བོད་ཡིག

e-texts based on the ACIP/ALL Input

/ (//chos spyod thams cad kyi man ngag mngon par rtogs pa'i rnam bshad gzi brjid snang ba zhes bya ba bzhugs so//) //rgya gar skad du/ sarba d+harma tsarya au pa de sha a b+hi sa ma yA tan+t+ra byA khyA te dzA A lo ka nA ma/ bod skad du/ chos spyod thams cad kyi man ngag mngon par rtogs pa'i rgyud kyi rnam par bshad pa gzi brjid snang ba zhes bya ba 'phags pa phyag na rdo rje la phyag 'tshal lo/ /bcu gcig sa la rab gnas mngon rdzogs thams cad mkhyen/ /bdud rtsi rgya mtshos 'khor ba'i dug sel thar pa chen po'i lam/ /rnam dag byang chub sems chus khrus byas bslab pa'i gos gtsang gyon/ /'gro ba byang chub lam la 'god mdzad gsum la phyag 'tshal nas/ /chos rnams kun gyi man ngag zab mo mngon par rtogs pa yi/ /'grel 'di 'gro la phan phyir rgyas bshad bya/ /bde bar gshegs pas gsungs pa yi/ /chos 'di 'gro ba kun gyi dpal/ /'di rgyan me tog rab bkod pa'i/ /gleng gzhi sdom dang yan lag bcas/ /man ngag pha rol phyin drug ldan/ / de 'bras gdams ngag bstan pa'o/ /de bdun gzi brjid snang ba yis/ /skyon bral bzang por nges par bshad/ /de la bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pas 'gro ba sems can thams cad myur bar rdzogs par sangs rgyas par mdzad pa'i phyir/ chos thams cad las khyad par du 'phags pa'i man ngag 'di gsungs te/ nges pa'i don 'ba' zhig las ma gtogs pa drang ba'i tshig gcig kyang med pa'i phyir ro/ /dus tha ma'i sems can la bla mas slob ma la man ngag byin pa bzhin du man ngag yang dag par gnang ba yin te/ rgyud bzhi las yang brgyud pa'i phyir ro/ /de la rgyud bzhi zhes bya ba ni/ bcom ldan 'das la 'jam dpal gyis zhus te/ 'jam dpal la bcom ldan 'das kyis yang dag par gtad pa dang/ 'jam dpal gyis gsang ba'i bdag po lag na rdo rje la yongs su gtang ba dang/ gsang ba'i bdag po lag na rdo rje man ngag bdud rtsi 'khor lor yang dag par bsdus pa dang/ de dag gi don bdag gis au pa la brtsegs pa'i gtsug lag khang du gzi brjid snang ba 'di yang dag par bkrol ba na rgyud bzhi zhes bya'o/ /de la 'di yang dag par ston pa ni bde bar gshegs pa'i bstan pa 'dzin pa yin te/ lha dang mi la sogs pa thams cad kyis bkur par 'os pa'o/ /gang yongs su ston pa 'am/ 'di thog mar spel ba'i gang zag de ni phyag na rdo rje dang/ phyogs bcu'i sangs rgyas thams cad kyis byin gyis brlabs pa las byung ba'o/ /'di ston la sogs pa ni bla ma dam pa de/ de la srog la sogs pas kyang mchod pa byas pa yin/ rdzas la sogs pa ni smos mi dgos par yongs su mchod pa'o/ /'di skad bdag gis thos pa dus gcig na/ bcom ldan 'das rgyal po'i khab bya rgod phung po'i ri lha ma yin gyi brag phug na bzhugs te/ zhes bya ba la sogs pa 'jam dpal gyis bcom ldan 'das kyis gsungs pa'i skad cig de nyid la thos pa na dus gcig na'o/ /des gang la gsungs she na/ gsang ba'i bdag po la sogs pa la lan gnyis pa'i brda' nye bar sbyar ba'o/ /bya rgod phung po ni bya rgod la sogs pa 'dus pa ni ma yin te/ ri de nyid kyi dbyibs bya rgod dpungs pa 'dra bas na bya rgod phung po'o/ /rgyal po'i khab ni rgyal po gsal rgyal la sogs pa'i khab yin pa'i phyir ro/ /lha ma yin ni lha ma yin pa'i phyir ro/ /lha ma yin gyi brag phug ni bya rgod dpungs pa'i ri'i byang shar gyi mtshams na/ zab mo'i chos gsungs pa'i gnas rin po che'i gter mngon par snang ba zhig yod de/ de na yang dag par bzhugs pa'o/ /de na sa bcu la gnas pa'i byang chub sems dpa' la sogs pa thams cad dang thabs cig ste/ de'i tshe bcom ldan 'das me long gi 'khor lo zhes bya ba'i ting nge 'dzin la snyoms par bzhugs so zhes bya ba la/ dper na me long gi g.ya' phyis pa'i nang du phyi rol gyi gzugs brnyan sna tshogs snang ba bzhin du/ /ting nge 'dzin de'i byin brlabs kyis/ /'gro ba rnams kyi sems kyi dri ma yang dag par bsal nas chos nyid mngon par mthong bar byed pa'i chos ston pas me long gi sgra'o/ /'khor lo zhes bya ba ni lte ba dang rtsibs dang mu khyud du bcas pa la 'khor lo yin te/ de dang mtshungs par bcom ldan 'das kyis man ngag 'di dang po byang chub sems bskyed pa dang dri ma la sogs pa'i chos brgyad dang/ mdza' ru bsgom pa'i chos spyod thams cad kyi mdza' ru thug pa mu khyud kyi tshul du gsungs te/ de bas na me long dang 'khor lo gnyis dang chos 'thun pa'i phyir ting nge 'dzin de la me long gi 'khor lo zhes bya'o/ /snyoms par zhugs pa ni ting nge 'dzin de lta bu la bcom ldan 'das kyis thugs mnyam par bzhag pa la bya ste/ dper na mi gang zhig pha rol gyi nor brku ba'i bsam pa dang ldan pa la/ rkun po la zhugs pa zhes bya ba dang 'dra bar/ rgyu'i byed pa las 'bras bu kun nas slong ba'i sgra'o/ /ting nge 'dzin de la snyoms par zhugs ma thag tu/ sa chen po rab tu g.yos par gyur to/ /nam mkha' las kyang 'brug gi sgra dang/ pi wang dang/ rol mo'i sgra sna tshogs dang/ dri'i thig le dang/ spos kyi ngang dang/ me tog gi char rab tu 'bab pa dang/ pad+ma 'dab ma stong dang ldan pas nam mkha' i khams rab tu gang ste/ pad+ma de re re'i steng nang 'od kyi gong bu sna tshogs pa mngon par rab tu 'bar ba dang/ gzhan yang ngo mtshar can gyi chos sna tshogs pa mang po dag kyang snang bar gyur te zhes bya ba la/ ci'i phyir de yang dag par 'byung zhe na/ bcom ldan 'das kyis 'jam dpal gzhon nur gyur pa la bka' stsal pa/ 'jam dpal ring chos spyod thams cad kyi man ngag mngon par rtogs pa zhes bya ba'i chos zab mo ston par gyur pa de'i rgyu de'i rkyen las yang dag par byung ba'i zhes sbyar te/ ting nge 'dzin de'i stobs las byung ba ni bdag pa'i stobs spyi'i 'jam dpal gyi rtogs pa bsams pa'o/ /yan lag gi don bshad pa 'di lta ste/ sa rab tu g.yos pa ni zab mo'i chos man ngag 'di las sems can rnams kyis yang dag par spyod pas/ sems can de dag thams cad sa mngon par thob pa dang/ sa nas ser 'phel bar 'gyur ba las rab tu g.yo ba yin pas na/ 'bras bu'i rtags rgyu la nye bar mtshan pa 'am/ 'byung ba yin te dper na me tog pa sha ka'i dri mnab pa bzhin no/ /nam mkha' las 'brug gi sgra grags ni/ byang chub sems dpa' rnams sgrib pa rnam pa gnyis rims kyis rnam par byang ba las/ ye shes kyi snang ba byang chub kyi sems 'od zer zhun mar la phog pa 'dra ba skyes te/ de'i skad cig las nam mkha' las 'brug gi sgra grag pa nyid kho na'o/ /pi wang dang rol mo'i sgra sna tshogs pa dang/ dri'i thig le dang/ spos kyi ngad dang/ me tog gi char rab tu 'bab pa ni bcom ldan 'das de bzhin gshegs pa dgra bcom pa yang dag par rdzogs pa'i sangs rgyas rdo rje'i gdan la mngon par rdzogs par sangs rgyas pa'i gnas skabs na dpal du mngon par grub pa'o/ /de la dpal ni sh+rI ste/ sbyor ba gnyis dang ldan pa'o/ /de la spangs pa ni skad cig ma de nyid la nyon mongs pa thams cad ma lus par spangs pa dang/ bdud bzhi yang dag par bcom pa la bya ste rkyen tha ma la sbyar bar bya'o// 'byor pa ni de'i skad cig ma la rnam par rgyal ba zhes kyang bya ste/ rang 'byung ba dang lha la sogs pa rnams kyis mchod pa'i tshogs kyis mngon par mchod par 'gyur ba ste/ dper na skyas bu dpa' bo zhig pha rol gyi dmag tshogs las rgyal te/ phyir khyim du rol mo'i tshogs kyis bskor nas 'ong ba bzhin te/ rkyen bar ma la yang dag par sbyar ro/ /ldan pa ni dang po'i rkyen gyis de gnyis ka dang yang dag par ldan pa ste/ dper na skyes bu dpa' bo ni yid bde ba dang/ mi bde ba gnyis dang ldan pa bzhin no/ /de yang kha cig gi bsam pas ci de bcom ldan 'das la yang bde ba dang mi bde ba mnga' 'am zhes rtogs te/ de ni byis pa'i rtog pa cher snang pa yin pas na skyes bu'i bde ba dang mi bde ba nyams su myong ba lta bu ni bcom ldan 'das la yang dag par mi mnga' o/ /pad+ma 'dab ma stong dang ldan pas nam mkha' i khams rab tu gang ste/ pad+ma re re'i steng na 'od kyi gong bu sna tshogs pa mngon par 'bar ba dang zhes bya ba ni rgyud de las de bzhin gshegs pa rigs lnga'i bdag nyid can pad+ma'i gdan la zhugs par mngon par grub pa'i rtags mtshon pa'o/ /de 'od kyi gong bu ni bde bar gshegs pa'i rtag de pad+ma'i gdan dngos su bstan pa'o/ /sna tshogs pa ni rigs lnga'i bye brag go /'bar ba ni bde bar gshegs pa'i 'od zer gyis 'gro ba'i don byed pa'o/ /gzhan yang ngo mtshar can gyi chos sna tshogs pa mang po dag kyang snang bar gyur pa ni glog dang/ gang mo'i sgra dang/ kha dog lnga'i 'ja' tshon snang ba dang/ kye ma a la la 'khor ba stongs par gyur to zhes bya ba la sogs pa 'byung ste/ glog ni ting nge 'dzin de la ye shes kyi snang ba 'byung ba'o/ /gang mo'i sgra ni phyogs bcu dus gsum gyi bde bar gshegs pa rnams kyis thabs 'di la rten te sems can ma lus pa thams cad mngon par rdzogs par 'tshang rgya ba la gzigs nas de la mngon par dgyes pa'o/ /kha dog lnga'i 'ja' tshon ni bde bar gshegs pa rnams kyi 'od kyi snang ba'o/ /kye ma a la la 'khor ba stongs par 'gyur ro zhes bya ba'i sgra ni gang dang gang mngon par rdzogs par 'tshang rgya bar 'gyur ba de dang de nyid kyi 'khor ba'i rgyun stongs par 'gyur ba la dgongs pa te/ nges par shes par bya'o/ /de nas bcom ldan 'das kyis 'khor 'das pa de'i nang nas zhes bya ba nas/ /'di skad ces gsol to zhes bya ba'i bar ni/ bcom ldan 'das kyis yang dag par byin gyis brlabs te/ 'jam dpal la don gyi 'dib mngon par bskul bar shes par bya'o/ /lhag ma ni gong du bstan te 'dir ma bshad do/ /'jam dpal gyis gsol pa/ bcom ldan 'das chos spyod thams cad kyi man ngag mngon par rtogs pa zhes bgyi ba'i zab mo'i chos de ji lta bu zhig lags/ /de bdag dang sems can thams cad la phan pa'i phyir bshad du gsol zhes bya ba ni 'di nyid kyis byin gyis brlabs las lan gnyis pa'i sgras ched du gsol ba btab ste/ dang po'i gleng gzhi'o/ /lan gyi glang gzhi ni/ bcom ldan 'das kyis bka' stsal pa/ 'jam dpal de'i dus la 'bab par shes na legs par nyon la yid la zung zhig dang/ das khyod la bshad do zhes bya ste/ bcom ldan 'das nyid kyis bshad pa'i skabs sam/ dus la bab par khyod kyis mnyan pa'i skabs la bab pas na/ dri ma can gyi sems yang dag par spangs te 'gro ba la phan par bshad pa'i phyir yid la zung zhig pa'o/ /de yang kha cig gi bsam pas 'jam dpal kho na la 'am zhe na/ ma yin te/ khyod ces bya ba ni sems can thams cad la 'jug pa'i sgra'o/ /ci mngon zhe na/ ngas khyod la bshad do zhes bya bas mngon te/ bcom ldan 'das kyis sems can thams cad myur bar 'tshang rgya ba'i phyir 'jam dpal kho na la yin pa bsal to/ /'jam dpal sa la gnas pa'i byang chub sems dpa' rnams kyis/ /zab mo'i chos man ngag mngon par rtogs pa 'di la brten nas sa mngon par thob pa yin no zhes bya ba ni sa bcu la gnas pa'i byang chub sems dpa' rnams man ngag 'di dang yang dag par ldan pas dang ba la sogs pa thob pa ni dgongs pa ma yin pa'o/ /man ngag 'di la yongs su spyad pas da ltar yang thob pa dang 'di la brten nas mngon par spyad pas phyi mar yang thob par 'gyur ba yang dgongs pa ma yin pa'o/ /de'i rkyen gyis lhag ma ni go sla ba'i phyir ma bshad do/ /nges pa'i don kho na'o/ /'jam dpal zab mo'i chos man ngag mngon par rtogs pa 'di ni sde snod thams cad kyi snying po ste rgyu'i theg pa dang/ 'bras bu'i theg pa mdza' dag gi bcud lta bu yin no zhes bya ba la/ sde snod ni rnam pa gsum mo/ /thams cad ni ma lus pas te/ de dag gi snying po yin pa'i phyir ro/ /snying po ni don gi snying po bsgrub bya ste/ gnyis su med pa'i ye shes so/ /ye shes de 'di la yang dag par gnas pa'i phyir snying po yin pa'o/ /rgyu'i theg pa ni nyan thos kyi theg pa la sogs pa'o/ /'bras bu'i theg pa ni theg pa chen po gsang sngags kyi theg pa ste/ de dag gi bcud lta bu yin no/ /de yang ci'i phyir rdo rje theg pa la 'bras bu zhes gdags she na/ zab mo'i don yang dag par ston cing 'bras bu nye bar 'thob pa la dgongs te/ dper na gri rnon po dang rtul po gnyi gas chod pa dang 'dra yang rnon pos chod bzhes btags pa bzhin no/ /de la bcud ces bya ba ni man ngag bsdus pa la bya ste/ dper na dang ba'i nang nas mar bsdus pa bzhin no/ /'jam dpal zab mo'i chos man ngag mngon par rtogs pa 'di la brten nas sngon 'das pa'i dus na lha'i bu mo nor bu bshes gnyen zhes bya ba gcig gis mngon par rdzogs par sangs rgyas par gyur to zhes bya ba la/ lha'i bu mo de man ngag 'di dang skad cig kyang ma bral bar zab mo'i chos la longs spyad pas skye ba gcig gis sangs rgyas pa ni dgongs pa ma yin te/ nges pa'i don kho na'o/ /de lta na zhes bya ba nas mngon par sangs rgyas par 'gyur ro zhes bya ba'i bar du ni de de bzhin te/ dgongs pa ma yin zhing nges pas na go sla ba'i phyir 'dir ma bshad do/ /'jam dpal 'dul ba'i sde snod ni pa lta bu'o/ /mdo sde'i sde snod ni 'o ma lta bu'o/ /phyi'i mngon pa'i sde snod ni zho lta bu'o/ /nang gi mngon pa'i sde snod ni mar lta bu'o/ /zab mo'i chos man ngag mngon par rtogs pa 'di ni mar gyi snying khu lta bu'o zhes bya ba la sogs pa rims par 'jug pas na/ zab mo'i chos 'di snying po las kyang ches snying po yin par gsungs te/ de yang 'dul ba ni rigs pa'i dngos po cher snang bas 'gro ba 'dul ba yin te/ khrus dang gtsang sbra dang/ dka' ba sna tshogs pa mang po dang/ 'jig rten pa dang mthun pa'i drang srong gi chos kyis yang dag par spyod pas na/ dang po'i gzhi yin pa'i phyir blta bur gsungs te/ lus la mngon par spyod pa'o/ /de la yang dag par gyur pa las phyis mdo sde snod du zhugs te/ de bas zab mo'i chos yang dag par ston pa dang/ gang la mngon par spyod pas 'gro ba 'dul ba ste/ bslab pa'i gzhil snying po la mngon par phyogs pa'i phyir 'o ma lta bur gsungs so/ /phyi'i mngon pa'i sde snod ni zho lta bu zhes bya ba ni shes rab kyi pha rol tu phyin pa kho na te/ zab mo'i chos rgya chen por mngon par rtogs pa'i bdag nyid yin yang gsal bar ma bshad cing/ dbyings bsgrib pas phyi ru gsungs te/ 'o ma las gyur pas mar nye bar 'od ba'i rgyu zho lta bur gsungs so/ /de yang dper na 'o ma las zho 'gyur ba bzhin du mdo sde las shes rab kyi pha rol tu tu phyin pa la 'jug go / de nyid nang du yang dag par gsungs shing dbyings rab tu gsal bas sems kyi spyod yul thams cad du spyod pa'i phyir/ gsang sngags la nang gi mngon par zhes bya bar gsungs te/ mar lta bu'o/ / zab mo'i chos man ngag mngon par rtogs par ni mar gyi snying khu lta bu ste/ de la mar gyi snying zhu zhes bya ba ni chu bre bzhi'i nang du mar bre gang blugs nas chu bre bzhi ma skams kyi bar du bsdus pa la mar gyi snying khu zhes bya ste/ chu bre bzhi spangs pa la bya'o/ /de bzhin zab mo'i chos kyang sde snod bzhi la brten nas sdo snod bzhi yang dag par gsungs te/ 'di nyid la mngon par spyod pa'i phyir na mar gyi snying khur gsungs pas te/ rim par 'jug pa'i dpe'o/ /de nas yang bcom ldan 'das kyis mdo sde rin po che brtsegs pa las 'di skad gsungs te/ dper na byis pa gzhon nu la/ nu zho phye ma zan dron sha /tshog bu'i rim pas bslabs nas ni/ phyi nas sran ma 'bras chan sogs/ /mang pos zos kyang stobs 'phel 'gyur/ /de bzhin nga yi sras rnams kyang/ /mdo sde 'dul ba mngon pa sogs/ /rim pa'i rjes las man ngag 'di/ /rtogs pa kun mkhyen yongs su 'grub/ ces gsungs te/ sde snod rnam pa gsum yang rtogs pa'i bdag nyid 'di la 'jug pa'i yan lag tu gsungs pa kho na'o/ /de yang pa ni bcud kyi gzhi 'dzin pa'o/ /'o ma ni bcud pa'o/ /zho ni rab tu bcud pa'o/ /mar ni yang dag par bcud pa'o/ /zab mo'i chos man ngag mngon par rtogs pa 'di ni bcud nye bar phan par byed pa'o zhes bya ba 'di ni snying po las kyang snying po'i dper na gsungs te/ ba bcud kyi rten yin pa dang/ de la 'o ma bcur phyir 'byung ba dang/ zho bcud du bsgyur ba dang/ mar bcud dngos su byas pa dang/ bcud de mi la phan par yang dag par btang ba bzhin du 'dul ba'i sde snod ni gnyis su med pa'i ye shes la 'jug pa'i rten du gyur pa dang/ mdo sde'i snod ni ye shes la nye ba'o/ /phyi'i mngon pa'i sde snod ni de bas nye ba'o/ /zab mo'i chos man ngag mngon par rtogs pa 'di ni ye shes la reg par gyur pas na nye bar phan pa zhes gsungs pa'o/ /'jam dpal zhes bya ba nas/ byang chub myur ba thob pa'i phyir ro zhes bya ba'i bar du ni go sla bas 'dir ma bshad do/ /de'i mthar spyi'i sdom bshad par bya ste/ de nas bcom ldan 'das kyis chos spyod thams cad kyi man ngag mngon par rtogs pa zab mo'i chos tshigs su bcad de bka' stsal pa zhes bya ba'o/ /de la a tha'i sgras ni bkra shis pa la sogs pa mang po la 'jug na yang skabs 'dir don dam pa gnyis su go bar bya ste/ gzhan gyi tshig gi don du gnyer bar 'byung ba'i mtshams sbyor ba dang/ med pa'i sgras nyon mongs pa spong ba'i sgra'o/ /gzhon nu nga la legs par nyon/ /nga yi bstan la zhugs rnams la/ /man ngag 'di ni rab tu gces de la man ngag 'di yin te zhes bya ba la/ gzhon nu zhes bya ba'i sgras ni byis pa la yongs su 'jug ste/ yang dag pa'i don la shed ma bye ba'i byis pa sems can thams cad la'o/ /nga la legs par nyon zhes bya ba ni brtan bar zung zhig pa'o/ /nga'i bstan la zhugs rnams la zhes bya ba ni bde bar gshegs pa'i bstan pa lam dad pa 'am/ log par zhen pa de las phyi rol tu gyur pa rnams bsal te/ rab tu gces pa zhes bya ba ni yang dag par snying po 'dod pa rnams la med du mi rungs par bstan to/ /de la zhes bya ba ni mang po la 'jug na yang skabs 'dir ni gnyis su go bar bya ste/ dug rnams bsreg pa dang/ dmigs nye bar ston pa'i sgra'o/ /'di yin te zhes bya ba ni de dngos bstan pa'o/ /man dag ces bya ba ni phan pa dang nye bar ston pa dang stobs dang don grub pa'i phyir man ngag go / bzhi brtsom pa dang spel ba dang/ yang dag grub par nges bshad do/ /zhes bya ba ni spyir dam pa'i chos sbyong ba'i gang zag gis chos kyi bya ba dpag tu med pa gcig yod na yang/ bsdu na gsum du 'dus te/ de la gang rtsam pa zhes bya ba ni rten mi dmigs pa las rten yongs su 'cha' ba ste/ dper na longs spyod kyis rten khang pa la sogs pa lta bu'o/ /spel ba ni gnas la brten te longs spyod sogs shing rgyas par byed pa ste/ dper na rdzas kyi dngos po la sogs pa lta bu'o/ /bsgrub ces bya ba ni longs spyod te/ de dag dgos pa bdag dang gzhan la phan 'dogs shing bde ba bsgrub pa ste/ dper na rdzas longs spyod/ pa lta bu'o/ /de gsum ga yang rgyu dang lam dang 'bras bur shes par bya'o/ /'khor ba'i 'dam la rgal 'dod pas/ lus ngag yid kyi spyad par bya/ /kun kyang gsum du rab nges te zhes bya ba la/ bde bar gshegs pa'i bstan pa la yang dag par zhugs pa/ /nyon mongs pa'i nad kyis gzir ba/ 'khor bas yid 'byung zhing srid pa'i 'dam las rgal bar byed cing yang dag pa'i ye shes bsgrub par 'dod pa rnams kyis man ngag 'di dang ngag dang lus yid gsum gyis spyad par bya'o/ / kun kyang zhes bya ba ni spyi'i don rnam pa gsum las yan lag gi don rnam pa gsum gsum du bshad do/ /de la yan lag gi don ni 'di yin te/ 'dri dang nyan dang 'dzin pa la zhes bya ba ni dang po'i sdom gyi yan lag go /slob pa'i sgras ni spyi la khyab ces bya ba ni de gsum ka la yang gnyis su med pa'i ye shes tshol ba la dang por 'jug pa'i slob pa zhes sgras yang dag par 'jug pa'o/ /sbyin dang bshad dang sgrogs pa la zhes phya ba ni sdom pa gnyis pa'i yan lag go / rgyas byed sgras ni gsum la khyab ces bya ba ni/ spel ba dang gnyis don khyad med kyang sgra'i bye brag gis/ mang po'i chos rgyal par byed pa kho na'o/ /mchod dang bzlas dang bsgom pa la zhes bya ba ni sdom tha ma'i yan lag go /nye bar sbyor bar bshad pa yin zhes bya ba ni gnyis su med pa'i ye shes la nye bar ram/ reg par byed pas na nye bar sbyor zhes bshad pa'o/ /dang po'i sbyor ba la bzhi rtsom pa dang/ /zhes bshad pa nas/ gzhi'i dbye ba'i dmigs pa bstan pa'i phyir/ 'bras bu'i gzhi dang rgyu'i gzhi/ rtags kyi gzhi rungs bshad do zhes gsungs pa de yang gang zhe na snyam pa la/ sku gzugs ring srel sbyor la brtson/ /rtags dang 'bras bur brjod pa yin/ /rgyu'i gzhi ni gsum pa la/ /nges pa'i blo ni brtan par bya zhes gsungs te/ rtags ni 'gro ba yongs su 'dul ba la brtson pas/ sku mdog dang phyag mtshan dang dbyibs la sogs pa de bzhin gshegs pa la sogs pa'i sku'i gzugs brnyan du byas te/ bsod nams kyi tshogs bskyed pa'i rtags yang dag par bstan pa ste/ de la sbyor ba nyid do/ /'bras bu de bzhin gshegs pa'i sku la dran pa nye bar bzhag pa bzhi la sogs pa byang chub kyi phyogs kyi chos sum cu rtsa bdun yang dag par ldan te/ ring srel seng+ge'i khri dang/ bang rim bzhi dang/ bum pa dang/ rgyan yongs su rdzogs pa la byas te de la yongs su sbyor ba'o/ /rgyu'i gzhi ni gsum po zhes gsungs te/ 'dri ba la sogs pa'i sbyor ba'o/ /blo brtan bya ni rang gi rtog pa mi bslad pa'o/ /'di la lus ngag yid gsum gyis/ mnyam par bzhag na 'bras bu 'byung zhes bya ba ni 'di zhes bya ba'i sgra ni dngos po yang dag par ston pas te/ man ngag 'di la zhes bya ba'i don te/ lus ngag yid gsum gyis chos la spyod do cog la man ngag 'dis mnyam par bzhag na yang dag pa'i ye shes kyi 'brus bu mngon du 'byung bar gsungs so/ /de'i mthar ni 'dri ba'i yan lag bshad par bya ste/ byang bar bslabs dang ma 'brel gcig /dkar nag phye dang snyoms par drang/ /myur ba bdun dang ldan pa ni/ /'dri ba mkhas zhes brjod pa yin zhes bya ba la/ dang por byad bar bslabs pa dang/ ma 'brel zhes bya ba ni yi ge rnams kyi snag 'dabs ma 'byor ba'o/ /gcig zhes bya ba ni shes pa che long bas bltas na pir gyis bris pa ltar gcig par mngon pa'o/ /dkar nag phyed pa ni dkar dang nag tu mnyam pa'o/ /snyoms pa ni yi ge'i 'bru snyoms pa'o/ /drang zhes bya ba yan lag drang pa'o/ /myur ba ni 'dri ba mgyogs pa ste/ yan lag de bdun dang ldan pa la 'dri ba mkhas zhes bya ba ni 'dri ba tsam la sogs pa yongs su bkag pa'o/ /de la kha cig gis bsam pas ni de bcom ldan 'das 'dri ba la sogs pa mkhas pa rnams la gsungs kyi bri ba tsam la sogs pa la ma bstan nam zhe na/ de ni ma yin te/ man ngag 'di 'dri bo cog la sogs pa la gces par go mnyam pa'o/ /de bas na 'dri bo cog gi man ngag 'di yin no/ /de'i man ngag bshad par bya'o/ /dang por byang chub sems bskyed la/ /bdag nyid rgyal ba'i yul du bsgom/ /rig pa dang ni rkang par ldan/ /ngo bo gcig las byung ba yi/ /'bru rnams sprul ba skur bsams te/ /yid kyis 'gro ba'i don byed shog /ma yis bu la gsol skul btab/ ces bya ba la/ dad par byang chub sems bskyed pa ni 'dri ba la 'jug pa'i skabs su/ /bdag gis 'gro ba sems can thams cad myur bar mngon par rdzogs par 'tshang rgya bar bya ba'i dam pa'i chos kyi yi ge bri bar bya'o zhes bsam pa sngon du gtang ba'o/ /bdag nyid rgyal ba'i yum du bsgom zhes bya ba ni raM las nyi ma'i dkyil 'khor de'i steng du paM ser po bsams te/ de yongs su gyur pa las shes rab kyi pha rol tu phyin pa'i glegs baM/ de yongs su gyur pa las rgyal ba'i yum shes rab kyi pha rol tu phyin ma sku mdog gser lta bu/ phyag bzhi pa g.yas dang po'i rdo rje 'dzin pa/ g.yas tha ma skyabs mdzad kyi phyag rgya mdzad ma/ g.yon dang po shes rab kyi pha rol tu phyin pa'i po ti 'dzin pa/ g.yon tha ma thugs ka na chos 'chad pa'i phyag rgya can te/ bdag nyid skad cig la bsams la bri'o/ /rig pa ni smyu gu'o/ /rkang pa ni lag pa'o/ /ngo bo gcig pa ni smyu gu dang lag par sbyar ba'o/ /de las byung ba ni yi ge'i 'bru re re la sprul ba'i sku shAkya thub pa'i cha lugs can dpag tu med pa bsams pa ni rgyal ba'i yum las sras byung ba'i tshul du bsam pa'o/ /yid kyis 'gro ba'i don byed shog /ces pa ni/ bdag gis yi ge 'di yis 'gro ba'i don byed par gyur cig ces ma yis bu la gsol ba gdab pa kho na'o/ /de'i mthar pha rol tu phyin pa drug dang ldan par bstan pa ni 'di dag go / sbyin dang bus dang brtags pa dang/ /'grus dang ma yengs legs par 'dri/ /ma cig yan lag drug dang ldan zhes bya ba la/ sbyin pa ni snag tsha sbyin pa ste/ de'i skad cig ma la sbyin pa rdzogs pa'o/ /bus pa ni rdul bus pa ste/ dri ma rnam par dag pas byas pas de'i skad cig ma la tshul khrims rdzogs pa'o/ /brtags pas ni srog chags brtags pa ste/ 'dug na bsal ba ste/ mi 'dug na rtogs pa'i sngon du snying rje 'gro bas na de'i skad cig la bzod pa rdzogs pa'o/ /'grus pa ni 'dri ba la 'grus pa ste/ de'i skad cig la brtson 'grus rdzogs pa'o/ /ma yengs pa ni 'dri ba'i bar du gzhan la ma yengs pa ste/ de'i skad cig ma la bsam gtan rdzogs pa'o/ /legs par 'dri ba ni yi ge'i yan lag la sogs pa la dpyad cing 'dri pas na shes rab ste/ de'i skad cig la shes rab kyi pha rol tu phyin pa yongs su rdzogs pa'o/ /ma cig 'dri mkhan te/ dang por yum du bsgom pa'i phyir ro/ /de yang dngos po la pha rol tu phyin pa drug dang ldan yang de'i skad cig de dag la sbyin pa la sogs par ma bskyed na mi ldan pa nyid yin pas/ de dag gi skad cig de dag la 'di ni sbyin pa'o/ /'di'i skad cig ni tshul khrims so/ /'di'i skad cig bzod pa'o/ /'di'i skad cig ni brtson 'grus so/ /'di'i skad cig ni bsam gtan no/ /'di'i skad cig ni shes rab kyi pha rol tu phyin pa'o zhes yid kyis mnyam par bzhag pa bya'o/ /de ltar byas na de nyid pha rol tu phyin pa drug dang ldan pas na/ 'bras bu sngon du 'grub pa kho na'o/ /de'i mthar na de nyid kyis 'das pa'i 'bras bu gsungs te 'di dag go / de ltar de'i sbyor ba yis/ /sngon tshe 'das pa'i dus na ni/ /zhing pha'i bu ni pad+ma tog /yi ge mkhan du gyur pa'i tshe/ /skad cig de dang ma bral bas/ /nam zhig tshe yi dus byas te/ /grong khyer pa ni thams cad kyi/ /ma bsgribs bsel bar mthong bar ni/ /lha dang lha min thams cad kyis/ /mchod pa'i yo byad mang po yis/ /mngon par mchod nas nam mkha' la/ /spyan drangs mngon par sangs rgyas yin/ /zhes bya ba la/ dang por byang chub sems bskyed nas tha mar pha rol tu phyin pa drug dang ldan pa'i man ngag de'i sbyor ba yis/ /sngon 'das pa'i dus na zhing pa'i bu pad+ma'i tog ces bya ba zhig yi ge mkhan du gyur to/ /mi de yis yi ge 'dri ba'i skabs na skad cig ma gcig kyang man ngag de dang ma bral bar bzhag pa'i stobs kyis dus nam zhig na tshe'i dus byas pa las/ grong khyer thams cad kyis mi'i de'i ro yul na gnas par mthong ba la mi de'i gzugs brnyan lha dang mi la sogs pha rol mo'i sgra sna tshogs pa dang/ gdugs la sogs pa'i mchod pa'i yo byad mang pos nam mkha' la spyan drangs par mthong bar sangs rgyas zhes brjod do/ /de la sems can bsam pa chung pa kha cig ni 'das pa'i dus na bskal pa bzang po tsam na ni de'i sbyor bas sangs rgyas la/ /da ltar bdag cag dus kyi snyigs ma la bab pas/ de'i sbyor bas sems can dmyal ba las ma rtogs par 'tshang rgya bar mi 'gyur ro zhes sems pa smra ba yod de/ de ltar bsam pa 'am smra ba de ni bskal pa bzhi khri lnga stong gi bar du sems can dmyal ba chen por ltung bar 'gyur ro/ /'das pa'i dus na sangs rgyas pa dang da ltar 'tshang rgya ba dang/ ma 'ongs pa na 'tshang rgya bar nges pa ni gleng gzhi las yang dag par yid ches par bya'o/ /dam pa'i chos spyod do cog thams cad la skad cig ma cig kyang 'di dang ma bral bar mnyam par bzhag na ci'i phyir mngon par rdzogs par 'tshang mi rgya ste/ sangs rgyas pa nyid kho na'o/ /de ltar 'og ma'i 'bras bu bstan pa rnams la'ang de bzhin du go bar bya ste/ dgongs pa ma yin zhing nges pa kho na'o/ /de'i mthar nyan pa po'i yan lag bshad par bya ste/ nga rgyal spangs dang dad par ldan/ /bla ma la gus gtong ba phod/ /chog shes med cing don du gnyer/ /sdug bsngal dka' ba mang po spyod/ /de bdun ldan pa'i gang zag la/ /nyan par 'dod ces bya ba yin zhes bya ba la/ nga rgyal chung ba dang/ shin tu dad pa chen po dang ldan pa dang/ bla ma la yang dag par gus pa/ sbyin pa la sogs pa gtong ba phod pa dang/ chos nyan ba la chog shes mi 'dzin pa dang/ chos la ltad mo dang che grags kyi phyir ma yin zhing don du gnyer ba dang/ chos 'phags la rtag tu du lta bur sdug gi dka' ba mang pos dam pa'i chos tshol ba de ni yan lag bdun zhes bya'o/ /de dang ldan pa'i gang zag de la nyan bar 'dod ces bya ba yin/ grogs dga' ba dang/ tshul 'chos la sogs pa'i nyan pa tsam bkag pa'o/ /yan lag bdun dang ldan pa la ni bla mas dam pa'i chos rgyas bar bshad pa dang man ngag yang dag par sbyin pa'o/ /gal te bla ma ngan pa bdag gis yan lag bdun dang ldan pa'i nyan pa po dag chos 'dod pa la rnyed pa la sogs pa yongs su bsgrags saM/ /skad cig cig kyang de'i sems bzlog na mtshams med pa lnga byas pa bas sdig pa che bas nges par sems can dmyal ba chen por ltung bar ro/ /de'i mthar man ngag bshad de/ /dang por byang chub sems bskyed la/ rang nyid sgrol mar bsgom byas te/ /rna ba g.yas par pad+ma bsam/ /slob dpon 'jam dpal bsgom byas nas/ bla ma'i zhal gyi 'od zer dag / pad+ma nges par thim bar bya/ /grogs rnams lha mo bsgom byas nas/ /thon kar mi rtag stong pa nyid/ /skad cig gnyis tsam bsgom par bya/ /zhes bya ba la dang por byang chub tu sems bskyed pa ni dam pa'i chos nyan pa'i sngon du bdag gis 'gro ba sems can thams cad mngon par rdzogs par 'tshang rgya bar bya ba'i phyir/ dam pa'i chos mnyan par bya'o zhes byas sam sngon du btang ba'o/ /rang nyid sgrol mar bsgom zhes bya ba ni rim pa zla ba'i dkyil 'khor bas ste/ de'i steng du tam ljangs gu yongs su bsam mo/ /de gyur ba las aud pa la ljang gu'o/ /de dag gyur pa las bdag nyid sgrol ma sku mdog ljang gu phyag gnyis pa las g.yas pa aud pal 'dzin pa'o/ /g.yon pa skyabs mdzad kyi phyag rgya can du yang dag par bsam mo/ /rna ba g.yas par pad+ma bsam zhes bya ba ni de'i rna ba g.yas pa la nges par pad+ma 'dab ma bcu drug pa yang dag par rgyas par bsam mo/ /slob dpon 'jam dpal bsgom zhes bya ba ni bdag nyid nyan pa pos slob dpon de'i 'og tu haM las seng+ge'i khri yongs su bsam mo/ /de'i steng du muM bsams te/ de yongs su gyur pa las aud pa la dmar po bsams te/ de dag yongs su gyur pa las 'jam dpal gzhon nur gyur pa sku mdog dmar ser/ phyag gnyis pa la g.yas pa chos 'chad kyi phyag rgya can/ g.yon pa po ti yang dag 'dzin pa las chos 'chad par bsgom mo/ /bla ma'i zhal gyi 'od zer dag /pad mar nges par thim par bya ba? ni bla ma'i chos 'chad pa'i 'og tu bsams la bdag gi pad+ma'i nang du thim par bsgom mo/ /grogs rnams lha mo bsgom par bya ba ni nyan pa po gzhan rnams la lha mo'i cha lugs su bsam mo/ /thon kar mi rtag stong pa nyid/ /skad cig gnyis tsam bsgom par bya zhes pa ni chos thon kar 'dus byas mi rtag pa bsgom pa skad cig ma cig dang dngos por 'dzin pa stong par bsgom pa'i skad cig ma cig yang dag par bsgom pa'o/ /de'i mthar nyan pa po'i pha rol tu phyin pa drug dang ldan pa bshad de/ me tog stan sogs rab phul nas/ /sa phyogs spyod pa bsdams pa dang/ /srog chags rnams la 'tshe mi byed/ /bla ma la ni gsol ba 'debs/ ma yengs bla ma'i man ngag 'dzin/ /rtog sel phyir na skyon tshig 'dri/ /sgrol ma yan lag drug dang ldan/ zhes bya ba la/ me tog dang bstan la sogs pa phul ba'i skad cig ma cig la ni sbyin pa'i pha rol tu phyin pa yongs su rdzogs pa'o/ /sa gzhi mi gtsang ba la sogs pa dang/ rang gi sgo gsum gyi spyod pa bsdams pa'i skad cig la ni tshul khrims kyi pha rol tu phyin pa yongs su rdzogs pa'o/ /sa gzhi la srog chags la sogs pa gnas pa la mi 'tshe bar sel ba'i skad cig la ni bzod pa'i pha rol tu phyin pa yongs su rdzogs pa'o/ /bla ma la chos 'chad pa la gsol ba 'debs pa'i skad cig la ni brtson 'grus rdzogs pa'o/ /gzhan la bla ma'i gdam ngag 'dzin pa'i skad cig ma la bsam gtan rdzogs pa'o/ /rang gi rtogs pa bsal ba'i phyir/ /phyir la skyon tshig 'dri ba'i skad cig la shes rab kyi pha rol tu phyir pa yongs su rdzogs pa'o/ /de yang gong du smos pa de ltar skad cig ma de dag la bsam pa rnam par bzhag pa'o/ /'bras bu ni go sla ba'i phyir 'dir ma bshad do/ /de'i mthar 'dzin pa po'i yan lag bshad par bya ste/ shin tu dad ldan dbang po gsal/ /le lo chung dang skyo ba med/ /nyin mtshan sems dang zlos par rem/ /de drug ldan pa'i gang zag la/ /'dzin pa po zhes ngas bshad do/ /zhes bya ba la/ shin tu dad pa dang ldan pa dang/ dbang bo ni mig la sogs pa ste/ de dag rab tu gsal ba dang/ le lo chung ba dang/ dam pa'i chos 'dzin pa la yid skyo ba med pa dang/ sngon du sems bzung ba rnams nyin dang mtshan mor zlos pa rem ba ste/ de drug ldan pa'i gang zag gi 'dzin pa'i dgos pa yang dag par 'grub pa'o/ /de drug ldan pa'i gang zag la 'dzin pa po zhes ngas bshad do zhes bya ba ni gong gi yan lag de dag dang mi ldan pa'i 'dzin pa tsam dang 'grogs dga' la sogs pa rnams rnam par bkag pa'o/ /yan lag drug dang ldan pa'i gang zag de ni/ bla mas shin tu yang dag par gnyer te/ 'dzin pa'i tshig yongs su sbyin pa kho na'o/ /de'i mthar man ngag bshad par bya ste/ dang por byang chub sems bskyed do/ /bdag nyid 'jam dpal skur bsgoms nas/ /lce la ral gri bsam bya ste/ /slob dpon bde gshegs shAkya thub/ /nyid kyis bdag la gang dbang gis/ /'khor lo lte bar bsam par bya zhes bya ba la/ dang por byang chub tu sems bskyed pa ni 'dzin pa'i sngon du bdag gis sems can thams cad mngon par rdzogs par 'tshang rgya bar bya ba'i phyir dam pa'i chos 'di gzung bar bya'o zhes bsam pa sngon du mnyam par bzhag pa'o/ /bdag nyid 'jam dpal skur bsgoms te zhes pa ni a las zla ba'i dkyil 'khor bsams te/ de'i steng du muM rab tu bsgom pa'o/ /de gyur pa las aud pa la bsams te/ de dag gyur pa las 'jam dpal bdag nyid bsgoms te/ sku mdog dmar ser phyag gnyis pa/ phyag g.yon pa na po ti 'dzin pa/ /g.yas pa chos 'tshang kyi phyag rgya can du bsam mo/ /lce la ral gri bsam byas te/ zhes pa ni lce'i rtse mor kham rnams te/ de gyur pa las ral gri'i rnam par bsam ste/ de yis shes bya'i sgrib pa rnams yongs su bcad par bsam mo/ /slob dpon bde gshegs shAkya thub/ /de nyid kyis bdag la ngag dbang gi / 'khor lo ster bar bsam par bya zhes pa ni 'dzin pa'i slob dpon de'i 'og tu/ a las zla ba bsams te/ de'i steng du ri ser po las gyur pa'i lhung bzed do/ /de dag yongs su gyur pa las slob dpon bde gshegs shAkya thub par bsam par bya ste/ sku mdog gser btsom lta bu phyag g.yas chos 'chad kyi phyag rgya bcas pa/ g.yon pa mnyam pa nyid la bzhag par bsgoms te/ de yis bdag la tshig byin pa'i skad cig la dag gi 'khor lo chos kyi sgo mo dpag tu med par ster bar bsam mo/ /de'i mthar 'dzin pa po'i pha rol tu phyin pa drug dang ldan par bshad par bya ste/ po ti byin dang skyon mi lta/ /bla mas kha byas yongs su bzod/ /bla ma la ni yang yang 'dri/ /bar du ma yengs gong 'og dpyod 'jam dpal yan lag drug dang ldan zhes pa ni dang por slob dpon la dam pa'i chos 'dzin pa po'i yang dag par phul ba'i skad cig la sbyin pa'i pha rol tu phyin pa yongs su rdzogs pa'o/ /skyon mi lta ba ni dam pa'i chos de po ti rnying pa la sogs pa dang yi ges mi gsal ba rnams la mi rtog pa ste de'i skad cig la tshul khrims yongs su rdzogs pa'o/ /bla ma kha byas yongs su bzod pa ni/ bdag gis tshig lag pa dang/ 'khrul pa rnams la bla mas dag rtsub mo la sogs pa smras kyang yang dag par bzod pa ste/ de'i skad cig la bzod pa yongs su rdzogs pa'o/ /bla ma la ni yang yang 'dri pa ni tshig gi rkang pa gcig la lan nyi shu 'am sum cu la sogs par bzlas te yang dag par zhen pas phyis yang de'i mdza' i tshig la sogs pa yang yang 'dri ba ste/ de'i skad cig la brtson 'grus yongs su rdzogs pa'o/ /bar du ma yengs gong 'og dpyod ces pa ni bar du 'khor ba'i chos gzhan la ma yengs par 'dzin pa ste/ de'i skad cig la ni bsam gtan yongs su rdzogs pa'o/ / gong 'og dpyod pa ni tshig 'brel pa'i gong 'og dang tshig gi 'khrul pa rnams dpyad cing 'dzin pa 'am zlos pa ste/ de'i skad cig la shes rab kyi pha rol tu phyin pa yongs su rdzogs pa'o/ /'jam dpal yan lag drug dang ldan/ zhes pa ni bdag nyid 'jam dpal du bsgoms pa'i phyir ro/ /de yang de dag gi skad cig de dag la mnyam par bzhag pas pha rol tu phyin pa drug dang ldan pa yang yin la/ 'bras bu yang rdzogs par 'byung ba nyid kho na'o/ /de'i 'bras bu gsungs pa ni de de bzhin te nges pa nyid yin pas go sla ba'i phyir ma bshad do/ /de'i mthar rtags kyi gzhi'i yan lag bshad par bya ste/ de la 'di ni ngang ba'i yan lag gi /sngon du lag sbyangs yan lag bde/ /tshon rnams sbyor mkhas tshad dang ldan/ /sna tshogs rnam pa mang shes zhing/ /bde gshegs sku la rin mi brtsi/ /de drug ldan pa'i gang zag la/ /ri mo mkhas zhes brjod pa yin/ /mi gang zhig sngon du lag pa'i mo la slob dpon gyis kyang sbyangs pa dang tshon sbyor mkhas pa ste/ kha dog gi rnam pa lnga dang bcu la sogs pa 'jam pa dang/ gsal ba dang/ bkrag che ba la sogs par shes par bya'o/ /yan lag bde ba ni yan lag bde ba dang/ zhi ba dang/ rengs pa dang spom pa dang/ gyod pa la sogs par ma song zhing skyon spangs pa dang ldan pa'o/ /tshad dang ldan pa ni bde bar gshegs pa la sogs pa'i sku rnams dpral ba la de nyid kyi sor bzhi dang/ de nas dpral ba'i smin mtshams nas sna gong du mnyam pa dang sna'i rtse mo nas kos ke'i bar mnyam pa dang/ sku byin la zhabs pus mo nas long bu'i tshad tsam la cha gsum du ldan pa la sogs pa la bya'o/ /sna tshogs rnam pa mang shes pa ni rgyan dang mchod pa'i yo byad ba dan dang/ sems can gyi gzugs brnyan yod do cog shes pa'o/ /de rnams dang ldan pa ni yan lag dam pa ni bde bar gshegs pa'i sku la rin gyi cha ru mi gcod cing rngan pa la dmigs su mi 'dzin pa ste/ de drug dang ldan pa'i gang zag la/ ri mo mkhas zhes brjod pa yin zhes pa ni/ ri mo 'dri ba tsam khe dang rnyed par lhur len pa rmongs pa rnams bslu ba la sogs pa bsal ba'o/ /de'i man ngag brjod par bya ste/ dang por byang chub sems bskyed la/ /sku gzugs dngos por sbyor ba'i tshe/ /bdag nyid rgyal ba'i yum du bskyed/ /yum las byung ba'i sangs rgyas sku/ /yongs su grub bar yang dag bsham/ /rgyan rnams legs par 'dogs pa ni/ /yon gyi bdag por bsam par bya/ /tshon rnams kha dog rim pa bzhin/ /mu tig gser dang byu ru dang/ /mar ga ta dang mu men dang/ /byin gyis brlabs la bri bar bya zhes pa la/ dang por byang chub tu sems bskyed pa ni ri mo 'dri ba'i sngon du bdag gis sems can thams cad mngon par rdzogs par 'tshang rgya bar bya ba'i phyir bde bar gshegs pa'i sku bri bar bya'o/ /zhes pa sngon du btang ba'o/ /sku gzugs dngos po sbyor ba ni sku'i gzugs brnyan 'dri tsam na bdag nyid yum du bskyed pa ni/ bdag nyid kyi sngon du paM? las pad+ma/ /de'i steng du pram las po ti de dag gyur pa la bdag nyid yum shes rab kyi pha rol tu phyin pa dus gsum gyi rgyal ba thams cad bskyed pa'i tshul can phyag gnyis ma la sku mdog ser mo/ /phyag g.yas pa yis pir shes rab dang lag pa thabs su 'brel pas sku yang dag par bskyed par bsam mo/ /rgyan rnams legs par 'dogs pa na/ yon gyi bdag por bsam par bya zhes pa ni/ dbu rgyan dang na bza' dang me long la sogs pa 'dogs pa'i dus na yon gyi bdag por bdag dang bsams la yon gyi bdag pos dbu rgyan dbul bar bsam mo/ /tshen rnams kha dog rim pa bzhin/ /mu tig gser dang byu ru dang/ /mar ka ta dang mu men dang/ byin gyis brlabs la bri bar bya zhes pa dang dkar po la mu tig tu byin gyis brlabs pa dang/ ser po la gser du byin gyis brlabs pa dang/ dmar po la byu ru byin gyis brlabs pa dang/ ljang gu la mar ga tar byin gyis brlabs pa dang/ nag po la mu men du byin gyis brlabs la bri bar bya'o/ /de'i mthar ri mo mkhan la pha rol tu phyin pa drug dang ldan par bshad par bya ste/ dkar zhal phyin dang gtsang mar sbyar/ /gzhan gyis ngan smras bzod par ldan/ /bar du myur bar 'grus pa dang/ ma yengs shin tu legs par 'dri/ /spu shad phyogs kun gsal bar gcod/ /yon bdag yan lag drug dang ldan zhes pa ni dang por rtsig pa'i legs la dkar zhal byin pa 'am tshon byin pa'i skad cig la/ sbyin pa'i pha rol tu phyin pa yongs su rdzogs pa'o/ /tshen la sogs pa gtsang mar sbyar ba'i skad cig la ni tshul khrims kyi pha rol tu phyin pa yongs su rdzogs pa'o/ /mi gzhan la sogs pa sa'i mo la sogs pa la 'phyas kyang gzhan la mi khro bar bzod pa'i skad cig la ni bzod pa yongs su rdzogs pa'o/ /le lo med cing myur ba'i skad cig la ni brtson 'grus yongs su rdzogs pa'o/ /gzhan la sems ma yengs pas mnyam par bzhag pas 'dri ba'i skad cig la ni bsam gtan yongs su rdzogs pa'o/ /spu shad kyi rnam par bcad nas phyogs kun gsal bar gcod pa'i skad cig la ni shes rab gyi pha rol tu phyin pa yongs su rdzogs pa'o/ /yon bdag yan lag drug dang ldan zhes pa ni gong du yum du bsgoms nas 'dir yon bdag ces ci'i phyir bya snyam pa la/ dang por yum du bsgom pa yang bya ba che chung yin pas rgyan dang mchod pa'i yo byad la sogs pa la phal che ba'i bya ba mang ba ste/ de'i phyir yon bdag gi bya bas yon bdag tu brjod pa yin no/ /de'i skad cig de rnams la de dag dang ldan pa yin no snyam pa'i bsam pa mnyam par bzhag pa kho na'o/ /'bras bu ni go sla ba'i phyir 'dir ma bshad do/ /de'i mthar de dang cha mthun pa'i rtags kyi gzhi lugs dang/ 'jim pa la sbyor bdas bshad par bya ste/ lugs dang 'jim pa la sogs pa/ /yan lag tshon spangs lnga dang ldan/ /dang por byang chub sems bskyed la/ /snga ma'i sbyor ba'i rigs 'dra las/ /mgar ba'i bu dang lder so mkhan/ /mngon par sangs rgyas nga yis mthong zhes pa ni lugs kyi sku dang 'jim pa'i sku byed pa rnams kyi yan lag ni gong gi ri mo las tshon sbyar ba ma rtogs pa lnga dang ldan pa'o/ /de la man ngag ni dang por las la 'jug pa'i sngon du bdag gis sems can thams cad mkhyen par 'tshang rgya ba'i phyir las 'di bya'o zhes bsam pa sngon du btang ba'o/ /snga ma'i sbyor ba'i rigs 'dra las shes pa ni dang por gzugs la sbyor tsam na yum gyi tshul du bskyed pa dang/ rgyan dang ba dan la sogs ba sbyor tsam na yon gyi bdag por bsgom par shes par bya'o/ /pha rol tu phyin pa drug dang ldan pa ni 'dir bcom ldan 'das kyis ma gsungs mod kyang 'jim pa dang spra tshil dang zangs la sogs pa byin pa'i sbyin pa dang/ byi dor dang bzang zhal la sogs pa byed pa'i tshul khrims dang/ rdzas rnams la srog chags bsal ba la sogs pa ni bzod pa dang/ bar du le lo med pa ni brtson 'grus dang/ gzhan la ma yengs par byed pa'i bsam gtan dang/ tshad la sogs pa rnams par dpyad cing byed pa'i skad cig rnams la shes rab kyi pha rol tu phyin pa la sogs pa yongs su rdzogs bar byed pa ni 'dir go bar bya'o/ /'bras bu ni rgyas par ma gsungs mod kyi/ mgar ba'i bu dang lder so mkhan/ /mngon par sangs rgyas nga yis mthong zhes gsungs pas don gyis go bar bya'o/ /de'i mthar 'bras bu'i gzhi'i yan lag bshad par bya ste/ sku gdung ring bsrel thams cad la 'jim pa legs dang so phag ldan/ /rtse gu mkhas dang phyogs cha snyoms/ /tshad dang ldan pa'i ring bsrel mkhas zhes bya ba la/ 'jim pa lags pa'i rde'u dang rus pa la sogs pa med cing bsnol legs pa ldan pa'o/ /so phag grwa mnyams pa dang/ 'khyog pa dang gru bzhir ma gyur par med par byas pa'o/ /rtse gu mkhas pa ni 'jim pa snyoms pa dang/ so phag snal mar shes pa dang/ dgye ba dang dgu bo la sogs med par shes pa'o/ /tshad dang ldan pa ni gru bzhi'i tshad dang/ bang rim gyi 'phang dang/ srubs pa'i zhang du mnyam pa'o/ /de bzhi dang ldan pa'i gang zag la/ ring bsel mkhas zhes brjod pa yin zhes pa ni ring bsrel byed pa tsam la sogs pa rnam par bcad pa'o/ /de'i man ngag bshad pa ni/ bdag nyid rgyal ba'i yum du bsam zhes pa la sogs pa'i tshig gis de ma thag pa'i man ngag las shes par bya'o/ /de'i mthar ring bsral mkhan la pha rol tu phyin pa drug dang ldan par bstan pa ni/ so phag byin dang chu gtsang gis/ /sbrus dang sa gzhi phyags pa dang/ srog chags phra mo rab bsrungs dang/ /myur bar ma yengs lags par brtson/ /ring srel mkhan po yan lag drug ces bya ba la/ sa phag byin pa'i skad cig la sbyin pa yongs su rdzogs pa'o/ /'jim pa la ni chu gtsang gis sbrus pa'i skad cig la tshul khrims yongs su rdzogs pa'o/ /'jim pa dang chu la srog chags phra mo rnams la skyob cing bsrung ba'i skad cig la bzod pa'o/ /le lo med par myur ba'i skad cig la brtson 'grus so/ /ma yengs par mnyam par bzhag pas rtsig pa'i skad cig la ni bsam gtan to/ /zur dang logs la sogs pa la dpyad pa'i skad cig de dag la ni shes rab kyi pha rol tu phyin pa la sogs pa yongs su rdzogs pa ste/ de dang de'i skad cig de rnams la 'di'i skad cig la ni 'di yongs su ldan no zhes mnyam par bzhag pa kho na'o/ /ring bsrel mkhan po yan lag ces pa ni de drug dang ldan pa'o/ /'bras bu go sla ba'i phyir ma bshad do/ /de'i mthar sbyin pa'i yan lag bshad par bya ste/ yid 'ong dus su sbyin pa dang/ /sdug mi sdug la mi lta zheng/ 'gyod pa med dang lan mi re/ /de lnga ldan pa'i gang zag la/ /sbyin pa mkhas zhes ngas bshad do/ /zhes bya ba la/ yid du 'ong ba sbyin pa na de'i snying du sdug pa byin pa'o/ /dus su byin pa de ni de la des 'phongs par 'gyur zhing de dang ma ldan na rkyen la sogs pa cher 'ong ba la byin pa'o/ /sdug mi sdug la mi lta zhing zhes pa ni sbyin pa gtong pa'i dus su rang gi snying du sdug pa la gtong ba dang mi sdug pa la mi gtong ba med par snyoms pa'o/ /'gyod pa med pa ni btang nas phyis btang ba ma lags so snyam pa'i sems mi skye ba'o/ /lan mi re ba ni bdag gis 'di btang bas phyis bdag la lan 'debs par 'gyur ro snyam pa'i sems pa dang/ rnam par smin pa la mi re ba'o/ /de lnga ldan pa'i gang zag la/ sbyin pa mkhas zhes ngas bshad do ces pa ni kheng grags dang/ rogs dkar gtong ba dang/ lan por gtong ba la sogs par bsal ba'o de'i mthar man ngag bshad par bya ste/ dang por byang chub sems bskyed la/ bdag nyid 'jig rten mgon por bskyed/ /khyad par dngos dang tha mal nyid /khyad par gzhi la mchod la mchod pa ste/ /tha mal pa rnams yi dags su/ dmigs pas snying rje rab bskyed de/ /dang por bdag gis btang bar bya zhes bya ba la/ /dang por byang chub tu sems pa ni bdag gis sems can thams cad mngon par rdzogs par 'tshang rgya bar bya ba'i phyir sbyin pa 'di gtad pa bya'o/ zhes bsam pa sngon du gtang pa'o/ /'jig rten mgon por bskyed pa ni bdag gi 'og tu paM las pad+ma bskyed do/ de'i steng du h+ri dkar po'o/ /de yongs su gyur pa las bdag nyid 'jig rten mgon por bskyed par bya ste/ sku mdog dkar po phyag gnyis pa la/ /g.yas pa pad+ma dkar po 'dzin la/ /g.yon pa mchod sbyin pa'i phyag rgya can du bsam pa'o/ /khyad par dngos dang tha ma nyid/ /khyad par gzhi la mchod pas te/ /tha mal pa rnams yi dags su/ /dmigs pa dngos po gtad bar bya/ zhes pa ni 'khrul pa yod pa'i phyir rnam pa gnyis su phye ba'o/ /khyad par zhes pa ni bla ma dang gong ma rnams la de dag la ni mchod par 'gro ba de'i phyir yi dags su mi sgom pa'o/ /sngon 'das pa'i dus na rgyal po'i btsun mo nyi m a'i mdog gis sbyin pa'i dus su sbyin par bya ba yi dags su dmigs par bya ba dran par byas pas byang chub tu sems bskyed pa'i tha mal yon 'phul ba'i dus su bla ma la yi dags su bsgoms pas skye ba lnga stong du yi dags su skyes pa ste/ gzigs pas mchod par bya ba dang sbyin par bya ba'o/ /tha mal pa rnams kyi dags dmigs pas zas sogs pas 'phangs pas snying rje chen po bskyed de gtang bar bya ba'o/ /de'i mthar sbyin pa po la pha rol tu phyin pa drug dang ldan par bshad de/ rdzas byin yid du 'ong ba dang/ /smre sngags 'dod la zhe mi sdang/ /le lo med cing myur bar gtong/ /dus su gong gi bsam gtan 'jog /rnam par dpyad nas gtong ba ni/ /'jig rten mgon po yan lag drug ces bya ba la/ /rdzas phyin pa ni sbyin pa'i pha rol tu phyin pa'o/ /yid du 'ong zhing gtsang ba byin pa ni tshul khrims so/ /slong ba smre sngags 'don cing lag pas 'drang ba la sogs pa la zhe sdang med pa na bzod pa'o/ /gtong pa'i skabs su le lo med cing/ /myur bar gtong ba ni brtson 'grus so/ /gtong ba'i dus su gong gi bsam gtan la mnyam par 'jog pa ni bsam gtan no/ /rnam par dpyad ces pa ni/ thob pa dang ma thob pa la dpyod pa'i skad cig rnams la ni shes rab kyi pha rol tu phyin pa la sogs yongs su rdzogs pa ste/ de dag gi skad cig ma rnams la mnyam par bzhag pa'o/ /'jig rten mgon po yan lag drug ces pa ni dang por 'jig rten mgon por bsgom pa'i phyir ro/ /'bras bu ni go sla ba'i phyir 'dir ma bshad do/ /de'i mthar bshad pa'i yan lag bshad par bya ste/ man du thos dang shes rab che/ /lung gi dgongs pa legs par rtogs/ /bden pa gnyis po 'byed par shes/ /snying rje che dang skyo ba med/ /nga rgyal chung dang lan 'debs mkhas/ /de brgyad ldan pa'i gang zag la/ /'tshad pa mkhas zhes ngas bshad do zhes pa ni mang du thos pa'i rgyal pa'i bka' ma lus pa mdza' dag thos pa dang/ bka' la brten pa bstan bcos sgra dang tshad ma la sogs pa ma lus par 'chad pa'o/ /shes rab che ba ni yang dag pa'i don la blo 'jug pa la mgo smos pas go ba ste/ dper na me stag gi yar ma ras yug la phog pa lta bu'o/ /lung gi dgongs pa rtogs pa ni rgyal ba'i bka' dri ma med pa dgongs pa bsam gyis mi khyab pa gsungs pa ste/ de dag la ji bzhin pa sgra ji bzhin pa rnams yang dag par shes pa ste/ dper na rdo rje nyi ma snang ba'i nang nas/ rang dang lhan cig tu mnyam pa'i/ /rgyal po'i bu mo mdzas ma dang/ lhan cig 'grogs dang srog chags rnams/ /bsad pas dngos grub thob par 'gyur zhes bya ba ni rang dang skad cig tu dus mnyam pa thag ma med pa nas rang gi rgyud la gnas pa'i ye shes so/ /rgyal po'i bu mo zhes bya ba ni rigs shin tu mthong zhing rigs ngan pa ma sogs pa'i skyon gyis ma gos pa dang/ gnyis su med pa'i ye shes de yang me long lta bu'i ye shes la sogs pas ni rigs khyad par can du 'phags shing nyon mongs pa'i skyon gyis mgos pa'o/ /lhan cig dgod? zhes bya ba ni rgyal ba'i bu mo de yang sngon yul dang dus la sogs pas bskal bas ngo mi shes te phyis ngo shes te phrad nas bde ba gang 'grub pa'o/ /de bzhin du ye shes yang glo bur gyi sgrib pas bsgribs kyang bla ma'i man ngag las rtogs pa dang bral ba'i bar ba 'grub pa'o/ /srog chags rnams bsad ces bya ba ni 'gro ba sems can thams cad 'khor bas rang gi rgyud bsad nas thar ba la yongs su 'god pa'o/ /dngos grub thob par 'gyur ba ni de yis nges par dngos grub thob nges pa ste/ de lta bu dgongs pa yang dag par shes pa'o/ /bden pa gnyis po 'byed par shes pa ni kun rdzob tu dngos po thams cad khyad du mi gsod cing/ pha rol gyi bsam pa dang sbyar te rims kyis stan pa dang/ yang dag par na ci'i? ngo bo bor yang mi rtog cing tshul bzhin la gnas pa'o/ /snying rje che ba ni snyed pa dang bkur sti'i phyir ma yin/ zhing chos don du gnyer ba rnams la khyad par du ston pa'o/ /skyo ba med pa ni chos 'chad pa la yid mi skyob ste gang dang gang gis bsam bskor ba'o/ /nga rgyal chung ba ni bshad pa gzhan la zur mi za ba dang/ rang la zur mi bstod cang dper na rgyal po'i dran lta bur gnas pa'o/ /gzhan la zur mi za ba ni med sde rnam par 'thag pa nas shin tu smad pas thams cad du mi bya ba'o/ lan 'debs pa la mkhas pa ni chos 'dri ba la sogs pa la khong mi khro zhing 'jam pas lan 'debs pa dang/ pha rol gyi skyon la sogs pa yongs su shes pa'o/ /de brgyad dang ldan pa'i gang zag la/ /'chad pa mkhas zhes bya ba ni ma thos pa rang gis rtogs pas 'chad pa dang/ rnyed pa dang bkur sti'i phyir 'chad ba dang/ 'chad pa tsam la sogs pa rnam par gcad pa'o/ /de'i mthar man ngag bshad par bya ste/ dang por byang chub sems bskyed la/ rang nyid sprul pa'i skur bsgoms te/ dus gsum bde gshegs thams cad la/ /lce la gnas pa bshad par byas nas/ /skad cig ma ni cig la yang/ /chos kyi 'khor lo brgyad khri dag /bzhi stong de la smra bar 'gyur zhes bya ba la/ /dang por byang chub tu sems bskyed pa ni chos 'chad pa'i sngon du bdag gis sems can thams cad bla na med pa yang dag par 'tshang rgya bar bya ba'i phyir/ dam pa'i chos 'di bshad par bya'o zhes bsam pa sngon du btang ba'o/ /rang nyid sprul pa'i bskur bsgoms pa ni rang gi 'og tu ha las seng ge'i khri chen por yang dag par bskyed/ de'i steng du paM las pad+ma 'dab ma brgyad cu drug pa bskyed/ /de'i steng du paM ser po bsam pa'o/ /de gyur pa las lhung bzed do/ /de dag yongs su gyur pa las bdag nyid sprul pa'i sku shAkya thub par skad cig ma gcig la rdzogs par bya ste/ sku mdog gser btso ma lta bu/ /phyag gnyis pa la g.yas chos 'chad pa'i phyag rgya can/ g.yon bdud 'dul sa gnon gyi phyag rgya can gnas par bsgom mo/ /dus gsum bde gshegs mchod byas la/ /lce la gnas par bshad byas na/ zhes pa ni lce'i rtse mo la tsam las 'khor lo rtsibs bcu drug pa bsgom/ /de'i lte ba la hUM yongs su gyur pa las/ de las 'od zer nam mkha' i phyogs su spros pas phyogs bcu dus gsum gyi bde bar gshegs pa thams cad bkug ste 'khor lo la bstim pa dam pa'i chos bshad na/ skad cig sna tshogs dang ldan pa rnams la yang de dang de'i skad cig la rnam par go bzhin skad cig ma gcig la chos kyi sgo mo brgyad khri bzhi stong smra bar 'gyur ro/ de'i mthar 'chad pa po la pha rol tu phyin pa drug dang ldan par bshad par bya/ chos sbyin sgo gsum bsdam pa dang/ chos 'dri ba la khong mi khro/ /cig car myur bar le lo med/ /ma yengs mnyam par bzhag pas 'chad/ /gong 'og tshig gi don rnams dpyod/ /sprul sku yan lag drug dang ldan zhes bya ba la/ chos byin pa'i skad cig pa ni sbyin pa'i pha rol tu phyin pa yongs su rdzogs pa'o/ /sgo gsum bsdams pa ni lus kyi rkang pa brkyang ba dang/ lag pa kyag kyog la sogs pa mi byed pa'o/ /ngag bsdams pa ni 'dod pas log bar g.yem pa'i gtam dang/ 'khrug pa dang rnam par g.yeng ba'i gtam mi smra'o/ /yid bsdams pa ni 'dod pa'i sems dang gnod pa'i sems la sogs pa mi skye ba ste/ de'i skad cig la tshul khrims yongs su rdzogs pa'o/ /chos 'dri ba la khong mi khro ba la sogs pa ni bzod pa'o/ /le lo'i gtam gyis bar mi chod par 'chad pa'i skad cig la ni brtson 'grus so/ /gzhan la ma yengs par go ba'i bsam pa mnyam par gzhag pa ni bsam gtan no/ /gong 'og gi tshig gi don rnams rnam par dpyod cing ma 'khrul bar 'chad pa'i skad cig la ni shes rab kyi pha rol tu phyin pa yongs su rdzogs pa ste/ de dang de'i skad cig la ni 'di'i skad cig la ni 'di dang ldan no/ /zhes pa la sogs pas mnyam par bzhag na de dang ldan pa yang yin la 'bras bu yongs su grub pas na mnyam par bzhag pa kho na'o/ /sku sprul yan lag drug dang ldan zhes pa ni/ dang por sprul pa'i sku shAkya thub par bsgoms pa'i phyir ro/ /'bras bu ni go sla ba'i phyir 'dir ma bshad do/ /de'i mthar sgrogs pa'i yan lag bshad par bya ste/ sgra skad 'byor dang dbyangs dang ldan/ /tshig gi lhad med don rab gsal/ /gzhan gyi gtam gyis bar ma chod/ /de lnga ldan pa'i gang zag la/ /klog pa mkhas zhes ngas bshad do/ /zhes bya ba la/ sgra skad 'byor ba ni ring po dang thung ngu dang/ hU lud dang/ drag po la sogs pa ma nor bar 'byor pa'o/ /dbyangs dang ldan pa ni/ bcom ldan 'das kyis mdo sde ri bo brtsegs pa las/ dbyangs ldan klog ni thar pa'i rgyu zhes gsungs te/ de bas na dbyangs rings la 'jam par sgrogs pa'o/ /tshig gi lhag chad med pa ni/ dbyangs kyi tshig a dang kye la sogs pa'i tshig gis ma bslang pa'o/ /don gsal ba ni tshig don phan tshun ma 'dres shing dbugs zha ba la sogs pa ma yin par gzhan gyis go bar bsgrogs pa'o/ /gzhan gyi gtam gyis bar ma chod pa ni/ /dam pa'i chos sgrogs pa'i skabs su/ gzhan la gtam mi smra bar sgrogs pa'o/ /de lnga dang ldan pa'i gang zag la/ sgrogs pa mkhas zhes pas bshad do/ /zhes bya ba ni/ yan lag de lnga dang mi ldan par bsgrogs pa'o/ /sgrogs pa tsam la sogs pa rnam par gcad pa'o/ /de'i mthar man ngag bshad par bya ste/ dang por byang chub sems bskyed la/ /bdag nyid bcom ldan 'das su bskyed/ /phyogs bcur gnas pa ma lus pa/ /bkug bas mkha' la gnas byas la/ /rkan la rnga chen rab bsams te/ nang du chos kyi sgo mo bsam/ /lce la rnga brdungs rdo rje bsam/ /rdo rjes rnga la rab brdungs pas/ /sgra skad chen po de yis ni/ /stong gsum ma lus kun khyab bsam/ /zhes bya ba la/ dang por byang chub tu sems bskyed pa ni/ bdag gis sems can thams cad myur du mngon par rdzogs par 'tshang rgya bar bya ba'i phyir dam pa'i chos 'di bsgrags par bya'o/ /zhes bsam pa sngon du gtang ba'o/ /bdag nyid bcom ldan 'das su bskyed pa ni/ rang gi 'og tu sam las seng ge'i khri rnam par bsams te/ de'i steng du paM ser po las bskyed pa'i lhung bzed bskyed de/ de dag yongs su gyur pa las/ bdag nyid bcom ldan 'das shAkya thub par bsgoms te/ sku mdog ser po phyag g.yas pa chos 'chad kyi phyag rgya can/ g.yon pa mchod sbyin du mdzad pa bsgom mo/ /phyogs bcur gnas pa ma lus pa/ /bkug pas mkha' la gnas byas la/ zhes pa ni/ bcom ldan 'das kyi thugs kar a las zla ba'i dkyil 'khor bsams te/ de'i steng du hUM las 'od zer sna tshogs nam mkha' i phyogs la sogs pa spros la/ des phyogs bcu'i sangs rgyas dang byang chub sems dpa' dang/ 'phags pa nyan thos la sogs pa brgyad bsam pa'o/ /lce la rnga brdungs rdo rje bsam pa ni lce'i rtse mo la hUM bsams la de gyur pa las rdo rje bsam pa'o/ /rdo rje rnga la rab brdungs pas/ /sgra skad chen po de yis ni/ stong gsum ma lus khyab par bsam/ zhes pa ni/ chos sgrogs pa'i dus su rdo rje rnga bo che brdungs/ /nang gi chos kyi sgo mo rnams kyang gang dang gang la skad kyi rnam pa yod pa de dang de la yang dag par go bar byed pa'i chos sgra chen po byung bas skad cig ma cig la stong gsum gyi stong chen po ma lus pa sgra des khyab par bsam par bya ba kho na'o/ /de'i mthar sgrogs pa po la pha rol tu phyin pa drug dang ldan par bshad par bya ste/ khri stan me tog rab phul dang/ lag bkrus kha bshal gtsang ma nyid/ /khong mi khro zhing srog chags sel/ /yun rings 'brus dang ma yengs sgrogs/ /'bru'i 'khrul pa rnam par dpyod/ /shAkya thub yan lag drug dang ldan zhes bya ba la/ /dam pa'i chos sgrogs pa'i dus su khri dang gdan dang me tog la sogs pa byin pa'i skad cig la ni sbyin pa'i pha rol tu phyin pa yongs su rdzogs pa'o/ /yan lag drug bkru ba dang kha bshal pa dang/ bar du ngag gi lung pa 'gags pa sel ba ni tshul khrims so/ /gzhan gyi blag chor la sogs pa la khong mi khro ba dang/ thon khor na gnas pa'i srog chags sel ba ni bzod pa'o/ /bar du le lo med cing yun ring du gus pa ni brtson 'grus so/ /'khor ba'i chos rnams la ma yengs par sgrogs pa ni bsam gtan no/ /yi ge'i 'bru rnams 'khrul pa rnam par dpyod pas sgrogs pa'i skad cig la ni shes rab kyi pha rol tu phyin pa yongs su rdzogs pa'o/ /de dang de'i skad cig la ni 'di dang ldan no zhes bya ba la sogs pas mnyam par bzhag pa kho na'o/ /shAkya thub yan lag drug dang ldan zhes pa ni/ de nyid gang du shAkya thub par bsgom pa'i phyir te/ 'bras bu ni go sla ba'i phyir 'dir ma bshad do/ /de la kha cig gi bsam pas ci de bzhin du 'don pa dang bcur bcom ldan 'das kyis gsungs na/ 'dir ni kha don yongs su mi dmigs so zhe na/ rigs pa la yang kha dog nyid sgrogs pa'i khong du 'dus pa yin la/ /lung yang bcom ldan 'das kyis de dgongs pa sgrogs pa'i 'bras bu bstan pa'i skabs su klog dang 'don pa'i tshe zhes gsungs pa'i phyir gcig pa rag? bar bya'o/ /de'i mthar mchod pa bshad par bya ste/ mchod pa'i las su brjod pa ni/ lus ngag yid dang rdzas dag ste/ de lus kyi mchod pa ni/ phyag 'tshal ba dang bskor ba dang/ dkyil 'khor phyag rgya gar dang ldan zhes bya ba la/ bcom ldan 'das kyis mchod pa rnam pa bzhir gsungs te/ lus dang ngag dang yid dang rdzas kyi mchod pa'o/ /de las lus kyi mchod pa la yang rnam pa lngar gsungs te/ phyag 'tshal ba lus kyi mchod ba dang/ skor ba lus kyi mchod pa dang/ dkyil 'khor bya ba lus kyi mchod pa dang/ phyag rgya lus kyi mchod pa dang/ gang lus kyi mchod pa dang/ de la dang por phyag 'tshal ba ni yan lag bshad par bya ste/ ngag yid gus pas rab btung dang/ pus gtsugs thal sbyar yan lag btung ngal dub med cing dus la brtson/ /de bdun ldan pa'i gang zag la/ /phyag byed mkhas zhes ngas bshad do zhes bya ba la/ ngag gus par btud pa ni gang dang gang la phyag byed pa de dang de tshig gi snyan ngag legs par brjod pa ste/ dper na sangs rgyas gtso la phyag 'tshal lo/ / zhes bya ba la sogs pa bzhin no/ /yid gus par btung ba ni dang ba'i dad bas smin ma bsdus pa dang smad kyi sha bskul ba la sogs pa byed pa'o/ /pus mo gtsugs pa ni rkang pa nyis ldab tu bltabs pa ste/ gzhibs pas legs par bsrang ba'o/ / thal mo sbyar ba ni lag pa thal mo legs par sbyar ba la/ mthe bong rgya gram du byas te snying gar bzungs ba'o/ /yan lag btud ba ni snyan ngag gi tshig gi skad cig la yan lag gi dbang po mgo bo pus mo'i snangs la gtugs te lag pa dang/ gsum du sbyar ba'o/ /ngal dub med pa ni phyag 'tshal ba la ngal dub med cing lus yang ba'o/ /dus la brtson pa ni bcom ldan 'das kyis mdo sde'i sdong po'i sgra las/ /snga dro phyed dang dgongs ka dang/ /dkon mchog bla ma la phyogs la/ /nga yi sras kyis phyag bya'o zhes gsungs pa na/ snga dro dang po dang/ nyi ma phyed dang dgongs ka dag gi dus su phyag 'tshal bal brtson pa'o/ /de bdun ldan pa'i gang zag la/ phyag byed mkhas zhes ngas bshad do/ /zhes pa ni/ lus ngag yid gsum btung ba dang/ zla bo legs kyi phyir byed cing/ sems dang ba ma yin pa dang/ phyag byed pa tsam la sogs pa rnam par bcad pa'o/ /de'i mthar man ngag bshad de/ dang por byang chub sems bskyed de/ 'od zer 'phros pas phyogs bcu yi/ /sangs rgyas byang chub sems dpa' dang nyan thos rang rgyal dgra bcom dang/ sku gdungs ring bsrel dam chos rnams/ /ma lus mdun du bkug byas la/ /mngon par shin tu phyag byas nas/ de byas skad cig de nyid las/ /ma lus phyag ni byed par 'gyur/ /zhes bya ba la/ dang por byang chub tu sems bskyed pa ni phyag byed pa'i sngon du bdag gis sems can thams cad mngon par rdzogs par 'tshang rgya bar bya ba'i phyir dkon mchog gsum la phyag bya'o zhes bsam pa sngon du btang ba'o/ /'od zer zhes pa nas/ ma lus phyag ni byed par 'gyur zhes pa'i bar du ni yang dag par brjod de/ rang gi snying ga nas raM las nyi ma'i dkyil 'khor bsams la/ de'i steng du hUM yang dag par bsam pa'o/ /mdun du paM las pad+ma 'dab ma brgya dang ldan pas nam mkha' i khams rab tu gang bar bsams la/ de'i steng du dang po'i sa bon las 'od zer kha dog rnam pa lnga nam mkha' i phyogs su spros pas/ phyogs bcu'i sangs rgyas dang byang chub sems dpa' dang/ 'phags pa dgra bcom pa dang/ rang sangs rgyas dang/ nyan thos la sogs pa ma lus pa bkug la/ pad+ma'i steng du bzhugs par bsams la/ phyag byas na de'i skad cig la phyag gcig las ma byas kyang ma lus pa byed par 'gyur ro/ /de'i mthar pha rol tu phyin pa drug dang ldan par bshad de/ lus phul gos sogs bsdams pa dang/ phyag 'tshal sa ru srog chags sel/ /le lo med cing phyag la brtson/ /ma yengs mnyam par bzhag pas 'tshal/ /mu stegs lha tshogs yin min dpyod/ /mi de yan lag drug dang ldan zhes pa la/ phyag byed pa'i sngon du dang por bde bar gshegs pa rnams la/ lus dbul ba ste/ de'i skad cig la sbyin pa'i pha rol tu phyin pa yongs su rdzogs pa'o/ /chos gos dang/ gos bsdams ba dang/ lus bsrang ba dang/ dag bsdams pa la sogs pa ni tshul khrims so/ /phyag 'tshal ba'i sa gzhi la srog chags sel ba ni bzod pa'o/ /ku re dang rkyal ka la sogs pa mi phyed pas phyag la brtson 'grus so/ /gong gi bsam gtan gyis mnyam bar bzhag nas 'tshal ba ni bsam gtan no/ /phyag 'tshal ba'i gnas su phyi rol pa dang/ 'jig rten pa'i lha yin min dpyod pa'i skad cig la shes rab kyi pha rol tu phyin pa yongs su rdzogs pa ste/ de dag gi skad cig de rnams la de dag dang ldan pa nyid du mnyam par bzhag pa kho na'o/ /mi de yan lag drug dang ldan pa ni phyag byed pa de la pha rol tu phyin pa drug dang ldan pa ste/ 'bras bu ni go sla ba'i phyir 'dir ma bshad do/ /de'i mthar bskor ba lus kyi mchod ba'i yan lag bshad de/ nyams stobs che dang sha lus yang/ /phyin ci ma log bskor bar mos/ /tshul 'chos ma yin lus po bsrad/ /de drug ldan pa'i gang zag la/ /bskor ba mkhas zhes bya ba yin zhes bya ba la/ nyams stobs che ba ni nad dang zas la sogs pas phung po rgud par ma gyur cing rtsol phod pa'o/ /sha lus yang ba ni stobs dang ldan yang sha lus yang ba dang/ gsus pa lci bar ma gyur pa'o/ /phyin ci ma log pa ni g.yas phyogs su bskor ba dang/ /zlum por bskor ba'o/ /bskor bar mos pa ni dus su sgor bar 'dod cing bskor ba la dga' ba'o/ /tshul 'chos ba ma yin pa ni zas dang gos la sogs brnyed pa'i phyir ma yin pa'o/ /lus po bsrang ba ni dgye ba dang dgu ba dang lag pa sbyar ba la sogs pas ma yin par bskor ba'o/ /de drug ldan ba'i gang zag la/ /bskor ba mkhas zhes ngas bshad do/ /zhes pa ni/ grogs dga' dang tshul 'chos dang skor pa tsam la sogs pa rnam par bcad pa'o/ /de'i mthar man ngag bshad par bya ste/ dang por byang chub sems bskyed la/ /bskor ba'i sar ni pad+ma yi/ /sdod po yan lag dpag tu med/ /phyogs bcu ma lus khyab par bsam/ /de nas 'od zer 'phros ba yis/ /sangs rgyas byang chub sems dpa' dang/ nyan thos rang rgyal dgra bcom dang/ /dam chos ma lus kun bkug la/ /pad+ma'i steng du bzhugs par bsam/ /de bsam pad+ma'i rtsa ba la/ /bskor ba ma lus bskor ba yin/ /zhes bya ba la skabs 'dir bshad bar bya ste/ dang por byang chub tu sems bskyed pa ni/ skor ba byed pa'i sngon du bdag gis 'gro ba sems can thams cad myur du mngon par 'tshang rgya bar bya ba'i phyir/ bskor ba 'di bya'o/ /zhes bsam pa sngon du btang ba'o/ /bskor ba byed pa'i sar paM las pad+ma'i sdong po rags shing spom pa bsams la/ pad+ma'i sdong po de las pad+ma'i yal ga dpag tu med cing mtho bas phyogs bcur khyab par bsam pa'o/ /de nas rang gi snying gar a las zla ba'i dkyil 'khor bsams la/ de'i steng du hUM bsams te/ de las 'od zer spros bas phyogs bcu dus gsum gyi sangs rgyas dang/ byang chub sems dpa' dang/ 'phags pa nyan thos dang/ rang rgyal dang/ dam pa'i chos ma lus pa bkug ste/ pad+ma'i steng du bzhugs par bsams la/ de nas pad+ma'i rtsa ba la bskor ba byas pas rtsa ba gcig pa'i phyir bskor ba gcig gis kyang ma lus bskor ba byas par 'gyur ro/ /de'i mthar pha rol tu phyin pa drug dang ldan pa bshad de/ /rang gi rgyud phul spyod lam bsdams/ /lam ga'i srog chags la sogs blta/ /le lo med par rgyun du bskor/ /gzhan la ma yengs sngags sogs la/ /'khrul ba med dam dpyod pas zlos/ /mi de yan lag drug dang ldan/ zhes bya ba la/ bskor ba byed pa'i dang por rang gi rgyud dkon mchog gsum la phul ba ni sbyin pa'o/ /rnam par g.yeng ba'i sems dang ngag 'khyal ba dang/ lus kyi gos la sogs pa'i dpyod lam bsdams pa ni tshul khrims so/ /laM kan srog chags gnas pa rnams la mi 'tshe bsel ba 'am/ skrod pa ni bzod pa'o/ /bskor ba la le lo med par rgyun du bskor ba ni brtson 'grus so/ /gang gi bsam gtan la mnyam par bzhag pas skor pa ni bsam gtan no/ /bskor ba'i skabs su zlos pa'i sngags tsam kha don gong 'og gi tshig don rnam par gcod cing bskor ba'i skad cig de rnams la ni shes rab kyi pha rol tu phyin pa yongs su rdzogs pa ste/ de la mnyam par bzhag pa kho na'o/ /mi de yan lag drug dang ldan pa ni/ bskor ba mkhan de la pha rol tu ldan pas te/ 'bras bu ni go sla ba'i phyir 'dir ma bshad do/ /de'i mthar dkyil 'khor bya ba lus kyi mchod pa'i yan lag bshad de/ sa gzhi legs dang rgyud la mkhas/ /yan lag mnyen dang yid bzo ldan/ /de nyid shes dang tshad dang ldan/ /me tog tshom bu chur ldan ba'i/ /de bdun ldan pa'i gang zag la/ /dkyil 'khor mkhas zhes ngas bshad do/ /zhes bya ba la/ sa bzhi legs pa ni 'jam pa dang/ snum pa dang/ gyo mo dang/ gsag ma la sogs pa med pa'o/ /rgyud la sogs pa ni de nyid kyi rgyud dang gzhan gyi rgyud rnam pa lnga la sogs pa la thos pa dang/ legs par go ba'o/ /yan lag mnyen pa ni/ yan lag gyod po ma yin pa dang/ rengs ba dang/ 'khyog po dang/ spom po dang/ thus du la sogs pa ni ma yin pa'o/ /yid bzo ba ni shes rab zab ba'o/ /de nyid shes pa ni dkyil 'khor gyi sgo dang/ logs dang/ zur dang/ rgyan rnams yang dag pa'i don la sbyor shes pa dang/ gzhan yang de nyid kyi nges pa'i tshig rgyas par shes pa'o/ /tshad dang ldan pa ni rab dang 'bring dang tha ma la sogs pa'i tshad dang/ sku dang gsung dang thugs gsum gyi tshad yongs su ldan par byed pa dang/ khru gang las tshung ba ma yin pa'o/ /me tog tshom bu chur/ zhes bya ba ni rang bzhin dang/ dam tshig la sogs pa'i dkyil 'khor ma yin pa/ gzugs brnyan gyi dkyil 'khor la 'jug ste/ de yang me tog gsungs pa ni/ byug pa'i dkyil 'khor zlum po la sogs pa'o/ /tshom bu gsungs pa ni/ rdul tshon gyi dkyil 'khor byed pa gsungs pa'o/ /chu ni phyir gsungs pa ste/ gnyis ka la dgos pa'i phyir ro/ /de bdun ldan pa'i gang zag la/ /dkyil 'khor mkhas zhes ngas bshad do zhes gsungs pa ni/ dkyil 'khor byed pa tsam la sogs pa rnam par gcad pa'o/ /de'i mthar man ngag bshad de/ dang por byang chub sems bskyed la/ bdag nyid rdo rje las su bsgom/ /nying lag khro bo bcur bsgoms la/ rgyu rnams rin po cher bsams te/ bdag gis yang dag byas pa las/ /gzhal yas khang ni rgya che bar/ /mngon par bsams nas bder gshegs ni/ /ma lus kun la dbul bar bya/ /phyi nas stong pa'i ngang gis su/ /yongs su bsams te bsdu bar bya/ zhes bya ba la/ skabs 'dir yang don gces pa'i phyir don bshad do/ /dang por byang chub tu sems bskyed pa ni dkyil 'khor byed pa'i sngon du/ bdag gis sems can thams cad myur bar 'tshang rgya bar bya ba'i phyir/ dkyil 'khor 'di bya'o zhes bsam pa sngon du btang ba'o/ /de'i rjes la rang gi rkang ba'i 'og tu raM las nyi ma'i dkyil 'khor bsams la/ de'i steng du hUM bsams te/ de gyur pa las rdo rje rtse lnga pa'o/ /de dag yongs su gyur pa las bdag nyid rdo rje las su bsgoms par bya ste/ sku mdog ljang gu phyag gnyis pa la rgyan cha lngas yang dag par bsams te/ de'i sor mo bcu la zla ba'i dkyil 'khor bcu bsams la/ de'i steng rnams su mum ljang gu bcu yang dag par bsam pa'o/ /de gyur pa las sna tshogs rdo rje bcu yongs su gyur pa las khro bo kha dog ljang gu shin tu mi bzad pa drag po bcu yongs su bsgom pa'o/ /rgyu tshon dkar po la sogs pa rnams la/ rims pa bzhin du mu tig dang/ byu ru la sogs par byin gyis brlangs pa dang/ gci ba la sogs pa la ni rin po cher yongs su bsams te/ yang dag par byas nas dkyil 'khor de gzhal yas khang chen po rin po che sna bzhi las grub par bsams la/ phyogs bcu'i dkon mchog gsum la phul te/ phyi nas dngos po ma lus pa stong pa'i rang bzhin no/ /zhes bsam pa yongs su bsdu bar bya ste/ ma bsdus na shin tu sdig che ba'i phyir ro/ /de'i mthar pha rol tu phyin pa drug dang ldan bshad de/ chu sogs byin dang gtsang mar byas/ /srog chags bsal dang le lo med/ /khro bo yan lag drug dang ldan/ zhes bya ba la/ chu la sogs pa byin pa ni sbyin pa'o/ /mi gtsang ba dang sbar sbur la sogs pa bsal ba ni tshul khrims so/ /sa la gnas pa'i srog chags rnams bsal ba ni bzod pa'o// de le lo med par de la 'khrus pa ni brtson 'grus so/ /gzhan la ma yengs par mnyam par bsam pa dang ldan pa ni bsam gtan no/ /de dag ya yo med par reg la legs par gcod pa'i skad cig la shes rab kyi pha rol tu phyin pa yongs su rdzogs pa yin la/ /'bras bu yang rdzogs par kho na ste/ de dang de rnams kyi skad cig de rnams la yang dag par mnyam par bzhag ba kho na'o/ /khro bo yan lag drug dang ldan pa ni dang por khro bor bsams pa'i phyir te/ 'bras bu ni go sla'o/ / de'i mthar phyag rgya lus kyi mchod pa bshad par bya ste/ bla ma la sbyangs yan lag mnyen/ /ma nor de dang rjes su mthun/ /rgyud mang thos shing phyir mi ston/ /sngags dang skad cig dus mnyam byed/ /de bdun ldan pa'i gang zag la/ /phyag rgya mkhas zhes pas bshad do// zhes bya ba la/ bla ma la sbyangs pa ni/ sngon du phyag rgya mdud pa bla ma la byang bar sbyangs pa'o/ /yan lag mnyen pa ni zhi bo dang rengs pa la sogs pa ma yin pa'o/ /ma nor ba ni gzhan dang ma nor ba'o/ /de dang rjes su mthun pa ni/ lha de dang rjes su mthun pa'o// rgyud mang ba na theg pa chen po gsang sngags kyi rgyud mang por thos pa'o/ /phyir mi ston pa ni mi gzhan la mi ston pa'o/ /sngags dang skad cig dus mnyam pa ni/ lha'i snying po kho na bzas pa dang/ phyag rgya dang mdung pa'i dus skad cig la ni dus mnyam par byed pa'o/ /de bdun dang ldan pa'i gang zag la/ /phyag rgya mkhas zhes ngas bshad do/ /zhes pa ni gzhan la ni ston pa dang/ sngags dang dus mnyam pa dang/ phyag rgya byin ba tsam la sogs pa rnam par gcad pa'o/ /de'i mthar man ngag bshad de/ dang por byang chub sems bskyed la/ /gang dang gang la sbyor ba yi/ /de de lha ru nges par bsam/ /de bsams phyir na dgrol kha ru/ /sgyu ma'i sems kyis yongs su dgrol/ /zhes bya ba la/ dang por byang chub tu sems bskyed pa ni/ bdag gis sems can thams cad mngon par rdzogs par 'tshang rgya bar bya ba'i phyir/ phyag rgya 'di bya'o zhes bsam pa sngon du btang ba'o/ /zhi ba dang brag po dang/ dbang dang rgyas pa la sogs pa'i las la sbyor ba'i tshe/ gang dang gang gi lha'i snying po brjod tsam na/ lha de dang de ru bsgoms pas yongs su bdud pa'o/ /de nas phyag rgya 'grol khar sgyu ma tsam mo zhes bya ba'i bsam pas yang dag par dgrol bar bya ba kho na'o/ /de'i mthar pha rol tu phyin pa drug dang ldan pa bshad de/ phul dang legs par mdud pa dang/ /lag pa na yang yongs su bzod/ /myur la ma yengs mnyam par 'jog /skad cig du mnyam legs par dpyod/ /sna tshogs yan lag drug dang ldan/ zhes bya ba la/ phyag rgya phul ba ni sbyin pa'o/ /legs par mdud pa ni tshul khrims so/ /lag pa dang nying lag na ba la bzod pa ni bzod pa'o/ /sngags dang gnyis myur bar byed pa ni brtson 'grus so/ /lha'i bsam pa dang ldan zhing ma yengs pa ni bsam gtan no/ /sngags dang phyag rgya la 'khrul ma 'khrul dpyod pa'i skad cig ma rnams la shes rab kyi pha rol tu phyin pa la sogs pa yongs su rdzogs pa'o/ /skad cig de rnams la 'di ni 'di dang ldan no/ /zhes bya ba la sogs pas mnyam par bzhag par bya'o/ /sna tshogs yan lag drug dang ldan zhes bya ba ni/ lha sna tshogs pa mang po bsams pa'i phyir te/ 'bras bu ni go sla ba'i phyir ma bshad do/ /de'i mthar gar lus kyi mchod pa'i yan lag bshad par bya ste/ rkeng pa 'pha dang rkang lag mnyen/ /byang bar slabs dang 'jag stobs ldan/ /sgra dang rjes su mthun par shes/ /de drug ldan pa'i gang zag la/ /gar byed mkhas zhes ngas bshad do/ /zhes bya ba la/ rkeng pa phra ba ni bu che ba la sogs pa ma yin pa'o/ /rkang lag mnyen pa ni rengs pa la sogs pa ma yin pa'o/ /byang par bslabs pa'i slob dpon la sngon du byang bar bslabs pa'o/ /ngag bde ba ni 'gyur ldog la mkhas pa'o/ /stobs dang ldan pa ni nang la sogs pas mdud pa'o/ /sgra dang rjes su mthun pa ni rnga pa ta ha la sogs pa'i sgra rgyur drug pa la sogs pa dang gar mthun par byed pa'o/ /de drug ldan pa'i gang zag la/ /gar byed mkhas zhes ngas bshad do/ /zhes bya ba ni/ gar byed pa tsam la sogs pa rnam par gcad ba'o/ /de'i mthar man ngag bshad de/ dang por byang chub sems bskyed la/ /rang nyid lha mor bsgoms byas nas/ /mchog gsum mdun du dmigs byas te/ /ma lus kun las dbul bar bya/ zhes bya ba la/ dang por byang chub tu sems bskyed pa ni gar byed pa'i sngon du bdag gis sems can thams cad mngon par rdzogs par 'tshang rgya ba'i phyir/ /bdag gis gar 'di bya'o/ /zhes bsam pa sngon du btang ba ste/ rang nyid kyi 'og tu paM las pad+ma bsams la/ de'i steng du naM bsams te/ naM yongs su gyur pa las bdag nyid lha mo gar gyi dbang phyug mar bsgom par bya ste/ sku mdog ljang gu phyag gnyis pa la shin tu mdzes pa'i cha byad can rgyan sna tshogs kyis yongs su brgyan par bsams la/ de'i snying ga nas hUM las 'od zer nam mkha' i phyogs su spros pas/ /phyogs bcu nas gsum gyi dkon mchog gsum spyan drangs te/ mdun du dmigs pa ma lus par kun la dbul bar bya'o/ /de'i mthar pha rol tu phyin pa drug dang ldan pa bshad de/ lus phul gos sogs bsdoms pa dang/ lus ngal bzod dang ma yengs myur/ /sgra la rnam spyod lha mo ni/ /yan lag drug dang ldan pa yin/ zhes bya ba la lus phul ba ni sbyin pa'o/ /gos dang lus ngag yid gsum bsdams pa ni tshul khrims so/ /lus ngal ba la bzod pa ni bzod pa'o/ /myur bar byed pa ni brtson 'grus so/ /gzhan la ma yengs par lha mo'i bsam pas byed pa ni bsam gtan no/ /rnga la sogs pa'i sgra la rnam par spyod cing byed pa'i skad cig rnams la shes rab kyi pha rol tu phyin pa la sogs pa yongs su rdzogs pa ste skad cig de rnams kyi bsam pa bzhag par bya ba kho na'o/ /lha mo yan lag drug zhes pa ni/ sngar lha mo bsgoms pa'i phyir ro/ /'bras bu ni go sla ba'i phyir 'dir ma bshad do/ /de'i mthar man ngag gi mchod pa'i yan lag bshad par bya ste/ dbyangs snyan sngags dang rab ldan dang/ /bstod tshig legs pa'i yan lag brjod/ /sdig pa bshags pa'i smre sngags 'don/ /sgra dang rjes mthun gsol smon 'debs/ /de bdun ldan pa'i gang zag la/ /ngag mchod mkhas zhes ngas bshad do/ /zhes bya ba la/ dbyangs dang ldan pa ni ngag shin tu phra ba dang/ mgrin pa la nad kyis ma gzeng ba dang/ gre ba'i khugs dang ldan pa'o/ /sngags dang ldan pa ni mchod pa'i sngags de dang rjes su 'thun pa ste/ dper na bu dza pa s+tha na zhes pa la sogs pa bzhin no/ /bstod tshig legs pa'i yon tan no/ /gang dang gang la mchod pa de dang de la legs pa'i yon tan gyi tshig gis bstod pa ste/ dper na 'phags pa phyag na rdo rje la/ gsang ba'i bdag po stobs po che/ dus gsum sangs rgyas kun gyis sngags/ /bdud dang dgra dgegs 'dul mdzad pa'i// rdo rje'i bdag nyid phyag 'tshal bstod/ /zhes bya ba la sogs pa bzhin no/ /sdig pa bshags pa'i smre sngags dang ni bdag dang sems can thams cad kyis tshe rabs thog ma ma mchis pa nas dug gsum gyi dbang gis sdig pa bgyis pa de dag thams cad mthol zhing bshags so/ /byang zhing dag bar gyur cig /ces bya ba la sogs pa ste/ sngags ni sarba pA paM de sha na bya ba la sogs pa'o/ /sgra dang rjes su 'thun pa ni dril bu dang cang te'u la sogs pa'i sgra dang rjes su 'thun pa'o/ /gsol ba 'debs pa ni phyogs bcu'i sangs rgyas rnams la mya ngan las mi 'da' bar bzhugs su gsol ba dang/ 'gro ba'i don du chos kyi 'khor lo'i bskor bar gsol pa 'debs pa'o/ /smon lam 'debs pa ni sems can thams cad 'jig rten 'di ni sdug bsngal sna tshogs dang bral bar gyur nas phyi mar mngon bar rdzogs bar 'tshang rgya bar gyur cig ces bya ba la sogs pa'o/ /de bdun ldan pa'i gang zag la/ /ngag mchod mkhas zhes ngas bshad do/ /zhes pa ni/ kheng grags dang gzhan la chags pa'i bsam pas brjod pa dang/ ngag brjod pa tsam la sogs pa rnam par gcad pa'o/ /de'i ? man ngag bshad par bya ste/ dang por byang chub sems bskyed la/ /bdag nyid lha mo bsgom byas nas/ /ngag gi gnas su 'khor lo bsam/ /'khor lo de las 'od 'phros pas/ /phyogs bcu dus gsum bzhugs pa yi/ /ngag dbang ma lus bkug byas nas/ /de la thim par brjod byas na/ /dbyang kyis yan lag rgya mtsho rnams/ /skad cig gcig la smra bar 'gyur zhes bya ba la/ dang por byang chub tu sems bskyed pa ni ngag brjod pa'i sngon du bdag gis sems can thams cad mngon par rdzogs par 'tshang rgya bar bya ba'i phyir ngag 'di brjod par bya'o zhes bsam pa sngon du btang ba'o/ /bdag nyid lha mor bsgom pa ni rang gi 'og tu paM las pad+ma 'dab brgyad pa bsams la de'i steng du paM bsams te/ de gyur pa las sna tshogs rdo rje'o/ /de dag yongs su gyur pa las bdag nyid las kyi lha mo sna tshogs mar bsgoms te/ sku mdog ljang khu rgyan sna tshogs kyis brgyan pa'o/ /phyag gnyis pa la g.yas pa pi wang bsnams pa'o/ /g.yon pas cang te'u yongs su bzung bar bsams te/ de'i mgrin pa'i nang du paM las ngag gi 'khor lo kha dmar po rtsibs lnga pa bsams pa las/ de'i steng du a dmar po bsams te/ de las 'od 'phros pas phyogs bcu na bzhugs pa'i pad+ma'i rigs kyi lha mo/ /lus par bkug la 'khor lo'i aM la bstims te/ ngag yongs su brjod na skad cig ma gcig la yang dbyangs kyi yan lag rgya mtsho ji snyed pa thams cad brjod par 'gyur ba kho na'o/ /de mthar pha rol tu phyin pa drug dang ldan par bshad de/ ngag phul gre pa bsal ba dang/ gzhan gyis zhum par ma gyur cing/ myur bar 'grus dang ma yengs brjod/ /rnam par dpyod pas legs par sgrogs/ /lha mo yan lag drug dang ldan zhes bya ba la/ dkon mchog gsum la ngag phul ba ni sbyin pa'o/ /gre ba'i lung pa bsal ba la sogs pa ni tshul khrims so/ /mi gzhan la sogs pas lta ba la zhum par mi 'gyur cing bzod pa ni bzod pa'o/ /le lo med cing myur bar 'grus pa ni brtson 'grus so/ /gzhan la ma yengs par lha mo'i bsam pa dang ldan pa ni bsam gtan no/ /ngag brjod pa ni dbyangs dang tshig rnams ma 'khrul par dpyod cing legs par/ brjod pa'i skad cig ma rnams la ni shes rab kyi pha rol tu phyin pa la sogs pa yongs su rdzogs pas te/ de dag gi skad cig ma rnams la mnyam par bzhag pa kho na'o/ /lha mo yan lag drug dang ldan/ zhes bya ba ni/ sngar lha mor bsgoms pa'i phyir te/ 'bras bu ni go sla ba'i phyir ma bshad do/ /de'i mthar yid kyi mchod pa'i yan lag bshad par bya ste/ man ngag ldan dang blo brtan dang/ /yid ches zhing gnas sems zin pa// de bzhi ldan pa'i gang zag la/ /yid mchod mkhas zhes ngas bshad do/ /zhes bya ba la/ man ngag dang ldan pa'i bla ma la rim pa ji lta ba bzhin du man ngag thob pa'o/ /blo brtan pa ni sems rnam par dag g.yeng pa la sogs pa ma yin pa'o/ /yid ches pa ni bla ma'i man ngag nyid mchod pa'i khyad par du gyur pa la nges par yid ches pa'o/ /zhi gnas kyis sems 'dzin pa ni dmigs su med pa la gtan la phebs pa'o/ /de bzhi ldan pa'i gang zag la/ /yid mchod mkhas zhes ngas bshad do/ /zhes bya ba ni/ yid kyi mchod pa tsam la sogs pa rnam par bcad pa'o/ /de'i mthar man ngag bshad de/ dang por byang chub sems bskyed la/ snying kar yid bzhin nor bu bsam/ /de las byung ba'i mchod pa'i tshogs/ /me tog spos dang snang ba dang/ /dri dang byug pa zhal zas mchog / na bza' gdugs dang rgyal mtshan dang/ /ba dan rol mo mang po nyid/ /mchod pa'i tshogs ni ma lus pas/ /nam mkha' gang bar dbul bar bya/ zhes bya ba la/ dang bor byang chub tu sems bskyed pa ni yid kyis mchod pa'i sngon du bdag gis sems can thams cad mngon par rdzogs par 'tshang rgya bar bya ba'i phyir yid kyi mchod pa 'di brjod par bya'o/ /zhes bsam pa sngon du btang ba'o/ /rang gi snying khar raM las nyi ma'i dkyil 'khor bsams te/ de'i steng du kha dog sna tshogs pa bsams la/ de gyur pa las yid bzhin nor bu rin po che 'bar bas/ zur drug pa kha dog sngon po la cung zad skye ba yongs su bsams te/ phyogs bcu dus gsum gyi sangs rgyas dang/ chos dang dge 'dzun gyi tshogs rnams mdun du bsams la/ de las byung ba'i mchod pa'i tshogs phreng ba'i rtse mo'i tshul du aud pa la sogs pa'i me tog dang a ka ru la sogs pa'i bdug pa dang rin po che la sogs pa snang ba dang/ ga bur la sogs pa'i dri dang/ lha bshos la sogs pa'i bza' ba dang/ gdugs dang/ rgyal mtshan dang/ na bza' dang/ ba dan dang/ pi wang dang rnga la sogs pa'i rol mo sna tshogs pa yongs su dbul bar bya ba nyid do/ /de yang kha cig gi bsam pas ci de bde bar gshegs pas ni mchod pa'i tshogs nam mkha' gang bar dbul/ zhes gsungs na/ 'dir ni phreng ba rtseg ma zhes ci'i phyir bya snyam pa la/ nam mkha' gang ba ni shin tu bsam par dka' ba yin pas mi 'grub pa'i phyir phreng ba rtseg ma nyid pa kho na'o/ /de'i mthar pha rol tu phyin pa drug dang ldan pa bshad de/ mchod pa phul dang legs par gtsang/ /gzhan gyi blag tshor khong mi mi khro/ /ma rdzogs par du mi gcod/ /mnyam par bzhag dang rim par spyod/ /yid mchod mkhan po yan lag drug /ces bya ba la/ mchod ba phul ba ni skyon ba'o/ /mchod pa'i rdzas rnams la gtsang mar bsams ba ni tshul khrims so/ /bsam pa'i bar du gzhan gyi blag cor la khor mi khro ba bzod pa ni bzod pa'o/ /bsam pa ma rdzogs kyi bar du bar mi gcod par 'grub pa ni brtson 'grus so/ /mnyam bar bzhag pa ni bsam gtan no/ /mchod ba'i cho ga rim par ji bzhin par spyod pa'i skad cig rnams la ni shes rab kyi pha rol tu phyin pa la sogs pa yongs su rdzogs pa ste/ skad cig de rnams yang dag par gzhag par bya ba kho na'o/ /yid mchod mkhan po yan lag drug /zhes pa ni/ de la pha rol tu phyin pa drug dang ldan te/ 'bras bu ni go sla ba'i phyir 'dir ma bshad do/ /de mthar pha rol gyi mchod pa yan lag bshad par bya ste/ rdzas rnams phun sum tshogs pa dang/ gtsang mar bshams dang dang bas zin/ /rim pa ma nor gnas shes dang/ /chud ma gsan par mchod 'gyur ba'i/ /de drug ldan pa'i gang zag la/ /rdzas mchod mkhas zhes nges bshad do/ /zhes bya ba la/ rdzas phun sum tshogs pa ni mchod pa'i rdzas me tog dang spos la sogs pa ma lus pa thams cad 'byor ba'o/ /gtsang mar bshams pa ni lhag ma la sogs pa ma yin pa dang/ dri ma dang mi gtsang ba la sogs pas sbags pa ma yin pa'o/ /dad pas zin pa ni 'jig rten gyi grags pa'i phyir ma yin pa'o/ /sems dang po'i sgo nas 'bul ba'o/ /rim pa ma nor ba ni bde bar gshegs pas mdo sde ri bo'i zom las su/ /'khor los sgyur rgyal 'byor pa bzhin/ /dang bor gnas sogs tha mar ni/ sna tshogs rol mo dkon mchog mchod/ ces gsungs pas me tog dang gdan dbul ba la/ de nas bar du bza' ba la sogs pas yongs su mchod la/ /tha mar rol mo sna tshogs pas yang dag par mchod pa'o/ / gnas shes pa ni me tog zhal la dbul ba dang/ bdug pa shangs la dbul ba la sogs pa'i gnas shes pa'o/ /chud ma gsan pa ni mchod pa'i rdzas gzhan du ma gyag pa'o/ /de drug ldan pa'i gang zag la/ /rdzas mchod mkhas shes pas bshad do// zhes pa ni/ /dad pas zin pa 'am/ mchod pa tsam la sogs pa rnam par bcad pa'o/ /de'i mthar man ngag bshad de/ dang por byang chub sems bskyed la/ /bdag nyid las kyi lha mo ni/ /sna tshogs pa ru bsam byas la/ 'od zer nam mkha' phyogs spros pas/ /sangs rgyas byang chub sems dpa' dang/ /dam chos ma lus tshogs rnams kun/ /mkha' la sprin bzhin rab bsams te/ so sor legs par dbul bar bya/ zhes bya ba las/ dang por byang chub tu sems bskyed pa ni bdag gis sems can thams cad mngon bar rdzogs par 'tshang rgya ba'i phyir mchod par bya'o/ /zhes bsam pa sngon du btang ba'o/ /bdag nyid las kyi lha mo sna tshogs mar bsam pa ni rang gi 'og tu paM las pad+ma 'dab ma brgyad pa bsams te/ de'i steng du ba las byung ba'i sna tshogs rdo rje'o/ /de dag yongs su gyur pa las bdag nyid las kyi lha mor bsam byas te/ sku mdog ljang gu phyag gnyis pa la rgyan sna tshogs kyis brgyan pa bsam par bya'o/ /de'i snying gar a las zla ba'i dkyil 'khor bsams te/ de'i steng du hUM bsams la/ de las 'od 'phros pas phyogs bcu'i sangs rgyas dang/ de dag gis gsungs pa'i dam pa'i chos dang/ byang chub sems dpa' la sogs pa'i dge 'dun gyi tshogs nam mkha' la sbyin bzhin du bsams la/ sangs rgyas dang chos dang dge 'dun rnams las so sor dbul bar bya'o/ /de'i mthar bdag nyid kyi yan lag khrus gsol ba bshad de/ dag par byed pa khrus kyi mchog /lugs kyi sku ni gcig po la/ /phyogs bcu'i bde gshegs ma lus pa/ /gong ma'i sbyor bas bkug byas la/ /de'i nang du til gyi ni/ /gong bu bzhin du rdzogs par bsam/ /de bsams de la khrus gsol las bas /ma lus khrus gsol dag pa yin/ zhes bya ba la lus kyi sku ni chu yis 'dzin/ 'jig par mi 'gyur ba'i phyir de kho na la khrus kyi gzhi bca' o/ /dag par byed ces pa ni bde bar gshegs pa la dri ma'i rnam pa ni mnga' yang de'i rkyen gyis bdag dang sems can gyi bag chags kyi dri ma yongs su dag par 'gyur ba la dgongs pa'o/ /phyogs bcu dus gsum gyi bde bar gshegs pa ma lus pa rnams gong ma'i sbyor ba'i snying ga nas 'od zer spros pas bkug la sku'i nang du til gyi gong bu bzhin du ma lus par rdzogs par bsam pa'o/ / de la khrus yang dag par gsol bas bde bar gshegs pa ma lus pa rnams kyang khrus gsol ba yin la/ dag ces pa ni bdag dang sems can thams cad kyi bag chags kyi dri ma dag par 'gyur ba'o/ /de'i mthar pha rol tu phyin pa drug dang ldan pa bshad de/ mchod pa dul dang gtsang mar bshams/ /srog chags gnas pa'i phyir bsal ba dang/ mchod pa 'grus dang ma yengs 'bul/ /rnam par dpyad nas bde gshegs la/ /phyi rol lha rnams rtogs pas bsal/ /sna tshogs lha mo yan lag drug / ces bya ba la/ mchod pa phul ba ni sbyin pa'o/ /gtsang mar bshams pa ni tshul khrims so/ /mchod pa'i rdzas rnams la srog chags phra mo rnams bsal ba ni bzod pa'o/ /le lo med par mchod par 'grus pa ni brtson 'grus so/ /lha mo'i bsam pas ma yengs par 'bul ba ni bsam gtan no/ /bdag gis bde bar gshegs pa rnams la yang dag par dpyad nas phyi rol pa'i lha dbang phyug chen po la sogs pa'i cha byad rnams phyir bsal ba'i skad cig rnams la ni/ shes rab kyi pha rol tu phyin pa la sogs pa yongs su rdzogs pa ste/ de dag gi skad cig rnams la ni mnyam par gzhag pa'o/ /sna tshogs lha mo yan lag drug ces pa ni rang gi lha mo sna tshogs mar bsgom pa'i phyir te/ 'bras bu ni go sla ba'i phyir ma bshad do/ /de'i mthar sngags bzlas pa'i yan lag bshad par bya ste/ man ngag bcas dang 'bru gsal zlos/ /de don go dang phreng bar bcas par chad med dang ldan pa yi/ /de lnga ldan pa'i gang zag la/ /bzlas pa mkhas shes ngas bshad do zhes bya ba la/ man ngag bcas pa ni sngags bzlas pa'i man ngag dang ldan pa'o/ /'bru gsal ba ni sngags de'i sgra yongs su dag pa ste/ rdzogs pa'i mthar phyin pa'o/ /don go bar ni sngags zlos pa dang de'i don go bdag skad cig gcig la dus mnyam pa ste/ dper na pA paM dzA re swAhA/ zhes bzlas pa'i skad cig la sdig pa'i nang zhi par gyur cig ces pa'i don go ba lta bu'o/ /phreng bar bcas pa ni grangs kyi tshad 'dzin pa'i phyir phreng ba 'dzin pa'o/ /bar chad med pa ni sngags ma thon gyi bar gzhan gyi tshig gis bar mchod pa'o/ /de lnga ldan pa'i gang zag la/ /bzlas pa mkhas zhes ngas bshad do/ /zhes bya ba la/ man ngag med pa dang/ rang dgar bzlos pa dang/ bzlos pa tsam la sogs pa rnams par gcod pa'o/ de'i mthar man ngag bshad de/ dang por byang chub sems bskyed la/ /bsgrub dang las la sbyor ba'i tshe/ /dbugs ni phyi ru mi rgyu bar/ /phan tshun lha yi bsam pa yis/ /de'i bzlas pa bya ba yin/ zhes bya ba la/ dang por byang chub tu sems bskyed pa ni bdag gis sems can thams cad mngon par rdzogs par 'tshang rgya bar bya ba'i phyir sngags 'di bzlas par bya'o/ /zhes bsam pa sngon du btang ba'o/ /bsgrub pa zhes pa ni sngon du lha? gang nye bar yang dag par bsnyen pa dang/ de rdzogs pa'i rjes la zhi ba la sogs pa la sbyor bas te/ de'i tshe bdag dang sngags de nyid kyi lha rnams gnyi ga cho ga rnam pa gsum las bskyed de/ ngo bo gcig par sgom pa'o/ /dbugs ni phyi ru mi rgyu bar/ /zhes pa ni/ yi ge cha gsum pa rnams skad cig kyang bar du rgyun ma chad par 'od 'phro zhing gsal bar brtsegs nas cig nas gcig tu 'khor bar bsams te/ dper na zo chun rgyud me'i tshul du yongs su bsam pa'o/ /de yang de'i skad cig de nyid la lha'i ngo bor gsal ba dang/ don go ba dang/ 'bru gsal ba dang rgyun ma chad pa rnams dus mnyam pa'o/ /de'i mthar pha rol tu phyin pa drug dang ldan par bshad de/ sngags bzlas pa dang 'khrul pa med/ /phyi rol g.yeng ba yongs su bzod/ /myur bar bar chad med pa dang/ /man ngag mnyam par bzhag pas zlos man ngag sngags kyi don la spyod/ /lha de yan lag drug dang ldan/ zhes bya ba la/ sngags bzlas pas pha rol tu phyin pa drug sbyin pa'o/ /sngags bzlas pa la 'khrul pa med pa ni gtsang ma ste tshul khrims so/ /phyi rol gyi g.yeng ba sgral bzod pa ni bzod pa'o/ /sngags la myur zhing le lo med pa ni brtson 'grus so/ /gong gi man ngag mnyam par bzhag pas bzlos pa ni bsam gtan no/ man ngag dang sngags kyi don rnams la rnam par dpyod pa'i skad cig la ni shes rab kyi pha rol tu phyin pa la sogs pa yongs su rdzogs pa ste/ de dang de'i skad cig rnams la ni mnyam par bzhag pa kho na'o/ /lha de yan lag drug dang ldan zhes pa ni rang lha'i ngo bor bsgom pa'i phyir de/ 'bras bu ni go sla ba'i phyir ma bshad do/ /de'i mthar bsgom pa'i yan lag bshad par bya ste/ bla mas zin dang man ngag bcas/ /sngon du sems ni gtan la phebs/ /rnam par mi g.yeng rtog dang gal/ /kha zas gos sogs don mi gnyer/ yid gzhungs bdun dang ldan pa la/ /bsgom pa mkhas shes pas bshad do/ zhes bya ba la/ bla mas zin pa ni sngon du yang dag pa'i bla ma man ngag phyin ci ma log par ston pa la mkhas pa snying rje chen po dang ldan pa/ /'gro ba'i don la brtson zhing rnyed pa'i phyir ma yin pa'i byang chub kyi sems dang ldan pa la rim pa ji bzhin par bsnyen te/ de yis yongs su zin pa'o/ /man ngag bcas pa ni bla med yis man ngag yongs su gnang pa'o/ /sngon du sems gtan la phebs pa ni bla ma des bdag la byin gyis brlabs pa'i rim pas sems yongs su zin nas 'khor ba'i rlung gis bskyod par mi nus pa ste/ dper na bum pa'i nang gi me mar phyi rol gyi rlung gis mi g.yo zhing 'od gsal ba ste/ gcig tu gnas pa bzhin no/ /rnam par mi g.yeng ba ni blo mi rgod pa ste/ dang po'i yan lag go /rtog pa dang bral ba ni dngos po'i mtshan ma sna tshogs pa 'byung ba la mi rtog pa'o/ /kha zas gos sogs don du mi gnyer ba ni 'jig rten gyi kha zas dang po la sogs pa la cher chags pa ma yin pas te/ dper na drang srong rgyags pa nags dang dur khrod la sogs par gnas nas/ 'bras bu dang dur khrod kyi zas la sogs pa za zhing shing lo dang dur khrod kyi ras la sogs pa gon nas yang dag pa'i ye shes tshol ba bzhin du gnas pa'o/ /yid gzhungs pa ni yang dag pa'i ye shes la zhen pa chen pos gnas pa ste/ dper na ri dags nag po bu la zhen nas srog la pa bkyang mi gtong ba bzhin du gnas pa'o/ /de bdun ldan pa'i gang zag la/ bsgom pa mkhas zhes pas bshad do/ /zhes pa ni/ rnam par rtog pa la cher gnas pa dang/ mchin ma'i g.yeng ba dang bcas pa bsgom pa tsam la sogs pa rnam par bcad pa'o/ /de'i mthar man ngag bshad do/ /dang po byang chub sems bskyed la/ /rim pa bzhi la rab bzhugs te/ bde ba chen po ye shes sku/ /rtog pa thams cad rab spangs pa'i/ /de nyid ngo bo gcig/ bsgom pa zhes bya ba la/ dang por byang chub tu sems bskyed pa ni bdag gis 'gro ba thams cad bla na med pa yang dag par rdzogs par 'tshang rgya bar bya ba'i phyir gnyis su med pa'i ye shes btsal bar bya'o/ /zhes bsam pa sngon du gtang ba'o/ /rim pa bzhi la rab zhugs te zhes pa ni dang por 'jig rten pa rnams kyis rtags pa'i 'di ltar snang ba'i dngos po thams cad yod pa nyid du 'dod pa la bdag gis yongs su brtag pa'o/ /de ci phyir brtag can/ bcom ldan 'das kyis theg pa chen po'i mdo mngon par rtogs pa la/ dngos por rags pa shes byas nas/ rdul phran rdzas su shes par bya/ de spangs rnam par rigs pa tsam/ /phra mo che la mi rtog cing/ /gdong nas ma skyes 'gag pa med/ /ces gsungs pa'i phyir te/ de nyid rtags pas rol mo'i char mi snang ba la/ nyan thos kyis brtags pa'i rdul phra rab kyis char mthong ba'o/ /de nyid yongs su rtags pas 'di ltar snang ba thams cad sems las phyi rol na med pa'i phyir rang gi mtshan nyid du snang ba'o/ /zhes dngos por snang ba thams cad la yang dag par mi rtog pa'o/ /sems de nyid yongs su brtags pa las sems nyid 'khrul bar snang zhing yang dag par med de/ gdod nas stong pa'i rang bzhin du grub pa'o/ /rim pa bzhi pa rab zhugs te/ zhes pas/ lnga pa 'bras bu'i bdag nyid rnam par rtog pa thams cad dang bral ba'i ye shes kyi sku nyid mngon par grub pa'o/ /kha cig gi bsam pas de'i phyir sdug bsngal gyi rnam pa mang po la nye bar rtog pa dang po nyid stong pa'i rang bzhin rnam par rtog pa dang bral ba nyid la gnas na 'gal ba ni ci yod ce na/ stong pa'i rang bzhin ni rim par bsdus pa las stang bar blo brtan par 'gyur gyi/ thog ma nyid du stong pa la dmigs na stong pa la blo mi brtan yid ches par mi 'gyur ba'i phyir ro// de ltar de nyid ngo bo cig bsgom pa de kho na nyid gnyis su med pa'i ye shes bde ba chen po'i ngang rnam par rtog pa thams cad dang bral ba de man ngag bdud rtsi 'khor lo'i thabs la yang dag par thob ste/ ci'i ngo bor yang mi rtog pa de'o/ /de'i mtshan nyid ji lta bu zhig yin snyam pa la/ yod pa ma yin med pa min/ gnyi ga'i ming ni rab spangs to/ /gsum pa nye bar mi rtog cing/ bzhi pa de la nye bar gnas/ /yod pa ma yin zhes pa ni/ /rtag pa'i mdza' la mi gnas pa'o// med pa min zhes pa ni chad pa'i mdza' yongs su bkag pa'o/ /gnyi ga'i mdza' yongs su spangs pa ni yod pa dang med pa dang yod pa'ang ma yin pa la mi rtog pa ste/ bzhi pa zhes bya ba ni dngos por gzung ba med de/ mdza' gsum spangs pa nyid la bzhi ba zhes gsungs te/ ci yang mi rtog pa nyid do/ /de nyid ji lta bu zhig yin snyam pa la/ de ni 'di'i bdag nyid can/ /'khor min mya ngan 'das pa min/ /bdag nyid ma yin gzhan ma yin/ /bde ba ma yin sdug bsngal min/ /rtag pa ma yin mi rtag min/ /snang ba ma yin mi snang min/ /zhes gsungs te/ 'khor ba ma yin pa ni rnam par rtog pa dang bral ba'i phyir ro/ /mya ngan las 'das pa ma yin pa ni gdod nas ye shes kyi sku'i rang bzhin yin pa'i phyir ro/ /yang dag ba'i ye shes sngon du rnyed pa ni stong pa chen po'i rang bzhin grub pas bdag dang gzhan du mi rtog pa dang/ bde ba dang sdug bsngal du mi rtog pa dang/ rtag pa dang mi rtag pa dang/ snang ba dang mi snang ba la mi rtog pa nyid do/ /de nyid kyi ye shes kho na la bsgrub pa'i spyod lam yin te/ de'i spyod lam 'di yin te/ mig btsums ma yin phye ba min/ /'dug pa med la langs pa med/ /bsgom pa po med bsgom pa'ang med/ /stan med gos med gnas pa med/ /bying ba ma yin rgod pa min rim pa'i rjes la thob pa yi/ /rang bzhin mchog de 'od gsal ba'o/ /zhes gsungs te stong pa chen po'i rang bzhin yin pa'i phyir ro/ /mig btsum pa yang med/ /phye ba yang med/ 'dug pa'ang med/ langs pa'ang med/ bsgom par bya ba yang med/ stan la gnas pa'ang med/ gos kyang med/ bsam gtan gyi ro la chags pa'i bying ba'ang med/ rnam par g.yeng ba'i rgod pa'ang med pa nyid do/ /de nyid rim pa'i rjes ni gnas dang sa bon la sogs pa ste/ mar me'i rtse mo lta bur mthar 'od gsal ba'i bdag nyid du bsgom pa kho na'o de la 'od gsal zhes gsungs pas kha dog gi rnam pa gsal ba ma yin pa'i phyir ro/ /'od gsal de'i kha dog kyang/ dkar po ma yin ser po min/ /dmar po ma yin sngon po min/ /nag por snang ba mi rtog cing/ /kha dog lnga dang yang dag ldan/ /bder gshegs lnga yi gzugs 'chang zhing/ /bde ba chen po'i rol pas gnas shes gsungs te/ kha dog dkar po la sogs pa'i kha dog gi rnam par mi bsgom pa'o/ /kha dog lnga dang yang dag ldan/ zhes pa ni/ kha dog lnga bsres na ci'i rnam par brjod du med pa'i phyir/ rang bzhin du 'od gsal ba tsam la kha dog gi rnam par ma bzung ba nyid do/ /bde gshegs lnga'i gzugs 'chang ba ni gnyis su med pa ni ye shes de nyid rnam par snang mdzad la sogs pa'i rigs lnga'i bde bar gshegs pas 'gro ba'i don mdzad pa nyid du grub pa'o/ /de nyid bde ba chen po rnam par rtog pa thams cad dang bral ba nyid de/ rol pa ni 'gro ba'i don la brtson par bzhugs pa la dgongs pa'o/ /de nyid longs spyod rdzogs pa'i sku dang ldan par gsungs pa ste/ rin chen gzhal yas nyams dga' bar/ /mtsho dang rdzing bus rab brgyan te/ /dar ber sna tshogs gos gyon cing/ /rin chen sna tshogs rgyan gyis brgyan/ /btsun mo mang po dpag med las/ /'byung ba'i bu yis 'gro ba sgrol/ /rang nyid tshogs kyi rol mo dang/ /mngon par longs spyod bsam mi khyab/ /gzhal yas mchog kyang de la yod/ /dgra yi 'jigs pa de la med/ /ces gsungs te/ rang bzhin du 'od gsal ba'i chos kyi sku'o/ /rin chen gzhal yas nyams dga' bar/ zhes pa ni/ mngon par longs spyod bsam gyis mi khyab pa zhes pa'i bar gyis ni longs spyod rdzogs pa'i skur mtshan dang dpe byad dang ldan pa/ rgyan sna tshogs kyis brgyan te/ rin po che'i rang bzhin gzhal yas khang rgya chen po na rdzas dang chos kyi longs spyod chen po nyid rdzogs pa ste/ rnam par snang mdzad kyi cha lugs kyis la gnas pa'i byang chub sems dpa' rnams la chos ston pa nyid du grub pa'o/ /bde gshegs lnga yis gzugs 'chang zhing/ /btsun mo mang po dpag med las/ /'byung ba'i bu yis 'gro ba sgrol/ zhes pa ni/ btsun mo ni shes rab kyi pha rol tu phyin pa skad cig bye brag mang po dang ldan pas te/ de las yang dag par byung ba sprul pa'i sku dpag tu med pa dgye ste/ gang dang gang las 'dul ba bde ba de la thabs kyis 'gro ba yongs su 'dul bar bstan pa'o/ /pha dang ma ni sbyor brtson pas/ /bde ba'i 'bras bu mngon par 'grub// ma med pha la bde ba med/ /pha med ma la reg mi 'gyur/ /pha dang ma ru gnyis shes na/ bde ba mdog gi bu ru 'gyur/ /zhes bya ba la/ pha dang ma ni thabs dang shes rab ste/ thab ni zhi gnas so/ /shes rab ni lhag mthong ngo/ /de gnyis yongs su 'brel pa las bde ba'i 'bras bu yang dag pa'i ye shes skye ba nyid do/ /pha med ma la reg mi 'gyur ba ni/ /zhi gnas gtan la ma phebs par lhag mthong nye bar mi rnyed do/ /ma med pha la bde ba med pa ni lhag mthong yongs su ma rnyed na zhi gnas la rtog pa dang bcas pa'i phyir yang dag pa'i ye shes med pa nyid do/ /pha dang ma ru gnyis shes na/ /bde ba mchog gi bu ru 'gyur ba ni zhi gnas la mngon par bslabs te lhag mthong yang dag pa skyes pas gnyis su med pa'i ye shes skye ba kho na'o/ /cig car pha la mngon zhen na/ pha yis rtag tu 'tshogs par 'gyur/ /pha yi mtshan nyid ma shes na/ ma la mngon par zhen mi btub/ /gal te zhen par gyur na ni/ /de ni brlag par 'gyur ba yin/ zhes bya ba la/ pha ni kun rdzob nyid la yang dag par 'dzin cing rtag tu mngon par zhen na de nyid du rtag tu 'khor bar 'khor zhing/ sdug bsngal gyi rnam pa mang po myong zhing 'khor bar gnas par 'gyur ba nyid do/ /pha'i mtshan nyid ni kun rdzob kyi mtshan nyid de mi rtag pa dang/ sdug bsngal ba dang/ stong pa dang/ bdag med bar yongs su shes par bya ste/ de shes pa las yang dag pa'i ye shes mngon par mthong ba kho na ste/ kun rdzob kyi mtshan nyid ma shes par don dam pa la 'jug par mi 'gyur ba nyid do/ /gal te kun rdzob kyi mtshan nyid ma shes na stong pa'i sgra la zhen nas kun rdzob khyad du bsad nas brlag par 'gyur ba nyid do/ /de'i mthar pha rol tu phyin pa drug dang ldan par bshad de/ sems gtong ba dang rtog pa yi// skyon gyis ma gos dri ma mad/ /sdug bsngal che las yongs su bzod/ /bar chad med bar rtag tu bsgom/ /de nyid gcig la mnyam par 'jog /bde ba'i 'bras bu ye shes skyes/ /sgom chen yan lag drug dang ldan/ /zhes bya ba la/ bsam pa la sems btang ba ni sbyin pa'o/ /rnam par rtog pa'i skyon gyis ma gos pa ni tshul khrims so/ /zas dang gos la sogs pa yid phongs pa dang/ sdug bsngal gyi rnam pa mang po la bzod pa ni bzod pa'o/ /rgyun du bar chad med par sgom pa ni brtson 'grus so/ /de kho na nyid rtse gcig pa'i bsam gtan la mnyam par bzhag pa ni bsam gtan no/ /de las 'bras bu ye shes skyes pa'i skad cig rnams la shes rab kyi pha rol tu phyin pa la sogs pa yongs su rdzogs pa ste/ skad cig rnams la mnyam par bzhag pa kho na'o/ /sgom chen yan lag drug dang ldan/ zhes bya ba ni sgom chen de pha rol tu phyin pa drug dang ldan pa bstan te/ 'bras bu ni de de bzhin te go sla ba'i phyir ma bshad do/ /de'i mthar gdams ngag bshad par bya ste/ kye ma 'gro ba sdug bsngal myong/ /kye ma 'gro ba sdug bsngal gnas/ /kye ma 'gro ba sdug bsngal bde/ /kye ma 'gro ba'i sdug bsngal spongs/ /zhes bya ba la/ kye ma zhes bya ba'i sgra ni yang dag par bod pa'i tshig ste/ kye ma 'gro ba sems can thams cad nyon cig zhes pa'o/ /'gro ba sdug bsngal myong ba ni 'khor ba'i sdug bsngal skye rga na 'chi'i sdug bsngal la sogs pa dag par myong ba'o/ /'gro ba sdug bsngal gnas pa ni/ /srid pa'i rgya mtsho sdug bsngal gyi gnas yongs su gnas pa'o/ /'gro ba sdug bsngal bde zhes pa ni 'gro ba rnams sdug bsngal gyi rnam pa de nyid la bde bar lta zhing sdug bsngal la mngon par rgyug pa'o/ /de nyid la zhen pas 'khor ba'i rgyu ru gyur pas yang nas yang du sdug bsngal gyi rgya mtshor bying bas na 'gro ba rnams sdug bsngal spongs zhes yang dag par gnas pa'o/ /chos 'di spyod pa'i gang zag gis/ /dang por byang chub sems bskyed nas/ /rtag tu bzhan gyi sdug bsngal la/ /yid ni log par mi bya'o/ /zhes bya ba la/ dam pa'i chos zab mo mngon par rtogs pa 'di la yang dag par zhugs pa'i gang zag ni byang chub sems dpa' yin pas/ byang chub sems dpa' des dang por 'gro ba sems can thams cad bsgral bar sems bskyed nas bar du 'gro ba gzhan gyi sdig pa'i las mang po byed pa mthong nas/ de dag gi bde bsgral bar bya ba'i phyir dag pa'i las rnams byas kyang 'gro ba rnams sdig pa'i lam la zhugs pas nam du yang grol bar mi 'gyur ro snyam pas byang chub kyi sems yongs su spang bar mi bya'o/ /'gro ba rnams la bu lta bur/ /byams kyis kun la pha ltar mthong/ /ji srid thog ma med pa nas/ /pha ma ming srid phu nu dang/ tsha zhang 'brel par ma gyur pa/ /gang yang yod pa ma yin pas/ /de bas de ltar kun la brtag /ces bya ba ji srid thog ma med gnas da ltar gyi bar du pha dang ma dang ming srid dang tshang zhang la sogs pa'i 'brel bar ma gyur ba gang yang med pas na 'gro ba sems can thams cad la bu lta bur yongs su brtag go / de lta bur brtag ces bya ba ni/ 'brel pa rnams la bu la zhen pa che ba'i phyir na du lta bur brtag pa'o/ /du lta bur brtags pa las 'jig rten 'dir bdag la sems can thams cad kyis pha lta bur mthong zhing kun gyi snying du sdug par 'gyur ro/ /pha ma la sogs 'brel pa la/ /zhen pas chags par mi bya zhing/ /chags pas 'khor ba'i rgyu ru 'gyur/ /gzhan la zhe sdang phra dog skyes/ /kun gyis bdag la dgra ltar sdang/ zhes bya ba la/ da res tsam gyi pha ma la sogs pa'i 'brel pa la ni/ zhen pa chen pos yongs su chags par mi bya'o/ /de dag la yang dag par zhen bas na 'khor pa'i rgyu ru 'gyur ba'i phyir rab tu spangs pa kho na'o/ /'gro ba sems can gzhan rnams la bdag gi yul la brten te zhe sdang dang phra dog la sogs pas dag rtsub po dang lus kyi sbyor ba rtsub mo rnams yongs su mi bya'o/ de gal te byas gyur na bdag la 'jig rten 'di dang phyi mar dgra mang por 'gyur te/ kun nas sdang bar 'gyur ro/ /dam chos ma lus kun bris kyang/ man ngag 'di dang ma ldan na/ zhes pa nas skad cig gcig kyang ma bsgoms yin zhes bya ba'i bar du ni rnam pa gnyis su go bar bya ste/ man ngag 'di dang mi ldan na 'di pa la sogs pa'i chos spyod ci byas kyang bsod nams kyi tshogs chung ba'i phyir rnam par dag pa'i sgra gcig kyang byas pa med de/ zhes gsungs pa'o/ /'og nas bye brag gis sgra las til dang ri rab khyad par ro/ /zhes gsungs pas na/ bsod nams kyi tshogs shas chung ba las yod pa nyid du bstan pa'o/ /man ngag 'di 'dzin nga yi bu/ /nga yi bu yis srog gcod spongs/ /srog bcad pa yi 'bras bu yis/ /bskal pa bye ba brgya dag tu rang nyid srog kyang gcod par 'gyur/ /'khor ba'i rtsa ba nyid dang yang/ /sdug bsngal sna tshogs myong bar 'gyur/ /gal te srog dag gcod 'gyur na/ /chos pa'i ming ni yod ma yin/ zhes bya ba la/ dam pa'i chos zab mo mngon par rtogs pa'i man ngag 'dzin pa ni nga'i bu/ zhes gsungs te/ dper na rgyal po'i bu yis pha rgyal po'i cha byad dang/ rgyal srid 'dzin pa bzhin du man ngag 'di 'dzin pa ni bde bar gshegs pa'i cha byad dang ngang tshul 'dzin pa'i phyir du zhes pa'o/ /de'i mthar srog gcod pa yang dag par spongs zhes gsungs te/ srog bcad pa'i 'bras bu yis bskal pa bye ba brgyar rang gi srog rnam par smin pa'i tha ma gyis gzhan gyis gcod par 'gyur ba dang/ gzhan gyi yang sdug bsngal rnam pa sna tshogs pa myong ba dang/ chos pa tsam gyi ming yang yod pa ma yin pa ni dgongs pa ma yin zhing yang dag par nges pa kho na'o/ nga yi bu yis ma byin len/ /thag ring ba ru spang bar bya/ /ma byin blangs pa'i 'bras bu yis/ /bskal ba bye ba brgya dag tu/ /mi bzang yi dags skye bar 'gyur/ zhes bya ba la/ ma byin par blangs pa'i rnam par smin pas ni bskal pa bye ba brgya ru mi bzad pa'i yi dags me lce'i 'khor lo can du skye bar 'gyur ba nyid do/ /nga'i bu yis 'dod log spongs/ /'dod log spyad pa'i 'bras bu yis/ /bskal pa bye ba brgya stong du/ /ro myags 'dam du skye bar 'gyur/ zhes bya ba la/ 'dod pa log par spyad pas ni 'jig rten 'dir mthu dang stobs dang bkrag la sogs pa'ang nyams par 'gyur zhing/ pha rol tu bskal pa bye ba brgya stong du ro myags kyi 'dam du skye ba ni nges pa'i don du shes par bya'o/ /nga yi bu yis rdzun tshig spongs/ /brdzun chog smras pa'i 'bras bu yis/ /bskal pa bye ba stong du yang/ /dam chos thos par mi 'gyur zhing/ dmyal bar nges par skye bar 'gyur zhes gsungs pa la/ brdzun gyi tshig smras 'bras bu yis/ /bskal pa bye ba stong du dam pa'i chos rin po che'i ming yang thos par mi 'gyur zhing/ dmyal bar skye bar 'gyur ba nyid do/ /gzhan yang phas pham par 'gyur ba'i chos thams cad las shin tu smad pas na 'dir ni gsal bar ma bshad do/ /bu yi pha yis gdam ngag nyon/ /bu yis pha yis gdam ngag gzung byas na/ /man ngag med pa'i grogs dag la/ ltos te nga rgyal mi bya zhing/ /gzhan dag la yang snang mi bya/ /gzhan smad sdig pa dpag tu med/ /ces bya ba la 'gro ba sems can thams cad la sa? ba lta bur nyon mongs pa'i 'jigs pa las sgrol zhing/ /gnyis su med pa'i ye shes skyed par byed pas na pha zhes bya ste/ pha yis nyon mongs pa las sgrol ba gdam ngag 'di 'gro ba rnams kyis nyon zhes pa'o bu 'gro ba thams cad kyis pha yi gdam ngag 'di yongs su gzung zhi bza' ba dang de la mngon par spyad ba nyid do/ /de yang man ngag 'di dang ldan pa'i gang zag rnams ni gdam ngag dang ldan te/ gzhan la sogs pa rnams ni bde bar gshegs pa'i bstan pa la bzhugs pa tsam las chos spyod pa ni rnam pa ci dang mi ldan no/ /zhes rang las nga rgyal pa'i rnam pas gzhan la snang bar bya ba ma yan zhing/ man ngag 'di dang mi ldan pa rnams la yongs su bstan pa dang spel bar bye ba kho na'o/ /nga rgyal byas pa'i 'bras bu yis/ /bskal pa bye ba brgya dag tu/ /dmu chu can du skye bar 'gyur/ /nga rgyal dug gi rtsa ba yin/ /nga rgyal byang chub gsum la sgrib/ /nga rgyal 'phral du sdug bsngal bskyed ces bya ba la/ bde bar gshegs pas man ngag 'di gsungs pa la/ skye bo mi shes pa phal pa rnams kyis nga rgyal gyi rgyu ru song du dogs las na bde bar gshegs pas nga rgyal la shin tu smad pa yin te/ nga rgyal gyi 'bras bu skye ba phyi mar ci bya ste/ stong pa zhes brjod nas ci'i phyir mi bya/ /bde ba ni rnam par rtog pa yin no snyam pa las/ bcom ldan 'das kyis snang ba rin po che'i mdo snyan gyi gong rgyan dum bu tha ma chos nyid bstan pa'i le'u shlo ka bzhi brgya lnga bcu pa las/ ngag gi lam las 'das gyur kyang/ rtog dang bral phyir chos nyid la/ /bde ba che zhes rab tu brjod/ ces gsungs pa dang gzhan yang rdo rje brtsegs pa'i mdo las/ su ni yang dag ye shes te/ ka ni gang duAng mi gnas pas/ mi rtog ye shes bde ba che/ zhes gsungs pa'i phyir/ stong pa chen po ye shes te tshig gi brjod pa las 'das kyang rtog pa ni sdug bsngal ba/ de dang bral ba nyid bde ba yin pa'i phyir/ bde bzhes brjod pa la 'gal ba med pa'i phyir ro/ /de bas na yang dag pa'i ye shes sa nyid dngos po'i chos gang la yang mi gnas pa dang/ mi rtog pa nyid bde ba yin pa'i phyir bde ba'o/ /de nyid 'jig rten pa'i bde ba las khyad par du 'phags pa'i phyir/ chen po ste de bas na bde pa chen po yin pas na/ yang dag pa'i ye shes la bde ba chen po zhes bya ba kho na'o/ /stong pa nyid dang mi ldan par/ /kun rdzob dngos po khyad bsad nas/ /chad pa'i mdza' la mngon par zhen te/ 'di kun stong zhes tshig tu brjod/ /stong pa'i bdag po stong par 'gro /zhes bya ba la/ stong pa nyid yang dag par ye shes kyi don dang mi ldan par kun rdzob kyi bden pa khyad du bsad de/ gzhan la sogs pa la dngos po snang ba 'di thams cad ni stong pa ste/ skye bar mi 'gyur ba nyid do zhes tshig tu brjod cing 'chad pa'i tshig gi stong pa'i bdag po ste/ gnyis su med pa'i ye shes kyis stong zhing med pas ni stong par ro/ /'gro ba ni ngan 'gro rnam pa gsum du 'gro bas na stong par 'gro ba nyid do/ /de bas na gnyi gar mi rtog gnyis la lta/ phyogs bcu sprul pa rab tu spro/ /ji bzhin 'gro ba'i don la sbyor/ /gang dang gang gis bsam pa la/ /de dang mthun pa'i de ba skongs/ zhes gsungs te/ kun rdzob gnyi gar mi rtog pa ni stong pa'o// gnyis la lta zhes pa ni/ don dam par ci'i ngo bo mi rtog pa dang/ kun rdzob tu dngos po thams cad la rim pa ji bzhin du 'gro pa'i don la sbyor ba ste/ sems can mos pa sna tshogs pa rnams dang/ yul dang dus dang gnas skabs kyi bye brag gis sems can thams cad kyi spyod pa dang mthun par byed pa ste/ 'jig rten gyi kha na ma tho ba nyid do/ /man ngag 'di la ma brten par zhen pa nas/ /'tshang rgya ru mi 'gyur ro zhes bya ba'i bar du ni de de bzhin te/ dgongs pa ma yin no/ /'di ni thabs kyi yan lag ldan/ /dper na chu bo chen po la/ /mi rnams pha rol 'gro 'dod pas/ /'di thabs med pa'i gang zag ni/ /chu yi nang du phyir dang 'dra/ /'di dang ldan pa'i gang zag ni/ /bar snang dag la myur bar 'gro /zhes bya ba la/ dper na chu bo chen po la mi la sogs pa pha rol tu 'gro bar 'dod pas/ man ngag 'di dang mi ldan pa rnams ni chu po'i nang du brgal ba dang 'dra ste/ pha rol tu myur du byin pa dang/ lus ngal ba dang/ gsher ba dang sprul la sogs pas 'dzin pa dang/ chus khyer ba la sogs pas 'jigs pa dang bcas pa bzhin du/ byang chub myur du mi 'thob pa dang/ bdud kyi bar chod 'ong ba dang/ 'khor ba phyir 'khor ba dang/ sdug bsngal cher byas kyang 'bras bu chung ba nyid do/ /man ngag 'di dang ldan pa rnams ni zam pa la 'gro ba dang mtshungs te pha rol tu phyin pa dang/ lus ngal ba med pa dang/ ma gsher ba dang/ chus mi khyer ba dang/ sprul la sogs pa'i 'jigs pa med pa bzhin du/ byang chub myur bar thob pa dang/ bdud kyi bar chod du mi 'gyur ba dang phyir 'khor bar mi 'khor ba nyid do/ /de bas na chu bo'i pha rol du 'gro ba la zam pa thabs chen po dang ldan pa bzhin du yang dag pa'i ye shes tshol ba la man ngag 'di thabs chen po dang ldan pas shes par bya'o/ /tha mal pa dang khyad par mchog /'di dang mi ldan tha mal te 'di dang ldan pa mchog gi rgyu/ /de gnyis bye brag dper na ni/ /til dang ri rab khyad par ro/ /zhes bya ba la/ chos spyod rnam pa gnyis su gsungs te/ man ngag 'di dang mi ldan pa ni khyad par mchog gi chos spyod de/ khyad par zhes pa ni bye brag gi sgra'o// mchog ni bzang zhing rab kyi don te/ de gnyis kyi bsod nams kyi bye brag che chung gi tshang ni til dang ri rab tsam du gsungs te/ yang dag pa nyid do/ /'jam dpal 'di ni legs par spel zhes pa nas/ 'di bshad bsod nams khyad par 'phags zhes pa'i bar du ni de bzhin du go bar bya ste/ rtag tu byang chub sems bskyed pa dang/ bsam pa nyid la mnyam par 'jog cing man ngag dang bcas pa'i phyir nges don to/ /dper na mar me 'chig ru/ /'od ni gsal ba 'byung bar 'gyur/ /de bzhin nga yis bstan pa yang/ /nub kar zab mo'i chos dar 'gyur/ /bstan pa nub par gyur tsam na/ /'di min mgon skyabs med pa yin/ /'di ldan mgon skyabs bzang po yin/ /'jigs pa'i bag dang ldan mi 'gyur/ /de bas 'di ni 'gro kun gyis// mgon dang skyabs su 'di tshol cig ces bya ba la/ /dper na mar me 'chi ka ru 'od gsal bar 'byung ba ste/ de bzhin du bde bar gshegs pa'i bstan pa yang nyams dams par 'gyur ba las/ nub kar zab mo'i chos theg pa chen po gsang sngags dang shes rab kyi pha rol tu phyin pa la sogs pa dar cing rgyas pa las/ ldem por dgongs pa rnams kyang de de bzhin du gzung zhing log par spyad pa las nub par 'gyur ba nyid do/ /de bas na dgra yis 'jigs pa 'byung tsam ma rgyal po la skyabs btsal ba dang 'jigs pa'i bag tu mi 'gyur ba bzhin du bstan pa nub pa ste/ log pa'i dgra bar ba'i skabs su man ngag 'di dang mi ldan na mgon dang skyabs med pa yin te/ dgras khyer ba nyid do/ /man ngag 'di dang ldan pa rnams ni rgyal po ye shes la skyabs btsal ba ste/ log pa'i dgra nyon mongs pa dang/ 'khor bas 'jigs pa mi 'gyur ba kho na'o/ /de bas bde bar gshegs pa'i bstan pa nub par 'gyur tsam na 'gro ba rnams la mgon dang skyabs su zab mo'i chos man ngag mngon par rtogs pa 'di tshol cig ces bcom ldan 'das kyis yang dag par gdams pa'o/ /des par 'chi ba cha yod kyang/ /ci phyir des pa'i dug gis myos/ de bas dam chos 'di nyid la/ /yid ches pa yis brtan par zur zhes bya ba la/ 'chi ba zhes gsungs pa ni mi rtag pa ste/ dam pa'i chos spyod pa'i skal ba dang ldan pa dang/ mi ldan pa bde 'gro mi ru skye bar shin tu bka' ba ste/ ci'i phyir 'dod pa'i dug gis myos/ /mi'i gnas skabs 'dir man ngag 'di la yid ches pa yis brtan par gzung ste/ longs spyod ces gsungs pa'o/ /de'i rgyus skye ba phyi ma la mir skye ba'o/ /dam pa'i chos 'di skye ba 'di la longs ma spyod na/ skye ba phyi mar mir skye ba'i des pa med de/ ngan 'gror lhung ba phal che ba'i phyir/ bcom ldan 'das kyis yang dag par gdams pas/ 'di la kun yid ches par bya ste/ pha yi gdams ngag bu yis ma nyan na ngan 'gro'i gnas skabs su 'gyod par 'gyur ba nyid do/ /de bas 'jam dpal gzhon nu yis/ /bcom ldan 'das la 'di skad gsol/ /legs so bcom ldan bde gshegs legs/ /bka' gzhan dgongs pa bsam mi khyab/ /'di ni dpe don rgyas par gsungs/ /ma rig mun sel sgron me gsungs/ /'khor ba'i 'dam 'dren zhags pa gsungs/ /thar pa'i khang pa sgo mo gsungs/ /dbyings su 'jug pa'i lam chen gsungs/ /rtog pa 'joms pa'i thob gsungs/ /zhe sdang me 'jil chu bo gsungs/ /'dod chags chu skems nyi ma gsungs/ /rim par 'jug pa'i skas pa gsungs/ /'gro ba ma lus 'tshang rgya ba'i/ /rgyu de la ni yi rang ngo/ /zhes bya ba la/ bcom ldan 'das la 'jam dpal gyi chos kyi don gyi sgo nas bstod pa ste/ bka' gzhan du mi dgongs pa bsam gyis mi khyab pas gsungs pas/ gzung dka' ba dang/ rigs rnam pa gsum gyis gtan la dbab dgos pa nyid do/ /man ngag 'di ni des pa'i don rgyas par gsungs pa ste/ yid ches par bya'o/ /ma rig pa'i mun pa sel ba ni bsgom pa'i man ngag go /'khor ba'i 'dam nas 'dren pa'i zhags pa ni chos spyod ma lus pa'o/ /ye shes ni thar pa chen po ste/ de'i sgo ni spyi la go bar bya'o/ /dbyings ni chos kyi dbyings ta/ der 'gro ba'i lam yang chos spyod spyi'o/ /rtag pa 'joms pa'i tho ba ni stong pa chen po'i skabs so/ /zhe sdang me 'jil chu bo ni 'gro ba kun la bu lta bur zhes bya ba la sogs pa'i skabs so/ /'dod chags kyi chu skams pa'i ti ma ni pha ma la sogs kyi 'brel pa la zhen pas chags par mi bya'o/ /zhes pa'i skabs so/ /rim par 'jug pa'i skas pa ni 'di dang nyan dang zhes pa la/ de nyid ngo bo gcig bsgoms pa'o/ /zhes bya ba'i bar du go bar bya ste/ de dag 'gro ba ma lus par 'tshang rgya ba nyid do/ /de la 'jam dpal rjes su yi rang ste mngon par bstod pa'o/ /de skad ces 'jam dpal gyis bcom ldan 'das la mngon par bstod de/ lha dang/ klu dang/ gnod sbyin dang/ lha ma yin dang/ dri zar bcas pa'i 'jig rten thams cad bcom ldan 'das kyis gsungs pa la mngon par bstod do zhes bya ba la/ dang por 'khor 'dus pa sa la gnas pa'i byang chub sems dpa' la sogs pa thams cad bcom ldan 'das kyis gsungs pa la mngon par bstod de/ skabs kyi bye brag rdzogs pa'o/ /de la kha cig gi bsam pas ngam pa'i chos 'di la rnal 'byor chen po'i rgyud yin pas rnal 'byor chen po'i dbang ma bskur bas longs spyad du mi rung bar 'dod de/ de ltar sems dpa' i gang zag rnams ni shin tu rmongs par 'gyur ba yin pas na de ltar ni mi bsam mo/ /rnal 'byor chen po'i rgyud yin na dang por dge slong la sogs pa bzhi dang/ tshangs pa la sogs ci'i phyir 'du/ /yang rnal 'byor chen pos gsungs pa'i gnas ni btsun mo'i b+ha ga yin la/ /'dir bya rgod 'phungs po'i ri la gsungs pa'i phyir de bzhin gshegs pa'i bstan pa la zhugs cog thams cad kyis mnyan pa dang/ bshad pa dang/ bsgrub du rung ba kho na yin pas na the tshom mi bya ba nyid do/ /dper na mkha' la bya 'phur pa'i/ /grib ma de rjes 'brang ba bzhin/ /gang zhig dam chos 'di nyid la/ /tshogs na gnas kyang rab tu sbyor/ /de ni dge slong de dgra bcom/ /de ni rang rgyal byang chub sems/ /de ni bde gshegs de sangs rgyas/ /de ni don dam ye shes yin/ /dper na yi ge bcings pa rnams kha zas rnams la smod byed bzhin/ /gang zhig 'di la smod pa rnams/ /de na sdug bsngal de dud 'gro/ de ni dmyal ba de yi dags/ /de ni 'khor ba zhes bya'o/ /dga' bar byed pa sbyin pa'i mchog /sgo gsum bsdams pa tshul khrims mchog /khor? mi khro ba bzod pa'i mchog / don du gnyer ba brtson 'grus mchog/ sems mi g.yeng ba bsam gtan mchog /rtog dang bral ba shes rab mchog /'gro bas 'di drug rab spyad na/ /rdzogs sangs rgyas su de 'gyur ro/ /bdag gi gzi brjid snang ba zhes bya'i 'brel pa 'di/ /byas pa dri med dge ba chen po gang mthong des/ /lha dang mi sogs 'gro ba bdun skye bzhi bsdus pas/ /sbyin pa longs spyod ldan zhing tshul khrims gos gyon te/ /bzod pa'i rgyan btags brtson 'grus glang po zhon/ /bsam gtan gar bcas shes rab mtshon thogs nas/ /bdud dang mu stegs logs 'bren gdug tshogs rnams/ /rab tu bcom ste theg chen go 'phang mchog /mi rtog gnyis med ye shes thob par shog /slob dpon chen po yul sing ga li? rgyal po 'phags pa spyan ras gzigs kyi sprul par grags pa/ mdo sde lang kar gshegs pa nas sa brgyad pa'i byang chub sems dbar lung bstan pa/ /klu'i dbang phyug ces bya bas mdzad pa/ chos spyod thams cad kyi man ngag mngon par rtags pa'i rnam bshad/ /gzi brjid snang ba zhes bya ba rdzogs so// //lha dbang phyug ngam pa'i mnga' bdag lha btsan po bo d+hi rA dza'i bka' lung gis/ dbu rtse nas rgya gar gyi dpe phyung nas/ bod kyi dge tshul khyung grags kyis bsgyur cing zhus te gtan la phab pa'o/ / (//dam tshig gsum bkod pa'i rgyal po'i yi ge brgya pa'i sgrub thabs bzhugs/) /rgya gar skad du/ trai sa ma ya byA ha rA dza sha ta a k+Sha ra sA d+ha ni/ bod skad du/ dam tshig gsum bkod pa'i rgyal po'i yi ge brgya ba'i sgrub thabs/ dus gsum gyi de bzhin gshegs pa thams cad la phyag 'tshal lo/

CLOSE WINDOW