel yongs su zad/ /dbu ma la 'jug pa las 'od 'phro ba zhes bya ba byang chub sems dpa' i sems bskyed pa bzhi pa'o// //spyang dka' i sar gnas bdag nyid chen po de/ /bdud rnams kun gyis 'pham par nus ma yin/ /bsam gtan lhag cing blo bzang bden rang bzhin/ /zhib mo rtogs la'ang shin tu mkhas pa thob/ /dbu ma la 'jug pa las spyang dka' ba zhes bya ba byang chub sems dpa' i sems bskyed pa lnga pa'o/ / //mngon du phyogs par mnyam bzhag sems gnas te/ /rdzogs pa'i sangs rgyas chos la mngon phyogs shing/ /rkyen nyid 'di ba'i de nyid mthong ba de/ /shes rab gnas pas 'gog pa thob par 'gyur/ /ji ltar long ba'i tshogs kun bde blag tu/ /mig ldan skyes bu gcig gis 'dod pa yi/ /yul du khrid pa da bzhin 'dir yang blos/ /mig nyams yon tan blangs te rgyal bar khrid/ /ji ltar de yis chos zab chos rtogs pa/ /lung dang gzhan yang rigs pas yin pas na/ /de ltar 'phags pa klu grub gzhung lugs las/ /ji ltar gnas pa'i lugs bzhin brjod par bya/ /so so skye bo nyad na'ang stong nyid thos/ /nang du dga' ba yang dang yang du 'byung/ /dga' ba las byung mchi mas mig gang zhing/ /lus kyi ba spu ldang gyur gang yin pa/ /de la rdzogs pa'i byang chub sa bon yod/ /de nyid bstan pa'i snod ni de yin te/ de la don dam bden pa bstan par bya// de la de rjes 'gro ba'i yon tan 'byung/ /rtag tu tshul khrims blangs nas gnas par 'gyur/ /sbyin pa gtong zhing snying rje brten par byed/ /bzod pa sgom zhing dge ba byang chub tu/ 'gro ba dgrol phyir yongs su bsngo byed cing/ /byang chub sems dpa' rnams la gus par byed/ /zab cing rgya che'i tshul la mkhas pas ni/ /rim gyis rab tu dga' ba'i sa thob pas/ /de don gnyer bas lam 'di mnyan par gyis/ /de nyid de las 'byung min gzhan dag las kyang min/ /gnyis ka las min rgyu med par yang 'byung ba min/ /de ni de las 'byung na yon tan 'ga' yang med/ /skyes zin slar yang skye bar rigs pa'ang ma yin nyid/ /skyes ba slar yang skye bar yongs su rtog na ni/ /myu gu sogs kyi skye ba thob par mi 'gyur zhing/ /sa bon srid mthar thug par skye ba nyid du 'gyur/ /ji ltar de nyid kyis de rnam par 'jig par 'gyur/ /byed rgyu sa bon gyi las myu gu'i dbyibs dang ni/ /kha dog ro nus smin pa'i tha dad med par 'gyur/ /gal te rang gi sngar gyi ngo bo yongs btang nas/ /gzhan gyi ngo bor gyur na de nyid ji ltar yin/ /gal te sa bon myu gu 'dir gzhan ma yin na/ /sa bon bzhin du myu gu bzung du med pa 'am/ /yang na de bzhin de yang bzung du yod par 'gyur// de yi phyir na de dag gcig par khas mi blang/ /gang phyir rgyu zhig na yang 'bras bu mthong ba'i phyir/ /de dag gcig ces 'jig rten pas kyang khas len med/ /de phyir dngos po bdag las 'byung zhes btags pa 'di/ /de nyid dang ni 'jig rten du yang rigs ma yin/ /bdag skyes 'dod na bskyed par bya dang skyed byed dang/ las dang byed po gcig tu 'gyur na de dag ni/ /gcig nyid min pas bdag las skye ba khas blang bar/ /bya min rgya cher bshad pa'i nyes par 'gyur phyir ro/ /gal te gzhan la brten nas gzhan zhig 'byung na ni/ /me lce las kyang mun pa 'thug po 'byung 'gyur zhing/ /kun las thams cad skye bar 'gyur de gang gi phyir/ /skye byed min pa kun la'ang gzhan nyid mtshungs phyir ro/ /rab tu bya bar nus pa de phyir 'bras bur des brjod cing/ /gang zhig skyed byed nus pa de ni gzhan na'ang rgyu yin la/ /rgyud gcig rtogs dang skyed par byed las bskyed pa de yi phyir/ /sa lu'i myu gu nas la sogs pa de lta min zhe na/ /ji ltar nas dang ge sar dang ni ked shu ka la sogs/ /nus pa med dang rgyud gcig min dang 'dra ba min pa dag /sa lu'i myu gu skyed byed min par 'dod pas de bzhin du/ /sa lu'i sa bon nyid kyang de bzhin nyid de gzhan nyid phyir/ /myu gu sa bon dus mnyam yod pa ma yin te/ /gzhan nyid med par sa bon gzhan du ga la 'gyur/ /des na myu gu sa bon las skye 'grub min pas/ /gzhan las skye zhes bya ba'i phyogs ni btang bar byos/ /ji ltar srang gyi mnga' gnyis mtho dang dma' ba dag/ dus mnyam ma yin min par mthong ba de bzhin du/ /bskyed bya skyed byed dag gis skye 'gag 'gyur zhe na/ /gal te dus gcig yin na 'dir dus gcig med de/ /skye bzhin pa de skye la phyogs pas yod min zhing/ /'gag bzhin pa ni yod kyang 'jig la phyogs gyur pa/ /de tshe 'dir ni ji ltar srang dang mtshungs pa yin/ /skye ba 'dir ni byed po med par rigs ma yin/ /mig gi blo la rang gi skyed byed dus gcig pa/ /mig la sogs dang lhan cig 'byung ba 'du shes las/ /gzhan nyid yod na yod la 'byung bas dgos ci yod/ /de med ce na 'di la nyes pa bshad zin to/ /skyed byed bskyed bya gzhan bskyed pa de rgyu yin na/ /yod med gnyis dang gnyis ka min pa bskyed 'gyur grangs/ /yod na ci dgos med la'ang des ni ci zhig bya/ /gnyis la ci bya gnyis dang bral ba'ang des ci bya/ /rang lta la gnas 'jig rten tshad mar 'dod pa na/ /'dir ni rigs pa brjod pa nyid kyis ci zhig bya// gzhan las byung ba'ang 'jig rten pa yis rtogs 'gyur te/ /des na gzhan skye yod 'dir rigs pa ci zhig bya/ /dngos kun yang dag mthong ba'i 'khrul pa yis/ /dngos snyed ngo bo gnyis ni 'dzin par 'gyur/ /yang dag mthong yul gang yin de nyid de/ /mthong ba 'khrul pa'i kun rdzob bden par gsungs/ /mthong ba 'khrul pa'ang rnam pa gnyis 'dod de/ /dbang po gsal dang dbang po skyon ldan no/ /skyon ldan dbang can rnams kyis shes pa ni/ /dbang po legs gyur shes pa log par 'dod/ /gnod pa med pa'i dbang po drug rnams kyi/ /bzung ba gang zhig 'jig rten gyis rtogs te/ 'jig rten nyid las bden yin lhag ma ni/ /'jig rten nyid las log par rnam par bzhag /mi shes gnyid kyis rab bskyod mu stegs can/ /rnams kyis bdag nyid ji bzhin brtags pa dang/ sgyu ma smig rgyu sogs la brtags pa gang/ /de dag 'jig rten las kyang yod min nyid/ /mig ni rab rib can gyis mthong ba yis/ /rab rib med ces la gnod min ji ltar/ /de bzhin dri med ye shes spangs pa'i blos/ /dri med blo la gnod pa yod ma yin/ /gti mug rang bzhin sgrib phyir kun rdzob ste/ /des gang bden par mthong ba'i bcos ma de/ /kun rdzob bden zhes thub pa des gsungs te/ /bcos mar gyur ba'i dngos ni kun rdzob tu'o/ /rab rib mthu yis skra bshad la sogs pa'i/ /ngo bo log pa gang zhig rnam brtags pa/ /de nyid bdag nyid gang du mig dag pas/ /mthong de de nyid de bzhin 'dir shes kyis/ /gal te 'jig rten tshad ma yin na ni/ /'jig rten de nyid mthong bas 'phags gzhan gyis/ /ci dgos 'phags pa'i lam gyis ci zhig bya/ /blun po tshad mar rigs pa'ang ma yin no/ /rnam kun 'jig rten tshad min de yi phyir/ /de nyid skabs su 'jig rten gnod pa med/ /'jig rten don ni 'jig rten grags nyid kyis/ /gal te sel na 'jig rten gyis gnod 'gyur/ /gang phyir 'jig rten sa bon tsam btab nas/ /bdag gis bu 'di bskyed ces smra byed cing/ /shing yang btsugs so snyam du rtogs des na/ /gzhan las skye ba 'jig rten las kyang med/ /gang phyir myu gu sa bon las gzhan min/ /de phyir myug tshe sa bon zhig pa med/ /gang phyir gcig nyid yod min de phyir yang/ /myug tshe sa bon yod ces brjod mi bya/ /gal te rang gi mtshan nyid brten 'byung na/ de la bkur bas dngos po 'jig pa'i phyir/ /stong nyid dngos po 'jig pa'i rgyur 'gyur na/ /de ni rigs min de phyir dngos yod min/ /gang phyir dngos po 'di dag rnam dpyad na/ /de bzhin nyid kyi dngos las tshu rol tu/ /gnas rnyed ma yin de phyir 'jig rten gyi/ /tha snyad bden la rnam par dpyad mi bya/ /de nyid skabs su rig pa gang zhig gis/ /bdag dang gzhan las skye ba'ang rigs min pa'i/ /rigs des tha snyad du yang rigs min pas/ /khyod kyi skye ba gang gis yin par 'gyur/ /dngos po stong pa gzugs brnyan la sogs pa/ /tshogs la bltos rnams ma grags pa'ang min/ /ji ltar der ni gzugs brnyan sogs stong las/ /shes pa de yi rnam pa skye 'gyur pa/ de bzhin dngos po thams cad stong na yang/ /stong pa nyid las rab tu skye bar 'gyur/ /bden pa gnyis su 'ang rang bzhin med pa'i phyir/ /de dag rtag pa ma yin chad pa'ang min/ /gang phyir rang bzhin gyis de mi 'gag pa/ /de phyir kun gzhi med kyang 'di nus phyir/ /la lar las 'gags yun rings lon las kyang/ /'bras bu yang dag 'byung bar rigs par gyis/ /rmi lam dmigs pa'i yul dag mthong nas ni/ /sad kyang blun la chags pa skye 'gyur ba/ /de bzhin 'gags shing rang bzhin yod min pa'i/ /las las kyang ni 'bras bu yod pa yin/ /ji ltar yul ni med pa nyid mtshungs kyang/ /rab rib can gyis skra shad rnam par ni/ /mthong gi dngos gzhan rnam par ma yin ltar/ /de bzhin smin las slar smin min shes kyis/ /de phyir rnam smin mi dge nag po las/ /rnam smin dge nyid dge las yin mthong zhing/ /dge mi dge blo med pa thar 'gyur te// mthong gi dngos gzhan rnam par ma yin ltar/ /las 'bras rnams la sems dpa' dgag pa mdzad/ /kun gzhi yod cing gang zag yod nyid las/ /phung po 'di dag 'ba' zhig nyi yod ces/ /bstan pa 'di ni de ltar ches zab don// rigs par mi 'gyur gang yin de la'o/ /'jigs tshogs lta dang bral yang sangs rgyas kyis/ /ji ltar nga dang nga yi bstan pa ltar/ /de bzhin dngos rnams rang bzhin med mod kyi/ /yod ces drang don nyid du bstan pa yin/ /bzung ba med par 'dzin pa ma mthong zhing/ /srid gsum rnam shes tsam du rab rtogs pas/ /shes rab la gnas byang chub sems dpa' des/ /rnam shes tsam du de nyid rtogs par 'gyur/ /ji ltar rlung gis bskul bas rgya mtsho ni/ /che las chu rlabs 'byung ba de bzhin du/ /kun gyis sa bon kun gzhi zhes bya las/ /rang gi nus pa rnam shes tsam zhig 'byung/ /de phyir gzhan gyi dbang gi ngo bo gang/ /dngos po btags par yod pa'i rgyur 'gyur zhing/ /phyi rol bzung ba med par 'byung 'gyur la/ /yod dang spros kun yul min rang bzhin yod/ /phyi rol med sems dper na gang du yod/ /rmi lam ji bzhin zhe na de bsam bya/ /gang tshe nga la rmi lam na yang sems/ /yod min de tshe khyod kyi dpe yod min/ /gal te sad tshe rmi lam dran las yid/ /yod na phyi rol yul yang de bzhin 'gyur/ /ji ltar khyod kyis ngas mthong dran snyam pa/ /de 'dra phyi rol la yang mtshungs pa yin/ /gal te gnyid ni mig blo mi srid pas/ /yod min yid kyi shes pa kho na yod/ /de yi rnam pa phyi rol nyid du zhen/ /rmi las ji lta bzhin du 'dir 'dod na/ /ji ltar khyod kyi phyi yul rmi lam du/ /ma skyes de bzhin yid kyang skyes ma yin/ /mig dang mig gi yul dang des bskyed sems/ /gsum po thams cad kyang ni rdzun pa yin/ /rna sogs gsum po lhag ma'ang skye ba med/ /rmi lam ji lta bzhin du sad 'dir yang/ /dngos rnams rdzun yin sems de yod ma yin/ /spyod yul med cing dbang po rnams kyang med/ /'di ni ji ltar sad bzhin ji srid du/ /ma sad de srid de la gsum po yod/ /sad par gyur na gsum char yod min ltar/ /gti mug gnyid las sad de de bzhin no/ /dbang po rab rib bcas pas blo gang gis/ /rab rib mthu las skra rnams gang mthong ba/ /de blo la bltos gnyis char bden pa des/ don gsal mthong la gnyis ka 'ang rdzun pa yin/ /gal te shes bya med par blo yod na/ /skra de'i yul dang mig ni rjes 'brel pa'i/ /rab rib med la'ang skra shad blor 'gyur na/ de lta ma yin de phyir de yod min/ /gang phyir mthong ba dag la blo nus ni/ /smin med de phyir de la blo mi 'byung/ /shes bya yod dngos bral bas min zhe na/ /nus de med pas 'di ni 'grub ma yin/ /skyes la nus pa srid pa yod ma yin/ /ma skyes ngo bo la yang nus yod min khyad par med par khyad par can yod min/ /mo gsham bu la'ang de ni yod par thal/ /gal te 'byung bar 'gyur bas bsnyad 'dod na/ /nus pa med par 'di yi 'byung 'gyur med/ /phan tshun don la brten pa'i grub pa ni/ /grub nyid min zhes dam pa rnams kyis gsungs/ /gal te 'gag pa'i dus min las gyur na/ /gzhan gyis nus pa las gzhan 'byung bar 'gyur/ /rgyun can rnams der phan tshun tha dad yod/ /de phyir kun las thams cad 'byung bar 'gyur/ gal te 'dir ni rgyun can tha dad kyi/ /de dag la rgyun tha dad med de'i phyir/ /nyes med ce na 'di ni bsgrub bya zhig /tha mi dad pa'i rgyun skabs med phyir ro/ /byams pa nyer sbas la brten chos rnams ni/ /gzhan nyid phyir na rgyud gcig rtogs min te/ gang dag rang mtshan nyid kyis so so ba/ /de dag rgyud gcig rtogs par rigs ma yin/ mig blo skye ba'i rang nus gang zhig las/ /de ma thag tu de ni skye 'gyur zhing/ /rang gi rnam shes brten gyi nus de la/ /dbang po gzugs can mig ces bya bar rtogs/ /'di na dbang po las byung rnam par rigs/ /phye bzung med bar rang gi sa bon las/ /sngon sogs snang nyid 'byung bar ma rtogs nas/ /skye bos phyi rol bzung bar sems khas len/ /rmi lam ni ni gzugs don gzhan med par/ /rang nus smin las de yi rnam can sems/ /'byung ba ji lta ba de bzhin sad la'ang 'dir/ /phyi rol med par yid ni yod ce na/ /ji ltar mig med par ni rmi lam du/ /sngon sogs snang ba'i yid sems 'byung de ltar/ mig dbang med par rang gi sa bon ni/ /smin las long ba la 'dir ci mi skye/ /gal te khyod ltar rmi lam drug pa yi/ /nus pa smin yod sad par med 'gyur na/ /drug pa'i nus smin ji ltar 'dir med ba/ /de ltar rmi tshe med ces cis mi rigs ji ltar mig med 'di yi rgyu min ltar/ /rmi lam du yang gnyid ni sgyu ma yin/ /de phyir rmi lam du yang de dngos mig /rdzun pa'i yul can rtogs pa'i rgyur khas blangs/ 'di yi lan ni gang dang gang btab pa/ /de dang de ni dam bca' mtshungs mthong ba/ rtsod 'di sel byed sangs rgyas rnams kyis ni/ /'gar yang dngos po yod ces ma bstan to/ /rnal 'byor ba yis bla ma'i man ngag las/ /keng rus kyis gang sa gzhi mthong ba gang/ /der yang gsum char skye ba med par mthong// log pa yid la byed par bstan phyir ro/ /khyod kyi dbang blo'i yul rnams ji ltar bar/ de ltar mi sdug yid kyis yang 'gyur na/ /de bzhin yul der blo gtad cig shos kyis/ /rtogs 'gyur de ni rdzun par yang mi 'gyur/ /rab rib dang ldan dbang po can mtshungs ba/ /chu 'bab klung la yi dwags nag blo yang/ /mdor na ji ltar shes bya med de bzhin/ /blo yang med ces don 'di shes par gyis/ /gal te bzung med 'dzin pa dang bral zhing/ /gnyis kyis stong pa'i gzhan dbang dngos yod na/ /'di yi yod nyid gang gis shes par gyis/ /ma bzung bar yang yod ces byar mi rung/ /de nyid kyis de myong bar grub ma yin/ /gal te phyi dus dran las 'grub ce na/ /ma grub bsgrub par bya phyir brjod pa yi/ /ma grub 'di ni sgrub par byed pa min/ /rang rig pa ni grub la rag mod kyi/ /de lta'ang dran pa'i bran pa rigs min te/ /gzhan phyir ma shes rgyud la skyes pa bzhin/ gtan tshigs 'dis ni khyad par dag kyang 'joms/ /gang phyir gang gi yul myong gyur de las/ /bdag las dran pa gzhan yod ma yin pa/ /de phyir bdag gis mthong snyam dran 'gyur te/ /'di yang 'jig rten tha snyad tshul lugs yin/ /de phyir rang rig yod pa ma yin na/ /khyod kyi gzhan dbang gang gis 'dzin par 'gyur/ /byed po las dang bya ba gcig min pas/ /de nyid kyis de 'dzin par rigs ma yin/ /gal te skye ba med cing ma shes pa'i/ /bdag cag gzhan dbang ngo bo dngos yod na/ /gang gis na 'di yod par mi 'dod pa/ /khyod la mo sham bus gnod ci zhig bskyal/ /gang tshe gzhan dbang cung zad yod min na/ /kun rdzob bden pa'i rgyur ni gang zhig 'gyur/ /gzhan gyi ltar na rdzas la chags pa yis/ /'jig rten grags pa'i rnam gzhag kun kyang brlag/ slob dpon klu sgrub zhabs kyi lam las ni/ /phyi rol gyur la zhi ba'i thabs med do/ /de dag kun rdzob de nyid bden las nyams/ /de las nyams pas thar pa grub yod min/ /tha snyad bden pa thabs su gyur ba dang/ don dam bden pa thabs byung gyur pa ste/ /de gnyis rnam dbye gang gis mi shes pa/ /de ni rnam rtog log pas lam ngan zhugs/ /ji ltar khyod kyis gzhan dbang dngos 'dod ltar/ kun rdzob kyang ni bdag gis khas ma blangs/ /'bras phyir 'di dag med kyang yod do zhes/ /'jig rten ngor byas bdag ni smra par byed/ /ji ltar phung po spangs nas zhir zhugs pas/ /dgra bcom rnams la yod pa min de ltar/ /'jig rten la yang med na de bzhin 'di/ /'jig rten las kyang yod ces bdag mi smra/ /gal te khyod la 'jig rten mi gnod na/ /'jig rten nyid bltos 'di ni dgag par gyis/ /khyod dang 'jig rten 'dir rtsod gyis shig dang/ /phyi nas stobs ldan bdag gis bsten par bya/ /mngon gyur mngon phyogs byang chub sems dpa' yis/ /srid gsum rnam shes tsam du gang rtogs pa/ /rtag bdag byed po bkag pa rtogs phyir des/ /byed pa po ni sems tsam yin par rtogs/ /de phyir blo ldan blo ni 'phel ba'i phyir/ /lang kar gshegs mor? de las kun mkhyen gyis/ mu stegs ri bo spo mthon 'joms byed dag /rdo rje 'di ni dgongs pa bcad phyir gsungs/ /ji ltar rang gi bstan bcos de de las/ /mu stegs rnams kyi gang zag sogs de dag /smras pa de dag byed por med gzigs nas/ /rgyal pos sems tsam 'jig rten byed por gsungs/ /ji ltar de nyid rtogs la sangs rgyas bsnyad/ /de bzhin sems tsam gtsor gyur 'jig rten la/ /mdo las sems tsam zhes gsungs gzugs ni 'dir/ /'gog pa de ltar mdo yi don ma yin/ /gal te 'di dag sems tsam zhes mkhyen nas/ /de las gzugs nyid dgag pa mdzad na ni/ /slar yang de las bdag nyid chen pos sems/ /ma rig las las skyes par ci phyir gsungs/ /sems nyid kyis ni sems can 'jig rten dang/ /snod kyi 'jig rten shin tu sna tshogs 'god/ /'gro ba ma lus las la skye bar gsungs/ /sems spangs nas ni las kyang yod ma yin/ /'di ltar gzugs yod med kyi de la ni/ /sems bzhin byed pa po nyid yod ma yin/ /des na sems las gzhan pa'i byed pa po/ /bzlog gi gzugs ni bkag pa ma yin no/ /'jig rten pa yi de nyid la gnas la/ /phung po 'jig rten grags de lnga char yod/ /de nyid ye shes 'char bar 'dod pa na/ /rnal 'byor pa la de lnga 'byung mi 'gyur/ /gzugs med na ni sems yod ma 'dzin cig /sems yod nyid na'ang gzugs med ma 'dzin cig /de dag shes rab tshul mdor sangs rgyas kyis/ /mtshungs par spangs shing mngon pa'i chos las gsungs so/ /bden gnyis rim pa 'di dag bshig nas kyang/ /khyod kyi rdzas ni bkag par 'grub mi 'gyur/ de phyir de lta'i rim pas dngos gdod nas/ /de nyid ma skyes 'jig rten skyes rig bya/ /mdo sde gang las phyi rol don yod min/ /sems nyid sna tshogs snang ngo zhes gsungs pa/ /gzugs la lhag par chags gang de dag la/ /gzugs bzlog pa ste de yang drang don nyid/ /'di ni ston pas drang don nyid gsungs shing/ /'di ni drang don nyid du rigs pas 'thad/ /rnam pa de lta'i mdo sde gzhan yang ni/ /drang don nyid du lung 'dis gsal bar byed/ /shes bya med na shes pa gsal ba ni/ /bde blag rnyed ces sangs rgyas rnams kyis gsungs/ /shes bya med na shes pa bkag 'grub pas/ /dang por shes bya dgag par mdzad pa yin/ /de ltar lung gi lo rgyus shes bya ste/ /mdo gang de nyid ma yin bshad don can/ /rang don gsungs pa'ang rtogs nas drang bya zhing/ /stong nyid don can nges don yang shes kyis/ /gnyis las skye ba'ang rigs pa ma yin gang gi phyir/ bshad zin nyes pa thog tu 'bab pa nyid phyir ro/ 'di ni 'jig rten dang ni de nyid duAng 'tha min te/ /gang phyir re re las skyes grub pa med phyir ro/ /gal te rgyu med kho nar skye bar 'gyur na ni/ /de tshe kun las thams cad rtag tu skye 'gyur zhing/ /'jig rten pa dag 'bras bu 'grub phyir sa bon sogs/ /brgya phrag sgo nas sdud byed par yang mi 'gyur ro/ /gal te 'gro ba rgyu yis stong na nam mkha' yi/ /autAl dri mdog ji bzhin bzung du med 'gyur na/ /shin tu bkra ba'i 'jig rten 'dzin pa'ang yin de'i phyir/ /rang gi blo bzhin 'jig rten rgyu las byung shes kyis/ /'byung ba de dag bdag nyid gang zhig khyod kyir pra'i/ /yul du 'gyur ba de yi bdag can ma yin na/ /gang la yid kyi mun 'thug 'di nyid du yod pa/ /des ni ji ltar 'jig rten pha rol rtogs par 'gyur/ 'jig rten pha rol 'gog pa'i dus su bdag nyid ni/ /shes bye'i rang bzhin log par lta ba rtag bya ste/ /de yi lta ba'i rnam pa'i brten mtshungs lus ldan phyir/ /gang tshe 'byung ba'i yid nyid khas len de che bzhin/ /'byung ba de dag ji ltar med pa bshad zin te/ gang gi phyir na gong du rang gzhan gnyis ka dang/ /rgyu med skye ba thun mong du ni bkag zin phyir/ /ma bshad 'byung ba lta zhig yod pa ma yin no/ /gang gi phyir na bdag gzhan gnyis ka las skyes dang/ /rgyu la ma bltos med pas dngos rnams rang bzhin bral/ /gti mug stug po sprin tshogs lta bus 'jig rten dag /bsgribs pa des na yul rnams log pa snang bar 'gyur//rab rib mthu yis 'ga' zhig skra shad zla gnyis dang/ /rma bya'i mdongs dang sbrang ma la sogs 'dzin byed pa/ /de bzhin du ni gti mug dbang gis mi mkhas pas/ /blo yis 'dus byas sna tshogs dag ni rtogs par 'gyur/ /las ni gti mug brten 'byung gti mug med bar de/ mi 'byung zhes byar mi mkhas kho nas rtogs nyid la/ /blo bzang nyi ma mun pa stug po rnam par bsal ba yi/ /mkhas pa dag ni stong nyid rtogs nas grol bar 'gyur/ /gal te dngos rnams de nyid du med na/ /tha snyad du yang mo gsham bu ji bzhin/ /de dag med pa nyid du 'gyur de'i phyir/ /de dag rang bzhin gyis ni yod ce na/ gang dag rab rib can sogs yul gyur pa/ /skra shad la sogs de dag ma skyes pas/ /re zhig de dag nyid la brtsad byas te/ phyi nas ma rig rab rib rjes 'brel la'o/ /gal te rmi lam dri za'i grong khyer bcas/ /smig rgyu'i chu dang mig 'khrul gzugs brnyan sogs/ /skye med mthong na yod med min mtshungs kyang/ /khyod la ji ltar der 'gyur de mi rigs/ /de nyid du 'di ji ltar skye med kyang/ /mo gsham bu ltar gang phyir 'jig rten gyi/ /mthong ba'i yul du mi 'gyur ma yin la/ /de yi phyir na smras 'di ma nges pa'o/ /mo gsham bu la rang bzhin skye ba ni/ /de nyid du med 'jig rten du yang med/ /de bzhin dngos kun rang bzhin gyis skye ba/ /de nyid du med 'jig rten du yang med/ /de phyir 'di ltar ston pas chos rnams kun/ /gdod nas zhi zhing skye bral rang bzhin gyis/ /yongs su mya ngan 'das par gsungs gyur pa/ de phyir rtag tu skye ba yong ma yin/ /ji ltar bum sogs 'di dag de nyid du/ /med cing 'jig rten rab tu grags par yod/ /de bzhin dngos po thams cad 'gyur bas na/ /mo gsham bu dang mtshungs par thal mi 'gyur/ /gang phyir rgyu med pa dang dbang phyug gi / rgyu la sogs dang bdag gzhan gnyis ka las/ dngos rnams skye bar 'gyur ba ma yin pa/ /de phyir brten nas rab tu skye bar 'gyur/ /gang phyir dngos po brten nas rab 'byung bas/ /rtog pa 'di dag brtag par mi nus pa/ /de phyir brten 'byung rigs pa 'di yis ni/ /lta ngan dra ba mdza' dag gcod par byed/ /rtogs rnams dngos po yod na 'gyur ba ste/ dngos po ji ltar med par yod spyad zin/ /dngos po med par 'di rnams mi 'byung dper/ /bud shing med par me yod min de bzhin/ /so so'i skye bo rnams ni rtogs pas bcings/ /mi rtog rnal 'byor pa ni grol 'gyur bas/ /rtogs rnams log par 'gyur ba gang yin te/ rnam par dpyod pa'i 'bras bur mkhas rnams gsungs/ /bstan bcos la dpyad rtsod la chags pa'i phyir/ ma mdzad rnam grol phyir ni de nyid bstan/ /gal te de nyid rnam par bshad pa na/ /gzhan gzhung 'jig par 'gyur na nyes pa med/ /rang gi lta la chags dang de bzhin du/ /gzhan gyi lta la 'khrug gang rtog pa nyid/ /de phyir 'dod chags khong khro rnams bsal te/ rnam par dpyod na myu du grol bar 'gyur/ /nyon mngs skyon rnams ma lus 'jig tshogs la/ /lta las byung par blo yis mthong gyur zhing/ /bdag ni 'di yi yul du rtogs byas nas/ /rnal 'byor pa yis bdag ni 'gog par byed/ /za po rtag dngos byed po min pa'i bdag/ yon tan bya med mu stegs rnams kyis rtags/ /de dbye cung zad cung zad la brten nas/ /mu stegs can rnams lugs ni tha dad 'gyur/ /mo gsham bu ltar skye ba dang bral phyir/ /de ltar gyur pa'i bdag ni yod min zhing/ 'di ni ngar 'dzin rten duAng mi rigs la/ 'di ni kun rdzob tu yang yod mi 'dod/ /gang phyir bstan bcos bstan bcos las de'i khyad/ /mu stegs rnams kyis gang bstan de kun la/ /rang grags ma skyes gtan tshigs kyis gnod pa/ /de phyir de khyad kun kyang yod ma yin/ /de phyir phung po las gzhan bdag med de/ /phung po ma gtogs de 'dzin ma grub phyir// 'jig rten ngar 'dzin blo yi brten du yang/ /mi 'dod de mi shes pa'ang bdag lta'i phyir/ /gang dag dud 'gror bskal mang bskyal gyur pa/ /des kyang ma skyes rtag 'di ma mthong la/ /ngar 'dzin de dag la yang 'jug mthong ste/ des na phung po las gzhan bdag bka' med/ /phung po las gzhan bdag grub med pa'i phyir/ bdag lta'i dmigs pa phung po kho na'o/ /kha cig bdag lta'i brten du phung po ni/ /lnga char yang 'dod kha cig sems shig'dod/ /gal te phung po bdag na gang phyir de/ mangs pas bdag de dag kyang mang por 'gyur/ /bdag ni rdzas su 'gyur zhing der lta ba/ /rdzas la 'jug pas phyin ci log mi 'gyur/ /mya ngan 'das tshe nges par bdag chad 'gyur/ /mya ngan 'das sngon skad cig dag la ni/ /skye 'jig byed po med pas de 'bras med/ /gzhan gyis bsags la gzhan gyis za bar 'gyur/ /rgyud gcig yin pas skyon de med ce na/ /rgyud gcig nyid la nyes pa bshad zin to/ /de phyir phung po dang sems bdag mi rigs/ /'jig rten mdza' dang ldan sogs med phyir/ /khyod kyi rnal 'byor bdag med mthong ba la/ /de tshe nges par dngos rnams med par 'gyur/ /rtag bdag spong na de tshe de yi phyir/ /khyod kyi sems sam phung po bdag mi 'gyur/ /khyod kyis rnal 'byor bdag med mthong ba yis/ /gzugs sogs de nyid rtogs par mi 'gyur zhing/ /gzugs la dmigs nas 'jug phyir 'dod tshogs sogs/ /skye 'gyur de yi ngo bo rtogs med phyir/ /gang phyir ston pas phung po bdag go zhes/ /gsungs pa de phyir phung po bdag 'dod na/ /de ni phung las gzhan bdag 'gog pa ste/ /gzugs bdag min sogs mdo gzhan gsungs phyir ro/ /gang phyir gzugs tshor bdag min 'du shes kyang/ /ma yin 'du byed rnams min rnam shes kyang/ /min par mdo gzhan las gsungs de yi phyir/ /mdor bstan phung po bdag ces bzhed ma yin/ /phung po bdag ces brjod tshe phung rnams kyi/ /tshogs pa yin gyi phung po'i ngo bo min/ /mgon min 'dul ba 'am dbang po nyid kyang min/ /de med phyir de tshogs pa ma yin no/ /de tshe de yi yan lag tshogs gnas rnams/ /shing rta nyid 'gyur shing rta dang bdag mtshungs/ /mdo las phung po brten nas yin gsungs pa/ de phyir phung po 'dus tsam bdag ma yin/ /dbyibs so zhe na gzugs can la yod pas/ /de dag nyid la bdag ces khyod 'dod kyi/ /sems la sogs pa 'dus pa'i ngo bo ni/ /bdag min 'gyur te de la dbyibs med phyir/ /nye bar len po blangs bya dngos gcig tu/ /mi rigs las dang byed po gcig 'gyur phyir/ /byed po med la las ni yod ce na/ /ma yin byed pa med las min phyir ro/ /gang phyir thub pas bdag nges sa chu ma rlung dang rnam shes nam mkha' zhes bya ba/ /khams drug dang ni mig sogs reg pa yi/ /rten drug dag la brten nas nyer bstan zhing/ /sems dang sems byung chos rnams nyer bzung nas/ /nges gsungs de phyir de ni de ni de rnams dang/ /de nyid ma yin tshogs tsam nyid min te/ /de phyir de dag rnams la dar mi rigs/ /bdag med rtogs tshe rtag pa'i bdag spong zhing/ 'di ni dar 'dzin rten duAng mi 'dod pa/ /de phyir bdag med shes pas bdag lta ba/ /cis kyang 'byin zhes smra ba shin tu mtshan rang khyim rtsig phug sbrul gnas mthong bzhin du/ /'di na glang chen med ces dogs bsal te/ /sbrul gyi 'jigs pa'ang spong bar byed pa ni/ kye ma gzhan gyi gnam par gyur nyid do/ /phung por bdag yod ma yin bdag la yang/ /phung po de rnams yod min gang gi phyir/ /gzhan nyid yod na rtog pa 'dir 'gyur na/ /gzhan nyid de med de phyir 'di rtog pa'o/ /bdag ni gzugs dang ldan min med pa'i phyir/ /de phyir dan don sbyor ba med pa can/ /gzugs can tha dad tha dang min brjod la/ /bdag ni gzugs las de nyid gzhan med phyir/ /gzugs bdag ma yin bdag ni gzugs ldan min/ /gzugs la bdag med bdag la'ang gzugs yod min/ /de ltar rnam bzhir phung kun shes bya ste/ /de dag bdag tu lta ba nyi shur 'dod/ /bdag med rtogs pa'i ye shes rdo rje yis/ /bcom pa'i bdag dang lhan cig 'jig 'gyur ba/ /'jig tshogs ltar? bstan pa la gnas pa'i/ /rtse mo mtho bar gyur pa 'di dag go/ /kha cig gang zag rdzas yod de nyid gzhan rtag dang mi rtag brjod du med 'dod de/ /rnam shes drug gi shes byar de 'dod cing/ /de ni bdag tu 'dzin pa'i gzhir yang 'dod/ /gang phyir dngos yod brjod med ma yin pas/ /gzugs las sems brjod med par mi rtogs pa/ /de bzhin bdag 'ga' dngos por grub gyur na/ /sems ltar brjod du med pa nyid mi 'gyur/ /ji ltar bum pa'i dngos po gzugs sogs las/ /brjod du med pa'i rang bzhin med 'gyur bzhin/ /bdag gang phung po las brjod med 'gyur te/ ngo bo nyid kyis yod par rtogs mi 'gyur/ /rnam shes dngos yod rang las gzhan min dang/ gzugs sogs rnams las gzhan du gyur 'dod cing/ /dngos la rnam pa de gnyis mthong gyur pa/ /bdag ni med de dngos chos dang bral phyir/ /de phyir ngar 'dzin brten ni dngos po min/ /phung las gzhan min phung po'i ngo bo min/ /phung po'i rten min 'di ni de ldan min/ /'di ni phung rnams brten nas 'grub par 'gyur/ /shing rta rang gi yan lag las gzhan min/ /gzhan min ma yin de ldan yang min zhing/ /yan lag la yin yan lag dag der min/ /'dus pa tsam min dbyibs min sngar bzhin no/ /gal te tshogs tsam shing ltar 'gyur na ni/ /sil bur gnas la shing rta nyid yod 'gyur// gang phyir yan lag can med yan lag dag / med pas tshogs tsam shing rtar rigs pa'ang min/ /gal te yan lag gi dbyibs sngar yod pa/ ji bzhin shing rtar gtogs la'ang de bzhin na/ /de dag dbye bar gyur la ji lta bar/ /da lta yang ni shing rta yod na ni 'gyur/ /gal te shing rta'i dus na yan lag la/ /sngar las dbyibs kyi khyad par gzhan yod na/ /gzung yod 'gyur na yod min de yi phyir/ /yan lag gi dbyibs shing rta nyid ma yin/ /gang phyir khyod kyi tshogs pa can med pa/ /dbyibs de yan lag tshogs kyi ma yin na/ /gang zhig ci yang ma yin de brten nas/ /'dir ni dbyibs su lta zhig ji ltar 'gyur/ /khyod kyis 'di ni ji ltar 'dod de ltar/ /mi bden pa yi rgyu la brten byas nas/ /'bras bu'i rnam pa mi bden rang bzhin can/ /thams cad kyang ni skye bar shes par gyis/ /'dis ni gzugs sogs de ltar gnas rnams la/ /bum blo zhes bya 'ang rigs ba'ang ma yin nyid/ /skye ba med pas gzugs sogs kyang yod min/ /de yi phyir yang de dag dbyibs mi rigs/ /de ni dam pa'i don dang kun rdzob tu/ /rnam pa bdun gyis grub 'gyur min mod kyi/ /nam dbyad med par 'jig rten nyid las 'di/ /rang gi yan lag brten nas 'dogs pa yin/ /shing rta nyid ni yan lag can nyid dang/ /cha shas can dang byed pa po nyid dang/ /len pa nyid duAng 'jig rten la grub pas/ /'jig rten grags pa'i kun rdzob dgag mi bya/ rnam bdun gyis med gang de ji lta bur/ /yod ces rnal 'byor pas 'di yod mi rnyed/ /des de nyid la'ang bde blag 'jug 'gyur bas/ 'dir de'i grub pa'ang de bzhin 'dod par byed/ /shing rta med na de tshe yan lag can/ /med pas de yi yan lag kyang yod min/ /blo mes yan lag can bsregs yan lag ni/ /shing rta chig pa'i yan lag bzhin du med/ /de bzhin 'jig rten grags pas phung po dang/ /khams dad de bzhin skye mched drug brten nas/ /bdag kyang nye bar len po nyid du 'dod/ /nyer len las yin 'di ni byed po'ang yin/ /dngos yod min phyir 'di ni brtan min zhing/ /mi brtan nyid min 'di ni skye 'jig min/ /'di la rtag pa nyid la sogs pa yang/ /yod min de nyid dang ni gzhan nyid min/ /gang la rtag tu 'gro rnams dang 'dzin blo/ /rab tu 'byung zhing de yi gang yin der/ /da yir 'dzin blo 'byung ba bdag de ni/ /ma rtags grags par gti mug las yin no/ /gang phyir byed po med can las med pa/ /de phyir bdag nyid med par bdag gir med/ /de phyir bdag dang bdag gi stong lta bas/ /rnal 'byor ba de rnam par grol bar 'gyur/ /bum snam re lde dmag dang phreng ba nags tshal dang/ /shing rta bran dang khang khyim la sogs dngos po rnams/ /gang gi sgo nas 'gro 'dis bsnyad bzhin rtogs bya ste/ /thub dbang de ni 'jig rten rtsod pa mi mdzad phyir/ /yon tan yan lag 'dod chags mtshan nyid shing sogs dang/ yon tan can lus chags dang mtshan gzhi la sogs dag /shing rta'i dpyad pas rnam pa bdun du yod min zhing/ de las gzhan du 'jig rten grags par yod pa yin/ /gal te rgyu yis bskyed bya bskyed pas na de rgyu yin la/ /gal te 'bras mi bskyed na de rgyu nyid du mi 'gyur zhing/ /'bras bu yang ni rgyu yod gyur na skye bar 'gyur ba'i phyir/ /gang las gang zhig 'gyur ba gang zhig las sngar gang 'gyur smros/ /gal te khyod kyi rgyu yis phrad nas rgyu yin la/ /gal te 'bras mi bskyed na de rgyu nyid du mi 'gyur zhing/ /'bras bu yang ni rgyu yod gyur na skye bar 'gyur ba'i phyir/ /gang las gang zhig 'gyur ba gang zhig las sngar gang 'gyur smros/ /gal te khyod kyi rgyu yis phrad nas 'bras bu skye dbyed na/ /nus pa gcig pas rgyu dang 'bras bu tha dad med 'gyur zhing/ /ma phrad na ni rgyu dang rgyu min khyad par med 'gyur la/ /gnyis po spangs nas rtog pa gzhan yang yod par 'gyur ma yin/ /ci ste rgyu yis 'bras mi bskyed na 'bras med pas/ /'bras bral rgyu ni rgyu med can 'gyur 'dod pa'ang min/ /gang phyir 'di gnyis sgyu ma dang 'dra de yi phyir/ /bdag la skyon med 'jig rten dngos po rnams kyang yod/ /sun 'byin 'dis ni sun dbyung phrad nas sun 'byin nam/ /ma phrad 'byin zhes skyon 'di khyod la'ang 'gyur min nam/ /gnyis po spangs nas rtog pa gzhan yang yod ma yin/ /de skad smro zhing rang phyogs kho na rnam 'joms pa/ /de tshe khyod kyis sun dbyung sun 'byin nus ma yin// rang gi tshig la'ang thal ba mtshungs pa'i ltag chod kyis/ /rigs pa med par dngos po kun la skur 'debs phyir/ /khyod ni skye bo dam pas bzhed par mi 'gyur zhing/ rang phyogs med pas sun mi phyin du rgol ba'ang yin/ /sun 'byin pa yis sun dbyung phrad dang ma phrad par/ /sun 'byin byed ces smras pa'i nyes pa 'di gang la/ /nges par phyogs yod de la 'gyur gyi bdag la phyogs/ /yod pa min pas thal bar 'gyur ba srid ma yin/ /ji ltar nyi ma'i dkyil 'khor la yod khyad par rnams gzugs brnyan la yang mthong 'gyur de tshe nyi ma dang/ /phrad dang ma phrad 'thad pa med par gzugs brnyan ni/ /tha snyad tsam du rten cing 'brel bar 'byung ba yin/ /der ni med kyang rang gi byad bzhin mdzes pa dag/ sgrub bar byed ba 'di bzhin 'dir yang shes rab gdong/ /sbyang bar bya la nus par mthong ba'i gtan tshigs ni/ /mi bden pas kyang bsgrub bya rtogs par shes par bya/ /gal te rang gi go byed gtan tshigs dngos nyid dang/ dngos su go bya bsgrub bya'i ngo bo'ang yod 'gyur na/ /phrad ba la sogs rigs pa nye bar sbyor bar 'gyur zhig na/ /de ni med pas khyod kyi yi chad 'ba' zhig yin/ /dngos rnams rang bzhin med par rtogs su gzhug par ni/ /bla ba de ltar rang bzhin yod par gzhan dag la/ /bde blag nyid du sgrub par nus pa ma yin na/ /ci phyir rtogs ge ngan pas 'jig rten 'dir bcol byed/ /sun 'byin lhag ma gong du bstan pa'ang shes byas nas/ /phrad pa'i rtag pa la sogs lan du 'di brjod bya/ /sun ci phyin du rgol ba'ang ji ltar yod min zhes/ /sngar bshad lhag ma phyogs 'di nyid kyis rtogs par bya/ /bdag med 'di ni 'gro ba rnam dgrol phyir/ /chos dang gang zag dbye bas rnam gnyis gsungs/ /de ltar ston pas slar yang 'di nyid ni/ /gdul bya rnams la phye ste rnam med gsungs/ /spros dang bcas par stong pa nyid/ /bcu drug bshad nas mdor bsdus te/ /slar yang bzhir bshad de dag ni/ /theg chen du yang bzhed pa yin/ /gang phyir de yi rang bzhin ni/ /yin phyir mig ni mig gis stong/ /de bzhin rna ba sna dang lce/ /lus dang yid kyang bsnyad par bya/ /thar thug gnas pa ma yin dang/ /'jig pa ma yin nyid kyi phyir/ mig la sogs pa drug po yi/ /rang bzhin med nyid gang yin pa/ /de ni nang stong nyid du 'dod/ /gang phyir de yi rang bzhin de/ /yin phyir gzugs ni gzugs kyis stong/ /sgra dang dri ro reg bya dang/ /chos rnams nyid kyang de bzhin no/ /gzugs sogs rang bzhin med pa nyid/ /phyi rol stong pa nyid du 'dod/ /gnyis ka rang bzhin med pa ni/ phyi nang stong pa nyid yin no/ /chos rnams rang bzhin med pa nyid/ /mkhas pas stong pa nyid ces pa snyad/ /ngo bos stong par 'dod pa yin/ /stong nyid stong nyid du 'dod de/ stong nyid dngos po'i blo can gyis/ /'dzin pa bzlog phyir gsungs pa yin/ /sems can snod kyi 'jig rten ni/ /ma lus khyab byed nyid phyir dang/ /tshad med dpe yi mu mdza' ni/ /med phyir phyogs rnams chen po nyid// 'di dag bcu car phyogs rnams kyis/ /stong pa nyid de gang yin pa/ /chen po stong pa nyid yin te/ /chen por 'dzin pa bzlog phyir gsungs/ /'di ni dgos pa mchog yin pa/ /don dam mya ngan 'das pa yin/ /de ni de yis stong nyid gang/ /de ni don dam stong pa nyid/ /mya ngan 'das dngos blo can gyi 'dzin pa bzlog par bya ba'i phyir/ /don dam mkhyen pas don dam pa/ /stong pa nyid ni bstan pa mdzad/ /rkyen las byung phyir khams gsum po/ /'dus byas byin par nges par bsnyad/ /de nyid de yis stong nyid gang/ /de ni 'dus byas stong nyid bsnyad/ /gang la skye gnas 'jig med pa/ /de ni 'dus ma byas shes bya/ /de yi stong nyid gang yin pa/ /de ni 'dus ma byas stong nyid/ /gang la mdza' ni yod min pa/ /de ni mdza' las 'das par brjod/ /de yi stong nyid gang yin pa/ /de ni mdza' las 'das stong nyid/ /thog ma dang po tha ma mdza' / /de dag med phyir 'khor ba ni/ /thog ma tha ma med par brjod/ /'gro 'ong bral phyir rmi lam lta'i/ /srid 'di de yis dben nyid gang/ /de ni thog ma dang tha ma/ /med pa'i stong pa nyid do zhes bstan bcos las ni nges par bsnyad/ /dor ba zhes bya 'thor ba dang/ /khor ba la ni nges par brjod/ /dor med stong pa med pa ste/ /'ga' yang bor med gang yin pa'o/ /dor ba med pa de nyis kyis/ /de nyid stong pa gang yin pa/ /de yi phyir na dor med pa/ /stong pa nyid ces bya bar brjod/ /'dus byas la sogs ngo bo nyid/ /gang phyir slob ma rang sangs rgyas/ /rgyal sras de bzhin gshegs rnams kyis/ /ma mdzad de phyir 'dus byas la/ /sogs pa rnams kyis ngo bo nyid/ /rang bzhin nyid du bsnyad pa ste/ de nyid de yis stong nyid gang/ /de ni rang bzhin stong pa nyid/ /khams bco brgyad dang reg drug dang/ /de las byung pa'i tshor drug dang/ /gzugs can gzugs can min de bzhin/ /'dus byas 'dus ma byas chos rnams/ /chos de dag ni thams cad kyis/ /de dag gis dben nyid nyid gang/ /gzugs la sogs pa'i dngos med gang/ /de ni rang mtshan stong pa nyid/ /gzugs ni gzugs rung mtshan nyid can/ /tshor ba myong ba'i mtshan nyid can/ /'du shes mtshan mar 'dzin pa ste/ /'du byed mngon bar 'du byed pa'o/ /yul la so sor rnam rig pa pa/ /rnam shes rang gi mtshan nyid do/ /phung po sdug bsngal rang mtshan nyid/ /khams kyi bdag nyid sbrul gdug 'dod/ /skye mched rnams kyi sangs rgyas kyis/ /skye pa'i sgor gyur nyid du gsungs/ /rten cing 'brel par 'byung ba gang/ /de ni 'du 'phro mtshan nyid do/ /gtong ba sbyin pa'i pha rol phyin/ /tshul khrims gdung med mtshan nyid bzod/ /khro med mtshan nyid brtson 'grus kyi/ /kha na ma tho med nyid do/ /bsam gtan sdud pa'i mtshan nyid can/ /shes rab chags med mtshan nyid de/ /mya ngan 'das par 'gro phyir ro/ /'ga' la'ang chags pa med phyir ro/ /pha rol phyin pa drug rnams kyi/ /mtshan nyid 'di dag yin par brjod/ /bsam gtan rnams dang tshad med dang/ de bzhin gzhan gang gzugs med pa/ /de dag yang dag mkhyen pa yis/ /mi 'khrugs mtshan nyid can du gsungs/ /byang chub phyogs ni sum cu bdun/ /nges par 'byung byed rang mtshan nyid/ /stong pa nyid kyi mtshan nyid 'di/ /dmigs pa med pas rnam dben nyid/ /mtshan ma med pa'i zhi nyid te/ /gsum pa'i mtshan nyid sdug bsngal dang/ /gti mug med pa'o rnam thar gyi/ /mtshan nyid rnam par grol byed pa'o/ /stobs zhes bya ba shin tu ni/ /rnam par nges pa'i rang bzhin gsungs/ /skyob pa'i mi 'jigs ba rnams ni/ /shin tu brtan pa'i ngo bo yin/ /so so yang dag rig rnams ni/ /spobs sogs chad med mtshan nyid can/ /'gro la phan pa nyer sgrub pa/ /byams pa chen po zhes bya'o/ /sdug bsngal can rnams yongs skyob pa/ /thugs rje chen po'o dga' pa ni/ /rab dga' mtshan nyid btang snyoms ni/ /ma 'dres mtshan nyid yin zhes bya/ /sangs rgyas chos ni ma 'dres pa// bcu dang brgyad du gang 'dod dag / gang phyir ston des mi 'phrogs pa/ /de phyir mi phrogs rang mtshan nyid/ /rnam kun mkhyen nyid ye shes ni/ /mngon sum mtshan nyid can du 'dod/ /gzhan ni nyi che ba nyid kyis/ /mngon sum zhes byar mi 'dod do// gang zhig 'dus byas mtshan nyid dang/ /'dus ma byas pa'i mtshan nyid gang/ /de de kho nas stong pa nyid/ /de ni rang mtshan stong nyid brjod/ /da ltar ba 'di mi gnas shing/ /'das dang ma 'ongs yod ma yin/ /gang du de dag mi dmigs pa/ /de la mi dmigs pa zhes brjod mi dmigs pa de rang ngo bo/ /de yi dben pa nyid gang de/ /ther zug gnas dang 'jig min pas/ /mi dmigs zhes bya'i stong nyid do/ /rkyen las byung phyir dngos rnams las/ /'dus pa pa yi ngo bo med/ /'dus pa pa ni de nyid kyis/ /stong nyid dngos med de nyid do/ /dngos po'i sgras ni mdor bsdu na/ /phung po lnga rnams brjod pa yin/ /de rnams de yis stong nyid gang/ /de dngos stong pa nyid du bshad/ /mdor na dngos po med pa ni/ /'dus ma byas chos rnams la brjod/ /de nyid dngos med de stong nyid/ /dngos po med pa'ang stong nyid do/ /rang bzhin ngo bo med nyid ni/ /rang bzhin zhes bya'i stong nyid do/ /'di ltar rang bzhin ma byas pas/ /rang bzhin zhes ni bya bar bsnyad/ /sangs rgyas rnams ni 'byung ba 'am/ /ma byung rung ste dngos su na/ /dngos po kun gyi stong pa nyid/ /gzhan gyi dngos por rab tu bsgrags/ /yang dag mdza' dang de bzhin nyid/ /gang de gzhan dngos stong nyid do/ /shes rab pha rol phyin gzhung las/ /de dag de skad rab tu bsgrags/ /de phyir blo gros zer gyis snang ba gsal byas pa/ /rang gi lag na gnas pa'i skyu ru ra bzhin du/ /srid gsum 'di dag gdod nas skye med par/ /rtogs te tha snyad bden pa'i stobs kyis 'gog par 'gro/ /rtag tu 'gog par rtogs pa'i bsam ldan yin mod kyi// 'gro ba mgon med pa la snying rje'ang skyed par byed/ /bde gshegs gsung skye ba sangs rgyas 'bring bcas ma lus kun/ /gong du 'gro ba'i blo yis pham par byed pa'ang yin/ /kun rdzob don dam gshog yangs dkar po rgyas gyur pa/ /dad pa'i rgyal po de ni skye bo'i dad pa yis/ /mdun du brdar nas dge ba'i rlung gi shugs stobs kyis/ /rgyal pa'i yon tan rgya mtsho'i pha rol mchog tu 'gro /dbu ma la 'jug pa las mngon du gyur pa zhes bya ba byang chub sems dpa' i sems bskyed pa drug pa'o/ / //ring du song ba 'dir ni skad cig dang/ skad cig la ni 'gog par 'jug gyur zhing/ /thabs kyi pha rol phyin legs 'bar pa 'thob/ /dbu ma la 'jug pa las ring du song ba zhes bya ba byang chub sems dpa' i sems bskyed pa bdun pa'o/ / //yang yang sngar dge las lhag thob bya'i phyir/ /gang du phyir mi ldog pa nyid 'gyur ba/ /mi g.yo de la bdag nyid che de 'jug /de yi smon lam rnam par dag 'gyur zhing// rgyal ba rnams kyi 'gog las slong par mdzad/ /chags pa med pa'i blo ni skyon rnams dag dang lhan cig mi gnas phyir/ /sa brgyad pa la dri ma de dag rtsar bcas nye bar zhi 'gyur zhing/ /nyon mongs zad cing khams gsum bla mar gyur kyang sangs rgyas rnams kyi ni/ /'byor pa mkha' ltar mdza' bral ma lus thob par nus ma yin/ /'khor ba 'gags kyang dbang rnams bcu po thob par gyur zhing de dag gis/ /srid pa'i 'gro bar rang gi bdag nyid sna tshogs ston par byed par 'gyur/ /dbu ma la 'jug pa las mi g.yo ba zhes bya ba byang chub sems dpa' i sems bskyed pa brgyad pa'o// //dgu pa la ni de'i stobs lta zhig mdza' dag rdzogs par dag 'gyur zhing/ de bzhin yang dag rig chos rang gi yon tan yongs su dag pa'ang 'thob/ /dbu ma la 'jug pa las legs pa'i blo gros zhes bya ba byang chub sems dpa' i sems bskyed pa dgu pa'o// //bcu pa'i sa la de yis kun nas sangs rgyas rnams las dbang bskur bas/ /dam pa 'thob cing ye shes lhag par mchog tu byung bar gyur ba'ang yin/ /char sprin rnams las chu char 'bab pa ji ltar de bzhin 'gro rnams kyi/ /dge ba'i lo thog ched du rgyal sras las kyang lhun grub chos char 'bab/ /dbu ma la 'jug pa las chos kyi sprin zhes bya ba byang chub sems dpa' i sems bskyed pa bcu pa'o// //de tshe 'dis ni sangs rgyas brgya mthong zhing/ /de dag byin gyis brlabs kyang 'di yis thob/ de nyid tshe na bskal pa brgyar gnas shing/ /de snyed sngon dang phyi ma'i mthar yang 'jug /ting 'dzin brgya la 'jug cing ldang byed de/ 'jig rten khams brgya g.yo zhing snang bar nus/ /de bzhin sems can brgya phrag smin byed cing/ /brgya phrag zhing dag tu yang 'gro bar 'gyur/ /der ni rang gi lus brgya ston byed cing/ /mdzes pa'i lus re la yang rang gi 'khor/ /rgyal ba'i sras po brgya phrag ldan par ston/ /blo ldan rab dga' la gnas yon tan 'di dag ste/ /de bzhin dri med thob par gyur pa'i yon tan yang/ /de dag stong ni thob par 'gyur te sa lnga po/ /'di dag la gnas rim pa bzhin du 'bum phrag thob/ /bye ba brgya 'thob bye ba stong phrag thob par 'gyur/ /bye ba brgya phrag stong 'gyur thob cing bye ba phrag / khrag khrig phrag brgyar gyur pa de nyid stong phrag tu/ /yongs su bsgyur ba de ni mdza' dag rab tu 'thob par 'gyur/ /mi g.yo'i sar gnas rnam rtog med pa des/ /stong gsum brgya phrag stong bsdoms 'jig rten na/ rdul tshad ji snyed yod pa de rnams dang/ /grangs mnyam yon tan dag ni 'thob par 'gyur/ /legs pa'i blo gros sa la gnas pa yi/ /byang chub sems dpas sngar bstan yon tan dag /grangs med brgya phrag stong du yang dag par/ /bsdoms pa phrag bcu'i rdul tshad thob par 'gyur/ /re zhig bcu pa 'dir de'i yon tan dag /ngag gi spyod yul las ches 'das gyur zhing/ /ngag gi spyod yul ma yin bsdoms rnams na/ rdul dag ji snyed yod pa de snyed 'thob/ /grangs med brgya phrag stong du yang dag par/ /ba spu'i khung bur byang chub sems rnams dang/ /lhan cig rdzogs sangs rgyas sku grangs med dang/ /de bzhin lha dang lha min mi dag kyang/ /skad cig skad cig la ni ston par nus/ /ji ltar dri med mkha' la zla snang gsal ba ltar/ /sngon tshe stobs bcu bskyed pa'i sa la khyod kyis slar yang 'bad gyur cing/ /'og min du ni gang gi don du 'bad gyur go 'phang mchog zhi ba/ /yon tan kun gyi mthar thug mtshungs pa med de khyod kyis brnyes/ /ji ltar snod kyi dbye bas mkha' la dbye ba med de ltar/ /dngos byas dbye ba 'ga' yang de nyid la med de yi phyir/ /ro gcig nyid du yang dag thugs su chud par mdzad gyur nas// mkhyen bzang khyod kyis skad cig gis ni shes bya thugs su chud/ /gang tshe zhi ba de nyid yin na de la blo gros 'jug mi 'gyur/ /blo ma zhugs par shes bya'i yul can nges par rigs pa'ang ma yin la/ /kun nas shes med pa ni shes par ji ltar 'gyur te 'gal bar 'gyur/ /mkhyen po med par khyod kyi gzhan la 'di lta'o zhes su zhig ston/ /gang tshe skye med de nyid yin zhing blo yang skye ba dang bral ba/ /de tshe de yis de rnams brten las de nyid rtogs par brjod bya ste/ /ji ltar sems ni gang gi rnam pa can du gyur ba de yis yul/ /de yongs shes pa de bzhin tha snyad nye bar bsten nas rigs pa yin/ /de yi longs spyod rdzogs sku bsod nams kyi/ /zin dang sprul pa la gzhan las de'i mthus/ /sgra gang chos kyi de nyid ston 'byung ba/ /de las 'jig rten gyis kyang de nyid rig /'di ltar rdza mkhan stobs dang ldan pa yis/ /yun rings 'bad pa ches bskor 'khor lo de/ de'i rtsol da ltar skyes pa med bzhin duAng/ /'khor zhing bum pa la sogs rgyur mthong ltar/ /de bzhin da lta skyed stsol med bzhin du/ /chos kyi bdag can sku nyid la bzhugs de'i/ /'jug pa gdul bya'i dge dang smon lam gyi/ /khyad par gyis 'phangs las ches bsam mi khyab/ /shes bya'i bud shing skam po ma lus pa/ /bsregs pas zhi de rgyal rnams chos sku ste/ /de tshe skye ba med cing 'gag pa'ang med/ /sems 'gags pa de sku yis mngon sum mdzad/ /zhi sku dpag bsam shing ltar gsal gyur zhing/ /yid bzhin nor bu ji bzhin rnam mi rtogs/ /'gro grol bar du 'jig rten 'byor slad rtag /'di ni spros dang bral la snang bar 'gyur/ /thub dbang dus gcig kho nar de'i rgyu mthun/ /gzugs sku gcig la rang gi skye gnas skabs/ /sngar 'gag gsal dang ma 'chol byung tshul ni/ /ma lus kyis bkra mdza' dag ston par mdzad/ /sangs rgyas zhing ni ci 'drar sangs rgyas dang/ /de dag sku spyod mthu stobs ci 'dra dang/ /nyan thos dge 'dun ji snyed ci 'dra dang/ /byang chub sems rnams der gzugs ji 'dra dang/ /ci 'dra'i chos dang der bdag ci 'dra ba/ /chos thos spyod pa gang la spyad pa dang/ /sbyin gang ji tsam de dag la phul ba/ /de dag ma lus sku gcig la ston mdzad/ /de bzhin tshul khrims bzod brtson ting 'dzin dang/ shes rab spyod tshe sngar gyi gnas skabs gang/ /ma tshang med dang nyid kyi spyod pa kun/ /sku yi ba spu khung bur gsal bar ston/ /sangs rgyas gang dag 'das dang 'byung 'gyur dang/ /gang dag de ltar 'jig rten khams kun na/ /tshig gsang mthon pos chos ston sdug bsngal gyis/ /gzir ba'i 'gro dbugs 'byin mdzad bzhugs pa dang/ /dang po thugs bskyed byang chub snying po bar/ /de dag skyong kun dngos rnams mi 'phrul gyi// rang bzhin mkhyen nas bdag bzhin ba spu yi/ /khung bur dus gcig la ni gsal bar ston/ /de bzhin dus gsum 'phags pa rgyal sras dang/ /rang sangs rgyas dang nyan thos ma lus kyi/ /spyod dang de dag skye bo'i gnas skabs ni/ /thams cad ba spu'i khung bur dus gcig ston/ /dag pa 'di ni bzhed par 'jug pa yis/ /rdul gcig yul la mkhas gtugs 'jig rten dang/ /'jig rten mdza' yas phyogs khyab rdul ston mod/ /rdul rags mi 'gyur 'jig rten phra mi 'gyur/ /rnam rtog mi mnga' khyod kyis srid mdza' i bar/ /skad cig re la ston mdzad spyad pa yi/ /rnam pa sna tshogs de snyed 'dzam gling gi /ma lus rdul gyi grangs la yod ma yin/ /gnas dang gnas min mkhyen stobs dang/ /de bzhin las rnams smin mkhyen dang/ /mos pa sna tshogs thugs chung dang/ /sna tshogs khams ni mkhyen stobs dang/ /dbang po mchog dang mchog ma yin/ /mkhyen dang kun 'gro mkhyen pa dang/ /bsam gtan rnam thar ting 'dzin dang/ /snyoms par 'jug sogs mkhyen stobs dang/ /sngon nas dran pa mkhyen pa dang/ de bzhin 'chi 'pho skye mkhyen dang/ /zag pa rnams zad mkhyen stobs te/ /stobs ni bcu po 'di dag go /rgyu gzhan zhig las gang zhig nges par skye 'gyur ba/ /de ni de yi gnas su de mkhyen rnams kyis gsungs/ /bshad pa las bzlog gnas min shes bya mdza' yas dang/ mkhyen pa thogs pa med pa de ni stobs su bshad/ /'dod dang mi 'dod de la bzlog dang zad dngos kyis/ /las dang de yi rnam smin shin tu sna tshogs la'ang/ /bshad pa las bzlog gnas min shes bya mdza' yas pa/ /mkhyen pa nus mthu thogs med so sor 'jug gyur pa/ /dus gsum shes bya khyab mdzad de ni stobs su 'dod/ /'dod chags sogs kyi 'byung ba'i stobs kyis 'dod pa ni/ /shin tu sna tshogs dman dang 'bring dang khyad 'phags dag /de las gzhan rnams kyis bsgribs mos pa'ang mkhyen pa ni/ /dus gsum 'gro ba ma lus khyab pa stobs zhes bya/ /sangs rgyas khams kyi rnam par dbye la mkhas rnams kyis/ /mig sogs dag gi rang bzhin gang de khams su gsungs/ /rdzogs pa'i sangs rgyas rnams kyis mkhyen pa mdza' yas shing/ /rnam kun khams kyi khyad par la 'jug stobs su 'dod/ /kun tu rtog sogs chos rno nyid ni mchog nyid dang/ /'bring dang brtul pa'i gnas skabs mchog min brjod pa dang/ /mig la sogs dang phan tshun sgrub nus chub pa la/ /rnam pa thams cad mkhyen pa chags med stobs su 'dod/ /lan 'ga' rgyal ba nyid dang 'ga' zhig rang rgyal gyi/ /byang chub dang ni nyan thos lha mi dang/ /yi dwags dud 'gro dmyal sogs rnams 'gro ba/ /de la mkhyen pa chags med mdza' yas stobs su 'dod/ /'jig rten mdza' yas rnal 'byor bye brag tha dad pa/ /bsam gtan rnam thar brgyad dang zhi gnas gang dag dang/ /snyoms 'jug khyad par gang dag gcig dang brgyad gyur pa/ /de la mkhyen pa thogs med 'di ni stobs su bshad/ /gti mug de srid srid nas 'das pa'i dus dang ni/ /sems can gzhan re'i srid par sems can ji snyed pa/ /de snyed mdza' yas bzhi dang bcas shing yul phyogs dang/ /rnam pa dang bcas mkhyen pa gang yin stobs su bshad/ /sems can rnams kyi sems can re re'i 'chi 'pho dang/ /skye gang 'jig rten la gnas nam mkha' i mthar thug dang/ /bkra mang de la mkhyen pa dus der 'jug pa yis/ /ma chags rnams kun yongs dag mdza' yas stobs su 'dod/ /rnam kun mkhyen pa'i stobs kyis myur du rgyal rnams kyis/ /nyon mongs dag ni bag chags dang bcas 'jig 'gyur dang/ /slob ma la sogs nyon mongs blo yis 'gog pa dang/ /de la mkhyen pa chags med mdza' yas stobs su 'dod/ /nam mkha' i med pas 'dab chags ldog par mi 'gyur gyi/ /'dir ni rang mthu zad pas ldog par 'gyur de bzhin/ /slob ma dang bcas sangs rgyas sras rnams sangs rgyas kyi/ /yon tan mkha' ltar brjod mi nus pas ldog par 'gyur/ /de phyir khyod kyi yon tan bdag 'dra bas/ /shes ba dang ni brjod par nus min yang/ /'on kyang de dag 'phags pa klu sgrub kyis/ /bshad phyir dogs spangs cung zad tsam cig smras/ /zab mo stong pa nyid yin te/ /yon tan gzhan rnams rgya che ba'o/ /zab dang rgya che'i tshul shes pas/ /yon tan 'di dag thob par 'gyur/ /khyod ni srid gsum brgal te mi g.yo'i sku las slar yang sprul pa yis/ /gshegs pa dang ni bltams dang byang chub zhi ba'i 'khor lo'ang ston par mdzad/ /de ltar khyod kyi 'jig rten g.yo bag spyod can re ba'i zhags pa ni/ /mang pos bcings pa ma lus thugs rjes mya ngan 'das par bkri bar mdzad/ /gang phyir 'di na de nyid shes las dri ma mdza' dag sel ba ni/ /lhur len gzhan med chos rnams de nyid rnam 'gyur dbye la'ang rten min zhing/ /de nyid yul can blo gros 'di yang tha dad 'gyur ba ma yin pa/ /de yi phyir na khyod kyis 'gro la theg pa mi mnyam dbyer med bstan/ gang phyir 'gro la nyes pa skyed byed snyigs ma 'di dag yod gyur ba/ /de phyir 'jig rten sangs rgyas spyod yul gting zab la 'jug mi 'gyur zhing/ /bde gshegs kyang phyir khyod la mkhyen rabs thugs rje thabs dang lhan cig pa/ /mnga' dang gang phyir bdag gis sems can dgrol zhes khyod kyis zhal bzhes pa/ /de phyir mkhas pas rin po che yi gling du chags pa'i 'gro sogs kyi/ /dal ba nyer sel grong khyer yid 'ong bar du rnam par bkod pa ltar/ /khyod kyi theg pa 'di ni slob ma nye bar zhi ba'i tshul la yid/ /sbyar ba mdzad cing rnam par dben la blo sbyangs rnams la logs su gsungs/ /sangs rgyas yul gyur phyogs bcu'i zhing rnams ma lus na/ /rdul phran ji snyed yod pa de snyed bde gshegs ni/ /byang chub mchog tu gshegs pa'i skal pa de snyed de/ /khyad kyis gsang 'di bsnyad par bgyi ba ma lags so// ji srid 'jig rten ma lus mchog tu zhi ba ma thob dang/ /ji srid nam mkha' i khams ni med par ma gyur de srid du/ /shes rab yum dang snying rje'i ma mas bskyed cing 'dzin byed pas/ /rgyal ba khyod la rab tu zhi bar 'gyur ba gang la mnga' / /gti mug skyon gyis 'jig rten kha zas dug bcas za ba yi/ /skye bo nyid kyi nang mi de la khyod brtse ji lta ba/ /de ltar dug zos nyen pa'i bu yi ma la sdug bsngal min/ /des na mgon po mchog tu rab zhir gshegs par 'gyur ma lags/ /gang gi phyir na mi mkhas dngos dang dngos po med par zhen pa'i blo can gyis/ /skye dang 'jig gnas skabs dang sdug dang mi sdug bral phrad kyis bskyed sdug bsngal dang/ /sdig can 'gro ba thob pa de phyir thugs brtse'i yul du rab dong bas// bcom ldan thugs rjes khyod thugs zhi las bzlog pas khyod la mya ngan 'das mi mnga' / /lugs 'di dge slong zla grags kyis/ /dbu ma'i bstan bcos la btus nas/ /lung ji bzhin dang man ngag ni/ /ji lta ba bzhin brjod pa yin// 'di las gzhan na lugs 'di ni/ /med pa de bzhin lugs 'di yang/ /gzhan la yod pa ma yin zhes/ /mkhas pa rnams kyis shes par bya/ /klu sgrub blo mtsho shin tu rgya che'i kha dog gis 'jigs pas/ /skye bos lugs bzang gang dag rgyang rings spangs pas de yi tshig / le'ur byas pa'i kha 'bus ku mu da kha phye ba'i chus/ /da ltar zla ba grags pa re rnams rab tu skod par byed/ /de nyid bshad zin zab mo 'jigs rung 'di ni sngon goms nyid las skye bo yis/ /nges par rtogs 'gyur 'di ni gsan rgya che yang gzhan gyis khongs du chud mi 'gyur/ /de phyir tshul lugs rang blos sbyar ba de dag mthong nas bdag tu brjod pa yi/ /gzhung lugs rnams ltar gzhan lugs bzhed gzhung 'di las gzhan la dga' blo dor bar bya/ /slob dpon klu sgrub lugs bzang bsnyad las bdag gis bsod nams phyogs kyi mthar/ /khyab cing yid mkha' nyon mongs kyis sngo ston ka'i rgyu skar ltar dkar ba 'am/ /sems kyi sprul la gdengs ka'i nor bu dang 'dra gang zhing thob pa des/ /'jig rten ma lus de nyid rtogs nas myur du bde gshegs sar bgrod shog /dbu ma la 'jug pa zhes bya ba'i tshig le'ur byas pa/ /slob dpon zla ba grags pa/ /zab pa dang/ rgya che ba'i tshul gsal bar byed pa/ theg pa mchog la thugs gzhol bas/ /mi 'phrogs pa'i mkhyen rabs dang thugs rje mnga' ba/ ri mor bris pa'i bdrus ma las 'o ma bzhos pas bden par zhen pa bzlog par mdzad pas sbyar ba rdzogs so// //rgya gar gyi mkhan po kriSh+Na paN+Di ta dang/ bod kyi lo tsA ba nag tsho tshul khrims rgyal bas bsgyur ba las/ slad kyis rgya gar gyi mkhan po ti la ka ka la sha dang/ /bod kyi lo tsA ba pa tsha ba nyi ma grags kyis bsgyur ba ltar cung zad bcos pa/ /don tshang zhing tshig bde bar bris pa'o/ /yon mchod bkra shis par gyur cig/ (//dbu ma 'jug pa bzhugs so//) //rgya gar skad du/ ma d+hya ma kA pa tA ra nA ma/ bod skad du/ dbu ma la 'jug pa zhes bya ba/ 'jam dpal gzhon nur gyur pa la phyag 'tshal lo/

CLOSE WINDOW