བོད་ཡིག

e-texts based on the ACIP/ALL Input

/ (//phyag na rdo rje gos sngon can gyi cho ga bzhugs so/) /rgya gar skad du /nI lAM ba ra badzra pA Ni maN+Da la bi d+hi nA ma/ bod skad du/ phyag na rdo rje gos sngon po can gyi dkyil 'khor gyi cho ga zhes bya ba/ sangs rgyas dang byang chub sems dpa' thams cad la phyag 'tshal lo/ /bcom ldan 'das phyag na rdo rje gos sngon po can la phyag 'tshal lo/ /nyes pa kun bcom de nyid rtogs gyur kyang/ /thugs rje'i rgyun gyis 'jigs pa'i sku sprul pa/ /klu dbang la sogs gdug pas phyag byas pa'i/ /gos sngon phyag na rdo rje khyod phyag 'tshal/ /gang zhig mthong bas sdug bsngal sel 'gyur zhing/ /gang du smin pas dngos grub skal gyur phyir/ /dri med rgyud mang mthong dang bla ma yi/ /drin thob gyur pas dkyil 'khor cho ga bshad/ /gang zhig dbang rnams rim thob dam tshig ldan/ /brten zhing dul ba bzod ldan blo gros che/ /dpa' zhing brtson ldan drangs la g.yo sgyu med/ /sngags dang rgyud kyi sbyor ba rab shes dang/ /de nyid bcu shes dkyil 'khor bri bar mkhas/ / mtshan nyid dang ldan gyur pa'i bla ma la/ /skal ldan slob mas gsol ba lan gsum gdab/ /snod ldan gyur na bla mas gnas ba sbyin/ /slob ma'i lte bar hUM gi yi ge ni/ /du ba'i mdog can 'od zer 'bar ba bsam/ /snying kar kaM yig nag po smig pa yi/ /rang bzhin bltas te hUM gi 'od zer gyis/ /sna rtser bton te ltung bas sdig pa ni/ /mi sdug cer bu skra grol nyal thag cing/ /til mar gyis bsgos gnag la rid pa bsam// hUM las byung ba'i rdo rje gnod sbyin la/ /badzra yak+Sha sogs sngags kyis zos pa 'am/ /hUM las byung ba'i phur bus gdab par bya/ /saM las kun tu bzang po bskyed nas ni/ /snying gar hUM las sna tshogs rdo rje bsam/ /spyi bor gtugs te rtsa sngags lan gsum gyis/ /bzlas te slob ma yongs su bsrung bar bya/ /dben zhing nyam dga' i gnas su bdag nyid ni/ /ting 'dzin sum ldan mtshan ma thob ba 'am/ /bzlas pa 'bum rdzogs yang na zla gcig dang/ /zla drug la sogs bsnyen pa rdzogs par bya/ /de ltar bsnyen pa yongs rdzogs nas/ /khang stong dag gam dur khrod dang/ /sbum med drag po'i las can dang/ /de bzhin tshang tshing mi bzad 'jigs/ /de la sogs pa'i gnas rnams su/ /drag po'i las kyi dkyil 'khor bri/ /yang na yid ni gang dag du// nges par dga' ba skye 'gyur ba/ /mdor na sa gzhi nyams dga' dang/ /mdangs bsam shar du gzhol bar bshad/ /yul der dkyil 'khor bri ba yi/ /las ni legs par sbyar bar bya/ /tsan dan a ka ru sogs la/ /dri zhim chu dang ba sogs kyi/ / chag chag legs par gdab par bya/ /phyogs skyong rnams la gtor ma ni/ /sbyin par byas te gsol ba gdab/ /sa yi lha mo sku mdog ser/ /phyag gnyis bum pa bsnams pa ni/ /zlos bkug mchod de gsol ba gdab/ /skyob pa sangs rgyas thams cad la/ /lha mo khyod ni dpang du gyur/ /rin chen sna tshogs 'dzin pa yi/ /sa 'dir dkyil 'khor bri bar bya/ /zhes brjod nas mkhar gdegs par bya/ /bdag dang slob ma sa bdag sogs/ /zhi bar bya ba'i phyir dang ni/ /bgegs rnams bzlog bar bya ba'i phyir// zhi dang drag po'i sbyin sreg bya/ /de nas pus nub 'dom gang par/ /brus te rdo dang rus sogs bsal/ /slar yang sa yis de nyid dgang/ /gal te lhag par gyur na ni/ /dngos grub yod par ston pa yin/ /de ltar sbyang ba byas pa dang/ /dri zhim chu dang sbyar ba'i sas/ /gru bzhi shin tu 'thas byas te/ /dri zhim chu dang ba yi lngas/ /shar nas brtsams te legs byugs la/ /grwa bzhi sgo bzhi khang brtsegs ma/ /rta babs sgar khung dra ba can/ /me tog chun 'phyang sogs ldan pa'i/ / khang pa'i nang chud rgyan sogs dgram/ /de nas hUM baM hUM zhes pas/ /rnam par dag pa'i nam mkha' bsam/ /hUM suM hUM las byung ba yi/ /rin chen sna bzhi'i ri rab bskyed/ /de steng hUM laM hUM byung ba'i/ /gser gyi sa bzhi bru bzhi pa/ /bskyed de thal bcings kha sbub la/ /sngags kyis byin gyis brlabs par bya/ /aoM me di ni badzri b+ha ba band+ha hUM/ de nas khams gsum rnam rgyal ni/ /bsrung ba'i sngags kyis bsrung bya ba/ /sa yi cho gar gsungs pa yin/ /de nas bdag nyid khrus byas shing/ /shin tu sngo ba'i gom? bgos te/ /ji snyed rgyan gdags dri zhim bya/ /dkyil 'khor dbus nas shar du bltas/ /ji ltar sgrub thabs las bshad pa'i/ /ting 'dzin gsum ni bsgom pa dang/ /bzlas pa dag la brtson pa la/ /grogs mchog rnams kyis bstod gsol gdab/ /gsang ba'i bdag po brtson chen po/ /sangs rgyas sku dang 'dra ba'i lus/ /gti mug rdo rje'i rang bzhin can/ /rdo rje sku la phyag 'tshal lo/ /gsang ba'i bdag po brtson chen po/ /sangs rgyas gsung dang 'dra ba'i ngag /'dod chags rdo rje'i rang bzhin bdag / rdo rje gsung la phyag 'tshal lo/ /gsang ba'i bdag po brtson chen no/ /sangs rgyas thugs dang 'dra ba'i yid/ zhe sdang rdo rje'i rang bzhin bdag /rdo rje thugs la phyag 'tshal lo/ /mgon po khyod la gsol ba ni/ /sems can kun la sman slad du// gdub pa thams cad 'dul byed pa'i/ /dkyil 'khor dam pa bshad du gsol/ /de ltar gsol gdab bdag po yi/ /nga rgyal brtan pas langs nas ni/ /bdag nyid rang bzhin rdo rje can/ /phyag na rdo rje bdag rang yin/ /bdag ni sangs rgyas rgyal po che// stobs chen rnal 'byor can bdag yin/ /rnal 'byor dbang phyug rgyal po'i bdag /phyag na rdo rje bstan bdag ste/ /byin gyis brlabs pa mi 'dor ro/ /zhes brjod badzrod ti Sha yis/ /dkyil 'khor mkhar bteg ma Ta yis/ /nyi ma zla ba hUM mtshan nyid/ /rkang 'og hUM las byung ba yi/ /sna tshogs rdo rje bsam byas nas/ /bsgyings pa'i tshul gyis yongs bskor bas/ /bgegs bskrad ra ba sa gzhi kun/ /rdo rje'i rang bzhin can du bsam/ /de nas dbus su gnas nas ni/ /sku gsung thugs kyi rdo rje can/ /sangs rgyas thams cad bdag la gson/ /bdag ni dpal ldan rdo rje 'dzin/ /bka' yi 'khor lo rab sbyor gyis/ /lha dang lha min gsang ba pa/ /brjed byed la sogs bgegs kyi tshogs/ /sa 'dir ma gnas gzhan du dengs/ /gal te dam tshig las 'das na/ /rdo rje khro bo bzhin 'bar pa'i/ /rdo rje rab tu 'bar ba yis/ /mgo ni tshal pa brgyar 'gas shing/ /zhig bar 'gyur bar gdon mi za/ zhes brjod byang shar nas brtsams te/ /khro bo'i gar gyi 'dor stangs kyis/ /drag tu lan gsum bskor byas la/ / dbus 'dug bden pa'i byin brlabs brjod/ /bdag slob dpon ming 'di zhes bya bas/ /slob ma che ge mo zhig rdzogs pa'i byang chub thob par bya ba dang/ sems can thams cad kyis kyang bla na med pa'i ye shes thob par bya ba'i phyir/ /sa phyogs 'dir bcom ldan 'das gos sngon po can zhes bya ba'i dkyil 'khor gyi rgyal po 'dri bas lha dang lha yin dang/ gnod sbyin dang srin po dang/ yi dags dang/ sha za dang/ brjed byed dang/ 'byung po dang/ mkha' 'gro ma dang/ mi 'am ci dang/ rig sngags grub pa rgan po dang/ rgan mo 'khor dang g.yog tu btsas pa gang dag 'khor pa rnams dengs shig / de ltar rdo rje 'chang ba'i bka' thos nas myur du dengs shig /gang dag mi 'gro ba de dag ni/ /phyag na rdo rje hUM zhes bya ba rab tu 'bar ba khro bzhin 'bar ba'i ye shes kyi rdo rje chen po 'dis mgo tshal pa brgyar 'gas bar byed do/ /de ltar brjod nas dbus su ni/ /mthun pa'i stang stabs shar la sogs/ /phyogs bzhi stang stabs bzhi yis ni/ /bgegs rnams tshar gcad bsrung 'khor bya/ /de nas phur bu lnga la ni/ /dri phyug me tog srad? bu dmar/ /btags te zhal gsum phyag drug pa/ /smad ni mdud ltar byin brlabs te/ /phur pa'i gsang sngags legs brjod la/ /g+ha g+ha la sogs kyis gdab bya/ /de nas dbus su dris byugs la/ /baM las ma yi lha mo bskyed/ /bkug ste mchod la gsol ba gdab/ /skyob pa sangs rgyas thams cad kyi/ /spyod pa'i tshul gyi khyad bar dang/ /sa dang pha rol phyin pa la/ /lha mo khyod ni dpang du gyur/ /shAkya seng+ge skyob pa yis/ /ji ltar bdud kyi sde bcom pa/ /de bzhin bdag gi bdud kyi steng/ /pham par byas te dkyil 'khor bri/ zhes ni lan gsum brjod de bstim/ /de nas dris yis legs byugs la/ /dri yi thig le dgu byas te/ /me tog tshom bu lhar bskyed la/ /nam mkha' i dkyil 'khor phab mchod bstod/ /rdo rje 'char ba bcom ldan 'das/ /rig sngags rgyal la phyag 'tshal lo/ /thugs kyi bdag nyid can rnams kyis/ /dkyil 'khor bdag ni 'dri bar 'tshal/ /slob ma rnams la brtse ba dang/ /khyod rnams la yang mchod pa'i phyir/ /bcom ldan bdag ni gus pa la/ /de ni gnang pa mdzad pa'i rigs/ /sangs rgyas 'gro 'khor bya don stsol/ /byang chub sems dpa' 'bras gnas dang/ /gang gzhan gsang sngags lta rnams dang/ /'jig rten skyong ba'i lha rnams dang/ /gang yang 'byung po mthu chen dang/ /gang yang rdo rje spyan mnga' ba'i/ /sems can bstan la dga' ba rnams/ /bdag ming 'di zhes bgyi ba yis/ /phyag na rdo rje'i dkyil 'khor ni/ /yo byad ci 'byor pas 'dri na/ /deng bdag slob mar bcas pa la/ /thugs brtse bas ni dgongs nas su/ /tshogs pa thams cad dkyil 'khor du/ /byin gyis brlab pa mdzad du gsol/ /zhes ni lan gsum gsol btab la/ /mchod dang bstod pa rgyas par bya/ /de nas bum pa dgu 'am bcu/ /mtshan nyid dang ldan bkru byas te/ /rigs kyi mtshan mas mtshan byas la/ /sman 'bru rin chen lnga dri chu/ /btsal te mgul bcings kha brgyan la/ /rnam rgyal bum pa gtso bo'i mdun/ /lhag ma phyi rol dag la 'god/ /las byed bum pa sgo 'gram dgod/ / baM las bum bskyed de'i nang du/ /lha rnams skad cig gis bskyed la/ /ye shes sems dpa' dgug sogs bya/ /mchod bstod byas te gtso bo la/ /rtsa ba'i sngags ni brgya rtsa brgyad/ /sa bon de nyid gsum ldan ni/ /lhag ma rnams ni bzla bar bya/ /de nas mtshan nyid dang ldan pa'i/ /slob ma nang du pos byas la/ /sngags kyi dngos grub don gnyer gang/ /dkyil 'khor 'dir ni 'jug par byed/ /bsod nams 'dod pas de las gzhan/ /gzhan dag 'jig rten pha rol gnyer/ /'jig rten pha rol don gnyer ba'i/ /dad pa mang du byad pa yis/ /blo ldan dkyil 'khor 'jug par bya/ /tshe 'di'i 'bras bu gnyer mi bya/ /gal te 'di 'bras don gnyer na/ /'jig rten pha rol 'grub mi 'gyur/ /'jig rten pha rol la dmigs na/ /'bad pa med par 'di 'bras 'grub/ /ces brjod slob mas gsol ba gdab/ /dga' chen khyod bdag ston ba bas/ /slob dpon khyed ni dgongs su gsol/ /byang chub chen po'i tshul bstan pa/ /mgon po chen por bdag 'tshal lo/ /dam tshigs de nyid stsal du gsol/ /sangs rgyas chos dang dge 'dun te/ /skyabs gsum dag ni bdag la gsol/ /thar pa chen po'i grong mchog tu/ /mgon po bdag ni 'jug par 'tshal/ /de ltar lan gsum brjod nas ni/ /khyod ni tshul chen snod yin te/ /bu chur theg pa chen po yi/ /gsang sngags spyod tshul cho ga ni/ /khyod la yang dag bstan par bya/ /rdzogs pa'i sangs rgyas gang 'das dang/ /de bzhin gang dag ma byon dang/ /da ltar byung ba'i mgon po rnams/ /'gro la phan phyir bzhugs pa dag/ de dag kun gyis gsang sngags kyi/ /cho ga bzang po'i 'di mkhyen nas/ /dpa' bos byang chub shing drung du/ /thams cad mkhyen pa mtshan med brnyes/ /gsang sngags sbyor ba mnyam med de/ /shAkya seng+ge skyob pa yis/ /bdud sde shin tu mi bzad pa/ /dpung chen dgra yang de yis bcom/ /de bas kun mkhyen thob bya'i phyir/ /bu yis blo gros 'di gyis shig /ces brjod slob mas bshags sogs bya/ /dkon mchog gsum la skyabs su mchi/ /sdig pa thams cad bshags par bgyi/ /'gro ba'i dge la rjes yi rang/ /sangs rgyas byang chub tu sems bskyed/ /de nas slob ma'i gnas gsum du/ /khu tshur spos chur ldan pa yis/ /thig le byas te zla ba dang/ /pad+ma nyi steng sa yig gsum dgong/ /sku gsung thugs su byin brlab nas/ /dus 'di nas ni gzung nas ni/ /'khor ba'i nyes pas ma gos par/ /mchod pa kun dang ldan par ni/ /dus kun tu ni bde bar mnos/ zhes brjod me tog sogs kyis mchod/ /a shwatTha sogs so shing ni/ /sor bcu gnyis drang srog chags med/ /rtse mo me tog gis btags sbyin/ /dkyil 'khor 'dom gang gru bzhi la/ /shar ram byang du bltas te dor/ /byang shar lho nub steng 'og tu/ /zhi rgyas mngon spyod dbang rigs 'dzin/ /sa 'og dngos grub phyir lhung med/ /aoM h+rIgzengs bstod phyir 'chos pa/ /'jig rten du ni kun mkhyen rnams/ /au duM bA ra'i me tog bzhin/ /brgya lam na ni res 'ga' zhig /'byung 'gyur yang na mi 'byung ngo/ /gsang sngags spyod pa'i tshul 'byung ba/ /de bas kyang ni dkon pa ste/ /gang gis mnyam med sems can don/ /mya ngan mi 'da' byed par nus/ /bskal pa bye ba du ma ru/ /sdig pa bgyi bar 'gyur ba gang/ /de kun dkyil 'khor 'di 'dra ba/ /mthong bas 'byang bar 'gyur lag na/ /grags pa mdza' yas sngags spyod pa'i/ /tshul la gnas par smos ci dgos/ /skyob pa gsang sngags bzlas nas ni/ /go 'phang bla med thob par 'gyur/ /gang dag spyod pa mchog 'di la/ /blo gros rtag tu mi g.yo ba/ /de dag gis ni ngan 'gro'i rgyu/ /sdug bsngal kun 'byung rab tu bcad/ /bdag nyid chen po khyed rnams kyis/ /rnyes pa mnyam med de ring rnyed/ /gang phyir rgyal ba sras bcas la/ /bdag nyid chen po kun gyis ni/ /bstan pa 'di la khyed rnams kun/ /yongs su bzung ste skye bzhin pa/ /de phyir khyed rnams theg chen la/ /sang ni rab tu skye bar 'gyur/ /theg pa chen po cher 'byung ba'i/ /lam mchog 'di ni dpal dang ldan/ /khyed rnams 'dir ni dong bas na/ /rang byung skal ba chen po pa/ /'jig rten thams cad mkhyen pa yi/ /de bzhin gshegs pa rnams su 'gyur/ /de ltar chos bshad spro bskyed la/ /bzhin bzangs longs la song zhig dang/ /sang ni thar pa chen po yi/ /grong khyer mchog ni mthong 'gyur zhes/ /brjod la nyal du gtang bar bya/ /slob dpon bdag nyid dkyil 'khor gyi/ /mdza' legs dag tu nyal bar bya/ /de ltar lhag gnas rdzogs byas nas/ /nang par skya reng shar ba dang/ /lha yi rnal 'byor ldan byas te/ /slob ma'i rmi lam brtag byas la/ /ngan na sbyin sreg gis bzlog bya/ /nyi ma 'char kar gyur pa dang/ /dkyil 'khor nam mkhar bteg byas la/ /thig gdab pa ni brtsams par bya/ /sar pa legs par bka' nas kyang/ /tshad dang mi thun pa'i mdzes pa ni/ /kha dog so sor bsgyur byas la/ /aoM traM h+rIbar bya ba yin/ /aoM n+yo n+ya aoM nu ga ta sarba d+harmA ba ras pa ra sarba d+harmA/ /a tyan ta a nu ga ta sarba d+harmA/ aoM badzra sa ma ya sU tra ma ti kra ma hUM/ grogs mchog khams gsum rnam rgyal du/ /dmigs te dza gsum gyis thig drang// shar dang byang ltar tshangs thig gdab/ /mer gnas byang du bltas pa dang/ /rlung gnas lho ru bltas pa dang/ /de nyid nas ni shar bltas dang/ /me gnas nub tu bltas pa yis/ /phyi yi thig ni bzhi gdab bya/ /me dang bden bral du gnas te/ /mtshams kyi thig gnyis gdab par bya/ /de bzhin tshangs pa'i thig nas ni/ /phyi yi thig gi bar du ni/ /ngos rer bdun bdun gdab par bya/ /de bzhin sgo khyud logs dang ngos/ /'gram dang ya phubs kyang gdab bya/ /sgo ni 'khor lo brgyad kyi cha/ /sgo khyung lha rnams sgo yi tshad/ /kha khyer dra phyed de yi phyed/ /tshon sna lnga ni kha khyer phyed/ /rta babs sgo yi gsum 'gyur ro/ /gru bzhi pa la sgo bzhi pa/ /rta babs bzhi dang yang dag ldan/ /mchod rnam bzhi yis yongs su bskor/ /ka ba brgyad kyis nye bar mdzes/ /rdo rje thig gis yongs su bskor/ /dra ba dra ba phyed pas brgyan/ /bla re rnga yab me long dang/ /gos dang me tog phreng gis brgyan/ /lha rdzas bsnams pa'i lha mo'i tshogs/ /ba dan rtse mo rlung bskyod ldan/ /de ltar legs par thig btab nas// tshon dgyes ba ni brtsam par bya/ /rin chen lnga yi phye ma 'am/ /yang na sa yi phye ma ni/ /kha dog lnga dang ldan pa la/ /sa bon lnga dang ldan byas te/ /'bar ba'i lta bas sangs rgyas lnga/ /spyan drangs tshan la bstim par bya/ /aoM badzra tsi tra saM ma ya hUM/ phur bu'i bu ga bkang nas ni/ /dbang ldan nas brtsams bri bya ste/ /ma chad ya yo med par bri/ /dkar po ser po dmar dang ljang/ /sngon po nang du bri bar bya/ /shar phyogs su ni dkar ba ste/ /lho dang nub dang byang dang dbus/ /ser po dmar po ljang dang gnag /legs par bris nas mtshan ma dgod/ /dbus su sna tshogs pad+ma ste/ /sbrul brgyad mjug ma bsnol ba la/ /nyi ma'i steng du rdo rje che/ /sngon po rtse lnga 'od zer can/ /shar sogs leng tshe bzhin la ni/ /sna tshogs pad steng 'jigs byed dang/ /stag dang chu srin mi rnams la/ /nyi me'i dkyil 'khor ldan par bya/ /chu srin steng du zla ba bri/ /de rnams steng du rdo rje che/ /rtse mo dgu pa nyid dang ni/ /tsan dan bud shing pad+ma dang/ /rin po che rnams bri bar bya/ /shar la sogs pa'i phyogs rnams su/ /pad+ma nyi ma'i gdan rnams la/ /gri gug sbrul gyi pags pa dang/ /sbal ba'i khrag ldan thod pa dang/ /gri ste mtshan ma bzhi bri bya/ /de ltar legs par bri byas la/ /me tog chal ba bkram nas ni/ /gzhan yang rgyan rnams legs par 'god/ /de nas rgongs ka'i dus su ni/ /khrus byas nang du zhugs byas la/ /gzhal yas khang bslang shugs 'jug bya/ /aoM badzra au tiSh+Tha/ aoM badzra be gA kra ma hUM/ lhag chad bskad ste me tog ni/ /bcom ldan 'das la dbul bar bya/ /de nas sgo phye phyir byung ba/ /dang po sbyor ba'i ting 'dzin la/ /gnas nas lha rnams spro bar bya/ /so sor gnas su gdan bskyed la/ /bdag gi thugs ka'i sa bon las/ /zla nyi sa bon ldan spros pas/ /de las so so'i mtshan mar gyur/ /de las lha rnams kun rdzogs bsgom/ /nam mkha' i dkyil 'khor bkug nas ni/ /dkyil 'khor gcig tu bsgom par bya/ /bdag gi thugs ka'i sa bon la/ /nam mkhar rgyal ba spyan drangs la/ /mched bstod gsol btab dbang bskur ba/ /kun gyi dbul mi bskyod pa/ /lha rnams kun gyi gnas gsum du/ /de nyid gsum gyis byin brlabs bya/ /de nas me tog la sogs pa'i/ /mchod pa rnams kyis mchod bstod bya/ /phyogs skyong la sogs gdon tshogs la/ /gtor ma rgya chen sbyin par bya/ /de nas zhi ba'i thab khung du/ /lha rnams sbyin sreg gis tshim bya/ /de nas bum pa so so la/ /sngar bzhin bzlas pas mnyes par bya/ /de nas slob dpon bdag nyid ni/ /'jug dang dbang bskur ba yi ram/ /slob ma'i bzhin du 'dir spyad bya/ /de nas slob ma gzhug don du/ /bden pa'i byin brlabs brjod par bya/ /nam mkha' skye ba mtshan ldan phyir/ /thog ma tha ma med pa'i mchog / sems pa'i rdo rje che rang bzhin/ /rdo rje sems dpa' i bdag 'grub mdzod/ /kun mchog dngos grub chen po ste/ /dbang phyug chen po lhag pa'i lha/ /rdo rje 'dzin pa kun gyi rgyal/ /mi 'gyur mchog tu bdag 'grub mdzod/ /nyes pa mi mda' rtag pa khyod/ /'dod chags kun gyi rjes chags pa/ /'dod chags chen po dga' ba che/ /bcom ldan de nyid kyis 'grub mdzod/ /shin tu dag pa kun gyi mchog /gdod nas grol ba de bzhin gshegs/ /kun tu bzang po kun bdag nyid/ /byang chub sems dpa' bdag 'grub mdzod/ /dngos grub chen po kun gyi mchog /dbang phyug chen po phyag rgya'i mchog /grub pa'i rdo rje cher bstod pa/ /rdo rje snyems bdag bdag mdzod cig /sems can kun gyi yid khyab cing/ /sems can kun gyi snying la zhugs/ /sems can gyi yab gyur cing/ /'dod chags dam tshig gyur pa'o/ /bden pa gang gis ye shes mchog /shes rab thabs bdag dkyil 'khor yin/ /bden pa de yis mgon bdag la/ /khyod kyis 'dod pa rab rdzogs mdzod// chos rnams gzugs brnyan lta bu ste/ /dag cing gsal la rnyog pa med/ /gzung du med cing brjod du med/ /rgyu dang las las kun tu 'byung/ /de bzhin nyid las nges par skyes/ /bden pa 'di yis dkyil 'khor du/ /gzugs brnyan gsal bar slob ma ni/ / kun gyis dri ma med mthor shog / de ltar slob dpon bdag zhugs la/ /slob ma 'jug pa brtsam par bya/ /las byed bum pas khrus byas la/ /ras sngon gdong g.yogs phyi rol dgug /'dod pa dag pa gang yin smos/ /bdag ni skal bzang zhes brjod do/ /de nas slob dpon phyag byas la/ /dga' chen khyod bdag ston pa bas/ /slob dpon khyod ni dgongs su gsol/ /byang chub sems dpa' i tshul bstan pa/ /mgon po chen po bdag la gsol/ /dam tshig de nyid bdag la gsol/ /de ltar lan gsum gsol btab la/ /me tog thogs pa'i slob ma yis/ /sdig pa bshags la sogs pa bya/ /slar yang gsol ba gdab bya ste/ /gtso bo bdag la sdom pa gsol/ /thub pa'i nyi ma ma lus pa/ /sangs rgyas rnams ni bdag la dgongs/ /bdag ming 'di zhes bgyi ba yis/ /slob dpon dbang du gnas pa la/ /sangs rgyas rol mo las byung ba'i/ /mi ldog pa la 'khor lo sbyor/ /thar ba chen po'i grong khyer mchog /gsang ba chen po 'jug par bgyi/ /gsang ba thams cad bsdus pas ni/ /slob dpon chen po bdag 'jug mdzod/ /mi ldog pa yi dbang bskur ba/ /skal pa chen po bdag la gsol/ /mtshan rnams kun gyis rgyas btab cing/ /dpe byad rnams dang yang dag ldan/ /sangs rgyas sku ni yid 'ong ba'i/ /slob dpon chen po bdag la gsol/ /dbang bskur chen po rmad byung ba'i/ /sems can kun gyi don gyi phyis / bdag ni rtag tu slob dpon bgyi/ /slob dpon chen po bdag la gsol/ /de nas rdo rje slob dpon bgyi/ /che ge zhes bya ba 'di nyid ni/ /byang chub sems ni yongs 'dzin pa'i/ /dam tshig mchog dang gsang ba yi/ /'khor lo 'dir ni 'jug par mtshal/ /de ltar gsol btab 'dod dam dri/ /gsang chen po yi rigs dag pa'i/ /gsang ba chen po yongs 'dzin par/ /bdag nyid chen po 'dod dam cing/ /des kyang tshal zhes brjod par bya/ /sangs rgyas chos dang dge 'dun te/ /dkon mchog gsum la skyabs su song/ /'di ni sangs rgyas rigs dag pa'i/ /dam tshig brtan par 'gyur ba'o/ /rdo rje dril bu phyag rgya dag /blo chen khyod kyis gzung bar bya/ /byang chub sems gang de rdo rje/ /shes rab bril bu zhes bshad do/ /slob dpon dag kyang gzung bar bya/ /bla ma sangs rgyas kun dang mnyam/ /'di ni rdo rje rigs dag pa'i/ /sdom pa dam tshig yin par gsungs/ /rin chen rigs mchog chen po la/ /nyin dang mtshan mo lan gsum du/ /zang zing mi 'jigs chos dang byams/ /sbyin pa rnam bzhi rtag tu byin/ /phyi dang gsang ba theg pa gsum// dam chos khyod kyis gzung bar bya/ /'di ni pad+ma'i rigs dag pa'i/ /dam tshig sdom pa yin par gsungs/ /las kyi rigs mchog chen po la/ /sdom pa thams cad ldan par ni/ /yang dag nyid du gzung bar bya/ /mchod pa'i las kyang ci nus bya/ /gzhan yang bcu bzhi 'di dag ni/ /phas pham par ni rab tu bshad/ /spang zhing dor bar mi bya ste/ /rtsa ba'i ltung bar shes par bya/ /nyin dang mtshan mo lan gsum du/ /nyin re zhing ni bzla bar bya/ /gang tshe nyams gyur rnal 'byor pa/ /kha na ma tho sbom por 'gyur/ /khyod kyis srog chags gsad mi bya/ /ma byin par yang mi blang ngo/ /'dod pa log par mi spyod cing/ /brdzun du smra bar mi bya'o/ /phung khrol kun gyi rtsa ba ste/ /chad ni rnam par spang bar bya/ /sems can 'dul phyir ma gtogs pa/ /bya ba ma yin thams cad spang// dam pa nye bar bstan bya zhing/ /rnal 'byor pa las bsnyen bkur bya/ /lus kyis las ni rnam gsum dang/ /ngag gi rnam pa bzhi rnams dang/ /yid? kyis rnam pa gsum dag ni/ /cing nus par ni rjes su spongs/ /theg pa dman la 'dod mi bya/ /sems can rnams la rgyab phyogs min/ /'khor ba dag kyang yong mi spang/ /rtag tu mya ngan 'da' mi chags/ /lha dang lha min gsang ba pa/ /khyod kyis brnyas par mi bya zhing/ /phyag rgya bzhon pa mtshon cha dang/ /mtshan ma 'gom par mi bya zhing 'di dag dam tshig yin par bshad/ /khyod kyis rtag tu bsrung bar byed/ /des kyang 'di skad brjod bya ste/ /slob dpon 'di ni bdag la gson/ /gtso bos ji ltar bka' stsal pa/ /de ltar bdag ni bgyid 'tshal zhes/ /ji ltar gzung bzhin khas blang bya/ /de nas slob ma sems bskyed de/ /aoM sarba yo ga tsit+ta aut pA da yA mi/ /de nas snying gar rdo rje ni/ /sngags 'dis rab tu gzhag par bya/ /su ra ta sa ma ya stwaM ho badzra sid+d+hi ya thA su khaM/ de nas slob ma ltar bskyed la/ /dri la sogs pa lngas mchod bya/ /me tog thogs pa'i slob ma yis/ /bla ma yon gyis mnyes byas la/ /las byed bum pas dbang bskur te/ /gung mos me tog gzung byas la/ /sgo bzhi nas bcug shar du gnas/ /deng khyed de bzhin gshegs pa thams cad kyi rigs su zhugs kyis/ ngas khyod la ye shes gang gis de bzhin gshegs pa thams cad kyi dngos grub kyang 'thob na/ dngos grub gzhan lta smos kyang ci dgos te/ de lta bu'i ye shes bskyed par bya yi/ khyod dkyil 'khor chen po ma mthong ba rnams la smra bar ma byed cig /dam tshig nyams par gyur ta re/ de nas sngags 'dis chu 'thung gzhug rdo rje sems dpa' der khyod kyi/ /snying la yang dag zhugs par mdzad/ /gal te tshul 'di smra na ni/ /de ma thag tu dril te gshegs/ /aoM badzro da ka tha/ de nas brtsams te khyod kyis phyag na rdo rjer yin gyis nga la brnyas par ma byed cig /mi bde ba ma spangs pas khyod dus byas nas dmyal bar ltung bar gyur ta re/ /de nas gdam ngag ji lta ba/ /slob ma'i rgyud la dbab par bya/ /legs par babs par shes pa dang/ /'di ltar bdag gi slob ma ni/ /dkyil 'khor du ni legs bcug nas/ /'di yi bsod nams ci 'dra las/ /lha yi rim bzhin 'bab par shog / 'di ni dngos grub gang gyur dang/ /rigs ni gang gi snod gyur dang/ /bsod nams mthu ni ci yod dang/ /dkyil 'khor ba'i de? de bzhin 'gyur/ /de nas me tog bcom ldan gyi/ /dbu la brtan pas dong bar bya/ /pra tIts+tsha badzra ho/ /dor te me tog slar bcings nas/ /pra ti grih+na la sogs brjod/ /dngos grub gang 'grub mtshan min/ /ci zhig mthong zhes dri bar bya/ /sngags 'dis gdongs g.yogs grol byas te/ /aoM rdo rje sems dpa' khyod la deng/ /mig 'byed pa la brtson bar mdzad/ /mig ni thams cad 'byed 'tshal te/ /rdo rje mig ni bla na med/ /he badzra pA sh+ya/ de nas lha rnams legs bstan la/ /dbang bskur ba ni brtsam par bya/ /slob ma gzhag ste lhag byas la/ /gnas gsum de nyid gsum 'god de/ /dri la sogs pa lngas mchod bya/ /bkra shis brjod cing bum pa yis/ /chu yis dbang bskur sbyin par bya/ /aoM badzra a b+hi Shiny+tsa/ sa bon lnga las skyes pa yi/ /cod pan mgo bor bcings byas la/ /sangs rgyas rnams kyi rdo rje'i dbang/ /de ring khyod la bskur bar bya/ /sangs rgyas kun gyi rang grub phyir/ /rdo rje 'di ni khyod kyis long/ /aoM badzra ya d+hi pa ti stwaM a b+hi Shiny+tsa mi/ tiSh+Tha badzra sa ma ya stwaM/ /rdo rje dang ni dril bu gnyis/ /'khyud pa'i tshul du 'dzin du gzhug /de nas rdo rje dril bu gnyis/ /slob dpon spyi bor gzung bya la/ /badzra satwa stwaM a b+hi Shiny+tsa mi tiSh+Tha badzra nA ma a b+hi She ka ta/ kye dpal phyag na rdo rje zhes bya ba'i de bzhin gshegs pa zhes/ ming 'dis dbang bskur bar bya/ /de nas rdo rje slob dpon gyis/ /dbang bskur phyir ni gsol ba gdab/ /bdag dang gzhan gyi don gyi phyir/ /rdo rje slob dpon dbang bskur ba/ /thugs rje can khyod bka' drin gyis/ /bdag la di ring stsal du gsol/ /de ltar gsol btab hUM las ni/ /rdo rje rab tu bskyed byas la/ /thog mdza' med pa'i sems dpa' ni/ /rdo rje sems dpa' dga' ba che/ /kun tu bzang po kun bdag nyid / rdo rje snying po bdag po'i gtso/ /bcom ldan 'das dpal mchog dang po'i skyes bu'o/ /a las dril bu bskyed byas te/ /'di ni sangs rgyas thams cad kyi/ /shes rab dbyangs kyi rjes 'gror brjod/ /khyod kyis kyang ni rtag tu bcang/ /byang chub mchog tu rgyal ba bzhed/ /slob ma'i lag tu sbyin bya la/ /srid pa'i rang bzhin dag pa'i phyir/ /rang bzhin gyis ni dngos med byas/ /rang bzhin dag pa'i sems ldan pas/ /srid pas dag pa'i mchog tu byed/ /de ltar brjod la dkrol par bya/ /yid kyi lus ni brtan pa'i phyir/ /dam tshig phyag rgya zhes byar brjod/ /gang gis lus kun rten byed pa/ /de nas phyag rgyar rab tu grags/ /de rjes dkyil 'khor dag pa dang/ /lha yi rnam dag slong dpon gyi/ /bya ba'i rim pa legs par brlab/ /de nas gser gyi thur thogs te/ /de nas mig mkhan rgyal po yis/ /'jig rten ling tog bsal ba ltar/ /bu khyod kyi ni mi shes pa'i/ /rab rib rgyal ba rnams kyis bsal/ /aoM badzra nai tra a pa ha ra pa Ta laM h+ri/ /de nas me long rab bstan la/ /chos rnams gzugs brnyan lta bu ste/ /gsal zhing dag la rnyog pa med/ /gzung du med cing brjod du med/ /rgyu dang las las kun tu 'byung/ /rang bzhin dag phyir bdag med pa/ /de ltar chos rnam shes byas nas/ /sems can don ni mnyam med byos/ /'on kyang sangs rgyas sras su skyes/ /a yis dril bur rab byin la/ /thams cad nam mkha' i mtshan nyid de/ /nam mkha' la ni mtshan nyid med/ /nam mkha' dang mnyam sbyor ba yis/ /kun mchog mnyam pa nyid du gsal/ /ho yis mda' drug gzhu byin la/ /de bzhin gshegs rnams mnyes gyis zhes/ /brjod la mnga' drug 'phen du gzhug /badzra satwas me long bstan/ /rdo rje sems dpa' me long bzhin/ gsal zhing dag la rnyog pa med/ /bu khyod kyi ni sting la gnas/ /rdo rje sems dpa' rang nyid gtso/ /rkang pa'i bar du 'khor lo ni// badzra he tus bcug byas la/ /aoM b+ha Sha raM gyis ni/ /lag pa g.yas pas dung byin la/ /g.yon par po ti legs sbyin la/ /de nas brtsams te sems bskyed pa/ /tsam gyis chos kyi 'khor lo bskor/ /khyod kyis the tshom dogs med par/ /yid gnyis med pa'i sems kyis su/ /chos kyi dung ni bla med pa/ /dri med kun tu gang bar gyis/ /sngags mchog tshul gyis gdug pa rnams/ /skye bo rnams kyis don du chos/ /de ltar byas na sangs rgyas la/ /phan 'dogs drin du gzo zhes bya/ /rdo rje 'dzin pa de kun kyang/ /khyod la rtag du bsrung bar byed/ /sems can kun la phan pa'i phyir/ /sems can ma lus thams cad la/ /ji ltar 'dul gyur sna tshogs pa/ /chos kyi 'khor lo rab tu bskur/ /de bzhin rdo rje rin chen pad/ /las kyi 'khor lo'i rjes gzhan sbyin/ /de nas lung brtan dbugs 'byung sogs/ /ji skad gsungs bzhin sbyin par bya/ /'di ni sangs rgyas thams cad kyi/ /phyag na rdo rje'i lag na 'dug /rtag tu khyod kyis gzung bar bya/ /phyag na rdo rje brtul zhugs brtan/ /aoM sarba ta thA ga ta sid+d+hi badzra sa ma ya tiSh+Tha e Sha twaM/ d+ha ra ya mi hi hi hi hi hUM/ zhes pas brtul zhugs sbyin par bya/ /de nas 'byor pa'i yon bdag gis/ /bla ma rjes su mnyes par bya/ /zhi ba yi ni thab khung du/ /sbyin sreg gis ni tshim par bya/ /de nas rdul tshon la sogs ni/ /'dod pa'i mi la sbyin pa 'am/ /chu bo chen por dor bar bya/ /klu rigs kun gyi dgrar gyur pa'i/ /gos sngon dkyil 'khor cho ga byas/ /'di la 'khrul pa mthong na yang/ /mkhas pa rnams kyis bzod par mdzod/ /'di byas dge ba gang thob pa/ /des ni 'gro ba ma lus pa/ /rdo rje can gyi zhal mthong nas/ /sdug bsngal mtshe las sgrol bar shog /phyag na rdo rje gos sngon po can gyi dkyil 'khor gyi cho ga /slob dpon chen po stong pa nyid kyi ting nge 'dzin snying rje'i zhal snga nas mdzad pa rdzogs so// // rgya gar gyi mkhan po paN+Di ta don yod pa'i rdo rje dang/ bod kyi lo tsa ba khams pa ba ri dge slong rin chen grags pas bsgyur cing zhus pa'o// //rgya gar skad du/ badzra kro d+ha d+ha ra sA d+ha nA ma/ bod skad du/ khro bo rdo rje 'dzin pa'i sgrub pa'i thabs zhes bya ba/

CLOSE WINDOW