བོད་ཡིག

e-texts based on the ACIP/ALL Input

/ //paN+Di ta su na ya sh+rI mi tra dang bod kyi lo tsA ba dge slong dar ma grags kyis bsgyur cing zhus te gtan la phab pa'o// //gang zhig bdag 'dra'i bsod nams kyis/ /rnam pa mang por gsol btab kyang/ /bsod snyoms pa yi zhal snga nas/ /thugs rje chen yang rgyan ma mdzad/ /de phyir bdag gis bco brgyad pa/ /de mnyes gsal bar khong du chud/ /de yi zhabs zung? phyag 'tshal nas/ /rang nyid dran phyir cung zad bri/ /'di ltar man ngag dang bcas pa'i rgyud thams cad le'u bcu bdun po rnams kyis mdo'i gnas su gyur pa bstan nas/ da ni de nyid gsal por byed de/ zab par brjod pa rnam par spros pa dang/ ma brjod pa gsal bar byed pa dpal ldan gsang ba 'dus pa'i bshad pa'i rgyud phyi ma le'u bco brgyad pa ston pa sdud par byed pas brjod pa/ de nas zhes pa la sogs pa la/ de nas zhes pa ni de bzhin gshegs pa thams cad kyi dbang bskur ba sku dang gsung dang thugs kyi gsang ba bstan pa'i rjes la'o/ /yang ni tshig gi rgyan no/ /byams pa la sogs pa zhes pa la/ chos kyi rgyal tshab tu dbang bskur ba/ thod bcings pa/ skye ba gcig gis byang chub la thogs pa theg pa chen po'i mngon pa'i chos mdzad pa po bcom ldan 'das byams pa ste/ gang rnams kyi rab kyi gtso bo yin te gleng gzhi'i le'ur brjod pa'i sgrib pa thams cad rnam par sel ba la sogs pa'i byang chub sems dpa' chen po rnams kyi ste de rnams ni de bzhin du brjod do/ /de bzhin gshegs pa thams cad kyi dbang bskur ba ni/ 'bras bur gyur pa bde ba chen po'i ngo bo bcom ldan 'das byang chub kyi sems rdo rje ste/ de nyid sprul pa dang longs spyod dang chos kyi sku'i bdag nyid sku dang gsung dang thugs kyi gsang ba nyid kyi sku dang gsung dang thugs kyi gsang ba yin la de'i bstan pa ni gsungs pa'o/ /yang na de'i ston cing rtogs par byed pa gang gis de le'u bcu bdun gyi bdag nyid rtsa ba'i rgyud kyis so/ /dngos po thams cad kyis zhes pa ni mngon rtogs dang bris pa'i dkyil 'khor dang las kyi tshogs dang ston pa la mkho ba'i ngo bos sam rnam pa thams cad kyis te sgyu ma la sogs pa rnams kyis so/ /ji lta ba ni phyin ci ma log pa'o/ / dam tshig ji lta ba ni gleng gzhi'i le'ur brjod pa'i rdo rje 'dzin pa chen po'i 'khor gyi lugs las ma 'das pas so/ /mthong bas ni 'bras bur gyur pa'i rdo rje 'dzin pa'o/ /thos pa ni de las lam gyi bdag nyid do/ /khong du chud pa ni mngon sum du byas pa'o/ /yang na mthong ba ni sprul pa'i sku'i bdag nyid sku rdo rje'i ngo bo'o/ /thos pa ni longs spyod rdzogs pa'i sku'i rang bzhin gsung rdo rje'i rnam pas so/ /khong du chud pa ni chos kyi sku'i ngo bo thugs rdo rje'i rnam pas mngon sum du byas pa'o/ /gzhan ni mthong ba ni rigs pa dang bsam pa las byung ba dag gis so/ /thos pa ni thos pa las byung bas so/ /khong du chud pa ni bsgom pa las byung bas so/ /zhes so/ /de rnams la ni 'khor du tshogs pa'i mi bskyod pa la sogs pa'i de bzhin gshegs pa rnams la'o/ /gzigs pa ni brjod ma thag pa'i chos gang rnams kyis de rnams gzigs pa'i chos rnams te/ de nyid chos gzigs pa'o/ /rgyud yongs su rdzogs nas sku la sogs pa rnams khams gsum pa'i lus la sogs pa la bzhugs pa sngar ma mthong ba tha mi dad par so sor rang rig pa rang gi mtshan gyi ngo bor mthong nas ji ltar na 'khor ba yin zhes ya mtshan skyes par gyur nas kye ma zhes bya ba la sogs pas ched du rjod pa brjod do/ /sku gsung thugs kyi nges pa ni rang ji lta ba rang gi mtshan nyid dang bral bas gnyis su med pa nyid du nges pa'o/ /rdo rje gsum ni sku la sogs pa'i rdo rje ste/ bems po ma yin pa'i ngo bos bzhugs pa'o/ /gang du zhe na brjod pa rdo rje gsum la ste/ khams gsum gyi lus dang ngag dang sems rdo rje rnams la de'i rang bzhin gyis rnam pa thams cad bzhugs pa'o/ /'di nyid ci'i phyir zhe na/ gang las sems can thams cad byung ba rnams so/ /rang gi rang bzhin gyis zhe na/ rdo rje gsum gyi ngo bos so/ /dus gsum ni sku la sogs pa'i rdo rje'i ngo bos so/ /byang chub rdo rje ni rdo rje sems dpa' ste de'i gnas thob pa rnams/ /de nyid kyi phyir sangs rgyas rdo rje ni rdzu 'phrul chen po yang yin no/ /de brjod pa/ chos nyid kyis ni dbye ba 'ga' yang med ces bya ba la sogs pas so/ /slar yang sangs rgyas min mnyam nyid/ /mi mnyam med phyir gru bzhi ste/ zhes pas so/ ngo mtshar che ba ni gzhan du ma mthong bas so/ /dbang po las 'das pa ni dbang po'i spyod yul ma yin pa'i phyir ro/ /mchog tu mya ngan las 'das pa ni srid pa dang zhi ba la mi gnas pa'i phyir ro/ /rnam pa 'di ltar yang shes pa yod pa la 'khor ba'i rgyun 'jug pa zhes ngo mtshar ba'o/ /ngo mi mtshar ba ni chos nyid kyis de nyid gnyug ma'i rang bzhin yin pa'i phyir ro/ /shin tu rnyed par bka' ba ni thabs 'di'o/ /byang chub bsgrub pa ni rgyu gzhan med pa ste/ thabs gzhan rnams ni bar du chod pa'i phyir ro/ /de nyid kyi phyir gsungs pa/ rgyud rnams kyi ni mchog ces te/ /rnal 'byor dang rnal 'byor bla na med pa'i rgyud rnams las mchog go /khyod la gsol ba 'tshal ba'o/ /ci'i phyir zhe na gsungs pa/ sbas pa de nyid rtogs phyir ro/ / gang gi za ba yin zhe na/ gsungs pa/ gang brjod pa ste sngar yang dag par gsungs pa de'i 'o/ /ci'i khyed rnams kyis de khong du ma chud dam zhe na/ gsungs pa/ sems can rnams la phan 'dod pas zhes so/ /de nas zhes pa ni gsol ba btab pa'i rjes la'o/ /de dag ces pa ni mi bskyod pa la sogs pa rnams so/ /de rnams la zhes pa ni byams pa la sogs pa rnams la'o/ /legs so legs so zhes pa la sogs pas ni dga' bas ma 'ongs pa'i slob dpon rnams la'ang 'di bzhin du gzhan gyi don la zhugs pa'i 'dri ba po rnams legs so zhes pa la sogs pas spro bar bya zhes yang dag par slob par byed do/ /chos la gus pas yang nas yang du phyag 'tshal nas 'dri bar byed do/ /gsang ba zhes 'dir gang la bgyi zhes pa la sogs pa ni dri ba'i tshogs te go sla'o/ /de rnams bstan pa dang bshad pa dang so sor bshad pa dang dri ba dang lan dang bcas pas spros par bya'o zhes gsungs pa sku rdo rje la sogs pas sku rdo rje la sogs pa la bzhag nas zhes pa ni gcig tu gyur par byas nas so/ /rdo rje 'dzin pa chen po'i sku la sogs pa'i rdo rje la rang rang gi sku la sogs pa'i rdo rje rnams kyi dmigs pa ste/ dbyer med pas yin la sgro 'dogs pa la dpyad nas chos nyid nye bar blangs te cang mi gsung bar gyur to/ /dang po nyid du dpal gsang ba 'dus par grags pa ni kun tu bzang po yin la de'i thabs su gyur pa yang de'i rjod par byed pa'i rgyud kyi ming gi don du bstan pa'i rim pas bshad pa'i rim pa gsungs pa/ sku gsung thugs ni rnam pa gsum zhes pa ni so sor sku dang gsung dang thugs kyi dbye bas rnam pa gsum mo/ /gsang ba ni thams cad kyi spyod yul ma yin pa'i phyir ro/ /tshogs pa ni 'dus pa yin no/ /mtshan nyid ji lta bu zhe na/ de bzhin gshegs pa thams cad kyi ming can te rang gi don la ka na sbyar bar bya'o/ /'di skad brjod par 'gyur te sangs rgyas thams cad kyi sku la sogs pa gsum gyi rang bzhin gyis gcig pa ni gsang ba 'dus pa'o/ /yang na rten dang brten pa'i rnam par dag pas de bzhin gshegs pa rnams kyi yon tan mdza' dag dkyil 'khor gyi rnam pas tshogs zhing 'dus pa'o/ /'di ni gsang ba 'dus pa bshad do rgyud kyi 'brel pa ji ltar lags zhes pa ni dri ba'o/ /lan gsungs pa lnga pa zhes pa la sogs pa'o/ /lnga pa ni le'u lnga pa'o/ /dgu ni dgu pa'o/ /bdun dang bcu ni bcu bdun pa'o/ /bcu gsum ni bcu gsum pa'o/ /'di rnams su don gang bshad ce na gsungs pa/ rim pa bzhin du rnam par mi rtog pa'i spyod pa dang/ dam tshig bzhi yang yin la de'i bshad pa log par rtogs pa 'gegs pa dang 'jig rten pa'i lha thams cad kyi dam tshig dang bse ru la sogs pa'i tshul nges pa dang sngags kyi bzlas pa dang de'i don la sogs pa dang kha dog dang phyag mtshan la sogs pa'i nges pa dang zhi ba yang ngo/ /gang rnams kyi zhe na/ sangs rgyas rnams kyi ste rnam par snang mdzad la sogs pa rnams kyi dang/ byang chub sems dpa' rnams kyi ni sgrib pa thams cad rnam par sel ba la sogs pa rnams kyi'o/ bstan ba ni bstan pa la mkho ba ste bsam gtan gyi dkyil 'khor dang bris pa'i dkyil 'khor dang/ las kyi tshogs ni las las gzhan legs so legs so zhes pa la sogs pa'o/ /sgrub pa chen po ni las kyi tshogs la sogs rnams so/ /bzhi pa thugs kyi dkyil 'khor gyi cho ga'o/ /bcu drug bar sku dang gsung thams cad kyi bdag po'i dkyil 'khor rnams so/ /der thig skud dang/ rdul tshon dang/ bum pa la sogs pa 'das bya ba dang/ sbyin sreg dang/ gtor ma dang/ slob ma gzhug pa dang dbang bskur ba la sogs pa ni slob dpon gyi las so/ /brgyad par brtul zhugs ste de kho na nyid dang rjes su 'brel ba'i mchod pa dang de nyid 'khor ba dang ngan song gi lam las sdom par byed bas sdom pa'o/ /bcu gnyis bar mi snang ba dang mngon par shes pa la sogs pa thun mong gi dngos grub sgrbub pa dang/ gnyan ba la sogs pa'i yan lag bzhi yang ngo/ /brgyad pa zhes pa ni drug pa ste gzhung lhag pas so/ /de la rjes su chags pa zhes pa ni de bzhin gshegs pa thams cad kyi rjes su chags dang mchod pa'i sngags dag go /nye bar sgrub pa na de dang nye bas bsgrub pa nyid ste/ sku dang gsung dang thugs byin gyis brlab pa'i sngags brjod pa'o/ /gnyis par ni sdom ba zhes pa byang chub kyi sems so/ /bcu pa dang bcu bzhi par drag po'i spyod pa'o/ /bdun par sdom pa ste rjes su dran pa'i rang bzhin gsungs so/ /gsum par rdo rje bkod pa'i ting nge 'dzin gyi ngo bo bsnyen pa'o/ /gcig bcu zhes pa ni bcu gcig par lha rnams kyi gzugs rdzogs pa'i rgyu mtshan yi ge gsum la sogs pa dang mi snang ba la sogs pa'i dngos grub dang de gnas kyang ngo/ /de nyid du gcig gi sgra phyis pa mthong bas dang po bzung ste/ der de bzhin gshegs pa thams cad kyi las lha rnams 'byin pa la sogs pa brjod do/ /bcu dang lnga pa zhes pa ni bco lnga pa ste/ de ru grub pa'i zhing dang de'i rgyu mtshan rmi lam la sogs pa yang gsungs so/ /'di dag ni mtshon pa tsam ste/ gzhan yang de dang der brjod pa bstan par 'dod nas gsungs pa/ tshar gcod rjes su bzung ba dang zhes ba la sogs pa'o/ /tshar gcod pa ni spyo bar bya ba'i gdul bya rnams so/ /rjes su gzung ba ni bsad pa nye bar bsdu ba bstan nas 'tsho bar byed pa'o/ /de dag nus pa ni las so/ /dul ba ni sngar gyis sangs rgyas rnams kyis so/ /gdul dka' ba ni gdul bar mi nus pa'i gdul bya'o/ /zhi ba ni rang bzhin du gnas pa'o/ /de rnams gzhug pa'o/ /bskyed pa'i rim pa dang 'brel ba'i zhes pa ni / bskyed pa'i rim pa'i lha'i 'khor lo grub pa'i de'i rim pa'o/ /zla ba rdo rje la sogs pa'i mtshan nyid kyi rim pa ni bsnyen pa'o/ /de dbyer med par grub par byed pas cho ga'o/ /bzhi zhes pa ni dang por stong nyid byang chub ces pa la sogs pa 'chad par 'gyur ba'i rim pas rnam pa bzhi'o/ /thun mong gi dngos grub dang 'brel pa'i zhes pa ni rgyud 'og ma'i bskyed pa'i rim pa dang 'dra ba yin pas thun mong ba'o de'i dngos grub ni de dang 'brel pa gzhung ngo/ /mchog tu gyur pa nyid ces pa la mchog ni mchog gi bsnyen pa ste/ zla ba zhu ba'i dag nyid mngal nas skye ba'i rim pa'i ngo bo'o/ /gang 'chad par 'gyur ba mchog ni ye shes bdud rtsi nyid ces so/ /de gsal bar byed pa yang gzhung ngo/ /nyid ces pa ni nges par bzung ba'o/ /da ni sdud pa po gzhan dag ni thun mong gi dngos grub ni mi snang ba la sogs pa yin la mchog dang yang 'brel to zhes so/ /dkyil 'khor ni sku la sogs pa'i dkyil 'khor ro/ /brtul zhugs ni rigs pa'i brtul zhugs so/ /gzhung ni slob dpon phun sum tshogs pa rtogs par byed pa'o/ /bla ma sngags kyi lam nas ni zhes pa ni sngags kyi theg pa'i lugs so/ /slob ma yongs su smin pa ni 'jug par byed pa'o/ /brtul zhugs bzang po ni bzung ba'i mi dman pa'i mthun mtshams bzhi ting nge 'dzin gsum dang rnal 'byor bsrung ba ?? pa dang dam tshig nyams su len pa la sogs pa'i nges pa'o/ /dbang bskur ba ni dar nyid kyis mchog gi mchog la sogs pa'i dbang bskur ba la sogs pa'o/ /de nyid kyi phyir slob ma bzang po brtan zhing gus pa bdag nyid chen po zab pa dang rgya che ba'i chos la mos pa ni sangs rgyas dang 'brel ba 'di yin te/ ston pa ni gsal bar byed pa yin la gzhan 'di lta bu'i mtshan nyid dang bral ba ni ma yin no zhes blta bar bya'o/ /srid pa dang zhi ba'i rtog pa dang bral bas yongs su grol ba yin te bya'o zhes sngar dang 'brel to/ /rnal 'byor zhes 'dir ci la bgyi zhes pa ni 'dri ba'o/ /lan la thabs dang shes rab la sogs pa'o/ /thabs dang shes rab 'chad par 'gyur ba dag snyoms par 'jug pa ni phyi rol ma yin pa'i ngo bos snyoms par 'jug pa nges bar gtod pa tshul bzhin yid la byed pa rnal 'byor zhes bshad do/ /de dag 'chad de/ gang dngos po med pa ni gzung ba dang 'dzin pa'i rnam pa sgro 'dogs pa'i ngo bor brtags ba'i rang bzhin dang bral ba gnyis su med pa ste/ de ni shes rab bo/ /shes rab pha rol phyin gnyis med/ /ye shes de ni zhes brjod pas so/ /yang thabs ni sems can thams cad sgyu ma lta bur sems can thams cad la kun rdzob tu snying rjes mngon par 'dod pa'i bsam pa ni dngos po ste/ de nyid 'di'i mtshan nyid yin la gdul bya'i dbang gyis rnam pa sna tshogs par snang ba rgya chen pos rab tu snang ba'i phyir ro/ /rgya chen po yang zab mo'i rang bzhin nyid do/ /de nyid brjod pa/ zab pa dang ni rgya che las/ /yongs min rnam rtog med pa nyid/ /ces pa la sogs pa'o/ slar yang rnam par mi rtog zab pa dang/ /rgya che ba ni rang gzhan 'byung/ /zhes pa la sogs pa ste/ 'dis ni rnal 'byor bshad do/ /sngar ni rgyud kyi 'brel pa brjod la/ da ni rgyud kyi sgra nyid kyi don ma dris pa nyid du gsungs pa/ snying rje chen po'i gzhan dbang du gyur pas ma 'ongs pa'i slob dpon yang 'di ltar nyid du slob mas mi shes pas ma dris par go nas bstan par bya'o/ /zhes yang dag par bslab pa'i ched du lan gsungs pa/ rgyun ni tshogs pa ste/ rjod pa byed pa'i tshogs yin la rgyud ni 'dis don gsal bar byed pas zhes so/ /de'i rgyun ni rnam pa gsum yin te/ phye nas ston pa byed pa ni gzhi dang zhes pa la sogs pa'o/ /cha byad ni rnam pa la sogs pa khyad par can rgyu'i dkyil 'khor pa'i gzugs ni rang bzhin du brjod do ces pa'i don to/ /de nyid mi 'phrog pa ni 'bras bu rgyas kun tu bzang ba yid yin te rgyu dang 'bras bu dag dbyer med bas so/ /bzhi'i don 'grel pa ni thabs zhes te chos kyi 'byung gnas dang gzhal yas khang la sogs pa zhes pa'i don to/ /gsum po 'dis rgyud kyi don yang dag par bsdus so/ /gzhan yang gal te rgyud 'dir ston pa de yang 'di gsum du 'dus pa nyid do/ /zhes bstan par 'dod nas gsungs pa/ rigs ni lnga dang zhes pa la sogs pa'o/ /gang dngos po la rigs gcig yin la gcig kho na rigs yin te 'di lta ste thugs kyi rigs so zhes brjod pas so/ /de nyid rnam par spros pa'i gnas skabs ni lnga'o/ /rigs lnga ni me long lta bu la sogs pa'i dbye bas so/ /rigs gsum ni sku la sogs pa'i dbye bas so/ /ye shes lnga rnams nyid las dang chos dang chen po dang dam tshig gi phyag rgya'i dbye bas brgya'o/ /dbye ba 'di yang mtshon pa tsam ste rnam pa 'dis rigs mdza' yas pa'i phyir ro/ /de brjod pa/ ye shes lnga rnams phyag rgya yis/ /rigs brgya lnga dang gsum gyis so/ /zhes so/ /de las gzhan pa yang rnam pa 'di ltar rgyu dang 'bras bu dang rten rnams la ji lta ji ltar nang du 'dus so/ /zhes pa'i don to/ /de dang de yang rtsa ba'i rgyud du bshad do/ /rgyud phyi ma'i don yang gsungs pa/ byang chub rdo rje bcas ces pa la sogs pa'o/ /le'u bcu bdun po rnams su byang chub rdo rje 'dzin pa'i tshig gis spyir gsungs pa gang de bzhin gshegs pa rnams kyis de nyid rgyud phyi mar bzhed de/ ston pa pos don ji ltar brjod pa de bzhin du bshad pa'i tshul nyid rgyud phyi mar bzhed do/ /ces pa'i don to/ /de nyid rnam pa dru ru bshad/ /ces pa la sogs pa dri ba bzhi po de rnams kyi lan ni go rims ji lta bar 'di rnams yin te don gzhan pa ni rten nas su/ don de nyid ni bzlas pa yin zhes pas 'dir 'dri ba bzhi'i sgo nas byung bas zlos pa ma yin no/ /de ni rnam pa lnga ru bshad ces pa ni bshad zin to/ /lhag pa'i lha nyid ni rigs gcig gi rang bzhin kun tu bzang po ste rigs brgyar gsungs so/ /byang chub sems zhes gang la bgyi zhes pa'i dris pa'i lan ni thog ma tha med zhi ba zhes pa la sogs pa ste thog ma dang tha ma dag gang la med pa de la de skad ces bya'o/ de nyid kyi phyir na zhi ba ste/ rnam par dkrugs pa thams cad dang bral bas so/ /dngos po ni brtags pa'i ngo bo bzung ba dang 'dzin par sgro brtags pa'o/ /dngos med ni yang dag ba ma yin pa'i rnam par rtog pa dang yongs su grub pa dag la rnam pa thams cad du bskur pa 'debs pa ste/ de dag zad pa gnyis su med pa'i ye shes gang la yin pa de bskad ces bya'o/ /de nyid kyi phyir na gtso bo ni byang chub gyi sems te de bzhin gshegs pa thams cad bskyed pa'i sa bon du gyur pa'i phyir ro/ stong pa nyid ni gzung ba dang 'dzin pa'i rnam pa dang bral ba nyid do/ /snying rje ni sems can thams cad kyi sdug bsngal skyob pa'o/ /de dag phye ba ni ro gcig tu gyur pa'i rang bzhin te byang chub kyi bdag nyid sems brjod do/ /mi phyed pa zhes pa'i tshig la yang don 'di nyid do/ /de bzhin rig pa'i skyes bu ci zhes pa ni dri ba yin la lan la sku gsung thugs kyi rdo rje yis mi phyed pa yin te chos nyid kyis gsum po rnams gcig gi rang bzhin yin pa'i phyir ro/ /phyed pa ni dngos po nyid kyi ldog pas byas pas tha dad ba'i rnam pa yin te don dam par ni ma yin no/ /rig pa ni rang gi snang ba shes pa dang lhan cig ldan pa'o/ /ro gcig tu gyur pa la rig pa'i skyes bu zhes brjod do/ /badzra d+h+rika ces pa ni ci la bgyi zhes pa ni dris pa yin la lan la rgyu lnga zhes te rnam par dag pa'i rang bzhin phung po lnga ni rgyu'o/ /phung po gnas gyur pa'i sgo nas ye shes lnga bskyod pa'i rgyu nyid 'di yin no/ /rig pa lnga la ye shes lnga ni rig pa'o/ /de gnyis pa 'di dag rtse lnga pa'i rdo rjer brjod do/ /dzi na d+h+rika de 'dzin pa'i phyir na d+h+rika go /de'i mjug bsdu ba gsungs pa/ rnam par shes pa ni rnam par shes pa'i phung po yin la rdo rje 'dzin pa ni mi bskyod pa'o/ /slar yang de nyid bstan par byed pa ni yid ces pa'o/ /de bzhin dzi na dzika ni gang zhes pa ni dris pa yin te lan la yod ba ni grub pa ste/ byis pas yongs su brtags pa bzung ba dang 'dzin pa'i ngo bor sgro btags pa'o/ /med pa ni dngos po thams cad med ces bskur pa btab pa'o/ /de dag gi dbus ma ni dbus so/ /byis pas brtags pa 'di shin tu med pa dag las 'das pa yin te cha shas med pa'i phyir ro/ /de ji ltar zhe na brjod pa/ 'byung dang 'byung las gyur pa'i rnam pa las byung ba ni skyes pa yin la 'di lta bu'i mtshan nyid ni lus yin te sems can thams cad kyi lus so/ /dzi na dzika 'di ni rnam par snang mdzad yin te/ rgyal ba ni nyon mongs pa'i dgra rnams las yin la de las rgyal ba ni gnyis su med pa'i ye shes so/ /de la ratna d+h+rika ni gang zhes pa ni dri? ba yin la lan ni/ sems ni rin po che zhes bya ba ste de bzhin gshegs pa nyid la sogs pa'i phun sum tshogs pa'i sa bon du gyur pa'i phyir ro/ /sems can thams cad rjes su 'dzin pa'i don rnams kyi mtshan nyid kyis de dang de'i rnam pas yid bzhin gyi nor bu bzhin du 'di byung bas so/ /'khrul nas phyi rol gyi don du 'gyur ro zhes pa ma yin pa nyid do/ /zhes dgag pa gsungs pa/ phyi rol gyi don med pas tshor ba po ste 'dzin pa po med par 'gyur te/ gzung ba med pas de 'dzin med ces pa'i rig pas so/ /rang gis rig pas na tshor ba yin la tshor ba rnam par dag pa'i ngo bo ni rin chen 'byung ldan yin te/ ratna d+h+rika ni yid kyi shes pa'o/ /de bzhin A ro lika ni ce zhes pa ni dris pa yin la lan ni/ mtshan gzhi mtshan nyid dngos po yis zhes te mtshan gzhi ni sngon po la sogs pa'o/ /mtshan nyid ni rang dang spyi te kun la ni ma lus par ste de'i ngo bos brtags pa'i phyir ro/ /rnam pa kun gyis te phyi rol dang nang gi ngo bos so// dga' ba ni gnyis su med pa nyid du spyod pa'o/ /de 'di lta bur gyur pa ni mtshan nyid dang mtshan gzhi yang yin te 'du shes kyi phung po rnam par dag pa'i ngo bo snang ba mdza' yas ni A ro li ko/ /pradz+nyA d+h+rika ces gang la bgyi zhes pa ni dri ba yin la lan la rab gyi mthar phyin pa'i rnam par shes pa gang yin pa de ni shes rab yin la/ chos rnam par 'byed pa'i ngo bo zhes sems so/ /'du byed ni 'du byed kyi phung po yin la de'i rang bzhin gyi sems dpar 'dzin pa'o/ /pradz+nyA d+h+rika ni don yod grub pa'o/ /'dis rnam par shes pa dang gzugs dang tshor ba dang 'du shes dang 'du byed kyi phung po rnam par dag pa'i rang bzhin rnams ni de bzhin gshegs pa rnams su bshad do/ /rigs 'dir de bzhin gang zhig zhes pa'i dris pa la lan ni rigs ni rgyud de yin te de yang thog ma'i rang bzhin las/ gcig pa nyid ni rigs yin te gang brjod pa de ston pa ni mi 'jig skye ba med gang yin mgon po zhes so/ /gang zhes pa ni byang chub kyi sems yin te de bzhin gshegs pa thams cad bskyed pa po yin pa'i phyir rdo rje sems dpa' o/ /de rab tu bshad do/ /'dis ni rnam par ma spros pa'i ngo bo gcig la rigs su bshad do/ /da ni zhe sdang gti mug zhes pa la sogs pa'i tshigs rnams 'chad pas gsungs pa rnam shes zhes pa la sogs pa'o/ /rnam par shes pa ni so sor rnam par shes pa ste de'i tshogs so/ /de nyid zhe sdang yin par bshad ste zhe sdang zhes brjod pa'i phyir ro/ /ci'i phyir zhe na/ rgyu dang rigs pa zhes sngar brjod pa'i gnyis po ste/ gnyis po dag gis gzung ba dang 'dzin pa nyid la sdang ba ni zhe sdang gi bdag nyid yin pa'i phyir ro/ /gzugs ni gzugs kyi phung po ste gti mug ces byar bshad pa ni brjod pa'o/ /ci'i phyir zhe na/ gsungs pa/ bems po bcings pa'i rang bzhin las te mi gsal ba'i bdag nyid yin pas so/ /tshor ba ni tshor ba'i phung po'o/ /dregs pa ni dga' ba'o/ /rlom pa ni sems khengs pa ste/ de'i ming can no/ /ci'i rang bzhin gyis shes na bdag tu rlom pa'i ngo bos so/ /'du shes ni mtshan mar 'dzin pa'i rang bzhin yin te 'du shes kyi phung po'o/ /de nyid yang dag par chags pa'i bdag nyid ces te yang dag par chags pa'i rang bzhin no/ /ci'i phyir zhe na/ dngos po la mngon par chags pa yin pa'i phyir ro/ /'du byed ni 'du byed kyi phung po yin la de yang phrag dog ste/ gzhan gyi phun sum tshogs pa'i rtogs pa rnyed nas/ de nyid kyis drangs pa'i bdag nyid kyi ngo bos mi bzod pa'o/ /zhe sdang la sogs pa 'di rnams kyi rang bzhin yang byang chub kyi sems nyid do/ /de yang thams cad du khams gsum du byung ba de'i bdag nyid du gnas pa ste/ chos kyi dbyings kyi ngo bo yin pa'i phyir ro/ /'dis ni zhe sdang gti mug de bzhin chags/ /de bzhin nor bu dam tshig ste/ /rigs lngar gtogs pa 'di rnams kyis/ /zhes pa bshad do/ /'dod pa ni rnam pa lnga ste de yang sems so/ /'dis ni 'dod dang thar pa rab bsgrub pa'o zhes pa yang ma dris pa nyid bshad do/ /ji lta bur gyur pa yin zhe na/ 'dod chags zhe sdang rmongs ldan pa ste ldan pa'o/ /dam tshig 'di 'da' bar bya ba ma yin pa'o/ /sna tshogs 'dra ba zhes pa ni dngos po thams cad kyi rang bzhin gyi bdag nyid rdo rje 'dzin pa chen po dang 'dra pa'o/ mngon par phyogs pa ni ring po ma yin pa'o/ /las las skyes pa ni bsgoms pa las byung ba'i las las skyes pa ste 'bras bu'o/ /da ni lha mo rnams kyi 'byin pa'i rnam par dag pa gsungs pa/ gti mug ces pa gang la bgyi zhes pa ni dris pa yin te lan la rang bzhin gyis gnyis su med pa'i ye shes kyi rang bzhin gyi chos rnams la gang la nga rgyal byed pa de rmongs zhes bshad do/ /zhe sdang zhes 'dir gang la bgyi ces ba ni dris pa yin te/ lan la phan tshun du 'byer ba ni phan tshun du gnod pas so/ / gnyis su med pa'i ye shes de la zhe sdang zhes bya bar bshad do/ /chags pa zhes ni ci la bgyi ces pa ni dris pa yin la/ lan la 'dod chags kyi mtshan nyid ni zhen pa yin te yul lnga po rnams la'o/ /rdo rje zhes 'dir ci la brjod ces pa dris pa yin la/ lan ni gang ye shes 'di ni rdo rje zhes bshad do/ /dA ti zhes 'dir ci la brjod/ ces pa ni dris pa yin la/ lan ni bzhi po 'di rnams kyi dga' ba ni mchog dga' o/ /de'i shin tu longs spyod pa ni bdag nyid kyi dbang du byed pa'o/ /phun sum tshogs pa ji ltar lags/ zhes pa ni dris pa yin la/ lan ni phun sum tshogs pa yin la/ bud med ni gnyis su med pa'i shes rab yin te de'i bdag nyid kyi bde ba de yang mchog go /'dis ni de bzhin gshegs pa thams cad kyi btsun mo'i mchog phun sum tshogs pa'o// zhes pa bshad do/ /da ni ma lus par de rnams dga' ba gang rnams la gnas brjod par byed de/ gti mug la ni spyan no/ /zhe sdang la ni mA ma kI'o/ /'dod chags la gos dkar mo'o/ /rdo rje la sgrol ma'o/ /rtag pa ni skad cig ma rigs mthun pa brgyud pa'o/ /dga' ba ni rang rig pa bde ba chen po'i mtshan nyid kyis gnas pa'o/ /'di ni sangs rgyas rnams kyi thabs yin te de nyid kyi phyir mi phyed pa'i theg pa'o/ /sgo skyong 'don pa'i rnam par dag pa gsungs pa/ ya mAn+ta krita don ni gang zhes pa ni dris pa yin te/ lan la mi 'jigs pa'i bdag nyid ni mi 'jigs pa'i rang bzhin la chos rnams ni phyi dang nang gi bdag nyid do/ /'dis ni dngos po las tha dad pa'i 'jig pa gsal ba yin no/ /ji ltar zhe na/ brjod pa/ ma skyes pa'i ngo bo nyid ces pa la don 'di yin te/ gzugs la sogs pa'i dngos po rang bzhin nyid kyis gdod nas ma skyes pa yin la shes pa 'ba' zhig nyid yin te chos rnams ni ma yin no/ /'di nyid dam tshig ste dngos po kun gyi de kho na nyid do/ /rgyu de nyid kyis phyi rol gyi don du zhen pa'i mtshan nyid kyi gshin rje mthar byas pa'o/ /gzhan dag ni gshin rje'i phyogs kyi bdag po mthar byas pa/ zhes 'chad do/ /de ni 'thad pa ma yin te de lung gang la'ang ma mthong bas so/ /de bzhin pradz+nyAn+ta krita ci zhes pa ni dris pa yin te/ lan la rnam shes ma yin pa ni phyi rol gyi don mi shes pa yin la de'i bdag nyid yin te de'i rang bzhin no/ /ji ltar zhe na gsungs pa/ don dam par chos kyi dbyings kyi bdag nyid kyi rig pa yin te/ de'i rnam par dag pa ni mnyam pa nyid yin la de nyid dam tshig ste de kho na nyid do / sems kun ni rnam par shes pa ni brgyad rnams so/ /shes rab des brtags pa'i so sor rnam par rig pa'i gshin rje mthar byas pa'o/ /rgyal ba ni nyon mongs pa las rgyal ba'o/ /padmAn+ta krita ji ltar lags zhes pa na dris pa yin te/ lan la brjod du med pa'i rang bzhin rnams so/ gang rnams zhe na/ ches rnams te rjod par byed pa rnams ni mi srid pas so/ /gang gis zhe na/ dngos po rnams yod pa ma yin pa'o/ /ming ni gzugs can ma yin pa'i phung po bzhi'o/ / gzugs ni gzugs kyi phung po ste de'i mtshan nyid do/ /blo ni blo gros so/ /chos rnams kun gyi dam tshig nyid do/ /des na pad+ma so sor rtog pa'i ye shes kyis brjod bya rjod byed du brtags pa mthar byas pa'o/ /de bzhin big+h+nAn+ta krita ci zhes pa ni dris pa yin te/ lan la mi rtog bdag nyid chos rnams yin te 'gal ba'i rnam par rtog pa med pa'i phyir ro/ /ji ltar zhe na gsungs pa/ rang bzhin gyi dngos so/ /zhi ba'i dngos po ni nyon mongs pa thams cad rnam par dag pa'i ngo bo sogs rdo rje kun ni rnam par rtog pa rnams te 'di ni dam tshig go / des bgegs rnams mthar byas pa ste/ bgegs ni rnam par rtog pa tsam la rag las pa'i phyir ro/ /da ni ji skad du bshad pa'i gshin rje gshed la sogs pa bzhi po rnams dris pa'i ched du brjod pa gsungs pa mi 'jigs pa ni gshin rje gshed do/ /rnam par mi shes pa ni gzhan gyis mi thub pa'o/ /brjod du med pa rta mgrin no/ /rtog pa bral ba ni bdud rtsi 'khyil pa'o/ /de ni rten dang brten pa'i dkyil 'khor 'di dag thams cad kyi sangs rgyas rnams kyi byang chub ni ye shes so/ /'di shes pas bde ba mchog tu dga' ba'i ngo bo thob par 'gyur ro/ /slar yang sgo skyong rnams kyi rnam par dag pa gsungs pa/ gti mug ni mi shes pa'o/ /de'i rnam par dag pa ni gti mug chen po'i bdag nyid rnam par snang mdzad kyi gzugs kyis bdag nyid kyi dbang du byas pa'i nye bar longs spyod ba'o/ /des gti mug zad pa ni gti mug gi zad pa ste/ rnam par snang mdzad de yang gshin rje mthar byed do/ /phung po mthar byed pa ni phung po'i bdud mthar byed pa'o/ /nges shes bya ste/ shes bya'i sgrib pa yang mthar byed par 'gyur ro/ /nyes pa zhe sdang yin la de'i rnam par dag pa ni zhe sdang chen po ste mi bskyod pa'i ngo bos nye bar longs spyod pa'o/ /nyes pa zad pa ni zhe sdang zang pa'i rnam par dag pa ste/ shes rab mthar byed do/ /des na bsags pa'i don gyis na sems te mthar byed pa'o/ /nyon mongs pa ni bdud dang nyon mongs pa'i sgrib pa yang de nyid kyis mthar byas pa'o/ /'dod chags ni nyon mongs pa te 'dod chags de rnam par dag pa'i ngo bo ni 'od dpag tu med pa nyid kyis so/ /'dod chags zad pa'i rnam par dag pa ni pad+ma mthar byed do/ /des ni tshig mthar byed par 'gyur ro/ /snyoms par 'jug pa ni nyon mongs pa'i 'dod chags kyi mtshan nyid mthar byas pa'i rnam par dag pa rdzogs par byed pa'o/ /'chi bdag gi bdud dang skye ba'i sgrib pa yang mthar byas par 'gyur ba blta bar bya'o/ /nyon mongs pa kun ni 'dod chags la sogs pa rnams so/ /rdo rje thams cad ni dbyer mi phyed pa'i rnam par rtog pa'i phung po rnams so/ /sgrib pa kun ni shes bya la sogs pa rnams te shes pa de la zad pa ni bgegs rnams mthar byas pa'o/ /lha'i bu'i bdud dang blta ba mchog tu 'dzin pa 'dir shes par bya'o/ /da ni thams cad kyi nyon mongs pa'i rdo rje'i sgrib pa rnam par ni las rnam par dag pa gsungs pa/ las thams cad ces pa ni 'jig rten pa dang 'jig rten las 'das pa'i lus dang ngag dang yid kyi bya ba'i mtshan nyid rnam par dag cing yongs su dag par 'gyur ro/ /las rnams thams cad rnam dag pas/ de las skyes pa'i 'bras bu rnam par dag par 'gyur ro/ /da ni me long lta bu la sogs pa'i rim pas de bzhin gshegs pa lnga rnams kyi ji ltar srid pa rnam par dag pa skye ba gsungs pa/ 'dzin dang zhes pa la sogs pa la 'dzin pa ni 'gro ba rjes su 'dzin pa ste/ bya ba nan tan gyi ye shes kyi rang bzhin no/ /chags pa ni 'gro ba nyid so sor kun tu rtog pa'i ngo bo'o/ /rnam pa ni rnam par byed pa ste me long lta bu'i ye shes kyi bdag nyid do/ /mi g.yo ba ni tshad mas grub pa'i phyir te mnyam pa nyid kyi ye shes so/ /rgyu nyid ni kun tu bzang po ste ye shes lnga'i bdag nyid do/ /'bras bu nyid ni chos kyi dbyings rnam par dag pa'o/ /drug po 'di rnams kyis sems can rnam pa dag pa'i ye shes su 'byung ste kun tu bzang po nyid thob po/ /de brjod pa sems can don dang bdag dang rnam rtog zhes pa la sogs pa'o/ /'dzin pa ni gzugs la sogs pa'i yul 'dzin pa'o/ /chags pa ni de la zhen pa'o/ /rnam pa ni dbang po dang don nye ba las skyes pa'i kun gzhi rnam par shes pa'o/ /mi g.yo ba ni de brtan pa'i dngos po'o/ /rgyu nyid ces pa ni thabs kyi mtshan nyid do/ /'bras bu nyid ni shes rab dang thabs gnyis su med cing lhag pa med pa'i 'bras bu'o/ / drug rnams zhes pa ni brjod ma thag pa rnams kyis so/ /yang na drug rnams shes pa ni mig gi rnam par shes pa la sogs pa rnams te/ thugs las byung zhes gzhan dag go /gzhan dag gzhan du 'chad de ma brjod do/ /rnam par dag pa'i sgo nas dkyil 'khor pa sgo skyong gi khro bo rnams bshad nas bsrung ba'i 'khor lo la sogs pa dang las kyi tshogs la nye bar 'khor ba'i khro bo rnams tha snyad kyi don du ming gzhan gyis ston to/ /'dod pa'i rgyal po la sogs pa gang rnams ni dbyug pa sngon po la sogs pa de rnams te drug go / ming ji lta bu zhe na/ khro bo'i dbang po rnams so/ /rgyud 'dir de rnams phung po la sogs par ma 'dus pas dkyil 'khor ba ma yin pa nyid kyis rnam par dag par brjod do/ / dam tshig rdo rje la sogs pa rnams ni sgrib pa thams cad rnam par sel ba la sogs pa rnams te/ drug po de rnams kyang mig la sogs pa de rnam par dag pa'i ngo bo 'byung ba las gyur par yod pa rig pa'i rgyal po zhes bshad pa rnams so/ sa la sogs pa lnga la rnam pa lnga po rnams te sa la sogs pa rnam par dag pa'i rang bzhin spyan la sogs pa dang nam mkha' rnam par dag par gyur pa chos kyi 'byung gnas kyi phyag rgya dang bcas pa lnga ste 'byung ba zhes bshad do/ /gzugs rdo rje la sogs pa drug ni gzugs rdo rje la sogs pa'i phyi'i skye mched rnam par dag pa'i ngo bo drug po ni 'byung ba las gyur pa ste/ rdo rje'i bdag po zhes bshad do/ /gzugs rdo rje la sogs pa drug po 'di rnams gang gis 'byin zhe na/ /gsungs pa/ bdag nyid chen po ni rdo rje 'dzin pa chen po'i'o/ /sku gsung thugs kyi rdo rje las/ /zhes pa ni rdo rje la sogs pa'i rang bzhin yi ge gsum pos so/ /byung ba ni 'byin par byed pa'o/ /de brjod pa/ de nyid gsum gyis gzugs kyi rdo rje la sogs pa lha mo rnams ni sku la sogs 'dra ba zhes so/ /de nyid kyi phyir 'di dag nyid dkyil 'khor ba rnams te 'dod pa rgyal po la sogs pa rnams ni ma yin no zhes dgongs so/ /da ni kun tu spyod pas gang zhig lags zhes pa ni dris pa yin te/ lan gsungs pa/ thabs dang shes rab zhes pa la sogs pa la ji skad du bshad pa'i shes rab dang thabs kyi ting nge 'dzin las byung ba grub pa'i dkyil 'khor gyi rnam pa skad cig tsam gyis rdzogs pa'i rim pa phung po dang khams dang skye mched kyi bdag nyid kyi lus te sku ru nges par byas nas sbyor ba ni gnyis su med pa'i sbyor bas so/ /yid skyob pa dang ldan pas sngags dang ldan pa'o/ /thams cad dag par mos pa yis/ /'jigs pa thams cad spangs nas de mi g.yo ba'i sems kyi seng+ge 'dra bar spyod do/ 'dir rnal 'byor pa de ci mtho ris dang thar pa'i bar du spyod pa phyin ci log las byung ba nyon mongs pa'i bdag nyid srog gcod pa la sogs pa'i bya ba la sogs pa yod dam zhe na/ gsungs pa/ 'di la mi bya ci yang med/ /ces pa la sogs p a la rang las tha mi dad pa'i bstan pa dang g.yo ba la sogs par snang ba so so'i rdul phra rab bde ba chen po'i dkyil 'khor gyi 'khor lo'i rang bzhin brjod ma thag pa yin la mi bya ba'i dngos po de la ji ltar yod par 'gyur te med pa nyid do zhes dgongs/ /le'u lnga pa la sogs par yang dag par rdzogs pa'i byang chub kyi grogs su gyur pas dam tshig dang sdom pa'i ngo bo'i bya ba slar yang yod pa nyid do/ /'di nyid gang las zhe na/ /gang gi phyir mi mnyam zhes ste mi mnyam pa ni rdo rje sems dpa' bstan pa dang g.yo ba'i bdag nyid do/ /de bzhag cing sbyor ba gang du rnal 'byor yin pa de ni zhes tshig rnam par sbyar ro/ /des ni rtag tu mnyam par bzhag pa nyid do/ /de brjod pa/ de ltar sdig pa ma lus spangs pa yi// sems ni nag po'i las su ga la 'gyur/ /zhes so/ /slar yang rjes su mthun pa'i 'gro ba'i don zhes pa la sogs pa'o/ /sngags spyod ji ltar shes par bgyi zhes pa ni dris pa yin te/ lan la rkyen rnyed nas gang skye ba'o/ /ci nyid nas zhe na/ dbang po dang ni yul rnams kyang ngo/ /ci skye bar 'gyur zhe na yid do/ /de de bzhin du spyod pas na yin te rtogs pa'i phyir ro/ /'dis ni man bshad do/ /yi ge tra ni ngan song dang 'khor ba las skyob pa'i don gyis so/ /'dis ni de kho na nyid la sems dpa' i phyir dang skyob pa'i yang phyir sngags bshad do/ /da ni de'i bdag nyid gcig pa'i spyod pa ston te 'jigs pa ni 'jig rten yin pa de'i spyod pa ni thos pa dang dran par brjod pa'o/ /de las grol ba ni rang gi lung dang mi 'gal ba'i dam tshig dang sdom pa te/ gang dam tshig dang sdom pa'i le'ur gsungs pa yin la de skyang ba zhes dgongs so/ /rdo rje kun ni sku rdo rje la sogs pa rnams so/ /de ni sngags kyi bdag nyid kyi spyod pa'o/ /'dir bzlas ji ltar shes par gyi/ zhes pa ni dris pa yin la lan la rang rang gi ni sku la sogs pa'i rang bzhin no/ /rnam par dpyad pa ni bla ma'i man ngag las so/ /gang gis zhe na yid kyis so/ /sku la sogs pa'i snying gar bzlas pa spro bar byed pa yin zhes pa dang 'brel to/ /spro bar byed pa ni skyed pa yin la bsdus pa ni sdus par byed par ji ltar 'gyur ba ste/ de bzhin du brjod pa ni 'byung ba dang rdub ba dag ma sdams par gsal por ro/ /dbye ba ni rim dang cig car gyi dbye bas so/ /sna tshogs rdo rje'i bdag nyid ni rigs sna tshogs pa'i rang bzhin gyi sangs rgyas rnams so/ /ye shes sa bon ni ye shes sems dpa' i thugs kar gnas pa'i sa bon las so/ /byang chub bdag med ni rang bzhin med pa'o/ /de nyid sa bon te rgyu'o/ /des rang bzhin med pa rnams la bzung bar bya ste sngags la zhugs pas thim par byas nas brtan par bya'o/ /spro ba bstan par bzhed nas gsungs pa/ spro bar bya'o zhes pa ni sna tshogs bzhin du sna tshogs te/ rnam pa du ma'i sku la sogs pa'i dkyil 'khor du bsdus pa'o/ /dus gsum sa bon ni dus gsum gyi sku la sogs pa'i rang bzhin gyi yi ge gsum gyi nang du chud par byas pa'i ye shes sems dpa' i sa bon bzlas par bya'o/ /'di skad brjod par 'gyur te/ sku la sogs pa'i thugs ka na gnas pa dang ye shes sems dpa' i thugs ka'i zla ba la gnas pa de dang de'i sa bon brjod pa ni dbugs dbyung bas spros te mchod nas dbugs rdub pas bsdus la de'i sa bon la zhugs nas gcig tu byas te/ bstan par bsgom par mos pa byas nas bzlas pa bya'o/ /yi ge'i don 'ba' zhig bshad do/ /'di'i don bla ma'i man ngag las shes par bya'o/ /de brjod pa/ yang na bzlas la rtse gcig sems nyid ni zhen pa la sogs pa'o/ /de nyid gsal por byed pa ni bzlas pa ni zlos pa ste brjod par bya bas dang rjod par byed pa dang bral ba'o/ /de dang 'dra ba ni ngag gi rnam par rig byed kyi rang bzhin thams cad ste de nyid sngags so/ /gang 'di yang bzlas par smra bar grags pa yin te/ de kho na nyid chos nyid yin la bskul ba ni smra bar byed pa ste/ gsal bar byed pa yin zhing rjod par byed pa yin te/ brjod pa dang bral ba la sogs pa mngon du byas nas bzlos pa'o/ /de skad brjod pa/ rnam pa de 'dra'i sems ldan lus dang ni zhes pa la sogs pa'o/ /rgyas btab pa zhes gang la bshad ces pa ni dras pa yin te/ lan la ji ltar zhes pa ni 'bral ba 'khrugs pa yin te ji ltar rang gi ting nge 'dzin rang gi bdag po'i lha'i yin pa de bzhin du ye shes sems dpa' i bsgom pa'o/ /zhes pa'i don to/ rang gi ting nge 'dzin 'ba' zhig ni ma yin te/ rang gi phyung ba'i dkyil 'khor pa dang sku la sogs pa'i gsang ba la sogs pa rnams la yang ye shes sems dpa' bsgom pa dang dbang bskur ba la sogs pa de bzhin du bya'o zhes pa ni de rnams zhes pa la sogs pa'o/ /spyi bor dbang bskur ba ni thub pa'i mchog gi 'od zer las byung ba'i rig ma rnams kyis sku la sogs pa rnams dang chen po'i bsnyan pa la sogs pa'i dkyil 'khor pa rnams dang thig le dang phra mo dang sngags kyis bzlas pas spros pa de rnams la yang bsgom par bya'o/ /de bzhin du gzugs rdo rje la sogs pa'i mchod pa yang bsgom par bya'o/ /brjod pa/ lhag par mos pas rgyu mthun sogs/ /thig le phra mo gsang gsum 'byung/ /chu du la sogs kyis phye ltar/ /rnal 'byor bsnyen sogs de bzhin bsgom zhes so/ /rig pa zhes pa ni yongs su khyab pa'o/ /rig pa ni snang ba'i ngo bo'i rang 'od dang lhan cig tu sbyor ba yod pa yin te dbang po gnyis kyis snyoms par 'jug pa dang zhal gsum phyag drug gi rnam pas so/ /gang gi zhe na/ rdo rje 'chang ba gang yin pa ste/ rnam pa sna tshogs pa'i lha'i gzugs de'i 'o/ /'di gi sgra las rig pa yang ngo/ / longs spyod bzhin zhes bya ba ni las dang chos dang chen po dang dam tshig gi bdag nyid phyag rgya bzhir bsgom par bya'o/ /de nyid ston pa bdag byin brlab sogs ni ye shes sems dpas byin gyis brlab pa la sogs pa dang/ dam tshig gi phyag rgya la sogs pa'i ngo bo rnams kyis zhes pa'i don to/ /gzhan dag ni bdag byin gyis brlab pa/ aoM d+harmA d+hA tu swa b+hA wa at+ma konyahaM zhes pas byin gyis brlab pa'o/ /sogs pa'i sgras ni mig la sogs pa dang thugs la sogs pa byin gyis brlab pa'o/ /'di mtshon par byed pa yin pa'i phyir chu? du dang 'bring dang chen po'i bsnyen pa la sogs pa'i yan lag bzhi dang gtso bo'i dkyil 'khor du gyur pa dang spro ba yang blta bar bya'o zhes 'chad do/ /lhag par mos pa rgyu mthun sogs/ /zhes pa la sogs pa yang 'di nyid du sbyor bar byed do/ /rgyud gzhan du brjod pa de bzhin gshegs pa lngas dbu rgyan par bshad pa dag pa gsungs pa/ dpa' bo zhes pa la sogs pa'o/ /re re zhes pa ni dkyil 'khor gyi bdag po rnams so/ /rdo rje can kun ni dkyil 'khor pa rnams te na re re la/ rang gi rigs kyi bdag mos spyi bo na bzhugs pa ni dbang bskur ba'o/ /snying po phyag rgya zhes pa ni snying gar phyag rgya ste mtshan ma yin la de la sngags te/ de'i 'od zer gyis bskul ba'i de bzhin gshegs pa'i 'od zer las byung ba'i spyan la sogs pa rnams kyis dbang bskur ba'i rjes la rang gi rigs kyi bdag po bsgom pa ni phyag rgya ste des rgyas btab pa'o/ /de nyid gsungs pa/ rang rig rim gyis rgyas btab pa zhes pa'o/ /dkyil 'khor pa rnams la rgyas btab pa gsungs nas mi bskyod pa dang/ kun tu bzang po dag gis gsungs pa/ 'bras bu mi bskyod pas rgyu kun tu bzang po la yin te/ de bzhin gshegs pa thams cad bskyed pa'i sa bon du gyur pa la'o/ /rgyas btab pa ni dbang bskur ba'o/ /'bras bu ni mi bskyod pa yin la rgyu kun tu bzang pos so/ /ji ltar bya zhe na/ bsgom par bya'o/ /slar yang gzhan du na dngos grub ni bskal pa bye ba la dbyung bar mi 'gyur ro/ /de brjod pa/ sangs rgyas cod pan zhes pa la sogs pa dang ye shes sems thugs snying ? kyis zhes pa la sogs pa yang ngo/ /chos 'byung bsgom pa ji ltar lags zhes pa ni dris pa yin te/ lan la longs spyod bzhin bshad ma thag pa nyid yin la de rnams kyang yang dag par ldan pa'o/ /rigs pa'i skyes bu ni bshad zin te de nyid rdo rje can no/ /de'i sku gsung thugs kyi dbye ba yis/ /rnam par dag pa zur gsum rnams la ni chos kyi 'byung gnas kyi rgyu mtshan du bsgom par bya'o/ /gang du zhe na/ gsungs pa/ rtsibs bcu zhes bya ba la sogs pa ste/ rtsibs bcus mtshon pa'i 'khor lo'o/ /kun nas ser po ni sems gso ba'i mtshan nyid bgegs rengs par byed pa'i dbang du byas pas so/ /de'i dbus su chos kyi 'byung gnas bsgom par bya ste/ rdo rje hUM mdzad la sogs pa sgra ji bzhin shes pa'i ye shes kyi rnam par dag pa'i rang bzhin ni 'khor lo'i lte bar bsgoms pa yongs su gyur pa las so/ /rtsibs thams cad du ci bsgom par bya zhe na/ rtse bas kun tu ni zhes pa la sogs pa ste/ phyogs dang phyogs mtshams dang steng dang 'og tu gnas pa rnams la'o/ /khro bo bcu rnams ni gshin rje mthar byed dang/ shes rab mthar byed dang/ pad+ma mthar byed dang/ bgegs mthar byed rnams phyogs su ste/ go rim ji lta bar sdug bsngal shes pa dang/ kun 'byung shes pa dang 'gog pa shes pa dang lam shes pa rnam par dag pa'i ngo bo rnams so/ /mtshams rnams su 'dod pa'i rgyal po dang dbyig pa sngon po dang stobs po che dang mi g.yo ba rnams te/ zad pa shes pa dang mi skye ba shes pa dang chos shes pa dang rjes su shes pa'i rnam par dag pa'i bdag nyid rnams so/ /steng dang 'og tu gtsug tor 'khor los sgyur ba dang gnod mdzes rgyal po dag ste kun rdzob shes pa dang sbyangs pa shes pa dang rnam par dag pa'i bdag nyid dag go /'di ltar 'phags pa brgyad stong pa la sogs pa'i shes rab kyi pha rol tu phyin pa la sogs pa shin tu rgyas pa'i mdo sder yongs su brjod pa'o/ /shes pa bcu'i bdag nyid las byung ba'i khro bo rnams bsgom par bya'o zhes 'brel to/ /yang gzhan dag ni me long lta bu'i ye shes la sogs pa lnga dang/ rnam par byed pa'i phung po de rgyur gyur pas ye shes brtags nas brjod do ces 'dir 'chad do/ /de la zhes pa la chos 'byung ba bsgom pa'i don du dang po bsrung ba'i 'khor lo yongs su gyur pa las rdo rje'i rang bzhin gyi sa gzhi bsgoms te/ de nas kun tu bzang po yongs su gyur pa las chos kyi 'byung gnas bsgom par bya'o/ /dbus zhes pa la 'di'i dgos pa ni man ngag las shes gzhan dag go /drag po'i sgrub pa la sogs pa'i dus su bsgrub byar gyur pa'i bcom ldan 'das nam mkha' i dbyings kyi chos kyi 'byung gnas la gnas pa lha mo bzhis yongs su bskor ba/ 'dod pa'i yon tan thams cad kyis rol pa rgyun mi 'chad pa mchog tu zag pa med pa'i dga' ba'i bdag nyid bltas te/ dbus zhes pa ni le'u bcu pa las bshad pa'i rim pa de'i snying po bskul ba'i don du rang gi shes rab kyi chos 'byung gi dbus su khro bo rdo rje bsgom par bya'o zhes gzhan dag go / bgegs rnams 'gog pa yin te bsrung ba'i 'khor lo grub cing gsal bar gyur bas so/ /khro bo rnams las rdo rje 'bar ba spro bar bya'o/ /ji ltar zhe na/ sprin te tshogs rnams kyis so/ /'khor lo de yang myur bar 'khor bas mi g.yo ba bzhin du snang ba yin la khro bo rnams ni mi g.yo ba nyid do/ /de lta ba zhes pa ni bshad ma thag pa'o/ /chos 'byung ni stobs bcu la sogs pa'i ye shes 'byung ba'o/ /de nyid kyi phyir rang bzhin gyi dri ma med pa'o/ /zhi ba ni nyon mongs pa thams cad rnam par dag pa'i ngo bo'o/ /sangs rgyas rnams kyi spyan ye shes kyi rang bzhin 'byung ngo/ /de brjod pa hUM mdzad yang na gtsug gtor ram zhes pa la sogs pa'o/ /da ni bsgom pa'i rim pa'i rnam par dbye ba ma dris pa ston par byed de/ rim pa gnyis la yang dag brten/ /zhes pa la rdo rje can gyi ni kun tu bzang po'i yin te rgyud ston pa po'o/ /rim pa gnyis po gang zhe na/ bskyed pa'i rim pa ste/ mngal nas bskyed pa'i rim pa dang/ zla ba dang rdo rje la sogs pa'i mtshan nyid do/ /rdzogs pa'i rim pa ni grub pa'i rim pa'o/ /de brjod yang ye shes skad cig gis rdzogs pa rdzogs pa'i rnal 'byor du brjod do zhes so/ /bskyed pa'i rim pa'i de kho na nyid rgyas par ston par byed do/ /bsgrub pa ni lha'i rnal 'byor ro/ /rtogs pa ni de nyid gnyis su med pa nyid du nges pa'o/ /dam tshig ni bshad zin to/ /sdom pa ni mi dge ba rnams sdom pa'o/ /'di dag thams cad sngar rtsa ba'i rgyud du rgyas par rjod pa 'byed do/ /ji ltar zhe na rim pa ste bskyed pa'i rim pa dang rdzogs pa'i rim pa'i mtshan nyid kyi phye ba'o/ /de bzhin sdom pa ji lta bu zhes pa ni dris pa yin te/ lan la gzugs dang sgra la sogs pa rnams 'dod par byed cing dga' bar byed pa'i phyir 'dod pa rnams so/ /rang bzhin gyis bde ba'i bdag nyid dang sdug bsngal gyi bdag nyid dang/ bde ba yang ma yin sdug bsngal yang ma yin pa'i bdag nyid do/ de rnams rnam par dag par brten par byed pa ni ci byed par 'gyur zhe na gsungs pa/ snying la ste sems la skye bar 'gyur ro/ /rtag pa ni mi 'jig pa yin la skye ba ni rnam par dag pa'o/ /'dod chags zhe sdang gti mug ni nye bar mtshon pa yin pas nga rgyal dang phrag dog kyang zhe sdang du gtogs so/ /'di nyid gsal por gsungs pa/ chags la 'dod chags rang bzhin can zhes pa ni chags pa la de'i rang bzhin snang ba mdza' yas so/ /chags la 'dod chags rang bzhin can zhes bya ba ni nye bar mtshon pa'o/ /de nas zhe sdang la sogs pa ma brjod pa dang rnam par snang mdzad kyang bzung ngo/ /de bzhin du zhe sdang la de'i rang bzhin rdo rje mi bskyod pa'o/ /gti mug tu rnam par snang mdzad do/ /de ltar nga rgyal la rin chen 'byung ldan no/ /phrag dog la dam tshig don yod grub pa'o/ /de'i phyir 'dod pa de rnams ni brjod ma thag pa rnams te bsten par bya'o/ /gang gi phyir dam tshig ni rdo rje sems dpa' dang mtshungs pa yin te 'da' bar bya ba ma yin pa'i phyir ro/ /de bzhin du yang brjod pa/ dka' thub ces bya ba la sogs pa'o/ /zhe sdang gti mug 'dod chags ches/ /sems can don mdzad ji lta bu/ /zhes dris pa'i lam la rnam bcas zhes pa la sogs pa ste/ skyes bu chen po'i mtshan sum cu rtsa gnyis dang dpe byad bzang po brgyad cu dang ldan pa zhal gsum phyag drug gi rnam pa khyad par can longs spyod rdzogs pa'i skus sa bcu'i byang chub sems dpa' i yul de rnam pa ste/ de dang lhan cig pa ni rnam pa dang bcas pa'o/ /rnam pa med pa ni byang chub kyi phyogs dang tshad med pa la sogs pa'i chos kyi rang bzhin so sor bdag nyid rig pa de bzhin gshegs pa'i spyod yul chos kyi sku yin te/ brtags pa'i gzung pa dang 'dzin pa'i rang bzhin bems po'i rnam pa dang bral ba'i phyir ro/ /kun 'gro ni mos pa sna tshogs pa'i gdul bya rnams la dus mtshungs par rnam pa sna tshogs pa'i phan pa rnams sprul pa sna tshogs pa rnams kyis 'khor ji srid pa'i bar du don rgyun ma chad par 'gro ba ma lus pa'i don byed pa ni sprul pa'i sku yin te/ so so'i skye bo lha dang lha ma yin dang bcas pa mi la sogs pa rnams kyi thun mong gi yul nyid kyi mdzad pa rgya che ba'i phyir khyab pa yin pas kun 'gro ba'o/ /de brjod pa/ de'i mdzad pa rgya che ba'i phyir/ khyab pa zhes ni brjod pa yin/ /de nyid zad par mi 'gyur phyir/ /rtag pa zhes ni brjod pa yin zhes so/ /yang rnam pa dang bcas pa ni mchog tu dag pa'i bdag nyid rten dang brten pa'i dkyil 'khor gyi ngo bo rang dang gzhan gyi don 'byung ba'i rgyu chen po'i rab tu snang ba'o/ /rnam pa med pa ni brtags pa'i rnam pa de nyid dang bral ba'i phyir te/ chos kyi dbyings kyi rang bzhin yin pa'i phyir ro/ /zab ba'i phyir dang rnam par rtog pa dang bral ba'i phyir ro/ /de brjod pa/ rnam par mi rtog zab pa dang/ /rgya che ba ni rang bzhin 'byung/ /zab dang rgya chen 'di dag nyid/ /shes rab thabs bdag nyid du bzhed ces/ /de nyid kyi phyir kun tu 'gro ba ste/ /chos kyi dbyings las ma rtogs pa/ /'di ltar chos yi dam yin no/ /zhes pa'i rigs pas so/ /yi ge gsum gyi bdag nyid ni sku gsum gyi bdag nyid thugs la sogs pa gsang ba dbyer med pas byin gyis brlabs pas so/ /byed pa ni dkon mchog gsum la gnod pa byed pa dang mtshams med pa la sogs pa la/ zhugs pa de rnams bzlog pa'i ched du thabs gzhan med pa nyid kyi phyir snying rje chen po'i gzhan dbang du gyur pas bsad nas mi bskyod pa'i gzugs su skyed par byed pa'o/ /'phrog par byed pa ni gti mug la sogs pa'i sbyor bas gzhan gyi bud med rnams 'phrog pa'o/ /dang yig gis brdzun du smra ba yang yin te gdul bya de dang de ser sna la sogs pas nyams pa rnams kyi don bya'o/ /ci byed pas zhes na/ gsungs pa/ spro dang rang gi bzlas pa zhes te/ rang gi ni sngags kyis te/ ji lta ba bzhin du bsgrub bya'i ming nang du bcug pa dang lhan cig pa'i bzlas pa brjod pas so/ /spro ba ni nye bar mtshon pa tsam ste bsdu ba la sogs pa yang brjod ma thag pa bya ba'i rgyu mtshan du bya'o/ /gzhan dag na re byed pa ni spros bas 'gro ba'i don byed pa yin la de rnams nyid de ma thag tu yang dag par sdud pa ni 'phrog pa'o/ /spro ba ni spro bar byed pa nyid do/ /dang yig gis ni zhugs pa dang brtan par gnas pa dag bsdu'o/ /rang gi bzlas pa byed pas zhe sdang la sogs pas sems can gyi don bya'o/ /zhes 'chad do/ /'dir rang gi bdag po'i lha'i ting nge 'dzin gsum gyi sbyor ba la ma bltos par bzlas pa tsam yin nam zhe na gsungs pa/ de ltar zhes pa la sogs pa'o/ /de ltar brjod ma thag pa'i sku gsum gyi rnam par dag pa'i ngo bo thugs rdo rje la sogs pa'i gsang ba byin gyis brlabs pa'o/ /zhe sdang ni mi bskyod pa yin la gti mug ni rnam par snang mdzad do/ /kyang yig gis 'dod chags ni 'od dpag tu med pa yin la nga rgyal ni rin chen 'byung ldan yin zhing don yod grub pa ni phrag dog gi rang bzhin no/ /'di rnams las gang yang rung ba sbyor ba ji lta bar sgrub thabs kyi rim pas bdag nyid bskyed nas so/ /sa gsum yang 'dod pa dang gzugs dang gzugs med pa'i ming can no/ /kun tu gnyis su med pa nyid kyis de'i rang bzhin du byas pa 'am yid las byung ba'i gzugs kyis bskyed de spro ba la sogs pa byed pa ni bzlas pa'o/ /brjod ma thag pa'i dkon mchog la gnod pa byed pa la sogs pa bsad pa dang/ dam tshig bzhin po nyid theg pa dman pa la sogs pa la brten pa'i nyan thos la sogs pa rnams dang rang gi theg pa la brten pa'i dbang ma thob pa rnams la sbas pa ni gsang ba'o/ /de'i yang dag par grub pa ni 'dod pa'i don grub pa'o/ /de nyid kyis dkon mchog gsum la gnod pa byed pa la zhugs pa'i sems can de rnams dus cung zad tsam rmi lam bzhin du brgyal ba'i gnod pa nye bar bstan nas mnar med pa la sogs pa'i dmyal ba chen po'i sdug bsngal nas zlog nas mi bskyod pa'i rnam par bskyed do/ /de'i sangs rgyas kyi zhing du bzhag pa'i don du yang ngo/ /yang na de rnams nyid kyis rang bzhin gyis bdag nyid kyi dngos por gyur pa las mi bskyod pa'i gzugs su gyur pa ni dag pa ste/ don de nyid byed do/ /gang rnams zhe na/ snying rje chen po can dbyer mi byed pa'i shes rab dang thabs gnyis su med pa'i rnal 'byor pa rdo rje can rnams so/ /de bzhin du ma byin par len pa la sogs pas ser sna la sogs pas nyams pa rnams la yang lta bar bya'o/ /de bzhin du thun mong du zhe sdang la sogs pa rnams kyis 'gro ba'i don bya ba rtogs par byas nas rgyas par srog gcod pa la sogs pa so sor rnal 'byor pa gang gis ji ltar bya ba de bzhin du de ltar rtogs par bya bar 'dod nas gsungs pa/ zhe sdang 'khor lo ni zhe sdang rdo rje'i bdag po'i dkyil 'khor ro/ /sems can thams cad bsdud pa'i ngo bo snying rje chen po dri ma med pa bcos ma'i zhe sdang mngon du byas nas de dang rjes su mthun pa'i na bza' dang gdan dang nyams la sogs pa dang ldan pa'o/ /rdo rje drag po rgyab nas de'i rang bzhin las nyams par byed pa le'u dgu par byed pa'i gnod mdzes mang po 'od 'phro ba 'bar ba'i rdo rjes sam rang gi gsang ba'i rdo rjes so/ /lhag ma ni go sla'o/ /rku ba gsungs pa/ bskyed nas zhes te sngar bzhin du'o/ /gti mug gi 'khor lo ni gti mug gi rigs kyi bdag po'i dkyil 'khor ro/ /gti mug gi sbyor pa ni rnam par snang mdzad kyi bdag nyid kyis nor 'phrog pa'i bsam pas so/ /rgyan la sogs pa brku bar bya ste 'phrog go /gti mug gi sems nyid ni rgya mtsho'o/ /lhag ma ni go sla'o/ /gzhan gyi chung ma 'phrog pa gsungs pa/ 'dod chags 'khor lo 'dod chags kyi rigs kyi bdag po'i dkyil 'khor ro/ /'dod pa'i sbyor ba ni 'khyud la sogs pa rnam pa sna tshogs pa'i jag gi khyad par gyi rjes su chags par bya'o/ /de shin tu zhen pa'i yid kyi mngon sum nyid du byas pa ste/ mos pa tsam gyis ni ma yin no/ 'di rnams kyi rnam par dag pa ni dgu par rgyas par gtan la phab pa dang 'dra'o/ /da ni ye shes la dbang thob pa'i rnal 'byor pa'i nus pa ston par byed de/ dkyil 'khor ni bris dkyil 'khor ro/ /dbang ni dbang bskur bar sbyin pa'o/ /mchog las tshogs rnams so/ nyams su len pa ni sems can gyi don bya'o/ /byin gyi rlob pa ni dus cung zad pa'i sprul pa'o/ /grub pa ni ye shes la dbang thob pa rnams so/ /las dang po pa las ye shes la dbang thob pa'i bgrod pa ni gzhan te/ mtshan nyid mi mthun pa'o/ /de brjod pa/ yis dbang thob pa'i sems nyid kyi 'khor lo gsum po bya/ /byin rlabs des ni 'khor lo de/ /gang phyir rang gzhan dag la gnang/ /'dir ni 'jug dang rjes gnang bas/ /rmi lam gsal ba bzhin du gnang/ /gang phyir sems kyi tshul bstan pas/ /de ni mchog tu shes par ces so/ /dkyil 'khor zhes ni ci la brjod/ /ces pa ni dris pa yin te/ lan la b+ha ga na shes rab kyi yin te der sems can gyi 'jig rten rnam par dag pa'i dkyil 'khor ro/ /pad+mar byang chub kyi sems yongs su gyur pa'i yang dkyil 'khor ro// lus la phyag rgya bzhi'i bdag nyid kyi dkyil 'khor ro/ /'di ni dkyil 'khor rnam pa gsum du rtags pa yin no/ /phyag rgya dgod pa ji ltar 'gyur zhes pa'i dris pa'i lan la rgyas btab pa ni brtan pa nyid du bskyed pa'o/ /phyag rgya gang gis gang la zhe na/ brtan pa dang g.yo ba'i dngos po thams cad la gang gi phyir rnam par snang mdzad la sogs pa'i rang bzhin phung po dang khams dang skye mched des yin te/ de ni rtag pa rgya dgod pa zhes bstan pa'i phyir ro/ /de bzhin du bris pa'i dkyil 'khor la yang de rtogs par byed pa'i mtshan ma dgod pas dkyil 'khor zhes bstan pa yin no/ /da ni bsrung ba'i 'khor la sogs pa las kyi tshogs las dbang ba'i phyag mtshan gyi phyogs kyi nges pa gsungs pa/ mtshams rnams su me la sogs pa'i mtshams bzhi po rnams su ste/ brjod ma thag pa'i srung ba'i 'khor lo dang 'brel pa yin no/ /dkyil 'khor gyi zur rnams su ni ma yin te/ phung po la sogs pa'i rnam par dag pa'i yan lag ma yin pa'i phyir ro/ /de rnams kyi ming yang gsungs pa/ 'dod pa ni 'dod pa'i rgyal po'o/ /dbyug pa ni dbyug pa sngon po'o/ /stobs ni stobs po che'o/ /mi g.yo ba ni byis pa'o/ /'khor lo ni gtsug tor 'khor los bsgyur ba ste steng du yin la gnod mdzes ni 'og tu ste/ 'di dag gi mtshan ma ni 'khor lo dang rdo rje dag go / dam tshig rdo rje la sogs pa rigs rgyal rdo rje can rnams kyi zhes pa de'i ming can rnams kyi phyag mtshan gsungs pa dang/ 'khor los sgyur ba drug ni de bzhin gshegs pa drug po rnams te gang phyag rgya yin pa de nyid ci ltar rigs par de rnams kyi'o/ /dbu rgyan dang gdan por ba'i kha dog la sogs pas yang blta bar bya'o/ /sa la sogs pa'i sems dpa' ni spyan la sogs pa rnams te rang gi dkyil 'khor du brjod pa rnams so/ /rtsa ba'i rgyud du ma brjod pa'i gzugs rdo rje la sogs pa'i phyag mtshan gsungs pa/ yang dag par mthong ba ni me long yin la/ pi paM ni pi paM nyid do/ /dri ni dra'i dung ngo/ /snod ni ngo yis gang ba'i thod pa'o/ /sna tshogs pa'i ras ni kha dog sna tshogs pa'i gos so/ /chos kyi 'byung gnas kyi phyag rgya yang yin no/ /drug po rnams ni rdo rje'i bdag po rdo rje can rnams kyi grangs ji lta ba bzhin du gzugs rdo rje la sogs pa rnams so/ /sangs rgyas ni rnam par snang mdzad la sogs pa rnams so/ /byang chub sems dpa' ni spyan ma la sogs pa rnams so// khro rgyal ni gshin rje gshed la sogs pa rnams so/ /mngon par rgyas btab pa ni de rnams kyi phyag rgya dang kha dog dang phyag mtshan gyi bdag nyid rnams rtsa ba'i rgyud nyid du brjod do/ /ces pa'i don to/ /de'i phyir 'di rnams las gzhan pa ni dpa' bo gcig pa ste/ las kyi tshogs la nye bar mkho ba dkyil 'khor ba ma yin pa mdung can ma la sogs pa rnams te de rnams ni rang gi rigs kyi bdag po'i kha dog la sogs pa rnams kyis brtag go /'dir ni me tog ci zhig lags/ /zhes pa ni dris pa yin te/ lan la rtsa ba'i rgyud du ma brjod pa nyid do/ /lha mo zhes pa la sogs pa la/ gsar pa ni bud med mngal ma nyams pa rnams te/ de rnams kyi nam mkha' i khams ni b+ha ga'o/ /de las byung ba ni rang byung gi me tog yin te me tog gi sgras brjod do/ /'di nyid du me tog ldan zhing sa bon 'byung zhes brjod pa'i phyir ro/ /gzhan dag spyan la sogs pa'i lha mo dgu po yin la nam mkha' i khams kyi sgras chos kyi dbyings kyi rdo rje yin no zhes 'chad pa de 'dir 'dod pa ma yin te/ sangs rgyas la ni ngo tsha med ces pa la sogs pas rnam 'grel byed pas rgyas par sun phyung ngo/ /bdud rtsi rnam pa lnga sbyong ba'i phyogs gsungs pa/ pad+ma'i snod na gnas pa'i bdud rtsi rnam pa lnga sku gsung thugs kyi dbye ba yis/ /de rnam par dag pa rnam par snang mdzad la sogs pa'i ngo bo rang gi sa bon ji lta bu las bskyed pa dgod pa ste de rnams la bcug ste gcig tu bya'o/ /de nyid gsungs pa/ rigs kyi rim gyis zhes so/ /gzhan dag ni gzugs rdo rje la sogs pa de nyid gdon no zhes te de ni ma yin te zlos pa'i skyon yod pa'i phyir ro/ /mchod rten zhes ni gang la bshad ces pa ni dris pa yin te lan la cita ni spungs pa yin te stobs bcu la sogs pa'i yon tan rnams kyi phung po'o/ /de yang sangs rgyas thams cad kyi gnas yin te rdo rje rin chen gyi rtse mo can gyi gzhal yas khang la dkyil 'khor zhes pa'i tha tshig go / ye shes 'khor lo ji ltar shes zhes pa ni dris pa yin te lan la ye shes kyis bdag nyid thog pa ma med pa'i ngo bo'i sems dpa' gang phyung zhing sbrul pa ni ye shes kyi 'khor lo'o/ / gzhan dag ni ye shes sems dpa' i thugs ka'i sa bon gyi 'od zer gyi lcags kyus reg nas gang dang po nas grub pa bkug pa'o/ /zhes so/ /'dir ni gnas ni gang la bshad ces pa ni dris pa yin te/ lan la lha rnams kyi sa bon ni gnas yin te/ gnas ni gzugs rdzogs par byed pa'o/ /rdo rje gsum rnams ni sku la sogs pa'i yi ge gsum yin te/ chos kyi dbyings kyi ngo bos kyang mi 'gyur ba'o/ /mgon po bskul ba ji lta bu zhes pa ni dris pa yin te/ lan la sku la sogs pa de kho na nyid kyis ngo bos mos pa ji lta bar rnam pa byin gyis brlab pa'i don du sad pa ste/ rdo rje 'dzin thugs dpal dang ldan zhes pa la sogs pa'i tshigs su bcad pa rnams kyis gsol ba 'debs pa ni bskul ba'o/ /gtong ba dag kyang ji lta bu zhes pa ni dris pa yin te/ lan la gtong ba ni rang gi 'od zer spros pa des de bzhin gshegs pa thams cad spyan drangs pa'i don du 'phro zhing spros pa'o/ /gang du zhes na phyogs bcu'i 'jig rten gyi khams rnams su'o/ /ji ltar de rnams spyan drangs bgyi zhes pa ni dris pa yin te/ lan la spyan drang pa ni gang rdo rje can yin pa de ste dkyil 'khor gyi lha rnams so/ /rdo rje can kun gyi spyan drang ba ste/ phan tshun gcig tu byed pa'o/ /bcing ba 'di ni ji lta bu zhes pa ni dres pa yin te/ lan la 'od zer te 'od zer gyi tshogs kyis so/ /gang rnams zhe na/ rdo rje can kun te sku la sogs pa'i bdag nyid can rnams so/ /rdo rje can kun ni sku la sogs pa'i rdo rje can no/ /de'i gnas ni sa bon yin te de la bsdus pa'o/ gong bu'i tshul ni brten par zhugs pas dbyer mi phyed par byin gyis rlob pa gang yin pa de ni bcings pa yin par bshad do/ /dbang bskur ba ni ci ltar rtsal zhes pa ni dris pa yin te/ lan la sku la sogs pa'i rdo rje rnams kyi'i sku la sogs pa'i dkyil 'khor la rgyas btab cing brtan par byas pa'o/ /yid la byung ba 'am rdul mtshon gyi dkyil 'khor brtags nas dbang bskur bar bya'o/ /de brjod pa dkyil 'khor yang dag ji lta bar/ /rab tu brtags par su yis nus/ /rang bdag lha yis sbyor ba yis/ /dkyil 'khor brtags pas grub pa yin/ /zhes so/ /dbang bskur ba de nyid gsal por gsungs pa dbang bskur dbye ba rnam pa gsum zhes pa la sogs pa'o/ /dbang bskur ba de yang bla ma'i drin las shes par bya'o/ /de bzhin rig pa'i brtul zhugs gang/ /zhes pa ni dris pa yin te/ /lan la rig pa'i lha mo de nyid ni zhes pa ni dad pa la sogs pa'i yon tan dang ldan pa ste lha mo bde ba chen po bla na med pa'i mtho ris kyi srid par shin tu rol par byed pas na lha mo'o/ /rig pa ni rnam par thar pa'i sgo bzhi'i don rig pas so/ /slob mas brjod ma thag pas rim pas gsang ba blangs nas so/ /rdo rje can ni rang 'dod pa'i lha dang mi dad par byas pas so/ /lag pa zhes pa ni g.yas par ste lag pa bzhag par bya'o/ /dbang por byas nas te/ deng nas bdag gi yang dag par/ /sgrub pa po la bu mo byin/ /byang chub chen po bsgrub ched du/ /de bzhin gshegs pa rnams kyis mkhyen zhes so/ /de nas de kho na nyid bstan par bya'o/ /gnyis su med pa ni gzung ba dang 'dzin pa dang bral bas so/ /chos kun ni rang dang spyi'i bdag nyid do/ /dngos po gnyis ni ldog pas byas pa'i dbye bas mtshon pa'o/ /dngos po la ni shes rab dang thabs dbyer med pa nyid do/ /gang gi phyir 'di ltar yin pa de'i phyir rnam par bral bar mi bya'o/ /gang gis zhe na/ gnyis su med pa'i bdag nyid can 'dis so/ /gang du zhe na/ 'khor bar ro/ /gzhan du 'dod chags dang bral bas nyan thos la sogs pa'i byang chub tu thal bar 'gyur bas so/ /rtag tu ni byang chub kyi bar du'o/ /'di ni rig pa'i brtul zhugs mchog yin no/ /bdud rtsi lnga rnams ji ltar bza' zhes pa ni dris pa yin te/ lan la tha mal pa'i rang bzhin gyi lus kyi chos rnams la dri ma lnga po rnams mdzes pa yin no// me long lta bu la sogs pa'i ye shes lnga rnams rnam par snang mdzad la sogs pa'i rnam par dag pa'i rang bzhin rnams kyis so/ /de rnams byin gyis rlabs pa ni de'i bdag nyid du bskyed pa ste/ bdud rtsi lnga'i bdag nyid ces pa'i ming thob po/ /ji ltar de rnams kyis byin gyis brlab par bya zhe na/ gsungs pa/ sbar ba ni yaM yig las skyes pa'i rgyal mtshan sngon po gnyis kyis mtshan pa'i gzhu'i rnam pa'i rlung gi dkyil 'khor gyis yin la/ sreg pa ni 'og na gnas pa'i raM las byung ba'i gru gsum pa dmar po me'i dkyil 'khor rlungs la gnas pas so/ /gsal bar bya ba ni aoM yig gis so/ /gzugs snang ba ni bum yig la sogs pa'i sa bon yongs su gyur pa rnam par snang mdzad la sogs pa'i ngo bos grub pa'o/ /sngags kyi bdag nyid lus ni 'dod pa'i lha yis so/ /de'i rab tu sbyor ba ni shes rab dang thabs snyoms par 'jug pa'i mtshan nyid do/ /des bza' bar bya'o/ /bdud rtsi lnga nyid ni 'chi ba dang bral bas bdud rtsi'o/ /slar yang der gzhan ci zhig bsgom par bya zhe na/ bar snang la gnas pa'i zla ba'i dkyil 'khor la yi ge hUM las skyes pa'i rdo rje'i lte bar de dang ldan pa'o/ /'og tu ni zla ba'i dkyil 'khor gyi'o/ /pad+ma ni pad+ma'i snod ste yi ge agyi steng du'o/ /brjod pa/ thod pa la ni pad+mar brjod ces so/ /pad+ma'i snod de ru bdud rtsi rnams bcug nas rnam par snang mdzad la sogs pa'i rang bzhin du byas te/ rdo rje nang du bcug nas ro mnyam par bya ste/ yi ge aoM gyis sbar ba ri ye shes nyi ma dang 'dra ba'o/ /mtshon cha mchog gis drangs pa ni de'i 'od zer gyi tshogs kyis so/ /phyogs bcu'i 'jig rten gyi khams na gnas pa'i de bzhin gshegs pa rnams kyi bdud rtsi'i rnam pa rnams bdud rtsi de ru bcug ste rnal 'byor pas bza' bar bya ba ni snying gar ye shes dang dam tshig la sogs pa'i mtshan nyid kyis bza' bar bya'o/ /zhe sdang dang 'brel to/ /de brjod pa/ 'bar ba'i aoM gyis byin brlabs zhes pa la sogs pa'o/ /de bzhin dpa' bo lnga gang lags/ zhes pa ni dris pa yin te/ lan la dpa' bo lnga ni da ha na go ku rnams kyi sha'o/ /de bzhin du rnam pa de nyid kyis bza' ste bsgrub bya'i dngos grub chog yis/ /zhes te ji lta ba'i dngos grub bsgrub pa'i cho gas so/ /bskyed pa ni brjod ma thag pa'i rang bzhin du yi ge gsum gyis so/ /gzhan du na phyugs bzhin du dngos grub ster bar mi 'gyur bar thal lo zhes pa'i don to/ /dngos grub tha mal ji lta bu zhes dris pa'i lan la/ mi snang ba la sogs pa'i bdud rtsi la sogs pa gang rnams yin pa de ltar ro/ /tha mal pa'i dngos grub ces bsgrags pa yin no/ /de bzhin mchog kyang ji lta bu zhes pa'i lan la mchog gi dngos grub ces gsungs te gang rnams zhes ni sangs rgyas rnams so/ /ji lta bu ce na gang gi phyir sangs rgyas nyid kyi sgrub thabs so/ /de la thabs ni rnam pa du/ zhes pa dris pa'i lan gsungs pa/ rnam pa bzhi ste/ tshul bzhin 'di'i yin pa ni thabs rnam bzhi yin te/ kun tu bzang po thob pa'i lam mo/ /byang chub rdo rje can/ rdo rje 'dzin pas gsungs shing brjod pa yin no/ /gang du zhe na/ rnal 'byor gyi rgyud du ste bya ba'i rgyud rnams su ni ma yin no/ /gang rnams kyi zhe na/ rnal 'byor pa rnams te sgrub pa po rnams kyi'o/ /de gang yin zhe na brten pa'i chog dang po ste zhes pa la sogs pa'o/ /bsnyen pa pa ni bcu gnyis par bshad do/ /bsnyen pa'i dam tshig gi rnal 'byor na rnam pa gnyis su rtogs par byed de thun mong mchog gi dbye bas so/ /gcig ni thun mong ba yin la mchog kyang yin te dbye ba'i rnam pa'o/ /de yang rnam pa bzhi yin te tshul bzhi'o/ /rnam pa bzhi po gang yin zhe na/ gsungs pa/ dang po stong nyid byang chub ste/ zhes pa la sogs pa rdo rje bzhi yis so/ /de ci yin zhe na/ tha mal ba de thun mong gi bsnyen pa'o/ /mchog ni mchog yin te ye shes kyi bdud rtsi kun tu bzang po nur nur po'i dngos pos so/ /thun mong pa'i bsnyen pa mdor bstan pa'i rdo rje bzhi rgyas par ston pa ni dang po zhes te/ stong pa nyid kyi mtshan nyid bshad pa ni don dam pa'i byang chub kyi sems kyi mtshan nyid bsgoms pa ste/ aoM shU n+ya te dz+nyA na badzra swa b+ha ba At+ma konyahaM zhes pa ni bsnyem pa dang po'o/ /gnyis pa ni gnyis pa ste/ sa bon gyis te/ bcu drug gi cha dang tshogs las byung ba'i ye shes kyi zla ba la gnas pa la sogs pa dpal mchog dang po'i snying po las byung ba nor bu dmar po dang 'dra ba'i rdo rje'i lte ba na gnas pa de las byung ba'i 'od zer rnams kyis 'gro ba sangs rgyas su byas nas de nyid du zhugs pa'i rjes la/ aoM badzra At+ma konyahaM zhes bya ba ni bsdus pa'o/ /gsum ni gsum pa ste/ gzugs ni skyes bu chen po'i mtshan sum cu rtsa gnyis dang ldan pa'i lha'i gzugs grub pa ste/ aoM badzra at+ma konyahaM zhes pa'i nga rgyal gyi de ma thag tu'o/ /bzhi pa ni bzhi pa'i bsnyen pa yin la mi 'gyur ba na yi ge yin te/ chos kyi dbyings yin la de dgod pa ni byin gyis brlab pa ste/ aoM d+harmA d+hA tu swa b+hA ba At+ma konyahaM zhes pa'o/ /'di nyid kyi rdo rje bzhi rnams kyi bsnyen pa ni thun mong pa'o/ /gang la zhe na gsungs pa/ sgrub pa la te/ sgrub bya rdo rje 'dzin pa la'o/ gzhan dag ni bzhi pa yi ge dgod pa'o/ /zhes pa mig la sogs pa rnams la k+ShiM yig la sogs pa'i yi ge rnams dgod par brjod do/ /de yang nye ba'i sgrub pa ste/ bsnyen pa ma yin no/ /'dis zla ba rdo rje'i rim pa rnal 'byor dang/ rnal 'byor bla na med pa la sogs pa'i rgyud dang thun mong par brjod do/ /gang 'chad par 'gyur ba snying po de ni thugs ka ru/ /zla ba rdo rje'i sbyor bas blta zhes pa la sogs pa'o/ /kha cig ni dkyil 'khor pa thams cad dus gcig nyid du bskyed pa ni chen po'i bsnyen pa nyid du thun mong gi bsnyen pa'o zhes so/ /dkyil 'khor rgyal mchog la snying ga'i sa bon gyis bkug pa'i de bzhin gshegs pa rnams rang gi lus la bcug pa zhu ba 'don pa'i cha ni stong pa nyid byang chub po/ /de yongs su gyur nas rang gi sa bon bsgom pa ni sa bon bsdus pa'o/ /sa bon de yongs su gyur pas dkyil 'khor pa yongs su rdzogs pa ni gzugs rdzogs pa'o/ /de nas rang rang gi 'byin pa'i sngags brjod pas phyung nas phyi'i gzhal yas khang na gnas pa'i rang rang gi gdan rnams la dgod pa ni yi ge bkod pa'o zhes rdo rje bzhi brjod par byed ste/ 'di yang chen po yin pa'i phyir thun mong ba ma yin no zhes gzhan dag go /rnal 'byor ma lus par bla na med pa mchog gi dngos grub bsgrub pa la bsnyen pa ni ye shes kyi bdud rtsi nyid kyis kun tu bzang po nur nur po'i dngos po nyid du bya ba ste/ bsnyen pa yan lag drug gis ni zhes pa la sogs pa'o/ /bsnyen pa zhes pa ni nye bar mtshon pa ste/ nye bar sgrub pa la sogs pa lhag ma rnams kyi yang yan lag chung ngu dang 'bring dang chen po'i rnam par dbye bas phye ba rnams bskyed nas so sor sdud pa la sogs pa'i yan lag drug bsgoms pas phyag rgya chen po la sogs pa mchog bsgrub par bya'o/ /de'i sgrub pa ni rgyu yin te gang gi phyir bsnyen pa 'di nyid yin pas so/ /gzhan du na zhes pa ni ldog pa'o/ /nga ni yan lag de rnams nyid rtogs par byed pa so sor sdud dang zhes pa la sogs pa'i sdud pa'i tshig gi bshad pa gsungs pa/ dbang po bcu rnams ni 'di ltar yin te/ bdag po'i don ni dbang po'i don to/ /dbang po'i don nye ba las sngon po la sogs pa'i rnam par shes pa skye bas phyi rol gyi don la yang dbang po zhes bshad do/ /gang gi tshe yul dang dbang po rnams la thams cad du rang gi rang gis 'jug cing gnas pa de'i tshe so sor sdud pa'o/ /'di skad brjod par 'gyur te/ sa'i snying po la sogs pa'i rang bzhin mig la sogs pa lnga po rnams gzugs rdo rje la sogs pa'i rang bzhin lnga po rnams la 'dod pa las ma 'das par 'jug pa yin te ma bkag par ro/ so sor sdud pa ste/ de dang de rnam par dag pas bdag nyid kyi dbang du byas pa ste/ kun las so sor sdus pa'o/ /'di nyid kyi phyir so sor 'dod pa rnams len pa'o/ /bsam gtan ston par byed de/ 'dod pa lnga rnams mdor bsdus nas/ / sangs rgyas lnga rnams yin te rnam par snang mdzad la sogs pa rnams so/ /de rnams kyi sbyor ba las zhes pa ni rigs ji lta bar rnam par dag pa ste/ brtags pa ni rnam par bzhag pa yin la bsam gtan ni rnam par mi g.yeng bar brjod do/ /bsam gtan de ni rnam pa lnga ste/ rtog pa la sogs pa'i dbye ba rnam lngar 'gyur ro/ /rnal 'byor rgyud ni thams cad du ces pa ni de kho na nyid bsdus la sogs pa rnams so/ /rnam pa du mar rnam par mi g.yeng ba'i rgyu rnams su brjod ma thag pa rnams su yongs su bsgrags pa yin no/ /rtogs pa la sogs pa de rnams nyid bshad par bya'o/ /gsang ba gsum ni sku dang gsung dang thugs rnams yin zhing de rnams las byung ba ni 'di'i rtog pa yin no/ /zhes gsang ba gsum las byung ba yin la rtog pa ni rnam par rtog pa yin te/ gzugs la sogs pa rnam par dag pa'i sgo nas rtog pa ni bsam gtan dang po'o/ /spyod pa ni bsam gtan rnam par rtog pa mdza' dag med pa ste/ rab tu zhi ba yin la de'i longs spyod pa ni bdag nyid kyi dbang du byed pa de'i dngos po yin te gnyis pa'o/ /rnam par rtog pa dang spyad pa dag /rgya che ba dang phra bas so/ /zhes chos mngon pa'i lung las so/ /rnam par rtog pa mdza' dag med pa'i rab tu zhi ba'i don la zad pa med pa'i dga' ba ni gsum pa'o/ /bzhi pa ni de'i mtshan nyid kyi bde ba rnams bsdus pa'i ngo bo'o/ /rang sems lnga par shes par bya ba ni brtags pa'i rnam pa'i shes pa dang shes bya dag byung ba zad pa las so sor rang gis rig pa'o/ /mi zad pa zhes pa'i tshig la ni brtags pa'i shes pa dang shes bya dag byung ba de med pas rang bzhin gyis 'od gsal ba dang gnyis dang bral ba'i sems rgyun du 'byung bas mi zad pa yin te bsam gtan lnga par brjod do/ /'di rnams ni bsam gtan lngar bsdus pa'o/ /srog dang rtsol ba 'chad pa ni sangs rgyas kun gyi rang bzhin yin te/ de nyid kyi phyir na zhi ba yin la 'dod pa thams cad la rab tu gnas pa'o/ /ye shes lnga'i rang bzhin ni me long lta bu la sogs pa'i ye shes kyi rang bzhin no/ /dbugs ni byang chub kyi sems kyi rang bzhin gyi yid do/ /sa la sogs pa'i 'byung ba lnga'i rang bzhin yin te phyung ba ni de bzhin gshegs pa zhugs pa la sogs pa sngon du 'gro ba'i gsang ba'i rdo rjes so/ /gong bu'i gzugs ni gcig tu byas pa ste/ sna'i rtse mo ni rang 'od kyi rig ma'i chos 'byung gi'o/ /nas tsam gyi rdo rje'i lte bar kha dog lnga'i rin po che byang chub kyi sems yungs kar gyi tshad tsam mo/ /de'i dbus su rang 'dod pa'i lha'i dkyil 'khor rtags par bya zhing bsgom par bya'o/ /de la srog dang rtsol ba zhes bshad do/ /de brjod pa/ yang na rang gi mtshan mo ni zhes pa la sogs pa'o/ /'dzin pa ston te rang gi sngags ni rang gi sa bon no/ /snying gar zhes pa ni ye shes sems dpa' i phyag mtshan gyi dbus su'o/ /tsa na ka'i rus pa'i tshad tsam byang chub kyi sems kyi bdag nyid bsam nas so// srog ni 'dod pa'i lha'i ngo bo ste yid do/ /de'i dbus su rnam par rtog pa phyir ma 'phros par bsgom par bya ste/ bzhag par bya'o/ /dgag pa ni mi g.yo ba yin te phya'i rgyu ba dang bral ba'i phyir ro/ /rang gi dbang po ni rang gi sems yin zhing de nyid rin po che yin te de bzung ba 'dzin pa'o/ /de brjod pa/ gsang sngags dam pa thig le'i gzugs su ni/ /rang yid 'ong dang ldan par yongs su bsgom/ /sems de 'od zer zhes pa la sogs pa'o/ /'gog pa ni mi g.yo ba'i dngos po ste/ rdo rje ni mi phyed pa yin la gyur pa ni sems su'o/ /brtan pa las mtshan ma yang dag par 'dzin pa skye bar 'gyur ro/ /mtshan ma du rnams yin zhing rnam pa ji lta bu zhe na/ gsungs pa/ dang por smig rgyu'i rnam pa lta bu ste/ gnyis pa ni du ba'i rtse mo'i rnam pa yin la gsum pa ni mkha' snang lta bu yin zhing bzhi pa ni mar me 'bar ba'i rnam pa yin la/ lta ba ni rtag tu snang ba yin te/ 'od gsal ba yin pa'i phyir sprin med nam mkha' dang 'dra ba'o/ /phra mo'i rnal 'byor la gang gi tshe brtan par gyur pa de'i tshe spro bar bya'o/ /kha cig ni thig le yang ngo/ /zhes so/ /nam mkha' i khams rnams su zhes pa ni nam mkha' i dbyings rnams su te/ mngon par khyab pa'o/ /rdo rje'i lam nas de bzhin gshegs pa'i tshul gyis sam/ phyag mtshan rnam pa sna tshogs pa spro bar bya'o/ /de brjod pa/ mtshan ma brtan po mthong nas spro ba ni 'od zer de yid sprul pa'i thub dbang dang zhes pa la sogs pa'o/ /rjes su dran pa gsungs pa/ lha gang gi gzugs bsgom nas de rjes su dran pas dang de'i rnam pa spro bar bya ste de rjes su dran pa zhes shes par bya'o/ /de la de'i snang ba ste rab tu rtogs pa skye bar 'gyur ro/ /ting nge 'dzin 'chad pa ni shes rab dang thabs dag snyoms par 'jug pa ste gcig tu byas pa'o/ /des de'i rang bzhin gyi dngos po thams cad yang dag par bsdus nas gang bu'i tshul gyis gcig tu gyur pa'i dngos lha'i gzugs kyis dbus su bsgom par bya'o/ /zhes pa ni lhag ma'o/ /yud tsam ni myur ba dang bcas pa'o/ /ye shes kyis rdzogs pa yin te gtod par byed pa'i ting nge 'dzin yin la de nyid kyi ming can no/ /yan lag drug gi phan yon gsungs pa ni so sor sdud la snyoms 'jug ni zhes pa la sogs pa ste de yang go sla'o/ /gzhan dag ni yang mchog gi bsnyen pa nyid gnyis yin te ye shes kyi bdud rtsi dang yan lag drug gi sbyor bas so/ /zhes 'chad de/ /de ma yin no zhes gzhan dag te/ gang gi phyir so sor sdud pa la sogs pa'i yan lag drug po las rgyal po mchog gi ting nge 'dzin du 'dus pas de'i phyir bsnyen pa ma yin no/ /de'i phyir bsnyen pa yan lag drug sbyor bas zhes pa ni nye bar mtshon pa yin pa nyid kyi phyir chung ngu dang 'bring dang chen po'i bsnyen pa la sogs pa yan lag bzhi po gang yin pa yang bskyed nas phra mo dang thig les kyang mtshan ma thob par bya ste/ phyis nas rjes su dran pa la sogs pa bsgoms pa na ji skad brjod pa'i dkyil 'khor la gnas te mchog gi dngos grub sgrub par bya'o/ /gzhan du na 'grub par mi 'gyur ro zhes bshad pa 'di nyid mdzes so/ /de brjod pa/ nyin re zhing ni thun bzhi ru/ /ting 'dzin gsum gyi sbyor ldan par/ /gyur par dngos grub sgrub bya ba/ /thun mong dngos grub cig shos so/ /zhes so/ /nga ni thun mong gi bsnyen pa rdo rje ba ni po brjod pa nyid gsal bar byed pa ni sems de nyid ni zhes te rnam par thar pa'i sgo gsum gyi bdag nyid du rab tu rtogs pa'i sems ni de'i ye shes so/ /snying gar zhes pa ni dkyil 'khor 'di'i dbus su yin par blta bar bya ste/ rang gi snying gar ni ma yin no/ /mtshon nas zla ba rdo rje'i sbyor ba yis/ zhes pa ni gzhal yas khang yi dbus na gnas pa'i sna tshogs pad+ma la gnas pa'i zla ba'i dkyil 'khor gyi steng du cha bcu drug pa dang tshogs las byung ba'i zla ba'i dkyil 'khor yongs su gang ba'o/ /de'i steng du dpal mchog dang po'i snying po las byung ba nor bu dmar po dang 'dra ba steng du gnas pa'i rtse mo lnga gnyis can lte bar hUM yig dang ldan pa'i rdo rje'o/ /de dag rab tu sbyor ba te de dag gi rnam pas so/ /mtshon cha mchog ste/ 'od zer gyi tshogs kyis de bzhin gshegs pa rnams drangs pa'o/ /sems ni 'gro ba'i rang bzhin yin te khams gsum ni sems can gyi rang bzhin pa'i phyir ro/ /de nyid rdo rje'i lte ba la gnas pa'i sngags la zhugs nas de'i rang bzhin du byas nas tha dad par sgro 'dogs par gsal ba'i ched du byang chub kyi tshigs su bcad pa/ aoM badzra at+ma konyahaM zhes de'i rnam pa'i bdag nyid yin par smos cing brjod par bya'o/ /de nyid gsungs pa/ sngags zhes pa la sogs pa/ /sngags kyi bdag nyid kyi gzugs ni rdo rje ste/ de'i sbyong bas byang chub kyi tshigs su bcad pa brjod par bya'o/ /de brjod pa/ dpal mchog dang po'i snying po las byung ba zhes pa la sogs pa'o/ /gzhan dag ni rang gi snying ga nyid kyi zla ba la gnas pa'i rdo rje'i lte bar thugs rdo rje yin pa ni zla ba rdo rje'i sbyor ba zhes 'chad de/ gsung dang sku dag ni gsung dang sku rdo rje dag ste/ byang chub kyi tshigs bshad ni/ rdo rje 'dzin thugs so dpal dang ldan/ /zhes pa la sogs pa sbyor bar byed do/ /de'i rjes la rang gi dkyil 'khor la yang dag par gnas pa'i dbus su gyur par chos kyi dbyings kyi bdag nyid do/ /gang rnams kyi zhe na/ cho ga ste mngon par rtogs pa'i yang dag par sbyor ba'i cho ga bsgoms pa rnams kyis so/ /de nyid sems yin te/ ye shes kyi rang bzhin k+ShiM la sogs pas grub pa'i sa'i snying po la sogs pa'i gzugs kyis so/ /bsgom pa ni mig la sogs pa byin gyis brlab pa ste/ dngos kyi nye bar sgrub pa'o/ /gzhan dag ni sgrub pa nyid yin no zhes so da ni mtshan ma thob cing bzlas pa rdzogs pa'i rig pa'i brtul zhugs can gyis zla ba drug gis gal te ma grub na de'i tshe nges slar yang ci nyams su blang zhe na gsungs pa/ mthong ba zhes te rnal 'byor pa'i shes pa la gsal ba nyid do/ /de yang ji srid du gnyis su 'gyur ba de srid du zla ba drug tu bsgom par bya'o/ /ci lus dka' ba la sogs pa'i rnam par g.yeng ba de bya 'am zhes 'dod pa kun la langs spyod pas zhes so/ /gal te ji skad du brjod pa/ mthong ba zla ba drug gis mi skye na de'i tshe na ji srid du lan gsum du mi skyo ba nyid du brtsam par bya'o/ /gang rnams kyis zhe na/ ji skad du brjod pa sdom pa'i cho ga rnams kyis so/ /'di ltar byas kyang gal te sgrub pa po la mthong skye bar mi 'gyur te/ byang chub ma grub na de'i tshe drag shul gyi bsgrub pas bsgrub par bya'o/ /ci ste rang gi sems ma rtogs pa'i byang chub zhen pa ni cung zad kyang med na de ltar drag shul gyis bsgrub ce na/ brjod par bya ste/ tha mi dad pa bden yang thos pa nyung ba kha cig rang gi rig pa las gzhan pa'i byang chub yod par sems dpas bsgom pa byed du 'jig ste/ de'i sems rnam par dag pa'i rgyu ru 'di yin te tha mi dad pa'i bgegs skrad pa dang 'dra ba'i phyir nyes pa med de/ de nyid kyi phyir brjod/ sgrub pa po de'i gnyis su med pa'i ye shes kyi dngos grub de'i tshe rabs kyi mthar phyin par 'byung bar 'gyur ro/ /da ni bsam gtan las skyes pa'i drag po'i bsgrub pa'i cho ga gsungs pa/ rigs kyi dbye ba'i sbyor bas rdo rje'i phur bus le'u bcu bzhi par brjod pa'i gnas phur ba gdab ste/ mi g.yo bar bya'o de nas zhes pa ni drag po'i de ma thag tu'o/ /dbang du bya ba dang bsrung ba ste/ rang gi sems la snang ba'i lha'i gzugs su bya'o/ /ci ltar zhe na/ sbyor ba yis te gsungs pa'i mtshan nyid kyis so/ /drag po'i sgrub pa bstan yang mngon par rtogs pa'i cha ston par byed de/ 'dod chags chen po'i tshul nyid ni le'u dang por bshad pa'i ting nge 'dzin gyis so/ /bsdu ba ni de bzhin gshegs pa rnams te bdag nyid la bcug nas so/ /'khor lo can ni dkyil 'khor gyi 'khor lo'o/ / btsun mo spro ba ni lha mo spro ba'o/ /dgu ni rnam pa dgu yin la/ chos kyi dbyings kyi rdo rje ma dong? ba yin te/ de mchog tu dga' ba bskyed pa'i yan lag yin pa'i phyir ro/ /rang gi bsgrub par bya ba rang 'od kyi shes rab kyi lus po la gzhug par bya'o// ci byas nas shes na gsungs pa/ de rnams yongs su gyur pa ste/ bud med kyi gzugs su gyur pa rnams so/ /de brjod pa phyung nas rigs ma de dag thams cad ni/ gnyug pa'i rig pa'i nang du chud par bya zhes so/ /da ni chos kyi dbyings nur ba por gyur pa la mA ma kI la sogs pas bskul ba las bzhengs pa gsungs pa/ phyag rgya bzhi'i dkyil 'khor ni chos kyi dbyings kyi 'od zer gyis bskul ba'i de bzhin gshegs pa'i 'od zer las byung ba'i byams pa dang/ snying rje dang/ dga' ba dang/ btang snyoms rnam par dag pa'i ngo bo mA ma kI la sogs pa'i lha mo bzhi po ni phyag rgya bzhi yin la/ dkyil 'khor ni rang rang gi phyogs na gnas pa ste de rnams kyis so/ /dkyil 'khor gyi dbus der brtags par bya'o/ /bdag nyid ces pa ni bdag ste chos kyi dbyings kyi ngo bo'i nang du chud par byas nas so/ /gang rnams zhe na/ spyan la sogs pa rnams kyi'o/ /'khor lo can kun bsdu bar bya/ zhes pa ni sngar gyi zhu ba'i gnas skabs so/ /rang gi sems dri za'i sems can gyi ngo bo'i dkyil 'khor gyi 'khor lo'i bdag nyid rang gi zhal nas bcug ste/ rdo rje nas byung nas chos kyi 'byung gnas su ho yig gnyis kyi nang du chud pa'i yi ge gsum du 'gyur ro/ /de nas yi ge lnga po de dag thams cad dang rig ma dang bcas pa'i rdo rje sems dpa' rdo rje'i rang bzhin du byas nas te/ zla ba zhu ba'i bdag nyid du bskyed nas de nas byang chub kyi bdag nyid kyi lus bsgom par bya'o/ /phyag mtshan dang sa bon yongs su gyur pa las 'dod pa'i lha'i gzugs su bsgom par bya'o/ /gang gi rjes la zhe na/ bskul ba'i glu dbyangs bzhi yis lha mo spyan la sogs pa bskul ba na'o/ /gang la zhe na/ snying la ste chos kyi dbyings la'o/ /dus gsum rdo rje'i rang bzhin ni sku rdo rje la sogs pa'i rang bzhin no/ /ye shes lta bu ni bems po ma yin pa'i ngo bos so/ /lus ni brjod ma thag pa'i bsgom pa'o/ /de brjod pa zhal du zhugs nas zhes pa nas brtsams te/ aoM d+harmA b+hA tu badzra swa b+hA ba At+ma konyahaM/ zhes pa la thug pa ste/ mchog gi bsnyen pa bshad do/ /las kyi rjes su mthun pas kha dog gi dbye bar 'gyur ro/ /zhes gsungs pa/ dregs pa ste zhe sdang la sogs pa'i bsam pa'i ngo bos so/ /kha dog ni sngon po la sogs pa'i dbye bas so/ /nyams ni khro bo la sogs pa'i nyams kyis te/ phyi dang nang dang khro bo la sogs par mngon par 'gyur ro/ /zhes pa'i don to/ /nang ni bsil ba nyid yin la/ phyi rol 'bar ba'i bdag nyid yin no/ /zhes pa ni ma yin no/ /rang gi rgyu'i bdag nyid rigs kyi bdag po mgo bo la gnas pa nyid kyis rgyu ma yin pa rnams las 'byed do/ /rang gi rigs kyi bdag po'i gzhi'i dkyil 'khor gyi 'bras bu ste/ rigs can phye bas bdag por 'gyur ro/ /gzhi yang de'i kha dog gi khyad par gyis so/ /sngags kyis te zhi ba la sogs pa'i ngo bos so/ /chos ni chu la sogs pa'i dkyil 'khor gyi ngo bo'i gang? na te/ zhi ba la sogs pa'i las kyi dbye bas 'byed do/ /rig pa'ang chos kyi phyag rgyas so/ /zhes pa ni sngags nyid rig pa'o/ /de yang chos kyi phyag rgya'i las kyi dbye bas yin te/ nang du gzhug pa la sogs pas phye bas zhes pa'i don to/ /gzhan dag ni sngags kyis te/ rang gi sa bon nyid kyis rang 'od kyi rig ma phye ste/ sgrub par byed pa yin la de yang chos kyi phyag rgya ste snying kan gnas pa'i shes rab gtso bor gyur pas thabs las 'byed do zhes 'chad do/ /dkyil 'khor ba rnams la tha snyad ni don du med gzhan gsungs pa 'khor los sgyur ba'i rgyal po drug ni rnam par snang mdzad la sogs pa rnams yin te/ gtsug tor rnams zhes grags pa yin no/ /rig ma'i rgyal mo zhes byar grags pa yin la longs spyod bzhi ni spyan la sogs pa yin te/ de rnams kyang rdzu 'phrul chen mo'o/ /'dod pa thams cad ste/ gzugs rdo rje la sogs pa rnams de bzhin du rdo rje'i bdag po zhes shes par bya'o/ /rgyud gzhan du brjod pa'i shing la sogs pas dbang bskur ba dgag pa gsungs pa/ bsam gtan rdo rjes ni dbyer mi phyed pa'i bsam gtan nyid kyis te/ rjod ma thags pa thams cad la dbang bskur ba ni rab tu sngags so/ /dbang bskur ba la thug pa 'dis ji ltar 'dod pa'i sku la sogs pa'i lha'i lus rnam par bsgoms nas shes rab dang lhan cig tu gnyis su med par bya'o/ /zhes byang chub sbyor ba 'di yis ni zhes pa la sogs pas ston te/ ye shes ni rig ma yin la de dang lhan cig pa'i lus ni phyi rol ma yin pa nyid kyis snyoms par 'jug par bya'o/ /zhes pa ni lhag ma'o/ de nyid kyi phyir sku gsung thugs kyi rdo rje yis/ /gnyis su med par byed par bsgrub pa ni gnyis su med par 'gyur ba yin te/ rig pa dang lhan cig gcig tu byas pas so/ /sgrub pa ni bde ba chen po'i bdag nyid kyi byang chub pa'i'o/ /'di ltar sngar brjod pa'i rjes su 'brangs nas rig pa'i skyes bu rdo rje can du dang por bdag bskyed nas rjes su chags pa la thug pa dang phyi nas bdag nyid dang 'dra ba ste mtshungs pa rig pa'i skyes bu'i bdag nyid kyi dkyil 'khor te/ rang gi dkyil 'khor de rnams byung ste/ chen po'i bsgrub pa chen po la thugs pa chen po'i rgyu mthun pa la sogs pa'i 'bras bu ched 'grub pa'i ched du bya'o/ /de la 'di ni chen po'i bsgrub pa ste/ bsgrub pa chen po ru brjod do/ /bsrung ba'i 'khor lo bsgom pa sngon du song bas bsnyen pa bya'o// zhes gsungs pa/ bsnyen pa'i dus su bsnyen pa'i mtshan nyid kyi yan lag gi dus su'o/ /gtsug tor chen po ni bsrung ba'i 'khor lo'i dbus su gtsug tor 'khor los sgyur ba la sogs pa gang yang rung ba'i gzugs dmigs pa'o/ /sbyor ba ni sgrubs thabs kyi cho ga'i rim pa ste/ phyi nas bsnyen par bya'o zhes pa'i don to/ /de brjod pa/ hUM mdzad yang ni gtsug tor ram zhes pa la sogs pa'o/ /nye bar sgrub pa'i dus ni zhes pa nye bar sgrub cing rdzogs par bya'o zhes pas spyir dngos grub bshad do/ /gang gi gang la la'i dngos grub sgrub pa'i dus su bdud rtsi 'khyil pa bgegs skrad pa'i ched du bsgom par bya'o zhes blta bar bya'o/ /de brjod pa/ bgegs rnams bdud rtsi thal sbyor 'khor lo'i zhes pa la sogs pa'o/ /sgrub par dang lha'i sbyor la yis zhes pa ni thugs dang gsung dang sku byin gyis brlab pa'i lha'i rnal 'byor snying ga la sogs par thugs rdo rje la sogs ngo bo de'i dus bsgom par bya'o/ /sgrub pa chen po'i dus su sangs rgyas bdag po'i sku rang gi rigs kyi bdag po dbu rgyan du de bzhin du bsgoms par bya'o/ /de brjod pa dri med rang srid zla ba'i zhes pa nas brtsams te/ cod pan gyur zhes pa'i bar du'o/ /'di ni rdo rje can kun gyi zhes pa ni go sla'o/ /de ltar zhes pa ni brjod ma thag pa'i rnam par dbye bas dngos grub mchog ste? sangs rgyas bsgrub par bya'o/ /gzhan ni go sla'o/ /da ni rdzogs pa'i rim pa dang 'brel pa'i khyad par du 'phags pa'i bsnyen pa la sogs pa gzhan gsungs pa/ grub bya ste kun tu bzang po yid? la sgrub thabs ni mngon par rtogs pa yin zhing yang dag par sbyor ba ni gcig tu byed pa yin te bsnyen pa'o/ /rdo rje ? ma nyi sbyor ba te/ don? yi hUM las grub pa'i gsar ba'i rdo rje'o/ /pad+ma ni A yis byas pa'i sna tshogs ze 'bru dang yi ge hUM gis sprul pa'i 'dab ma brgyad pa'i ngo bo chos kyi 'byung gnas te/ phan tshun gcig pa'i dngos po ni nye bar sgrub pa'o/ /bskyod pa sgrub pa zhes pa ni pad+ma dang rdo rje dag ste/ phan tshun du byas pa'i dga' ba bskyed pa'i ched du yi ge hUM phaT brjod pa dang ldan pa ni yang dag par ldan pa'o/ ngo bo nyid ni bcos ma ma yin zhing phyi rol ma yin pa las byung ba'i ngo bo'o/ /rang gi bde pa ni dga' ba'i ngo bo'o/ /de yang zhi ba yin te rdo rje dang pad+ma yang dag par reg pa las byung ba ni sgrub pa chen po'o/ /de bzhin thabs byung ji lta bu zhes pa ni dris pa yin te/ lan la sangs rgyas kun gyi bdag po dpal ldan kun tu bzang po yin te/ bsod nams dang ye shes kyi tshogs dang ldan pa'o/ /de nyid rtogs shing go bar byed pas gnas te rten no/ /thabs las byung ba ni 'bras bu ste/ de nyid bsgrub bya yin pa'i phyir ro/ /de nyid kyi phyir sangs rgyas kun ni 'das pa la sogs pa rnams so/ /chos rnams ni stobs bcu dang ma 'dres pa la sogs pa rnams so/ /de nyid chos nyid de bzung ba dang 'dzin pa'i rnam pa dang bral ba nyid de/ gnyis su med pa'i ye shes kyi dngos po kun tu bzang po'o/ /rnal 'byor rdo rje can kun gyi/ /bka' ni ji ltar bsgoms par bgyi/ /zhes pa ni dris pa yin te/ lan la gang dag gang drag pa la sogs pa'i las la de dang rjes su mthun pa'i gzugs kyi yin la rnal 'byor ni lha'i rnal 'byor te/ rang nyid kyis dmigs par bya'o/ /rnal 'byor pa yis zhes pa ni rnal 'byor ba'o/ /dkyil 'khor de dang de bskyed nas zhes pa ni man nag ji lta bar mdun du gyur pa'i bsgrub bya'i rang 'dod pa'i lha'i gzugs dam tshig ni bzad pa bsgom par bya ste/ sangs rgyas thams cad bdag la gson zhes pa la sogs pa dang gnod pa byas pa yang ngo/ /sngar ni le'u bcu gsum par ro/ /dam tshig ni sku dang gsung dang thugs rdo rje 'dzin pa'i bsrung bar bya'o/ /yang na gtsug tor gyi dam tshig go / bka' i 'khor lo la gnas pa ste/ de dang de'i las kyi rjes su mthun pa 'am rang gi dkyil 'khor ni 'khor la gnas pas so/ /bka' bsgo ba ni rnal 'byor pa ste/ de rjes su gnang ba nyid do zhes bsam mo/ /las kyi mchog gi tshogs rnams ni/ sna tshogs ji ltar byed par 'gyur zhes pa ni dris pa yin te/ lan la bsgrub bya ni brjod pa'i mtshan nyid dang ldan pa ste lus so/ /dkyil 'khor ni dkyil 'khor gyi 'khor lo'i rnam pas bsgom par bya'o/ /de nas de bzhin gshegs pa byung ba de rnams la'o/ ci byas nas she na/ gsungs pa/ bsgrub bya de bcom nas te rab tu rnam pa bsgom par bya'o/ /dngos po kun gyis drangs nas te rang gi dkyil 'khor gyi 'khor lo la phyung ba de rnams gzhugs par bya'o/ /phyi'i las ston par byed de/ rtsa ba'i rgyud du ji ltar gsungs pa'i dug la sogs pa'i rdzas rnams kyis so/ /de nas bka' mnos nas 'jigs su rung ba'i khro bo'i tshogs rnams kyis bskor ba rnams rnal 'byor bas btang bar bya'o/ /bsad pa nyid kyi don ni de'i don no/ /gang dag gi don yin zhe na/ bsgrub? bya dang sgrub byed rdo rje dag gi'o/ /'di dag kyang yi ge'i don tsam ste/ lhag ma ni bla ma rnams las shes par bya'o/ /las kyi tshogs lhag ma ni go sla'o/ /de nas bcom ldan 'das zhes pa la sogs pa ni de bzhin kho na'o/ /bstod pa'i rgyal bo 'dis bstod pa ni sku la sogs pa'i rnam par dag ba zur gyis ston par byed pas bstod par byed do/ /sku la sogs pa'i rdo rje ni sku la sogs pa thob pas so/ /sems can mi mnyam pa dang mnyam pa ste/ rdo rje sems dpa' dang mnyam pa'i sangs rgyas rnams so/ /bsgrub bya gang yin sgrub pa po gang zhes te/ bsgrub bya sgrub byed dag rdo rje sems dpa' nyid mnyam pa'i phyir ro/ /gang gi phyir sems can thams cad dang de bzhin gshegs pa dag dbyer med pa de'i phyir sangs rgyas thams cad bcom zhing bsad bas bsgrub pa'i dbang po sdig pa rnams kyis ji ltar gos par mi 'gyur gal te gos na 'di'i 'bras bur ji ltar 'gyur sems so/ /de nas zhes pa la sogs pa la dbyangs chen po ni rnam par dag pa'i brjod bya dang rjod byed kyi dngos po rnams so/ /de rnams la mchod pa ni mchod pa chen po gang yin pa de rnams so/ /legs so zhes byas pas dga' bar byas nas sngar nyid kyi dgongs pa rtogs par byas kyang rnam par dag pa ston par mdzad do/ /sangs rgyas kun gyi bdag po zhes pa la de gang yin zhe na/ gsungs pa/ dpal ldan ni slob dpon te dngos po thams cad kyi bskyed pa dang sdud par yang mdzad pa'o/ /rgyu des dkon mchog gsum la sogs pa la gnod pa byed pa dang mtshams med pa la zhugs pa rnams gsad pas don gyi bya ba byed pa na/ de'i sdig par mi 'gyur te/ 'on kyang bsod nams nyid do/ /kyang gi sgra yang gi don la'o/ /snying rje chen po'i gzhan dbang du gyur pas de bzhin du de'i mdzad pa mdzad do/ /de bzhin du brjod ma thag pa'i rim pas gang gis bsod nams 'ba' zhig nyid yod pa yin te/ thugs rje chen po phyin ci ma log pa'i sbyor ba dang ldan pas so/ /sdig pa yod pa ma yin te rnam pa thams cad du sdig pa yod pa ma yin no/ /de'i phyir de nyid byang chub yin par gsungs te/ sdig pa byang chub kyi bar chad yin pas rnal 'byor pa rnams kyis rnam pa thams cad du dor bar bya ba yin pa'i phyir ro/ /de rnams kyi rgyud la de srid du sdig pa med pa de rigs pa yin te/ de dang 'gal ba'i chos shin tu mngon sum du gyur pa'i phyir ro/ /phyin ci ma log pa de rnams la bsod nams brtags pa ma yin pa yod pa ma yin te/ snying rje chen po'i gzhan dbang du gyur pas sems can gyi don la de dang der gshegs pa rnams yin no zhes gcir pu pa la sogs pa rnams 'dod pa de rnams kyi phyogs dgag par 'dod nas 'di brjod de las dang lus ngag spongs ma yin/ mi mthun phyogs ni med phyir dang/ /mi nus phyir te srid pa ni/ /gnas la slar yang skye phyir ro/ /srid pa gnod pa ma mthong na/ /de med rnam par mi nges phyir/ /gtan tshigs ma grub the tsom za/ /thams cad mkhyen pas 'di brjod phyir/ /las kyi gnyen po'i phyogs la ni/ /the tshom bgag pa med pa'i phyir/ /sgrub dang gnod byed ma mthong bas/ /yod dang med pa ma nges phyir/ /gang phyir 'dir tshig rigs cha yin/ /gnyen po'i tshogs la the tshom phyir/ /'khrul yin 'chad pa po rnams kyis/ /gzhan du yongs su brtags phyir ro/ /mi mthun phyogs gang mi srid par/ /rnam pa kun tu sngar gsal byas/ /phyi nas las dang mi mthun par/ /yang bshad de rnams 'gal ba yin/ /srid la gnod pa cung zad ni/ /de yis bstan pa ma yin no/ /de med ji ltar gtan tshigs yin/ /go byed nyid du 'dir nges min/ /las kyi mi mthun phyogs med dang/ /de dang 'gal ba yod pa na/ /phan tshun du ni 'gal ba 'di/ /rtog ldan tshig ni ji ltar yin/ /las de de 'dra gang dang ni/ /tshogs pa gzhan na srid pa na/ /'bras bu 'byin te las dang ni/ /'gal ba yod na ma yin no/ /mi mthun phyogs dang bgegs dang ni/ 'gal ba zhes la sogs bsal bar/ /rnam grangs 'jig rten pa la grub/ /tha dad don min brjod pa'i phyir/ /yod pa srid pa de la ni/ /de tshe de yi ji ltar 'gyur/ /sgrub byed gnod byed ma mthong la/ /'di yi the tshom rigs pa'i cha/ /'di ni rgyud pa yod pa la/ /dngos su mi mthun phyogs med zhe/ /khyab byed mi dmigs pa la sogs/ /med na de yang ci phyir rtogs/ /gnyen po'i phyogs la the tshom na/ /spangs pa la yang the tshom yin/ /'dir ni nges pa zhes pa'i tshig / de phyir mkhas pas bskang bya/ /de phyir mi nus phyir gtan tshigs/ /gnyis pa 'dir ni bsdus pa yin/ /tshad med rgyu sred pa la'ang/ /las dang lus ni slar yang skye/ /tham cad mkhyen pa'i spyod yul nyid/ /de ltar na yang srid yin zhe/ /sred pa yod pa de lta na 'ang/ /la sogs slar 'byung ma yin min/ /las de zad par 'dod chags kyis/ /sred pa gcod pa 'bad par bya/ /rgyu ni ma tshang med pa la/ /'bras bu dgag par nus ma yin/ /yang ni sred pa bcad grub la/ /'bras bu las zad ci zhig bya/ /skye ba med par yang dag grub/ /lhan cig byed rgyu med pa'i phyir/ /ma tshang ba yi rgyu la ni/ /'bras bu 'byung ba yod ma yin/ /sa bon sogs srid chu sogs med/ /myu gu la sogs ji bzhin no// ma lus skye ba gcod pa la/ /gnyid po mi srid pa ru 'dod/ /sred pa yang dag gnas zhe na/ /gnod pa byed pa gsal bar brjod/ /ji srid tshad mas gnod byed de/ /srid la ma bstan pa la ni/ /gtan tshigs ma grub the tshom za/ /tshang pas kyang ni sba mi nus/ /sred pa med pa la yang ni/ /thugs rjes bsod nams yod pas na/ /yod pa na yang dbang byas pas/ /slar yang sdig mdzad ma yin no/ /gang phyir sa la gnas pa rnams/ /sbyin sogs 'jug pa srid pa'i phyir/ / mi mthun phyogs kyi sdig rnams la/ /rnam pa thams cad nyid 'jug min/ /bshags pa la sogs phyir bcos kyis/ /las gang rnam par bzlog pa la/ /de la 'bras bur 'dod mthong med/ /de nyid lam ni rnam rtog pas/ /gzhan du na ni lung gis gnod/ /'dir ni ma spangs thal bar 'gyur/ /thams cad mkhyen pa'i tshig gis gnod/ /chos can tshad mas grub pa la'o/ /des bskyed shes pas phan btags pas/ /yid ni lus la brten par brjod/ /'di ltar de ni spangs pa nyid/ /de yi don ni grub phyir ro/ /gzhan du mngon sum gyis grub pa'i/ /chos can yid ches 'di la ni/ /lung gis gnod pa ji ltar 'gyur/ /gang gi 'di ltar de sel ba/ /de phyir de nyid min tshig las/ /thams cad mkhyen brjod gnod pa yi/ /lung gi tshad ma grub pa yi/ /chos can la ni gnod nges min/ /'dir ni nges pa med nyid du/ /gtan tshigs 'brel pa mdzad pas mdzad/ /des na lung brjod gnyen po ni/ /rgyas par rab tu bstan pa yin/ /gnyis po rtag tu brjod pa yi/ tshad ma yi ni ma grub pa/ /mi mthun phyogs dang gnyen po yang/ /'gal ba nyid kyis go ba yin/ /khyab par byed pa mi dmigs sogs/ /gang tshe mi mthun phyogs la ston/ /gtan tshigs ma grub the tshom du/ /de tshe mkhas rnams dogs pa med/ rnam pa kun tu dgag pa ni/ /mi dmigs pa yi bsgrub pa yin/ /tshad mas grub par smra ba rnams/ /shugs kyis bzlog pa nyid las yin/ /skal pa bye ba brgyar yang ni/ /las rnams rab tu chu zos min/ /'di ltar lung la brten pa na/ / gzhung 'di 'gal ba ma yin no/ /skye 'dod nyes pa bkag pa yis/ /gang rnams nyes pa dang 'gal yin/ /des skyed las rnams nus ldan gyur/ /byas pa nyams par ci ltar 'gyur/ /gnyen po thob par ma gyur pa'i/ /las ni zad par mi 'dod do/ /'khor ba'i dri ma gang yin pa'i/ /las ni cung zad 'bral med min/ /byes par myor bar 'gyur ba ni/ /yongs kyang 'bras bur 'gyur ba'i phyir/ /gnyen po thob par gyur kyang ni/ /de las shin tu 'bral mi 'gyur/ /shin tu chung du yod pas na/ /de phyir 'bras bur brjod pa yin/ /tshogs brnyed pa'i dus dag tu/ /lus can rnams la 'bras bur nges/ /gang gi las rnams zad pa ru/ /sangs rgyas kun gyi brjod pa ni/ /dngos po kun gyi thams cad du/ /rnam pa thams cad mngon rtogs pas/ /rnam pa thams cad rtogs pa nyid/ /sgrib pa thams cad spangs pa yin/ /gzung dang 'dzin pa'i ngo bo yi/ /las ni rnam pa thams cad zad/ /rang gi rig pa'i mthar thug la/ /gzung 'dzin la sogs mi dmigs pas/ / gzung dang 'dzin pa'i ngo bo ni/ /spangs pa rnam par 'dod pa yin/ /las rnams zad par mi 'gyur na/ /mi bden lta bas rtsad bcad dang/ /dge slong sogs kyi rtse lhung yang/ /rnam pa kun tu 'thad mi 'gyur/ /gang la bsod nams sdig pa med/ /de ni byang chub yin par gsungs/ /'di ni bla med byang chub la/ /de nyid yang dag gnas pa yin/ /gang la bsod nams yod nyid la/ /rnam pa kun tu sdig med nyid/ /bsod nams ye shes rang bzhin phyir/ /byang chub nyid du de 'dod do/ /bgegs tshig sdig pa dang 'brel yin/ /snga ma byed la'ang ldan pa'i cha/ /bsod nams nyid kyi rtsa ba nyid/ /sangs rgyas rnams kyi byang chub brjod/ /ji ltar sangs rgyas thams cad kyi/ /bsod nams nyid yod thams cad du// slob dpon yang ni de dag phyir/ /bsod nams kyang ni de bzhin nyid/ /de yi mngon sum byas pa la/ /gzung ba la sogs mi dmigs pas/ /gzung dang 'dzin pa'i ngo bo yi/ /bsod nams sdig pa med nyid la/ /yang na rang rig mthar thug la/ bsod nams la sogs rtog med phyir/ /gzung dang 'dzin pa'i ngo bo nyid/ /rnam pa thams cad ma dmigs phyir/ /gzung ba'i cha nyid la dmigs nas/ /rnam par rtog pa rab tu 'jug /rang gi rig pa'i mthar thug ?/ /rnam par rtog pa 'jug nyid min/ /gang du gang zhig sgra don 'dzin/ /shes nges de la rtogs pa yin/ /rang gi ngo bo 'di sgra don min/ /de la ma lus mngon sum phyir/ /yang na de nyid gzigs rnams kyi/ /khams gsum srid pa rab bcom pas/ / 'bras bu thob yin dag pa'i sems/ /chos dang chos nyid yongs spangs phyir/ /sdig ni sdig pa rtag tu brten/ /de bzhin chos la chos brten yin/ /de nyid lam rton mkhas pa yin/ /gnyi ga dag ni spangs pa yin/ /gang rnams lam? dang lam min rmongs/ /sangs rgyas bstan la de rnams rmongs/ /nyi ma la ni mun pa bzhin/ /de rnams la ni zhi ba med/ /chu klung chu yis khengs rnams la/ /kha cig pha rol 'gro ba yis/ /rgal dang rtswa dang shing rnams ni/ /bor nas bde bar 'gro ba yin/ /chos rnams la ni nges bstod pa/ /chos dang chos min spyod pa de/ /rnam dag nam mkha' dri ma med/ /'di la dkyil 'khor du brjod do/ /las dang nyon mongs rnam grol yid/ /las dang nyon mongs rnam grol ldan/ /de rnams sbyin gnas 'jig rten na/ /mchod 'os rjes 'os rtag tu yin/ /'dis ni las ni cung zad dang/ /mtshams med pa la byung gyur pa/ /de dag kun zad rnal 'byor pa/ /legs par mnyam gzhag sems dpas so/ /slob dpon mgon po de'i bslu ba la sogs pa yin te des ngan 'gro ste/ ngan 'gror skye par mi 'gyur la bsgrub bya dang sgrub byed kyang ngo/ /nyid kyi sgra ni nges par gzung ba'o/ /gang de nyid kyi phyir byang chub kyang rnyed par mi dka' ba yin te de'i gnyen po mngon sum du byas pas tshogs pa rnyed nas sangs rgyas rnams su yang 'gyur ro/ /mi bzad pa ste sngon gyi las kyis gal te dmyal ba'i 'bras bur skye'o/ /de rnams skye bar 'gyur ba mngon spyod byas pa de'i tshe dmyal ba rnams de'i stobs kyis 'bras bu chen po ste/ bde ba skye bar 'gyur la dus de srid pa'i dmyal ba'i sdug bsngal bcom pa rnams yin no/ /byang chub rdo rje can rnams ye shes kyis rgyas par btab par 'gyur ro/ /bsgrub bya 'di ni bsgrub bya rnams so/ /rgyu des mchog tu phan btags pas shes par bya'o/ /gang rnams zhe na/ /sems can rnams te sngags kyi sgo'i spyod pa la spyod pa rnams so/ /de nyid kyi phyir des tshar gcad pa'i sgo nas rjes su bzung ba'i las bya ste/ bdag nyid chen po rnams kyis bya'o/ /las 'di sgrub pa chen po la thug pa'i lha'i rnal 'byor bya ste brtsam par bya'o/ /de nyid kyi phyir brjod pa/ bsad dang skrad pa'i las dang ni/ /dbye ba dang ni mngon spyod ni/ /thabs gzhan dag ni mi srid na/ /de nyid bya 'os de byed pa'o/ /dang po dbus dang tha ma ru/ gang gis snying rje ma spangs pas/ /zhes so/ /de nas zhes pa la sogs pa la rdo rje can ni de bzhin gshegs pa rnams te snying rje chen po'i rang bzhin gyi chos gsang ba la sogs pas 'gro ba rjes su gzung ba'i mtshan thos nas dga' ste/ thos pa'i phyir ro/ /rab tu dga' ni bsams pas so/ /yang dag par rab tu dga' ba ni bsgom pas so/ /e ma 'o zhes pa la sogs pa la mchog tu dri ma med pa yin te/ rnam pa thams cad du gzhan gyi don la zhugs pas so/ /ji ltar zhe na brjod pa/ mi zad pa'i las la yang/ sdang ba gdul dka' ba dkon mchog gsum la gnod pa byed pa la sogs pa dang/ mtshams med pa'i las la zhugs pa rnams gang la sangs rgyas nyid kyi 'bras bu stsol ba'o/ /de nas zhes pa la sogs pa la gang de ltar yin de'i phyir de bzhin gshegs pa thams cad kyi dbang bskur ba ni gsang ba 'dus pas dbang bskur bas so/ /byang chub rdo rje las byung ba rnams yin no/ /gang rnams zhe na/ zhe sdang rdo rje la sogs pa chen po rnams so/ /yongs su spangs par mi bya ste/ 'phya bar mi bya'o/ /rnam par dag pa'i ngo bos rgyud kyi rgyun bsdus pa'o/ /thams cad kyi dgongs pa bzung nas de bzhin gshegs pa rnams mgrin gcig gis dpal gsang ba 'dus par brjod pa de bzhin gshegs pa thams cad kyi bdag po la bstod par byed de dang po ni bdag po'i sgo nas so/ /bcom ldan 'das gang dus gsum rdo rje ste/ 'das pa la sogs pa'i de bzhin gshegs pa rnams sam sku rdo rje la sogs pa'i snying po'o/ /de zhes pa ni thams cad du sbyar ro/ /srod pa dang thar par gyur pa mi gnas pa'i mya ngan las 'das pa'i bdag nyid do/ /zhi ba ni zhi ba nyid yin te thams cad las brgal ba'i phyir ro/ /sgrib pa med pa ni shes bya'i sgrib pa dang bral ba'i phyir ro/ /de nyid kyi phyir na dag pa yin te nam mkha' dang 'dra ba'i rang bzhin no/ /sangs rgyas rnam par snang mdzad la sogs pa rnams las lhag pa'i sangs rgyas so/ /de nyid kyi phyir na mchog gi dbang phyug ste/ byang chub kyi rdo rje'i bdag nyid kyi rdo rje'o/ /lus dang ngag dang yid kyis rtag tu phyag 'tshal ba'o/ /de bzhin gshegs pa rnams kyi phung po la sogs pa rnam par dag pa'i sgo nas bstod pa gsungs pa/ gang gzugs ni gzugs kyi phung po yin la/ tshor ba ni tshor ba rnams yin te/ legs par 'du shes pa ni 'du shes yin la legs par 'dus byas ni 'du byed yin zhing rnam par shes pa ni rnam par shes pa'i phung po'o/ /skye mched drug ni gzugs la sogs pa'o/ /dbang po drug ni mig la sogs pa'o/ /'dis ni gzugs rdo rje la sogs pa dang sa'i snying po la sogs pa'i yang dag par bstan pa yin no/ /sa chu me dang rlung zhes pa ni mA ma kI la sogs pa rnams so/ /nam mkha' zhes pa nam mkha' i rdo rje'o/ /thams cad ma lus pa rnams chos nyid kyis byang chub kyi sems dang 'dra ba'i rgyan chen po rnams so/ /spyan la sogs pa rnams 'byin pa rnam par dag pa'i bstod pa la gang gti mug dang nyid pa ste/ zhe sdang de bzhin du 'dod chags dang de nyid rdo rje dang bcas pa yin la/ chos ni rig pa'i sbyor ba las byung ba rnams yin te rtag tu rtag pa'i ngo bos rgyun rnams yin no/ /phyung ba'i rjes la dga' ba'i sgra 'chad de sna tshogs pa'i ngo bo sna tshogs pa'i dga' bas myos pa'i ngo bor gyur pa rnams so/ /sdud dang chags dang zhes pa ni tshigs su bcad pa'i rim pa bzhin du bstod pa'o/ /yang dag par sdud pa ni sdud pa yin la dga' ba ni de bzhin du chags pa'o rnam pa ni cha byad do/ /mi g.yo ba ni mi g.yo ba nyid yin la rgyu ni rgyu nyid de/ 'bras bu ni 'bras bu nyid yin la/ rang bzhin gyi sems su gtogs pa ni 'di rnams yin te rjes kyi chos so/ /de nyid kyi phyir drug las thugs ni kun tu zhes bshad pa yin no/ /mun pa ni gti mug yin te nyes pa ni zhe sdang yin la de bzhin du sgrib pa yin te 'di rdo rje yin no/ /da ni de bzhin gshegs pa rnams bstod nas/ de bsgom pa'i rnal 'byor pa la phyag 'tshal pa gsungs pa/ 'di bsgom pa zhes pa la 'di ni brjod ma thag pa'o/ /rnam par dag pa dang thog ma med pa'i rang bzhin yang yin no/ /slar yang ji ltar gyur pa yin zhe na/ shes rab dang thabs las byung ba yin te des na dpe dang bral ba yin la gsang ba'i dbang bskur ba rdo rje'i brtul zhugs dang sdom pa dag gi sbyor ba des brtag pa yin no/ /mchog gi dngos grub kyi thabs te/ gang gis zhe na/ snyen pa la sogs pa'i cho gas so/ /blo'i shes ni mi 'gyur ba yin no/ /gang rnams zhe na/ sgrub pa'i dbang po rnams so/ /thun bzhi rdo rje dag gis zhes pa ni bshad zin to/ /mchog gi dngos grub kyi bsgrub pa po rnams la re zhig bzhag nas mi snang ba la sogs pa'i dman pa'i dngos grub bsgrub pa po rnams la yang ngo/ /nyams pa med pa'i lam zhes pa ni mngon par rtog pa ste/ bla ma'i drin gyis rtog pa'o/ /dman pa'i dngos grub kyi bsgrub pa po bzhag ste/ gang rnams rgyud kyi ming thos pa de rnams la yang phyag byed ste tshigs su bcad pa ni go sla'o/ /zhi ba la sogs pa'i las kyi tshogs chags pa la sogs pa med pa'i stobs kyis te/ 'khrul 'khor gyis so/ /ji lta bur gyur pa zhe na/ sngags kyi spyod pas so/ /rgyas btab pa ni bsgom pa'i phyag rgyas so/ /da ni gang rnams kyi dpal gsang ba 'dus pa'i sgrub pa mthong ba de rnams la yang phyag 'tshal ba yin no/ /bstod pa'i tshig 'di rnams kyis ma 'ongs pa'i rnal 'byor pas gal te de bzhin gshegs pa rnams la bstod cing bstod par bya'o/ /de'i tshe de rnams rjes su yi rang bar byed pa yin te/ mgon po sangs rgyas bcom ldan 'das rnams so/ /lags par gsung pa ji lta bu zhe na/ gsungs pa/ dam tshig chos nyan pa rnams so/ /rgyud kun gyi ni rnal 'byor la sogs pa ste/ mchog gi bdag po nyid do/ /sku la sogs pa la zhugs pa ni kun tu bzang po yin la/ de'i sku la sogs pa'i rdo rje ste/ sku la sogs pa'i rnams rang gi sku la sogs pa nyid kyis dmigs shing gcig tu byas pas yang dag par go bar bya ste/ cang mi gsung bar gyur to/ /thams cad kyang yin la gsang ba yang yin te/ de rnams ston pa yin la de nyid rdo rje ye shes yin te/ de byin gyis brlab pa'o/ /de nyid kyi ming ni de ston par byed pa'i gzhung gi le'u 'o/ /phyi ma'i rgyud kyi ming can bco brgyad pa'i/ /bshad 'di se ma pu red bdag gis byas/ /de nyid kyi ni chos 'byung gis ni yang dag par/ /grogs byas gzhan gyis don du yang dag byas/ /'di la lhag dang chad pa gang/ /mkhas pa rnams la snang gyur na/ /'di de bdag nyid nyes pa ste/ /blo tshan bla ma'i ma yin no/ /byang phyogs lam du 'khrungs gyur pa'i/ /dri ma'i tshogs dang bral gyur pa/ /sbas pa'i zhabs ni bsten byas nas/ /de yi bshad pa dri med pa/ /zla ba dag gis gang rtogs pa/ /cung zad bris pa dag gi ni/ /bsod nams gang des 'jig rten rnams/ /dpal ldan gsang 'dus la gnas shong/ /dkyil 'khor chen po slob dpon byang phyogs kyi lam la mkhas pa chen po'i zhabs la dran par byas pa/ slob dpon zla ba'i 'od dang ming gzhan rin chen rdo rje'i myu gus mdzad pa// //le'u bco brgyad pa'i rnam par bshad pa rdzogs so// // rgya gar gyi mkhan po chen po su na ya sh+rI mi tra dang/ bod kyi sgra bsgyur gyi lo tsA ba dge slong dar ma grags kyis mang yul skyid grong gi lha khang ke ru dang/ ag tsar sgang du bsgyur cing zhus te gtan la phab pa'o// //yang dag rig byed ces bya ba'i rgyud phyi ma'i 'brel ba bzhugs so/

CLOSE WINDOW