བོད་ཡིག

e-texts based on the ACIP/ALL Input

rgyud ma lus pa'i don nges par skul bar byed pa dpal gsang ba sgrub pa bzhugs so/ / rgya gar skad du/ sa ka la tan+t+ra sa b+ha bA sany+tso ta ni sh+rI gu hya sid+d+hi nA ma:/ bod skad du/ rgyud ma lus pa'i don nges par skul bar byed pa dpal gsang ba grub pa zhes bya ba/ dpal rdo rje sems dpa' la phyag 'tshal lo/ /'jam dpal gzhon nur gyur pa la phyag 'tshal lo/ /dngos po med cing khyab pa mchog tu zhi ba'i go 'phang 'jig rten spyod pa dag las rnam grol ma/ /gang zhig rtag 'byung zhi la rgyal ba dam pa khyu mchog rnams kyis phyag byas bsam gtan dang bral ba/ /ci yang rung ba'i gnas gyur dpal ldan rgyal ba'i sku yi dam pa rnam dag nang gi bdag nyid kyis 'jug pa/ /sangs rgyas kyis kyang rtogs par bya ba min zhing dri ma rnams dang bral ba'i de nyid de la phyag 'tshal nas/ /go 'phang mchog tu 'gro ba tshol byed pho nya mchog gyur sangs rgyas thob pa'i rgyur gyur cing/ /spyod pa sna tshogs dang 'brel rtsod pa'i dri ma'i bgegs kyis byas pa'i g.yeng ba spong byed pa'i/ /dngos grub rnams kyi skye sa rgyal ba rnams kyi yon tan brgya phrag mang po'i gnas gyur ma lta bu/ /mchog tu legs spyod thar pa ster byed rin chen gyur pa dpal ldan gsang ba grub pa bshad/ /yon tan dpag med gzhir gyur pa/ /mi phyed rdo rje gsum gyi sku/ /gang gi spyod yul las 'das pa/ /dang por bde chen phyag byas nas/ /gsang ba grub pa bla med pa/ /sgrub pa po la phan gdags phyir/ /sems ni snying rje'i dbang gyur pas/ /pad+ma rdo rje bdag gis bshad/ /rgyud gzhan du ma nyid du yang/ /sangs rgyas mgon pos ma gsungs pa/ /nges pa'i man ngag dang ldan pas/ / de ni da ltar bdag gis bshad/ /rdzogs pa'i rim pa'i rnal 'byor gyis/ /'bad pa thams cad spang bar bya/ /bskyed pa mang zhing ring ba dang/ /dang po'i las can bsgom pa'i phyir/ /rgyud kyi dam pa'i dngos brten nas/ /dngos grub bsdu ba'i mtshan nyid can/ /bsgom pa yi ni bar chad can/ /rgyas pa thams cad rnam spangs la/ /sangs rgyas dngos grub legs ster ba/ /shes rab thabs kyi cho ga yis/ /gsang ba grub pa bla med pa/ / bzang pos mdor bsdus bshad par bya/ /dge 'byung nyon mongs med pa dang/ /bgegs rnams thams cad 'jigs mdzad cing/ /dngos grub kun gyi rten gyur pa/ /yid bzhin nor bu mchog lta bu/ /sangs rgyas thams cad skyed byed cing/ /g.yeng ba'i dgra rnams 'joms byed pa/ /don rnams thams cad grub byed pa/ /mngon par byang chub mtshan nyid do/ /gang dang gang der gnas na yang/ /thabs bzang dag dang ldan pa yis/ /bsgom pa dag la rab gnas na/ /sgrub po gang de dngos grub 'gyur/ /sbas pa'i brtul zhugs dang ldan pas/ /chos rnams dang yang 'gal med par/ /rdor gsum dbye ru med gzugs can/ /byang chub mchog ni thob par 'gyur/ /dus kyi nges pa yongs spangs nas/ /bla med gnas su 'gro bar 'gyur/ /srog chags gsod cing khro ba dang/ /gang yang khro ba'i las dga' zhing/ / rdzun gyi tshig gis spros pa yis/ /mi gang rmongs pas 'tsho ba yi/ /mi de dag kyang myur bar 'dir/ /spyod pa 'dis ni 'grub par 'gyur/ /gzhan gyi chung ma spyod pa dang/ /gzhan gyi nor la rku ba dang/ /dman pa'i las can smad pa gang/ /rtag tu spyod par byed pa dang/ /gang la spyod pas 'dod khams kyi/ /steng gi pha rol 'gro bar 'gyur/ /sbas pa'i rtul zhugs ngo bo nyid/ /sgrub pa po la bdag gis brjod/ /gsang ba'i spyod pa mchog bzang po/ /dngos grub kun ster thabs bcas pa/ /rdo rje sems dpa' i gnas gang yin/ /tshe 'dis la las thob par 'gyur/ /gang zhig mchog tu zhi ba nyid/ /sangs rgyas rnams kyis rtogs pa'i gnas/ /thob par 'dod pas mchog zhi ba/ /gsang ba grub pas bsgrub par bya/ /rdzogs pa'i rim pa'i rnal 'byor nyid/ /de nyid ldan pas bsgom par bya/ /gzhan du de nyid dman pas ni/ / dngos grub thob par mi 'gyur ro/ /de nyid brtags pa rnams las gzhan/ /khyad par thams cad rnam spangs shing/ /mtshan ma med cing snang ba med/ /gnyis med mchog tu zhi ba nyid/ /lung dang bstan bcos lugs rim pas/ /ji srid rtog pa dang bcas pas/ /de srid bar du rgyas 'gyur te/ /chu la 'bru mar thim pa bzhin/ /re zhig rtogs des dgos med chog /rnam rtog sna tshogs byed pa yi/ /bstan bcos de nyid tshol mi dgos/ /bskyed pa'i rim pa'i ngo bo nyid/ /dang por de nyid shes byas la/ /de nyid bsgrub phyir nyes gnas bya/ /de nas bsgom la 'bad pa yis/ /nyams su myong ba bskyed par bya/ /de nyid gsal bar gyur sems kyis/ /phyi nas spyod pa yang dag spyad/ /rig pa dang ldan brtul zhugs kyang/ /de yi rjes la spyad par bya/ /gcig pu brtan pa'i sems kyis ni/ /gsang ba'i spyod pa spyad nas ni/ /de ni mthar thug skyes gyur nas/ /phyi nas rig pa'i brtul zhugs spyad/ /gzhan du de nyid dman pa yi / / 'tsho ba'i rgyu can nyid gyur pa/ /dmyal ba 'thob par byed pa'i rgyu/ /brtul zhugs kyis ni ci zhig bya/ /grub po de nyid la gnas pas/ /brtul zhugs med par 'grub par 'gyur/ / brtul zhugs brgya phrag la spyad kyang/ /de nyid dman na 'grub mi 'gyur/ /de nyid ldan na thams cad kyis/ /dri med de ni 'grub par 'gyur/ /sgrub po sgom pa dang ldan zhing/ /sdig pa kun las rnam grol bas/ /brtul zhugs kyis ni chags med thob/ /dngos grub rgyal bas thob ma gsungs/ /dngos grub de nyid shes gyur nas/ /'thob kyi brtul zhugs kyis ni min/ /chags pa kun las log gyur cing/ /slongs mo gtso bor bya ba ste/ /de tsam brtul zhugs kyis khyab 'gyur/ /de nyid spangs nas dngos grub med/ /'bab? stegs? lha rten sbyin pa'ang min/ /khrus dang dka' thub de bzhin te/ /'di kun bden pa ma yin gyi/ /'di nyid gcig pu bden pa nyid/ /gnod pa skyed par byed pa yi/ /ngan pa'i las dag sngon byas pas/ /de nyid dman pa'i lus can gyis/ /brtul zhugs ngo bo ma lus myong/ /mtshams med lnga po byed pa dang/ /srid bar ngal bar byas pas kyang/ /de nyid ldan na 'grub 'gyur te/ /nor rnams phun tshogs bdag nyid kyi/ /de nyid rin chen sgom byed na// brtul zhugs med kyang de nyid ni/ /nges par bla na med par 'gro /lung gi spyod pa las gsungs pa'i/ /brtul zhugs gang zhig 'dir gnas ba/ /nor rnams sgrub par mi nus pas/ /'tsho ba'i phyir ni brtag pa nyid/ /phung po lnga yi rang bzhin gzugs/ /rnam par shes pa'i gzhir gyur ltar/ /de ltar de nyid ldan brtul zhugs/ /de nyid las ni 'jug par brtan/ /'dul ba'i thabs kyi rgyu phyir dang/ /nor la sogs pa bsgrub phyir dang/ /sems can don du de nyid bcas/ /brtul zhugs zhal gyis bzhes pa yin/ /'tsho ba yis ni thabs tsam du/ /so so'i skye bos gtsor byed pas/ /ji ltar mtshan ma'i che ba nyid/ /de nyid bral na dngos grub med/ /nor gyi 'byor pa ldan pa'i bdag /rtag tu bsgoms par ral byas pa'i// smyon pa'i gzugs nyid la brten cing/ /gsang ba grub par rnam gnas nas/ /de nyid rdo rje 'chang bla ma/ /bsgom dang ldan pas 'grub par 'gyur/ /gzhan du de nyid ldan gyur kyang/ /dngos grub 'bras bu'i snod mi 'gyur/ /de ltar phyi rol yongs bcad la/ /de nyid bla med shes byas nas/ /sangs rgyas nyid du nges bya ste/ /blo ldan gsang ba grub par spyod/ /rnam par g.yeng ba kun gyi gzhi/ /brtul zhugs spangs shing de nyid shes/ /shes rab thabs kyi cho ga yis/ /go 'phang mchog ni bsgrub par bya/ /de nyid de yang rgyud gnas pas/ /dpal ldan gsang ba 'dus par gsal/ /spros pa du ma rgyas gyur pas/ /gzhan du sbas nas bstan pa yin/ /bya ba spyod pa'i dbye ba dang/ /mdo sde'i sde snod la sogs su/ /mchog tu dag pa gcig pu nyid/ /rnam pa du mar rnam par gnas/ /phung po rin chen snod nyid du/ /sems can bsam pa'i bye brag gis/ /de nyid 'bad pas sba mdzad nas/ /sangs rgyas mgon pos rnam par bzhag /byang chub sems mchog rnam par dag / bla ma'i zhabs kyi bka' drin gyis/ /rang gi lus la rab gnas pa/ /de ni 'bad pas rig par bya/ /de nas spyod pa bya ba 'am/ /khyim du gnas te bsgom par bya/ /de nyid rin chen rnam dag bdag /rtsod pa thams cad rnam spangs pa/ /thabs bzangs po ni rnam spangs nas/ /'gal ba'i dam tshig la sogs la/ /gzhan du gang zhig sgrub gyur pa/ /de ni du 'bad sogs par 'tshed/ /ji ltar me ni 'bar gyur pa/ /de ni rtsa shing phung po dag /bcug nas thal ba nyid du 'gyur/ /myu gu sogs pa'ang 'byung mi 'gyur/ /de bzhin de nyid med bzhin du/ /ngo mtshar che ba ltar byed pa/ /ji srid nam mkha' gnas bar du/ /shi ba'i 'og tu dmyal bar 'gro /ji ltar 'ga' zhig sbrul gdug la/ /sman dang sngags sogs mi ldan par// rmongs pa bdag nyid gang rtse ba/ /gshin rje'i gnas 'gro 'dod pa yin/ /ji ltar mdza' med rgya mtsho la/ /gru med gzhan zhig 'jug 'gyur ba/ /thabs dang rten med gyur nas ni/ /skad cig gis ni 'chi bar 'gyur/ /de bzhin dza yi mdza' can rgyud/ /yang dag rab sbyin spangs gyur pa/ /smad cing dman pa'i las rnams ni/ /byas na mnar med 'gro bar 'gyur/ /rnyed dka' bla med go 'phang mchog /de nyid ces byar mngon brjod pa/ /gang gis dag pa de thob pa/ /de yi thabs ni bdag gis brjod/ bla ma dang ni rdo rje 'dzin/ /gang gis gnyis su med par mthong/ /dngos grub bsdus pa'i mtshan nyid can/ /de nyid de ni 'dir thob 'gyur/ /gang yang khro zhing nga rgyal can/ /bslus pa byis dang spros la dga' / /'dod cing chags pa'i sems can gang/ /gang las rnyed cing gang las min/ /g.yo sgyus bla mar phyag byed cing/ /skyon rtog pa la ched du byed/ /brdzun pas nga rgyal gdug pa can/ /tshig gis rtsod la rtag tu gnas/ /rdo rje spun dang bla ma la/ /bslu pa'i bsam pa brtan pa can// sems can des ni dngos grub kun/ /ster ba'i go 'phang de mi thob/ /'dir ni 'di 'dra gzhan yang mthong/ /ji srid 'dod pa thob bar du/ /phyag 'tshal mchod dang bsnyen bkur gyis/ /brtan par bla ma mnyes byas nas/ /go 'phang mchog ni thob nas ni/ /mdun nyid na ni gnas na yang/ /su zhig gang nas ji ltar 'ongs/ /rang bzhin ngan pas mi shis so/ /gcig pu mthong nas ring po nas/ /gus par phyag ni 'tshal byed cing/ /de yang mang po'i nang du ni/ /bde bar byon nam tsam gyis phongs/ /de lta bu yi sems can gang/ /mya ngan 'das mchog go 'phang mchog /yang dag gsung pas gang gsungs pa/ /de yi thob par mi 'gyur ro/ /gzhan yang sems can 'di lta bu/ /bla ma smod dang dag kyang mthong/ /ngo tsha spangs shing spyod pa ring/ /yang dag rim pa sun 'byin pa/ /rgyud ni bsdu ba tsam nyid kyis/ /de yi dngos la kha phyir ltas/ /dbang bskur rjes gnang med par yang/ /slob ma dag ni sdud par byed/ /glegs bam mthong bas dga' 'gyur nas/ /gsang sngags rang nyid len par byed/ /slob dpon las ni shes min pa/ dam tshig spyod pa rnam par spangs/ /sems can rnams ni sdud pa na/ /glegs bam bka' yi byed pa yin/ /de nyid shes pa ma yin par/ /gang phyir yang dag gsungs pas bstan/ /de lta bu dang de dag nyid/ /kun kyang sdig pa'i las can de/ /dam pa min pa'i lam zhugs nas/ /dmyal ba dag tu 'gro bar gcig /sdug bsngal 'bongs dang nyon mongs dang/ /sna tshogs nang kyis gtses pa'i mthar/ shi nas dmyal bar 'gro bar 'gyur/ /skye gnas ngan par skye bar 'gyur/ /bde gshegs dngos grub 'dod na ni/ /dam tshig spyod pa spangs pa yis/ /sgrub dka' de dang lhan cig tu/ /gnas pa nyid duAng mi bya'o/ /dngos po kun gyi slob dpon la/ /ji srid mnyes par gyur bar du/ /lus ngag yid kyi brtan pa ru/ /dus ni ring por mnyes byed pa'i/ slob ma shin tu dri med pa'i/ /de nyid yang dag rab sbyin gnas/ /bla ma'i zhabs kyis bka' drin gyis/ /de nas bgegs med thob 'gyur ba/ /rdo rje gsum dbyer med pa'i dngos/ /de nyid rgyal po yangs pa ste/ /nyin dang mtshan du bsgoms pa yis/ /dngos grub myur du des 'thob 'gyur/ /sngags dang phyag rgya rgyas gyur pa'i/ /dngos grub sgrub pa'i dbang po la/ /rgyud rnams du mar gsungs pa yi/ /bzlas dang sbyin bsregs brtul zhugs sogs/ /thun mtshams bzhi yi cho ga yi/ /yul dang dkyil 'khor bri la sogs/ kha dog gzugs sogs dbye ba yi/ /rig rnams su ni rnam brtags dang/ /khrus dang lha mchod smyung ba dang/ /phyag rgya 'ching ba'i rigs de bzhin/ /sku gzugs la sogs cho ga dang/ /mchod rten las ni rgyas pa dang/ /de ltar rnam pa sna tshogs pa'i/ /rnam rtog sna tshogs byed pa yi/ /grub pa sems can bsam rim bzhin/ /dpal 'byung ba yi mgon pos gsungs/ /de ltar rnam rtog 'bum phrag gi /yang dag gsung ba grub gsungs pa/ /der ni dngos grub gang grub pa'am/ /'on kyang 'dir ni de mi 'grub/ /lo gcig la sogs bskal ba dang/ /gcig dang gnyis su srid pa'i mthar/ /sgrub po gang gis 'grub 'gyur ba/ /chos kyi rnam grangs rgyas gyur pa/ /skye ba grangs med du ma ru/ /bsgom la brtan zhing chags med pas/ /sgrub pa'i dbang po grub pa ru/ /'gyur bar gang zhig sdang gsungs pa/ /de ni re zhig 'dir mi dgos/ /thob par 'gyur ba dgos ma yin/ /grub pa'i bde ba las lhag pa'i/ /lus gdungs sdug bsngal gyi mi 'thob/ /dpal ldan 'dus pa zhes bya 'dir/ /spros pa thams cad rnam spangs nas/ /rdzogs pa'i rim pa'i rnal 'byor gyis/ /tshe 'di nyid la 'grub par 'gyur/ /dpal ldan 'dus las mchog gzhan med/ /'jig rten gsum gyi rin chen gyur/ /snying po las kyang snying po mchog /rgyud kun gyis ni bla ma'i bla/ / bstan dang bshad pas rnam gnas pa/ /rdzogs pa'i rnal 'byor rim pa nyid/ /'dus pa gang gis mi shes pa/ /de yi dngos grub ji ltar 'grub/ /the tshom thams cad gcod byed cing/ /mi shes rab rib sel byed pa/ /sangs rgyas rin chen za ma tog / dpal ldan 'dus pa yongs spangs nas/ /rnam rtog du mas brtags pa yis/ /rmongs pa dngos grub 'dod gyur pa/ /mkha' la khu tshur rdeg pa dang/ /smig rgyu'i chu la 'thung ba bzhin/ /dang po'i las can bsgom pa yi/ /spros pa'i rgyud rnams spang byas shing/ /thabs dang shes rab shes byas nas/ /ji lta ba bzhin rnam par mnos/ /de phyir nges byas sems gcig pa/ /blo dang ldan pas bsgom par bya/ /nyin dang mtshan du bsgom byas na/ /'grub 'gyur 'di la the tshom med/ /tshes grangs med cing rgyu skar med/ /'di la smyung ba bshad pa med/ /gnyis med ye shes dang ldan na/ /bde bar gshegs pa'i dngos grub 'gyur/ /yon tan gter gyur rdo rje 'chang la dri med rdo rje gsum gyis rtag tu gus byas la/ /skya ba'i rgya mtsho sdig pa'i rlabs dag mang ldan pa la grub gyur gcig pu mchog /gsang ba'i yon tan 'byung 'gyur dri ma bral zhing don kun sgrub cing rab tu sbyin par byed pa yi/ /rgyud nas gsungs pa'i lam dang ldan pa'i sgrub pa blo dang ldan pas deng nas brtsam par bya/ /don dam pa'i yi ge gsum dang ldan pa'i rgyud kyis dam pa'i don nges par bsdus pas dpal gsang ba grub ba zhes bya ba dpal rdo rje sems dpa' mnyes par bya ba dang brtul zhugs dang de kho na nyid nges par bstan pa zhes pa'i le'u ste dang po'o/ / //rgyud gzhan rim pa ma yin pa'i/ /cung zad sdus pa'i lam nyid las/ /gsang ba las byung sgrub pa'i thabs/ /de las yang dag bshad par bya/ /phyi rol de nyid bya ba'i lam/ / shin tu ring ba kun spangs la/ /lugs bcas rnal 'byor rim pa yis/ /ji lta ba bzhin bdag gis brjod/ /slob dpon phal cher 'di skad brjod/ /dpal ldan 'dus pa mdangs chen gyi/ /rgyud kyi sdud par byed pa po/ /dpa' bo 'jig rten dbang phyug zer bla ma zhabs kyi bka' drin gyis/ /dpal ldan 'dus pa'i sdud pa po/ /gzhan dag yod pa ma yin zhes/ /bdag nyid 'ba' zhig smra bar byed/ /rgyud mdzad pa ni thugs rje che/ /gsung ba po de brjod pa'ang de/ /de las gzhan dag yod min pas/ bde chen las gzhan gsung pa med/ /'di skad thos pa'i tshig gang dang/ /bzhugs zhes bya ba'i tshig gnas pa/ /thugs kyi rdo rje bdag nyid kyis/ /sangs rgyas kun la bstan pa yin/ /dpal ldan bde chen mgon po yis/ /bzhugs zhes bya ba'i tshig bzang por// ji ltar bzang po gang bstan pa/ /de bzhin bdag gis cung zhig brjod/ /dus gcig mchog tu mdor bstan pa/ /gang tshe gtso pos gsungs pa na/ /sangs rgyas rnams kyi rgyud bden don/ /bde ba chen po bdag nyid yin/ /rgyal ba'i sras po thams cad kyis/ /rgyud don bden pa de thos nas/ /'dar zhing 'jigs pa dang ldan pas/ /dbang phyug mchog la de nyid zhus/ /dpa' bo chos nyid 'di lta bu/ /gtso bo gsung bar dka' ba gsung/ /sangs rgyas kun kyang thams cad du/ /shin tu 'jigs pa skyed byed pa// rdo rje theg pa bla na med/ /shin tu gsang ba 'byed par byed/ /chos kun mnyam nyid gcig la nyid/ /gang yin gtso bo khyed kyis gsungs/ /'di skad brjod par gyur pa na/ /sangs rgyas grags chen thams cad kyang/ /'dar zhing brgyal bar gyur ma kyang/ /byang chub sems ni thugs la bzhag / e ma'o gsang pa las gsang ba/ /rdo rje theg pa'i bshad pa 'di/ /ngo bo med cing dag gyur la/ /gang las dpe yang yod min pas/ /sangs rgyas thams cad brgyal gyur pa/ /rdo rje sems dpas de gzigs nas// bde ba chen po'i bdag nyid kyang/ /ting 'dzin bzang po la gnas nas/ /de nas sangs rgyas rdo rje dang/ /pad+ma'i snyoms 'jug sbyor ba mdzad/ /mchog tu dga' ba'i gzugs can gyi/ /'jam po'i gsung gis gsung bar mdzad/ /kye kye rgyal ba thams cad gzigs/ /byang chub sems kyi rnam 'phrul yin/ /gang du lus ngag sems med pa/ /der ni gzugs su rab tu mthong/ /byang chub sems kyi sbyor ba yis/ /ji srid 'bad pas rtogs 'gyur ba/ /sangs rgyas kun gyi gnas shis pa/ /chos 'byung mi 'gyur zhi ba nyid/ /shes rab rang gi dngos de srid/ /kun tu bzang po'i ye shes kyis/ /spros pa med cing dag pa las/ /'di dag thams cad rnam par 'phrul/ /mchog tu shis shing rnam dag gang/ /sangs rgyas kun gyis phyag byas pa'i/ /brjod min kun la khyab par gnas/ /thams cad de yi rnam 'phrul yin/ /bzang po de nyid gnas pa yang/ /mkha' dbyings zhes bya'i sgrib bral la/ /mchog tu dga' ba'i gzugs can gyis/ /sems can kun gyi bde 'byung byed/ /rnam dag shes rab lus las byung/ /sangs rgyas kun gyi gnas zhi pa/ /lha rdzas chos 'byung mi 'byung ba/ /glo yis de ni bdag gis brtan/ /a'i cha byad bzang po la/ /dbus su baM gis rnam par brgyan// bde ba kun gyi gnas gyur pas/ /sangs rgyas rin chen za ma tog /rgyud kyi dang por gang gnas pa/ /de phyir de ni bshad par bya/ /dpa' bo bde chen 'di skad du/ /de bzhin gshegs pa kun la gsungs/ /gang zhig sangs rgyas thams cad kyis/ /sku gsung thugs kyi tshul dag gis/ /gnas shing dngos grub bzang ster ba/ /shes rab ces bya'i ming gi gnas/ /de la gnas pa gang yin pa/ /b+ha ga zhes bya'i yi ge gnyis/ /dag pa'i de nyid ces bya ste/ /don dam pa de bdag gis brten/ /sangs rgyas byang chub sems dpa' dang/ /bcas pa'i sku gsung rdo rje nyid/ /dag pa de lang gnas nas/ /ji ltar 'dod pa bzhin du spyod/ /chos kyi 'byung gnas spangs pa yis/ /chos gnas dag pa gzhan dag med/ /gang la sangs rgyas kun 'byung zhing/ /sangs rgyas byang chub rab gnas pa'o/ /dag pa de nyid gnas med pas/ /'jig pa nyid du ma byed cig /chos 'byung mi 'gyur zhi ba nyid/ /rdo rje btsun mo nyid la gnas/ /dud 'gro la sogs 'gro ba kun/ /de las thams cad 'byung bar 'gyur/ /rgyal bar ci yi phyir na yang/ /khyod ni 'jigs pa nyid du 'gyur/ /sangs rgyas snying po las byung ba/ /de ni de yi chos nyid mchog /snying po'i ye shes mdza' gcig pu/ /ma byung 'byung bar mi 'gyur ro/ /de nyid 'di skad thos 'gyur te/ /sangs rgyas byang chub la gnas nas/ /bye ba kun gyi bstod byed cing/ /phyag 'tshal gzugs kyi 'byung bar 'gyur/ /sems can kun la phan ston pa'i/ /snyan pa'i tshig rnams smra byed pa/ /thub chen dpa' bo chen po ni/ /'gro ba'i mgon gyis bshad du gsol/ /sangs rgyas kun gtso yongs dag pa/ /rdo rje theg pa skor mdzad cing/ /'gyur ba med cing snang ba med/ /gnas med de nyid bshad du gsol/ /dpa' bo nyon mongs mtsho chen las/ /rgyal bas ji ltar nges grol ba'i/ /de nyid mchog ni bshad du gsol/ /de nyid kun gyi mchog gi mchog /bzhugs zhes bya ba'i tshig gi 'gor/ /e baM tshig gis rnam brgyan pa/ /gang zhig shes ba tsam gyis ni/ /bde gshegs dngos grub 'byung 'gyur ba'o/ /dpal ldan bde chen rdo rje 'chang/ /de ltar gsol 'debs gsan gyur nas/ /sangs rgyas byang chub sems dpa' la/ /go 'phang mchog ni gsung bar mdzad/ /'di ltar sangs rgyas thams cad la/ /rdo rje snying po kun bsdus pa/ /shin tu gsang ba phyed mdzad nas/ /rdo rje thugs kyi bstan pa ltar// 'di ltar rnam par gnas pa bzhin/ /de bzhin bdag gis bshad par bya/ /bla ma zhabs kyi bka' drin gyis/ /gsal por thams cad shes byas nas/ /dngos grub thams cad kun bsdus pa/ /bzang po de nas bshad par bya/ /rgyud kyi dang por rnam gnas pa/ /snying po las ni snying po mchog /de nyid bde chen mgon po yis/ /gsang ba de nyid ces byar gsungs/ /sangs rgyas byang chub sems dpa' dang/ /sems can kun gyi bde 'byung ba/ /gsang ba'i rtog pa'i dbang rgyal po/ /dpal ldan 'dus par rnam par gnas/ /e baM rnam dag yi ge la/ /khams gsum po kun gus phyag 'tshal/ /gang de dpal ldan 'gro mgon gyis/ /phyag rgya'i mchog gyur brtags pa nyid/ /de ni shes rab ces byar grags/ /thog ma bar mdza' dri ma med/ /ye shes rdo rje gsum 'byung? ba/ kun rdzob gzugs su rnam par gnas/ /sems can rjes su bzung ba'i phyir/ /las kyi phyag rgya zhes byar grags/ /mi mo'i lus la brten nas ni/ /sems can kun la phan par mdzad/ /kun khyab dge ba thams cad pa/ /shes rab lha mo bla na med/ /gcig pu bzang po 'byung 'gyur ba/ /sems can mgon gyis bsten pa yin/ /mkha' dbyings pho brang nyams dga' na/ /sna tshogs thugs rje can gnas pa/ /de la bya ga zhes brjod dang/ /e baM? zhes bya'i mig? gnyis la/ /lus ngag yid kyi sbyor ba yis/ /sangs rgyas kun gyi de nyid gnas/ /de phyir de nyid mdor bstan dang/ /rgyas par bstan pa'i tshul gyis gnas/ /dpal gsang ba 'dus pa rje btsun gyi nang na gnas pa yang/ /de'i gzhung lugs nyams pa spas pa las shin tu sbas pa'i don dam pa'i bdag nyid can gyi rgyud kyi ngo bo nyid dbang du byas nas brjod par bya'o/ /'di lta ste/ bsam gyis mi khyab pa'i brten pa dang/ g.yo ba'i dngos po thams cad kyi ngo bo de bzhin nyid kyi ye shes sgyu ma'i rang bzhin gyi rjes su byed pa'i gzugs can thugs rdo rje'i skyes bu chen po'i mtshan sum cu rtsa gnyis kyi brgyan pa'i skur gyur nas/ dpal gsang ba 'dus pa e baM zhes bya ba la sogs pas don dam pa'i de kho na nyid sangs rgyas dang byang chub sems dpa' rnams la don dam pa'i ngo bo nyid kyi nges par ston to/ /don dam pa'i bsam gyis mi khyab pa'i lha'i gzugs de nyid rgyud kyi rim pa ji lta ba bzhin du byang chub sems dpa' bcu bdun gyi go rims kyi nges par rdzogs par gyur nas do rab tu ston par mdzad de/ dang po gleng gzhi'i le'u las/ /byang chub sems dpa' bcu bdun gyi med brjod pa'i mdza' na/ ji ltar chos kyi dbyings kyi ngo bo mngon par bsgom pa'i rdo rje zhes bya ba'i byang chub sems dpa' sems dpa' chen po dang zhes bya ba la sogs dbang du byas nas brjod de/ /'di ni re zhig dang po'i lha rnal 'byor yin te/ chos kyi dbyings kyi ngo bo nyid dngos po med pa'i gzugs can yin pa'i phyir ro/ /lus dang ngag dang yid kyi bdag nyid can du gyur nas/ dam tshig dang/ ting nge 'dzin dang/ bzlas pa'i cho ga'i lugs sngon du 'gro bas/ sa la sogs pa'i ma bzhi'i rigs dang lhan cig nam mkha' i khams su rnam par gnas nas 'dod pa'i yon tan lnga'i longs spyod kyi sgo nas/ brjod du med pa'i yang brjod du med pa'i dud 'gro la sogs pa'i sems can gyi rim pa ma lus pa'i byin gyis brlabs pa'i sngags kyi sku mchog du dga' ba'i gzugs can/ bde ba mchog gi gtso bo'i dpal pad+ma'i dkyil 'khor byin gyis brlabs pa/ sangs rgyas dang byang chub sems dpa' rnams kyi don dam pa'i chos nyid kyi dam tshig gi de kho na nyid sgra thos pa na/ brgyal bar gyur pa'i de bzhin gshegs pa rnams slang bar bya ba'i phyir/ e baM zhes bya ba la sogs pas don dam pa'i de kho na nyid gang yin pa de 'dod brjod par bya'o/ /rgyud kyi dang por gang gnas pa/ /sbas pa de phyir bshad par bya/ /rdo rje btsun mo las byung ba/ /e baM rnam dag yi ge nyid/ /e baM nam mkha' i khams su brjod/ /ma ya phyag rgyar rjes su thob/ /gang zhig de ni ston byed pa/ /thos pa zhes bya 'dir brjod do/ /rtog med kun mkhyen ye shes nyid/ /dus cig pa yang de yin no/ /b+ha ga'i gzugs can gang yin te/ /nam mkha' i khams zhes bya bar brjod/ /dus gcig na zhes gang bstan pa/ /de mdor bstan pa zhes brjod do/ /nam mkha' i khams zhes bde 'byung ba/ /gang yin bdag gis der brten to/ /sna tshogs dril bu rnga yab phreng/ /dril bu rin chen gyis nyer brgyan/ /sangs rgyas rang bzhin kun bzang po/ /gnas kyi mchog der mchod par byed/ /bcom ldan 'das zhes nyer bstan pa/ /gtso bo bdag po thugs nyid do/ /rdo rje btsun mo zhes brjod pa/ /shes rab rgyal ba kun dngos te/ /thams cad ces bya sgra brjod pa/ /mi bskyod la sogs de bzhin gshegs/ /de yi sku gsung thugs gang yin/ /thugs nyid du ni rnam par gnas/ /rnam dag btsun mo'i b+ha ga der/ /bde ba chen po rnam par bzhugs/ /dngos po kun gyi ngo bo yis/ /mchog tu dga' bas rnam rol cing/ /e yi cha byad bzang po la/ /dbus su baM gis rnam par brgyan/ /der ni rdo rje 'dzin mchog gnas/ /shes rab las byung zhi ba nyid/ /der ni sangs rgyas kun 'byung zhing/ /de nyid du ni rnam par gnas/ /ri rab rdul phran grangs snyed kyi/ /mdza' med bskal ba bye ba ru/ /sangs rgyas byang chub sems dpa' dang/ /bcas pa'i pad+ma'i dkyil 'khor de/ /dpal ldan bde chen rdo rje 'chang// dpal dang ldan de de na bzhugs/ /nam mkha' i khams zhes bya ba der/ /til gyi gang bu gang zhig mthong/ /gang gA'i klung gi bye snyed kyi/ /de bzhin gshegs pas yongs gang pa/ /yi ge de yi de kho na/ /brten par byas pa'i thabs nyid kyis/ /sangs rgyas byang chub sems dpa' rnams/ /bla med go 'phang thob par 'gyur/ /de ltar bzhugs zhes bya ba'i tshig /don dam nyid du rnam par gnas/ /gzhan du de nyid rnal 'byor pa'i/ /nyams su myong ba skye mi 'gyur/ /rdo rje thugs sam gzhan yang rung/ /dpal ldan bde chen rgyal po ni/ /'dus pa zhes bya'i byed po gang/ /de ni e baM 'di rab gnas/ /e baM zhes sogs rnam dag dang/ /sh+ru ta zhes bya'i yi ge gnyis/ /gsang ba'i tshig gnas nges par yang/ /rgyud kyi dang por brjod par bya/ /'di dang 'chad par 'gyur ba yis/ /de ni byed pa por 'dod do/ /'di ni yi ge gnyis po ni/ /rgyud kyi dang por med mi 'dod/ /mchog tu dri med go 'phang ni/ /de ltar rnam dag shes gyur nas/ /dpal ldan 'dus par gang gsungs pa/ /sangs rgyas kun gyi gnas zhi ba/ /dngos grub mchog gyur dang shes nas/ /rgyud pas khyab par brjod par bya/ /dge ba'i bshes gnyen bzhin gsungs pa/ /dam tshig spyod pa ston pa po/ /dag cing brjod du med pa yi/ /byang chub sems ni thams cad du/ /rab tu rgyas pa'i rgyud thams cad/ /lam nyer ston par rnam par gnas/ /chos 'byung yi ge zhi nyid du/ /brjod du med par rnam par gnas/ /de yi dbye ba mdza' med pas/ /sna tshogs khyab nas rnam par gnas/ /'di ni spun pa 'dra ba yi/ /de yi dbye ba kun spangs pa/ /de ni rnam dag ngo bo nyid/ /sgrub pa'i thabs ni bdag gis brjod/ /dngos po med pa de nyid ni/ /thabs bcas pad+ma rdo rje skyes/ /dga' bral mchog dga' i bar nyid du/ /mtshon nas gang zhig rnam gnas par/ /rtag tu ? btang yid nyid kyis/ /gang zhig der gnas 'grub par 'gyur/ /sgrub po sgom pa ldan pa yis/ /lha yi ye shes nyams myong 'gyur/ /don dam pa'i yi ge gsum dang ldan pa'i rgyud kyi dam pa'i don nges par bsdus pa dpal gsang ba grub pa zhes bya ba dpal rdo rje sems dpa' mnyes par bya ba las bzhugs pa'i tshig nges par bstan pa zhes bya ste le'u gnyis pa'o/ / //de nas gsang ba bshad par bya/ /shes rab thabs ni rnam sgom pas/ /thugs ni rdo rje dran pa nyid/ /gsang ba las kyang gsang ba mchog/ rang gi lus la gnas pa yi/ /dag pa gang zhig shes gyur nas/ /gnas bzang por ni gnas par 'gyur/ /de ni bdag gi yang dag bshad/ /dpal ldan 'dus pa'i rjes 'brangs pa'i/ /dngos grub bzang po sgrub pa'i phyir/ /mkha' dbyings lha yi gzhal yas na/ /ji lta ba bzhin yang dag gnas/ /bzang po rang gi sbyer byed pa/ /thog ma dbus mthar dri ma med/ /dang po'i las can sems can rnams/ /mtshon cing yid ches byed pa'o/ /mkha' dbyings rdo rje kun sbyor ba'i/ /reg las ngo mtshar chen po nyid/ /bde ba gang zhig 'byung 'gyur te/ mchog tu dga' bar byed pa'o/ /de zad nas ni dga' bral te/ /gang gi mdza' na dga' bral can/ /rang gi ngo bo bstan med pa'i/ /bdag nyid cung zhig 'byung bar 'byung/ /dbang po kun las rnam grol zhing/ /gnyis med mchog tu zhi ba nyid/ /khyab cing rang bzhin med pa yi/ /rtogs pa de ni go 'phang mchog /lha rdzas kun bzang zhes bya ba/ /dga' bral mdza' na rnam par gnas/ /mchog 'di sgrub po rnams kyi ni/ /grol ba'i gnas su rab tu grags/ /dpal ldan 'dus pa de nyid gang/ /bde gshegs dam pas gang gsungs pa/ /dngos med mchog tu rnam par dag /byang chub sems ni bla med pa/ /rang bzhin dag pa de nyid ni/ /bdag gis rgyas par bstan par bya/ /nam mkha' i khams kyi dbus gnas par/ /zla ba'i dkyil 'khor bsgom par bya/ /zhes bya ba la sogs pas bstan par bya'o/ /gang zhig mkha' dbyings steng du rin chen 'gyur/ /bde ba kun gyi rang bzhin rnam par gnas/ /dbus su yon tan gyis brgyan sems gyur pa/ /de 'dir skyes bu'i sna rtse zhes byas bstan/ /rtog pa dang bcas sems zhes bya bas der/ /zla ba'i gzugs dang sangs rgyas sku yis khyab/ /longs spyod rdzogs sku bde ba'i ngo bo nyid/ /kun rdzobs byang chub sems zhes de la brjod/ /kun rdzob byang chub sems ni nub gyur cing/ /der ni dga' bral zhes bya 'byung gyur nas/ /mnyam med sprul pa'i sku yi brgyan gyur cing/ /sangs rgyas sna tshogs du ma spro bar byed/ /gnas skabs gang la dga' bral zhes bya ba'i/ /skad cig b+ha ga'i dbus su 'byung 'gyur te/ /yungs kar zhes bya'i ming gi rnam gnas pa/ /de la sprul pa'i sku zhes rgyal bas gsungs/ /bde ba'i dngos 'dir longs spyod rdzogs sku dang/ /sprul pa'i sku yang 'gags shing bzhugs gyur pa/ /bdag med rdo rje rim gyis cho ga bzhin/ /kun rtog rnam par rtog pa nges par spangs/ /bdag med rdo rje shin tu dri ma med/ /de nas dga' bral bde ba rnam par spangs/ /mar la mar bzhag bzhin du skad cig gis/ /byang chub gnas dang lhan cig gcig tu byas/ /der ni dga' bral bde ba son gyur nas/ /bdag med rdo rje shin du brtan par bzhugs/ /der ni brjod med shes byar gang gnas pa/ /rnam dag byang chub go 'phang kun 'gro ba// shes bya'i bdag nyid dpag med mdangs ldan pa'i/ /de nyid bdag nyid lhan cig gzugs bsgom bya/ /dga' bral zhes bya gang gis brjod min pa/ /de yi mtshon rdzogs bsam mi khyab pa'i gzugs/ /kun tu dri ma med pa'i ngo bo nyid/ /yid bzhin nor dang bum pa bzang zhes pa/ /so so rang rig lugs bzhin rig gyur pas/ /don dam rnam dag rgyal ba rnams kyi sku/ /byang chub dam pa mchog gtso de nas bsgom/ /bzang po bde ba'i sar gyur kun 'gro ba/ /gsang gsum dri med rin chen de nyid bcas/ /rtag tu sems can don du lugs rig pas/ /dbang po gnyis sbyor mchog tu rab brtags nas/ /'od zer du ma de nas sgro bar bya/ /gcig dang du ma'i ngo bo khams gsum 'di/ /dngos po rang bzhin med par rnam par dpyad/ /de nyid de ni bzung ba la/ /'bad pa'i thabs gzhan spyod min pas/ /bla ma zhabs kyi bka' drin gyis/ /shes nas blo dang ldan pas bsgom/ /bdag nyid dri med zhi ba yi/ /de nyid de dang ldan gyur pas/ /las kyi phyag rgyas bsgom pa yang/ /'dir ni 'grub 'gyur the tshom med/ /las kyi phyag rgya mnyam ldan pas/ /rdo rje pad+ma mnyam sbyor bas/ /bden pa gsung bas mngon sum du/ /'di 'dra'i bsgom pa gang gsungs pa/ dang po'i las can sems can la/ /las kyi phyag rgya gang spangs nas/ /byang chub sems ni rab bstan pa/ /gzhan gyi mtshon pas mi 'thob ste/ /dang po'i las pas rig bya ba/ /thog ma bar mdza' dri med pa/ /gnas te gzhan du nus ma yin/ /de lta'i de nyid mchog zhi ba/ /mkha' dbyings zhes byar gnas pa ni/ /rdo rje pad+ma mnyam sbyor dang/ /yang dag rang bzhin gyis thob 'gyur/ /kun tu 'gro ba de nyid ni/ /dang po'i las pas bzung ba'i phyir/ /mkha' dbyings pho brang bzang po ru/ /sgrub po mchog gis thob par 'gyur/ /mya ngan 'das mchog gang yin te/ /bde ba'i ngo bo dngos med pa// de ni phyag rgya la brten nas/ /rang gi rig pa'i ngo bor gnas/ /shes rab thabs dag rnam bsgoms pas/ /de ltar de nyid shes byas la/ /chos 'byung mi 'gyur zhi ba nyid/ /ji lta ba bzhin rnam par gnas/ /ngo mtshar mchog gyur rdo rje can/ /de yi tshe na sgrub par bya/ /rang lus thabs dang ldan pa'am/ /yang na las kyi phyag rgyas so/ /las kyi phyag rgyas pad+mar gnas/ /mtshon du med par gang gnas pa/ /gong nas gong du bsgom pa yis/ /zhi dpal rdo rje 'dzin par mtshon/ /de ni bdag gis thams cad bstan/ /gzhan yang bdag gis bstan par bya/ /las kyi phyag rgya dang ldan pas/ /de nyid ldan pas bsgom par bya/ /phyag rgya med par lha rdzas nyid/ /de bzhin sgrub pas 'thob par 'gyur/ /mya ngan 'das pa'i go 'phang mchog /mdor bsdus bdag gis bshad par bya/ /las kyi phyag rgya khro rgyu can/ /ye shes phyag rgya yang de bzhin/ /rnam rtog mang ba spangs byas la/ /phyag rgya chen po rnam sgom bya/ /rnam par g.yengs pa kun 'byung ba'i/ /bud med phyag rgya rnam spangs la/ /rang lus thabs dang ldan pa yi/ /phyag rgya chen po bstan par bya// rang gi rig pa'i lha rdzas de/ /phyag rgya chen po mchog tu dge/ tha mal lus la brten nas gnas/ /shes rab chung bas mthong mi 'gyur/ /mi 'gyur ba yi rang lus de/ /mchog gcig gis ni shes par 'gyur/ /bla ma'i bka' drin gnang ba la/ /ji lta ba bzhin rnam par gnas/ /rtswa shing 'khri shing la sogs la/ /kun tu gnas par gyur pa yang/ /mi yi thabs dang bral ba yis/ /me ni mthong bar 'gyur ma yin/ /thabs dang bral na nam du yang/ /lha rdzas yon tan kun 'byung ba/ /gnyug ma'i lus po gnas na yang/ /shes rab de bzhin mthong mi 'gyur/ /ji ltar bud shing khu ba dang/ /til la til mar ji bzhin pa/ /de bzhin lus la thams cad du/ /shes rab pha rol phyin pa gnas/ /lha rdzas mchog de thams cad la/ /rnam par gnas par shes par bya/ /sangs rgyas kun gyis skyed byed pa/ /shes rab lha mo bla na med/ /khams gsum ma lus pa 'di dag /gang gis thams cad gsal byed pa/ /mya ngan 'das pa gnas dngos kyi/ /thog ma bar mdza' rnam par mdzes/ /de ltar shes nas 'bad pa yi/ /shes rab pha rol phyin zhi ba/ /rdzogs pa'i rim pa'i rnal 'byor gyis/ /dbang phyug mchog gis khyab par 'gyur/ /gang zhig sems la 'dod gyur pa/ /da ni de nas bsgom par bya/ /thabs dang ldan pa'i rnal 'byor gyis/ /sangs rgyas dngos grub rab tu stsol/ /de dang lhan cig tshol byed pas/ /de nyid bdag gis rtag tu rig /nyin dang mtshan du bsgom 'gyur na/ /'di ni thob 'gyur the tshom med/ /smyon pa'i gzugs la brten nas ni/ /bsal por skye ba smad byed cing/ /thabs bzang dag dang ldan pa yis/ /byang chub yangs pa bsgom par bya/ /mchog tu mya ngan 'das gsungs pa/ /dag cing rang bzhin dri ma med/ /rang lus de nyid blo ldan gyis/ /de dang ldan pas bsgom par bya/ /dngos grub kun sbyin sgrub pa'i thabs/ phung po lnga yi bdag lus nyid/ /ji ltar gsang ba gnas gyur pa/ /de nas yang dag bshad par bya/ /phyag rgya chen po rtogs byas pas/ /dpa' bo ji ltar rdzogs 'gyur ba/ /mchog tu gyur pa'i rang gi lus/ /shin tu gsang ba bdag gis bshad/ /blo ldan dngos po mi bsgom zhing/ /dngos med pha rol ring du spangs/ /gcig gis rtag par 'dzin gyur cing/ /gzhan dag gis ni stong nyid du'o/ /rtag dang chad pa'i sbyor ba las/ /mchog tu 'dzin pa zad pa gang/ /ye shes ci zhig 'byung 'gyur ba/ /thog ma dbus mdza' dri ma med/ /gtso bo rtag pa mchog tu zhi/ /rgyu dang dpe ni rnam spangs pa/ /dngos dang dngos med rnam par spangs/ /rtag tu 'byung zhing 'gyur ba med/ /mi gnas mya ngan 'das pa nyid/ /sdig pa thams cad rnam spangs pa/ /der gnas bsgom dang ldan gyur pa// sangs rgyas kyis kyang spyod yul min/ /de mi bgrod dang bgrod bya med/ /bgrod par 'gyur ba 'ga' yang med/ /sgom dang bsgom bya sgom pa po/ /don dam par na yod ma yin/ /dpe las 'das shing brjod du med/ /bzung dang 'dzin pa rnam par spangs// mtshan ma med cing rdul dang bral/ /mya ngan 'das zhes de la bshad/ /gang la mchog ces brjod bya ste/ /phyag rgya chen po mngon par gnas/ /lha rdzas longs spyod grol steng ba/ /mya ngan 'das pa'i go 'phang mchog /bzang po'i gnas de sems can la skal ba ji bzhin rab tu bstan/ /gcig nyid gnyis su rnam par gyur/ /bsam pa'i dbye bas mchog nyid de/ /lha rdzas mya ngan 'das pa'i gzugs/ /dag cing rang bzhin dri ma med/ /bud med skyes ba sogs gzugs kyis/ /thams cad du ni rnam par gnas dbang po las 'das zhi ba gang/ /rjod med kun tu 'gro ba mchog /'phel zhing 'grib las rnam grol ba/ /dpal ldan bde chen zhes brjod pa/ /cung zad rdzas su 'du shes gang/ /thams cad de las kun tu 'byung/ /khams gsum pa yi lam bzang po/ /kun tu de ni rnam par gnas/ /de ni dngos grub sa bon te/ /dngos grub rnams kyi go 'phang mchog /sangs rgyas rnams kyi gnas mchog ste/ /bde ba can zhes mngon par brjod/ /lha dang lha mi na mir bcas pa/ /thams cad 'di las nges par 'byung/ /khams gsum ma lus pa 'di dag /thams cad bde ba nyid du gnas/ /gang gis gzugs ni shes min zhing/ /gang zhig tshig dang blo spangs la/ /sgra dang dri dang ro las 'das/ /blo yi yul las gang 'das pa/ /de ni 'jig rten las 'das pa/ /mchog tu bden pa'i gzugs gang zhig /rang gis dbang gis 'jug 'gyur ba/ /chos kyi 'khor lo bskor bar gyur/ /gsang sngags bye ba grangs med kyang/ /de yi nges par 'byung bar 'gyur/ /bden pa gsungs pa'i lung gis 'ba' / /bde par gyur pa'i rim ston pa'i/ /bla ma'i zhabs kyi bka' drin gyis/ /de ltar de nges shes byas la/ /thabs gang gis ni de yi dngos/ /mchog tu brjod med gang thob pa/ /blo ldan de nyid rang lus la/ /sngags pas de nyid sgrub par bya/ /dngos po med pa dang bsres la/ rtse gcig sems dang ldan pa yi/ /thabs bzang po dang ldan byas nas/ /yang dang yang du ral bar bya/ /gnyis pa thams cad rnam spangs pas/ /dus mi ring par 'grub par 'gyur/ /shin tu sbas pa'i rab sbyin dang/ /rig pa yis ni gang shes dang/ /'dod pa'i yon tan lnga ldan pa'i/ dag pa'i bdag nyid gang sgom bya/ /gsang ba grub pa la gnas pa'i/ /dngos grub des ni gdon mi za/ /las kyi phyag rgya ldan pa'am/ /yang na phyag rgya chen po yi/ /sangs rgyas rnams kyi thugs gyur pa/ /'di ni chos nyid mchog yin no/ /snying po'i ye shes gcig bsdus pa/ /ma byung 'byung bar mi 'gyur ro/ /bdag med gnas 'di ma gtogs pa'i/ /rnam dag dngos grub gzhan dag med/ /rnam par mi rtog dmigs med pa/ /gang las sangs rgyas 'byung 'gyur ba'i/ /shes rab lha mo bla na med/ /'di na pha rol zhes byar brjod/ /gal te shes nas sgoms gyur na/ /sems can kun gyi grol ster 'gyur/ /sngar bstan cho ga'i rim pa yis/ /dag pa'i de nyid gang bsgoms pa/ /rang bzhin 'od gsal rnam dag pas/ /bdag nyid rdo rje kun las skyes/ /mtshan rnams kun gyis rnam par brgyan/ /rnam pa kun gyi mchog ldan pa'i/ /tha mal pa yi lus spangs nas/ /lha rdzas nga rgyal ldan yid kyis/ /thabs dang yang dag ldan pa dang/ /ting 'dzin mchog la rnam gnas nas/ /pad+ma rdo rje tshig bzhin du/ /de ni 'grub 'gyur the tshom med/ /gang zhig phyag rgya chen ldan pas/ /bde ba chen po myong gyur pa/ /ye shes bdud rtsi mchog bzang po/ /de ni brjod par nus pa yin// rang gis rig pa'i de nyid de/ /gzhan gyis brjod par nus mi 'gyur/ /gus dang bsgom pas rtogs 'gyur gyi/ /de ni gzhan du rtogs mi nus/ /de nyid shes nas nyin mtshan du/ /gus pas bsgom par bya ba yin/ /mya ngan 'das pa'i go 'phang mchog / bde ba zhi ba bla med deng/ /der ni gus pa'i stobs nyid dang/ /bsgom pa'i stobs kyis gang sprul pa/ /der ni 'byung bar 'gyur ba'i gzugs/ /kun dga' las byung ci yang mchog /spro zhing sdud par byed pa can/ /gsal por yud kyis byung gyur pa/ /sa 'og sa bla sa stengs 'di/ /rgyu dang rgyu min snang bar byed/ /de nyid bsgoms pa'i stobs nyid kyis/ /thabs dang shes rab dngos zhi ba/ /nyon mongs kun las rnam grol zhing/ /mtshan rnams kun gyis rnam brgyan pa/ /stong nyid ye shes las byung zhes/ /gnyis med mchog tu zhi ba nyid/ /rnam pa kun tu mchog ldan zhing/ /gzung dang 'dzin pa rnam par spangs/ /rnam dag ye shes sgyu ma'i dngos/ /gsal zhing rang bzhin dri ma med/ /sgra dang dri dang ro las 'das/ /de bzhin reg pa rnam par spangs/ /ting 'dzin ye shes mig nyid kyis/ /mchog gcig pu de mthong bar 'gyur/ /bzang po grib ma'i sgyu 'dra yis/ /'du byed bzang po dang ldan pa/ /me yis thag pa bsregs pa bzhin/ /nyon mongs 'ching ba las grol ba/ /rnam pa sna tshogs lus rnams ni/ /ye shes rlabs kyi phreng ba spros/ /dbang po'i gzhu dang 'dra ba'i sku/ /de nyid bsgoms pas thob par 'gyur/ /rnal 'byor bsgom pa'i nus pa dang/ /dam tshig rnams ni bskyed byas pas rgyal ba yis kyang brjod med pa'i/ /de 'dra'i gzugs ni thob par 'gyur/ /gang du lus ngag sems med pa'i/ /gnas gang kun 'gro mchog gyur pa'i/ /der ni yang dag bstan dbang gis/ /rang bzhin bsgom par gyur la ltos/ /e ma'o ngo mtshar byed pa'o/ /e ma'o zhi ba dbang po las/ /e ma'o mchog tu zhi ba nyid/ /byang chub sems kyi rnam 'phrul yin/ /lha yi rnal 'byor mchog nyid kyis/ /rim gyis 'di 'dra thob par 'gyur/ /sangs rgyas go 'phang bsgrub pa'i phyir/ /de nas spyod pa spyad par bya/ /nyon mongs kun dang bral ba'i gnas/ /brjod dang brjod bya rnam spangs la/ /'bad pa nyid kyi mngon sum du/ /sgrub pa pos ni yang dang yang/ /brtan pa'i sems kyis nges par yang/ /gsang ba'i spyod pa spyad par bya/ /rdzogs pa'i rim pa'i rnal/ 'byor gyis/ /nyes pa thams cad rnams spangs la/ /lha rdzas gar dang rgod sogs kyis/ /ji ltar skyo ba mi skye bar/ /sangs rgyas spyod pa la mos pas/ /brtul zhugs can gyis gsang ba spyad/ /brtul zhugs dang ldan der gnas nas/ / der gtad bsgom pa dang ldan pas/ /nyon mongs thams cad mthar byas la/ /go 'phang mchog ni 'grub par bya/ /rgyun tu mchog tu gsang ba ste/ /bla ma'i zhabs la rab gnas pas/ /sangs rgyas dngos grub bzang ster ba/ /de ni thams cad bdag gis bshad/ /don dam pa'i yi ge gsum dang ldan pa'i rgyud kyi dam pa'i don nges par bsdus pa dpal gsang ba grub pa zhes bya ba las dpal rdo rje sems dpa' mnyes par bya ba las mngon par byang chub pa bstan pa'i le'u ste gsum pa'o/ / //dang po'i las pa'i sems can gyis/ /bskyed pa'i rim pa'i bsgom pa nyid/ /cung zhig rgyas pa'i mtshan nyid can/ /de nas da ni bshad par bya// dpal ldan 'dus par yongs gsal bar/ /'gro ba'i mgon pos gang gsungs pa/ /gong ma gong ma'i lam nyid kyis/ /bsgom par bya ba bzhi po nyid/ /dang po yi ge dgod par bya/ /bskyed pa'i rim pa la gnas pas/ /sgrub po'i dbang pos bsgom bya ba/ /gnyis pa rang gi rang bzhin nyid/ /gsum pa bzang po mchog gyur pa/ /ye shes phyag rgya rnam par bsgom/ /bzhi pa gong mar gang gsungs pa/ /phyag rgya chen por rnam par bsgom/ /de ltar de nyid bzhi po ni/ /'di dag la ni yang dag gnas/ /bsgom pa dag gis gang bstan pa/ /de dag bdag gis so sor bshad/ /yi ge dgong pa'i sbyor ba yis/ /bsgom par bya ba gang gsungs pa/ /sems can dang po'i las can rnams/ /gzhug par bya phyir gang gsungs pa/ /ji lta ba bzhin rnam gnas pa'i/ /dang po re zhig bstan par bya/ /bskyed pa'i rim pa'i lam nyid du/ /gcig nyid rnam pa lnga ru 'gyur/ /mngon par byang chub rnam lnga yi/ /ye shes mchog tu dge ba nyid/ /ji ltar bstan par shes gyur nas/ /rtag tu gnas ta 'dir bshad bya/ /gong ma gong ma'i rim nyid kyis/ /thugs kyi rdo rje gang gsungs pa/ /yi ge dgong pa'i sbyor ba yi/ /chos kyi dbyings kyi bdag nyid bdag /bzang po nam mkha' i mtshan nyid can/ /kun rtog thams cad spangs pa yi/ /kun 'gro'i ye shes rnam dag pa/ /thog ma bar mdza' dri ma med/ /chos rnams kyis ni ngo bo gang/ /so so'i gzugs su gang gnas pa/ /bdag med gnas pa'i rnal 'byor gyis/ /'bad pa nyid kyi so sor brtag /spros pa thams cad las grol ba'i/ /gzugs gang mchog ni zhi ba nyid/ /chos kyi dbyings kyi ngo bo shes/ /ye shes 'di la 'di rab grags/ /gnas bzang po der gnas nas ni/ /nyon mongs thams cad rnam spangs la/ /sems can rnams kyi don bya gang/ /gzugs kyi mchog nyid dmigs par bya/ /thabs bzang dag dang ldan pa yi/ /shes rab dang ni bcas pa'i gzugs/ /gsal po rnam pas byung gyur pa/ /mtshan rnams kun gyis rnam par brgyan/ /rgyan rnams thams cad yongs su rdzogs/ /bzung med mchog tu zhi ba nyid/ /dang zhing skyon bral dri ma med/ /phyag rgya chen por rjes rig bya/ /gzugs de las ni 'byung 'gyur ba/ /de yi gzugs brnyan ltar byed pa/ /sgyu ma'i rjes grub bzang po gang/ /rnal 'byor phyag rgya gzugs ldan pa'i/ /dngos po med pa'i rang bzhin gyis/ /gzugs brnyan yid kyi rang bzhin nyid/ /yon tan mdza' med 'byung 'gyur ba/ /sangs rgyas kyis kyang mi mkhyen pa'i/ /dpal ldan me long ming can du/ /ye shes de la brjod par bya/ /dngos po med pa'i rang bzhin du/ /der ni 'gog pa'i ye shes gang/ /de yi rang bzhin rnal 'byor ldan/ /mnyam nyid ye shes zhes brjod do/ /rgyas pa spyan zhes bya ba gang/ /lha rdzas bud med dkyil 'khor ro/ /'bad pas so sor rtogs gyur pa/ /de bzhin gshegs pa kun gyi gnas/ /bdag med gnas kyi rnal 'byor pa/ /dngos po med pa'i rang bzhin can/ /lha rdzas nam mkha' i khams kyi ngor/ /sangs rgyas kun gyi pho brang mchog /phra mo'i rnal 'byor sbyor gcig pas/ /ji srid de la rtogs 'gyur bas/ /rtog pa cung zhig bskul gyur ba/ /de srid de ni mthong bar 'gyur/ /sangs rgyas byang chub sems dpa' dag /srid gsum gnas na gang gnas pa/ /gang zhig gnas pa de dag kun/ /til gyi gang bu bzhin 'dir mthong/ /gang gA'i klung gi bye snyed kyi/ /de bzhin gshegs pas yongs gang ba/ /sangs rgyas gzugs ni 'od chen po/ /bzang po de ni mthong gyur nas/ /nam mkha' i dbyings kyi gnas bzang por/ /rnal 'byor 'di ni brtag par bya/ /der ni de bzhin gshegs pa kun/ /da ltar bzhugs dang gang 'das dang/ /gang dang 'byung bar gyur ba dag /de dag kun gyi gnas mchog ni/ /dag cing dang pa dri med de/ /de bzhin gshegs pa kun gyi mchod/ /ye shes de ni mdor bsdus na/ /so sor rtog pa zhes byar brjod/ /de bzhin gshegs pa'i pho brang du/ /'bad pas so sor rtog pa nyid/ /de yi phyi nas nyams len pa/ /rdo rje pad+ma'i rnam 'phrul pas/ /lha yi rnal 'byor kun 'gengs shing/ /mchog tu dga' ba'i gzugs can gyis/ /sa la sogs pa'i rim pa yis/ /byang chub sems ni yang dag spro/ /gang 'dod lha yi rnal 'byor ni/ /der ni nges par sgrub par bya/ /rtag dang mi skyod rin chen tshe/ /rigs la sogs par gang gnas pa/ /'khor los sgyur ba'i rnal 'byor gyis/ /rig ma'i skyes bu bsgom par bya/ /bzang po'i rgyan dang yang dag ldan/ /phyag rgya chen po rjes rig pa/ /rdo rje pad+ma mnyam sbyar bas/ /mchog tu dga' ba'i gzugs can gyis/ /rnam pa sna tshogs gzugs ldan pa'i/ /ye shes rlabs kyi phreng ba spros/ /bya ba nan tan ye shes zhes/ /mchog tu gyur pa de la brjod/ /gang la rgyal ba rnams 'byung bas/ /gang du phyag rgya byin rlabs pas/ /ting 'dzin lnga po 'dir gnas pas/ /gang zhig yang dag 'byung 'gyur bas/ /mngon par byang chub rnam lnga yi/ /ye shes zhes ni 'di rab grags/ /bskyed pa'i rim pa la gnas par/ /de yi khyad par brjod pa yin/ /lha dgong rnal 'byor ldan pa yi/ /ji lta ba bzhin rnam par gnas/ /khams drug pa dag mnyam ldan pa'i/ /rgyud las gsungs pa'i 'khor los sgyur/ /rim gyi yum gyur bzhi po dang/ /khro bo sems dpa' de dang mtshungs/ /'khor bcas pa yi byang chub sems/ /bcu drug dag dang mnyam ldan pa'i/ /mtshan ni sum cu rtsa gnyis dang/ /de bzhin dpe byad brgyad cur ldan/ /mngon par byang chub rnam lnga zhes/ /de bzhin gshegs pas bstan pa yin/ /rtag dang mi skyod rin chen gyis/ /rigs la sogs par yang dag gnas/ /de ltar rnam pa sna tshogs pa'i/ /rnam par rtog pa'i rgyas gang ba'i/ /dang po'i las can sems can gyi/ /bsgom par bya bar gsungs pa yin/ /'khor lo'i rim par bsgom bcas pa/ /'di ni phyi rol zhes bshad de/ /yi ge dgod pa'i rnal 'byor gyis/ /dang po nyid du gang gnas pa'o/ /sems can dang po'i las can la/ /las kyi phyag rgya bsgoms pa yi/ /rnam par gnas pa'i pad gnas gang/ /gong ma mchog gi go 'phang yin/ /byin gyis brlabs pa'i gnas bsgoms te/ /de nyid mchod pa rab tu brtag /de nyid dpal ldan 'dus par ni/ /rdo rje 'dzin pas mchog tu gsungs/ /bskyed pa'i rim pa nyung ldan pas/ /rdo rje pad+ma mnyam sbyor bas/ /'di ni bsgom pa gnyis pa ste/ /rang gi ngo bo yin zhes grags/ /gsum pa de ni bstan pa ste/ /nang gi go 'phang bsgom pa yin/ rnam pa kun ni mchog ldan pa'i/ /ye shes phyag rgya rab brtag pa'o/ /bzhi pa gong na med pa'i rgyu/ /mngon par byang chub byed pa po/ /phyag rgya chen po rnam bsgom pa/ /de yi gong na gzhan med pa'o/ /dbang po kun las rnam grol zhing/ /'byung ba'i spyod pa sbas gyur pa/ /zhi zhing grub pa myur ster la/ /bla ma'i zhal las rab gnas pa'o/ /gcig min du ma ma yin zhing/ /rlabs med snang ba med pa dang/ /thams cad kyis ni bde gnas pa/ /mchog tu dga' ba byed pa po/ /rang sems tsam du shes pa bya/ /nyon mongs tshogs ni 'gag 'gyur zhing// dam pa'i shes rab gyur pa'i lus/ /de ltar rgyud kyi rim shes nas/ /lha yi rnal 'byor mchog nyid dang/ /gong ma gong ma'i lam nyid kyis/ /drang po min pas gang 'ongs pa/ /de dag thams cad des btang la/ /rim pa bzhin du bsgom par bya/ /phyag rgya chen por 'bad pa yis/ /sngags pas rtag tu bsgom par bya/ /grub pa thams cad rab sbyin zhing/ /thabs kyi mchog dang bcas par ni/ /de dag bsgom pa dang ldan na/ /tshe 'di nyid las grub par 'gyur/ /gang zhig sems ni bla med pas/ /skye ba med par gang rtogs pa/ /de yi dngos med shes rab ste/ /thabs kyi rab tu bskul ba nyid/ /de ltar de nyid shes pa la/ /phyag rgya chen po rnam par bsgom/ /de nas thabs dang bcas gyur pas/ /gang 'dod pa yi brtul zhugs bya/ /sangs rgyas gos med zhi ba 'am/ /de bzhin nor gyi bdag po 'am/ /yang na brtul zhugs chen po'am/ /yang na sems la 'dod pa'o/ /bshad par gyur pa shes byas la/ /brtul zhugs mo yin shes pa nyid// blo dang ldan pas shes bya ba/ /rgyu las gzhan dag bshad pa yi/ /dor ba'i brtul zhugs kun mi bya/ /mchog tu gyur pa yin par 'dod/ /de las yid la gang 'dod pa/ /spyad pa med par spyad par bya/ /dpal ldan 'dus pa'i rjes su 'brel gyur pa/ /lam mchog dpe med 'bad pas shes byas la/ /brtan pa'i blo yi dam pa de nyid gcig /phyi rol dri ma ma lus spangs byas nas/ /bde ba'i rdzu 'phrul dang ldan gnyug ma'i gzugs/ /'du 'dzi dri ma spangs la bsgom par bya/ /ye shes rang bzhin rjes 'brel nyin mtshan du/ /sangs rgyas thar pa'i rgyur gyur bstan pa nyid/ /dga' ba'i dbang phyug dang ldan dga' ba'i sems/ /rtag tu byang chub la bzhugs bsgom pa'i sems 'brel ba/ /dri ma ma lus zad par gyur pa yis/ /'khor ba'i 'chid ba rnams ni spang bar bya/ /bde ba'i go 'phang mchog gyur brtan pa'i sems kyis bsgom/ /rtag tu goms par byas pa'i rnal 'byor dang/ /bdag nyid de nyid rnal 'byor ldan pa yi/ /dri ma'i rab rib spangs dag mthong ba bzang/ /gcig tu gsang ba'i sa phyogs yon tan rgya'i gzhir gyur ri 'am khyim stong dam/ /skyed cha la rnying dang brag phug dur khrod dag gams phug nyams dga' 'am/ /de ltar dri med byas pa'i sa phyogs dag tu bzang po mtshon cing bzung/ /yul gyi bde ba skyed byed de nyid rin chen rdo rje can gyi 'du 'dzi spangs la bsgom/ /rnal 'byor pa ni thams cad kyang/ /de nyid lam la rab chags pas/ /thabs dang bcas pa'i rnal 'byor gyis/ /de ni 'grub 'gyur gzhan du min/ /bskyed pa'i rim pa lam gyis ni// gzhan dag tu yang 'gyur ba yin/ /skye ba du ma dag gis kyang/ /'dir ni gcig gis 'byung bar bshad/ /de ltar the tshom med shes nas/ /shes rab thabs kyi bsgom pa yis/ /phyi rol rnam pa sna tshogs kyi/ /bya ba'i bye brag yongs spangs la/ /dpal ldan 'dus pa'i lam 'bras bcas/ /sangs rgyas dngos grub rab ster ba/ /thabs bzang dag dang ldan pa yi/ /blo ldan gsang ba grub par spyad/ /yul dang dus dang gza' rnams dang/ /rgyu skar phyi rol dkyil 'khor rnams/ /med par gsang ba rdo rje can/ /sgrub pa'i thabs 'di bshad par bya/ /nges pa brtul zhugs gso sbyong sogs/ /yi ge brjod pa'i bsgom pa yis/ /'di ltar dngos grub gang brtags pa/ /spyod pa dka' bas brtags pa yin/ /yi ge brtags pa'i ngo bo nyid/ /kha dog dbye bas mtshon bya ba/ /sems can kun gyi gsang dbang gis/ /dpal ldan gsang bar gang gsungs pa/ /dkyil 'khor dag ni gang gsungs pa/ /rigs nyid so sor so so dang/ /phyag rgya'i dbye ba sna tshogs dang/ /de bzhin sngags kyi dbye ba rnams/ /mchod dang bsnyen bkur byed pa dang/ /rigs kyi dbye ba du ma nyid/ /ting 'dzin dbye ba phye ba yi/ /lha rnams su ni brtags pa dang/ /dus nges pa yi bye brag rnams/ /bskyed pa'i rim pa bsgom pa yi// spro ba dang ni bsdu ba dang/ /sbyor ba du ma nyid dang ni/ /'dod chags la sogs dri ma rnams/ /sna tshogs gzugs kyi gang gnas pa/ /'khor bar rab tu 'chi ba byed pa'i/ /khams gsum pa yi bstan pa'i lam/ /de kun dngos pa med gyur pa'i/ /ye shes mchog gi rnam 'phrul yin/ /rtog med rnam par dag pa ni/ /rgyu dang mi rgyu kun tu song/ /'dod chags zhe sdang gti mug dang/ /de bzhin gzhan yang yod ma yin/ /dang po'i rnal 'byor ngo bo yis/ /ji srid kun la rnam par spyod/ /chos dang chos min mtshan nyid kyi/ /thams cad mngon du brtags pa can/ /bdag med gnas kyi sbyor ba yis/ /ji srid brtan par ma brtags pa'o/ /rnam par mi rtog gnas pa med/ /dag cing par bzhin dri ma med// srid pa'i rtse mo'i mthar thug pa/ /khams gsum 'di dag thams cad nyid/ /lam gyi so sor brtags byas nas/ /phung po'i bden pa yod ma yin/ /su zhig gis ni so sor rtog /'dir ni gang la brtag par bya/ /'bad pas de nyid de kho na/ /ji srid bar du brtag byas pa/ /de srid thams cad 'od gsal te/ /rnam dag rang bzhin dri ma med/ /dngos dang dngos med las grol zhing/ /spros pa med pa'i ngo bo nyid/ /sangs rgyas kyis kyang rtogs min na/ /skye bo gzhan gyis smos ci dgos/ /rtag dang chad pa las grol zhing/ /kun 'gro mchog tu zhi ba nyid/ /dngos med snang ba med pa yi/ /byang chub sems dpas phyag byas pa'o/ /yon tan med cing nga rgyal med/ /mtshan ma med cing sgrib pa med/ /'grib dang 'phel las rnam gral ba/ /ngag gi spyod yul dag las 'das/ /de la 'gro dang 'ong ba dang/ /'dir ni 'gro ba po 'ga' med/ /sgom dang sgom pa sgom bya ngag /don dam par na yod ma yin/ /de nyid mchog gyur gcig pu nyid/ /byang chub sems zhes rab tu brjod/ /dbye ba sna tshogs bsam mi khyab/ /bye ba snyed du rab rgyas pa/ /bzang po kun 'gro rnam dag ste/ /ming gcig nyid kyi gnas pa min/ /sems can bsam pa'i bye brag gis/ /khams gsum kun tu rab tu khyab/ /zhi ba rnams kyi de nyid mchog /rig byed smra ba tshangs pa zer/ /sangs rgyas pa rnams byang chub mchog /gos med pa rnams srog ces zer/ /grangs can rig pa can la sogs/ /dbye ba gang zhig rnam brtag pa/ /de dag brjod pa ga la nus/ /sna tshogs nyid la khyab gnas nas/ /rnam pa sna tshogs ngo bo rnams/ /des ni smra bar nus ma yin/ /bzang po'i dbye bas gang gnas pa/ /yang dag mdza' nyid du mar bstan/ /kun mkhyen ye shes mi rtog pa/ /rdo rje can mchog gang yin te/ /khams gsum ma lus 'di dag ni/ /thams cad 'di pas kun tu 'byung/ /zhi zhing dag pa'i gnas gang de/ /sangs rgyas kun gyis phyag byas pa/ /brjod med kun 'gro'i gnas yin te/ /'di kun de yin ma 'phrul yin/ /cung zad dngos grub mtshan nyid gang/ /thams cad de la rnam par gnas/ /spros pa'i tshul gyis ngo bo nyid/ /chos kyi 'khor lo rnam par skor/ /khams gsum rnam dag 'di thams cad/ /sa bon shes rab las byung kun/ /mtshan ma med cing mchog tu zhi/ /ye shes sgyu ma'i rjes 'jug pa/ /mang po dag ni gcig pa nyid/ /ji srid yod pa'i bud shing kun/ /stong pa'i me yi ma bsreg par/ /sgrub pa po yi ji ltar mthong/ /lta ba'i bud shing phung po rnams/ /stong nyid me yi bsreg byas nas/ /'dir ni mnyam nyid la gnas na/ /de bzhin nyid kyi me yang 'gag /bsam gtan shes rab mig sman gyis/ /ji srid bskur ba ma byas pa/ /de srid lta ngan rab rib rnams/ /dri ma med par ji ltar 'gyur/ /dngos po brten dang g.yo ba kun/ /'bad pas de ltar rnam sbyangs nas/ /bdag med go 'phang la gnas la/ /da nas sgrub pa brtsam par bya/ /bdag gi gang du gang smras pa'i/ /lha'i rnal 'byor shes byas la/ /de ni 'dad pas bsgom byas na/ /'di ni 'grub 'gyur the tshom med/ /sangs rgyas nges par sgrub par byed pa yi/ /cho ga rkang gnyis mchog gis nges par gang bstan pa/ /spyod pa du mas mdzes shing yid du 'ong bar 'gyur ba'i rgyud du gsal/ /de srid de ni ma bstan yon tan ldan pa'i dngos grub 'byung bar mi 'gyur bar/ /shes nas mkhas pa rnams kyis spyod pa dang ldan cho ga bzhin du sgrub pa rtsom/ /don dam pa'i yi ge gsum dang ldan pa'i rgyud kyi don nges par bsdus pa dpal gsang ba grub zhes bya ba dpal rdo rje sems dpa' mnyes par bya ba las mngon par byang chub pa lnga bstan pa'i le'u ste bzhi pa'o// dpal ldan gsang ba rdo rje 'dzin/ /rdo rje sems dpa' sgrub pa'i thabs/ /yang dag spyod pa sbas gyur pa/ /de nas yang dag bshad par bya/ /rdzogs pa'i rim pa'i rnal 'byor gyis/ /rnam par g.yeng ba'i dgra gsod cing/ /dge bzang gsang ba'i sgrub thabs kyis/ /rol mo'i las kyi sgrub par bya/ /dbang bskur ba ni mchog bzang po/ /dpal ldan 'dus par rjes 'gro bas/ /phyag rgya chen po dbang bskur nas/ /bzang po dngos grub rab tu bsgrub/ /de bzhin 'dod chags rab gnas nas/ /lha'i rnal 'byor der gnas pas/ /gsang ba grub par rab gnas na/ /sgrub po gang phyir 'grub par 'gyur/ /bzang po ye shes goms byas shing/ /spyod pa thams cad rnam spangs nas/ /gnyis pa thams cad las grol bas/ /gang du 'dod pa de ru gnas/ /sgrub pa po la phan gdags phyir/ /gsang ba grub pa mdor bsdus nas/ /dngos grub rnams kyi go 'phang mchog /de ni bdag gis bshad par bya/ /gang zhig skye ba bu ma yi/ /dngos grub thob par 'dod 'gyur ba/ /des ni gsang ba'i brtul zhugs kyis/ /gnyis pa thams cad spang bar bya/ /dge ba thams cad 'byung ba'i rgyud/ /'dus pa zhes bya'i dbang bskur bas/ /bzang po dngos grub sbyin byed pa'i/ /phyag rgya chen po'i dbang bskur pas/ /de nas rang 'dod la gnas shing/ /dang po'i rnal 'byor gcig gtad pas/ /bla ma'i zhal nas 'byung ba yis/ /rnal 'byor rin chen goms par bya/ /dpal ldan bde ba'i mgon po yis/ /mchog tu gsang zhing sbas pa yis// shin tu sbas pa'i dbang bskur ba/ /de nas yang dag bshad bar bya/ /gzugs bzang yon tan 'byung 'gyur ba/ /phyag rgya 'bad pas rnyed gyur nas/ /rgyud kyi spyod pa dang ldan pas/ /slob dpon la ni dbul bar bya/ /phyag rgyar bcas pa'i rdo rje 'dzin/ /gus pa'i 'o ma mar me dang/ /dri dang phreng ba rgyan chen gyis/ /de nas blo dang ldan pas mchod/ /de la gus pas mchod bya zhing/ /blo dang ldam pas cho ga bzhin/ /bla ma phyag rgyar ldan mthong nas/ /rtog pa'i cho ga'i rim pa bzhin/ /bus mo g.yas pa'i lha ra ni/ /sa 'bar? tu btsugs byas la/ /bstod pa'i rgyal po rdo rje can/ /cho ga bzhin du brjod par bya/ /kun mkhyen sa kun dbang phyug pa/ /kun gyi dbang phyug 'gro ba'i bdag /thugs kyi bdag po dpa' bo che/ /dpa' bo gtso la phyag 'tshal bstod/ /'byung po kun bdag bdag nyid gnas/ /rdo rje ye shes gsum 'byung ba/ /rdo rje hUM mdzad hUM mdzad pa/ /nyon mongs mthar mdzad phyag 'tshal bstod/ /sangs rgyas kun mchog phyag 'tshal 'dud/ /rdo rje gsum dbyer med pa'i sku/ /chos bdag med pa las byung ba/ /ye shes bdud rtsi phyag 'tshal 'dud/ /kun mkhyen ye shes phung po can/ /srid pa'i 'khor lo rnam sbyong ba/ /dpa' chen ye shes chen po ba/ /gzi brjid chen po phyag 'tshal bstod/ /phyag chen dpa' bo chen po ste/ /stobs chen mchod pa chen por/ /'dud mthar byed pa dpa' chen po/ /dpa' bo dbang phyug phyag 'tshal bstod/ /skye dang gnas dang sdud pa yi/ /byed pa por 'gyur 'gro ba'i gtso/ /dngos dang dngos med rang bzhin nyid/ /ngo mtshar mchog gyur phyag 'tshal bstod/ /ye shes rnam shes zhes bya ba'i/ /lam du 'jug 'gyur phyag 'tshal bstod/ /'gro ba'i mgon la phyag 'tshal bstod/ /pad+ma las byung phyag 'tshal 'dud/ /bstod pa'i rgyal po 'di yis ni/ /cho ga bzhin du gsol btab nas/ /sems can kun la phan 'dod pas/ ? snyan pa'i tshig ni rjod par bya/ /khyod kyi zhabs kyi bka' drin gyis/ /ye shes bla med bya ba shes/ /de ltar dbang skur rin chen gyis/ /mgon pos bdag ni dbang skur mdzod/ /dpal ldan bde ba'i mgon po yis/ /dpal ldan chos kyi rdo rje la// gsang ba de nyid bstan pa ltar/ /mgon pos de bzhin bka' drin gsol/ /sdug bsngal kun gyi gnas gyur pa/ /dmyal ba nas ni gtso bos drongs/ /sdug bsngal thams cad thar mdzad pa/ /mgon med bdag la thugs rje mdzod/ /khyod zhabs pad+ma spangs nas ni/ /gtso bo gzhan la skyabs ma mchis/ /'gro ba'i dpa' bo thub chen gyis/ /de phyir sangs rgyas mchog gnang mdzod/ /gsol ba 'debs pa'i cho ga mchog /bzang po de ltar thob gyur nas/ /snying rje slob ma la bskyed ni/ /bla ma dpal ldan yon tan mtshos/ /bzhin ni rab tu dang gyur pas/ /rjes su rtse phyir rab dga' bas/ /gsang zhing mchog tu gsang gyur pas/ /dam tshig de nas thob par bya/ /bu yi srog chags gsang bar bya/ /brdzun gyi tshig kyang smra bar bya/ /ma byin par yang blang bar bya/ /gzhan gyi chung ma brten par bya/ /'di ni cho ga mdor bsdus pa'i/ /phyag rgya chen po des brten pas/ /'di ni rtag tu bya ba yin/ /dam tshig bzhi po 'di nyid ni/ /bzang po khyod kyi rtag tu brten/ /de ltar dam tshig thos gyur nas/ /bzang po dngos grub kun ster ba/ /phyag rgya dang ni ldan gyur pa'i/ /slob dpon thugs rje ldan pa yi/ /rdo rje pad+ma snyoms 'jug cing/ /yang dag rab sbyin la gnas nas/ /lha yi rnal 'byor skyed gyur pas/ /ji lta ba bzhin rnam par gnas/ /'bad pas gsung gi rdo rje yi/ /pad+ma pas byung blang bar bya/ /khrag dang khu ba rnams bsres la/ /slob dpon mchog gis mchod pa'i phyir/ /mi yi thod par blangs nas ni/ /bshang gci rdo rje char/ /?? de nas slob ma kun gyis la/ /sangs rgyas kun gyis byin brlabs nas/ /gnyug ma'i? phyag rgya dang bcas pas/ /dam tshig de ni sbyin par bya/ /dngos grub kun gyi gnas gyur cing/ /sangs rgyas byin brlabs lam gyur pas/ /rdo rje slob ma de nyid rig /chogs de ltar gtang byas pas/ /rang gi phyag rgya dam tshig ni/ /bzang ldan rgyud nas gsungs pa nyid/ /shin tu bzhin bzangs mig yangs ma/ /rtag tu byang chub sems la dpa' / /mA ma kI ltar yongs dag pa/ /rab dga' gos ni rnam spangs ma/ /'di ni yang dag mchod byas nas/ /phyag rgya'i pad+ma rnam gnas pa/ /sngon bzhin spyod pa'i slob ma ni/ /rdo rje 'dzin pa gnyis pa la// bkra shis brjod pa'i tshig gis ni/ /dbyangs ni rnam pa sna tshogs dang/ /rnga yab rgyal mtshan gdugs las so/ /phreng ba tsandan la sogs mchod/ /phyag rgya'i dbang bskur rin chen gyis/ /dam tshig la gnas brten par bzhag /khams gsum pa yi dbang bskur nas/ /slob mas thal mo sbyar byas la/ /de la rjes gnang sbyin bya ste/ /rgyud las ji skad gsungs pa bzhin/ /chos kyi rdo rje gang 'dod par/ /chos kyi 'khor lo bskor bar gyis/ /sangs rgyas byang chub sems dpa' yi/ /chos kyi 'khor lo bla na med/ /rdo rje sems dpas gsungs gyur pa/ /sangs rgyas mchog gis bshad par gyis/ /de ltar bstan pas slob ma la/ /yang dag par sbyin rab sbas dang/ /phyag rgya rin chen dbang bskur dang/ /rjes su gnang ba'i khyad par gyis/ /rgyud kyi don la nges byas nas/ /rdo rje theg pa'i rim 'byung ba'i/ /byang chub sems dpa' rnams kyis bstan/ /sems can mchog gis bshad par gyis/ /'di lta bu yi dbang bskur bas/ /sgrub pa'i nges pa byas gyur nyid/ /de nyid bsgom pas ngal gyur pas/ /nges par mchog ni thob par 'gyur/ / rdzogs pa'i byang chub nges byas nas/ /lugs bcas rim pa'i rnal 'byor gyis/ /gnyis pa thams cad rnam spangs la/ /rdo rje sems dpa' zhes bya sgrub/ /lugs bcas rim pa de nyid nges pa'i blo ldan sgom gyur rdo rje can/ /'dod pa'i yon tan bzang po rab dga' i yid can dngos grub don kun sgrub/ /mo yis tshe 'di nyid la 'grub 'gyur dpal ldan gsang grub la gnas nas/ /thabs bzangs dag dang ldan pas brjod med mchog gyur go 'phang ngam par 'gro /de ltar thams cad shes byas la /rim pa ji bzhin gnas byas te/ /dpal ldan 'dus pa'i rim pa yes/ /ji ltar yang dag bstan pa ltar/ /de nas rang 'dod la gnas pa'i/ /gsang ba grub pa la gnas pa'i/ /dngos grub bzang po la 'bad pas/ /rigs kun la ni kun tu spyod/ /yang na phyag rgya ldan pa yis/ /'bod pa'i yon tan lnga ldan pas/ /rgod dang phreng la sogs bzang po/ /sems ni spro bar byed pa can/ /chags med gsang ba grub pa yis/ /go 'phang mchog ni bsgrub par bya/ /gnyis pa thams cad rnam spangs la/ /mchog tu dga' ba spel bar byed/ /don dam pa'i yi ge gsum dang ldan pa'i rgyud kyi don nges par sdud par byed pa dpal gsang ba grub pa zhes bya ba dpal rdo rje sems dpa' mnyes par bya ba las sgrub pa phyag rgya chen po mngon par bstan pa'i le'u ste lnga pa'o/ / //gsang ba'i spyod pa dge 'byung zhing/ /sangs rgyas thams cad skyed byed la// g.yeng ba'i sgra rnam zad byed pa/ /de nas yang dag bshad par bya/ /rkang pa rkyang ba spangs nas ni/ /'khor ba'i mngag gzhug dor nas ni/ /rtag tu brtson dang ldan yid kyis/ /rdo rje sems dpa' rtag tu sgrub/ /rgod dang 'gyod dang gnyid la sogs/ /'bad pas rab tu spang bar bya/ /gzhan du bskal? ba bye ba ni/ /brgyar yang dngos grub 'byung mi 'gyur/ /mgon po rdo rje slob dpon la/ /dngos po kun gyi phyag byas nas/ /rdo rje gsum dbyer med pa'i gzugs/ /gsang ba'i dngos grub yang dag sbyar/ /mtshan ma med cing snang ba med/ /rang gi lus kyi thabs ldan pa'i// rdo rje sems dpa' bde ba'i mchog/ 'bad pas rab tu bsgom par bya/ /'bad pas de ltar shes byas nas/ /rdo rje'i rang bzhin kun dbang po/ /sngags pas rang lus de nyid dang/ /rdo rje can dngos dbyer med pa'i/ /sna tshogs spyod pa gsal gyur pa'i/ /gsang ba'i brtul zhugs/ bzang po spyod/ /thabs bzang dag dang ldan pa yis/ /mchog tu dga' bas yongs su dgang/ /rnam rtog yid las byung ba yi/ /'jig rten pa yi gang smad pa'i/ /de de gzugs su gnas byas la/ /gsang ba'i brtul zhugs brtul zhugs can/ /ji ltar dpal ldan 'dus spyod pa'i/ /gsang ba zhes byar rab gnas pa/ /bshang gci zas su byas gyur na/ /sgrub pa'i snod du nges par 'gyur/ /dam tshig bzang po gzhan dag kyang/ /gsal byed la sogs khyad par dang/ /phyag rgya'i 'ching ba byin brlabs nas/ /rgyud nas gsungs pa'i bzang po kun/ /rdo rje'i tshigs ni bzang po 'di/ /rdo rje thugs kyis gsungs pa yis/ /gsang ba'i spyod pa bla med pa/ /de ni bdag gis bshad par bya/ /rdo rje thugs kyis gang sbas pa/ /de ni bdag gis bshad par bya/ /sangs rgyas 'bras bu 'dod pa yi/ /sgrub pa po la phan gdags phyir/ /mnyam gzhag mi smra gyur pa yi/ /smyon pa'i gzugs su bzhag par bya/ /rang 'dod lha yi rnal 'byor gyis/ /sha za bzhin du kun tu 'khyam/ /yang dang yang du ngal byas la/ /rdo rje sems dpa' zhes bya bsgom/ /rtag tu bsgom dang ldan gyur pa'i/ /rig pas rang gis rtogs byas la/ /grong dang yul 'khor grong khyer dang/ /tshal la sogs par 'khyam par bya/ /bzhi mdo dag dang dur khrod dang/ /lha rten pho brang khyad par du/ /dor ba rnying pas mgo bcings la/ /tshogs bcas gnas su 'jug na yang/ /mchog tu bde ba bsgom par bya/ /'bad med rol mo brdung ba der/ /gang dang glu yi g.yeng bar bya/ /'o ma sgron mar ldan pa de'i/ /rgyal mtshan can gyi gnas 'jug bya/ /la lar rgod cing la lar smra/ /la lar glu yang blang bar bya/ /la lar gar bya la lar brdab/ /la lar sna tshogs brjod bya ba/ /ji ltar skyo bar mi 'gyur ba/ /thams cad rim gyis rim gyis bya/ /skyo bar gyur nas sangs rgyas nyid/ /nam yang 'grub par mi 'gyur ro/ /'jig rten spyod pa rnam spangs la/ /rigs rnams kun la kun tu spyang/ /'dus shing tshogs pa thams cad du/ /gcig tu 'o ma goms byed par/ /rol la sogs pa'i dam tshig la/ /shin tu sred par mi bya'o/ /nga rgyal spang bar bya ba'i phyir/ /bdag nyid kyis kyang goms par bya/ /mchog tu dga' ba'i sems nyid ni/ /ji ltar myos par mi 'gyur bar/ /dam tshig thams cad sngon 'gro ba/ /sngags pas de ltar bya ba nyid/ /glu dang gar gyi dga' ba ni/ /ji ltar yid ni mi nyams par/ /ji srid mngon sum gyur gyi bar/ /de ltar de nyid la sems bzhag /bdud rtsi lnga la gcig gus pas/ /de nyid nges par byas nas ni/ /rnam par snang mdzad blang byas nas/ /smyon pa'i brtul zhugs kyis brgyan pa'i/ /smyon pa'i mtshan ma gang yin pa/ /de ni rtag tu brten par bya/ /sngags pas gsang ba'i spyod pa ni/ /cho ga bzhin du spyang par bya/ /srog chags kun lus las byung ba'i/ /sgron ma rtag tu cho ga bzhin/ /lha yi dngos grub thob bya'i phyir/ /'bad pas bza' bar bya ba nyid/ /sbrang ma'i skyug pa 'dres pa dang/ /bshang dang gci ba bsres byas nas/ /sgron ma lnga dang bsres pa yi/ /rtag tu bdag nyid mchod pa bya/ /dngos med mchog tu zhi ba yi/ /dpal ldan bde chen rdo rje can/ /rang rig tsam zhig bskyed byas la/ /go 'phang mchog de sgom par bya/ /sngags pas 'di ltar bsgom byas la/ /rang gi lus mchog bsgom par bya/ /smad par gyur pa ma lus pa/ /dpyad pa med par bya ba nyid/ /btsun mo'i rang byung me tog ni/ /byang chub sems dang gcas gyur pa// ? la gsung gi rdo rje can/ /bde ba chen po yang dag mchod/ glang po khyi rta rnga mo yi/ /sgron ma mi las byung ba dag /sngags pas rtag tu bza' bya zhing/ /gzhan du bza' bar mi bya'o/ /de nyid rnal 'byor 'di yis ni/ /gang zhig rtag tu goms byed pa/ /rdo rje pad+ma'i ting nge 'dzin/ /de ni 'grub 'gyur the tshom med/ /slongs mo spyod pa bya ba'i phyir/ /brtul zhugs can gyis snod mi bzung/ /grong pas zos shing por ba yi/ /gyo dus la sogs dar bza' zhing/ /gang du bor zhing byin par bza' / /des ni gang du zos gyur nas/ /tshim par gyur nas de yang dor/ /de yi smad g.yogs dum bu yang/ /rnying zhing dum bur gyur pas bya/ /yang na phyogs kyi gos can gyis/ /gong du 'gro bar 'dod par bya/ /til 'bras tsam gyi dngos po yang/ /yongs su bzung bar mi bya'o/ /yongs su 'dzin las sdug bsngal 'byung/ /sdug bsngal gyis ni sems 'khor 'gyur/ /'khor bas sems ni zhum 'gyur te/ /zhum pas dngos grub nyams par 'gyur/ /dngos grub med na 'khor ba ste/ /'khor bas dmyal bsgrub par byed/ /dmyal bar nyon mongs sdug bsngal gyis/ /grangs med bskal par gnod par 'gyur// bzhin skabs sdug bsngal gyur pa dang/ /gzhan gyi bran la sogs par skye/ /rnam dag legs par 'dod pa yi/ /skye ba slar yang thob mi 'gyur/ /de ltar bdag gis bdag nyid kyis/ /gsang ba'i spyod pa rnam bsgoms nas/ /khams gsum rnam pa gcig gyur pa/ /rnam dag thabs bzangs? la gnas pas/ /rnam dag legs par 'dod pa yis/ /skye ba slar yang thob par 'gyur/ /gsang ba grub pa la gnas nas/ /de nas seng ge bzhin du spyod/ /smyon pa'i gzugs 'dzin gyur pa yis/ /kun spyod thams cad rnam spangs la/ /gsang gsum dri med rnal 'byor gyis/ /bza' ba kun la spyod par bya/ /shing rdos yi rang bzhin gyis/ /lha rnams la yang phyag mi bya/ /lus nyid la ni mchod pa dang/ /bla ma gus pas phyag bya'o/ /sa rdo'i rang bzhin mchod rten dang/ /glegs bam la sogs mi bya zhing/ /rmi lam du yang dkyil 'khor sogs/ /lag pa'i phyag rgya mi bya'o/ /theg pa gsum la zhugs rnams la/ /phyag la sogs pa mi bya'o/ /sangs rgyas dam par mi 'dzin na/ /rnal 'byor pa gzhan smos ci dgos/ /bsgom la chags gyur sems kyis ni/ /ngag gi rtsod pa mi bya'o/ /dam tshig dag ni nyams par 'gyur/ /nyams 'gyur yid ni g.yengs gyur pas/ /sbyor ba la sogs 'bad pa yis/ /de nyid rig par rtag tu spang/ /rdo rje sems dpa' i nga rgyal nyid/ /spangs nas gzhan du mi bya'o/ /dag pa de nyid la gnas pas/ /sbyor ba rnams kyang mi bya ste/ /dam tshig dag ni nyams par 'gyur/ /nyams pas yid ni sdug bsngal 'thob/ /bdag med rnal 'byor ldan pa yi/ /ji srid de la rtogs gyur pas/ /dngos med go 'phang la gnas nas/ /thabs bzang dag dang ldan pa yi/ /rtog las gang zhig 'byung ba rnams/ /ma brtag par ni 'byung bar 'gyur/ /bsgom bya'i sbyor ba'i stobs kyis ni/ /dngos grub mtshan nyid gang ci rang rung/ /de kun skad cig tsam la ni/ /rang nyid gnas par 'gyur ba yin bsgom pa 'di ni bar chad can/ /sngags pas gsang sngags mi bzla zhing/ /dkyil 'khor dag kyang mi bya la/ /phyag rgya mi bcing phyag mi bya/ /lus nyid dkyil 'khor zhes gsungs te/ /shes rab phyag rgya zhes byar grags/ /dpal ldan rdo rje sems dag sngags/ /de bsten pa ni phyag yin no/ /nang gi bdag nyid de byas nas/ /mkhas pas phyi rol thams cad spangs/ /gsang ba'i spyod pa dang ldan pas/ /de nyid rig pas rtag tu spyad/ /dpal ldan rdo rje sems dpa' i bdag /rnam par rtog med sngags pa yis/ /gsang ba'i spyod pa dang ldan pas/ /de ltar 'gyur med 'grub par 'gyur/ /spro zhing de la rab sbyor bas/ /dam tshig dag ni skyong ba dang/ /dge ba'i bshes gnyen bsten pa yis/ /shes rab thabs dag rnam par bsgom/ /gar dang glu sogs sbyor ba yi pad+ma rdo rje rnam rol zhing/ /bur chang sgron ma gus pa dang/ /dri dang phreng sogs rgya chen dang/ /gling bu rnga zlum sgra dag dang/ rdza rnga'i sgra la sogs pa dang/ /lha rdzas lus bzangs dri bzangs ma/ /rdo rje sems dpa' rab tu bsgrub/ /lha rdzas bzang po mchog 'di dang/ /nang gi bdag nyid bsgoms pa yis/ /rdo rje sems dpa' 'grub 'gyur ba/ /spyad par bya ba ma yin no/ /rdo rje pad+ma mnyam sbyor ba/ /mchog tu dga' ba'i gzugs can gyis/ /byang chub sems ni rab spros pas/ /chu skyes khyad par bza' bar bya/ /rtag tu chags pa dang ldan zhing mchog tu dga' ba la sred pas/ /rdo rje sems dpa' 'grub par 'gyur/ /mang du smras pa ci zhig dgos/ /rtag tu ngo tsha spangs gyur pas/ /dam tshig spyod la ci zhen pa/ /smyon pa'i gzugs kyis mi smra ba/ /dur khrod la sogs gar gnas nas/ /mA ma kI dang spyan la sogs/ /rgyan rnams la sogs kyis brgyan pa'i/ /phyag rgya'i tshogs dang lhan cig tu/ /rdo rje sems dpa' zhes bya bsgom/ /rdo rje nam mkha' i khams sbyor bas/ /der ni thams cad bsgom par bya/ /zhal gsum pa yi rnal 'byor gyis/ /ye shes rgya chen rlabs spro bya/ /dbang po gnyis kyi sbyor ba yis/ /rang dngos rig pa bskul byas na/ /sangs rgyas ye shes gzugs can rnams/ /rab tu bsdus pa dag kyang bya/ /phyogs bcu dag tu rgyug byed pa'i/ /rang sems gal te 'dzin par 'dod gyur na/ /sangs rgyas thob pa'i rgyur gyur rang gi sems/ /de tshe yang dag sbyor ba mchog tu bya/ /gong du nyams myong phyag rgya rjes bsam bya/ /rtser ldan rjes 'gro bzang dga' chags pa can/ /chag pas thob gyur de las sems gtad nas/ /slar yang rim pa'i khyad par gsal bar bsgrub/ /bsam gtan 'di la sbyor ba yi/ /rin chen sems ni brtan gyur nas/ /sangs rgyas byang chub rab gnas de/ /byin gyis brlab pa mdzad par 'gyur/ /de lta de nyid shes gyur nas/ /der gtad nas ni bsgom par bya/ /ji srid yid ni mi skyo bar/ /blo bzang sems ni mnyam gzhag pas/ /skyon ji ltar 'dod pa yi/ /sems kyis kun tu khyab par bya/ /cung zad mig ni rgyal 'gyur bas/ /byang chub rin chen bsgom par bya/ /la la rgod dang smra ba dang/ /la lar gar dag byed pa na/ /ji ltar skyo bar mi 'gyur bas/ /bsgom pa la chags sems kyis so/ /rnam par rtog med sngags pa yis/ /da lta'i ting 'dzin dang ldan pas/ /dus kyi nges pa yongs spangs nas/ /bla med go 'phang thob par 'gyur/ /bzang po'i rigs lnga las byung ba'i/ /dam tshig rtag tu bza' bar bya/ /khyad par gzhan dang ldan pa yi/ /dam tshig brten pa'i mchod par bya/ /rtag tu bde gshegs bsam gtan pas/ /spyan ni rgyas par gyur nas su/ /byang chub sems ni rnam bsgoms pas/ /ye shes rgya mtsho bsgom par bya/ /spyod pa rin chen la gnas shing/ /rdo rje ye shes la mos pas/ /bde gshegs go 'phang 'dod na ni/ /mi dge'i sems su mi bya'o/ /khams gsum tu mi 'byung 'gyur ba'i/ /btsun mo kun la 'dod par bya/ /dman las skyes dang 'gyur ba can/ /de nyid rnal 'byor bas mchod bya/ /rnam par snang mdzad las byung dang/ /srog chags kun lus las byung ba'i/ /srog chags rnams ni rnal 'byor pas/ /dngos grub 'dod na sgrub par bya/ /bshang gci sa bon la sogs pa/ /sna yi nang nas byung ba yis/ /rang lus rdo rje bsgoms nas ni/ /sngags pas rtag tu mchod par bya/ /khams gsum pa las byung ba yi/ /rtag tu dam tshig la mchod pas/ /de nyid rin chen la rab sbyar/ /gzhan du 'grub par mi 'gyur ro/ /'dir ni mang du smra ci dgos/ /gang dang gang zhig dmigs 'gyur ba/ /de kun de nyid rnal 'byor du/ /rig pas rtogs shing blta bar bya/ /rdo rje sgrub par gang gsungs pa/ /shes rab thabs kyi cho ga yis/ /dam tshig bzang po dang ldan pa'i/ /de nyid gsum dbyer med pa'i sku/ /sngags pas rtag tu mchod par bya/ /kun kyang rtog pa sngon 'gro bas/ /khams gsum 'di dag rnam par dag/ ma rig de bas yang dag bsgribs/ /rmi lam rtsed mo rjes su 'gro /phung po khams sogs mtshan nyid rnams/ /de ltar 'bad pas dpyad na ni/ /mtshan ma med cing snang med pa'o/ /thabs dang bcas pa rnam par bsgom/ /de ltar chog ldan shes pas/ /sems ni de nyid byin brlabs nas/ /ji ltar thos pas 'tsho byed cing/ /dam tshig ma lus la rab sbyor/ /tshong dpon bram ze rde'u rigs dang/ /shi ba sogs kyi 'gron bos na/ /zos shing tshem nas bor gyur pa'i/ /gcig tu bsdus pa'i dman pa rnams/ /khyi dang wa yi smad pa dang/ blangs nas de ni bza' bar bya/ /de nyid bsgom pa'i rnal 'byor pas/ /gzhan du 'grub par mi 'gyur ro/ /cung zhig smyon pa'i sems ldan pa'i/ /rigs rnams kun la mnyam par sbyor/ /bzang po'i dbyangs dang ldan pa'i gar/ /rdo rje gar gyis gom par gnas/ /glu rnams len par byed pa yi/ /rdo rje glu ni mi gsal bar/ /khams gsum dag tu grags pa yi/ /gzhan dag gsal ba nyid du len/ /sna tshogs skad bsres glu len cing/ /sha za bzhin du kun tu 'khyam/ /las dag gang gis skye bo rnams/ /gang dang gang du 'ching 'gyur ba/ /thabs dang bcas na de nyid kyis/ srid pa'i 'ching las grol bar 'gyur/ /khyad par thams cad spangs pa yi/ /de nyid zhi ba thob gyur nas/ /thabs bzang dag dang ldan pa yi/ /go 'phang mchog ni bsgrub par bya/ /'byung po kun gyi de nyid gang/ /bzung dang 'dzin pa rnam spangs pa/ /'gro kun mchog tu zhi ba nyid// khyad par gnas pa'i bzang po gang/ /rang lus thabs dang bcas pa yi/ /de nyid rtag tu bsgom par bya/ /dus pa kun la thal mo'i sgra/ /rim gyi gang ni bzang po bya/ /kun rtog thams cad spangs pa yi/ /byang chub mchog tu 'gro bar 'gyur/ /bzang po go 'phang der gnas nas// gang dang gang du gnas na yang/ /byang chub mchog tu nges byas pas/ /sbyong ban? can yang 'grub par 'gyur/ /smyon pa'i brtul zhugs la brten nas/ /yid ni de nyid byin brlabs nas/ /gsang spyod mchog gi rol pa yi/ /tshe 'di nyid la 'grub par 'gyur/ /gal te rgya chen khyim/ rnams ni/ /spong bar nus pa ma yin yang/ /dpal ldan gsang 'dus las bstan pa'i/ /byang chub 'byung ba'i spyod pa rnams/ /khyim de nyid du gnas byas nas/ /'jig rten spyod pa la gnas nas/ /ji ltar rig pa mi 'gyur bar/ /gsang ba'i dam tshig spyad par bya/ /mtshan mo gsal por byas nas ni/ /'o ma gcig tu goms byas pas/ /phyag rgyar bcas pas bya ba ste/ /yid ches pas yin gzhan gyis min/ /dri chu la sogs dam tshig rnams/ /rtag tu spyad par bya ba nyid/ /gcig tu dam tshig goms byed na/ /de nyid bla med 'grub par 'gyur/ /shin tu gsang ba'i grogs dag nyid/ /de nyid shes shing mchog gyur pa/ /de dang lhan cig dam tshigs rnams/ /rgyud las gsung ba spyad par bya/ /bud med bzang dang longs spyod bzang/ /de bzhin gnas mal bzang sogs kyis/ /de nyid bsgom pas ngal gyur pa'i/ /ye shes ldan pas 'grub par 'gyur/ /dam tshig spyod pa der gtad par/ /khyim nyid du yang 'grub par 'gyur/ /dam tshig spyod pa dman gyur na/ /spyod pa min zhing khyim duAng min/ /de ltar dam tshig mngon ldan zhing/ /ye shes bzang po la dga' ba/ /cho ga 'dis ni bskul byas nas/ /rdo rje sems dpa' 'grub par 'gyur/ /nyams su blangs bya thams cad ni/ /'gal ba'i dam tshig la sogs pa/ /smad par gyur pa sngon 'gro ba'i/ /ma lus pa dag gang bstan pa/ /dngos grub bzang po'i rgyu yi phyir/ /de dag thams cad bya ba nyid/ /'di kun mngon sum nyid du ni/ /byed pa'i char ni dbye bya ste/ /gsang ba spyod pa ldan pa yi/ /de nyid shes yin gzhan ma yin/ /'gal ba'i dam tshig la sogs pa'i/ /gsang ba grub pa zhes byar brjod/ /rtags can gzugs la gnas gyur nas/ /'jig rten spyod las 'das gyur te/ /smad pa rnams la gsal po ru/ /nyams su len par byed gyur cing/ /nus pa dag ni ma skyes par/ /kun rdzob nyid du 'jug 'gyur ba'i/ /dman pa'i rigs la sogs pa la/ /rtag tu dam tshig sogs spyod cing/ /'dod dang bcas pa'i sems nyid kyis/ /thab khung dkyil 'khor sogs byed pa/ /rtag dang chad pa smra ba yi/ /gang zhig cho ga 'dir gnas pas/ /de ni bstan pa 'jig byed gsungs/ /gal te rtags dang ldan gyur pas/ /sgrub pa 'di ni byed 'gyur na/ /de ni mtshan mo dam tshig spyad/ /nyin mo shin tu gsang bar bya/ /dman pa'i 'gro ba nyan thos sogs/ /ji ltar gzhan gyis mi rig pa/ /de ltar sngags pas bya ba ste/ /bdag nyid sgrub phyir shin tu spang/ /'jig rten kun gyis mi gnod cing/ /'jig rten kun la mi gnod par/ /de bzhin sngags pas 'dir bya'o/ /bde gshegs dngos grub 'dod gyur na/ /gsang ba grub pa la gnas shing/ /sgrub pa po la nus pa zhig /ji srid 'byung bar ma gyur ba/ /de srid brtul zhugs rtags mi bzung/ /nus pa zhig ni skyes 'gyur pa/ /de nas gsang ba'i spyod pa spangs/ /de rjes rig pa'i brtul zhugs bzang/ /de dag rtag tu blang bar bya/ /go 'phang nyams dga' der gnas pas/ /rnal 'byor der gtang bsgom par bya/ /'du 'dzi thams cad der bral nas/ /go 'phang mchog ni 'grub par 'gyur/ /'du 'dzi ring du spangs shing rang bzhin g.yo ba'i sems nyid rab sbyar nas/ /dngos dang dngos med rang bzhin bde ba'i mchog ldan de nyid la gnas bsgom par bya/ /nyon mongs pa yi dgra tshogs mang po las rgyal mi nyams bzang por gyur pa yi/ /sems can don ldan sems kyis rtag tu rnal 'byor pa rnams 'jig rten gsum na spyod/ /spyan ni cung zhig phye nas srid pa'i sdug bsngal bsal ba'i sems dang ldan pa yi/ /cho ga shes par gyur pas sna tshogs ma lus brdzun pa'i blo dang sgra spangs la/ /mchog tu legs par spyod pa'i sems can don ldan 'jig rten gsum na grags par byed/ /dngos rnams dpag med byang chub go 'phang mchog gyur mnyam med sems can mchog gyur rol pa gang/ /khyim gyi 'dzin pa rtsa bzhin ma lus sgyu ma bzhin lta ba/ /spre'u dang rlung dang glog bzhin g.yo ba'i sems zhes bya la dbang du gyur pas gzhag /dngos po'i de nyid bsgoms pa'i lus can dam pa'i bde ba de nyid mchog /sems can don la spro ba'i de nyid sems la nges par rnal 'byor dbang phyug rol bar byed/ /don dam pa'i yi ge gsum dang ldan pa'i rgyud kyi don nges par bsdus pa dpal gsang ba grub pa zhes bya ba dpal rdo rje sems dpa' mnyes par bya ba las/ /sgrub pa'i thabs kyi mnyam pa nyid kyi sems dri ma med par byed pa'i gsang ba'i spyod? pa'i rim pa ma lus par bstan pa zhes bya ba'i le'u ste drug pa'o/ / /dag cing rang bzhin dri ma med/ /sna tshogs gzugs rnams phun sum tshogs/ /'ching dang mya ngan rnam spangs pa/ /lha yi phyag rgya mchog rnyed nas/ /lha mo klu mo gnod sbyin mo/ /de bzhin lha min bu mo'ang rung/ /dri za'i bu mo gzugs ldan pa'i/ /grub pa'i rnal 'byor ma yang rung/ /'di lta'i bu mo rnal 'byor ma'am/ /de nyid rnal 'byor ldan pa dang/ /zhags pa lcags kyu'i sbyor ba yis/ /bkug nas longs spyod nyid du bya/ /lha rdzas grub pa gang yin de/ /dam tshig sbyor bar rab tu brjod/ /bsgrubs na ma dag gzhug par 'gyur zhing/ /gang 'dod pa de byed par 'gyur/ /des ni sems ni rnam g.yeng bar/ /nam yang byed par mi 'gyur ro/ /mi yi bu mo mthu chen gyis/ /dam tshig bzang po 'grub par 'gyur/ /'dod pa'i rdzu 'phrul che ldan zhing/ /chu dang chu? bdag rnam par spangs/ /sna tshogs gzugs dag rab ston pa'i/ /lha rdzas btsun mo bsten par bya/ /de dang lhan cig mnyam ldan pa'i/ /skye bo med pa'i tshal song la/ /'jigs pa thams cad rnam spangs nas/ /seng ge bzhin du rnam par spyad/ /lha rdzas btsun mo 'gugs pa yi/ /nus pa gal te med gyur na/ /'dod pas gnod pa nyid gyur la/ /des ni mi yi bu mo bsten/ /longs spyod bzang po dang ldan pa'i/ /g.yeng ba'i myos pa zhi bya'i phyir/ /de phyir sgrub pa'i dbang po la/ /mi las byung ba'i bu mo bsten/ /rnam g.yeng khro ba mnga' dang/ /skyon rnams thams cad 'byung 'gyur zhing rgas shing mya ngan gyis non pa'i/ /mi yi bu mo shin tu spang/ /de lta'i lha rdzas med gyur nas/ /dngos grub bzang po'i rgyu yi phyir/ /rgyud kyi bya ba'i rim pa yis/ /mi yi bu mo bstan par bya/ /de ltar tha mal byang chub nyid/ /sngags kyi cho ga bzhin byas nas/ /mchog tu dga' ba'i yid can gyis/ /byang chub mchog ni bsgrub par bya/ /tha mal pa yi rim pa yi/ /phyag rgya de nyid bshad par bya/ /mthar skyes dang por byas pas ni/ /gang gi dngos grub thob 'gyur ba'o/ /mthar skyes mi srid bu mo dang/ /de bzhin tshos ma'i bu mo dang/ /smad pa'i rigs las byung gyur dang/ /gang yang bde ba rnyed pa dang/ /rgyud nas gsungs pa'i rig byas pa'i/ /khyad par du ni bu mo nyid/ /dam tshig spyod pa thams cad la/ /byis pa nyid nas rim gyis brlab/ /byang chub sems la dga' zhing mkhas/ /chos nyid la ni bzod byas pas/ /mkhas pas cho ga ji bzhin du/ /rdo rje gsum dbyer med par bsgrub/ /rgyud nas ji skad gsungs pa yi/ /mchod pa de la gnas nas brtsam/ /gus pas 'o ma sgron ma dang/ /phreng ba la sogs rgyan rnams dang/ /thal ba bzang po bsdu? bya zhing/ /ral pa'i cod pan gyis brgyan par/ /sngags pas rang gi gzugs nyid dang/ /de yi gzugs kyang bya ba nyid/ /stag gis bags pas gos byas shing/ /sna tshogs rgyan gyis rnam par brgyan/ /rdo rje kha TwAM ga blang zhing/ /dril bu cang te'us rnam par brgyan/ /de bzhin rna ba mgrin dpung? pa/ /rus pa'i dum bus rnam par brgyan/ /mi yi thod pa g.yon pa sta/ /de bzhin g.yas par DA ma ru/ /bdag dang phyag rgya de bzhin du/ mA ma kI 'am spyan dag gam/ /bdag nyid rdo rje mchog 'dzin pas/ /'di 'dra'i gzugs su byas nas ni/ /rgyud las byung ba'i cho ga yis/ /rig pa'i brtul zhugs bzang po spyad/ /gnyis med nges par byas nas ni/ /tshe 'di nyid la 'grub par 'gyur/ /don dam pa'i yi ge gsum dang ldan pa'i rgyud kyi don nges par bsdus pa dpal gsang ba grub pa zhes bya ba las rig pa'i brtul zhugs nges par bstan pa zhes bya ba ste le'u bdun pa'o/ / //mthar skyes ngo mtshar chen po las/ /rgyud las sgrub thabs gang gsungs pa/ /ji ltar nges par des 'thob pa/ /de nas yang dag bshad par bya/ /skyob pa'i nges pa yongs spangs la/ /tshogs kyi dbang phyug gzugs byas nas/ /gang dus sus kyang mi shes par/ /mthar skyes nang du 'jug par bya/ /tshogs kyi mtshan ma blangs nas ni/ /mgo bo'i skra ni bregs nas kyang/ /ral pa sbom po gcig bzhag nas/ /gtsug phud gcig ni bzung bar bya/ /ru rag sha dang shel bzang po/ /tshan tshan dag tu spal byas pa'i/ /phreng ba'i do shal 'phyang po dag /mgul ba'i rgyan du bzung bar bya/ /dpung rgyan gdu bu bzang po dag /'od zer 'phro zhing 'khrug gyur dang/ /'bad pas mtshan gsum byas nas ni/ /mdzub mo la ni zangs ma'i rgya/ /mdun gyi phyogs su 'phyang gyur pa'i/ /smad g.yogs dum bu de nas bzung/ /lcags mdung la btags me tog snod/ /phrag pa dag la dgal bar bya/ /yan lag thams cad rnam brgyan nas/ /tshogs kyi dbang phyug gzugs su bya/ /phrag pa gnyis ni dag ba byas nas/ /mthar skyes khyim du 'jug par bya// bzang po de ltar gsang byas nas/ /de nas bsgrub par bya phyir dpyad/ /gang zhig sus kyang mi shes par/ /bzang po'i yul du 'khyam par bya/ /grong khyer sum brtsegs nye ba'i mthar/ /mthar skyes nang du 'jug par bya/ /yang dag tu na lta gzhan ni/ /des ni shes par mi 'gyur ro/ /rtag tu khrus dang lha mchod cing/ /rtag tu rang gi grub mthar bsgom/ /yi ge las ni cung zhig gis/ /rang byung lta la chags gyur pas/ /gdol pa'i gzugs kyi tshogs nyid gyi/ /de ltar de yi nang zhugs la/ /byang chub mchog ni bsgom par bya/ /chos dang grub mdza' sngon 'gro bas/ /de nas de la ston par byed/ /dus kyi phyi ma la sogs pa'am/ /yang na dbugs kyi sgom pa ston/ /de nas rgyud nas gsungs kun gyis/ /yid brtan pa nyid 'grub bar 'gyur/ /dbang dang dkyil 'khor sngon 'gro bas/ /bdag nyid kyis ni slob mar byas/ /de yi byin pa'i rdzas rnams dang/ /snga mo? yod pa dang bcas pas/ /de ni de la gtad byas la/ /de yi bla ma mchod phyir byin/ /de yi bkas gnang blang bya ste/ /shin tu bzhin bzang mig yangs ma/ /de ni rgyud don bden pa la/ /mkhas shing dam tshig 'dod byas nas/ /sangs rgyas nyid du nges byas la/ /blo ldan rig pa'i brtul zhugs spyad/ /nges par rgyud gsungs dam tshig gis/ /tshe 'di nyid la 'grub par 'gyur/ /ri 'am rgya mtsho'i 'gram dag gam/ /skyon rnams spangs pa'i yul 'khor dang/ /dgon pa chen po'i sa phyogs sam/ /phug dang grong khyer rnying pa dag /dri med chu mi? gu'i? ba dang/ /me tog 'bras bu sogs pas brgyan/ /ljon shing 'khri shing gis brgyan pa khyad par du ni dben gyur pa/ /der ni phyag rgya dang bcas par/ /sgrub po brtan zhing nges pa yis/ /sgom pa'i sbyor ba der gtad pa'i/ /rtag tu nags su bsod snyoms blang// byang chub sems la dga' zhing mkhas/ /lus ni nus pa can byas nas/ /yang dag rim pas der gnas nas/ yang dang yang du goms par bya/ /ljon shing rgyal po de dag kun/ /sgrub po dbang po mdangs ldan pas/ /de nyid sbyor bas bkug byas nas/ /zhal zas bzang po steng? bar 'gyur/ /blo bzang rtag tu 'dod med cing/ /blo yis rtag tu goms par bya/ /rdo rje theg pa la dga' zhing/ /rtag tu bde gshegs bsam pa can/ /bstan bcos ma lus la goms shing/ /de bzhin gtong ldan dpa' zhing gsal/ /phongs par gyur pa'i tshe na yang/ /mnyam pa'i sems nyid gcig tu bsgom/ /phyag rgya 'ang de 'drar shes bya ste/ /chags med zhen pa med pa dang/ /zab mo'i chos dang ldan pa dang/ /sgrub po 'dod bzhin rjes su 'phrang/ /bzhin bzang mig ni dkyus ring ma/ /gzugs dang lang chos rnam par brgyan/ /byang chub sems la dga' zhing gsal/ /rdo rje sgrub la shin tu gsal/ /ci ltar bu bzhin brtse ba dang/ /de bzhin spun dang pha ma ltar/ /rtag tu sgrub po mthong ba na/ /brtse bas shin tu goms byed na/ /bud med sgyu bral yid du 'ong/ /skal pa bzang zhing snyan par smra/ /phrag dog spangs shing rjes su mthun/ /sgrub pa po yi bka' bzhin byed/ dmar ser lus phra gzugs bzang ma/ /tshul khrims yon tan gyis brgyan pa/ /mdog snum cho ga shes pa dang/ /ring min thud pa ma yin pa/ /lo grangs bcu gnyis lon pa 'am/ /yang na de bzhin bcu drug gam/ /de nyid rig pa dang ldan pas/ /mur gong mdza' ni rnam par mdzes/ /yan lag thams cad yongs su rdzogs/ /skra yi rtse kun cung zhig 'khyil/ /skad snyan shin tu dga' ba can/ /lta ba bzang po rnam rgyas ba// 'bad pas bu mo 'di 'dra ba/ /dngos grub don gnyer gyur nas su/ /rtogs las ji skad gsungs pa bzhin/ /de nas rig pa'i brtul zhugs brtsam/ /'bad pas de ni bzung byas nas/ /go 'phang mchog ni sgrub par bya/ /rang gi rdo rje mchod nas ni/ /byang chub sems ni btang bar bya/ /de nas sku yi rdo rje bsgom/ /ngag gi rdo rje kun nas bzung/ /de yi b+ha gar byung ba'i khus/ /sems kyi rdo rje rab tu mchod/ /de la gus pas mchod nas ni/ /cho ga bzhin du sbyor ba las/ /de nyid sbyor la bsgom par bya/ /tsun da 'am ni mA ma kIr/ /dang po'i rnal 'byor rnam bsgoms nas/ /thams cad bya ba kho na yin/ /dam tshig gi ni khyad par dang/ /bud med mchog ni bsten par bya/ /b+ha gar ling ga bzhag nas ni/ /byang chub sems ni btang mi bya/ /der bskyed pa yi dga' ba yis/ /sems ni bkang bas bsgom par bya/ /ji srid rnal 'byor byang chub sems/ /gtong bar byed pa ma yin pa/ /de srid kun dga' las byung bde/ /ci yang rgyun mi 'chad par 'thob/ /bde ba de yi ngo bo dang/ /yang dag ldan pa'i byang chub mchog /bdag nyid rtag tu bsgoms nas ni/ /'grub 'gyur 'di la the tshom med// dngos grub kun gyi rten gyur pa/ /byang chub sems ni der lhung bas/ /phung po rnam shes brgyal gyur nas/ /ma smad dngos grub ga la yod/ /phyag rgya ma la dam 'khyud nas/ /yang dang yang du 'o byas la/ /gnas de ru ni bskyod pa yis/ /byang chub sems ma rab 'bab pas/ /phyag rgya chen po rnam bsgoms la/ /lha mo de la 'o yang bya/ /mig gnyis dag ni rgyas gyur nas/ /bde ba chen po'i ros gang ba/ /ma mchu cung zhig rgyas pa yis/ /nu ma cung zhig dam par 'dzin/ /brla gnyis dri ma med pa mchog /mig kyang cung zhig rgyas pa dang/ rdo rje theg par ngal byas pas/ /der gtang pa yi bsgom dang ldan/ /sangs rgyas chos dang dge 'dun la/ /rtag tu dir gtang bsam pa can/ /'o ma byin nas yang dang yang/ /khyad par du ni rab tu mchod/ rdo rje can gyi phyag rgya bzhin/ /de nyid sbyor bas bsgom par bya/ /yid 'ong bcos ma'i zas dang ni/ /dri dang me tog sogs bsnyen bkur/ /nya dang sha dang dur chang sogs/ /sems ni spro bar byed pa can/ /'bad pas de lta bus mchod nas/ /de nyid ched du bsgom par bya/ /cho ga 'di yis bskul nas ni/ /rdo rje sems dpar bdag 'grub 'byung?/ /byang chub sems dang ldan pa yi/ /bdud rtsi me tog myang bar bya/ /mkha' dbyings rdo rje dbus gnas pa/ /de ni rdo rje 'dzin pa mchod/ /bsgom dang dam tshig nyams len pas/ /de lta'i dngos grub myur du thob/ /sems kyi dam tshig sdang pa la/ /rgyal bas gsungs pa'i dngos grub med/ /lha yi rnal 'byor bsgom pa dang/ /dam tshig bsrung bar bya ba ni/ /shes pas 'bad pas bsgoms byas na/ /'grub 'gyur 'di la the tshom med/ /ji skad gsungs pa'i sa phyogs su/ /rig pa'i brtul zhugs spyad na ni/ /sdig pa ma lus sbyangs nas ni/ /rig ma dang bcas grol bar 'gyur/ /grong dang grong khyer dag tu 'am/ /sems ni rab tu dga' ba der/ /der ni rig pa'i brtul zhugs spyad/ /dgag pa dang ni bsgrub pa med/ /dpal ldan 'dus rab yongs gsal ba'i/ /sgrub thabs rgyud las gang gsungs pa/ /rig pa'i brtul zhugs ldan pa yi// gsang ba'i spyod pas rnam brgyan pa/ /de ni dngos grub myur thob par/ /rdo rje sems dpa' i zhal nas gsungs/ /dam tshig spyad pa dang ldan par/ /rtag tu goms par bya ba yin/ /don dam pa'i yi ge gsum dang ldan pa'i rgyud kyi don nges par bsdus pa dpal gsang ba grub pa zhes bya ba las tshogs kyi brtul zhugs nges par bstan pa zhes bya ba'i le'u ste brgyad pa'o/ /me dang chu dang dug sogs la/ /thabs ni gang gis mi shes pa/ /de ni tshig dang nub pa dang/ /'chi bar 'gyur bar the tshom med/ /de bzhin gsang 'dus rgyud kyis ni/ /shes rab thabs ni spangs gyur pa/ /'gal ba dag ni spyod byed pa'i/ /bsam ngan de ni brlag par 'gyur/ /gang gis de yi de nyid shes/ /yang dag rab sbyin la gnas nas/ /dpal ldan 'dus pa la dga' ba'i// sems can de ni steng du 'gro/ gsang ba'i spyod dang brtul zhugs dang/ /phyag rgya rgyas pa gang gsungs pa/ /'di dag thams cad rtog don yin/ /bsgom pa 'ba' zhig tsam yin te/ /gang yang rgyas pa'i bdag nyid can/ /kun kyang sems can bsam pas gsungs/ bsgom pa la ni rab gnas pa'i/ /ye shes ldan pas 'grub par 'gyur/ /rnam rtog du ma rgyas gyur pa/ /'di ni thams cad spangs byas nas/ /phyag rgya chen po la 'bad bas/ /shes rab ldan pas rtag tu bsgom/ /'du 'dzi thams cad spangs nas ni/ /gnyis pa thams cad rnam spangs nas/ /yang dang yang du goms byas nas/ /pad+ma rdo rje'i tshig bzhin du/ /dus mi ring bas 'grub par 'gyur/ /dam tshig dag ni thams cad las/ /bla ma mchod pa mchog yin te/ /sangs rgyas rin chen za ma tog /dpal ldan 'dus pa 'am gzhan du bstan// bzung min brjod pa ma yin pa/ /sems can kun la yang dag gnas/ /lus ngag yid kyi bde ba yin/ /rnam rtog med cing gnas med pa/ /dag cing ngo bo nyid med pa/ /byang chub sems zhes dran par bya/ /bla ma'i zhabs kyi bka' drin gyis/ /de ni myur du thob par 'gyur/ /khams gsum rin po cher gyur pa/ /slob dpon las ni mchog gzhan med/ /gang las bka' drin thob pa yi/ /mkhas pas dngos grub du ma 'thob/ /yang dag gsungs pas spyod pa gang/ /dpal ldan mnyam nyid gnyis med gsungs/ /des ni slob dpon bya ba ste/ /gzhan gyis 'grub par mi 'gyur ro/ /gos dang rgyan dang longs spyod dang/ /rang gi phyag rgyas brgyan byas nas/ /bla ma mchod cing phul byas pas/ /sangs rgyas dngos grub 'thob par 'gyur/ /rang gi phyag rgya phul nas ni/ /rgyud nas gsungs pa'i dngos grub 'grub/ /gzhan dag phyi rol dam tshig gis/ /bsgrubs kyang 'grub par mi 'gyur ro/ /'di ni rgyud kyi bden don gyis/ /dam tshig gtso bo mchog yin no/ /sgrub pa po la phan gdags phyir/ /dpal ldan rdo rje mngon gsungs pa'i/ /dam tshig dag ni thams cad las/ /gnyug ma'i phyag rgya dbul ba mchog gzhan du phyi rol tshul dag gi/ dam tshig 'grub par mi 'gyur go /de phyir 'bad pa thams cad kyis/ /gus pas bla ma mchod par bya/ /rang gi phyag rgya pad+ma yi/ /mchod mchog mgrin pa'i dbyangs dag dang/ /brla brdab pa yi rol mo dang/ /rdo rje 'jug pa'i spyod pa dang/ /rig ma'i ma mchu'i ro myang dang/ /cung zhig 'khyud par spro ba yi/ /bza' ba chos pa sna tshogs gang/ /nya dang khung ba la sogs dang/ /sha dang bur chang bzang po dag/ /rgyud nas gsungs pa sna tshogs dang/ /phyag rgya gnyug ma phul byas nas/ /de nas dngos grub 'grub par 'gyur/ /'di lta'i gzugs su ma byas nas/ /gzhan du dngos grub 'byung mi 'gyur/ /rdo rje ston la gang gus pas/ /'di lta'i tshul du byed 'gyur ba/ /de nyid rig pa'i las nyid kyis/ /dri med rdo rje gsum dbyer med/ /yang dag rab sbyin gsang 'gyur ba/ /sems can des 'dir thob par 'gyur/ /bla ma rdo rje mnyes 'gyur bas/ /dngos grub bzang po kun sbyin byed/ /rgyud nas gsungs pa'i dam tshig bzang/ /de ltar rtag par rab bsgrub pas/ /rdo rje slob dpon thugs rje mchog/ man ngag myur du thob par 'gyur/ /'di lta'i tshul gyis 'ongs gyur pa'i/ /de nyid gsal por yongs shes nas/ /gus pa'i dngos po 'phel 'gyur bas/ sangs rgyas nyid ni 'grub par 'gyur/ /mchod pa'i dus su 'bad pa yis/ /gus pas bla ma phyag byas nas/ /phyi nas sangs rgyas dngos grub gtso/ /rab sbyin rtse gcig sems kyis bsgom/ /slob dpon mchog la dmod pa dang/ rdo rje sems dpa' khyad par du/ /dkon mchog gsum la dmod pa dang/ /'di dag 'bad pas spangs par bya/ /gang gi sangs rgyas rnams kyi chos/ /nam mkha' lta bu mi shes pas/ /theg pa mchog 'di thos gyur nas/ /sems can de ni skrag 'gyur na/ /rdo rje theg pa dmod pa dang/ /ngan 'gro dag tu 'gro bar 'gyur/ /dman la mos pa'i sems can rnams/ /bskal pa brgya yi bar du yang/ /ngan 'gro dag tu 'gro bar 'gyur/ /ngan 'gro dag nas byung nas yang/ /de ni 'khor ba'i sdug bsngal 'gyur/ /sangs rgyas chos dang dge 'dun la/ /gang zhig gus par mi byed pa/ /sdug bsngal 'phongs pa kun 'byung bar/ /sdig pa'i las kyi 'gro 'gyur te/ /bde gshegs mtshan ma la brten nas/ /mnar med par ni 'gro bar 'gyur/ /gang zhig gus pa dang ldan pas/ /chos nyid bsgom par byed 'gyur bas/ /de ni sdig pa kun spangs nas/ /gtso bo'i gnas su 'gro bar 'gyur/ /bla med rdzogs pa'i byang chub tu/ /'dod pa'i yon tan lnga ldan pas/ /'khor ba'i rgya mtsho 'jigs pa las/ /sems can rnams ni des grol 'gyur/ /sangs rgyas byang chub mchog gnas/ /bla na med pa'i chos rnams ni// 'jig rten kun la ston pa por/ /dus mi ring bar 'grub par 'gyur/ /mi shes sgrib pas ldongs gyur pa'i/ /sems can rnams la don dam gyis/ /ye shes snang bar byed 'gyur te/ /mun pa la ni mar me bzhin/ /bde chen mgon po gcig pu nyid/ /gang zhig rtag tu dran byed cing/ /zhabs kyi pad+ma gnyis gus pa'i/ /sdig pa thams cad zad gyur nas/ /sems can de nyid de yi mthus/ /pad bsnams 'jig rten mgon po ltar/ /dngos grub kun gyi gter gyur pa/ /dus mi ring bar 'gyur ba nyid/ /gang zhig dag pa'i de nyid sems// gus pas lcags kyus brtan bkug nas/ /dpal ldan rdo rje sems dpa' yi/ /gsang ba'i sgrub thabs gang byas pa/ /gal te de ni bzang gyur na/ /bzang zhes ci phyir rjod par byed/ /gal te dman dang 'dres gyur na/ /slob dpon rnams kyi de bzod mdzod/ /gang zhig rgyud kyi rjes 'brengs nas/ /brjod pa dag gis ma shes pa'i/ /rang gi bu bzhin 'phags pa rnams/ /ma lus pa dag bzod par mdzod/ /dpal ldan mgon po bde chen gyis/ /zhabs kyi pad+mas nyer 'tsho ba/ /pad+ma rdo rjes sems can kun/ /rjes su bzung phyir byas pa yi/ /gsang ba grub pa zhes bya ba/ /dngos grub kun gyi bla ma'i bla/ /grol bar 'dod pa'i sgrub pa po/ /'bad pa nyid kyis bsten par bya/ /blo bzang rtogs pa'i cho ga bzhin/ /gsang ba grub par gang spyod pa/ /mi yi tshe 'di nyid la ni/ /dngos grub ma lus 'thob par 'gyur/ /sems can kun dang dus gcig du// gsang ba'i spyod pa gang grub pa'i/ /legs pa ma lus gang yod pas/ /dpal ldan slob dpon zhabs grub shog /sangs rgyas thob pa'i rgyur gyur pas/ /yul gzhan la ni sems zhen pas/ /sgrub dka' yul dang lan cig tu/ /kun rtog thams cad spang bar bya gnas skabs lnga ni gnod gyur na/ /skad cig gis ni 'khor bar ltung/ /snyoms dang gnyid dang 'gyod pa dang/ /rgod dang the tshom zhes bya ba'i/ /sgrib pa lnga po sangs rgyas dang/ /byang chub sems dpa' mi bzhed do/ /lnga po de ni yongs spangs nas/ /sangs rgyas nyid du nges byas nas/ /smyon pa'i brtul zhugs kyis rol na/ /tshe 'di nyid la 'grub par 'gyur/ /gsang ba de nyid mchog de nyid/ /grub pa gang zhig de brten pa/ /der ni rgyal ba kun 'byung ba/ /gsang ba grub pa zhes byang brjod/ /ces bya'o/ /dgu bcu rtsa lnga pa bcas pa'i/ /tshigs su bcad pa lnga brgyar ni/ /dngos grub thams cad bsdus pa'i phyir/ /gsang ba grub pa zhes byar brjod/ /pad+ma rdo rje'i dga' bas thob gyur bsod nams gang yin pas/ /sangs rgyas 'byung ba'i sar gyur 'jig rten gyur pa yon tan rgyan gnas pa/ /sangs rgyas thob pa'i rgyur gyur gsang ba grub pa gtan du nyin dang mtshan su sbyor gyur cig /sems can 'di kun ma lus byang chub snying po'i bar du legs par spyod gyur cig /gang zhig rgya mtsho dang bcas sa gzhi ri dang ljon shing sogs pas brgyan pa rnams de dag de nyid gzugs brnyan bzhin du chen por gyur pa'i khongs su chud par snang gyur pa/ /rdzogs pa'i byang chub dri med zla ba'i 'od zer dpal ldan gsang ba grub pa mchog /mdzad pa thugs rjes gzhan gyi dbang gyur dpal ldan pad+ma rdo rje gtso la phyag 'tshal lo/ / don dam pa'i yi ge gsum dang ldan pa'i rgyud kyi don nges par bsdus pa dpal gsang ba grub pa zhes bya ba dpal rdo rje sems dpa' mnyes par bya ba las/ don dam pa'i slob dpon gyi mchod pa nges par bstan pa zhes bya ba'i le'u ste dgu pa'o/ / //lha dang lha min la sogs pa ma lus pas/ zhabs kyi pad+ma zung la me tog gi phreng bas mchod pa dpal mgon po bde ba chen po pad+ma badzras mdzad pa rdzogs so// //rgya gar gyi mkhan po kriSh+Na paN+Di ta dang/ /lo tsa ba dge slong tshul khrims rgyal bas bsgyur cing zhus te gtan la phab pa'o// (//gnyis su med par grub pa'i sgrub thabs zhes bya ba dpal mor mdzad pa bzhugs so//) //rgya gar skad du/ pradz+nyo pa ya bi ni shtsA ya sid+d+hi/

CLOSE WINDOW