བོད་ཡིག

e-texts based on the ACIP/ALL Input

/dper na dri ma med pa'i nam mkha' la zla ba shar bas rdzas kyi dngos po thams cad gsal bar byas pa de bzhin du de bzhin gshegs pa sgrib pa dang bral bas rang gis mkhyen pa dang/ gzhan la go bar byed pa'o/ /de'i phyir rdzas kyi dngos po thams cad khyab ces bya'o/ /des ni de bzhin gshegs pa thams cad mkhyen par bstan to/ /gzhan dag na re lus bsgyur ba las ye shes yin no zhes zer ro dper na chang gi ra ro ba bzhin no zhes zer ro/ /lta ba ngan pa de bsal ba'i phyir/ lus la gnas kyang de ma byung zhes bya ba la sogs pa la/ lus bsgyur ba las ye shes yin na khu khrag gnyis kyi bar du gzhan nas rnam par shes pa 'ongs nas de ci'i phyir 'jug /shi ba'i dus su lus las rnam par shes pa 'byung bar mi rigs so/ /de'i phyir na lta ba de ni ngan par bshad do/ /rnam par shes pa'i 'gro ba dang 'ong ba'i lam rtsa rnams yin no/ /rtsa ni gang zhig yin/ grangs ni du zhe na/ rtsa ni sum cu rtsa gnyis te zhes bya ba la sogs pa la/ grangs kyi 'brel ba'i phyir na sum cu rtsa gnyis shes bya'o/ /de ni 'jig rten pa'i lugs so/ /de'i ming dang gnas ni phyis bstan par bya'o/ /bde ba chen po'i gnas shes bya ba ni mgo'o/ /mgo nas rkang mthil gyi bar du rtsa rnams kyis khyab nas gnas pa'o/ /dbugs dang srog gi rlung dang byang chub kyi sems de gsum ni rnam par shes pa'i grogs so/ /de gsum ni rtsa na rgyu ba'o/ /de rnams nang na rtsa gsum rab ces bya ba la sogs pa la/ ci'i phyir rab ces bya zhe na/ nang du 'dren par byed pa dang/ 'byung bar byed pa'o/ /de'i phyir na rab ces bya'o/ /lus g.yon phyogs kyis nang du 'dren par byed pa dang/ phyir 'byung bar byed pa ni rgyang ma'o/ /g.yas phyogs kyi nang du 'dren par byed pa dang/ 'byung bar byed pa ni ro can ma'o/ /bar du gnas par byed pa ni rkun 'joms ma'o/ /de dag ni don dam par gcig go /dper na thag pa gcig sdong po la btags nas byis pa la sogs pa dpyad mo nyug pa'i bya ba byed pa de bzhin du byis pa rkang pa 'jog pa lta bu'i lte ba'i dkyil 'khor ro/ /ci'i phyir bar zhes bya zhe na/ nang du 'jug pa'i rlung ngal bso ba'i phyir bar zhes bya'o/ /der rnam par shes pa gnas par 'gyur ba'i tshe spros pa thams cad bral bar 'gyur ro/ /dbus kyi phyogs su kun 'joms ma zhes bya ba la sogs pa la/ rten dang brten can gyi 'brel pas kun 'joms ma la gzung 'dzin dang bral ba zhes bya'o/ /mi shigs zhes bya ba ni snying kha na gnas pa zhes bya'o/ /phra mo gzugs can ma zhes bya ba ni dpral ba na'o/ /legs ldan zhes bya ba ni smin ma gnyis kyi bar na'o/ /g.yon ma zhes bya ba ni g.yon gyi phyogs kyi rtsib rings kyi sna na'o/ /g.yon can ma zhes bya ba ni g.yas kyi phyogs kyi rtsib rings kyi sna na'o/ /ru sbas 'byung ma zhes bya ba ni g.yas phyogs kyi tshigs pa'i 'gram na'o/ /dngos can ma zhes bya ba ni tshigs pa'i glo g.yon na'o/ /dbang bskur zhes bya ba ni ming pa'i nang na'o/ /skyon can zhes bya ba ni 'bras bu gnyis kyi bar gyi 'og na'o/ /dri chen ma zhes bya ba ni gsang ba'i lam na'o/ /ma mo rnams zhes bya ba ni smin ma gnyis la'o/ /kun nub ces bya ba ni g.yas kyi rna ba la'o/ /grangs sbyin zhes bya ba ni g.yon gyi rna ba la'o/ /drod can ma zhes bya ba ni lte ba'i 'og na'o/ /tshad ma zhes bya ba ni glo ba la'o/ /nag mo zhes bya ba ni mchin pa la'o/ /spyi ma zhes bya ba ni rkang pa g.yas kyi sgyid khung la'o/ /rgyu'i sku la sbyin ma zhes bya ba ni rkang pa g.yon pa'i sgyid khung la'o/ /sbyor byed ces pa ni lag ngar g.yas kyi nang rol na'o/ /dga' chen zhes bya ba ni g.yon phyogs kyi lag ngar gyi nang rol na'o/ /grub pa mo zhes bya ba ni rkang pa g.yas pa'i rgyu zhabs na'o/ /chos byed ma zhes bya ba ni rkang pa g.yon pa'i rgyu zhabs na'o/ /yang dag yid ces bya ba ni ma tshogs ma na'o/ /gsum dkris ma zhes bya ba ni kun 'joms ma dkris pa'o/ /'dod chags ma zhes bya ba ni phrag pa gnyis la'o/ /khang pa mo zhes bya ba ni rgyu ma la'o/ /drag mo zhes bya ba ni ltag khung na'o/ /karka ta ni zhes bya ba ni nu ma gnyis la'o/ /bdud kyi las smad 'tshong ma zhes bya ba ni gsang ba'i rdo rje'i glo gnyis na'o/ /srid pa gsum zhes bya ba ni lus ngag yid gsum gyi skye ba la'ang srid pa gsum zhes bya'o/ /de 'grub par bya ba'i phyir rtsa rnams skye bar 'gyur ro/ /rtsa med par gyur na byang chub kyi sems dang/ rang 'byung me tog dang/ rnam par shes pa 'du bar mi 'gyur bas na lus ngag yid gsum gyi rgyu yin par bstan to/ /rgyu de'i phyir rtsa rnams ni srid pa'i rang bzhin yin par brtags pa'o/ /sdom pa'i dbye ba bstan par bya zhes bya ba ni 'gro ba ris drug las sdom par byed pas na sdom pa zhes bya'o/ /de la nyan thos la sogs pa'i dbye ba yod pas na dbye ba zhes bya'o/ /yang na kun rdzob dang don dam pa ma spangs par rnam pa thams cad go bas na sdom pa zhes bya'o/ /A li kA li zhes bya ba ni zla ba dang/ nyi ma dang/ g.yon dang/ g.yas dang/ mtshan mo dang/ nyin mo dang/ thabs dang/ shes rab la sogs pa'i rang bzhin no/ /pad+ma 'dab ma sum cu rtsa gnyis zhes bya ba ni dbugs 'gro ba dang 'ong ba dang grangs kyi 'grel pas lus la rtsa sum cu rtsa gnyis gnas pa'o/ /de'i rnam par dag pa ni pad+ma 'dab ma sum cu rtsa gnyis so/ /de lta bu'i rim pas rnga yab drug cu rtsa bzhi rnam bar dag pa ni pad+ma 'dab ma drug cu rtsa bzhi'o/ /nyin dang mtshan du dbugs phyi nang du rgyu ba gnyis las bcu drug pa gnyis la gcig tu brtsis te/ de'i grangs kyi 'grel pas dus kyi 'pho ba bcu drug go /de'i rnam par dag pa ni pad+ma 'dab ma bcu drug go /nyin dang mtshan la pra ha ra brgyad do/ /de'i rnam par dag pa ni pad+ma 'dab brgyad do/ /pra ha ra rnam pa bzhi zhes bya ba ni de'i rnam par dag pa ni 'khor lo bzhi'o/ /hom ma byas par 'jig rten dang 'jig rten las 'das pa'i dngos grub mi thob pas na lus la hom shes par bya'o// de'i phyir lte bar tsaN+Da lI ni 'bar zhes bya ba la sogs pa la/ de la lte ba'i dkyil 'khor ni hom khung ngo/ /de'i dbus su hom gyi las bya'o/ /tsaN+Da la'i zhes bya ba ni shes rab bo/ /shes rab de'i rang bzhin ji lta bu zhe na/ rang rang gis go ba'o/ /rdo rje pad+ma'i rnal 'byor gyis 'bar ba'o/ /ci'i phyir 'bar ba zhes bya zhe na/ langs pas na 'bar ba zhes bya'o/ /de bzhin gshegs pa lnga zhes bya ba ni rnam par rtog pa lnga'o/ /bsregs zhes bya ba ni spong bar byed pa'o/ /spyan ma la sogs pa zhes bya ba ni khams dang skye mched dang phung po'o/ /de ni shing ngo/ bsregs zhes bya ba ni bshad ma thag pa de sreg par byed pa'o/ /tha mar dgang gzar gyis blugs par bya ba bstan pa'i phyir/ haM bsregs pas ni zla ba zhu zhes bya ba ni shing thams cad bsregs pas sku'i 'khor lo haM dang bcas pa thur du blta ba'i kha 'ju bar 'gyur ro/ /de ni dgang gzar gyi rang bzhin gong du bshad ma thag pa la zhu ba zhes bya pa'o/ /ci zhig zhu zhes/ byang chub sems bdud rtsi'i rang bzhin du zhu ba'o/ /de'i gzugs ni dgang gzar gyi mar khu blugs pa bzhin du'o/ /des dga' bar gyur pas gang 'dod pa'i 'bras bu sbyin par 'gyur ro/ /pad+ma'i myu gu rdo rjes kye'i rdo rje'i le'u dang po'i 'grel pa mdzad pa rdzogs so// //char pa dbab pa'i cho ga dang/ sprin gtor ba dang/ dkar rtsi bsgrub dang/ dngos grub dang/ tsha ba'i rim gyi cho ga dang/ chang skyugs pa dang/ dbang du bya ba dang/ nyi zla gzung ba'o/ /de dag la ni dngos grub phra mo zhes bya'o/ /de dag gi dang po grub pa'i rnal 'byor ni kye'i rdo rje phyag bcu drug pa bsgom par bya'o/ /gzhan rnams ni rim pa ji bzhin du badzra'i dang/ gau rI dang/ bA rI dang/ badzra DA ki nI dang/ nai rAt+me ka dang/ b+hu tsa rI dang/ khe tsaM rI 'o/ /de bdun gyi rnal 'byor gyi so sor bsgrub par bya'o/ /so sor bstan pa de ni mtshon pa tsam zhig bstan pa yin gyi/ gcig gis kyang dngos grub thams cad 'grub par bstan to/ /ci'i phyir mtshon pa tsam bstan zhe na/ thams cad nus mod kyi las kyi gtso bo bstan pa'o/ /de bas na mtshon pa tsam smos pa'o/ /tshig de dag gis ni dngos grub phra mo rnams lha'i rnal 'byor tsam gyis 'grub par bstan to/ /phyag rgya chen po'i dngos grub gang yin zhe na/ de bzhin gshegs pa'o/ /de la de bzhin gshegs pa'i las ni sems can gyi don byed pa'o/ /de ni thabs bzhi med par mi 'grub pas thabs bzhi ni bsnyen pa dang/ nye ba'i bsnyen pa dang/ sgrub pa dang/ sgrub pa chen po dang/ de dag gi bye brag ni bsnyen pa dang/ bar ma dang chen po dang/ de las kyang che bar gyur pa'o/ /tshig de dag gis don gang bstan zhe na/ rdo rje'i sa gzhi dang bsrungs pa'i 'khor lo dang/ de'i dbus su dkyil 'khor gyi 'khor lo dang/ de'i dbus su mngon bar byang chub pa'i rim pas sku rdzogs par byas pa'o/ /de nas zhu bar 'gyur ro/ /de nas lha mo bzhis de la bskul nas gtso bo bzhengs par byed do/ /de'i skye mched byin gyis brlab pa dang/ 'khor lo bzhis byin gyis brlab pa dang/ dbang bskur ba'o/ /rang gi de bzhin du shes rab ma dang/ dkyil 'khor 'khor lo'i lha rnams kyang de bzhin du bya'o/ /de dag med par phyag rgya chen po'i dngos grub 'grub par mi 'gyur ro/ /de dag gi don ni de bzhin gshegs pas bstan par bya ste/ de'i phyir dang po stong nyid byang chub phyir/ /gnyis pas sa bon yang dag gzung/ /gsum pa gzugs brnyan grub pa ste/ bzhi pa la ni yi ge dgod/ pad+ma rdo rje myu gus mdzad pa'i kye'i rdo rje'i le'u gnyis pa'i 'grel pa rdzogs so// // byams pa bsam par bya zhes bya ba ni gang phan pa ston par byed pa dang/ bde ba sbyin par byed pa'o/ /de lta bu'i sems la byams pa zhes bya'o/ /sems can thams cad kyi sdug bsngal dang sdug bsngal gyi rgyu de gnyis dang bral bar 'dod pa la snying rje zhes bya'o/ /sems can thams cad kyi yid mi dga' ba bdag gis dga' bar bya ba dang/ gang 'dod pa sbyin par byed pa la/ dga' ba la ni gsum pa dga' ba bsam par bya zhes bya'o/ /sems can gdul par dga' ba dang/ thabs med par gdul bar ma nus pa dang/ chags pa chen po dang ldan pa'i sems can gyi skyon gcig kyang nyams su mi len pa la btang snyoms zhes bya'o/ /dang po stong pa nyid byang chub phyir zhes bya ba la sogs pa la/ de dag gis bsnyen pa la sogs pa yan lag bzhi bstan par bya ste/ bsnyen pa dang nye ba'i bsnyen pa dang/ sgrub pa dang/ sgrub pa chen po'i de bzhi'i 'bras bu bstan par bya ste/ 'dra bar 'byung ba'i 'bras bu dang/ rnam par smin pa'i 'bras bu dang/ skyes bu byed ba'i 'bras bu dang/ dri ma med pa'i 'bras bu'o/ /de ni yan lag bzhi'i 'bras bu dang bcas pa'i mtshan nyid bstan par bya ste/ lha mo bzhis bskul nas/ gtso bo bzhengs pa la ni bsnyen pa'i bsnyen pa'i yan lag dang 'dra bar 'byung ba'i 'bras bu zhes bya'o/ /mig la sogs pa'i skye mched byin gyis brlabs pa ni bsnyen pa'i nye ba'i sgrub pa'i yan lag dang/ rnam par smin pa'i 'bras bu zhes bya'o/ /'khor lo bzhis byin gyis brlabs pa ni bsnyen pa'i sgrub pa dang/ skyes bu byed pa'i 'bras bu zhes bya'o/ /dbang bskur ba la ni bsnyen pa'i sgrub pa chen po dang/ dri ma med pa'i 'bras bu zhes bya'o/ /shes rab ma'i yang sku rdzogs pa la sogs pa la bar gyi bsnyen sgrub yan lag bzhi zhes bya'o/ /de'i 'bras bu bzhi yang de bzhin du shes par bya'o/ /dkyil 'khor gyi 'khor lo'i lha rnams kyi sku rdzogs pa la sogs pa la chen po'i bsnyen sgrub yan lag bzhi zhes bya'o 'dra bar 'byung ba'i 'bras bu la sogs pa la chen po'i 'bras bu bzhi zhes bya'o/ /dang po stong nyid ces bya ba la sogs pa ni bsnyen pa'i bsnyen pa la sogs pa'i spyi'i rgyu yin par bstan to/ /de'i bye brag bstan par bya ste/ raM sgyur nyi ma bdun du bsgom/ /de nyid nyi ma'i steng du ni/ /hUM byung sna tshogs rdo rje nyid/ /rdo rje de las rdo rje yang nas yang du spros pa las rdo rje'i sa gzhi bsam par bya'o/ /de nas rdo rje ra ba dang rdo rje gzeb bo/ /de dag bsam par bya'o/ /dang po raM ni bsam bar bya zhes bya ba la sogs pa la/ dkyil 'khor 'khor lo'i nang du pad+ma 'dab ma brgyad pa bskyed la de'i ze 'bru la zhing chen bsam par bya'o/ /rang gi snying gar raM yig bsam zhes bya ba ni rnal 'byor pas yid du 'ong ba'i gnas su 'dug la de nas rang gi snying gar yi ge raM bsam par bya'o/ /de bsgyur ba nyi ma'i dkyil 'khor te/ de'i steng du hUM nyid dang las rdo rje bsam par bya'o/ /de'i bum par hUM bsam par bya'o/ /des 'od zer dpag tu med pa spros nas he ru ka gau rI la sogs pa lha mo brgyad dang bcas pa bkug nas nam mkha' la bsam par bya'o/ /rang gi snying ga nas gau rI la sogs pa spros la phyi nang gsang ba'i mchod pa byas par bsam mo/ /de nas de'i sngon du sdig pa bshags pa la sogs pa bya'o/ /de nas gshegs su gsol lo/ /sngon du bstan pa'i chos dbyings kyi bdag nyid zhing chen gyi steng du/ A li kA li zhes bya ba la sogs pa la/ de la a la sogs pa las zla ba'i dkyil 'khor bsam par bya'o/ /ka la sogs pa las nyi ma'i dkyil 'khor bsam par bya'o de gnyis kyi bar du sa bon bsam par bya'o/ /sa bon ni gong du kha dog nag po 'jigs su rung zhes bya ba la sogs pa dang 'brel bar shes par bya'o/ /hUM gyur pa las rdo rjer bsam par bya'o/ /de la hUM gis mtshan par shes par bya'o/ /de ltar bsgom par bya'o/ /nyi zla dang rdo rje bum pa'i hUM dang bcas pa de dag kha dog sngon po'o/ /de dag thams cad gyur pa las rdo rje gtams pa nag po che zhes bya ba la sogs pa dang 'brel bar shes par bya'o/ /tshig de dag gis ci zhig bstan zhe na/ mngon par byang chub pa rnam pa lnga'i rim pas rnal 'byor pas gong du bstan pa'i zhing chen gyi steng du he ru ka bsdom par bya'o/ /bshad ma thag pa de sngon du/ dang por ni rnam pa bsam zhes bya ba la sogs pa dang 'brel par shes par bya'o/ /sems dpa' zhes bya ba de nyid gsungs zhes bya ba na da ni 'og tu 'brel par shes par bya'o/ / tshig des ni rdo rje sems dpa' nyid do/ /bde mchog dga' ba'i rang bzhin zhes bya ba ni sems can thams cad kyi rang bzhin zhes bya ba'i don to/ /snying gar dgug byas yang dag bsdu zhes bya ba la sogs pa la/ rdo rje pad+ma'i sgras de bzhin gshegs pa thams cad bkug nas snying gar zhugs par bsam par bya'o/ /de byang chub kyi sems su zhu nas pad+ma'i nang du dbab par bya'o/ /de las rang gi lus lta bu'i rnal 'byor ma rnams spro bar bya'o/ /spros nas nam mkha' i khams thams cad du khyab par bya'o/ /de nas slar bkug nas dkyil 'khor lo dgod par bya'o/ /ji ltar kye'i rdo rje'i zhal brgyad pa 'ju bar bstan pa de bzhin du 'di yang 'ju bar 'gyur ro/ /lha mo bzhi'i glus bskul nas bzhengs par bya'o/ /de'i don go bar bya ba'i phyir/ rnal 'byor zhe sdang bdag nyid 'gyur zhes bya ba la sogs pas bstan to/ /des ni 'bras bu'i rang bzhin bstan to/ /mdog sngon bag zhad dmar ba zhes bya ba la sogs pas ni 'bras bu'i yon tan bstan to/ /de'i rim pas phyag bzhi pa dang phyag drug pa yang bzhengs par shes par bya'o/ pad+ma'i myu gu rdo rjes mdzad pa'i kye'i rdo rje'i le'u gsum pa'i 'grel pa rdzogs so/ / //dper na rgyal por dbang ma bskur bar rgyal po'i bya ba byed mi nus pa de bzhin du de bzhin gshegs pa la chos kyi rgyal po'i dbang ma bskur bar chos bshad mi nus pas na dbang bskur ba'i le'u bshad par bya'o/ /rang snying 'od zer spro byas nas zhes bya ba ni mngon par byang chub pa rnam pa lnga'i rim pas rdzogs par 'gyur ro/ /de nas sa bon zla ba lta bur 'gyur ro/ /de la bskul ba'i dbang gis bzhengs par 'gyur ro/ /de la 'khor lo bzhi byin gyis brlab par bya'o/ /de nas snying ga'i 'khor lo la gnas pa'i sa bon las 'od zer 'phros nas phyogs bcu na gnas pa'i de bzhin gshegs pa bkug nas/ 'od zer nag po lcags kyu 'dra zhes bya ba ni mig g.yas pa ma las nyi ma bsam mo/ /mig g.yon pa Ta las zla ba bsam par bya'o/ /de las 'od zer lcags kyu lta bu spro bar bya'o/ /de nas dgug pa'i lta stangs bya'o/ /de nas mig 'khyil bar bya ba dang/ rdzi ma brdab par bya'o/ /tshig de dag gis he ru ka rdzogs par bstan to/ /de lta bu'i rim pas mchog gi bsnyen pa'i yan lag la sogs pa dus gsum du rtag par bsgom pa'i rnal 'byor pas phyag rgya chen po'i dngos grub thob par 'gyur ro/ /des lta bu'i don bstan to/ /tshig gang gis bstan zhe na/ mchog gi dngos grub ye shes bdud rtsis 'grub ces gsungs so/ /pad+ma'i myu gu rdo rjes mdzad pa'i kye'i rdo rje'i le'u bzhi pa'i 'grel pa rdzogs so// //rang bzhin gyis ni gzugs kyang med ces bya ba la sogs pa la/ de la gzugs mi rnam pa gnyis te/ kha dog dang dbyibs so/ /de'i bye brag rnam pa nyi shu ste/ sngon po dang ser po dang dmar po dang dkar po dang/ ring po dang/ thung du dang zlum po dang/ phya le ba dang/ mthon po dang/ dma' ba dang/ gru bzhi dang/ mi mnyam pa dang sprin dang du ba dang rdul dang/ khug rna dang/ grib ma dang/ nyi ma dang/ snang ba dang/ mun pa'o/ /snang ba ni zla ba dang/ skar ma dang/ me dang sman dang/ rin po che 'o/ /de dag gi 'od zer la snang ba zhes bya'o/ /sgra med thos pa po yang med ces bya ba la de ni rnam pa brgyad de/ bskyed pa'i sgra 'byung ba chen po'i rgyu las byung ba dang/ ma skyes pa'i sgra 'byung ba chen po'i rgyu las byung ba dang/ sems can gyi sgra dang/ sems can ma yin pa'i sgra dang/ snyan pa'i sgra dang/ mi snyan pa'i sgra'o/ /thal mo brdabs pa la sogs pa'i sgra ni bskyed pa'i sgra 'byung ba chen po'i sgra las byung ba zhes bya'o/ /rlung dang nags tshal dang/ chu rlung dang de dag gi sgra la ni ma skyes pa'i sgras 'byung ba chen po'i rgyu las byung ba zhes bya'o/ /ngag gi sgra la ni sems can gyi sgra zhes bya'o/ /brag cha la sogs pa'i sgra la sems can ma yin pa'i sgra zhes bya'o/ /dri med tshor ba po yang med ces bya ba la/ dri ni rnam pa bzhi ste/ de la dri zhim pa dang/ dri mi zhim pa dang/ gnyis 'dres pa dang/ dri gnyis ka ma yin pa'o/ /ro med myong ba po yang med ces bya ba la/ ro ni rnam pa drug ste / mngar ba dang skur ba dang kha ba dang/ lan tshwa dang/ tsha ba dang/ bska ba'o/ /reg med reg pa po yang med ces bya ba la de ni rnam pa bcu gcig ste/ 'byung ba chen po bzhi dang/ shin tu grang ba dang/ shin tu dro ba dang/ de gnyis 'dres pa dang/ 'jam pa dang/ rtsub pa dang/ de gnyis 'dres pa dang/ gnyis ka ma yin pa'o/ /de dag ji ltar med ce na/ rdul phra rab gcig dang du ma gnyis ka yang med do/ /ji ltar med ce na/ rdul phra rab gcig la thog ma dang tha ma dang bar mi dmigs pas gcig pa med do/ de'i phyir du ma yang med do/ /gtan tshigs de'i phyir dus gsum du rtag par gnas nas longs spyad pa'i skyes bu med do/ /ci'i phyir dus gsum du longs mi spyod ce na/ 'das pa'i dus ni 'gags pa dang ma 'ongs pa'i dus ni ma skyes pa dang/ dus bar ma ni khab kyi rtse mo la yungs kar gyi 'bras bu mi gnas pa bzhin du gnas par mi 'gyur ro/ /skyed byed ma dang zhes bya ba la sogs pa'i tshig gis ni don dam par 'brel pa med par bstan to/ /ci'i phyir don dam par 'brel pa med ce na/ phan tshun bltos pa ma yin pa'i phyir ro/ /gang ma skyes pa ltos pa med do/ /ci'i phyir bltas pa med ce na/ med pa yin pas so/ /gang rang bzhin yod pa la ni bltos pa med do/ /gar mkhan chos mkhan de bzhin du zhes bya ba la sogs pas ni don dam par rigs med par bstan to/ /ci'i phyir med ce na/ pags pa dang sha dang khrag dang/ rus pa dang rkang dang/ tshil dang/ khu ba'o/ /dngos po de dag ni bram ze dang/ gdol pa la sogs pa kun la yod pa'i phyir rigs med par bstan to/ /gsang bar ma byas zhes bya ba la sogs pa la/ dam tshig med pa gang gis shes pas byang chub sems dpa' la sems ngan par byas pas dmyal bar 'gro bar 'gyur ro/ /byang chub sems dpa' ni sems can thams cad la phan par bya bar smon lam btab pas na de la nyams par 'gyur ro/ /rdo rje zhes bya ba ni ye shes rnam pa lnga'i rang bzhin rnam par snang mdzad dang/ mi skyod pa dang/ rin chen 'byung ldan dang snang ba mdza' yas dang/ don yod grub pa ste/ de dag la rigs lnga zhes bya'o/ /tshig de dag gis ni don 'di ston par byed de/ ma la sogs pa'i bud med gang rnyed pa la rigs lngas byin gyis brlabs pa dang/ ji bzhin du chos thams cad kyi rang bzhin bsam pa dang/ de bzhin gshegs pa thams cad la mchod pa bya bar bsam la spyad par bya'o/ /de lta bu'i thabs dang shes rab bsgom pa'i rim pa de lta bu'i ting nge 'dzin sems can thams cad la sbyin par bsam par bya'o/ /bshad ma thag pa de'i bar du rnal 'byor pas/ de kho na nyid go bar bya ba'i phyir nan tan bskyed par bya'o/ /rigs drug rnam pa so sor gsungs zhes bya ba ni rdo rje 'dzin pa dang drug go /rdo rje 'dzin pa gang zhig yin zhe na/ sprul pa sna tshogs sprul nas sems can gyi dbyings dpag tu med pa na chos kyi sprin gyis sems can thams cad 'dul bar byed do/ /sa bcu la gnas pa yang dag par rdzogs pa'i sangs rgyas kyi rgyu'o/ /de'i phyir de bzhin gshegs pa thams cad kyi yab ces bya'o/ /gsang sngags kyi theg pa la ni mngon par byang chub pa rnam pa lnga'i rim pas bskyed pa de la rdo rje sems dpa' zhes bya'o/ /de 'gyur ba las bskyed pa la ni yang dag par rdzogs pa'i sangs rgyas zhes bya'o/ /gzugs la thogs pa med pa dang/ sngon med pa dang/ da lta med pa dang/ skye ba gzhan med pa dang/ las dkar nag gi dmigs med pa dang/ slob dpon dang slob bu'i 'brel pa med pa dang byang chub grub par 'dod pa'i brtson pa yang don med par 'gyur bas skyon de dag bsal ba'i phyir de bzhin gshegs pas ston par byed do/ /sngags dang lha dag yang dag gnas zhes bya ba la sogs pas ni gcig dang du ma la sogs pa'i rnam par rtog pa la ni spros pa zhes bya'o/ /de dang bral bar ni thams cad yod do/ /de'i phyir spros pa med pa'i rang bzhin zhes bya'o/ /spros pa med pa'i rang bzhin zhes bya ba gang zhe na/ rang gis go la gzhan la brjod par mi nus pa'o/ /de ni shin tu gsal ba'i rang bzhin no/ /kun rdzob du rnam par snang mdzad la sogs pa'i ming dang gzugs su ston par byed do/ /sems can de gang la mos pa la de ston par byed do/ /shes rab la sogs pa kun rdzob tu brjod par byed do/ /pha las ji bzhin bde ba thob ces bya ba la sogs pa la/ rdo rje sems dpa' i gnas skabs su chos thams cad kyi rang bzhin gnyis su med pa'i ye shes kyi ting nge 'dzin brnyes nas nyon mongs pa med pa'i bde ba nyams su myong ste/ de nas bag chags thams cad spangs nas de bzhin gshegs par gyur ro/ /des rang gi bde ba la spyod par 'gyur ro/ /tshig 'di dag gis ni don 'di ston par byed de/ bde ba dang sdug bsngal ba la sogs pa'i bag chags spangs nas de bzhin gshegs pa ni bems po'i rang bzhin ni ma yin par bstan to/ /de ni ji lta bu'i de bzhin gshegs pa yin zhe na/ ting nge 'dzin las skyes pa dang/ nyon mongs pa med pa dang/ rgyun chad pa med pa la sogs pa'i bde ba chen po'i rang bzhin rnyed pa'o// de bzhin gshegs pa'i ting nge 'dzin ji lta bu yin zhe na/ shi ba gang de bde ba yis zhes bya ba la sogs pa la/ de bzhin gshegs pa'i ting nge 'dzin las bde ba rnyed pas 'jig rten gyi nyon mongs pa dang bcas pa'i bde ba 'chi bar 'gyur ro/ /ji ltar 'chi bar 'gyur zhe na/ 'gag par 'gyur ba dang/ phyis skye bar mi 'gyur ba'o/ /de bzhin gshegs pa'i ting nge 'dzin ni bde ba'i rang bzhin no/ /pad+ma'i myu gu rdo rjes mdzad pa'i kye'i rdo rje'i le'u lnga pa'i 'grel pa rdzogs so/ / //spyod pa zhes bya ba gang zhe na/ gsang nas 'gro ba la spyod pa zhes bya'o/ /go bar byed pa'i rgyur 'dod pa'i yon tan rnam pa lnga spyod pa la yang spyod pa zhes bya'o/ /de kho na nyid gang gis rig ces bya ba la sogs pa la/ mngon sum du gyur pa la ni rig ces bya'o/ /he ru ka'i rang bzhin la de kho na nyid ces bya'o/ /gang gis mngon sum du byed ce na/ bshad par bya ba'i spyod pa 'dis so/ /grub ces bya ba ni he ru ka'i sku smin par gyur pa'o/ /he ru ka'i sku smin pa de'i rgyu gang gis she na/ pha rol tu phyin pa rnams kyis so/ /shing gcig ces bya ba ni nor sbyin gyi 'khor la sogs pa gnas pa la na shing gcig ces bya'o/ /dur khrod ces bya ba ni gang na ro gnas pa la ni dur khrod ces bya'o/ /mtshan mo zhes bya ba ni mi rnams nyal ba'i dus so/ /ma mo'i khang pa zhes bya ba ni grong na gnas pa'i ma mo'i khang pa'o/ /yang na dben sa zhes bya ba ni nor skye bo rnams dang bral ba'o/ /grong bar zhes bya ba ni grong khyer gyi sgra mi thos pa'o/ /yang na lag pa la sogs pa'i yan lag dang bcas pa'i rang gi phung po la shing gcig ces bya'o/ /de nyid dbugs dang bcas pa'i phyir na dur khrod ces bya'o/ /ma mo zhes bya ba ni khams rnams so/ /khang pa zhes bya ba ni de 'dus pa'o/ /mtshan mo zhes bya ba ni 'dod chags la sogs pa'o/ /dben sa zhes bya ba ni 'jig rten pa'i rnam par rtog pa dang bral ba'o/ /grong bar zhes bya ba ni nye ba'i dkyil 'khor ro/ /bsnyen pa'i rnal 'byor pa dang/ bar ma dang/ de las che ba dang/ de las kyang shin tu che ba'o/ /de dag ni rnal 'byor ba rnam pa bzhi'o/ /de dag la rim pa de bzhin du ye shes kyi snang ba bzhi skye bar 'gyur ro/ /ye shes kyi drod skye ba dang/ drod kyis bzod pa skye ba dang/ spyi bo'i gtsug las 'od zer 'byung ba dang/ yang dag pa'i chos so/ /cung zad mthu dang ldan pa'i zhes bya ba la sogs pa la/ rnal 'byor pa 'jig rten pa'i brod kyi ye shes bag zhing dbang du gyur pas gang spyod pa byed par 'dod na/ de bzhin gshegs pas gsungs pa 'dis so// thabs gang gis yin zhe na/ legs can ma ni mig yangs ma zhes bya ba la sogs pa'o/ /de ci'i phyir thabs yin zhe na/ ye shes kyi snang ba mnyen pa dang/ dbang po rnams g.yo ba dang/ yul gyi rlung rnams che ba dang/ de lta bu'i rgyus ye shes 'gag par 'gyur bas na/ spyod pa 'dis byas pas ye shes 'gag par mi 'gyur ro/ /yang na glu len dga' ba'i zhes bya ba la sogs pa'i tshig de dag gis ni glu dang gar gyi rnam par dag pa bstan to/ /sbyin sreg dang ni mchod sbyin dang zhes bya ba la sogs pa la/ rnal 'byor pas 'jig rten las 'das pa'i drod rnyed pa'i yon tan bstan to/ /shes rab rno ba'i dbang dang/ ting nge 'dzin gyis thams cad nus pa'o/ /de'i phyir 'jig rten pa'i rnal 'byor pa de bas 'jig rten las 'das pa'i rnal 'byor pa che bar bstan to/ /de'i phyir/ dam tshig sdom pa rnam par grol/ /yang dag rnal 'byor dang ldan pa/ /rnal 'byor gyi ni spyod pa bya/ /pad+ma'i myu gu rdo rjes mdzad pa'i kye'i rdo rje'i le'u drug pa'i 'grel pa rdzogs so// //mtshon pa'i zhes bya ba ni gdol pa'i skyod yang na btags pa'o phyag rgya zhes bya ba ni dang po gang gis brda bstan pa de la ni phyag rgya zhes bya'o/ /lan gyi phyag rgya yis zhes bya ba ni phyis gang gis brda bstan pa la ni lan gyi phyag rgya ye shes bya'o/ /tshig des ni don 'di ston par byed de/ rnal 'byor pa gang gis sems ting nge 'dzin la brtan par gyur pa ni bsod nams kyi las goms pa'i dbang gis brtan par gyur pa'o/ /rnal 'byor pa de la sangs rgyas dang byang chub sems dpa' rnams phrad par byed pa dang/ chos ston par byed pa dang/ rtags kyang ston par byed do/ /de dag gang gis gzugs kyis ston par byed ce na/ rnal 'byor ma'i gzugs la sogs pas so/ /yang na phreng ba'i phyag ni bstan zhes bya ba'i tshig /des ni rnal 'byor pa dang rnal 'byor ma mngon sum du phrad par bstan to/ /phreng ba yongs su btang byas nas zhes bya ba'i tshig des ni rtags bstan to/ /phyi rol zhes bya ba ni dam tshig med pa'i spyod yul ma yin pa'o/ /'du ba zhes bya ba ni rnal 'byor ma rnams 'dus pa'o/ /rnal 'byor ma rnams 'dus pas ci zhig byed ce na/ gang na rnal 'byor pa bsod nams kyi las dang ldan pa la me tog gi phreng ba gtong bar byed do/ /de nas rnal 'byor pa bkug nas nged kyi dam tshig la gnas par gyis zhes zlos par byed do/ /rnal 'byor pa de yang 'di ltar zlo bar byed do/ rnal 'byor ma rnams ji ltar gsungs/ de ltar thams cad bya dgos shes bya ba ni dus thams cad du rnal 'byor ma cig gsungs bdag gis bya'o zhes zlo bar byed do/ /phyi rol gyi gnas la gang dga' ba'i rnal 'byor pa'i ched du gdan la sogs pa bcu gnyis ston par byed do/ /tshig gang gis bcu gnyis ston par byed ce na/ gdan dang nye ba'i gdan zhes bya ba la sogs pas bstan to/ /sangs rgyas dang byang chub sems dpa' rnams kyi gnas kyi gtso bo bshad par bya'o/ /sa bcu gnyis ni 'di rnams te zhes bya ba ni sems can thams cad sangs rgyas par bya'o snyam pa'i mos pas spyod pa'i sa dang/ sa dang po rab tu dga' ba dang/ sa gnyis pa dri ma med pa dang/ sa gsum pa 'od byed pa dang/ sa bzhi pa 'od snang ba dang/ sa lnga pa sbyang dka' ba dang/ sa drug pa mngon du gyur pa dang/ sa bdun pa ring du song ba dang/ sa brgyad pa mi g.yo ba dang/ sa dgu pa legs pa'i blo gros dang/ sa bcu pa chos kyi sprin dang/ bcu gcig kun tu bzang po'i sa dang bcu gnyis so/ /ting nge 'dzin skye ba dang/ gzungs goms par byed pa dang/ chos shes pa dang don shes pa dang pra kri ta'i skad shes pa dang/ gzhan gyis dris pa bsam mi dgos pas shes pa'o/ /de dag goms par byed pa la ni sems can thams cad sangs rgyas par bya'o snyam pa'i mos pas spyod pa'i sa zhes bya'o/ /sngon du de kho na nyid mi shes pa la phyis de kho na nyid shes pas dga' ba'i phyir sa dang po rab tu dga' ba zhes bya'o// sa der ni gzhan yang bdag gi don byed pa bzhin du gzhan gyis don byed pa'o/ /sbyin pa'i pha rol tu phyin pa yang 'phel bar 'gyur ro/ /sa der ni byang chub sems dpas de kho na nyid go nas sdig pa'i phyogs bag zhad tsam skyes pa bzod par mi nus nas der gnas par bya'o/ /bzod par nus gnyis pa dri ma med par 'jug par bya'o/ /der zhugs nas sems can gyi skyon thams cad dang bral bar 'gyur ro/ /tshul khrims kyi pha rol tu phyin pa yang 'phel bar 'gyur ro/ /tshul khrims ma yin pa'i dri ma dang bral bas nas gnyis pa dri ma med pa zhes bya'o/ /sa de la gnas pa'i byang chub sems dpas ji tsam du 'jig rten pa'i ting nge 'dzin ma rnyed pa dang/ thos nas don 'dzin par mi nus kyi bar dus der gnas par bya'o de de nus na sa gsum pa 'od byed pa der 'jug par bya'o/ /sa der zhugs nas don byed pa dang/ sdug bsngal la bzod pa'o/ /de'i phyir bzod pa'i pha rol tu phyin pa 'phel bar 'gyur ro/ /ting nge 'dzin gyi stobs kyis 'jig rten gyi khams dpag tu med pa'i 'od kyi snang bar byed pas na sa gsum pa 'od byed pa zhes bya'o/ /sa der gnas pa'i byang chub sems dpas 'jig rten pa'i ting nge 'dzin rnyed nas kyang byang chub kyi phyogs kyi chos dang bcas par 'khor la ston mi nus pa'i bar dang/ ser sna thams cad spong bar mi nus kyi bar du bshad ma thag pa'i sa der gnas par bya'o/ /nam zhig nus par gyur pa'i tshes bzhi pa 'od snang bar 'jug par bya'o/ /de na gnas pa'i byang chub sems dpas rtag par sems kyi rnam par rtog pa spang bar bya ba'i phyir byang chub kyi phyogs kyi chos rnams spong bar mi byed do/ /de'i phyir brtson 'grus kyi pha rol tu phyin pa rgyas par 'gyur ro/ /de la gnas pa'i byang chub sems dpas nyon mongs pa'i shing rnams bsreg pa'i stobs dang ldan pa dang/ byang chub kyi phyogs kyi chos rnams kyi 'od zer yod pas na sa bzhi pa 'od snang ba zhes bya'o/ /de la gnas pa'i byang chub sems dpas 'phags pa'i bden pa bzhi bsgom pa dang/ 'khor ba las sems phyir mi ldog gi par dang/ byang chub kyi phyogs gyi chos rnams thabs dang bcas par mi bsgom gyi bar du bshad ma thag pa'i sa der gnas par bya'o/ /de nus pa'i tshe sa lnga par 'jug par bya'o/ /de la gnas pa'i byang chub sems dpas byang chub kyi phyogs kyi chos rnams thabs dang bcas par bsgom pa ni shin tu sdug bsngal bar gyur kyang spang bar mi bya ba dang/ bdud thams cad kyi rgyal bar mi nus pa'i phyir sa lnga pa rgyal bar dka' ba zhes bya'o/ /der gnas pa'i byang chub sems dpa' ni rtag par sgom pa la gnas pas bsam gtan gyi pha rol tu phyin pa rgyas par 'gyur ro/ /byang chub sems dpa' bag chags ngan pa spangs nas bag chags bzang po'i rgyu ma rnyed kyi bar du sa der gnas par bya'o/ /rnyed par gyur pa'i tshe sa drug pa mngon du gyur par 'jug par bya'o/ /de la gnas pa'i byang chub sems dpas rgyu rkyen tshogs pa las skyes par rtag par bsgoms pa'i phyir shes rab kyi pha rol tu phyin pa rgyas par 'gyur ro/ /de bzhin gshegs pa thams cad mngon du gyur pa'i phyir sa drug par mngon du gyur pa zhes bya'o/ /chos thams cad kyi rgyu ma shes rab kyi bar dus der gnas par bya'o/ /shes par gyur pa'i tshe sa bdun pa ring du song bar 'jug par bya'o/ /de la gnas pa'i byang chub sems dpas rgyu thams cad shes nas mi spong ba'i phyir thabs kyi pha rol tu phyin pa rgyas par 'gyur ro/ /thabs kyi lam du zhugs pas ring du song ba'i phyir sa bdun pa ring du song ba zhes bya'o/ /de ni ji tsam gnas kyi bar du rgyu med par sems can gyi don byed pa ma rnyed kyi bar du der gnas par bya'o/ /rnyed par gyur pa'i tshe sa brgyad pa mi g.yo bar 'jug par bya'o/ /de la gnas pa'i byang chub sems dpas nan tan ma byas par bsod nams kyi tshogs kun brnyes pa'i phyir dang/ sems can thams cad kyi don nyon mongs pa med par byed pa'i phyir smon lam gyi pha rol tu phyin pa brgyas par 'gyur ro/ /rgyu med pa dang nan tan med pa dang/ 'dar ba med pa'o/ /de dag med pa'i phyir sa brgyad pa mi g.yo ba zhes bya'o/ /de la gnas pa'i byang chub sems dpas de bzhin gshegs pas pra kri ta'i skad du chos bstan pa la sogs pa so sor ston par mi nus kyi bar du bshad ma thag pa'i der gnas par bya'o/ /ston par nus par gyur pa'i tshes dgu pa legs pa'i blo gros la 'jug par bya'o/ /de la gnas pa'i byang chub sems dpas shes rab kyi stobs che ba'i phyir stobs kyi pha rol tu phyin pa rgyas par 'gyur ro/ /lam thams cad kyi sgo nas chos ston par nus pa dang/ rkyen med pa dang/ ltag pa rnyed pa'i phyir sa dgu pa legs pa'i blo gros zhes bya'o/ /de la gnas pa'i byang chub sems dpas de bzhin gshegs pa'i zhing khams mang por sprul par mi nus pa dang/ 'khor mang por sprul par mi nus pa dang/ sprul pa dpag tu med pa la sogs par sprul par mi nus pa dang/ sems can gyi bsod nams kyi tshogs rnams smin par mi nus kyi bar du der gnas par bya'o/ /zhes par gyur pa'i tshe/ sa bcu pa chos kyi sprin la 'jug par bya'o/ /de la gnas pa'i byang chub sems dpas sprul ba dang/ sems can smin par byed pa dang/ sems can la ye shes kyis khyab par sbyin byed pa'i phyir ye shes kyi pha rol tu phyin pa rgyas par 'gyur ro/ /chos bka' stsal pa'i sprin las sems can gyi khams dpag tu med par chos kyi char 'bebs pa'i phyir sa bcu pa chos kyi sprin zhes bya'o/ /de la gnas pa'i byang chub sems dpas gzungs rnams la thogs pa med par ma gyur gyi bar dang/ de'i ye shes la gzhan gyis bsgrib par nus kyi bar dus der gnas par bya'o/ /mi nus par gyur pa'i tshe sa bcu gcig pa sangs rgyas kyi sa kun tu bzang por 'jug par bya'o/ /sa de'i phyogs gcig tsam gyi yon tan ni de bzhin gshegs pas brjod par mi nus na rangs pa'i yon tan smos kyang ci dgos/ sa de la sangs rgyas dang byang chub sems dpa' rnams kyi 'du ba'i gnas zhes bya'o/ /de ni rtag par gnas par gsungs so/ /sa bcu'i dbang phyug ces bya ba ni rdo rje sems dpa' o/ /mgon po zhes bya ba ni he ru ka'i sku'o/ /gzhan ma yin zhes bya ba ni phyi'i dzA land+ha ra la sogs pas ma bstan to/ rnal 'byor ma rnams kyi 'du ba'i nyi ma bstan par bya ste de'i phyir yi dags kyi ni phyogs su la zhes bya ba smos so/ de ni zla ba mar gyi ngo zhes bya ba'i don to/ yang na gsang ba'i phyogs shes bya'o/ /ci'i phyir gsang ba'i phyogs zhes bya zhe na/ nyan thos la sogs pa'i spyod yul ma yin pa'i phyir ro/ /bcu bzhi zhes bya ba ni de bzhin gshegs pa'i sa'o/ brgyad ces bya ba ni sa brgyad pa mi g.yo ba'o/ /da ni 'dus pa de'i bza' bar bya ba stan bar bya ste/ rgyal mtshan zhes bya ba ni sdong po la 'chang ba'i zhing chen no/ /mtshon brgyab ces bya ba ni ral gri la sogs pa brgyab nas bsad pa'o/ /bdun 'khor zhes bya ba ni skye bdun mir skyes pa de nyid rang shi ba ni bdun 'khor zhes bya'o/ /nan tan snying rje bskyed pa yis bya ba la sogs pa la/ rin chen gsum la gnod par byed la sogs pa dang/ dam tshig nyams par byed pa'o/ /de la snying rje chen po bskyed la bde ba can gyi 'jig rten gyi khams sam/ gzhan yang gnas bzang po gang yang rung bar rnam par shes pa bsgral bar bya'o/ /kha sbyor kha phye la sogs pa'i rim pas bsad nas de'i sha 'bar ba dang dro bar bya ba la sogs pa'i rim pas bza' bar bya'o/ /gang gang skye bo rnams la ni zhes bya ba la sogs pa la sngon du bstan pa'i sems can gnas bde ba can du bsgral ba des chos thos pas che ge mos drin btags so zhes zlo bar 'gyur ro/ /de rnal 'byor ba'i dbang du 'gyur ro/ /tshig des don de bstan to/ /gzhan yang rnal 'byor pa'i bza' bar bya ba gsum ston par byed de/ gzhan gyis bsad pa dang/ rang shi ba dang/ sems bzang pos rang gis bsad pa'o/ /pad+ma myu gu rdo rjes mdzad pa'i kye'i rdo rje'i rgyud kyi le'u bdun pa'i 'grel pa rdzogs so// //nam mkha' i khams zhes bya ba la sogs pa la/ sngon du rdo rje'i sa gzhi dang rdo rje'i ra ba dang/ rdo rje'i gzeb de dag stan to/ /de'i dbus su bsrung ba'i 'khor lo bsam par bya'o/ /ji ltar bsam par bya zhe na/ 'khor lo rtsibs bcu pa kha dog ser po 'khor bar bsam mo/ /tshig des ni 'khor lo bstan to/ /sngon du ji ltar rigs zhes bya ba la sogs pa la 'khor lo de la gshin rje gshed la sogs pa shar phyogs nas bzung nas lha rnams ji bzhin skye ba bzhin du dgod par bya'o/ /de la shar phyogs kyi rtsibs la gshin rje gshed po kha dog nag po zhal g.yas dkar ba g.yon dmar ba'o/ /phyag g.yas gnyis na rdo rje tho ba/ tha ma na ral gri'o/ /phyag g.yon gyi gnyis na rin po che/ tha ma na pad+ma'o/ /lho phyogs kyi rtsibs la shes rab mthar byed sku mdog dkar po g.yas sngo g.yon dmar ba'o/ /g.yas kyi gnyis na dbyug pa dkar po dang/ ral gri'o/ /g.yon gyi gnyis na rin po che dang/ pad+ma'o/ /nub phyogs kyi rtsibs la pad ma mthar byed sku mdog dmar po g.yas sngo g.yon dkar po'o/ /g.yon gyi gnyis na rin po che dang 'khor lo'o/ /byang phyogs kyi rtsibs la bgegs mthar byed sku mdog nag po g.yas dkar g.yon dmar ba'o/ /g.yas gnyis na rdo rje dang ral gri'o/ /g.yon gnyis na rin po che dang/ pad+ma'o/ /me mtshams su khro bo chen bo Tak+ki rA dza sgeg pa'i tshul dang ldan pa sku mdog sngon po g.yas dkar g.yon dmar ba'o/ /g.yas gnyis na lcags kyu dang ral gri'o/ /g.yon gnyis na rin po che dang/ pad+ma'o/ /srin po'i mtshams na dbyug pa mngon po phyag mtshan dbyug pa sngon po ma gtogs pa phyi ma rnams gshin rje gshed dang mthun no/ /rlung gi mtshams su stobs po che phyag mtshan rtse gsum ma gtogs pa phyi ma rnams bshed dang mthun no/ /Tak+ki rA dza ma gtogs pa de dag sku mthung ba gsus pa che la 'phyang ba/ sku sprul gyis brgyan pa/ zhal 'jigs pa'i gzugs dang ldan pa/ ljags blu? ma po 'dril ba mche ba gtsigs pas gzhad pa/ dbu skra dmar ser gyen du 'khyil ba sma ra dmar ser dang ldan pa'o/ /dbang ldan gyi mtshams su mi g.yo mgon po phyag mtshan rdo rje dang spyan dmar ser ma gtogs pa gzhan Tak+ki rA dza dang mthun no/ /steng du gtsug gtor 'khor lo sgyur ba'i rgyal mo sku mdog ser po zhal g.yas sngo g.yon dkar ba'o/ /g.yas gnyis na 'khor lo ser po dang ral gri'o/ /g.yon gnyis na rin po che dang pad+ma'o/ /'og gi phyogs su sum b+ha phyag mtshan rdo rje ma gtogs pa gzhan Tak+ki rA dza dang mthun par bshad do/ /khro bo thams cad kyi phyag dang po yum la 'khyud pa'o/ /'khor lo de'i dbus la nam mkha' i khams zhes bya'o/ /b+ha ga zhes bya ba ni chos kyi 'byung gnas so/ /de ni bshad ma thag pa der bsam bar bya'o/ /chos kyi 'byung gnas de ji lta bu zhe na/ gru gsum kha dog dkar po dang gru phra mo kha thur du bltas pa'o/ /ji bzhin rig pa zhes bya ba ni rim pa bzhin du'o/ /rim pa ni sa'i dkyil 'khor dang/ chu'i dkyil 'khor dang/ me'i dkyil 'khor dang/ rlung gi dkyil 'khor chen po'o/ /de'i dkyil du 'khor lo bsam par bya'o/ /'khor lo bsam par bya zhes bya ba'i don de ji lta bu zhe na/ rnam par snang mdzad bsgyur nas gzhal yas khang bskyed pa zhes bya ba'i don / rim pa gnyis pa zhes bya ba ni gzhal yas khang rim pa gnyis dang ldan pa'o/ /snying po la ni gcig par gyur zhes bya ba ni gzhal yas khang gi dbus kyi pad+ma'i ze'u 'bru la rim pa dang po zhes bya'o/ /gru gsum la ni gzhan ma gsungs zhes bya ba ni ze'u 'bru ma gtogs pa chos kyi 'byung gnas kyi nang du gzhal yas khang ga ngo bo ji tsam gnas pa la ni rim pa zhes bya'o/ /'khor lo zhes bya ba ni lha rnams bsgom par bya ba'o/ /de'i dbus su zhes bya ba ni gzhal yas khang gi dbus zhes bya'o/ /ro ni bsam par bya zhes bya ba ni lha bco lnga'i gdan zhing chen bsam par bya'o/ /gang bsam par bya zhe na/ ze'u 'bru dang 'dab ma brgyad dang/ sgo bzhi dang/ shar phyogs kyi pad+ma'i 'dab ma'i sna dang nub phyogs kyi pad+ma'i 'dab ma'i snar bsam par bya'o/ /de'i thog tu zhes bya ba ni gnas kyi gtso bo'i steng na gnas pa'i gdan de'i steng du'o/ /zla bar gyur zhes bya ba ni a la sogs pa zhu ba las zla bar bsam par bya'o/ /de nas ma lus nyi mas gnang zhes bya ba ni ka la sogs pa zhu ba las nyi ma'i dkyil 'khor bsam par bya'o/ /sa bon de'i steng du zhes bya ba ni aM dang hUM ngo/ /de dag thams cad bsgyur ba las rdo rje sems dpa' bsam par bya'o/ /rdo rje sems dpa' ji lta bu zhe na/ zhal dang phyag mtshan sras dang 'dra zhes bya ba ni 'bras bur gyur pa'i gzugs dang mthun par bshad do/ /'bras bur gyur pa'i lha'i gzugs dang zhal la sogs pa mthun na bye brag ci yod ce na/ de'i bye brag bstan par bya'o/ /de'i phyir zla 'od nor bu kha dog 'dra zhes smos so/ /cho ga des ni bye brag 'di bstan par bya ste/ rgyu'i gzugs kyi gdan ni zla ba'i dkyil 'khor ro/ /de'i sku ni zla pa'i kha dog dang 'dra'o/ /'od zer kyang zla ba'i 'od zer dang 'dra bar bstan to/ /'bras bu'i gzugs kyi ni nyi ma'i gdan nyi ma'i 'od zer dang ldan pa'o/ /yi ge rnams las byung ba'i sku zhes bya ba la sogs pa la yi ge rnams las byung ba zhes bya ba ni rdo rje sems dpa' i sku'o/ /sku des mnyam par sbyor ba'i dus su byang chub kyi sems rengs par byed pa hUM phaT bsam par mi bya'o/ /de bsam par mi bya ba'i phyir/ zla ba nyi ma gnyis med sbyor zhes bya ba smos so/ /de ni byang chub sems dang rang byung gi me tog de gnyis 'dus par gyur pa'o// gau rI la sogs pa zhes bya ba ni bshad ma thag pa de las spro ba bstan to/ /gau rI la sogs pa gang yin zhe na/ zhal brgyad pa la sogs pa rnams kyi dkyil 'khor gyi lha'o/ /de'i don rgyas par bshad par bya ste/ gau rI la sogs pa nyi ma zla ba 'dus pa las skye ba'i phyir/ thabs dang shes rab rang bzhin gyis zhes bya ba la sogs pa smos so/ /thabs dang shes rab mnyam par sbyor ba la zla ba nyi ma dbye ba las zhes bya'o/ /de rnams sku mdog so sor dbye zhes bya ba la sogs pa ni dbus kyi gtso bo la bltos nas de dag gi sku mdog gi bye brag so sor shes par bya'o/ /gau rI la sogs pa zhes bya ba'i tshig des ni bdag med ma la sogs pa'i 'dra ba 'byung ba'i 'bras bur shes par bya'o/ /rnam par smin pa'i 'bras bu thob par bya ba'i phyir mig la sogs pa'i skye mched byin gyis brlabs par bya ste/ de'i phyir dang po nag po bsam par bya zhes bya ba la sogs pa smos so/ /yang na de bzhin chags bral mdza' zhes bya bas ni 'khor lo bzhi byin gyis brlab par bya ba dang/ skyes bu byed pa'i 'bras bu bstan to/ / phyin ci log pa thams cad spong ba dang/ phyin ci ma log pa bskyed pa'i rim pa bshad par bya ste/ bskyed pa'i rim pa ji lta bu zhe na/ bskyed pa'i rim pa ji bzhin du zhes bya ba smos so/ /kun rdzob tu rgyu dang 'bras bu'i dngos po la bya bar bstan to/ /rdzogs pa'i rim pa de bzhin du zhes bya ba ni rdzogs pa dang rang bzhin gyis grub par gnas pa'o/ /kun gyi rting la rang bzhin dga' zhes bya ba ni rnam par rtog pa med pa'i ye shes gcig kho na rgyu yin gyi gzhan ma rnams la ni bltos pa med do/ /de la ni rang bzhin dga' ba zhes bya'o/ /bde mchog dga' ba srid par gsungs zhes bya ba ni chags pa dang bcas pa'i ye shes la ni bde mchog dga' ba zhes bya'o/ /de la ni srid pa zhes bstan to/ /chags pa dang bral ba'i ye shes me mar shi ba lta bu mya ngan las 'das pa la chags pa dang bral ba kun 'das pa zhes bya'o/ /btang snyoms su gnas pa la ni bar ma'i dga' ba tsam zhes bya'o/ /de gsum dang bral ba la ni 'di rnams kyi ni rang bzhin spangs zhes bya'o/ /des ni rang bzhin dga' ba bstan to/ /de gsum dang bral ba rang bzhin dga' ba yin na 'khor ba dang mya ngan las 'das pa btang snyoms so/ /de gsum spangs nas sgra gzhan gyi de brjod par bya bar rigs na de gsum la ltos nas rang bzhin dga' ba ci phyir bstan/ de'i lan du rang bzhin bstan du gzhan mi nus/ gang na'ang de ni mi thob pa po zhes bya ba smos so/ /de ni 'khor ba la sogs pa'i sgra ma gtogs pa gzhan gyi ni ma yin no/ /rang bzhin ni 'khor pa la sogs pa ma gtogs par gzhan la thob pa med do/ /ci'i phyir gzhan las thos par mi 'gyur zhe na/ yon tan ma yin pa ni 'khor ba yin la de yang rnam par shes pa las tha dad pa med do/ /rnam par shes pa la yang 'das ba dang ma 'ongs pa de la med do/ /skad cig ma shin tu cha phra ba'i ngo bor yod pa'o/ /de'i phyir gang zhig 'khor/ 'khor ba zhes bya gang/ 'khor ba'i las ni gang zhig yin te/ de ni med de/ de'i phyir 'khor ba med par bstan to/ /de'i phyir mya ngan las 'das pa yang med do/ /de gnyis med pas bar ma yang dmigs pa med do/ /de bas na 'khor ba la sogs pa'i rang bzhin go ba la rang bzhin dga' ba zhes bya'o/ /de'i phyir sgra gzhan gyis brjod par mi nus pa dang/ gzhan las mi thob par bstan to/ /de lta bu'i ye shes ji ltar go bar 'gyur zhe na/ de'i phyir bla ma'i bkur sti zha 'bring gis zhes bya ba la sogs pa la bsod nams kyi las goms pa'i dbang gis sems bzang pos gyur pas yang dag pa'i bla ma dang phrad par 'gyur zhing des lam ston par byed do/ /de goms pa'i dbang gis rang gi go bar 'gyur ro/ /sgrib pa dang bral ba'i ye shes skyes pa'i skad cig la rnam pa thams cad go bar 'gyur ro/ /de'i phyir na rnam pa thams cad gcig go /de bas na rang bzhin dga' ba las thams cad skye bar bstan to/ /de lta bu'i ye shes rtag par goms pas skye bar 'gyur ro/ /de go bar bya ba'i phyir tshig 'di bstan par bya'o/ /'di ltar bsam byas rnal 'byor pa zhes bya ba la sogs pa bstan to/ /rtswa shing dbyi mo la sogs pa zhes bya ba la sogs pa ni rnam par shes pa'i rnam pa yin gyi/ gzhan gyi na ma yin no/ /rnam pa thams cad rnam par shes pa las logs shig na med na phyi rol rnams kyis ci'i phyir shes par mi 'gyur/ de'i lan du dpag tu med pa'i dus nas phyi rol yin par brtags pas na go bar mi 'gyur ro/ /mnyam pa'i ro goms pa dang ldan pa'i rnal 'byor pas phrin las thams cad 'grub par 'gyur ro/ /ji ltar 'grub par 'gyur zhe na/ de'i phyir tshig 'di bstan par bya ste/ rtog pas las ni skye bar 'gyur zhes bya ba ni rang bzhin dga' ba'i ting nge 'dzin la gnas pa'i rnal 'byor pas sems can gyi don du ji ltar brtags pa de bzhin du phrin las kun 'grub par 'gyur ro/ /de la las zhes bya ba ni zhi ba la sogs pa'i phrin las so/ /rnam pa thams cad pa rnam par rtog pa thams cad dang las thams cad de dag thams cad bshad ma thag pa'i rnal 'byor pa des 'grub par 'gyur ro/ /de'i phyir tshig 'di bstan par bya ste rang bsdu rang gis byed pa'o/ /zhes bya ba la sogs pa bstan to/ /chos 'byung gnas las byung ye shes zhes bya ba ni rdo rje pad+ma dang mnyam par sbyar ba las skyes pa'i ye shes so// thabs ldan zhes bya ba ni lha'i rnal 'byor dang ldan pa'o/ /des ni ye shes skye bar byed pa'i rgyu bstan to/ /gzhan yang ye shes skye ba'i rgyu ni bskyod pa dang/ ga bur spang bar mi bya ba dang/ bsgom pa'i stobs so/ /de dag gi dbang gis ji lta bu'i ye shes skye bar 'gyur zhe na/ spros pa thams cad dang bral ba/ 'das pa dang ma 'ongs pa rnam pa gnyis dang bral/ rang gis rig pa/ gzhan la tshig du brjod par mi nus pa/ don thams cad mngon sum du byed par nus/ bems po ma yin pa thams cad mkhyen pa/ 'das pa dang ma 'ongs pa da ltar gyi ye shes so/ /bshad ma thag pa'i rang bzhin no/ /pad+ma'i myu gu rdo rjes mdzad pa'i kye'i rdo rje'i rgyud kyi le'u brgyad pa'i 'grel pa rdzogs so// //dbang po drug ces bya ba ni mig gi dbang po la sogs pa'o/ /phung po lnga zhes bya ba ni gzugs kyi phung po la sogs pa'o/ /de la gzugs kyi phung po ni dbang po dang/ yul lnga dang/ sngon du gzugs rnam pa gnyis zhes bya ba la sogs pa bstan pa dang/ 'byung ba chen po bzhi dang/ mig gi dbang po'i rten la sogs pa dang/ gzugs 'das pa la sogs pa la ni gzugs kyi phung po zhes bya'o tshor ba'i phung po zhes bya ba ni bde ba dang sdug bsngal dang btang snyoms so/ /gzhan yang mig gi 'dus te reg pa la sogs pa las byung ba'i tshor ba bco brgyad dang/ tshor ba 'das pa la sogs pa dpag tu med pa la tshor ba'i phung po zhes bya'o/ /'du shes zhes bya ba ni rgyu rkyen 'dus nas mtshan mar 'dzin pa 'du shes zhes bya'o/ /de'i rgyu ni gzugs la sogs pa dpag tu med pa'o/ /de yang chung ngu dang/ chen po dang tshad med pa'o/ /de yang 'das pa dang da ltar dang ma 'ongs pa la 'du shes kyi phung po zhes bya'o/ /'du byed kyi phung po zhes bya ba ni sems las gang byung ba'o/ /de la sems las byung ba zhes bya ba ni dad pa la sogs pa dang/ 'dod chags la sogs pa ste/ de yang mig gi dbang po la sogs pa ste/ de yang mig gi dbang po la sogs pa la brten nas skye ba'o/ /de dag thams cad la 'du byed kyi phung po zhes bya'o/ /rnam par shes pa'i phung po zhes bya ba ni mig gi rnam par shes pa la sogs pa drug go / de yang dge ba dang mi dge ba dang lung du bstan pa dang ma bstan pa'o/ /de ni chung ngu dang 'bring dang chen po'o/ /de dag la ni rnam par shes pa'i phung po zhes bya'o/ /nang gi gnas drug dang/ phyi'i yul drug go /de'i rnam par dag pa ni gzung 'dzin dang bral ba zhes bsten to/ /rdo rje ma sgyur gzugs phung la zhes bya ba la sogs pas bstan to/ /lha'i rnam par dag pa bstan nas dbus kyi gtso bo zhal brgyad pa'i rnam par dag pa bstan par bya ste/ de bstan par bya ba'i phyir/ phyag rnams kyi ni stong nyid dag ces bya ba la/ nang stong pa nyid dang/ phyi stong pa nyid dang/ phyi nang stong pa nyid dang/ stong pa nyid stong pa nyid dang/ chen po stong pa nyid dang/ don dam pa stong pa nyid dang/ 'dus byas stong pa nyid dang/ 'dus ma byas stong ba nyid dang/ shin tu stong pa nyid dang/ thog ma dang tha ma med pa stong pa nyid dang/ dor ba med pa stong pa nyid dang/ rang bzhin stong pa nyid dang/ chos thams cad stong pa nyid dang/ rang gi mtshan nyid stong pa nyid dang/ mi dmigs pa stong pa nyid dang/ ngo bo nyid stong pa nyid do/ /de la nang stong pa nyid ces bya ba ni mig gi dbang po la sogs pa la ni nang stong pa nyid ces bya'o/ /mig gi yul gzugs la sogs pa la ni phyi stong pa nyid ces bya'o/ /de gnyis stong ngo snyam pa'i sems de yang stong pas na phyi nang stong pa nyid ces bya'o/ /stong pa nyid stong pa nyid ces bya ba ni chos thams cad stong pa nyid do snyam pa'i sems de yang stong pa nyid yin pas na stong pa nyid stong pa nyid ces bya'o/ /shar phyogs la sogs pa stong pa nyid la ni chen po stong pa nyid ces bya'o/ /don dam pa stong pa nyid ces bya ba ni mya ngan las 'das pa yang stong pas don dam pa stong pa nyid ces bya'o/ /'dus byas stong pa nyid ces bya ba ni 'dod pa'i khams dang/ gzugs kyi khams dang/ gzugs med pa'i khams so/ /de dag 'dus byas stong pa nyid ces bya'o/ /'dus ma byas stong pa nyid ces bya ba ni skye ba dang gnas pa dang 'gag pa med pa la ni 'dus ma byas stong pa nyid ces bya'o/ /shin tu stong pa nyid ces bya ba ni rtag par blta ba dang/ chad par blta ba de gnyis kyi stong pa la ni shin tu stong pa nyid ces bya'o/ /thog ma dang tha ma med pa stong pa nyid ces bya ba ni 'gro ba dang 'ong ba med pa'o/ /de la ni thog ma dang tha ma med pa stong pa nyid ces bya'o/ /dang ba med pa stong pa nyid ces bya'o/ /rang bzhin stong pa nyid ces bya ba ni chos thams cad kyi rang bzhin gang gis kyang ma byis pas na rang bzhin stong pa nyid ces bya'o/ chos thams cad stong pa nyid ces bya ba ni 'dus byas dang 'dus ma byas dag de gnyis kyis stong pa la chos thams cad stong pa nyid ces bya'o/ /rang gi mtshan nyid stong pa nyid ces bya ba ni chos thams cad rang rang gi mtshan nyid kyis stong pas na rang gi mtshan nyid stong pa nyid ces bya'o/ /mi dmigs pa stong pa nyid ces bya ba ni dus gsum gyi chos mi dmigs pa la ni mi dmigs pa stong pa nyid ces bya'o/ /ngo bo nyid stong pa nyid ces bya ba ni rgyu rkyen las skyes pa rnams ni don dam par med pas na ngo bo nyid stong nyid ces bya'o/ /de dag gi rnam par dag pa ni phyag bcu drug go /zhabs kun bdud kyi dag pa yis zhes bya ba ni nyon mongs pa'i bdud la sogs pa 'joms par byed pa ste/ de ji ltar 'joms par byed ce na/ shes rab kyi stobs kyis so/ /shes rab de yang bzhi ste/ dngos po stong pa nyid dang/ dngos po med pa stong pa nyid dang/ rang bzhin stong pa nyid dang/ gzhan rang bzhin gyis stong pa nyid do/ /de la dngos po stong pa nyid ces bya ba ni dngos po rang gi rang bzhin gyis stong pa nyid do/ /dngos po med pa stong pa nyid ces bya ba ni dngos po med pas stong pa nyid ces bya'o/ /rang bzhin stong pa nyid ces bya ba ni rang bzhin gyis stong pa nyid do/ /gzhan rang bzhin gyis stong pa nyid ces bya ba ni gzhan nyid rang bzhin gyis stong pas na gzhan rang bzhin gyis stong pa nyid ces bya'o/ /de dag gi rnam par dag pa ni zhabs bzhir bstan to/ /rnam par thar pa brgyad kyi zhal zhes bya ba ni gzugs can gzugs la lta ba dang/ sdug pa'i rnam par thar pa lus kyis mngon sum du byas nas rab tu byung ba'i spyod pa bslabs nas gnas pa dang/ rnam shes mdza' yas kyi skye mched la gnas pa dang/ nam mkha' mdza' yas so snyam pa'i gnas dang/ ci yang med pa'i skye mched kyi gnas pa dang/ 'du shes med 'du shes med min gyi gnas pa dang/ 'gog pa'i snyoms par 'jug pa'o/ /de dag gi rnam par dag pa ni zhal brgyad do/ /spyan dag rdo rje can gsum gyi zhes bya ba ni sku gsung thugs kyi rnam par dag pa ni spyan gsum mo/ /gang dang gang gis 'jig rten bcings zhes bya ba ni rnam par rtog pa de dang de'i mun pas bcings pa'i shes pa de nyid kyi snang bas rang nyid grol bar 'gyur ro/ /pad+ma'i myu gu rdo rjes mdzad pa'i kye'i rdo rje'i rgyud kyi le'u dgu pa'i 'grel pa rdzogs so// //byang chub sems dpa' i khang pa la zhes bya ba ni dur khrod do/ /yang na de rung gang rung thob ces bya ba ni thabs dang shes rab kyi rgyus dngos grub thob par 'gyur ro/ /de la rigs ni tshad ma ma yin no/ /phyag rgya ma'i gdong g.yogs zhes bya ba ni dbang bzhi bshad pa'i gnas skabs su bstan par bya'o/ /rang bzhin dga' ba'i ngo bo ni rnal 'byor ma chen mo rnams kyi 'du bar bya ba'i le'ur bstan zin to/ /'dir ni slob mar go bar bya ba'i phyir bstan par bya ste/ de bas na zlos pa'i skyon du mi 'gyur ro/ /yang na thams cad kyi ni spangs zhes bya ba la sogs pas ni chags pa dang chags pa dang bral ba ni phyin ci log gi rnam par rtog pas brtags pa'o/ /rtog pa de 'gags par gyur pas de yang 'gag par 'gyur ro/ /de gnyis 'gag pas ni bar ma yang mi dmigs so/ /de'i phyir de gsum gyis rang bzhin dga' ba spangs pa'o/ /yang na bshad ma thag nyid kyis rang bzhin go bar bya ste/ de ji ltar go bar bya zhe na/ spros pa thams cad dang bral ba rang gis go la gzhan la brjod par mi nus pa'o/ /de spangs nas gzhan du ni rang bzhin dga' ba mi snyed do/ /de'i phyir rang bzhin dga' ba ni dga' ba gsum gyi bdag nyid do/ /rtsed mo mchog gi bde ba la zhes bya ba ni rtog pa med pa'i ting nge 'dzin no/ /de rnyed pas gzung ba la sogs pa'i rnam par rtog pa dang bral bar 'gyur ro/ /rang bzhin gnyis zhes bya ba ni thabs dang shes rab kyi dbye bas rang bzhin dga' ba gnyis zhes bya'o/ /rang bzhin ni yang dag par rdzogs pa'i sangs rgyas so/ /stong nyid ces bya ba ni chos thams cad mi dmigs pa'o/ /snying rje zhes bya ba ni sems can thams cad 'khor ba las sgrol ba'o/ /de yang dmigs par sgrol bar byed pa'i rang bzhin la ni snying rje zhes bya'o/ /stong pa nyid dmigs pa med pa dang snying rje dmigs pa dang bcas pa ji ltar gcig par 'gyur zhe na/ de ni skyon med de/ ting nge 'dzin gang stong pa nyid dang bcas pa de la ni stong pa nyid ces bya'o/ /de ni snang ba'i rang bzhin no/ /snying rje ni shes rab kyi mig gi rang bzhin no/ /de'i phyir ting nge 'dzin la snang ba skyes nas snying rje'i mig gis bltas na sems can gang gi sgo nas grol bar 'gyur ba shes par byas nas sems can gyi don byed par 'gyur ro/ /de'i phyir stong pa nyid dang snying rje ni mi mthun par 'gyur ba med do/ /de bas na de gnyis phan tshun gcig la gcig yon tan du 'gyur ro/ /pad+ma'i myu gu rdo rjes mdzad pa'i kye'i rdo rje'i rgyud kyi le'u bcu pa'i 'grel pa rdzogs so/ / //g.yon par gnas pa'i lta ba'i dbang zhes bya ba ni mig gi 'bras bu gnyis kyis g.yon phyogs su blta bar bya'o/ /de la ni dbang du bya ba'i lta ba zhes bya'o/ /de lta bu'i rim pas g.yas phyogs su bltas nas dgug pa'i lta bstangs bya'o/ /de la ni dgug pa'i lta ba zhes bya'o/ /mig 'bras gnyis kyang steng du zhes bya ba la sogs pa ni de la mig 'bras gnyis bag zhad g.yon du bskyod nas bag zhad steng du lta bar byed pa'o/ /de la ni rengs par byed pa'i lta ba zhes bya'o/ / sna'i gdong rgyud bar na ste/ zhes bya ba ni mig 'bras gnyis mig gi bar du bzhag nas sna'i rtse mo la blta bar byed pa'o/ /de la ni bsod par byed pa'i lta ba zhes bya'o/ /rtog pa 'di ni mi bya'o zhes bya ba ni the tshom mi bya'o/ /ci'i phyir the tshom mi bya zhe na/ tshad ma las byung ba'i phyir ro/ /tshad ma zhes bya ba gang yin zhe na/ gang goms par byas pa mngon du gyur pa la ni tshad ma zhes bya'o/ /de'i phyir sangs rgyas rdzu 'phrul bsam mi khyab ces bya'o/ /de la bsam mi khyab ces bya ba ni rnam par rtog pa med pa'o/ / rnam par rtog pa med pa gang yin zhe na/ 'jig rten gyi khams dpag tu med pa na 'khor ba dpag tu med pa dang/ mya ngan las 'das pa la sogs ba rdzu 'phrul dpag tu med pa ston par byed do/ /de dag thams cad kyang rnal 'byor pa las 'grub par 'gyur na/ lta ba tsam 'grub par 'gyur ba lta smos kyang ci dgos/ gsod pa 'di na dgos pa med ces bya bas ni bsrung bar bya ba'i dam tshig bstan to/ /thog ma na dang thog ma ga zhes bya ba la sogs pas ni bza' bar bya ba'i dam tshig bstan to/ /pad+ma'i myu gu rdo rje kye'i rdo rje'i rgyud kyi rdo rje snying po yongs su bla na med pa'i byang chub kyi bskal pa'i rgyal pos 'grel pa mdzad pa rdzogs so/ / //dgongs la gzugs brnyan dag par bya zhes bya ba ni mngon par byang chub pa lnga'i rim pas lder so la sogs pa bskyed nas/ bskyed pa de nyid zhu bar bsam par bya'o/ /de la bskul nas bzhengs par bsam par bya'o/ /de'i skye mched byin gyis brlabs pa dang ye shes sems dpa' bsam par bya'o/ /de dag ting nge 'dzin gyis rdzogs par bya'o/ /de nas de bzhin gshegs pa rnams kyis dbang bskur nas rigs kyi gtso bos dbu brgyan par bsam par bya'o/ /de dag bsam par byas nas rnam par rgyal ba'i bum pa la sogs pa'i nang du snying po lnga'i sman dang bdud rtsi rnam pa lnga dang/ dri zhim po'i chu dang de dag nang du blugs par bya'o/ /pa la sha la sogs pa'i yal gas kha brgyan par byas la/ ras gtsang mas mgrin pa bcing bar bya ba dang/ legs par lta'i phyag mtshan bri bar bya'o/ /de nas rnam par rgyal ba'i bum pa la sogs pa'i steng du rdo rje la me tog gi phreng ba bcings la me tog gi phreng ba'i sna bzung la bsnyen pa dbul bar bya'o/ /de yang rang gi yi dam gyi lha la sogs pa'i sngags dbul bar bya'o/ /de nas ba'i rnam lnga dang shun phrags lnga dang/ dri zhim po lnga dang/ til mar ro/ / de nas khrus bya ba bstan par bya ste/ glu dang rnga skad dpag tu med pas mchod pa dang/ bros slu la sogs pa me long la khrus bya'o/ /de nas blud btang par bya bar bya ba dang/ de nas dgug par bya ba la sogs pa dang na bza' la sogs ba dbul bar bya ba dang/ de dag ni rim pa bzhin du sngags kyi dbul bar bya'o/ /gzhan yang ting nge 'dzin gyi mchod pa dang/ bstod pa dang/ bdud rtsi myang bar bya'o/ /pad+ma'i myu gu rdo rjes kye'i rdo rje'i rgyud kyi kalpa gnyis pa'i bskos pa'i rim par phye ba le'u dang po'i 'grel pa mdzad pa rdzogs so/ / //dang por rtag par goms par bya bar bstan to/ /spyod lam rnam pa bzhi kar de sems la gzhag par bya'o/ /de'i phyir skad cig ma las gzhan mi sems zhes bya bas bstan to/ /sngon du rnal 'byor gyi spyod pa bya ba'i phyir shes rab dag par bya ba bstan to/ /da ni phyag rgya chen po'i dngos grub grub par bya ba'i phyir tshig 'di bstan par bya ste/ nga nyid thob byas mig yangs ma zhes bya ba la sogs pa smos so/ /sngon tu rang bzhin dga' ba sna tshogs kyi rnam par bstan to/ /da ni rang bzhin dga' ba gcig nyid rnam pa kun gyi lus yin pa dang/ de nyid de bzhin gshegs pa yin pa'o/ /de ni dbye bas rnam pa lngar 'gyur ro/ /de yang rgyas par phye bas gang+gA'i bye ma snyed kyi grangs dpag tu med par 'gyur ro/ /de'i don go bar bya ba'i phyir/ dga' ba chen po gcig pu zhes bya ba la sogs pas bstan to/ /pad+ma'i myu gu rdo rjes kye'i rdo rje'i rgyud kyi rtog pa zhes bya ba rim par phye ba le'u gnyis pa'i 'grel pa mdzad pa rdzogs so// //rigs ngan pa las bton nas nyan thos kyi sa la sogs pa las sdom par byed pas na sdom pa zhes bya'o/ /sdom pa de gang la gnas she na/ de'i phyir e baM la ni rab tu gnas zhes bya ba smos so/ /de la e baM zhes bya ba ni chos kyi 'byung gnas so/ /bshad ma thag pa'i sdom pa de ni bde ba chen po'i rang bzhin no/ /de'i thabs kyi de go bar 'gyur ro/ /dga' ba rnams ni de las 'byung zhes bya ba ni sngon du bstan pa'i dga' ba rnams ni de las skye bar 'gyur ro/ /skad cig ma'i dbye ba yis shes bya ba ni so sor ma la sogs pa'o/ /de bzhin ni dbang bzhi dang sbyar bar bya ste/ slob dbon dang/ gsang ba'i dbang dang/ shes rab ye shes kyi dbang dang/ dbang bzhi pa dang sbyar bar bya'o/ /slob mas dang po slob dpon la zhu bar bya ba'i phyir tshig 'di brjod par bya'o/ /byang chub rdo rje sangs rgyas la/ /chen po chen po ji ltar byin/ /da ni bsrung bar bya ba'i phyir/ /byang chub rdo rje bdag la byin/ /de nas sangs rgyas spyan la sogs pas bum pa gzung nas dbang bskur bar bsam par bya'o/ /de'i 'og tu tshigs bcad brjod pa'o/ /tshigs bcad ni 'di ste/ /dbang ni rdo rje chen po ni/ /khams gsum gyis ni phyag byas pa/ /byin? bya sangs rgyas thams cad la/ /gsang ba gsum gyi gnas las byung/ /de ltar tshigs bcad brjod nas bdud rtsi 'khyil ba'i sngags kyi btab pa'i chu rdo rje bzung ba'i lag pas gzung nas slob ma 'khor lo sgyur ba'i rgyal po lta bur bsam par byas nas gtor bar bya'o/ /de nas gser la sogs pa las byas pa'i dbu rgyan yi dam gyi ltar bsam par byas la sngon du bstan pa bzhin du dbu rgyan slob ma'i mgo la gzung la/ de bzhin gshegs pa thams cad nam mkha' la bsams nas/ dbu rgyan gyi gzugs su dbu rgyan la zhugs pas bsam par bya'o/ /de ltar dbu rgyan gyi dbang bskur bya'o/ /de nas rdo rje gzung la/ /de ring dbang ni khyod la bskur/ /sangs rgyas kyis ni rdor 'dzin dbang/ /'di ni sangs rgyas thams cad kyi/ /rdo rje 'di zung dngos grub phyir/ /de nas rdo rje gzung la slob ma'i mgo bo dang/ mgrin pa dang/ snying gar gzung la phyis lag pa g.yas par sbyin par bya'o/ /de nas lag pa g.yon par dril bu sbyin par bya'o/ /de gnyis dang ldan pa'i slob mas 'khyud par bya'o/ /de nas tshigs bcad brjod par bya ste/ aoM badzra a d+hi pa ti tiSh+Tha a b+hi Shiny+tsa mi tiSh+Tha sa ma ya badzra stwaM zhes brjod par bya'o/ /de'i 'og tu rdo rje dril bu slob ma'i mgo la gzung la/ aoM badzra satwa stwaM/ a b+hi Shiny+tsa mi badzra nA ma a b+hi she ka ta/ kye dpal che ge mo rdo rje zhes bya bas ming gi dbang bstan to/ /de nas rdo rje dam tshig dang/ dril bu'i dam tshig dang/ phyag rgya chen po'i dam tshig go /dam tshig de gsum sbyin par bya'o/ /de nas dkyil 'khor gyi de kho na nyid bshad par bya'o/ /de nas lung bstan par bya'o/ /de nas rdo rje'i rab tu byung ba sbyin par bya'o/ /de nas dbugs dbyung ba sbyin par bya'o/ /de dag slob dpon gyi dbang zhes bya'o/ /yol ba la sogs pas gnas dgon par byas nas slob mas rang gi yid du 'ong ba snying rje la sogs pa dang ldan pa dang/ ting nge 'dzin gsum dang ldan pa gsang ba'i dbang gis phyir slob dpon la dbul bar bya'o/ /phul nas byang chub rdo rje zhes bya ba la sogs pa'i tshigs bcad brjod par bya'o/ /bla mas ci zhig byed ce na/ chos kyi rang bzhin pad+ma la bskul bar bya ba dang/ de nas rdo rje rin po che'i nang du sems gtad par bya'o/ /nam mkha' i khams kyi lam du bskyod par mi byed do/ /pad+ma nas bzlog la mthe bong dang srin lag gi bar du bsdams la slob ma'i lta ba'i spyod yul du mi 'gyur bar byas la/ de'i zhal pad+ma lta bu'i nang gi nam mkhar spar bar bya'o/ /de nas slob mas 'di skad brjod par bya ste/ a ho su khaM zhes brjod nas bkug ste/ longs spyod rdzogs par bskyod par bya'o/ /de nas chos kyi rang bzhin bzhengs nas rang gi lus la gnas pa'i me tog gi ro khyer nas slob ma'i kha pad+ma lta bu'i nang du spar bar bya'o/ /de yang gos dang bral ba'o/ /de la gsang ba'i dbang zhes bya'o/ /gang sangs rgyas par gyur pa'i chos kyi rang bzhin gcig par 'dod pa'i de'i bzhed kyis shes rab ye shes kyi dbang ni de nyid sbyin par bya'o/ /rang bzhin gcig par mi 'dod pa'i bzhed kyis stong pa nyid gzhan sbyin par bya'o/ /de nas thos pa dang go ba'i ye shes mngon sum du bya ba'i phyir sngon du bstan pa'i bskul ba'i tshigs bcad kyis slob dpon la bskul bar bya'o/ /de nas slob dpon gyis slob ma'i lag par stong pa nyid byin la/ de slob dpon gyi phyag gis bzung nas tshigs su bcad pa 'di brjod par bya ste/ 'di ni khyod kyi gzugs mar bzang/ /sangs rgyas kyis rtogs khyod kyis spyod/ /dkyil 'khor rim pa'i rnal 'byor gyis/ /yang bdag bde ba myong bar gyis/ /thabs gzhan gyi ni sangs mi rgya/ /rang bzhin gyis dag 'jig rten gsum/ /de'i phyir shes rab spang mi bya/ /dus gsum skad cig spang mi bya/ /'di ni sangs rgyas thams cad kyi/ /rig pa'i rab byung bla na med/ /spong dang ngan smra glen par bshad/ /de yis dngos grub mchog mi thob/ /de ltar brjod nas sbyin par bya'o/ /de nas bshad ma thag pa'i stong pa nyid kyis gos dang bral bar byas nas/ chos kyi 'byung gnas bstan te/ sgeg pa'i tshul du gnas nas 'di ltar brjod par byed de/ kye 'di ltar dam tshig spyod par khyod nus sam/ /rnam snang la sogs khyod kyis sbyong nus sam/ /khrag dang byang chub sems dang sha chen dang/ /stong nyid rnams la dad par khyod kyis gyis/ /b+ha ga pad+ma dag la khyod kyis gtugs/ /'khyud pa la sogs ngas ni gang zhig zlo/ /de rnams thams cad khyod kyis bya dgos so/ /kye de ltar byas pas bde ba skye bar 'gyur/ / da ni slob mas zlo bar byed de/ kye/ ci phyir lha mo bdag gis mi nus gsungs/ /dri chen dri chu la sogs bdag gis bza' / /stong nyid rnams la rtag tu dad par bya/ /b+ha ga pad+ma rnams la gtug par bya/ /de ltar slob mas brjod nas/ stong pa nyid kyis brjod par byed de/ a ho bdag gis pad+ma 'di ni ste/ /bde ba thams cad kun dang ldan pa ste/ /gang zhig slob dpon man ngag dang ldan spyod/ /de yi mdun du bdag nyid gnas pa ste/ /ji ltar bzlas pa bzhin du khyod kyis spyod/ /yang dag sangs rgyas la sogs khyod kyis mchod/ /bde ba chen po rgyal po 'di na gnas/ /de nas stong pa nyid kyi sngags 'di brjod par bya ste/ b+ha dza stwaM ho/ /yang slob mas 'di ltar byed de/ me tog gi g.yon phyogs su gnas nas rdo rje dbyings kyi dbang phyug ma zhes bya ba'i rtsa de slob dpon gyi man ngag gis go bar byas la phyis pad+ma rgyas par gyur pa'i tshe dper na bung bas me tog gi rtsi myong ba bzhin du myong bar bya'o/ /rnal 'byor pas ni ji tsam dus ma byed/ /byang chub sems ni spong bar mi byed do/ /sems la 'dod pa thams cad rnyed par 'gyur/ /dga' ba la skyes rtag gnas ji lta bu/ /byang chub sems mi spangs par gyur na ni/ / dngos grub thams cad kyi ni mdzod yin pa / rnam shes dag dang phung po rgyal ba ni/ /yang dag dngos grub dag ni skye mi 'gyur/ /nam mkha' i khams dang rdo rje'i rnal 'byor la/ /reg bya reg pas shin tu che ba ste/ /bde ba skyes pas bde mchog dga' bar byed/ /bde mchog chags bral bar du go bar bya / pad+ma'i nam mkha' rin po che yis mnan/ /de yi gnas su rdo rje skyil krung bcas/ /sems ni rdo rje la ni shes par bya/ /de yi dus na ye shes gang skyes pa/ /ye shes 'di ltar yin zhes brjod mi nus/ chags pa ma yin chags pa dang bral min/ /bar zhes bya ba yang ni dmigs pa min/ /de dag gis ni shes rab ye shes kyi dbang bstan to/ /bshad ma thag pa'i shes rab ye shes kyi dbang gi de kho na nyid la ni dbang rin po che zhes bya'o/ /de ni slob dpon gyi man ngag gis shes par bya'o/ /dbang gis de nyid ji ltar bzlas bzhin yin/ /slob ma'i sems ni yang dag rang gis shes/ /rang zab theg las yang dag grol bas te/ /tshig gi dbang ni rin chen bstan par bya/ /de dag gis ni dbang bzhi pa bstan to/ /bzhi po de ni skad cig ma bzhi dang spyar bar bya'o/ /ston pas gsungs zhes bya ba ni bla mas ston zhes bya ba'i don to/ /gzugs ma zhes bya ba ni stong pa nyid do/ /bde ba che zhes bya ba ni bshad ma thag pa nyid bde ba chen po yin pa dang rang bzhin dga' ba'i ngo bo'o/ /byang chub ma thob yan chad du zhes bya ba ni yang dag par rdzogs pa'i sangs rgyas la khyab pa'o/ /de ni yang dag pa'i ye shes so/ /thams cad lus la rnam par gnas zhes bya ba ni chos kyi sku dang/ longs spyod rdzogs pa'i sku dang sprul pa'i sku dang/ bde ba chen po'i sku'o/ /de la gnas par gyur pa'o/ /bde ba chen po la ci'i phyir sku zhes bya zhe na /de bstan par bya ste/ sngon po la sogs pa'i rnam pa rnam par shes pa las ma gtogs pa logs shig med do/ /de bas na thams cad shes pa'i rnam pa'o/ /phyin ci log gi dbang gis tha dad par snang ngo/ /de'i phyir bde ba la sogs pa yon tan ma yin pa yin nam ci/ shes pa spangs nas rgyu gzhan las skyes pa yin nam/ de ltar ni ma yin no/ /rnam par shes pa las sdug bsngal la sogs par myong bar mi 'gyur ro/ /de'i phyir sngon po la sogs pa'i rnam pa bde ba las tha dad pa ma yin no/ /bde ba yang sngon po la sogs pa las tha dad ma yin no/ / gang gang las tha dad pa ma yin pa ni de nyid yin no/ /dper na shing sA la brjod pa lta bu'o/ /gang zhig bya ba med pa ni dngos po zhes bya'o/ /de'i phyir bde ba nag po bde zhes bya ba la sogs pa gong du bstan to/ /gtan tshigs de'i phyir bde ba chen po ni rang bzhin gyi skur bstan to/ /byang chub kyi sems kyis 'khor ba ji srid yod kyi bar du gnas nas sems can gyi don ji ltar byed ce na/ de bstan par bya ba'i phyir/ dkyil 'khor la sogs thabs kyi ni zhes bya ba la sogs pa bstan to/ /de la dkyil 'khor zhes bya ba ni gzhal yas khang gi rim pa la sogs pa'o/ /lha'i sku rdzogs par byas nas rang 'od kyi rig ma'i pad+ma dang rang gi rdo rje dang gnyis kyi nam mkha' la phaT ser po bsam par bya ste/ des ni byang chub kyi sems reng par byed do/ /de ltar rtag tu goms par byed pa la dngos grub 'grub par 'gyur ro/ / phung po dang khams dang skye mched ni bden pa yang ma yin brdzun pa yang ma yin no/ /gcig pa yang ma yin du ma yang ma yin pas na bden pa ma yin no/ /mngon sum du mthong bas na brdzun pa yang ma yin no/ /dper na chu'i nang gi zla ba'i gzugs brnyan lta bu'o/ /de bstan par bya ba'i phyir/ de bzhin brdzun min bden min no zhes bya ba la sogs pa bstan to/ /gnyid log spang bar mi bya ste zhes bya ba ni rnal 'byor pa gang gnyid ma log pas lus nyam chung bar 'gyur bas ni ting nge 'dzin 'grub par mi 'gyur te/ de'i phyir gnyid log par bya'o/ /blo can sngags bzlas mi bya'o zhes bya ba ni don dam pa'o snyam pa'i sems kyis sngags bzla bar mi bya'o/ /ting nge 'dzin kyang de bzhin du mi bya'o/ /khrus dang gtsang sbra mi bya'o zhes bya ba la sogs pas ni 'jig rten pa'i chos lugs brgyad spang bar bstan to/ dbang po rnams kyang mi dgag go /zhes bya ba ni yul rnam par dag par ma byas par shes bya'i sgrib pa dang bral bar mi 'gyur ba'i phyir yul rnam par dag par byas la dbang po dgag par mi bya'o/ /blang ba dang dor ba'i sems dang ma bral bas nyon mongs pa'i sgrib pa dang bral bar mi 'gyur ro/ /de'i phyir thams cad bza' bar bya'o/ /de'i don ni bdud rtsi rnam lnga bu ram chang zhes bya ba la sogs pas bstan to/ /sngon du skye mched byin gyis brlab pa'i dus su kha dog gi rnam par dag pa bstan to/ /de ni zhe sdang la sogs pa'i rnam par dag pa lha mo rnams bstan par bya ste/ mig ni gti mug rdo rje ma zhes bya ba la sogs pas bstan to/ /dam tshig las ni nyams pa yin zhes bya ba ni sangs rgyas dang byang chub sems dpa' bsad pa 'dra bar bstan to/ /pad+ma'i myu gu rdo rjes kye'i rdo rje rgyud kyi mtshon pa'i skad kyi rim par phye ba'i le'u gsum pa'i 'grel pa mdzad pa rdzogs so/ / //glu zhes bya ba ni rdo rje'i glu'o/ /stong pa nyid dang snying rje dbyer mi phyed pa ni rdo rje zhes bya'o/ /de go bar byed pa la ni glu zhes bya'o/ /lha'i rnal 'byor byas ba la ni rdo rje zhes bya'o/ /ci'i phyir rdo rje zhes bya zhe na/ ye shes lnga las grub pa'i phyir ro/ /de'i phyir rdo rje'i gar zhes bya'o/ /gang gis glu thos pa dang gar mthong bas bsod nams chen por thob par 'gyur ro/ /bsod nams de'i stobs dang lha'i ting nge 'dzin byas pas rnal 'byor pas glu len pa dang gar byed pas dga' ba chen po skye bar 'gyur ro/ /de'i stobs kyis sangs rgyas la dad pa'i lha mo rnams 'ong bar 'gyur ro/ /sngon du dngos grub thob pa'i rnal 'byor pa rnams kyang 'ong bar 'gyur ro/ /de dag 'ongs pa'i rtags ni rgyud kyi nang nas 'byung ba bzhin du shes par bya'o/ /byang chub sems skye zhes bya ba ni snying pa nyid dang snying rje'i rang bzhin no/ /de yang rgyu 'bras kyi ngo bor sum cu rtsa gnyis so/ /dkyil 'khor zhes bya ba la sogs pa ni gzhal yas khang la sogs pa bsams te/ dkyil 'khor gyi lha rnams kyis bskor nas gnas pa'i byang chub kyi sems bsam par bya'o/ /thams cad kyi rnam par dag pa ni bdag nyid yin pa dang/ dngos po thams cad rang bzhin bdag yin pa'o/ /de ltar bsam par bya'o/ /de'i don bstan par bya ba'i phyir/ rang byin rlab pa'i rim pa yis zhes bya bas bstan to/ /don dam pa zhes bya ba ni rnam par rtog pa med par sems can gyi don byed pa'o/ /kun rdzob ces bya ba ni rang gis myong ba'i bde ba'o/ /de gnyis kyi rnam par dag? pa bde ba dang ga bur ro sngon du phyag rgya ma ni rnam par snang mdzad la sogs pa'i rigs su bstan to/ /'dir ni ye shes lnga'i rang bzhin du bstan par bya ste/ de'i phyir de nyid me long ye shes dngos zhes bya ba la sogs pas bstan to/ /ji bzhin phyi rol zhes bya ba la sogs pa ni/ ji bzhin phyi'i dkyil 'khor de bzhin du rang gi lus so/ /shAkya thub pa la sogs pa de bzhin gshegs pa'i gzugs gang gis sems can gyi khams dpag tu med par dus gcig la sems can thams cad kyi don byas so/ /de'i gzugs kyis 'khor ba ji srid yod kyi bar du sems can gyi don byed do/ /de la ni sprul pa'i sku zhes bya'o/ /de'i don de bzhin gshegs pas gsungs so/ /sku ni gang gis ri mo sna tshogs pa/ /sems can thams cad kyi ni don ni byed/ /dngos med rgyun mi 'chad pa don kun? byed// de lta bu la sprul pa'i sku zhes bya/ /dran pa nye bar bzhag pa bzhi nas/ 'phags pa'i lam yan lag brgyad pa'i par dang/ tshad med pa bzhi dang/ rnam par thar pa brgyad dang/ gzugs kyi khams kyi bsam gtan bzhi dang/ gzugs med pa'i snyoms par 'jug pa bzhi dang/ 'gog pa'i snyoms par 'jug pa dang dgu'o/ /de dag la ting nge 'dzin gyi rgyu zhes bya'o/ /sa gzhi dang/ chu dang me dang/ rlung dang/ sngon po dang/ ser po dang/ dmar po dang/ dkar po dang/ rnam par shes pa dang/ nam mkha' ste/ de dag la ni zad par gyi skye mched bcu zhes bya'o/ /nang gi gzugs can zhes bya ba ni sngon po dang/ ser po dang/ dmar po dang/ dkar po ste/ de dag rnam par rtog pa dang/ bral bar shes pa'o/ /phyi'i gzugs can zhes bya ba ni phyi'i gzugs dang/ nang gi gzugs dang de gnyis 'dres pa dang gzugs kyi rnam pa ste/ brgyad po de dag la ni ye shes kyi gnas zhes bya'o/ /gzhan gyi sems la nyon mongs pa'i 'khrug pa rtsa ba nas don par byed pa la ni 'khrug pa sel bar byed pa'i ting nge 'dzin ces bya'o/ /yang dag par 'khor ba'i rgyu dang bral ba dang/ 'khor ba'i bcings pa las grol pa dang/ the tshom sel bar byed pa dang/ 'khor ba ji snyed yod kyi bar du nan tan bskyed nas sems can gyi don byed pa ste/ de dag la ni smon pa'i ye shes zhes bya'o/ /mngon par shes pa drug gi ye shes dang/ so so yang dag par rig pa bzhi dang/ gnas dang dmigs pa dang/ sems dang ye shes te/ de dag la ni rnam par dag pa bzhi zhes bya'o/ /tshe dang sems dang yo byad dang/ las dang skye ba dang/ mos pa dang/ smon lam dang/ sprul pa dang/ ye shes dang/ chos te de dag la ni dbang bcu zhes bya'o/ /de bzhin gshegs pa'i stobs bcu dang/ mkhas pa'i yon tan bzhi dang/ bsrung ba med pa gsum dang/ chos bshad ba la nyan par 'dod pa dang/ nyan par mi 'dod pa dang/ btang snyoms su gnas pa de gsum btang snyoms su byas nas chos bka' stsal pa la ni dran pa gsum zhes bya'o/ /sems can gyi don byed pa'i dus nges pa la ni sems can mi bslu ba zhes bya'o/ sgrib pa gnyis kyi sa bon bag zhad kyang med pa la ni sgrib pa gnyis dang bral ba zhes bya'o/ /sems can thams cad la sems bzang ba la ni snying rje zhes bya'o/ /de bzhin gshegs pa'i chos gzhan gyis 'phrog par mi nus pa bco brgyad do/ /de dag thams cad la ni chos kyi sku zhes bya'o/ /de dag gi ni don bsdus te bstan par bya ste/ byang chub phyogs dang tshad med dang/ /rnam thar brgyad kyi rim pa ste/ /lus dgu dang ldan ting 'dzin no/ /zad par gyi ni skye mched dang/ /ye shes gnas ni rnam pa brgyad// 'khrug sel smon pa'i ye shes ni/ /drug dang yang dag ye shes so/ /rnam pa thams cad rnam dag bzhi/ /dbang phyug dang ni stobs bcu ste/ /mkhas pa'i shes bzhi bsrung mar gsum/ /dran pa gsum dang slu med dang/ /sgrib bral sems can snying rje che/ /dbog par mi nus bco brgyad de/ /de dag thams cad bsdus pa ni/ /thams cad mkhyen pa chos kyi sku zhes gsungs so/ /sa brgyad pa'i byang chub sems dpas longs spyod pa 'am/ yang na sa bcu pa'i dbang phyug byang chub sems dpas longs spyod par byed do/ longs spyad par bya ba ji lta bu zhe na/ mtshan bzang po sum cu rtsa gnyis 'dzin pa dang/ dpe byad bzang po brgyad cu'i rang bzhin ni theg pa chen po'i longs spyod rdzogs pa'i gnas so/ /de'i don ni de bzhin gshegs pas gsungs so/ /ji ltar gsungs she na/ /mtshan ni sum cu rtsa gnyis de bzhin bdag /longs spyod rdzogs pa zhes bya'i sku yin te/ /dpe byad brgyad cu'i 'od zer dag gis brgyan/ /theg pa chen po dag gi longs spyod do/ /de la ni longs spyod rdzogs pa'i sku zhes bya'o/ /dran pa nye bar gzhag pa bzhi la sogs pa'i ye shes kyi bdag 'jig rten las 'das pa'i chos kyi dbyings kyi rang bzhin gyi rgyus nyon mongs pa med pa dang/ /blo bur ba'i dri ma dang bral ba dang/ rnam pa thams cad rnam par dag pa dag /rang bzhin gyis stong pa'o/ /de lta bu mtshan ma rnyed pa de'i rang bzhin ni ma skyes pa dang/ /'jig rten las 'das pa'i ye shes shes pa 'am yang na rnyed pa'o/ /ma byas pa rang bzhin gyis gnas pa la ni bde ba chen po'i sku zhes bya'o/ /de'i don ni de bzhin gshegs pas gsungs so/ /ji ltar gsungs she na/ chos kyi rnam par dag pa brnyes/ /rnam pa thams cad nyon mongs med/ /de bzhin gshegs pa'i rang bzhin sku/ /de dag gi ni rang bzhin no/ /de la ni bde ba chen po'i sku zhes bya'o/ /rgyu ni de'i phyir zhes bya ba ni rang bzhin gyis grub pa 'am/ rang bzhin gyis grub nas gnas pa'o/ /sems can thams cad rang bzhin gyis sangs rgyas pa yin na/ byang chub sems dpar 'dod pa dang sangs rgyas par 'dod pa ni don med par 'gyur ro/ /rnal 'byor mas de bzhin gshegs pa'i gsung thos nas dam pa skyes te rgyal bar gyur to/ /de tshig gang gis bstan par bya zhing/ de nas la mo thams cad du zhes bya ba la sogs pas bstan to/ /de brgyal ba las bslang ba'i phyir/ sems can rnams ni sangs rgyas yin zhes bya ba la sogs pas bstan to/ /de la blo bur du 'ongs ba ni rang gis brtags pa yin te/ gzhan nas ni 'ongs pa ma yin no/ /rang gis rang gi sems dri ma can du byas pa'o/ /dri ma zhes bya ba gang yin zhe na/ gzung ba dang 'dzin pa'i rnam par rtog pa'o/ /de dang bral bas bag chags kyang rtsa ba nas phyung ba yin no/ /bag chags rtsa ba nas phyung pas sems can thams cad sangs rgyas pa yin no/ /de ltar gang gis shes pas 'grub par 'gyur ro/ /gdol pa zhes bya ba la sogs pa ni rigs dang 'gro ba ris drug dang/ skye gnas so/ /de dag ni des pa ma yin no// //he ru ka'i rnal 'byor ram/ yang na bdag med rnal 'byor byas nas yaM sngon po las rlung gi dkyil 'khor gzhu lta bu 'phan gyis mtshan pa'o/ /de'i steng du raM dmar por bsgyur ba las me'i dkyil 'khor dmar po gru gsum pa'o/ /de'i steng du raM 'am/ yang na rdo rjes mtshan pa bsam par bya'o/ /de'i steng du a bsgyur ba las ka pA la bsam par bya'o/ /de'i nang du bza' bar bya ba dang/ bdud rtsi rnam pa lnga dang/ gsal ba'i me mar lnga'o/ /de'i steng du de bzhin gshegs pa lnga'i sa bon bsam par bya'o/ /de'i steng du aom bsgyur ba las zla ba'i dkyil 'khor bsam par bya'o/ /zla ba'i dkyil 'khor gyi steng du hUM bsgyur ba las rdo rje bsam par bya'o/ /de nas rlung gis me spar ba las thams cad bdud rtsi'i ngo bor zhu bar bsam par bya'o/ /de nas sngon grub nas gnas pa'i bdud rtsi rnams blangs la bdud rtsi'i nang du blug par bya'o/ /de'i rting la aoM A:hUM zhes bya ba'i sngags kyis byin gyis rlab par bya'o/ /de nas gau rI la sogs pa gang yang rlung ba las spros nas/ rang bzhin gyi dkyil 'khor spyan drangs nas/ mdun du bsam mo/ /de la arg+ha la sogs pa spyin par bya'o/ /de nas thim par bya'o/ /dbus kyi gtso bo la sogs pa'i lce la hUM bsams te rdo rjer gyur bsam par bya'o/ /de nas byin gyis brlabs pa'i bdud rtsi myang bar bya'o/ /de'i rting la bcad? pa ni mtshams bzhi dang steng dang 'og tu'o/ /gnas de dag tu rim pa bzhin du brgya byin dang gshin rje dang/ chu lha dang/ nor sbyin dang/ me lha dang/ srin po dang/ rlung lha dang/ lha chen po ma ha de ba dang/ nyi ma'i lha dang zla ba'i lha dang/ tshangs pa dang/ sa'i lha dang/ theg 'brangs ris kyi rgyal po'o/ /de dag bkug la rang rang gi gnas bsams la arg+ha la sogs pa sbyin par bya'o/ /de nas aoM ainda dza ma zhes bya ba la sogs pa'i sngags brjod la dgyes par bya'o/ /de nas sngon du bstan pa bzhin du gsang gtor ma sogs pa bya'o/ /nam phur bus 'debs pa'i tshe de dag spyi gtsug tu bsams la bsrung ba'i 'khor lo la gnas pa'o/ /khro bo rnams smad phur bu dbu dang/ stong rang gi gzugs su bsams la rim pa bzhin du sngon du bsam pa rnams la phur bus gdab par bya'o/ /yang na bdud rtsi 'khyil ba gdab bar bya'o/ /pad+ma'i myu gu rdo rjes kye'i rdo rje'i rgyud kyis rgyas btab pa bsdus pa'i don zhes bya ba'i rim par phye ba le'u bzhi pa'i 'grel ba mdzad pa rdzogs so/ / //brgya byin phyogs su zhes bya ba ni shar phyogs so/ /shar sgo la zhes bya ba la sogs pa ni shar phyogs kyi sgo'i pad+ma'i 'dab ma rnams la gnas pa'o/ /de lta bu'i rim pas gau rI dang/ tsau rI dang/ pet+ta lI dang/ g+hasma rI'o/ /de dag gi sgo'i pad+ma'i 'dab ma la bsam par bya'o/ /sa bon gcig las grub pa dpag tu med par ji ltar 'gyur zhe na/ de'i lan du rnam par dag pa'i dbye bas grangs mang por 'gyur ro/ /dper na khro bo gcig 'khor lo'i rje dpon yang yin la/ sgo srungs kyang byed la bsrung ba'i 'khor lo la yang gnas pa'o/ /de ltar gnas gsum du mthong bar 'gyur ro/ /de bzhin du gau rI la sogs pa sgo srungs la sogs pa byed par 'gyur ro/ /de dag gi rnam par dag pa'i dbye ba'i sgo nas kha dog kyang shes par bya'o/ /de'i don ni de bzhin gshegs pas gsungs par byed do/ /gzugs brnyan gyi dkyil 'khor gyi lha rnams kyi sku dog gi dbye ba'i sgo nas phyag mtshan brgyad bri bar bya'o/ /de dag gis dgos pa mthong nas la lar ni brgyad du 'gyur ba dang/ bcu gsum du 'gyur pa dang/ bco lngar yang 'gyur ro/ /dper na ming du ni khro bo bcu zhes brjod la dgos pa mthong nas bco bzhir yang 'gyur ro/ /de bas na skyon med do/ /rnam par rgyal ba'i bum pa zhes bya ba ni gtso bo yin pas na rnam par rgyal ba'i bum pa zhes bya'o/ /de ni dkyil 'khor gyi rjes dpon yin par shes par bya'o/ /gzhan yang lha mo brgyad kyi bum pa brgyad shes par bya'o/ /sgo'i phyogs su bgegs bsgrad par bya ba'i phyir bum pa gcig bsam par bya ba dang bcu tham pa'o/ /de ni rgyud kyi rig pa yin no/ /bcu las nyung bar mi bya'o zhes gsungs so/ /longs spyod ces bya ba ni byang chub kyi sems myong ba'i dus la longs spyod ces bya'o/ /de'i don ni sna'i dbugs dang kha'i dbugs bsdams la 'og tu khyer bar bya'o/ /yang na longs spyod ces bya ba ni gnyis su med pa'i ting nge 'dzin rang gis go ba mngon sum du bya ba'i dus su phyi dang nang gi rtog pa mi bya'o/ /de nas zhes bya ba ni rnam par rtog pa gnyis 'gags par 'gyur pa'o/ gtsang ma'i bu mo de bzhin du / ji ltar de ni 'byung bar 'gyur zhes bya ba ni sems kyi spyod yul gcig tu brjod pas nyon mongs pa med pa'i bde ba 'khor ba ji srid yod kyi bar du sems can gyi don byed pa'i stobs dang ldan pa'i ye shes skye bar 'gyur ro/ /pad+ma'i myu gu rdo rje'i kye'i rdo rje'i rgyud kyi mngon par shar ba'i rim par phye ba'i le'u lnga ma'i 'gyel ba mdzad pa rdzogs so/ / //bla na med pa'i chos ston par byed de/ de'i phyir rgyud kyi rgyal po 'di gsungs so/ de bas na bris sku'i sgrub thabs ni rigs pa ma yin no/ /de rgyud gzhan las gsungs pa ni phyi rol gyi rim pa la mos pa rnams kyi don gyi phyir gsungs so/ /de'i don ni phyi rol la ni mos pa yi/ /don phyir bris sku la sogs gsungs/ de'i lan du rgyud gzhan la gzhan la gnas pa'i rnal 'byor pa phyi rol la mos pas bris sku 'gul ba la sogs pa mthong nas dngos grub nye bar zhes zer ro/ /'di la gnas pa'i rnal 'byor pas de bzhin gshegs pas ji ltar gsungs pa bzhin du bris sku bris na rnal 'byor ba zhal dang phyag la sogs pa rmongs par mi 'gyur ro/ /de mthong bas rnal 'byor yang goms par 'gyur ro/ /de bzhin gshegs pa rnams kyis kyang byin gyis rlob par 'gyur ro/ /de ltar na phyag gya chen po'i dngos grub thob par 'gyur ro/ /de'i phyir bri ba'i sku gzugs kyi sgrub thabs kyi skyon du mi 'gyur ro/ /phyi'i rnam par rtog par yang mi 'gyur ro/ /pad+ma'i myu gu rdo rjes kye'i rdo rje'i rgyud kyi sku gzugs kyi rim par phye ba'i le'u drug pa'i 'grel pa mdzad pa rdzogs so// // lag pa la sogs pa'i nang du sba bar bya ba'i phyir sor bcu gnyis gsungs so/ /'dir mdor bsdus nas chos thams cad gsungs so/ /ye shes ni spros pa'i ngo bo ma yin no/ /spros pa la gnas pa'i sems can gyis gong med go bar mi 'gyur ro/ / de'i phyir spros pa la gnas pa'i sems can gyis po ti ma mthong nas de bzhin gshegs pa'i lung ma yin no zhes zer ro/ /dam tshig med pa'i mis yang dag pa'i chos ga bar byed pa'i tshig smad nas dmyal bar skye bar 'gyur ro/ /rnal 'byor pas kyang de bzhin gshegs pa'i tshig rin po che dam tshig med pa la bstan na/ dam tshig nyams par 'gyur te/ de'i phyir phyag rgya chen po'i dngos grub thob par mi 'gyur ro/ /de'i don ni/ tshe rabs 'di la grub pa med ces bya ba la sogs pas bstan to/ /tshogs kyi dkyil 'khor zhes bya ba ni bla mas dbu mdzad nas slob ma dpag tu med pa'o/ /'dod pa'i don kun 'grub pa zhes bya ba ni thun mong gi dngos grub dang/ thun mong ma yin pa'i dngos grub rnal 'byor pas thob par 'gyur ro/ /des ni theg pa gsum la gnas pa la ji ltar 'dod pa bzhin du ston pa'i stobs dang ldan par bstan to/ /dkyil 'khor gyi dbus kyi gtso bo dang 'dra bar slob dpon la bsams la dbus su gdan sbyin par bya'o/ /slob ma rnams la dkyil 'khor gyi lha dang 'dra bar bsams la gdan sbyin par bya'o/ de nas zan dang tshod ma la sogs pa bdud rtsir byin gyis rlabs la rang yang lha'i ting nge 'dzin du gnas te/ thams cad kyi lce la hUM bsams la/ de gyur pa las lce rdo rje'i ngo bor bsams par bya'o/ /de ltar byas nas bza' ba dang/ btung ba la sogs pa bya'o/ /de ltar rtag par goms par byas pas sems la dkyil 'khor rtag par mthong bar 'gyur ro/ /de ltar rtag par mthong pas rdo rje lta bu'i ting nge 'dzin skye bar 'gyur ro/ /de skyes pas nyon mongs pa la sogs pa'i sgrib pa ji lta bu 'joms pa'i stobs dang ldan par 'gyur ro/ /de nas sgrib pa gnyis dang bral bar 'gyur ro/ /de dang gral bas bla na med pa'i ngo bo sgrib pa med pa rgyun mi 'chad pa bde pa chen po'i rang bzhin sems can gyi khams dpag tu med pa'i don byed pa'i stobs dang ldan ba sku gsum gyi rang bzhin yin no/ /de lta bu'i byang chub thob par 'gyur ro/ /de bas na bza' ba la sogs pa la ting nge 'dzin bya ba ni mtshan ma tsam zhig yin gyi/ dus rtag tu ting nge 'dzin bya bar bstan to/ /de nyid rtag par bsgrub par bya ba yin gyi/ bza' ba la sogs pa ni bsgrub par bya ba ma yin no/ /de'i don gyi kye'i rdo rje'i sku gzugs ni/ dbus nyid du ni bdag nyid de/ zhes bya ba la sogs pas bstan to/ /pad+ma'i myu gu rdo rjes kye'i rgyud kyi bza' thabs kyi rim par phye ba'i le'u bdun pa'i 'grel pa mdzad pa rdzogs so/ / //rnal 'byor pa bsod nams kyi tshogs dang ldan pa dang/ ting nge 'dzin gyi stobs kyis byang chub sems dpa' dbang du 'gyur ro/ /de bud med kyi gzugs su byas nas 'ong bar 'gyur ro/ /de la phyag rgya chen po zhes bya'o// yang na 'og gi sa la gnas pa'i byang chub sems dpa' las kyi bye bra gis rgyus bud med du skye bar 'gyur ro/ /de la phyag rgya chen po zhes bya'o/ /de'i mtshan nyid bstan par bya ba'i phyir/ yang na ring min thung ba min zhes bya ba la sogs pas bstan to dang po bsnyen gnas khrims ni sbyin zhes bya ba ni de'i mtshan ma tsam zhig bstan par yin gyi/ srog gcod pa dang/ ma byin par len pa dang/ mi tshangs par spyod pa dang/ brdzun du smra ba dang/ 'bru'i chang dang chos pa'i chang ste/ de dag yang spangs pa la ni dge bsnyen gyi sdom pa zhes bya'o/ /dri zhim po dang me tog gi phreng ba dang byug pa dang glu dang gang dang/ bro brdung ba dang/ khri stan mthon po dang/ khri stan chen po dang/ dus ma yin pa'i zas so/ /de dag gong gi steng du bsnan pas brgyad du 'gyur ro/ /de brgyad la ni bsnyen gnas kyi sdom pa zhes bya'o/ /de'i steng du gser dngul mi reg pa bsnan pas ge tshul gyi khrims bcu zhes bya'o/ /de lta bu'i rim pas lus ngag yid gsum gyi mi dge ba'i las spangs la bshar ma thag pa de nyid go bar bya'o/ /de'i don ni de bzhin gshegs pas gsungs so/ /ji ltar gsungs zhe na/ lnga dang brgyad dang bcu ni spang bar bya zhes gsungs so/ /de spangs pas dge bsnyen dang bsnyen gnas dang dge tshul la sogs par 'gyur ro/ /de'i don ni de'i rting la bslab pa bcu zhes bya bas bstan to/ /de nas bye brag smra ba bstan zhes bya ba la sogs pa gsungs pa la nyan thos kyi byang chub dang/ rang rgyal ba'i byang chub des ston par byed do/ /de ji ltar thob pa bstan par bya ste/ gzugs kyi phung po la sogs pa la dus shes bya'o/ /de la ci'i phyir dus shes bya zhe na/ de yang 'das pa la sogs pa bzhi'i rang bzhin yin pa'i phyir ro/ /de la sdug bsngal zhes bya'o/ /ci'i phyir sdug bsngal zhes bya zhe na/ sdug bsngal gyi rang bzhin yin pa'i phyir ro/ /gzhan yang stong pa nyid dang bdag med pa'o/ /tshig de dag gis ni 'dra bur gyur pa'i phung po rnam pa lnga la sdug bsngal gyi bden pa zhes bya'o/ /de de ltar nyams su myong ba'o/ /de'i rgyur gyur pa'i sgo nas kun 'byung gi bden pa zhes bya'o/ / de gnyis 'gags pa la ni 'gog pa'i bden pa zhes bya'o/ /de yang rnam pa gnyis te/ so sor brtags pa ma yin pa'i 'gog pa'o/ /de yang lam med par mi thob pas na lam gyi bden pa bsam par bya'o/ /de'i ming gi rnam grangs ni rigs pa zhes kyang bya/ 'khor lo zhes kyang bya phung po lnga zhes kyang bya'o/ /de la ni nyan thos dang rang rgyal ba'i byang chub ces bya'o/ /tshig de dag gis ni don 'di ston par byed de/ nyan thos la sogs pas 'khor ba la sdug bsngal bar mthong nas spong bar byed pa dang/ phyis ji ltar mi skye ba'i thabs byed pa'o/ /'phags pa'i bden pa bzhi ni tshad ma yin pa'i byas la bsgom par bya'o/ /de la sdug bsngal ni shes par bya ba dang/ kun 'byung spang bar bya ba dang/ 'gog pa mngon du bya ba dang/ lam bsgom par bya ba'o/ /de'i phyir phung po lnga'i rang bzhin brtag par bya'o/ /ji ltar brtag par bya zhe na/ dper na nad dang nad kyi rgyu dang/ nad dang bral ba dang sman no/ /de la sdug bsngal ni nad lta bu'o/ /kun 'byung ni nad kyi rgyu lta bu'o/ /'gog pa ni nad dang bral ba lta bu'o/ /lam ni sman lta bu'o/ /de ltar 'phags ba'i bden pa bzhi gang gis brtags pas shes pa brgyad dang/ bzod pa brgyad skye bar 'gyur ro/ /de dag la skad cig ma bcu drug ces bya'o/ /de ni 'ji rten las 'das pa'i ye shes kyi snang ba mthong ba'i lam zhes bya'o/ /de mngon du ma mthong ba mthong bas na mthong ba'i lam zhes bya'o/ /'gog pa mngon sum du byas pas na lam zhes bya'o/ /de la skad cig ces bya ba ni sdug bsngal la chos shes pa dang/ sdug bsngal la chos shes pa'i bzod pa dang/ sdug bsngal la chos rjes su shes pa dang/ sdug bsngal la rjes su chos shes pa'i bzod pa dang/ kun 'byung la chos shes pa dang/ kun 'byung la chos shes pa'i bzod pa dang/ kun 'byung la rjes su chos shes pa dang/ kun 'byung la rjes su chos shes pa'i bzod pa dang/ 'gog pa la chos shes pa dang/ 'gog pa la chos shes pa'i bzod pa dang/ 'gog pa la rjes su chos shes pa dang/ 'gog pa la rjes su chos shes pa'i bzod pa dang/ lam la chos shes pa dang/ lam la chos shes pa'i bzod pa dang/ lam la rjes su chos shes pa dang/ lam la rjes su chos shes pa'i bzod pa dang bcu drug go / de lta bu'i rim pas mthong ba'i lam mthong ba'i lam bsgoms pas khams gsum gyi nyon mongs pa mthong bas spang bar bya ba brgyad cu rtsa brgyad la sogs pa spong bar 'gyur ro/ /de la sdug bsngal mthong bas spang bar bya ba bcu gnyis ni rtag par lta ba dang/ bdag tu lta ba dang/ chad par lta ba dang/ 'jig tshogs la lta ba dang/ tshul khrims dang brtul zhugs mchog tu 'dzin pa'i lta ba dang/ the tshom dang 'dod chags dang zhe sdang dang/ nga rgyal dang/ ma rig pa'o/ /kun 'byung mthong bas spang bar bya ba bdun ni gong ma'i de la rtag par lta ba dang/ bdag tu lta ba dang/ 'jig tshogs la lta ba bor bas lhag ma kun 'byung mthong bas spang bar bya ba bdun no/ 'gog pa mthong bas spang bar bya ba yang de dang mthun no/ /lam mthong bas spang bar bya ba drug gi ni 'dod chags dang/ zhe sdang dang/ nga rgyal dang/ ma rig pa dang/ tshul khrims dang/ brtul zhugs mchog tu 'dzin pa dang/ the tshom dang drug go / 'dod pa'i khams kyis mthong bas spang bar bya ba sum cu rtsa gnyis dang/ bsgom pas spang bar bya ba bzhi spangs pas 'dod pa'i khams su skye bar mi 'gyur ro/ /the tshom dang 'dod chags dang/ zhe sdang dang/ nga rgyal dang/ ma rig pa'o/ /de dag ma gtogs pa gzugs kyis khams su skyes pa la mthong bas spang bar bya ba sum cu rtsa gcig spang bar bya'o/ /gzugs med pa'i khams na de dang 'dra'o/ /mthong bas spang bar bya ba brgyad cu rtsa brgyad la sogs pa spangs pas khams gsum du skye ba'i rgyu dang bral ba yin no/ /de dang bral ba ni khams gsum la 'dod chags dang bral ba zhes bya'o/ /de la nyan thos kyi sangs rgyas dang/ rang rgyal ba'i sangs rgyas zhes bya'o/ /de ni nyon mongs pa dang bral bas 'khor bar mi skye'o/ /de'i phyir mya ngan las 'das pa zhes bya'o/ de yang dper na me mar shi ba lta bu'o/ /nyan thos dang rang rgyal ba la bye brag ci yod ce na/ yang dag par rdzogs pa'i sangs rgyas la thos nas nyan thos kyang yang dag par rdzogs pa'i sangs rgyas su 'gyur ro/ /des dag gi sgo nas chos bshad nas sems can 'dul bar byed do/ /gzhan gyis nyon cig par bskul nas nyan pas na nyan thos zhes bya'o/ /rang rgyal ba'i sangs rgyas ni sngon du rang gis thos pa gzung nas gzhan gyi man ngag la mi bltos par rang gi byang chub? bas na rang sangs rgyas zhes bya'o/ /des tshig gi sgo nas bshad pa spangs nas ni sku'i sgo nas sems can dge ba bcu la 'god par byed do/ /de'i don ni gzhan gyi man ngag la ma brten par rang gis go pha dang rang nyid sangs rgyas pas de'i ye shes yang dag zab pa ste/ de phyir rang rgyal gyi ming du bstan/ phung po lnga bdag med pa la bdag dang bdag gir lta ba la ni rtag par lta ba zhes bya'o/ /de lta bu phung po la sogs bdag med pa la bdag tu lte ba dang/ de yang rtag par lta ba ni bdag tu lta ba zhes bya'o/ /gzhan la gnod pa mi byed pa la ni tshul khrims zhes bya'o/ /khyi nyal ba'i sa dang/ ba lang mang po 'drul ba'i lam dang/ ri dags gnas pa'i sa la sogs pa de dag tu gnas pa'o/ /gzhan yang thal ba'i steng na nyal ba dang/ skra 'dreg sna dang/ drang srong gis khrus byas pa'i sar khrus la 'gro ba dang/ 'bras bu dang/ rtsa ba za ba dang/ ral pa 'dzin pa dang/ shing shun gyon pa la sogs pa la brtul zhugs zhes bya'o/ /de ltar byed pa la tshul khrims dang brtul zhugs mchog tu 'dzin pa zhes bya'o/ /bden pa dang rin po che la yid gnyis su gyur pa la ni the tshom zhes bya'o/ /khams gsum la chags pa la ni 'dod chags zhes bya'o/ /sems can nam sems can ma yin pa la zhe sdang skye ba la ni zhe sdang zhes bya'o/ /nga rgyal zhes bya ba ni sems khengs pa'i mtshan nyid do/ /de yang rnam pa bdun te/ nga rgyal ba dang che ba'i nga rgyal dang/ nga rgyal las kyang nga rgyal dang/ nga'o snyam pa'i nga rgyal dang/ mngon pa'i nga rgyal dang/ cung zad tsam pa'i nga rgyal dang/ log pa'i nga rgyal lo/ /che ba'i nga rgyal zhes bya ba ni rigs las che ba dang/ gzugs bzang ba dang/ nor dang/ thos pa dang/ de dag gzhan pas ches che bas na che ba'i nga rgyal lo/ /nga rgyal las kyang nga rgyal zhes bya ba'i gong ma de dag 'dra bar yod bzhin du de bas kyang bdag che bo snyam pa'i nga rgyal las kyang nga rgyal zhes bya'o/ nga'o snyam pa'i nga rgyal ni rigs 'dra yang gzugs dang thos pa dang/ nor dang/ tshul khrims te de dag gis nga che'o snyam pa la ni nga'o snyam pa'i nga rgyal zhes bya'o/ /mngon pa'i nga rgyal zhes bya ba ni 'di la bdag tu lta ba yod kyi/ nga la bdag tu lta ba med do zhes zer ba dang/ ngas 'jig rten las 'das pa'i chos shes la 'dis 'jig rten las 'das pa'i chos mi shes so zhes zer ba la ni mngon pa'i nga rgyal zhes bya'o/ /rigs la sogs pa cung zad kyis chung ngo snyam pa la ni chung zad snyam pa'i nga rgyal zhes bya'o/ /yon tan med par nga la yon tan yod do zhes zer ba la ni log pa'i nga rgyal zhes bya'o/ /ma rig pa zhes bya ba ni shes pa la sgrib par byed pas na ma rig pa zhes bya'o/ /yang na sdug bsngal gyi bden pa la sogs pa mi shes pa la ma rig pa zhes bya'o/ /nyon mongs pa de dag la ni sems can 'khor ba dang 'brel bar byed pa zhes bya'o/ /yang na lus ngag yid gsum gyi bdag nyid nyon mongs par byed pas na nyon mongs pa zhes bya'o/ / de nas rnal 'byor spyod pa zhes bya ba smos so/ /de ni rnal 'byor spyod pa'i byang chub ston par byed de/ de bstan par bya ba'i phyir gzugs la sogs pa'i yul rnams gang gis don dam par phyi rol gyi yin par 'dzin te/ des ni de bzhin gshegs pas dgengs pa'i dbang gis bstan pa la don dam par 'dzin to/ /de ni gcig dang bum? brtags pas don dam pa ma yin no/ /de don dam pa ma yin na yul dang sa la sogs pa'i nges pa'i rnam pa gang yin zhe na/ de'i lan du dpag tu med pa'i dus nas phyin ci log tu rnam par rtog pa'i bag chags ma spangs pa'i dbang gis shes pa la phyi rol yin par 'dzin pa'o/ /de'i don ni de bzhin gshegs pas gsungs so/ /ji ltar gsungs she na/ 'phags pa sangs rgyas phal po che las/ kye rgyal ba'i sras dag khams gsum pa 'di dag ni sems tsam mo zhes gsungs so/ /de'i phyir sems tsam bsgoms pas byang chub thob par 'gyur ro/ /shes pa ni shes pa'i ngo bo yin pas bden pa zhes bya'o/ /phyi rol gyi rnam pa ni shes pa'i ngo bo ma yin pas na brdzun pa zhes bya'o/ / phyi'i bden pa ma yin par gtan tshigs de'i phyir sdug bsngal dang kun 'byung gi rang bzhin phung po lnga yang bden pa ma yin no/ /des bskyed pa'i nyon mongs pa yang bden pa ma yin no/ /de ltar shes pas nyon mongs pa'i sgrib dang bral bar 'gyur ro/ /gzugs la sogs pa don dam pa med pas na gzung bar bya ba ma yin no/ /de ltar gang gis shes pas shes bya'i sgrib pa dang bral bar 'gyur ro/ /de gnyis dang bral ba la ni de bzhin gshegs pa zhes bya'o/ /des ni rnal 'byor spyod pa'i byang chub bstan to/ /dbu ma'i byang chub bstan par bya ste/ de'i phyi nas dbu ma bstan zhes bya ba smos so/ /de la gong du shes pa ni shes pa'i ngo bo yin pas bden pa zhes bya ba de ni yod pa zhig yin nam/ yang na med pa zhig yin zhe na/ de yod pa'i rang bzhin yin na / gcig par yod dam/ du ma'i ngo bor yod ce na/ gcig pa'i ngo bor yod na ni skyon 'di yod de/ dper na ri mo la sogs pa tha dad par ci'i phyir 'gyur/ tha dad par snang ba'i gtan tshigs de'i phyir na gcig pa ma yin no/ /gcig pa yin na ni ri mo la sogs pa tha dad par snang ba ni brdzun du 'gyur ro/ /ci'i phyir brdzun yin zhe na/ sna tshogs su snang ba'i phyir ro/ /sna tshogs su snang ba de yang rgyu sna tshogs pa'i dbang gis so/ /de la gcig pa'i mtshan ma ni med do/ /de la gcig ces bya ba ni skad cig la sna tshogs par mthong ba la ni gcig ces bya'o/ /de ni skad cig dang sna tshogs pa ni gcig pa yin nam/ tha dad pa yin tha dad pa yin na khyed bden gyi tha dad pa ma yin na ni bden pa ma yin no/ /de ni bden pa ma yin te/ /dus 'das pa la sogs pa de las logs shig na med pa'i phyir ro/ /de'i phyir gcig pa ma yin no/ /du ma yang ma yin te/ gcig gi rang bzhin brtags pas ma grub pa'i phyir du ma yang bden pa ma yin no/ /phyi rol gyi don rnams gcig dang du ma'i gtan tshigs kyis ma grub pa de'i phyir/ de bzhin du rnam par shes pa yang med do/ /'o na ji ltar yod ce na/ me long gis gzugs brnyan la sogs pa lta bur yod do/ /de ltar yod na gang zhig sangs rgyas par 'gyur zhe na/ de'i lan du phyi dang nang gi rnam par rtog pa bsal bar yin gyi/ rang bzhin ni med pa ma yin no/ /rang bzhin zhes bya ba ji lta bu zhe na/ rang bzhin gyi dri ma dang bral ba'o/ /gzhan yang rang gi go la gzhan la tshig gis brjod par mi nus pa'o/ /de yang phyi nang gis dngos po rang bzhin gyis stong pa yin pa de la thos par bya ba dang/ bsam par bya ba dang/ rtag par dran par bya ba la sogs pa spros pa dang bral ba rang bzhin gyis zhi ba mngon sum du byas pa la ni thams cad mkhyen pa zhes bya'o/ /de'i don ni stong phrag nyi shu lnga pa las/ rab 'byor gang dang ldan pas thams cad mkhyen par 'gyur/ de'i rang bzhin ni ji lta bu/ de'i bdag pha ni gang zhig yin zhes gsungs pa la/ gang dang ldan pas thams cad mkhyen par 'gyur zhes bya ba ni stong pa nyid dang ldan pas thams cad mkhyen par 'gyur ro/ /de'i rang bzhin ni de lta bu zhes bya ba ni zhi ba'i rang bzhin no/ /de'i bdag po ni gang yin zhes bya ba ni dran pa'o/ /sngags kyi rgyud kun shes byas nas zhes bya ba la/ sngags ni sa bon no/ /de bsgyur bas lha'i sku rdzogs par 'gyur ro/ /sku des phung po dang khams dang/ skye mched dang/ de bzhin gshegs pa thams cad kyi chos kyi rnam par dag pas gsungs so/ /gang gsungs she na/ dpal rdo rje snying po rgyan gyi rgyud dang/ chos kyi dbyings dag gi dbang phyug gi dkyil 'khor la sogs pa las ji ltar gsungs pa bzhin du shes par byas nas bla na med pa'i chos shes par bya ba mdor bsdus pa kye'i rdo rje'i rgyud brtsam par bya'o/ /brtsam par bya zhes bya ba ni mnyan par bya zhes bya ba'i don to/ /de ltar shes pas mi go ba dang/ phyin ci log tu go ba dang/ the tshom dang bcas par go bar de gsum dang ldan par mi 'gyur ro/ /de'i phyir nan tan dang ldan par 'gyur ro/ /dngos grub kyang thob par 'gyur ro/ /pad+ma'i myu gu rdo rjes kye'i rdo rje'i rgyud kyi le'u brgyad pa'i 'grel ba mdzad pa rdzogs so// // dkon mchog gsum la gnod par byed pa dang/ dam tshig nyams par byed pa dang bla ma la smod par byed pa'o/ /de ltar byas pas dmyal bar skye bar 'gyur ro/ /de'i phyir snying rje dang bcas par khro bar bya'o/ /rang gi snying gnas ye shes sems dpa' phyung ba des bshad ma thag pa de'i lus kyi lha la sogs pa la de'i skyon brjod la khyod kyis 'di spongs shig ces smra bar bya'o/ /de nas lus kyi lha la sogs pa khyer nas rang gi sku gsung thugs gsum la thim par bsam par bya'o/ /de'i rnam par shes pa byang chub sems dpar bsams la bde ba can gyi zhing khams su bzhag la chos nyan don du gzhug go /de nas de'i lus khang pa stong pa dang 'dra bar bsams la/ gzhan yang de lha dang sems dang bral bar bsams la/ /khro bo dpag tu med pa gzungs nas gcod pa la sogs pa byed par bsam par bya'o/ /gzhan yang bya rgod la sogs pa dang ce spyang la sogs pas bza' bar bsam par bya'o/ /gzhan yang de'i gsang ba'i lam la sogs pa la rdo rje'i kha 'bar ba zhugs par bya'o/ /lte ba la gnas pa'i pad+ma yang bsregs nas thal par gyur par bsam par bya'o/ /tho bas kyang brdegs par bsam par bya'o/ /de'i snying gar raM bsgyur ba las me'i dkyil 'khor 'bar bar bsam par bya'o/ /des bsregs pas thal bar gyur par bsam par bya'o/ /de lta bu'i rim pas bsgral bar bstan to/ bsod pa'i 'phrin las snying rjes bya zhes bya ba la sogs pa ni gong ma des bshad par shes par bya'o/ /spyan ni zhes bya ba ni tshig gnyis kyi don ci'i phyir smos she na/ phyag gnyis pa'i he ru ka shes par bya ba'i phyir gnyis kyi tshig bstan to/ /de gcig bu'i spyan dmar ba ma yin te/ thams cad kyang shes par bya'o/ /yang dag bsdu ba bzhi zhes bya ba ni sbyin pa dang/ snyan par smra ba dang/ don mthun pa dang/ don spyod pa'o// byang chub yan lag bdun zhes bya ba ni dran pa yang dag byang chub kyi yan lag dang/ chos shes pa byang chub kyi yan lag dang/ brtson 'grus byang chub kyi yan lag dang/ dga' ba byang chub kyi yan lag dang/ le lo med pa byang chub kyi yan lag dang/ ting nge 'dzin byang chub kyi yan lag dang/ btang snyoms byang chub kyi yan lag go /dran pa yang dag byang chub kyi yan lag ces bya ba ni sngon du sems can gyi don du 'tshang rgya bar smon lam btab pa dang/ thos pa la sogs pa dran pa'o/ /chos shes pa byang chub kyi yan lag ces bya ba ni chos thams cad stong pa nyid du shes pa'o/ /de yang nas yang du goms par 'dod pa la ni brtson 'grus byang chub gyi yan lag ces bya'o/ /de bsgoms pas nyon mongs pa med pa'i dga' ba skyes pa la ni dga' ba byang chub kyi yan lag ces bya'o/ /des lus ngag yid gsum bya ba byed pa la le lo med par byas pas na le lo med pa byang chub kyi yan lag ces bya'o/ /tshad med pa bzhi dang de bzhin nyid la sems rtse gcig par gyur pa la ni ting nge 'dzin byang chub kyi yan lag ces bya'o/ /sems can thams cad kyi skyon btang snyoms su bzhag nas pha rol tu phyin pa la sogs pa'i yon tan 'dzin pa la ni btang snyoms byang chub kyi yan lag ces bya'o/ /pad+ma'i myu gu rdo rjes kye'i rdo rje'i rgyud kyi le'u dgu ba'i 'brel pa mdzad pa rdzogs so/ / //zhi ba la sngags dkar po bsam par bya'o/ /dbang la dmar po bsam par bya'o/ /rengs par byed pa la ser por bsam par bya'o/ /rgyas pa la dmar ser du bsam par bya'o/ /dgug par byed pa la dmar por bsam par bya'o/ bsod pa dang 'khon par byed pa la ni nag por bsam par bya'o/ /zhi ba la ni sems zhi bar bya'o/ /dbang la ni rnal 'byor bas sems sgeg pa'i tshul du bya'o/ /dgug pa la mi dpa' ba' i sems dang ldan par bya'o rengs par byed pa ni ngan pa'i sems bya'o/ /rgyas pa la ni snying rje'i sems/ 'khon par byed pa ni rnal 'byor pa gzhan 'jigs pa'i gzugs su bya'o/ /gsod par byed pa la ni shin tu yang khro ba'i sems su bya'o/ /ji ltar phrad ba gsungs pa gzung la bzlas brjod bya'o/ /zhi ba la sogs pa la ni rim pa bzhin du mdza' ba bya'o/ /gsod pa la sogs pa la rim pa las bzlog la bzlas brjod bya'o/ pad+ma'i myu gu rdo rjes kye'i rdo rje'i rgyud kyi le'u bcu pa'i 'grel pa mdzad pa rdzogs so/ / //skyed mos tshal zhes bya ba ni dam tshig med pa'i mi mi gnas pa rnal 'byor pa'i yid du 'ong ba la ni skyed mos tshal zhes bya'o/ /mchod ces bya ba'o/ /mngon par byang chub pa rnam pa lnga'i rim pas he ru ka phyag gnyis pa'i sku bskyed la skye mched byin gyis brlab pa la sogs par bya'o/ /de yang zhal gcig dang spyan gsum pa'o/ /de ltar byas nas phyi rol gyi ga pur la sogs pa dang/ nang gi nyi ma la sogs pas shes rab ji ltar dga' ba bzhin du bya'o// yang yang zhes bya ba ni rtag par zhes bya ba'i don to/ /'og ces bya ba ni pad+ma'o/ /steng du zhes bya ba ni kha'o/ /khas pad+ma la gtugs la shes rab ji ltar dga' bar 'gyur ba de bzhin du bya'o/ /yang na 'og ces bya ba ni thun mong gi dngos grub bo/ /steng du zhes bya ba ni thun mong ma yin pa'i dngos grub bo/ /dngos grub de gnyis sems can thams cad la sbyin pa'i bsam pa byas la sngon du bstan pa'i rdo rje dbyings kyi dbang phyug ma bla ma'i man ngag gis bskul la bsgom par bya'o/ /rang bzhin dga' ba'i don bstan par bya ste/ /rnal 'byor ye shes lta ba nam gyi tshe/ /bde bar gnas nas phyir ni mi 'byung ste/ /pra har gcig gam yang na nyi ma gcig /zla phyed zla ba gcig gam lo ni ste/ /bskal pa gcig gam yang na bskal pa stong/ / gnas pa de ni ye shes dang ldan pa/ /yangs la shin tu che ba'i dngos grub ni/ /thob pas sangs rgyas thams cad dang ni 'dra/ /de lta bu'i dngos grub rnyed pas chos kyi sku la sogs pa dang ldan par 'gyur ro/ /pad+ma'i myu gu rdo rjes kye'i rdo rje'i rgyud kyi le'u bcu gcig pa'i 'grel pa mdzad pa rdzogs so/ / //sngon du bstan pa'i dbang rnams ni tshigs su bcad pa bstan par bya ste/ kye rdo rje chen po zhes bya ba la sogs pas bstan to/ /de yang dkyil 'khor bstan pa dang/ /chu'i dbang dang/ dbu rgyan gyi dbang dang/ /rdo rje'i dbang dang/ dril bu'i dbang dang/ ming gi dbang la sogs pa la ni bum pa'i dbang zhes bya'o/ /de bzhin gshegs pa thams cad bkug la zhal du zhugs par bsam par bya'o/ /de zhu nas rdo rje rtse gnyis pa'i mgo bo la brtan par byas la me tog las bton nas slob ma'i kha la dbab par bya'o/ /de la ni gsang ba'i dbang zhes bya'o/ /rdo rje rtse gnyis pa dang me tog gi ting nge 'dzin la gnas la bde mchog dga' ba chags pa dang bral ba'i bar du ye shes skyes pa de'i rang bzhin ni chags pa dang/ chags pa dang bral ba dang/ ? ma dang/ de gsum dang bral ba'o/ /de yang rang gis go ba dang nyon mongs pa med pa'i bde ba'i rang bzhin no/ /de la ni shes rab ye shes kyi dbang zhes bya'o/ /bla ma'i man ngag gi de lta bu'i ye shes skye bar 'gyur ro/ /de ni 'khor ba ji srid yod kyi bar du gnas pa des sems can gyi khams dpag tu med par sems can gyi sems shes par byas nas don byed do/ /de lta bu go bar byed pa ni dbang bzhi pa zhes bya'o/ /de las gong du mchog tu gyur pa'i ye shes med pas na dbang rnam pa bzhir bstan to/ /pad+ma'i myu gu rdo rjes kye'i rdo rje'i rgyud kyi kalpa gnyis pa'i 'grel ba mdzad pa rdzogs so// //thams cad rnam pa thams cad ni/ /de bzhin gshegs pas ston par nus/ /de ltar shes bzhin mkhas pas nyon/ /snying rje yi ni dbang gis so/ /bdag nyid blo ni zhen pa ste/ /snying rjes nga yi sems ni bslang/ /yang dag shes pa min pas byas/ /mkhas pa rnams kyi bzod par mdzod/ /don chen dang ldan lung 'di bkrol ba ste/ /de yi dge rtsa bdag gis gang thob bas/ /sems can thams cad kyis ni sems kyi ni/ /rin chen gsum la sogs pa'i gnas gyur cig /mdo sde stong bzhi brgya shes pa'i slob dpon pad+ma'i myu gu rdo rje'i zhabs kyis/ /kye'i rdo rje zhes bya ba'i rgyud kyi rgyal po'i 'grel pa mdzad pa rdzogs so/ / //rgya gar gyi mkhan po chen po pad+ma A ka ra la mtshur ston dbyig gi rgyal mtshan la sogs pas zhus nas/ bla ma bde gshegs zhabs kyi grags pa yi/ /slob ma'i mthar gyur rin chen 'bar ba ni/ /blo zhan la sogs rgya gar skad mi mkhas/ /des bsgyur kye yi rdo rje'i dka' 'grel la/ /mkhas mchog btsun pa rnams kyis spyas mi zhu/ /dad pa bskyed nas bsgyur ba'i dge rtsa 'dis/ /khams gsum sems can thams cad kyi ni sems/ /sgrib pa gnyis dang yang dag bral gyur cig/ (//dpal dgyes rdor dka' 'grel mu tig phreng ba zhes bya ba slob dpon ratnA ka ra shIn+ta pas mdzad pa bzhugs so//) //rgya gar skad du/ sh+rI he badzra pany+dzi kA nA ma muk+ti kA ba li/ bod skad du/ dpal dgyes pa'i rdo rje'i dka' 'grel mu tig phreng ba zhes bya ba/

CLOSE WINDOW