བོད་ཡིག

e-texts based on the Adarsha Input

/rgya gar skad du/ bi na ya k+Shu dra ka bstu/ bod skad du/ 'dul ba phran tshegs kyi gzhi/ bam po dang po/ thams cad mkhyen pa la phyag 'tshal lo/ /phran tshegs kyi gzhi'i sdom ni/ so phag chan pa chos gos dang / /shing tshad dang ni gnas brtan lus/ /rgyus pa 'gyod pa dbyung ba nyid/ /phran tshegs gzhir ni yang dag bshad/ / bsdus pa'i sdom ni/ so phag sen mo bcos pa dang / /lhung bzed yan lag me long skyes/ /lam phran chu tshags mon sran sde'u/ /rkang pa bkru dang gos mdud do/ / sdom ni so phag dang ni sa dkar dang / /nya phyis dri yi lag ris dang / /ka ba dang ni skud pa gnyis/ /lag rgyan dang ni sor gdub rgya/ /sangs rgyas bcom ldan 'das yangs pa can na spre'u rdzing gi 'gram khang pa brtsegs pa na bzhugs so/ /drug sde rnams snga dro sham thabs dang chos gos bgos/ lhung bzed thogs te yangs pa can du bsod snyoms kyi phyir zhugs pa dang / yangs pa can gyi bar dang / khang pa brtsegs pa'i bar gyi bar skabs de na yangs pa can gyi lid tsha bi rnams kyi bskyed mos tshal me tog dang / 'bras bu dang / chu phun sum tshogs pa/ bya sna tshogs skad 'byin pa dga' ba'i tshal dang 'dra ba de dag na de dag gi rtse ba dang / gar dang / glu dang / rol mo'i sgra'i cha byad sna tshogs dag dang / khrus kyi yo byad sna tshogs dag kyang bzhag pa dang / drug sde rnams kyis smras pa/ dga' bo nye dga' bo/ yangs pa can gyi lid tsha bi 'di dag dang / bskyed mos tshal gyi dga' ba ni bcom ldan 'das kyis sum bcu rtsa gsum pa'i lha rnams kyi dper mdzad na/ re shig de dag gi bskyed mos tshal ci 'dra ba blta'o zhes de rnams glod nas de dag gi bskyed mos tshal du zhugs so/ /de dag gis de na brtsal ba'i yo byad mda' bo che dang drang ba dang / 'phang rdo sna tshogs dang / gar dang glu dang / rol mo'i sgra'i cha byad sna tshogs dang / pi bang dang / gling bu dang / rdza rnga dang / khar rnga dang / skad snyan la sogs pa sna tshogs dang / khrus kyi yo byad so phag dang / bkru ba'i phye ma dang / mgo bkru ba skyu ru ra sna tshogs mthong ba dang / de rnams kyis phan tshun smras pa/ dga' bo nye dga' bo yo byad phun sum tshogs pa rnam pa du ma 'di dag yod na/ ci re shig brtsal bya 'am/ 'on te gar bya 'am/ glu blang ngam/ rol mo'i sgra bya 'am/ khrus bya/ kha cig gis smras pa bdag cag bkrus nas ring zhig lon gyis/ je khrus bya'o zhes de dag glod nas so phag dag gis drud cing drud nas khrus bya bar brtsams pa dang / bzo'i gnas dang / las kyi gnas de dag la mkhas pas khrus la zhugs pa de rnams kyi sgra yid du 'ong ba 'di lta ste/ sil snyan yan lag lnga pa skyes bu mkhas pas legs par dkrol ba'i lta bu byung ngo / /skye bo'i tshogs phal po che lam de nas 'gro bas sgra de thos pa dang / de rnams rna byo ste/ yud tsam bsdad nas smras pa/ shes ldan dag yangs pa can gyi lid tsha bi rnams kyi bskyed mos tshal na gar mkhan rnams gar byed pa ltar 'dong ngam/ de ltar bya'o zhes ltad mo la yid 'dun pa de dag myur bar chas te bskyed mos tshal du dong nas de dag nang du zhugs pa dang / drug sde rnams kyang phyir byung ngo / /de dag gis de rnams la smras pa/ 'phags pa dag phyogs gang na gar mkhan rnams gar bgyid/ de rnams kyis smras pa/ bkren pa khyod kyis bye brag mi phyed de/ gar mkhan gar byed pa la sgra 'di lta bu 'byung ngam/ 'phags pa dag 'o na 'di su'i sgra lags/ shes ldan dag kho bo cag lus drud nas khrus byas pa yin no/ /'phags pa dag ci dge sbyong khyed 'dod pa'i yon tan gyis gzir tam/ bkren pa khyed kyi mgrin pa rdog pas mnan la dge sbyong kho bo cag 'dod pa'i yon tan gyis gzir to/ /khyed kho bo cag gi rjes su ston pa yin nam ci/ ma smra bar deng / khyed la gnod pa byas sa re zhes de rnams kyis de dag bsdigs pa dang / spa gong nas dong ste/ yangs pa can du zhugs nas lam po che dang / srang dang / bzhi mdo dang / sum mdo dag tu 'phya bar brtsams so/ /dge slong rnams kyis skabs de thos nas bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni dge slong rnams so phag dag gis lus drud de khrus byed pa las gyur gyis/ de lta bas na dge slong gis so phag gis lus drud de khrus mi bya'o/ /'drud na 'gal tshabs can du 'gyur ro/ /bcom ldan 'das kyis dge slong gis so phag gis lus drud de khrus mi bya'o zhes bka' stsal pa dang / dge slong dag rkang pa ser ga byung zhing dri ma dang bcas bzhin bsod snyoms la 'jug pa de dag bram ze dang / khyim bdag rnams kyis mthong nas smras pa/ 'phags pa dag khyed zhabs ser ga byung zhing dri ma dang bcas na/ ci ste dri ma sbyang bar mi bgyi/ de rnams kyis smras pa/ bzhin bzangs dag bcom ldan 'das kyis ma gnang ngo / /ci 'phags pa khyed dri ma'i 'dam bcangs pas dag par 'gyur ram/ de rnams cang mi smra bar 'dug ste/ bsod snyoms la brgyus nas gtsug lag khang du dong ba dang / skabs de dge slong rnams kyis bcom ldan 'das la rgyas par gsol to/ /bcom ldan 'das kyis bka' stsal pa/ dge slong dag de ltar na snga ma ni bcas pa'o/ /'di ni gnang ba yin te/ de lta bas na dge slong gis rkang pa so phag gis drud par gnang ngo / /lus gzhan ni ma yin te/ 'drud na 'gal tshabs can du 'gyur ro/ /bcom ldan 'das yangs pa can na spre'u rdzing gi 'gram khang pa brtsegs pa na bzhugs so/ /dge slong rnams snga dro sham thabs dang chos gos bgos/ lhung bzed thogs te yangs pa can du bsod snyoms kyi phyir zhugs pa dang / de rnams kyis bram ze zhig sa dkar gyis so ris gsum byugs nas slongs mo la rgyu zhing de'i bslangs pa yang mang du rnyed par mthong ngo / /drug sde rnams kyis smras pa/ dga' bo nye dga' bo thabs 'di ni bzang po zhig ste/ bdag cag kyang de ltar bya'o zhes de rnams phyi de nyin sa dkar gyis so ris gsum byugs nas bsod snyoms la zhugs pa ma dad pa rnams kyis mthong nas 'phya zhing gus par smra'o/ /gus par smra'o zhes smras pa dang / drug sde rnams kyis smras pa/ bkren pa khyed kyis gus par smra bar bya ba gang dag yin pa dang / phyag bya ba gang dag yin pa 'di yang mi shes sam/ de dag gis smras pa/ 'di la ci zhig 'tshal bar bgyi/ bram ze rgan pa rgan pa rnams ni gus par smra bar bya ba yin la/ dge slong rnams ni phyag bya ba yin na/ de ci'i phyir khyed dge slong rnams la gus par smra ba byed kyi phyag ma yin/ 'phags pa dag bdag cag gis khyed bram ze lags par 'tshal gyi dge slong du ni ma lags so/ /de lta lags pas bdag cag gis ma 'tshal gyis bzod par gsol lo zhes byas pa dang / de dag cang mi smra bar 'dug go/ /skabs de dge slong rnams kyis thos nas bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad ci byung ba ni dge slong rnams so ris gsum 'dri ba las gyur gyis/ de lta bas na dge slong gis so ris gsum bri bar mi bya'o/ /dge slong so ris gsum 'dri na 'gal tshabs can du 'gyur ro/ /bcom ldan 'das kyis dge slong gis so ris gsum mi byug go zhes bka' stsal pa dang / dge slong dag sman pas bsgo yang lus sas mi skud pa'i skabs de dge slong rnams kyis bcom ldan 'das la gsol to/ /bcom ldan 'das kyis bka' stsal pa/ dge slong dag de ltar na snga ma ni bcas pa'o/ /'di ni gnang ba yin te/ de lta bas na sman pas bsgo ba ni ma gtogs so/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /drug sde rnams snga dro sham thabs dang chos gos bgos/ lhung bzed thogs te mnyan yod du bsod snyoms kyi phyir zhugs pa na/ de rnams kyis bram ze 'gi'u wang gi thig le byas pa zhig skye bo phal po che'i tshogs kyis bskor zhing ston mo'i bsngags pa brjod pa mthong ba dang / de rnams kyis smras pa/ dga' bo nye dga' bo thabs 'di ni bzang po zhig ste/ bdag cag kyang 'di ltar bya'o/ /legs kyis de ltar bya'o zhes de rnams phyi de nyin 'gi'u wang gi thig le dag gis bdag nyid brgyan pa byas nas bsod snyoms la zhugs pa dang / bram ze dang khyim bdag dag gis mthong nas 'phya zhing gus par smra'o gus par smra'o zhes smras pa dang / drug sde rnams kyis smras pa/ bkren pa khyod kyis gus par smra bar bya ba gang dag yin pa dang / phyag bya ba gang dag yin pa 'di yang mi shes sam/ de dag gis smras pa/ 'di la ci zhig 'tshal bar bgyi/ bram ze rgan pa rgan pa rnams ni gus par smra bar bya ba yin la/ dge slong rnams ni phyag bya ba yin na/ de ci'i phyir khyed dge slong rnams la gus par smra ba byed kyi phyag ma yin/ 'phags pa dag bdag cag gis khyed bram ze lags par 'tshal gyi dge slong du ni ma lags so/ /de'i slad du bdag cag gis ma 'tshal gyis/ bzod par gsol lo/ /zhes byas pa dang / de dag cang mi smra bar 'dug go/ /skabs de dge slong rnams kyis bcom ldan 'das la gsol pa dang / bcom ldan 'das gyis dgongs pa/ nyes dmigs gang cung zad ci byung ba ni dge slong dag 'gi'u wang gi thig le dag gis bdag nyid brgyan pa las gyur gyis/ de lta bas na dge slong gis 'gi'u wang gi thig le dag gis brgyan par mi bya'o/ /brgyan na 'gal tshabs can du 'gyur ro/ /bcom ldan 'das kyis dge slong gis 'gi'u wang gi thig le dag gis bdag nyid brgyan par mi bya'o zhes bka' stsal pa dang / dge slong zhig dpral bar rma byung ba de sman pa'i drung du song nas bzhin bzangs bdag la sman ston cig /'phags pa rma'i than kor 'gi'u wang gis skus shig dang khyod 'tsho bar 'gyur ro/ /des smras pa/ bcom ldan 'das kyis ma gnang ngo / /'phags pa khyod kyi ston pa ni thugs rje can yin pas gnang bar 'gyur ro/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na dge slong dag sman pas bsgo ba ni ma gtogs so/ /bcom ldan 'das kyis dge slong gis so phag gis lus drud par mi bya'o zhes bka' stsal pa dang / dge slong rnams nya phyis kyis 'drud par byed do/ /bcom ldan 'das kyis bka' stsal pa/ nya phyis kyis drud par mi bya'o/ /'drud na 'gal tshabs can du 'gyur ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /drug sde rnams dris byugs te gzhon nu rnams kyi nang du dong nas smras pa/ gzhon nu dag nged kyi dri ji lta snoms shig /de dag gis smras pa/ gnas brtan ci khyed dris byugs sam/ byugs so/ /gnas brtan khyed dris byug tu rung ngam/ rung yang rung mi rung yang rung ste/ nged kyis ni byugs so/ /de dag 'phya smod kha zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni dris nyug pa las gyur gyis de lta bas na dge slong rnams kyi dris byug par mi bya'o/ /nyug na 'gal tshabs can du 'gyur ro/ /bcom ldan 'das kyis dge slong rnams kyis dris byug par mi bya'o zhes bka' stsal pa dang / dge slong nad pa zhig sman pa'i drung du song ste/ bzhin bzangs bdag la sman ston cig /des smras pa/ 'phags pa dris byugs na khyod 'tsho bar 'gyur ro/ /bzhin bzangs ci kho bo 'dod pa spyod dam/ 'phags pa khyod kyi sman ni 'di yin te/ gzhan gyis ni 'tsho bar mi nus so/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis sman pa'i lung gis dri bcang bar bya'o/ /dge slong dag dris byugs nas dge 'dun gyi nang na 'dug cing bram ze dang khyim bdag 'ongs shing lhags pa rnams la chos ston par byed/ bram ze dang khyim bdag gi khyim rnams su yang 'gro bar byed pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ ngas dge slong dri 'chang ba'i kun du spyad pa'i chos bca' bar bya ste/ dge slong dri 'chang bas dris byugs nas dge 'dun gyi nang du 'dug par mi bya/ bram ze dang khyim bdag 'ongs shing lhags pa rnams la chos bstan par mi bya/ bram ze dang khyim bdag gi khyim rnams su 'gro bar mi bya'i/ nam sos par gyur pa de'i tshe khrus byas nas dri med par gyur pa dang dge 'dun gyi nang du 'dug par bya/ bram ze dang khyim bdag 'ongs shing lhags pa rnams la chos bstan par bya/ bram ze dang khyim bdag gi khyim rnams su 'gro bar bya'o/ /dge slong dri 'chang bas kun du spyad pa'i chos ji ltar bcas pa bzhin yang dag par blangs te mi 'dug na 'gal tshabs can du 'gyur ro/ /bram ze dang khyim bdag dad pa can dag dge slong rnams la dri 'bul ba na/ dge slong rnams 'gyod nas mi len pa dang de dag gis smras pa/ 'phags pa dag gang gi tshe sangs rgyas bcom ldan 'das 'jig rten du byung bar ma gyur pa de'i tshe ni mu stegs can rnams yon gnas lags/ da ni bcom ldan 'das 'jig rten du byung bas da ltar khyed yon gnas lags na/ gal te khyed kyis ma bzhes na ci bdag cag 'jig rten 'di nas 'jig rten pha rol du dge ba'i lam rgyags ma mchis par mchi 'am/ bdag cag la thugs brtse ba'i slad tu bzhes shig /de dag gis smras pa/ bcom ldan 'das la zhu'o/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ blang bar bya'o/ /dge slong rnams kyis blangs nas de dag nyid kyi mdun du bor ba dang / de dag gis smras pa/ 'phags pa dag bdag cag gis rin thang bzhin du nyo nyo na khyed kyis blangs te dor ram/ skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ blangs nas dor bar mi bya'i/ 'on kyang de bzhin gshegs pa'i mchod rten la dri'i lag ris byug par bya'o zhes bka' stsal pa dang / dge slong rnams kyis blangs nas dbu skra dang sen mo'i mchod rten dag la dri'i lag ris nyug go/ /de dag gis smras pa/ 'phags pa dag ci bdag cag gis mchod rten ma mthong ngam/ bdag cag gis ni khyed kho na la phul te/ dbu skra dang sen mo'i mchod rten dag la ni sngar phul lags so/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ blangs nas gnas khang la byug par bya'o/ /de rnams kyis gnas khang gi sgo la byugs pa dang / de dag dri gtsang khang yin no snyam nas phyag 'tshal bar byed pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ nang du byug par bya'o/ /dge slong rnams kyis drang thad du byugs pa dang / nyes dmigs de nyid du gyur nas bcom ldan 'das kyis bka' stsal pa/ sngas dang nye ba 'am rkang pa dang nye bar byug par bya zhing dri zhim po thams cad mig la phan pas dus dus su bsnam par bya ste/ 'di la 'gyod par mi bya'o/ /sangs rgyas bcom ldan 'das chu srin byis pa gsod kyi ri la 'jigs 'jigs lta'i tshal ri dgas kyi nags na bzhugs so/ /ji tsam na rgyal bu gzhon nu rtogs byed kyi khang bzangs pad ma ris byed du bcug nas bcom ldan 'das nyan thos kyi dge 'dun dang bcas pa gdugs tshod la spyan drangs te/ bcom ldan 'das khang bzangs pad ma'i ris su dge slong gi dge 'dun gyi gung la gdan bshams pa la bzhugs so/ /nye dga' bo zan za ba'i tshe lag pas ka ba la bsnun pa dang / khang bzang pad ma ris g.yos par gyur to/ /'dri mkhan rnams kyis smras pa/ 'phags pa rgyal bu rtogs byed kyis khang bzangs pad ma ris tshon brgya rtsa gcig gis bkra bar byas pa khyed kyis gzhig gam ci/ nye dga' bos smras pa/ bkren pa rtogs byed 'di la lhag par chags pas dus byas nas gar skye gtol med do/ /khyed kyang 'di la lhag par chags pas dus byas nas yi dags lba ba can rnams kyi nang du skye bar 'gyur ro/ /de dag kha zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis dgongs pa nyes dmigs gang cung zad byung ba ni dge slong dag ka ba la lag pas bsnun pa las gyur gyis/ de lta bas na dge slong gis lag pas ka ba la bsnun par mi bya'o/ /snun na 'gal tshabs can du 'gyur ro/ /bcom ldan 'das kyis dge slong gis ka ba la lag pas bsnun par mi bya zhes bka' stsal pa dang / drug sde rnams khu tshur dang gru mo dang / phrag pa dang mgo dang / rtsib logs dang / rgyab dang / rked pa dang / brla dang / pus mo dang / byin pa dang / rkang pa dang / dbyug pa dang / bong ba dang / gzhan gyis snun par byed pas nyes dmigs de nyid du gyur nas/ bcom ldan 'das kyis bka' stsal pa/ gang gis kyang bsnun par mi bya'o/ /drug sde rnams rtsig pa dang sa dang / gzhan la snun par byed pa dang / bcom ldan 'das kyis bka' stsal pa/ gzhan la yang gang gis kyang bsnun par mi bya'o/ /bsnun na 'gal tshabs can du 'gyur ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ / drug sde rnams snga dro mnyan yod du bsod snyoms kyi phyir zhugs pa dang / de rnams kyis bram ze zhig tshangs pa'i skud pa thogs te slongs mo la rgyu zhing des bza' ba dang bca' ba yang mang du rnyed pa mthong nas drug sde rnams kyis smras pa/ 'ga' bo nye dga' bo thabs 'di ni bzang po zhig ste/ bdag cag kyang de lta bu bya'o zhes de dag phyi de nyin tshangs pa'i skud pa thogs te/ bsod snyoms la zhugs pa ma dad pa rnams kyis mthong nas/ 'phya zhing gus par smra'o/ /gus par smra'o zhes smras pa dang / drug sde rnams kyis smras pa/ bkren pa khyed kyis gus par smra bar bya ba gang dag yin pa dang / phyag bya ba gang dag yin pa 'di yang mi shes sam/ de dag gis smras pa/ 'di la ci zhig 'tshal bar bgyi/ bram ze rgan pa rgan pa rnams ni gus par smra bar bya ba yin la/ dge slong rnams ni phyag bya ba yin na/ de ci'i phyir khyed dge slong rnams la gus par smra bar byed kyi phyag ma yin/ 'phags pa dag bdag cag gis khyed bram ze lags par 'tshal gyi dge slong du ni ma lags so/ /de lta lags pas bdag cag gis ma 'tshal gyis bzod par gsol lo zhes byas pa dang / de dag cang mi smra bar 'dug go/ /skabs de dge slong rnams kyis thos nas bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad ci byung ba ni dge slong rnams tshangs pa'i skud pa thogs pa las gyur gyis/ de lta bas na dge slong gis tshangs pa'i skud pa gdags par mi bya'o/ /'dogs na 'gal tshabs can du 'gyur ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /drug sde rnams snga dro sham thabs dang chos gos bgos/ lhung bzed thogs te mnyan yod du bsod snyoms kyi phyir zhugs pa na/ de dag gis bram ze dri dang me tog gis brgyan pa tshon sna lnga pa'i skud pas lag pa bcings pa zhig dus ston zos nas dbang po tshim ste/ khyim nas byung ba mthong ba dang / de dag gis smras pa/ dga' bo nye dga' bo thabs 'di ni bzang po zhig ste/ bdag cag kyang 'di bzhin bya'o zhes de dag phyi de nyin tshon sna lnga pa'i skud pas lag pa bcings nas bsod snyoms la zhugs pa/ bram ze dang khyim bdag rnams kyis mthong nas 'phya zhing gus par smra'o/ /gus par smra'o zhes smras pa dang / drug sde rnams kyis smras pa/ bkren pa khyed kyis gus par smra bar bya ba gang dag yin pa dang / phyag bya ba gang dag yin pa 'di yang mi shes sam/ de dag gis smras pa/ 'di la ci zhig 'tshal bar bgyi/ bram ze rgan pa rgan pa rnams ni gus par smra bar bya ba yin la dge slong rnams ni phyag bya ba yin no/ /de ci'i phyir khyed dge slong rnams la gus par smra bar byed kyi phyag ma yin/ 'phags pa dag bdag cag gis khyed bram ze lags par 'tshal gyi/ dge slong du ni ma lags so/ /de lta lags pas bdag cag gis ma 'tshal gyis bzod par gsol lo zhes byas pa dang / de dag cang mi smra bar 'dug go/ /skabs de dge slong rnams kyis thos nas bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad ci byung ba ni dge slong rnams tshon sna lnga pa'i skud pas lag pa 'ching ba las gyur gyis/ de lta bas na dge slong gis tshon sna lnga pa'i skud pas lag pa bcing bar mi bya'o/ /'ching na 'gal tshabs can du 'gyur ro/ /bcom ldan 'das kyis dge slong tshon sna lnga pa'i skud pas lag pa bcing bar mi bya'o zhes bka' stsal pa dang / dge slong nad pa gzhan zhig sman pa'i drung du song ste/ bzhin bzangs kho bo la nad 'di lta bu byung na sman ston cig ces byas pa dang / des smras pa/ 'phags pa skud pa la gsang sngags dag gis bzlas brjod byas te/ lag pa la bcings na khyod 'tsho bar 'gyur ro/ /des smras pa/ bzhin bzangs bcom ldan 'das kyis ma gnang ngo / /'phags pa khyod kyi ston pa ni thugs rje can yin pas gnang bar 'gyur ro/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis sman pa'i lung gis skud pa bcang bar bya'o/ /bcom ldan 'das kyis sman pa'i lung gis skud pa bcang bar bya'o zhes bka' stsal pa dang / dge slong rnams lag pa g.yas pa'i rtse mo la 'ching ste/ nyes dmigs de nyid du gyur nas/ bcom ldan 'das kyis bka' stsal pa/ dge slong dag lag pa g.yas pa'i rtse mo la bcing bar mi bya'o/ /de rnams lag pa g.yas pa'i dpung pa la 'ching ste/ nyes dmigs de nyid du gyur nas/ bcom ldan 'das kyis bka' stsal pa/ lag pa g.yas pa'i dpung pa la bcing bar mi bya'o/ /de rnams lag pa g.yon pa'i rtse mo la 'ching ste/ nyes dmigs de nyid du gyur nas/ bcom ldan 'das kyis bka' stsal pa/ lag pa g.yon pa'i rtse mo la bcing bar mi bya'i/ 'on kyang lag pa g.yon pa'i dpung pa la bcing bar bya'o/ /dge slong rnams nad sos par gyur nas skud pa bab bab tu 'dor bas mi ma yin pa rnams 'phya ste/ 'phags pa dag nged kyis sos par byas na da ma gus par byed pa lta/ skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ bab bab tu dor bar mi bya ste/ gal te nad ma byang na chos gos kyi mtha' 'am/ rgya cang la bcing bar bya'o/ /'on te thams cad kyi thams cad du sos par gyur na ka ba'i ser ga 'am/ rtsig pa'i gseb tu gzhug par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /drug sde rnams snga dro sham thabs dang chos gos bgos/ lhung bzed thogs te mnyan yod du bsod snyoms kyi phyir zhugs pa na/ bram ze dang khyim bdag rnams kyis rgyan slob ma'i nang du bzhag pa drug sde rnams kyis rkang rgyan dang lag rgyan dag thogs nas smras pa/ dga' bo nye dga' bo ji lta mdzes sam/ bram ze dang khyim bdag dag gis smras pa/ 'phags pa khyed mgo ni byi/ mchan khung ni spun na 'di la lus mdzes pa ci zhig yod gdon mi za bar dge sbyong khyed 'dod pa'i yon tan dag gis gzir bar gyur to zhes byas pa dang / de rnams cang mi smra bar 'dug go/ /skabs de dge slong rnams kyis thos nas bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni dge slong rnams lag rgyan dang rkang rgyan dag gis bdag nyid brgyan pa las gyur gyis/ de lta bas na dge slong gis lag brgyan dang rkang rgyan gyis bdag nyid brgyan par mi bya'o/ /brgyan na 'gal tshabs can du 'gyur ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /gtsug lag khang du ma byin par len pa rnams kyis dge 'dun gyi mdzod dang / gang zag gi gnas khang dag nas brkus so/ /dge slong gzhan dag gcig gi yang stor na/ bdag cag gi stor nas ji tsam lon pa ma tshor ro/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis rgya bcang bar bya'o bcom ldan 'das kyis rgya bcang bar bya'o zhes bka' stsal pa dang / drug sde rnams kyis gser dang / dngul dang / bai dUr+ya dang shel las byas pa dang / sor gdub rgya rgyan sna tshogs kyis brgyan pa dag bcangs so/ /de nas bram ze dang khyim bdag dag gis mthong nas lag pa brgyang ste smras pa/ bzhin bzangs nad med cig nad med cig /de dag gis smras pa/ 'phags pa 'di ci lags/ bzhin bzangs bcom ldan 'das kyis rgya gnang ngo de dag 'phya smod kha zer zhing dge sbyong shAkya'i bu rnams kyis dge sbyong gi tshul nyams shing tshangs pa'i tshul nyams te/ 'di na da ltar rgya la tha snyad 'dogs shing rgyan rnams kyis bdag nyid brgyan par byed do/ /skabs de dge slong rnams kyis thos nas bcom ldan 'das la gsol pa dang / bcom ldan 'das kyis bka' stsal pa/ dge slong gis gser dang / dngul dang / bai dUr+ya dang / shel las byas pa'i rgya bcang bar mi bya/ sor gdub rgya yang bcang bar mi bya'i 'on kyang rgya lnga po ra gan dang / zangs las byas pa dang / khar ba las byas pa dang / ba so las byas pa dang / rwa las byas pa bcang bar bya'o/ /drug sde rnams kyis rgya la skyes pa dang / bud med nyal po byed pa bris pa dang / bram ze dang khyim bdag rnams kyis smras pa/ 'phags pa ci dge sbyong khyod 'dod pa'i yon tan dag gis gzir tam/ gnas skabs de dge slong rnams gyis bcom ldan 'das la gsol pa dang / bcom ldan 'das kyis bka' stsal pa/ rgya ni gnyis te/ dge 'dun gyi dang gang zag gi'o/ / de la dge 'dun gyi ni dbus su 'khor lo bris la/ glo gnyis su ri dgas 'og tu gtsug lag khang gi bdag po'i ming bri bar bya'o/ /gang zag gi ni rus pa'i keng rus sam/ mgo'i thod pa bri bar bya'o/ / sdom ni/ sen mo 'breg dang byi dor dang / /a mra dang ni skyu ru ra/ /lhung bzed brgyad po bkag pa dang / /rjes su gnang ba gnyis yin no/ /sangs rgyas bcom ldan 'das rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /gang gi tshe khyim bdag mgon med zas sbyin gyis sangs rgyas la sogs pa dge slong gi dge 'dun la rgyal bu rgyal byed kyi tshal phul ba de'i tshe/ des 'breg mkhan gyi mi la smras pa/ kye skyes bu rgyal bu rgyal byed kyi tshal du song la 'phags pa rnams kyi skra dang kha spu bregs shig /de rgyal bu rgyal byed kyi tshal du song ba dang / drug sde rnams kyi kun du spyod pa ni drug sde gang yang rung ba zhig gis rgyal bu rgyal byed kyi tshal gyi sgo mi stongs pa yin te/ tshe dang ldan pa nye dga' bo rgyal bu rgyal byed kyi tshal na 'chag cing 'dug pa des de rgyang ring po nas mthong nas smras pa/ bzhin bzangs 'ongs pa legs so/ /'ongs pa legs so/ /khyod zla ba lta bur gnas na ring mo zhig lon te/ gang nas 'ongs/ des smras pa/ 'phags pa khyim bdag gis 'phags pa rnams kyi skra dang kha spu breg pa'i slad du 'dir btang ngo / /des smras pa/ sen mo legs par 'breg shes sam/ 'phags pa 'di nyid bdag gi bzo lags so/ /bltas tshur de nye bar 'ongs pa dang / nye dga' bos lag pa brkyang ngo / /'breg mkhan gyis smras pa/ 'phags pa ci 'dra bar breg /bzhin bzangs 'bru'i rtse mo ltar bregs shig /des 'bru'i rtse mo ltar bregs pa dang / des smras pa/ da ni ra ba'i cog lta bu dang / spu gri'i so dang / ste'u ka dang / zla ba tshes pa ltar gyis shig /des de ji lta/ ji ltar sgo ba de lta bur byas pa dang / mjug tu smras pa/ bkren pa khyod ko cung zad kyang mi shes pa zhig /'di kho na ltar mnyam par gyis la song shig ces des de nyi ma nub kyi bar du ma btang ngo / /de nyi ma nub nas khyim bdag mgon med zas sbyin gyi drung du song ba dang / mgon med zas sbyin gyis smras pa/ kye skyes bu khyod kyis 'phags pa mang po ji snyed cig gi mgo dang kha spu bregs/ bdag gis 'phags pa rnams kyi skra dang kha spu ga la bregs/ dge sbyong gzu lums can nye dga' bos bdag bsgor nas/ sen mo 'bru'i rtse mo dang / ra ba'i cog dang / spu gri'i so dang / ste'u ka dang / zla ba tshes pa lta bur gyis shig ces pa'i rnam pa thams cad bdag gis bgyis pa dang / de nas 'di skad ces/ bkren pa khyod ko cung zad kyang mi shes pa zhig /'di kho na ltar mnyam par gyis la song shig ces mchi nas da gzod kho na shor na ci zhig bgyi/ khyim bdag mgon med zas sbyin legs par gsungs pa'i chos 'dul ba la rab tu byung ba rnams la nye bar zhi ba med pa lta zhes 'phya ba la zhugs so/ /skabs de dge slong rnams kyis thos nas bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni dge slong rnams sen mo 'breg pa las gyur gyis/ de lta bas na dge slong gis sen mo breg par mi bya'o/ /'breg na 'gal tshabs can du 'gyur ro/ /bcom ldan 'das kyis dge slong gis sen mo breg par mi bya'o zhes bka' stsal pa dang / dge slong rnams sen mo ring po ring por 'dug pa bram ze dang khyim bdag de dag gis mthong nas smras pa/ 'phags pa dag ci ste sen mo ring po ring por 'jog / bzhin bzangs bcom ldan 'das kyis ma gnang ngo / /'phags pa ci khyod sen mo bcangs pas 'dag par 'gyur ram/ skabs de dge slong rnams kyis thos nas/ bcom ldan 'das la gsol pa dang / bcom ldan 'das kyis bka' stsal pa/ snga ma ni bcas pa'o/ /'di ni gnang ba yin te de lta bas na gnang gis sen mo rnam pa gnyis po spu gri'i so dang / ste'u ka lta bur breg par bya'o/ /bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /gang gi tshe khyim bdag mgon med zas sbyin gyis sangs rgyas la sogs pa dge slong gi dge 'dun la zhes bya ba thams cad de kho na bzhin no/ /khyod sen mo 'chos shes sam/ 'phags pa ji lta bur bgyi/ ser po dang dmar po dang dkar po dang gser gyi kha dog lta bur gyis shig ces pa'i rnam pa thams cad bdag gis bgyis pa dang / de nas 'di skad ces bkren pa khyed ko cung zad kyang mi shes pa zhig /'di kho na ltar mnyam par gyis la song shig ces mchi nas da gzod kho na shor na ci zhig bgyi/ khyim bdag mgon med zas sbyin legs par gsungs pa'i chos 'dul ba la rab tu byung ba rnams la nye bar zhi ba med pa lta zhes 'phya ba la zhugs so/ /skabs de dge slong rnams kyis thos nas/ bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni dge slong rnams sen mo dag byi dor byed pa las gyur gyis/ de lta bas na dge slong gis sen mo dag byi dor mi bya'o/ /byed na 'gal tshabs can du 'gyur ro/ /bcom ldan 'das kyis dge slong gis sen mo dag byi dor mi bya'o/ /zhes bka' stsal pa dang / dge slong tshon rtsi'i las dang / lhung bzed kyi las byed pa rnams kyi sen mo dri ma chags la mdog mi sdug par gyur cing / de rnams sen mo de 'dra ba kho nar bsod snyoms la 'jug go/ /bram ze dang khyim bdag rnams kyis mthong nas smras pa/ 'phags pa dag khyed ci'i phyir sen mo de lta bur dri ma chags shing mdog mi sdug / de dag gis bsnyad pa dang / de rnams kyis smras pa/ 'phags pa ci'i phyir dri ma mi dbyid/ bcom ldan 'das kyis ma gnang ngo / /'phags pa khyed ci dri ma'i 'dam bcangs pas 'dag par 'gyur ram/ skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dri ma dbyid pa'i phyir sen mo bzhar bar bya'o/ /sangs rgyas bcom ldan 'das rgyal po'i khab na 'od ma'i tshal bya ka lan da ka gnas pa na bzhugs so/ /rgyal po gzugs can snying po'i kun du spyod pa ni dus kyi gsar thog 'bru sar pa 'am 'bras bu sar pa gang ci yang rung ba de dag dang por dge 'dun la 'bul lo/ /de'i 'og tu bdag nyid za'o/ /de'i blon po rnams kyis a mra'i shing thog dag phul ba dang / des smras pa/ song la 'phags pa rnams la phul cig /de dag gis rgad pa dang / des smras pa/ shes ldan dag ci la rgod/ de dag gis smras pa/ lha ci khyod da ni 'phags pa rnams la dang por 'bul snyam dgongs kyi/ bdag cag gis ches sngar 'phags pa rnams la phul bar ni ma lags sam/ des smras pa/ gal te de lta na ngas 'phags pa rnams la stong gi kun dga' ra ba nyid phul lo/ /lha legs te rjes su yi rang ngo / /des phyogs bzhi'i dge slong gi dge 'dun gyi phyir stong gi kun dga' ra ba phul nas der dus ston kyang btsugs so/ /de ji ltar yul ma ga d+ha na gnas pa'i skye bo'i tshogs dus ston la lta bar 'ongs pa a mra'i shing thog smin pa rnams kyis tshim par gyur pa de ltar shing thog rgyas par gyur to/ /de dge 'dun la phul zhes dge slong rnams kyis a mra'i 'bras bu dag ma smin pa nyid du zos so/ /ji tsam na mtshams kyi rgyal po zhig la a mra dag dgos par gyur nas/ des rgyal po gzugs can snying po la pho nya btang ste/ grogs po bdag la a mra dag dgos kyis bskur ba'i rigs so zhes byas pa dang / des pho nya de la smras pa/ kye skyes bu ngas stong gi kun dga' ra ba de 'phags pa'i dge 'dun la phul gyis song la 'phags pa'i dge 'dun rnams la slongs shig / de 'od ma'i tshal du song ba dang / drug sde rnams kyis kun du spyod pa ni rtag tu kun dga' ra ba'i sgo mi stongs par byed pa yin/ tshe dang ldan pa nye dga' bo 'od ma'i tshal gyi sgo na 'chag cing 'dug go/ /de de'i drung du song nas phyag 'tshal te des smras pa/ rgyal po che ge mo zhig gis a mra'i ched du khyed kyi thad tu btang na de'i slad tu a mra dag stsal ba'i rigs so/ /des smras pa/ kye skyes bu song la a mra ji tsam dgos pa de tsam long shig / de song nas a mra'i shing rnams kyi drung du bltas na mi snang ste/ de slar log nas smras pa/ 'phags pa ma mchis so/ /nye dga' bos de khrid nas kun dga' ra bar zhugs te/ kun dga'i ra ba thams cad bskor nas smras pa/ kye skyes bu shing 'di la 'dzegs shig /des 'dzegs nas ma mthong ba dang / nye dga' bos smras pa/ kye skyes bu dag shar gyi yal gar song lho dang nub kyi yal gar song / de thams cad du song nas skyo bar gyur te babs nas smras pa/ 'phags pa ci kun dga'i ra ba 'di lo 'di la 'bras bu ma chags sam/ bzhin bzangs ji ltar lo re zhing lo re zhing shing thog yod pa de ltar 'di 'bras bu chags so/ /'phags pa ci rlung dang char pas blags sam/ bzhin bzangs rlung dang char pas ma blags kyi/ 'on kyang kho bo cag gis a mra'i 'bras bu dag ma smin pa nyid du 'chos so/ /de slar log nas rgyal po gzugs can snying po la gsol pa/ lha 'phags pa rnams kyi zhal nas kho bo cag gis a mra'i 'bras bu dag ma smin pa nyid du 'chos so zhes gsung ngo / /des smras pa/ legs te nga la longs spyad pa nyid dgos so zhes byas pa dang / mi de slar song ngo / /ji tsam na dus ston la bab pa'i tshe yul ma ga d+ha na gnas pa'i skye bo'i tshogs 'dus nas/ de dag gis smras pa/ 'phags pa dag ci stong gi kun dga' ra ba 'di lo 'di la 'bras bu ma chags sam/ bzhin bzangs dag ji ltar lo re lo re zhing shing thog yod pa de ltar 'di 'bras bu chags mod kyi/ 'on kyang kho bo cag gis a mra'i 'bras bu dag ma smin pa nyid du 'chos so/ /'phags pa dag gang yul ma ga d+ha na gnas pa'i skye bo'i tshogs thams cad a mra smin pa dag gis tshim par 'gyur ba de khyed kyis 'bras bu ma smin pa kho nar 'chos te/ gang kho bo cag la gnod pa byas pa ni ma legs pa zhig byas so/ /des smras pa/ 'di rgyal pos yul ma ga d+ha na gnas pa'i skye bo'i tshogs la byin pa ma yin gyi/ 'on kyang dge slong gi dge 'dun la phul te/ de lta bas na kho bo cag gis ji ltar 'dod pa bzhin zos so/ /khyed ci gtogs zhes byas pa dang / de dag 'phya smod kha zer bar byed do/ /skabs de dge slong rnams kyis thos nas/ bcom ldan 'das la gsol pa dang / bcom ldan 'das kyis dgongs pa nyes dmigs gang cung zad ci byung ba ni dge slong rnams a mra dag za ba las gyur gyis/ de lta bas na dge slong gis a mra dag bza' bar mi bya'o/ /dge slong a mra dag za na 'gal tshabs can du 'gyur ro/ /bcom ldan 'das kyis dge slong gis a mra dag bza' bar mi bya'o/ /zhes gsungs pa dang / bram ze dang khyim bdag dad pa can dag dge slong rnams la shing sa ha ka ra'i shing tog dag 'bul ba na/ dge slong rnams kyis smras pa bcom ldan 'das kyis ma gnang ngo / /de dag gis smras pa/ 'phags pa dag gang gi tshe sangs rgyas bcom ldan 'das 'jig rten du byung bar ma gyur pa zhes bya ba nas/ 'jig rten 'di nas 'jig rten pha rol du 'gro 'am/ bzhes shig ces bya ba'i bar snga ma bzhin no/ /skabs de/ dge slong rnams kyis thos nas/ bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis mtshan nyid grub pa yin no zhes byas nas bza' bar bya ste/ 'di la 'gyod par mi bya'o/ /de la mtshan nyid grub pa ni 'di dag yin te/ tshig gu chags pa rnams so/ /bram ze dang khyim bdag dad pa can gzhan dag cig /dge slong rnams la a mra'i shing thog smin pa dag 'bul ba na zhes bya ba nas/ de bzhin du 'jig rten 'di nas 'jig rten pha rol du mchi 'am/ bzhes shig ces bya ba'i bar thams cad snga ma bzhin no/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis mtshan nyid bye brag phyed do zhes byas te bza' bar bya'o/ /de la mtshan nyid bye brag phyed pa ni 'di dag yin te/ sha zhugs pa rnams so/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na dge slong nad pa zhig sman pa'i drung du song ste/ bzhin bzangs bdag 'di 'dra ba'i nad kyis thebs na sman ston cig /des smras pa/ 'phags pa je mar 'thung la snum par gyis shig dang bkru sman sbyin no/ /des mar 'thungs pa dang / skom pas gnod par gyur to/ /sman pa 'ongs te dris pa/ 'phags pa bde bar 'dug gam/ des smras pa/ bzhin bzangs bdag skom pas gnod do/ /skyu ru ra chongs shig ces byas pa dang / des lag tu blangs te 'dug go/ /yang sman pas dris pa/ 'phags pa skom pa dang bral lam/ des smras pa/ bzhin bzangs ma bral lo/ /sman pas smras pa/ 'phags pa de'i tshe skyu ru ra ma bcangs sam/ bzhin bzangs yod de 'di yin no/ /'phags pa khar chongs shig /bzhin bzangs bcom ldan 'das kyis ma gnang ngo / /'phags pa khyod kyi ston pa ni thugs rje can yin pas gnang bar 'gyur ro/ /skabs de zhes bya ba nas/ bcom ldan 'das kyis bka' stsal pa/ khar bcang bar bya'o zhes bya ba'i bar du'o/ /des khar bcug nas 'dug go/ /yang sman pa de 'ongs nas dris pa/ 'phags pa skom pa dang bral lam/ des smras pa/ bzhin bzangs da rung ma bral lo/ /sman pas smras pa/ 'phags pa de'i tshe skyu ru ra khar ma bcangs sam/ bzhin bzangs bcangs te 'dug pa 'di yin no/ /des smras pa/ 'phags pa mur cig /gzhan du na skoms pa dang bral bar mi 'gyur ro/ /des smras pa/ bcom ldan 'das kyis ma gnang ngo / /'phags pa khyod kyi ston pa ni thugs rje can yin pas gnang bar 'gyur ro/ /skabs de dge slong rnams kyis thos nas bcom ldan 'das la gsol pa dang / bcom ldan 'das kyis bka' stsal pa/ mur bar bya'o/ /mur mur nas bor gyi ma mid pa dang / skom pas je gnod par gyur to/ /yang sman pa 'ongs nas dris pa/ 'phags pa skom pa dang bral lam des smras pa/ bzhin bzangs shin du gnod do/ /'phags pa de'i tshe skyu ru ra ma mur ram/ bzhin bzangs mur nas bor ro/ /'phags pa ci'i phyir ma mid/ bzhin bzangs bcom ldan 'das kyis dus ma yin pa'i zas bkag go/ /'phags pa khyod ni nad pa yin la/ khyod kyi ston pa ni thugs rje can yin pas gnang bar 'gyur ro/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na dge slong dag gnang gis 'bras bu lnga dus su yang rung / dus ma yin par yang rung / nad pa yang rung / mi na bas kyang rung bza' bar bya ste/ 'di la 'gyod par mi bya'o/ /bcom ldan 'das kyis 'bras bu lnga dus su yang rung / dus ma yin par yang rung / nad pa yang rung / mi na bas kyang rung ste/ bza' bar bya'o zhes gsungs pa dang / dge slong rnams kyis 'bras bu lnga gang dag yin pa mi shes pa dang / bcom ldan 'das kyis bka' stsal pa/ skyu ru ra dang / a ru ra dang / ba ru ra dang / pi pi ling dang / na le sham mo/ /sangs rgyas bcom ldan 'das rgyal po'i khab na 'od ma'i tshal bya ka lan da ka gnas pa na bzhugs so/ /rgyal po'i khab kyi grong khyer na khyim bdag shin du bzang po zhes bya ba phyug cing nor mang ba longs spyod chen po zhig gnas pa de gcer bu pa rnams la rab tu dad do/ /des rigs mnyam pa las chung ma blangs nas/ de de dang lhan cig rtse bar byed dga' bar byed/ dga' mgur spyod par byed do/ /de rtse bar byed dga' bar byed/ dga' mgur spyod par byed pa las dus gzhan zhig na chung ma la sems can zhugs par gyur to/ /bcom ldan 'das kyang snga dro sham thabs dang chos gos mnabs lhung bzed bsnams te/ rgyal po'i khab tu bsod snyoms kyi phyir zhugs nas/ rgyal po'i khab na bsod snyoms la rgyu zhing khyim bdag shin du bzang po'i khyim ga la ba de logs su gshegs pa dang / khyim bdag shin du bzang pos bcom ldan 'das rgyang ma nas mthong ngo / /mthong nas kyang chung ma khrid nas bcom ldan 'das ga la ba der song ste/ phyin nas bcom ldan 'das la 'di skad ces gsol to/ /bcom ldan 'das bdag gi mchis brang 'di sems can zhugs par gyur na ci zhig tu btsa' bar 'gyur/ bcom ldan 'das kyis bka' stsal pa/ bu phor btsa' bar 'gyur zhing / rigs gsal bar byed par 'gyur/ lha dang mi'i dpal nyams su myong bar 'gyur/ nga'i bstan pa la rab tu byung nas nyon mongs pa thams cad spangs te/ dgra bcom pa nyid mngon sum du byed par 'gyur ro/ /des bcom ldan 'das la bza' ba dang bca' ba gtsang zhing bsod pas lhung bzed bkang ste phul ba dang / bcom ldan 'das kyis nad med cig ces gsungs nas bsod snyoms bzhes te gshegs so/ /de dang ha cang mi ring ba zhig na gcer bu pa zhig 'dug pa des bsams pa/ gang bdag cag la bslang ba'i khyim gcig pu zhig yod pa de yang dge sbyong gau ta mas kha drangs kyis song la dge sbyong gau ta mas ci lung bstan pa blta'o snyam mo/ /de der song ste smras pa/ khyim bdag dge sbyong gau ta ma 'ongs par gyur tam/ byon to/ /des ci zhig lung bstan/ 'phags pa bdag gis de la chung ma bstan te/ ci zhig tu btsa' bar 'gyur zhes bgyis pa dang / de bu phor btsa' bar 'gyur zhing / rigs gsal bar byed par 'gyur/ lha dang mi'i dpal nyams su myong bar 'gyur/ nga'i bstan pa la rab tu byung nas nyon mongs pa thams cad spangs te/ dgra bcom pa nyid mngon sum du byed par 'gyur ro zhes gsung ngo / /gcer bu pa de rtsis mkhas pa zhig ste/ rdo rgyus kha dog dkar po blangs nas brtsis pa dang / bcom ldan 'das kyis ji skad du lung bstan pa de thams cad de kho na bzhin du mthong nas/ des bsams pa/ gal te rjes su bsngags na ni khyim bdag 'di dge sbyong gau ta ma la dad par 'ong bas de bas na 'dir cung zad cig ni bsngags par bya/ cung zad cig ni smad par bya'o snyam du bsams nas/ lag pa dkyog bzhin bsgyur ba dang / khyim bdag shin du bzang pos smras pa/ 'phags pa ci ste lag pa dkyog bzhin bsgyur/ des smras pa/ khyim bdag 'di la cung zad cig ni bden/ cung zad cig ni brdzun no/ /'phags pa gang ni bden gang ni brdzun/ khyim bdag bu phor btsa' bar 'gyur ro zhes zer ba gang yin pa de ni bden no/ /rigs gsal bar byed par 'gyur ro zhes zer ba gang yin pa de ni bden na/ gsal ba ni me'i ming yin pas sems can skal ba chung ngu de btsas ma thag kho nar khyim mes tshig par 'gyur ro/ /lha dang mi'i dpal nyams su myong bar 'gyur ro/ / zhes zer ba gang yin pa de ni brdzun te/ khyim bdag khyod kyis mir gyur pa la lha dang mi'i dpal nyams su myong bar gyur pa 'ga' yod pa lta mthong ngam/ nga'i bstan pa la rab tu 'byung ngo zhes zer ba de bden te/ gang gi tshe 'di bza' ba yang med/ bgo ba yang med pa de'i tshe gdon mi za bar dge sbyong gau ta ma'i thad du rab tu byung bar 'gyur ro/ /nyon mongs pa thams cad spangs nas dgra bcom pa nyid mngon sum du byed par 'gyur ro zhes zer ba gang yin pa de ni brdzun te/ re shig dge sbyong gau ta ma la yang nyon mongs pa thams cad spangs pa'i dgra bcom pa nyid med na/ de'i nyan thos la lta smos kyang ci dgos/ khyim bdag shin du bzang po mi dga' bar gyur nas smras pa/ 'phags pa 'di la bdag gis ji ltar bsgrub par bgyi/ gcer bu pas smras pa/ khyim bdag bdag cag ni rab tu byung ba ste/ bslab pa blangs pa yin pas khyod nyid shes so zhes smras nas song ngo / /shin du bzang pos bsams pa 'di yang dor ro snyam nas sman ma yin pa sbyin par brtsams pa dang / sems can de srid pa tha ma pa zhig pas sman ma yin pa de yang de la sman du gyur to/ /des de'i dku g.yon pa mnye bar brtsams pa dang / mngal na 'dug pa de dku g.yas par song ngo / /shin du bzang pos dku g.yas pa mnye bar brtsams pa dang / de dku g.yon par song ste/ srid pa tha ma pa'i sems can zag pa zad pa ma thob kyi bar du bar ma dor rgyun chad cing dus byed par 'gyur ba gang yin pa de ni gnas ma yin zhing go skabs med do/ /khyim bdag shin du bzang po'i chung ma de dku mnyes pas ngu bar brtsams pa dang / khyim tshes dag gis thos nas rings pa rings par song ste dris pa/ shes ldan khyim bdag gi chung ma 'di ci ste ngu / shin du bzang pos smras pa/ gdon mi za bar 'di bu btsa' ba'i dus la bab bo zhes byas pa dang / de de dag dong ngo / /shin du bzang pos bsams pa/ bdag gis 'di 'dir gsad mi nus kyis dgon par bkri'o/ /snyam nas des de dgon par khrid nas ci nas 'chi bar 'gyur ba de lta de ltar brtsal nas des de sbas te khyim du khyer nas mdza' bo dang / nye du dang / phu nu dang / khyim tshes rnams la smras pa/ shes ldan dag kho bo'i chung ma shi'o/ /de dag gis ngu bar brtsams nas de dag ngu zhing de gos sngon po dang / ser po dang / dmar po dang / dkar po rnams kyis khyogs brgyan nas bsil ba tshal gyi dur khrod tu khyer ro/ /gcer bu pa dag gis thos nas de dag dga' mgu rangs nas gdugs dang / rgyal mtshan dang / ba dan dag bsgreng ste rgyal po'i khab grong khyer gyi lam po che dang / srang dang bzhi mdo dang / sum mdo dag tu rgyu zhing smras pa/ shes ldan dag nyon cig /dge sbyong gau ta mas khyim bdag shin du bzang po'i chung ma bu phor btsa' bar 'gyur zhing / rigs gsal bar byed par 'gyur/ lha dang mi'i dpal nyams su myong bar 'gyur/ nga'i bstan pa la rab tu byung nas nyon mongs pa thams cad spangs te dgra bcom pa nyid mngon sum du byed par 'gyur ro zhes lung bstan pa de ni shi nas bsil ba tshal gyi dur khrod tu khyer ro/ /re shig shing gang la rtsa ba nyid kyang med pa de la yal ga dang 'dab ma dang / lo ma 'byung bar lta ga la 'gyur/ skabs 'di lta bu la sangs rgyas bcom ldan 'das rnams mi mkhyen pa 'am/ mi gzigs pa 'am/ mi rig pa 'am/ rnam par mi mkhyen pa cung zad kyang mi mnga' ste/ sangs rgyas bcom ldan 'das thugs rje chen po 'jig rten la phan par zhugs pa/ srung ba gcig pu/ gcig tu dpa' ba/ zla med pa gnyis su mi gsung ba/ zhi gnas dang lhag mthong gis gnas pa/ bslab pa gsum la legs par bslabs pa/ 'dul ba'i gzhi gsum la mkhas pa/ chu bo bzhi las rgal ba/ rdzu 'phrul gyi rkang pa bzhi'i zhabs kyi mthil la legs par gnas pa/ bsdu ba'i dngos po bzhi la yun ring po nas goms par mdzad pa/ mi 'jigs pa bzhis mi snyengs pa/ yan lag lnga rnam par spangs pa/ 'gro ba lnga las yang dag par 'das pa/ yan lag drug dang ldan pa/ pha rol du phyin pa drug yongs su rdzogs pa/ drug la rtag tu gnas pa/ byang chub kyi yan lag bdun gyi me tog gis phyug pa/ lam yan lag brgyad pa ston pa/ mthar gyis gnas pa'i snyoms par 'jug pa dgu la mkhas pa/ stobs bcu'i stobs mnga' ba/ grags pas phyogs bcur khyab pa/ stong la dbang sgyur ba bas khyad par du 'phags pa rnams ni chos nyid kyis nyin lan gsum mtshan lan gsum du sangs rgyas kyi spyan gyis 'jig rten la gzigs shing su ni nyams/ su ni dar su ni nyam nga bar gyur/ su ni skobs su chud par gyur/ su ni gnod par gyur/ su ni nyam nga ba dang skobs su chud pa dang / gnod par gyur/ su ni ngan song la gzhol/ su ni ngan song la bab/ su ni ngan song la 'bab/ gang ni ngan song las drangs nas mtho ris dang / thar pa dang / 'bras bu la dgod/ gang zhig gis dge ba'i rtsa ba ma bskyed pa ni bskyed par bya/ gang zhig gis bskyed pa ni yongs su smin par bya/ gang zhig smin pa ni grol bar bya zhes ye shes gzigs pa 'jug go/ /yang smras pa/ chu srin gnas kyi rgya mtsho ni/ /dus rlabs 'da' bar 'gyur srid kyi/ /gdul bar bya ba'i sras rnams la/ /sangs rgyas dus las mi 'da'o/ /ji ltar ma ni sdug pa'i bu gcig la/ /lta zhing de yi srog kyang srung ba ltar/ /de bzhin gshegs pa gdul ba'i skye bo la/ /de bzhin gzigs shing de'i rgyud kyang srung / /thams cad mkhyen pa'i rgyu la gnas pa yi/ /thugs rje'i ba drus pa gshin be'u stor bzhin/ /srid pa bgrod dkar 'khyams par gyur pa yi/ /gdul ba'i sras rnams skyo mi mkhyen par tshol// //'dul ba phran tshegs kyi gzhi/ bam po gnyis pa/ de nas bcom ldan 'das kyis phyogs zhig tu 'dzum pa mdzad do/ /chos nyid kyis gang gi tshe sangs rgyas bcom ldan 'das rnams 'dzum pa mdzad pa de'i tshe zhal nas 'od zer sngon po dang / ser po dang / dmar po dang / dkar po dag byung nas kha cig ni 'og tu 'gro/ kha cig ni steng du 'gro ste/ gang dag 'og tu 'gro ba de dag ni dmyal ba yang sos dang / thig nag dang / bsdus gzhom dang / ngu 'bod dang / ngu 'bod chen po dang / tsha ba dang / rab tu tsha ba dang / mnar med pa dang / chu bur can dang / chu bur rdol ba dang / so thams thams dang / kyi hud zer ba dang / a cu zer ba dang / ut+pal ltar gas pa dang / pad ma ltar gas pa dang / pad ma ltar gas pa chen por song ste/ tsha ba'i dmyal ba gang dag yin pa de dag tu ni bsil bar gyur nas 'bab/ grang ba'i dmyal ba gang dag yin pa de dag tu ni dro bar gyur nas 'bab po/ /des sems can de rnams kyi sdug bsngal gyi khyad par rgyun bcad pa dang / de dag 'di snyam du sems te/ shes ldan dag ci bdag cag 'di nas shi 'phos sam/ 'on te gzhan du skyes shes zer ro/ /de dag dad pa bskyed pa'i phyir bcom ldan 'das sprul pa gtong ste/ de dag gis sprul pa de mthong nas 'di snyam du sems shing shes ldan dag bdag cag 'di nas shi 'phos pa yang ma yin gzhan du skyes pa yang ma yin gyi/ 'on kyang sems can 'di sngon ma mthong ba zhig ste/ 'di'i mthus bdag cag sdug bsngal gyi khyad par rgyun chad do zhes zer ro/ /de dag sprul pa la sems mngon par dang bas dmyal ba myong bar 'gyur ba'i las de zad par byas nas gang du sems can rnams snod du gyur pa lha dang mi rnams kyi nang du nying mtshams sbyor ba 'dzin to/ /gang dag steng du 'gro ba de dag ni rgyal chen bzhi'i lha dang / sum bcu rtsa gsum pa dang / 'thab bral dang / dga' ldan dang / 'phrul dga' dang / gzhan 'phrul dbang byed dang / tshangs ris dang / tshangs pa'i mdun na 'don dang / tshangs chen dang / 'od chung dang / tshad med 'od dang / 'od gsal dang / dge chung dang / tshad med dge dang / dge rgyas dang / sprin med dang / bsod nams 'phel dang / 'bras bu che ba dang / mi che ba dang / mi gdung ba dang / shin du mthong ba dang / gya nom snang ba dang / 'og min gyi lha rnams kyi nang du song nas mi rtag pa dang / sdug bsngal ba dang / stong pa dang / bdag med pa zhes bya ba yang sgrogs so/ /tshigs su bcad pa gnyis kyang sgrogs te/ brtsams par bya zhing 'byung bar bya/ /sangs rgyas bstan la 'bab par bya/ /'dam bu'i khyim la glang chen bzhin/ /'chi bdag sde ni gzhom par bya/ /chos 'dul 'di la gang zhig ni/ /bag dang bcas par spyod byed pa/ / skye ba'i 'khor ba rab spangs nas/ /sdug bsngal gyi ni mthar byed 'gyur/ /de nas 'od zer de dag stong gsum gyi stong chen po'i 'jig rten gyi khams bskor nas bcom ldan 'das nyid kyi phyi bzhin phyi bzhin 'brong zhing 'gro ste/ de gal te bcom ldan 'das kyis 'das pa lung ston par bzhed na ni bcom ldan 'das kyi snam logs su nub par 'gyur ro/ /ma 'ongs pa lung ston par bzhed na ni mdun du nub par 'gyur ro/ /dmyal bar skye bar lung ston par bzhed na ni zhabs kyi mthil du nub par 'gyur ro/ /dud 'gror skye bar lung ston par bzhed na ni long bur nub par 'gyur ro/ /yi dags su skye bar lung ston par bzhed na ni zhabs kyi mthe bor nub par 'gyur ro/ /mir skye bar lung ston par bzhed na ni pus mor nub par 'gyur ro/ /stobs kyi 'khor los sgyur ba'i rgyal srid lung ston par bzhed na ni phyag g.yon gyi mthil du nub par 'gyur ro/ /'khor los sgyur ba'i rgyal srid lung ston par bzhed na ni phyag g.yas kyi mthil du nub par 'gyur ro/ /lhar skye ba lung ston par bzhed na ni lte bar nub par 'gyur ro/ /nyan thos kyi byang chub lung ston par bzhed na ni zhal du nub par 'gyur ro/ /rang sangs rgyas kyi byang chub lung ston par bzhed na ni mdzod spur nub par 'gyur ro/ /bla na med pa yang dag par rdzogs pa'i byang chub lung ston par bzhed na ni gtsug tor du nub par 'gyur ro/ /de nas 'od zer de dag gis stong gsum gyi stong chen po'i 'jig rten gyi khams bskor nas bcom ldan 'das la lan gsum bskor ba byas te/ bcom ldan 'das kyi zhal du nub bo/ /de nas tshe dang ldan pa kun dga' bos thal mo sbyar te bcom ldan 'das la zhus pa/ rnam pa sna tshogs tshon ni stong dag gis/ /bkra ba'i tshogs dag zhal gyi nang nas byung / /nyi ma shar bar gyur pa ji lta bar/ /de yis phyogs rnams kun du snang bar bgyis/ /tshigs su bcad de yang gsol pa/ sangs rgyas rgod bral zhum dang rgyags pa spangs/ /rgyal ba dgra thul 'gro mchog rgyur gyur pa/ /rgyu ma mchis par pad ma'i rtsa lag dang / /dung ltar dkar ba'i 'dzum pa ston mi mdzad/ /de ltas nyid kyi brtan blos dus mkhyen nas/ /rgyal dbang nyan po nyan par 'tshal rnams kyi/ /the tshom skyes pa thub pa skyes mchog gi/ /gsung mchog bzang zhing brtan pas bsal du gsol/ /rdzogs pa'i sangs rgyas ri rab ltar brtan pa/ /zung thub rnams ni glo bur 'dzum mi ston/ /mgon po ci slad 'dzum pa mdzad pa de/ /skye bo'i tshogs 'di nyan par yang dag 'tshal/ /bcom ldan 'das kyis bka' stsal pa/ kun dga' bo de de bzhin no de de bzhin te/ de bzhin gshegs pa dgra bcom pa yang dag par rdzogs pa'i sangs rgyas rnams ni rgyu med rkyen med par 'dzum pa mi mdzad do/ /kun dga' bo s ong la dge slong rnams la dge slong dag de bzhin gshegs pa dur khrod tu rgyu zhing gshegs par bzhed kyis khyed las gang zhig de bzhin gshegs pa dang lhan cig dur khrod tu rgyu zhing 'gro bar spro ba de chos gos dag so so nas long shig ces bsgo shig / tshe dang ldan pa kun dga' bos btsun pa de ltar 'tshal lo zhes bcom ldan 'das kyi ltar mnyan nas/ dge slong dag gang na ba der song ste phyin nas dge slong rnams la dge slong dag de bzhin gshegs pa dur khrod tu rgyu zhing gshegs par bzhed kyis/ khyed las gang zhig de bzhin gshegs pa dang lhan cig dur khrod tu rgyu zhing 'gro bar spro ba de chos gos dag so so nas long shig ces bsgo ba dang / dge slong thams cad 'dus nas bcom ldan 'das kyi spyan sngar lhags so/ /de nas bcom ldan 'das dul ba 'khor dul ba zhi ba 'khor zhi ba grol ba 'khor grol ba/ dbugs phyin pa 'khor dbugs phyin pa/ rnam par dul ba 'khor rnam par dul ba/ dgra bcom pa 'khor dgra bcom pa/ 'dod chags dang bral ba 'khor 'dod chags dang bral ba/ mdzes pa 'khor mdzes pa/ glang po che glang po che'i phru gu'i tshogs kyis bskor ba lta bu/ seng ge mche ba can gyi tshogs kyis bskor ba lta bu/ ngang pa'i rgyal po ngang pa'i tshogs kyis bskor ba lta bu/ nam mkha' lding bya'i tshogs kyis bskor ba lta bu/ sman pa nad pa'i tshogs kyis bskor ba lta bu/ dpa' bo dmag mi'i tshogs kyis bskor ba lta bu/ sa mkhan 'dron pa'i tshogs kyis bskor ba lta bu/ ded dpon tshong pa'i tshogs kyis bskor ba lta bu/ tshong dpon 'khor gyi tshogs kyis bskor ba lta bu/ khams kyi rgyal po blon po'i tshogs kyis bskor ba lta bu/ 'khor los sgyur ba bu stong gis bskor ba lta bu/ zla ba skar ma'i tshogs kyis bskor ba lta bu/ nyi ma 'od zer stong gis bskor ba lta bu/ yul 'khor srung dri za'i tshogs kyis bskor ba lta bu/ 'phags skyes po grul bum gyi tshogs kyis bskor ba lta bu/ mig mi bzang klu'i tshogs kyis bskor ba lta bu/ rnam thos sras gnod sbyin gyi tshogs kyis bskor ba lta bu/ thags zangs ris lha ma yin gyi tshogs kyis bskor ba lta bu/ brgya byin sum bcu rtsa gsum pa'i tshogs kyis bskor ba lta bu/ tshangs pa tshangs ris pa'i tshogs kyis bskor ba lta bu/ rgya mtsho mi g.yo ba lta bu/ sprin chu dang bcas pa lta bu/ glang po che'i rgyal po dregs pa med pa lta bu/ dbang po shin du dul bas spyod lam mi nyams par gshegs pa/ sku skyes bu chen po'i mtshan sum bcu rtsa gnyis kyis brgyan pa/ dpe byad bzang po brgyad cus mdzes par byas pa/ sku 'od 'dom gang gis brgyan pa/ 'od nyi ma stong bas lhag pa/ rin po che'i ri 'gro ba lta bur kun nas bzang ba/ stobs bcu dang / mi 'jigs pa bzhi dang / ma 'dres pa'i dran pa nye bar gzhag pa gsum dang / thugs rje chen po dang ldan pa/ nyan thos chen po kun shes kauN+Di n+ya dang / rta thul dang / rlangs pa dang / ming chen dang / bzang po dang / shA ri'i bu dang / maud gal gyi bu dang / 'od srung dang / grags pa dang / gang po la sogs pa dang / dge slong gi dge 'dun mang po gzhan dang / srog chags brgya stong phal mo ches bskor nas bsil ba'i tshal gyi dur khrod tu gshegs so/ /sangs rgyas gshegs pa la phan yon bcwa brgyad yod de/ bcwa brgyad gang zhe na/ me'i 'jigs pa med/ chu'i 'jigs pa med/ seng ge'i 'jigs pa med/ stag gi 'jigs pa med/ gzig gi 'jigs pa med/ pha rol gyi dmag tshogs kyi 'jigs pa med/ rkun po'i 'jigs pa med/ la gcan pa'i 'jigs pa med/ gru btsas kyi 'jigs pa med/ sho gam gyi 'jigs pa med/ bsel rngan gyi 'jigs pa med/ mi'i 'jigs pa med/ mi ma yin pa'i 'jigs pa med/ dus dus su gzugs bzang po dag mthong bar 'gyur/ sgra snyan pa dag thos par 'gyur/ 'od chen po dag mthong bar 'gyur/ kun shes pa lung ston pa dag thos par 'gyur/ chos kyi longs spyod dang / zang zing gi longs spyod dang ldan par 'gyur ro/ /sangs rgyas gshegs pa ni gnod pa chung ba yin pas lha dang / mi brgya stong du ma bcom ldan 'das kyi zhabs 'bring du phyi bzhin 'brang ngo / /bsil ba'i tshal logs nas rlung dag kyang langs so/ /rgyal rigs kyi khye'u zhig dang / bram ze'i khye'u byis pa gnyis shig rgyal po'i khab nas phyi rol du byung ste rtse zhing 'khod do/ /de gnyis las rgyal rigs kyi khye'u ni dad pa dang ldan pa yin/ bram ze'i khye'u ni de lta ma yin no/ /bram ze'i khye'u des rgyal rigs kyi khye'u la smras pa/ grogs po bcom ldan 'das kyis khyim bdag shin du bzang po'i chung ma'i bu khye'ur skye bar 'gyur te/ rigs 'bar bar 'gyur zhing lha dang mi'i dpal yang myong bar 'gyur nas nga'i bstan pa la rab tu byung ste/ nyon mongs pa thams cad spangs pas dgra bcom pa nyid mngon sum du byed par 'gyur ro zhes lung bstan pa de ni 'chi ba'i dus byas nas bsil ba'i tshal gyi dur khrod tu khyer na/ bcom ldan 'das kyis bka' stsal pa/ brdzun du ma gyur grang / rgyal rigs kyi khye'u des tshigs su bcad pa smras pa/ zla ba skar ma'i tshogs bcas sa la lhung yang srid/ /sa 'di ri dang nags bcas mkha' la 'gro yang srid/ / rgya mtsho chen po'i chu ni skam par 'gyur srid kyi/ /drang srong chen po brdzun gsung 'gyur ba srid pa min/ /bram ze'i khye'u des grogs po de ltar na bsil ba'i tshal gyi dur khrod lta zhing 'dong ngo zhes smras nas de gnyis dong ba dang bcom ldan 'das rgyal po'i khab nas gshegs pa mthong ngo / /rgyal rigs kyi khye'us bcom ldan 'das thag ring po kho na nas mthong nas yang tshigs su bcad pa smras pa/ thub pa the tshom bral zhing rgod pa mi mnga' ba/ /ri dgas rgyal po lta bu'i sgra skad mchog sgrogs shing / /the tshom med par pha rol smra bas mi rdzi ba/ /'di ltar skye bo'i tshogs kyis yongs su bskor cing gshegs/ /bsil tshal phyogs su kha ba'i tshogs lta bu'i/ /bsil ba'i ngad can rlung ni langs par gyur pa ni/ /shAkya thub pa'i rdzu 'phrul brtag pa'i don gyi phyir/ /lha tshogs mang po gnas nas 'ongs pa nyid du nges/ /rgyal po gzugs can snying pos bcom ldan 'das kyis khyim bdag shin du bzang po'i chung ma'i bu khye'ur skye bar 'gyur te/ rigs 'bar bar 'gyur zhing lha dang mi'i dpal yang myong bar gyur nas nga'i bstan pa la rab tu byung ste nyon mongs pa thams cad spangs pas dgra bcom pa nyid mngon sum du byed par 'gyur ro zhes lung bstan na de ni 'chi ba'i dus la bab nas bsil tshal gyi dur khrod du phyung zhing / bcom ldan 'das kyang nyan thos kyi dge 'dun dang thabs gcig tu bsil ba'i tshal gyi dur khrod du gshegs so zhes thos so/ /thos nas kyang de 'di snyam du sems te/ bcom ldan 'das ni don med par bsil tshal gyi dur khrod du mi gshegs pas bcom ldan 'das kyis khyim bdag shin du bzang po'i chung ma la brten te gdul ba'i don chen po zhig mdzad par 'gyur gor ma chag gis ltar 'gro'o snyam nas de btsun mo dang / gzhon nu dang / blon po dang / pho brang 'khor ba dang / ljongs kyi mis yongs su bskor nas rgyal po'i khab nas song ba dang / rgyal rigs kyi khye'u des rgyal po bzo sbyangs gzugs can snying po thag ring po kho na nas mthong nas yang tshigs su bcad pa smras pa/ ma ga d+ha'i mnga' bdag rgyal po'i gtso bo 'di/ 'di ltar 'khor bcas rgyal po'i khab nas byung ba las/ /skye bo'i tshogs kyi 'byor pa phun sum tshogs par ni/ /bdag gi snying la nges pa'i blo dag skyes par gyur/ /skye bo'i tshogs rnams kyis bcom ldan 'das mthong nas gshegs shul phye ba dang / bcom ldan 'das zhal 'dzum pa mdzad cing skye bo rnams kyi gung la bzhugs so/ /bcom ldan 'das zhal 'dzum pa mdzad pa gcer bu pa dag gis mthong nas bsams pa/ 'di ltar dge sbyong gau ta ma bzhin 'dzum pa byed cing skye bo mang po'i gung la 'dug pa las na sems can 'di ma shi bar nges so snyam nas/ des khyim bdag shin du bzang po la smras pa/ khyim bdag sems can skal ba chung ngu 'di ni ma shi'o/ /des smras pa/ 'phags pa de ltar gyur na skabs 'di la da ji ltar bsgrub par bya/ des smras pa/ khyim bdag kho bo ni bslab pa'i gzhi yang dag par blangs pa yin gyis/ khyod nyid shes par gyis shig /des bud shing bcer te chung ma'i ro me'i phung po'i nang du bcug ste bsregs pa dang / de'i lus thams cad tshig na lto'i nyen kor de bzhin du 'dug go/ /de nas lto'i nyen kor de rdol nas pad ma byung ste/ pad ma de'i snying po las gzhon nu gzugs bzang ba blta na sdug pa/ mdzes pa zhig byung ngo / /de srog chags brgya stong dag gis mthong nas mchog tu ngo mtshar chen po skyes par gyur pa dang gcer bu pa dag gi rgyags pa dang / nga rgyal dang / khengs pa dag nyams so/ /de nas bcom ldan 'das kyis khyim bdag shin du bzang po la bka' stsal pa/ khyim bdag gzhon nu long shig / des gcer bu pa'i gdong du bltas pa dang / des smras pa/ khyim bdag me phung rab tu 'bar ba'i nang du zhugs na thams cad kyi thams cad du tshig par mi 'gyur ram/ de skad smras pas des ma blangs so/ / de nas bcom ldan 'das kyis 'tsho byed gzhon nus gsos la bka' stsal pa/ 'tsho byed gzhon nu long shig /des bsams pa/ bcom ldan 'das kyis gnas ma yin skabs ma yin par bdag mi bskos kyis blang ngo snyam nas de the tshom med par me phung gi nang du zhugs te blangs so/ /rgyal ba'i bka' yis me yi phung por zhugs gyur te/ /de yis gzhon nu me yi nang nas blangs pa na/ /rgyal ba'i mthu yis me ni zhi ba nyid gyur cing / /kha ba'i tshogs ltar bsil ba 'ang skad cig de la byung / /de nas bcom ldan 'das kyis 'tsho byed gzhon nu la bka' stsal pa/ 'tsho byed khyod nyams pa 'am/ gnod pa dag tu ma gyur tam/ des gsol pa/ btsun pa bdag rgyal po'i pho brang du btsas zhing rgyal po'i pho brang du skyes par gyur kyang 'di ltar bcom ldan 'das kyi byin gyi rlabs kyis zhugs kyi phung po tsan dan sa mchog lta bur bsil bar gyur pa 'di lta bu ni sngon chad ma myong lags so/ /de'i tshe bcom ldan 'das kyis khyim bdag shin du bzang po la bka' stsal pa/ khyim bdag gzhon nu 'di long shig /de log par blta ba la phyogs pas re shig len par mi byed cing / gcer bu pa de nyid kyi gdong du lta bar byed do/ /des smras pa/ khyim bdag mang du smra ci dgos/ mes ni thams cad 'tshig pa yin na/ gzhon nu shin du skal pa chung ba 'di ma tshig pa las na/ 'di khyod kyi khyim du khyer na khyod kyi khyim yang tshig cing khyod kyi srog gi bar chad du yang 'gyur bar nges so/ /des bdag las gces pa med do snyam nas de ma blangs pa dang / de'i tshe bcom ldan 'das kyis ma ga d+ha'i rgyal po bzo sbyangs gzugs can snying po la bka' stsal pa/ rgyal po chen po gzhon nu long shig / des gus par bsgrims pa dang bcas pas lag pa brkyang ste/ de blangs nas kun du brtags te gsol pa/ bcom ldan 'das khye'u 'di'i ming cir gdags/ bcom ldan 'das kyis bka' stsal pa/ rgyal po chen po khye'u 'di 'di ltar me'i nang nas skyes pas de'i phyir khye'u 'di'i ming me skyes shes bya bar gdags so/ /de nas bcom ldan 'das kyis skye bo phal po che'i tshogs de dag gi bsam pa dang / bag la nyal dang / khams dang / rang bzhin thugs su chud nas ci nas kyang sems can brgya phrag mang po de dag gis thos nas khyad par rnyed par 'gyur ba de lta bur chos bstan pa mdzad pas kha cig gis ni rgyun du zhugs pa'i 'bras bu mngon sum du byas/ kha cig gis ni lan cig phyir 'ong ba'i 'bras bu/ kha cig gis ni phyir mi 'ong ba'i 'bras bu/ kha cig gis ni rab tu byung ste/ nyon mongs pa thams cad spangs pas dgra bcom pa nyid mngon sum du byas par gyur to/ /kha cig gis ni dro bar gyur pa'i dge ba'i rtsa ba dang / kha cig gis ni rtse mo dang / kha cig gis ni bzod pa chung ngu dang 'bring bskyed par gyur to/ /kha cig gis ni nyan thos kyi byang chub dang / kha cig gis ni rang sangs rgyas kyi byang chub dang / kha cig gis ni bla na med pa yang dag par rdzogs pa'i byang chub kyi sems bskyed par gyur to/ /kha cig gis ni skyabs su 'gro ba dang bslab pa'i gzhi dag yang dag par blangs te 'khor de dag las phal cher sangs rgyas la gzhol ba dang / chos la 'bab pa dang / dge 'dun la bab par gyur to/ /de nas rgyal po gzugs can snying pos khye'u me skyes ma ma brgyad po pang na 'tsho ba'i ma ma gnyis dang / nu ma snun pa'i ma ma gnyis dang / dri ma 'phyi ba'i ma ma gnyis dang / rtsed grogs kyi ma ma gnyis la rjes su gtad do/ /de ma ma brgyad po dag gis 'o ma dang / zho dang / mar dang / zhun mar dang / mar gyi snying khu dang / gzhan yang yo byad kyi bye brag gtso bo gtso bo dag gis sring bar byed skyed par byed cing / rdzing na gnas pa'i pad ma bzhin du myur du skyed par byed do/ /de'i zhang po zong thogs te yul gzhan du song ba des ji ltar bdag gi sring mo la sems can zhugs par gyur pa de bcom ldan 'das kyis khye'ur skye bar 'gyur te/ rigs 'bar bar 'gyur zhing / lha dang mi'i dpal yang myong bar gyur nas/ nga'i bstan pa la rab tu byung ste nyon mongs pa thams cad spangs nas dgra bcom pa nyid mngon sum du byed par 'gyur ro zhes lung bstan pa thos nas des zong bsgyur te rin blangs nas rgyal po'i khab tu song ba dang / des 'di ltar bdag gi sring mo de 'chi ba'i dus la bab po zhes thos so/ /thos nas kyang bsams pa/ bcom ldan 'das kyis de'i bu khye'ur skye bar 'gyur te/ rigs 'bar bar 'gyur zhing / lha dang mi'i dpal yang myong bar gyur nas nga'i bstan pa la rab tu byung ste nyon mongs pa thams cad spangs pas dgra bcom pa nyid mngon sum du byed par 'gyur ro/ /zhes lung bstan na/ bcom ldan 'das kyis bka' stsal pa/ de brdzun du ma gyur tam snyam nas des khyim tshes dag la dris pa/ bdag gi sring mo la sems can zhugs par gyur pa de bcom ldan 'das kyis khye'ur 'gyur te/ rigs 'bar bar 'gyur zhing / lha dang mi'i dpal yang myong bar gyur nas nga'i bstan pa la rab tu byung ste/ nyon mongs pa thams cad spangs pas dgra bcom pa nyid mngon sum du byed par 'gyur ro zhes lung bstan par thos so/ /thos nas bdag kun du dga' ba las de yang 'chi ba'i dus la bab po zhes thos na/ bcom ldan 'das kyis bka' stsal pa/ de brdzun du ma gyur tam/ de dag gis tshigs su bcad pa smras pa/ zla ba skar ma'i tshogs bcas sa la lhung yang srid/ /sa 'di ri dang nags bcas mkha' la 'gro yang srid/ /rgya mtsho chen po'i chu ni skam par 'gyur srid kyi/ /drang srong chen po brdzun gsung 'gyur ba srid pa min/ /bcom ldan 'das kyis bka' stsal pa ni brdzun du mi 'gyur te 'di ltar khyim thab des de ji lta ji ltar 'chi bar 'gyur ba de lta de ltar byas pas 'chi ba'i dus la bab nas de'i khye'u dbang thang chen po can mer bsregs kyang ma tshig pa mthu bo che zhig da ltar rgyal po'i pho brang na gso zhing 'dug go zhes smras pa dang / de khyim bdag shin du bzang po'i gan du song ste smras pa/ khyim bdag khyod kyis mi rigs pa zhig byas so/ /ci zhig byas/ gcer bu pas bslus nas khyod kyis nga'i sring mo la sems can zhugs pa ji lta ji ltar 'chi bar 'gyur ba de lta de ltar byas pas 'chi ba'i dus la bab par byas so/ /des khye'u dbang thang can mer bsregs kyang ma tshig pa mthu bo che zhig da ltar rgyal po'i pho brang na gso zhing 'dug pa de la ni re shig ci byar yang med de/ 'di ltar da yang gal te gzhon nu de blangs na de lta na legs/ 'on te mi len na ngas khyod gnyen du yang mi brtsi/ rabs yig kyang dor zhing lam po che dang / srang dang lam gyi sum mdo dang / bzhi mdo dag tu yang khyim bdag shin du bzang pos bdag gi sring mo bsad de/ chung ma gsod pa 'di la sus kyang gtam 'dre bar mi bya'o zhes mi snyan pa bsgrag cing rgyal po'i gnod pa yang byed du gzhug go zhes smras pa dang / des de thos nas skrag ste/ de skad smras pa dang sbyar na bdag la de ltar byed par nges so snyam nas/ de rgyal po'i gan du song ste rkang pa gnyis la phyag 'tshal nas smras pa/ lha bdag gi nye du po'i mchid nas da yang gal te gzhon nu de blangs na de lta na legs/ 'on te mi len na ngas khyod gnyen du yang mi brtsi/ rabs yig kyang dor zhing / lam po che dang / srang dang lam gyi sum mdo dang / bzhi mdo dag tu yang khyim bdag shin du bzang pos bdag gi sring mo bsad de chung ma gsod pa 'di la sus kyang gtam 'dre bar mi bya'o zhes mi snyan pa bsgrag cing rgyal po'i gnod pa yang byed du gzhug go zhes mchi bas/ de'i slad du lhas gzhon nu me skyes bdag la stsal ba'i rigs so/ /rgyal pos smras pa/ khyim bdag gzhon nu me skyes ngas khyod la blangs pa ma yin gyi/ bcom ldan 'das kyis nga la gtad pa yin pas khyod la gal te gzhon nu dgos na gzhon nu'i ched du bcom ldan 'das la sngar zhus shig /de bcom ldan 'das kyi spyan sngar song nas zhabs gnyis la phyag 'tshal te 'di skad ces gsol to/ /bcom ldan 'das bdag gi nye du po'i mchid nas da yang gal te gzhon nu de blangs na de lta na legs/ 'on te mi len na ngas khyod gnyen du yang mi brtsi/ rabs yig kyang dor zhing / lam po che dang / srang dang / lam gyi sum mdo dang / bzhi mdo dag tu yang khyim bdag shin du bzang pos bdag gi sring mo bsad de/ chung ma gsod pa 'di la sus kyang gtam 'dre bar mi bya'o zhes mi snyan pa bsgrag cing / rgyal po'i gnod pa yang byed du gzhug go zhes mchi bas/ de'i slad du gzhon nu me skyes bdag la stsal ba'i rigs so/ /bcom ldan 'das kyis gal te khyim bdag shin du bzang po gzhon nu me skyes ma thob na khrag tsha ba skyugs nas 'chi ba'i dus byed par 'gyur ba'i gnas skabs de lta bu yod par gzigs nas tshe dang ldan pa kun dga' bo la bka' stsal pa/ kun dga' bo song la rgyal po gzugs can snying po la nga'i bkas a rog khya zhes byos la 'di skad ces rgyal po chen po khyim bdag shin du bzang po la gzhon nu me skyes byin cig / gal te khyim bdag shin du bzang po gzhon nu me skyes ma thob na khrag tsha ba skyugs nas 'chi ba'i dus byed par 'gyur ba'i gnas skabs de lta bu yod par 'gyur ro zhes kyang bsgo shig / tshe dang ldan pa kun dga' bos btsun pa bka' bzhin 'tshal zhes bcom ldan 'das kyi bka' mnyan nas rgyal po gzugs can snying po ga la ba der song ste phyin nas/ rgyal po gzugs can snying po la 'di skad ces smras so/ /bcom ldan 'das kyis khyod la rgyal po chen po a rog khya zhes bka' stsal te/ rgyal po chen po khyim bdag shin du bzang po la gzhon nu me skyes byin cig / gal te khyim bdag shin du bzang po gzhon nu me skyes ma thob na khrag tsha ba skyugs nas 'chi ba'i dus byed par 'gyur ba'i gnas skabs de lta bu yod par 'gyur ro zhes kyang bka' stsal to/ /rgyal pos smras pa/ btsun pa kun dga' bo bcom ldan 'das la phyag 'tshal lo/ /bcom ldan 'das kyis ji skad bka' stsal pa de bzhin 'tshal lo/ /tshe dang ldan pa kun dga' bos rgyal po chen po a rog khya zhes smras te song ngo / /rgyal pos smras pa/ khyim bdag gzhon nu 'di ngas bskyed de yid du 'ong zhing sdug pa yin pas dam tshig bcas la sbyin par bya ste/ nyi ma re re la yang dus gsum gsum du nga blta ba'i phyir gtong na sbyin par bya'o/ /des smras pa/ lha khyod kyi spyan sngar mi gtang na gzhan su'i thad du gtang bar bgyi/ gtang bar 'tshal lo/ /rgyal pos de rgyan thams cad kyis brgyan te glang po che la bkyon nas btang ngo / /'di ltar 'jig rten pa rnams kyi kun du spyod pa ni ji skad du pha gson pa de srid du bu'i ming mi sgrogs so/ /ji tsam dus gzhan zhig na khyim bdag shin du bzang po 'chi ba'i dus byas nas gzhon nu me skyes pha'i khyim na gnas par gyur te/ de sangs rgyas la mngon par dad/ chos dang dge 'dun la mngon par dad/ sangs rgyas la skyabs su song / chos dang dge 'dun la skyabs su song ngo / /des khyim bdag shin du bzang pos phyogs gang du bdag gi ma bsad pa'i phyogs der gtsug lag khang rtsig tu b cug nas yo byad thams cad phun sum tshogs par sbyar te phyogs bzhi'i dge 'dun la phul nas 'di ltar gnas brtan dag gis kyang mdo sde dag la bcom ldan 'das rgyal po'i khab na dku mnyed pa'i tshal na bzhugs so zhes nye bar sbyar to/ /khyim bdag shin du bzang po'i mi zho shas 'tsho ba yul gzhan du dong ba dag gis khyim bdag shin du bzang po ni 'chi ba'i dus la bab po/ /gzhon nu me skyes ni rang gi khyim na gnas te/ de sangs rgyas la mngon par dad/ chos dang dge 'dun la mngon par dad/ sangs rgyas la skyabs su song chos dang dge 'dun la skyabs su song ngo zhes thos so/ /thos nas kyang de dag gis tsan dan sa mchog pa'i lhung bzed cig rin po che dag gis bkang ste khyim bdag me skyes la skyes su bskur ro/ /des kyang de shing ring po'i rtse mo la btags te bzhag nas/ 'di skad ces 'di sus kyang skas dang / ya gad dang / kyo btang dag gis blang bar mi bya'i/ 'di ltar dge sbyong ngam bram ze gang dag rdzu 'phrul che ba 'am/ mthu che ba/ de dag las 'ga' zhig gis len na des ni 'di ci bder khyer la rag go zhes dril bsgrags pa yang byas so/ /gzhan mu stegs can rnams nang par sngar langs nas chu ngogs dag tu nye reg byed du 'dong ba de dag gis mthong ngo / /mthong nas kyang khyim bdag me skyes la smras pa/ khyim bdag 'di ci yin/ des de dag la rgyas par bsnyad pa dang / de dag gis smras pa/ khyim bdag khyod shAkya'i bu'i dge sbyong rnams la mngon par dad pas de dag nyid len par 'gyur ro zhes smras nas dong ngo / /ji tsam na dge slong gnas brtan gnas brtan dag rgyal po'i khab tu bsod snyoms la zhugs pa de dag gis de mthong nas de dag gis kyang khyim bdag me skyes la smras pa/ khyim bdag 'di ci yin/ des de dag la de kho na bzhin du rgyas par bsnyad pa dang / de dag gis smras pa/ khyim bdag bcom ldan 'das kyis dge slong dag gis yon tan ni bcab par bya/ skyon ni bsgrag par bya'o zhes bka' stsal na/ ji lhung bzed tsam gyi ched du bdag nyid bstan par bya 'am zhes smras nas dong ngo / /ji tsam na tshe dang ldan pa 'od srungs stobs bcu pa de phyogs der 'ongs te/ khyim bdag la smras pa/ khyim bdag 'di ci yin/ des ji lta bu yin pa smras pa dang / tshe dang ldan pa 'od srungs stobs bcu pas bsams pa/ bdag gis thog ma med pa'i dus nas bsags pa'i nyon mongs pa'i tshogs rnams spangs shing bor la bsal cing sbyang ba byas na khyim bdag gis bdag mu stegs can dang rdzu 'phrul 'gran par chad kyis de'i phyir 'di'i yid mgu bar bya'o snyam nas/ des lag pa glang po che'i sna lta bu brkyang ste lhung bzed de blangs nas des de khyer te gtsug lag khang du song ngo / /de la dge slong dag gis smras pa/ gnas brtan khyod kyi tsan dan sa mchog pa'i lhung bzed 'di ga las mchis/ des ji ltar gyur pa brjod pa dang / dge slong dag gis smras pa/ gnas brtan khyod lhung bzed tsam gyi ched du khyim pa'i mdun du rdzu 'phrul rnam par bstan du rung ngam/ de tshe dang ldan pa dag rung yang bla mi rung yang bla ste byas zin pas da ci byar yang med do zhes zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong gis khyim pa'i mdun du rdzu 'phrul rnam par bstan par mi bya'o/ /rnam par ston na 'gal tshabs can du 'gyur ro/ /gzhan yang lhung bzed rnam pa bzhi po gser las byas pa dang / dngul las byas pa dang / bai dUr+ya las byas pa dang / shel las byas pa dang / gzhan yang lhung bzed rnam pa bzhi po ra gan dang / zangs dang / khar ba dang / shing las byas pa dag las 'di ltar lhung bzed snga ma bzhi po gang dag yin pa de dag ni ma blangs pa yang blang bar mi bya la/ blangs pa yang gtang bar bya'o/ /lhung bzed phyi ma bzhi po gang dag yin pa de dag ni ma blangs pa ni blang bar mi bya zhing blangs pa na sman phor du longs spyad pas spyad par bya ba yin no/ /'di ltar lcags dang / sa'i lhung bzed gnyis ni byin gyis brlab tu rung ba dag yin no/ /de nas dus gzhan zhig na khyim bdag me skyes lha dang mi'i dpal yang myong bar gyur nas/ rgyal po'i khab dang tsam pa dag gi bar na sho gam gyi gnas shig yod pa de'i sho gam pa 'chi ba'i dus la bab nas de gnod sbyin gdug pa zhig tu skyes pa dang / des bu'i rmi lam du 'di skad ces bu khyod kyis gnas 'dir gnod sbyin gyi rten 'dzugs su chug la der dril yang gyis la thogs shig dang / gang gi tshe der su dag zong las sho gam mi 'jal bar 'gro bar byed pa de'i tshe dril de sgra 'byin par byed cing / de dag phyir ldog pa las sho gam chod par 'gyur ro zhes bstan to/ /des gnyen bshes dang / nye du dang / rtsa lag dag la rmi lam de bzlas nas nyi ma dang / tshes grangs dang / yud tsam dang / gza' dang / rgyu skar dang / dus shis pa la bab pa'i tshe gnas der gnod sbyin gyi rten 'dzugs su bcug nas der dril yang byas te btags so/ /grong khyer tsam pa na bram ze zhig gis rigs mnyam pa las chung ma blangs pa dang / bram ze mo des bsams pa/ bdag bram zes thabs de dang de dag gis bsgrubs pa'i nor dag spyod cing las ci yang mi byed par 'dug pa ni bdag gi tshul dang 'thun pa ma yin no snyam nas/ de tshong dus su song ste ras bal nyos nas sel gyis zhag par byas shing bkal te tha ga pa mkhas pa la kar sha pa Na stong ri ba'i ras zung cig 'thag tu bcug go/ /de nas des bram ze la smras pa/ ras zung 'di kAr shA pa Na stong ri ba lags kyis/ tshong dus su bzhud la gang dag kar sha pa Na stong gis 'jal ba la ni stsol cig /gal te des mi 'jal na tshong 'dus ma yin no zhes bsgrags nas gzhan du bzhud par mdzod cig / des de khyer te tshong 'dus su song ba na kAr ShA pa Na stong gis nyo ba su yang med nas/ des tshong 'dus ma yin no zhes bsgrags te ras zung de gdugs kyi rtsa ba'i nang du bcug ste 'dron pa dag dang lhan cig rgyal po'i khab tu song ngo / /ji tsam na rim gyis sho gam gyi gnas su phyin pa dang / sho gam pas 'dron pa de dag la sho gam bcad pa na de dag gis sho gam phul nas dong ngo / /de na dril sgra 'byin par byed nas sho gam pa dag gis smras pa/ shes ldan dag dril 'di ltar sgra 'byin pa las na 'dron pa dag gis sho gam legs par ma phul gor ma chag gis/ yang sho gam gcad do zhes de dag gis 'dron pa dag yang phyir bkug ste btsal na sho gam ma phul ba 'ga' yang med do/ /de dag dong ba dang yang dril sgra 'byin pa nyid du byed nas/ de dag gis 'dron pa dag yang phyir bkug ste btsal na sho gam ma phul ba 'ga' yang med par gyur nas/ 'dron pa dag deng la khyed cag chom po byed par sems sam/ ci na yang dang yang du phyir 'gugs par byed ces smod par byed do/ / de dag gis 'dron pa de dag tshoms gnyis su byas te bkye ba dang / tshoms gang gi nang na bram ze de med pa dag ni de bzhin dong ngo / /tshoms cig shos 'dong ba na dril de de bzhin du sgra 'byin par byed nas de dag gis de dag kyang de bzhin du tshoms gnyis su byas shing byas shing bkye ba dang / tha mar bram ze de gcig pu nyi tshe lus par gyur nas de de dag gis bzung ngo / /des bdag la cung zad kyang med kyis tshol cig ces smras pa dang / de dag gis btsal na ci yang med nas btang ba na yang dril de sgra 'byin pa nyid du byed do/ /de dag gis bram ze de yang phyir bkug nas smras pa/ kye bram ze lha'i byin gyi rlabs ni de ltar gyur na khyod bden par smros shig dang / kho bo cag khyod la sho gam mi len to/ /des smras pa/ bden pa mi len tam/ de dag gis smras pa/ mi len to/ /des gdugs kyi rtsa ba'i nang nas ras zung de phyung te bstan to/ /de dag kye ma lha'i byin gyi rlabs ni 'di 'dra'o zhes ngo mtshar chen po skyes par gyur nas/ de dag gis de'i ras ya gcig phye ste lha la bstan to/ /bram zes smras pa/ kye khyed cag na re sho gam mi len to zhes zer na da thams cad 'phrog gam/ de dag gis smras pa/ bram ze nged cag len par mi byed de/ lha'i byin gyi rlabs de lta bu mdzad pas nged kyis lha la bstan par zad kyis long la song shig / des de blangs nas yang gdugs kyi rtsa ba'i nang du bcug ste song nas khad kyi rgyal po'i khab tu phyin to/ /des tshong 'dus su ras zung de bkram pa na der yang de kar Sha pa Na stong gis nyo ba su yang med nas des rgyal po'i khab kyi tshong 'dus kyang tshong 'dus ma yin no zhes bsgrags so/ /de na gzhon nu me skyes glang po che la zhon te rgyal po'i pho brang nas phyir byung ste/ tshong 'dus kyi nang nas rang gi khyim du 'gro bas de thos pa dang / des shes ldan dag bram ze de ci'i phyir tshong 'dus ma yin no zhes sgrogs par byed pa dri bar byas bos shig /de dag gis bos nas me skyes kyis smras pa/ bram ze khyod ci'i phyir tshong 'dus 'di tshong 'dus ma yin no zhes sgrogs par byed/ des smras pa/ khyim bdag ras zung 'di lta bu kar Sha pa Na stong gis nyo ba su yang med pa'i phyir ro/ /des smras pa/ bltas khyer te shog /des de nye bar bstan to/ /me skyes kyis smras pa/ bram ze de tsam ni ri mod kyi 'on kyang ras gcig ni spyad zin pa zhig /gcig ni ma spyad pa zhig pas ma spyad pa gang yin pa 'di ni kar Sha pa Na lnga brgya ri/ gang spyad pa 'di ni nyis brgya lnga bcu ri'o/ /bram zes smras pa/ ci 'di de lta bur 'gyur ram/ me skyes kyis smras pa/ bram ze khyod kyi mngon sum du bstan gyis ltos shig ces des ma spyad pa de steng gi nam mkha' la bor ba dang / de brkyang zhing 'dug go/ /spyad pa bor ba na de ma thag tu phyir lhung ngo / /bram ze ngo mtshar skyes te smras pa/ khyim bdag khyod ni rdzu 'phrul che ba mthu che ba zhig go/ /me skyes kyis yang ltos shig ces smras nas/ des ma spyad pa gang yin pa de tsher ma'i steng du bor na ma thogs par song ngo / /gcig shos de bor na tsher ma la thogs nas bram ze de ngo mtshar chen po des mngon par dad par gyur nas smras pa/ khyim bdag khyod ni rdzu 'phrul che ba mthu che ba zhig pas khyod rin ji tsam gyis bzhed pa de tsam gyis snoms shig / des smras pa/ bram ze khyod 'gron yin gyis khyod nyid la mchod pa bya ba'i phyir kar sha pa Na stong nyid sbyin par bya'o/ /zhes des de la kar Sha pa Na stong byin pa dang / bram zes de blangs nas song ngo / /me skyes kyis de dag las gang spyad pa ni khye'u zhig la byin/ ma spyad pa ni khrus ras su byas so/ /de nas dus gzhan zhig na rgyal po gzugs can snying po steng gi khang bzangs gyi thog na blon po'i tshogs kyis yongs su bskor cing 'dug pa'i tshe me skyes kyi khrus ras khang pa'i steng du skam du bcug pa rlung gis nam mkha' la khyer nas/ rgyal po gzugs can snying po'i steng du lhung ba dang rgyal pos smras pa/ shes ldan dag rgyal po la 'os pa'i gos 'di lta bu ga las 'ongs/ de dag gis smras pa/ lha rgyal po nga las nu byung ba'i tshe ni dgung bdun du rin po che'i char bab po zhes thos na lha la yang na bza'i char bab pa las na ring po mi thogs par rin po che'i char 'bab par 'gyur ro/ /rgyal pos smras pa/ bcom ldan 'das kyis khyim bdag me skyes lha dang mi'i dpal yang myong bar 'gyur ro/ /zhes lung bstan la/ 'di yang lha'i gos nam mkha' las 'ongs pa zhig na de 'ongs dang sbyin par byas zhog shig ces bsgo'o/ /de dag de skad smra ba'i tshe nyid na me skyes 'ongs pa dang / rgyal pos smras pa/ gzhon nu khyod bcom ldan 'das kyis lha dang mi'i dpal yang myong bar 'gyur ro zhes lung bstan la/ nga la yang lha'i gos nam mkha' las lhung ba 'di lta bu yod kyis de khyod khyer cig /des lag pa brkyang ste smras pa/ lha g.yar snga brim gyis tshur stsal zhes brtags na ji tsam na bdag gi khrus ras yin par mthong nas cung zad bgad de smras pa/ lha 'di bdag gi khrus ras bser mas 'tshal nas 'dir mchis pa lags so/ /rgyal pos smras pa/ gzhon nu da khyod kyis lha dang mi'i dpal yang myong bar gyur tam/ lha myong bar gyur to/ /gzhon nu gal te de lta na ci'i phyir nga spyan 'dren par mi byed/ lha spyan 'dren to/ /song la yo lang gi zhal ta dag shoms shig / lha gang gis lha dang mi'i dpal yang myong bar gyur pa la zhal ta bgyi ci 'tshal mod kyi/ 'on kyang bdag zhal ta bgyid du mchi'o/ /rgyal po me skyes kyi khyim du song nas bud med kyi 'khor phyi pa dag mthong ba dang dbang po dag phyir glon par byed do/ /me skyes kyis smras pa/ lha ci'i slad du dbang po dag slar glon par mdzad/ des smras pa/ gzhon nu mna' ma yin pas de ltar byas so/ /lha snam zungs ma lags te/ 'di ltar bud med kyi 'khor phyi pa dag lags so/ /de ngo mtshar chen po skyes nas yang bud med kyi 'khor bar ma dag mthong ba dang / dbang po dag phyir ldon par byed do/ /me skyes kyis de bzhin du dris pa dang rgyal pos kyang de bzhin smras so/ /me skyes kyis smras pa/ lha 'di dag kyang snam zungs ni ma lags te/ 'di ltar bud med kyi 'khor bar ma dag lags so/ /de ngo mtshar chen po lhag par skyes so/ /rgyal pos de'i bar sgo'i phyogs rin po che'i rang bzhin las gyur pa rdzing chus gang ba lta bu de na nya dag rgyu ba 'dra ba'i 'khrul 'khor gyi sbyor ba byas pa dag mthong ste/ nang du 'gro bar 'dod nas lham dag dbud par brtsams pa dang / me skyes kyis smras pa/ lha ci'i slad du chags dag bsil bar mdzad/ des smras pa/ gzhon nu chu la 'bog par bya ba'i phyir ro/ /me skyes kyis smras pa/ lha 'di chab ma lags te/ chab lta bur gda' ba ni rin po che'i sa gzhi lags so/ /des smras pa/ gzhon nu nya rgyu ba dag 'di ltar snang ngo / /lha 'khrul 'khor gyi sbyor ba las de dag rgyu bar gda'o/ /rgyal po yid ma ches pa dang / des sor gdub rgya 'phangs pa na sgra k+r+wa la la zer te rin po che'i sa gzhi'i steng du 'jol bar gyur nas/ de ngo mtshar skyes te nang du song nas seng ge'i khri la 'dug go/ /mna' ma dag rkang pa la phyag 'tshal du lhags pa de dag mchi ma byung nas rgyal pos smras pa/ gzhon nu ci'i phyir mna' ma 'di dag ngu / des smras pa/ lha 'di dag ngu ba ma lags te/ 'di ltar lha'i na bza' la shing gi dud pa'i dri gda' bas des 'di dag mchi ma byung bar gyur to/ /rgyal po lha dang mi'i dpal de dag la nye bar spyod cing phyir mi ldog pa na/ rgyal po'i bya ba dang rgyal po'i byed pa dag yongs su nyams par gyur nas gzhon nu ma skyes dgra la blon po rnams kyis smras pa/ gzhon nu lha ni me skyes kyi khyim du gshegs nas bag ma mchis par gyur gyis bzhud la sbron cig /de song nas smras pa/ lha khyod 'dir gshegs te bzhugs par mdzad dam ci/ blon po rnams kyi mchid nas rgyal po'i bya ba dang byed pa dag yongs su nyams par gyur to zhes mchi'o/ /des smras pa/ gzhon nu ci khyod kyis zhag gcig tsam rgyal srid byed du 'jug kyang mi nus sam/ des smras pa/ lha bdag gis ni lhas dgung bdun lags par 'tshal na/ lhas ni dgung gcig lags par mkhyen pa lta/ rgyal pos me skyes kyi gdong du brtags te smras pa/ gzhon nu bden nam/ lha mad de dgung bdun kho na lags so/ /'o na nyin mtshan ji ltar shes/ lha me tog dag kha 'bye zhing 'dzums pa dang / nor bu dag gi 'od 'bar ram mi 'bar ba dang / bya dag skad 'byin tam mi 'byin pa'i tshul las gda'o/ /me tog gang dgung la kha 'bye zhing gdugs la zhum par 'gyur ba yang mchis/ gang dag gdugs la kha 'bye zhing dgung la zhum par 'gyur ba yang mchis/ nor bu gang dag dgung la 'bar zhing gdugs la mi 'bar ba yang mchis/ gang dag gdugs la 'bar zhing dgung la mi 'bar ba yang mchis/ bya gang dag dgung la skad 'byin cing gdugs la mi 'byin pa yang mchis/ gang dag gdugs la skad 'byin cing dgung la skad mi 'byin pa yang mchis so/ /rgyal po ngo mtshar skyes nas smras pa/ gzhon nu bcom ldan 'das ni phyin ci ma log par gsung ba ste/ bcom ldan 'das kyis khyod ji ltar lung bstan pa kho na las gzhan du ma gyur to/ /de skad smras nas rgyal po de me skyes kyi khyim nas phyir byung ste song ngo / /gzhon nu ma skyes dgras me skyes kyi nor bu gcig brkus te khye'u zhig gi lag tu gtad pa dang / des gang nas blangs pa de nyid du phyir song ste 'dug go/ /ma skyes dgras smras pa/ khye'u nor bu de bltas khyer shog / des chang pa phye ste smras pa/ gzhon nu gar mchis ma 'tshal to/ /des de brdeg par brtsams pa dang me skyes kyis smras pa/ gzhon nu 'di la ci'i phyir rdeg par byed/ khyim bdag kho bo yang rkun ma yin na 'di ni rkun chen zhig ste/ bdag gis khyod kyi nor bu brkus pa de yang 'dis brkus so/ /des smras pa/ gzhon nu khyod kyis kyang ma brkus/ 'dis kyang ma brkus te/ 'di ltar khyod kyis gang nas blangs pa de nyid du phyir song ste 'dug go/ /de lta mod kyi gzhon nu khyod nyid kyi khyim yin gyis nor bu ji snyed dgos pa dang / gzhan yang nor rdzas ci dgos pa de dag ci bder long shig /de skyengs nas bsams pa/ nam zhig na bdag gi pha 'chi ba'i dus la bab nas bdag rgyal po byed pa de'i tshe blang ngo snyam mo/ /ji tsam na ma skyes dgra lha sbyin gyis bslus nas pha chos kyi rgyal po chos dang ldan pa srog dang phral nas rang gis cod pan bcings te rgyal por zhugs nas de'i tshe des me skyes bos te/ khyim bdag khyod dang nga spun yin pas khyim dag bgo bar bya'o/ /des bsams pa/ 'di ni pha chos kyi rgyal po chos dang ldan pa de lta bu bsad de bdag nyid kyis cod pan bcings nas rgyal por zhugs pa yin pas 'dis gal te na bdag kyang bsad par 'gyur ro/ /'di bdag gi khyim dbrog par sems yang ngag gis sbyin par bya'o/ / snyam du bsams nas smras pa/ lha 'di khyod mnga' na bgo ci 'tshal/ khyod kyi khab tu ni bdag mchi'o/ /bdag gi sdum par ni khyed gshegs su gsol/ ma skyes dgras smras pa/ legs kyis de bzhin bya'o zhes de de'i khyim du 'phos shing me skyes ni ma skyes dgra'i khyim du 'phos pa dang / dpal dang ldan pa'i khyim de mi snang bar gyur cing me skyes ga la ba de nyid du byung ngo / /de ltar lan bdun gyi bar du mi snang bar gyur cing byung ba dang ma skyes dgras bsams pa/ 'di ltar me skyes kyi nor bu dag bdag gis dbrog par ma nus kyis thabs gzhan zhig bya'o snyam nas/ des chom rkun pa dag bskos te/ deng la me skyes kyi khyim nas nor bu dag rkus shig ces bsgo nas/ de dag gis skas dang / ya gad dang / kyo btang dag gis 'dzeg par brtsams pa dang / steng gi khang bzangs kyi gzhir gtogs pa na chung ma'i 'khor 'khod pas de dag mthong nas de dag gis rkun po byung ngo / /rkun po byung ngo zhes bya ba'i sgra phyung ngo / /me skyes kyis de thos nas chom rkun pa dag 'dug par gyur cig ces yid la yang bsams tshig tu yang brjod pa dang de dag gang nas ji ltar 'dzegs pa de nyid na de bzhin 'khod par gyur to/ /ji tsam na mtshan mo 'das te nam nangs pa dang skye bo phal po che'i tshogs dag gis mthong nas de dag gis smras pa/ shes ldan dag rgyal po sdig can 'dis pha chos kyi rgyal po chos dang ldan pa srog dang phral nas da yang khyim 'joms par byed pa de ci'i phyir bdag cag gis dang du blang bar bya/ ma skyes dgras me skyes kyi gan du pho nya btang ste/ nga la skyon du 'gyur bas de dag thong shig ces byas pa dang / me skyes kyis chom rkun pa 'di dag 'dong bar gyur cig ces yid la yang bsams tshig tu yang brjod nas de dag dong ngo / /me skyes kyis bsams pa/ gang gis 'di ltar pha chos kyi rgyal po chos dang ldan pa srog dang phral ba des bdag bsad par 'gyur gor ma chag gis/ bdag ni bcom ldan 'das kyis nga'i bstan pa la rab tu byung ste nyon mongs pa thams cad spangs pas dgra bcom pa nyid mngon sum du byed par 'gyur ro zhes lung bstan pa yin pas rnam pa thams cad du der song la rab tu byung ngo snyam nas/ des nor gyi rnam pa thams cad phongs pa dag dang / mgon med pa dag dang / dbul po dag dang / nad pa dag la byin te/ nor med pa rnams nor dang ldan par byas te bzhag go/ /de nas khyim bdag me skyes mdza' bshes dang / rtsa lag dang nye du dang / phu nu dag gi ngo bltas nas bcom ldan 'das ga la ba der song ste phyin nas/ bcom ldan 'das kyi zhabs gnyis la mgo bos phyag 'tshal te mtha' gcig tu 'dug go/ /mtha' gcig tu 'dug nas khyim bdag me skyes kyis bcom ldan 'das la 'di skad ces gsol to/ /btsun pa bdag legs par gsungs pa'i chos 'dul ba la rab tu 'byung zhing bsnyen par rdzogs pa dge slong gi dngos po 'thob pa lta na/ bcom ldan 'das kyi spyan sngar bdag tshangs par spyad pa spyod par 'tshal lo/ /de la bcom ldan 'das kyis dge slong tshur shog ces bya bas dge slong tshur shog tshangs par spyad pa spyod cig ces bka' stsal ma thag kho nar skra byi zhing snam sbyar bgos nas/ lag pa lhung bzed dang bya ma bum dang ldan pa dang / skra dang kha spu bregs nas zhag bdun lon pa tsam du gyur cing / dge slong bsnyen par rdzogs nas lo brgya lon pa'i spyod lam lta bur gnas par gyur to/ /de bzhin gshegs pas tshur shog bka' stsal pas/ /skra byi snam sbyar gyon pa'i lus ldan zhing / /mod la dbang po rab zhir gnas 'gyur te/ /sangs rgyas dgongs pas lus gzugs bkab par gyur/ /bcom ldan 'das kyis de la lung phog nas des brtsal ba dang / 'bad pa dang / bsgrim pa byas pas 'khor ba'i 'khor lo cha lnga pa g.yo ba dang / mi g.yo ba 'di nyid rig ste/ 'du byed kyi rnam pa thams cad nyams pa dang / ltung ba dang / rnam par 'thor ba dang / rnam par 'jig pa'i chos nyid kyis bcom nas nyon mongs pa thams cad spangs pas dgra bcom pa nyid mngon sum du byas te/ dgra bcom pa khams gsum pa'i 'dod chags dang bral ba/ bong ba dang gser du mnyam pa/ nam mkha' dang lag mthil ltar sems mnyam pa/ ste'u dang tsan dan du mnyam pa/ rig pas sgo nga'i sbubs dral bar gyur cing rig pa dang / mngon par shes pa dang / so so yang dag par rig pa thob pa/ srid pa dang 'dod pa'i rnyed pa dang / bkur sti la rgyab kyis phyogs pa/ dbang po dang nye dbang dang bcas pa'i lha rnams kyis mchod par bya ba dang / rjed par bya ba dang / gus par smra bar bya bar gyur to/ /dge slong rnams the tshom skyes nas the tshom thams cad gcod pa sangs rgyas bcom ldan 'das la zhus pa/ btsun pa tshe dang ldan pa me skyes 'dis las ci zhig bgyis na/ las de'i rnam par smin pas ma dang lhan cig zhugs kyi phung por bsregs shing lha dang mi'i dpal myong nas/ bcom ldan 'das kyi bstan pa la yang rab tu byung ste nyon mongs pa thams cad spangs pas dgra bcom pa nyid mngon sum du bgyis par gyur/ bcom ldan 'das kyis bka' stsal pa/ dge slong dag rigs kyi bu me skyes nyid kyis las tshogs rnyed pa/ rkyen yongs su bsgyur ba/ 'od pa bzhin du nye bar gnas pa gdon mi za bar 'byung bar 'gyur ba dag byas shing bsags pas/ me skyes nyid kyis las byas shing bsags pa dag / gzhan su zhig gis so sor myong bar 'gyur/ dge slong dag las byas shing bsags pa dag ni phyi rol gyi sa'i khams la rnam par smin par mi 'gyur/ chu'i khams la mi 'gyur/ me'i khams la mi 'gyur/ rlung gi khams la mi 'gyur gyi/ 'di ltar las dge ba dang / mi dge ba byas shing bsags pa dag ni zin pa'i phung po dang / khams dang / skye mched dag la rnam par smin par 'gyur te/ las rnams bskal pa brgyar yang ni/ /chud mi za ba'ang tshogs dang dus/ /rnyed na lus can rnams la ni/ /'bras bu dag tu 'gyur ba nyid/ /dge slong dag sngon byung ba bskal pa dgu bcu rtsa gcig 'das pa na ston pa de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das rnam par gzigs shes bya ba 'jig rten du byung ste/ dge slong drug khri nyis stong gi 'khor dang thabs gcig tu ljongs rgyur gshegs pa na rgyal po'i pho brang rtsa lag can du byon nas rtsa lag can gyi tshal na bzhugs so/ /de'i tshe rgyal po'i pho brang rtsa lag can na rgyal po gnyen ldan zhes bya ba chos kyi rgyal po chos dang ldan pas rgyal srid 'byor pa/ rgyas pa bde ba/ lo legs pa/ skye bo dang / mi mang pos gang ba/ thab mo dang / 'thab pa dang / rtsod pa dang / 'gyed pa dang / phyi dgra dang / nang 'khrug dang / chom rkun dang / mu ge dang / nad rab tu zhi ba/ 'bru dang / bu ram shing dang ba glang dang / ma he phun sum tshogs pa byed du bcug go/ /de na khyim bdag nyes med ces bya ba phyug pa/ nor mang ba/ longs spyod che ba/ yongs su gzung ba yangs shing rgya che ba rnam thos kyi bu'i nor dang ldan pa rnam thos kyi bu la nor gyis 'gran pa zhig 'dug pa des bsams pa/ bdag gis yang dag par rdzogs pa'i sangs rgyas rnam par gzigs lan du ma zhig khyim du spyan drangs te gdugs tshod gsol mod kyi/ zla ba gsum du yo byad thams cad kyis bstabs pa ni nam yang ma byas pas da bdag gis yang dag par rdzogs pa'i sangs rgyas rnam par gzigs la zla ba gsum du yo byad thams cad kyis bstabs so snyam nas/ yang dag par rdzogs pa'i sangs rgyas rnam par gzigs ga la ba der song ste phyin nas/ yang dag par rdzogs pa'i sangs rgyas rnam par gzigs kyi zhabs gnyis la mgo bos phyag 'tshal te mtha' gcig tu 'dug go/ /mtha' gcig tu 'dug nas yang dag par rdzogs pa'i sangs rgyas rnam par gzigs khyim bdag nyes med la chos dang ldan pa'i gtam yang dag par ston par mdzad/ yang dag par 'dzin du 'jug par mdzad/ yang dag par gzeng bstod par mdzad/ yang dag par rab tu dga' bar mdzad do/ /rnam grangs du mar chos dang ldan pa'i gtam yang dag par bstan/ yang dag par 'dzin du bcug /yang dag par gzeng bstod/ yang dag par rab tu dga' bar mdzad nas cang mi gsung bar bzhugs so/ /de nas khyim bdag nyes med stan las langs te bla gos phrag pa gcig tu byas nas yang dag par rdzogs pa'i sangs rgyas rnam par gzigs ga la ba de logs su thal mo sbyar ba btud nas yang dag par rdzogs pa'i sangs rgyas rnam par gzigs la 'di skad ces gsol to/ /bcom ldan 'das dge slong gi dge 'dun dang bcas pa la bdag dgung zla gsum du na bza' dang / zhal zas dang / gnas mal dang / snyun gyi rkyen dang / sman gyi yo byad rnams 'bul bar ci gnang / yang dag par rdzogs pa'i sangs rgyas rnam par gzigs kyis khyim bdag nyes med la cang mi gsung bas gnang ngo / /de nas khyim bdag nyes med kyis yang dag par rdzogs pa'i sangs rgyas rnam par gzigs kyis cang mi gsung bas gnang bar rig nas yang dag par rdzogs pa'i sangs rgyas rnam par gzigs kyi zhabs gnyis la mgo bos phyag 'tshal te stan las langs nas song ngo / /rgyal po gnyen ldan gyis yang dag par rdzogs pa'i sangs rgyas rnam par gzigs dge slong drug khri nyis stong gi 'khor dang thabs gcig tu ljongs rgyur gshegs pa na rgyal po'i pho brang rtsa lag can du byon nas rtsa lag can gyi tshal na bzhugs so/ /zhes thos so thos nas kyang des bsams pa/ bdag gis yang dag par rdzogs pa'i sangs rgyas rnam par gzigs lan du ma zhig pho brang du spyan drangs te gdugs tshod gsol mod kyi/ zla ba gsum du yo byad thams cad kyis bstabs pa ni nam yang ma byas pas da bdag gis yang dag par rdzogs pa'i sangs rgyas rnam par gzigs la zla ba gsum du yo byad thams cad kyis bstabs so snyam nas yang dag par rdzogs pa'i sangs rgyas rnam par gzigs ga la ba der song ste phyin nas/ yang dag par rdzogs pa'i sangs rgyas rnam par gzigs kyi zhabs gnyis la mgo bos phyag 'tshal te mtha' gcig tu 'dug go/ /mtha' gcig tu 'dug nas yang dag par rdzogs pa'i sangs rgyas rnam par gzigs rgyal po gnyen ldan la chos dang ldan pa'i gtam yang dag par ston par mdzad/ yang dag par 'dzin du 'jug par mdzad/ yang dag par gzeng bstod par mdzad/ yang dag par rab tu dga' bar mdzad do/ /rnam grangs du mar chos dang ldan pa'i gtam yang dag par bstan yang dag par 'dzin du bcug /yang dag par gzeng bstod/ yang dag par rab tu dga' bar mdzad nas cang mi gsung bar bzhugs so/ / //'dul ba phran tshegs kyi gzhi/ bam po gsum pa/ de nas rgyal po gnyen ldan stan las langs te bla gos phrag pa gcig tu gzar nas yang dag par rdzogs pa'i sangs rgyas rnam par gzigs ga la ba de logs su thal mo sbyar ba btud nas yang dag par rdzogs pa'i sangs rgyas rnam par gzigs la 'di skad ces gsol to/ /bcom ldan 'das dge slong gi dge 'dun dang bcas pa la bdag dgung zla gsum du na bza' dang / zhal zas dang / gnas mal dang / snyun gyi rkyen dang / sman gyi yo byad rnams 'bul bar ci gnang / rgyal po chen po khyim bdag nyes med kyis dang po kho nar spyan drangs zin to/ /bcom ldan 'das kyis bdag la gnang na ji ltar gnang ba de ltar bdag gis khyim bdag nyes med 'drang bar bgyi'o/ /bka' stsal pa/ rgyal po chen po gal te khyim bdag nyes med 'drang na ngas de bzhin gnang bar bya'o/ /rgyal po gnyen ldan yang dag par rdzogs pa'i sangs rgyas rnam par gzigs kyi zhabs gnyis la mgo bos phyag 'tshal nas stan las langs te rang gi gnas ga la ba der song ste phyin nas/ rgyal po gnyen ldan gyis khyim bdag nyes med pho nyas bkug nas smras pa/ khyim bdag shes par byos shig /yang dag par rdzogs pa'i sangs rgyas rnam par gzigs dang po nas ngas gdugs tshod gsol bar de'i 'og tu khyod kyis yang dag par rdzogs pa'i sangs rgyas rnam par gzigs gdugs tshod gsol na khyod la gnod pa med dam/ des smras pa/ lha yang dag par rdzogs pa'i sangs rgyas rnam par gzigs dang po kho nar bdag gis spyan drangs lags pas bdag gis gdugs tshod gsol bar 'tshal lo/ /rgyal pos smras pa/ khyim bdag gal te de lta mod kyi/ 'on kyang khyod nga'i yul na gnas pas dang po kho nar ngas gdugs tshod gsol bar 'os so/ / lha 'di ltar bdag khyod kyi yul na mchis mod kyi/ 'on kyang gang gis sngar spyan drangs pa de nyid kyis gdugs tshod gsol ba 'di la lhas gnod par bgyi ba mi rigs so/ /khyim bdag khyod 'dod rgyal du mi gtang gis gdugs tshod gang bzang bas spyan drang bar bya ste/ gang gi gdugs tshod bzang bas sngar gsol bar bya zhing / gang gis ma thub pa des phyis gdugs tshod gsol bar bya'o/ /khyim bdag nyes med kyis de bzhin bgyi'o zhes mnyan nas/ de nyid kyi nub mo khyim bdag nyes med kyis bza' ba dang bca' ba gtsang zhing bsod pa dag sbyar te/ nang par sngar langs nas gdan thabs mang po bshams shing chu ra dag nye bar bzhag nas/ yang dag par rdzogs pa'i sangs rgyas rnam par gzigs la gdugs tshod kyi dus su spyan 'dren gyis bcom ldan 'das gdugs tshod g.yar dgongs 'tshal lags te/ btsun pas da de'i dus la bab par dgongs su gsol zhes gsol pa dang / yang dag par rdzogs pa'i sangs rgyas rnam par gzigs snga dro sham thabs gsol/ lhung bzed dang chos gos bsnams te/ dge slong gi dge 'dun gyi tshogs kyis yongs su bskor cing mdun du bdar te khyim bdag nyes med kyi bkad sa ga la ba der gshegs te byon nas/ dge slong gi dge 'dun gyi gung la gdan bshams pa nyid la bzhugs so/ /de nas khyim bdag nyes med kyis sangs rgyas la sogs pa dge slong gi dge 'dun bde bar bzhugs par rig nas/ bza' ba dang bca' ba gtsang zhing bsod pa dag rang gi lag nas bstabs shing tshim par byas te/ lan grangs du mar bza' ba dang bca' ba gtsang zhing bsod pa dag rang gi lag nas bstabs shing tshim par byas pa dang / bcom ldan 'das kyis gsol nas phyag bcabs te lhung bzed bzhag par rig nas stan ches dma' ba zhig blangs te/ yang dag par rdzogs pa'i sangs rgyas rnam par gzigs kyi spyan sngar chos mnyan pa'i phyir 'dug go/ /de nas yang dag par rdzogs pa'i sangs rgyas rnam par gzigs khyim bdag nyes med la chos dang ldan pa'i gtam yang dag par ston par mdzad/ yang dag par 'dzin du 'jug par mdzad/ yang dag par gzeng bstod par mdzad/ yang dag par rab tu dga' bar mdzad do/ /rnam grangs du mar chos dang ldan pa'i gtam yang dag par bstan yang dag par 'dzin du bcug / yang dag par gzeng bstod/ yang dag par rab tu dga' bar mdzad nas slar gshegs so/ /rgyal po gnyen ldan gyis kyang gzhung gong ma ji lta ba de bzhin du gdugs tshod gsol ba rgya cher rig par bya'o/ /rgyal po dang khyim bdag gnyi ga'i gdugs tshod bzang bar 'dra ste/ gang yang pham rgyal med nas rgyal po gnyen ldan skom tshugs bcas te sems khongs su chud cing 'dug pa dang / blon po dag gis smras pa/ lha khyod ci'i slad du skom tshugs bcas te sems khongs su chud cing bzhugs/ des smras pa/ shes ldan dag ngas nga'i yul na gnas pa'i grong mi gang yin pa de yang gdugs tshod lhag par bzang pos pham par ma nus na/ nga ji ltar skom tshugs bcas te sems khongs su chud cing mi 'dug tu rung / de dag gis smras pa/ lha zhugs shing 'tshong ba rnams bkag pa dang / khyim bdag de'i zhugs shing ma mchis par 'gyur ro/ /rgyal pos smras pa/ shes ldan dag gang dag nga'i yul na gnas pa de dag gis shing btsong bar mi bya'o/ /gang dag shing 'tshong ba de dag ni nga'i yul na ma 'dug shig ces dril sgrogs shig de ltar byas pa dang / khyim bdag nyes med kyis spos kyis shing dag gis gdugs tshod g.yos shing / 'bru mar dri zhim pos brlan pa'i ras kyis bag chos dag btso bar brtsams pa dang / gnyen ldan gyi grong khyer thams cad dri zhim po dag gis khyab par gyur to/ /rgyal po gnyen ldan gyis smras pa/ shes ldan dag 'di lta bu'i dri zhim po gang nas byung / de dag gis rgya cher brjod pa dang des smras pa/ ci nga la yo byad dag med dam ngas kyang de lta bu bya'o/ /blon po dag gis smras pa/ lha de ltar mdzad du mi rung ste/ khyim bdag 'di ni bu ma mchis pas ring po mi thogs par 'gum pa'i dus la bab nas nor thams cad khyod nyid mnga' bar 'gyur gyis/ lha zhugs shing 'tshong du gnang bar mdzod cig /de nas des shing dag 'tshong du gnang ngo / /khyim bdag nyes med kyis rgyal pos shing dag 'tshong du ma gnang ngo zhes thos nas sems 'khrugs te/ kho bo la shing dag gis rgyal po gnyen ldan de ma dang lhan cig me'i phung por sreg kyang chog pa tsam yod do zhes tshig brlang po dag brjod do/ /rgyal po skom tshugs bcas te sems khongs su chud cing 'dug nas blon po dag gis smras pa/ lha ci'i slad du skom tshugs bcas te sems khongs su chud cing bzhugs/ des rgyas par brjod pa dang / de dag gis smras pa/ lha mi dgyes par ma mdzad cig dang / bdag cag gis ji ltar lhas khyim bdag nyes med thub par 'gyur ba de ltar bgyi'o zhes byas nas/ de dag gis phyi de nyin par rgyal po gnyen ldan gyi grong khyer gyi rdo ba dang / gseg ma dang / gyo mo dag bsal ba byas nas tsan dan gyi chus chag chag btab ste/ dri rab tu zhim pos gang ba'i pog snod dag bzhag cing / dar gyi chun po dag spyangs rgyal mtshan dang ba dan dag kyang bsgreng / me tog sna tshogs dag kyang bkram ste/ dga' ba'i tshal dang 'dra bar 'khor gyi khyams legs par brgyan pa de dang bsgrun du rung ba byas nas/ de rin po che sna tshogs kyis brgyan pa'i gdan thabs rin po che dang / gding ba dang / gos phun sum tshogs pas mdzes par byas pa bshams nas bza' ba dang bca' ba bsod pa mang po rgya che la dri rab tu zhim pa phun sum tshogs pa rnam pa sna tshogs skyu skrums dang bcas pa lha'i zhal zas dang 'dra bar yid du 'ong ba/ 'jig rten gsum gyi bla ma dang rjes su 'thun pa'i zhal zas dag bshams nas rgyal po gnyen ldan la smras pa/ lha'i grong khyer 'di 'dra ba dang / zhal zas dang / yo lang 'di 'dra ba dag bshams kyis dgyes pa bskyed du gsol rgyal po gnyen ldan gyis bltas nas ngo mtshar chen po skyes te/ ngo mtshar dang ldan pa'i sems kyi rgyud kyis yang dag par rdzogs pa'i sangs rgyas rnam par gzigs la gdugs tshod kyi dus su spyan 'dren gyis bcom ldan 'das gdugs tshod kyi g.yar dgongs 'tshal lags te/ btsun pas da de'i dus la bab par dgongs su gsol zhes gsol pa dang / de nas yang dag par rdzogs pa'i sangs rgyas rnam par gzigs snga dro sham thabs gsol/ lhung bzed dang chos gos bsnams te/ dge slong gi dge 'dun gyi tshogs kyis yongs su bskor cing mdun du bdar te/ rgyal po gnyen ldan gyi bkad sa ga la bar gshegs te byon nas dge slong gi dge 'dun gyi gung la gdan bshams pa nyid la bzhugs so/ /yang dag par rdzogs pa'i sangs rgyas rnam par gzigs kyi dbu'i steng du rgyal po gnyen ldan nyid dbang bskur ba'i bkra shis la gtogs pa'i glang po che'i gtso bo rtsibs brgya dang ldan pa'i gdugs 'dzin du bcug go/ /dge slong rnams kyi steng du yang glang po che gzhan dag gdugs gzhan dag 'dzin du bcug go/ /yang dag par rdzogs pa'i sangs rgyas rnam par gzigs la rgyal po gnyen ldan gyis btsun mo dam pa bsil yab gser dang / nor bu las byas pa'i yu ba can gyis g.yob tu bcug go/ /dge slong rnams la yang btsun mo'i tshogs gzhan dag bsil yab dag gis g.yob tu bcug go/ /khyim bdag nyes med kyis rtog chen gyi mi zhig bskos te/ kwa'i nang rje song la bcom ldan 'das la sogs pa dge slong gi dge 'dun la rgyal po gnyen ldan gyis gdugs tshod ji lta bu zhig gsol pa rtogs shig ces bsgo'o/ /de song ste brtags na 'byor pa de lta bu dag mthong nas ngo mtshar chen po skyes te/ ngo mtshar dang ldan pa'i yid kyis de nyid du 'dug go/ /de bzhin du gnyis pa dang gsum pa dag btang na de dag kyang song zhing de nyid du 'dug go/ / de nas khyim bdag nyes med rang nyid der song ste brtags na 'byor pa de dag mthong nas ngo mtshar chen po skyes te des bsams pa/ gzhan ni bdag gis kyang 'byor pa nus na/ glang po che dang / btsun mo'i tshogs bdag gis ga la 'byor snyam du rig nas khyim du song ste mi sgo ba bos nas smras pa/ kwa'i sgo ba mi slongs mo pa gang dag lhags na de dag ci 'dod pa dag byin la nang du ma btang shig ces bsgo nas/ de mya ngan gyi khang par zhugs te skom tshugs bcas nas sems khongs su chud cing 'dug go/ /de nas lha'i dbang po brgya byin gyi shes pa dang / mthong ba ni 'og gi phyogs su 'jug pa yin pas des bsams pa/ 'jig rten na mchod gnas gang dag yin pa/ de dag gi nang na ni yang dag par rdzogs pa'i sangs rgyas rnam par gzigs mchog yin la/ sbyin bdag gang dag yin pa dag gi nang na ni khyim bdag nyes med mchog yin pas de'i grogs bya'o snyam nas bdag nyid kau shi ka'i rigs kyi bram ze zhig tu sprul nas khyim bdag nyes med kyi khyim ga la ba der song ste phyin nas mi sgo ba bos te smras pa/ kye sgo ba song la khyim bdag nyes med la kau shi ka'i rigs kyi bram ze zhig sgor 'ongs te khyod mthong bar 'dod do zhes gyis shig / des smras pa/ bram ze khyim bdag gis bdag la mi slongs mo pa gang dag lhags na/ de dag ci 'dod pa dag byin la nang du ma btang shig ces bsgos/ khyim bdag gis khyod la ci bya/ khyod ci dgos pa de dag khyer la song shig /des smras pa/ kye sgo ba kho bo la dgos pa gzhan ci yang med de/ kho bo ni khyim bdag nyid mthong bar 'dod kyis song shig /de khyim bdag nyes med kyi gan du song ste smras pa/ jo bo kau shi ka'i rigs kyi bram ze zhig chab sgor mchis te jo bo mthong bar 'tshal zhes mchi 'o/ /des smras pa/ kwa'i sgo ba ngas khyod la sngar mi slongs mo pa gang dag lhags na/ de dag ci 'dod pa dag byin la nang du ma btang shig ces ma bsgo 'am/ de nang du 'ongs pas ci bya/ ci 'dod pa dag byin la thong shig jo bo bdag gis de skad bgyis na/ de'i mchid nas kho bo la dgos pa gzhan ci yang med de/ kho bo ni khyim bdag nyid mthong bar 'dod do zhes mchi 'o/ / des smras pa/ kwa'i sgo ba song la de nang du thong shig /des de btang ba dang / des smras pa/ khyim bdag khyod ci'i phyir mya ngan gyi khang par zhugs te skom tshugs bcas nas sems khongs su chud cing 'dug /khyim bdag gis tshigs su bcad pa smras pa/ gang gis mya ngan sel bar mi nus pa/ /de la mya ngan brjod par mi bya ste/ /gang gis mya ngan sel bar byed nus pa/ /de la mya ngan brjod par bya ba yin/ /brgya byin gyis smras pa/ khyim bdag khyod kyi mya ngan gang yin pa smros dang / kho bos khyod kyi mya ngan bsal bar bya'o/ /des rgya cher brjod pa dang / de nas lha'i dbang po brgya byin gyis kau shi ka'i rigs kyi bram ze'i gzugs mi snang bar byas te rang bzhin du 'dug nas smras pa/ khyim bdag kho bos lha'i bu las thams cad pa khyod kyi grogs byed du gzhug go zhes byas nas song ngo / /de nas lha'i dbang po brgya byin sum bcu rtsa gsum pa'i lha rnams kyi nang du song ste/ lha'i bu las thams cad pa bos nas smras pa/ lha'i bu las thams cad pa song la/ khyim bdag nyes med kyi grogs gyis shig /des smras pa/ kau shi ka rab tu legs so zhes lha'i bu las thams cad pas lha'i dbang po brgya byin gyi tshig mnyan nas des de bas ches mdzes shing khyad par du 'phags pa'i grong khyer dag mngon par sprul cing / lha'i 'khor gyi khyams dang / lha'i gdan dag kyang bshams/ lha'i zhal zas dag kyang g.yos nas yang dag par rdzogs pa'i sangs rgyas rnam par gzigs kyi dbu'i steng du ni lha'i dbang po brgya byin gyi bskyed mos tshal du spyad pa'i glang po che'i rgyal po sa srung gi bu rtsibs brgya dang ldan pa'i gdugs 'dzin du bcug go/ /dge slong rnams kyi steng du yang lha'i glang po che gzhan dag gdugs gzhan dag 'dzin du bcug go/ /yang dag par rdzogs pa'i sangs rgyas rnam par gzigs la lha'i dbang po brgya byin gyi btsun mo dam pa lha mo bde sogs lha'i bsil yab gser dang nor bu las byas pa'i yu ba can gyis g.yob tu bcug go/ /dge slong rnams la yang lha'i btsun mo'i tshogs gzhan dag bsil yab gzhan dag gis g.yob tu bcug go/ /rgyal po gnyen ldan gyis rtog chen gyi mi zhig bskos te/ kwa'i nang rje song la bcom ldan 'das la sogs pa dge slong gi dge 'dun la khyim bdag nyes med kyis gdugs tshod ji lta bu zhig gsol ba rtogs shig ces bsgo'o/ /des brtags na 'byor pa de lta bu dag mthong nas ngo mtshar chen po skyes te/ ngo mtshar dang ldan pa'i yid kyis de nyid du 'dug go/ /des blon po dag btang ba dang de dag kyang song zhing de nyid du 'dug go/ /gzhon nu btang na de yang song zhing de nyid du 'dug go/ /de nas rgyal po gnyen ldan rang nyid der song ste/ sgor bsdad pa dang / yang dag par rdzogs pa'i sangs rgyas rnam par gzigs kyis bka' stsal pa/ khyim bdag khyod kyis rgyal po gnyen ldan bden pa mthong bar gyur pa la tshig brlang po smras pa/ de sgo 'di na 'dug gis song la bzod par gsol cig / des de'i gan du song ste bzod par gsol nas smras pa/ rgyal po chen po nang du gshegs la nyid kyi phyag nas brim pa dag mdzad du gsol/ de nang du song ste bltas na lha'i 'byor pa dag mthong nas ngo mtshar chen po skyes nas sangs rgyas la sogs pa dge slong gi dge 'dun ni khyim bdag khyod gcig pus gdugs tshod gsol ba'i rigs kyi kho bos ni ma yin no zhes smras so/ /khyim bdag nyes med kyis yang dag par rdzogs pa'i sangs rgyas rnam par gzigs la de lta bu'i 'byor pas zhal zas dag gis tshim par byas nas/ zhabs la phyag 'tshal te smon lam 'di skad ces ji ltar bdag gis yon gnas 'di lta bu la bsnyen bkur byas pa'i dge ba'i rtsa ba 'dis bdag phyug cing nor mang la longs spyod che ba'i rigs su skye zhing / lha dang mi'i dpal yang myong bar 'gyur ba dang / chos kyi tshul 'di lta bu thob pa dang / 'di lta bu'i ston pa mnyes par byed cing mi mnyes par mi byed par gyur cig ces btab bo/ /dge slong dag de'i tshe de'i dus na khyim bdag nyes med gang yin pa de ni khyim bdag me skyes 'di yin te/ rigs kyi bu des rgyal po gnyen ldan bden pa mthong ba la tshig brlang po smras pa de'i las kyi rnam par smin pas ni tshe rabs lnga brgyar ma dang lhan cig me'i phung por bsregs shing da ltar 'dir yang me'i phung por bsregs par gyur to/ /de bzhin gshegs pa rnam par gzigs gang yin pa la bsnyen bkur byas shing smon lam btab pa de'i las kyi rnam par smin pas ni phyug cing nor mang la longs spyod che ba'i rigs su skyes te/ lha dang mi'i dpal yang myong bar gyur cing / nga'i bstan pa la yang rab tu byung ste/ nyon mongs pa thams cad spangs pas dgra bcom pa nyid mngon sum du byas shing / yang dag par rdzogs pa'i sangs rgyas rnam par gzigs dang shugs mnyam pa dang / stobs mnyam pa dang / brtson 'grus mnyam pas kun du mnyam par gyur pa'i ston pa nga mnyes par byas shing mi mnyes par ma byas so/ /dge slong dag de lta bas na las gcig tu gnag pa rnams kyi rnam par smin pa ni gcig tu gnag pa yin la/ las gcig tu dkar ba rnams kyi ni rnam par smin pa yang dkar ba yin las 'dren ma rnams kyi rnam par smin pa yang 'dren ma yin no/ /dge slong dag de lta bas na las gcig tu gnag pa rnams dang 'dren ma rnams spangs te/ las gcig tu dkar ba rnams la brtsal bar bya ste/ dge slong dag khyed kyis de ltar bslab par bya'o/ /de skad ces bka' stsal nas/ dge slong rnams bcom ldan 'das kyis gsungs pa la mngon par bstod do/ sdom la/ lhung bzed glan dang spyad rnams dang / /gri'u dang khab dang khab ral dang / /gtan pa dang ni mang po dag /drang srong chen pos rjes su gnang / /gleng gzhi ni mnyan yod na'o/ /mnyan yod na dge slong gcig cig gi lhung bzed rdol nas des de mgar ba'i gan du khyer te song nas smras pa/ bzhin bzangs kho bo'i lhung bzed rdol ba 'di klon la byin cig /des bsams pa/ 'di dag ni khas las byed du 'jug pa yin gyi/ gla rngan ni mi ster bas ci nas kyang yun ring du bsgyangs te bzhag na 'di rang gi blos phyir len par 'gyur snyam nas/ smras pa/ 'phags pa bzhud la sang ngam gnangs spyon cig /snga dro 'am/ gung tshigs sam/ phyi dro spyon cig ces bsgyang bar brtsams so/ /dge slong de nyin gcig bzhin der 'gro ba na skyo ba skyes pa dang / de'i mdza' bo zhig gis mthong nas tshe dang ldan pa khyod nyin gcig bzhin der 'gro na/ ci de khyod kyi nye du'i khyim 'am sbyin bdag gi khyim yin/ des smras pa/ tshe dang ldan pa 'di kho bo'i nye du'i khyim yang ma yin/ sbyin bdag gi khyim yang ma yin te/ 'di ltar kho bo'i lhung bzed rdol nas de glon du bcug pa na 'di sgyong bar byed pas de'i phyir 'dir 'gro'o/ /des smras pa/ tshe dang ldan pa khyod kyis lag bzo bden par smra ba dkon no zhes bya ba ma thos sam/ kho bo yang bzo shes mod kyi bcom ldan 'das kyis ma gnang ngo zhes zer ba'i skabs de dge slong dag gis thos nas bcom ldan 'das la gsol pa dang / bcom ldan 'das kyis bka' stsal pa/ de lta bas na dge slong bzo bo dag yod na/ des dben pa'i phyogs su lhung bzed klan par rjes su gnang ngo / / de dge slong de'i gan du song ste smras pa/ tshe dang ldan pa bcom ldan 'das kyis gnang gis lhung bzed 'di klon cig /des smras pa/ tshe dang ldan pa 'di lag pa 'ba' shig gis glan du mi rung gi mgar spyad dag kyang dgos so zhes zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge 'dun gyi ched du mgar spyad nye bar gzhag par rjes su gnang ngo / /gleng gzhi ni mnyan yod na'o/ /dge slong dag gi chos gos dra dgos par gyur pa de dag lag pa dag gis 'dral nas ma legs par gyur nas/ bcom ldan 'das kyis bka' stsal pa/ lag pas dral bar mi bya bar gri 'us dra bar bya'o/ /bcom ldan 'das kyis gri 'us dra bar bya'o zhes bka' stsal pa dang / dge slong zhig gi chos gos dra dgos nas des khyim bdag las gri brnyas te dras nas/ des de khyim bdag de la slar byin pa dang / des smras pa/ 'phags pa khyod nyid kyi lags so/ / bzhin bzangs bcom ldan 'das kyis ma gnang ngo zhes zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na dge slong gis gri'u bcang bar rjes su gnang ngo / /bcom ldan 'das kyis gri'u bcang bar bya'o zhes bka' stsal pa dang / drug sde dag gser dang / dngul dang / bai dUr+ya dang / shel las byas pa'i gri yu ba bsrub pas sbyangs pa dag 'chang nas/ bram ze dang khyim bdag dag gis smras pa/ 'phags pa dag 'di ci lags/ de dag gis smras pa/ bcom ldan 'das kyis gri rjes su gnang ba'o/ /'phags pa dag dge sbyong khyed cag ni 'dod pa'i yon tan dag gis gzir to zhes byas pa dang / de dag spobs pa med par gyur nas cang mi smra bar 'khod pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong gis gser dang / dngul dang / bai dUr+ya dang shel las byas pa'i gri yu ba khra bo dang / bkra ba bcang bar mi bya bar lcags kyi gri'u bcang bar bya'o/ /bcom ldan 'das kyis lcags kyi gri'u bcang bar bya'o zhes bka' stsal pa dang / de dag gri ha cang chen po dag 'chang nas/ bram ze dang khyim bdag dag gis smras pa/ 'phags pa dag 'di ci lags/ bzhin bzangs dag gri'u yin no/ /'phags pa dag gri lags kyi gri'u ni ma lags so zhes zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ gri ha cang chen po dag bcang bar mi bya'o/ /dge slong dag gis gri ha cang chung ngu 'chang bar byed pa na des bya ba ci yang mi nus nas/ bcom ldan 'das kyis bka' stsal pa/ gri'u chen po dang 'bring dang / chung ngu rnam pa gsum bcang bar bya ste/ de la chen po ni sor drug go/ /chung ngu ni sor bzhi'o/ /de dag gi bar ma ni 'bring ngo / /gleng gzhi ni mnyan yod na'o/ /dge slong rnams kyi chos gos dag drub dgos par gyur pa na dge slong dag gis smyug ma'i tshal pa dang / bya gag gi gshog shing gis 'drub pa na/ de dag ral nas bcom ldan 'das kyis bka' stsal pa/ khab bcang bar bya'o/ /dge slong zhig gi chos gos drub dgos nas/ des khyim bdag las khab brnyas te drubs nas des de khyim bdag de la phyir byin pa dang / des smras pa/ 'phags pa khyod nyid kyi lags so/ /bzhin bzangs bcom ldan 'das kyis ma gnang ngo zhes zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na dge slong gis khab bcang bar rjes su gnang ngo / /bcom ldan 'das kyis dge slong gis khab bcang bar bya'o zhes bka' stsal pa dang / drug sde dag gser dang / dngul dang bai dUr+ya dang / shel las byas pa'i khab dag 'chang nas/ bram ze dang khyim bdag dag gis smras pa/ 'phags pa dag 'di ci lags de dag gis smras pa/ bcom ldan 'das kyis khab rjes su gnang ba'o/ /'phags pa dag dge sbyong khyed cag ni 'dod pa'i yon tan dag gis gzir ba'o zhes byas pa dang / de dag spobs pa med par gyur nas cang mi smra bar 'khod pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa dge slong gis gser dang / dngul dang bai dUr+ya dang / shel las byas pa'i khab bcang bar mi bya bar khab rnam pa bzhi po 'di lta ste/ ra gan dang / zangs dang / khar ba dang / lcags las byas pa dag bcang bar bya'o/ /bcom ldan 'das kyis dge slong gis khab rnam pa bzhi po dag bcang bar bya'o zhes bka' stsal pa dang / dge slong dag gis bab bab tu bzhag ste/ de dag btsa' zhugs par gyur nas/ bcom ldan 'das kyis bka' stsal pa/ khab ral bcang bar bya'o/ /dge slong dag gis khab ral ci 'dra bar bcang bar bya ba mi shes nas/ bcom ldan 'das kyis bka' stsal pa/ khab ral ni rnam pa gnyis te/ sbu bu can dang / chang ba lta bu'o/ /dge slong dag gis chang ba lta bu'i khab ral du gri'u bcug nas de ral bar gyur pa dang / bcom ldan 'das kyis bka' stsal pa/ gri'u ni rnam pa gnyis su bya ste/ bya rog gi mchu dang / bya gag gi gshog pa lta bur bya'o/ /gleng gzhi ni mnyan yod na'o/ /bcom ldan 'das kyis dge slong rnams kyis chos gos snam sbyar dag bya'o zhes bka' stsal pa dang / dge slong rnams sa la brkyang ste 'dra bar byed pa na rdul dag gis dri ma can du gyur cing / sril dag gis kyang ma rung bar byas nas/ bcom ldan 'das kyis bka' stsal pa/ sa la bting ste dra bar mi bya bar gtan pa dag bya'o/ /dge slong dag gis gtan pa ji ltar bya ba mi shes nas/ bcom ldan 'das kyis bka' stsal pa/ gtan pa ni rnam pa gnyis ste/ shing dang smyug ma las gru bzhir byas pa dag go/ /dge slong dag gis phur bur brgyangs pa dang ral nas/ bcom ldan 'das kyis bka' stsal pa/ bu gu byas la sgrog zungs kyis brgyang bar bya'o/ /gleng gzhi ni mnyan yod na'o/ /bcom ldan 'das kyis chos gos rnam pa gsum po chen po/ dang 'bring dang / chung ngu'o zhes bka' stsal pas chos gos chen po brgyang ba'i gtan pa gang yin pa de la 'bring po dang chung ngu brgyang du mi rung nas/ bcom ldan 'das kyis bka' stsal pa/ gtan pa mang po dag bya'o/ sdom la/ me long dang ni chu dag dang / /de bzhin so mangs smyug shad gnyis/ /gtsug phud dang ni skra rings dang / /bsro gang lid tsha chen po'o/ /gleng gzhi ni mnyan yod na'o/ /drug sde dag snga dro sham thabs bgos/ lhung bzed dang chos gos thogs te/ mnyan yod du bsod snyoms la zhugs pa dang / de dag gis bram ze dang khyim bdag dag gis byi dor gyi yo byad gos kyi sprog ma'i steng du bzhag pa mthong nas/ drug sde dag gis de dag gi me long blangs te bzhin bltas nas smras pa/ dga' bo nye dga' bo ji lta bdag cag bzang ngam/ bram ze dang khyim bdag dag gis smras pa/ 'phags pa dag khyed mgo ni bregs la mchan khung ni ral bu can du 'dug na khyed kyi gdong mdzes par ga la 'gyur/ dge sbyong 'di dag ni 'dod pa'i yon tan dag gis gzir bar nges so zhes byas pa dang / de dag cang mi smra bar 'khod pa'i skabs de dge slong dag gis thos nas/ bcom ldan 'das la gsol pa dang / bcom ldan 'das kyis bka' stsal pa/ de lta bas na dge slong gis me long la bzhin brtag par mi bya'o/ /rtog par byed na 'gal tshabs can du 'gyur ro/ /bcom ldan 'das kyis dge slong gis me long la bzhin brtag par mi bya'o zhes bka' stsal pa dang / de dag gis chu dag la bzhin brtag par brtsams nas/ bcom ldan 'das kyis bka' stsal pa/ chu la yang bzhin brtag par mi bya'o/ /bcom ldan 'das kyis dge slong gis chu la yang bzhin brtag par mi bya'o zhes bka' stsal pa dang / dge slong dag chu la rtog par byed pa na bzhin mthong nas de dag 'gyod par gyur nas/ bcom ldan 'das kyis bka' stsal pa/ chu brtag pa dang / rma dang / gnyer ma dang / rgas pa dang / lus kyi gnas skabs snga phyir brtag pa'i phyir bltas pa la ltung ba med do/ /gleng gzhi ni mnyan yod na'o/ /drug sde dag snga dro sham thabs bgos lhung bzed dang chos gos thogs te mnyan yod du bsod snyoms la zhugs pa dang / de dag gis bram ze dang khyim bdag dag gis byi dor gyi yo byad gos kyi sprog ma'i steng du bzhag pa mthong nas/ drug sde dag gis de dag gi so mangs blangs te skra bshad nas smras pa/ dga' bo nye dga' bo ji lta bdag cag bzang ngam/ bram ze dang khyim bdag dag gis smras pa/ 'phags pa dag khyed mgo ni bregs la mchan khung ni ral bu can du 'dug na khyed kyi skra mdzes par ga la 'gyur/ dge sbyong 'di dag ni 'dod pa'i yon tan dag gis gzir bar nges so zhes byas pa dang / de dag cang mi smra bar 'khod pa'i skabs de dge slong rnams kyis thos nas bcom ldan 'das la gsol pa dang / bcom ldan 'das kyis bka' stsal pa/ de lta bas na dge slong gis so mangs kyis skra bshad par mi bya'o/ /bshad par byed na 'gal tshabs can du 'gyur ro/ /gleng gzhi ni mnyan yod na'o/ /bcom ldan 'das kyis dge slong gis so mangs kyis skra bshad par mi bya'o zhes bka' stsal pa dang / drug sde dag gis smyug shad kyis bshad par brtsams pa na/ bcom ldan 'das kyis bka' stsal pa/ smyug shad kyis kyang bshad par mi bya'o/ /bshad par byed na 'gal tshabs can du 'gyur ro/ /gleng gzhi ni mnyan yod na'o/ /bcom ldan 'das kyis dge slong gis smyug shad kyis skra bshad par mi bya'o zhes bka' stsal pa dang / de dag gis phyogs gcig ni so mangs su byas la/ phyogs gcig ni smyug shad du byas pas skra bshad par byed nas/ bcom ldan 'das kyis bka' stsal pa/ so mangs dang / smyug shad gnyi gas kyang skra bshad par mi bya'o/ /gleng gzhi ni mnyan yod na'o/ / gang gi tshe khyim bdag mgon med zas sbyin gyis sangs rgyas la sogs pa dge slong gi dge 'dun la rgyal byed kyi tshal phul ba de'i tshe des 'breg mkhan zhes bya ba la sogs pa snga ma ji lta ba bzhin no/ /nye dgas smras pa/ bzhin bzangs gtsug pud 'jog shes sam/ 'phags pa de ni bdag gi sug las lags so/ /bltas zhog shig /'phags pa ji ltar gzhag par bgyi/ chen por ro/ /des gtsug pud chen por bzhag pa dang / nye dgas smras pa/ phyogs gcig bregs shig / des phyogs gcig bregs pa dang / des smras pa/ gnyis pa dang / gsum pa zhes bya ba nas phyogs bdun pa'i bar bregs shig ces zer nas/ des phyogs bdun pa'i bar du bregs pa dang / nye dgas smras pa/ bkren pa khyod ko ci yang mi shes pa zhig gis snga ma kho na bzhin du byos te song shig ces bya ba la sogs pa snga ma ji lta ba bzhin no/ /bcom ldan 'das kyis bka' stsal pa/ de lta bas na dge slong gis gtsug pud gzhag par mi bya'o/ /'jog par byed na 'gal tshabs can du 'gyur ro/ /gleng gzhi ni mnyan yod na'o/ /tshe dang ldan pa ba lang gnas kau sham bi na ri chus bskor la bad sa'i rgyal po 'char byed kyi bskyed mos tshal gyi phag mo'i phug na 'dug go/ /de nas dus gzhan zhig na/ gang gi tshe dpyid kyi dus la bab pa de'i tshe shing ljon pa dag me tog rgyas shing ngang pa dang / khrung khrung dang / rma bya dang / ne tso dang / ri skegs dang / khu byug dang / shang shang te'u dag tshal gyi nang na sgra 'byin par byed pa na/ bad sa'i rgyal po 'char byed kyis bskyed mos tshal srung ba'i mi bos te/ smras pa/ kwa'i mi khyod tshur shog /nga bskyed mos tshal du 'gros/ ri chus bskor gyi nyen kor gyi rdo ba dang / gseg ma dang / gyo mo thams cad sol la/ chu ra dag kyang zhog ste/ tshal rtogs la/ la gcan pa dag kyang bskos shig /bskyed mos tshal srung ba'i mis lha bka' bzhin 'tshal zhes bad sa'i rgyal po 'char byed kyi tshig mnyan nas/ ri chus bskor gyi nyen bskor gyi rdo ba dang / gseg ma dang / gyo mo thams cad bsal nas/ chu ra dag kyang bzhag ste/ tshal brtags shing la gcan pa dag kyang bskos nas bad sa'i rgyal po 'char byed ga la ba der song ste/ phyin nas bad sa'i rgyal po 'char byed la 'di skad ces smras so/ /lha 'di ltar mkhyen par mdzad du gsol/ /ri chus bskor gyi gor ma dang / gseg ma dang / gyo mo thams cad bsal cing chu ra dag kyang bzhag ste/ tshal kyang brtags/ la gcan pa dag kyang bskos lags na/ lha da de'i dus la bab par mkhyen par mdzad du gsol/ de nas bad sa'i rgyal po 'char byed btsun mo'i tshogs kyis yongs su bskor nas bskyed mos tshal du song ste/ des der dga' ba dang / rtse ba dang / dga' mgur spyod pa nyams su myong bar byas nas de gnyid log par gyur to/ / bud med rnams kyi rang bzhin ni me tog dang 'bras bu la dga' ba yin pas/ de'i btsun mo'i 'khor rnams bskyed mos tshal der ci dgar rgyu zhing khyam du dong ba dang / de'i tshe tshe dang ldan pa ba lang gnas skra dang kha spu ring zhing chos gos rnying pa dang / sham thabs hrul po bgos nas shing ljon pa zhig gi drung na rten cing 'dug go/ /tshe dang ldan pa ba lang gnas skra dang kha spu ring zhing / chos gos rnying pa dang / sham thabs hrul po bgos nas 'dug pa btsun mo'i 'khor de dag gis mthong ngo / /mthong nas kyas bsngangs te/ a tsi lha cig 'di na 'dre zhig gda'o/ /a tsi lha cig 'di na 'dre zhig gda'o zhes bred skad phyung ba dang / tshe dang ldan pa ba lang gnas de nas langs te rings pa rings par phag mo'i phug tu song ngo / /sgra des rgyal po sad nas ral gri shubs nas phyung ste/ brgyugs nas bud med dag 'dre ga la 'dug ces smras pa dang / de dag gis smras pa/ lha cig phag mo'i phug tu mchis so/ /de nas bad sa'i rgyal po 'char byed mtshon thogs te phag mo'i phug sgor bsdad nas smras pa/ kwa'e 'byung po khyod su zhig /des smras pa/ lha dge sbyong lags so/ /khyod gang gi dge sbyong yin/ shAkya'i sras kyi dge sbyong lags so/ /ci khyod dgra bcom 'am/ lha ma lags so/ /'o na khyod phyir mi 'ong ba 'am/ lan cig phyir 'ong ba 'am/ rgyun du zhugs pa zhig yin nam/ lha ma lags so/ / 'o na ci khyod bsam gtan bzhi pa thob pa yin nam lha ma lags so/ /'o na khyod bsam gtan gsum pa 'am/ gnyis pa 'am/ dang po thob pa zhig yin nam/ lha ma lags so zhes byas pa dang / rgyal po btsun mo'i 'khor la phrag dog za bas phyir lhag par khros te/ blon po rnams la smras pa/ kwa'e shes ldan dag dge sbyong so so'i skye bo 'dis nga'i btsun mo'i 'khor rnams ma rung bar byas kyis rnga mo'i grog ma chen po dag 'dir myur du lhogs shig dang / de dag gis phug 'di khyab par bkang ste dge sbyong 'di gsad par bya'o/ /de nas phag mo'i phug na gnyug mar gnas pa'i lha zhig 'dug pa des bsams pa/ rgyal po gtum po 'dis bdag la skyabs su 'ongs pa'i dge sbyong nyes pa med pa skyon med pa bsad par gyur na mi rung gis/ bdag gis 'di thar bar bya ba'i thabs shig la brtson par bya'o snyam nas de bdag nyid phag mo chen mo'i gzugs su mngon par sprul te/ phug nas sgor byung ngo / /rgyal po de lings la dga' bas mi zhig la smras pa/ kwa'e mi 'di song la nga'i rta dang mda' gzhu dag khyer te shog shig /des rgyal po'i rta dang mda' gzhu dag phul lo/ /de nas phag mo de skyed mos tshal gyi nang nas phyir byung ste 'bros par brtsams pa dang / rgyal po de de'i phyi bzhin snyegs su 'gro ba na des thag ring du khrid de song ngo / /de nas btsun mo'i 'khor gyi tshogs kyis tshe dang ldan pa ba lang gnas la smras pa/ 'phags pa rgyal po 'di ni gtum pa lags pas khyod bkrongs par gyur na ma legs kyis khyod da myur du bzhud cig / tshe dang ldan pa ba lang gnas kyis myur ba myur bar lhung bzed dang / chos gos blangs te/ skyed mos tshal de nas phyir byung nas mnyan yod du song ngo / /de khad kyis mnyan yod du phyin pa dang / dge slong dag gis mthong nas smras pa/ tshe dang ldan pa 'ongs pa legs so/ /'ongs pa legs so/ /khyod yun ring po ring po nas zla ba bzhin du rgyu zhing ga las 'ongs/ kau sham bi nas so/ /ji lta tshe dang ldan pas bde bar brgyus sam/ tshe dang ldan pa dag ji ltar bde bar brgyus/ bdag bad sa'i rgyal po 'char byed kyis had por de'u bsad do/ /ci'i phyir/ des rgyas par smras pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis dge slong zhig la bka' stsal pa dge slong tshur shog / khyod dge slong ba lang gnas ga la der song la ba lang gnas la 'di skad ces ston pas bka' stsal pa/ khyod spyan sngar mchi shig ces byung ngo zhes sgo shig /dge slong des btsun pa bka' bzhin 'tshal zhes bcom ldan 'das kyi bka' mnyan nas/ tshe dang ldan pa ba lang gnas ga la ba der song ste phyin nas tshe dang ldan pa ba lang gnas la 'di skad ces smras so/ /ston pas bka' stsal pa/ khyod spyan sngar mchi shig ces byung ngo / /tshe dang ldan pa ba lang gnas kyis tshe dang ldan pa bka' bzhin 'tshal zhes dge slong de'i tshig mnyan nas bcom ldan 'das ga la ba der song ste phyin nas bcom ldan 'das kyi zhabs gnyis la mgo bos phyag 'tshal te mtha' gcig tu 'dug go/ /mtha' gcig tu 'dug nas bcom ldan 'das kyis tshe dang ldan pa ba lang gnas la 'di skad ces bka' stsal to/ /dge slong khyod bad sa'i rgyal po 'char byed kyis ci'i phyir de'u bsad/ des bcom ldan 'das la skabs de rgyas par gsol pa dang / bcom ldan 'das kyis bka' stsal pa/ 'di ltar mi gti mug can khyod phug de la lhag par chags pas des na khyod shin tu sdug bsngal bar gnas par gyur to/ /de cang mi smra bar 'dug nas/ bcom ldan 'das kyis dge slong dag la nyes migs cung zad gang byung ba de ni skra ring por 'jog pa las gyur par mkhyen nas/ bka' stsal pa/ de lta bas na dge slong gis skra ring por gzhag par mi bya'o/ /'jog na 'gal tshabs can du 'gyur ro/ /bcom ldan 'das kyis dge slong gis skra ring por gzhag par mi bya'o zhes bka' stsal pa dang / dge slong dgon pa pa dag gis 'breg mkhan ma rnyed nas de dag gis dgon pa'i gnas mal spangs nas grong mtha'i gnas mal dag tu 'khod do/ /sangs rgyas bcom ldan 'das rnams ni mkhyen bzhin du rmed pas/ sangs rgyas bcom ldan 'das kyis tshe dang ldan pa kun dga' bo la rmas pa/ kun dga' bo ci'i phyir dge slong dgon pa pa dag gis dgon pa'i gnas mal spangs nas grong mtha'i gnas mal dag tu 'khod par gyur/ des bcom ldan 'das la skabs de rgyas par gsol pa dang / /bcom ldan 'das kyis bka' stsal pa/ de lta bas na dge slong dgon pa pas ni skra sor gnyis kyi tshad du gzhag par rjes su gnang ngo / /grong mtha' bas ni de bas thung ngur bya'o/ /gleng gzhi ni mnyan yod na'o/ /mnyan yod na dge slong nad pa zhig 'dug pa de sman pa'i gan du song nas smras pa/ bzhin bzangs bdag la sman ston cig / des smras pa/ 'phags pa bsro gang sten cig dang khyod sos par 'gyur ro/ /des smras pa/ bzhin bzangs ci kho bos 'dod pa dag spyad par bya 'am/ 'phags pa khyod kyi sman ni 'di lags kyi gzhan gyis 'tsho bar mi 'gyur ro zhes zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ gal te sman pas dge slong khyod kyi sman ni 'di yin gyi/ gzhan gyis 'tsho bar mi 'gyur ro zhes bsgo na dge slong gis bsro gang bsten par bya'o/ /bcom ldan 'das kyis dge slong gis bsro gang bsten par bya'o zhes bka' stsal pa dang / dge slong dag gis sman pa de la dris pa/ bzhin bzangs bcom ldan 'das kyis gnang na bsro gang ji lta bu yin pa smros shig / des smras pa/ 'phags pa bdag gis 'khor los sgyur ba'i gso ba blags pa las bsro gang bsro gang zhes 'byung bar bas kyi bsro gang ji lta bu lags pa da dung ma 'tshal te/ 'di ltar khyod nyid kyi ston pa thams cad mkhyen pa lags pas de nyid mkhyen to zhes zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ bsro gang gi khang pa zlum po bya'o/ /de dag skar khung mi dod nas bcom ldan 'das kyis bka' stsal pa/ skar khung gdod par bya'o/ /de dag skar khung phyi yangs la nang dog pa byed du 'jug nas/ bcom ldan 'das kyis bka' stsal pa/ phyi rub la nang yangs pa rgya mtsho'i rnam pa lta bur bya'o/ /de dag gis mthon por gtod pa na mun gnag par gyur nas/ bcom ldan 'das kyis bka' stsal pa/ ha cang mthon por gdod par mi bya'o/ /de dag gis dma' bar btod pa na du ba 'tshang du mi btub nas/ bcom ldan 'das kyis bka' stsal pa/ ha cang dma' bar gdod par mi bya'o/ /de dag gis gar gdod mi shes nas/ bcom ldan 'das kyis bka' stsal pa/ dkyil du gdod par bya'o/ /bye'u dang phug ron dag 'jug nas/ bcom ldan 'das kyis bka' stsal pa/ skar khung dra ba can bya'o/ /rlung dang char chu'i zer ma dag nang du 'ong nas/ bcom ldan 'das kyis bka' stsal pa/ skar khung la sgo glegs gzhug par bya'o/ /rlung gis bskyod 'dug tu mi btub nas bcom ldan 'das kyis bka' stsal pa/ 'khor gtan dang / gnam gzer dang / phred gtan gzhug par bya'o/ /dbye ba dang bcad pas dge slong dag nyon mongs par gyur nas/ bcom ldan 'das kyis bka' stsal pa/ dbyug gu skam kha nye bar gzhag par bya'o/ /sgo la sgo glegs mi 'jug nas/ bcom ldan 'das kyis bka' stsal pa/ sgo glegs gzhug par bya zhing sgo gtan yang gzhug par bya ste/ de la yang mig dang / lag zungs kyang gzhug par bya'o/ /chu dag dma' ba'i phyogs su bzhag pas de grangs par gyur nas/ bcom ldan 'das kyis bka' stsal pa/ nang gi phyogs su gzhag bstegs bya zhing der bum pa dag gzhag par bya'o/ /sa gzhir me bus pas des zhal zhal ma rung bar gyur nas/ bcom ldan 'das kyis bka' stsal pa/ so phag gi gcal dgram par bya'o/ /de dag gis me bdal pa dang de shi nas/ bcom ldan 'das kyis bka' stsal pa/ bdal nas de bzhin mi dor bar bcer te gzhag par bya'o/ /de dag gis cis bcer ba mi shes nas/ bcom ldan 'das kyis bka' stsal pa/ lcags kyi thal phyags byas la des bcer bar bya'o/ /de dag me 'bar ba na bsro gang gi nang du 'jug cing rmya bar gyur nas/ bcom ldan 'das kyis bka' stsal pa/ me 'bar ba na 'jug par mi bya'o/ /dge slong dag der zhugs pa na me'i dugs kyis bog par gyur nas de dag myos te sa la sgyel nas/ bcom ldan 'das kyis bka' stsal pa/ phye dang yungs mar du bsres pa dag mer glugs par bya'o/ /dri mi zhim par gyur nas/ bcom ldan 'das kyis bka' stsal pa/ bdug spos glugs par bya'o/ /dud pas dge slong dag mchi ma 'dzag nas/ bcom ldan 'das kyis bka' stsal pa/ nas kyi bag zan gyi chang bus glan par bya'o/ /'on kyang 'dzag nas/ bcom ldan 'das kyis bka' stsal pa/ skyu ru ra'i chang bus glan par bya'o/ /stan med nas dge slong dag gis stan khyer te song ba dang / de dag 'bru mar gyis snums par gyur nas/ bcom ldan 'das kyis bka' stsal pa/ rtswa bam dag gzhag par bya'o/ /rkang pa dag sa la bzhag pas rdul gyis gos nas/ bcom ldan 'das kyis bka' stsal pa/ sa gzhir rtswa dag dgram par bya'o/ /skam po dag bting ba na me stag gis tshig nas/ bcom ldan 'das kyis bka' stsal pa/ sngon po dag dgram par bya'o/ /sngon po dag ma rnyed nas/ bcom ldan 'das kyis bka' stsal pa/ chus sbangs la dgram par bya'o/ /dge slong dag 'bru mar gyis snums pa na 'jag ma dang gseg ma dag gis lus la phrugs pas rma byung nas/ bcom ldan 'das kyis bka' stsal pa/ lcags kyi phrug spyad bya'o/ /de bab bab tu bzhag pas de ma rung bar gyur nas/ bcom ldan 'das kyis bka' stsal pa/ lung mig byas la the gus btags te rdzas kyi blas dben par gzhag par bya'o/ /de snums par gyur nas dge slong dag de yang dang yang du sbyong bar byed nas bcom ldan 'das kyis bka' stsal pa/ mes rung bar bya'o/ /dge slong dag gis der khrus byas pas 'dam rdzab tu gyur nas/ bcom ldan 'das kyis bka' stsal pa/ der khrus mi bya bar khrus khang byas la der khrus bya'o/ / gang dag khrus byed pa de dag la chus gnod par gyur nas/ bcom ldan 'das kyis bka' stsal pa/ khrus dong brkos la so phag gis bsgron te gang khrus byed pa de khrus dong du zhugs la gang khrus chu ldugs pa de ni khar 'dug ste khrus chu glugs par bya'o/ /de chus gang nas/ bcom ldan 'das kyis bka' stsal pa/ stor khung gdod par bya'o/ /dge slong dag khrus byas nas 'dag rdzas dang / ba lang gi lci ba dang / so shing len du gtsug lag khang du 'dong nas/ bcom ldan 'das kyis bka' stsal pa/ de nyid du 'dag rdzas dang / ba lang gi lci ba dang / so shing gis bkang ba'i gyo mo dag gzhag par bya'o/ /dge slong dag me'i dugs kyis nyam dmas par gyur nas/ bcom ldan 'das kyis bka' stsal pa/ khye'u sus bza' bar bya'o/ /de dag lag pa bsnyal bas thogs par gyur nas/ bcom ldan 'das kyis bka' stsal pa/ kha gzar bcang bar bya'o/ /dge slong zhig gis khye'u sus thugs pa ha cang tsha ba zhig rnyed nas/ bcom ldan 'das kyis bka' stsal pa/ kha gzar gyis btung bar bya'o/ /de la lan tshwa dgos pa dang / lo ma dag ma rnyed nas/ bcom ldan 'das kyis bka' stsal pa/ tshwa khug bcang bar bya'o/ / bcom ldan 'das kyis bsro gang du byi dor gyi las bya'o zhes bka' stsal pa dang / dge slong dag gis byi dor gyi las sus bya ba mi shes nas/ bcom ldan 'das kyis bka' stsal pa/ lhan cig gnas pa dang / nye gnas dag gis bya'o/ /de dag gi ni gcig gis gcig la bya'o/ /de ltar bsro gang yo byad dang bcas pa rjes su gnang ngo / /gleng gzhi ni mnyan yod na'o/ /de'i tshe yangs pa can na li tsha bi chen po zhes bya ba g.yo sgyu med pa drang po drang ba'i rang bzhin can zhig 'dug pa de nyin gcig bzhin bcom ldan 'das kyi zhabs la phyag 'tshal du 'gro ba yin pas de bcom ldan 'das kyi spyan sngar 'gro ba'i tshe dge slong mdza' bo dang / sa las skyes kyang ljongs rgyu zhing 'gro ba na yangs pa can du phyin nas de gnyis kyis de lam kar mthong nas de gnyis kyis smras pa/ chen po gar 'gro/ des smras pa/ 'phags pa gnyis bcom ldan 'das kyi zhabs la phyag 'tshal du mchi'o/ /de gnyis tshe dang ldan pa gyad bu nor dang / tshe rabs tshe rabs su khon yod pas de gnyis kyis smras pa/ chen po sangs rgyas bcom ldan 'das la ni gtam gyi skyes dbul bar bya ba yin na/ khyod la gtam gyi skyes cung zad yod dam/ 'phags pa gnyis ma mchis so/ /chen po tshur shog / khyod bcom ldan 'das ga la ba der song ste phyin nas/ bcom ldan 'das la 'di skad ces/ btsun pa 'di ltar 'phags pa gyad bu nor gyis bdag gi mchis brang dang lhan cig mi tshangs par spyad de pham par gyur pa de ni mi mdzes shing tshul dang / 'thun pa ma lags so zhes gsol cig dang / bcom ldan 'das khyod la dgyes par 'gyur ro/ /des 'phags pa gnyis de bzhin 'tshal lo zhes smras te/ bcom ldan 'das ga la ba der song ste phyin nas/ bcom ldan 'das kyi zhabs gnyis la mgo bos phyag 'tshal te/ bcom ldan 'das la 'di skad ces btsun pa 'di ltar 'phags pa gyad bu nor gyis bdag gi mchis brang dang lhan cig mi tshangs par spyad de pham par gyur pa de ni mi mdzes shing tshul dang 'thun pa ma lags so zhes gsol nas song ngo / /de nas bcom ldan 'das kyis dge slong rnams la bka' stsal pa/ dge slong dag lid tsa bi chen po dang / gzhan yang de lta bu gang yin pa la lhung bzed khas dbub par bya'o/ /khas dbub pa ni 'di ltar bya ste/ gnas mal bshams pa byas nas/ gaN DI brdungs te dris pa'i tshig gis dge slong rnams la yang dag par bsgo nas dge 'dun thams cad 'dug cing 'thun par gyur pa la dge slong gcig gis gsol ba 'ba' shig gis las bya ste/ dge 'dun btsun pa rnams gsan du gsol/ lid tsa bi chen pos tshe dang ldan pa gyad bu nor la yang dag pa ma lags pas skur na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis lid tsa bi chen po la lhung bzed khas dbub par bgyi'o/ /'di ni gsol ba'o/ /dge 'dun gyis gang la lhung bzed khas phub pa de'i khyim du dge slong dag gis 'gro bar mi bya/ stan la longs spyod par mi bya/ bsod snyoms blang bar mi bya/ chos bstan par mi bya'o/ /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo song la lid tsa bi chen po la 'di skad ces/ khyod la dge 'dun gyis lhung bzed khas dbub pa mdzad do zhes sgo shig /tshe dang ldan pa kun dga' bos btsun pa bka' bzhin 'tshal zhes bcom ldan 'das kyi bka' mnyan nas lid tsa bi chen po'i khyim ga la ba der song ngo / /de'i tshe lid tsa bi chen po bya ba zhig gi ched du phyi rol du song ngo / /des de'i chung ma la smras pa/ sring mo lid tsa bi chen po gar song / /des smras pa/ 'phags pa slad rol du mchis so/ /sring mo 'di lta ste/ khyed la dge 'dun gyis lhung bzed khas dbub pa mdzad pa shes par byos shig /des smras pa/ btsun pa kun dga' bo lhung bzed khas dbub pa zhes bgyi ba ci lags/ sring mo gang la lhung bzed khas dbub pa de'i khyim du dge slong dag 'dong bar mi byed/ stan la longs spyod par mi byed/ bsod snyoms len par mi byed/ chos ston par mi byed do/ /'phags pa kun dga' bo dge 'dun gyis thabs kyis bdag gi tshul shing bor te dge 'dun la bdag cag gis nongs pa de lta bu ci zhig bgyis na de'i slad du lhung bzed khas dbub pa mdzad/ sring mo 'di ltar khyod kyi khyim thab bcom ldan 'das ga la ba der song ste phyin nas/ bcom ldan 'das la 'di skad ces btsun pa 'di ltar 'phags pa gyad bu nor gyis bdag gi mchis brang dang lhan cig mi tshangs par spyad de pham par gyur pa de ni mi mdzes shing tshul dang 'thun pa ma lags so zhes gsol to/ /de ngo tsha bar gyur nas khyim du zhugs pa dang / tshe dang ldan pa kun dga' bo phyir song ngo / /ji tsam na lid tsa bi chen po khyim du 'ongs nas/ chung mas smras pa/ rje'i sras 'o skol la dge 'dun gyis lhung bzed khas dbub pa mdzad do/ /bzang mo legs par lhung bzed khas phub bo/ /shin tu lhung bzed khas phub bo/ /rje'i sras legs par lhung bzed khas phub bo/ /shin du lhung bzed khas phub bo zhes gsungs ngam/ khas phub bzhes bgyi ba ji mkhyen tam/ mi shes so/ /rje'i sras gang la lhung bzed khas phub pa de'i khyim du dge slong dag 'ong bar mi bgyid/ stan la longs spyod par mi bgyid/ bsod snyoms len par mi bgyid/ chos ston par mi bgyid do/ /rje'i sras ci khyod kyis 'phags pa gyad bu nor dang bdag lhan cig mchis pa gzigs sam/ bzang mo ma mthong ngo / /'o na ci ste 'phags pa la yang dag pa ma lags pas skur/ gal te nga yang 'di ltar bcom ldan 'das dang dge slong gi dge 'dun bzod pa gsol na de lta na legs/ mi gsol na khyod kho mo'i khyim du mi gzhug go zhes byas pa dang / de sems khongs su chud cing 'dug ste bsams pa 'dis ji skad smras pa de bzhin 'gyur bas bzod pa gsol du 'gro'o snyam nas/ de bcom ldan 'das kyi spyan sngar song ste phyin nas zhabs gnyis la mgo bos phyag 'tshal te 'di skad ces gsol to/ /bcom ldan 'das bdag gi kun du spyod pa ni gdugs gcig bzhin nang par sngar langs nas/ bcom ldan 'das kyi zhabs la phyag 'tshal du mchi ba lags pas bdag la dge slong mdza' bo dang / sa las skyes gnyis kyi mchid nas chen po tshur shog /khyod bcom ldan 'das ga la ba der song ste zhes bya ba nas/ bdag gi mchis brang dang lhan cig mi tshangs par spyad de pham par gyur to zhes bya ba'i bar thams cad snga ma bzhin du sbyar ro/ /des btsun pa bdag gis ci nongs pa bzod par gsol zhes gsol pa dang / de nas bcom ldan 'das kyis dge slong rnams la bka' stsal pa/ dge slong rnams lid tsha bi chen po dang / gzhan yang de lta bu gang yin pa la lhung bzed phyir bzlog par bya'o/ /phyir bzlog pa ni 'di ltar bya ste/ gnas mal bsham pa byas nas gaN DI brdungs te/ dris pa'i tshig gis dge slong rnams la yang dag par bsgo nas dge 'dun thams cad 'dug cing 'thun par gyur pa la lid tsha bi chen pos phyag 'tshal nas rgan pa'i mtha' logs su tsog pur 'dug ste thal mo sbyar nas 'di skad ces brjod par bya'o/ /dge 'dun btsun pa rnams gsan du gsol/ bdag lid tsha bi chen po mi dge ba'i grogs pos bslus pas 'phags pa gyad bu nor la yang dag pa ma lags pas skur pas dge 'dun gyis bdag la lhung bzed khas dbub pa mdzad de/ bdag la lhung bzed khas phub pa/ dge 'dun las lhung bzed slar bzlog par gsol na/ thugs brtse ba can dge 'dun btsun pa rnams kyis lid tsha bi chen po bdag la thugs brtse ba'i slad du lhung bzed slar bzlog tu gsol/ de bzhin du lan gnyis lan gsum du bzlas de nas lid tsha bi chen po thos pa'i nyen kor nas bkar te mthong ba'i nyen kor du bzhag la dge slong gcig gis gsol ba 'ba' shig gis las bya'o/ /'di ltar bya ste/ dge 'dun btsun pa rnams gsan du gsol/ lid tsha bi chen po mi dge ba'i grogs pos bslus pa 'dis tshe dang ldan pa gyad bu nor la yang dag pa ma lags pas skur te/ dge 'dun gyis de la lhung bzed khas dbub pa mdzad pa las lid tsha bi chen po lhung bzed khas phub pa de dge 'dun las lhung bzed slar bzlog par gsol na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis lid tsha bi chen po la lhung bzed slar bzlog pa mdzad do/ /'di ni gsol ba'o/ /dge 'dun gyis gang la lhung bzed phyir bzlog pa de'i khyim du dge slong dag gis 'gro bar bya/ stan la longs spyad par bya/ bsod snyoms blang bar bya/ chos bstan par bya'o// // sdom la/ yan lag rnam pa me long dang / /gar dang glu dang rol mo'i sgra/ /skad kyi gtang rag gnang ba dang / /lhung bzed bzhi dang lhan cig pa'o/ /sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra na bzhugs so/ /mnyan yod na dge slong spong ba pa zhig gnas pa de gang gi tshe skyil mo dkrung bcas te 'dug go chog na de'i tshe yan lag gi rnam pa las su rung bar gyur to/ /de dus gzhan zhig na bsod snyoms brgyus nas zas kyi bya ba byas te/ phyi ma'i zas kyi bsod snyoms las phyir log pas lhung bzed dang chos gos mkhos su phab ste rkang pa gnyis bkrus nas shing ljon pa zhig gi drung du skyil mo dkrung bcas te yid la byed pa la zhugs shing 'dug pa na/ yang de'i yan lag gi rnam pa las su rung bar gyur nas des de ji ltar zhi bar 'gyur ba de ltar byas so/ /sems ni myur du 'gyur ba yin pas de sems yengs pa na yang dang yang du las su rung bar gyur nas de 'dod chags kyis kun nas dkris pa na/ zhe sdang chen po yang skyes nas des de rdo ba'i steng du bzhag nas rdo ba gzhan gyis brdungs so/ / de sdug bsngal gyi tshor bas gdungs nas bsams pa/ bdag sdug bsngal gyi tshor bas gdungs na/ bcom ldan 'das kyis mi dgongs pa lta zhig snyam pa dang / de nas bcom ldan 'das thugs rje chen po'i dbang gis der gshegs nas bka' stsal pa/ dge slong 'di ci nyes/ des ji ltar gyur pa gsol pa dang / bcom ldan 'das kyis bka' stsal pa/ dge slong ngas 'dod chags kyi gnyen po ni mi sdug pa bsgom pa'o zhes ma gsungs sam/ mi gti mug can brdungs bar bya ba ni gzhan yin na khyod kyis ni gzhan brdungs so/ /de cang mi smra bar 'dug pa dang / bcom ldan 'das kyis dge slong rnams la bka' stsal pa/ dge slong dag khyed kyis chos gcig bsgoms na phyir mi 'ong bar 'gyur bar nga khas 'che ste/ de ni 'di lta ste/ lus la dmigs pa'i dran pa'o/ /dge slong dag khyed kyis lus la dmigs pa'i dran pa bsgoms shig dang / phyir mi 'ong bar 'gyur bar nga khas 'che'o/ / de lta bas na dge slong gis brdung bar bya ba gzhan yin la gzhan brdung bar mi bya'o/ /rdung na 'gal tshabs can du 'gyur ro/ /sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na khyim bdag gcig 'dug pa des rigs mnyam pa las chung ma blangs nas de de dang lhan cig rtse bar byed/ dga' bar byed/ dga' mgur spyod par byed do/ /des rtse ba dang dga' ba dang / dga' mgur spyad pas de'i chung ma la sems can zhugs par gyur to/ /de zla ba brgyad dam dgu 'das te btsas pa las khye'u gzugs bzang ba blta na sdug pa mdzes pa zhig byung ngo / /de dus gzhan zhig na legs par gsungs pa'i chos 'dul ba la rab tu byung nas de dus chung zhig ljongs su 'dug nas lhung bzed dang chos gos thogs te ljongs rgyu zhing song ngo / /de ljongs rgyu zhing 'gro ba na gdong la phol mig byung nas des sman pa gtar ka byed du bcug pa dang / gdong mi sdug par gyur nas/ de dus gzhan zhig na mnyan yod du song ba dang / dge slong zhig gis 'jug tu ma ster to/ /de dge slong gzhan zhig gi gan du song nas smras pa/ btsun pas bdag mi mkhyen tam/ des smras pa/ bzhin bzangs mi shes na khyod gang zhig yin/ des smras pa/ bdag gi ming ni 'di zhes bya/ khyim bdag che ge mo zhig gi ni bu'o/ /rab tu ni der byung ngo / /yul de nas ni 'dir 'ongs so/ /des smras pa/ tshe dang ldan pa khyod bzhin bzang zhing mdog sdug pa yin na ci'i phyir khyod kyi bzhin mi sdug par gyur/ des ji ltar gyur pa kun smras pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong gi gdong me long dang 'dra ba yin pas de lta bas na dge slong gis gdong la sman pa gtar ka byed du gzhug par mi bya'o/ /byed du bcug na 'gal tshabs can du 'gyur ro/ /bcom ldan 'das kyis dge slong gi gdong la sman pa gtar ka byed du gzhug par mi bya'o zhes bka' stsal pa dang / dge slong dag khrag rgyas nas gtar ka gdab dgos par gyur pa na dge slong dag mi 'debs nas/ bcom ldan 'das kyis bka' stsal pa/ gtar kha gdab par bya ste/ 'di la 'gyod par mi bya'o/ /sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe mnyan yod na dga' 'dun gnyis shig yod de/ tshong pa'i dga' 'dun dang / ru ba'i dga' 'dun no/ /de gnyis las tshong pa'i dga' 'dun gyis ni ru ba'i dga' 'dun gar dang / glu dang / rol mo'i sgra dag gis pham par byed do/ /ru ba'i dga' 'dun gyis ni tshong pa'i dga' 'dun dgra thabs kyis pham par byed do/ /de nas dus gzhan zhig na ru ba'i dga' 'dun dag gis smras pa/ shes ldan dag 'di dag gis bdag cag gar dang glu dang / rol mo'i sgra dag gis pham par byas shing bdag cag gis kyang de dag dgra thabs kyis pham par byas na bdag cag gis kyang thabs ji lta bu zhig gis de dag gar dang glu dang / rol mo'i sgra dag gis pham par bya/ de dag las kha cig gis smras pa/ de bzhin te bdag cag gis kyang gar dang / glu dang / rol mo'i sgra dag bslab par bya'o/ /kha cig gis smras pa/ legs so su las bslab par bya/ de rnams kyis smras pa/ 'phags pa drug sde dag gar dang glu dang / rol mo'i sgra dag la mkhas pas de dag las bslab par bya na de dag ni 'dod pa'i bdag nyid can yin pas gal te cung zad cig slong na yang sbyin par bya'o/ /de rnams kyis smras pa/ legs so/ /de bzhin du sbyin par bya'o/ /de rnams drug sde dag ga la ba der dong ste phyin nas rkang pa la phyag 'tshal te smras pa/ 'phags pa dag bdag cag la gar dang glu dang / rol mo'i sgra dag bslab tu gsol/ de dag gis smras pa/ shes ldan dag gal te bca' ba'i rin dag nged la sbyin na bslab par bya'o/ /'phags pa dag bdag cag la sman yon btags kyis dbul lo/ /de dag gis de rnams gar dang glu dang rol mo'i sgra dag bslabs so/ /gang gi tshe byang bar gyur pa de'i tshe de rnams kyis tshong pa'i dga' 'dun dag dgra thabs kyis kyang pham par byas shing gar dang glu dang / rol mo'i sgra dag gis kyang pham par byas shing gar dang glu dang rol mo'i sgra dag gis kyang pham par byas pa dang de dag gis smras pa/ bzhin bzangs dag sngon ni khyod cag gis nged dgra thabs kyis pham par byas shing / nged kyis kyang gar dang glu dang rol mo'i sgra dag gis khyed pham par byas na/ da ni khyod kyis kho bo cag gnyis kas pham par byas pa'i sbyor ba gang yin/ de rnams kyis smras pa/ da kho bo cag gis bslabs so/ /su las bslabs/ 'phags pa drug sde dag las so/ /de rnams shAkya'i sras kyi dge sbyong dag gi dge sbyong gi tshul ni tshig go/ /bram ze'i tshul ni tshig ste/ 'di ltar gar dang glu dang rol mo'i sgra dag kyang slob par byed do zhes smod par byed/ phyar ka gtong bar byed/ kha zer bar byed pa'i skabs de dge slong rnams kyis bcom ldan 'das la gsol pa dang / bcom ldan 'das kyis dgongs pa/ dge slong dag la nyes dmigs cung zad gang byung ba ni gar dang glu dang / rol mo'i sgra dag slob pa las gyur par mkhyen nas bka' stsal pa/ de lta bas na dge slong gis gar dang / glu dang rol mo'i sgra dag bslab par mi bya'o/ /slob na 'gal tshabs can du 'gyur ro/ /bcom ldan 'das kyis dge slong gis gar dang / glu dang / rol mo'i sgra dag bslab par mi bya'o zhes bka' stsal pa dang / dga' 'dun de rnams kyis brjed nas de rnams yang drug sde dag gis gan du dong ste smras pa/ 'phags pa dag bdag cag gis de bskyud par gyur na yang bslab tu gsol/ de dag gis smras pa/ bzhin bzangs dag bcom ldan 'das kyis dge slong gis gar dang / glu dang / rol mo'i sgra dag bslab par mi bya'o zhes bslab pa'i gzhi bca' ba mdzad pas mi bslab bo/ /'phags pa dag gal te mi bslab na sbyang ba tsam mdzad cing gshegs su gsol/ de dag gis smras pa/ bzhin bzangs dag 'dong ngo / /de dag der dong nas sbyangs te de rnams kyis de dag pham par byas pa dang / yang dge sbyong gi tshul ni tshig go/ /bram ze'i tshul ni tshig go zhes bya ba nas smod par byed/ phyar ka gtong bar byed/ kha zer bar byed ces bya ba'i bar du snga ma bzhin no/ /skabs de dge slong rnams kyis bcom ldan 'das la gsol pa dang / bcom ldan 'das kyis dge slong dag la nyes dmigs cung zad gang byung ba ni gar dang glu dang / rol mo'i sgra dag sbyong bar byed pa las gyur par mkhyen nas bka' stsal pa/ de lta bas na dge slong gis gar dang / glu dang / rol mo'i sgra dag sbyang bar mi bya'o/ /sbyong bar byed na 'gal tshabs can du 'gyur ro/ /bcom ldan 'das kyis dge slong gis gar dang / glu dang rol mo'i sgra dag sbyang bar mi bya'o zhes bka' stsal pa dang / dga' 'dun rnams kyis yang brjed nas de rnams yang drug sde dag gi gan du dong ste/ de bzhin du smras pa dang / de dag gis smras pa/ bzhin bzangs dag bcom ldan 'das kyis bkag pas mi sbyang ngo / /de rnams kyis smras pa/ 'phags pa dag khyed gshegs te gzigs pa tsam kho nas kyang bdag cag gis de dag gis pham par 'gyur ro/ /gal te de lta na 'dong ngo zhes de dag der dong ba dang / dga' 'dun de rnams mthong ba tsam nyid kyis bag khums par gyur nas de rnams shAkya'i sras kyi dge sbyong dag gi dge sbyong gi tshul ni tshig go/ /bram ze'i tshul ni tshig ste/ 'di ltar gar dang / glu dang / rol mo'i sgra dag blta ba'i phyir yang 'gro zhes smod par byed/ phyar ka gtong bar byed/ kha zer bar byed pa'i skabs de dge slong rnams kyis bcom ldan 'das la gsol pa dang / bcom ldan 'das kyis dge slong dag la nyes dmigs cung zad gang byung ba de ni gar dang / glu dang / rol mo'i sgra dag ltar 'gro ba las gyur par mkhyen nas bka' stsal pa/ de lta bas na dge slong gis gar mi bya/ glu blang bar mi bya/ rol mo'i sgra mi bya'o/ /gar dang glu dang / rol mo'i sgra dag sbyang bar mi bya'o/ /de dag la ltar yang 'gro bar mi bya'o/ /dge slong dag dge slong gar slob bam/ glu slob bam/ rol mo'i sgra slob bam/ gar dang glu dang / rol mo'i sgra sbyong ngam/ de dag la ltar 'gro na 'gal tshabs can du 'gyur ro// //'dul ba phran tshegs kyi gzhi/ bam po bzhi pa/ sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe kau sham bi na khyim bdag bzang ldan zhes bya ba dad pa dang ldan zhing bzang la dge ba'i bsam pa can zhig 'dug pa des rigs mnyam pa las chung ma blangs te/ de de dang lhan cig rtse bar byed/ dga' bar byed/ dga' mgur spyod par byed do/ /des rtse ba dang / dga' ba dang / dga' mgur spyad pas dus gzhan zhig na de'i chung ma la sems can zhugs par gyur to/ /tshe dang ldan pa shA ri'i bu sems can de gdul ba la ltos pas de'i khyim du song ste/ khyim bdag rang bzhin bzang po de skyabs su 'gro ba dang / bslab pa'i gzhi dag la bzhag nas dus dus su de'i gan du 'gro'o/ /ji tsam dus gzhan zhig na tshe dang ldan pa shA ri'i bu phyi bzhin 'brang ba'i dge sbyong med par gcig pu song ba dang / khyim bdag gis smras pa/ 'phags pa ci khyod la phyi bzhin 'brang ba'i dge sbyong ma mchis sam/ des smras pa/ bzhin bzangs ci kho bo'i phyi bzhin 'brang ba'i dge sbyong rtswa ka sha'i khrod dang / ku sha'i khrod nas 'ong ngam/ khyod lta bu las 'thob par 'gyur ba gang dag yin pa de dag kho bo'i phyi bzhin 'brang ba'i dge sbyong kho nar 'gyur ro/ /des smras pa/ 'phags pa gal te de lta na bdag gi mchis 'brang la sems can zhugs par gyur pa de gal te khye'u btsas na de 'phags pa'i phyi bzhin 'brang ba'i dge sbyong du dbul lo/ / bzhin bzangs khyod nad med par gyur cig /kho bos bkri'o zhes smras nas song ngo / /ji tsam na khyim bdag gi chung ma de zla ba dgu tshang ste btsas pa las khye'u mdog ngan zhing lus chung la skad snyan pa zhig byung ngo / /de'i nye du dag 'dus shing lhags nas nyi ma bdun gsum nyi shu rtsa gcig tu btsas pa'i btsas ston rgya cher byas nas khye'u ming cir gdags shes ming 'dogs par byed pa na/ nye du dag gis smras pa/ gang gi phyir khye'u 'di mdog ngan zhing lus chung yang khyim bdag bzang ldan gyi bu yin zhing skad snyan pa de'i phyir khye'u 'di'i ming snyan pa bzang ldan zhes bya'o zhes de'i ming snyan pa bzang ldan zhes bya bar btags so/ /de bsrings shing bskyed nas chen por gyur to/ / de nas tshe dang ldan pa shA ri'i bu snga dro sham thabs bgos/ lhung bzed dang chos gos thogs te/ kau sham bi bsod snyoms la rgyu ba'i tshe khyim bdag bzang ldan gyi khyim du song ba dang / khyim bdag bzang ldan gyis 'phags pa byon pa legs so zhes bya ba'i tshig kun du spyad pas kun du spyad nas rkang pa gnyis la phyag byas so/ /de'i chung mas kyang bca' ba dang / bza' ba gtsang zhing bsod pas lhung bzed bkang ste phul lo/ /khye'u de tshe dang ldan pa shA ri'i bu'i gdong du rtog nas/ tshe dang ldan pa shA ri'i bus khyim bdag bzang ldan la brda byas pa dang / des khye'u de la smras pa/ bu khyod ma btsas pa nyid nas/ ngas 'phags pa shA ri'i bu'i zhabs 'bring du phul gyis khyod 'phags pa dang lhan cig song shig / srid pa tha ma pa'i sems can de de'i phyi na 'dug pa'i tshe des de rab tu phyung bsnyen par rdzogs par byas te/ de la lung phog nas des brtsal ba dang / 'bad pa dang bsgrim pa byas pas 'khor ba'i 'khor lo cha lnga pa g.yo ba dang mi g.yo ba 'di nyid rig ste/ 'du byed kyi rnam pa thams cad nyams pa dang / ltung ba dang / rnam par 'thor ba dang / rnam par 'jig pa'i chos nyid kyis zil gyis mnan nas nyon mongs pa thams cad spangs pas dgra bcom pa nyid mngon sum du byas te/ dgra bcom pa khams gsum pa las 'dod chags dang bral ba bong ba dang gser du mnyam pa/ nam mkha' dang lag mthil du mtshungs pa'i sems dang ldan pa tsan dan zhag lon par bzhag pa lta bu/ rig pas sgo nga'i sbubs dral bar gyur cing rig pa dang / mngon par shes pa dang / so so yang dag par rig pa thob pa/ srid pa dang 'dod pa'i rnyed pa dang / bkur sti la rgyab kyis phyogs pa/ dbang po dang nye dbang dang bcas pa'i lha rnams kyis mchod par bya ba dang / rjed par bya ba dang / gus par smra bar bya bar gyur to/ /gang gi tshe des skad kyi gtang rag gis chos smras pa/ de'i tshe tshangs pa'i 'jig rten man chad khyab par gyur cing sems can mang po dag gi rgyud la yang thar pa'i cha dang 'thun pa'i dge ba'i rtsa ba dag skyed par byed de/ mdor na dud 'gro'i skye gnas su gtogs pa'i sems can dag kyang sgra snyan pa de la rna blags te nyan to/ /de nas bcom ldan 'das kyis dge slong rnams la bka' stsal pa/ dge slong dag nga'i nyan thos kyi dge slong skad kyi gtang rag snyan pa rnams kyi nang na 'di lta ste dge slong snyan pa bzang ldan 'di mchog yin no/ /de'i skad kyi gtang rag snyan pa yid du 'ong ba'i sbyor bas dge slong 'dod chags dang ma bral ba rnams rang gi bya ba btang nas nyin cig bzhin de'i gan du 'gro bar byed do/ / ji tsam dus gzhan zhig na ko sa la'i rgyal po gsal rgyal glang po che'i gtso bo pad ma dkar po gcig pa la zhon nas kha lo sgyur ba dpal 'phel dang nam gyi tho rangs ri brags shig tu song ba'i tshe tshe dang ldan pa snyan pa bzang ldan gyis nang par skad kyi gtang rag gis chos smra bar brtsams pa glang po che'i gtso bo pad ma dkar po gcig pas thos so/ /des tshe dang ldan pa snyan pa bzang ldan gyi skad kyi gtang rag thos nas kyang yang rna ba blags te mi g.yo bar sdod do/ /kha lo sgyur ba dpal 'phel gyis phan tshun nas lag pa dang rkang pa dag g.yabs te bskyod par brtsams kyang de bzhin mi g.yo ba dang / rgyal pos smras pa/ dpal 'phel glang po che thob shig lha btab kyang mi mchi na 'di rgyu gang lags ma 'tshal to/ /rgyal pos smras pa/ zhog shig dang lam gang du 'gro ba blta'o/ /des ji bder bzhag pa dang / de rgyal byed kyi tshal logs su song nas khad kyis khad kyis rgyal byed kyi tshal du phyin pa dang / rgyal byed kyi tshal gyi sgo na rna blags te sdod do/ /tshe dang ldan pa snyan pa bzang ldan gyis skad kyi gtang rag gis chos dag smras pa'i mjug tu/ 'byung po gang dag 'dir ni lhags gyur te/ /sa 'am 'on te bar snang gnas pa dag / sems can rnams la rtag tu byams byed cing / /nyin dang mtshan du chos kyang spyod par shog /ces yongs su bsngo ba byas pa dang / de nas glang po che'i gtso bo pad ma dkar po gcig pas tshe dang ldan pa snyan pa bzang ldan gyis skad kyi gtang rag gis chos dag smras pa mtha' phyin par shes nas yid dang 'thun par gang dang gang du bskyod pa de dang der song ngo / /rgyal pos smras pa/ dpal 'phel rgyu gang gis 'dir gang dang gang du bskyod pa de dang der 'gro/ des smras pa lha ma 'tshal te/ 'phags pa zhig gis skad kyi gtang rag gis chos smras pa'i sgra gang lags pa de dag thos nas glang po che 'di yid phrogs te dbang ma mchis par gyur to/ /rgyal pos smras pa/ dpal 'phel glang po che phyir zlog shig dang / 'phags pa de btsal la na bza' zhig dbul shing sang nang par ri brags su 'dong ngo / /lha de bzhin 'tshal lo/ /de phyir log ste khyim du song ba dang / btsun mo phreng ldan mas dris pa/ lha ci'i slad du slar gshegs/ des ji ltar gyur pa brjod nas 'di skad ces kyang smras so/ /phreng ldan ma nga la gos byin cig dang song la 'phags pa de la dbul lo/ /des bsams pa/ 'phags pa snyan pa bzang ldan gyis skad kyi gtang rag gis chos smras par gyur pa lta zhig na/ /de ni mdog ngan zhing lus chung la rgyal po 'di ni rgya chen po la mos pa yin pas 'dis de mthong na gal te ma dad par 'gyur ba'i gnas yod par 'gyur srid kyis thabs kyi rnam pa zhig bya'o snyam nas smras pa/ lha ni ri brags su gshegs shig /bdag gis ni 'phags pa de la na bza' dbul lo/ /des smras pa/ phreng ldan ma khyod kyis kyang gos gzhan phul cig /ci gos gnyis kyis ko sa la'i pho brang dbul por 'gyur ram de cang mi smra bar 'dug pa dang / rgyal pos chen po la 'os pa'i gos khyer nas rgyal byed kyi tshal du song ngo / /de'i tshe na tshe dang ldan pa kun dga' bo rgyal byed kyi tshal gyi sgo na 'chag cing 'dug nas rgyal po glang po che las babs nas rkang pa gnyis la phyag 'tshal te smras pa/ 'phags pa da nang skad kyi gtang rag gis chos smras pa'i 'phags pa de gang lags/ des smras pa/ rgyal po chen po de cir 'tshal/ 'phags pa de la na bza' dbul lo/ /des bsams pa/ tshe dang ldan pa snyan pa bzang ldan gyis skad kyi gtang rag gis chos dag ni smras na de ni mdog ngan zhing lus chung la rgyal po 'di ni rgya chen po la mos pa yin pas 'dis de mthong na gal te ma dad par 'gyur ba'i gnas yod par 'gyur srid kyis thabs kyi rnam pa zhig bya'o snyam nas smras pa/ rgyal po chen po bdag la stsol cig dang / bdag gis de la dbul bar bgyi'o/ /rgyal pos smras pa/ 'phags pa bcom ldan 'das kyis rang gi lag nas dbul ba bsngags pas rang gi lag nyid nas dbul gyis de ston cig / de'i tshe na tshe dang ldan pa snyan pa bzang ldan nyin mo spyod pa'i phyir shing ljon pa zhig gi drung na nye bar rten cing 'dug go/ /de nas tshe dang ldan pa kun dga' bos smras pa/ rgyal po chen po de ni shing ljon pa zhig gi drung na nye bar rten cing mchis kyis bzhud cig /de de'i gan du song ste bltas pa dang / re shig na de shin tu mi sdug pa mthong ba dang / de ma dad pa skyes nas mi dga' ste bzhin phyir phyogs nas gos 'phangs te phyir song ngo / /tshe dang ldan pa snyan pa bzang ldan gyis de'i tshe tshigs su bcad pa dag smras pa/ gang dag nga yi gzugs la rtog /sgra la 'ang rjes su 'brang byed pa/ /'dod pa'i dbang du gyur pa yi/ /skye bo de dag nga mi mthong / /gal te nang ni shes gyur cing / /phyi rol dag la mi lta ba/ /nang gi 'bras bu mthong ba gang / /de nyid sgra yis khrid par 'gyur/ /gal te nang ni mi shes shing / /phyi rol rnam par mthong gyur pa/ /phyi rol 'bras bu mthong ba gang / /de yang sgra yis khrid par 'gyur/ /gal te nang yang mi shes shing / /phyi rol dag kyang ma mthong ba/ /kun du rmongs pa'i byis pa dag /de yang sgra yis khrid par 'gyur/ /gal te nang yang rab shes shing / /phyi rol dag kyang mthong ba yi/ /brtan po shes rab phyogs pa de/ /sgra yis khrid par mi 'gyur ro/ /de'i tshe dge slong rnams the tshom skyes nas the tshom thams cad gcod pa sangs rgyas bcom ldan 'das la zhus pa/ btsun pa tshe dang ldan pa snyan pa bzang ldan gyis las ci zhig bgyis na las de'i rnam par smin pas mdog ngan zhing lus chung la skad snyan par gyur/ bcom ldan 'das kyis bka' stsal pa/ dge slong dag rigs kyi bu snyan pa bzang ldan nyid kyis las tshogs rnyed pa/ rkyen yongs su bsgyur ba 'od pa bzhin du nye bar gnas pa/ gdon mi za bar 'byung bar 'gyur ba dag byas shing bsags pas snyan pa bzang ldan nyid kyis las byas shing bsags pa dag gzhan su zhig gis so sor myong bar 'gyur/ dge slong dag las byas shing bsags pa dag ni phyi rol gyi sa'i khams la rnam par smin par mi 'gyur/ chu'i khams la mi 'gyur/ me'i khams la mi 'gyur/ rlung gi khams la mi 'gyur gyi/ 'di ltar las dge ba dang mi dge ba byas shing bsags pa dag ni zin pa'i phung po dang / khams dang / skye mched dag la rnam par smin par 'gyur te/ las rnams bskal pa brgyar yang ni/ /chud mi za ba 'ang tshogs dang dus/ /rnyed na lus can rnams la ni/ /'bras bu dag tu 'gyur ba nyid/ /dge slong dag sngon byung ba 'das pa'i dus na bskal pa bzang po 'di nyid la skye dgu'i tshe lo bzhi khri thub pa na ston pa de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das 'khor ba 'jig 'jig rten du byung ste/ des sangs rgyas kyi mdzad pa mtha' dag mdzad nas bud shing zad pa'i me bzhin du phung po'i lhag ma med pa'i mya ngan las 'das pa'i dbyings su mya ngan las 'das so/ /rgyal po mdzes ldan gyis sangs rgyas bcom ldan 'das 'khor ba 'jig de'i sku la mchod pa rgya chen po dag byas nas mchod rten khor yug tu dpag tshad re re yod pa gnam phang du dpag tshad phyed dang gnyis pa zhig byed du gzhug par brtsams nas de'i lag gi bla mi dad pa dang ldan zhing bzang la dge ba'i bsam pa can las byed pa la brtson pa zhig bskos so/ / de na yang gla mi gzhan zhig yod pa des mchod rten ha cang chen po rtsom pa de mthong nas lta zhing shes ldan dag rgyal po 'dis 'di lta bu'i mchod rten chen po byed du gzhug par brtsams pa nam tsam zin par 'gyur ma shes so zhes 'phya bar brtsams pa dang / de la lag gi blas smras pa/ kwa'e nang rje ci'i phyir 'phya bar byed/ gal te mi nus na las bya ba thong shig /de cang mi smra bar 'dug pa dang / lag gi bla des de phyir dbyung bar brtsams so/ /des de la bzod pa gsol nas/ yang las bya bar brtsams pa na mchod rten de ma zin nas de yang 'phya bar brtsams pa dang / lag gi bla des phyir phyung ngo / /yang shin tu 'bad de bzod pa gsol nas las bya bar brtsams pa dang / ji tsam na mchod rten blta bas mi ngoms pa srog chags 'bum phrag mang po dag gi mig dang yid 'phrog par byed pa zhig zin par gyur to/ /de nas gla mi des de mthong nas 'di ltar las byed pa na bdag gis 'di la dpyas pa ni ma legs pa zhig byas so zhes 'gyod pa skyes nas 'di la rnam pa thams cad du mchod pa bya'o zhes des de'i gla rngan ci thob pa de las gser gyi dril bu byed du bcug nas sems mngon par dad pas mchod rten de la btags so/ /dge slong dag de'i tshe de'i dus na gla mi gang yin pa de ni dge slong snyan pa bzang ldan 'di nyid yin te/ des yang dag par rdzogs pa'i sangs rgyas 'khor ba 'jig gi mchod rten gyi las byed pa na dpyas pa gang yin pa de'i las kyi rnam par smin pas ni mdog ngan zhing lus chung bar skyes so/ /yang dad pa skyes nas gser gyi dril bu byed du bcug nas mchod rten la btags pa'i las kyi rnam par smin pa gang yin pa de ni skad snyan par gyur to/ /de nas yang dge slong rnams the tshom skyes nas/ the tshom thams cad gcod pa sangs rgyas bcom ldan 'das la zhus pa/ btsun pa tshe dang ldan pa snyan pa bzang ldan gyis las ci zhig bgyis na des tshangs pa'i 'jig rten man chad sgras khyab par gyur/ bcom ldan 'das kyis bka' stsal pa/ dge slong dag rigs kyi bu snyan pa bzang ldan nyid kyis las tshogs rnyed pa zhes bya ba nas 'bras bu dag tu 'gyur ba nyid ces bya ba'i bar du snga ma bzhin no/ /dge slong dag sngon byung ba 'das pa'i dus na bskal pa bzang po 'di nyid la skye dgu'i tshe lo nyi khri thub pa na ston pa de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das 'od srung 'jig rten du byung ste/ de bA rA Na sI na drang srong smra ba ri dgas kyi gnas na nye bar rten cing bzhugs so/ /bA rA Na sI dang drang srong smra ba'i bar na a mra'i shing ljon pa zhig y od pa de la bya ko ki la pho zhig gnas pa des gang gi tshe sangs rgyas bcom ldan 'das 'od srung bA rA Na sIr bsod snyoms la gshegs pa de'i tshe de la shin du rtog cing sgra snyan pa khyad par can phyung nas de bzhin du yang dang yang du bltas pas/ sems tshim par gyur nas dad pa skyes so/ /des dus gzhan zhig na skad 'byin cing yang dag par rdzogs pa'i sangs rgyas 'od srung la lan gsum bskor ba byas nas dga' ba dang bde ba skyes te a mra'i shing ljon pa de nyid la 'dug go/ /'dug ma thag tu bya khra zhig gis srog dang phral te 'chi ba'i dus byas nas las drug la mkhas pa'i bram ze zhig tu skyes so/ /dge slong dag de'i tshe de'i dus na bya ko ki la gang yin pa de ni dge slong snyan pa bzang ldan 'di nyid yin te/ des yang dag par rdzogs pa'i sangs rgyas 'od srung la sgra snyan pa phyung ste bskor ba byas pa de'i las kyi rnam par smin pas tshangs pa'i 'jig rten man chad sgras khyab par gyur to/ /de nas yang dge slong rnams the tshom skyes nas/ the tshom thams cad gcod pa sangs rgyas bcom ldan 'das la zhus pa/ btsun pa tshe dang ldan pa snyan pa bzang ldan gyis las ci zhig bgyis na las de'i rnam par smin pas bcom ldan 'das kyi bstan pa la rab tu byung ste nyon mongs pa thams cad spangs pas dgra bcom pa nyid mngon sum du bgyis te bcom ldan 'das kyis skad kyi gtang rag snyan pa rnams kyi mchog tu bstan/ bcom ldan 'das kyis bka' stsal pas/ de ni smon lam gyi dbang gis te/ gang du smon lam btab ce na/ yang dag par rdzogs pa'i sangs rgyas 'od srung de nyid kyi gsung rab la dge slong zhig rab tu byung bar gyur pa de bcom ldan 'das 'od srung gis skad kyi gtang rag snyan pa rnams kyi mchog tu bstan to/ /de na 'dis k yang tshe ji srid par tshangs par spyod pa spyad na yon tan gyi tshogs 'ga' yang ma thob nas de'i 'og tu 'chi ba'i tshe 'di skad ces bdag gis bcom ldan 'das yang dag par rdzogs pa'i sangs rgyas 'od srung gi spyan sngar tshe ji srid par tshangs par spyod pa spyad na yon tan gyi tshogs 'ga' yang ma thob ste/ bdag gi dge ba'i rtsa ba 'dis bcom ldan 'das yang dag par rdzogs pa'i sangs rgyas 'od srung gis bram ze'i khye'u bla ma la bram ze'i khye'u khyod ma 'ongs pa'i dus na skye dgu'i tshe lo brgya thub pa na de bzhin gshegs pa dgra bcom pa yang dag par rdzogs pa'i sangs rgyas shAkya thub pa zhes bya bar 'gyur ro zhes lung bstan pa de'i bstan pa la bdag rab tu byung ste/ nyon mongs pa thams c ad spangs pas dgra bcom pa nyid mngon sum du byed cing ji ltar mkhan po 'di bcom ldan 'das yang dag par rdzogs pa'i sangs rgyas 'od srung gis skad kyi gtang rag snyan pa rnams kyi mchog tu bstan pa de bzhin du bdag kyang bcom ldan 'das des skad kyi gtang rag snyan pa rnams kyi mchog tu bstan par gyur cig ces btab pas smon lam de'i dbang gis da ltar nga'i bstan pa la rab tu byung ste/ nyon mongs pa thams cad spangs pas dgra bcom pa nyid mngon sum du byas te/ ngas dge slong skad kyi gtang rag snyan pa rnams kyi mchog tu bstan to/ /dge slong dag de lta bas na las gcig tu gnag pa rnams kyi rnam par smin pa ni gcig tu gnag pa zhes bya ba nas/ dge slong khyed kyis de ltar bslab par bya'o zhes bya ba'i bar du snga ma bzhin no/ /sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /ji tsam na dge slong dag chos 'don pa nyid na rgya shug gi 'bras bu'i tshogs gtor ba bzhin 'don la mu stegs can rnams ni skad kyi gtang rag gis gzhung 'don to/ /khyim bdag mgon med zas sbyin gyi kun du spyod pa ni nang par sngar langs nas bcom ldan 'das kyi zhabs la phyag 'tshal du 'gro'o/ /des mu stegs can rnams skad kyi gtang rag gis gzhung 'don pa thos nas des bsams pa/ mu stegs can rnams kyi chos 'dul ba ni nyes par smras pa yin yang 'di dag skad kyi gtang rag gis gzhung 'don la/ bdag gi 'phags pa rnams ni gzhung 'don pa nyid na rgya shug gi 'bras bu'i tshogs gtor ba bzhin 'don pas 'di nyid bdag gi bya ba yin no snyam nas/ de bcom ldan 'das ga la ba der song ste phyin nas bcom ldan 'das kyi zhabs gnyis la mgo bos phyag 'tshal te mtha' gcig tu 'dug go/ /mtha' cig tu 'dug nas khyim bdag mgon med zas sbyin gyis bcom ldan 'das la 'di skad ces gsol to/ /btsun pa 'di ltar re shig mu stegs can rnams kyi chos 'dul ba ni nyes par smras pa lags kyang / de dag skad kyi gtang rag gis gzhung 'don par bgyi la/ 'phags pa rnams ni gzhung 'don pa nyid na rgya shug gi 'bras bu'i tshogs gtor ba bzhin 'don pas de la gal te bcom ldan 'das kyis 'phags pa rnams kyang skad kyi gtang rag gis gzhung 'don par gnang na legs so/ /bcom ldan 'das kyis khyim bdag mgon med zas sbyin la cang mi gsung bas gnang ngo / /khyim bdag mgon med zas sbyin gyis bcom ldan 'das kyis cang mi gsung bas gnang bar rig nas/ bcom ldan 'das kyi zhabs gnyis la mgo bos phyag 'tshal nas bcom ldan 'das kyi spyan snga nas song ngo / /de nas bcom ldan 'das kyis dge slong rnams la bka' stsal pa/ dge slong dag de lta bas na khyed kyis skad kyi gtang rag gis chos 'don par gnang ngo / /bcom ldan 'das kyis skad kyi gtang rag gis chos gdon par bya'o zhes bka' stsal pa dang / dge slong rnams skad kyi gtang rag gis lung 'bogs par byed/ 'don par byed/ kha ton byed/ yongs su 'dri bar byed do/ /ji tsam na khyim bdag mgon med zas sbyin rgyal byed kyi tshal du song ba na des thos nas smras pa/ 'phags pa dag ci khyed kyi gtsug lag khang 'dir rol mo mkhan gyi brang btab bam/ skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong gis skad kyi gtang rag gis lung 'bog par mi bya gdon par mi bya/ kha ton mi bya/ yongs su 'dri bar mi bya'o/ /'di ltar ston pa'i yon tan yang dag par bsgrag pa dang / rgyud chags gsum pa gdon pa dag ni skad kyi gtang rag gis gdon par bya'o/ /bcom ldan 'das kyis skad kyi gtang rag gis de dag gdon par bya'o zhes bka' stsal pa dang / gzhon nu zhig skad kyi gtang rag mi shes nas/ des gzhung dag ston pa nyid na rgya shug gi 'bras bu'i tshogs gtor ba bzhin ston par gyur nas/ dge slong dag gis smras pa/ tshe dang ldan pa bcom ldan 'das kyis skad kyi gtang rag gnang gis skad kyi gtang rag gis thon cig / des smras pa/ tshe dang ldan pa dag bdag gis skad kyi gtang rag mi shes so/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ skad kyi gtang rag bslab par bya'o/ /bcom ldan 'das kyis skad kyi gtang rag bslab par bya'o zhes bka' stsal pa dang / dge slong rnams khyams dang / gnas khang dang / sgo khang dag na skad kyi gtang rag dag slob par byed pa na/ khyim bdag mgon med zas sbyin gtsug lag khang du 'ongs pa dang / des thos nas smras pa/ 'phags pa dag gtsug lag khang 'di rol mo mkhan gyi brang ni ma lags na/ khyed kyis da dung yang rol mo mkhan dag ma btang ngam/ skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dben pa'i phyogs su skad kyi gtang rag dag bslab par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong zhig 'greng ste lhung bzed 'byin pa dang / dge slong dag gis de la smras pa/ tshe dang ldan pa 'greng ste lhung bzed ma 'byin cig /des smras pa/ ci nyes/ de dag gis smras pa/ lhung bzed de chag par 'gyur mod gzhan ci nyes par 'gyur/ de cang mi smra bar 'dug pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong gis 'greng ste lhung bzed dbyung bar mi bya'o/ /de bzhin du gzhug pa dang / bkru ba dang / skam pa dag la yang rgya cher sbyar bar bya'o/ / sdom la/ lam phran dang ni snod gsum dang / /phying ba dra bar mi bya dang / /gding ba dang ni mi 'bral ba/ /drang srong chen pos rjes su gnang / /sangs rgyas bcom ldan 'das ngan spong gi bu dag na chu srin byis pa gsod kyi ri la 'jigs rung gi nags ri dgas kyi gnas na bzhugs so/ /gang gi tshe rgyal bu gzhon nu rtogs ldan gyis khang bzangs pad ma can/ tshon brgya rtsa gcig gis bris pa byed du bcug cing ras sar pa kha tshar ring po can dag gis chal par bting ste/ bcom ldan 'das nyan thos kyi dge 'dun dang bcas pa gdugs tshod la spyan drangs pa'i tshe bcom ldan 'das khang bzangs pad ma can du gshegs par bzhed pa na ma gshegs pa dang / rgyal bu gzhon nu rtogs ldan gyis smras pa/ bcom ldan 'das gshegs su gsol/ 'on kyang bcom ldan 'das ma gshegs pa dang / rgyal bu gzhon nu rtogs ldan gyis ras rnams bsdus pa mu stegs can rnams kyis thos nas de rnams kyis smras pa/ shes ldan dag dge sbyong gau ta ma ni bkur sti de lta bu'i gnas ma yin no zhes zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag gal te bram ze dang / khyim bdag dad pa can dag gis lam phran dag tu yang ras sar pa kha tshar ring po can dag bting zhing 'phags pa dag bdag cag la thugs brtse ba'i slad du gshegs su gsol zhes zer na/ mu stegs can rnams zil gyis mnan pa'i phyir mi rtag pa nyid yid la bya bas zil gyis mnan cing 'dong bar bya ste/ 'di la 'gyod par mi bya'o/ /sangs rgyas bcom ldan 'das ngan spong gi bu dag na chu srin byis pa gsod kyi ri la 'jigs rung gi nags ri dgas kyi gnas na bzhugs so/ /dge slong zhig lhung bzed lag na thogs te song ba dang / de phyogs gzhan zhig tu sgyel nas lhung bzed de sa la lhung ste chag nas de'i bar chad du gyur pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na dge slong gis lhung bzed lag na bkur bar mi bya bar lhung bzed kyi snod du bcug ste bkur bar bya'o/ /bcom ldan 'das kyis dge slong gis lhung bzed lag na bkur bar mi bya bar lhung bzed kyi snod du bcug ste bkur bar bya'o zhes bka' stsal pa dang / dge slong rnams lhung bzed kyi snod du bcug ste lag pa nyid na khyer te 'dong ba na nyes dmigs de nyid du gyur pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ lhung bzed kyi snod lag na bkur bar mi bya bar lung thag btags te mchan khung gis bkur bar bya'o/ /sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /dge slong rnams don 'thun dag dang lhan cig ljongs rgyu zhing dong ngo / /ji tsam na bram ze zhig na nas de sman pa'i gan du song ste smras pa/ kye bdag nyid chen po kho bo'i nad kyi rnam pa 'di lta bu'i sman ston cig /des smras pa/ jo bo a ru ra gsol dang snyun gdangs par 'gyur ro/ /des smras pa/ lam ka 'di na a ru ra ga la yod/ des smras pa/ bram ze shAkya'i sras kyi dge sbyong 'di dag ni mkhas pa lags pas 'di dag la khyod kyis bslangs na 'di dag la mchis par 'gyur gda'o de dge slong rnams kyi drung du song ste dris pa/ 'phags pa dag la a ru ra lta mchis sam/ de dag gis smras pa/ bram ze yod na de cir dgos/ bdag la sman pa'i mchid nas a ru ra tshol cig ces mchi na gal te mnga' na bdag la stsal du gsol/ dge slong des de'i mdun du lhung bzed kyi snod phye ba dang / de nyid na smyung bu yang 'dug cing / de nyid na gri'u dang / de nyid na 'breng bu dang / de nyid na sman dag 'dug pa bram zes mthong nas smras pa/ 'phags pa dag khyed ni kun du spyod pa mi gtsang ba yin te/ 'di 'dra ba za ba bas ni bdag shi yang ches bla'i mi gtsang ba za ba ni de lta ma yin no zhes zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ snod gsum bcang bar bya ste/ lhung bzed kyi snod dang / sman snod dang / bar bur snod rnams so/ /dge slong dag gis de dag gi lung thag mnyam par btags pas de dag gis mchan khung rlo bar gyur pa dang / ma dad pa dag 'phags pa dag ci khyed rdza rnga thogs te 'gro 'am zhes co 'dri bar byed pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ mnyam par gdags par mi bya bar ci rigs par gdags par bya'o/ /dge slong dag gis ras ma phra mo dag btags pas de dag la na bar gyur nas/ bcom ldan 'das kyis bka' stsal pa/ ras ma zheng chen po dag gdags par bya'o/ /de dag gis zheng chen po dag btags pa dang de dag nyid zhum nas/ bcom ldan 'das kyis bka' stsal pa/ dkyil phying bu dang sbyar te skabs skabs su srubs bya rog rkang dag drub par bya'o/ /sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /dge slong zhig gis phying ba zhig rnyed nas des bsams pa/ bcom ldan 'das kyis chos gos gsum dras te bcang bar bya'o zhes bka' stsal gyis dra'o snyam nas/ de gri'u dang khab dag khyer nas shing ljon pa zhig gi drung du song ba dang / bcom ldan 'das kyang phyogs der gshegs te gzigs nas bka' stsal pa/ dge slong 'di ci yin/ des gsol pa/ btsun pa bcom ldan 'das kyis dge slong gis chos gos gsum dras te bcang bar bya'o zhes bka' stsal pas bdag gis phying pa 'di rnyed nas chos gos su 'dra ba lags so/ /de nas bcom ldan 'das kyis bslab pa la gus pa'i bsngags pa brjod nas dge slong rnams la bka' stsal pa/ dge slong dag de lta bas na lnga po 'di dag ni dra bar mi bya ste/ be'u ras thams cad dang / la ba thams cad dang / phying pa thams cad dang / klam thams cad dang / seng ba thams cad do/ /sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /dge slong zhig bya ba zhig gi phyir gtsug lag khang gzhan du song ba dang / de der nam sros par gyur nas gnas mal gyi zhal ta byed pas smras pa/ tshe dang ldan pa gnas mal dag nos shig /des smras pa/ bdag gis gding ba khyer te ma 'ongs so/ /gnas mal gyi zhal ta byed pas smras pa/ gal te de lta na khri kling ba nos shig /des khri kling ba mnos nas nyal ba dang / de grang ba'i sdug bsngal gyis nyen bzhin du mtshan mo 'das nas na bar gyur pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na dge slong gis gding ba med par 'gro bar mi bya'o/ /'gro na 'gal tshabs can du 'gyur ro/ /bcom ldan 'das kyis dge slong gis gding ba med par 'gro bar mi bya'o zhes bka' stsal pa dang / dge slong rnams deng nyid phyir ldog pa'i bsam pas de'i nyen kor gyi gtsug lag khang gzhan du 'gro ba dang / 'chag tu 'gro ba dang / grong gzhan du 'gro ba de dag tu yang gding ba khyer ba na gnas brtan rgan po rgas pa nyam chung ba rnams dang / nad pa sbyor mi bzod pa rnams nyam thag par gyur nas/ bcom ldan 'das kyis deng nyid phyir ldog pa'i bsam pas 'gro ba der yang gding ba med par 'gror ma gnang ngo zhes 'khod pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na dge slong gis nyen kor dang nyin mo spyod du 'gro ba la gding ba bkur bar mi bya'o/ /grong gzhan du 'gro ba na deng nyid phyir ldog pa'i bsam pas 'gro na der kyang bkur bar mi bya'o/ /dge slong gzhan dag gding ba med par grong gzhan du de nyid ldog pa'i bsam pas 'gro ba na de rnams la bya ba'i rnam pa de lta bu dag byung nas des nam sros par gyur pa dang / de dag bslab pa la gus pas nub mo phyir dong ba na seng ge dang / stag dang / chom rkun pa dang / g.yon can dag gis bgrod par gyur pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ gal te de ltar bsams te dong ba dag der nam sros par gyur na de nyid du gnas par bya ste/ 'di ltar tshangs pa mtshungs par spyod pa dag las gding ba brnyas te nyal bar bya'o/ / gal te rnyed na de lta na legs/ gal te ma rnyed na bla gos bzhi ltab tu byas te bting la yun thung du ni nyal/ yun ring du ni mi nyal bar mtshan mo 'da' bar bya'o/ /dge slong gzhan zhig gis dge slong zhig las gding ba brnyas pa dang / de la rmi lam gyi gnod pa byung nas des mi gtsang bas ma rung bar gyur pa de bzhin du dge slong de la phyir dbul bar brtsams pa dang / des ma 'dod pa'i skabs de zhes bya ba la sogs pa snga ma bzhin no/ /bcom ldan 'das kyis bka' stsal pa/ bkrus te sbyin par bya'o/ /dge slong des bkrus te byin na 'on kyang de len par mi byed pa'i skabs de zhes bya ba'i bar du yang snga ma bzhin no/ /bcom ldan 'das kyis bka' stsal pa/ ri ba'i rin sbyin par bya ba 'am/ de'i sems mgu bar bya'o/ /dge slong dag gtsug lag khang gzhan dang / grong gzhan dag tu deng nyid phyir ldog pa'i bsam pas chos gos gsum po dag med par dong ba dang / de rnams der dong ba dag la ci tsam na bya ba'i rnam pa de lta bu dag byung ste der nam sros par gyur to/ /de dag bslab pa la gus pas mtshan mo phyir dong ba na seng ge dang / stag dang / chom rkun pa dang / g.yon can dag gis bgrod par gyur pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ gal te de lta bu'i bsam pas dong ba rnams der nam sros par gyur na de nyid du 'dug par bya zhing tshangs pa mtshungs par spyod pa dag las chos gos dag brnyas te byin gyis brlab par bya'o/ /de rnams chos gos dag brnyas nas ji ltar byin gyis brlab par bya ba ma shes nas/ bcom ldan 'das kyis bka' stsal pa/ snga ma rang gi sems kyis phyung ba byin gyis brlab par bya'o/ /lnga po 'di dag ni sems bskyed pas 'grub ste/ gso sbyong dang / dgag dbye dang / chos gos byin gyis brlab pa dang / chos gos dbyung ba dang / gang zag 'gron du bos pa'o/ /dge slong de dag gis chos gos dras shing kha dog ma bsgyur ba dag rnyed nas/ bcom ldan 'das kyis bka' stsal pa/ gal te dras shing kha dog ma bsgyur ba dag rnyed na dras shing kha dog ma bsgyur ba dag byin gyis brlab par bya'o/ /ji ste kha dog ma bsgyur cing ma dras pa dag rnyed na lhan thabs kyis glan la byin gyis brlab par bya'o/ /gal te rnyed na de lta na legs/ gal te ma rnyed na de bzhin byin gyis brlab par bya'o/ /tha na khyim pa'i gos la yang byin gyis brlab par bya ste/ 'di la 'gyod par mi bya'o/ /sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /dge slong dag cig gding ba med par yul gzhan du 'dong ba dang / der dong ba de rnams 'gyod par gyur pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag ngas chos gos gsum dang bral bar ni gsungs kyi/ gding ba dang ni ma yin te/ de lta bas na bsams bzhin du bzhag ste 'gro bar mi bya'o/ /brjed pa la ni ltung ba med do/ / sdom ni/ chu tshags la ni rnam bzhi dang / /sder rnams dang ni gcig tu za/ /gos gcig gis ni za ba dang / /sgren mor khrus ni byed pa'o/ /sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /lho lam nas dge slong bcom ldan 'das kyi zhabs la phyag 'tshal ba gnyis shig mnyan yod du dong ngo / /de gnyis lam du chu zad nas skom pa'i sdug bsngal gyis gdungs pa na rdzing bu zhig gi drung du phyin nas de gnyis las gcig gis smras pa/ tshe dang ldan pa khyod kyis myur du chu rtogs shig dang btung ngo / /des brtag par brtsams pa dang / ji tsam na chu ma dag par gyur nas des tshigs su bcad pa smras pa/ bskal pa 'bum phrag stong dag tu/ /gang zhig mthong bar rab dka' bas/ /bdag gis chu dag 'thungs nas ni/ /de nas 'dren pa blta bar bya/ /gcig shos kyis tshigs su bcad pa smras pa/ gang zhig sems can rnams la thugs nas thugs rje zhing / /srid pa kun la chags pa gtan nas spangs gyur pa/ /de yi bstan mchog 'di la bslab pa blang ba yis/ /srog nyid spang gi srog chags gsad par bya ba min/ /de nas gang gis chu 'thungs pa de ni song ngo / /gang gis ma 'thungs pa des ni brtson 'grus brtsams te/ shing ljon pa zhig gi drung du 'dug nas/ de ji srid du lus kyi mthu yod pa de srid du dge ba'i phyogs dag byas shing gang gi tshe lus kyi mthu dang bral ba de'i tshe 'chi ba'i dus la bab nas rgyal chen bzhi'i ris kyi lha rnams kyi nang du skyes so/ /lha'i bu 'am/ lha'i bu mo'i chos nyid ni skyes nas ring po ma lon pa la sems gsum skye ste/ gang nas shi 'phos pa dang / gang du skyes pa dang / las gang gis skyes pa'o/ /des mi rnams kyi nang nas shi 'phos pa dang / rgyal chen bzhi'i ris kyi lha rnams kyi nang du skyes pa dang / bcom ldan 'das la sems mngon par dad par byas pas skyes par mthong ngo / /de nas sngon dge slong lha'i bu de 'di snyam du sems te/ gang gi phyir bdag yongs su gnas pa bsten te bcom ldan 'das la blta ba dang / bsnyen bkur bya ba'i phyir nye bar 'gro ba ni bdag gi tshul dang 'thun pa ma yin gyis bdag yongs su gnas pa ma bsten pa kho nar bcom ldan 'das la blta ba dang / bsnyen bkur bya ba'i phyir nye bar 'gro'o snyam mo/ /de nas sngon dge slong lha'i bu rna cha gdub kor g.yo zhing dri ma med pa thogs te/ do shal dang se mo dos brgyan pa'i lus kyis lha'i me tog ut+pa la dang / pad ma dang ku mu da dang / pad ma dkar po dang / man dA ra ba dag gis thu ba bkang ste kha dog shin tu 'das pas mtshan mo la bab pa dang / bcom ldan 'das ga la ba der song ste phyin nas bcom ldan 'das la me tog dag gis mngon par gtor te bcom ldan 'das kyi zhabs gnyis la mgo bos phyag 'tshal nas mtha' gcig tu 'dug pa dang / 'di ltar sngon dge slong lha'i bu'i kha dog gi mthus rgyal byed kyi tshal thams cad snang ba rgya chen pos khyab par gyur to/ /de nas bcom ldan 'das kyis sngon dge slong lha'i bu'i bsam pa dang / bag la nyal ba dang / khams dang / rang bzhin thugs su chud nas/ gang thos nas sngon dge slong lha'i bus stan de nyid la 'dug bzhin du 'jig tshogs la lta ba'i ri'i rtse mo nyi shu mtho ba ye shes kyi rdo rjes bcom ste rgyun du zhugs pa'i 'bras bu mngon sum du byas pa de lta bur 'phags pa'i bden pa bzhi yang dag par so sor rtogs par byed pa'i chos bstan pa mdzad do/ /des bden pa mthong nas btsun pa bcom ldan 'das kyis bdag la gang mdzad pa 'di lta bu ni bdag la phas kyang ma bgyis/ mas kyang ma bgyis/ rgyal pos kyang ma bgyis/ lha rnams kyis kyang ma bgyis sngon gyi pha mes dag gis kyang ma bgyis/ dge sbyong dang bram ze dag gis kyang ma bgyis/ byams pa dang mdza' bshes dang rtsa lag gi tshogs kyis kyang ma bgyis te/ khrag dang mchi ma'i rgya mtsho ni skams/ rus pa'i ri dag las ni bsgral/ ngan song gi sgo dag ni bkum/ mtho ris dang thar pa'i sgo dag ni phye/ sems can dmyal ba dang / dud 'gro dang yi dags dag nas ni rkang pa phyung / lha dang mi rnams kyi nang du ni bzhag go zhes lan gsum ched du brjod pa ched du brjod do/ /yang smras pa/ khyod mthus rab dregs nyes pa mang ldan pa'i/ /ngan song shul bkag bsod nams rab ldan pa'i/ /mtho ris 'gro ba phye zhing bdag gis ni/ /mya ngan 'das pa'i shul yang thob par gyur/ /shin tu rnam dag khyod brten bdag gis ni/ /de ring skyon bral dag pa'i mig thob cing / /go 'phang zhi ba 'phags pa dgyes thob ste/ /sdug bsngal rgya mtsho'i pha rol rgal bar gyur/ /'gro bar lha min mi dang lhas mchod pa/ /skye dang rga dang na 'chi bral ba po/ /srid pa stong du mthong ba rab dkon pa/ /thub pa de ring khyod mthong 'bras bu mchis/ /de nas gdud byas do shal rab 'phyang bas/ /zhabs la phyag 'tshal rangs pa skyes gyur nas/ /dgra thul g.yas nas yongs su bskor byas te/ /lha yi 'jig rten mngon phyogs mkha' la song / /de nas sngon dge slong lha'i bu tshong pa khe spogs rnyed pa lta bu dang / zhing pa lo tog 'byor pa lta bu dang / dpa' bo g.yul las rnam par rgyal ba lta bu dang / nad pa nad thams cad las yongs su thar pa lta bur gyur te/ cha lugs gang gis bcom ldan 'das kyi spyan sngar 'ongs pa'i cha lugs de nyid kyis rang gi gnas su song ngo / /dge slong cig shos de yang khad kyis mnyan yod du phyin to/ /de nas lhung bzed dang chos gos mkhos su phab ste/ rkang pa dag bkrus nas bcom ldan 'das ga la ba der song ste phyin nas/ bcom ldan 'das kyi zhabs gnyis la mgo bos phyag 'tshal te phyogs gcig tu 'dug go/ /sangs rgyas bcom ldan 'das rnams ni chos nyid kyis dge slong glo bur du 'ongs pa la dge slong khyod da gzod gang nas 'dir 'ongs/ dbyar gang du gnas shes yang dag par dga' bas yang dag par dga' bar mdzad pa yin te/ bcom ldan 'das kyis dge slong de la khyod ga las 'dir 'ongs/ dbyar gang du gnas shes yang dag par dga' ba mdzad pa dang / des gsol pa/ btsun pa bdag lho phyogs nas da gzod 'dir mchis te/ lho phyogs su dbyar gnas legs so/ /bcom ldan 'das kyis bka' stsal pa/ dge slong khyod la grogs dge slong lta yod dam/ bcom ldan 'das mchis so/ /de gar song / /des ji ltar gyur pa gsol to/ /de nas bcom ldan 'das kyis de'i tshe tshigs su bcad de bka' stsal pa/ nga yi bstan la ma gus gang / /des ni nga mthong ci zhig phan/ /des ni nga la bltas na yang / /mthong ba ma yin mchod pa min/ /nga yi bslab la gang slob pa'i/ /dge slong des ni nga mthong ste/ /shes rab dman pa khyod kyis ni/ /sangs rgyas mngon sum ma mthong ngo / /de nas bcom ldan 'das kyis nyid kyi sku las bla gos phye nas yang tshigs su bcad de bka' stsal pa/ ltos shig dge slong lus 'di la/ /gtsang zhing gser gyi mdog 'dra ba/ /sngon gyi las kyi rnam smin dang / /pha dang ma las byung ba'o/ /gang gis chos nyid ma mthong ba/ /rdzogs pa'i sangs rgyas des mi mthong / gang gis chos nyid mthong gyur pa/ /de yis thub pa chen po mthong / /gzhan yang brtan zhing dge ba'i blo gros can/ /bslab pa rjes su srung byed pa/ /de yi dang por nga la ni/ /gzugs kyi sku dang chos skur mthong / /bdag nyid chen po 'od srung gi/ /bslab mtshams 'das pas da dung du/ /e la'i 'dab de klu yi ni/ /skye gnas dag las ma thar to/ /bcom ldan 'das kyis dgongs pa/ nyes dmigs gang cung zad byung ba ni dge slong rnams chu tshags mi 'chang ba las gyur gyi/ de lta bas na dge slong gis chu tshags nye bar gzhag par bya'o/ /bcom ldan 'das kyis chu tshags nye bar bzhag par bya'o zhes bka' stsal pa dang / dge slong dag chu tshags du yod mi shes nas/ bcom ldan 'das kyis bka' stsal pa/ chu tshags ni lnga ste/ chu tshags gru gsum dang / bum tshags lce'u can dang ril ba zhabs tshags can dang / spyangs tshags dang / bsal tshags rnams so/ /sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na dge slong phan tshun zhe 'gras pa gnyis shig ljongs rgyu zhing dong ngo / /de dag las gcig la ni chu tshags yod/ cig shos la ni med do/ /gang la yod pa des chu btsags te 'thungs pa dang / gang la med pa des smras pa/ tshe dang ldan pa chu tshags g.yor cig / des ma ster nas de phongs par gyur pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong dag de lta bas na dge slong gis zhe 'gras pa dang lhan cig ljongs rgyu zhing 'gro bar mi bya'o/ /gal te de lta bu'i rkyen cig byung na gcig la gcig bzod pa gsol te 'dong bar bya'o// //'dul ba phran tshegs kyi gzhi/ bam po lnga pa/ sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na dge slong gnyis shig ljongs rgyu zhing dong ba dang / de dag las gcig la ni chu tshags yod/ cig shos la ni med nas de la des dris pa/ khyod la chu tshags yod dam/ des smras pa yod do/ /sbyin nam mi sbyin zhes ni ma smras so/ /de dag las gang la chu tshags yod pa des ni chu 'thungs pa dang / gang la med pa des smras pa/ tshe dang ldan pa chu tshags g.yor cig /des smras pa/ tshe dang ldan pa khyod kyis bdag la chu tshags ni dris kyi sbyin nam mi sbyin ma dris pas ma gus pa khyod la kho bos chu tshags ci'i phyir sbyin/ mi sbyin gyis song shig /des de la ma byin par de phongs par gyur pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ 'gro bar 'dod pa'i dge slong gis gal te chu tshags med na dge slong grogs po la khyed la chu tshags yod dam med dri bar bya'o/ /gal te yod do zhes zer na bdag la sbyin nam mi sbyin zhes brjod par bya zhing gal te sbyin no zhes zer na 'gro bar bya'i gzhan du na 'gro bar mi bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na dge slong gnyis shig ljongs rgyu zhing dong ngo / /de dag las gcig la ni chu tshags yod/ cig shos la ni med pa dang / gang la med pa des de la dris pa/ khyod la chu tshags yod dam med/ des smras pa/ yod do/ / bdag la g.yar ram mi g.yar/ g.yor ro/ /de dag dong ba dang ji tsam na lam kar 'dron po dag gcig 'ongs nas gang la chu tshags yod pa de'i bya ba gang yin pa de 'gron po de nyid las grub ste/ de phyir ldog par brtsams pa dang / gcig shos des smras pa/ tshe dang ldan pa khyod kyis bdag la chu tshags khas blangs pa g.yor cig /des smras pa/ de lta na de ni bden na des na bdag gis chu btsag pa'i slad du byin gyi/ thams cad kyi thams cad du byin pa ni ma yin no zhes ma byin pas de phongs par gyur pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong gang la chu tshags med pa des dge slong grogs po la khyod la chu tshags yod dam med ces dri bar bya'o/ /gal te yod do zhes zer na des ji bdag la sbyin nam mi sbyin zhes brjod par bya'o/ /gal te sbyin no zhes zer na gal te khyod slar ldog par gyur tam/ gzhan du 'gro bar gyur na sbyin nam mi sbyin zhes brjod par bya'o/ /gal te sbyin no zhes zer na 'gro bar bya yi gzhan du na 'gro bar mi bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe tshe dang ldan pa nye bar 'khor gyis sangs rgyas bcom ldan 'das la zhus pa/ btsun pa chu tshags ma mchis par gtsug lag khang gzhan nam/ grong gzhan du mchir gnang ngam/ nye bar 'khor mi gnang ngo / /gal te der song nas phongs par mi 'gyur na gnang ngo / /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe tshe dang ldan pa nye bar 'khor gyis bcom ldan 'das la zhus pa/ btsun pa chu tshags gcig gis gnyis ljongs rgyu zhing mchir gnang ngam/ nye bar 'khor gal te der song nas phongs par mi 'gyur na gnang ngo / /btsun pa chu tshags gcig gis mang po rnams sam/ dge 'dun dag ljongs rgyu mchir gnang ngam/ nye bar 'khor gal te der song nas phongs par mi 'gyur na gnang ngo / /btsun pa chu tshags ma mchis par chu klung gi 'gram nas mchir gnang ngam/ nye bar 'khor gnang ste/ mgyogs pa la gal te chu gzhan dang 'dres par ma gyur na rgyang grags re re zhing brtag par bya'o/ /chu gzhan dang 'dres par gyur na gang dang gang du len pa de dang der brtag par bya'o/ /mi mgyogs pa la ni 'gram dang 'gram du brtag par bya'o/ /de la mgyogs pa ni rgyun myur ba'o/ /mi mgyogs pa ni rgyun bul ba'o/ /btsun pa 'gram gyi nye 'khor gang lags/ nye bar 'khor 'dom gang kho ra khor yug go/ /btsun pa chab ma btsags shing ma brtags pa 'tshal du gnang ngam/ nye bar 'khor mi gnang ngo / /btsun pa chab ma btsags shing brtags pa 'tshal du gnang ngam/ nye bar 'khor mig gis dag go zhes bya ste gnang ngo / /btsun pa chab btsags shing brtags pa 'tshal du gnang ngam/ nye bar 'khor gnang ngo / /'on kyang chu rung ba ni lnga ste/ dge 'dun gyis rung ba dang / gang zag gis rung ba dang / chu tshags kyis rung ba dang / chu mig gis rung ba dang / khron pas rung ba'o/ /de la dge 'dun gyis rung ba ni gang dge 'dun 'thun pas bskos pa'i dge slong gis chu btsags par gyur pa ste/ dge 'dun gyis rung ba de la dge slong gis longs spyad par bya'o/ /gang zag gis rung ba ni dge slong gang tshul khrims ma nyams pa dang / lta ba ma nyams pa dang / spyod pa ma nyams pa dang / 'tsho ba ma nyams pas yongs su dag par gyur pa ste/ gang zag gis rung ba de la dge slong gis longs spyad par bya'o/ /chu tshags kyis rung ba ni chu tshags gang nam yang ma brtags pa ma yin pa des btsags pa ste/ btung bar bya'o/ /chu mig gis rung ba ni 'bab pa'o/ / khron pas rung ba ni khron pa gang gi chu dag pa de las nyi ma nub kar blangs nas ji srid nyi ma shar gyi bar du ste/ khron pas rung ba'i chu btung bar bya'o/ /dge slong rnams ha cang yun ring du chu rnyog pas 'khrug pa mthong bar gyur nas/ bcom ldan 'das kyis bka' stsal pa/ glang drug gi shing rta smyig mas bkang ba 'khor ba tsam 'am/ ji tsam gyis yid ches pa de tsam du brtag par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bram ze dang khyim bdag dad pa can rnams dge slong rnams la sder spyad dag 'bul bar byed pa na dge slong rnams mi len to/ /de dag gis smras pa/ 'phags pa dag gang gi tshe sangs rgyas bcom ldan 'das 'jig rten du byung bar ma gyur pa de'i tshe ni mu stegs can dag yon gnas lags/ da ni sangs rgyas bcom ldan 'das 'jig rten du byung bas khyed yon gnas lags te/ gal te khyed kyis ma bzhes na ci bdag cag 'jig rten 'di nas 'jig rten pha rol du dge ba'i lam rgyags ma mchis par mchi 'am bzhes shig /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge 'dun gyi phyir sder spyad dag blang bar bya'o/ /bcom ldan 'das kyis dge 'dun gyi phyir sder spyad dag blang bar bya'o zhes bka' stsal pa dang / dge slong rnams kyis de dag blangs nas mdzod du bcug ste bzhag nas de bzhin du lhung bzed dag tu za ba dang / bram ze dang / khyim bdag dad pa can rnams kyis mthong ste smras pa/ 'phags pa dag bdag cag gis sder spyad phul ba de dag mi gda' na/ dge slong rnams kyis smras pa/ bzhin bzangs dag mdzod na 'dug go/ /de dag gis smras pa/ 'phags pa dag ci bdag cag gi khyim na gnas ma mchis te/ bdag cag gis khyed la phul lam/ yongs su longs spyad na bdag cag la yongs su longs spyad pa'i rgyu las byung ba'i bsod nams su 'gyur ba zhig na khyed kyis kyang mdzod du bcug pa lta/ skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ sbyin bdag gis byin pa'i sder spyad dag yongs su longs spyad par bya'o/ /bcom ldan 'das kyis sbyin bdag gis byin pa'i sder spyad dag yongs su longs spyad par bya'o zhes bka' stsal pa dang / dge slong rnams kyis yongs su longs spyad par brtsams so/ /bram ze dang khyim bdag gzhan rgya chen po la mos pa de dag gis sder spyad tshad chen po dag phul ba dang / dge slong gnas brtan rnams de dag 'khru bas ngal bar gyur nas/ bcom ldan 'das kyis bka' stsal pa/ sder spyad kyi zhal ta ba bsko bar bya'o/ /bcom ldan 'das kyis sder spyad kyi zhal ta ba bsko bar bya'o zhes bka' stsal pa dang / bye brag med par bskos nas/ bcom ldan 'das kyis bka' stsal pa/ chos lnga dang mi ldan pa'i sder spyad kyi zhal ta ba ma bskos pa ni bsko bar mi bya/ /bskos pa ni dbyung bar bya ste lnga gang zhe na 'dun pas 'gro ba dang / zhe sdang dang / gti mug dang / 'jigs pas 'gro ba dang / sder spyad brims pa dang ma brims pa dag mi shes pa'o/ /chos lnga dang ldan pa'i sder spyad kyi zhal ta ba ma bskos pa ni bsko bar bya/ bskos pa ni dbyung bar mi bya ste/ lnga gang zhe na/ 'dun pas mi 'gro ba dang / zhe sdang gis ma yin pa dang / gti mug gis ma yin pa dang / 'jigs pas mi 'gro ba dang / sder spyad brims pa dang ma brims pa dag shes pa'o/ /bsko ba ni 'di ltar bya ste/ gnas mal bshams nas gaN DI brdungs te dris pa'i tshig gis dge 'dun rnams la bsgo nas dge 'dun thams cad 'dus te 'dug pa dang / re shig dang por spro bar bya ste/ ming 'di zhes bya gyi ba dge 'dun gyi sder spyad 'brim par bsko bar spro 'am/ gal te spro na des spro'o zhes smra bar bya'o/ /de'i 'og tu dge slong gcig gis gsol ba byas nas las bya ste/ dge 'dun btsun pa rnams gsan du gsol/ dge slong ming 'di zhes bgyi ba 'di dge 'dun gyi sder spyad 'drim par spro ste/ gal te dge 'dun gyis dus la bab cing bzod na dge 'dun gyis gnang bar mdzod cig dang / dge 'dun gyis ming 'di zhes bgyi ba sder spyad kyi zhal ta bar bskos te/ sder spyad kyi zhal ta ba ming 'di zhes bgyi ba dge 'dun gyi sder spyad 'drim par 'gyur ro/ /'di ni gsol ba'o/ /las ni 'di ltar bya ste/ dge 'dun btsun pa rnams gsan du gsol/ /dge slong ming 'di zhes bgyi ba 'di dge 'dun la sder spyad 'drim par spro ste/ de'i slad du dge 'dun gyis ming 'di zhes bgyi ba sder spyad kyi zhal ta bar bsko zhing sder spyad kyi zhal ta ba ming 'di zhes bgyi ba dge 'dun la sder spyad 'drim par 'gyur na/ tshe dang ldan pa gang dag ming 'di zhes bgyi ba sder spyad kyi zhal ta bar bsko bar bzod pa de dag ni cang ma gsungs shig / gang dag mi bzod pa de dag ni gsungs shig /dge 'dun gyis bzod cing gnang nas sder spyad kyi zhal ta ba ming 'di zhes bgyi ba dge 'dun la sder spyad dag 'drim par 'gyur te/ 'di ltar cang mi gsung bas de de bzhin du 'dzin to/ /dge slong rnams kyis zas zos nas lhag ma 'bags bzhin du de nyid la byin pa dang / bcom ldan 'das kyis bka' stsal pa/ lhag mas 'bags pa dag lhan cig gnas pa dang / nye gnas rnams kyis bkru bar bya'o/ /bcom ldan 'das kyis lhag mas 'bags pa dag lhan cig gnas pa dang / nye gnas rnams kyis bkru bar bya'o zhes bka' stsal pa dang / dge slong gzhan dag cig la 'khor med nas de dag bdag nyid 'khru bar byed pa dang / bcom ldan 'das kyis bka' stsal pa/ de dag ni 'di sder spyad kyi zhal ta ba dag kho nas bkru bar bya zhing de dag gis kyang de dag la sbyin par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyis kun dga' ra ba na bzhugs so/ drug sde rnams lhung bzed nag po gcig tu gcig char bza' bar brtsams nas de drug car gyis mnyam du lag pa bcug pa dang / lhung bzed lag pa la thogs te de 'phyang bar gyur pa dang / de dag gis tshe dang ldan pa dag lhung bzed nag po cho 'phrul byed pa la ltos/ de dag gis lag pa drangs te lhung nas chag pa dang / de dag gis rta rgad kyis btab pa dge slong rnams kyis mthong ste de dag gis smras pa/ tshe dang ldan pa dag 'di lta bu mi mdzes pa byas nas gnong ste 'dug par bya ba yin na/ khyed rgod pa lta/ de dag gis smras pa/ ci byas chang 'thungs sam sku 'dong zos/ dge slong rnams kyis smras pa dang / ci de yang byed dam/ gzhan ci byas/ lhung bzed nag po ma bcag gam/ 'di la 'gal ba ci zhig yod/ ci rdza mkhan shi 'am/ 'jim pa med dam/ gzhan byar zad mod/ de dag cang mi smra bar 'dug pa dang / skabs de dge slong rnams kyis bcom ldan 'das la gsol to/ /bcom ldan 'das kyis dgongs pa/ nyes dmigs gang cung zad byung ba ni dge slong rnams gcig tu za ba las gyur gyis/ de lta bas na dge slong gis gcig tu bza' bar mi bya'o/ /za na 'gal tshabs can du 'gyur ro/ /bcom ldan 'das kyis dge slong rnams kyis gcig tu bza' bar mi bya'o zhes bka' stsal pa dang / dge slong dag cig 'dron pa dang / thabs gcig chas pa 'dron pa phyogs gcig tu zan bza' bar brtsams pa na dge slong de dag thams cad la sder spyad dag mi bdog ste/ de dag re re nas zan za ba la ring zhig thogs nas 'dron pa thal ba dang / chom po dag gis bcom mo/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ lam du zhugs pa na gal te sder spyad dag ma rnyed na gcig tu bza' bar bya ste/ lag pa ni re re nas gzhug par bya zhing dbyung bar bya'i gcig car du ma yin no/ /bcom ldan 'das kyis lam du zhugs pa na gal te sder spyad dag ma rnyed na gcig tu bza' bar bya'o zhes bka' stsal pa dang / de na dge tshul gang dag 'khod pa de dag dang lhan cig gcig tu za bar byed pas nyes dmigs de nyid du gyur nas/ bcom ldan 'das kyis bka' stsal pa lhung bzed bzung la de dag dang yang lhan cig bza' bar bya'o/ /rung ba byed pa gzhan dag cig yod pa de dag zan za ba na 'dron pa rnams dang bral nas nyes dmigs de nyid du gyur pa dang / bcom ldan 'das kyis bka' stsal pa dang / gong bur sgongs la byin cig / dge slong gzhan dag cig gnyen gyi khyim du song ba dang / gnyen dag gis smras pa/ bdag cag lhan cig zos nas ring zhig lon pas zan lhan cig bzas tshur/ de dag gis smras pa/ khyed ni khyim pa/ bdag cag ni rab tu byung ba yin pas bzar mi rung ngo / /de dag mi dga' nas mchi mas brnangs shing 'dug go/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ gal te yang dang yang du don du gnyer na gdon mi za bar dus kyis 'chu bar shes nas gang du gzhan dag gis mthong nas mi mdzes par mi 'gyur ba der sder spyad bzung la bza' bar bya ste/ 'di la 'gyod par mi bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /drug sde rnams gos gcig pu dang bsod snyoms za ba bram ze dang khyim bdag rnams kyis mthong nas dris pa/ shes ldan dag zan za ba 'di dag su zhig / gzhan dag gis smras pa/ dge slong shAkya'i bu yin no/ /de dag 'phya zhing shes ldan dag ston pa ngo tsha shes pa dang ldan pa de lta bu la ngo tsha shes pa dang khrel yod pa dang bral ba 'di lta bu ga la yod ces zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni dge slong rnams gos gcig gyon pa las gyur gyis de bas na dge slong gis gos gcig dang zan bza' bar mi bya'o/ /za na 'gal tshabs can du 'gyur ro/ /bcom ldan 'das kyis dge slong gis gos gcig dang zan bza' bar mi bya'o zhes bka' stsal pa dang / rgan po rgas te nyam chung ba dang / nad pa sbyor mi bzod pa dag chos gos rnams gyon te zan bza' bar mi nus nas/ bcom ldan 'das kyis bka' stsal pa/ de dag gis rngul zan 'jam po dang / zan bza' bar bya ste/ 'di la 'gyod par mi bya'o/ /'on kyang gzhan dag cig gis ma nus pa dang bcom ldan 'das kyis bka' stsal pa/ de dag gis phyogs dben par bza' bar bya ste/ 'di la 'gyod par mi bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /drug sde rnams chu bo dregs ldan la gcer bur khrus byed pa bram ze dang khyim bdag rnams kyis mthong nas dris pa/ shes ldan dag gcer bu pa khrus byed pa 'di dag su zhig gzhan dag gis smras pa/ dge sbyong shAkya'i bu yin no/ /de dag 'phya zhing shes ldan dag ston pa ngo tsha shes pa dang ldan pa de lta bu la ngo tsha shes pa dang khrel yod pa dang bral ba 'di lta bu dag ga la yod ces zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis dgongs pa nyes dmigs gang cung zad byung ba ni dge slong rnams sgren mor khrus byed pa las gyur gyis de lta bas na dge slong gis sgren mor khrus mi bya'o/ /byed na 'gal tshabs can du 'gyur ro/ /'on kyang khrus ras bcang bar bya'o/ /bcom ldan 'das kyis khrus ras bcang bar bya'o zhes bka' stsal pa dang / dge slong rnams nyis sbyar 'chang nas/ bcom ldan 'das kyis bka' stsal pa/ chig rkyang bcang bar bya ste gang la nyis sbyar yod pa des ni chu brtags la bkru bar bya'o/ /chos gos gsum pa rnams mi rung ngo snyam nas mi 'chang ba dang / bcom ldan 'das kyis bka' stsal pa/ de rnams kyis kyang byin gyis brlabs te bcang bar bya'o/ / gzhan dag cig gis khrus ras ma rnyed pa dang / bcom ldan 'das kyis bka' stsal pa/ gang dag gis khrus ras ma rnyed nas lo ma dag gis mdun dang rgyab nas g.yogs te/ phyogs dben pa gang na gzhan dag gis mthong nas ma dad par mi 'gyur bar khrus bya'o/ /dge slong rnams khrus ras bcus te de dag 'gyod par gyur pa dang / bcom ldan 'das kyis bka' stsal pa/ ras chig rkyang la ni srog chags dag med mod kyi 'on kyang ras bshal nas bcu bar bya ste/ 'di la 'gyod par mi bya'o/ / sdom ni/ mon sran gre'u dang mi rung ba'i/ /sa dang bskyugs shing za ba dang / /bdams shing zas ni za ba dang / /'gyod dang khar ba'i lhung bzed do/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /tshe dang ldan pa nam gru gang ci la yang khu phrig za ba cig pas de'i ming nam gru khu phrig can nam gru khu phrig can zhes bya bar chags so/ /de dus gzhan zhig na chab khung sar zhugs pa dang / des de na mon sran gre'u'i zhal lu zhig mthong nas de yang dag pa ma yin pa'i rtog pa skyes pa bdag gis sa bon gyi chos ma rung bar byas so snyam mo/ /ci tsam dus gzhan zhig na dge 'dun la mon sran gre'u'i bza' ba dag cig grub pa de mi za bar lhung bzed bkab ste 'dug pa dang / lhan cig gnas pa dang / nye gnas dag gis smras pa/ mkhan po dge 'dun la mon sran gre'u'i bza' ba dag byung ba ci'i slad du mi gsol/ des smras pa bu dag kho bos sa bon gyi chos ma rung bar byas so/ /de dag gis smras pa/ mkhan po ji lta bu zhig bgyis/ des ji ltar gyur pa bsnyad pa dang / de dag gis kyang mi za bar brtsams so/ /de dag la 'grogs bshes rnams kyis dris pa/ ci'i phyir mi za/ de dag gis ji ltar gyur pa bsnyad pa dang / de 'khor mang po can zhig pas de la brten nas dge 'dun thams cad kyis ma zos so/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag sa bon gyi rigs tshos dka' ba zhes bya ba yod de/ de yang rlangs pa byung na chos so zhes byas nas bza' bar bya ste/ 'di la 'gyod par mi bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /tshe dang ldan pa nye bar 'khor gyis sangs rgyas bcom ldan 'das la zhus pa/ btsun pa mi rung ba'i sa nas shing 'khrungs la rung ba'i sar 'bras bu lhags na yongs su longs spyod par bgyi 'am/ yongs su longs spyod par mi bgyi/ bcom ldan 'das kyis bka' stsal pa/ nye bar 'khor yongs su longs spyod par mi bya'o/ /btsun pa re shig rung ba'i sa nas shing 'khrungs la mi rung ba'i sar 'bras bu dag lhags na yongs su longs spyad par bgyi 'am/ yongs su longs spyad par mi bgyi/ nye bar 'khor yongs su longs spyad par mi bya'o/ /btsun pa re shig rung ba'i sa nas shing 'khrungs la mi rung ba'i sar 'bras bu dag lhags na yongs su longs spyad par bgyi 'am/ yongs su longs spyad par mi bgyi/ nye bar 'khor gal te zhag tu ma lon na yongs su longs spyad par bya'o/ /btsun pa re shig rung ba'i sa nas shing 'khrungs la mi rung ba'i sar 'bras bu dag lhags na yongs su longs spyod par bgyi 'am/ yongs su longs spyad par mi bgyi/ nye bar 'khor yongs su longs spyad par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na bram ze zhig gnas pa des slongs mo btab pas glang zhig rnyed do/ / de'i 'og tu ba zhig rnyed do/ /de'i 'og tu yang glang zhig rnyed do/ /de'i 'og tu yang ba zhig rnyed de de'i ba lang khyu longs par gyur to/ /bram ze des thog mar rnyed pa'i glang la bkra shis kyi glo byung nas/ glang de yang yan du btang ngo / /dus gzhan zhig na de rgas 'khogs nyam chung bar gyur te/ de chu 'dod nas chu bo dregs ldan gyi 'gram du song ba las 'dam du song ngo / /tshe dang ldan pa shA ri'i bu yang lam der song ba las/ des de mthong nas bsams pa/ glang 'di la dge ba'i rtsa ba lta cung zad yod dam snyam pa dang / yod par mthong ngo / /su la rag las snyam pa dang / bdag kho na la ste/ des 'dam nas phyung nas lag pas phyis so/ /de nas bzhin bzangs 'di ltar 'du byed thams cad ni mi rtag pa'o/ /chos thams cad ni bdag med pa 'o/ /mya ngan las 'das pa ni zhi ba'o zhes chos tshig gsum bshad de nga la dang bar yang gyis shig dang / de lta na byol song gi skye gnas las 'dod chags dang bral bar 'gyur ro zhes smras nas song ngo / /de yang wa dag gis zos pa dang / de wa dag gis za ba'i tshe bsams pa/ gal te 'phags pa 'dir ma phyin na bdag 'di 'dra ba'i gnas skabs su mi 'gyur ro snyam nas/ de tshe dang ldan pa shA ri'i bu la sems mngon par dang bar byas nas dus las 'das te mnyan yod na bram ze las drug la brtson pa'i rigs shig tu skyes so/ /tshe dang ldan pa shA ri'i bus glang de'i gnas skabs de ji lta bu zhig yin pa bsams pa dang / ji tsam na dus las 'das par mthong ngo / /yang gar skyes bsams pa dang / mnyan yod nyid du bram ze las drug la brtson pa'i rigs su skyes par mthong nas de khyim der yang dang yang du song zhing des bram ze de chung ma dang bcas te skyabs su 'gro ba dang / bslab pa'i gzhi dag la bkod do/ /de dus gzhan zhig na phyi bzhin 'brang ba'i dge tshul med par song ba dang / bram ze des smras pa/ 'phags pa ci phyi bzhin 'brang ba'i dge tshul mi mnga' 'am/ des smras pa bzhin bzangs ci kho bo'i phyi bzhin 'brang ba'i dge tshul dag rtswa ka sha la bzung ba 'am/ rtswa ku sha la bzung bas 'byung ngam/ khyod lta bu las rnyed pa gang yin pa de kho bo'i phyi bzhin 'brang ba'i dge tshul du 'gyur mod/ 'phags pa bdag gi mchis brang 'di la sems can zhugs te gal te khye'ur btsas na de khyod kyi phyi bzhin 'brang ba'i dge tshul bgyi 'o/ /bzhin bzangs nad med cig blangs so zhes smras nas song ngo / /de zla ba brgyad dam dgu 'das nas bu ba lang gi sha tshugs lta bu zhig btsas pa dang / de'i nye du rnams lhags te 'dus nas zhag bdun gsum nyi shu gcig tu btsas pa'i btsas ston rgya cher byas nas ming 'dogs par byed de/ khye'u 'i ming cir gdags/ nye du rnams kyis smras pa/ gang gi phyir khye'u 'di sha tshugs ba lang dang 'dra ba de'i phyir khye'u'i ming ba lang bdag tu gdags so/ / zhes ming ba lang bdag ces bya bar brtags so/ /de bskyed bsrings nas chen por gyur pa dang / de nas tshe dang ldan pa shA ri'i bu snga dro sham thabs dang chos gos dang lhung bzed thogs te/ mnyan yod du bsod snyoms kyi phyir zhugs so/ /mnyan yod du bsod snyoms la rgyu ba na des bram ze de'i khyim du phyin pa dang / bram ze des byon pa legs so zhes bya ba'i smra ba kun du spyad nas rkang pa la phyag byas so/ /chung mas kyang de la bza' ba dang bca' ba gtsang zhing bsod pas lhung bzed bkang ste phul lo/ /khye'u de tshe dang ldan pa shA ri'i bu'i gdong du lta nas des bram ze la brda byas pa dang / des khye'u de la smras pa/ bu khyod ngas ma btsas pa nas 'phags pa shA ri'i bu'i phyi bzhin 'brang ba'i dge tshul du phul gyis 'phags pa dang lhan cig song shig / sems can de srid pa tha ma pa zhig ste/ de'i phyi bzhin song ba dang / des de rab tu phyung bsnyen par rdzogs par byas te/ gdams ngag byin no/ /des 'bad brtsal bsgrims pas 'khor ba'i 'khor lo g.yo ba dang / mi g.yo ba cha lnga pa 'di nyid rtogs nas 'du byed kyi rnam pa thams cad chos nyid kyis 'jig pa ltung ba/ 'gyes pa/ rnam par 'jig pa'i chos can du bsgoms te nyon mongs pa thams cad spangs nas dgra bcom pa nyid mngon sum du byas te/ khams gsum gyi 'dod chags dang bral ba/ sems gser dang bong bar mtshungs pa/ tsan dan dang ste 'ur 'dra ba/ nam mkha' dang lag mthil du mnyam pa/ ma rig pa'i sgo nga'i sbubs bcom pa/ rig pa dang / mngon par shes pa dang / so so yang dag par rig pa thob pa/ srid pa dang rnyed pa la chags pa dang bkur sti la rgyab kyis phyogs pa/ dbang po dang nye dbang du bcas pa'i lha rnams kyis mchod pa dang / phyag bya ba dang / gus par smra bar bya ba'i dgra bcom par gyur to/ /de la las las skyes pa'i mid pa gnyis yod de/ gcig nas ni skyugs pa 'byin to/ /cig shos nas ni myid do/ /gang gi tshe bcom ldan 'das kyis dus ma yin pa'i zas kyi bslab pa ma bcas pa de'i tshe ni bskyugs shing mid do/ /gang gi tshe bcas pa de'i tshe ni bskyugs shing 'dor bas de lus rke/ nyam chung / shig shig po/ rod nyams par gyur to/ /sangs rgyas bcom ldan 'das rnams ni mkhyen bzhin du rmed pa yin pas sangs rgyas bcom ldan 'das kyis tshe dang ldan pa kun dga' bo la rmas pa/ kun dga' bo ba lang bdag ci'i phyir lus rke/ nyam chung / shig shig po/ rod nyams par gyur/ des ji ltar gyur pa gsol pa dang / bcom ldan 'das kyis bka' stsal pa/ kun dga' bo gang la las kyi rnam par smin pa las skyes pa'i mid pa gnyis grub pa des bskyugs pa lan gnyis sam/ gsum bor te kha bkrus nas lhag ma mid par bya ste 'di la 'gyod par mi bya'o/ /dge slong rnams zas zos nas skyugs te de dag 'gyod par gyur pa dang / bcom ldan 'das kyis bka' stsal pa/ gal te dge slong gzhan zhig zan zos te skyugs na des kha bkru bar bya ste/ 'di la 'gyod par mi bya'o/ /gang gi tshe tshe dang ldan pa ba lang bdag rab tu phyung ba de'i tshe bram ze dang khyim bdag rnams 'phya smod/ kha zer zhing dge sbyong shAkya'i bu rnams kyi dge sbyong gi tshul nyams shing tshangs pa'i tshul nyams te/ da ni ba lang bdag la sogs pa 'jigs 'jigs lta rnams kyang rab tu 'byin to zhes pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ nyan thos chen po ri rab dang 'dra ba la skye bo'i tshogs phal po che ma dad par byed kyis/ de lta bas na ba lang bdag yul dbus su gnas su mi gzhug go snyam nas/ tshe dang ldan pa ba lang bdag la bka' stsal pa/ ba lang bdag khyod deng phyin chad yul dbus na ma gnas par mtha' 'khob kyi gnas mal dag sten cig / btsun pa de ltar 'tshal lo zhes tshe dang ldan pa ba lang bdag gis bcom ldan 'das kyi ltar mnyan nas mnyan yod nas mi snang bar gyur te/ shing shir sha ka'i gzhal med stong par 'dug go/ /de nas bcom ldan 'das kyis dge slong rnams la bka' stsal pa/ dge slong dag nga'i nyan thos kyi dge slong bas mtha'i gnas mal la dad pa rnams kyi nang na mchog ni 'di lta ste/ dge slong ba lang bdag 'di yin no/ /dge slong rnams the tshom skyes nas the tshom thams cad gcod pa sangs rgyas bcom ldan 'das la zhus pa/ btsun pa tshe dang ldan pa ba lang bdag gis las ci zhig bgyis na las de'i rnam par smin pas sha tshugs pa lang lta bur gyur lags/ bcom ldan 'das kyis bka' stsal pa/ dge slong dag ba lang bdag nyid kyis las rnams byas shing bsags pa/ tshogs rnyed pa/ rkyen yongs su bsgyur ba/ chu bo bzhin nye bar gnas pa nges par myong bar 'gyur ba yin te/ ba lang bdag nyid kyis byas pa'i las rnams gzhan su zhig gis myong bar 'gyur/ dge slong dag las byas shing bsags pa rnams ni phyi rol gyi sa'i khams la smin par mi 'gyur/ chu'i khams la ma yin/ mye'i khams la ma yin/ rlung gi khams la ma yin gyi/ 'on kyang las dge ba dang / mi dge ba byas shing bsags pa rnams ni zin pa'i phung po dang / skye mched dang / khams dag kho na la rnam par smin par 'gyur ro/ /bskal pa brgya phrag rnams su yang / /las rnams chud zar mi 'gyur te/ /tshogs shing dus la bab pa na/ /lus can rnams la 'bras bur smin/ /dge slong dag sngon byung ba bskal pa bzang po 'di nyid la skye dgu'i tshe lo nyi khri thub pa na yang dag par rdzogs pa'i sangs rgyas 'od srung zhes bya ba/ rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das 'jig rten du byung ste de'i bstan pa la 'di rab tu byung bar gyur to/ /dge slong gang gis rab tu phyung ba de rgas 'khogs nyam chung ba zhig ste/ de de'i lhung bzed 'khru ba na dge slong gzhan zhig dang lhan cig kha ton zer ba las ring zhig thogs nas de'i mkhan po des rang dgar zan zos pa dang / de kha ton la chags pas mkhan po de la 'phyas so/ /ji tsam dus gzhan zhig na zan zos nas bdag nyid kyis lhung bzed bkrus te mkhan po'i drung du song ba dang / da dung zan za ba mthong nas de kun nas dkris pas smras pa/ mkhan po ci khyod glang rgan bzhin du ldad cing bzhugs sam/ des bsams pa/ 'di kun nas dkris pas gal te cung zad cig smras na/ je thu bar 'khrug pa bskyed par 'gyur gyis gang gi tshe kun nas dkris pa dang bral ba de'i tshe dri bar bya'o snyam nas/ des de kun nas dkris pa dang bral ba dang smras pa/ tshe dang ldan pa ci zer/ des smras pa/ khyod glang rgan bzhin ldad dam zhes de skad mchi mod/ des smras pa/ tshe dang ldan pa khyod kyis nga su yin shes sam/ 'tshal te khyod kyang yang dag par rdzogs pa'i sangs rgyas 'od srung gi gsung rab la rab tu byung ba lags la/ bdag kyang de kho na'i gsung rab la rab tu byung ba lags so/ /des smras pa/ de ni de lta yin te bden na 'on kyang rab tu byung bas bya ba 'am byed pa gang yin pa de ngas byas te/ de lta bas na nga ni 'ching ba thams cad las grol ba yin/ khyod ni 'ching ba mtha' dag gis bcings pa yin na khyod kyis ngag gi las rtsub mo smras kyis/ khyod kyis las de ci nas kyang bsrabs pa nyid dang / yongs su zad pa nyid dang / yongs su gtugs par 'gyur bar nyes pa la nyes par shogs shig / des nyes pa la nyes par bshags so/ /gang 'dis dge slong dgra bcom pa la glang rgan zhes bya ba'i smra ba kun du spyod pa kun du spyad pa'i las de'i rnam par smin pas tshe rabs lnga brgyar ba lang gi skye gnas su skyes so/ /las kyi lhag ma de nyid kyis da ltar sha tshugs ba lang lta bur skyes so/ /yang dge slong rnams kyis sangs rgyas bcom ldan 'das la zhus pa/ btsun pa tshe dang ldan pa ba lang bdag gis las ci zhig bgyis na las de'i rnam par smin pas/ bcom ldan 'das kyis bas mtha'i gnas mal la dad pa rnams kyi nang na mchog tu bstan lags/ bcom ldan 'das kyis bka' stsal pa/ smon lam gyi dbang gis so/ /gang du smon lam btab lags/ 'di yang dag par rdzogs pa'i sangs rgyas 'od srung de kho na'i gsung rab la rab tu byung bar gyur te/ der 'dis tshe gcig tu tshangs par spyod pa spyad na yon tan gyi tshogs 'ga' yang thob par ma gyur to/ /gang gi thad du rab tu byung ba de ni bcom ldan 'das 'od srung gis bas mtha'i gnas mal la dad pa rnams kyi nang na mchog tu lung bstan to/ /de na 'dis smon lam btab pa/ 'di ltar bdag gis bcom ldan 'das yang dag par rdzogs pa'i sangs rgyas yon gnas bla na med pa 'od srung gi thad du tshe gcig tu tshangs par spyod pa spyad kyang yon tan gyi tshogs 'ga' yang thob par ma gyur gyis/ dge ba'i rtsa ba 'dis bdag bcom ldan 'das yang dag par rdzogs pa'i sangs rgyas 'od srung gis bram ze'i khye'u bla ma la/ bram ze'i khye'u khyod skye rgu'i tshe lo brgya thub pa na de bzhin gshegs pa dgra bcom pa yang dag par rdzogs pa'i sangs rgyas shAkya thub pa zhes bya bar 'gyur ro zhes lung bstan pa gang yin pa de'i gsung rab la bdag rab tu byung nas nyon mongs pa thams cad spangs te/ dgra bcom pa nyid mngon sum du byed par 'gyur zhing / ji ltar bdag gi mkhan po bcom ldan 'das yang dag par rdzogs pa'i sangs rgyas 'od srung gis bas mtha'i gnas mal la dad pa rnams kyi nang na mchog tu bstan pa de bzhin du bdag kyang shAkya'i rgyal po chen po shAkya thub pa des bas mtha'i gnas mal la dad pa rnams kyi nang na mchog tu ston par gyur cig / smon lam gyi dbang gis da ltar de bzhin gshegs pas bas mtha'i gnas mal la dad pa rnams kyi nang na mchog tu bstan to/ /dge slong dag de ltar na las gcig tu gnag pa rnams kyi rnam par smin pa ni gcig tu gnag la/ gcig tu dkar ba rnams kyi ni gcig tu dkar/ 'dren ma rnams kyi ni 'dren ma yin no/ /dge slong dag de lta bas na las gcig tu gnag pa dang 'dren ma rnams spangs nas las gcig tu dkar ba dag la brtsal bar bya ste/ dge slong dag gis de lta bu la bslab par bya'o/ / sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /drug sde rnams 'di byin cig /'di las byin cig ces 'dam zhing 'dam zhing zas za ba dang 'drim pa 'khrugs par gyur nas skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong gis bdams shing zas bza' bar mi bya ste/ za na 'gal tshabs can du 'gyur ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong rnams zas za ba na lhung bzed bzed pa las de lhung bzed kyi gzhi'i steng du lhung / lhung bzed kyi gzhi bzed pa las lhung bzed du lhung nas de rnams 'gyod de mi za ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag lhung bzed bzed pa las lhung bzed kyi gzhi'i steng du lhung na byin len byas pa zhes bya/ lhung bzed kyi gzhi bzed pa las lhung bzed kyi nang du lhung na byin len byas pa zhes bya/ lhung bzed bzed pa las lhung bzed kyi nang du lhung na byin len byas pa zhes bya/ lhung bzed kyi gzhi bzed pa las lhung bzed kyi gzhi'i nang du lhung na byin len byas pa zhes bya ste/ 'on kyang byin len gyi sems ni nye bar gzhag par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /tshe dang ldan pa nye dga' bo khar ba'i mgar ba'i drung du song nas des smras pa/ bzhin bzangs khar ba'i lhung bzed cig bya na nus sam/ des smras pa/ 'phags pa 'di nyid bdag gi bzo lags kyis tshad ji tsam zhig bgyi/ chen por bya'o/ /'phags pa khyod la khar ba'i lhung bzed chen po ci 'tshal/ bkren pa khyod ci rin med par byed du 'jug snyam 'am/ rin thang bzhin sbyin gyis byos shig /des bsam pa/ 'di la bdag gi khar ba ci zhig 'god bya'o snyam nas des de'i khar ba'i lhung bzed chen po zhig byas so/ /des smras pa/ gang 'di'i nang du chud pa gzhan zhig kyang gyis shig /des gzhan yang byas so/ /de bzhin du gzhan gang yin pa bdun pa'i bar du byas nas de rnams tshe dang ldan pa nye dga' bos dge tshul 'khrur bcug ste/ tshon sna lnga pa'i skud pa las dra ba byed du bcug nas de rnams der bcug ste/ go rim bshams nas dge tshul gyi mgo la bkur te gang du 'gron du bos pa der 'gro'o/ /son nas de dag bkram ste 'dug pa dang / khyim bdag dang bram ze rnams kyis smras pa/ 'phags pa ci khyod kyis khar ba'i mgar ba'i zong bkram 'am/ des smras pa/ bkren pa khyed ci shes/ 'dir ni re shig phye dag blang ngo / /'dir ni snum khur dag go/ /'dir ni 'bras chen dag go/ /gzhan rnams su ni tshod ma dag blang ngo / /de rnams kyis smras pa/ 'phags pa gal te de ltar na ko res 'ga' tshod ma mang po dag 'byung bas gzhan dag dang gzhan dag kyang nye bar gzhag dgos so zhes byas pa dang / de cang mi smra bar 'dug go/ /skabs de dge slong rnams kyis bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni dge slong rnams khar ba'i lhung bzed 'chang ba las gyur gyis de lta bas na dge slong gis khar ba'i lhung bzed bcang bar mi bya'o/ /'chang na 'gal tshabs can du 'gyur ro/ /kha gzar dang / tshwa khug dang / phul ba'i btung phor ni ma gtogs so/ sdom ni/ rkang pa bkru ba bkag pa dang / /shol zangs dag ni gnang ba dang / /de bzhin bsil yab nyid dang ni/ /sbrang ma rnams la g.yab pa'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong rnams bab bab tu rkang pa 'khru ba der sbrang bu dag gis gang bar 'dug go/ /ji tsam na bram ze dang khyim bdag gtsug lag khang ltar 'ongs pa de dag gis mthong nas smras pa/ 'phags pa sbrang bu zi zi mchi bas gang dang phyogs 'di ci zhig /dge slong rnams kyis smras pa/ bdag cag gis 'dir rkang pa bkrus so/ /de dag 'phya ste/ shAkya'i bu'i dge sbyong rnams ni gtsang sbra med de bab bab tu rkang pa 'khru'o zhes pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ rkang pa bab bab tu bkru bar mi bya'i/ 'on kyang gnas khang gi steng shar lho'i mtshams su rkang pa bkru ba'i gnas bya'o/ /bcom ldan 'das kyis rkang pa bkru ba'i gnas bya'o zhes bka' stsal pa dang / dge slong rnams kyis ji lta bu bya ba mi shes nas/ bcom ldan 'das kyis bka' stsal pa/ rus sbal lta bur bya'o/ /rab tu 'jam par byed pa dang / bcom ldan 'das kyis bka' stsal pa/ rtsub por bya'o/ /dge slong rgas pa 'khogs pa nyam chung ba de dag phyogs der 'gro mi nus pa dang bcom ldan 'das kyis bka' stsal pa/ de dag gis gyo mo nye bar gzhag par bya'o/ /dge slong rnams gyo mor 'khru ba na de chag nas je ma rung bar gyur pa dang / bcom ldan 'das kyis bka' stsal pa/ shol zangs nye bar gzhag par bya'o/ /bcom ldan 'das kyis shol zangs nye bar gzhag par bya'o zhes bka' stsal pa dang / drug sde rnams kyis gser dang / dngul dang / bai dUr+ya dang / shel las byas pa'i shol zangs dag nye bar gzhag go/ /bram ze dang khyim bdag rnams kyis mthong nas smras pa/ 'phags pa 'di ci zhig /de rnams kyis smras pa/ bzhin bzangs dag bcom ldan 'das kyis shol zangs gnang ngo / /'phags pa ci dge sbyong khyod 'dod pa'i yon tan dag gis gnod dam/ de dag gis smras pa/ khyed kyi mgrin par rdog pas mnan to/ /de dag 'phya ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ gser dang / dngul dang / shel dang / bai dUr+ya las byas pa'i shol zangs dag nye bar gzhag par mi bya ste/ 'on kyang 'jim pa las byas pa'i shol zangs nye bar gzhag par bya'o/ /rnga mo lta bu nye bar bzhag pa dang / de ldeg nas bcom ldan 'das kyis bka' stsal pa/ glang po che'i rkang pa lta bur bya zhing de'i dbus su 'bur ka dam pa'i me tog lta bur bya'o/ /shin tu 'jam por byas pa dang / bcom ldan 'das kyis bka' stsal pa/ rtsub por bya'o/ /dge slong rnams shol zangs bab bab tu 'jog nas/ bcom ldan 'das kyis bka' stsal pa/ dge 'dun gyi ni khang thog tu khas phul la zhog cig /gang zag dag gi ni gnas khang gi sgo lkog tu zhog cig / sangs rgyas bcom ldan 'das yul kau sham bI na sgra len gyi kun dga' ra ba na bzhugs so/ /dpyid kyi yul la bab nas dge slong rnams tsha bas rmya ste/ de dag lus skya bo bseng bseng por gyur cing rke/ nyam chung / shig shig po/ rod nyams par gyur pa khyim bdag dang / bram ze rnams kyis mthong nas smras pa/ 'phags pa khyed ci'i slad du lus skya bo bseng bseng por gyur cing rke/ nyam chung shig shig po/ rod nyams par gyur/ de dag gis ji ltar gyur pa bsnyad pa dang / de rnams kyis smras pa/ 'phags pa dag khyed bsil yab mi 'chang ngam/ bzhin bzangs dag bcom ldan 'das kyis ma gnang ngo / /'phags pa dag khyed kyi ston pa ni thugs rje can yin pas gnang bar 'gyur ro/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis bsil yab bcang bar bya'o/ /bcom ldan 'das kyis bsil yab bcang bar bya'o zhes bka' stsal pa dang / drug sde rnams kyis yu ba gser dang / dngul dang / shel dang / bai dUr+ya las byas pa bsrubs pa/ bkra ba dang / nye bar bkra ba'i yu ba can gyi bsil yab dag bcangs pa dang / bram ze dang / khyim bdag rnams kyis shes bya ba nas/ khyed kyi mgrin pa rdog pas mnan to zhes bya ba'i bar snga ma bzhin no/ /de dag 'phya ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ yu ba gser dang dngul dang / bai dUr+ya dang / shel las byas pa bsrubs pa bkra ba dang / nye bar bkra ba'i yu ba can gyis bsil yab dag nye bar gzhag par mi bya'i/ 'on kyang bsil yab gnyis po rtsa ba ru ta las byas pa dang / shing ta la'i 'dab ma bcang bar bya'o/ /bram ze dang khyim bdag dad pa can dag dge slong rnams la bsil yab rnam pa sna tshogs 'bul ba na zhes bya ba'i bar snga ma bzhin te/ bcom ldan 'das kyis bka' stsal pa/ de lta bas na gnang gis dge 'dun gyi phyir bcang bar bya'o/ /sangs rgyas bcom ldan 'das yangs pa can na spre'u rdzing gi 'gram khang pa brtsegs pa na bzhugs so/ /dge slong rnams la sbrang ma dag za ste/ de dag gi lus sbrang mas zos pas 'brum bus gang ste/ de dag gis yang dang yang du phrugs pa dang / bram ze dang khyim bdag rnams kyis smras pa/ 'phags pa dag khyed ci'i phyir lus 'di ltar 'brum bus gang / de dag gis ji ltar gyur ba bsnyad pa dang / de rnams kyis smras pa/ 'phags pa dag khyed sbrang yab mi 'chang ngam bzhin bzangs dag bcom ldan 'das kyis ma gnang ngo / /'phags pa dag khyed kyi ston pa ni thugs rje can yin pas gnang bar 'gyur ro/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis sbrang yab bcang bar bya'o/ /bcom ldan 'das kyis sbrang yab bcang bar bya'o zhes bka' stsal pa dang / drug sde rnams kyis yu ba gser dang / dngul dang / bai dUr+ya dang / shel las byas pa dang / rnga ma las byas pa'i sbrang yab dag nye bar bzhag pa dang / bram ze dang / khyim bdag rnams shes bya ba'i bar snga ma bzhin no/ /sbrang yab ni lnga ste/ bal las byas pa dang / sha na las byas pa dang / ras bal las byas pa dang / ras ma dang / lo ma sbams pa'o/ / sdom ni/ gos mdud pa dang lus dang ni/ /khar ba dra ba 'chang ba dang / /sgog skya dag ni bkag pa dang / /nad pa la ni gnang ba'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bcom ldan 'das kyis stongs mo bya'o zhes bka' stsal pa dang / de na dge slong gcig skas la 'dzeg pa na 'og na shing mkhan zhig 'dug pa des de mdogs dang ba mthong nas smras pa/ 'phags pa khyod skyes pa'i dbang po dang ldan pas bdag gis pho lags par gdod 'tshal lo/ /de gnong nas cang mi smra bar 'dug pa'i skabs de dge slong rnams kyis bcom ldan 'das la gsol pa dang / bcom ldan 'das kyis dgongs pa nyes dmigs gang cung zad byung ba ni dge slong rnams gos mdud pa ma bor ba nyid du skas la 'dzeg pa las gyur gyis de'i phyir dge slong mkhar lan byed pa gos mdud pa bor nas mkhar lan byed du gzhug go snyam du dgongs nas/ dge slong rnams la bka' stsal pa/ dge slong dag de lta bas na dge slong stongs mo byed pas gos mdud pa bor nas mkhar lan bya'o/ /bcom ldan 'das kyis dge slong gis gos mdud pa bor nas mkhar lan bya'o zhes bka' stsal pa dang / dge slong rnams gos mdud pa bor nas mkhar lan byed pa na ma dad pa rnams 'phya ste/ 'phags pa ci stobs 'gyed dam/ de dag gis smras pa/ bzhin bzangs dag mkhar lan byed do/ /de dag cang mi smra bar 'dug pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ gang dag skas la 'dzeg pa de dag gis mdud pa bor bar bya'i gzhan dag gis ni ma yin no/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /drug sde rnams lus kyis khur khyer ba dang / bram ze dang / khyim bdag rnams 'phya ste/ 'phags pa bdag cag ni re shig pha ma dang bu dang chung ma'i slad du khur thogs na khyed su'i slad du lus kyis khur bsnams/ de dag gis smras pa/ bzhin bzangs dag bdag cag la yang ston pa mchod pa dang / dge 'dun bshos gsol ba dang / nad pa rnams kyi rim gro dang / bya ba mang po yod do/ /de dag cang mi smra bar 'dug go/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na dge slong gis lus kyis khur bkur bar mi bya'o/ /khyer na 'gal tshabs can du 'gyur ro/ /sangs rgyas bcom ldan 'das rgyal po'i khab na bya rgod kyi phung po'i ri la bzhugs so/ /dge slong rnams bya rgod kyi phung po'i ri la 'dzeg cing 'bab pa na de dag gred cing rdeg 'chos te snad par gyur to/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na dge slong rnams kyis khar ba bcang bar bya'o/ /bcom ldan 'das kyis dge slong rnams kyis khar ba bcang bar bya'o zhes bka' stsal pa dang / drug sde rnams kyis gser dang / dngul dang / bai dUr+ya dang / shel las byas pa'i khar ba bsrubs pa/ bkra ba/ nye bar bkra ba dag bcangs pa/ bram ze dang khyim bdag rnams kyis mthong nas 'phya ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag de lta bas na gnyis kyis khar ba bcang bar bya ste/ rgan po rgas te nyam chung ba dang / nad pa sbyor mi nus pas so/ /bcom ldan 'das kyis gnyis kyis khar ba bcang bar bya ste/ rgan po rgas te nyam chung ba dang / nad pa sbyor mi bzod pas so zhes bka' stsal pa/ rgan por gtogs pa dang / nad par gtogs pa rnams kyang khar ba 'chang ba zhugs pa dang / bcom ldan 'das kyis bka' stsal pa/ rgan po dang nad pas dge 'dun la khar ba'i sdom pa gsol bar bya zhing / gang la dge 'dun gyis khar ba'i sdom pa byin pa des khar ba bcang bar bya'o/ gsol ba ni 'di ltar bya ste/ gnas mal bshams la gaN DI brdungs te dris pa'i tshig gis dge slong rnams la bsgo nas dge 'dun thams cad 'dus shing 'khod pa dang / dge slong rgan po rgas te nyam chung ba 'am/ nad pa sbyor mi bzod pas rgan pa'i mthar tsog tsog por 'dug la thal mo sbyar te 'di skad ces smra bar bya'o/ /dge 'dun btsun pa rnams gsan du gsol/ bdag dge slong rgan po rgas te nyam chung ba 'am nad pa sbyor mi bzod pa ming 'di zhes bgyi ba dge 'dun las khar ba'i sdom pa gsol na/ dge 'dun thugs brtse ba can btsun pa rnams kyi thugs brtse bas nye bar bzung ste/ bdag dge slong rgan po rgas te nyam chung ba 'am/ nad pa sbyor mi bzod pa ming 'di zhes bgyi ba la khar ba'i sdom pa stsal du gsol/ de bzhin du lan gnyis lan gsum gyi bar du'o/ /de'i 'og tu dge slong gcig gis gsol ba byas nas las bya ste/ dge 'dun btsun pa rnams gsan du gsol/ dge slong rgan po rgas te nyam chung ba 'am/ nad pa sbyor mi bzod pa ming 'di zhes bgyi ba 'di dge 'dun las khar ba'i sdom pa gsol te/ gal te dge 'dun gyis dus la bab cing bzod na dge 'dun gyis gnang bar mdzod cig dang / dge 'dun gyis dge slong rgas te nyam chung ba 'am/ nad pa sbyor mi bzod pa ming 'di zhes bgyi ba la khar ba'i sdom pa stsal to/ /'di ni gsol ba'o/ /las ni 'di ltar bya ste/ dge 'dun btsun pa rnams gsan du gsol/ dge slong rgan po rgas te nyam chung ba 'am/ nad pa sbyor mi bzod pa ming 'di zhes bgyi ba dge 'dun las khar ba'i sdom pa gsol te/ de'i slad du dge 'dun gyis dge slong rgan po rgas te nyam chung ba 'am/ nad pa sbyor mi bzod pa ming 'di zhes bgyi ba la khar ba'i sdom pa stsol na/ tshe dang ldan pa gang dag dge slong rgan po rgas te nyam chung ba 'am/ nad pa sbyor mi bzod pa ming 'di zhes bgyi ba la khar ba'i sdom pa stsal bar bzod pa de dag ni cang ma gsung shig / gang dag mi bzod pa de dag ni gsungs shig /dge 'dun gyis bzod cing gnang nas dge 'dun gyis dge slong rgan po rgas te nyam chung ba 'am/ nad pa sbyor mi bzod pa ming 'di zhes bgyi ba la khar ba'i sdom pa stsal lags te 'di ltar cang mi gsung bas de de bzhin du 'dzin to/ /gang la dge 'dun gyis khar ba'i sdom pa byin pa des khar ba bcang bar bya ste/ 'di la 'gyod par mi bya'o// //'dul ba phran tshegs kyi gzhi/ bam po drug pa/ sangs rgyas bcom ldan 'das rgyal po'i khab na bya rgod kyi phung po'i ri la bzhugs so/ /dge slong gnas brtan gnas brtan rnams dang / rlung nad can rnams bya rgod phung po'i ri la 'dzeg pa dang / 'bab pa na gred cing rdeg 'chos nas snad par yang gyur/ bya ma bum dang / ril ba spyi lugs dag kyang chag go/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na dge slong rnams kyis dra ba bcang bar bya'o/ /bcom ldan 'das kyis dge slong rnams kyis dra ba bcang bar bya'o zhes bka' stsal pa dang / drug sde rnams kyis tshon sna lnga pa'i skud pa las byas pa'i dra ba bcangs pa dang / bram ze dang khyim bdag rnams kyis mthong nas 'phya bar byed do/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ tshon sna lnga pa'i skud pa las byas pa'i dra ba bcang bar mi bya'i 'on kyang tshon snas cig pa las byas pa'o/ /bcom ldan 'das kyis tshon sna cig las byas pa'i dra ba bcang bar bya'o zhes bka' stsal pa dang / rgas pas nyam chung bar gtogs pa rnams dang / rlung nad can du gtogs pa rnams kyang dra ba 'chang ba la zhugs nas/ bcom ldan 'das kyis bka' stsal pa/ rgan po dang rlung nad can gyis kyang dge 'dun la dra ba'i sdom pa gsol bar bya zhing / gang la dge 'dun gyis dra ba'i sdom pa byin pa des dra ba bcang bar bya'o/ /gsol ba ni 'di ltar bya ste/ gnas mal bshams la gaN DI brdungs te dris pa'i tshig gis dge slong rnams la bsgo nas dge 'dun thams cad 'dus te 'dug pa dang / dge slong rgan po rgas te nyam chung ba 'am/ rlung nad can gyis rgan pa'i mthar tsog tsog por 'dug ste/ thal mo sbyar nas tshig 'di skad ces brjod par bya'o/ /dge 'dun btsun pa rnams gsan du gsol/ bdag dge slong rgan po rgas te nyam chung ba 'am/ rlung nad can ming 'di zhes bgyi ba dge 'dun las dra ba'i sdom pa gsol na/ dge 'dun btsun pa thugs brtse ba can rnams kyis thugs brtse ba nye bar bzung ste/ bdag dge slong rgan po rgas te nyam chung ba 'am/ rlung nad can ming 'di zhes bgyi ba la dra ba'i sdom pa stsal du gsol/ de bzhin du lan gnyis lan gsum gyi bar du'o/ /de'i 'og tu dge slong gcig gis gsol ba byas nas las bya ste/ dge 'dun btsun pa rnams gsan du gsol/ dge slong rgan po rgas te nyam chung ba 'am rlung nad can ming 'di zhes bgyi ba 'di dge 'dun las dra ba'i sdom pa gsol na/ gal te dge 'dun gyis dus la bab cing bzod na dge 'dun gyis gnang bar mdzod cig dang / dge 'dun gyis dge slong rgan po rgas te nyam chung ba 'am/ rlung nad can ming 'di zhes bgyi ba la dra ba'i sdom pa stsol to/ /'di ni gsol ba'o/ / las ni 'di ltar bya ste/ dge 'dun btsun pa rnams gsan du gsol/ dge slong rgan po rgas te nyam chung ba 'am rlung nad can ming 'di zhes bgyi ba dge 'dun las dra ba'i sdom pa gsol te/ de'i slad du dge 'dun gyis dge slong rgan po rgas te nyam chung ba 'am/ rlung nad can ming 'di zhes bgyi ba la dra ba'i sdom pa stsol na/ tshe dang ldan pa gang dag dge slong rgan po rgas te nyam chung ba 'am/ rlung nad can ming 'di zhes bgyi ba la dra ba'i sdom pa stsal bar bzod pa de dag ni cang ma gsung shig / gang dag mi bzod pa de dag ni gsungs shig /dge 'dun gyis bzod cing gnang nas dge 'dun gyis dge slong rgan po rgas te nyam chung ba 'am/ rlung nad can ming 'di zhes bgyi ba la dra ba'i sdom pa stsal lags te/ 'di ltar cang mi gsung bas de de bzhin du 'dzin to/ /gang la dge 'dun gyis dra ba'i sdom pa byin par gyur pa des dra ba bcang bar bya ste/ 'di la 'gyod par mi bya'o/ /dge slong gzhan dag cig la khar ba yang dgos/ dra ba yang dgos nas de dag la dge slong rnams kyis khar ba dang / dra ba'i sdom pa so sor byin pa dang / bcom ldan 'das kyis dka' stsal pa/ khar ba dang dra ba'i sdom pa gcig car snga ma bzhin sbyin par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na dge slong zhig 'dug pa des sgog skya zos nas/ des bcom ldan 'das ga la ba der song ste phyin pa dang bcom ldan 'das kyi zhabs la mgo bos phyag 'tshal nas phyogs cig tu 'dug go/ /bcom ldan 'das kyis dge slong de la bka' stsal pa/ dge slong dge slong khyod la chos bstan gyis rna ba gtod la 'dug shig / des bcom ldan 'das kyi zhabs la mgo bos phyag 'tshal nas phyogs gcig tu 'dug go/ /bcom ldan 'das kyis de la chos bstan par brtsams te/ ji lta ji ltar bcom ldan 'das kyis de la chos bstan pa de lta de ltar dge slong de bcom ldan 'das la dris gnod par gyur na mi rung ngo snyam nas kha logs shig tu lta'o/ /lan gnyis lan gsum du bcom ldan 'das kyis dge slong de la 'di skad ces dge slong khyod la chos bstan gyis rna gtod cig ces bka' stsal na dge slong de lan gnyis lan gsum du yang kha gzhan du bltas nas/ bcom ldan 'das kyi zhabs la mgo bos phyag 'tshal te bcom ldan 'das kyi spyan snga nas song ngo / /sangs rgyas bcom ldan 'das rnams ni mkhyen bzhin du rmed par mdzad pa yin pas sangs rgyas bcom ldan 'das kyis tshe dang ldan pa kun dga' bo la rmas pa/ kun dga' bo ci'i phyir ngas ji lta ji ltar chos bstan pa de lta de ltar dge slong de kha gzhan du lta/ des gsol pa/ btsun pa dge slong des sgog skya 'tshal to/ /kun dga' bo dge slong dag gang gis na bden pa rnams kyi bar chad du 'gyur ba sgog skya za ba lta/ bcom ldan 'das 'tshal lags so/ /kun dga' bo gal te dge slong 'dis de ring sgog skya zos par ma gyur na deng nyid du 'dis 'jig tshogs la lta ba'i ri'i rtse mo nyi shu mtho ba ye shes kyi rdo rjes bcom nas rgyun du zhugs pa'i 'bras bu mngon sum du byas par 'gyur ro/ /kun dga' bo de lta bas na dge slong gis da phyin chad sgog skya dang sku 'dong dang / ke'u yongs su longs spyad par mi bya ste/ yongs su longs spyad na 'gal tshabs can du 'gyur ro/ /yang de'i tshe tshe dang ldan pa shA ri'i bu 'khor de nyid du 'dus par gyur te 'dug pa des bsams pa/ dge slong 'dis de ring bden pa dag ma mthong na re shig sang mthong bar 'gyur 'am blta'o snyam nas sems pa la zhugs pa dang ma mthong ngo / /des rab kyi mtha' ba'i bsam gtan bzhi pa la rnam par bltas nas dus ji tsam na mthong bar 'gyur ba sems pa la zhugs na/ 'on kyang ma mthong ste/ tshe dang ldan pa shA ri'i bu ting nge 'dzin de las langs nas tshigs su bcad de smras pa/ dal ba'i mchog 'di 'dir bor nas/ / 'di yis 'di na bden pa dag /nams kyang shin tu mthong bar ni/ /mi 'gyur ba yi gnas de yod/ /de nas bcom ldan 'das kyi thugs kyis tshe dang ldan pa shA ri'i bu'i sems mkhyen nas/ tshe dang ldan pa shA ri'i bu la bka' stsal pa/ shA ri'i bu khyod sangs rgyas kyi yul la lag 'jug par ma byed cig /'di ni 'di nas nyan thos dang rang sangs rgyas kyi ye shes kyi yul las 'das pa'i dus na de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa bde bar gshegs pa/ 'jig rten mkhyen pa skyes bu 'dul ba'i kha lo sgyur ba bla na med pa lha dang mi rnams kyi ston pa/ sangs rgyas bcom ldan 'das thams cad zil gyis gnon pa zhes bya ba'i ston pa 'byung bar 'gyur te/ de'i bstan pa la 'di rab tu byung nas nyon mongs pa thams cad spangs te dgra bcom pa nyid mngon sum du byed par 'gyur ro/ /de skad ces gsungs nas/ bcom ldan 'das kyis dgongs pa/ nyes dmigs gang cung zad byung ba ni dge slong dag sgog skya za ba las gyur gyis de lta bas na dge slong gis sgog skya bza' bar mi bya'o/ /za na 'gal tshabs can du 'gyur ro/ /bcom ldan 'das kyis dge slong gis sgog skya bza' bar mi bya'o zhes bka' stsal pa dang / dge slong zhig na ba de sman pa'i drung du song ste/ nad med cig ces byas nas smras pa/ bzhin bzangs kho bo la nad 'di lta bu zhig byung na sman ston cig /sman pas smras pa/ 'phags pa sgog skya gsol cig dang khyod sos par 'gyur ro/ /des smras pa/ bzhin bzangs bcom ldan 'das kyis ma gnang ngo / /'phags pa khyod kyi sman 'di yin te/ gzhan gyis ni gsos par mi nus so/ /skabs de dge slong rnams la smras so/ /dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ gal te sman pas dge slong khyod kyi sman 'di yin te/ gzhan gyis ni gsos par mi nus so zhes zer na bza' bar bya ste/ 'di la 'gyod par mi bya'o/ /bcom ldan 'das kyis dge slong nad pas sman pa'i lung gis sgog skya bza'o zhes bka' stsal pa dang / dge slong nad pas sgog skya zos nas gtsug lag khang la yang longs spyad par byed/ gnas mal dang / snam phyis dang / chab khung du yang 'jug /dge 'dun gyi nang du yang 'gro/ bram ze dang khyim bdag 'ongs shing lhags pa rnams la yang chos ston/ mchod rten la yang phyag byed/ bram ze dang khyim bdag gi khyim dag tu yang nye bar 'gro/ skyed mos tshal dang / 'dun sa dang / lha khang dang / skye bos gang ba'i phyogs gzhan dag tu yang 'dug pa dang / bram ze dang khyim bdag rnams kyis dri tshor nas 'phya smod kha zer zhing / dge sbyong shAkya'i bu rnams kyi dge sbyong gi tshul nyams/ tshangs pa'i tshul nyams te/ da ni rab tu byung ba rnams sgog skya za'o zhes pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ ngas dge slong sgog skya za ba'i kun du spyad pa'i chos bca' bar bya ste/ dge slong sgog skya za bas sgog skya za bzhin du gtsug lag khang la yongs su longs spyad par mi bya/ gnas mal la ma yin/ snam phyi sar 'jug par mi bya/ chab khung sar ma yin/ dge 'dun gyi nang du 'gro bar mi bya/ bram ze dang khyim bdag 'ongs shing lhags pa rnams la chos bstan par mi bya mchod rten la phyag mi bya/ bram ze dang khyim bdag rnams kyi khyim du nye bar 'gro bar mi bya/ skyed mos tshal dang / 'dun sa dang / lha khang dang / skye bos gang ba gzhan dag tu gnas par mi bya'i/ phyogs dben pa gang du gzhan dag gis mthong na ma dad pa skye bar mi 'gyur bar bza' bar bya'o/ /gang gi tshe bya ba zin par gyur pa de'i tshe phyogs de nyid du zhag bdun 'dug par bya'o/ /sku 'dong na ni zhag gsum/ ke'u na ni zhag gcig go/ /de nas khrus byas la chos gos dag kyang bkru bar bya zhing bdug pa dag gis bdug par bya'o/ /de nas dri nga ba med pa dang / gtsug lag khang du 'jug par bya zhing ji ltar bkag pa yang bya'o/ /sgog skya za ba'i dge slong gis kun tu spyad pa'i chos ji ltar bcas pa rnams yang dag par blangs te/ mi gnas na 'gal tshabs can du 'gyur ro/ /phran tshegs las sgo dang po rdzogs so// // bsdus pa'i sdom ni/ chan pas 'breg dang gdugs dang ni/ /be'u ras dang ni rgyan spel ma/ /len dang tshogs dang khrus dang ni/ / gcin dang sgo 'phar spo ba'o/ / sdom ni/ chan pas 'dreg dang mdoms dang ni/ /de bzhin byin pa nyid dang ni/ /khri dang rtswa stan gcig dang ni/ /khyim na gnas dang bgo ba min/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /gang gi tshe khyim bdag mgon med zas sbyin gyis phyogs bzhi'i dge 'dun la rgyal bu rgyal byed kyi tshal phul ba de'i tshe des 'phags pa rnams kyi skra dang kha spu bregs shig ces 'breg mkhan gyi mi btang ba dang zhes bya ba'i bar snga ma bzhin no/ /nye dga' bos smras pa/ bzhin bzangs khyod skra chan pas 'breg shes sam/ des smras pa/ 'phags pa de nyid bdag gi bzo lags so/ / bzhin bzangs gal te de lta na tshur shog bregs shig /des skra chan pas bregs pa dang / nye dga' bos smras pa/ da dung bregs shig /des yang bregs pa dang / des smras pa/ da dung yang bregs shig / des yang bregs so/ /de bzhin du ji tsam nyi ma nub kyi bar du ma btang nas/ de'i 'og tu 'di skad ces smras so/ /bkren pa khyod ci yang mi shes pa zhig 'di kho na bzhin mnyam par byos te song shig ces bya ba'i bar snga ma bzhin no/ /bcom ldan 'das kyis bka' stsal pa/ dge slong gis skra chan pas breg par mi bya'o/ /dge slong skra chan pas 'breg na 'gal tshabs can du 'gyur ro/ /bcom ldan 'das kyis dge slong gis skra chan pas breg par mi bya'o zhes bka' stsal pa dang / dge slong dag gi mgo la rma byung nas spu gris reg pa na de dag snad pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ rma'i than kor gyi skra chan pas breg par bya zhing / lhag ma rnams spu gris breg par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de nas yang khyim bdag mgon med zas sbyin gyis 'breg mkhan gyi mi btang ste zhes bya ba'i bar snga ma bzhin no/ /bzhin bzangs mdoms kyi phyogs kyi spu 'breg shes sam/ des smras pa/ 'phags pa de nyid bdag gi bzo lags so/ /bzhin bzangs gal te na de lta na tshur shog bregs shig /'phags pa ji 'dra bar breg /bzhin bzangs mdzes par bregs shig /des breg par brtsams pa dang / nye dgas smras pa/ bzhin bzangs 'di ltar byos shig /des de bzhin byas pa dang / yang smras pa/ gzhan 'di lta bur yang byos shig ces des de ji tsam nyi ma nub kyi bar du ma btang nas/ dge sbyong shAkya'i sras rnams kyi dge sbyong gi tshul ni nyams/ tshangs pa'i tshul ni nyams te/ da ni gsang ba'i phyogs kyi spu yang 'breg par byed do zhes smod par byed/ gzhogs 'phyas byed/ kha zer bar byed pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ de lta bas na dge slong gis mdoms kyi phyogs kyi spu breg par mi bya'o/ /dge slong mdoms kyi phyogs kyi spu 'breg par byed na 'gal tshabs can du 'gyur ro/ /bcom ldan 'das kyis dge slong gis mdoms kyi phyogs kyi spu breg par mi bya'o zhes bka' stsal pa dang / dge slong dag gi mdoms kyi phyogs su rma byung ba dang / dge slong dag 'gyod nas spu 'breg par mi byed do/ /dge slong gzhan dag la yang srin bu byung ste/ de dag de'i gnod pas dge ba'i phyogs kyi bya ba mi nus pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong gnas brtan gnas brtan dag la bstan nas rma 'am/ srin bu'i phyir ni mdoms kyi phyogs kyi spu breg par bya ste/ 'di la 'gyod par mi bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de nas yang khyim bdag mgon med zas sbyin gyis 'breg mkhan gyi mi btang ba dang zhes bya ba'i bar snga ma bzhin no/ /bzhin bzangs khyod byin spu 'breg shes sam/ 'phags pa de nyid bdag gis bzo lags so/ /bzhin bzangs gal te de lta na tshur shog bregs shig / 'phags pa ci 'dra bar breg par bgyi/ bzhin bzangs mdzes par bregs shig /des breg par brtsams pa dang / nye dga' bos smras pa/ bzhin bzangs 'di ltar byos shig /des de bzhin byas pa dang / yang smras pa/ gzhan 'di ltar yang byos shig /des de ji tsam nam sros kyi bar du ma btang bas/ khyim bdag mgon med zas sbyin gyis de la zhes bya ba nas/ dris pa zhes bya ba'i bar snga ma bzhin no/ /des ji ltar gyur pa smras pa dang / de smod par byed pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ de lta bas na dge slong gis byin spu breg par mi bya'o/ /dge slong byin spu 'breg par byed na 'gal tshabs can du 'gyur ro/ /sangs rgyas bcom ldan 'das yangs pa can na spre'u rdzing gi 'gram khang pa brtsegs pa na bzhugs so/ /bcom ldan 'das kyis dge slong gis byin spu breg par mi bya'o zhes bka' stsal pa dang / dge slong rnams kyi brla la rma byung zhing dge slong gzhan dag la srin bu byung nas/ de dag de'i gnod pas dge ba'i phyogs bya bar mi nus par gyur pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ rma byung ba'i phyir ram/ srin bu'i phyir ni byin spu breg par bya ste/ 'di la 'gyod par mi bya'o/ /sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /drug sde rnams khri gcig la nyal bar byed cing / de dag der nyal nas ku re byed/ rtse bar byed/ ca co smra bar byed/ rgod pa dang 'phyar g.yeng dang / lus la rdeg par byed pa'i skabs de dge slong dag gis bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni dge slong rnams khri gcig la nyal bar byed pa las gyur pas de'i phyir dge slong gzhan dang lhan cig khri gcig la nyal du mi gzhug go snyam du dgongs nas/ dge slong rnams la bka' stsal pa/ dge slong dag khyed kyis deng phyin chad dge slong gis khri gcig la nyal bar mi bya'o/ /byed na 'gal tshabs can du 'gyur ro/ /bcom ldan 'das kyis dge slong gis khri gcig la nyal bar mi bya'o zhes bka' stsal pa dang / ji tsam na dge slong mang po rnams ljongs rgyu zhing dong ste/ ljongs rgyu ba na ri brags shig tu phyin nas de dag gis der khri brnyas pa dang / de dag gis khri dag byin no/ /de rnams kyis smras pa/ 'di dag nyungs kyis gzhan yang bsnams te spyon cig / de dag gis smras pa/ 'phags pa dag bdag cag ni khri re re la skye bo mang po dag nyal bar bgyid na/ khyed gzhan yang g.yor ram/ re re la gnyis sam gsum gzims par mdzod cig /de rnams kyis smras pa/ bcom ldan 'das kyis khri gcig la gnyis sam gsum nyal du ma gnang na ji ltar nyal bar bya/ de dag gis smras pa/ 'phags pa dag khri gzhan ni ma mchis so/ /de skad smras pas cang mi smra bar 'khod pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong gang dag ngo tsha shes shing 'gyod pa dang ldan la/ bslab pa 'dod pa de dag gis dran pa nye bar bzhag ste/ gding ba bting la bar du chos gos kyi gtur bu 'am/ lhung bzed kyi snod dag bcug la nyal bar bya ste/ 'di la 'gyod par mi bya'o/ /khri la ji lta bar rtswa stan dang gzhan dag la yang de dang 'dra'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong mang po rnams ljongs rgyu zhing dong ba dang / ri brag shig tu phyin nas de rnams kyis khyim bdag cig las bsti gnas brnyas so/ /grang ba'i dus la bab pas de rnams kyis gos brnyas pa dang bram ze dang khyim bdag rnams kyis 'di dag ni rab tu byung ba yin no snyam ste/ snying rje nye bar bzhag ste gos dag byin pa dang / gang gis gang thob pa des de gyon te nyal nas dge slong gzhan dag grang bas sbrebs par gyur pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ gang gis gang thob pa de dag nyid kyis bgo bar mi bya'i thams cad kyis bgo bar bya ste/ gcig rnyed par gyur pa gang yin pa des thams cad kyi steng du rgan rim bzhin ji tsam yog pa dgab par bya'o/ /ji tsam na ri brag gzhan zhig tu dong ba dang / der gos gcig cig rnyed nas de dag gis steng du g.yogs pa na nye dgas de gyon te 'chag tu song ba dang / dge slong rnams grang bas sdug bsngal bar gyur nas smras pa/ btsun pa nye dga' bo bdag cag ni grang bas sdug bsngal na khyod 'ba' shig gyon nas 'chag gam/ des smras pa/ kho bos bkag gam ci/ khyed kyang ci phyir mi 'chag /de rnams grang ba'i sdug bsngal gyis mtshan 'das par gyur pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ 'chag pa gang yin pa des gang zag gi gos bgos te bcag par mi bya'o/ /gzhan gyis 'chag na 'gal tshabs can du 'gyur ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /grang ba'i dus la bab pas dge slong rnams grang ba'i gnod pas glos phab ste 'dug go/ /ji tsam na khyim bdag mgon med zas sbyin gtsug lag khang du 'ongs pa dang / des de dag mthong nas smras pa/ 'phags pa ci'i slad du gcig tu brtson pa'i gsung rab la glos phab ste bzhugs shing dge ba'i phyogs dag mi mdzad/ de dag gis smras pa/ khyim bdag bde ba dang ldan pa dag ni chos dran par 'gyur gyi/ kho bo cag shin du grang bas sdug bsngal bar gyur to/ /des khyim du song nas be'u ras lnga brgya bkur ba dang / dge slong rnams kyis khyim pa'i gos de dag bgos te phyi rol tu dong ba bram ze dang khyim bdag rnams kyis mthong nas co 'dri zhing smras pa/ 'phags pa dag ci khyed babs sam/ de dag gis smras pa/ kho bo cag grang bar gyur nas bgos kyis tshe dang ldan pa dag de skad ma zer cig /de rnams smod par byed pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong gis khyim pa'i gos bgo bar mi bya'o/ /de lta bu'i rkyen cig byung na steng du gos ngur smrig gis g.yogs nas bgo bar bya'o/ /dge 'dun gyi yang de bzhin du gyon par byed nas/ bcom ldan 'das kyis bka' stsal pa/ dge 'dun gyi ni 'og tu gos bcug nas steng nas g.yogs te bgo bar bya'i gzhan du na 'gal tshabs can du 'gyur ro/ / sdom ni/ gdugs dang 'jig rten rgyang pan dang / /bsdebs sbyar de bzhin nags me dang / /gnas med par ni lam dag dang / /la ba bgos pas mi bcag pa'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na bram ze gos spyod pa zhig 'dug pa des gos byas shing byas shing 'tshong bar byed do/ /dus gzhan zhig na des gos mang po rnyed par gyur nas/ des bsam pa thabs ji lta bu zhig byas na des bsod nams kyang 'thob cing rnyed pa yang 'grub par 'gyur snyam pa dang / de dad pa can zhig pas de'i blo skyes te sangs rgyas la sogs pa dge slong gi dge 'dun spyan drangs la gos kyi gdan bshams te gdugs tshod gsol lo/ /de ltar byas na gos kyang yongs su spyad par 'gyur la/ gos yongs su longs spyad pa dang zhal zas yongs su longs spyad pas bsod nams chen po yang 'thob par 'gyur ro snyam du rig nas/ des sangs rgyas la sogs pa dge slong gi dge 'dun rang gi khyim du gdugs tshod la spyan drangs nas zhal zas gtsang zhing bsod pa bshams te gdan dag gi steng du gos bting ngo / /de nas gdan bshams zin pa dang bcom ldan 'das spyan 'dren gyis spyan drangs na dge slong gi dge 'dun ni gshegs/ bcom ldan 'das ni gtsug lag khang na bzhugs shing bsod snyoms drangs so/ /sangs rgyas bcom ldan 'das rnams ni rgyu rnam pa lngas gtsug lag khang na bzhugs shing bsod snyoms 'dren te/ lnga gang zhe na/ nang du yang dag 'jog bzhed par gyur pa dang / lha rnams la chos ston bzhed par gyur pa dang / nad pa gzigs bzhed par gyur pa dang / gnas mal gzigs bzhed par gyur pa dang / nyan thos rnams 'dul ba la bslab pa'i gzhi bca' bar bzhed pa'o/ /don 'di la ni sangs rgyas bcom ldan 'das nyan thos rnams 'dul ba la bslab pa'i gzhi bca' bar bzhed nas gtsug lag khang na bzhugs shing bsod snyoms drangs so/ /dge slong rnams lam gar char pa bab nas de dag gi gos char pas gsher bzhin du 'khod pas gang gi gos ci 'dra bas 'khod pa de'i de kho na lta bu'i sbra sbre byung bar gyur pa bram ze des mthong ba dang 'khrugs nas smras pa/ bdag gi zong 'di lta bu dag zong du mi rung bar bgyis kyis gos 'di dag khyed thal byung snoms shig ces zer ba'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong dag bram ze des ma dad pa skyes nas byin pas blang bar mi bya'o/ /de 'khrugs pa de dang bral nas yang des dad pa'i sems kyis phul ba'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong dag da ni bram ze des dad pa'i sems kyis phul bas blang bar bya ste/ blangs nas kyang rung ba byas la bgo bar bya'o/ /dge slong dag gis blangs pa dang / bram ze des smras pa/ e ma'o 'phags pa dag gdugs bcang ba'i rigs so/ /skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ gal te de lta na rjes su gnang ste/ dge slong dag gis gdugs bcang bar bya'o/ /bcom ldan 'das kyis dge slong dag gis gdugs bcang bar bya'o zhes bka' stsal pa dang / drug sde rnams kyis gdugs kyi rtsa ba gser dang / dngul dang / bai dUr+ya dang / shel las byas shing / gzhan yang bkra zhing nye bar bkra ba dang / bsrubs pa las byas la/ gdugs ni dkar po dang / rma bya'i mdongs dag las byas pa dang / bram ze dang khyim bdag rnams kyis mthong nas de dag gis smras pa/ 'phags pa dag 'di ci lags/ bcom ldan 'das kyis gdugs gnang ngo / /'phags pa dag dge sbyong khyed ci 'dod pa'i yon tan gyis gzir tam/ gang gi phyir 'di 'dra ba'i gdugs dag 'chang / de dag gis smras pa/ dgra bo rnams kyi mgrin pa rdog bas mnan nas 'dod pa'i yon tan gyis gzir to/ /de dag smod par byed pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ de lta bu'i gdugs dag bcang bar mi bya'i/ 'on kyang rtsa ba ru ta dang / lo ma las byas pa'i gdugs rnam gnyis bcang bar bya'o/ /bcom ldan 'das kyis gdugs rnam gnyis bcang bar bya'o/ /zhes bka' stsal pa dang / drug sde rnams kyis gdugs kyi rtsa ba ring po ring por byas nas gdugs kyi rtsa ba bsgreng ste grong khyer gyi nang du song ba dang / bram ze dang khyim bdag dag gis mthong nas 'di lta bu nor can nam/ tshong dpon nam/ ded dpon nam/ su zhig 'ong zhes langs nas rtog par byed do/ /kha cig sur dong ba dang / gang gi tshe mthong bar gyur pa de'i tshe ma dad par gyur pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ gdugs kyi rtsa ba ring po ring por mi bya'i 'on kyang lus kyi tshad tsam gyi rtsa ba gdags par bya zhing grong gi nang du gdugs thogs te 'gro bar mi bya'o/ /bcom ldan 'das kyis grong gi nang du gdugs thogs te 'gro bar mi bya'o zhes bka' stsal pa dang / ji tsam na dge slong mang po dag don 'thun dang lhan cig ljongs rgyu zhing dong ba dang / re shig na grong du lam byung bar gyur nas de dag gis bsams pa/ bcom ldan 'das kyis grong gi nang du gdugs thogs te 'gro bar mi bya'o zhes bka' stsal pas grong dor bar bya'o snyam nas de dag gis grong spangs pa dang / don 'thun rnams dang bral bas chom pos bcom pa'i skabs de/ dge slong dag gis bcom ldan 'das la gsol pa dang / bcom ldan 'das kyis bka' stsal pa/ gal te grong gi dbus su lam byung bar gyur na gdugs glor bsnyal nas 'dong bar bya ste/ 'di la 'gyod par mi bya'o/ /bsod snyoms pa rnams bsod snyoms la zhugs pa dang / char pa bab nas char chus gos gsher bar gyur pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ bsod snyoms pas gdugs kyi rtsa ba rung bar byas nas 'jug par bya ste/ zhugs nas gal te char pa chad na gdugs khyim dang por bzhag la 'jug par bya zhing de nas phyir blangs te 'gro bar bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /lho phyogs kyi yul nas kun du rgyu 'jig rten rgyang pan pa 'char pa zhes bya ba zhig ljongs rgyu zhing mnyan yod du 'ongs so/ /de ngal bsos nas tshe dang ldan pa kun shes kauN+Di n+ya ga la ba der song ste phyin nas smras pa/ kye dge slong kho bos bla ma dag las blangs pa'i yi ge cung zad yod de/ de'i phyir khyod dang lhan cig gtam bya bar 'dod do/ /des de la smras pa/ bram ze kho bo smra ba don du gnyer ba ma yin gyis song shig /de tshe dang ldan pa rta thul dang / bzang po dang / rlangs pa dang / ming chen dang / grags pa dang / gang po dang / dri med dang / ba lang bdag dang / lag bzangs ga la ba der song ba dang / de rnams kyis kyang de kho na skad smras so/ /de nas tshe dang ldan pa shA ri'i bu ga la ba der song ste phyin nas smras pa/ kye dge slong kho bos bla ma las yi ge cung zad blangs pa dag yod de/ de'i phyir khyod dang lhan cig gtam bya bar 'dod do/ /tshe dang ldan pa shA ri'i bus bsams pa/ ci kun du rgyu 'di la dge ba'i rtsa ba cung zad yod dam 'on te med snyam na yod par mthong ngo / /su la rag las brtags na bdag nyid la'o/ /ci smra bas 'dul ba gzhan cung zad yod dam snyam na yod par mthong ngo / /ji tsam na tshogs pa brtags na zhag bdun tshun chad kyis tshogs par shes nas smras pa/ legs te de bzhin bya na rig pa'i gnas gang du bya/ che ge mo zhig tu'o/ /smra ba'i zhal che ba bzhag ste phyogs snga ma dang phyi ma rnam par bzhag nas/ sus phyogs snga ma/ sus gzugs shes glengs pa dang / tshe dang ldan pa shA ri'i bus smras pa/ kun du rgyu glo bur du 'ongs pa yin pas 'di nyid kyis phyogs snga ma tshugs shig /kun du rgyus phyogs snga ma smras pa dang / tshe dang ldan pa shA ri'i bus bzlas nas khyod kyi 'di ni mi rigs so/ /'di ni mi 'dra'o/ /'di ni mi 'thad do zhes skyon brtags so/ /des yang smras pa dang / tshe dang ldan pa shA ri'i bus mjug tu ma phyin par bzhag go/ /lho phyogs kyi yul nas kun du rgyu 'jig rten rgyang pan pa 'char pa zhes bya ba zhig mnyan yod du 'ongs te/ de tshe dang ldan pa shA ri'i bu dang lhan cig brtsad nas/ deng du zhag bdun lon no zhes kun du sgra grags pa dang / srog chags brgya phrag mang po dag kha cig ni ya mtshan skyes/ kha cig ni sngon gyi dge ba'i rtsa ba dag gis bskul nas 'dus pa dang / tshe dang ldan pa shA ri'i bus bsams pa/ bdag gi smra bas 'dul ba 'dus sam snyam na 'dus par mthong ngo / /de nas tshe dang ldan pa shA ri'i bus ma lus par smras pa dang / kun du rgyu de tshar bcad do/ / de nas mngon par dad par gyur te smras pa/ btsun pa shA ri'i bu bdag gis legs par gsungs pa'i chos 'dul ba la rab tu byung ba dang bsnyen par rdzogs par dge slong gi dngos po 'thob na/ bdag bcom ldan 'das kyi spyan sngar tshangs par spyod pa spyad do/ /de tshe dang ldan pa shA ri'i bus rab tu phyung bsnyen par rdzogs par byas te/ gdams ngag byin no/ /des brtsal ba dang 'bad pa dang bsgrim pa byas pas 'khor ba'i 'khor lo cha lnga pa g.yo ba dang mi g.yo ba 'di nyid rig ste zhes bya ba nas gus par smra bar bya bar gyur to zhes bya ba'i bar snga ma bzhin no/ /de nas 'khor de dag 'phags pa shA ri'i bus 'di lta bu'i smra ba chen po pham par byas so/ /zhes shin du ya mtshan skyes so/ /de nas tshe dang ldan pa shA ri'i bus 'khor de dag gi bsams pa dang / bag la nyal dang / khams dang / rang bzhin rtogs nas de dag dang 'thun par chos bstan te/ srog chags 'bum phrag mang po dag gi de thos nas lhag pa'i khyad par chen po thob pa 'di lta ste/ kha cig gis ni rgyun du zhugs pa'i 'bras bu mngon sum du byas/ kha cig gis ni lan gcig phyir 'ong ba'i 'bras bu kha cig gis ni phyir mi 'ong ba'i 'bras bu zhes bya ba nas dge 'dun la gzhol zhes bya ba'i bar snga ma bzhin no/ /skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong dag thams cad du dge slong shA ri'i bu 'am/ shA ri'i bu dang 'dra bar mi 'gyur bas de lta bas na gnang gis dge slong dag gis 'jig rten rgyang pan pa la sogs pa phyi rol pa'i bstan bcos bslab par bya'o/ /bcom ldan 'das kyis dge slong dag gis 'jig rten rgyang pan pa la sogs pa phyi rol pa'i bstan bcos bslab par bya'o zhes bka' stsal pa dang / dge slong byis pa 'am/ rmongs pa 'am/ mi gsal ba dag gis kyang thams cad kyis khyad par med par bslab pa dang / bcom ldan 'das kyis bka' stsal pa/ phas kyi rgol ba tshar gcod nus pa gang yin pa de dag gis 'jig rten rgyang pan pa la sogs pa phyi rol pa'i bstan bcos bslab par bya'o/ /byis pa dang / rmongs pa dang / mi gsal ba dang / mi mkhas pa dag gis ma yin no/ /de rnams de la brtson pa nyid du gyur nas/ bcom ldan 'das kyis bka' stsal pa/ dus gsum du byas la/ dus gnyis ni sangs rgyas kyi gsung rab klag par bya zhing gsum pa la ni phyi rol pa'i bstan bcos dag go/ /bcom ldan 'das kyis dus gsum du bya'o zhes bka' stsal pa dang / dge slong rnams lo dang zla ba'i dus dag tu slob par byed nas/ bcom ldan 'das kyis bka' stsal dge slong dag tshe ni skad cig ma yin pas ngas lo dang zla ba'i dus las dgongs te ma gsungs kyi/ 'on kyang nyin gcig la cha gsum du bya'o/ /dge slong rnams gsal ba'i dus su ni phyi rol pa'i bstan bcos 'don la/ gzhan dag tu ni sangs rgyas kyi gsung rab 'don nas/ bcom ldan 'das kyis bka' stsal pa/ gsal ba'i dus su sangs rgyas kyi gsung rab gdon par bya ste/ phyi rol pa'i bstan bcos ni ma yin no/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /tshe dang ldan pa shA ri'i bus bram ze'i khye'u lha sbyin dang / ba lang 'byor gnyis rab tu phyung nas/ de dag tshe dang ldan pa shA ri'i bus mdo sde 'don du bcug go/ /ji tsam dus gzhan zhig na ljongs rgyu zhing dong nas ri brags shig du phyin pa dang / der de dag la rnyed pa dang bkur sti chen po byung nas de gnyis der 'khod do/ /de gnyis sngon goms pa'i shugs kyis sangs rgyas kyi gsung rab sdeb sbyor dang / tshig dang rim par sbyar nas kha ton du 'don to/ /de dag las gcig ni shi'o/ /cig shos kyis gzhung brjed par gyur nas/ de la kha ton las byung ba'i rnyed pa med nas de dang de dag tu mkhyam 'khyam nas phyir mnyan yod du 'ongs so/ /de nas ngal bsos te tshe dang ldan pa kun shes kauN+Dan+ya ga la ba der song ste phyag byas nas smras pa/ gnas brtan g.yar ton dbog tu gsol/ des smras pa/ bu legs so de bzhin kha ton bslab bo zhes des de dang lhan cig kha ton bya bar brtsams pa dang / kha ton thung ngur 'don nas smras pa/ gnas brtan khyod kyis ring por ma bton pas gdon nongs so/ /des smras pa/ bu kho bos de ltar bslabs so/ / des de'i rkang pa la mgo bos phyag 'tshal nas/ tshe dang ldan pa rta thul dang / bzang po dang / rlangs pa dang / ming chen dang / grags pa dang / gang po dang / dri med dang / ba lang bdag dang / lag bzangs ga la ba der song ste phyin nas rkang pa la phyag 'tshal te/ smras pa/ gnas brtan g.yar ton dbog tu gsol/ des smras pa/ bu legs so de bzhin kha ton bslab par bya'o/ /zhes des de dang lhan cig kha ton 'don par brtsams pa dang / de nas kha ton thung ngur bton nas smras pa/ gnas brtan khyod kyis gdon nongs so/ /des smras pa/ bu kho bos de ltar bslabs so/ /des de'i rkang pa la phyag byas nas tshe dang ldan pa shA ri'i bu ga la ba der song ste phyin nas/ tshe dang ldan pa shA ri'i bu'i rkang pa la phyag byas nas tshe dang ldan pa shA ri'i bu la 'di skad ces smras so/ /mkhan pos g.yar ton dbog tu gsol/ des smras pa/ bu legs so/ /de bzhin du kha ton du bslab bo/ /des de dang lhan cig kha ton bya bar brtsams pa dang / ji tsam na kha ton ring por bton nas/ tshe dang ldan pa shA ri'i bus kyang ring por bton pa dang / des smras pa/ mkhan po dge slong de dag kun gyis ni gdon nongs gyi/ khyod nyag gcig gis ma nyams par bton to/ /des smras pa/ mi blun po khyod nyid kyis gdon nyes kyi/ dge slong dag gis ni ma nyams par bton to zhes des spyos nas cang mi smra bar 'dug pa'i skabs de dge slong dag gis bcom ldan 'das la gsol pa dang / bcom ldan 'das kyis dgongs pa/ nyes dmigs cung zad gang byung ba ni dge slong rnams sangs rgyas kyi gsung rab bsdeb sbyor dang / tshig dang rim pa sbyar nas 'don pa las gyur gyis/ de lta bas na dge slong gis sangs rgyas kyi gsung rab sdeb sbyar dang / tshig dang rim pa sbyar nas gdon par mi bya'o/ /dge slong gis sangs rgyas kyi gsung rab sdeb sbyar dang / tshig dang rim pa sbyar nas 'don na 'gal tshabs can du 'gyur ro/ /yul gyi nges pa'i tshig dang / skad kyi nges pa'i tshig dang / ljongs kyi nges pa'i tshig yin na ltung ba med do/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /drug sde rnams rgas pa'i gnas skabs na yang rgod bag byed pa dang / dge slong de dag gis smras pa/ tshe dang ldan pa dag khyed mgo skyas kyang da dung rgod bag mi gtong ngam/ de dag cang mi smra bar 'khod nas mtha' gcig tu dong ste smras pa/ dga' bo nye dga' lhung bzed nag po can dkos thag pa 'di dag la mi dga' ba zhig bya'o/ / zhes de dag de ltar glags tshol ba la brtson par 'khod pa na dge slong gnas brtan gnas brtan dag dgon pa'i gnas su dong ste bsam gtan dang klag par bya ba dag brtsams so/ /de nas drug sde rnams kyis gnas gsum nas nags mes btang ste ngos gcig tu 'dus nas bsdad pa dang / dge slong rnams nags mes tshig pa'i gnod pa byung bas rings pa rings par 'bros par brtsams so/ /drug sde rnams kyis smras pa/ gnas brtan dag ci'i slad du rings rings ltar bzhud/ tshe dang ldan pa dag nags kyi me ma mthong ngam/ gnas brtan dag bcom ldan 'das kyis bde ba'i gnas skabs su tshul khrims gsungs sam ci lags zhes cung zad rgad pa dang / de dag gis smras pa/ tshe dang ldan pa dag khyed kyis kho bo cag la bsam bzhin du ma gtses grang / bkren pa dag khyed de ltar mi dga' bar bya'o zhes zer ba'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong gis nags mes gtang bar mi bya'o/ /gtong na nyes pa sbom por 'gyur ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na dge slong rgan po zhig dang / gsar bu zhig ljongs rgyu zhing dong ba dang / rgan po la ni snod mang zhing yo byad mang la/ gsar bu ni ma grags shing chos gos gsum las lhag pa med pa zhig pas/ rgan pos smras pa/ tshe dang ldan pa kho bo ngal gyis re shig chos gos kyi gtur bu khyer te shog shig /gsar bu des smras pa/ gnas brtan bka' 'bab par mi 'gyur na re shig cung zad cig gsol ba mchis so/ /tshe dang ldan pa 'di la su zhig gshe smros shig /gnas brtan sangs rgyas dang chos dang dge 'dun la ma gzigs sam ci/ rmongs pa'i yo byad 'dis ci zhig bgyi/ bzhin bzangs gal te mi bkur ba ni re shig rung na 'di 'dri bar bya ste/ khyod kho bo'i mkhan po 'am/ slob dpon yin nam/ ci gang gi phyir rjes su ston par byed/ de cang mi smra bar 'dug pa dang / rgan pos bsams pa/ bkren pa 'di mi dga' bar bya'o/ /snyam mo/ /ji tsam na de gnyis gtsug lag khang du dong ba dang / de na nub gcig kyang mi gnas par 'dug par mi bya ba'i khrims su bya ba yod de/ de gnyis la gnas mal gyi zhal ta byed pas gnas mal dag snoms shig ces smras pa dang / rgan pos ni blangs so/ /gsar bu des smras pa/ tshe dang ldan pa kho bos gnas ma bcas kyis/ je gnas gsol lo zhes de dge 'dun gyi gnas brtan gyi gan du song ste rkang pa la phyag 'tshal nas smras pa/ gnas brtan bdag gi gnas mdzad du gsol/ des smras pa/ bzhin bzangs khyod su dang lhan cig 'ongs/ gnas brtan dge slong che ge mo zhig dang ngo / /bzhin bzangs de dge 'dun gyi gnas brtan gyis bdag 'khor dang phye'o zhes zer du 'ong gis song la de nyid la gnas gsol cig / de gzhan dag gi gan du song ba dang / thams cad kyis de bzhin spangs nas nam sros te rgan po de nyid kyi gan du song nas sgo la brdabs te smras pa/ gnas brtan phyag 'tshal lo/ /khyod su zhig bdag ming 'di zhes bgyi ba de lags so/ /khyod nad med par gyur cig /gnas brtan gtsug lag khang 'di na nub gcig kyang mi gnas par mchis par mi bgyi ba'i khrims su mdzad pa mchis na bdag gi gnas mdzad du gsol/ bzhin bzangs dge 'dun gyis de lta bu'i khrims su bca' ba mdzad pa legs te/ gal te ma mdzad na kho bos 'char gzhug pa zhig / de'i tshe ni kho bo snod mang zhing yo byad mang ba yin la/ da ni gnas brtan yin nam/ khyod ma gus pa byas kyang gnas ster ba gang yin pa de la gnas chos shig /de spobs pa med par gyur nas cang mi smra bar 'dug ste/ de'i gnas bar chad du gyur pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ gnas med par ljongs rgyu zhing 'gro bar mi bya/ dge slong gis seng ge bzhin gtum por mi bya/ dge 'dun gyis kyang dge slong rnams la gnod par 'gyur ba'i khrims bca' bar mi bya ste/ dge slong gnas ma bcas par ljongs rgyu zhing 'gro 'am/ seng ge bzhin gtum por byed dam/ dge 'dun gyi khrims su bya ba de lta bu bcas na thams cad 'gal tshabs can du 'gyur ro/ /sangs rgyas bcom ldan 'das zhabs 'bring ba tshe dang ldan pa klu skyong dang yul ma ga d+har ljongs rgyu zhing gshegs te grong khyer sa kar can du gshegs nas/ sa kar can na gnod sbyin ba ku la'i gnas na bzhugs so/ /de nas bcom ldan 'das mtshan mo nam sros te/ mun gnag cing khad kyis cung zad char 'bab cing glog 'byung ba na bla gab med pa'i 'chag sa na 'chag pa mdzad do/ /chos nyid kyis sangs rgyas bcom ldan 'das rnams kyi zhabs 'bring ba dge slong rnams ni ji srid sangs rgyas bcom ldan 'das rnams nang du yang dag 'jog la mi bzhugs pa de srid du nang du yang dag 'jog la mi 'jug go/ /brgya byin lha'i dbang po'i shes pa dang mthong ba ni 'og tu 'jug pa yin pas des bsams pa/ sangs rgyas bcom ldan 'das de grong khyer sa kar can na sa kar can gyi ri la gnod sbyin ba ku la'i gnas na bzhugs shing / de mtshan mo nam sros te mun gnag cing khad kyis cung zad cung zad char 'bab cing glog 'byung ba na/ bla gab med pa'i 'chag sa na 'chag ste/ ma la bdag der nye bar 'gro'o snyam du rig nas bai dUr+ya las byas pa'i dri gtsang khang mngon par sprul te/ bcom ldan 'das ga la ba der song ste phyin nas/ bcom ldan 'das 'chag pa mdzad pa'i zhabs 'bring na 'chag cing 'dug go/ /de'i tshe yul ma ga d+ha pa'i mi rnams khye'u dang bu mo ngu ba gang yin pa de dag la de rnams gnod sbyin ba ku la'i ming gis bsdigs par byed do/ /de nas tshe dang ldan pa klu skyong gis 'di snyam du bsams te/ kye ma bcom ldan 'das ha cang yun ring du bla gab med pa'i 'chag sa na 'chag pa mdzad pas ma la bdag gis de la gnod sbyin ba ku las bsdigs so snyam du rig nas la ba bzlog ste bgos nas 'chag pa'i slad du 'dug ste/ bcom ldan 'das la 'di skad ces gsol to ba ku la ba ku la dge sbyong nga ni gnod sbyin ba ku la yin no/ /de nas bcom ldan 'das kyis tshe dang ldan pa klu skyong la 'di skad ces bka' stsal to/ /mi blun po khyod kyang de bzhin gshegs pa la gnod sbyin ba ku las bsdigs par sems sam/ de bzhin gshegs pa dgra bcom pa yang dag par rdzogs pa'i sangs rgyas ni bsnyengs pa dang bag tsha ba dang bral ba ste/ de bzhin gshegs pa la bsnyengs pa 'am/ zhum pa 'am/ spu zing zhes byed pa mi mnga'o/ /de nas lha rnams kyi dbang po brgya byin ma dad par gyur nas/ bcom ldan 'das la 'di skad ces gsol to/ /btsun pa chos 'dul ba 'di la 'di 'dra ba'i gang zag kyang mchis sam/ kau shi ka khyod sdod cig /gau ta ma'i rigs ni rgya che ba yin pas 'di yang phyis rnam par dag pa'i chos can du 'gyur ro/ /bcom ldan 'das kyis dgongs pa/ nyes dmigs gang cung zad byung ba ni dge slong dag la ba bzlog ste gyon pa las gyur par mkhyen nas dge slong rnams la bka' stsal pa/ dge slong dag mi blun po klu skyong gis la ba bzlog ste bgos nas de bzhin gshegs pa la ba ku la ba ku la/ dge sbyong nga ni gnod sbyin ba ku la yin no/ /zhes zer te/ de lta bas na dge slong gis la ba bzlog ste bgo bar mi bya'o/ /gyon na 'gal tshabs can du 'gyur ro/ /bcom ldan 'das kyis dge slong gis la ba bzlog ste bgo bar mi bya'o/ /gyon na 'gal tshabs can du 'gyur ro/ /zhes bka' stsal pa dang / dge slong ba lang gi gnas na 'khod pa de dag gis der la ba'i bgo ba dag rnyed pa dang / de dag la shig zhugs te/ dge slong rnams shig gis zos pas bde ba mi thob pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ la ba bzlog ste gyon pas 'dug par bya/ nyal bar bya'i bcag par ni mi bya'o/ sdom ni/ be'u ras dang ni la ba dang / de bzhin la ba'i mchog dang ni/ /sgrog mig sgrog rten mdud pa dang / /ska rags dag ni gsum yin no/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de nas bcom ldan 'das kyis dge slong rnams la bka' stsal pa/ dge slong dag gal te dge 'dun la be'u ras grub na yang gnang la/ gang zag la yang gnang ngo / /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs shing snga ma bzhin te/ dge 'dun la la ba grub na yang gnang la/ gang zag la yang gnang ngo / /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs shing snga ma bzhin te/ dge 'dun la la ba mchog grub na yang gnang la/ gang zag la yang gnang ngo / /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na dge slong bsod snyoms pa zhig 'dug pa de snga dro sham thabs dang chos gos bgos/ lhung bzed thogs te mnyan yod du bsod snyoms kyi phyir zhugs so/ /de bsod snyoms kyi phyir rgyu ba na chos gos nar nas/ des myur ba myur bar lhung bzed sa la bzhag nas de tshags byas pa dang / de bram ze dang khyim bdag rnams kyis mthong nas 'phya zhing dge sbyong shAkya'i bu rnams ni gtsang sbra med de/ lhung bzed bab bab tu 'jog go zhes zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong gis lhung bzed bab bab tu bzhag par mi bya'o/ /dge slong lhung bzed bab bab tu 'jog na 'gal tshabs can du 'gyur ro/ /'on kyang chos gos bsrung ba'i phyir chos gos kyi sgrog mig gdags par bya'o/ /dge slong rnams kyis btags pa dang / des chos gos ral nas/ bcom ldan 'das kyis bka' stsal pa/ sgrog zungs kyis glon la thogs shig /dge slong rnams kyis sgrog zungs kyis glan nas btags pa dang / de sgrog mdud med pas ma chags te nyes dmigs de nyid du gyur pa dang / bcom ldan 'das kyis bka' stsal pa/ mdud pa bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na dge slong bsod snyoms pa zhig 'dug pa de snga dro sham thabs dang chos gos bgos/ lhung bzed thogs te mnyan yod du bsod snyoms kyi phyir zhugs so/ /de bsod snyoms kyi phyir rgyu ba na smad g.yogs snyil ba dang / des myur ba myur bar lhung bzed sa la bzhag ste/ de tshags bcos so/ /bram ze dang / khyim bdag rnams kyis mthong nas zhes bya ba snga ma bzhin no/ /bcom ldan 'das kyis bka' stsal pa/ chos gos bsrung ba'i phyir ska rags rnam pa gsum po/ shur bu dang / shur bu phre'u dang / lcag phod bcang bar bya'o// //'dul ba phran tshegs kyi gzhi/ bam po bdun pa/ sdom ni/ ston pa ser skya'i gnas bzhugs pas/ /rgyan spel ma dang chang phrul can/ /zla gam dang ni gser skud can/ /khra bo thams cad bkag pa yin/ /sangs rgyas bcom ldan 'das ser skya'i gnas na n+ya gro d+ha'i kun dga' ra ba na bzhugs so/ /de'i tshe shAkya ming chen gyi khyim gyi zhal ta ba dus las 'das pa dang / ri brags na gnas pa'i skye bo'i tshogs dag shAkya ming chen ga la ba der song ste smras pa/ rje khyod kyi khab kyi zhal ta ba gum na/ zhal ta ba gzhan zhig bsko bar gsol/ des de'i drung na bram ze'i khye'u zhig 'dug pa de la smras pa/ bram ze'i khye'u re shig khyod song shig /ji tsam na zhal ta ba gzhan zhig btang ngo / / de song nas des chos bzhin du rigs par spyad pas dpya nar ma dang / bla skyes rab tu mang por phul ba dang / shAkya ming chen gyis smras pa/ bram ze'i khye'u dpya nar ma dang bla skyes 'di ltar mang ba khyod kyis skye bo'i tshogs la gnod par ma byas grang / des smras pa/ rje dpya nar ma dang bla skyes 'di rigs pas mchis pa lags te/ bdag gis skye bo'i tshogs la gnod pa bgyis pa ma lags so/ /des ri brag na gnas pa'i skye bo'i tshogs de la smras pa/ shes ldan dag bram ze'i khye'u 'dis khyed 'ga' la gnod pa mi byed grang / rje dpya nar ma dang bla skyes 'di rigs pas mchis pa lags te/ 'dis 'ga' la yang gnod pa ma bgyis so zhes smras pa dang / des de ri brag gi zhal ta bar bcug go/ /'jig rten ni 'byor pa 'dod cing rgud pa dang mi mthun pa yin pas de la bram ze gzhan zhig gis bu mo byin pa dang / des de nyi ma dang / tshes grangs dang / yud tsam dang sbyar nas bag mar blangs so/ /de de dang lhan cig rtse bar byed/ dga' bar byed/ dga' mgur spyod par byed de/ de rtse bar byed/ dga' bar byed dga' mgur spyod par byed pa las bu khye'u zhig btsas te/ de btsas pa'i btsas ston rgya cher byas nas rigs dang mthun pa'i ming btags so/ /yang de rtse bar byed dga' bar byed dga' mgur spyod par byed pa las bu mo zhig btsas te/ de'i btsas ston yang rgya cher byas nas ming zla ba zhes bya bar btags so/ /de bskyed bsrings te chen mor gyur pa dang / de mkhas shing spyod lam dang 'gro 'dug 'o gze bas ri brags na gnas pa'i skye bo'i tshogs thams cad kyi yid du 'ong bar gyur to/ /ji tsam dus gzhan zhig na bram ze'i khye'u de na bar gyur nas rtsa ba dang / sdong bu dang / lo ma dang / me tog dang / 'bras bu'i sman gyis rim gro byas kyang nad de zhi bar ma gyur nas/ ri brags pa des dpya nar ma dang / bla skyes phul ba gang yin pa de dag thams cad spyad cing skyin po gzhan dag blangs nas/ 'on kyang sos par ma gyur nas de de nyid du dus las 'das so/ /ri brags na gnas pa'i skye bo'i tshogs dag shAkya ming chen ga la ba der 'ongs te smras pa/ rje zhal ta ba de ni gum lags so/ /des smras pa/ shes ldan dag de na dpya nar ma dang bla skyes su phul ba yod dam/ rje te por mang du phul mod kyi des bro 'tshal ba'i yo byad tu spyad na 'on kyang sos par ma gyur nas skyin po gzhan dag kyang bgyis so/ /deng la de na lhag ma cung zad ci yod pa des bu lon sobs shig /rje de na cung zad kyang ma mchis te/ lus par btab na de'i mchis brang dang / bu pho dang bu mo mchis te/ de'i bu mo de mkhas shing spyod lam dang 'gro 'dug 'o gze ba lags pas ri brags na gnas pa'i skye bo'i tshogs thams cad kyi yid du mchi bar gyur to/ /ming chen gyis smras pa/ shes ldan dag de'i chung ma dang bu pho dag ci dgar thong la bu mo de 'dir khug shig /de rnams kyis de'i chung ma dang bu pho de dag ci dgar btang nas bu mo de ming chen gyi gan du khrid do/ /shAkya ming chen gyi chung ma rgan mo gcig kha zas g.yo ba dang / me tog 'thu ba'i las rnam gnyis byed pa des smras pa/ jo bo de ni bdag shin du rgas pas sug las rnam gnyis bgyid rngo mi thog na/ zla ba 'di bdag gi ngan grogs su bskor gsol/ des de ngan grogs su bskos so/ /des de la smras pa/ zla ba khyod ni kun dga' ra bar song la me tog thus shig /ngas ni kha zas g.yo 'o/ /de kun dga' ra bar song nas me tog btus te de nas phreng ba legs par brgyus nas ming chen gyi gan du song ba dang / des mthong nas yongs su dga' ste smras pa/ legs so zhog shig ces smras nas chung ma rgan mo de la 'di skad ces smras so/ /ci'i phyir sngon ni me tog nyung la de ring mang bar gyur/ des smras pa/ sngon ni khyod kyi gnyen dag mchis nas bdag la slong ba na bdag gis de dag la stsal la/ 'dis ni su la yang ma stsal ba dang bdag ni rgas pas mig rtul la/ 'di ni/ mig rno bas thu mkhas pa las gyur to/ /des smras pa/ gal te de lta na de kun dga' ra bar thong la der zhog shig /des de kun dga' ra ba de nyid du bzhag pa dang / de me tog gi phreng ba bzang po rgyud par byed pas de'i ming phreng ldan ma phreng ldan ma zhes bya bar grags so/ /dus gzhan zhig na de khyim nas rang gi zan blang te kun dga' ra bar song ba dang / bcom ldan 'das kyang bsod snyoms la gshegs so/ /des bcom ldan 'das sku blta bas chog mi shes pa mthong nas shin du bde zhing rab tu dga' bas rtog par byed cing bsams pa/ 'di lta bu'i yon gnas yang dag pa la bdag gis bya ba ma byas pas des na bdag 'di lta bu'i gnas skabs su gyur par gdon ma zos so/ /de'i phyir gal te bcom ldan 'das kyis bdag las bsod snyoms bzhes na/ bdag gis bcom ldan 'das la dbul lo snyam pa dang / skabs de lta bu la sangs rgyas bcom ldan 'das rnams la mi mkhyen pa dang / mi gzigs pa dang / mi rig pa dang / rnam par mi mkhyen pa ci yang mi mnga' bas sangs rgyas bcom ldan 'das rnams la ni chos nyid kyis zhes bya ba nas/ lus can rnams la 'bras bur smin ces bya ba'i bar snga ma bzhin no/ /de nas bcom ldan 'das kyis de rjes su gzung ba'i phyir lhung bzed bzhed de sring mo khyod kyis gal te yongs su btang na lhung bzed 'dir byin cig ces bka' stsal ba dang / des shin du dad pas bcom ldan 'das la bsod snyoms de phul nas zhabs gnyis la phyag 'tshal te smon lam btab pa/ bdag gi dge ba'i rtsa ba 'dis bran mo dang dbul por mi 'gyur ba shog shig /ji tsam na de'i pha'i grogs po bram ze mtshan mkhan zhig yod pa des de mthong nas smras pa/ bu mo khyod ga las 'ongs/ ri brags de kho na nas so/ /su la gnas shing 'dug des smras pa/ gang na skal pa chung ngu gnas pa na ste/ bdag ming chen gyi bran mor bgyis so/ /khyod kyi pha de gar song / gum mo/ ma dang ming po de dag gar dong / gar mchis ma 'tshal to/ /zla ba khyod bran mo'i 'os ma yin na lag pa rkyongs shig dang blta'o/ /des lag pa brkyang ba dang / des bltas nas tshigs su bcad de smras pa/ gang gi lag pa'i mthil dag la/ /lcags kyi 'khor lo'i mtshan yod pa/ /bran gyi rigs su skyes gyur kyang / /rgyal po'i btsun mor bzhes par 'gyur/ /gang gi bzhin ni rgyas pa dang / /ngang pa'i rgyal po'i gdangs 'dra ba/ /bran gyi rigs su skyes gyur kyang / /rgyal po'i btsun mor bzhes par 'gyur/ /gang gi rkang pa'i mthil dag la/ /grong khyer lcog dang rta babs bcas/ /bran gyi rigs su skyes gyur kyang / / rgyal po'i btsun mor bzhes par 'gyur/ /khyod mi dga' ba ma byed par song shig dang / khyod bran mor mi 'gyur gyi khyod rgyal po'i btsun mor 'gyur ro/ /de gnas de nas skyed mos tshal du song ba dang yul ko sa la'i rgyal po gsal rgyal ri dgas shor du chas pa rtas kha khyer te/ gcig pu ser skya'i gnas su phyin to/ /de phan tshun 'khyams pa las ming chen gyi kun dga' ra bar song nas des bu mo de la dris pa/ bu mo 'di su'i kun dga' ra ba yin/ des smras pa/ lha shAkya ming chen gyi lags so/ /des rta las babs te smras pa/ bu mo rkang pa bkrus chu long shig /des shin du myur bar rdzing bur song ste nyi ma'i 'od zer gyis bsros pa'i chu blangs pa dang / des rkang pa bkrus nas yud tsam zhig bsdad 'di smras pa/ bu mo gdong bkrus chu longs shig /des chu'i steng rim lag pas bsal te/ chu ha cang dro ba yang ma yin ha cang grang ba yang ma yin pa blangs nas des gdong bkrus so/ /des yang smras pa/ bu mo btung dgos gyi chu long shig / des chu rnam par glongs te chu bsil ba'i lo ma'i snod du blangs pa rgyal pos 'thungs nas smras pa/ bu mo kun dga' ra ba 'di na rdzing bu gsum yod dam ci na khyod kyis chu rnam pa gsum khyer te 'ongs/ des smras pa lha 'di na rdzing bu gcig kho na mchis kyi/ gsum ni ma mchis so/ /des smras pa/ 'o na khyod kyis chu rnam pa gsum ga las khyer te 'ongs/ des ji ltar gyur pa brjod pa dang / rgyal pos smras pa/ des ni go'o 'di 'dri bar bya ste/ ci'i phyir khyod kyis chu rnam pa gsum khyer te 'ongs/ des smras pa/ lha bdag gis dang por chab dron po 'tshal te mchis pa ni lha mnyel bsos par bgyi ba'i slad du'o/ /slad kyis ha cang dro ba yang ma lags ha cang grang ba yang ma lags pa 'tshal te mchis pa ni dro ba dang grang ba gang lags pa dag spyan la gnod pa spang ba'i slad du'o/ /rnam par glongs nas shin du bsil ba 'tshal te mchis pa ni lha skyems pa dang bral bar bgyi ba'i slad du'o/ /des bsams pa/ bu mo 'di ni mkhas pa yin no snyam du rig nas smras pa/ bu mo mdzangs shing mkhas pa khyod rkang pa mnye dgos kyis re shig mal chos shig /des de'i rkang pa mnyes pa dang / de reg bya dang ldan pa yin pas mnyes ma thag nyid du de gnyid log go/ /de gnyid log pa dang / des bsams pa/ rgyal po 'di dag la ni dgra mang bas gal te 'di gnyid log pa la 'ga' zhig gis gnod pa byas na nges par bdag gi rje bo la grags pa ma yin par 'gyur bas sgo gcad par bya'o snyam nas/ des sgo bcad de 'dug pa dang / ji tsam na gcig nas gcig tu thos te dpung gi tshogs yan lag bzhi pa dag bskyed mos tshal der lhags nas de rnams sgo phye zhes zer ro/ /des sgo ma phye ba dang / rgyal po ku cho'i sgras sad nas smras pa/ bu mo de ci zhig /des smras pa/ lha mi dag cig chab sgo phye zhes mchi zhing / lha'i mtshan kyang smos so/ /des smras pa/ bu mo sgo 'di sus bcad/ lha bdag gis bkum mo/ / ci'i phyir bcad/ lha bdag gi glo ba la rgyal po 'di dag la ni dgra mang bas gal te 'di mnal log pa la 'ga' zhig gis gnod pa bgyis na nges par bdag gi rje bo la grags pa ma lags par 'gyur ro/ /snyam nas de'i slad du bdag gis chab sgo bkum mo/ /des smras pa/ bu mo 'dzangs ma khyod la nga'i the tshom 'di 'dri bar bya ste/ re shig khyod ming chen gyi cir 'ong smros shig /des smras pa/ bdag de'i mngag gzhug bgyid pa'i bran mo lags so khyod de'i mngag gzhug byed pa'i bran mo ma yin gyi/ khyod nges par de'i bu mo yin gyis khyod kyis drang por smros shig /de cang mi smra bar 'dug pa dang / rgyal pos smras pa/ bu mo khyod ming chen gyi gan du song la/ rgyal po gsal rgyal khyod kyi kun dga' ra ba na bzhugs so zhes byos shig / de myur ba myur bar song ste/ jo bo ko sa la'i rgyal po gsal rgyal khyod kyi kun dga' ra ba na bzhugs so zhes smras so/ /shAkya ming chen gyis thos nas bza' ba dang / btung ba dang / dri dang phreng ba dag bshams nas/ skye bo phal po ches bskor te kun dga' ra bar song ngo / /de nas gcig la gcig byon pa legs so zhes bya ba'i tshig gis kun du spyad pas so so yang dag par dga' bar byas nas rgyal po khrus byas shing zan zos nas gtam dag byas te yud tsam zhig bsdad nas smras pa/ ming chen bu mo 'di khyod kyi cir 'ong / lha mngag gzhug bgyid pa'i bran mo lags so/ /'di khyod kyi mngag gzhug byed pa'i bran mo ma yin gyi/ 'di khyod kyi bu mo yin gyis nga la byin cig /des smras pa/ lha shAkya'i bu mo gzhan 'di bas ches khyad par du 'phags pa dag mchis na de dag bzhes su gsol/ 'di cir 'tshal rgyal pos smras pa/ 'di nyid nga la dgos kyis/ 'di nga la byin cig /des smras pa/ lha gal te de lta na tshul bzhin bgyis te dbul lo/ /de bzhin byos shig /de nas shAkya ming chen gyis grong khyer mdzes par byed du bcug ste/ bu mo de rgyan thams cad kyis klubs nas glang po che la bskyon te lam po che dang / srang dang / lam gyi sum mdo dang / bzhi mdo dag tu grong khyer ser skya'i gnas na 'khod pa dang / yul sna tshogs nas lhags pa'i skye bo'i tshogs la shes ldan dag nyon cig shAkya ming chen gyi bu mo phreng ldan ma ko sa la'i rgyal po gsal rgyal gyi btsun mor phul lo zhes dril bsgrags pa byas so/ /de nas de ko sa la'i rgyal po gsal rgyal gyi btsun mor phul bar skye bo phal po che rnams kyis kyang shes so/ /de nas ko sa la'i rgyal po gsal rgyal gyis dpal gyi 'byor ba chen pos blangs nas mnyan yod du khrid pa dang / de'i mas bdag gi bus bran mo chung mar blangs so/ / zhes thos te/ de kun nas dkris pa skyes nas bsam pa/ 'di ni nges par pha de'i bu ma yin pa 'am/ bdag gi khong du don med pa zhig bsrel te/ 'di ltar bran mo'i khyor skyes par gyur to snyam nas/ de yang sems khongs su chud cing 'dug pa dang rgyal pos kyang phreng ldan ma la smras pa/ phreng ldan ma song la sgyug mo'i zhabs la phyag byos shig /de song ste de'i rkang pa gnyis la bzung ba dang / de reg bya dang ldan pa yin pas des reg pa tsam gyis de gnyid log ste sad nas bsams pa/ bu zan ma'i bu mo 'di'i reg pa 'di 'dra bas ko sa la'i rigs 'di rgyas par 'gyur ro/ /snyam mo/ /de'i tshe ko sa la'i rgyal po gsal rgyal la/ btsun mo dam pa rgyal rigs dbyar tshul ma dang / phreng ldan ma gnyis yod de/ gang gi tshe rgyal po phreng ldan ma dang thabs gcig bzhugs pa de'i tshe/ phreng ldan ma rgyal rigs dbyar tshul ma ni 'di lta bur yang gzugs bzang ngo zhes dbyar tshul ma'i bsngags pa brjod pa dang / des smras pa/ lha de bdag gis nam zhig na mthong bar 'gyur lags/ rgyal pos smras pa/ ma rings shig dang ring po mi thogs par mthong bar 'gyur ro/ /de re ba dang bcas pas 'dug go/ /gang gi tshe rgyal rigs dbyar tshul ma dang thabs gcig tu 'dug pa de'i tshe yang dbyar tshul ma phreng ldan ma ni de lta bu'i reg bya dang yang ldan pa yin no zhes phreng ldan ma'i bsngags pa brjod pa dang / des smras pa lha de bdag gis nam zhig na mthong bar 'gyur lags/ rgyal pos smras pa/ ma rings shig dang ring por mi thogs par mthong bar 'gyur ro/ /de dag rgyal pos ji lta ji ltar ya mtshan bskyed pa de ltar phan tshun mthong bar spro bar gyur to/ /ji tsam dus gzhan zhig na so ka'i dus la bab ste/ nags tshal na shing rnams me tog rgyas par gyur cing ngang pa dang / khrung khrung dang / rma bya dang / ne tso dang / ri skegs dang / khu byug dang / shang shang te'u sgra 'byin pa'i bskyed mos tshal gyi gnas su rgyal po btsun mo'i tshogs kyis yongs su bskor cing gshegs so/ /bud med ni me tog dang 'bras bu la dga' ba yin pas bskyed mos tshal de dang de dag tu 'khyam par brtsams pa dang / rgyal rigs dbyar tshul ma ngal bas skyo zhing snyom par gyur nas shing mya ngan 'tshang la snyes te 'dug pa dang / ji tsam na phreng ldan mas mthong ngo / /de de'i gzugs bzang ba mthong bas shing gi lha mo yin no snyam du rig nas mod la rkang pa la phyag byas pa dang / phreng ldan ma'i lag pas reg ma thag pa nyid du gnyid log par gyur to/ /ji tsam na rgyal pos dbyar tshul ma la phreng ldan ma'i bsngags pa brjod par brtsams pa dang / des smras pa/ lha de bdag gis nam zhig na mthong bar 'gyur lags/ rgyal pos smras pa/ de khyod kyis mthong ngo / /lha bdag mi dran no/ /ngas khyod dran par bya'o/ /legs so/ /gang gi lag pa gnyis kyi khyod kyi rkang pa la bzung ba de dran nam/ lha de lha mo phreng ldan ma lags sam/ de yin no/ /lha gang khyod reg bya dang ldan pa'i btsun mo de lta bu spangs te bdag gi drung du gshegs pa de ni khyod bdag la nges par byams shing thugs gcugs pa lags so/ /de bzhin du phreng ldan ma la dbyar tshul ma ni 'di lta bu yin no zhes bsngags pa brjod par brtsams pa dang / des smras pa/ lha bdag gis nam zhig na mthong bar 'gyur lags/ rgyal pos smras pa/ de khyod kyis mthong ngo / /lha bdag mi dran no/ /ngas khyod dran par bya'o/ /legs so/ /khyod kyis shing mya ngan 'tshang la bsnyes te 'dug pa gang la phyag byas pa de dran nam/ lha ci de dbyar tshul ma lags sam/ de yin no/ /lha gang khyod kyis btsun mo gzugs bzang ba de lta bu spangs te bdag gi drung du gshegs pa de ni khyod nges par bdag la byams shing thugs bcugs pa lags so/ /skabs der ko sa la'i rgyal po gsal rgyal la btsun mo dam pa rgyal rigs dbyar tshul ma dang / phreng ldan ma gnyis yod de/ de dag las gcig ni gzugs bzang ba rnams kyi mchog yin la/ gcig shos ni reg bya dang ldan pa rnams kyi mchog yin no zhes phyogs su sgra grags pa dang / dge slong rnams the tshom skyes nas/ the tshom thams cad gcod par mdzad pa sangs rgyas bcom ldan 'das la zhus pa/ btsun mo phreng ldan ma dang / dbyar tshul mas las ci zhig bgyis na/ las de'i rnam par smin pas gcig ni reg bya dang ldan pa rnams gyi mchog tu gyur la/ gcig shos ni gzugs bzang ba rnams kyi mchog tu gyur/ bcom ldan 'das kyis bka' stsal pa/ dge slong dag de dag nyid kyis las tshogs rnyed pa/ rkyen yongs su bsgyur ba/ 'od pa bzhin du nye bar gnas pa gdon mi za bar 'byung bar 'gyur ba dag byas shing bsags pas de dag nyid kyis las byas shing bsags pa dag gzhan su zhig gis so sor myong bar 'gyur/ dge slong dag las byas shing bsags pa dag ni sa'i khams la rnam par smin par mi 'gyur/ chu'i khams la ma yin/ me'i khams la ma yin/ rlung gi khams la ma yin gyi/ 'on kyang las dge ba dang / mi dge ba byas shing bsags pa dag ni zin pa'i phung po dang / khams dang / skye mched dag la rnam par smin par 'gyur te/ bskal pa brgya phrag rnams su yang / /las rnams chud zar mi 'gyur te/ /tshogs shing dus la bab pa na/ /lus can rnams la 'bras bur smin/ /dge slong dag sngon byung ba 'das pa'i dus na ri brags shig na bram ze zhig 'dug pa des rigs mnyam pa las chung ma blangs te de de dang lhan cig rtse bar byed/ dga' bar byed/ dga' mgur spyod par byed de/ de rtse bar byed/ dga' bar byed/ dga' mgur spyad pas bu khye'u zhig btsas so/ /yang rtse bar byed dga' bar byed/ dga' mgur spyod par byed pa las bu mo zhig btsas te/ de dag bsring shig bskyed nas chen por gyur to/ /ji tsam dus gzhan zhig na bram ze de chung ma dang bcas te shi nas bram ze'i khye'u de pha ma dang bral bas dben pa la dga' bar gyur te/ des sring mo de khrid de dgon pa'i gnas su song nas 'khod de/ der de dag rtsa ba dang / sdong bu dang / me tog dang / 'bras bu dag gis 'tsho bar brtsams so/ /bcom ldan 'das kyis bka' stsal pa/ dge slong dag sbrul nag po la ni nyes dmigs rnam pa lnga yod de/ lnga gang zhe na/ khro ba dang / khon du 'dzin pa dang / 'khu ba dang / byas pa mi gzo ba dang / dug rno ba'o/ /de bzhin du bud med kha cig la yang nyes dmigs rnam pa lnga yod de/ lnga gang zhe na/ khro ba dang / khon du 'dzin pa dang / 'khu ba dang / byas pa mi gzo ba dang / dug rno ba'o/ /dge slong dag de la bud med kyi dug rno ba ni 'di yin te/ 'di ltar bud med ni phal cher 'dod chags lhag par che ba'o/ /de'i sring mo de nyon mongs pa dag gis gdungs nas/ des smras pa/ ming po bdag dgon pa'i rtsa ba dang / sdong bu dang / me tog dang / 'bras bus 'tsho ba'i rngo mi thog gis grong mthar bzhud do/ /des de khrid de grong mthar song ste/ de bram ze zhig gi der slongs mo la zhugs so/ /des sring mo dang lhan cig slongs mo'i phyir cig car sgra phyung ba bram ze des thos te phyir byung nas smras pa/ drang srong dag kyang chung ma dang bcas te rgyu 'am/ des smras pa/ 'di bdag gi chung ma ma yin gyi sring mo'o/ /'di su la byin/ su la yang ma byin no/ /gal te de lta na kho bo la ci'i phyir mi byin/ 'di ni dam pa ma yin pa sdig pa'i chos de spangs pa yin no/ /de 'dod pa'i 'dod chags kyis gdungs pas smras pa/ ming po ci bdag dgon pa'i rtsa ba dang / sdong bu dang / lo ma dang / me tog dang 'bras bus 'tsho bar rngo mi thog pa mad snyam 'am/ bdag gis ni nyon mongs pa spang rngo ma thog pa'i slad du khyod la de skad bgyis kyis/ bdag bram ze 'di la stsol cig /des smras pa/ de ni chos dang 'gal bas ngas khyod sbyin par mi bya'i khyod nyid shes par zad do/ /bram ze des de dang de'i bsam pa shes nas 'byor ba'i dpal chen pos de bag mar blangs te/ rang gi khyim du bcug go/ /de nas des ming po de la smras pa/ ming po tshur spyon khyod kyis khab dbub par mdzod cig dang thabs cig tu bzhugs so/ /des smras pa/ sring mo/ kho bo ni 'dod pa don du mi gnyer te/ khyod kyis gnang na rab tu 'byung ngo / /des smras pa/ dam zhig bca' ste/ gal te khyod skabs skabs su bdag gzigs shing byon na gnang bar bgyi'o/ /des smras pa/ legs te de bzhin bya'o/ /de des gnang nas drang srong rnams kyi nang du rab tu byung ngo / /de dge ba'i rtsa ba bskyed pa yin pas des slob dpon med par byang chub kyi phyogs dang 'thun pa'i chos sum bcu rtsa bdun mngon du byas te rang byang chub mngon sum du byas nas des bsams pa/ bdag gis sring mo de la 'ong ngo zhes dam bcas pas de'i phyir de'i gan du 'gro bar bya'o snyam nas/ de de'i gan du song ngo / /song nas 'bar ba dang / gsal ba dang / char 'bab pa dang / glog 'byung ba'i cho 'phrul dag bya bar brtsams pa dang / so so'i skye bo dag ni rdzu 'phrul la myur du dad pa yin pas de shing drungs nas bcad pa bzhin du rkang pa la phyag 'tshal te smras pa/ ming po khyod kyis yon tan gyi khyad par 'di lta bu thob bam/ thob bo/ gal te de lta na khyod ni bsod snyoms don du gnyer ba lags/ bdag kyang bsod nams don du gnyer ba lags pas de'i slad du 'di nyid du bzhugs shig dang / khyod la bdag gis bsod snyoms dbul bar bgyi'o/ /des smras pa/ sring mo khyod ni gzhan la rag las pa yin gyis/ khyim thab la je dris shig /legs te de bzhin bgyi'o/ /des khyim thab la smras pa/ rje'i sras bdag gi ming po rab tu byung ba brtul zhugs grub pa bdag nyid chen por gyur te/ gal te khyod kyis gnang na bdag gis zla ba gsum du bsod snyoms la spyan drang ngo / /des smras pa/ bzang mo gal te 'di rab tu byung bar ma gyur na bdag cag gis mi 'dod bzhin gso dgos par 'gyur na/ da rab tu byung ste brtul zhugs grub pa bdag nyid chen por gyur na lta smos kyang ci dgos/ song la spyan drongs shig /des de zla ba gsum du bsod snyoms la spyan drangs so/ /bram ze de'i chung ma gnyis pa gzhan zhig yod pa des bsams pa/ bdag cag longs spyod thun mong las 'di ni bsod nams 'di lta bu byed na bdag gis ci'i phyir mi bya snyam du rig nas de la smras pa/ phu nu mo khyod kyi dral gang lags pa de bdag gi ming po yang de kho na lags pas khyod kyi gdugs gcig bshos gsol la/ bdag gis kyang gdugs gcig bshos gsol bar bgyi'o/ /des smras pa/ legs te/ de bzhin bgyi'o/ /rang sangs rgyas kyi sring mo de de'i sems bsrung ba'i phyir zas bsod pa reg bya phun sum tshogs pa zas dman pas g.yogs te de la bstan nas phu nu mo khyod rjes su yi rang byos shig /bdag gi ming po la zhal zas 'di lta bu gsol lo/ /des smras pa/ legs so/ /rjes su yi rang ngo / /de yang de'i sems bsrung ba'i phyir zas dman pa bsod pa dag gis g.yogs te de la bstan nas phu nu mo khyod kyang rjes su yi rang ba gyis shig / bdag kyang dral la zhal zas bsod pa kha dog phun sum tshogs pa 'di lta bu gsol lo/ /dge slong dag ji snyam du sems/ rang sangs rgyas kyi sring mo gang yin pa des rang sangs rgyas la reg bya phun sum tshogs pa zas dman pas bkab ste 'bul ba gang yin pa de ni lha mo phreng ldan ma 'di nyid yin te/ de'i tshe de'i dus na 'dis gang rang sangs rgyas la reg bya phun sum tshogs pa zas dman pas bkab ste phul ba'i las de'i rnam par smin pas tshe rabs lnga brgyar reg bya dang ldan par gyur te/ de'i bar du yang reg bya dang ldan pa rnams kyi mchog tu gyur to/ /gcig shos gang yin pa des rang sangs rgyas la zas dman pa kha dog phun sum tshogs pas bkab ste phul ba gang yin pa de ni rgyal rigs dbyar tshul ma 'di nyid yin te/ de'i tshe de'i dus na gang 'dis rang sangs rgyas la zas dman pa kha dog phun sum tshogs pas bkab ste phul ba'i las de'i rnam par smin pas tshe rabs lnga brgyar gzugs bzang bar gyur te/ da lta'i bar du yang gzugs bzang ba rnams kyi mchog tu gyur to/ /dge slong dag de lta bas na las gcig du gnag pa rnams kyi rnam par smin pa ste gcig tu gnag pa yin la zhes bya ba nas/ dge slong dag 'di ltar bslab par bya'o zhes bya ba'i bar snga ma bzhin no/ /dus gzhan zhig na lha mo phreng ldan ma sems can zhugs par gyur to/ /nyi ma gang la sems can zhugs par gyur pa de nyid kyi nyi ma la bram ze mdun na 'don gyi chung ma la yang sems can zhugs par gyur te/ nyi ma gang la sems can zhugs par gyur pa de nyid kyi nyi ma nas sdug bsngal gyi nyen to/ /ji tsam na lha mo phreng ldan ma zla ba dgu lon nas khye'u gzugs bzang ba blta na sdug pa mdzes pa zhig btsas so/ /de'i btsas ba'i btsas ston rgya cher byas nas/ khye'u 'di'i ming cir gdags zhes ming 'dogs par byed pa na/ rgyal pos smras pa/ song la 'di phyi mo la phul cig dang / de nyid ming 'dogs par 'gyur ro/ /blon po rnams kyis de khyer te de'i gan du dong nas smras pa/ lha mo lha'i zhal nas gzhon nu'i ming gdags su gsol zhes byung ngo / /des smras pa/ shes ldan dag ngas dang po nyid nas bu zan ma'i bu mo 'dis ko sa la'i rigs 'di rgyas par 'gyur ro/ /zhes ma smras sam/ blon po dag gis smras pa/ de'i don 'tshal te/ lha mos 'di ma bltam pa nyid nas 'phags skyes po zhes kun du spyad pas de'i slad du gzhon nu'i mtshan 'phags skyes po zhes gdags so zhes de'i ming 'phags skyes po zhes bya bar btags so/ /gang gi nyin par gzhon nu 'phags skyes po btsas pa de nyid kyi nyi ma la mdun na 'don gyi bu btsas nas/ de'i nye du dag kyang 'ongs shing 'dus nas zhag bdun gsum nyi shu gcig tu btsas pa'i btsas ston rgya cher byas nas khye'u 'di'i ming cir gdags shes ming 'dogs par byed pa na/ de na kha cig gis smras pa/ 'di gang gi nyi ma la ma'i mngal du zhugs pa de'i nyin mo nyid nas ma sdug bsngal gyis nyen cing / skyes nas kyang sdug bsngal ba kho na yin pas de'i phyir khye'u'i ming ma la gnod ces gdags so zhes de'i ming ma la gnod ces bya bar btags so/ /gzhon nu 'phags skyes po ma ma brgyad po nu ma bsnun pa'i ma ma gnyis dang / pang na 'tsho ba'i ma ma gnyis dang / dri ma 'phyi ba'i ma ma gnyis dang / rtsen grogs kyi ma ma gnyis la gtad de/ ma ma brgyad po de dag gi 'o ma dang / zho dang / mar dang / zhun mar dang mar gyi snying khu dang / gzhan yang yo byad kyi khyad par gtso bo gtso bo dag gis rdzing na gnas pa'i pad ma bzhin du bsrings shing bskyed do/ /gang gi tshe de chen por gyur pa de'i tshe yi ge bslabs te/ yi ge mthar phyin nas brtag pa brgyad po 'di lta ste/ rin po che brtag pa dang / shing brtag pa dang / gzhi brtag pa dang / gos brtag pa dang / glang po che brtag pa dang / rta brtag pa dang / bud med brtag pa dang / skyes pa brtag pa la mkhas par gyur cing / dbye ba dang / klag pa la mkhas shing spyod pa gsal ba/ rnam pa thams cad kyi tshul la mkhas te/ de rgyal po rgyal rigs spyi bo nas dbang bskur ba/ yul gyi dbang phyug mthu dang / brtson 'grus thob pa sa'i dkyil 'khor chen po cham du phab ste/ gnas pa rnams kyi bzo'i gnas dang las kyi gnas gang dag yin pa 'di lta ste/ glang po che'i gnyar zhon pa dang rta la zhon pa dang / shing rta'i thabs dang / ral gri'i thabs dang / gzhu bzung ba dang / mdun du bsnur ba dang / phyir bsnur ba dang / lcags kyus sgyur thabs dang / zhags pa gdab pa dang / mda' bo che'i 'phen thabs dang / 'dzin stangs dang / gom stabs dang / thor tsugs dang / rgyang nas phog pa dang / sgra grags par phog pa dang / gnad du phog pa dang / mi 'chor bar phog pa dang / tshabs che ba dang / dral ba dang / dbug pa dang / gcad pa'i gnas lnga po dag la mkhas par gyur to/ /khye'u ma la gnod kyang ma ma brgyad po dag la gtad de zhes bya ba nas rdzing na gnas pa'i pad ma bzhin du zhes bya ba'i bar snga ma bzhin no/ /de gang gi tshe chen por gyur pa de'i tshe yi ge bslabs te/ bram ze'i lta ba dang / spyod lam dang / tshul dang / gtsang sbra dang / spyod tshul dang / ril ba bzung ba dang / sa blang ba dang / thal ba blang ba dang / oM zhes bya ba dang / b+ho zhes bya ba dang / nges brjod kyi rig byed dang / mchod sbyin gyi rig byed dang / snyan tshig gi rig byed dang / srid srung gi rig byed dang / drang srong ga rgas byed pa dang / mA tha ras byas pa dang / sa g.yo ba'i dpyad dang / bar snang gi dpyad dang / bram ze'i las kyi mtha' drug po mchod sbyin byed pa dang / mchod sbyin byed du 'jug pa dang / klog pa dang / klog tu 'jug pa dang / sbyin pa dang / len pa dag la mkhas par gyur to/ /ji tsam dus gzhan zhig na 'phags skyes po dang / ma la gnod lhan cig ri dgas bshor ba'i phyir dong ba dang / de rtas kha khyer te ser skya'i gnas su phyin nas de dang de dag na 'khyams zhing ser skya na gnas pa'i shAkya rnams kyi skyed mos tshal du song ngo / /bskyed mos tshal srung ba'i mis ser skya na gnas pa'i shAkya rnams la smras pa/ shes ldan dag 'phags skyes po rtas kha khyer te khyod kyi bskyed mos tshal du 'ongs so/ /de rnams mi bzod pa skyes nas smras pa/ shes ldan dag gal te de lta na dus la bab pa 'di yin gyis 'dong de gsad do/ /de bzhin bya'o zhes de rnams go bgos te dong ba dang / shAkya rgan rabs rnams kyis mthong nas de dag gis smras pa/ gzhon nu dag gar dong / de rnams kyis smras pa/ 'phags skyes po bdag cag gi skyed mos tshal du mchis te/ de 'gums su mchi'o/ /shAkya rgan rabs rnams kyis smras pa/ gzhon nu dag de glo bur ba yin pas de'i nyes pa 'ga' bzod pa gyis la phyir log shig /de rnams phyir log pa dang / ji tsam na 'phags skyes po'i dpung gi tshogs yan lag bzhi pas gcig nas gcig tu thos nas tshol zhing skyed mos tshal du 'ongs nas dpung gi tshogs yan lag bzhi pas skyed mos tshal kun nas khyab par gyur pa dang / skyed mos tshal srung ba'i mis ser skya na gnas pa'i shAkya rnams la smras pa/ shes ldan dag 'phags skyes po'i dpung gi tshogs yan lag bzhi pa rnams skyed mos tshal du lhags te/ glang po che dang / rta'i mi gtsang ba dag gis bskyed mos tshal thams cad ma rung bar byas so/ /de rnams shin du mi bzod pa skyes nas shAkya rgan po'i tshig bcag ste 'phags skyes po gsad pa'i phyir dong ba dang / 'phags skyes pos 'di ltar ser skya na gnas pa'i shAkya rnams bdag gsod du 'ong ngo zhes thos nas/ des mi zhig bzhag ste smras pa/ kye skyes bu nga gud du 'gros/ khyod kyi ser skya na gnas pa'i shAkya rnams ci zer ba de nga la zlos shig /ser skya na gnas pa'i shAkya rnams skyed mos tshal du 'ongs pa na 'phags skyes po mi snang nas de rnams kyis mi de la bran mo'i bu de gar song zhes dris pa dang / des smras pa/ bros te mchis so/ /de dag las kha cig gis smras pa/ de gal te bdag cag gis mthong bar gyur na/ bdag cag gis de'i lag pa gcad par 'gyur ro/ /gzhan dag gis smras pa/ gal te bros par ma gyur na/ de kho bo cag gis rkang pa gcad par 'gyur ro/ /kha cig gis smras pa/ kho bo cag gis ni thams cad kyi thams cad du srog dang phral bar 'gyur ba zhig na/ gal te bros na de ji ltar bya/ de dag gis gla mi rnams la bsgo ba/ bskyed mos tshal phyag dar byos la bran mo'i bus phyogs gang du bcag pa'i phyogs de'i sa dag 'or la sa gzhan gyis khong shig / rtsig pa'i phyogs gang la brten pa de dag kyang zhal zhal khogs la gzhan gyis yugs shig /'o ma'i chus chag chag thob la spos chus thor te/ dri dang me tog la sogs pas kyang shin du phun sum tshogs par byos shig /des de bzhin du byas so/ /de nas mi des ji ltar gyur pa dag mthong nas 'phags skyes po'i gan du song ste rkang pa gnyis la phyag 'tshal nas mtha' gcig tu 'dug go/ /'phags skyes pos smras pa/ kwa'e skyes bu ser skya na gnas pa'i shAkya rnams ci zer/ lha ji skad mchi ba lha la gsol ba'i rngo mi thog ste/ de ni de dag nyid la gyur cig /kwa'e skyes bu de yang shes pa tsam du byas smros shig /des de dus kyis 'chu bar rtogs nas rgyas par bsnyad pa dang / des nang mi rnams la smras pa/ shes ldan dag gang gi tshe nga yab 'das te rgyal por gyur pa de'i tshe ngas de dag srog dang bral ba gang yin pa de kho na thog mar bya dgos kyis/ khyod kyis ji ltar gyur pa 'di thams cad skul cig dang / ngas ser skya na gnas pa'i shAkya rnams kha gdag go/ /de rnams kyis kyang khas blangs so/ /ma la gnod kyis smras pa/ legs so legs so/ /lha khyod kyis kyang de ni gdon mi 'tshal bar bgyid 'tshal te/ dge ba rnams ni dam bcas pa la brtan pa lags so/ /des smras pa/ nga dus ji tsam zhig na rgyal por 'gyur ba de mi shes so/ /ma la gnod kyis smras pa/ de ltar ma dgongs shig /rgyal po bgres po ni ring po mi thogs par lha nyid du gshegs pas khyod nyid rgyal por 'gyur ro/ /'dod pa bsten pas ni sdig pa'i las mi bya ba ci yang med pas ko sa la'i rgyal po gsal rgyal la blon po lnga brgya yod pa las 'phags skyes pos blon po rnams dang dbye bar brtsams pa dang / spyod pa'i bu ring po ma gtogs pa thams cad kha phyin to/ /blon po'i mchog de ni rje bo la snying nye ba yin pas kha ma phyin to/ /ji tsam dus gzhan zhig na spyod pa'i bu ring po bya ba zhig gi phyir 'phags skyes po'i gan du song ba dang / 'phags skyes pos rgyal po gsal rgyal gsod pa'i sbyor bas spyod pa'i bu ring po la ser skya na gnas pa'i shAkya rnams la ngas sha glan par bya na/ nga nam rgyal por 'gyur ba smon shig /des smras pa/ lha ci'i slad du bsod nams ma lags pa skyed par mdzad/ rgyal po bgres po ni ring po mi thogs par lha nyid du gshegs te rgyal por gzhan mi 'gyur gyi khyod nyid 'gyur ro/ /spyod pa'i bu ring po de ni ngas bgam par khyod kho na la smras kyi/ khyod kyis su la yang smra bar mi bya'o/ /lha bdag gis ma 'tshal tam ci/ su la yang ji ltar brjod par bgyi zhes smras te song ngo / /de'i tshe bcom ldan 'das shAkya rnams kyi nang na shAkya rnams kyi grong rdal me tsu ru de zhes bya ba na bzhugs te/ de nas ko sa la'i rgyal po gsal rgyal bzhon pa bzang po la zhon te kha lo sgyur ba spyod pa'i bu ring po dang / ljongs rgyu zhing 'gro ba na grong khyer zhig tu phyin nas ko sa la'i rgyal po gsal rgyal kyis dgon pa'i nags mdab bas mtha'i gnas mal dben pa skye bo sdig can dang bral ba mi chig rkya thub pas so sor bsten pa nang du yang dag 'jog dang 'thun pa mthong ngo / /mthong nas yang spyod pa'i bu ring po la smras pa/ spyod pa'i bu ring po bcom ldan 'das de dgon pa nags 'dab bas mtha'i gnas mal dben pa skye bo sdig can rnams dang bral ba mi chig rkya thub pas so sor bsten pa nang du yang dag 'jog dang 'thun pa 'di lta bu na bzhugs te/ der ngas bcom ldan 'das de la res 'ga' bsnyen bkur byas na ring po bcom ldan 'das de ltar gang na bzhugs/ ji ga khyod kyis thos sam/ lha bdag gis thos te bcom ldan 'das ni shAkya rnams kyi nang na shAkya rnams kyi grong rdal me tsu ru de zhes bgyi ba na bzhugs so/ /ring po shAkya rnams kyi grong rdal me tsu ru de zhes bya bar thag ji srid yod/ lha rgyang grags gsum lhag tsam mchis so/ /des ring po shAkya rnams kyi grong rdal me tsu ru di ga la ba der shing rta drong shig /lha de bzhin 'tshal lo zhes spyod pa'i bu ring pos ko sa la'i rgyal po gsal rgyal gyi ltar mnyan nas/ shAkya rnams kyi grol rdal me tsu ru di ga la ba der shing rta khrid de bzhon pas 'gro ba'i sa ji srid pa de srid du zhon te song nas bzhon pa las babs te rkang pas kun dga' ra bar zhugs so/ /de'i tshe bcom ldan 'das gtsug lag khang chen po sgo bcad pa zhig na nyin mo gnas pas bzhugs so/ /dge slong mang po rnams ni gtsug lag khang gi phyi rol bla gab med pa'i 'chag sa na 'chag par byed pa ko sa la'i rgyal po gsal rgyal gyi mthong ngo / /dge slong mang po dag thag ring po nyid nas mthong nas kyang dge slong mang po dag ga la ba der song ste phyin nas dge slong mang po dag la 'di skad ces smras so/ /btsun pa dag bcom ldan 'das ga la bzhugs/ rgyal po chen po bcom ldan 'das ni gtsug lag khang chen po chab sgo bkum pa 'di na nyin mo gnas pas bzhugs te/ rgyal po chen po khyed bzhed na gtsug lag khang chen po sgo bkum pa ga la bar bzhud de/ der byon pa dang khad kyis dal bus sgo glegs la rdungs shig dang / bcom ldan 'das chab sgo 'byed par 'gyur ro/ /de nas ko sa la'i rgyal po gsal rgyal gyi rgyal po'i rtags lnga po/ /gtsug tor dang / gdugs dang / ral gri dang / rnga yab nor bu'i yu ba can dang / lham khra bo dag phud de/ spyod pa'i bu ring po la byin nas kha phyir lta'o/ /de nas spyod pa'i bu ring po 'di snyam du sems te/ lhas rgyal po'i rtags lnga po gtsug tor dang / gdugs dang / ral gri dang / rnga yab nor bu'i yu ba can dang / lham khra bo dag bdag la bzhag ste/ zhal phyir gzigs pa las na/ lha ni phrin las gsang ba zhig mdzad par bzhed pas bdag 'di nyid du 'dug par bya'o snyam mo/ /de nas ko sa la'i rgyal po gsal rgyal gtsug lag khang chen po sgo gcad pa ga la ba der song ste phyin nas/ khad kyis dal bu dal bus sgo glegs la brdabs pa dang / de la bcom ldan 'das kyis sgo phye'o de nas ko sa la'i rgyal po gsal rgyal bcom ldan 'das ga la ba der song ste phyin nas bcom ldan 'das kyi zhabs gnyis la mgo bos phyag 'tshal te/ gdong dang kha phyis nas 'di skad ces gsol to/ /bcom ldan 'das bdag gis ring mo zhig lags nas mthong ngo / /bde bar gshegs pa bdag gis ring mo zhig lags nas mthong ngo / /de nas bcom ldan 'das kyis ko sa la'i rgyal po gsal rgyal la 'di skad ces bka' stsal to/ /rgyal po chen po khyod ci'i phyir de bzhin gshegs pa la shin du dman pa bas kyang ches dman pa byed/ btsun pa bcom ldan 'das bdag la chos las byung ba'i dad pa mchis te/ des na bdag 'di snyam du bcom ldan 'das ni de bzhin gshegs pa dgra bcom pa yang dag par rdzogs pa'i sangs rgyas so/ / khyod kyi chos 'dul ba ni legs par gsungs pa'o/ /nyan thos kyi dge 'dun ni legs par zhugs pa'o snyam mo/ /rgyal po chen po khyod nga la chos las byung ba'i dad pa ji lta bu zhig yod/ btsun pa bdag gis 'di na dge sbyong dang / bram ze mkhas pa mkhas pa'i nga rgyal can smra ba dang / phas kyi rgol ba la goms par bgyis pa/ skye bo phal po che la byis pa'i dang yas 'bigs pa'i ngo bor bkur ba kha cig mthong ste/ de dag rang gi shes rab dang spobs pas gzhan gyi lta ba'i rnam pa 'dren ma'i ngo bo dag 'jig cing de dag zhu ba rtsom par bgyid de/ bdag cag shes ldan gau ta ma de'i drung du dong la dri ba 'di dang 'di lta bu dag dri ste/ gal te lung ston par mi byed na ni brtsad par bya'o/ /gal te 'di lta bu dang 'di lta bu yin no/ /zhes lung ston par byas na/ de lta na de la 'di skad ces brjod par bya ste/ kye gau ta ma khyod kyi 'di ni mi rigs so/ /'di ni mi 'dra'o/ /'di ni mi 'thad do/ /zhes brjod par bya'o/ /zhes de rnams kyis zhu ba de dag bsdogs nas bcom ldan 'das kyi spyan sngar bab par mchis pa'i rngo yang ma thog na smra bar lta ga la rngo thog ste/ btsun pa bdag bcom ldan 'das la chos las byung ba'i dad pa de lta bu mchis te/ des na/ bdag 'di snyam du bcom ldan 'das ni de bzhin gshegs pa dgra bcom pa yang dag par rdzogs pa'i sangs rgyas lags/ khyod kyi chos 'dul ba ni legs par gsungs pa lags/ nyan thos kyi dge 'dun ni legs par zhugs pa lags so snyam bgyid do/ /btsun pa bdag la bcom ldan 'das la chos las byung ba'i dad pa gzhan yang mchis te/ btsun pa 'di na bdag gis dge sbyong dang / bram ze mkhas pa mkhas pa'i nga rgyal can zhes bya ba nas/ kha cig mthong ste zhes bya ba'i bar snga ma bzhin no/ /de rnams kyis zhu ba de dag bsdogs nas/ bcom ldan 'das ga la ba der mchis te phyin nas bcom ldan 'das la zhu ba zhu ba'i rngo mi thog gi/ gzhan du na bcom ldan 'das kho na'i zhal du lta ba dang / zhal du rtog par bgyid cing / bcom ldan 'das gau ta ma 'di kho nas shes par bya ba mkhyen to/ /gzigs par bya ba gzigs so snyam ste/ btsun pa 'di yang bdag bcom ldan 'das la chos las byung ba'i dad pa lags te/ zhes bya ba snga ma bzhin no/ /btsun pa bdag la chos las byung ba'i dad pa gzhan yang mchis te/ btsun pa 'di na bdag gis dge sbyong dang / bram ze mkhas pa mkhas pa'i nga rgyal can zhes bya ba nas kha cig mthong ste zhes bya ba'i bar snga ma bzhin no/ /des zhu ba de dag bsdogs nas bcom ldan 'das ga la ba der mchis te phyin nas/ bcom ldan 'das la zhu ba yongs su ma rdzogs par zhus pa dang / bcom ldan 'das kyis de dag la zhu ba yongs su ma rdzogs par zhus bzhin yongs su rdzogs par lung bstan pa dang / de dag zhu ba lung bstan pa de yid rangs shing mgu nas sangs rgyas dang / chos dang / dge slong gi dge 'dun la skyabs su mchi zhing bslab pa'i gnas dag kyang len par bgyid de/ btsun pa 'di yang bdag bcom ldan 'das la chos las byung ba'i dad pa lags so zhes pa'i bar snga ma bzhin no/ /btsun pa bdag la bcom ldan 'das la chos las byung ba'i dad pa gzhan yang mchis te/ 'di na bdag gis bram ze dang khyim bdag mkhas pa mkhas pa'i nga rgyal can zhes bya ba nas/ kha cig mthong zhes bya ba'i bar snga ma bzhin no/ /de dag gis zhu ba de dag bsdogs nas bcom ldan 'das ga la ba der song ste phyin nas/ zhu ba rdzogs par zhus pa dang / bcom ldan 'das kyis de dag la chos yongs su rdzogs par lung bstan nas/ de dag lung bstan pa des yid rangs shing mgu nas bcom ldan 'das la rab tu 'byung ba dang / bsnyen par rdzogs pa dge slong gi dngos po gsol zhing / bcom ldan 'das kyis rab tu byung bar mdzad/ bsnyen par rdzogs par mdzad de/ rab tu byung zhing bsnyen par rdzogs pa dgra bcom pa nyid thob pa rnam par grol ba'i dga' ba dang bde ba nyams su myong ba de dag 'di snyam du sems te/ bdag cag de'u ma rung ngo / /bdag cag rab tu de'u ma rung ngo / /bdag cag sngon dge sbyong ma yin bzhin du bdag cag dge sbyong ngo snyam du khas 'ches/ bdag cag bram ze dang / dgra bcom pa ma yin bzhin du bdag cag dgra bcom pa'o snyam du khas 'che'i/ da ni bdag cag dge sbyong dang / bram ze dang dgra bcom pa yin no snyam ste/ btsun pa 'di yang bdag bcom ldan 'das la chos las byung ba'i dad pa lags te zhes bya ba snga ma bzhin no/ /btsun pa bdag la bcom ldan 'das la chos las byung ba'i dad pa gzhan yang mchis te/ btsun pa 'di na bdag gis dge sbyong dang bram ze skya bo bseng bseng bo sha bri srab pa/ nyam chung ba mdog ngan pa/ dbang po nyams pa skye bo mang po'i mig gis bltar mi chags pa dag cig mthong ngo / /mthong nas kyang bdag 'di snyam du sems te/ shes ldan 'di dag mi 'dod bzhin du tshangs par spyad pa spyod pa'am/ nad yun ring po 'ga' zhig gis thebs sam/ sdig pa mi dge ba'i las 'ga' zhig lkog tu byas nas bcabs par ma gyur grang / 'di ltar shes ldan 'di dag skya bo bseng bseng po sha bri ngan pa/ nyam chung ba dbang po nyams pa skye bo mang po'i mig gis bltar mi chags so snyam mo/ /de dag gi drung du mchis shing mchis nas 'di skad ces bgyis te/ shes ldan dag ci'i phyir skya bo bseng bseng po sha bri ngan pa/ nyam chung ba dbang po nyams pa/ skye bo mang po'i mig gi bltar mi chags par gyur/ de dag gi mchid nas rgyal po chen po 'dod chags kyis gnod do/ /btsun pa de la bdag 'di snyam du sems te gal te 'dod pa rnams rnyed pa dang bsten pa dang bsags pas gzugs bzang ba 'am/ blta na sdug pa 'am/ mdzes pa zhig tu 'gyur na ni da lta ko sa la'i rgyal po gsal rgyal bdag gzugs ches bzang ba dang ches blta na sdug pa/ ches mdzes par 'gyur ro/ /de ci'i phyir zhe na/ ko sa la'i rgyal po gsal rgyal bdag ni 'dod pa'i yon tan lnga po rnams 'dod rgur rnyed pa dang / tshegs med par rnyed pa lags so/ /gang gis phyir 'dod pa rnams rnyed pa dang bsten pa dang bsags pas gzugs ches bzang ba dang / ches blta na sdug pa dang ches mdzes par mi 'gyur ba de'i phyir bdag gis bcom ldan 'das kyi nyan thos kyi dge 'dun gzugs shin tu bzang ba/ dbang po rgyas pa/ bzhin gyi mdangs gsal ba/ pags pa'i mdog yongs su dag pa/ sems khral chung ba/ 'tsho ba gzhan la rag ma lus pa mthong ste/ des na ji srid 'tsho'i bar du tshangs par spyod pa ma 'dres pa/ yongs su rdzogs pa/ yongs su dag pa/ yongs su byang ba spyod par nus so snyam ste/ btsun pa 'di yang bdag bcom ldan 'das la chos las byung ba'i dad pa lags te zhes bya ba snga ma bzhin no/ /btsun pa bdag la bcom ldan 'das la chos las byung ba'i dad pa gzhan yang mchis te/ btsun pa 'di na bdag gis nor gyi slad du mchis pa rnams 'dod pa'i rgyu dang / 'dod pa'i gzhi dang 'dod pa'i ched kyi slad du ma ni bu dang lhan cig rtsod/ bu ni ma dang / pha ni bu dang / bu ni pha dang / ming po ni sring mo dang / sring mo ni ming po dang / grogs po ni grogs dang rtsod pa dag mthong na skye bo dang skye bor lta smos kyang ci 'tshal de dag rtsod cing 'gyed par gyur pa na/ ma ni bu'i mi snyan pa smra/ bu ni ma'i/ pha ni bu'i/ bu ni pha'i/ ming po ni sring mo'i/ sring mo ni ming po'i/ grogs ni grogs kyi mi snyan pa smra na/ skye bo skye bo'i lta smos kyang ci 'tshal/ yang 'di na bdag gis mthong ba/ dge slong gnyis shig dge slong dag dang lhan cig gzhi 'ga' zhig gis slad du rtsod nas bslab pa phul te babs par gyur na/ de dag rnam grangs gang gis kyang sangs rgyas la mi snyan pa brjod pa 'am/ chos dang dge 'dun la mi snyan pa brjod par mi bgyid kyi/ gzhan du na bdag nyid kho na la yongs su smod par bgyid de/ bdag cag gnyis ni 'di na dman pa dang / ma rabs dang dpal med pa ste bdag cag gis bcom ldan 'das kyi spyan sngar ji srid 'tsho ba'i bar du tshangs par spyod pa/ ma 'dres pa yongs su rdzogs pa/ yongs su dag pa/ yongs su byang ba spyad par ma nus so zhes mchi ste/ btsun pa 'di yang bdag bcom ldan 'das la chos las byung ba'i dad pa lags so zhes bya ba snga ma bzhin no/ /btsun pa bdag la bcom ldan 'das la chos las byung ba'i dad pa gzhan yang mchis te/ btsun pa 'di na ko sa la'i rgyal po gsal rgyal bdag dgum par bgyi ba ma lags pa rnams kyang 'gums/ dgum par bgyi ba rnams ni gtong bar dbang na/ bdag don gyi ched du mchis pa la rgyal rigs rgya chen po shing sA la chen po lta bu dag dang / bram ze rgya chen po shing sA la chen po lta bu dag dang / khyim bdag rgya chen po shing sA la chen po lta bu dag gtam mjug tu phyin pa la mi sdod par bar skabs bar skabs su bka' mchid mchi zhing / ma gus pa dang zhe sa ma mchis par smra bar bgyi bar sems lags so/ /btsun pa dus gcig cig na/ bcom ldan 'das 'khor brgya phrag du ma'i gung la bzhugs shing / chos ston par mdzad pa de na lud pa'i sgra yang mi gda'/ sbrid pa'i sgra yang mi gda'o/ /de nas mi zhig gis lud pa'i sgra phyung ba dang / yang mi zhig gis mi de la 'di skad ces kye skyes bu khyod kha rog par 'dug /bcom ldan 'das sbrang ma'i rtsis tshim par mdzad pa lta bu'i chos snyan pa ston par mdzad pa ma mthong ngam zhes smras lags so/ /de skad ces bgyis pa dang / mi de cang mi mchi bar mchis so/ /de la bdag 'di snyam bgyid de/ bcom ldan 'das ni de tsam du mthu che zhing / rdzu 'phrul che ba lags na/ 'di na da ltar chad pa med pa dang / mtshon cha med pa'i chos mnyan pas 'khor btul ba ngo mtshar to snyam ste/ btsun pa 'di yang bdag bcom ldan 'das la chos las byung ba'i dad pa lags te zhes bya ba'i bar snga ma bzhin no/ /btsun pa bdag bcom ldan 'das la chos las byung ba'i dad pa gzhan 'di yang mchis te/ btsun pa 'di na bdag gis dge sbyong dang / bram ze kha cig mthong na nor med par bgyis te tshangs par spyad pa spyod pa las des zla ba dgu 'am zla ba brgyad 'das pa dang / rnam pa de dag dang / rtags de dag dang mtshan ma de dag bor te/ phyir 'dod pa'i yon tan lnga po dag 'byor cing ldan par gyur cing rtse bar bgyid/ dga' bar bgyid/ dga' mgur spyod par bgyid do/ /btsun pa 'di na bdag gis mthong ba bcom ldan 'das kyi nyan thos dag ji srid 'tsho'i bar du tshangs par spyod pa/ ma 'dres pa/ yongs su rdzogs pa/ yongs su dag pa/ yongs su byang ba spyod cing zhes bya ba nas/ srog gi mtha'i bar zhes bya ba dang / btsun pa 'di yang bcom ldan 'das la chos las byung ba'i dad pa lags so/ / zhes bya ba'i bar snga ma bzhin no// //'dul ba phran tshegs kyi gzhi/ bam po brgyad pa/ btsun pa bdag la bcom ldan 'das la chos las byung ba'i dad pa gzhan 'di yang mchis te/ btsun pa 'di na bdag drang srong sbyin pa dang / rnying pa dang / de dag la yid rton cing de dag la longs spyod rnams kyang stsol/ grags pa yang stsol ba nas/ de dag gi srog gi bar yang stsol na/ de dag bcom ldan 'das la ji lta ba de ltar bdag la bgyi ba bgyid par mi sems te/ btsun pa dus gcig cig na bdag drang srong yid brtan pa sbyin pa dang / rnying pa dag brtag par 'tshal nas 'khor gyi nang nas byung ste phyogs dog pa zhig tu mchis nas/ 'di ltar 'di dag bcom ldan 'das dang bdag gang logs su rkang pa ston blta'o snyam na/ de dag gis rnam grangs du mar sangs rgyas kyi bsngags pa brjod/ chos dang dge 'dun gyi bsngags pa brjod nas/ bcom ldan 'das gang na ba de logs su ni mgo bstan/ bdag ga la ba de logs su ni rkang pa bstan to/ /de la bdag 'di snyam bgyid de/ bcom ldan 'das ni de tsam du rdzu 'phrul che zhing mthu che ste/ 'di na da ltar bdag 'di dag la longs spyod rnams kyang sbyin/ grags pa yang sbyin pa nas/ srog gi bar yang stsol na/ 'di dag bcom ldan 'das ji lta ba de ltar bdag la bya ba byed par mi sems pa ni ngo mtshar to snyam ste zhes bya ba nas/ btsun pa 'di yang bdag bcom ldan 'das la chos las byung ba'i dad pa lags so zhes bya ba'i bar snga ma bzhin no/ /btsun pa bdag la chos las byung ba'i dad pa gzhan yang mchis te/ btsun pa bdag kyang yul ko sa la pa lags/ bcom ldan 'das kyang yul ko sa la pa lags/ bdag gi rigs kyang rgyal rigs lags/ bcom ldan 'das kyi rigs kyang rgyal rigs lags/ bdag kyang rgas pa 'khogs pa/ gtugs pa na tshod lo brgyad cu lon pa lags/ bcom ldan 'das kyang bgres pa/ 'khogs pa/ gtugs pa/ sku na tshod lo brgyad bcu lon pa lags/ btsun pa bdag kyang rgyal po rgyal rigs spyi bo nas dbang skur ba lags/ bcom ldan 'das kyang bla na med pa'i chos kyi rgyal po lags pas btsun pa 'di yang bdag bcom ldan 'das la chos las byung ba'i dad pa lags te/ des na bdag 'di snyam du bcom ldan 'das ni de bzhin gshegs pa dgra bcom pa yang dag par rdzogs pa'i sangs rgyas so/ /khyod kyi chos 'dul ba ni legs par gsungs pa'o/ /nyan thos kyi dge 'dun ni legs par zhugs pa'o/ /snyam du sems lags so/ /de nas ko sa la'i rgyal po gsal rgyal gyis bcom ldan 'das kyi spyan sngar chos sna tshogs rgya cher bshad nas bcom ldan 'das kyi zhabs la phyag 'tshal te song ngo / /de nas bcom ldan 'das kyis ko sa la'i rgyal po gsal rgyal song nas ring po ma lon par mkhyen nas/ dge slong rnams la bka' stsal pa/ dge slong dag khyod kyis chos sna tshogs pa'i chos kyi rnam grangs zung shig / chongs shig /lhogs shig /de ci'i phyir zhe na/ dge slong dag chos sna tshogs pa'i chos kyi rnam grangs ni don dang ldan pa/ chos dang ldan pa/ tshangs par spyod pa dang ldan pa ste/ mngon par shes par byed pa dang / rdzogs par byang chub par byed pa dang / mya ngan las 'das par byed pa yin no/ /de lta bas na rigs kyi bu dad pas rab tu byung bas chos sna tshogs pa'i chos kyi rnam grangs blangs te kun chub par byas nas de lta de ltar gzung bar bya/ bcang bar bya/ klag par bya'o/ /ko sa la'i rgyal po gsal rgyal bcom ldan 'das kyi spyan sngar chos nyan pa la ring zhig thogs pa dang / spyod pa'i bu ring po yang cung zhig bsdad nas shing ltar zhugs te mnyan yod du song nas des 'phags skyes po rgyal srid la bzhag go/ /phreng ldan ma dang / dbyar tshul mas spyod pa'i bu la dris pa/ spyod pa'i bu lha ga la bzhugs/ grong rdal me tsu ru di na bzhugs so/ /de dag rkang gis grong rdal me tsu ru dir chas so/ /ko sa la'i rgyal po gsal rgyal yang bcom ldan 'das las chos mnyan nas gtsug lag khang nas byung na spyod pa'i bu ring po mi snang nas/ des dge slong rnams la dris pa/ 'phags pa dag spyod byed kyi bu ring po gar mchis/ de dag gis smras pa/ de lha nang du gshegs ma thag du shing rtar zhugs nas mchis so/ /zhes byas pa dang rgyal po rkang gis song ngo / /bcom ldan 'das kyang ches snga ba zhig tu rgyal po'i khab tu gshegs so/ /ji tsam na rgyal pos lam kar phreng ldan ma dang / dbyar tshul ma mthong nas/ des de dag la dris pa/ khyed ci phyir rkang gis 'dir 'ongs/ de dag gis smras pa/ lha spyod pa'i bu ring pos 'phags skyes po rgyal srid la bzhag ste/ de nas bdag cag lha'i gan du mchis mod/ bdag cag gzhan gar mchi/ rgyal pos smras pa/ phreng ldan ma khyod kyis khyo'i rgyal srid nyams su myong zin gyis song la da bu'i rgyal srid nyams su myong bar gyis shig nga yang dbyar tshul ma dang lhan cig rgyal po'i khab tu 'gro 'o zhes byas pa dang / phreng ldan ma snying rje rje skad du smre sngags 'don cing ngu bzhin phyir log go/ /ko sa la'i rgyal po gsal rgyal yang dbyar tshul ma dang lhan cig rgyal po'i khab tu chas te rim gyis rgyal po'i khab tu phyin nas phan tshun 'khyam 'khyam pa las ma skyes dgra'i bskyed mos tshal du 'dug ste/ des dbyar tshul ma la smras pa/ dbyar tshul ma song la rgyal po ma skyes dgra la ko sa la'i rgyal po gsal rgyal skyed mos tshal na 'dug go zhes gyis shig / des rgyal po ma skyes dgra la smras pa/ lha ko sa la'i rgyal po gsal rgyal khyod kyi bskyed mos tshal na bzhugs te/ lha gzigs par bzhed do/ / des thos nas sngangs te smras pa/ shes ldan dag rgyal po de dmag mang po can yin te/ glo bur kho nar 'ongs na khyed sus kyang ma tshor ram/ dbyar byed mas smras pa/ lha de la dmag ga la mchis/ bus rgyal srid las phyung nas de g.yog dang gnyis su 'dir mchis so/ /des smras pa/ de rgyal po byed pa legs te/ bdag ni gzhon nu'i gnas na gnas so zhes smras nas/ blon po rnams la smras pa/ shes ldan dag gang ngas rgyal po rgyal rigs spyi bo nas dbang bskur ba bkur sti med par spyan drang ba ni nga la rigs pa ma yin par 'gyur bas deng la grong khyer mdzes pa dang / lam mdzes par gyis shig /de dag gis grong khyer de rdo ba dang / gseg ma dang / gyo mo med par byas shes bya ba nas/ lha rnams kyi skyed mos tshal dga' ba'i tshal bzhin du zhes bya ba'i bar snga ma bzhin no/ /de nas lam mdzes pa dang / grong khyer mdzes pa so sor khyad par du 'phags par byas nas/ dril bsgrags pa shes ldan rgyal po'i khab na gnas pa dang / pho brang 'khor ba dang / yul sna tshogs nas lhags pa'i skye bo'i tshogs dag nyon cig /ko sa la'i rgyal po gsal rgyal skyed mos tshal na 'dug gis/ de khyed lha dang lhan cig tu gdugs dang / rgyal mtshan dang / ba dan dag gis bsu bar bya'o/ /de nas rgyal po ma skyes dgra shing rta stong phrag du ma phyi bzhin du khrid de/ dpung gi tshogs yan lag bzhi pa dang / ko sa la'i rgyal po gsal rgyal bsur dong ngo / /de yang ma skyes dgra ring du thogs pas bru bas bskyed pa'i sdug bsngal bar gyur to bskyed mos tshal dang ha cang yang mi ring ba zhig na la phug gi ra ba zhig yod pa der song ba dang / de la ldum pas la phug spar gang byin no/ /de nas des la phug gi rdog ma dang / lo ma dag zos pa dang / skom rab tu gyur nas rdzing drung du song ste chu ngoms par 'thungs nas langs pa dang / lag pa rengs shing ma zhu bas thebs nas shing rta'i lam du 'gyel ba dang / de 'khor lo dril ba'i rdul gyis kha gang nas dus las 'das so/ /rgyal po ma skyes dgra skyed mos tshal du song ste phan tshun btsal bar bsams nas ma rnyed do/ /des phyogs bzhir pho nya rta pa bkye ste tshol cig ces byas pa dang de na pho nya gcig la bug gi ra bar phyin nas des ldum pa de la dris pa/ kye skyes bu bskyed mos tshal 'dir 'ongs pa 'ga' lta yod dam/ 'ongs so de gar song la spug sbar gang khyer nas lam 'di nas rdzing bur song ngo / /de de'i rjes bzhin du song na shing rta'i lam na dus las 'das par mthong ngo des rgyal po ma skyes dgra la smras pa/ lha shing rta'i lam ga ge mo zhig gi phyogs su dus las 'das so/ /rgyal pos kye ma kye hud ces smras nas skye bo brgya stong du mas bskor te phyogs der song ba dang / ji tsam na shi ba'i ro shin du mi sdug pa mthong nas yang blon po rnams la smras pa/ shes ldan dag rgyal po rgyal rigs spyi bo nas dbang bskur ba 'di nga'i yul du dus la 'das pa nga la snyan pa ma yin par 'gyur gyis khyed kyis 'di bkur sti chen pos bsil ba'i tshal gyi dur khrod du skyol cig / nga yang 'di'i khog pa la mchod pa lhag par bya ba'i phyir bcom ldan 'das la zhu'o/ /de dag gis kyang de bkur sti chen pos bsil tshal gyi dur khrod chen por bskyal to/ /rgyal po ma skyes dgra yang bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te 'di skad ces gsol to/ /btsun pa ko sa la'i rgyal po gsal rgyal bdag gi yul du dus las 'das na de'i khog pa la bdag gis mchod pa ji lta bu zhig bgyi/ bcom ldan 'das kyi bka' stsal pa/ rgyal po chen po ci nus ci phod kyis lus la mchod pa rgya cher gyis shig /de nas rgyal pos de'i khog pa la mchod pa chen po byas nas/ yang bcom ldan 'das kyi spyan sngar song ste bcom ldan 'das la zhus pa/ btsun pa ko sa la'i rgyal po gsal rgyal gyis las ci zhig bgyis na las de'i rnam par smin pas la pug gi rdog ma dang lo ma dag 'tshal nas sug pa rengs shing ma zhu bas thebs te dus las 'das lags/ bcom ldan 'das kyis bka' stsal pa/ ko sa la'i rgyal po gsal rgyal nyid kyis las byas shing bsags pa tshogs rnyed pa rkyen yongs su bsgyur ba/ dba' rgal bzhin du nye bar gnas pa/ gdon mi za bar 'byung ba dag gzhan su zhig gis myong bar 'gyur te/ rgyal po chen po las byas shing bsags pa rnams ni phyi rol gyi sa'i khams la smin par mi 'gyur/ chu'i khams la ma yin/ me'i khams la ma yin/ rlung gi khams la ma yin gyi 'on kyang las dge ba dang / mi dge ba byas shing bsags pa rnams ni zin pa'i phung po dang khams dang skye mched dag kho na la rnam par smin par 'gyur ro/ /bskal pa brgya phrag rnams su yang / /las rnams chud zar mi 'gyur te/ /tshogs shing dus dang ldan pa na/ /lus can rnams la 'bras bur smin/ /rgyal po chen po sngon byung ba ri brags shig na bram ze zhig gnas pa des rigs mnyam pa las chung ma blangs nas de de dang lhan cig rtse bar byed/ dga' bar byed dga' mgur spyod par byed do/ /de rtse bar byed/ dga' bar byed dga' mgur spyod par byed pa las bu pho zhig btsas te/ ji tsam na bskyed bsrings nas chen por gyur to/ /des dus gzhan zhig na slongs mo la song ba dang / la phug spar gang zhig rnyed do/ /des ma la 'di re shig khrus byas te 'ong ngo zhes gtams so/ /des de de la gtams nas khrus byed du song ngo / /sangs rgyas rnams ma byung ba'i tshe 'jig rten du rang sangs rgyas ngan pa dang dman pa la thugs brtse ba can/ bas mtha'i gnas mal la dad pa/ 'jig rten gyi yon gnas gcig pu dag 'byung bar 'gyur ro/ /ji tsam na rang sangs rgyas shig ljongs rgyu zhing 'gro ba na ri brags der phyin te/ de phyogs shig tu zhag lon nas snga dro sham thabs dang chos gos bgos/ lhung bzed blangs te ri brags su bsod snyoms la zhugs pa dang / rim gyis khyim der phyin to/ /bram ze mo des de lus mdzes pa dang / sems mdzes pa la sogs pa mthong ste/ de sems dang ba skyes pa des la phug spar gang rang sangs rgyas de la phul lo/ /bdag nyid chen po de dag ni lus kyi chos ston gyi tshig gis ma yin pas/ des ngang pa'i rgyal po 'dab ma brkyang ba bzhin du nam mkha'i dbyings la 'phags te/ cho 'phrul sna tshogs dag bstan par brtsams so/ /so so'i skye bo ni rdzu 'phrul la myur du dad par byed pa yin pas des shing rtsa ba nas bcad pa bzhin du rkang pa la gtugs pa dang / des de la snying brtse bar byas nas song ngo / /ji tsam na bram ze'i khye'u de 'ongs nas smras pa/ yum la phug spar gang po de stsol cig /des smras pa/ bu rjes su yi rang ba gyis shig /ngas de rab tu byung ba zhi ba'i bdag nyid can/ bsod snyoms don du gnyer ba phyin nas de la phul lo zhes byas pa dang / de bkres pas sdug bsngal dang yid mi bde ba skyes te smras pa/ rab tu byung ba des de zos nas ci ste lag pa rengs shing gsud de dus byas par ma gyur/ rgyal po chen po ji snyam du sems/ bram ze'i bu gang yin pa de ni ko sa la'i rgyal po gsal rgyal 'di nyid yin te/ de'i tshe de'i dus na 'dis rang sangs rgyas la tshig rtsub mo smras pa'i las de'i rnam par smin pas/ lo mang po/ lo brgya phrag mang po lo stong phrag mang po lo brgya stong phrag mang por dmyal ba rnams su skyes so/ /las kyi lhag ma de nyid kyis lan drug tu lag pa rengs shing gsud pas dus las 'das te/ da lta'i dus kyi bar 'di dang lan bdun du lag pa rengs shing gsud pa kho nas dus las 'das so/ /de lta bas na rgyal po chen po las gcig tu gnag pa rnams kyi zhes bya ba nas/ las gcig tu dkar ba rnams kho na la 'bad par bya ste/ rgyal po chen po khyod kyis de lta bu la bslab par bya'o zhes bya ba'i bar snga ma bzhin no/ /de nas rgyal po ma skyes dgra bcom ldan 'das kyis gsungs pa la mngon par dad nas rjes su yi rang ste/ bcom ldan 'das kyi zhabs la mgo bos phyag 'tshal nas bcom ldan 'das kyi spyan snga nas song ngo / /ji tsam na ma la gnod kyis 'phags skyes po la 'di skad ces smras so/ /lha yab rgyal po mdzad cing lha dbang ma bskur ba na/ gang gi tshe nga rgyal por gyur pa de'i tshe ngas shAkya rnams kha gtag ste/ de ni ngas dang por bya ba yin no/ /zhes de lta bu'i khyu mchog gi tshig rlabs po che gsungs nas gcig tu chad par mdzad de 'khor gyi nang du seng ge'i sgra yang dag par bsgrags pa gang lags pa de dgongs sam/ da ni de'i dus la bab lags so des smras pa/ ma la gnod ci nga ji snyed smras pa de thams cad bya 'am/ don de 'das pa yin pas thong / rgyal po'i bya ba dag dang rgyal po'i byed pa dag yongs su nyams par 'gyur ro/ /des smras pa/ lha dge ba rnams ni dam bcas pa la brtan pa lags pas ji ltar dam bcas pa bzhin sgrub tu gsol/ ma la gnod re shig zhog cig dang / de yang mi dga' bar 'gyur ro/ /des smras pa/ lha 'di ni thog mar dam bcas pa lags pas gdon mi 'tshal bar bgyi 'tshal te/ deng kho na gdugs kyang bzang / yud tsam yang bzang / skar ma yang bzang / bsod nams kyi gdugs kyang bzang bas lha de dag gis ngo lon ma bshams par deng nyid gshegs pa'i rigs so/ /de nas 'phags skyes po ma la gnod kyis bslus pas dpung gi tshogs yan lag bzhi pa glang po che'i tshogs dang / rta pa'i tshogs dang / shing rta pa'i tshogs dang / dpung bu chung gi tshogs go bskon nas ser skya'i gzhi na gnas pa'i shAkya rnams gsad pa'i phyir mnyan yod nas ser skya'i gzhir chas so/ /skabs de lta bu la sangs rgyas bcom ldan 'das rnams la mi mkhyen pa 'am/ mi gzigs pa 'am/ rnam par mi mkhyen pa cung zad kyang mi mnga' ste/ de ser skya na gnas pa'i shAkya rnams kyi las chud mi za bar mkhyen nas ches sngar mnyan yod nas ser skya'i gzhir gshegs so/ /de nas bcom ldan 'das lam kar shing shA ko Ta ka shun par ri 'chus shing mi sdug pa/ lo ma srab pa/ grib ma chung ngu zhig gi drung du skyil mo dkrung bcas te nyin mo'i gnas pas bzhugs so/ /rgyal po 'phags skyes pos bcom ldan 'das thag ring po nas mthong ngo / /mthong nas bcom ldan 'das ga la ba der song ste phyin nas/ bcom ldan 'das la 'di skad ces gsol to/ /btsun pa shing lo ma mi sdug cing grib ma chung ngu ma lags pa gzhan dag mchis na ci'i slad du bcom ldan 'das de dag spangs te/ shing shA ko Ta ka shun pa 'chus shing mi sdug pa lo ma srab pa/ grib ma chung ngu 'di'i drung na bzhugs/ bcom ldan 'das kyis bka' stsal pa/ rgyal po chen po gnyen bshes rnams la ni gnyen bshes kyi grib ma bsil lo/ /'phags skyes pos bsam pa/ bcom ldan 'das la gnyen rnams la gzigs shing / thugs brtse ba mnga' ste/ kye ma bcom ldan 'das ni gnyen rnams la thugs brtse ba mdzad do snyam du rig nas de nyid nas slar log go/ /bcom ldan 'das kyis dgongs pa/ gal te ser skya na gnas pa'i shAkya rnams kyis bden pa ma mthong bar 'phags skyes po'i dmag gis thebs na bden pa dag mthong ba'i snod du mi 'gyur ro snyam du mkhyen nas/ shAkya rnams kyi nang du ljongs rgyu zhing gshegs pa las ser skya'i gzhir byon te/ ser skya'i gzhi'i n+ya gro d+hA'i kun dga' ra ba na bzhugs so/ /ser skya na gnas pa'i shAkya rnams kyi bcom ldan 'das shAkya rnams kyi nang du ljongs rgyu zhing gshegs pa las 'dir byon te/ n+ya gro d+hA'i kun dga' ra ba 'di kho na na bzhugs so zhes thos so/ /thos nas kyang bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te phyogs gcig tu 'khod do/ /de nas bcom ldan 'das kyis de rnams kyi bsam pa dang / bag la nyal ba dang / khams dang / rang bzhin mkhyen nas 'phags pa'i bden pa bzhi rtogs par 'gyur ba'i chos de lta bu ston par mdzad pa dang / de thos nas srog chags brgya stong phrag du mas khyad par chen po thob ste/ kha cig gis ni rgyun du zhugs pa'i 'bras bu mngon sum du byas/ kha cig gis ni lan cig phyir 'ong ba'i 'bras bu zhes bya ba nas/ dge 'dun la 'bab pa la bkod do zhes bya ba'i bar snga ma bzhin no/ /ma la gnod kyis 'phags skyes po mthong nas/ des smras pa/ lha ci ste slar log /des smras pa/ ma la gnod bcom ldan 'das nye du rnams la gzigs shing thugs brtse ba mnga' ste/ kye ma bcom ldan 'das nye du rnams la thugs brtse ba mnga' bas rgyal po chen po nye du rnams la ni nye du'i grib ma bsil lo zhes de lta bu'i gsung 'di bka' stsal to/ /de ni nga'i snying la lhangs shes byed kyis/ ser skya na gnas pa'i shAkya rnams gsad pa thong shig /des smras pa/ lha dge sbyong gau ta ma ni 'dod chags dang bral ba lags te/ 'dod chags dang bral ba rnams kyi nye du la mi lta bas deng kho na lha'i nyi ma yang bzang / yud tsam yang bzang / skar ma yang bzang / bsod nams kyi gdugs kyang bzang bas deng nyid ser skya'i gzhir gshegs shig / de mi dge ba'i grogs pos log par bzung bas dpung gi tshogs yan lag bzhi pa glang po che'i tshogs dang / rta pa'i tshogs dang / shing rta'i tshogs dang / dpung bu chung gi tshogs go bskon nas ser skya'i gzhir song ste ha cang mi ring ba zhig tu phru ma btab nas 'dug go/ /de nas tshe dang ldan pa maud gal gyi bu chen po bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te phyogs cig tu 'dug nas bcom ldan 'das la tshe dang ldan pa maud gal gyi bu chen pos 'di skad ces gsol to/ /btsun pa bdag gis skyes bu gti mug can 'phags skyes po dpung gi tshogs yan lag bzhi pa glang po che pa'i tshogs dang / rta pa'i tshogs dang / shing rta'i tshogs dang / dpung bu chung gi tshogs go bskon nas ser skya na gnas pa'i shAkya rnams dgum pa'i slad du ser skya'i gzhir mchis shes thos te/ de'i slad du bdag de dpung dang bzhon pa dang bcas te 'jig rten gyi khams gzhan du bkur ba 'am/ khor yug gi slad rol du 'phang ba 'am/ ser skya'i gzhi'i grong khyer lcags kyi ra bas bskor ba 'am/ lcags kyi dra bas bskor ba spro lags so/ /maud gal gyi bu de de bzhin no/ /de de bzhin te/ khyod kyis snga ma bzhin du bskor ba zhes bya ba'i bar nus mod kyi/ 'on kyang ser skya'i gzhi na gnas pa'i shAkya rnams nyid kyis las tshogs rnyed pa/ rkyen yongs su bsgyur ba dba' rgal bzhin nye bar gnas pa/ gdon mi za bar 'byung bar 'gyur ba dag byas shing bsags pa rnams gzhan su zhig gis myong bar 'gyur te/ dge slong dag las byas shing bsags pa rnams ni phyi'i sa'i khams la rnam par smin par mi 'gyur me'i khams la ma yin/ chu'i khams la ma yin/ rlung gi khams la ma yin gyi/ 'on kyang las dge ba dang mi dge ba byas shing bsags pa rnams ni zin pa'i phung po dang khams dang skye mched dag kho na la rnam par smin par 'gyur te/ bskal pa brgya phrag rnams su yang / /las rnams chud zar mi 'gyur te/ /tshogs shing dus dang ldan pa na/ /lus can rnams la 'bras bur smin/ /maud gal gyi bu 'jig rten ni las bdag gir bya ba/ las kyi skye gnas pa/ las kyi bsgo skal la spyod pa/ las la rton pa yin pas gang gis las dge ba 'am sdig pa byas pa de ni las de'i skal ba can du 'gyur ro/ /maud gal gyi bu de lta bas na las la gzhol bar bya'o/ /de nas tshe dang ldan pa maud gal gyi bu bcom ldan 'das kyi zhabs la mgo bos phyag 'tshal nas song ngo / /ser skya'i gzhi na gnas pa'i shAkya rnams kyis skyes bu gti mug can 'phags skyes po dpung gi tshogs yan lag bzhi pa glang po che pa'i tshogs dang / rta pa'i tshogs dang / shing rta'i tshogs dang / dpung bu chung gi tshogs go bskon nas bdag cag gsod du 'ongs so zhes thos so/ /thos nas de dag gis kyang dpung gi tshogs yan lag bzhi pa glang po che pa'i tshogs dang / rta'i tshogs dang / shing rta'i tshogs dang / dpung bu chung gi tshogs go bskon nas g.yul sprad pa'i phyir 'phags skyes po logs su spags so/ /de dag bden pa mthong ba yin pas gsod par ni cung zad kyang mi byed kyi/ gzhan du na de'i tshe dbyug pa dang lcag dag gis snun cing / gzhu rgyud dang / rgyun dang / 'bring ba rnams gcod pa dang / rna rgyan dag la mda' 'phen par byed do/ /'phags skyes po'i dpung go cha zhig par byas nas ser skya'i gnas su zhugs te sgo dag bcad nas ra ba la sbrengs te 'khod do/ /de dag gis pha rol gnon pa'i mthu nye bar bcom pa dang / ma la gnod la smras pa/ ma la gnod mthong ngam/ shAkya rnams kyis bdag cag brlag par byas su 'ong gis thong la 'dong / des smras pa/ lha thugs ma chad cig /ser skya na gnas pa'i shAkya rnams ni bden pa mthong ba lags pas 'di rnams srog chags grog sbur yang srog dang 'bral ba'i thugs mi thub ste/ de ni 'di dag gis bdag cag gi sems can gcig kyang ma bsad pa las mngon no/ /de des bslus nas cang mi smra bar 'dug go/ /shAkya rnams kyis kyang khrims su bcas pa/ shes ldan dag bdag cag las sus kyang 'phags skyes po 'am/ 'phags skyes po'i dpung la bsnun par mi bya ste/ gang zhig snun pa de ni bdag gi nye du yang ma yin/ shAkya yang ma yin no/ /de'i tshe de'i dus na shAkya sham b+ha ka zhes bya ba zhig ri brags shig na rang zhal ta byed cing las kyi mtha' byed pa des shAkya rnams kyis khrims su bcas pa ma thos so/ /de yang so so'i skye bo zhig yin te/ des 'phags skyes po bdag cag gsad pa'i phyir ser skya'i gnas su 'ongs nas phyogs che ge mo zhig na 'dug go zhes ji lta bu yin pa thos so/ /thos nas kyang khro bas kun nas dkris pas bskyed pa'i yid mi bde ba'i mod la 'phags skyes po'i dpung gi thog tu drangs nas des der skye bo'i tshogs mang po zhig ni kha btag / kha cig ni tha ma ma shi tsam du byas so/ /de nas 'phags skyes po yid mi bde nas smras pa/ ma la gnod khyod kyis mthong ngam/ khyod cag na re 'di dag bden pa mthong ba yin pas srog chags grog sbur yang srog dang 'bral bar mi byed do zhe na/ re shig 'di dag gcig gis kyang bdag cag gi skye bo mang po 'di lta bu bsad na/ gal te thams cad lhags par gyur na bdag cag gi sems can 'ga' yang mi 'tsho bar 'gyur ba lta smos kyang ci dgos/ dus kyis gcus pas chog gis slar 'dong / des smras pa/ lha shAkya rnams kyis 'di lta bu'i khrims su bca' ba bgyis te bdag cag las gang gis kyang 'phags skyes po 'am/ 'phags skyes po'i dpung la bsnun par mi bya ste/ gang zhig snun pa de ni bdag cag gi nye du yang ma yin/ shAkya yang ma yin no zhes dam bcas na/ de 'dis ma thos pas da ni 'di nang du yang mi chud pa'i gnas gang lags pa de mchis so/ /de ser skya'i gnas kyi sgor song ste 'dug nas smras pa/ shes ldan dag nang du 'ong gis sgo phye zhig /de dag gis smras pa/ khyod kyis kho bo cag gi khrims su bca' ba dral bas da phyin chad khyod kho bo cag gi gnyen yang ma yin/ shAkya yang ma yin no/ /khyod nang du lta ga la gtang song shig /des smras pa/ bdag gis khyod kyi khrims su bca' ba ma thos te 'on kyang mang du smra ci dgos/ gal te bdag gis khyed kyi khrims su bca' ba dral na bdag gi 'khor phyir phyung shig dang gzhan du 'gro'o/ /de dag gis de'i 'khor phyir phyung ba dang / des de dag khrid nas bcom ldan 'das ga la ba der song ste phyin pa dang / bcom ldan 'das kyi zhabs la mgo bos phyag 'tshal nas phyogs gcig tu 'dug go/ /phyogs gcig tu 'dug nas bcom ldan 'das la shAkya sham+b+ha kas 'di skad ces gsol to/ /btsun pa bdag gis bcom ldan 'das la gang la bgyi ba bgyi ba'i mtshan ma cung zad cig bdag la stsal du gsol/ bcom ldan 'das kyis de la rdzu 'phrul gyis dbu skra dang / sen mo dang / tshems dag cig gnang ba dang / des de dag khyer nas yul ba ku dar chas so/ /de rnams kyis shAkya sham+b+ha ka zhes bya ba brtson pa dang / stobs dang / pha rol gnon pa chen po phun sum tshogs pa zhig bdag cag gi yul du rgyal srid 'dod de 'ong ngo zhes thos so/ /thos nas kyang grogs bya bar brtsams pa/ shes ldan dag shAkya sham+b+ha ka zhes bya ba brtson pa dang / stobs dang / pha rol gnon pa chen po phun sum tshogs pa zhig bdag cag gi yul du 'ong ngo zhes grag gis de'i phyir re shig tshur shog 'dus shig / ci de dang phrad cing 'dong ngam mi 'dong / de dag thams cad re shig gi drung du 'dus te re shig 'dug pa de'i bar du sham+b+ha kas 'khor rnams phyogs gcig tu bzhag nas bang chen gyi cha lugs su byas te de dag gi drung du song ba dang / de dag gis 'ongs pa legs so zhes bya ba'i smra ba kun du spyad nas dris pa/ khyod ga las 'ongs des smras pa/ shAkya sham+b+ha ka zhes bya ba brtson pa dang / stobs dang / pha rol gnon pa chen po phun sum tshogs pa de rgyal srid 'dod cing 'dir 'ong bar 'dod de des spring yig 'di bskur gyis 'khod la lhogs shig /de dag gis smras pa/ stan yang med na gang du 'khod/ des ral gri shubs nas phyung nas pha bong dum bu dum bur gshegs te 'di la 'khod cig ces byas pa dang / de dag gis mthong nas ngo mtshar gyi mig gdangs te smras pa/ kye skyes bu de la khyod 'dra ba de lta bu'i mi ji tsam yod/ des smras pa/ shes ldan dag kho bo ni de'i bang chen te/ kho bos lta ci zhig nus/ de la skyes bu dpa' bo gzhan mang du yod do/ /de dag gis thos nas sngangs te phan tshun smras pa/ shes ldan dag gang gi bang chen 'di 'dra ba de'i mi gzhan ci 'dra ba zhig yod/ tshur de yong bdag cag gi rgyal por gzhug go zhes de dag gis spring yig blags nas de la spring yig gi lan byin pa/ byon pa legs so/ /sman btags te bdag cag bka' bzhin bgyid pa lags so/ /des spring yig gi lan khyer nas 'khor dang bcas te 'byor pa mchog dang / yul ba ku dar 'ongs pa dang / de dag gis de bskur sti chen pos bsu nas/ rgyal srid la bzhag go/ /yul ba ku da pa rnams kyis shAkya sham+b+ha ka zhes bya ba rgyal srid la dbang bskur ro zhes kun du sgra grags te/ rgyal po sham+b+ha ka rgyal po sham+b+ha ka zhes bya bar ming chags so/ /des der bcom ldan 'das kyi dbu skra dang / sen mo'i mchod rten byed du bcug ste sham+b+ha ka'i mchod rten/ sham+b+ha ka'i mchod rten zhes bya bar ming chags so/ /de'i chung ma dad pa med pa zhig ni/ de yang de'i btsun mo dam pa yin pas des de'i ngo cung zad kyang mi chod pas des blon po rnams la bsgo ba/ dgon pa bsrung ba gyis shig /de dag gis dgon pa bsrung ba byas pas da dung yang de na ri dgas dag mi gsod do/ /'phags skyes pos ma la gnod la smras pa/ ma la gnod da ni shAkya rnams kyis sgo rnams bcad de ra ba rnams su sbrengs nas/ bag brkyang ste 'khod na nges pa'i dus kyis 'chu bas ci zhig bya 'dong / des smras pa/ lha ci grong khyer thams cad pha rol gnon pa gcig pus choms sam/ bdag rgyal po'i pho brang na spyod pas thos pa ni/ mkhas pa rnams ni bzhams pa dang / /rab tu sbyin dang bslu ba dang / kun du spyad pa lnga pa ni/ /dpung gis don rnams sgrub par byed/ /ces bgyi ste/ de lta bas na de dag la dbyen bgyi ba dgongs shig / 'phags skyes pos de dag la spring ba/ shes ldan dag nga ni khyed la rjes su chags pa yang med/ khong khro ba yang med kyi/ 'on kyang nga 'o nir bya ba cung zhig yod de/ de ngas byas shing thob nas myur ba myur bar 'gros sgo phye shig /shAkya rnams kyis smras pa/ shes ldan dag 'dus la ci sgo dbye 'am/ 'on te mi dbye ba dpyad par bya'o zhes de dag thams cad 'dus pa dang / de na kha cig gis smras pa/ dbye bar bya'o/ /gzhan dag gis smras pa/ gal te phye na ma legs so/ /kha cig gis smras pa/ shes ldan dag kha cig ni dbye'o zhes zer/ gzhan dag ni phye na ma legs so zhes zer bas/ de'i phyir gal te khyod 'dod na tshul shing rims shig dang / skye bo mang po'i 'dod pa gang yin pa de bya'o zhes de rnams kyi tshul shing brim par brtsams so/ / skabs der bdud sdig can 'di snyam du sems te/ bdag gis lan du ma zhig dge sbyong gau ta ma la glags btsal zhing glan ka btsal te phyi bzhin phyi bzhin du 'brangs kyang glags ma rnyed kyis/ ma la da bdag gis 'di'i nye du rnams kha btag go snyam du rig nas bdag nyid shAkya rgan po zhig tu mngon par sprul te rgan pa'i mthar 'dug nas des thog mar tshul zhing blangs pa dang / shAkya rgan pos tshul shing blangs so zhes thams cad kyis blangs so/ /de nas blo gcig pas 'phags skyes po la spring ba nang du zhugs shig /de dpung gi tshogs yan lag bzhi pa dang nang du zhugs te zhugs nas smras pa/ ngas shAkya rnams kha gtag go/ /ngas shAkya rnams yongs su spangs so zhes smras pa'i tshig rjes chad ma thag tu skyes bu mtshon gzas pa rnams kyis shAkya rnams kun nas gsad par brtsams pa dang / ku co chen po 'thon to/ /shAkya ming chen gyis sgra de thos nas nye du la byams pas bskyed pa'i yid mi bde bas rings pa rings par 'phags skyes po'i drung du song ste/ des smras pa/ lha dam pa 'os pa bdag la dam pa stsol cig /des smras pa/ khyod dam pa ci slong smros shig /des smras pa/ lha bdag gi nye du rnams la mi 'jigs pa stsol cig / 'phags skyes pos smras pa/ ngas khyod kyi nye du rnams la ni mi 'jigs pa mi sbyin no/ /'on kyang khyod 'khor dang bcas te phyir byung shig /des smras pa/ lha ji srid bdag chu'i nang du nub ste 'dug pa de srid du gang dag phyir 'byung ba de dag la mi 'jigs pa stsol cig / des blon po rnams kyi gdong du blta bar brtsams pa dang / de dag gis smras pa/ lha ming chen 'di ni khyod kyi yum mes kyang lags/ yab kyi grogs po yang lags pas 'di la ni dam pa de stsal ba'i rigs so/ /des smras pa/ gal te de lta na de skad cig byin no/ /shAkya ming chen nye du la chags pas bskyed pa'i yid mi bde ba snying rjes brlan pa'i sems kyis chu'i rdzing du song ste/ de'i 'gram na shing sa la zhig yod pa de'i yal ga rdzing gi chu'i nang du nub pa de la des gtsug phud btags nas nam srog dang bral ba de'i bar du nub ste 'dug go/ /de na ser skya'i gnas na gnas pa'i shAkya gang dag gis tshogs pa can gyi las ma byas pa de dag las kha cig ni ser skya'i gnas nas byung ste gyad rgyu bar song ngo / /kha cig ni bal yul du dong ngo / /kha cig ni grong dang grong rdal dang / rgyal po'i yul 'khor dang / pho brang de dang de dag du song ngo / /gang dag gis tshogs pa can gyi las byas pa de dag ni ser skya'i gzhi'i shar sgor byung nas lho nas 'jug / lho nas byung nas nub nas 'jug /nub nas byung nas byang nas 'jug /byang nas byung nas shar nas 'jug pa dang / blon po rnams kyis smras pa/ lha kye ma shAkya rnams ni tshig go/ /kye ma shAkya rnams ni tshig ste/ 'di na da ltar shar sgo nas nang du zhugs nas lhor 'byung / lho nas zhugs nas nub tu 'byung / nub nas zhugs nas byang du 'byung / byang nas zhugs nas lhor 'byung ngo / /'phags skyes pos smras pa/ shes ldan dag mes po de chur nub nas ring zhig lon gyis ltos shig blon po rnams kyis rings par chu'i rdzing du song nas brtag par brtsams pa las de tsam na dus las 'das so/ /de dag 'ongs te lha dus las 'das so zhes byas pa dang / de che thang du kun nas dkris pas smras pa/ shes ldan dag stan shoms shig /ji srid du lam po cher khrag gi 'od pa bab par ma gyur pa de srid du phyogs 'di nas mi 'gro'o/ /skyes bu dpa' bo rnams bsad na khrag nyung ngu 'byung ba 'di ni chos nyid yin pas blon po rnams phan tshun bgro bar brtsams pa/ shes ldan dag sems can 'di ni sdig pa'i las byed pa dang / dam bcas pa la brtan pa yin na/ 'dir 'di snyed kyi khrag cig ga las 'byung / rgya skegs dag cig len du gzhug go/ /zhes de rnams kyis rgya skegs blangs nas rgya skegs kyi chu bum pa brgya stong du ma lam po cher phab pa dang / 'phags skyes pos bsam pa/ bdag gi dam bcas pa rdzogs pas 'gro'o snyam mo/ /de nas skyes bu gti mug 'phags skyes pos shAkya bdun khri bdun stong bsad de phal cher ni bden pa mthong ba sha stag go/ /des sems can de snyed bsad nas gzhon nu lnga brgya dang / bu mo lnga brgya khrid de gzhan mu stegs can kun du rgyu rnams kyi kun dga' ra ba phag mo'i gnas shes bya ba ga la ba der song ba dang / ma la gnod kyis smras pa/ lha khyod kyis dgra yongs su bskyangs so/ /dgra 'di dag ci ste yal bar gzhag sod cig /'phags skyes pos gshed ma'i mi rnams la gtad de/ 'di rnams glang po che dag gis rdzir chug shig ces bsgo'o/ /de rnams kyis glang po dag gis rdzir gzhug par brtsams pa dang / de dag gis glang po che de dag gan rgyal du mnan te lag pa nas lag par sbed par brtsams so/ /ma la gnod kyis smras pa/ lha khyod kyis 'di dag gi pha rol gnon pa gzigs sam/ mthong ngo / /lha 'di dag yal bar bzhag na/ lha la gnod pa bgyid par mi 'gyur ram/ ma la gnod de de bzhin te/ 'di dag ji ltar gsad par bya ba dris smros shig /des smras pa/ lha dong du stsol la/ steng nas lcags kyi shal bas 'tshal du stsol cig /de bzhin byed du chug shig / des de dag dong du bcug nas steng nas lcags kyi shal bas mnan to/ /de nas gnyis shig bros te bcom ldan 'das kyi spyan sngar song ngo / /song nas de gnyis bcom ldan 'das kyis lhung bzed kyis bkab pa dang de nyid du shi'o/ /shAkya rnams bsad pa na bcom ldan 'das kyi dbu shin du bsnyung bar gyur to/ /de nas skyes bu gti mug 'phags skyes pos mi zhig la smras pa/ kye skyes bu khyod tshur de bzhin gshegs pa'i spyan sngar song ste 'dug la/ bcom ldan 'das ci gsung ba de khyod kyis nyon la nga la zlos shig ces smras nas song ngo / /mi de bcom ldan 'das kyi spyan sngar song ste 'dug go/ /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo nga la chu lhung bzed gang byin cig / des bcom ldan 'das la chu lhung bzed gang phul lo/ /bcom ldan 'das kyis der chu'i thigs pa gnyis gsum tsam blugs pa dang / de dag chu'i nang de nas du bar thul zhing tsi ri ri zer la sgra yang 'byin to/ /dge slong rnams cho 'phrul de mthong nas yid dad cing sangs rgyas bcom ldan 'das la zhus pa/ btsun pa bcom ldan 'das kyis phrin las ci zhig mdzad na/ phrin las de'i rnam par smin pas bcom ldan 'das dbu bsnyung bar gyur/ ser skya na gnas pa'i shAkya rnams kyis sug las ci zhig bgyis na/ des nongs pa yang ma mchis/ gnod pa bgyis pa yang ma mchis par skyes bu gti mug 'phags skyes pos bkum pa lags/ bcom ldan 'das kyis bka' stsal pa/ dge slong dag tshur gzhan mu stegs can kun du rgyu rnams kyi kun dga' ra ba phag mo'i gnas gang du skyes bu gti mug 'phags skyes pos shAkya rnams bsad pa ga la ba de kho nar de rnams dang / bdag nyid kyi las kyi rgyu ba lung bstan par bya'o/ /btsun pa de ltar 'tshal lo zhes dge slong de rnams bcom ldan 'das kyis ltar nyan to/ /de nas bcom ldan 'das dge slong rab tu mang po dang thabs gcig tu gzhan mu stegs can kun du rgyu rnams kyi kun dga' ra ba phag mo'i gnas ga la ba der gshegs so/ /bre bo dang rus 'thun pa'i bram ze zhig gis bcom ldan 'das thag ring po kho na nas mthong ste/ mthong nas kyang bcom ldan 'das la 'di skad ces gsol to/ /kye gau ta ma gang gi slad du skyes bu gti mug 'phags skyes pos ser skya na gnas pa'i shAkya nongs pa yang ma mchis/ gnod pa bgyis pa yang ma mchis pa rnams srog dang phral ba ni bsod nams ma lags pa mang po zhig bskyed do/ /bcom ldan 'das kyis bka' stsal pa/ bram ze de de bzhin no/ /de de bzhin te/ gang gi phyir skyes bu gti mug 'phags skyes pos ser skya na gnas pa'i shAkya nyes pa yang med gnod pa byas pa yang med pa rnams srog dang bral ba ni bsod nams ma yin pa mang po zhig bskyed do/ /de nas bcom ldan 'das gzhan mu stegs can kun du rgyu rnams kyi kun dga' ra ba phag mo'i gnas ga la ba der gshegs pa dang de na ser skya na gnas pa'i shAkya lcags kyi shal bas bshal ba las srog gi lhag ma cung zad lus pa gang dag yin pa de dag gis bcom ldan 'das mthong nas skad ngan bton to/ /de nas bcom ldan 'das phyogs cig tu gshegs nas gdan bshams pa nyid la bzhugs so/ /bzhugs nas bcom ldan 'das kyis dge slong rnams la bka' stsal pa/ dge slong dag ser skya na gnas pa'i shAkya 'di rnams kyis 'di dang lan gsum gyi bar du sgra chen po phyung ste/ sngon nya pa byed pa'i tshe nya 'dod pa'i phyir gang yin pa dang / chom rkun pa byed pa'i tshe grong 'jom pa'i phyir gang yin pa dang / da lta ser skya na gnas pa'i shAkya byed pa'i tshe skyes bu gti mug 'phags skyes pos srog gi lhag ma cung zad tsam lus par byas te 'chi ba la mngon du phyogs pa'i tshe gang yin pa'o/ /'di dag thams cad kyi brdol ba la ni khyad par ram/ bsam pa 'am/ tha dad du bya ba cung zad kyang med de mtshungs so/ /dge slong dag ji snyam du sems/ shan pa 'di las de dang bzo de dang 'tsho ba des glang po che la zhon te 'gro ba 'am/ rta la zhon te 'gro ba 'am/ shing rtar zhugs te 'gro ba 'am/ dpung bu chung dang chas te 'gro ba 'am/ nor gyi phung po rgya chen po mang po grub nas gnas pa lta ci ga la mthong ngam/ thos sam/ btsun pa ma lags so/ /dge slong dag legs so legs so/ /ngas kyang shan pa 'di las de dang zhes bya ba nas nor gyi phung po rgya chen po mang po bsgrubs nas gnas pa zhes bya ba'i bar snga ma bzhin te/ ma mthong ma thos so/ /de ci'i phyir zhe na/ 'di ltar shan pa rnams ni sdig pa'i bsam pas rtog par byed de/ des na 'di glang po che la zhon te 'gro ba 'am/ rta la zhon te 'gro ba 'am/ shing rtar zhugs te 'gro ba 'am/ dpung bu chung dang chas te 'gro bar yang mi 'gyur la/ nor gyi phung po rgya chen po mang po bsgrubs te gnas par yang mi 'gyur ro/ /gzhan yang dge slong dag ji snyam du sems/ khyod kyis bya gag gsod pa 'am/ phag gsod pa 'am/ nya pa 'am/ ri dgas bshor ba 'am/ bya ba 'am/ bong bu rgyas 'chor ba 'am/ ba lang gsod pa dag las de dang zhes bya ba nas/ nor gyi phung po rgya chen po mang po bsgrubs te gnas pa de mthong ngam/ thos sam zhes bya ba'i bar snga ma bzhin no/ /de ci'i phyir zhe na/ 'di ltar ba lang gsod pa de sdig pa'i bsam pas rtog par byed de/ des na de glang po che la zhon te 'gro bar mi 'gyur zhes bya ba nas/ nor gyi phung po rgya chen po mang po bsgrubs te gnas par mi 'gyur zhes bya ba'i bar snga ma bzhin no/ /dge slong dag re shig byol song gi skye gnas su song ba'i srog chags rnams kyis kyang sdig pa'i bsam pas brtags na glang po che la zhon te 'gro ba 'am/ rta la zhon te 'gro ba 'am/ shing rta la zhugs te 'gro ba 'am/ dpung bu chung dang chas te 'gro bar yang mi 'gyur la/ nor gyi phung po rgya chen po mang po bsgrubs te gnas par yang mi 'gyur na/ skyes bu gti mug 'phags skyes po slob pas longs shes smras pas tshul khrims kyi gzi brjid kyi nye bar bcom pa lta zhig glang po che la zhon te 'gro ba 'am/ rta la zhon te 'gro ba 'am/ shing rtar zhugs te 'gro ba 'am/ dpung bu chung dang chas te 'gro ba 'am/ nor gyi phung po rgya chen po mang po bsgrubs te gnas pa lta zhig smos kyang ci dgos te/ de ni gnas med do/ /dge slong dag ko sa la'i rigs 'di nas zhag bdun na sbrul gyis bltas pa bzhin du rabs chad par 'gyur ro/ /skyes bu gti mug 'phags skyes po yang ma la gnod dang bcas te zhag bdun na mes tshig nas cho nge 'don bzhin dmyal ba chen po mnar med par skye bar 'gyur ro/ /dge slong dag de lta bas na 'di ltar bslab par bya ste/ gang mgal dum la yang ngan sems mi bya na rnam par shes pa dang bcas pa'i lus la lta smos kyang ci dgos/ dge slong dag khyed kyis de lta bur bslab par bya'o/ /dge slong rnams the tshom skyes nas the tshom thams cad gcod par mdzad pa sangs rgyas bcom ldan 'das la zhus pa/ btsun pa shAkya lnga brgya po 'di rnams kyis las ci zhig bgyis na las de'i rnam par smin pas nongs pa yang ma mchis/ gnod pa bgyis pa yang ma mchis par skyes bu gti mug 'phags skyes pos srog dang phral/ bcom ldan 'das kyang shAkya rnams bkum pa'i tshe dbu snyun tshabs chen pos thebs par gyur lags/ bcom ldan 'das kyis bka' stsal pa/ dge slong dag 'di dag nyid dang / ngas las byas shing bsags pa tshogs rnyed pa/ rkyen yongs su bsgyur ba/ dba' rgal bzhin nye bar gnas pa/ gdon mi za bar 'byung ba dag yin te/ 'di dag dang ngas las byas shing bsags pa gzhan su zhig gis myong bar 'gyur dge slong dag las byas shing bsags pa rnams ni phyi rol gyi sa'i khams la rnam par smin par mi 'gyur/ chu'i khams la ma yin/ me'i khams la ma yin/ rlung gi khams la ma yin gyi 'on kyang las dge ba dang mi dge ba byas shing bsags pa rnams ni zin pa'i phung po dang khams dang skye mched dag kho na la rnam par smin par 'gyur te/ bskal pa brgya phrag rnams su yang / / las rnams chud zar mi 'gyur te/ /tshogs shing dus la bab pa na/ /lus can rnams la 'bras bur smin/ /dge slong dag sngon byung ba chu bo zhig gi 'gram na nya pa lnga brgya gnas so/ /de rnams kyis nya gnyis shig rgya mtsho chen po na phan tshun rgyu rgyu ba las chu bo der zhugs pa mthong ba dang / de rnams rab tu dga' ba skyes nas de dag nya rgya chen pos bcus so/ /de rnams kyis de gnyis kyi lus mthong nas gros bya bar brtsams pa/ shes ldan dag 'di la ji ltar bsgrub par bya/ 'di dag lus che ches pas gal te bsad na sha ldom par mi 'gyur te/ de 'drul bar 'gyur ro/ /de na kha cig gis smras pa/ 'di la ci zhig sgrub tu yod/ gcig ni bsad la gcig ni brtags te gzhag mod/ gzhan dag gis smras pa/ 'di yang che ste/ 'di yang ldom par mi 'gyur bas sdong po la btags la gson por sha bcad cing bcad cing btsong ngo / /de rnams kyis smras pa/ legs te de ltar bya'o de dag gis de ltar bya bar brtsams pa dang / de dag de ltar gcod pa na rang gi skad du 'o dod 'bod par brtsams so/ /de dag mi bde ba de nya pa'i khye'u zhig gis thos nas rab tu dga' ba skyed par byed do/ /de nas nya de gnyis de ltar bcad pa'i tshe de rnams la 'di lta bu'i sems bskyed de/ gang bdag cag gis nyes pa yang med/ gnod pa byas pa yang med par 'di dag gis 'di ltar bsad de/ de'i phyir bdag cag kyang gang du 'di dag nyes pa yang med/ gnod pa byas pa yang med par gsod par 'gyur ba der skye bar gyur cig /dge slong dag ji snyam du sems/ nya gnyis po gang dag yin pa de dag ni 'phags skyes po dang / ma la gnod 'di dag kho na yin no/ /nya pa lnga brgya gang dag yin pa de dag ni shAkya lnga brgya po 'di dag kho na yin te/ gang 'di gnyis kyis nya de dag de ltar bsad pa'i las de'i rnam par smin pas/ da ltar 'phags skyes po dang ma la gnod dag gis shAkya gyur pa nyes pa yang med/ gnod pa byas pa yang med pa rnams lcags kyis shal bas mnan cing 'o dod 'bod bzhin bsad do/ /nya pa'i khye'u gang yin pa de ni nga nyid de'i tshe de'i dus na de yin te/ gang ngas nya bsad pa na rab tu dga' ba bskyed pa'i las de'i rnam par smin pas da ltar nga mngon par rdzogs par sangs rgyas kyang dbu snyun tshabs chen pos thebs par gyur to/ /gal te ngas yon tan gyi tshogs 'di lta bu thob par ma gyur na nga yang las 'di lta bu dag thob par 'gyur ro/ /dge slong dag gzhan yang ser skya na gnas pa'i shAkya rnams kyis las gang byas pa de nyon cig /dge slong dag sngon byung ba chom rkun lnga brgya zhig gis lam du 'gro ba dag bcom nas phrogs pa'i rdzas dag khyer te/ ri brags zhig tu 'joms su song ngo / /de dag gis ri brags na gnas pa'i skye bo'i tshogs de thams cad bcom nas phrogs so/ /khyim bdag gnyis shig yang thog tu 'dzegs te 'dug pa dang / rkun po rnams kyis smras pa/ shes ldan dag gang dag 'dir 'dzeg pa de dag bobs shig /thams cad kyi thams cad du med par gyur ta re/ de gnyis kyis smras pa/ ji srid 'tsho ba de srid du mi 'babs so/ /de rnams kyis rtswa dang shing phal mo che bcer nas yang tog de me btang ba dang de gnyis tsha bas sdug bsngal bskyed pas gdungs te 'di lta bu'i sems bskyed do/ /bdag cag nyes pa yang med/ gnod pa byas pa yang med par 'di rnams kyis bsad pas bdag cag kyang 'di rnams nyes pa yang med/ gnod pa byas pa yang med par gsod par gyur cig /dge slong dag ji snyam du sems/ khyim bdag gnyis po gang dag yin pa de dag ni 'phags skyes po dang ma la gnod 'di dag kho na yin no/ /g.yon can lnga brgya po gang dag yin pa de dag ni shAkya lnga brgya po 'di dag kho na yin te/ gang 'di rnams chom rkun par gyur pas de dag nyes pa yang med/ gnod pa byas pa yang med par srog dang phral ba'i las de'i rnam par smin pas da ltar 'phags skyes pos ma la gnod dang bsdongs nas shAkya lnga brgya po dag nyes pa yang med/ gnod pa byas pa yang med par srog dang phral lo/ /dge slong dag de ltar na las gcig tu gnag pa rnams kyi rnam par smin pa yang gcig tu gnag la gcig tu dkar ba rnams kyi yang gcig tu dkar/ 'dren ma rnams kyi yang 'dren ma yin no/ /dge slong dag de lta bas na las gcig tu gnag pa dang 'dren ma rnams spangs nas las gcig tu dkar ba dag la brtsal bar bya ste/ dge slong rnams kyis de lta bu la bslab par bya'o/ /'phags skyes pos shAkya rnams de ltar bsad nas mnyan yod du song ngo / /de nang du zhugs pa dang / rgyal po'i gzhon nu rgyal bu rgyal byed steng gi khang bzangs su song nas skyes pa med par rol mos rtse bar byed/ dga' bar byed/ dga' mgur spyod par byed pa/ 'phags skyes pos thos nas des smras pa/ shes ldan dag rtse ba'o ni su zhig blon po rnams kyis smras pa/ gzhon nu rgyal bu rgyal byed lags so/ /des smras pa/ shes ldan dag de bos shig / de rnams kyis de bos pa dang / 'phags skyes pos smras pa/ rgyal bu rgyal byed nga ni dgra bsad nas 'ongs na khyod rtse zhing 'dug gam/ des smras pa/ lha'i dgra su dag zhig lags/ shAkya rnams so/ /gal te shAkya rnams khyod kyi dgra lags na/ mdza' bo ji lta bu dag ci lags/ des smras pa/ shes ldan dag 'di yang de dag gi phyogs kho na yin pas 'di bsad par bya'o zhes de dag gis de bsad de dus las 'das nas lha gya nom pa sum bcu rtsa gsum pa rnams kyi nang du skyes nas de'i mi'i rol mo'i sgra ma zhi bar lha'i sgra byung ngo / /de nas bcom ldan 'das kyis byung ba de la tshigs su bcad pa dag bka' stsal pa/ bsod nams byas pa 'dir dga' phyi mar dga'/ /gnyi gar dga' ste de ni bdag nyid kyi/ /las rnam smin mthong de dga' rab tu dga'/ /'gro ba bzang por song ba phyir zhing dga'/ /bsod nams byas pa 'dir mgu phyi mar mgu/ /gnyis gar mgu ste de ni bdag nyid kyi/ /las rnams smin mthong de mgu rab tu mgu/ /'gro ba bzang por song ba phyir zhing mgu/ /de nas bcom ldan 'das la tshe dang ldan pa kun dga' bos 'di skad ces gsol to/ /btsun pa tshigs su bcad pa 'di'i don ma mjal lags so/ /bcom ldan 'das kyis bka' stsal pa/ kun dga' bo gzhon nu rgyal bu rgyal byed de nyes pa med cing gnod pa med par skyes bu gti mug 'phags skyes pos srog dang phral te de'i mi'i rol mo'i sgra ma zhi bar lha'i sgra byung ngo / /ngas de las dgongs nas 'di skad du/ bsod nams byas pa 'dir dga' phyi mar dga'/ /zhes bya ba nas/ 'gro ba bzang por song ba phyir zhing mgu/ /zhes bya ba'i bar du gsungs so/ /zhes gsungs pa dang / de cang mi smra bar 'dug go/ /ji tsam dus gzhan zhig na 'phags skyes po btsun mo'i 'khor gyi nang du ngom zhing rnam par ngom ste/ nga rgyal can mthu dang ldan pa/ dpa' bo brtson 'grus dang pha rol gnon pa can gang dag yin pa de dag ngas rmeg med par byas te/ nga dang 'dra ba su zhig yod ces zer ro/ /de nas 'phags skyes pos shAkya'i bu mo lnga brgya khrid pa de dag gis kyang tshigs su bcad de smras pa/ khyod kyis gang dag rmeg med byas/ /de dag rgyal sras shAkya'i sras/ /bslab pa'i sdom pas bsdams pa yin/ /khyod kyis 'dir smras ci zhig rung / /de skad ces smras pa dang / khros nas blon po rnams la tshigs su bcad pas bsgo ba/ klu rnams bsad na klu'i bu mo dag /dug gis gang ba sprin gyis khebs pa ltar/ /'di dag la gor rkang lag rnams chod la/ /nye du de dag nyid rjes myur du thong / /blon po rnams kyis shAkya'i bu mo lnga brgya po de dag dmar bu can gyi rdzing 'gram du lag pa dang rkang pa dag bcad de/ de lag pa'i dong lag pa'i dong zhes bya bar ming chags nas gnas brtan rnams kyis kyang de bzhin du mdo sde'i mgo la bcom ldan 'das mnyan yod na lag pa'i dong gi rdzing 'gram na bzhugs so zhes bris so/ / //'dul ba phran tshegs kyi gzhi/ bam po dgu pa/ de rnams sdug bsngal mi bzad pa rtsub pa tsha ba yid du mi 'ong ba'i tshor ba nyams su myong ba na bsams pa/ bdag cag mi bzad pa dog pa nyam nga bar gyur na/ bcom ldan 'das kyis ma dgongs pa lta snyam mo/ /skabs de lta bu la sangs rgyas bcom ldan 'das rnams la mi mkhyen pa 'am/ mi gzigs pa 'am/ thugs su ma chud pa 'am/ rnam par mi mkhyen pa cung zad kyang mi mnga' ste/ de nas bcom ldan 'das thugs rje chen pos bskul nas phyogs der gshegs pa dang / ji tsam na bud med de dag thams cad sgren mor 'dug pa gzigs so/ /gzigs nas kyang bcom ldan 'das kyis 'jig rten pa'i thugs bskyed do/ /chos nyid kyis gang gi tshe sangs rgyas bcom ldan 'das rnams kyis 'jig rten pa'i thugs bskyed pa de'i tshe srog chags grog sbur rnams kyis kyang bcom ldan 'das kyis thugs sems kyis shes so/ /gang gi tshe 'jig rten las 'das pa'i thugs bskyed pa de'i tshe ni nyan thos dang rang sangs rgyas rnams kyis kyang bcom ldan 'das kyi thugs sems kyis mi shes na/ dud 'gro'i skye gnas su song ba'i srog chags rnams kyis lta smos kyang ci dgos/ bcom ldan 'das kyis dgongs pa/ kye ma lha'i bu mo bde sogs kyis gos dag dang chu khyer te 'ongs kyang bla na snyam du bcom ldan 'das kyis thugs bskyed ma thag tu lha'i bu mo bde sogs kyis ras zung lnga brgya dang / mtsho chan po ma dros pa nas chu blangs nas/ bcom ldan 'das ga la ba der song ste phyin nas/ bcom ldan 'das kyi zhabs gnyis la mgo bos phyag 'tshal te 'di skad ces gsol to/ /btsun pa ras yug lnga brgya 'di dag dang chab 'tshal te mchis so/ /bcom ldan 'das kyis bka' stsal pa/ song la shAkya'i bu mo 'o ni rnams dbugs phyung ste/ dbugs phyung nas rkang pa dang lag pa dag khrus la gos rnams skon cig /btsun pa de ltar 'tshal lo zhes smras nas/ des de rnams kyi rkang pa dang lag pa dag bkrus nas gos rnams bskon no/ /de nas bcom ldan 'das kyi zhabs la mgo bos phyag 'tshal te bcom ldan 'das kyi spyan sngar 'khod do/ /de nas bcom ldan 'das kyis rdzu 'phrul gyis shAkya'i bu mo lnga brgya po de rnams kyi sdug bsngal rgyun bcad do/ /rgyun bcad nas bka' stsal pa/ sring mo dag khyed nyid kyis las 'di dag byas shing bsags pa/ tshogs pa rnyed pa/ rkyen yongs su bsgyur ba/ dba' rgal bzhin nye bar gnas pa/ gdon mi za bar 'byung ba yin te/ khyed kyis las byas shing bsags pa rnams gzhan su zhig gis myong bar 'gyur/ sring mo dag las la gzhol bar gyis shig ces gsungs nas bcom ldan 'das gshegs so/ /de dag kyang bcom ldan 'das la sems rab tu dang bar byas nas dus las 'das te/ rgyal chen bzhi'i lha rnams kyi nang du skyes so/ /chos nyid kyis lha'i bu 'am lha'i bu mo skyes nas ring po ma lon pa la sems gsum skye ste/ gang nas shi 'phos pa dang / gang du skyes pa dang / las gang gis yin pa'o/ /de rnams kyis mi rnams kyi nang nas shi 'phos pa dang / rgyal chen bzhi pa'i lha rnams kyi nang du skyes pa dang / las gang gis zhe na/ bcom ldan 'das la sems rab tu dang bar byas pas yin par mthong ngo / /de nas sngon shAkya'i bu mo byed byed pa'i lha lnga brgya po de rnams 'di snyam du sems te/ bdag cag zhag tu 'dug nas bcom ldan 'das blta ba'i phyir 'dong ba ni cha ma yin gyis/ ma la bdag cag zhag ma lon pa nyid du bcom ldan 'das blta ba'i phyir 'dong ngo snyam mo/ /de nas sngon shAkya'i bu mo byed byed pa'i lha rnams rna cha gdub 'khor dri ma med pa g.yo ba thogs shing / lus do shal dang se mo dos brgyan nas de nyid kyi mtshan mo lha rdzas kyi me tog ud pa la dang / pad ma dang / ku mu da dang / pad ma dkar po dang man dA ra ba rnams kyis thu ba bkang nas rgyal bu rgyal byed kyi tshal thams cad snang ba rgya chen pos snang bar byas te/ bcom ldan 'das la me tog rnams kyis gtor nas bcom ldan 'das kyi spyan sngar chos mnyan pa'i phyir 'dug go/ /bcom ldan 'das kyis de rnams kyi bsam pa dang / bag la nyal dang / khams dang / rang bzhin mkhyen nas 'phags pa'i bden pa bzhi rtogs par 'gyur ba de lta bu'i chos bstan pa mdzad pa dang / de rnams kyis de thos nas 'jig tshogs la lta ba'i ri'i rtse mo nyi shu mtho ba ye shes kyi rdo rjes bcom nas rgyun du zhugs pa'i 'bras bu mngon sum du byas so/ /de rnams kyis bden pa mthong nas ched du brjod pa lan gsum brjod pa/ bcom ldan 'das kyis gang bdag cag la sman btags pa 'di lta bu ni bdag cag la mas ma bgyis/ phas ma lags/ rgyal pos ma lags/ lha rnams kyis ma lags/ rang gi skye bo dang gnyen sdug pa'i tshogs kyis ma lags/ sngon gyi mes po rnams kyis ma lags/ dge sbyong dang bram ze rnams kyis ma lags te/ khrag dang mchi ma'i rgya mtsho ni bskams/ rus pa'i ri las ni bsgral/ ngan song gi sgo rnams ni bcad/ mtho ris dang thar pa'i sgo rnams ni phye/ lha dang mi rnams la ni bkod do/ /yang smras pa/ khyod kyi mthu yis ngan song lam dag ni/ /shin du mi bzad nyes mang ldan pa bcad/ /mtho ris sgo phye bdag gi bsod nams ni/ /shin du bzang dang mya ngan 'das lam thob/ /khyod brten de ring bdag gis skyon bral zhing / /shin du rnam par dag mig dag pa thob/ /'phags pa dgyes pa'i go 'phang zhi ba 'ang thob/ /sdug bsngal rgya mtsho pha rol mchog tu rgal/ /'gro bar lha min lha dang mis mchod cing / /skye rga 'chi ba'i skyon dang bral ba po/ /srid pa stong du mthong rab rnyed dka' ba/ /thub pa khyod deng mthong ba 'bras bu mchis/ /de nas se mo do 'phyang dga' skyes rnams/ /zhabs gnyis la ni gdud pa byas nas kyang / /dgra thul pa la yongs su bskor byas nas/ /slar yang lha yi 'jig rten mngon phyogs dong / /dge slong rnams the tshom skyes nas the tshom thams cad gcod par mdzad pa sangs rgyas bcom ldan 'das la zhus pa/ btsun pa shAkya'i bu mo lnga brgya po dag gis las ci zhig bgyis na des lag pa dang rkang pa dag bkum/ las ci zhig bgyis na des lha rnams kyi nang du skyes/ las ci zhig bgyis na des bcom ldan 'das kyi spyan sngar bden pa mthong bar bgyis lags/ bcom ldan 'das kyis bka' stsal pa/ dge slong dag 'di dag nyid kyis las byas shing bsags pa/ tshogs rnyed pa zhes bya ba nas/ lus can rnams la 'bras bur smin/ /ces bya ba'i bar snga ma bzhin no/ /dge slong dag sngon byung ba bskal pa bzang po nyid la skye dgu'i tshe lo nyi khri thub pa na de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das ston pa 'od srung zhes bya ba 'jig rten du byung ste/ de'i gsung rab la 'di rnams rab tu byung bar gyur to/ /de na 'di rnams kyis slob pa'i dang mi slob pa'i dge slong rnams la lag rdum rkang rdum zhes bya ba'i tshig kun du spyod pa kun du spyad de las de'i rnam par smin pas lo mang por dmyal ba rnams kyi nang du skyes so/ /las de nyid kyi lhag mas 'di rnams tshe rabs lnga brgyar lag pa dang / rkang pa dag bcad de/ da lta'i bar du yang lag pa dang rkang pa dag bcad pa yin no/ /gang nga la sems rab tu dang bar byas pa'i las de'i rnam par smin pas ni lha rnams kyi nang du skyes so/ /gang 'di rnams kyis de na lung mnos pa dang / blags pa dang / kha ton byas pa des nga'i spyan sngar bden pa mthong bar byas pa yin no/ /dge slong dag de ltar na las gcig tu gnag pa rnams kyi zhes bya ba nas/ brtsal bar bya ste/ dge slong dag khyed kyis de lta bur bslab par bya'o zhes bya ba'i bar snga ma bzhin no/ /de nas mi de 'phags skyes po'i drung du 'ongs pa dang / 'phags skyes pos smras pa/ kye skyes bu bcom ldan 'das ci gsung / des smras pa/ lha bcom ldan 'das kyi zhal nas 'di nas zhag bdun na ko sa la'i rigs sbrul gyis bltas pa bzhin du rabs chad par 'gyur ro/ /'phags skyes po yang ma la gnod dang bcas te mes tshig bzhin sems can dmyal ba chen po mnar med par ltung bar 'gyur ro zhes gsung ngo / /'phags skyes pos thos nas lag pa 'gram pa la gtad nas sems khongs su chud de 'dug go/ /ma la gnod kyis smras pa/ lha khyod ci'i phyir phyag 'gram pa la gtad nas sems khongs su chud cing bzhugs/ des smras pa/ ma la gnod 'di ltar bcom ldan 'das 'di skad ces zhag bdun na 'phags skyes po ma la gnod dang bcas te mes tshig bzhin sems can dmyal ba chen po mnar med par ltung bar 'gyur ro zhes gsung na/ nga ji ltar sems khongs su chud cing mi 'dug /des smras pa/ lha gang zhig bram ze 'ongs pa la 'tshal ma mi stsol pa de yang phung ba brgya stong du sems na/ lhas dge sbyong gau ta ma'i gnyen bshes de snyed cig bkum pa lta smos kyang ci 'tshal/ de de skad gsung kyang rung / gzhan gsung kyang rung ste/ 'on kyang lha skyed mos tshal du chab kyi nang du khang bzangs ka ba gcig pa zhig bgyid du stsal te/ lha der gshegs nas dgung bdun du bzhugs la dgung bdun 'das pa dang / slar mnyan yod du gshegs par mdzad cig /des smras pa/ de ltar byas 'gro'o zhes de btsun mo'i 'khor dang bcas te der song nas 'dug go/ /nyin zhag gcig thal ba dang / ma la gnod kyis smras pa/ lha dgung zhag bdun las gcig ni thal lags/ lhag ma dgung zhag drug mchis te/ dgung zhag drug 'das nas mnyan yod du gshegs par mdzad do zhes bya ba nas/ nyin zhag gnyis dang gsum nas bdun pa la lha deng kho na la mnyan yod du gshegs par mdzad do zhes bya ba'i bar de bzhin du byas so/ /de na yul ngan zhig kyang byung bar gyur to/ /bud med ni rgyan la dga' ba yin pas btsun mo'i 'khor rnams kyis smras pa/ phu nu mo dag bdag cag deng mnyan yod du 'dong dgos pas rgyan thogs par bya'o zhes de rnams kyis rgyan thogs par brtsams so/ /de na btsun mo'i 'khor zhig gis sngas nang tshangs can gyi steng du nor bu me shel bzhag nas rgyan thogs par brtsams so/ /ji tsam na yul ngan sangs pa dang / nyi ma'i 'od zer gyis me shel gyi thog tu bab nas me byung ba de sngas nang tshangs can la mched do/ /de las kyang khang bzang la mched nas btsun mo'i 'khor rnams ni bros so/ /'phags skyes po dang ma la gnod tshig bzhin 'bros par brtsams pa dang / ji tsam na mi ma yin pa dag gis sgo rnams bcad nas 'phags skyes pos tshig bzhin du smras pa/ ma la gnod tshig go/ /des smras pa/ lha tshos so zhes de dag de skad du 'o dod 'bod cing dmyal ba chen po mnar med par skyes so/ /de nas bcom ldan 'das kyis byung ba de la tshigs su bcad pa dag bka' stsal pa/ sdig pa byas pas 'dir tshig phyi mar tshig /gnyi gar tshig ste de ni bdag nyid kyi/ /las rnams smin mthong de tshig rab tu tshig /'gro ba ngan par song ba phyir zhing tshig /sdig pa byas pa 'dir smre phyi mar smre/ /gnyi gar smre ste de ni bdag nyid kyi/ /las rnams smin mthong de smre rab tu smre/ /'gro ba ngan par song ba phyir zhing smre/ /zhes gsungs pa dang / bcom ldan 'das la tshe dang ldan pa kun dga' bos 'di skad gsol to/ /btsun pa tshigs su bcad pa 'di bdag gis ma 'tshal to/ /bcom ldan 'das kyis bka' stsal pa/ kun dga' bo skyes bu gti mug 'phags skyes po de ma la gnod dang bcas te mes tshig bzhin dmyal ba mnar med par song ste ngas de las dgongs nas/ sdig pa byas pa 'dir tshig phyi mar tshig / ces bya ba nas/ 'gro ba ngan par song ba phyir zhing smre/ /zhes bya ba'i bar gsungs pa yin no/ /gang gi tshe 'phags skyes pos shAkya rnams bsad pa de'i tshe shAkya'i bu mo rnams kyis de rnams kyi rgyan dag mthong nas ngu bar brtsams te/ de rnams kyis bsams pa/ shAkya rnams ni 'phags pa rnams la mngon par dad pa yin pas rgyan 'di dag 'phags pa rnams la dbul lo zhes de rnams kyis rgyan de dag dge slong rnams la phul lo/ /drug sde rnams kyis rgyan de dag thogs nas ser skya'i gnas su zhugs pa dang / shAkya'i bu mo rnams kyis de dag mthong nas de bzhin du ngu bar gyur cing smras pa/ 'phags pa dag bdag cag gis de'i slad du 'di dag phul na nyes dmigs de nyid byung bar gyur to zhes byas pa dang / de dag cang mi smra bar 'dug go/ /skabs de dge slong rnams kyis bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni dge slong rnams rgyan thogs pa las gyur gyis de lta bas na dge slong gis rgyan spel ma dang / chang phrul can dang / zla gam can dang / gser skud dang / rgyan sna tshogs gzhan ci yang rung ba yang thogs par mi bya ste/ thogs na 'gal tshabs can du 'gyur ro/ / sdom ni/ blangs pa dang ni bslab pa dang / /du ba'i ri lu sman ce'u bcas/ /lhung bzed snod dang zu nga dang / /mar dkar 'bru mar byug pa'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /ri brags zhig na khyim bdag cig gnas pa des rigs mnyam pa las chung ma blangs nas de de dang rtse bar byed/ dga' bar byed dga' mgur spyod par byed do/ /dus gzhan zhig na de nye du rnams kyang zad par gyur/ nor yang zad/ longs spyod dag kyang zad nas des bsams pa/ da ni bdag rgas pas nor bsgrub par bya yang mi nus/ bdag la longs spyod dag kyang med/ bdag gi nye du rnams kyang dus las 'das pas/ song la rab tu 'byung ngo snyam du rig nas des chung ma la smras pa/ bzang mo da ni nga rgas pas nor bsgrub par bya yang mi nus/ nga la longs spyod dag kyang med/ nga'i nye du rnams kyang dus las 'das pas khyod la dris te song la rab tu 'byung ngo / /khyim bdag de drang po zhig na de ni g.yo kun du spyod cing rtag tu skyes pa gzhan la lta ba zhig pas des smras pa/ rje'i sras de bzhin du mdzod cig /'on kyang dus dus su bltar spyon cig /des de bzhin bya'o zhes dam bcas nas rgyal bu rgyal byed kyi tshal du song ste/ dge slong zhig gi drung du phyin nas smras pa/ 'phags pa rab tu 'byung bar 'tshal lo/ /des smras pa/ bzhin bzangs khyod 'jigs pa med par spobs pa dge ste legs so/ /bcom ldan 'das kyis kyang phan yon lnga yang dag par mthong ba'i mkhas pas ni rab tu 'byung bar mos par bya ba nyid du 'os te/ lnga gang zhe na/ bdag gis rang gi don ma 'dres pa thob par 'gyur bar yang dag par mthong ba'i mkhas pas rab tu 'byung bar mos par bya bar 'os pa nyid dang / bdag gang dag gi bran dang / mngag gzhug pa dang / bkol ba dang / rang dbang med pa dang / dga' mgur 'gror med pa yin pa de dag gis mchod par bya bar 'gyur ba dang / bstod par bya bar 'gyur bar yang dag par mthong ba'i mkhas pas rab tu 'byung bar mos par bya bar 'os pa nyid dang / mya ngan las 'das pa grub pa dang bde ba bla na med pa thob par yang dag par mthong ba'i mkhas pas rab tu 'byung bar mos par bya bar 'os pa nyid dang / bdag mya ngan las 'das pa grub pa dang bde ba bla na med pa ma thob pa las yongs su nyams kyang lha rnams kyi nang du skye bar 'gyur bar yang dag par mthong ba'i mkhas pas rab tu 'byung bar mos par bya bar 'os pa nyid dang / sangs rgyas rnams dang / sangs rgyas kyi nyan thos skyes bu dam pa yang dag par song ba mchog rnams kyis rnam grangs du mar rab tu 'byung ba bsngags par yang dag par mthong ba'i mkhas pas rab tu 'byung bar mos par bya bar 'os pa nyid do zhes bka' stsal te/ khyod kyis sems bskyed pa dges legs par gsungs pa'i chos 'dul ba 'di la rab tu byung shig ces des de rab tu phyung bsnyen par rdzogs par byas so/ /de nas zhag gnyis gsum zhig kun du spyad pa'i chos bslabs nas smras pa/ bzhin bzangs ri dgas kyis ri dgas mi sos kyis mnyan yod rgya chen por rang gi spyod yul pha'i yul du bsod snyoms la rgyu zhing 'tsho bar gyis shig /de phyi de nyin snga dro sham thabs dang chos gos bgos lhung bzed thogs te mnyan yod du bsod snyoms kyi phyir zhugs so/ /de bsod snyoms la rgyu ba na rang gi chung ma 'dra ba'i bud med cig mthong nas/ des bsams pa/ bdag gi sngon gyi chung ma de la rab tu byung nas ltar 'ong ngo des dam bcas kyis de'i phyir bdag da gzod rab tu byung ba yin pas dus cung zad cig bsdad la de mi dga' bar mi 'gyur bar de ltar 'gro'o snyam du bsams nas/ bsod snyoms la brgyus te rgyal bu rgyal byed kyi tshal du song ngo / /de dus cung zhig bsdad nas/ mkhan po la smras pa/ mkhan po bdag la sngon gyi mchis brang zhig mchis te/ de la bdag gis rab tu byung nas ltar mchi'o zhes dam bcas pas de'i slad du gnang bar mdzod cig dang mchi'o/ /des smras pa bu song la khyod kyis sems srungs shig /des smras pa/ bsrung bar bgyi'o zhes smras nas chas pa dang / rim gyis ri brags der phyin no/ /des de rgyang ring po kho na nas mthong ba dang / dga' ba dang bcas shing myur ba myur bas bsu nas smras pa/ rje'i sras byon pa legs so/ /byon pa legs te/ ring mo zhig lon nas mthong ngo zhes smras nas/ reg par brtsams pa dang / des smras pa/ ci byed chos gos dag blangs nas mnyel bsor gzhug mod/ des smras pa/ ma reg shig /ci'i slad du mkhan pos nga la khyod kyi sems srungs shig ces bsgo'o/ /des smras pa/ rje'i sras khyod sems srungs la rag mod/ bdag gis bkag gam/ ci zhes des de'i chos gos blangs stan bting ste rkang pa bkrus nas bskus so/ /de nas khrus byas nas zan byin te/ de yang de nyid du zan bza' bar 'dug pa dang / des smras pa ci byed des smras pa/ rje'i sras khyod dang lhan cig zan zos nas ring mo zhig lon no/ /des smras pa/ mkhan pos nga la khyod kyis sems srungs shig ces bsgo'o/ /des smras pa/ rje'i sras khyod sems srung la rag mod/ bdag gis bkag gam ci bdag khyod dang lhan cig zan zos nas ring mo zhig lon pas gdon mi za bar bza'o zhes des de dang lhan cig zan zos so/ /de nas mal bshams nas smras pa/ rje'i sras gzims mal 'dir shul gyis mnyel ba'i mnyel sos shig /des rkang pa bkrus nas nyal ba dang / de yang de nyid du nyal bar brtsams so/ /des smras pa ci byed/ des smras pa/ rje'i sras khyod dang lhan cig nyal nas ring mo zhig lags pas ma bkyon cig / des smras pa/ mkhan pos nga la khyod kyi sems srungs shig ces bsgo'o/ /des smras pa/ rje'i sras khyod sems srung la rag mod/ bdag gis bkag gam ci/ khyod dang bdag lhan cig nyal nas ring mo zhig lags pas gdon mi za bar nyal bar bgyi'o/ /des ma btub pa dang / des bsams pa/ mgul nas 'jus na bdag gi dbang du 'gyur ro snyam nas/ des de'i mgul nas 'jus pa dang / bud med ni reg pa'i dug yin pas reg pa tsam gyis log par spyad do/ /dus ring zhig 'dug nas smras pa/ bzang mo 'gro'o/ /des bsams pa/ 'di dang bdag lhan cig gsang ba byas pa gang yin pa de dge slong rnams kyis mi shes pas skyes bo mang pos shes par bya'o/ /des na de dag gis bskrad pas slar 'ong bar 'gyur ro snyam du bsams nas/ des smras pa/ rje'i sras de bzhin du ji ltar bzhud/ lam rgyags kyi zong kAr Sha pA Na dag snoms shig /des smras pa/ bzang mo dge slong rnams dbyig la mi reg na ji ltar blang / des smras pa/ rje'i sras bdag gis ji nas kyang mi reg pa de ltar bgyis snoms shig ces des dbyig thum por bcug nas bcings te/ khar gsil gyi rtsa ba la btags so/ /dregs pas ldongs pa dang / sred pas ldongs pa rnams ni mi byed pa cung zad kyang med pas des de khyer te song ba dang / rim gyis mnyan yod du phyin no/ /drug sde rnams kyi kun du spyod pa ni drug sde gang yang rung ba zhig gis rgyal bu rgyal byed kyi tshal gyi sgo mi stongs pa yin pas tshe dang ldan pa nye dga' bo rgyal bu rgyal byed kyi tshal gyi sgo na 'chag cing 'dug pa des de thag ring po nas mthong na skra spra ba'i me tog lta bu/ smin ma rab tu 'phyang ba zhig nas/ des bsams pa/ 'di dge slong gnas brtan zhig 'ong gis bsur 'gro'o zhes de bsur song ste/ gnas brtan byon pa legs so/ /byon pa legs so zhes byas pa dang / de slob dpon phyag 'tshal lo phyag 'tshal lo zhes zer nas tshe dang ldan pa nye dgas bsams pa/ kye ma 'di ni rgan zhugs zhig ste/ slob dpon yang mi shes/ mkhan po yang mi shes so/ /re shig 'di ga las 'ongs pa dri'o snyam du bsams nas smras pa/ rgan zhugs khyod ga las 'ongs/ des smras pa/ slob dpon bdag sngon gyi mchis brang zhig mchis pa ltar mchis te/ bdag de nas mchis so/ /rgan zhugs legs te khyod ni byas pa gzo ba zhig go/ /byas pa gzo ba ni mkhas pa rnams kyis bsngags te/ bcom ldan 'das kyis bka' stsal pa/ dge slong dag de lta bas na 'di ltar bslab par bya ste/ 'di ltar byas pa gzo ba dang byas pa tshor bar bya zhing byas pa chung ngu yang chud gzan par mi bya na/ chen po lta smos kyang ci dgos shes bka' stsal to/ /sngon gyi chung ma mthong ngam/ mthong lags so/ /de khams bde 'am/ khams bde lags so/ /rgan zhugs de ni go na khar gsil gyi rtsa ba la 'phyang ba 'o ni ci yin/ slob dpon de shul rgyags kyi zong du kAr Sha Na dag cig stsal ba lags so/ /rgan zhugs khyod lta bsod nams byas pa zhig ste/ sngon gyi chung ma yang mthong la/ rnyed pa yang grub bo/ /slob dpon khyod kyi bka' drin lags so/ /des bsams pa/ 'di las gzhan yang 'byung gis/ re shig 'di la dri bar bya'o snyam nas/ des de la tshig 'jam po brjod pa'i tshul gyis thams cad dris pa dang / rgan zhugs de drang po'i rang bzhin can zhig pas des ji ltar gyur pa bsnyad do/ /des smras pa/ rgan zhugs de thams cad mkhan po la smros shig dang / khyod kyi mkhan po yid dga' bar 'gyur ro/ /de de ltar bslus pas ji ltar gyur pa mkhan po la bsnyad pa dang / des kyang dge slong rnams la bsnyad/ dge slong rnams kyis kyang bcom ldan 'das la gsol to/ /bcom ldan 'das kyis bka' stsal pa/ dge slong dag skyes bu gti mug 'di sbyor ba nyams kyi bsam pa ni ma nyams so/ /'di phas pham pa byung ste/ de lta bas na gnang gis rab tu byung ma thag tu phas pham par gyur pa'i chos bzhi rgyas par shod cig dang / nyes pa 'dir mi 'gyur ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na dge slong dga' ba can zhes bya ba zhig gnas pa de rtag tu dgon pa nags mtha'i gnas mal dag na bsam gtan byed pa zhig pas de'i ming bsam gtan pa dga' ba can zhes bya bar chags so/ /de gang gi tshe skyil mo dkrung bcas nas bsam gtan byed pa de'i tshe bdud kyi ris kyi lha dag gis gtses so/ /de dus gzhan zhig na skyil mo dkrung bcas te 'dug pa dang / bdud kyi ris kyi lha mo zhig gis de'i skyil mo dkrung gi steng du 'dug pa dang / bud med ni reg pa'i dug yin pas des de dang lhan cig log par spyad do/ /log par spyad ma thag tu zug rngus zug pa bzhin du gnod nas sems skyed pa bdag gis mi tshangs par spyod pa 'khrig pa'i chos bsten pas/ bdag song la 'babs so snyam mo/ /yang bsams pa/ bdag gis bcab pa'i sems gcig gis kyang ma bcabs pas re shig bcom ldan 'das kyi spyan sngar song ste/ gal te skal ba yod pa zhig tu gyur na ni gnas so/ /'on te med na ni dga' mgur spyad par bya'o snyam du bsams nas/ lag pa g.yas pas ni chos gos rnams khyer/ lag pa g.yon pas ni yan lag skyes bkab nas ngom zung gnag cing mchi ma dang bcas bzhin bcom ldan 'das ga la ba der song ngo / /de'i tshe bcom ldan 'das 'khor dge slong brgya stong du ma'i gung la gdan bshams pa la bzhugs te chos ston to/ /bcom ldan 'das kyis tshe dang ldan pa dga' ba can rgyang ring po kho na nas gzigs so/ /gzigs nas kyang dgongs pa/ gal te dga' ba can la ma smras na gang khrag dron por skyugs nas dus byed par 'gyur ba'i gnas de yod do snyam du dgongs nas/ tshe dang ldan pa dga' ba can la 'di skad ces bka' stsal to/ /dga' ba can 'ongs pa legs so/ /khyod ji ste ngom zung gnag /des gsol pa/ btsun pa bdag sngon ni dga' ba can lags kyi da ni mi dga' ba can lags so/ /dga' ba can ci ste de skad smra/ khyod kyis ci zhig byas/ btsun pa bdag gis bslab pa ma phul bar mi tshangs par spyod pa 'khrig pa'i chos bsten te/ de ni bcab pa'i sems gcig gis kyang ma bcabs lags so/ /dga' ba can khyod ji srid 'tsho'i bar du bslab pa la slob par spro 'am/ bcom ldan 'das spro lags so/ / de nas bcom ldan 'das kyis dge slong rnams la bka' stsal pa/ dge slong dag dge slong dga' ba can gyis spyad par bya ba ma yin pa spyad kyang sems gcig gis kyang ma bcabs pas/ 'di phas pham par ma gyur gyi/ dge slong dga' ba can dang gzhan yang rung ste/ 'di lta bu gang yin pa la ji srid 'tsho'i bar du bslab pa'i sdom pa byin cig /sbyin pa yang 'di ltar bya ste/ gnas mal bshams nas gaN DI brdungs te dris pa'i tshig gis dge slong rnams la bsgo nas dge 'dun thams cad 'dus te 'dug pa dang / dge slong dga' ba can gyis rgan rim ji lta ba bzhin du gdud pa byas la rgan pa'i mthar tsog tsog por 'dug ste thal mo sbyar nas 'di skad ces brjod par bya'o/ /dge 'dun btsun pa rnams gsan du gsol/ bdag dge slong dga' ba can zhes bgyi bas bslab pa ma phul bar mi tshangs par spyod pa 'khrig pa'i chos bsten te/ de ni bcab pa'i sems gcig gis kyang ma bcabs nas/ bdag dge slong dga' ba can dge 'dun las ji srid 'tsho'i bar du bslab pa gsol na/ dge 'dun thugs brtse ba can btsun pa rnams kyis thugs brtse ba nye bar bzung ste/ bdag dge slong dga' ba can la ji srid 'tsho'i bar du bslab pa stsal du gsol/ de bzhin du lan gnyis lan gsum gyi bar du'o/ /de'i 'og tu dge slong dga' ba can thos pa'i nyen kor nas bkar te mthong ba'i nyen kor du bzhag la/ dge slong gcig gis gsol ba byas nas las bya ste/ dge 'dun btsun pa rnams gsan du gsol/ dge slong dga' ba can 'dis bslab pa ma phul bar mi tshangs par spyod pa 'khrig pa'i chos bsten te/ de ni 'dis 'chab pa'i sems gcig gis kyang ma bcabs nas/ dge slong dga' ba can 'di dge 'dun las ji srid 'tsho'i bar du bslab pa gsol na/ gal te dge 'dun gyi dus la bab cing bzod na dge 'dun gyis gnang bar mdzod cig dang / 'di ltar dge 'dun gyis dge slong dga' ba can la ji srid 'tsho'i bar du bslab pa stsol to/ /'di ni gsol ba'o las ni 'di ltar bya ste/ dge 'dun btsun pa rnams gsan du gsol/ dge slong dga' ba can 'dis bslab pa ma phul bar mi tshangs par spyod pa 'khrig pa'i chos bsten te/ de ni 'dis bcab pa'i sems gcig gis kyang ma bcabs nas/ dge slong dga' ba can 'di dge 'dun las ji srid 'tsho'i bar du bslab pa gsol te/ de'i slad du dge 'dun gyis dge slong dga' ba can la ji srid 'tsho'i bar du bslab pa stsal na/ dge slong dga' ba can la ji srid 'tsho'i bar du bslab pa stsal bar tshe dang ldan pa gang dag bzod pa de dag ni cang ma gsung shig / gang dag mi bzod pa de dag ni gsungs shig /'di ni las brjod pa dang po ste/ las brjod pa gnyis pa dang / gsum pa yang de bzhin du bya'o/ /dge 'dun gyis bzod cing gnang nas dge 'dun gyis dge slong dga' ba can la ji srid 'tsho'i bar du bslab pa stsal lags te/ 'di ltar cang mi gsung bas de de bzhin du 'dzin to/ /ngas bslab pa byin pa'i dge slong gi kun du spyad pa'i chos bca' bar bya ste/ bslab pa byin pa'i dge slong gis rang bzhin du gnas pa'i dge slong gi gus par smra ba dang / phyag 'tshal ba dang / mngon du ldang ba dang / thal mo sbyor ba dang / gdud pa'i las bdag gir mi bya/ stan gcig la 'dug par mi bya/ gal te 'dug na yang stan ches dma' ba long shig /'chag sa gcig tu 'chag par mi bya/ gal te 'chag na yang gom pa bsri'o/ /phyi bzhin 'brang ba'i dge sbyong rang bzhin du gnas pa'i dge slong dang / bram ze dang khyim bdag gi khyim dag tu 'gro bar mi bya/ gal te 'gro na dge sbyong mdun du gtang bar bya/ steng g.yogs gcig par nyal bar mi bya/ rab tu dbyung bar mi bya/ bsnyen par rdzogs par mi bya gnas sbyin par mi bya/ dge sbyong gi ched du gzhag par mi bya/ gsol ba'i las mi bya/ gsol ba dang gnyis ma yin/ gsol ba dang bzhi mi bya'o/ /las byed par bsgo bar mi bya/ dge slong ma'i ston pa mi bya/ sngon bskos pa zhig na yang des dge slong ma la gdams par mi bya/ dge slong la tshul khrims nyams pa dang / lta ba nyams pa dang / spyod pa nyams pa dang / 'tsho ba nyams pas gleng bar mi bya/ des gdams ngag dbog par mi bya/ gso sbyong ma yin/ dgag dbye ma yin/ gsol ba'i las ma yin/ gsol ba dang gnyis ma yin/ gsol ba dang bzhi ma yin/ nang par sngar langs te sgo dbye bar bya/ mar me'i snod bsal bar bya/ gtsug lag khang chag chag gdab par bya/ phyag dar bya/ ba lang gi lci ba sar pa bzang pos byug par bya/ bshang gci khang phyag dar bya/ sa dang lo ma dag dang chu grang mo 'am dron mo dus dang 'thun par gzhag par bya/ de nas wa'i kha phyag par bya/ dus shes par bya ste/ stan bsham par bya bdug pa'i snod dang bdug pa nye bar gzhag par bya/ gal te ston pa'i yon tan sgrogs par nus na bdag nyid kyis bya/ ci ste mi nus na smra ba po la gsol bar bya'o/ /zas kyi skos sa la brtag par bya zhing / zas bskos zin nas khang steng du song ste gaN DI brdung bar bya/ tsha ba'i dus su dge slong rnams la bsil yab kyis g.yab par bya/ de nas bsnyen par rdzogs pa thams cad kyi ni 'og / bsnyen par ma rdzogs pa rnams kyi ni gong du spyod lam zhi bas dge slong gi 'du shes nye bar bzhag ste/ zas bza' bar bya/ zas kyi bya ba byas nas gnas mal phug tu brtul bar bya/ lhung bzed kyi gzhi dor bar bya dus shes par byas nas de bzhin gshegs pa'i dbu skra dang / sen mo'i mchod rten dag phyag dar bya zhing / ba lang gi lci ba sar pa bzang pos byug par bya/ 'du ba'i dus su gnas mal bsham par bya zhing bdug pa dang bdug pa'i snod gzhag par bya/ ston pa'i yon tan bsgrag par bya/ dge 'dun btsun pa rnams gsan du gsol/ deng dge 'dun gyi tshes gcig lags te/ gtsug lag khang gi bdag po dang / gtsug lag khang gi lha rnams kyi don du tshigs su bcad pa gsungs shig ces nyi ma brjod par bya/ ci ste mi nus na dge slong la bcol bar bya'o/ /dge slong rnams de'i gnas khang sko bar mi byed nas bcom ldan 'das kyis bka' stsal pa/ gnas khang bsko bar bya'o/ /rnyed pa yang mi ster nas/ bcom ldan 'das kyis bka' stsal pa/ rnyed pa sbyin par bya'o/ /de dge ba'i phyogs la brtson par mi byed nas/ bcom ldan 'das kyis bka' stsal pa/ dge ba'i phyogs la brtson par bya'o/ /de'i spyad pa ni 'di yin te/ ji srid lam du ma zhugs kyi bar du'o/ /de la lam du zhugs pa ni 'di yin te/ zag pa zad pa'o/ /des 'bad brtsal bsgrims pas 'khor ba'i 'khor lo g.yo ba dang mi g.yo ba cha lnga pa 'di nyid rtogs nas 'dus byas kyi rnam pa thams cad chos nyid kyis 'jig pa/ lhung ba/ 'gyes pa/ rnam par 'jig par sgoms te nyon mongs pa thams cad spangs nas dgra bcom pa nyid mngon sum du byas te/ khams gsum gyi 'dod chags dang bral ba/ gser dang bong bar mnyam pa nam mkha' dang lag mthil du mtshungs pa/ tsan dan dang ste'ur 'dra ba/ ma rig pa'i sgo nga'i sbubs bcom pa/ rig pa dang / mngon par shes pa dang / so so yang dag par rig pa thob pa/ srid pa'i rnyed pa la chags pa dang / bkur sti la rgyab kyis phyogs pa/ dbang po dang nye dbang du bcas pa'i lha rnams kyis mchod pa dang / rjed pa dang / gus par smra bar bya ba'i dgra bcom par gyur to/ /dgra bcom pa nyid thob kyang de bzhin du 'dug cing las kyang byed nas bcom ldan 'das kyis bka' stsal pa/ de rgan rims bzhin 'dug par bya zhing ji ltar bkag pa yang rang bzhin du gnas pa'i dge slong rnams kyis bya'o/ /sangs rgyas bcom ldan 'das rgyal po'i khab na 'od ma'i tshal bya ka lan da ka gnas pa na bzhugs so/ /tshe dang ldan pa pi lin da'i bu rab tu byung tshun chad de rtag tu na nas tshangs pa mtshungs par spyod pa rnams kyis de'i drung du song ste dris pa/ gnas brtan bde 'am/ des smras pa/ tshe dang ldan pa dag bdag na ste mi bde 'o/ /gnas brtan khyod ci na/ tshe dang ldan pa dag bdag glo lu zhing na'o/ /gnas brtan sman cung zad mdzod cig / tshe dang ldan pa dag bdag gis sngon ri lu'i du ba bsten to/ /gnas brtan da ci ste mi sten/ bcom ldan 'das kyis ma gnang ngo / /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis dge slong nad pas ri lu'i du ba brngub par bya'o/ /bcom ldan 'das kyis dge slong nad pas ri lu'i du ba brngub par bya'o zhes bka' stsal pa dang / dge slong rnams de bzhin du rngub pa dang ma legs nas/ bcom ldan 'das kyis bka' stsal pa/ kham phor bu ga phug la/ kham phor kha sbyar nas rngubs shig /'on kyang ma legs nas bcom ldan 'das kyis bka' stsal pa/ sbu gu can gyis rngubs shig /de rnams kyi smyug ma'i sbu gus brngubs pa dang / nyes dmigs de nyid du gyur nas/ bcom ldan 'das kyis bka' stsal pa/ smyug ma'i sbu gus brngub par mi bya'i/ 'on kyang lcags kyi sman gce'u bya'o/ /ha cang thung ba byed nas/ bcom ldan 'das kyis bka' stsal pa/ ha cang thung ngur mi bya'o/ /ha cang ring por byed nas/ bcom ldan 'das kyis bka' stsal pa/ ha cang ring por mi bya'i/ 'on kyang sor bcu gnyis kyi tshad du bya'o/ /de dag rnon por byed nas/ bcom ldan 'das kyis bka' stsal pa/ rnon por mi bya'o/ /rtsub por byed nas bcom ldan 'das kyis bka' stsal pa/ rtsub por mi bya'o/ /de bab bab tu 'jog nas bcom ldan 'das kyis bka' stsal pa/ bab bab tu gzhag par mi bya'i/ 'on kyang snod du bcug ste gzhag par bya'o/ /de rnams kyi snod du bcug ste sa la 'jog pa dang / bcom ldan 'das kyis bka' stsal pa/ snod sa la gzhag par mi bya'i/ 'on kyang zung nga 'am/ gos kyi rdang la gdags par bya'o/ /de btsas khyer nas bcom ldan 'das kyis bka' stsal pa/ mar dkar ram 'bru mar gyis bskus te gzhag par bya'o/ /dgos pa byung ba'i tshe de bkrus pa dang / bcom ldan 'das kyis bka' stsal pa/ bkru bar mi bya'i/ 'on kyang mer gzhug par bya ste/ de nyid de'i bkru ba yin no/ / sdom ni/ bsogs pa dang ni khrus rtsi dang / /snar glugs spyad dang btung phor dang / /khyogs dang chab khung sa dag dang / /chu dang bkru ba'i sa yin no/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong nad pa zhig sman pa'i drung du song nas bzhin bzangs sman ston cig ces byas pa dang / des smras pa/ 'phags pa bsogs pa'i khrus kyis khrus mdzod cig dang sos par 'gyur ro/ /des smras pa/ bzhin bzangs bcom ldan 'das kyis ma gnang ngo / /khyod kyi ston pa ni thugs rje can yin pas gnang bar 'gyur ro/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ gal te sman pas bstan na bsogs pa'i khrus kyis khrus bya ste/ khrus bya ba 'di la 'gyod par mi bya'o/ /bcom ldan 'das kyis bsogs pa'i khrus kyis khrus bya'o zhes bka' stsal pa dang / dge slong rnams kyis bsogs pa'i khrus ji lta bu yin pa ma shes nas/ de rnams yang sman pa'i drung du song ste/ de rnams kyis smras pa/ bzhin bzangs bcom ldan 'das kyis gnang na/ bsogs pa'i khrus ji lta bu yin pa ston cig / des smras pa/ 'phags pa bdag gis kyang mi shes te/ bdag gi 'khor los sgyur ba'i gso ba'i spyad las bsogs pa'i khrus shes bya ba bton na/ de ni ji lta bu yin pa ni mi shes so/ /'on kyang khyed nyid kyi ston pa thams cad mkhyen pa yin pas de nyid kyis mkhyen gyis song la de nyid la zhus shig / skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ rlung 'byin pa'i rtsa ba dang / sdong bu dang / me tog dang / 'bras bu gang dag yin pa de dag bskol nas khrus bya'o/ /dge slong rnams kyis de dag bskol te khrus byas pa dang / de rnams rtsub por gyur to/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ snum bsku bar bya'o/ /de rnams kyis bskus pa dang / ha cang snum ches pas gnas mal dag ma rung bar gyur pa dang / bcom ldan 'das kyis bka' stsal pa/ khrus rtsis bkru bar bya'o/ /de rnams de bzhin du rtsub por gyur nas/ bcom ldan 'das kyis bka' stsal pa/ chu'i bum pa tha ma'i nang du 'bru mar thigs pa gsum 'am/ gnyis blugs par bya'o/ /sangs rgyas bcom ldan 'das rgyal po'i khab na 'od ma'i tshal bya ka lan da ka gnas pa na bzhugs so/ /tshe dang ldan pa pi lin da'i bu gang nas rab tu byung ba de tshun chad rtag tu na nas tshangs pa mtshungs par spyod pa rnams de'i drung du song ste/ gnas brtan bde 'am zhes dris pa dang / tshe dang ldan pa dag bdag na ste mi bde'o/ /gnas brtan khyod ci na/ tshe dang ldan pa dag bdag cham pa bdo'o/ /gnas brtan sman cung zad mdzod cig / tshe dang ldan pa dag sngon bdag gis snar blugs pa'i las byas so/ /gnas brtan ci ste mi byed/ bcom ldan 'das kyis ma gnang ngo / /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis snar glugs pa'i las bya'o/ /bcom ldan 'das kyis snar glugs pa'i las bya'o zhes bka' stsal pa dang / dge slong rnams de bzhin du snar glugs pa dang / bo nas bcom ldan 'das kyis bka' stsal pa/ de bzhin du glugs par mi bya'o/ /dge slong rnams kyis lo ma'i phur mas glugs pa dang / nyes dmigs de nyid du gyur nas/ bcom ldan 'das kyis bka' stsal pa/ lo ma'i phur mas glugs par mi bya'o/ /dge slong rnams kyis chos gos kyi grwas glugs pa dang / nyes dmigs de nyid du gyur nas/ bcom ldan 'das kyis bka' stsal pa/ chos gos kyi grwas glugs par mi bya'i/ 'on kyang snar glugs pa'i spyad kyis glugs par bya'o/ /dge slong rnams snar glugs pa'i spyad mchu gcig pa byed nas/ bcom ldan 'das kyis bka' stsal pa/ snar glugs pa'i spyad mchu gnyis pa bya'o/ /dge slong rnams mchu rnon por byed nas/ bcom ldan 'das kyis bka' stsal pa/ mchu rnon por mi bya'o/ /dge slong rnams lag pa ma bkrus par glugs nas/ bcom ldan 'das kyis bka' stsal pa/ lag pa dag bkrus te byin len byas nas glugs par bya'o/ /sangs rgyas bcom ldan 'das rgyal po'i khab na 'od ma'i tshal bya ka lan da ka gnas pa na bzhugs so/ /tshe dang ldan pa pi lin da'i bu gang nas rab tu byung ba de tshun chad rtag tu na nas tshangs pa mtshungs par spyod pa rnams de'i drung du song ste/ gnas brtan bde 'am zhes dris pa dang / des smras pa/ bdag na ste mi bde'o/ /gnas brtan khyod ci na/ tshe dang ldan pa dag gnang ngo / /gnas brtan sman cung zad mdzod cig /tshe dang ldan pa dag bdag gis sngon phul ba'i btung phor bcangs so/ / gnas brtan da ci ste mi bcang / bcom ldan 'das kyis ma gnang ngo / /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis phul ba'i btung phor bcang bar bya'o/ /sangs rgyas bcom ldan 'das rgyal po'i khab na 'od ma'i tshal bya ka lan da ka gnas pa na bzhugs so/ /tshe dang ldan pa pi lin da'i bu'i gnyen dag 'ongs pa dang / des 'ongs pa de dag la chos bstan nas de rnams khyim du song ste chung ma dag la smras pa/ 'phags pa pi lin da'i bus chos snyan cing snyan pa dag bshad de/ bdag cag gis de mnyan nas 'ongs so/ /de dag gis smras pa/ khyed ni sangs rgyas byung ba 'bras bu dang bcas pa yin no/ /ci'i phyir de dag gis smras pa/ khyed kyis 'phags pa pi lin da'i bu la chos snyan cing snyan pa dag mnyan pas so/ /khyed kyang ci'i phyir mi nyan/ bdag cag ni ngo dman pa ste ngo tsha'o/ /'on kyang gal te 'phags pa 'dir gshegs te bshad na bdag cag gis kyang mnyan to/ /gal te de lta na 'phags pa la bya'o/ /de dag gis smras pa/ legs so/ /de rnams kyis de'i drung du song nas/ 'phags pa bud med dag chos nyan par 'tshal lo zhes byas pa dang / des smras pa/ shes ldan dag nyan la rag mod/ ci kho bos bkag gam/ de rnams kyis smras pa/ 'phags pa bud med kyi mchid nas bdag cag ngo tsha ste/ gal te 'phags pa 'dir gshegs nas bshad na bdag cag kyang nyan to zhes mchi'o/ /des smras pa/ shes ldan dag bdag na ba ma song ste bshad mi nus so/ /'phags pa khyogs 'tshal te mchis des gshegs shig /bzhin bzangs bcom ldan 'das kyis ma gnang na ji ltar 'gro/ skabs de dge slong rnams kyis thos nas/ bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis bzhon pas 'gro bar bya'o/ /bcom ldan 'das kyis bzhon pas 'gro bar bya'o zhes bka' stsal pa dang / tshe dang ldan pa pi lin da'i bu lhan cig gnas pa dang / nye gnas dag gis bskor te khyogs su zhugs nas chos ston du chas pa drug sde rnams kyis mthong nas/ de rnams kyis de'i lhan cig gnas pa dang / nye gnas dag la dris pa/ shes ldan dag 'gro ba 'di su zhig / de rnams kyis smras pa/ mkhan po'o/ /ci bcom ldan 'das kyis khyogs gnang ngam/ gnang ngo / /bcom ldan 'das kyis dgongs pa ni bzang ste/ shAkya skyid de ba 'di rnams rkang gis 'gro bar mi nus pas rnam pa thams cad du bdag cag la brtse bar mdzad do/ /de dag song ba dang / drug sde rnams kyis smras pa/ dga' bo nye dga' bo bdag cag ci ste 'khod/ khyogs bya'o/ /legs te de bzhin bya'o zhes de rnams kyis rnga ma dang dril bu la sogs pas mdzes par byas pa'i khyogs byas so/ /de nas de rnams zhugs nas srang gi nang du 'jig rten la bu bzhin du rlom zhing chas pa dang / bram ze dang khyim bdag rnams kyis smras pa/ shes ldan dag 'di ci zhig /bcom ldan 'das kyis bzhon pa gnang ngo / /'phags pa ci dge sbyong khyed kyang 'dod pa'i yon tan dag gis gnang ngam/ de dag cang mi smra bar 'dug go/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong mi na ba bzhon pas 'gro bar mi bya'o/ /dge slong mi na ba bzhon pas 'gro na 'gal tshabs can du 'gyur ro/ /'on kyang bzhon pas 'gro ba ni gnyis te/ rgas 'khogs pa nyam chung ba dang / nad pa sbyor mi bzod pa'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na khyim bdag dad pa can zhig 'dug pa de bram ze ma dad pa zhig dang lhan cig rgyal bu rgyal byed kyi tshal du song ste/ dad pa can gyis de la nye ba'i tshal bstan par brtsams so/ /de phan tshun 'khyam 'khyam pas shing drung na ngan skyugs shig mthong nas/ des smras pa/ grogs po dge sbyong shAkya'i bu'i rnams ni gtsang sbra med pa ste/ me tog dang 'bras bu'i shing gi drung du bshang ba dang gci ba byed do/ /des smras pa/ grogs po bdag nyid chen po de dag ni de ltar mi byed kyi gdon mi za bar khyim pa 'ga' zhig gis byas so/ /de dag de skad du smra ba na rgan zhugs zhig mgo gos kyis bkris nas shing drung du bshang ba bya bar brtsams pa dang / de bram ze ma dad pa des mthong nas smras pa/ grogs po khyed cag na re khyim pas byas so zhes mi zer ram/ dge sbyong mgo gos kyis dkris te shing drung na bshang ba byed pa 'o ni la ltos shes byas pa dang / de skyengs nas cang mi smra bar 'dug go/ /des skabs de dge slong rnams la bsnyad do/ /dge slong rnams kyis bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni dge slong rnams shing drung du bshang ba byed pa las gyur gyis/ de lta bas na dge slong gis shing drung du bshang ba dang gci ba mi bya'o/ /byed na 'gal tshabs can du 'gyur ro/ /bcom ldan 'das kyis shing drung du bshang ba dang gci ba mi bya'o zhes bka' stsal pa dang / dge slong dag lam du zhugs te dong ba dang / ji tsam du 'brog cig tu phyin to/ /de na dge slong kha cig bshang ba bro'o/ /kha cig ni gci ba bro na de rnams shing 'di dag 'dab chags pa'o snyam nas bshang ba yang ma byas gci ba yang ma byas pas de rnams na bar gyur to/ / skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dgon pa'i shing 'dab chags pa gang yin pa der ni bshang ba dang gci ba bya ste 'di la 'gyod par mi bya'o/ /bcom ldan 'das kyis dgon par bshang ba dang gci ba dag bya'o zhes bka' stsal pa dang / grong mtha'i dge slong rnams mi byed de/ ji tsam na dpyid kyi dus la bab pa dang bshang ba dang gci ba byed cing nyi ma la bshang ba dang gci ba byed pas rmya bar gyur pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis shing tsher ma can gang dag yin pa de dag gi drung du bshang ba dang gci ba bya ste/ 'di la 'gyod par mi bya'o/ / gang gi tshe nye dgas la phug gi ra ba bshang bas ma rung bar byas pa de'i tshe bcom ldan 'das kyis bka' stsal pa/ dge slong gis rtswa sngon po yod par bshang ba dang gci ba mi bya'o/ /dge slong rnams rtsa sngon po med pa'i sa phyogs su bshang ba dang gci ba byas pas de mi gtsang bas gang bar gyur pa dang / bram ze dang khyim bdag rnams kyis mthong nas/ 'phya bar byed/ smod par byed de/ dge sbyong shAkya'i bu 'di rnams kyi chos re bzang ji ltar gcig tu 'dus nas za ba de kho na bzhin du bshang ba dang gci ba byed do zhes zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis bshang ba'i sa bya'o/ /dge slong rnams kyis byang dang nub kyi ngos su bshang ba'i khang pa bya bar brtsams pa dang / de dag gis ji lta bu bya ba ma shes nas/ bcom ldan 'das kyis bka' stsal pa/ chab kung sa ni rnam pa gnyis su bya ste/ khang bu lta bu dang ba gam lta bu'o/ /de la khang bu lta bu ni gru bzhir byas la dbus su gdung bres la khung bu gdod cing wa gzhug par bya'o/ /ba gam lta bu yang gdung phyir phyung la bya ste/ de'i 'og tu shing tsher ma can bskyed do/ /chab khung sar chab kung sa'i khung bu'i steng du chab kung sa'i rkang rten gzhag par bya/ ril ba spyi lugs gzhag pa'i gnas bya zhing / sgo bsnol mar gtod la sgo 'phar dang sgo gtan dag kyang gzhug par bya'o/ /gal te gcig nang du zhugs par gyur na cig shos kyis sgra dbyung bar bya zhing / gal te sdod na nang du 'jug par bya'o/ /nang na gnas pas kyang sgra dbyung bar bya'o/ /dri mi zhim par gyur na khang skyong gis nyin gcig bzhin sbyang bar bya zhing / sa dang lo ma dag kyang gzhag par bya ste/ de lta bas na chab khung sa 'khor dang bcas pa rjes su gnang ngo // //'dul ba phran tshegs kyi gzhi/ bam po bcu pa/ sdom ni/ gci ba'i sa dang snod spyad dang / /ston pa la ni dga' nyid dang / /bza' ba lnga dang 'o ma dang / /zho dang zas dang gnang ba'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bcom ldan 'das kyis chab khung sa 'khor dang bcas pa bya'o zhes bka' stsal pa dang / dge slong dag de nyid du gci bar byed pa na/ dge slong gzhan dag bshang ba bro bas mi bde zhing de dag bgags pas na bar gyur nas/ bcom ldan 'das kyis bka' stsal pa/ gci ba'i gnas logs shig tu bya'o/ /dge slong dag phyogs gang du ji lta bur bya ba mi shes nas bcom ldan 'das kyis bka' stsal pa/ de nyid dang nye bar ba gam lta bu bya ste/ wa bcug la sgo gdod cing sgo 'phar dang sgo gtan gzhug par bya ste/ chab khung sa ji lta bar thams cad snga ma bzhin du bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /so ga'i dus kyi tshe bram ze zhig skom pas nyam thag ste/ chu 'dod nas gtsug lag khang du zhugs te de dge slong zhig gi gan du song nas/ des smras pa/ dge slong dag skom na chab stsal du gsol/ des ril ba blangs nas song ste des smras pa/ bram ze 'thung shig /des smras pa/ 'phags pa gtsang sbra ni tha dad pa lags na/ kye ma'o khyed kyi chab snod bzhag la/ de nas dge sbyong ngam/ bram ze dag blud na ci nongs/ khyed bsod nams la mi sbyor ram/ skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge 'dun gyi chu snod gzhag par bya'o/ /bcom ldan 'das kyis dge 'dun gyi chu snod gzhag par bya'o zhes bka' stsal pa dang / khyim bdag cig gis bcom ldan 'das kyis dge 'dun gyi chu snod gzhag par gnang ngo zhes thos nas/ des rdza mkhan gyis byas pa'i snod spyad gtsug lag khang gi nang du spungs te/ de las kun dga' ra ba pa dang / khyim pa gzhan dag gis kyang gang dang gang 'dod pa khyer nas dong ste/ dge slong rnams kyis ma bkag pas snod spyad de dag zad nas/ dge slong dag gis khyim bdag de la smras pa/ bzhin bzangs snod spyad dag zad kyis gzhan dag byin cig /des smras pa/ 'phags pa dag bdag gis mang po rab tu phul na ci'i slad du ring por ma thogs pa kho nar bas par gyur/ de dag gis ji ltar gyur pa brjod pa dang / des smras pa/ 'phags pa dag yal bar bor ba gang lags pa ni ma legs pa zhig bgyis te/ de dag bdag gis khyim pa rnams la ni ma stsal to zhes zer ba'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ de bzhin yal bar dor bar mi bya'o/ /'on kyang snod spyad 'brub pa bsko bar bya'o/ /dge slong rnams kyis bye brag med par bskos nas/ bcom ldan 'das kyis bka' stsal pa/ snod spyad 'brub pa chos lnga dang ldan pa ni ma bskos pa yang bsko bar mi bya la bskos pa yang dbyung bar bya ste/ lnga gang zhe na/ 'dun pas 'gro ba dang / zhe sdang gis 'gro ba dang / gti mug gis 'gro ba dang / 'jigs pas 'gro ba dang / snod spyad brubs pa dang / ma brubs pa mi shes pa'o/ /snod spyad 'brub pa chos lnga dang ldan pa ni ma bskos pa yang bsko bar bya la/ bskos pa yang dbyung bar mi bya ste/ lnga gang zhe na/ 'dun pas mi 'gro ba dang / zhe sdang gis mi 'gro ba dang / gti mug gis mi 'gro ba dang / 'jigs pas mi 'gro ba dang / snod spyad brubs pa dang ma brubs pa shes pa'o/ /bsko ba yang 'di ltar bya ste/ gnas mal bsham par byas la gaN DI brdungs nas zhes bya ba nas/ spro bar bya ste zhes bya ba'i bar du snga ma bzhin no/ /ming 'di zhes bya ba khyod dge 'dun gyi snod spyad 'brub par spro 'am/ gal te spro na des spro'o zhes brjod par bya'o/ /de'i 'og tu dge slong gcig gis gsol ba byas nas las bya ste/ dge 'dun btsun pa rnams gsan du gsol/ dge slong ming 'di zhes bgyi ba dge 'dun gyi snod spyad 'brub par spro na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis dge slong ming 'di zhes bgyi ba 'di dge 'dun gyi snod spyad 'brub par bsko bar bgyi ste/ dge slong ming 'di zhes bgyi ba 'di dge 'dun gyi snod spyad 'brub bo/ /'di ni gsol ba'o/ /las kyang 'di ltar bya ste/ dge 'dun btsun pa rnams gsan du gsol/ dge slong ming 'di zhes bgyi ba 'di dge 'dun gyi snod spyad 'brub par spro ste/ de'i slad du dge slong ming 'di zhes bgyi ba 'di dge 'dun gyi snod spyad 'brub par bsko na/ tshe dang ldan pa gang dag dge slong ming 'di zhes bgyi ba 'di dge 'dun gyi snod spyad 'brub par bsko bar bzod pa de dag ni cang ma gsung shig /gang dag mi bzod pa de dag ni gsungs shig /dge 'dun gyis bzod cing gnang nas dge 'dun gyis dge slong ming 'di zhes bgyi ba 'di dge 'dun gyi snod spyad 'brub par bskos lags te/ 'di ltar cang mi gsung bas de de bzhin du 'dzin to/ /des dge slong rnams la ni snod spyad rnying pa dag sbyin zhing / khyim pa rnams la ni sar pa dag sbyin par byed nas/ bcom ldan 'das kyis bka' stsal pa/ dge slong rnams la sar pa dag sbyin par bya zhing / khyim pa rnams la ni rnying pa dag sbyin par bya'o/ /de khyim pa rnams la byin pa ni phyir len par mi byed cing / dge slong rnams las ni phyir len nas/ bcom ldan 'das kyis bka' stsal pa/ khyim pa rnams la byin pa ni blang bar bya'i/ dge slong rnams la ni ma yin no/ /phyi rol du bzhag pas de dag 'khyams par gyur nas/ bcom ldan 'das kyis bka' stsal pa/ snod spyad kyi mdzod cig byas la der rdza mkhan gyis byas pa'i snod spyad rnams gzhag par bya'o/ /bcom ldan 'das kyis snod spyad kyi mdzod cig byas la/ der rdza mkhan gyis byas pa'i snod spyad rnams gzhag par bya'o zhes bka' stsal pa dang / ji tsam na byang phyogs nas 'dron pa zhig 'ongs nas des dge 'dun la zla ba gsum du yo byad thams cad kyis bstabs te/ des bsams pa/ bdag gis dge 'dun la yo byad brnyan pos ci'i phyir bsnyen bkur bya/ ma la bdag nyid kyi snod spyad kyis bsnyen bkur bya'o snyam nas des zangs kyi snod spyad mang po nye bar bzhag go/ /de nas yo byad mang pos bcom ldan 'das dge slong gi dge 'dun dang thabs gcig zla ba gsum du ston mo gsol nas/ mjug tshod kyi ston mo byas nas chas so/ / de 'gro ba'i tshe zangs kyi snod spyad de dag thams cad dge 'dun la phul nas/ dge slong dag gis mdzod de nyid du rdza mkhan gyis byas pa'i snod spyad dang lhan cig bzhag pa dang / zangs kyi snod spyad kyis bsngos te rdza mkhan gyis byas pa'i snod spyad rnams chag nas/ bcom ldan 'das kyis bka' stsal pa/ zangs kyi snod spyad rnams gud du gzhag cing / rdza mkhan gyis byas pa'i snod spyad rnams kyang gud du gzhag par bya'o/ /ji tsam na bram ze zhig skom pas nyen nas dze ta'i tshal du song ste de dge slong zhig gi gan du phyin nas smras pa/ kye dge slong bdag skom na bdag la chab stsal du gsol/ des de la bum pa dang srad bu dag byin pa dang / des smras pa/ 'phags pa 'dis ci bgyi/ chab stsal du gsol/ des smras pa/ bram ze chu bcus zin pa med do/ /'phags pa khyed ni sems can thams cad la phan par zhugs pa lags pas kye ma'o khyed kyis chab nye bar bzhag kyang ci ma rung / des smras pa/ bcom ldan 'das kyis ma gnang ngo / /skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge 'dun gyis chu nye bar gzhag par bya'o/ /dge slong dag gis khyams dang / gnas khang dang / gtsug lag khang gi nang dang / sgo khang dang bang rim dag tu bab bab tu bzhag nas/ bcom ldan 'das kyis bka' stsal pa/ khyams dang / gnas khang dang / gtsug lag khang gi nang dang / sgo khang dang / bang rim dag tu bab bab tu gzhag par mi bya'i/ 'on kyang chu'i khang pa bya'o/ /bcom ldan 'das kyis chu'i khang pa bya'o zhes bka' stsal pa dang / dge slong dag gis phyogs gang du ji lta bu bya ba mi shes nas/ bcom ldan 'das kyis bka' stsal pa/ gtsug lag khang gi nang lho dang nub kyi ngos su chu'i khang pa bya'o/ /mun gnag par gyur nas/ bcom ldan 'das kyis bka' stsal pa/ skar khung dag gdod par bya'o/ /rdzab chags par gyur nas/ bcom ldan 'das kyis bka' stsal pa/ so phag gi gcal dgram par bya zhing stor khung gdod par bya'o/ /sgo gdod par bya zhing sgo glegs dang yang ming kyang gzhug par bya'o/ /chu sa la 'jog par byed nas/ bcom ldan 'das kyis bka' stsal pa/ shing gi khri la gzhag par bya'o/ /shing dag med nas bcom ldan 'das kyis bka' stsal pa/ so phag gi stegs bu byas la de'i steng du rten ma bya zhing bum pa gzhag par bya'o/ /bum pa'i nang gi chu rul nas bcom ldan 'das kyis bka' stsal pa/ bcom ldan 'das kyis dus dus su bum pa bkru bar bya'o zhes bka' stsal pa dang / dge slong dag gis cis bkru ba mi shes nas/ bcom ldan 'das kyis bka' stsal pa/ shing la pu shel tsi'i khrud shing ngam/ lo ma sbams pa 'am/ ras ma'i thum po bcings nas rung bar bya ste bkru bar bya'o/ /'on kyang chu rul ba nyid du gyur nas/ bcom ldan 'das kyis bka' stsal pa/ bum pa dag la phyed ni bkru bar bya zhing / phyed du chu glugs par bya'o/ /bcom ldan 'das kyis chu glugs par bya'o zhes bka' stsal pa dang / dge slong dag gis sus chu glugs pa mi shes nas/ bcom ldan 'das kyis bka' stsal pa/ gnas pa dag gis chu glugs par bya ste/ de lta bas na chu'i khang pa 'khor dang bcas pa gnang ngo / /sangs rgyas bcom ldan 'das ser skya'i gnas na shing n+ya gro d+hA'i kun dga' ra ba na bzhugs so/ /de nas skye dgu'i bdag mo chen mo gau ta mI 'khor lnga brgya dang / bcom ldan 'das ga la ba der song ste phyin nas bcom ldan 'das kyi zhabs gnyis la mgo bos phyag 'tshal te/ phyogs gcig tu 'dug go/ /skye dgu'i bdag mo chen mo gau ta mI 'dug pa dang / bcom ldan 'das kyis chos dang 'thun pa'i gtam gyis shes bya ba nas/ bcom ldan 'das sbrid pa byung zhes bya ba'i bar snga ma bzhin no/ /de nas skye dgu'i bdag mo chen mo gau ta mis bcom ldan 'das la 'di skad ces gsol to/ /bdag gi bcom ldan 'das yun ring du 'tsho zhing thub pa chen po bskal par bzhugs par gyur cig /skye dgu'i bdag mo chen mo gau ta mi'i sgra thos nas/ dge slong ma lnga brgya po dag gis kyang de kho na skad du bcom ldan 'das yun ring du 'tsho zhing thub pa chen po bskal par bzhugs par gyur cig ces smras so/ /dge slong ma lnga brgya po dag gi sgra sa bla pa'i gnod sbyin dag gis thos nas bcom ldan 'das yun ring du 'tsho zhing thub pa chen po bskal par bzhugs par gyur cig ces sgra 'byin cing dbyangs sgrogs par byed do/ /sa bla pa'i gnod sbyin gyi sgra nam mkha' la gnas pa'i gnod sbyin dang / rgyal chen bzhi'i ris kyi lha rnams dang / sum bcu rtsa gsum dang / 'thab bral dang / dga' ldan dang / 'phrul dga' dang / gzhan 'khrul dbang byed kyi lha rnams kyis thos nas/ skad cig de dang / thang cig de dang / yud tsam de dang / skad cig dang / thang cig dang / yud tsam de la tshangs pa'i 'jig rten gyi bar du sgra grag par gyur nas/ tshangs ris kyi lha rnams kyis bcom ldan 'das yun ring du 'tsho zhing thub pa chen po bskal par bzhugs par gyur cig ces sgra 'byin cing dbyangs sgrogs par byed do/ /de nas bcom ldan 'das kyis skye dgu'i bdag mo chen mo gau ta mi la 'di skad ces bka' stsal to/ /gau ta mi khyod kyis sems can mang po'i bar chad byas te/ gau ta mi khyod kyi sgra dge slong ma lnga brgya po dag gis thos nas de bzhin du sgra sgrogs par byed cing / dge slong ma lnga brgya po dag gis sgra sa bla pa'i gnod sbyin dang nam mkha' la gnas pa'i gnod sbyin dang / rgyal chen bzhi'i ris kyi lha rnams dang / sum bcu rtsa gsum pa dang / mthab bral dang / dga' ldan dang / 'phrul dga' dang / gzhan 'phrul dbang byed kyi lha rnams kyis thos nas/ skad cig de dang / thang cig de dang / yud tsam de dang / skad cig dang / thang cig dang / yud tsam de la tshangs pa'i 'jig rten gyi bar sgras khyab par gyur cing / tshangs ris kyi lha rnams kyis kyang de kho na bzhin sgra phyung mod kyi/ gau ta mi de bzhin gshegs pa dgra bcom pa yang dag par rdzogs pa'i sangs rgyas la ni de ltar phyag mi bya ste/ de ltar phyag byas pa ni legs par phyag byas pa ma yin no/ /btsun pa de bzhin gshegs pa dgra bcom pa yang dag par rdzogs pa'i sangs rgyas la phyag ji ltar bgyi/ phyag ji ltar bgyis na legs par phyag bgyis par 'gyur/ gau ta mi de bzhin gshegs pa dgra bcom pa yang dag par rdzogs pa'i sangs rgyas la ni 'di ltar phyag bya ste/ bdag gi bcom ldan 'das nyan thos kyi dge 'dun dang bcas te 'thun kun du dga'/ mi rtsod rtse gcig /'don pa gcig cing chu dang 'o ma gcig tu 'dres pa lta bur gyur la/ ston pa'i bstan pa gsal ba mthong bar gyur cig ces de ltar de bzhin gshegs pa dgra bcom pa yang dag par rdzogs pa'i sangs rgyas la phyag bya ste/ de ltar phyag byas na legs par phyag byas par yang 'gyur ro/ /de'i tshe dge slong zhig gis tshigs su bcad de smras pa/ skye dgu'i bdag chen gau ta mis/ /ston pa'i zhabs la phyag 'tshal te/ /bdag gi bcom ldan ring du bzhugs/ /thub chen bskal par bzhugs gyur cig /de yis ston la de skad gsol/ /sru la 'di skad bka' stsal te/ /gau tam ji ltar phyag byas pa/ /de bzhin gshegs la phyag byas min/ /shes rab ldan pa ji ltar du/ /de bzhin gshegs la phyag bgyis na/ /ji ltar legs par phyag bgyis 'gyur/ /zhus pa bdag la bstan du gsol/ /brtson 'grus brtsams pa bdag nyid brtson/ /rtag tu pha rol gnon brtan pa'i/ /nyan thos 'thun pa lta phyed pa/ /de ni sangs rgyas phyag 'tshal yin/ /skye dgu'i bdag mo chen mo gau ta mis bsams pa/ bcom ldan 'das ni dge 'dun 'thun pa'i bsngags pa brjod par mdzad de/ de'i phyir ji srid bcom ldan 'das bzhugs shing dge slong gi dge 'dun 'thun pa de'i tshe bdag yongs su mya ngan las 'da' bar bya'o snyam du rig nas stan las langs te bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to/ /btsun pa bdag bsams bzhin du yongs su mya ngan las 'da' bar 'tshal lo/ /de skad ces gsol pa dang / bcom ldan 'das cang mi gsung bar bzhugs nas/ skye dgu'i bdag mo chen mo gau ta mis bcom ldan 'das la lan gnyis lan gsum du 'di skad ces gsol to/ /btsun pa bdag bsams bzhin du yongs su mya ngan las 'da' bar 'tshal lo/ /bcom ldan 'das lan gnyis lan gsum du cang mi gsung bar bzhugs nas/ skye dgu'i bdag mo chen mo gau ta mis yang bcom ldan 'das la 'di skad ces gsol to/ /btsun pa bdag bsams bzhin du yongs su mya ngan las 'da' bar 'tshal lo/ /de skad ces gsol pa dang / bcom ldan 'das kyis skye dgu'i bdag mo chen mo gau ta mi la 'di skad ces bka' stsal to/ /gau ta mi mya ngan las 'da' ba'i phyir smra 'am/ bcom ldan 'das mya ngan las 'da' ba'i slad du'o/ /gau ta mi mya ngan las 'da' ba'i phyir smra 'am/ bde bar gshegs pa mya ngan las 'da' ba'i slad du'o/ /gau ta mi khyod mya ngan las 'da' ba'i phyir smra na/ gau ta mi 'dus byas thams cad ni de lta bu'i chos can yin na ngas smra ci dgos/ dge slong ma lnga brgya po de dag gis kyang bcom ldan 'das kyi zhabs gnyis la mgo bos phyag 'tshal nas 'di skad ces gsol to/ /btsun pa bdag cag kyang bsams bzhin du yongs su mya ngan las 'da' bar 'tshal lo/ /bcom ldan 'das kyis bka' stsal pa/ gau ta mi dag mya ngan las 'da' ba'i phyir smra 'am/ bcom ldan 'das mya ngan las 'da' ba'i slad du'o/ /gau ta mi dag mya ngan las 'da' ba'i phyir smra 'am/ bde bar gshegs pa mya ngan las 'da' ba'i slad du'o/ /gau ta mi dag khyed mya ngan las 'da' ba'i phyir smra na 'dus byas thams cad ni de lta bu'i chos can yin pas ngas smra ci dgos/ de nas skye dgu'i bdag mo chen mo gau ta mi bcom ldan 'das kyis gsungs pa la mngon par dga' zhing rjes su yi rangs nas bcom ldan 'das kyi zhabs gnyis la mgo bos phyag 'tshal te song ngo / /tshe dang ldan pa dga' bo dang / ma 'gags pa dang / sgra gcan zin dang / tshe dang ldan pa kun dga' bo ga la ba der song ste phyin nas/ tshe dang ldan pa kun dga' bo'i rkang pa gnyis la phyag 'tshal te/ tshe dang ldan pa kun dga' bo la 'di skad ces smras so/ /btsun pa bdag cag bsams bzhin du yongs su mya ngan las 'da' bar 'tshal lo/ /gau ta mi dag khyed mya ngan las 'da' ba'i phyir smra 'am/ btsun pa kun dga' bo mya ngan las 'da' ba'i slad du'o/ /gau ta mi dag mya ngan las 'da' ba'i phyir smra 'am/ btsun pa kun dga' bo mya ngan las 'da' ba'i slad du'o/ / gau ta mi dag khyed mya ngan las 'da' ba'i phyir smra na sring mo dag 'dus byas rnams ni de lta bu'i chos can yin pas nged kyis smra ci dgos/ de nas skye dgu'i bdag mo chen mo gau ta mi dang / 'khor dge slong ma lnga brgya dge slong gnas brtan gnas brtan dag gi rkang pa gnyis la/ mgo bos phyag 'tshal te dbyar khang du song ngo / /der 'khor gsum po dag gi rnam pa la brtags nas nyin zhag bdun du gang thos nas sems can mang pos khyad par chen po thob pa de lta bu'i chos bstan to/ /de nas sa phyogs bar skabs yangs pa zhig tu dge slong ma'i dge 'dun gyi gung la skyil mo dkrung phyed bcas nas 'dug go/ /dge slong ma de dag kyang de bzhin du 'dug go/ /de nas skye dgu'i bdag mo chen mo gau ta mi ting nge 'dzin 'di lta bu la snyoms par zhugs te/ gang la sems mnyam par bzhag na rang gi stan las mi snang bar gyur cing / shar phyogs kyi steng gi nam mkha' la mngon par 'phags nas spyod lam rnam pa bzhi po 'chag pa dang / 'greng ba dang / 'dug pa dang / nyal ba dag ston par byed cing me'i khams la yang snyoms par zhugs so/ /me'i khams la snyoms par zhugs nas/ skye dgu'i bdag mo chen mo gau ta mi'i lus las 'od zer rnam pa sna tshogs 'di lta ste/ sngon po dang / ser po dang / dmar po dang / dkar po dang / btsod kha dang / shel gyi kha dog lta bu dag ston par byed cing cho 'phrul zung dag kyang ston par byed de/ lus kyi smad nas me 'bar la/ lus kyi stod nas chu grang mo'i rgyun 'byung ba dang / lus kyi stod nas me 'bar la/ lus kyi smad nas chu grang mo'i rgyun 'byung bar byed do/ /shar phyogs su ji lta ba de bzhin du lho dang / nub dang / byang gi phyogs su yang de bzhin byed de/ 'di ltar phyogs bzhir rdzu 'phrul gyi cho 'phrul rnam pa bzhi po dag ston par byed cing bsam gtan dang po la snyoms par zhugs so/ /dge slong ma lnga brgya po de dag kyang bsam gtan dang po la snyoms par zhugs so/ /bsam gtan dang po las langs nas bsam gtan gnyis pa la/ gnyis pa las bsam gtan gsum pa la/ gsum pa las bsam gtan bzhi pa la/ bzhi pa las nam mkha' mtha' yas skye mched la/ nam mkha' mtha' yas skye mched las rnam shes mtha' yas skye mched la/ rnam shes mtha' yas skye mched las ci yang med pa'i skye mched la/ ci yang med pa'i skye mched las 'du shes med 'du shes med min skye mched la snyoms par 'jug cing / 'du shes med 'du shes med min skye mched las langs nas/ yang ci yang med pa'i skye mched la snyoms par zhugs so/ /ci yang med pa'i skye mched las rnam shes mtha' yas skye mched la/ rnam shes mtha' yas skye mched las nam mkha' mtha' yas skye mched la/ nam mkha' mtha' yas skye mched las bsam gtan bzhi pa la/ bzhi pa las gsum pa la/ gsum pa las gnyis pa la/ gnyis pa las bsam gtan dang po la snyoms par zhugs so/ /de nas bsam gtan dang po nyid la brten nas yongs su mya ngan las 'das so/ /dge slong ma lnga brgya po de dag kyang de bzhin du lugs dang 'thun pa dang / lugs las ldog par snyoms par zhugs nas bsam gtan dang po nyid la brten te yongs su mya ngan las 'das so/ /skye dgu'i bdag mo chen mo gau ta mi mya ngan las 'das ma thag tu sa chen po g.yos par gyur cing / skar mda' ltung ba dang / phyogs dmar po dang / bar snang la lha'i rol mo'i sgra dag byung ngo / /de nas dge slong gang ri rab kyi bang rim dang / gzhan yang grong khyer dang / grong rdal dang / yul 'khor dang / rgyal po'i pho brang dang / dben pa'i gnas mal dag na bsam gtan byed pa de dag gis sa chen po g.yos par rig nas sa chen po 'di ci'i phyir g.yos shes bsam pa la zhugs na/ ji tsam na skye dgu'i bdag mo chen mo gau ta mi 'khor lnga brgya dang yongs su mya ngan las 'das par mthong nas/ de dag 'di snyam du sems te/ sangs rgyas kyi sru yongs su mya ngan las 'das na/ de'i lus la mchod pa lhag par bya ba la brtson par byas 'dong ngo snyam nas/ de dag shing dri zhim po dag khyer nas skye dgu'i bdag mo chen mo gau ta mi'i dbyar khang du dong ngo / /bcom ldan 'das kyang nyan thos chen po kun shes kauN+Di n+ya dang / 'od srung chen po dang / rlangs pa dang / ming chen dang / ma 'gags pa dang / shA ri'i bu dang / maud gal gyi bu la sogs pa dang / gzhan yang dge slong gi dge 'dun chen po dag dang thabs gcig tu skye dgu'i bdag mo chen mo gau ta mi'i dbyar khang du gshegs so/ /de bzhin du yul ko sa la'i rgyal po gsal rgyal btsun mo'i 'khor dang / gzhon nu dang / blon po dang / grong mi dang / yul gyi mi rnams kyi 'khor gyis yongs su bskor ba dang / khyim bdag mgon med zas sbyin 'khor gyis yongs su bskor ba dang / ri dgas 'dzin gyi ma sa ga dang / bla mkhyen drang srong byin dang / rnying pa dang / gzhan yang yul sna tshogs nas lhags pa'i skye bo'i tshogs dag kyang skye dgu'i bdag mo chen mo gau ta mi'i dbyar khang du song ngo / /de nas rgyal po gsal rgyal gyis rin po che dang / gos sna tshogs kyis brgyan pa'i khyogs lnga brgya dang / dri dang / bdug spos dang / me tog dang / phreng ba dang / gdugs dang / rgyal mtshan dang / ba dan dang / rol mo'i sgra rnam pa sna tshogs dag phul lo/ /de nas tshe dang ldan pa dga' bo dang / ma 'gags pa dang / kun dga' bo dang / sgra gcan zin gyis skye dgu'i bdag mo chen mo gau ta mi'i khyogs bteg go/ /bcom ldan 'das kyis kyang phyag g.yas pas bzung ngo / /dge slong lhag ma rnams kyis kyang dge slong ma lhag ma rnams kyi khyogs bteg go/ /de nas mchod pa chen po byas te khyer nas sa phyogs bar skabs dben par khyogs rnams bzhag go/ /de nas bcom ldan 'das kyis skye dgu'i bdag mo chen mo gau ta mi dang / dge slong ma lnga brgya po dag gi lus las bla gos phud nas/ dge slong rnams la bka' stsal pa/ dge slong dag skye dgu'i bdag mo chen mo gau ta mi dang / dge slong ma lnga brgya po 'di dag lo brgya nyi shu lon yang lus la gnyer ma dang / skra dkar med cing bu mo lo bcu drug lon pa lta bu la ltos/ de nas yul ko sa la'i rgyal po gsal rgyal btsun mo'i tshogs dang / gzhon nu dang / blon po dang / grong mi dang / yul mi dang bcas pas dri sna tshogs kyi shing gi phung po spungs nas skye dgu'i bdag mo chen mo gau ta mi la sogs pa dge slong ma lnga brgya po dag bsregs so/ /bcom ldan 'das kyis kyang mi rtag pa dang ldan pa'i chos dag bshad nas gtsug lag khang du gshegs so/ /gshegs nas kyang dge slong gi dge 'dun gyi gung la gdan bshams pa nyid la bzhugs so/ /bzhugs nas dge slong rnams la bka' stsal pa/ dge slong dag 'di ltar sbrid pa byung ba la sos shes zer ba la nyes dmigs 'di lta bu dang / gzhan dag kyang yod pas de lta bas na dge slong gis sbrid pa byung ba la sos shes brjod par mi bya'o/ /rjod na 'gal tshabs can du 'gyur ro/ /dge slong rnams the tshom skyes nas the tshom thams cad gcod pa sangs rgyas bcom ldan 'das la zhus pa/ btsun pa skye dgu'i bdag mo chen mo la sogs pa dge slong ma lnga brgya po dag gis las ci zhig bgyis na/ des 'di dag skyes nas dgung lo brgya nyi shu lags kyang lus la gnyer ma dang / skra dkar ma mchis shing bu mo dgung lo bcu drug lon pa lta bu lags/ bcom ldan 'das kyis bka' stsal pa/ dge slong dag skye dgu'i bdag mo chen mo gau ta mi la sogs pa dge slong ma lnga brgya po dag nyid kyis las tshogs rnyed pa/ rkyen yongs su bsgyur ba/ 'od pa bzhin du nye bar gnas pa/ gdon mi za bar myong bar 'gyur ba dag byas shing bsags te/ skye dgu'i bdag mo chen mo la sogs pa dge slong ma lnga brgya po dag nyid kyis las byas shing bsags pa dag gzhan su zhig gis so sor myong bar 'gyur/ dge slong dag las byas shing bsags pa dag ni phyi rol gyi sa'i khams la rnam par smin par mi 'gyur/ chu'i khams la mi 'gyur/ me'i khams la mi 'gyur/ rlung gi khams la mi 'gyur gyi/ 'di ltar las dge ba dang mi dge ba byas shing bsags pa dag ni zin pa'i phung po dang / khams dang / skye mched dag la rnam par smin par 'gyur te/ bskal pa brgya phrag rnams su yang / /las rnams chud zar mi 'gyur te/ /tshogs shing dus la bab pa na/ /lus can rnams la 'bras bur smin/ /dge slong dag sngon byung ba 'das pa'i dus na bskal pa bzang po 'di nyid la skye dgu rnams kyi tshe lo nyi khri thub pa na ston pa 'od srung zhes bya ba 'jig rten du byung ste zhes bya ba nas/ de grong khyer bA rA Na sI na drang srong smra ba ri dgas kyi gnas na rten cing bzhugs so zhes bya ba'i bar snga ma bzhin no/ /gang gi tshe yang dag par rdzogs pa'i sangs rgyas 'od srung gis sangs rgyas kyi mdzad pa mtha' dag mdzad nas shing zad pa'i me bzhin du phung po'i lhag ma med pa'i mya ngan las 'das pa'i dbyings su yongs su mya ngan las 'das pa de'i tshe rgyal po kri ki zhes bya bas de'i sku la sku'i mchod pa byas nas/ lam po che'i bzhi mdor rin po che sna bzhi las byas pa'i mchod rten khor yug tu dpag tshad gcig yod la gnam 'phang du dpag tshad phyed pa byas so/ /rgyal po kri ki'i btsun mo dam pa la sogs pa bud med lnga brgya po de dag rgas pa'i gnas skabs na lus la gnyer ma dang skra dkar byung nas rgyal pos spangs pa dang / de dag phan tshun smra bar brtsams pa/ grogs mo dag lhas da bdag cag ci'i phyir spangs/ de dag las kha cig gis smras pa/ 'di la dpyad du ci yod bdag cag da lus gnyer ma dang skra dkar can du gyur pas de'i phyir bdag cag spangs mod/ gzhan dag gis smras pa/ de ni de lta yin te/ da bdag cag lha la ji zhig bya/ bud med gzugs dang na tshod dang ldan pa gzhan dag yod pa de dag dang lhan cig dga' mgur spyod grang / de'i phyir bcom ldan 'das 'od srung gi mchod rten gyi drung du dong nas mchod pa byas la des na bdag cag phyin chad 'khor bar lus gnyer ma dang skra dkar can du ma gyur cig ces smon lam gdab par bya'o/ /de dag gis smras pa/ legs kyis de bzhin bya'o zhes de dag gis yang dag par rdzogs pa'i sangs rgyas 'od srung gi mchod rten la dri dang / phreng ba dang / byug pa dang / gdugs dang / rgyal mtshan dang / ba dan dag gis mchod pa byas nas me tog rnam pa sna tshogs dri zhim zhing ma rnyis pa'i chun po dang / phreng ba yid du 'ong ba dag btags nas/ bdag cag gis bcom ldan 'das yang dag par rdzogs pa'i sangs rgyas 'od srung gi mchod rten la dri dang / phreng ba dang / byug pa dang / gdugs dang / rgyal mtshan dang / ba dan dag gis mchod pa byas nas me tog rnam pa sna tshogs dri zhim zhing ma rnyis pa'i chun po dang / phreng ba yid du 'ong ba dag btags nas/ bdag cag gis bcom ldan 'das y ang dag par rdzogs pa'i sangs rgyas yon gnas bla na med pa 'od srung la mchod pa bgyis pa'i dge ba'i rtsa ba gang lags pa 'dis bdag cag skyes nas lo brgya nyi shu lon yang lus la gnyer ma dang skra dkar mchis par ma gyur cig ces smon lam btab bo/ /dge slong dag ji snyam du sems/ rgyal po kri ki'i btsun mo dam pa la sogs pa bud med lnga brgya po gang dag yin pa de dag ni skye dgu'i bdag mo chen mo la sogs pa dge slong ma lnga brgya po 'di dag nyid yin te/ 'di dag gis yang dag par rdzogs pa'i sangs rgyas 'od srung gi mchod rten la mchod pa byas shing smon lam btab pa gang yin pa'i las de'i rnam par smin pas da ltar skyes nas lo brgya nyi shu lon yang lus la gnyer ma dang skra dkar med cing bu mo lo bcu drug lon pa'i gzugs lta bur gyur to/ /dge slong dag de lta bas na las gcig tu gnag pa rnams kyi zhes bya ba nas de ltar brtsal bar bya ste/ dge slong dag khyed kyis de ltar bslab par bya'o zhes bya ba'i bar snga ma bzhin no/ / bcom ldan 'das kyis de skad ces bka' stsal pa dang / dge slong rnams bcom ldan 'das kyis gsungs pa la yi rangs te mngon par bstod do/ /bcom ldan 'das kyis dge slong gis sbrid pa byung ba la sos shes brjod par mi bya'o zhes bka' stsal pa dang / mnyan yod na khyim bdag cig 'dug pa des rigs mnyam pa las chung ma blangs te/ de de dang lhan cig rtse bar byed/ dga' bar byed/ dga' mgur spyod par byed do/ /de rtse bar byed/ dga' bar byed/ dga' mgur spyod par byed kyang / bu pho yang med/ bu mo yang med la/ rgas pa'i gnas skabs su nor zad cing longs spyod zad par gyur nas/ des chung ma la smras pa/ bzang mo kho bo ni rgas shing bkren la bu pho yang med/ bu mo yang med pas rgyal byed kyi tshal du rab tu byung du 'gro'o/ /des smras pa/ rje'i sras de bzhin rab tu 'byung bar mdzod cig /de rgyal byed kyi tshal du song ste rab tu byung ngo / /ji tsam dus gzhan zhig na de'i chung ma blta ba'i phyir 'ongs pa dang / de sbrid pa byung na dge slong gang gis kyang sos shes ma byas so/ /de nas de'i sngon gyi chung mas lag pa g.yon pas sa blangs te sas mtshams gcad pa byas nas yun ring du 'tsho bar gyur cig ces smras so/ /dge slong dag gis de la brtag par brtsams pa dang / des de'i lag nas bzung ste drangs nas smras pa/ rje'i sras dgra bo rnams kyi nang du rab tu byung ste rgyal byed kyi tshal 'di gnod sbyin gos sngon po gyon pa lnga brgyas mi stongs te/ bdag 'ba' shig gis khyod la sos shes bgyis pa des na de rnams kyis khyod kyi mdangs ma khyer te/ 'dir bzhugs pas 'tshal gyis/ khyim nyid du bzhud kyis gshegs shes de'i lag pa nas bzung ste song ba dang / de la dge slong rnams kyis smras pa/ rgan zhugs ma 'gro bar 'dug shig /de 'gro ba nyid du byed cing mi 'dug nas dge slong dag gis de'i lag pa ya gcig nas bzung ste drangs pa dang / des smras pa/ na'o na'o zhes zer ba'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ khyod kyi lag pa gang na zhes dri bar bya ste/ gal te khyed kyis bzung ba gang yin pa'o zhes zer na rgan zhugs 'gro 'dod par nges kyis thams cad kyi thams cad du gtang bar bya'o/ /gal te sngon gyi chung mas bzung ba gang yin pa'o zhes zer na 'gro bar mi 'dod pas de gtang bar mi bya'o/ /'on kyang dge slong dag rgan zhugs ni 'tsho bar 'dod pa'i bsam pa can yin pas de lta bas na rgan zhugs sbrid pa byung ba la sos shes brjod par bya'o/ /dge slong dag gis de la smras pa/ rgan zhugs khyod kyi lag pa gang na/ des smras pa/ tshe dang ldan pa dag khyed kyis bzung ba gang yin pa'o/ /de dag gis de btang ba nas rang gi khyim du song ste/ de nyid de'i rab tu byung ba dang bsnyen par rdzogs pa dge slong gi dngos po'i bar chad du gyur to/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na khyim bdag dad pa can zhig 'dug pa de bram ze ma dad pa zhig dang lhan cig rgyal byed kyi tshal du song ba dang / khyim bdag de sbrid pa byung na dge slong gang gis kyang sos shes ma byas kyi/ bram ze de nyid kyis sos shes byas nas des smras pa/ grogs po khyed ni dgra bo rnams la dad de rgyal byed kyi tshal 'di ni gnod sbyin gos sngon po gyon pa lnga brgyas mi stongs te/ khyod la kho bo 'ba' zhig gis sos shes byas pa des na de dag gis khyod kyi mdangs ma phrogs kyis tshur shog 'dong zhes zer ba'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong dag khyim pa rnams ni 'tsho ba'i bsam pa can yin pas de lta bas na khyim pa sbrid pa byung ba la sos shes brjod par bya'o/ /gzhan yang dge slong dag rgan pa sbrid pa byung ba la ni langs nas phyag bya zhing gzhon pa sbrid pa byung ba la ni rgan pas nad med cig ces brjod par bya'o/ /sangs rgyas bcom ldan 'das grong khyer bA rA Na sI na drang srong smra ba ri dgas kyi nags na bzhugs so/ /gang gi tshe bcom ldan 'das kyis dge slong lnga tshan pa rnams nges pa la zhugs pa dang ldan pas legs par gsungs pa'i chos 'dul ba la btsud pa de'i tshe de dag gis bca' bar bya ba gang yin pa dang / bza' bar bya ba gang yin pa mi shes pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong dag bca' ba ni lnga ste/ rtsa ba'i bca' ba dang / sdong po'i bca' ba dang / lo ma'i bca' ba dang / me tog gi bca' ba dang / 'bras bu'i bca' ba'o/ /bza' ba ni lnga ste/ phye ma dang / 'bras chan dang / zan dron dang / sha dang snum khur ro/ /de dag gis tshod ma gang dag dang / bza' bar bya ba mi shes nas bcom ldan 'das kyis bka' stsal pa/ 'o ma dang / zho dang / mar sar dang / mar dang / nya dang / sha dang / sha skam dang / gzhan yang rung ba gang yin pa ste tha na chus kyang rlan par bya ste bza' bar bya'o/ /dge slong dag rlan pa thams cad ni nyam skyed par byed pa yin no/ / sdom la/ sgo 'phar gyi ni lag zungs dang / /skar kung dag gi dra ba dang / /ma dpyis dang ni ya dpyis dang / /rked gtan dbyug gu skam ka'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong rnams gnas khang dag rtsig cing sgo dod par mi byed nas bcom ldan 'das kyis bka' stsal pa/ sgo gdod par bya'o/ /dge slong rnams kyis sgo btod cing sgo 'phar 'jug par mi byed pas bsam gtan dang 'don pa la zhugs pa dag snang ste/ de dag bram ze dang khyim bdag dag gis mthong nas nye bar 'ongs te de dag gtam brjod pas sems rtse gcig pa nyid du ma gyur nas/ bcom ldan 'das kyis bka' stsal pa/ dge slong dag sgo 'phar gzhug par bya'o/ /dge slong dag gis sgo 'phar bcug cing lag zungs yang mig ma btags pas dbye dka' bar gyur nas/ bcom ldan 'das kyis bka' stsal pa/ lag zungs yang mig gdags par bya'o/ /de phye ba na sgra 'byung nas/ bcom ldan 'das kyis bka' stsal pa/ ko ba'i dum bu gzhug par bya'o/ /skar khung ma btod pas mun gnag par gyur nas/ bcom ldan 'das kyis bka' stsal pa/ skar khung gdod par bya'o/ /ha cang dma' bar btod nas chom rkun pa dang / g.yon can dag gis bgrod par gyur nas/ bcom ldan 'das kyis bka' stsal pa/ dma' bar gdod par mi bya'o/ /ha cang mtho bar btod pa dang nyes dmigs de nyid du gyur nas/ bcom ldan 'das kyis bka' stsal pa/ dkyil du gdod par bya'o/ /dge slong dag gis nang rub la phyi yangs par byas nas/ bcom ldan 'das kyis bka' stsal pa/ phyi rub la nang yangs pa rgya mtsho'i rnam pa lta bur gdod par bya'o/ /bye'u dang phug ron dag 'jug nas/ bcom ldan 'das kyis bka' stsal pa/ dra ba bya'o/ /dge slong dag gis dra ba byas shing sgo glegs ma bcug pas sbrul dang / sdig pa dang / srin bu t+r+yai ma bu ka dang / trai'i la ta dag 'jug nas/ bcom ldan 'das kyis bka' stsal pa/ sgo glegs gzhug par bya'o/ /dge slong dag gis sgo glegs bcug pa dang / 'og mi chags nas/ bcom ldan 'das kyis bka' stsal pa/ ma dpyis gzhug par bya'o/ / dge slong dag gis ma dpyis bcug na steng 'dug tu mi rung nas/ bcom ldan 'das kyis bka' stsal pa/ ya dpyis gzhug par bya'o/ /dge slong dag gis ya dpyis bcug na rlung gis phye nas bcom ldan 'das kyis bka' stsal pa/ phred gtan gzhug par bya'o/ /dge slong dag gis phred gtan bcug pa dang / gcad dka' ba dang / dbye dka' bar gyur nas/ bcom ldan 'das kyis bka' stsal pa/ dbyi gu skam ka bcang bar bya ste/ des gcad pa dang dbye bar bya'o/ sdom la/ gsor dang lcags kyi thu lum dang / /phor ba shing gi thal phyags dang / /rdo gu khri dang rgyab rten dang / /sta re dang ni gzong bu'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bcom ldan 'das kyis sgo 'phar la lag zungs kyi lung mig gdags par bya'o zhes bka' stsal pa dang / dge slong dag gis sgo 'phar la yang mig gis brkos te sgo 'phar gas nas/ bcom ldan 'das kyis bka' stsal pa/ sgo 'phar la brko bar mi bya'o/ /bcom ldan 'das kyis sgo 'phar la brko bar mi bya'o zhes bka' stsal pa dang / dge slong dag gis yang mig btags te drangs na mi brtan zhing phyir byung nas/ bcom ldan 'das kyis bka' stsal pa/ de lta bas na rjes su gnang ste gsor bcang bar bya zhing / des phug la yang mig gdags par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /tshe dang ldan pa pi lin da'i bu gang gi tshe rab tu byung ba nas shes bya ba nas/ tshe dang ldan pa dag bdag na ste mi bde'o zhes bya ba'i bar snga ma bzhin no/ /gnas brtan khyod ci na/ tshe dang ldan pa dag bdag rlung nad na'o/ /gnas brtan sman cung zad mdzod cig / tshe dang ldan pa dag sngon ni bdag gis lcags kyi thu lum bsregs te/ des chab bsros nas lus rngul bar bgyis so/ /gnas brtan ci'i slad du mi srel/ bcom ldan 'das kyis ma gnang ngo / /skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ de lta bas na rjes su gnang ste/ rlung nad can gyis lcags kyi thu lum bcang bar bya ste/ des chu bsros la lus rngul bar bya'o/ /bcom ldan 'das kyis lcags kyi thu lum bcang bar bya'o zhes bka' stsal pa dang / dge slong dag gis de bsregs pa dbyung ma nus nas/ bcom ldan 'das kyis bka' stsal pa/ lcags thag gis gdags par bya'o/ /dge slong dag gis lcags thag kyang mer bcug pas de yang tsha bar gyur nas/ bcom ldan 'das kyis bka' stsal pa/ de der gzhug par mi bya'i des gsher ba'i nang du bcug la lcags kyi thu lum bsreg par bya'o/ /de dag lcags kyi thu lum rtswa u Sha hu gas rung bar byed nas/ bcom ldan 'das kyis bka' stsal pa/ de rung bar mi bya'i bsregs pa de nyid de'i rung ba yin no/ /dge slong dag dang por yongs su spyad pa'i chu bsro bar byed cing phyis rung ba'i chu bsro bar byed nas/ bcom ldan 'das kyis bka' stsal pa/ sngar rung ba'i chu bsro bar bya zhing phyis yongs su spyad pa'i chu bsro bar bya'o/ /sangs rgyas bcom ldan 'das rgyal po'i khab na 'od ma'i tshal bya ka lan da ka'i gnas na bzhugs so/ /tshe dang ldan pa pi lin da'i bu gang gi tshe rab tu byung ba nas zhes bya ba nas/ tshe dang ldan pa dag bdag na ste mi bde'o zhes bya ba'i bar snga ma bzhin no/ /gnas brtan khyod ci na/ tshe dang ldan pa dag 'di dang 'di na'o/ /gnas brtan sman cung zad mdzod cig /tshe dang ldan pa dag sngon ni bdag gis sman phor bcangs so/ /gnas brtan da ci ste mi bcang / bcom ldan 'das kyis ma gnang ngo / /skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ de lta bas na rjes su gnang ste/ sman phor bcang bar bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /khyim bdag cig gis dge 'dun gyi bsro khang byas na der sol ba dag bdal de 'jog nas/ bcom ldan 'das kyis bka' stsal pa/ bsdu bar bya'o/ /bcom ldan 'das kyis sol ba dag bsdu bar bya'o zhes bka' stsal pa dang / dge slong dag cis bsdu bar bya ba mi shes nas/ bcom ldan 'das kyis bka' stsal pa/ lcags kyi thal phyags byas la des bsdu bar bya'o/ /bcom ldan 'das kyis lcags kyi thal phyags bya'o zhes bka' stsal na/ dge slong dgon pa ba dag la de'i 'byor pa med pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ de dag gis shing gi thal phyags byed du gzhug go/ /bcom ldan 'das kyis shing gi thal phyags byed du gzhug go zhes bka' stsal pa dang / dge slong dag gis thal phyags ji lta bu bya ba mi shes nas/ bcom ldan 'das kyis bka' stsal pa/ mgo sbom por byas la de nas lci ba dang 'jim pas bskus te des sol ba bsdu bar bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ / dge slong zhig na nas sman pa'i gan du song ste smras pa/ bzhin bzangs kho bo la nad 'di lta bu byung na sman ston cig /des smras pa/ 'phags pa 'di dang 'di mdzod cig dang khyod sos par 'gyur ro/ /de la sman sbyar ba'i rdo gu dgos nas de khyim bdag cig gi gan du song ste/ rdo gu brnyas pa dang / des de la rdo gu byin no/ /des sman sbyar te slar khyim bdag de nyid la byin pa dang / des smras pa/ 'phags pa khyod kyi lags kyis bzhud cig / des smras pa/ khyim bdag bcom ldan 'das kyis ma gnang ngo / /des smras pa/ 'phags pa gal te de lta na zhog la bzhud cig /skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ de lta bas na rjes su gnang ste/ rdo gu bcang bar bya'o/ /ri dgas 'dzin gyi ma sa gas bcom ldan 'das kyis dge slong rnams la rdo gu ji ltar 'chang du gnang ba thos nas des lcags rdo gu lnga brgya phul na/ dge slong dag gis ji ltar bya ba mi shes nas/ bcom ldan 'das kyis bka' stsal pa/ rgan rims ji lta ba bzhin brim par bya'o/ /bcom ldan 'das kyis rgan rims ji lta ba bzhin brim par bya'o zhes bka' stsal pa dang / gzhon pa'i mthar ma khyed pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ ma thob pa gang dag yin pa de dag la kham pa'i rdo gu sbyin par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong zhig sa la nyal bas de'i kha zas ma zhu bar gyur nas des khyim bdag cig gi gan du song ste khri brnyas nas de de'i steng du nyal bas sos te slar de la byin pa dang / des smras pa/ 'phags pa khyod nyid kyi lags kyis bzhud cig /khyim bdag bcom ldan 'das kyis ma gnang ngo / /des smras pa/ 'phags pa gal te de lta na zhog la bzhud cig /skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ de lta bas na rjes su gnang ste/ dge slong gis khri bcang bar bya'o/ /ri dgas 'dzin gyi ma sa gas bcom ldan 'das kyis dge slong rnams la khri bog ri can ji ltar gnang ba thos nas de khri bog ri can lnga brgya phul na dge slong rnams kyis ji ltar bya ba mi shes nas/ bcom ldan 'das kyis bka' stsal pa/ rgan rims ji lta ba bzhin brim par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong zhig la rgyab rten dgos par gyur nas des khyim bdag cig la brnyas te des dgos pa byas nas slar byin pa dang / des smras pa/ 'phags pa khyod nyid kyi lags kyis bzhud cig /khyim bdag bcom ldan 'das kyis ma gnang ngo / /des smras pa/ 'phags pa gal te de lta na zhog la bzhud cig /skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ de lta bas na rjes su gnang ste dge slong gis rgyab rten bcang bar bya'o/ /ri dgas 'dzin gyi ma sa gas bcom ldan 'das kyis dge slong rnams la rgyab rten ji ltar gnang ba thos nas des rgyab rten lnga brgya phul na dge slong rnams kyis ji ltar bya ba mi shes nas/ bcom ldan 'das kyis bka' stsal pa/ rgan rims bzhin brim par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong zhig gi btso blag gi las byed pa de la sta re dgos par gyur nas des khyim bdag cig la brnyas te des dgos pa byas nas slar byin pa dang / des smras pa/ 'phags pa khyod nyid kyi lags kyis bzhud cig /khyim bdag bcom ldan 'das kyis ma gnang ngo / /des smras pa/ 'phags pa gal te de lta na zhog la bzhud cig /skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ de lta bas na rjes su gnang ste dge slong gis sta re bcang bar bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong zhig gi khri'i ya thog chag nas des khyim bdag cig las gzong bu brnyas te/ des dgos pa byas nas slar byin pa dang / des smras pa/ 'phags pa khyod nyid kyi lags kyis bzhud cig / khyim bdag bcom ldan 'das kyis ma gnang ngo / /des smras pa/ 'phags pa gal te de lta na zhog la bzhud cig /skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ de lta bas na rjes su gnang ste/ dge slong dag gis gzong bu bcang bar bya'o/ sdom la/ ste'u dang skas ni gsum dag dang / /sgre'u dang nang pa phan gdags dang / /shing dang rdo dang sa dag gi/ /thang ma skas gsum gnang ba'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong zhig gi khri'u'i rkang pa chag ste de la ste'u dgos nas des khyim bdag cig la ste'u brnyas nas des dgos pa byas nas slar byin pa dang / des smras pa/ 'phags pa khyod nyid kyis lags kyis bzhud cig /des smras pa/ khyim bdag bcom ldan 'das kyis ma gnang ngo / /des smras pa/ 'phags pa gal te de lta na zhog la bzhud cig /skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ de lta bas na rjes su gnang ste/ dge slong gis ste'u bcang bar bya'o/ /sangs rgyas bcom ldan 'das mnyan yod na shar gyi kun dga' ra ba na ri dgas 'dzin gyi ma'i khang bzangs na bzhugs so/ /bcom ldan 'das kyis dge slong dag gis rtsig pa'i grogs bya'o zhes bka' stsal pa dang / dge slong dag mchod rten dang / gtsug lag khang rtsig pa'i grogs byed do/ /ji tsam na ri dgas 'dzin gyi ma'i khang bzangs mthon por brtsigs pas de la gzeg dgos par gyur na/ dge slong dag gis ci las gzeg par bya ba mi shes nas/ bcom ldan 'das kyis bka' stsal pa/ skas las gzeg par bya'o/ /bcom ldan 'das kyis skas la gzeg par bya'o zhes bka' stsal pa dang / dge slong dag skas du yod mi shes nas/ bcom ldan 'das kyis bka' stsal pa/ skas ni rnam pa gsum ste/ shing gi dang / thag pa'i dang / smyug ma'i 'o/ /sangs rgyas bcom ldan 'das ser skya'i gnas shing n+ya gro d+ha'i kun dga' ra ba na bzhugs so/ /bcom ldan 'das kyi gcung po dge slong dga' bo zhes bya ba de'i lus gser gyi mdog 'dra zhing skyes bu chen po'i mtshan sum bcu can/ srid kyang bcom ldan 'das las sor bzhis thung ba zhig yod pa de'i chung ma mdzes ma zhes bya ba gzugs bzang ba/ mdzes pa/ blta na sdug pa/ skyes pa'i yid du 'ong ba zhig yod pa de la/ de lhag par chags pa dang / zhen pa dang / 'chums pa dang / mdud pa bor ba dang / brgyal ba dang / lhag par zhen pa dang / lhag par chags par gyur to/ /bcom ldan 'das kyis de gdul ba'i dus la bab par mkhyen nas snga dro sham thabs gsol/ lhung bzed dang chos gos bsnams te phyi bzhin 'brang ba'i dge sbyong kun dga' bo dang / ser skya'i gnas su bsod snyoms la gshegs so/ /ser skya'i gnas na bsod snyoms mdzad pa na dga' bo'i khyim ga la ba der gshegs te byon nas bcom ldan 'das de'i sgor bzhugs te 'od zer gser gyi kha dog lta bu btang nas de dag gis khyim de gser zhun ma lta bur snang bar gyur to/ /des bsams pa/ nges par bcom ldan 'das gshegs te/ des na bdag gi khyim gser zhun ma lta bur snang bar gyur to/ /snyam nas des mi zhig btang ste/ kye mi khyod song la sgo na su yod ltos shig /de phyir byung ba dang / ji tsam na bcom ldan 'das mthong nas de rings pa rings par nang du song ste/ des smras pa/ jo bo bcom ldan 'das gshegs te chab sgo na bzhugs so/ /de gus pa dang bcas pas 'gro bar brtsams pa dang / mdzes mas bsams pa/ gal te 'di bcom ldan 'das kyi spyan sngar song na 'di nges par bcom ldan 'das kyis rab tu phyung ngo snyam nas des gos kyi tha ma nas bzung ste/ rje'i sras ma gshegs par bzhugs shig /des smras pa/ thong shig bcom ldan 'das kyi zhabs la phyag 'tshal nas slar 'ong ngo / /des de la mtshan ma btab nas smras pa/ rje'i sras gal te khyod 'di bskams te gshegs na bdag kar sha pa Na lnga brgya dbang ngo / /des smras pa/ legs te de bzhin byas thong shig /des de dam bcas nas btang ste song nas bcom ldan 'das kyi zhabs la phyag 'tshal te bcom ldan 'das las lhung bzed blangs nas slar song ngo / /de nas bza' ba dang bca' ba gtsang zhing bsod pas lhung bzed bkang ste byung ba dang / bcom ldan 'das bzhes pa nyid du mi mdzad par gshegs shing tshe dang ldan pa kun dga' bo la yang ma len cig pa'i brda mdzad do/ /sangs rgyas bcom ldan 'das rnams ni bsnyen par dka' zhing bzod par dka' ba yin pas sangs rgyas bcom ldan 'das la bzhes shes smra ma nus so/ /de nas tshe dang ldan pa kun dga' bo la dbul bar brtsams pa dang / des smras pa/ dga' bo gang kho na las blangs pa de nyid la phul cig /de spobs pa med par gyur nas/ bcom ldan 'das kyi lhung bzed khyer nas chas te/ bcom ldan 'das gtsug lag khang du gshegs te bzhugs pa dang / dga' bos lhung bzed phul lo/ /de nas bcom ldan 'das kyis zhal zas kyi mdzad pa mdzad nas dga' bo la bka' stsal pa/ dga' bo lhung bzed kyi lhag ma zo shig / bcom ldan 'das 'tshal lo/ /bcom ldan 'das kyis de la lhung bzed kyi lhag ma stsal nas des zos so/ /zos nas bcom ldan 'das kyis bka' stsal pa/ dga' bo khyod ci ste rab tu mi 'byung / 'di ltar bcom ldan 'das kyis gdung rabs de dang de dag tu yab yum dang / mkhan po dang / slob dpon dang / gzhan yang bla ma'i gnas lta bu dag gi chos dang ldan pa'i tshig 'ga' yang ma bcag pas/ des smras pa/ bcom ldan 'das bdag rab tu 'byung ngo / /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo song la dga' bo'i skra dang kha spu bregs shig /btsun pa bka' bzhin 'tshal zhes tshe dang ldan pa kun dga' bos bcom ldan 'das las mnyan nas 'breg mkhan gnyer te breg par brtsams pa dang / dga' bos 'breg mkhan la kwa'i 'breg mkhan nga ni ring po mi thogs par stobs kyis 'khor lo sgyur ba'i rgyal por 'gyur te/ gal te khyod kyis nga'i skra dang kha spu bregs na ngas khyod kyi lag pa khrig ma man chad bcad do zhes bsdigs pas de skrag ste 'breg spyad btul te 'dug pa dang / tshe dang ldan pa kun dga' bos bcom ldan 'das la gsol to/ /de nas bcom ldan 'das tshe dang ldan pa dga' bo ga la ba der gshegs te byon nas bka' stsal pa/ dga' bo khyod rab tu mi 'byung ngam/ des gsol pa/ bcom ldan 'das bdag rab tu 'byung ngo / /de nas bcom ldan 'das nyid kho nas chu snod nas mgor chu blugs shing 'breg mkhan gyis skra dang kha spu bregs pa dang / des bsams pa/ re shig bcom ldan 'das la gus par bya ba'i phyir rab tu byung la nam sros nas 'gro'o snyam nas de nam sros nas song ba dang / bcom ldan 'das kyis g.yang sa zhig sprul to/ /dga' bos bsams pa/ mdzes ma dang thag ring ba nyid du gyur cing bdag gzhan kho nar 'chi bar 'gyur gyis nam nangs te 'gro'o snyam nas/ de shin du bzang mo la rnam par rtog cig sdug bsngal bas mtshan mo 'das so/ /bcom ldan 'das kyis de'i sems thugs kyis mkhyen nas/ tshe dang ldan pa kun dga' bo la bka' stsal pa/ kun dga' bo khyod song la/ dga' bo la khyod khang skyong byos shig ces bsgo shig /des song nas tshe dang ldan pa dga' bo bcom ldan 'das kyis khyod khang skyong byos shig ces bka' stsal to zhes de la bsgo'o/ /des smras pa/ btsun pa kun dga' bo khang skyong zhes bya ba de ci lags/ de ji lta bu dag bgyi/ des smras pa/ tshe dang ldan pa dga' bo gtsug lag khang gi las bya ste/ dge slong rnams bsod snyoms la dong nas dang por rje gtsug lag khang phyag dar bya zhing de nas ba lang gi lci ba sar pas bskyang nul bya/ gtsug lag khang bsrung bar bya/ dge slong rnams kyis smras pa/ gang yin pa de brjod par bya/ dri dang / me tog dang / bdug spos la sogs pa ji snyed yod pa de dag kyang dge 'dun la brim par bya/ nub mo sgo gcad par bya zhing nang par dbye bar bya/ bshang ba'i gnas dang / gci ba'i gnas dag kyang sbyang bar bya zhing / gzhan yang gtsug lag khang dang 'brel ba'i bya ba gang yin pa de dag bya'o/ /des smras pa/ btsun pa kun dga' bo bcom ldan 'das kyis ji skad bka' stsal pa de bzhin 'tshal lo/ /ji tsam na dge slong rnams snga dro sham thabs bgos/ lhung bzed dang chos gos thogs te ser skya'i gnas su bsod snyoms la zhugs pa dang / dga' bos bsams pa/ gtsug lag khang phyags la 'gro'o snyam nas des phyag dar byas pa dang / bcom ldan 'das kyis gang gi tshe khyams cig phyags pa de'i tshe gnyis pa phyag dar gyis gang bar gyur pa de ltar byin gyis brlabs so/ /des bsams pa/ phyag dar bor la 'gro'o snyam nas des phyags ma bzhag ste phyag dar dbo bar brtsams pa dang / zad par ma gyur nas des bsams pa/ gnas khang rnams kyi sgo bcad la 'gro'o snyam nas des gnas khang rnams kyi sgo bcad par brtsams pa dang / bcom ldan 'das kyis de gang gi tshe gnas khang gcig gi sgo bcad pa de'i tshe gzhan bye bar gyur pa de lta bur byin gyis brlabs pas de skyo nas smras pa/ bdag rgyal por gyur nas 'di bas ches lhag pa'i gtsug lag khang byas 'gro'o/ /yang bsams pa gseb lam du 'gro'o snyam nas des gseb lam du song ba dang / bcom ldan 'das kyis de'i sems kyi rtog pa thugs kyis mkhyen nas lam de nyid du gshegs so/ /des bcom ldan 'das thag ring po kho na nas mthong nas de dang ha cang mi ring ba na shing yal ga stug po thur du 'phyang ba zhig yod pa de myur ba myur ba nyid du song ste/ de'i 'og tu gab nas 'dug pa dang / bcom ldan 'das kyis shing de'i yal ga rnams ji ltar gyen du 'phags par gyur pa de ltar byin gyis brlabs so/ /de nas bcom ldan 'das kyis bka' stsal pa/ dga' bo khyod gar 'gro/ tshur shog 'dong / de spobs pa med par gyur cing ngo tsha ba'i yid kyis bcom ldan 'das kyi phyi bzhin song ngo / /bcom ldan 'das kyis dgongs pa/ 'di shin du bzang mo la lhag par chags pas 'di de dang 'bral bar bya'o snyam du mkhyen nas de de dang dbral bar bya ba'i phyir ser skya'i gnas su ji tsam bzhed pa bzhugs nas mnyan yod ga la ba der rgyu zhing gshegs te khad kyis mnyan yod du gshegs pa dang / ri dgas 'dzin gyi ma sa gas bcom ldan 'das kyi gcung dga' bo zhes bya ba de'i lus gser gyi mdog 'dra zhing skyes bu chen po'i mtshan sum bcu can bcom ldan 'das las sor bzhis thung ba de bcom ldan 'das dang thabs gcig 'dir 'ongs so zhes thos nas de bdag gis nam mthong snyam mo/ / //'dul ba phran tshegs kyi gzhi/ bam po bcu gcig pa/ de nas tshe dang ldan pa dga' bo dus gzhan zhig na snga dro sham thabs bgos lhung bzed dang chos gos thogs te mnyan yod du bsod snyoms la zhugs nas de khad kyis ri dgas 'dzin gyi ma sa ga'i khyim du song ngo / /des de'i gzugs bzang zhing kha dog shin du rgyas pa mthong nas bsams pa/ 'di ni nges par bcom ldan 'das kyi mched dga' bo yin no snyam nas/ de dad pa skyes te de'i rkang pa la gtugs nas phyag byas so/ /des de'i rkang pa la reg pa dang / bud med kyi reg pa ni gdug pa yin pas de 'dod chags bdo bas de'i khu ba stor nas sa ga'i mgor lhung ba dang / sangs rgyas bcom ldan 'das rnams ni bsnyel ba mi mnga' ba'i chos can yin pas bcom ldan 'das kyis de tu rus ka'i 'bru mar du byin gyis brlabs so/ /des bsams pa/ 'di na tu rus ka'i 'bru mar ga las 'byung / nges par 'phags pa dga' bos mi gtsang ba shor la/ bcom ldan 'das bsnyel ba mi mnga' ba'i chos can des 'di tu rus ka'i 'bru mar du byin gyis brlabs so snyam du rig nas yid rangs pas yid rangs shing kye ma'o sangs rgyas/ kye ma'o chos/ kye ma'o dge 'dun/ kye ma'o chos legs par gsungs pa nyid 'di ltar da ni 'phags pa dga' bo la sogs pa 'dod chags shas che ba dag kyang tshangs par spyad pa spyod do zhes ched du brjod pa ched du brjod do/ /de nas tshe dang ldan pa dga' bo bdag la dge 'dun lhag ma'i ltung ba byung bar ma gyur tam snyam nas 'gyod pa skyes te/ des skabs de dge slong rnams la brjod pa dang / dge slong dag gis bcom ldan 'das la gsol nas/ bcom ldan 'das kyis bka' stsal pa/ dge slong dag dge slong dga' bo 'dod chags lhag par che ba 'di la ltung ba med do/ /de lta bas na rjes su gnang ste 'dod chags lhag par che bar gyur pa de lta bu gang dag yin pa de dag gis 'dzag snod bcang bar bya ste/ 'di la 'gyod par mi bya'o/ /bcom ldan 'das kyis 'dod chags lhag par che bas sgre'u bcang bar bya'o zhes bka' stsal pa dang / dge slong rnams ci'i lpags pa'i sgre'u bcang bar mi shes nas/ bcom ldan 'das kyis bka' stsal pa/ ra dang / ri dgas dang / byi ba dang / gsum gyi lpags pa'i sgre'u bcang bar bya'o/ /de dag gis de bzhin bzhag pas dri mi zhim par gyur nas/ bcom ldan 'das kyis bka' stsal pa/ bkru bar bya/ mnye bar bya/ skam par bya'o/ / de dag gis ji srid bkrus nas skems par byed pa de'i bar du de dag bud med mthong nas khu ba stor bas sham thabs dbra dbrer gyur nas/ bcom ldan 'das kyis bka' stsal pa/ gnyis byas la gcig bskam par bya zhing gcig gdags par bya'o/ /kha cig khu ba lhag par mang du byung bas de gsher bar gyur nas/ bcom ldan 'das kyis bka' stsal pa/ der phru glugs par bya'o/ /dge slong dag gis so phag gi bur ma dag glugs pas sdug bsngal bar gyur nas/ bcom ldan 'das kyis bka' stsal pa/ bye ma 'am sa'i phru glugs par bya'o/ /dge slong dag de btags bzhin du zas za bar byed cing mchod rten la phyag 'tshal bar byed nas/ bcom ldan 'das kyis bka' stsal pa/ de phyogs dben pa zhig tu bzhag la khrus byas nas zas bza' ba dang mchod rten la phyag dag bya'o/ /de nas dus gzhan zhig na tshe dang ldan pa dga' bo phyogs gzhan zhig na rdo leb la 'dug pa dang / des shin du bzang mo dran nas des de rdo leb de la ri lus bri bar brtsams pa dang / tshe dang ldan pa 'od srung chen po yang der 'ongs te des de mthong nas smras pa/ tshe dang ldan pa dga' bo khyod ci byed/ des smras pa/ btsun pa 'od srung chen po bdag shin du bzang mo 'dri'o/ /des smras pa/ tshe dang ldan pa bcom ldan 'das kyi dge slong gi bya ba ni gnyis te/ bsam gtan dang / gdon pa'o zhes gsungs na khyod rang gi chung ma 'dri zhing 'dug gam/ de cang mi smra bar 'dug go/ /skabs de tshe dang ldan pa 'od srung chen pos bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni dge slong dag ri mo 'dri ba las gyur par mkhyen nas/ dge slong rnams la bka' stsal pa/ dge slong dag skyes bu gti mug dga' bos shin tu bzang mo la chags pa'i sems kyis ri mo bris so/ /de lta bas na dge slong gis ri mo bri bar mi bya'o/ /dge slong ri mo 'dri bar byed na 'gal tshabs can du 'gyur ro/ /bcom ldan 'das kyis dge slong gis ri mo bri bar mi bya'o/ /zhes bka' stsal pa dang / dge slong dag de bzhin gshegs pa'i dbu skra dang / sen mo'i mchod rten la yang dris byug pa dang / dris gtor bar mi byed do/ /sangs rgyas bcom ldan 'das rnams ni mkhyen bzhin du 'dri bar mdzad pas sangs rgyas bcom ldan 'das kyis tshe dang ldan pa kun dga' bo la dris pa/ kun dga' bo ci'i phyir dge slong dag de bzhin gshegs pa'i dbu skra dang sen mo'i mchod rten la dris byug pa dang dris gtor bar mi byed des skabs de bcom ldan 'das la rgyas par gsol pa dang / bcom ldan 'das kyis bka' stsal pa/ de lta bas na rjes su gnang ste/ dris byug pa dang / dris gtor ba dag bya'i sems can gyi gzugs ni bri bar mi bya'o/ /bcom ldan 'das kyis dgongs pa/ skyes bu blun po dga' bo 'di ni da dung yang shin du bzang mo la chags pa dang ldan zhing sems 'brel gyis 'di la thabs bsham pa zhig bya'o snyam du mkhyen nas/ tshe dang ldan pa dga' bo la bka' stsal pa/ dga' bo khyod kyis ri spos kyi ngad ldang mthong ngam/ btsun pa ma mthong lags so/ /gal te de lta na de bzhin gshegs pa'i chos gos kyi tha ma nas zung shig / des bcom ldan 'das kyi chos gos kyi tha ma nas bzung ngo / /de nas bcom ldan 'das ngang pa'i rgyal po 'dab ma brkyang ba ltar nam mkha'i dkyil du 'phags te steng gi nam mkha' las ri bo spos kyi ngad ldang la gshegs nas/ de der tshe dang ldan pa dga' bo dang thabs gcig de dang de dag tu gshegs pa na shing sa ha ka ra zhig gi drung du byon pa dang / de na spra mo zhar ma zhig ci dgar rgyu zhing 'dug pa des bcom ldan 'das mthong nas mi g.yeng bar rtog par byed do/ /de nas bcom ldan 'das kyis tshe dang ldan pa dga' bo la bka' stsal pa/ dga' bo khyod kyis spra mo zhar ma 'di mthong ngam/ bcom ldan 'das mthong lags so/ /dga' bo khyod ji snyam du sems spra mo 'di dang shin du bzang mo gnyis gang gzugs bzang / gang mdzes pa dang blta na sdug pa yin/ des gsol pa/ btsun pa spra mo 'dis shAkya'i bu mo shin du bzang mo'i brgya'i char yang nye bar mi mchi/ stong gi char yang / brgya stong gi char yang / grangs dang / bgrang ba dang / cha dang / rtsis dang / dpe dang / rgyur yang nye bar mi mchi ste/ btsun pa shAkya'i bu mo shin du bzang mo ni lha'i bu mo dag dang 'gran pa lags so/ /bcom ldan 'das kyis bka' stsal pa/ dga' bo gal te de lta na de bzhin gshegs pa'i chos gos kyi tha ma nas zung shig / des bcom ldan 'das kyi chos gos kyi tha ma nas bzung ngo / /de nas bcom ldan 'das ngang pa'i rgyal po 'dab ma brkyang ba bzhin nam mkha'i dkyil du 'phags te steng gi nam mkha' las gshegs nas khad kyis sum bcu rtsa gsum pa'i lha'i nang du byon to/ /de nas bcom ldan 'das dga' ba'i tshal gyi bskyed mos tshal du bzhugs nas/ tshe dang ldan pa dga' bo la bka' stsal pa/ dga' bo khyod song la sum bcu rtsa gsum pa'i lha rnams ltos shig /de nas lha rnams kyi rtse ba dang / dga' ba dang / skyid pa dang / bsam pa'i gnas bskyed mos tshal dang / dga' ba'i tshal dang / shing rta sna tshogs dang / rtsub 'gyur dang / 'dres pa dang / yongs 'du dang / chos bzangs la sogs pa bltas na/ de dag gcig pas gcig bzang zhing spa ba mchog tu gyur pa mthong nas grong khyer blta na sdug tu phyin to/ /de der song ste bltas na/ pi bang dang / gling bu dang / pi bang rgyud gsum pa dang / jeng dang / sgra snyan la sogs pa rnam pa sna tshogs bzhag cing gnas dang gnas dag na lha'i bu rnams lha'i bu mo dag dang lhan cig rtse zhing 'khod pa mthong ngo / /de 'byor pa de dag la blta zhing thog tag tu 'gro bar brtsams pa dang / ji tsam na phyogs gzhan zhig na lha'i bu med cing lha'i bu mos gang ba'i gzhal med khang zhig mthong nas/ des lha'i bu mo rnams la dris pa gang gis na gzhal med khang gzhan dag na ni lha'i bu dang lha'i bu mo dag gis gang zhing rtse ba dang dga' ba nyams su myong la khyed la ni lha'i bu dag med pa 'di la rgyu ci zhig yod/ de dag gis smras pa/ bcom ldan 'das kyi gcung dga' bo zhes bya ba bcom ldan 'das kyi spyan snga na tshangs par spyad pa spyod pa de dus byas nas 'dir 'ong bar 'gyur te/ de'i phyir gzhal med khang 'di 'dzin cing bdag cag kyang de la sdod cing 'khod do/ /des thos nas dga' zhing mgu la rab tu dga' nas rings pa rings par bcom ldan 'das kyi spyan sngar song ba dang / bcom ldan 'das kyis bka' stsal pa/ khyod kyis sum bcu rtsa gsum pa'i lha rnams mthong ngam/ des gsol pa/ bcom ldan 'das mthong lags so/ /bcom ldan 'das kyis bka' stsal pa/ khyod kyis der ci dag mthong smros shig /des ci dag mthong ba rgyas par gsol pa dang / bcom ldan 'das kyis bka' stsal pa/ dga' bo khyod kyis lha'i bu mo dag mthong ngam/ bcom ldan 'das mthong lags so/ / dga' bo ji snyam du sems/ shin du bzang mo dang lha'i bu mo de dag gang gzugs bzang zhing mdzes pa dang blta na sdug pa yin/ des gsol pa/ btsun pa lha'i bu mo dag la shAkya'i bu mo shin du bzang mos brgya'i char yang nye bar mi mchi/ stong gi char yang brgya stong gi char yang / grangs dang / bgrang ba dang / cha dang / rtsis dang / dpe dang / rgyur yang nye bar mi mchi'o/ /dga' bo de lta bas na tshangs par spyod pa la gnas na phan yon 'di lta bu dang gzhan dag kyang yod de/ khyod kyis de la mngon par dga' bas tshangs par spyad pa spyod cig dang lha'i dpal nyams su myong bar 'gyur ro/ /de bcom ldan 'das kyi bka' la sems kyis rjes su yi rang nas cang mi smra bar 'dug go/ /de nas bcom ldan 'das sum bcu rtsa gsum pa'i lha'i gnas nas mi snang bar gyur nas mnyan yod du gshegs so/ /de nas tshe dang ldan pa dga' bo lha'i 'jig rten la mngon par dga' bas tshangs par spyad pa spyod do/ /de nas bcom ldan 'das kyis de'i sems thugs kyis mkhyen nas/ tshe dang ldan pa kun dga' bo la bka' stsal pa/ kun dga' bo song la dge slong rnams la 'di skad ces dge slong dag khyed cag gang gis kyang dga' bo dang lhan cig stan gcig la 'dug par mi bya/ 'chag sa gcig tu bcag par mi bya/ chos gos kyi rdang bu gcig la chos gos gzhag par mi bya/ lhung bzed kyi gzhi gcig tu lhung bzed gzhag par mi bya/ chu gzhag pa'i khri gcig la chu gzhag par mi bya/ klag par mi bya/ gdon par mi bya'o zhes bsgo shig / btsun pa bka' bzhin 'tshal zhes tshe dang ldan pa kun dga' bos bcom ldan 'das kyi ltar mnyan nas/ dge slong rnams la tshe dang ldan pa dag /bcom ldan 'das kyis 'di skad ces bka' stsal te/ tshe dang ldan pa dag khyed kyis dga' bo dang lhan cig stan gcig la 'dug par mi bya zhes bya ba nas/ gdon par mi bya zhes bya ba'i bar snga ma bzhin no/ /btsun pa kun dga' bo de bzhin te/ bcom ldan 'das kyis ji skad bka' stsal pa de bzhin 'tshal lo zhes de dag de dang lhan cig stan gcig la 'dug par mi byed/ 'chag sa gcig tu 'chag par mi byed/ chos gos kyi rdang gcig la chos gos 'jog par mi byed/ lhung bzed kyi gzhi gcig la lhung bzed 'jog par mi byed/ chu gzhag pa'i khri gcig la chu 'jog par mi byed/ de dang lhan cig klog pa dang / 'don par mi byed do/ /de dge slong rnams kyis de ltar spangs pa na shin du gnong bar byed/ ngo tsha bar byed/ khrel bar byed/ smod par byed do/ /ji tsam dus gzhan zhig na tshe dang ldan pa dga' bo dge slong mang po rnams dang lhan cig rim gro'i gnas su chos gos kyi las byed pa na tshe dang ldan pa dga' bos bsams pa/ dge slong 'di dag gis ni bdag spangs grang na/ tshe dang ldan pa kun dga' bo 'di ni bdag gi phu nu bo yin na ci 'dis kyang bdag spang ngam snyam du rig nas des lhan cig 'dug pa dang / tshe dang ldan pa kun dga' bo myur ba myur ba kho nar langs so/ /des smras pa/ tshe dang ldan pa kun dga' bo tshangs pa mtshungs par spyod pa 'di dag gis ni re shig bdag spang ba rigs na/ khyod bdag gi phu nu bo lags na bdag ci'i slad du spang / des smras pa/ tshe dang ldan pa dga' bo de ni bden na 'on kyang khyod ni lam gzhan du zhugs pa yin la/ kho bo cag kyang lam gzhan du zhugs pa yin pas spang dgos ches mod/ des smras pa/ tshe dang ldan pa kun dga' bo khyed shul gang du zhugs pa dang / bdag gang du zhugs pa gsungs shig /des smras pa/ khyod ni lha'i 'jig rten la mngon par dga' bas tshangs par spyad pa spyod la/ kho bo cag ni mya ngan las 'das pa'i bsam pas tshangs par spyad pa spyod do/ /de skad ces smras pa dang / de shin tu skyo bar gyur to/ /de nas bcom ldan 'das kyis de'i sems thugs kyis mkhyen nas/ tshe dang ldan pa dga' bo la bka' stsal pa/ dga' bo khyod kyis dmyal ba mthong ngam/ /bcom ldan 'das ma mthong lags so/ /bcom ldan 'das kyis bka' stsal pa/ nga'i chos gos kyi tha ma nas zung shig /des bcom ldan 'das kyi chos gos kyi tha ma nas bzung ngo / /de nas bcom ldan 'das kyis tshe dang ldan pa dga' bo khrid de dmyal ba'i gnas su gshegs so/ /de nas bcom ldan 'das lhag pa'i phyogs shig tu bzhugs nas/ tshe dang ldan pa dga' bo la bka' stsal pa/ dga' bo song la dmyal ba rnams ltos shig /des bltas na/ chu bo rab med dang / lo ma ral gri lta bu'i nags dang / ro myags dang / me ma mur dang / lhag pa'i gnas de dag gcig bas kyang gcig sdug bsngal gyi khyad par shin du mi bzad pa mthong nas dmyal ba'i gnas su song na/ des de na dbyung ba dang / gcad pa dang / gzhom pa la sogs pa'i sdug bsngal gyi khyad par gyis sems can rnams sdug bsngal zhing kha cig ni skam pas mig dang / so dag phyung / kha cig ni sog les gshegs/ kha cig ni sta res rkang pa dag bcad/ kha cig ni mdung thung dang / mda' bo che dang / mtshon rtse gcig pa dag gis phug / kha cig ni lcags kyi tho bas brdungs/ kha cig ni lcags kyi zangs po che 'bar/ rab tu 'bar/ kun du rab tu 'bar la/ me lce gcig tu gyur cing bskol ba'i nang du bcug pa mthong ngo / /des sdug bsngal gyi khyad par rnam pa sna tshogs de dag mthong nas phyogs gzhan zhig tu song ba dang / ji tsam na de na lcags kyi zangs po che khol ba zhig mthong ngo / /mthong nas kyang mi dga' nas dmyal ba'i srungs ma rnams la dris pa/ shes ldan dag gang gis na lcags kyi zangs po che gzhan dag tu ni sems can dag bcug la 'di gcig po khol zhing 'dug pa 'di la rgyu ci yod/ de dag gis smras pa/ bcom ldan 'das kyi gcung dga' bo zhes bya ba de lha'i 'jig rten la mngon par dga' bas/ bcom ldan 'das kyi spyan snga na tshangs par spyad pa spyod pa de shi nas 'dir 'ong ste/ de'i phyir 'di bsdogs shing kho bo cag kyang de la sdod cing 'khod do/ /des thos nas 'jigs skrag mi dga' zhing spu zing zhes byed nas bsams pa/ da lta nyid du bcug par 'gyur du 'ong gis myur du 'bros so snyam du rig nas/ rings pa rings par bros nas rod nyams shing ngom zung nag por bcom ldan 'das kyi spyan sngar song ba dang / bcom ldan 'das kyis bka' stsal pa/ dga' bo khyod kyis dmyal ba rnams mthong ngam/ de sro shi zhing lce ldib bzhin tshig snying rje rje skad du dal bu bags kyis gcom chung ngur gsol pa/ bcom ldan 'das mthong lags so/ /bcom ldan 'das kyis bka' stsal pa/ khyod kyis der ji lta bu dag mthong ba smros shig /des ji lta bu dag mthong ba rgyas par gsol pa dang / bcom ldan 'das kyis bka' stsal pa/ dga' bo lha'i 'jig rten la smon pas tshangs par spyad pa spyod pa la ni nyes dmigs 'di lta bu dang gzhan dag kyang yod de/ de lta bas na khyod kyis mya ngan las 'das pa la mngon par dga' bar bya'i lha'i 'jig rten la mngon par dga' bar mi bya'o/ / de ngo tsha bar gyur pa'i sems kyis cang mi smra bar 'dug go/ /de nas bcom ldan 'das dmyal ba'i gnas nas mi snang bar gyur cing grong khyer tsam par drang srong 'ga' rga'i rdzing drung du gshegs so/ /de nas dus gzhan zhig na tshe dang ldan pa dga' bo 'khor dge slong lnga brgya dang phyi dro nang du yang dag 'jog las langs nas/ bcom ldan 'das ga la ba der song ste phyin nas/ bcom ldan 'das kyi zhabs gnyis la mgo bos phyag 'tshal te phyogs gcig tu 'dug go/ /dge slong lnga brgya po de dag kyang bcom ldan 'das kyi zhabs gnyis la mgo bos phyag 'tshal nas phyogs gcig tu 'dug go/ /de nas bcom ldan 'das kyis dge slong gi dge 'dun phyogs gcig tu 'dug par mkhyen nas/ tshe dang ldan pa dga' bo la bka' stsal pa/ dga' bo khyod la chos bstan par bya ste/ 'di lta ste/ mngal du 'jug pa zhes bya ba'i chos kyi rnam grangs thog mar dge ba/ bar du dge ba/ tha mar dge ba/ don bzang po/ tshig 'bru bzang po/ ma 'dres pa yongs su rdzogs pa/ yongs su dag pa/ yongs su byang ba/ tshangs par spyod pa rab tu bstan gyis de legs par rab tu nyon la yid la zung shig dang bshad do/ /btsun pa bka' bzhin 'tshal zhes tshe dang ldan pa dga' bos bcom ldan 'das kyi ltar mnyan pa dang / de la bcom ldan 'das kyis 'di skad ces bka' stsal to/ /dga' bo ma'i mngal du 'jug pa dang / mi 'jug par 'gyur ba ji lta bu zhe na/ dga' bo 'di lta ste/ pha ma chags par gyur cing phrad pa dang / ma yang rung bar gyur cing zla mtshan dang ldan pa dang / dri za yang nye bar gnas par gyur cing 'jug par 'dod na ste/ dga' bo dri za zhes bya ba de ni/ srid pa bar ma pa'i sems can gyi tshig bla dgas yin no/ /de yang kha dog bzang po pa dang / kha dog ngan pa dang rnam pa gnyis te/ sems can dmyal ba rnams kyi srid pa bar ma ni kha dog ngan pa dper na sdong po tshig pa lta bu'o/ /dud 'gro'i skye gnas su song ba rnams kyi srid pa bar ma ni kha dog du ba lta bu'o/ /yi dags rnams kyi kha dog chu lta bu'o/ /mi rnams dang lha rnams kyi srid pa bar ma ni kha dog gser lta bu'o/ /gzugs na spyod pa'i lha rnams kyi ni dkar po'o/ /gzugs med pa na spyod pa'i lha rnams ni gzugs med pa'i phyir srid pa bar ma med do/ /srid pa bar ma'i sems can kha cig ni lag pa gnyis dang rkang pa gnyis pa yin/ kha cig ni rkang bzhi pa/ kha cig ni rkang mangs/ kha cig ni rkang med yin no/ /srid pa bar ma pa'i sems can ni sngon gyi las las skyes pa'i 'gro ba ci 'dra ba de 'dra bar 'gyur te/ srid pa bar ma pa'i sems can thams cad kyang nam mkha' la 'gro ba rdzu 'phrul dang ldan pa lta bu dang / lha'i mig can lta bur 'gyur ro/ /ma zla mtshan dang ldan par gyur pa zhes bya ba la dga' bo zla mtshan zhes bya ba ni dus dang tshe ste/ dga' bo de la bud med kha cig ni zhag gsum 'am/ zhag lnga 'am/ zhag bdun du zla mtshan can du 'gyur ro/ /kha cig ni rgyu dang rkyen gyi dbang gis yun ring du zla mtshan can du 'gyur te/ zla mtshan dang zla mtshan du mtshams 'byor par yang 'gyur ro/ /de la bud med sdug bsngal ba/ byur ngan pa/ nye bar gdungs pa/ bza' ba dang / btung ba mi bsod pa zos pa gang dag yin pa de dag ni zla mtshan ring po mi thogs shing myur du yongs su zad pa dang gtugs par 'gyur te/ dga' bo dper na sa phyogs rtsub por chus btab na myur du yongs su zad pa dang / gtugs par 'gyur ba de bzhin du bud med sdug bsngal ba/ byur ngan pa/ nye bar gdungs pa/ bza' ba dang btung ba mi bsod pa zos pa gang dag yin pa de dag gi zla mtshan yang ring por mi thogs shing myur du yongs su zad pa dang gtugs par 'gyur ro/ /de la bud med bde ba dang ldan pa/ bde ba mang ba/ nye bar ma gdungs pa/ bza' ba dang / btung ba bsod pa zos pa gang dag yin pa de dag gi zla mtshan ni ring du thogs shing myur du yongs su zad pa dang gtugs par mi 'gyur te/ de dag gi zla mtshan dang / zla mtshan du mtshams 'byor par yang 'gyur ro/ /dga' bo dper na sa phyogs 'jam por chus gtor na myur du yongs su zad pa dang / gtugs par mi 'gyur ba de bzhin du bud med bde ba dang ldan pa/ bde ba mang ba/ nye bar ma gdungs pa/ bza' ba dang btung ba bsod pa zos pa gang dag yin pa de dag gi zla mtshan yang ring du thogs shing yongs su zad pa dang gtugs par mi 'gyur te/ de dag gi zla mtshan dang / zla mtshan du mtshams 'byor par yang 'gyur ro/ /dga' bo gal te pha las khu ba byung la/ ma las ma byung na yang de'i tshe re shig mngal du 'jug par mi 'gyur ro/ / gal te ma las byung la pha las ma byung na yang de'i tshe re shig mngal du 'jug par mi 'gyur ro/ /gal te ma las kyang ma byung / pha las kyang ma byung na yang de'i tshe re shig mngal du 'jug par mi 'gyur ro/ /ma dag par gyur pa la pha ma dag par gyur pa dang / pha dag par gyur la ma ma dag par gyur pa dang / de'i tshe ma'i mngal rlung gis bgags par gyur pa 'am/ mkhris pas bgags pa 'am/ bad kan gyis bgags pa 'am/ khrag gis bgags pa 'am/ tshil gyis bgags pa 'am/ mtshams shas gang ba 'am/ sman gyis bsgyur ba 'am/ dbus nas 'dra ba 'am/ grog ma'i rked pa 'dra ba 'am/ rnga mo'i kha lta bu 'am/ sgo shing 'ba' ta kha dbus pa lta bu 'am/ sgo gshol mda' lta bu 'am/ sgo shing rta lta bu 'am sba lta bu 'am lo ma lta bu 'am/ nang du gra ma lta bu skyes pa 'am/ 'og zab pa 'am/ steng zab pa 'am/ mngal snod du mi rung ba 'am/ khrag zag pa 'am/ thung ba 'am/ bya rog gi mchu lta bu 'am/ g.yon yangs pa 'am/ g.yas yangs pa 'am/ steng yangs pa 'am/ 'og yangs pa 'am/ mtho ba 'am/ dma' ba 'am/ khas bub pa 'am/ mtshan ma tsam yod pa 'am/ yo ba 'am/ skyon dang bcas pa 'am/ skabs bsgyur ba 'am/ srog chags be sa ra kas zos par gyur na yang de'i tshe re shig mngal du 'jug par mi 'gyur ro/ /pha dang ma dag dbang che bar grags la dri za dbang chung bar grags na yang de'i tshe re shig mngal du 'jug par mi 'gyur ro/ /dri za dbang che bar grags la pha dang ma dag dbang chung bar grags na yang de'i tshe re shig mngal du 'jug par mi 'gyur ro/ /gal te thams cad dbang chung bar grags la/ pha ma dag gis kyang bu rnyed par 'gyur ba'i las ma byas shing ma bsags par gyur/ dri zas kyang pha mar gyur pa'i las ma byas shing ma bsags par gyur/ dri zas sems gnyis po/ pho'i sems sam/ mo'i sems las sems gang yang rung ba zhig nye bar bzhag par ma gyur na yang de'i tshe re shig mngal du 'jug par mi 'gyur ro/ /gal te thams cad dbang che bar grags la/ pha ma dag gis kyang bu rnyed par 'gyur ba'i las byas shing bsags par ma gyur/ dri zas kyang pha mar 'gyur ba'i las byas kyi bsags par ma gyur/ dri zas sems gnyis po pho'i sems sam/ mo'i sems las sems gang yang rung ba zhig nye bar ma bzhag na yang de'i tshe re shig mngal du 'jug par mi 'gyur ro/ /dga' bo ji ltar na ma'i mngal du 'jug par 'gyur zhe na/ dga' bo 'di na pha dang ma chags par gyur cing 'dus pa dang / ma yang rung zhing zla mtshan dang ldan par 'gyur/ dri za yang nye bar gnas shing 'jug 'dod par gyur/ pha dang ma las kyang khu ba byung / pha dang ma dag par yang gyur/ de'i tshe ma'i mngal rlung gis bgags par ma gyur/ mkhris pas ma bgags/ bad kan gyis ma bgags/ khrag gis ma bgags/ tshil gyis ma bgags mtshams shas gang ba ma yin/ sman gyis ma bsgyur/ dbus nas 'dra ba ma yin/ grog ma'i rked pa 'dra ba ma yin/ rnga mo'i kha lta bu ma yin/ sgo shing 'ba' ta kha 'bus pa lta bu ma yin/ sgo gshol mda' lta bu ma yin/ sgo shing rta lta bu ma yin/ sba lta bu ma yin/ lo ma lta bu ma yin/ nang du gra ma lta bu skyes pa ma yin/ 'og zab pa ma yin/ steng zab pa ma yin/ mngal snod du mi rung ba ma yin/ khrag zag pa ma yin/ thung ba ma yin/ bya rog gi mchu lta bu ma yin/ g.yon yangs pa ma yin g.yas yangs pa ma yin/ steng yangs pa ma yin/ 'og yangs pa ma yin/ mtho ba ma yin/ dma' ba ma yin/ khas bub pa ma yin/ mtshan ma tsam yod pa ma yin/ yo ba ma yin/ skyon dang bcas pa ma yin/ ska bas ma bsgyur/ srog chags be sa ra kas zos par ma gyur/ pha dang ma dag dbang che bar grags na dri za yang dbang che bar grags/ pha dang ma dag dbang chung bar grags na/ dri za yang dbang chung bar grags/ thams cad dbang che bar grags par gyur la/ pha dang ma dag gis kyang bu rnyed par 'gyur ba'i las byas shing bsags par gyur/ dri zas kyang pha mar 'gyur ba'i las byas shing bsags par gyur/ dri zas sems gnyis po pho'i sems sam mo'i sems las sems gang yang rung ba zhig nye bar bzhag na ma'i mngal du 'jug par 'gyur ro/ /dga' bo de la dri za ma'i mngal du 'jug par 'dod pa na sems phyin ci log dang ldan pa/ log pa'i nga rgyal can gyis skye ba so so tha dad par sngon gyi las kyi rgyu dang / rkyen gyi stobs kyis yang dag pa ma yin pa'i 'du shes bcu po 'di lta ste/ dro ba'i 'du shes dang / nyi ma'i 'du shes dang / rlung gi 'du shes dang / char gyi 'du shes dang / rdzi char gyi 'du shes dang / grang ba'i 'du shes dang / yul ngan gyi 'du shes dang / rlung dmar gyi 'du shes dang / char drag gi 'du shes dang / skye bo phal po che ku co 'don pa'i 'du shes de dang de dag thob par 'gyur ro/ /dga' bo de'i 'du shes de dag skye ba thob cing ldan nas yang dag pa ma yin pa'i 'du shes gzhan bcu nang du skye ba na skye bar 'gyur te/ 'o na bdag khyim du 'jug go snyam pa dang / khang bzangs la gzeg go snyam pa dang / khang pa brtsegs mar 'jug go snyam pa dang / khri la 'dzeg go snyam pa dang / rtswa spyil du 'jug go snyam pa dang / lo ma'i spyil bur 'jug go snyam pa dang / rtswa stug po 'am/ nags thibs po 'am/ rtsig pa'i gseb bam/ rtsig pa'i drung du 'gro'o snyam pa ste/ dga' bo 'du shes 'di rnams las 'du shes gang yang rung ba zhig la brten nas ma'i mngal du 'jug par 'gyur ro/ / de der skyes nas lus nur nur por mngon par 'grub par 'gyur ro/ /dga' bo de la nur nur po'i lus ni pha ma'i mi gtsang ba yin par yang mi blta la/ nur nur po'i lus pha ma'i mi gtsang ba las gzhan yang ma yin te/ dga' bo 'on kyang pha ma'i mi gtsang ba de nyid la brten nas rgyu dang rkyen tshogs pa'i dbang gis nur nur po'i lus 'byung bar 'gyur te/ 'di ltar khu ba dang khrag ni dmigs pa tsam dang / rten tsam du 'gyur bar zad do/ /dga' bo dper na zho la yang brten/ rdza ma la yang brten/ srub ma la yang brten/ skyes bu'i de las byung ba'i rtsol ba la yang brten nas zho las mar sar 'byung ngo / /dga' bo de la so so la mar sar mi dmigs mod kyi/ dga' bo 'on kyang zho de nyid la brten nas rgyu dang rkyen tshogs pa'i dbang gis mar sar 'byung ste/ 'di ltar zho ni mar sar gyi dmigs pa tsam dang rten tsam du 'gyur bar zad do/ /de bzhin du pha ma'i mi gtsang ba las nur nur po'i lus blta bar bya ste/ nur nur po'i lus pha ma'i mi gtsang ba las gzhan ma yang ma yin no/ /dga' bo 'on kyang pha ma'i mi gtsang ba de nyid la brten nas rgyu dang rkyen tshogs pa'i dbang gis nur nur po'i lus mngon par 'grub ste/ 'di ltar khu ba dang khrag ni dmigs pa tsam dang rten tsam du 'gyur bar zad do/ /dga' bo dper na rtswa sngon po la brten nas srin bu skye'o/ /dga' bo de la srin bu ni rtswa sngon po yin par yang mi blta la/ srin bu rtswa sngon po las gzhan par yang mi blta'i/ 'on kyang rtswa sngon po de nyid la brten nas rgyu dang rkyen tshogs pa'i dbang gis srin bu kha dog 'thun pa'i mthu can skye zhing kha dog gi mthu des na srin bu de de'i ngo bo nyid de lo ma sngon po lta bur 'gyur ro/ /dga' bo de bzhin du nur nur po'i lus pha ma'i mi gtsang ba yin par yang mi blta/ nur nur po'i lus pha ma'i mi gtsang ba las gzhan pa yang ma yin gyi/ dga' bo 'on kyang pha ma'i mi gtsang ba la brten nas rgyu dang rkyen tshogs pa'i dbang gis dbang po'i 'byung ba chen po dag mngon par 'grub par 'gyur ro/ /dga' bo dper na ba lang gi lci ba la brten nas srin bu skye'o/ /dga' bo de la srin bu ni ba lang gi lci ba yin par mi blta/ srin bu ba lang gi lci ba las gzhan par yang mi blta'i/ dga' bo 'on kyang ba lang gi lci ba de nyid la brten nas rgyu dang rkyen tshogs pa'i dbang gis srin bu kha dog 'thun pa'i mthu can skye zhing kha dog gi mthu des na srin bu de de'i ngo bo nyid de ser por 'gyur ro/ /dga' bo de bzhin du nur nur po'i lus kyang pha ma'i mi gtsang ba yin par mi blta/ nur nur po'i lus pha ma'i mi gtsang ba las gzhan pa yang ma yin gyi/ dga' bo 'on kyang pha ma'i mi gtsang ba de nyid la brten nas rgyu dang rkyen tshogs pa'i dbang gis dbang po'i 'byung ba chen po dag mngon par 'grub bo/ /dga' bo dper na rgya shug la brten nas srin bu skye'o/ /dga' bo de la srin bu ni rgya shug yin par blta bar mi bya/ srin bu rgya shug las gzhan du yang blta bar mi bya'i/ dga' bo 'on kyang rgya shug de nyid la brten nas rgyu dang rkyen tshogs pa'i dbang gis srin bu kha dog 'thun pa'i mthu can skye zhing kha dog gi mthu des na srin bu de de'i ngo bo nyid de dmar por 'gyur ro/ /dga' bo de bzhin du nur nur po'i lus kyang pha ma'i mi gtsang ba yin par mi blta/ nur nur po'i lus pha ma'i mi gtsang ba las gzhan pa yang ma yin gyi/ dga' bo 'on kyang pha ma'i mi gtsang ba de nyid la brten nas rgyu dang rkyen tshogs pa'i dbang gis dbang po'i 'byung ba chen po dag mngon par 'grub par 'gyur ro/ /dga' bo dper na zho la brten nas srin bu skye'o/ /dga' bo de la srin bu ni zho yin par mi blta/ srin bu zho las gzhan par yang blta bar mi bya'i/ dga' bo 'on kyang zho de nyid la brten nas rgyu dang rkyen tshogs pa'i dbang gis srin bu kha dog 'thun pa'i mthu can skye zhing kha dog gi mthu des na srin bu de de'i ngo bo nyid de dkar por 'gyur ro/ / dga' bo de bzhin du nur nur po'i lus kyang pha ma'i mi gtsang ba yin par mi blta/ nur nur po'i lus pha ma'i mi gtsang ba las gzhan pa yang ma yin gyi/ dga' bo 'on kyang pha ma'i mi gtsang ba de nyid la brten nas rgyu dang rkyen tshogs pa'i dbang gis pha ma dang 'dra ba'i dbang po'i 'byung ba chen po dag mngon par 'grub bo/ /dga' bo de la pha ma'i rgyu las byung ba mi gtsang ba nur nur po'i lus la sa'i khams ni sra ba nyid du/ chu'i khams ni gsher ba nyid du me'i khams ni dro ba nyid du/ rlung gi khams ni yang zhing g.yo ba nyid du nye bar gnas pa yin no/ /dga' bo gal te pha ma las byung ba mi gtsang ba nur nur po'i lus de la sa'i khams yod kyi chu'i khams med na skam pa dang 'gyes par 'gyur te/ dper na phye spar gang 'am thal ba spar gang lta bu'o/ /dga' bo gal te pha ma'i rgyu las byung ba mi gtsang ba nur nur po'i lus de la chu'i khams yod kyi sa'i khams med na gsher bas 'bo bar 'gyur te/ dper na 'bru mar ram chu lta bu'o/ /dga' bo 'on kyang chu'i khams kyis sa'i khams bsdus pas mi 'gyes la sa'i khams kyis chu'i khams bzung bas mi 'bo'o/ /dga' bo gal te pha ma'i rgyu las byung ba mi gtsang ba nur nur po'i lus de la sa'i khams dang / chu'i khams yod kyi me'i khams med na gsher ba dang / 'jig pa dang / 'drul bar 'gyur te/ dga' bo dper na so ga rnams kyi zla ba phyi ma la sha'i dum bu me'i khams med pas gsher ba dang / 'jig pa dang / 'drul bar 'gyur ba de bzhin du dga' bo gal te pha ma'i rgyu las byung ba mi gtsang ba nur nur po'i lus de la sa'i khams dang / chu'i khams yod kyi me'i khams med na gsher ba dang / 'jig pa dang / 'drul bar 'gyur ro/ /dga' bo gal te pha ma'i rgyu las byung ba mi gtsang ba nur nur po'i lus de la sa'i khams dang / chu'i khams dang / me'i khams yod kyi rlung gi khams med na g.yo bar yang mi 'gyur/ 'phel zhing rgyas pa dang / yangs par yang 'gyur du mi btub pa zhig na dga' bo 'on kyang 'byung ba chen po nang gis kun nas bslang ba sngon gyi las kyi rnam par smin pa las byung ba nye bar gyur pa/ zin pa phan tshun gyi rgyu can 'di dag nyid sa'i khams kyis brten/ chu'i khams kyis bsdus/ me'i khams kyis yongs su smin par byas/ rlung gi khams kyis g.yo bar byas pas 'phel zhing yangs pa dang / rgyas par 'gyur ro/ /dga' bo dper na snum khur mkhan nam/ snum khur mkhan gyi slob mas bu ram byi dor byas pa mer bskol ba dang / dbugs kyis pad ma'i rtsa ba'i sbubs su bsgrubs na de dag nyid 'phel zhing rgyas pa dang / yangs par 'gyur ro/ /dga' bo de bzhin du 'byung ba chen po nang gis kun nas bslang ba sngon gyi las kyi rnam par smin pa las byung ba nye bar gyur pa zin pa phan tshun gyi rgyu can 'di dag nyid sa'i khams kyis brten/ chu'i khams kyis bsdus/ me'i khams kyis yongs su smin par byas/ rlung gi khams kyis g.yo bar byas na 'phel zhing yangs pa dang rgyas par 'gyur ro/ /dga' bo de la nur nur po'i lus pha ma'i mi gtsang ba yin par blta bar mi bya ste/ pha'i rked las ma yin ma'i mngal nas ma yin/ las de las ma yin/ rgyu de las ma yin/ rkyen de las ma yin mod kyi/ dga' bo 'on kyang pha ma'i mi gtsang ba de dag nyid la brten cing rgyu rnams tshogs pa dang / 'dus pa dang / 'byor pa dang / mngon du gyur pa las mngal na gnas pa 'grub par 'gyur ro/ /dga' bo dper na sa bon sar pa grung po ma grugs pa/ ma phug pa/ ma gas pa/ ma rul ba/ rlung dang nyi mas ma nyams pa dag rlan dang bcas pa'i sa phyogs snyi ba 'am/ zhing bzang po gshin pa zhig la btab par gyur cing legs par tshas byas pa ni sa bon de dag las rgyu rkyen gyi dbang gis myu gu dang / 'dab ma dang / sdong bu dang / snying po dang / me tog dang / 'bras bu dag rim gyis mngon par 'grub bo/ /dga' bo de la myu gu la sogs pa dag ni sa bon de dag nyid ma yin zhing de dag ma gtogs par rgyu med pa dang rkyen med pa las myu gu la sogs par 'gyur ba ma yin no/ /'on kyang rgyu rkyen tshogs pa las myu gu la sogs par 'gyur ba de bzhin du dga' bo nur nur po'i lus kyang pha ma'i mi gtsang ba yin par mi blta ste/ pha'i rked las ma yin/ ma'i mngal nas ma yin/ las de las ma yin/ rgyu de las ma yin/ rkyen de las ma yin mod kyi/ dga' bo 'on kyang pha ma'i mi gtsang ba de nyid la brten cing rgyu rnams tshogs pa dang / 'dus pa dang / 'byor pa dang / mngon du gyur pa las mngal na gnas pa 'grub par 'gyur ro/ /dga' bo dper na skyes bu mig dang ldan pa me yang dag pa kho nar 'byung bar 'dod pas nor bu me shel blangs te nyi ma la bstan te bzhag nas ba lang gi lci ba skam po'i phye ma legs par bzhag pa las me 'byin par byed na dga' bo rgyu de dag la me yod pa yin/ rgyu de dag spangs te rgyu med pa dang / rkyen med pa las me 'byung bar 'gyur ba ma yin mod kyi/ 'on kyang rgyu rkyen tshogs pa las me 'byung bar 'gyur ba de bzhin du dga' bo pha ma'i mi gtsang ba de dag nyid la brten cing rgyu rnams tshogs pa dang / 'dus pa dang / 'byor pa dang / mngon du gyur pa las mngal na gnas pa 'grub par 'gyur ro/ /dga' bo de la pha ma'i rgyu las byung ba mi gtsang ba nur nur po'i lus gang yin pa 'di ni gzugs so/ /de dang lhan cig 'byung ba tshor ba dang / 'du shes dang / 'du byed rnams dang / rnam par shes pa 'di dag ni ming ngo / /ming 'di dang gong ma'i gzugs de dag gcig tu bsdus nas ming dang gzugs shes bya ba'i grangs su 'gro ste/ dga' bo 'di lta ste/ ming dang gzugs de ni de dag kho na tsam du zad do/ /dga' bo nga ni srid pa mngon par grub pa chung ngu la yang bsngags par mi byed/ srid pa mngon par grub pa skad cig la yang bsngags par mi byed do/ /de ci'i phyir zhe na/ srid pa mngon par grub pa ni sdug bsngal ba'o/ / dper na ngan skyugs ni chung ngu yang dri mnam mo/ /dga' bo de bzhin du srid pa mngon par grub pa yang chung ngu yang skad cig kyang sdug bsngal ba'o/ /dga' bo de la gzugs kyi skye ba dang / gnas pa dang / mngon par 'grub pa dang / 'byung ba dang / tshor ba dang / 'du shes dang / 'du byed rnams dang / rnam par shes pa'i skye ba dang / gnas pa dang / mngon par 'grub pa dang / 'byung ba gang yin pa skye ba de ni sdug bsngal ba'o/ /gnas pa de ni nad do/ /'byung ba de ni rga ba dang / 'chi ba'o/ /dga' bo de la srid pa mngon par 'dod pa ma'i ltor mngal na gnas pa la mnog ci zhig yod/ dga' bo de la zhag bdun pa dang po la ni mngal gyi zug rngu mi gtsang ba rul ba/ rab tu 'bar ba'i 'dam gyi nang na 'dug pa lus kyi dbang po thams cad sdug bsngal ba/ shin du dka' ba/ dog pa dang / nyam nga bar gyur pa/ sdug bsngal bar ro gcig pa'i rnam par shes pa can de ma'i ltor nur nur por 'gyur ro/ /dga' bo de la nur nur po'i rang bzhin ji lta bu zhe na/ dga' bo nur nur po'i rang bzhin ni dper na 'bras khu 'am zho'i zho kha chu lta bu ste/ nur nur po ni de lta bu'i rang bzhin no/ /de der zhag bdun du gnas shing de zhag bdun po der gdung ba dang / kun du gdung ba dang / tsha ba dang / kun du tsha ba dang / yongs su tsha bar 'gyur te/ de la sa'i khams ni sra ba nyid du/ chu'i khams ni gsher ba nyid du/ me'i khams ni tsha ba nyid du/ rlung gi khams ni yang zhing g.yo ba nyid du nye bar gnas so/ /dga' bo zhag bdun pa gnyis pa la ni mngal gyi zug rngu mi gtsang ba/ rul ba/ rab tu 'bar ba'i 'dam gyi nang na 'dug pa lus kyi dbang po thams cad rab tu tsha ba/ shin du mi bzad pa dang / dog pa dang / nyam nga bar gyur pa sdug bsngal bar ro gcig pa'i rnam par shes pa can de la ma'i ltor nang gi rlung sngon gyi las kyi rnam par smin pa las skyes pa kun sdud ces bya ba dag ldang ste/ de'i reg pas mngal gyi zug rngu de mer mer por 'gyur ro/ /dga' bo de la mer mer po'i rang bzhin ji lta bu zhe na/ dga' bo dper na zho 'am mar mkhrang po lta bu ste/ mer mer po ni de lta bu'i rang bzhin yin no/ /de der zhag bdun du gnas shing de zhag bdun po der gdung ba dang / kun du gdung ba dang / tsha ba dang / kun du tsha ba dang / yongs su tsha bar 'gyur te/ de la sa'i khams ni sra ba nyid du/ chu'i khams ni gsher ba nyid du/ me'i khams ni dro ba nyid du/ rlung gi khams ni yang zhing g.yo ba nyid du nye bar gnas so/ /dga' bo zhag bdun pa gsum pa la ni mngal gyi zug rngu mi gtsang ba/ rul ba/ rab tu 'bar ba'i 'dam rdzab kyi nang na 'dug pa/ lus kyi dbang po thams cad rab tu tsha ba shin du mi bzad pa dang / dog pa dang / nyam nga bar gyur pa/ sdug bsngal bar ro gcig pa'i rnam par shes pa can de la ma'i ltor nang gi rlung sngon gyi las kyi rnam par smin pa las skyes pa mdzod sgo zhes bya ba dag ldang ste/ de'i reg pas mngal gyi zug rngu de nar nar por 'gyur ro/ /dga' bo de la nar nar po'i rang bzhin ji lta bu zhe na/ dga' bo dper na zangs kyi thur ma phra mo 'am srin khrol ma lta bu ste/ nar nar po ni de lta bu'i rang bzhin du 'gyur ro/ /mngal gyi zug rngu de der zhag bdun du gnas shing de zhag bdun po der gdung ba dang / kun du gdung ba dang / tsha ba dang / kun du tsha ba dang / yongs su tsha bar 'gyur te/ de la sa'i khams ni sra ba nyid du/ chu'i khams ni gsher ba nyid du/ me'i khams ni dro ba nyid du/ rlung gi khams ni yang zhing g.yo ba nyid du nye bar gnas so/ /dga' bo zhag bdun pa bzhi pa la ni mngal gyi zug rngu mi gtsang ba/ rul ba/ rab tu 'bar ba'i 'dam gyi nang na 'dug pa/ lus kyi dbang po thams cad rab tu tsha ba/ shin du mi bzad pa dang / nyam nga ba dang / dog par gyur pa/ sdug bsngal bar ro gcig pa'i rnam par shes pa can de la ma'i ltor nang gi rlung sngon gyi las kyi rnam par smin pa las skyes pa nang 'dren pa zhes bya ba dag ldang ste/ de dag gis mngal na gnas pa de gor gor por 'gyur ro/ /dga' bo de la gor gor po'i rang bzhin ji lta bu zhe na/ dga' bo dper na gdar ram/ mchi gu lta bu ste/ gor gor po ni de lta bu'i rang bzhin yin no/ /de der zhag bdun du gnas shing de zhag bdun po der gdung ba dang / kun du gdung ba dang / tsha ba dang / kun du tsha ba dang / yongs su tsha bar 'gyur te/ de la sa'i khams ni sra ba nyid du/ chu'i khams ni gsher ba nyid du/ me'i khams ni dro ba nyid du/ rlung gi khams ni yang zhing g.yo ba nyid du nye bar gnas so/ /dga' bo zhag bdun pa lnga pa la ni mngal na gnas pa de la ma'i lto'i nang du nang gi rlung sngon gyi las kyi rnam par smin pa las skyes pa kun du sdud pa zhes bya ba dag ldang ste/ des na mngal gyi zug rngu de'i lus la mtshan ma lnga po dpung pa gnyis kyi dpung pa'i mtshan ma dag dang / brla gnyis kyi brla'i mtshan ma dag dang / lnga pa mgo'i mgo'i mtshan ma 'byung bar 'gyur ro/ /dga' bo dper na dus tshigs kyi dus kyi tshe dbyar gyi char bab na dang por shing gi phung po dag las myu gu 'byung bar 'gyur ro/ /dga' bo de bzhin du mngal na gnas pa de la ma'i lto'i nang du nang gi rlung rnam par smin pa las skyes pa kun du sdud pa zhes bya ba dag ldang ste/ des na mngal na gnas pa de lus la mtshan ma lnga po dpung pa gnyis kyi dpung pa'i mtshan ma dag dang / brla gnyis kyi brla'i mtshan ma dag dang / lnga pa mgo'i mgo'i mtshan ma 'byung bar 'gyur ro/ /dga' bo zhag bdun pa drug pa la ni mngal na gnas pa de la ma'i ltor nang nas nang gi rlung sngon gyi las kyi rnam par smin pa las skyes pa rgya chen po zhes bya ba dag ldang ste/ des na mngal gyi zug rngu de'i lus la mtshan ma bzhi po lag ngar gnyis kyi lag ngar gyi mtshan ma dag dang / rje ngar gnyis kyi rje ngar gyi mtshan ma dag 'byung bar 'gyur ro/ /dga' bo dper na dbyar gyi char bab na dang por rtsa dur ba'i myu gu skye bar 'gyur ro/ /dga' bo de bzhin du mngal na gnas pa de la ma'i ltor nang nas nang gi rlung sngon gyi las kyi rnam par smin pa las skyes pa rgya chen po zhes bya ba dag ldang ste/ des na mngal gyi zug rngu de'i lus la mtshan ma bzhi po lag ngar gnyis kyi lag ngar gyi mtshan ma dag dang / rje ngar gnyis kyi rje ngar gyi mtshan ma dag 'byung bar 'gyur ro/ /dga' bo zhag bdun pa bdun pa la ni mngal na gnas pa de la ma'i ltor nang nas nang gi rlung kun du sgyur ba zhes bya ba dag ldang ste/ des na mngal na gnas pa de'i lus la mtshan ma gzhan bzhi po lag pa'i bol gnyis kyi lag pa'i bol gyi mtshan ma dag dang rkang pa'i bol gnyis kyi rkang pa'i bol gyi mtshan ma rgya chen po 'byung bar 'gyur te/ dga' bo dper na sbu ba'i phung po 'am nya lcibs kyi phung po lta bu'o/ /dga' bo de bzhin du ma'i lto'i nang du mngal na gnas pa'i zug rngu de'i lus la mtshan ma bzhi po lag pa'i bol gnyis kyi lag pa'i bol gyi mtshan ma dag dang / rkang pa'i bol gnyis kyi rkang pa'i bol gyi mtshan ma dag 'byung bar 'gyur ro/ /dga' bo zhag bdun pa brgyad pa la ni mngal na gnas pa de la ma'i ltor nang nas nang gi rlung yongs su sgyur ba zhes bya ba dag ldang ste/ des na mngal gyi zug rngu de'i lus la mtshan ma nyi shu po lag pa'i sor mo bcu'i lag pa'i sor mo'i mtshan ma rnams dang / rkang pa'i sor mo bcu'i rkang pa'i sor mo'i mtshan ma rnams skye bar 'gyur ro/ /dga' bo dper na dbyar char bab na dang por shing gi phung po'i drung gi rtsa ba dag skye bar 'gyur ro/ /dga' bo de bzhin du ma'i lto'i nang du mngal gyi zug rngu de'i lus la mtshan ma nyi shu po lag pa'i sor mo bcu'i lag pa'i sor mo'i mtshan ma rnams dang / rkang pa'i sor mo bcu'i rkang pa'i sor mo bcu'i mtshan ma rnams 'byung bar 'gyur ro/ /dga' bo zhag bdun pa dgu pa la ni ma'i lto'i nang du mngal na gnas pa zug rngu de'i lus la mtshan ma dgu po mig gi mtshan ma gnyis dang / rna ba'i mtshan ma gnyis dang / sna'i mtshan ma gnyis dang / smad kyi mtshan ma gnyis dang / kha'i mtshan ma 'byung bar 'gyur ro/ /dga' bo zhag bdun pa bcu pa la ni mngal na gnas pa de la ma'i ltor nang nas nang gi rlung sngon gyi las kyi rnam par smin pa las skyes pa brtan pa zhes bya ba dag ldang ste/ des na mngal na gnas pa de'i lus la sra ba nyid dang / lci ba nyid kun du gnas par 'gyur ro/ /zhag bdun pa de nyid la mngal na gnas pa de la ma'i ltor nang nas rlung kun nas sgo zhes bya ba dag ldang zhing de dag gis mngal na gnas pa de gang bar byed/ kun du gang bar byed/ kun du yongs su gang bar byed de/ dga' bo dper na rkyal pa 'am sbud pa gang ba bzhin no/ /dga' bo zhag bdun pa bcu gcig pa la ni mngal na gnas pa de la ma'i ltor nang nas rta byed ces bya ba'i rlung dag ldang ste/ des na mngal na gnas pa de khong stong du 'gyur zhing de'i lus la bu ga dgu yang dod par 'gyur te/ ji lta ji ltar de'i mas bskyod pa dang / kun du bskyod pa dang / yongs su bskyod pa 'am/ drag tu brtsal ba 'am/ lus dag rnam par g.yengs pa de lta de ltar mngal na gnas pa de khong stong du 'gyur zhing de'i bu ga de dag kyang mngon par 'grub par 'gyur ro/ /dga' bo rta byed ces bya ba'i rlung de dag ni gyen du ltas te 'gro ba na stod kyi bu ga 'byung bar byed/ thur du ltas te 'gro ba na smad kyi bu ga 'byung bar byed do/ /dga' bo dper na mgar ba'i sbud pa mgar ba mkhas pa 'am mgar ba'i slob mas blangs pa ji lta ji ltar lag pa gnyis kyis bus pa de lta de ltar rlung g.yo bar 'gyur ro/ /dga' bo de bzhin du rlung rta byed ces bya ba de dag kyang gyen du ltas te 'gro ba na stod kyi bu ga 'byung bar byed/ thur du ltas te 'gro ba na smad kyi bu ga 'byung bar byed do/ /dga' bo rlung rta byed de dag ni skye mched de rnams btod nas de nyid du med par 'gyur ro/ /dga' bo zhag bdun pa bcu gnyis pa la ni mngal na gnas pa de la ma'i ltor nang nas rlung yon po'i sgo zhes bya ba dag ldang ste/ de dag gis mngal na gnas pa de'i lto g.yas g.yon du rgyu ma dang gnye ma dag mngon par 'grub par byed de/ dga' bo dper na pad ma'i rtsa ba'i sbu bu'i rtsa lag dag breng chags pa bzhin du de'i nang grol 'brel pa/ dog pa 'dzings pa lta bu de 'dra ba lus la rten par 'gyur ro/ /de nas zhag bdun pa de nyid la rlung spu byed ces bya ba dag ldang ste/ de dag gis mngal na gnas pa de'i lus la tshigs sum brgya sum bcu las mi mang mi nyung ba skyed cing rlung gi dbang gis lus la gnad brgya rtsa gcig kyang rten par 'gyur ro/ /dga' bo zhag bdun pa bcu gsum pa la mngal na gnas pa de la ma'i lto'i nang du bkres pa dang skom pa dag 'byung ste/ de'i mas zos shing 'thungs pa gang yin pa de las bcud de'i lte ba nas 'jug cing de de na des 'tsho bar byed do/ /de yi ma yis zas dang skom/ /gnyis po spyad pa gang yin des/ /ma yi lto na 'dug pa yi/ /mi de de na skyed par byed/ /dga' bo zhag bdun pa bcu bzhi pa la ni mngal na gnas pa de la ma'i ltor nang nas/ rlung skud pa'i sgo zhes bya ba dag ldang ste/ de dag gis mngal na gnas pa de'i lus la chu rgyus dgu brgya po lus kyi mdun du nyis brgya nyi shu rtsa lnga dang / lus kyi rgyab tu nyis brgya nyi shu rtsa lnga dang / lus kyi g.yas su nyis brgya nyi shu rtsa lnga dang / lus kyi g.yon du nyis brgya nyi shu rtsa lnga skyed par byed do/ /dga' bo zhag bdun pa bcwa lnga pa la ni mngal na gnas pa de la ma'i ltor nang nas rlung pad ma zhes bya ba dag ldang ste/ de dag gis mngal na gnas pa de'i lus la rtsa nyi shu skyed par 'gyur te/ dga' bo de la lus kyi mdun du rtsa lnga'o/ /lus kyi rgyab tu rtsa lnga'o/ /lus kyi g.yas su rtsa lnga'o/ /lus kyi g.yon du rtsa lnga'o/ /rtsa de dag la yang ming du ma dang / ming sna tshogs dang / kha dog du ma dang / kha dog sna tshogs te/ grogs shes bya ba yod/ stobs shes bya ba yod/ brtan pa zhes bya ba yod/ mthu can zhes bya ba yod do/ /kha dog sngon po dang / kha dog ser po dang / kha dog dmar po dang / kha dog dkar po dang / bab la lta bu'i ser skya dang / khra bo dang / mar gyi kha dog dang / zho'i kha dog dang / 'bru mar gyi kha dog dang / mkhris pa ma smin pas khyab pa dang / mkhris pa smin pas khyab pa dag yod do/ /dga' bo rtsa nyi shu po de dag re re la yang 'khor rtsa bzhi bcu bzhi bcu yod pas rtsa de dag brgyad brgyar 'gyur ro/ /dga' bo de la nyis brgya ni lus kyi mdun du/ nyis brgya ni lus kyi rgyab tu/ nyis brgya ni lus kyi g.yas su/ nyis brgya ni lus kyi g.yon du 'byung bar 'gyur te/ nyis brgya ni grogs rnams kyi yin/ nyis brgya ni stobs rnams kyi yin/ nyis brgya ni brtan pa rnams kyi yin/ nyis brgya ni mthu can rnams kyi yin no/ /dga' bo yang rtsa brgyad brgya po de dag re re la yang 'khor rtsa brgya brgya yod de/ de dag na rtsa de dag brgyad khrir 'gyur ro/ /dga' bo de la nyi khri ni lus kyi mdun du/ nyi khri ni lus kyi rgyab tu/ nyi khri ni lus kyi g.yas su/ nyi khri ni lus kyi g.yon du 'byung bar 'gyur ro/ /dga' bo yang rtsa brgyad khri po de dag gi gzhi la bu gu du ma dang / bu gu sna tshogs te/ bu gu gcig pa yang yod/ bu gu gnyis pa dang / bu gu gsum pa dang / bzhi pa dang / lnga pa dang / drug pa dang / bu gu bdun pa dag kyang yod de/ dga' bo 'di lta ste/ dper na pad ma'i rtsa ba dang / sdong bu la bu gu du ma dang / bu gu sna tshogs te/ bu gu gcig pa yang yod/ bu gu gnyis pa dang / bu gu gsum pa dang / bzhi pa dang / lnga pa dang / drug pa dang / bu gu bdun pa dag yod pa de bzhin du dga' bo rtsa brgyad khri po de dag gi gzhi la yang bu gu du ma dang / bu gu sna tshogs te/ bu gu gcig pa yang yod/ bu gu gnyis pa dang / bu gu gsum pa dang / bzhi pa dang / lnga pa dang / drug pa dang / bu gu bdun pa dag yod do/ /dga' bo de la rtsa de dag ni ba spu'i khung bu so so so so dang 'brel bar 'dug go/ /dga' bo zhag bdun pa bcu drug pa la ni mngal na gnas pa de la ma'i ltor nang nas rlung mi 'chi ba zhes bya ba dag ldang ste/ de dag gis mngal na gnas pa de'i mig gi skye mched gnyis kun du 'god par byed/ nges par 'god par byed/ 'jog par byed/ yang dag par 'jog par byed/ so sor 'jog par byed cing de'i rna ba'i skye mched gnyis dang / sna'i skye mched gnyis dang / kha'i sgo dang / mid pa dang / snying gi than kor dang / gang gis zos pa dang / 'thungs pa dang / 'chos pa dang / myangs pa 'ju bar byed pa dang / gang du gnas pa dang / gang gis thur du 'byung bar byed pa de yang de la kun du 'god par byed/ nges par 'god par byed/ 'jog par byed/ yang dag par 'jog par byed/ so sor 'jog par byed do/ / dga' bo dper na rdza mkhan nam/ rdza mkhan gyi slob ma mkhas pas 'jim pa'i gong bu legs par bstar ba blangs nas 'khor lo'i steng du bzhag ste snod kyi rnam pa kun du 'god par byed/ nges par 'god par byed/ 'jog par byed/ yang dag par 'jog par byed/ so sor 'jog par byed do/ /dga' bo de bzhin du rnam par smin pa las skyes pa'i rlung de dag kyang de'i mig gi skye mched gnyis dang / rna ba'i skye mched dag dang / sna'i skye mched dag dang / kha'i sgo dang / myid pa dang / snying gi than kor dang / gang gis zos pa dang / 'thungs pa dang / 'chos pa dang / myangs pa 'ju bar byed pa dang / gang du gnas pa dang / gang gis thur du 'byung bar byed pa de yang kun du 'god par byed/ nges par 'god par byed/ 'jog par byed/ yang dag par 'jog par byed/ so sor 'jog par byed do/ /dga' bo zhag bdun pa bcu bdun pa la mngal na gnas pa de la ma'i ltor nang nas rlung 'bri'i gdong zhes bya ba dag ldang ste/ de dag gis mngal na gnas pa de'i mig gi skye mched gnyis yongs su byang bar byed/ so sor 'jog par byed/ nges par 'god par byed/ rnam par 'god par byed/ kun nas 'jog par byed cing / de'i rna ba'i skye mched gnyis dang / sna'i skye mched dag dang / kha'i sgo dang / mid pa dang / snying gi than kor dang / gang gis zos pa dang / 'thungs pa dang / 'chos pa dang / myangs pa 'ju bar byed pa dang / gang du gnas pa dang / gang gis thur du 'byung bar byed pa de yang yongs su byang bar byed/ nges par 'god par byed/ rnam par 'god par byed/ kun nas 'jog par byed do/ /dga' bo dper na khye'u 'am bu mo mkhas pa me long gi dkyil 'khor yongs su ma dag pa blangs nas thal ba thogs pa 'am/ sa'i phye ma thogs pa 'am/ 'bru mar thogs pa'i lag pa 'am/ ras ma'i chang bus phyi ba dang / kun du phyi ba dang / yongs su sbyang ba byed cing rab tu gsal bar byed do// //'dul ba phran tshegs kyi gzhi/ bam po bcu gnyis pa/ dga' bo de bzhin du las kyi rnam par smin pa las skyes pa'i rlung de dag kyang de'i mig gi skye mched gnyis dang / rna ba'i skye mched dag dang / sna'i skye mched dag dang / kha'i sgo dang / myid pa dang / snying gi than kor dang / gang gis zos pa dang / 'thungs pa dang / 'chos pa dang / myangs pa 'ju bar byed pa dang / gang du gnas pa dang / gang gi thur du 'byung bar byed pa de yang yongs su byang bar byed/ kun du 'jog par byed/ so sor 'jog par byed/ nges par 'god par byed/ rnam par 'god par byed/ yang dag par 'god par byed do/ /dga' bo zhag bdun pa bcwa brgyad pa la ni mngal na gnas pa de la ma'i ltor nang nas rlung dri ma med pa zhes bya ba dag ldang ste/ de dag gis de'i skye mched de rnams yongs su dag pa dang / yongs su byang bar 'gyur ro/ /dga' bo dper na nyi ma'i dkyil 'khor 'am/ zla ba'i dkyil 'khor sprin chen pos khebs par gyur pa rlung chen pos gtor na yongs su dag pa dang / yongs su byang bar 'gyur ro/ /dga' bo de bzhin du zhag bdun pa bcwa brgyad pa la yang mngal na gnas pa de la ma'i lto'i nang du rlung dri ma med pa zhes bya ba dag langs na de dag gis de'i skye mched rnams yongs su dag pa dang / yongs su byang bar 'gyur ro/ /dga' bo zhag bdun pa bcu dgu pa la ni mngal na gnas pa des ma'i lto'i nang du dbang po bzhi po mig gi dbang po dang / rna ba'i dbang po dang / sna'i dbang po dang / lce'i dbang po 'thob par 'gyur ro/ /dbang po gsum po lus kyi dbang po dang / yid kyi dbang po dang / srog gi dbang po dag ni des sngon ma'i mngal du zhugs pa na thob par 'gyur ro/ /dga' bo zhag bdun pa nyi shu pa la ni mngal na gnas pa de la rlung sra ba zhes bya ba dag ldang ste/ de dag gis mngal na gnas pa de'i rkang pa g.yon pa la brten nas rus pa nyi shu skyed par byed/ rkang pa g.yas pa la brten nas rus pa nyi shu skyed par byed/ long bu'i rus pa bzhi dang / rje ngar gyi rus pa gnyis dang / pus mo'i rus pa gnyis dang / brla'i rus pa gnyis dang / mjug do'i rus pa gsum dang / sgal tshigs kyi rus pa bcwa brgyad dang / rtsib ma'i rus pa nyi shu rtsa bzhi dang / rked pa'i rus pa gsum skyed par byed do/ /lag pa g.yon pa la brten nas rus pa nyi shu skyed par byed/ lag pa g.yas pa la brten nas rus pa nyi shu skyed par byed/ dpung pa'i rus pa gnyis dang / lag ngar gyi rus pa bzhi dang / brang gi rus pa bdun dang / sogs phrag gi rus pa bdun dang / sgrog rus dang / 'gram slang gi rus pa gnyis dang / so rtsa'i rus pa sum bcu rtsa gnyis dang / mgo'i thod pa'i rus pa bzhi skyed par byed do/ /dga' bo dper na gzugs mkhan nam/ gzugs mkhan gyi slob ma mkhas pa dang por shing gi dum bu sra ba dag srad bus bcings nas de dang de'i kha dog dang dbyibs kyi gzugs mngon par sgrub par byed do/ /dga' bo de bzhin du las kyi rnam par smin pa las skyes pa'i rlung de dag kyang rus pa'i lus de lta bu mngon par sgrub par byed do/ /dga' bo de ltar na zhag bdun pa nyi shu pa la ni rus pa lhan cig 'byung ba chung ngu dang / phra mo ma gtogs pa rus pa chen po nyis brgya 'byung bar 'gyur ro/ /dga' bo zhag bdun pa nyi shu rtsa gcig pa la ni mngal na gnas pa de la ma'i ltor nang nas rlung kun du 'byung ba zhes bya ba dag ldang ste/ de dag gis de'i sha skyed par byed do/ /dga' bo dper na zhal zhal mkhan nam/ zhal zhal mkhan gyi slob ma mkhas pa 'jim pa legs par byas pas rtsig pa'i gzhi la zhal zhal byed do/ /dga' bo de bzhin du kun du 'byung ba'i rlung de dag kyang mngal na gnas pa de la sha skyed par byed do/ / dga' bo zhag bdun pa nyi shu rtsa gnyis pa la ni mngal na gnas pa de la ma'i ltor nang nas rlung yongs su rgyal ba zhes bya ba dag ldang ste/ de dag gis mngal na gnas pa de'i khrag skyed par byed do/ /dga' bo zhag bdun pa nyi shu rtsa gsum pa la ni mngal na gnas pa de la ma'i ltor nang nas rlung gtsang 'dzin ces bya ba dag ldang ste/ de dag gis mngal na gnas pa de'i lus la lpags pa skyed par byed do/ /dga' bo zhag bdun pa nyi shu rtsa bzhi pa la ni mngal na gnas pa de la ma'i ltor nang nas rlung yongs su 'phyo ba zhes bya ba dag ldang ste/ de dag gis mngal na gnas pa de'i lus la lpags pa rab tu dang bar byed do/ /dga' bo zhag bdun pa nyi shu rtsa lnga pa la ni mngal na gnas pa de la ma'i ltor nang nas rlung khyer 'jig ces bya ba dag ldang ste/ de dag gis mngal na gnas pa de'i lus la sha dang khrag rab tu dang bar byed do/ /dga' bo zhag bdun pa nyi shu rtsa drug pa la ni mngal na gnas pa de la ma'i lto'i nang du skra dang spu dang sen mo dag skye bar 'gyur te/ skra dang spu dang sen mo de dag kyang so so so sor rtsa rnams dang 'brel to/ /dga' bo zhag bdun pa nyi shu rtsa bdun pa la ni mngal na gnas pa de la ma'i ltor nang nas rlung sman yon chen po zhes bya ba dag ldang ste/ de dag gis mngal na gnas pa de'i skra dang spu dang sen mo rnams rab tu dang bar byed do/ /dga' bo gal te des sngon ser sna'i dra bas kun nas dkris shing 'jungs par gyur pa dang / yo byad kun du 'dzin pa dang / bla ma rnams la gus par mi nyan pas lus dang ngag dang yid kyi sdig pa mi dge ba'i las byas shing bsags la/ de yang gal te rnam par smin pa'i phyir mngon du gyur na de brgya la mi rnams dang skal pa mnyam pa 'di lta bur 'ong na yang dbyibs kyi sdom gyi tshigs su bcad pa/ ring dang thung dang 'brel pa dang / / de bzhin du ni mang po nyid/ /mnyam dang yangs dang mkhregs pa dang / /mtho dang nag po mdzes pa'o/ /de yan lag ring na mdzes pa gang dag yin pa de dag ni de la thung ngur 'gyur la/ thung na mdzes pa gang dag yin pa de dag ni de la ring por 'gyur/ sbom na mdzes pa gang dag yin pa de dag ni de la phra mor 'gyur/ phra na mdzes pa gang dag yin pa de dag la ni de la sbom por 'gyur/ 'brel na mdzes pa gang dag yin pa de dag ni de la ma 'brel bar 'gyur/ ma 'brel na mdzes pa gang dag yin pa de dag ni de la 'brel bar 'gyur/ mang na mdzes pa gang dag yin pa de dag ni de la mi mang bar 'gyur/ mi mang na mdzes pa gang dag yin pa de dag ni de la mang bar 'gyur/ mnyam na mdzes pa gang dag yin pa de dag ni de la mi mnyam par 'gyur/ mi mnyam na mdzes pa gang dag yin pa de dag ni de la mnyam par 'gyur/ yangs na mdzes pa gang dag yin pa de dag ni de la mi yangs par 'gyur/ mi yangs na mdzes pa gang dag yin pa de dag ni de la yangs par 'gyur/ mkhregs na mdzes pa gang dag yin pa de dag ni de la ma mkhregs par 'gyur/ ma mkhregs na mdzes pa gang dag yin pa de dag ni de la mkhregs par 'gyur/ dma' na mdzes pa gang dag yin pa de dag ni de la mtho bar 'gyur/ mtho na mdzes pa gang dag yin pa de dag ni de la dma' bar 'gyur/ gnag na mdzes pa gang dag yin pa de dag ni de la dkar por 'gyur/ dkar na mdzes pa gang dag yin pa de dag ni de la nag por 'gyur ro/ /yang dga' bo des ji lta ji ltar sdig pa mi dge ba'i las byas shing bsags pa de lta de ltar glen pa dang / lkugs pa dang / mthong na yid du mi 'ong ba dang / rten 'phye dang / rna ba nyams pa dang / lce nyams pa dang / kha'i sgo zums pa dang / lag pa zha bar 'gyur zhing / yi dags rnams dang 'dra bar 'gyur gyi mi rnams dang 'dra bar ni ma yin no/ /de rang gi nye du dang snag gi gnyen mtshams rnams kyis kyang mi 'dod pa dang / mthong na yid du mi 'ong ba dang / spang ba'i chos can du 'gyur na skye bo gzhan gyis lta smos kyang ci dgos te/ des 'jig rten la lus dang / ngag dang / yid kyis gang cung zad bsgrubs pa de thams cad kyang 'jig rten la gzung bar 'os pa dang / mngon par mi 'gyur ro/ /dga' bo de ci'i phyir zhe na/ 'di ltar de ni sdig pa mi dge ba'i las byas pa dang bsags pa'i phyir de lta bur 'gyur ro/ /dga' bo gal te des ser sna'i dri ma spangs shing gtong ba dang ldan pa dang / bla ma la gus par nyan pas lus dang ngag dang yid kyi las dge ba byas shing bsags la de yang gal te rnam par smin pa'i phyir mngon du gyur na de brgya la mi rnams dang skal ba mnyam pa 'di lta bur 'ong na yang de yan lag ring na mdzes pa gang dag yin pa de dag ni de la ring por 'gyur la/ thung na mdzes pa gang dag yin pa de dag ni de la thung ngur 'gyur/ yan lag sbom na mdzes pa gang dag yin pa de dag ni de la sbom por 'gyur/ yan lag phra na mdzes pa gang dag yin pa de dag ni de la phra mor 'gyur/ 'brel na mdzes pa gang dag yin pa de dag ni de la 'brel bar 'gyur/ ma 'brel na mdzes pa gang yin pa de dag ni de la ma 'brel bar 'gyur/ mang na mdzes pa gang yin pa de dag ni de la mang bar 'gyur/ mi mang na mdzes pa gang yin pa de dag ni de la mi mang bar 'gyur/ mnyam na mdzes pa gang yin pa de dag ni de la mnyam par 'gyur/ mi mnyam na mdzes pa gang yin pa de dag ni de la mi mnyam par 'gyur/ yangs na mdzes pa gang yin pa de dag ni de la yangs par 'gyur/ mi yangs na mdzes pa gang yin pa de dag ni de la mi yangs par 'gyur/ mkhregs na mdzes pa gang yin pa de dag ni de la mkhregs par 'gyur/ ma mkhregs na mdzes pa gang yin pa de dag ni de la ma mkhregs par 'gyur/ dma' na mdzes pa gang yin pa de dag ni de la dma' bar 'gyur/ mtho na mdzes pa gang yin pa de dag ni de la mtho bar 'gyur/ gnag na mdzes pa gang yin pa de dag ni de la nag por 'gyur/ dkar na mdzes pa gang yin pa de dag ni de la dkar por 'gyur ro/ /yang dga' bo des ji lta ji ltar dge ba'i las byas shing bsags pa de lta de ltar gzugs bzang ba dang / mdzes pa dang / blta na sdug pa dang / kha dog rgyas pa mchog dang ldan par 'gyur zhing de skye bo gzhan gyis kyang 'dod pa dang / yid du 'ong bar 'gyur na nye du dang snag gi gnyen mtshams kyis lta smos kyang ci dgos/ de lus dang ngag dang yid kyis 'jig rten la gang cung zad bsgrubs pa de thams cad kyang 'jig rten la gzung bar 'os pa dang mngon par 'gyur ro/ /dga' bo de ci'i phyir zhe na/ 'di ltar de ni las dge ba dag byas pa dang bsags pa'i phyir de lta bur 'gyur ro/ /dga' bo gal te khye'ur 'gyur na ni de ma'i dku g.yas par tsog tsog por 'dug ste/ lag pa gnyis kyis gdong bkab nas ma'i sgal tshigs la kha bltas te pho ba'i 'og long ka'i steng na pho bas bkab long kas brten nas bcing ba lngas bcings pa 'am gsal shing gis btsugs pa bzhin gnas so/ /dga' bo gal te bu mor 'gyur na ni ma'i dku g.yon par tsog tsog por 'dug ste/ lag pa gnyis kyis gdong bkab nas ma'i lto la kha bltas te/ pho ba'i 'og long ka'i steng na pho bas bkab long kas brten nas bcing ba lngas bcings pa 'am gsal shing gis btsugs pa bzhin gnas so/ /dga' bo ma ha cang zas mang du zos na mngal na gnas pa la gnod cing ha cang zas nyung du zos na yang mngal na gnas pa la gnod par 'gyur la/ de bzhin du ha cang snum pa dang / ha cang rtsub pa dang / ha cang grang ba dang / ha cang tsha ba dang / ha cang lan tshwa che ba dang / ha cang skyur ba dang / ha cang mngar ba dang / ha cang kha ba dang / ha cang tsha ba dang / ha cang bska ba'i zas dag zos na yang mngal na gnas pa la gnod par 'gyur ro/ /'dod pa dag la spyod par byed pa dang / ha cang rgyug pa dang / mgyogs pa dang / mchong ba dang / rkyal ba dag la spyod par byed na 'gro ba la zhugs pa mngal na gnas pa la gnod pa dang / me'i drung na 'dug gam tsog tsog por 'dug na mngal na gnas pa la gnod par 'gyur te/ dga' bo ma'i mngal na gnas pa ni de ltar sdug bsngal drag po rtsub pa tsha ba yid du mi 'ong ba yin no/ /dga' bo bde 'gro'i 'gro bar ming thogs pa mi gang dag yin pa de la yang de lta bu'i sdug bsngal myong bar 'gyur na ngan song ngan 'gro log par ltung ba sems can dmyal ba dag la lta smos kyang ci dgos te/ de'i sdug bsngal ni dpe bya bar yang mi nus so/ /dga' bo de la srid pa tshol ba ma'i mngal na gnas pa la mnog ci zhig yod/ dga' bo zhag bdun pa nyi shu rtsa brgyad pa la ni mngal na gnas pa des ma'i mngal gyi nang du phyin ci log gi 'du shes brgyad po khyim gyi 'du shes dang / bzhon pa'i 'du shes dang / bskyed mos tshal gyi 'du shes dang / khang pa brtsegs pa'i 'du shes dang / kun dga' ra ba'i 'du shes dang / khri'i 'du shes dang / chu bo'i 'du shes dang / rdzing bu'i 'du shes thob par 'gyur ro/ /dga' bo zhag bdun pa nyi shu rtsa dgu pa la ni mngal na gnas pa de la ma'i ltor nang nas rlung yang dag skyed pa zhes bya ba dag ldang ste/ de dag gis mngal na gnas pa de'i lus kyi lpags pa'i mdog yongs su byang bar byed/ rab tu dang bar byed do/ /dga' bo de la kha cig gi lpags pa'i mdog ni las kyi rnam par smin pas nag po/ kha dog nag po/ nag po lta bur ston pa/ 'od nag po 'byung ba yongs su byang bar byed/ rab tu dang bar byed do/ / kha cig gi lpags pa'i mdog ni sngo bsangs/ kha dog sngo bsangs / sngo bsangs lta bur ston pa/ 'od sngo bsangs 'byung ba yongs su byang bar byed/ rab tu dang bar byed do/ /kha cig gi lpags pa'i mdog ni rtsub pa/ kha dog rtsub pa/ rtsub pa lta bur ston pa/ 'od rtsub po 'byung ba yongs su byang bar byed/ rab tu dang bar byed do/ /de bzhin du kha cig gi mdog snum pa dang / dkar po/ kha dog dkar po zhes bya ba la sogs pa snga ma bzhin no/ /kha cig gi lpags pa'i mdog ni rtswa dur ba'i shun pa'i mdog lta bu/ mdog rtswa dur ba'i shun pa'i lta bu/ mdog rtswa dur ba'i shun pa'i mdog lta bur ston pa/ rtswa dur ba'i shun pa'i mdog yongs su byang bar byed/ rab tu dang bar byed do/ /dga' bo zhag bdun pa sum bcu pa la ni mngal na gnas pa de la ma'i ltor nang nas rlung lcags kyi sgo zhes bya ba dag ldang ste/ de dag gis mngal na gnas pa de'i lus la skra dang spu dang sen mo'i bar yongs su byang bar byed/ rab tu dang bar byed cing / kha cig gi ni skra dang spu dang sen mo'i bar gnag pa/ kha dog gnag pa/ kha cig gi ni ser skya/ kha dog ser skya/ rtsub pa/ kha dog rtsub pa/ snum pa kha dog snum pa yongs su byang bar byed/ rab tu dang bar byed do/ /dga' bo zhag bdun pa sum bcu rtsa gcig pa la ni mngal na gnas pa de ma'i lto'i nang du 'phel zhing rgyas par 'gyur te/ dga' bo de bzhin du zhag bdun pa sum bcu rtsa gnyis pa dang / sum bcu rtsa gsum pa dang / sum bcu rtsa bzhi pa la yang mngal na gnas pa de ma'i lto'i nang du 'phel zhing rgyas par 'gyur ro/ /dga' bo zhag bdun pa sum bcu rtsa lnga pa la ni mngal na gnas pa de ma'i lto'i nang du yan lag dang nying lag thams cad dang ldan par 'gyur ro/ /dga' bo zhag bdun pa sum bcu rtsa drug pa la ni mngal na gnas pa de 'byung 'dod cing mngon par mi dga'o/ /dga' bo zhag bdun pa sum bcu rtsa bdun pa la ni mngal na gnas pa des ma'i lto'i nang du phyin ci ma log pa'i 'du shes gsum po mi gtsang ba'i 'du shes dang / dri nga ba'i 'du shes dang / 'byung ba'i 'du shes dag thob par 'gyur ro/ /dga' bo zhag bdun pa sum bcu rtsa brgyad pa la ni mngal na gnas pa de la ma'i ltor nang nas rlung yan lag ces bya ba dag ldang ste/ de dag gis mngal na gnas pa de bsgyur nas lag pa gnyis bcum ste/ ma'i mngal gyi sgor 'jog par byed do/ /de'i las dang 'bras bus rlung kha thur du lta ba zhes bya ba dag ldang ste/ de dag gis de'i rkang pa gyen du bstan cing mgo thur du bstan nas ma'i gci ba'i lam du phyogs par 'phul lo/ /dga' bo gal te des sngon ma'i mngal gyi nang du 'chi bar 'gyur ba sdig pa mi dge ba'i las byas shing bsags na de rkang pa log pa 'am/ lag pa log par 'gyur ro/ /de log cing 'byung du ma btub na de'i srog gi dbang po 'gag par 'gyur ro/ /de nas de la mkhas pa'i bud med dam/ gzhon nu gso ba la mkhas pa dag gis mar ram/ 'bru mar 'jam tsam dang / shing shal ma li legs par btags pa'i 'di gu 'am/ gzhan dag gis lag pa bskus nas lag pa de nyid la mtshon srab mo so legs par bdar ba shin du rnon po spu gri lta bu btags nas chab kung sa bzhin du shin du skyug bro ba/ dri nga ba mun khung / nyal nyil bcer ba/ srin bu'i rigs stong phrag shin du mang po'i gnas rtag tu 'dzag pa can/ rgyun du byi dor bya dgos pa/ btsog pa khu chu dang / khrag dang / dri ma dang / chu ser gyis kun du rul/ rnam par rul cing myags pa/ 'greng ba mthong na 'jigs su rung ba'i bu ga'i lpags pas g.yogs pa/ sngon gyi las kyi rnam par smin pa las byung ba'i lus kyi rma'i sbubs der lag pa mar ram/ 'bru mar dang / shing shal ma li'i 'de gus 'jam por byas pa bcug nas mngal na gnas pa de kun du mnams te dum bur bcad nas 'byin par byed do/ /gzhi de las de'i ma bu mngon par 'dod pa yang sdug bsngal gyi tshor ba drag pa/ rtsub pa/ mi bzad pa yid du mi 'ong ba myong bar 'gyur zhing tshor bas nyen pas 'chi bar 'gyur ba 'am/ shi la thug pa'i sdug bsngal myong bar 'gyur ro/ /dga' bo gal te des sngon tshe ring bar 'gyur ba'i las dge ba byas shing bsags na de log cing 'byung du mi btub par yang mi 'gyur/ de'i srog gi dbang po yang 'gag par mi 'gyur/ gzhi de las de'i ma sdug bsngal gyi tshor ba drag pa/ rtsub pa/ mi bzad pa/ yid du mi 'ong ba char cig nyams su myong bar mi 'gyur ro/ /de zhag bdun pa sum bcu rtsa brgyad pa 'das nas sdug bsngal gyi tshor ba chen po/ drag pa chen po dang / rtsub pa chen po dang / mi bzad pa chen pos ma'i lto nas 'byung ste/ dga' bo skye ba ni shin du sdug bsngal ba'o/ /dga' bo byung ma thag pa de la 'du shes gnyis 'byung bar 'gyur te/ khye'u 'am/ bu mo skyes so snyam mo/ /dga' bo khye'u 'am/ bu mo btsas ma thag tu gal te lag pas blangs nas de gzhi de las sdug bsngal gyi tshor ba drag pa/ rtsub pa/ mi bzad pa/ yid du mi 'ong ba so sor myong bar 'gyur ro/ / gal te gos kyis blangs na de gzhi de las sdug bsngal gyi tshor ba drag pa/ rtsub pa/ mi bzad pa/ yid du mi 'ong ba so sor myong bar 'gyur ro/ /gal te pang du blangs sam/ gal te khri la bzhag gam/ gal te khri'u 'am/ gal te sa 'am/ gal te shing leb la 'am/ gal te bla gab can nam/ gal te bla gab med pa 'am/ gal te grib ma la bzhag gam/ gal te nyi mas reg gam/ gal te lhags pas reg na gzhi de las sdug bsngal kho na'i tshor ba so sor myong bar 'gyur zhing drag pa nyid dang / rtsub pa nyid dang / mi bzad pa nyid dang / yid du mi 'ong ba nyid dag so sor myong bar 'gyur ro/ /dga' bo dper na ba lang gi lpags pa bshus pa ni gal te rtsig pa la rten cing 'dug na de na de la rtsig pa la rten pa'i srog chags gang dag yin pa de dag za la/ gal te shing 'am/ gal te rtswa'i phung po 'am/ gal te nam mkha' la rten cing 'dug na de na de la nam mkha' la rten pa'i srog chags gang yin pa de dag za ste/ dga' bo ba lang lpags pa bshus pa de gang la brten cing 'dug kyang de la brten pa'i srog chags rnams za bar byed cing gzhi de las sdug bsngal gyi tshor ba drag pa/ rtsub pa/ mi bzad pa/ yid du mi 'ong ba myong bar 'gyur ro/ /dga' bo de bzhin du khye'u 'am/ bu mo btsas ma thag pa yang gal te lag pas blangs na de gzhi de las sdug bsngal gyi tshor ba zhes bya ba nas yid du mi 'ong ba so sor myong bar 'gyur ro zhes bya ba'i bar snga ma bzhin no/ /gal te gos kyis blangs sam/ gal te pang du blangs sam/ gal te khri la bzhag gam/ gal te khri'u 'am/ gal te sa 'am/ gal te shing leb bam/ gal te bla gab can nam/ gal te bla gab med pa 'am/ gal te grib ma la bzhag gam/ gal te tsha ba 'am/ gal te grang bas reg na de gzhi de las sdug bsngal kho na so sor myong bar 'gyur zhing drag pa nyid dang / rtsub pa nyid dang / mi bzad pa nyid dang / yid du mi 'ong ba nyid so sor myong bar 'gyur ro/ /dga' bo byis pa btsas ma thag pa ni chu 'jam tsam gyis btab na yang de gzhi de las sdug bsngal kho na zhes bya ba nas/ yid du mi 'ong ba kho na'i bar so sor myong bar 'gyur ro/ /dga' bo dper na skyes bu mdze can lus 'dzag pa/ lus tshos pa/ lus zhigs pa/ sdug bsngal ba/ dbang po nyams pa la lcag gis gzhus na sdug bsngal kho na so sor myong bar 'gyur zhing drag pa nyid dang / rtsub pa nyid dang / mi bzad pa nyid dang / yid du mi 'ong ba nyid so sor myong bar 'gyur ro/ /dga' bo de bzhin du byis pa btsas ma thag pa de gal te chu 'jam tsam gyis btab na yang de gzhi de las sdug bsngal kho na so sor myong bar 'gyur zhing drag pa nyid dang / rtsub pa nyid dang / mi bzad pa nyid dang / yid du mi 'ong ba nyid so sor myong bar 'gyur ro/ /dga' bo de ltar skyes shing de ltar byung / de ltar mngon par grub pa dang / de nas de mas rang gi khrag gi dri mas skyed par byed/ gso bar byed/ sring bar byed do/ /dga' bo khrag gi dri ma de ni 'phags pa'i chos 'dul ba 'di la 'di lta ste/ ma'i nu zho la bya'o/ /dga' bo de la 'khor ba na yang srid pa mngon par 'dod pa de ltar sdug bsngal du mas nyen pa la mnog ci zhig yod/ de ltar skyes shing de ltar byung ba'i lus la zhag bdun 'das nas srin bu'i rigs brgyad khri 'byung bar 'gyur zhing de dag gis sems can de'i lus thams cad la za bar byed de/ dga' bo de la srin bu'i rigs skra za ba zhes bya ba ni skra'i drung na rten cing skra dag za bar byed/ srin bu'i rigs gnyis po dbyug gu can dang / mgo bo che dag ni mgo la rten cing mgo za bar byed/ srin bu'i rigs mig zan ces bya ba ni mig la brten cing mig za bar byed/ srin bu'i rigs bzhi po rgyug pa dang / sbyin byed dang / rigs ldan dang / gang po rnams ni glad pa la rten cing glad pa za bar byed/ srin bu'i rigs bsam lo zhes bya ba ni mig la rten cing mig dag za bar byed/ srin bu'i rigs mdzod sgo zhes bya ba ni sna la rten cing sna dag za bar byed/ srin bu'i rigs gnyis po 'phen byed dang / 'jog byed ni mchu la brten cing mchu dag za bar byed/ srin bu'i rigs sbrang rtsi'i 'dab ces bya ba ni so la rten cing so dag za bar byed/ srin bu'i rigs shing sgo zhes bya ba ni so'i rtsa ba la rten cing so'i rtsa ba dag za bar byed/ srin bu'i rigs khab mchu zhes bya ba ni lce la rten cing lce za bar byed/ srin bu'i rigs mchu rnon zhes bya ba ni lce drung la rten cing lce drung za bar byed/ srin bu'i rigs lag can zhes bya ba ni dkan la rten cing dkan za bar byed/ srin bu'i rigs gnyis po chu'i dra ba dang / phyed sgur ni lag sor la gnas shing lag sor dag za bar byed/ srin bu'i rigs gnyis po 'phyang ba dang rab tu 'phyang ba ni lag pa'i bol la rten cing lag pa'i bol za bar byed/ srin bu'i rigs gnyis po dpung pa dang nye dpung ni dpung pa la rten cing dpung pa dag za bar byed/ srin bu'i rigs gnyis po rko ba dang / nye rko ni lkog ma la rten cing lkog ma za bar byed/ srin bu'i rigs gnyis po khon can dang / khon can chen po ni snying la rten cing snying za bar byed/ srin bu'i rigs gnyis po dung dang dung chu ni sha la brten cing sha za bar byed/ srin bu'i rigs gnyis po mdog can dang stobs can ni khrag la brten cing khrag 'thung bar byed/ srin bu'i rigs gnyis po dpa' bo dang dri sgo ni chu rgyus la brten cing chu rgyus za bar byed/ srin bu'i rigs gnyis po dma' ba dang / kha sbubs can ni sgal tshigs la rten cing sgal tshigs za bar byed/ srin bu'i rigs tshil mdog ces bya ba ni tshil la rten cing tshil za bar byed/ srin bu'i rigs mkhris mdog ces bya ba ni mkhris pa la rten cing mkhris pa za bar byed/ srin bu'i rigs mu tig ces bya ba ni mtsher pa la rten cing mtsher pa za bar byed/ srin bu'i rigs mu tig chen po zhes bya ba ni mkhal ma la rten cing mkhal ma za bar byed/ srin bu'i rigs 'ongs min zhes bya ba ni mchin pa la rten cing mchin pa za bar byed/ srin bu'i rigs bzhi po chu 'dres dang / chu 'dres chen po dang / khab mchu dang khab mchu chen po ni rgyu ma la brten cing rgyu ma dag za bar byed/ srin bu'i rigs lnga po zla ba dang / zla gdong dang / zla 'od dang / zla 'od gdong dang / rgya chen ni glo g.yas pa la rten cing glo g.yas pa za bar byed/ srin bu'i rigs de skad ces bya ba gzhan dag ni glo g.yon pa la brten cing glo g.yon pa za bar byed/ srin bu'i rigs bzhi po rim 'bigs dang / sngar 'bigs dang / sra 'bigs dang / brtan 'bigs ni rus pa la brten cing rus pa za bar byed/ srin bu'i rigs bzhi po dkar po dang / nye dkar dang / stobs 'phrog dang / snom pa ni rtsa la rten cing rtsa za bar byed/ srin bu'i rigs bzhi po seng ge dang / stobs can dang / 'dam bu dang / me tog len ni pho ba la brten cing pho ba za bar byed/ srin bu'i rigs gnyis po brtan pa dang / nye brtan ni long ka la brten cing long ka za bar byed/ srin bu'i rigs bzhi po srin bu'i mchu dang / phung po'i gdong dang / dra ba'i kha dang / 'dral byed ni gci ba'i lam la gnas shing gci ba'i lam za bar byed/ srin bu'i rigs bzhi po sgra ngan dang / sgra ngan chen po dang / 'dren byed dang / 'drul ldan ni bshang ba'i lam la brten cing bshang ba'i lam za bar byed/ srin bu'i rigs gnyis po kha nad dang / 'jigs byed ni brla la brten cing brla za bar byed/ srin bu'i rigs gnyis po mdze dang / nye mdze ni pus mo la brten cing pus mo dag za bar byed/ srin bu'i rigs glen gzhi zhes bya ba ni rje ngar la brten cing rje ngar za bar byed/ srin bu'i rigs mgo nag ces bya ba ni rkang sor la brten cing rkang sor dag za bar byed do/ /dga' bo lus 'di ni de ltar srin bu'i rigs brgyad khris nyin mtshan du za bas gtses te des na gdung ba dang / kun du gdung ba dang / nyam chung ba dang / rmya bar 'gyur zhing dga' bo gzhi de las gdung ba dang / kun du gdung ba dang / yongs su gdung ba dag myong bar 'gyur/ so sor myong bar 'gyur/ tshor bar 'gyur/ yang dag par tshor bar 'gyur la/ sems kyi gdung ba dang / kun du gdung ba dang / yongs su gdung ba dag kyang myong bar 'gyur/ so sor myong bar 'gyur/ tshor bar 'gyur/ yang dag par tshor bar 'gyur ro/ /lus kyi rims dang / ngal ba dang / yongs su gdung ba dag kyang myong bar 'gyur/ so sor myong bar 'gyur/ tshor bar 'gyur/ yang dag par tshor bar 'gyur zhing sems kyi rims dang / ngal ba dang / yongs su gdung ba dag kyang myong bar 'gyur/ so sor myong bar 'gyur/ tshor bar 'gyur/ yang dag par tshor bar 'gyur te/ de la ni sman pa rnams kyang rmongs shing sman gyi sbyor ba mi shes na dga' bo de la 'khor ba na yang srid pa la mngon par dga' ba de ltar sdug bsngal du mas nyen pa la mnog ci zhig yod/ dga' bo de ltar byung zhing de ltar mngon par grub pa de lus la gdon 'di lta bu dag 'byung ste/ 'di lta ste/ lha'i gdon dang / klu'i gdon dang / lha ma yin gyi gdon dang / rlung lha'i gdon dang / nam mkha' lding gi gdon dang / dri za'i gdon dang / mi 'am ci'i gdon dang / lto 'phye chen po'i gdon dang / gnod sbyin gyi gdon dang / srin po'i gdon dang / yi dags kyi gdon dang / sha za'i gdon dang / 'byung po'i gdon dang / grul bum gyi gdon dang / srul po'i gdon dang / lus srul po'i gdon dang / srul po long ba'i gdon dang / skem byed kyi gdon dang / smyo byed kyi gdon dang / grib gnon gyi gdon dang / rngul byed kyi gdon dang / bya'i gdon dang / ri dgas kyi gdon dang / nam gru'i gdon dang / phyugs bdag gi gdon dang / ma mo'i gdon dang / 'dzums byed kyi gdon dang / rkang bam gyi gdon dang / nyams byed kyi gdon dang / zla ba'i gdon dang / nyi ma'i gdon dang / rgyu skar gyi gdon te/ gdon de lta bu dag lus la 'byung na dga' bo de la srid pa tshol ba ma'i mngal na gnas pa la mnog ci zhig yod/ dga' bo de ltar skyes shing de ltar mngon par grub pa de mas rang gi khrag gi dri mas skyed par byed/ gso bar byed/ sring bar byed de/ dga' bo ma'i nu zho de ni 'phags pa'i chos 'dul ba la 'di lta ste/ khrag gi dri ma zhes bya'o/ /dga' bo de la srid pa tshol ba ma'i mngal gyi gnas na gnas pa de ltar skyes shing de ltar byung / de ltar mngon par grub/ de ltar zas rags pa za ba la mnog ci zhig yod de/ de ltar legs par bde bar yongs su bsrungs na de ring na lo brgya 'am/ cung zad cig lhag par 'tsho'o/ /de las kyang phyed ni gnyid kyis khebs so/ /lo bcu ni byis pa'o/ /lo nyi shu rgas pa ste/ mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams kyis kyang gcad/ lus las byung ba'i nad rnam pa du ma brgya phrag du mas kyang gcad do/ /dga' bo lus kyi nad shin du bzod par dka' ba dag 'byung bar 'gyur te/ de dag gis gzir na srog chags rnams 'chi yang 'dod do/ /dga' bo da ltar lus can rnams kyi 'tsho ba ni shin du mi bzad pa thung ba ngan pa ste/ de yang sdug bsngal dang ldan zhing tshe phyi mar 'gro ba yin pas dge ba bya zhing tshangs par spyod pa spyad par bya ste/ skyes pa la mi 'chi ba med do/ /'on kyang da ltar mi rnams ni 'di lta ste/ don spyad pa dang / chos spyad pa dang / bsod nams spyad pa dang / dge ba spyad pa dang / dge legs spyad pa la bag bor nas gnas te/ las kyis ni 'di la las dge ba dang / mi dge ba dag byed pa yin no/ /dga' bo dran pa dang ldan pa dang / bag yod par gnos shig /khyod mjug tu 'gyod ta re/ 'dod pa dang / sdug pa dang / dga' ba dang / yid du 'ong ba thams cad dang 'bral bar 'gyur te/ 'bral ba dang / 'gyes pa ni gdon mi za bar 'byung ngo / /dga' bo lus can rnams ni las bdag gir bya ba dang / las kyi bgo skal la spyod pa dang / las la rton pa can yin te/ las dge ba 'am/ sdig pa yang rung / gang dang gang kho na byed pa'i las de dang de'i skal ba can du 'gyur ro/ /dga' bo lo brgyar 'tsho ba la gnas skabs bcu so sor myong bar 'gyur te/ gnas skabs dang po la ni byis pa dman pa gan rkyal du nyal bar 'gyur ro/ /gnas skabs gnyis pa la ni gzhon nu rtse ba'i rang bzhin can du 'gyur ro/ /gnas skabs gsum pa la ni thor bu 'dod pa spyod par 'gyur ro/ /gnas skabs bzhi pa la ni stobs dang ldan zhing spro ba can du 'gyur ro/ /gnas skabs lnga pa la ni shes rab dang ldan zhing spobs pa dang ldan par 'gyur ro/ /gnas skabs drug pa la ni dran pa dang ldan zhing dpyod pa'i rang bzhin can du 'gyur ro/ / gnas skabs bdun pa la ni brtan pa tshad la bab par 'gyur ro/ /gnas skabs brgyad pa la ni brtan pa rgyal po lta bur 'gyur ro/ /gnas skabs dgu pa la ni rgan po rga bas 'khogs par 'gyur ro/ /gnas skabs bcu pa la ni tshe zad cing 'chi ba'i chos can du 'gyur te/ dga' bo de ltar na lo brgyar 'tsho ba la gnas skabs bcu po de dag so sor myong bar 'gyur ro/ /lo brgyar 'tsho ba ni dus tshigs sum brgyar 'tsho bar 'gyur te/ dgun rnams kyi dus tshigs brgya dang / so ga rnams kyi dus tshigs brgya dang / dbyar rnams kyi dus tshigs brgya'o/ /dus tshigs sum brgyar 'tsho ba ni zla ba stong nyis brgyar 'tsho ste/ dgun rnams kyi bzhi dang / so ga rnams kyi bzhi dang / dbyar rnams kyi bzhi'o/ /zla ba stong nyis brgyar 'tsho ba ni zla ba phyed po nyis stong bzhi brgyar 'tsho bar 'gyur te/ dgun rnams kyi brgyad dang / so ga rnams kyi brgyad dang / dbyar rnams kyi brgyad do/ /zla ba phyed po nyis stong bzhi brgyar 'tsho ba ni nyin zhag sum khri drug stong du 'tsho bar 'gyur te/ nyin zhag sum khri drug stong du 'tsho ba ni zan gyi bar chad kyi zan ma gtogs par zan bdun khri nyis stong za bar 'gyur ro/ /de la zan gyi bar chad ni 'di dag yin te/ gang khros pas mi za ba dang / bde bas mi za ba dang / sdug bsngal bas mi za ba dang / rnyed kyang mi za ba dang / ma rnyed de mi za ba dang / nyal te mi za ba dang / smyung bar gnas te mi za ba dang / rtse bas myos te mi za ba dang / bya bas g.yengs te mi za ba'o/ /za ba gang yin pa dang / mi za ba gang yin pa de dag gcig tu bsdus nas ma'i nu zho dang bcas te zan bdun khri nyis stong du 'gyur ro/ /dga' bo de lta bas na mi tshe lo brgya thub pa rnams kyi tshe dang / dus tshigs dang / zla ba dang / zla ba phyed dang / nyin zhag dang / zan dang / zan gyi bar chad dag kyang brjod pa yin no/ /dga' bo de ltar skyes shing de ltar byung / de ltar mngon par grub pa'i lus la lus kyi nad 'di lta bu dag 'byung bar 'gyur te/ 'di lta ste/ mgo nad dang / mig nad dang / rna ba'i nad dang / sna nad dang / so nad dang / mgul nad dang / snying nad dang / cham pa dang / shu ba dang / g.yan pa dang / rkang shu dang / mdze dang / 'bras dang / 'brum bu phra mo dang / sha bkra dang / brjed byed dang / lhog pa dang / rkang bam dang / mtshan bar rdol dang / dmu rdzing dang / skyigs bu dang / skyug bro ba dang / ser ga dang / 'khru ba dang / rims dang / rims drag po dang / lud pa dang / dbugs mi bde ba dang / skem pa dang / bkres pa dang / skya rbab dang / skrang ba dang / tshil nad dang / mkhris nad dang / me dbal dang / rims nad dang / rims nyin gcig pa dang / nyin gnyis pa dang / nyin gsum pa dang / nyin bzhi pa dang / rtag pa'i rims dang / yan lag tsha ba dang / rtsib logs tsha ba dang / snying tsha ba dang / yan lag na ba dang / rtsib logs na ba dang / snying na ba dang / nam tshong na ba ste/ dga' bo de lta bu dang cha 'thun pa'i nad rlung las gyur pa'i nad brgya rtsa gcig dang / mkhris pa las gyur pa'i nad brgya rtsa gcig dang / bad kan las gyur pa'i nad brgya rtsa gcig dang / 'dus pa las gyur pa'i nad brgya rtsa gcig ste/ de dag bsdoms na nad bzhi brgya rtsa bzhi nad du 'byung bar 'gyur te/ dga' bo lus 'di ni nad du gyur pa/ 'bras su gyur pa/ zug rngur gyur pa/ ring po mi thogs pa dang / 'jig pa dang / mi rtag pa dang / sdug bsngal ba dang / stong pa dang / bdag med pa dang / 'gran zla dang bcas pa dang / dbugs mi phyin pa dang / rnam par 'gyur ba'i chos can no/ /dga' bo srog chags rnams ni skyes na lag pa bcad pa'i sdug bsngal myong bar 'gyur/ so sor myong bar 'gyur/ tshor bar 'gyur/ so sor tshor bar 'gyur/ rkang pa bcad pa'i sdug bsngal dang / rna ba bcad pa'i sdug bsngal dang / mchu bcad pa'i sdug bsngal dang / lce bcad pa'i sdug bsngal dang / mgo bcad pa'i sdug bsngal dang / su mi 'dod dang / lcags dang / mdor thod dang / phyin ka log tu bcings pa dang / bcing ba lngas bcing ba la sogs pa'i sdug bsngal rnam pa sna tshogs myong bar 'gyur/ so sor myong bar 'gyur/ tshor bar 'gyur/ so sor tshor bar 'gyur/ re lder dril ba dang / gsal shing gis gzugs pa dang / gag shing du gzhug pa dang / zangs su btso ba la sogs pa'i sdug bsngal rnam pa sna tshogs drag pa/ rtsub pa/ mi bzad pa/ 'chi ba la thug pa'i sdug bsngal myong bar 'gyur/ so sor myong bar 'gyur/ tshor bar 'gyur/ so sor tshor bar 'gyur ro/ /gsad pa dang / bcing ba dang / brdeg pa dang / bsdigs pa dang / bkres pa dang / skom pa'i sdug bsngal dang / lhags pa dang / char pa dang / sha sbrang dang / sbrang bu mchu rings dang / rlung dang nyi ma dang / sdig sbrul gyi reg pa las byung ba'i sdug bsngal rnam pa sna tshogs dag myong bar 'gyur/ so sor myong bar 'gyur/ tshor bar 'gyur/ so sor tshor bar 'gyur ro/ /dga' bo de ltar sdug bsngal de lta bu dag gis g.yen spyo zhing shin du nyam nga bar gyur pa'i srog chags kun du tshol ba'i rtsa ba can gyi sdug bsngal don du gnyer ba yongs su tshol ba rnams la yang dang yang du don du gnyer ba la zhen pa las 'byung / lus dang sems kyi sdug bsngal drag pa/ rtsub pa/ mi bzad pa/ yid du mi 'ong ba/ nad gdung bar byed pa dag skye bar 'gyur te/ dga' bo de lta bas na skye ba ni sdug bsngal ba'o/ /rga ba ni sdug bsngal ba'o/ /na ba ni sdug bsngal ba'o/ /'chi ba ni sdug bsngal ba'o/ /sdug pa dang bral ba ni sdug bsngal ba'o/ /mi sdug pa dang phrad pa ni sdug bsngal ba'o/ /gang 'dod pa btsal te mi rnyed pa de yang sdug bsngal ba'o/ /mdor na nye bar len pa'i phung po lnga sdug bsngal ba'o/ /dga' bo 'chag pa dang / 'dug pa dang / 'greng ba dang / nyal ba'i spyod lam dag kyang so so so sor sdug bsngal bar rig par bya ste/ bsam gtan pas spyod lam de dang / de dag gi rang bzhin brtags na/ gal te 'chag pas nyi ma 'da' bar byed cing / 'greng bar mi byed/ 'dug par mi byed/ nyal bar mi byed na des 'chag pa de la sdug bsngal kho na so sor myong bar 'gyur zhing / drag pa nyid dang / rtsub pa nyid dang / mi bzad pa nyid dang / yid du mi 'ong ba nyid so sor myong bar 'gyur gyi/ 'chag pa de la bde ba'i 'du shes 'byung bar ni mi 'gyur ro/ /gal te 'dug pas nyi ma 'da' bar byed cing / 'chag par mi byed/ 'greng bar mi byed/ nyal bar mi byed na de 'dug pa de la/ sdug bsngal kho na so sor myong bar 'gyur zhing / drag pa nyid dang / rtsub pa nyid dang / mi bzod pa nyid dang / yid du mi 'ong ba nyid so sor myong bar 'gyur gyi/ 'dug pa de la bde ba'i 'du shes 'byung bar ni mi 'gyur ro/ /gal te 'greng bas nyi ma 'da' bar byed cing / 'dug par mi byed/ 'chag par mi byed/ nyal bar mi byed na/ des 'greng ba de la sdug bsngal kho na so sor myong bar 'gyur zhing / drag pa nyid dang / rtsub pa nyid dang / mi bzad pa nyid dang / yid du mi 'ong ba nyid dag so sor myong bar 'gyur gyi 'greng ba de la bde ba'i 'du shes 'byung bar ni mi 'gyur ro/ /gal te nyal bas nyi ma 'da' bar byed cing 'chag par mi byed/ 'greng bar mi byed/ 'dug par mi byed na des nyal ba de la sdug bsngal kho na so sor myong bar 'gyur zhing / drag pa nyid dang / rtsub pa nyid dang / mi bzad pa nyid dang / yid du mi 'ong ba nyid so sor myong bar 'gyur gyi/ nyal ba de la bde ba'i 'du shes 'byung bar ni mi 'gyur ro/ /dga' bo 'on kyang spyod lam gyi sdug bsngal de dang de rgyun gcad pa'i phyir sdug bsngal sar pa gzhan dang gzhan 'byung ba la bde ba'i 'du shes 'byung ste/ dga' bo 'byung ba na yang sdug bsngal 'di kho na 'byung la/ 'gag pa na yang sdug bsngal kho na 'gag /'byung ba na yang 'du byed dag nyid 'byung la/ 'gag pa na yang 'du byed dag nyid 'gag go/ /de bzhin gshegs pas ni 'du byed rnams kyi rgyud nying mtshams sbyor ba thugs su chud nas sems can rnams kyi 'chi 'pho dang skye ba bka' stsal to/ /dga' bo 'du byed thams cad ni mi rtag pa/ mi brtan pa/ 'du byed thams cad ni dbugs mi phyin pa/ rnam par 'gyur ba'i chos can no/ /dga' bo de lta bas na 'du byed thams cad la yid byung bar bya ba'i rigs spangs pa dang / rnam par grol bar bya ba'i rigs so/ /dga' bo bde 'gro'i 'gro ba'o snyam pa'i 'du shes can gang yin pa de dag na yang shin du mi bzad pa/ 'jigs su rung ba/ smad pa/ brjod dka' ba de lta bu dang / slu ba de lta bu dang / sdug bsngal gyi rnam pa de lta bu 'byung na/ dmyal ba dang / dud 'gro dang / yi dags kyi yul du skyes pa rnams la lta smos kyang ci dgos te/ de dag gi sdug bsngal gyi rnam pa ni 'di 'dra'o zhes dpe bstan par yang shin du dka' 'o/ /dga' bo mngal du 'jug pa ni bzhi ste/ bzhi gang zhe na/ 'di na la la shes bzhin du ma'i mngal du 'jug /shes bzhin du ma'i mngal na gnas/ shes bzhin du ma'i mngal nas 'byung ste/ 'di ni mngal du 'jug pa dang po'o/ /dga' bo gzhan yang 'di na la la shes bzhin du ma'i mngal du 'jug /shes bzhin du ma'i mngal na gnas shing shes bzhin ma yin par ma'i mngal nas 'byung ste/ 'di ni mngal du 'jug pa gnyis pa'o/ /dga' bo gzhan yang 'di na la la shes bzhin du ma'i mngal du 'jug cing / shes bzhin ma yin par ma'i mngal na gnas/ shes bzhin ma yin par ma'i mngal nas 'byung ste/ 'di ni mngal du 'jug pa gsum pa'o/ /dga' bo gzhan yang 'di na la la shes bzhin ma yin par ma'i mngal du 'jug /shes bzhin ma yin par ma'i mngal na gnas/ shes bzhin ma yin par ma'i mngal nas 'byung ste/ 'di ni mngal du 'jug pa bzhi pa'o/ /ji ltar na 'di shes bzhin du ma'i mngal du 'jug /shes bzhin du ma'i mngal na gnas/ shes bzhin du ma'i mngal nas 'byung zhe na/ 'di na la la so so'i skye bo nyid yin la rang bzhin gyis tshul khrims dang ldan par gyur cing / dge ba'i chos can/ dge ba la 'dun pa/ dge ba kun du spyod pa/ sdom pa mang ba so sor rtog pa mang ba/ bag yod par gnas pa/ shes rab chen po can yin zhing / de 'gyod pa med par ram/ rgyun du zhugs pa re ltar thogs na srid pa lan bdun pa 'am/ rigs nas rigs su skye ba 'am/ lan gcig phyir 'ong ba 'am/ bar chad gcig pa zhig 'chi ba'i dus byed na dge ba'i chos de dag gis nye bar brtan pa de 'chi ka'i sdug bsngal gyi tshor ba drag pa/ rtsub pa/ mi bzad pa/ yid du mi 'ong ba/ srog 'phrog par byed pa dag gis kun du reg kyang dran pa nyams par mi 'gyur zhing / de dran pa ma nyams par 'chi ba'i dus byed de/ de nas de dran pa ma nyams par shes bzhin du ma'i mngal du 'jug par 'gyur ro/ / de der zhugs nas las bdag gir bya ba/ las kyi skye gnas pa/ las kyi bgo skal la spyod pa/ las la brten pa/ sems pas byas pa/ rten cing 'brel bar 'byung ba de phug rab tu tsha ba/ las bdag gir bya ba/ las kyi bgo skal la spyod pa/ las la rton pa/ sems pas byas pa/ rten cing 'brel bar 'byung ba/ bdud la rag las pa/ bdud kyi snod bdud kyi khyim/ mi gtsang ba thams cad kyi gter/ mi brtan pa/ slu ba'i chos can byis pa 'drid pa/ rus pa'i 'khrul 'khor rtsa'i breng chags pa can/ chu rgyus kyi dra bas che long sbrel ba/ sha dang / khrag dang tshil gyis dkris pa/ lpags pa tsam gyis g.yogs pa/ sla tsha'i tshogs gcer ba skra dang sen mo dang / so dang / spu skye bar 'gyur bar mngon pa can nga'o snyam pa'i nga rgyal ngar 'dzin pa dang / nga yir 'dzin pa/ gsal bas mngon par zhen pa/ rang dbang med pa/ snabs rul pa'i rlan sungs shing myags pa dang / tshil dang / chu ser dang / rngul gyi dri ma dang / kha chu dang / mkhris pa dang / bad kan dang / glo ba dang / rgyu ma dang / gnye ma dang / mtsher pa dang / lgang pa dang / mi gtsang ba rnam pa mang pos yongs su gang ba/ srin bu'i rigs stong phrag mang po'i gnas shin du dri nga ba'i sgo gnyis dang ldan pa/ rus pa'i bu ga dang / khung bu phug du ma dang ldan pa/ gcin dang / glad pa dang / glad rgyas dang / rkang gi tshogs kyi ljan ljin can du pho ba'i 'og long ka'i steng na kha ni sgal tshigs la bltas/ rgyab ni lto ba'i lpags pa la bstan te/ zla ba re re zhing zla mtshan 'byung bas ni brta ma'i zas kyi rnam pa so'i phreng ba gnyis kyis zhib mor byas shing mid par mid pa/ 'og nas kha'i rma'i dri ma dang kha chus brlan pa steng nas glad rgyas kyis sbags pa/ skyugs pa dang / 'dra ba'i zas kyi ro khong na lte ba'i bu ga nas 'jug pas ni skyed cing / nur nur po dang mer mer po dang / nar nar po dang / gor gor po dang / rkang lag 'gyus pa'i ngo bor yongs su 'gyur bar 'gyur zhing / lag pa dang / rkang pa dang / 'gram pa ni sha ma'i snod kyis dkris/ snam phyis bzhin du dri nga ba mnam pa mi bzad pa/ mun gnag 'greng bar ni yan man rgyu/ zas kyi ro kha ba dang / skyur ba dang / rtsub pa dang / lan tshwa dang / tsha ba dang / ska ba me stag lta bu dag gis ni reg /srin grol ma bzhin mi gtsang ba'i khu bas ni gso/ mi gtsang ba myags pa rab tu 'bar ba'i 'dam gyi nang du ni song / srog gi dbang po ni mi brtan/ ma'i lus kyi nang gi mes ni kun nas gdung / kun du gdung / yongs su gdung / tsha kun du tsha/ yongs su tsha/ sreg cing kun du sreg /yongs su sreg cing sdug bsngal gyi tshor ba chen po drag pa/ rtsub pa/ mi bzad pa/ yid du mi 'ong ba myong bar 'gyur ro/ /ji lta ji ltar de'i ma g.yo ba dang / kun du g.yo ba dang / yongs su g.yo ba dang khur lci ba khyer ram/ lus 'phyang ba de lta de ltar yang de bcing ba lngas bcings pa dang / me ma mur gyi dong du bcug pa lta bur sdug bsngal gyi tshor ba chen po drag pa/ rtsub pa/ mi bzad pa/ yid du mi 'ong ba/ dpe bya bar dka' ba myong bar 'gyur ro/ /de de ltar ma'i mngal gyi gnas na gnas shing sdug bsngal gyis nyen kyang dbang po rno ba'i phyir dran pa nyams par mi 'gyur ro/ /de ltar ma'i mngal na gnas pa rnams la yang kha cig la sngon gyi las kyi rgyu dang rkyen gyi dbang gis mngal log par 'gyur zhing / mngal na gnas pa la mi bde bar 'gyur ro/ /mas bza' ba dang btung ba mi mthun pa ha cang grang ba 'am/ ha cang dro ba 'am/ ha cang skyur ba 'am/ ha cang mngar ba 'am/ ha cang kha ba 'am/ ha cang tsha ba 'am/ ha cang bska ba 'am/ ha cang rtsub pa 'am/ ha cang lan tshwa che ba bsten pa 'am/ btung bas mus byung bar gyur pa 'am/ skyes pas mus byung bar gyur pa 'am/ nad mang ba 'am/ smra ba mang ba 'am/ mya ngan mang ba 'am/ chags ches pa 'am/ sgyel ba 'am/ brgyab par gyur na rgyu de dag gis de'i lus la gnod par 'gyur ro/ /lus la gnod na de la brten pa mngal na gnas pa la yang gnod par 'gyur ro/ /de de na gnod cing shin du sdug bsngal bas nyen pa na 'gul te 'gul bas log par 'gyur ro/ /de nas de shes pa'i bud med dam/ gzhon nu gso ba la mkhas pas chu 'jam tsam dang / mar dkar dang / 'bru mar gyis lag pa byugs nas chab khung sa lta bur dri nga ba/ mnam pa/ mi bzad pa/ mun gnag /ljan ljin gyi 'dam can/ srin bu'i rigs stong phrag shin du mang po'i gnas rtag tu 'dzag pa/ rgyun du byi dor bya dgos pa/ btsog pa/ khrag gi dri ma dang / chu ser kun du rul/ rnam par rul cing myags pa can/ 'dred pa mthong na shin du 'jigs su rung ba/ bu ga'i pags pas g.yogs pa/ rus pa'i 'khrul 'khor chen po'i bu ga der lag pa bcug ste/ dal bu dal bus mnams shing gnas ji lta ba bzhin du 'jog par byed do/ /de der chu 'jam tsam dang / mar dkar dang / 'bru mar gyis byugs pa'i lag pas mnams shing cham du 'bebs pa na sdug bsngal gyi tshor ba chen po drag pa/ rtsub pa/ mi bzad pa/ yid du mi 'ong ba myong bar 'gyur ro/ /dga' bo dper na rigs kyi bu shin du gzhon nu'i rang bzhin can gyi lus la spu gri rnon po spu breg tu rung bas yan lag dang nying lag thams cad bcad cing / lus rtsi drag pos kun nas bskus na lus la sdug bsngal gyi tshor ba chen po shin du drag pa/ rtsub pa/ mi bzad pa/ yid du mi 'ong ba 'byung bar 'gyur ro/ /dga' bo de bzhin du de la chu 'jam tsam dang / mar dkar dang / til mar gyis byugs pa'i lag pas mnams na lus la sdug bsngal gyi tshor ba chen po drag pa/ rtsub pa mi bzad pa/ yid du mi 'ong ba 'byung bar 'gyur ro/ /mngal gyi gnas na gnas pa de'i lus la sdug bsngal gyi reg pa las byung ba'i sdug bsngal gyi tshor ba chen po drag pa/ rtsub pa mi bzad pa/ yid du mi 'ong ba de dag byung yang dbang po rno ba'i phyir dran pa nyams par mi 'gyur te/ de ltar na de shes bzhin du ma'i mngal na gnas pa yin no/ /de nas de yan lag dang nying lag thams cad skyes nas gcin gyi gnas rul ba/ ltung ba/ 'greng ba/ mi bzad pa/ dri nga ba/ mnam pa/ mun gnag /mthong na shin du 'jigs su rung ba/ phyi sa dang / gcin gyis bsgos pa/ dri mi zhim pa'i dri ma dang / khrag dang chu ser can rtag tu 'dzag pa'i rma'i sgor sngon gyi las kyi rnam par smin pa las skyes pa'i rlung gis rkang pa ni gyen du bstan/ mgo ni thur du bstan/ lag pa gnyis ni bskums pa na rus pa'i 'khrul 'khor gnyis kyis gzir/ kun du gzir/ yongs su gzir cing / sdug bsngal gyi tshor ba chen po/ drag pa rtsub pa/ mi bzad pa/ yid du mi 'ong ba dag gis lus kyi yan lag rma sar pa lta bu gze re can thams cad sngon por 'gyur la/ lus kyi dbang po thams cad ni tsha/ mngal gyi dri ma shin du btsog pas ni lus yog /skom pas chu dang mgrin pa dang / snying ni skams te/ dog pa dang nyam nga bas mi bzad par gnas pa de rgyu dang rkyen gyi dbang gis sngon gyi las kyi rnam par smin pa las skyes pa'i rlung gis phul ba na dka' dka' ltar ji zhig lta ste 'byung ngo / /de byung ma thag tu phyi rol gyi rlung rma la rtsi drag po'i reg pa can lta bu 'am/ lag pa 'am/ gos kyis reg na ral gris bcad pa bzhin du sdug bsngal gyi tshor ba chen po drag pa/ rtsub pa mi bzad pa/ yid du mi 'ong ba myong bar 'gyur ro/ /de sdug bsngal de lta bus nyen kyang dbang po rno ba'i phyir dran pa nyams par mi 'gyur te/ de ltar na de shes bzhin du ma'i mngal nas 'byung ba yin no/ /dga' bo de ltar na ma'i mngal du 'jug pa yang sdug bsngal ba/ gnas pa yang sdug bsngal ba ma'i mngal nas 'byung ba yang sdug bsngal ba yin na/ dga' bo de la srid pa mngon par 'dod pa ma'i mngal gyi gnas na gnas pa la mnog ci zhig yod/ ji ltar na 'di shes bzhin du ma'i mngal du 'jug /shes bzhin du ma'i mngal du gnas shing shes bzhin du ma yin par ma'i mngal nas 'byung zhe na/ 'di na la la so so'i skye bo nyid yin la/ rang bzhin gyis tshul khrims dang ldan par gyur cing / dge ba'i chos can/ dge ba la 'dun pa/ dge ba kun du spyod pa/ sdom pa mang ba/ so sor rtog pa mang ba/ bag yod par gnas pa yin zhing 'gyod pa med pa 'am/ rgyun du zhugs pa re ltar thogs na srid pa lan bdun pa 'am/ rigs nas rigs su skye ba 'am/ lan cig phyir 'ong ba 'am/ bar chad gcig pa zhig 'chi ba'i dus byed na dge ba'i chos de dag gis nye bar brtan pa/ de 'chi ka'i sdug bsngal gyi tshor ba drag pa/ rtsub pa/ mi bzad pa/ yid du mi 'ong ba/ srog 'phrog par byed pa dag gis reg kyang dran pa nyams par mi 'gyur zhing de dran pa ma nyams par 'chi ba'i dus byed de/ de nas de dran pa ma nyams par shes bzhin du ma'i mngal du 'jug go/ /de der zhugs nas las bdag gir bya ba zhes bya ba nas/ srin grol ma bzhin du khu bas ni gso/ mi gtsang ba myags pa rab tu 'bar ba'i 'dam gyi nang du ni song / srog gi dbang po ni mi brtan/ ma'i lus kyi nang gi mes ni kun nas gdung zhes bya ba'i bar snga ma bzhin no/ /sreg /kun du sreg /yongs su sreg cing / sdug bsngal gyi tshor ba chen po drag pa/ rtsub pa/ mi bzad pa yid du mi 'ong ba myong bar 'gyur ro zhes bya ba nas/ ji lta ji ltar de'i ma g.yo ba dang / kun du g.yo ba dang / yongs su g.yo ba de lta de ltar yang de bcing ba lngas bcings pa dang me ma mur gyi dong du bcug pa lta bur sdug bsngal gyi tshor ba chen po drag pa rtsub pa mi bzad pa yid du mi 'ong ba/ dpe bya bar dka' ba myong bar 'gyur ro/ /de de ltar ma'i mngal gyi gnas na gnas shing sdug bsngal gyis nyen kyang dran pa nyams par mi 'gyur ro/ /de ltar ma'i mngal na gnas pa rnams la yang kha cig la sngon gyi las kyi rgyu dang rkyen gyi dbang gis mngal log par 'gyur zhing mngal na gnas pa la mi bde bar 'gyur ro/ /mas bza' ba dang / btung ba mi mthun pa ha cang grang ba 'am/ ha cang dro ba 'am zhes bya ba'i bar snga ma bzhin no/ /chags ches pa 'am/ sgyel ba 'am/ brgyab par gyur na rgyu de dag gis de'i lus la gnod par 'gyur ro/ /lus la gnod na de la rten pa mngal na gnas pa la yang gnod par 'gyur ro/ /de de na gnod cing sdug bsngal bas nyen pa na 'gul te 'gul bas log par 'gyur ro/ / de nas de shes pa'i bud med dam/ gzhon nu gso ba la mkhas pas chu 'jam tsam dang / mar dkar dang / 'bru mar gyis lag pa byugs nas zhes bya ba nas/ mnams shing gnas ji lta ba bzhin du 'jog par byed do zhes bya ba'i bar snga ma bzhin no/ / de der chu 'jam tsam dang / mar dkar dang / 'bru mar gyis byugs pa'i lag pas mnams pa na sdug bsngal gyi tshor ba chen po drag pa/ rtsub pa mi bzad pa/ yid du mi 'ong ba myong bar 'gyur ro/ /dga' bo dper na rigs kyi bu shin du gzhon nu'i rang bzhin can gyi lus la spu gri rnon po spu breg tu rung bas yan lag dang / nying lag thams cad bcad cing lus la rtsi drag pos kun nas bskus na lus la sdug bsngal gyi tshor ba chen po drag pa/ rtsub pa mi bzad pa yid du mi 'ong ba myong bar 'gyur ro/ / //'dul ba phran tshegs kyi gzhi/ bam po bcu gsum pa/ dga' bo de bzhin du de la chu 'jam tsam dang / mar dkar dang / 'bru mar gyis bskus pa'i lag pas mnams pa na lus la sdug bsngal gyi tshor ba chen po drag pa/ rtsub pa mi bzad pa/ yid du mi 'ong ba 'byung bar 'gyur ro/ /mngal gyi gnas na gnas pa de'i lus la sdug bsngal gyi reg pa las byung ba'i sdug bsngal gyi tshor ba chen po drag pa/ rtsub pa mi bzad pa/ yid du mi 'ong ba de dag byung yang dran pa nyams par ni mi 'gyur te/ de ltar na 'di shes bzhin du ma'i mngal na gnas pa yin no/ /de nas de yan lag dang nying lag thams cad skyes nas gcin gyi gnas rul ba/ ltung ba 'gred pa/ mi bzad pa dri nga ba/ mnam pa/ mun gnag mthong na 'jigs su rung ba/ phyi sa dang / gcin gyis bsgos pa/ dri mi zhim pa'i dri ma dang / khrag dang chu ser can rtag tu 'dzag pa'i rma'i sgor sngon gyi las kyi rnam par smin pa las skyes pa'i rlung gis rkang pa ni gyen du bstan/ mgo ni thur du bstan/ lag pa gnyis ni bskums pa na rus pa'i 'khrul 'khor/ gnyis kyis gzir kun du gzir/ yongs su gzir cing / sdug bsngal gyi tshor ba chen po drag pa/ rtsub pa/ mi bzad pa/ yid du mi 'ong ba dag gis lus kyi yan lag rma sar pa lta bu gze re can thams cad sngon por gyur la/ lus kyi dbang po thams cad ni tshe/ mngal gyi dri ma shin du btsog pas ni lus g.yogs/ skom pas mchu dang / mgrin pa dang / snying ni bskams te/ de dog pa nyam nga bas mi bzad par gnas pa de rgyu dang rkyen gyi dbang gis sngon gyi las kyi rnam par smin pa las skyes pa'i rlung gis phul ba na dka' dka' ltar ji zhig lta ste 'byung ngo / /de byung ma thag tu phyi rol gyi rlung rma la rtsi drag po'i reg pa can lta bu 'am/ lag pa 'am/ gos gyis reg na ral gris bcad pa bzhin du sdug bsngal gyi tshor ba chen po drag pa/ rtsub pa mi bzad pa/ yid du mi 'ong ba myong bar 'gyur ro/ /de sdug bsngal de lta bus nyen na dbang po 'bring po yin pa'i phyir dran pa nyams pa dang / sems nye bar nyams par 'gyur te/ de ltar na de shes bzhin ma yin par ma'i mngal nas 'byung ba yin no/ /dga' bo de ltar na ma'i mngal du 'jug pa yang sdug bsngal ba/ ma'i mngal na gnas pa yang sdug bsngal ba/ ma'i mngal nas 'byung ba yang sdug bsngal ba yin na/ dga' bo de la srid pa 'dod pa ma'i mngal gyi gnas na gnas pa la mnog ci zhig yod/ ji ltar na 'di shes bzhin du ma'i mngal du 'jug cing shes bzhin ma yin par ma'i mngal na gnas/ shes bzhin ma yin par ma'i mngal nas 'byung zhe na/ 'di na la la so so'i skye bo kho na rang bzhin gyis tshul khrims dang ldan par gyur cing / dge ba'i chos can dge ba la 'dun pa/ dge ba kun du spyod pa/ sdom pa mang ba/ so sor rtog pa mang ba/ bag yod par gnas pa/ 'gyod pa med pa 'am/ rgyun du zhugs pa re ltar thogs na srid pa lan bdun pa 'am/ rigs nas rigs su skye ba 'am/ lan gcig phyir 'ong ba 'am/ bar chad gcig pa zhig 'chi ba'i dus byed na dge ba'i chos de dag gi nye bar brtan pa de 'chi ka'i sdug bsngal gyi tshor ba drag pa rtsub pa/ mi bzad pa/ yid du mi 'ong ba srog 'phrog par byed pa dag gis reg kyang dran pa nyams par mi 'gyur zhing de dran pa ma nyams par 'chi ba'i dus byed de/ de nas de dran pa ma nyams par shes bzhin du ma'i mngal du 'jug go/ /de der zhugs nas las bdag gir bya ba las kyi skye gnas pa/ las kyi bgo skal la spyod pa/ las la rton pa/ sems pas byas pa/ rten cing 'brel bar 'byung ba de phug rab tu tsha ba/ las bdag gir bya ba/ las kyi bgo skal la spyod pa/ las la rton pa/ sems pas byas pa/ rten cing 'brel bar 'byung ba/ bdud la rag las pa/ bdud kyi snod/ bdud kyi khyim mi gtsang ba thams cad kyi gter/ mi brtan pa/ slu ba'i chos can/ byis pa 'drid pa/ rus pa'i 'khrul 'khor/ rtsa'i breng chags pa can/ chu rgyus kyi dra bas che long sbrel ba/ sha dang khrag dang tshil gyis dkris pa/ lpags pa tsam gyis g.yogs pa/ sla tsha'i tshogs bcer ba/ skra dang sen mo dang / so dang / spu skye bar 'gyur bar mngon pa can/ nga'o snyam pa'i nga rgyal/ ngar 'dzin pa dang / nga yir 'dzin pa gsal bas mngon par zhen pa/ rang dbang med pa/ snabs rul pa'i rlan sungs shing myags pa dang / tshal dang / chu ser dang / rngul gyi dri ma dang / kha chu dang / mkhris pa dang / bad kan dang / glo ba dang / rgyu ma dang / gnye ma dang / mtsher pa dang / lgang pa dang / mi gtsang ba rnam pa mang pos yongs su gang ba/ srin bu'i rigs stong phrag mang po'i gnas/ shin du dri nga ba'i sgo gnyis dang ldan pa/ rus pa'i bu ga dang khung bu'i phug du ma dang ldan pa/ gcin dang / glad pa dang / glad rgyas dang / rkang gi tshogs kyi ljan ljin can du pho ba'i 'og long ka'i steng na kha ni sgal tshigs la bltas/ rgyab ni lto'i lpags pa la bstan te/ zla ba re re zhing zla mtshan 'byung bas ni brta ma'i zas kyi rnam pa so'i phreng ba gnyis kyis zhib mor byas shing mid par mid pa/ 'og nas kha'i rma'i dri ma dang / kha chus brlan pa/ steng nas glad rgyas kyis spags pa/ skyugs pa dang 'dra ba'i zas kyi ros khong na lte ba'i bu ga nas 'jug pas ni skyed cing nur nur po dang / mer mer po dang / nar nar po dang / gor gor po dang / rkang lag 'gyus pa'i ngo bor yongs su 'gyur bar 'gyur zhing lag pa dang / rkang pa dang / 'gram pa ni sha ma'i snod kyis dkris snam phyis bzhin du dri nga ba/ mnam pa/ mi bzad pa/ mun gnag 'gred par ni yan man rgyu/ zas kyi ro kha ba dang / skyur ba dang / rtsub pa dang / lan tshwa dang / tsha ba dang / bska ba me stag lta bu dag gis ni reg /srin grol ma bzhin mi gtsang ba'i khu bas ni gso/ mi gtsang ba myags pa rab tu 'bar ba'i 'dam gyi nang du ni song / srog gi dbang po ni mi brtan/ ma'i lus kyi nang gi mes ni kun nas gdung / kun du gdung / yongs su gdung / tsha kun du tsha/ yongs su tsha/ sreg kun du sreg /yongs su sreg cing / sdug bsngal gyi tshor ba chen po drag pa/ rtsub pa/ mi bzad pa/ yid du mi 'ong ba myong bar 'gyur ro/ /ji lta ji ltar de'i ma g.yo ba dang / kun du g.yo ba dang / yongs su g.yo ba dang / khur lci ba khyer ram/ lus 'phyang ba de lta de ltar yang de bcing ba lngas bcings pa dang / me ma mur gyi dong du bcug pa lta bur sdug bsngal gyi tshor ba chen po drag pa/ rtsub pa/ mi bzad pa/ yid du mi 'ong ba dpe bya bar dka' ba myong bar 'gyur ro/ /de de ltar ma'i mngal gyi gnas na gnas shing sdug bsngal gyis nyen pa na dran pa nyams par 'gyur ro/ /de ltar ma'i mngal na gnas pa rnams la yang kha cig la sngon gyi las kyi rgyu dang rkyen gyi dbang gis mngal log par 'gyur zhing mngal na gnas pa la mi bde bar 'gyur ro/ / mas bza' ba dang btung ba mi mthun pa ha cang grang ba 'am/ ha cang dro ba 'am zhes bya ba nas chags ches pa 'am/ sgyel ba 'am/ brgyab par gyur na rgyu de dag gis de'i lus la gnod par 'gyur ro/ /lus la gnod na de la brten pa mngal na gnas pa la yang gnod par 'gyur ro/ /zhes bya ba'i bar snga ma bzhin no/ /de de nas log par 'gyur te/ de nas de shes pa'i bud med dam/ gzhon nu gso ba la mkhas pas chu 'jam tsam dang / mar dkar dang / 'bru mar gyis lag pa byugs pas mnams shing cham du 'bebs par byed do/ /de der chu 'jam tsam dang / mar dkar dang / 'bru mar gyis byugs pa'i lag pas cham du 'bebs pa na sdug bsngal gyi tshor ba chen po drag pa/ rtsub pa/ mi bzad pa/ yid du mi 'ong ba myong bar 'gyur ro/ /dga' bo dper na rigs kyi bu shin du gzhon nu'i rang bzhin can gyi lus la spu gri rnon po/ spu breg tu rung bas yan lag dang nying lag thams cad bcad cing / lus rtsi drag pos kun nas bskus na lus la sdug bsngal gyi tshor ba chen po drag pa/ rtsub pa/ mi bzad pa/ yid du mi 'ong ba 'byung bar 'gyur ro/ /dga' bo de bzhin du mngal na gnas pa de la chu 'jam tsam dang / mar dkar dang / 'bru mar gyis bskus pa'i lag pas mnams na lus la sdug bsngal gyi tshor ba chen po drag pa/ rtsub pa/ mi bzad pa/ yid du mi 'ong ba 'byung bar 'gyur ro/ /mngal gyi gnas na gnas pa de'i lus la sdug bsngal gyi reg pa las byung ba'i sdug bsngal gyi tshor ba chen po drag pa/ rtsub pa mi bzad pa/ yid du mi 'ong ba de dag byung na dbang po rtul ba'i phyir dran pa nyams par 'gyur zhing sems nye bar nyams par 'gyur te/ de ltar na de shes bzhin du ma'i mngal du 'jug cing shes bzhin ma yin par ma'i mngal na gnas pa yin/ shes bzhin ma yin par ma'i mngal nas 'byung ba yin no/ /dga' bo de ltar ma'i mngal du 'jug pa yang sdug bsngal ba/ ma'i mngal na gnas pa yang sdug bsngal ba/ ma'i mngal nas 'byung ba yang sdug bsngal ba yin na/ dga' bo de la 'khor ba na srid pa mngon par 'dod pa ma'i mngal gyi gnas na gnas pa la mnog ci zhig yod/ ji ltar na 'di shes bzhin ma yin par ma'i mngal du 'jug / shes bzhin ma yin par ma'i mngal na gnas/ shes bzhin ma yin par ma'i mngal nas 'byung zhe na/ 'di na la la rang bzhin kho nas tshul khrims 'chal ba yin zhing mi dge ba'i chos can/ mi dge ba la 'dun pa/ mi dge ba kun du spyod pa/ sdom pa ma yin pa mang ba/ so sor rtog pa med pa mang ba/ bag med par gnas pa/ yo byad kun du 'dzin pa/ ser sna can/ 'jungs pa/ brnab sems can/ gnod sems can/ log par lta ba/ 'gyod pa can yin la/ 'chi ba'i dus byed na mi dge ba'i chos de dag gis nye bar brtan pa de 'chi ka'i sdug bsngal gyi tshor ba drag pa/ rtsub pa/ mi bzad pa/ yid du mi 'ong ba/ srog 'phrog par byed pa de dag gis reg na/ dran pa nyams par 'gyur zhing sems nye bar nyams par 'gyur te/ de na sdug bsngal du ro gcig pa'i rnam par shes pa can 'di gang yin/ 'di ji lta bu yin/ bdag gang yin/ gang nas shi 'phos gang nas 'ongs/ gang du skye zhes bya ba mi shes te/ de ltar na 'di shes bzhin ma yin par ma'i mngal du 'jug /shes bzhin ma yin par ma'i mngal na gnas/ shes bzhin ma yin par ma'i mngal nas 'byung ba yin no/ /dga' bo de ltar na ma'i mngal du 'jug pa yang sdug bsngal ba/ ma'i mngal na gnas pa yang sdug bsngal ba/ ma'i mngal nas 'byung ba yang sdug bsngal ba yin na dga' bo de la 'khor ba na yang srid pa la mngon par dga' ba de ltar sdug bsngal du mas nyen pa la mnog ci zhig yod/ dga' bo skye ba de ni de ltar sdug bsngal du mas gtses par gyur pa yin yang mi nyid ni bskal pa bye ba brgya stong du yang rnyed par dka' 'o/ /dga' bo lha dag 'chi 'pho ba na lha gzhan dag kye bde 'gro'i 'jig rten du song la rab tu brtan par so sor gnos shig ces skul bar byed do/ /dga' bo lha rnams kyi bde 'gro'i 'jig rten gang zhe na/ mir skye ba yin te/ de ltar shin du rnyed par dka' 'o/ /de lta bas na dal ba phun sum tshogs pa shin du rnyed par dka'o/ /sems can dmyal ba rnams ni gcig tu sdug bsngal ba dang / gcig tu drag pa dang / gcig tu rtsub pa dang / gcig tu mi bzad pa dang / gcig tu yid du mi 'ong ba ste/ dga' bo de ni sdug bsngal gyi dpe yang bya bar mi nus so/ /yi dags rnams ni gnod sems can/ sems nyon mongs pa can/ sems 'jam pa ma yin pa/ g.yo dang rgyu yod pa/ rtsub pa/ 'tshe ba/ lag pa khrag gis gsher ba/ yid du mi 'ong ba/ sgrib pa can/ gcer bu/ gzugs mi sdug pa/ 'jigs su rung ba/ bkres pa dang / skom pa'i sdug bsngal gyis nyen pa yin no/ /lha rnams ni 'chi 'pho ba dang / ltung ba dang / rnam par 'gyur ba dang / sdug pa dang 'bral ba'i sdug bsngal dang / mya ngan gyi chos can rtag tu 'jigs pa yin no/ /dud 'gro'i skye gnas pa'i sems can ni mtha' med na dga' bo de na don spyod pa ma yin/ bsod nams spyod pa ma yin/ chos spyod pa ma yin/ dge ba spyod pa ma yin/ dge legs spyod pa ma yin gyi/ gcig la gcig za bar byed pa ste/ sems can de dag ni ji ltar mthu chung ba za bar byed pa'o/ /dga' bo dud 'gro rnams kyi nang du skyes pa'i sems can dag la gang dag mun par skyes shing mun par rgas/ mun par 'chi ba'i dus byed pa dag kyang yod do/ /de dag kyang gang zhe na/ 'di lta ste/ sbur ba dang / phye ma leb dang / sbrang bu mchu rings dang / zas su til gyi phub ma za ba dang / srin bu t+r+yai bu ka dang / srin bu trai la ta dang / gzhan yang sems can mun par skyes shing mun par rgas/ mun par 'chi ba'i dus byed pa gang dag yin pa'o/ /de la byis pa so so'i skye bo thos pa dang mi ldan pa/ sngon ro la lhag par chags pa/ lus kyis nyes par spyod pa spyad cing ngag dang yid kyis nyes par spyod pa spyad nas sems can de lta bu rnams dang skal ba mnyam par skye bar 'gyur te/ sems can de dag ni mun par skyes shing mun par rgas mun par 'chi ba'i dus byed par 'gyur ro/ /dga' bo dud 'gro rnams kyi nang du skyes pa'i sems can dag la gang dag lus las skye zhing lus la rgas/ lus la 'chi ba'i dus byed pa dag kyang yod do/ /de dag kyang gang zhe na/ 'di lta ste/ sro ma dang / shig dang srin bu g.yon can dang / 'bu dang / gzhan yang sems can lus las skyes shing lus la rgas/ lus la 'chi ba'i dus byed pa gang dag yin pa'o/ /de la byis pa so so'i skye bo thos pa dang mi ldan pa sngon ro'i rjes su chags pa/ lus kyis nyes par spyod pa spyad cing ngag dang yid kyis nyes par spyod pa spyad nas sems can de lta bu dag dang skal ba mnyam par skye bar 'gyur te/ sems can de dag ni lus las skye zhing lus la rgas/ lus la 'chi ba'i dus byed par 'gyur ro/ /dga' bo dud 'gro rnams kyi nang du skyes pa'i sems can dag la gang dag chur skyes shing chur rgas/ chur 'chi ba'i dus byed pa dag kyang yod do/ /de dag kyang gang zhe na/ 'di lta ste/ nya dang ru sbal dang / sbal pa dang / chu srin byis pa gsod dang / srog chags ba lu ka dang / gzhan yang sems can chur skyes shing chur rgas/ chur 'chi ba'i dus byed pa gang dag yin pa'o/ /de la byis pa so so'i skye bo thos pa dang mi ldan pa sngon ro'i rjes su chags pa/ lus kyis nyes par spyod pa spyad cing ngag dang yid kyis nyes par spyod pa spyad nas sems can de lta bu rnams dang skal ba mnyam par skye bar 'gyur te/ sems can de dag ni chur skyes shing chur rgas/ chur 'chi ba'i dus byed do/ /dga' bo dud 'gro rnams kyi nang du skyes pa'i sems can dag la gang dag bshang ba dang gci ba'i dri tshor nas 'di bza'o 'di btung ngo snyam zhing der rgyug / kun du rgyug pa dag kyang yod do/ /de dag kyang gang zhe na/ 'di lta ste/ ra dang lug dang / bya gag dang / phag dang / khyi dang / wa dang / bya rog dang / chun lag dang / sbrang bu dang / gzhan yang sems can bshang ba dang / gci ba'i dri tshor nas 'di bza'o 'di btung ngo snyam zhing der rgyug /kun du rgyug pa gang dag yin pa'o/ / de la byis pa so so'i skye bo thos pa dang mi ldan pa/ sngon dri'i rjes su chags pa/ lus kyis nyes par spyod pa spyad cing ngag dang yid kyis nyes par spyod pa spyad nas sems can de de lta bu rnams dang skal ba mnyam par skye bar 'gyur te/ sems can de dag ni bshang ba dang gci ba'i dri tshor nas 'di bza'o 'di btung ngo snyam zhing rgyug /kun du rgyug par 'gyur ro/ /dga' bo dud 'gro rnams kyi nang du skyes pa'i sems can dag la gang dag rtswa skam po dang / gsher ba lce'i rtse mos bsdus nas so'i skam pas bcad de za ba dag kyang yod do/ /de dag kyang gang zhe na/ 'di lta ste/ glang po che dang / rta dang / rnga mo dang / ba lang dang / bong bu dang / ri dgas dang / ma he dang / phag rgod dang / gzhan yang sems can rtswa skam po dang / gsher ba lce'i rtse mos bsdus nas so'i skam pas bcad de za ba gang dag yin pa'o/ /dga' bo 'khor ba ni bzang rlag pa shin du bzang rlag pa ste/ 'di thams cad ni 'bar/ kun du 'bar kun du rab tu 'bar zhing me lce gcig tu gyur pa yin no/ /dga' bo gzhan yang thams cad ni mig dang / rna ba dang / sna dang / lce dang / lus dang / yid dang / gzugs rnams dang / sgra dang dri dang / ro dang / reg bya dang / chos rnams so/ /dga' bo de thams cad gang gis kun du 'bar/ rab tu 'bar/ kun du rab tu 'bar zhing me lce gcig tu gyur pa yin zhe na/ 'dod chags kyi me dang / zhe sdang gi me dang / gti mug gi mes kyang kun du 'bar kun du rab tu 'bar zhing me lce gcig tu gyur pa yin/ skye ba dang / rga ba dang / na ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams kyis kyang kun du 'bar sdug bsngal gyis kyang kun du 'bar ro zhes bshad do/ /dga' bo le lo can sdig pa mi dge ba'i chos kun nas nyon mongs par byed pa/ yang srid pa pa/ rnam par smin pa sdug bsngal ba can/ tshe phyi ma la skye ba dang / rga ba dang / 'chi bar 'gyur ba dag dang / 'dres pa can ni sdug bsngal bar gnas so/ /dga' bo brtson 'grus brtsams pa/ mthu dang ldan pa/ brtson 'grus dang ldan pa/ spro ba can/ pha rol gnon pa brtan pa/ nem nur med pa/ dge ba'i chos rnams la brtson pa ma btang ba ni bde bar gnas so/ /dga' bo de lta bas na 'di ltar bslab par bya ste/ lpags pa dang / chu rgyus dang / rus pa tsam lus kyang rung / lus las sha dang khrag dag skams kyang bla 'on kyang kye ma brtson 'grus brtsams pa mthu dang ldan pa/ brtson 'grus dang ldan pa/ spro ba can/ pha rol gnon pa/ brtan pa/ nem nur med pa/ dge ba'i chos rnams la brtson pa ma btang bas thob par bya ba gang yin pa de ma thob par bar skabs su brtson 'grus dor bar mi bya'o zhes dga' bo khyod kyis de ltar bslab par bya'o/ /dga' bo nga ni 'jig rten dang lhan cig rtsod par mi byed de/ 'jig rten nyid nga dang lhan cig rtsod par byed do/ /de ci'i phyir zhe na/ chos smra ba ni su yang 'ga' dang yang lhan cig rtsod par mi byed de/ nga'o zhes rtsod par mi byed/ lta ba rtog pa'i bzod pas ma yin/ skal ba yod pa'i gzugs kyis ma yin gyi/ nga ni bdag gis ji tsam mthong ba dang / rig pa dang / mngon par rdzogs par sangs rgyas pa dang / mngon sum du byas pa de kho na smra 'o/ /dga' bo de ji snyam du sems/ de bzhin gshegs pa gzhan du 'gyur ba'i tshig gang yin pa de gsung ngam/ btsun pa ma lags so/ /dga' bo legs so legs so/ /de bzhin gshegs pa gzhan du 'gyur ba'i tshig gang yin pa de gsung ba ni gnas ma yin zhing go skabs med de/ dga' bo de bzhin gshegs pa ni yang dag pa gsung ba/ bden pa gsung ba/ chos gsung ba/ de kho na nyid gsung ba/ phyin ci ma log par gsung ba'o/ /de bzhin gshegs pa ni yun ring po nas 'jig rten la phan pa bzhed pa/ bde ba bzhed pa/ grub pa dang bde ba bzhed pa/ lam mkhyen pa/ lam grub pa/ lam ston pa/ lam brjod pa/ lam yongs su 'dren pa'o/ /de bzhin gshegs pa ni dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba/ bla na med pa/ lha dang mi rnams kyi ston pa/ sangs rgyas bcom ldan 'das so/ /dga' bo 'jig rten ni dad pa med pa/ dbang pos 'khol ba/ 'phral gang du lta ba/ lag tu 'ongs pa mthong ba/ 'god pa che ba/ bsags pa nyung ba ste/ sla ba mi byed kyi dka' bas bdag nyid kun du rtsol bar byed do/ /dga' bo lung yang mi dgos/ shes rab kyang mi dgos/ khyod kyis sha'i mig gis ji tsam mthong ba de kho na la yang dag par rtogs shig dang / ji ltar mthong ba la yang dag par brtags pa nyid kyis thar bar 'gyur ro/ /dga' bo khyod nga la dad pas ma 'gro/ dga' bas ma 'gro/ rjes su thos pas ma 'gro/ rnam pa la rtog pas ma 'gro/ dge sbyong du lta bas ma 'gro/ dge sbyong gi lta ba rtog pa bzod pas ma 'gro/ dge sbyong la gus pas ma 'gro/ bdag gi bla ma dge sbyong gau ta ma'o zhes ma 'gro shig / dga' bo 'on kyang gcig pu lkog tu song la ngas chos gang dag nyid kyi mngon par mkhyen pas mngon par rdzogs par sangs rgyas pa de dag soms shig /gzhol cig /nye bar rtogs shig / lan mang du gyis shig dang / chos gang dang gang mngon sum du byas pa'i chos de dang de rdzogs par byas na bdag nyid gling dang / bdag nyid skyabs can dang / chos gling dang / chos skyabs can dang / gzhan ma yin pa gling dang / gzhan ma yin pa skyabs can du gnas so/ /dga' bo ji ltar na dge slong bdag nyid gling dang / bdag nyid skyabs can dang / chos gling dang / chos skyabs can dang / gzhan ma yin pa gling dang / gzhan ma yin pa skyabs can du gnas she na/ dga' bo 'di na dge slong rtun pa dang ldan pa/ dran pa dang shes bzhin can/ 'jig rten la brnab sems dang / yid mi bde ba rnam par spangs nas nang gi lus la lus kyi rjes su lta zhing gnas/ phyi'i lus la lus kyi rjes su lta zhing gnas/ phyi dang nang gi lus la lus kyi rjes su lta zhing gnas/ lus la kun 'byung ba'i chos su rjes su lta zhing gnas/ lus la kun 'byung ba la zad pa'i chos su lta zhing gnas/ lus yod do zhes de'i dran pa 'di lta ste/ shes pa tsam dang / mthong ba tsam dang / so sor dran pa tsam du legs par gnas shing mi rten par gnas la/ 'jig rten na chung zad kyang len par mi byed do/ / dga' bo de bzhin du dge slong rtun pa dang ldan pa/ dran pa dang shes bzhin can/ 'jig rten la brnab sems dang / yid mi bde ba rnam par spangs nas/ nang gi lus la yang lus kyi rjes su lta zhing gnas/ phyi dang nang gi lus la yang lus kyi rjes su lta zhing gnas/ nang gi tshor ba dag dang / phyi'i tshor ba dag dang / phyi dang nang gi tshor ba dag la tshor ba'i rjes su lta zhing gnas/ nang gi sems dang / phyi'i sems dang / phyi dang nang gi sems la sems kyi rjes su lta zhing gnas/ nang gi chos rnams dang / phyi'i chos rnams dang / phyi dang nang gi chos rnams la chos kyi rjes su lta zhing gnas/ chos rnams la kun 'byung ba'i chos su rjes su lta zhing gnas/ chos rnams la kun 'byung ba la zad par rjes su lta zhing gnas/ chos rnams yod do zhes de'i dran pa 'di lta ste/ shes pa tsam dang / mthong ba tsam dang / so sor dran pa tsam du legs par gnas shing mi rten par gnas la/ 'jig rten na cung zad kyang nye bar len par mi byed de/ dga' bo de ltar na dge slong bdag nyid gling dang / bdag nyid skyabs can dang / chos gling dang / chos skyabs can dang / gzhan ma yin pa gling dang / gzhan ma yin pa skyabs can du gnas pa yin no/ /dga' bo tshur skyes bu g.yo med pa/ sgyu med pa/ drang po/ brtan pa'i rang bzhin can de ni ngas nang btams na/ nub kun shes pa lung ston par 'gyur/ nub btams na nang kun shes pa lung ston par 'gyur ro/ /dga' bo nga'i chos ni legs par gsungs pa/ yang dag par mthong ba/ nad med pa/ dus chad pa med pa/ nye bar gtod pa/ 'di mthong ba la don yod pa/ mkhas pa rnams kyis rang gis rig par bya ba yin no/ /gsung rab 'di ni 'di lta ste/ ston pa yang mngon sum du gyur/ dam pa'i chos nye bar gtod pa/ yongs su mya ngan las 'da' bar 'gyur ba/ rdzogs pa'i byang chub tu 'gro ba/ bde bar gshegs pas thugs su chud pa yang ston pas snying po btung bar bya ba yin no/ / dga' bo de lta bas na khyod kyis rang gi don dang / gzhan gyi don dang / gnyi ga'i don la lta zhing so sor yang dag par bslab par bya ste/ ci nas kyang bdag rab tu byung nas don yod pa dang / 'bras bu dang bcas pa dang / rnam par smin pa bde bar 'gyur ba dang / gang dag gi chos gos dang / bsod snyoms dang / gnas mal dang / na ba'i rkyen gyi yo byad sman dag yongs su spyad pa/ de dag gi bya ba byas pa de dag kyang ci nas kyang shin tu 'bras bu che ba dang / shin du phan yon che ba dang / shin du gzi brjid che ba dang / rgya chen por 'gyur ba de ltar dga' bo khyod kyis bslab par bya'o/ /gang la dga' ba dang / gang la mngon par dga' ba'i gzugs de la rnam par 'gyur ba dang / gzhan du 'gyur ba dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'byung bar mi 'gyur ba'i gzugs ni ngas gcig kyang yang dag par rjes su ma mthong ngo / /dga' bo de ji snyam du sems/ gzugs rtag gam mi rtag /btsun pa mi rtag lags so/ /mi rtag pa gang yin pa de sdug bsngal ba yin nam sdug bsngal ba ma yin/ btsun pa de ni sdug bsngal ba lags te/ gang mi rtag pa ni sdug bsngal bar 'gyur ba'i chos can lags so/ /de ji ga 'phags pa nyan thos thos pa dang ldan pa 'di ni bdag gi'o/ /'di ni bdag go/ /de ni bdag gi bdag go zhes bdag gir khas len tam/ btsun pa ma lags so/ /dga' bo de ji snyam du sems/ tshor ba dang / 'du shes dang / 'du byed rnams dang / rnam par shes pa rtag gam mi rtag / btsun pa mi rtag lags so/ /mi rtag pa gang yin pa de sdug bsngal ba yin nam/ sdug bsngal ba ma yin/ btsun pa de ni sdug bsngal ba lags te/ gang mi rtag pa ni sdug bsngal bar 'gyur ba'i chos can lags so/ /de ji ga 'phags pa nyan thos thos pa dang ldan pa 'di ni bdag gi'o/ /'di ni bdag go/ /'di ni bdag gi bdag go zhes bdag tu khas len tam/ btsun pa ma lags so/ /dga' bo de lta bas na khyod kyis gzugs gang yin pa ci yang rung / 'das pa 'am/ ma 'ongs pa 'am/ da ltar byung ba 'am/ nang gi 'am/ phyi'i 'am/ rags pa 'am/ phra ba 'am/ ngan pa 'am/ gya nom pa 'am/ thag ring ba gang yin pa 'am/ nye ba gang yin pa de dag thams cad la/ 'di ni bdag gi ma yin/ 'di ni bdag ma yin/ 'di ni bdag gi bdag ma yin no/ /zhes de de ltar yang dag pa'i shes rab kyis yang dag pa ji lta ba bzhin du blta bar bya zhing / tshor ba gang yin pa ci yang rung ba dang / 'du shes gang yin pa ci yang rung ba dang / 'du byed gang yin pa ci yang rung ba dang / rnam par shes pa gang yin pa ci yang rung / 'das pa 'am/ ma 'ongs pa 'am/ da ltar byung ba 'am/ nang gi 'am/ phyi'i 'am/ rags pa 'am/ phra ba 'am/ ngan pa 'am/ gya nom pa 'am/ thag ring ba gang yin pa 'am/ nye ba gang yin pa de thams cad la 'di ni bdag gi ma yin/ 'di ni bdag ma yin/ de ni bdag gi bdag ma yin no/ /zhes de de ltar yang dag pa'i shes rab kyis yang dag pa ji lta ba bzhin du blta bar bya'o/ /'phags pa nyan thos thos pa dang ldan pa de ltar lta ba na gzugs las kyang yid 'byung bar 'gyur zhing / tshor ba dang / 'du shes dang / 'du byed rnams dang / rnam par shes pa las kyang yid 'byung bar 'gyur ro/ /yid byung na 'dod chags dang 'bral lo/ /'dod chags dang bral na rnam par grol lo/ /rnam par grol na bdag gi zag pa zad do/ /tshangs par spyod pa bsten to/ /bya ba byas so/ /'di las srid pa gzhan mi shes so zhes rnam par grol lo snyam pa'i ye shes mthong bar 'gyur ro/ /chos kyi rnam grangs 'di bshad pa na tshe dang ldan pa dga' bo chos rnams la chos kyi mig rdul med cing dri ma dang bral ba skyes so/ /dge slong lnga brgya ni len pa med par zag pa dag las sems rnam par grol lo/ /bcom ldan 'das kyis de skad ces bka' stsal te/ bde bar gshegs pas de skad gsungs nas/ ston pas gzhan yang 'di skad bka' stsal to/ /dga' bo mnyam gzhag min sems la/ /phung po thams cad zad pa dang / /ye shes dag pa skye mi 'gyur/ /de ltas brtson pa lhur blang bya/ /phung po skye zhing 'jig pa dag /yang dang yang du so sor brtag /dag pa yang dag skyes pa la/ /lha rnams thams cad dga' bar 'gyur/ /sdug dang grogs dang 'grogs pa dang / /ldang zhing rim gro byed pa dang / /rnyed dang bkur sti tshigs su bcad/ /gang de dga' bo yongs spang gyis/ /khyim gnas de bzhin khyim pa min/ /gnyi ga dang ni mi 'dre na/ /sdug bsngal gyi ni mthar byed khyod/ / de lta na ni mthar phyin 'gyur/ /dang po nur nur por 'gyur te/ /de nas mer mer por 'gyur ro/ /mer mer po las nar nar 'gyur/ /nar nar po las gor gor 'gyur/ /gor gor po las yan lag ni/ /bzhi dang mgo yang skye 'gyur zhing / /las kyi rgyu las byung ba yi/ /rus tshigs sna tshogs skye bar 'gyur/ /mgo yi thod pa'i dgu dang ni/ /'gram pa yi ni rus pa gnyis/ /so ni sum bcu rtsa gnyis dang / /so yi rtsa ba sum bcu gnyis/ /mgrin pa dang ni rna ba'i drung / /sna dang kan ni gong ma dang / /snying kha lkog ma med pa yi/ /rus pa dag ni nyi shur 'gyur/ /mig gi rus pa bzhi dang ni/ /thal gong gi yang rus pa bzhi/ /dpung pa g.yas dang g.yon dag gi/ /rus pa dag ni lnga bcu yod/ /brang gi rus pa brgyad yin te/ /de la sgal tshigs sum bcu gnyis/ /rgyab kyi rtsib ma'i rus pa ni/ /rus pa dag ni sum bcu 'o/ /ngos gnyis rtsib logs g.yas pa na/ /rtsib rus bcu gsum ldan pa ste/ /de bzhin rtsib logs g.yon pa na/ /gzhan yang bcu dang gsum yod do/ /de dag nyi shu rtsa drug ste/ /tshigs gsum pa ni gsum gsum dang / /tshigs gnyis pa ni gnyis dang ldan/ /lhag ma rnams ni tshigs med do/ /brla ni g.yas dang g.yon dag la/ /rus pa dag ni bcwa lnga yod/ /lus 'di dag la rus pa ni/ /brgya dang lnga dang gsum yod par/ /rdzogs pa'i sangs rgyas rab mkhyen pa/ /bden pa'i mtshan gyis bka' stsal to/ /'og tu rkang pa'i mthil nas ni/ /gong du klad pa'i bar gyi lus/ /gang dag gis ni nyer brten pa/ /'dam bu'i khyim bzhin nyam chung ngo / /gzer gyi gzungs kyis ma zin pa/ /sha dang khrag gis g.yogs pa ste/ /sgyu ma mkhan gyi srad bu yis/ /shing gi 'khrul 'khor sbrel ba ltar/ /de bzhin du ni lus 'di yang / /chu rgyus dag gis breng gis sbrel/ /lpags pa rlon pas so sor g.yogs/ /sgo dgu'i rma ni chen por ldan/ /mi gtsang rul pa'i dri mnam pa/ /kun nas rab tu 'dzag par 'gyur/ /ji ltar 'bru ni sna tshogs kyis/ /sbyang ni bkang bar gyur pa ltar/ /de bzhin du ni lus 'di yang / /sna tshogs rul pa'i 'byung gnas yin/ /rus pa'i 'khrul 'khor 'di 'dra ba'i/ /lus ni rul pa snying po med/ /'di la byis pa bag med de/ /chags su med par shes par gyis/ /rngul dang mchil ma snabs dag dang / /bad kan rnag dang khrag rnams dang / / mchin pa mkhris pa zhag dang ni/ /zag pa glad pa glad rgyas dang / /snying dang sul mangs mkhal ma dang / /mi gtsang glo ba lgang pa dang / /tshil dang spu dang mtsher pa dang / /rgyu ma dang ni gnye ma ste/ /'di ni rul pa sna tshogs pa/ / 'di 'dra ba yi 'byung khung yin/ /sdig lus 'jigs pa chen po ste/ /dgra dang 'dra bar shes par bya/ /grong khyer rnying pa ci bzhin du/ /rul pa'i lus ni nyam chung ngo / /'dus byas nyin dang mtshan du yang / /rnam par 'jig cing rab tu 'jig / grong khyer rus pa'i rtsig pa can/ /sha dang khrag gis zhal zhal byugs/ /de la 'dod chags zhe sdang dang / /gti mug dang ni 'chab pa skye/ /grong khyer rtsig pa'i rus pa can/ /sha dang khrag gis byugs pa dag / phyi dang nang bcas rtag tu yang / /mi mdza' ba yis mngon par gtses/ /bcom ldan 'das kyis de skad ces bka' stsal pa dang / tshe dang ldan pa dga' bo dang / /dge slong lnga brgya po de dag yi rangs te/ bcom ldan 'das kyis gsungs pa la mngon par bstod do/ /de nas bcom ldan 'das kyis tshe dang ldan pa dga' bo mngal du 'jug pa'i mdos btams nas 'khor ba'i dgon pa las bsgral te shin du mthar thug pa'i grub pa dang bde ba mya ngan las 'das pa la bzhag go/ /de nas bcom ldan 'das kyis dge slong rnams la bka' stsal pa/ dge slong dag nga'i dge slong dbang po'i sgo bsdams pa rnams kyi mchog ni 'di lta ste/ dge slong dga' bo 'di yin no/ /de nas tshe dang ldan pa dga' bo dgra bcom pa nyid thob ste rnam par grol ba'i dga' ba dang bde ba myong bas de'i tshe tshigs su bcad de smras pa/ bsro khang gi ni khrus dag dang / /zas dang snum bsku byug pa dang / /gdugs kyis dgab pa byas pa yi/ /bde ba mang po nyams su myong / /dge slong rnams the tshom skyes nas the tshom thams cad gcod par mdzad pa sangs rgyas bcom ldan 'das la zhus pa/ btsun pa tshe dang ldan pa dga' bos las ci zhig bgyis na las de'i rnam par smin pas 'di'i lus kyi mdog gser gyi kha dog lta bur grub cing skyes bu chen po'i mtshan sum bcus ni brgyan/ bcom ldan 'das bas ni sor bzhis thung la/ 'dod pa dag la lhag par chags pa las bcom ldan 'das kyis nan gyis phral nas 'khor ba'i dgon pa las bsgral te/ shin du mthar thug pa'i grub pa dang bde ba mya ngan las 'das pa la bzhag lags/ bcom ldan 'das kyis bka' stsal pa/ dge slong dag dga' bo nyid kyis las byas shing bsags pa/ tshogs rnyed pa/ rkyen yongs su bsgyur ba/ dba' rgal bzhin nye bar gnas pa/ nges par gyur pa yin te/ dga' bo nyid kyis las byas shing bsags pa gzhan su zhig gis myong bar 'gyur/ dge slong dag las byas shing bsags pa dag ni phyi rol gyi sa'i khams la rnam par smin par mi 'gyur/ chu'i khams la ma yin/ me'i khams la ma yin/ rlung gi khams la ma yin gyi/ 'on kyang las dge ba dang mi dge ba byas shing bsags pa rnams ni zin pa'i phung po dang khams dang / skye mched dag kho na la rnam par smin par 'gyur te/ bskal pa brgya phrag rnams su yang / / las rnams chud zar mi 'gyur te/ /tshogs shing dus la bab pa na/ /lus can rnams la 'bras bur smin/ /dge slong dag sngon byung ba skye dgu rnams kyi tshe lo brgyad khri thub pa na ston pa sangs rgyas bcom ldan 'das rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa rnam par gzigs shes bya ba mi'i 'jig rten du byung ste/ de 'khor dge slong 'bum phrag drug bcu rtsa gnyis dang ljongs rgyu zhing gshegs pa na rgyal po'i pho brang gnyen ldan du byon nas gnyen ldan gyi tshal na bzhugs so/ /de'i g.yas khyim gyi gcung 'dod pa dag la shin du chags par gyur pa las yang dag par rdzogs pa'i sangs rgyas rnam par gzigs kyis nan gyis phral nas 'khor ba'i btson ra las bsgral te shin du mthar thug pa'i grub pa dang bde ba mya ngan las 'das pa la bzhag go/ /de'i tshe rgyal po'i pho brang gnyen ldan na rgyal po gnyen ldan zhes bya ba rgyal srid byed du 'jug ste/ rgyal srid 'byor pa dang / rgyas pa dang / bde ba dang / lo legs pa/ skye bo dang / mi mang pos gang ba/ 'thab pa dang / rtsod pa dang / 'khrug pa dang / 'khrug long zhi ba chom rkun dang / nad dang bral ba/ sa lu dang / bu ram shing dang / ba lang dang / ma he phun sum tshogs pa/ chos kyi rgyal po chos dang 'thun pas chos bzhin du byed du 'jug go/ /de'i g.yas khyim gyi nu bo ni 'dod pa rnams la shin du chags par gyur to/ /rgyal po gnyen ldan gyis yang dag par rdzogs pa'i sangs rgyas rnam par gzigs 'khor dge slong 'bum phrag drug bcu rtsa gnyis dang 'dir byon nas 'di nyid na gnyen ldan gyi tshal na bzhugs so zhes thos so/ /thos nas kyang btsun mo'i 'khor dang / gzhon nu dang / blon po dang / grong khyer gyi mi dang bcas te yang dag par rdzogs pa'i sangs rgyas rnam par gzigs ga la ba der song ngo / /de la yang dag par rdzogs pa'i sangs rgyas rnam par gzigs kyis gang zhig thos nas rgyal po gnyen ldan btsun mo'i 'khor dang / gzhon nu dang / blon po dang / grong khyer gyi mi dang bcas te/ khyad par chen po thob pa de lta bu'i chos bstan to/ /de'i g.yas khyim gyi nu bo ni 'dod pa la lhag par chags pa dang ldan pas khyim nas ma byung ba dang / de la blon po'i bu dang / mdun na 'don gyi bu dang / gzhan yang chung po grogs rnams kyis dong ste smras pa/ grogs po rgyal po ni btsun mo'i 'khor dang / gzhon nu dang / blon po dang / grong mi dang bcas te yang dag par rdzogs pa'i sangs rgyas rnam par gzigs blta ba'i phyir gshegs na/ khyod lta bu mi nyid rnyed dka' zhing shin du rnyed dka' ba thob nas 'dod pa rnams la shin du chags nas khyim nas ma byung ngo / /de de dag gis btams pa dang / snying la ngo tsha bar gyur nas de dag 'grogs te yang dag par rdzogs pa'i sangs rgyas rnam par gzigs ga la ba der song ngo / /ji tsam na yang dag par rdzogs pa'i sangs rgyas rnam par gzigs kyi gcung gis de rnams kyis bzhin btab nas khrid pa mthong ste/ des dris pa/ ci'i phyir 'di de ltar bzhin btab nas khrid/ de dag gis ji ltar gyur pa de la rgyas par bsnyad pa dang / des smras pa/ shes ldan dag nga yang yang dag par rdzogs pa'i sangs rgyas rnam par gzigs kyi gcung yin te/ de kho na bzhin du 'dod pa rnams la lhag par chags par gyur pa las/ nga bcom ldan 'das yang dag par rdzogs pa'i sangs rgyas rnam par gzigs kyis nan gyis phral nas 'khor ba'i dgon pa las bsgral te shin du mthar phyin pa'i grub pa dang bde ba mya ngan las 'das pa la bzhag go/ /de lta bas na skyes bu gti mug kha cig ni de ltar bya dgos pas khyed kyis 'di khrid de 'ongs pa gang yin pa ni legs pa byas kyis/ deng la bcom ldan 'das kyi spyan sngar khrid cig dang / 'di gdon mi za bar bcom ldan 'das la dad pa rnyed par 'gyur ro/ /ji tsam na de dag gis de yang dag par rdzogs pa'i sangs rgyas rnam par gzigs kyi spyan sngar khrid pa dang / de la yang dag par rdzogs pa'i sangs rgyas rnam par gzigs kyis de lta bu'i chos bshad do/ /des de thos nas de bzhin gshegs pa rnam par gzigs la dad pa rnyed pa dang ldan te/ stan las langs nas bla gos phrag pa gcig tu gzar te/ yang dag par rdzogs pa'i sangs rgyas rnam par gzigs ga la ba de logs su thal mo sbyar ba btud nas yang dag par rdzogs pa'i sangs rgyas rnam par gzigs la 'di skad ces gsol to/ /bcom ldan 'das nyan thos kyi dge 'dun dang bcas te bdag gi sdum par khrus khang gi khrus mdzad par ci gnang / bcom ldan 'das yang dag par rdzogs pa'i sangs rgyas rnam par gzigs kyis cang mi gsung bas gnang ngo / /de nas yang dag par rdzogs pa'i sangs rgyas rnam par gzigs kyis cang mi gsung bas gnang bar rig nas bshad pa la mngon par dga' ste/ rjes su yi rang nas zhabs la mgo bos phyag 'tshal te/ stan las langs nas song ste rgyal po gnyen ldan ga la ba der song ngo / /song nas rgyal po gnyen ldan gyi rkang pa la mgo bos phyag 'tshal te rgyal po gnyen ldan la 'di skad ces smras so/ /lha bdag gis yang dag par rdzogs pa'i sangs rgyas rnam par gzigs nyan thos kyi dge 'dun dang bcas te bdag gi sdum par khrus khang gi khrus mdzad par spyan drang pa las des cang mi gsung bas gnang ste/ de ni bkur sti bgyi bar 'os pa lags pas lha de'i slad du de grong khyer du gshegs pa'i grong khyer du mdzes par bgyi ba dang / shul mdzes par bgyi ba'i rigs so/ /rgyal po gnyen ldan gyis bsams pa/ gal te de lta na bdag gis bcom ldan 'das grong khyer du gshegs pa'i grong khyer mdzes pa dang / lam mdzes par bya na/ ci bcom ldan 'das kyis gdul dka' ba gang yin pa 'di yang btul ba lta snyam du rig nas smras pa/ nu bo legs pa byas kyis khyod song la rdzas dag sta gon gyis shig /ngas ni grong khyer mdzes pa dang / lam mdzes pa bya'o/ /de dga' ba dang rab tu dga' ba skyes nas rgyal po gnyen ldan gyi rkang pa la mgo bos phyag 'tshal nas stan las langs te song ngo / /rgyal po gnyen ldan gyis blon po rnams la bsgo ba/ shes ldan dag deng la grong khyer du dril sgrogs te/ sang yang dag par rdzogs pa'i sangs rgyas rnam par gzigs grong khyer du gshegs kyis/ de'i phyir khyed grong khyer na gnas pa dang / yul sna tshogs nas lhags pa'i skye bo'i tshogs kyis grong khyer mdzes pa dang / lam mdzes par gyis la rang gi 'byor pa dang 'thun pa'i mdzes pas bsu shig /lha de ltar 'tshal lo zhes blon po rnams kyis rgyal po gnyen ldan gyi ltar mnyan nas dril bsgrags te/ 'di skad du shes ldan grong khyer na gnas pa dag dang / grong mi dang / yul sna tshogs nas lhags pa'i skye bo'i tshogs dag nyon cig /lha'i zhal nas bcom ldan 'das yang dag par rdzogs pa'i sangs rgyas rnam par gzigs grong khyer du gshegs kyis de'i phyir khyed grong khyer na gnas pa dang / yul sna tshogs nas lhags pa'i skye bo'i tshogs thams cad kyis grong khyer mdzes pa dang / lam mdzes par gyis la thams cad kyis rang gi 'byor pa dang 'thun pa'i mdzes pas bsu shig ces de skad bka' stsal to/ /de dag gis grong khyer de yang rdo ba dang / gseg ma dang / gyo mo ni med par byas/ tsan dan gyi chus ni chag chag btab bdug pa dri zhim po can gyi pog phor ni bzhag / dar gyi lda ldi mang po ni bres/ rgyal mtshan dang ba dan ni bsgreng / me tog sna tshogs ni bkram ste lha rnams kyi skyed mos tshal dga' ba'i tshal bzhin du dga' dga' ltar byas/ lam yang de bas kyang lhag par mdzes par byas te/ der yang dri sna tshogs kyis bsgos pa'i chu dron dang / 'bru mar yang sta gon byas/ khrus khang yang byi dor byas/ gdan yang bshams nas yang dag par rdzogs pa'i sangs rgyas rnam par gzigs grong khyer du gshegs pa bsu'o/ /de nas yang dag par rdzogs pa'i sangs rgyas rnam par gzigs rgyal po gnyen ldan btsun mo'i 'khor dang / gzhon nu dang / blon po dang / grong mi dang / gzhan yang skye bo'i tshogs phal po che dang bcas pas zhabs ring byas te 'byor pa mchog gis rgyal po'i pho brang gnyen ldan du gshegs so/ /de nas rgyal po'i nu bo de dad pa skyes nas khrus khang gi nang du gshegs su gsol to/ /nang du gshegs nas khrus mdzad par brtsams pa dang / ji tsam na sangs rgyas rnam par gzigs kyi sku gser gyi mdog lta bu skyes bu chen po'i mtshan sum bcu rtsa gnyis kyis kun nas brgyan pa mthong ngo / /mthong nas kyang yang dad pa skyes te/ khrus byas nas zhabs la gtugs te smon lam btab pa/ gang bdag gis yon gnas yang dag pa 'di lta bu la bya ba byas pa'i dge ba'i rtsa ba 'dis bdag kyang bdag nyid chen po 'di'i ji lta bar lus gser gyi mdog lta bu dang / 'dis gcung po 'dod pa rnams la shin du chags pa las nan gyis phral te rab tu phyung nas 'khor ba'i dgon pa las bsgral te shin du mthar thug pa'i grub pa dang / bde ba mya ngan las 'das pa la bzhag pas ji lta bar bdag kyang ston pa 'di lta bu'i gcung du gyur cing gal te bdag de bzhin du 'dod pa rnams la lhag par chags par gyur na yang / bdag bcom ldan 'das des nan gyis phral te rab tu phyung nas 'khor ba'i dgon pa las bsgral te shin du mthar thug pa'i grub pa dang bde ba mya ngan las 'das pa la 'jog par gyur cig ces byas so/ /dge slong dag ji snyam du sems/ rgyal po gnyen ldan gyi nu bo gang yin pa de ni rigs kyi bu dga' bo 'di nyid yin te/ de'i tshe de'i dus na 'dis yang dag par rdzogs pa'i sangs rgyas rnam par gzigs la khrus khang gi khrus kyis khrus byas nas/ smon lam btab pa gang yin pa'i las de'i rnam par smin pas de bzhin gshegs pa'i gcung du gyur cing / 'di'i lus kyang gser gyi kha dog lta bur gyur la/ ngas kyang nan gyis phral te rab tu phyung nas 'khor ba'i dgon pa las bsgral te shin du mthar thug pa'i grub pa dang bde ba mya ngan las 'das pa la bzhag pa yin no/ /yang dge slong rnams the tshom skyes nas the tshom thams cad gcod pa sangs rgyas bcom ldan 'das la zhus pa/ btsun pa tshe dang ldan pa dga' bos las ci zhig bgyis na/ las de'i rnam par smin pas 'di la skyes bu chen po'i mtshan sum bcu mngon par grub lags/ bcom ldan 'das kyis bka' stsal pa/ dge slong dag 'di nyid kyis las byas shing bsags pa/ tshogs rnyed pa/ rkyen yongs su bsgyur ba/ dba' rgal bzhin nye bar gnas par gyur pa yin te/ 'di nyid kyis las byas shing bsags pa dag gzhan su zhig gis myong bar 'gyur/ dge slong dag las byas shing bsags pa dag ni phyi rol gyi sa'i khams la rnam par smin par mi 'gyur/ chu'i khams la ma yin/ me'i khams la ma yin/ rlung gi khams la ma yin gyi/ 'on kyang dge ba dang mi dge ba'i las byas shing bsags pa rnams ni zin pa'i phung po dang / khams dang / skye mched dag kho na la rnam par smin par 'gyur te/ bskal pa brgya phrag rnams su yang / /las rnams chud zar mi 'gyur te/ /tshogs shing dus la bab pa na/ /lus can rnams la 'bras bur smin/ /dge slong dag sngon byung ba ri brags shig na khyim bdag phyug pa/ nor mang ba/ longs spyod che ba zhig gnas te/ de la skyed mos tshal me tog dang / 'bras bu dang / rtsa ba sna tshogs dang / chu phun sum tshogs pa/ shing rnam pa sna tshogs kyis brgyan pa rab tu byung ba'i skye bo dang 'thun pa zhig yod do/ /sangs rgyas dag 'byung ba med pa na 'jig rten du rang sangs rgyas dman pa dang phongs pa la snying brtse ba can/ bas mtha'i gnas mal la dga' ba/ 'jig rten gyi yon gnas gcig pu dag 'byung bar 'gyur ro/ /de nas rang sangs rgyas shig ljongs rgyu ba rgyu zhing ri brags der phyin te/ de gnas tshol zhing phan tshun rgyu ba na/ skyed mos tshal der phyin pa dang / skyed mos tshal srung ba'i mis byon pa legs so zhes bya ba'i kun du spyod pas spyad nas bstir bcug go/ /de nub mo me'i khams la snyoms par zhugs pa dang / bskyed mos tshal srung ba'i mis mthong nas rab tu byung ba 'di ni 'di lta bur bdag nyid chen po brtul zhugs grub pa'o zhes shin du ngo mtshar skyes par gyur nas de nyid kyi mtshan mo langs te/ khyim bdag la smras pa/ rje rab tu dgyes pa bskyed du gsol/ khyod kyi skyed mos tshal du rab tu byung ba bdag nyid chen po brtul zhugs grub pa zhig dgongs btab ste/ des skyed mos tshal de thams cad mtshan mo snang bar bgyis so/ /des thos nas rab tu dga' ba skyes te/ rings pa rings par song ste rkang pa la gtugs nas smras pa/ 'phags pa khyod ni bsod snyoms don du gnyer ba/ bdag ni bsod nams don du gnyer ba lags na skyed mos tshal 'di nyid du bzhugs su gsol/ bdag gis khyod kyi bsod snyoms sbyar bar bgyi'o/ /des khas blangs nas de der bsam gtan dang / rnam par thar pa dang / ting nge 'dzin dang / snyoms par 'jug pa'i bde ba nyams su myong bar byed cing / dus cung zad cig 'dug nas des bsams pa/ bdag gis lus rul pa 'dis thob par bya ba gang yin pa de ni thob zin gyi ma la bdag zhi ba mya ngan las 'das pa'i dbyings su 'jug go snyam du rig nas 'bar ba dang / gsal ba dang / char 'bab pa dang / glog 'gyu ba'i cho 'phrul dag byas te/ phung po'i lhag ma ma lus pa'i mya ngan las 'das pa'i dbyings su yongs su mya ngan las 'das so/ / //'dul ba phran tshegs kyi gzhi/ bam po bcu bzhi pa/ de nas khyim bdag des dri thams cad kyi bsreg shing dag bcer nas bsregs te/ bsreg shing de dag 'o mas bsad do/ /rus pa de rnams bum pa sar par bcug ste/ rus pa'i mchod rten byas nas gdugs dang / rgyal mtshan dang / ba dan dag btsugs so/ /btsugs nas dad pa skyes te/ de nas gur gum gyis bskus nas dri'i lag ris sum bcu byas so/ /dge slong dag ji snyam du sems/ khyim bdag gang yin pa de ni rigs kyi bu dga' bo 'di nyid yin te/ de'i tshe de'i dus na 'dis rang sangs rgyas kyi mchod rten byas nas gdugs dang / rgyal mtshan dang / ba dan btsugs te/ dad pa skyes nas gur gum gyis byugs shing / dri'i lag ris sum bcu byas pa gang yin pa'i las de'i rnam par smin pas 'di la skyes bu chen po'i mtshan sum bcu grub pa yin no/ /yang dge slong rnams the tshom skyes nas the tshom thams cad gcod par mdzad pa sangs rgyas bcom ldan 'das la zhus pa/ btsun pa tshe dang ldan pa dga' bos las ci zhig bgyis na las de'i rnam par smin pas gal te rab tu byung bar ma gyur na 'dis stobs kyis 'khor lo sgyur ba'i rgyal srid bgyis par 'gyur lags/ bcom ldan 'das kyis bka' stsal pa/ dge slong dag rigs kyi bu dga' bo 'di nyid kyis las byas shing bsags pa tshogs rnyed pa/ rkyen yongs su bsgyur ba/ dba' rgal bzhin nye bar gnas pa nges par gyur pa yin te/ las byas shing bsags pa rnams gzhan su zhig gis myong bar 'gyur/ dge slong dag las byas shing bsags pa rnams ni phyi rol gyi sa'i khams la rnam par smin par mi 'gyur/ chu'i khams la ma yin/ me'i khams la ma yin/ rlung gi khams la ma yin gyi/ 'on kyang dge ba dang mi dge ba'i las byas pa rnams ni zin pa'i phung po dang khams dang / skye mched dag kho na la rnam par smin par 'gyur te/ bskal pa brgya phrag rnams su yang / /las rnams chud zar mi 'gyur te/ /tshogs shing dus la bab pa na/ /lus can rnams la 'bras bur smin/ /dge slong dag sngon byung ba bskal pa bzang po 'di nyid la skye dgu'i tshe lo nyi khri thub pa na ston pa de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das 'od srung zhes bya ba 'jig rten du byung ste/ de grong khyer bA rA Na sI na brten cing drang srong smra ba ri dgas kyi nags na bzhugs so/ /de'i tshe de'i dus na bA rA Na sI na rgyal po kri ki zhes bya ba rgyal srid byed du 'jug ste/ rgyal srid 'byor pa dang / rgyas pa dang / bde ba dang / lo legs pa/ skye bo dang / mi mang pos gang ba zhes bya ba nas/ chos bzhin byed du 'jug go zhes bya ba'i bar snga ma bzhin no/ /rgyal po de la bu gsum ste/ rab dang / 'bring po dang / tha chungs so/ /gang gi tshe yang dag par rdzogs pa'i sangs rgyas 'od srung sangs rgyas k yi mdzad pa mtha' dag mdzad nas bud shing zad pa'i me bzhin du phung po'i lhag ma med pa'i mya ngan las 'das pa'i dbyings su yongs su mya ngan las 'das pa de'i tshe rgyal po kri kis de'i sku la mchod pa byas nas rin po che bzhi las byas pa mchod rten khor yug tu dpag tshad gcig pa/ 'phang du dpag tshad phyed pa zhig brtsigs so/ /de la gdugs 'dogs par byed pa ni rgyal po kri ki'i bu 'bring po dad pa skyes nas gdugs 'bring zhig btags so/ /dge slong dag ji snyam du sems/ rgyal po kri ki'i bu 'bring po gang yin pa de ni rigs kyi bu dga' bo 'di nyid yin te/ 'dis yang dag par rdzogs pa'i sangs rgyas 'od srung gi mchod rten la dad pa skyes nas gdugs 'bring btags pa gang yin pa'i las de'i rnam par smin pas stobs kyis 'khor lo sgyur ba'i rgyal srid nyis stong lnga brgya byas te/ gal te da ltar rab tu byung bar ma gyur na da ltar yang 'dis stobs kyis 'khor lo sgyur ba'i rgyal srid byas par 'gyur ro/ /yang dge slong rnams kyis sangs rgyas bcom ldan 'das la zhus pa/ btsun pa tshe dang ldan pa dga' bos las ci zhig bgyis na las de'i rnam par smin pas bcom ldan 'das kyis dbang po'i sgo bsdams pa rnams kyi mchog tu bstan lags/ bcom ldan 'das kyis bka' stsal pa/ smon lam gyi dbang gis so/ /gang du smon lam btab lags/ dge slong dag 'di yang dag par rdzogs pa'i sangs rgyas 'od srung gi bstan pa la rab tu byung bar gyur te/ gang las 'di rab tu byung ba de bcom ldan 'das yang dag par rdzogs pa'i sangs rgyas 'od srung gis dbang po'i sgo bsdams pa rnams kyi mchog tu bstan to/ /de na 'dis tshe ji srid par tshangs par spyod pa spyad kyang yon tan gyi tshogs 'ga' yang ma thob po/ /de na 'dis 'chi ba'i dus kyi tshe smon lam btab pa/ 'di ltar bdag gis yon gnas bla na med pa bcom ldan 'das yang dag par rdzogs pa'i sangs rgyas 'od srung gi spyan sngar tshe ji srid par tshangs par spyod pa spyad kyang yon tan gyi tshogs 'ga' yang thob par ma gyur gyis/ bdag dge ba'i rtsa ba 'dis b com ldan 'das yang dag par rdzogs pa'i sangs rgyas 'od srung gis bram ze'i khye'u bla ma la bram ze'i khye'u khyod skye dgu'i tshe lo brgya thub pa na de bzhin gshegs pa dgra bcom yang dag par rdzogs pa'i sangs rgyas shAkya thub par 'gyur ro zhes lung bstan pa gang yin pa de'i gsung rab la rab tu byung nas nyon mongs pa thams cad spangs te dgra bcom pa nyid mngon du byed par 'gyur ba dang / ji ltar bcom ldan 'das yang dag par rdzogs pa'i sangs rgyas 'od srung gis b dag gi mkhan po dbang po'i sgo bsdams pa rnams kyi mchog tu bstan pa de bzhin du bdag kyang bcom ldan 'das shAkya thub pa shAkya'i rgyal po gtso bo des dbang po'i sgo bsdams pa rnams kyi mchog tu lung ston par gyur cig ces byas te/ smon lam de'i dbang gis da ltar de bzhin gshegs pas dbang po'i sgo bsdams pa rnams kyi mchog tu bstan to/ /dge slong dag de lta bas na las gcig tu gnag pa rnams shes bya ba nas brtsal par bya ste/ dge slong rnams kyis de ltar bslab par bya'o zhes bya ba'i bar snga ma bzhin no/ /gleng gzhi ni mnyan yod na'o/ /dge slong zhig na ste de sman pa'i drung du song nas smras pa/ bzhin bzangs bdag la nad 'di lta bu byung na sman ston cig / des smras pa/ 'phags pa sman mas gtang ba mdzod cig dang khyod sos par 'gyur ro/ /des smras pa/ bzhin bzangs bcom ldan 'das kyis ma gnang ngo / /sman pas smras pa/ 'phags pa khyod kyi ston pa ni thugs rje can yin pas gnang bar 'gyur ro/ /des skabs de dge slong rnams la bsnyad do/ /dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis dge slong nad pas sman pa'i lung gis sman mas gtang bar bya'o/ /gleng gzhi ni mnyan yod na'o/ /bcom ldan 'das kyis dge slong rnams kyis gtsug lag khang lnga rtseg tu byed na dri gtsang khang ni bdun rtseg /sgo khang steng gi bsil khang u0fd3u0fd4/ /yang bdun rtseg du bya'o/ /dge slong rnams kyis gtsug lag khang sum rtseg tu byed na dri gtsang khang ni lnga rtseg /sgo khang steng gi bsil khang yang lnga rtseg tu bya'o zhes bka' stsal pa dang / dge slong dag gis phyogs gang nas 'dzeg mi shes nas bcom ldan 'das kyis bka' stsal pa/ them skas rnam pa gsum pa shing gi them skas dang sa'i them skas dang / rdo'i them skas dag bya'o/ /dge slong dag steng du ni rdo'i bar du ni sa'i tha mar ni shing gi btsugs nas 'dzegs pa dang / bcom ldan 'das kyis bka' stsal pa/ tha mar ni rdo'i/ bar du ni sa'i steng du ni shing gi gzugs par bya'o/ /phran tshegs kyi gzhi las sgo gnyis pa'o// // bsdus pa'i sdom ni/ chos gos gdang dang nang dang bskrad/ /khang bzangs lan tshwa sbu bu dang / /gdong phyis dang ni phyi ba dang / /mkhar len stan dang spu gri 'o/ / sdom ni/ chos gos tshad kyi shing dang ni/ /glegs bu dag dang rdul phyags dang / /sa drud pa ni nyid dag dang / /mchig ni mchig gur bcas pa'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bcom ldan 'das kyis dras pa'i chos gos gsum dge slong dag gis bcang bar bya'o zhes gsungs pa dang / dge slong dag gis chos gos dra bar brtsams te/ de dag gis glegs bu dang / glegs bu phyed dag mi mnyam par byas so/ /skabs de dge slong dag gis bcom ldan 'das la gsol pa dang / bcom ldan 'das kyis glegs bu dang glegs bu phyed dag mi mnyam par dra bar mi bya'i 'on kyang mnyam par dra'o zhes bka' stsal pa dang / de dag gis ji ltar mnyam par 'gyur ba mi shes nas/ bcom ldan 'das kyis bka' stsal pa/ glegs bu dang glegs bu phyed dag gi tshad kyi shing bcad par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong dag gis chos gos kyi tshal bu dag mi mnyam par drubs pa dang / de dag mi mdzes nas/ skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ tshal bu dag mnyam par drub par bya'o/ /bcom ldan 'das kyis tshal bu mnyam par drub par bya'o zhes gsungs pa dang / dge slong dag ji ltar mnyam par bya ba mi shes nas/ bcom ldan 'das kyis bka' stsal pa/ tshal bu'i tshad kyi shing bcad zhing des gzhal nas drub par bya'o/ /bcom ldan 'das kyis tshal bu shing gis gzhol la drubs shig ces gsungs pa dang / dge slong dag gis tshal bu tshad las 'das par byas nas/ bcom ldan 'das kyis bka' stsal pa/ tshal bu tshad las 'das par mi bya'o/ /'on kyang tshal bu ni gsum ste/ chen po dang / 'bring dang / chung ngu'o/ /de la chen po ni sor bzhi 'am/ bya rog gi mtho gang ngo / /chung ngu ni sor gnyis sam mthe bo'i lto gang ngo / /'bring ni de dag gi bar ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong dag sa rdul can la chos gos 'drub pa dang / de dri ma can du gyur nas/ bcom ldan 'das kyis bka' stsal pa/ lci ba'i byug pas bskus la chos gos drub par bya'o/ /bcom ldan 'das kyis lci ba'i byug pas bskus la chos gos drubs shig ces gsungs pa dang / lci ba ma rnyed nas/ bcom ldan 'das kyis bka' stsal pa/ phyogs der chag chag btab cing phyags te drub par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong dag gis khri'i rkang pa rnon por byas pa dang / de dag gis sa bstar ba ma rung bar gyur nas bcom ldan 'das kyis bka' stsal pa/ khri'i rkang pa rnon por mi bya'i 'on kyang zlum por gcad par bya'o/ /'on kyang ma rung par gyur nas bcom ldan 'das kyis bka' stsal pa/ phub ma'i thum po la gzhag gam/ ras mas dkri bar bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na bram ze zhig 'dug pa de dgos pa zhig gi phyir phyi rol du byung nas de de dang de dag tu 'khyam pa las nyi ma phyed kyi dus kyi tshe yongs su ngal nas rgyal byed kyi tshal du zhugs pa dang / des de na stan bzang po bshams pa dang / kha zas bsod par sbyar ba mthong ngo / /des mthong nas mngon par dad de/ des chen po la 'os pa'i gos gyon pa de des gding ba'i phyir rgan pa'i mtha' logs su gos de phul lo/ /de dus gzhan zhig na dri ma can du gyur nas dge skos kyis gzhon pa'i mtha' logs su bting ngo / /re shig cig na bram ze de gtsug lag khang du zhugs pa dang / des gos de rgan pa'i mtha' logs na mi snang nas de rim gyis lta zhing gzhon pa'i mtha' logs su song ba dang / ji tsam na dri ma can du gyur nas gzhon pa'i mthar bting ba mthong ste/ des bsams pa/ gos 'di sar pa chen po la 'os pa yin na/ gang gis 'di lta bu'i gnas skabs su gyur pa 'di la rgyu gang yin re shig blta'o snyam nas cung zhig bsdad pa dang / ji tsam na dge skos kyis gdan rim bzhin bshams nas phyag dar bya bar brtsams pa dang / des bsams pa/ gang gis gos 'di dri ma can du gyur pa 'di la rgyu ni 'di yin no snyam du rig nas/ dge skos la smras pa/ 'phags pa khyod kyis ji ltar sa la chag chag btab te phyags nas rim bzhin gding bar bya ba 'di tsam yang mi mkhyen tam/ de bas kyang khyod kyis bdag gi gos dri ma can du byas so/ /skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ sa la chag chag btab ste phyags nas rim bzhin gding bar bya'o/ /dge skos kyis rdul gyis gang ba'i stan la mal stan dag bting ba dang / nyes dmigs de nyid du gyur nas/ bcom ldan 'das kyis bka' stsal pa/ stan rnams sprugs la mal stan dag gding bar bya'o/ /ci yis sprug pa dge skos kyis mi shes nas/ bcom ldan 'das kyis de las gos gcig gis sprug par bya'o zhes gsungs pa dang / des bzang pos sprugs nas/ bcom ldan 'das kyis bka' stsal pa/ ngan pas sprug par bya'o/ /dge skos kyis ngan pas sprugs pa dang / gang gi tshe de rnyings shing zhigs nas bcos su mi rung ba de'i tshe bor ba dang / bcom ldan 'das kyis bka' stsal pa/ de nyid tshal bu dang shar bu dag tu gyis la shing la bcings te sprug par bya'o/ /de shin du spyad par mi rung ste bor nas/ bcom ldan 'das kyis bka' stsal pa/ shin du spyad par mi rung yang ma dor bar lci ba 'am/ 'jim pa dang bsres la ka ba'i ser ga 'am/ rtsig pa'i bu ga dag tu skus shig dang / sbyin bdag gi bsod nams yun ring du 'phel bar 'gyur ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de nas dus de'i tshe dge slong gzhon nu zhig phyogs shig na 'chag pa dang / de 'chag pa'i sa phyogs de rkang pas drud pas zad do/ /ji tsam na khyim bdag cig de dang de dag tu 'khyam zhing phyogs der 'ongs pa dang / des bsams pa/ re shig yang gnas skabs 'di lta bur gyur na 'phags pa 'di'i rkang pa ci 'dra ba zhig tu gyur snyam nas smras pa/ 'phags pa sa 'di ci zhig gis 'di ltar yongs su zad/ des smras pa/ khyim bdag bdag 'chag 'chag pas so/ /khyim bdag gis smras pa/ 'phags pa re shigs yang gnas skabs 'di lta bur gyur na/ khyod kyi zhabs ci 'dra bar gyur/ re shig khyod kyi zhabs blta'o/ /des de la rkang pa bstan pa dang / des mthong ste snying rje skyes nas/ des smras pa/ 'phags pa bdag gis sa 'di la par tang dag gding bar bgyis/ bde bar tshogs shig ces smras pa dang / des smras pa/ khyim bdag bcom ldan 'das kyis ma gnang ngo / /'phags pa khyod kyi ston pa ni thugs rje can yin pas gnang bar 'gyur ro/ /skabs de des dge slong dag la bsnyad do/ /dge slong dag gis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis dge slong brtson 'grus brtsam pa'i 'chag sar par tang bting bar bya'o/ /khyim bdag des bting ba dang / dge slong de de la phyogs gcig tu 'chag par brtsams pas ji tsam na de dum bu gnyis su gyur nas/ de'i dum bu gcig ni phyogs gcig na 'dug / gnyis pa yang gzhan na 'dug go/ /ji tsam na khyim bdag de 'ongs nas par tang de'i dum bu gcig ni phyogs gcig na 'dug /gnyis pa yang gzhan na 'dug pa mthong nas des smras pa/ 'phags pa par tang de gnas skabs 'di lta bur gyur na/ e ma khyod kyis ral ba btsem na ci nongs/ skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ khyim bdag de zer ba bden te de lta bas na ral ba dang ral ba dag drub cing gzungs dang lhan pa dag gdab par bya'o/ /gang gi tshe shin du rnyings shing dengs te bcos dka' ba de'i tshe de lci ba 'am/ 'jim par bsres la de nyid du byugs shig dang / sbyin bdag gi bsod nams yun ring du 'phel bar 'gyur ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong zhig na ste sman pa'i drung du song ste smras pa/ bzhin bzangs bdag la nad 'di lta bu byung na sman ston cig ces smras pa dang / des smras pa/ 'phags pa 'di lta bu dang 'di lta bu mdzod dang khyod sos par 'gyur ro/ /des sman btag pa'i mchig dgos nas de khyim bdag gcig gi drung du song ste/ mchig brnyas pa dang / des de la mchig mchi gu dang bcas te byin no/ /des sman btags nas yang khyim bdag de nyid la slar byin pa dang / des 'phags pa khyod nyid bzhes la bzhud cig / des smras pa/ khyim bdag bcom ldan 'das kyis ma gnang ngo / /des smras pa/ 'phags pa gal te de lta na zhog la bzhud cig /skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ de lta bas na gnang gis dge slong gis mchig mchi gu dang bcas te bcang bar bya'o/ / sdom ni/ nang dang phyi rol chos gos gdang / /de bzhin lcug ma thag gu dang / /mar me dang ni 'khor gyi khyams/ /chos gos mtshan mas gdab pa'o/ /bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong dag chos gos bab bab tu 'jog ste/ de rdul gyis dri ma can du gyur cing / sril gyis zos nas skabs de bcom ldan 'das la dge slong dag gis gsol pa dang bcom ldan 'das kyis bka' stsal pa/ chos gos bab bab tu gzhag par mi bya'o/ /'on kyang chos gos gdang la gzhag par bya'o/ /dge slong dag gis rtsig pa la khung brkos nas chos gos kyi gdang bcug pa dang / rtsig pa snyi bar gyur te/ bcom ldan 'das kyis bka' stsal pa/ rtsig pa la khung brko bar mi bya'o/ /'on kyang gang gi tshe gtsug lag khang rtsig pa de nyid kyi tshe bu ga gdod par bya zhing / der chos gos kyi gdang gzhug par bya'o/ /bcom ldan 'das kyis gtsug lag khang du chos gos kyi gdang gi bu ga thod cig ces gsungs pa dang / nyen kor du ma byas nas/ bcom ldan 'das kyis bka' stsal pa/ gtsug lag khang du ji lta ba de bzhin du nyen kor dag tu yang bya'o/ /bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bcom ldan 'das kyis chos gos kyi gdang la chos gos dag gzhag par bya'o/ /zhes gsungs pa dang / dge slong dgon pa pa dag gis chos gos kyi gdang ma rnyed nas skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ de dag gis lcug ma btags nas gzhag par bya'o/ /gzhan dag la lcug ma yang med nas/ bcom ldan 'das kyis bka' stsal pa/ de dag gis tha gu btags te gzhag par bya'o/ /bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bcom ldan 'das kyis dge slong dag mtshan zhing chos mnyan pa sbyin par bya'o zhes gsungs te/ dge slong dag mtshan mo chos mnyan pa sbyin par brtsams so/ /ji tsam na chos nyan pa'i dus su sbrul zhig 'ongs pa de dge slong gzhon nu zhig gis mthong nas de sngangs te/ shes ldan dag rgyab rings rgyab rings shes smras so/ /dge slong dag kyang so so'i skye bo yin pas sngangs te/ de dag gis chos nyan pa bar bcad do/ /skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ chos mnyan pa gcad par mi bya'i 'on kyang mar me bus te chos bstan par bya'o/ /bcom ldan 'das kyis mar me bus te chos bstan par bya'o zhes gsungs pa dang dge slong dag gis dbyar gyi mtshan mo mar me bus te chos bshad pa dang / srog chags dag mar mer song nas bcom ldan 'das kyis bka' stsal pa/ /mar me'i khang bu bya'o/ /dge slong dag gis mar me'i khang bu ji ltar bya ba mi shes nas/ bcom ldan 'das kyis bka' stsal pa/ smyig ma'i tshal pa gzer bur gyis la ras dkar pos g.yog par bya'o/ /ras dkar po ma rnyed nas/ bcom ldan 'das kyis bka' stsal pa/ lhang tsher gyis g.yog par bya'o/ /de yang ma rnyed nas bcom ldan 'das kyis bka' stsal pa/ dge slong dag bu ga brgya pa bya'o/ /dge slong dag gis bu ga brgya pa ci 'dra bar bya ba mi shes nas/ bcom ldan 'das kyis bka' stsal pa/ rdza mkhan gyis 'jim pa gsher ba las gyo mo byas la bu ga brgya par bya'o/ / rdza mkhan med na bum pa'i gyo mo 'am/ gzhan yang rung bcag nas bu ga brgya pa bya ste/ de nas mar me sbar la des g.yog par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /so ka'i dus la bab pa dang / dge slong dag tsha bas gdungs te lus rmya zhing sha bri ngan pa dang / mdog ngan pa skya bo bseng bseng por gyur to/ /sangs rgyas bcom ldan 'das rnams ni mkhyen bzhin du 'dri bar mdzad pa yin pas sangs rgyas bcom ldan 'das kyis tshe dang ldan pa kun dga' bo la rmas pa/ kun dga' bo ci'i phyir da ltar dge slong dag lus rmya zhing / sha bri ngan pa dang / mdog ngan pa skya bo bseng bseng por gyur/ skabs de bcom ldan 'das la rgyas par gsol nas bcom ldan 'das kyis bka' stsal pa/ de bas na gnang gis 'khor gyi khyams bya'o/ /dge slong dag gis ji ltar bya ba mi shes nas/ bcom ldan 'das kyis bka' stsal pa/ ngos gsum par bya'o/ /de dag gis nang du ni rtsig pa brtsigs/ phyir ni ka ba'i phreng ba byas pa dang / bcom ldan 'das kyis bka' stsal pa/ nang du ni ka ba'i phreng ba bya'o/ /phyi rol du ni rtsig pa brtsig go/ /skar khung ma btod pas phyir tsha bar gyur nas/ bcom ldan 'das kyis bka' stsal pa/ skar khung dag gdod par bya'o/ /de dag gis dma' bar btod pas nyes dmigs de nyid du gyur te/ bcom ldan 'das kyis bka' stsal pa/ bstod de gdod par bya'o/ /ha cang mthon por btod nas bcom ldan 'das kyis bka' stsal pa/ ha cang mthon por mi gdod kyi 'on kyang stan dang thad kar gdod par bya'o/ /bye'u dang phug ron dag 'jug nas/ bcom ldan 'das kyis bka' stsal pa/ skar khung dra ba can du bya'o/ /rlung dang char pa dag gis gnod par gyur nas/ bcom ldan 'das kyis bka' stsal pa/ sgo 'phar gzhug par bya'o/ / dge slong dag gis zan za ba na sgo bcad pas mun pa gnag par gyur nas/ bcom ldan 'das kyis bka' stsal pa/ zan za ba'i dus kyi tshe dbye bar bya'o/ /dge slong dag tsha ba'i dus na klog pa dang / kha ton byed pa dang / rnam par nges pa'i gtam la 'khod pa 'am/ chos gos kyi las byed pa 'am/ las kyis shin du dub pa na der rngul gzan dang / sham thabs gnyis gyon la 'dug par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bcom ldan 'das kyis dga' bo rab tu phyung bsnyen par rdzogs par mdzad nas ri spos kyi ngad ldang dang / sum bcu rtsa gsum pa'i lha dang sems can dmyal ba dag tu khrid de slar mnyan yod du khrid pa dang / de glo bur pa yin pas dge slong thams cad kyis ngo ma shes te/ de'i lus gser gyi kha dog lta bu mtshan gyis mngon par gsal ba'i lus de mthong nas bcom ldan 'das gshegs so snyam nas dge slong gnas brtan gnas brtan dag kyang ldang bar byed do/ /gang gi tshe kun shes par gyur pa de'i tshe 'gyod pa skyes nas skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ dge slong dag 'di ni ston pa'o/ /'di ni gzhan no zhes bde blag tu shes par bya ba'i phyir dga' bo dang gzhan yang rung gang de lta bu'i chos gos la mtshan mas gdab par bya'o/ / sdom ni/ dge slong rnams ni bskrad pa dang / /so shing rnam pa gsum dag dang / /gzhon nu bskrad par bya ba dang / /kun du bskrad par mi bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /gang gi tshe chu bo snyan ldan gyi 'gram gyi dge slong dag gis dang po bum pa dang / pho long gi sbyor bas 'bad pa dang / bsgrim pa dang / brtsal bas nyon mongs pa thams cad spangs te dgra bcom pa nyid mngon sum du byas pa de'i tshe de dag gi spyod lam dang / spyod pa dag la sgrub pa des skye bo mang po rnams mngon par dad do/ /de nas bcom ldan 'das kyis dge slong rnams la bka' stsal pa/ dge slong dag gang dag gi grong gi zhing na chu bo snyan ldan gyi 'gram gyi dge slong rnams gnas pa'i mi de dag gi rnyed pa ni legs par rnyed do/ /bcom ldan 'das kyi bsnyen bkur ba tshe dang ldan pa kun dga' bo bcom ldan 'das kyi drung na spyod cing gnas pa des bcom ldan 'das kyis dgongs pa rtags sam/ gsung ba las shes nas des de dag la tshe dang ldan pa dag bcom ldan 'das ni khyed kyi bsngags pa brjod cing gzigs par yang bzhed kyis khyed 'ong ba'i rigs so zhes spring ngo / /de dag gis thos nas phan tshun glengs pa/ tshe dang ldan pa dag bcom ldan 'das ni bdag cag gi bsngags pa brjod cing gzigs par yang bzhed ces zer na de la ji ltar bsgrub par bya/ de na kha cig gis smras pa/ 'di la ci zhig bsgrub tu yod 'dong mod/ dgra bcom pa rnams ni ma bsams par ye shes mthong ba mi 'jug pas gzhan dag cig gis smras pa legs te/ 'on kyang skye bo'i tshogs mang po dag la sbran nas 'dong ngo / /de nas de dag gis dge slong rnams la smras pa/ tshe dang ldan pa dag shes par gyis shig /bcom ldan 'das bdag cag gi yon tan brjod cing gzigs par bzhed de/ khyed la bltas nas 'dong ba yin no/ /de dag gis smras pa/ tshe dang ldan pa dag de lta na bdag cag kyang 'gro'o/ /de ltar gyis shig /de rnams de dag dang lhan cig chas te rim gyis mnyan yod du phyin pa dang / de nas kun dga'i ra bar dge slong glo bur ba dag dang / gzhi ba rnams phan tshun yang dag par dga' bar byed pa'i sgra mthon po/ sgra chen po dang / skye bo'i tshogs phal po che'i sgra skad byung bar gyur to/ /bcom ldan 'das kyis kun dga'i ra bar sgra mthon po/ sgra chen po dang / skye bo'i tshogs phal po che'i sgra skad gsan te/ sangs rgyas bcom ldan 'das rnams ni mkhyen bzhin du 'dri bar mdzad pa yin pas sangs rgyas bcom ldan 'das kyis tshe dang ldan pa kun dga' bo la rmas pa/ kun dga'i ra bar sgra mthon po/ sgra chen po dang / skye bo'i tshogs phal po che'i sgra skad grag pa 'o ni ci zhig /des gsol pa/ btsun pa de ni chu bo snyan ldan gyi 'gram gyi dge slong rnams kyis skye bo mang po sbran nas dge slong rab tu mang po dang lhan cig 'dir mchis te/ dge slong gzhi ba dang / glo bur ba rnams phan tshun yang dag par dga' bar bgyid pa'i sgra mthon po/ sgra chen po dang / skye bo'i tshogs phal po che'i sgra skad lags so/ /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo song la chu bo snyan ldan gyi 'gram gyi dge slong rnams la dge slong dag khyed 'di na ma gnas par deng shig ces skrod cig / btsun pa de ltar 'tshal lo/ /zhes tshe dang ldan pa kun dga' bos bcom ldan 'das kyi ltar mnyan nas snyan ldan gyi 'gram gyi dge slong rnams la 'di skad ces smras so/ /tshe dang ldan pa dag shes par gyis shig /bcom ldan 'das kyis khyed 'di na ma gnas par deng shig ces bskrad do/ /de dag bdag cag ni bcom ldan 'das kyis bskrad do snyam du rig nas lhung bzed dang chos gos blangs te ljongs rgyu zhing dong ngo / /lan gnyis lan gsum du yang bcom ldan 'das kyis dge slong rnams la bka' stsal pa/ dge slong dag gang dag gi grong gi zhing na chu bo snyan ldan gyi 'gram gyi dge slong rnams gnas pa'i mi de dag gi rnyed pa ni rnyed pa legs par rnyed do zhes bya ba nas/ de dag bdag cag ni bcom ldan 'das kyis bskrad do snyam nas lhung bzed dang chos gos blangs te ljongs rgyu zhing 'dong ngo zhes bya ba'i bar snga ma bzhin no/ /yang bcom ldan 'das kyis dge slong rnams la bka' stsal pa/ dge slong dag gang dag gi grong gi zhing na chu bo snyan ldan gyi 'gram gyi dge slong rnams gnas pa'i mi de dag gi rnyed pa ni rnyed pa legs par rnyed do zhes bya ba nas/ 'ong ba'i rigs so zhes bya ba'i bar snga ma bzhin no/ /de dag phan tshun gleng ba tshe dang ldan pa dag ci'i phyir bcom ldan 'das bdag cag gi bsngags pa brjod cing gzigs par yang bzhed la/ 'on kyang song dgun bcom ldan 'das kyis bskrad/ gdon ma zos par bdag cag gis skye bo mang po la sbran pas bskrad kyis/ ma la da ni bdag cag gis mi sbran pa kho nar 'dong ngo zhes de dag gis ma sbran pa kho nar nyi tshe bcom ldan 'das ga la ba der song ste phyin pa dang / bcom ldan 'das kyi zhabs la mgo bos phyag 'tshal te phyogs gcig tu 'khod do/ /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo song la gtsug lag khang gcig tu de bzhin gshegs pa dang / chu bo snyan ldan gyi 'gram gyi dge slong dag gi khri shoms shig / btsun pa de ltar 'tshal lo zhes tshe dang ldan pa kun dga' bos bcom ldan 'das kyi ltar mnyan nas gtsug lag khang gcig tu de bzhin gshegs pa dang / chu bo snyan ldan gyi 'gram gyi dge slong dag gi khri bshams nas bcom ldan 'das gang na ba der song ste phyin nas bcom ldan 'das kyi zhabs la mgo bos phyag 'tshal te phyogs gcig tu 'dug go/ /phyogs gcig tu 'dug nas tshe dang ldan pa kun dga' bos bcom ldan 'das la 'di skad ces gsol to/ /btsun pa bcom ldan 'das dang / chu bo snyan ldan gyi 'gram gyi dge slong rnams kyi khri gtsug lag khang gcig tu bshams lags na/ bcom ldan 'das da de'i dus la bab par dgongs su gsol/ de nas bcom ldan 'das chu bo snyan ldan gyi dge slong rnams kyi gtsug lag khang gang na ba der gshegs so/ /gshegs nas gtsug lag khang gi phyi rol tu zhabs bkrus te gtsug lag khang du gshegs nas khri bshams pa nyid la skyil mo dkrung bcas nas sku drang por bsrang ste dgongs pa mngon du bzhag nas bzhugs so/ / chu bo snyan ldan gyi 'gram gyi dge slong rnams kyang rang rang gi gtsug lag khang gang na ba der dong ste phyin pa dang / gtsug lag khang gi phyi rol du rkang pa bkrus nas gtsug lag khang du dong ste ji ltar stan bting ba la 'khod do/ /de nas bcom ldan 'das bsam gtan dang po la snyoms par zhugs pa dang / chu bo snyan ldan gyi 'gram gyi dge slong rnams kyang bsam gtan dang po la snyoms par zhugs so/ /bcom ldan 'das bsam gtan dang po las bzhengs nas gnyis pa dang / gsum pa dang / bzhi pa dang / nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched dang / 'du shes med 'du shes med min skye mched la snyoms par zhugs pa dang / chu bo snyan ldan gyi 'gram gyi dge slong rnams kyang bsam gtan dang po las langs nas gnyis pa dang / gsum pa dang / bzhi pa dang / nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched dang / 'du shes med 'du shes med min skye mched la snyoms par zhugs so/ /de nas bcom ldan 'das 'du shes med 'du shes med min skye mched las bzhengs nas ci yang med pa'i skye mched la snyoms par zhugs pa dang / chu bo snyan ldan gyi 'gram gyi dge slong rnams kyang 'du shes med 'du shes med min skye mched las langs nas ci yang med pa'i skye mched la snyoms par zhugs so/ /bcom ldan 'das ci yang med pa'i skye mched las bzhengs nas rnam shes mtha' yas skye mched dang / nam mkha' mtha' yas skye mched dang / bsam gtan bzhi pa dang / gsum pa dang / gnyis pa dang / dang po la snyoms par zhugs pa dang / chu bo snyan ldan gyi 'gram gyi dge slong rnams kyang ci yang med pa'i skye mched las langs nas rnam shes mtha' yas skye mched dang / nam mkha' mtha' yas skye mched la snyoms par zhugs nas bsam gtan bzhi pa dang / gsum pa dang / gnyis pa dang / bsam gtan dang po la snyoms par zhugs so/ /de nas bcom ldan 'das 'di snyam du dgongs so/ /nga bsam gtan dang po la snyoms par zhugs na chu bo snyan ldan gyi 'gram gyi dge slong dag kyang bsam gtan dang po la snyoms par zhugs/ nga bsam gtan dang po las langs nas 'du shes med 'du shes med min skye mched kyi bar la snyoms par zhugs na/ chu bo snyan ldan gyi 'gram gyi dge slong rnams kyang bsam gtan dang po las langs nas 'du shes med 'du shes med min gyi skye mched kyi bar la snyoms par zhugs/ nga 'du shes med 'du shes med min skye mched las langs nas ci yang med pa'i skye mched la snyoms par zhugs na/ chu bo snyan ldan gyi 'gram gyi dge slong rnams kyang 'du shes med 'du shes med min skye mched las langs nas ci yang med pa'i skye mched la snyoms par zhugs/ nga ci y ang med pa'i skye mched las langs nas bsam gtan dang po'i bar la snyoms par zhugs na chu bo snyan ldan gyi 'gram gyi dge slong rnams kyang ci yang med pa'i skye mched las langs te bsam gtan dang po'i bar la snyoms par zhugs kyis ma la da ni nga rnam pa de dag dang / rtags de dag dang / rgyu mtshan de dag gis gang la nyan thos dang / rang sangs rgyas thams cad rdugs pa'i bsam gtan dang po rdzogs par byas te gnas par bya'o snyam du dgongs so/ /de nas bcom ldan 'das rnam pa de dag dang / rtags de dag dang / rgyu mtshan de dag gis gang la nyan thos dang / rang sangs rgyas thams cad rdugs pa'i bsam gtan dang po rdzogs par byas te bzhugs so/ /de nas chu bo snyan ldan gyi 'gram gyi dge slong rnams 'di snyam du sems te/ tshe dang ldan pa dag shes par gyis shig /da ltar bcom ldan 'das ni nyid kyi gnas pas gnas kyis ma la bdag cag kyang rang gi gnas pas gnas par bya'o zhes de dag kyang rang gi gnas pas gnas par brtsams so/ /de nas bcom ldan 'das nang par sngar ting nge 'dzin de las bzhengs te/ dge slong gi dge 'dun gyi gung la gdan bshams pa nyid la bzhugs so/ / de nas tshe dang ldan pa kun dga' bo stan las langs te bla gos phrag pa gcig tu gzar te/ bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /btsun pa bcom ldan 'das yang dang yang du chu bo snyan ldan gyi 'gram gyi dge slong dag gi bsngags pa brjod cing gzigs par yang bzhed la/ 'on kyang de dag la bcom ldan 'das kyis yang dag par dga' bar ni ma mdzad do/ / bcom ldan 'das kyis bka' stsal pa/ kun dga' bo de bzhin gshegs pas chu bo snyan ldan gyi 'gram gyi dge slong rnams la yang 'phags pa'i yang dag par dga' bas yang dag par dga' bar byas so/ /btsun pa ji tsam gyis na 'phags pa'i chos 'dul ba la 'phags pa'i so so yang dag par dga' ba lags/ ji ltar na bcom ldan 'das kyis 'phags pa'i yang dag pa'i dga' bas yang dag par dga' bar mdzad lags/ kun dga' bo 'di na nga chu bo snyan ldan gyi 'gram gyi dge slong dag gi gtsug lag khang gang na ba der song ste phyin pa dang / gtsug lag khang gi phyi rol du zhabs bkrus te gtsug lag khang du gshegs nas stan bshams pa nyid la dkyil mo dkrung bcas nas lus drang por bsrang ste dran pa mngon du bzhag nas 'dug go/ /chu bo snyan ldan gyi 'gram gyi dge slong rnams kyang gtsug lag khang gi phyi rol du rkang pa bkrus nas gtsug lag khang du dong ste rang gi stan bshams pa la skyil mo dkrung bcas te lus drang por bsrang nas dran pa mngon du bzhag ste 'khod do/ /nga bsam gtan dang po la snyoms par zhugs na/ chu bo snyan ldan gyi 'gram gyi dge slong rnams kyang bsam gtan dang po la snyoms par zhugs so/ /nga bsam gtan dang po las langs te 'du shes med 'du shes med min skye mched kyi bar la snyoms par zhugs na/ chu bo snyan ldan gyi 'gram gyi dge slong rnams kyang bsam gtan dang po las langs nas 'du shes 'du shes med min skye mched kyi bar la snyoms par zhugs so/ /nga 'du shes med 'du shes med min skye mched las langs nas ci yang med pa'i skye mched la snyoms par zhugs na/ chu bo snyan ldan gyi 'gram gyi dge slong rnams kyang 'du shes med 'du shes med min skye mched las langs nas ci yang med pa'i skye mched la snyoms par zhugs so/ / nga ci yang med pa'i skye mched las langs nas snga ma bzhin du bsam gtan dang po'i bar la snyoms par zhugs pa dang / chu bo snyan ldan gyi 'gram gyi dge slong rnams kyang ci yang med pa'i skye mched las langs nas snga ma bzhin du bsam gtan dang po'i bar la snyoms par zhugs so/ /de la nga 'di snyam du sems te/ nga bsam gtan dang po la snyoms par zhugs na/ chu bo snyan ldan gyi 'gram gyi dge slong rnams kyang bsam gtan dang po la snyoms par zhugs/ nga bsam gtan dang po las langs te snga ma bzhin du 'du shes med 'du shes med min skye mched kyi bar la snyoms par zhugs na/ chu bo snyan ldan gyi 'gram gyi dge slong rnams kyang bsam gtan dang po las langs nas snga ma bzhin du 'du shes med 'du shes med min skye mched kyi bar la snyoms par zhugs/ nga 'du shes med 'du shes min skye mched las langs nas ci yang med pa'i skye mched la snyoms par zhugs na/ chu bo snyan ldan gyi 'gram gyi dge slong rnams kyang 'du shes med 'du shes med min skye mched las langs nas ci yang med pa'i skye mched la snyoms par zhugs/ nga ci yang med pa'i skye mched las langs nas snga ma bzhin du bsam gtan dang po'i bar la snyoms par zhugs na/ chu bo snyan ldan gyi 'gram gyi dge slong dag kyang ci yang med pa'i skye mched las langs nas snga ma bzhin du bsam gtan dang po'i bar la snyoms par zhugs kyis/ ma la da ni nga rnam pa de dag dang / rtags de dag dang / rgyu mtshan de dag gis gang la nyan thos dang / rang sangs rgyas thams cad rdugs pa bsam gtan dang po rdzogs par byas te gnas par bya'o snyam nas nga rnam pa de dag dang / rtags de dag dang / rgyu mtshan de dag gis gang la nyan thos dang / rang sangs rgyas thams cad rdugs pa'i bsam gtan dang po rdzogs par byas te gnas so/ /de nas chu bo snyan ldan gyi 'gram gyi dge slong de dag 'di snyam du sems te/ /tshe dang ldan pa dag bcom ldan 'das ni da ltar nyid kyi gnas pas gnas kyis/ ma la bdag cag kyang rang gi gnas pas gnas par bya'o snyam nas de dag kyang rang gi gnas pas gnas par brtsams te/ kun dga' bo de tsam gyis na 'phags pa'i chos 'dul ba la 'phags pa'i yang dag par dga' ba yin zhing / de ltar na 'phags pa'i yang dag par dga' bas yang dag par dga' bar byas pa yin no/ /btsun pa 'phags pa'i chos 'dul ba la 'phags pa'i yang dag par dga' ba ni bzang ngo / /btsun pa 'phags pa'i chos 'dul ba la 'phags pa'i yang dag par dga' ba ni shin du bzang ste/ bcom ldan 'das kyis chu bo snyan ldan gyi 'gram gyi dge slong dag kyang 'phags pa'i yang dag par dga' bas yang dag par dga' bar mdzad do/ /bcom ldan 'das kyis chu bo snyan ldan gyi 'gram gyi dge slong rnams 'phags pa'i yang dag pa'i dga' bas yang dag par dga' bar mdzad do/ / zhes kun du sgra grags pa nyen kor na 'khod pa'i bram ze dang khyim bdag rnams kyis thos nas/ de rnams blta ba'i phyir 'ong ba dang / de dag nye bar 'ongs pa de rnams la chos ston par byed do/ /de dag la chos ston pa na kha nas dri mi zhim pa byung nas de dag phan tshun du bltas nas dris pa/ 'phags pa dri mi zhim pa 'di su las byung / de dag gis smras pa/ tshe dang ldan pa dag kho bo cag gi kha nas byung ngo / /de dag gis smras pa 'phags pa dag ci khyed so shing mi 'dor ram/ tshe dang ldan pa dag mi dor ro/ /'phags pa ci'i slad du tshe dang ldan pa dag bcom ldan 'das kyis ma gnang ngo / /'phags pa ci khyed so shing ma zos pas yongs su dag par 'gyur ram/ de dag cang mi zer bar 'khod do/ /skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ dge slong dag bram ze dang khyim bdag dag gis legs par smras so/ /de lta bas na gnang gis dge slong gis so shing dor bar bya'o/ /de ci'i phyir zhe na/ dge slong dag so shing la yon tan lnga ste/ lnga gang zhe na/ mkhris pa 'dren par byed/ bad kan 'dren par byed/ rlung 'dren par byed/ kha'i dri mi zhim pa sel bar byed/ yi ga 'byed par byed cing dge slong dag so shing ni mig la phan pa yang yin no/ /bcom ldan 'das kyis so shing dor bar bya'o zhes gsungs pa dang / ji tsam na dge slong gzhon nu zhig gis mi dben par 'dug ste/ so shing thung ngu zhig dor bar brtsams pa na bcom ldan 'das kyang phyogs der gshegs so/ /de nas dge slong des bcom ldan 'das mthong ba dang spa gong bar gyur nas de 'di snyam du sems te/ bdag gis bcom ldan 'das kyi spyan sngar kha gdangs te so shing bza' ba gang yin pa ni bdag gi cha ma yin no snyam nas des mid pa dang mgrin par thogs so/ /sangs rgyas bcom ldan 'das rnams ni bsnyel ba mi mnga' ba'i chos can yin te/ de nas bcom ldan 'das kyis phyag g.yon pa 'khor lo dang / bkra shis dang / g.yung drung can bsod nams brgya phrag du ma las skyes pa 'jigs pa rnams la dbugs 'byin par mdzad pas mgo nas mnan te/ phyag g.yas pa'i mdzub mo bkug pas khrag dang bcas te kha nas phyung ste/ dge slong de la bka' stsal pa/ dge slong 'di ci yin des skabs de bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni dge slong dag mi dben par so shing za ba las gyur to snyam du mkhyen nas dge slong dag la bka' stsal pa/ dge slong dag dge slong gzhon nu che ge mo zhig gis mi dben par 'dug ste so shing thung ngu zhig zos pa dang / de la nyes dmigs 'di lta bu byung ngo / /de lta bas na dge slong gis mi dben par 'dug ste so shing bza' bar mi bya/ thung ngur yang mi bya'o/ /dge slong mi dben par 'dug ste so shing za 'am/ thung ngur byed na 'gal tshabs can du 'gyur ro/ /bcom ldan 'das kyis dge slong gis mi dben par 'dug ste so shing bza' bar mi bya'o zhes gsungs pa dang / dge slong gsar bu rnams gnas brtan dag gi nang du 'dug nas so shing za bar brtsams pa dang / bcom ldan 'das kyis bka' stsal pa/ dge slong gsar bu dag gnas brtan rnams kyi nang na 'dug cing so shing bza' bar mi bya/ mi dben par yang mi bya'i 'on kyang gsum ni dben par bya ste/ bshang ba dang / gci ba dang / so shing bza' ba'o/ /bcom ldan 'das kyis so shing thung ngu bza' bar mi bya'o zhes gsungs pa dang / drug sde rnams lcug ma ring po ring po dag za bar rtsom pa dge slong dag gis mthong nas smod de/ tshe dang ldan pa dag ci lhag chad du byed dam/ 'di la lhag chad ci zhig yod/ khyod kyis dge slong so shing thung ngu zos te de shi ba las bcom ldan 'das kyis bskyabs pa ma mthong ngam/ ci khyed cag nged kyi lhung bzed dang chos gos 'dod dam/ 'di la phan yon gzhan dag kyang yod de rdza ma'i 'og tu bud pa dang / dge sbyong brdab pa'o/ /de dag cang mi zer bar 'khod nas/ skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ dge slong gis so shing ha cang ring po bza' bar mi bya ste/ dge slong so shing ha cang ring po za bar byed na 'gal tshabs can du 'gyur ro// //'dul ba phran tshegs kyi gzhi/ bam po bcwa lnga pa/ bcom ldan 'das kyis dge slong gis so shing ring po bza' bar mi bya'o zhes gsungs pa dang / dge slong dag gis tshad ji tsam bza' bar bya ba mi shes nas/ bcom ldan 'das kyis bka' stsal pa/ so shing rnam pa gsum ste/ ring po dang 'bring dang thung ngu'o/ /ring po ni sor bcu gnyis so/ /thung ngu ni sor brgyad do/ /de'i bar ni 'bring po'o/ /bcom ldan 'das kyis phyogs dben pa dag tu so shing bza' bar bya'o zhes gsungs pa dang / nad pa dang rgan po 'khogs pa dag gis gnas dben par 'gro mi nus nas/ bcom ldan 'das kyis bka' stsal pa/ de dag gis chol zangs gzhag par bya'o/ /dge slong dag gis khang bzangs su de bzhin gyo mo dag nye bar bzhag pa dang / de rkang pas reg pas 'gyel te sa gzhi ma rung bar gyur nas/ bcom ldan 'das kyis bka' stsal pa/ glang po che'i rkang pa lta bu dag nye bar gzhag par bya'o/ / gzhan dag gis chol zangs ma rnyed nas/ bcom ldan 'das kyis bka' stsal pa/ de dag gis chu khung gi sgor bza' bar bya'o/ /dge slong dag chu khung gi sgo nas ha cang thag ring ba na za bar byed nas/ bcom ldan 'das kyis bka' stsal pa/ chu khung gi sgo nas khru gang nyen kor du 'dug ste bza' bar bya'o/ /bcom ldan 'das kyis so shing bza' bar bya'o zhes gsungs pa dang / dge slong dag gis so shing za zhing lce ma bzhar bas nyes dmigs de nyid du gyur pa dang / bcom ldan 'das kyis bka' stsal pa/ so shing zos nas lce bzhar bar bya'o/ /bcom ldan 'das kyis so shing zos nas lce bzhar bar bya'o zhes gsungs pa dang / dge slong rnams ci zhig gis lce bzhar bar bya ba mi shes nas/ bcom ldan 'das kyis bka' stsal pa/ de lta bas na gnang gis lce bzhar bcang bar bya'o/ /bcom ldan 'das kyis lce bzhar bcang bar bya'o zhes gsungs pa dang / drug sde rnams kyis gser dang / dngul dang / bai dUr+ya dang / shel las byas pa'i lce bzhar bcangs pa bram ze dang khyim bdag dag gis mthong nas smras pa/ 'phags pa 'di ci zhig /bzhin bzangs bcom ldan 'das kyis lce bzhar gnang ngo / / 'phags pa ci dge sbyong khyed 'dod pa'i yon tan gyis gzir tam/ de dag cang mi zer bar 'khod do/ /skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ lce bzhar bzhi bcang bar bya ste/ ra gan dang zangs ma dang lcags dang khar ba'i 'o/ dge slong dag gis rnon por byas nas/ bcom ldan 'das kyis bka' stsal pa/ rnon por mi bya'o/ /bcom ldan 'das kyis lce bzhar bzhi bcang bar bya'o zhes gsungs pa dang / dge slong kha cig gis ma 'byor nas/ bcom ldan 'das kyis bka' stsal pa/ gang dag gis ma 'byor pa de dag gis so shing de nyid bkas te/ lce bzhar bar bya'o/ /dge slong dag gis so shing bkas nas ma sbyangs par lce bzhar ba dang snad nas/ bcom ldan 'das kyis bka' stsal pa/ so shing bkas te phan tshun drud nas lce bzhar bar bya'o/ /dge slong dag gis so shing zos nas sgra ma phyung bar de bzhin bor ba dang / gtsug lag khang de na gnas pa dag gi mgor phog ste/ de dag phya nas bcom ldan 'das kyis bka' stsal pa/ de bzhin mi dor gyi 'on kyang sgra dbyung bar bya'o/ /dge slong dag so shing 'dor ba na sgra 'byin gyi/ gzhan yang gang cung zad bshang ba dang / gci ba dang mchil ma dang snabs dang / skyugs pa dang 'khru ba dag de bzhin bor ba dang / nyes dmigs de nyid du gyur nas/ bcom ldan 'das kyis bka' stsal pa/ gang cung zad bshang ba dang / gci ba la sogs pa thams cad la sgra dbyung zhing dor bar bya'o/ /bcom ldan 'das kyis so shing bza' bar bya'o zhes gsungs pa dang / dge slong dag lam du zhugs pa na/ lam du zhugs pa de rnams la phyogs kha cig na shing dang lo ma dang yal ga med de so shing ma rnyed nas de dag zan gcod par byed pa dang / bcom ldan 'das kyis bka' stsal pa/ zan gcad par mi bya'i/ 'on kyang lci ba'i phye ma 'am/ lci bas kha rung bar byas la lan gsum bshal nas bza' bar bya ste 'di la 'gyod par mi bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /tshe dang ldan pa shA ri'i bu la dge tshul tsun da dang / sgra gcan zin dang gnyis yod do/ /de nas dus gzhan zhig na tshe dang ldan pa shA ri'i bu ljongs rgyur chas pa na dge sbyong gi mched tsun da dang / sgra gcan zin la smras pa/ dge tshul dag nga ni ljongs rgyu zhing 'gro na/ khyed 'dug gam 'on te 'gro/ tshe dang ldan pa tsun das smras pa/ mkhan po bdag ni khyod kho na dang lhan cig mchi'o/ / sgra gcan zin gyis smras pa/ mkhan po bdag ni 'di nyid na mchis so/ /tshe dang ldan pa shA ri'i bus smras pa/ sgra gcan zin gal te de lta na su la gtad/ des smras pa/ mkhan po btsun pa 'char ka la gtad du gsol/ de'i drung na mchis so/ /des smras pa/ sgra gcan zin de ni gnas ngan len kun du spyod pa yin pas khyod la gnod pa byed par mi 'gyur grang / mkhan po de ni bdag gi pha ma dang 'dra bar gnas pa lags pas des gnod pa ci zhig bgyid par 'gyur/ des de la gtad nas ljongs rgyur chas pa dang / de dang sgra gcan zin yang gtsug lag khang nas byung ngo / /des smras pa/ sgra gcan zin 'di dang 'di gyis shig /des smras pa/ mi byed do/ /'char kas khros te smras pa/ blun po 'di tsam yang mi bya na gzhan ci zhig bya des smras pa/ ci khyod nga'i slob dpon yin nam/ mkhan po yin nam/ mi byed do/ /'char ka je khros nas des de'i mgul nas bzung ste gtsug lag khang nas bskrad pa dang / de rgyal byed kyi tshal gyi sgo na ngu zhing 'dug go/ /skye dgu'i bdag mo chen mo gau ta mI 'khor lnga brgya dang / bcom ldan 'das kyi zhabs la phyag 'tshal du rgyal byed kyi tshal du 'ongs pa dang / des de ngu ba mthong nas smras pa/ 'phags pa sgra gcan zin ci ste bshums/ gau ta mI bdag bskrad do/ /su zhig gis/ tshe dang ldan pa 'char kas so/ /des bsams pa bdag gis sangs rgyas kyi sras la rgyab bstan te 'gro ba gang yin pa ni bdag gi cha ma yin no snyam nas de dag gis de bskor te 'khod do/ /ji tsam na ko sa la'i rgyal po gsal rgyal bcom ldan 'das kyi zhabs la phyag 'tshal du 'ongs pa dang / des kyang de la dri bar brtsams pa/ 'phags pa sgra gcan zin ci ste bshums/ des ji ltar gyur pa bsnyad pa dang / des kyang bsams pa bdag gis sangs rgyas kyi sras dang / sangs rgyas kyi sru la rgyab bstan te 'gro ba gang yin pa ni bdag gi cha ma yin no snyam nas des kyang de bskor te 'dug go/ /tha gi tsam na khyim bdag mgon med zas sbyin bcom ldan 'das kyi zhabs la phyag 'tshal du 'ongs te des kyang de la dri bar brtsams pa/ tshe dang ldan pa sgra gcan zin ci ste bshums/ des ji ltar gyur pa bsnyad pa dang / des bsams pa bdag gis sangs rgyas kyi sras dang / sangs rgyas kyi sru dang / rgyal po la rgyab bstan te 'gro ba gang yin pa ni bdag gi cha ma yin no snyam nas des kyang de bskor te 'dug go/ /bar skabs der kun dga'i ra ba'i nang du sgra mthon po sgra chen po dang / skye bo'i tshogs phal po che'i sgra skad byung bar gyur to/ /sangs rgyas bcom ldan 'das rnams ni mkhyen bzhin du rmed par mdzad pa yin pas sangs rgyas bcom ldan 'das kyis tshe dang ldan pa kun dga' bo la rmas pa/ kun dga' bo kun dga'i ra ba na sgra mthon po sgra chen po dang / skye bo'i tshogs phal po che'i sgra skad grag pa 'o ni ci zhig /des gnas skabs de bcom ldan 'das la rgyas par gsol pa dang / bcom ldan 'das kyis bka' stsal pa/ kun dga' bo dge slong dag dge slong dge 'dun gyi gtsug lag khang nas skrod par byed dam/ bcom ldan 'das skrod par byed do/ /bcom ldan 'das kyis bka' stsal pa/ kun dga' bo dge slong ni rang gi gnas khang la dbang gi dge 'dun gyi gtsug lag khang la ni ma yin no/ /de lta bas na dge slong gis dge slong dge 'dun gyi gtsug lag khang nas bskrad par mi bya'o/ /skrod na 'gal tshabs can du 'gyur ro/ / bcom ldan 'das kyis dge slong gis dge slong dge 'dun gyi gtsug lag khang nas bskrad par mi bya'o zhes bka' stsal pa dang / dge slong rnams lhan cig gnas pa dang / nye gnas dag la cung zad kyang ma smras pas de dag dbang du ma gyur cing ma dul nas bcom ldan 'das kyis bka' stsal pa/ thul gzhug par bya'o/ /bcom ldan 'das kyis thul gzhug par bya'o zhes bka' stsal na/ de dag gis ji ltar thul gzhug par bya ba mi shes nas/ bcom ldan 'das kyis bka' stsal pa/ thul gzhug pa ni lnga ste/ mi smra ba dang mi gdams pa dang longs mi spyod pa dang / dge ba'i phyogs rgyun gcad pa dang gnas dgag pa'o/ /de la mi smra ba ni smra bar mi bya ba dang / kun du smra bar mi bya'o/ /mi gdams pa ni gdams par mi bya ba dang rjes su bstan par mi bya'o/ /longs mi spyad pa ni de dag las rim gro bdag gir mi bya ba dang / zang zing gi longs spyad mi bya ba dang chos kyi longs spyod kyang mi bya ba'o/ /dge ba'i phyogs rgyun gcad pa ni de dag gis dge ba'i phyogs gang brtsams pa de rgyun gcad par bya ba'o/ /gnas dgag pa ni de dag gnas 'char mi gzhug pa'o/ /bcom ldan 'das kyis thul gzhug par bya'o zhes bka' stsal pa dang / dge slong dag khyad par med par thul 'jug par byed nas/ bcom ldan 'das kyis bka' stsal pa/ chos lnga dang ldan pa'i lhan cig gnas pa 'am/ nye gnas thul gzhug par bya ste/ lnga gang zhe na/ ma dad pa dang / le lo can dang bka' blo mi bde ba dang ma gus pa dang sdig pa'i grogs po can no/ /dge slong dag gang zhig chos lnga car dang ldan pa de kho na thul 'jug par byed kyi/ gang zhig de dag las gang yang rung ba zhig dang ldan pa de ni thul 'jug par mi byed nas/ bcom ldan 'das kyis bka' stsal pa/ chos lnga po 'di dag las gang yang rung ba zhig dang ldan na de yang thul gzhug par bya'o/ /de thul bcug pa dang gzhan sdud par byed nas/ bcom ldan 'das kyis bka' stsal pa/ mkhan po dang slob dpon dag gis thul bcug pa bsdu bar mi bya ste/ byed na dbyen dang nye ba'i nyes pa sbom por 'gyur ro/ / bcom ldan 'das kyis lhan cig gnas pa 'am/ nye gnas thul bcug pa sus kyang bsdu bar mi bya ste/ byed na dbyen dang nye ba'i nyes pa sbom por 'gyur ro zhes bka' stsal pa dang sus kyang ma bsdus pas de dag shin du ma gus par gyur te/ kha cig ni yul gzhan du 'gro/ kha cig ni bstan pa las 'da' bar byed nas/ bcom ldan 'das kyis bka' stsal pa/ gang zhig de sdums byed pa'i dge slong bsko bar bya'o/ /de dag gis mi mkhas pa bskos te/ de song nas tshe dang ldan pa khyod kyi mkhan po na re tshur spyon bzod pa mdzod cig ces zer ro zhes byas pa dang / de je khengs par gyur nas/ bcom ldan 'das kyis bka' stsal pa/ gang zhig rang gi blo gros kyis sdums byed pa'i mkhas pa bsko bar bya'o/ /thams cad la khyad par med par bzod pa gsol bas de dag dge ba'i chos mi 'phel zhing gsar bu gzhan dag kyang bstan pa las gyed par byed nas/ bcom ldan 'das kyis bka' stsal pa/ chos lnga dang ldan pa la bzod pa gsol bar bya ste/ dad pa can dang brtson 'grus brtsams pa dang / gus pa dang bka' blo bde ba dang dge ba'i bshes gnyen can no/ /dge slong dag gang zhig chos lnga car ldan pa de la bzod pa gsol nas/ bcom ldan 'das kyis bka' stsal pa/ gang zhig de dag las gang yang rung ba zhig dang ldan pa de la bzod pa gsol bar bya'o/ /dge slong thul gzhug par mi 'os pa thul 'jug na 'gal tshabs can du 'gyur ro/ /thul gzhug par 'os pa thul mi 'jug na 'gal tshabs can du 'gyur ro/ /bzod pa gsol bar 'os pa la bzod pa mi gsol na 'gal tshabs can du 'gyur ro/ /bzod pa gsol bar mi 'os pa la bzod pa gsol na 'gal tshabs can du 'gyur ro/ /de la chos gong ma lnga las gang yang rung ba zhig dang ldan pa bzod pa gsol te/ gal te sems ngad ldang bar 'gyur ba lta na bzod pa gsol bar bya'o/ /sems ngad mi ldang ba lta na bzod pa gsol bar mi bya'o/ /gang zhig chos lnga car dang ldan pa de la ni bzod pa gsol bar mi bya ba nyid de/ bzod pa gsol bar byed na 'gal tshabs can du 'gyur ro/ /gang zhig bzod pa mi byed pa de gal te dge tshul yin na chu tshags dang / ril ba dang stod g.yogs dang / smad g.yogs bcas pa byin te bskrad par bya'o/ /'on te bsnyen par rdzogs pa 'am bsnyen par rdzogs par 'dod pa zhig yin na yo byad lnga byin te bskrad par bya'i sgren mor ni mi bya'o/ sdom ni/ khang bzangs stegs bu de bzhin du/ /lan kan dra ba zu nga dang / /phyags ma dang ni yang tog dang / /yang tog lan kan gdags pa'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bcom ldan 'das kyis gnas mal rnams kyi nang na shing drung ni rung ba rnyed kyang sla ba ste/ de la gnas na dge slong legs par gsungs pa'i chos 'dul ba la rab tu byung zhing bsnyen par rdzogs pa dge slong gi dngos por 'gyur ro/ /lhag par rnyed na gnas khang ngam/ snga khang 'am khang pa rtseg ma 'am zhes bka' stsal pa dang / dge slong rnams gnas khang dag byed nas/ bcom ldan 'das kyis bka' stsal pa/ khang bzangs bya'o/ /bcom ldan 'das kyis khang bzangs bya'o zhes bka' stsal na/ dge slong dag gis ji lta bur bya ba mi shes nas/ bcom ldan 'das kyis bka' stsal pa/ gzhi so phag rim pa bdun nam brgyad brtsigs te stegs bu pus mo tsam du phyin pa dang ka rten gzhag go/ /de'i steng du ka ba'i phreng ba gzugs so/ /ka ba rnams kyi steng du ka zhu'o/ /ka zhu'i steng du gdung ngo / /gdung gi steng du spang leb bo/ /de rnams kyi steng du so phag gis g.yog go/ / de nas so phag gi phye mas g.yogs te/ khang bzangs ni de ltar bya'o/ /bcom ldan 'das kyis khang bzangs de ltar bya'o zhes bka' stsal nas dge slong rnams kyis khang bzangs byas te lan kan ma byas nas/ bcom ldan 'das kyis bka' stsal pa/ lan kan bya'o/ /lan kan byas pa dang de lhung nas bcom ldan 'das kyis bka' stsal pa/ 'byor par bya zhing de lcags kyi gzer bu dag gis gdab par bya'o/ /dge slong rnams khang bzangs su zan za ba na bye'u dang phug ron dag gis gtses nas/ bcom ldan 'das kyis bka' stsal pa/ rgyas gcad par bya'o/ /bcom ldan 'das kyis rgyas gcad par bya'o zhes bka' stsal na/ dge slong dag gis ji lta bu bya ba mi shes nas bcom ldan 'das kyis bka' stsal pa/ rgya ni lnga ste/ sha na las byas pa dang / rtswa mun dza las byas pa dang / rtswa bal ba dza las byas pa dang / rtswa ku sha las byas pa dang / srad bu las byas pa'o/ /dge slong dag gis phyogs gang du bre ba mi shes nas/ bcom ldan 'das kyis bka' stsal pa/ grwa bzhi nas zu nga thogs la de dag la legs par gdags par bya'o/ /de rnams kyis shing gi zu nga btags pa dang / nyi mas gas shing char gyi chus kyang rul nas bcom ldan 'das kyis bka' stsal pa/ lcags las byas pa gdags par bya'o/ /bya rog dang bye'u dang phug ron dag phyin cad mi 'ong nas/ bcom ldan 'das kyis bka' stsal pa/ phyogs gcig tu bya rog gi khung gdod par bya zhing de yang zan za ba'i dus su chod la dge slong dag zan zos zin nas yang dbye bar bya'o/ /dge slong zhig zan za ba na de'i mdun na khyi zhig bdag la gdon mi za bar sbyin par 'gyur ro snyam nas/ re bzhin sdod pa las dge slong des de la ma byin pa dang / de yi chad de dus las 'das so/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dud 'gro'i phyir zas kyi chang bu gzhag par bya'o/ /bcom ldan 'das kyis dud 'gro'i phyir zas kyi chang bu gzhag par bya'o zhes bka' stsal pa dang / dge slong dgon pa pa zhig 'dug pa des wa rnams la zas kyi chang bu byin te bya rog dag bskrad pa dang / de dag khros nas bya rog gi skad du rkun po'i sde dpon la dge slong 'di la gser mang du yod do zhes smras so/ / rkun po'i sde dpon de bya rog gi skad la mkhas pa zhig pas des dge slong de la brdeg par brtsams pa dang / des smras pa/ kye skyes bu nga la ci ste brdeg /des smras pa/ 'phags pa khyod la gser yod pa byin cig /des smras pa/ kye skyes bu nga la gser gyi 'byor pa ga la yod/ dmigs med par ma rdeg shig /des smras pa/ khyod la gser yod kyis byin cig /gal te mi ster na khyod ngas gsad do/ /des smras pa/ kye skyes bu khyod ni gcig gis bslus na khyod la su zer ba smros shig rkun po'i sde dpon gyis smras pa/ bya rog dag zer ro/ /des smras pa/ kye skyes bu de dag ni nga la khros pa yin no/ /ci'i phyir/ des ji ltar gyur pa bsnyad pa dang / rkun po'i sde dpon gyis smras pa/ 'phags pa gal te khyod kyis bdag la de skad du drang por ma smras par gyur na bdag khyod bsad par gyur to/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag nyes dmigs 'di dag bsngos te bzhag pa las gyur gyis de lta bas na sems can thams cad kyi phyir spyi la ci bde ba'i zas kyi chang bu gzhag par bya'o/ /dbyar khang bzangs chus gang nas bcom ldan 'das kyis bka' stsal pa/ skyabs bya'o/ /bcom ldan 'das kyis skyabs bya'o zhes bka' stsal na/ dge slong dag skyabs ji lta bu bya ba mi shes nas/ bcom ldan 'das kyis bka' stsal pa/ ka ba'i bar rnams su spang leb kyis gcad par bya'o/ /thams cad du bcad pas mun nag par gyur nas/ bcom ldan 'das kyis bka' stsal pa/ thams cad du gcad par mi bya'i 'on kyang snang ba'i sa gzhag par bya'o/ /shing dag ma rnyed nas bcom ldan 'das kyis bka' stsal pa/ re lde 'am seg gis gcad par bya'o/ /de dag gis bcad pa dang chus rul cing sril dag kyang zhugs nas/ bcom ldan 'das kyis bka' stsal pa/ zla ba bzhi bzhir bzhag nas phyis dbyung bar bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ / khyim bdag mgon med zas sbyin gyi kun du spyod pa ni nang par sngar langs nas bcom ldan 'das la blta ba'i phyir nye bar song nas rgyal byed kyi tshal rang gis 'phyag go/ /de nas dus gzhan zhig na khyim bdag mgon med zas sbyin brel ba 'ga' zhig byung nas de ma 'ongs pa dang / rgyal byed kyi tshal ma phyags par lus te phyag dar gyis gang ba de bcom ldan 'das 'chag pas gzigs so/ /gzigs nas kyang kye ma lha'i dbang po brgya byin gyis ri spos kyi ngad ldang las phyags ma khyer te 'ongs kyang bla na snyam du 'jig rten pa'i thugs bskyed de/ chos nyid kyis gang gi tshe sangs rgyas bcom ldan 'das rnams 'jig rten pa'i thugs bskyed par mdzad pa de'i tshe srog chags grog sbur rnams kyis kyang bcom ldan 'das kyi thugs sems kyis shes so/ /gang gi tshe 'jig rten las 'das pa'i sems bskyed par mdzad pa de'i tshe ni nyan thos dang rang sangs rgyas rnams kyis kyang bcom ldan 'das kyi thugs sems kyis mi shes na dud 'gro'i skye gnas su su song ba'i srog chags rnams kyis lta smos kyang ci dgos/ lha'i dbang po brgya byin gyis ci'i phyir bcom ldan 'das kyis 'jig rten pa'i thugs bskyed snyam du bsams na rgyal byed kyi tshal phyag bzhed par mthong ngo / /de nas lha'i dbang po brgya byin gyis bcom ldan 'das kyi thugs sems kyis shes nas shing bal ltar reg na 'jam pa'i phyags ma lnga brgya blangs te/ bcom ldan 'das kyi spyan sngar 'dug go/ /de nas bcom ldan 'das kyis bsod nams 'dod pa'i sems can rnams la bsod nams kyi stegs nye bar bstan pa'i phyir nyid kyis phyags ma bsnams te rgyal byed kyi tshal 'phyag par zhugs so/ /bcom ldan 'das mthong nas nyan thos chen po shA ri'i bu dang maud gal gyi bu dang 'od srung dang kun dga' bo dang nam gru la sogs pa yang 'phyags pa la zhugs so/ /de nas nyan thos chen po dag dang thabs gcig rgyal byed kyi tshal phyags nas rim gro'i khang par gshegs te/ dge slong gi dge 'dun gyi gung la gdan bshams pa nyid la bzhugs so/ /bzhugs nas bcom ldan 'das kyis dge slong rnams la bka' stsal pa/ dge slong dag phyag dar 'chags pa la phan yon lnga yod de/ lnga gang zhe na/ bdag nyid kyi sems rab tu dang bar 'gyur/ gzhan gyi sems rab tu dang bar 'gyur/ lha rnams yid dga' bar 'gyur mdzes par 'gyur ba'i dge ba'i rtsa ba sogs par 'gyur/ lus zhig nas bde 'gro mtho ris lha rnams kyi nang du skye bar 'gyur ro/ /de nas khyim bdag mgon med zas sbyin yang phyogs der phyin pa dang / de nas bcom ldan 'das nyan thos chen po dang thabs gcig nyid kyis tshal ji ltar phyags pa thos nas de 'di snyam du sems te/ gang du bcom ldan 'das nyan thos chen po dang thabs gcig nyid kyis phyag dar mdzad pa de'i steng du bdag ji ltar 'gro snyam mo/ /de nas khyim bdag mgon med zas sbyin ngo tsha shes pa snying la ngo tsha nas de nyid du 'dug go/ /sangs rgyas bcom ldan 'das rnams ni mkhyen bzhin du rmed par mdzad pa yin pas bcom ldan 'das kyis dge slong rnams la rmas pa/ dge slong dag 'o ni su zhig /dge slong rnams kyis gsol pa/ mgon med zas sbyin lags te gang du bcom ldan 'das nyan thos chen po dang thabs gcig nyid kyis phyag dar mdzad pa de'i steng du sug pa dor du bcom ldan 'das la g.yar tsha nas bcom ldan 'das kyi spyan sngar mchi bar mi 'tshal lo/ /de nas bcom ldan 'das kyis de la bka' stsal pa/ khyim bdag sangs rgyas kyi bka' kha ton bya zhing 'jug par bya ste/ 'di ltar sangs rgyas bcom ldan 'das rnams ni chos la gus pa yin la/ chos ni dgra bcom pa rnams kyi yang bla ma yin no/ /de nas mgon med zas sbyin tshigs su bcad pa'i dbyangs 'don cing bcom ldan 'das kyi spyan sngar nye bar song ngo / /de nas bcom ldan 'das kyis de la chos dang ldan pa'i gtam gyis yang dag par ston par mdzad/ yang dag par len du 'jug par mdzad/ yang dag par gzeng bstod par mdzad/ yang dag par dga' bar mdzad de/ bcom ldan 'das kyis de la chos dang ldan pa'i gtam gyis yang dag par bstan/ yang dag par len du bcug yang dag par gzeng bstod/ yang dag par dga' bar byas nas song ngo / /dge slong rnams the tshom skyes nas the tshom thams cad gcod par mdzad pa/ sangs rgyas bcom ldan 'das la zhus pa/ btsun pa bcom ldan 'das chos la gus pa skyes shing zhe sa dang bcas par gyur pas de ltar chos kyi bsngags pa brjod pa gang lags pa ni ngo mtshar lags so/ /bcom ldan 'das kyis bka' stsal pa/ dge slong dag de bzhin gshegs pa da ltar 'dod chags dang bral ba zhe sdang dang bral ba/ gti mug dang bral ba/ skye ba dang / rga ba dang / na ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams las yongs su grol zhing thams cad mkhyen pa rnam pa thams cad mkhyen pa ye shes kyis shes bya thams cad la dbang brnyes nas chos la gus pa skyes shing zhe sa dang bcas par gyur pas de ltar chos kyi bsngags pa rjod par mdzad pa gang yin pa 'di la ngo mtshar ci zhig che/ 'das pa'i dus na nga 'dod chags dang bcas zhe sdang dang bcas gti mug dang bcas/ skye ba dang / rga ba dang / na ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa dag las yongs su ma grol bas chos kyi phyir rang gi srog yongs su btang ba gang yin pa de legs par rab tu nyon la yid la zung shig dang bshad do/ /dge slong dag sngon byung ba grong khyer bA rA Na sI na rgyal po tshangs byin zhes bya ba rgyal srid byed du 'jug ste/ rgyal srid 'byor pa dang / rgyas pa dang / bde ba dang / lo legs pa dang / skye bo dang / mi mang pos gang ba/ 'thab pa dang / rtsod pa dang / 'khrug pa dang / 'khrug long rab tu zhi ba/ chom rkun med pa sa lu dang bu ram shing dang / ba lang dang ma he phun sum tshogs pa/ chos kyi rgyal po chos dang 'thun pas chos bzhin byed du 'jug go/ /rgyal po de yang dad pa can dge ba'i bsam pa bzang ba/ bdag dang gzhan la phan par zhugs pa/ snying rje can bdag nyid chen po chos 'dod pa/ skye dgu la byams pa/ thams cad rab tu sbyin pa/ thams cad yongs su gtong ba zhig ste/ gtong ba chen po la 'jug go/ /de dus gzhan zhig na btsun mo dam pa dang lhan cig rtse bar byed dga' bar byed/ dga' mgur spyod par byed do/ /de rtse bar byed dga' bar byed dga' mgur spyod par byed pa las btsun mo la sems can zhugs par gyur te/ de la legs par gsungs pa nyan 'dod pa skyes so/ /des rgyal po la smras nas/ rgyal pos mtshan mkhan rnams bos te dris pa dang / de dag gis smras pa/ lha sems can 'di'i mthu lags so/ /de nas rgyal pos legs par gsungs pa'i don du gser srang 'bum bskur te/ grong dang grong rdal dang / yul 'khor dang rgyal po'i pho brang 'khor du bskor kyang legs par gsungs pa ma rnyed do/ /ji tsam na zla ba dgu tshang nas btsun mo de la khye'u gzugs bzang ba/ blta na sdug pa mdzes pa mdog gser gyi kha dog can/ mgo gdugs lta bu dpung pa ring ba/ dpral ba'i dbyes che ba/ smin ma 'dab chags pa/ sna mtho ba/ yan lag dang nying lag thams cad dang ldan pa zhig btsas pa dang / zhag bdun gsum nyi shu rtsa gcig tu de btsas pa'i btsas ston rgya cher byas nas khye'u yi ming cir gdags shes ming 'dogs par byed do/ /blon po rnams kyis smras pa/ lha gang gi slad du khye'u 'di ma btsas pa nyid nas legs par gsungs pa tshol ba de'i slad du khye'u yi ming legs gsungs tshol zhes de'i ming legs gsungs tshol zhes bya bar btags so/ /khye'u legs gsungs tshol ma ma brgyad po pang na 'tsho ba'i ma ma gnyis dang / nu ma snun pa'i ma ma gnyis dang / dri ma 'phyi ba'i ma ma gnyis dang / rtsed grogs kyi ma ma gnyis la gtad nas de ma ma brgyad kyis 'o ma dang zho dang mar sar dang / zhun mar dang / mar gyi snying khu dang / yo byad kyi khyad par gtso bo gzhan dang gzhan dag gis bskyed bsrings nas rdzing gi pad ma bzhin du skye drag par gyur to/ /de gang gi tshe chen por gyur pa de'i tshe yang legs par gsungs pa btsal na ma rnyed do/ /de pha 'das nas rgyal srid la bzhag pa dang / blon po rnams la smras pa/ gtso bo dag nga la legs par gsungs pa dgos kyis legs par gsungs pa tshol cig / de nas blon po de rnams kyis gser srang 'bum bskur te 'dzam bu'i gling mtha' dag gi grong dang / grong rdal dang / yul 'khor dang / rgyal po'i pho brang 'khor dag tu bskor kyang legs par gsungs pa ma rnyed do/ /de nas de rnams kyis rgyal po la byas pa dang / de nas rgyal po legs par gsungs pa mnyan pa'i phyir re bas yongs su gdungs par gyur to/ /lha'i dbang po brgya byin gyi shes pa dang mthong ba ni 'og tu 'jug pa yin pas des rgyal po legs par gsungs pa'i phyir sdug bsngal bar mthong nas de 'di snyam du sems te/ ma la bdag gis rgyal po bgam par bya'o snyam mo/ /de nas lha'i dbang po brgya byin gnod sbyin gyi gzugs su lag pa dang rkang pa dang / mig mi sdug par bsgyur nas rgyal po'i mdun du 'dug nas de'i tshe tshigs su bcad de smras pa/ legs par spyad pa'i chos spyad bya/ /nyes spyad de ni spyad mi bya/ /chos spyod 'jig rten 'di dang ni/ /pha rol du yang bde bar gnas/ /de nas rgyal pos tshigs su bcad pa de thos ma thag tu dga' ba dang rab tu dga' ba skyes nas gnod sbyin la smras pa/ gsang ba po tshigs su bcad pa de yang smros shig /smros shig mnyan par bya'o/ /de nas gnod sbyin des rgyal po la smras pa/ lha bdag gis smras pa gang yin pa de mdzad na gdod bdag kyang bka' stsal pa gang lags pa de bgyid do/ /rgyal pos smras pa/ ci smra/ gnod sbyin gyis smras pa/ nyin zhag bdun du seng ldeng gi shing dag me dong du bus nas gal te der bdag nyid 'dor na de'i 'og tu bdag gis tshigs su bcad pa smra'o/ /de thos ma thag tu rgyal po yid dga' nas gnod sbyin de la smras pa de bzhin bya'o/ /de nas rgyal po des yul thams cad du dril bsgrags te/ zhag bdun na rgyal po legs par gsungs pa mnyan pa'i phyir me dong du bdag nyid 'dor na gang dag ya mtshan blta bar 'dod pa de dag kyang shog shig ces byas so/ /de nas srog chags brgya stong phrag du ma yang 'dus/ nam mkha'i ngos la yang lha brgya stong du ma yang 'dus te byang chub sems dpa'i lhag pa'i bsam pa dag pa nyid shes nas ya mtshan gyi ngo bo blta ba'i phyir der 'khod do/ /de nas gnod sbyin de nam mkha' la 'phags nas byang chub sems dpa' la smras pa/ rgyal po chen po ji ltar dam bcas pa bzhin mdzod cig /de nas rgyal po des gzhon nu thu bo rgyal srid la bzhag ste/ blon po dang / grong rdal pa dang / yul mi rnams la yang bzod pa gsol/ skye bo'i tshogs kyang dbugs phyung nas me dong gi drung du nye bar song ste tshigs su bcad pa smras pa/ me dong 'jigs pa che byed nyi ma 'char ka'i 'od dang 'dra ba 'dir/ /chos phyir srog la brtsam med nges pa'i yid kyis rab tu mchong bar bya/ /bdag gi bsod nams mthu yis me dong 'di yang pad ma 'khrigs pa yi/ /mtsho chu tsan dan 'de gus bcin pa lta bur bsil ba bzang gyur cig / de skad ces smras nas byang chub sems dpa' me dong der mchongs pa dang / de mchongs ma thag tu me'i dong de mtshor gyur to/ /de nas lha'i dbang po brgya byin gyis rgyal po'i ya mtshan lha dang mi dad par byed pa'i cho 'phrul de mthong nas gnod sbyin gyi gzugs mi snang bar byas nas rang gi gzugs kyis 'dug ste/ de'i tshe tshigs su bcad pa smras pa/ legs par spyad pa'i chos spyad bya/ /nyes spyad de ni spyad mi bya/ /chos spyod 'jig rten 'di dang ni/ /pha rol du yang bde bar gnas/ /de nas byang chub sems dpas tshigs su bcad pa de bzung nas gser gyi glegs bam dag la bris te 'dzam bu'i gling mtha' dag gi grong dang / grong rdal dang / yul 'khor dang / rgyal po'i pho brang 'khor dag tu bskur to/ /bcom ldan 'das kyis bka' stsal pa/ dge slong dag ji snyam du sems/ de'i tshe de'i dus na rgyal por gyur pa gang yin pa de ni nga yin te/ de'i tshe yang ngas chos kyi phyir srog yongs su btang na da lta lta smos kyang ci dgos/ dge slong dag de lta bas na 'di ltar bslab par bya ste/ chos la gus par bya bla mar bya/ mnyes par bya mchod par bya ste chos la gus par byas/ bla mar byas/ mnyes par byas/ mchod par byas shing nye bar brten te gnas par bya'o zhes dge slong dag khyed kyis de ltar bslab par bya'o/ /bcom ldan 'das kyis de skad ces bka' stsal pa dang / dge slong de dag yi rangs te bcom ldan 'das kyis gsungs pa la mngon par bstod do/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bcom ldan 'das kyis phyag dar 'phyag pa la phan yon lnga yod do zhes bka' stsal pa dang dge slong gnas brtan gnas brtan dag bsam gtan dang 'don pa bor te rgyal byed kyi tshal 'phyag pa la zhugs nas/ bcom ldan 'das kyis bka' stsal pa/ ngas dge skos las dgongs te gsungs kyi dge slong gnas brtan gnas brtan dag ni ma yin no/ /'on kyang legs par gsungs pa'i chos 'dul ba la rab tu byung ba'i dge slong gi las ni gnyis te/ 'di lta ste bsam gtan dang / gdon pa'o/ /bcom ldan 'das kyis ngas dge skos la dgongs te gsungs so zhes bka' stsal pa dang / des rgyal byed kyi tshal ril phyag par ma nus nas/ bcom ldan 'das kyis bka' stsal pa/ ji tsam sbyang dgos pa de dge skos kyis phyag par bya zhing gzhan tshes brgyad dang bcu bzhi la gaN DI brdungs te dge 'dun thams cad kyis phyag par bya'o/ /bcom ldan 'das kyis tshes brgyad dang bcu bzhi la gaN DI brdungs te dge 'dun thams cad kyis phyag par bya'o zhes bka' stsal pa dang / dge slong kha cig lag na phyags ma thogs te gtam bzang po ma yin pa zer zhing las byed pa dang / rgyal byed kyi tshal na gnas pa'i mi ma yin pa dang / dge slong gzhan dag kyang 'phya nas/ bcom ldan 'das kyis bka' stsal pa/ rnam par nges pa'i gtam chos dang 'thun par bya ba 'am/ 'phags pa'i mi smra bas phyag dar bya'o/ /dge slong dag rgyal byed kyi tshal phyags nas lus la rdul gyis gos bzhin 'dug pa dang / ma dad pa dag gis mthong ste 'phya nas/ bcom ldan 'das kyis bka' stsal pa/ phyags te phyag dar bor nas gang dag khrus byed par 'dod pa de dag gis ni khrus bya'o/ /gang dag khrus bya bar mi 'dod pa de dag gis ni lus chus phyis nas lag pa dang rkang pa bkrus te 'jug par bya'o/ /de nyid kyis nyin par gnas mal la blta bar bya'o zhes bka' stsal pa dang / dge 'dun thams cad de bzhin du lta nas/ bcom ldan 'das kyis bka' stsal pa/ dge 'dun thams cad kyis blta bar mi bya'i 'on kyang gnas 'cha' ba rnams kyis blta bar bya'o/ /bcom ldan 'das kyis phyag dar byas pa'i steng du sangs rgyas kyi bka' kha ton bya zhing 'gro bar bya'o zhes bka' stsal pa dang / dge slong dag chag chag btab nas phyag dar byed cing dkyil 'khor byed de des na phyogs der 'gror mi rung ngo snyam nas dge slong dag mi 'gro ba dang / bcom ldan 'das kyis bka' stsal pa/ gtsug lag gi tshigs su bcad pa gdon zhing 'gro bar bya ste/ de la 'gyod par mi bya'o/ /dri gtsang khang gi grib ma dang / sku gzugs dang / mchod rten gyi srog shing gi grib ma dag byung ba dang / de dag la yang dge slong rnams 'gyod cing ma bgoms pa dang / bcom ldan 'das kyis bka' stsal pa/ dge slong dag grib ma ni mi brtan pa yin pas de la yang gtsug lag gi tshigs su bcad pa gdon cing bgom par bya ste/ 'di la 'gyod par mi bya'o/ /ge re'i rgyal pos ko sa la'i rgyal po gsal rgyal la ge ra'i khye'u bran bu dang / skyong ba zhes bya ba gnyis skyes su bskur te/ de gnyis las bran bu ni bza' ba dang btung ba'i cho ga la mkhas/ skyong ba ni gnas mal gyi cho ga la mkhas so/ /mtha' 'khob na gnas pa rnams ni phal cher brkam chags can gyi rang bzhin can yin pas gang gi tshe srang du 'gro ba de'i tshe yul mi las nya dang / sha dang / snum khur dag phrogs shing za nas de rnams kyis de dag la brgyab pa dang / de gnyis kyis rgyal po la smras pa/ lha deng bdag cag srang du mchis nas der bdag cag gis nya las cung zad cig sug nya bgyis na de rnams kyis bdag cag btsogs te tha ma ma gum tsam du bgyis so/ /rgyal po gsal rgyal gyis dril bsgrags nas sus kyang bran bu dang / skyong ba dag brdeg par mi bya'i 'on kyang bdag nyid kyi rdzas bsrung bar bya'o zhes bsgo nas gang gi tshe de gnyis srang du 'gro ba de'i tshe skye bo'i tshogs kyis de gnyis mthong nas bdag nyid kyi rdzas sbed par byed do/ /ji tsam dus gzhan zhig na rgyal po las byed pa las ngal te mal du 'phres pa dang / bran bu dang skyong ba dag de'i rkang pa mnyed cing drung na 'khod pas rgyal po bsgul nas bran bus skyong ba la smras pa/ skyong ba lha mnal log gam/ des smras pa/ mnal log go/ /rgyal pos thos nas bsams pa gdon mi za bar 'di gnyis gsang gtam cung zad cig byed 'dod par gyur to snyam nas des gnyid log pa ltar rdzus te 'dug pa dang / bran bus skyong ba la smras pa/ skyong ba 'jig rten pha rol yod dam med cig gu/ des smras pa/ bran bu 'jig rten pha rol yod re skan/ skyong bas smras pa/ bran bu 'jig rten na dgra bcom pa yod dam/ des smras pa/ 'jig rten na dgra bcom pa yod re skan/ rgyal pos de thams cad thos nas des bsams pa/ 'di gnyis kyang 'di lta bu'i sdig pa'i lta ba kun tu spyod de/ 'di la gcig ni rtag par lta/ gcig ni chad par lta'o snyam mo/ /kun tu yang yul ko sa la'i rgyal po gsal rgyal gyi ge ra'i khye'u gnyis las gcig ni rtag par lta/ gcig shos ni chad par lta'o zhes sgra grags par gyur to/ /de'i tshe khyim bdag mgon med zas sbyin gyis khyu mchog gi tshig rlabs po che 'di lta bu mgo gcig bzung nas smras pa/ su gang zhig nga'i khyim du mir gyur nas dus byed pa de thams cad lus zhig nas bde 'gro mtho ris lha rnams kyi nang du skye bar 'gyur ro zhes 'khor gyi nang du seng ge'i sgra yang dag par bsgrags so/ /rgyal po gsal rgyal gyis bsams pa/ gang gi tshe khyim bdag mgon med zas sbyin 'dir 'ongs pa de'i tshe de la khye'u 'di gnyis thabs shig bshams te sbyin no snyam mo/ /ji tsam dus gzhan zhig na khyim bdag mgon med zas sbyin rgyal po'i drung du song ba dang / khye'u zhig gis de'i stan bting ste dus ran pa dang 'ong ngo snyam nas phyir byung ste byis pa rnams dang lhan cig rtse bar brtsams so/ / rgyal pos de song bar shes nas bsams pa/ 'di gnyis thabs bshams nas sbyin pa'i dus de ni 'di yin no snyam du rig nas des sgo ba la gsang ste/ khyim bdag mgon med zas sbyin gyi khye'u phyir byung ba gang yin pa de nang du ma gtang shig ces bsgo ba dang / sgo bas de nang du ma btang ngo / /khyim bdag mgon med zas sbyin 'gro bar brtsams nas stan las langs te phan tshun bltas pa dang / rgyal pos smras pa/ khyim bdag ci lta lha stan 'tshal ba'i khye'u 'o/ / des smras pa/ khyim bdag ngas bran bu dang / skyong ba gnyis sbyin gyis khyer la song shig /des rgyal po'i ngor khas blangs nas des bsams pa/ ci'i phyir lhas bran bu dang / skyong ba gnyis bdag la byin snyam mo/ /yang bsams pa/ 'di gnyis sdig pa'i lta ba can yin pas lhas bdag brtag par bzhed do snyam nas des de gnyis khyim du khrid de mdzod pa bos te smras pa/ kye skyes bu 'di dag ci 'dod pa de thams cad khyod kyis byin cig /srang du song ste skye bo'i tshogs la smras pa/ bran bu dang / skyong ba ci len pa de khyed kyis byin la rin yang rtsis te zhog shig dang ngas nyis gyur du sbyin no/ /de dag gis mdzod pa'i lag nas gang cung zad ci bslangs pa de thams cad thob pa dang / de dag mgu nas smras pa/ kye skyes bu kho bo cag gis gang bslangs pa de thams cad khyod kyis kho bo cag la byin na khyod la su zhig gis bsgo/ des smras pa/ bdag la khyim bdag gis de skad du bsgo'o/ /de dag gis bsams pa/ khyim bdag ni bdag cag gi pha ma dang 'dra bar gnas te gang bslangs pa de thob po snyam mo/ /dus gzhan zhig na de dag srang du song ba dang / de dag la skye bo'i tshogs kyis sgra phyung nas sbyin te/ kha cig ni bran bu nged las khyer cig ces zer/ gzhan dag kyang nged las khyer cig ces zer ba dang / de dag gis smras pa/ shes ldan dag khyed sngon nged mthong na snod du sbed na da sgra phyung nas ster ba 'di la rgyu gang zhig yin/ de dag gis smras pa/ sngon ni khyed 'phrog cing za/ da ni khyim bdag gis rin nyis gyur tu byin no/ /de dag gis bsams pa/ khyim bdag ni bdag cag shin tu phan bsgrub pa lhur len to snyam nas de dag khyim bdag gi drung du song ste smras pa/ khyim bdag bdag cag la las dbog tu gsol/ shes ldan dag sdod cig dang las kyang yod do/ /ji tsam na dus gzhan zhig na khyim bdag mgon med zas sbyin bran bu dang skyong ba dag khrid nas rgyal byed kyi tshal 'phyag tu song ngo / /de der son pa dang bya ba cung zad cig byung nas/ des smras pa/ bran bu dang / skyong ba nga la bya ba zhig byung gis khyed kyis rgyal byed tshal phyogs la sheg shig / de dag gis phyag par brtsams pa dang / bcom ldan 'das kyis ji ltar phyag dar mi zad pa de ltar byin gyis brlabs so/ /de dag jo bo la snying nye bas skyo bzhin ma btang ngo / /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo bran bu dang / skyong ba dag la lhung bzed kyi lhag ma zhog shig /des de dag la lhung bzed kyi lhag ma bzhag go/ /phyag dar bor ba dang / de kho na bzhin du zad ma shes nas de dag ji srid nam sros par gyur pa de srid du las byed cing 'khod do/ /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo khyod kyis bran bu dang / skyong ba dag drung du snyol cig /dge slong rnams la yang ngas dge slong dag khyed kyis dge ba mi spyoms pa dang / sdig pa bshags te gnas par bya'o zhes gsungs mod kyi 'on kyang bran bu dang / skyong ba dag lta ba dbral bar bya dgos pas khyed las gang gis gnas pa'i snyoms par 'jug pa gang thob pa des gnas pa'i snyoms par 'jug pa des gnos shig ces byos shig / btsun pa de ltar 'tshal lo zhes tshe dang ldan pa kun dga' bos bcom ldan 'das kyi ltar mnyan nas bran bu dang / skyong ba la smras pa/ khyed kho bo kho na'i drung du nyol cig /dge slong rnams la yang smras pa/ tshe dang ldan pa dag bcom ldan 'das kyi zhal nas ngas dge slong dag khyed kyis dge ba mi spyoms pa dang / sdig pa bshags te gnas par bya'o zhes gsungs mod kyi 'on kyang bran bu dang / skyong ba dag lta ba dbral bar bya dgos pas khyed las gang gis gnas pa'i snyoms par 'jug pa gang thob pa des gnas pa'i snyoms par 'jug pa des gnos shig ces de skad bka' stsal to/ /btsun pa kun dga' bo bcom ldan 'das kyis ji skad bka' stsal pa de bzhin 'tshal lo zhes smras nas/ mtshan mo thun dang po la rdzu 'phrul bstan pa brtsams te/ kha cig ni 'bar bar byed/ kha cig ni glog 'gyu bar byed pa dang / bran bu dang / skyong bas smras pa/ 'phags pa kun dga' bo 'di ci zhig lags/ des smras pa/ 'di dag ni dgra bcom pa rdzu 'phrul gyis rnam par rtse ba yin no/ /de dag gis smras pa/ kun dga' bo 'jig rten na dgra bcom pa mchis pa lta zhig 'di dag mngon sum kho nar mi snang ngam/ 'di la the tshom zar ci zhig yod ces byas pa dang / de dag las gang gi lta ba 'jig rten na dgra bcom pa med do snyam pa de dang bral zhing 'jig rten na dgra bcom pa yod do snyam pa yang dag pa'i lta ba thob par gyur to/ /de nas bcom ldan 'das kyis gung thun la kye ma brgya byin dang tshangs pa la sogs pa lha dag 'ongs kyang bla na snyam du 'jig rten pa'i thugs bskyed par mdzad do/ /gang gi tshe sangs rgyas bcom ldan 'das rnams 'jig rten pa'i thugs bskyed par mdzad pa zhes bya ba nas/ brgya byin dang tshangs pa la sogs pa lha rnams kyis bcom ldan 'das kyi thugs sems kyis shes nas bcom ldan 'das kyi spyan sngar song ngo zhes bya ba'i bar snga ma bzhin no/ /de rnams kyi mthus snang ba rgya chen po byung ba dang / bran bu dang / skyong ba dag gis smras pa/ 'phags pa kun dga' bo 'di ci zhig lags/ des smras pa/ 'di dag ni brgya byin dang tshangs pa la sogs pa lha rnams bcom ldan 'das kyi spyan sngar lhags pa yin no/ /'jig rten pha rol mchis pa lta zhig /'di dag mngon sum kho nar mi snang ngam/ 'di la the tsom zar ci yod ces byas pa dang / de dag las gang gi lta ba 'jig rten pha rol med do snyam pa de dang bral zhing 'jig rten pha rol yod do snyam pa yang dag pa'i lta ba skyes so/ /de dag dad pa skyes nas bcom ldan 'das ga la ba der song ste phyin nas bcom ldan 'das kyi zhabs la mgo bos phyag 'tshal te phyogs gcig tu 'dug go/ /bcom ldan 'das kyis de dag gi bsam pa dang / bag la nyal ba dang / khams dang / rang bzhin thugs su chud nas 'phags pa'i bden pa bzhi rtogs par 'gyur ba de lta bu'i chos bstan pa mdzad do/ /de thos nas bran bu dang / skyong ba dag gis 'jig tshogs la lta ba'i ri'i rtse mo nyi shu mtho ba ye shes kyi rdo rjes bcom nas rgyun tu zhugs pa'i 'bras bu mngon sum du byas so/ /de dag bden pa mthong nas bcom ldan 'das kyi zhabs la gtugs te gsol pa/ btsun pa bdag cag legs par gsungs pa'i chos 'dul ba la rab tu 'byung zhing bsnyen par rdzogs pa dge slong gi dngos po thob na/ bdag cag bcom ldan 'das kyi spyan sngar tshangs par spyod pa spyad par 'tshal lo/ /bcom ldan 'das kyis de gnyis la bran bu dang / skyong ba khyed tshur tshangs par spyad pa spyod cig ces dge slong tshur zhes bya bas kun tu bka' stsal to/ /bcom ldan 'das kyis bka' stsal ma thag tu de dag skra bregs pa dang / snam sbyar gyon pa dang / lag na lhung bzed dang / bya ma bum thogs pa dang / skra dang kha spu bregs nas zhag bdun lon pa lta bu dang / dge slong bsnyen par rdzogs nas lo brgya lon pa'i spyod lam lta bur gnas par gyur to/ /de bzhin gshegs pas tshur shog bka' stsal pas/ /mgo bregs lus la snam sbyar bgos gyur cing / /mod la dbang po rab tu zhir gnas te/ /sangs rgyas dgongs pas lus kyi cha lugs bsgyur// //'dul ba phran tshegs kyi gzhi/ No existing page N o existing page bam po bcu drug pa/ bcom ldan 'das kyis de gnyis la gdams ngag gnang ba dang / de gnyis kyis 'bad brtsal bsgrims pas nyon mongs pa thams cad spangs nas dgra bcom pa nyid mngon sum du byas te/ dgra bcom pa khams gsum las 'dod chags dang bral ba sems bong ba dang gser du mnyam pa/ nam mkha' dang lag mthil du mnyam pa/ ste'u dang tsan dan du mtshungs pa/ ma rig pa'i sgo nga'i sbubs dral ba/ rig pa dang / mngon par shes pa dang / so so yang dag par rig pa thob pa/ srid pa dang rnyed pa las chags pa dang / bkur sti la rgyab kyis phyogs pa/ dbang po dang nye dbang du bcas pa'i lha rnams kyis mchod pa dang / rjed pa dang / gus par smra bar bya bar gyur to/ /gang gi tshe bcom ldan 'das kyis bran bu dang / skyong ba dag rab tu phyung ba de'i tshe rgyal po gsal rgyal bcom ldan 'das kyis bran bu dang / skyong ba dag rab tu byung ba gang yin pa ni ma legs pa zhig mdzad de de dag ni sdig pa'i lta ba kun tu spyod pa'o zhes ma dad par gyur to/ /bcom ldan 'das kyis dgongs pa nyan thos chen po ri rab dang 'dra ba dag la rgyal po gsal rgyal ma dad par gyur gyis/ de'i phyir de dag gi yon tan brjod par bya'o snyam du dgongs so/ /bcom ldan 'das de snyam du dgongs pa dang / de nas khyim bdag mgon med zas sbyin bcom ldan 'das ga la ba der song ste phyin nas bcom ldan 'das kyi zhabs la mgo bos phyag 'tshal te phyogs gcig tu 'dug go/ /phyogs gcig tu 'dug pa dang / bcom ldan 'das kyis khyim bdag mgon med zas sbyin la chos dang ldan pa'i gtam gyis yang dag pa ston par mdzad/ yang dag par len du 'jug par mdzad/ yang dag par gzeng bstod par mdzad/ yang dag par rab tu dga' bar mdzad de/ rnam grangs du mar chos dang ldan pa'i gtam gyis yang dag par bstan/ yang dag par len du bcug / yang dag par gzeng bstod/ yang dag par rab tu dga' bar mdzad nas cang mi gsung bar bzhugs so/ /de nas khyim bdag mgon med zas sbyin stan las langs te bla gos phrag pa gcig tu gzar nas bcom ldan 'das ga la ba de logs su thal mo sbyar ba btud de bcom ldan 'das la 'di skad ces gsol to/ /bcom ldan 'das dge slong gi dge 'dun dang thabs gcig sang bdag gi sdum par gdugs tshod gsol bar ci gnang / bcom ldan 'das kyis khyim bdag mgon med zas sbyin la cang mi gsung bas gnang ngo / /de nas khyim bdag mgon med zas sbyin bcom ldan 'das cang mi gsung bas gnang bar rig nas/ bcom ldan 'das kyis bshad pa la mngon par dga' ste rjes su yi rang nas/ bcom ldan 'das kyi zhabs la mgo bos phyag 'tshal te bcom ldan 'das kyi spyan snga nas song ngo / /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo bran bu dang / skyong ba dag gi drung du song la song nas 'di skad ces/ sang khyim bdag mgon med zas sbyin gyis gdugs tshod sbyar ba'i tshe khyed gnyis kyis chu rims shig ces gyis shig /btsun pa de ltar 'tshal lo zhes tshe dang ldan pa kun dga' bo bcom ldan 'das kyi ltar mnyan nas/ tshe dang ldan pa bran bu dang / skyong ba ga la ba der song ste phyin nas tshe dang ldan pa bran bu dang / skyong ba la 'di skad ces smras so/ /tshe dang ldan pa dag bcom ldan 'das kyi zhal nas sang khyim bdag mgon med zas sbyin gyi gdugs tshod sbyar ba'i tshe khyed gnyis kyis chu rims shig ces de skad bka' stsal to/ /de dag gis smras pa/ btsun pa kun dga' bo bcom ldan 'das kyis ji skad bka' stsal pa de bzhin 'tshal lo zhes smras nas bsams pa/ ci'i phyir bcom ldan 'das kyis dge slong gnas brtan gnas brtan dag bzhag ste/ bdag cag la sang khyed gnyis kyis chu rims shig ces bka' stsal/ gdon ma zos par bdag cag kho na'i yon tan brjod par mdzad par bzhed de legs kyis ston pa'i dgongs pa rdzogs par bya'o snyam mo/ /de nas khyim bdag mgon med zas sbyin de nyid kyi mtshan mo bza' ba dang bca' ba gtsang zhing bsod pa yang dag par bsgrubs nas nang par sngar langs te gdan bshams/ chu ra bzhag nas bcom ldan 'das la pho nya las btsun pa gdugs tshod dus su bshams lags te/ bcom ldan 'das da de'i dus la bab par mkhyen par mdzad du gsol zhes dus bdas par gsol to/ /de nas bcom ldan 'das snga dro chos gos mnabs lhung bzed bsnams te/ dge slong gi tshogs kyis bskor nas dge slong gi dge 'dun gyis mdun du bdar te khyim bdag mgon med zas sbyin gyi bkad sa ga la ba der gshegs so/ /gshegs nas dge slong gi dge 'dun gyi gung la gdan bshams pa nyid la bzhugs so/ /de nas khyim bdag mgon med zas sbyin gyis rgyal po gsal rgyal gyi thog tu pho nya btang ste/ lha bdag gis sangs rgyas la sogs pa dge slong gi dge 'dun sdum par gdugs tshod la spyan drangs na/ de'i slad du gshegs shing rjes su yi rang ba mdzad pa'i rigs so zhes byas pa dang / de btsun mo'i 'khor dang / gzhon nu dang / blon pos bskor nas khyim bdag mgon med zas sbyin gyi khyim du gdugs tshod sbyar ba la rjes su yi rang bar bya ba'i phyir 'ongs te rgan rims bzhin du phyag byas nas 'dug go/ /de nas tshe dang ldan pa bran bus rgan pa'i mtha' logs su 'dug nas ji ltar gzhon pa'i mthar phyin nas 'bo ba de ltar chu'i rgyun byin gyis brlabs so/ /tshe dang ldan pa skyong bas kyang ji ltar rgan pa'i mthar phyin nas 'bo ba de ltar chu'i rgyun byin gyis brlabs pa dang / rgyal po gsal rgyal gyis bsams pa/ ston pa'i spyan sngar rdzu 'phrul rnam par 'phrul ba byed pa'i dge slong gang zhig yin snyam nas chu'i rgyun gyi rjes bzhin gzhon pa'i mthar song ba dang / ji tsam na tshe dang ldan pa skyong ba mthong ngo / /de nas yang phyir chu'i rgyun gyi rjes bzhin rgan pa'i mthar song ba dang / ji tsam na tshe dang ldan pa bran bu mthong nas de shin tu ya mtshan skyes nas ro stod bstod/ lag pa g.yas pa brkyang ste/ kye ma'o sangs rgyas/ kye ma'o chos/ kye ma'o dge 'dun/ kye ma'o chos legs par gsungs pa nyid/ da ltar 'di na bran bu dang / skyong ba la sogs pa sdig pa'i lta ba can dag kyang yon tan 'di lta bu dag thob par gyur to zhes ched du brjod par byed do/ /de nas khyim bdag mgon med zas sbyin sangs rgyas la sogs pa dge slong gi dge 'dun bde bar bzhugs par rig nas rang gi lag dar te bza' ba dang bca' ba gtsang zhing bsod pas kun tu tshim par byed/ kun tu stobs par byed do/ / rnam grangs du mar rang gi lag dar te bza' ba dang bca' ba gtsang zhing bsod pas kun tu tshim par byas/ kun tu bstabs nas bcom ldan 'das gdugs tshod gsol te/ phyag bcabs lhung bzed gyur bar rig nas stan ches dma' ba zhig blangs te chos mnyan pa'i phyir bcom ldan 'das kyi spyan sngar 'dug go/ /de nas bcom ldan 'das kyis rgyal po gsal rgyal dang / khyim bdag mgon med zas sbyin la chos dang 'thun pa'i gtam gyis yang dag par bstan/ yang dag par len tu bcug /yang dag par gzeng bstod/ yang dag par dga' bar mdzad nas gdan las bzhengs te gshegs so/ /dge slong rnams the tshom skyes te the tshom thams cad gcod pa sangs rgyas bcom ldan 'das la zhus pa/ btsun pa bran bu dang / skyong ba dag gis las ci zhig bgyis na des na yul mtha' 'khob tu skyes shing gcig ni rtag par lta/ gcig ni chad par lta bar gyur/ las ci zhig bgyis na des na bcom ldan 'das kyi bstan pa la rab tu byung nas nyon mongs pa thams cad spangs te dgra bcom pa nyid mngon sum du bgyis lags/ bcom ldan 'das kyis bka' stsal pa/ dge slong dag bran bu dang / skyong ba dag gis sngon gyi tshe rabs gzhan dag tu las byas shing bsags pa/ tshogs rnyed pa zhes bya ba nas/ lus can rnams la 'bras bur smin zhes bya ba'i bar snga ma bzhin no/ /dge slong dag sngon byung ba bskal pa bzang po 'di nyid la skye dgu'i tshe lo nyi khri thub pa na ston pa 'od srung zhes bya ba nas/ drang srong smra ba ri dgas kyi nags na zhes bya ba'i bar snga ma bzhin no/ /de'i bstan pa la 'di gnyis rab tu byung bar gyur te de na 'di gnyis mtha' 'khob tu dong nas gdams ngag med par yid la bya ba bskyed do/ /de na 'di gnyis kyis ma rtogs par rtogs so snyam pa'i 'du shes thob bo/ /de nas 'di gnyis 'chi ba'i dus kyi tshe 'jig rten las 'das pa la log par lta ba thob bo/ /de gnyis log par lta bas nyams nas smras pa/ yang dag par rdzogs pa'i sangs rgyas 'od srung gis bslus te/ re shig bdag cag la yang nyon mongs pa spangs pa'i dgra bcom pa nyid med na gzhan la lta yod par 'gyur re skan zhes smras so/ /dge slong dag ji snyam du sems/ yang dag par rdzogs pa'i sangs rgyas 'od srung gi gsung rab la rab tu byung nas mtha' 'khob tu gdams ngag med par yid la byed pa bskyed pa gang yin pa de dag ni bran bu dang / skyong ba 'di dag nyid yin no/ /de na 'di dag gis mtha' 'khob tu song ste gdams ngag med par yid la byed pa bskyed nas lta ba log pa thob pa gang yin pa'i las de'i rnam par smin pas ngan song rnams kyi nang du skyes nas lo mang por mtha' 'khob rnams su skyes shing log par lta ba can du gyur te/ da lta'i bar du yang mtha' 'khob tu skyes nas log par lta ba can du gyur pa yin no/ /gang yang 'di dag gis de na blags pa dang / kha ton byas pa dang / phung po la mkhas pa dang / khams la mkhas pa dang / skye mched la mkhas pa dang / rten cing 'brel bar 'byung ba la mkhas pa dang / gnas dang gnas ma yin pa la mkhas par byas pa des na nga'i bstan pa la rab tu byung nas nyon mongs pa thams cad spangs te dgra bcom pa nyid mngon sum du byas so/ /dge slong dag gdams ngag med par bsam gtan byed pa la nyes dmigs/ 'di dag dang gzhan yang yod de/ de lta bas na dge slong gis gdams ngag med par bsam gtan mi bya'o/ /dge slong gdams ngag med par bsam gtan byed na 'gal tshabs can du 'gyur ro/ /dge slong dag de lta bas na las gcig tu gnag pa rnams kyi rnam par smin pa yang gcig tu gnag / las gcig tu dkar ba rnams kyi yang gcig tu dkar/ 'dren ma rnams kyi yang 'dren ma yin no/ /dge slong dag de lta bas na las gcig tu gnag pa dang 'dren ma rnams spangs nas/ las gcig tu dkar ba dag la brtsal bar bya ste/ dge slong dag gis de ltar bslab par bya'o/ /gleng gzhi ni mnyan yod na'o/ /mnyan yod na khyim bdag cig 'dug pa des dgon par spyil bu byed du bcug ste/ de na dge slong gcig 'dug pa de so ka tsha bas rmya nas skya bo bseng bseng por gyur cing lus sha bri ngan pa/ nyam chung ba/ shig shig por gyur nas de khyim bdag shes par gyis shig /gzhan zhig tu 'gro'o zhes byas pa dang / des smras pa/ 'phags pa cung zad cig brel bar ma gyur grang / des smras pa/ khyim bdag brel ba ni cung zad kyang med mod kyi 'on kyang so ka'i dus la bab pas spyil bu de na tsha ste skyo'o/ /des smras pa/ 'phags pa bzhugs shig dang / sa'i khang pa bgyid du stsal lo/ /khyim bdag bcom ldan 'das kyis ma gnang ngo / /'phags pa bcom ldan 'das ni thugs rje can yin pas gnang bar 'gyur ro/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis sa'i khang pa byed du gzhug go/ /bcom ldan 'das kyis sa'i khang pa byed du gzhug go/ /zhes bka' stsal pa dang / khyim bdag des sa'i khang pa byas so/ /de dbyar gyi dus su rlan par gyur pa dang / dge slong de khyim bdag gi drung du song nas smras pa/ khyim bdag shes par gyis shig /gzhan zhig tu 'gro'o/ /des smras pa/ 'phags pa cung zad brel bar ma gyur grang / des smras pa/ khyim bdag brel ba ni cung zad kyang med mod kyi 'on kyang sa'i khang pa tshan can 'dir 'dug mi phod do/ /des smras pa/ 'phags pa gal te de lta na yang thog bgyid du stsal gyis bzhugs shig /des smras pa/ bcom ldan 'das kyis ma gnang ngo / /bcom ldan 'das ni thugs rje can yin pas gnang bar 'gyur ro/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis yang thog byed du gzhug go/ /bcom ldan 'das kyis yang thog byed du gzhug go zhes bka' stsal pa dang / khyim bdag des yang thog byas so/ /de rdib par gyur nas/ bcom ldan 'das kyis bka' stsal pa/ lan kan gdags par bya'o/ /de 'gul nas bcom ldan 'das kyis bka' stsal pa/ rten ma gzhug cing lcags gzer dag gis gdab par bya'o/ / sdom ni/ lan tshwa dang ni sbu bu rwa/ /kha sbyar sman gyi phor bu dang / /par tang dang ni gding ba dang / / rkang pa'i rten dang rdo ba'o/ /sangs rgyas bcom ldan 'das rgyal po'i khab na 'od ma'i tshal bya ka lan da ka gnas pa na bzhugs so/ /tshe dang ldan pa pi lin da bad sa'i bu gang nas bzung ste rab tu byung ba de tshun chad rtag tu na 'o/ /de'i drung du tshangs pa mtshungs par spyod pa rnams song ste dris pa/ gnas brtan bde 'am/ des smras pa/ tshe dang ldan pa dag bdag na ste mi bde'o/ /gnas brtan khyod kyis sngon ci dag bsrel/ bzhin bzangs lan tshwa'o/ /gnas brtan gal te de lta na da ci ste mi srel/ bzhin bzangs bcom ldan 'das kyis ma gnang ngo / /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis lan tshwa bsrel bar bya'o/ /bcom ldan 'das kyis lan tshwa bsrel bar bya'o zhes bka' stsal pa dang / dge slong dag gis bab bab tu bzhag ste chud zos pa dang / bcom ldan 'das kyis bka' stsal pa/ bab bab tu gzhag par mi bya'i 'on kyang sbu bur gzhag par bya'o/ /de dag gis smyug ma'i sbu bur bzhag pa dang de zhu nas/ bcom ldan 'das kyis bka' stsal pa/ rwa'i sbu bur gzhag par bya'o/ /dge slong dag gis rwa tsam pa'i nang du bcug ste/ de'i dri mi zhim par gyur nas/ bcom ldan 'das kyis bka' stsal pa/ rwa tsam pa'i nang du gzhug par mi bya'i 'on kyang ba lang gi gci ba dang / tshos la bkrus te gzhug par bya'o/ /gleng gzhi ni rgyal po'i khab na'o/ /bcom ldan 'das kyis lan tshwa rwa'i nang du gzhug par bya'o zhes bka' stsal pa dang / tshe dang ldan pa pi lin da'i bus lan tshwa rwa'i nang du bcug nas bzhag ste kha gab ma bkab pas rdul zhugs so/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ kha gab dgab par bya'o/ /bcom ldan 'das kyis kha gab gdab par bya'o zhes bka' stsal pa dang / dge slong dag gis ji lta bus dgab pa mi shes nas/ bcom ldan 'das kyis bka' stsal pa/ rwa de kho na lta bu gnyis pa zhig byas la rwa kha sbyar du gzhag par bya'o/ /sangs rgyas bcom ldan 'das rgyal po'i khab na 'od ma'i tshal bya ka lan da ka gnas pa na bzhugs so/ /tshe dang ldan pa pi lin da'i bu gang nas bzung ste rab tu byung ba tshun chad de rtag tu na'o/ /de'i drung du tshangs pa mtshungs par spyod pa rnams song ste dris pa gnas brtan bde 'am/ des smras pa/ tshe dang ldan pa dag bdag na ste mi bde'o/ /de dag gis smras pa/ gnas brtan khyod kyis sngon ci zhig bcangs/ bzhin bzangs sman gyi phor bu'o/ /gnas brtan gal te de lta na da ci ste mi bcang / bzhin bzangs bcom ldan 'das kyis ma gnang ngo / /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis sman phor bcang bar bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe mnyan yod na khyim bdag cig yod pa des rigs mnyam pa las chung ma blangs nas/ de de dang rtse bar byed/ dga' bar byed/ dga' mgur spyod par byed do/ /de rtse bar byed/ dga' bar byed/ dga' mgur spyod par byed pa las bu zhig btsas te/ de bskyed bsring nas chen por gyur to/ /de dus gzhan zhig na legs par gsungs pa'i chos 'dul ba la rab tu byung ba dang / des khri 'ba' shig thob kyi mal stan ni med do/ /ji tsam dus gzhan zhig na khyim bdag de rgyal byed kyi tshal du song ba dang / bu de khri stong pa la nyal te mal stan med par mthong nas des smras pa/ bu dge slong 'di rnams la mal stan yod na khyod la ci ste med/ des smras pa/ pha dge slong 'di dag ni rab tu byung nas yun ring du lon pas 'di dag gis mal stan thob kyi bdag ni da gzod rab tu byung bas na bdag gis ma thob bo/ /des smras pa/ bu gal te de lta na/ ngas khyod la par tang zhig bskur gyis de 'dir thing shig /des smras pa/ bcom ldan 'das kyis ma gnang ngo / /bu bcom ldan 'das ni thugs rje can yin pas gnang bar 'gyur ro/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis dge slong gis par tang gding bar bya'o/ /bcom ldan 'das kyis dge slong gis par tang gding bar bya'o zhes bka' stsal pa dang / des par tang de gding ba med par spyad pas dri ma can du gyur to/ /re shig cig na khyim bdag de yang gtsug lag khang du 'ongs pa dang par tang dri ma can de mthong nas des ngo ma shes te smras pa/ bu khyod bshes gnyen can bsod nams chen por gyur tam/ pha ci mngon par tang gzhan 'di rnyed mod/ pha gzhan rnyed re skan/ bu ci'i phyir 'di 'di ltar dri ma can du gyur/ pha bdag gis gding ba med par spyad pas so/ /bu khyod kyis chen po la 'os pa'i gos 'di lta bu yang ma rung bar byas sam/ kye ma khyod kyis gding ba bting nas spyad kyang bla na/ skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ gang zag gi khra bo la yang gding ba med par spyad par mi bya ste/ spyod na 'gal tshabs can du 'gyur ro/ /sangs rgyas bcom ldan 'das rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bcom ldan 'das kyis chos mnyan pa sbyin par bya'o zhes bka' stsal pa dang / chos smra ba seng ge'i khri la 'dug pa'i rkang pa 'phyangs nas/ bcom ldan 'das kyis bka' stsal pa/ rkang rten bca' bar bya'o/ /bcom ldan 'das kyis rkang rten bca' bar bya'o zhes bka' stsal pa dang / dge slong dag gis ji lta bu bca' ba mi shes nas/ bcom ldan 'das kyis bka' stsal pa/ seng ge'i khri brtan po gang yin pa la ni so phag gi them skas bya'o/ /'on te yang dang yang du rkyong na ni shing gi khri'u gzugs so/ /bskyod dka' bar gyur nas/ bcom ldan 'das kyis bka' stsal pa/ rtsa ba bzhi la lcags kyi yang mig gdags par bya zhing de dag nas bzung ste/ ci dgar bskyod par bya'o/ /bsod nams 'dod pa'i dge slong dag dang / bram ze dang khyim bdag dad pa can rnams kyis rkang rten la dri'i lag ris dang / dri dag gis byugs pa dang chos smra ba 'gyod de de la rkang pa 'jog par mi byed nas/ bcom ldan 'das kyis bka' stsal pa/ de'i steng du lo ma'i khres sam/ rtsa bam gzhag par bya zhing bzhag nas rkang pa gzhag par bya ste/ 'di la 'gyod par mi bya'o/ /sangs rgyas bcom ldan 'das rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bcom ldan 'das kyis seng ge'i khri la rkang rten gzugs par bya'o zhes bka' stsal pa dang / dge slong dgon pa pa rnams la rkang rten mi bdog nas de dag rkang pa 'phyang bzhin chos ston par byed pas ngal bar gyur to/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de dag gis rdo gzhag par bya'o/ sdom ni/ phyi ba seng ras mchil ma'i snod/ /lus phyi ba dang gzhong rings dang / /gcal dang me shel dag dang ni/ /gtso blag mkhan dang shing leb bo/ /bcom ldan 'das rgyal po'i khab na 'od ma'i tshal bya ka lan da ka gnas pa na bzhugs so/ /tshe dang ldan pa pi lin da'i bu gang nas bzung ste rab tu byung ba tshun chad de rtag tu na'o/ /de'i drung du tshangs pa mtshungs par spyod pa rnams song ste dris pa/ gnas brtan bde 'am/ des smras pa/ tshe dang ldan pa dag bdag na ste mi bde'o/ /gnas brtan khyod kyis sngon ci zhig bcangs/ bzhin bzangs gdong phyi ba'o/ /gnas brtan gal te de na da ci ste mi bcang / bcom ldan 'das kyis ma gnang ngo / /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis gdong phyis bcang bar bya'o/ /sangs rgyas bcom ldan 'das rgyal po'i khab na 'od ma'i tshal bya ka lan da ka gnas pa na bzhugs so/ /so ga'i dus la bab pa dang / tshe dang ldan pa pi lin da'i bu tsha bas rmya ste/ skya bo bseng bseng por gyur cing lus sha bri ngan pa/ nyam chung ba shig shig por gyur to/ /de'i drung du tshangs pa mtshungs par spyod pa rnams song ba dang / de dag gis 'di'i lus kyi gnas skabs mthong nas smras pa/ gnas brtan ci ste skya bo bseng bseng po lus sha bri ngan pa nyam chung ba shig shig por gyur/ des smras pa/ bzhin bzangs tsha bas bdag gi lus kyi gnas 'di lta bur gyur to/ / gnas brtan khyod kyis sngon so ga'i dus su ci zhig bcangs/ bzhin bzangs seng ras so/ /gnas brtan gal te de lta na da ci ste mi bcang / bzhin bzangs bcom ldan 'das kyis ma gnang ngo / /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis dge slong gis seng ras bcang bar bya'o/ /sangs rgyas bcom ldan 'das rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong zhig cham lud bdo ste na ba des sa la mchil ma bor bas mal gyi g.yas g.yon gnyis mi mdzes par byas so/ /ji tsam na de'i lhan cig gnas pa nang par sngar langs te gnas khang du zhugs nas phyag byas te nad dris nas byung ngo / /de phyag 'tshal ba na dpral ba la mchil ma'i thal ba reg pa de dge slong rnams kyis mthong nas de dag gis smras pa/ tshe dang ldan pa gang du khyod kyis dpral ba la mchil ma 'di reg / des smras pa/ mkhan po cham lud na ba des sa la mchil ma bor bar ma gyur grang / re shig blta'o zhes de gnas khang du zhugs pa dang / ji tsam na mal gyi glo g.yas g.yon du mchil ma bor ba mthong ngo / /des dge slong dag la bsnyad pa dang / de dag 'phya bar byed/ smod par byed/ kha zer bar byed de da ji lta bu zhig tu gyur/ dge slong dag mchil mas dge 'dun gyi gnang khang ma rung bar byed do zhes zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong gi gnas mal bcas par mchil ma dor bar yang mi bya/ mun par phyag byed pas mgos drung du gtug par yang mi bya'i/ tshig tsam gyis phyag bya zhing gang cung zad bya ba yod na yang der tshig tsam gyis dri bar bya'o/ /gzhan yang gang la cham pa dang kha chu bdo ba des mchil ma'i snod nye bar gzhag par bya'o/ /dge slong dag gis kham phor du mchil ma bor ba dang de 'dril te ches mang du ma rung bar gyur nas/ bcom ldan 'das kyis bka' stsal pa/ mchil ma snod rten ma dang bcas pa 'am/ yang na zangs po che gzhag par bya'o/ /dge slong dag zangs po che ci 'dra ba yang rung nye bar 'jog par byed pas de yang 'dril te nyes dmigs de nyid du gyur nas bcom ldan 'das kyis bka' stsal pa/ glang po che'i rkang pa lta bu nye bar gzhag par bya'o/ /gzhan dag cig mchil ma 'dor ba na zer ma yar nas/ bcom ldan 'das kyis bka' stsal pa/ gcal dgram par bya'o/ / dge slong rnams kyis gcal ci zhig gis dgram pa mi shes nas bcom ldan 'das kyis bka' stsal pa/ so phag gi bur ma 'am bye ma'o/ /der sbrang ma dag 'du nas bcom ldan 'das kyis bka' stsal pa/ bskrad par bya'o/ / dri mi zhim par gyur nas/ bcom ldan 'das kyis bka' stsal pa/ dus dus su bshal bar bya'o/ /dge slong dag gis bshal nas ma bskams pa dang srog chags dag byung nas bcom ldan 'das kyis bka' stsal pa/ bshal nas bskam par bya'o/ /dge slong gzhan dag cig lud pa bdo nas de dag ji srid du bskems pa de'i bar du nyam nga bar gyur nas/ bcom ldan 'das kyis bka' stsal pa/ nad pa tshabs po che gang dag yin pa de dag gis ni mchil ma'i snod gnyis nye bar gzhag par bya'o/ /dge slong khang bzangs dag tu klog pa dang / kha ton byed pa dang / chags pa de dag mchil ma bro ba dang / de dag sems yengs shing bab bab du mchil ma 'dor bar byed nas/ bcom ldan 'das kyis bka' stsal pa/ brjed phyal bar gnas mal bcas par mchil ma dor bar mi bya'i 'on kyang tsug lag khang gi grwa bzhir ka ba'i drung du dge 'dun gyi mchil ma'i snod bzhi gzhag par bya zhing de dag du klog pa dang / kha ton byed pa 'am/ 'chags pas dran pa nye bar bzhag ste mchil ma dor bar bya'o/ /sangs rgyas bcom ldan 'das rgyal bu rgyal byed kyi tshal mgon med zas sbyin kyi kun dga' ra ba na bzhugs so/ /de'i tshe tshe dang ldan pa gang gi ka spun po tshe rabs lnga brgyar sems can dmyal ba dag gi nang nas shi 'phos nas sems can dmyal ba dag gi nang du skyes shing de nas phyir 'dir skyes pa de byis pa'i gnas skabs nas khyim pa/ khyim la lhag par chags pa/ rtse ba'i dga' bas dga' ba dang / cha ba la brtson pas dmyal ba la dmigs pa'i dran pa ma skyes so/ /de dus gzhan zhig na legs par gsungs pa'i chos 'dul ba la rab tu byung nas bcom ldan 'das kyis mdo sde dang / 'dul ba dang / chos mngon pa'i phyogs de dang de dag tu dmyal ba dang / yi dags dang / dud 'gro dang / lha dang mi dag bshad pa dang / des dmyal ba'i gtam thos nas sems can dmyal ba'i tshor ba mngon du gyur te ba spu'i khung bu thams cad nas khrag byung ste/ chos gos dag kyang khra bor gyur/ dri yang mi zhim par gyur to/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis dge slong rnams kyis lus phyi ba bcang bar bya'o/ /bcom ldan 'das kyis lus phyi ba bcang bar bya'o zhes bka' stsal pa dang / de dag gis chos gos kyi phyi rol du bgos pas nyes dmigs de nyid du gyur nas/ bcom ldan 'das kyis bka' stsal pa/ nang du bgo bar bya'o/ /de dag gis de kho nas lus drud pas ril rma byung nas/ bcom ldan 'das kyis bka' stsal pa/ de kho nas drud par mi bya'i 'on kyang ska ba'i chus sbangs nas dal bus bags kyis bkru bar bya'o/ /lus phyi ba'i gos kyis rnag dang khrag kyang dus dus su bkru bar bya zhing de yang tshon gyis kha bsgyur bar bya'o/ /sangs rgyas bcom ldan 'das rgyal po'i khab na 'od ma'i tshal bya ka lan da ka gnas pa na bzhugs so/ /tshe dang ldan pa pi lin da'i bu gang nas bzung ste rab tu byung tshun chad de rtag tu na'o/ /de'i drung du tshangs pa mtshungs par spyod pa rnams song ste dris pa/ gnas brtan bde 'am/ bzhin bzangs bdag na ste mi bde'o/ /de dag gis smras pa/ gnas brtan khyod kyis sngon ci zhig bcangs/ bzhin bzangs lcags kyi gzhong rings so/ /gnas brtan gal te de lta na da ci ste mi bcang / bzhin bzangs bcom ldan 'das kyis ma gnang ngo / /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis dge slong gis lcags kyi gzhong rings bcang bar bya'o/ /sangs rgyas bcom ldan 'das rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong dag mchod rten la phyag 'tshal ba na de dag gi rkang pa la 'dam rdzab gos nas/ bcom ldan 'das kyis bka' stsal pa/ gcal dgram par bya'o/ /de dag gcal ci las 'gram pa mi shes nas/ bcom ldan 'das kyis bka' stsal pa/ so phag gi gcal dgram par bya zhing de nas so phag gi phye mas btab ste rdo thal gyis byug par bya'o/ /mchod rten gyi 'khor sa chen por gyur te ma 'byor nas/ bcom ldan 'das kyis bka' stsal pa/ nyen kor mdom gang dgram par bya'o/ /'on kyang ma 'byor nas/ bcom ldan 'das kyis bka' stsal pa/ gal te mi 'byor na spang leb dgram par bya'o/ / de yang ma 'byor nas/ bcom ldan 'das kyis bka' stsal pa/ bar bar du so phag gzhag par bya'o/ /dge slong sgo gang la rten pa rnams kyi khyams su 'dam rdzab chags nas/ bcom ldan 'das kyis bka' stsal pa/ der yang rim pa de bzhin du bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na khyim bdag cig 'dug pa des dgon par spyil bu byed du bcug ste/ de na dge slong gcig gnas so/ /dgun stod kyi dus la bab pa dang / de lhags pas nyen nas skya bo bseng bseng por gyur cing lus sha bri ngan pa rid pa rmya bar gyur nas de khyim bdag de'i drung du song ste/ khyim bdag shes par gyis shig / gzhan zhig tu 'gro'o zhes byas pa dang / des smras pa/ 'phags pa cung zad brel bar ma gyur grang / des smras pa/ brel ba ni cung zad kyang med mod kyi 'on kyang lhags pas skyo'o/ /des smras pa/ 'phags pa bzhugs shig dang / khyed la nor bu me shel sbyin to/ /des smras pa/ khyim bdag bcom ldan 'das kyis ma gnang ngo / /'phags pa bcom ldan 'das ni thugs rje can yin pas gnang bar 'gyur ro/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis dge slong nor bu me shel nye bar gzhag par bya zhing des me phyung la me'i bya ba bya'o/ /khyim bdag des dge slong de la nor bu me shel byin nas/ de des me 'byin cing me'i bya ba byed do/ /ji tsam na rkun po lnga brgya ri brags shig tu las byed par 'dong ba phyogs der phyin pa dang / de dag gis dge slong de la smras pa/ 'phags pa lhags pas sbrebs na 'di na me yod dam/ des smras pa/ bzhin bzangs med do/ /'phags pa khyod me'i bya ba ji ltar byed/ bzhin bzangs bdag ni nor bu me shel gyis me phyung nas me'i bya ba byed do/ /'phags pa nor bu de dag ga re/ bzhin bzangs phyogs 'di na'o/ /de dag gis de mthong nas ri brags su song ste/ der las byas nas byung ste smras pa/ shes ldan dag tshur 'phags pa de'i nor bu phrog gis 'dong / de dag de'i drung du dong nas/ smras pa/ nor bu me shel de ga re bzhin bzangs phyogs 'di nyid na 'dug go/ /de dag gis de khyer te song ngo / /yang dge slong de lhags pas nyen nas khyim bdag de'i drung du song ste smras pa/ khyim bdag shes par gyis shig gzhan zhig tu 'gro'o/ /des smras pa/ 'phags pa chung zad brel bar ma gyur grang / des smras pa/ khyim bdag brel ba ni chung zad kyang med kyi 'on kyang lhags pas skyo'o/ /des smras pa/ 'phags pa bdag gis khyod la nor bu me shel ma byin tam/ khyim bdag byin no/ /de ga re rkun po dag gis phrogs so/ /chen po la 'os pa'i nor bu de lta bu yang khyod kyis rkun po la bkur ba lta/ kye ma khyod kyis phyogs dben pa zhig tu bzhag mod/ skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ rin po che de lta bu dag ma byin pa len pa rnams la bstan par mi bya'i/ 'on kyang me phyung la gtad par bya'o/ /me shel ji lta bar chu shel yang de dang 'dra'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /drug sde rnams btso blag mkhan la chos gos dag 'khrur 'jug go/ /ji tsam dus gzhan zhig na mnyan yod du dus ston byung ste/ mnyan yod kyi bram ze dang / khyim bdag rnams kyi gos tshon sna tshogs can dag btso blag mkhan la 'khrur bcug go/ /nye dga' yang nyi ma nub kar chos gos ngur smrig gcig khyer te btso blag mkhan gyi drung du song nas/ bzhin bzangs chos gos 'di khrus shig ces byas so/ /des smras pa/ 'phags pa deng 'jig rten pa'i gos mang zhig 'tshal te mchis kyis bzhud cig sang bkru bar bgyi'o/ /de khros nas bsdigs par brtsams pa dang / des smras pa/ 'phags pa bsdigs su ci mchis/ gal te mi bzod na zhog la bzhud cig sang bkru mod des bzhag ste song ba dang / de'i tug rid kyis btso blag mkhan sems g.yengs par gyur nas des chos gos de bul tog gi nang du sbangs nas gos tshon sna tshogs can rnams kyi nang du bzhag pa dang / der zhag lon nas gos tshon sna tshogs can rnams kyis thams cad khra bor byas so/ /btso blag mkhan lag pa 'gram pa la gtad de sems khongs su chud cing 'dug pa dang / skye bo'i tshogs ma dad par gyur to/ /skabs de dge slong rnams kyis bcom ldan 'das la gsol pa dang / bcom ldan 'das kyis dgongs pa/ bram ze dang khyim bdag dag ma dad par gyur pa thog tu bab par mkhyen nas/ dge slong rnams la bka' stsal pa/ dge slong nye dgas chos gos ngur smrig btso blag mkhan la 'khrur bcug pa 'jig rten pa'i gos tshon sna tshogs can rnams kyis khra bor byas so/ /de lta bas na dge slong gis gos ngur smrig dag btso blag mkhan la 'khrur mi gzhug go/ /dge slong gos ngur smrig dag btso blag mkhan la 'khrur 'jug na 'gal tshabs can du 'gyur ro/ / bcom ldan 'das kyis dge slong gos ngur smrig dag btso blag mkhan la 'khrur mi gzhug go/ /zhes bka' stsal pa dang / drug sde rnams kyis gos dkar po dag 'khrur gzhug par brtsams so/ /btso blag mkhan gyis de dag bag med par shing leb la brdabs nas bkrus pa dang / de na gos kha cig ni ral/ kha cig ni mtha' zegs so/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag de lta bas na dge slong gis thams cad du btso blag mkhan la gos 'khrur mi gzhug go/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bcom ldan 'das kyis dge slong gis thams cad kyis thams cad du btso blag mkhan la gos 'khrur mi gzhug go zhes bka' stsal pa dang / drug sde rnams btso blag mkhan gyi 'khru sar dong nas/ mgo chos gos kyis dkris te/ btso blag mkhan bzhin du sngam pa su su zhing bdag nyid gos dag 'khru bar byed pa bram ze dang khyim bdag dag gis mthong nas ma dad par gyur to/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na dge slong gis btso blag mkhan gyi 'khru sar song ste/ btso blag mkhan bzhin du sngam pa su su zhing bdag nyid kyis gos dag bkru bar mi bya'o/ /dge slong btso blag mkhan gyi 'khru sar song ste/ btso blag mkhan bzhin du sngam pa su su zhing bdag nyid kyis gos dag 'khru bar byed na 'gal tshabs can du 'gyur ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bcom ldan 'das kyis dge slong gis gtso blag mkhan gyi 'khru sar song ste/ btso blag mkhan bzhin du sngam pa su su zhing bdag nyid kyis gos dag bkru bar mi bya'o/ /zhes bka' stsal pa dang / drug sde rnams shing leb la 'khru bar byed de nyes dmigs de nyid du gyur nas/ bcom ldan 'das kyis bka' stsal pa/ shing leb la gos dag bkru bar mi bya'i 'on kyang gzhong khung du chu 'jam tsam gyi nang du dal bus bzlog cing bzlog cing bdag nyid kyis bkru bar bya'o/ /bcom ldan 'das kyis gzhong khung du dal bus bzlog cing bzlog cing bkru bar bya'o zhes bka' stsal pa dang / dge slong gzhan dag gcig gis lag pa gnyis kyis bkru bar ma nus nas/ bcom ldan 'das kyis bka' stsal pa/ gang dag lag pa gnyis kyis 'khru bar mi nus pa de dag gi rkang pa gnyis kyis bkru bar bya'o/ /gzhan dag cig gi lag pa gnyis kyis kyang ma nus la/ rkang pa gnyis kyis kyang ma nus nas/ bcom ldan 'das kyis bka' stsal pa/ de dag gi zhal ta gyis la gzhan dag 'khrur chug shig / sdom ni/ phyi ba dang ni sbrul gyi snyi/ /rdo phru 'gyod pa nyid dang ni/ /tshon gyi gzhong khung rtsig pa dang / /tshon rtsi rnam pa bzhi yin no/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong rnams khrus byas nas lus gsher bzhin du chos gos dag gyon pa dang / de dag khra bo dang dri mi zhim par gyur to/ /skabs de dge slong rnams kyi bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis lus phyi ba bcang bar bya'o/ /bcom ldan 'das kyis lus phyi ba bcang bar bya'o zhes bka' stsal pa dang / dge slong gzhan dag cig la de mi bdog nas/ bcom ldan 'das kyis bka' stsal pa/ gang dag la mi bdog pa de dag gis re shig tsog tsog por 'dug la khrus ras kyis lus phyis te chos gos dag bgo bar bya'o/ /dge slong rnams kyis lham la rdul chags par gyur nas dge slong dag gis de dag brdabs so/ /de dag brdabs pa dang ral cing gzungs gyi bsrad bu dag kyang chad nas/ bcom ldan 'das kyis bka' stsal pa/ lham brdabs par mi bya'o/ /dge slong dag gis chus bkrus pa dang / de dag ma rungs nas/ bcom ldan 'das kyis bka' stsal pa/ chus bkru bar mi bya'i 'on kyang ras chus sbangs la phyi bar bya ste/ de lta bas na gnang gis lham phyi ba bcang bar bya'o/ /sangs rgyas bcom ldan 'das yul tsam pa na drang srong gar ga'i rdzing bu'i 'gram na bzhugs so/ /yul tsam pa na tsam pa'i klu'i bu mo dad pa can dge ba'i bsam pa bzang ba zhig yod pa de'i bu ma dad pa ma dul ba byed pa zhig go/ /des de chos mnyan pa yang dag par len tu bcug ste/ bu song la 'phags pa rnams kyi drung du phyin nas chos nyon cig dang / khyed la bsod nams su 'gyur ro zhes byas pa dang / de des yang dag par len du bcug pas rang bzhin gyi cha lugs kyis chos nyan par zhugs pa rnams kyi nang du song ngo / /de gzhon nu zhig gis mthong nas de sngangs te/ tshe dang ldan pa dag rgyab rings po rgyab rings po zhes smras pa dang thos nas dge slong gang dag 'dod chags dang ma bral ba de dag sngangs nas de dag gis de ske nas rnga ma'i srad bus btags te/ gtsug lag khang gi steng nas 'phangs so/ /de mas mthong ste smras pa/ bu khyod kyis 'phags pa rnams las chos thos sam/ des smras pa/ ma de 'dra ba'i 'phags par ni su yang ma gyur cig / bu de dag gis khyod la ci zhig byas/ des ji ltar gyur pa bsnyad pa dang / des smras pa/ bu de bas dang de dag 'phags pa yin no/ /gzhan dag cig gis khyod mthong du zin na bsad par gyur to zhes pa dang / de cang mi zer bar 'dug go/ /de la ne'u ldangs rnams kyis bzhad gad du mgrin snad mgrin snad ces smras pa dang / de de dag gis ku re smras pas lus skya bo bseng bseng por gyur cing sha bri ngan pa rke ba skem por red par gyur to/ /de la mas smras pa/ bu khyod ci ste lus skya bo bseng bseng por sha bri ngan pa rke ba skem por gyur/ des smras pa/ ma bdag la klu gzhon nu 'di dag mgrin snad mgrin snad ces co 'dri bar byed de ci bya'i gtol med do/ /bu khyod rang gi cha lugs kyis song bas des na gnas skabs 'di lta bur gyur gyi gal te khyod sprul pa'i gzugs kyis song bar gyur na rnga ma'i snyis btags par yang mi 'gyur ro/ /da sprul pa'i gzugs kyis song la chos nyon cig dang khyod la thams cad legs par 'gyur ro/ /'on te rang gi gzugs kyis nyan na khyod gnas na 'dug ste nyon cig ces byas pa dang / de ma dad pa'i phyir khas ma blangs te ma'i ngor cang mi zer bar 'dug go/ /des bsams pa/ 'phags pa dag klu gzhon nu rnga ma'i snyis 'dogs pa ni gang su yang rung / chos nyan par 'dod pa de dag gi yang bar chad du 'gyur bas 'di kho na bdag gis bya ba yin no snyam ste/ de kha dog 'phags pas nam sros pa dang / bcom ldan 'das ga la ba der song ste phyin nas bcom ldan 'das gyi zhabs la mgo bos phyag 'tshal te/ phyogs gcig tu 'dug pa dang / de'i tshe tsam pa'i klu'i bu mo'i kha dog gi mthus drang srong gar ga'i rdzing 'gram thams cad snang ba rgya chen pos khyab par gyur to/ /phyogs gcig tu 'dug nas tsam pa'i klu'i bu mos bcom ldan 'das la 'di skad ces gsol to/ /btsun pa bdag gi bu ma dad pa zhig mchis pa de bdag gis chos nyan pa yang dag par len tu stsal nas de chos nyan du mchis pa dang / 'phags pa rnams kyis rnga ma'i snyis ske nas btags te bor bas de'i mgrin pa snad de/ de la ne'u ldang rnams kyis mgrin snad mgrin snad ces gtses lags so/ /de de ltar gtses pa na lus skya bo bseng bseng por gyur cing / sha bri ngan pa rke ba skem par gyur na/ kye ma bcom ldan 'das kyis thugs brtse bar dgongs te/ gang gis na 'phags pa rnams klu gzhon nu rnga ma'i snyis 'dogs par mi 'gyur bar 'phags pa rnams dran par bgyid pa chung zad cig bcar gsol/ bcom ldan 'das kyis tsam pa'i klu'i bu mo la cang mi gsung bas gnang ba dang / de nas tsam pa'i klu'i bu mo bcom ldan 'das kyi zhabs la mgo bos phyag 'tshal nas de nyid du mi snang bar gyur to/ /de nas bcom ldan 'das kyis de nyid kyi mtshan mo 'das nas dge slong gi dge 'dun gyi gung la gdan bshams pa nyid la bzhugs so/ /bzhugs nas bcom ldan 'das kyis dge slong rnams la bka' stsal pa/ dge slong dag mdang tsam pa'i klu'i bu mo nga ga la ba der 'ongs te phyin nas nga'i zhabs la mgo bos phyag 'tshal te phyogs gcig tu 'dug pa dang / de'i tshe tsam pa'i klu'i bu mo'i kha dog gi mthus drang srong gar ga'i rdzing 'gram thams cad snang ba rgya chen pos khyab par gyur to/ /phyogs gcig tu 'dug nas tsam pa'i klu'i bu mos nga la 'di skad ces gsol to/ /btsun pa bdag gi bu ma dad pa zhig mchis pa de bdag gis chos nyan pa yang dag par len tu stsal nas de 'phags pa rnams kyi drung du chos nyan du mchis pa dang / de dag gis de rnga ma'i snyis btags te bor bas de'i mgrin pa snad nas/ de la ne'u ldangs rnams kyis mgrin snad mgrin snad ces co dri ba smras lags so/ /de la/ de skad ces bgyis pa na lus skya bo bseng bseng por gyur cing sha bri ngan pa/ rke ba skem por gyur na kye ma bcom ldan 'das kyis thugs brtse bar dgongs te gang gis na 'phags pa rnams klu gzhon nu rnga ma'i snyis 'dogs par mi 'gyur bar 'phags pa rnams dran par bgyid pa cung zad cig bcar gsol zhes zer ro/ /dge slong d ag de lta bas na gang la da ltar lha rnams kyang kye ma shAkya'i bu'i dge sbyong rnams ni dge ba'i chos rnams las yongs su nyams par gyur to zhes 'phya bar 'gyur ba 'di ni mdzes pa ma yin rung ba ma yin gyis de lta bas na dge slong gis klu gzhon nu rnga ma'i snyis gdags par mi bya'i 'on kyang klu gzhon nu mthong na se gol gyi sgra byung ste/ bzhin bzangs mthong ba'i lam na ma 'dug shig ces brjod par bya'o/ /gal te mthong ba'i lam na mi 'dug na de lta na legs/ ji ste 'dug na dbyug gu skam khas dal gyis blangs te bum pa 'am rdza mar bcug la de la bu ga btod de kha bcad nas dbyung bar bya'o/ /gal te dbyug gu skam kha med na shur bu 'am/ lcags pod dam/ rgya cang gis ske nas btags te dbyung bar bya'o/ /ji ste shur bu 'am/ lcags phod dam/ rgya cang med na gdang thag gi snyi 'am/ gres thag gi snyi la ras mas dkris nas des gdags par bya zhing de nas bum par bcug ste dbyung bar bya'o/ /dge slong dag gis de de bzhin du phyung nas nags kyi nang du bor ba dang / de khros pa'i mes nags bsregs te de yang de nyid du tshig pa dang / bcom ldan 'das kyis bka' stsal pa/ nags kyi nang du dor bar mi bya'o/ /dge slong dag gis snang ba'i gnas su bor ba dang / skad cig kyang ma thogs par srog chags 'ol bas khyer nas/ bcom ldan 'das kyis bka' stsal pa/ de'i mod kho na la ldog par mi bya'i 'on kyang snang ba'i gnas su bzhag nas ji srid gnas su ma zhugs pa de srid du bsdad par bya'o/ /sangs rgyas bcom ldan 'das rgyal po'i khab na 'od ma'i tshal ka lan da ka gnas pa na bzhugs so/ /rgyal po'i khab na khyim bdag cig 'dug pa rdo'i las la mkhas pa zhig ste/ rdo phru dag byas shing byas shing 'tshong ngo / / dus gzhan zhig na de la rnyed pa mang du grub nas des bsams pa/ gang gis na bsod nams su yang 'gyur la rnyed pa yang mang du 'grub par 'gyur ba'i thabs de gang zhig yin snyam pa dang / de dad pa can zhig pas de 'di snyam du sangs rgyas la sogs pa dge slong gi dge 'dun khyim du spyan drangs la/ rdo phru dag nas bshos gsol na bdag gi bsod nams su yang 'gyur la/ rnyed pa yang mang du 'gyur ro snyam du bsams so/ /de bcom ldan 'das ga la ba der song ste zhes bya ba nas/ dge slong gi dge 'dun gyi gung la gdan bshams pa nyid la bzhugs so/ /zhes bya ba'i bar snga ma bzhin no/ /de nas khyim bdag des sangs rgyas la sogs pa dge slong gi dge 'dun bde bar bzhugs par rig nas rang gi lag dar te bza' ba dang bca' ba gtsang zhing bsod pas kun tu tshim par byed/ kun tu stobs par byed do/ /rnam grangs du mar rang gi lag dar te bza' ba dang bca' ba gtsang zhing bsod pas kun tu tshim par byas/ kun tu bstabs nas bcom ldan 'das gdugs tshod gsol te phyag bcabs lhung bzed gyu bar rig nas stan ches dma' ba zhig blangs te chos mnyan pa'i phyir bcom ldan 'das kyi spyan sngar 'dug go/ /de nas bcom ldan 'das kyis sbyin pa de la rjes su yi rang ba 'dis rjes su yi rang ba mdzad do/ /mchod sbyin nang na sbyin sreg mchog / bsdebs sbyar nang na skyong byed mchog /mi yi nang na rgyal po mchog /chu bo'i nang na rgya mtsho mchog /skar ma'i nang na zla ba mchog /gsal ba'i nang na nyi ma mchog /steng dang 'og dang thad kar yang / /skye bo'i 'gro ba ji snyed pa/ /lha dang bcas pa'i 'jig rten na/ /mchod bya dam pa rdzogs sangs rgyas/ /zhes bya ba nas yang dag par rab tu dga' bar mdzad nas gdan las bzhengs te bzhud do zhes bya ba'i bar snga ma bzhin no/ /des yang sangs rgyas la sogs pa dge slong gi dge 'dun khyim du bshos la spyan drangs nas des rgan rims bzhin rdo phru sar pa brims nas spyad spyad pa de dag nyid kyang brim par brtsams pa dang / dge slong rnams 'gyod de len par mi byed nas/ bcom ldan 'das kyis bka' stsal pa/ khyim pas yongs su dag go zhes byas nas blang bar bya ste/ 'di la 'gyod par mi bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bcom ldan 'das kyis tshon gyi las bya'o zhes bka' stsal pa dang / dge slong dag gis tshon gsher bar bskol ba dang / de zho can yin pa'i phyir btsos pa dang mi sdug par gyur cing de dag kyang ma rung nas/ bcom ldan 'das kyis bka' stsal pa/ bskams nas bskol bar bya'o/ /dge slong dag gis nyi ma la bskams te non chung bar gyur nas/ bcom ldan 'das kyis bka' stsal pa/ nyi ma la bskam par mi bya'o/ /dge slong dag grib ma la skems te rlams khyer nas/ bcom ldan 'das kyis bka' stsal pa/ grib ma la bskam par mi bya'i 'on kyang nyi ma phyed yod pa la bskam par bya'o/ /dge slong dag gis tshon dang chos gos dag gcig char chur bcug ste btsos pa dang / de dag ma rung bar gyur nas bcom ldan 'das kyis bka' stsal pa/ tshon logs shig tu bskol bar bya'o/ /dge slong dag lan cig kho na bskol te 'dor bar byed nas/ bcom ldan 'das kyis bka' stsal pa/ lan gsum gyi bar du bskol nas dor bar bya'o/ /dge slong dag gis lan gsum gyi bar du bskol na gcig kho nar bzhag pa dang / bcom ldan 'das kyis bka' stsal pa/ snod so sor gzhag par bya'o/ /dge slong dag gis dang po ni gang yin/ gnyis pa ni gang yin/ gsum pa ni gang yin ma shes nas/ bcom ldan 'das kyis bka' stsal pa/ 'di ni dang po'o/ /'di ni gnyis pa'o/ /'di ni gsum pa'o zhes yi ge bri bar bya'o/ /dge slong dag gis tshon nyid du chos gos dag bcug pa dang / bcom ldan 'das kyis bka' stsal pa/ tshon nyid du chos gos dag gzhug par mi bya'i 'on kyang gzhong khung du tshon blugs la bsug par bya'o/ /dge slong gis ha cang gsher ba la bsugs pas de 'khrus nas bcom ldan 'das kyis bka' stsal pa/ ha cang gsher ba la bsug par mi bya'o/ /dge slong dag gis ha cang skam pa la bsug pas chos gos dag khra bor gyur nas/ bcom ldan 'das kyis bka' stsal pa/ ha cang skam po la bsug par mi bya'i 'on kyang ran tsam la bsug par bya'o/ /dge slong rnams chos gos dag sa la skems par byed de/ de dag rdul gyis dri ma can du gyur nas/ bcom ldan 'das kyis bka' stsal pa/ sa la bskam par mi bya'o/ /dge slong dag gis rtswa bting nas bskams te tshon phyogs gcig tu song nas/ bcom ldan 'das kyis bka' stsal pa/ gzar thag la btags la der bskam par bya'o/ /dge slong dag gis de bzhin du gzar thag la bkal bas bar du tshon ma chags nas/ bcom ldan 'das kyis bka' stsal pa/ grwa nas tha gus btags la rgyang shing bres nas gzungs btab ste bskam par bya'o/ /dge slong dag gis bsugs nas ma bzlog ste tshon phyogs gcig tu 'dris nas/ bcom ldan 'das kyis bka' stsal pa/ yang dang yang du bzlog par bya'o/ /snam sbyar gzhan dag cig tshad che ste gzar thag la ma shong nas/ bcom ldan 'das kyis bka' stsal pa/ rtswa bting nas bskam par bya zhing yang dang yang du bzlog par bya'o/ /dge slong dag chos gos rnying pa dag la ni tshon sar pa ldugs/ chos gos sar pa dag la ni tshon rnying pa ldugs nas/ bcom ldan 'das kyis bka' stsal pa/ tshon sar pa yang sar pa kho na dag la glugs par bya zhing rnying pa yang rnying pa dag la glugs par bya'o/ /dge slong rnams chos gos sar pa dag ni grib ma la skems/ rnying pa dag ni nyi ma la skems nas/ bcom ldan 'das kyis bka' stsal pa/ sar pa dag ni nyi ma la bskam par bya zhing / rnying pa dag ni grib ma la bskam par bya'o/ /dge slong dag dang por ni tshon gsum pa/ de'i 'og tu ni gnyis pa/ de'i 'og tu ni dang po ldugs pas dang po lhag par gyur nas/ bcom ldan 'das kyis bka' stsal pa/ dang por dang po dang gnyis pa glugs par bya zhing phyis gsum pa glugs par bya'o/ /dge slong dag gis chu'i nang du ma bsugs pas chos gos dag khra bor gyur nas/ bcom ldan 'das kyis bka' stsal pa/ chu'i nang du bsugs par bya'o/ /dge slong dag gis de nyid kyi nyin par chu'i nang du bsugs pa dang / bcom ldan 'das kyis bka' stsal pa/ phyi de nyin bsugs par bya'o/ /dge slong gzhan dag cig tshon gyi las byed pa na rlung dang char pa byung nas dge slong rnams phyogs gang du bskam zhes chos gos dag phan tshun sbed par byed nas/ bcom ldan 'das kyis bka' stsal pa/ rlung dang char pa byung na khang bzangs su tshon gyi las bya'o/ /bcom ldan 'das kyis rlung dang char pa byung na khang bzangs su tshon gyi las bya'o zhes bka' stsal pa dang / dge slong dag gis khang bzangs su tshon gyi las byas pas khang bzangs tshon gyis sbags nye bar sbags shing 'dug pa bram ze dang khyim bdag rnams kyis mthong nas smras pa/ 'phags pa khrag 'di ga las bo/ /dge slong dag gis smras pa/ 'di khrag ma yin gyi kho bo cag gis phyogs 'dir tshon gyi las byas so/ /de dag gis smras pa/ bdag cag gis khrag yin no snyam du bsams so/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ phyogs der ba lang gi lci ba 'am 'jim pas byug par bya'o/ / sangs rgyas bcom ldan 'das mnyan yod na rgyal bu rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /gang gi tshe khyim bdag mgon med zas sbyin gyis sangs rgyas la sogs pa dge slong gi dge 'dun la rgyal byed kyi tshal phul ba na de'i blo skyes pa/ bdag gis rgyal byed kyi tshal sangs rgyas la sogs pa dge slong gi dge 'dun la phul na der rtsig pa dag ri mo ma bris pas song la bcom ldan 'das la bdas par gsol te bri'o snyam nas/ de bcom ldan 'das ga la ba der song ste phyin nas bcom ldan 'das kyi zhabs la mgo bos phyag 'tshal te phyogs gcig tu 'dug go/ /phyogs gcig tu 'dug nas khyim bdag mgon med zas sbyin gyis bcom ldan 'das la 'di skad ces gsol to/ /bcom ldan 'das bdag gis 'dir rtsig pa dag ri mo ma bris te de'i slad du gal te bcom ldan 'das kyis gnang na da rtsig pa ri mo bri bar 'tshal lo/ /bcom ldan 'das kyis bka' stsal pa/ khyim bdag gnang gis bris shig / bcom ldan 'das kyis rtsig pa ri mo bri bar bya'o zhes bka' stsal pa dang / dge slong dag gis tshon sna du'i ri mo bri ba ma shes nas de dag gis bcom ldan 'das la zhus pa/ bcom ldan 'das kyis khyim bdag mgon med zas sbyin la gnang ste/ rtsig pa ri mo bri bar bya'o zhes bka' stsal pa de tshon sna du zhig gis bri bar bgyi lags/ bcom ldan 'das kyis bka' stsal pa/ dge slong khyim bdag mgon med zas sbyin gyis ma shes pa de khyed kyis dris pa legs so legs so/ /tshon sna bzhi po sngon po thams cad dang / ser po thams cad dang / dmar po thams cad dang / dkar po thams cad kyis bri bar bya'o// //'dul ba phran tshegs kyi gzhi/ bam po bcu bdun pa/ sdom ni/ mkhar len pa yi spyad dag dang / /bu ga can gyi khri'u dang ni/ /phyag dang skra rnams bzed pa dang / /phreng ba khab dang tsher ma'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na khyim bdag cig gnas pa de'i khyim du bsod snyoms pa zhig dus dus su 'ong zhing des de skyabs su 'gro ba dang / bslab pa'i gzhi dag la bzhag go/ /dus gzhan zhig na de la rdzas las byung ba'i bsod nams bya ba'i dngos po bdun gyi bsngags pa brjod pa dang / des smras pa/ 'phags pa bdag gis rdzas las byung ba'i bsod nams bya ba'i dngos po gang yang rung ba zhig bgyi'o/ /bsod snyoms pas smras pa/ khyim bdag legs kyis de bzhin du gyis shig / 'phags pa ci zhig bgyi/ khyim bdag dge 'dun gyi gtsug lag khang gyis shig /'phags pa bdag la kAr ShA pa Na dag ni mchis na/ 'on kyang chos kyi grogs bgyid pa ma mchis so/ / khyim bdag kAr ShA pa Na dag byin cig dang / khyod kyi chos kyi grogs nga yin no/ /'phags pa legs kyis kAr ShA pa Na 'di re zhes des de la kAr ShA pa Na dag byin no/ /bsod snyoms pa des bsams pa/ 'di phyogs bzhi'i tshangs pa mtshungs par spyod pa rnams kyi nor yin pas 'di las ji ltar spyad par bya/ bzhag la re shig gzhan bslang bar bya'o snyam nas des kAr ShA pa Na mdzod du bcug ste bzhag go/ /ji tsam dus gzhan zhig na khyim bdag des bsams pa/ 'phags pa bdag gi gtsug lag khang byed kyis re shig song la de na ci dag byed blta'o snyam mo/ /de song ba dang ji tsam na ci yang mi snang nas/ des smras pa/ 'phags pa bdag gi gtsug lag khang cung zad kyang ma bgyis sam/ bsod snyoms pas smras pa/ re shig gtsug lag khang gi mkhar lan pa'i lag spyad kyang med na cis bya/ 'phags pa kye ma kAr ShA pa Na dag gar mchis/ khyim bdag mdzod na 'dug go/ /'phags pa de nyid las mkhar lan pa'i lag cha bgyid du stsol cig /khyim bdag ngas ji ltar phyogs bzhi pa'i nor gyis mkhar lan pa'i lag cha byed du gzhug /'phags pa gtsug lag khang 'di yang phyogs bzhi'i dge slong dag kho na'i slad du bgyid na 'di la ci zhig 'gal/ khyim bdag bcom ldan 'das la zhu'o/ /'phags pa de bzhin mdzod cig /des gnas skabs de dge slong rnams la bsnyad pa dang / dge slong rnams kyis bcom ldan 'das la gsol to/ /bcom ldan 'das kyis bka' stsal pa/ nor de nyid las mkhar lan pa'i lag spyad bya ste/ 'di la 'gyod par mi bya'o/ /bsod snyoms pa de gtsug lag khang byed cing bsod snyoms la yang rgyu ba dang / khyim bdag gis smras pa/ 'phags pa bdag gis gtsug lag khang mdzad cing bsod snyoms la yang rgyu 'am/ 'di nyid las mkhar lan pa'i bsod snyoms su mdzod cig dang bdag gis kAr ShA pa Na gzhan dag kyang dbul lo/ /khyim bdag mkhar lan pa'i nor las ji ltar bsod snyoms su bya/ 'phags pa 'di bdag nyid kyi sems kyis bag yangs su bgyis pas mdzod cig /'di la 'gal ba ci zhig mchis/ des smras pa/ bcom ldan 'das la zhu'o/ /'phags pa de bzhin mdzod cig /des gnas skabs de dge slong rnams la bsnyad pa dang / dge slong rnams kyis bcom ldan 'das la gsol to/ /bcom ldan 'das kyis bka' stsal pa/ mkhar lan byed pas mkhar lan gyi nor kho na las bsod snyoms yongs su spyad par bya'o/ /bcom ldan 'das kyis mkhar lan pa'i nor kho na las bsod snyoms yongs su spyad par bya'o zhes bka' stsal pa dang / de ha cang ngan pa za nas/ bcom ldan 'das kyis bka' stsal pa/ ha cang ngan pa bza' bar mi bya'o/ /de ha cang bsod pa bza' bar brtsams pa dang / bcom ldan 'das kyis bka' stsal pa/ ha cang bsod pa bza' bar mi bya'i 'on kyang gtsug lag khang gzhan gyi thad tsam du yongs su spyad par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong zhig 'khru bag na ba de yang dang yang du chab kung sar 'gro bas rmya'o/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ khri'u bu ga can bya'o/ /bcom ldan 'das kyis khri'u bu ga can bya'o zhes bka' stsal pa dang / dge slong dag gis khyad par med par khri'u dag la mtshon gyis phug ste bu ga btod pa dang / bcom ldan 'das kyis bka' stsal pa/ sbas btags pa dang / 'breng bus btags pa gang yin pa de la ni phug nas bu ga gdod par bya'o/ /the gus btags pa gang yin pa de la ni bu ga btod la bcing bar bya'o/ /de bshang ba byed pa na rkub rus na nas/ bcom ldan 'das kyis bka' stsal pa/ phyogs der lo ma'i khres gzhag par bya'o/ /bshang ba sa la lhung nas bcom ldan 'das kyis bka' stsal pa/ 'og tu gyo mo gzhag par bya'o/ /ha cang mthon por 'jog par byed nas/ bcom ldan 'das kyis bka' stsal pa/ ha cang mthon por gzhag par mi bya'o/ /de dri mi zhim par gyur te dge slong dag gis de phyung nas bor te gzhan bzhag pa dang / de yang dri mi zhim par gyur to/ /de yang bor ba dang gzhan ma rnyed nas bcom ldan 'das kyis bka' stsal pa/ thams cad dor bar mi bya'i gnyis bcangs la gcig bkrus te bskam par bya zhing gcig shos kyang de bzhin du bya'o/ /'on te gnyis su ma rnyed par gyur na de'i steng du lo ma sbrel ba gzhag cing der bshang bar bya ste/ de lta bu gzhan yang gzhag par bya'o/ /bcom ldan 'das kyis gyo mo de bkru bar bya'o zhes bka' stsal pa dang / de bkrus kyang dri mi zhim par gyur nas/ bcom ldan 'das kyis bka' stsal pa/ til mar gyis bsku bar bya'o/ /'on kyang dri mi zhim par gyur nas/ bcom ldan 'das kyis bka' stsal pa/ yungs mar gyis bsku bar bya'o/ /bcom ldan 'das kyis nad pa la blta bar bya'o zhes bka' stsal nas/ de'i drung du nad pa la blta ba'i dge slong rgan po yang 'ong ngo / /gzhon nu dag kyang 'ong ngo / /de nas gzhon nu gang dag yin pa de dag ni de phyag 'tshal bar byed/ rgan po gang dag yin pa de dag la ni nad pa de phyag 'tshal bar byed pas de skyo bar gyur nas/ bcom ldan 'das kyis bka' stsal pa/ /'bags pa la phyag mi bya/ 'bags pas phyag mi bya/ 'bags pas phyag bdag gir mi bya/ 'bags pa las phyag bdag gir mi bya'o/ /'bags pa la phyag byed dam/ 'bags pas phyag byed dam/ 'bags pas phyag bdag gir byed dam/ 'bags pa las phyag bdag gir byed na 'gal tshabs can du 'gyur ro/ /sangs rgyas bcom ldan 'das la tshe dang ldan pa nye bar 'khor gyis zhus pa/ bcom ldan 'das kyis 'bags pa la phyag mi bya/ 'bags pas phyag mi bya/ 'bags pas bdag gir mi bya/ 'bags pa las phyag bdag gir mi bya'o zhes gang gsungs pa/ btsun pa 'bags pa du zhig mchis lags/ nye bar 'khor 'bags pa ni gnyis te/ zas kyis 'bags pa dang / mi gtsang bas 'bags pa'o/ /de la zas kyis 'bags pa ni so shing dang / bza' ba dang / btung ba dang / 'bras bu dang / rtsa ba la sogs pa za bas brel ba'o/ /mi gtsang bas 'bags pa ni bshang ba dang / gci ba dang / de dag bkru bar mi gtsang ba'i gnas kyi byi dor bya ba byed pa'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /sangs rgyas bcom ldan 'das la tshe dang ldan pa nye bar 'khor gyis zhus pa/ btsun pa bcom ldan 'das la bram ze pad ma'i snying pos bcom ldan 'das kyis nam bdag shing rta la 'tshal ba 'am/ kha lo sgyur ba 'am/ lcag sgreng ba 'am/ skad cher smra ba gzigs pa de'i tshe bdag phyag 'tshal bar gau ta ma khyod kyis gzung du gsol/ nam srang na mchis sam/ lham 'bud dam/ shul las byol lam/ sug pa brkyang pa gzigs pa de'i tshe bdag phyag 'tshal bar gau ta ma khyod kyis gzung du gsol/ nam 'khor gyi nang nas mchis sam/ stan las 'phags sam/ gtsug tor dang / gdugs phog pa de'i tshe bdag phyag 'tshal bar gau ta ma khyod kyis gzung du gsol zhes gsol pa gang lags pa/ btsun pa ci lags 'phags pa'i chos 'dul ba la de lta bu dag phyag 'tshal bar chud dam/ nye bar 'khor phyag byas pa ma yin gyi/ nye bar 'khor de ni gus par smra ba'i tshig tsam du zad kyi lus 'dud pa dang / tshig tu 'byin pa gang yin pa de ni mchod pa yin no/ /nye bar 'khor 'on kyang 'phags pa'i chos 'dul ba la ni phyag gnyis te/ yan lag lnga pa dang / byin pa la 'khyud pa'o/ /gleng gzhi ni mnyan yod na'o/ /dge slong dag chos gos gang dag gyon nas skra dang kha spu 'breg pa byed pa de dag nyid gyon nas zan za bar byed/ de dag nyid dang ston pa la phyag 'tshal bar byed pa dang / ma dad pa rnams 'phya bar byed cing shAkya'i bu'i dge slong rnams ni gtsang sbra med pa ste/ chos gos gang dag gyon nas skra dang kha spu 'breg pa de dag nyid gyon nas zan za bar byed cing de dag nyid dang ston pa la phyag 'tshal bar byed do zhes zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ chos gos dag gyon nas skra dang kha spu breg par mi bya'i 'on kyang skra bzed kyi gos bcang bar bya zhing de bgos nas skra breg par bya'o/ /bcom ldan 'das kyis skra bzed kyi gos bcang bar bya'o zhes gsungs pa dang / gzhan dag cig la 'byor pa med nas/ bcom ldan 'das kyis bka' stsal pa/ gang dag la 'byor pa med pa/ de dag gis rngul zan gyis lus dkris la skra breg par bya'o/ /dge slong dag gis skra dang kha spu bregs nas de bzhin du song ba dang / bram ze dang khyim bdag dag shAkya'i bu'i dge sbyong rnams ni spu gri'i las byas nas khrus mi byed pas gtsang sbra med pa'o zhes 'phya bar byed do/ /skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ spu gri'i las byas nas khrus bya'o/ /dge slong gzhan dag cig ni rgas 'khogs shing nyam chung bar gyur/ gzhan dag cig ni na nas khrus kyi sbyor ba mi bzod par gyur/ gzhan dag cig la ni chu'i rnyed pa med nas/ bcom ldan 'das kyis bka' stsal pa/ de dag gis ni yan lag lnga tsam bkru bar bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bram ze dang khyim bdag dad pa can dag gis dge slong dag la me tog gi phreng ba 'bul ba dang / de dag gis ma blangs nas bram ze dang khyim bdag dag gis smras pa/ 'phags pa dag gang gi tshe sangs rgyas bcom ldan 'das shes bya ba nas/ ci bdag cag 'jig rten 'di nas 'jig rten pha rol tu dge ba'i lam rgyags bral te mchi 'am/ bzhes shig ces bya ba'i bar snga ma bzhin no/ / skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ de lta bas na me tog gi phreng ba len par rjes su gnang ngo / /de dag gis blangs te de dag nyid kyi mdun du bor ba dang / de dag 'phya zhing 'phags pa bdag cag gis ri ba'i rin gyis nyos pa yin na ci khyed kyis blangs te dor ram zhes zer nas/ bcom ldan 'das kyis bka' stsal pa/ dor bar mi bya'o/ /dge slong dag gis dbu skra dang sen mo'i mchod rten dag la btags pa dang de dag gis smras pa/ ci 'phags pa bdag cag gis de bzhin gshegs pa'i dbu skra dang / sen mo'i mchod rten ma mthong snyam 'am/ bdag cag gis khyed la byin pa lags kyi bdag cag gis de bzhin gshegs pa'i dbu skra dang sen mo'i mchod rten dag la ni dang po nyid du phul lo/ /dge slong rnams kyis blangs nas gnas khang gi sgor bzhag pa dang / bram ze dang khyim bdag dad pa can gyis mthong nas dri gtsang khang yin no snyam ste phyag 'tshal nas/ bcom ldan 'das kyis bka' stsal pa/ gnas khang gi sgor gzhag par mi bya'i nang du gzhag par bya'o/ /dge slong dag gis sgo'i drang thad du bzhag pas nyes dmigs de nyid du gyur nas/ bcom ldan 'das kyis bka' stsal pa/ dri zhim po thams cad mig la phan pas phyogs dben par gzhag cing bsnam par bya'o/ /bcom ldan 'das kyis gnas dben par gzhag cing bsnam par bya'o zhes gsungs pa dang / dge slong dag gis ji ltar gzhag pa mi shes nas/ bcom ldan 'das kyis bka' stsal pa/ sngas logs su khab bam tsher ma btab la 'phyang du gzhug par bya'o/ / sdom ni/ stan bzangs dang ni rgyab rten dang / /dris bsku lhung bzed bu ga dang / /'bru mar snod ni gsum dag dang / /gtur thag dang ni khron pa'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de nas bcom ldan 'das kyis dge slong dag la bka' stsal pa/ dge slong dag dge 'dun la ni 'byor na stan bzang po gnang gi gang zag la ni mi gnang ngo / / dge 'dun la ni 'byor na rgyab rten gnang gi gang zag la ni mi gnang ngo / /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bram ze dang khyim bdag dad pa can dag gis dge slong rnams la dri phul ba dang / dge slong rnams kyis ma blangs nas de dag gis smras pa/ 'phags pa gang gi tshe sangs rgyas bcom ldan 'das 'jig rten du ma byung ba zhes bya ba nas bcom ldan 'das kyis bka' stsal pa/ de lta bas na gnang gis dri blang bar bya'o/ /zhes bya ba'i bar snga ma bzhin no/ /de rnams kyis blangs nas de dag nyid kyi mdun du bor ba dang / de dag gis 'phags pa dag bdag cag gis ri ba'i rin gyis nyos pa yin na khyed kyis blangs te dor ram zhes 'phya bar byed do/ /skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ dor bar mi bya'o/ /de dag gis dbu skra dang sen mo'i mchod rten la phul ba dang / de dag gis smras pa/ 'phags pa dag ci bdag cag gis de bzhin gshegs pa'i dbu skra dang sen mo'i mchod rten ma mthong ngam/ bdag cag gis khyed la phul gyi de bzhin gshegs pa'i dbu skra dang sen mo'i mchod rten la ni bdag cag gis dang po nyid du phul lags so/ /dge slong dag gis blangs nas gnas khang gi sgor bzhag pa dang / bram ze dang khyim bdag dad pa can dag gis mthong nas dri gtsang khang yin no snyam ste zhabs la gtugs nas/ bcom ldan 'das kyis bka' stsal pa/ gnas khang gi sgor mi gzhag gi/ 'on kyang nang du gzhag par bya'o/ /dge slong dag gis sgo'i drang thad du bzhag nas nyes dmigs de nyid du gyur te/ bcom ldan 'das kyis bka' stsal pa/ sgo'i drang thad du gzhag par mi bya'i 'on kyang dri zhim po thams cad ni mig la phan pas sngas kyi thad kar dri'i lag ris bya zhing de nas dus dus su bsnam par bya'o/ /gzhan dad pa can dag gis dge slong dag khyim du spyan drangs te mchod ston gsol nas de rnams de dag gi rkang pa la dri'i lag ris skud pa dang / dge slong dag gis ma blangs nas de dag gis smras pa/ 'phags pa gang dag bram ze la mngon par dad pa de dag gis de dag la dang por dri dang phreng ba dag phul na de dag gis blangs te/ mgo dang lus la nye bar sbyor bar bgyid na bdag cag gis ni khyed la mngon par dad de zhabs dag la 'bul ba 'gal ba ci zhig mchis bzhes su gsol/ skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ rkang pa dag la 'bul ba bdag gir bya'o/ /dge slong dag gis blangs te de dag nyid kyi mdun du bor ba dang / de dag gis smras pa/ e ma 'phags pa khyed cag gtsug lag khang du gshegs te ci bder mdzod cig /ji ltar bdag cag dad pa skyes pa de ltar ma dad pa 'ang skyes so/ /skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ de dag nyid kyi mdun du dor bar mi bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ / dge slong dag lhung bzed bab chol du 'jog par byed pas de dag ma rung bar gyur nas/ skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ lhung bzed bab chos du gzhag par mi bya'i/ 'on kyang lhung bzed bzhag pa'i bu ga byas la der gzhag par bya'o/ /dge slong dag rtsig pa rko bar byed nas/ bcom ldan 'das kyis bka' stsal pa/ rtsig pa brko bar mi bya'i 'on kyang gang gi tshe/ gtsug lag khang rtsig pa de kho na'i tshe lhung bzed kyi bu ga bya ste/ de bzhin du 'khor gyi khang pa la 'ang bya'o/ /bcom ldan 'das kyis lhung bzed gzhag pa'i bu gar lhung bzed gzhag par bya'o zhes gsungs pa dang / dge slong dgon pa pa dag lhung bzed gzhag pa'i bu ga med nas/ bcom ldan 'das kyis bka' stsal pa/ de dag gis lcug ma 'am/ srad bu'i skon bu byas te de la ba lang gi lci ba 'am/ 'jim pas bskus la der gzhag par bya'o/ /rdul gyis khyer nas bcom ldan 'das kyis bka' stsal pa/ de la de dang 'dra ba'i kha gab bya'o/ /dge slong dag gis de sa la bzhag nas bcom ldan 'das kyis bka' stsal pa/ sa la mi gzhag gi 'on kyang gdang thag gam/ shing gi yal ga la dpyang du gzhug par bya'o/ /de dag gang gi tshe ljongs rgyu zhing 'gro ba de'i tshe de khyer zhing dong nas ma dad pa dag 'phags pa ci 'dir khyim bya 'am spre'u khyer zhes 'phya bar byed nas/ bcom ldan 'das kyis bka' stsal pa/ gar 'gro dgur skon bu khyer te/ 'gro bar mi bya'i 'on kyang gang du 'gro ba der gzhan zhig gzhag par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong zhig ljongs rgyu zhing ri brags shig tu phyin te/ des khyim zhig tu gnas brnyas nas rkang pa bkrus te 'bru mar bslang bar brtsams pa dang / ji tsam na bud med cig gis til mar khyer te 'ongs nas dge slong des lag pa brkyang ba dang / des smras pa/ 'phags pa slong bar mdzad la snod mi mnga' ba de ga la gda'/ e ma'o khyod kyis 'bru mar gyi snod bcang 'dang cig /des smras pa/ sring mo bcom ldan 'das kyis ma gnang ngo / /de cang mi zer bar 'dug nas skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ de lta bas na gnang gis 'bru mar gyi snod bcang bar bya'o/ /bcom ldan 'das kyis 'bru mar gyi snod bcang bar bya'o zhes gsungs pa dang / tshe dang ldan pa nye dga'i dge tshul gnyis 'bru mar gyi 'brag khyer te 'bru mar gyi bsod snyoms la zhugs pa dang / bud med cig gis 'bru mar khyer te 'ongs pa dang / ji tsam na dge tshul gnyis shig 'bru mar gyi 'brag thogs pa mthong nas des brang brdungs te smras pa/ 'phags pa khyed kyi 'di su zhig gis 'gengs par byed/ de dag gis smras pa/ bkren pa mo khyod kyis re shig ci byin pa de lugs shig /lhag ma lta bram ze dang khyim bdag dad pa can dag 'gengs so/ /de cang mi zer bar gyur nas skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ dge slong dag gis 'bru mar gyi snod ha cang chen po bcang bar mi bya'o/ /bcom ldan 'das kyis dge slong dag gis 'bru mar gyi snod ha cang chen po bcang bar mi bya'o zhes gsungs pa dang / de dag gis ha cang chung ngu bcangs pas des dgos pa mi chog nas/ bcom ldan 'das kyis bka' stsal pa/ ha cang chung ngu yang mi bcang gi 'on kyang 'bru mar gyi snod ni gsum ste/ chen po dang / 'bring dang / chung ngu'o/ /de la chen po ni phul gang ba'o/ /chung ngu ni phul phyed pa'o/ /de dag gi bar ni 'bring ngo / /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong rgan po dang gsar bu zhig dang gnyis lam du zhugs te dong ba dang / de dag gtam bzang po ma yin pa zer zhing 'gro ba ji tsam na gnod sbyin ma dad pa zhig gis thos nas des bsams pa/ shAkya'i bu'i dge sbyong 'di gnyis gtam bzang po ma yin pa zer zhing 'dong bas 'di dag gi mdangs dbrog par bya'o snyam bsams te/ de de gnyis kyi phyi bzhin 'brang ngo / /yang bsams pa/ gang 'das pa de ni 'das su zad/ gal te da gtam bzang po ma yin pa dag zer na nges par mdangs dbrog par bya'o snyam mo/ /de de ltar sems shing de dag gi phyi bzhin 'brang ba las gnod sbyin dad pa can gzhan zhig phyogs der 'ongs te/ des de la grogs po gar 'gro zhes dris pa dang / des ji ltar gyur pa de la smras so/ /des smras pa/ grogs po dge slong 'di dag ni dka' thub dang ldan pas gor ma chags par chos kyi gtam zer zhing 'dong ngo / /khyod la dge slong dag gis ci zhig byas/ 'dug shig dang / bdag cag phan tshun yang dag par dga' ba'i gtam dag bya zhing 'dong ngo / /des smras pa/ grogs po bdag gis 'di gnyis nges par mi gtang gis tshur shog 'dong ngo / /des de dus kyis 'chu bar shes nas de dang lhan cig tu de gnyis kyi phyi bzhin du 'brangs pa dang / dge slong de gnyis gtam bzang po ma yin pa kho na zer zhing 'dong ba las ji tsam na lam gnyis su gyur nas/ dge slong de gnyis las kyang gcig ni rgyal byed kyi tshal du 'gro'o/ /gcig ni ri dgas 'dzin gyi ma'i khang bzangs su 'gro'o/ /de gnyis las gsar bu gang yin pa des rgan po la phyag byas te/ des smras pa/ tshe dang ldan pa bdag ni ri dgas 'dzin gyi ma'i khang bzangs su mchi 'is khyod bag yod par mdzod la nad med par gshegs shig ces smras nas de song ba dang / gnod sbyin ma dad pa de skra gyen du bslang ste mdangs dbrog ces byas pa dang / gnod sbyin dad pa can des smras pa/ grogs po gzu lums ma byed cig /'di gnyis kyis chos bshad de/ gang nad med par gyur cig ces smras pa nad med pa de ni rnyed pa'i mchog yin la/ gang bag yod par byos shig ces zer ba bag yod pa ni chos thams cad kyi rtsa ba yin no/ /bcom ldan 'das kyis kyang / bag yod 'chi med gnas yin te/ /bag med pa ni 'chi ba'i gnas/ /bag yod 'chi bar mi 'gyur te/ /bag med rtag tu 'chi bar 'gyur/ /zhes gsungs so zhes des de slar bzlog go/ /gnod sbyin dad pa can de 'di snyam du 'di kho na bdag gis bya ba yin no snyam bsams nas/ bcom ldan 'das ga la ba der song ste phyin pa dang / bcom ldan 'das kyi zhabs la mgo bos phyag 'tshal nas phyogs gcig tu 'dug go/ /phyogs gcig tu 'dug nas bcom ldan 'das la gnod sbyin des 'di skad ces gsol to/ /btsun pa bcom ldan 'das kyi bstan pa la mngon par ma dad pa/ mi ma lags pa/ gnod sbyin gtum po rtag tu gnas shing mchis lags so/ /btsun pa mngon par dad pa gang dag lags pa de dag ni nyung zad cig mchis lags te/ bcom ldan 'das kyi bstan pa la mngon par dad pa/ mi ma lags pa/ gnod sbyin gtum po/ rtag tu gnas kyang bcom ldan 'das kyi bstan pa la mngon par ma dad pa'i gnod sbyin gtum po rtag tu gnas pa ni ches mang lags la/ btsun pa 'phags pa 'di dag ni gtam bzang po ma lags pa mchi zhing shul du zhugs te mchi na/ kye ma bcom ldan 'das kyis brtse bar dgongs te/ gang gis na 'phags pa dag gtam bzang po ma lags pa mchi zhing shul tu zhugs te mchi bar mi 'gyur bar 'phags pa rnams dran par bgyid pa cung zad cig bcang gsol/ bcom ldan 'das kyis gnod sbyin de la cang mi gsung bas gnang nas/ de nas gnod sbyin de bcom ldan 'das cang mi gsung bas gnang bar rig nas bcom ldan 'das kyi zhabs la mgo bos phyag 'tshal te/ bcom ldan 'das kyi spyan snga nas song ngo / /de nas bcom ldan 'das kyis gnod sbyin de song ste ring po ma lon par mkhyen nas dge slong gi dge 'dun gyi gung la gdan bshams pa nyid la bzhugs so/ /bzhugs nas bcom ldan 'das kyis dge slong dag la bka' stsal pa/ dge slong dag ngas gnod sbyin zhig las dge slong dag gtam bzang po ma yin pa zer zhing lam du zhugs te 'dong ba la gnod sbyin ma dad pa dag skabs tshol zhing glags lta zhes thos so/ /dge slong dag legs par gsungs pa'i chos 'dul ba la rab tu byung ba rnams 'di lta ste/ gtam bzang po ma yin pa zer ba de ni mdzes pa ma yin zhing 'tsham pa ma yin no/ /de lta bas na ngas dge slong lam du 'jug pa'i kun tu spyod pa'i chos dag bca' bar bya ste/ lam du 'jug pa'i dge slong gis chos kyi gtam dang / 'phags pa'i mi smra ba dang rnam pa gnyis kyis lam du zhugs nas 'gro'o/ /ngal bso ba'i gnas kyi phyogs su gtsug lag gi tshigs su bcad pa gdon par bya'o/ /chu chu ba na chu de gang gi yin pa dang / de'i lha la tshigs su bcad pa gdon par bya'o/ /gang du gnas 'cha' ba der rgyud chags gsum pa gdon par bya'o/ /lam du zhugs pa'i dge slong gis kun tu spyod pa'i chos ji ltar bcas pa dag yang dag par blangs te 'jug par mi byed na 'gal tshabs can du 'gyur ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong dag gis chos gos zin pa/ chos gos mthar phyin pa tshon sar pa can dag phrag pa la bkal te lam du zhugs pa dang / de dag rdul dang rdul gyis ma rung bar gyur nas/ bcom ldan 'das kyis bka' stsal pa/ gtur bu byas la der bcug ste bkur bar bya'o/ /bcom ldan 'das kyis gos dag gtur bur bcug ste bkur bar bya'o zhes gsungs pa dang / dge slong dag gis chos gos kyi gtur bu ji lta bu bya ba mi shes nas/ bcom ldan 'das kyis bka' stsal pa/ ras gang chur ni khru gsum zheng du ni khru phyed dang do pa de gnyis su bltab la drub par bya'o/ /dge slong dag gis mtha' mar kha btod pas glang po che'i sna ltar gyur nas bcom ldan 'das kyis bka' stsal pa/ mthar kha mi gdod kyi 'on kyang dbus su gdod par bya'o/ /de dag gis kha thag ma btags pas de bzhin du rdul zhugs nas/ bcom ldan 'das kyis bka' stsal pa/ srad bus dra ba lta bu byas la de nas srad bu gzhan gyis brgyu bar bya'o/ /de dag gis chos gos gang dag bgo ba de dag ni 'og tu bzhag /gzhan ni steng du phyung ba dang / de dag gtur bu yang dang yang du 'byed pa na 'chol bar gyur nas/ bcom ldan 'das kyis bka' stsal pa/ gang dag bgo ba de dag ni steng du bzhag la/ lhag ma dag ni 'og tu gzhag par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe mi rgod dag gis 'dron pa bcom nas phan tshun khus 'debs shing bros pa dang / so so'i grong na gnas pa dag khyim nas lhags te mi rgod dag btags rab tu btags nas/ mgon med cing skoms pas gdungs te/ gcig nas gcig tu chu btsal ba'i phyir rmed cing khron pa zhig tu phyin pa dang / rkun po'i sde dpon gyis smras pa/ shes ldan dag 'dir chu snod dang / thag pa dag ltos shig / bltas na thag pa yang med/ chu snod kyang med do/ /sde dpon gyis smras pa/ shes ldan dag gal te 'dron pa 'ga' zhig 'ong na de la thag pa dang / chu snod brnyas/ shing la 'dzegs te ltos shig /de dag gis shing la 'dzegs te blta bar brtsams na/ ji tsam na thag ring ba zhig nas dge slong dag cig 'ong ba mthong ste/ de dag gis smras pa/ sde dpon shAkya'i bu mang zhig 'ong ngo / /des smras pa/ shes ldan de dag ni mkhas pa yin pas gdon mi za bar de dag la gdang thag dang / chu snod yod do/ /de dag gis smras pa/ sde dpon gal te de dag la yod na de lta na legs/ ji ste med na de dag gi lto dral te khrag btung bar bya'o/ /de dag gis de ltar gros byas te bsdad pa dang / dge slong dag kyang lhags so/ /mi rgod dag gis dris pa/ 'phags pa bdag skom na khyod la gdang thag dang / chu snod yod dam/ de dag gis smras pa/ bzhin bzangs med do/ /mi rgod dag 'khrugs par gyur te mtshon cha la nom pa dang / de na dge 'dun gyi gnas brtan dgra bcom pa zhig gis ci'i phyir 'di dag 'khrugs shing mtshon cha la nom zhes bsam pa la zhugs pa dang / dge slong dag gsad par 'dod par mthong nas/ des smras pa/ tshe dang ldan pa dag khyed ci'i phyir 'khrugs par gyur/ de dag gis ji ltar gyur pa smras so/ /des smras pa/ tshe dang ldan pa dag thabs yod kyis tha mal par 'dug la chu 'thung shig /de dag tha mal par 'dug pa dang / dge slong dag gis lhas ma dang / lcag phod dang / rgya cang dag mthud de lhung bzed khron par dpyang la btang nas de nas chu bcus te btags so/ /btags nas mi rgod thams cad ngoms par byas pa dang / de dag gis smras pa/ 'phags pa dag gal te khyed kyis bdag cag la chu ma stsal bar gyur na bdag cag gis khyed thams cad bsad par gyur to/ /e ma khyed gdang thag 'chang bar mdzod cig /de dag gis smras pa/ tshe dang ldan pa dag de bzhin bya'o/ /mi rgod dag gis phyag byas te dong ngo / /dge slong dag gis kyang ji tsam ngoms pa chu 'thungs nas ril ba dang / bya ma bum dag bkang ste dong nas de rim gyis mnyan yod du lhags so/ /dge slong dag gis 'ongs pa legs so zhes bya ba'i kun du spyod pas kun tu spyad nas tshe dang ldan pa dag ci bde bar spyad dam/ zhes dris pa dang / de dag gis ji ltar gyur pa smras so/ /skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ de lta bas na gnang gis dge slong dag gis gdang thag bcang bar bya'o/ /bcom ldan 'das kyis dge slong dag gis gdang thag bcang bar bya'o zhes gsungs pa dang / dge slong rnams kyis shin tu ring po dag 'chang nas/ bcom ldan 'das kyis bka' stsal pa/ shin du ring po yang bcang bar mi bya'o/ /de dag shin du thung ngu dag bcangs nas/ bcom ldan 'das kyis bka' stsal pa/ shin du thung ngu yang bcang bar mi bya'o/ /'on kyang gdang thag gsum bcang bar bya ste/ ring po dang / 'bring dang / thung ngu'o/ / ring po ni khru brgya lnga bcu'o/ /thung ngu ni khru brgya'o/ /de dag gi bar ni 'bring ngo / /bcom ldan 'das kyis gdang thag gsum bcang bar bya'o/ /zhes gsungs pa dang / dge slong rnams 'chang bar gyur te/ yul gzhan zhig na chu mod pa der yang dge slong dag gdang thag khyer te 'dong nas/ bcom ldan 'das kyis bka' stsal pa/ gdang thag ni yul rnams dang sbyar zhing bcang bar bya'o/ / sdom ni/ spu gri bdar dang sen gri dang / /smang tshar dang ni sngas shing dang / /bad tsha'i rigs la 'jim pa ni/ /dri yis yongs su bsgos pa'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong zhig gi skra ring po ring por gyur te/ de 'breg mkhan gyi gan du song nas bzhin bzangs bdag gi skra regs shig /des bsams pa/ shAkya'i bu'i dge sbyong 'di dag ni nan che ste rngan pa med par las byed du 'jug pas gal te 'di'i skra bregs nas thos pa dang / gzhan dang gzhan dag kyang 'ong bar 'gyur bas dus ring du bsgyangs te bzhag pa dang / 'di rang gi blos ldog go snyam nas des dus btab pa/ 'phags pa gshegs la sang gnangs snga dro 'am/ slad dro 'am/ gdugs kyi gung zhig la spyon cig /de des bslus pas yang dang yang du 'gro'o/ /de la dge slong mdza' bshes shig yod pa des de yang dang yang du 'gro ba mthong nas smras pa/ tshe dang ldan pa khyod ci'i phyir 'dir yang dang yang du 'gro/ ci 'di gnyen gyi khyim 'am/ rigs kyi khyim yin/ des smras pa/ tshe dang ldan pa de ni gnyen gyi khyim dang / rigs kyi khyim yang ma yin mod kyi 'on kyang bdag gi skra ring po ring por gyur nas bdag gis 'breg mkhan de la 'di skad du/ bdag gi skra ring po ring po regs shig dang / khyod la bsod nams su 'gyur ro zhes byas pa dang / des dus btab ste ma bregs so/ /des smras pa/ tshe dang ldan pa bzo bo la bden par smra ba dkon no zhes khyod kyis ma thos sam/ kho bo ni skra 'breg kyang mkhas na bcom ldan 'das kyis ma gnang ngo / /des skabs de dge slong dag la bsnyad pa dang / dge slong dag gis bcom ldan 'das la gsol to/ /bcom ldan 'das kyis bka' stsal pa/ de lta bas na gnang gis dge slong gang zhig shes pa des phyogs dben par skra breg par bya ste/ 'di la 'gyod par mi bya'o/ /bcom ldan 'das kyis dge slong gang zhig mkhas pa des phyogs dben par skra breg par bya'o zhes bka' stsal pa dang / dge slong dge slong de'i drung du song nas tshe dang ldan pa bcom ldan 'das kyis gnang gis skra regs shig des smras pa/ tshe dang ldan pa bcom ldan 'das kyis gnang ba ni legs na de ci mdzub mos breg par bya 'am/ 'di la spu gri dang / gdar dang / sen gri dang / smang tshar dag kyang dgos so/ /des skabs de dge slong dag la smras nas/ dge slong dag gis kyang bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis dge 'dun gyi phyir spu gri'i lag cha bcang bar bya'o/ /sangs rgyas bcom ldan 'das ser skya'i gnas n+ya gro d+ha'i kun dga' ra ba na bzhugs so/ /gang gi tshe bcom ldan 'das kyis ser skya na gnas pa'i shAkya'i rigs las re re rab tu phyung ba na de dag rab tu gzhon pa'i rang bzhin can yin pas de dag sngas shing med par khas bub tu nyal nas gnyid log go/ /de dag de bzhin du gnyid log pas khams ma snyoms te drod chung bar gyur nas de dag sman pa'i drung du song ste smras pa/ bzhin bzangs bdag cag drod chung bar gyur na sman ston cig /des smras pa/ 'phags pa bzhud cig dang khyed cag ci 'dra bar nyal zhing 'dug pa ltar 'dong ngo / /de song ba dang / ji tsam na sngas shing med par khas bub tu nyal ba mthong nas des smras pa/ 'phags pa khyed cag khas bub tu nyal bas de'i phyir khyed khams ma snyoms la drod chung bar gyur gyis sngas shing chug la nyol cig /des smras pa/ bcom ldan 'das kyis ma gnang ngo / /des smras pa/ 'phags pa khyed kyi ston pa ni thugs rje can yin pas gnang bar 'gyur ro/ /skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ de lta bas na gnang gis sngas shing btsugs te nyal bar bya'o/ / de dag sngas shing btsugs te nyal na 'on kyang sos par ma gyur nas de dag gis yang sman pa la smras pa dang / des smras pa/ 'phags pa sngas nang tshangs can bcug ste nyal bar bya'o/ /bzhin bzangs bcom ldan 'das kyis ma gnang ngo / /'phags pa khyed kyi ston pa thugs rje can yin pas gnang bar 'gyur ro/ /skabs de bcom ldan 'das la rgyas par gsol pa dang / bcom ldan 'das kyis bka' stsal pa/ de lta bas na gnang gis dge slong gis sngas nang tshangs can bcang bar bya'o/ /bcom ldan 'das kyis sngas nang tshangs can bcang bar bya'o zhes gsungs pa dang / dge slong dag gis ci 'dra ba zhig bya ba mi shes nas/ bcom ldan 'das kyis bka' stsal pa/ ras de ni srid du khru bzhi zheng du khru dor byas la drub ste/ de nas shing bal gyis bkang la sngas su gzhug par bya'o/ /sangs rgyas bcom ldan 'das rgyal po'i khab 'od ma'i tshal bya ka lan da ka gnas pa na bzhugs so/ /tshe dang ldan pa pi lin da'i bu rab tu byung tshun cad ces bya ba nas/ gnas brtan khyod kyis ci bcangs shes bya ba'i bar snga ma bzhin no/ /des smras pa/ tshe dang ldan pa dris bsgos pa'i 'jim pa dag bcangs so/ /gnas brtan da ci'i phyir mi bcang / tshe dang ldan pa dag bcom ldan 'das kyis ma gnang ngo / /skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ dge slong nad pas dris bsgos pa'i 'jim pa bcang bar bya ste/ 'di la 'gyod par mi bya'o/ /'dul ba phran tshegs kyi gzhi las sgo gsum pa rdzogs s+ho// // bsdus pa'i sdom ni/ gnas brtan ra ba lhan pa dang / /nad pa dang ni rigs ngan phag /ri mo lhung bzed med pa dang / /gnas bca' ba dang shing bskyed pa'o/ / sdom ni/ gnas brtan re mos gzhan dang ni/ /gso sbyong mtshams ni sbyar ba dang / /btung ba rnams gnyis ldan pa dang / /gtsug lag khang ni dus kun pa'o/ /sangs rgyas bcom ldan 'das mnyan yod na rgyal bu rgyal byed gyi tshal mgon med zas sbyin gyi kun dga' ra ba na bzhugs so/ /bcom ldan 'das kyis zla ba phyed phyed cing gso sbyong gi tshe kha ton gdon par bya'o zhes bka' stsal pa dang / dge slong dag gis gang gis kha ton gdon par bya ba mi shes nas/ bcom ldan 'das kyis bka' stsal pa/ dge 'dun gyi gnas brtan gyis kha ton gdon par bya'o/ /bcom ldan 'das kyis dge 'dun gyi gnas brtan gyis kha ton gdon par bya'o zhes bka' stsal nas/ dge 'dun gyi gnas brtan zla ba phyed phyed cing gso sbyong gi tshe kha ton 'don par zhugs so/ /re shig cig na gtsug lag khang gzhan zhig na gnas brtan zhig 'dug pa de kha ton 'don mi nus pa dang / de la dge slong dag gis smras pa/ gnas brtan gso sbyong nye bar gnas na ci mi sems par 'dug gam/ des smras pa/ tshe dang ldan pa dag bdag gis mi nus na ji ltar bya/ skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ gal te dge 'dun gyi gnas brtan gyis mi nus na gnas brtan gnyis pas kha ton gdon par bya'o/ /bcom ldan 'das kyis gnas brtan gnyis pas kha ton gdon par bya'o zhes bka' stsal pa dang / re shig na gtsug lag khang gzhan zhig na gnas brtan gnyis pas kyang ma nus nas skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ gal te gnas brtan gnyis pas kyang ma nus na gnas brtan gsum pas kha ton gdon par bya'o/ /bcom ldan 'das kyis gnas brtan gsum pas kha ton gdon par bya'o zhes bka' stsal pa dang / re shig cig na gtsug lag khang gzhan zhig na gnas brtan gsum pas kyang ma nus nas skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ gal te gnas brtan gsum pas kyang ma nus na dge slong rnams kyis res su blags te kha ton gdon par bya'o/ / bcom ldan 'das kyis dge slong rnams kyis res su blags te kha ton gdon par bya'o zhes bka' stsal nas/ dge slong rnams res su blags te kha ton gdon par brtsams pa dang / res su blags te kha ton gdon pa de dag las kha cig ni nus pa la res bab/ kha cig ni mi nus pa la res bab nas/ de la nus pa gang yin pa des ni res bab pa na zla ba phyed phyed cing so sor thar pa'i mdo gdon pa 'don par byed/ mi nus pa gang yin pa de ni res bab pa na mi shes na ji ltar bya zhes zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ des kyang nus pa gang yin pa de la bcol bar bya'o/ /bcom ldan 'das kyis mi nus pa la res bab pa gang yin pa des kyang gzhan la bcol bar bya'o zhes bka' stsal pa dang / re shig cig na gtsug lag khang gzhan zhig na mi nus pa la res bab pa des gang la bcol ba de ma btub nas skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ nus pa gzhan gang yin pa de kho na la rtag tu bcol bar bya'o/ /bcom ldan 'das kyis zla ba phyed phyed cing dge 'dun gyi gnas brtan gyis so sor thar pa'i mdo gdon par bya'o/ /de med na gnas brtan gnyis pas so/ /de yang med na gsum pas so/ /de yang med na res su blags te kha ton gdon par bya ba 'am/ gzhan nus pa gang yin pa de la bcol bar bya'o zhes bka' stsal pa dang / gtsug lag khang gzhan zhig na so sor thar pa'i mdo bstan pa ril thon pa ni 'ga' yang med kyi dge 'dun gyi gnas brtan gyis phas pham par gyur pa'i chos bzhi bton te/ lhag ma ma thon nas dge slong dag gis gso sbyong bzhag go/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ gso sbyong gzhag par mi bya'i 'on kyang gang gis gang thon pa des de gdon par bya ste/ gal te dge 'dun gyi gnas brtan gyis phas pham par 'gyur ba'i chos bzhi thon na de dag gdon par bya zhing gzhan gyis dge 'dun lhag ma'i chos bcu gsum gzhan gyis ma nges pa'i chos gnyis/ gzhan gyis spang ba'i ltung byed kyi chos sum bcu/ gzhan gyis ltung byed kyi chos dgu bcu/ gzhan gyis so sor bshags par bya ba'i chos bzhi/ gzhan gyis bslab pa mang po'i chos rnams gzhan gyis rtsod pa zhi bar byed pa'i chos bdun te/ de ltar gso sbyong gi mtshams sbyar na gso sbyong gi bar chad du 'gyur bar nga mi smra'o/ /gleng gzhi ni mnyan yod na'o/ /sangs rgyas bcom ldan 'das la tshe dang ldan pa nye bar 'khor gyis zhus pa/ btsun pa dus su rung ba'i btung ba zhes kyang bka' stsal/ dus ma lags par rung ba zhes kyang bka' stsal na/ btsun pa dus su rung ba ni gang lags/ dus ma lags par rung ba ni gang lags/ nye bar 'khor ma btsags pa ni dus su rung ba'o/ /btsags te chu dang bsres pa ni dus ma yin par rung ba'o/ /gleng gzhi ni mnyan yod na'o/ /drug sde rnams sdig pa 'dod pa/ ser snas mi rigs par gtsug lag khang la yongs su spyod par byed de kha cig la ni dus thams cad pas kha cig la ni gnas res su gcod pas/ kha cig la ni dus re shig pas/ kha cig la ni rting gnon pas yongs su spyod par byed do/ /ji ltar dus thams cad pas yin zhe na/ 'di ni bdag gi dgun gyi gtsug lag khang ngo / /'di ni dpyid kyi'o/ /'di ni dbyar gyi'o zhes bya ba ste/ de ltar na dus thams cad pas yin no/ /ji ltar na gnas res su gcod pas yin zhe na/ 'di ni bdag gi sang gi gtsug lag khang ngo / /'di ni gnangs kyi'o/ /'di ni gzhes kyi'o zhes bya ba ste/ de ltar gnas res su gcod pas yin no/ / ji ltar na dus re shig pas yin zhe na/ 'dir ni snga dro gnas so/ /'dir ni phyi dro'o zhes bya ba ste/ de ltar na dus re shig pas yin no/ /ji ltar na rting gnon pas yin zhe na/ 'di ni bdag gi slob dpon gyi gtsug lag khang ngo / /'di ni mkhan po dang / lhan cig gnas pa dang / nye gnas dang / gtam 'dres pa dang / phebs par smra ba'i 'o zhes bya ba ste/ de ltar na rting gnon pas yin no/ /yul sna tshogs na gnas pa'i dge slong dag lhags pa dang phongs par gyur nas skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na dge slong gi gtsug lag khang dag la dus thams cad pa dang / gnas ris su gcod pa dang / dus re shig pa dang / rting gnon pas yongs su spyad par mi bya ste/ spyod na 'gal tshabs can du 'gyur ro/ / sdom ni/ ra ba dang ni shing thags dang / /lam dang 'obs dang skar rgyal dang / /chos gos bcags shing phyis pa dang / /cha ga dang ni bram ze 'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /gang gi tshe khyim bdag mgon med zas sbyin gyis rgyal byed kyi tshal phyogs bzhi'i dge slong gi dge 'dun la phul ba de'i tshe 'jig rten dag rgyal byed kyi tshal gyi nang du dga' mgur 'gro zhing 'ong nas khyim bdag mgon med zas sbyin gyis bsams pa/ bdag gi gtsug lag khang lam po cher gyur gyis de'i phyir gal te bcom ldan 'das kyis gnang na bdag gis ra bas bskor ro snyam du bsams nas/ bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te phyogs gcig tu 'dug go/ /phyogs gcig tu 'dug nas khyim bdag mgon med zas sbyin gyis bcom ldan 'das la 'di skad ces gsol to/ /btsun pa gtsug lag khang 'di shul po cher gyur te de'i slad du gal te bcom ldan 'das kyis gnang na bdag gis 'di ra bas bskor bar bgyi'o/ /bcom ldan 'das kyis bka' stsal pa/ khyim bdag de lta bas na gnang gis skor cig / des ra bas bskor ba dang / gang gi tshe dbyar gyi dus la bab pa'i tshe rgyal byed kyi tshal chus sbyang bzhin gang ste 'dug go/ /ji tsam na khyim bdag mgon med zas sbyin bcom ldan 'das kyi zhabs la phyag 'tshal du song ba dang / des rgyal byed kyi tshal chus sbyang bzhin du gang ba mthong nas/ des bsams pa bdag gis rgyal byed kyi tshal ra bas bskor gyi stor khung ma btod pas des na 'di chus sbyang bzhin du gang ste 'dug go/ /de'i phyir gal te bcom ldan 'das kyis gnang na stor khung gdod do snyam du bsams nas/ bcom ldan 'das la 'di skad ces gsol to/ /btsun pa bdag gis rgyal byed kyi tshal ra bas bskor gyi stor khung ma btod pas des na 'di chab kyis sbyang bzhin bltam ste mchis so/ /de'i slad du gal te bcom ldan 'das kyis gnang na bdag gis stor khung gdod par bgyi'o/ /bcom ldan 'das kyis bka' stsal pa/ khyim bdag de lta bas na gnang gis thod cig / des stor khung btod do/ /ba lang dag 'ongs shing 'ongs nas rtsig pa la lus kyis bsnyogs shing rwas brud pa dang / ji tsam na khyim bdag mgon med zas sbyin gyis mthong nas des bsams pa/ bdag gis rgyal byed kyi tshal ra bas bskor gyi shing thags ma bres pas des na ba lang dag 'ongs shing 'ongs nas 'di la lus kyis bsnyogs shing rwas brud do/ /de'i phyir gal te bcom ldan 'das kyis gnang na bdag gis 'di shing thags kyis bskor bar bya'o snyam du bsams nas/ bcom ldan 'das ga la ba der song ste phyin nas bcom ldan 'das kyi zhabs la mgo bos phyag 'tshal te phyogs gcig tu 'dug go/ /phyogs gcig tu 'dug nas khyim bdag mgon med zas sbyin gyi bcom ldan 'das la 'di skad ces gsol to/ /btsun pa bdag gis rgyal byed kyi tshal ra bas bskor gyi shing thags ma bres pas ba lang dag mchis shing mchis nas de la lus kyis bsnyogs shig rwas brud de/ de'i slad du gal te bcom ldan 'das kyis gnang na shing thags bre bar bgyi'o/ /bcom ldan 'das kyis bka' stsal pa/ khyim bdag de lta bas na gnang gis shing thags res shig /des shing thags bres pa dang / ma byin par len pa dag gis shing thags dral te brkus so/ /ji tsam dus gzhan zhig na khyim bdag mgon med zas sbyin 'chag cing song ba dang / shing thags bar bar nas dral zhing shing de yang brkus par mthong ngo / /des bsams pa/ bdag gis rgyal byed kyi tshal ra bas bskor nas shing thags bres na/ 'di bar bar nas dral te shing yang brkus kyis de'i phyir gal te bcom ldan 'das kyis gnang na bdag gis 'obs kyis bskor ro snyam du bsams nas bcom ldan 'das ga la ba der song ste phyin nas bcom ldan 'das kyi zhabs la mgo bos phyag 'tshal te phyogs gcig tu 'dug go/ /phyogs gcig tu 'dug nas khyim bdag mgon med zas sbyin gyis bcom ldan 'das la 'di skad ces gsol to/ /btsun pa bdag gis rgyal byed kyi tshal ra bas bskor cing shing thags bres na de 'obs kyis ma bskor bas bar bar nas dral nas shing brkus na/ de'i slad du gal te bcom ldan 'das kyis gnang na bdag gis 'obs kyis bskor bar bgyi'o/ /bcom ldan 'das kyis bka' stsal pa/ khyim bdag de lta bas na gnang gis 'obs kyis skor cig /des 'obs kyis bskor to/ /gleng gzhi ni mnyan yod na'o/ /mnyan yod na dge slong ma skar rgyal zhes bya ba zhig 'dug pa de skra ring po ring por gyur nas de 'breg mkhan kyi drung du song ste/ bu skra regs shig /khyod la bsod nams su 'gyur ro zhes byas pa dang / des bsams pa/ ji ltar shAkya'i bu'i dge sbyong dag nan che ba de ltar 'di dag kyang rngan pa med par las byed du 'jug ste/ gal te 'di'i skra bregs na gzhan dang gzhan dag kyang 'ong bar 'gyur bas dus ring du bshol te bzhag pa dang / 'di rang gi blos ldog par 'gyur ro snyam nas/ des 'phags ma bzhud la sang gnangs snga dro 'am/ nyi ma'i gung ngam/ slad dro spyon cig ces dus btab po/ /de des bslus pas yang dang yang du 'gro ba dang / de'i smos 'drin dge slong ma zhig yod pa des de yang dang yang du 'gro ba mthong nas/ des smras pa/ 'phags ma khyod ci'i phyir 'dir yang dang yang du 'gro/ ci 'di khyod kyi nye du'i khyim 'am/ rigs kyi khyim yin/ des smras pa/ 'phags ma 'di ni bdag gi nye du'i khyim yang ma yin/ rigs kyi khyim yang ma yin mod kyi 'on kyang bdag gi skra ring po ring por gyur nas bdag gis 'breg mkhan 'o ni la bu bdag gi skra ring po ring po bregs shig dang / khyod la bsod nams su 'gyur ro zhes byas na des ma bregs te dus btab po/ /des smras pa/ 'phags ma khyod kyis bzo bo la bden par smra ba dkon par ma thos sam/ kho mo ni skra 'breg mkhas na 'on kyang bcom ldan 'das kyis ma gnang ngo / /des skabs de dge slong ma rnams la bsnyad pa dang / dge slong ma rnams kyis dge slong rnams la'o/ /dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong ma gang zhig mkhas pa des phyogs dben par skra breg par bya'o/ /bcom ldan 'das kyis dge slong ma gang zhig mkhas pa des phyogs dben par skra breg par bya'o zhes bka' stsal nas/ dge slong ma de dge slong ma de'i drung du song ste/ 'phags ma bcom ldan 'das kyis gnang gis tshur spyon skra regs shig /des smras pa/ 'phags ma gal te bcom ldan 'das kyis gnang na legs na/ de ci'i sor mos breg gam/ 'di la spu gri dang / bdar dang / sen gri dang / smang tshar dag dgos so/ /des skabs de dge slong ma rnams la bsnyad pa dang / dge slong ma rnams kyis dge slong rnams la'o/ /dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis dge slong ma rnams kyis dge 'dun gyi phyir spu gri'i spyad dag bcang bar bya'o// //'dul ba phran tshegs kyi gzhi/ bam po bcwa brgyad pa/ sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /gang gi tshe bcom ldan 'das kyis dga' bo rab tu byung ba de'i tshe de la bzang mos chos gos bcags shing rab tu bcags pa dag mnyan yod du skur ro/ /de nas tshe dang ldan pa dga' bos chos gos bcags shing rab tu bcags pa sar pa ba sos phyis pa dag bgos/ lhung bzed 'tsher ba thogs nas dge slong rnams kyi mdun na 'gying bag tu rlom nas skabs de dge slong rnams kyis bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni dge slong dag chos gos bcags pa dang / rab tu bcags pa dag gyon pa las gyur to snyam du mkhyen nas dge slong rnams la bka' stsal pa/ dge slong dag de lta bas na skyes bu gti mug dga' bo chos gos bcags shing rab tu bcags pa sar pa ba sos phyis pa dag bgos lhung bzed 'tsher ba thogs nas/ dge slong rnams kyi mdun du 'gying bag tu rlom pa 'di ni mdzes pa ma yin zhing 'tsham pa ma yin no/ /de lta bas na dge slong gis chos gos bcags shing rab tu bcag pa dag bcang bar mi bya ste/ 'chang na 'gal tshabs can du 'gyur ro/ /bcom ldan 'das kyis dge slong gis chos gos bcags shing rab tu bcag pa dag bcang bar mi bya'o zhes bka' stsal pa dang / bram ze dang khyim bdag dad pa can dag dge slong rnams la chos gos bcags shing rab tu bcags pa dag 'bul ba na dge slong rnams kyis ma blangs nas/ de dag gis smras pa/ 'phags pa dag gang gi tshe sangs rgyas bcom ldan 'das 'jig rten du ma byung ba de'i tshe ni mu stegs can rnams sbyin gnas lags/ bcom ldan 'das 'jig rten du byung na da ltar khyed sbyin gnas lags na/ gal te khyed mi bzhes na ci bdag cag 'jig rten 'di nas 'jig rten pha rol tu dge ba'i lam rgyags ma mchis par mchi 'am zhes zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa dang / de lta bas na gnang gis blang bar bya zhing blangs nas 'tsher ba yal bar byas te yongs su longs spyod par bya'o/ /de dag gis lag pas mnyes nas yal bar ma nus nas/ bcom ldan 'das kyis bka' stsal pa/ zil pa la bzhag ste yal bar bya'o/ /zil pa la bzhag ste yal bar byas na 'on kyang thams cad kyi thams cad du yal bar ma gyur nas/ bcom ldan 'das kyis bka' stsal pa/ chu'i nang du bsug par bya'o/ /dge slong dag gis chu'i nang du bsugs na 'on kyang yal bar ma gyur nas/ bcom ldan 'das kyis bka' stsal pa/ de ltar byas kyang ma yal na yongs su longs spyad par bya ste/ 'di la 'gyod par mi bya'o/ /de bzhin du bram ze dang khyim bdag dad pa can dag gis dge 'dun la chos gos bcags pa dang rab tu bcags pa dag phul na de la yang rim pa 'di nyid kyis yongs su longs spyad par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe mnyan yod kyi bram ze dang khyim bdag rnams rtog khang du 'dus shing 'khod nas bar skabs kyi gtam 'di lta bu dag gleng ste/ dge sbyong gA+au ta ma bcom ldan 'das kyang bgo bsha' byed pa'i rang bzhin can ma yin la/ de'i nyan thos rnams kyang bgo bsha' byed pa'i rang bzhin can ma yin pas/ nyis na mu stegs can dag rung gi dge sbyong mgo reg de dag ni ma yin no zhes zer ro/ /de na bram ze gcig cig gis smras pa/ kho bos dge sbyong gA+au ta ma bgo bsha' byed pa'i rang bzhin can yin nam/ 'on te bgo bsha' byed pa'i rang bzhin can ma yin/ de'i nyan thos rnams bgo bsha' byed pa'i rang bzhin can yin nam/ 'on te ma yin pa sang khyed kyis mngon sum du gyur par bya'o/ /de dag gis smras pa legs te/ de bzhin du gyis shig dang blta'o/ /des ras yug cig khyer nas rgyal byed kyi tshal du song ste/ des ras yug de rgan pa'i mtha' logs su bzhag nas/ phyogs bzhi'i dge slong gi dge 'dun la phul te/ 'phags pa bdag gis ras yug 'di dge 'dun la phul gyis ci bder mdzod cig ces byas pa dang / de la dge 'dun gyi gnas brtan gyis smras pa/ bram ze chen po nad med par gyur cig /sbyin pa 'dis khyod kyi sems kyi rgyan dang / sems kyi yo byad dang / rnal 'byor gyi tshogs dang / don gyi mchog thob pa dang / lha dang mi'i gos dag thob par gyur cig ces byas pa dang / des bcos mar mgos phyag byas nas song ngo / /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo song la dge slong rnams la ras yug 'o ni bram zes glags btsal ba'i phyir phul gyis de lta bas na khyed kyis mnyam par bgos la/ la las ni cha gar thob shig /la las sgrog gzungs su/ la las ni lhan par/ la las ni chos gos kyi sgro gur gyis shig ces bsgo shig /btsun pa de ltar 'tshal lo zhes tshe dang ldan pa kun dga' bos bcom ldan 'das kyi ltar mnyan nas/ dge slong rnams la tshe dang ldan pa dag bcom ldan 'das kyi zhal nas ras yug 'o ni bram zes glags btsal ba'i phyir phul gyis/ de lta bas na khyed kyis mnyam par bgos la/ la las ni cha gar thob shig /la las ni sgrogs gzungs su/ la las lhan par/ la las ni chos gos kyi sgro gur gyis shig ces de skad bka' stsal to/ /dge slong rnams kyis smras pa/ btsun pa kun dga' bo bcom ldan 'das kyis ji skad bka' stsal pa de bzhin 'tshal lo zhes de rnams kyis de mnyam par gses/ de bzhin du bgos so/ /ji tsam na bram ze nang par sngar langs nas mnyan yod kyi sgo na 'dug go/ /dge slong dag kyang snga dro sham thabs bgos/ lhung bzed dang chos gos thogs te mnyan yod du bsod snyoms kyi phyir 'jug par brtsams pa dang / bram ze des smras pa/ 'phags pa bdag gis dge 'dun la ras phul ba gang lags pa de khyed kyis cir bgyis/ de na dge slong gcig cig gis smras pa/ bram ze chen po dge 'dun gyis mnyam par gses nas bgos te/ kho bo'i skal ba gang yin pa de ni cha gar btab pa 'di yin no/ /gzhan zhig gis smras pa/ kho bo'i ni sgrog gzungs su btags pa 'di yin no/ /gzhan zhig gis smras pa/ kho bo'i ni lhan par btab pa 'di yin no/ /gzhan zhig gis smras pa/ kho bo ni chos gos kyi sgro gur byas pa 'di yin no/ /bram ze des bsams pa/ bram ze rnams shAkya'i bu'i dge sbyong rnams bgo bsha' byed pa'i ngang tshul can ma yin no zhes zer ba ni gyi na zhig brdol te/ bdag nyid chen po 'di dag ni bgo bsha' byed pa'i ngang tshul can yin pas 'di dag kho na'i nang du rab tu 'byung ngo snyam nas/ de dad pa skyes te/ bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te/ bcom ldan 'das la 'di skad ces gsol to/ /btsun pa bdag legs par gsungs pa'i chos 'dul ba la rab tu 'byung zhing bsnyen par rdzogs pa dge slong gi dngos po 'thob na bdag bcom ldan 'das kyi spyan sngar tshangs par spyad pa spyod do/ /bcom ldan 'das kyis bka' stsal pa/ bram ze legs so legs so/ / khyod kyis sems bskyed pa ni bzang ste/ rab tu 'byung ba ni mchog go/ /phan yon lnga mthong ba'i mkhas pas rab tu 'byung ba kho nar mos par bya ba'i rigs te/ lnga gang zhe na/ bdag gis rang gi don ma 'dres pa thob par 'gyur ro zhes bya bar mthong ba'i mkhas pas rab tu 'byung ba kho nar mos par bya ba'i rigs so/ /bdag gang dag gi bran dang mngag gzhug pa dang / bsgo ba bzhin byed pa dang / rang dbang med pa dang / dga' mgur byed pa de dag gi yang mchod par bya ba dang / bsngags par bya bar 'gyur ro zhes bya bar mthong ba'i mkhas pas rab tu 'byung ba kho nar mos par bya ba'i rigs so/ /grub pa dang bde ba bla na med pa mya ngan las 'das pa 'thob par 'gyur ro zhes bya ba mthong ba'i mkhas pas rab tu 'byung ba kho nar mos par bya ba'i rigs so/ /bdag grub pa dang bde ba bla na med pa mya ngan las 'das pa thob pa las nyams kyang lha rnams kyi nang du skye bar 'gyur ro zhes bya bar mthong ba'i mkhas pas rab tu 'byung ba kho nar mos par bya ba'i rigs so/ /bdag grub pa dang bde ba bla na med pa mya ngan las 'das pa thob pa las nyams kyang lha rnams kyi nang du skye bar 'gyur ro zhes bya bar mthong ba'i mkhas pas rab tu 'byung ba kho nar mos par bya ba'i rigs so/ /sangs rgyas rnams dang / sangs rgyas kyi nyan thos dam pa yang dag par zhugs pa'i skyes bu dam pa rnams kyis rab tu byung ba rnam grangs du mar bsngags so zhes bya bar mthong ba'i mkhas pas rab tu 'byung ba kho nar mos par bya ba'i rigs so/ /de lta bas na legs kyis rab tu byung shig /de nas bcom ldan 'das kyis dge slong tshur shog zhes bya bas rab tu phyung bsnyen par rdzogs par mdzad nas gdams ngag gnang ba dang / des 'bad brtsal bsgrims pas 'khor ba'i 'khor lo g.yo ba dang mi g.yo ba cha lnga pa 'di nyid rig nas 'du byed kyi rnam pa thams cad nyams pa ltung ba dang 'gyes pa dang / 'jig pa'i chos nyid kyis 'joms par rtogs te nyon mongs pa thams cad spangs nas dgra bcom pa nyid mngon sum du byas te/ dgra bcom pa khams gsum las 'dod chags dang bral ba/ sems bong ba dang gser du mnyam pa/ nam mkha' dang lag mthil du mnyam pa/ ste'u dang tsan dan du mtshungs pa/ rig pas ma rig pa'i sgo nga'i sbubs dral ba/ mngon par shes pa dang / so so yang dag par rig pa thob pa/ srid pa dang rnyed pa dang bkur sti la rgyab kyis phyogs pa/ dbang po dang nye dbang du bcas pa'i lha rnams kyis mchod pa dang rjed pa dang gus par smra bar bya bar gyur to/ /de nas bcom ldan 'das kyis dge slong rnams la bka' stsal pa/ dge slong dag tshod zin pa la phan yon 'di dang / gzhan dag kyang yod do/ /dge slong dag de lta bas na zas kyi rnyed pa zhig byung na/ 'u su'i lo ma tsam du yang mnyam par byas te bgo bar bya'o/ /gos kyi rnyed pa zhig byung na mar me'i snying po tsam du yang mnyam par byas te bgo bar bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na bram ze gtsang sbra 'dod pa zhig rab tu 'byung bar 'dod pa des bsams pa/ gang zhig gi gtsang sbras bdag gi sems rangs pa de'i bstan pa la bdag rab tu 'byung ngo snyam nas des mu stegs can gyi gnas de dag byul na/ de dag gis gtsang sbras de'i sems ma rangs so/ /des bsams pa/ bdag gis mu stegs can thams cad bgams na gang gis kyang bdag gi sems ma rangs kyis/ da ni shAkya'i bu'i dge sbyong dag lus pas song ste de dag bgam par bya'o snyam nas de rgyal byed kyi tshal du song ba dang / ji tsam na tshe dang ldan pa shA ri'i bu ril ba thogs te phyi rol du chab khung sar chas pa mthong nas des bsams pa/ dge sbyong gA+au ta ma'i nyan thos kyi mchog 'di yin pas re shig 'di kho na gtsang sbra ji ltar byed pa blta'o snyam mo/ /de de'i phyi bzhin 'brang zhing song ba dang / dgra bcom pa rnams ni ma bsams par ye shes mthong ba mi 'jug pas tshe dang ldan pa shA ri'i bu sems pa la zhugs te/ bram ze 'di ci'i phyir bdag gi phyi bzhin 'brang snyam na ji tsam na gtsang sbra 'dod par mthong ngo / /yang bsam pa la zhugs te/ ci 'di la dge ba'i rtsa ba 'ga' zhig yod dam 'on te med snyam na yod par mthong ngo / /su la rag las snyam na bdag kho na la yin par mthong ngo / /des bsams nas/ lham phud/ chos gos dag bzhag ste/ de nas phyogs gcig tu sa phung bu bdun bzhag /gzhan zhig tu bdun/ gzhan zhig tu yang sa'i phung bu gnyis bzhag go/ /de nas sa phung bu gsum zhig khyer nas ci nas bram ze des mthong ba de ltar bshang ba bya bar brtsams so/ /de nas bshangs zin nas sa phung gcig gis rkub phyis/ gnyis kyis khrus byas so/ /de nas dal gyis langs nas phyogs der 'ongs te phyin nas lag pa g.yon pas sa phung bu bdun gyis khrus byas so/ /de nas gnyi gas phung bu bdun gyis khrus byas so/ /de nas sa phung bu gcig gis dpung pa man cad bkrus so/ /lag pa dag bkrus nas gnyis pas ril ba dag bkrus so/ /de nas dal gyis langs te spyod lam zhi bas chos gos bgos nas rkang pa dag bkrus pa dang / bram ze des mthong nas mngon par dad par gyur te/ des bsams pa/ shAkya'i bu'i dge sbyong rnams kyi sa'i phung bu gcig ni mchog yin gyi mu stegs can rnams kyi brgya yang de lta ma yin no snyam du rig nas/ tshe dang ldan pa shA ri'i bu'i rkang pa la gtugs nas tshe dang ldan pa shA ri'i bu la 'di skad ces smras so/ /'phags pa shA ri'i bu bdag legs par gsungs pa'i chos 'dul ba la rab tu 'byung zhing bsnyen par rdzogs pa dge slong gi dngos po thob na/ bdag 'phags pa shA ri'i bu'i spyan sngar tshangs par spyad pa spyod do/ /shA ri'i bus smras pa/ bram ze legs so/ /khyod kyis sems bskyed pa ni bzang ste/ rab tu 'byung ba ni mchog go/ /bcom ldan 'das kyis kyang phan yon lnga mthong ba'i mkhas pas rab tu 'byung ba kho nar mos par bya ba'i rigs te zhes bya ba nas/ sangs rgyas rnams dang / sangs rgyas kyi nyan thos dam pa yang dag par zhugs pa'i skyes bu dam pa rnams kyis rab tu byung ba rnam grangs du mar bsngags so zhes bya bar mthong ba'i mkhas pas rab tu 'byung ba kho nar mos par bya ba'i rigs so zhes gsungs shes bya ba'i bar snga ma bzhin no/ /de lta bas na legs kyis rab tu phyung shig /des de rab tu phyung bsnyen par rdzogs par byas te gdams ngag byin pa dang / des 'bad brtsal bsgrims pas 'khor ba'i 'khor lo g.yo ba dang mi g.yo ba cha lnga pa 'di nyid rig nas shes bya ba nas/ gus par smra bar bya bar gyur to zhes bya ba'i bar snga ma bzhin no/ /dge slong rnams the tshom skyes nas the tshom thams cad gcod par mdzad pa/ sangs rgyas bcom 'das la zhus pa/ btsun pa tshe dang ldan pa shA ri'i bus gtsang sbras bram ze 'di dad par bgyis nas 'khor ba'i dgon pa las bsgral te/ grub pa dang bde ba bla na med pa shin tu mthar thug pa mya ngan las 'das pa la bzhag pa la gzigs/ bcom ldan 'das kyis bka' stsal pa/ dge slong dag 'di 'ba' shig tu ma zad kyi/ ji ltar 'das pa'i dus na yang 'dis 'di rkun po las bzlog ste brtul zhugs kyi gnas lnga la bzhag pa de nyon cig /dge slong dag sngon byung ba ri brags shig na bram ze zhig gnas pa des rigs mnyam pa las chung ma blangs te/ de dang lhan cig rtse bar byed dga' bar byed/ dga' mgur spyod par byed do/ /de rtse bar byed dga' bar byed/ dga' mgur spyod par byed pa las dus gzhan zhig na chung ma la sems can zhugs par gyur to/ /de zla ba brgyad dam dgu 'das nas bu mo gzugs bzang ba/ blta na sdug pa mdzes pa zhig btsas te/ de btsas ston zhag bdun gsum nyi shu gcig tu rgya cher byas nas/ rigs dang 'thun pa'i ming btags so/ /de bskyed bsrings te chen mor gyur pa dang / re shig cig na ri brags der rkun po lnga brgya zhig 'joms 'dod cing lhags so/ /de dag gi sde dpon gang yin pa de skoms pas gdungs nas bram ze de'i khyim du zhugs pa dang / ji tsam na bu mo de mthong ngo / /mthong nas kyang smras pa/ bu mo chu byin cig /des smras pa/ re shig cung zhig gzhes shig /de cang mi smra bar 'dug go/ /des myur ba myur bar mar me bus pa dang / rkun po'i sde dpon bu mo de la mig gtad de rtog go/ /bu mo de mar me bus nas chu la lta ba dang / rkun po'i sde dpon gyis smras pa/ bu mo ci la lta/ des smras pa/ chu la lta'o/ /des smras pa/ de la bltar ci yod/ des smras pa/ 'dir sbur ma 'am skra song du 'ong bas so/ /des smras pa/ bu mo kho bo ni khyed la gnod pa bya ba'i phyir zhugs pa yin pas kho bo la dug glud par bya ba yin na khyod ko de skad smras pa lta zhig /des tshigs su bcad de smras pa/ gzhan gyi nor 'phrog g.yon can gyis/ /bya ba gang de rkun po rnams/ / byed dam 'on te min yang rung / /bdag gis chos ni rtag bsrung bya/ /de shin tu dga' nas smras pa/ bu mo khyod bdag gi sring mor bya na ci zhig bya smros shig /des smras pa/ khyod gzhan gyi nor la mngon par chags pa bskyed pas mdas gnad du bsnun nas dus byas par gyur na/ bdag ming po dang bral ba'i sdug bsngal gyis nyam thag cing cho nges 'debs na dga' bar mi 'gyur bas rkun po byed pa'i ming po gang yin pa de lta bu ni bdag la mi dgos so/ /de lta bas na gal te khyod kyis brtul zhugs kyi gzhi lnga yang dag par len nus na de lta na bdag gis khyod kyi sring mo bya'o/ /des mi 'dod bzhin du tshig yid du 'ong ba snyan pa'i tshul gyis smras pa dang / des de sring mo bya bar shin tu dga' zhing 'dod par gyur te/ des smras pa/ sring mo legs te de bzhin du bya'o/ /des de chom rkun las bzlog ste brtul zhugs kyi gnas lnga la bzhag go/ /dge slong dag ji snyam du sems de'i tshe de'i dus kyi rkun po'i sde dpon de ni bram ze 'di nyid yin no/ /de'i tshe de'i dus kyi bram ze'i bu mo de ni dge slong shA ri'i bu 'di nyid yin te/ de'i tshe yang 'dis de rkun po las bzlog ste bslab pa'i gzhi lnga la bzhag go/ /da ltar yang 'di gtsang sbras dad par byas nas 'khor ba'i dgon pa las bsgral te/ grub pa dang bde ba bla na med pa shin tu mthar thugs pa'i mya ngan las 'das pa la bzhag pa yin no/ /dge slong dag de ltar na gtsang sbra la phan yon 'di dang gzhan dag kyang yod do/ /de lta bas na ji ltar shA ri'i bus byas pa ltar dge slong dag gis rnam pa des gtsang sbra bya'o/ / sdom ni/ cha ga gzungs dang rngul gzan dang / /dge slong ma ni zla ba dang / /gnas ni bca' ba drug ldan dang / /khri la gsum ni 'dug bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe dge slong dag gis dus su bgos pa'i chos gos rnams mi bsri bar spyad pas de dag gi mtha' ma'i skud pa rnams zegs so/ /skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ chos gos zegs pa rnams kyi mthar cha ga gdab par bya'o/ /bcom ldan 'das kyis chos gos zegs pa rnams kyi mthar cha ga gdab par bya'o zhes gsungs pa dang / dge slong dag gis cha ga btab nas spyad par brtsams na/ 'on kyang skud pa rnams zegs par gyur nas/ bcom ldan 'das kyis bka' stsal pa/ bar bar du gzungs gdab par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bcom ldan 'das kyis snam sbyar ni lpags pa dang 'dra bar bsrung bar bya'o zhes gsungs pa dang / dge slong gzhan dag cig la gos spyad par 'os pa gzhan med nas de dag gis rtag par snam sbyar bgos pas/ de so ga tsha ba'i dus su mchan khung gi phyogs kyi rngul zags pas dri ma can du gyur cing dengs pa dang / dri mi zhim par gyur nas/ skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ mchan khung gi phyogs su rngul gzan gzhug par bya'o/ /bcom ldan 'das kyis mchan khung gi phyogs su snam sbyar gyi rngul gzan gzhug par bya'o zhes gsungs pa dang / dge slong dag gis rngul gzan ji lta bu bya ba mi shes nas bcom ldan 'das kyis bka' stsal pa/ gos chur khru phyed dang ngo / /zheng du mtho gang yin pa de phyogs der gzhug par bya'o/ /dge slong dag gis drubs pa dang / bcom ldan 'das kyis bka' stsal pa/ drub par mi bya'o/ /de dri ma can du gyur nas/ bcom ldan 'das kyis bka' stsal pa/ dus dus su bkru zhing kha bsgyur bar bya'o/ /dge slong dag gis ngos gcig tu bcug nas/ bcom ldan 'das kyis bka' stsal pa/ ngos gnyi gar gzhug par bya'o/ /bcom ldan 'das kyis kha bsgyur bar bya'o zhes gsungs pa dang / dge slong dag gis ngur smrig btsos nas/ bcom ldan 'das kyis bka' stsal pa/ ngur smrig tu btso bar mi bya'i btsag gis kha bsgyur bar bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na bram ze zhig 'dug pa des rigs mnyam pa las chung ma blangs te/ de de dang lhan cig rtse bar byed/ dga' bar byed/ dga' mgur spyod par byed do/ /de rtse bar byed/ dga' bar byed/ dga' mgur spyod par byed pa las dus gzhan zhig na de'i chung ma la sems can zhugs par gyur to/ /de zla ba dgu 'das pa dang bu mo zhig btsas te/ de'i btsas ston rgya cher byas nas de'i ming zla ba zhes bya bar btags te/ de bskyed bsrings nas chen mor gyur to/ /ji tsam dus gzhan zhig na skye dgu'i bdag mo chen mo gA+au ta mi las rab tu byung zhing bsnyen par rdzogs pa dang / de nas skye dgu'i bdag mo chen mo gA+au ta mI 'khor lnga brgyas bskor te/ bcom ldan 'das ga la ba der song ste phyin nas/ bcom ldan 'das kyi zhabs gnyis la mgo bos phyag 'tshal te sa phyogs gcig tu 'dug go/ /phyogs gcig tu 'dug pa dang / bcom ldan 'das kyis skye dgu'i bdag mo chen mo gau ta mi la chos dang ldan pa'i gtam gyis yang dag par bstan/ yang dag par len du 'jug par mdzad yang dag par gzeng bstod par mdzad/ yang dag par rab tu dga' bar mdzad do/ /rnam grangs du mar chos dang ldan pa'i gtam gyis yang dag par bstan/ yang dag par bskul/ yang dag par gzeng bstod/ yang dag par rab tu dga' bar mdzad de cang mi gsung bar bzhugs so/ /de nas skye dgu'i bdag mo chen mo gau ta mi stan las langs te/ bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /btsun pa bcom ldan 'das kyis dge slong rnams la dge slong gi 'dul ba bstan lags na/ kye ma bcom ldan 'das kyis thugs brtse ba nye bar bzung ste/ dge slong ma rnams la dge slong ma'i 'dul ba bstan du gsol/ bcom ldan 'das kyis bka' stsal pa/ gau ta mi de bzhin gshegs pa chos tshig re nas gsungs pa de ni gnas ma yin zhing go skabs med do/ /'on kyang gal te dge slong ma 'ga' zhig ngas lan cig bshad pa 'dzin par spro na de ltar na ngas bstan par bya'o/ /de nas de'i tshe dge slong ma zla ba 'khor de nyid du 'dus te 'dug par gyur to/ /de nas dge slong ma zla ba stan las langs te bcom ldan 'das ga la ba de logs su thal mo sbyar ba btud nas bcom ldan 'das la 'di skad ces gsol to/ /bcom ldan 'das kyis lan cig bka' stsal pa/ bdag gis gzung bar 'tshal na bstan du gsol/ de nas bcom ldan 'das kyis de la bstan pa dang / des lan cig gsungs pa bzung ngo / /de nas bcom ldan 'das kyis dge slong rnams la bka' stsal pa/ dge slong dag nga'i nyan thos kyi dge slong ma rnams kyi nang na thos pa 'dzin pa'i mchog ni 'di lta ste/ dge slong ma zla ba 'di yin no/ /bcom ldan 'das kyis dgongs pa/ thams cad du dge slong ma zla ba 'am/ zla ba lta bu 'byung bar mi 'gyur ro/ /de lta bas na dge slong rnams kyis kyang dge slong ma'i 'dul ba bzung nas bcang bar bya zhing / dge slong ma rnams la yang bstan par bya/ kha ton byed pa dang / 'dri bar byed pa dag la yang sbyin par bya'o snyam du dgongs nas/ dge slong rnams la bka' stsal pa/ dge slong dag gal te dge slong ma zla bas nga las dge slong ma'i 'dul ba lan cig bshad pa blangs mod kyi 'on kyang thams cad du dge slong ma zla ba 'am/ zla ba lta bu mi 'byung bas dge slong dag gis kyang dge slong ma'i 'dul ba gzung bar bya/ bcang bar bya zhing dge slong ma rnams la yang bstan par bya/ kha ton byed pa dang / 'dri bar byed pa dag la yang sbyin par bya'o/ /bcom ldan 'das kyis tshul khrims la brten cing tshul khrims la gnas nas zhi gnas dang lhag mthong gi chos gnyis bsgom par bya'o zhes gsungs pa dang / dge slong ma zla bas 'dul ba'i rjes su 'thun par tshul khrims la brten cing tshul khrims la gnas nas/ bsam gtan dang 'don pa'i sbyor bas 'bad/ brtsal/ bsgrims pas 'khor ba'i 'khor lo g.yo ba dang mi g.yo ba cha lnga pa 'di nyid rig ste/ 'du byed kyi rnam pa thams cad nyams pa dang / ltung ba dang / 'gyes pa dang / 'jig pa'i chos nyid kyis 'joms par rtogs te/ nyon mongs pa thams cad spangs nas dgra bcom pa nyid mngon sum du byas te/ dgra bcom ma khams gsum gyi 'dod chags dang bral ba/ sems gser dang bong bar mnyam pa/ nam mkha' dang lag mthil du mnyam pa/ ste'u dang tsan dan du mtshungs pa/ rig pas ma rig pa'i sgo nga'i sbubs dral ba/ mngon par shes pa dang / so so yang dag par rig pa rnams thob pa/ sred pa dang rnyed pa dang bkur sti la rgyab kyis bltas pa/ dbang po dang nye dbang du bcas pa'i lha rnams kyis mchod par bya ba dang / rjed par bya ba dang / gus par smra bar bya bar gyur to/ /de nas bcom ldan 'das kyis dge slong rnams la bka' stsal pa/ dge slong dag nga'i nyan thos dge slong ma rnams kyi nang na shes rab che ba dang / spobs pa che ba dang / thos pa 'dzin pa'i mchog ni 'di lta ste/ dge slong ma zla ba 'di yin no/ /dge slong dag the tshom skyes nas the tshom thams cad gcod pa sangs rgyas bcom ldan 'das la zhus pa/ btsun pa bcom ldan 'das dge slong ma zla bas las ci zhig bgyis na las de'i rnam par smin pas shes rab che zhing spobs pa che ba dang / bcom ldan 'das kyis kyang thos pa 'dzin pa'i mchog tu bstan la/ bcom ldan 'das kyi bstan pa la rab tu byung nas kyang nyon mongs pa thams cad spangs te dgra bcom pa nyid mngon sum du bgyis/ bcom ldan 'das kyis bka' stsal pa/ dge slong dag dge slong ma zla ba nyid kyis las byas shing bsags pa tshogs rnyed pa zhes bya ba nas/ lus can rnams la 'bras bur smin/ /ces bya ba'i bar snga ma bzhin no/ /dge slong dag sngon byung ba bskal pa dgu bcu rtsa gcig na skye dgu rnams kyi tshe lo brgyad khri thub pa na de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo bsgyur ba bla na med pa/ lha dang mi rnams kyi ston pa/ sangs rgyas bcom ldan 'das rnam par gzigs shes bya ba ston pa 'jig rten du byung ste/ de 'khor dge slong drug khri nyis stong dang rgyal po'i khab gnyen ldan du gshegs te/ gnyen ldan gyi tshal na bzhugs so/ /de nas de'i tshe rgyal po'i khab gnyen ldan na khyim bdag cig 'dug pa des rigs mnyam pa las chung ma blangs te/ de de dang lhan cig rtse bar byed/ dga' bar byed/ dga' mgur spyod par byed do/ /de rtse bar byed/ dga' bar byed/ dga' mgur spyod par byed pa las dus gzhan zhig na chung ma la sems can zhugs par gyur to/ /de zla ba dgu 'das nas bu mo zhig btsas te/ de'i btsas ston rgya cher byas nas rigs dang 'thun pa'i ming btags te/ de bskyed bsrings nas chen mor gyur pa dang / khyim bdag de dad pa can zhig pas dgag dbye'i tshe de khrid nas dge slong ma'i dbyar khang du song ste/ des dge slong ma rnams la so sor khab dang gri la sogs pa'i yo byad kyis dge slong ma'i dge 'dun la dgag dbye byed do/ /bu mo des mdzes par mthong nas dad pa skyes te/ pha la smras pa/ yab bdag gis kyang ji zhig cig gis dge slong ma'i dge 'dun la dgag dbye bgyi'o/ /khyim bdag des smras pa/ bu mo legs te de bzhin dgag dbye gyis shig /des khab dang / gri dang / gser dang / dbyigs la sogs pa yo byad kyi khyad par dag gis dge slong ma'i dge 'dun la dgag dbye byas te/ rab tu dang ba drag pos rgan pa'i mtha' nas rkang pa la phyag byas nas smon lam btab pa/ bdag gis sems bskyed de sbyin par bya ba'i chos yongs su btang ba'i dge ba'i rtsa ba 'dis shes rab che zhing spobs pa che ba dang / thos pa 'dzin par gyur cig ces byas so/ /dge slong dag ji snyam du sems/ khyim bdag gi bu mo gang yin pa de ni dge slong ma zla ba 'di nyid yin te/ 'dis gang yang dag par rdzogs pa'i sangs rgyas rnam par gzigs kyi dge slong ma'i dge 'dun la khab dang / gri dang / gser dang / dbyig la sogs pa yo byad kyi khyad par dag gis dgag dbye byas nas/ bdag gis sems bskyed cing sbyin par bya ba'i chos yongs su btang ba'i dge ba'i rtsa ba 'dis bdag shes rab che zhing spobs pa che ba dang / thos pa 'dzin par gyur cig ces smon lam btab po/ /de'i las kyi rnam par smin pas da ltar shes rab che zhing spobs pa che ba dang / thos pa 'dzin par gyur to/ /yang bcom ldan 'das 'od srung gi gsung rab las rab tu byung bar gyur te/ des de na tshe gcig tu tshangs par spyod pa spyad kyang yon tan gyi tshogs 'ga' yang thob par ma gyur to/ /mkhan po gang las rab tu byung ba de ni bcom ldan 'das yang dag par rdzogs pa'i sangs rgyas 'od srung gis thos pa 'dzin pa'i mchog tu bstan to/ /de na 'dis 'di ltar bdag gis bcom ldan 'das yang dag par rdzogs pa'i sangs rgyas yon gnas bla na med pa 'od srung gi spyan sngar tshe gcig gi bar du tshangs par spyod pa spyad kyang yon tan gyi tshogs 'ga' yang thob par ma gyur gyis/ bdag dge ba'i rtsa ba 'dis gang yang dag par rdzogs pa'i sangs rgyas 'od srung gis bram ze'i khye'u bla ma zhes bya ba la bram ze'i khye'u khyod skye dgu'i tshe lo brgya thub pa na de bzhin gshegs pa dgra bcom pa yang dag par rdzogs pa'i sangs rgyas shAkya thub pa zhes bya bar 'gyur ro zhes lung bstan pa de'i bstan pa la bdag rab tu byung nas nyon mongs pa thams cad spangs te dgra bcom pa nyid mngon sum du byas te/ ji ltar bdag gi mkhan po bcom ldan 'das yang dag par rdzogs pa'i sangs rgyas 'od srung gis thos pa 'dzin pa'i mchog tu bstan pa de bzhin du bdag kyang bcom ldan 'das shAkya thub pa/ shAkya'i rgyal po'i gtso bo des thos pa 'dzin pa'i mchog tu bstan par gyur cig ces smon lam btab po/ /de'i smon lam de'i dbang gis da ltar de bzhin gshegs pas thos pa 'dzin pa'i mchog tu bstan pa yin no/ /de lta bas na dge slong dag las gcig tu gnag pa rnams kyi rnam par smin pa yang gcig tu gnag / gcig tu dkar ba rnams kyi rnam par smin pa yang gcig tu dkar zhes bya ba nas/ brtsal bar bya ste/ dge slong dag gis de ltar bslab par bya'o zhes bya ba'i bar snga ma bzhin no/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe na dge slong gzhon nu zhig dge slong zhig dang lhan cig ljongs rgyu zhing mnyan yod du phyin nas dge slong de ni ri dgas 'dzin gyi ma'i khangs bzangs su song / gzhon nu de yang rgyal byed kyi tshal du song ste/ des dge slong zhig la gnas bcas nas de de'i thad na cung zad cig 'dug nas smras pa/ bdag gis 'phags pa gtsug lag khang che ge mo zhig tu lhung bzed dang chos gos bzhag ste mchis la de blangs nas slar mchi'o/ /des smras pa/ bu song la myur du shog shig /des smras pa/ slob dpon bdag de na ci zhig bgyid de/ bdag myur du mchis par bgyi'o zhes rkang pa la phyag byas te song nas rim gyis gtsug lag khang der phyin no/ / ji tsam na dge 'dun dag gis gtsug lag khang der gnas med par nub gcig kyang mi gnas par khrims su bya ba bcas so/ /des khrims bzhin du dge slong zhig la gnas bcas nas de nub mo nyal lo/ /nam nangs nas bsams pa/ bdag song la slob dpon de blta'o snyam nas de'i gnas khang du song ste/ sgo la brdabs te slob dpon phyag 'tshal lo/ /khams bde 'am zhes byas pa dang / bu bdag na ste mi bde'o/ /de 'di snyam du bdag slob dpon na ba bor te 'gro ba gang yin pa ni bdag gi tshul ma yin te/ bcom ldan 'das kyis kyang de'i phyir gcig gis cig bstang zhing na ba'i nad g.yog bya ba'i phyir gnas bca' bar gnang bas de'i phyir de'i nad g.yog byas te sos nas 'gro bar bsams so/ / des de'i g.yog byas nas sos par gyur pa dang / des smras pa/ slob dpon mkhyen par mdzod cig mchi'o/ /des smras pa/ bu cung zad mi bde ba lta med grang / slob dpon mi bde ba ni cung zad kyang ma mchis na 'on kyang bdag 'dir gnas su mchis pa ma lags kyi bdag gis chos gos dang lhung bzed bzhag pa len du mchis pa las dge 'dun gyi gnas med par nub gcig kyang mi gnas par khrims su bya ba bcas so/ /de'i slad du bdag gis khrims bzhin du gnas bcas pa dang / khyod na bar gyur nas bdag gis bsams pa/ bdag slob dpon bor nas 'gro ba gang yin pa ni bdag gi tshul ma lags te/ bcom ldan 'das kyis kyang de'i phyir gcig gis gcig bstang zhing na ba'i nad g.yog bya ba'i phyir gnas bca' bar gnang bas de'i phyir nad g.yog byas la sos na 'gro'o snyam pa las/ da ni khyod sos par gyur pas mkhyen par mdzod cig mchi'o/ /tshe dang ldan pa legs so legs so/ /khyod ji ltar zhugs pa de ltar lhan cig gnas pa dang / nye gnas dag gis mkhan po dang slob dpon dag la bsgrub par bya'o/ /lhan cig gnas pa dang / nye gnas rnams kyis mkhan po dang / slob dpon dag la de ltar sgrub na ji ltar ud pa la chu nas 'byung ba bzhin du dge ba'i chos rnams kyis 'phel bar 'gyur ro/ /skyes bu dam pa khyod bag yod par byos la song shig /des de la phyag byas nas rim gyis rgyal byed kyi tshal du phyin pa dang / de'i slob dpon gyis mthong nas smras pa/ tshe dang ldan pa 'ongs pa legs na/ ci ste ring zhig thogs nas 'ongs/ des ji ltar gyur pa smras so/ /des smras pa/ tshe dang ldan pa legs so legs so/ /khyod ji ltar zhugs pa de ltar gnas pa dang nye gnas dag gis mkhan po dang / slob dpon dag la bsgrub par bya'o/ /de ltar bsgrubs na ji ltar ud pa la chu nas 'byung ba bzhin du dge ba'i chos rnams kyis 'phel bar 'gyur ro/ /dge slong de 'gyod pa skyes te/ 'di'i gnas de nyid kyis chog gam/ 'on te gzhan zhig sbyin dgos snyam nas des skabs de dge slong dag la smras te/ dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong dag des re shig pa'i gnas bcas par zad de/ de lta bas na de'i gnas de kho nas chog gi gzhan ni ma yin no/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na dge slong spong ba pa zhig la dge slong gzhon nu zhig gis gnas bcas pa dang / de 'di snyam du bcom ldan 'das kyis dge slong dag rab tu phyung zhing bsnyen par rdzogs par byas nas gdams ngag ma byin zhing rjes su ma bstan pa bas ni shan pa byed kyang bla'o zhes gsungs te/ 'di ltar nye gnas kyang de bzhin du slob ma yin na/ bdag kyang spong ba pa zhig pas 'di gang zhig sbyin par byed pa 'ga' zhig la gtad do snyam bsams nas de dge slong zhig gi thad du song nas tshe dang ldan pa gzhon nu 'di bslab par gyis shig / des smras pa/ gal te khyod bdag gi g.yog byed na dam bcas te bslab par bya'o/ /des smras pa/ bslab tu gsol bgyi'o/ /des de bslab par brtsams so/ /dus gzhan zhig na de na bar gyur nas gnas bcas pa'i slob dpon des de'i nad g.yog byas so/ /ji tsam dus gzhan zhig na gnas bcas pa'i slob dpon de na bar gyur na/ des de slar ma bltas shing de bzhin du lan gsum gyi bar du yang ma bltas nas/ des de la smras pa/ tshe dang ldan pa khyod gzhan zhig gi drung du song la gnas chos shig / des smras pa/ 'phags pa bdag khyod kho na'i drung du mchis te/ bdag la phongs pa cung zad kyang ma mchis so/ /des smras pa/ tshe dang ldan pa khyod la phongs pa med pa ni bden na/ 'on kyang kho bo phongs te khyod na bar gyur pa na ngas khyod kyi nad g.yog byas na nga lan gsum gyi bar du na bar gyur pa na ci ste khyod kyis nga la slar ma bltas kyis song la gang zhig khyod 'dra ba'i ma gus pa la gnas ster ba de la gnas chos te 'dug shig / des spobs pa med de cang mi zer bar 'dug nas skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ gnas pas slob dpon la rim gro bya'o/ /ji tsam dus gzhan zhig na klog pa'i slob dpon na bar gyur na des slar ma bltas kyi gang gi tshe sos par gyur pa de'i drung du song ste des smras pa/ slob dpon bdag la lung phog shig /des smras pa/ tshe dang ldan pa kho bo na ba na khyod kyis res 'ga' yang slar ma bltas kyis khyod song la gang zhig khyod lta bu ma gus pa la klog tu 'jug pa de las lhogs shig / des spobs pa med de cang mi zer bar 'dug nas skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ klog pa'i slob dpon la rim gro bya'o/ /bcom ldan 'das kyis klog pa'i slob dpon la rim gro bya'o zhes gsungs pa dang / ji tsam dus gzhan zhig na klog pa'i slob dpon dang / gnas kyi slob dpon de gnyi ga na bar gyur nas des gang gi rim gro bya ba mi shes nas skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ gal te nus na gnyis ka'i bya'o/ /ji ste mi nus na gnas kyi slob dpon la bya ste 'di ltar klog pa med par ni 'dug tu rung gi gnas pa med par ni ma yin no/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /rab tu 'byung bar 'dod pa zhig dge slong zhig gi drung du song ba dang / des de rab tu phyung zhing bsnyen par rdzogs par byas te ljongs rgyu zhing song ngo / /lhan cig gnas pa de la zang zing gis bsdu ba ni byas na/ chos kyi ma byas pas de gzhan zhig la gnas te 'dug go/ /bcom ldan 'das kyis bsdu ba'i dngos po bzhi po sbyin pa dang / snyan par smra ba dang / don dpyod pa dang / don 'thun pa zhes gsungs pas des de la chos dang zang zing dag gis kyang sdud pas de slob dpon de la rtag tu lta zhing sems la 'dzin to/ /ji tsam dus gzhan na de'i mkhan po ci 'dod par ljongs brgyus nas slar mnyan yod du phyin pa dang de mthong nas tshangs pa mtshungs par spyod pa gsar bu gang dag yin pa de dag ni stan las ldang bar byed/ gang dag rgan pa de dag gis ni 'ongs pa legs so zhes bya ba'i kun tu spyod pas kun tu spyod do/ /de'i lhan cig gnas pa de ni stan las kyang ma langs pa dang / de la dge slong dag gis smras pa/ tshe dang ldan pa khyod kyi mkhan po 'ongs na tshangs pa mtshungs par spyod pa kha cig gis ni mngon du ldang bar byas/ kha cig gis ni legs par 'ongs so zhes kun tu spyod pas kun tu spyad na khyod de mthong bzhin du stan las kyang ma langs pa de ni rigs pa ma yin no/ /des smras pa/ bdag 'dis rab tu phyung nas ci zang zing gis/ bsdu ba byas sam/ 'on te chos kyis bsdu ba byas/ gang zhig dran nas ldang bar bya/ de dag gis smras pa/ tshe dang ldan pa de skad ma zer cig /bcom ldan 'das kyis kyang gang zag gcig gang zag gang zhig la brten nas de bzhin gshegs pas gsungs pa'i chos 'dul ba la skra dang kha spu bregs nas gos ngur smrig bgos te yang dag par dad pas khyim nas khyim med par rab tu byung ba'i gang zag des ni gang zag de la ji srid 'tsho ba'i bar du yang 'di lta ste/ chos gos dang / bsod snyoms dang / nad kyi gsos sman dang / mal stan dang / yo byad dag gis lan glan par sla ba ma yin no/ /zhes ma gsungs sam/ tshe dang ldan pa khyod de skad zer ba de ni legs pa ma yin no/ /de spobs pa med de cang mi zer bar 'dug nas/ skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ lhan cig gnas pa dang / nye gnas kyi dge slong rnams kyis mthong ma thag tu stan las ldang bar bya ste/ mkhan po mthong ma thag tu gnas bcas pa yang med par 'gyur ro/ /bcom ldan 'das kyis mkhan po mthong ma thag tu gnas bcas pa med par 'gyur ro zhes gsungs pa dang / gzhan dag cig gis mkhan po 'dug mi phod pa dag cig 'ongs shing de dag dus cung zad 'dug nas 'gro bar byed do/ /de la kha cig la ni mkhan po dang slob dpon rnams gshe/ kha cig la ni dga' bar gyur cing / de rnams gang dag la gshe ba de dag la ni sngun gnas bcas pa la yang mi ster cing bdag nyid kyang sdud par mi byed/ gang dag la dga' ba de dag ni sdud par byed pa nas/ sngun gyi slob dpon rnams 'khrug par gyur cing song ba de dag yang sdud par mi byed pa'i skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ 'dug mi phod pa gang dag yin pa de dag la yang thams cad bya zhing / sngon gyi slob dpon rnams la yang thams cad bya mod kyi/ 'on kyang gnyis ka'i sems kyang mgu ba lhur blang bar bya zhing gnyi ga la yang dri bar bya'o/ /gal te thams cad kyi thams cad du mkhan po dag 'dug na de nyid la dri bar bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong zhig gis gzhon nu gcig cig la gnas byin te/ de zla ba phyed cing gso sbyong gi tshe de'i thad du song nas smras pa/ slob dpon/ phyag 'tshal lo/ /zhu'o/ /gso sbyong byin gyis brlabs so/ /des smras pa/ bzhin bzangs kho bo ji ltar khyod kyi slob dpon du 'gyur/ des smras pa/ bdag ni khyod nyid la gnas bcas te mchis pas so/ /des smras pa/ bzhin bzangs gang zhig khyod lta bu ma gus shing zhe sa med pa la gnas ster ba de la gnos te 'dug la de nyid la zhus shig / de spobs pa med de cang mi zer bar 'dug nas/ skabs de bcom ldan 'das la dge slong dag gis gsol pa dang / bcom ldan 'das kyis dgongs pa nyes dmigs gang cung zad byung ba ni dge slong dag dus gsum du mkhan po dang slob dpon rnams la ltar mi 'gro ba las gyur to/ /de lta bas na lhan cig gnas pa dang / nye gnas rnams kyis dus gsum du mkhan po dang / slob dpon rnams blta ba'i phyir 'gro bar bya'o snyam du dgongs nas/ dge slong rnams la bka' stsal pa/ dge slong dag de lta bas na lhan cig gnas pa dang / nye gnas rnams kyis dus gsum du mkhan po dang slob dpon dag blta ba'i phyir 'gro bar bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong zhig gis dge slong gzhon nu gcig cig la gnas byin nas des de bu bzhin bskyangs so/ /des dus gzhan zhig na ljongs rgyu bar chas te smras pa/ slob dpon phyag 'tshal lo/ /mkhyen par mdzod cig /ljongs rgyur mchi'o/ /des smras pa/ bu mi bde ba cung zad med dam/ des smras pa/ slob dpon mi bde ba ni cung zad kyang ma mchis na 'on kyang bdag ljongs rgyu bar spro ste slar yang mchi'o/ /des smras pa/ bu de lta na song la lam kar 'gyod par gyur na slar ldog par gyis shig /des smras pa/ slob dpon legs gyis slar ldog par bgyi'o zhes de chas pa dang / ci tsam na de lam kar 'gyod pa skyes te des bsams pa/ bdag la slob dpon des yo byad thams cad sbyar ba las bdag song ba ma legs kyis slar ldog par bya'o snyam du bsams nas der slar log pa dang / slob dpon gyis mthong nas des smras pa/ bu ci ste slar log /cung zad brjed pa lta med dam/ des smras pa/ slob dpon brjed pa lta ci yang ma mchis na 'on kyang bdag gis bsams pa/ bdag la slob dpon gyis yo byad thams cad sbyar na don ci zhig la 'gro snyam nas bdag slar log pa lags so/ /des smras pa/ bu gal te slar log na legs so/ /khyod kyi slob dpon ni nga nyid yin no zhes smras nas bsams pa/ ci 'di'i gnas bcas pa de kho nas chog gam/ 'on te gdod sbyin par bya snyam ste/ des skabs de dge slong dag la smras nas/ dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong dag gal te slob dpon gyis ma btang ba la/ nye gnas kyis btang na gnas bcas pa ma zhig pa zhes brjod do/ /slob dpon gyis btang la nye gnas kyis ma btang na gnas bcas pa ma zhig pa zhes brjod do/ /slob dpon gyis kyang ma btang la nye gnas kyis kyang ma btang na gnas bcas pa ma zhig pa zhes brjod do/ /slob dpon gyis kyang btang la nye gnas kyis kyang btang na gnas bcas pa zhig pa zhes brjod par bya'o/ / sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na dge slong tshogs la ston pa zhig 'dug pa de gzhon nu mang po dag klog tu 'jug go/ /de dus gzhan zhig na na bar gyur pa dang / de dag gis slar ma bltas shing de bzhin du lan gsum na bar gyur kyang de dag gis slar ma bltas so/ /de dus gzhan zhig na sos par gyur pa dang / nye gnas dag de'i drung du 'ongs te/ de na gcig gis smras pa/ slob dpon bdag la lung dbog tu gsol/ gzhan zhig gis smras pa/ bdag la g.yar ton dbog tu gsol/ gzhan zhig gis smras pa/ zhu bar 'tshal lo/ /des smras pa/ tshe dang ldan pa dag bdag lan gsum gyi bar du na bar gyur kyang khyed gang gis kyang slar ma bltas pas gang zhig khyed lta bu ma gus pa la gdams ngag dang / kha ton dag 'bogs par byed pa de'i thad du deng shig /skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ klog pa'i slob dpon la rim gro bya'o/ /de dag thams cad kyis byas pa dang de rnams kyi dge ba'i phyogs nyams par gyur nas/ bcom ldan 'das kyis bka' stsal pa/ res su bcad de bya'o/ /de dag gis res kyis bya bar brtsams pa dang / rgan po rab tu byung ba zhig de la gnas te 'dug pa de la de dag gis smras pa/ rgan zhugs sang khyod la res bab bo/ /des smras pa/ tshe dang ldan pa dag ci slob dpon la res kyis g.yog bya 'am/ kho bo kho nas g.yog byas/ khyed cag sems las chung ngur gyis shig /de dag gis smras pa/ rgan zhugs gal te de lta na legs so/ /bcom ldan 'das kyis kyang gang nad pa la rim gro byed pa de ni nga la rim gro byed pa yin no/ /zhes gsungs pas skyes bu dam pa khyod kyis gyis shig /des de'i rim gro byed par brtsams nas/ de sos par gyur te de'i lus kyi gnas skabs shes nas smras pa/ slob dpon bdag la gdams ngag dbog tu gsol/ des smras pa/ khyod kyi res la ma bab pas re shig sdod cig / yang smras pa/ slob dpon kha ton dang zhu ba dag gnong shig /khyod kyi res la ma bab pas re shig sdod cig /des smras pa/ slob dpon rim gro byed pa ni bdag la res bab na klog pa dang 'don pa ni 'di dag la res bab pa ci'i slad du bdag 'chi'i mkhyen par mdzod cig / des smras pa/ bu thams cad byas ma 'gro bar sdod cig /de cang mi zer bar 'dug nas skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ gang zhig rtag tu g.yog byed pa de mi dga' bar ma gyur par gzhan dag la lung dang / kha ton dang zhu ba dag sbyin par bya'o/ /mkhas pa dang mi mkhas pa kha cig klog pa na mkhas pa dag la ni lung byin pas mi mkhas pa dag la gnod par gyur nas/ bcom ldan 'das kyis bka' stsal pa/ de rnams la yang lung dang kha ton dang dri ba dag skabs su sbyin par bya'o/ /bar sdom ni/ nad pa spong ba mkhan po dang / /zla ba phyed cing 'ong ba dang / / tshogs dag klog tu 'jug byed pa/ /bar sdom dag tu yang dag bstan/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /drug sde rnams rigs kyi khyim du song ba dang / de dag gis khri phyung ste 'phags pa ci bder bzhugs shig /de rnams cig car 'khod nas khri de chag par gyur te/ de dag gis rta rgad kyis btab pa dang / dge slong gzhan dag kyang der 'ongs te/ de dag gis de rnams mthong nas/ des smras pa/ tshe dang ldan pa khyed 'di lta bu'i 'phyar po byas nas/ dgod dam zhes smras pa dang / de dag gis smras pa/ ci chang 'thungs sam/ sgog skya zos/ des smras pa/ ci de dag kyang byed dam/ gzhan ci zhig byas/ khri ma bcag gam/ ci shing zad dam/ shing mkhan dag shi'am/ de dag ma rangs bzhin cang mi zer bar 'dug nas skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ de lta bas na khri gcig la drug 'dug par mi bya'o/ /bcom ldan 'das kyis khri gcig la drug 'dug par mi bya'o/ /zhes gsungs pa dang / lnga 'dug ste nyes dmigs de nyid du gyur nas/ bcom ldan 'das kyis bka' stsal pa/ lnga yang 'dug par mi bya'o/ /bzhi 'dug ste nyes dmigs de nyid du gyur nas/ bcom ldan 'das kyis bka' stsal pa/ bzhi yang 'dug par mi bya'i 'on kyang khri la ni gsum 'dug par mi bya'o/ /khri'u la ni gnyis so/ /khri'u chung la ni gcig go/ / sdom ni/ nad pa yi ni nad g.yog dang / /shing la 'dzeg par mi bya dang / /bkrabs pa bsnyen rdzogs mi bya dang / /lag pa gcad par mi bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /sangs rgyas bcom ldan 'das la tshe dang ldan pa nye bar 'khor gyis zhus pa/ btsun pa bcom ldan 'das kyis nad pa'i rim gro bya'o zhes gsungs pa gang lags pa de yo byad ji lta bu dag gis bgyi/ bcom ldan 'das kyis bka' stsal pa/ nye bar 'khor rang bzhin gyis kha na ma tho ba dang bcas pa dag ma gtogs pa gzhan dag gis bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /tshe dang ldan pa nye dga'i dge tshul bsnyen par rdzogs par 'dod nas des bsnyen par rdzogs par bya ba'i ched du las byed pa'i dge slong dang / gsang ste ston pa dang / dge slong gang dag dkyil 'khor du 'ong ba la gsol ba btab ste/ de nas dge tshul dang stan khyer te dkyil 'khor du sngar song nas dkyil 'khor phyag dar byas te stan bshams na dge slong dag ma 'ongs te/ nye dgas phan tshun du bltas na des me tog gi shing zhig mthong ste/ des smras pa/ dge tshul re shig me tog dag ltogs la dge slong rnams la rims shig / des 'dzegs pa dang ma stes te lhung nas lag pa chag ste/ de nyid de'i bsnyen par rdzogs pa dge slong gi dngos po'i bar chad du gyur nas skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ dper na 'khor los sgyur ba'i rgyal po'i bu thu bo dbang bskur bar 'os pa dbang ma bskur bar 'dug cing mtshams la bab pa bsrung bar bya ba dang / bskyang bar bya ba yin pa de bzhin du dge slong gis dge tshul bsnyen par rdzogs par 'dod pa yang bsrung zhing bskyang bar bya ba yin no/ /de lta bas na dge slong gis bsnyen par rdzogs par 'dod pa'i dge tshul shing la 'dzeg tu mi gzhug ste/ 'dzeg tu 'jug na 'gal tshabs can du 'gyur ro/ / //'dul ba phran tshegs kyi gzhi/ bam po bcu dgu pa/ sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /yul ko sa la'i rgyal po gsal rgyal la nang mi gcugs pa chen po zhes bya ba zhig yod do/ /de dus gzhan zhig na rgyal pos spyos nas des bsams pa/ rgyal po dag ni ji ltar byas kyang mgu dka' bas song la rab tu 'byung bar bya'o snyam nas de rgyal byed kyi tshal du song ngo / /drug sde rnams kyi kun tu spyod pa ni drug sde gang yang rung ba zhig gis rgyal byed kyi tshal gyi sgo mi stongs pa yin pas tshe dang ldan pa nye dga' sgo na 'dug go/ /des de snga na ngo shes pas des de la 'ongs pa legs so zhes bya ba kun tu spyad nas chen po khyod zla ba lta bur gnas na ring mo zhig lon te ga las 'ongs shes byas pa dang / des smras pa/ 'phags pa yang dang yang mthong bas ni brnyas par 'gyur gyi yun ring zhig lon te mthong ba ni legs pa yin no/ /chen po dgos pa ci zhig la 'ongs/ 'phags pa rgyal po ni mgu dka' bas lha'i thugs mnyes par bya mi nus te rab tu 'byung ngo / /chen po khyod kyi sems bskyed pa ni bzang ste legs so/ /rab tu 'byung ba ni mchog yin te/ bcom ldan 'das kyis kyang phan yon rnam pa lnga mthong ba zhes bya ba nas/ sangs rgyas rnams dang / sangs rgyas kyi nyan thos dam pa yang dag par zhugs pa skyes bu dam pa rnams kyis rab tu byung ba rnam grangs du mar bsngags pa zhes bya ba'i bar snga ma bzhin no/ /legs kyis rab tu byung shig ces de rab tu byung nas bsnyen par rdzogs par byas so/ /rgyal pos blon po dag la bka' stsal pa/ shes ldan dag chen po mi snang na mi na grang / de dag gis smras pa/ lha de bro 'tshal ba ni ma mchis mod kyi lhas ci zhig bka' stsal na rgyal byed kyi tshal du mchis nas rab tu byung lags/ sus rab tu phyung / 'phags pa nye dgas so/ /rgyal pos de thos nas khros te/ des de la pho nya btang nas 'phags pa dag gis spyos pa khyod kyis rab tu dbyung ngam/ khyod kyis chen po rab tu phyung na da bdag dang 'phags skyes po dang / phreng ldan ma dang / dbyar byed ma dag kyang rab tu phyung la khyed rang rgyal srid gyis shig /des kyang de la lan spring ba/ lha kye tshur shog /khyod dang / 'phags skyes po dang / phreng ldan ma dang / dbyar byed ma rab tu phyung la nga nyid rgyal srid byed do/ /'di ltar ngas khyod kyi chen po 'am gzhan yang rung ba bslus te rab tu phyung ngam ci/ nged ni gang zhig rgyal byed kyi tshal du 'ongs nas nged la gsol ba 'debs pa de rab tu 'byin to/ /rgyal pos thos te ma dad par gyur nas skabs de bcom ldan 'das la dge slong dag gis gsol pa dang / bcom ldan 'das kyis dgongs pa nyes dmigs gang cung zad byung ba ni dge slong dag rgyal pos bkrabs pa rab tu 'byin pa las gyur gyis de'i phyir dge slong gis rgyal pos bkrabs pa rab tu mi dbyung bar dgongs nas/ dge slong rnams la bka' stsal pa/ dge slong dag skyes bu gti mug nye dgas blon po rab tu phyung bas rgyal po ma dad par gyur to/ /de lta bas na dge slong dag gis rgyal pos bkrabs pa rab tu dbyung bar mi bya'o/ /gang yang rung ba zhig gi drung du rab tu 'byung bar 'dod pa zhig nye bar 'ongs na des de la rgyal pos bkrabs pa ma yin nam zhes dri bar bya ste/ ma dris par rab tu 'byin na 'gal tshabs can du 'gyur ro/ /bcom ldan 'das kyis rgyal pos bkrabs pa rab tu dbyung bar mi bya'o zhes gsungs pa dang / kha cig yul ring po dag nas kyang 'ong / rgyus mi shes pa yang 'ong ma gnang ba dag kyang 'ong nas dge slong dag the tshom du gyur te de dag kyang rab tu ma phyung nas/ bcom ldan 'das kyis bka' stsal pa/ gang yul ring po dang / rgyus mi shes pa dang / ma gnang ba dag 'ong ba de dag rab tu dbyung bar bya ste 'di la 'gyod par mi bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /tshe dang ldan pa dga' bo skra dang kha spu bregs nas ring po ma yin par snga dro chos gos bgos te lhung bzed thogs nas mnyan yod du bsod snyoms la zhugs so/ /de rim gyis srang du song ba dang / ji tsam na bram ze zhig bram ze'i khye'u lnga brgya tsam bram ze'i gsang tshig klog tu 'jug ste/ de yang gtum po gzu lums can rtsub mo zhig yin pas des bram ze'i khye'u zhig la smras pa/ kye bram ze'i khye'u khyod dge sbyong mgo reg 'di'i mgor ltag dbyug snun nus sam/ des smras pa/ mkhan po te por rngo thog go zhes de de'i drung du song nas de'i mgor ltag dbyug gis brgyab po/ /tshe dang ldan pa dga' bo log ste bram ze de la bltas pa dang / de je khros nas des smras pa/ bram ze'i khye'u yang rgyob shig /des de la lan gnyis su ltag dbyug gis brgyab pa dang / tshe dang ldan pa dga' bos bsams pa/ bdag gis bltas te ci rung 'gro'o snyam ste song ngo / /rgyal byed kyi tshal du phyin nas zas kyi bya ba byas te lhung bzed bkrus nas dge slong dag la smras pa/ tshe dang ldan pa dag srang che ge mo zhes bya bar ma 'dong shig /dge slong dag gis smras pa/ ci'i phyir/ des smras pa/ de na bram ze gtum po gzu lums can rtsub mo zhig bram ze'i khye'u lnga brgya tsam zhig la bram ze'i gsang tshig klog tu 'jug pa 'dug ste/ des bdag la ltag dbyug gnyis bsnun no/ /de dag gis smras pa/ khyod kyis ci nyes/ des smras pa/ tshe dang ldan pa dag gcig ni nyes/ gnyis pa ni ma nyes so/ /ji ltar ni nyes ji ltar ni ma nyes/ gcugs med par des kho bo la ltag dbyug gis bsnun nas kho bos log ste bltas pa dang / des lan gnyis bsnun nas kho bos de la log ste bltas pa gang yin pa de ni nyes so/ /snga ma ni ma nyes so/ /tshe dang ldan pa nye dgas thos nas/ des smras pa/ 'phags pa ci zhig gsung / des smras pa/ chen po ma lags so/ /nye dgas smras pa/ 'phags pa de bdag gis thos kyis yang gsungs shig /des ji ltar gyur pa smras pa dang / nye dgas mgo lan gsum gcogs nas mjal to zhes byas te mi dga' bar bya'o/ /snyam nas de mgo bzlas te bregs nas til mar gyis bskus te bkrus nas snga dro sham thabs bgos lhung bzed dang chos gos thogs te mnyan yod du bsod snyoms la zhugs so/ /de rim gyis srang du phyin na bram ze de gzhan du yengs pas des de ma mthong ngo / / tshe dang ldan pa nye dga' de'i mdun du 'chag par brtsams pa dang / bram ze des mthong nas des bram ze'i khye'u zhig la smras pa/ bram ze'i khye'u song la dge sbyong mgo reg 'di'i mgor ltag dbyug gis snun cig /tshe dang ldan pa nye dgas de thos nas smras pa/ bkren pa 'o ni gtang ci dgos/ khyod nyid tshur/ de skad smras pa dang / bram ze de khros te des bdag nyid song nas nye dga' la ltag dbyug gis bsnun nas nye dgas bram ze de'i dpung pa nas bzung ste bkren pa nye dga' la yang rdeg gam/ tshur rgyal po'i pho brang du 'dong ngo zhes des de'i dpung pa nas bzung ste drangs pa dang / des bram ze'i khye'u de dag la bos nas de dag gis kyang de'i dpung pa ya gcig nas bzung ste drangs so/ /nye dga' tshan po che chen po'i stobs can des bram ze'i khye'u lnga brgya po de dag dang / bram ze de drangs nas rgyal po'i pho brang gi sgor song ste 'dug go/ /'di ni chos nyid yin te/ gang gi tshe drug sde rnams khros nas rgyal po'i pho brang gi sgo na 'dug pa de'i tshe rgyal po gsal rgyal gyi khang bzangs g.yo bar 'gyur ro/ /rgyal pos bltas te mthong nas mi zhig la bsgo ba/ kye skyes bu sgor 'phags pa drug sde 'ga' zhig byon par ma gyur grang / song la ltos/ des byung ste/ bltas na tshe dang ldan pa nye dga' bram ze'i khye'u lnga brgya tsam dang sgo na 'dug nas/ des rgyal po la smras pa/ lha 'phags pa nye dga' chab sgo na mchis so/ /rgyal pos smras pa/ de nang du spyan drongs shig /de nang du 'ongs te smras pa/ lha 'phags pa dga' bo rab tu byung bar ma gyur na ci zhig tu 'gyur/ 'phags pa stobs kyis 'khor los sgyur ba'i rgyal por 'gyur ro/ /'o na khyod de'i cir 'gyur/ 'phags pa g.yog tu 'gyur ro/ /lha khyod kyis dge slong rnams ni gzhon nu'i thabs su gnang / dge slong ma rnams ni btsun mo'i 'khor gyi thabs su gnang ste/ de ltar bdag cag la'o byams na bram ze gcig cig gis lha khyad du bkum ste/ slob dpon dga' bo la ltag dbyug gnyis bsnun/ bdag la yang ltag dbyug gis brgyab po/ /rgyal po khros te des blon po rnams la bka' stsal pa/ song la bram ze de'i lag pa chod cig /des de khrid de srang du song na bram ze de'i pha ma gnyis kyis thos nas de dag mdza' bo dang / phu nu dang gnyen dag dang 'dus shing snying rje rje ltar sma bab pa'i tshig dal gyis smra zhing kyi hud bu zhes cho nges 'debs bzhin srang du song nas de dag dang skye bo'i tshogs des blon po de la smras pa/ kye dge ba lha la nyes pa byas pa lag pa bcad pa'i ni rigs na bram ze 'di lag pas 'tsho ba zhig pas lag pa g.yon pa gcad pa'i rigs so/ /des de'i lag pa g.yon pa bcad pa dang / ji tsam dus gzhan zhig na bram ze de de bzhin du lag pa g.yon pa g.yogs nas g.yas pas klog par byed do/ /re shig cig na nye dgas mthong nas de shin tu khros te rgyal po'i thad du song nas smras pa/ rgyal po rnams kyi bde ba ni 'di lta ste/ bka'i 'bras bu brtsan pa 'dir zad na de yang lha la med do/ /des smras pa/ 'phags pa ci zhig byas/ nye dgas smras pa/ lha bram ze de'i lag pa ma bcad do/ /rgyal pos blon po rnams bos te smras pa/ khyod kyis bram ze de'i lag pa ma bcad dam/ des smras pa/ lha bkum lags so/ /de lta na 'o na 'phags pa nye dga' 'di skad zer ro/ /tshe dang ldan pa nye dgas smras pa/ lha bram ze de de bzhin du lag pa g.yas pas sgyur sgyur bgyid cing bram ze'i khye'u rnams klog tu 'jug go/ /blon pos smras pa/ lha de'i pha ma dag gi mchid nas bram ze 'di lag pas 'tsho ba zhig pas lag pa g.yon pa chod cig ces mchi ste/ de'i slad du bdag gis de'i sug pa g.yon pa bkum mo/ /rgyal pos smras pa/ gal te de'i pha ma dag gis lag pa g.yon pa gcod du bcug na ngas g.yas pa gcod du gzhug gis song la chod cig / des de'i drung du song nas lag pa g.yas pa bcad pa dang / de lag pa gnyi ga 'phyang zhing 'dug go/ /de sdug bsngal zhing 'dug pa dang nye dga' bos smras pa/ bram ze ci ste kho bo cag la ltag dbyug gis mi rdeg par lag pa spyangs te 'dug /de sma bab nas dregs pa dang nga rgyal bcag ste cang mi zer bar 'dug pa dang / bram ze dang khyim bdag rnams dge sbyong shAkya'i bu rnams ni snying rje med pa ste/ chad pas bcad nas kyang zhe gcod par byed do zhes 'phya bar byed/ smod par byed/ kha zer bar byed pa'i skabs de dge slong rnams kyis bcom ldan 'das la gsol pa dang / bcom ldan 'das kyis dgongs pa nyes dmigs gang cung zad byung ba ni dge slong dag lag pa yang gcod du 'jug pa las gyur gyis/ de lta bas na dge slong gis lag pa dang / rkang pa dag gcad par mi bya'o snyam du dgongs nas/ dge slong rnams la bka' stsal pa/ dge slong dag skyes bu gti mug nye dgas dge sbyong gi las ma yin pa byas te/ dge slong dag nga'i bstan pa la rab tu byung ba rnams las de lta bu byed du 'jug pa de ni mdzes pa ma yin/ 'tsham pa ma yin no/ /de lta bas na dge slong gis lag pa dang rkang pa dag gcad par mi bya'o/ /gcod par byed na nyes pa sbom por 'gyur ro/ /dge slong dag the tshom skyes nas/ the tshom thams cad gcod pa sangs rgyas bcom ldan 'das la zhus pa/ btsun pa bram ze de tshe dang ldan pa dga' bos ni bsrungs/ nye dgas ni yongs su btang ba la gzigs/ bcom ldan 'das kyis bka' stsal pa/ dge slong dag da ltar 'ba' shig tu ma zad kyi ji ltar 'das pa'i dus na yang dga' bos ni bsrungs/ nye dgas ni btang ba de nyon cig /dge slong dag sngon byung ba bskyed mos tshal shing sna tshogs kyi tshal gyis brgyan pa me tog dang 'bras bu dang chu phun sum tshogs pa zhig na drang srong 'bras bu dang / rtsa ba dang / chu za zhing 'thung ba g.yang gzhi dang shing shun gyon pa zhig gnas te de shing bil ba'i drung na 'dug cing rang gi don sems par byed do/ /de'i steng nas spre'u zhig gis bil ba'i 'bras bu zhig 'phangs pa des drang srong de'i mgo snad nas smras pa/ khyod med 'gyur ba gang yin pa/ /de ni kho bo mi byed kyi/ /khyod med 'gyur ba gang yin pa/ /de ni khyod nyid byed cing 'dug /drang srong de'i smos 'drin rngon pa zhig 'dug pa de ri dgas shor du song ba las bsti gnas der phyin to/ /drang srong de ni bya ba 'ga' zhig gi phyir shing bil ba'i drung nas gzhan zhig tu song ngo / /rngon pa de de mi snang nas te por lta zhing bil ba de'i drung na 'dug go/ /spre'u des rngon pa de'i mgor bil ba'i 'bras bu gcig 'phangs pa dang / rngon pa de spyi gcer zhig pas de'i glad pa snad nas bil ba'i 'bras bus bsnun pas bskyed pa'i sdug bsngal dang yid mi bde bas gyen tu blta bar brtsams pa dang / ji tsam na spre'u mthong nas de khros pas gzhu rna drung du bkang ste dug mda' gcig de'i gnad du bsnun pa dang / sa la lhung nas dus las 'das so/ /dge slong dag ji snyam du sems/ de'i tshe de'i dus kyi drang srong gang yin pa de ni dge slong dga' bo 'di nyid yin no/ /de'i tshe de'i dus kyi spre'u gang yin pa de ni bram ze 'di nyid yin no/ /de'i tshe de'i dus kyi rngon pa gang yin pa de ni nye dga' 'di nyid yin te/ de'i tshe yang 'di dga' bos ni bsrungs la/ nye dgas ni yongs su btang ngo / / da ltar yang dga' bos ni bsrungs la/ nye dgas ni yongs su btang ngo / / sdom ni/ rigs ngan dang ni 'char kar bcas/ /snam sbyar dang ni brnyas pa dang / /mtshams bzangs dang ni bzang sbyin dang / /bdag gir 'du shes lhung bzed blangs/ /ma pham pa dang zla srungs kyi/ /rang gi bcos bu'i ras brkus pa'o/ /sdom gyi tshigs su bcad pa 'di ni phas pham pa gnyis pa las ji skad 'byung ba de bzhin du rgyas par sbyar bar bya ste/ khyad par cung zad kyang med do/ / sdom ni/ phag dang bu ram shing dang ni/ /ta la chos gos gnag dga' bo/ /spra tshil gyis ni byugs pa'i snod/ /mching bu'i phor ba sbom dga' mo'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe mu ge'i dus la bab nas ma byin par len pa rnams kyis phag dag cig brkus te tshal stug po'i nang du dong ste der de dag gis de bsad do/ /bsad nas sha bzang po rnams zos te/ mgo dang / rus thogs dang / sug pa rnams bor ro/ /drug sde rnams kyi kun tu spyod pa ni nang par sngar langs nas khang pa'i steng du 'dzegs te phyogs bzhir lta zhing de dag gis gang na dud pa 'thul ba dang / bya rgod lding ba dag mthong ba der thams cad 'dus te 'dong bas nang par sngar langs nas khang pa'i steng du 'dzegs te phyogs bzhir blta bar brtsams pa dang / ji tsam na tshal stug po'i nang na dud pa dang bya rgod lding ba mthong nas smras pa/ dga' bo nye dga' tshal gyi nang na dud pa 'thul zhing bya rgod lding bas gal te cung zad rnyed kyang srid pas 'dong ngo / /de dag myur ba myur bar dong ba dang / phag gi mgo dang / rus thogs dang / sug pa bor ba dag mthong nas de dag gis smras pa/ dga' bo nye dga' phyag dar lta bu zhig rnyed kyis btsos te bza' bar bya'o/ /de dag gis bsdus nas 'tshed pa na phag bdag rnams tshol zhing der lhags pa dang / ji tsam na drug sde rnams phag sha 'tshod pa mthong ste/ de dag gis smras pa/ 'phags pa dag drang srong gi rgyal mtshan yang thogs la bya ba 'di lta bu yang byed dam/ de dag gis smras pa/ bzhin bzangs kho bo cag srog gcod du rung na lta bdag cag gis ri dgas bzang po bzangs po dag bsad nas sha bzang po dag bza' mi nus sam ci/ ci'i phyir kho bo cag mgo dang rus pa dang / sug pa dag bsdus nas 'tshed/ ma byin par len pa 'ga' zhig gis brkus te zos nas bor ba 'di dag kho bo cag gis phyag dar bor ba lta bu blangs par zad do/ /de dag gis smras pa/ 'phags pa gal te de lta na 'on kyang 'di ltar khyed rab tu byung ba yin pas 'di ni 'tsham pa ma yin no zhes zer ba'i skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ dge slong dag dge slong gis de lta bu'i phyag dar blang bar mi bya'o/ /blangs na 'gal tshabs can du 'gyur ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /ma byin par len pa rnams kyis bu ram gyi shing dag brkus te zos nas de dag gis rtsa ba dang / thor to ro chung ba dag bor ba dang / drug sde rnams phan tshun 'phyan zhing phyogs der phyin pa dang / de dag gis mthong nas smras pa/ dga' bo nye dga' phyag dar lta bu 'di rnyed kyis blang bar bya'o/ /de dag gis blang bar brtsams na/ bu ram shing srung ba dag tshol zhing der lhags pa dang / ji tsam na drug sde rnams bu ram shing gi rtsa ba dang / thor to ro chung ba dag len pa mthong nas des smras pa/ 'phags pa dag drang srong gi rgyal mtshan yang thogs la 'di lta bu'i sdig pa'i las kyang byed dam/ de dag gis smras pa/ bzhin bzangs gal te bdag cag ma byin par len du rung na lta bdag cag gis bdams shing bdams nas bu ram shing bzang po 'am/ gzhan yang nor bu dang mu tig la sogs pa rin po che dbrog par mi nus sam ci/ ma byin par len pa 'ga' zhig gis brkus te zos nas da gzod kho bo cag gis rtsa ba dang / rtse mo ro chung ba dag bsdus par zad do/ /de dag gis smras pa/ 'phags pa gal te de lta na 'on kyang 'di ltar khyed rab tu byung ba yin pas 'di ni 'tshams pa ma yin no/ /de dag cang mi zer bar 'dug nas skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ dge slong dag dge slong gis de lta bu'i phyag dar blang bar mi bya'o/ /dge slong de lta bu'i phyag dar len na 'gal tshabs can du 'gyur ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /ma byin par len pa rnams kyis shing ta la'i 'bras bu dag brkus nas nags stug po'i nang du khyer nas bdams shing bdams te zos te snyigs ma dag bor ba dang / drug sde rnams phan tshun 'khyam pa las phyogs der phyin nas de dag gis de mthong nas/ de dag gis smras pa/ dga' bo nye dga' phyag dar lta bu 'di rnyed kyis bsdu bar bya'o/ /de rnams kyis de bsdu bar brtsams na/ shing ta la'i srung ma 'tshol zhing der son pa dang / ji tsam na drug sde rnams shing ta la'i mgo thogs dang snyigs ma dag sdud pa mthong nas/ des smras pa/ 'phags pa drang srong gi rgyal mtshan yang thogs la 'di lta bu'i sdig pa'i las kyang byed dam/ de dag gis smras pa/ bzhin bzangs gal te kho bo cag ma byin par len du rung na lta bdams shing bdams te shing ta la'i 'bras bu bzang po dag dang / gzhan yang nor bu dang mu tig la sogs pa rin po che dag dbrog par mi nus sam ci/ ma byin par len pa 'ga' zhig gis 'di dag brkus pa las kho bo cag gis nyal nyil bsdus par zad do/ /des smras pa/ gal te de lta na yang 'di ltar khyed rab tu byung ba yin pas 'di ni 'tsham pa ma yin no/ /de dag cang mi zer bar 'dug nas skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ dge slong dag gis de lta bu'i phyag dar blang bar mi bya'o/ /dge slong gis de lta bu'i phyag dar blangs na 'gal tshabs can du 'gyur ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe mnyan yod na spos 'tshong gi khye'u zhig 'dug pa de la la ba bzang po zhig bdog nas de de la shin tu chags so/ /de dus gzhan zhig na na bar gyur pa dang / la ba de la ji lta bar dbyig dag la ni mya ngan mi byed do/ /de rtsa ba dang / sdong bu dang / 'dab ma dang / me tog dang / 'bras bu'i sman dag byas kyang phan par ma gyur te/ des gang gi tshe lus kyi gnas skabs shes pa de'i tshe nye du rnams bsogs te smras pa/ gang gi tshe kho bo shi bar gyur na de'i tshe khyed cag gis ma bsregs par 'on kyang la ba 'dis dkris nas 'or cig /de dag gis de dbugs phyung ste smras pa/ ji snyed nad kyis btab pa thams cad 'chi 'am ci sos par 'gyur bas ma 'jigs shig / de tshe zad pa zhig pas rim gro dang gsos byas kyang ma phan te shi nas la ba la lhag par chags pas yi dags lba ba can rnams kyi nang du skyes so/ /de nye du rnams kyis gos sngon po dang / ser po dang / dmar po dang / dkar po dag gis khyogs brgyan nas la ba de nyid kyis dkris te dur khrod du bor ro/ /de dge slong dag gis mthong nas/ de dag gis dge slong dur khrod pa gnag dga' bo zhes bya ba de la smras pa/ tshe dang ldan pa spos 'tshong gi khye'u shi ba de nye du dag gis la bas dkris nas/ dur khrod du bor gyis song la phyag dar khrod long shig /de myur ba myur bar dur khrod du song nas la ba blangs pa dang / mi ma yin pa des smras pa/ 'phags pa gnag dga' bo bdag gi la ba ma bsnams shig / dur khrod pa phal cher snying stobs can yin pas des de la smras pa/ bkren pa khyod la ba 'di la lhag par chags pa yi dags lba ba can rnams kyi nang du skyes na/ da yang ci dmyal bar skye bar 'dod dam thong shig ces byas na/ 'on kyang des ma btang ngo / /de lhag par chags pas des de la rdog pas bsnun nas bshus te des de khyer nas rgyal byed kyi tshal du song ngo / /de yang cho nges 'debs shing de'i phyi bzhin du 'brangs te/ 'phags pa gnag dga' bo/ la ba 'o ni stsol cig ces byas na des khyad du bsad de rgyal byed kyi tshal du song ba dang / rgyal byed kyi tshal na sangs rgyas la mngon par dad pa'i lha dang / klu dang / gnod sbyin dag 'dug pas dbang chung ngur grags pa de nang du 'jug ma nus nas rgyal byed kyi tshal gyi sgo na cho nges 'debs shing 'dug go/ /sangs rgyas bcom ldan 'das rnams ni mkhyen bzhin du rmed par mdzad pa yin pas de nas tshe dang ldan pa kun dga' bo la rmas pa/ kun dga' bo ci'i phyir rgyal byed kyi tshal gyi sgo na mi ma yin pa ngu / des gsol pa/ btsun pa gnag dga' bos de'i la ba blangs lags so/ /bcom ldan 'das kyis dgongs pa mi ma yin pa 'di chags pa de lta bus ngu ste/ gal te la ba ma thob na khrag dron du skyugs nas 'chi bar 'gyur ba gang yin pa'i gnas de yod do snyam du dgongs nas/ tshe dang ldan pa kun dga' bo la bka' stsal pa/ kun dga' bo song la dge slong gnag dga' bo la mi ma yin pa 'di la la ba byin cig / gal te 'di la la ba ma byin na gdon mi za bar 'di khrag dron du skyugs nas 'chi bar 'gyur ro/ /gang gi tshe byin pa de'i tshe yang mdun du song shig ces smra bar bya'o/ /gang gi tshe dur khrod du son pa de'i tshe yang nyol cig ces brjod par bya zhing gang gi tshe nyal ba de'i tshe de'i steng du dgab par bya'o zhes gyis shig / btsun pa de ltar 'tshal lo zhes tshe dang ldan pa kun dga' bos bcom ldan 'das kyi ltar mnyan nas tshe dang ldan pa gnag dga' bo ga la ba der song ste phyin nas tshe dang ldan pa gnag dga' bo la 'di skad ces smras so/ /tshe dang ldan pa gnag dga' bo shes par gyis shig /bcom ldan 'das kyi zhal nas mi ma yin pa 'di la la ba byin cig /gal te 'di la la ba ma byin na gdon mi za bar khrag dron du skyugs nas 'chi bar 'gyur ro/ /gang gi tshe byin pa de'i tshe yang mdun du song shig ces brjod par bya'o/ /gang gi tshe dur khrod du phyin pa de'i tshe yang nyol cig ces brjod par bya zhing / gang gi tshe nyal ba de'i tshe de'i steng du dgab par bya'o zhes de skad bka' stsal to/ /tshe dang ldan pa kun dga' bo bcom ldan 'das kyis ji skad bka' stsal pa de bzhin du 'tshal lo/ /tshe dang ldan pa kun dga' bo song ba dang / gnag dga' bos mi ma yin pa de la smras pa/ gal te khyod la ba 'dod na mdun du song shig dang sbyin no/ /de mdun du song ba dang / yang smras pa/ gal te khyod la ba 'dod na nyol cig ces byas pa dang / de nyal nas de'i steng du bkab bo/ /mi ma yin pas kyang de la rdog pas bsnun pa dang / de stobs dang ldan pa yin pas des mnags so/ /skabs de dge slong rnams la bsnyad pa dang / dge slong dag gis bcom ldan 'das la gsol nas/ bcom ldan 'das kyis bka' stsal pa/ dge slong dag gya tshom du ro'i gos blang ba 'am sbyin par mi bya'i/ len na des rkang pa'i mtha' nas mgo'i mthar song ste blang bar bya'o/ /gang zhig sbyin pa des kyang mgo'i mtha' nas rkang pa'i mthar song ste sbyin par bya'o/ /dge slong ro'i gos la nyes dmigs lnga yod de/ lnga gang zhe na/ kha dog ngan pa dang / dri mi zhim pa dang / rnyings pa dang / shig mang ba dang / gnod sbyin mi srun pa mang ba'o/ / 'on kyang phyag dar khrod pas ji srid du rma ma phyung bar ro'i gos blang bar mi bya'o/ /bcom ldan 'das kyis rma ma phyung bar shi ba'i gos blang bar mi bya'o zhes gsungs pa dang / drug sde rnams kyis khyi khrid de dong ba dang / ma dad pa dag gis mthong nas/ 'phags pa khyed ci ste khyi khrid nas dgon par 'dong / ci srog gcod par byed dam zhes kha zer ba dang / de dag gis lan gzhan du blan no/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ khyi khrid de 'gro bar mi bya'o/ /de dag gis mtshon gyis rma phyung ste blangs pa dang / bcom ldan 'das kyis bka' stsal pa/ mtshon gyis rma phyung ste blang bar mi bya'i 'on kyang gang gi tshe srin bu phre'u dang / grog mas zos kyang rung de'i tshe blang bar bya'o/ /de dag gis blangs te de bzhin du gyon nas/ bcom ldan 'das kyis bka' stsal pa/ de bzhin du bgo bar mi bya'i/ 'on kyang zhag bdun nam brgyad du dben par bzhag la gang gi tshe rlung dang nyi mas gdungs par gyur pa de'i tshe bkrus nas btsos la bgo bar bya'o/ /de dag gis de bgos te gtsug lag khang du 'jug cing mchod rten dag la phyag 'tshal bar byed nas/ skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ ngas dge slong dur khrod pa'i kun tu spyod pa'i chos bca' bar bya ste/ dge slong dur khrod pas ro'i gos bgos te gtsug lag khang du 'gro bar mi bya/ mchod rten la phyag 'tshal bar mi bya/ de ste phyag byed na yang mdom gang khor yug las nye bar 'gro bar mi bya/ gnas khang la longs spyad par mi bya/ gnas mal la yang 'dug par mi bya/ dge 'dun gyi nang du 'dug par mi bya/ bram ze dang khyim bdag 'ongs shing lhags pa rnams la chos bstan par mi bya/ bram ze dang khyim bdag gi khyim dag tu 'gro bar mi bya/ gal te 'gro na yang sgor bsdad par bya'o/ /gal te 'phags pa nang du gshegs shes zer na/ bdag ni dur khrod pa'o zhes smra bar bya'o/ / ji ste 'phags pa gal te khyed lta bu sbyangs pa'i yon tan yang dag par blangs te 'dug pa dag khyim gyi nang du byon na bdag gis rnyed pa dag legs par rnyed pa ma lags sam zhes zer na nang du 'gro bar bya zhing stan la ni 'dug par mi bya'o/ / gal te 'phags pa gdan la bzhugs shig ces zer na/ bdag ni dur khrod pa'o zhes brjod par bya'o/ /ji ste 'phags pa gal te khyod lta bu sbyangs pa'i yon tan yang dag par blangs te 'jug pa dag stan dang khyim la yongs su longs spyod na bdag gis rnyed pa dag legs par rnyed pa ma lags sam zhes zer na der 'dug par bya ste 'di la 'gyod par mi bya'o/ /dge slong dur khrod pas kun tu spyad pa'i chos ji ltar bcas pa bzhin yang dag par blangs te mi 'jug na 'gal tshabs can du 'gyur ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong rnams gri dang khab dag bab chol du 'jog pas de dag btsas zos nas/ skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ bab chol du gzhag par mi bya'i 'on kyang snod du gzhag par bya'o/ / bcom ldan 'das kyis snod du gzhag par bya'o zhes bka' stsal pa dang / dge slong dag gis snod ji lta bu bya ba mi shes nas/ bcom ldan 'das kyis bka' stsal pa/ ras la spra tshil gyis byugs nas/ der khab dang gri dag gzhug par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na dge slong ma sbom dga' mo zhes bya ba de la 'ching phor zhig yod do/ /ji tsam na dge slong ma gzhan zhig skom pas nyam thag ste chu 'thung 'dod nas de de'i drung du song ste smras pa/ 'phags ma skom ste chu btung gis 'ching phor g.yor cig des smras pa/ 'di na 'dug gis long la song shig / des blangs te song ba dang / lag nas lhung ste chag nas de cang mi smra bar 'dug go/ /dus gzhan zhig na sbom dga' mos de dran nas de'i drung du song ste smras pa/ 'phags ma 'ching phor bsnams pa de stsol cig / des smras pa/ 'phags ma 'tshal na 'on kyang lag nas lhung ste chag gis gzhan zhig nyos te dbul lo/ /des smras pa/ de nyid byin cig ces des de ring zhig tu gtses te btang ngo / /skabs de dge slong ma dag gis dge slong dag la bsnyad do/ /dge slong rnams kyis bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni mching phor nas chu 'thung ba las gyur gyis/ de'i phyir dge slong mas 'ching phor du chu btung bar mi bya'o snyam du mkhyen nas/ dge slong rnams la bka' stsal pa/ nyes dmigs gang cung zad byung ba ni dge slong ma dag 'ching phor nas chu 'thung ba las gyur gyis/ de lta bas na dge slong mas 'ching phor nas chu btung bar mi bya zhing gzhan yang btung ba dang bza' bar mi bya'o/ /dge slong ma 'ching phor nas chu 'am gzhan du yang rung 'thung ngam za na 'gal tshabs can du 'gyur ro/ /sdom ni/ ri mo'i mkhar lan me dang ni/ /khrus dang 'gags dang lhung bzed kyi/ /lhag rol ma yin lhung bzed gzhir/ /rkang pa mi gzhag lham dag go/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /gang gi tshe khyim bdag mgon med zas sbyin gyis phyogs bzhi'i dge 'dun la rgyal byed kyi tshal phul ba de'i tshe de'i blo skyes pa 'di ri mo ma bris pas mi sdug ste/ de'i phyir gal te bcom ldan 'das kyis gnang na 'di ri mo bri'o snyam du rig nas de bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te phyogs gcig tu 'dug go/ /phyogs gcig tu 'dug nas bcom ldan 'das la khyim bdag mgon med zas sbyin gyis 'di skad ces gsol to/ /btsun pa bdag gis rgyal byed kyi tshal 'di ri mo ma bris pas mi sdug ste/ de'i slad du bcom ldan 'das kyis gnang na bdag gis 'di ri mo bri bar bgyi'o/ / bcom ldan 'das kyis bka' stsal pa/ khyim bdag de lta bas na gnang gis ri mo ris shig /bcom ldan 'das kyis ri mo ris shig ces bka' stsal nas/ des tshon rtsi dag kyang bsogs/ ri mo mkhan rnams kyang bos te smras pa/ shes ldan dag bcom ldan 'das kyis gnang gis/ de'i phyir tshon rtsi 'di dag gis rgyal byed kyi tshal ri mo ris shig /de dag gis smras pa/ khyim bdag ri mo bri na phyogs gang du ci zhig bri ba gsungs shig / des smras pa/ shes ldan dag bdag gis mi shes kyis sdod cig dang bcom ldan 'das la zhu'o/ /de dag gis smras pa/ khyim bdag legs te de bzhin du mdzod cig dang sdod do/ /de bcom ldan 'das kyi spyan sngar song nas zhabs la mgo bos phyag 'tshal te gsol pa/ bcom ldan 'das tshon rtsi dag kyang bsogs/ ri mo mkhan rnams kyang bos na de dag gi mchid nas khyim bdag phyogs gang du ci zhig bri ba smros shig ces mchi na/ de'i slad du bcom ldan 'das kyis thugs brtse ba nye bar bzung ste phyogs gang du ci zhig bri ba bka' stsal du gsol/ bcom ldan 'das kyis bka' stsal pa/ khyim bdag gal te de lta na song la re shig phyi sgor gnod sbyin lag na dbyug thogs 'brir bcug nas/ sgo khang du ni cho 'phrul chen po dang 'khor ba'i 'khor lo cha lnga pa/ khyams su ni skyes pa'i rabs kyi phreng ba/ dri gtsang khang gi sgor ni gnod sbyin lag na phreng ba thogs pa dag / rim gro'i khang par ni dge slong gnas brtan gnas brtan chos rnam par gtan la 'bebs par byed pa/ bkad sar ni gnod sbyin lag na zas thogs pa dag /mdzod kyi sgor ni gnod sbyin lag na lcags kyu thogs pa dag / chu'i khang par ni klu lag na bum pa thogs pa rgyan sna tshogs kyis brgyan pa dag /khrus khang ngam/ bsro gang du ni lha'i mdo las 'byung ba 'am/ gzhan dmyal ba'i rabs/ nad pa'i sman khang du ni de bzhin gshegs pa nad pa'i nad g.yog mdzad pa/ chab khung sar ni dur khrod shin tu 'jigs su rung ba/ gnas khang gi sgor ni rus pa'i keng rus dang / mgo'i thod pa bri'o/ /btsun pa de ltar 'tshal lo zhes khyim bdag mgon med zas sbyin gyis bcom ldan 'das kyi ltar mnyan nas thams cad de kho na bzhin du 'brir bcug go/ /gang gi tshe khyim bdag mgon med zas sbyin gyis rgyal byed kyi tshal ri mo bris pa de'i tshe dge slong shes bzhin med par gnas pa kha cig gis der me bus pas du bas ri mo ma rung bar gyur nas/ skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag ngas me'i khang pa gnang gis dge slong gang zhig la me dgos pa des me'i khang par me bud par bya'i khang bzangs su ni ma yin no/ /khang bzangs su me 'bud na 'gal tshabs can du 'gyur ro/ /bcom ldan 'das kyis me'i khang par me bud par bya'i khang bzangs su ni ma yin no zhes bka' stsal pa dang / dge slong gzhan nad pa dag cig 'khod pa de dag mes phongs par gyur nas/ bcom ldan 'das kyis bka' stsal pa/ nad pa gang dag mes phongs pa de dag gis gtsug lag khang gi phyi rol 'am/ rdzing drung du me bus la mdag ma du ba med pa nang du gzhag par bya'o/ /dge slong rnams khang bzangs su khrus byed pas ri mo byid nas/ bcom ldan 'das kyis bka' stsal pa/ khang bzangs su khrus mi bya'i 'on kyang rdzing gi grwa gcig tu ston pa'i spyan sngar ma bab pa 'am/ khrus kyi khang pa byas nas der khrus bya'o/ /'dam du gyur nas/ bcom ldan 'das kyis bka' stsal pa/ phyogs der so phag gi gcal dgram par bya'o/ /chu 'khyil nas bcom ldan 'das kyis bka' stsal pa/ chu'i stor khung gdod par bya'o/ /bcom ldan 'das kyis chu'i stor khung gdod par bya'o zhes bka' stsal pa dang / chu'i stor khung gi kha 'gags par gyur nas/ bcom ldan 'das kyis bka' stsal pa/ dus dus su bsal bar bya zhing chu'i stor khung gi kha nyid du khrus bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na bram ze zhig gi bu na bar gyur nas de sman pa'i drung du song ste smras pa/ bkra shis par gyur cig /bkra shis par gyur cig /sman pas smras pa/ jo bo ci bzhed gsungs shig /des smras pa/ kye dge ba cung zad kyang mi 'dod mod kyi/ 'on kyang kho bo'i bu nad 'di dang 'dis thebs kyis sman ston cig / sman pa de dad pa can zhig pas des smras pa/ bram ze 'phags pa rnams kyi drung du bzhud la lhung bzed kyi chu slongs la de khrus shig dang sos par 'gyur ro/ /des bram ze bkra shis par gyur cig ces smras nas chas te rgyal byed kyi tshal du song ngo / /drug sde rnams kyi kun tu spyod pa ni drug sde gang yang rung ba zhig gis rgyal byed kyi tshal gyi sgo mi stong pa yin te/ tshe dang ldan pa nye dga' rgyal byed kyi tshal gyi sgo na 'chags pa des bram ze de mthong nas smras pa/ bram ze chen po 'ongs pa legs so 'ongs pa legs so/ /khyod zla ba lta bur gnas pa yin na ring mo zhig ste ga las 'ongs/ 'phags pa phyag 'tshal lo/ /ring mo zhig ste mthong ba ni legs te/ yang dang yang du mthong bas ni brnyas par 'gyur ro/ /dgos pa ci zhig la 'ongs/ 'phags pa bdag gi bu bro tshabs chen po zhig gis thebs te/ de la sman pas 'phags pa rnams kyi thad nas lhung bzed kyi chu blangs te des bkrus dang sos par 'gyur ro zhes bstan nas/ bdag lhung bzed kyi chu bslang ba'i slad du 'dir mchis kyis stsol cig /des smras pa/ khyod ko lhung bzed kyi chu'i phyir 'dir 'ongs pa lta/ 'phags pa de lta lags te dgos pa de ni mchis so/ /gal te de lta na sdod cig dang kho bos lhung bzed kyi chu blang ngo zhes byas nas de nang du song ngo / /des zan zos nas lhung bzed bkrus te der rus pa dang / sha'i kham tshad dang / nya'i gram dang / 'bras can gyi brul ma dang / phye dang / tshong shol dang / khur ba cung zad cig blugs so/ /de nas phyir byung nas smras pa/ bram ze lhung bzed kyi chu 'de re khyer cig /bram zes mthong nas smras pa/ 'phags pa bdag gi bu gum bla'i chu 'di lta bu mi gtsang bas khrus bgyis pa ni mi rung ngo / /tshe dang ldan pa nye dgas smras pa/ khyod dad pa 'di lta bu dang ldan pas khyod kyi bu sos zin du zad do/ /bram ze de 'phya ba la zhugs nas/ skabs de dge slong rnams kyis bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni dge slong dag lhung bzed nas lhag rol 'dor ba las gyur gyis/ de'i phyir dge slong gis lhung bzed nas lhag rol dor bar mi bya'o snyam du dgongs te/ dge slong rnams la bka' stsal pa/ dge slong dag de lta bas na dge slong gis lhung bzed nas lhag rol dor bar mi bya'o/ /'dor na 'gal tshabs can du 'gyur ro/ /'on kyang ngas dge slong gis lhung bzed kyi chu sbyin par byed pa'i kun tu spyod pa'i chos bca' bar bya ste/ dge slong lhung bzed kyi chu sbyin par byed pas lhung bzed lan gsum bkrus te/ lhung bzed kyi chu la gtsug lag gi tshigs su bcad pas mngon par bsngags nas sbyin par bya'o/ /dge slong lhung bzed kyi chu sbyin par byed pas kun tu spyod pa'i chos ji ltar bcas pa bzhin yang dag par blangs te mi 'jug na 'gal tshabs can du 'gyur ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong dag lhung bzed kyi gzhi la rkang pa bzhag ste zan za ba bram ze dang khyim bdag rnams kyis mthong nas/ shAkya'i bu'i dge sbyong rnams ni gtsang sbra med pa ste/ lhung bzed kyi gzhi la rkang pa bzhag ste zan za'o/ /zhes 'phya ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag bram ze dang khyim bdag rnams 'phya ba ni thog tu bab po/ /de lta bas na dge slong gis lhung bzed kyi gzhi la rkang pa bzhag ste zan bza' bar mi bya'o/ /dge slong lhung bzed kyi gzhi la rkang pa bzhag ste zan za na 'gal tshabs can du 'gyur ro/ /sangs rgyas bcom ldan 'das yangs pa can na spre'u rdzing gi 'gram khang pa brtsegs pa na bzhugs so/ /dge slong dag lham ma phud par zan za ba bram ze dang khyim bdag rnams kyis mthong nas/ shAkya'i bu'i dge sbyong rnams ni gtsang sbra med pa ste lham ma phud par zan za'o zhes 'phya ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag bram ze dang khyim bdag 'phya ba ni thog tu bab po/ /de lta bas na dge slong gis lham ma phud par zan bza' bar mi bya'o/ /dge slong lham ma phud par zan za na 'gal tshabs can du 'gyur ro/ /bcom ldan 'das kyis dge slong gis lham ma phud par zan bza' bar mi bya'o zhes bka' stsal nas/ dge slong dag gis lham phud de zan za bar brtsams pa dang / de dag na bar gyur pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ nad pa gang dag yin pa de dag gis ni ma phud par zan bza' bar bya ste 'di la 'gyod par mi bya'o/ sdom ni/ lhung bzed med dang grags pa dang / /dbyar gnas pa dang gnas med dang / /lo lnga rnyed pa gcig pa dang / /glo dang rgyab dang rked pa mgo/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /nye dga' bos gcig cig rab tu phyung ba de la snga nas lhung bzed nye bar ma bzhag go/ /ji tsam na dge slong rnams zas kyi dus la bab ste rang rang gi lhung bzed dag bkrus nas lhung bzed kyi gzhi la bzhag ste mchod rten la phyag 'tshal du dong ba dang / des bsams pa/ lhung bzed 'di dag mang mo zhig 'dug pas gdon mi za bar gang gang gis ji ltar blangs pa des zos shing zos nas 'di nyid du 'jog go/ /de lta bas na re shig bdag gis kyang blangs la slar bzhag go snyam nas des gnas brtan kun shes kauN+Di n+ya'i lhung bzed blang bar brtsams pa dang / gzhan zhig gis de la smras pa/ tshe dang ldan pa lhung bzed 'di ni gnas brtan kun shes kauN+Di n+ya'i yin gyis 'di ma len cig /des de bzhag nas tshe dang ldan pa rta thul dang / bzang po dang / rlangs pa dang / ming chen dang / gang po dang / dri ma med pa dang / ba lang bdag dang / lag bzangs dang / dge slong gzhan dag cig gi lhung bzed dag blang bar brtsams pa dang / dge slong rnams kyis smras pa/ tshe dang ldan pa khyod la lhung bzed med na lhung bzed med pa khyod sus rab tu phyung / des smras pa/ mkhan po nye dgas so/ /dge slong rnams 'phya bar byed de gnas ngan len kun tu spyod pa de ma yin pa gzhan su zhig gis lhung bzed med pa rab tu 'byin ces zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong gis lhung bzed med pa rab tu dbyung bar mi bya ste/ rab tu 'byin na 'gal tshabs can du 'gyur ro/ /rab tu 'byin par byed pas yo byad drug gis mi brel bar bya'o/ /sangs rgyas bcom ldan 'das la tshe dang ldan pa nye bar 'khor gyis zhus pa/ btsun pa re shig dge slong dag gis lhung bzed med pa zhig bsnyen par rdzogs par bgyid na bsnyen par rdzogs pa zhes brjod par bgyi 'am/ nye bar 'khor bsnyen par rdzogs pa zhes bya ste/ bsnyen par rdzogs par byed pa rnams ni 'gal tshabs can du 'gyur ro/ /btsun pa dge slong dag gis lhung bzed chung ngu 'am/ lhung bzed chen po 'am/ lhung bzed skya bos bsnyen par rdzogs par bgyid na bsnyen par rdzogs pa zhes bgyi 'am/ nye bar 'khor bsnyen par rdzogs pa zhes bya ste/ bsnyen par rdzogs par byed pa rnams ni 'gal tshabs can du 'gyur ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe chom rkun par grags pa zhig rkun po byed pa tshor nas des bzung ba dang / brkus pa bor nas bros so/ /de lam gyi ngal bas dub nas rgyal byed kyi tshal gyi lam ka shing zhig gi drung na lag pa 'gram pa la gtad de sems khongs su chud cing 'dug pa dang / tshe dang ldan pa nye dga' snga dro sham thabs bgos lhung bzed dang chos gos thogs te mnyan yod du bsod snyoms kyi phyir chas pa des de mthong nas smras pa/ tshe dang ldan pa khyod su'i/ des smras pa/ 'phags pa bdag ni mgon med pa zhig ste/ bdag la ci yang ma mchis so/ /des smras pa/ bzhin bzangs gal te de lta na ci ste rab tu mi 'byung / des smras pa/ 'phags pa khyod rab tu byung ba lags pas re shig drang por smra bar bgyi ste/ bdag ni chom rkun par grags pa lags na su zhig bdag rab tu 'byin/ bu bcom ldan 'das kyi bstan pa ni thugs rjes rab tu phye ba yin pas su zhig rab tu mi 'byin/ sems rton cig dang ngas rab tu dbyung ngo / /'phags pa legs te rab tu 'byung ngo / /des de rab tu phyung bsnyen par rdzogs par byas nas/ smras pa/ bzhin bzangs ri dgas kyis ri dgas mi gsos kyis mnyan yod rgya chen por rang gi spyod yul pha yul du bsod snyoms la rgyus la 'tsho bar gyis shig / de snga dro sham thabs bgos lhung bzed dang chos gos thogs te mnyan yod du bsod snyoms kyi phyir zhugs pa dang / de bsod snyoms la rgyu ba na/ bram ze dang / khyim bdag rnams kyis ngo shes nas/ de na kha cig na re shes ldan dag 'di ni chom rkun par grags pa de yin na rab tu byung ngo zhes zer/ gzhan dag na re dge sbyong shAkya'i bu pa rnams kyi chos ni bzang ste chom rkun par grags pa yang rab tu 'byin par byed do/ /'di dag ni nyin mo bsod snyoms pa'i cha byad kyis khyim dag tu glags bcar nas nub mo rkur 'ong ngo zhes zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni dge slong dag chom rkun par grags pa rab tu 'byin pa las gyur te/ de'i phyir dge slong gis chom rkun par grags pa rab tu dbyung bar mi bya'o snyam du dgongs nas dge slong rnams la bka' stsal pa/ dge slong dag bram ze dang / khyim bdag rnams 'phya ba ni thog tu bab po/ /de lta bas na dge slong gis chom rkun par grags pa rab tu dbyung bar mi bya'o/ /bcom ldan 'das kyis dge slong gis chom rkun par grags pa rab tu dbyung bar mi bya'o zhes bka' stsal pa dang / dge slong dag gis chom rkun pa yin par mngon pa med pa dag kyang rab tu ma phyung bas de dag gi rab tu 'byung ba dang bsnyen par rdzogs pa dge slong gi dngos po'i bar chad du gyur pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ chom rkun pa yin par mngon pa rab tu dbyung bar mi bya'i/ mngon pa med pa ni rab tu dbyung bar bya'o/ /de lta bas na gang yang rung ba zhig gi drung du rab tu 'byung bar 'dod pa zhig nye bar 'ongs na/ des de la chom rkun par grags pa ma yin nam zhes dri bar bya'o/ /ma dris par rab tu 'byin na 'gal tshabs can du 'gyur ro// //'dul ba phran tshegs kyi gzhi/ bam po nyi shu pa/ sangs rgyas bcom ldan 'das mnyan yod na/ rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe gnas shig na dge slong mang mo zhig gcig cig la gnas bcas te 'dug pa las/ ji tsam na de dag gi gnas kyi slob dpon de dus las 'das pa dang / de dag gis su zhig la bdag cag gis 'phral gyi bya ba zhu bar bya ba dang / gang la gnas bcas te 'dug par bya ba mi shes nas/ skabs de dge slong rnams la bsnyad do/ / dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong de dag gis dge slong zhig las su bsko ba spang ba dang / gnas khang spang ba dang / mal stan spang ba dang / rim gro pa spang bas btsal bar bya ste/ ci ste rnyed na de lta na legs/ ci ste ma rnyed na dge slong de dag gis gnas der gso sbyong gnyis pa'i bar du 'dug par mi bya ste 'dug na 'gal tshabs can du 'gyur ro/ /dge slong gzhan dag cig gnas shig tu gnas kyi slob dpon gcig cig dang dbyar gnas par khas blang bar 'dod pa las/ de dag gi gnas kyi slob dpon de yang dus las 'das nas de dag kyang ji ltar bsgrub pa mi shes pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong de dag gis kyang dge slong zhig las su bsko ba spang ba dang / gnas khang spang ba dang / mal stan spang ba dang / rim gro pa spang bas btsal bar bya ste/ gal te rnyed na de lta na legs/ ji ste ma rnyed na dge slong de dag gis gnas der dbyar snga mar gnas par dam bca' bar mi bya ste/ gnas par dam 'cha' na 'gal tshabs can 'gyur ro/ /dge slong gzhan dag cig gnas shig tu gnas kyi slob dpon gcig cig dang dbyar snga mar gnas par dam bcas pa las de dag gi slob dpon de yang dus las 'das nas/ de dag gis kyang ji ltar bsgrub pa mi shes pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong de dag gis kyang dge slong zhig las su bsko ba spang ba dang / gnas khang spang ba dang / mal stan spang ba dang / rim gro pa spang bas btsal bar bya ste/ gal te rnyed na de lta na legs/ ci ste ma rnyed na dge slong de dag gis der gnas par mi bya'i gzhan du song la dbyar nye bar sbyor ba gnyis par dbyar gnas par khas blang bar bya'o/ /der gnas na 'gal tshabs can du 'gyur ro/ /dge slong gzhan dag cig gnas shig tu gnas kyi slob dpon gcig cig dang dbyar gnas par khas blang bar 'dod pa las/ de dag gi gnas kyi slob dpon de yang dus las 'das nas/ de dag gis kyang ji ltar bsgrub pa mi shes pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong de dag gis kyang dge slong zhig las su bsko ba spang ba dang / gnas khang spang ba dang / mal stan spang ba dang / rim gro pa spang bas btsal bar bya ste/ gal te rnyed na de lta na legs/ ji ste ma rnyed na dge slong de dag gis der dbyar snga mar gnas par dam bca' bar mi bya ste/ gnas par dam 'cha' na 'gal tshabs can du 'gyur ro/ /dge slong gzhan dag cig gnas shig tu gnas kyi slob dpon gcig cig dang dbyar phyi mar gnas par dam bcas pa las/ de dag gi slob dpon de yang dus las 'das nas de dag gis kyang ji ltar bsgrub par mi shes pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong de dag gis zla ba gnyis kyi bar du gcig la gcig dri zhing so sor brtags par gnas par bya'o/ /zla ba gnyis 'das nas dge slong zhig las su bsko ba spang ba dang / gnas khang spang ba dang / mal stan spang ba dang / rim gro pa spang bas btsal bar bya ste/ gal te rnyed na de lta na legs/ ji ste ma rnyed na dge slong de dag gis gnas der gso sbyong gnyis pa'i bar du 'dug par mi bya ste/ 'dug na 'gal tshabs can du 'gyur ro/ / dge slong gzhan dag cig gnas shig tu dge slong gcig cig gis rab tu phyung bsnyen par rdzogs par byas pa las/ de dag gi mkhan po de dus las 'das pa dang / de dag gis kyang ji ltar bsgrub pa mi shes zhes bya ba nas thams cad slob dpon la ji lta bar snga ma bzhin du brjod par bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /ri 'or zhig na khyim bdag gcig gnas pa des gtsug lag khang byed du bcug ste yo byad thams cad kyis bkang nas phyogs bzhi'i dge slong gi dge 'dun la phul lo/ /ji tsam dus gzhan zhig na khyim bdag de rgyal po'i pho brang du bzung ba dang / dge slong rnams kyis thos so/ /de dag gis thos nas gtsug lag khang bor te bros pa dang / dkon mchog gsum gyi dkor ma byin par len pa rnams kyis brkus so/ /ji tsam na khyim bdag de slar btang ste/ dge slong rnams kyis gtsug lag khang gi bdag po de ji ltar slar btang ba thos nas de dag khyim bdag de'i drung du song ba dang / khyim bdag des ji ltar dge slong dag gtsug lag khang bor te bros nas dkon mchog gsum gyi dkor ma byin par len pa rnams kyis brkus pa snga nas thos pas des de dag bskyengs pa/ 'phags pa khyed ci'i phyir bros/ de dag gis smras pa/ kho bo cag gis khyod rgyal po'i pho brang du ji ltar bzung ba thos te thos nas de nas bdag cag skrag ste bros so/ /'phags pa dag gal te bdag rgyal po'i pho brang du bzung yang khyed ko ci'i slad du 'bros/ bdag gi nye du dag ni ma bzung na ci de dag kyang khyed kyi yo byad sbyor bar mi 'gyur ram/ de dag spobs pa med par cang mi zer bar 'dug pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de bzhin 'bros par mi bya'i 'on kyang gtsug khang gi bdag po'i nye du dag la gtsug lag khang gi bdag po ni rgyal po'i khab tu bzung na/ ci khyed kyis bdag cag gi bsod snyoms kyi yo byad sbyar nus sam zhes dri bar bya ste/ gal te de dag sbyor na de lta na legs/ ci ste mi sbyor na lo lnga'i bar du bsod snyoms bya zhing 'dug par bya'o/ /lo lnga 'das nas gal te gtsug lag khang gi bdag po slar btang na de lta na legs/ ji ste ma btang na gsol ba dang gnyis kyi las byas nas gtsug lag khang de'i nyen khor gyi gtsug lag khang dag yongs su skyong bar byed pa rnams dang / rnyed pa thun mong dang gso sbyong tha dad pa dag gis lo gzhan lnga'i bar du 'dug par bya'o/ /las ni 'di ltar bya ste/ nyen kor gyi gtsug lag khang dag tu gnas mal bshams te/ gaN DI brdungs nas dris pa'i tshig gis dge slong rnams la yang dag par bsgo nas dge 'dun thams cad 'dus shing 'khod pa dang / dge slong gcig gis gsol ba byas nas las bya ste/ dge 'dun btsun pa rnams gsan du gsol/ gtsug lag khang che ge mo zhig gi bdag po rgyal pos bzung ste/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis gtsug lag khang de gtsug lag khang 'di dag dang rnyed pa thun mong dang gso sbyong tha dad par bgyi'o/ /'di ni gsol ba'o/ /las ni 'di ltar bya ste/ dge 'dun btsun pa rnams gsan du gsol/ gtsug lag khang che ge mo zhig gi bdag po rgyal pos bzung ste/ de'i slad du dge 'dun gyis gtsug lag khang de gtsug lag khang 'di dag dang rnyed pa thun mong dang gso sbyong tha dad par mdzad na/ tshe dang ldan pa gang dag gtsug lag khang de gtsug lag khang 'di dag dang rnyed pa thun mong dang gso sbyong tha dad par mdzad par bzod pa de dag ni cang ma gsung shig / gang dag mi bzod pa de dag ni gsungs shig /dge 'dun gyis bzod cing gnang nas dge 'dun gyis gtsug lag khang che ge mo zhig rnyed pa thun mong dang gso sbyong tha dad par mdzad lags te/ 'di ltar cang mi gsungs bas de de bzhin du 'dzin to/ /gal te rnam pa des lo bcu'i bar du gnas pa rnams la gtsug lag khang gi bdag po 'ongs na de lta na legs/ ji ste ma 'ongs na nyen kor gyi gtsug lag khang dag tu gnas mal dang / snod dang / yo byad dag bzhag nas nang sgo bcad de 'gro bar bya'o/ /gang gi tshe gtsug lag khang gi bdag po slar btang ba de'i tshe nyen kor gyi gtsug lag khang nas rdzas ji ltar bzhag pa rnams phyir blangs te de nyid du sbyin par bya'o/ /gal te nyen kor gyi gtsug lag khang na gnas pa'i dge slong rnams kyis byin na de lta na legs/ ci ste ma byin na 'gal tshabs can du 'gyur ro/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /drug sde rnams lus kyis khur khyer ba bram ze dang khyim bdag rnams kyis mthong nas 'phya bar byed de/ 'phags pa re shig bdag cag ni khyim pa khyim na gnas pa lags pas pha ma dang bu dang / bu mo dang / bran pho dang / bran mo dang / las byed pa dang / zho shas 'tsho ba dang / rgyal po dang / lha dang / gshin ngog dang / dge sbyong dang / bram ze rnams kyi don du lus kyis khur 'tshal na khyed ko su'i don du khur snoms/ de dag cang mi zer bar 'dug pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag bram ze dang khyim bdag rnams 'phya ba ni thog tu bab po/ /de lta bas na dge slong gis lus kyis khur bkur bar mi bya'o/ /dge slong lus kyis khur khyer na 'gal tshabs can du 'gyur ro/ /bcom ldan 'das kyis dge slong gis lus kyis khur bkur bar mi bya'o zhes bka' stsal pa dang / drug sde rnams kyis rgyab dang / rked pa dang / glo dang / mgos khur bkur bar brtsams te nyes dmigs de nyid du gyur nas/ bcom ldan 'das kyis bka' stsal pa/ rgyab kyis ma yin/ rked pas ma yin/ glos ma yin/ mgos khur bkur bar mi bya ste/ 'khur na 'gal tshabs can du 'gyur ro/ sdom ni/ gnas dang yo byad drug dang ni/ /de nas de las phrogs pa dang / /yid gcugs len pa lnga dang ni/ /btso blag sgo khang 'chag sa'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe bram ze rab tu 'byung bar 'dod pa zhig rgyal byed kyi tshal du song ba dang / ji tsam na dge slong lag na lhung bzed thogs pa mang po khar gsil thogs nas bsod snyoms la chas pa de dag des mthong nas des bsams pa/ re shig 'di dag gang du 'gro dri'o snyam nas des de dag la dris pa/ 'phags pa gang du bzhud de dag gis smras pa/ bram ze bsod snyoms la 'gro'o/ /des smras pa/ 'phags pa dge slong thams cad bsod snyoms la rgyu 'am/ de dag gis smras pa/ bram ze dge slong bshes gnyen can gang dag yin pa de dag la ni bram ze dang khyim bdag rnams bsod snyoms gtsug lag khang du khyer te 'ongs nas 'bul lo/ /bshes gnyen med pa gang dag yin pa de dag ni bsod snyoms la 'gro'o/ /des bsams pa/ dge sbyong shAkya'i bu pa rnams kyi nang du rab tu phyung ba dang khyad par ci yod kyis bdag gis 'dir yang de bzhin du bsod snyoms la 'gro bar bya'o snyam mo/ /des yang bsams pa/ re shig dge slong gzhan zhig la yang ci 'di dag bsod snyoms kho na la gnas te rab tu byung ngam/ 'on te gnas gzhan yang yod dri bar bya'o snyam nas/ de dge slong zhig gi drung du song ba dang / des de la 'ongs pa legs so zhes bya ba'i kun tu spyod pa kun tu spyad nas smras pa/ bram ze khyod gang nas ci'i phyir 'dir 'ongs/ des smras pa/ 'phags pa khyod blta ba kho na'i phyir 'ongs te/ re shig khyod ci la gnas nas rab tu byung ba dri'o/ /des smras pa/ bram ze legs so legs so/ /khyod kyi rtog pa ni bzang ste 'dug shig dang gtam bya'o/ /bram ze rab tu 'byung bar 'dod pa des rkang pa la phyag byas nas de'i mdun du 'dug pa dang / des smras pa/ bram ze bzhi po 'di dag ni bcom ldan 'das kyis legs par gsungs pa'i chos 'dul ba la rab tu byung ba bsnyen par rdzogs pa dge slong gi gnas su bcas pa yin no/ /bram ze bzhi gang zhe na/ bcom ldan 'das kyis dge slong dag gos rnams kyi nang na phyag dar khrod ni rung ba rnyed kyang sla ba ste/ de la gnas na dge slong legs par gsungs pa'i chos 'dul ba la rab tu byung bsnyen par rdzogs pa dge slong gi dngos por 'gyur ro/ /zas rnams kyi nang na bsod snyoms dang / gnas mal rnams kyi nang na shing drung dang / sman rnams kyi nang na bkus te bor ba ni rung ba rnyed kyang sla ba ste/ de la gnas na dge slong legs par gsungs pa'i chos 'dul ba la rab tu byung bsnyen par rdzogs pa dge slong gi dngos por 'gyur ro zhes bka' stsal to/ /bram ze bcom ldan 'das kyis bdag cag la gnas su bcas pa ni bzhi po 'di dag yin te/ 'di dag la gnas nas bdag cag legs par gsungs pa'i chos 'dul ba la rab tu byung bsnyen par rdzogs pa dge slong gi dngos por 'gyur ro/ /bram zes smras pa/ 'phags pa su zhig gnas 'di dag gis 'tsho bar nus/ bdag rab tu 'byung ngo snyam ste 'dir mchis na rab tu 'byung ba 'di yang dka' ba zhig pas phyag 'tshal lo mchi'o zhes smras te song ngo / /de nyid de rab tu 'byung zhing bsnyen par rdzogs par dge slong gi dngos po'i bar chad du gyur nas/ skabs de dge slong rnams kyis bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni dge slong dag rab tu ma byung ba kho na la gnas bzhi brjod pa las gyur gyis/ de lta bas na dge slong gis rab tu ma byung ba 'am/ bsnyen par ma rdzogs pa la gnas bzhi brjod par mi bya'i/ gang gi tshe rab tu byung bsnyen par rdzogs pa/ de'i tshe gnas bzhi brjod par bya'o/ /rab tu ma byung bsnyen par ma rdzogs pa la gnas bzhi rjod na 'gal tshabs can du 'gyur ro/ /gleng gzhi ni mnyan yod na'o/ /mnyan yod na khyim bdag cig gnas pa des rigs mnyam pa las chung ma blangs nas de de dang rtse bar byed/ dga' bar byed/ dga' mgur spyod par byed do/ /de rtse bar byed/ dga' bar byed/ dga' mgur spyod par byed pa las zhes bya ba snga ma bzhin no/ /rigs dang 'thun pa'i ming btags te de bskyed bsrings nas chen por gyur to/ /de dus gzhan zhig na phas spyos pa dang / des bsams pa/ pha mgu dka' bar gyur gyis rgyal byed kyi tshal du song la rab tu 'byung ngo snyam nas de rgyal byed kyi tshal du song ngo / /drug sde rnams kyi kun tu spyod pa ni drug sde gang yang rung ba zhig gis rgyal byed kyi tshal gyi sgo mi stongs pa yin te/ tshe dang ldan pa nye dga' sgo na 'dug pa des de mthong nas smras pa/ bzhin bzangs 'ongs pa legs so/ /khyod zla ba lta bur gnas pa yin na ring mo zhig lon te ga las 'ongs/ des smras pa/ 'phags pa ring mo zhig lon te mthong ba ni legs kyi/ yang dang yang mthong ba ni brnyas par 'gyur ro/ /'on kyang 'phags pa rab tu 'byung bar 'tshal gyis rab tu phyung shig /bzhin bzangs khyod kyi sems bskyed pa ni bzang ste rab tu byung ba ni mchog go/ /bcom ldan 'das kyis phan yon lnga mthong ba'i mkhas pas rab tu 'byung bar bya bar mos par bya ba'i rigs so zhes bya ba nas/ sangs rgyas rnams dang / sangs rgyas kyi nyan thos dam pa yang dag par zhugs pa'i skyes bu dam pa rnams kyis shes bya ba'i bar snga ma bzhin no/ /de lta bas na legs kyis rab tu phyung shig /de lta mod kyi 'di la yo byad drug dgos na khyod la yo byad drug yod dam/ 'phags pa yo byad drug po de dag ji lta bu zhig lags/ bzhin bzangs lhung bzed dang / chu tshags dang / chos gos gsum dang / gding ba'o/ /'phags pa ma mchis so/ /bzhin bzangs kho bo la yang med de/ re shig song shig dang kho bos yo byad drug btsal lo/ /de pha spangs nas gnyen dag gi drung du song ba dang / de dag gis khye'u de ji ltar rab tu 'byung ba thos pas de dag gis de'i chung ma blangs so/ / tshe dang ldan pa nye dgas yo byad drug bzhag ste mnyan yod du bsod snyoms kyi phyir zhugs pa dang / des khye'u de srang du mthong nas/ des smras pa/ bzhin bzangs kho bos yo byad drug po de dag rnyed de/ tshur rab tu dbyung gis 'dong / des smras pa/ 'phags pa bdag gis kyang yo byad drug rnyed do/ /bzhin bzangs ci 'dra ba dag cig /'phags pa mig dang / rna ba dang / sna dang / lce dang / lus dang / yid do/ /bzhin bzangs de ji tha tshig / 'phags pa bdag nye du rnams kyis chung ma blangs na/ ci da rab tu 'byung ngam/ de nyid de'i rab tu 'byung zhing bsnyen par rdzogs pa dge slong gi dngos po'i bar chad du gyur nas/ skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag de lta bas na gnang gis yo byad drug brnyas nas rab tu dbyung bar bya zhing bsnyen par rdzogs par bya'o/ /legs par gsungs pa'i chos 'dul ba la rab tu 'byung zhing bsnyen par rdzogs pa dge slong gi dngos po rnyed dka' bas yo byad drug po dag rim gyis btsal nas brnyas pa slar byin cig / gleng gzhi ni mnyan yod na'o/ /de'i tshe dge slong rab tu mang po ljongs rgyu zhing dong ba dang rkun po dag gis bcom nas de dag gis phrogs pa de khyer te rgyal byed kyi tshal du lhags nas btsong bar brtsams so/ /dge slong bcom pa de dag kyang de nyid du 'ongs nas dge slong de dag gis rang gi lhung bzed dang chos gos dag ngo shes te de dag gis ku cho'i sgra bton nas shes ldan dag 'di dag gis bdag cag gi lhung bzed dang chos gos 'di phrogs kyis/ rkun po rnams zung shig zung shig ces byas pa dang / de dag ku cho'i sgra thos nas skrag ste bros so/ /dge slong rnams kyis rang rang gi lhung bzed dang chos gos blangs nas 'dug ste ci 'di bdag cag la rung ba yin nam 'on te rung ba ma yin mi shes pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de ni gang gis phrogs pa de kho na'i yin pas de dag bsdigs par mi bya'o/ /bcom ldan 'das kyis de ni gang gis phrogs pa de kho na'i yin no zhes bka' stsal pa dang / dge slong gzhan dag cig ljongs rgyu zhing dong ba dang / rkun po rnams kyis mthong nas de dag gis de rnams gzhom par brtsams te/ de dag gis de rnams kyi lhung bzed dang chos gos ji snyed la lag pas reg pa de rnyed lta ba med par bor nas de rnams lhung bzed dang / chos gos kyis phongs par gyur pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ ji srid rkun po dag gis phrogs khyer nas sbyor ba'i rgyun ma bcad pa de srid du lta ba med par mi bya'o/ /bcom ldan 'das kyis ji srid du rkun po dag gis phrogs pa khyer nas sbyor ba rgyun ma bcad pa de srid du lta ba med par mi bya'o zhes bka' stsal pa dang / rkun po de dag gis phrogs pa de khyer nas mnyan yod du zhugs te srang du btsong bar brtsams so/ /dge slong de rnams kyis phrogs pa de ngo shes te ngo shes nas rkun po de rnams rgyal po'i pho brang du khrid de/ de dag der gsad pa dang / bcing ba dang / gcad pa dang / dbug pa la sogs pa sdug bsngal gyi khyad par dag gis nye bar gzir cing shin tu sdug bsngal bar byas pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ rgyal po'i pho brang du sbron par mi bya'i 'on kyang sngar chos bshad nas bslang bar bya'o/ / gal te mi ster na rin phyed kyis blang bar bya'o/ /gal te de ltar yang mi ster na rin tshang bar byin la blang bar bya ste/ dge slong dag gis lhung bzed dang chos gos byas pa mthar phyin pa ni rnyed par dka'o/ /gleng gzhi ni mnyan yod na'o/ / dge slong dag gis lci ba skam po dang / so shing tshon rtsi'i shal ma la sogs pa de bzhin du bor nas mi lta bar dong ba dang / de dag dge slong 'gas kyang 'gyod pas ma blangs pas de nyid du chus zos pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ yid gcugs pa lngas len pa mdza' ba dang / yid du 'ong ba dang / bla ma dang / dran par bya ba dang / thos nas dga' bar 'gyur ro snyam nas len pa ni legs par blangs pa yin te 'di la 'gyod par mi bya'o/ /gleng gzhi ni mnyan yod na'o/ /bcom ldan 'das kyis btso blag gi las bya'o zhes bka' stsal pa/ dge slong dag gis sgo khang dang 'chag sa dag tu chos gos dag btsos pas de dag rdul gyis kyang phog / rdzi char gyis kyang gsher ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ gtsug lag khang du btso blag gi las bya'o/ /dge slong dag gis gtsug lag khang du btso blag gi las bya bar brtsams pa dang / tshon sa la bo ba khrag lta bur snang ba bram ze dang khyim bdag rnams kyis mthong nas smras pa/ 'phags pa phyogs 'dir ra lug gsad dam ci/ de dag gis smras pa/ shes ldan dag bdag cag gis phyogs 'dir btso blag gi las byas pas 'dir tshon rtsi bo'o/ / de dag gis smras pa/ 'phags pa gal te tshon rtsi pho na te por mi sdug par snang gis sa byi dor bgyid du stsol cig /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ zhal zhal byug par bya'o/ /de dag gis thams cad du byugs pa dang / rdo thal dag ma rung bar gyur nas/ bcom ldan 'das kyis bka' stsal pa/ rdo thal can ni bkru bar bya'o/ /gzhan du ni zhal zhal gyis byug par bya'o/ sdom ni/ shing rnams bskyed par gnang ba dang / /na me ru ka gos dag dang / /kha tshar ring po tshigs bcad du/ /bsdus nas sdom du yang dag bstan/ /sangs rgyas bcom ldan 'das rgyal po'i khab 'od ma'i tshal bya ka lan da ka gnas pa na bzhugs so/ /gang gi tshe bcom ldan 'das kyis lha'i dbang po brgya byin lus 'phags ri la bden pa la bzhag pa'i tshe rgyal po gzugs can snying pos der dus ston btsugs pas der yul ma ga d+ha na gnas pa'i skye bo'i tshogs thams cad 'du'o/ /lus 'phags ri rdo can shing med pa zhig pas yul ma ga d+ha na gnas pa'i skye bo'i tshogs tsha bas gdungs te smras pa/ 'phags pa kye ma khyod kyis 'dir shing bskyed mdzod cig /de dag gis smras pa/ shes ldan dag bcom ldan 'das kyis ma gnang ngo / /'phags pa 'di la ci zhig 'gal/ de dag cang mi smra bar 'dug pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis shing bskyed par bya'o/ /bcom ldan 'das kyis shing bskyed par bya'o zhes bka' stsal pa dang / dge slong dag gis shing bskyed de dong bas de dag de bzhin du bskams so/ /yul ma ga d+ha na gnas pa'i skye bo'i tshogs phyi de lo lhags pa dang / de bzhin du tsha bas gdungs nas smras pa/ 'phags pa khyed kyis shing de dag ma bskyed dam/ shes ldan dag bskyed na 'on kyang zhal ta ma byas pas ma rung ngo / / 'phags pa gal te khyed kyang pha ma dag gis bskyed nas zhal ta byas par ma gyur na khyed kyang ma rung bar 'gyur ro/ /kye ma khyed kyis zhal ta mdzod cig /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ shing bskyed nas yal bar dor bar mi bya'i 'on kyang zhal ta bya'o/ /bcom ldan 'das kyis shing bskyed nas yar bar dor bar mi bya'i 'on kyang zhal ta bya'o zhes bka' stsal pa dang / dge slong dag gis ji ltar zhal ta bya ba mi shes nas/ bcom ldan 'das kyis bka' stsal pa/ dus dus su chus bcu bar bya'o/ /dge slong dag de kho na lhur len pas dge ba'i phyogs yongs su nyams par gyur nas/ bcom ldan 'das kyis bka' stsal pa/ de lhur blang bar mi bya'i la lar ni lag pa/ la lar ni rkang pa bkru bar bya'o/ /la lar ni so shing bza' bar bya'o/ /la lar ni lhung bzed bkru bar bya'o/ /la lar ni khrus bya'o/ /de dag dgun stod kyi dus su kha bas tshig nas bcom ldan 'das kyis bka' stsal pa/ tshas su gzhug par bya'o/ /dge slong dag gis tshas su bcug pa dang / de dag nags me shor bas tshig nas/ bcom ldan 'das kyis bka' stsal pa/ ra bas bskor bar bya'o/ /rlung ma shor bas tsha bas gdungs nas/ bcom ldan 'das kyis bka' stsal pa/ skar khung gdod par bya'o/ /dbyar sbyang bzhin du chus gang ste 'dug nas/ bcom ldan 'das kyis bka' stsal pa/ dbyar gyi dus su rtsig pa bshig la chu 'bo bar bya'o/ /dge slong dag gis ji srid shing de dag chen por ma gyur par de dag bor te dong ba dang / de dag de bzhin du skams nas/ skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ ngas dge slong shing skyed par byed pa'i kun tu spyod pa'i chos bca' bar bya ste/ dge slong shing skyed par byed pas gal te me tog gi shing bskyed par gyur na ji srid du me tog ma chags pa de srid du 'gro bar mi bya'o/ /'on te 'bras bu'i shing bskyed par gyur na ji srid du 'bras bu ma chags pa de srid du 'gro bar mi bya'o/ /bcom ldan 'das kyis dge slong shing skyed par byed pas/ ji srid du me tog dang 'bras bu ma chags pa de srid du 'gro bar mi bya'o zhes bka' stsal pa dang / dge slong rnams la bya ba rings pa dag cig byung ste/ de dag gis ji ltar bsgrub pa mi shes nas/ bcom ldan 'das kyis bka' stsal pa/ de dag gis kun dga' ra ba pa 'am/ dge slong smos 'drin la bcol nas 'gro bar bya ste 'di la 'gyod par mi bya'o/ /gleng gzhi ni rgyal po'i khab na'o/ /rgyal po sa 'dzin gyis rgyal po gzugs can snying po la la ba rin po che zhig skyes su bskur ba dang / de rgyal po gzugs can snying pos tshe dang ldan pa pi lin da'i bu la byin no/ /tshe dang ldan pa pi lin da'i bus de gyon nas dgon pa'i gnas su song ste 'dug pa dang / rkun po rnams kyis rgyal po sa 'dzin gyis rgyal po gzugs can snying po la la ba rin po che zhig bskur ba de des 'phags pa pi lin da'i bu la byin pa dang / des de gyon nas dgon pa'i gnas che ge mo zhig na 'dug go zhes ji lta ba bzhin du thos nas de dag phan tshun gros bya bar brtsams pa/ shes ldan dag de skad ces grag na 'di la ji ltar bsgrub par bya/ kha cig gis smras pa/ 'di la ci zhig bsgrub tu yod/ tshur dong la dbrog mod/ de dag dong ste sgo la dal gyis brdungs pa dang / tshe dang ldan pa pi lin da'i bus smras pa/ 'di su zhig /de dag gis smras pa/ 'phags pa bdag cag ni rkun po'o/ /ci 'dod/ 'phags pa la ba rin po che'o/ /bzhin bzangs dag gal te de lta na skar khung nas lag pa rkyong zhig /de nas gcig cig gis lag pa brkyang ba dang / tshe dang ldan pa pi lin da'i bus la ba rin po che de ma 'chad cig /ma 'tshig cig 'dren pa na zad par ma gyur cig ces de ltar byin gyis brlabs nas skar khung nas de'i phyogs cig phyung ba dang / rkun po rnams kyis drang shing drang nas phung por byas te drangs nas zad du ma btub nas de dag gis mtshon gyis bcad par brtsams na yang ma chod/ mes bsregs par brtsams na yang 'tshig tu ma btub nas/ de dag gis smras pa/ 'phags pa pi lin da'i bu bdag cag la ci zhig tho brtsam/ thong shig / des smras pa/ skyes bu gti mug dag khyed kyis tho ma brtsams na ngas ji ltar tho brtsam/ khyed kyi stobs dang / brtson 'grus dang / pha rol gnon pa gang yin pa des drangs na ngas ji ltar mi gtang / de dag gis smras pa/ shes ldan dag 'phags pa pi lin da'i bu rdzu 'phrul chen po mthu chen pos ma btang phan chad 'dzin pa 'ongs na mi rung gis bros te 'dong ngo zhes de dag bros so/ /skabs de dge slong rnams kyis bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni dge slong de lta bu'i rin po che dag gyon nas dgon pa'i gnas na 'dug pa las gyur gyis/ de'i phyir dge slong gis de lta bu'i rin po che dag dgon pa'i gnas su bkur bar mi bya'o snyam du dgongs nas dge slong rnams la bka' stsal pa/ dge slong dag dge slong pi lin da'i bus la ba rin po che de 'dra ba gyon nas dgon pa'i gnas su 'dug pa gang yin pa ni ma legs pa zhig byas so/ /de lta bas na dge slong gis la ba rin po che de lta bu gyon nas dgon pa'i gnas su 'dug par mi bya'o/ /'dug na 'gal tshabs can du 'gyur ro/ /'on kyang dge slong dgon pa'i gnas na gnas pa gang zhig la la ba rin po che de lta bu bdog pa des khyim du gzhag par bya'o/ /bcom ldan 'das kyis la ba rin po che de 'dra ba khyim du gzhag par bya'o zhes bka' stsal pa dang / dge slong dgon pa'i gnas na 'dug pa gzhan zhig la chen po la 'os pa'i la ba grub pa des de khyim du bzhag pa dang / srog chags dag gis rmugs pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ na me ru kas btab ste bzhag par bya'o/ /gal te ma rnyed na shing kun nam/ ba sha ka'i lo ma 'am/ a ri sta'i lo mas rim pa rim par btab nas gzhag par bya'o/ /rim pa rim pas gdab tu ma 'byor nas/ bcom ldan 'das kyis bka' stsal pa/ gal te 'byor pa med na steng du btab nas gzhag par bya zhing dus dus su bskabs par bya'o/ /gleng gzhi ni mnyan yod na'o/ /gang gi tshe khyim bdag mgon med zas sbyin gyis rgyal byed kyi tshal phyogs bzhi'i dge slong gi dge 'dun la phul ba de'i tshe de'i dus na dus su ston pa'i zhabs dang / dge slong gnas brtan gnas brtan rnams la phyag 'tshal du 'ong ngo / /ji tsam dus gzhan zhig na dgun ga dge slong rnams lhags pas basbrebs nas bskums te gnas khang dag na nyal zhing 'dug go/ /khyim bdag mgon med zas sbyin gyi ston pa'i zhabs la phyag 'tshal du rgyal byed kyi tshal du song ba des dge slong de dag dge ba'i phyogs btang ste de bzhin du 'dug pa mthong nas des smras pa/ 'phags pa gcig tu brtson pa'i bstan pa la ci ste dge ba'i phyogs btang ste bzhugs/ de dag gis smras pa/ khyim bdag lhags pas sbrebs so/ /de cang mi smra bar rkang pa la phyag byas te song ngo / /des khyim du phyin nas gos lnga brgya dge 'dun la bskur ba dang / dge slong rnams kyis kha tshar bcad nas btsag dang tshon gzhan gyis ci dga' mgur kha bsgyur te gyon no/ /ji tsam na khyim bdag mgon med zas sbyin yang ston pa'i zhabs la phyag 'tshal du 'ongs pas dge slong rnams kyi gnas khang du bltas na gos de dag mi snang nas des smras pa/ 'phags pa gos de dag mi gda' na khyed kyis gang du bzhag /de dag gis ji ltar gyur pa bsnyad pa dang / des smras pa/ 'phags pa khyed kyis chen po la 'os pa'i gos de lta bu chud gsan to/ /kye ma khyed kyis kha tshar ring po nyid dang dkar por bzhag mdzod cig / de dag spobs pa med nas cang mi zer bar 'dug pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis dge 'dun gyis gos sar pa kha tsar ring po ring po dag bcad par bya'o/ /'dul ba phran tshegs kyi gzhi las sgo bzhi pa rdzogs s+ho// // bsdus pa'i sdom ni/ lus dang gleng ba sangs rgyas dang / /spang ba dag dang nga 'das dang / /mtshams las phyi rol dge slong rnams/ /dus ston rgyu bar bcas pa'o/ / sdom ni/ ro ni bsregs par bya ba dang / /shA ri'i bu'i mchod rten dang / /der ni dus ston bya ba dang / /dung dang nya phyis tshong pa'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na khyim bdag gcig gnas pa des rigs mnyam pa las chung ma blangs te/ de de dang lhan cig ces bya ba nas/ bu pho zhig b tsas te de btsas pa'i btsas ston zhag bdun gsum nyi shu gcig tu rgya cher byas nas rigs dang 'thun pa'i ming btags te bsrings bskyed nas chen por gyur to zhes bya ba'i bar snga ma bzhin no/ /ji tsam dus gzhan zhig na legs par gsungs pa'i chos 'dul ba la rab tu byung ba dang / de'i khams ma mnyam nas na bar gyur te/ de rtsa ba dang / sdong bu dang / me tog dang / 'bras bu'i sman dag gis rim gro byas na ma phan te dus las 'das so/ /de dge slong dag gis lhung bzed dang bcas/ chos gos dang bcas par lam dang nye ba zhig tu bor ro/ /ji tsam na lam de nas bram ze dang khyim bdag 'gro ba de dag gis de mthong ste/ de na kha cig gis smras pa/ shes ldan dag shAkya'i bu zhig dus las 'das so/ /gzhan dag gis smras pa/ tshur sheg blta bar bya'o/ / de dag gis mthong nas ngo shes te de dag gis smras pa/ shes ldan dag 'di ni khyim bdag che ge mo'i bu yin te/ dge sbyong shAkya'i bu pa mgon med pa rnams kyi nang du rab tu byung bas gnas skabs 'di 'dra bar gyur to/ / 'di dag gi nang du rab tu byung bar ma gyur na de nye du dag gis 'di rim gro byas par 'gyur ba zhig /skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ dge slong dag de lta bas na gnang gis dge slong shi ba'i rim gro bya'o/ /bcom ldan 'das kyis dge slong shi ba'i rim gro bya'o zhes gsungs pa dang / dge slong dag ji ltar rim gro bya ba mi shes nas/ bcom ldan 'das kyis bka' stsal pa/ bsreg par bya'o/ /bcom ldan 'das kyis bsreg par bya'o zhes gsungs pa dang / bcom ldan 'das la tshe dang ldan pa nye bar 'khor gyis zhus pa/ btsun pa bcom ldan 'das kyis lus 'di la srin bu'i rigs brgyad khri yod do zhes gang gsungs pa de dag ji lta bu lags/ bcom ldan 'das kyis bka' stsal pa/ nye bar 'khor de skyes ma thag tu de dag kyang skye la/ shi ba'i tshe de dag kyang 'chi mod kyi 'on kyang rma'i sgo rnams su brtags te bsreg par bya'o/ / bcom ldan 'das kyis bsreg par bya'o zhes gsungs pa dang / shing ma 'byor nas skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ chu klung dag tu dor bar bya'o/ /chu klung med nas bcom ldan 'das kyis bka' stsal pa/ sa brkos te gzhug par bya'o/ /dbyar kha sa yang 'thas la shing yang srog chags can du gyur nas/ bcom ldan 'das kyis bka' stsal pa/ thibs po'i phyogs su mgo byang phyogs su bstan te sngas su rtsa'i bam po bzhag la glo g.yas pas bsnyal te rtsa'am lo ma'i tshogs kyis g.yogs la yon bsngo zhing rgyun chags gsum gyi chos mnyan pa byin nas 'dong bar bya'o/ /dge slong dag de bzhin du dong ba dang / bram ze dang khyim bdag dag shAkya'i bu'i dge sbyong rnams ni ro bskyal nas khrus mi byed par de bzhin 'dong ste gtsang sbra med do/ / zhes 'phya bar byed nas/ skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ de bzhin du 'dong bar mi bya'i 'on kyang khrus bya'o/ /de dag thams cad bkru bar brtsams pa dang / bcom ldan 'das kyis bka' stsal pa/ thams cad khrus mi bya'i gang dag reg pa de dag gis gos dang bcas te bkru bar bya'o/ /gzhan dag gis ni rkang lag nyi tshe bkru bar bya'o/ /de dag mchod rten la phyag mi 'tshal nas/ bcom ldan 'das kyis bka' stsal pa/ mchod rten la phyag 'tshal bar bya'o/ /sangs rgyas bcom ldan 'das rgyal po'i khab bya ka lan da ka gnas pa na bzhugs so/ /tshe dang ldan pa shA ri'i bu dang / maud gal gyi bu gnyis kyi kun tu spyod pa ni dus dus su sems can dmyal bar yang rgyu zhing 'dong / dud 'gror yang 'dong / yi dags dag tu yang 'dong / lha'i nang du yang 'dong / mi dag tu yang rgyu zhing 'dong ngo / /de gnyis dus gzhan zhig na dmyal bar rgyu zhing 'dong ba las mnar med pa'i dmyal ba chen por son pa dang / der tshe dang ldan pa shA ri'i bus tshe dang ldan pa maud gal gyi bu chen po la smras pa/ tshe dang ldan pa maud gal gyi bu dmyal ba pa'i sems can rnams ngal sos par gyis shig / tshe dang ldan pa maud gal gyi bus tshe dang ldan pa sha ri'i bu de bzhin du bgyi'o zhes tshe dang ldan pa sha ri'i bu'i ltar mnyan te/ nam mkha' la 'phags nas char shing rta'i srog shing tsam gyi rgyun dbab par brtsams pa dang / chu de mnar med pa'i me lce'i 'od kyis bar du skams par gyur to/ /tshe dang ldan pa sha ri'i bus smras pa/ tshe dang ldan pa maud gal gyi bu chen po gzhes shig dang / bdag gis ngal sos par bgyi'o/ /des smras pa/ legs kyis de bzhin du ngal sos par mdzod cig ces smras te/ tshe dang ldan pa maud gal gyi bu chen pos bsdad pa dang / tshe dang ldan pa sha ri'i bus ting nge 'dzin mos pa can zhes bya ba la snyoms par zhugs nas des mnar med pa chen po de bsil bar byas te/ mnar med pa'i sems can rnams kyi sdug bsngal rgyun bcad do/ /de nas de gnyis kyis rdzogs byed chos log par ston pas lus chen por gyur cing de'i lce la yang gshol lnga brgyas rmed pa mthong ba dang / des smras pa/ 'phags pa sha ri'i bu dang / maud gal gyi bu gal te 'dzam bu'i gling du gshegs na tshangs pa mtshungs par spyod pa rnams la bdag gi mchid nas/ ngas chos log par bstan pas skye bo'i tshogs mang po bslus te/ nga las yang dag par blangs shing kun tu spyad pa des lce la gshol lnga brgyas rmed cing khyed kyis ji lta ji ltar nga'i mchod rten la rjed pa byas pa de lta de ltar nga la sdug bsngal ches mi bzad par gyur gyis phyin cad ma byed par thong shig ces mchi'o zhes gsungs shig / tshe dang ldan pa sha ri'i bu dang / maud gal gyi bu dag gis rdzogs byed la cang mi smra bas khas blangs so/ /tshe dang ldan pa sha ri'i bu dang / maud gal gyi bu mnar med pa nas mi snang bar gyur te/ rgyal po'i khab tu dong ngo / /de gnyis rgyal po'i khab tu phyin pa dang / kun tu rgyu dbyug thogs spyi phud can dag cig phyir byung nas de dag kha cig gis smras pa/ shes ldan dag shakya'i bu'i dge sbyong 'di dag brdeg go/ /kha cig gis smras pa/ de bzhin kho nar brdegs na ma legs te klan ka btsal nas brdeg par bya'o/ / de dag gis smras pa/ de bzhin du bya'o/ /tshe dang ldan pa shA ri'i bu sngar song ba dang / de dag gis de la smras pa/ 'phags pa shA ri'i bu kun tu 'tsho ba dag la dge sbyong yod dam/ des tshigs su bcad de smras pa/ kun tu 'tsho la dge sbyong med/ /shAkya rnams kyi nang na yod/ /dgra bcom dag la chags ldan med/ /bus pa so so'i skye bo'ang med/ /de dag gis tshigs su bcad pa de'i don khong du ma chud nas de dag gis smras pa/ shes ldan dag 'di ni bdag cag gi bsngags pa smras kyis su ci yang ma smra bar 'gror chug shig ces byas te de song ngo / /tshe dang ldan pa maud gal gyi bu phyi bzhin du 'ong ba sngon gyi las kyi rnam par smin pa nye bar gnas pas dal nas dal nas 'ong ba de dag gis mthong nas 'phags pa maud gal gyi bu kun tu 'tsho ba dag la dge sbyong yod dam/ des smras pa/ shes ldan dag kun tu 'tsho ba dag la dge sbyong ga la yod de/ bcom ldan 'das kyis kyang 'di la dge sbyong dang po yod/ 'di la gnyis pa yod/ 'di la gsum pa yod/ 'di la bzhi pa yod kyi 'di las phyi rol pa la ni dge sbyong dang bram ze med de pha rol rab tu smra ba rnams ni dge sbyong dang bram zes stong ngo / /de lta bas na 'dir 'khor gyi nang du seng ge'i sgra yang dag par bsgrags so/ /zhes gsungs so/ /gzhan yang khyed kyi ston pa de mnar med pa chen por skyes te/ chos log par bstan pas lus chen por gyur cing lce la gshol lnga brgyas rmed do/ /des nga la than btang ba bdag gi tshangs pa mtshungs par spyod pa rnams la ngas chos log par bstan pas skye bo'i tshogs mang po bslus te/ nga las yang dag par blangs shing kun tu spyad pa des lce la gshol lnga brgyas rmed cing khyed kyis ji lta ji ltar nga'i mchod rten la rjed par byas pa de lta de ltar nga la sdug bsngal ches mi bzad par gyur to/ /zhes gsungs shig ces zer ro/ /de dag rngam nas smras pa/ shes ldan dag mgo reg ngan pa bdag cag la kha zer bar ma zad/ bdag cag gi ston pa la yang mi snyan pa zer na ji ltar bsgrub par bya/ de na kha cig gis smras pa/ 'di la bsgrub tu ci yod/ 'di te por gtal du zad mod/ gzhan dag gis smras pa/ sngar yang bdag cag gis smras pa yin te/ de de bzhin du brdeg gis tshur/ khyed na re glan ka btsal nas brdeg go zhes zer ba de ni da bdag cag dang bdag cag gi ston pa la kha byas pas don gyis grub po zhes de dag gis de'i yan lag dang nying lag 'dam bu bzhin bcom nas dong ngo / /tshe dang ldan pa sha ri'i bus tshe dang ldan pa maud gal gyi bu ci thogs snyam bsam nas/ des phyir log ste bltas na ji tsam na yan lag dang nying lag 'dam bu bzhin du bcom nas sa la 'gyel ba mthong ste/ des smras pa/ tshe dang ldan pa maud gal gyi bu 'di ci nyes/ des smras pa/ tshe dang ldan pa shA ri'i bu las su zad mod gzhan ci zhig yin par 'gyur/ tshe dang ldan pa sha ri'i bus smras pa/ tshe dang ldan pa maud gal gyi bu khyod bcom ldan 'das kyis rdzu 'phrul can gyi mchog tu ma bstan tam/ de ji ltar gyur/ des smras pa/ tshe dang ldan pa shA ri'i bu bdag las kyis non pas rdzu zhes bya ba yang mi dran na rdzu 'phrul lta smos kyang ci dgos/ de nas tshe dang ldan pa shA ri'i bus tshe dang ldan pa maud gal gyi bu byis pa chung ngu bzhin du bla gos kyi nang du bcug nas gtsug lag khang du khyer ba dang / dge slong dag gis de lta bu'i mi sdug pa mthong nas sngangs te 'dus nas tshe dang ldan pa sha ri'i bu la dris pa/ 'di ci zhig /des smras pa/ tshe dang ldan pa maud gal gyi bu kun tu rgyu dbyug thogs spyi phud can rnams kyis 'di lta bur byas mod ces smras te/ des de dal gyis sa la bsnyal lo/ /dge slong dag gis smras pa/ tshe dang ldan pa sha ri'i bu 'di bcom ldan 'das kyis rdzu 'phrul can gyi mchog tu bstan pa ma yin nam/ des smras pa/ bstan na tshe dang ldan pa dag las rnams kyi mthu la ltos/ gang gis lha rnams kyi dbang po rgya brgya byin gyi khang bzangs rnam par rgyal byed rkang pa g.yas pa'i mthe bos bsgul/ rab tu bsgul/ kun tu rab tu bsgul te/ bcom ldan 'das kyis rdzu 'phrul che ba dang mthu che ba rnams kyi mchog tu bstan pa deng las kyis non nas rdzu zhes bya ba mi dran na rdzu 'phrul lta smos kyang ci dgos/ de na dge slong gang dag 'phags pa'i lam ma skyes pa de dag mi dga' zhing shin tu skyo nas dgon pa dang / nags khrod dang / bas mtha'i gnas mal dag tu gnas nas yid la byed pa bskyed par brtsams so/ /rgyal po'i khab kyi grong khyer kun tu kun tu rgyu dbyug thogs spyi phud can rnams kyis/ 'phags pa maud gal gyi bu chen po brdegs te yan lag dang nying lag 'dam bu bzhin du bcom nas/ 'phags pa shA ri'i bus bu chung ngu bzhin du bla gos kyi nang du bcug ste 'od ma'i tshal du khyer nas srog gi lhag ma cung zad cig lus de ring po mi thogs par dus byed par 'gyur ro/ /zhes bya ba'i sgra de grags nas srog chags brgya stong du ma 'od ma'i tshal du 'dus pa dang / rgyal po ma skyes dgra'i blon po dag gis lha 'phags pa maud gal gyi bu chen po kun tu rgyu dbyug thogs spyi phud can rnams kyis brdegs te yan lag dang nying lag 'dam bu bzhin du bcom nas/ 'phags pa shA ri'i bus de bus pa chung ngu bzhin du bla gos kyi nang du bcug ste/ 'od ma'i tshal du 'tshal te mchis na/ srog gi lhag ma cung zad cig lus te ring po mi thogs par dus bgyid par 'gyur ro/ /zhes sbran pa dang / des thos nas khros de de rnams la smras pa/ shes ldan dag kun tu rgyu dbyug thogs spyi phud can rnams tshol cig ces smras nas/ de btsun mo'i 'khor dang / gzhon nu dang / pho brang 'khor gyi mi dag dang lhan cig 'od ma'i tshal du song ngo / / de nas skye bo'i tshogs mang pos rgyal po mthong nas lam phye ba dang / de mig mchi mas gang zhing snying rje rje skad du mi dga' ba'i tshig gis dal gyis dris pa/ 'phags pa maud gal gyi bu chen po 'di ci zhig /des smras pa rgyal po chen po las su bas mod/ gzhan ni ci zhig tu 'gyur/ 'phags pa khyod bcom ldan 'das kyis rdzu 'phrul can gyi mchog tu bstan pa ma yin nam/ rgyal po chen po de de bzhin te bstan mod kyis las kyis non pas 'on kyang rdzu zhes bya ba yang mi dran na rdzu 'phrul lta smos kyang ci dgos/ bcom ldan 'das ni gnyis su mi gsung ba ste/ bcom ldan 'das kyis 'di skad du/ bskal pa brgya phrag rnams su yang / / las rnams chud zar mi 'gyur te/ /tshogs shing dus la bab pa na/ /lus can rnams la 'bras bur smin/ /ces gsungs pa de nye bar gnas par gyur ro zhes byas pa dang / rgyal pos gos kyi mtha' mas mchi ma phyis te sman pa thams cad bkug nas bsgo ba/ shes ldan dag gal te 'phags pa maud gal gyi bu chen po zhag bdun na sos par ma byas na khyed kyi dbang thang gcad par bya'o/ /zhes bsgo ste blon po dag la yang gtad nas song ngo / /kun tu rgyu dbyug thogs spyi phud can rnams kyang thos nas bros so/ /sman pa rnams kyis phan tshun gros bya bar brtsams pa/ shes ldan dag rgyal pos ni de skad bka' stsal na 'di la ji ltar bsgrub par bya/ 'phags pa maud gal gyi bu chen po ni bgres la/ de'i yan lag dang nying lag thams cad 'dam bu bzhin du bcom pas de ji ltar gso bar nus/ ye de nyid mthu che ba rdzu 'phrul che ba yin pas de nyid la skyabs su 'dong ngo / /kha cig gis smras pa/ legs kyis de bzhin du bya'o zhes de dag thams cad 'dus nas tshe dang ldan pa maud gal gyi bu chen po'i thad du song ste rkang pa gnyis la phyag byas nas/ smras pa/ 'phags pa bdag cag la lhas 'di skad du 'phags pa maud gal gyi bu chen po zhag bdun na ma sos na khyed kyi dbang thang gcad do zhes bka' stsal na/ khyod ni bgres pas sngon bzhin du bgyi bar bdag cag gis rngo mi thog ste/ khyod nyid rdzu 'phrul che zhing mthu che bas ji ltar bdag cag gi dbang thang gcad par mi 'gyur ba de ltar mdzad du gsol/ des smras pa/ shes ldan dag gal te de lta na deng la/ rgyal po ma skyes dgra la 'phags pa maud gal gyi bu chen po bdag nyid zhag bdun na rgyal po'i khab tu bsod snyoms la 'jug go zhes gyis shig / de dag rab tu dga' nas de'i rkang pa gnyis la phyag byas nas rgyal po ma skyes dgra'i thad du song nas rkang pa gnyis la gtugs te smras pa lha 'phags pa maud gal gyi bu chen po bdag nyid dgung bdun na rgyal po'i khab tu bsod snyoms la 'jug go/ /rgyal po rab tu dga' nas smras pa/ shes ldan dag gal te de lta na legs so/ /ji tsam na zhag bdun lon pa dang / 'phags pa maud gal gyi bu chen po rang nyid kyi rdzu 'phrul gyis mi bde ba de med par byas te/ rgyal po'i khab du bsod snyoms la zhugs so/ /dgra bcom pa rnams kyi ye shes mthong ba ni bsam pas ' jug pas tshe dang ldan pa shA ri'i bus tshe dang ldan pa maud gal gyi bu chen po rab tu na na ci'i phyir bdag nyid rgyal po'i khab du bsod snyoms la zhugs shes bsam pa la zhugs na yongs su mya ngan las 'da' 'dod par mthong ngo / /de de dang mdza' ba'i bag chags kyis rgyud bsgos pas de nyid kyi nyin par nas na bar gyur te/ des bsam pa/ tshe dang ldan pa maud gal gyi bu chen po yongs su mya ngan las 'da' na bdag ci ste 'dug / bdag ches sngar mya ngan las 'da' bar bya'o snyam du bsams te/ rgyal po'i khab nas grong na la dar song ste/ de nas tshe dang ldan pa sha ri'i bu yul ma ga d+ha'i grong khyer na la da na rim gro pa dge sbyong gi ched skul byed dang / nad tshabs chen pos mi bde zhing sdug bsngal te 'dug go/ /de nas tshe dang ldan pa sha ri'i bu nad de nyid kyis yongs su mya ngan las 'das pa dang / tshe dang ldan pa maud gal gyi bu chen po yang grong khyer shing thags can du song nas/ de'i phyi dro yongs su mya ngan las 'das so/ /gang gi tshe tshe dang ldan pa sha ri'i bu yongs su mya ngan las 'das pa de'i tshe/ dge slong phal cher dbang dang ldan pa sha stag la brgyad khri yongs su mya ngan las 'das so/ /gang gi tshe tshe dang ldan pa maud gal gyi bu chen po yongs su mya ngan las 'das pa de'i tshe/ yang dge slong phal cher dbang dang ldan pa sha stag la bdun khri bdun stong yongs su mya ngan las 'das so/ /de nas dge sbyong gi ched skul byed kyis tshe dang ldan pa shA ri'i bu'i ring bsrel la lus kyis mchod pa byas te/ ring bsrel dang / lhung bzed dang / chos gos dag khyer nas/ rgyal po'i khab ga la ba der rgyu zhing song ste rim gyis rgyu zhing song ba na rgyal po'i khab du phyin to/ /dge sbyong gi ched skul byed lhung bzed dang chos gos cham du phab nas/ rkang pa gnyis bkrus te/ tshe dang ldan pa kun dga' bo gang na ba der song ste phyin pa dang / tshe dang ldan pa kun dga' bo'i rkang pa gnyis la mgo bos phyag byas te phyogs gcig tu 'dug go/ /phyogs gcig tu 'dug nas dge sbyong gi ched skul byed kyis/ tshe dang ldan pa kun dga' bo la 'di skad ces smras so/ /btsun pa kun dga' bos mkhyen par mdzod cig /bdag gi mkhan po btsun pa shA ri'i bu ni yongs su mya ngan las 'das te/ de'i ring bsrel dang / lhung bzed dang / chos gos kyang 'di lags so/ /de nas tshe dang ldan pa kun dga' bos/ dge sbyong gi ched skul byed khrid de/ bcom ldan 'das gang na ba der song nas phyin pa dang / bcom ldan 'das kyi zhabs la mgo bos phyag 'tshal te/ phyogs gcig tu 'dug go/ /phyogs gcig tu 'dug nas/ tshe dang ldan pa kun dga' bos bcom ldan 'das la 'di skad ces gsol to/ /btsun pa dge sbyong gi ched skul byed kyis 'di bdag gang na ba der mchis te/ mchis nas bdag la 'di skad du/ btsun pa kun dga' bos mkhyen par mdzod cig /bdag gi mkhan po btsun pa sha ri'i bu yongs su mya ngan las 'das te/ de'i ring bsrel dang / lhung bzed dang / chos gos kyang 'di lags so/ /zhes mchis nas/ btsun pa bdag gi lus gdung bar gyur cing phyogs kyang bslad/ chos shes pa rnams kyang bskyud par gyur to// //'dul ba phran tshegs kyi gzhi/ bam po nyi shu gcig pa/ kun dga' bo ci dge slong shA ri'i bus tshul khrims kyi phung po khyer te yongs su mya ngan las 'das sam/ btsun pa ma lags so/ /ting nge 'dzin gyi phung po dang / shes rab kyi phung po dang / rnam par grol ba'i phung po dang / rnam par grol ba'i ye shes mthong ba'i phung po khyer te yongs su mya ngan las 'das sam/ btsun pa ma lags so/ /gang yang ngas nyid kyi mngon par shes pas mngon par rdzogs par sangs rgyas te bshad pa'i chos 'di lta ste/ dran pa nye bar gzhag pa bzhi dang / yang dag par spang ba bzhi dang / rdzu 'phrul gyi rkang pa bzhi dang / dbang po lnga dang / stobs dang / byang chub kyi yan lag bdun dang / 'phags pa'i lam yan lag brgyad pa dag khyer te yongs su mya ngan las 'das sam/ btsun pa ma lags te/ btsun pa tshe dang ldan pa shA ri'i bus tshul khrims kyi phung po 'tshal te/ yongs su mya ngan las 'das pa ma lags/ ting nge 'dzin gyi phung po yang ma lags/ shes rab kyi phung po yang ma lags/ rnam par grol ba'i phung po yang ma lags/ rnam par grol ba'i ye shes mthong ba'i phung po 'tshal te mya ngan las 'das pa yang ma lags/ gang yang bcom ldan 'das kyis nyid kyi mngon par shes pas mngon par rdzogs par sangs rgyas te/ bshad pa'i chos 'di lta ste/ dran pa nye bar gzhag pa bzhi dang / yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / 'phags pa'i lam yan lag brgyad pa dag 'tshal te yongs su mya ngan las 'das pa yang ma lags mod kyi 'on kyang / tshe dang ldan pa shA ri'i bu ni tshul khrims dang ldan pa/ mang du thos pa/ chog shes pa/ 'dod pa chung ba rab tu dben pa/ brtson 'grus brtsams pa/ dran pa nye bar gnas pa/ mnyam par gzhag pa/ shes rab can/ shes rab myur ba/ shes rab mgyogs pa/ shes rab rno ba/ nges par 'byung ba'i shes rab can/ nges par 'byed pa'i shes rab can/ shes rab che ba/ shes rab yangs pa/ shes rab zab pa/ shes rab mnyam pa med pa/ shes rab rin po che dang ldan pa/ yang dag par ston par bgyid pa/ yang dag par len du 'jug par bgyid pa/ yang dag par gzeng bstod par bgyid pa/ yang dag par rab tu dga' bar bgyid pa/ yang dag par ston pa dang / yang dag par len du 'jug pa dang / yang dag par gzeng bstod pa dang / yang dag par rab tu dga' ba'i bsngags pa brjod pa/ 'khor bzhi la chos ston pa na dub pa ma mchis pa ste/ bdag tshe dang ldan pa shA ri'i bu'i chos dang / chos kyi longs spyod gang dag lags pa de dag rjes su dran na/ tshe dang ldan pa sha ri'i bu'i yongs su mya ngan las 'das pa de'i slad du dbyar ngan dang / smre sngags 'don to/ /kun dga' bo khyod mya ngan ma byed/ blong bar ma byed/ smre sngags 'don par ma byed cig /gang skyes pa dang / byung ba dang / byas pa dang / 'dus byas pa dang / bsams pa dang / rten cing 'brel bar byung ba de ni 'jig pa'i chos can te/ de dang ldan pa la 'jig par mi 'gyur ba de ga la yod de de ni gnas med do/ / kun dga' bo ngas snga nas khyod la 'dod pa dang / sdug pa dang / dga' ba dang / yid du 'ong ba thams cad ni 'gyes pa dang / med pa dang / bral ba dang / mi ldan par 'gyur bar ma bstan tam/ kun dga' bo dper na ljon shing chen po rtsa ba dang bcas/ snying po dang bcas/ sdong po dang / lo ma dang / 'dab ma dang / me tog dang / 'bras bu dag dang ldan pa'i 'dab ma gang ches mtho ba de dang por ltung ngo / /rin po che'i ri chen po'i rtse mo gang ches mtho ba dag kyang dang por rnyil lo/ / de bzhin du sangs rgyas la sogs pa dge slong gi dge 'dun bzhugs pa'i nang na dge slong shA ri'i bu yongs su mya ngan las 'das te/ dge slong shA ri'i bu phyogs gang na gnas pa'i phyogs der nga thugs khral chung ngur bzhugs so/ / 'di lta ste/ dge slong shA ri'i bu gang na gnas pa'i phyogs de ngas stong pa ma yin par mthong ngo / /de lta bas na kun dga' bo khyod mya ngan ma byed/ blong bar ma byed/ smre sngags 'don par ma byed cig /gang skyes pa dang / byung ba dang / byas pa dang / 'dus byas pa dang / bsams pa dang / rten cing 'brel bar byung ba de ni 'jig pa'i chos can te/ de dang ldan pa la 'jig par mi 'gyur ba de ga la yod de de ni gnas med do/ /kun dga' bo ngas snga nas khyod la 'dod pa dang / sdug pa dang / dga' ba dang / yid du 'ong ba thams cad ni 'gyes pa dang / med pa dang / 'bral ba dang / mi ldan par 'gyur bar ma bstan tam/ kun dga' bo de lta bas na da lta nga 'am/ nga 'das kyang rung bdag nyid gling dang / bdag nyid skyabs dang / chos gling dang / chos skyabs dang / gling gzhan ma yin pa dang / skyabs gzhan ma yin par gnas par bya'o/ /de ci'i phyir zhe na/ kun dga' bo da ltar 'am/ nga 'das kyang rung gang dag bdag nyid gling dang / bdag nyid skyabs dang / chos gling dang / chos skyabs dang / gling gzhan ma yin pa dang / skyabs gzhan ma yin pa la gnas pa de dag ni 'di lta ste/ nga'i dge slong bslab pa 'dod pa rnams kyi mchog tu 'gyur ro/ /ji ltar dge slong bdag nyid gling dang / bdag nyid skyabs dang / chos gling dang / chos skyabs dang / gling gzhan ma yin pa dang / skyabs gzhan ma yin par gnas pa yin zhe na/ 'di na dge slong / nang gi lus la lus kyi rjes su lta zhing 'jig rten la brnab sems dang / yid mi bde ba brtul nas rtun pa dang / shes bzhin dang / dran pa dang ldan par gnas shing phyi'i lus dang / phyi nang gi lus dang / nang gi tshor ba dang / phyi'i tshor ba dang / phyi dang nang gi tshor ba dag dang / nang gi sems dang / phyi'i sems dang / phyi dang nang gi sems dang / nang gi chos dang / phyi'i chos dang / phyi dang nang gi chos dag la chos kyi rjes su lta zhing 'jig rten la brnab sems dang / yid mi bde ba brtul nas rtun pa dang / shes bzhin dang / dran pa dang ldan par gnas pa yin te/ kun dga' bo de ltar na dge slong bdag nyid gling dang / bdag nyid skyabs dang / chos gling dang / chos skyabs dang / gling gzhan ma yin pa dang / skyabs gzhan ma yin par gnas pa yin no/ /de nas tshe dang ldan pa kun dga' bo bcom ldan 'das kyis gsungs pa la mngon par bstod de rjes su yi rangs nas/ bcom ldan 'das kyi zhabs la mgo bos phyag 'tshal te/ bcom ldan 'das kyi spyan snga nas song ngo / /rgyal po'i khab na gnas pa'i skye bo'i tshogs kyis ji ltar kun tu rgyu dbyug thogs spyi phud can rnams kyis 'phags pa maud gal gyi bu chen po'i yan lag dang nying lag dag 'dam bu bzhin du bcom pas/ 'phags pa sha ri'i bu rgyud de dang mdza' ba'i bag chags kyis bsgos pa yang grong na la dar song ste/ snga dro yongs su mya ngan las 'das/ tshe dang ldan pa maud gal gyi bu chen po yang grong shing thags can du song ste yongs su mya ngan las 'das pa thos so/ /bar skabs der dge slong rnams the tshom skyes nas the tshom thams cad gcod par mdzad pa/ sangs rgyas bcom ldan 'das la zhus pa/ btsun pa tshe dang ldan pa maud gal gyi bu chen pos las ci zhig bgyis na/ las de'i rnam par smin pas kun tu rgyu dbyug thogs spyi phud can rnams kyis 'di'i yan lag dang / nying lag 'dam bu bzhin du bcom lags/ bcom ldan 'das kyis bka' stsal pa/ dge slong dag dge slong maud gal gyi bu 'di nyid kyis las byas shing bstsags pa/ tshogs rnyed pa/ rkyen yongs su bsgyur ba/ 'od pa bzhin du nye bar gnas pa/ gdon mi za bar 'byung bar 'gyur ba zhes bya ba nas/ lus can rnams la 'bras bur smin ces bya ba'i bar snga ma bzhin no/ /dge slong dag sngon byung ba ri 'or zhig na bram ze zhig gnas pa des rigs mnyam pa las chung ma blangs de/ de de dang lhan cig rtse bar byed/ dga' bar byed/ dga' mgur spyod par byed do/ /de rtse bar byed/ dga' bar byed/ dga' mgur spyod par byed pa las dus gzhan zhig na chung ma la sems can zhugs par gyur to/ /de zla ba brgyad dam dgu 'das nas khye'u zhig btsas te zhag bdun gsum nyi shu gcig tu de btsas pa'i btsas ston rgyas par byas nas ming btags te bskyed bsrings nas chen por gyur to/ /phas de'i chung ma blangs nas de de dang lhan cig rtse bar byed/ dga' bar byed/ dga' mgur spyod par byed cing de la yang rab tu chags so/ /de la de'i mas rtag tu tshig yid du mi 'ong ba ngan par smra ba dag gis spyos pa dang / des khyo la bzlas nas des de ci nas kyang ma la shin tu byams pa med pa dang / de'i bya dgu la phyi lang byed pa de lta de ltar bslus so/ /des smras pa/ khyod gang gi phyir de la shin tu chags pas nga la phyir lang byed dam/ de ngo tsha nas cang mi zer bar 'dug pa dang / de'i chung mas bsams pa/ re shig kha dug can 'di lang tsho yal yang rang gi khyo la chags pa cung zad kyang mi gtong zhing bdag gi khyo la gshe bar byed do snyam du rig nas de glags tshol bar zhugs so/ /ji tsam na dus gzhan zhig na de'i ma skar ma dang sbyar te khrus byas nas dri dang me tog dag gis lus brgyan te nyi ma ma nub pa kho nar des khyim mi dag ma brtags par khyo dang lhan cig gsang ba spyod do/ /de nas mna' ma des khyo de khrid nas ci nas kyang phyogs der son pa de ltar byas pa dang / ji tsam na pha dang ma gnyis gsang ba spyod pa mthong nas/ des bsams pa/ kha dug can 'di/ bdag la ni khyod bud med la shin tu chags so/ /zhes gshe bar byed na 'di da rung yang zhi ba med de/ khyim mi dag la yang mi rtog par nyi ma ma nub pa nyid du gsang ba spyod do/ /snyam du bsams nas khros te/ gang zhig 'di gnyis kyi yan lag dang nying lag 'dam bu bzhin 'jom pa de 'ga' med dam zhes ngag gi las rtsub mo smras so/ /bcom ldan 'das kyis bka' stsal pa/ dge slong dag ji snyam du sems/ de'i tshe de'i dus na bram ze'i khye'ur gyur pa gang yin pa de ni/ dge slong maud gal gyi bu 'di nyid yin te/ gang 'dis sems 'khrugs te/ pha dang ma la ngag gi las rtsub mo smras pa de'i las kyi rnam par smin pas tshe rabs lnga brgyar 'di'i yan lag dang nying lag 'dam bu bzhin du bcom ste/ da ltar srid pa tha ma/ gnas tha ma/ lus tha ma/ bdag nyid tha ma thob ste/ rdzu 'phrul can gyi nang na mchog tu bstan pa'i bar du yang yan lag dang nying lag 'dam bu bzhin du bcom par gyur to/ /dge slong dag de lta bas na las gcig tu gnag pa rnams kyi rnam par smin pa yang gcig tu gnag /gcig tu dkar ba rnams kyi yang gcig du dkar/ 'dren ma rnams kyi yang 'dren ma'o/ /dge slong dag de lta bas na las gcig tu gnag pa dang / 'dren ma rnams spangs nas/ las gcig tu dkar ba dag la brtsal bar bya ste/ dge slong dag khyed kyis de ltar bslab par bya'o/ /bcom ldan 'das kyis de skad ces bka' stsal pa dang / dge slong de dag yi rang ste/ bcom ldan 'das kyis gsungs pa la mngon par bstod do/ /yang sangs rgyas bcom ldan 'das la dge slong rnams kyis zhus pa/ btsun pa kun tu rgyu dbyug thogs spyi phud can rnams kyis tshe dang ldan pa shA ri'i bu ni btang / tshe dang ldan pa maud gal gyi bu chen po ni brdegs pa la gzigs/ bcom ldan 'das kyis bka' stsal pa/ dge slong dag da ltar 'ba' shig ma yin gyi/ 'das pa'i dus na yang ji ltar shA ri'i bu ni btang la/ maud gal gyi bu ni brdegs pa de nyon cig /dge slong dag sngon byung ba ri'i 'or zhig na khye'u dang / bu mo dag cig rtse ba de dag gis bram ze'i khye'u gnyis shig mthong nas de dag gis smras pa/ bram ze'i khye'u pha bi dag brdeg go/ /yang smras pa/ re shig mi brdeg par je dri ba zhig dris la/ gal te sems mgu bar byas na ni mi brdeg ji ste ma yin na ni brdeg go/ /de dag gis bram ze'i khye'u gcig la dris pa dus gang du grang / des bsams pa/ ji lta bu'i sems kyis 'di dag bdag la 'dri snyam na des gor ma chag par 'di dag brdeg par 'dod par shes nas/ des tshigs su bcad de smras pa/ grang ngam gal te dro yang rung / /gang gi tshe na rlung langs pa/ /rlung gis btab na grang ba ste/ /rlung med pa yi grang ba med/ / de de dag gis btang nas/ gcig shos la dris pa dang / des smras pa dgun drang mod ces byas pa dang / de de dag gis brdegs so/ /dge slong dag ji snyam du sems/ btang ba gang yin pa de ni shA ri'i bu 'di nyid yin no/ / brdegs pa gang yin pa de ni maud gal gyi bu 'di nyid yin te/ de'i tshe yang shA ri'i bu ni btang la/ maud gal gyi bu ni brdegs so/ /da ltar yang shA ri'i bu ni btang la/ maud gal gyi bu ni brdegs so/ /yang ji ltar shA ri'i bu ni btang la/ maud gal gyi bu ni brdegs pa de nyon cig /dge slong dag sngon byung ba chu klung skams pa'i shol cig na khye'u dang bu mo dag cig rtse ba de dag gis shing shal ma la'i me tog chu'i rgyun gyis khyer ba zhig dang / bram ze'i khye'u gnyis shig 'ong ba mthong nas zhes bya ba nas/ de dag gis bram ze'i khye'u gcig la dris pa/ chus khyer ba 'di ci zhig /des bsams pa/ ci 'dra ba'i sems kyis 'di dag bdag la 'dri snyam na/ gor ma chag par brdeg 'dod par zhes bya ba'i bar snga ma bzhin no/ /des kyang tshigs su bcad de smras pa/ stobs dang ldan pas tshar bcad pa/ /nges par 'byung ba'i tshol ba yis/ /shal ma li zhes mi bsam ste/ /skam gyi pad ma bzhin par bsam/ /de de dag gis btang nas/ gcig shos la dris pa dang / des smras pa/ ma mthong ngam/ shing shal ma li'i me tog yin mod ces byas pa dang / de de dag gis brdegs so/ /dge slong dag ci snyam du sems shes bya ba rgyas par snga ma bzhin no/ /de nas bcom ldan 'das rgyal po'i khab na ji tsam dgyes par bzhugs nas mnyan yod gang na ba der rgyu zhing gshegs so/ /rgyu zhing gshegs pa dang / rim gyis mnyan yod du byon te mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /khyim bdag mgon med zas sbyin gyis 'phags pa shA ri'i bu yongs su mya ngan las 'das te/ de'i ring bsrel 'phags pa kun dga' bo'i lag na yod do zhes thos so/ /thos nas kyang tshe dang ldan pa kun dga' bo gang na ba der song ste phyin nas/ tshe dang ldan pa kun dga' bo'i rkang pa gnyis la mgo bos phyag 'tshal te/ phyogs cig tu 'dug go/ /phyogs cig tu 'dug nas khyim bdag mgon med zas sbyin gyis tshe dang ldan pa kun dga' bo la 'di skad ces smras so/ /'phags pa kun dga' bo mkhyen par mdzod cig /'phags pa shA ri'i bu ni bdag gi yun ring po nas sdug pa dang / yid du 'ong ba dang / bla ma dang / dran par bgyid pa lags na/ de yongs su mya ngan las 'das te/ de'i ring bsrel khyod kyi phyag na mnga' ba de dag bdag la stsol cig dang / de'i ring bsrel la ring bsrel gyi mchod pa bgyi'o/ /des smras pa/ khyim bdag de ni bdag gi yang yun ring po nas sdug pa dang / yid du 'ong ba dang / bla ma dang dran par bya ba yin pas bdag nyid de'i ring bsrel la ring bsrel gyi mchod pa byed do/ /de nas khyim bdag mgon med zas sbyin gyis/ bcom ldan 'das gang na ba der song ste phyin pa dang / bcom ldan 'das kyi zhabs gnyis la mgo bos phyag 'tshal te/ phyogs gcig tu 'dug go/ /phyogs gcig tu 'dug nas/ khyim bdag mgon med zas sbyin gyis/ bcom ldan 'das la 'di skad ces gsol to/ /btsun pa mkhyen par mdzad du gsol/ 'phags pa shA ri'i bu ni bdag gi yun ring po nas sdug pa dang / yid du 'ong ba dang / bla ma dang / dran par bgyi ba lags te/ de'i ring bsrel 'phags pa kun dga' bo'i sug pa na mchis pa bcom ldan 'das kyis bdag la stsol du stsal bar gsol/ bdag de'i ring bsrel la ring bsrel gyi mchod pa 'tshal lo/ /de nas bcom ldan 'das kyis tshe dang ldan pa kun dga' bo pho nyas bkug nas 'di skad ces bka' stsal to/ / kun dga' bo dge slong shA ri'i bu'i ring bsrel rnams khyim bdag mgon med zas sbyin la byin la de mchod pa byed du chug shig /bram ze dang khyim bdag rnams ni don 'dis na dad pa can yin no/ /kun dga' bo gzhan yang 'di tsam gyis ni khyod kyis nga'i bstan pa la phan pa byas pa 'am/ lan lon pa ma yin no/ /de lta bas na khyod kyis rab tu phyung shig bsnyen par rdzogs par gyis shig /gnas byin cig /dge sbyong gi ched nye bar zhog shig / de dag la yang ji ltar thon pa bzhin 'don du chug shig /'dzin du chug shig /slobs shig dang 'di tsam gyis na khyod kyis nga'i bstan pa la phan btags pa dang / lan lon pa yin no/ /de nas tshe dang ldan pa kun dga' bos ston pa'i bkas khyim bdag mgon med zas sbyin la tshe dang ldan pa shA ri'i bu'i ring bsrel dag byin te/ 'di ltar bcom ldan 'das sngon byang chub sems dpar gyur pa na lan 'ga' yang yab yum dang / mkhan po dang / slob dpon dang gzhan bla ma'i gnas lta bu dag gi tshig ma bcag pas so/ /de nas khyim bdag mgon med zas sbyin gyis tshe dang ldan pa shA ri'i bu'i ring bsrel dag khyer nas rang gi khyim ga la ba der song ste phyin nas/ de dag khyim gyi mchog gi nang du mthon po zhig du bzhags nas nang mi dang bcas/ mdza' bo dang / nye du dang / phu nu dang bcas te/ mar me dang / bdug pa dang / me tog dang / dri dang / phreng ba dang / byug pa rnams kyis mchod par bya bar brtsams so/ /mnyan yod na gnas pa'i skye bo'i tshogs kyis ji ltar 'phags pa shA ri'i bu yul ma ga d+ha'i grong na la dar yongs su mya ngan las 'das pa de'i ring bsrel dag 'phags pa kun dga' bos blangs nas/ khyim bdag mgon med zas sbyin la byin te/ des de dag khyim du bzhag nas nang mi dang bcas/ mdza' bo dang / gnyen dang / phu nu dang bcas te/ mar me dang / bdug pa dang / me tog dang / dri dang / phreng ba dang / byug pa dag gis mchod pa thos so/ /de bzhin du yul ko sa la'i rgyal po gsal rgyal gyis kyang thos nas btsun mo phreng ldan ma dang / rgyal rigs dbyar tshul ma dang / drang srong byin dang / rnying pa dag dang ri dgas 'dzin gyi ma sa ga dang / gzhan yang dad pa can mang po dag dang lhan cig de dag thams cad mchod pa'i yo byad dag khyer te khyim bdag mgon med zas sbyin gyi khyim du dong nas/ de rnams kyis mchod pa'i yo byad dag gis mchod par brtsams pa las der kha cig gis yon tan gyi tshogs dag thob bo/ /ji tsam dus gzhan zhig na khyim bdag mgon med zas sbyin ri 'or zhig du bya ba cung zad zhig byung nas des der sgo bcad nas song ngo / /skye bo phal po che dag de bzhin du 'ongs pa dang / ji tsam na sgo bcad pa mthong nas khyim bdag mgon med zas sbyin gyis sgo bcad de song bas des bdag cag gi bsod nams kyi bar chad byas so/ /zhes de dag 'phya bar byed/ gzhogs 'phyas byed/ smod par byed do/ /de nas khyim bdag mgon med zas sbyin ri 'or de nas 'ongs pa dang / de'i nang mis smras pa/ khyim bdag skye bo'i tshogs chen po mchod pa'i yo byad thogs te 'ongs pa las sgo bcad pa mthong nas/ des bdag cag gi bsod nams kyi bar chad byas so/ /zhes 'phya bar byed/ gzhog 'phyas byed/ smod par byed do/ / de 'di snyam du 'di nyid bdag gis bya ba yin no/ /snyam du shes nas/ bcom ldan 'das gang na ba der song ste phyin pa dang / bcom ldan 'das kyi zhabs gnyis la mgos phyag byas te phyog cig tu 'dug go/ / phyogs gcig tu 'dug nas/ bcom ldan 'das la 'di skad ces gsol to/ /btsun pa 'phags pa shA ri'i bu la rab tu dad pa'i skye bo'i tshogs chen po mchod pa'i yo byad dag thogs te/ bdag gi sdum par mchis pa las bdag bgyi ba cung zad cig gi slad du chab sgo bkum nas gzhan du mchis pa dang / de dag khyim bdag mgon med zas sbyin gyis sgo bcad de song bas/ bdag cag gi bsod nams kyi bar chad byas so zhes 'phya bar bgyid/ gzhogs 'phyas bgyid smod par bgyid do/ /de'i slad du gal te bcom ldan 'das kyis gnang na bdag gis/ 'phags pa shA ri'i bu'i mchod rten phyogs snang yal can zhig tu bgyis la/ der skye bo'i tshogs chen po bag yangs su mchod pa bgyid du stsal to/ /bcom ldan 'das kyis bka' stsal pa/ khyim bdag de lta bas na gnang gis byos shig /bcom ldan 'das kyis gnang gis byos shig ces bka' stsal pa dang / des ji lta bur bya ba mi shes nas/ bcom ldan 'das kyis bka' stsal pa/ rim gyis bang rim bzhi byas la de nas bum rten bya'o/ /de nas bum pa dang bre dang srog shing dang / gdugs gcig dang / gnyis dang / gsum dang / bzhi bya ba byas nas bcu gsum gyi bar du bya zhing char khab dag gzhag par bya'o/ /bcom ldan 'das kyis mchod rten de lta bu bya'o zhes gsungs pa dang / des ci 'phags pa shA ri'i bu 'ba' zhig la mchod rten rnam pa de lta bu'am/ 'on te 'phags pa thams cad la bya ba mi shes nas/ skabs de bcom ldan 'das la dge slong dag gis gsol pa dang / bcom ldan 'das kyis bka' stsal pa/ khyim bdag re zhig de bzhin gshegs pa'i mchod rten ni rnam pa thams cad rdzogs par bya'o/ /rang sangs rgyas kyi char khab mi gzhag par bya'o/ /dgra bcom pa'i ni gdugs bzhi'o/ /phyir mi 'ong ba'i ni gsum mo/ /phyir 'ong ba'i ni gnyis so/ /rgyun du zhugs pa'i ni gcig go/ /so so'i skye bo dge ba rnams kyi mchod rten ni byi bor bya'o/ /bcom ldan 'das kyis 'phags pa rnams kyi mchod rten ni rnam pa 'dis so/ /so so'i skye bo rnams kyi ni 'dis so zhes bka' stsal pa dang / des gang gi gnas gang du bya ba mi shes nas/ bcom ldan 'das kyis bka' stsal pa/ ji ltar de bzhin gshegs pa bzhugs pa na/ shA ri'i bu dang / maud gal gyi bu dag 'dug pa de bzhin du yongs su mya ngan las 'das pa'i mchod rten yang bya'o/ /gzhan yang gnas brtan gnas brtan rnams kyi mchod rten ni rgan rims bzhin sbreng bar bya'o/ /so so'i skye bo dge ba rnams kyi ni dge 'dun gyi kun dga' ra ba'i phyi rol du bya'o/ / khyim bdag mgon med zas sbyin gyis gsol pa/ gal te bcom ldan 'das kyis gnang na/ bdag gis 'phags pa shA ri'i bu'i mchod rten gyi dus ston dag bgyi'o/ /bcom ldan 'das kyis bka' stsal pa/ khyim bdag gnang gis gyis shig / yul ko sa la'i rgyal po gsal rgyal gyis ji ltar/ khyim bdag mgon med zas sbyin gyis bcom ldan 'das la 'phags pa shA ri'i bu'i mchod rten gyi dus ston gzugs par gsol ba las/ bcom ldan 'das kyis 'dzugs par gnang ba thos nas/ ma la bdag gis kyang de'i grogs bya'o snyam nas/ des 'di ltar dril bsgrags nas/ shes ldan mnyan yod na gnas pa'i grong khyer pa rnams dang / yul gzhan nas lhags pa'i skye bo'i tshogs dag nyon cig / 'phags pa shA ri'i bu'i mchod rten gyi dus ston la bab pa'i tshe zong thogs nas 'ongs pa gang yin pa de la sho gam yang med la gcan kyang med/ gru btsas kyang med kyis de bag yangs su 'dir shog shig / bar skabs der rgya mtsho chen po nas tshong pa lnga brgya zhig gru bo che'i nor grub ste/ mnyan yod du phyin pa de dag gis ji ltar rgyal pos mnyan yod du dril bsgrags te/ 'di skad du gang zhig 'phags pa shA ri'i bu'i mchod rten gyi dus ston la bab pa'i tshe zong thogs te 'ong ba de la sho gam yang med la gcan yang med/ gru btsas kyang med kyis de bag yangs su 'dir shog shig / ces bsgo ba thos nas re shig rgyal po 'di rang gi bsod nams kyi 'bras bu la gnas kyang bsod nams dag gis ngoms mi shes te/ sbyin pa dag sbyin/ bsod nams dag byed na bdag gis ci'i phyir sbyin pa dag mi sbyin/ bsod nams dag mi bya snyam nas/ de dag yid rab tu dang ba skyes te/ dus ston de'i dus su dung dang / nor bu dang mu tig la sogs pa phul ba dang / dge slong dag gis ji ltar bsgrub pa mi shes nas/ bcom ldan 'das kyis bka' stsal pa/ pud dud gang yin pa de dag ni shing 'dzam bu'i grib ma na bzhugs pa'i sku gzugs la dbul bar bya'o/ /gzhan yang chung shas shig ni shA ri'i bu'i mchod rten de'i bcos legs bya bar bzhag la lhag ma ni dge 'dun tshogs pas bgo bar bya'o/ /de de bzhin gshegs pa'i mchod rten gyi ma yin gyi/ shA ri'i bu'i mchod rten gyi yin te/ de lta bas na 'gyod par mi bya'o/ / sdom ni/ gleng dang dran pa nyid dang ni/ /skabs dbye ba dang smra mi bya/ /lung 'bog pa dang / gso sbyong dang / dgag dbye 'jog par byed pa'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong drug sde dag gis nyes par mthong ba dang / nyes par thos pa dang / nyes par dogs pas dge slong dag la glengs so/ /dge slong dag la nyes par mthong ba dang / nyes par thos pa dang / nyes par dogs pas glengs pa na de dag bag tsha bzhin du gnas so/ /de dag bag tsha bzhin du gnas pas rid pa dang / skem pa dang / rnyis pa dang / lus las su ma rung bar gyur te lung ston pa dang / klog pa dang / kha ton dang / rnal 'byor dang / nang gi tshul bzhin yid la byed pa dag shor nas skabs de dge slong dag gis bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni dge slong dag dge slong la nyes par mthong ba dang / nyes par thos pa dang / nyes par dogs pas gleng ba las gyur gyis de lta bas na dge slong gis dge slong la nyes par mthong ba dang / nyes par thos pa dang / nyes par dogs pas gleng bar mi bya'o/ /dge slong gis nyes par mthong ba dang / nyes par thos pa dang / nyes par dogs pas dge slong la gleng bar byed na 'gal tshabs can du 'gyur ro/ /gleng bar byed pa ji lta bar dran par byed pa dang / skabs 'byed par byed pa dang / mi smra bar byed pa dang / lung 'bogs par byed pa dang / gso sbyong 'jog par byed pa dang / dgag dbye 'jog par byed pa yang de dang 'dra ste/ sdom gyi tshigs su bcad pa thams cad snga ma bzhin du brjod par bya'o/ / sdom ni/ sangs rgyas mtshan nas smos pa dang / /tshe dang ldan pa kun mi spyad/ /'phral thabs can la ma dad dang / /'dul ba mdor ni bsdus pa'o/ /sangs rgyas bcom ldan 'das bA rA Na sI na drang srong smra ba ri dgas kyi nags na bzhugs so/ /de nas bcom ldan 'das kyis dge slong lnga po dag la bka' stsal pa/ dge slong dag ngas sngon ma thos pa'i chos rnams la 'di ni sdug bsngal 'phags pa'i bden pa'o zhes tshul bzhin yid la byas pa na mig skyes so/ /shes pa dang rig pa dang / blo dang / rtogs pa skyes so/ /dge slong dag ngas sngon ma thos pa'i chos rnams la 'di ni sdug bsngal kun 'byung ba'o/ /'di ni sdug bsngal 'gog pa'o/ /'di ni sdug bsngal 'gog par 'gyur ba 'phags pa'i lam mo/ /zhes tshul bzhin du yid la byas pa na mig skyes so/ /shes pa dang rig pa dang / blo dang / rtogs pa skyes so/ /dge slong dag ngas sngon ma thos pa'i chos rnams la sdug bsngal 'phags pa'i bden pa de mngon par shes pas yongs su shes par bya'o/ /zhes tshul bzhin yid la byas pa na mig skyes so/ /shes pa dang / rig pa dang / blo dang rtogs pa skyes so/ /dge slong dag ngas sngon ma thos pa'i chos rnams la sdug bsngal kun 'byung ba 'phags pa'i bden pa de mngon par shes pas spang bar bya'o zhes tshul bzhin yid la byas pa na mig skyes so/ /shes pa dang / rig pa dang / blo dang rtogs pa skyes so/ /dge slong dag ngas sngon ma thos pa'i chos rnams la sdug bsngal 'gog pa 'phags pa'i bden pa de mngon par shes pas mngon sum du bya'o zhes tshul bzhin du yid la byas pa na mig skyes so/ /shes pa dang rig pa dang / blo dang rtogs pa skyes so/ /dge slong dag ngas sngon ma thos pa'i chos rnams la sdug bsngal 'gog par 'gyur ba'i lam 'phags pa'i bden pa de bsgom par bya'o/ /zhes tshul bzhin yid la byas pa na mig skyes so/ /shes pa dang rig pa dang blo dang rtogs pa skyes so/ /dge slong dag ngas sngon ma thos pa'i chos rnams la sdug bsngal 'phags pa'i bden pa de mngon par shes pas yongs su shes so/ /zhes tshul bzhin yid la byas pa na mig skyes so/ /shes pa dang rig pa dang blo dang rtogs pa skyes so/ /dge slong dag ngas sngon ma thos pa'i chos rnams la sdug bsngal kun 'byung ba 'phags pa'i bden pa de mngon par shes pas spangs so zhes tshul bzhin yid la byas pa na mig skyes so/ /shes pa dang rig pa dang blo dang rtogs pa skyes so/ / dge slong dag ngas sngon ma thos pa'i chos rnams la sdug bsngal 'gog pa 'phags pa'i bden pa de mngon par shes pas mngon sum du byas so/ /zhes tshul bzhin yid la byas pa na mig skyes so/ /shes pa dang rig pa dang blo dang rtogs pa skyes so/ /dge slong dag ngas sngon ma thos pa'i chos rnams la sdug bsngal 'gog par 'gyur ba 'phags pa'i lam de mngon par shes pas bsgoms so/ /zhes tshul bzhin yid la byas pa na mig skyes so/ /shes pa dang / rig pa dang / blo dang / rtogs pa skyes so/ /dge slong dag gang la ji srid du 'phags pa'i bden pa bzhi po 'di dag la de ltar lan gsum du bzlas te rnam pa bcu gnyis pa'i mig skyes par ma gyur/ shes pa ma yin/ rig pa ma yin/ blo ma yin/ rtogs pa ma skyes pa de srid du nga 'jig rten lha dang bcas/ bdud dang bcas/ tshangs pa dang bcas/ dge sbyong dang bram ze'i skye dgu dang bcas/ lha dang mi dang bcas pa 'di las grol ba dang / nges par byung ba dang / bral ba dang / rab tu grol ba dang / phyin ci log dang bral ba'i sems kyis mang du gnas par ma gyur pa de srid du nga bla na med pa yang dag par rdzogs pa'i byang chub mngon par rdzogs par sangs rgyas so snyam du shes par ma gyur gyi dge slong dag gang nas bzung ste/ nga la 'phags pa'i bden pa bzhi po 'di dag la de ltar lan gsum du bzlas te rnam pa bcu gnyis pa'i mig skyes/ shes pa dang / rig pa dang / blo dang rtogs pa skyes pa de nas bzung ste/ nga 'jig rten lha dang bcas/ bdud dang bcas/ tshangs pa dang bcas/ dge sbyong dang bram ze'i skye dgu dang bcas/ lha dang mi dang bcas pa 'di las grol ba dang / nges par byung ba dang / rab tu grol ba dang / phyin ci log dang bral ba'i sems kyis mang du gnas par gyur/ de nas bzung ste nga bla na med pa yang dag par rdzogs pa'i byang chub tu mngon par rdzogs par sangs rgyas so snyam du shes par gyur to/ /chos kyi rnam grangs 'di bshad pa na tshe dang ldan pa kauN+Di n+ya dang / lha brgyad khri chos rnams la chos kyi mig rdul med cing dri ma dang bral ba skyes par gyur to/ /de nas bcom ldan 'das kyis tshe dang ldan pa kauN+Di n+ya la bka' stsal pa/ kauN+Di n+ya khyod kyis chos kun shes sam/ bcom ldan 'das kun 'tshal to/ /kauN+Di n+ya khyod kyis chos kun shes sam/ bde bar gshegs pa kun 'tshal to/ / tshe dang ldan pa kauN+Di n+ya chos kun shes pa de'i phyir tshe dang ldan pa kauN+Di n+ya'i ming kun shes kauN+Di n+ya zhes bya bar chags so/ /tshe dang ldan pa kauN+Di n+ya chos kun shes pa na sa bla pa'i gnod sbyin rnams kyis sgra phyung zhing dbyangs rjes su bsgrags pa/ grogs po dag bcom ldan 'das kyis skye bo mang po la phan pa dang / skye bo mang po la bde ba dang / 'jig rten la thugs brtse ba dang / lha dang mi rnams kyi don dang / phan pa dang / bde bar mdzad pa'i slad du 'jig rten na dge sbyong ngam/ bram ze 'am/ lha 'am/ bdud dam/ tshangs pa gang gis kyang chos dang 'thun par ma bskor ba'i chos kyi 'khor lo chos dang 'thun pa lan gsum du bzlas te rnam pa bcu gnyis pa 'di yul bA rA Na sI drang srong smra ba ri dgas kyi nags su bskor bas lha'i ris dag ni mngon par 'phel bar 'gyur/ lha ma yin gyi ris dag ni yongs su nyams par 'gyur ro/ /sa bla pa'i gnod sbyin rnams kyi sgra bar snang la spyod pa'i gnod sbyin rnams dang / rgyal chen bzhi'i lha rnams dang / sum bcu rtsa gsum pa rnams dang / 'thab bral ba rnams dang / dga' ldan pa rnams dang / 'phrul dga' ba rnams dang / gzhan 'phrul dbang byed kyi lha rnams kyis thos nas skad cig de dang / thang cig de dang / yid tsam de dang / skad cig dang / thang cig dang / yud tsam de la tshangs pa'i 'jig rten gyi bar du sgra grags par gyur te/ tshangs ris pa'i lha rnams kyi sgra phyung zhing dbyangs rjes su bsgrags pa/ grogs po dag bcom ldan 'das kyis lha dang mi rnams kyi zhes bya ba nas/ 'di yul bA rA Na sI drang srong smra ba ri dgas kyi nags su bskor bas lha'i ris dag ni mngon par 'phel bar 'gyur/ lha ma yin gyi ris dag ni yongs su nyams par 'gyur ro zhes bya ba'i bar snga ma bzhin no/ /bcom ldan 'das kyis yul bA rA Na sI drang srong smra ba ri dgas kyi nags su chos kyi 'khor lo chos dang 'thun pa lan gsum gyi bar du bzlas te rnam pa bcu gnyis pa bskor te/ de'i phyir chos kyi rnam grangs 'di chos kyi 'khor lo bskor ba zhes bya'o/ /gang gi tshe bcom ldan 'das kyis dge slong lnga po dag gi rgyud la chos kyi 'khor lo bskor te/ de dag bsnyen par rdzogs pa dge slong gi dngos por gyur pa de'i tshe de dag de bzhin gshegs pa la shin tu mtshan nas smos pa dang / gdung nas smos pa dang / tshe dang ldan pa zhes smos pa kun tu spyod nas bcom ldan 'das kyis de dag la bka' stsal pa/ dge slong dag khyed de bzhin gshegs pa la shin tu mtshan nas smos pa dang / gdung nas smos pa dang / tshe dang ldan pa zhes smos pa kun tu ma spyod cig /dge slong dag de ci'i phyir zhe na/ gang zhig de bzhin gshegs pa la shin tu mtshan nas smos pa dang / gdung nas smos pa dang / tshe dang ldan pa zhes smos pa kun tu spyod pa de ni skyes bu gti mug de la yun ring por gnod pa dang / phan pa ma yin pa dang / sdug bsngal bar 'gyur ro/ /bcom ldan 'das kyis dgongs pa/ nyes dmigs gang cung zad byung ba ni dge slong dag de bzhin gshegs pa la mtshan nas smos pa dang / gdung nas smos pa dang / tshe dang ldan pa zhes smos pa kun tu spyod pa las gyur kyis/ de'i phyir dge slong gis de bzhin gshegs pa la mtshan nas smos pa dang / gdung nas smos pa dang / tshe dang ldan pa zhes smos pa kun tu spyad par mi bya'o snyam du dgongs nas dge slong lnga po dag la bka' stsal pa/ dge slong dag de lta bas na dge slong gis de bzhin gshegs pa la mtshan nas smos pa dang / gdung nas smos pa dang / tshe dang ldan pa zhes smos pa kun tu spyad par mi bya ste/ kun tu spyod na 'gal tshabs can du 'gyur ro/ /bcom ldan 'das kyis dge slong gis de bzhin gshegs pa la mtshan nas smos pa dang / gdung nas smos pa dang / tshe dang ldan pa zhes smos pa kun tu spyad par mi bya ste/ kun du spyod na 'gal tshabs can du 'gyur ro zhes bka' stsal pa dang / dge slong gzhon nu gzhon nu dag dge slong rgan pa rgan pa dag la ming nas smos pa dang / rus nas smos pa dang / tshe dang ldan pa zhes smos pa kun tu spyod nas skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong gzhon nus dge slong ches rgan pa la ming nas smos pa dang / rus nas smos pa kun tu spyad par mi bya'o/ /'on kyang tshe dang ldan pa zhes bod pa 'am/ btsun pa zhes bod pa gnyis kun tu spyad par bya'o/ /dge slong gzhon nus dge slong ches rgan pa la ming nas smos sam/ rus nas smos pa kun tu spyod na 'gal tshabs can du 'gyur ro/ /gleng gzhi ni mnyan yod na'o/ /mnyan yod na dge slong 'phral thabs can dang / dge slong ma gsod mo ji lta ji ltar skye bo'i tshogs mang po mi dad par 'gyur ba de lta de ltar khyim dag tu rgyu ba byed ces bya ba rgyas par rnam par 'byed pa las ji skad 'byung ba bzhin no/ /sangs rgyas bcom ldan 'das ku sha'i grong khyer na gyad kyi nyen 'khor shing sa la zung gi tshal na bzhugs so/ /de nas bcom ldan 'das yongs su mya ngan las 'da' ba'i dus kyi tshe de na dge slong rnams la bka' stsal pa/ dge slong dag ngas 'dul ba rgyas par bstan na/ mdor bsdus te yang ma bstan pas legs par rab tu nyon la yid la zung shig bshad do/ /dge slong dag khyed kyis ngas sngon gnang ba yang med/ bkag pa yang med pa gang yin pa de yang gal te mi rung ba sten cing rung ba dang mi mthun na rung ba ma yin pa'i phyir spyad par mi bya'o/ /gal te rung ba sten cing mi rung ba dang mi mthun na rung ba yin pa'i phyir spyad par bya ste 'di la 'gyod par mi bya'o/ / sdom ni/ spangs pa dag ni bged pa dang / /sbrang ma rnams kyi skyabs dang ni/ /spyad tshags dang ni gyo mo dang / /sra brkyang gding dang mang po'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /dge slong zhig la chos gos kyi spang ba byung nas/ des de rgan pa'i mtha' logs su 'dug ste dge 'dun la spangs so/ /dge skos kyis bsams pa/ 'di ni dge 'dun gyi rnyed pa grub pa yin te spel nas bgo bar bya'o snyam nas/ des de spel nas dge 'dun la brims pa dang / dge slong de phongs par gyur to/ /skabs de dge slong rnams kyis bcom ldan 'das la gsol pa dang / bcom ldan 'das kyis dgongs pa nyes dmigs gang cung zad byung ba ni dge slong dag spang ba dge 'dun la spangs pa las gyur kyis/ de'i phyir dge slong gis dge 'dun la spang bar mi bya'o snyam du dgongs nas/ dge slong rnams la bka' stsal pa/ dge slong dag dge slong zhig gis spang ba dge 'dun la spangs pa dang / de dge skos kyis spel te bgos kyis/ de lta bas na dge slong gis spang ba dge 'dun la spang bar mi bya'i/ 'on kyang gang zag la spang bar bya'o/ /gal te mi shes pas spangs na yang dge 'dun gyis bgo bar mi bya'o/ /dge slong gis spang ba dge 'dun la spangs sam/ dge 'dun gyis bgos na gnyi ga la 'gal tshabs can du 'gyur ro/ /bcom ldan 'das kyis dge slong gi spang ba dge 'dun la spang bar mi bya'i/ 'on kyang gang zag la spang bar bya'o zhes bka' stsal pa dang / dge slong gzhan zhig la chos gos kyi spang ba byung ste/ des dge slong mi shes pa zhig la spangs pa dang / des blangs nas cang mi zer bar 'dug go/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong gzhan gyis brda' sprad par bya ste/ gal te byin na legs/ ci ste mi ster na mthus phrogs la byin gyis brlab par bya'o/ /rung bar bya ba'i phyir spangs pa yin pas spangs pa gtan bkur bar mi bya'i 'on kyang spangs pa slar sbyin par bya'o/ /gleng gzhi ni yangs pa can na'o/ /dbyar gyi dus su dge slong dag sbrang bu mchu rings kyis zos te/ de dag g.ya' ste sen mos lus kun phrugs pa dang / bar bar du khrag gi thigs pa dang thor bu dag byung bar snang ngo / /de ltar lus mi sdug pa de dag bram ze dang khyim bdag rnams kyis mthong nas/ de dag gis smras pa/ 'phags pa khyed ci zhig gis lus kyi gnas skabs 'di lta bur gyur/ de dag gis ji ltar gyur pa bsnyad pa dang / de dag gis smras pa/ 'phags pa khyed sbrang skyabs mi 'chang ngam/ bzhin bzangs bcom ldan 'das kyis ma gnang na ji ltar bcang / 'phags pa khyed kyi ston pa ni thugs rje can yin pas gnang bar 'gyur ro/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis dge slong dag gis sbrang skyabs bcang bar bya'o/ /bcom ldan 'das kyis dge slong gis sbrang skyabs bcang bar bya'o zhes bka' stsal na/ dge slong gis ci 'dra ba bcang bar ma shes nas/ bcom ldan 'das kyis bka' stsal pa/ ras srid du khru bzhi zheng du khru do pa de shing la brgyangs la steng nas dgab par bya zhing ras khru bcu gnyis pas ngos khor yug tu bskor bar bya'o/ /dge slong dag gis ras de ma lus par byas pa dang / glo nas sbrang bu mchu rings dag 'jug nas/ bcom ldan 'das kyis bka' stsal pa/ ras lhag ma dang bcas pa bcang bar bya zhing des glo nas dkri bar bya'o/ /dge slong dag gis sbrang skyabs byas nas ras de phyogs gcig nas bteg ste 'dzul ba dang bcom ldan 'das kyis bka' stsal pa/ sgo gdod par bya'o/ /dge slong dag gis sgo thad kar btod pa dang / bcom ldan 'das kyis bka' stsal pa/ bsnol mar bya'o/ /tsha nas bcom ldan 'das kyis bka' stsal pa/ de nyid du bsil yab gzhag par bya'o/ /'og nas sbrang ma mchu rings dag 'jug nas/ bcom ldan 'das kyis bka' stsal pa/ gnas mal gyis dgab par bya zhing rnam pa gang dang gang gis sbrang bu mchu rings za ba de thams cad rung ba bya'o/ /gleng gzhi ni mnyan yod na'o/ /bcom ldan 'das kyis chu btsag par bya'o zhes bka' stsal pa dang / dge slong dag lag pas chu tshags 'dzin pas de dag ngal bar gyur nas/ bcom ldan 'das kyis bka' stsal pa/ shing la btags te btsag par bya'o/ /dge slong dag gis shing la btags te btsags na 'on kyang ngal nas/ bcom ldan 'das kyis bka' stsal pa/ dbyug gu gsum bcang bar bya'o/ /dge slong dag gis dbyug gu gsum la btags na 'dug tu ma btub nas/ bcom ldan 'das kyis bka' stsal pa/ de dag phug la srad bu 'am/ gzer bus sbrel la chu tshags gdags par bya'o/ /dge slong dag gis chu tshags btags nas chu blugs pa dang / phyed sa la bo nas/ bcom ldan 'das kyis bka' stsal pa/ ci nas sa la mi 'bo bar dran pa nye bar gzhag ste glugs par bya'o/ /dge slong dag gis bum pa zhabs rten med par bzhag pas de 'dril nas/ bcom ldan 'das kyis bka' stsal pa/ zhabs rten gzhug par bya'o/ /dge slong gzhan dag gcig gis chu blang bar brtsams pa dang / de chu tshags su ma tshags pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ gcal gzhug par bya'o/ /dge slong dag gis ci zhig gzhug pa ma shes nas/ bcom ldan 'das kyis bka' stsal pa/ bye ma 'am/ ba lang gi lci ba'o/ /'on kyang ma tshags nas bcom ldan 'das kyis bka' stsal pa/ tshags rten snod bcang bar bya'o/ /bcom ldan 'das kyis tshags rten snod bcang bar bya'o zhes bka' stsal pa dang / dge slong dag gis ji lta bu bcang mi shes nas/ bcom ldan 'das kyis bka' stsal pa/ tshags rten snod ni gnyis te/ zangs las byas pa dang / sa las byas pa'o/ /dge slong dag gis tshags rten snod lag pas bzung ba dang / de dag ngal nas bcom ldan 'das kyis bka' stsal pa/ zangs las byas pa gang yin pa de ni phug la lcags thag 'jam pos dbyug gu gsum la gdags par bya'o/ /sa las byas pa gang yin pa de ni phug la tha gus gdags par bya'o/ /chu tshags gzhan dag chu ma phyin nas/ bcom ldan 'das kyis bka' stsal pa/ de dag gis glor yang dang yang du brdab par bya'o/ /dge slong dag chu rtog pa na bum pa ma gang ba la brtags pas srog chags dag ma rtogs nas/ bcom ldan 'das kyis bka' stsal pa/ bum pa legs par bkang la ji srid du chu mi g.yo ba de srid du gzhag par bya zhing / de nas brtag par bya'o/ /bum pa bkang ba dang steng du rdul zhugs pa dge slong dag gis de ma bsal bas srog chags dag ma rtogs nas/ bcom ldan 'das kyis bka' stsal pa/ rdul bsal nas brtag par bya'o/ /dge slong dag gis srog chags mdzub mo'i rtse mos bstan pas de dag 'gul te mig gis ma sod pa dang / bcom ldan 'das kyis bka' stsal pa/ shing bu'i rtse mo 'am/ rtsa'i rtse mo 'am phra mo gzhan gang yang rung bas bstan par bya'o/ /dge slong dag gis chu tshags nyid nas chu khron par pho ba dang / srog chags dag rdab snun pas gnod par gyur nas/ bcom ldan 'das kyis bka' stsal pa/ bsal tshags bsrel bar bya'o/ /dge slong dag gis bkang ste btang na phyir gang bzhin du 'ong ba gang yin pa de lta bu bsrel nas/ bcom ldan 'das kyis bka' stsal pa/ bkang ste btang na phyir stong par 'ong ba ci 'dra ba de 'dra ba bsrel bar bya'o/ /gzhan dag gcig gis bsal tshags ma 'byor nas/ bcom ldan 'das kyis bka' stsal pa/ de dag gis ni chu tshags the gus btags la ci nas bkang ste btang na phyir stong par 'ong ba de ltar gtang bar bya'o/ /dge slong dag gis chu pho nas chu tshags bshal bar mi byed 'khru bar mi byed/ 'tshir bar mi byed/ skems par mi byed/ ltob par mi byed nas/ bcom ldan 'das kyis bka' stsal pa/ chu tshags kyis chu pho nas de bshal bar bya/ bkru bar bya/ btsir bar bya/ bskam par bya/ bltab par bya'o/ /dge slong dag dge 'dun gyi chu yang chu tshags kyis tshag par byed pa dang / dge slong gi dge 'dun phal ches bas skyo bar gyur nas/ bcom ldan 'das kyis bka' stsal pa/ gal te dge slong gi dge 'dun phal che bar gyur na chu tshags mang po bcang ba 'am/ yang na bum tshags gce'u can bcang bar bya'o/ /bcom ldan 'das kyis bum tshags gce'u can gyis btsag par bya'o zhes bka' stsal pa dang / dge slong dag gis bum tshags gce'u can ji lta bu mi shes nas/ bcom ldan 'das kyis bka' stsal pa/ sa 'am zangs las bum pa'i dbyibs lta bu bya zhing de la pad ma'i snying po lta bu'i bu ga dag gdod par bya'o/ /de dag bsdu ba'i phyir de dag gi steng du bu ga chen po gcig gdod do/ /de dag nyid bsdu ba'i phyir gce'u gzhug par bya'o/ /de nas steng ras kyis g.yogs la chu btsag par bya zhing ras de yang bshal bar bya/ bkru bar bya/ bskam par bya'o// //'dul ba phran tshegs kyi gzhi/ bam po nyi shu gnyis pa/ dge slong dag gis shig dang / rtswa shig dang / srog chags gzhan dag g.yang sa nas bor ba dang / de dag dran pa nyams shing gnod par gyur to/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ srog chags thams cad g.yang sa nas dor bar mi bya'o/ /de dag gis gar bab bab tu bor ba dang / bcom ldan 'das kyis bka' stsal pa/ gar bab bab tu bor bar mi bya'i/ shig ni ra de'i nang du gzhug par bya/ de ma rnyed na ka ba'i ser ka 'am/ rtsig pa'i bu gar chug shig / rtswa shig ni ne'u gsing sngon po'i sa phyogs su gzhag par bya'o/ /de ma rnyed na bsil ba'i phyogs su'o/ /srog chags gzhan yang rang rang gi gnas su gtang bar bya'o/ /sangs rgyas bcom ldan 'das la tshe dang ldan pa nye bar 'khor gyis zhus pa/ btsun pa chab brtsags pa ma brtags pa 'tshal du rung lags sam/ nye bar 'khor myig gis ma brtags na mi rung ngo / /btsun pa chab btsags pa brtags pa 'tshal du rung lags sam/ nye bar 'khor mig gis brtags pa'i phyir rung ngo / /gleng gzhi ni mnyan yod na'o/ /bcom ldan 'das kyis dbyar gnas par khas blangs pa'i dge 'dun gyis sra brkyang gding bar bya'o zhes bka' stsal pa/ ko sa la'i rgyal po gsal rgyal gyis thos nas des dge 'dun la sra brkyang phul lo/ /de bzhin du btsun mo phreng ldan ma dang / rgyal rigs dbyar tshul ma dang / khyim bdag mgon med zas sbyin dang / drang srong byin dang / rnying pa dag dang / phya mkhan dag dang / gzhan mang po dag gis sra brkyang phul ba dang / dge slong dag gis sra brkyang gcig cig byin gyis brlabs nas lhag ma gzhan de dag nyid la slar bskur bar brtsams pa dang / de dag gis 'phags pa 'di dag ni bdag cag gis dge 'dun la phul ba lags pas bdag cag slar ji ltar 'tshal/ skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ de'i phyir gnang gis blang bar bya zhing blangs nas kyang gtan pa 'ding ba'i dge slong mang po bsko bar bya'o/ /ji ltar sngar bskos pa de las phyis gcig gding bar bya'o/ /lhag ma rnams ni gzhag par bya zhing / de ni dbyar gnas par khas blangs pa'i dge 'dun gyi bgo ba'i rnyed pa yin pas dbyar gnas par khas blangs pa'i dge 'dun tshogs pas ci dgar bgo bar bya ste 'di la 'gyod par mi bya'o/ / sdom ni/ nga 'das pa la sbyin med dang / /gang gis bsngos pa shi ba dang / /gang la gtad pa shi ba dang / /babs pa dang ni 'gyod pa'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na khyim bdag cig gnas pa des rigs mnyam pa las chung ma blangs te/ de de dang lhan cig rtse bar byed/ dga' bar byed/ dga' mgur spyod par byed do/ /de rtse bar byed dga' bar byed/ dga' mgur spyod par byed pa las rim gyis bu gsum byung ngo / /de rnams kyi tha chungs gang yin pa de legs par gsungs pa'i chos 'dul ba la rab tu byung ngo / /de dus gzhan zhig na ljongs rgyu zhing song ngo / /ljongs rgyu zhing song ba na de'i pha nad kyis thebs nas de rtsa ba dang / sdong bu dang / lo ma dang / me tog dang / 'bras bu'i sman rnams kyis rim gro byas kyang de'i nad de zhi bar ma gyur te/ gang gi tshe de shi la thug pa'i tshor ba byung ste/ ring po mi thogs par 'chi ba'i dus byed par 'gyur ba de'i tshe des mdza' bo dang / gnyen dang phu nu bo dang / khyim tshes rnams bsdus nas bu de gnyis la smras pa/ bu nga'i khyim na cung zad ci yod pa de thams cad khyer te shog shig /de dag gis kyang de'i tshig mnyan te thams cad khyer te 'ongs pa dang / des mdza' bo dang / gnyen dang / phu nu de dag dang / khyim tshes kyi mi de la smras pa/ shes ldan dag gson cig /bdag gi bu gsum yod pa las phu bo gnyis ni 'di dag yin/ tha chungs gang yin pa de ni dge sbyong shAkya'i nang du rab tu byung ngo / /de'i phyir bdag gi khyim na nor gang cung zad ci yod pa de thams cad de rnams mnyam par bgos shig ces smras nas/ bsags pa kun gyi mtha' zad cing / /mthon po'i mtha' ni rnyil bar 'gyur/ /'du ba'i mtha' ni 'bral ba ste/ /gson po'i mtha' ni 'chi ba yin/ /zhes bya bas dus kyi chos dang ldan par gyur te/ de khyogs gos sngon po dang / dmar po dang / ser po dang / dkar po dag gis brgyan te dur khrod du khyer nas bsregs so/ /de'i bu de dag gis de'i shid btang ba dang mya ngan bsang ba byas te 'dug go/ /de'i bu des bdag gi pha de shi'o zhes thos nas/ de 'di snyam du bdag song la ma yar mo de dang / phu bo de dag la chos bshad de mya ngan bsang bar bya'o snyam du bsams nas de ji srid 'dod par ljongs na 'dug nas lhung bzed dang / chos gos khyer te/ mnyan yod gang na ba der rgyu zhing song nas/ rim gyis rgyu zhing song ba las mnyan yod du phyin to/ /des chos gos dang lhung bzed rgyal byed kyi tshal du bzhag ste lam gyis dub pa ngal bso nas rang gi khyim du song ngo / /nang mi rnams kyis de mthong nas ngus so/ /ngu ba de thos nas khyim tshes rnams 'dus te/ la la ni skad phyung ste ngu / la la ni mig mchi mas gang bar gyur to/ /de so so'i skye bo yin pas skye bo'i tshogs chen po smre zhing 'dug pa thos nas de yang mig mchi mas gang zhing 'dug pa dang / de la khyim tshes kyi bud med gcig gis smras pa/ bu mya ngan ma byed cig /khyod kyi pha de bsod nams byas pas lha yul du song ngo / /khyod la yang phas mdza' bo dang / gnyen dang / phu nu bo dang / khyim tshes rnams bsdus te nor gyi sum cha gcig kyang byin no/ /des bsams pa bcom ldan 'das kyis nga 'das nas 'di la byin cig ces zer ba ni med pa yin no zhes gsungs pa gang yin pa de ni 'di lta bu yin no snyam du rig nas nga de'i phyir mya ngan byed pa ni ma yin gyi nga'i pha de dka' ba byed byed pas dbang med par mchi ma byung ngo / /bcom ldan 'das kyis kyang pha ma ni bu la dka' ba byed de/ snyod pa dang / gso ba dang / bskyed pa dang / 'dzam bu'i gling sna tshogs ston pa yin te/ bu'i phrag pa gcig gis pha blangs shing / gcig shos kyis ma blangs te lo brgya tshang bar bkur ba byas pa 'am/ sa chen po 'di la nor bu dang / mu tig dang / bai dUr+ya dang / man shel dang / byu ru dang / dngul dang / gser dang / rdo'i snying po dang / spug dang / pad ma rA ga dang / g.yas su 'khyil pa de lta bu'i dbang phyug gi bdag por bzhag kyang 'di tsam gyis na bus pha dang ma la phan thogs pa 'am lan lon par mi 'gyur gyi/ gang zhig gis pha ma de dag ma dad pa las dad pa phun sum tshogs pa yang dag par len du 'jug / gzeng stod par byed/ 'dul bar byed/ 'jog par byed/ rab tu 'jog par byed cing / tshul khrims 'chal ba tshul khrims phun sum tshogs pa dang / 'jungs pa gtong ba phun sum tshogs pa dang / shes rab 'chal pa shes rab phun sum tshogs pa yang dag par len tu 'jug /gzeng stod par byed/ 'dul bar byed/ 'jog par byed/ rab tu 'jog par byed na de tsam gyis na bus pha ma la phan btags pa dang lan blan par 'gyur ro zhes gsungs so/ /yang bcom ldan 'das kyis nga 'das nas de la byin cig ces zer ba ni sbyin pa ma yin no zhes bkag go/ /bud med de cang mi zer bar 'dug go/ /skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong dag ngas ni khyim pa las dgongs te gsungs pa ma yin gyi/ 'on kyang rab tu byung ba las dgongs pa yin no/ /khyim bdag ni chags pa dang bcas bzhin du 'chi bar 'gyur la/ rab tu byung ba ni ma yin no/ /de lta bas na de'i phyir khyim pa 'di snyam du nga 'das nas 'di la sbyin no snyam du sems pa ni byin pa yin gyi/ rab tu byung ba ni ma yin pas blang bar bya zhing blangs nas kyang ji ltar 'dod pa bzhin du longs spyod du yongs su spyad par bya'o/ /gleng gzhi ni mnyan yod na'o/ /dge slong zhig gis dge slong zhig la chos gos dag bsngos so/ /des de dag bsngos nas dus las 'das pa dang / dge slong de dag gis de khyer nas sreg tu song ngo / / de'i bar du dge slong des de'i gnas khang nas de'i chos gos de dag blangs te rang gi gnas khang du bzhag go/ /de nas dge slong de dag gis de'i rim gro byas nas gtsug lag khang du log pa dang / dge skos kyis de'i gnas khang du brtags na/ ji tsam na lhung bzed dang chos gos gsum dang / chu tshags mthong nas/ des rgan pa'i mthar khyer ba dang / de la dge slong de dag gis smras pa/ tshe dang ldan pa khyod kyis de'i chos gos gsum po 'di khyer te 'ongs sam/ de la chos gos rung bar byas pa gzhan yang mang du yod na de dag khyer te shog shig /des smras pa/ de'i gnas khang na ni 'dir zad kyi gzhan cung zad kyang med do/ /dge slong dag gis smras pa/ tshe dang ldan pa de'i smos 'drin dge slong che ge mo zhes bya ba de la dris shig / des de la dris pa dang smras pa/ bdag gis khyer te/ des bdag la bsngos so/ /skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong dag rung bar bya ba'i phyir ngas bsngo bar gnang ste/ gang gis de dag khyer ba de la 'di skad ces gyis shig /shi ba'i yo byad kyi rnyed pa de dag dge 'dun la phul la rang gi skal bas chog par gyis shig / gleng gzhi ni mnyan yod na'o/ /dge slong gzhan zhig gis dge slong zhig la chos gos dag bsngos pa dang / gang la bsngos pa de dus las 'das so/ /de dge slong rnams kyis dur khrod du khyer nas bsregs te slar 'ongs nas de'i chos gos de dag rgan pa'i mthar khyer ba dang de la dge slong dag gis smras pa/ tshe dang ldan pa 'di dag su'i yin/ des smras pa/ 'di dag ni bdag gi lags mod kyi 'on kyang bdag gis de la bsngos so/ /dge slong dag gis de ji ltar bsgrub pa mi shes nas/ skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong dag rung bar bya ba'i phyir ngas bsngo bar gnang mod kyi 'on kyang gang gis bsngos pa de nyid kyi yin no/ /gleng gzhi ni mnyan yod na'o/ /dge slong gzhan zhig gis dge slong zhig la chos gos dag bsngos pa dang / gang la bsngos pa de babs nas/ des bsams pa/ bdag la dge slong des chos gos dag bsngos pas bdag babs mod kyi 'on kyang de dag bdag dbang gis len tu 'gro'o snyam nas/ de dge slong de'i drung du song ste/ des smras pa/ 'phags pa khyod kyis chos gos dag bdag la bsngos na de dag bdag la stsol cig / skabs de dge slong dag la brjod pa dang / de dag gis ji ltar bsgrub pa mi shes nas/ skabs de dge slong dag gis bcom ldan 'das la rgyas par gsol pa dang / bcom ldan 'das kyis dgongs pa/ nyes dmigs gang cung zad byung ba ni dge slong gang kho na la yid brtan te chos gos dag btams pa de kho na'i mdun du bsngo ba las gyur gyis de'i phyir dge slong gis gang la yid brtan te chos gos dag btams pa de kho na'i mdun du bsngo bar mi bya'o snyam du dgongs nas/ dge slong rnams la bka' stsal pa/ dge slong dag de lta bas na dge slong gis yid brtan cing chos gos btams pa de nyid kyi mdun du chos gos bsngo bar mi bya'i/ de'i mngon sum du bsngo bar ma byas na nyes dmigs der mi 'gyur ro/ /gleng gzhi ni mnyan yod na'o/ /dge slong gzhan zhig gis dge slong zhig la chos gos dag bsngos te/ gang la bsngos pa de thab khrol can zhig ste/ rtag tu dge slong dag dang lhan cig thab khrol byed pa las de gzhan zhig dang thab mo byas nas 'gro bar chas pa dang / gang gis de la chos gos dag bsngos pa des de mi btang bar brtsams te/ tshe dang ldan pa ma 'gro shig ces des de bzung ba dang / 'dug tu ma btub bo/ /des yang dang yang du bzlog pa dang / de la dge slong zhig gis smras pa/ tshe dang ldan pa 'di ni thab khrol can zhig ste rtag tu dge slong rnams la mi bde bar byed pa yin gyis thong shig / des smras pa/ gzhan gyi phyir 'di mi gtong ba ma yin gyi/ nga nyid kyi chos gos dag 'di la bsngos pas 'di 'dzin to/ /skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ gal te yid brtan pa'i dge slong rgya mtsho'i pha rol na 'dug pa zhig yin na de la yang yid brtan te/ bsngo ba byas nas gzung bar byas te/ 'di la 'gyod par mi bya'o/ /bcom ldan 'das kyis gal te yid brtan pa'i dge slong rgya mtsho'i pha rol na 'dug pa zhig yin na de la yang chos gos dag bsngo bar bya'o zhes bka' stsal pa dang / dge slong gzhan zhig gis dge slong yul shin tu thag ring po na 'dug pa zhig la chos gos bsngos te/ de dus las 'das par gyur pa dang / dge slong des dge slong de ji ltar dus las 'das par gyur pa'i ring zhig lon nas thos pa dang / dge slong de 'gyod pa skyes so/ /skabs de dge slong dag la smras pa dang / dge slong dag gis bcom ldan 'das la gsol nas/ bcom ldan 'das kyis bka' stsal pa/ gang gi tshe thos pa de'i tshe gzhan la bsngo bar bya ste/ 'di la 'gyod par mi bya'o/ / sdom ni/ mtshams kyi phyi rol 'dug pa yis/ /dad pa mi dbul sbyin mi bya/ /gcig la gcig ni mi bya dang / /gso sbyong dang ni dgag dbye'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ / dge slong drug sde dag mtshams kyi phyi rol na gnas kyang dad pa 'bul ba'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ mtshams kyi phyi rol na gnas pas dad pa dbul bar mi bya'o/ /bcom ldan 'das kyis mtshams kyi phyi rol na gnas pas dad pa dbul bar mi bya'o zhes bka' stsal pa dang / dge slong gzhan dag cig mtshams kyi phyi rol tu song ngo / /de dag chas pa dang / dge 'dun gyi bya ba zhig byung nas drug sde rnams kyis de dag las dad pa blangs so/ /skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ mtshams kyi phyi rol tu song ba las dad pa blang bar mi bya'o/ / bcom ldan 'das kyis mtshams kyi phyi rol na gnas pas dad pa dbul bar mi bya/ mtshams kyi phyi rol tu song ba las dad pa blang bar yang mi bya'o zhes bka' stsal pa dang / drug sde rnams mtshams kyi phyi rol na gnas bzhin du gcig la gcig dad pa sbyin par byed de/ dga' bos ni nyes dga' la/ nye dgas kyang dga' bo la/ 'dun pas ni 'char ka la/ 'char kas kyang 'dun pa la/ 'gro mgyogs kyis ni nab so la/ nab sos kyang 'gro mgyogs la dad pa byin pa dang / skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong gis gcig la gcig dad pa sbyin par mi bya ste/ byin na 'gal tshabs can du 'gyur ro/ /gleng gzhi ni mnyan yod na'o/ /bcom ldan 'das kyis zla ba phyed phyed cing gso sbyong gi tshe so sor thar pa'i mdo gdon pa thon cig ces bka' stsal pa dang / drug sde dag mtshams kyi phyi rol na gnas shing gso sbyong la 'dun pa dang / yongs su dag pa 'bul lo/ /skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ mtshams kyi phyi rol na gnas pas gso sbyong la 'dun pa dang / yongs su dag pa dbul bar mi bya'o/ /bcom ldan 'das kyis mtshams kyi phyi rol na gnas pas gso sbyong la 'dun pa dang / yongs su dag pa dbul bar mi bya'o zhes bka' stsal pa dang / dge slong gzhan dag gcig mtshams kyi phyi rol tu song ngo / /de dag chas pa dang / dge 'dun gso sbyong bya bar bzhed nas 'dus pa dang / drug sde rnams kyis de dag las 'dun pa dang / yongs su dag pa blangs so/ /skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ mtshams kyi phyi rol du song ba las 'dun pa dang / yongs su dag pa blang bar mi bya'o/ /bcom ldan 'das kyis mtshams kyi phyi rol na gnas pas dad pa dang / yongs su dag pa dbul bar mi bya/ mtshams kyi phyi rol du song ba las dad pa dang / yongs su dag pa blang bar yang mi bya'o zhes bka' stsal pa dang / drug sde dag mtshams kyi phyi rol na gnas bzhin du gcig la gcig dad pa sbyin par byed de/ dga' bos ni nye dga' la/ nye dgas kyang dga' bo la/ 'dun pas ni 'char ka la/ 'char kas kyang 'dun pa la/ 'gro mgyogs kyis ni nab so la/ nab sos kyang 'gro mgyogs la dad pa byin pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong gis gcig la gcig gso sbyong gi dad pa dang / yongs su dag pa sbyin par mi bya'o/ /dge slong gis gcig la gcig gso sbyong gi dad pa dang / yongs su dag pa sbyin na 'gal tshabs can du 'gyur ro/ /gleng gzhi ni mnyan yod na'o/ /bcom ldan 'das kyis dbyar gnas par khas blangs pa'i dge slong gis gnas gsum po mthong ba dang / thos pa dang / dogs pas dgag dbye bya'o zhes bka' stsal pa dang / drug sde dag mtshams kyi phyi rol na gnas shing dgag dbye'i dad pa dang / yongs su dag pa 'bul ba rgyas par thams cad gso sbyong bzhin no/ / sdom ni/ dge slong bgrang bar bya ba dang / /tshul shing dag dang gang 'dod dang / /stan gcig khyim na gnas pa dang / /dge tshul gsar bu mi 'dug pa'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na bram ze zhig 'dug pa de bya ba cung zad cig la phyir byung nas rgyal byed kyi tshal du song ba dang / de re shig 'di na dge slong du zhig gnas dri'o snyam pa'i 'dod pa skyes nas/ des dge slong rnams la dris pa/ 'phags pa dag 'di na dge slong du zhig gnas/ de dag gis smras pa/ bram ze ma shes so/ /bram zes smras pa/ yul ko sa la'i rgyal po gsal rgyal gyi khrom gyi ru'i grangs kyang shes na khyed kyis dge slong dag mi shes pa lta/ de dag cang mi smra bar 'dug pa dang / bram ze de song ngo / /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag bgrang bar bya'o/ /bcom ldan 'das kyis dge slong dag bgrang bar bya'o zhes bka' stsal pa dang / dge slong dag gis gcig ces bya ba la sogs pas bgrangs ba dang / phyis brjed nas bcom ldan 'das kyis bka' stsal pa/ gcig ces bya ba la sogs pas bgrang bar mi bya'o/ /dge slong dag gis sor mos 'dzugs shing bgrangs na 'on kyang brjed nas/ bcom ldan 'das kyis bka' stsal pa/ sor mos gzugs shing bgrang bar mi bya'o/ /bcom ldan 'das kyis dge slong dag gis gcig ces bya ba la sogs pas bgrang bar mi bya/ sor mos btsugs shing bgrang bar mi bya'o zhes bka' stsal pa dang / dge slong dag gis ji ltar bgrang ba ma shes so/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ tshul shing brim par bya zhing brims nas bgrang bar bya/ bgrangs nas dge 'dun la dge slong 'di snyed do zhes brjod par bya'o/ /bcom ldan 'das kyis tshul shing brim par bya'o zhes bka' stsal pa dang / dge slong dag gis nyi ma 'am zla ba 'am/ lo gang la brim pa mi shes nas bcom ldan 'das kyis bka' stsal pa/ dbyar nye bar gtong ba'i tshe tshul shing brim par bya'o/ /bcom ldan 'das kyis dge slong dag bgrang bar bya'o zhes bka' stsal pa dang / mnyan yod na khyim bdag cig gnas pa de dus dus su rgyal byed kyi tshal du nye bar 'ongs te/ des de na dge slong dag bsam gtan dang / 'don pa dang / yid la byed pa'i rnal 'byor la brtson pa mthong nas/ de de dag gi spyod lam dang / spyod pa dang / sgrub pa des mngon par dad de/ des bsams pa/ re shig 'di na dge slong ji snyed cig yod pa dris la phyis spyan drangs te bshos gsol lo snyam nas/ des dge slong rnams la dris pa/ 'phags pa/ dge slong ji snyed gcig /dge slong dag gis smras pa/ 'di snyed cig go/ /des rkang pa la phyag 'tshal te song nas rang gi khyim du phyin te nang mi la smras pa/ song kho bos sangs rgyas la sogs pa dge slong gi dge 'dun bshos gsol gyis khyed kyis dge slong 'di snyed cig gi bshos sbyor cig /de dag gis smras pa/ rje'i sras legs te de bzhin du bgyi'o zhes de dag gis hwags dang / bu ram dang / sha ka ra la sogs pa sta gon bya bar brtsams so/ /khyim bdag de yang mdza' bo dang / nye du dang / phu nu rnams sbran nas bshams zin pa'i dus su de dag dang lhan cig rgyal byed kyi tshal du song ste/ rgan pa'i mtha' nas rkang pa la phyag byas nas/ dge skos la smras pa/ 'phags pa khyim bdag che ge mo zhig sang sangs rgyas la sogs pa dge slong gi dge 'dun sdum par gdugs tshod la spyan 'dren to/ /zhes de skad gsungs shig / dge skos kyis smras pa dang / dge slong gi dge 'dun gyis gnang nas/ de rkang pa la phyag 'tshal te song ngo / /dge slong gzhan dag cig kyang ljongs rgyu ba rgyu zhing mnyan yod du phyin to/ /de nas khyim bdag de de nyid kyi nub mo bza' ba dang bca' ba gtsang zhing bsod pa sta gon byas nas/ nang par sngar langs te gdan bshams chu ra bzhag nas/ bcom ldan 'das la pho nya las btsun pa gdugs tshod bshams lags na/ bcom ldan 'das kyis da de'i dus la bab par dgongs su gsol zhes gdugs tshod gdas par gsol to/ /dge slong rnams snga dro sham thabs bgos lhung bzed dang chos gos thogs te khyim bdag de'i khyim du dong ngo / /bcom ldan 'das ni gtsug lag khang na bzhugs shing gdugs tshod der drangs so/ /sangs rgyas bcom ldan 'das rnams ni rgyu lngas gtsug lag khang na bzhugs shing gdugs tshod 'dren te/ lnga gang zhe na/ nang du yang dag 'jog par bzhed pa yin/ lha rnams la chos ston par bzhed pa yin/ gnas mal la gzigs par bzhed pa yin/ nad pa la gzigs par bzhed pa yin/ nyan thos rnams 'dul ba la bslab pa'i gzhi bca' bar bzhed pa yin no/ /don 'di la ni bcom ldan 'das nyan thos rnams 'dul ba la bslab pa'i gzhi bca' bar bzhed nas gtsug lag khang na bzhugs shing der gdugs tshod drangs so/ /khyim bdag des dge slong gi dge 'dun gyi tshad bzhin stan bshams/ zan sta gon byas pa las ji tsam na dge slong rab tu mang bar mthong nas des smras pa/ 'phags pa bdag gis khyed kyis dge slong ji snyed yod pa bstan pa de snyed kyi dge slong gi gdan bshams/ bshos sta gon byas na dge slong mang du byon to/ /dge slong rnams kyis smras pa/ khyim bdag dge slong glo bur pa dag lhags kyis rab tu dga' ba skyed cig / des smras pa/ 'phags pa kye ma khyed kyis dge slong gzhan dag kyang 'ongs so zhes bgyis dang / bdag gis bshos kyang mang du sta gon bgyis/ gdan yang mang du bshams pa zhig / dge slong dag spobs pa med nas cang mi smra bar 'dug go/ /de na kha cig tha ma ma smyungs tsam du gyur te/ de dag la dge slong rnams gshe bzhin du kham zin tsam za bar gyur to/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge skos kyi dge slong glo bur ba 'di snyed cig lhags so zhes dge slong glo bur pa rnams shes par byas nas khyim bdag la sbran par bya'o/ /dge slong gzhan dag gcig zan gyi thad ka kho nar 'ongs nas bcom ldan 'das kyis bka' stsal pa/ de dag kyang sbran par bya'o/ /dge slong gzhan dag gcig sngar bos pa las gud du song nas/ bcom ldan 'das kyis bka' stsal pa/ de dag kyang sbran par bya'o/ /gzhan yang ngas dge 'dun gyi gnas brtan gyi dge slong gi kun tu spyad pa'i chos bca' bar bya ste/ dge 'dun gyi gnas brtan gyis dge slong gi dge 'dun blta bar bya zhing / gal te dge slong ni mang zan ni nyung na/ sbyin bdag la bzhin bzangs zan ni nyung / dge slong ni mang gis snyoms par rims shig ces brjod par bya'o/ /'on te zan ni mang dge slong ni nyung na des bzhin bzangs zan ni mang gis ci 'byor pa bzhin rims shig ces brjod par bya'o/ /dge 'dun gyi gnas brtan gyi dge slong gis kun tu spyad pa'i chos ji ltar bcas pa rnams yang dag par blangs te mi 'jug na 'gal tshabs can du 'gyur ro/ /gleng gzhi ni mnyan yod na'o/ /de nas tshe dang ldan pa 'char ka snga dro sham thabs bgos lhung bzed dang chos gos thogs te mnyan yod du bsod snyoms kyi phyir zhugs so/ /mnyan yod du bsod snyoms la brgyus nas/ btsun mo phreng ldan ma ga la ba der song ste phyin nas btsun mo phreng ldan ma la chos bstan par brtsams so/ /des de la chos ston pa na ri dgas 'dzin gyi ma sa ga dge slong gi dge 'dun gyi na ba'i sman khyer nas glu dang rol mo'i sgra dang / rgyal byed kyi tshal du chas pa btsun mo phreng ldan mas thos nas des smras pa/ 'phags pa glu dang rol mo'i sgra grags pa 'o ni su'i lags/ des smras pa/ btsun mo ri dgas 'dzin gyi ma sa ga dge slong gi dge 'dun gyi na ba'i sman khyer nas 'gro ste/ sgra 'o ni de'i yin no/ /des smras pa/ 'phags pa gal te de lta na btsun mo phreng ldan gyis dge slong gi dge 'dun la na ba'i sman gyis bstabs so zhes bdag gi ming gis dge slong gi dge 'dun la brjod pa'i rigs so/ /des smras pa/ btsun mo legs te/ bcom ldan 'das kyis kyang gang zhig nad pa la rim gro byed pa de ni nga la rim gro byed pa yin no zhes gsungs pas/ khyod kyis ming gis dge slong gi dge 'dun la bstab par bya'o zhes smras nas/ btsun mo phreng ldan ma la nad med par gyur cig ces byas te stan las langs nas song ngo / /de nas gtsug lag khang du song ste/ rgan pa'i mthar 'dug nas smras pa/ btsun mo phreng ldan mas dge slong gi dge 'dun la na ba'i sman gyis bstabs kyis/ gang zhig sman gang 'dod pa de song la slongs shig / dge skos kyis bsgo ba dang / dge slong rnams kyis smras pa/ tshe dang ldan pa 'char ka bcom ldan 'das kyis rgyal po'i pho brang du 'gro ba la nyes dmigs bcu yod do zhes ma gsungs sam/ de ji ltar bdag cag gis sman gyi phyir bslab pa las 'da' bar bya/ de spobs pa med nas cang mi zer bar 'dug ste/ dge slong 'ga' yang phreng ldan ma las sman mi slong ngo / /ji tsam na tshe dang ldan pa 'char ka yang btsun mo phreng ldan ma'i der song ba dang / des smras pa/ 'phags pa khyod kyis bdag gi ming gis dge slong gi dge 'dun la na ba'i sman gyis ma bstabs sam/ btsun mo bstabs so/ /'phags pa gal te de lta na ci'i slad du dge slong dag mi byon/ btsun mo bcom ldan 'das kyis rgyal po'i pho brang du 'gro ba la nyes dmigs bcu yod do zhes ma gsungs sam/ dge slong dag 'dir ji ltar 'ong / 'phags pa gal te de lta na bdag gis 'di la ji ltar bsgrub par bgyi/ btsun mo tshong dus pa'i tshong pa'i lag tu kar sha pa Na dag gtad na/ dge slong gang zhig gang 'dod pa de de las de slong grang / des smras pa/ 'phags pa legs te de ltar bgyi'o zhes tshong 'dus pa'i tshong pa'i lag tu kar sha pa Na dag gtad nas smras pa/ 'phags pa dag rgyal po'i pho brang du mi 'ong gis dge slong gang zhig gang 'dod pa de la de byin cig / tshong pas rgyal mo'i bkas kar sha pa Na dag blangs te bzhag pa dang / dge slong rnams kyis lha mo phreng ldan mas spos 'tshong che ge mo zhig la kar sha pa Na dag gtad de/ dge slong gang zhig gang 'dod pa de khyod kyis sbyin par bya'o zhes bsgo ba thos nas song la bslang ngo snyam mo/ /de na dge slong kha cig ni song nas smras pa/ bzhin bzangs kho bo cag la khur skam dang / khur ba dang / sha khu dag byos la byin cig / kha cig gis smras pa/ kho bo cag la khur ba dang sha skam byin cig /kha cig gis smras pa/ kho bo cag la sha khu khrol bu dang / tshog pa byin cig /de de dag gis gtses pa dang / smras pa/ 'phags pa bdag ni khur mkhan yang ma lags sha g.yos mkhan yang ma lags pas/ dbyig 'di snoms te bzhud la gang zhig gang bzhed pa des de bgyid du stsol cig /de dag gis smras pa/ bzhin bzangs bcom ldan 'das kyis dbyig ma gnang ngo / /des smras pa/ 'phags pa bdag ni spos 'tshong ste tshong 'dus kyis 'tsho ba lags na/ de lta na bdag gi 'tsho ba 'chad par 'gyur ro/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ sbyin bdag la yid brtan te kar sha pa Na dag blangs nas ci 'dod par yongs su spyad par bya ste/ 'di la 'gyod par mi bya'o/ /gleng gzhi ni mnyan yod na'o/ /drug sde rnams khyim pa dag dang lhan cig stan gcig la 'dug pa bram ze dang / khyim bdag dad pa can dag gis mthong nas 'phya bar byed cing / 'phags pa khyed rab tu byung ba tshangs par spyod pa yin na/ ji ltar 'dod pa'i longs spyod spyod pa 'di dag dang lhan cig stan cig la 'dug ces byas pa dang / de dag cang mi zer bar 'dug pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag bram ze dang / khyim bdag dad pa can dag 'phya ba ni thog tu bab bo/ /de lta bas na dge slong dag gis khyim pa dag dang lhan cig stan gcig la 'dug par mi bya ste/ 'dug na 'gal tshabs can du 'gyur ro/ /bcom ldan 'das kyis khyim pa dag dang lhan cig stan gcig la 'dug par mi bya'o zhes bka' stsal pa dang / dge tshul dag dang lhan cig stan gcig la 'dug pa dge bsnyen dag gis mthong nas smras pa/ 'phags pa khyed ni bsnyen par rdzogs pa lags na/ ji ltar dge tshul dag dang lhan cig stan gcig la bzhugs de dag gis smras pa/ tshe dang ldan pa dag 'di dag ni khyim pa ma yin te/ 'di dag dge sbyong yin na 'di la 'gal ba ci zhig yod/ de dag cang mi smra bar 'dug pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ bsnyen par ma rdzogs pa dang lhan cig stan cig la 'dug par mi bya'o/ /bcom ldan 'das kyis bsnyen par ma rdzogs pa dang lhan cig stan gcig la 'dug par mi bya'o zhes bka' stsal pa dang / dge slong rgan pa rgan pa dag gsar bu gsar bu dag dang lhan cig stan gcig la 'dug pas gsar bu rnams rgan pa rnams la ma gus par byed pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ rgan pa dang gsar bu lhan cig stan gcig la 'dug par mi bya'i/ 'on kyang bar na lo gsum zhugs pa dang lhan cig stan gcig la 'dug par bya ste/ lor ma lon pa dang / lo gsum lon pa yang lhan cig 'dug par bya zhing / lo gcig lon pa dang / lo bzhi lon pa nas de bzhin du lo dgu lon pa dang / lo bcu gnyis lon pa'i bar yang lhan cig 'dug par bya'o/ / bcom ldan 'das kyis bar na lo gsum zhugs pa dang lhan cig 'dug par bya ste/ lor ma lon pa dang / lo gsum lon pa yang lhan cig 'dug par bya zhing / lo gcig lon pa dang / lo bzhi lon pa nas de bzhin du lo dgu lon pa dang / lo bcu gnyis lon pa'i bar yang lhan cig 'dug par bya'o zhes bka' stsal te/ bcom ldan 'das kyis bar na lo gsum zhugs pa dang lhan cig 'dug par bya'o zhes bka' stsal pa dang / dge slong dag khyim gyi nang du yang bar na lo gsum zhugs pa dang lhan cig 'dug par mi byed pas des stan dag ma 'byor nas/ bcom ldan 'das kyis bka' stsal pa/ khyim gyi nang du ni slob dpon dang mkhan po dag dang yang lhan cig 'dug par bya ste 'di la 'gyod par mi bya'o/ / sdom ni/ dge tshul khri'u g.yogs mi sbyin dang / /dge tshul kha drang mi bya dang / /mna' dang skugs 'dzugs mi bya dang / /stag gi god ma mi bza' ba'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bcom ldan 'das kyis chos nyan pa'i stan bshams par bya'o zhes bka' stsal pa dang / dge tshul dag kyang khri'u g.yogs ma can la 'dug nas chos nyan par byed de/ de dag gnyid log nas de nyid du bshang gci shor te khri'u g.yogs ma can dag ma rung bar gyur pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge tshul la khri'u g.yogs ma can sbyin par mi bya'o/ /bcom ldan 'das kyis dge tshul la khri'u g.yogs ma can sbyin par mi bya'o zhes bka' stsal pa dang / tshe dang ldan pa shA ri'i bu'i dge tshul skul byed ces bya ba de chos nyan du song ba dang / de la dge slong dag gis khri'u rkyang pa zhig byin pa dang / des smras pa/ tshe dang ldan pa dag ci'i phyir bdag la khri'u rkyang pa sbyin/ de dag gis smras pa/ bcom ldan 'das kyis dge tshul rnams la khri'u g.yogs ma can bkag go/ /des smras pa/ tshe dang ldan pa dag ci kho bo yang nyes dmigs de byed dam/ skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge tshul gang dag dran pa nye bar 'jog pa de dag la/ khri'u g.yogs ma can sbyin par bya'i/ gzhan dag la ni ma yin no/ /gleng gzhi ni mnyan yod na'o/ /dge slong zhig la dge tshul zhig yod pa de la des nan tur byas pa dang / de rgyal byed kyi tshal gyi sgo na ngu zhing 'dug go/ /drug sde las gang yang rung ba zhig gis rgyal byed kyi tshal gyi sgo mi stongs pa yin pas tshe dang ldan pa nye dga' sgo na 'dug pa des de mthong nas des smras pa/ dge tshul ci'i phyir ngu / des smras pa/ btsun pa nye dga' bdag mkhan pos nan tur byas so/ /bu tshur ngas khyod kyi lhung bzed dang / chos gos dang / dra ba dang / phor bu dang / ska rags dang / khyod gang dang gang gis phongs pa de dang des mi phongs par bya'o zhes des gnas khang du khrid do/ /bcom ldan 'das kyis nan tur byas nas yal bar dor bar mi bya'o/ /'on kyang slar dgug par bya'o zhes bka' stsal pas/ dge slong des dge sbyong de la dge slong zhig mngags nas des de la smras pa dang / des smras pa/ kho bo la mkhan po ci dgos/ nye dgas kho bo'i yo byad thams cad sbyar bas mi 'gro'o/ /dge slong de 'phya bar byed/ gzhog phyas byed/ smod par byed de/ bdag gis rab tu phyung ba nye dgas kha phyung ngo zhes zer ba'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong gis gzhan gyis dge tshul kha drang bar mi bya ste kha 'dren na dbyen dang nye ba'i nyes pa sbom por 'gyur ro/ /gleng gzhi ni mnyan yod na'o/ /drug sde rnams gang dang gang du dgos par mna' 'dor bar byed de/ sangs rgyas la mna' 'dor/ chos dang dge 'dun la mna' 'dor/ slob dpon dang mkhan po la mna' 'dor ba dang / bram ze dang khyim bdag dad pa can rnams kyis smras pa/ slob dpon dag bdag cag khyim pa lags kyang / ston pa la mna' 'dor bar mi bgyid na/ khyed rab tu byung ba lags na ji ltar ston pa la mna' 'dor 'di ni 'tshams pa ma lags so zhes byas pa dang / de dag cang mi zer bar 'dug pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag bram ze dang khyim bdag dad pa can rnams 'phya ba ni thogs tu bab po/ /rab tu byung ba ni bden pa'i bsam pa can yin te/ de lta bas na dge slong gis mna' 'dor bar mi bya'o/ /dge slong mna' 'dor na 'gal tshabs can du 'gyur ro/ /gleng gzhi ni mnyan yod na'o/ /drug sde dag gang dang gang du dgos par lhung bzed dang / chos gos dang / dra ba dang / phor bu dang / ska rags dang / gzhan yang dge sbyong gi yo byad gang yang rung ba dag skugs su 'dzugs par byed pa bram ze dang khyim bdag rnams kyis mthong nas 'phya bar byed cing 'phags pa khyed ci khyim pa dag bzhin du lhung bzed la sogs pa yo byad skugs su 'dzugs sam/ de ni 'tshams pa ma yin no/ /de dag gis smras pa/ sgog skya zos sam/ chang 'thungs sam/ 'di la mi 'tsham pa ci zhig yod/ de dag cang mi zer bar 'dug pa'i skabs de dge slong rnams kyis bcom ldan 'das la gsol pa dang / bcom 'das bcom ldan 'das kyis bka' stsal pa/ dge slong dag bram ze dang khyim bdag rnams 'phya ba ni thog tu bab po/ /de lta bas na dge slong gis skugs gzugs par mi bya ste/ dge slong skugs 'dzugs na 'gal tshabs can du 'gyur ro/ /gleng gzhi ni mnyan yod na'o/ drug sde rnams kyis kun tu spyod pa ni nang par sngar langs nas khang thog tu 'dzegs te phyogs bzhir blta zhing de dag gang na du ba 'thul ba 'am/ bya rgod lding ba snang ba der myur du gom pa bslang ste 'gro bar byed do/ /ji tsam dus gzhan zhig na nye dga' nang par sngar khang thog tu 'dzegs te blta bar brtsams na/ des bya rgod lding ba mthong nas de rings pa rings par song ba dang / ji tsam na stag gis nags thibs po'i sa phyogs shig tu god ma zhig sbas pa mthong nas de dga' ste/ de khyer nas rgyal byed kyi tshal du song ba dang / stag dri snom zhing phyi bzhin 'brangs nas rgyal byed kyi tshal gyi sgo na sgra 'byin par byed do/ /sangs rgyas bcom ldan 'das rnams ni mkhyen bzhin du rmed par mdzad pa yin pas bcom ldan 'das kyis tshe dang ldan pa kun dga' bo la rmas pa/ stag 'o ni ci ste skad 'byin/ des gsol pa/ btsun pa des god ma sbas pa de btsun pa nye dgas 'tshal te mchis pa'i slad du'o/ /bcom ldan 'das kyis bka' stsal pa/ kun dga' bo dge slong stag gi god ma za 'am/ btsun pa 'tshal ba lags so/ /kun dga' bo ri dgas kyi rgyal po seng ge ni ri dgas bzangs po bzang po dag bsad nas sha bzang po dag zos shing khrag bzang po dag 'thungs nas bor te 'gro'i/ stag ni god ma sbed par byed pas de lta bas na dge slong gis stag gi god ma bza' bar mi bya ste/ za na 'gal tshabs can du 'gyur ro/ /dge slong dag gzhan yang ngas dge 'dun gyi gnas brtan gyi kun du spyad pa'i chos bca' bar bya ste/ dge 'dun gyi gnas brtan gyi dge slong gis sha 'drim pa'i tshe 'di ci'i sha stag gi god ma ma yin nam zhes dri bar bya'o/ /ma dris par len na 'gal tshabs can du 'gyur ro/ / sdom ni/ tshul shing rnams ni brims pa na/ /spun gnyis dag ni gab pa dang / /la ba bsgyur bar bya ba dang / /de lta bu la sogs pa'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /ri 'or zhig na gtsug lag khang zhig yod de/ ji tsam dus gzhan zhig na dga' bo dang / nye dga' ljongs rgyu zhing dong ba las ri 'or der phyin to/ /de dag der phyin pa na dge 'dun la yang rnyed pa zhig grub na de dag gnas ngan len kun tu spyod pa yin pas dge slong gang gis kyang ma bcar ba dang / nye dga' bos dga' bo la smras pa/ slob dpon lhung bzed nag po can 'di dag khengs pa nga rgyal can dag cig pas gtses tshul spyon/ gab ste bzhugs la 'di dag rnyed pa ji ltar 'ged pa gzigs so/ /des smras pa/ legs te de bzhin bya'o zhes de dag gab ste 'dug pa dang / dge 'dun gyis rnyed pa de bgos so/ /gang gi tshe rnyed pa bgos zin pa de'i tshe de dag 'ongs nas smras pa/ tshe dang ldan pa dag dge 'dun gyi rnyed pa grub pa bgo'o/ /dge slong rnams kyis smras pa/ khyed ga las da gzod 'dir 'ongs kyi/ rnyed pa de 'drim pa'i tshe ma yin/ de dag gis smras pa/ ci khyed bgod rgyu zhig yin nam/ bgos par mi chud kyi bgo nyes te/ ci khyod kyis go bar byas nas bgos sam/ skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge 'dun la deng dge 'dun gyi rnyed pa 'drim na/ dge slong gang yang gang du yang ma 'gro shig ces go bar byas nas rnyed pa brim par bya'o/ / dge slong rnams kyis rnyed pa de slar bsdus so/ /bsdus nas dge 'dun la dge 'dun gyi rnyed pa 'drim na/ dge slong gang yang gang du yang ma 'gro shig ces bsgo nas/ de dag gis bgo bar brtsams pa dang / dga' bo dang nye dga' de bzhin du gab ste 'dug go// //'dul ba phran tshegs kyi gzhi/ bam po nyi shu gsum pa/ gang gi tshe dge 'dun gyis rnyed pa de bgos zin pa de'i tshe de dag yang 'ongs nas smras pa/ tshe dang ldan pa dag tshur rnyed pa de bgo'o/ /dge slong dag gis smras pa/ khyed gang nas da gzod 'dir 'ongs kyi rnyed pa de dge 'dun la go bar byas nas 'drim pa'i tshe ni ma yin/ de dag gis smras pa/ gal te khyed kyis go bar byas kyang bgos par mi chud kyi bgo nyes te/ ci khyod kyis go bar byas nas 'gan DI brdungs sam/ skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ go bar byas nas gaN DI brdungs te dge 'dun la rnyed pa de brim par bya'o/ /dge slong rnams kyis yang rnyed pa de slar bsdus so/ /bsdus nas de bzhin du go bar byas te/ gaN DI brdungs nas bgo bar brtsams pa dang / de dag de kho na bzhin du gab ste 'dug go/ /gang gi tshe rnyed pa de bgos zin pa de'i tshe yang 'ongs te de kho na bzhin du smras pa dang / dge slong rnams kyis smras pa/ dge 'dun la yang go bar byas/ gaN DI yang brdungs nas khyed ga las da gzod 'dir 'ongs/ de dag gis smras pa/ khyod kyis go bar yang byas/ gaN DI yang brdungs kyang ci ga khyed kyis tshul shing brims sam/ bgos par mi chud kyi bgo nyes so zhes zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ go bar byas te gaN DI brdungs nas tshul shing brim par bya'o/ /dge slong rnams kyis yang rnyed pa de bsdus so/ /bsdus nas go bar byas/ gaN DI brdungs/ tshul shing brims te bgo bar brtsams pa dang / de dag de kho na bzhin du gab ste 'dug go/ /gang gi tshe rnyed pa de bgos zin pa de'i tshe de dag 'ongs nas de kho na bzhin du smras pa dang / dge slong rnams kyis smras pa/ tshe dang ldan pa khyed kyis dge 'dun la de ltar co dri 'am/ dge 'dun la go bar byas/ gaN DI brdungs tshul shing brims na khyed ga las da gzod 'dir phyin/ de dag gis smras pa/ tshe dang ldan pa dag rnyed pa lta phar zhog /gal te de lta na kho bo cag gis dge 'dun ji ltar co dris pa smros shig /gal te khyod kyis dge 'dun la go bar byas/ gaN DI brdungs/ tshul shing brims na de ci khyed kyis kho bo cag gi bgo skal bstan tam/ der zad/ rnyed pa med kyang bla 'gro'o zhes zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge 'dun la go bar byas/ gaN DI brdungs/ tshul shing brims nas gang zhig mi snang ba de'i bgo skal bstan nas bgo bar bya'o/ /bgos zin te 'ong ba gang yin pa de la ni rnyed pa sbyin par mi bya ste/ gal te de ltar bgos na legs par bgos pa yin pas 'di la 'gyod par mi bgyi'o/ /dge slong gis ched du bsams te de ltar dge 'dun la co dri bar yang mi bya'o/ /dge slong ched du bsams te dge 'dun la co 'dri bar byed na 'gal tshabs can du 'gyur ro/ /gleng gzhi ni mnyan yod na'o/ /gang gi tshe khyim bdag mgon med zas sbyin gyis rgyal b yed kyi tshal phyogs bzhi'i dge slong gi dge 'dun la phul nas tshon rtsi'i khyad par rnam pa sna tshogs kyis phyi nang bcas te ri mo bris pa de'i tshe mnyan yod na gnas pa'i skye bo'i tshogs kyis ji ltar khyim bdag mgon med zas sbyin gyis rgyal byed kyi tshal tshon rtsi'i khyad par rnam pa sna tshogs kyis phyi nang bcas te ri mo bris nas mchog tu phun sum tshogs par byas pa thos te/ de'i tshe srog chags brgya stong phrag du ma rgyal byed kyi tshal blta ba'i phyir nye bar song ngo / / yang de'i tshe mnyan yod na bram ze zhig gnas pa de la rgyal po dang / blon po dang / grong mi rnams bram ze 'di mdzes so zhes mngon par dad de des rgyal po'i pho brang nas chen po la 'os pa'i la ba zhig thob bo/ /des de bgos nas rgyal byed kyi tshal du ltad mo ltar song ba dang / de mthong ma thag kho nar dad pa chen po skyes nas des la ba de phyogs bzhi'i dge slong gi dge 'dun la phul lo/ /bcom ldan 'das kyis gos kyi rnyed pa byung na tha na me mar gyi snying po'i rgyu tsam du yang mnyam par bgo'o zhes gsungs pas/ dge slong rnams kyis de tshal bu tshal bur byas nas mnyam par bgos so/ /bram ze des bsams pa/ la ba de chen po la 'os pa zhig pas bdag gis 'phags pa rnams la kar sha pa Na dag phul la slar blang ngo snyam ste de nang par sngar langs nas rgyal byed kyi tshal du song ba dang / rgyal byed kyi tshal gyi sgo na dge slong mang po dag cig 'dug go/ /des smras pa/ 'phags pa dag phyag 'tshal lo/ /bram ze chen po nad med cig /'phags pa la la ba phul ba de khyed kyis cir bgyis/ dge slong rnams kyis smras pa/ bram ze chen po rjes su yi rang bar gyis shig /kho bo cag gis mnyam par bgos so/ /gcig gis smras pa/ bdag gis ni bgo skal zhwa la glan no/ /gzhan zhig gis smras pa/ bdag gis ni lham yu thung la glan no/ /gzhan zhig gis smras pa/ bdag gis ni stod kor la glan no/ /gzhan zhig gis smras pa/ bdag gis ni lhung bzed phyi bar byas so/ des smras pa/ 'phags pa la ba de chen po la 'os pa zhig na kye ma khyed kyis de kar sha pa Na dag tu bsgyur la kar sha pa Na dag bgo mdzad cig ces zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag bram ze de zer ba bden te/ de lta bas na dge 'dun la gos kyi rnyed pa de lta bu grub pa gang yin pa de kar sha pa Na dag tu bsgyur la/ kar sha pa Na dag bgo bar bya'o// // sdom ni/ rung ba ma yin lnga dag gi/ /lham ni dgag pa mdzad pa dang / /dom lpags kyi ni lham dag dang / /de yi steng gi rim pa'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /drug sde rnams kyis smras pa/ dga' bo nye dga' bo bdag cag gis mnyan yod du skye bo mang po thams cad la ma lus par bza' ba'i rim bslangs na/ rgyal po'i glang po che 'dul ba de dag gis bdag cag la cung zad kyang ma byin gyis tshur shog 'dong cung zad cig bslang ngo / /de na kha cig gis smras pa/ legs te de ltar bya mod kyi/ 'on kyang thabs shig bsham par bya'o/ /ci zhig bya/ seng ge'i lpags pa las lham byas la de bgos te rdzi kar 'dug nas glang po che rnams bskrogs par bya'o/ /gzhan dag gis smras pa/ re shig de bzhin du bslangs la gal te ma ster na phyis de ltar bya'o zhes de rnams nang par sngar langs te de dag gi drung du song nas smras pa/ bzhin bzangs dag gtum po khyod kyis kho bo cag la zas kyi rin mi sbyin nam/ de dag gis smras pa/ 'phags pa khyed la kho bo cag ci rag lus na gang gi phyir kho bo cag gis zas kyi rin sbyin/ drug sde rnams kyis 'jal to zhes byas nas song ngo / /de dag gis sngar gros byas pa bzhin seng ge'i lpags pa las lham byas nas bgos te de dag glang po che rnams rgyu ba'i rdzi kar dong ste 'dug pa dang / glang po che rnams kyis seng ge'i dri tshor te bred nas gcin rtug stor te 'bros par brtsams so/ /glang po che 'dul ba rnams kyis lcags kyu dag gis zho sha yod med kyis bzung na ma thub pa dang / drug sde rnams kyis smras pa/ tshe dang ldan pa dag ma gtang shig ma gtang shig / de dag gis smras pa/ 'phags pa mi thub na ji ltar mi gtang / drug sde rnams kyis smras pa/ kho bo cag gis glan nam/ 'phags pa de ltar gnang na sman che'o/ /tshe dang ldan pa dag gal te bza' ba'i rin ster bar dam 'cha' na glan no/ /'phags pa dbul lo/ /bden grang zhes byas nas de dag rdzi phyogs ma yin par dong ste 'dug pa dang / seng ge'i dri mi mnam par glang po che rnams sdod do/ / glang po che 'dul ba rnams kyis smras pa/ 'phags pa ci khyod rig sngags mkhyen tam/ bzhin bzangs kho bo cag gis rig sngags mi shes so/ /'phags pa gal te de lta na khyed kyis ji ltar bzlog /de rnams kyis ji ltar gyur pa bsnyad pa dang / de dag gis smras pa/ khyed kyis gnod pa 'di lta bu yang byas pa lta/ gal te rgyal po'i glang po che dam pa yan lag mchog can 'di lta bu dag nags kyi nang du shor bar gyur na/ khyed kyis rgyal po la dgu byas par ma gyur tam/ de dag 'dzum dmul nas cang mi zer bar 'dug pa'i skabs de dge slong rnams kyis bcom ldan 'das la gsol pa dang / bcom ldan 'das kyis dgongs pa/ nyes dmigs gang cung zad byung ba ni dge slong dag seng ge'i lpags pa'i lham gyon pa las gyur kyis/ de'i phyir dge slong gis seng ge'i lpags pa'i lham bcang bar mi bya'o snyam du dgongs nas/ dge slong rnams la bka' stsal pa/ dge slong dag de lta bas na dge slong gis seng ge'i lpags pa'i lham bcang bar mi bya ste/ dge slong seng ge'i lpags pa'i lham 'chang na 'gal tshabs can du 'gyur ro/ /bcom ldan 'das kyis dge slong gis seng ge'i lpags pa'i lham bcang bar mi bya'o zhes bka' stsal pa dang / drug sde rnams kyis stag lpags kyi lham bcang bar brtsams pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na sen mo dang / mche ba'i stobs can lnga po glang po cang shes dang / rta cang shes dang / seng ge dang / stag dang / gung gi lpags pa'i lham bcang bar mi bya'o/ /bcom ldan 'das kyis sen mo dang mche ba'i stobs can lnga'i lpags pa'i lham bcang bar mi bya'o zhes bka' stsal pa dang / tshe dang ldan pa nye bar 'khor gyis bcom ldan 'das la zhus pa btsun pa sen mo dang mche ba'i stobs can gzhan dag kyang mchis na/ ci lags de dag gi lpags pa'i lham yang bcang bar mi bgyi lags sam/ nye bar 'khor de dag gi lpags pa'i lham yang bcang bar mi bya ste/ 'chang na 'gal tshabs can du 'gyur ro/ /gleng gzhi ni mnyan yod na'o/ /mnyan yod na dge slong zhig gzhang 'brum gyi nad kyis thebs pa de sman pa'i drung du song nas bzhin bzangs bdag gzhang 'brum gyis thebs na sman ston cig des smras pa/ 'phags pa dom lpags kyi lham mnobs shig dang khyod sos par 'gyur ro/ /des smras pa/ bcom ldan 'das kyis ma gnang ngo / /'phags pa khyod kyi ston pa ni thugs rje can yin pas gnang bar 'gyur ro/ /skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na gnang gis dge slong gzhang 'brum gyi nad kyis thebs pas dom lpags kyi lham bcang bar bya'o/ /bcom ldan 'das kyis dge slong gzhang 'brum gyi nad kyis thebs pas dom lpags kyi lham bcang bar bya'o zhes bka' stsal pa dang / rim pa mang po ma rnyed nas/ bcom ldan 'das kyis bka' stsal pa/ gal te rim pa mang por ma rnyed na steng rim cig spun pag tu klan par bya'o/ / //'dul ba phran tshegs kyi gzhi las sgo lnga pa rdzogs s+ho// // bsdus pa'i sdom ni/ rgyus pa rab snang drag po dang / /bran dang de bzhin btsod ka dang / /babs pa dang ni tshong dpon dang / /dge slong lhag ma mi dor ba'o/ / sdom ni/ de yi rgyus pa 'breng bu dang / /de bzhin brang lhan rting lhan dang / /yu chad dang ni yu thung dang / /sgro gu can dag mi bya'o/ /sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /bcom ldan 'das kyis dge slong gis sen mo dang mche ba'i stobs can lnga'i lpags pa'i lham bcang bar mi bya'o zhes bka' stsal pa dang / drug sde rnams kyis de dag gi rgyus pas lham btsems te nyes dmigs de nyid du gyur nas/ bcom ldan 'das kyis bka' stsal pa/ de dag gi rgyus pas lham btsem par mi bya'o/ /bcom ldan 'das kyis de dag gi rgyus pas lham btsem par mi bya'o zhes bka' stsal pa dang / drug sde rnams kyis de dag gi lpags pa'i 'breng bus btsems te/ nyes dmigs de nyid du gyur nas/ bcom ldan 'das kyis bka' stsal pa/ de dag gi lpags pa'i 'breng bus lham btsem par mi bya'o/ /bcom ldan 'das kyis de dag gi rgyus pa dang lpags pa'i 'breng bus lham btsem par mi bya'o zhes bka' stsal pa dang / drug sde rnams kyis de dag gi lpags pa las brang lhan byas te nyes dmigs de nyid du gyur nas/ bcom ldan 'das kyis bka' stsal pa/ de dag gi lpags pa las brang lhan mi bya'o/ /bcom ldan 'das kyis de dag gi lpags pa las brang lhan mi bya'o zhes bka' stsal pa dang / drug sde rnams kyis de dag gi lpags pa la rting lhan byas te/ nyes dmigs de nyid du gyur nas/ bcom ldan 'das kyis bka' stsal pa/ de dag gi lpags pa las rting lhan mi bya'o/ /bcom ldan 'das kyis de dag gi lpags pa las brang lhan dang / rting lhan mi bya'o zhes bka' stsal pa dang / drug sde rnams kyis de dag gi lpags pa las lham yu chad byas te nyes dmigs de nyid du gyur nas/ bcom ldan 'das kyis bka' stsal pa/ de dag gi lpags pa las lham yu chad mi bya'o/ /bcom ldan 'das kyis de dag gi lpags pa las brang lhan dang / rting lhan dang / lham yu chad mi bya'o zhes bka' stsal pa dang / drug sde rnams kyis de dag gi lpags pa las lham yu thung byas te/ nyes dmigs de nyid du gyur nas/ bcom ldan 'das kyis bka' stsal pa/ de dag gi lpags pa las lham yu thung mi bya'o/ /bcom ldan 'das kyis de dag gi lpags pa las lham yu thung mi bya'o zhes bka' stsal pa dang / drug sde rnams kyis de dag gi lpags pa las lham sgro gu can byas te nyes dmigs de nyid du gyur nas/ bcom ldan 'das kyis bka' stsal pa/ de dag gi lpags pa las lham sgro gu can mi bya'o/ / sdom ni/ rab snang 'dod pa thams cad dang / /dge 'dun bshos dang bzo sbyangs dang / /mgon med zas sbyin khre'u rnams dang / /gtsug lag khang dang bzang po'o/ /bar sdom ni/ bltam dang rgyal po che dang bdag gi mthu/ /de bzhin mi dkar rab byung rgyal tshab dang / /sangs rgyas rgyal srid nyid dang yan lag mchog /de bzhin rmi lam sa 'dzin skyes dang gnas/ /byang chub sems dpa' dga' ldan gyi gnas na bzhugs pa na rgyal po'i khab kyi grong khyer na rgyal po pad ma chen po zhes bya ba rgyal srid byed du 'jug ste/ chos kyi rgyal po rgyal srid 'byor pa dang / rgyas pa dang / bde ba dang lo legs pa dang / skye bo dang / mi mang pos gang ba 'thab pa dang / rtsod pa dang / 'khrug pa dang / 'khrug long rab tu zhi ba/ chom rkun dang / nad med pa/ sa lu dang / bu ram shing dang / ma he phun sum tshogs pa/ chos dang 'thun pas byed du 'jug go/ /mnyan yod na ni rgyal po tshangs byin ring du 'phur/ 'phags rgyal na ni mu khyud mtha' yas/ kau sham bi na ni dmag brgya pa zhes bya ba rgyal srid byed du 'jug ste/ rgyal srid rgyas pa dang zhes bya ba nas/ chos dang 'thun par byed du 'jug go zhes bya ba'i bar snga ma bzhin no/ /gang gi tshe byang chub sems dpa' bcom ldan 'das dga' ldan gyi gnas na bzhugs pa na gzigs pa lnga po rigs la gzigs pa dang / dus la gzigs pa dang / yul la gzigs pa dang / rus la gzigs pa dang / bud med la gzigs pas 'jig rten la gzigs te/ 'dod pa na spyod pa'i lha drug kyang lan gsum du sbyang ba mdzad nas glang po cher bstan pas yum gyi lhums su zhugs so/ /de'i tshe sa chen po yang shin tu g.yos par gyur/ 'jig rten 'di thams cad kyang snang ba rgya chen pos sum bcu rtsa gsum pa'i lha rnams kyi kha dog gi mthu yang zil gyis mnan nas khyab par gyur/ 'jig rten dang 'jig rten gyi bar gyi mun pa mun gnag thibs po smag tu gyur pa gang du nyi ma dang zla ba 'di ltar rdzu 'phrul che ba/ 'di ltar mthu che ba 'di dag gi 'od kyis snang bar ma nus pa gang dag yin pa de dag kyang de'i tshe snang ba rgya chen pos khyab par gyur te/ der sems can gang dag skyes pa de dag rang gi lag nas bzung yang mi mthong ba de dag kyang 'od des sems can phan tshun mthong nas shes ldan dag sems can gzhan dag kyang 'dir skyes pa lta/ shes ldan dag sems can gzhan dag kyang 'dir skyes pa lta zhes bya bar shes so/ /gang gi tshe byang chub sems dpa' bcom ldan 'das bltam pa de'i tshe rgyal po chen po bzhi'i bu yang btsas te/ rgyal po'i khab tu ni rgyal po pad ma chen po'i bu btsas so/ /mnyan yod du ni tshangs byin gyi/ 'phags rgyal du ni mu khyud mtha' yas kyi/ kau sham+bir ni rgyal po dmag brgya pa'i bu btsas so/ /byang chub sems dpa' bltam pa na sa chen po 'di gser zhun ma lta bur snang bar gyur pa dang / rgyal po so so nas bsams pa/ bdag gi bu'i mthu'o bdag gi bu'i mthu'o snyam nas de dag so so nas ming 'dogs par byed de/ rgyal po pad ma chen pos smras pa/ shes ldan dag nga'i bu btsas pa na nyi ma'i gzugs bzhin du 'jig rten snang bar byas pas de'i phyir gzhon nu'i ming gzugs can snying po zhes gdags so/ /rgyal po tshangs byin ring du 'phur gyis smras pa/ nga'i bu btsas pa na gzhongs rnams gsal zhing gsal ba lta bur snang bas de'i phyir gzhon nu'i ming gsal rgyal zhes bya bar gdags so/ /rgyal po mu khyud mtha' yas kyis smras pa/ nga'i bu btsas pa na 'jig rten rab tu snang ba kho nas snang bar byas pas de'i phyir gzhon nu'i ming rab snang zhes bya bar gdags so/ /rgyal po dmag brgya pas smras pa/ nga'i bu btsas pa na 'jig rten nyi ma shar ba bzhin du snang bar byas pas de'i phyir gzhon nu'i ming shar bar gdags so/ /de'i tshe ri ki skin da la drang srong mi dkar ba zhes bya ba 'jig rten 'di'i 'jig pa la mkhas pa/ 'chags pa la mkhas pa zhig gnas so/ /de'i tsha bo na la da zhes bya ba zhig yod pa de de'i drung du yang dang yang du nye bar 'gro'o/ / des nye bar 'ongs pa de la rtag tu 'jig pa dang 'chags pa'i gtam byas te/ de 'jig pa dang 'chags pa'i gtam thos nas skyo ste de'i thad du rab tu byung ngo / /des dus gzhan zhig na drang srong mi dkar ba'i phug snang ba rgya chen pos khyab pa mthong ngo / /mthong nas kyang tshigs su bcad de smras pa/ nyi ma thams cad gcig car du/ /'dir ni shar bar gyur tam ci/ /'di ltar ri dang phug bcas par/ /'od zer dag gis 'bar ba bzhin/ / mi dkar ba yis de smras pa/ /nyi ma'i 'od tsha 'od 'di bsil/ /lus 'dir snang ba 'jug pas na/ /'di ni nges par thub pa'i 'od/ /byang chub sems dpa' 'od po che/ /gdon mi za bar lhums nas byung / /'di ni byang chub sems dpa' de/ /byung ba'i 'od ni dri med pa/ /'jig rten gsum po dag kun ni/ /gser dang 'dra ba bkye ba yin/ /na la das smras pa/ mkhan po gal te de lta na tshur spyon/ byang chub sems dpa' gzigs kyis bzhud do/ /des smras pa/ bu da ltar byang chub sems dpa' lha dbang che bar grags pa/ dbang che bar grags pa rnams kyis bskor cing bzhugs te/ de bdag cag gis mthong bar sla ba ma yin gyis/ gang gi tshe pho brang du gshegs nas mtshan btags te phyir byung ba de'i tshe ltar 'dong ngo / /gang gi nyin par byang chub sems dpa' bltam pa de nyid kyi nyin mo 'dun pa la sogs pa rim gro pa lnga brgya dang / 'dun ma la sogs pa'i rim gro ma lnga brgya dang / glang po che mo lnga brgya dang / rta rgod ma lnga brgya yang btsas shing 'brangs/ gter lnga brgya yang kha bye ste snang ngo / /blon po rnams kyis rgyal po zas gtsang la sbran pa/ lha zhal rjes dgyes pa mdzad du gsol/ gzhon nu bltam pa na don 'di snyed grub ste/ rim gro ba lnga brgya dang / rim gro ma lnga brgya yang btsas/ glang po che mo lnga brgya dang / rta rgod ma lnga brgya yang 'brangs/ gter lnga brgya yang kha bye ste bstan lags so/ /rgyal po zas gtsang gis thos nas yid bde ba skyes te smras pa/ shes ldan dag gzhon nu btsas pa ni nga'i don thams cad dang las kyi mtha' thams cad grub pas de'i phyir gzhon nu'i ming don thams cad grub pa zhes bya bar gdags so zhes byang chub sems dpa'i mtshan 'di lta ste don thams cad grub pa zhes bya bar der btags so/ /byang chub sems dpa' rin po che sna bzhi'i khyogs la bzhag ste sems can stong phrag du mas bskor nas lha dang mi'i bkur sti chen pos ser skya'i gzhi'i grong khyer du zhugs so/ /byang chub sems dpa' grong khyer du zhugs pa na shAkya nga rgyal can mur cor smra ba/ thugs thub can rnams thub pa bzhin du cang mi smra bar 'dug pa dang / rgyal po zas gtsang gis smras pa/ shAkya nga rgyal can mu cor smra ba thugs thub can 'di dag gzhon nu grong khyer du zhugs pa dang thub pa bzhin du cang mi smra bar 'dug pas de'i phyir gzhon nu'i ming shAkya thub par gdags so zhes de ni byang chub sems dpa'i mtshan gnyis pa 'di lta ste shAkya thub pa zhes bya ba der btags so/ /shAkya rnams la gnod sbyin gnyug mar gnas pa shAkya spel ba zhes bya ba zhig yod de/ shAkya su'i bu 'am/ bu mo btsas kyang rung de dang por gnod sbyin shAkya spel ba'i rkang pa la phyag 'tshal du khrid nas rgyal po zas gtsang gis smras pa/ shes ldan dag deng la gzhon nu gnod sbyin shAkya spel ba'i rkang pa la phyag 'tshal du chug shig / blon po rnams kyis de'i mdun du khrid pa dang / gnod sbyin shAkya spel bas byang chub sems dpa' thag ring po kho na nas mthong ngo / /mthong nas kyang de brtad de rings pa rings par gom pa bslang nas byang chub sems dpa' bsu ste rkang pa la phyag byas pa dang / rgyal po zas gtsang gis smras pa/ shes ldan dag gnod sbyin shAkya spel ba yang gzhon nu'i rkang pa la phyag 'tshal te/ de lta bas na 'di ni lha'i yang lha yin pas de'i phyir gzhon nu'i ming lha'i yang lha zhes gdags so zhes des na byang chub sems dpa'i mtshan gsum pa 'di lta ste/ lha'i yang lha zhes bya ba der btags so/ / de nas rgyal po zas gtsang gis byang chub sems dpa' bram ze rnams dang / mtshan mkhan rnams dang / skar mkhan rnams la bstan nas/ shes ldan dag gzhon nu cig gang dag dang ldan na skyes bu chen po'i 'gro ba gnyis su 'gyur gyi gzhan du ma yin te/ gal te khyim pa khyim na gnas pa 'khor los sgyur ba'i rgyal po mtha' bzhir rnam par rgyal ba chos kyi rgyal po chos dang 'thun pa rin po che sna bdun dang ldan par 'gyur zhing / de'i rin po che sna bdun ni 'di lta bu dag yin te/ 'khor lo rin po che dang / glang po rin po che dang / rta rin po che dang / nor bu rin po che dang / bud med rin po che dang / khyim bdag rin po che dang / bdun pa blon po rin po che'o/ /gal te skra dang kha spu bregs nas gos ngur smrig dag bgos te dad pas yang dag par khyim nas khyim med par rab tu phyung na 'jig rten na de bzhin gshegs pa dgra bcom pa yang dag par rdzogs pa'i sangs rgyas shes sgra rnam par grags par 'gyur/ skyes bu chen po'i mtshan sum bcu rtsa gnyis dang ldan nam/ de dag gis smras pa/ lha de lta lags te/ gzhon nu ni gang dag dang ldan na skyes bu chen po'i 'gro ba gnyis su 'gyur gyi gzhan du ma lags te zhes bya ba nas 'jig rten na sgra rnam par grags par 'gyur ba skyes bu chen po'i mtshan sum bcu rtsa gnyis dang ldan lags so/ /na la das smras pa/ mkhan po byang chub sems dpa' ser skya'i gzhi'i grong khyer du gshegs te/ de'i mtshan yang btags lags kyis tshur gshegs gzigs su bzhud do/ /des smras pa/ bu legs te/ de bzhin byas 'dong ngo zhes de gnyis rdzu 'phrul gyis chas pa dang / byang chub sems dpa'i mthus de'i rdzu 'phrul nyams te rkang pa kho nas ser skya'i gzhi'i grong khyer du zhugs nas rgyal po zas gtsang gi pho brang ga la ba der song ste phyin nas rgyal po'i pho brang gi sgo na sdod do/ /de nas drang srong mi dkar bas mi zhig la smras pa/ kye skyes bu khyed tshur shog song la rgyal po zas gtsang la drang srong mi dkar ba lha lta bar 'dod de sgo na 'dug go zhes sbron cig / de song nas rgyal po zas gtsang la lha drang srong mi dkar ba lha lta bar 'tshal te chab sgo na mchis so zhes sbran pa dang / des smras pa/ shes ldan dag drang srong mi dkar ba las su 'gog nang du shog shig de nang du zhugs pa dang / rgyal po zas gtsang gis byon pa legs so zhes bya ba'i kun tu spyod pas kun tu spyad nas rkang pa la mchod yon phul te seng ge'i khri la 'dug tu bcug go/ /de nas rgyal po zas gtsang gis de'i rkang pa gnyis la gtugs nas smras pa/ drang srong chen po ci zhig gi slad du byon/ des tshigs su bcad de smras pa/ rgyal chen bdag ni khyod kyi sras/ /blta bar 'tshal nas mchis lags te/ / 'jig rten gtso bo rnams 'dren pa/ /thub pa de ni blta 'tshal lo/ /thub pa de ni blta 'tshal lo/ /rgyal po zas gtsang gis smras pa/ drang srong chen po gzhon nu gnyid log go/ /des smras pa/ mnal bzhin blta bar bya'o/ /rgyal po zas gtsang gis smras pa/ drang srong chen po legs kyis de bzhin du mdzod la gzigs shig /des song nas byang chub sems dpa' mig mi 'dzums par gzugs rnams la gzigs pa mthong ngo / /mthong nas kyang tshigs su bcad de smras pa/ rigs kyi rta po rnam dag ni/ /nam gyi gung la nyal ba ltar/ /dgos pa don du gnyer rnams kyi/ /mig la yun ring gnyid mi gnas/ /zhes smras nas smras pa/ lha ci gzhon nu bram ze rnams dang / mtshan mkhan rnams dang / skar mkhan rnams la bstan tam/ des smras pa/ drang srong chen po bstan to/ /lha de dag gis ci zhig tu lung bstan/ rgyal po zas gtsang gis smras pa/ 'khor los sgyur ba'i rgyal por 'gyur ro zhes mchi'o/ /des byang chub sems dpa' la yan man brtag par brtsams pa dang / ji tsam na byang chub sems dpa' la sangs rgyas kyi mtshan rnams mthong nas/ dus ci tsam gyis bdud rtsi thob par 'gyur zhes bsams pa la zhugs nas des lo nyi shu rtsa dgu lon pa dang khyim nas byung ste lo drug tu dka' ba spyad nas bdud rtsi thob par 'gyur bar mthong ngo / / de na bdag nyid kyi rgyud bsam pa la zhugs pa dang / bar skabs su 'chi bar mthong nas 'dod pa na spyod pa'i sred pa byung nas de mig mchi mas gang bzhin tshigs su bcad de smras pa/ sa bdag rtog ge rnams kyi blo gros 'khrul/ /dus kyi mthar ni 'khor los sgyur mi 'byung / /bsod nams mchog can 'di ni chos kyi mdzod/ /nyes pa rnams las rgyal te sangs rgyas 'gyur/ /mi yi dbang po mtshan gsal min rnams kyis/ / gling bzhi rnams kyi bdag po'i dbang phyug 'gyur/ /shin tu mtshan gsal thub dbang rdzogs sangs rgyas/ /mi mchog chos kyi 'khor lo skor bar 'gyur/ /de nas rgyal pos de mig mchi mas gang ba mthong nas bag tsha ste mi dga' nas slar tshigs su bcad de smras pa/ skyes pa bud med dag ni gang phrad nas/ /ngoms par mi 'gyur dga' ba thob 'gyur ba/ /lus bzangs dga' byed de ni 'dir gzigs nas/ /ci slad khyod kyi zhal ni mchi mar bcas/ /bdag gi gzhon nu 'ga' las 'jigs pa 'am/ /tshe zad nye bar gnas par mi 'gyur grang / /de slad dge ba 'di myur bdag la gsungs/ /khyod kyi bshums mo byung bas bdag 'dar ro/ /des kyang tshigs su bcad de smras pa/ gal te 'di yi steng du mkha' las ni/ /rdo rje'i char drag rab tu bab gyur kyang / /thub pa chen po'i sku yi spu nyag gcig /kun tu bskyod par nus pa ma yin no/ /tshan chen rlung gis rab tu bskyod pa yi/ /shin tu mi bzad mtshon rnon rnam dag dang / /sbrul gdug rnams dang shin tu gdug pa'i dug /gzhon nu'i lus la bab kyang smas mi nus/ /mi dbang bdag ni chos mchog mdzod 'di dang / /phrad nas don ma grub par 'chi 'gyur te/ /zhi ba mi 'thob rang gi nyes mthong nas/ /de yi slad du bdag ni ngu bar bas/ /'jig rten dag ni gang rnams dus su ni/ /smra ba'i dam pa mtshungs med 'di yi chos/ /nyan cing thos nas rab zhi mchog 'gro ba/ /bde skyid bsod nams can de rims nad bral/ /rgyal po zas gtsang gis byang chub sems dpas bdud rtsi 'thob par thos nas cang mi zer bar 'dug go/ /log pa'i lta bas nyams pa ni phal chen brdzun smra ba dang g.yo kun tu spyod pa la zhugs pa yin pas drang srong mi dkar bas smras pa/ lha khyod kyi grong khyer na gnas pa'i skye bo'i tshogs 'di snyam du kye ma drang srong mi dkar ba rkang gis ser skya'i gzhi'i grong khyer du 'ongs kyang ci ma rung snyam du yun ring po nas smon pas bdag skye bo la snying brtse ba'i phyir rkang kho nas ser skya'i gzhi'i grong khyer du 'ongs te rkang kho nas 'byung gis grong khyer mdzes par bgyid du stsol cig / rgyal po zas gtsang gis blon po rnams la bsgo ba/ shes ldan dag drang srong mi dkar ba rkang gis grong khyer nas 'byung gis/ grong khyer dang lam mdzes par byed du chug la dril sgrogs te 'di skad du ser skya'i gzhi na gnas pa'i skye bo'i tshogs dang yul sna tshogs nas lhags pa gzhan gyis kyang drang srong mi dkar ba grong khyer nas 'byung ba su shig ces sgo shig / lha de ltar 'tshal lo zhes blon po rnams kyis ser skya'i gzhi'i grong khyer rdo dang / gseg ma dang / gyo mo med par byas/ tsan dan gyi chus chag chag btab dri zhim po'i pog phor bzhag / dar gyi lda ldi mang po bres/ rgyal mtshan dang ba dan bsgreng / me tog sna tshogs bkram lha rnams kyi bskyed mos tshal dga' ba'i tshal bas kyang lhag par dga' dga' ltar grong khyer mdzes pa dang / lam mdzes par byas nas dril bsgrags te/ 'di skad ces shes ldan grong khyer na gnas pa rnams dang / pho brang 'khor ba rnams dang / yul sna tshogs nas lhags pa'i skye bo'i tshogs nyon cig / lhas 'di skad ces drang srong mi dkar ba sang rkang gis ser skya'i gzhi'i grong khyer nas 'byung gis de'i phyir khyed thams cad kyis de su shig ces bka' stsal to/ /ji tsam nam nangs pa dang / drang srong mi dkar ba mi'i mchog stong phrag du mas bkur sti chen pos bskyal nas rkang gis ser skya'i gzhi'i grong khyer nas byung ngo / /des ri ki skin dar song nas yang bsam gtan dag kyang bskyed/ rdzu 'phrul yang bsgrubs so/ /de'i tshe rnam par smin pa'i las yongs su zad pas nad kyis thebs te/ rtsa ba dang / sdong bu dang / me tog dang / 'dab ma dang / 'bras bu'i sman rnams kyis rim gro byas kyang nad de nye bar zhi bar ma gyur to/ /na la das de'i lus kyi gnas skabs shes nas rkang pa la phyag 'tshal te smras pa/ mkhan po gang cung zad rab tu 'byung ba de thams cad ni bdud rtsi don du gnyer ba bdud rtsi tshol ba lags te/ de'i slad du gal te khyod kyis bdud rtsi brnyes na/ bdag la yang bdud rtsi'i bgo bsha' mdzad du gsol/ des smras pa/ bu nga yang gang cung zad rab tu byung ba de thams cad bdud rtsi don du gnyer ba dang / bdud rtsi tshol ba yin na ngas bdud rtsi ma rnyed do/ /'on kyang khyod shAkya rnams kyi nang du gzhon nu 'khrungs pa de'i spyan sngar rab tu byung la rigs rlom par ma byed/ rus rlom par ma byed/ bram ze'i bu'i rlom pa ma byed par nga rgyal chog la tshangs par spyad pa spyod cig dang / des na khyod bdud rtsi thob par 'gyur ro zhes smras nas/ bsags pa kun gyi mtha' zad cing / /mthon po'i mtha' ni snyil bar 'gyur/ /phrad pa'i mtha' ni 'bral ba ste/ /gson pa'i mtha' ni shi ba yin/ /zhes bya bas dus kyi chos dang ldan par gyur to/ /des de'i rus bu la rus bu'i mchod pa byas nas grong khyer bA rA Na sIr song ste drang srong gi nang na 'dug go/ /de na la da dang rus 'thun pas de'i ming drang srong na la da zhes bya bar chags so/ /gzhon nu rab snang ma ma brgyad po pang na 'tsho ba'i ma ma gnyis dang / nu ma snun pa'i ma ma gnyis dang / dri ma 'phyi ba'i ma ma gnyis dang / rtsen grogs kyi ma ma gnyis la gtad nas de ma ma brgyad kyis 'o ma dang / zho dang / mar sar dang / mar dkar dang / mar gyi snying khu dang / gzhan yang yo byad kyi khyad par gtso bo dag gis bskyed bsrings pas mtshe'u na 'dug pa'i pad ma bzhin du skyed drag par gyur to/ /de gang gi tshe chen por gyur pa de'i tshe yi ge dang / grangs dang / rtsis dang / lag rtsis dang / rgyal po rgyal rigs spyi bo nas dbang bskur ba/ yul kyi dbang phyug la gnas pa'i mthu thob pa/ sa chen po'i dkyil 'khor rnal du phab ste gnas pa rnams kyi bzo'i gnas dang / las kyi gnas tha dad pa gang dag yin pa 'di lta ste/ glang po che'i gnyar zhon pa dang / rta la zhon pa dang / shing rta'i thabs dang / ral gri'i thabs dang / 'phong dpyad dang / phyir bsnur ba dang / mdun du bsnur ba dang / lcags kyus bsgyur thabs dang / zhags pa gdab pa dang / mda' bo che 'phen pa dang / gcad pa dang / dral ba dang / 'dzin stangs dang / gom stabs dang / thor tshugs dang / rgyang nas phog pa dang / sgra grag par phog pa dang / gnad du phog pa dang / mi 'chor bar phog pa dang / tshabs chen po de dag la mkhas par gyur te gnas lnga la yang byang bar gyur to/ /gang gi tshe byang chub sems dpa' bcom ldan 'das gzhon nu'i rol pa la rol pa'i tshe gzhon nu rab snang yang gzhon nu'i rtse ba la rtse'o/ /gang gi tshe byang chub sems dpa' rgyal tshab tu dbang bskur ba de'i tshe gzhon nu rab snang yang rgyal tshab tu dbang bskur to/ /gang gi tshe byang chub sems dpa' rgan po dang nad pa dang shi ba gzigs nas skyo ste sa 'tsho ma dang / ri dgas skyes dang / grags 'dzin ma la sogs pa bud med drug khri spangs nas nam gyi gung la dka' thub kyi nags su gnas te/ gong ma dang 'og ma'i rnam pa las grol ba'i drang srong rnams kyi thad nas 'dod pa'i khams las 'dod chags dang bral ba dang / gzugs kyi khams las 'dod chags dang bral ba dang / rangs byed k yi bu lhag spyod kyi thad nas gzugs med pa'i khams ci yang med pa'i skye mched kyi bar las 'dod chags dang bral bar byas te lung 'bog pa med pa'i phyir dka' ba spyad pa rung ngo snyam nas lo drug tu dka' ba spyad na khyad par rtogs pa thob par ma gyur te/ dbugs kyang mi bder brngubs shing ci bder phyung / zhal zas rags pa 'bras can dang zan dron kyang gsol/ mar dkar dang / til mar gyis kyang sku byugs/ chu grang dro ran pas kyang sku khrus mdzad nas sde grong zhes bya ba'i grong du gshegs nas bu mo dga' mo dang dga' stobs las 'o thug sbrang rtsi can lan bcu drug tu nying khur byas pa bzhes te gsol nas/ klu'i rgyal po nag pos bstod cing rtswa 'tshong bkra shis las rtswa dag bzhes nas byang chub kyi shing drung ga la ba der gshegs te byon nas/ nyid kyis rtswa ma 'khrugs ma 'dzings par bting ste bzhugs nas dkyil mo dkrung bcas te sku drang por bsrang dgongs pa mngon sum du bzhag nas ji srid zag pa zad pa ma thob pa de srid kyi bar du dkyil mo dkrung mi gzhig go snyam du thugs bskyed cing tshig tu yang gsungs te/ des ji srid du zag pa zad pa ma brnyes pa/ de srid du dkyil mo dkrung ma bshig go/ /gang gi tshe bcom ldan 'das kyis bdud 'byung po dkrigs phrag drug bcu'i 'khor can byams pa'i mtshon gyis pham par mdzad nas bla na med pa'i ye shes brnyes te/ tshangs pas bskul nas yul bA rA Na sIr gshegs te lan gsum du bzlas te rnam pa bcu gnyis pa'i chos kyi 'khor lo chos dang 'thun pa bskor ba de'i tshe gzhon nu rab snang yang rgyal po chen por dbang bskur bas dbang bskur ro/ /de na yul 'phags rgyal na rgyal po rab snang zhes bya ba chos kyi rgyal po rgyal srid 'byor pa dang / rgyas pa dang / bde ba dang / lo legs pa/ skye bo mang po dang / mis gang ba/ 'thab pa dang / rtsod pa dang / 'khrug pa dang / 'khrug long rab tu zhi ba/ chom rkun dang / nad med pa/ sa lu dang / bu ram shing dang / ma he phun sum tshogs pa/ chos dang 'thun par byed du 'jug ste/ de'i mthus rtag tu dga' ston gyis rab tu dga'o/ /grong khyer 'phags rgyal de na dbang po lnga dang / nye dbang lnga yod do/ /rdzing bu lnga brgya las wa nas 'bab pa'i chu lnga brgya rgyal po'i pho brang mdzes pa zhes bya ba de nyid du 'bab bo/ /rgyal po rab snang la yan lag mchog lnga po glang po che 'dam bu'i ri dang / glang po che mo bzang ldan dang / rnga mo rgya mtsho'i rkang pa dang / rta gos mgrin dang / 'phar ma pa khwa zhes bya ba yod de/ de dag las 'dam bu'i ris ni nyin zhag gcig la dpag tshad brgya chod do/ /bzang ldan gyis ni dpag tshad brgyad bcu'o/ /rgya mtsho'i rkang gis ni dpag tshad bdun bcu'o/ /rta gos mgrin gyis ni dpag tshad lnga bcu'o/ /khwas ni dpag tshad nyi shu'o/ /de de ltar 'byor pa phun sum tshogs pa de khams ma mnyam pas nad gnyid med pa zhes bya bas thebs so/ /rgyal po de ni mar la sdang zhing chang la dga' ba zhig ste/ de la sman pa rnams kyis rdzas kyi tshogs kyi khyad par sna tshogs dang sbyar ba'i mar blud na de 'thung du mi btub bo/ /de la btsun mo'i 'khor dang / gzhon nu dang / blon po dang / pho brang 'khor gyi mi rnams kyis mar glud par byas na mar la je khro bar rtsom zhing gang zhig mar gyi ming 'byin pa de'i mgo drung nas bcad nas sa la 'dor bar byed do/ /de gnyid med pas nam gyi thun dang po la ni btsun mo'i 'khor dang lhan cig dga' ba'i rtsed mo nyams su myong bar byed do/ /gnyis pa la ni glang po che dang / rta dag la blta'o/ /gsum pa la ni 'bangs mel tshe ba rnams la da ltar mel tse su byed ces 'dri zhing / de gang zhig tshig dang po la ni lan mi glon pa de la yang bzod do/ /gnyis pa la lan mi glon pa de la yang bzod de/ gang zhig gsum pa la lan mi glon pa de'i ni mgo drungs nas bcad nas sa la 'dor bar byed pas de'i ming rgyal po rab snang rgyal po rab snang zhes bya ba gang yin pa de nub nas ming gtum po rab snang gtum po rab snang zhes bya bar chags so/ /des dus gzhan zhig na btsun mo'i 'khor rnams la smras pa/ bud med dag nga ni mel tse byed na khyed ci'i phyir mel tse mi byed/ de dag gis smras pa/ lha bdag cag kyang zhugs tshe bgyid do/ /de dag gis mel tse cung zad cig byas nas smras pa/ lha gal te bdag cag gis rtag tu zhugs tshe bgyi na lha'i thugs bsrung bar bgyi ba'i rngo mi thog gi steng du 'di ni bdag cag gi sug las ma lags so/ /des smras pa/ gal te 'di khyed kyi las ma yin na 'o na 'di su'i las yin/ de dag gis smras pa/ lha gzhon nu rnams kyi lags so/ /des de dag btang nas gzhon nu rnams kyi drung du song ste smras pa/ gzhon nu dag nga yang mel tse byed na khyed ci'i phyir mel tse mi byed/ de dag gis smras pa/ lha bdag cag kyang zhugs tshe bgyid do/ /de dag gis kyang mel tse cung zad cig byas nas smras pa/ lha gal te bdag cag gis rtag tu zhugs tshe bgyi na/ rgyal po'i bya ba gang dag lags pa zhes bya ba nas/ gnas lnga la zhes bya ba'i bar snga ma bzhin te/ byang bar bgyi ba'i rngo mi thog gi steng du 'di ni bdag cag gi sug las ma lags so/ /des smras pa/ gal te 'di khyed kyi las ma yin na 'o na su'i las yin/ de dag gis smras pa/ lha blon po rnams kyi lags so/ /des de dag btang nas blon po rnams la smras pa/ shes ldan dag nga yang mel tse byed na khyed ci'i phyir mel tse mi byed/ de dag gis smras pa/ lha bdag cag kyang zhugs tshe bgyid do/ /de dag gis kyang mel tse cung zad cig byas nas smras pa/ lha gal te bdag cag gis rtag tu zhugs tshe bgyi na/ chos dang 'thun par rgyal srid bgyi ba'i rngo mi thog gi steng du 'di ni bdag cag gi sug las ma lags so/ /des smras pa/ gal te 'di khyed kyi las ma yin na 'o na su'i las yin/ de dag gis smras pa/ lha khrom gyi ru'i las so/ /des de dag btang nas khrom gyi ru'i drung du song ste smras pa/ shes ldan dag nga yang mel tse byed na khyed ci'i phyir mel tse mi byed/ khrom gyi rus smras pa/ lha bdag cag kyang zhugs tshe bgyid do/ /de dag gis kyang mel tse cung zad cig byas nas smras pa/ lha bdag cag gis rtag tu zhugs tshe bgyi na/ lha la rgol ba dang / phyir rgol ba rnams dang lhan cig g.yul sprad pa'i rngo mi thog gi steng du 'di ni bdag cag gi sug las ma lags so/ /des smras pa/ 'di khyed kyi las ma yin na 'o na su'i las yin/ de dag gis smras pa/ lha grong mi dang / yul mi rnams kyi lags so/ / des de dag btang nas grong mi dang / yul mi rnams kyi drung du song ste smras pa/ shes ldan dag nga yang mel tse byed na khyed ci'i phyir mel tse mi byed/ de dag gis smras pa/ lha bdag cag kyang zhugs tshe bgyid do/ /des de dag rtag tu mel tse byed pa bskos nas/ de dag res su bcad de mel tse bya bar brtsams so/ /ji tsam na spos 'tshong gi khye'u zhig la res bab pa dang / de rgyal po de gtum pas bsad du dogs te yid mi dga' zhing lag pa 'gram pa la gtad nas sems khong du chud cing 'dug pa dang / de sems khong du chud pa grogs po zhig gis mthong nas smras pa/ grogs po ci ste lag pa 'gram pa la gtad nas sems khong du chud cing 'dug /des ji ltar gyur pa bsnyad pa dang / de'i khyim drung nas 'dzin pa zhig yod de/ des de la smras pa/ grogs po khyod kyis khyim drung nas 'dzin pa zhig yod na ci'i phyir de la mi 'chol/ des smras pa/ grogs po ji ltar kho bo'i srog phangs pa ltar de'i yang de dang 'dra na/ ci'i phyir kho bo'i bcol ba byed/ des smras pa/ grogs po de la kAr ShA pa Na dag byin dang gdon mi za bar mel tse byed do/ /des de la bcol ba dang / des smras pa/ kAr ShA pa Na lnga brgya byin cig dang mel tse bya'o/ / des sbyin no zhes dam bcas pa dang / des smras pa/ re shig nyis brgya lnga bcu zhig byin cig /lhag ma ni gal te kho bo gson por slar 'khor na byin cig /ci ste ma yin na khyod nyid kyi yin gyis ci bder gyis shig /des smras pa/ legs te de bzhin bya'o zhes des de la kAr ShA pa Na nyis brgya lnga bcu byin pa dang / des de dag blangs nas srang du song ste/ des der sha dang chang dang khur ba mang du nyos so/ /de nas rgyal po gtum po rab snang gi nang mi thams cad 'gron du bos te zan byin/ chang yang ci 'dod pa blud nas/ smras pa/ shes ldan dag kho bo la mel tse'i res bab na rgyal po 'di'i spyod pa ci 'dra ba smros shig /de dag gis de la ji lta bu yin pa thams cad bsnyad pa dang / des smras pa/ shes ldan dag kho bos cung zad byas pa dran par gyis shig /de dag gis smras pa/ sa 'dzin pa da dung khyod kyis zan byin pa dang / skom blud pa yang ma zhu na ci ste mi dran/ ci bya ba smros shig /des smras pa/ gal te ma stes te kho bo nyal ba la rgyal pos mel tse ba dag byul na khyed kyis kho bo slong shig / de dag gis smras pa/ legs te de bzhin bya'o/ /de la bas smad dkris nas mel tse byed pa na thal byung gnyid kyis log go/ /ji tsam na rgyal po de kho na bzhin du thun dang po la btsun mo'i 'khor dag dang lhan cig rtses dga' bar byas/ dga' mgur spyad de/ thun bar ma la glang po che dang rta la bltas nas thun tha ma la mel tse ba rnams la brtag par brtsams pa na/ de dag gis sa 'dzin pa de la sa 'dzin pa lha gshegs kyis longs shig ces bslang ba dang / de myur ba myur ba kho nar langs nas de bzhin du la bas smad dkris te 'dug go/ /rgyal pos su mel tse byed ces sgra phyung ba dang / sa 'dzin pas bsams pa/ gal te tshig dang po kho na'i lan glan te phyis lan ma glan dang / rgyal po 'dis gdon ma zos par bdag gi mgo drungs nas bcad de sa la 'dor ro snyam du rig nas cang mi zer bar 'dug go/ /lan gnyis kyi bar du rgyal pos su mel tse byed ces sgra phyung na yang de bzhin du cang mi zer bar 'dug go/ / lan gsum du rgyal pos su mel tse byed ces sgra phyung ba dang / des smras pa/ sa 'dzin pa bdag go/ /rgyal pos smras pa/ sa 'dzin pa ci sems/ de sems ngan la 'jig rten gyi sgrung gtam la yang mkhas pa zhig pas/ des smras pa/ 'jig rten gyi bsam pa sems lags so/ /bar sdom ni/ 'ug pa khrung khrung mun dza dang / /nag mo sreg pa bum pa dang / /lan tshwa phye dang shi ba dang / /dong thags rdza ma sdig pa'o/ /sa 'dzin pa 'jig rten gyi bsam pa ji lta bu zhig sems/ lha srog chags 'ug pa sgro dang bcas pa dang / sgro ma mchis pa srang la gzhal na mnyam pa kho nar 'gyur te/ de ngo mtshar che lags so/ /sa 'dzin pa ci de ltar 'gyur ram/ lha spyan sngar bab par bgyi'o/ /sa 'dzin pa legs so/ /des phyi de nyin 'ug pa zhig khyer te 'ongs nas/ de rgyal po'i mdun du sgro dang bcas te bcal nas/ yang sgro btogs te bcal na de kho na dang mnyam mo/ /rgyal pos smras pa/ sa 'dzin pa 'di la rgyu ci zhig yod/ des smras pa/ lha 'di'i sgro dag gis rlung 'dzin pa'i slad du'o/ /rgyal pos smras pa/ sa 'dzin pa khyod ni mkhas pa zhig go/ /des lha khyod kyi bka' drin lags so zhes byas pa dang / rgyal po cang mi zer bar 'dug go/ /sa 'dzin pa nam ngo ma langs te nangs nas mgo la byugs te rgyal po'i pho brangs nas byung ba dang / spos 'tshong gi khye'u des kAr ShA pa Na nyis brgya lnga bcu po de dag kyang de la byin no/ /yul 'phags rgyal na gang dang gang la res bab pa des kAr ShA pa Na lnga brgyas des glas te gtong bas de rtag tu mel tse kho na byed par gyur to/ /yang rgyal pos de kho na bzhin du su mel tse byed ces smras pa dang / des snga ma'i tshul du smras pa/ lha bdag zhugs tshe bgyid do/ /rgyal pos de kho na bzhin du sa 'dzin pa ci sems shes smras pa dang / des smras pa/ lha 'jig rten pa'i bsam pa sems lags so/ /rgyal pos smras pa/ sa 'dzin pa 'jig rten gyi bsam pa ji lta bu zhig sems/ lha khrung khrung zhes bgyi ba'i bya de dag la 'o ma dang chu bsres te stsal na/ de dag 'o ma ni 'tshal/ chab ni 'dor ro/ /sa 'dzin pa ci de de ltar 'gyur ram/ lha spyan sngar bab par bgyi'o/ /sa 'dzin pa legs so/ /des phyi de nyin khrung khrung zhig khyer de 'ongs nas de rgyal po'i drung du 'o ma chu dang bsres te blud pa dang des 'o ma ni 'thungs chu ni bor ro// //'dul ba phran tshegs kyi gzhi/ bam po nyi shu bzhi pa/ rgyal pos smras pa/ sa 'dzin pa 'di la rgyu ci zhig yod/ des smras pa/ lha 'di'i mchu la skyur mchis te des de 'tshal ba'i 'o ma zhor 'gyur ba'i slad du'o/ /rgyal pos smras pa/ sa 'dzin pa khyod ni mkhas pa zhig go/ /lha khyod kyi bka' drin lags so zhes byas pa dang / rgyal po cang mi zer bar 'dug go/ /yang rgyal pos de bzhin du su mel tse byed ces smras pa dang / des snga ma'i tshul du smras pa/ lha bdag zhugs tshe bgyid do/ / rgyal pos smras pa/ sa 'dzin pa ci sems/ des smras pa/ lha 'jig rten pa'i bsam pa sems lags so/ /sa 'dzin pa 'jig rten pa'i bsam pa ji lta bu zhig sems/ lha rtswa mun dza tho bas brdungs pa dang / ma brdungs pa srang la bcal na mnyam pa kho nar 'gyur lags so/ /sa 'dzin pa ci de de ltar 'gyur ram/ lha spyan sngar bab par bgyi'o/ /sa 'dzin pa legs so/ /des phyi de nyin rtswa mun dza khyer te 'ongs nas/ rgyal po'i mdun du ji ltar bstan pa bzhin byas na thams cad de bzhin du gyur pa dang / rgyas pos smras pa/ sa 'dzin pa 'di la rgyu ci zhig yod/ /lha tho bas brdungs pas rlung bsdus pa'i slad du'o/ /sa 'dzin pa khyod ni mkhas pa zhig go/ /des lha khyod kyi bka' drin lags so zhes byas pa dang / rgyal po cang mi zer bar 'dug go/ /yang rgyal pos de bzhin du su mel tse byed ces smras pa dang / des snga ma'i tshul du smras pa/ lha sa 'dzin pa bdag go/ /rgyal pos smras pa/ sa 'dzin pa ci sems lha 'jig rten pa'i bsam pa sems lags so/ /sa 'dzin pa 'jig rten pa'i bsam pa ji lta bu zhig sems/ lha shing spra mgo nag mo zhes bgyi ba de'i lus ji tsam pa mjug ma yang de tsam mo/ /sa 'dzin pa ci de de ltar 'gyur ram/ lha spyan sngar bab par bgyi'o/ /sa 'dzin pa legs so/ /des phyi de nyin spra mgo nag mo zhig khyer te 'ongs nas/ rgyal po'i mdun du ji lta ba bzhin du bstan na thams cad de bzhin du gyur pa dang / rgyal pos smras pa/ sa 'dzin pa khyod kyis ji ltar shes/ lha bdag gis so ga'i dus na 'di 'jug pa'i tshe mjug mas mgo slebs pa mthong lags so/ /sa 'dzin pa khyod ni mkhas pa zhig go/ /lha khyod kyi bka' drin lags so zhes byas pa dang / rgyal po cang mi zer bar 'dug go/ /yang rgyal pos su mel tse byed ces smras pa dang / des snga ma'i tshul du smras pa/ lha sa 'dzin pa bdag go/ /rgyal pos smras pa/ sa 'dzin pa ci sems/ lha 'jig rten pa'i bsam pa'o/ / sa 'dzin pa 'jig rten pa'i bsam pa ji lta bu zhig /lha sreg pa'i gshog pa bkra ba yang ji snyed pa mi bkra ba yang de kho na snyed mchis so/ /sa 'dzin pa ci de de ltar 'gyur ram/ lha spyan sngar bab par bgyi'o/ /sa 'dzin pa legs so/ /des phyi de nyin rgyal po'i mngon sum du byas na de thams cad de bzhin du gyur pa dang / rgyal pos smras pa/ sa 'dzin pa khyod kyis ji ltar shes lha sngon bdag gis bgrangs lags so/ /sa 'dzin pa khyod ni mkhas pa zhig go/ /lha'i bka' drin lags so zhes byas pa dang / rgyal po cang mi zer bar 'dug go/ /rgyal pos yang de bzhin du su mel tse byed smras pa dang / des snga ma'i tshul du smras pa/ lha sa 'dzin pa bdag go/ /rgyal pos smras pa/ ci sems/ lha 'jig rten pa'i bsam pa'o/ /sa 'dzin pa 'jig rten pa'i bsam pa ji lta bu zhig /lha bye ma bum pa gang gi nang du chab bum pa gang blugs na chab de thams cad de'i nang du shong ngo / /sa 'dzin pa ci de de ltar 'gyur ram/ lha spyan sngar bab par bgyi'o/ /sa 'dzin pa legs so/ /des phyi de nyin mngon sum du byas na de thams cad de bzhin du gyur pa dang / rgyal pos smras pa/ sa 'dzin pa khyod kyis ji ltar shes/ lha bye ma chu las byung ba'i slad du'o/ /sa 'dzin pa khyod ni mkhas pa zhig go/ /lha khyod kyi bka' drin lags so/ /zhes byas pa dang / rgyal po cang mi zer bar 'dug go/ /yang rgyal pos de bzhin du su mel tse byed ces smras pa dang / des snga ma'i tshul du lha sa 'dzin pa bdag go/ /rgyal pos smras pa/ sa 'dzin pa ci sems/ lha 'jig rten pa'i bsam pa'o/ /sa 'dzin pa 'jig rten pa'i bsam pa ji lta bu zhig sems/ lha chab phul gang gi nang du lan tshwa phul gang stsal na chab phul gang kho nar 'gyur ro/ /sa 'dzin pa ji de de ltar 'gyur ram/ lha spyan sngar bab par bgyi'o/ / sa 'dzin pa legs so/ /des phyi de nyin mngon sum du byas pa na thams cad de bzhin du gyur pa dang / rgyal pos smras pa/ sa 'dzin pa 'di la rgyu ci yod/ lha lan tshwa chab las byung ba'i slad du'o/ /sa 'dzin pa khyod ni mkhas pa zhig go/ /lha khyod kyi bka' drin lags so zhes byas pa dang / rgyal po cang mi zer bar 'dug go/ /yang rgyal pos de bzhin du su mel tse byed ces smras pa dang / des snga ma'i tshul du smras pa/ lha sa 'dzin pa bdag go/ /rgyal pos smras pa/ sa 'dzin pa ci sems/ lha 'jig rten pa'i bsam pa'o/ /sa 'dzin pa 'jig rten pa'i bsam pa ji lta bu zhig /lha zhib phul gang gi nang du chab phul gang stsal na sla bar yang mi 'gyur gar bar yang mi 'gyur ro/ /sa 'dzin pa ci de ltar 'gyur ram/ lha spyan sngar bab par bgyi'o/ /sa 'dzin pa legs so/ /des phyi de nyin mngon sum du byas na thams cad de bzhin du gyur pa dang / rgyal pos smras pa/ sa 'dzin pa 'di la rgyu ci yod/ lha bdag cag sa 'dzin pa rnams ni phye 'tshal ba lags pas bdag gis lan du ma mthong lags so/ /sa 'dzin pa khyod ni dran pa can zhig go/ /lha khyod kyi bka' drin lags so zhes byas pa dang / rgyal po cang mi zer bar 'dug go/ /yang rgyal pos de bzhin du su mel tse byed ces smas pa dang / des snga ma'i tshul du smras pa/ lha sa 'dzin pa bdag go/ /rgyal pos smras pa/ sa 'dzin pa ci sems/ lha 'jig rten pa'i bsam pa'o/ /sa 'dzin pa 'jig rten pa'i bsam pa ji lta bu zhig /lha gum pa dang / gson po gnyis srang la bcal na mi mnyam par 'gyur ro/ /sa 'dzin pa ci de de ltar 'gyur ram/ lha spyan sngar bab par bgyi'o/ /sa 'dzin pa legs so/ /des phyi de nyin mngon sum du byas na thams cad de bzhin du gyur pa dang / rgyal pos smras pa/ sa 'dzin pa 'di la rgyu ci yod/ lha gum pa mi ma lags pas mdangs phrogs pa'i slad du'o/ /sa 'dzin pa khyod ni mkhas pa zhig go/ /lha khyod kyi bka' drin lags so zhes byas pa dang / rgyal po cang mi zer bar 'dug go/ / yang rgyal pos de bzhin du mel tse su byed ces smras pa dang / des snga ma'i tshul du smras pa/ lha sa 'dzin pa bdag go/ /rgyal pos smras pa/ sa 'dzin pa ci sems/ lha 'jig rten pa'i bsam pa'o/ / sa 'dzin pa 'jig rten pa'i bsam pa ji lta bu zhig /lha dong brkos pa la sa de de nyid du stsal na mnyam par mi 'gyur lags so/ /sa 'dzin pa ci de de ltar 'gyur ram/ lha spyan sngar bab par bgyi'o/ /sa 'dzin pa legs so/ /des phyi de nyin mngon sum du byas na thams cad de bzhin du gyur pa dang / rgyal pos smras pa/ sa 'dzin pa 'di la rgyu ci yod/ lha mi ma lags pas mdangs phrogs pa'i slad du'o/ / sa 'dzin pa khyod ni mkhas pa zhig go/ /lha khyod kyi bka' drin lags so zhes byas pa dang / rgyal po cang mi zer bar 'dug go/ /yang rgyal pos de bzhin du mel tse su byed ces rmas pa dang / des snga ma'i tshul du smras pa/ lha sa 'dzin pa bdag go/ /rgyal pos smras pa/ sa 'dzin pa ci sems/ lha 'jig rten pa'i bsam pa'o/ /sa 'dzin pa 'jig rten pa'i bsam pa ji lta bu zhig /lha tha ga pas nyin mtshan du gos btags na gar mchis pa ma 'tshal to/ /kye sa 'dzin pa gar song mi shes pa yus so/ /lha sar gyur pa lags so/ /kye sa 'dzin pa sar gyur pa lta zhig /yang rgyal pos de bzhin du mel tse su byed rmas pa dang / des snga ma'i snga ma'i tshul du smras pa/ lha sa 'dzin pa bdag go/ /sa 'dzin pa ci sems/ lha 'jig rten pa'i bsam pa'o/ /sa 'dzin pa 'jig rten pa'i bsam pa ji lta bu zhig /lha rdza mkhan gyis nyin mtshan du snod bgyis na de gar mchis ma 'tshal to/ /kye sa 'dzin pa gar song mi shes pa yus so/ /lha sar gyur to/ /kye sa 'dzin pa sar gyur pa lta zhig /kye sa 'dzin pa khyod ni mkhas pa zhig ste/ thams cad shes na nga gnyid med pa 'di la rgyu ci yod/ lha mi 'jigs pa stsal na smra bar bgyi'o/ /sa 'dzin pa mi 'jigs pa sbyin gyis bag ma tsha bar smros shig /lha khyod ni sdig pa las skyes so/ /sa 'dzin pa ci khyod nga la mi snyan par zer ram/ lha de skad ma gsung shig /lha la bdag gis mi snyan pa ji skad du bgyis/ lha mi snyan pa ma bgyis te lha'i mngon sum du bgyi'o/ /sa 'dzin pa legs so/ /des dong brkos ba lang gi lci ba skam pos bkang ste/ de'i steng du mal bcas nas phyi de nyin rgyal po la lha mal 'dir gzims shig ces smras pa dang / rgyal pos der nyal lo/ /nyal ma thag tu gnyid kyis log par gyur to/ /gang gi tshe sad pa de'i tshe lha khyod kyis gzigs sam zhes smras pa dang / des bdag gis mngon sum du byas pa shes nas btsun mo'i 'khor du song ste ma la dris pa/ yum bdag su las skyes pa brdzun ma gsung bar drang por gsungs shig / lha smra bar bgyi'is/ bdag la mi 'jigs pa stsol cig /yum gsol lo/ /lha khyod kyi yab btsun mo'i 'khor rgya chen po dang ldan pas de ljongs shig tu song ba na bdag zla mtshan dang ldan par gyur te/ de'i tshe bdag zla mtshan gyi khrus bgyid pa na/ sdig pa zhig mthong ba dang / bdag gis blo skyes pa/ ji ste 'di pho zhig tu gyur na bdag 'di dang lhan cig 'dod pa'i longs spyod dga' mgur spyad par bya'o snyam pa dang / stes te de pho zhig tu gyur nas de dang bdag lhan cig tu 'dod pa'i longs spyod dga' mgur spyad pa dang / de las khyod skyes par gyur to/ /des bsams pa/ sa 'dzin pa de ni mkhas pa zhig ste/ des bdag shes na de la bdag gis mi 'jigs pa byin pas de gsad du ni mi rung gi gzhan su la yang mi zer bar bya ba'i phyir bya dga' byin la yul dbyung ngo snyam nas/ des de la kAr ShA pa Na lnga brgya byin te yul phyung ngo / / sdom ni/ 'tsho byed dang ni gser 'od dang / /e la'i 'dab dang na la dang / /rab byung skra can zas dang ni/ /'bru mar snod ni tha ma 'o/ /rgyal po gtum po rab snang gis bsams pa/ bdag gi nad 'di gzhi cher gyur pas sman pa dag bsdus la dpyad bya'o snyam du bsams nas/ des yul na gnas pa'i sman pa thams cad bsdus te smras pa/ shes ldan dag nga'i nad 'di lta bu la dpyad gyis shig /de dag gis smras pa/ lha bdag cag gis khyod kyi dpyad pa bgyid pa'i rngo mi thog ste/ 'on kyang rgyal po'i khab na rgyal po gzugs can snying po'i bu sman pa'i rgyal po 'tsho byed ces bgyi ba mchis te/ gal te na des lha'i dpyad bgyid rngo thog go/ /des rgyal po gzugs can snying po la yi ge springs te/ sman pa'i rgyal po 'tsho byed tshur thong shig / yang na nga 'o nir 'ong gis rtswa dang / chas sta gon gyis shig ces byas pa dang / rgyal po gzugs can snying pos yi ge blags nas sngangs te lag pa 'gram pa la gtad nas sems khong du chud cing 'dug ste/ gal te 'tsho byed ma btang na de la ci dang ci dgos pa de 'gugs pas don gyis bdag kyang de'i dpyas par gyur pas ma legs so snyam nas de yid mi bde ba sman pa'i rgyal po 'tsho byed kyis mthong ngo / /de nas rkang pa la phyag 'tshal te smras pa/ lha ci'i slad du phyag 'gram pa la gtad nas sems khong du chud cing bzhugs/ des smras pa/ bu khyod kyis 'di lta bu'i bzo bslabs pa des na gnod par gyur to/ /'tsho byed kyis smras pa/ ji ltar gnod par gyur/ des ji ltar gyur pa brjod pa dang / lha bka' lung stsal du gsol mchi bar bgyi'o/ /bu rgyal po de gtum po zhig ste/ ci'i phyir yang sems can gsod par byed pas khyod mi gsad grang / lha bdag srung mi nus pa'i sman pa de ci 'dra ba zhig ste/ thugs mi chung bar bdag gtang du gsol/ des smras pa/ bu gal te de lta na song la ji ltar nga dang / btsun mo'i 'khor dang / gzhon nu dang / blon po dang / pho brang 'khor gyi mi dang / yul sna tshogs nas 'ongs pa'i skye bo'i tshogs rnams mya ngan skye bar mi 'gyur ba de ltar khyod kyis bag yod par gyis shig /des lha ci'i slad du de ltar gyur/ bdag gis nad pa'i sems bsrung rngo thog go zhes byas pa dang rgyal po cang mi zer bar 'dug go/ /'tsho byed kyis 'phar ma pa'i mi de la dris pa/ kye skyes bu rgyal po de'i spyod pa ni ci 'dra ba zhig nad ni ji lta bu zhig gis thebs/ des ji ltar gyur pa rgyas par bsnyad do/ /de nas 'tsho byed kyis chang gi kha dog dang / chang gi dri dang / chang gi ro bro ba'i mar sbyar nas dge mtshan dang / bkra shis dang / bde legs dag byas te grogs po dang / gnyen dang / phu nu bo rnams la sbran nas yul 'phags rgyal du song ngo / /de mthar gyi yul ka nan+ya kub dzar phyin pa dang / de na gnas pa'i sman pa'i khye'u zhig yod pa des ji ltar sman pa'i rgyal po'i 'tsho byed 'ongs te 'phags rgyal du 'gro ba thos so/ /des a ru ra gcig khyer te de'i drung du song ste phan tshun yang dag par dga' ba dag byas nas/ 'tsho byed kyis smras pa/ kye chos kyi spun rgyal po gtum po rab snang de nad ji lta bu zhig gis thebs/ khyed cag gis de'i dpyad ma byas sam/ des smras pa/ rgyal po de gnyid med pa'i nad kyis thebs te/ de la mar phan na de mar la ni sdang / chang la ni dga' zhing gtum ste/ gang zhig de'i mdun du mar gyi ming 'byin pa de'i mgo drungs nas bcad de sa la 'dor bas de dag 'jigs nas 'bros na su zhig de'i dpyad byed par nus/ 'tsho byed kyis smras pa/ de'i phyir ngas chang gi kha dog dang / chang gi dri dang / chang gi ro bro ba'i mar bskol te khyer te 'ongs kyis 'dong / gang gi tshe ngas khyod la brda byas pa de'i tshe khyod kyis mar 'di tsam gyi tshod cig byin cig / nga ni de'i mdun nas 'gro yis khyod kyis re shig tsam zhig de'i rim gro gyis shig dang / sos nas ngas khyod la rngan pa rab tu mang po sbyin zhing sbyin du yang gzhug go/ /des smras pa/ legs kyis bzhud do zhes de de dang lhan cig dong ngo / /'tsho byed rim gyis 'phags rgyal dang nye bar phyin pa dang / rgyal po rab snang gis ji ltar sman pa'i rgyal po 'tsho byed 'ongs pa thos nas des bsams pa/ de ni rgyal po'i bu yang yin la sman pa'i rgyal po yang yin pas mchod pa dang bkur stis grong khyer du 'ong bar bya'o snyam nas des grong khyer mdzes pa dang / lam mdzes par byas te/ btsun mo'i 'khor dang / gzhon nu dang / blon po dang / pho brang 'khor gyi mi dang bcas pas bsu nas sman pa'i rgyal po 'tsho byed mi stong phrag du mas bskor te grong khyer du 'ongs so/ /de nas de lam gyis dub pa ngal bso ste cung zhig bsdad nas rgyal po gtum po rab snang gis 'tsho byed la bdag gnyid med pa'i nad dkyel cher gyur na dpyad gyis shig ces smras pa dang / des smras pa/ lha bgyi mod kyi 'on kyang 'di la sman 'tshal na de dag kyang yul sna tshogs dang / gnas sna tshogs na mchis te/ sman kha cig bdag gis ngo 'tshal la gzhan gyis ma 'tshal ba yang mchis/ kha cig gzhan gyis 'tshal la bdag gis ma 'tshal ba yang mchis/ kha cig bdag gis kyang 'tshal la gzhan gyis kyang 'tshal ba yang mchis/ kha cig thag ring po na yang mchis/ kha cig nye ba na yang mchis pas khyod kyis glang po che mo bzang ldan bdag cag la ci bder mdzod cig /rgyal pos 'tsho byed legs kyis de bzhin du gyis shig ces smras nas/ des glang po che 'dul ba rnams la bsgo ba/ 'tsho byed glang po che mo bzang ldan ci bder spyod du bcug gis khyed cag gis ma dgag shig /blon po dang chab sgo ba rnams la yang bsgo ba/ 'di nyin par yang rung mtshan mo yang rung glang po che bzang ldan la zhon te 'gro zhing 'ong ba khyed cag gis ma dgag par ji ltar 'dod par dga' mgur 'gro zhing 'ong du chug shig / blon po dang / chab sgo ba dang / glang po che 'dul ba rnams kyis smras pa/ lha ji ltar bka' stsal pa bzhin 'tshal lo/ /sman pa'i rgyal po 'tsho byed glang po che mo bzang ldan la zhon te mig slob par rtsom pa na snga dro song zhing res 'ga' phyi dro slar 'ong ngo / /gung la song zhing res 'ga' phyi dro 'ong ngo / /phyi dro song zhing res 'ga' nub mo'i thun 'da' zhing 'ong ste/ de de ltar yid ches pa bskyed pa'i rtags kyis 'gro ba dang / 'ong bar byed do/ /rgyal pos smras pa/ 'tsho byed dpyad gyis shig /des smras pa/ lha re shig khrus mdzod cig /des bkrus nas/ yang smras pa/ 'tsho byed ngas khrus byas na ci sdod/ des smras pa/ lha re shig gdugs tshod gsol cig /des zan bza' bar brtsams pa dang / 'tsho byed kyis smras pa/ lha bdag gis yul ma ga d+ha'i skyems shin tu bda' ba zhig 'tshal te mchis kyis/ gal te lha gsol na cung zad cig gsol lo/ /rgyal pos smras pa/ 'tsho byed legs kyis 'on cig blta'o/ /des sman pa'i khye'u de la de tsam gyi tshod cig byin cig pa'i brda' byas pa dang / des de tsam gyi tshod cig byin nas rgyal pos 'thungs so/ /'thungs ma thag tu gnyid kyis log pa dang / 'tsho byed glang po che mo bzang ldan la zhon te bros so/ /rgyal po yang nam phyed na sad do/ /ji tsam na de la mar gyi sgregs pa byung ba dang / des mi zhig la bos te kwa'e skyes bu 'tsho byed bos shig /des nga la mar blud kyis mgo drungs nas bcad de sa la dor ro/ /des kun tu btsal bar brtsams na mi snang nas des de la smras pa/ lha mi gda' ste/ de gdon ma 'tshal bar bros so/ /rgyal po je khros nas smras pa/ kwa'e skyes bu 'phar ma pa khwa bos shig ces bsgo ba dang / des de bos so/ /des kye 'phar ma pa khwa song la myur du glang po che 'dam bu'i ri la zhon te 'tsho byed ske nas thogs la khrid de shog shig / de'i mgo drungs nas bcad do/ /gal te sgyu mkhan des khyod la cung zad cig byin na khyod kyis blang bar mi bya'o/ /lha de ltar 'tshal lo zhes 'phar ma khwas rgyal po gtum po rab snang gi ltar mnyan nas myur bar glang po che 'dam bu'i ri la zhon te rjes bzhin du song ngo / /des de skyu ru ra'i tshal du zhugs pa mthong nas smras pa/ 'tsho byed lha gsung gis tshur shog 'dong / des smras pa/ kye khwa ci rings tshur re shig skyu ru ra zo shig /des smras pa/ lhas nga la de sgyu mkhan yin pas khyod kyis de las cung zad kyang ma len cig ces bsgo'o/ /'tsho byed kyis smras pa/ kwa'e khwa gal te de lta na khyod kyis phyed zo/ ngas kyang phyed bza'o/ /des bsams pa/ phyed bza' ste phyed la sgyu ji lta bu zhig byar yod snyam du rig nas smras pa/ 'tsho byed bza' yis byin cig /de skyu ru ra phyed zos te sen mo'i bar phye mas bkang ba'i sen mos bcad pa'i phyed byin no/ /des de zos pa dang de mdze can zhig pas yan man gnyi gar 'khrus so/ /des de ri 'or zhig tu bzhag nas ri 'or pa de dag la bsgo ba/ shes ldan dag rgyal po gtum po rab snang gi yan lag gi mchog gsum ni glang po 'dam bu'i ri dang / glang po che mo bzang ldan dang / 'phar ma pa khwa 'di yin na 'di na ste 'di dpyad 'dis rim gro gyis dang sos par 'gyur ro/ /gzhan du na rgyal pos khyed cag nges par phung bar byed do zhes smras nas song ngo / /de dag gis de'i rim gro byas pa dang sos par gyur nas song ngo / /rgyal po yang sman pa'i khye'u des ji ltar bstan pa'i dpyad kyis rim gro byas pas de yang sos par gyur to/ /'phar ma pa khwa yang rim gyis rgyal po'i drung du phyin pa dang / rgyal pos dris pa khwa 'tsho byad de ga re lha bros lags so/ /khwa gal te bros na ma legs pa zhig byas so/ /lha ci ste khugs par gyur na de la lhas ci zhig bgyis par 'gyur/ khwa ngas de'i mgo drungs nas gcad de sa la bor bar 'gyur ro/ /lha sman pa'i rgyal po gang gis lha dang bdag kyang sos par bgyis pa de lta bu dgum pa de ni rigs pa ma lags so/ /khwa gal te de lta na de la ci zhig bya/ lha rngan pa rgya cher stsal mod/ legs kyis de bzhin du bya'o/ /des de la yi ge spring ste/ sman pa'i rgyal po 'tsho byed khyod ci ste bros/ khyod rngan pa sbyin gyis tshur shog rngan pa long shig /'tsho byed kyis de la spring pa/ lha khyod kyi bka' drin la bdag gi khyim na nor tsam mchis so/ /'on kyang gal te lhas bdag la thugs dpag mdzad na sman pa'i khye'u gang gis lha'i rim gro bgyis pa de la bya dga' stsal ba'i rigs so/ /rgyal pos khye'u de la rngan pa mang du byin no/ /'tsho byed la yang brgya stong ri ba'i ras yug chen gyi gos bskur ba dang / 'tsho byed kyis bsams pa/ gos 'di ni rgyal po la 'os pa yin te/ su la sbyin snyam na des bcom ldan 'das ni chos nyid kyis bdag gi pha yin pas 'di la dbul lo snyam du bsams nas des de bcom ldan 'das la phul lo/ /bcom ldan 'das kyis tshe dang ldan pa kun dga' bo la bka' stsal pa/ kun dga' bo 'di chos gos su gyis la nga la phul cig / tshe dang ldan pa kun dga' bos de blangs nas blangs pa des bcom ldan 'das kyis chos gos gsum langs pa bas lhag par mthong nas des drub par brtsams na de las bcom ldan 'das kyi chos gos gsum dang / tshe dang ldan pa kun dga' bo'i stod g.yogs dang smad g.yogs su bcas pa dang / sgra gcan zin gyi rngul zan yang langs so/ /dga' ldan gyi gnas na sangs rgyas kyis gsungs pa'i dri ba 'di skad du/ bdag po rgyal po gang zhig ni/ /chags na rdul dang ldan pa yin/ /rdul med na ni rdul bral 'gyur/ /gang gis 'dir ni chags shes brjod/ /blo ngan ji ltar mya ngan byed/ /mkhas pa ji ltar dga' bar 'gyur/ /gang gis ldan pa las bral nas/ /'di na grub dang bde zhes brjod/ /ces bris te/ 'dug pa gang gi tshe sangs rgyas bcom ldan 'das 'jig rten du ma byung ba de'i tshe sus kyang gzung bar yang mi nus/ de dag gi don smra bar yang mi nus so/ /gang gi tshe sangs rgyas bcom ldan 'das 'jig rten du byung ba de'i tshe yang dri ba de dag gzung bar nus kyi de dag gi don smra bar ni mi nus so/ /re shig cig na gnod sbyin gyi bdag po rnam thos kyi bu bya ba zhig gi phyir dga' ldan gyi lha'i nang du song ba dang / des dri ba dris pa de dag mthong ngo / /de nas ya mtshan skyes te de bzung na don khong du chud par ma nus te/ des de dag pho brang lcang lo can du khyer nas spang leb la bris te bzhag go/ /de'i tshe rdo 'jog ces bya ba na klu'i rgyal po e la'i 'dab ces bya ba gnas pa de yun ring po nas bdag gis nam zhig sangs rgyas bcom ldan 'das mthong zhes de snyam du smon to/ /de'i mdza' bo gnod sbyin gser 'od ces bya ba de bya ba zhig gi phyir gnod sbyin gyi bdag po rnam thos kyi bu'i pho brang lcang lo can du song ba dang / des dri ba de dag spang leb la bris pa mthong nas des de dag blangs te chub par byas nas dpyad par brtsams na don khong du ma chud nas des rdo 'jog tu khyer te klu'i rgyal po e la'i 'dab la byin nas smras pa/ grogs po dri ba 'di dag ni sangs rgyas kyis gsungs pa yin na/ 'di dag ni don sus kyang ma rtogs kyis khyod kyis 'di dag dang gser 'bum khyer la grong dang / grong rdal dang / rgyal po'i pho brang 'khor du bskor te 'di skad ces gang gis dri ba 'di dag gi don smra nus pa de la ngas gser 'bum sbyin zhing bkur sti chen pos kyang rim gro bya'o zhes smros shig /gal te 'ga' zhig gis smra bar nus na de la gser 'bum byin cig / ji ste ma nus na grong khyer dang / grong rdal ma yin no zhes sgrogs la gzhan du song shig /des de bzung nas kun chub par byas te/ bdag nyid bram ze'i khye'u'i gzugs su sprul nas/ gser 'bum khyer te grong dang / grong rdal dang / rgyal po'i pho brang dag tu bskor nas bA rA Na sIr phyin to/ /de bA rA Na sI'i lam po che dang / srang dang / bzhi mdo dang / sum mdo dag tu shes ldan bA rA Na sI'i grong na gnas pa dang / yul so so nas 'ongs pa'i skye bo'i tshogs dag nyon cig / bdag gis dri ba 'di dag khyer te 'ongs te gang zhig 'di dag gi don smra bar nus pa de la ngas gser 'bum 'di sbyin zhing bkur sti chen pos kyang rim gro bya'o zhes bsgrags pa dang / kha cig ni mkhas pa snyems/ kha cig ni ya mtshan skyes nas srog chags brgya stong phrag du ma 'dus kyang sus kyang don smra bar ma nus so/ /des grong khyer dang / grong rdal ma yin no zhes bsgrags par brtsams pa dang / bA rA Na sI na gnas pa'i bram ze dang khyim bdag gis smras pa/ re shig grong dang / grong rdal ma yin no zhes ma sgrogs par bdag cag gi skye bos nges par bkur ba'i dge sbyong dang / bram ze dgon pa'i gnas na 'dug pa gang dag yin pa de dag je 'ong du chug la phyis grong khyer dang / grong rdal ma yin no zhes sgrogs shig / des smras pa/ de dag gang zhig yin/ na la da la sogs pa'o/ /des legs kyis de bzhin bya'o zhes smras nas/ de sdod pa dang / ji tsam zhig na na la da 'ongs so/ /des de'i mdun du 'dug ste smras pa/ drang srong chen po bdag gis dri ba 'di dag khyer te 'ongs te/ gang zhig 'di dag gi don smra bar nus pa de la gser 'bum 'di yang sbyin zhing bkur sti chen pos kyang rim gro bya'o/ /na la das de dag blags nas smras pa/ bram ze'i khye'u legs kyis de bzhin du byas te smra'o/ /yun ji srid cig na lo bcu gnyis 'das nas so/ /drang srong chen po dus de ni rings so/ /drug na'o/ /de yang rings so/ /gsum na'o/ /gcig na'o/ /zla ba drug na'o/ /zla ba gsum na'o/ /zla ba na'o/ /zla ba phyed na'o/ /zhag bdun 'das na'o/ /e la'i 'dab kyis drang srong chen po legs kyis de ltar byos shig / de bar du sdod do zhes smras nas de sdod pa dang / drang srong na la da'i smos 'drin dge slong lnga po yin pas de de dag gi drung du song nas smras pa/ shes ldan dag bram ze'i khye'u zhig gis dri ba 'di dag dang / gser 'bum k hyer nas bdag gi drung du 'ongs te gang zhig dri ba 'di dag gi don smra nus pa de la gser 'bum 'di sbyin zhing bkur sti chen pos kyang ri mor bya'o zhes zer na dri ba 'di dag gi don mang la tshig nyung bas khong du chud par dka' na 'di la ji ltar bsgrub par bya/ de dag gis smras pa/ na la da song la sangs rgyas bcom ldan 'das la zhus shig /shes ldan dag ci sangs rgyas bcom ldan 'das 'jig rten du byung ngam/ byung ngo / /gang na bzhugs/ drang srong smra ba ri dgas kyi nags na'o/ / de dga' ba dang mgu ba skyes nas myur ba myur bar bcom ldan 'das gang na ba der song ba dang / na la das sangs rgyas bcom ldan 'das sku skyes bu chen po'i mtshan sum bcu rtsa gnyis kyis brgyan pa/ dpe byad bzang po brgyad bcus mdzes par byas pa/ 'od mdom gang gis brgyan pa/ nyi ma stong bas lhag pa'i 'od can rin po che'i ri bo 'gro ba lta bu kun nas bzang ba mthong ste/ ji ltar dge ba'i rtsa ba bsags pa'i sems kyis thog ma sangs rgyas mthong ba ltar/ lo bcu gnyis kyi bar du zhi gnas kyi sems goms par byas pa 'am/ bu med pas bu rnyed pa 'am/ dbul pos gter mthong ba 'am/ rgyal srid la mngon par dga' ba rgyal srid kyi dbang bskur ba ni de ltar nyams bde bar 'gyur ba ma yin no/ /mthong nas kyang bcom ldan 'das gang na ba der song ste phyin nas bcom ldan 'das kyi zhabs la mgo bos phyag 'tshal te phyogs cig tu 'dug go/ /phyogs cig tu 'dug pa dang / bcom ldan 'das kyis de'i bsam pa dang / bag la nyal ba dang / khams dang / rang bzhin thugs su chud nas 'phags pa'i bden pa bzhi rtogs par 'gyur ba de lta bu'i chos bshad pa mdzad pa dang / de thos nas drang song na la das 'jig tshogs la lta ba'i ri'i rtse mo nyi shu mtho ba ye shes kyi rdo rjes bcom nas rgyun tu zhugs pa'i 'bras bu mngon sum du byas so/ /des bden pa mthong nas zhabs la phyag 'tshal te gsol pa/ btsun pa bdag legs par gsungs pa'i chos 'dul ba la rab tu 'byung zhing bsnyen par rdzogs pa dge slong gi dngos po 'thob na bcom ldan 'das kyi spyan sngar bdag tshangs par spyad pa spyod par 'tshal lo/ /bcom ldan 'das kyis bka' stsal pa/ na la da khyod kyis bram ze'i khye'u de la dri ba'i don smra'o zhes dam bcas pas de'i phyir song la re shig sngar dam bcas pa de tshar phyung ste phyis rab tu byung shig / des gsol pa/ btsun pa bdag gis yon tan gyi tshogs 'di lta bu thob mod kyi 'on kyang dri ba de dag gi don bdag gis smra rngo mi thog na der mchis te ci zhig bgyi/ bcom ldan 'das kyis bka' stsal pa/ na la da song la son nas 'di skad du re shig dri ba de dag smros shig ces gyis shig /gang gi tshe des 'di skad ces ni/ bdag po rgyal po gang zhig ni/ /chags na rdul dang ldan pa yin/ /rdul med na ni rdul bral 'gyur/ /gang gis 'dir ni chags shes brjod/ /blo ngan ji ltar mya ngan byed/ /mkhas pa ji ltar dga' bar 'gyur/ /gang gi ldan pa las bral nas/ /'di ni grub dang bde zhes brjod/ /ces smras par gyur pa de'i tshe khyod kyis 'di skad ces smros shig / drug pa bdag po rgyal po ni/ /chags na rdul dang ldan pa yin/ /rdul med na ni rdul bral 'gyur/ /chags na byis pa zhes 'dir brjod/ /blo ngan de ltar mya ngan byed/ /mkhas pa de ltar dga' bar 'gyur/ /'di yi ldan pa las bral nas/ /'di ni grub dang bde zhes brjod/ /gal te brda ma phrad do zhes zer na de la/ legs par gsungs pa shes pa gces pa ste/ /thos dang ting 'dzin shes pa gces pa yin/ /mi gang gya tshom bag med gyur pas ni/ /mi shes de la thos pa don mi che/ /zhes smros shig /gal te sangs rgyas gsung dag smra mod kyi/ /khyod la mtshan ni mi snang ngo / /'di la bdag gi blo rmongs kyis/ /the tshom myur du gcad par gyis zhes zer na/ de'i mdun du sen mos rtswa chod cig /gal te ci sangs rgyas bcom ldan 'das 'jig rten du byung ngam zhes zer na byung ngo zhes smros shig /ji ste gang na bzhugs zhes zer na drang srong smra ba ri dgas kyi nags na'o zhes gyis shig / btsun pa de bzhin du 'tshal zhes rigs kyi bu na la das bcom ldan 'das kyi ltar mnyan te bram ze'i khye'u gang na ba der song ste phyin pa dang / bram ze'i khye'u la 'di skad ces smras so/ /bram ze'i khye'u de re shig dri ba de dag smros shig /des tshigs su bcad de smras pa/ bdag po rgyal po gang zhig ni/ /chags na rdul dang ldan pa yin/ /rdul med na ni rdul bral 'gyur/ /gang gis 'dir ni chags shes brjod/ /blo ngan ji ltar mya ngan byed/ /mkhas pa ji ltar dga' bar 'gyur/ /gang zhig ldan pa las bral nas/ /'di ni grub dang bde zhes brjod/ /des smras pa/ drug pa bdag po rgyal po ni/ /chags na rdul dang ldan pa yin/ /rdul med na ni rdul bral 'gyur/ /chags na byis pa zhes 'dir brjod/ /blo ngan de ltar mya ngan byed/ /mkhas pa de ltar dga' bar 'gyur/ /'di yi ldan pa las bral nas/ /'di na grub dang bde zhes brjod/ /bram ze'i khye'us smras pa/ drang srong chen po brda ma phrad do/ /des smras pa/ legs par gsungs pa shes pa gces pa ste/ /thos dang ting 'dzin shes pa gces pa yin/ /mi gang gya tshom bag med gyur pas ni/ /mi shes de la thos pa don mi che/ /bram ze'i khye'us smras pa/ na la da/ sangs rgyas gsung dag smra mod kyi/ /khyod la mtshan ni mi snang ngo / /'di la bdag gi blo rmongs kyis/ /the tshom myur du gcad par gyis/ /na la das de'i mdun du sen mos rtswa bcad pa dang / des smras pa/ na la da ci sangs rgyas bcom ldan 'das 'jig rten du byung ngam/ des smras pa/ bram ze'i khye'u byung ngo / /gang na bzhugs/ yul bA ra Na sI 'di nyid na'o/ /phyogs gang na/ drang srong smra ba ri dgas kyi nags na'o/ /bram ze'i khye'us bsams pa/ gal te bdag gis 'di la rang gi rigs bsnyad na ni 'dis brnyas par 'gyur ro/ /'on te bram ze'i khye'u'i cha lugs kho nas song na ni bA rA Na sI na gnas pa'i bram ze rig pa gsum dang ldan pa 'am/ kha cig bram ze'i khye'u rigs mthon po las skyes pa dag dge sbyong gau ta ma'i drung du song ngo zhes ma dad par 'gyur ro/ /gal te rang gi cha lugs kyis song na ni bdag dang / klu mang po 'khon yod pas la las bdag la gnod pa byas su 'ong bas ma la bdag gis bdag nyid 'khor los sgyur bar mngon par sprul la bcom ldan 'das kyi spyan sngar 'gro'o snyam mo/ /de nas klu'i rgyal po e la'i 'dab kyis bdag nyid 'khor los sgyur ba'i rgyal por mngon par sprul te/ rin po che sna bdun gyis ni mdun drangs/ khrom gyi ru bye ba phrag dgu bcu rtsa dgus ni bskor/ bu stong rin po che sna tshogs kyi rgyan gyis brgyan cing zla ba kham pa lta bur bskor/ mu stegs can dang / dge sbyong dang / bram ze dang / bkren pa dang / phongs pa sna tshogs dang / mi'i mchog stong ni phyi bzhin 'brang / rtsibs stong dang ldan pa'i gdugs ni steng nas 'dzin cing nyi ma 'od stong gi 'od kyis snang bas zla ba rgyu skar dang gza' dang bcas pa'i gzhal med khang gis mdzes pa yang zil gyis gnon pa'i 'od kyang zil gyis mnan nas drang srong smra ba ga la ba der song ngo / /yang de'i tshe bcom ldan 'das 'khor brgya phrag du ma'i mdun na bzhugs shing chos ston to/ /'khor de dag gis klu'i rgyal po e la'i 'dab rgyang ring po nas mthong ngo / /mthong nas kyang ngo mtshar du gyur te mig bgrad nas rtog pa rnams pa sna tshogs skyes te/ kha cig ni 'di skad du shes ldan dag rgyal po 'di ga las 'ongs pa zhig ces zer ro/ /gzhan dag na re shes ldan dag gang la 'di lta bu'i 'byor pa phun sum tshogs pa yod pa 'di rgyal po ma yin gyi sa'i steng gi sa'i dbang phyug gang zhig yin zhes zer ro/ /gzhan dag ni 'di rgyal po ma yin gyi lha'i dbang po brgya byin bcom ldan 'das la blta ba'i phyir 'dir 'ongs so zhes zer ro/ /de na gang dag chags pa'i dbang du song ba de dag gis de mthong nas bdag kyang 'di 'dra bar nam zhig 'gyur zhes chags pa bskyed do/ /de dag de ltar rnam pa du mar rtog pa na klu'i rgyal po e la'i 'dab bcom ldan 'das ga la ba der song ste phyin pa dang / bcom ldan 'das kyi zhabs la mgo bos phyag 'tshal te phyogs cig tu 'dug go/ /phyogs cig tu 'dug pa dang / bcom ldan 'das kyis klu'i rgyal po e la'i 'dab la 'di skad ces bka' stsal to/ /skyes bu blun po khyod yang dag par rdzogs pa'i sangs rgyas 'od srung gi bslab pa'i mtshams las 'das pas klu'i skye gnas smad par skyes na/ da nga'i 'khor yang bslu bar 'dod dam ci song la sprul pa thong ste rang gi cha lugs kyis shog shig /des gsol pa/ btsun pa bdag dang klu mang po khon mchis pas la las bdag la gnod pa bgyis su mchi'o/ /de nas bcom ldan 'das kyis gnod sbyin lag na rdo rje la bka' stsal pa/ lag na rdo rje song la klu'i rgyal po e la'i 'dab la bsrung bar gyis shig /btsun pa de ltar 'tshal lo zhes gnod sbyin lag na rdo rjes bcom ldan 'das kyi ltar mnyan nas klu'i rgyal po e la'i 'dab bsrung ba lhur len cing phyi bzhin 'brang ngo / / //'dul ba phran tshegs kyi gzhi/ bam po nyi shu lnga pa/ de nas klu'i rgyal po e la'i 'dab bcom ldan 'das kyi spyan snga nas song ste rang bzhin du mngon par bsgyur nas mjug ma ni rdo 'jog na 'dug / mgo bdun po ni bA rA Na sI na 'dug ste/ mgo re re la sngon gyi las kyi rnam par smin pas grub pa'i shing e la skyes pas kun nas srin bu'i rigs brgya phrag du mas ni gang / sbrang bu'i tshogs du ma ni lding zhing 'bab/ rnag dang khrag gi dri mnam zhing rab tu mnam pa ni 'dzag go/ /de nas sems can rnams kyis mthong na mig bsgyur ba de lta bur lus bsgyur nas/ bcom ldan 'das ga la ba der song ste phyin nas bcom ldan 'das kyi zhabs la mgo bos phyag 'tshal te phyogs cig tu 'dug pa dang / 'khor de dag gis klu'i rgyal po e la'i 'dab kyi lus mthong na mi 'dod pa shin tu 'jigs su rung ba/ 'dod chags dang ma bral ba 'jigs pa dang / mya ngan dang / skyo bar byed pa che zhing gas pa/ rtsub pa/ mdangs med pa/ kha dog gi rnam pa dang dbyibs kyi khyad par du ma dang ldan pa mthong ngo / /mthong nas kyang skrag nas bcom ldan 'das la 'di skad ces gsol to/ /bcom ldan 'das bcom ldan 'das kyi spyan sngar mchis pa shin tu 'jigs su rung ba 'di gang zhig lags/ bcom ldan 'das kyis bka' stsal pa/ dge slong dag 'di ni 'khor los sgyur ba'i cha lugs 'chang zhing nga'i drung du 'ongs pa gang la khyed kyis 'khor ba'i sgo'i khyad par 'dod pas chags pa bskyed pa de yin te/ de'i da lta'i lus 'di ni mi 'dod pa'i las kyi nyes pas mngon par grub pa rang bzhin pa yin no/ /snga ma ni sprul pa yin no/ /de dag gis las chud mi za ba thos pas yid mi bde ba skyes te cang mi zer bar 'dug go/ /de nas klu'i rgyal po e la'i 'dab kyis bcom ldan 'das la 'di skad ces gsol to/ / bcom ldan 'das bdag lung bstan du gsol/ bde bar gshegs pa bdag lung bstan du gsol/ bcom ldan 'das kyis bka' stsal pa/ klu'i dbang po mi rnams kyi tshe lo brgyad khri thub pa na ston pa byams pa zhes bya ba de bzhin gshegs pa dgra bcom pa zhes bya ba nas/ lha dang mi rnams kyi ston pa/ sangs rgyas bcom ldan 'das 'jig rten du 'byung bar 'gyur ro zhes bya ba'i bar snga ma bzhin te/ des khyod la lung ston par 'gyur ro/ /de nas klu'i rgyal po e la'i 'dab bcom ldan 'das kyi zhabs la mgo bos phyag 'tshal nas de nyid du mi snang bar gyur to/ /dge slong dag the tshom skyes te the tshom thams cad gcod par mdzad pa sangs rgyas bcom ldan 'das la zhus pa/ btsun pa klu'i rgyal po e la'i 'dab kyis las ci zhig bgyis na las de'i rnam par smin pas klu'i skye gnas smad par skyes nas shing e la mgo la skyes pas kun nas srin bu'i rigs brgya phrag du mas ni gang / sbrang ma'i tshogs du ma ni lding zhing 'bab/ rnag dang khrag gi dri mnam zhing rab tu mnam pa ni 'dzag pa'i sdug bsngal 'di lta bu 'di nyams su myong lags/ bcom ldan 'das kyis bka' stsal pa/ dge slong dag klu'i rgyal po e la'i 'dab kyis las byas shing bsags pa/ tshogs rnyed pa/ rkyen yongs su bsgyur ba/ 'od pa bzhin du nye bar gnas pa nges par 'byung ba yin te/ klu'i rgyal po e la'i 'dab kyis las byas shing bsags pa gzhan su zhig gi myong bar 'gyur/ dge slong dag las byas shing bsags pa dag ni phyi rol gyi sa'i khams la rnam par smin par mi 'gyur/ chu'i khams la ma yin/ me'i khams la ma yin/ rlung gi khams la ma yin gyi/ 'on kyang las dge ba dang mi dge ba byas pa dag ni zin pa'i phung po dang / khams dang / skye mched dag kho na la rnam par smin par 'gyur te/ bskal pa brgya phrag rnams su yang / /las rnams chud zar mi 'gyur te/ /tshogs shing dus la bab pa na/ /lus can rnams la 'bras bur smin/ /dge slong dag sngon byung ba bskal pa bzang po 'di nyid la skye dgu'i tshe lo nyi khri thub pa na ston pa 'od srung zhes bya ba rig pa dang zhabs su ldan pa bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba bla na med pa/ lha dang mi rnams kyi ston pa/ sangs rgyas bcom ldan 'das 'jig rten du byung ste/ de grong khyer bA rA Na sI'i drang srong smra ba ri dgas kyi nags na gnas shing bzhugs so/ /de'i bstan pa la 'di rab tu byung nas sde snod gsum dang ldan pa spong ba par gyur te/ de dben pa'i phyogs shig na shing e la'i drung du 'chag sa bcas te/ de de na 'chag pa'i dpral bar shing e la'i 'dab mas phog pa dang / des de mnags so/ /ji tsam dus gzhan zhig na yid la byed pa'i rnal 'byor gyis ngal te 'chag pa na de'i dpral ba la de'i mdab mas phog pa dang / des de la khros te bcad nas lag pa gnyis kyis dum bu dum bur byas te bor nas 'di skad du srog kyang med/ 'tsho ba yang med pa 'di la bcom ldan 'das 'od srung gis nyes pa ci zhig gzigs na/ gang gi phyir bslab pa'i gzhir bcas zhes kyang smras so/ /des khros te bslab pa dral bas lus zhig nas klu rnams kyi nang du skyes te mgo la shing e la skyes pas srin bu'i rigs brgya phrag du mas ni gang / sbrang ma'i tshogs du ma ni lding zhing bab/ rnag dang khrag gi dri mnam zhing rab tu mnam pa ni 'dzag go/ /dge slong dag ji snyam du sems/ de'i tshe de'i dus kyi dge slong sde snod gsum pa spong ba pa gang yin pa de ni klu'i rgyal po e la'i mdab 'di nyid yin te/ gang 'dis yang dag par rdzogs pa'i sangs rgyas 'od srung gi bstan pa la rab tu byung nas rab tu khros te bslab pa dral ba'i las de'i rnam par smin pas klu rnams kyi nang du skyes te/ mgo la shing e la skyes pas kun nas srin bu'i rigs brgya phrag du mas ni gang / sbrang bu'i tshogs du ma ni lding zhing bab/ rnag dang khrag gi dri mnam zhing rab tu mnam pa ni 'dzag go/ /dge slong dag de ltar na las gcig tu gnag pa rnams kyi rnam par smin pa yang gcig tu gnag / gcig tu dkar ba rnams kyi yang gcig tu dkar/ 'dren ma rnams kyi yang 'dren ma'o/ /dge slong dag de lta bas na las gcig tu gnag pa dang / 'dren ma dag spangs te las gcig tu dkar ba dag kho na la brtsal bar bya ste/ dge slong dag khyed kyis de ltar bslab par bya'o/ /bcom ldan 'das kyis de skad ces bka' stsal pa dang / dge slong de dag yi rangs te bcom ldan 'das kyis gsungs pa la mngon par bstod do/ /de nas drang srong na la da bcom ldan 'das gang na ba der song ste phyin nas bcom ldan 'das kyi zhabs la mgo bos phyag 'tshal te phyogs cig tu 'dug go/ /phyogs cig tu 'dug nas bcom ldan 'das la drang srong na la das 'di skad ces gsol to/ /btsun pa bdag gis sngon dam bcas pa tshar phyung lags te/ btsun pa bdag legs par gsungs pa'i chos 'dul ba la rab tu 'byung ba dang bsnyen par rdzogs pa dge slong gi dngos po 'thob na bdag bcom ldan 'das kyi spyan sngar tshangs par spyad pa spyod par 'tshal lo/ /bcom ldan 'das kyis de la dge slong tshur tshangs par spyad pa spyod cig ces dge slong tshur zhes bya bas bka' stsal pa dang / de bcom ldan 'das kyis bka' stsal ma thag tu skra byi/ snam sbyar gyon/ lag na lhung bzed dang bya ma bum thogs shing skra dang kha spu bregs nas zhag bdun lon pa lta bu bsnyen par rdzogs nas lo brgya lon pa'i spyod lam du gnas par gyur to/ /de bzhin gshegs pas tshur shog bka' stsal pas/ /skra bregs snam sbyar bgos pa'i lus ldan zhing / /sangs rgyas dgongs pas cha lugs bsgyur nas ni/ /mod la dbang po rab zhi kho nar gnas/ / gang gi tshe bcom ldan 'das kyis tshe dang ldan pa na la da dge slong tshur shog ces bya bas rab tu phyung ba de'i tshe de la tshangs pa mtshungs par spyod pa dag gis ji skad bod mi shes pa'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong dag 'di'i rus kA t+yA yi bu yin te de bas na 'di la kA t+yA'i bu zhes bos shig /dge slong dag gis de la kA t+yA'i bu zhes bod par brtsams pa dang / de'i ming kA t+yA'i bu zhes bya bar chags so/ /de nas bcom ldan 'das kyis tshe dang ldan pa kA t+yA'i bu la bka' stsal pa/ kA t+yA yi bu 'jig rten 'di ni phal cher yod pa dang med pa gnyis la rten to/ /kA t+yA'i bu 'jig rten 'di ni phal cher phung po dang nye bar len pas rnam par bcings shing yod pa dang med pa gnyis la rten to/ /kA t+yA'i bu sems kyi mngon par zhen pa bag la nyal du 'gyur ba 'di dag la bdag ces bya bar khas mi len/ len par mi byed/ gnas par mi byed/ mngon par zhen par mi byed do/ /kA t+yA'i bu skye ba na sdug bsngal 'di skye'o/ /'gag pa na sdug bsngal 'di 'gag go/ /kA t+yA'i bu 'di la khyod yid gnyis dang the tshom med par gzhan la rag ma las pa'i shes pa kho na skyes na kA t+yA'i bu 'di tsam gyis na yang dag pa'i lta ba yin te/ 'di tsam gyis na de bzhin gshegs pas yang dag pa'i lta bar 'dogs pa na 'dogs par mdzad do/ /de ci'i phyir zhe na/ kA t+yA'i bu 'jig rten kun 'byung ba yang dag pa ji lta ba bzhin du yang dag pa'i shes rab kyis lta ba ni 'jig rten la med pa gang yin pa der mi sems so/ /kA t+yA'i bu 'jig rten 'gog pa yang dag pa ji lta ba bzhin du yang dag pa'i shes rab kyis lta ba ni 'jig rten la yod pa gang yin pa der mi sems so/ /kA t+yA'i bu de bzhin gshegs pa ni mtha' gnyis po de dag la mi rten par 'jig rten la dbu ma'i lam gyis chos ston cing 'di ltar 'di yod pas 'di 'byung / 'di skyes pas 'di skye ste/ 'di lta ste/ ma rig pa'i rkyen gyis 'du byed/ 'du byed kyi rkyen gyis rnam par shes pa/ rnam par shes pa'i rkyen gyis ming dang gzugs/ ming dang gzugs kyi rkyen gyis skye mched drug /skye mched drug gi rkyen gyis reg pa/ reg pa'i rkyen gyis tshor ba/ tshor ba'i rkyen gyis sred pa/ sred pa'i rkyen gyis len pa/ len pa'i rkyen gyis srid pa/ srid pa'i rkyen gyis skye ba/ skye ba'i rkyen gyis rga shi dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'byung ste/ de ltar na sdug bsngal gyi phung po chen po 'di 'ba' zhig kun tu 'byung bar 'gyur ro/ /'di ltar 'di med pas 'di mi 'byung / 'di 'gags pas 'di 'gag ste/ 'di lta ste ma rig pa 'gags pas 'du byed 'gag /'du byed 'gags pas rnam par shes pa 'gag / rnam par shes pa 'gags pas ming dang gzugs 'gag /ming dang gzugs 'gags pas skye mched drug gag /skye mched drug 'gags pas reg pa 'gag /reg pa 'gags pas tshor ba 'gag / tshor ba 'gags pas sred pa 'gag /sred pa 'gags pas len pa 'gag /len pa 'gags pas srid pa 'gag /srid pa 'gags pas skye ba 'gag /skye ba 'gags pas rga shi dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'gag ste/ de ltar na sdug bsngal gyi phung po chen po 'ba' zhig pa ni 'gag par 'gyur ro/ /de nas tshe dang ldan pa kA t+yA'i bus bden pa mthong ste/ 'khor ba'i 'khor lo g.yo ba dang mi g.yo ba cha lnga pa 'di nyid rig ste/ 'dus byas kyi rnam pa thams cad chos nyid kyis 'jig pa dang / ltung ba dang / 'gyes pa dang / 'joms par rtogs nas nyon mongs pa thams cad spangs te dgra bcom pa nyid mngon sum du byas nas/ dgra bcom pa khams gsum pa'i 'dod chags dang bral ba/ sems gser dang bong bar mnyam pa/ nam mkha' dang lag mthil du 'dra ba/ tsan dan dang ste'ur mtshungs pa/ rig pas ma rig pa'i sgo nga'i sbubs bcom pa/ mngon par shes pas so so yang dag par rig pa thob pa/ srid pa dang rnyed pa la chags pa dang / bkur sti la rgyab kyis phyogs pa/ dbang po dang nye dbang dang bcas pa'i lha rnams kyis mchod pa dang / rjed pa dang / gus par smra bar gyur to/ /bcom ldan 'das kyis de la kA t+yA'i bu zhes bka' stsal cing bos pas de'i ming kA t+yA'i bu chen po zhes bya bar chags so/ /ji tsam dus gzhan zhig na 'phags rgyal du khyogs dang khyogs su 'dom pa'i mi ngas shig byung nas rgyal po gtum po rab snang btsun mo'i 'khor dang / gzhon nu dang / blon po dang / pho brang 'khor gyi mi dang bcas te sems khong du chud cing 'dug go/ /de na kha cig gis smras pa/ lha zhi ba bgyid du stsol cig /gzhan dag gis smras pa/ bram ze rnams 'tshal ma stsol cig /kha cig gis smras pa/ lha nye 'khor na gnas pa'i dge ba'i ngo bor bkur ba'i dge sbyong dang bram ze gang yang rung ba de dag tshol du stsol cig / rgyal po gtum po rab snang gis chab sgo ba rnams la bsgo ba/ shes ldan dag dge sbyong ngam bram ze gang su yang rung ba yams kyi nad zhi bar byed par 'gyur ba zhig 'dir 'ongs na de nga la sbron cig /skabs 'di lta bu la sangs rgyas bcom ldan 'das rnams ni mi mkhyen pa 'am mi gzigs pa 'am mi rig pa dang / rnam par mi mkhyen pa cung zad kyang mi mnga' ste/ sangs rgyas bcom ldan 'das thugs rje chen po mnga' ba/ 'jig rten la phan 'dogs par zhugs pa srung ba gcig pa/ gcig tu dpa' ba/ zla med pa/ gnyis su mi gsung ba/ zhi gnas dang / lhag mthong la gnas pa/ gdul ba'i dngos po gsum la mkhas pa/ chu bo bzhi las rgal ba/ rdzu 'phrul gyi rkang pa bzhi zhabs kyi mthil la legs par gnas pa/ bsdu ba'i dngos po bzhi la yun ring po nas goms pa/ yan lag lnga spangs pa/ 'gro ba lnga las shin tu 'das pa/ yan lag drug dang ldan pa/ pha rol tu phyin pa drug yongs su rdzogs pa/ byang chub kyi yan lag bdun gyi me tog gis phyug pa/ 'phags pa'i lam yan lag brgyad pa ston pa/ mthar gyis gnas pa'i snyoms par 'jug pa dgu la mkhas pa/ stobs bcu'i stobs dang ldan pa/ phyogs bcur grags pas khyab pa/ brgya phrag bcu la mnga' sgyur bas khyad par du 'phags pa rnams ni chos nyid kyis nyin lan gsum mtshan lan gsum du sangs rgyas kyi spyan gyis 'jig rten la gzigs shing su ni rgud/ su ni dar/ su ni phongs par gyur/ su ni nyam nga bar 'gyur/ su ni gnod par gyur/ su ni phongs pa dang nyam nga ba dang gnod par gyur/ su ni ngan song la gzhol/ su ni ngan song la 'bab/ su ni ngan song la bab/ su ni ngan song nas drangs te mtho ris dang thar pa la gzhag / su'i dge ba'i rtsa ba ma skyed pa dag ni bskyed par bya/ su'i bskyed pa dag ni yongs su smin par bya/ su'i smin pa ni rnam par grol bar bya/ su ni 'dod pa'i 'dam du bying ba las lag nas drang bar bya/ su ni 'phags pa'i nor dang bral ba las 'phags pa'i nor gyi dbang phyug la dbang byed par gzhag /su ni sangs rgyas 'byung bas brgyan pa'i 'jig rten 'bras bu dang bcas par bya'o zhes ye shes gzigs pa 'jug go/ /smras pa/ rgya mtsho chu srin rnams kyi gnas/ /dus rlabs yol bar 'gyur srid kyi/ /gdul bar bya ba'i sras rnams la/ /sangs rgyas dus las yol ba med/ /ji ltar ma ni bu gcig sdug pa la/ /lta bar byed cing de'i srog bsrung ltar/ /de bzhin gdul ba'i skye bo rnams la ni/ /de bzhin gshegs pa gzigs shing de'i rgyud srung / /thams cad mkhyen pa'i rgyud la gnas pa yi/ /thugs rje'i ba drus srid pa bgrod dka' bar/ /'khyams par gdul bar bya ba'i sras dag ni/ /ba gshin be'u stor bzhin du skyo med tshol/ /bcom ldan 'das kyis dgongs pa/ rgyal po gtum po rab snang btsun mo'i 'khor dang / gzhon nu dang / blon po dang / 'phags rgyal na gnas pa'i skye bo'i tshogs dang bcas pa gang gis gdul bar bya ba yin snyam na dge slong kA t+yA'i bu chen po yin par gzigs so/ /de nas bcom ldan 'das kyis tshe dang ldan pa kA t+yA'i bu chen po la bka' stsal pa/ kA t+yA'i bu 'phags rgyal gyi rgyal po gtum po rab snang btsun mo'i 'khor dang / gzhon nu dang / blon po dang / 'phags rgyal na gnas pa'i skye bo'i tshogs dang bcas pa la soms shig /btsun pa de ltar 'tshal lo zhes tshe dang ldan pa kA t+yA'i bu chen pos bcom ldan 'das kyi ltar mnyan te/ de nyid kyi mtshan mo 'das nas snga dro chos gos dang sham thabs bgos/ lhung bzed thogs te bA rA Na sIr bsod snyoms la zhugs so/ /bA rA Na sIr bsod snyoms spyad nas zas kyi bya ba byas te zas phyis len pa spangs nas/ gnas mal ji ltar spyad pa cham du phab ste/ lhung bzed dang chos gos thogs nas 'khor lnga brgya dang 'phags rgyal gang na ba der rgyu zhing song ngo / /de'i tshe yul kan n+ya kub dza na tshe dang ldan pa kA t+yA'i bu chen po'i sngon khyim pa'i mdza' bo bram ze zhig gnas pa de'i bu mo gzugs khyad par can dang ldan pas tshe rabs snga ma'i ming dang 'thun par skra can zhes btags so/ /ji tsam na lho phyogs nas gar mkhan gyi slob dpon zhig 'ongs te des de'i skra bzang bar mthong nas bram ze'i drung du 'ongs te des smras pa/ kye bram ze chen po bu mo 'di'i skra rnams bdag la byin cig dang / kar sha pa Na stong sbyin no zhes smras pa dang / des slob dpon bdag cag ni bram ze yin te/ bdag cag skra 'tshong du mi rung na ji ltar skra btsong zhes smras pa dang / gar mkhan gyi slob dpon de cang mi zer bar song ngo / /bram ze de yang phyi de nyin dus las 'das so/ /de'i chung mas ji ltar 'phags pa kA t+yA'i bu chen po 'khor lnga brgya dang de nas thag mi ring ba zhig na 'dug ste/ 'phags rgyal du 'ong bar 'dod do zhes thos so/ /khyo dang bral bas sdug bsngal ba dang yid mi bde ba skyes pa de tshe dang ldan pa kA t+yA'i bu chen po 'ong ba thos nas lag pa 'gram pa la gtad de sems khongs su chud cing 'dug go/ /bu mo skra can mas ma de ltar 'dug pa mthong ngo / /mthong nas kyang smras pa/ ma ci'i phyir lag pa 'gram pa la gtad de sems khongs su chud cing 'dug /des smras pa/ bu mo 'phags pa kA t+yA'i bu chen po khyod kyi pha'i chung po grogs 'di nas mi ring ba zhig na 'dug ste 'phags rgyal du 'ong 'dod na khyod kyi pha ni dus las 'das/ bdag cag gi khyim gyi gnas skabs ni 'di lta bur gyur pas ring zhig na 'ongs pa de la nyi ma 'ga'i bsod snyoms kyang sbyin mi nus pas so/ /des smras pa/ ma gal te de lta na gar mkhan gyi slob dpon de bdag gi skra kar shA pa Na stong gis nyo bas de nyid du tshongs la 'phags pa kA t+yA'i bu chen po la bsod snyoms phul cig / bdag gi skra ni yang skye bar 'gyur gyis mya ngan ma mdzad cig / des de'i tshig dad pa las byung ba de thos nas/ bu mo legs kyis de ltar bya'o zhes smras te/ gar mkhan gyi slob dpon gang na ba der song ste phyin nas smras pa/ slob dpon khyod kyis nga'i bu mo'i skra kAr ShA pa Na stong gis 'jal na de snoms la kar shA pa Na stong stsol cig / des smras pa/ sring mo de'i tshe ni kho bo la de dag dgos kyi da ni de dag mi dgos mod kyi 'on kyang kAr ShA pa Na lnga brgyar 'tshong na blang ngo / /des smras pa/ slob dpon stsol la 'di dag bzhes shig / de blangs so/ /ji tsam na tshe dang ldan pa kA t+yA'i bu chen po yul ka n+ya kub dzar phyin nas de dben pa bla gab med pa zhig tu 'dug go/ /de nas bram ze mo de rtabs bor gom pa bslang ste/ tshe dang ldan pa kA t+yA'i bu chen po gang na ba der song nas phyin pa dang / tshe dang ldan pa kA t+yA'i bu chen po la 'di skad ces smras so/ /'phags pa kA t+yA'i bu chen po sang bdag gi sdum par gdugs tshod gsol bar ci gnang / des smras pa/ bram ze mo nga'i 'khor skye bo phal po che'o/ /des smras pa/ 'phags pa 'khor ji snyed cig mchis/ bram ze mo nga'i 'khor lnga brgya yod do/ /'phags pa legs te de bzhin bgyi yis gnang bar mdzod cig /tshe dang ldan pa kA t+yA'i bu chen pos bram ze mo de la cang mi zer bas khas blangs so/ /de nas bram ze mo de tshe dang ldan pa kA t+yA'i bu chen pos cang mi zer bas khas blangs par rig nas rkang pa la phyag byas nas stan las langs te song ngo / /de nas bram ze mo des de nyid kyi nub mo gtsang zhing bsod pa'i bza' ba dang bca' ba dag bshams te nang par sngar langs nas stan bting / chu ra bzhag nas tshe dang ldan pa kA t+yA'i bu chen po la spyan 'dren gyis 'phags pa gdugs tshod bshams lags te/ 'phags pa da de'i dus la bab par dgongs su gsol zhes dus gdab par byas so/ /de nas tshe dang ldan pa kA t+yA'i bu chen po snga dro chos gos dang sham thabs bgos lhung bzed thogs nas dge slong mang pos bskor cing dge slong gi dge 'dun gyis mdun du bdar te bram ze mo de'i bkad sa gang na ba der song ngo / /phyin nas dge slong gi dge 'dun gyi gung la stan bshams pa nyid la 'dug go/ /de nas bram ze mo des kA t+yA'i bu chen po la sogs pa dge slong gi dge 'dun dag bde bar bzhugs par rig nas gtsang zhing bsod pa'i bza' ba dang / bca' ba dag rang gi lag dar te yang dag par tshim par byed/ yang dag par stobs par byed do/ /rnam grangs du mar gtsang zhing bsod pa'i bza' ba dang bca' ba dag rang gis lag dar te yang dag par tshim par byas/ yang dag par bstabs nas tshe dang ldan pa kA t+yA'i bu chen po bshos gsol nas lhung bzed gyu phyag bcabs par rig nas tshe dang ldan pa kA t+yA'i bu chen po'i mdun du chos mnyan pa'i phyir stan ches dma' ba zhig bting nas 'dug go/ /de nas tshe dang ldan pa kA t+yA'i bu chen po bram ze mo de la chos 'chad par 'dod nas bram ze mo de la 'di skad ces smras so/ /bram ze'i bu mo skra can ga re/ des smras pa/ 'phags pa spyod lam nyams lags so/ /dgra bcom pa rnams ni ma bsams par ye shes mthong ba mi 'jug pas des bu mo skra can gyi spyod pa bsams nas smras pa/ bram ze mo dge ba'i bsam pa can gyi bu mo de bos shig /des bos pa dang / khang pa nas phyung ste dad pa drag pos tshe dang ldan pa kA t+yA'i bu chen po'i rkang pa la phyag 'tshal te phyogs cig tu 'dug pa dang / bram ze mo des smras pa/ 'phags pa skra can ma 'di sdig pa spangs pas khyod kyi sras mo lags te/ de'i slad du ji ltar bgyis kyang bdag cag gis khyod kho na la zhu 'tshal na 'di bdag cag gis su la stsal bar bgyi gsungs shig / des smras pa/ bram ze mos cha ma yin pa zhig dris te/ de ni rab tu byung ba la 'tsham pa ma yin mod kyi 'on kyang bu mo 'dis gsang ba'i rgyan lnga brgya dang / phyi rol gyi rgyan lnga brgya dang / grong gi mchog lnga brgya rnyed par 'gyur ro/ /des smras pa/ 'phags pa bdag cag bram ze ni dbul ba lags na bdag cag gis de dag ga las rnyed/ des smras pa/ bram ze mo de skad ma zer cig /bu mo 'dis zhing bzang po la dad pa drag pos bya ba byas pas bsod nams kyi dbang che bar grags pa yin te/ nges par 'di la thams cad 'byor par 'gyur gyis smre sngags ma 'don cig ces byas pa dang / de cang mi zer bar 'dug go/ / tshe dang ldan pa kA t+yA'i bu chen pos bram ze mo de dang bu mo de la chos dang 'thun pa'i gtam gyis yang dag par ston/ yang dag par len du 'jug /yang dag par gzeng bstod/ yang dag par dga' bar byed cing rnam pa du mar chos dang 'thun pa'i gtam gyis yang dag par bstan/ yang dag par len du bcug /yang dag par gzeng bstod/ yang dag par dga' bar byas nas stan las langs te song nas rim gyis 'phags rgyal du phyin to/ / de grong khyer du zhugs pa'i tshe mod la yams kyi nad phyed zhi bar gyur pa dang / chab sgo bas rgyal po la sbran pa/ lha sngon ma byung ba'i rtags dang cha lugs 'chang ba'i dge sbyong zhig g.yog lnga brgya dang mchis te/ de mchis pa'i mod la yams kyi nad phyed zhi bar gyur to/ /rgyal pos smras pa/ kye skyes bu legs kyis de la bkur sti gyis shig /bram ze rnams kyis smras pa/ lha bdag cag gis nyin mtshan du zhi ba'i las la brtson par bgyis pas na bdag cag gi mthus yams kyi nad phyed zhi bar gyur te dgung ring po mi thogs par thams cad yong ye zhi bar bgyi'o/ /dge slong dag gis ni rgyal po gtum po rab snang la nad med par gyur cig ces smras nas cang mi zer bar dong ngo / /rgyal pos blon po rnams la smras pa/ shes ldan dag chab sgo ba ni lha sngon ma byung ba'i rtags dang cha lugs 'chang ba'i dge sbyong zhig 'khor lnga brgya dang 'dir mchis te/ de mchis pa'i mod nyid la yams kyi nad phyed zhi bar gyur to zhes zer/ bram ze rnams ni lha bdag cag gis gdugs mtshan du zhi ba'i las la brtson par bgyis pas bdag cag gis mthus yams kyi nad phyed zhi bar gyur to zhes zer te de gang gi mthu yin pa mi shes na/ deng la dge sbyong dang bram ze de dag glang po che'i bres kyi mi gtsang ba'i phyogs shig tu 'bras chan ngan pa dang / rtsabs dag gi zas byin la zos nas phyir byung ba dang gnyi ga la zan ci 'dra ba zhig dris shig /lha de ltar 'tshal lo zhes smras nas/ blon po rnams kyis bsgo ba bzhin du glang po che'i bres kyi mi gtsang ba'i phyogs shig tu stan bting nas dge sbyong dang bram ze dag la zan byin te zos zin nas phyir byung ba dang / bram ze rnams la sgo bas kye bram ze chen po dag lhas khyed cag ci 'dra ba'i kha zas kyis tshim par byas shes dris pa dang / de dag khros te smras pa/ byed stangs dang rgyal po thams cad chos ma yin pa la gzhol ba zhig ste/ des bram ze rnams la 'bras chan mi gtsang ba dang / sran tshod yan lag gnyis pa dang / rtsab mo byin te tshim par byas mod ces byas pa dang / de cang mi zer bar 'dug go/ /de dag dong nas dge slong rnams la dris pa/ 'phags pa khyed lhas ci 'dra ba'i kha zas kyis tshim par byas/ de dag gis smras pa/ bzhin bzangs sbyin pa pos ni byin/ len pa po rnams kyis ni zos te/ 'byung ba chen po rnams tshim par byas shing nyin zhag gi rgyags blangs so/ /sgo bas rgyal po la smras pa/ lha bram ze rnams ni 'di skad mchi'o/ /dge slong rnams ni 'di skad mchi'o/ /rgyal pos blon po rnams la bsgo ba/ shes ldan dag deng la da ni gnyi ga glang po che'i bres ma yin pa'i gtsang ma'i phyogs shig tu kha zas bsod pa dag byin la de bzhin du dris shig /de dag gis glang po che'i bres ma yin pa'i gtsang ma'i phyogs shig tu stan bshams te kha zas bsod pas tshim par byas na de bzhin du sgo bas dris pa dang / bram ze rnams kyis smras pa/ byed stangs dang rgyal po rgyal rigs spyi bo nas dbang bskur ba zhig ste zas ci 'dod pa byin nas tshim par byas so/ /des bram ze dag rgyal po'i pho brang 'di ni sko sham pa'i kha na las pas res 'ga' ni ngan par gyur/ res 'ga' ni bzang por gyur gyis nga ma 'phya shig ces smras pa dang / de dag cang mi zer bar 'dug go/ /de dag dong nas dge slong dag la dris pa dang / de dag gis snga ma bzhin du smras so/ /sgo bas rgyal po la de bzhin du smras so/ /glang po che'i bres ji lta ba de bzhin du rta'i bres dang / phyag dar khrod dang / sa phyogs gtsang mar ngan pa dang bsod pa dag sbyar bar byas so/ /rgyal po gtum po rab snang gis bsams pa/ dge slong dag sbyin gnas yin gyi bram ze dag ni ma yin no snyam du rig nas dad pa skyes te tshe dang ldan pa kA t+yA'i bu chen po ga la ba der song ste phyin pa dang / tshe dang ldan pa kA t+yA'i bu chen po'i rkang pa la mgo bos phyag byas te phyogs gcig tu 'dug go/ /phyogs gcig tu 'dug pa dang rgyal po gtum po rab snang la tshe dang ldan pa kA t+yA'i bu chen pos chos dang ldan pa'i gtam gyis yang dag par ston/ yang dag par len du 'jug yang dag par gzeng bstod/ yang dag par dga' bar byed cing rnam grangs du mar chos dang ldan pa'i gtam gyis yang dag par bstan/ yang dag par len du bcug /yang dag par rab tu dga' bar byas nas mi smra bar 'dug go/ /de nas rgyal po gtum po rab snang stan las langs te bla gos phrag pa gcig tu gzar nas tshe dang ldan pa kA t+yA'i bu chen po gang na ba de logs su thal mo sbyar ba btud de/ tshe dang ldan pa kA t+yA'i bu chen po la 'di skad ces 'phags pa kA t+yA'i bu chen po dge slong gi dge 'dun dang thabs gcig tu sang bdag gi sdum par gdugs tshod gsol bar ci gnang zhes smras pa dang / tshe dang ldan pa kA t+yA'i bu chen pos rgyal po gtum po rab snang la cang mi zer bas gnang ngo / /de nas rgyal po gtum po rab snang gis tshe dang ldan pa kA t+yA'i bu chen pos cang mi smra bas gnang bar rig pas tshe dang ldan pa kA t+yA'i bu chen po'i rkang pa la mgo bos phyag 'tshal te stan las langs nas song ngo / /de nas rgyal po gtum po rab snang gis de nyid kyi nub mo gtsang zhing bsod pa'i bza' ba dang bca' ba dag bshams te/ nang par sngar langs nas gdan bting chu ra bzhag ste/ tshe dang ldan pa kA t+yA'i bu chen po la spyan 'dren pas 'phags pa kA t+yA'i bu chen po gdugs tshod bshams lags te da de'i dus la bab par dgongs su gsol zhes dus tshod gdas par byas so/ /tshe dang ldan pa kA t+yA'i bu chen po snga dro chos gos dang sham thams bgos lhung bzed thogs te dge slong gi tshogs kyis bskor cing dge slong gi dge 'dun gyis mdun du bdar te rgyal po gtum po rab snang gi bkad sa gang na ba der song ste phyin pa dang / dge slong gi dge 'dun gyi gung la stan bshams pa nyid la 'dug pa dang / de yang 'dug ste rol mo'i sgra phyung nas bro gar mkhan rnams kyis bro gar rnam pa du ma dag bya bar brtsams pa dang / tshe dang ldan pa kA t+yA'i bu chen po dang dge slong dag dbang po bsdams te 'khod do/ /glu gar dang rol mo'i sgra de dag zhi nas rgyal po gtum po rab snang gis 'phags pa ci gar bzang lags sam/ glu snyan lags sam zhes smras pa dang / tshe dang ldan pa kA t+yA'i bu chen pos smras pa/ rgyal po chen po gang gis thos pa 'am/ mthong ba dag la'o/ /des smras pa/ 'phags pa dbang po nang du bsdus pa rnams kyis ma gzigs su ni stsol na ji ltar ma gsan/ des smras pa/ lha khyod la mi gsad pa la thug pa 'ga' yod dam/ 'phags pa mchis na de cir 'tshal/ lha skyes bu de'i lag tu snod til mar gyis khong ste bskur la phyi bzhin gshed ma'i mi thong ste de la 'di skad ces kye mi khyod tshur shog / snod 'bru mar gyis kha da chad du gang ba/ bya rog gis btung du rung ba 'di khyer la ljongs bzang po thams cad skor la 'dir khyer te shog shig / ji ste til mar thigs pa gcig sa la bo na mi ral gri gdengs pa 'dis khyod kyi mgo drungs nas bcad de sa la 'dor du gzhug go zhes bsgo la/ de'i mdun du rol mo'i sgra sna tshogs phyung ste bro gar rnam pa sna tshogs byed du chug shig dang / de nas khyod yid ches par 'gyur ro zhes smras so/ /rgyal po gtum po rab snang des ji skad bstan pa thams cad rim gyis byas nas mi de la kye skyes bu ci gar bzang ngam/ glu snyan pa blangs sam/ rol mo'i sgra snyan tam zhes dris pa dang / des smras pa/ lha gang gis mthong ba 'am/ thos pa dag la'o/ /rgyal pos smras pa/ kwa'e skyes bu dbang po nang du bsdus pa dag gis ma mthong du ni chug na/ ji ltar ma thos/ des l ha bdag 'di snyam du gal te bdag gis 'bru mar gyi snod 'di las 'bru mar thigs pa gcig sa la bo na yang gshed ma mi ral gri gdengs pa 'dis bdag gi mgo drungs nas bcad nas sa la bor ro snyam ste bdag 'chi bas 'jigs skrag nas 'bru mar gyi snod la sems rtse gcig tu gtad de lta bas nyam thag ste 'dir mchis na ji ltar mthong ngam thos shes smras pa dang / rgyal po spobs pa med nas cang mi zer bar 'dug go/ /tshe dang ldan pa kA t+yA'i bu chen pos smras pa/ lha khyod kyis mthong ngam/ 'phags pa mthong lags so/ /lha re shig mi 'di tshe gcig gi sdug bsngal gyi phyir bdag nyid mi g.yeng ba dang / bag yod par kun tu srung bar bgyid na/ bdag cag dge slong rol mo'i sgra la lta ba dang / nyan pa spong ba blangs te/ bslab pa bzung ba dag tshe rabs du ma'i sdug bsngal gyi rgyu gar dang / glu dang / rol mo'i sgra la lta ba 'am nyan pa lta smos kyang ci dgos te de ni gnas med do/ /rgyal po gtum po rab snang 'bru mar gyi snod mthong bas yid ches te lhag par dad nas btsun mo'i 'khor dang / gzhon nu dang / blon po dang / pho brang 'khor gyi mi dang bcas pas kA t+yA'i bu la sogs pa dge slong gi dge 'dun bde bar bzhugs pa la gtsang zhing bsod pa'i bza' ba dang bca' ba dag rang gi lag nas dar te yang dag par tshim par byed/ yang dag par stobs par byed cing rnam grangs du mar gtsang zhing bsod pa'i bza' ba dang bca' ba dag rang gi lag nas dar te yang dag par tshim par byas/ yang dag par bstabs nas tshe dang ldan pa kA t+yA'i bu chen pos gdugs tshod gsol nas lhung bzed gyu phyag bcabs par rig nas stan ches dma' ba zhig blangs te/ tshe dang ldan pa kA t+yA'i bu chen po'i mdun du 'dug go/ /'dug nas tshe dang ldan pa kA t+yA'i bu chen po la 'di skad ces smras so/ /'phags pa ji ltar bdag gis bgyis pa de ltar 'khor lnga brgya la bsod pa'i zhal zas kyis tshim par bgyis pa/ gzhan 'ga' mchis sam/ des smras pa/ lhas bdag du ma bas khyad zhugs pa khyod kyis bdag 'khor lnga brgya dang bsod pa'i kha zas 'di lta bus tshim par byas pa gang yin pa 'di la ngo mtshar ci zhig che/ bdag 'dir 'ongs ba'i tshe ri 'or na gnas pa'i bu mo zhig gis bdag nyid kyi skra btsongs nas 'khor lnga brgya dang kha zas bsod pa 'di lta bus tshim par byas pa ni 'di bas ches khyad zhugs par ngo mtshar che'o/ /rgyal po gtum po rab snang gis bsams pa/ bu mo gang zhig gis skra kAr ShA pa Na lnga brgyar ldom pa de lta bu'i bud med ni lha dag gi nang na yang ga la yod/ mdor na de btsal bar bya'o snyam na tshe dang ldan pa kA t+yA'i bu chen po ni bsnyen par dka' ba yin pas des de la bu mo de ri 'or gang na 'dug ces dri bar ma nus te/ des zho shas 'tsho ba rnams la bsgo ba/ shes ldan dag kA t+yA'i bu chen po lam gang nas 'ongs pa de nas deng la ri 'or gang na bu mo zhig gis skra btsongs nas 'phags pa kA t+yA'i bu chen po 'khor lnga brgya dang bcas pa la bshos gsol ba tshol la btsal nas de nga'i don du slongs shig / lha de ltar 'tshal lo zhes zho shas 'tsho ba rnams kyis rgyal po gtum po rab snang gi ltar mnyan te rim gyis tshol ba na kan n+ya kub dzar phyin te de dag gis de btsal lo/ /btsal nas lam gyis dub pa ngal bso ste/ bram ze mo de'i khyim gang na ba der song ste phyin pa dang / sgo khang du 'khod nas smras pa/ bkra shis par gyur cig /bkra shis par gyur cig /bram ze mo des smras pa/ shes ldan dag ci 'dod/ de dag gis smras pa/ bu mo skra can ma'o/ /bram ze mos smras pa/ su'i don du slong / de dag gis smras pa/ bram ze mo rgyal po gtum po rab snang gi'o/ /des smras pa/ shes ldan dag legs mod kyi 'on kyang 'di la gnyod mang du dgos so/ /de dag gis smras pa/ sring mo ji tsam zhig dgos/ des smras pa/ gsang ba'i rgyan lnga brgya dang / phyi rol gyi rgyan lnga brgya dang / grong khyer mchog lnga'o/ /de dag gis rgyal po gtum po rab snang la lha bu mo gnyod 'di snyed cig gis khugs so zhes don de spring ba dang / rgyal po gtum po rab snang gis phyir spring ba/ shes ldan dag bu mo gnyod ji tsam gyis khugs pa nos shig thams cad sbyar ro/ /de dag gis blangs nas rgyal pos nyi ma dang / tshes grangs dang / yud tsam dang sbyar te dpal gyi 'byor pa chen pos bag mar blangs so/ /gang gi nyin par 'phags rgyal du phyin pa de nyid kyi nyin par yul 'phags rgyal du mi ngas thams cad kyi thams cad du nye bar zhi zhing zhi bar gyur nas de'i ming zhi ba zhes bya bar chags so// // 'dul ba phran tshegs kyi gzhi/ bam po nyi shu drug pa/ sdom ni/ skye dang 'tsho byad kA t+yA'i bu/ /zhi dang tshong dpon g.yul dang ni/ /mdun na 'don dang sgrol ma dang / /pi bang len dang skra bregs dang / /rus pa'i keng rus gtogs par ni/ /de ni tshoms su yang dag bsdus/ /de'i tshe 'phags rgyal na tshong dpon gyi bu zhig gnas pa des rigs mnyam pa las chung ma blangs nas de de dang lhan cig rtse bar byed dga' bar byed/ dga' mgur spyod par byed do/ /des dus cung zad cig rtses dga' bar byas/ dga' mgur spyad nas zong khyer te yul gzhan du song ngo / /de'i chung ma zhim po dang bzang po zos shing gyon pas nyon mongs pas shin tu gzir te/ de nyin gcig bzhin du khang thog tu song nas thams cad du skyes pa la lta'o/ /ji tsam du dus gzhan zhig na rgyal po gtum po rab snang glang po che la zhon te de'i khyim dang nye ba zhig tu song ba dang / des de la me tog gi phreng ba 'phongs pa de rgyal po gtum po rab snang gi phrag pa la phog go/ /des gyen du blta bar brtsams pa dang / ji tsam na na tshod gzhon nu kha dog dang dbyibs kyi khyad par gyis bdag nyid shin tu mdzes pa rlom pa/ 'dod pas thebs pa'i spyod pas zur stegs su mig zur gyis lta ba de mthong ngo / /mthong nas kyang de la sems kyi bsam pa 'chums par gyur te/ des smras pa/ gal te de lta na phyir byung shig /des smras pa/ lha mchid g.yar tshas 'di nyid du spyon cig /de yang de la chags pas ldog ma nus te/ de glang po che las babs nas de'i khyim du zhugs te de dang lhan cig dga' mgur spyad pas sems can zhugs par gyur to/ /bud med mkhas pa'i rang bzhin can kha cig la ma 'dres pa'i chos lnga yod de/ lnga gang zhe na/ skyes pa chags pa shes shing ma chags pa shes pa dang / dus shes shing zla mtshan dang ldan pa shes pa dang / mngal du zhugs pa shes pa dang / gang las mngal du zhugs pa shes pa dang / khye'ur shes shing bu mor shes pa yin no/ /des rgyal po la lha bdag ni sems can dang ldan par gyur to zhes ji ltar gyur pa smras pa dang / rgyal pos de la mu tig gi se mo do zhig byin te smras pa/ gal te khyod las bu khye'u zhig byung na de la mu tig gi se mo do 'di byin la nga'i drung du thong shig / 'on te bu mo na khyod nyid kyi yin no zhes smras te song ngo / /de la mngal gyi mtshan ma byung bar gyur pa na tshong dpon des yi ge spring ste/ bdag kyang bde bar 'ong gis mi dga' bar ma byed par bag rton cig ces byas pa dang / des thos nas skrag ste des rgyal po la gsol pa dang / lha bdag gi khyim thab de nye ba zhig tu mchis na bdag gis ji ltar bsgrub par bgyi/ rgyal pos de la spring ba/ khyod mi dga' ba ma byed par bag rton cig dang / ngas ji ltar de thag ring bar 'gro ba de ltar bya'o zhes spring nas de cang mi zer bar 'dug go/ /rgyal pos de la nor 'di lta bu zhig nga la dgos kyis de ma rnyed par ma 'ong shig ces spring ba dang / de dag tshol du lam ring po zhig du song ngo / /de yang zla ba dgu 'das nas khye'u gzugs bzang zhing mdzes pa dang blta na sdug pa zhig btsas pa dang / des mar dang sbrang rtsis kha bkang ste sgrom gyi nang du shing bal bting nas de'i thog tu bzhag ste/ steng nas gos dkar pos g.yogs nas de'i thog tu mu tig gi se mo do bzhag ste kha bcad nas sgrom de la rgya skyegs la rgya btab ste bran mo la bran mo khyod sgrom 'di khyer te song la/ rgyal po'i khab kyi sgor dkyil 'khor gyis la mar me bus te zhog shig / bzhag nas nam sus blangs kyi bar du phyogs gcig tu 'khod cig ces bsgo ba dang / des de bzhin du byas so/ /ji tsam zhig na ba lang lam de nas 'gro ba dag gis sgrom de bskor te 'khod do/ /re shig cig na rgyal po gtum po rab snang btsun mo zhi ba dang lhan cig khang bzangs kyi steng du song ste 'dug pa des de bskor te 'dug pa'i ba lang de dag mthong ste des zho shas 'tsho ba rnams la bka' stsal pa/ shes ldan dag ba lang gis bskor cing 'dug pa de ci yin ltos shig /de dag gis mthong nas smras pa/ lha sgrom rgya skyegs la rgya btab pa zhig mchis so/ /rgyal pos smras pa/ khyer te shog shig /btsun mo zhi bas lha sgrom de'i nang na rdzas ci mchis pa de bdag la stsol cig ces gsol pa dang / rgyal pos smras pa/ legs kyis de bzhin du bya'o/ /ji tsam na sgrom de rgyal po'i thad du blangs nas rgyal pos kha phye ste bltas na re shig na mu tig gi se mo do dang bu zhig mthong ste/ des mu tig gi se mo do ngo shes nas de 'di ni bdag gi bu yin no snyam pa'i sems skyes nas/ des de zhi ba la 'di ni khyod kyi bu'o zhes gtad do/ /des smras pa/ lha khye'u 'di'i ming ji skad du gdags/ des smras pa/ khye'u 'di ba lang dag gis bskyangs pas de'i phyir 'di'i ming ba lang skyong du gdags so zhes de'i ming ba lang skyong zhes bya bar btags so/ /de nas btsun mo zhi bas de bskyed pas na de'i ming yang ba lang skyong gi ma zhes bya bar chags so/ /de'i tshe yul rdo 'jog na rgyal po pad ma'i snying po can zhes bya ba rgyal srid byed du 'jug ste/ 'byor pa zhes bya ba nas chos dang 'thun pas rgyal srid byed du 'jug go zhes bya ba'i bar du snga ma bzhin no/ /de'i yul na dus bzhin du char bab pas shing rnams kyi me tog dang / 'bras bu yang rtag tu chags/ sa la lo yang legs te slongs mo bas kyang zas rnyed sla'o/ /ji tsam du dus gzhan zhig na rgyal po pad ma'i snying po can khang bzangs kyi thog tu song ste blon po'i tshogs kyis bskor cing 'dug pa des blon po rnams la smras pa/ shes ldan dag rgyal po gzhan gang gi yul na yang 'di ltar char dus bzhin du 'bab cing shing las me tog dang 'bras bu rtag tu 'chags pa dang / sa la lo legs shing slongs mo bas kyang zas rtag tu rnyed sla ba yod dam/ de dag gis smras pa/ lha mchis te rgyal po gtum po rab snang gi yul 'phags rgyal zhes bgyi ba na char dus bzhin du 'bab cing shing las me tog dang 'bras bu yang rtag tu 'chags/ sa la lo legs pas slongs mo bas kyang rtag tu zas rnyed sla'o zhes gda'o/ /des smras pa/ shes ldan dag gal te de lta na dpung gi tshogs yan lag bzhi pa go skon cig dang de'i yul 'khor gzhom par byas 'dong ngo / /de dag gis dpung gi tshogs yan lag bzhi pa go bskon nas rgyal po pad ma'i snying po can dpung gi tshogs yan lag bzhi pa dang / yul 'phags rgyal du dong ste rim gyis rgyal po gtum po rab snang gi yul du phyin to/ /des de dag gzhom par brtsams pa na/ yul de na gnas pa'i skye bo'i tshogs kyis rgyal po gtum po rab snang la lha rgyal po pad ma'i snying po can zhes bgyi ba dpung gi tshogs chen po bsdus nas lha'i yul 'joms su mchis so zhes sbran pa thos pa dang / des kyang dpung gi tshogs yan lag bzhi pa glang po che'i tshogs dang / rta'i tshogs dang / shing rta'i tshogs dang / dpung bu chung gi tshogs go bskon te rgyal po pad ma'i snying po can dang g.yul 'gyed pa'i phyir spags so/ /de na rgyal po pad ma'i snying po can gyis rgyal po gtum po rab snang gi glang po che'i tshogs thams cad kyang phrogs/ rta'i tshogs dang / shing rta'i tshogs dang / dpung bu chung gi tshogs kyang phrogs te rgyal po gtum po rab snang bcom btags byin bsgral pham par byas te/ g.yul bzlog pa na phan tshun kun tu byer ba las blon po dang skye bo'i tshogs gzhan rnams ni 'phags rgyal du zhugs nas ra ba'i khar sbrengs te 'dug go/ /rgyal po ni rkya gcig por ri 'or zhig tu phyin pa dang / ri 'or de na zhing pa snams byed ces bya ba zhig zhing rmed pa des de mthong nas smras pa/ kye khrom gyi dpa' bo rgyal po pad ma'i snying po can gyis rgyal po gtum po rab snang bcom btags byin bsgral pham par byas te g.yul bzlog ces grag na de bden nam/ kye skyes bu bden no/ /yul na gnas kyang yul gzhan nas 'ongs pa'i rgyal po pad ma'i snying po can gyis bcom btags byin bsgral pham par byas te g.yul bzlog pa rgyal po de'i blon po dang / dmag dpon ci 'dra ba zhig /gal te nga de'i blon por gyur na myur zhing myur bar rgyal po pad ma'i snying po can mgul nas btags te 'phags rgyal du khrid pa zhig /de de skad du gtam zer zhing 'dug pa na/ de'i chung ma ri khrod ma zhes bya ba zan khyer te 'ongs nas des sa brkos te lo ma bting nas lag pa bkrus te zan bza' bar byas pa na/ rgyal po la bltas te/ kye khrom gyi dpa' bo khyod ngal bas skyo zhing bkres skom pas nyon mongs kyis bdag cag dbang thang chung ngu'i bza' ba dang / btung ba ci 'dra yang mi bsngo de gsol gyis tshur gshegs zhes smras pa dang / rgyal po gtum po rab snang gis bsams pa/ gal te ma zos na ltogs te 'chi bar 'gyur ro snyam du rig nas rta las babs te lag pa dang rkang pa bkrus nas rta las stan phog ste bting nas 'dug go/ /'dug nas des 'tsho ba'i bsam pas bza' bar brtsams so/ /de nas phor bu kha chag cig nas chang blud pa dang / rgyal pos bsams pa/ phor pa ni kha chag mod kyi 'on kyang gang du ma chag pa'i phyogs de nas chang btung ngo snyam mo/ /rgyal po rnams ni shes rab dang ldan pa tshul phun sum tshogs pa yin pas des yang bsams pa/ gal te kha ma chag pa'i phyogs nas bdag gis chang 'thungs na 'dis ni ma chag pa nas 'thungs so zhes 'di khu 'phrig za bar 'gyur zhing 'dis bdag spangs par 'gyur bas 'dis gang nas 'thungs pa de nyid nas 'thungs na bdag la shin tu dga' bar 'gyur ro snyam nas des ngos de nyid nas 'thungs pa dang snams byed kyis bsams pa/ khrom gyi dpa' bo 'di ni cho ga med pa zhig ste/ bdag gis ngos gang nas 'thungs pa'i ngos de nyid nas 'dis kyang 'thungs pas 'di dang 'jig rten gyi lugs yun ring du mi 'chor bar mdza' bo bya'o snyam nas/ des chung ma la smras pa/ bzang mo khrom gyi dpa' bo 'di nga'i snying gi grogs po yin gyis 'di khyim du khrid de song la/ dril phyi dang khrus gyis te zan byin la rta yang rtswa dang chas byin cig / des de khyim du khrid nas dril phyi dang khrus byas te zan byin nas rta yangs rtswa dang chas byin no/ /rgyal po pad ma'i snying po can la ri brags pa skya bseng zhes bya ba dag gis bsdos nas de dag ri brags kyi lung pa nas brlugs te rgyal po pad ma'i snying po can gyi yul gzhom par brtsams pa dang / blon po rnams kyis rgyal po pad ma'i snying po can la lha ri brags pa skya bseng dag gis lha'i yul gzhom par bgyis kyis ji ltar bgyi ba dgongs su gsol zhes yi ge spring ste/ yi ge'i nang du yang tshigs su bcad pa/ gzhan gyis yul ni gzhom pa'i phyir/ /ji ltar nan tan mdzad pa ltar/ /rang gi yul 'khor bsrung ba yang / /de bzhin lhas kyang mdzad du gsol zhes bris so/ /rgyal po pad ma'i snying po can gyis yi ge blags nas bsam pa/ gal te bdag de bzhin du song na 'jig rten dag rgyal po pad ma'i snying po can pham ste/ de'i phyir log go zhes sems par 'gyur bas yong mjal dum byas te 'gro'o snyam nas des rgyal po gtum po rab snang la spring ba/ grogs po sdug pa gang thal zin pa de thal du zad/ da phyir byung shig dang khyod la cung zad kyang mi byed kyi gzhan du na phan tshun mgul nas 'jus te 'gro bar zad do/ /blon po dag gis spring ba de thos nas bsams pa/ gal te 'di na rgyal po med do zhes spring na glags rnyed par 'gyur gyis ye g.yo zhig bya'o snyam ste de dag gis de la yi ge spring ba/ grogs po sdug pa gal te de lta yin yang kho bo cag rgyal po ni bya rog bzhin du dogs pa dang bcas pa yin pas bdag ni phyir mi 'byung ngo / /khyod kyi mdza' bo'i bu rgyal po'i gzhon nu ba lang skyong 'di 'ong gis de dang brang sprod la bzhud cig ces spring ba dang / rgyal po pad ma'i snying po can gyis rgyal po gzhon nu ba lang skyong dang brang sprad nas 'phags rgyal bskor ba btang ste rdo 'jog du song ngo / /blon po rnams kyis smras pa/ shes ldan dag rgyal po pad ma'i snying po can gyis bag phab ste yul rdo 'jog tu song gis da ni lha tshol du 'dong ngo zhes de dag gis pho nya rta pa kun tu btang ngo / /rgyal po gtum po rab snang gis rgyal po pad ma'i snying po can gyis 'phags rgyal bskor ba btang nas yul rdo 'jog tu song ngo zhes thos pa dang / des zhing pa snams byed de la smras pa/ snams byed bdag ni 'jigs pa dang bral bas de'i phyir bdag 'phags rgyal du 'gros/ gal te khyod 'phags rgyal du 'ong na bdag gi khyim du shog shig /des smras pa/ khrom gyi dpa' bo khyod kyi ming yang kho bos mi shes na ji ltar khyim du 'ong / des smras pa/ snams byed nga'i khyim mi shes kyang bla 'on kyang khyod 'phags rgyal du 'ongs pa dang rta mangs kyi khyim gang yin zhes dris shig ces smras nas song nas rim gyis yul 'phags rgyal du phyin pa dang / des chab sgo ba la bsgo ba/ kwa'e skyes bu 'ga' zhig rta mangs kyi khyim gang yin zhes 'dri ba dang / de nga'i drung du khrid de shog shig ces smras nas khyim du zhugs so/ /ji tsam dus gzhan zhig na yul 'phags rgyal du dus ston la bab nas/ yul de na gnas pa'i skye bo'i tshogs dag kyang der dong ba dang / zhing pa'i chung ma ri khrod mas rje'i sras yul 'phags rgyal na dus ston la bab ste skye bo'i tshogs der dong na bdag cag kyang bzhud la/ der dus ston kyang nyams su myong bar bya zhing rta mangs de yang gzigs so/ /des smras pa/ bzang mo ci khrom gyi dpa' bos gang smras pa de thams cad bden du re 'am/ de ni gnas gsum gyis blta bar bya ste/ bcom pa dang / bros pa dang / rgyal srid las nyams pa zhig na'o/ /des smras pa/ rje'i sras gal te de lta na thong / bzhud la dus ston nyams su myong bar bgyis nas byon to/ /des smras pa/ bzang mo legs kyis de bzhin du byas 'dong ngo zhes de gnyis dong nas rim gyis 'phags rgyal du phyin pa dang / snams byed kyis sgo ba la kye skyes bu rta mangs zhes bya ba'i khyim gang yin zhes dris pa dang / des de chung ma dang bcas te rgyal po gtum po rab snang gi drung du khrid pa dang / rgyal pos rgyang ring po nas zhes byas te 'ongs pa legs so zhes bya ba'i kun tu spyod pa kun tu spyad nas/ snams byed khyod 'ongs sam/ lha bdag mchis so/ /rgyal po de spyi cer zhig yin pa las/ des cod pan bcings pas des rgyal po ngo ma shes so/ /rgyal pos seng ge'i khri las babs pa dang / des ngo shes nas des chung ma dang bcas te rkang pa la phyag byas so/ /rgyal po gtum po rab snang gis kyang rim gro cher byas nas btsun mo'i 'khor gyi nang du khrid de dril phyi dang khrus byas zan byin nas nyal khang yang byin te btsun mo'i 'khor rnams la bsgo ba 'di dag nga'i pha ma yin te/ de'i phyir khyed kyis 'di gnyis la bza' ba dang / btung ba dang / mal cha dang / stan dang / bran pho dang / bran mo dang / las byed pa'i mi dang / rim gro ba dang / yo byad dag gis rim gro gyis shig /de rgyal pos bkur sti dang mchod pa byas so snyam nas btsun mo'i 'khor dang / gzhon nu dang blon po dang / pho brang 'khor gyi mi thams cad kyi rim gro bya bar brtsams so/ /zhing pa snams byed cung zad cig 'dug nas smras pa/ lha mkhyen par mdzod cig /bdag mchis te slar lha'i zhal lta ba mi dka' lags so/ /rgyal pos smras pa/ snams byed 'di nyid du 'dug shig dang lhan cig rgyal srid gzung ngo / /des smras pa/ lha zhing pa bdag lta bus rgyal srid gzung ba'i rngo ci zhig thog /rgyal pos smras pa/ snams byed de'i tshe ni khyod na re gal te bdag rgyal po de'i blon po 'am/ dmag dpon du gyur na bdag gis myur zhing myur bar rgyal po pad ma'i snying po can mgul nas btags te 'phags rgyal du khrid pa zhig ces zer/ da ni mi nus so zhes zer na de ji lta bu zhig ces byas pa dang / de cang mi zer bar 'dug go/ / rgyal po gtum po rab snang la blon po lnga brgya yod de/ des de dag la de gsor bcug go/ /de dag gis de gsos pa dang / de'i ming gsos pa gsos pa zhes bya bar chags so/ /dus gzhan zhig na rgyal pos de la dris pa/ gsos pa khyod ji lta zhig 'dug / lha ji 'dra zhig mchis/ bdag la blon po de rnams brnyas bzhin bgyid mod rgyal pos smras pa/ gsos pa de lta na de rnams dgos pa byung ba'i gros byed pa'i nang du khyod kyang zhugs shig dang / su yang khyod la ma gus par mi byed do/ /des smras pa/ lha zhing pa bdag lta bus gros dag gi nang du 'jug pa'i rngo ci zhig thog /rgyal pos gsos pa de bzhin du gyis shig dang blon po de thams cad gus pa byed par 'gyur ro zhes bsgo ba dang / de cang mi zer bar 'dug go/ /ci tsam dus gzhan zhig na rgyal po gtum po rab snang blon po'i tshogs kyis bskor cing 'dug pa dang / des gsos pa smrar gzhug par 'dod pa'i blo sngon du btang ste blon po rnams la shes ldan dag don 'di ji ltar bya zhes rmas pa dang / de na kha cig gis smras pa/ lha de 'di dang 'di lta bur bgyi/ rgyal pos smras pa/ don 'di ni de ltar mi bya'o/ /gzhan dag cig gis smras pa/ lha don 'di ni 'di dang 'di lta bur bgyi'o/ /rgyal pos smras pa/ don 'di ni de ltar mi bya'o/ /rgyal pos gsos pa la don 'di ji ltar bya zhes rmas pa dang des lha don 'di ni 'di ltar bgyi ste/ de ltar mdzad na legs par 'gyur ro zhes smras pa dang / rgyal pos de bzhin du byas so/ /blon po rnams kyis smras pa/ rgyal po yang 'di'i gros bzhin mdzad pas de la ma gus par mi bya'o zhes de dag gis de la gus pa bya bar brtsams so/ /yang rgyal pos gsos pa la dris pa/ khyod ji lta zhing 'dug /des smras pa/ lha ci 'dra zhing mchis/ re shig dang por bdag la khyim ma mchis so/ /rgyal pos blon po rnams la bsgo ba/ shes ldan dag gsos pa la khyim byin cig /de dag gis smras pa/ lha blon po che ge mo zhig bgyi ba dus las 'das pa de'i khyim zhig mchis te/ de'i mchis brang yang de na mchis so/ /rgyal pos khyim de chung ma dang nor du bcas par gsos pa la byin cig ces bsgo ba dang / de dag gis khyim de chung ma dang bcas te gsos pa la byin no/ /yang rgyal pos gsos pa la rmas pa/ gsos pa khyod ji lta zhing 'dug /des smras pa/ lha mchis brang gi 'khor rnams mi 'di zhing pa'o zhes brnyas par bgyid lags so/ / rgyal pos smras pa/ gsos pa gal te de lta na gang gi tshe khyod khrus byed par 'dod pa de'i tshe ngas khyod la 'gugs pa gtang dang khyod kyis de la khrus zin te 'ong ngo zhes byos shig /gsos pas smras pa/ ji ltar bdag gis lha'i bka' gcag / rgyal pos smras pa/ gsos pa ngas khyod la gnang na 'di la 'gal ba ci zhig yod/ gang gi tshe khyod zan za bar 'dod pa de'i tshe ngas 'gugs pa gnyis pa gtang gis de la yang khyod kyis zan zos te 'ong ngo zhes gyis shig dang / de nas nga nyid khyod kyi khyim du 'ongs te/ 'ongs nas khyod dang lhan cig tu snod cig tu zan bza'o/ /des smras pa/ lha bdag ni 'bangs lags/ khyod ni rje bo lags pas bdag khyod dang lhan cig gcig tu 'tshal ma mi 'tshal te/ de ni cha ma lags so/ /rgyal pos gsos pa ngas khyod la gnang na 'di la 'gal ba ci zhig yod/ khyod zo shig dang de lta na de dag khyod la gus pa byed par 'gyur ro zhes bsgo ba dang des khas blangs nas cang mi zer bar 'dug go/ /de nas rgyal pos de khrus byed pa'i dus su gsos pa dgos pa cung zad cig yod kyis myur du shog shig ces pho nya btang ba dang / des de'i drung du song ste smras pa/ gsos pa dgos pa cung zad cig yod kyis rings par shog shig ces lhas bka' stsal to/ /des smras pa/ kye nang rje khrus byas te 'ong gis song shig ces byas pa dang / mi de slar song ngo / /de'i chung ma'i 'khor dag cig gtam gleng bar brtsams pa phu nu mo'u bu cag gi khyo zhing pa 'di 'di ltar tshod med de/ lha'i bka' khyad du gsod pa la ltos/ de na kha cig na re phu nu mo gang dag rigs ngan pa las byung ba de dag ni gyi nas kyang dregs par 'gyur ro zhes zer ro/ / gzhan dag na re phu nu mo ma rings par ltos shig dang / mthon po'i mtha' ltung bas na gdon mi za bar rgyal pos 'di brlag par 'gyur ro zhes zer ro/ /de khrus byas nas zan bza' bar brtsams pa na rgyal pos de la gsos pa bya ba cung zad cig yod pa mi slebs kyis rings par shog shig ces pho nya gnyis pa btang ba dang / des der song ste de bzhin du bsgo na/ des smras pa/ kye mi khyod song shig zan zos te 'ong ngo / /ji tsam na rgyal po nyid 'ongs nas smras pa/ gsos pa ci zan za 'am/ des smras pa/ lha 'tshal ma 'tshal lo/ /rgyal pos smras pa/ gsos pa nga la 'gron mi bya 'am/ des smras pa/ lha 'gron bgyi yis bshos gsol cig /chung ma dag gis bsams pa/ lha 'di dang lhan cig bzhad bgad mdzad do snyam nas de dag ngo mtshar du gyur te mig tshugs su rtog par brtsams so/ /rgyal pos rkang pa dang lag pa bkrus te de dang lhan cig tu zan bza' bar brtsams pa dang / chung ma rnams kyis mthong nas sngangs te phan tshun du smras pa/ phu nu mo bdag cag gis 'di la 'di zhing pa'o zhes brnyas pa byas na lha 'di dang lhan cig bshos gsol ba la ltos/ de na kha cig gis smras pa/ phu nu mo 'di la ji ltar bsgrub par bya/ gzhan dag gis smras pa/ 'di la ci zhig bsgrub tu yod/ /gang dang lhan cig rgyal po bshos gsol ba de la bdag cag gis bkur sti ma byas na ji ste rgyal pos mkhyen na bdag cag la gdon mi za bar gnod pa byed par 'gyur bas gang thal de thal du zad/ da ni nam yang de la mi gus pa mi bya'o zhes byas pa dang / gzhan dag gis smras pa/ legs kyis de bzhin du bya'o zhes de dag 'tsher zhing mi dga' bzhin du de'i ngag mi gcog go/ /yang rgyal pos gsos pa la ji lta zhing 'dug ces rmas pa dang / lha ci 'dra zhing mchis/ khyod kyi zhang po de bdag la shin tu khyad du 'gums lags mod/ rgyal pos smras pa/ gsos pa de lta bu bya bar mi nus mod kyi 'on kyang thams cad khyod kho na la rag las kyis khyod nyid shes so/ /des smras pa/ lha gal te de lta na khyod kyis bdag la bka' gyod mi rma bar ci gnang / rgyal pos smras pa/ legs kyis de bzhin du gyis shig /ji tsam dus gzhan zhig na gsos pa srang gi nang nas song ba dang / de na pha ma dang bral ba'i byis pa gnyis shig ci dgar rgyu zhing gnas pa gang yang rung ba nyin par gyi zas bsgrubs nas ngan gong gis rtse zhing 'dug go/ /ji tsam na bran mo zhig chu'i bum pa khyer nas lam de nas 'gro ba dang de na khye'u cig gis grogs po ltos shig ri lu'i bum pa 'di brtol lo zhes smras pa dang / des smras pa/ gal te khyod kyis ri lu skam pos bu ga phyung na de ni ngo mtshar mi che'o/ /ngas ri lu gsher ba 'dis glan pa gang yin pa 'di ni ngo mtshar che'o/ /des legs kyis de bzhin du bya'o zhes smras nas/ des de la ri lu skam pos brtol ba dang / der gsher bas klan to/ /de nas gsos pas de dag mthong nas shin tu ngo mtshar skyes te/ des bsams pa/ de gnyis kyis bstangs na de la sha glan par nus so snyam du rig nas kwa'i byis pa khyed gnyis su'i yin zhes dris pa dang / de gnyis kyis smras pa/ lha bdag cag pha ma dang bral nas gang yang rung ba nas nyin par gyi zas tshol ba zhig lags so/ /des smras pa/ gal te de lta na ci nga'i gan du mi 'dug gam/ lha mchis par ni bgyi na/ 'on kyang gsol ba zhig mchis te/ bdag cag gis khyod kyi las ci zhig bgyi bar 'tshal/ des smras pa/ cung zad kyang byar med kyi/ ngan gong 'di nyid goms par byed du gzhug cing gzhag go/ /'on kyang khyod kyis nga'i don gcig bya ste/ gang zhig nga dang lhan cig tu thab mo byed pa de'i kha khyed gnyis kyis mi gtsang ba'i nang du bsgres pa'i ri lus khong shig / de gnyis kyis smras pa/ lha legs kyis de bzhin du bgyi'o/ /ji tsam dus gzhan zhig na ji zhig gi phyir de de dang lhan cig tu thab mo byed par brtsams pa na de gnyis kyis de'i khar mi gtsang ba'i nang du bsgres pa'i ri lus bkang ba dang / de skyengs nas la gor du phyis te kha btsums nas spobs pa med par gyur to/ /yang rgyal pos gsos pa la gsos pa khyod ji lta zhing 'dug ces rmas pa dang / des smras pa/ lha ci 'dra zhing mchis/ khyod kyi nang mi des zhing pa'i mi yin no zhes bdag la brnyas par bas mod/ rgyal pos smras pa/ gsos pa gal te de lta na gang gi tshe nga btsun mo'i 'khor gyi nang du song ba de'i tshe khyod shog la rgyal po ga la bzhugs shes dris shig / gal te btsun mo'i 'khor gyi nang na bzhugs so zhes zer na de btsun mo'i 'khor gyi nang du bzhud cing gnas na rgyal po'i bya ba dang rgyal po'i don dag nyams par 'gyur ro zhes smros shig / gal te yang der nga'i mal lam khri dag mthong na khyod der 'dug shig dang / ngas khyod kyi rkang pa bkru bar bya'o/ /des smras pa/ lha khyod ni rje lags/ bdag ni 'bangs lags pas de ji ltar rung ste de ni cha ma lags so/ /rgyal pos smras pa/ gsos pa nga de ltar 'dod na 'di la khyod la 'gal ba ci zhig yod/ de ltar na de dag khyod la rim gro byed par 'gyur ro zhes byas pa dang / des khas blangs nas thams cad rim gyis byas so/ /rgyal po'i mal stan gang yin pa'i steng du re shig ngal bso'o zhes byas nas nyal ba dang / de nyid du gnyid kyis log go/ /rgyal po phyir byung nas 'di su zhig ces rmas pa dang / de dag gis smras pa/ gsos pa lags so/ /rgyal pos smras pa/ 'di sus kyang rkang pa ma bkrus sam/ chu khyer te shog shig rkang pa bkru'o zhes rgyal pos de'i rkang pa bkrus pa dang / de dag dogs shing mi dga' bzhin de la rim gro bya bar brtsams so/ /rgyal po gtum po rab snang bud med la brkam chags can zhig pas de dus gzhan zhig na blon po'i bu ne'u ldangs dag dang lhan cig khang bzangs kyi steng du song nas de dag dang / gtam bzang po ma yin pa zer zhing 'dug ste/ shes ldan dag grong dang / grong rdal dang / yul 'khor gang na bud med bzang / de na kha cig gis smras pa/ lha kan n+ya kub dza na bud med bzang lags so/ /gzhan dag gis smras pa/ lha kam po dzi ka pa'i bud med bzang lags so/ /gzhan dag gis smras pa/ lha sbrul gdug pa dag bzang lags/ gzhan dag gis smras pa/ grong khyer gzhan na gnas pa'i bud med dag lta zhog 'phags rgyal 'di nyid na gzugs kyis 'tsho ba bzang mo zhes bgyi ba gang zhig mthong na sum bcu rtsa gsum pas bkur ba'i lha mo gzugs dang / kha dog dang / na tshod dang / dbyibs dang ldan pa yang nyi ma'i 'od zer gyi snang bas lha'i gzhal med khang na gnas pa'i skar ma rnams kyi 'od kyi snang ba zil gyis gnon pa de lta bu zhig gnas lags so/ /rgyal pos de'i gzugs dang na tshod kyi yon tan brjod pa thos nas lhag par gzhan gyi bud med gyi gan du 'gro 'dod par gyur te cha lugs mi mngon par byas nas de nyid kyi nub mo kAr ShA pa Na lnga brgya khyer te de'i khyim du song ba dang / des de la byon pa legs so zhes bya ba'i kun du spyod pa kun du spyad nas mngag gzhug ma'i bu mo la gtad do/ /bu mo song la rigs kyi bu 'di dril phyi dang khrus gyis shig /jo mo de ltar 'tshal lo zhes bu mo des gzugs kyis 'tsho ba bzang mo'i ltar mnyan te rgyal po gtum po rab snang la dril phyi bya bar brtsams so/ /de de la dril phyi byed pa na mi gzhan zhig kyang kAr ShA pa Na lnga brgya khyer te der 'ongs nas des bzang mo dga' mgur spyad kyis 'dong zhes smras so/ /gzugs kyis 'tsho ba bzang mo de'i kun du spyod pa ni gal te cig nang du 'ongs la yang cig 'ongs na snga ma bsad cing phyi ma dang / lhan cig dga' mgur spyod do/ /bu mo des rgyal po gtum po rab snang de'i gzugs dang na tshod mdzes pa de mthong nas 'di lta bu'i rgyal rigs kyi bu yang sdig pa'i chos kun du spyod pa 'dis gsad do snyam nas ngus so/ /des ngus pa dang / mchi ma'i thigs pa rgyal po gtum po rab snang gi lus la phog par gyur to/ /des rgyal po gtum po rab snang gis gyen du bltas na bu mo de ngu nas/ des smras pa/ bu mo ci'i phyir ngu / des smras pa/ gzhon nu chen po ma lags so/ /rgyal po dogs par gyur nas yang dris pa/ bu mo ci'i phyir ngu ba bag ma tsha bar smros shig ces dris pa dang / des rgyas par brjod do/ /rgyal po gtum po rab snang gis smras pa/ bu mo gang gis na nga 'bros pa'i thabs lta 'ga' yod dam/ des smras pa/ 'di'i khyim kun nas gshed ma'i mi ral gri thogs pas bskor bas med mod kyi 'on kyang phyogs gcig cig yod na/ de mi gtsang bas de lta zhig smras kyang ci rung / rgyal pos smras pa/ bu mo gtsang yang rung mi gtsang yang rung smros la srog byin cig /des smras pa/ phyogs 'di na chab kung sa zhig yod de de lcags kyi phur pas btab cing 'dug gis gal te 'byin nus na de phye la bros shig / rgyal pos smras pa/ bu mo tshur phyogs de gang yin pa ston cig dang / ngas de dbyung nus so zhes smras pa dang / des phyogs de de la bstan to/ / smad 'tshong ma de'i khyim dang 'dab chags na bram ze ltas mkhan zhig gi khyim yod de/ re shig na bram ze de gcin gcir byung na/ de'i chung ma yang chu khyer nas phyi bzhin du 'ongs te/ bram ze des skar ma la bltas pa dang / mi bzang bar mthong nas des bram ze mo la smras pa/ bram ze mo skar ma mi bzang bas lha ni mi bzad pa dog pa nyam nga bar gyur to/ /des smras pa/ bram ze de skad ma zer cig de ni rgyal po khro bar 'gyur ro/ /des smras pa/ bram ze mo bdag cag ni rgyal po'i skyabs na bde bar gnas pa yin pas des na mi dga' ste de skad smra mod/ de thams cad rgyal pos thos so/ /de nas rgyal pos lcags kyi phur pa de bsgul bar brtsams na ma nus nas stobs dang ldan pa des bsgrims te bsgul nas phyin pa dang / bshang ba 'bab pa de dang lhan cig byung ste song ngo / /bram ze des bram ze mo de la smras pa/ bram ze mo lha de'i mi bzad pa dogs pa nyam nga bar gyur pa gang yin pa de dang lha bral te/ rgyal po gson pa bdag cag dbang thang che na/ rgyal po ni de ltar sbags bzhin du btsun mo zhi ba'i thad du song ngo / /des lha de ci zhig ces smras pa dang / des ji lta bur gyur pa smras so/ /btsun mo zhi ba mig mchi mas gang bzhin du de smig ma'i tshal pas bzhar to/ / smig ma'i tshal pas bzhar nas sa gar gyis dril phyi byas so/ /sa gar gyis dril phyi byas nas spos sna tshogs kyis bsgos pa'i chus bkrus te 'thun pa'i gos dag bskon to/ /de phyi de nyin par don bya ba'i sar 'dug nas blon po rnams la smras pa/ shes ldan dag ltas mkhan dag bos shig /de dag gis ltas mkhan dag bos pa dang / de dag la rgyal pos rmas pa/ shes ldan dag mdang nga'i mtshan mo ji lta bur 'das par gyur/ de dag gis smras pa/ lha ji ltar rgyal po rgyal rigs spyi bo nas dbang bskur ba chos bzhin du sa skyong ba ltar lags so/ /rgyal pos smras pa/ shes ldan dag phyogs che ge mo zhig na bram ze ltas mkhan zhig gnas pa de bos shig / de dag gis de'i thog tu rgyal po'i mi dag btang ngo / /de dag der song nas bram ze de la lha 'bod do zhes bsgo ba dang / des shes ldan dag lhas ji ltar bka' stsal pa bzhin 'tshal gyis song shig gos 'tshal la mchi'o zhes smras so/ /de dag slar song ba dang bram ze mo des smras pa/ bram ze bdag gis sngar khyod la rgyal po gtum po khro bar 'gyur ba ma smra shig ces byas na khyod nga'i ngag nyan du ma btub pas da ni de byung ngo / /des bram ze mo la thams cad legs par 'gyur gyis bag ma tsha zhig ces smras nas des de dbugs phyung ste rgyal po'i drung du song ngo / /rgyal pos rgyang ring po nas mthong nas byon pa legs so zhes bya ba'i tshig brjod nas mkhan po byon pa legs te phyogs 'dir bzhugs shig ces byas pa dang / de yid dga' ba skyes nas rgyal po la rgyal ba dang tshe spel ba byas nas ji ltar sgo ba'i gnas su 'dug go/ /rgyal pos yud tsam zhig bsdad nas smras pa/ mkhan po khyod ltas mkhyen tam/ des smras pa/ lha mnyes par rngo thog go/ /mkhan po bdag mdang ji lta zhig tu 'das par 'gyur/ lha mi bzad pa dog pa nyam nga bar gyur pa las khyod bsod nams kyi mthu can zhig ste de'i slad du mi mdza' ba rnams kyi nang nas 'o brgyal te thar bar gyur to zhes byas pa dang / rgyal pos mgu nas shes ldan dag mkhan pos ji skad smras pa de de bzhin te gzhan du ma yin no zhes smras nas/ mkhan po khyod la dam pa ci zhig dbul ba gsungs shig ces smras pa dang / des smras pa/ re shig nang mi dang mchid gros 'tshal te slad kyis gsol bar 'tshal lo/ /rgyal pos smras pa/ mkhan po legs kyis de bzhin gyis shig /des rings par 'gros bslang nas song ste rang gi khyim du phyin pa dang / nang mi rnams la bos te smras pa/ nga la lhas dam pa sbyin par chad na/ khyod ci 'dod pa smros shig /bram ze mos smras pa/ bram ze re shig khyod nyid la dris khyod ci 'dod/ /des smras pa/ bram ze mo nga ni grong mchog lnga'o/ /des smras pa/ bram ze gal te de lta na bdag ni ba lang brgya'o/ /bus smras pa/ yab bdag ni cang shes kyi shing rta'o/ /bu mos smras pa/ bdag ni nor bu'i rna cha gdub 'khor ro/ /de'i bran mo skyed mas smras pa/ ci ste khyed cag de lta bu 'dod na bdag ni rdo leb bzang po'o/ /bram zes bsams pa/ tshigs su bcad pa'i dbyangs kyis lha las dam pa gsol gyi phal pa gzhan ltar ni mi bya'o/ /snyam du bsams nas tshigs su bcad pa sems shing rgyal po'i drung du song ste smras pa/ lha bdag cag ci 'tshal ba de gsan du gsol/ bdag ni grong khyer lnga zhig 'tshal/ /bram ze mo yang ba lang brgya/ / bu ni cang shes shing rta ste/ /bu mo nor bu'i rna cha 'tshal/ /bdag gi bran mo skyed ma ste/ /de yang rdo leb bzang po 'tshal/ /rgyal po gtum po rab snang gis kyang de la de bzhin du slar tshigs su bcad de smras pa/ khyod la grong mchog lnga sbyin te/ /chung ma la yang ba lang brgya/ /bu la rta yi shing rta brgyan/ /bu mo la yang rna cha dag /bran mo skyed ma slong ba yi/ /rdo leb bzang po 'dod pa yang / /de yi re ba 'bras yod par/ /ji ltar 'dod pa bskang bar bya/ /de nas rgyal pos de la ji ltar 'dod pa'i dam pa byin nas smras pa/ mkhan po rub ste rgyal srid bgyis/ bdag la gros ston cig /des lha bdag cag ni bram ze lags pas de ni bdag gi cha ma lags so zhes smras pa dang / des de nan tan gyis mdun na 'don du bcug go/ /re shig cig na rgyal po gtum po rab snang la ri khrod pa skya bseng pa zhes bya ba dag log pa dang / des gsos pa la bka' stsal pa/ song la skya bseng dag rnal du phob shig /des kyang dpung gi tshogs yan lag bzhi pa glang po che'i tshogs dang / rta pa'i tshogs dang / shing rta pa'i tshogs dang / dpung bu chung gi tshogs go bskon nas song ngo / /des de dag rnal du phab ste/ de nas der gte'u yang bzung / dpya nar ma dang / bla skyes kyang 'bul du bcug nas song ngo / /rgyal pos ji ltar gsos pas skya bsing dag rnal du phab nas gte'u yang bzung / dpya nar ma dang / bla skyes kyang 'bul du bcug nas 'ongs pa thos so/ /des thos nas kyang dpung gi tshogs yan lag bzhi pa dang bsur song ngo / /ji tsam zhig na gte'u pa de'i nang na ri brags kyi bu mo shu ba dang g.yan pas thebs pa zhig mthong ngo / /mthong nas kyang gsos pa la dris pa/ gsos pa 'di dang lhan cig dga' mgur spyod pa'i mi lta 'ga' yod dam/ des smras pa/ lha dga' mgur spyod pa 'ba' shig tu ma bas/ gang la 'di stsal pa de'i rgyab tu 'di 'tshal na/ rta skad 'byin par bgyid pa de gnas mchis so/ /rgyal pos smras pa/ gsos pa de ci de bzhin du 'gyur ram/ des smras pa/ lha spyan sngar bab par bgyi'o/ /gsos pas bu mo de sman pa rnams la gtad nas shes ldan dag kho bos yo byad thams cad sbyar gyis khyed kyis 'di dpyad gyis shig / de dag gis de la dpyad byas pa dang nad kyang sos par gyur to/ /de nas rim gyis yo byad kyi khyad par rnams kyis bskyed pas gzugs bzang mor gyur pa dang / gsos pas de bu mor bzung ste/ de'i ming skya bseng gi bu mo sgrol ma zhes bya bar btags so/ /gsos pas bu mo de la bu mo ngas lha 'dir gdugs tshod la spyan drang gis khyod rgyan thams cad kyis klubs la lha la bdag nyid ston cig ces bsgo ba dang / de cang mi smra bar 'dug go/ /gsos pas rgyal po la smras pa/ lhas bdag gi sdum pa yongs su spangs pa lta zhig da mi gzigs sam/ des smras pa/ gsos pa khyod kyis ma bos par ji ltar blta bar bya/ des smras pa/ lha gal te de lta na spyan 'dren no/ /legs te phan btags so/ /gsos pas rgyal po la 'os pa'i bza' ba dang btung ba dag sbyar te khyim yang byi dor byas pa dang / rgyal po de'i khyim du 'ongs so/ /des kyang rgyal po la 'os pa'i dril phyi dag gis phyis nas dri sna tshogs kyis bsgos pa'i chus ni bkrus/ byug pa rnam pa sna tshogs kyis ni byugs/ gos rnam pa sna tshogs ni bskon te/ rgyal po la 'os pa'i bshos gsol nas gsos pa dang lhan cig tu gtam dag gleng zhing 'dug pa na des kyang yol bas bskor ba'i nang nas pho long 'phangs nas des yol ba bzlog ste yab cig pho long slar stsol cig ces smras pa dang / de na tshod gzhon zhing mdzes pa rgyal pos mthong ngo / /mthong ma thag tu chags par gyur te smras pa/ gsos pa 'di su'i bu mo yin/ lha bdag gi bu mo lags so/ /gsos pa ci 'ga' zhig la byin nam/ lha ma stsal to/ /gsos pa gal te de lta na ci'i phyir nga la mi sbyin/ lha 'bul bar 'tshal lo/ /de rgyal po gtum po rab snang gis dpal gyi 'byor pa chen pos chung mar blangs so/ /sar pas rnying pa thams cad zil gyis gnon pa 'di ni chos nyid yin pas/ rgyal po yang de la gcig tu blta zhing sems chags pas las gzhan btang ste de kho na lhur len cing 'dug go/ /gsos pas bsams pa/ sngon dam bcas pa bya ba'i dus de ni 'di yin no snyam nas bu mo la 'di skad ces smras so/ /bu mo khyod kyis rgyal po 'di'i rgyab tu zhon nas rta skad zer du gzhug par nus sam/ des cung zad cig bgad nas smras pa/ yab cig re shig gal te rngo thog gam mi thog blta bar bgyi'o// //'dul ba phran tshegs kyi gzhi/ bam po nyi shu bdun pa/ bud med rnams ni ma bslabs par mkhas pa yin pas de gos dri ma can bgos nas khri'u dra ba can gyi steng na nyal zhing 'dug pa dang / rgyal pos smras pa/ lha mo 'di ci'i tha tshig / des smras pa/ lha lha rnams 'khrugs par gyur to/ /des smras pa/ khyod kyis lha rnams la 'khrugs ci byas/ lha gang gi tshe lhas bdag gi pha ri khrod pa skya bseng 'bebs su btang ba de'i tshe bdag gis de zhi bar bgyi ba'i slad du lha rnams la gsol ba btab ste/ gal te bdag gi phas don yang dag par grub nas slar 'khor na gang gis bdag blangs pa de'i rgyab tu bdag zhon la rta skad zer du stsal to zhes bgyis pa las bdag ni lha la phul/ lha'i btsun mo'i 'khor ni rgya ches pas cis kyang bdag gis don 'di mi bgyis par 'gyur bas so/ /'dod pa'i 'dod chags la zhen pa rnams kyis ni mi bya ba ci yang med pa yin pas des smras pa/ lha mo khyod kyis don du nga'i ched du gsol ba byas pa yin pas thams cad bsgrub kyis bde bar 'dug shig /de cang mi zer bar 'dug go/ /rgyal po gtum po rab snang gis smras pa/ lha mo khyod ci'i phyir mi smra bar 'dug /lha mo khyod kyis gsol pa gzhan yang cung zad med grang / des smras pa/ lha cung zad kyang ma mchis mod kyi 'on kyang de'i dus su bram ze mdun na 'don gyis lha'i shis pa brjod pa brjod par bgyi/ pi bang len pa'i mis kyang pi bang dag blang bar bgyi'o/ /des smras pa/ lha mo de yang sla ste bram ze mdun na 'don ni yod na 'on kyang pi bang len pa zhig btsal bar bya'o/ /des smras pa/ lha legs kyis pi bang len pa btsal du gsol/ de'i tshe yul sa 'dzin nas sa 'dzin pa zhig zong thogs nas 'phags rgyal du 'ongs so/ /de smad 'tshong ma la ji ltar 'dod pa'i 'dod chags kyis zil gyis non pa des zong thams cad btsongs te/ de dang lhan cig zos pa de ltar lhag par chags so/ /de'i gla mi gang dag yin pa de dag thams cad kyis bor nas bros pa dang / des de la smras pa/ rje'i sras bdag ni zhing pa ma lags tshong pa ma lags/ grong mi zong thogs nas yul gzhan du 'gro ba yang ma lags kyi/ gzhan du na khyed lta bu dag las rnyed pa gang lags pa des 'tsho ba lags pas kAr ShA pa Na dag stsol cig / yang na skyes bu gzhan gyi skabs phye shig /des smras pa/ bzang mo kho bo la kAr ShA pa Na dag med mod/ ji ste kAr ShA pa Na dag bdog na khyod las lhag pa gzhan su zhig yod de sbyin ches mod/ 'on kyang khyod bdag la sdug pas 'dir 'dug gis ma bskrad cig /ci ste bdag gis smras pa gang yin pa de byed na de lta na gdod bdag khyod la sdug par shes so/ /des smras pa/ bzang mo mgo bos bkur ro/ /des bshang ba byas nas de'i steng du rgya shug gi tshig gu bzhag ste smras pa/ ci ste khyod bdag la byams na rgya shug gi tshig gu 'di sos zung shig / des bzung bar brtsams pa dang / des rdog pa cig bsnun nas phul te bkren pa ci 'di lta bu dag kyang byed dam brtsog pa khyod dang lhan cig mi 'dug gis song shig ces smras nas/ des de khyim nas bskrad do/ /de yang pi bang la mkhas pa zhig ste/ pi bang len pas 'tsho ba tshol bar gyur to/ /rgyal pos gsos pa la smras pa/ khyod kyi bu mos 'di lta 'di ltar lha rnams la gsol ba byas te bram ze mdun na 'don ni nga la yod na pi bang sus blang par bya/ des smras pa/ lha sa 'dzin pa pi bang len pas 'tsho bar bgyid pa cig mchis kyis de'i mig dar gyis bkab la nang du dgug par bgyi'o/ / rgyal pos smras pa/ gsos pa legs kyis de bzhin du gyis la khug shig /rgyal po dang mdun na 'don khang pa bdun rtseg gi steng du 'dzegs nas des mdun na 'don la ji ltar gyur pa thams cad bsnyad pa dang / de cang mi zer bar 'dug go/ /gsos pas kyang sa 'dzin pa'i mig dar gyis bkab nas khang pa bdun brtseg gi steng du bzhag go/ /skya bseng gi bu mo sgrol ma yang ngo mtshar dang / bkra shis dang / bde legs dag byas te/ gos dkar po bgos nas rgyal po'i rgyab tu zhon pa dang bram ze mdun na 'don gyis ni shis par brjod pa brjod par brtsams/ sa 'dzin pa'i mis ni pi bang blangs/ rgyal po gtum po rab snang yang rta'i skad 'byin par zhugs pa dang / sa 'dzin pa des bsams pa/ khang pa 'di ni bdun rtseg yin pas rtas 'dir ga la thar/ gdon mi za bar 'dir bdag lta bu bud med kyi dbang du gyur pa 'ga' zhig bud med kyis co dris so snyam nas des glu tshig tu blang ba/ rgya shug tshig gus gyur pa ltar/ /rgya shug tshig gus gyur pa ltar/ /don 'di'ang phal cher 'dra ba yin/ /don 'di'ang phal cher 'dra ba yin/ / zhes zer zhing de pi bang mi len par yang nas yang du rgyun mi 'chad par glu len cing glu tshig de smra'o/ /rgyal pos de la dris pa/ kye skyes bu glu de'i don 'di ci yin/ des ji ltar gyur pa rnams brjod pa dang / des bsams pa/ 'dis bdag shes kyis yul dbyung bar bya'o snyam nas rgyal pos de la kAr ShA pa Na lnga brgya byin nas yul phyung ngo / /dus gzhan zhig na mdun na 'don gyis rgyal po la lha khyod kyis mi rigs pa zhig bgyis te/ rgyal po dag ni bud med kyi dbang du 'gyur ba ma lags so zhes smras pa dang / de snyad med par cang mi zer bar 'dug go/ /des phyi de nyin gsos pa la smras pa/ deng bram ze des 'di skad ces smras na/ de rang gi chung mas mgo dbyir gzhug na khyod kyis nus sam/ des lha re shig bltas te bgyi'o zhes smras nas/ gsos pas khyim du song ste chung ma la smras pa/ bzang mo bram ze mdun na 'don gyis lha la 'di dang 'di skad ces smras pa las de kho bo la smra na/ khyod kyis ci nas bram ze de rang gi chung mas mgo dbyir gzhug pa de lta bu'i sbyor ba bya bar nus sam/ des smras pa/ rje'i sras 'di la ci zhig bgyir mchis/ de lta zhig bgyis lags su bas kyis gzigs shig / des smras pa/ bzang mo gal te de lta na legs so/ /g.yon can gyi chung ma g.yon can nyid du 'gyur bas des bram ze de'i chung ma dang lhan cig mdza' mor bya bar brtsams so/ /gang gi tshe de gnyis phan tshun yid phebs par gyur pa de'i tshe des bram ze mo la smras pa/ grogs mo bdag gi khyim thab ni rab tu byams te/ de bdag gis gang smras pa de byed do/ /des smras pa/ grogs mos kho mo la thub re skan/ ji ltar khyim thab bdag gi dbang du 'gyur ba de ltar khyod kyis ga la 'gyur/ gsos pa'i chung mas smras pa/ grogs mo ci ste khyod kyi khyim thab khyed kyi dbang du 'gyur na blta yis de'i mgo phyi shig /des de nga rgyal bskyed pas grogs mo dbyis ltos shig ces smras nas/ de gos dri ma can gyon nas khri'u dra ba can gyi steng na nyal te 'dug go/ /mdun na 'don gyis dris pa/ bram ze mo 'di ci'i tha tshig des smras pa/ bram ze lha rnams 'khrugs par gyur to/ /des smras pa/ bram ze mo khyod kyi khyim na mi bdog gam ci khyod kyis lha rnams la khas blangs pa gang yin pa de thams cad gyis shig dang bde bar 'gyur ro/ / de cang mi zer bar 'dug pa dang / mdun na 'don gyis smras pa/ bram ze mo khyod kyis lha rnams la ci zhig khas blangs/ des smras pa/ bram ze gang gi tshe khyod bram ze'i tshul du gnas pa na lhas bos pa de'i tshe bdag gis lha rnams la 'di skad ces bdag gi khyim thab bde bar slar 'ongs na/ bdag gis de'i mgo phyi nas de'i skra rnams khyed la dbul lo zhes gsol ba byas pa las de'i rjes la khyod kyang longs spyod skyes par gyur/ bdag gis kyang brjed de da ni lha de rnams 'khrugs par gyur pas mdor na bdag 'gum du bas so/ /des smras pa/ bram ze mo khyod kyis gang lha rnams la gsol ba byas pa de yang nga'i ched yin pas longs shig dang lha gsol te thams cad bsgrub par bya'o/ /des gsos pa'i chung ma de la bdag gi khyim thab ni 'di skad du lha las gsol te thams cad bya'o zhes spring ba dang / des kyang gsos pa la rje'i sras mdun na 'don gyi chung ma des bdag la 'di skad du bdag gis khyim thab khas len du bcug ste/ lha la gsol nas thams cad bya'o zhes zer ro zhes spring ba mchis so/ /gsos pas kyang rgyal po la smras pa/ lha don de grub lags te mdun na 'don de khyod la zhur mchis mkhyen par mdzad du gsol/ rgyal pos smras pa/ gsos pa de nga'i ched yin pas bag ma tsha zhig /re shig na mdun na 'don de rgyal po la gsol du 'ongs te/ lha bdag lha rnams kyi don cung zad cig bgyid de zla ba drug na lha'i zhal lta zhing mchi bar 'tshal lo/ /rgyal pos smras pa/ legs kyis de bzhin du gyis shig /de khyim du song nas mgo phyi'o/ /de mgo phyi nas kyang khyim gyi nang nyid na 'dug go/ /de'i chung mas gsos pa'i chung ma la grogs mo kho mo'i khyim thab de ni mgo phyi zin no zhes spring ba dang / des kyang gsos pa la bsnyad do/ /gsos pas kyang rgyal po gtum po rab snang la smras pa dang de rab tu dga' ste mdun na 'don de khug cig ces bsgo'o/ /gsos pas kyang khye'u gnyis shig glu tshig bslabs pa/ gang na bud med gzugs ldan la/ /rigs dang ldan zhing rigs spel ma/ /de na rta med rta skad zer/ /mdun 'don mgo bo phyi la ltos/ /shes bslabs so/ /ji tsam na mdun na 'don de zhwa zhig gyon nas rgyal po'i drung du 'ongs pa dang / khye'u de gnyis kyis glu tshig bya bar brtsams pa/ gang na bud med gzugs ldan la/ /rigs dang ldan zhing rigs spel ma/ /de na rta med rta skad zer/ /zhes byas nas gzhan zhig de'i zhwa phud nas/ mdun na 'don mgo bo phyi la ltos/ /shes byas pa dang / de nas gad mo chen po byung ste/ mdun na 'don yid la ngo tsha bar gyur nas kha rog par mgo smad de sma bab nas song ngo / /gsos pas dgos pa dag byung ba na de dag la gtse bar brtsams nas gang na 'di lta bur bud med kyi dbang du gyur pa de na rgyal po'i don ga la yod ces byas pa dang / rgyal pos mdun na 'don la smras pa/ mkhan po khyod kyis gsos pa de gtse bar nus sam/ des smras pa/ lha re shig rngo thog gam mi thog bltas te bgyi'o/ /de'i tsha bo sgyu ma mkhas pa zhig yod pas des de la smras pa tsha bo gsos pa 'dis rgyal po 'khor dang bcas pa'i mdun du bdag la tho brtsams na de la khyod kyis gtse bar nus na bdag gi sha glan par 'gyur ro zhes smras pa dang / des zhang po re shig nus sam mi nus bltas te bgyi'o zhes smras nas des mig 'phrul gyis 'dron pa sprul/ phyag dar gyi phung po las khyim du sprul/ rus pa'i rus gong las ded dpon gyi chung ma gzugs bzang zhing blta na sdug pa mdzes pa zhig sprul to/ /rgyal po'i kun du spyod pa ni gal te 'dron pa 'ongs na de la bdag nyid kyis sho gam gcod pa 'am/ yang na gsos pa gtong ngo / /gsos pas 'dron po de dag las sho gam gcad par brtsams nas des 'dron po rnams la dris pa/ shes ldan dag ded dpon gyi khyim gang yin/ de dag gis khyim 'di lags so zhes bstan to/ /de der zhugs pa dang / re shig na ded dpon gyi chung ma gzugs bzang ba mdzes pa blta na sdug pa/ dbang po 'phrog pa/ sems g.yo bar byed pa zhig mthong ngo / /mthong ma thag tu chags par gyur nas/ des smras pa/ bzang mo khyod dang lhan cig dga' mgur spyad na 'dron pa'i sho gam mi gcad par bgyi'o/ /des smras pa/ rje'i sras de ltar ni bgyi na 'on kyang mtshan mo dga' mgur spyad do/ /de'i mig 'phrul gyis mtshan mor sprul pa dang / gsos pa de dang lhan cig dga' mgur spyad nas ji tsam na mgul pa nas 'khyud de gnyid kyis log go/ /mig 'phrul mkhan gyis mig 'phrul slar bsdus pa dang / gsos pa phyag dar khrod na keng rus kyi mgul nas 'khyud de nyal zhing 'dug go/ /mdun na 'don gyis rgyal po la lha gsos pa'i gnas skabs de gzigs shig ces smras pa dang / rgyal pos blta ba'i phyir srog chags brgya stong phrag du ma bsdus te song nas rgyal pos de se gol gyi sgras bslang nas gsos pa ci bud med gang dang lhan cig dga' mgur spyad pa de'i sha yang za 'am zhes smras pa dang / de rab tu skyengs nas langs te bsams pa/ 'di ltar rgyal po 'dis bdag co dris na gson te yang ci rung ba dag rang 'chi bar bya'o snyam mo/ /yang bsams pa/ bdag rang gis rang 'chi bar bya ba ni dkas song la 'phags pa kA t+yA'i bu chen po'i gan du rab tu 'byung ngo snyam nas de tshe dang ldan pa kA t+yA'i bu chen po gang na ba der song ste phyin nas tshe dang ldan pa kA t+yA'i bu chen po la 'di skad ces smras so/ /'phags pa bdag rab tu 'byung bar 'tshal gyis rab tu dbyung du gsol/ /des de rab tu phyung ste bsnyen par rdzogs par byas nas gcig las 'phros pa'i lung klog tu bcug go/ /rgyal po gtum po rab snang de med pa dang mi dga' bar gyur nas de rab tu byung ba las phab ste sngon gyi gnas ji lta ba bzhin bzhag go/ / sdom ni/ ba lang skyong dang rngon pa nyid dang ni/ /bud med rnams dang bad sa'i rgyal po dang / /nor lhas byin pa dang ni rab snang dang / /rgyal po rdo 'jog tu ni song ba dang / /rmi lam rmis par gyur pa tha ma yin/ /rgyal po gtum po rab snang mal chen por 'dug pa rnam par rtog pa 'di skyes te ci bdag 'das na gzhon nu ba lang skyong gis rgyal srid bya bar nus sam 'on te mi nus snyam mo/ /yang bsams pa/ re shig 'di bgam par bya'o snyam nas des de bos te smras pa/ bu re shig btsun mo'i 'khor du bya ba cung zad cig yod de nga zhag bdun gyi bar du btsun mo'i 'khor gyi nang na 'dug gis de'i bar du khyod kyis rgyal po gyis shig ces bsgo nas de rgyal po byed cing rgyal po gtum po rab snang ni btsun mo'i 'khor gyi nang na 'dug go/ /gzhon nu ba lang skyong yang rgol ba dang / phyir rgol ba rnams kyi tha snyad la legs par sbyong ste/ rgyal po'i mi rnams kyis byi ba byed pa dang bud med gang dag bzung ba de d ang de dag la so sor kye mi khyod bud med 'di 'dod dam zhes rmed la bud med la yang khyod skyes pa 'di 'dod dam zhes rmed cing gal te de dag phan tshun mngon par 'dod par gyur na de nas blon po rnams la shes ldan dag 'di dag phan tshun mngon par 'dod na nga ci'i phyir mi 'dod/ 'di dag la nga'i chab 'og na 'tsho ba sus kyang cung zad kyang ma smra bar 'di dag ci dgar spyod cing 'dug tu chug shig ces bsgo'o/ /dpya 'bul ba rnams la ni nan tan du lta'o/ /zhag bdun lon te rgyal po phyir byung nas gsos pa la rmas pa/ gsos pa ci gzhon nu ba lang skyong nga 'das nas rgyal srid byed nus sam/ des smras pa/ lha rngo ni thog na 'on kyang byi ba bgyid pa rnams ni dar bar 'gyur lags so/ /rgyal pos smras pa/ gsos pa byi ba byed pa dang byi ba mi byed pa zhes bya ba de ji lta bu yin/ des ji lta bu yin pa brjod pa dang / rgyal pos bsams pa ci gzhon nu 'di gzhan gyi bud med rnams la phrag dog med pa zhig gam/ 'on te rang gi chung ma la yang de bzhin pa de re shig brtag par bya'o snyam nas des sa 'dzin pa zhig las 'dzin pa khyod song la gzhon nu ba lang skyong gi chung ma dang lhan cig dga' mgur spyod cig ces bsgo ba dang / des rna ba gnyis bkag nas smras pa/ lha sdig pas brlag lags so/ /rgyal pos smras pa/ sa 'dzin pa rgyal po'i don ni de lta bur gnas pa yin gyis song shig / gal te rim pa bzhin ma byas na rgyal po'i don nyams par 'gyur ro/ /des smras pa/ lha mod la de ltar bgyi ba'i rngo mi thog pas bags kyis bgyi'o/ /des smras pa/ de bzhin du ni byed la rag na sa 'dzin pa thabs ji lta bu zhig byed/ lha de'i sdum pa dang nye ba zhig tu zong bkram la bgyis/ zong stsol cig dang de nas 'dris par bgyis nas bka' ji skad stsal pa bsgrub par bgyi'o/ /rgyal pos de la zong byin pa dang / des rdzas dag bsags te tshong zong bkram pa dang / ba lang skyong gi sgyug mo'i bran mo zhig yod pa de zong khyer nas spos kyi phur ma nyor 'ongs so/ /sa 'dzin pas bu mo de la bu mo spos kyi phur ma 'di su 'ir bya zhes dris pa dang / des smras pa/ gzhon nu ba lang skyong gi sgyug mo'i 'o/ /de ming ci zhig /ming 'di zhes bya'o/ /bu mo nga'i ma de yang ming ni de skad ces bya bas de ni nga'i ma dang 'dra'o zhes smras nas des de la spos kyi phur ma rin bskyungs nas mang du byin no/ /ba lang skyong gi sgyug mos bu mo de la dris pa/ bu mo sngon chad ni rin 'di tsam gyis rdzas nyung ngu khugs la/ da ni shin du mang du khugs pa 'di la rgyu ci yod/ /des kyang ji ltar gyur pa thams cad brjod do/ /des smras pa/ legs te/ de ni nga'i bu dang 'dra'o/ /de bzhin du lan gnyis lan gsum du byas pa dang / de de la dga' bar gyur to/ /dus gzhan zhig na sa 'dzin pas smras pa/ bu mo ma la 'di skad du ma'i zhal ltar mchi'o zhes gyis shig /des de la byas pa dang / des smras pa/ legs kyis tshur shog shig ces gyis shig /des de la smras pa dang / des skyes su dri'i rdzas dag khyer te 'ongs nas des de la brang sprad de ngus pa dang / des smras pa/ bu ci'i phyir ngu / des smras pa/ yum ci 'dra ba bdag gi ma'i dbyibs kyang de 'dra bas de'i slad du bdag mchi ma byung ngo / /des bu nga nyid khyod kyi ma de yin te/ khyod nga'i bu yin gyis ma ngu shig ces smras nas de de la lhag par dga' bar gyur to/ /ji tsam zhig na phyogs shig tu ba lang skyong gi chung ma song ba las des de bos nas bu mo tshur ming po'i zhabs la phyag gyis shig ces byas pa dang / de 'ongs so/ /ma cig bu mo 'di'i ming ci lags/ bu ming 'di zhes bya'o/ /ma cig bdag gi mna' ma yang ming yang 'di dang 'dra/ dbyibs kyang 'di dang 'dra bas 'di ni bdag gi mna' ma lags so/ /des bu legs so zhes smras so/ /gang gi tshe de dag phan tshun gcugs par gyur pa de'i tshe des g.yo thabs su na ba ltar bcos nas 'dug go/ /bu mo de yang rdzas nyor 'ongs pa dang / sa 'dzin pa'i khye'u des smras pa/ bu mo nga ni the gi na na ma cig nga ltar mi 'ong ngam/ des khyod na bar mi shes so/ /des smras pa/ de la gyis shig des de la byas pa dang / de yang blta ba'i phyir 'ongs te dris pa bu khyod ji ltar na/ des smras pa/ ma cig bdag gi bro ni ya nga ba zhig lags so/ /des smras pa/ bu sman pa la dris te dpyad dag gyis shig /des smras pa/ ma cig 'di ni dpyad kyis 'tsho ba ma lags te/ bdag nad 'di kho nas srog dang 'bral bar 'gyur ba'i gnas gang lags pa de mchis so/ /des smras pa/ bu ci sems thabs gang gis nad 'di zhi bar 'gyur/ ma cig zhi bar 'gyur ba'i thabs shig ni mchis na 'on kyang mi 'byor to/ /bu ci mi 'byor smros shig dang thams cad 'byor par bya'o/ /des smras pa/ ma cig ba lang skyong gi btsun mo dang lhan cig dga' mgur spyad na de lta na bro 'di sos par 'gyur lags so zhes smras pa dang de rab tu khros nas smras pa bkren pa khyod da shir zad khyod r gyal po'i btsun mo dang lhan cig dga' mgur spyod 'dod dam zhes des de la spyos te langs te song ngo sa 'dzin pa de g.yon can zhig pas des nor thams cad dkar chag la bris nas dkar chag de la nga shi na rdzas thams cad ba lang skyong gi sgyug mo'i yin no zhes de skad du yang bris so/ /dkar chag de de la bskur ba dang des blags nas khro ba zhi bar gyur te bsams pa de bdag gis da gzod kho na spyos te 'ongs na de bdag la je byams par gyur gyis de'i phyir bud med rnams kyi rang bzhin ni de lta bu yin pas de shi na mi rung bas de la bsgrub po snyam nas des bu mo de bos te de nas sa 'dzin pa'i bsngags pa rim gyis brjod nas smras pa bu mo khyod kyi skud po de na na de ltar rim gro 'am des smras pa ma cig sman pa ma mchis sam/ ci ste dpyad ma bgyis/ des smras pa/ bu mo de'i nad ni ya nga ba zhig ste de nad de kho nas dus byed par 'gyur ba gang yin pa'i gnas de yod na 'on kyang de na re gal te mna' ma dang lhan cig dga' mgur spyad na de lta na bdag 'tsho bar 'gyur ro zhes zer ro/ /de khros nas smras pa/ ma cig bkren pa de da dus byas su bas rgyal po'i btsun mo dang lhan cig dga' mgur spyad 'tshal lam/ des smras pa mo khyod kyi gyos po gang las skyes pa khyod shes sam/ ma cig ma 'tshal to/ /bu mo de ni sdig pa las skyes te rgyal por gyur nas dpung gi dmag mang ba yin no/ /khyod kyi khyo de yang tshong dpon zhig gi bu yin te yang rgyal por 'gyur ro/ /khyod kyang 'di dang lhan cig dga' mgur spyod cig dang / khyod las bu gang 'byung ba de yang rgyal por 'gyur ro zhes de des bslus pa dang / khas blangs nas des sa 'dzin pa'i khye'u de la spring ba/ bu bu mo 'dis khas ni blangs na khyod la gnod par byed srid kyis dus shes par gyis la shog shig ces byas so/ /sa 'dzin pas rgyal po la lha don 'di ni grub na 'on kyang re shig ba lang skyong mi gtang du gsol zhes spring ngo / /rgyal pos bsams pa/ bdag 'das nas gzhon nu ba lang skyong rgyal por 'gyur zhing de 'das nas kyang de'i bu rgyal por 'gyur ba yin na/ gal te ba lang skyong gi chung ma las sa 'dzin pa'i bu skyes par gyur na de rgyal por 'gyur bas de'i phyir gang gis na sa 'dzin pa de'i dbang po sa bon du mi 'gyur ba de lta bu'i sman sbyin par bya'o snyam nas des de'i dbang po sa bon du mi 'gyur ba'i la du dag cig bskur nas/ sa 'dzin pa khyod gang gi tshe gzhon nu ba lang skyong gi chung ma dang lhan cig dga' mgur spyod pa de'i tshe khyod kyis la du 'di dag zo shig ces spring ngo / /ba lang skyong la yang bu gros su bya ba cung zad cig yod kyis re shig khyim du ma 'gro shig ces bsgo ba dang de 'dug go/ /sa 'dzin pas kyang dbang po sa bon du mi 'gyur ba'i la tu zos nas/ ba lang skyong gi chung ma la dga' mgur spyad nas 'dod pa'i dga' bas dub par gyur te/ de'i mgul nas 'khyud bzhin du gnyid log par gyur to/ /rgyal pos bsams pa/ des de la dga' mgur spyad de song grang gis gzhon nu gtang bar bya'o snyam nas des gzhon nu ba lang skyong la smras pa/ bu mna' ma mi dga' bar 'gyur gyis ring po ma 'dug par song shig /de khyim du song ba dang re shig na chung ma gzhan gyi skyes bu zhig dang lhan cig tu 'dug cing sa 'dzin pa de'i lag pa 'phyang ba mthong nas/ des de'i lag pa bskums nas 'di dag 'ga' zhig gis mthong bar 'gyur du 'ong ngo snyam nas gos kyis g.yogs so/ /sa 'dzin p a mtshan rangs par nyal nas nam nangs te nyi ma shar ba dang sad nas des bdag mthong ngam ma mthong snyam nas rgyugs te song ngo ba lang skyong la rgyal pos bu mdang sum nga'i rmi lam na khyod kyi chung ma skyes pa gzhan zhig dang lhan cig dga' mgur spyod pa mthong ngo zhes smras pa dang / lha khyod kyis ni rmang lam du gzigs/ bdag gis ni mngon sum kho nar mthong ngo / /ji lta zhig tu/ des ji ltar gyur pa'i gtam rgyas par brjod do/ /rgyal pos smras pa/ bu khyod la phrag dog med dam/ lha ma mchis so/ /bu de ci'i phyir/ lha bdag rang bzhin gyis tshe rabs dran te/ bdag sngon gyi tshe rabs gzhan zhig na ded dpon zhig gi chung mar gyur pa las/ ded dpon de zong 'tshal nas yul gzhan du chas pa dang / de la bdag gis rje'i sras bdag kyang mchi'o/ / zhes smras so/ /des de na khyod kyi rim gro su byed ces smras te/ de bdag mi bkri bar bgyis pa dang ngus so/ /de la zho shas 'tsho ba rnams kyis smras pa/ ded dpon gyi chung ma ci'i phyir ngu / des de dag la ji ltar gyur pa brjod pa dang / de dag gis ded dpon khrid cig dang bdag cag gis rim gro bya'o zhes smras nas des bdag khrid do/ /ji tsam na lam kar mi rgod lnga brgya tsam byung nas de dag gis 'dron pa de rnams kyang bcom/ ded dpon yang bsad nas bdag ni mi rgod lnga brgya po de rnams kyis dga' mgur spyad do/ /de rnams kyis 'dron pa gzhan bsad pa'i bud med gzhan zhig rnyed pa dang / de bdag gis 'di ni bdag gi chun mar 'gyur ro snyam nas khron pa rnyid par bor ba dang de nyid du gum par gyur to/ /lha bdag gi mi rgod lnga brgyas dga' mgur spyad na ngoms par ma gyur pa de lta bu bdag gis 'tshal bzhin du ci bud med rnams la phrag dog skyed lags sam/ lha 'on kyang 'jig rten gang zhig bud med rnams yid brtan par 'jog pa de ni blun pa lags kyi/ bud med rnams kyis skyes pa dag yid brtan par gzhag par bgyi ba 'di ni rigs lags so/ /des smras pa/ bu de de bzhin te/ bud med rnams kyis skyes pa dag yid brtan par gzhag par bya'o/ /'phags rgyal na rngon pa zhig gnas pa de'i chung ma gzugs bzang zhing mdzes pa blta na sdug pa zhig pas de de la shin du chags te/ des bsams pa/ gal te chung ma bzhag ste dgon pa'i gnas su song na ni 'di skyes pa gzhan dang lhan cig dga' mgur spyod par 'gyur/ ci ste ma song na ni bdag rngon pa ste/ gzhan gyi srog gcod cing gzhan gyi srog bcad pas 'tsho bar byed pa yin gyis bdag ni zhing pa ma yin/ tshong pa ma yin/ gzhan gyis 'tsho ba yang ma yin pas gdon mi za bar ltogs te 'chi bar 'gyur bas ma la bdag gis chung ma khrid la 'gro'o snyam nas/ des chung ma khrid de dgon pa'i gnas su song nas phyogs cig cig tu lo ma'i spyil bu byas te 'dug go/ /des der ri dgas mchog bdams shing bsad de sha bzang po btsongs nas 'tsho bar byed do/ /ji tsam dus gzhan zhig na rgyal po gtum po rab snang ri dgas shor du song ba las de rtas kha khyer nas phyogs der phyin pa dang / rngon pa des de ngo shes par gyur cing ji ltar rtas kha khyer ba yang shes nas des de la byon pa legs so zhes bya ba'i tshig kun du spyad pa dang / de rta las babs te shing drung zhig tu 'dug go/ /rngon pas bsams pa/ bdag gis rgyal po rgyal rigs spyi bo nas dbang bskur ba la zhag lon pa'i sha dbul ba gang yin pa ni bdag gi cha ma yin pas ma la bdag gis zhag ma lon pa gzhan zhig khyer te 'ongs ngo snyam nas des mda' lcugs bgos mda' gzhu lag na khyer te ri dgas shor du song ngo / /rgyal po gtum po rab snang gis de'i chung ma gzugs dang na tshod dang ldan pa de mthong nas nyon mongs pa drag po'i mthus 'dod pa'i 'dod chags bskyed pas rngon pa de'i chung ma dang lhan cig tu de ma thag tu log par spyad do/ /rngon pa des ri dgas bsad nas slar log pa dang re shig na chung ma de la log par spyad pa mthong ngo / / khon rnams kyi nang na 'di lta ste bud med rnams kyi phyir khon pa de tha chad yin pas de khros nas bsams pa dus ngan pa'i rgyal po rgyal po'i chos las 'das pa 'di gsad do snyam pa las yang bsams pa/ bud med tsam gyi phyir ci 'di gsad dam/ de de snyam du sems pa na ma stes te seng ge zhig dang gdong thug tu phrad nas des de bsad do/ /des rgyal po gtum po rab snang la byams pa'i sems bskyed pas shi nas rgyal chen bzhi'i ris kyi lha rnams kyi nang du skyes so/ / rgyal pos bsams pa/ bud med 'di bdag gis longs spyad la 'di'i khyo yang dus las 'das na bdag gis 'di bor ba gang yin pa ni bdag gi cha ma yin no snyam bsams nas/ des de spro bsrings nas de dang lhan cig gtam zer zhing 'dug go/ /ji tsam na blon po dang / gzhon nu dang / khrom gyi ru dag yan man du tshol zhing phyogs der phyin pa dang / de dag gis smras pa/ lha bud med 'di su'i lags/ des smras pa/ nged ni rgyal po yin pas nga la su zhig bud med mi 'bul/ deng la 'di btsun mo'i 'khor gyi nang du zhog shig /de dag gis de btsun mo'i 'khor gyi nang du bzhag go/ /rgyal po yang dpung dang bzhon pa'i tshogs dang ji ltar 'dod pa bzhin du song nas 'phags rgyal du phyin par gyur pa na de'i btsun mo'i 'khor dag rgya cher 'phel bar gyur to/ /bcom ldan 'das kyis ji ltar sems 'di myur du 'gyur ba de lta bu'i chos ni gcig kyang ngas yang dag par rjes su ma mthong ngo zhes gsungs pas rgyal po gtum po rab snang gis btsun mo'i 'khor rgya che ba dag mthong nas bsams pa/ re shig rngon pa nyon mongs des chung ma gcig cig 'brog dgon par khrid de bzhag na de yang bsrung bar ma nus na bdag gis btsun mo'i 'khor shin tu rgya che ba bsrung ba lta smos kyang ci dgos snyam nas/ des 'phags rgyal du dril bsgrags te/ 'di skad du shes ldan 'phags rgyal na gnas pa dang / grong khyer pa dang / yul sna tshogs nas 'ongs pa'i skye bo'i tshogs dag nyon cig /ngas btsun mo'i 'khor rnams ji ltar 'dod par longs spyod du gtang gis gang gis btsun mo'i 'khor dag yongs su longs spyad pa des ni legs par longs spyad pa yin no zhes bsgrags so/ /btsun mo'i 'khor rnams kyang bos nas khyed kyang gzhan gyi skyes pa dang lhan cig dga' mgur spyod du deng la gang zhig rnga brdungs pa'i tshe slar ma 'ongs pa de'i mgo drungs nas bcad de sa la dor bar bya'o zhes kyang bsgo'o/ /bud med thams cad ni skyes pa 'dod pa yin na rgyal po'i btsun mo'i 'khor rnams lta smos kyang ci dgos pas de dag 'phags rgyal na kun du 'phyan cing gang gis skyes pa gang mthong ba de de dang lhan cig dga' mgur spyod par brtsams so/ /ba lang skyong gi ma zhi ba dang / skya bseng gi bu mo sgrol ma ni rgyal po gtum po rab snang lhag par byams pas de dag rgyal po'i ngo ma chod de ma song ngo / /rgyal pos zhi ba la smras pa/ zhi ba khyod kyang song la gzhan gyi skyes pa dag dang lhan cig dga' mgur spyod cig des smras pa/ lha bdag ni lha btang nas skyes pa gzhan dang lhan cig dga' mgur mi spyod lags so/ /skya bseng gi bu mo sgrol ma la khyod song shig ces smras pa dang / de na tshod kyis gzhon la mi brtan pa'i rang bzhin can zhig yin pas skyes pa gzhan 'dod de des khas blangs nas de srang na mar song ngo / /de kun du 'phyan pa na spos 'tshong gi khye'u sdu gu zhig mthong nas des de la smras pa/ dga' mgur spyod kyis tshur/ des smras pa/ re shig mar me zung shig dang / ji 'du 'god brtsis la phyis dga' mgur spyad par bgyi'o zhes byas pa dang / des mar me bzung nas 'dug go/ /spos 'tshong gi khye'u des 'di las ni 'di khugs so/ /'di ni che ge mo zhig la byin pa yin no zhes de rtsis byed cing de la mi sems par 'dug gi bar du ji tsam na nam nangs par gyur te/ rgyal po'i pho brang du rnga brdungs pa dang / skya bseng gi bu mo sgrol mas mar me sa la bzhag ste song ngo / /des smras pa/ dga' mgur spyad kyis sdod cig / des smras pa/ ji ltar dga' mgur spyad/ lhas 'di skad du bud med gang zhig rnga brdungs te ma 'ongs pa de'i mgo bo drungs nas bcad de sa la dor bar bya'o zhes khrims su bcas te bzhag la/ da gzod rnga de yang brdungs zin na ci bdag la mgo gnyis yod dam 'gro'o zhes de dga' mgur ma spyad pa nyid du song ngo / /rgyal pos dris pa/ sgrol ma khyod kyis dga' mgur spyad dam/ des smras pa/ lha dga' mgur ma spyad do/ /ci'i phyir zhes byas pa dang / des ji ltar gyur pa brjod nas rgyal po cang mi zer bar 'dug go/ /yang rgyal pos de bzhin du dril bsgrags pa dang / kun du rgyal po gtum po rab snang gis btsun mo'i 'khor ji ltar 'dod pa bzhin du skyes bu longs spyod du btang ngo zhes sgra grags so/ /kau sham bi'i rgyal po shar ba'i bus ji ltar rgyal po gtum po rab snang gis btsun mo'i 'khor ji ltar 'dod pa bzhin du skyes bu longs spyod du btang ngo zhes thos so/ /thos nas kyang sbyor ba 'chang la smras pa/ sbyor ba 'chang rgyal po gtum po rab snang gis btsun mo'i 'khor ji ltar 'dod pa bzhin du skyes bu longs spyod du btang ngo zhes grag gis/ rgyal po gtum po rab snang gi btsun mo'i 'khor rnams dang lhan cig dga' mgur spyod du 'gro'o/ /des smras pa/ lha rgyal po gtum po rab snang ni khyod kyi yun ring po nas gsod pa phyir rgol ba mi mdza' ba lags pas gal te lha der bzhud de mjal na gnod pa bgyid pa'i gnas gang lags pa de mchis so/ /des smras pa/ sbyor ba 'chang mi rnams kyi nang na mi gzu lums can dag yod mod kyi 'on kyang khyod 'dir 'dug shig nga ni 'gro'o des smras pa/ gal te lha de ltar bzhed na/ lha bag mi mnga' ba lags mod kyi 'on kyang bag mdzad pa'i rigs so/ /rgyal po shar pa'i bu yang shin du bud med la brkam chags can zhig pas des de'i tshig khyad du bsad nas 'phags rgyal du song ba dang / skya bseng gi bu mo des de gzugs bzang zhing blta na sdug pa mdzes pa mthong ngo / /des de mthong nas smras pa/ rgyal rigs tshur spyon skya bseng gi bu mo sgrol ma dang dga' mgur spyad par bgyi'o/ /des smras pa/ legs kyis mal gyis shig /des smras pa/ khyod mal gyis shig de gnyi ga yang dregs shing nga rgyal gyis khengs pas rgyal po shar pa'i bus kyang mal ma byas/ skya bseng gi bu mo sgrol mas kyang ma byas par de gnyis khyod mal byos shig nga mi byed do zhes smra ba'i bar du nam nangs par gyur te/ rgyal po'i pho brang du rnga brdungs pa dang / skya bseng gi bu mo sgrol ma song ngo / /rgyal po shar pa'i bus smras pa/ sdod cig dga' mgur spyad par bya'o/ /skya bseng gi bu mo sgrol mas smras pa/ ji ltar dga' mgur spyad lhas 'di skad du bud med gang zhig rnga brdungs te ma 'ongs pa de'i mgo bo drungs nas bcad de sa la dor ro zhes khrims su bcas pa bzhag la/ da gzod rnga de yang brdungs na ci bdag la mgo gnyis yod dam 'gro zhes de dga' mgur ma spyad par rgyal po shar pa'i bu'i lag nas sor gdub rgya phyung ste song ngo / /rgyal pos dris pa/ sgrol ma khyod kyis dga' mgur spyad dam/ des smras pa/ lha dga' mgur ma spyad do/ /ci'i phyir khyod kyis dga' mgur ma spyad/ des ji ltar gyur pa brjod nas sor gdub rgya bstan te 'di ni bdag gis de'i sor gdub rgya 'tshal te mchis pa lags so/ /rgyal po gtum po rab snang gis de'i rgya blags nas gsos pa la smras pa/ gsos pa rgyal po shar pa'i bu dmag mang po can 'dir 'ongs pa sus kyang ma tshor te/ de yang nga'i btsun mo'i 'khor 'dod na khyod kyis ji ltar yal bar dor des smras pa/ lha ma tshor bar de 'dir mchis mod ci ste da dung 'dir mchi na mi bzod par bgyi'o/ /de nas rgyal po gtum po rab snang gis yang de bzhin du dril bsgrags pa dang / rgyal po shar pa'i bu des de bzhin du thos nas sbyor ba 'chang la smras pa/ sbyor ba 'chang rgyal po gtum po rab snang gis yang btsun mo'i 'khor ji ltar 'dod pa bzhin du skyes bu longs spyod du btang ngo zhes grag gis de'i phyir rgyal po gtum po rab snang gi btsun mo'i 'khor rnams dang lhan cig dga' mgur spyad kyis tshur shog 'dong sbyor ba 'chang gis smras pa/ lha de'i tshe ni khyod ma tshor bar bzhud pas de'i slad du bde bar 'dir 'khor gyi/ da ni rgyal po gtum po rab snang sta gon du chas shing mchis pas ma gshegs na legs so/ /des smras pa/ sbyor ba 'chang mi rnams kyi nang na mi gzu lums can dag yod de 'gro'o zhes de song ba dang sbyor ba 'chang yang rgyal po'i bkas song ngo / /rgyal po shar pa'i bu rim gyis 'phags rgyal du phyin te khyim gang du zhugs pa de gsos pas lag na ral gri thogs pa'i mi dag gis kun du bskor nas de rnams la bsgo ba/ shes ldan dag gal te bud med cig phyi rol du byung na ni thong shig /ji ste skyes pa zhig na ma gtang zhig /sbyor ba 'chang gis tshor nas des bsams pa bdag gis rgyal po mi bzad pa dogs pa nyam nga bar gyur pa yal bar dor ba gang yin pa ni bdag gi cha ma yin no snyam nas/ des rgyal po de bud med phal pa'i cha lugs dang rgyan gyis brgyan te/ de nas bum pa bskur nas lcug mas gzhus te spyo zhing lha da cung tshems shing ma gsol na khyod chu khyer te mi 'ong ngam/ zhes byas nas phyir phyung ngo / /rgyal po'i mi rnams kyis bu mo mngag gzhug ma yin no snyam nas yal bar btang ba dang des bum pa rdzing bu'i 'gram du bor nas bros te song ngo / /gsos pas khyim de bltas pa dang re shig na bros par gyur nas des sbyor ba 'chang bzung ste rgyal po gtum po rab snang la phul nas lha mi 'dis rgyal po shar pa'i bu btang lags so/ /sbyor ba 'chang gis smras pa/ lha bdag gis de'i zas dang gos dag bdag gir bgyis te bdag gis de btang ba gang lags pa de ni bdag gis rigs pa zhig bgyis kyi/ 'dis ni khyod kyi zas dang gos bdag gir bgyis la btang ba na yal bar bor ba gang lags pa de ni rigs pa ma lags so/ /zhes smras pa dang / rgyal po gsos pa la khros nas smras pa/ gsos pa rgyal po shar pa nga'i btsun mo'i 'khor 'dod pa yal bar btang ba'i rigs sam/ de'i phyir gal te re shig rgyal po shar pa'i bu khrid de 'ongs na de lta na legs/ ji ste ma 'ongs na chad pas cher gcad do zhes byas pa dang / de skrag nas de gzung ba'i thabs sems shing 'dug go/ /re shig na lho phyogs nas 'khrul 'khor gyi sgyu rtsal gyi slob dpon zhig 'ongs pa dang / gsos pas kye skyes bu 'di dang 'di lta bu'i 'khrul 'khor byed nus sam zhes dris pa dang / des smras pa/ lha bdag gis mnyes par rngo thog go/ /gsos pas glang po che'i gtso bo 'dam bu'i/ ri zhes bya ba dben pa zhig tu sbas nas 'phags rgyal du glang po che'i gtso bo 'dam bu'i ri bros so zhes sgra btang ba dang / de'i tshe sgra de yang phyogs dang phyogs mtshams dag tu grags par gyur to/ /de'i tshe des 'khrul 'khor gyi sgyu rtsal gyi mkhan po la 'di lta bu'i 'khrul 'khor zhig gyis shig ces smras pa dang / des kyang glang po che'i gtso bo 'dam bu'i ri ci 'dra ba de kho na 'dra ba'i 'khrul 'khor zhig byas nas 'khrul 'khor der mi lnga brgya yang bcug /glang po che'i lci ba dang chu yang mang du bcug ste/ de nas mi de rnams la bsgo ba/ ci nas khyed cag gis ji ltar kau sham bi'i nyen 'khor mig lam du 'bab pa de ltar 'khrul 'khor 'di drongs shig /ji ste rgyal po shar pa'i bu dpung gi tshogs yan lag bzhi pa dang byung na ni khyed kyis de'i lag tu ma sbyin cig / 'on te cig pu 'ongs na ni zung la bzung nas myur du 'dir khrid de shog shig ces byas pa dang / de dag gis ji ltar 'khrul 'khor de kau sham bi'i nyen 'khor bltar rung ba de ltar legs par drangs te 'dug pa dang / phyugs rdzi dang / ba lang rdzi dang / rtswa thun dang / shing thun dang / lam gyis 'tsho ba dang / lam gol bas 'tsho ba'i mi rnams ngo mtshar du gyur pa'i mig bgrad nas bskor te blta bar brtsams so/ /de na kha cig na re shes ldan dag 'di ni glang po che'i gtso bo rgod yin no zhes zer ro/ /gzhan dag na re 'di glang po che rgod ma yin gyi 'phags rgyal gyi rgyal po gtum po rab snang gi glang po che'i gtso bo 'dam bu'i ri zhes bya ba bros pa de 'dir 'ongs pa yin no zhes zer ro/ /de nas kha cig gis rgyal po shar pa'i gan du song nas gcam bu gsol pa/ lha 'phags rgyal na gnas pa'i rgyal po gtum po rab snang gi glang po che'i gtso bo 'dam bu'i ri bros par gyur pa gang lags pa de ni lha'i bsod nams kyi mthus 'dir mchis te srog chags brgya stong du ma ltar mchis so zhes byas pa dang / rgyal po shar pa'i bus thos nas dga' ba dang / yid bde ba skyes te dga' ba'i rnga ni brdungs/ dung zung kha bstams pa ni bus nas sbyor ba 'chang la bsgo ba/ song la dpung gi tshogs yan lag bzhi go skon la grong khyer du yang dril sgrogs te/ 'di skad du grong khyer na gnas pa thams cad dang / yul sna tshogs nas 'ongs pa'i skye bo'i tshogs rnams la rgyal po glang po che'i gtso bo 'dam bu'i ri 'dzin tu gshegs kyis mtshon cha rnam pa sna tshogs dang zhags pa thogs te shog shig ces bsgo shig / sbyor ba 'chang gis dpung gi tshogs yan lag bzhi pa go bskon te/ grong khyer du yang dril bsgrags nas 'di skad du shes ldan grong khyer na gnas pa rnams dang / pho brang 'khor na gnas pa rnams dang / yul sna tshogs nas 'ongs pa'i skye bo'i tshogs dag nyon cig lhas nga glang po che'i gtso bo 'dam bu'i ri 'dzin du gshegs kyis khyed cag mtshon cha sna tshogs dang zhags pa dag thogs te shog shig ces bka' stsal to/ /zhes byas so/ /de nas rgyal po shar pa dpung gi tshogs yan lag bzhi pa dang / mi'i mchog stong phrag du ma dang / lhan cig tu glang po che'i gtso bo 'dam bu'i ri 'dzin du dong ba dang / 'khrul 'khor 'phul ba rnams kyis ji ltar glang po che'i gtso bo 'dam bu'i ri ltar bcos pa de 'bros par rtsom pa de ltar 'khrul 'khor de phul ba dang / blon po rnams kyis smras pa/ lha khyod nyid glang po che'i cho ga la mkhas pa lags pas glang po che 'di 'bros su bgyid kyis khyod nyid kyis thabs mdzad du gsol/ rgyal pos sbyor ba 'chang la bsgo ba/ dpung gi tshogs yan lag bzhi pa khyed cig /nga nyid thabs kyis 'di'i drung du 'gro'o/ /des dpung gi tshogs yan lag bzhi pa bkyed nas rgyal po bdag nyid pi bang snyan pa len cing nye bar 'gro bar brtsams pa dang / 'khrul 'khor 'phul ba rnams kyis ji ltar 'khrul 'khor rgyal po shar pa'i bu drung du song nas 'dug pa de ltar phul te mi lnga brgya po de dag 'khrul 'khor nas byung ste bzung ngo / /bzung nas 'khrul 'khor du bcug ste 'khrul 'khor de ji ltar rlung gi shugs ltar mgyogs par gyur pa de ltar phul lo/ /rgyal po shar pa'i bu khrid do/ /rgyal po shar pa'i bu khrid do zhes blon po rnams kyis kun du sbran pa dang / srog chags brgya stong du ma dang / dpung gi tshogs yan lag bzhi pas bsnyag par brtsams so/ /gang gi tshe sa tshigs 'das par gyur pa de'i tshe sbyor ba 'chang gis smras pa/ shes ldan dag rgyal po khrid zin te thabs gzhan zhig bsam gyis slar log shig ces byas pa dang de dag thams cad log go/ /rgyal po shar pa'i bu yang 'phags rgyal du khrid nas gsos pas rgyal po gtum po rab snang la phul te/ lha rgyal po shar pa'i bu 'di lags so zhes byas pa dang / rgyal po dga' ba'i rnga ni brdungs/ dung zung kha bstams pa ni bus te/ grong dang grong khyer dang / grong rdal dang / srang na gnas pa'i srog chags snying na ba du ma tshogs pa dang / gsos pa la bsgo ba ngas rgyal po shar pa'i bu yongs su btang gis sod cig / blon po rnams kyis smras pa/ lha rgyal po 'di ni glang po che'i cho ga la mkhas pa zhig ste/ gal te 'di bkum na glang po che'i cho ga nub par 'gyur bas de'i slad du re shig lhas 'di las glang po che'i cho ga bslab tu gsol/ slad kyis ji ltar bka' stsal pa bzhin bgyi'o/ /rgyal pos smras pa/ gsos pa gal te de lta na khyod kyis 'di las glang po che'i cho ga slobs shig /ngas 'di las glang po che'i cho ga bslabs te nga'i slob dpon du gyur na ji ltar slob dpon bsad par bya/ gsos pas smras pa/ lha bdag la yang nyes dmigs de nyid du 'gyur bas de ni cha ma lags so/ /rgyal pos smras pa/ gsos pa gal te de lta na su zhig 'di la slob tu bcug la de las ngas bslab par bya/ gsos pas smras pa/ lha khyod kyis sras mo nor lhas byin 'di le lo ma mchis pa/ brtson 'grus dang ldan pa/ mkhas pa/ grims pa lags pas 'di slob tu stsal te/ 'dis lha la bslab par bgyi'o/ /rgyal po gtum po rab snang gis nor lhas byin la smras pa/ bu mo mi de mtshan ngan pa bcwa brgyad dang ldan na/ 'on kyang glang po che'i cho ga la mkhas pa zhig pas khyod kyis de las bar du yol bas bcad de glang po che'i cho ga slobs la phyis nga la slobs shig / khyod kyis de la blta bar yang mi bya ste/ de mthong na bkra mi shis pas khyod kyis de mthong na khyod 'chi'o zhes byas pa dang / des yol bas bcad de de las glang po che'i cho ga bslab par brtsams so/ /sbyor ba 'chang gis bsams pa/ gal te lha btsal te gson na ni de thar pa'i thabs shig bsam mo/ /'on te shi ste dus las 'das na ni gzhan zhig rgyal por dbang bskur ro snyam nas/ de'i sring mo gser phreng can zhes bya ba sgyu bsham pa la sbyor ba 'chang ba bas kyang lhag pa zhig yod pa de la des smras pa/ sring mo 'phags rgyal du song la son nas rgyal po kun du tshol te/ gal te gson na de thar pa'i thabs shig bsam par bya'o/ /'on te shi ste dus las 'das na gzhan zhig rgyal por dbang bskur ro zhes byas pa dang des de la cang mi smra bas khas blangs te kun du rgyu'i cha lugs su bsgyur nas 'phags rgyal du song ngo / /de rgyal po'i sgor 'dug nas rgyal po'i mi dag la dris pa/ shes ldan dag rgyal po shar pa'i bu ci gson nam 'on te shi/ rgyal po'i mi dag gis smras pa/ re shig rab tu byung ba khyod la dris/ des khyod la gnod pa ci zhig byas/ des smras pa/ shes ldan dag des kho mo'i khyo dang bu ni 'tsho ba dang phral/ bdag gi nor rdzas thams cad ni phrogs so de dag gis smras pa/ rab tu byung ba de ni dus las ma 'das te/ de rgyal po'i sras mo nor lhas byin pa la glang po che'i cho ga slob po de bzhin du des rgyal po'i sgo bzhir rgyal po'i mi dag la dris pa dang / de dag gis kyang de bzhin du lan btab po/ /de g.yo thabs de dang des nang du chud pa dang / de rgyal po shar pa'i bu mthong nas phyogs bzhir bltas te dal bus lha gson nam zhes smras pa dang de yang bag tsha zhing yid mi dga' bzhin du phyogs bzhir bltas nas sring mo gson no zhes smras so/ /des de mngon sum byas nas thabs gzhan zhig gis nor lhas byin pa mthong nas smras pa/ bu mo khyod su las glang po che'i cho ga slob des smras pa/ bgres mo mi mtshan ngan pa bcwa brgyad dang ldan pa zhig yod de de la bar yol bas bcad nas slob bo/ /des smras pa/ 'di na mi mtshan ngan pa bcwa brgyad dang ldan pa 'ga' yang ga la yod/ gang zhig khyod slob pa de ni rgyal po shar pa'i bu yin te/ gzugs bzang ba mdzes pa blta na sdug pa mtshan thams cad legs par rdzogs pa yin na/ khyod la su zhig gis de skad du bslus/ ci ste khyod yid mi ches na yol ba phye la ltos shig ces byas pa dang / des de'i gzugs dang na tshod thos nas dad de yol ba phye ba dang mthong ngo / /mthong ma thag tu rlung gi stobs kyi shugs kyis bskyod pa bzhin du 'dod pas g.yems nas smras pa/ bgres mo khyod ji skad gsung pa gang lags pa de ni mad na 'on kyang gsol ba zhig mchis te/ bdag 'di dang lhan cig mjal bar khyod kyis spyod dam/ des smras pa/ bu mo bdag gis khyod kyi de kho na bzhin du bsgrub par bya ste/ gar bskor kyang skyes bu 'di lta bu dang phrad pa yang dka' na gang khyod nga la 'di lta bu 'chol pa lta smos kyang ci dgos// //

CLOSE WINDOW