བོད་ཡིག

e-texts based on the ACIP/ALL Input

/ //rnal 'byor gyi dbang phyug shi bai ro tsa na badzras bsgyur ba'o// //rgya gar skad du/ do ha ko ? bod skad du/ do ha mdzod/ dpal rdo rje mkha' 'gro la phyag 'tshal lo/ /phung po khams dang skye mched dbang po rnams/ /lhan cig skyes pa'i rang bzhin las/ /ma lus de las byung zhing de ru thim/ /lhan skyes dngos dang dngos med gtam mi 'dri/ /stong pa snying rje de ru ro mnyam 'dod/ /yid la ma byed gnyug ma'i rang bzhin la/ /brdzun pa rnams kyis skur pa ma 'debs shig/ rang dbang yod pas rang nyid 'ching ma byed/ sems la mya ngan 'das pa rgyab la sod/ /khams gsum stong pa gos pa med la 'jug/ sems ni mkha' 'dra mnyam pa'i bde bar zhugs/ /dbang po yul rnams skad cig tsam ni der ma mthor? thog ma spangs shing 'di ru tha ma spangs/ /bla ma mchog gi zhabs kyis gnyis med bstan/ /sems ni gang du zhi gyur pa/ /der ni rlung yang thim par 'gyur/ /rang rig pa yi de nyid 'bras bu ni/ /su zhig la ni gang gis ji ltar bstan/ /rmongs pa'i 'jig rten 'gro ba rnams kyi spyod yul min/ /mkhas pa rnams kyis de nyid bgrod bya min/ /gang la bla ma'i zhabs ni mnyes pa yi/ /kye ho gang zag de yi spyod yul min/ /rang rig de nyid 'bras bur ni/ /tai lo pa yis de skad bstan pa yin/ /yid kyi spyod yul du ni gang gyur pa/ /de ni don dam ma yin no/ /de nyid bla ma'i gsungs gis bstan par bya ba min/ /des na slob mas go pa lta yin no/ /lhan skyes 'bras bu bdud rtsi'i ro/ /de nyid su zhig la ni ci zhig bstan/ /gang du yin ni zhi ba dang/ /yid dang rlung gnyis mnyam par zhu/ /der ni rnam kun spangs pa la/ /khams gsum de ru gnas pa yin/ /rmongs pa gnyug ma'i rang bzhin shes par gyis/ /de cho gti mug dra ba ma lus chad par 'gyur/ lhan cig skyes pa'i sems ni legs par sbyongs/ /tshe 'dir dngos grub thar pa lus 'dis rnyed/ /gang du sems ni 'gro ba der/ /der ni sems med par ni ltos/ /dbye ba med par ro mnyam gnas par gyis/ /sems dang sems med de ni legs par tshol/ /tshe 'di nyid la dngos grub legs par gsal por rnyed/ /sems ni gang du zhi gyur pa/ /khams gsum po ni de ru thim/ /rang gzhan mnyam pas sangs rgyas rje btsun 'gyur/ /sems ni nam mkha' i dang du zhugs nas thim/ /de'i tshe dbang po lnga dang yul rnams dang/ /phung po khams nang du zhugs nas sod/ /gang zhig brtan dang g.yo ba'i rnam pa kun/ /stong pa gos pa med pa ste/ /'di la dpyad par mi bya'o/ /'di ni bdag go 'di ni 'gro pa'o/ /gang zhig dbye ba yongs shes pa/ /dri med sems kyi rang bzhin la/ /gang zhig rang rig shes par bya/ /bdag nyid 'gro ba bdag nyid sangs rgyas te/ /bdag nyid dri ma med cing bdag nyid yid la mi byed pa/ /de la 'gro ba med cing gos ma med/ /yid ni rje btsun nam mkha' rje btsun ma/ /nyin mtshan du ni gar byed lhan cig skyes la rol/ /skye dang 'chi ba dag las grol bar 'gyur/ /gnyug ma'i yid la rgyun du gnas par gyis/ /'bab stegs dka' thub nags la ma brten cig/ khrus dang gtsang sbras bde ba mi rnyed do/ /tshangs pa khyab 'jug dbang phyug lha/ /byang chub yod bzhin gsum la bkur mi bya/ /lha rnams ma mchod 'bab stegs ma 'gro zhig/ lha rnams mchod kyang thar pa thob mi 'gyur ro/ /rnam par mi rtog sams kyis sangs rgyas mchod par gyis/ /srid dang mya ngan 'das la gnas par ma byed cig/ shes rab thabs kyi ting 'dzin zhugs/ /gang tshe mi g.yo bar ni brtan par byed nus na/ /de yi tshe na nams myong 'grub par 'gyur/ /ji ltar dug ni zos par gyur pa las/ /dug gis kyang ni 'chi bar mi 'gyur ba/ /de ltar srid pa zos kyang rnal 'byor pa/ /'dod yon gyis ni 'ching bar mi 'gyur ro/ /kye'o rnal 'byor pas ni las la skur mi 'debs/ /skad cig bzhi dang 'ga' ba bzhi ru de ru sod/ /skad cig dga' ba de yi bye brag shes par gyis/ mtshan gzhi mtshan nyid spangs pa shes par gyis/ /kye'o mchog dang dga' bral 'di ni dpyad par bya/ /bla ma mchog gi zhabs la gus par gyis la legs par long/ /gang zhig dga' ba mchog dang dga' bral gyis/ /kye'o skad cig der ni lhan skyes rtogs par bya/ /yon tan rin chen dpral ba'i glad rgyas gzhag bya ste/ /'dod pa mo yi ze 'bru las ni 'di nyid shes par bya/ /skad cig bye brag de ru lhan skyes par shes pa/ /de ni tshe 'di nyid la rnal 'byor par brjod do/ /thog ma tha ma gzung ba 'dzin pa spangs/ /bla ma mchog gi zhabs kyis gnyis med bstan/ /mi g.yo dri med rnam par rtog pa med/ /shar ba nub pa spangs pa 'di ni snying po yin/ /'di ni mya ngan 'das par rab tu brjod/ /yid kyi nga rgyal gang du chad gyur pa/ /skyon dang yon tan spungs pa 'di ni don dam mo/ /rang rig la ni gang yang med/ /sems dang sems med rtag tu spongs/ /kye'o lhan cig pa'i rang bzhin du ni gnas par bya/ /skye ba med cing 'chi ba med/ /rtsa ba med cing rtse mo med/ /'ong ba med cing 'gro ba med/ /gang du yang ni mi gnas so/ /bA? ma'i man ngag gis ni snying la chud/ /kha dog ljongs? shing rigs med pa/ /snang ba thams cad de la rdzogs/ /yid ni gsod la sems ni rtsa ba med par gyis/ /sems kyi lhag ma zug rngu thong/ /'di ru sku bzhi phyag rgya bzhi/ /khams gsum ma lus de tshe dag bdag dang 'gro ba khams gsum stong/ /dri ma med pa'i lhan cig skyes pa la/ /dge dang mi dge gang yang med/ /yid ni gang du 'gro 'dod pa/ /de la 'khrul par mi bya'o/ /mig ni mi 'dzum Ta pa dag gis/ /bsam gtan gyis ni gnas par bya/ /slob dpon chen po te lo pas mdzad pa'i do ha mdzod ces bya ba rdzogs so// //rgya gar lho phyogs ko sA lar sku 'khrungs pa'i rnal 'byor ba chen po mkhas pa dpal rnam par snang mdzad rdo rje'i zhal snga nas rang 'gyur du gsungs pa'o/

CLOSE WINDOW