བོད་ཡིག

e-texts based on the ACIP/ALL Input

bod kyi sgra bsgyur gyi lo tsA ba dge slong dar ma grags kyis mang yul skyid grong gi lha khang ke ru dang/ ag tsar sgang du bsgyur cing zhus te gtan la phab pa'o// //yang dag rig byed ces bya ba'i rgyud phyi ma'i 'brel ba bzhugs so/ /rgya gar skad du/ samyaka bi dya ka ra nA ma aut+ta ra tan+ta byA khyA naM/ /bod skad du/ yang dag rig byed ces bya ba phyi ma'i rgyud kyi rnam par bshad pa/ dpal rdo rje sems dpa' la phyag 'tshal lo/ /gang gis nyi mas me tog rnam phye bung ba'i tshul du snying po'i rtsi blangs nas/ mi shes kun spangs dri ma med cing ye shes rgyas pas rang rgyud tshim mdzad cing/ /sna tshogs rigs kyi sprul pa'i tshogs kyis 'gro rnams rab tu tshim par mdzad pa yi/ /dpal ldan 'jam dbyangs rdo rje de la rab btud rgyud don 'dzin bdag bla ma la 'ang/ /sangs rgyas ye shes zhabs sogs rim pa'i man ngag rang dang gzhan gyis dran pa'i phyir/ /dpal ldan 'dus pa'i rgyud rgyal de bzhin gshegs pas mchog tu gsal byed phyi ma'i rgyud/ dam pas bdag la gnad phyir chos kun bzhi yis bdag la rab tu bskul ba'i phyir/ /yang dag rig byed ces bya rnam bshad 'di ni nus pa ji bzhin bdag gis btsam/ /byang chub rdo rje la sogs pa/ /dam pa'i spyod yul phyi ma'i rgyud/ /'dren byed rnams kyi thugs rje yis/ /bdag gis kyang ni bshad par bya/ /de la 'di'i gling gzhi phun sum tshogs pa'i rnam par bshad pa dang/ /rtog pa mngon du gtong ba'i nyan pa po rnams khas len pa'i yan lag rnams ni sdus pa'i don du bshad pas de las dpags te shes par bya'o/ /nga ni de nas zhes bya ba la sogs pas phyi ma'i rgyud kyi don phun sum tshogs pa ston te/ de yang dang po thabs khyad par can dang ldan pa'i byang chub sems dpa' rnams kyi ji ltar thugs su chud pa'i don gsol ba ston te/ de rnams kyi bye brag gi tshig byams pa la sogs pa zhes pas ni thugs su chud pa'i gang zag ston to/ /ci 'dra ba zhe na/ byang chub sems dpa' sems dpa' chen po zhes bya ba smos so/ /thabs gang gis she na/ de bzhin gshegs pa thams cad kyi dbang skur ba thob pas sku dang gsung dang thugs kyi gsang ba bstan pa la zhes bya ba smos so/ /dngos po gang gis zhe na/ dngos po thams cad kyis zhes so/ /ji ltar chud ce na/ ji lta ba dang dam tshig ji lta ba bzhin du mthong zhing thos te rtogs nas zhes so/ /gang la gsol zhe na/ de bzhin gshegs pa de dag thams cad la zhes so/ /ci 'dra ba'i de bzhin gshegs pa yin zhe na/ chos gzigs pa dang ldan pa zhes bya ba smos so/ /ji ltar gsol zhe na/ e ma'o zhes bya ba la sogs pa gsungs so/ /da ni yan lag gi don rnam par bshad par bya ste/ de la de nas zhes bya ba ni rtsa ba'i rgyud dang rgyud phyi ma'i mtshams 'brel zhing 'jug bsdu ba dang/ rgyan yin par blta'o/ /byams pa la sogs pa zhes pa ni rdo rje 'dzin pa'i mthus yongs su dag pa'i zhing gi rdul dang mnyam pa rnams so/ /byang chub ni rnam pa thams cad mkhyen pa mngon par rdzogs par byang chub pa'i snying rje dang shes rab dbyer med dkyil 'khor gyi 'khor lo ste/ de thob par bya ba'i phyir 'dun pa ni sems dpa' o/ /kha na ma tho ba las ring du song ba 'ga' zhig la yod do/ /zhe na/ de'i phyir sems dpa' chen po zhes bya ba smos te/ sems can tshad ma chad pa'i rigs rnams kyi don la dmigs par byed pas na de skad ces brjod do/ /so so'i skye bo 'ga' zhig las dgar ba'i phyir byang chub sems dpas khyad par du byas so/ /de bzhin gshegs pa thams cad kyi dbang thob pas zhes pa ni de bzhin gshegs pa thams cad las byung ba'i dbang ni byang chub kyi sems so/ nges bskur ba'i nyan pa'i skal pa dang ldan par byas nas gnas pa ni dbang thob pa ste/ 'dod chags las byung ba'i ting nge 'dzin gnyis kyis yang dag par bsdus pa'i chos ji snyed pa thams cad la de skad ces brjod do/ /sku gsung thugs kyi gsang ba bstan pa la zhes pa ni des dag pa la sku gsung thugs kyi gsang ba'i rang bzhin yi ge dang/ phyag rgya dang/ ting nge 'dzin la sogs pa rdo rje chen pos bstan pa de/ lhag mas bsdus pa'i chos rnams la de skad ces bya'o/ /dngos po thams cad kyi zhes pa ni rang rang gi lus la sogs pa rtse gcig pas zhes so/ /ji lta ba dang zhes pa ni nges rang bzhin du gnas pa'i lha 'am bdag nyid du lus la sogs pa ji lta ba bzhin du rtogs pa ste/ ji ltar zhe na/ dam tshig ji lta ba bzhin du zhes te/ sgro ma btags skur pa ma btab pas ji lta ba'i don las mi 'da' ba' i gzhung le'u dang po la sogs pa'i rim pa bzhin du shes so/ /mthong ba ni skus so/ /thos pa ni gsung gis so/ /rtogs pa ni thugs kyis so/ /so so yang dag pa rig pa mar dang mar 'dres pa ltar dbyer med pa la de skad ces bya ste/ 'di skad ces gsol to zhes pa dang sbyor ro/ /gang la gsol zhe na/ chos gzigs pa dang ldan pa zhes pa ste/ gang gi phyir rdo rje 'dzin pa'i mthu las de rnams shin tu zab par gyur pa de'i phyir de dang lhan cig tu dus gang gi tshe na des gzigs pa de'i tshe na chos gzigs pa dang ldan pa zhes bya'o/ /de bzhin gshegs pa thams cad ces pa ni gzugs la sogs pa'i rang bzhin rtag pa la sogs pa ste/ dang po mgon po ltar bzhud par byed pa'i phyir de skad ces bya'o/ /e ma'o zhes pa ngo mtshar ba ste/ gang la zhe na/ kun tu bzang po'i zhes te/ rgyu ba dang mi rgyu ba'i chos thams cad kyi rang bzhin du gnas pa'i kun tu bzang po ni rdo rje 'dzin no/ /de'i sku gsung thugs kyi nges pa de ngo mtshar zhes so/ /nges pa dngos gang zhe na/ rdo rje gsum la kun tu ni/ rdo rje gsum ni rnam bzhugs te zhes pa ste/ sems rnams kyi sku la sogs pa'i rdo rje rnams la kun tu bzang po'i sku la sogs pa'i rdo rje rnams don dam pa 'am kun rdzob tu gcig pa 'am/ go rim bzhin du dbyer med par gnas pa la de skad ces bya'o/ /de bas na bcom ldan 'das rnam par snang mdzad khams gsum pa thams cad kyi zhes bya ba la sogs pa le'u bcu bdun pa'i 'das ma thag pa'i don bstan pa yin no/ /de ltar rdo rje 'dzin pa dang sems can rnams dbyer med par bstan nas/ da ni don dam par na de dag kyang sangs rgyas yin par bstan pa/ sems can dus gsum du byung ba thams cad rdo rje'i ngo bo nyid ces te/ 'das pa la sogs pa'i sems can thams cad kyang 'das pa la sogs pa'i de bzhin gshegs pa rnams kyi snying po dang ldan par gyur pas de rnams kyi ngo bo nyid las byung ba ste/ de'i phyir de rnams kyang byang chub rdog nas thob pa/ sangs rgyas rdo rje rdzu 'phrul che zhes te/ gdod ma nas de lta bu'i rang bzhin du gnas pa la de skad ces brjod do/ /da ni de lta bu'i don de la ngo mtshar bar gsungs pa/ e ma'o zhes pa la sogs pa'o/ /'di rab tu ngo mtshar che zhes pa ni rab tu yang ngo mtshar che zhes so/ /ji lta bu zhe na/ dbang po las 'das shing zhes pa ni de rnams kyi spyod yul las 'das pa'i phyir zhi ba ste spros pa dang bral ba'o/ /de bas 'khor ba dag gi rgyun/ /mchog tu mya ngan 'das zhes te/ / bdag dang bdag gi la sogs par snang ba'i 'khor ba'i rgyun kho na la/ de bzhin nyid du shes na mchog tu mya ngan las 'das pa ste/ de nyid e ma'o zhes so/ /'dir rang bzhin dang/ dbye ba dang/ mtshan nyid dang/ ma rdzogs pa dang/ mchog tu mya ngan las 'das pa lnga las 'dir tha mar bzung ste/ ro myang ba'i mtshan nyid brgyad dang ldan pa'o/ /de ni de bzhin gshegs pa rnams kyis de ma nor bar gsungs pa/ de nas zhes bya ba la sogs pa gsungs so/ /de ltar byang chub sems dpa' rnams kyis thugs su chud pa'i don gsol nas/ nga ni ma rtogs pa'i sems can rgyud kyi don la the tshom gcod pa'i phyir/ zhus lan gyi bye brag bstan pa/ de nas zhes pa la sogs pa'o/ /gsang ba mchog gi mchod pa ni so so'i sa bon las byung ba'i gsang ba'i mchod pa lha mo'i gzugs la sgeg pa'i nyams kyis rgyan pas bde ba mchog gi rkyen du gyur pa rnams kyis te/ de yang dag par mchod nas zhes so/ /mgrin gcig tu zhes pa ni mgrin pa gcig nas 'byung ba bzhin du ste/ dgongs pa gcig dang/ dbyangs gcig pa ste/ rnam par grol ba'i mthu thob pa'i phyir ro/ /gang gsal zhe na/ e ma'o zhes pa la sogs pa'o/ /shin tu thob dka' zhes pa ni au duM par ltar sangs rgyas rnams shin tu 'byung dka' bas na thob par dka' zhes te/ sangs rgyas 'byung ba rnams kyis kyang skal ba med pa'i sems can gyi dbang du byas nas don 'di lta bu mi ston te/ ji skad du rtsa ba'i rgyud las/ mar me mdzad dang thub pa 'od srungs la sogs pa'i dus su ngas ma bshad de/ de'i dus na sems can rnams la skal ba med pa'i phyir ro zhes bya ba la sogs pa rgyas par gsungs so/ /de gang zhe na/ gsang ba 'dus pa zhes bya ba'i rgyud ces so/ /de yang bya ba'i rgyud la sogs pa rnams kyi phyi ma ni thabs gtso bor byed pa'i rgyud de/ de'i phyi mar gyur pa'i rgyud de 'dus pa'o/ /de nyid rtogs pa dka' zhes te/ shes rab kyis nga rgyal rnams nga rgyal bsal bar bya ba dang/ dngos grub ni bla ma rag las par bstan pa'i phyir ro/ /tshig dang yi ge dang/ don sbas pa gsum du bshad pa'i phyir ro/ /de nyid 'gro ba rnams kyis rtogs par bya ba'i don du zhes so/ /des byang chub sgrub pa'i thabs rim pa ji lta ba bzhin bsten pas lus rgyud cig car rnam par dag ste/ de'i phyir/ sems can rnams la phan pa'i phyir zhes so/ /yang dag gsungs pas zhes pa ni yang dag par gsungs pa ste ston pa'o/ /ji skad du/ nga ni rdzun sogs bag la nyal/ /bcas pa spangs phyir gsungs pa ni/ /ma nor gsungs pas de bas nga/ /yang dag gsungs pa zhes bshad do zhes so/ /nges gang bshad pa zhes so kye mgon po zhes bos nas khyed rnams la gsol ba 'debs so zhes spyir zhus pa'o/ /de'i lan gyis de bzhin gshegs pa rnams kyis gnang ba'o skabs phye ba gsungs pa/ de nas zhes bya la sogs pa'o/ /byang chub che zhes bya ba ni byang chub chen po dang ldan pa'i phyir ro/ /yon tan 'byung gnas zhes pa ni stobs la sogs pa che ba'i yon tan thams cad kyi gter du gyur pa'i phyir/ /legs zhes gnyis smos pa ni spro ba bskyed pa'i phyir ro/ /de ltar spyir zhus shing sbyir lan bstan nas nga ni khyad par du zhus shing de'i lan bstan pa'i phyir/ /de nas zhes bya ba la sogs pa tshig re re nas zhus pa ston te/ rab tu dga' bas mig gdangs nas shes pa ni rjes su gnang ba'i tshig gis yid spro pa'i rtags sngon legs par spyad pa'i 'bras bu pad+ma'i 'dab ma rangs la lta bu 'dzum pa dang ldan par zhes so/ /'di'i som nyi zhus bar gyur zhes ba ni yang dag pa'i don la yid gnyis za ba'i som nyi ma yin te/ 'di ni yang dag pa'i lta ba la 'jug pa'i som nyi ste/ de zhus pa'o/ 'di gsang ba zhes ji ltar lags/ ji ltar na ni 'du shes kyi zhes pa ni mtshan gyi don zhus pa'o/ /de la sogs pa zhus tshig lnga bcu rtsa bzhi ni lan gyi skabs su gsal bar bya'o/ /de nas de bzhin gshegs pa rnams rdo rje 'dzin pa chen po la dmigs pa bstan pa'i phyir/ /de nas zhes pa la sogs pa'o/ /de byang chub sems dpa' rnams kyis bskul ba'i sa la bzhes par rig nas yang dang yang du bskul ba gsungs pa/ /de nas zhes bya ba la sogs pa'o/ /de bzhin gshegs pa rnams kyi mnyam par zhog la nyon cig par gdam pa bstan pa/ de nas zhes bya ba la sogs pa'o/ /sku gsung thugs kyi rdo rje rnams zhes pa ni rang rang gi rdo rje gsum gyis so/ /sku gsung thugs kyi rdo rje la zhes pa ni rdo rje 'dzin pa'i sku la sogs pa'i rdo rje la bzhag nas zhes te/ rang gi yang dag par rig pa dbyer med par rtse gcig tu byas nas zhus pa/ rgya cher bshad pa zhes pa'i bsam pa dang/ tshig dang/ rtog pa dang/ gnas pa rgya che ba la dmigs pa'i phyir ro/ /de bzhin gshegs pa de dag gis gsung gi rim pa bzhin du de dag gi sems bsgrub par gsungs pa/ de nas zhes bya ba la sogs pa'o/ /byang chub sems dpa' zhes pa ni byang chub sems dpa' i cha lugs dang gdan la sogs pa 'dra bar byed cing byang chub kyi bdag nyid can te rdo rje 'dzin pa chen po'o/ /de'i rdo rje gsum la rang rang gi sku la sogs pa'i rdo rje rnams su dmigs nas so/ /zhes te/ ngo bo nyid med par rang gis yang dag par mngon sum du byas nas cad mi ? bar gyur to zhes so/ /da ni de bzhin gshegs pa rnams kyis zhus pa'i lan ched du brjod pa dang bcas pa bstan pa gsungs pa/ /de nas de bzhin zhes pa la sogs pa'o/ /rang rang gi thugs shes pa ni de nyid kyi yul can gyi ye shes nyid thugs te/ de las thugs rje chen por dmigs nas shes pa ni dag pa 'jig rten pa'i ye shes su dmigs pa ste/ des phyi rol yul du byed pa'i phyir ro/ /byin gyis brlabs te zhes pa ni nyan pa po'i byang chub sems dpa' rnams snod du rung bar byas pa ste/ de bas na dam tshig la sogs pa ni yang dag par byed pa'i rgyu yin pas ma 'ongs pa'i rnal 'byor pa rnams kyis yang dang yang du bsgrub par bstan pa'i phyir 'dis yang byin gyis brlabs te/ ji skad du/ snod rung byas nas 'chang ba ni/ /ston pa rnams kyi chos nyid do zhes so/ /'di yi gsang ba ji ltar lags zhes zhus pa'i lan bstan pa'i phyir/ /gsang ba zhes su bstan pa sku gsung thugs ni rnam pa gsum zhes te/ de rnams rgyud pa dang gnas pa'i chos thams cad la khyab cing thugs rje dang ldan pa'i bde bar gshegs pa rnams kyis bstan kyang theg pa 'og ma rnams kyi yul du ma gyur pa'i phyir gsang ba zhes bya'o/ /ji skad du/ nga yi de nyid dam pa ni/ /rgyud 'di la ni gsum du grags/ rdo rje dang gsung dang thugs/ /rgyu dang mi rgyu'i dngos po la/ /khyab nas thub dbang thams cad kyis/ /thugs rje kun tu bstan gyur kyang/ /byis pa rnams kyi ma rtogs phyir/ /rang bzhin gyis ni gsang zhes bya zhes so/ /ji ltar na ni 'du shes ba'i? zhes pa'i lan bstan pa'i phyir/ /sangs rgyas thams cad ces bya ba/ /tshogs bar 'dus par gsungs pa'o/ /zhes te/ rang bzhin gyi sangs rgyas dang laM gyis bsgrub pa'i sangs rgyas rnams don dam pa dang kun rdzob kyi tshul du tshogs pa'i phyir 'dus pa zhes bshad de/ bsdus pa'i don du blta bar bya'o/ /rgyud kyi 'brel pa ji ltar lags zhes pa'i lan bstan pa'i phyir/ lnga pa zhes pa la sogs pa'o/ /de la le'u lnga pa las sgrub pa po'i sngon dang phyis spyod pa'i khyad par bstan to/ /dgu pa las ni srog gcod pa la sogs pa'i srung ba'i dam tshig bzhi bstan to/ /bcu bdun pa las ni 'jig rten pa dang 'jig rten las 'das pa'i srung ba dang bza' ba'i dam tshig rgyas par bstan to/ /bcu gsum pa las ni gsang sngags bzlas brjod kyi sbyor ba ston to/ /le'u lnga pa'i sgrub pa po dang/ gzhan gyi tshig la sogs pa 'brel to/ /de rnams kyang sangs rgyas dang byang chub sems dpa' rnams sgrub pa chen por bstan pa yin zhes te/ mchog gi dngos grub kyi rgyu'o zhes gsungs so/ /bzhi pa la ni ri mo'i dkyil 'khor gsungs te/ slob dpon gyi las so/ /bcu drug pa las ni brtul zhugs dang ri mo'i dkyil 'khor gyi lhag ma ston te/ gnyi ga dang 'brel to/ /brgyad pa las ni de bzhin nyid dang rjes su 'brel pa'i mchod pa spro pa ste sdom pa'o/ /bcu gnyis pa la ni thun mong gi dngos grub mi snang ba la sogs pa ston te/ lnga pa'i don kho na dang 'brel to/ /brgyad pa zhes pa ni gong du brgyad pa smos pas 'di gzhung lhag pas drug par 'dod de/ drug pa de las rjes su chags pa'i sngags dang/ nye bar bsgrub pa rdo rje gsum byin gyis brlabs pa'i cho ga ston te/ ji skad du gnyis pa las sems de ye shes gzugs bsgyur ba/ bsgom pa nye bar sgrub pa'o/ /zhes pas so/ /gnyis pa las spyi dang rigs so so'i byang chub sems dpa' te sdom pa'o/ /bcu pa dang bcu bzhi pa las thugs bskul ba dang/ phur bus gdab pa'i drag shul gyi sbyor ba ston te/ bar mi'i gnyis ma kho na dang 'brel to/ /bdun pa las rjes su dran pa bcu drug ste sgrub pa'i sdom pa'o/ /gcig las lha rnams phyung ba spyi dang khyad par gyi 'phrin las mdzad pa ste/ de bzhin gshegs pa kun gyi las so/ /gsum pa las lha rnams kyi sku mdog dang/ mtshan ma dang/ chos kyi dbyings su byin gyis brlabs pa'i sngags te bsnyen pa'o/ /bcu gcig pa las ri bo la sogs pa'i gnas te dngos grub kyi zhing ngo/ /bco lnga pa las rmi lam gyi bye brag gnyis te mtshan ma'o/ /de ni sgrub pa po kho na dang 'brel to/ /de rnams ni mtshon pa tsam du zad de/ gzhan yang le'u de dang de las don 'di lta bu gsungs so zhes bstan pa/ dul dang zhes pa la sogs pa'o/ /dul ba ni byang chub sems dpa' rnams so/ /gdul dka' ni gcer bu pa la sogs pa'o/ /zhi ba ni 'phags pa rang rgyal dang nyan thos so/ /sems can rnams ni zhes pa ni tha mal pa rnams te/ de rnams gzhugs pa la thabs gnyis te/ gdul bar dka' ba tshar bcad pa dang/ gzhan dag la phan gdags pa'o/ /de yang phan gdags pa ni slob dpon dang 'brel to/ /tshar bcad pa dang/ phan gdags pa'i bya ba gnyis ka dang/ sgrub pa po 'brel to/ /de ni bsdus pa'i don las dpags te shes par bya'o/ /de ltar chos dang gang zag 'brel pa bstan nas/ da ni chos dang gzhung 'brel par gsungs pa/ bskyed pa'i zhes pa la sogs pa'o/ /de la bskyed pa'i rim pa ni bsnyen pa dang/ rdo rje cho ga bzhi ste/ dang po'i cho ga dang/ mtshan ma'i cho ga dang/ sku'i cho ga'o/ /gzhan ni 'di las 'og nas ston te der shes par bya'o/ /de lta bu dang gzhung 'brel zhes so/ /de bzhin du bzhung 'di dngos grub thun mong dang 'brel to/ /gzhan yang mchog tu gyur ba zhes pa ni mchog gi dngos grub dang 'brel ba'i gzhung ngo/ /de bzhin du dkyil 'khor de gzhung bzhi pa dang bcu drug par 'brel/ brtul zhugs dang bcu drag par 'brel zhes so/ /bcu bdun pa dang slob dpon gyi yon tan 'brel to/ /bla ma rnams kyi sngags lam gyis slob ma rnams yongs su smin par byed pa dang yang gzhung 'di 'brel to/ /de dngos gang yin zhe na/ shin tu dbang bskur ba'i brtul zhugs zhes pa shes rab ye shes kyi dbang bskur ste/ des de nyid rtogs par byed pa ni de thob pa ni slob ma bzang po bdag nyid che'o/ /de lta bu'i slob ma des sangs rgyas la sogs pa dang 'brel ba'i bstan pa 'dis de'i 'khor ba las yongs su grol ba yin no zhes so/ /de thams cad kyang de dang de las ci rigs par ston pas bsdus pa'i don la dpags te shes par bya'o/ /'di'i sbyor ba ji ltar lags shes pa'i lan bstan pa'i phyir/ thabs dang shes rab ces pa la sogs pa'o/ /gang zhig dngos med shes rab ste/ zhes pa ni chos thams cad kyi chos nyid spros pa dang bral ba ngo bo nyid med pa'o/ /rang gi mtshan nyid thabs yin no zhes pa ni rang rang gi mtshan nyid phyin ci log las grol ba'i kun rdzob kyi sems dkyil 'khor lta bu ste/ de gnyis zung du 'brel par 'jug pa ni rnal 'byor zhes bya'o/ /gong du rgyud gyi 'brel pa bshad nas/ de ni rgyud ces pa'i sgra don bshad pa'i phyir/ rgyud ni zhes pa la sogs pa'o/ /rgyud rnam pa gsum las bzhi bshad pa ni/ gzhi ni thabs zhes bya ba yin zhes te/ kun rdzob du sa'i cha bskyed pa la sogs pa thams cad kyi ngo bo ji snyed pa thams cad gzhi'o/ /rang bzhin med pa'i rnam pa ste/ shes rab kyi ngo bo 'byung gnas sam rgyu zhes bya'o/ /de bzhin 'bras bu mi 'phrogs pa zhes pa ni gnyis dbyer med par rtogs pa ni 'bras bu ste/ rgyu rkyen gzhan gyis 'phrogs par mi nus zhes so/ /de ltar rnam pa gsum rab tu 'brel cing bsdus pa'i phyir rgyud ces bya ste/ rgyud kyis ston pa'i phyir ro/ /de las gzhan yang rgyud kyi nang du grub par byed pa kun de kho nar 'dus pa bstan pa/ rigs ni rnam pa zhes pa la sogs pa'o/ don dam par ni sems kyi rang bzhin gcig ste rdo rje 'dzin to/ /de nyid spros pa gsum ste/ sku gsung thugs so/ /de las yang lnga ste/ rtag pa la sogs pa'i gzugs so/ /de re re la lnga lngar phye ba'i nyi shu rtsa lnga las sku la sogs pa'i rnam par phye ba'i brgya ste/ spyir na rigs ni mdza' yas pa'o zhes so/ /rigs de dag gam gzhan yang de dang 'dra ba ji snyed pa kun kyang gzhi dang/ rang bzhin dang/ 'bras bu rnam pa gsum la ji lta ba bzhin du bsdu bar bya'o/ /de ltar rtsa ba'i rgyud kyi don de rnams kyi rgyud kyi don gang yin zhe na/ byang chub rdo rje zhes bya ba la sogs pa'o/ /rtsa ba'i rgyud la ston pa byang chub kyi sems rdo rje yis gsungs pa'i tshig dang 'dra bar gsungs pas de rgyud phyi mar 'dod ces te/ don tha mi dad par gsungs pa'i phyir de yang rnam pa gsum du 'dod ces so/ /kho na nyid ji ltar lags shes pa la sogs pa zhus tshig bzhi'i lan bstan pa'i phyir/ de kho na nyid ces pa la sogs pa'o/ /de rnams ni go sla'o/ /byang chub kyi sems rdo rje zhes pa'i sgra bstan pa'i phyir ro/ byang chub kyi sems ni ji ltar lags? zhes pa'i lan bsten pa'i phyir/ skye 'gag med la zhes pa la sogs pa'o/ /dngos po dngos med mi zad ces pa ni mdza' gnyis dang bral ba'i mi gnas pa'i mya ngan las 'das pa zhes pa'i don to/ /gtso zhes pa ni rgyu lta bur kun tu khyab pa'o/ /stong pa nyid snying rje mi phyed pa zhes pa ni chos dbyings zhes so/ /le'u dang po las rig pa'i skyes bu zhes pa'i sgra'i don bstan pa'i phyir/ de bzhin rig pa'i skyes bu ci zhes pa'i lan gsungs pa/ rang gi zhes pa la sogs pa'o/ /mi phyed pa'i zhes pa ni yab yum gnyis rdo rje gsum gyis ngo bo nyid gcig pa zhes so/ /phyed dngos te zhes pa ni de gnyis rnam pa'i kun rdzob kyis bye ba ste/ de bas na rig pa dang ldan pa'i skyes bu la rig pa'i skyes bu zhes so/ /le'u dang po'i dbyung ba'i sngags kyi don dri? ba'i phyir/ badzra d+h+rika ni ji ltar lags zhes pa la sogs pa'i zhus tshig lnga'i lan gsungs pa ni/ rgyu zhes pa la sogs pa'o/ /rgyu lnga dang zhes pa ni gzugs la sogs pa lnga'o/ /'bras bu lnga zhes pa ni mi bskyod pa la sogs pa lnga'o/ /de nyid 'og dang gong gi tshul gyis 'bras bu rnam par dag pa'i tshul gyis gzugs ni badzra zhes su bstan no/ /de 'dzin pas na d+h+rika ce ste/ rnam par shes po'i phung po rnam par dag pa'i yid du 'dod do/ /yod med dbus las 'das pa las zhes pa ni yong pa dang med pa dang dbus rnam par rtog pa de gang zhe na/ 'byung ba dang 'byung ba las gyur pa'i gzugs me long lta bu'i ye shes su rnam par dag pa de sems can thams cad kyi kun bzhi'i rnam pa'i gzugs de la dzina dzika ces bya'o/ /skye ba zhes pa ni dzina ste/ kun rtags kyi bdag nyid do/ /de las rgyal bar byed pas dzik ces bya ste/ rtags pa'i rang bzhin du skye'o zhes so/ /tshig gi don thams cad mnyam pa nyid las 'byung bas na des dag pas na des dag pa'i sems ni rin po che yin pas na/ thams cad don kun 'byung bas na/ /sems ni rad nar bstan pa yin zhes so/ /de yang tshor ba rnam par dag pa yis nges par tshor bas de dag pa'i yid ni ratna d+h+rika ces bya'o/ /'dod pa'i mtshan nyid ces pa nag po dang ser la sogs pa mtshon pa'i phyir ro/ /de nges par rtogs pa'i ngo bo yod na mtshon pa zhes bya'o/ /thams cad nas thams cad du gang rol cing yul du byed pas de rnam par dag pa'i yid mtshan ma dang/ mtshon pa de yang A ro lig ces bya'o/ /rnam shes rab tu gsal byed pa zhes pa ni sa bon la sogs pa nas nang gi bzlas pa'i lan can gyi bar gyis goms pas rnam par shes pa la bya ba nan tan gyi ye shes su gsal ba'i ngo bo de shes rab ces bya'o/ /'du byed kyi phung po rnam par dag pa'i ngo bo 'dzin pas na d+h+rika ces bya'o/ /da ni le'u dang po las zhe sdang gi rigs mchog la sogs pa'i don zhu ba'i phyir/ /de bzhin rigs 'dir gang la bgyi zhes pa'i lan bstan pa'i phyir/ /rigs ni zhes pa la sogs pa'o/ /rgyud ni thog ma zhes brjod de zhes pa ni thog ma nas so sor yang rigs su rgyun ma chad ces pa'i don to/ /mi 'jigs zhes pa ni rigs lnga'i rang bzhin gnyis su med pa la 'jigs pa med do/ da ci'i phyir zhe na/ skye ba med pa gang yin zhes sku gsung thugs kyi chos thams cad brtags pa'i bdag nyid kyis ma skyes te/ de bzhin gshegs pa lnga'i rnam par skye ba'i phyir ro/ /de bzhin gshegs pa mdza' yas pa'i mgon po yin par brjod do/ /de ltar de bzhin gshegs pa'i rnam par dag pa sngags kyi sgo nas bstan nas/ da ni phung po'i sgo nas rnam par dag pa gsungs pa/ rgyu 'bras zhes pa la sogs pa'o/ /de la rgyu la rgyu nyid du zhen pa dang/ 'bras bu la 'bras bu nyid du mngon par zhen pa dang gnyis kyi rim pa ste chen po'i zhe sdang zhes bya'o/ /gnyis po de 'jig par byed pa ni rnam shes zhe sdang yin par bshad ces te/ rnam par shes pa'i phung po rnam par dag pa'i rang bzhin te/ rgyu 'bras med par chung ba'i ye shes zhes pa'i don to/ /gzugs kyi phung po ni sems med pas bems pos bcings pa'i rang bzhin te/ de rnam par dag pa la gti mug ces bya ste/ thams cad la rang rig cing 'byed pa med pa zhes bya'o/ /tshor ba ni dregs pa dang nga rgyal la sogs pa'i myong ba'i ngo bo bas na de rnam par dag pa'i ngo bo ni bdag tu rlom pa'i nga rgyal te/ thams cad bdag la mnyam mo snyam pa'i mtshan nyid du gnas pa'o/ /'du shes ni mtshan mar 'dzin pa'i bdag nyid pas na dngos po la chags pa'i mtshan nyid can zhes bya'o/ /de rnam par dag pa ni 'dod chags te/ thams cad mi gtong pa'i bdag nyid do/ /'du byed ni 'du byed pa'i bdag nyid pas rkyen gyis drangs pa'i bdag nyid can zhes te/ bdag kho na sems can gyis don bya yis gzhan gyis ni ma yin no zhes nan tan du byed pas na phrag dog ste/ bye ba nan tan gyi ye shes so/ /le'u gnyis pa'i byang chub kyi sems kyis kun la khyad par bstan pa'i phyir/ byang chub ces pa la sogs pa'o/ /byang chub sems kyi ngo bo nyid ni thams cad la mnyam pa'i rang bzhin yin pas srid pa 'byung ba thams cad du zhes te/ srid pa dang zhi ba mnyam pa'i rang bzhin zhes so/ /da ni le'u dang po las/ 'dod dang thar ba rab sgrub pa'o/ /zhes pa las 'dod pa'i don bstan pa'i phyir 'dod chags zhes pa la sogs pa'o/ /'dod chags la sogs pa dang ldan pa'i sems ni 'dod pa'o/ /dam tshig ni thams cad las mi 'da' ba' i rdo rje 'dzin to/ /de yang thams cad la mnyam pa nyid du gnas pas na sna tshogs 'dra ba'o/ /de yang rang rig pa la mngon par phyogs shing byams pa la sogs pa goms pa las skyes pa'i 'bras bu bas na de dang ldan pa'i sems ni 'dod pa'o/ /da ni mo ha zhes 'dir gang la bgyi zhes pa la sogs pa zhus tshig lnga'i lan gsungs pa/ gnyis med ces pa la sogs pa'o/ /de yang chos nyid kyi yul can gyi gnyis su med pa'i ye shes kyi nga rgyal gyi ngo bo nyid du rmongs pa de la mo ha zhes bya'o/ /de nyid phyogs nges pa med par phan tshun thug cing dbyer ba'i ngo bo bas na dwe Sha'o/ /de nyid de bzhin nyid kyi mtshan nyid la zhen cing mi gtong bas nar ga'o/ /de nyid mi tshad cing mi shis pa'i ngo bo'i ye shes de ni badzra zhes bya'o/ /bzhi po de dag gi ra ti rdzogs pa'i longs spyod mchog ces bya ste/ gnyis su med pa las rtsa ba'i ye shes kyi dga' ba mtshan ma med pa skye ba'i phyir ro/ /le'u dang po las btsun mo'i mchog phun sum tshogs pa'o zhes pa'i don bstan pa'i phyir/ phun sum tshogs pa ji ltar lags zhes pa'i lan bstan pa'i phyir bud med bde mchog phun sum tshogs zhes te/ yang dag pa'i bde mchog skyed pa'i rgyur gyur pa'i phyir na phun sum tshogs pa'o/ /gti mug dga' ma la sogs pa gsum la rdo rje dga' mas zin par bstan pa/ mo ha zhes pa la sogs pa'o/ /gnyis su med pa'i ye shes kyi bdag nyid ni rdo rje ste/ de nas gti mug la sogs pa gsum bsgyur bas na/ de ni sangs rgyas gyi thabs/ rdo rje theg pa zhes su bshad/ /ces pa ni 'di 'gro bar byed pa'i phyir ro/ /da ni ya mAn+ta krita don ni gang zhes pa la sogs pa zhus tshig bzhi'i lan bstan pa'i phyir/ mi 'jigs zhes pa sogs pa'o/ /lus la sogs pa'i chos rnams ni gcig dang du ma la sogs pa'i ngo bos ma skyes pa'i ngo bo nyid bas na mi 'jigs bdag nyid chos te/ de nyid dngos po thams cad mi 'da' bas na dam tshig ste/ de lta bu'i rnam byar dag pa'i yum la dad pa'i yul rnam par dag pa'i bdag nyid ya mAn+ta krita ces so/ /shes bya'i sgrib pa dang/ ma dad pa dang/ gzung ba'i rtogs pa ni ya ma'o/ /de nyid med pas na ta krita to/ /don dam pa'i 'gyur ba'i bdag nyid chos thams cad dag par byed pas na rnam shes min bdag ste/ byang chub kyi bdag nyid 'dzin pa'i rang bzhin ma yin zhes pa'i don to/ /de lta bu sems kun gyi dam tshig ste/ de'i tshul gyi pradz+nyAn+ta krita ces te/ yang dag pa'i spong ba bzhi byed pa'i phyir dad pa dang ldan pa'i brtson 'grus kyis skyon kho na med par byed pas na ta krita do/ /chos thams cad kyi rang bzhin la ming dang gzugs la sogs pa'i blo'i ngo bo med pas na brjod med bdag nyid chos rnams ni zhes bya'o/ /de lta bu de chos thams cad kyi dam tshig ste/ des na pad+ma n+ta krita ces so/ /ci'i phyir zhe na/ brjod du med pa'i yul la 'dun pa la sogs pa'i rnam pa la brtson 'grus dang ldan pa'i rnal 'byor pas sems ma 'khrugs pa'i dran pa thob ba ni pad+ma'o/ /de nyid skyon rnams med par byed pas na ta krita do/ /phung po la sogs pa'i tshogs rnams ni 'dzin pa la sogs pas rang bzhin gyis zhi ba nyid yin pas mi rtogs bdag nyid rnams ni zhi zhes bya'o/ /de nyid rdo rje ste de bzhin gshegs pa thams cad kyi dam tshig ste/ tshul des na big+h+nAM ta krita zhes so/ /mi rtog pa'i chos la dran ba dang ldan pa'i rnal 'byor pas sems rtse gcig pa'i ting nge 'dzin yang dag pa'i shes rab kyi rgyu gang yin pa de la big+ha nAn+ta krita ces ma dang ba la sogs pa'i bgegs med pa'i byed pa'i phyir ro/ /da ni don de rnams sangs rgyas kyi byang chub kyi ngo bo yin pas de shes na bde ba chen po thob par 'gyur ro zhes bzhi char gyi mjug bsdu ba'i phyir/ mi 'jigs zhes pa la sogs pa'o/ /da ni gshin rje gshed la sogs pa rnams nyon mongs pa'i rnam par dag pa'i sgo nas rang gi bya ba bstan pa'i phyir/ /gti mug ces pa la sogs pa'o/ /de la gti mug ni gong du bstan pa'o/ /des longs spyod par gyur ba ni rnam par snang mdzad de/ de goms ba las skyes te/ de dag mi phyed pa'i rang bzhin la longs spyod pa zhes bya'o/ /gti mug zad phyir zhes pa ni de'i mi mthun pa'i phyogs mi shes pa'i gti mug rab tu 'jug pa zad par byed pa'i sgo'i bdag por gyur ba'i phyir gshin rje gshed do/ /de nyid kyis na lus mthar byed ces te/ 'jigs tshogs la lta ba med pa'i phyir zhes so/ /gzung ba spangs pa nyid kyis na shes bya mthar byed 'gyur zhes so/ /gzhan rnams la yang tshig thabs de bsgre bar bya'o/ /sems ni mthar byed de zhes pa ni 'dzin pa'i rtog ba'i sems ni sems te/ de med par byed do zhes so/ /de med bas na nyon mongs mthar byed 'gyur zhes te/ nyon mongs pa rnams ni 'dzin pa'i bdag nyid sngon du 'gro bas na de skad ces bya'o/ /dag mthar byed ces pa ni tshig gi ngo bo 'gog par byed pa ste/ de yang gang zhe na/ snyoms 'jug ces te/ tshig dang tshig bya gnyi ga mnyam pa ni snyoms 'jug ste/ dag gi ngo bo 'gog pas de med par byed pa'o// 'dod chags la sogs pa'i nyon mongs pa dang/ mtshams med pa snga la sogs pa'i las kyi sgrib pa kun zad par byed pa'i ye shes des skyon gsum 'joms par byed ces bya'o/ /ci'i phyir zhe na/ nyon mongs zhes pa la sogs pa'o/ /de nyon mongs pa nyid mi shigs pas rdo rje ste de nyid sgrib p yin la/ de rnam par dag pa gnyis su med par shes na las rnams thams cad rnam par dag ces so/ /de dag pas na las las skyes pa'i 'bras bu yang rnam par dag par 'gyur ro zhes te/ mtho ris dang ngan song yang rnam par dag pa ste/ byang chub kyi rgyur 'gyur ro zhes ji skad du/ gang la sdig dang bsod nams med de la byang chub yin par gsungs/ zhes gsungs pa'i phyir ro/ /khro bo rnams kyi skabs bshad pa */ /yin pas na zhus pa med na yang rang bzhin du gtogs pa'i chos rnam par dag pa kho na gsungs pa/ gzungs dang zhes pa la sogs pa'o/ /de gzung ba dang 'dzin pa dang/ tshig dang tshig bya dang/ sgrib pa rnam par dag pa'i rang bzhin de'i rnam pa so sor shes pa de la bzung ba zhes bya ste/ 'dod pa'i rgyal po'o/ /chags pa ni de la dga' ba ste dbyug pa sngon po'o/ /rnam pa ni 'dra bar skyes pa ste stobs po che'o/ /mi g.yo ba ni de kho na nyid la brtan pa'i bdag nyid du gnas pa ste mi g.yo mgon po'o/ /rgyu nyid ni de nyid goms pa las nus pa dang ldan pa ste/ gtsug tor 'khor lo sgyur ba'o/ /'bras bu nyid ni de nyid la goms pa la gsal bar 'gyur ba ste gnod mdzes so/ /de bas na 'dod pa'i rgyal po la sogs drug / khro bo'i dbang po rnam par grags shes te/ rgyu'i sde med pa'i phyir ri mo dang/ 'byin pa dang/ lus kyi dkyil 'khor gyi lha ma yin zhes so/ /ma zhus kyang gleng gzhi la gtogs pa'i byang chub sems dpa' rnams kyi ming la sogs pa la som nyi dgag pa'i phyir/ /dam tshig rdo rje zhes pa la sog pa'o/ /dam tshig rdo rje la sogs pa drug ni gzugs dang ba rnams rnam par dag pa 'byung ba las gyur par grags so/ /mig la sogs pas thams cad mkhyen par bsgrub pa'i phyir rtsa ba'i rgyud las rig pa'i rgyal po zhes kyang bshad do/ /de bzhin dus rdo rje la sogs pa lnga ni 'byung ba rnam par dag pa'i rang bzhin du grags so zhes so/ /de rnams la rtsa ba'i rgyud las/ rdo rje bdag po zhes 'byung ste/ de rtogs pas mya ngan las 'das pa thob par byed pas de skad do/ /de bas na 'di rnams kyi rtog pas gleng gzhi la sdud pa pos rnam par bkod pa'o/ /gzugs la sogs pa'i lha mo rnams yi ge gsum gyis 'byung bar gsungs pa/ sku gsung zhes pa la sogs pa'o/ /de bas na rgyu'i sde med pa'i phyir dam tshig rdo rje la sogs pa yang ri mo dang/ 'byin pa dang/ lus kyi lha ma yin no/ /da ni le'u lnga pa las thams cad la spyod pa ni kun tu spyod pa'o zhes pa'i don bstan pa'i phyir/ mgon po kun tu spyod pa ci zhes pa'i lan gsungs pa/ thabs dang shes rab ces pa la sogs pa'o/ /de ji skad du bshad pa'i thabs dang shes rab las byung zhing dkyil 'khor ba'i rnam par phung po la sogs pa thams cad dag par mos pas gnyis su med pa'i sbyor ba sngags pas nges par byas la/ 'jigs pa thams cad bral zhing mi 'gyur bar dogs pa med pa'i sems kyi seng ge bzhin du rgyud zhir gnas so zhes so/ /de ltar gnas pa la spyod pa thams cad spyad par bstan pa/ 'di la mi bya ci yang med ces pa la sogs pa'o/ /de bas na mnyam par ma bzhag sbyor ba yis zhes te/ smyon pa la sogs pa'i tshul du sbyor yang sems rtag pa nyid mnyam par 'jog pas na sems la spyod pa ste/ de kun nas spyod pas na de skad do/ /le'u bdun pa las sngags kyi spyod pa'i don bstan pa'i phyir/ de bzhin sngags kyi spyod pa ci zhes pa'i lan gsungs pa/ rkyen las byung zhes pa la sogs pa'o/ /dbang dang yul la brten nas rnam par shes pa gang 'byung bar 'gyur ba de ni yid kyi sgrar bshad la/ de nyid rnam par dag pa las 'khor ba las skyob pas na man+t+ra ste sngags so/ /des 'jig rten gyi spyod pa las rnam par grol ba'i dam tshig dang sdom pa rdo rje thams cad kyi bskyangs pa'i ngo bo srung ba de sngags kyi spyod pa zhes bya'o// le'u gsum pa las bzlas brjod bstan pa gsal bar bya ba'i phyir/ rang rang zhes pa la sogs pa'o/ /de yang sku rdo rje la sogs pa rang rang gi ngo bo rnams yid kyi rnam par bsams te zhes so/ /des na gsang sngags zlos pa'i dbye ba yis zhes te/ rim pa 'am/ cig car gyi dbye bas sngags zlos par byed cing spro ba dang bsdu bar bya'o/ /zhes so/ /de ltar rdo rje gsum gyi bzlas pa bstan nas/ da ni ye shes sems dpa' i bzlas pa gsungs pa/ sangs rgyas shes pa la sogs pa'o/ /sangs rgyas sna tshogs zhes pa ni rigs lnga'i dkyil 'khor rnams dus gcig kho nar ye shes sems dpa' i sa bon dag las spro zhing bsdu zhes so/ /de nas ci zhe na/ byang chub bdag med de/ gzung 'dzin dang bral pas na de skad do/ /brtul zhugs kyi de bzhin nyid yin pas bdag med pa'i sa bon la gzung zhes te/ gnas brtan par bya'o zhes so/ /de nas yang ci zhes na/ sna tshogs bzhin du zhes te/ rang nyid dngos po thams cad kyi ngo bo nyid du mos nas zhes so/ /sna tshogs spro zhes pa ni rigs lnga la sogs pa spro ba ste/ de yang dus gsum ni rdo rje yi ge gsum gyi bar du bcug pa'i sa bon dag gis bzlas zhes so/ /de bas na bzlas pa ni smra ba yin la/ smra ba ni ngag gi bzlas pa zhes bya la/ de nyid 'bod pa yin la/ 'bod pa nyid de kho na la skul bar smra bas na rnal 'byor pa skyang sku mchog rdo rje rdzogs byang chub ces pa la sogs pa'i de kho na nyid kyis bskul bar bya'o/ /zhes so/ /dam tshig sems dang 'dra bar ye shes sems dpa' i bskyed do zhes bstan pa'i phyir/ ji ltar snying gar byin rlob pa'i ting nge 'dzin yang de bzhin no/ /spro ba'i sangs rgyas la sogs pa de rnams kyi bdag kho na bzhin du bsnyen bsgrub bzhi dang ldan par bstan pa de rnams shes pa la sogs pa'o/ /spro ba de rnams kyang spyi bo dbang bskur nas gong ma bzhin du mchod pa spros la mchod par bya'o/ /de yang rdo rje 'chang bzhin du rig pa dang lhan cig tu yod pa ste/ de'i longs spyod bzhir shes par bya'o/ /de gsungs pa/ bdag byin brlabs zhes te/ chos kyi dbyings su byin gyis brlabs zhes te smos pa'o/ /sogs kyis sgras ni lhag ma gnyis bsdu'o/ /de bas na thams cad kyi spros pa yang dkyil 'khor gyi bdag po bzhin du shes par bya'o/ /da ni le'u bco lnga pa'i rgyas 'debs pa'i don bstan pa'i phyir ro/ /rgyas 'debs ji ltar 'tshal bar bgyi zhes pa'i lan gsungs pa'o/ /dpa' bo zhes pa la sogs pa'o/ /dpa' o zhes pa ni byang chub sems dpa' dang/ khro bo rnams so zhes so/ /rdo rje rnams zhes pa ni de bzhin gshegs pa rnams so/ /de rnams kyi spyi bor dbang bskur re re ste zhes pa ni rang rang gi rigs kyi bdag po rig ma dang ldan pa re re ste/ rigs lnga ni ma yin no zhes so/ /de 'ba' zhig gis rgyas gdab ce na/ snying po zhes pa la sogs pa'o/ /de la snying po dang phyag rgya dang sngags ni phyag rgya bzhi ste/ de ltar thams cad kyi rigs kyi rim pas rgyas gdab ces so/ /rgyu rdo rje 'chang ba la 'bras bu mi bskyod pa rgyas gdab ces te zlog go / le'u gsum pa la sogs pa'o/ /nam mkha' dbyings kyi dbus gnas par zhes pa la sogs pa'i don brtan phyir/ /chos 'byung ba ni ji ltar bsgom zhes pa'i lan gsungs pa/ longs spyod bzhi zhes pa la sogs pa'o/ /de yang gtso bo nges pa gnas gyur pa las bsnyen pa la sogs pa'i longs spyod bzhi dang ldan pa'i rig ma'i skyes bu rdo rje can du gyur nas/ de gnas gyur pas sku la sogs pa'i ngo bo nyid gru gsum du rnam par bsgom zhes so/ /gzhi gang la bsgom zhe na/ kun nas ser po'i 'khor lo ni rtsibs bcu ste bcu rtag par bsgom zhes te/ sa bcu rnam par dag pa'i 'khor lo ser po rtsibs bcu pa rnam par bsgoms la/ de'i dbus su sgo nga la brtan pa zhes so/ /rtsibs rnams la khro bo bcu bsgom ste/ de yang rang ba la sogs pa'i shes pa rnam par dag pas bdag nyid ye shes bcu las 'gyur zhes so/ /'gog pa'i rdo rje zhes pa ni rtse gcig pa mang po 'phros pas zhes so/ /de bas na sems mchog tu mdzes pas bsgrub par bya'o 'khor lo de yang sa gzhi rdo rjer skad cig gis g.yon du 'khor byed pas mi 'gul ba 'dra bas na mi g.yo ba dang mtshungs par 'khor zhes so/ /chos 'byung ba'i rang bzhin dang yon tan gsungs pa/ de ltar zhes pa la sogs pa'o/ /le'u bcu bdun pa la sogs pa'i sdom pa bstan pa'i phyir/ de bzhin sdom pa ji lta bu zhes pa'i lan gsungs pa/ rdo rje can zhes pa la sogs pa'o/ /sgrub pa zhes pa ni rim pa gnyis kyi sgrub ni rgyu'o/ /nan tan ni rjes su blangs pa'o/ /dam tshig ni bsrung ba dang/ bza' ba dang/ spang ba'o/ /de thams cad rtsa ba'i rgyud du gsungs so/ /sdom pa yang der gsungs so/ /de nyid yin yang rim pa'i dbye bas phye ba yin zhes te/ khyad par du gsungs so zhes te/ de nyid gsungs pa/ gzugs dang zhes pa la sogs pa'o/ /de yang gzugs la sogs pa re re la yang bde ba la sogs pa la 'dod chags dang/ zhe sdang dang gti mug sogs rtag tu snying la skye bar 'gyur zhes so/ /de nyid sdom pas chags la 'dod chags rdo rje can zhes te/ 'dod chags byung ma thag tu tshe dpag med du bsam mo/ /rdo rje 'dra ba rin chen 'byung zhes pa ni zhe sdang byung ma thag rin chen 'byung ldan te/ mnyam pa nyid kyi phyir ro/ /de bzhin du gti mug la dam tshig ces rnam par snang mdzad kyi ngo bo las mi 'da' ba' i phyir ro/ /'dod pa de rnams dam tshig mtshungs zhes pa ni de thams cad kyang rdo rje 'chang chen por blta ste/ de ltar gnyis su med pas gzugs la sogs pa bsten pa ni sdom pa zhes bya'o/ /da ni le'u dgu pa'i lus kyi las rnam par dag pa'i don bstan pa'i phyir/ zhe sdang gti mug ces pa la sogs pa'i lan gsungs pa/ brkam pa dang zhes pa la sogs pa'o/ /rnam bcas dang ni zhes pa ni thabs dang shes rab tu snang ba'o/ /rnam pa med ces pa ni don dam par gnyis su med par bsams nas/ kun 'gro yi ge gsum bdag ces pa ni kun gyi rang bzhin yi ge gsum gyi rgyas btabs nas/ bya ba dang zhes pa gnod byed gsod pa dang/ dbrog pa zhes pa ser sna can gyi nor dbrog pa la sogs pa yang spro ba dang rang gi bzlas pas bya'o zhes so/ /de ltar zhe sdang la sogs pa las dang rjes su mthun pa'i gzugs gsum du skyed par bya ste/ sku gsung thugs kyi gsang ba dag bas rgyas gdab par bya zhing dbyer med pa can gyis ji ltar 'dod pa'i don byed zhes so/ de ltar spyir bstan nas/ da ni zhes sdang la sogs pa'i las so sor bstan pa/ zhe sdang sbyor zhes pa la sogs pa'o/ /de yang bla ma la brnyas pa la sogs pa'i bsgrub bya dmyal bar 'gro ba mthong nas de las 'byin par 'dod pa'i snying rje chen po dang ldan pas srung ma dang dbral ba la sogs pa'i las byas nas zhe sdang gtso bor gyur pa'i 'khor lo bskyed pa thams cad nag por bsams te/ rdo rje dag po'i gzugs spros pas bsgrub bya bcom te ye shes rdo rje can gyis bsdu ba la sogs pa bya'o/ /'dis rang rgyud dag par bstan pa/ 'di lta'i sbyor ba zhes pa la sogs pa'o/ /khams gsum zhes pa la sogs pas ni phan yon ston to/ /gti mug gi rnal 'byor pas nor dbrog pa gsungs pa/ gti mug ces pa la sogs pa'o/ /de yang mi mkho ba'i yo byad kyang sems kyis 'dzin pa yi dags kyi gnas su 'gro bar mthong nas de dgag pa'i phyir rnal 'byor pas gti mug gtso bor gyur pa'i dkyil 'khor thams cad bskyed nas spro bar byas pas gdu bu la sogs pa'i rgyan ji snyed pa thams cad rku bar gti mug sems kyi rgya mtsho bsgom mo/ /de nas brkus pa'i rin po ches sems can thams cad la sbyin pa'i char 'phebs par bsams pas de las thar bar 'gyur ro/ /gsang sngags ni bla ma dang sems kyi 'gyur bas byed pas na som nyi mi bya'o/ /des rnal 'byor ba'i phan yon bstan pa/ rdzas rnams thams cad ces pa la sogs pa'o/ /'dod chags kyi rnal 'byor pas gzhan gyi chung ma spyad pa'i las gsungs pa/ 'dod chags sbyor ba'i zhes pa la sogs pa ste/ de yang bsam pa'i khyad par las byung ba'i khyad par dang/ de la spros nas rjes su chags pas ngan par 'gro ba'i las te/ de dgag pa'i phyir 'dod chags gtso bor gyur pa'i 'khor lo bskyed nas spro ba byas pas lha mo la sogs pa dgug cing 'dod pa spyad par bya'o/ /de nas lha mo bzhis dga' ba la sogs pa myong bar bya'o/ /de bzhin du thams cad la yang dbul bar bya zhing 'dod pas rtsen par bsams na gong ma ltar de thams cad kyang des dag par 'gyur ro/ /rang nyid kyang dag par 'gyur ba'i phan yon bstan pa/ khams gsum zhes pa la sogs pa'o/ /las 'di dag la nus pa gzhan yang ji lta bu yod ce na/ dkyil 'khor pa zhes pa la sogs pa'o/ dam tshig bsrungs pa la bstan pa'i dkyil 'khor la sogs pa 'dod pa tsam gyis byed pa/ de nyams su len pa la byin gyis rlob par byed pas na sgrub pa po rnams kyi grub pa ni gzhan yin no zhes te/ bsam gyis mi khyab po zhes pa'i don to/ /'di las dkyil 'khor gsal bar bya ba'i phyir/ dkyil 'khor zhes ni gang la bgyi zhes pa'i lan gsungs pa/ b+ha ga zhes pa la sogs pa'o/ /de la b+ha ga'i dkyil 'khor zhes grags dang zhes pa ni chos 'byung ba'i nang du chud pa'i rten can gyi dkyil 'khor la bya'o/ /byang chub sems kyi dkyil 'khor dang zhes pa ni sa bon gyis dgug pa la sogs pa'i rim pas cho ga gsum gyis sgrub pa'i dkyil 'khor ro/ /dkyil 'khor lus su bshad pa zhes pa ni nye bar sgrub pa la sogs pa ste/ de ltar dkyil 'khor gsum mo/ /le'u bzhi pa las/ las kyi cho ga mthong ba yis/ de nas phyag rgya dgod par bya zhes pa'i don bstan pa'i phyir/ phyag rgya dgod pa ji ltar lags zhes lan gsungs pas lus kyi dkyil 'khor gyi don yang gsal bar bya ba'i phyir/ phung po skye mched ces pa la sogs pa'o/ /de phung po la sogs pa la lha thams cad kyis rgyas btab pa ste/ de yang rtag par phyag rgya dgod pa zhes te/ brtags pa'i dus nyid ni yang zhes so/ /de ni lus kyi dkyil 'khor zhes bstan pa yin no/ /khro bo rnams kyi phyag rgya dgod pa gsungs pa/ lcags kyu zhes pa la sogs pa'o/ /bsrung ba'i 'khor lo'i me mtshams la sogs pa dang/ steng 'og gi rtsibs la 'dod pa'i rgyal po la sogs pa rnams kyi g.yas par mar lcags kyu la sogs pa dgod par bya'o zhes so/ /phyogs kyi khro bo'i mtshan ma ni thugs kyi dkyil 'khor gyi rim par shes par bya'o/ /rig rgyal rdo rje can rnams zhes pa ni sa'i snying po la sogs pa drug ste/ de'i phyag rgya dang mdog la sogs pa ni rdo rje 'chang la sogs pa dang 'dra bar bstan pa'i phyir/ 'khor lo sgyur ba drug gi rgya zhes so/ /sa la sogs pa'i sems dpa' ni spyan ma la sogs pa'o/ /rdo rje'i bdag po rdo rje can zhes pa ni de rnams kyi don mtshan ma'i lhag ma rnams 'khor lo sgyur ba drug dang 'dra'o zhes so/ / sangs rgyas zhes pa ni de bzhin gshegs pa drug go / byang chub sems dpa' ni spyan la sogs pa'o/ /khro rgyal zhes pa ni khro bo bcu ste/ de rnams rgyas btab pa'i phyag rgya ni bshad zin to/ /zhes so/ /de las gzhan yang dpa' bo gcig ces pa ni rdo rje dpa' bo dang/ dzaM b+ha la dang/ tsun dam la sogs pa ste/ mi skyong pas zhes so/ /rigs ni kha dog gis brtags ces ni gnod sbyin mo dang/ phyag brnyan dang/ tshangs pa dang sogs pa ni rigs bzhin du shes par bya'o/ /zhes so da ni le'u brgyad pa las/ mkhas pas autpa la dag dang zhes pa'i me tog gi don ni/ me tog ces ni gang la bgyi zhes pa'i lan gsungs pa/ bud med ces pa la sogs pa'o/ /lha mo rnam pa bcu po la 'dir me tog gi sgrar brjod de/ de yang autpa la dang/ pad+ma ni gzugs kyi rdo rje ma la sogs pa'i yongs su rdzogs pa'o/ /dzA ti gsum ni dman pa dang/ 'bring dang/ mchog gi skye gnas kyis phye ba'i chos kyi dbyings kyi rdo rje'o/ /karni ka la sogs pa bzhi ni spyan ma la sogs pa bzhi'o/ /lha mo rnam pa drug yi ge rnam pa gsum gyi dbyung bar yang bstan pa/ sku gsung zhes pa la sogs pa'o/ /rigs kyis rim gyis shes pa ni rigs kyi bdag pos rgyas btab pa'i ngo bo rnams shes pa'i don to/ /le'u brgyad pa las/ mchod rten rin chen sna bzhi pa zhes pa'i don bstan pa'i phyir mchod rten zhes ni gang la bgyi zhes pa'i lan gsungs pa/ mchod rten zhes pa la sogs pa'o rnam par snang mdzad las gyur pa'i gzhal yas khang brtsegs pa mchod rten zhes pa'i don no/ /le'u bcu bdun pa las ye shes 'khor lo'i bsam gtan gyis zhes pa'i don bstan pa'i phyir/ ye shes 'khor lo ji lta bu zhes pa'i lan gsungs pa/ ye shes sems dpa' zhes pa la sogs pa'o/ /ye shes sems dpa' gang reg pa ni ye shes sems dpa' i sa bon gyi 'od kyi dngos suAm brgyud pas yang dag par bskul la/ /sangs rgyas kyi dkyil 'khor spyan drangs pa gang yin pa de la ye shes 'khor lo zhes su bshad ces so/ /le'u drug pa las/ sngags kyi thabs su rnam par bsgom zhes pa'i don bstan pa'i phyir/ sngags kyi thabs ni ji ltar lags zhes pa'i lan gsungs pa/ mi 'gyur zhes pa la sogs pa'o/ /hUM la sogs pa'i sa bon gyi yi ge yid la rnam par gsal bas rdo rje gsum 'grub par bya'o pas na thabs zhes bya'o/ /le'u drug pa las/ dam tshig bskul ba la sogs pa bzhi'i don bstan pa'i phyir/ mgon po ji ltar bskul bar bgyi zhes pa la sogs pa dris tshig bzhi'i lan gsungs pa/ sku gsung thugs zhes pa la sogs pa'o/ /de la sku la sogs pa de kho na nyid la ji ltar mos pa bzhin du byin gyis brlabs pa'i phyir gsol ba gdab pas sad par bya ba ni bskul bar bshad ces so/ /phyogs bcu 'jig rten gyi khams kyi thugs rdo rje la sogs pa bod pa'i don du lta mo la sogs pa'i 'od zer spro ba ni gtong ba zhes bya'o/ /rdo rje thams cad de de bzhin gshegs pa gang spros pas bkug pa mngon du byed pa de ni spyan drangs pa zhes bya'o/ /bskul ba ni skabs 'dir shes par bya'o/ /de nas rdo rje can gyi gnas sa bon rnams la 'od zer gyis bkug pa'i rdo rje gsum rnams bsdus nas gong bu'i tshul gyis bcug nas byin gyis brlab pa ni bcing ba zhes bya'o/ /le'u bcu drug pa'i dbang bskur ba'i don bstan pa'i phyir/ dbang bskur ba ni ji ltar lags zhes pa'i lan gsungs pa/ sku gsung zhes pa la sogs pa'o/ /sku gsung thugs kyi rdo rje ste mi bskyod pa la sogs pas so/ /des sku gsung thugs kyi dkyil 'khor du zhes so/ /sku gsung thugs kyi phyag rgyas rgyas btab ste/ zhes pa ni mtshan ma 'am phyag rgya chen pos rgyas btab ste/ zhes so/ /ri mo'i dkyil 'khor gnyis kyis ste/ de bas na gsum pas bsam gtan gyi dkyil 'khor brtags la dbang bskur bar bya'o zhes ste/ slob dpon gyi las ni thams cad las ma bkag pa'o/ /de lta bu'i dkyil 'khor du dbang ji ltar bskur zhe na/ dbang bskur zhes pa la sogs pa'o/ /bum pa'i dbang gi cho ga rtsa ba'i rgyud du bshad nas/ gsang ba'i dbang bskur ba'i cho ga gsungs pa mig yangs shes pa la sogs pa'o/ /de yang ji skad du gsung pa'i mig yangs tshogs kyi mchod pa dang bcas te bla ma la phul nas des ji skad du gsungs pa'i gsang ba'i dbang bskur ba slob ma la sbyin par bya'o/ /cho ga de yang gang zhe na/ nam mkha' i dbyings zhes pa la sogs pa'o/ /cho ga ni ma phye ba'o/ /bsngags pa'i ltar yang de 'di zhes pa la sogs pas bstan to/ /shes rab ye shes kyi dbang bskur ba gsungs pa/ mchog tu dad cing zhes pa la sogs pa'o/ /de yang ji skad du gsungs pa'i phyag rgya btsal nas yon rnams rab tu phul nas su zhes pa ni rjes su mthun pa'i yon dang bcas par phul nas so/ /de nas bla mas de la shes rab ye shes kyi dbang bskur bar gsungs pa/ bla mas de ni zhes pa la sogs pa'o/ /rmongs pa gti mug ces pa la sogs pa ni ye shes la rtogs pa'i slob ma'i rgyud dag par bya ba'i phyir bla ma'i ting nge 'dzin gsungs so/ /rigs pa'i lha mo de nyid ni zhes pa la sogs pas ni rig pa'i brtul zhugs kyi dbang ston to/ /da ni le'u bcu drug pa las gsungs pa'i rig ma'i brtul zhugs kyi don bstan pa'i phyir/ de bzhin rig pa'i brtul zhugs gang zhes pa'i lan gsungs pa/ chos kun zhes pa la sogs pa'o/ /dngos po gnyis su brtags pa yin zhes yang dag pa'i kun rdzob tu thabs dang shes rab gnyis su snang ba ste/ de bas 'khor ba rnams bral bar zhes pa ni 'khor ba'i rgyun zlog par byed pa'i lam dam pa ni shes rab kyi pha rol tu phyin pa'i phyag rgya yin pas na de dang bral par ma byed cig ces pa'i don to/ /brtul zhugs len pa'i phyir na brtul zhugs te rig pa'i brtul zhugs so/ /le'u drug pa las gsungs pa'i bdud rtsi'i don bstan pa'i phyir/ bdud rtsi lnga rnams ji ltar bza' zhes pa'i lan gsungs pa/ tha mal lus kyi zhes pa'o/ /sogs pa'o/ /tha mal pa'i lus la dri ma ltar snang ba ni ye shes lnga'i tshogs byin gyis brlabs pas na bdud rtsi lnga zhes bya ba yin no/ /cho ga de gang zhes na/ sbar dang shes pa la sogs pa'o/ /de la sbar dang zhes pa ni rlung gi dkyil 'khor ro/ /bsreg pa zhes pa ni me'i dkyil 'khor ro/ /de'i don ni 'di lta ste/ yaM las byung ba'i rlung gi steng du raM las byung ba'i me'i dkyil 'khor bsams la/ de'i steng du a las byung ba'i pad+ma band+ha bsgom par bya'o/ /de'i nang du bdud rtsi ni de'i dbus su gzhug par bya'o/ de'i steng du snang bar bya dang gzugs snang ba zhes pas nyi ma dang zla ba'i gzugs bskyed la/ de'i steng du sngags kyi lus su zhes te/ buM aM dzaM khaM hUM bsam mo/ /de nas phyogs bcu'i 'jig rten khams rnams kyi/ mtshon cha mchog gi drangs nas ni/ bdud rtsi de la phab nas kyang zhes pas sa bon gyi bkug pa'i de bzhin gshegs pa sa bon des gzhug par bya'o/ /de nas me sbar ba la sogs pas rlangs pa las byung ba'i hUM las rdo rje dkar po bar snang ba bsam par byas nas phreng ba lta bu'i rgyun tu zhu zhing dbab par bya'o zhes bya'o/ /de nas aoM gyis bsil dbab par bya'o/ /de tsam na shel dang mtshungs par snang zhing nyi ma ltar dag par bsams nas/ bza' ba'i cho ga zhes pa ni lce dag par bya ba dang/ pad+ma spro ba la sogs pas bza' bar bya'o/ /da ni le'u bcu gnyis pa las/ sha chen dam tshig mchog gis ni zhes pa la sogs pa'i don bstan pa'i phyir/ de bzhin dpa' ibo lnga gang lags zhes pa'i lan gsungs par/ bsgrub bya'i zhes pa la sogs pa'o/ /de la bsgrub bya'i dngos grub ces pa ni mi snang ba la sogs pa ste/ de rdzogs par bya ba'i don ched du zhes so/ /cho ga yis de bzhin dpa' bo lnga rnams zhes pa ni gong ma'i cho ga kho nas sha rnam pa lnga zos na 'grub par 'gyur ro/ /yi ge gsum bzla ba na gong du yang shes par bya'o/ /da ni dngos grub thun mong ji ltar lags zhes pa la sogs pa zhus tshig gnyis kyi lan gsungs pa/ mi snang la sogs zhes pa'o/ de la mi snang ba dang/ rig 'dzin dang/ mngon par shes pa lnga dang/ rgya mtsho rkang bas dgag pa dang/ mngag gzhug dang/ mig sman dang/ sngags kyi khyad par gyi grub pa dang/ las kyi rab tu dbye ba rnams ni thun mong gi dngos grub ste/ sa'i dbang phyug dang/ 'phags pa dang/ lha chen po dang/ bya ba'i rgyud la sogs pa dang/ thun mong du gyur pa'i phyir ro/ /lam gang gi sangs rgyas nyid du bsgrub pa ni sangs rgyas gyis dngos grub mchog ces gsungs te/ bla na med pa'i phyir ro/ /dngos grub de yang thabs kyi grub pas na/ de la thabs ni rnam pa du zhes pa'i lan bstan pa'i phyir/ thabs ni rnam pa bzhi po dag ces pa la sogs pa'o/ /thabs bzhi dngos gang zhe na/ bsnyen pa'i chog zhes pa la sogs pa ste/ mya ngan las 'das pa'i yan lag dang/ thams cad mkhyen pa'i yan lag dang/ sku gsung thob pa'i yan lag dang/ khams gsum chos kyi rgyal por dbang thob pa'i yan lag bzhi'o/ /bsnyen pa la sogs pa'i dbye ba yang bstan par bya ba'i phyir/ thun mong zhes pa la sogs pa'o/ /thun mong bsnyen pa gnyis dang/ mchog gi bsnyen pa gnyis dang rnam pa bzhi'o/ /nye bar sgrub la sogs pa yang rnam pa bzhi'o/ /zhes tshig lhag ma'o/ /de la dang po thun mong gi bsnyen pa gcig ni rnam bzhi'o/ /mchog gi bsnyen pa gcig kyang ye shes bdud rtsi ste/ bar gyi srid pa'i sems las 'od du zhu zhing bskul ba las bdag po'i lha 'byung ba ste/ 'di gtso bo 'ba' zhig la gtogs pa'i yan lag tu 'gyur bas na mchog gi bsnyen pa zhes bya'o/ de bas na yan lag gzhan yang de skad ces bya'o/ /rdo rje rnam pa bzhi po de nyid gsungs pa/ dang po stong pa nyid ces pa la sogs pa'o/ /de yang sa bon gyi 'od kyis bskul ba'i bde bar gshegs pa rnams zhal du zhugs pa zhu bar gyur pa pad+ma'i nang du gnas pa ni dang po stong nyid byang chub bo/ sa bon la sogs pas stong pa'i phyir ro/ /de las gtso bo 'ba' zhig gi sa bon bcu dgur gyur pa ni gnyis pa sa bon bsdus pa yin zhes so/ /de las rang nyid dam bdag pos gtso bo byas pa'i dkyil 'khor bskyed pa ni gsum pa gzugs ni rdzogs pa ste zhes bya'o/ /de nyid badzra d+h+rika la sogs pa'i sngags kyis rang rang gdan la bkod pa ni zhi ba yi ge dgod pa'o zhes so/ /de bas na rdo rje rnam bzhi 'di dag gis/ thun mong bsnyen pa bsgrub par bya zhes te/ lha thams cad la gtogs pa'i phyir thun mong gi bsnyen pa zhes bya la/ yan lag gzhan rnams kyang thams cad gtogs pa'i phyir thun mong gi nye bar bsgrub pa la sogs pa yang shes par bya'o/ /mchog gi ye shes bdud rtsi zhes ste/ de ni ye shes bdud rtsi gong ma lta bus mchog gi bsnyen pa la sogs pa byas la thun mong gi bsnyen pa 'di bya'o/ /zhes so/ /mchog gi bsnyen pa gnyis pa phyis 'chad par 'gyur ro/ /thun mong gi bsnyen pa gnyis pa bstan pa'i phyir/ sbyor ba drug ces pa la sogs pa'o/ /yan lag drug gang zhe na/ so sor spyod pa la sogs pa'o/ /de la dang por so sor spyod pa bstan pa/ dbang po bcu zhes pa la sogs pa'o/ /mig la sogs pa lnga dang/ gzugs la sogs pa lnga ni tshogs dang bcas pa la dbang byed pas na dbang po rnams te/ rang rang gi ngo bo nyid tsam la gnas pa las 'dod pa lnga'i ngo bor so sor sbyor ba zhes bya'o/ /gnyis pa bsam gtan gyi yan lag bstan pa/ 'dod pa lnga ni zhes bya ba la sogs pa'o/ /'dod pa lnga la sangs rgyas lnga'i rang bzhin yan lag lnga brtag pa ni bsam gtan zhes bya'o/ /yan lag lnga gang zhe na/ bsam gtan de rnams zhes pa la sogs pa ste/ gzhan yang thun par bstan pa'i phyir ro/ /rtog pa la sogs pa'i rang gi ngo bo yang so sor bstan pa/ gsang ba zhes pa la sogs pa'o/ /de la thabs dang shes rab de'i bde ba ni gsang ba gsum ste/ rtog pa'o/ /shes rab de nyid la bud med gnyis kyi ngo bor longs spyod pas spyod pa'o/ /de 'dra ba'i gzugs la rangs? pa'i mtshan nyid ni dga' ba'o/ de'i 'og tu bde ba bsdus pa'i khyad par ni bde ba zhes bya'o/ /de na rang gi sems ye shes dang shes bya'i cha rnam par zad pa'i ngo bo rtog pa thams cad dang bral ba lhan cig skyes pa'i dga' ba ni rtse gcig pa zhes bya'o/ /go rim bzhin du mi bskyod pa la sogs pa'i ngo bo'o/ /gsum pa dbugs dgag gtong gi yan lag bstan pa ni/ /sangs rgyas zhes pa la sogs pa'o/ /phra mo'i rnal 'byor la gnas pas sems bying bar song na sangs rgyas kun gyi dngos po zhi ba gzugs la sogs pa 'dod pa kun la rab tu gnas pa ye shes rnam pa lnga'i rang bzhin gyi dbugs dbyung ba lnga'i ngo bo nyid du gnas pa/ gong bu'i gzugs zhes te/ rang gi lha'i mtshan ma phra ma la dkyil 'khor gnas pa rang gi rdo rje'i dbus lcags kyu lta bus ze 'bru'i bum pa las phyung nas rig ma'i pad+ma'i sna rtser rab brtags la ting nge 'dzin gsum pa la spro bsdu bya'o zhes pa'i tshig lhag ma'o/ /de mtshon pa tsam du phyag mtshan cig gsungs pa/ rin chen kha dog sna lnga pa zhes te/ yungs kar gyi 'bru tshod tsam mo/ /des na 'khor lo dang pad+ma ni tsa na ka'i 'bru tsam mo/ /rdo rje dang ral gri ni nas tsam mo zhes shes par bya'o/ /de ni dbugs dgag gtong ba zhes su bshad ces te/ dgag pa dang gtong ba gsum gyis rnam par bsgrub pa zhes bya'o/ /bzhi pa gzung pa'i yan lag bstan pa / rang sngags zhes pa la sogs pa'o/ /phra mo'i rnal 'byor la gnas pas rang gi sa bon thig le'u gzugs su gnas pa ye shes sems dpa' i thugs kar bsams la rang gi dbugs thig le la bzhag par bya'o/ /rang dbang zhes pa ni rang gi dbu/ thig le la bzhag par bya'o/ /rang dbang zhes pa ni rang gi srog gi dbang po dbugs de nyid do/ /mchog tu gyur pas na rin po che ste/ bkag nas dmigs pa la bzung ba zhes bya'o/ /de gzung ba ni sems 'gog pa'i rdo rjer gyur nas bstan par gyur pa'i mtshan mnye bar 'dzin par 'gyur ro/ /mtshan ma de yang smig rgyu 'dra ba la sogs pa lngar 'gyur ro/ /de yang sa rnam par log pas de'i 'od zer smig rgyu 'dra ba 'byung ba ni dang po ste/ chu rnam par log pa las du ba lta bu 'byung ba ni gnyis pa'o/ /me rnam par log pas mkha' zhes pa ni srin bu me khyer lta bu ni gsum pa'o/ /rlung rnam par log pas mar me ltar 'bar ba ni bzhi pa'o/ /rnam par shes pa rnam par gyur pas de'i 'od zer zab gsal gyi ye shes la reg la/ nye ba'i rtags mtshan ma la sogs pa'i gzugs/ sprin med nam mkha' lta bur ni/ rtag tu snang ba lnga pa'o zhes so/ /de rnams rnal 'byor pa bzhir 'gyur pa'i mtshan ma'o/ /lnga pa rjes su dran pa'i yan lag gsungs pa/ brtan 'gyur zhes pa la sogs pa'o/ /phra mo la gnas pas brtan par gyur pa'i mtshan ma lnga mthong nas rdo rje'i lam nas nam mkha' i khams kun tu ji skad gsungs pa'i cho gas bcu gcig spro bar bya zhes pas so/ /des spro ba ni rjes su dran pa gang bsgoms pa de dang 'dra bar spro bar bya ba ni rjes su dran pa zhes bya'o/ /so sor snang ba de las zhes skye zhes pa ni spro ba dang bsdu ba las sngon mthong ba'i don so sor snang ba de las skye'o zhes so/ /de nas ni drug pa ting nge 'dzin gyi yan lag bstan pa'i phyir/ /thabs dang shes rab ces pa la sogs pa'o/ / d e la thabs dang shes rab kyi bdag nyid snyoms par 'jug pas dngos po thams cad sa bon gyi drangs nas rang gi sa bon la gong bu'i tshul gyis bsdus nas rang gi snying gi dbus su thig le'i gzugs rnam par bsgoms nas yang de la lha'i 'khor lo'i ye shes yud tsam gyis rdzogs par bsgoms nas de la yang de bzhin du bsgoms pa ni ting nge 'dzin ces bya ba yin zhes so/ /da ni yan lag drug so so'i phan yon gsungs pa/ so sor spyod pa zhes pa la sogs pa gsungs te/ bsam gtan gyi mthu ni dpag tu med pas na rigs pas mi dpag go / de bas na 'di rnams la yang sku dang/ byed pa dang/ dbang dang/ mkhyen pa rnams lha thams cad kyi thun mong du gyur pa'i phyir thun mong gyi bsnyen pa la sogs par bshad do/ /da ni nye bar sgrub pa la sogs pa'i rnam pa gzhan yang ci rigs par gsungs pa/ snying po de ni zhes pa la sogs pa'o/ /de yang thugs rdo rje la sogs pa'i thugs ka'i phyag mtshan gyi dbus su snying po dang zhes hUM la sogs pa bsam zhes so/ /gang zhe na/ zla ba rdo rje'i sbyor bas lta zhes pa ni dbyer med pa'i zla ba'i gdan la bsam mo/ /mtshon cha mchog gis zhes pa ni hUM la sogs pa'i 'od zer lha mo dang bcas pas zhes pas so/ /sngags kyi gzugs kyi tshul gyis ni zhes pa ni de shes rab dang ldan pa'i rang gi dkyil 'khor la gnas pa'i tshogs spyan drangs nas/ byang chub tshigs bcad ces pa ni dpal ldan sangs rgyas thugs 'chang ba ces pa la sogs pas yang dag par sbyor bar dkyil 'khor rnams/ sems ni sngags kyi dngos bya ste/ rang gi sngags kyi ngo po la thim nas rang gi thugs kyi rdo rje rgyal ba thams cad kyi ye shes kyi gzugs bsgyur ba de dang gnyis su med par bsgom pa ni nye bar sgrub pa zhes bya ste/ 'dis sangs rgyas kyi tshogs rnams dang don nye bar sgrub pas nas de skad de/ 'di ni chung ngu'i sgrub par shes par bya'o/ /da ni mchog gi bsnyen sgrub bzhi la gnas pas rang gi rigs kyi bu mo lhan cig tu phyag rgya chen po sgrub par ston to/ /ji srid ces pa la sogs pa'o/ /de gnyis shes pa ni zhi ba'i sbyor ba dang/ drag shul gyi sbyor ba'o/ /mthong ba de srid du zhes pa ni byin gyis brlabs pa'i phyag rgya chen po thob pa'o/ /de yang dang por bya bar 'os pa tshogs pa'i rnal 'byor pas zhi ba'i sbyor ba nyid kyis lha mo'i 'dod pa thams cad la longs spyod cing zla ba drug gi bar du bsgrub par bya'o zhes so/ /de ltar gnas pas gang gsungs pa'i dngos grub mthong bar ma gyur na de'i tshe ji skad gsungs pa'i cho ga dang ldan pa lan gsum du brtsam par bya'o zhes so/ /gal te de tsam yang thig ler gnas par ma gyur na de'i tshe le'u bcu pa dang bcu bzhi pa las gsungs pa'i drag shul gyis bsgrub par bya'o/ /zhes so/ /le'u bcu bzhi pa'i phur bus gdab pa'i cho ga la thugs kyi rdo rje la sogs pa gsum la shes rab mthar byed la sogs pa'i phur bus gdab pa zhes shes par bya ba'i phyir/ rigs kyi dbye ba'i zhes pa la sogs pa'o/ /de yang bcu pa las gsungs pa'i de ma thag tu pad+ma'i nang du me'i dkyil 'khor la gnas pa'i sgrub bya dam tshig la snyems par bsams nas rigs kyi khro bo phur bu'i gzugs su gnas pa rang gi rdo rje las byung ste gnas rnams su gtab pas sngags kyi lus thal ba ltar gtor nas shes pa mar me'i tshul du gnas pa rang gi mi shigs pa'i thig le la bcug par byas pas 'grub par 'gyur ro zhes so/ /da ni le'u dang po las de bzhin gshegs pa'i 'khor lo nyid kyi sku zhugs par mdzad de zhes pa nas/ de bud med kyi gzugs su byung bar 'gyur to zhes gsungs pa de rnams rig ma la zhugs par gsal bar bya ba'i phyir/ 'dod chags zhes pa la sogs pa'o/ /'dod chags chen po'i ting nge 'dzin gyi ye shes kyi 'khor lo ste/ sangs rgyas bsdus nas de spyan ma la sogs pa'i bud med dgur spros nas bsgrub bya zhes pa ni rang gi rig ma la chud par bya'o zhes so/ /da ni ye shes bdud rtsir gyur pa la spyan la sogs pa'i glus bslang ba'i sku ni mchog gi bsnyen par bya ba'i phyir/ spros nas zhes pa la sogs pa'o/ /de la spros nas zhes ni 'od kyi gong bu la spros nas zhes so/ /phyag rgya bzhi ni lha mo bzhi'o/ /bskor nas brtag pa ni go rim bzhin du bskor bas brtag pa zhes so/ /bdag nyid zla ba zhu ba'i ngo bo dbus su gnas par byas la de rnams bskul ba dang sa bon las gyur pa'i phyag mtshan gyi dbus kyi 'od kyis 'khor lo thams cad ces pa dang/ sangs rgyas rnams rang gi lha'i gzugs su byas nas bsdu bar bya'o/ /zhes te/ bkug nas sa bon la gzhug go zhes so/ /de nas de gyur pa'i lus rdo rje kun gyi ngo bor byas zhing byang chub kyi bdag nyid kyi sku lha mos snying po la bskul ba'i stobs kyis 'das pa la sogs pa'i sangs rgyas thams cad kyi rang bzhin ye shes lta bu'i lus su bsgom pa ni mchog gi bsnyen pa zhes bya'o zhes so/ /las kyi dbye bas kha dog bye brag tu gyur par bstan pa'i phyir/ 'dod pa yis zhes pa la sogs pa'o/ /de bzhin nyid kyis thugs phye ste zhes pa ni khro bo rnams kyis nyams dang thugs bye brag tu gyur te/ thugs ni rnam par zhi ba ston zla ba'i rgya mtsho'i dbus dang 'dra zhes so/ /dbang bskur bas ni rang gi rgyu/ /bzhi yis 'bras bu phye ba yin/ /spyi bor dbang bskur bas rgyu ma yin pa las phye ba yin la/ bzhi'i tshul gyis rnam par gnas pas 'bras bu ma yin pa las bye brag phye ba yin zhes so/ /rang sngags kyis ni chos mar 'gyur zhes pa ni rang gi shes rab ma rang gi sngags kyi cho ga bzhin du bskyed par bya'o zhes so/ /rig ma la chos kyi rgya zhes pa ni ye shes sems dpa' rig ma bye brag tu phye te/ shes rab kyis thabs dang 'dra'o/ /ye shes sems dpa' mo'i gnas pa bkag pa rnam par bzhag ste/ des thabs kyi ches shes rab bye brag tu byed pa zhes pa'i don to/ de bzhin du gzhan las yang thabs kyi snying gar shes rab kyi bzhag pa yang de'i rim par shes par bya'o/ /da ni le'u bco lnga pa las rdo rje can gyi gzugs la sogs/ gtsug tor mnyes par byed pa yin zhes pa'i gtsug tor gyi sgra la sogs pa bstan pa'i phyir/ 'khor lo sgyur ba zhes pa la sogs pa'o/ /de bzhin gshegs pa drug gi dbu la gnas pas gtsug tor zhes pa'i spra? brjod la/ mdzes par byed pa'i don gyis na rgyal po zhes so/ /longs spyod bzhi ni lha mo bzhi ste/ gnyis su med par longs spyod pas rig pa chen po'i rgyud yin pas na rig pa'i rgyal mo zhes bya bar bshad do/ /gzhan ni bshad zin to/ /da ni dbang bskur ba bsam gtan gyi mchog yin te/ phyi rol gyi mchog ma yin par bstan pa'i phyir/ thams cad bsam gtan 'khor lo yis/ /dbang bskur ba ni bsngags pa ste/ zhes rang gi dbu la rigs kyi dbang phyug bzhag pa ni mchog gam gtso bo zhes so/ /de yan chad kyis rang gi gzugs rdzogs par byas nas rig ma dang lhan cig tu gnyis su med par bya'o zhes bstan pa'i phyir/ mchog gi sbyor ba 'di yis ni zhes pa gsungs so/ /de ltar gong du smos pa'i rim pas rig ma dang lhan cig tu bskyed nas dkyil 'khor dbyung bar bya'o/ /zhes gsungs pa/ rang sngags bshad pa'i zhes pa la sogs pa'o/ /rig ma dang ldan pa'i skyes bu rdo rje gsum gyis byin gyis brlabs pa nas rjes su chags pa'i mdza' la thug pas gtso bo bsgrubs nas bdag dang 'dra ba dkyil 'khor 'byin pa chen po'i sgrub pa chen po'i mthar thug pa'i bar du bskyed do/ /zhes so/ /de kho na bstan pa/ bsnyen pa'i dus zhes pa la sogs pa'o/ /mchog gi bsnyen pa'i dus na gtsug tor chen po zhes pa sangs rgyas gang yang rung ba'i gzugs su dmigs so/ /sbyor ba zhes pa'i don ni chung du dang 'bring po'i 'bras bu bzhis dag par byas pa la sogs pa rjes su chags pa'i mdza' la thugs pas dang po'i sbyor ba byas te thun mong gi bsnyen pa rdo rje cho ga bzhis chen po'i rgyu thun pa'i 'bras bu skyed do/ /de bzhin du thun mong gi nye bar sgrub pa la sogs pa'i rnam pa gzhan yang gsungs pa/ nye bar sgrub pa'i zhes pa la sogs pa'o/ /nye bar sgrub pa ni bdud rtsi thabs kyi bar du lta thams cad mig la sogs pa byin gyis brlabs pa ni chen po'i rnam par smin pa'i 'bras bu'o/ /de bzhin du sgrub pa'i tshe na cho ga shes pa'i sngags pas rang lha'i sbyor ba byas te/ thugs byin gyis brlab pa la sogs pa byas pa ni chen po'i skyes bu byed pa'i 'bras bu'o/ /sgrub pa chen po'i dus su thams cad la sangs rgyas bdag po mnga' bdag gzugs zhes te/ rang rang gi bdag po mgo la bzhag pa ni chen po'i bral ba'i 'bras bu'o/ /de ltar thun mong dang mchog gi bsnyen pa la sogs pa'i bye brag brjod nas de'i phan yon gsungs pa/ de lta'i zhes pa la sogs pa'o/ /bye brag shes par byas nas dngos grub mchog sgrub par bya'o zhes so/ /de rnams dang bral bas ni zhi ba mchog gi dngos grub mi 'grub ces so/ /gang gis zhe na/ bskal pa bye ba stong du yang/ /skyob pa sangs rgyas rnams kyis so/ /zhes so/ /sa 'og ma'i sangs rgyas rnams kyis te/ thabs khyad par can dang bral ba'i phyir ro/ /de ni mchog gi bsnyen pa gnyis pa gsungs pa/ bsgrub bya zhes pa la sogs pa'o/ /de yang bsgrub par bya ba dang bsgrub pa bo'i pad+ma dang rdo rje reg pa gang yin pa de mchog gi bsnyen pa zhes gsungs te/ mchog gi dngos grub kyi rgyu nyid kyi phyir ro zhes so/ /de nyid kyi phyir na mchog gi nye bar sgrub pa la sogs pa/ rdo rje pad+ma zhes pa la sogs pa'o/ /de la rdo rje dang pad+ma yang dag par zhugs pa'i 'og tu rag pa nye bar sgrub pa zhes bya ste/ sgrub pa dang nye ba'i phyir ro/ /yang rdo rje dang pad+ma gnyis hUM gis rdzogs pa'i lam phaT ser pos bkag pas bskyod pa ni sgrub pas zhes bya ste/ bde ba chen po 'dis sgrub par byed phyir ro/ de'i 'og tu rang bzhin nyid kyis bde zhing spros pa thams cad nye bar zhi ba zhes lhan cig skyes pa ste/ sgrub pa chen po zhes bya'o zhes te/ dngos grub mchog gi ngo bo'i phyir ro zhes so/ /de ltar des thams cad gzhi'i bye brag bsnyen sgrub bcu drug tu phye pa gsungs so/ /nga ni thabs byung dngos po ji lta bu zhes pa'i lan bstan pa'i phyir/ dpal ldan zhes pa la sogs pa'o/ /yang dag pa'i don phun sum tshogs pa thams cad dang ldan pa'i rdo rje 'chang chen po de ni sangs rgyas kun gyis thabs kyis thob par bya ba yin no zhes so/ /ji lta bu zhe na/ chos rnams kyi chos nyid de zhes te/ chos thams cad don dam pa dang kun rdzob tu ro gcig pa'i phyir chos nyid de kho na bsgrub bya yin no zhes so/ /nga ni le'u bcu gsum pa la sogs pa'i las bzhi'i bye brag bstan pa'i phyir dkyil 'khor kun la rnal 'byor pas/ bka' ni ji ltar rtsal bar bgyi zhes pa'i lan gsungs pa/ gang las dang zhes pa la sogs pa'o/ /de yang rnal 'byor pas las dang rjes su mthun par sbyor ba dmigs so zhes ston te/ /kha dog dang gdan la sogs pa dang ldan par ro/ /nga yang chung du 'am zhe na/ dkyil 'khor thams cad dmigs nas su zhes dkyil 'khor gyi 'khor lo dang ldan par byas nas zhes so/ /dam tshig mi zad bsgo bar bya zhes pa ni rig pa'i sngags kyis bsgos pas las byed par 'gyur ro/ /zhes so/ /sngon du song ba'i rgyu gsungs pa/ sku gsung thugs zhes pa la sogs pa'o/ /'di yang rtsa ba'i rgyud las rgyas par shes par bya'o/ /da ni le'u bco lnga pa'i kha 'byed kyi don bstan pa'i phyir/ thams cad rdo rje can kun la/ las rnams sna tshogs ji ltar bcol zhes pa'i lan gsungs pa/ gang zhig ces pa la sogs pa'o/ /de yang bsgrub bya la nyes pa bsgo ba'i phyir ting nge 'dzin khyad par rnams bya ba'i de ma thag tu bsgrub bya'i lus la thun mong du gyur pa'i srungs ma'i dkyil 'khor gyi 'khor lo rnam par bsgoms nas zhes so/ /de nas sgrub pa pos bsgrub bya de'i lus la gnas pa'i 'khor lo la bsgrub bya de'i nyes pa bla ma brlas pa la sogs pa bsgo bar bya'o zhes so/ /de nas de rnams kyis gnas de bcom nas 'byung bar rab tu bsgoms nas de thams cad drangs nas rang gi lus kyi 'khor lo la rab tu gzhug par bya'o/ /de nas khang stong lta bur bsams la rgyud las gsungs pa'i rdzas ske tshe dang chu 'gram gyis la sogs pa la bsgrub bya'i gzugs byas la rang nyid khro bo gang yang rung ba'i gzugs su bskyed nas gcer bu 'am gos dang ldan par mtshan ma rkang pas mnan la bsgyings nas sngags bzla bar bya'o/ /da nas khro bo bka' nod pa'i tshogs rnams la bka' sgo ba de rnams gtang bar bya'o/ /de rnams kyi bsgrub bya bcing ba la sogs pa byas dgug par bya'o/ /de nas gzugs brnyan la phab nas g+ha g+ha zhes pa'i sngags kyi spyi bo la sogs par phur bus gdab par bya'o/ de bzhin du yams kyi nad la sogs pa la yang cho ga des gsal bar bstan pa/ yams nad ces pa la sogs pa'o/ /de bzhin du las kyi dbye ba gzhan yang rnam pa gsum du shes par bya'o zhes gsungs pa'o/ /de nas sbyor ba zhes pa? la sogs pa'o/ /mtshan ma mnan bzlas pa 'am zhes pa ni 'das ma thag pa'am/ le'u bcu bzhi pa 'am/ bco lnga pa las gsungs pa'o/ /sbyin sreg khro bo rnal 'byor pa zhes pa ni le'u bco lnga pa las gsungs pa'o/ /gdug pa'i sems can bsam gtan gyis/ bza' ba ru ni rab tu brtag ces pa ni bcu gsum pa 'am/ /bco lnga par gsungs pa'o/ /de bas na mngon spyod kyi cho ga ni 'am gyis 'grub pa zhes bya'o/ /da ni las bzhi'i ting nge 'dzin bstan pa'i phyir ro/ zhi ba la ni zhi ba'i sems shes pa la sogs pa gsungs so/ /de ltar zhugs pa rnams kyi som nyi bsal nas da ni de bzhin gshegs pa rnams kyi sku la sogs pa dang gcig gi rang bzhin du gnas pa rdo rje 'dzin chen po'i sku la sogs pa la dmigs nas cang mi gsung bar gyur to zhes gsungs pa de nas bcom ldan 'das zhes pa la sogs pa'o/ /de rnams kyang rdo rje 'dzin pa'i mthus ye shes phul du byung ba yin pas de kho na la dmigs pa zhes bya'o/ /da ni byang chub sems dpa' de dag shin tu mgu nas sku la sogs pa'i ngo bo'i sgo nas stod pa de rnams la bstod nas khyad par du zhes sdang gi las 'ba' zhig gi sgo nas zhus pa dang lan gsungs pa/ de nas byang chub sems dpa' zhes pa la sogs pa'o/ /de la thams cad mdzad la phyag 'tshal 'dud ces pa ni srog gcod pa la sogs pa'i las thams cad byed pa zhes so/ /de la dris par sku gsung thugs ni zhes pa la sogs pa'o/ /sems can thams cad kyi lus la sogs pa rnam par dag pa yin pas rnam par snang mdzad la sogs pa'i ngo bo nyid sku la sogs pa thob pas sems can nyid mnyam med dang mnyam pa ste/ sangs rgyas thams cad dang mnyam zhes so/ /'o na de ci 'gog ce na/ sgrub byas su yin sgrub po gang zhes te/ sems can thams cad sangs rgyas nyid yin pas bsgrub bya dang sgrub po med do zhes so/ /des na sgrub pa'i dbang po bdag nyid chen po des mngon spyod kyi las kyi sangs rgyas thams cad gsod pa yis bdag nyid chen po ji ltar sdig pas mi gos te/ gal te gos bar gyur na 'bras bu bla na med pa'i byang chub tu ji ltar 'gyur zhes zhus pa'o/ /da ni de bzhin gshegs pa rnams kyis legs so pa'i tshig sngon du gsol nas de'i lan gsungs pa/ de nas de bzhin gshegs pa la sogs pa'o/ /sems can gyi don la sems dpa' dang/ ye shes kyi sku'i ngo bo dang/ shes pa'i shes rab las byung ba dang/ bde bar gshegs pa thams cad mnyes par byed pa'i phyir go rim bzhin du sems dpa' chen po dang/ bdag nyid chen po dang/ gsung dbyangs chen po dang/ mchod pa chen po zhes bos nas legs so/ /zhes tshig sngon du gsol lo/ /sgrub pa po slob dpon te/ sangs rgyas kun gyi 'khor lo der gtogs pa ste de'i bdag po'o/ /de bas na dpal ldan no/ /de lta bu'i byang chub kyi rdo rje can gyis dngos po thams cad sgyu ma lta bu'i tshul gyis 'byin pa dang/ sdud par byed kyi tha dad pa'i blos ma yin no/ /de bas na rmi lam dang 'dra ba'i tshul gyis las thams cad 'byed pas na slob dpon de'i sdig par mi 'gyur te/ zhe sdang gis blang ba ma yin pa'i phyir ro/ /de bzhin du phyugs bsad pa'i mchod sbyin lta bu ma yin pas bsod nams su yang mi 'gyur ro/ /de bas na bsod nams dang sdig par mi 'gyur ba de ltar na byang chub kyi mtshan nyid kyi rgyur gyur par bstan pa'i phyir/ gang la zhes pa la sogs pa'o/ /phyi rol gyi lta ba dang gral bas na sdig dang bsod nams su mi 'gyur te/ snying rje chen pos 'dren par byed pas byang chub kho na'i rgyu yin par gsungs so/ /ci'i phyir zhe na/ mgon po de yis zhes pa la sogs pa'o/ /mgon po de yis zhes pa ni sgrub pa po des 'jigs par byed pa'i zhes yang dag par 'jig par byed pa'i las kyis lus thams cad 'jig par mdzad kyang las nges ngan 'gror skye bar mi 'gyur zhing de nyid la goms par brlabs pas byang chub kyang rnyed sla bar 'gyur zhes so/ /rmongs pa'i lus can de dag kyang cho ga ji lta bas bsad pas 'bras bu mchog thob par bstan pa'i phyir/ sngon ni zhes pa la sogs pa'o/ /sngon shin tu mi zad pa'i las byas pas gal te dmyal ba rnams su skye bar 'gyur ba'i skye bo de rnams cho ga ji lta ba bzhin byas pa'i mthus sdig pa dang bral bar byas pas dmyal ba rnams kyi 'bras bu che zhes te/ de'i thad kar 'bras bu chen po skyed de/ ji skad du/ rdo rje gsang ba'i 'di lta bus sems can thams cad bsad na ni/ /mi bskyod pa yi rgyal ba'i zhing dag tu/ /rgyal ba'i sras su skye bar 'gyur zhes so/ /cho ga gang gis lus can rmongs pa de rnams bsgrub par bya ba de bstan pa'i phyir/ /byang chub rdo rjes bsgrub bya 'di zhes te/ sgrub pa pos bsgrub bya de sngags dang/ thabs dang sbyor ba la sogs pa dang ldan pa gnyis su med pa'i bdag nyid kyi ye shes kyis rgyas btab cing sbyor ba des mchog tu phan btags par shes par bya'o/ /de ltar bsgrub byar gtogs pa'i cho ga bstan nas nga ni sgrub pa po'i yan lag kyang bstan pa'i phyir/ tshar gcod pa zhes pa la sogs pa'o/ /de bas na lus can thams cad la phan btags par shes nas/ snying rje chen po dang ldan pa'i rnal 'byor bas tshar bcad pa dang rjes su bzung ba'i las bya'o/ /zhes ji skad du/ gang gis snying rje ma nyams pa/ de yis las 'di bya bar 'os zhes so/ /sbyor ba gang gis dus su las 'di bya zhe na/ sgrub pa po zhes pa la sogs pa'o/ /de yang snying rje'i sems bskyed pa dang po nas brtsams te/ sbyor ba dang po'i mthar thug par byas nas dkyil 'khor dbyung ba nas chen po'i sgrub pa chen po'i mthar thug par byas nas dkyil 'khor gyis 'khor lo rdzogs pas las kyi rgyal ba mchog gis las rnams bsgrub par bya'o zhes so/ /da ni de bzhin gshegs pa rnams kyi thugs rje chen po'i tshul gyi chos thos nas byang chub sems dpa' i rnams kyis legs so pa'i tshig sngon du gsol nas ji skad gsungs pa'i don rjes su zlos pa bstan pa'i phyir/ de nas zhes pa la sogs pa'o/ /sems can rnams g.yang sa las sgrol ba dang/ nyon mongs pas non pa'i lus ngag gi las med byed pa dang/ phung po la sogs pa thams cad rnam par dag pa dang/ yul tshad med pa bsgral bar dam bcas pa'i phyir go rim bzhin du mgon po dang/ thugs rje chen po dang/ chos rnams chen po dang/ thugs rje chen po zhes gsol nas legs so zhes bya ba byin nas don de rjes su bzlas gsungs pa/ e ma'o zhes pa la sogs pa'o/ /kun tu bzang po'i thugs rje ji lta bar dri ma med ces na/ gdug pa'i mi bzad las kyis kyang zhes pa ni bla ma la smod pa la sogs pa bla ma 'ba' zhig gis grol ba'i sems can sangs rgyas kyi bstan pa las nyams shing phyogs pa'i las can rnams sangs rgyas kyi 'bras bu tshol zhes te/ ji skad du/ bshad pa'i cho ga phun sum tshogs pa'i nus pas gsol zhes so/ /da ni byang chub sems dpa' rnams kyis ji bzhin pa'i don thugs su chung bar mkhyen nas/ de bzhin gshegs pa rnams kyis don kho na la blo brtan por bya ba gsungs pa/ de nas zhes pa la sogs pa'o/ /gsar ba 'dus par dbang bskur ba'i sngags pa ni rnal 'byor gyi rgyud la sogs pa las thams cad khyad par du gyur pa ste/ de'i phyir de'i lung ji lta bzhin du thob pa'i sngags pas 'jig par mi bya skrag par mi bya zhes te/ zhe sdang gi las la sogs pa'o/ /de ci'i phyir zhe na/ zhes zhus pa dang/ de bzhin gshegs pa rnams kyis bka' stsal pa/ byang chub rdo rje las byung ba zhes te/ don dam par na rdo rje 'chang chen po'i ngo bo las byung zhing rnam par spros pa ni zhe sdang rdo rje la sogs pa'o/ /de bas na sngags kyi rgyud ni bsdus pa dang/ /yongs su spang bar mi bya'o zhes te/ zhe sdang gi las la sogs pa thams cad rdo rje 'dzin pa'i rang bzhin nyid kyis rnam par dag pas ni der? bar bya ba ji lta bu zhig yod de/ bsgrub par bya ba'i rang bzhin kho na yin no zhes so/ /da ni rgyud kyi don gyi sgo nas de bzhin gshegs pa rnams pa byang chub sems dpa' rnams kyis bstod pa bya ba bstan par bya ba'i phyir/ de nas byang chub sems dpa' zhes pa la sogs pa'o/ /de la dus gsum rdo rje'i thugs yin/ 'das pa dang ma 'ongs pa'i sangs rgyas dag pa dang ma dag pa thams cad kyi snying por gyur pa'i phyir/ srid dang thar gyur zhes pa ni shes pa dang thugs rjes srid pa dang thar gyur te/ mi gnas pa'i mya ngan las 'das pa'i bdag nyid can zhes pa'i don no/ /zhi zhing sgrib med ces pa ni ro myang ba'i rgyun gyis zhi zhing shes bya'i sgrib pa la sogs pa rnam par bsal ba ste/ de'i phyir nam mkha' odag pa'i ngo bo nyid ces te/ dmigs su med pas nam mkha' dang 'dra'o zhes so/ /de nyid kyang gang zhe na/ sangs rgyas la sogs pa zhes te/ rtag pa la sogs pa'i sangs rgyas kyi yang sangs rgyas su 'gyur bas byang chub ste de nyid bdag po bas na dbang phyug rdo rje can no/ /de la lus dang ngag dang yid kyis rtag tu ste blo dang mi 'byed pas phyag 'tshal lo/ /zhes so/ /rnal 'byor pas kyang tha mi dad pa'i blos phyag bya'o zhes so/ /des na rdo rje 'chang chen po'i spros pa med pa'i bdag nyid rang gi phun sum tshogs pa la bstod pa'o/ /da ni spros pa'i bdag nyid gzhan gyi don phun sum tshogs pas/ lha thams cad? kyi sgo nas bstod pa gsungs pa/ gang zhig gzugs dang zhes pa la sogs pa'o/ /rnam par shes pa'i bar gyis ni phung po lnga bstan la de rnam par dag pa'i rnam par snang mdzad la sogs pa'i ngo bo nyid do zhes so/ /skye mched drug ni phyi'i skye mched drug ste/ gzugs kyi rdo rje ma la sogs pa'i ngo bo nyid do zhes so/ /dbang po drug ces pa ni nang gi skye mched drug ste/ sa'i snying po la sogs pa'i ngo bo nyid do/ /zhes so/ /sa chu me dang rlung dang nam mkha' zhes pa ni 'byung ba lnga bstan ste/ spyan ma la sogs pa'i ngo bo nyid do/ /de thams cad kyang byang chub kyi sems rdo rje dang 'dra ba nyid du rgya che zhing spros pa ste/ de bas na de la yang gong ma'i tshul gyis bya ba rnam pa gsum gyis phyag 'tshal lo zhes so/ /de ltar chos can nyi shu rtsa gcig dag pa'i sgo nas bstod nas/ da ni nyon mongs pa gsum dag pa'i sgo nas sku gsung thugs rdo rje gsum la khyad par du bstod pa gsungs pa/ gti mug ces pa la sogs pa'o/ de la gti mug rnam par dag pa ni sku rdo rje'o/ /nyes pa ni zhe sdang ste/ de rnam par dag pa ni thugs rdo rje'o/ 'dod chags rnam par dag pa ni rdo rje chos bcas gang zhes te gsung rdo rje'o/ /de'i sngon du song ba'i rgyu/ rig ma'i sbyor ba las byung rtag tu rang? 'brel bar zhes te/ dus gang gi tshe dang lhan cig tu 'dres pa'i dus che rnam par dag pa ste/ de nas bzung ste/ rnam pa sna tshogs pa'i dga' bas myos pa'i dngos por gyur pa ste/ srid pa ji srid kyi bar du ro myang ba'i bde ba dang ldan pa'i rdo rje sems dpa' byang chub kyi sems rdo rje dang 'dra bar rgya chen por spros pa de la phyag 'tshal lo zhes so// da ni rang bzhin dang sems su gtogs pa'i chos dag pa'i sgo nas khro bo rnams la bstod pa gsungs pa/ dam par gzung dang zhes pa la sogs pa'o/ /gzung ba ni spros pa'o/ /dga' ba ni bdud pa'o/ /rnam pa ni rang gi lha'i rnam par gyur pa'o/ / mi g.yo ba ni de nyid la brtan par gyur pa'o/ /rgyu ni de nyid la slob pa'o/ /'bras bu ni de gsal bar gyur pa'o/ /de rnams gong du smos pa'i rang bzhin las byung bas na rang bzhin du rjes su gtogs pa ni chos to/ /don dang mtshan mar bcas pa rnam par dag pa khro bo drug go de bzhin du sems su gtogs pa'i chos ni gti mug dang nyes pa dang 'dod chags dang/ sgrib pa rnams rnam par dag pas khro bo bzhi ste/ /de thams cad kyang rdo rje ste/ de bas na byang chub sems rdo rje 'dra bar rgya chen por spros pa de la phyag 'tshal lo zhes ba'i don to/ /de ltar lha'i ngo bo'i sgo nas bstod nas/ da ni sgrub pa la sogs pa'i sgo nas bstod pa gsungs pa/ gang zhig ces pa la sogs dang por gong gi don gsang ba'i dbang bskur ba dang ldan par bsgom pa de phyag 'tshal ba'i gnas yin par bstan te/ gang zhig ces pa ni sgrub pa'o/ /thog ma med dngos rnam dag 'di sgom pa zhes pa dngos po'i tshogs thams cad thog ma med pa'i dus nas dkyil 'khor gyi 'khor lo gong du gsungs pa ltar dag ste/ de yang thabs dang shes rab dbyer med pa'i don nam mkha' i dkyil ltar rnam par dag pa las byung zhing mtshan ma'i spros pa dang bral ba sgom par byed pa'o/ /gang dang ldan par sgom par byed ce na gsang ba'i dbang thob nas khyad par gyi brtul zhugs dang dam tshig dang sbyor ba la gnas nas rtogs pa ni lam khyad par can dang ldan pas byang chub kyi sems rdo rje bzhin du bltas la phyag 'tshal zhes so/ /thabs kyi dngos po bzhis bsgom par byed pa yang phyag 'tshal ba'i gnas yin par gsungs pa/ gang zhig ces pa la sogs pa'o/ /dngos grub mchog ni rdo rje 'chang ba'o/ /de'i thabs ni ka la te mnga' i thams cad dang 'dra ba'i phyir ro/ /de dngos gang zhe na/ bsnyen pa'i cho ga zhes bya ba ni sa lha'i sku'o/ /nye bar sgrub pa ni mig la sogs pa'i byin gyis brlabs pa'o/ /sgrub pa ni sku gsung thugs byin gyis brlabs pa'o/ /dngos grub chen po ni rigs kyi bdag pos dbu rgyan pa'o/ /de yang sngar bshad pa'i rim pa bzhin du phye ba rnams te/ de la blo mi 'gyur ba'i sgrub pa'i dbang po de la yang byang chub rdo rje dang 'dra bar phyag 'tshal lo zhes so/ /thun bzhir sgom par byed pa'i sgrub pa po bsam gtan gyi skal pas phyag 'tshal ba'i gnas yin par bstan pa/ gang zhig ces pa la sogs pa'o/ /thun bzhi zhes pa ni tho rangs dang/ snga dro dang/ phyed 'phreng dang/ srod dang phyag rgya bzhi'i dus pas rdo rje ste/ der sgrub par byed pa zhes so/ /des mi snang ba la sogs pa'i dngos grub nas mchog ste/ de dag kho na smin pa'i dbang las sangs rgyas kyi dngos grub du yang 'gyur ro/ /zhes so/ /de lta bu'i bla ma'i drin gyis ma nor ba'i lam rtogs pa de la yang byang chub kyi sems rdo rje bzhin du phyag 'tshal lo zhes so/ /gsang ba 'dus pa'i rgyud nyan pa la sogs pa rnams kyang sangs rgyas kyi sa bon thob pas phyag 'tshal ba'i gnas yin par bstan pa/ gang zhig ces pa la sogs pa'o/ /bla ma la nyan pa dang/ kha ton du 'don par byed pa dang/ klog pa dang/ rtag tu yid la sems pa dang/ me tog la sogs pas mchod pa dang/ yi ge 'dri ba dang / gzhan 'drir 'jug pa yang dag par lam gyi gzhi yid la gnas pas byang chub kyi sems rdo rje bzhin du bltas la phyag 'tshal lo zhes so/ /sngags dang thabs la sogs pas sgrub par byed pa'i skye bo rnams sgrub pa po ye shes kyi rgyas btab pas sdig pa'i las dang bral bas phyag 'tshal ba'i gnas yin par bstan pa/ gang zhig ces pa la sogs pa'o/ /de yang le'u bcu bzhi pa la sogs pa las gsungs pa'i thabs dang/ sngags dang/ zhi ba la sogs pa'i las rnams kyis de bzhin du rgyas btab pa'i sgrub pa'i dbang pos yang dag par zin pa'i sgrub par bya ba 'di dang ldan pa de yang las kyi sgrib pa dang rnam par bral bas na byang chub kyi sems rdo rje dang 'dra bar bltas la phyag 'tshal lo zhes so/ /gang yang sgrub pa'i dbang po de lta bu mthong ba la sogs pas dga' ba yang dang pa'i stobs kyis mi dge ba'i las rnam par 'jig pas phyag 'tshal ba'i gnas yin par bstan pa/ gang zhig ces pa la sogs pa'o/ /gang zhig ces pa ni skye bo gang gis zhes pa'o/ /gtso bo sgrub pa po zhes pa ni gnyis su med pa'i rnal 'byor la gnas pa bla ma ste/ de gang zag gang gis mthong ba 'am/ reg pa 'am/ yid la sems shing legs par dran par byed pa 'am/ ming tsam thos nas dad par byed cing yon tan gyi phyogs gcig tsam yang 'dzin par byed pa de yang bla ma'i stobs kyi dag pas na/ byang chub kyi sems rdo rje dang 'dra bar bltas la phyag 'tshal lo zhes so/ /ji skad du/ gang zhig mthong bar gyur pa dang/ thams cad du ni mchod gyur na/ sangs rgyas thams cad mthong ba dang/ mchod pa nyid du 'gyur ba yin zhes so/ /de ltar tshigs bcad bcus bstod pa'i sgo nas rgyud kyi don rjes su bstan/ nga ni don chen pos bstod pa'i tshig ni zhes pa la sogs pa'o/ /bstod pa'i tshig ni zhi ba 'dis shes pa ni don zhi ba rab tu ston pa'i phyir de skad do/ /'dren pa kun zhes ba ni bde bar gshegs pa rnams te/ thugs rje'i phyag dang ldan pa'i phyir ro/ /de rnams bstod pa dang/ byang chub sems dpa' grags chen la/ mgon po de dag ces te/ bde bar gshegs pa rnams yid rang zhing mngon par dga' o zhes so/ /ma 'ongs pa'i rnal 'byor pa rnams kyis bstod pa 'di byas na de dag dga' zhing dngos grub gsol bar 'gyur ro/ /zhes pa'i don to/ /da ni gsang ba 'dus pa'i rgyud 'di ni rgyud gzhan las phul du byung bar bstan pa'i phyir/ 'dus pa gsang ba zhes pa la sogs pa'o/ /rgyud thams cad kyi don 'dir 'dus pas na/ kun gyi bdag po zhes bya'o/ /de nyid kyi phyir na rgyud 'di legs par gsungs pa yin zhes te/ sgro 'dogs pa dang skur pa gnyis dang bral bar gsungs so zhes pa'i don to/ /da ni de bzhin gshegs pa la sogs pa thams cad ji skad bshad pa'i ste/ kho na nyid kyi don la sbyar nas cang mi gsungs bar sbyar ba bstan pa'i phyir de skad ces bka' stsal nas zhes pa la sogs pa'o/ /de'i don ni 'di lta ste/ sku dang gsung dang thugs rdo rje zhes pa ni rdo rje 'dzin pa'i sku rdo rje la sogs pa ste/ de bzhin gshegs pa thams cad kyi sku dang gsung dang thugs la zhes te/ sa bon gyi bsdus nas rnam par bcug ste/ sku la sogs pa yang de bzhin nyid nam mkha' dang 'dra bar brjod du med pas na de la dmigs te cang mi gsung bar gyur to zhes pa'i don to/ /de bas na 'di ni dkyil 'khor bsdu ba'i don du lta bar bya'o/ /de bzhin gshegs pa thams cad kyi rang bzhin ni sku dang gsung dang thugs te/ de'i ngo bo nyid ni gsung ba'o/ /de bas na gsang ba yang de 'dus pa yang de bas na gsang ba 'dus pa'i rgyud las gsang ba thams cad de sbas pa'i ngo bo rnams ston pas na des byin gyis brlab cing shes par byed pa dang/ mdzes pa'i don gyi rgyal po ste/ de ston par byed pa'i gzhung gi le'u bco brgyad pa'o/ /zhes so/ /gang zhig gsang rgyud yang dag sbas pa rnams sbyin pa/ /bde gshegs blo mchog nyi ma'i 'od 'dra phyi ma'i rgyud/ /tha shal bdag 'dras ga la spobs te bzhag par 'os/ 'on kyang 'gal la phan pa dam pa'i bka' yis de ni phye/ /de las byung ba'i dge ba kha ba zla ba ltar snang bas/ /skye bo gsang ba 'dus rgyud yang dag don ni rab chud de/ /'di la rim pa gang gis 'gro ba'i lam de yis/ /rdo rje 'dzin pa'i sa la yang dag rol bar shog/ //yang dag rig byed ces bya ba rgyud phyi ma'i rnam par bshad pa slob dpon bi dyA pa ngas mdzad pa rdzogs so// //rgya gar gyi mkhan po ka ma la gu hya dang/ bod kyi lo tsA ba mnga' bdag lha ye shes rgyal mtshan gyis bsgyur cing zhus pa'o/ / //gsang ba 'dus pa'i bshad sbyar snyim pa'i me tog ces bya ba bzhugs so/ /!/ /rgya gar skad du/ ku su mAny+dza le gu hya sa ma dzi band+ha mA na/ bod skad du/ gsang ba 'dus pa'i bshad sbyar snyim pa'i me tog ces bya ba/

CLOSE WINDOW