བོད་ཡིག

e-texts based on the ACIP/ALL Input

bzhi bcu rtsa gnyis pa'o// //'phags pa thabs kyi zhags pa padmo'i 'phreng gi 'grel pa rdzogs so// //rgya gar skad du/ ma hA rA dza tan+t+ra sh+rI gu ya garb+ha nA ma ti ga /bod skad du/ rgyud kyi rgyal po chen po dpal gsang ba'i snying po'i 'grel pa zhes bya ba/ dpal rdo rje sems dpa' la phyag 'tshal lo/ /dus gsum kun gyi bdag nyid che/ /byed pa rdo rje dkyil 'khor gtso/ /dgos pa mdza' dag gter gyur pa/ /kun bzang yid la 'ang phyag 'tshal lo/ / ston pa gnyis la mchod byas nas/ /dngos gsum gsal byed gcig gi gter/ /rnam grangs gsum bzhis mtshon pa'i rgyud/ /thar lam mdo tsam dbye bar bya/ /de la spyir gsang sngags kyi rgyud mdza' dag rgyud gsum gyi dbye bas bshad de/ thugs kyi thigs pa las/ rang bzhin bde bar gshegs gdul bya yi/ /snang ba gsum gyi ngo bo la/ /rgyud kyi dbye ba rnam par bzhag /gcig sa gsum gyi ngo bo yang/ /'khrul pa'i snang bas gsum du 'gyur/ /des na snang ba bzhi dag tu/ /lung rigs kun las gsal bar bshad/ ces 'byung bas/ rang rig pa thams cad rtsal ma 'gags pa ni rang bzhin gyi snang ba ste/ thams cad du 'bral cing thams cad tshang ba'i phyir/ rang bzhin gyi rgyud du gsungs la/ dngos par ston pa yang/ blo'i rim pa bye brag tu snang ba rnams ni/ gdul bya'i snang ba ste/ rjes su mthun cing thams cad 'gro ba'i phyir lam gyi rgyud do/ /des mthar thug pa ni bral ba dang thob pa med pa'i ngo bo nyid du lhun gyis grub pas thams cad rdzogs pa ni/ de bzhin gshegs pa'i snang ba ste/ rjes su snyegs pa'i phyir 'bras bu'i rgyud de/ de dag ngo bo gcig pa la /rim par snang ba ni kun tu brtags pa sna tshogs kyis bsgribs pa dang/ sangs pa dang phye ba gang yin pa ni/ 'khrul pa'i snang bar gsungs pa'i phyir/ zhor la gshang pa bzhir phye bar 'gyur ro/ /de la rang bzhin gyi snang ba ni gzhung nyid las/ kun gzhi rnam par shes pa nyid/ dngos po sna tshogs par snang ste zhes 'byung bas/ rang rig pa'i lugs kyis/ cir snang ba de bdag nyid rang rig pa nyid kyi phyir yon tan tshang zhing gnyis kyang skabs las 'brel pa rgyud de/ zhor la bshang ba'i nyes pa lnga yis bsgribs pas/ gnyis la rag lus par snang ngo/ /lnga gang yin snyam pa la/ rgyu rkyen byed po ngo bo dang/ /de'i nyes pa rgyal bas gsungs/ zhes 'byung ba ste/ gzhung las/ ma rig rtog pa'i gzung 'dzin gyis zhes pa dang/ rang gi rnam rtog las kyis sprul ces pa dang/ /ma bcos rgyun gyi skad cig ma/ /de yis ma byas gang yang med ces pa dang/ /sna tshogs lus dang longs spyod dang/ /gnas dang sdug bsngal la sogs pa/ /bdag dang bdag gir so sor 'dzin/ /de yang/ bdag dang bdag gi gzhan rnams ni/ /log par rtogs pa tsam nyid las/ /'phra zhing zab pa'ang yod ma yin/ ces 'byung ngo/ / nyes pa yang/ chos rnams ye nas dag 'gyur kyang/ /phyin ci log gi blo log nas/ /log rtog gnas dang longs spyod dang/ /ma rig 'khrul 'khor bsam mi khyab/ /sems can ma lus thams cad la/ ye shes lnga yis kun khyab kyang/ /rang gi rnam rtog bsgribs byas nas/ /ye shes lnga'i don ma mthong/ /zhes gsungs so/ /de'i phyir lam gyi rang gi ngo bo nyid mngon du byas pa la/ 'bras bur 'dogs kyang/ ngo bo nyid gcig ste/ /rang bzhin ni thams cad kyi gdags gzhir gyur pa'i phyir/ thams cad rang rig byang chub sems/ /de ni lung gi tshad mar bshad/ /tshad bzhi phab pa'i don yin te/ /dag pa rnam gsum tshul gnas shing/ /'bru ldar 'dus pa'i thabs chen de/ /'gro ba kun la rang bzhin gnas/ zhes gsungs so/ / gnyis pa ni gzhi dang lam gyi nyes pa gnyis zad pa gang yin pa ste/ nges snang ba'i phyir 'bras bu zhe'o/ /de yang rang bzhin gyis byin gyis brlabs kyis 'brel pa dang/ /bdag dang gzhan gyi dgos pa phun sum tshogs pa'i phyir rgyud do/ /de la gnyis su 'bres? te/ de la ngo bo ni mtshan nyid 'di 'brar brjod par dka' na yang/ rmongs pa rnams kyi don du/ nyi shu rtsa lngar bsdu ba mdzad do/ /de thob pa'i tshul ni lam gyi gtan tshigs dang rtsol bas nyes pa gnyis zad pa'i dus na rang snang ba la 'dogs pa'i phyir/ gzhung las/ ngo mtshar cho 'phrul rmad kyi chos/ /gzhan nas yod 'ong ma yin te/ /thabs la brten pa'i shes rab nyid/ /da lta bu'i ngang du byung zhes pa dang/ yang/ rgyu 'bras ye nas dbyer med lnga phyi ma yin pas/ 'bras bu lam du gyur nas dus gcig mnyam par sbyor/ ces pa la sogs pa gsungs so/ /gsum pa ni de dag shes pa dang/ grub par byed pa'i las btags te/ de yang blo'i bye brag gis tha dad par snang ba kho na'o// de la don drug ste/ ngo bo des tshig dgos ched dang/ /'byung tshul gnyer bshad thabs kyis dbye zhes pa'o/ /ngo bo la gsum ste/ phyag na rdo rjes dbang bskur ba la sogs pa bya ba'i rgyud/ de kho na nyid thub pa la sogs pa thub pa'i rgyud dang/ thabs kyi theg pa'i rgyud do/ /de la yang gsum ste/ dpal gsang ba 'dus pa la sogs pa thabs kyi rgyud dang/ dpal bde mchog la sogs pa shes rab kyi rgyud dang/ dpal 'bu ta 'byung ba la sogs pa ma ning gi rgyud do/ /de la dpal gsang ba'i snying po 'di ni thams cad kyi don dang rgyu 'bras tshang zhing 'brel pa'i phyir/ rgyud thams cad kyi spyi yin par gsungs so/ /des tshig ni/ rang bzhin 'bras bu rnam gnyis las/ /shes thob btags pa'i nges tshig gnyis/ /rgyu rkyen thabs 'brel rgos rdzogs phyir/ /rang gi nges tshig bzhi ru 'gyur zhes pa go sla'o/ /rgos ched ni/ rang bzhin gyi rgyud mi 'gyur ba'i yongs su grub pa ste/ lam gyi rgyud gsum gyis phyin ci ma log par bya ba dang/ 'bras bu rgyud mngon du snang bar byed pa'i phyir ro/ / 'byung tshul ni/ drug pa'i ston pa lhun gyis grub pa'i thabs dang/ smon lam gyis go phye nas/ le'u dang por rgyu snang bar mdzad/ /gnyis bar rkyen sbyar/ gsum par thun mong bcas bzhi'i ston pa drug snang bar mdzad de/ dus mtshungs par tha dad pa'i rgyud rnams 'byung ba'o/ /gnyer ni yongs su grub pa gnyis dang/ tha mal pa'i blo brod pa bskyed pa'i phyir 'bras bu'i chos rnams kyi mtshan nyid brjod pa'o// //rgyud kyi bshad pa'i thabs ni/ gdul bya dang dbang po rab 'bring tha ma'i don du don gsum mo/ /de la rab kyi don du mtshan bshad pa yang 'dir gsum ste/ rgyud dang dkyil 'khor skyes bu'i mtshan thun mong du btags pa ni/ rdo rje sems dpa' i sgyu 'phrul dra ba'o/ /che ba las btags lung gi spyi'o/ /don gyi ngo bo las btags pa ni/ gsang ba'i snying po de kho na nyid nges pa'o/ zhes bya ba ste/ de la gsang ba la gsum te/ rang bzhin dang/ sbas pa dang/ gab pa'o/ /de la rang bzhin gyis gsang ba ni/ gzhung nyid las/ e ma'o ye nas gsang ba'i chos/ /sna tshogs snang la rang bzhin gsang/ /ngo bo nyid kyis rab tu gsang/ gzhan du min las shin tu gsang/ zhes 'byung ste/ ye nas gsang ba ni/ gnyis su med pa rang 'byung gi ye shes yon tan ril lhun gyis grub pa de/ rang chas su yod kyang ma shes pa kho na la bya'o// //rang bzhin gyis gsang ba ni/ de nyid rang snang ba'i dngos po ril mi zad pa rgyan gyi 'khor lor rang rgyud du gnas pa/ brtags pas bsgribs pa'o/ /ngo bo gsang ba ni/ rang bzhin gyi rgyud kyi ngo bo nyid/ /yul sems rgyu 'bras dang/ bden pa gnyis po las grol ba de / bar? snang ba'i phyir rang gi ngo bo nyid yul du ma dmigs pa kho na'o/ /shin tu gsang ba ni/ 'bras bu'i rgyud bsgrub par bya ba ste/ gud na med kyang/ nyon mongs pa dang shes bya dang/ lta ba'i sgrib pas/ gzhan du tshol yang/ rang rig pa las snang ba kho na'o// spas pa'i gsang ba ni/ spyod pa'i khyad par lta gsum dang/ stan 'gan dang bya ba med pa la sogs pa/ lta spyod 'brel pa dang/ 'jug par gsungs pa de dag /sngags kyi man ngag med pa dang/ sgra bzhin spyod pa rnams kyis spyad na/ shin tu nyes pa che bas/ brdar spas nas gtan dgos pa ste/ gzhung las kyang/ kha cig lta bas mnyam gnas kyang zhes pa la sogs pa dang mnyam pa'i don nyid ma rtogs par ces pa la sogs pa'i don gyis/ gsang phyir gdam ngag sna tshogs gsungs/ zhes pa 'byung ba'o/ /gab pa'i gsang ba ni/ rgyud kyi don phun sum tshogs pa dang/ rang bzhin gyi don rnams 'khrul pa dang/ mchod? pa rnams la gab pa de dang de/ tshad ma gnyis kyi bdag pos 'byin pa'o/ /snying po zhes bya bas gsum ste/ de la theg pa thams cad 'byung ba'i snyed po ni/ byin gyis rlabs kyis bstan pa ste/ gdul bya las tha ma'i don du rgyud 'di bstan pa'i mdzad pas go phye nas/ thams cad kyang 'byung ba ste/ gzhung las 'dul ba mdo sde chos mngon dang/ zhes pa nas/ 'bebs pa mthar thug go /theg pa kun gyi 'bras bu'i snying po ni/ sgo kun nas bsgrub pa'i mdza' / rang bzhin gsang ba'i snying po 'di mngon du byed pa'i phyir/ gzhung las/ sa rnams khyad par bkod pa yang/ / gsang ba'i snying pos 'gro ba lam/ zhes pa la sogs pas ston pa ni chos thams cad kyi don gyi snying po yin pas/ gtan tshigs kyi sgo gang nas rmal kyang/ mthar gtugs pa'i de bzhin gshegs pa'i spyod yul ni/ rtog tshogs su btags pa ril/ sku dang ye shes bzhi bcu gnyis su sangs rgyas pas khor ba dkar dag pa ste/ gzhung las/ don bsdus gsung rab bzhi bcu gnyis/ /de las lhag pa'i don smra ba/ /de ni rnam dag lam min te/ /rang blos bsam pa 'khrul pa yin ces pa dang/ yang/ de bzhin gshegs pa thams cad la/ gsang ba 'di las gzhan mi mnga' / /zhes pa gsungs so/ /de kho na nyid ces bya ba la gsum ste/ rgyu 'bras gnyis su med pa la/ de nyid ngo bo skabs kyis gsum/ zhes pas/ rtogs tshogs ril dang rig pa las ni gzhan pa'i phyir/ snang stong gnyis dang bral ba'i ye shes kyi dkyil 'khor la/ blo ma bcos par gzhag pa ni/ ma bcos pa'i de kho na nyid do/ skabs kyis rgyu zhes btags so/ /de nyid ye shes kyi phyag rgya mang por snang bar mngon sum du byung ba ni/ ma nor ba'i de kho na nyid de/ spros pa la zhen pa rnams la 'bras bu zhes btags so/ /de dag kyang mngon par zhen pa dag gi skabs las gzhan ma yin pa ni/ gzhan ma yin pa'i de kho na nyid de/ dbye ba ma grub pas rgyu 'bras gnyis su med pa'i de kho na nyid do zhes bya'o/ /nges pa'o zhes bya ba ni/ gzhi dang lam dang ngo bo yis/ /nges pa rnam pa gsum du bshad/ ces pas/ rgyud kyi gzhi ni/ rang bzhin gsang ba'i snying po ste/ rang bzhin gyis nges pa'o/ /de 'dir nges par ston pa'i phyir/ gzhung las/ sgro dang skur bzhi pa'i gsang ba'i snying po de kho na/ nyid de nges pa'i dbyings nas byung zhes gsungs pa'o/ /'di'i lugs kyis 'bras bu nyid nges pa'i lam du byed pa'i phyir/ yang 'di ni gsang chen nges pa'i 'bras bu lam du gyur pa yin/ ces gsungs so/ /'di rang gi ngo bos de bzhin gshegs pa'i dgos pa mngon du ston pa'i phyir/ /rgyal ba'i dkyil 'khor ma lus la/ /'di las gsang ba'i nges don med ces gsungs pas/ don gnyis las skal ba'i las can la nges pa'i don du gsungs pa'o/ /spros pa la dga' ba dbang po 'bring gi don tu rgyud kyi don rnam par phye ba la don rnam pa lnga ste/ rgyud kyi rgyud dang rkyen dang/ yongs su shes par bya ba dang/ rgos 'brel dang/ yongs su gtad pa'o/ /de la rgyud 'byung ba'i rgyu gleng gzhi phun sum tshogs pa la rnam pa gnyis te/ thun mong dang/ thun mong ma yin pa'o/ /thun mong gi gleng gzhi la gnyis te/ khyad par dang/ bstan pa spyi'i gleng gzhi'o/ /khyad par gleng gzhi la drug go /de la ston pa la ngo bo dang/ rang bzhin dang/ bshad pa'i skyes bu'o/ /gnas la rang bzhin dang gzhal yas khang gdan dang rgyan du bcas pa'i mtshan nyid do/ /'khor la rang bzhin gnyis su med pa'i 'khor dang/ rig pa khyad par can gyi 'khor dang/ tshad dang/ mdog go / dus dang/ sdud pa dang/ bstan pa'o/ bstan pa spyi'i gleng gzhi la/ rgyud dang/ ngo bo'o/ /ngo bo la ston pa dang/ zhing khams dang/ mdzad pa dang/ gdul bya dang/ de dag gi bstan pa'o/ /rgyud 'byung ba'i rkyen gleng bslang ba la gnyis te/ thun mong ma yin pa'i gleng bslang ba/ 'khor la dbang gnyis kyi skabs phye ba dang/ thun mong du gleng bslang ba bstan pa mdza' dag bshad par zhus pa dang/ gnang ba'o/ /rgyud rang gi ngo bo yongs su shes par bya ba'i dngos po la bdun gyis dbye ste/ lta spyod dkyil 'khor dbang ngam dang/ /'phrin las bsgrub pa'i lam rim gyis/ /gsang sngags rgyud kyi dbye ba bya/ zhes pas ston te/ de la lta ba la gtan tshigs dang/ ngo bo'o/ /spyod pa la/ shes rab dang mthun pa'i spyod pa dang/ thabs dang mthun pa'i spyod pa dang/ phyogs gcig pa'i spyod pa dang tshogs kyi spyod pa'o/ /dkyil 'khor ni gzhung las/ 'dis ni rang bzhin dkyil 'khor dang/ /gzugs brnyan lhag pa'i gzugs brnyan dang/ ting 'dzin lhag pa'i dkyil 'khor lnga/ /byang chub sems dang tshogs mchod bstan ces pa'o/ /de la rang bzhin la/ rang bzhin nyid kyi dkyil 'khor dang/ rang bzhin lhun gyis grub pa'o/ /lhun gyis grub pa'i dkyil 'khor la zhi khro gnyis so/ /de re re la yang sku gsung thugs te drug go / lhag pa'i ting nge 'dzin gyi dkyil 'khor la yang drug rjes su mthun no/ /lhag pa gzugs brnyan gyi dkyil 'khor la/ sa gzhi snyam pa dang/ tshad dang/ thig dang/ bri ba dang/ tshon dang/ dbye ba dang/ rab gnas dang/ sbyin sreg dang/ der 'jug pa dang/ byas nas zhugs pa'i yon tan dang bcu'o/ /tshogs kyi dkyil 'khor la zhi khro gnyis so/ /dkyil 'khor kyi nges tshig ni rgyas pa nas gsal lo/ /dam tshig la rang bzhin dang/ che ba dang/ grangs dang/ skyon dang/ yon tan no/ /dbang la ngo bo dang/ bskur ba'i rim pa dang/ bskur thabs dang/ skyon dang/ yon tan no/ /'phrin las la/ lhag pa hom gyi las dang/ lhag pa rdzas kyi las dang/ lu gu rgyud kyi pas? dang/ yon tan no/ bsgrub pa'i thabs lam gyi rim pa la gnyis te/ bskyed pa'i rim pa ting nge 'dzin lnga'i sgo nas rim par 'jug pa dang/ rdzogs pa'i rim pa chos thams cad dag pa gsum dang mnyam pa rnam pa lnga'i dang du sangs rgyas pa de rtogs pa'i bzhi'i lam gyis yid ches te/ de la mtshan nyid gsum dang dgos 'brel gyis lam mtshon nas/ bsnyen bsgrub bzhis don mthar phyung ste/ bdud bzhi yang gdul bas/ 'bras bu lhun gyis grub par 'jug go /dgos 'brel ni/ thun mong dang thun mong min pa'i tshul gyis gnyis te/ de yang/ brjod 'brel dgos dang yang dgos pa'i/ /rgyud kyi yan lag bzhi ru 'gyur/ /ces pas/ thun mong lam gyi rgyud ni brjod par byed pa'o/ /rgyud gnyis ni brjod bya'o/ /gleng gzhi tshogs nas gleng bslang ba ni thabs de las rgyud 'di snang ba ni nges par 'byung ba'o/ /lam gnyis ni rgyu/ mi zad pa rgyan gyi 'khor lo ni 'bras bu'o/ /rgyud kyi dngos po bdun ni dgos pa'o/ /mi zad pa rgyan gyi 'khor lo ni dgos pa'i yang dgos pa'o/ thun mong ma yin par na/ thig le chen po thabs dang bcas pa ni brjod par byed pa'o/ /thig le bcu drug gi bde ba ni brjod par bya'o/ /byed pa sdom pa rlung dang bcas pa ni thabs so/ /des rang bzhin gsang ba'i snying po myong ba ni thabs las byung ba'o/ /thig le bzhi bcu rtsa gnyis ni rgyu'o/ /ye shes bzhi bcu rtsa gnyis mngon du shar ba ni 'bras bu'o/ /sems lnga rgyun tu bskyed pa ni dgos pa'o/ /bcu drug tsha la rdzogs pa'i ye shes chen po ni dgos pa'i yang dgos pa'o// rgyud yongs su gtad pa ni gnyis te/ de la gdam pa ni rang bzhin gsang ba'i snying po la/ stsol ba ril bral bar gdams pa'o/ /gtad pa la gnyis te/ sdud pa po la zung la spros shig pa dang/ rnal 'byor ba la yon tan brjod de zung cig pa'o/ /sa gcod kyi drangs de dag dkyus kyi thad dkar ngo sprad nas bstan to/ /dbang po tha ma'i don du/ gsang sngags kyi spyi'i rgyud kyi bshad thabs bcu yis 'bru gnyir dbye'o/ /de la bcom ldan 'das dpal kun tu bzang po la phyag 'tshal lo/ /zhes bya ba ni/ sdud pa pos tshig gnyer ba de'i tshe rang gi ston pa la mchod pa'o/ /'di skad bshad pa'i dus na/ zhes bya ba ni/ thun mong ma yin pa'i gleng gzhi ste/ gzhung gzhan las khyad par gyur ba'i phyir/ sgyu 'phrul thal ba'i rgyu las/ 'di zhes nye bar mtshon pa ni/ /e sogs rnams bzhi dbyings can gnas/ /skad ces gsal byed las ming can/ /baM dbyibs thig ler bcas ston pa'o/ /ma dang me nu sdom byed yin/ /las can rnams shes de dag la/ /gsal bar go bar bshad par 'dod/ /pa sgra don dam nges pa'i rgyud/ /ya na theg chen 'di yin no/ /dus ni bsam gyis mi khyab dus/ /nam de ming zhes bya'o/ /zhes 'byung ngo/ /de la nye bar mtshon pa ni gnas te/ khyams dang/ sgo dang/ bya'i gdong dang/ za ma tog rnams/ drag rgyas zhi dbang du gnas pa ni/ sangs rgyas ril gyi bzhugs gnas su gnas so/ /gu ya badzra dbur rdzogs pa'i thig le dang bcas pa'i ni ma lus pa'i byed pa po'i phyir ston pa'o/ /ma ni ma da na sdom byed de sems lngas glang ba'i las kyis mnun? yid de/ rnam par shes pa'i rgyal po dang/ rdo rje mthong ba la sogs pas pa yin ci ma log par go ba ni brjod pa dang 'dra ba'i phyir/ 'khor la bshad do bar tha snyad du 'dogs so/ /go ba nyid gang snyam pa la/ ba bar ma ta na don dam pa byang chub kyi sems te/ sems lnga'i tha ma skad cig ma bcu drug pa'i byang chub sems mthas ma reg pa ni/ ma ha ya na na theg pa chen po ste/ rgyud 'di'o/ /de'i dus ni gcig tu brjod du med pas/ bsam gyis mi khyab pa'i dus zhes bya bar tha snyad 'dogs so/ /de ni gdul bya las tha ma? rnams kyi don gyi phyir/ thun mong ma yin pa'i gleng gzhi'o// //da ni thun mong gi gleng gzhi ston pa'i rang bzhin te/ rgyal ba drug pa'i yon tan mdza' yas pa yang mdor bdun du bsdu ste/ de bzhin gshegs pa zhes bya ba ni/ gnyis su med pa'i rig pa rang byung gi ye shes ni/ ma bcos par ril lhun gyis grub pa'i phyir/ de bzhin nyid do/ /der son pa ni ngo bo nyid du gyur pas/ gnyis dang bral ba'i phyir de bzhin nyid du gshegs pa yang/ sna tshogs zhen las grol bar zad ce'o// yang dag par rdzogs pa zhes bya ba ni/ gnyis su med pa'i byang chub kyi sems ni ril ngo bor gyur pas/ spangs pa mi dmigs pa'i phyir yang dag pa'o/ /de nyid kyi phyir thams cad 'bras bur rang snang bar yang bzhugs so/ /sangs rgyas zhes bya ba ni/ sa pa la sogs pa'i lta ba ngan pa thams cad dang bral ba'i ye shes mdza' dbus med par brdal bas ye shes bla ma'i sa mngon du byas pa'o/ /bcom ldan 'das zhes bya ba ni/ nyon mongs pa la sogs pa/ mi mthun pa nyid rang rig tu gsal bas/ de dag 'bras bur mnga' mdzad kyang/ ngo bo nyid 'di 'drar? mi rnyed pas spyod yul du byang med pa'i phyir ro/ /longs spyod chen po zhes bya ba ni/ thams cad kyi ro myang yang/ bdag nyid chen po'i phyir/ spyod yul dang bral bas gzhan las khyad par du gyur pas chen po'o/ /phyogs bcu dus bzhi'i de bzhin gshegs pa thams cad kyi sku dang gsung dang thugs rdo rje'i bdag nyid/ ces bya ba ni/ tha snyad gnyis kyis bsdus pa'i de bzhin gshegs pa ril gyis yon tan brjod pa las 'das pa yang/ mdo nyi shu rtsa lngar 'dus te/ de dag yang dag par rdzogs pa'i phyir/ rgyal ba drug pa'i khyad par las snang bas/ sangs rgyas kun gyi spyi gzugs can dang/ rigs thams cad kyi bdag po zhes tha snyad du 'degs so/ /ma lus mi lus lus pa med pa thams cad dang/ so so ma yin tha mi dad dbyer med pa'i rang bzhin te/ zhes bya ba ni/ dus gsum gyis bsdus pa'i sems can dang/ chos thams cad dang bsdu ba ni su zhig snyam pa la/ drug pa'i de bzhin gshegs pa ste/ de dag rig pa sgyu ma'i phyir dang/ sems nyid du ma skyes pa dang/ bden pa gnyis kyi tha snyad las 'das par gcig pa ste/ kun kyang de 'dra ba'i phyir/ /gnyis su med pa dang/ snying rje chen po'o/ zhes bya ba kho na'o/ / de'i gnas gang snyam pa la/ 'og min gyi gnas mdza' dang dbus med pa na/ zhes bya ba ni/ rang bzhin gtan te/ de yang/ gtsang ma'i rigs dag spangs pa yi/ /'og min chen po'i gnas mchog na/ /rigs bdag phyag rgya lhun grub sku// gcig dang du ma rnams spangs pa/ /sangs rgyas kun gyi spyi gzugs te/ /gdod nas theg mchog mdzod nyid phyir/ /sgrib pa mdza' spangs gdul bya la/ /skad cig gcig gis snang bar mdzad/ ces pas/ yul khyad par can de ni/ rang rig pa kho na'i phyir mdza' dbus dang bral ba'o/ /gzhi tshad med pa'i ye shes kyi 'khor lo gsal ba la/ zhes bya ba ni/ 'og gi 'khor lo chen po ni ye shes kyi phyir gdul bya'i snang bas tshad gzung du med de/ de yang ye shes lnga'i rtsal rang snang ba'i phyir phan tshun du gsal lo/ /gzhan gyi rgyu ci snyam pa la/ ye shes rin po che 'bar ba'i gzhal yas khang/ zhes bya ba ni/ gnas kyi rgyud yang rang rig pa nyid kha dog dang dbyibs su snang ba ni tha snyad du rin po che ste/ las kyang mi 'dod pa ma yin no/ /rgya phyogs bcur yongs su ma chad pa/ zhes bya ba ni/ rang bzhin te/ rgyu'i phyir ye shes nyid mdza' kun dang bral ba ni/ de bzhin gshegs pa'i snang bar 'gyur ro/ de'i phyir phyal bar 'gyur ro snyam pa la/ /yon tan dpag tu med pa rgyas pa'i phyir gru bzhir gyur pa zhes gsungs te/ ye shes kyi phyir 'bras bu chos ril lhun gyis grub pa de nye bar mtshon pa'o/ /lhag pa'i ye shes rin po che'i glo 'bur gyis mdzes pa/ zhes bya ba ni/ gang rtogs pa'i ye shes ni bye brag mngon du snang bas de nyid kyi rtsal glo bur bzhir snang ba ni kha dog gis rgyan lta bur mdzes pa'o/ rtse mo phyogs bcu dus bzhi'i sangs rgyas kyi dkyil 'khor ma lus pa thams cad so so ma yin ngo bo nyid gcig pa'i ye shes kun tu 'khyil pa/ zhes bya ba ni/ zlum par mtho ba nyid rang rig pa nyid zhing khams thams cad du snang bas/ thams cad rang rig tu gyur pa ni/ gang du yang mi gnas pa'i ye shes chen po ste/ snang ba gnyi ga las ma 'das pa'o/ /ye shes bsam gyis mi khyab pa'i ye shes rin po che'i dbyibs dang/ kha dog la sogs pa rnam pa tha dad pa'i bye brag dang/ khyad par du gyur pa zhes bya ba ni/ ye shes kyi las kyi skabs las bye brag bsam gyis mi khyab par snang ba nyid sna tshogs kyi dbyibs dang 'od zer dang sprul pa'i rnam pa lta bas mi ngoms par rdzogs par snang ngo/ /bags pa tshad dpag tu med pa/ zhes bya ba ni lam gzhan las 'di 'phar ba dang/ 'di nyid thug pa med pa'i phyir/ sgo la sogs pa'i rim pa dang/ bum pa sangs rgyas kyi spyi gtsug lta bur gnas pa'o/ /ye shes rin po che sna tshogs ces pa nas klubs pa'i mthar thug pa ni/ ye shes chen po snang stong gnyis su med thugs rje sprul pa rgyun dang ldan pa dang/ bden pa gnyis mi phyed pa dang/ thabs sna tshogs ma 'dres pa dang/ gang yang ma spangs pa longs spyod chen po'i phyir/ rgyan de dag gis mdzes pa yang 'khrigs pa dang 'dus pa byas te/ ye shes kyi phyir phyi nang med par gsal ba ni/ /gser gyi spu gur rin po che ze'u bcug pa lta bu'o/ /rnam par thar pa bzhi'i sgo nas 'jug pa'i sgo khyud can/ zhes bya ba ni/ ye shes chen po'i mdza' kun dang bral ba rang gi mtshan nyid med pa la 'bras bu ril tshang bas 'dod pa dang bral ba nyid cir yang snang ba'i phyir/ stong pa nyid la sogs pa'i sgo bzhi ma 'dres la/ yongs su rdzogs par rtogs pa ni/ a ti yo gar 'jug go /zhes tha snyad du 'dogs pas sgo bzhi kha dog gis gsal ba'o/ /rnam par thar pa brgyad kyi rta babs dang ldan pa/ zhes bya ba ni/ 'das ma thag pa nyid theg pa brgyad la sbyangs pa las snang ba'i phyir nye bar mtshon pa/ zhabs dang ma chags za ra tshags/ /sna 'phyong chun 'byad phreng ba dang/ /sna tshogs khyung mgo rim par 'khrigs she'o/ /phyi dang nang med pa kun tu yang nang du gyur pa na zhes bya ba ni/ rang rig pa ni/ bdag nyid chen po'i phyir gsal bar bya ba mi dmigs pas/ mdza' med pa la phyi nang yod par mi 'gyur ba ni/ de bzhin gshegs pa'i snang ba ste/ rang bzhin no zhes bya ba'o/ /mi 'jigs pa seng ge zhes pa nas/ gdan la zhes pa mthar gtug pa ni/ ye shes chen po mngon du byas pa'i rig pa ni 'bras bu'i chos bzhi dang/ bcu gnyis gnyis dang/ thams cad mkhyen pa nyid rdzogs pas/ yang dag par rdzogs pa'i sangs rgyas su bstan cing nges par byas pa yang theg pa brgyad kyis nges par 'byung ba'i phyir/ seng ge la sogs pa smon lam gyi byang chub sems dpa' gcig kyang brgyad brgyad do/ /rang bzhin gyis 'od gsal ba nyi zla'i dkyil 'khor dang/ zhes bya ba ni/ rang rig pa cing yang ma skyes pa nyid kun tu snang bas/ thabs dang shes rab gnyis su med pa'i phyir nyi zla brtsegs ma ste/ thig le chen po dang sa bon ni/ thams cad kyi byed pa po'i phyir bdag po dang rdo rje ste/ dbus na zla ba blar gnas so/ /gos pa med pad+ma rin po che'i gdan la/ zhes bya ba ni/ snang stong gnyis dang bral ba'i rig pa ni gang du yang ma nges pas cis kyang ma gos pa dang/ ci byas ci snang ba ril gzhan du mi g.yo bar byed pa'i dpe rin po che chu 'dang lta bu de nyid yon tan du snang/ ba'i phyir/ rin po che sna tshogs kyi phri rkang bteg pa'i/ gdung re re la mdzod bdun bdun te/ nges pad+ma sna tshogs bteg pa'o/ /de dag ni gdul bya'i snang pas gnyis su yang 'gyur te/ thal ba'i rgyud las/ bcud 'dus thig le chen po nyid/ /snang dang stong pa la sogs pa/ /brjod bya ma lus rdzogs par snang/ /rtog tshogs sangs rgyas bzhi bcu lnga/ /snang bas phye phyir gnyis su med/ /de gnas pad+ma rim gsum po/ /gnyis gsum brgyad kyi khyad par can/ /tha ma gnas dang yon tan gyis/ /mngon par mtho bas 'og min te/ /las dang bcud kyis mdza' bral ba/ /ye shes bzhi la dpag mi rig /dgos pa 'byung ldan rin po che/ /ye shes lnga yi 'khor los bskor/ /sangs rgyas ngo bo snod bcud kyis/ /spyi po shin tu 'khyil bar gnas/ ? ? sor gyis spags pa ni/ /sa ya bcu gsum bde bas brgyan/ /'dod yon khyad pa can gyis mdzes/ /gang yang bde byed phyi nang bral/ /bde ba chen po'i ro nyid la'ang/ /'bras bu'i chos kun ? ? ?/ /byang chub mchog tu zla? shar/ /de nyid bzhugs gnas yin par bshad/ ces 'byung ngo/ sgo la sogs pa ji lta bu snyam pa la/ rgyas pa'i rgyud las/ nub phyogs 'og mi gnas mchog tu/ /ma chags pad+ma'i gdan bting ba/ /dus gsum rgyal ba bzhugs pa'i gnas/ /rnam par thar pa'i sgo bzhi la/ /phyag rgya bzhi dang nges par ldan/ /dbang dang skal med gsang ba'i phyir/ /nang gtan phyi rim lcags dang ldan/ ces gsungs te/ bla ma 'chad par 'gyur ro/ /sku mdun dang rgyab med par/ thams cad du zhal thal le par gsal zhing/ zhes bya ba ni/ ston pa'i ngo bo dang skyes bu'i mtshan nyid thun mong du bstan te/ drug pa la sogs pa'i de bzhin gshegs pa ni/ ye shes kho na'i phyir/ gdul bya'i snang ba ltar ma yin/ thams cad du yang zhal lo/ /mtshan dang dpe byad du ldan pa zhes bya ba ni/ 'khor lo la sogs pa thun mong pa'i chos de nyid yon tan 'phrin las kyi bye brag sum cu gnyis dang/ ye shes kyi khyad par brgyad cur snang ba'i phyir/ gang yang ma spangs pa'o/ zhes bya ba kho na'o/ /bsam gyis mi khyab pa thams cad du/ sku gsung thugs sna tshogs kun tu snang ba zhes bya ba ni/ khyab pa dang rdzogs pa'i phyir/ mdza' yas pa'i gdul bya'i ngo la zhi khro la sogs pa'i sku gsung thugs kyi mdzad pa gang yang ma nges par snang ba'o/ /thabs dang shes rab kyi zhabs gnyis mnyam pa yi/ brtul shugs kyi skyil mo krung du bzhugs pa zhes bya ba ni/ bde ba chen po'i spyod pas gdul ba'i phyir/ rdo rje'i skyil mo la shes rab kyis 'khyud pa dang/ rtse mo sprad pa'i bde ba la rgyu 'bras ril mnyam par rdzogs pa'i phyir/ mi 'gyur bar bzhugs so/ /ye shes drug gi phyag ye shes rin po che'i phyag rgya 'bar ba can zhes bya ba ni/ de bzhin nyid de ye shes su rang snang ba ni/ yul shin tu rnam par dag pas ming gsum dang ldan te/ thun mong dang thun mong min pa bzhi dang lnga rdzogs pa'i rtsal nyid cir yang mi 'gag pas/ don mdzad pa'i phyir/ rdo rje la sogs pa'i 'od zer dang bcas par 'dzin pa'o/ sku gsung thugs bsam gyis mi khyab pa'i dbu gsum dang ldan pa zhes bya ba ni/ rnam par thar pa gsum chub pa'i rig pa ni/ sku gsung thugs su rang snang ba ste/ de gcig kyang gsum gsum la sogs pa'i bya'o/ ? grags dang bral ba yang gdul bya'i snang bas gsum kho na'o/ /de dag gdul bya'i skabs kyis gnyis su 'gyur te/ thal ba'i rgyud las/ bcud lnga ye shes kho na'i phyir/ /dangs snyigs med par kun tu gsal/ /sgra dbyangs gsung gi gnas bzhi yis/ /dbye bas gsum gsum ngos gnyis dang/ /bzhi bcu gnyis su 'gyur pa yin/ /sa ya bcu gsum la sogs par/ /skye 'gag gnas pa'i ngo bo yang/ /rten can ji bzhin rten de bzhin/ /nyi zla thabs dang shes rab kyis/ /ro gnyis mnyam par dus gsum bzhugs/ /dangs ma'i thig le chen po yi/ /bde pas dngos po 'ang ye shes snang/ /zhes 'byung ngo/ /'phro tshol ba ni gang zhe na/ zhes bya ba ni/ thun mong bstan pa'o// //bcom ldan 'das de bzhin gshegs pa zhes pa nas/ 'du? byed kyi rgyal po'i dar du ni/ skyes bu rang bzhin gnyis su med pa'i 'khor te/ mtshan thun mong ba gnyis ni sngar thal te/ kun gzhi la sogs pa dang rtog pa lnga smos pa ni rang bzhin yin pa dang/ thun mong ma yin pa'i phyir smos pa ste/ de dag ? dag par chud pa las/ rdo rje 'dzin pa la sogs par snang ba'i phyir ro/ /rang bzhin las khyad par mngon du byas pa dang/ zag pa med pa'i longs spyod yongs su rdzogs pa'i phyir na rgyal po zhes bya'o/ /de dag kun kyang mthing ga dang/ dkar po dang?/ ser po dang/ ? ? rgan dang/ ljang gu'i mdog tu 'tshar ba zhes bya ba ni/ rang bzhin las 'das pa'i phyir smos te/ ye shes kyi rtsal ma 'dres pa nyid cir yang snang bas blta pas mi ngoms pa'o/ /de dag gdul bya'i snang pas gnyis su 'gyur te/ thal ba'i rgyud las/ mtshan nyid kun bcom bde chen po/ /rang gi ngo bo ma grub pa/ /rang bzhin lhan cig skyes pa'i phyir/ /bcom ldan de bzhin gshegs zhes bya/ /gzugs sogs lhag pa'i thig le ni/ las dang yon tan sngon ldan phyir/ /rigs kyi bdag po nyid du brjod/ /bcud lnga khu ba'i thig le ni/ /rgyu dang gnas kyi kha dog ldan/ /ro dang las kyang rang bzhin te/ /rang gi mtshan nyid kun tu snang/ /sa 'byung ngo/ /btsun mo zhes pa nas sogs zhes pa'i bar du ni/ gang zhig spyad par bya ba ni btsun mo ste/ de dag yon tan gyi rtsal khyad par du gyur pas so/ /nam mkha' la sogs pa smos pa rjes su mthun te/ rgyur gyur pa ni skabs kyi dbyings so/ /bsdu ba ni tshogs dang mthun pa ste/ rgyud 'di thams cad du khas len pa'i phyir/ /bud med kyi dkyil na gsung brjod pa med par yang bzhugs so/ /chos kyi dbyings zhes pa nas/ zhugs pa'i bar ni/ dpes 'khor gyi tshad ston pa ste/ rang bzhin mngon du byas pa dang bdag nyid chen po'i phyir/ sel med pa ni tshang kho na'o zhes bya'o/ /de dag yang thal pa'i rgyud las/ /mkha' sogs nang gi 'byung las snang/ /ye shes 'byung lnga'i las dag gis/ /skyed phyir dbyibs su brjod pa ste/ /btsun mo'i dngos por de 'dod do/ /thig le snod kyi khyad par gyis/ /til gang lta bur mkha' gang ba/ /dkyil 'khor chogs chen brjod mi lang/ /zhes 'byung ngo/ /de nas byang chub chen po zhes pa nas/ myong bar bya ba zhes pa'i bar du ni/ 'di na ma rig pa khyad par gyis 'khor te/ gdul bya las mthar thug pa ni drug pa'i sangs rgyas kyi zhing du 'gyur te/ de dags gzhan las khyad par gyur pas chen po ste/ lta ba'i sgrib pa 'joms pa'i phyir/ las kyi rdo rje'o/ /mig la sogs pa smos pa rjes su mthun te/ sa'i snying po dang/ nam mkha' i snying po dang/ spyan ras gzigs dang/ phyag na rdo rje de dag /la se dang ma? le dang/ glu dang gar dang ldan par bzhugs so/ /byang chub chen po rdo rje mthong byed ces pa nas/ ma byon pa bya ba'i bar du gzhan ni bshad zin te/ dus ni dbang po dangs ma'i las kyi yul gnang ba'i go 'byed pa'i phyir te/ thabs dang shes rab tu smos so/ /de dag kyang byams pa dang/ sgrib sel dang/ kun tu bzang po dang/ 'jam dpal rnams/ spos me dang/ me tog mar me bsil byed mar ldan pa'o/ /yang thal ba'i rgyud las/ mig sogs rang gi thig le ni/ /las dang ngo bo 'bras bu'i phyir/ /sems dpa' chen po nyid du brjod/ /nyes zad byed phyir rdo rje ste/ /rang gi gnas kyis phye ba'o/ /gzugs sogs nang nyid phyir snang ste/ /rang gi rtsa bcud bcas pa las/ /bde ba bskyed pa'i btsun mo'o/ /dus ni rlung gis go phye ste/ /byams pa la sogs ye shes bzhi/ /de bde rim pas skye ba yang/ ting 'dzin dbang du nges par gsungs/ zhes 'byung ngo// //'joms pa chen po reg pa zhes pa nas/ bzhugs so zhes pa'i bar du ni/ sku gsung thugs kyi 'phrin las kho na'i phyir te/ /gnod sbyin la sogs pa las khyad par du gyur pa'o/ /lus kyi reg pa la sogs pa ni gsang ba'i khams te/ gzhan yang dor ba ma yin no/ /rtag ba la sogs pa ni/ dngos po rnams la phyin ci log par 'dzin pa'i phyir 'brel pa ste/ smos pa ni/ rjes su mthun pa dang/ de dag mi gnas par byed pa'i phyir ro/ /de dag kyang gshin rje gshed dang/ stobs po che dang/ rta'i rgyal po dang/ bdud rtsi 'khyil pa rnams su yum? dang 'khril bas rngam las zhal phyir bltas pa'o/ /gnyis su med par bzhugs so zhes bya ba ni/ rang bzhin dang thun mong min pa dang/ bdag nyid chen po dang/ gnas kyi phyir bzhag pa'o/ /thal ba'i rgyud las/ gsang yul dbang po rnams shes reg / lus kyi chos bzhi 'dus spyad pas/ /ma lus 'joms phyir khro bo ste/ /mtshan nyid las kyis phye ba yin/ /gsang gsum thabs kyi spyod pa nyid/ /rtag sogs mtshan mas las bskyed phyir/ / btsun mo zhes su bstan pa ste/ las kyi skabs kyi mi gnas pa'o/ zhes 'byung ngo// //de nas de bzhin gshegs pa btsun mo'i tshogs dang/ gnyis su med pa'i gsang ba'i dkyil 'khor de dag nyid kyi gsang ba 'di nyid ces bya ba ni/ 'di nas gleng gzhi sdud pa ston te/ thabs dang shes rab 'byor pa'i bde ba chen po la/ 'bras bu ril lhun gyis grub pa ni/ dka' ba'i phyir thun mong ma yin pas gsang ba'i dkyil 'khor te/ de bzhin gshegs pa de dag gi ngo bo ni snang ba gsum mi phyed pa'o/ /de nye bar mtshon pa ni 'og nas ston pa'o/ /sku gsung thugs yon tan 'phrin las rdo rje las phyung ngo/ /zhes bya ba ni/ lnga'i ngo bo rigs lnga ste/ de dag gcig dang du ma bral bas mi phyed pas rdo rje ston pa'i ngo bo yang yin la/ gdul bya'i snang bas 'chad pa'i skyes bu ni/ rigs lnga kho na'i phyir rdo rje ste/ de las mngon du snang ba las phyung ngo/ /e e ma e ma'o zhes bya ba ni/ ston pa dang/ gnas dang/ 'khor khyad par du gyur pa la dam pa ste/ rang rig pa nyid gsum gyi khyad par snang ba la dam pa gsum mo/ /de bzhin nyid kyi dbyings nyid/ ces bya ba ni/ gnas kyi rang bzhin ston te/ de yang sems nyid lhun gyis grub pa'i de bzhin nyid dang/ mnyam pa nyid kyi dbyings su ye nas gnas pa'o// dbang sgyur zhes bya ba ni/ ston pa'i ngo bo ste de yang don gong ma de yid byed pa por 'byung gi ye shes kyis rtogs par mnga' mdzad pa'o/ /ye shes kyi dkyil 'khor thugs rje'i dang/ zhes bya ba ni/ ston pa'i rang bzhin te/ de yang rtogs ba'i rig pa nyid ye shes lngar gsal ba'i bye brag rnams las 'bras bu'i chos ril du snang la dus gsum gyi chos kun tu rgya ma chad pas/ thugs rjes 'brel pa'o/ /rang snang ba nyid ces bya ba ni/ gnas kyi ngo bo ston te/ de rtogs pa'i rig pa la 'bras bu sku dang ye shes thams cad rdzogs pa nyid rtsal ma 'gags par rang snang ba ni gru bzhi glo 'bur dang dbyibs dang kha dog sna tshogs su snang pa'o/ /ting 'dzin zhes bya ba ni/ sgo bzhi ste/ de yang stong pa nyid la sogs pa'i ting nge 'dzin bzhi'i sgo nas 'jug pas/ sgo bzhir bsgom pa yang/ theg pa brgyad kyi sgo nas mtshon dgos pa'i phyir te/ de'i gzugs brnyan ni rta babs brgyad do/ /sgyu ma rnam dag gsal ba zhes bya ba ni/ gdan de rtogs pa'i rig pa sgyu ma nyid stobs la sogs pa 'bras bu'i chos su snang bas seng ge la sogs par bsgom pa'o/ /rnam dag ni thams cad rang rig pa'i phyir spyad kyang mi gos pas pad+mar gyur pa'o/ /gsal ba ni zhes bya ba ni/ ma skyes pa'i ye shes nyid thabs dang shes rab tu gsal pas nyi zlar bsgom pa'o// // der ci zhig bsgom snyam pa la sku gsung thugs yon tan 'phrin las zhes gsungs te/ skyes bu dang 'khor te/ phung po dang 'byung ba dkar dag pa rigs lnga yab yum du bsgom pa'o/ /sel med pa zhes bya ba ni/ 'khor gyi tshad de/ de yang phung po dang 'byung bas ril bsnas pas thams cad kyang sku dang ye shes ngo bor gyur pas khyab pa ni til gyi gang bu ltar spyod yul yongs su dag pa kho na'o/ /yon tan yid bzhin rin po che zhes bya ba ni/ sku mdog ste phyag rgya chen por gsal ba de dag ma 'dres par don mdzad pa'i phyir/ rin po che tshon she'ang du bcug pa ltar gsal bar bsgom pa'o/ /mi zad par ldan rgyan gyi 'khor lo zhes bya ba ni/ rig pa khyad par gyi 'khor te/ de yang de dag phye ba khams la sogs pa'i tha snyad ril sku dang ye shes kyi dkyil 'khor du gyur pa ni/ /rgyas par phye ba/ grangs las 'das pas/ brjod kyis mi lang ba dang gnyis su med par bzhugs so/ zhes bya ba kho na'o// //rdo rje mchog gi gnas nyid do zhes bya ba ni/ gleng gzhi'i nges tshig ste/ de yang rdo rje theg pa'i rgyud kyi mchog gi gnas ni gsum po tshogs pa las 'byung yang/ sku gsung thugs kyi rdo rje'i 'bras bu ni/ tshig bzhi sa mtshon pa'i ting nge 'dzin las byung ba'i phyir ro/ /rdo rje gsang ba'i tshig tu'o/ zhes bya ba ni snang ba gsum mi phyed pa ni rdo rje ste/ nyams su len pa de dka' ba mtshon pa'o/ /gleng gzhi'i le'u zhes bya ba ni/ gleng ba ni brjod pa ste/ bya ba dang byed pa gnyis kyi rtsa ba ni ston pa la sogs pa tshogs pa kho na'o/ / le'u dang po mdor bkrol ba'o/ / //de nas bcom ldan 'das byed pa po rdo rje yid kun tu bzang po zhes bya ba ni/ de ma thag par skabs 'byed pa ste/ rgyu bstan nas rgyud kyi rkyen gnyis las/ thun mong ma yin pa'i gleng bslang ba gsang ba'i dbang ston pa'i phyir ro/ /yid kyi skabs kyis rtog pa dang ye shes kyi bdag nyid kyi bying? 'khor ba dang mya ngan las 'das pa gnyis ka'i byed pa po'o/ /de yang ltos pa'i kun brtags pa can rnams kyi yang rgyu rkyen las snang bar 'dod pa las khyad par du gyur bas rdo rje yid de/ gang 'dus ma byas pas skye 'jig dang bral ba'i phyir ro/ /de nyid ma stsal bar rang snang bas/ thams cad kyang ye shes kho na bas spang bya mi dmigs pa'i phyir kun tu bzang po'o/ /de nyid drug par snang pas don las mtshan brtags pa'o/ /thams cad ma lus pa'i rang bzhin gyis tshul rdo rjes zhes bya ba ni/ byed pa po'i phyir gang byas pa ril gyis rang bzhin rang rig pa'i ye shes su tshul gcig la/ der snang ba'i rgyal ba ril yang drug bar tshul gcig pas/ mi phyed pa ni sku gsung thugs rdo rje'i bdag po'o/ /btsun mo bya ba mo chos kun tu bzang mo la 'jug par gyur te/ zhes bya ba ni/ yongs su shes par bya ba nyid ni/ 'dus byas pa dang 'dus ma byas pa'i chos ril sems nyid kyi phyir spang bya mi dmigs nyid rang snang ba ni phyag rgya chen po'i gzungs te/ de la de skad ces bya'o/ /snyoms par 'jug pa ni/ gdul bya'i snang ba'o/ /zhugs pas phyogs bcu dus bzhi'i de bzhin gshegs pa ma lus pa thams cad gcig gi rang bzhin du dbyer med pas zhes bya ba ni/ 'byung ba ma nges pa'i de bzhin gshegs pa ni 'gro ba ril yang 'gyur bas thams cad kyang lhan cig skyes pa'i ye shes su gsal ba la/ gnyis pa mi snang ba'i phyir ro/ /de bzhin gshegs pa nyid la nyid ched du brjod pa 'di brjod do zhes gsungs te/ brjod pa dang 'dra'o zhes bya'o/ /e ma'o zhes bya ba ni/ dam pa ste 'dod chags kyi sgo nas spyod yul yongs su dag pa'i phyir ro/ /myong ba nyid la dam pa de gang yin snyam pa la/ rdo rje phung po yan lag ni/ zhes pa la sogs pa gsungs te/ lnga phung gi rgyu ni rang rig pa'i ye shes rdo rje'o/ /rkyen ni aoM dang mUM 'brel ba'i rdo rje dril bu'i sa bon no/ /rgyu rkyen gnyis kyi phyir/ ngo bo nyid snang stong mi phyed pa'i rdo rje ste/ de dag rang gi yan lag brgyad cu dang bcas pa nyid/ rdzogs pa'i sangs rgyas lnga ru grags zhes bya ba ni/ spyir sangs rgyas dang yang dag par rdzogs pa'i sangs rgyas las/ sku gsum thob pa dang/ sku lngar lhun gyis grub pa'o/ /de ni lam 'dris 'bras bu mthar phyin pa'i ?? grags pa ni gsal ba'o/ /skye mched khams rnams mang po kun/ /byang chub sems dpa' i dkyil 'khor nyid/ ces bya ba ni/ skye mched dang khams ni/ mig la sogs pa bco lnga'o/ /rnam grangs kyi sgra ni dus bzhi dang/ phyin ci log bzhi dang/ reg pa dag pa'o/ /de dag rig pa rang snang bas rdo rje'i phyir sems dpa' dang sems ma bcu drug go /khro bo yang 'dul ba'i skabs kyis sems dpa' dang sems pa'o/ /sa chu spyan dang mA ma ki /me rlung gos dkar sgrol ma ste/ /nam mkha' dbyings kyi dbang phyug ma/ zhes bya ba ni/ nang gi dangs ma ye shes kyi 'byung ba nyid brtags pa'i dbang gis nam mkhas 'phangs pa snang ba de dag rang rig gi phyir snang stong gnyis su med pa'i ye shes so// de dag las kyis yum kho na'o/ /srid gsum ye nas sangs rgyas zhing/ zhes bya ba ni/ khams gsum gyis bsdus pa ril chags pa dang gnas pa dang 'jig par snang ba de dag kyang/ rang rig gi phyir/ sku gsum gyi ngo bo nyid du gyur pa'i phyir/ zhing khams yongs su dag pa'o/ /thams cad ma lus pa chos so cog /sangs rgyas nyid la gzhan ma yin/ zhes bya ba ni/ de dag gis mtshon nas ji snyed pa yang/ ming dang/ las dang/ dngos po dang/ mtshan nyid tha snyad bzhir bsdus pa'i ril/ rang rig gi phyir sku dang ye shes su dkar dag pas/ brtags pa'i tha snyad de dag /dngos po rnams kyi ngo bo nyid de la btsal na/ de bzhin gshegs pa'i spyan gyis kyang ma gzigs pas/ sangs rgyas nyid las gzhan ma yin btsal kyang rgyal bas mi brnyed do/ zhes gsungs so/ /thal ba'i rgyud las/ thabs lam bde ba'i gnyer dag gis/ /rtags pa rang gi rtog pa zlog /dngos po rnams kyi ngo bo las/ /bzlog bya bas kyang ma gzigs so/ zhes gsungs so/ /de bzhin gshegs pa thams cad mnyes par gyur to zhes bya ba ni/ rang bzhin gnyis su med pa'i 'khor rnams so/ /de nas zhes pa nas/ bzang po dang zhes pa'i bar du ni go sla'o/ /gnyis su med par gyur nas zhes bya ba ni/ thig le gnyis su med pa ste/ dgongs pa yang bsdu'o/ /yab yum gyi las dang myong ba dang/ tshig 'di dag yi ge snga phyi yod kyang dus mnyam par gsungs so/ /kye ma'o zhes pa ni bod pa dang dam pa ste/ bde ba gzhan la bstan pa'i phyir ro/ gcig ni rjes su mthun no/ /phyogs bcu stong khams ye nas dben/ zhes bya ba ni/ kun gzhi nyid tha snyad gnyis kyis bsdus pa'i don dang sems can du snang bas de dag nyid kun gzhi ma skyes pa'i ye shes kyi phyir chos kyi sku ste/ de la bcu gsum la sogs pa'i tha snyad thams cad gdod nas stong pa kho na'o/ /srid pa gsum ni dag pa'i zhing/ zhes pa bshad zin to/ /snyigs ma lnga nyid bde ldan gnas zhes bya ba ni/ dus dang sems can dang tshe dang las dang nyon mongs pa rnams tham pa'i phyir snyigs ma'o/ /de nyid brtags pa'i phyir glo bur ba yin pas/ rang bzhin nyid ni myong yang ma dmigs pas bde ba chen po'i rol pa kho na'o/ /phung po lnga ni mngon sangs rgyas zhes bshad zin to/ /thams cad mchog gi snying po bas/ zhes bya ba ni/ bshad pa'i dngos po bzhi bsdus pa ril yon tan du bstan pa ni 'bras bu'i mchog ste/ bsgrub bya'i snying po'o/ /gzhan du rgyal ba'i zhes pa nas/ mi bsnyes so zhes pa'i bar du ni go sla ste/ chos bzhi po'i rang bzhin las 'bras bu gung nas mi rnyed pa'i phyir ro/ /thams cad ye nas sangs rgyas par de bzhin gshegs pa nyid kyis mkhyen to/ zhes bya ba ni/ snyoms par zhugs pa'i 'bras bu de 'khor rnams la byin yang nyid la gsal pa nyid gzhan la mi snang ba'i phyir nges tshig tu 'gyur ro/ /de nas de bzhin gshegs pa gnyis su med pa'i bdag nyid chen pos/ zhes bya ba ni/ thams cad mkhyen pa'i dbang dang/ shin tu brtan pa'i dbang gis las thun mong du brten to/ /gnyis su med pa ni thig le ste/ dgongs pa yang mi 'dod pa ma yin no/ /sngon nas snyoms par zhugs pas mnga' mdzad pa'i phyir bdag po'o/ /ye nas sangs rgyas pa'i sems ye shes su bskyed pa 'di zhes bya ba ni/ de'i dngos po nyid yab yum gnyis kyis mkhyen pa gang yin pa de'o/ /de la 'khor gyi sems/ rang bzhin lhan cig skyes pa'i ye shes snang bar bya ba yang rim pa lnga yis bskyed par bya ba'i thabs kyi rim pa 'di zhes bya ba kho na'o zhes bya'o/ /de la sems lnga ni bka' tshad ma las/ g.yo dang smon pa la sogs pa lngas 'bras bu mthar phyin par gsungs pa de dag / skabs 'dir rgyas pa las/ 'jig dang ldang dang gnas dang smon pa yi/ /g.yo dang 'gro 'od 'jug dang bde gnas pa/ /gsang pa'i dbang po pad mas thob par 'gyur/ zhes 'byung bas/ thabs kyi rim pas sems lnga rdzogs par ston te/ e ma'o ngo mtshar rmad kyi tshes/ zhes bya ba ni/ dam pa ste spyir 'gro'o/ /gang la ngo mtshar chen/ 'dod chags kyi spyod pa nyid/ dka' tshad ma las rmad du byung ba'i byang chub sems lngar snang ba ni/ thabs kyi theg pa chen po'i chos so/ /rdzogs pa'i sangs rgyas kun gyi gsang/ zhes bya ba ni/ 'dod chags kyi byang chub ni/ drug pa'i sangs rgyas kyi rgyu dang ngo bo nyid kyi phyir phal gyi spyod yul ma yin pa'o/ /skye ba med las thams cad skyes zhes bya ba ni/ g.yo ldang gi byang chub sems te/ thig le rang gi gnas dang lam nas ldang ba'i tshe bde ba mnyam du g.yo ba'i phyir ro/ /rang bzhin gyi ye shes ni skye 'jig smon 'jug ril dang bral ba ste/ de ni gzhi dang bsgrub bya ste/ lnga'i spyir shes par bya'o/ /skyes pa nyid na skye ba med ces bya ba ni/ de'i ro yang rang bzhin las ma 'das pa'i phyir ro/ /e ma'o zhes pa la sogs pa gzhan ni bshad zin to/ /'gag pa med las thams cad 'gag /ces bya ba ni/ 'jig pa dang 'jug pa byang chub sems te/ sa bcu drug pa ni phyi ma phyi ma thig le 'jug pa'i tshe/ snga ma'i 'dod chags kyi ro 'gag pa'i phyir ro/ /'gag pa nyid na 'gag pa med ces bya ba ni/ ye shes kyi ro ni skad cig ma'i rgyun tu 'phel ba'i phyir/ mi 'gag pa kho na'o/ /gnas pa med pas thams cad gnas zhes bya ba ni/ gnas pa byang chub sems te/ thig le bcu drug gi ye shes la gnas pa med pa'i tshul gyis gnas pa'i phyir ro/ /gnas pa nyid na gnas pa med ces bya ba ni/ ye shes rang snang ba'i phyir/ yul dang bral bas gnas bca' ru med 'bras bu la lam du byed pa'i phyir ro/ /dmigs pa med las thams cad dmigs/ zhes bya ba ni/ smon pa byang chub sems te/ ye shes snga ma la gnas bzhin tu/ sa'i dbang gis phyi ma 'dod pa kho na'o/ / dmigs pa nyid na dmigs pa med ces bya ba ni/ skyes bu thal ba nyid kyang/ rang rig pa'i phyir rkyen tsam ste/ gzhan nas thob pa med pa'i phyir ro/ /'gro 'od med las 'gro dang 'od zhes bya ba ni/ 'jug pa byang chub sems te/ dang la thun mong gi lam du 'jug pa ni/ 'gro ba'o/ /theg pa chen po'i lugs kyis rgyu 'bras bzlog pa ni 'ong ba zhes bya ba kho na'o/ /'gro 'od nyid na 'gro 'od med/ ces bya ba ni/ lam 'dis 'bras bu mngon du byed de/ sngon gyi gnas rjes su dran pa'i mngon par shes pa'i phyir dang/ gang du yang phyin pa med pa kho na'o/ zhes bya'o/ /sems 'di dag sa gcig la yang tshang ba'i phyir/ dus gcig tu skye bar 'gyur ba'i phyir/ cig car 'jug pa'i lam zhes bya'o/ zhes brjod pas zhes bya ba ni/ thabs lnga po des zhes bya'o/ /de nas de bzhin gshegs pa thams cad dang/ btsun mo'i tshogs thams cad mnyes pas khyab par gyur to/ zhes bya ba ni/ sems bskyed pa'i thabs lnga'i sgo nas ma 'ongs pa'i de bzhin gshegs pa/ sems dpa' dang sems ma ril gyis phun sum tshogs pa lnga lhun gyis grub ste/ rang bzhin gsang ba'i snying po mngon du byas nas/ /sku dang ye shes bzhi bcu rtsa lngar mthar phyin nas rdo rje gsang ba'i gral du 'khod pa ni dgyes pa chen po'i phyir/ rgyas pa'i rgyud las/ dkyil 'khor bzhi bcu rtsa gnyis dang/ /phun sum tshogs pa'i lhun grub rnams/ /gsang dbang mchog gis 'byin par byed/ ces 'byung ngo// //de nas de bzhin gshegs pa btsun mo'i tshogs dang bcas pas/ ched du brjod pa 'di brjod do/ zhes bya ba ni/ 'di nas mar thun mong gi gleng bslang bstan pa mdza' dag zhus pa ston te/ 'bras bu mthar phyin pa'i de bzhin gshegs pas so/ /e ma'o ye nas gsang ba'i chos/ /sna tshogs snang la rang bzhin gsang/ /ngo bo nyid kyis rab tu gsang/ /gzhan du min las shin tu gsang/ zhes bya ba ni/ bshad zin te/ rang bzhin gsang ba'i snying po 'bras bu khyad par can 'di lta bu/ gsang ba bzhis chod pa'i phyir/ rdo rje 'dzin pa'i zhal dang dbang ma mthong ma thos pas mngon du mi nus pas lam stegs gzhan la blo sbyangs pa mdza' i phyir/ lam gyi rgyud dang thun mong pa'i chos rnams bshad du gsol zhes zhus pa'o/ zhes brjod pas de bzhin gshegs pa thams cad dang chos thams cad ye nas sangs rgyas pa'i ngo bo nyid du gcig pa'i mtshan nyid yin pas dbyer med na/ zhes bya ba ni/ 'di nas mar gnang ba ston te/ de bzhin gshegs pa smos pa'i phyir chos ni 'bras bu ma gtogs pa ste/ rang bzhin dang/ mtshan nyid dang/ 'khrul pa dang lam dang tha snyad kyis bsdus pa'o/ /de dag ril sems nyid pas mdza' dang bral ba'i rig pa brdal khyab chen po'i ngo bo gcig pa ste/ yang dag pa'i chos kyi sku'i mtshan nyid yin pas/ rang gi ngo bo cir yang mi g.yo ba'i phyir ro/ /'gro ba'i rnam par rtog pa ma rig pa las/ 'gro ba lnga'i ris bsam gyis mi khyab par smin pa la zhes bya ba ni/ 'gro ba ni lnga ste/ de'i phyir las dang nyon mongs pa yang lnga'o/ /de dag gi rtsa ba ni ma rig pa gnyis kho na las byung bas de la de skad ces bya'o/ /de dag nang rigs ni mang ste/ khams gsum gyi lha yang nyi shu rtsa bdun la sogs pa'i phyir ro/ /thugs rje chen po sangs rgyas kyi zhing chen po skyes nas zhes bya ba ni/ spros pa dang bral ba'i rig ba thams cad du mnyam par khyab pa ni thugs rje chen po'o/ /de nyid gang dag gsang ba bzhis chod de/ nyam thag pa nas gzhan du tshol ba de dag la yang snang ngo/ /thams cad mkhyen pa'i ye shes ni byang chub sems dpa' las khyad par gyur pas chen po'o/ /de dag skyes pa ni gdul bya'i snang bar brjod do/ /e ma bder gshegs snying po las/ zhes bya ba ni/ gcig la gnyis la sogs par 'khrul pa ni ngo mtshar te/ de bzhin nyid la spros pa'i zug rngu med pas bde ba ste bshad zin to/ /snying po ni gnyis te/ kun gzhi gnyis so/ /de sbyor ba ni snang bar byed pa'i go 'byed pas so/ /gzhi ni 'bras bu thams cad lhun gyis grub pa'i phyir/ de bzhin gshegs pa'i chos thams cad kyi ngo bo nyid kyi phyir ro/ /de dag rang gi ngo bo nyid ma shes pa ni lhan cig skyes pa'i ma rig pa ste/ de bzhir gyur pa las she'o/ /rang gi rnam rtog las kyis sprul zhes bya ba ni/ rgyu des sbyor ba la bdag tu gzung ba'i ni rang gi rtog pa ste/ de las kun tu brtags pa'i nyon mongs pa skyes pas/ de la las sna tshogs sbyang pas glo bur du snang ba'i phyir sbrul pa'o/ /de nyid ji lta bu snyam pa la/ sna tshogs lus dang longs spyod dang/ /gnas dang sdug bsngal la/ sogs pa/ zhes bya ba ni go sla ste/ sdu ba ni las dang nyon mongs pa'o/ /bdag dang bdag gir so sor 'dzin/ zhes bya ba ni bshad pa nyid la ste/ des yang 'khor te/ nyam thag go /de sus byas snyam pa la/ sus kyang ma bcings bcings med de/ bcing bar bya ba yod ma yin/ zhes bya ba ni/ byed pa po lta bu dang zhags pa dgra bo gsum ni dang gis med do/ /'o na gang gis nyes snyam pa la/ rnam rtog bdag tu 'dzin pa yis/ /nan gyis mkha' la mdud pa dor/ zhes gsungs te/ bshang pa'i rgyu rkyen gyis de dag tu snang ba ni/ dper thang phrom gyi 'bras bu zos pa'i mis/ nam mkha' la gzugs sna tshogs mthong nas mdud pa byas pa lta bu'i phyir ro/ /bcings med rnam par grol med pa'i/ zhes bya ba ni/ lung las/ bcing bya bcing byed bcings pa'o/ /bdag 'dzin sems can sdug bsngal rngos/ /thams cad sems kyi ngo bo'i phyir/ /bdag 'dzin zhes bya ming yang med/ /des na gnyis po 'ang med pa la/ /grol ba bo yang yod ma yin/ zhes 'byung ste/ de ni go sla'o/ /ye nas lhun rdzogs sangs rgyas chos zhes bya ba ni/ thams cad rang rig pa'i ye shes su brdal ba ni bdag la sogs pa/ rang bzhin gyis stong pa nyid sku dang ye shes su gsal bar sangs rgyas kyis chud pa dang/ ngo bo nyid kyi phyir ro/ /de nges par mtshon pa'i gsang ba'i snying po 'di nyid bshad par dgyes pa'i tshul drug mdzad pa dang/ 'di'i lam stegs kyi theg pa gzhan bstan pa'i phyir sprul pa drug la sogs pa spros pas/ bstan phyir spro pa sna tshogs mdzad/ zhes gsungs so/ /de bzhin gshegs pa nyid de bzhin gshegs pa nyid la ched du gleng ngo/ zhes bya ba ni/ dpang rdzogs pa'i ril drug pa nyid du gyur pa'i phyir ro/ / don dam pa dang kun rdzob kyi byang chub kyi sems ye shes su bskyed pa zhes bya ba ni/ rang gi ngo bos thams cad du yang mi phyed pa ni don dam pa ste/ skabs kyis rang bzhin dang/ ye shes dang/ 'bras bu don dam pa'o/ /de dag bsal bas tha dad kyang ngo bos gcig go / de nyid sems lnga'i rim pas phyin ci ma log pa las snang la/ gdul bya'i dbang gis tha dad du snang ba ni kun rdzob ste/ rgyu rkyen dang ltos pas snang ba ste/ ngo bo bshad zin to/ /le'u gnyis pa mdor bkrol ba'o// // de nas bstan pa spyi'i gleng gzhi bstan pa'i phyir/ de nas de bzhin gshegs pa thams cad las zhes bya ba la sogs pa gsungs te/ rgyu dum bur gyur kyang rim lam nor pa kho na'i phyir/ de nas zhes bya'o/ /drug pa'i ston pa ni sangs rgyas kun gyi spyi gzugs can gyi phyir ril du yang 'gal pa med do/ /thugs rje chen po'i byin brlabs zhes bya ba ni/ spros pa dang bral ba'i rang 'byung ye shes ni dngos po ril la khyab pa'i phyir/ thams cad rang 'byung gi ye shes su lhun gyis grub pa nyid gdul bya'i snang ba cing yang mi 'gag pas/ de la de skad ces bya'o/ /rig pa'i skyes bu thub pa drug ces bya ba ni/ gzhan dag las/ rang gi lus ngag yid rdo rje/ mi phyed pa'i ngo bo ste/ rig par bcas dang ldan par ni/ /rig pa'i skyes bu zhes su bshad ces pa go sla'o/ /de dag kyang sku stag dang spre'u la sogs pa ltar mi mdzad pa dang/ ca co spangs pa dang/ mnyam par bzhag pa mi mnga' ba'i phyir thub pa ste/ las kyang mi 'dod pa ma yin no/ / grangs ni gdul bya'i dong? nges pa kho na'o zhes bya'o/ /de dag gi gzhi gang las snyam pa la/ de bzhin gshegs pa'i sku gsung thugs rdo rje las 'thon to/ zhes bya ba ni/ lugs kyis thabs dang shes rab gnyis su med pa'i byang chub sems ni yongs su rdzogs pa'i rgyur gsungs so/ /de yang ma g.yos par bkod pa ni zla ba dang chu zla lta bu'i phyir/ 'thon ces tha snyad du 'dogs so/ /de dag gang du ci mdzad snyam pa la/ 'thon nas kyang las kyi dbang gis snrel zhi dang yan man gyi 'jig rten drug gi phyogs bcu mdza' yas mu med pa'i stong gsum gyi stong chen po re rer thub pa chen po bcom ldan 'das re res zhes bya ba ni/ las mi mthun pas snang ba'i gnas ljing so so drug tu gnang pa'i phyir/ 'jig rten drug kha na ste/ de yang drug po ni longs spyod rdzogs pa'i phyir zhing khams mu med la sprul pa'i zhing nges pa ni gdul bya'i snang bas thun mong mthun par bkod de/ ril yang bdag gi las ma chad do/ zhes bya ba kho na'o/ /'dul ba rnam pa bzhis/ 'gro ba lnga'i don mdzad de/ zhes bya ba ni/ grangs ni dkyus las gsal lo/ /'gro ba lnga ni bsdus pa ste drug kho na'o/ /de la skus 'dul ba bstan pa'i phyir/ bltams pa dang/ zhes pa la sogs pa mthar thug pa ni/ drangs pas dga' ldan nas babs par zer ba ni/ bden mod kyi byang chub sems dpa' dbang thob pas mthar phyin pa'i phyir 'gal ba med de le'u slad nas 'byung khungs smos pa'o/ /mthun par bstan pa'i phyir/ lhums su zhugs pa dang/ bshung ba spang pa'i phyir mchan khung nas bltams pa dang/ rol rtsed mdzad pa dang/ khab bzhas pa dang/ gzhan ni go sla'o/ /bsdu ba ni sbyangs te sku gdud brgyad du bgos pa'o/ /thugs kyis 'dul ba gang yin snyam pa la/ dus bzhi kun tu mkhyen pa dang zhes pa la sogs pa gsungs te/ sngon gyi gnas la sogs pa mkhyen pa'o/ /thams cad kyi sems kyi rgyud mkhyen pa dang zhes bya ba ni/ pha rol gyi sems kyi nyon mongs pa dang/ rtog pa ril bdag las mi gzhan pa'i phyir mkhyen pa'o/ / rdzu 'phrul gyi spyan dang snyan zhes bya ba ni/ lta'i mig dang rna ba ste go sla'o/ /rdzu 'phrul gyi cho ga ni/ rdzu 'phrul gyi bya ba shes pa ste/ mi mthun pa brgyad la sogs par ston pa'o/ /zag pa med pa kun tu bzang po'i spyod pa rdzogs pa/ zhes bya ba ni/ de dag 'jig rten pa la yod pa 'dzin pa'i phyir zag par 'gyur la/ 'dir thams cad kyang gsal la/ bdag nyid kyi phyir mi 'dzin pas ma spangs la ma bral ba'i phyir ro/ /bsam gyis mi khyab pas 'dul ba bstan pa'i phyir/ kun tu sku bsam gyis mi khyab pa dang/ kun tu thugs bsam gyis mi khyab pa dang/ kun tu zhal bsam gyis mi khyab pa dang/ kun tu gsung bsam gyis mi khyab pa dang ldan pa zhes bya ba ni/ dus dang gdul bya gang yang ma bkol bar/ de dag gang gi ngo la khro bo dang 'phra men la sogs pa sku gsung thugs kyi dngos po dang mdzad pa gang du yang ma nges te/ thams cad du snang bas/ gzhan dag las/ res 'ga' zhi la res drag /res 'ga' gdon chen bgegs mdzad de/ /de la sogs te mdza' yas mchog / ri dang skye bo thams cad do zhe'o/ /grangs med pa phyogs bcur snang bar gyur to/ zhes bya ba ni/ gdul bya'i snang ba dang lhun gyis grub pa'i rol pa mi 'gag pa kho na'i phyir/ de dag la yang/ sprul zer ba ni kha bkang ba'o/ /gsung gis 'dul ba bston pa'i phyir/ thams cad kyang 'di lta ste 'dul ba'i dbang gis zhes bya ba nas mar ni go sla'o/ /de dag gi dgos ched ni/ spros na du yod snyam pa la/ ma rig pa'i rnam par rtog pa nyon mongs pa stong phrag brgyad cu rtsa bzhi'i gnyen por chos stong phrag brgyad cu rtsa bzhi gsungs so/ /gsung ngo/ gsung bar 'gyur ro/ zhes gsungs te/ rtsa 'am? rig pa gnyis las gyur pa'i nyon mongs pa dang rtog pa de dag gi rtsa ba na dug gsum dang dar bzung ba las gzhan kha dog pa'i phyir bsdu bas gcig ste/ gzhi la nad ris su gcig kyang nyi khri chig stong ste/ de dag gang gis dag par byed pa ni gnyen po ste/ de yang spong ba dang/ sbyong pa dang/ dbang du byed pa'i phyir ro/ /de bas na chos ni phrag gsum du yang snang ngo/ /de ltar dus gsum gyi sangs rgyas kyis mthun par bstan pa kho na'o zhes bya'o/ /gnyen po ji lta bu snyam pa la/ de dag kyang gzung ba dang 'dzin pa'i phyi nang gi rten cing 'brel par 'byung ba zhes pa dang/ las dang las kyi 'bras bu chud mi za zhes bya ba ni/ dge ba bcus lha dang mir nges par 'byung bas mi dge ba bcu spong ba dang/ rdul las spyod yul nges par yod pas 'dzin pa 'gog pas/ gnyi ga yang spong ba'i nyan thos dang /phyi nang gi rten 'brel nges par yod pa'i phyir/ nyon mongs pa 'gog pas spong ba'i rang rgyal ba dang/ de dag ni gnyen po gcig go /'dzin pa 'khrul pa la 'dogs pa dang zhes bya ba ni/ sems 'khrul pa'i rtags pa la gung du yul med pa'i phyir phan tshun ma skyes par shes na/ nyon mongs pa chos nyid du rgyud sbyong ba dang/ las dang las kyi 'bras bus mi gos zhes bya ba ni/ nyon mongs pa rnams sems nyid snang ba'i phyir/ sems ltar snang ba'i dus na spang bya med pa dang/ zhen pa 'dag pa'i kri ya dang yo ga pa kho na'o/ gos par mi 'gyur/ gos su med pa ston pa'i mthar thug go zhes bya ba ni/ bdag nyid kyi phyir nyon mongs pa nyid ye shes su shes pa ni mi mthun pa dang gnyen po med de/ sbyad pa nyid yon tan du snang ba'i thabs kyi theg pa ni rgyu 'bras gnyis su snang ba dang bral ba kho na'o zhes bya'o/ /de dag byung ba ni gsang ba'i snying po'i lam yongs su sbyangs pa'i phyir dang/ byin gyis brlabs kyi phyir bstan to// //de yan chad du rgyud kyi rgyu rkyan tshad nas/ gsum pa'i dang po lta ba bstan pa'i phyir/ de nas de bzhin gshegs pa la sogs pa gsungs te/ go sla'o/ /ji snyed 'jig rten 'khrul pa'i chos zhes bya ba ni/ 'di nas mar la 'khrul ba'i snang ba rgyu rkyen ngo bo gsum ston te/ snod bcud mdza' yas pa'i ris su snang ba'i blo 'khrul pa kho na'i phyir ro/ /de'i rgyu ci snyam pa la/ ma rig rtog pa'i gzung 'dzin gyis zhes gsungs te/ sems nyid rang bzhin gyis 'od gsal ba yin na yang nges pa'i shes pa ma skyes pa ni/ lhan cig skyes pa'i/ ma rig pa'o/ /des nang ru blta ba las nyon mongs pa dang las dang yul sems gzhan du snang ba ni rkyen kho na'o/ phyi nang rten 'brel gnyis su 'khor/ /mi mthun bde sdug myong bar 'gyur/ zhes bya ba ni/ nges na sned bcud dngos su snang bas 'dir 'byung zhing snang ba ni 'bras bu kho na'o/ /rang bzhin nyid las nyams pa med ces bya ba ni/ shes na spang bya mi dmigs pa ni/ rang bzhin gyi snang ba ste/ chos de dag gi rang bzhin ni/ sems nyid kyi sku dang ye shes kho na las 'gyur ba med do/ zhes bya ba kho na'o/ de nges par mtshon par bya ba'i phyir/ yang dag sgyu ma'i tshul gnyis su zhes pa la sogs pa gsungs pa ste/ yang dag sgyu ma ni nges par bden pa gnyis so/ /tshul ni rjes su 'jug pa ste/ mdo snga pa ltar gnyis su phye na zhes bya'o/ /bdag dang bdag gi gzhan med de zhes bya ba ni/ ma rig pa'i de dang/ myong ba'i phung po dang yul sna tshogs su sna ba dag ma grub ste/ ji lta zhe na/ sems nyid chos gsum du snang pas gzhan du ma grub pa ni don dam pa'i tshul lo/ /de dag sems nyid kyi phyir ye shes rang snang bsam bkag pa ni kun rdzob kyi tshul lo/ /de gnyis la de dag ma grub ba kho na'o/ de ni lhag pa'i mnyam pa gnyis so/ /rnam dag dbyings nyid tshul gcig go zhes bya ba ni/ dbyer med par mnyam pa ste/ bshad pa ltar shes nas de la 'ang mi gnas pa ni/ mdza' gnyis dag pas dbyings gnyis las mnyam pa nyid kyi dbyings zhes bya ste/ snang stong gnyis su med pa'i bden pa gnyis tshul gcig pa kho na'o/ zhes bya'o/ 'o na 'khrul pa'i snang bar yang med do snyam pa la/ bdag dang bdag gi gzhan rnams ni/ log par rtog pa tsam nyid las/ phra zhing zab pa yod ma yin/ zhes gsungs te/ chos gsum pa sems nyid las mi gzhan bzhin du/ rang rgyud kyi ris su snang ba ni 'khrul pa'i snang ba'o/ /de tsam ni mi 'gal te de las gzhan pa'i rdzas rdul tsam dang/ rang rgyud kyi skad cig ma gzugs med pa ni ngang? gis med pa kho na'o/ log rtog nyid la nyid spyod de/ gzhan du g.yo ba ci yang med/ ces bya ba ni/ snang spyod 'di ni rtog pa rtas pa snga ma la phyi mas rgyud mthun par spyod kyi/ sems nyid chos gsum gyis ris su gyur pa med do/ zhes gsungs so/ des na log rtog tsam ni nges par yod do snyam pa la/ log rtog rgyu 'bras rgyun nyid kyang/ / gzhi rtsa med dbyings skad cig ma zhes bya ba ni/ rgyu gcig par rtog pa ste/ ma rig pa'i bdag dang/ zhes pa snang ba chos sna tshogs kyang/ skad cig ma'i phyir bshad pa gsum gyi rjes su mthun te/ ji ltar zhe na/ phyi mo nas rang gi ngo bo ma grub ste/ sems nyid kho na'i phyir snang stong mi phyed pa ni bshad pa'i dbyings so/ /de la log rtog gi skad cig gi rgyun ma grub par ril sems su gcig pa kho na'o/ rnam par dag pa dbyings nyid tshul nyid la dbang sgyur nyid spyod phyir/ zhes bya ba ni/ 'di nas mar yig 'bru'i tshul dang dag pa gsum ston te/ bshad ba ltar log rtog gi rgyun ltar dag ste/ rang gi ngo bos sems su 'od gsal bas ma skyes pa'i phyir/ a lta bu'o/ rgyun med par rang rig cir yang snang pa ni ma bcos pa'i skad cig ma ste/ ye nas kho na'i phyir snang zhing spyod kyang gnyis su bya ba med pa ni/ theg pa chen po'i gtan tshigs so/ ma skyes pa nyid ye shes su gsal bas rgyan lta bu'o/ /bdag dang gzhan dang rtog pa'i rgyun/ /rnam dag bla med theg pa'i mchog / ces bya ba ni/ bshad pa'i byin gyis brlabs kyis phung po dang 'byung ba dang bslang pa'i rnam par shes pa gsum so so ba dang gi dag ste/ gnyis su med par gsal ba ni/ rigs lnga yab yum dang/ ye shes lngar gdong nas lhun gyis grub pas rdo rje theg pa zhes kho na'o/ de ni yi ge rdzogs pa lta bu ste/ dag pa gsum du yang 'dogs so/ /theg pa bzhi/ yis nges 'byung la/ /theg pa gcig gis 'bras bur gnas/ zhes bya ba ni/ bshad pa gzhan ni gzhung ma nor na ngan song dang 'khor ba dang mdza' gnyis las 'byung la/ 'das ma thag par ston pa ni/ don mthar thug pa'i phyir 'bras bu kho na'o/ /yang dag rtags pas rab rtags na/ /rang bzhin med las cir yang grub/ ces bya ba ni/ don dam pa gsum mngon du byas pa'i blo can la spyod yul dang bral bar mi snang ba ci yang med pa'i phyir/ mthong ba med pa'i tshul gyis mthong ba zhes pa dang/ rnam rtog mi mnga' cir yang sa le mkhyen zhes pa kho na'o/ /sangs rgyas mya ngan yongs su 'da' zhes pa'i tshig bshad gcig gi don ni bshad pa ltar lhun gyis grub pa la/ ston pa 'byung 'jig dang/ bstan pa dar nub med de ngo bo nyid kyi ma? rtag pa kho na'o/ /mtshan ma bzhir snang ba ni/ dman pa rnams kyi phyir te/ gdul bya'i snang ba kho na'o// snang ba de'i ngo bo dang/ gzhi bstan pa'i phyir/ 'dul pa mdo sde chos mngon dang/ zhes pa la sogs pa ni go sla te/ rgyud 'di'i rgyu rkyen tshad pa'i byin gyi brlabs las/ sde snod gsum dang/ sngags phyi pa gsum dang/ sku gsung thugs kyi rgyud thams kyi ston pa drug dang/ bsam gyis mi khyab pas 'dul ba'i ston pa rnams 'thon nas/ dus mnyam du gsungs shing gtan la phab pa'i phyir ro/ /de ltar na de dag so sor nges so snyam pa la/ chos rnams ming du btags btsam/ /ston pas don dang mthun phyogs su/ /ming dang tshigs su btags nas bstan/ /ston ming tshig la dngos po med ces gsungs te/ chos thams cad rang gi ngo bos ston pa'i phyir/ snang ba gnyis kho na'i ngo bor brtags tsam mo de ltar na/ grub pa'i rdzas su theg pa so so'i lte spyod bsgrub pa la sogs pa ril yang gdul bya'i ngo bo tsam te/ rang gi ngo bo nyid dang/ grangs ni grub pa dang nges pa med do/ zhes bya ba kho na'o/ de dag kyang gdul bya'i snang bas gnyis su 'gyur te/ thal ba'i rgyud las thig le zung 'jug bde ba ni/ sems mdza' ldog pas go phye nas/ /dkyil 'khor drug gi yul rnams su/ /sprul pa'i thig le rab shar ba'i/ /snang ba'i mdzad pa bsam mi khyab/ /chags sogs nyon mongs las rtog ril/ /gdul phyir sprul pa zhes su bshad/ /sgra dbyangs gsung gi bstan pa rnams/ /des par grags pa kho na nyid/ /phung sogs rtog pa'i 'jig rten kun/ /log rtog sgyu ma snang tsam las/ /nyi zla bden gnyis las nyid kyis/ / ma skyes mnyam la gnas 'gyur zhing/ /phung sogs lha'i dkyil 'khor du/ /rang snang rang rig mngon gsum gsal/ /dus gsum du 'ang mi 'gyur phyir/ /theg 'di thabs dang rdo rjer bshad/ ces gsungs so/ /de nas de bzhin gshegs pa thams cad ces pa la sogs pa ni rjes su mthun no/ /a ho zhes bya ba ni/ bshad pa'i dngos po gnyis gtan tshigs gsum gyis ngo bor gcig par grub pas mnyes pa'i phyir ro/ /srid rtsa nyes dmigs bdag du rtogs las 'phros/ /rgyu drug skye 'gag lus dang longs spyod dang/ /gnas dang sdug bsngal 'khrul 'khor la sogs pa/ /log rtog nyid las gzhan du ci yang med/ ces bya ba ni/ bshad pa'i ma rig pa'i bdag dang/ nyon mongs pa la sogs pa rang snang ba'i 'gro ba drug gi spyod yul ril rang rgyud du lta ba'i log rtog gi rgyun kho na'o/ /stong nyid bdag med ye mkhyen rang rig thugs/ /dmigs bya dmigs byed med par dran dbang sgyur/ /ngo mtshar sku gsung yon tan zhing khams las/ /gzhan na med de de nyid de ltar yin zhes bya ba ni/ /'das ma thag pa nyid gsang sngags kyi gtan tshigs gsum pas gzhal ba'i dus na/ log rtog gi rgyun las 'das te mnyam pa'i dbyings nyid ye shes su gsal ba ni/ ye shes nyid la nyid spyod pas shes bya dang shes byed dang gis med la/ rang snang gi ye shes ni yon tan thams cad lhan gyis grub pa las 'dul ba bzhi'i de bzhin gshegs pa ril zhing khams dang mdzad spyod du bcas par/ rang snang ba ni skabs kyi snang ba gnyis kho na'o zhes gsungs so/ thub pa drug gi sprul pa grangs med pa dang/ de bzhin gshegs pa thams cad kyi gsungs pa yang de dag tu 'dus par de bzhin gshegs pa nyid kyis mkhyed to zhes bya ba ni/ 'das ma thag pa nyid go sla ste/ de dag tu le'u ril 'dus pa go sla'o/ chos thams cad gtan la phab pa zhes bya ba ni/ theg pa dgu'i chos ril gsang ba'i snying po'i byin brlabs kyis gtan la thab la/ dngos po gnyis kyis bsdus pa ril snang ba gnyis las kyang 'das te/ gcig kho na de gtan tshigs gsum gyis phab po zhes bya ba kho na'o/ /zhes bya ba'o/ /le'u gsum pa mdor bshad pa'o// //de nas de bzhin gshegs pa thams cad dgongs pa gcig tu gyur nas/ zhes bya ba ni/ drug pa'i de bzhin gshegs pa ni/ gcig dang du mar bral ba'i phyir/ thams cad du 'ang 'gal ba med de/ de nyid gsung lnga lhun gyis grub par snang ba las mi g.yo ba ni dgongs pa ste/ gyur pa ni gdul bya'i snang ba'o/ /de nyid bstan pa'i phyir/ mnyam pa chen po'i tshul rdo rje dbyings su chos thams cad ye nas sangs rgyas pa'i ting nge 'dzin las mi g.yo bar zhes bya ba ni/ snang stong gnyis su med pa ni/ bden pa gnyis kyi mnyam pa las ltos pa ste/ de'i ngo bo nyid ni/ dngos po gnyis kyi bsdus pa ril sems nyid du ma skyes pa ste sku dang ye shes su gsal bar snang ba nyid drug pa'i ngo bo ste/ bsgom bya sgom byed gnyis las 'das pas ting nge 'dzin zhes bya ba kho na'o/ chos thams cad ming tsam du gnas pa'i yi ge phreng ba'i 'khor lo zhes bya ba ni/ dngos po rnams ni ngo bo nyid med pa kho na'i phyir/ ming tsam la de ni yi ge kho na'o/ /yi ge'i rgyun nyid gsung gi dkyil 'khor te/ sku la sogs pa bzhi yang lhun gyis grub pa las rang snang ba'o/ /de dag ni 'di lta ste/ a ka kha ga g+ha nga zhes pa nas/ phyung ngo zhes bya ba ni/ de dag rang snang ba ste/ gnas dang rkyen ni mgur dang ljags kyi dkyil dang rtse mo dang/ zhal gyi sgros dang/ sta zur la sogs pa'o/ /de dag kyang gdul bya'i snang bas gnyis su 'gyur te/ thal ba'i rgyud las/ rang snang sku'i dkyil 'khor la/ /rang bzhin gsung gi dkyil 'khor nyid/ /g.yas dang g.yon gyi dbye ba yis/ /sde tshan brgyad dang byed pa dang/ /khyab 'jug gsum yang de bzhin te/ /rim par bkod par dang snang bas/ /'jig rten 'das dang ma 'das pa'i/ /ji snyed bsgyur ba'i sgra rnams 'byung/ /rgyal ba bzhi bcu rtsa lnga yi/ /ngo bo nyid du 'ang nges pas na/ /khu ba rtsa'i gzugs ngag gis/ /sku gsung thugs dang ye shes lngar/ /ma brtsal lhun gyis grub pa'o/ /zhes gsungs so/ /'jig rten drug gi phyogs bcu mdza' yas pa rnam pa drug tu g.yos/ rab tu g.yos/ kun tu g.yos nas/ chos thams cad ming gi mtshan nyid tsam du gyur to/ zhes bya ba ni/ yi ge'i mthus cho 'phrul rnam pa drug tu snang la/ bshad pa bzhin dngos po rol ming dang yi ge kho na'i phyir/ ngo bo nyid bstan du med par snang ngo/ /gzhan yang 'chad pa bzhin 'khor lor gsal bar gyur pa'i dus su lus kyi dngos po ril g.yo zhing des mtshon pa thams cad kyang ming gis bsdus pa tsam ste/ sgyu mar mngon du gyur pa kho na'o/ zhes bya ba kho na'o/ a rab tu brtan 'gyur a dkar las/ /shin tu phra ba'i a rnams spro/ /phyogs bcu gang bar gsal gyur nas/ /bsdus kyang 'phel 'grib med par bstan ces bya ba ni/ lam gyi dbang du gsungs te/ a ni a'o/ dkar ba ni byang chub sems kyi phyir ro/ /gnas ni skyed rim la nges par snying gar te/ ting nge 'dzin bstan nas spro la des khams gsum ril yang sems kyi ngo bo nyid du brlab par snang ba'o/ /rdzogs pa'i rim pa la ni lta ba nyid du ste/ ting nge 'dzin rjes su mthun pas lus kyi rtsa ma lus pa'i bde ba chen po bskyed de bsdu ba las 'das pa ni/ ye shes rdo rje'i ngo bo nyid dang/ nye bar len pa'i yang rgyu'o/ /de bzhin du ka la sogs pa kun la yang 'jug pa ni yongs su rdzogs pa'i rgyu'i phyir/ de las ming tshogs gsal 'bar kun/ /spro zhing bsdu ba 'dra de bzhin no/ /'di ni rdo rje dngos grub kyis/ /rten 'byung ye shes rgyu yin no/ /zhes gsungs so/ /a ni stong dang mi stong gi/ dbu mnga' dmigs su yod ma yin/ /thams cad ming tsam sangs rgyas kun/ /yi ge 'phreng ba nyid la gnas zhes bya ba la sogs pa ni rang bzhin gnas pa'i phyir dbyibs dang kha dog nyid bde ba chen po'i ye shes su gsal bas brjod du med pa'i phyir ro/ /mdza' gsum las 'das pas chos kyi sku kho na'o/ /des na de nyid rang snang ba'i yi ge kun dang/ des mtshon pa'i dngos po ril yang rjes su mthun par shes na/ sangs rgyas kyi chos sku gzhan na med pa'o zhes bya'o/ /longs spyod kyi sku bstan pa'i phyir/ a nyid sna tshogs par snang ba'i/ /ka la sogs pa bzhi bcu gnyis// sgra'i ming gis thams cad bsdus/ /mngon rdzogs rgyas por de nyid nges/ zhes gsungs te/ a'i bde ba ma 'gags pa yi ge bzhi bcu zhe gnyis su rang snang ba'i phyir rta rnga brgya shes kyi sgra'i ye shes skad gcig ma'i bde ba ji lta bar phung po la sogs pa ril de ltar mda' mdzad pas longs spyod rdzogs pa'i sku kho na'o/ /e ma'o ngo mtshar ya mtshan gyi/ /'phrul chen bzhi bcu rtsa lnga'i ming/ /tshig rnams ma lus 'dzin pa'i gnas/ /sna tshogs don chen smra zhing ston zhes bya ba ni/ sprul pa'i skur ston te/ mi dang las dang rang bzhin la dam pa gsum mo/ /yi ge'i ming rnams kyis/ /tshig thams cad sdud la/ tshig gis tha snyad ma lus pa brda' sprod pas/ ming gi las yin te/ gsung kho na'o/ /dngos med yi ge'o rang bzhin sems/ /bdag med mdza' bral mi dmigs kyang zhes bya ba ni/ sems nyid yi ger rang snang ba'i phyir bde ba chen po'i rig pa las/ gzhan med pas mdza' gsum las 'das pa'i phyir/ yul dang bral bas thugs kho na'o/ /dbyibs dang kha dog ming tshogs kyis/ /rol pa cir yang spral cing ston zhes bya ba ni/ rang bzhin de lta bu'i phyir/ yi ge de las phung po dang rigs la sogs pa thams cad du snang zhing kun tu gyur pas na sku'i las kho na'o/ /bshad pa de dag yongs su rdzogs pa'i phyir/ phyogs bcu dus bzhi rdzogs pa yi/ /ye shes sems pa'i sku gsung thugs/ /dkyil 'khor bzhi bcu rtsa lnga nyid/ /yi ge mgo nas k+Sha la rdzogs/ zhes gsungs so/ /sems kyi rang bzhin yi ge ste/ /yi ge dngos po yang ma yin/ zhes bya ba ni/ sems dang yid dang rnam shes dang/ 'jug pa'i rnam par shes pa bzhin a la sogs pa bzhir nges par gnas la/ de dag re re'i brtsal yang yi ge du mar rang snang bas yi ge'i ngo bo nyid med pa kho na'o/ de lta bas na sems kyi ngo bo rnams ni snang stod gnyis su med pa'i phyir/ dmigs pa dang bral bas rang rig pa kho na ste/ dkyil 'khor la sogs pa gang du yang mi 'gag par snang ba kho na'i phyir/ dmigs med nyid ni sna tshogs pa'i/ /sku gsung thugs kyi dkyil 'khor che zhes gsungs so/ /sku gsung thugs kyi ngo mtshar gyi/ /ya mchan 'phrul chen rab 'gugs pa/ /dbyings la dbyings kyis bris pa ste/ /yi ge zhes ni de phyir brjod/ ces bya ba ni las dang rgyu yis ming don las btags pa ste/ bshad pa'i yon tan ril rang rig pa'i mngon sum du ston pa'i yi ge nyid/ tshul ji ltar snang zhe na/ gang phung po sogs pa sems nyid kyi ngo bo nyid las mi gzhan pa ni gsum pa kho nar 'gyur la/ de dag nyid rang snang ba'i bde ba chen po ni/ bshad pa bzhin du snang du sna tshogs su gsal ba'i phyir gnyis pa ste/ de yang rang snang ba gzhan gyis byas par thal ba med do/ /mgo ni ma nor lam yin te/ /tsheg ni shes rab ming du smra/ /shad ni thabs chen tshigs su gcod/ ces bya ba ni rim pa bzlog ste lus dkar dag pa thabs kyi ngo bo sku ste/ de nyid yi ge rnams tshigs su gcod pa'i shad du snang ngo/ /tsheg ni bye brag phye nas ming ston pas dag dkar dag pa gsung ste/ shes rab po/ /yi ge sprul lta bus thams cad kyi mgo 'dren pa nyid thugs nyid pas thabs dang shes rab gnyis su med pa ste/ yang dag pa'i lam mo zhes bya'o/ /a ni skye med de bzhin nyid/ ces bya ba ni/ chos kyi khams ril sems nyid pas so sor ma skyes pa ni bla dags su de bzhin nyid ces bya ste/ de nyid nges par ar snang ste/ de'i phyir thams cad kyang lhun gyis grub pas kun tu bzang mo zhes bya ste/ gang du yang ma nges par thams cad du snang ba kho na'o/ /bra ni sgyu 'phrul rdo rje nyid/ ces bya ba la sogs pa ni lnga phung sgyu ma lta bu sems nyid yin pas ye shes su rang snang ba ni dmigs pa med par sna tshogs su snang ba'i phyir/ skabs kyis yi ge lnga ste/ de dag la rdo rje sems dpa' la sogs par tha? snyad du 'dogs so/ /tha ni dra bas mngon rdzogs nyid ces bya ba la sogs pa ni/ dangs ma ye shes kyi 'byung ba lnga ni nam mkha' la sogs pa kun tu snang zhing ril yang tha mi dad par bsdus pas thams cad sems nyid du rang snang ba ni yi ge lnga ste/ kun tu bzang mo la sogs pa kho na'o zhes bya'o/ /ka ni spyan gyi thugs kyi mchog /ces bya ba la sogs pa ni/ rnam shes bzhi po ni rig pa kho na'i phyir thugs te/ de'i phyir yi ge bzhi pa nyid sa'i snying po dang/ phyag na rdo rje dang/ nam mkha' snying po dang/ spyan ras gzigs dang bzhi'o zhe'o/ /nga ni thugs kyang 'jigs byed par/ zhes bya ba ni/ lus kyi 'bras bu shes pa'i ngo bo gsang ba'i rnam par shes pa'i las kyis de dag la yang mi gnas par byed pa'i phyir khro bo ste/ gshin rje gshed po zhes bya'o/ /tsa ni spyan gyi sku yi mchog/ ces bya ba la sogs pa ni yul bzhi la rnam shes brten pa'i phyir skur 'gal ba med de/ bshad pa bzhin pas sa le la sogs nga'o zhe'o/ /nya ni sku la'ang 'jigs pa'o zhes bya ba ni/ lus kyi yul gsang ba'i pad+ma'i las rjes su mthun te rang bzhin bshad pa bzhin bas/ nya dang stobs po che'o/ /ba ni spyan gyi gsung gi mchog ces bya ba la sogs pa ni/ dbang po rnams ni yul shes pa rnams phyi nang gi tshul gyis brda' sprod par byed pas gsung ste/ bshad pa bzhin pas/ byams pa la sogs pa kho na'o/ /ma ni gsung yang 'jigs byed pa'o/ zhes bya ba ni/ gsang ba'i dbang po ste/ rjes su mthun pa'i phyir ro/ /ya ni skye ba rnam par dag ces bya ba la sogs pa ni/ dus bzhi kho na ste/ 'das pas go 'byed pa dang/ da ltar gnas pa dang/ rgyu rkyen du dgos pa'i phyir mi rtag pa nyid dang/ ngo bo nyid 'drar bstan du med pa rnams ni ma ning gi yi ge bzhir snang ste du pe la sogs pa'o/ /Sha ni brtag med dag pa ste/ zhes bya ba la sogs pa ni/ gsang ba'i khams gsum 'dus nas/ aoM ltar snang ba'i dus na rtag chad bdag mtshan dang gis stong pa nyid de/ de la yang ngo bo nyid kyis ma grub pa nyid yi ge bzhi ste/ sgo ma bzhi'o/ k+Sha ni ye shes thugs kyi thugs/ zhes bya ba ni/ rnam shes lnga'i yul ril kyang yid kho nas spyod pa'i phyir brtsegs pa ste/ yid rang 'byung ba'i ye shes rgyu rkyen la sogs pa'i cha shas ril zad pas/ k+Sha ya zhes bya ba ste/ thams cad kyang de bzhin par byed pa ste kun tu bzang po'o/ /ai ni rdul snyed lha rnams su zhes bya ba la sogs pa ni/ thog ma med pa can gyi gnyis kyi bag chags drug po nang ris su grangs las 'das pa ril yang sems nyid kho na bas ye shes drug gi ngo bo nyid du gsal ba ni yi ge drug kho na ste/ thub pa drug go/ aM ni thams cad 'jig par byed/ aau ni thams cad zhig pa yin zhes bya ba ni/ gsang ba'i khams gsum 'dus pa nyid du bde ba skyes pa'i dus na/ khams bco brgyad dang/ phyin ci log bzhi la sogs pa ril mthu nyams par 'gyur la/ nges par gcad pa'i dus na bde ba nyid las kyang 'das te/ brjod pa dang bral ba nyid ye shes lnga ste/ bdud rtsi 'khyil pa'o zhes bya'o/ /de dag nyid kyi phyir/ yi ge 'khor lo tshogs chen 'dis/ /sku gsung thugs kyi phreng ba bsdus zhes gsungs so/ / //de nas zhes pa la sogs pa ni go sla'o/ /thabs dang shes rab dgyes sprin byang chub sems tshogs rgyu 'khor lo zhes bya ba ni/ nyi zla 'byor pa ni gnyis su med pa'i byang chub sems zhes bya'o/ /de nyid sprin lta bur 'khor lo bzhi la sogs pa kun tu khyab pa nyid yi ge'i tshogs su rang snang bas/ 'dus ma byas pa ni yongs su rdzogs pa'i rgyu kho na ste/ rang bzhin gyis snang pa'i phyir rang bzhin gsung gi dkyil 'khor nyid do/ /sgrub pa pos kyang rjes su mthun par rgyu ma nor pa rtsa ba'i sngags las/ ting nge 'dzin nam thabs kyis bkod pa ni rkyen kho na'o/ /des ci zhig 'od snyam pa la/ 'bras bu rgyal ba smin drug ngo mtshar ming tshogs bzhi bcu gnyis/ 'dus ma byas nyid 'dus byas rdo rje'i dkyil 'khor 'byin pa'i dam zhes bya ba ni/ sku gsung thugs kyi phyag rgya rmad du byung ba rang rig pa'i mngon sum pa ni/ sangs rgyas bzhi bcu gnyis so/ /de dag bsgrub pa'i dbang du 'dus byas nyid du brjod kyang/ ngo bo nyid ni dus gsum du mi phyed pas rdo rje'i dkyil 'khor nyid do/ /'da' bar mi mdzad dbang med rgyu rkyen tshogs pa'i mthu chen yin/ zhes bya ba ni mi 'da' ba' i phyir dam tshig ste/ yongs su rdzogs pa'i rgyu la/ las sam ting nges 'dzin gyis lhan cig byas pas smin par snang ba ni/ gdul bya'i snang ba ste/ rang snang ba nyid mthu chen po'o/ /de bzhin gshegs pa thams cad yi ge'i 'khor lor gyur to/ zhes bya ba ni/ rang bzhin gyi dkyil 'khor gnyis kyis bsdus pa'i ril/ yi ge bzhi bcu rtsa lngar 'dus shing/ de dag nyid de'i ngo bo bas de la de skad ces bya'o/ /yi ge phreng ba'i 'khor lo bkod pa zhes bya ba ni/ gsung gi dkyil 'khor gyi rim pa dang/ las dang/ yon tan dang/ mtshan nyid dang/ ngo bo tha dad par snang ba'i phyir ro /le'u bzhi pa mdor bshad pa'o// //de nas yi ge 'khor lo sprin bkod pa las sgyu 'phrul rnam par 'phro ba zhes bya ba ni/ ting nge 'dzin gyis yi ge bkod pa'i mthu las lha'i dkyil 'khor dang/ las dang dngos grub gsum la sogs par snang ba rnams ni 'phro ba zhes bya ba ste/ gdul bya'i snang ba kho nar ston to zhes bya'o/ /de nyid kyi phyir bskyed pa'i rim pa'i dbang du rgyud kyi rim pa spangs te/ man ngag gi rim pa la 'jug par bya'o/ /de la 'grub pa'i rgyu bstan pa'i phyir/ ston pa mchog brtson rtogs pa gsal/ /dam tshig sngags dang phyag rgya rnams/ ma nyams shes shing yo byad ldan/ /'grub 'gyur mi ldan don med brlag/ ces gsungs te/ ston pa'i rang bzhin can gyi bla ma yang dag pa/ sgo gsum nas mnyes par byas nas/ dbang rim par thob par bya ba dang/ brtson 'grus kyi sngon du bya ba'i sgo gsum gyi spyod lam yongs su sbyangs pa dang/ chad pa bzhin lta ba yongs su dag par bya ba dang/ bco lnga pa la sogs pa'i dam tshig yongs su dag par bya ba dang/ phyag rgya chen po dang sngags kyi yan lag rnams mnyams par ldan pa dang/ gnas khang longs spyod bzhi po dag chad bar ldan par bsgrubs kyang tshang ba'i gnas su 'gyur ba'i phyir de dag nges par rdzogs par bya'o zhes gsungs so/ /gnyis pa lta ba bstan pa'i phyir/ gang gis dmigs med mi shes pa/ /de yis chos kyi dbyings mi shes zhes gsungs te/ gang ni skal ba dman zhing bla ma'i man ngag gis ma zin pa dag go/ sems nyid ni ci yang ma yin pa'i phyir/ ming gi mtshon pa zhig yid la byed pa rnams ni dmigs pa can zhes bya'o/ /de dag ni 'o ma 'dod pa rwa la 'job lta bu'o/ /de phyir dngos dang dngos med pa/ /'jig pas dmigs med shes par gyis zhes bya ba ni/ gtan tshigs sngar thal te/ ye shes ni rgyu rkyen 'dus pa kho na'i phyir/ 'jig pa lam bltos te/ dngos po ril sems nyid du 'jig la/ de nyid ye shes su gsal bas stong pa nyid kyang 'jig ste/ sems kyi ye shes ni chad pa bzhin pa ngang gis dmigs su med pa'o zhes bya'o/ /de nyid ci'i phyir snyam pa la/ gzhi rtsa med pa'i sems nyid ni/ /pho mo ma yin ma ning min/ / mtshan med ma yin rigs rgyud min/ /kha dog ma yin dbyibs ma yin/ /gnas su ma yin gang yang min/ /de bzhin nyid dbyings ye shes te/ zhes bya ba ni/ sems nyid phyi mo'i rgyu rkyen dang bral ba'i phyir/ rang 'byung gi ye shes te/ /ngo bo nyid ma grub pas sems can gyi mtshan ma gsum dang/ sgo nga lta bu dang/ 'gro ba drug dang/ gzugs kyi mtshan ma gnyis dang rten par bya ba dang/ byed pa'i gnas la sogs pa gang gi ngo bo nyid du yang gdod nas ma grub pas de bzhin nyid ces bya'o// de nyid mu mdza' bral zhing thams cad kyi 'byung gnas pas mnyam pa'i dbyings te/ de nyid rang rig pa kho nar gsal bas mi de ye shes gnyis su yang 'dogs so/ /de'i phyir de nyid rang bzhin dang ting nge 'dzin dang lhag pa'i phyag rgya gsum du yang mi 'gag par snang ba'i phyir/ thabs kyi phyag rgya kun gyi rgyu zhes gsungs so/ /gsum pa de la bsgom dgos par bstan pa'i phyir/ /dngos rnams nyid na dngos med pa/ /rtog pa'i dbang sgyur ting 'dzin yin/ zhes gsungs te/ bshad pa ltar dngos po ril sems nyid kho nar gsal la/ sems nyid bshad pa ltar ma grub pa kho na bas/ dngos po rnams gang du yang grub ma myong bar shes na/ de nyid las ma yengs pa'i btang snyoms ni shin tu gces par gsungs so/ /bzhi pa bsgom pa'i thabs bstan pa'i phyir/ gang gis glang chen myos 'dra'i sems/ /mnyam par bzhag pas brtul nas su/ zhes gsungs te/ gang bshad pa ltar shes pa nges she'o/ / 'khrul pa'i yul sna tshogs kyis g.yengs pa'i sems ni/ dper na glang po che rgun chang gis myos pa lta bu ste/ de dag 'dul ba ni zhi gnas lta bu ma yin te/ lta ba'i rjes su mi dmigs pa ni mnyam par bzhag pa zhes bya ste/ dbus las kyang 'das pa'i phyir ro/ /gzhi ji bzhin par ming gnyis su phebs pa ni thul ba ste/ de bzhin nyid kyi ting nge 'dzin zhes tha snyad du 'dogs so/ zhes bya ba'o/ /lnga pa de nyid thams cad du snang bar bstan pa'i phyir/ rtsa ba med pa'i sems nyid ni/ /chos rnams kun gyi rtsa ba yin/ /sems nyid yi ge'i rang bzhin te/ /yi ge'i yid bzhin rin chen sprin zhes gsungs te/ gcig ni bshad zin to/ /de lta bu las phyag rgya gsum po dang 'khrul pa'i chos ril yang snang bas thams cad kyi rtsa ba ste/ de dag de nyid du gnyis med par shes pa ni/ gnyis su med pa'i snying rje'o/ /thams cad las 'dir skabs kyis yi ge a ru snang ba las/ rin po che ltar dran pa tsam gyis yi ge phreng ba'ang byung la/ de dag nam mkha' khyab par 'phro ba dang bsdu ba'ang bya'o/ /drug pa de las dkyil 'khor bskyed pa bstan pa'i phyir/ thabs las thabs byung thabs bsam yis/ /tha dad med la tha dad pa'i/ /nang dang inang gi phyi rol gyi/ /dkyil 'khor bsam yas ye shes rol/ /'jigs med kun bzang phyag rgya mchog /ces gsungs te/ rang rig pa nyid yi ge ar snang ba ni rtsa ba'i thabs zhes bya'o/ /de las gzhal yas gdan dang bcas par snang ba ni gzhi'i thabs so/ /de dag tu lha'i dkyil 'khor bkod pa ni bsam gyis mi khyab pa'i thabs zhes bya'o/ /de dag kyang rang rig pa kho na yin pa bas/ sman pa'i blo la tha dad du snang ba'i lha rnams dang gnas de dag 'dus ma byas te/ bsam gyis mi khyab pa'i ye shes rang snang bas/ ye shes la ye shes rol pa ste brtags pa dang rgyu rkyen gzhan gyi dbang las 'das pa kho na'o/ /de ni spyod yul yongs su dag pas/ 'khor ba dang lam gyi g.yang sa gnyis dang bral bas ci bder mnos shig ces bya'o/ /bdun pa de nyid dkar dag pas blang dor bral bar bstan pa'i phyir/ de nyid ye shes rang snang ba'i/ /ming tshig gzugs sogs yid bzhin gyis/ /mun las snang 'byung ji bzhin du/ /'gyur bas gser 'gyur sman gyi tshul zhes gsungs te/ thabs gsum po nyid ci zhig las snang zhe na/ gdod ma nas sems kyi ye shes rang snang ba'i 'khor lo'i yi ge dang/ phung po la sogs pa khams gsum ril sems nyid kyi phyir cir yang snang bas/ de dag thabs gsum du ting nge 'dzin gyis dbang sgyur yang blangs pa dang dor pa med pa ni nges par dpe gsum gyis mtshon te go sla bas ma bshad do/ /brgyad pa de dag la 'dris par bsgom pa'i phyir/ sngags dang phyag rgyas rab brtan na/ /dngos grub ya mtshan chen por 'gyur zhes gsungs te/ de dag las 'phra mo dang snang ba rnam par 'byed pa'i ting nge 'dzin gyis phyag rgya chen por sngags gyi yan lag lnga dang ldan par gsal ba la yul gyis mi 'phrogs pa las dngos grub rnam gnyis nges par 'byung bas/ /brtan par gnas pa kho na'o zhes pa'o/ /dgu pa de'i thun mong gi dngos grub bstan pa'i phyir/ bdud rtsir 'gyur zhing 'byung ba dang zhes bya ba nas/ ting nge 'dzin 'di yis byed par 'gyur zhes pa'i bar du gsungs te/ dug las bdud rtsir bsgyur ba la sogs pa dngos po thams cad phan tshun mi mthun par bsgyur ba dang/ dngos po khyad par du gyur par byas pa la sogs pas sems can gyi bsam pa yongs su bskong ba ste/ thams cad kyang bdag las mi gzhan par shes nas stobs su gyur pa'i phyir ro/ /de dag ting nge 'dzin gnyis kyi skabs su shas kyis nus so zhes bya'o/ /bcu pa mchog gi dngos grub bstan pa'i phyir/ sgyu 'phrul dkyil 'khor bzhi bcu gnyis/ /dra ba'i dkyil 'khor mngon rdzogs pas/ /phyogs bcu dus bzhi rdzogs pa yis/ dkyil 'khor thams cad 'grub par 'gyur zhes gsungs te/ gang phung po la sogs pa lha'i dkyil 'khor bzhi bcu gnyis su rang rig pa'i mngon sum du bsal bas khams gsum ril lha'i tshogs su gsal yang/ spyod yul dang bral bas yi ge 'khor lo tshogs chen gyis te/ 'bras bu lus pa med pa/ kho na'o zhes bya'o/ /bcu gcig pa de nyid rgyas par bstan pa'i phyir/ dus gsum rgyal bas thugs chud pa'i/ /dngos grub mchog gi snying po ni/ / zod pa'i dus med yid bzhin mchog / 'phel 'grib med par 'byung ba ste/ dngos po med las dngos po'i sprin/ /sna tshogs rnam par 'byung zhing 'gyur zhes gsungs te/ bshad pa bzhin du dngos po thams cad sku dang ye shes su gsal ba ni/ rgyal ba ma lus pa'i ngo bo nyid dang/ lta ba dang/ dngos grub gsum ga yin pa'i phyir/ gzhan dag las/ byang chub sems kyi don rtogs pas/ sangs rgyas kun gyi nyid sha can/ /da ni sangs rgyas kun gyi dur/ dur khrod chen po nga nyid yin/ zhes 'byung ngo/ /de nyid ngo bo gcig tu ma grub par gdul bya la sna tshogs su snang zhing 'gyur yang 'phel ba dang 'grib pa med de/ ngo bo nyid kyi rtag pa zhes bya'o/ /de nas de bzhin gshegs pa thams cad gzigs mos mnyes par gyur to/ zhes bya ba ni/ ting nge 'dzin gyi mthu las sna tshogs su snang ba ril? bdag nyid kyi phyi rim bltas par gsal ba ni gzigs mo ste/ mi phyed pa ni gnyis su med pa'i mchod pa zhes bya'o/ /sgyu 'phrul bsgrub pa'i ting nge 'dzin zhes bya ba ni/ lha'i dkyil 'khor gyi ting nge 'dzin gnyis kyi mthu las dang dngos grub mang por 'grub pa ste le'u lnga pa bshad pa'o// //de nas de bzhin gshegs pa thams cad kyi rang bzhin gcig dang du ma med pa'i bdag nyid thams cad kyi zhes bya ba ni/ de bzhin gshegs par ma zad de/ chos thams cad rang rig par gsal bas/ ma 'dres la yongs su rdzogs pa'i phyir gcig dang du ma bral ba kho na'o/ /gang de nyid mngon du byas pa ni bdag nyid chen po ste/ thams cad kyi ngo bo nyid de ltar mtshungs par bzhugs so/ zhes bya ba'o/ /'jig rten drug gi phyogs bcu thams cad la nyid kyi che ba'i dkyil 'khor 'byung bar bzhed nas zhes bya ba ni/ khams gsum gyi phyogs dbus thams cad du rig par rang snang bas ril yang ye shes lnga'i dkyil 'khor du gdal ba ni de bzhin gshegs pa nyid kyi ngo bo yang yin la de nyid gsal bar bstan pas dgos pa mngon du gzhag pa ni/ bzhad pa zhes tha snyad du 'dogs so/ /de nyid bstan pa'i phyir/ ye shes phyogs bzhi dbus brtags te/ dkyil 'khor bsam yas lhun gyis grub/ ces bya ba ni/ rang rig pa nyid phyogs dbus su bsdus pa thams cad du rang snang ba'i phyir/ de dag de'i ngo bo nyid du gsal la mi rtog pa dang/ thams cad de'i ngo bor gcig pa dang/ ma 'dres pa dang/ yongs su rdzogs pas bya ba med pa dang/ mdza' thams cad las 'das pa'i ye shes lnga'i dkyil 'khor nyid de/ de'i ngo bo blos gzhal ba las 'das par gnas pa ni rdzogs pa chen po zhes bya ba ste/ rang bzhin gsang ba'i snying po'o/ /rdzogs chen rtogs pa'i rnal 'byor pas/ /kun 'byung dkyil 'khor chen po spyod/ ces bya ba ni/ gang gis de mngon du byas pa'i dus na/ snang spyod thams cad ye shes lnga las mi 'da' bas zhing dang spyod yul yongs su dag pa ste che ba'i ting nge 'dzin gyi dkyil 'khor phyung ba zhes bya'o/ /de'i rtsal mi 'gag pa dang/ mi lcogs pa rnams kyi phyir yang gsungs pa/ 'khor lo rtsibs bzhi mu khyud bcas/ zhes bya ba la sogs pa'i tshig gi sla ste/ le'u lnga pa'i ting nge 'dzin gsum gyi rjes su gzhi yi thabs 'di ltar mngon du bya ba ste/ de la lha bzhi bcu gnyis kyi cha byad can gyi sprul pa'i 'phro 'dus brgyan pa'o/ /der ci zhig go snyam pa la/ /seng ge glang chen rta dang khyung/ /nam mkha' lding gi khri chen la/ /nyi zla pad+ma rin po che zhes gsungs te/ rang 'byung gi ye shes la 'bras bu'i chos lnga rdzogs pa dang/ des thams cad kyang tshim par byed pa nyid sems can chen po lnga dang rin po che'i khri sna tshogs su mdzad pa brtan pas 'degs pa ni/ gzhan gyi gdan las spags pa las che ba'o/ /de dag la sogs par dgod pa ni/ thabs dang shes rab spyod pa'i gdan sum brtsegs te/ thams cad rang rig par gsal ba ni grang la spyad kyang mi gos pas 'bras bur 'gyur ba'i phyir ro/ /de dag la ci zhig bzhugs snyam pa las/ gdan la rdzogs dang sems dpa' i tshul zhes gsungs te/ gtso bo lnga ni rdzogs pa'i skyil mo'o/ /yum lnga ni btul zhugs kyi skyil mo'o/ /sems dpa' rnams ni mdzad pa yongs su ma rdzogs 'bab pa'i tshul lo/ /sems ma rnams bzhugs tshul gyis 'byung pa'o/ /'khor lo rgyal po rgyal mo dang/ /g.yas nas mthong thos snom pa dang/ /myong dang btsun mo'i tshogs su bcas/ zhes bya ba ni/ lte ba dang rtsibs la rigs lnga dang/ rtsibs mchan la thugs kyi sems dpa' bzhi ste/ rim pa ni yi ge'i dbang du gsungs pa ste/ gral ni lugs su mthun pa kho na'o/ /gru chad la ni mthong byed dang/ zhes pa la sogs pa ni go sla ste rim pa yang rjes su mthun no/ /bar khyams la ni thub drug dang/ /mdun dang rgyab tu byed pa dang/ /bya ba dag ni gnas par brtan zhes bya ba ni/ sdud pa'i don gyis 'dir brgyad kho na ste/ phyogs mtshams su mnyam par bzhugs pa'o/ /sgo khyud la ni 'joms pa bzhi/ /btsun mo tshogs dang ldan par gnas zhes bya ba ni/ rngam pa'i tshul gyis zhal phyir bltas pa'o/ /de dag gi phyag mtshan ni ci dang ci zhig snyam pa la/ rdo rje 'khor lo rin po che/ zhes bya ba la sogs pa gsungs te/ 'dzin pa'i rim pa ni/ sgyu 'phrul rdo rje las/ rdo rje 'khor lo ral gri 'bar/ /dril bu pad+ma rin po che/ /rdo rje 'dzin pa'i rim pa'o/ /gzhan gang gnas su rdo rje shes/ /dang po thugs dang g.yon 'khyud pa'o/ /rin chen myu gu ral gri 'bar/ /pad+ma dkar po rdo rje che/ /aud pas klu shing po ti ste/ /gzugs mdzes rin chen phreng ba dang/ /pi bang gar bsgyur spos me dang/ /puShpe me tog mar me dang/ byug pa gtso bo'i rim shes bya/ /nrir mgo rdo rje thod rgya gram/ /lcags kyu zhags pa spo ta ho/ /'od 'phro mnyam bzhag rdo rje thal/ /ye shes rtse lnga chos khams dril/ /thugs la bstan pa'i nyid du gsung/ thub chen nges par phyag gnyis shes/ /gseg par go mtshon pi bad rdebs/ /sgro na stobs pu ti chos 'chad tshul/ /me dpung bum pa shes par bya/ zhe'o/ /de dag gi sku mdog ci zhig snyam pa la mthing ga dkar po ser le brgan/ ljang gu la sogs sna tshogs pa'i/ /zhes gsungs te/ mtshams kyi sems dpa' dang khro bo la sogs pa'i phyir na nyi shu rtsa lngar yang gsal lo/ /mnyen cug 'khris ldem gzhon tshul can zhes bya ba ni/ sgeg pa'i tshul gyis thabs dang shes rab snyoms par zhugs kyang/ sku dang yan lag mnyen pa'i phyir/ drang zhing so sor ma 'dres par gsal lo/ /zhes bya ba'o/ /gsal 'tsher lhun stug gzi byin ldan zhes bya ba ni/ mtshan dang dpe byad yongs su rdzogs pas shin tu brjid pa'i phyir/ thams cad kyang zil gyis gnon pa'o/ /'od zer 'phro ba'i tshogs chen po zhes bya ba ni/ gsal la rno ba'i phyir te/ de yang dkar po dang dmar po dang ser po dang/ sngon po dang bcod kha dang/ shel dang/ dngul gyi mdog lta bu dang drug go /de dag nad ris su gcig kyang dbye ba ste/ de dag gi gnas btus pa ma yin gyi/ 'dir spu re re nas bye ba phrag drug drug phyogs bcur 'phro ba'i snang bas khyab par byed pa ni tshogs chen po zhes bya'o/ /'bar ba'i phreng bas 'khrigs pa ste zhes bya ba ni/ khro bo dang khro mo'i me dpung ste rdo rje rtse lnga par 'khyil pa'o// mdza' dbus med par khyab pa yi/ /dkyil 'khor bsam yas lhun gyis grub ces bya ba ni/ rang bzhin gyis rjes su lhag pa ting nge 'dzin gyi dkyil 'khor yang dbyings kyi mthas klas par de dag ngo bo nyid du gsal ba las/ gdul bya rang gi snang bas go phye nas sna tshogs su snang bas/ don bya bar bsgoms pa kho na'o/ zhes bya ba'o/ /rang bzhin sku'i dkyil 'khor gyi mtshan nyid dang/ 'phrin las dang/ de grub pa'i tshul bstan pa'i phyir/ phyogs bcu dus bzhi mngon rdzogs pa'i/ /sku'i phyag rgya che mchog ni/ /de bzhin nyid las ma g.yos kyang/ /yang dag thar pa'i gzugs sku dang/ /'gro ba ma lus 'dul ba'i phyir/ /mthun byas sku ni sna tshogs ston/ zhes pa yang dag par rdzogs pa'i zung 'jug sku ni sku lnga lhun gyis grub pas/ sku phyag rgya chen po las khyad par du gyur pa'i phyir mchog kho na'o/ /de dag gang zhe na ci gnang yang sems nyid kho na ba'i phyir snang stong gnyis su med pa ni chos sku nyid de/ rgyas pa las/ 'jig rten brtan g.yo la sogs pa// snang ba nyid na ngo bo med/ /de nyid chos sku chen po yin ces gsungs pas/ de ni de bzhin nyid kyi ye shes so/ /des ma rtsal ba ni ma g.yos pa'o/ /rtsol ba las grol bar ston pa ni yang dag pa'i thar pa ste/ longs spyod chen po'i sku dang/ 'gro ba drug dang/ mthun par bstan pa ni sprul pa ste bsam gyis mi khyab pas 'dul ba rnams su snang ngo/ zhes bya'o/ /ston nyid sgyu ma mig yor tshul/ zhes bya ba ni/ de dag kyang lhun gyis grub pa'i rgyu dang/ las kyi rkyen gyis snang ba kho na las/ rang rgyud du snang ba rnams ni 'khrul pa'o/ zhes bya ba'i tha tshig go /'o na ngo bo nyid ji lta bu zhe na/ tshul nyid dbyings las g.yos pa med ces gsungs te/ dpe'? de nyid kyi phyir sna tshogs su snang ba nyid na sems kyi dbyings nyid kho na bas bden pa gnyis su mi phyed pas rdo rje'i sku'o/ /'o na ngo bo nyid med pa nyid sna tshogs su snang bas rtsol bas byas so bar dogs pa la/ ma g.yos bzhin du sna tshogs pa/ /de tshe mi mthun sna tshogs la/ /so so 'dra bar snang ba ni/ /de bzhin nyid kyis ma bcos kyang/ /las 'phro dbang gis so sor snang/ zhes gsungs te/ thams cad ma brtsal bar lhun gyis grub pa ni/ mngon par byang chub pa'i sku ste/ de yang rim pa mthun par snang ba ni las kho na'o zhes bya'o/ /dper na me long chu zla bzhin zhes bya ba ni/ de dag ma g.yos par kun tu snang ba ni me long dang bzhin gyi tshul lo/ /'gro 'ong med par khyab pa ni chu zla'i dpes ston to zhes bya ba'o/ /de tshe mi mthun thams cad la/ /sdig spong gzugs su rnam par snang/ /dge tshul rnams la dgra bcom gzugs/ /rang rgyal rnams la bse' ru tshul/ zhes bya ba ni go sla'o/ /gzhan yang theg mchog rim pa bzhin/ zhes bya ba ni/ mos pas spyod pa la sprul pa'i sku nyid do/ / kri ya la sogs pa so so'i ston pa rnams kyang de bzhin nyid du snang ngo/ /'og min bla med gnas mchog tu/ /sku ni rnam par snang mdzad tshul/ /byang chub sems dpa' i 'khor rnams la/ /de bzhin gsung mchog mi smra ste/ /sku yis chos rnams 'jal par ston zhes bya ba ni/ /'og min chen po longs spyod kyi sku ni sprul pa'i de bzhin gshegs pa ltar tshig gi gsung gis mi ston te/ gzhan dag las/ de bzhin gshegs pa la la ni spyan phye bas chos ston to/ /la la ni btsums pas ston to/ /la la phyag brkyang bas ston to/ /la la ni bskum pas ston to/ /la la ni btsun mo dang bcas pas ston to/ /la la ni btsun mo med pas ston to zhes 'byung ba lta bu'o/ zhes bya'o/ /me long bstan pa'i tshul bzhin du/ /dngos kyi mdog ngan thams cad sel/ zhes bya ba ni go sla'o/ /'khor gyis de bzhin sku bltas na/ /byang chub sgrib pa gting dpag med/ /me long bzhin du sku la snang zhes bya ba ni/ de bzhin gshegs pa'i ye shes kyi sku ni gcig tu ma grub pas thams cad du snang ba'i phyir sgyu ma las 'das pa kho na'o/ /de dag de ltar ma grub pa ni ngos zin pa'o/ /de bzhin gshegs pa'i ye shes thabs kyi lus ni thig le chen po gnas na bzhugs pas thams cad kyang ye shes chen pos byin gyis rlob pa ste/ de dag gi lam mi mthun ba ni 'o ma 'dod pas rwa la bzhos pa ltar shes pa'i phyir ro/ /de nas sa bcu rim gyis 'byang zhes bya ba ni/ sa bcu pa rnams ni sangs rgyas kyis la nges par dbang kho nas 'gro ste/ lang ka'i mdo las/ blo gros chen po byin gyis brlabs gnyis kyis byin gyis brlabs pa'i byang chub sems dpa' dag / de bzhin gshegs pa'i zhabs 'thug cing dri ba yongs su 'dri'o/ /gnyis gang zhe na/ ting nge 'dzin gyi byin gyis brlabs dang sku dang zhal dang phyag gis dbang bskur ba'i byin gyis rlabs so/ /de la byang chub sems dpa' i sa dang po la sangs rgyas kyi ting nge 'dzin gyi byin gyis rlabs nas/ byang chub sems dpa' i ting nge 'dzin theg pa chen po rab tu snang ba zhes bya ba la 'jug ste/ zhugs ma thag tu phyogs bcu'i de bzhin gshegs pa rnams kyi zhal ston to/ zhe'o/ yang sa'i mi mthun pa'i phyogs rtogs par khong du chud de/ chos kyi sprin gyis thob po/ /de la de bzhin gshegs pa'i zhal dang phyag gis dbang bskur ro/ / zhes 'byung ngo/ /de ltar bcu pa dag dbang rim par khong du chud nas spang bya rnams kyang de bzhin du 'dag pa kho na'o/ /de'i rjes su kun tu 'od kyi sa nges par snang ba'i phyir/ bla med byang chub yang dag 'thob ces gsungs so/ /de nyid du mdo sde pa'i sku gsum bstan pa'i phyir/ /chos sku dpag med brjod du med/ /longs spyod zad med rin chen gter/ /sprul pa bye ba bsam mi khyab ces gsungs te go sla'o/ /de las kyang sngags kyis gnyis bstan pa'i phyir dang la/ thabs dang shes rab sa'i mchog / ces bya ba ni/ de'i tshe snying rje chen po mngon du byas pas thams cad du snang yang/ bdag nyid chen po'i phyir mi dmigs pa ces kyang dgos pa med pa'i sa ni ltos nas mchog kho na'o/ /de nyid du yi ge 'khor lo'i sa bstan pa'i phyir/ mtshan dang dpe byad thams cad rdzogs/ /spyod yul kun tu man da la/ tshogs chen gnyis kyang rdzogs par rol zhes bya ba ni/ ye shes bzhi'i byin gyi rlabs kyi ye shes bcu drug dang yul bcu drug gi byin brlabs sems dpa' dang sems ma sum cu rtsa gnyis dang/ ye shes lnga'i byin brlabs rigs brgyad cu la sogs pa ltun gyis grub par rang snang ba dang/ spyod yul ril bdag las mi gzhan pa'i dkyil 'khor du snang ba dag ni/ tshogs gnyis lhun gyis grub pa kho na'o/ /de'i yon tan bgrad bar mi nus pa'i phyir/ de la sogs pas bsam gyis mi khyab/ ces gsungs so/ /de la sngags kyi lugs su sku lnga lhun gyis grub par bstan pa'i phyir/ skye shi med pa'i g.yung drung sku zhes bya ba ni/ chos kyi sku ni bshad pa bzhin pas skad cig ma'i skye 'jig dang bral ba kho na'o/ /nyon mongs kun gyis zhing du gnas/ zad med rin chen gter du 'gyur zhes bya ba ni/ longs spyod chen po'i sku ni gang yang ma spangs pa kho na las nyon mongs pa spyod pa'i sprul pa mi zad pa'i 'byung khungs yin pa'o/ /rdo rje rig pa 'dzin pa'i sku zhes bya ba ni/ gang du yang rig pa gsal bas snang stong gnyis su mi phyed ba ni rdo rje'o/ /'dzin pa ni 'chang ba ste/ rang gi rig pa de ltar ldan pa ni rdo rje'i sku kho na'o/ / thams cad dbyer med mnyam pa'i sku/ zhes bya ba ni/ phung po la sogs pa'i ril rig par mnyam pa ni thams cad kyang bdag nyid dang ye shes su gsal bas mngon par byang chub pa'i sku'o/ /thams cad mkhyen pa'i ye shes sku/ zhes bya ba ni/ sprul pa'i sku ni gdul bya thams cad kyi gdul ba'i dus dang gang ltar 'tsham pa mi 'da' ba dang/ ma 'dres pa kho nar snang ba'i phyir ro/ /de dag gi phyir na/ de tshe sku lnga kun kyang rdzogs/ zhes gsungs so/ /'jig rten drug gi phyogs bcu mdza' yas mu med pa thams cad du/ dkyil 'khor brjod kyis mi lang ba zhing gi rdul snyed du gsal bar gyur to/ zhes bya ba ni/ go sla ste che ba'i dkyil 'khor mngon du phyung ba'i phyir sku'i rol pa yongs su bstan pa'i phyir ro/ /dmigs bya dmigs byed mi dmigs dpag med bsam mi khyab/ /ye shes rang rig dkyil 'khor sna tshogs brjod mi lang zhes bya ba ni/ snod bcud ril sems kyi ye shes su gsal ba'i dus na/ dbyings dang ye shes gnyis kyi tha snyad las kyang 'das te/ spyod yul dang bral bar gsal ba ni/ rdzogs pa chen po'i ting nge 'dzin gyi dkyil 'khor zhes bya'o/ /de sku dang ye shes ril lhun gyis grub pa nyid rig pa'i rgyal pos rang dbang sgyur te/ ye shes kyi rol pa lhag pa'i ting nge 'dzin gyi dkyil 'khor sna tshogs su rang snang ba nyid bdag nyid chen po'i dkyil 'khor du gsal bas spyod yul yongs su dag pa'i phyir/ dkyil 'khor bsam yas lhun gyis grub ces gsungs so/ /mnyam pa dang mi mnyam kun khyab khyab med khyab pa'i dbyings/ zhes bya ba ni/ drug pa'i sku'i rol pa ni gdul bya dag pa dang ma dag pa'i ril la khyab par don mdzad tsam na de dag gi de bzhin nyid las ma gyur pa'i phyir/ snang stong gnyis su song ba med pa kho na'o/ /de dag ci'i phyir snyam pa la/ ye shes kun gsal dkyil 'khor rnams 'phro spros pa med ces gsungs te/ dngos po kun gyi rang bzhin gdod nas sku lnga'i dkyil 'khor du gsal ba las/ de bzhin nyid du gshegs pa dang yang dag par rdzogs pa nyid kyi phyir gnyis su med par lhun gyis grub ste/ bar snang ba ni 'phro zhes tha snyad du 'dogs so/ /de dag las ? rim pa ji lta bar snang yang/ rang rgyud bar 'byung ba med pa kho na'o zhes bya'o/ /dkyil 'khor spros pa zhes bya ba ni/ ting nge 'dzin gyi dkyil 'khor dang/ lhag pa ting nge 'dzin gyi dkyil 'khor dang/ rang bzhin sku'i dkyil 'khor de dag gi ngo bo dang mtshan nyid dang/ 'phrin las yongs su bshad pa'o// //le'u drug pa'o// //da ni lhag pa ting nge 'dzin gsung gi dkyil 'khor gsal bar bstan pa'i phyir/ de nas de bzhin gshegs pa zhes bya ba la sogs pa gsungs so/ /b+h+ruM bi shwa bi shud+d+ha zhes bya ba ni/ 'dis gzhi'i thabs gzhal yas khang yongs su snang bar byed pa'o/ /de yang sgyu 'phrul thal ba'i rgyud las/ b+h+ruM dbyibs b+ha gar sna tshogs 'dus/ /las dang ngo bo dag pa yi/ /sangs rgyas rin chen za ma tog / byin rlabs skyob phyir sngags su brjod/ /ces bya'o/ /hUM badzra dri ga ces bya ba la sogs pa ni rigs lnga bskyed pa'i sngags so/ /de yang thal ba'i rgyud las/ tsit+ta khams lnga'i gshir la/ /rdo rje rgyal ba rin chen chos/ /shes rab rig ldan bcud kyi gzugs/ /nges par 'dzin pa gsang ba'i sngags so zhes/ /mUM da du shwa ri zhes pa la sogs pa ni yum lnga'i sngags so/ /de yang de nyid las/ de nyid dangs ma'i ye shes lnga/ /ma rig gnyis sogs bzhi po dang/ mi phyed phrag dog rdo rje sngags dbyings su skyob pa rga rab brjod / ce'o/ kri? hi ra tsa ya/ zhes bya ba la sogs pa ni thugs kyi sems dpa' bzhi'i sngags so/ /hUM la se sa ma ya stwaM zhes bya ba la sogs pa ni de dag gi yum bzhi'i sngags te/ yang las kyi bde bas sgeg pa ni/ /chags pa'i dam tshig dus yin no/ /slar yang lan gyis 'brel pa ni/ /gnyi ga dgyes pa'i mchog tu bshad/ /ha ta si'i bde sgra dag s/bdag gis chags pa thob pa'o/ /shin tu bskyod pa'i bde ba nyid/ /kun nas bskyed pa rlung zhes bya'o/ /me da ri ni sa ta? zhes bya ba la sogs pa ni/ gsung gi byang chub sems dpa' bzhi'i sngags so/ /dza du pa pra be sha zhes bya ba la sogs pa ni/ yang gnyis 'dren 'dzin pa zhes bya ste/ de nyid che ba las byung ba'o/ /me tog bsdus pa'i ngo bo nyid bdag po'i zhal du thim par bshad/ /shin tu bsdams pa'i rim las 'byung/ /gsal ba'i ye shes bde ba che/ /kun gsal brjod dang 'dra ba'i sgra/ /gnyis med thugs su shes par bya/ /zhe'o/ hUM ya mAn+ta krid phaT ces bya ba la sogs pa ni khro bo yab yum brgyad kyi sngags so/ /hUM hUM hUM badzra tsi ta a'oM/ a a a badzra pa tra sa mAn+ta a/ zhes bya ba ni/ byad pa po yab yum gyi sngags te/ yang rnam shes gsum 'das rdo rje ni/ /ye shes lnga rdzogs thugs nyid do/ /dbyings gsum rnam dag 'dus ma byas/ /kun tu 'ang de bzhin gnas byed pa'o/ zhe'o/ /aoM mu ne kri swa ha zhes bya ba la sogs pa ni sprul pa rnams kyi sngags te/ yang/ sa bon zung gsum de bde ba/ /des skyes rang rig gyur pa yis/ /gnyis 'byung 'dul ba thub par gsungs/ she'o/ aoM e hye hi b+ha ga bAn ma hA ka ru ni ka tri sha ho sa ma ya staM/ zhes bya ba ni/ rang bzhin gyi dkyil 'khor la dam tshig bskul te snyan gsan dbab pa'o/ /dzadu bzhugs pa kho na'o/ /aoM badzra sa ma ya aoM zhes bya ba la sogs pa ni/ phung po la sogs pa'i ngo bo nyid sku dang ye shes rtsa lngar shes pa'i dus na thams cad kyang gnyis su med par gsal ba ni/ de bzhin gshegs pa thams cad kyi rtsa bar gyur pa'i phyir/ dkyil 'khor thams cad du zhugs pa kho na'o/ /de nyid du gyur par nan tan gyis byin gyis brlabs par bskul ba'i phyir/ aoM ye shes rgyal po sku gsung thugs/ /yon tan 'phrin las rmad po che/ /de nyid du ni mnyam sbyor bas/ /phyag rgya chen por bdag sbyor cig /ces gsungs so/ /aoM badzra sa ma ya hUM/ aoM badzra sa ma ya stwaM/ aoM badzra sa ma ya ho/ zhes bya ba ni/ rang bzhin ye shes su gcig par byin gyis brlabs pa'i dus la bab pas de bdag la gsal bar mdzod cig ces bya ba kho na'o/ /dzakhyab par grags so/ zhes bya ba ni/ 'jig rten drug gi lus la sngags nyid gnas pa las lha'i dkyil 'khor dang/ las dang dngos grub ril du snang ba de nyid gsal bar byas pa'o/ /de nas bcom ldan 'das byed pa po rdo rje dang bya ba mo gnyis su med pa'i dkyil 'khor la thim par mdzad do zhes bya ba ni/ lhag pa ting nge 'dzin gyi dkyil 'khor gyis lha thams cad la/ rang bzhin lhun gyis grub pa'i thabs dang shes rab gnyis su med pa'i rgyu kho nas dbang bskur bar bya ba'i phyir ro/ /bdag nyid chen po'i ye shes dang byin bsdu ba zhes bya ba ni/ /ting nge 'dzin gyi dkyil 'khor gyi lha yan lag gi lha rnams ni/ ye shes lnga'i rgyun dang/ sku gsung thugs kyi byin phab pa las 'byung bas de dag nyid du nga rgyal byed pa'i phyir ro/ /aoM ma ha shuA n+ya tA dz+nyAn badzra swa b+hA ba at+ma ko haM/ zhes bya ba la sogs pa ni/ thal ba las/ mi bskyod byed po yum dang bcas/ /rdo rje 'dzin pa'i phyag rgyar ldan/ /byams pas snying de bzhin no/ /gzhan dag rang gi phyag rgya ste/ gshin rje gshed la rtag par bshad/ /thub chen rdo rje 'dzin 'chang ba/ /zla dang bral ba dpa' bo che zhes 'byung ba kho na'o/ /aoM sarba ta thA ga ta ma hA ka ya badzra swa b+hA ba at+ma konya haM zhes bya ba la sogs pa ni/ yang gnas gsum khyab 'jug yi ge las/ /'od zer 'phro ba'i tshogs chen pos/ /khams gsum byin brlabs gzi byin bsdus/ /rang bzhin rdo rje gsum 'chang ba/ /rgyu gnyis tshul gyis rang snang ba'o/ zhes 'byung ngo/ /aoM sarba ta thA ga ta ma hA a nu ra ga swa b+hA ba adma ko haM/ aoM sarba ta thA ga ta puA tsa badzra swa b+hA ba at+ma ko haM/ zhes bya ba ni/ yang lte ba rnam gnyis zla ba la/ sngon ljang yi ge swAhA nyid/ /rjes mthun 'od las yon tan las/ /yan lag rdzogs pa'i gzi byin ldan zhes 'byung ngo/ zhes brjod pas thim par gyur/ gsal bar gyur/ 'bar bar gyur to/ zhes bya ba ni/ ye shes rgyun tu 'bab pa gnyis su med pa dang/ rdo rje gsum mngon du snang ba dang/ yan lag gnyis kyi gzi byin dang ldan pa kho na'i phyir ro/ /de nas rang bzhin gsung gi dkyil 'khor gyi grangs dang las dang mtshan nyid bstan pa'i phyir/ e ma'o ngo mtshar rmad kyi chos/ /rdzogs pa'i sangs rgyas kun gyis gsung/ /sgra dang ming tshig kun las 'das/ /sna tshogs sgra rnams gsal bar 'byung zhes bya ba la sogs pa gsungs te/ drug pa'i don gyi gsung ni/ brjod bya'i ngo bo nyid gung nas 'dir grub pa med pa'i phyir/ yi ge'i sgra thams cad las 'das te/ brjod pa dang bral ba nyid bsam brjod ma lus pa'i gzhir gnas par gsungs pa'o/ /gsung gcig dkyil 'khor yan lag ni/ /bsam gyis mi khyab kun tu khyab/ /sgra dang ming tshig so sor grags/ /thams cad gsung gi phyag rgya'i mchog /ces bya ba ni/ tshig gi gsung ste/ de bzhin gshegs pa'i don gyi gsung nyid brjod bya thams cad du snang ba'i phyir/ de dag mtshon par byed pa'i phyir yan lag tshig gi gsung/ grangs las 'das par snang ba thams cad kyang don re mtshon pa las mi 'da' ba' i phyir/ de bzhin gshegs pa'i gsung nyid do/ zhes bya ba'i tha tshig go /de nas ming gsung gis mtshon pa'i rdo rje gsung gsal bar bstan pa'i phyir/ rgyud mchog sgyu 'phrul dra ba las/ /bde ldan gsung gi don 'byung ba/ /thams cad pad+ma'i dang gyur nas/ /grol thar lam dang 'khor ba'i sgra/ /ji ltar brjod kyang gsung mchog ste/ zhes bya ba la sogs pa gsungs te/ gsang ba'i snying po bde ba chen po'i gsung ni/ 'jig rten dang 'das pa'i sgra thams cad sems nyid kho na'i phyir/ so sor 'dzin pa med na/ ci snang ci srid brjod kyang gos pa med pas shin tu yangs pa'i phyir bde ba chen po'i gsung zhes bya ba'o/ /de nyid las ming gnyis kyi don bstan pa'i phyir/ /theg pa mthon dman thams cad dang/ /logs 'gro ma lus thams cad skad/ /byang chub rdo rje gsung du bsdus/ /bsdus nyid phyogs bcur rnam par grags/ /grags nyid ma chags gong du gsungs/ /gsungs pa nyid na brjod du med/ ces bya ba ni/ de bzhin gshegs pa'i bstan pa dang/ sems can gyi sgra ril/ sems nyid pas bdag nyid kyi gsung du gsal ba ni mngon par byang chub pa'i gsung zhes bya ba'o/ /de nyid du grags stong gnyis su med pas mdza' gnyis su mi phyed pa ni rdo rje gsung zhes bya ba'o/ /tshangs pa'i gsung bstan pa'i phyir/ brjod med de nyid sna tshogs sgra/ /kun la grags shing so sor mthal/ /dper na de bzhin sprid sangs bzhin/ /gsung gi sgra yis thams cad go /'di ni gsung mchog rgyal po yin/ /theg pa mthon dman thams cad kyang/ /de bzhin nyid las ma gsungs te/ /'dul ba'i thabs su so sor thos/ zhes bya ba la sogs pa gsungs te/ don gyi gsung las tshig gi gsung rnams 'dul bya la so sor snang ba ni/ ston pas de bzhin nyid 'ba' zhig gsungs na/ de nyid la sgra'i bye brag ril rdzogs pa'i phyir gdul bya'i bsam pa ji ltar so sor thos pa ni/ dper na bcom ldan shAkya thub pas sprid pa sangs pa lta bu ste/ mdo sde las kyang/ kau di n+ya/ ngas ni gzugs kyi de bzhin nyid 'ba' zhig gsungs na/ /la las ni gzugs stong zhes bya bar thos so/ / la las ni mi stong zhes bya bar thos so/ /la las ni bde zhes bya bar thos so/ /la las ni sdug bsngal zhes bya bar thos so/ zhes bya ba la sogs pa 'byung ba'i phyir ro/ /'o na sprul pa'i sku ltar sku gzhan yang gsung gcig gis nges par gsung ngo snyam pa la/ ji ltar gsung rab kun brjod kyang/ /de bzhin nyid kyis gsungs ba med/ /ces gsungs te/ longs spyod kyi ston pa'i chos rnams kyang tshig tu snang mod kyi/ de bzhin gshegs pas gsungs pa med pa kho na'o/ /'o na ci'i phyir snang snyam pa la ming gsum pa ni rig pa'i gsung mnga' bar bstan pa'i phyir/ /yi ge me dang rig pa'i gsung/ /ljags kyi rtse mor ma phyung yang/ /thugs rje gsung gi byin brlabs kyis/ /'gro don sna tshogs so sor gsal/ /gsal nyid gsung gi rdo rje mchog / ces gsungs te/ rig pa'i gsung ni rig pa kho na'i phyir/ yi ge dang bral ba nyid pas sgra brjod du med pa'i/ /thugs rig pa nyid spros pa dang bral ba de thams cad du khyab pas chos thams cad dang sgra ril bdag nyid du lhun gyis grub pa'i brlabs ni cir yang mi 'gag pas gdul bya'i bsam pa bzhin so sor brda' dus gcig tu sprod par byed pa ni/ drug pa'i gsung du 'gyur ro/ zhes bya ba'o/ /de bzhin gsung gi 'gro don rnams/ /de bzhin ngang las ma g.yos kyang/ /dper na brag ca'i sgra bzhin no/ zhes bya ba ni/ bshang ba nyid kyi phyir/ tshig so sor brjod pa med bzhin du brjod par snang ba ni/ dper na brag cha'i sgra ni rang gis bos pa ltar thos kyang brag gis smras pa med pa lta bu'o/ /dkyil 'khor bsdu ba dang gsang sngags kyi le'u zhes bya ba ni/ /gsung gi dkyil 'khor ji snyed pa yang gsung lnga kho nar bsdus pa lnga'i ngo bo dang las dang gzhal yas khang dang/ lha rnams kyi sngags kyi ngo bo dang las rnams bshad pa'i le'u bdun pa'o// //phyag rgya bstan pa'i phyir/ de nas zhes bya ba la sogs pa gsungs te/ yan lag thams cad dkyil 'khor du lhun gyis grub par byin gyis rlob pa zhes bya ba ni/ yan lag ni gnyis kho na ste/ las kyi yan lag mgo la sogs pa dang/ rtog pa'i yan lag phung po dang/ khams la sogs pa'o/ /de dag rigs lnga la sogs pa'i dkyil 'khor ye nas gnas pa ni rang bzhin gyi phyag rgya yin te/ rgyas pa'i rgyud las/ rang bzhin phyag rgya chen po ni/ /phyi nang snod bcud thams cad kun/ /rigs lnga bder gshegs yab yum gyi/ /phyag rgya chen po'i ngang du gnas zhes 'byung ngo/ /de dag de ltar gang gis shes pa ni lta ba'i phyag rgya'o/ /de ltar rigs nas ting nge 'dzin gyis brtan par byas pa las ma brtsal bar thams cad du snang ba ni lhun gyis grub ste/ de ltar bsgoms pa ni ting nge 'dzin gyi phyag rgya zhes bya'o/ /de las phyag rgya gsum thun mong du bstan pa'i phyir/ /sgyu 'phrul dra bas mngon rdzogs pas/ /thams cad byang chub mchog gi rgya zhes gsungs te/ rtog tshogs thams cad sgyu 'phrul dra ba'i dkyil 'khor du ye nas gsal bar rdzogs pa'i phyir/ ci snang ba ril dkyil 'khor gyi ngo bo nyid las 'da' ba med pa ni/ rang bzhin gyi phyag rgya'o/ /de nyid rtogs pas de ltar gyur pa ni lta ba'i phyag rgya'o/ /de dag mngon du gyur pas thams cad rigs drug la sogs par snang ba ni lhag pa'i phyag rgya'o/ /de dag ni phyag rgya'i mchog kho na'o/ /de dag gzhung gang gis ston snyam pa la/ gsang ba de nyid nges pa yi/ /snying po phyag rgya 'da' dka' o zhes gsungs so/ /lhag pa ting nge 'dzin gyi phyag rgya 'byung ba'i rgyu gnyis brtan pa'i phyir/ mi bskyod nyi ma'i dkyil yi ge / rin chen zla ba'i dkyil yi ge/ lnga gnyis zung du spros pa las/ /sbyar ba phyag rgya 'byung ba'i rgyu zhes gsungs te/ lag pa g.yas g.yon nyid rdo rje dang rin po che'i rigs kyi rang bzhin kho na'i gung mo dang mdzub mo dang mthe bong dang srin lag dang mthe chung rnams la g.yas par nyi ma g.yon par zla ba'i dkyil 'khor/ sran ma tsam bsnams la/ g.yas su hUM dang g.yon du mUM la sogs pa bkod pa ni so so'i phyag rgya 'byung ba'i rgyu kho na'o/ /de dag so sor thad kar sbyar ba ni dngos grub blang ba'i phyag rgya/ 'byung ba'i rgyu kho na'o/ /aoM dang mUM gnyis rtse sbyar te/ 'bru brgyad bsnol nas rtse sprad pa/ /rgyal ba kun dang mnyam sbyor ba'i/ /bde ba chen po sbyin pa'i rgya/ zhes bya ba ni/ dngos grub blang ba'i phyag rgya ste/ rgyud nyid las g.yas kyi gud mo dang/ /g.yon gyi mdzub mo sprad de/ gzhan yang so sor sprad pa ni rigs lnga'i dngos grub blang ba'i phyag rgya'o/ /de dag kyang gdul bya'i snang bas gnyis su 'gyur te/ sgyu 'phrul thal ba'i rgyud las/ mi bskyod rdo rje rtse lnga pa/ /nyi zla'i thig le yi ge dngos/ /rin chen par bu'i nyi lnga pa/ zla ba'i thig le nyi zla nyid/ /thig le thabs shes lnga gnyis bsnams/ /phrad pa'i dus las rang snang ba'i/ /phyag rgya chen po'i dngos grub 'byung/ /dbyings dang ye shes bdag po nyid/ /aoM dang mUM du rang bzhin gnas/ /rwa dang 'dab ma'i thig le rnams/ /rang gi gnas kyis snol mar 'gyur/ /rab tu 'ang 'dres par gyur pa las/ /rgyal ba'i ye shes bde chen po/ /myong phyir thob pa zhes su gsungs zhes 'byung ngo/ /'bru bzhi sbas nas thugs kar bkan/ /hUM bsgreng rtse mor rdo rje 'bar/ /zla brtul 'bru sbas dril bsil zhing/ /'khril ba'i tshul gyis chos la brtan zhes bya ba la sogs pas lhag pa ting nge 'dzin gyi phyag rgya bstan te/ g.yas pa gnod sbyin gyi khu tshur las gung mo bsgreng ba'i rgyab thugs kar gtad la rtse mo'i hUM nyid rdo rje rtse lnga par gyur pa ni/ bcing ba dang bsam pa gnyis ka'i dam tshig gi phyag rgya'o/ /g.yon pa'i zla ba'i yi ge rnams gshad pa'i khu tshur du byas pa dril bu dang bcas pa yum la 'khyud nas dkur bstan pa ni/ bcing ba dang bsam pa las kyi phyag rgya ste/ des thabs dang shes rab 'khril bar sbyor 'byed pa'i phyir ro/ /'bru bzhi sbas nas thugs kar bkan/ /mUM sgreng rtse mor dril bsil 'bar/ /nyi ma 'bru lnga las su 'khril/ /btud te 'dzum pa'i mdangs kyis blta zhes bya ba ni rjes su mthun te go sla'o/ /mUM nyid dril bu sgra dang bcas par gyur pa ni/ yum gyi dam tshig gi phyag rgya gnyis so/ /g.yas kyi sor mo bsnol ma yab la 'khyud pa ni las kyi phyag rgya gnyis so/ /rigs bzhi 'ang de bzhin du shes par bya'o/ /aud bal glu shing la sogs mtshan zhes bya ba la sogs pa ni/ sems dpa' dang sems ma dang sgo ba dang yab yum rnams kyi phyag rgya gnyis pa ste/ sor mo bzhi bzhi la nyi zla'i steng du yab yum so so'i yi ge bzhi bzhi bkod de bca' lugs dang ting nge 'dzin ni rjes su mthun pa kho na'i phyir na/ las la 'khril cing chos la bstan/ /dbu rnams 'byo zhing 'dud pa'i tshul/ /gong gi phyag rgya chen po bzhin/ /gnyis med dbyings kyi ngang? du 'khril zhes gsungs te/ kun kyang 'dzum pa dang bcas pas phan tshun ltas shing 'khyud pa kho na'o/ /de dag kyang gdul bya'i snang bas gnyis su 'gyur te/ thal ba'i rgyud las/ thig le bzhi bsdus gcig tu 'gyur/ /rlung gis bsdus pa bkan par brjod/ /zhal gyi lam dag gang rgyas pa/ /phyag rgya 'bar ba zhes pa'i sgra/ /zla ba nyi mas bsgribs pa yi/ /chu skyes rab tu rgyas pa ni/ /dril bu sgra dang ldan pa'o/ /phyed chung tshul gyis gar skyod pa/ /ltung ba med phyir brtan par bshad/ /zla ba'i thig le rjes mthun par/ /dril bu phyed kyis 'byor dgyes pa/ /mdza' gnyis gnon pa'i byang chub sems/ /phyag rgya chen por 'di brjod do/ /thub drug phyag rgya sna tshogs te/ mdor bsdus phyag rgya drug yin no/ zhes bya ba ni le'u drug par bshad zin to/ /de dag gzhan kun ltar phan tshun 'khyud par ma gsungs pa'i phyir ro/ /yum ni dmigs med ces gsungs so/ /'o na rgyud 'di'i gzhung du mi 'gyur ro snyam pa la chos kyi dbyings zhes gsungs te/ gang yang rang bzhin ma skyes pa nyid dbyings kho na ste/ yum nyid pas gang du yang bral ba med pa'i phyir/ snang ba mi 'gog thabs yin te/ rang bzhin med pas shes rab yin zhe'o/ /kun bzang mnyam gzhag ye shes 'phro/ /yum 'gyur mnyam rdzogs padmo'i dkyil/ /gzhan yang phyag rgya sna tshogs te/ /yang na de bzhin gshegs nyid dam/ yang na rdo rje thal mo nyid ces bya ba ni/ kun tu bzang po ni mnyam pa las sor mo kun tu 'od 'phros pa'o/ /yum gyi phyag rgya ma nges te/ mnyam pa las mtho bong rtse sprad de padmo ltar byas pa dang/ gnyis ni go sla'o/ /de las chos khams dril bu thugs kar brten zhes kyang zer te/ chos nyid cir yang snang ba'i phyir ma nges pa'o/ /lha ba'i phyag rgya bstan pa'i phyir/ /phyag rgya chen po'i tshogs mchog ni/ /thabs dang shes rab ldan 'byor na/ ma bskyod ma bsgul thams cad kun/ /phyag rgya chen po'i dang du gnas zhes gsungs te/ phung po la sogs pa ril lha yab yum gyi sku gsung thugs kyi phyag rgya yin pa ste/ snang la mi 'dzin par gsal ba'i dus na/ sgo gsum gyis ci byas pa dang/ ma byas pa kun sku gsung thugs las 'da' ba med par gnas pa ni phyag rgya'i mchog go / yan lag bzhi bcu rtsa gnyis ldan zhes bya ba la sogs pa ni/ yan lag gnyis pa byin gyis rlob pa ston te/ bdag tu lta ba'i yan lag rtog pa rnams zung cig la yang bzhi bcu gnyis yod pa'i phyir/ mi bskyod pa yab yum gyi rtog pa'i gnas su yab la yab rnams dang/ yum la yum rnams dang yab la thub pa rnams gsal bar bkod de bsgom pa ni ldan pa zhes bya ba ste de ni thabs kho na'o/ /de nyid yan lag spros bdag ste/ zhes bya ba ni/ yan lag bzhi bcu po de dag nyid kho na dang mtshungs pa'i ye shes sems dpa' re re'i snying la nges par gnas te shes rab bo/ /bdag ste zhes bya ba ni bshad pa'i lha rnams dang/ 'chad pa'i rdo rje gsum gyi lha rnams la rigs kyi bdag nyid la lngas dbang bskur bas bdag po'i rigs so sor mtshon pa kho na'o/ /de dag ni ye shes kyi dkyil 'khor stong kho na'o/ /bzhi bcu rtsa gnyis gsum 'phror 'gyur zhes bya ba ni/ bkod pa bzhi bcu rtsa gnyis la/ rdo rje gsum gsum 'phro ba'o/ /de ltar ldan pa'i gtso mchog gis zhes bya ba ni/ gtso bo yab yum la ye shes kyi dkyil 'khor stong/ thabs dang shes rab brgyad cu/ mi zad pa rgyan gyi 'khor lo'i lha brgya nyi shu de dag mngon du gsal ba ni rnal 'byor gyi mchog go /de las gzhan la yang bsgom pa'i phyir/ rgyal ba rgyal mchog de bzhin du zhes gsungs te/ rgyal ba rigs bzhi'o/ /kun tu bzang po ni rigs kyi bdag po'i phyir mchog ste/ yab yum bcu la'ang de bzhin bsgom mo/ zhes bya ba'o/ /bcu gnyis drug gi 'od 'phro 'bar/ /zhes bya ba ni/ yab yum bcu gnyis phrag gnyis kyi sems dpa' dang sgo ba rnams la'ang de ltar gsal la thub drug re re la yang de ltar gsal ba ni snang ba rnam par 'byed pa'i ting nge 'dzin zhes bya'o/ /de la sogs pa bsam mi khyab/ /phyogs bcu dus bzhi bsam yas su/ /'dul ba'i don rnams so sor ston zhes bya ba ni/ de dag las su rung nas dngos por ril dkyil 'khor ma gyur ba med pa des gdul bya ma lus pa'i re ba skod bar byed pa'o/ /'o na gzhi de'i phyir dkyil 'khor kho nas don byed do snyam pa la/ theg pa mthon dman thams cad dang/ /phyin ci log rnams bsam yas dang/ /zhi khro tshogs chen mdza' yas la/ /so sor mthun byas kun tu snang zhes gsungs te/ rtag chad la sogs pa so so'i ston pa rnams dang lha rnams dang bdud dang srin po la sogs pa gang la mos pa ltar snang bas gcig tu ma nges pa'i phyir/ sa gsum thams cad kun tu ni/ /sems dpa' chen po ston byed pa/ /res 'ga' byang chub res 'ga' lhums/ /res 'ga' zhi la res 'ga' drang /res 'ga' gdon chen bgegs mdzad de/ /de la sogs pa mdza' yas mchog /ri dang skye po thams cad do zhes 'byung ngo/ /de dag kyang stsol pas byed pa ma yin te/ lhun gyis grub pa nyid kun tu snang ba'i phyir/ dper na gar mkhan nyid 'dra ba/ /lus las ma gong sna tshogs ston zhes gsungs so/ /phyag rgya'i rnam grangs bstan pa'i phyir/ /mdor na phyag rgya thams cad kun/ /gcig ces 'di zhes brjod du med/ /gnyis dang gsum du rnam par 'phro/ /bskyod dang 'phro ba de bzhin nyid ces bya ba ni/ phyag rgya rim tshig gis mdor bsdu na/ lus kyi yan lag gi phyag rgya bskyod pa kun yang bya ba mo yi phyag rgya ltar gcig tu nges pa med/ zhabs gnyis dbu phyag gsum ste/ lnga la ting nge 'dzin gyi phyag rgya lnga bcur yang 'gyur ro/ /rtog pa'i yan lag spro ba'i phyag rgya la yang sku gsung thugs gsum dang thabs shes rab brgyad cu dang/ ye shes kyi phyag rgya stong la sogs par 'phro bas phyag rgya'i grangs ni ma nges pa kho na'o zhes bya'o/ /mdor na bsgul bskyod thams cad kun/ /phyag rgya chen po'i ngang du gnas/ /gnas nyid mi gnas pa 'ang min/ /de skad dag chog nyid kyis bshad zhes bya ba ni/ grangs de lta bus mtshon nas phyag rgya brjod kyis mi lang pa rnams kyang tshig gis mdor bsdus na/ rang bzhin gyi phyag rgya lta ba'i phyag rgya mngon du byas/ lhag pa ting nge 'dzin gyi phyag rgya gsal bar bsgom pa'i dus na/ ci snang ci byas pa thams cad bdag nyid chen po'i sku gsung thugs kho na las mi 'da' bar gnas la/ de tsam du yang blos 'dzin pa med na/ phyag rgya lhun gyis grub par byin gyis brlabs pa zhes bya ba kho na'o/ zhes gsungs so/ /de dag nyid kho na'i phyir/ yan lag thams cad dkyil 'khor du byin gyis brlabs nas phyag rgya spros pa zhes gsungs pa'o/ /le'u brgyad pa mdor bshad pa'o/ /de'i rjes su lhag pa gzugs brnyan gyi dkyil 'khor rgyas par bstan pa'i phyir/ de nas zhes bya ba la sogs pa gsungs so/ /dgyes pa chen po zhes bya ba ni/ thun mong gi dga' ba dang/ 'jig rten pa'i dga' ba dang/ dga' ba'i dga' ba dag ste/ de dag ni 'dod pa nye bar spyod pa dang/ bsam gtan bzhi dang/ mthong lam pa rnams kyi phyir smos pa ste/ de bzhin gshegs pa'i bsam gyis mi khyab pa'i dgyes pa ni ltos pa tsam ma yin gyi ngo bos kyang che ba ste/ mtshan don gyi skabs las brtags pa'o/ /rdo rje gsang ba'i dam tshig bkod pa zhes bya ba ni/ rang bzhin lhun gyis grub pa'i dkyil 'khor gyi sku gsung thugs kyis phyag rgya thams cad ye shes rdo rje'i ngo bor lhun gyis grub pa de phal gyis yul du ma gyur pas de mtshon cing sbyor ba las mi 'da' ba ni lhag pa gzugs brnyan gyi dkyil 'khor te/ de dag gi las kyi rim pa dang/ tshad dang/ ngo bo dang/ 'jug pa dang/ zhugs nas bsgrub pa dang/ 'bras bu'i bar rnams gsal bar ston pa ni rgyur nye bar gnas pa kho na'o/ /gzhan don nye bar ston pa'i le'u 'di yang rgyud kyi rim pa ring du spangs nas man ngag gi rim pa la 'jug par bya ba ste/ shin tu phra ba'i dam tshig mchog ces bya ba ni/ nye bar ston pa nyid kyang shin tu phra ba'i dkyil 'khor ro/ /'og nas shin tu phral sbyangs pa yis// bsam yas dag la de bzhin bya zhes pa'i phyir/ 'di ni zur gnyis pa kho na ste/ gzhan don nye bar byed pa'i bla mas ting nge 'dzin rnam pa gsum la blo sbyangs te rgyas pa las byung phra ba'i dkyil 'khor la goms nas zlas pa rdzogs par bya ba las mi 'da' ba kho na zhes bya ba'o/ /de nas gnas bzang po ru/ sa'i cho ga bya ba'i phyir/ yang na sa gzhi bar snyams la zhes gsungs so/ /sa btsal ba dang/ bslang ba dang/ rtag pa dang/ spyang ba dang/ bsrung ba rnams mngon par rtogs pa nas 'byung ba ltar sbyang bar bya'o/ /de nas dkyil 'khor rgyas 'bring gi tshad bstan pa'i phyir/ dkyil 'khor khru gang tshad du bya/ /yang ni lus gang tshad du ste/ /yang na lus ni gsum gyi tshad/ ces gsungs te/ sgyu 'phrul bsdus pa ni stang dbyal gnyis pa ste/ de la khru gang ngam bzhi par bya ste/ gnyis pa ni bzo'i sbyor ba'i phyir ro/ /'bring gi dkyil 'khor ni bzhi bcu rtsa gnyis te/ de la lus gsum pa khru bcu gnyis sam gzhan yang/ yang na khru ni bcu drug dang/ zhes bya ba dang/ gnyis so/ /nyi shu 'am nyi shu rtsa lngar bya zhes bya ba ni/ rgyas pa'i dkyil 'khor gyi tshad gnyis so/ /de dag las lhag pa ting nge 'dzin gyi gzugs brnyan bstan pa'i phyir/ yang na rgyang grags dpag tshad dam nam mkha' dbyings kyis bsam yas par/ /sangs rgyas dkyil 'khor sna tshogs bsgom zhes gsungs te/ /de la yang sgyu 'phrul rdo rje las/ slob dpon mthar nye'i lam gnas pas/ /rgyang grags dpag tshad la sogs par/ /rdo rje'i thig tshad dor tsam gyis/ /phyag rgya'i dkyil 'khor gsal ldan pa/ dkyil 'khor sna tshogs mchog tu gsungs zhes 'byung ba ni mchog gi yang ni mchog gi dkyil 'khor te/ slob bu las dag pa rnams kyi phyir ro/ /de dag gang byed kyang las dang bya bas sbyangs nas sa bsrung ba la sbyar ba'i phyir/ 'bru lnga spros lnga rin chen lnga/ /snying po lnga dang sman lnga dang/ /bdud rtsi lnga ni rab snyams la/ /rig pas thig ni gdab par bya/ zhes gsungs te/ phung po lnga dag pa sku lnga thob par bya ba'i phyir 'bru lnga dang/ dbang po lnga dag pa 'phrin las lnga thob par bya ba'i phyir spos lnga dang/ yul lnga dag pa yon tan lnga thob par bya ba'i phyir rin po che lnga dang/ rnam shes lnga dag pas ye shes lnga thob par bya ba'i phyir snying po dang/ 'dod yon lnga dag pa gsung lnga thob par bya ba'i phyir sman lnga dang/ khams lnga dag pa rigs lnga thob par bya ba'i phyir bdud rtsi lnga ste/ de dag cha snyams pa'i 'jim pa'i 'de gu glang ko tsam du byugs la/ der sa bsrung ba bya'o de nas rig pa ma yengs pas thig gdab par bya ste/ de'i phyir/ phur bu srad bu tshon phye dang/ /gos rgyan mdzes pa'i yi 'ong grogs/ /thig gdab chog phun sum tshogs/ /mkhas ldan chen pos bsgrims te bya zhes bya ba gsungs te/ rgyu pad+ma'i rgyus pa 'am ras las mtshan ldan bcu drug mas bka' ba' i skud pa kha dog gsum la dgu bsgril gyi dam tshig gi thig ste/ ring thung maN Da 'khor khyud tsam pa ste/ sku gsung thugs kyi bye brag tsam du byin gyis brlabs pa thogs te/ bcu drug ma rgyan gyi mdzes pa dang/ gnyis kyis drangs te/ rta babs brgyad kyis mdzes par gdab po/ /de nas ye shes kyi thig /kha dog sna lnga la re re yang lnga'o/ /ye shes nyi shu rtsa lngar byin gyis brlabs pa ste/ yab yum gnyis phyag rgyar gsal ba'i byang chub sems ye shes su drangs bas dam tshig gi thig thams cad sku gsung thugs gcig kyang ye shes lnga ldar gsal bas sku dang ye shes kyi gzhal yas su gsal ba kho na'o/ /de nas sa bzung ba'i cho ga byas nas/ skud pa dang rdul tshon ji ltar byin gyis brlab snyam pa la/ rigs kyi dkyil 'khor lnga rnams bsgom zhes gsungs te/ tshon sna re re yang yig 'bru lnga re re yang kha dog nad ris su lnga lnga ste/ nyi shu rtsa lnga 'phros 'dus pa las ye shes nyi shu rtsa lnga drangs shing bstims nas ye shes kyi rin po che nyi shu rtsa lnga kho nar gyur par bya'o/ /de ltar tshon nyi shu rtsa lnga'i dgos pa ci snyam pa la ma mthong rmongs la bstan phyir mtshon/ /kha dog nyi shu rtsa lnga 'am/ /lnga'i tshon gyis bri bar bya/ /'dul ba'i cho ga bzhin du bya/ /zhes gsungs te/ sems nyid ye shes nyi shu rtsa lngar 'dod nas gnas pa de mtshon par bya ba'i phyir te/ rgyas pa'i rgyud las/ sems can ma lus thams cad la/ /ye shes lnga yis kun khyab kyang/ / rang gi rnam rtog bsgrib byas nas/ /ye shes lnga'i don ma mthong/ /de ltar rmongs pa thams cad la/ /ye shes mtshan nyid bstan pa'i phyir/ /dkar dang dmar dang sems dang/ /ljang gu la sogs nag por bstan/ /zhes gsungs so/ /de lta bu'i bri ba yang rgyas 'bring pa gsum ni slob bu gang la dang ba bzhin bri ba'o zhes bya'o/ /de dag gi dbyibs ji ltar bri snyam pa la/ lte brtsibs dang ldan pa yi/ /rtsibs bzhi 'khor lo mu khyud bcas/ /gru chad bzhi dang gru bzhi yi/ /bar khyams sgo khyung ldan par bya/ /zhes gsungs pa go sla ste/ rgyas pa la ni/ gzhi tshad med pa'i 'khor lo'i steng du 'khor lo lnga ste/ 'khor lo drug pa'o/ /'bring po ni dkyus bzhin te gru chad la sogs pa ni gnyi ga la mthun no/ /bsdus pa la bar khams spangs pa ste/ rta babs brgyad la thams cad la yang bri bar bya'o/ /de dag du lha rnams ji ltar dgod snyam pa la/ sku gsung thugs ldan gzugs kyang dgong/ ces gsungs te/ khru gang la sogs pa la tsa ka li dgong pa ni sku'i dkyil 'khor/ snying po 'am ha thA bkod pa ni gsung gi dkyil 'khor ro/ /phyag rgya bkod pa ni thugs kyi dkyil 'khor ro/ /de dag gi rgyan ji ltar bri snyam pa la/ bcos bu ras ni sna tshogs dang/ /rgyan phreng btung ba'i bro bas skong/ zhes gsungs te/ kha dog sna tshogs bris pa'i ras kyi bla 'phan la sogs pa dang/ rin po che'i phreng ba sna tshogs dang/ chun 'phyang dang rol mo sna tshogs dang/ bza' btung sna tshogs kyis bskor ro zhes gsungs so/ /de dag gi rab gnas bstan pa'i phyir/ lus ngag sems dang chos thams cad// gang na 'ang mi gnas mi dmigs pa/ /mig yor tshul du sbyor ba yis/ /nam mkha' la ni nam mkha' bsgom zhes gsungs te gzugs brnyan gsum gyi phyag rgya dang/ gzhal yas khang gis mtshon pa'i chos thams cad/ sems nyid las dngos po gzhan med pa'i phyir/ cir snang yang mig yor lta bur rang gi ngo bo nyid med la sems nyid ji lta bu'i ngo bor yang dmigs su med pa nam mkha' lta bu'i phyir blo yang nam mkha' ltar mi dmigs par rang gsal bar 'dug go /de la shudz+nyA ta zhes bya ba'i sngags kyi nga rgyal bya'o/ /de las rol mo lta bu'i ting nge 'dzin gyis sna tshogs su bskyed par bstan pa'i phyir/ ting 'dzin rol mo mdza' yas mchog /yi ge 'am gdan nam snying po 'am/ /phyag rgya 'am sku gsung thugs ldan par/ /byin brlabs ya mtshan rmad po che/ / 'grub 'gyur sangs rgyas kun gyi dam zhes gsungs te/ dper na rol mo ni gzhi ma nges pa la las thabs kyis drangs nas sna tshogs su snang ba bzhin du/ bshad pa'i mi rtog pa'i ye shes las/ ye shes skad cig ma'i ting nge 'dzin gyi rang dbang sgyur nas 'byung ba'i dkyil 'khor dang bcas pa'i gzhal yas khang gdan dang bcas par snang la/ de dag tu sngar bkod pa'i hUM mUM la sogs pa'i snying po 'am ta tha la sogs pa'i gsung gi dkyil 'khor dang gdan la tsa ka li bkod pa ni sku'i dkyil 'khor dang phyag rgya thugs kyi dkyil 'khor gang yin yang/ de nyid sku gsung thugs gsum dang ldan pa'i lhar byin gyis brlabs nas/ lhun gyis grub pa'i dkyil 'khor yang drangs te/ bstims nas 'dod pa yongs su grub par gyur te/ rang bzhin gnyis dang ting nge 'dzin gsum tshogs pa'i phyir ro/ /'o na gzhan du tshol lam snyam pa la/ sa la sogs pa phyag rgyar byas/ rnam grol rim pa thob par 'gyur/ dag pa'i ye shes kyis spyangs pa/ smos ci dgos te de nyid yin zhes gsungs te/ 'byung ba dang de las gyur pa la/ sku gsung thugs kyi phyag rgya'i dbyibs byas pa tsam gyis kyang/ rgyu dang sems kyi ma rig pas sdug bsngal las rim par grol bar 'gyur na stong pa nyid dang/ rol mo lta bu'i ting nge 'dzin gnyis kyis lhar sbyangs te/ byin gyis brlabs kyang 'dus pa de ni de bzhin gshegs pa'i sku gsung thugs kyi dkyil 'khor kho na'o/ /de'i byin brlabs zhugs pa'i rab tu gnas pa bstan pa'i phyir/ phyogs dus dkyil 'khor bdag nyid che/ mi dmigs thugs kyi dkyil 'khor las/ dkyil 'khor thams cad spyan drang ngo/ /rang snang dbyer med dkyil 'khor la/ /'jug pa'i mtshan nyid mnyam sbyor bas/ /phyogs dus kun nas gshegs pa yi/ /bsnyen pa'i dkyil 'khor rab tu rdzogs/ /nye bar gyur pas dam tshig mchog ces gsungs te/ phyogs bcu dang dus bzhis bsdus pa'i sangs rgyas nyid kyi bdag nyid ni/ byang chub sems rang byung gi ye shes kho na yin la/ de'i ngo bo nyid ni cir yang mi dmigs pa'i stong pa nyid kyi ye shes la ye shes lnga lhun gyis grub pa'i dkyil 'khor ro/ /de nyid gcig kyang ye shes lnga lnga la sogs pa gsal ba las dkyil 'khor thams cad du rang snang ba de las spyan drangs nas bstim mo/ /de yang gung na med de/ sems rang snang ba'i phung po la sogs pa rnams/ rig pa rang snang ba'i sku dang ye shes su dbyer med pa de la/ phyag rgya bzhis bstim nas gnyis su med par gyur pa de la/ rkyen 'jug pa'i mtshan nyid kyis nyams su lon par bsgoms pas/ de la dkyil 'khor ril gyi yon tan rdzogs pa'i phyir/ ci 'dod pa yongs su 'grub par 'gyur ro/ zhes bya ba'o/ /de la phyi dang nang gi mchod pa bya dgos pa'i phyir ro/ /glu tshig bro gar rol mo yis/ /sprin phung tshogs kyis rab tu mchod/ /yum dang 'jom sems ma yis/ ji ltar 'dod pa'i las bzhin mchod/ ces gsungs te/ phyi'i mchod pa lnga dang bla 'phan rol mo rnams dang nang gi dam rdzas rnams dang/ bro gar bcu drug gi glu ye shes kyi mchod pa ste/ gsang ba'i yum dang sems ma brgyad dang/ sgo ma bzhi po dag kyang nam mkha' i khams bkang la dbul lo/ /de dag gi bsam pa dang bskul ba ni/ las gang 'dod pa'i skabs kyis byed pa'o zhes bya ba kho na'o/ /de dag las lhag pa ting nge 'dzin gyi mchod pa dang/ gsang ba'i mchod pa bstan pa'i phyir/ mchod pa'i phyag rgya chen po ni zhes bya ba la sogs pa gsungs te/ spyir gang gis mnyes pa ni mchod pa'i mchog ste/ 'dod pa lngas rig pa tshim par byed pa de dag ma spangs par sems nyid du shes pa khyad par du bya ste/ gnyis su med pa'i ngo bor phul ba ni mchod pa'i mchog gnas su stobs pa'o/ /de dag gi ngo bo ni/ 'jig rten thams cad sangs rgyas kyi zhing dag par byin gyis brlab pa dang/ ril sogs pa thams cad rin po che'i phung por brlab pa dang/ chu thams cad rin po che'i rdzing bu sna tshogs pa'i bar dang ldan par brlab pa dang/ so so'i gnas khang? thams cad rin po che'i khang pa sna tshogs su brlab pa dang/ rtsi shing thams cad rin po che'i dpag bsam gyi shing sna tshogs su byin gyis brlabs pa dang/ sgra skad thams cad stong tshig dang chos kyi sgra sna tshogs su grags pa dang/ gos thams cad lhab lhub? sna tshogs su byin gyis brlab pa dang/ rin po che thams cad phreng ba la sogs pa sna tshogs su brlab pa dang/ so so'i longs spyod thams cad bdud rtsi'i longs spyod sna tshogs su brlab pa dang/ 'gro ba rnams kyang lha dang lha mo rgyan gyis khyad par du mdzes shing mchod rdzas sna tshogs thogs pa dang/ de dag gi dkyil 'khor thams cad la stobs par bya'o/ /de dag dbul ba'i tshul ni/ skal ldan gsal ba'i khyad par gyis/ /rim gyis yang na cig car du/ /chos kyi dbyings dang mnyam sbyor zhing/ /mchod pa'i phyag rgya chen por bsgom zhes gsungs te/ rnal 'byor pa'i blo'i rim pa ltar/ tshig gi rim pa ltar ram/ skad gcig gis chos nyid la chos nyid thim pa'i tshul du 'dul lo zhes bya ba'o// // gsang ba'i mchod pa bstan pa'i phyir/ /gsal ldan ma 'am byin brlabs la/ /stong gsum yungs 'brur 'jug tshul du/ /dbyings nas dkyil 'khor spyan drangs mchod/ /mnyes nas grub pa'i dam tshig mchog ces gsungs te/ mchod pa'i yum dang shes rab dang ldan pas rang gis bsgoms pa'am/ gtso bos rlabs nas sna rtser yungs 'bru tsam gyis gzhal yas su lha tshang bar bkod de/ rang bzhin gyi dkyil 'khor spyan drangs bstim ste/ rol pa'i bde ba ji ltar myong ba ltar thams cad mnyes pa dang tshim par 'gyur ro/ /de dag gnyis su yang 'gyur te/ thal ba'i rgyud las/ shes rab thabs kyi rtsa gnas su/ /dra ba'i thig le yi ge nyid/ /sgyu 'phrul dkyil 'khor gnyis su brlab/ /b+ha ga 'dus pa'i yungs 'bru ru/ /khams gsum 'gro rnams bsdu bya ste/ /rtog tshogs dkyil 'khor mdun du bya/ /phyogs dus dkyil 'khor spyan drangs te/ rig pas so so'i gnas su bstim/ /bskyod pa'i ha si sgras bskul ba'i/ /bdag nyid chen po lnga'i rgyun/ /steng sgo nas 'byung bde ba'i bcud/ /so so'i bzhi bcu gnyis la thim/ /kun nas bde ba'i ye shes che/ /rgyal ba mnyes pa'i mchog tu gsungs/ /bco brgyad phrag gnyis bum pa dang/ /drug gnyis gzer gyis sbyangs nas ni/ /dbang sgyur byin brlabs bde thob pa/ /theg pa chen por dbugs phyung pa'o zhes 'byung ba'o/ /de lta bu'i rab gnas kyi dus su sbyin sreg bya ba bstan pa'i phyir/ /dbyibs dang kha dog mtshar ldan par/ /zhal du gyur pa'i me bos la/ /bza' ltung bro ba'i tshogs rnams kyis/ /las bzhi mchod par rab tu sbyin zhes gsungs te/ rgyas pa'i rgyud las/ 'phrin las bzhi la hom thab brgyad bstan pa las/ 'dir gnas skabs kyis rgyas pa'i thab gru bzhi 'am/ rin po che zur brgyad du byas te/ kha dog ser po bang rim dang sgrom dang rdo rje zhags pas bskor ba'o/ /de nyid kho na'i gzhal yas khang bsgoms te/ me lha ser po sgrom thogs par bskyed pa dang/ /drangs nas mchod de/ lto bar yang rgyas pa'i dkyil 'khor bskyed pa dang drangs nas bdud rtsi la sogs pas mchod de 'dod don gsol bar bya'o/ / //khro bo'i dkyil 'khor de bzhin te/ shin tu 'phral sbyangs pa yis/ /bsam yas dag pa de bzhin bya/ /rig pas dpag pa tsam du'o/ /zhes bya ba ni/ khro bo la sogs pa'i dkyil 'khor byed na yang las dang sbyin sreg rjes su mthun no zhes bya ba'o/ /dpag tshad la sogs pa mchog gi dkyil 'khor la yang de ltar bya'o/ /zhes bya ba'i tha tshig go/ //de ltar mchod pa rdzogs nas dkyil 'khor du 'jug pa bstan pa'i phyir/ kun byas dbang phyug rig pas 'jug/ de nas slob bu gzhug par bya zhes gsungs te/ bshad pa'i las rnams rdzogs nas slob dpon 'khrus gos dang ldan pas shar sgor gus par 'dug ste/ le'u bdun par bshad pa ltar zhugs pa ni/ rig pas zhugs pa kho na'o/ /de nas bu rnams khrus byas/ gdong g.yogs/ dri ba byas/ lus dbul/ byin gyis brlabs/ dam tshig dpog /nan chags bya/ dam tshig bsgrags/ me tog dor/ lha dpog /mig dbye/ dkyil 'khor ngo bstan par bya'o/ /de ltar zhugs pa'i phan yon dang/ yi dam lha mi spong bar gdams pa bstan pa'i phyir/ bde ba chen po'i dkyil 'khor la/ /stang dbyal gnyis sam yang na lnga/ /byas te dad ldan rab bzhugs na/ /'dod pa yid 'ong mnyam par 'gyur zhes bya ba ni/ rigs lnga thabs dang shes rab 'brel ba ni bde ba chen po kho na'o// de dag lhag pa gzugs brnyan gyi skabs su/ bsdus pa la ni stang dbyal gnyis so/ /rgyas pa dang 'bring la ni lnga pa ste/ de dag tu bshad pa bzhin zhugs pa'i yon tan ni/ sngon 'og min du zhugs pa dang/ mnyam par ston te/ gzhan dag las/ rdo rje sems dpa' la sogs pa'i/ /'khor lo mngon du mthong ba yi/ /bsod nams rtag pa gang yin pa/ /phyis byas pa'ang de bzhin no/ /zhes 'byung ngo/ /de ltar zhugs nas phog pa'i lha bsgrub dgos pa'i phyir/ skal pa mnyam pa'i ye shes te/ /gnyer na nye bar 'byung ba yi/ /ya mtshan chen po 'byung bar nges/ /dad med nyams na phung bar 'gyur zhes gsungs te/ bdag gi rang bzhin yang sku gsung thugs rdo rje lhun gyis grub pa la ni khyad par med pa kho na'o/ /yin mod kyi rtags pas sgribs pa de bsal ba'i thabs ni/ le'u lnga pa ltar ting nge 'dzin myur du 'grub pa'i phyir/ rtsa ba'i dam tshig gnyis su mnan nas gsungs pas bsgrub pa la nan tan che bar bya'o/ zhes gsungs pa'o/ /de nas dbang thob pa'i rgyu yon dbul ba bstan pa'i phyir/ de nas rigs kyi bu mchog des/ /rgyal srid dang ni rang gi lus/ /bu dang chung ma nor gyi dbyig /rab tu gces dang yid 'thad dbul zhes gsungs te/ rang gi lha de bzhin gshegs pa'i rigs la rgyal srid dbul lo/ /rdo rje'i rigs la rang lus dbul lo/ /pad+ma'i rigs la bu dang chung ma dbul lo/ /rin po che'i rigs la de nyid do/ /las kyi rigs la rang gces pa dbul lo/ /bdag po'i rigs la bla ma thugs dang ci 'thad pa dbul lo/ /de'i yon tan ci zhig snyam pa la/ /dbang phyug longs spyod lngas mchod na/ /dkyil 'khor thams cad mchod pa yin/ nye ba'i dkyil 'khor smos ci dgos/ /nyes pa thams cad dag par 'gyur zhes gsungs pa go sla ste/ bla ma mnyes pas thun mong dang thun mong min pa'i sdig pa sbyang ba'i phyir/ yon la ser sna spang ngo zhes bya ba'o// //de nas dbang bskur ba'i rim pa bstan pa'i phyir/ dad rtson brtul zhugs rab rtogs nas/ /phan pa'i dbang sbyin nus pa'i dbang/ /rim pa bzhin du bskur bar bya/ snying rje chung ma zos par zung zhes gsungs te/ theg pa 'di la dad pa rnams la phan pa'i dbang bcu 'di dang phyi mar phan gdags pa'o/ /bdag don gyi rtson pa can la nyan bsgom gyi dbang gnyis po sbyin no/ /gzhan don rtson pa can la nus pa'i dbang gsum po bskur ro/ /brtul zhugs ni rab 'bring gsum ste/ spyod pa'i brtul zhugs dang/ rig pa'i brtul zhugs dang/ mnyam pa'i brtul zhugs so/ /de yi dbang yang gsum ste/ dam rdzas kun la spyod pa'i dbang dang/ rang rig thams cad mkhyen pa'i dbang dang/ shin tu bstan pa'i dbang dang gsum rim pas sbyin te/ skas kyi gdang ltar 'dzegs nas/ bar ma dor mi 'dor ro/ zhes bya ba'i tha tshig go /bdag po'i yon tan dang/ brtul zhugs dbang du dkyil 'khor gsungs pa/ shin tu 'phra ba'i dam tshig mchog/ phyag rgya chen po'i phyag mthil du/ /thugs kyi dkyil 'khor yi ge hUM/ /sor ni bzhi'i tshad du bya zhes gsungs te/ nyid kyi mnyam pa'i phyag rgya'i steng du 'phra ba'i dkyil 'khor dgod do/ /gzhan du na/ thal ba'i rgyud nas/ phyag rgya chen po nam mkha' i dbyings/ /sor bzhi'i tshad du rang bzhin gnas/ /bde ba'i ye shes thugs dkyil 'khor/ /kha dog dbyibs dang ldan par bya/ /thabs kyi rab gnas cho gar ldan/ /'jug pa pos kyang gsol ba gdab ces 'byung ngo/ /de'i phyag rgya dgod pa gang zhig snyam pa la/ sen zlum tsam gyi nyi zla la/ /tsa na'i 'bru tsam padmo'i gdan/ /yungs 'bru tsam gyi yi ge la/ /phyag rgya til 'bru tsam du bri zhes gsungs so/ /yi ge yungs 'bru tsam las sku nas 'bru tsam dgod pa dang/ yi ge til 'bru tsam la sku yungs 'bru tsam dgong pa'o/ /de la dkyil 'khor gzhan ltar zla med dam snyam pa la/ yang na thal mo rab snol nas/ /phyag rgya chen po'i phang du ni/ /dkyil 'khor mdzub gang tshad du bya/ /mkhas pas cho ga bzhin du bya zhes gsungs/ ba'o/ /de ni thal ba'i rgyud las/ thal mo zhes bya rdeb pa'i sgra/ dbang po yul du rab sbyor bas/ /phyag rgya chen po nam mkha' i dbyings/ /brtul shugs chen pos pad du blang/ /rdo rje mdzub mo'i rtse dag tu/ /til 'bru nam mkha' i gzhal yas su/ /ri rab tsam gyi phyag rgya dgong/ /thabs kyi cho ga rab gnas dang/ /gsang ba'i sbyin sreg lugs su dbul zhes 'byung ste/ de dag gi las rim ni bla mas 'chad par 'gyur te/ dbang rdzogs par bkur ro/ / //de ltar dbang thob nas bskyed pa'i rim pa le'u lnga pa la sogs pa ltar ting nge 'dzin bzhi la gnas par bya ba'i phyir/ cho ga lnga ni rdzogs byas shing/ /yo byad lnga ni rdzogs par ldan/ /sngags kyi yan lag lnga rdzogs pas/ zhes gsungs te/ ting nge 'dzin dang po gnyis kyi dus su shes rab dang mthun pa'i spyod pa dang/ thabs dang mthun pa'i spyod pa gnyis dang yang ldan par byas nas/ de nas sku gsung thugs kyi cho ga gsum gyis sku bskyed de/ phra mo'i ting nge 'dzin gyi skabs su phyogs gcig pa'i spyod pas blo sbyangs pa ni rdzogs pa zhes bya'o/ /yid skyob pa dang byin gyis brlabs kyis phyir sngags te lha'o/ /de nyid kyi lus nyid kyi yan lag mgo bo la sogs pa la phyag rgya lnga bcu tham pa/ rgyas pa'i rgyud bzhin bkod pa dang/ rtog pa'i yan lag phung po la sogs pa dkyil 'khor bzhi bcu rtsa gnyis su snang ba rnam par 'byed pa dang/ de nyid kyi yan lag gcig la yang de dag tshad bar dgod pa dang/ de dag la yang rdo rje gsum bsgom pa dang/ dbang bskur ba'i yan lag dang lnga rdzogs te snang ba rnam par 'byed pa la dbang thob nas/ bza' btung dang sgra'i rol mo dang gro gar dang/ gos rgyan dang/ a li ma rnams dang/ 'khor gang gi gnas su tshud par byas te/ tshogs kyi spyod pas bsgrub po zhes bya ba kho na'o/ /des 'grub pa'i dus dang/ dngos grub bstan pa'i phyir/ ma nyams 'jug pa rab brtson pas/ zhag ni sum cu zhag drug gam/ bcu gnyis bcu bzhi bcu drug gis/ /dbang sgyur rigs kyi dam pa 'grub ces gsungs te/ gong ma las lta ba dang dam tshig ma nyams par brtson pa la gnas na/ zla ba drug nas bcu drug gi skabs kyis tshe la dbang ba thob par 'gyur te/ de ni? lus mi 'dor ba'i phyir rigs 'dzin gyi mchog grub pa'o// de nyid kho na 'am snyam pa la/ de tshe bcu drug tshun chad kyis/ /sku lnga lhun gyis rdzogs pa ni/ zhes gsungs te/ rgyas pa'i rgyud las/ tshe ni bcu dang drug pa yi/ /brgya brgya dag tu bsnur zhing gnas/ /lus ma bor bar sangs rgyas sa zhes 'byung bas/ blo dang brtson 'grus kyi shugs che chung gis lo brgya nas brgya phrag bcu drug gis bar du bsnur zhing tha ma yang des sku lnga mngon du grub pa'o/ /grub pa'i tshul ni ji lta bu yin zhe na/ ye shes thig le de nyid la/ ye shes thig le nyid snang ba/ /bsam gyis mi khyab mdza' yas mchog ces gsungs te/ bsgrub pa po'i rrang rig pa'i ngo la/ sangs rgyas kyi ye shes kyi yon tan brjod pa las 'das par snang ba yang/ gnyis su med pa'i tshul gyis snang ba nyid la nyid ces gsungs so/ /gzhan du na/ bde 'dus ye shes thig le las/ /mdza' yas ye shes rang snang ba/ /ma brtsal lhun grub rigs 'dzin mchog /ces pas lhun gyis grub pa'i rigs 'dzin zhes bya ba'o/ /phyogs bcu dus bzhi mngon rdzogs pa'i zhes bya ba la sogs pa ni/ chos kyi dbyings mdza' klas pa'i de bzhin gshegs pa thams cad kyi zhing khams gsum dang gzhal yas khang dang/ sku gsung thugs yon tan 'phrin las lnga la sogs pa ril gcig tu gsal bar snang nas/ de dag gi rig pa'i gsung gis bsngags pa dang/ chos ston pa dang/ dbang bskur pa thob ste/ bsam yas lhun gyis grub pa'i ting nge 'dzin mngon du byas pa ni/ rang 'byung gi ye shes dang/ rig pa'i ye shes dang/ lhun gyis grub pa'i ye shes gsum tshul gcig tu gyur bas mthun pa zhes bya ba kho na ste/ de'i phyir rang snang ba'i zhes gsungs so/ /rang snang ba'i tshul ji lta bu snyam pa la/ dpe ris bstan pa'i phyir/ dpag bsam shing dang yid bzhin gyi/ zhes bya ba la sogs pa gsungs te/ dpe ni go sla'o/ /ngo mtshar cho 'phrul rmad kyi chos/ /gzhan nas yod 'ongs ma yin te/ thabs la brten pa'i shes rab nyid/ /de lta bu'i ngang du 'byung zhes bya ba ni/ gzhi ci yang ma yin pa las/ nyi shu rtsa lnga sogs par mdza' yas par rang 'byung gi ye shes rang snang ba ni rmad du byung ba ste/ de dag bkug pa dang bgrod pa dang/ rgyu rkyen gyis ma byas par phung po la sogs pa sku gsung thugs kyi phyag rgya gsal ba de rang rig par rgyun tu bsgom pa las rgyu 'bras gnyis su med par rang 'byung ba'o/ /de ni rgyun las 'byung ba'i phyir/ rgyu rkyen las skyes so bar dogs pa la/ shes rab dbyings kyi de bzhin nyid/ /thabs kyi phyag rgyar 'gyur ba'i phyir/ /ye shes la ni ye shes ril zhes gsungs te thams cad bdag nyid kho na'o phyir/ /gang du 'di mi dmigs par rang gsal ba ni mnyam pa nyid kyi dbyings te theg pa chen po'i de bzhin nyid do/ /de nyid gdod nas thams cad lhun gyis grub pa nyid rang snang ste/ gyur pa ni gdul bya'i bla dags so/ /de bas na lhun gyis grub pa'i ye shes nyid bsam gyis mi khyab pa'i ye shes su rang snang ba de la rol zhes bya ba kho na'o/ /de dag mtshan mar gyur ro bar dogs pa la/ ye shes rol pa nyid kyang gsog ces gsungs te/ de'i ngo bo nyid ni cir yang bzung du med pa kho na'o/ /'o na des don brtan par mi nus so snyam pa la/ rgyal ba mngon 'byung skyob pa dang/ /byin brlabs ston pa'ang de bzhin de/ bya byed nus pa'i gzhi byin gyis/ /sgyu mo rdo rje btsan po mchog /ces gsum te/ /'gro ba drug la snang ba'i sprul pa'i sku dang/ de dag ston pa'i longs spyod sku dang/ sangs rgyas thams cad kyang bshad pa'i tshigs su gcad pa gnyis kyi tshul kho na bas/ sku gsung thugs kyi gzi byin dang/ sgyu ma'i rol pas cir yang don byed tsam na/ rang gi ngo bo nyid ni 'dus ma byas ba dang/ mi phyed pa'i phyir skye 'jig med pas/ rdo rje'i sku ste khyad par du 'phags pa kho na'o zhes bya ba'o// //mthar phyin pa de dag ngo bo nyid bstan pa'i phyir/ gcig dang du ma bral ba'i phyir/ /mdza' dang dbus med de bzhin nyid/ /sangs rgyas kyis kyang mi gzigs te/ /rang 'byung ye shes gnas med snang zhes gsungs te/ gcig gi ngo bo la yang thams cad bdag nyid chen por gyur pa'i phyir/ phan tshun ma yin pa'i tshul gyis gsal ba dang/ de nyid kyi tshul gyis thabs rnams ni ma 'dres par snang ba'i phyir/ rgyas pa'i rgyud las/ thabs chen ma 'dres rnam par thar pa'i dmigs med bder gshegs nyid dbyings thugs chud pas/ /dus bzhi rgyal ba kun dang mnyam par 'ub/ ces gsungs so/ de la yod pa dang med pa dang dbus dang/ dran rtog rtag chad skye 'gag 'gro 'ong la sogs pa thams cad las 'das pa'i phyir/ ngo bo nyid bstan du med pa thams cad lhun gyis grub par rang snang ba'i rang 'byung gi de bzhin nyid de mngon du byas pa'i phyir de bzhin du gshegs pa'o/ /yang dag par rdzogs pa'o/ /de ni gnas bya gnas byed gnyis med pas thams cad du rang snang ba'o zhes bya ba'o/ /'o na gnyis su bya ba med pas gdul bya mi gzigs so bar dogs ba la/ log par rtogs rtags rnam dag cing/ /ye shes dbyings lha mi gzhan phyir/ /thugs rje chen pos 'brel bas na/ /'gro drug dus na ma lus snang zhes gsungs te/ thams cad du thams cad kyang rang rig pa kho na'i phyir gnyis su med pa la/ gnyis su rtog pa ni log rtog ste/ de'i rgyun gyi de nyid du snang ba ni/ kun tu brtags pa ste glo bur ba'o/ /gang de las log pa ni dag pa ste/ de bzhin gshegs pa'o/ /dag pa'i phyir 'gro ba ril rang rig pa las mi gzhan par gsal bas/ thams cad zin pa dang khyab pa dang/ gnyis su mi rtog pa'i gtan tshigs gsum grub pas phyir zhes bya ste/ /de kho na theg pa mchog gi lugs kyi thugs rje'o/ /de'i phyir rtog pa med par gsal ba kho na'o/ /zhes bya'o/ /le'u dgu pa man ngag gi rim pa bshad pa'o// //dbang bskur ba ston te/ bshad pa'i rjes su nye bar 'jug pa'i phyir/ rgyal po sbyin pa zhes gsungs te/ che ba thams cad thob pa dang/ thams cad la dbang sgyur ba'i phyir/ rgyal po zhes bya ste/ don yang rjes su mthun pa'i phyir dbang phyug ces kyang bya'o/ /de nyid don gnyis kyi phyir nges pa'i tshig tu yang 'gyur ro/ de lta bu snod gsum po la thob par byed pa'i phyir/ sbyin pa zhes bya'o// //brtul zhugs can gyi dbang bstan pa'i phyir/ shes rab thabs kyis phyag rgya las/ /bde ba'i 'bru tshogs gsal ba'i rgyun/ /rdo rje lam nas padmor 'khyil/ /rtse nas bstim zhing dkyil 'khor sgyur zhes gsungs te/ de ni bdag gis mi nus kyang/ thal ba'i rgyud las/ mi bskyod yab yum rol pa yis/ /bde ba gsal zhing mi dmigs pa/ /shes rab thabs kyi phyag rgya'o// rdo rje ye shes hUM tshogs kyis/ /padmo'i ye shes bsdus 'khyil pa'i/ /yungs kar tshang tsam rdo rje sems/ /rtse nas rtse ru byin pa yi/ /rang bzhin chos khams dkyil 'khor gyi/ /sa bon zung gsum nyid dang bcas/ /gnas ngan len pa gsum sbyangs te/ /dmigs med sems kyi ye shes lnga/ /gsal bas sa bon tshig pa bzhin/ /mi skye thabs kyi dbugs phyung ba'o/ /de las gzhan yang bshad bya ba/ /rjes su 'jug pa'i phyag rgya nyid/ /zil ba'i thig le sngon lam bzhin/ bcu drug phyed phyed thig le gcig / phan tshun dgod pa'i stobs kyis bsti/ /bde ba gnyis pa'i ngo bo nyid/ /gsum pa'i ye shes dkyil 'khor du/ gsal bar shar bar gyur pa'i sgra/ /rang bzhin 'od gsal dkyil 'khor ro/ /de las gzhan yang bshad bya ba/ /rdo rje nyi ma thabs kyi rgya/ /phung sogs phyag rgya tshogs dang ldan/ /de zla bsil byed shes rab dngos/ /dus gcig ro mnyam thig le che/ /sum cu rtsa gnyis mtshan rdzogs shing/ /zla ba'i ye shes lnga bcu drug/ dpe byad la sogs dpag tu med/ /sems shes mngon par shes dang ldan/ /sems mdza' 'gro 'ong rdzu 'phrul shes/ /gnas nas log pa thim pa'i sgras/ /mdza' gnyis ma gos pad+ma'i spyan/ /sprul pa'i gnas nas bkye ba yis/ /bzhi bcu lnga sogs mdza' yas kun/ /rang bzhin nyid las rang gsal ba'i/ /bcu gsum yi ge 'khor lo brjod/ /ces 'byung ba kho na'o// //nyan byed 'khor lo'i gzhal yas su zhes bya ba la sogs pa ni bdag don gyi nus dbang ston te/ rna ba gnyis kyi rtsa'i nang na bcud 'dus pa'i thig le shin tu dang ba gnas pa las/ rtsa ni 'khor lo'i gzhal yas khang sgo dang bcas par bsgom/ thig le traM zung lngar gyur pa las cho ga rin po che'i dkyil 'khor yab yum bcu sgo ba yab yum dang bcas par gyur pa 'phro 'du las 'od du gyur pa slob bu rin chen 'byung ldan du byas pa la po ti gtang de/ traM gsang ba gsang chen gsang mchog gang zhes bya ba la sogs pa brjod de dbang bskur ro/ / //gsal ba'i 'khor lo'i gzhal yas su zhes bya ba la sogs pa ni rjes su mthun te/ snying la yi dam gyi lha gang yin pa'i rigs su bskyed pa ste phreng ba sbyin no/ / lag pa'i 'khor lo'i gzhal yas su zhes bya ba la sogs pa ni/ gzhan don nus pa 'phrin las kyi dbang ste/ sbyor ba ni rjes su mthun te/ lag pa'i rtsa gnyis la las gyi rigs bsgom mo/ /rdzas rdo rje gram sbyin no/ /smra byed 'khor lo'i gzhal yas su zhes bya ba ni 'chad pa'i dbang ste pad+ma'i rigs bsgom pa ste/ 'khor lo sbyin no/ /bskyod chen 'khor lo'i gzhal yas su zhes bya ba la sogs pa ni dbang phyug chen po'i dbang ste/ yan lag mgo bo'i dbang po lnga la aoM zung lnga/ g.yas kyi sor mo lnga la hUM zung lnga/ de bzhin du g.yon pa la traM/ rkang pa g.yon gyi sor mo la h+rI/ g.yas la ha/ lus kyi phyogs mtshams su hUM zung bcu'o/ /de dag las tshom bu lnga dang/ khro mo khro mo rnams bskyed pa yongs su gyur pa las/ kun tu bzang por gyur pa la/ rdo rje dang dril bu gtad de/ tshig bshad brjod do// //dbang ma thob pa'i skyon bstan pa'i phyir/ /slob dpon mnyes par ma byas shing zhes bya ba la sogs pa gsungs te/ go sla'o// //dang po phan pa'i dbang bstan pa'i phyir/ dbu rgyan cod pan phreng ba dang/ /go cha rgyal mtshan phyag rgya dang/ gdugs dang bum pa bza' btung dang/ snying po lnga yis dbang bskur zhes gsungs te/ dngos su bskur ba ni go sla'o/ /de yang thal ba'i rgyud las/ khams bcud bde ba'i lam gnyis dang/ /dbu ma bcud mdud mtshan ldan pa/ /dra ba'i rtsa dang dbang po dang/ /phung sogs ye shes bde 'khor lo/ /hUM gis bde ba ye shes bcas/ tshogs brgyad rang bzhin ye shes lnga/ /sngags rdzas dgongs pa gang ba smad pa/ /kun nas ldan zhing skyob pa yis/ /sdug bsngal las grol rigs su des/ zhes 'byung ba'i phyir/ phan pa'i dbang po kho na'o/ / //dus 'di phyin chad rgyal ba'i sras/ zhes 'byung ba la sogs pa ni go sla ste/ dbang gi yon tan thun mong du lha dang mar skyes na yang bdag por 'gyur la/ /nus pa'i dbang po thob nas thar pa'i lam ston pa'i bdag por 'gyur ro/ //zab mo'i dbang thob pa ni/ rigs kyi bdag po rdo rje 'dzin pa nyid du des so/ /zhes bya ba'o/ /le'u bcu pa mdor bshad pa'o/ /de nas ting nge 'dzin bzhi pa la gnas pa'i don du/ tshogs kyi dkyil 'khor bstan pa'i phyir de nas zhes bya ba la sogs pa gsungs so/ /rgyal po sgyur ba zhes bya ba mi sgyu 'phrul dra ba zhes bya ba nyid le'u bzhi par yab yum kho na la bya ba'i phyir/ tshogs kyi dkyil 'khor gyi skabs 'dir yab yum bdun cu la sogs pa'i phyag rgya 'brel pa ni sgyu 'phrul dra ba'i yang rgyal po'o/ /de dag gi dus su longs spyod thams cad dang ldan pa yang rgyal po zhes bya'o/ /'dus pa de dag rtogs pa rnam pa bzhis thams cad kyang sku dang ye shes kho nar gsal ba'i phyi spyod yul longs su dag pa ni sgyur bzhes bya ba'o/ /de lta bu'i don ston pa'i dgongs pa ma don du snang ngo/ zhes bya ba'i tha tshig ste gdul bya'i snang ba'o// //rgyu gcig pa dang yig 'bru'i tshul zhes bya ba la sogs pa ni/ lta ba'i gtan tshigs ston te/ rgyu rang 'byung gi ye shes rang snang ba'i sku dang ye shes te/ de dag ni mya ngan las 'das pa'i ngo bo'o/ /rgyu ma rig pa dang log rtog gi rgyun las 'khor ba'i chos su snang ngo/ /de gnyis ni gsal bas tha dad kyang ngo bo gcig pa ste/ 'khor ba'i rgyu gnyis po nyid rgyal po phru gu ltar las nor yang rang gi ngo bo mi 'gyur par bstan pa'i phyir/ rgyas pa'i rgyud las/ gti mug ces ni brjod pa yang/ ma rig ming gi rnam grangs te/ gnyis med don gcig yin par bshad ces pa dang/ yang/ phyin ci log ni yang dag ste/ ma rig pa nyid ye shes gsal/ /nyon mongs sdug bsngal byang chub mchog ces 'byung bas/ log rtog tu rig pa rang snang ba'i phyir/ rang 'byung gi ye shes kho na bas de'i ngo bo bstan du med pa ni mnyam pa'i dbyings su gsal bas thams cad rgyu gcig pa kho na'o/ /yig 'bru ni aoM ste/ rgyu nyid kyi phyir thams cad sems nyid las gang yang ma grub pa dang/ sems nyid ci yang ma skyes pa ni a ste gsung gi rang bzhin no/ /ngo bo nyid gcig tu ma grub pa ni/ rig pa cir yang snang ba ni a la na ro snang ba ste/ sku'i rang bzhin no/ /de dag tshig la snga phyir snang ba yang don gcig par rtogs pa'i rig pa nyid ye shes lngar gsal ba ni/ aoM ste thugs kho na'o/ /yi ge gcig pa gsum gyis mtshon nas phung po la sogs pa thams cad sku gsung thugs su sangs rgyas par byin gyis brlabs pa'i phyir/ byin gyis brlabs dang/ zhes gsungs so/ / mngon sum par zhes bya ba ni/ mngon sum bzhi las/ 'dir blta bya lta byed gnyis med pas rang rig pa'i mngon sum mo/ /des thams cad bshad pa'i rjes su dag pa'i phyir/ rab tu rtogs pa rnam bzhi yis/ /thams cad mngon rdzogs rgyal po che zhes gsungs so/ /yan lag dbang po rnam pa kun/ /rnam smin aoM du shes par bya/ zhes bya ba ni/ 'di nas mar spyod pa'i ting nge 'dzin bstan te/ 'di dag tu rang rig ba nyid snang bar shes pas/ rab 'bring tha mar mi snang gi bdag nyid du gsal ba ni ye shes lnga'i ngo bo bas/ aoM zhes brngar bstan to/ /de las zhi khro'i tshogs kyi dkyil 'khor gnyis kyi skabs su snang ba rnam par 'byed pa'i ting nge 'dzin gtso bos rigs lngar bsgom yang mi 'gal ba'i phyir/ rdzogs pa'i dkyil 'khor nyid du bsgom/ yang na khro bo'i dkyil 'khor bsgom zhes gsungs so/ /gzugs sgra dri re rig rnams la/ rnam smin mUM du shes par bya/ zhes bya ba ni/ rgyu nyid kyis 'bras bu yang bdag las mi zhan pa'i phyir/ gang du yang snang ba med par gsal ba ni mnyam pa nyid kyi dbyings te mUM zhes bya ba'o/ /gzhan ni rjes su mthun no/ /tshogs kyi yo byad bzhi byin gyis brlabs pa'i phyir/ gos rgyan bza' btung glu tshig dang/ bro gar tshogs kyi sprin phung la/ hUM du shes pas rab spyad na/ /ngo mtshar 'byung ba'i dkyil 'khor mnyes/ zhes gsungs pa gzhan ni go sla ste/ bro gar ni rigs so so'i bro gar/ rgyas pa'i rgyud las/ le'u gcig gis bstan to/ /de dag rab tu mang bar spyod pa'i phyir/ tshogs dang sprin zhes bya'o/ /de kun rang rig tu shes nas spyad na/ sbyong bzhin ma chags pa chu la nya dang/ nam mkha' la bya lta bu'i tshul gyis mi gos par/ tshogs gnyis su 'byung ba ni ngo mtshar ro/ zhes bya ba ste/ bdag nyid chen po'i mchod pa kho na'o/ /yo byad lnga pa byin gyis brlab pa bstan pa'i phyir/ lha mo klu mo rigs ngan mo/ zhes bya ba la sogs pa gsungs te/ 'di dag ni nus pas dngos su dgug pa yang yin la/ lo grangs gsum dang mtshan rab 'di dang/ zla ba dang/ nyi ma ldan pa dang mi ldan pa gsum dang/ sbyor ba'i thabs dag bde ba dang/ gzhan bde ba dang/ gnyi ga bde ba rnams kho na'o/ /dbye 'am yang na mi dbye bar zhes bya ba ni/ rang gi thabs dang sbyor ro/ zhes bya ba'o// bsnyen pa dang ni nye bsnyen pa/ bsgrub pa dang ni bsgrub chen pos/ zhes bya ba ni/ 'di dag lam gyi rim par sbyar ba ni/ bsnyen pa ni ting nge 'dzin gong ma gnyis kyi byang chub sems gnyis nyams su lon pa'o/ /nye ba'i bsnyen pa ni/ ting nge 'dzin 'og ma gnyis mngon du byas pa'o/ /bsgrub pa ni yo byad lngas tshogs bsgrub pa'o/ /bsgrub pa chen po'i dus su A li kA li nyams su lon pa ste/ de la bsnyen bsgrub bzhi kho na'o/ /A li phyag rgya rnyed nas chos gsum gyis brtan par byas pa ni bsnyen pa'o/ /yo byad bzhi dang 'dod pa'i chos kyi bde ba rgyas par byas pa ni/ nye ba'i bsnyen pa'o/ /snyoms par zhugs pa ni bsgrub pa'o/ /nyi zla rdo rje'i lces longs pa ni bsgrub pa chen po'o/ /de nyid gsal bar bstan pa'i phyir/ yum gyi pad+ma'i dkyil 'khor du/ zhes bya ba la sogs pa gsungs te/ le'u dgu par bshad zin to/ /bsgrub pa nyi zla'i snying po de/ /dkyil 'khor rdo rje lce 'is blang zhes pa ni/ bsgrub pa las byung ba'i phyir bsgrub pa'o/ /snying po ni nyi zla'i thig le gcig ste yon tan thams cad kyi snying po'o/ /de'i phyir ye shes lnga'i dkyil 'khor du gsal ba kho na'o/ /rdo rje nyid lce bas de la de skad ces bya'o/ /blad ni bcu par bshad zin te/ /tha mal pa rnams kyi dbang du lce la rdo rje bsgom pa ni rdo rje lce ste/ des blangs pa'i yon tan ni/ mkha' 'gro gsal 'bar tshe la sogs/ zhes bya ba'o/ /snga ma'i yon tan ni/ yid bzhin sprin gyi bdag por 'gyur/ zhes gsungs so/ /de dag gi thugs rje rmad byung ba'i spyod pa bstan pa'i phyir/ zhing 'gyur mchog dang mchog phran rnams/ nyi zla'i steng du mkhas pas bzhag ces bya ba la sogs pa gsungs te/ zhing gnyis las 'dir thugs rje'i zhing ste/ zhing bcu'o/ /de la brgyad ni mchog go /ngan song gsum pa ni 'phra ba'o/ /de dag e'i steng du nyi zla bsams te/ bdag nyid ta ki'i ting nge 'dzin ma yengs pas/ 'khor ba ril du bzlog par mnan pa ni mkhas pas bzhag kho na'o/ /gzhan du na nyi zla gnyis kyis rnam par shes pa dbang bskur ba'o/ /nga rgyal lag gi 'du byed bsgom/ /hUM du gyur pas rnam par dag /dbyings su thim nas phyag rgyar 'bar/ /sku 'gyur 'od zer 'phro bas brjid/ /gtsug tu rnam par rgyal ba bsgom zhes bya ba ni/ gang nyid lha'i ting nge 'dzin ma nyams pa'i sor mo yi ge lnga'i 'od zer gyis sa bon drug po sbyangs nas/ sems mi shigs pa'i thig le nyid hUM dkar por byas pa drangs te/ bdag gi shangs nas rim par brgyud nas/ mkha' la babs pa ste/ byang chub sems kyis bstims nas chog gsum gyis rdo rje sems dpa' i skur gyur to/ /de nyid nyon mongs pa lnga gnas su dag pa'i 'od zer sna lnga dang ldan pa'i spyi bor rigs kyi bdag po tshon gang bsgom pa ni 'khor ba las mngon par rgyal ba'i phyir te de la de skad ces bya'o/ /ngo mtshar ngan 'gro thar pa'i thabs zhes bya ba ni/ ngan par 'gro ba dang song ba ril la dang gis bsags pa med na/ thar pa'i thabs 'di las gzhan med pa'i phyir ro/ /'o na des mi sgrib pa ma snyam pa la shes rab kyis kyang mi gos par bstan pa'i phyir/ ye nas skye med de bzhin nyid/ /sgyu mar snang ba mig yor tshul/ /sbyor sgrol bya ba kun byas kyang/ /rdul cha tsam yang byas pa med/ ces gsungs te/ de dag nyid ril gyi rang bzhin snang ba ni/ de bzhin nyid kho na'o/ /de las rang gi log rtog gi rgyu rkyen 'dus pa tsam snang ba sgyu ma lta bu'o/ /de la ngo bo nyid yod par mthong ba ni mtho yor la mi ru 'du shes pa lta bu ste/ 'di dag ltar shes nas bsang ba med pas 'du shes mi 'jug pa kho na'o/ /de dag la sogs pa'i lta ba'i gtan tshigs bstan pa'i phyir/ snod bcud rgyu rnams dag rtogs shing zhes bya ba la sogs pa gsungs te/ bshad pa bzhin du rgyu nyid nas dag pa'i phyir thams cad kyang rang rig pa kho nar gsal ba'i phyir/ sku dang ye shes sha stag pas/ /'byung ba lnga'i ngo bo rigs kyi yum lngar dag pa dang/ phung po lnga rigs lngar dag pa dang/ rnam par shes pa brgyad ye shes lngar dag pa la 'khor ba dang gis med pa'i phyir ro/ /mnyam gnyis lhag pa'i mnyam gnyis kyis/ zhes bya ba ni/ chos thams cad bden pa gnyis su mnyam pa ni/ mdo sde dag dang yang mthun la/ lhag pa'i mnyam la gnyis ni gsum pa'i skabs su bshad do/ /rgyud kyi rang gzhung ni dag pa'i skabs las shes par bya'o/ /dkyil 'khor kun tu bzang po'i zhing/ zhes bya ba ni/ dngos po rnams gtan tshigs gsum gyis gzhal bas 'khrul pa'i snang ba dag pa nyid kyis dngos po rnams kyi de kho na nyid ni/ sku dang ye shes kyi dkyil 'khor du ye nas dag par gnas pa ni/ ngo bo nyid kyi zhing khams zhes bya ba kho na'o/ /byed spyod tshogs chen gnyis rdzogs nas/ /yan lag ma nyams yo byang ldan/ /cho ga rdzogs par shes pa yis/ /rnal 'byor tshogs pa'i dkyil 'khor gyis/ nges par legs pa'i dgongs pa 'grub/ ces bya ba ni/ sgrub pa po ston te/ lha spyod ting 'dzin 'phrugs par bya'o/ /de yang dang po dbang rim par nos nas/ de nas gtan tshigs gsum gyis dngos po'i de kho na nyid ngo shes par byas la/ de nas ting nge 'dzin rnam pa bzhi rim pas sems sbyangs te/ snang ba rnam par 'byed pa la dbang thob pa'i pho mo bdun cu 'am/ bzhi bcu rtsa drug gam/ bco brgyad kyis/ 'khor khang sum rim du yo byad lnga sogs te tshogs bsgrubs na/ rigs 'dzin gsum dang mthar sku lnga 'grub bo/ zhes bya ba'o/ /tshogs kyi dkyil 'khor ngo bo stan pa'i phyir/ lnga zhing lnga dang sbyor ba'i/ tshom bu lnga'i lha skod la/ khro bo bcu dang khro mo bcu/ /'khor lo tshul du rnam par bsgom zhes gsungs te/ lha so so thog ma nas bsgom pa 'am/ sgyur te bsgom pa'i pho mo bcu dbus su rdo rje'i rigs yab yum bcu ru dgod do/ /de ltar phyogs bzhir rigs bzhi yi yab yum bzhi bcu'o/ /de'i phyi rim du khro bo yab yum nyi shu'o// //tshom bu gsum pa bstan pa'i phyir/ de bzhin rigs dang rdo rje rigs bya ba la sogs pa gsungs te/ khro bo yab yum bcu drug go/ //tshom bu gcig pa bstan pa'i phyir/ rigs kyi rigs te rigs kyi gtso/ thugs kyi thugs te thugs kyi gtso/ zhes bya ba la sogs pa gsungs te/ rigs lnga ni rdo rje'i rigs su 'dus pas/ rdo rje'i rigs ni dkyil 'khor gyi skabs kyis rigs kyi gtso bo kho na'o/ /gcig dang tha dad las grol bas rigs gyur yang/ ye shes mi 'gyur ba'i phyir/ thugs thams cad ye shes lngar 'dus la/ lnga yang stong pa nyid kho nar 'dus pas de ni thams cad kyi mchog go/ gzhan ni go sla'o/ khro bo khro mo brgyad do/ /khro bo khro mo tshogs chen po/ /pho nya phyag brnyan bka' nyan tshogs/ /ci bgyi la sogs tshogs rnams kyis/ /dngos grub las rnams rdzogs par byed/ ces bya ba ni/ khro bo khro mo tshogs kyi dkyil 'khor bslub na / khro bo yab yum bcu dbus su dgong/ de bzhin du rim pas gnas yul bsgom nyi shu dang/ ci bgyi zhes las grub pa'i dbang phyug ma nyi shu rtsa brgyad dang/ bsdu ba'i khro bo khro mo nyi shu ste/ pho mo bdun cu rtsa brgyad kyis bsgrubs na las dang dngos grub gnyi ga yang 'grub bo zhes bya ba'i tha tshig go/ //rnal 'byor sngags 'chang dngos grub ni/ zhes bya ba la sogs pa ni/ tshogs kyi lta spyod 'brel pa dang/ rdzogs pa'i rim pa'i lam gnyis su thun mong du bstan to/ /rnal 'byor ni rnam pa gsum ste rang bzhin dang/ lam dang/ lhun gyis grub pa'o/ /lam la spyi du gnyis te/ phyag rgya'i rnal 'byor dang/ ye shes kyi rnal 'byor ro/ /de la rgyud 'di ni bden gnyis mi phyed pa kho na'o/ /sngags la gnyis te/ yid skyob pa dang/ byin gyis brlabs chen po'i phyir ro/ /'chang ba la gnyis te/ rnal 'byor gyi mngon sum ni 'chang ba'o/ /rang rig pa'i mngon sum du shin tu 'chang ba'o/ /dngos grub kyang gnyis te/ thun mong dang mchog ste/ zhar las 'byung ba'i phyir smos pa'o/ /mnyam rdzogs lhun grub dang gnas shing/ zhes bya ba ni/ rgyas pa'i rgyud las/ thabs kyi theg pa'i lta ba ni/ /bla med theg pa las 'phags pa'i/ /don dam du ni nor bdun no/ /kun rdzob tu ni mnyam rdzogs so/ zhes 'byung bas/ rang rig pa nyid dngos po thams cad du rang snang bas dngos po gnyi ga rang rig pa'i sku dang ye shes su gsal bar mnyam pa la 'bras bu lus pa med pa ni rdzogs pa kho na'o/ /dang la gnyis te/ skye ba med pa'i ngang ni/ spros pa brgyad dang bral ba kho na'o/ /lhun gyis grub pa'i ngang ni/ dngos po thams cad sems nyid kho na'i phyir ci yang ma yin pa nyid la yon tan ril lhun gyis grub par gnas pa'o/ /de dag ni rang bzhin gyi rnal 'byor te/ de ltar shes pa na rgyu'i mtshan nyid de/ rgos pa dang bsnyen pa'o/ /gang gis de la gnas par byar med pa'i tshul gyis gnas pa ni/ sngags 'chang ba lam gyi rnal 'byor te/ rkyen 'jug pa'i mtshan nyid do/ /spyod pa ci la 'ang thogs med pa zhes bya ba ni/ de dag gi spyod pa ni gang yang ma bkag pa kho na ste/ lta ba glung du byed pa dang/ spyod pa mi gos pa'i phyir te/ gang yang bya ba dang byed pa dang/ byas par yid la byed pa dang / thogs pa dang bcas pa'o/ /de gsum du mi 'dzin pa ni thogs pa med pa ste/ byis pa bzhin du spyod do zhes bya ba kho na'o/ /de dag ci'i phyir snyam pa la thams cad ye nas dbyer med pa'o/ /zhes gsum te/ dngos po thams cad ni gdod nas snang stong gnyis su dbye ru med pa kho na'i phyir ro zhes bya ba'o/ /de ltar lta spyod gnyis dang ldan pa ni/ 'jug pa nyams su lon pas/ 'brel pa dang nye ba'i bsnyen pa ste/ gzungs kyi rgyal po dang 'du 'bral med par bsgrub pa'o/ /de nyid mngon du byas pa ni bsgrub pa chen po'i 'bras bu'i mtshan te/ dgos pa'i yang dgos pa'o/ zhes bya ba'o/ /rdo rje rigs su thams cad dkyil zhes bya ba la sogs pa ni/ tshogs kyi dkyil 'khor gyi bsgrub pa'i thabs las 'dis tshom bu gcig pa'i bsgrub thabs ston te/ rdo rje'i rigs su rigs bzhi po 'dus pa'i phyir/ dkyil zhes bya ba kho na'o/ /spyir bdag po'i rigs kyang bla dags su rdo rje ste/ rigs lnga char lhun gyis grub pas mi phyed pa'i phyir ro/ /de bas na le'u dang po la sogs pa la/ de bzhin gshegs pa thams cad kyi sku dang gsung thugs yon tan 'phrin las rdo rje las phyung ngo/ zhes 'byung ngo/ /'od zer 'phro ba rab tu bsgom/ chags med tshul gyis bstim par bya / zhes bya ba ni/ /tshom bu gcig gi lha yan lag gi lha rnams dang chas par bsgoms te/ yo byad lnga la spyod tsam na thogs pa med pas 'du shes dang bral bas byas pa'i ngo bo med pa ni thim pa zhes bya ba kho na'o/ /gnyis mang gyur nas phyag rgya che/ zhes bya ba ni/ yo byad bzhi po lta spyod gnyis su med pas sku phyag rgya chen po'i rigs 'dzin thob pa'o/ /yo byad lnga pa nyi zla gnyis su med pas ni thabs dang shes rab kyi phyag rgya chen po'i dngos grub ste lhun gyis grub pa'i rigs 'dzin thob bo/ /yang na sku gsung thugs nyid de zhes bya ba la sogs pa ni/ chos thams cad sku gsung thugs su 'dus pa'i phyir/ tshom bu gsum pa'i sgrub thabs ston te/ rjes su mthun no/ /rdo rje rigs su skye ba'i gnas/ zhes bya ba ni de bzhin gshegs pa'i dkyil 'khor thams cad sku gsung thugs kho nar 'dus la/ de dag mi phyed pa ni rdo rje zhes bla dags su brjod pa'o/ /sngags 'chang dngos grub yang dag ni/ zhes bya ba la sogs pa ni/ tshom bu lnga'i bsgrub thabs te/ rjes su mthun no/ /dngos grub mchog gi snying po 'grub ces bya ba ni/ sku lnga ni dngos grub kyi mchog ste/ de dag lhun gyis grub pa'i rigs 'dzin las 'byung ba'i phyir ro/ /rnal 'byor thabs dang shes rab kyis/ de bzhin gshegs dang yum du bsgom/ /sems dpa' sems ma nyid du bsgom zhes bya ba ni/ sgyu 'phrul bsdus pa'i dkyil 'khor te/ sgo ba yab yum brgyad de lha bco brgyad do/ /dbus kyi gtso bo ni rigs drug po gang rung ba de ma nges pa'o/ /'di ni tshogs kyi dkyil 'khor dang gzugs brnyan gyi dkyil 'khor kun la'ang sbyar bar bya'o/ /so so sngags dang phyag rgya dang/ /ting 'dzin yang dag so sor gsal zhes bya ba ni/ dkyil 'khor du snang yang ting nge 'dzin dang/ phyag rgya dang/ sngags rang re ma 'dres pa kho na'o/ zhes bya ba'o/ /gnas dang longs spyod ci bde dang/ ma nyams blo ni rab ldan pas zhes bya ba ni/ shin tu dben pa'i sa phyogs su/ 'khor khang sum rim dri zhim pa yangs pa rgyan gyis spras pa byas la/ der longs spyod lnga la 'jal nyog tu spyod pa ni ci bde zhes bya'o/ /de'i dus su dam tshig nyams pa dang/ lta sbyong dang/ ting nge 'dzin du 'brel pas bsgrub po zhes bya ba'i tha tshig go/ dang po dam nos bzhin du bya zhes bya ba ni/ tshom bu'i grangs dang/ a li'i spyod pa dang/ dam tshig ni/ dam ji ltar bcas pa las mi 'da' ba kho na'o/ zhes bya ba'o/ /dkyil 'khor 'dis mthar gtugs pa'i phyir/ la la dag dus su smra ba dag don med pa kho na'o/ /le lo sgying snyoms med pa yis/ the tshom med par bsgrub byas na zhes bya ba ni/ som nyis ni 'bras bu ma lus pa'i gags kho na'i phyir/ dkyil 'khor thams cad 'grub par 'gyur/ rdo rje gsang mchog dam pa thob/ ces bya ba ni/ tshogs kyi dkyil 'khor gsum du dkyil 'khor mdza' dag 'dus te/ mi phyed pa'i phyir gcig dang du ma dang bral bas grub pa kho na'o/ bsgrub pa'i zhag dang tshes grangs ni/ rgyud las smos pa bzhin du bshad ces bya ba ni/ 'grub pa'i dus zhag sum cu drug la sogs pa ni 'di nyid kyi dgu pa las gsungs la/ skar ma dang chos bzang po la 'jug pa ni rgyud gzhan las gsungs pa ltar bya'o/ zhes bya ba kho na'o/ /tshogs kyi dkyil 'khor zhes bya ba ni/ sgyu 'phrul rdo rje las/ skye bo 'dza' ba kun tshogs pa/ /rnal 'byor 'dus pa'i tshogs zhes bya/ /'byor pa'i longs spyod ldan pa ni/ /bde ba'i longs spyod tshogs su bshad/ /lha dang dam can kun kyang 'dus/ /'dus pa chen po'i tshogs su gsung/ /thams cad spyod la mi zin pas/ /tshogs gnyis rgyun du rdzogs byed pas/ /tshogs chen po ru nges par bshad/ ces gsungs te/ dkyil 'khor ni/ /rgyas pa'i rgyud nas/ rdo rje sems dpa' i dkyil nyid de/ /rigs bzhi lha dang lha mo 'khor/ /yang na 'das pa dkyil nyid de/ /'jig rten sna tshogs 'khor yin no/ zhes gsungs so/ /le'u bcu gcig pa mdor bshad pa'o/ / //de nas dkyil 'khor de dag nye bar bsgrub pa'i thabs bstan pa'i phyir/ de nas zhes bya ba la sogs pa gsungs so/ /rol mo'i sprin rnam par 'phros te/ rgyan bkod pa zhes bya ba ni/ rol mo ni gzhi ma nges par sna tshogs su snang ba thams cad kyang tshim par byed pa ste/ 'dir yo byad lnga la sogs pa thams cad du/ rig par rang snang bar shes nas de la sna tshogs su spyod la nyid ye shes kyi rol pa ste/ de dag 'khor ba dang mya ngan las 'das pa gnyis su med par grub pa'i thabs su mdzes pa dang/ gnyis su med pa'i rgyan kho na'o/ /sgyu 'phrul dra ba mngon rdzogs dkyil 'khor bstan pa'i ting nge 'dzin zhes bya ba ni/ nges par tshogs bsgrub pa rnams kyis/ rgyud 'di'i gzhung gis tshogs kyi dkyil 'khor rnam pa gsum po gang yang rung ba la blo sbyangs te/ snang ba rnam par 'byed pa'i ting nge 'dzin thob par nges bsgrub po zhes bya ba'o/ /yo byad lnga sbyang pa'i so so'i yon tan bstan pa'i phyir/ bro gar 'du 'phro'i phyag rgya yis/ /'dzul lam nam mkhar 'gro bar 'gyur zhes bya ba ni/ dang la rgyas pa'i rgyud kyi bzhugs gnas kyi le'u bzhin gnas khang dang/ sa phyogs rdo rje'i gzhi la rin po ches spras par brlabs/ de nas yan lag lnga la dkyil 'khor lnga bkod pa dang/ yan lag kun gsal bar byas nas lus rgyan gyis brgyan te/ bro stabs dang/ lag gi gar stabs sna tshogs dang/ glu tshig rgyas pa las 'byung ba la sogs pa sna tshogs blangs pa'i dus na/ dbu'i dkyil 'khor bskul bskyod pas/ sangs rgyas zhing khams ma lus g.yo zhes bya ba la sogs pa bzhin du sprul pa'i 'phro 'du dang bcas pa'i bro gar byas pa'i yon tan ni/ ri brags la 'dzul zhing rkang 'og gi phyag rgya rnams spyod pa dang/ mkha' la 'gro zhing lha dang/ gnod sbyin mo rnams spyod cing thams cad 'khol bar byed do/ /glu tshig sgra'i phyag rgya yis/ chos kyi dngos grub thob par 'gyur zhes bya ba ni/ thams cad kyang rang rig pa kho na bas sku gsung thugs las 'da' ba med pa'i phyir phyag rgya ste/ des rgyu'i ting nge 'dzin kho na'i phyir/ gdul bya so so la chos so sor ston par 'gyur ro/ /rgyan dang bgo ba'i phyag rgya yis/ /'bad pa'i rgyal po thub med 'grub/ ces bya ba ni/ chas gos lnga dang rin po che sna tshogs kyi longs spyod rdzogs pa'i cha lugs kho na dang/ khro bor bsgrub na rus pa'i rgyan lnga la sogs pa des/ lus shin tu sngags pa'i gzi byin gyis/ thams cad kyang zil gyis mnan nas seng ge lta bur gnas pa kho na'o/ /bza' dang btung ba'i phyag rgya yis/ /yid bzhin sku dang bdud rtsi 'grub ces bya ba ni/ dam rdzas lngas gzhi byas pa'i longs spyod sna tshogs 'dod pa'i lha mor brlabs pas mchod pa yis/ sku rin po che'i tshon shel du bcug pa lta bu dang/ bdud rtsi'i bcung zad pa med pas thams cad tshim par byed pa kho na'o/ /A li kA li'i phyag rgya yis/ /thams cad thams cad 'grub par 'gyur zhes bya ba ni/ brdar bstan pa thabs dang shes rab kho na ste/ snyoms par 'jug pa ni bshad zin to// des ni las dang dngos grub ci 'dod pa ril bsam pa yongs su skong ba kho na'o/ /shes 'jug mtshan nyid 'byor pa'i gzungs/ /'bras bu smin byed rgyu dang rkyen/ /nus mthu can du gang gyur pa/ /rigs 'dzin rgyal ba'i zhing du grags/ zhes bya ba ni/ mtshan nyid rnam pa gsum gyis lam gnyis ka'i rim pa thun mong du ston te/ rtogs pa rnam bzhis mnyam rdzogs kyi don nyams su len pa ni shes pa'i mtshan nyid de rgyu kho na'o/ /de nas lhun gyis grub pa'i ngang la gnas te ci la'ang thogs pa med par spyod pa ni/ lha spyod mgo sbyor bar 'jug pa'i mtshan nyid de/ rkyen zhes bla dags tsam ste de ni 'jigs pa las thar pa kho na ste/ de la rgyun goms pa'i mthu can du gyur pas lhun gyis grub pa'i rigs 'dzin 'byung ba la ma reg par gnas pa ni/ rang gi ngo bo yongs su smin pa dang/ de nyid 'bras bu nye bar len pa'i phyir/ 'bras bu'i mtshan nyid de/ de las phyag rgya'i rnal 'byor pa ni/ so so'i rigs 'dzin pa kho na'o/ /de la rnam par smin pa dang/ phyag rgya chen po'i rigs 'dzin gnyis so// //gzhan dag gi spyir ni gang ting nge 'dzin rig pa yul gyis mi 'phrogs pa nyid rig pa zin pa'i phyir/ rig pa 'dzin pa ste/ de dag yid la byed pa spangs pa ni theg pa chen po par brjod pa ste/ brtags pa dang spyi'i mtshan nyid dang/ gzhan gyi dbang las yongs su grol ba'i phyir ro/ /de nyid ltar na cig shos pa'i lam du zhugs pa ste/ tshe la dbang thob pa la sogs pa gsum po ni lus 'di nyid mi spong ba kho na'o/ /gzhan gyi lugs kyi phyag rgya chen po pa dag lam 'dir mi chud pa ni/ sgyu 'phrul rdo rje las/ byang chub phyag rgya cha lugs sku/ /mtshan dang dpe 'byad la sogs pa'i/ /cha lugs mngon du gyur na yang/ /zhi ba de nyid mthong ba min zhes gsungs so/ /gong ma de dag phyogs bcu'i dkyil 'khor ma lus pas dbang bskur zhing lung ston pa kho na'o/ /mi dang lha dang tshangs pa yi/ /skye ba rnam dag 'dzin mod kyang/ /khyad par sa la gnas 'gyur yin zhes bya ba ni/ 'dod pa dang gzugs spyod pa'i lha dang mi'i dbang po dngos su grub pa dang/ rang dbang du 'gro ba yang yod pa de dag tu snang yang sa dang po dang brgyad pa dang/ bcu pa dag dang/ skal ba mnyam pa'i phyir ro zhes bya ba'i tha tshig go/ pha rol phyin pa kun tu rdzogs/ /thabs dang shes rab thabs kyi mchog/ shes rab mchog gi mchog gyur pa/ zhes bya ba ni/ khyad par gyis sa'i phyir gsungs pa ste/ 'jug pa'i mtshan nyid du sbyor ba'i phyir/ thams cad kyang tshogs su gyur pas pha rol tu phyin pa ril la rgyun tu zhugs pa kho na'o/ /rgyu dang mnyam pa'i ngang la gnas pa ni mthong ba dang bsgom pa'i lam gnyis kyang yongs su rdzogs pa'o/ /gang du nus pa'i mthu dang ldan pa ni thams cad kyi dbang dang lung chen po thob pa'i phyir mthar phyin pa kho na'o/ /nus pa'i mthus go phye ba ni/ rig pa nyid khyab pa'i phyir kun tu 'od ces bya ba'o/ /thabs ni rang snang ba'i phyir gang yang ma 'gags pa ste/ ma lus pa la spyod kyang shes rab kyi dbang gis ma gos pa ni/ 'dam gyi nang nas ma gos pa lta bu'i phyir/ thabs mkhas po zhes bya ba kho na'o/ /gang mi dmigs pa'i shes rab ni/ shes rab gsum gyi mchog ste/ de nyid rang snang ba'i phyir/ thams cad kyang bdag nyid chen po'i sku dang ye shes su gsal bas yum gyi tha snyad dang bral bar ril mkhyen pa ni mchog kho na'o/ /yi ge 'khor lo zhes bya'o/ /de dag mngon du byas pa ni 'bras bu'i mtshan nyid de/ gzhi cig la skabs kyi mtshan nyid tha dad tsam gyi phyir mi thob pa kho na'o/ /de dag rdzogs pa'i phyir/ sa'i khyad par bcu dang gsum/ rgyu 'bras khyad par lhun gyis rdzogs zhes gsungs so/ /mkha' dkyil dang pa'i dbyings nyi zla/ /ye shes rgyal po stangs dbyal bsgoms/ /rgyal ba'i dkyil 'khor thams cad kun/ /ma lus par ni bsgoms par 'gyur/ zhes bya ba ni/ rdzogs pa'i lam dang/ nye ba'i lha bsgom pa rnams kyi dbang du gsungs pa ste/ thams cad kyi ngo bo gcig dang du ma bral ba'i phyir/ dus bzhi phyogs bcu gang nas kyang/ /rdzogs pa'i sangs rgyas rnyed mi 'gyur/ zhes bya ba ni/ lam gnyis kyi gzhi thun mong du bstan pa ste/ sangs rgyas zhes tha snyad pa rnams kyi lugs gzhan ltar bsnyad pa dag srid kyi/ yang dag par rdzogs pa'i sangs rgyas ni gdul bya'i dbang du btags su zin kyang/ ngo bo nyid bstan par dka' ba'i phyir gzhal du mi rnyed pa kho na'o/ /'o na de ni rgya chad do bar dogs pa la/ sems nyid rdzogs pa'i sangs rgyas te/ zhes bya ba ste/ rgyu nyid nas khams gsum sems nyid du shes pa ni gang yang ma spangs par sku dang ye shes su gyur pa nyid/ bdag nyid las ci'ang ma dmigs pa ni/ rnyed pa dang gnas pa gnyis ka ma bsal bar grub pa'i phyir/ /sgyu 'phrul rdo rje las rang bzhin gnas phyir gzhan nas 'ongs pa med/ zhen pa lo ? bdag zhal bdag gis mthong zhes bya ba'i phyir/ sangs rgyas gzhan du ma tshol gcig/ ces gsungs so/ /dkyil 'khor kun tu rab sbyor bas/ /dkyil 'khor thams cad 'grub par 'gyur/ zhes bya ba ni/ rgyas pa'i rgyud las/ phyogs bcu'i rgyal ba'i dkyil 'khor ma lus pa/ nges pa'i don bkrol bzhi bcu rtsa lngar 'dus/ zhes 'byung ba'i phyir yang yin la/ cig shos kyi lam pa dag gi yang phyir te/ mi nang gi rgyud las/ dkyil 'khor dkyil 'khor zhes bya ba/ /byang chub sems las ma yengs na/ /dkyil 'khor snying por lhun grub pas/ /thams cad dus gcig bsgom par 'gyur/ zhes 'byung ba'i phyir ro/ /cho ga lhag gam ma tshang na/ skyon nyid dag ste nyes pa med/ ces bya ba ni/ la la dag rnal 'byor gsal ba rnams/ tshig gtsor mi byed pa'o zhes zer ro/ /lugs nyid ni bshad pa'i rjes su 'jug pa ste/ cho ga ni lnga'o/ lhag pa ni lhag pa ste/ thod rgal gyi ting nge 'dzin lta bu/ thams cad la yang mi dmigs pa'i tshul gyis slob pa'o/ /chad pa ni ma tshang ba ste/ sems med pa'i ting nge 'dzin ni/ rang gi ngo bo nyid kyang mi dmigs na/ gzhan lta ci smos pa ste/ gang yang skyon med pa kho na'i phyir 'ang zhes bya ba'o/ /gang zhig gang la gnod par 'gyur ba ni skyon pa ste/ bshad pa rnams kho na'o/ de dag gis ma gnod pa ni dag pa ste/ yon tan nyid duAng gyur pa'o/ zhes bya ba'i tha tshig go/ rol mo sprin gyis mnyes par gyur to/ /zhes bya ba ni/ rol mo bshad zin to/ /longs spyod lnga'i tshogs la sbyar pa de dag gis rgyu 'bras gnyis su med par longs spyod rdzogs pa chen po'i rgyan nyid las/ gsal bas/ gnyis su med pa'i mchod pa gnas su stobs pa kho nar bzhugs so zhes bya ba kho na'o/ /tshogs bsgrub pa'i le'u zhes bya ba ni/ tshogs ni bshad zin to/ /bsgrub pa ni lugs gzhan du gang dag gis gang zhig gnyer ba'i brtsol ba kho na ste/ 'dir ni rgyas pa'i rgyud las/ rgyu 'bras ye nas dbyer med snga phyi ma yin pas/ /'bras bu lam du gyur nas dus gcig mnyam par sbyor zhes gsungs pas/ 'jug pa nyams su len pa tsam la tha snyad du 'dogs pa'i phyir/ mtshan nyid gsum du btags pa'o/ /le'u bcu gnyis pa mdor bshad pa'o// // de nas de bzhin gshegs la phyogs bcu dus bzhi sku gsung thugs rdo rje'i dkyil 'khor thams cad gcig tu 'dus nas/ zhes bya ba ni/ phyogs bcu dus bzhis bsdus pa'i de bzhin gshegs pa thams cad kyi sku gsung thugs kyi dkyil 'khor ril ni sems nyid rang snang ba'i phyir/ rig pa kho nar gsal bar byed pas bla dags su rdo rje ste/ de nyid gcig tu 'dus pa zhes bya ba kho na'o/ /de dag le'u 'dir mngon du ston pa'i brda' ste/ de nyid bstan pa las thams cad kyi dgongs pa rdzogs par 'gyur ba'i phyir/ 'og nas/ rgyal ba'i dkyil 'khor ma lus la/ /'di las gsang ba'i nges don med/ ce'o// //de'i phyir tshogs par smra ba ni don med kyang/ bdag nyid chen po'i phyir/ sgra tsam ni 'gal ba med do/ /de nyid nye bar bstan pa'i phyir/ chos thams cad ye nas rdzogs pa chen por lhun gyis grub pa'i dam tshig shin tu gsang ba'i snying po sprin bkod pa zhes gsungs te/ dngos po gnyis kyis bsdus pa thams cad/ bka' nyid nas rang rig pa kho na'i phyir thams cad ma 'gags la/ gzhan du ma skyes par bdag nyid du gsal bas/ sku gsung thugs kho na las/ gzhan pa med pa ni rdzogs pa chen po'o/ /de la ltos pa'i kun brtags pa rnams kyis rgyu rkyen gyi rnam pa brjod kyang/ de nyid rang 'byung gi ye shes nyid pas/ rgyu rkyen med par rang snang ba las 'da' mi srid pa'i phyir/ lhun gyis grub pa'i dam tshig ces bya'o// //de ni rang bzhin gsang ba'i snying po nyid de/ phal gyi yul ma yin pa'i phyir ro/ /rgyas pa'i rgyud nas /de bzhin gshegs pa'i spyod yul te/ skye bu blo rtsal rab kyis rtogs she'o/ de la mtshon par byed pa'i sgo dang/ myong ba'i thabs dang/ mngon du byas pa'i yon tan mang po sprin tsam du phye nas ston pa'i dgongs pa nye bar snang ba ste gdul bya'i snang ba'o/ /de la mtshon pa'i sgo bstan pa'i phyir/ ma rtogs pa dang log par rtogs zhes bya ba ni/ ci yang ma rtogs pa ni 'jig rten phyal pa ste/ snang ba dang po las gol ba'i phyir zhen pa gol ba zhes bya'o/ /rtag chad gnyis ni log par rtogs pa ste/ phyogs las gol ba'o/ /dbugs 'byin pa'i theg pa bstan pa'i phyir/ phyogs rtogs yang dag nyid ma rtogs/ zhes gsungs te nyan thos rang rgyal ni phyogs tsam rtogs pa'o/ /rnam par rig pa ni phyogs gcig rtogs pa'o/ /dbu ma pa ni dngos po rnams kyi de kho na nyid don dam pa gsum gyi ngo bor gnas pa bden pa gnyis mi phyed pa de mngon du ma byas pa'i phyir/ yang dag nyid ma rtogs pa kho na'o/ / //'dul ba dgongs pa gsang ba dang/ rang bzhin gsang ba'i don rnams ni/ zhes bya ba ni/ yang dag par bstan mod kyi spyod pa sgo gsum 'dul ba kri ya dang/ spyod pa bas nang gi rnal 'byor gtsor byed yo ga dang/ phal la med pa'i lta sbyong la gnas pas gsang ba ste/ nang pa gnyis po dang/ dngos po thams cad kyi rang bzhin 'bras bur gnas kyang/ brtags pa la zhen pa'i rim pa sna tshogs kyi bsgrib pa tsam du ston pa'i a ti yo gra'o/ /de rnams kyi tha snyad kyi sgo bstan pa'i phyir/ yi ge sgra btags ming tshegs la/ /brten pa'i tshig gis rab mtshon te/ zhes gsungs te/ a'i nA da las snang ba'i phyir/ sgra'i yi ge sum cu bzhi'o/ /a nyid kyi sgra las btags pa dbyangs yig bcu gnyis so/ /gnyi ga las snang ba ni ma ning bzhi'o/ / //de dag las brten nas 'byung ba'i tshig tshogs rgya mtshos mtshon nas/ theg pa gzhan dag snang ba ni lam kho na'i phyir ro/ /khong nas gab sbas don 'byin pa/ /ston pa rdo rje thugs la gnas/ zhes bya ba ni/ rgyud 'di ni/ rang bzhin gsang ba'i snying po khong nas btags pas gab pa ni ston pas byin/ lam gyi rgyud 'di/ las sbas pa rnams/ rdo rje slob dpon gyis/ byin pas lung yod kyang/ mchog tu le'u 'di bla ma la thug cig pa kho na'o/ /dkyil 'khor ldan pa'i dkyil 'khor gyis zhes bya ba la sogs pa ni phyi rol tu bskyed pa'i rim pa'i dbang du bshad pa ni/ rang bzhin gyi dkyil 'khor ngo shes nas/ de'i blos stong pa nyid kyi ting nge 'dzin gyi skabs su ting nge 'dzin gyi dkyil 'khor bsgom pa de nas sgyu ma'i ting nge 'dzin gyi skabs su gzugs rnyan gyi dkyil 'khor ma bris par gsal bar byas/ de nas 'phra mo'i skabs su khams gsum ye shes sgyu ma nyid hUM tu bsdus te/ lhag pa'i ting nge 'dzin gyi dkyil 'khor bsgom pa'i dus na/ thugs kar ye shes sems dpa' dang/ dbang bskur byin gyis brlabs pa rab tu bstan nas/ snang ba rnam par 'byed pa'i skabs su/ phung po la sogs pa lhag pa'i ting nge 'dzin gyi dkyil 'khor du gsal ba'i yan lag rnams yongs su rdzogs pas/ spyod yul yongs su dag par bsgoms pa'o// //de nas tshogs bsgrub pa'i dus su longs spyod lnga la ma chags pa'i thabs kyis rol pas ci byas kyang/ bag chags su ma gyur pa ste/ tshogs gnyis kyi rgyun la gnas pas rgyu nyid las 'bras bum zhan pas rang snang bas sa bcu gsum pa ru phyin nas/ snang stong mi phyed pa zung 'jug gi sku thob pa'i dus na bdag zhal bdag gis mthong ste/ thams cad bdag nyid du dbang sgyur te/ dkyil 'khor ma lus pa dus gcig tu rang snang bas/ gdul bya gang yang mi 'dor ro/ zhes bstan to/ /sgra la mi dga' bas 'bru zhib tu ma bcom mo/ /de las nang du rdzogs pa'i bskyed pa'i rim pa bshad pa/ yid kun tu bzang po'i thig le'i man ngag bstan pa'i phyir/ dkyil 'khor ldan pa'i dkyil 'khor gyis zhes bya ba la sogs pa gsungs te/ nang gi dkyil 'khor rin po che'i sgrom na dangs ma chen po lnga rang snang ba ni yum lnga'i dkyil 'khor gyi ngo bo nyid de/ dag gi las mi mthun pa lnga yis thams cad bde ba chen por snang bar byed pas gnyis kho nar brjod kyang/ de nyid bdag po lta bu ma yin gyi/ rgyal ba'i sku ltar gnyi ga las ma 'das pa'i phyir ? pa po nyid du 'gal pa med do/ /dkyil 'khor la ni dkyil 'khor bsgom zhes bya ba ni/ de dag nyid gzhal yas khang gi phyir 'dun pa ste/ snying po nyid dang gcig dang du mar bral ba'i tshul gyi thabs dang shes rab gnyis su med pa nyid de/ ngo bo nyid kun da lta bu las 'od sna tshogs kyi phyin ci'ang ma nges par cir yang snang bas rtag tu med par gsal bas gsum par yang 'gyur te/ dngos po gsum du gyur pa med pa ni/ rang rig pa'i mngon sum yin par bsgom pa'i mchog go/ /de'i dgos pa ci zhig snyam pa la/ dkyil 'khor dkyil 'khor las byung ba/ /thugs kyi dkyil 'khor dkyil 'khor mchog ces gsungs te/ de dag ye shes drug gi dkyil 'khor du rang snang bar gnas pa ni mi 'gyur ba yongs su grub pa la/ bshad pa ltar phyin ci ma log par yongs su grub pas ma 'dres la yongs su rdzogs par gsal ba de bstan nas de'i 'od kyis rtsa bzhi'i sku gsung thugs kyi yi ge bskul/ de dag gi 'od kyis sa bon drug dang gnyid spangs nas rnam par shes pa bag chags dag pa/ ye shes kyi'o? kyis snying po la 'dus pas/ 'byung ba lnga rim par bsdus nas/ thig le nyid kyang ngo bo nyid ma dmigs te/ /mdza' thams cad dang bral ba'i ye shes lngar rang gsal ba ni gong na med pa'i phyir dkyil 'khor gyi mchog go /de dag lnga par bzhag mod kyi rang snang bas rkyen tsam ste/ rgyu 'bras thal ba med do// //dkyil 'khor gnyis pa kun tu bzang mo'i thig le'i man ngag bstan pa'i phyir/ gsang ba'i thig le dkyil 'khor dbyings zhes bya ba la sogs pa gsungs te / gsang ba'i lte ba ni/ dbyings phyug ma lnga'i thig le ye shes lnga'i dkyil 'khor du gsal ba de ni/ a'i phyir dang/ thams cad kyi rgyu'i phyir dbyings kho na'o/ /de'i phyir 'byung ba shes rab rigs kyi yum/ /chen po rigs kyi de bzhin te/ zhes bya ba la sogs pa gsungs te/ de'i dangs ma lnga'i 'phra rags las rigs lnga yab yum du rang snang ba'o/ /byang chub sems kyi rdo rje'i tshogs chen po'i rigs kyi de bzhin de zhes bya ba ni/ de'i yan lag gi yi ge rnams kyis mtshon pa'i dngos po rnams kyang rdo rje'i skye mched du gsal bar byed la/ de yis thams cad kyang phyag rgya'i dkyil 'khor du snang bar byed pas/ spyod yul yongs su dag pa'i phyir/ kun tu bzang po'i dkyil 'khor la zhes gsungs so/ bdag nyid chen po lhag pa yi/ /thugs kyi ye shes lngas lta zhing zhes bya ba ni/ dngos po thams cad kyang yid rang 'byung ye shes kho na'i phyir/ bdag nyid chen po zhes bya ba ste/ de yang dkyil 'khor dang por khyad par gyi cho gas khyad par du byas pa'i phyir/ lhag pa zhes bya ste/ de nyid ye shes ltar grub zin to/ /de la yi ge la dang sa dang gnyis kyis gsum pa dang/ gnyis pa lta bus 'dogs mod kyi/ gnas dang las kyis tha dad kyang ngo bo tha mi dad pas ye shes kyi lta ba ni/ mthong ba med pa'i tshul gyis mthong ba kho na'o/ /de ltar ma gyur pa ni theg pa chen po'i ting nge 'dzin las nyams pa'o/ /de nyid las bde ba thob pa'i dus na/ yid kyi rgyun yang bsdus te kun gzhi rang gi ngo bo nyid kyang ma dmigs nas mdza' thams cad dang bral bar rang gsal ba ni/ kun gzhi kun tu bzang mo'i ngo bo nyid rnyed pa kho na'o/ /dkyil 'khor gsum pa sbyor ba'i man ngag bstan pa'i phyir/ snying po thig le mnyam sbyor bas/ zhes bya ba la sogs pa ni/ gong ma las sgra tsam snang ba las kyang thig ler 'byung ngo/ /de dag gi gzer gyen du song bas longs spyod kyi thig le la phog pa ni sbyor ba dag pa'i man ngag go /bde ba'i ye shes rol mo yis/ /ye shes dgyes la mchod pa 'bul/ zhes pa ni/ de yongs su gyur pas ro drug gi bde ba ye shes drug tu gsal bas tshim par byed pa ni rol mo'i mchog ste/ de nyid mthong ba med pa'i tshul gyis myong ba mchod pa gnas su stobs pas thams cad kyang spyod la mi 'dzin par gyur to/ /'khor lo bzhi pa'i khyab brdal chen po'i man ngag bstan pa'i phyir/ zag pa med pa'i bsod nams kyis/ zhes bya ba la sogs pa gsungs te/ bshad pa nyid kyi ro drug la sogs pa thams cad kyis bag chags su mi 'gyur ba'i phyir ro/ /ye shes sgyu mar rang snang bas/ zhes bya ba ni/ de nyid skad cig ma'i phyir gnyis par yang 'gyur la/ sgyu mar yang 'dogs so/ /de'i phyir ye shes de nyid 'od zer drug tu 'bar nas gyen du 'gro'o/ /rol mo'i dkyil 'khor mdza' yas mchog ces bya ba ni/ de yis 'khor lo chen po'i thig le bzhu nas/ bzhi bcu rtsa lnga la sogs pa thams cad du thim pas/ phung po la sogs pa thams cad sku dang ye shes su snang bar byed do/ zhes bya ba'o/ /de ci'i phyir snyam pa la/ gsang ba'i thig le nyid kyi dbyings zhes gsungs te/ thig le de nyid bde ba chen po'i ngo bo nyid du gnas kyang rtogs par dka' ba las/ bde ba chen po'i rgyun gyi rgyur gyur pa'o/ /de nyid las dang po gnyi gas bde ba chen po'i phyir/ de ni sangs rgyas kun gyi dngos// zhes gsungs so/ / //de nyid kyi yon tan bstan pa'i phyir/ phyogs bcu dus bzhi mngon rdzogs pa'i/ /sku gsung yon tan 'phrin las thugs/ /ma lus bdag nyid zhal mthong ba'i zhes gsungs te/ bshad pa bzhin nyams su myong ba ni dkyil 'khor thams cad kyi zhal mthong ste/ de yang bdag zhal bdag gis mthong ba zhes bya'o/ /de dag la rdzogs pa'i rdzogs par thabs kyis bshad pa/ dkyil 'khor ldan pa'i dkyil 'khor gyis/ zhes bya ba la sogs pa gsungs pa ni/ rang bzhin nyid kyi dkyil 'khor dang/ nang dang byang chub sems kyi dkyil 'khor gyi don ngo bor go ba des/ /dkyil 'khor bzhi por ye shes bde ba'i ro bskyed la/ de nas thabs dang shes rab dkyil 'khor gnyis su byin gyis brlabs te rol pa las/ zla ba'i dkyil 'khor nor bur snang ba'i dus na/ ye shes lnga'i dkyil 'khor du snang ba ni rang bzhin gyi 'od gsal bas/ thabs nyid shes rab tu sbyor ba'o/ /de'i tshe nyi ma'i dkyil 'khor la thabs kyi bcud 'dus pa'i phyir/ ma lus pa'i rgyur gyur pas/ thabs mkhas pas zin na phung po la sogs pa thams cad kyang dkyil 'khor tu lhun gyis grub par byin gyis rlob par byed pa'i mthu dang lan pa / de ze 'bru'i rtser snang ba ni shes rab nyid thabs su sbyor ba'o/ /zla ba'i ro ma nyams shing dmigs pa mi 'gyur bas dus gcig tu bsres pas/ mdza' gnyis las grol ba'i ro thob nas rlung la sogs pa'i gar thabs chen pos sa bcu drug gi rim pa zlog nas/ rang bzhin nyid kyi dkyil 'khor la de bzhin nyid du gshegs pa'i tshe/ thams cad kyang snang ba gnyis su gnas pa'i phyogs gcig zad nas gcig la thabs kyis nges pa pos nges par byas pas snang la mi 'dzin pas/ byang ba dang chub pa dus gcig tu gyur te/ rang gi bde ba'i ye shes las sku dang ye shes bsam gyis mi khyab par snang yang nyi zla gnyis su med pa'i ro las ma 'das pa'i phyir/ /bden pa gnyis su mi phyed pa'i zung 'jug gi sku lnga lhun gyis grub pa rang rig pa mngon sum du byas pa ni/ mthong ba med pa'i tshul gyi bdag zhal du mthong ba zhes bya'o/ /de dag gi yon tan bstan pa'i phyir/ dbang bskur mchog nyid dam pa yin zhes gsung ste/ rnam par bshad pa'i rjes su las dang dngos grub thams cad la rang dbang du byed pa ni rig pa'i rgyal po rang dbang thob pa'o/ /dkyil 'khor la gnas dkyil 'khor nyid/ /rdzogs pa'i dkyil 'khor lhun gyis grub/ /rgyun du dkyil 'khor ma lus thogs zhes bya ba ni/ lhag pa'i ting nge 'dzin gyi dkyil 'khor dang/ byang chub sems kyi dkyil 'khor la blo brtan pas/ rang bzhin nyid kyi dkyil 'khor gyi dkyil 'khor nyid rang bzhin lhun gyis grub pa'i dkyil 'khor du rang snang bar gyur pas dkyil 'khor bdun gyis bsdus pa thams cad ma 'dres la yongs su rdzogs par snang ngo/ zhes bya ba ho na'o/ /'o na thams cad dkyil 'khor du snang bas thugs rje 'gag par 'dogs pa la/ rdzogs pa'i dkyil 'khor mnyam sbyor bas/ /thugs rje'i dkyil 'khor yongs kyis 'byung/ zhes gsungs so/ /bshad pa bzhin dkyil 'khor gnyis bdag tu mnyam par sbyor bas/ 'gro ba drug bdag las mi gzhan pa nyid thugs rje chen po yin pa'i phyir dus gnas thams cad ni ma 'dres pa yongs su rdzogs par gsal bas thams cad kyi mdzad pa gang yang mi 'gog pa kho na'o/ /de'i phyir/ phyogs dus dkyil 'khor 'dul ba'i mgon/ zhes gsungs te/ dus gsum gyis bsdus pa'i dkyil 'khor thams cad du rang snang bas gdul bya gang yang mi 'dor ro/ zhes bya'o/ /de dag gi rtog pa mi mnga' 'am snyam pa la/ sgyu ma'i dkyil 'khor sgrol ba yis/ bya byad med par dkyil 'khor spyod ces gsungs te/ dper na sgyu ma mkhan gyis byas pa nyid na/ /lo rgyus shes pas dngos por mi rtog ste/ 'du shes med do/ /de dag kyang thams cad sems nyid du sen pas de bzhin pa kho na'i phyir dngos po gsum du mi rtog par mdzad pa ril mi 'gog pa kho na'o/ /de dag byas pa ma yin par bstan pa'i phyir ye shes rdzogs pa'i dkyil 'khor la/ zhes bya ba la sogs pa gsungs te/ rang 'byung gi ye shes la 'bras bu ril rdzogs pa ni/ rdzogs pa chen po'i dkyil 'khor ro/ /de dag yod mod kyi then pa zlog par dka' i ba'i phyir/ thos bsams bsgoms la mnyam sbyor gyis/ rang 'byung skuAm lhun gyis grub ces gsungs te/ shes rab gsum gyis bshad pa'i man ngag gsum po la gnas pas zhen pa log pa'i dus na/ rang 'byung gi ye shes kyi dkyil 'khor rang rig pa mngon sum du bsal ba nyid la/ rang bzhin gyis grub pa'i dkyil 'khor du 'dogs pa'i 'od gsal ba'i phyir byas pa ma yin pa kho na'o/ /'di ni sangs rgyas thams cad kyi/ /'da' bar mi mdzad dam tshig mchog/ ces bya ba ni la/ ma 'di ma thob par lam gzhan gyis sangs mi rgya ba'i phyir dang/ thams cad kyi ngo bo nyid 'di las ma 'da' ba' i phyir ro/ /theg pa 'di'i yon tan bstan pa'i phyir/ gang zhig 'di la mos 'gyur ba/ /sangs rgyas dkyil 'khor thams cad kyis/ /phyogs dus kun nas thams cad du/ /dkyil 'khor ma lus bsnyen pa yi/ /nye ba'i sras su dgongs par 'gyur/ zhes bya ba la sogs pa gsungs te/ sdig pa'i grogs po ma bsten pas/ blo phyin ci ma log pa dag rgyud 'di la mos pa tsam gyis kyang sangs rgyas ma lus pas dus kun tu thugs kyi spas su dgongs pas bar ma dor mi 'dor ro/ zhes bya ba'o/ /skal pa zhing gi rdul rnyed du/ /shin tu sbyangs la rab gnas shing/ /dkyil 'khor ma lus bsnyen pa yi/ /'bras bu gsang chen 'di yin te/ zhes bya ba ni go sla ste/ dkyil 'khor thams cad la mchod cing bsgrubs pas rang bzhin gsang ba'i snying po nyams su myong bar gyur to/ zhes bya ba'o/ /de ji ltar zhe na/ 'jig rten drug gi phyogs bcu na/ /'das dang da ltar 'byung ba'i/ /rgyal ba'i dkyil 'khor ma lus pa/ /mnyes nas sku lnga lhun gyis rdzogs zhes bya ba ni go sla ste/ dus gnyis kyis bsdus pa'i sangs rgyas ril gyis/ dka' ba mang po spyad kyang mthar ma phyin pa de dag gsang ba'i snying po'i lam 'di rnyed nas bzod yang dag pa'i sangs rgyas su gyur kho na'i phyir/ 'byung dang ma 'ongs thams cad kyang/ /'di yis lhun gyis grub par 'gyur zhes gsungs te/ dus gnyis kyis bsdus pa'i rgyal ba rnams kyang 'di la brten dgos so/ /zhes bya ba'o/ /'di ni gsang chen dge ba yis/ /'bras bu la lam du gyur pa yin zhes bya ba ni/ rang bzhin gsang ba'i snying po nyid la/ mtshan nyid gsum du btags kyang/ ngo bo gcig pa kho na'o/ zhes bya ba'o/ /rgyal ba'i dkyil 'khor ma lus la/ /'di las gsang ba'i nges don med/ /btsal yang rgyal bas ma rnyes so zhes bya ba ni go sla ste/ dgongs pa yang 'di yin la lam dang rang bzhin gang yang 'di las mi 'da' ba' i phyir/ kun gyi phyag rgya chen po'i mchog /ces gsungs so/ 'di sus bzung snyam pa la/ thos bsam bsgoms la rab sbyangs pa'i/ shes rab mig ldan rnams kyis bzung/ zhes gsungs te/ dngos po thams cad kyi de kho na nyid shes pa ni shes rab kyi mig go /sbyin pa'i snod bstan pa'i phyir/ snod ldan dang tshul bzang la brtan/ /lus dang longs spyod gtong la sbyin zhes gsungs te/ shes rab dang snying rje dang nogs thub pa ni snod dang ldan pa'o/ /cis kyang mi 'khrugs pa ni dang bzang po'o/ /skye bo rnams kyi spyod pa las grol ba ni tshul shis pa'o/ /blo mi 'gyur ba ni brtan pa'o/ gzhan du rnams kyang sbyin mi bya/ /zhes bya ba ni gong ma rnams las zlog pa ste/ de dag la ni snying 'byin pa'i nyen dang bsngos te gsang ngo/ zhe'o/ gal te gsangs ma thub pa'i nyes pa ni/ rmongs la 'phyar bas gal te byin/ /dus min par ni srog zad nas/ /bsregs dang sbrebs la yun ring gnas/ zhes gsungs te/ bskal pa chen po gsum du dmyal bar gnas pa'o/ /de las thon nas skal pa gnyis su yi dags su gnas so/ /de nas kyang sangs rgyas kyi sgra thos par dka' o zhes 'byung ngo/ /shin tu gsang ba'i man ngag snying po zhes bya ba ni/ snod dkon zhing gsang ma thub pa'i nyen che ba'i phyir/ shin tu gsang dgos la/ snod dang ldan pas snyeng na tshegs chung dus dgos pa mdza' dag 'grub pa'i phyir/ man ngag gi snying po'o/ /le'u bcu gsum pa'i rnam grangs bshad pa'o// //de nas glu rgyan gyi ye shes kyi mchod pa bstan pa'i phyir/ de nas de bzhin gshegs pa thams cad/ nyid kyi dkyil 'khor la dgyes pa'i glu 'di zhes bya ba ni/ thams cad kyi bdag nyid bzhi bcu rtsa gnyis yin la/ glu lnga bsdus pa dang bcas par thams cad 'dus pa'i phyir ro/ /thams cad kyi ngo bo nyid gru yis mtshon pa ltar bzhugs pa gsal bar snang ba nyid dgyes pa ste/ gdul bya'i snang ba yin gyi rkyen gyis bskul ba lta bu ma yin no/ /dang por thams cad kyi sku lnga la stong pa bstan pa'i phyir/ aoM phyogs bcu dus bzhi rdzogs pa'i/ zhes bya ba la sogs pa gsungs te/ thams cad kyang gcig la lhun gyis rdzogs pa ni mngon par byang chub pa'i sku'o/ /ye shes dkyil 'khor thig le che/ zhes bya ba ni/ ye shes lnga ni rnam par mi rtog pa'i ye shes chen por gsal la/ de nyid khyab gdal chen por gnas pa ni chos kyi sku'o/ bsod nams dkyil 'khor zhes bya ba ni/ gang yang ma spangs pa'i zag pa med pa'i bsod nams rang snang ba ni longs spyod chen po'i chos sku kho na'o/ /sku'i tshogs zhes bya ba ni/ thams cad kyi ngo bo la thams cad kyi sku cir yang snang ba'i phyir sprul pa'i sku kho na'o/ /snang stong thig le kun tu rdzogs/ zhes bya ba ni/ snang stong gnyis su mi phyed pa'i phyir rdo rje'i sku kho na'o/ /aoM dang ho zhes bya ba ni/ aoM gyis yi ge lnga yis lnga mtshon par mgo 'dren pa dang/ de ltar bstod nas mnyes par gyur pa ni ho zhes bya ste/ kun la mthun par shes par bya'o/ /gsung lnga la bstod pa'i phyir/ aoM rdo rje bsod nams zhes bya ba ni/ bsod nams kyi ngo bo sgra thams cad ma spangs par snang ba'i phyir tshig gi gsung ngo/ /thig le zhes bya ba ni/ spros pa med pa la brjod du med pa'i phyir don gyi gsung ngo/ /rdo rje ye shes dkyil 'khor ldan zhes bya ba ni/ ma brjod par ye shes kyi rigs pa sna tshogs kyis thams cad gsal bar brda' sprod pa'i phyir rig pa'i gsung ngo/ /rdo rje sgra chen mdza' yas pa'i zhes bya ba ni/ sgra gcig yan lag mang por grags pa'i phyir tshangs pa'i gsung ngo/ /rdo rje rgyal po thig le che ho zhes bya ba ni/ tshig med pa nyid brjod pa dang 'dra bar gsal ba ni/ gsung gi rab yin pa'i phyir yi ge med pa'i gsung ngo/ aoM sku gsung thugs kyi rdzogs pa che/ /yon tan 'phrin las kun tu rdzogs zhes bya ba ni/ thugs lnga la bstod pa ste/ stong pa nyid dang/ so sor rtogs pa dang/ me long lta bu dang/ mnyam pa nyid dang/ bya ba grub pa zhes bya ba'i ye shes lnga po nyid la sku gsung thugs yon tan 'phrin las lnga rdzogs la/ de las ma brtsal bar sku la sogs par rang snang ba'i phyir/ ye nas lhun rdzogs kun tu bzang/ zhes gsungs so/ /'dus pa'i tshogs chen thig le che zhes bya ba ni/ de bas na lnga gnyis so de dag rgyu nas tha mi dad pa'i phyir gnas skabs kyi snang ba kho na'o/ aoM mi dmigs sgyu 'phrul mnyam pa'i dbyings zhes bya ba la sogs pa ni/ yon tan lnga la bstod pa ste/ mi dmigs pa'i rig pa nyid sgyu 'phrul sna tshogs su rang snang bas snang stong gnyis su med pa mnyam pa nyid kyi dbyings la phyi nang dang rgya che chung gzhal du med pa'i gzhal yas khang ngo/ /mdza' yas kun tu zhes bya ba ni/ drug pa'i zhing la mdza' thug pa med pa'i phyir zhing khams so/ /sna tshogs 'phro zhes bya ba ni 'od zer ro/ /mdza' yas kun nas lhun gyis thim zhes bya ba ni/ mdza' yas pa'i 'dod yon ril myong ba med pa'i tshul gyis myong ba ni/ longs spyod kho na'o/ /sna tshogs sku gsung thugs chen po zhes bya ba ni/ stobs dang mi 'jigs pa nyid seng khri la sogs par snang ba'i phyir de dag sku gsung thugs las mi gzhan pa ste/ khri rnams so/ /aoM phyogs bcu 'jig rten rdul snyed du/ rgya ba'i don rnams rdul phran bsam yas kyis zhes bya ba ni/ 'phrin las lnga la bstod pa ste/ zhing mdza' yas pa rnams ni dag pa dang/ ma dag pa dang/ bar ma gsum du 'dus so/ /'phrin las mdza' yas pa ni/ zhi rgyas dbang drag tu 'dus so/ / sprul pa mdza' yas pa ni/ zhi ba dang khro bo rnams kyi tshul zhes bya bar gsungs so/ /skad cig yud la lhun gyis grub ces bya ba ni/ de dag gis de dag du yud tsam gyis sod ba med par khyab nas/ de dag bya ba rdzogs pa'i skad cing gis ma brtsal bar zin pa'i phyir/ lhun gyis grub pa'i 'phrin las dang lnga'o/ /zhes bya ba kho na'o/ /aoM thams cad ma lus sku gsung thugs/ zhes bya ba ni/ de dag gis mtshon nas dngos po gnyis kyis sdus pa ril yang/ sku gsung thugs yon tan 'phrin las lngar gnas pa'o/ zhes bya'o/ /sku gsung thugs kyi bdag nyid che zhes bya ba ni/ gang chen po mtsho lnga yang de dag lnga'i de bo kho na'i phyir ro/ /sku gsung thugs kyis kun tu khyab ces bya ba ni/ gang chen po mtsho lnga yang de dag gi ngo bo nyid kho na'i phyir ro/ /sku gsung thugs kyis kun tu khyab ces bya ba ni/ de dag nyid kyang phan tshun tha mi dad pa'i phyir ro/ mnyes pa zhes bya ba ni bshad zin to// //le'u bcu bzhi pa khong khrol du bshad pa'o// //de nas khro bo'i dkyil 'khor bstan pa'i phyir/ de nas zhes bya ba la sogs pa gsungs so/ /spyir rgyud 'di las dkyil 'khor rnam pa bdun las/ lhag pa'i dkyil 'khor rnam pa gnyis dang/ tshogs kyi dkyil 'khor dang/ rang bzhin lhun gyis grub pa'i dkyil 'khor rnams la/ zhi khro gnyis gnyis su ston pa las/ de yan chad du zhi ba'i dkyil 'khor rnams la sogs pa dang/ khro bo'i tshogs dang/ lhag pa'i gzugs brnyan zur tsam bstan nas/ 'di nas mar khro bo'i dkyil 'khor las/ le'u 'dis khro bo rang bzhin gyi dkyil 'khor bstan te/ de bzhin gshegs pa thams cad kyi bdag po zhes bya ba ni/ de bzhin gshegs pa thams cad ni rigs lnga ru 'dus la/ lha'i bdag po ni rgyal ba drug pa'o/ /sangs rgyas thams cad kyi ngo bo nyid kyis zhes bya ba ni zhi khro'i sangs rgyas kyi dkyil 'khor thams cad gcig dang du mar bral ba'i tshul gyis lhun gyis grub pas/ drug pa thams cad kyi ngo bo nyid kho na ste/ sangs rgyas kun gyi spyi gzugs can zhes bya'o/ /de bas na khro bor bor yid snang ba'i phyir/ khro bo'i dkyil 'khor du mngon par 'du mdzad de/ khro bo la rnam pa gsum ste/ de la shes rab chen po'i khro bo ni/ sgyu 'phrul rdo rje las/ yang dag shes rab chen po ni/ mtshan ma 'joms phyir khro bo'i mchog /ce'o/ /ye shes chen po'i khro bo ni/ rgyas pa'i rgyud las/ rang rig ye shes rgyal po yis/ phyogs bcu'i khams rnams dbang bsdus nas/ kun kyang mi dmigs dbyings su thim/ /thams cad khro bo'i tshogs su 'gyur zhe'o/ /phyag rgya chen po'i khro bo ni/ 'og nas 'chad pa ste/ 'di dag gdul bya'i ngo bo la snang yang/ rtsol bar thal ba med do/ /ci'i phyir zhe na/ zhes bya ba ni/ gtan tshigs kyi dri ba dgos pa tshol ba ste/ gang snyam pa la/ bdag tu rmongs pa zhes bya ba la sogs pa gsungs te kun tu brtags pa las byung ba'i ma rig pa las las sna tshogs su snang ba'o/ /brtags pa la mngon par zhen pa bya ba ni/ kun brtags gnyis la zhen pa ste/ spyi'i mtshan nyid la rang gi mtshan du mthong ba'o/ /yang dag pa'i lam dang bral ba dag ni zhes bya ba/ lung man ngag gis ma zin pa'i bskyed rdzogs rnam pa gnyis kho na ste/ gang la de dag med pa'o/ /dag ces bya ba ni/ ngo bo ston pa ste/ sngon skal pa snga ma la byung ba'i dge slong nag po'o/ /de ci zhig snyam pa la/ gab pa'i gsang ba ma rtogs par zhes bya ba ni/ rang bzhin gsang ba'i snying po'o/ /spas pa'i gsang ba la mngon par 'chel nas zhes bya ba ni/ lam gyi rgyud las byung ba'i stan 'gan la sogs pa sgra ji bzhin par bzung nas rgyun du spyod pa'o/ rgyu dang 'bras bu la rmongs pa zhes bya ba ni/ mi dge ba'i rnam par smin pa mi shes pa'o/ /srid pa'i sa bon rtsub mo zhes bya ba ni/ las ngan pa dang nyon mongs pa dang kho na'i bag chags rnams so/ /mtshams med pa zhes bya ba ni sdug bsngal bar mi 'chad pa'o/ /rab tu tsha ba/ zhes bya ba la sogs pa ni go sla ste brgyad ces bya ba ni/ yang sos dang/ thig nag dang/ sdud 'joms dang/ ngu 'bod dang/ ngu 'bod chen po dang/ dmyal ba chen po dang/ rab tu tsha ba dang/ mnar med pa'o/ /shin tu grang ba brgyad ces bya ba ni/ chu bur can dang/ /chu bur rdol pa dang/ so tham tham dang/ a chu chu dang/ kyi hud zer ba dang/ aud pa la lhar gas pa dang/ pad+ma ltar gas pa dang/ gas pa chen po'o/ /'jig rten gyi khams brgyud cing zhes bya ba ni/ gnas 'jig na gzhan du 'pho ba'o/ /de nas rnam par smin pa de zad pa dang/ zhes bya ba ni/ bsad pa dang/ brdeg pa dang/ rang ka ma'i 'phrin las dang/ gdug pa dang/ dam tshig can la dan du sems pa dang/ che bas dregs pa la sogs pa ni rnam par smin pa'i 'bras bu'o/ /yi dags zhes bya ba la sogs pa ni go sla ste/ 'dod pa'i dngos po rnams yid du mi 'ong ba zhes bya ba ni/ ci 'ang dan skyugs su mthong ba ste/ phyi'i sgrib pa can zhes bya'o/ /gdug cing rtsub pa'i dngos po zhes bya ba ni/ ci zos pa khro chu dang/ lcags tsan du gyur pa ste/ me lce'i 'khor lo can zhes bya'o/ /yod med par 'gyur zhes bya ba yang phyi'i sgrib pa can te/ bza' bar mthong nas bgrod pas med pa'o/ /lus dang yan lag dang dbang po mi mtsham pa zhes bya ba ni/ lus ri bo tsam la kha khab mig tsam pa ste/ nang gi sgrib pa can zhes bya'o/ /de nas lus kyi sgrib pa rtsub po'i rnam par smin pa zhes bya ba ni/ nor zas la brkam pa dang/ 'thungs? pa dang/ brnab sems dang/ mchod pa'i longs spyod la rngam pa dang/ gsog 'jog byas pa la sogs pa'i rnam par smin pa'o/ /sngon gyi srid pas 'tshams sbyar nas zhes bya ba ni sngon khro bo dbu'dang phyag mang po dang/ 'phra men ma la sogs par yid la byas nas las rlang po byas pa'i rgyu mthun pa'i 'bras bu'o/ /yi dags kyi srin po chen po zhes bya ba la sogs pa ni bdud rang gi ngo bo ste go sla'o/ /nga ro dang dri dang zhes bya ba la sogs pa ni de'i las kyi sbyor ba thams cad la dgod pa'o/ /de sngon rten pa'i stobs zhes bya ba ni/ sngon theg pa chen por sems bskyed nas phyogs su spyong pa'o// thugs rjes 'dul bar gyur te zhes bya ba ni/ sngon spyod kyi dus bab pa'o/ /de nas de bzhin gshegs pa che ba'i rdo rje bkod pa'i sgyu 'phrul dra ba zhes bya ba la sogs pa/ bdud 'dul ba'i gleng gzhi rang gi ngo bo la don gsum ste/ cho 'phrul rmad du byung ba dang/ dkyil 'khor rmad du byung ba dang/ 'phrin las rmad du byung ba'o/ /de la cho 'phrul rmad du byung ba la don rnam pa drug las/ 'di ni ting nge 'dzin gyi cho 'phrul te/ rdo rje bkod pa zhi ba'i dkyil 'khor rnams kyis zhes bya ba'o/ / rdo rje bdag po zhes bya ba ni rigs kyi bdag po kun tu bzang po'o/ /khro bo'i rgyal po dkyil 'khor sprin chen po zhes bya ba ni/ khro ba'i dkyil 'khor thams cad kyi rtsa ba/ rigs lnga'i he ru ka'i yang rgyal po che mchog gi sku snang bar byed pa'i ting nge 'dzin de la de skad ces bya'o/ /de bzhin nyid kyi dbyings nas/ khro mo dbang phyug ma'i sku mngon du phyung ste zhes bya ba ni/ 'di nas mar dkyil 'khor bzhi las/ che mchog longs spyod chen po'i dkyil 'khor bstan te/ a ni skye med de bzhin nyid ces gsungs pa'i phyir/ de bzhin nyid ni kun tu bzang mo nyid kho na ste/ de nyid khro mor snang ba'o/ /gzhan ni go sla'o/ /gnyis su med pa 'khril ba'i dgyes pas thim nas zhes bya ba ni/ la la'i gzhung gis sku nyid yongs su gyur pa'i byang chub sems las khro bo spros nas phyis 'khor du snang bar yang 'chad de/ 'dir nyi zla gnyis su med pa ni thim pa zhes bya'o/ /de nyid dkyil 'khor thams cad kyi rgyu'i phyir/ byang chub sems kyi sprin las zhes gsungs so/ /hUM hUM hUM zhes bya ba la sogs pa ni kun brjod pa'i cho 'phrul lo/ /zhes brjod pas 'jig rten drug gi phyogs bcu zhes pa la sogs pa ni/ sprul pa rdzu 'phrul gyi cho 'phrul lo/ /'jig rten drug gi phyogs bcu thams cad ces bya ba la sogs pa ni/ byin gyis brlabs kyi cho 'phrul lo/ /'jig rten drug gi phyogs bcu stong khams thams cad ces bya ba la sogs pa ni/ chos kyis snang ba'i cho 'phrul lo/ /dbang che ba zhes bya ba ni ma ha de ba'o/ /gzi brjid che ba tshangs pa'o/ /mthu che ba khyab 'jug go / brgyal rab tu brgyal kun tu brgyal zhes bya ba la sogs pa ni/ khams 'khrugs nas lus 'gyel te/ sems myos par gyur pa'o/ /la la'i gzhung gi skabs 'dir khams gsum dur khrod kyi gzhal yas khang du brlab te dregs pa rnams gdan du mdzad pa ston pa'o/ /de nas bcom ldan 'das dgyas pa chen po zhes bya ba la sogs pa ni/ sbrul pa chen po'i dkyil 'khor ston to/ /dur khrod kyi bdag po dregs pa khyo shug ces bya ba ni/ ru dra pho mo'o/ /khro bo'i dkyil 'khor sprin phung zhes bya ba ni/ dang po byang chub sems ye shes lnga'i khyad par las 'phros pa ste slar yang rigs bzhin du 'dus pa'o/ /de nas dregs pa chen po la sogs pa gtum pa'i sems kyis zhes bya ba la sogs pa ni/ 'phrin las rmad du byung ba la gnyis sam/ 'phrin las kyi ngo bo ste/ 'bru ni go sla'o/ /dbu dgu phyag brgyad ces bya ba ni/ he ru ka dgu klong rngam pa'i zhal du gsol ba dang/ sgrol byed ging bco brgyad kyi phyag gis sgrol ba'i phyir ro/ /hUM hUM hUM ni sdud pa'o/ /ha ha ha ni rngam pa'i phyir ro/ /kha kha kha ni gsol pa'i phyir ro/ /snying chung ba ni sems brtsad gcad pa'i phyir ro/ /dbang po phyung ba ni sgo dgag pa'i phyir ro/ /nang grol drangs pa ni mngon par zhen pa dag par bya ba'i phyir ro/ /yan lag gcad pa ni las gcad pa'i phyir ro/ /khrag 'thungs pa ni 'dod chags zad pa'i phyir ro/ /rus pa 'chos pa ni zhe sdang dag pa'i phyir ro/ /de nas hUM hUM zhes pa la sogs pa ni/ ngo bo sdud pa'i cho 'phrul gnyis las/ sdud pa'i cho 'phrul ni/ phyogs bcu 'jig rten gyi khams nam mkha' dang bcas pa yungs 'bru gcig tsam du chud par bsdus so/ zhes bya ba ni/ dregs pa rnams kyi rnam par shes pa hUM du bsdus pa ste/ rgyu des chos thams cad sems su gcig par mthong ba'o/ /gzhan ni go sla'o/ /de nas bcom ldan 'das dgyes pa chen po zhes bya ba la sogs pa ni/ yongs su rdzogs pa'i dkyil 'khor bstan te/ 'dul ba'i thabs kyis yang rigs lnga'i 'jigs byed chen por snang bar byas nas zhes bya ba ni/ tshe mchog gi sku nyid ma mo rnams kyi ngo la rigs lngar snang ba ste/ gnyis kyi phyir yang zhes bya'o/ /de dag kun kyang dgyes pas rol pa zhes bya ba la sogs pa ni/ 'khor sdud pa'i cho 'phrul gyi bya ba'o/ /'bru ni go sla ba'o/ /de nas dgyes twe ha zhes brjod pas/ zhes bya ba la sogs pa ni/ ngo mtshar tshogs kyi dkyil 'khor bstan to/ /dkar mo zhes bya ba ni zhi ba'i las kyi phyir ro/ /rkun mo ni dbang gi phyir ro/ /rmongs mo ni zhi ba'i las kyi phyir ro/ /thal byed ni drag po'i las kyi phyir ro/ /sbos mo ni yon tan gyis rgyas pa'i phyir ro/ /gtum mo ni drag po'i phyir ro/ /dme sha can ni gang yang grub pa'i phyir ro/ /ma tshogs ma ni 'phel bar byed pa'i phyir ro// ngo mtshar dang zhes bya ba ni rngam zhing dam pa'i phyir ro/ /seng gdong ni thams cad zil gyis gnon pa'i phyir ro/ /stag gdong ni dpa' brtul gyis las drag pa'i phyir ro/ /wa ni thabs mkhas pas phung po'i bdud dag pa'i phyir ro/ / khyi gdong ni lha'i bu'i bdud 'joms pa'i phyir ro/ /gzhang gdong ni shes bya ba la thogs pa med pa'i phyir ro/ /dur bya ni 'khor ba dang du len pa'i phyir ro/ /lug gdong ni gdul bya phra ba yang mi 'dor ba'i phyir ro/ /rdo rje bsrings 'gro ma ni rta gdong ma ste 'khor ba mi gtong ba'o/ /gdong mo ni phag gi gdong pa ste 'phrin las gdong tshugs su byed pa'i phyir ro/ /'jig rten ma ni dred gdong ma ste thams cad bsreg par byed pa'i phyir ro/ /ro langs ma ni spyad gdong ma ste khams gsum slar 'tsho ma zhes bya'o/ /de nas bcom ldan 'das dgyes pa chen po zhes bya la sogs pa ni/ 'phrin las kyi 'bras bu la gnyis las dregs pa rnams gnas stobs pa'o/ /bdud rtsi 'byung ba zhes bya ba ni dri chen no/ /aoM badzra ma hA a mri ta zhes bya ba ni/ rdo rje bdud rtsi chen po ste/ gcig kyang lnga lnga dang ldan pa'o/ /ma hA kro ta zhes bya ba ni/ khro bo chen po ste 'og nas 'byung ba'i sme brtsegs so/ aM aM aM zhes bya ba ni/ lan gsum byin nas dbang bskur ba kho na'o/ /sku 'bar ba chen po'i dkyil 'khor na bzhugs par mthong ngo/ zhes bya ba ni/ bsam yas lhun gyis grub pa'i ting nge 'dzin ltar mthong ba'o/ /so sor snang ba dus gcig tu btul bar gyur to/ zhes bya ba ni/ sprul ba rdul phran grangs med kyi/ skad cig yur la lhun gyis grub ces bya ba ste/ tha dad bar snang bas don grub pa'o/ /de nas de dag gi chung ma'i tshogs rnams dang zhes bya ba la sogs pa ni 'phrin las rmad du byung ba'i 'bras bu la gnyis las 'khor dam la btags te bstan pa yun du gnas par bya ba'o/ /le'u bco lnga pa dka' ba bshad pa'o// // de nas lhag pa'i ting nge 'dzin gsung gi dkyil 'khor bstan pa'i phyir/ de nas zhes bya ba gsungs te/ dam tshig gis grub par bya ba'i phyir/ zhes bya ba ni/ gsung gi dam tshig ni gsang sngags rnams so/ /ye shes rngam pa zhes bya ba ni shin tu rngam pa'i por? dang/ chas pas grags pa'o/ /aoM sarba ta thA ga ta ma hA sh+rI he ru ka zhes bya ba ni nyid kyi snying po'o/ /ma hA tsaN Da ni gtum po chen po'o/ /sarba du staM na sdang ba thams cad do/ /ta ka ha na ni gtogs shig rgyob cig pa'o/ /da ha pa tsa ni chos shig choms shig pa'o/ /hUM hUM hUM phaT ces bya ba ni/ sdus la song cig pa ste/ de dag gi phyir rtsa ba las dang bcas pa'i sngags kho na'o/ /gzhan ni go sla'o/ /b+hyo rnams ni ma mo rnams kyi rtsa ba'i snying po ste/ bskyed pa dang bzlas pa ni mi nyid kyis grub pa'i phyir/ bshad pa nyid dpral skad du gsal ba'o/ /ru lu ru lu hUM b+hyo zhes bya ba ni/ snyan gsan gsol ba'i sngags so/ /e ha hi a na ya zhes bya ba ni bskul ba'o/ /dzadrangs nas nam mkha' la bzhugs pa'o/ /raM zhes bya ba ni/ dngos su me dpung gnyis 'dre ba ste/ shes rab kyis 'byor ba'i phyir ro/ /aoM badzra kro ta sa ma ya hUM zhes bya ba ni/ rig pa'i me tog dong ba ste/ ye shes su gcig par gsal ba'o/ / aoM khro la khros pas zhi mdzad pa zhes bya ba la sogs pa ni/ bskul ba ste bskul ba'i sa la bzhes pa'i phyir ro/ /aoM badzra kro ta sa ma ya stom/ aoM badzra kro ta sa ma ye ho/ aoM badzra kro ta sa ma ya phaT ces bya ba ni/ dam tshig bskul bas dgyes nas drag po'i yig 'bru mang pos snod dag par mdzad pa'o/ /de nas phyi'i mchod pa dbul ba'i phyir/ a li au li ta la ta pra ti zhes bya ba ni/ bza' ba dang btung ba dang/ 'bras bu rnams dang/ bca' ba sna tshogs spros la dbul lo/ /de dag gang la snyam pa la/ drang sta zhes bya ba ni/ mche ba can te he he ru ka rnams so/ /'gu'na ro'u ta zhes bya ba ni yon tan drag mo nyi shu'o/ kha ra ma yo gi ni zhes bya ba ni zhal 'bar ba'i rnal 'byor ma ste/ ma mo rnams so/ /kha ti zhes pa ni gsol cig ces pa'o/ /des mnyes pa'i phyir ho zhes bya'o/ /hUM ha te phaT ces bya ba ni dam tshig gi dkyil 'khor lo rim par thim pa'o/ /tshig rab tu tshig kun tu tshig go /zhes bya ba ni/ las kyi sngags rnams kyi mthu bstan pa'o/ /'bar rab tu 'bar kun tu 'bar zhes bya ba ni/ bskyed pa'i sngags rnams kyis thams cad kyud ltar gyur pa'o/ /thams cad du 'bar ba'i dkyil 'khor gyi tshogs kyi gang rab tu gang kun tu gang bar gyur to/ zhes bya ba ni/ bstim pa'i sngags kyis ye shes kyis dkyil 'khor dang dam tshig gi dkyil 'khor gnyis su med pa'i yon tan gyis kun tu rgyas par gyur to/ / //le'u bcu drug pa mdor bshad pa'o// // de nas lhag pa ting nge 'dzin sku dang thugs kyi dkyil 'khor bshad pa'i phyir/ de nas zhes bya ba la sogs pa gsungs so/ /'bar ba'i dkyil 'khor rtsibs bzhi pa zhes bya ba la sogs pa ni/ bzhugs gnas brtan pa ste/ 'di yang ting nge 'dzin gyi rim pa lnga pa dang rjes su mthun par sbyor ro/ /rgyu'i ting nge 'dzin hUM las dur khrod kyi 'byung ba lnga bskyed nas/ de'i steng du 'bru smug nag las dur khrod kyi gzhal yas khang 'di dag ltar bskyed pa ste go sla'o/ /'bar ba'i bar khyams gnyis kyis mdzes zhes bya ba ni/ bshad pa'i rgyud kyi sbyor ma'i sa dgos so zhe na/ 'phra men ma dang dbang phyug ma'i khyams su 'ang 'gal ba med pa'o/ /thod sprul sna tshogs nyi mas brjid ces pa ni/ thod pa sna tshogs kyi rtsig pa dang/ de dag nyid kyi brang la sbrul chen gyi zhags pa mgul du drangs pa'o/ /de dag gi bar nas nyi ma'i dkyil 'khor 'od zer gyis pas thams cad snang bar byed pa'o/ /'bar ba'i 'phro ba mang po 'khrug zhes bya ba ni/ phyi nang kun nas rdo rje'i me dpung 'bar ba las me'i khro bo mang po 'phro bar? byed pa'o/ /de'i gdan bstan pa'i phyir/ khyu mchog ma he gzig dang stag /gtum pa dom gyis spar bas ni/ zhes gsungs te/ gti mug dang/ nga rgyal dang/ 'dod chags dang/ phrag dog dang/ khong khro gnas su dag par khong du chud nas de dag gi sgo nas 'phrin las mdzad pa'i phyir 'di dag mnan pa'o/ /dbang phyug lha chen la sogs gzung zhes bya ba ni/ bsdu ba ni bco lnga par bshad de/ dregs pa rnams 'phrin las nan tur du bstan pa'i phyir spang par gzung ba'o/ /smug nag sngo nag ser nag dang/ /dmar nag ljang nag 'jigs pa'i sku/ zhes bya ba ni/ sku mdog rnams bstan pa ste/ las thams cad gzhi drag po kho nas mdzad pa'i phyir nag por smos so/ /dbu gsum phyag drug zhabs bzhir bgrang ces bya ba ni/ rnam par thar pa tri dang/ ye shes drug dang/ rdzu 'phrul gyi rkang pa bzhi dang ldan pa'i phyir ro/ /ko rlon gos ni sna tshogs gyon zhes bya ba ni/ thabs mkhas 'phrin las kyi gos dang/ khyab pa thugs rje'i gos/ phyi nang gsang bar bsdus pa'i gos kho na'o/ /zhing gi g.yang gzhi dang/ glang po dang/ stag gi pags pa kho na'o/ /rngam pa'i sgra chen 'jigs par sgrogs zhes bya ba ni/ gsher zhing myur bar bzhad pa'o/ /sbrul dang thod 'phreng nyi zlar chas zhes bya ba ni/ sbrul gyi chas brgyad dang/ thod pa tshar gsum dang/ dbu la nyi ma'i dkyil 'khor 'od zer bye ba 'gyed pa'o/ /stong gi 'jig rten 'khor yug bcas zhes bya ba la sogs pa ni/ lhag pa ting nge 'dzin thugs kyi dkyil 'khor ston te/ 'di dag rgyas pa las kyang gsungs na/ sgyu 'phrul rdo rje las/ rdo rje rdo rje dril bu dang/ 'jig rten 'khor yug bcas pa rdebs/ /de bzhin 'khor lo dgra sta dang/ /kha TwAM rab tu 'khrol ba'o/ /nor bu rin chen rgyu zhags dang/ /rdo rje dgra sta rab tu rdebs/ /chags mchog pad+ma? chen po dang/ dril bu lnga'i sgra sgrogs pa'o/ /las ni ral gri gshol chen dang/ 'jig rten rgyang mar 'phen pa ste/ bar ni rdo rje dung mar 'khrug /ster chen por rdebs pa'o zhes ba'o/ /btsun mo'i 'jigs pa'i tshogs dang 'khril/ /zhes bya ba la sogs pa ni go sla'o/ /'bar ba'i dkyil 'khor gyis kun tu gang bar gyur to zhes bya ba ni/ mtshon pa ste gdul bya'i snang ba'o/ /le'u bcu bdun pa mdor bshad pa'o// // de nas de dag gi mchod pa bstan pa'i phyir/ /de nas zhes bya ba la sogs pa gsungs so/ /mnyes pa'i mchod pa zhes bya ba ni/ rmad du byung ba'i mchod pa bzhi'o/ /de nas mchod sbyin dam pa ni zhes bya ba ni/ /de bzhin gshegs pa dang ma mo rnams kyi phyir/ nges tshig go zhe na/ dug gsum gyi mchod pa skyabs chen po thob pa'i phyir/ dam pa zhes bya ba kho na'o/ /de gang zhig snyam pa la/ thog mar bdag nyid rtogs goms bsgral/ zhes bya ba la sogs pa ste/ 'di ni sgrol ba po ste/ dang po rtogs pa rnam pa bzhis bshad pa bzhin du khong du chud nas ting nge 'dzin bstan pa'i stobs dang ldan pa ni/ bdag nyid sgrol ba'o/ /sgrol ba'i blta ba bstan pa'i phyir/ de nas gnyis med blo yis ni zhes gsungs te/ gang gis bshad pa bzhin du grub pa ni/ thams cad kyang bdag las mi gzhan par mthong bar gyur to/ /bsgral bya bstan pa'i phyir/ blo ngan 'jig rten snying res rje/ zhes bya ba gsungs te/ zhing bcu dag ni rgyu 'bras mi shes pa'i phyir blo ngan dag ste/ de dag gi las rnams kyis yun du 'khor ba'i phyir/ gtan du 'jig rten pa kho na ste/ snying rjes zin bar bya ba'i zhing ngo/ /bsgral ba'i thabs dang gnas brtan pa'i phyir/ gnyis su med par bsgral bar bya zhes gsungs te/ thabs ni dgu ba'i skabs su bshad zin to/ /gnas ni 'og min du 'phangs nas/ rdo rje 'dzin pa yab yum thabs shes rab gnyis su med pa'i byang chub sems kyi dbang bskur nas rigs nges par bya'o zhes bya'o/ /'ga' na'i mchod pa bstan pa'i phyir/ / 'khril pa'i mchod chen mnyam sbyor bas/ /bdag nyid mnyes pas mnyes par bya'o/ zhes gsungs te/ thabs dang shes rab 'khril ba'i mchod pa ni/ don gsum bsgrub pa'i phyir mchod pa chen po'o/ /de nyid byang chub sems dus mnyam par sbyor ba kho na'o/ /de dag gi thabs ni dgu par bshad zin to/ /dam rdzas rmad du byung ba'i mchod pa bstan pa'i phyir/ mnyam pa'i grub rdzas chen po dag /zhes bya ba la sogs pa gsungs te/ mnyam pa'i rang bzhin dang/ las kyi phyir ro/ /de dag grub pa bzhi dang ldan te/ chos nyid rang bzhin gyis grub pa dang/ chos can rang gi ngo bos grub pa dang/ mthus grub pa dang/ byin gyis brlabs kyis grub pa dang bzhi'o// de'ang thal ba'i rgyud las/ dngos po ma lus sems nyid phyir/ /mtshan nyid bral ba chos kyi dbyings/ /rang bzhin bde ba'i ye shes lnga/ /byed pa med par snang ba'o/ /shes rab ting 'dzin thabs dag ni/ /nus mthu nges par 'byung bar 'gyur/ /'di lha'i lam la gang gnas pa/ /phyogs dus kun nas byin gyis rlob/ ces 'byung ba kho na'i phyir ro/ /mchod pa'i gnas bstan pa'i phyir/ bdag dang mnyam pa'i tshogs la dbul/ zhes gsungs te/ gang dang gang dag de dag tu mnyam pa ni/ 'khor gsum yongs su dag pa'i phyir/ /mchod pa gnas su stobs pa kho na'o/ /longs spyod rgyan gyi mchod pa bstan pa'i phyir/ /bza' dang bca' dang btung dang bgo'zhes bya ba la sogs pa gsungs te/ 'di dag tshogs kyi le'u ru bshad zin to/ /de dag gi yon tan bstan pa'i phyir/ /phyogs bcu dus bzhi gshegs pa yi/ /bder gshegs yon tan rmad po che/ /gzhan na yod pa ma yin te/ /lha srin la sogs smos ci dgos/ zhes gsungs pa go sla'o/ /gang yang bdag nyid chen por gyur pa'i mtshan bstan pa'i phyir/ rnal 'byor las su rung rnams kyis/ /phyag rgya chen por rdzogs gyur cing/ /gsal ba yid gnyis med pas na/ /dkyil 'khor chen por 'bar bar 'gyur/ zhes gsungs te/ dkyil 'khor chen po gsum ril bdag nyid chen po'i dkyil 'khor du gyur pa ni/ dkyil 'khor chen po shes bya ba ste/ des na thams cad rig pa'i rgyal po rang dbang du gyur pa kho na'o/ /le'u bco brgyad pa mdor bshad pa'o// // de'i rjes su dam tshig bstan pa'i phyir/ de nas bcom ldan 'das dgyes pa chen pos/ sngags 'chang rnams don yod par bya ba'i phyir/ zhes gsungs te/ sngags 'chang ba ni bshad zin to/ /theg pa chen po'i dam tshig ni/ lam dang 'bras bu gnyi gar 'gyur ba'i phyir/ dam tshig rnams kyi thun mong gi 'bras bu la brten nas/ rgyud kyi shes par bya ba'i dngos po rnams nye bar grub par bya ba'i phyir/ gzhi dam tshig gis gzung ba kho na'o/ /dam tshig chen po zhes bya ba ni/ theg pa chen po'i lugs 'di/ dam tshig thams cad las spags pa'i phyir ro/ /dam tshig gi che ba bstan pa'i phyir/ bla med theg par rab nges nas/ zhes bya ba la sogs pa gsungs te/ theg pa 'di lam dang 'bras bu gnyis kyi gong na gzhan med pa'i phyir/ bla na med pa'i theg pa'o/ /'di gzhung gis dam tshig bco lnga nyams su lon pa ni nges pa zhes bya'o/ /nyon mongs 'dod lnga kun spyad kyang/ byas la mi sogs tshogs 'gyur te/ zhes bya ba ni/ kun shes pa'i don gyis mi dge ba bcu dang/ mtshams med pa la sogs pa kho na ste/ de dag sbyor bzhin mi 'dzin pa'i phyir ro/ /der ma zad tshul khrims sdom pa phun sum tshogs zhes bya ba ni/ sdom pa dang tshul khrims rnams kyi rtsa ba bzhi ni/ 'chad par 'gyur ba'i phyir rdzogs pa yan lag thams cad ni rnam pa gsum du 'dus te/ de dag 'dir ni dam tshig 'di la gnas pa'i dus na las dang nyon mongs pa ril spyad kyang mi 'dzin pas ci 'ang byas pa med pa ni sdom pa'i tshul khrims so/ /gzhan don du 'gyur na srog la sogs pa gang yang mi 'dor ba ni don byed pa'i tshul khrims so/ /sgo tri phyag rgya chen po las mi nyams pa ni/ dge ba chos sdung ba'i tshul khrims zhes bya ba las kho na'i phyir ro/ /bla med mchog gi dam tshig du/ /'dul ba'i dbang gis tshul khrims dang/ /ji snyed sdom pa bsam las pa/ /ma lus kun 'dus rnam par dag /ces gsungs so/ /yod med dbus ma 'ang mi dmigs shing zhes bya ba la sogs pa 'di dag tshul khrims sdom pa'i rtsa ba bzhi 'dus shing dag par ston te/ dam tshig gi spyod par yang 'gyur de/ /bdag gzhan gnyi ga sems nyid du gsal ba ni yod med dbus dang gsum las 'das pa'i phyir/ don dam par ma nyams pa kho na'o/ /sgyu ma mig yor lta bu tshul zhes bya ba ni/ kun rdzob tu log rtog gi rgyu rkyen 'dus pa tsam nyid gnyis su snang ba tsam las rang rgyud bar brtags pa de dag tho yor las mi lta bur ma grub pas shes pa'i phyir/ srog dang skyes bu log rtog tsam/ zhes gsungs te/ de ltar rig pa la gcad bya gcod byed gnyis ka nas dag pa'i phyir/ ci bcad kyang 'du shes med pas gcod pa med pa ni/ srog gi sdom pa 'dus pa dag pa'i phyir/ srog med srog kyang gcad du med/ ces gsungs so/ /bden pa gnyi ga g.yer med pas zhes bya ba la sogs pa ni/ ma byin par len pa ston te/ bden pa gnyis las bdag gzhan mi phyed pa ste/ 'bru ni sngar grub pa'o/ /'phrul dga' i tshul te tha dad pa ni zhes bya ba ni 'phrul dga' i lha rnams ni longs spyod la rang sprul cing len pa'o/ /de bzhin du rang rig pa thams cad du rang snang bas snang yang gnyis su ma grub par rig pa la/ rdzas dang bdag po gnyi ga bdag las mi gzhan pa'i phyir ci blangs kyang bdag nyid las 'das pa med pas/ gzhan dang ma byin med pa'i phyir/ blangs med thams cad nyid kyi dbyings zhes gsungs so/ /sdom pa 'dus la dag pa'o/ /rdzun gyi sdom pa bstan pa'i phyir/ chos rnams sgyu ma lta bu dang zhes bya ba la sogs pa gsungs te/ phyi dang nang gi dngos po rnams log rtog gi rgyu rkyen 'dus pa tsam kho na'i phyir ngo bo med bzhin du/ brtags pa rang gi ngo bo nyid du snang ba ni ngo bo nyid kyi brdzun zhes bya'o/ /ming dang tshig tu brtag pa brdzun zhes bya ba ni gnas nyid snang ba de dag la mi snang sna tshogs su brtags nas ming tsam la bden par spyod pa ni rjes su spyod pa'i rdzun zhes bya'o/ /de dag las 'gal pa ni log pa'i rdzun zhes bya'o/ /de dag gsum ga yul gyi gzhi ma grub pa'i phyir/ rdzun nyid la ni brdzun spyod de/ rdzun zhes btags pa tsam yod ma yin/ gsungs te/ de ltar shes na smras kyang mi gos pa ni sdom pa 'dus la dag pa'o/ ma chags pa la chags pa dang/ zhes bya ba ni/ dngos po thams cad sems nyid rang snang bas yul sems gnyis med par gsal pa ni ma chags pa'i ye shes nyid kho na'o/ /de la gnyis su zhen pa ni log pa'i 'dod chags te/ de'i dus nyid na sems nyid du shes pa dang thabs kyis zin pa ni ngo bo? nyid ye shes su gsal bas gos pa med pa'i phyir/ chags pa nyid na chags pa med/ de ni chags mchog rgyal po yin zhes gsungs so/ /shin tu chags pa chen po yin zhes bya ba ni/ de bzhin gshegs pa'i ngo bo nyid de thams cad kyang ? med pa'i phyir sdom par 'dus la dag pa'o/ /bla med mi spang bla ma bkur zhes bya ba la sogs pa ni dam tshig gi rnam grangs la gnyis las/ 'di nas mar mdor bstan pa ston te/ bla na med pa'i byang chub sems te/ theg pa chen po'i gzhung gis yi dam gyi lha'i sku phyag rgya snang stong gnyis su med pa kho na ste/ ngo bo nyid dang lam gong na gzhan med pa'i phyir ro/ /bla ma ni rdo rje slob dpon te/ de la rnam pa lnga ste/ 'dren pa dang/ dam tshig 'bogs shing dbang bskur ba dang/ nyams chag skong ba dang/ shes rgyud 'grol ba dang/ man ngag dang lung 'bogs pa'o/ /bkur ba ni sgo gsum zol med pa dang/ mnyes par rtsal 'byung ba kho na'o/ /sngags ni gsum mo/ /phyag rgya ni bzhi'o rgyu ni brtson pa rab 'bring dang/ gom pa che chung gis dus kyi rgyun gsum dang/ skad cig ma'i rgyun du bar mi gcod pa'o/ /yang dag lam du zhugs la byams zhes bya ba ni/ bskyed rdzogs rnam pa gsum la zhugs pa ni rdo rje'i spun no/ /de la nye ba dang ring ba dang 'dres pa'o/ /de dag la sgo gsum gyis phan pa'i rtsal 'byin pa ni byams pa'o/ /gsang ba'i don phyir sma mi bya zhes bya ba ni gsang ba ni bcu ste/ spyir gsang bzhi/ bar gsang bzhi/ gsang bar 'os pa dang/ gnyer gtad ba'o/ /de dag bdag gi don dang/ gzhan gyi don dang/ chos kyi don dang/ grogs po'i don bzhi po kho nar gyur par bya ba'i phyir/ dam med pa dang/ dam nyams pa dang/ dam ma 'dres pa dang 'dres pa dag la yang/ skabs kyis gsang ba ste/ tshig dang spyod lam yan chod kyis sbu ba kho na'o/ /'di ni rtsa ba lnga rnams te zhes bya ba ni/ lnga po de dag ni lam dang 'bras bu'i yon tan ril gyi gzhir gyur pa'i phyir ro/ /bsgrub dang bsrung ba'i dam tshig mchog ces bya ba ni/ gnyis ni bsgrub pa'i dam tshig go /gsum ni bsrung ba'o/ /yan lag gi dam tshig bstan pa'i phyir/ gti mug chags dang zhe sdang dang/ nga rgyal phrag dog mi spang ngo zhes bya ba la sogs pa gsungs te/ spyi ru yang dag pa'i dug lnga dang/ log pa'i dug lnga gnyis su rgyas pa'i rgyud las gsungs te/ de la log pa'i dug lnga nyid rang dang spyi'i mtshan nyid/ gtan tshigs kyis rang rig pa nyid du nyams su lon na sku gsung thugs kho na las spang bya gang yang mi ? pa'i phyir ro/ /yang dag pa'i drug lnga la gnas pa ni/ theg pa chen po'i lta spyod dam tshig ril rdzogs par gyur pa'i phyir mi spang pa kho na'o/ /dkar rtsi dmar rtsi dri sha chen/ /dag pa'i snod bcud mi dor ro/ zhes bya ba ni/ dam rdzas lnga po nyid/ bshad pa'i grub pa bzhi po dag gi phyir dang du blang ba ste/ des rtsang sme'i rtog pa sbyangs pa dang/ thun mong gi yon tan gnyis kyi 'ang phyir te/ de dag rgyun tu sbyang bar bya ba'o/ /yan lag bcu'i dam tshig ste zhes bya ba ni/ rtsa ba la dag ma nyams pa las 'di dag 'byung zhing bsgrub pa'i grogs bzhir byed pa'i phyir ro/ /ye nas dag mnyam rtogs pas spyad/ ces bya ba ni/ dngos po thams cad dag pa gsum dang mnyam pa'i ngo bor gnas pa de dag rtogs pas spyad pa dang/ rtogs par 'dod pas spyad pa ste/ go rims bzhin du shes par bya ba'o/ /bsrung zhing bsgrub pa'i dam tshig lnga/ /rtsa ba yin te rigs med 'gyur zhes bya ba la sogs pa ni/ phye ba'i dam tshig gi nges tshig bstan pa ste/ rtsa ba lnga po nyams na mi dang lha'i rigs kyang med par 'gyur na theg pa chen po'i rigs lta smos kyang ci dgos te/ rmad med par 'gyur ba'i phyir ro/ /mi spang ba mi dor lnga gnyis ni/ yan lag dam tshig 'da' dka' o/ /zhes bya ba ni/ log pa'i dug lnga spod ba ni nyan thos lta bur gyur pa ste/ lam nor pas lta ba'i klung las nyams so/ /yang dag pa'i dug lnga spong ba ni/ don gnyis mi 'grub ste/ byin gyi rlabs med par 'gyur ro/ /dam rdzas lnga spong ba ni/ kri ya pa ltar gyur pas lta pa dang spyod pa ma 'brel te theg pa 'dir mi chud pa kho na'i phyir ro/ /mnyam la mnyam par sbyor ba yis mnyam pa'i dam tshig la gnas na/ mnyam rdzogs chen po thob 'gyur pas zhes bya ba ni/ rnam grangs las rtsa ba gnyis su phye ba ni rtsa ba chen po mnyam pa nyid kyi dam tshig ste/ dngos po sar gyi rang bzhin bden pa gsum du mnyam pa la/ shes rab dang/ ting nge 'dzin gyi sbyong ba'i dus na gang yang bdag nyid chen po las mi 'da' ba ni/ mnyam pa nyid kyi dam tshig kho na'i phyir/ rgyas pa'i rgyud las dam tshig dam tshig ces bya ba/ gud na yod pa ma yin te/ rang gi lta ba dam tshig yin zhes gsungs so/ /'di'i 'bras bu ni gang yang ma spangs par kun tu bzang po dbye ba med pa'i sa non par gyur ba kho na'o/ /'das na sangs rgyas ma yin no zhes bya ba ni/ de nyid nyams pa'i skyon bstan pa ste/ de bzhin gshegs pa yang 'di yi ngo bo nyid las mi 'da' bas bzhugs pa'i phyir/ gang zhig bdag nyid chen pos las gzhan pa dang mthong ba dang spyad ba ni/ sangs rgyas kyi ngo bo las nyams pa kho na'o/ /rtsa ba nyams pa'i phyal? ba dag / gsol nye bar mi brtson na zhes bya ba ni/ rtsa ba snga bo kun nyams pa ni phyal pa zhes bya'o/ /de dag kun kyang sku gsung thugs su 'dus so/ /slob dpon dang spun la nyams na sbyod ba la sogs pas gnas su gso'o/ /bla na med pa'i sngags dang/ phyag rgya nyams na bsgrub pa chen po lan gsum gyis bshags nas bzlas pa sogs kyis gso'o/ /gsang ba thugs kyi dam tshig nyams pa ni/ shes rab dang ting nge 'dzin gyis gso'o/ /de ltar myur du mi gso pa ni/ 'o ma rul pa dang 'dra bas/ dam can thams cad kyis bar chung du 'gyur bas/ lung pa gcig gi chu la yang mi btung ba'i phyir/ skad cig yud tsam smra ma byed/ nyams 'gyur nyes pa brjod mi lang/ zhes gsungs so/ /rtsa ba'i dam tshig nyams gyur na bsgrub pa thams cad log par 'gyur zhes bya ba la sogs pa ni/ nyams pa'i skyon rnams bstan pa ste/ rtsa pa lnga po nyams na/ las ci bsags pa ril la nus mthu med cing/ bar chod mang pas gang yang don med par 'gyur zhing phyi mar yid du mi 'ong ba'i sdug bsngal sna tshogs 'byung ngo/ /yan lag dam tshig nyams 'gyur na/ 'bras bu med cing ngan song ltung zhes bya ba ni/ yan lag gnyis nyams na/ nyan thos dang kri ya ba ltar 'gyur bas sngags kyi gzhung gis bstan pa'i thun mong dang mchog gi 'bras bu med la/ de dag gtan tshigs gsum dang dgos ched gsum gyis mi spyod par log par spyod pa rnams ngan song du ltung bar 'gyur ba kho na'o/ /dam tshig rnams ni rdo rje che/ sangs rgyas kun gyi bdag nyid yin zhes bya ba ni/ dam tshig gi rang bzhin bstan pa ste/ rtsa ba dang yan lag rnams kyi rang bzhin ni/ lta spyod gnyis mi phyed pa ste/ rang bzhin dang/ lam dang 'bras bu gsum yang mi phyed pa'i phyir rdo rje zhes bya ba ste/ de dag ni dus gsum gyi sangs rgyas kun gyi lam dang ngo bo nyid kho na'i phyir ro/ /rtsa ba'i dam tshig lnga la ni/ gcig la gnyis dang bcu phrag gsum/ /yan lag dam tshig lnga rnams la/ gcig la'ang bcu phrag gnyis su dbye zhes bya ba la sogs pa ni/ rnam grangs gnyis las rgyas par bstan pa ste/ spyir dam tshig rgyas 'bring rnam pa tri la re re la yang gsum gsum ste dgur phye ba las 'bring gi 'bring sum brgya drug cur phye ba ste/ tshogs mang du dogs pa dang/ 'phra rgyas 'byed pa las gsal bas 'dir ma bris so/ /rgyas pa yang zur tsam bstan pa'i phyir/ dam tshig 'di ni smad po che zhes bya ba la sogs pa gsungs te/ theg pa chen po'i dam tshig rnams ni/ 'khor lo sgyur ba'i rgyal po'i khrims dang 'dra ste/ gdul bya'i dbang gis rgya chad pa 'ang med pa'i phyir ro/ /de nyid nye bar bstan pa'i phyir/ /'jig rten drug gi phyogs bcu na/ /srid gsum 'gro ba ji snyed pa'i/ /rtog 'dul dam tshig de snyed 'phro zhes gsungs te/ 'dul ba ni gnyen pos 'dul pa dang/ sbyangs pas 'dul ba dang/ bsgyur bas 'dul ba dang/ dag par 'dul ba dang/ ngo shes pas 'dul ba la sogs pa'o/ de dag gi phyir grangs ma nges pa kho na'o/ /gzhan yang rgyal mchog kun bzang gis/ zhes bya ba la sogs pa ni/ bsrungs pa'i yon tan bstan pa ste/ mnyam rdzogs kyi yon tan las gzhan par gyur pa ni/ yang zhes bya ba ste/ dam tshig bco lnga po mnyams pa ni/ gang du byung zhe na/ rigs kyi bdag po ni rgyal po'i mchog ste dngos kun tu bzang po'o/ /de'i ngo bo nyid ji ltar zhe na/ thams cad ma lus phyag rgya'i/ /bsgrub med dam pa ma lus 'byung zhes gsungs te/ dngos po gnyis kyis bsdus pa ril ni sku gsung thugs kyi phyag rgyar ye nas lhun gyis grub pas spang ba dang blang ba med pa ni 'bras bu dam pa ste/ kun tu bzang po'i yon tan ril lhun gyis grub po'o/ /de'i yon tan brjod pa las 'das pa'i phyir/ de la sogs pa bsam yas mchog ces gsungs so/ /rgyal ba'i rigs mchog 'dzin pa de/ zhes bya ba la sogs pa ni/ yon tan nye ba mdor bstan pa ste/ dam tshig 'di dag lta sbyong tshang bar sbyor ba ni/ sar chud pa'i rigs 'dzin no/ /rgyun tu gnas pa ni sa la gnas pa'o/ /stobs su gyur pa ni sar yongs su smin pa'i phyir ro/ /'jig rten gtso dang 'khor gyis bkur/ dam ba mchog dang dam pa yis/ /sras dang spun dgongs byin gyis rlob/ ces bya ba ni/ bsgrub pa po de la sde brgyad g.yog dang bcas pas/ dgongs pa bsgrub pa dang/ sangs rgyas dang byang chub sems dpa' ril gyis dgongs shing byin gyis rlob par 'gyur ba kho na'o/ /bder gshegs nyid kyi yul la zhugs zhes bya ba ni/ bco lnga po de nyid de bzhin gshegs pa'i ngo bo'i phyir ro/ /'jigs med kun tu bzang por sbyor/ zhes bya ba ni/ de phan chad ci spyad kyang lhung ba'i dogs pa med de spyod yul yongs su dag pa'i phyir ro/ /ji bzhin nyid dang 'dul ba'i thabs zhes bya ba ni chos thams cad kyi ji bzhin pa de nyid mngon du byed pa'i dam tshig chen po nyid dang 'dul ba'i thabs bco lnga po la sogs pa thams cad ma brtsal bar lhun gyis grub pa'i phyir/ ji snyed sdom pa bsam yas pa/ /ma lus rnam dag lhun gyis grub ces gsungs so/ /nyams na bskang bas rdzogs pa dang/ de la sogs pa bsam yas mchog ces bya ba ni/ spyir dam tshig rnams las ma log na nyams pa rnams bskangs pas kyang skongs so zhes bya'o/ /de nas de bzhin gshegs pa nyid de bzhin gshegs pa nyid la 'dul bar gyur to zhes bya ba ni/ dam tshig gi rang bzhin gyi phyir dang/ rgyal ba nyid kyang 'di dag las mi 'da' na gzhan lta ci smos zhes bya ba'i tha tshig go/ //le'u bcu dgu pa mdor bshad pa'o// // de nas 'phrin las bstan pa'i phyir/ lhun gyis grub pa'i dam tshig byin gyis rlob pa zhes bya ba la sogs pa gsungs te/ byang chub sems nyid la 'phrin las rnam bzhi rang bzhin gyis lhun gyis grub par gnas pa ste/ cho ga bzhi yis bskul pas mngon du snang bar byed pa ni byin gyis rlob pa zhes bya'o/ /e'i tshogs kyi dkyil 'khor mchog ces bya ba 'di dag kyang/ rim pa man ngag gis bsdebs te/ dang po bdud rtsi lnga 'am zas lnga la/ mtshan ma ming du bcas par bya zhes bya la sogs pa'i don gyis/ bsgrub bya dang 'das pa la sogs pa'i dam rdzas lnga 'am/ sha dang nya dang bu ram dang til dang sbrang la sogs pa rnams la ling ga bcas la/ shog bu 'am grog la ming rus bris la glan te/ thong pa'i nang du gzhug go /de nas sngags mkhan las/ rnam bzhi rang gi phyogs su kha bltas la/ e'i tshogs kyi dkyil 'khor mchog ces bya ba la sogs pa'i phyir/ las so so'i dkyil 'khor gsal bar bskyed de lha rnams las la nges par btsud de/ /de nas bkug nas rdo rje phur pas gdab ces bya ba la sogs pa'i phyir/ pho nya rnams kyis bkug nas ling ga la bstims te/ phyag rgya bzhis bcings nas mngon du byas la bzhag go /de la rgyu dang dbyibs so so'i phur pa rnams rigs so so'i ki la yar byin gyis brlabs la gnas bdun la sogs pa la btab la gzir ro/ /de nas rdul du byas la tshogs la dbul zhes bya ba'i don gyis/ /bsam pa dang chas pas ral gris gtubs la/ 'bar ba gtum chen rngam pa la/ /khros pa'i yid kyis mchod sbyin bya zhes bya ba la sog pa'i don gyis/ rigs so so'i dkyil 'khor bsam yas pa mngon sum du dmigs nas rtod cing zos pas dbul lo/ /de dag brlag pa dang/ 'dus pa la sogs pa'i bsam pas phye nas phul na/ mi gnod cing 'dod pa bzhin du 'gyur ro/ /de dag ni lhag pa rdzas kyi sgo nas las bya ba'o/ /rdo rje lu gu rgyud kyi las bya ba ni/ bsgrub pa po yab yum rnams srin lag lu gu rgyud du sgrel pa'i dbus su ling ga bzhag la/ aM raM baM raM ma raM ya raM zhes bya ba'i sngags kyis so so'i gzhal yas khang me dpung dang bcas par bsam ste/ de'i nang du so so'i dkyil 'khor du bdag nyid byin gyis brlabs la/ de nas rgyas pa las 'byung ba ltar tshigs su bcad pas bskul te/ stang stabs kyis sprul pa rnams spros pas khams gsum sprugs nas bsrung ba dang bral te bkug nas ling ga la mngon du gnas pa la/ gnas gsum nas 'od zer byung ba la thim nas bsam pas dbang bskur nas ji ltar 'dod pa 'grub pa ste/ drag po ni sangs rgyas sku yang 'jig pa dang/ tshig par gyur na gzhan lta ci smos zhes gsungs so/ /dbang ni dbang gi rgyal po pad+ma gar dbang dang phyag na rdo rje yang dbang du 'dun gzhan lta bci smos zhes gsungs so/ /rgyas pas ni yon tan gyis nam mkha' yang khengs par 'gyur ro/ /zhes gsungs so/ /zhi bas ni khro bo'i las kyi sbyor pa yang zhi bar byed do zhes gsungs te/ 'bru ni go sla bas so sor ma bshad do/ /slas dang phyi mo bran mo'i tshogs zhes bya ba la sog pa ni/ de dag gis dus su 'khor rnams bskul la las la mngag pa ste/ go sla'o/ /khro bo bsgrub pa'i las kyi gtso bo 'di yin no zhes bya ba ni/ khro bo che gas kyi dkyil 'khor bsgrub pa'i dus su las bzhi bya ba'i mchog ni bro gar gyis bsgrub po zhes bya ba'o/ /khrag 'thung chen po la sogs pa'i zhes bya ba la sogs pa ni/ rdo rje lu gu rgyud kyi las la sogs pa'i dus su/ bdag cag lha ru byin gyis brlabs/ khams gsum ril yang de las mi gzhan par byas te/ rkang pa'i bro thabs dang/ lag pa'i g.yeng ba dang/ sum pa ne zhes bya ba'i glu dang ro dang chas par bya ba'i ni/ thams cad thams cad ci 'dod par/ /thams cad thams cad byed pa yin zhes bya ba ni/ las dngos grub ci 'dod pa grub par 'gyur ro/ /mdzod ldan chen mo zhes bya ba ni ke ru la sogs pa ste dbang dang ci 'dod pa rgyas par byed do/ /spos mo chen mo ni pu ka si la la sogs pa ste/ zhi ba dang mngon spyod kyi las byed pa'o/ /gzhan ni go sla'o/ /ljon pa dang ni lcug phran tshal/ zhes bya ba la sogs pa ni/ las rnam bzhi'i yum ste sgyu 'phrul rdo rje las/ dkar mo bor chung skang chen la/ bzhin lugs gtsug phud g.yas su 'khyil/ /yan lag 'phra 'jam skad gsal cing/ /rlung dkar lcibs zhi ba bya/ /zla dang yan lag mang ba dang/ /'phra zhing bshad pa zabs su ring/ /bzhin lus ser zhing gru bzhir gnas/ /rna 'phyang sha dang nu ma rgyas/ /'phol ba'i dus su 'di dag gzung/ /bzhin mdog par 'dra sogs ka la/ /smin dkyus ring la stod smad tshad/ /lus dang chu klung dri zhim zhing bde ba ldan zhing yal ga med/ /'di ni sdud pa'i mchog tu 'gyur/ /nag mo gru gsum rtsid mgo ma/ /khro gnyer byis pa'i lus ldan zhing/ /gtum zhing brlang tshig 'jom bag med/ /gtsang sme'i rtog bral gsod par bshad/ /dang ba dga' ba chags pa dang/ khros bas ka li rab tu bya zhes bya ba ni/ las rnams bzhi'i bsam pa ste/ chos thams cad dang yid du mi 'ong ba'i dngos po rnams/ rang bzhin gyis mi gnas pa dang/ sbyor ba dang dangs par 'gyur ba kho na dang/ yon tan gyi dngos po rnams rang bzhin gyis gnas dang mngon du 'phel ba'o/ /bsgrub bya sems nyid las mi zhan pa dang/ mngon sum du zhen pa'o/ /sems rab tu 'khrugs shing 'jig par mos pa'i sems kyis las la sbyar ba'o/ /de nas de bzhin gshegs pa nyid la de bzhin gshegs pa nyid kyis sbyong bar gyur to/ zhes bya ba ni/ tshe ba'i tshad du yang 'gyur la/ dus phyi ma gnyis kyi de bzhin gshegs pa rnams la/ snga ma gnyis kyi de bzhin gshegs pa'i 'phrin las kyi rgyud dag par sbyong bar 'gyur ro/ zhes bya ba kho na'o/ /le'u nyi shu khong khrol du bshad pa'o// // de na khro bo'i dkyil 'khor la stong pa bstan pa'i phyir/ tshogs kyi dkyil 'khor gyis shin tu rngam pa'i mdangs kyis glu 'di blangs so zhes gsungs te/ rab tu rngam pa'i khro bo'i rang bzhin gyi dkyil 'khor rnams zhal khro tshul ldan pa'i 'dzam? pa dang/ bcas pa ni rngam pa'i mdangs zhes bya ba ste/ nga ro dang chas pas stong pa'o/ /dang po sku la stong pa bstan pa'i phyir/ hUM gtum chen dus mdza' i me ltar 'bar/ zhes bya ba la sogs pa gsungs te/ hUM gi glu nyid ye shes rgyan gyi phyir/ mgo drangs pa'o/ /rngam pa'i choms gtum pa dang/ 'bar ba'i sku btum pa dang/ 'phrin las drag shul mdzad pa'i phyag gtum pa'i phyir chen po ste/ de lta bu'i sku la bzod par dka' ba'i me dpung bskal pa'i me ltar 'khrug pa'o/ /'od zer nyi ma 'bum gyis gzi zhes bya ba ni/ mun pa sel ba'i 'od zer gsal ba dang/ thabs mkhas pa'i 'od zer mang ba dang/ thugs rje chen po'i 'od zer gyis khyab ste/ de dag nyi ma 'bum dus gcig tu shar ba'i 'od lta bus thams cad zil gyis gnon pa'o/ /khro gnyer glog stong 'gyur ba bzhin zhes bya ba ni/ dbang du sdud pa'i khro gnyer bsdus pa dang/ zil gyis gnon pa'i khro gnyer bsgreng ba dang/ thabs mkhas pa'i khro gnyer sna tshogs su g.yo ba de dag glog stong lta bur 'khyug pa'o/ /mche ba zang yag za byed che to zhes bya ba ni/ skye shi rtsang gcod pa'i mche ba dkar ba dang/ gdug pa za byed kyi mche ba rtsa dmar ba dang/ rngam pa'i mche ba rab tu rno ba'o/ /ho ni de dag gis mnyes pa'i don to/ /gsung lnga la bstod pa/ hUM rngam pa'i nga ror 'brug stong ldir zhes bya ba ni/ gsung rngam par sgrogs pa'i drag po'i dbyangs 'jigs par drag pa'o/ /tug chem ri rab 'bum rnyil skad/ ces bya ba ni/ lha gshegs pa'i tug chem dang/ 'phrin las mdzad pa'i tug chem dang/ sprul pa 'khrug pa'i gtum chen mo/ /a a ha la'i gang rgyangs che zhes bya ba ni/ rngam pa'i gad mo a a/ gtum pa'i gad mo ha la/ dgyes pa'i gad mo ha ho/ dbyug pa'i mthor rlung g.yeng ba che ho zhes bya ba ni/ 'khor sdud pa'i dbyugs pa/ gdug pa 'dul pa'i dbyugs pa dang/ byin 'bebs pa'i dbyugs pa ste/ de dag la mthor rlung chen po byung bas khams gsum yengs par byed do/ /thugs la bstod pa'i phyir/ hUM khro bo'i shes rab 'od po che zhes bya ba ni/ khro bo nyid shes rab kyi ngo bo ste/ lta ngan ril mi dmigs par byed pa'i phyir de cis kyang mi sgrib par gsal ba'o/ /ye shes dkyil 'khor kun tu gsal zhes bya ba ni/ ye shes lnga yis shes bya ma lus par mkhyen pa'i phyir ro/ /rdo rje lta bu ye shes kyis snang ba thams cad kyang nyid las mi zhan par spyod pa'i phyir/ 'bar ba'i ye shes kun tu 'joms zhes gsungs so/ /sna tshogs ye shes thig le che zhes bya ba ni/ ye shes chen po bco brgyad la sogs pa rtsis las 'das pa rnams tha dad du gsal ba kun kyang mi gnas pa'i ye shes chen por ro gcig par ston pa'o/ /hUM khro bo'i rgyal po sprin chen po/ khros pa'i dkyil 'khor char chen 'bebs zhes bya ba ni/ yon tan bstod pa ste/ dkyil 'khor 'di dag gi yon tan gyi tshogs mang po las/ khro bo'i dkyil 'khor so so'i sprul pa dang chas pa bsam yas par gdul bya tha dad la snang bar mdzad pa'o/ /de dag mi zad pa'i phyir/ dkyil 'khor yid bzhin 'byung ba'i gter zhes gsungs so/ / sna tshogs 'khros pa'i thig le che zhes bya ba ni/ yon tan sna tshogs dang bcas pa'i khro bo rnams ye shes chen po'i khro bor ro gcig pa'o/ /'phrin las bstod pa'i phyir/ hUM bdud kun gyi ni bdag po ste/ /bdud kyi bdud sde bdud rnams 'joms zhes bya ba ni/ bdud bzhi ma lus par ma sdangs par dbang du byed pa ni bdag nyid chen po ste/ de'i phyir ru tra sde dang bcas pa bsgral zhing gnas par nas phyi rol tu 'phad bar snang ba ni bcom pa zhes bya'o/ /'jigs pa'i tshogs kyang 'jigs byed pa/ /'jigs byed chen po thig le che ho zhes bya ba ni/ thams cad kyang sdigs par snang ba'i mdzad pa ril/ ye shes kyi mdzad pa nyid las ma g.yos par rang snang ba'i phyir ro/ /rdo rje brag chen sra ba po/ /rdo rje chu bo sdud chen po/ /rdo rje ste 'bar ba ste/ /rdo rje rlung ste mthong rlung che ho zhes bya ba ni/ de dag gi mjug bsdus nas stod pa ste/ khro bo rnams ni mi phyed pa dang 'joms pa'i phyir rdo rje kho na ste/ de dag gi phyir dpe bzhis lta bur snang ba'o/ /de las dur khrod kyi 'byung ba bzhi po yang ye shes rdo rje'i ngo bor stod pa yang zhar la bshad pa'o/ /le'u nyer gcig pa mdor bshad pa'o// //de nas rgyud gnyis yongs su gtad cing mi nus par gzung ba bstan pa'i phyir/ de nas bcom ldan 'das dgyes pa chen po de bzhin gshegs pa nyid la sngags kyi rgyal po brtan par gzung ba 'di ched du brjod do zhes bya ba la sogs pa gsungs te/ thams cad nyid las mi gzhan pa nyid dang/ yongs su rdzogs par chud pa'i phyir gang la yang 'gal ba med pa kho na'o/ /rgyud gnyis ni ngo bo dang yon tan bshad pa rnams kyi don gyis/ rgyal po kho na ste/ de dag gzhan du mi 'gyur bar bya ba dang/ gzung bas mi nus pa ni brtan pa zhes bya ba kho na ste/ yongs su gtad pa gnyis las gdam pa bstan pa'i phyir/ kye kye phyogs bcu dus bzhi rang bzhin 'di/ de bzhin gshegs pa'i ngo bo nyid ces gsungs te/ nyid las mi gzhan pa'i phyir gus pas pa ste/ da ltar dang ma 'ongs pa'i de bzhin gshegs pa rnams la'o/ /tha snyad gnyis kyis bsdus pa ril gyi rang bzhin nyid ni/ 'bu ta bzhi bcu rtsa lnga'i sku dang ye shes su gsal nas gnas pa ni rang bzhin gsang ba'i snying po'i ngo bo nyid de/ nges pa'i lung kho na'o/ /de ni rang bzhin gyis gnas pa ste mi 'gyur bar gdams pa'o/ /da ni lam gyi rgyud yongs su gtad pa bstan te/ de dag gi dgongs pa bstan pa'i phyir/ gzung 'dzin spros la 'chel ba yis/ rnam rtog zhags pas so sor bcings zhes bya ba ni/ yin mod kyi ma rig pa'i bdag las byung ba'i gzung 'dzin gyis kun brtags pa gnyis la thog ma med pa nas goms pa'i 'dzin pas bcings pa dag bdag nyid ngo mi shes pa dag zhen pa grol ba grol ba nyid kyis mnyam du thar par 'gyur ba'i phyir lam gyi rgyud rnams gsungs pa'o/ /'o na lam du ma ni dgos pa med dor bar dogs pa la/ sa rnams khyad par bkod pa yang/ /gsang ba'i snying por 'gro ba'i lam/ /ye shes ngo mtshar rab 'byams kyis/ /don du mi 'gyur yod ma gsungs/ zhes gsungs te/ rang bzhin gsang ba'i snying po ni shin tu zab pas phal gyi yul ma yin yang lam rig par sbyangs pa rnams kyis nyong du rung ba'i phyir/ lam mdza' yas pa yang 'di nyid kyi khyad par las snang bar byas pa kho na'o/ zhes bya ba'o/ /yongs su gtad pa rnam pa gnyis las/ sdud pa po la rgyud kyi mtshan nyid brjod nas gtad pa bstan pa'i phyir/ de bzhin gshegs pa thams cad la/ /gsang ba 'di las gzhan mi mnga' / /zhes bya ba la sogs pa gsungs te/ rgyal ba thams cad kyi ngo bo nyid dang dgongs pa phyin ci log par mngon du bstan pa dang/ rang bzhin gyi rgyud 'di yin pa'i phyir ro/ /sgro dang skur pa zhi ba'i gsang ba'i snying po de kho na nyid de nges pa'i dbyings nas phyung zhes bya ba ni/ de lta bu'i rang bzhin gsang ba'i snying po nyid ci 'dra ba sgro skur med pa phyin ci ma log par ston pa ni/ gsang ba'i snying po de kho na nyid nges pa zhes bya ba lam gyi rgyud 'di kho na ste/ shes bya'i ming shes byed la btags pa'i phyir ro/ /rang bzhin gyi rgyud ni cig shos ril gyi 'byung khungs su gyur pa las 'di nyid mngon su snang ba ni phyung ba zhas bya ba ste/ nges pa'i lung las phyung ba'i phyir mngon du phyung ba'i lung ngo/ /de lta bu'i phyir sdud pa pos zung zhig par gtang pa'o/ /bsgrub pa po la mi nub par gzung bar gtad pa bstan pa'i phyir/ de nas de bzhin gshegs pa thams cad kyi phyag rgya gsang chen snying po 'di zhes bya ba la sogs pa gsungs te/ rgyud 'di rigs thams cad kyi bdag po'i gsung du phyung ba ni gsung gi phyag rgya'o/ /'dis mchon pa dang 'di'i ngo bo nyid dang 'di las mi 'da' ba' i phyir ro/ /rtogs nas smra bar gang byed pa/ de nyid nga yin dbang yan rdzogs/ zhes bya ba ni/ bshad pa nyid kyi phyir rgyud 'di nyams su lon nas mi nub par sgrogs pa ni ston pa nyid dang khyad par med pa'i phyir/ dbang lnga yongs su rdzogs pas nus pa chen po dang ldan pa'o zhes bya ba'o/ /de dag gi phyir de ni nges par lung bstan te/ sras ni thugs las skyes pa yin/ zhes gsungs te/ rang rig pa phyin ci ma log par rtogs pa'i phyir ro/ lung bstan pa gang snyam pa la/ sa rab rig pa 'dzin la gnas zhes gsungs te/ sgyu 'phrul rdo rje las/ rang rig ye shes rgyud don phyir/ /rang snang rig pas mngon byas pa/ /rigs 'dzin mchog ste lhun grub pa'o/ /ting 'dzin nus pa'i mthu med kyang/ /sa sbyong sems pas bskyed du med/ /bder gshegs nyid dang spyod yul gcig /rig pa'i skyes bu'i lung thob po'o zhes gsungs so/ /de bzhin gshegs pa thams cad dbyer med par dgyes nas zhes bya ba ni/ dus gsum gyi rgyal ba ril yang bde ba chen por cig par snang ba ni bsam gyis mi khyab pa'i dgyes pa zhes bya'o/ /dus bzhi mnyam pa nyid kyi dbyings sku gsung thugs lhun stug po bkod pa'i rgyan tu bzhugs so zhes bya ba ni/ dus bzhis bsdus pa ril rang rig pa kho na las gzhan pa med cing de nyid ngo bo ma grub par thams cad du ma 'gags par dang snang ba ni snang stong gnyis su mi byed pas ma brtsal ba'i sku gsung thugs kho na'o/ /de dag gi ngo bo nyid ni brjod pa las 'das pas mdza' yas pa ye shes kyi phyag rgya ste/ sel med pa sha stag gis yongs su gang ba ni til gyi gang bu ltar chos kyi dbyings kyi mdza' klas par gdal ba ste de dag kyang/ shin tu mdzes pa dang/ ngo bo nyid brjod par dka' bas lta bas mi ngoms pa dang/ thams cad du cir yang snang ba'i phyir/ rang rig pa rgyan kho na ste/ phan tshun ring du spangs pa kho na'o/ thams cad kyang de lta bu'i ngo bor gnas pa med pa'i tshul gyis gnas pa ni bzhugs pa ste/ 'di dag gi ngo bo nyid dang/ dgongs pa ni bzhengs pa dang/ bzhugs pa nam du yang mi dmigs pas/ rtag pa rnam pa gsum las ngo bo nyid rtag pa'o zhes lung du ma las gsungs so/ / //'phags pa rtag pa'i rgyal po zhes bya ba ni/ shes bya dang/ thabs dang/ dus dang/ 'bras bu la sogs pa lugs gzhan las khyad par du 'phags pa'o/ /ngo bo nyid dang/ 'khrul pa dang/ log pa dang/ rnam pa dang/ yang dag pa'i rtog pa la sogs pa las 'di dag ni/ yang dag pa la nges par byed pa'i phyir yang dag pa'i rtog pa'o/ /de'i phyir rgyal po zhes bya ba'o/ /gzhan ni go sla'o/ /'khor lo bskor ba de dag gi 'bras bu'i mchog ces bya ba ni/ bstan pa rnams ni bskor ba dang/ 'khor ba dag gcod pa'i phyir 'khor lo ste mang po spros pa de dag gi 'bras bu ni 'dir 'du ba ste 'bras bu rnams las kyang 'bras bur bgrod pa'i phyir mchog go mnyes pa dang yongs su gzung ba zhes bya ba ni mdzad pa yongs su rdzogs/ thams cad kyang dbyer med par dgyes pa'i phyir ro// //le'u nyi shu gnyis pa man ngag gi rim pas bshad pa'o// //bsod nams tshogs ldan sems nyid rang snang rang 'byung lhun rdzogs nyid snang yang/ snang skyen rgos ldan nor bus mtshon byed sgro bral lung gis mngon 'byin dang/ /snod gzhan sbas bzhag rang sgrib rtul yog ngan rtog rigs ngan ming las pa/ mtshon shel spang khab rna brgyud nyams bkrol rang ltas don gsal kun rtogs shog / 'phags pa dpal gsang ba'i snying po zhes bya ba'i 'grel pa rin po che spang khab ces bya ba rdzogs so// //thugs dam 'di/ dbus pa gtan chung bas lus sems btud de bris pa'o/ / // #/ (/gsang ba snying po'i 'grel ba rin po che spar bka' sgeg pa rdo rjes mdzad pa/ slob dpon nyi ma'i 'od seng ges mdzad pa bzhugs//) // de bzhin gshegs pa thams cad kyi bdag po sangs rgyas thams cad kyi ngo bo nyid/

CLOSE WINDOW