བོད་ཡིག

e-texts based on the ACIP/ALL Input

(/sangs rgyas ye shes kyi zhal snga nas kyi sgrub thabs kyi man ngag zhal gyi lung bzhugs so//) // */ /rgya gar skad du/ mu kha A ga ma/ bod skad du/ zhal gyi lung/ dpal rdo rje sems dpa' la phyag 'tshal lo/ /dpal ldan ral gri las byung gur gum mdog / zhi ba'i zhal gsum phyag ni drug ldan zhing/ /shes rab kyis 'khyud chu skyes la zhugs pa'i/ /dpal ldan 'jam pa'i dbyangs la phyag 'tshal nas/ /dpal ldan 'dus pa'i rim pa'i gzhung lugs kyi/ /sgrub thabs bdag nyid dran phyir brtsam par bya/ /'jam dbyangs bde bar rtogs pa'i don du ni/ /rtog pa'i nga rgyal bde ba dang bral ba/ /sgra yi tshogs kyi sdeb sbyor bral dgongs pa/ /sbas rnams slob dpon zhabs kyis 'gro don du/ /gsal bar sgra ji bzhin du bshad don to/ /sdeb sbyor yangs shing mtshan nyid dang bral zhing/ /gang yang don zab tshad mas shin tu sbas/ /blo dman rnams kyis de rtogs mi 'gyur ba'i/ /dpal ldan ye shes zhal bshad sgrub thabs kyi/ /man ngag shin tu gsal bas bshad par bya/ /'bad pa chen pos bla ma mnyes bya ste/ /shin tu sdug sogs khyad 'phags sbyin pa dang/ /gzhan yang mchog tu gyur pas mchod byas na/ /'dir ni 'dod pa'i bka' drin ster bar 'gyur/ /chu yi dbang dang cod pan ming dang ni/ /rdo rje dril bu zhes ni bshad pa dang/ /bum pa zhes bya mchog tu gsang ba dang/ /shes rab zhes bshad lung bstan brtul zhugs dang/ /dbugs dbyung de rnams cho ga ji lta bar/ /rjes snang thob cing bla ma 'jam dbyangs dang// sngags pas bsrung ba'i thabs dang dam tshig dang/ /rtag tu sdom pa la gnas mngon ldan pa/ /yang dag thob cing sa phyogs gtsang mnyam pa/ /yid du 'ong zhing chu yis chags chag btab/ /dri bzang nyi zla chu dang sman rnams kyis/ /rab byugs me tog chal bar bkram pa dang/ /gla rtsi gur gum tsandan gyis mdzes pa/ /yang na sems kyis 'dir ni rnam par bsam/ /bde ba'i bstan la rdo rje skyil krung bcas/ /sems can la brtse ting 'dzin dang por bsgom/ /ji srid pa 'di sangs rgyas ma lus gyur/ /de srid bdag gis skyil krung gzhig mi bya/ /ma lus 'gro tshogs sangs rgyas rnam bya zhes/ /de ltar smon lam khyad 'phags gdab par bya/ /'gro ba rgyu dang mi rgyu thams cad dang/ /rang lus stong pa nyid du bsgom bya ste/ /rang lus lha yi ngo bo nyid du 'od gsal ba/ /rang gi sems tsam las byung ba lta bar bya/ /gang yang 'di ltar yi ge aoM dang por/ /swa b+hA ba shud+d+ha sarba d+harmA/ /swa b+hA ba shud+d+ho nyaM gsang sngags rgyal/ /mdza' thugs brjod cing 'dir yang de 'og tu/ /rang gi snying gar a las zla ba bsgom/ /de dkyil 'od zer tshogs ni ser po maM/ /khams gsum mun pa'i tshogs ni 'joms byed pa/ /rnam thar rnam gsum gyi sgo dag par 'gyur/ /aoM shU n+ya tA zhes dang por rnam par thar/ /gzhan ni a mri ta ra zhes su bshad/ /aoM a pra ti hi taM sgra de rnams/ /'dir bdag ye shes la sogs zhal gsum 'dod/ /des ni lha mig dag pa thob gyur nas/ /de las de bzhin gshegs pa thams cad mthong/ /sna tshogs gzhal yas khang byas dbus gnas pa'i/ /bla ma mgon po nam mkha' la gnas mchod/ /snying po'i sa bon gyis spros 'od zer tshogs/ /las byung gzugs sogs dgu po'i bdag nyid dang/ /me tog la sogs phyi rol rang gi mgon/ /'jig rten 'das dang 'jig rten gyis mchod bsam/ /rdzogs sangs 'khor lo'i spyan sngar? sa la ni/ /pus btsugs dman pa'i sems kyis thal sbyar byas/ /dkyil 'khor mgon po mchod pas rab mchod cing/ /sdig pa gshags pa la sogs brjod par bya/ /bdag gis lus dang ngag dang yid kyis kyang/ /chags dang zhe sdang rnam par rmongs pa yis// srid pa nyam nga rnams su sdig bgyis pa/ /des na sdig de thams cad rab tu bshags/ /sdig pa bshags pa'o/ /sngon chad byas pa'i sdig pa bshags nas kyang/ /slar yang de la 'jug par mi bgyid cing/ /byang chub snying po la gnas gyur gyi bar/ /rtag tu bdag bsod nams blo ldan shog / sdom pa'o/ /rdzogs sangs rgyas mgon byang chub sems dpa' mchog /'phags pa gzhan gyis dge ba gang bgyis pa/ /de la'ang bdag ni byang chub 'bras thob par/ /ma lus pa la bdag ni rjes yi rang/ /rjes su yi rang ba'o/ /legs par gsungs chus bran pa'i bsod nams kyi/ /myug ni bdag gis rim thob 'phel ba yis/ /'khor ba'i gdung bas bcom pa'i dgro rnams la/ /yang dag byang chub shing bcos 'bras bcas 'gyur/ /yongs su bsngo ba'o// rdzogs sangs rin chen rang gi sems gnas dang/ /rtog pa'i dra ba rab tu rnam bral chos/ /sa dbang sogs dang brtul zhugs dbang dge 'dun/ /rab tu dang pas rtag tu skyabs su mchi/ /gsum la skyabs su mchi ba'o/ /sdug bsngal tshogs kyis bsregs pa'i sems can kun/ /snying rje ldan pas byung kun gtong ba ni/ /dam chos chu char rab bsregs 'joms pa yi/ /sangs rgyas sgrub ces rang sems bskyed par bya/ /byang chub tu sems bskyed pa'o/ /sbyin pa la sogs bya bas skabs byas te/ /'das pa'i rgyal ba'i sras rnams kun gyi lam/ /gshegs dang gshegs 'gyur 'jig rten 'das pa yi/ /dpal 'bras lam mchog de la bsten par bgyi/ /lam la brten pa'o/ /rgyal dang bdag nyid la skyes de rnams la/ /kun nas kun tu bdag nyid bdag gis dbul/ /sems dbang mchog gis bdag nyid yongs bzung bas/ /dang bas khyed la 'bangs su mchi bar bgyi/ /bdag nyid dbul ba'o/ /glo bur nyon mongs tshogs chen gyis gdungs pa/ /bskyed pa'i skye bo mdza' med dgrol pa'i phyir/ / chos kyi bdud rtsi sngags rnams bshad pa ru/ /sman mchog mgon po la ni bdag bskul lo/ /bskul ba'o/ /mchog tu mi dge bsam pas rab bcom pa'i/ /bdud kyi skye rga na dang 'chi ba las/ /mya ngan 'das bzhed gyur pa spangs nas su/ /mgon mchog bzhugs par bdag ni gsol ba 'debs/ /gsol ba gdab pa'o/ /tshigs bcad rdzogs byas legs zhes brjod nas ni/ /thub dbang tshogs rnams de nas mi snang gyur/ hUM bsgoms nyi ma'i dkyil 'khor dbus su ni/ /nam mkha' a dza ni ri'i mdog ldan pa/ /de byung sna tshogs rdo rje'i nyid dkyil gnas/ /de las gtso bo'i sa bon 'od ldan pa/ /de las sna tshogs rdo rje'i sprin tshogs kyis/ /phyogs rnams thams cad char gyis yongs su gang/ /de las phyogs brgyad rdo rje rang bzhin char/ /rab 'bab de yis dra bar sprul pa dmigs/ /des ni sa bdun 'og la sogs 'phel nas/ /srid pa'i rtse mo'i bar du mda' rnams so/ /steng gi sa bon gyur bas skad cig la/ /sna tshogs rdo rje yi ni bla re byung/ /'od zer de tshogs mda' dang 'dru ba yis/ /nam mkha' khyab par kun tu gdugs su gyur/ /yaM las byung ba'i rlung ni 'og tu bsam/ /gzhung byas 'od sngon rgyal mtshan gyis ni mtshan/ /b+he ram pa zhes bya ba dum bu min/ /'gro ba'i snying po 'dzin 'gyur bzhag par bya/ /dbus su gru gsum 'bar ba rab dmar ba/ /raM gyi sa bon las byung phyogs gzhu 'dren/ /mthong nas de'i dbus su mtshams bcing bya/ /baM dkar las byung ba yi bum mtshan chu/ /de dbus lam las byung ba'i mdog ser po/ /ra ba'i don du gru bzhi dbang gi'o/ /hUM gis sna tshogs rdo rje byas sa phyogs// de dbus ra bar rnal 'byor pa yis bya/ /'di ni zhing rnam par dag pa'o/ /brum ser las byung 'khor lo rtsibs bcu pa'i/ /rtse mo'i 'od zer phyogs bcur spro bar bya/ /rtsibs rnams thams cad kyi ni lte ba'i phyogs/ /paM byung pad+ma'i steng du ra skyes nyi/ /legs gsungs rgyal ba rnams kyi skyed byed yam/ /bruM byung ye shes rnams ni gang yin nyid/ /sdug bsngal la sogs bcu gcig rnams kyi phyir/ /nyi ma nyi ma'i steng du hUM dgong bya/ /ye shes bcu gcig bcas 'dir 'khor lo la/ /nyi ma la gnas hUM byung rdo rje sngo/ /lte ba'i pad+ma nyid byung rdo rje las/ /dpal ldan rdo rje hUM mdzad sku ru gyur/ /yan lag kun ni dbu ma'i zhal dang 'dra/ /g.yas pa dkar zhing g.yon pa'i zhal yang dmar/ /shin tu 'jigs pa'i phyag drug 'jigs pa'i spyan/ /'jigs pa'i bskal pa'i sprin 'dra sgra sgrogs pa// rig ma kun tu bzang mos yang dag 'khyud/ /phyag gnyis kyis ni yan lag yongs su sdems/ /g.yas gnyis rdo rje ral gri 'dzin pa dang/ /zhags pa lcags kyu lag pa g.yon gnyis 'dzin/ /g.yas pas au ma'i nu ma'i dkyil mnan cing/ /g.yon pas bde 'byung dregs pa'i mgo bo gnon/ /de bzhin zhabs kyi g.yas brkyang bzlog pa yis/ /gnas pa'i mgon po sku ni rab tu sgeg /rtsibs re re la nyi ma bcu gnas pa'i/ /hUM byung mtshan ma 'dzin pa spro bar bya/ /bsdus na tho ba dbyug pa pad+ma dang/ /rdo rje de rnams dbang sogs phyogs gnas bskyed/ /skor phyogs su ni lcags kyu dbyug pa mdung/ /rdo rje me la sogs pa'i mtshams su bskyed/ /'khor lo dgra sta gnyis ni steng 'og tu/ /skyed par byed de khro bo'i zhal ljang dgod/ /gshin rje mthar byed gzhan gyis mi thub dang/ /rta gdong bgegs kyi tshogs ni rnam par 'joms/ /Tak+ki dbyug sngon dang ni stobs po che/ /khro bo mi g.yo gtsug gtor gnod mdzes rgyal/ /gnyis ni dkar po rtag gdong dmar po ste/ /de bzhin gtsug gtor 'khor lo sgyur ser po/ /bdun po gzhan dag kyang ni shin tu sngo// kun kyang nyi ma'i dkyil gnas rab tu grag / g.yas pa'i pus mo'i tshig ni shin tu bskums/ /g.yon pa'i brla dang rje dar gnyis rab brkyang/ /sna tshogs pad+ma nyi ma'i steng du gnas/ /phyogs dbang lus ni ji lta ba bzhin mnan/ /be ta lya dze dri khro gnyer ral pa gcig /g+ho na skul byed se bzang mchog chen po/ /mud gzhags pa gshin rje mthar byed sogs/ /de rnams bcu po mnyam du lha mo bstan/ /'khor lo'i gtso dang gtsug gtor gnod mdzes dang/ /de bzhin mi g.yo 'dod pa'i rgyal po lnga/ /sma ra med cing de rnams cod pan ldan/ /yan lag rin chen rgyan rnams kun gyis brgyan/ /shin tu mdzes pa'i 'od sngon gyen du 'byung/ /khro dang bcas par bzhad pa'i zhal gsum ni/ /mche ba cung zad btsigs shing spyan rnams dmar/ /shin tu mig zlum mi g.yo ba la sogs/ /yangs lta brdal brtan chos kun 'jigs med pa'o/ /gshin rje mthar byed gzhan gyis mi thub pa/ /dbyug sngon dang ni de bzhin rta mgrin dang/ /stobs po che dang bgegs mthar byed bcas pa'i/ /drug po mig ser gzhan yang shin tu drag /drag por lta bas sdang ba thams cad 'dul/ /gsus pa 'phyar zhing thung la mig? kyang zlum/ /shin tu lce bskyod khro gnyer 'jigs la drag /smin ma g.yo zhing spyan bgrang zhal mche btsigs/ /khros pas rnam 'jigs ha ha zhes bzhad pa/ /smin ma sma ra ser zhing skra ser spya/ /cod pan med cing rus pa sprul gyis brgyan/ /rked pa'i phyogs su stag gi pags pa mnabs/ /skad cig gis ni 'gro ba za mthur ldan/ /drag po 'di rnams mgo bo'i cod pan ni/ /rigs ldan dang ni mdza' yas mdog gnag gyur/ /'jog po zhes klu gser gyi mdog 'dra ba/ /de bzhin du ni sna cha dag tu 'gyur/ /de bzhin pad+ma zhes pa gser gtso'i mdog / 'di rnams kyis mdzes mgul pa'i do shal gyur/ /stobs rgyu pad+ma'i rtsa ba 'dra dkar ba/ /thugs rje ldan pa rnams kyi mchod phyir thogs/ /pad+ma dmar po 'dra ba'i nor rgyas bu/ /'od dpag dag gi rgyu ru bcing byas te/ /? dang? pad+ma dmar dang dkar ba gnyis/ /pad 'dra pad+ma'i rkang gdung gnyis su byas/ /g.yas phyogs su ni 'khor lo myur bar 'khor/ /khro bo'i tshogs de rnams ni mi 'gul lta/ /rtsibs rnon po yis yongs bcad dum bu yi/ /nyon mongs sa phyogs bdud rnams slar mi skye/ /dkon mchog gsum la 'di ru sun 'byin 'gyur/ /de la gtso bo gnod mdzes kyis sngags kyis/ /da ni rnam par bzlog nas phyir phyogs su/ /khro bo'i tshogs de rnams ni bskyod par byas/ /aoM AgI dI ni ma ma kri te ye na ke na tsi ta krita tA ni tA ni/ b+hinda b+hinda/ tshinda tshinda/ mu ru mu ru/ ku ru ku ru/ ha na ha na/ da ha da ha/ pa tsa pa tsa/ kaM pa ya kaM pa ya/ bi d+hwan sa ya bi d+hwan sa ya/ sha ta sa ha srA/ bi tsur+NA ya bi tsur+NA ya/ auSh+NI Sha bi dza ya tsakra barti bruM hUM/ da nas ji skad bshad pa'i bsgom pa'i rim pa yis/ /dgongs ka lan gsum sngags 'di bzlas par bya/ /sdad par sems par byed pa de yi ni/ /de nyid kyi 'grub 'gyur te the tshom med/ /gshin rje mthar byed la sogs rang sprul pa/ /phyogs bcur gnas pa'i drag po sgro bar bya/ /de rnams kyis kyang sna tshogs yongs khyab pas/ /bgegs dbang rnams kyis mgul nas thag pas bcings/ /aoM suM b+ha'i sngags ni zhal bzhi pas/ /phyogs bzhi dag tu brjod nas bsrung bar bya/ /yongs su bsrungs nas khro bo'i tshogs sprul pas/ /shin tu khri dang bcas pa'i ldad mig gis/ /gtso bo'i rdo rje tho ba dbyug sogs kyis/ /rang gi lus kun rab tu brdung bar 'gyur/ /mdun du zhags pas drangs shing bsdams nas ni/ /sna tshogs sa la gdong yang sbyar par byas/ /de nas 'od 'bar rdo rje phur bu yis/ /de steng rang gzugs ji lta bzhin du sprul/ /bsdus nas 'khor lo'i gtso bo'i bka' thob nas/ /khro dang bcas pa'i gnod mdzes lus kyis ni/ lag pa g.yon pa kun tu 'od ldan pas/ /snying rje med par khu tshur gyis bsdams te/ /bgegs tshogs de rnams mgon pos bsdus nas ni/ /phur bu gdab/ aoM g+ha g+ha g+ha ta ge na dang/ aoM badzra la sogs bzlas pa'i tho ba yis/ /nam mkha' bsdams shing khro drag lta stangs kyis/ /lag pa g.yas pas shin tu brdung bar bya// yongs su bsrung ba'i cho ga rdzogs so/ /de nyid gsum gyi sa bon dkar dmar gnag /mgo dang zhabs su ho ser gnyis dkyil bcug /nam mkha' i phyogs nas nor bu bzhin lhung ste/ /kha yi nang nas nang du rab tu zhugs/ /de nas snying rje ldan pas gzugs brtag pa/ / dngos po smig rgyu dbang po'i gzhu rang bzhin/ /bsgoms nas bdag med rang bzhin bsams nas ni/ /shU n+ya la sogs sngags rnams brjod par bya/ /ma rig pa'o/ /skad cig de la kha yi nang du zhugs/ /'khor lo 'byung bas zla ba'i gzugs su gyur/ /de dbus hUM las byung ba'i rdo rje dmar/ /zla hUM rdo rje las byung kun tu bzang/ /zhal gsum de rnams kyi ni gnyis 'gyur phyag /zhal ni gangs ri'i mdog 'dra gnag dang dmar/ /rdo rje ral g.yas nor bu pad+ma ga-yon/ /phyag gnyis kyis ni rang gi rig ma 'khyud/ /g.yas pas g.yas min brla yi rgyu ba mnan cing/ /g.yon pas g.yas pa yongs su mnan pa yis/ /sna tshogs pad+ma la ni skyil krung bcings/ /rdzogs sangs rgyas bcas 'og steng phreng ba 'phro/ /kun tu bzang las byung ba'i chos kyi dbyings/ /rdo rje gsum stong dkar po'i gru gsum ste/ /hUM ser gyis sprul zab mo dbus su ni/ /paM ser de las byung ba'i sna tshogs pad/ /pad steng kham ljang de las byung ba yi/ /sna tshogs rdo rje phyogs bcur rigs 'od 'gyed/ /rdo rje'i steng byung 'khor lo dkar po rtsibs bcu gnyis/ /rten 'brel las ni kun tu 'byung ba yi/ /phyag g.yas 'khor lo rtsibs brgyad kyis mtshan pa'i/ /rig bcas rnam par snang mdzad blta bar bya/ /kun tu bzang po'i rang gzugs ji lta bzhin/ /'di yi 'od zer mkha' dbyings rnam spros pas/ /mnar med me chen la sogs rnam par zhi/ /sems can rnams kyi 'dod pa phun tshogs grub/ /de bsdus bdag nyid zla ba sa bon la/ /spro bsdu yang byas las byung sangs rgyas sku/ /sna tshogs rigs kyi bye brag tha dad pa'i/ /rgyal ba'i sku las byung ba'i sna tshogs 'od/ /mthu yis de la dkyil 'khor dag tu gyur/ /zur bzhi pa la shin tu mdzes par byas/ /de la sgo rnams de bzhin rta babs khyams/ /zla ba dra phyed rin chen mdzes rnams dang/ /rlung gis skyod pa'i ba dan dril bu dang/ ye shes dam pa bsod nams tshogs gnyis kyi/ /gtso ma'i gser gyi rang bzhin bum pa bzang/ /mdzes pa rnams kyi nang dang phyi rol bzhag / rdo rje rdo rje phyed pa rtse lngas brgyan/ /sna tshogs g.yer ka dril bu'i sgra rnams dang/ /me long dang bcas rnga yab rnams kyis brgyan/ 'khor lo rin chen chu skyes ral gris mtshan/ /ka ba brgyad can de ni rnam dgu ldan/ /sgo yi phyogs gnyis kyi ni ka ba ni/ /ri dags gnyis dbus chos kyi 'khor lo'o/ /rdo rje 'dzin pas 'khor lo byas shing zlum/ /de yi phyi rol kun tu 'od tshogs 'khyil/ /'du byed do/ /byang chub kyi phyogs kyi chos sum bcu rtsa bdun rnam par rag pa'i dkyil 'khor ro/ /nyi shur gcig gis mtshan de rnams kyi/ paM las byung ba'i sna tshogs pad+ma'i gdan/ /'gro ba ma lus nye bar 'khrul bas na/ /rnam par dag pa'i pad+ma'i gdan rnams yin/ /raM las byung ba'i nyi ma bdun du gyur/ /aoM las byung ba'i rgyal pa'i zla bcu gnyis/ /nyon mongs thams cad nges par bsregs pa'i phyir/ /rnam par dag pa'i nyi ma bdun du gyur/ /bsod nams kun gyi myu gu bskyed pa'i phyir/ /zla ba'i gdan rnams dag ni byung ba yin/ /dbus su zla ba dbang po'i phyogs suAng zla/ /yongs su lhag pa'i phyogs suAng nyi ma gsum/ /zur bzhi mtshan suAng zla ba'o/ /rdo rje phreng bas bskor ba nye bar mdzes// phyi rol zur bzhi dang ni mtshams rnams dang/ /shar gyi sgo yi g.yon dang g.yas gnyis su/ /so so so so yi ni zla ba'i gzugs/ /sgo rnams de nyid du ni nyi ma bzhi/ /de bzhin dbus su zla ba'i steng du ni/ /zla ba'i dkyil 'khor gnyis ni rnam par bsgom/ /g.yon pa'i zla 'dir yi ge bcu drug sogs/ /g.yas pa'i zla gyur ka sogs ha mthar thug /zla bcas de la wa ya la gsum dang/ /a ka pa ao de la rab tu sbyar/ /de dag rnams ni nyis 'gyur rnams su bya/ /gang gyur de gnyis A li kA li zla/ /lugs su byung dang lugs las bzlog par bshad/ /dbyangs yig rnam dkar phreng ni gnyis su gyur/ /pha rol gsal byed rnams ni 'di ru dmar/ /de gnyis dbus su raM ni rnam par bsam/ /zhu bas gnyi ga gcig gyur 'od kyi tshogs/ /'od tshogs hUM byung hUM las rdo rje dmar/ /de yi dbus su zla gyur sa bon steng/ /zla hUM rdo rje las byung zla dbus su/ /ye shes rang bzhin las byung rdzogs par gyur/ /sku la sum cu rtsa gnyis mtshan 'chang zhing/ /dpe byad bzang po brgya bcus yang dag spras/ /me long ye shes la sogs nang du ni/ /sngags rnams lnga po 'di dag legs par sbyar/ /aoM sogs tsi ta pra ti pya d+haka/ /nga sri mdza' mar? de bzhin legs par brjod/ /kun gzhi rnam par shes pa gzhan gyur pa/ /zla gnyis 'dus gyur pa yi rnam snang mdzad/ /me long ye shes rang bzhin de gcig go /nyon mongs yid kyi rnam shes gzhan gyur pa/ /'od tshogs gang yin de yang rin chen 'byung de ni ye shes gnyis pa mnyam nyid gyur/ /rnam par rtog pa'i shes pa gzhan gyur pa/ /hUM byung rdo rje 'dzin pa 'od dpag med/ /so sor rtog pa'i ye shes 'di gsum pa/ /'jug pa'i rnam par shes pa gzhan gyur pa/ /rdo rje'i dbus kyi sa bon don yod grub/ / bya ba nan tan grub 'di bzhi pa yin/ /rang gi rnam par shes pa gzhan gyur pa/ /ye shes rnam bzhi rang bzhin gang yin gcig /de ni ye shes lnga par 'di ru bshad/ /spro dang bsdu ba thams cad las byung ba'i/ /rnam dag gnyis med chos dbyings rdo rje sems zhal gsum dbus dang yan lag thams cad dkar/ /g.yas dang g.yon gnyis zhal gnyis sngo dang dmar/ /rdo rje ral gri g.yas na rin chen pad+ma g.yon/ /phyag gnyis kyis ni rig ma 'khyud pa'o/ /nyes pa thams cad 'bigs pas rdo rje ste/ /las dang ma rig kun gcod phyir ral gri 'gro ba thams cad kyi ni bsam pa rnams/ /yongs su rdzogs pa'i phyir ni rin chen no/ /'dod chags dang ni zhe sdang 'dam kun gyi/ /ma gos par gyur pa'i phyir ni pad+ma'o/ /'di ni rang gi don phun sum tshogs pa'o/ /srid gsum 'jig rten de ni nang gnas shing/ /dngos po thams cad ro gcig chos kyi dbyings/ /rtag tu de bzhin gshegs pa kun gyi yum/ /mtshan ni rdo rje dbyings kyi dbang phyug ma/ /'dod chags la sogs kyis gdungs chus khengs pa'i/ /'gro ba chu bo bzhi yis kun tu bdas/ /nga rgyal la sogs dba' rlabs pha rol dogs/ /thag ring klong du las kyi rlung gis shin tu bdas?/ /byams pa phun sum tshogs pa'o/ /sems can 'khor bas gdungs pa mthong nas ni/ /snying rje'i ting 'dzin rgya cher bskyed par bya/ /thabs dang rig pa dgyes pa'i dgra rnams kyis / mkha' la sangs rgyas sems can dgyes pa bskyed/ /'od zer dra spros pas ni drangs pa'i mgon po rnams/ /kha yi dra bas nang du gzhug par bya/ /zhu gyur rdo rje lam byung gsang byung 'gyur/ /phyi na gnas pa'i lha mo rnam pa dgu /rim bzhin spos dang bdug pa mar me dang/ /dri dang de bzhin me long la sogs lnga/ /mchod pa bya phyir lag na thogs par blta/ /lha mo rnams dang rang nyid rdo rje sems/ /dang po spyan la sogs pa spro bar bya/ /gzugs la sogs pa lha mo kun kyang 'byung/ /slar bcug thams cad rdo rje lam byung nas/ /pad+ma sgo ru nges par 'bab 'gyur te/ /gsang ba'i lte ba'i zla dbus gzhug bar bya/ /'od zer de byung bshad pa'i dkyil 'khor nyid/ /bskyed nas srid pa gsum na gnas pa yi/ /sems can gang yin thams cad gzhug par bya/ /snying rje phun sum tshogs pa'o/ /rdo rje bcom nas pad+ma legs phye ba'i/ /de yi 'od kyis sangs rgyas spyan drangs nas/ /khar gzhug rdo rje lam ni byung gyur pa/ /rgyal ba la sogs zla ba zhus dbang bskur/ /mig la sogs pa drug dang gzugs rdo rje/ /spyan la sogs dang bde bar gshegs pa lnga/ /de bzhin gzhan yang khro po bzhi rnams dang/ /de dag rnams ni rang gi gzugs su gyur/ /dga' ba phun sum tshogs pa'o/ /stong gsum chen po'i 'jig rten khams gnas gyur/ /phyi rol sems can gzhan dag dga' med par/ kE la sogs pa'i sa bon gyis spro ste// de rnams thams cad byang chub la gzhol byas/ /gzhan gyi don rgyan sum tshogs pa'o/ /sems can don du smon lam byas gyur pa/ /gang yin de ni bdag gis yongs su bkang/ /'gro ba mya ngan 'das par 'dul don phyir/ /stong pa nyid du rab gzhug bzhed par gyur/ /rnam par shes pa'o/ /gtang snyoms yongs su ste rdzogs pa'o/ /aoM dang Acan dag tu gyur pa gang cung zad/ /de rnams rgyu gang gis ni yongs grol ba'i/ /mgon po bzhugs pa stong nyid rab zhugs gyur/ /gang rnams thog ma med pa'i dus dbus bsgom/ /thog med dus mdza' nas ni mi g.yo ba'i/ /tshangs pa'i gnas bzhi gzugs kyi lha mo rnams/ /rdo rje thugs khyod la sogs pa bzhi yis/ /rang gi glu rnams kyi mi yang dag bskul/ /rdo rje rdzogs la stong nyid yang dag spangs/ /mi bsam snga ma'i dkyil 'khor bzhin du gyur/ /sna tshogs pad+ma'i 'dab ma'i gdan dbus su /zla ba bcu gnyis dang ni nyi ma bdun/ /de dbus pad+ma zla ba'i gdan dbus su/ /maM las byung ba'i ral gri rnam par bsam/ /ral gri steng du yang ni zla maM ste/ /ral gri zla maM las byung 'jam rdo rje/ /ming dang gzugs so/ /rang gi zhal dang rang gi gur gum mdog /g.yas pa sngo zhing zhing g.yas pa ni na pa dkar/ /ral gri mda' dang autpal gzhu rnams shing/ /de yi phyag gnyis shes rab kun tu 'khyud/ /shes rab rnam dag ngo bo ral gri ste/ /chos rnams 'bigs par byed pa nyid kyis ni/ /rnam par dag pa'i thabs kyi ngo bo mda'/ /sems can thams cad tshim par byed pas na/ /autpal sngon po nyes kun gnyen po dang/ /yon tan thams cad 'dzin par byed pa'i gzhu/ /rnam pa sna tshogs mchog rnams kyis brgyan cing/ /yid du 'ong ba'i rin chen mchog gis brgyan/ /sangs rgyas sngar byas bdag nyid lus la spro/ /ri rab bzhin du mi g.yo dpal gyis mdzes/ /rang gi sa bon dkyil 'khor dbus su 'am/ /yang na gzhan ci 'dod pa'i cho gas mgon/ /de nyid kyis ni gnas su gyur pa ste/ /dkyil 'khor dbang po de yi gzugs 'dzin 'gyur/ /gzung ba dang ni 'dzin pa'i sems nyid med/ /aoM d+harmA d+hA tu la sogs sngags brjod de/ /brjod pa tsam gyis rdzogs par gyur ba ni/ /de 'dir bsnyen pa'i yan lag rdzogs byas pa'i/ /mig gnyis nad dang rna ba sna dang lce/ /yan lag dam pa drang dang zla gnas drug /kAM dzraM de bzhin khaM gaM de nas yaM/ sh+raM saM yi ge drug nyid rnam par bsgom/ /'khor lo rdo rje rin chen pad+ma dang/ /ral gri dang ni rdo rje rim bzhin du/ /phyag mtshan de rnams yang dag byung ba dang/ /mtshan ma de rnams dbus su zla sa bon/ /phyag mtshan zla ba sa bon bcas byung ba'i/ /yan lag sa bon dkyil 'khor gyis brgyan rig / drug bo brla gnyis rdo rje skyil krung gis/ /zla bcas sna tshogs pad+ma kun tu gnas/ /sa dbang rdo rje'i dbang po lag na rin/ /'jig rten dbang phyug sgrib sel kun tu bzang/ /dkar dang sngo dang de bzhin ser dang dmar/ /ljang dang skya dang gzhan yang de la sogs/ /sa yi dbang phyug gzugs kyi rdo rje 'khyud/ /rdo rje dbang po yang ni sgra rdo rjes/ /nam mkha' i snying po'i dri yi rdo rjes 'khyud/ /'jig rten dbang phyug dang ni ro yis te/ /sgrib pa rnam par sel ba reg pas 'khyud/ /chos kyis 'khyud pa yang ni kun tu bzang/ /de rnams bcu gnyis phyi nang dbye ba las/ /skye mched de rnams rnam par dag pa'o/ /gzugs rdor la sogs lha mo de dag rnams/ /gang yin phun tshogs skye mched dkyil 'khor gnas/ /de dag rnams la 'khyud 'gyur de bzhin du/ /bzlog pas gnas tshe thams cad de bzhin 'gyur/ de bzhin rtag tu bsgom pa bsgom bdag nyid/ /skad cig la ni mngon shes drug thob 'gyur/ /pha rol phyin drug rdzogs pa'i rnal 'byor par/ /gyur te nye pa yi ni sgrub pa rdzogs/ /reg pa'o/ /rdo rje gsum rdzogs nges par gnas don gru /zla gsum snying ga lkog ma mgo por yang/ /brang dang lkog ma'i bar du bzhi pa dgod/ /sna tshogs pad+ma rgyas pa'i dbus gnas pa'i/ /hUM gis rdo rje las byung thugs rdo rje/ /a yi pad+ma las byung khyad 'phags dag/ /aoM gyi 'khor lo yis ni sku rdo rje/ /maM gis ral gri las byung 'jam ? ?/ /chos dang longs spyod rdzogs pa sprul pa yi/ /sku gsum rnam par grol ba'i bdag nyid de/ /nges dbyings ye shes rang bzhin bzhi po'o/ /sngon po dmar po dang ni dkar dang ser/ /dpal ldan thugs kyi rdo rje'i phyag rgya che/ /dag ? sku 'khyud chos phyag rgya/ /de ba'i sku yi rdo rje'i ?? 'jam dbyangs nyid 'khyud dam tshig phyag rgya'o/ /de rnams bzhi po zla ba'i 'od kyis brgyan/ /rdo rje'i skyil krung gis kyang shin tu gnas/ /phyag rgya rnams kyi so so'i dbus su ni/ /'di ltar bsgom par bya zhes la la 'chad/ /de rnams kyi ni dbus su 'di lta yang// raM baM yaM laM la sogs yi ge dgod par bya/ /'di rnams bzhi po rdzogs par gyur pa dang/ /me chu rlung dang dbang gi dkyil 'khor rnams/ /dmar po gru gsum dkar zhing zlum pa dang/ /gzhu 'od sngon po ser po gru bzhi pa'o/ /mdung dang bum pa ba dang rdo rje yis go rim ji bzhin de rnams mtshan par 'dod/ /dkyil 'khor/ de yi dbus su rang sa bon/ /dmar ba phyag mtshan zla ba la gnas nyis 'gyur bya/ /mdog dang phyag mtshan rnams dang gdan la sogs/ /thugs rdo rje dang 'dra bar de rdzogs bya/ /rig ma spangs shing phyag gnyis zhal gcig ste/ /cod pan mtshon cha rgyan med de rnams ni/ /sngar gsungs dkyil 'khor rnams kyi dbus su ni/ /rnam par bsgom par bya zhes gzhan rnams 'chang/ /sems kyi 'od zer tshogs las rang byung ba'i/ /shes rab yan lag gis 'khyud gsal ba'i thugs/ /rgyal ba'i dbang po'i zhing rnams yang dag mchog/ rang gi lus ngag yid gsum byin gyis brlab/ /dpal ldan rdo rje 'chang zhes thugs brjod de/ /chos kyi gsung lam zhes bshad gsung brjod de/ /de bzhin dpal ldan rdo rje 'chang sku ste/ /de ltar sngags brjod 'di ni sgrub yan lag /sngags spangs brjod/ de sems kyi dbang bskur te/ /dpal ldan ye shes sems dpa' rtag tu bskul/ /gang phyir 'di ni rdo rje 'dzin rgyad gsungs/ /shes rab rno can de rnams kyis rab sgrub/ /tshor ba'o/ /bdag gis bdag snying ye shes 'od tshogs kyis/ /mkha' bzhugs rgyal ba ma lus yang dag bskul/ /de yi lus nas? byung ba'i 'od zer las/ /gzugs sogs rdo rje rab byung gzhan yang ni/ /dpal ldan mA ma kI dang gos dkar can/ /sgrol ma zhes bya lha mo de rnams ni/ /rnga yi sgra ldan rnams kyi sgra sgrogs shing/ /byug pa la sogs me tog phreng thogs shing/ /gser gyi bum pa ye shes chus gang ba/ /bkra shis bum pa lag thogs glu rnams kyis// rang gtso cod pan thogs shing mkhas dkyil gnas/ /mchog tu dbang bskur bar ni dbab par bya/ /bab 'gyur de nyid las ni byung ba yi/ /mi bskyod rdo rje cod pan dag tu gnas/ /mthong na shin tu sems ni rnam dag par/ /gyur pa de nyid sgrub pa chen po'o/ /srid pa'o/ /rig ma mtshan mchog yon tan kun ldan pa/ /rang gi sa bon las byung kun tu rtags/ /dkyil 'khor mngon sum du ni rab tu bzhag /de la bsnyen pa la sogs des byas bdag/ sa snying la sogs rnams kyis gang bar blta/ /sku la sogs pa'i yi ge gsum gyi lus/ /de 'dir chos la sbyar bar gyur pa yis/ /glo bur las byung lus ni kun tu dgang/ /mgo snying lte ba rked pa brla gnyis su/ /aoM hUM swA Arnam dgod rigs lnga ru ni rab tu bya/ /a las byung ba'i gsang ba'i lte bar ni/ /hUM las sna tshogs pad+ma 'dab brgyad kyi/ /nor bu aoM dang rang gi rdo rje hUM/ /sbubs gnyis su ni yi ge phaT bsgom bya/ /de 'og aoM sarba ta thA ga ta zhes/ /a nu rA ga na 'khyud gnyis su bya/ /len pa'o/ /de nas sngar bshad dbang bskur shes byas nas/ /rig dang lhar cig 'di ru dga' bar bya/ /srid pa'o/ /dang po bsnyen pa'i yan lag de nas nyer sgrub pa/ /sgrub pa'i yan lag chen po la sogs kyang/ /rtul po la sogs sbyor byas ?so sor? ni/ /'gyur te bzhi ru yang ni bshad par grags/ /rtul sogs rgyu mthun rnam smin skyes bu byed/ /dbang gi 'bras bu rnam par bzhi ru bzhag /bsnyen pa'i yan lag nas brtsams bya ba nas/ /thabs las byung ba'i bya ba rnam pa bzhi/ /shes rab kyis 'gyur de bzhin cho ga rnams/ /bsnyen pa'i yan lag la sogs dbang skur mdza' / /rgyu mthun la sogs bcas pa dbus kyi ming/ /yan lag bzhir 'gyur dang po'i sbyor ba'o/ /snying gi'i zla dbus gnas pa'i sngags 'od kyis/ /rgyal pa'i dbang po'i sku la ma lus gzhug / bde ba chen po las byung byang chub sems/ /hUM rdor las byung dkyil 'khor dkyil dbang dgod/ /skye ba'o/ /dwe Sha ra ti bcas pa'i thugs rdo rje/ /ain+d+ra nI la bcas byas lus 'char zhing/ /zhe sdang rdo rje ngo bo sna tshogs pad+ma la/ /bzhugs pa'i badzra d+h+rika ni zla dbus su/ /rga shi'o/ /bruM 'khor las ni dzina dzika gtso ba/ /rnam par snang mdzad gti mug 'bras rang bzhin/ /zla ba bye ba yi ni 'od gsal ba/ /shar phyogs zla dbus mo ha ra tir bcas/ /aoM gyi rin chen las byung gser gtso'i 'ong/ /rin dbang mgon po badzra ra ti bcas/ /nga rgyal gtso bo ratna d+h+rika ces pa/ /'di gdan nyi ma'i steng bzhugs lho phyogs su/ /dzriM gi pad+ma las byung mtshal mdog 'od/ /'dod chags la bzhugs mgon po 'od dpag med/ /rA ga ra tis dam 'khyud a ro lika/ nyi ma'i gdan la bzhugs 'gyur nub phyogs su/ /khaM gi ral gri las byung mdog mchog ljang/ /phrag dog rang bzhin de yang don yod grub/ /nu ma gnyis bsten badzra ra tir bcas/ /pradz+nyA d+h+rika ces byang phyogs nyi dbus su/ /ye shes lnga phung rnam par dag pa'o/ /lam gyi 'khor lo las byung mtshams su ni/ /rnam par snang mdzad mdog 'dra zla dkyil nas/ /sgeg pa'i cha byed rgyal la rab tu chags/ /mo ha ra ti gang yin de nyid spyan/ /maM gi autpal dmar po'i phyag mtshan byung/ /mi bskyod pa 'dra gshin rje'i phyogs zla dbus/ /rtag tu dang po'i sangs rgyas thabs gcig sbyor/ /dwe Sha ra ti mA ma kI gzhan min/ /paM gi pad+ma las byung zla dbus su/ /snang ba mdza' yas mdog 'dra rlung gi phyogs/ /pad+ma'i mgon po yis ni kun tu 'khyud/ /gos dkar gang yin rA ga ra ti 'ang de/ /taM gi autpal gser las byung gyur pa/ /rin dbang 'od 'dra badzra ra ti sgrol/ /dpal ldan phyogs su zla ba la gnas shing/ /don yod rdo rje'i yan lag gis 'khyud byas/ /'byung ba chen po bzhi rnam par dag pa'o/ /phyi rol byung nas me yi phyogs su ni// skor phyogs de nyid kyi ni nang du 'ang/ /zla ba drug dbus rang gi phyag mtshan rgyu/ /'od ldan yi ge drug po mthong nas ni/ /mtshams de rnams su dza hUM baM ho dang/ /khaM raM shar gyi sgor gyur phyogs gnyis su/ /me long pi paM dkar po dri dung chos/ /ro yi snod yang sna tshogs gos mkha' dbyings/ /sa bon bsams pa'i mtshan ma de mthong nas/ /gzugs rdo rje sogs lha mo de rnams drug /de rnams sa bon la sogs mdog 'dra zhing/ /lus la rtag tu de nyid gsum bsam bya/ /pha rol phyin drug rnam par dag pa'o/ /raM hUM nyi ma'i dkyil 'khor dbus gnas pa/ hUM gi sa bon mtshan byung khro ba'o gzugs/ /ji skad bshad pa'i khro bo'i tshogs nang gnas/ /bsgom bya de rnams rtag tu g.yas brkyang bzlog /mya ngan 'das srid rnam dag g.yas brkyang ba'o/ /gshin rje mthar byed dbang po zhes bya'i skor shes rab mthar byed nyi ma la skyes phyogs/ /pad+ma mthar byed klu yi gtso bo'i phyogs/ /bgegs mthar byed ba rnams thos phyogs na gnas/ /dad pa la sogs pa bzhi rnam par dag pa'o/ /gshin rje mthar byed de'i ba ta 'i/ /shes rab mthar byed gzhan gyis mi thub ma// pad+ma mthar byed lhan cig khro gnyer can/ /dgegs mthar byed pa ral pa gcig mar dmigs/ /ma lus 'khor lo sna tshogs pad+ma la/ /nyi zla'i dbus su ji lta ba bzhin bzhugs/ /zhi ba'i gzugs can gang yin 'dir lha rnams/ /de rnams thams cad rdo rje ba skyil krung gyur/ ting 'dzin chen po thob pas shin tu zhi/ /bdud rnams bzhi las mchog tu rgyal gyur pas/ /rnam par dag pa'i rdo rje skyil krung ngo/ /sangs rgyas sogs gzhan lha mo rnams bcas pa/ /dgyes pa'i brtson 'grus rtsom pa rnam par sbyar/ /dbus na gnas pa'i dkyil 'khor gtso bo yi/ /zhal 'di rnams kyi zhal ni nges par blta/ /rigs rnams dang bo'i rigs ni rdo rje'i rigs/ /de bzhin gshegs dang rin chen rigs gsum pa/ /de nas pad+ma'i rigs ni bzhi ba ste/ /sna tshogs rigs ni la lar las kyi rigs/ /sngon po la sogs gang yin mdog lnga yang/ /de mdog tha dad pas ni rigs rnam lnga/ /sems can bsam pa tha dad mdog tha dang/ /rigs las rang byung sangs rgyas rnams kyi sku/ /de rnams yan lag mchog rnams gsum gyis brgyan/ /sku gsung thugs ni rnam dag zhal gsum pa'o/ /sngon po dkar po gnyis kyis g.yon pa dmar/ /g.yas pa gnyis mdog rnam par zlog pa'o/ /ser po dang ni dmar po ljang gu'i sku/ /g.yas min dang ni g.yas pa dkar dang sngo/ /rigs kyi lha mo 'di dag rnams kyi ni/ /zhal gyi mdog rnams kyang ni so sor gyur/ /de rnams phyag drug dang ni yang dag ldan/ /gtso bo phyag gnyis kyis ni mtshon cha spangs/ /lag pa gnyis kyis rdo rje khu tshur ni/ /so so so song nges bcings de 'og tu/ /mthe'u chung rtse mo lcags kyu'i gzugs kyis ni/ /lag pa gnyis kyis mkhrig ma gnyis ni sbyar/ /gnas ldan gang yin la ni phyi rol gyis/ /de yi phar dbus 'dug 'gyur des mgul phyogs/ /g.yon ba'i nang du lag gnyis phyi rol gyur/ /gcig la gcig 'khyung phyag rgya bcing bar bya/ /pha rol phyin drug rnam dag phyag drug po/ /bak te ne bka twaM pa ri tsum pa ma na/ /dan+te shwa na taM pa ri g+hi sha ma na/ /thabs dang rig pa'i yan lag mi phyed par/ /dkyil 'khor 'khor lo'i rgyal po'i rnam par bsgom/ /ngo bo nyid kyis rnam dag 'khyud pa'o/ /gang yang phyag mtshan mchog las byung gang yin/ /mtshan ma mchog de lag pa g.yas su ste/ /phyag gsum thams cad la ni ral gri'o/ /ral gri las byung 'khor lo 'dzin 'gyur te/ /rin chen rigs kyi g.yon pa pad+mar gyur/ /de bzhin pad+ma rigs kyi rin chen te/ /'di gnyis kyi ni gsum par 'khor lor gyur/ /gzhan rnams kun gyi lag pa nor bu pad/ /de bzhin gshegs pa rnam par dag pa dang/ /shes rab pha rol rnam dag phyag mtshan no/ /rgyal ba lnga po rnams kyi ral pa'i tshogs /'dir ni de rnams bye brag gcig yong 'gyur/ /zhi ba rnams ni rin 'bar cod pan thogs/ khro bo rnams ni sbrul gyis sku brgyan cing/ /dpung pa lag ngar rked pa rkang pa dag /mgrin pa dang ni rna ba mgor thogs pa/ /'od ldan nor bus spras pas gser gyis bcings/ /ji lta ji ltar yan lag rgyan gyis brgyan/ /thabs kyis gyur pa gang yin shes rab kyi phyag dang mdog dar mtshon cha gos 'byung ba/ /gnas dang gnas pa nyid kyi gang dang gang/ /de rnams kyang ni bar gyur pa yir gyur/ /dkyil 'khor 'di ni gsang 'gyur rnam par bsam/ /byung nas de yang go rim ji lta bzhin/ /yig gsum badzra d+h+ri ka sogs sngags rnams kyis/ /dam tshig la sogs pa dang thabs gcig bya/ /mi bskyod rdo rje snying gar thugs rdo rje/ /rab zhugs nam mkha' dang mnyam ngo bo nyid/ /rnam par snang mdzad la sogs gzhan rnams kyang/ /gsang ba'i nang bshad gang yin phyogs rnams su'o/ /de dbus sngags kyi 'od zer rnam byur nas/ /gshin rje mthar byed ltar gyur nam mkhar gnas/ /rdo rje lcags kyus 'khor lo drangs nas ni/ /de nas mdun kyi dkyil 'khor dag tu bya/ /rdzogs nas yon chab mchog bkang pad+ma'i snod/ /lag pa gnyis kyis kun tu bzung nas kyang/ /de nas lag pa g.yon pas ba dan bzung/ /lag pa g.yas pa yis ni tsan dan na mdzes/ /me tog chu sogs kyis mdzes bdud rtsi lnga/ /rang gi snying sogs zlas pa'i mchod pa 'bul/ /gshin rje mthar byed la sogs thams cad kyang/ /ji zhes lhag par smra zhing srung bar byed// de bzhin khro gzhan rang gi las kyi mdza' / /hUM baM ho bcas pa yi sgra sgrog shing/ /gzhan gyis mi thub pad+ma bgegs mthar byed/ /rab bzhugs cing pa dang ni dgyes par byed/ /zhes pa'i bar gyur 'di ltar lhag bsnyen pa/ /lhag pa'i rgyu mthun 'bras bu dang lhan cig/ de nas thams cad kun tu dgyes pa dang/ /mig la sogs pa'i yan lag byin gyis brlab/ /sku sogs tshig gsum gyis ni byin brlabs te/ /dbang bskur byas pa'i dus kyi mdza' bar gnas/ /de rnams rim gyis gnas pa'i bar du ni/ /lhag pa'i 'bras bu gsum bcas yan lag go / rang gi sems las kun 'byung 'od chen 'phros/ /nam mkha' i rgyal dang rig na kun nas dangs/ /nam mkha' khyab par gdan la bzhugs par gyur/ /rang gi bdag po bcings nas cod pan bcings/ /gshin rje mthar byed pad mthar rdo rje gzhan/ /khro bo bgegs sgra rang gi dkyil 'khor gnas/ /nga rgyal bzhi po sems bdag 'jam dbyangs bcas/ /kun tu bzang dang phyag na rdo rje dang/ /dpal ldan rdo rje sems dpa' chos dbyings dang/ /dpal ldan dwe Sha rang bcas sgra rdo rje/ /'di rnams cod pan rdo rje mi bskyod pa/ / mi bskyod rdo rje'i steng du rdo rje sems/ /sa snying sku dbang dang na gzugs rdo rje/ /gshin rje mthar byed mo ha ra ti rnams/ /'di rnams kyi ni spyi bor rnam snang bzhugs/ /mkha' snying dri yi steng du rin chen tog /dag rdor 'jig rten dbang phyug dri dang ro pad mthar phyin rnams cod ban 'od dpag med/ /reg rdor sgrib sel badzra ra ti rnams/ /spyi bor yang ni don yod grub pa bzhugs/ /rang gi sa bon pad+ma'i nang gnas pa'i/ /'od kyis kyang ni phyag rgya lnga drangs nas/ /kha yi nang zhugs gsang ba'i dbus gnas te/ /zhu nas pa las gzugs la sogs par gyur/ /sku rdor la sogs mtshan ma de lha mo/ /me long sogs gang yin de las byur spros/ /gzhan yang phyi rol me tog gdug spos sogs/ /de rnams nam mkha' la ni gdums bzhin gyur/ aoM sarba ta thA ga ta dang/ /pU dza la sogs sgra yi sngags brjod cing/ /mi bskyod rdo rje la sogs tshigs bcad lnga/ /brjod nas de nas mdun du rnam bsam pa/ /yi las byung ba'i 'od sngon gzhur byas nyid/ /rgyal mtshan gyis mtshan rlung gi dkyil 'khor la/ /de nas ri byung shin tu mdog dmar pa'i/ /gru gsum gyen nas me yi tshogs kyis mnan/ /de nas me yi steng du 'od dmar aM/ /de las byung ba'i pad+ma'i snod mchog bsam/ /rnam pa bco lnga rdzas kyis yongs gang ba'i/ /bdud rtsi lnga la sa bon lnga rnams kyis/ /aoM hUM zla ba gnyis ni mkha' dkyil gnas/ /zhu nas de yi nang du lhung bar gyur/ /skol bas aoM ni tshur gyur kun tu blta/ /hUM gi sa bon las byung rdo rje nang/ /rdo rjes dkrug pas rnam par zhu gyur pa/ /yi ge hUM bzlas ye shes bdud rtsir gyur/ /de las gzhan pa yi ni snod rnams kun/ /thams cad rang gi lag na thogs par spro/ /lce yi rtse mor hUM byung rdo rje dkar/ /snying la gnas pa'i dkyil 'khor 'khor lo rgyal/ /thams cad kun tu chim par bsam par bya/ /dkyil 'khor dam pa'i mchog 'gyur ting 'dzin no/ /gang yang 'jam dbyangs rdo rje thugs ka yi/ /sems dpa' i snying po las byung 'jam ral gri/ mi las byung ba'i sems kyi me bsgoms te/ /rdo rje gsum sku dang yang gnyan por byung/ /de? rnams snying nas rang mtshan sa bon las/ /byung nas ye shes 'od zer rab gsal ba'i/ /'od kyi ma lus sna tshogs kun tu gang/ /ye shes bdud rtsi rgyun gyis rjes song nas/ /'jig rten khams rnams thams cad rgal nas kyang/ /rnal 'byor bdud rtsi gzhan dang gzhan bsdus nas/ /'og tu gdong ltas nas ni de byung bas/ /skad cig gis ni 'jig rten gsum bcas rgyal/ /ma lus sna tshogs sangs rgyas nyid byas nas/ /'ongs nas spyi po'i nang du rab tu zhugs/ /lus kun tshim par kun tu gyur nas ni/ /thang gcig de la yang ba'i rang bzhin gyur/ /de nyid gsum mchod cho ga bzhin du bya/ /maM gi nang du rab zhugs rnam par blta/ /maM las byung gyur ral gri dbus su ni/ /zla gnas tsa na ka tsam thig ler gnas// de dbus dkyil 'khor dkyil 'khor gyi dbang po/ /nyi shur gcig gis ma tshang de rnam dag /gang dang gang gis skyo med de bsgoms te/ /mngon sum byas nas thig le'i sbyor ba'o/ /rang gi lha yi sa bon las byung 'od 'phros pas/ /phyi rol gyi ni de bzhin gshegs pa rnams/ /chos 'byung zhes bya'i sna yi rtse mor bzhugs/ /yang dag byang chub sems byung 'jam ral gri/ yang na 'khor lo pad+ma rdo rje 'am/ /nas kyi tshad dam zla ba'i dbus su ni/ /de yi steng du maM byung mdog lnga pa'i/ /yungs kar tshad tsam rin chen zur brgyad pa/ /rin chen 'bras bu ngaM las byas pa'i 'khor lo nyid/ /gang yin de gyur rnal 'byor shes mchog gis/ /rdo rje sogs mtshan de bzhin gshegs rnams kyi/ /de rnams nyid dang mtshan ma sbro bar bya/ /mtshan ma brtan por byas pas rtags na ni/ /'od zer du ba'i 'od dang de bzhin gzhan/ /me khyed 'od dang snang ba chen po ste/ /rim gyis mthar thug phra mo'i sbyor ba'o/ /rdub ba dang ni gnas dang ring du gyur/ /sdud dang gang ba dang ni 'dzin pa rnams/ /'ong ba dang ni rje dran sngon grub rnams/ /srog ma bsngams par gyur pa gang yin dge/ aoM dang dbugs de mnyam du nang du zhugs /a'i sngags dang thabs gcig dbus na gnas/ /hUM gi mthar ni dang gi sgra dang ldan/ /bzlas pa kan dang mchu sbyar spang bar bya/ /de nyid sa bon las 'dir sangs rgyas spro/ /'od zer tshogs de nam mkhar song nas kyang/ /de nas byung ba'i lha mo de rnams kyis/ /dam tshig zhes bya'i 'khor lo mchod par byed/ / thams cad kun tu 'khyud par gyur pa dang/ /dga' ba'i dbang gis sangs rgyas rnams 'khyud 'gyur/ /de nas rang byas snying ga'i sems rdo rje/ /skad cig de la thub dbang zhugs par blta/ /gal te bsgoms dang bzlas pas skyo gyur na/ / rang gi snying ga'i de nyid rnams bsgoms pas/ /rigs ma'i tshogs 'ongs nas ni glu yi sgras/ /de dang de yis 'khor lo mchog sang byas/ /mgo bo pags pa'i mtho gang tsam du ni ma lus yongs su rdzogs pa'i zla ba dgod/ /bdud rtsi lnga rnams aoM dang ldan pa ni/ /zhu bas skad cig de la rang lus bab/ /bsam bya gangs chu bsil 'dra bab gyur pas/ /ma lus skyo ba rnam par bsal bar bya/ /de nas thangs cig de yis ngal bsos nas/ /slar yang de yis gsang sngags bzlas brjod bya/ /gong du bshad pa'i dbang bskur mchod pa dang/ /stod pa la sogs smon lam mthar thugs brjod/ /byas nas gang dag gang rigs rab 'byung ba'i/ /de ni de dang de yi snying gar gzhug /de nyid gsum tshig gis ni byin brlabs bya/ /gnas nas thog med ye shes gnyis med tshul/ /de la gshegs gsol gleng bzhi de rnams ni/ /las rgyal mchog ces bya ba'i ting 'dzin no/ /de las langs nas ting 'dzin sbyor ba yis/ /bdag nyid chen por dang lha'i rnam pa gzung/ /snang ba tsam du yul de mthong nas ni/ /sku tshogs rdo rje bdag nyid dngos rnams dag/ /rang gi sa bon las byung yongs rdzogs pa'i/ /'khor lo rang gi snying zlar zhugs par bsam/ /raM las byung pa'i me yang bsgom par bya/ /zan zang gyur pa'i tshe na 'di skad gsungs/ /sngar bshad rlung dang me dang dgos dbus su/ /rdo rje la sogs cho ga bzhin byas nas/ /sku sogs lha rnams kun tu tshim par bya/ /nang gi bdag nyid kyi ni sbyin sreg las/ /mthar thug par yang sems kyi bya ba ste/ /phung po la sogs bud shing kun tu ldan/ /ye shes me 'bar ba yi phung po ni/ /bsreg pa gang yin de ni bla med bshad/ /ma lus 'dod pa yi ni cho ga nyid/ /de yis rang gi lha yi rnam par bsgom par bya/ /rang dang gzhan lus la yang kun tu mchod/ /sangs rgyas rnams bsten dam chog shin tu thog/ /rjes su mthun pa'i 'gro ba'i don byas shing/ /de bzhin gshegs rnams kun tu mchod par bsam/ /sems ni gcig tu mnyam par bzhag gyur pas/ /lus la sogs pa'i las rnams rtag tu bya/ /gang yang lus dang ngag dang yid kyi las dga' bas thams cad nyin mtshan rab byed pa/ /de yi sngags dang phyag rgya rab brtags par/ /sangs rgyas mchog rnams kyis ni rab tu gsungs/ /ji ltar dngos po gcig la rnam par rtog /dpag med 'byung 'gyur bud med mthong ba las/ /kyi dang 'dod pa can dang rang byung gsum/ /de dang sdug bsngal rnam par grol ba'i sems/ /lus la sogs pa'i dge dang mi dge'i las/ /gang phyir de ni sems kyi dbang gis gsungs/ /de bas rtag tu rnam rtog dra gcod pa'i/ /sems ni nag po'i las su mi 'gyur ro/ /dam tshigs nyams pas kham las byung ba yi/ /snying gar sna tshogs rdo rje yis bkod pa/ /kham las byung ba'i ral gri de nyid ste/ /sa bon 'di las byung ba'i don yod grub/ /sna tshogs pad+ma'i gdan la bzhugs pa yis/ /gong gi go rim nyid bzhin thams cad bya/ /myur du dbang bskur bas ni nyes kun dang/ /'gro ba rang bzhin gyi ni dag par lta/ /phyi rol khrus la'ang cho ga 'dis bya'o/ /gang zhig thun mtshams nyams par gyur pa yis/ /des kyang cho ga 'di ni bya ba ste /ji lta ba bzhin nyes pa gsum 'byung gsungs/ /gang yang sna tshogs pad+ma'i dbus gnas pa'i/ /hUM las byung ba yi ni bgegs mthar byed/ /bdud rtsi zhes bya 'khor lo dbang bskur bas/ /'bad pas bgegs rnams thams cad gzhom bya ste/ /de ltar ting 'dzin gsum po bsgom bdag nyid/ /gang bsgoms pas ni shin tu skyo gyur nas/ /'khor lo rang snying nad zhugs rnam par bsam/ /rnal 'byor ldan pas rig mar ldan par nyal/ /rnal 'byor gnyid log ldang ba'i dus su ni/ / lha mo'i tshogs bkyil blangs pa'i glu yi sgras/ /myur ba'i kun tu langs nas yang byas te/ /sngar bshad pa yi mnyam par bzhag par bya/ /dngos grub mchen ma nye bar rtags nas ni/ /khang bzang ngos gnyis nas ni 'jig pa dang/ /dag pa'i gtsug lag khang rang sangs rgyas sku/ /rmi lam nu ma gzhan dang rgyal po mthong/ /de nyid gsum gyi cho ga bzhin mchod nas/ /dngos grub 'dod pa yis ni dkyil 'khor bya/ /rig pa 'dzin dang ri lu mig sman dang/ /bcud kyis len ni pa'am phyag rgya che la sogs/ /rta dang gser dang rin chen sa gzhi 'gro/ khrag dang bu dang bu mo du ma byin/ /bskal ba grangs med gsum la sogs pa yis/ /'dir ru la las sangs rgyas thob par 'gyur/ /gang yang bde ba chen po'i ting nge 'dzin/ /thams cad bsgoms pas bde bar nyer bsgoms nas/ /de steng sdig ba kun las rnam grol nas/ /skad cig gis te rdo rje 'dzin par 'gyur/ /bdag gis man ngag brtsams 'dir bdad pas/ /bla ma'i zhal gyi pad+ma las rnyed de/ /mkhas pa rnams gyis 'di la brtag mod gyis/ /'gro ba kun la phan phyir bdag gis byas/ /ji ltar log pa'i rdzun gyis byas pa yis/ /pha yi drung nas cung zad rnyed pa ltar/ /de bzhin bdag gis bsod nams cung zad rnyed/ /de nas 'jig rten 'jam pa'i rdo rjer shog dpal ldan au rgyan yul du ? can skyes shing/ /dpag med rgyud don ma lus rab mkhyen pa/ /dpal ldan rnam par dul zhi'i zhal snga nas/ /nga yis dbang bskur slob ma'i gtso bo mchog /de las sind+ha ngos su de skyes shing/ /rnam thos bsti gnas zhes bshad rgyal bzhugs nas/ /shAkya'i bshes gnyen bdag nyid sangs rgyas shing/ /de yis yongs bkrol zhal gyi man ngag go /dpal ldan au rgyan yul nas byung ba yi/ /sangs rgyas ye shes zhabs kyi zhal snga nas kyi sgrub thabs man ngag go rdzogs so// // lo ts+tsha ba dge slong khyung weng rin chen bzang pos bsgyur zhing zhus te gtan la phab pa'o/ / //dpal gsang ba 'dus pa'i sgrub thabs kun tu bzang po zhes bya ba slob dpon chen po sangs rgyas ye shes kyis mdzad pa'o// //*/ /rgya gar skad du/ sa man+ta b+ha dra nA ma swa d+ha ni/

CLOSE WINDOW