བོད་ཡིག

e-texts based on the ACIP/ALL Input

Arya tA ra aSh+Ta b+ha ya tra ta nA ma sA d+ha naM/ bod skad du/ 'phags ma sgrol ma 'jigs pa brgyad las skyob pa zhes bya ba'i sgrub thabs/ rje btsun ma sgrol ma la phyag 'tshal lo/ /kun mkhyen rgyal ba'i bdag po lhan cig skyes pa'i chos sku de bzhin du/ /longs spyod rdzogs dang sbrul ba'i sku ste pad+ma'i 'dab ma bzhin du yangs pa'i spyan/ /rnal 'byor dag par rnam par thar gyur srid dang srid las bral ba'i sku gsung thugs chags pa/ /thabs dang shes rab gnyis med lha dang lha min mis mchod de la phyag 'tshal te/ /skye 'jig rnam par spangs phyir chos nyid mi 'gyur yang dag nyid du dbyer med kyang/ /'khrul bcas 'gro ba'i don phyir sku gsung thugs kyi phrin las khyad par gsang sngags lam/ /sgrib ba myur 'joms sna tshogs phyag rgya'i gzugs 'phros sangs rgyas thams cad bskyed byed yum/ /'jigs pa brgyad las sgrol ba 'di deng bsgrub la dga' phyir dang pas brtsam par bya/ dad ldan rab brtson dam tshig ldan/ /rje btsun sgrub la dga' ba yis/ /rnam par 'chi med dben pa'i gnas/ /nyams dga' dngos grub 'byung gnas su/ /rten dang mchod rdzas sna tshogs pa/ /rab bshams bde ba'i stan nyid la/ /rdzogs sangs rgyas kyi bzhugs tshul gyis/ /phyi nang khrus kyis dag byas te/ /de nas rang gi snying ga ru/ /nga ro dang po las byung ba'i/ /chu shel dbus su yi ge ni/ /sde tshan bzhi pa'i dang po la/ /lnga pa'i tha ma'i thig les brgyan/ /de yi 'od kyis rje btsun dang/ /'phags pa'i tshogs rnams spyan drangs te/ /sangs rgyas kun gyi ye shes sku/ /gti mug ldongs pa'i sems can gyi/ /ma rig mun pa sel mdzad ma/ /bde gshegs sgrol ma phyag 'tshal lo/ /dri zhim me tog thams cad dang/ /a ke ru sogs bdug spos dang/ rab tu mun sel sgron me dang/ /ga bur la sogs dri yi mchog /gtsang sbyar bshos dang gzhan yang ni/ /sgra snyan la sogs mchod pa'i tshogs/ /thams cad dbul te sngags dang ni/ /phyag rgya'i rgyas kyang gdab bar bya/ /'khor ba thog ma med par du/ /sdig bgyis gang lags ma lus pa/ /da lta nyid du bshags bgyis nas/ /slan chang nam yang mi bgyid do/ /rdzogs sangs rgyas sogs 'phags rnams dang/ /'gro ba kun gyi dge ba ni/ /zag med zag dang bcas pa la/ bsam pas rjes su yi mang po/ /'gro mgon sprin bral nyi ma yi/ /dkyil 'khor rgyas par gyur rnams la/ /'gro ba rnams la phan pa'i phyir/ /chos kyi 'khor lo bskor bar bskul/ /rgyal ba zag med dbyings nyid du/ /mya ngan 'das gzigs bzhed rnams la/ /ji srid 'khor pa gnas kyi bar/ /mya ngan mi 'da' bzhugs par gsol/ /don dam rang bzhin mtshan ma med/ /rnam par mi rtog chos sku las gzugs sku lta bu'i tshul 'chang ba'i/ /'gro mgon khyed la skyabs su mchi/ /ji ltar dus gsum mgon po rnams/ /byang chub mchog tu thugs bskyed ltar/ /bdag kyang 'gro rnams bsgral ba'i phyir/ /byang chub mchog tu sems bskyed do/ /phyag 'tshal la sogs bgyis pa las/ /bdag gis bsod nams gang thob pas/ /sems can ma lus sangs rgyas kyi/ /sa ni myur du thob par shog / 'gro ba bde dang phrad la sogs/ /tshad med bzhi yang bsgom bar bya/ /de nas 'phags rnams gshegs byas la/ /brtan g.yo'i chos kun stong par bsgom/ /aoM shU n+ya tA dz+nyA na badzra swa b+ha ba At+ma ko haM/ de nas chu skyes steng du ni/ /chu shel de stengs sa bon no/ de yongs gyur las autpa la/ /sa bon nyid kyis mtshan pa'o/ /de yi 'od kyis skye dgu rnams/ /sbyangs nas yongs gyur bcom ldan ma/ /zhal gcig phyag gnyis dur ba'i mdog/ bcu drug na tshod rgyan rnams rdzogs/ /mchog sbyin pa dang autpa la/ /g.yas dang g.yon du shes bya ste/ /byed krung gis bzhugs 'dzum pa'i bzhin/ /mcho stengs rin chen brag phug nang/ /ltos 'gros zhabs brten bsgom par bya/ /g.yas dang g.yon gyi dang po ni/ /maM dang praM las lha mo ni/ /'od zer can dang so sor 'brang/ /ser mdog zhal gcig phyag gnyis ma/ /rgyan mdzes g.yon na shing lo ni/ /mya ngan med dang rdo rje bsnams/ /g.yas pa bdud pa'i tshul du'o/ /g.yas kyi 'og mar phag gdong ma/ /pa la sha mdog rgyan gyis mdzes/ /chos 'chad pa yi phyag rgya can/ /g.yon gyi 'og mar khro gnyer ma/ /mig sman mdog can khro mo'i tshul/ /gri gug thod khrag bsnams pa'o/ /de dag rnams kyi phyogs mtshams ni/ /brgyad na 'jigs pa rnam pa brgyad/ /bgegs dang dgra dang glang chen dang/ /me dang sbrul dang mi rgod dang/ lcags sgrog gis bcings chu rnams las/ /skyob byed sgrol ma brgyad 'phro ba/ /rnal 'byor pa yis bsgom par bya/ /de nas snying ga'i sa bon las/ /'od 'phros ye shes sems dpa' ni/ /snga ma'i tshul can spyan drangs la/ /mchod nas yi ge bzhi po yis/ /gnyis su med par bstim par bya/ / yi ge gsum gyis gnas gsum du/ /byin gyis brlab bya de yi rjes/ /dbang bskur rigs kyi bdag po ni/ /don yod grub pas spyi gtsug brgyan/ /de nas sa bon las byung ba'i/ /'od kyi spro bsdu cung zad bya/ /skyo na gsang sngags bzlas pa ni/ /yi ge bcu pa bgrang bar bya/ /aoM tA re tut+tA re tu re swAhA/ /'bum phrag 'am yang na drug /'bum phrag bcu yis las rnams 'grub/ /gal te 'byung po rnams la ni/ /gtor ma sbyin na snod gtsang du/ /zan blugs cho gas byin rlabs te/ /lag gnyis thal mo sbyar ba las/ /mdzub gnyis gung mo gnyis ba la/ /legs bcad pa ni aut pa la/ /kha 'bye bas ni phyag rgya ste/ /gnas gsum dag tu gtugs byas nas/ /'byung po rnams la gtor ma sbyin/ /aoM A kA ro mu khaM sarba d+harmA naM a dya nut pan Ta twAt aoM Ani/ /rgyas bar rgyud las gsungs pa'i phyir/ /'di ru ma bkod de ru blta/ /rnal 'byor pa ni gang zhig gis/ /'di don nyams su len byed na/ /dngos dang dngos med zad gtso bo/ /thog ma tha ma med zhi ba/ /skye dang zag pa rnams spangs pa/ /dpal ldan yum nyid thob 'gyur te/ /bum pa bzang sogs dngos grub dang/ /gzhan yang gsang dang bskrad dang dbye/ /dgug dang zhi dang rgyas pa yi/ /las grub 'gyur ba smos ci dgos/ /de ltar stong dang snying rje bdag can srid pa gsum skyes zad dngos shes dang ni/ /shes bya gnyis su med sku kun tu bzang po spyod pa'i bdag nyid sna tshogs yum/ /bcom ldan 'das ma'i sgrub thabs rgyud bzhin legs bkod pa las bsod nams dri ma med/ /bdag gis gang thob des ni 'gro ba ma lus rtog ba de mya ngan 'das thob shog/ 'phags pa 'jigs pa brgyad las skyob pa zhes bya ba'i sgrol ma'i sgrub thabs slob dpon chen po tsan dra go mis mdzad pa rdzogs so/ / //rgya gar gyi mkhan po dI baM kar sh+rI dz+nyA na dang/ bod kyi lots+tsha ba tshul khrims rgyal bas bsgyur ba las/ slad kyi rgya gar gyi mkhan po byang chub sems dpa' dA na sh+rI dang/ bod kyi lots+tsha ba mal gyi blo gros grags bas bcos te gtan la phab pa'o// //rgya gar skad du/ sI ta tA ra sA d+ha naM/ bod skad du/ sgrol ma dkar mo'i sgrub thabs/ 'phags ma sgrol ma dkar mo la phyag 'tshal lo/

CLOSE WINDOW