བོད་ཡིག

e-texts based on the ACIP/ALL Input

(/dbang bzhi pa'i rab tu byed pa bzhus so/) /rgya gar skad du/ tsa turthA b+hi She ka prA kA ra NA/ bod skad du/ dbang bzhi pa'i rab tu byed pa/ dpal rdo rje sems dpa' la phyag 'tshal lo/ /de'i rjes su ji skad gsungs pa'i cho gas shes rab ye shes kyi dbang mngon sum du byas pa la/ 'bras bu'i dbang bskur ba rin po che bzhi pa sbyin par bya ste/ de yang gsung pa/ ji skad gsungs pa'i cho gas dbang bskur zhing/ /yid kyis slob ma'i mos pa brtags nas ni/ /zab cing rgya che'i tshul la mos gyur na/ /dbang bskur rin chen tshig gis sbyin par bya/ /'o na 'di rgya che ba la mos pa dang/ yang na ma yin pa zhes ji ltar rtogs par bya zhe na/ du ba las ni me shes dang/ /chu skyad las ni chu shes ltar/ /byang chub sems dpa' i rigs dag ni/ /blo ldan gyis ni mtshan mas shes/ /gzhan gyi pad+ma rab dang zhing/ /dga' ba rgyas pa'i spu long can/ /mthong nas mkhas pas de nyid kyis/ /slob ma dam pa rjes bzung bya/ /myu gur gyur pa'i byang chub sems de kho na shes rab ye shes te/ bsgoms pas rab tu 'phel bzhin/ sa sgrib pa med pa nyid thob pa ni de kho na nyid dang/ chos thams cad bsam gyis mi khyab pa'i rang bzhin dang/ yan lag bdun dang ldan pa dang/ phyag rgya chen po'i bdag nyid dang/ rdo rje 'chang chen chen po'i rang bzhin dang bzhi pa zhes bya'o/ /yang gsungs pa/ der ni thog ma dbus mdza' min/ /srid min mya ngan 'das pa min/ /'di ni bdag min gzhan ma yin/ /'di de mchog tu bde chen po/ /yang gsungs pa/ 'gro ba rnams la rtag tu shar zhing rgyal gyur pa'i/ /bde ba'i rgyal po gcig pu de ni byed pa bral gang zhig dus su nges par gsal bar brjod pa na/ /thams cad mkhyen pa yang ni tshig gis dbul bar gyur/ /de ni bla mas brjod par bya ba 'am/ /de ni slob mas go bar bya ba min/ /lhan skyes bdud rtsi'i bde ba thob pa de/ /su la su zhig gis ni brjod par bya/ blo yi spyod yul ma yin pas ni tshig gi dpyod pa med/ /bla ma'i brjod pa las ring gtam gyi dngos pos 'jug pa ste/ de ni rim gyis snying rje la sogs yon tan dag pa dang/ /dad can rnams kyi snying la rang gi 'phang byed yin/ /'o na byang chub kyi sems skyes pa'i mtshan nyid ci zhe na dbang po rnams ni gnyid log lta bu dang/ /yid ni nang du zhugs pa 'dra ba ste/ /bya byed med pa lta bur snang ba dang/ /lus ni dam pa'i bde bas rgyal gyur pa'o/ /dbang po'i tshogs rnams 'jug pa med pa dang/ /srid pa'i sa bon rnams rtog rdzogs par nyams/ /dga' ba'i rang bzhin nam mkha' dang mnyam yang/ /bsil ba'i ro myong 'di ni a la la/ /dbang po ngang ni thim par son/ /bdag gi rang bzhin nyams pa de/ /nges par lhan skyes dag pa'i sku/ /bla ma'i zhabs la gsal bar dri/ /de nyid gsungs pa/ gang zhig shar bas dus mnyam du ni dbang po rnams/ /yul dang mtshungs par nub cing gang yang mkhas rnams kyi/ /snying la mngon dga' ci yang sang cing rgyas gyur pa/ /rgyal ba'i mdzes sku gcig pu de la phyag 'tshal lo/ /de bas na/ 'dir ni gang blo dam pa'i bde ba yis/ /stobs su gyur pa rnams rtog mdza' dag 'joms/ /de yang mkhas pa bya ba byas pa ste/ /gzhan pa de rnams rkang gnyis phyag yin no/ /gang du dngos dang dngos po med pa 'ba' zhig nyid dang rnam bral rang nyid mdzes pa ste/ /sdug por gyur pa'i dga' ba'i rang bzhin rab tu rtogs pa chen po nam mkha' i gnas khyab cing/ /rgya che'i rnam pa sna tshogs can dang dri med nyid kyis me long dkyil 'khor 'phro 'dra ba/ /bde ba kun gyi gzhir gyur lhan cig skyes pa'i dga' ba de ni bzhi pa yin par brjod/ /de yi phyir the tshom med pa las sku gsum gyi rjes su 'jug pa mchog tu mi 'gyur ba'i bde ba chen po phyag rgya chen po nyid ni bzhi pa yin par bya'o/ /dbang bzhi pa'i rab tu byed pa dkyil 'khor chen po'i slob dpon dpal nags kyi rin po che'i zhal snga nas mdzad pa'o/ / //zhal snga de nyid du legs par mnyan nas dge slong chos smra ba bsod nams rnam par rgyal bas bsgyur ba'o/

CLOSE WINDOW