བོད་ཡིག

e-texts based on the ACIP/ALL Input

/ //rgya gar skad du/ AR+ya badzra ts+tshe da ka nA ma pra dz+nyA pa ra mi ta ma hA ya na sU tra/ bod skad du/ 'phags pa shes rab kyi pha rol tu phyin pa rdo rje gcod pa zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das mnyan du yod pa na rgyal bu rgyal byed kyi tshal mgon med zas sbyin gyi kun dga' ra ba na dge slong stong nyis brgya lnga bcu'i dge slong gi dge 'dun chen po dang / byang chub sems dpa' sems dpa' chen po rab tu mang po dang thabs gcig tu bzhugs te/ de nas bcom ldan 'das snga dro'i dus kyi tshe sham thabs dang chos gos sku la gsol te lhung bzed bsnams nas mnyan yod kyi grong khyer chen por bsod snyoms kyi phyir zhugs so/ /de nas bcom ldan 'das mnyan yod kyi grong khyer chen por bsod snyoms kyi phyir gshegs nas bsod snyoms kyi zhal zas mjug tu gsol te zas kyi bya ba mdzad nas zas phyi ma'i bsod snyoms spangs pas/ lhung bzed dang chos gos bzhag nas zhabs bsil te gdan bshams pa la skyil mo krung bcas nas sku drang por bsrang ste dran pa mngon du bzhag nas bzhugs so/ /de nas dge slong mang po bcom ldan 'das ga la ba der dong ste lhags nas bcom ldan 'das kyi zhabs la mgo bos phyag 'tshal te bcom ldan 'das la lan gsum bskor ba byas nas phyogs gcig tu 'khod do/ /yang de'i tshe tshe dang ldan pa rab 'byor 'khor de nyid du 'dus par gyur te 'dug go / de nas tshe dang ldan pa rab 'byor stan las langs te bla gos phrag pa gcig tu gzar nas pus mo g.yas pa'i lha nga sa la btsugs te bcom ldan 'das ga la ba de logs su thal mo sbyar ba btud de bcom ldan 'das la 'di skad ces gsol to/ /bcom ldan 'das/ de bzhin gshegs pa dgra bcom pa yang dag par rdzogs pa'i sangs rgyas kyis byang chub sems dpa' sems dpa' chen po rnams la phan gdags pa'i dam pa ji snyed pas phan btags pa dang / de bzhin gshegs pa dgra bcom pa yang dag par rdzogs pa'i sangs rgyas kyis byang chub sems dpa' sems dpa' chen po rnams yongs su gtad pa'i dam pa ji snyed pas yongs su gtad pa ni/ bcom ldan 'das/ ngo mtshar lags so/ /bde bar gshegs pa/ ngo mtshar lags so/ /bcom ldan 'das/ byang chub sems dpa'i theg pa la yang dag par zhugs pas ji ltar gnas par bgyi/ ji ltar bsgrub par bgyi/ ji ltar sems rab tu gzung bar bgyi/ de skad ces gsol pa dang / bcom ldan 'das kyis tshe dang ldan pa rab 'byor la 'di skad ces bka' stsal to| |rab 'byor/ legs so/ /legs so/ /rab 'byor/ de de bzhin no/ /de de bzhin te/ de bzhin gshegs pas byang chub sems dpa' sems dpa' chen po rnams la phan gdags pa'i dam pas phan btags so/ /de bzhin gshegs pas byang chub sems dpa' sems dpa' chen po rnams la yongs su gtad pa'i dam pas yongs su gtad do/ / rab 'byor/ de'i phyir nyon la legs par rab tu yid la zungs shig dang / byang chub sems dpa'i theg pa la yang dag par zhugs pas ji ltar gnas par bya ba dang / ji ltar bsgrub par bya ba dang / ji ltar sems rab tu gzung bar bya ba ngas khyod la bshad do/ /bcom ldan 'das/ de bzhin no/ /zhes gsol nas tshe dang ldan pa rab 'byor bcom ldan 'das kyi ltar nyan pa dang / bcom ldan 'das kyis 'di skad ces bka' stsal to/ /rab 'byor/ 'di la byang chub sems dpa'i theg pa la yang dag par zhugs pas 'di snyam du/ bdag gis ji tsam sems can du bsdu bas bsdus pa sgo nga las skyes pa'am/ mngal nas skyes pa'am/ drod gsher las skyes pa'am/ brdzus te skyes pa'am/ gzugs can nam/ gzugs med pa'am/ 'du shes can nam/ 'du shes med pa'am/ 'du shes med 'du shes med min nam/ sems can gyi khams ji tsam sems can du gdags pas btags pa de dag thams cad phung po lhag ma med pa'i mya ngan las 'das pa'i dbyings su yongs su mya ngan las bzla'o/ /de ltar sems can tshad med pa yongs su mya ngan las bzlas kyang sems can gang yang yongs su mya ngan las bzlas par gyur pa med do/ /snyam du sems bskyed par bya'o/ /de ci'i phyir zhe na/ rab 'byor/ gal te byang chub sems dpa' sems can du 'du shes 'jug na/ de byang chub sems dpa' zhes mi bya ba'i phyir ro/ /de ci'i phyir zhe na/ rab 'byor/ gang sems can du 'du shes 'jug gam/ srog tu 'du shes 'jug gam/ gang zag tu 'du shes 'jug na/ de byang chub sems dpa' zhes mi bya ba'i phyir ro/ /yang rab 'byor/ byang chub sems dpas dngos po la mi gnas par sbyin pa sbyin no/ /chos gang la yang mi gnas par sbyin pa sbyin no/ /gzugs la'ang mi gnas par sbyin pa sbyin par bya'o/ /sgra dang / dri dang / ro dang / reg bya dang / chos la'ang mi gnas par sbyin pa sbyin no| |rab 'byor/ ci nas mtshan mar 'du shes pa la'ang mi gnas pa de ltar byang chub sems dpas sbyin pa sbyin no/ /de ci'i phyir zhe na/ rab 'byor/ byang chub sems dpa' gang mi gnas par sbyin pa sbyin pa de'i bsod nams kyi phung po ni/ rab 'byor/ tshad gzung bar sla ba ma yin pa'i phyir ro/ /rab 'byor/ 'di ji snyam du sems/ shar phyogs kyi nam mkha'i tshad gzung bar sla'am/ rab 'byor gyis gsol pa/ bcom ldan 'das/ de ni/ ma lags so/ /bcom ldan 'das kyis bka' stsal pa/ de bzhin du lho dang / nub dang / byang dang / steng dang / 'og gi phyogs dang / phyogs mtshams dang / phyogs bcu'i nam mkha'i tshad gzung bar sla'am/ rab 'byor gyis gsol pa/ bcom ldan 'das/ de ni/ ma lags so/ /bcom ldan 'das kyis bka' stsal pa/ rab 'byor/ de bzhin du byang chub sems dpa' gang mi gnas pa'i sbyin pa sbyin pa de'i bsod nams kyi phung po yang tshad gzung bar sla ba ma yin no/ /rab 'byor/ 'di ji snyam du sems/ mtshan phun sum tshogs pas de bzhin gshegs par blta'am/ rab 'byor gyis gsol pa/ bcom ldan 'das/ de ni| ma lags te/ mtshan phun sum tshogs pas de bzhin gshegs par mi blta'o/ /de ci'i slad du zhe na/ de bzhin gshegs pas mtshan phun sum tshogs par gang gsungs pa de nyid mtshan phun sum tshogs pa ma mchis pa'i slad du'o/ /de skad ces gsol pa dang / bcom ldan 'das kyis tshe dang ldan pa rab 'byor la 'di skad ces bka' stsal to/ /rab 'byor 'di ji snyam du sems/ mtshan phun sum tshogs pa de tsam du rdzun no/ /ji tsam du mtshan phun sum tshogs pa med pa de tsam du mi rdzun te/ de ltar de bzhin gshegs pa la mtshan dang mtshan med par blta'o/ /de skad ces bka' stsal pa dang / bcom ldan 'das la tshe dang ldan pa rab 'byor gyis 'di skad ces gsol to/ /bcom ldan 'das/ ma 'ongs pa'i dus lnga b rgya tha ma la dam pa'i chos rab tu rnam par 'jig par 'gyur ba na sems can gang la la dag 'di lta bu'i mdo sde'i chig bshad pa 'di la yang dag par 'du shes bskyed par 'gyur ba lta mchis sam/ bcom ldan 'das kyis bka' stsal pa/ rab 'byor/ khyod 'di skad du/ ma 'ongs pa'i dus lnga brgya tha ma la dam pa'i chos rab tu rnam par 'jig par 'gyur ba na sems can gang la la dag 'di lta bu'i mdo sde'i tshig bshad pa 'di la yang dag par 'du shes bskyed par 'gyur ba lta mchis sam zhes ma zer cig / yang rab 'byor/ ma 'ongs pa'i dus lnga brgya tha ma la dam pa'i chos rab tu rnam par 'jig par 'gyur ba na byang chub sems dpa' sems dpa' chen po tshul khrims dang ldan pa/ yon tan dang ldan pa/ shes rab dang ldan pa dag 'byung ste/ rab 'byor/ byang chub sems dpa' sems dpa' chen po de dag kyang sangs rgyas gcig la bsnyen bkur byas pa ma yin/ sangs rgyas gcig la dge ba'i rtsa ba bskyed pa ma yin gyi/ rab 'byor/ sangs rgyas brgya stong mang po la bsnyen bkur byas shing / sangs rgyas brgya stong du ma la dge ba'i rtsa ba dag bskyed pa'i byang chub sems dpa' sems dpa' chen po dag 'byung ngo / /rab 'byor/ gang dag 'di lta bu'i mdo sde'i tshig bshad pa 'di la sems dad pa gcig tsam rnyed par 'gyur ba de dag ni| rab 'byor/ de bzhin gshegs pas mkhyen to/ /rab 'byor/ de dag ni/ de bzhin gshegs pas gzigs te/ rab 'byor/ sems can de dag thams cad ni/ bsod nams kyi phung po dpag tu med pa bskyed cing rab tu sdud par 'gyur ro/ /de ci'i phyir zhe na/ rab 'byor/ byang chub sems dpa' sems dpa' chen po de dag ni/ bdag tu 'du shes 'jug par mi 'gyur zhing / sems can du 'du shes pa ma yin/ srog tu 'du shes pa ma yin te/ gang zag tu'ang 'du shes 'jug par mi 'gyur ba'i phyir ro/ /rab 'byor/ byang chub sems dpa' sems dpa' chen po de dag chos su 'du shes pa dang / chos med par yang 'du shes mi 'jug ste/ de dag ni/ 'du shes dang / 'du shes med par yang 'du shes 'jug par mi 'gyur ro/ /de ci'i phyir zhe na/ rab 'byor/ gal te byang chub sems dpa' sems dpa' chen po de dag chos su 'du shes 'jug na/ de nyid de dag gi bdag tu 'dzin par 'gyur zhing / sems can du 'dzin pa dang / srog tu 'dzin pa dang / gang zag tu 'dzin par 'gyur ba'i phyir ro/ /gal te chos med par 'jug na'ang de nyid de dag gi bdag tu 'dzin par 'gyur zhing / sems can du 'dzin pa dang / srog tu 'dzin pa dang / gang zag tu 'dzin par 'gyur ba'i phyir ro/ /de ci'i phyir zhe na/ yang rab 'byor/ byang chub sems dpas chos kyang log par gzung bar mi bya ste/ chos ma yin pa yang mi gzung ba'i phyir ro/ /de bas na/ de las dgongs te de bzhin gshegs pas chos kyi rnam grangs 'di gzings lta bur shes pa rnams kyis chos rnams kyang spang bar bya na/ chos ma yin pa rnams lta ci smos zhes gsungs so/ /gzhan yang bcom ldan 'das kyis tshe dang ldan pa rab 'byor la 'di skad ces bka' stsal to| |rab 'byor/ 'di ji snyam du sems/ de bzhin gshegs pas gang bla na med pa yang dag par rdzogs pa'i byang chub mngon par rdzogs par sangs rgyas pa'i chos de gang yang yod dam| de bzhin gshegs pas chos gang yang bstan tam/ de skad ces bka' stsal pa dang / bcom ldan 'das la tshe dang ldan pa rab 'byor gyis 'di skad ces gsol to/ /bcom ldan 'das/ bcom ldan 'das kyis gsungs pa'i don 'di bdag gis 'tshal ba ltar na/ de bzhin gshegs pas gang bla na med pa yang dag par rdzogs pa'i byang chub mngon par rdzogs par sangs rgyas pa'i chos de gang yang ma mchis so/ /de bzhin gshegs pas gang bstan pa'i chos de gang yang ma mchis so/ / de ci'i slad du zhe na/ de bzhin gshegs pas chos gang yang mngon par rdzogs par sangs rgyas pa'am bstan pa de ni/ gzung du ma mchis/ brjod du ma mchis te/ de ni/ chos kyang ma lags/ chos ma mchis pa yang ma lags pa'i slad du'o/ /de ci'i slad du zhe na/ 'phags pa'i gang zag rnams ni/ 'dus ma bgyis kyis rab tu phye ba'i slad du'o/ / bcom ldan 'das kyis bka' stsal pa/ rab 'byor/ 'di ji snyam du sems/ rigs kyi bu'am/ rigs kyi bu mo gang la la zhig gis stong gsum gyi stong chen po'i 'jig rten gyi khams 'di rin po che sna bdun gyis rab tu gang bar byas te sbyin pa byin na/ rigs kyi bu'am/ rigs kyi bu mo de gzhi de las bsod nams kyi phung po mang du bskyed dam/ rab 'byor gyis gsol pa/ bcom ldan 'das/ mang lags so/ /bde bar gshegs pa/ mang lags te/ rigs kyi bu'am/ rigs kyi bu mo de gzhi de las bsod nams kyi phung po mang du bskyed do| |de ci'i slad du zhe na/ bcom ldan 'das/ bsod nams kyi phung po de nyid phung po ma mchis pa'i slad du ste/ des na/ de bzhin gshegs pas bsod nams kyi phung po bsod nams kyi phung po/ /zhes gsungs so/ /bcom ldan 'das kyis bka' stsal pa/ rab 'byor/ rigs kyi bu'am/ rigs kyi bu mo gang gis stong gsum gyi stong chen po'i 'jig rten gyi khams 'di rin po che sna bdun gyis rab tu gang bar byas te sbyin pa byin pa bas/ gang gis chos kyi rnam grangs 'di las tha na tshig bzhi pa'i tshigs su bcad pa gcig tsam bzung nas gzhan dag la yang 'chad cing yang dag par rab tu ston na/ de gzhi de las bsod nams kyi phung po ches mang du grangs med dpag tu med pa bskyed do/ /de ci'i phyir zhe na/ rab 'byor/ de bzhin gshegs pa dgra bcom pa yang dag par rdzogs pa'i sangs rgyas rnams kyi bla na med pa yang dag par rdzogs pa'i byang chub ni/ 'di las byung ste/ sangs rgyas bcom ldan 'das rnams kyang 'di las skyes pa'i phyir ro/ /de ci'i phyir zhe na/ rab 'byor/ sangs rgyas kyi chos rnams sangs rgyas kyi chos rnams zhes bya ba ni/ sangs rgyas kyi chos de dag med par de bzhin gshegs pas gsungs pa'i phyir te/ des na/ sangs rgyas kyi chos rnams zhes bya'o/ /rab 'byor/ 'di ji snyam du sems/ rgyun du zhugs pa 'di snyam du/ bdag gis rgyun du zhugs pa'i 'bras bu thob bo snyam du sems sam/ rab 'byor gyis gsol pa/ bcom ldan 'das/ de ni/ ma lags so/ /de ci'i slad du zhe na/ bcom ldan 'das/ de ni/ ci la'ang zhugs pa ma mchis pa'i slad du ste/ des na/ rgyun du zhugs pa zhes bgyi'o/ /gzugs la'ang ma zhugs/ sgra la ma lags/ dri la ma lags/ ro la ma lags/ reg bya la ma lags/ chos la'ang ma zhugs te/ des na/ rgyun du zhugs pa zhes bgyi'o/ /bcom ldan 'das/ gal te rgyun du zhugs pa de 'di snyam du/ bdag gis rgyun du zhugs pa'i 'bras bu tho ba bo| |snyam du sems par gyur na/ de nyid de'i bdag tu 'dzin par 'gyur lags so/ /sems can du 'dzin pa dang / srog tu 'dzin pa dang / gang zag tu 'dzin par 'gyur lags so/ / bcom ldan 'das kyis bka' stsal pa/ rab 'byor/ 'di ji snyam du sems/ lan gcig phyir 'ong ba 'di snyam du/ bdag gis lan gcig phyir 'ong ba'i 'bras bu thob bo/ /snyam du sems sam/ rab 'byor gyis gsol pa/ bcom ldan 'das/ de ni/ ma lags so/ /de ci'i slad du zhe na/ gang lan gcig phyir 'ong ba nyid du zhugs pa'i chos de gang yang ma mchis pa'i slad du ste/ des na/ lan gcig phyir 'ong ba zhes bgyi'o/ /bcom ldan 'das kyis bka' stsal pa/ rab 'byor/ 'di ji snyam du sems/ phyir mi 'ong ba 'di snyam du / bdag gis phyir mi 'ong ba'i 'bras bu thob bo/ /snyam du sems sam/ rab 'byor gyis gsol pa/ bcom ldan 'das de ni/ ma lags so/ /de ci'i slad du zhe na/ gang phyir mi 'ong ba nyid du zhugs pa'i chos de gang yang ma mchis pa'i slad du ste/ des na/ phyir mi 'ong ba zhes bgyi'o/ /bcom ldan 'das kyis bka' stsal pa/ rab 'byor/ 'di ji snyam du sems/ dgra bcom pa 'di snyam du/ bdag gis dgra bcom pa nyid thob bo/ /snyam du sems sam/ rab 'byor gyis gsol pa/ bcom ldan 'das/ de ni/ ma lags so/ /de ci'i slad du zhe na / gang dgra bcom pa zhes bgyi ba'i chos de gang yang ma mchis pa'i slad du'o/ /bcom ldan 'das/ gal te dgra bcom pa 'di snyam du/ bdag gis dgra bcom pa nyid thob bo/ /snyam du sems par gyur na/ de nyid de'i bdag tu 'dzin par 'gyur lags so/ /sems can du 'dzin pa dang / srog tu 'dzin pa dang / gang zag tu 'dzin par 'gyur lags so/ /bcom ldan 'das| bdag ni/ de bzhin gshegs pa dgra bcom pa yang dag par rdzogs pa'i sangs rgyas kyis nyon mongs pa med par gnas pa rnams kyi mchog tu bstan te/ bcom ldan 'das/ bdag 'dod chags dang bral ba dgra bcom pa lags kyang / bcom ldan 'das/ bdag 'di snyam du/ bdag ni/ dgra bcom pa'o/ /snyam du mi sems lags so/ /bcom ldan 'das/ gal te bdag 'di snyam du/ bdag gis dgra bcom pa nyid thob bo/ /snyam du sems par gyur na/ de bzhin gshegs pas bdag la rigs kyi bu rab 'byor ni/ nyon mongs pa med par gnas pa rnams kyi mchog yin te/ ci la'ang mi gnas pas na/ nyon mongs pa med par gnas pa/ nyon mongs pa med par gnas pa zhes lung mi ston lags so/ /bcom ldan 'das kyis bka' stsal pa/ rab 'byor/ 'di ji snyam du sems/ de bzhin gshegs pas de bzhin gshegs pa dgra bcom pa yang dag par rdzogs pa'i sangs rgyas mar me mdzad las gang blangs pa'i chos de gang yang yod dam/ rab 'byor gyis gsol pa/ bcom ldan 'das/ de ni/ ma lags te/ de bzhin gshegs pas de bzhin gshegs pa dgra bcom pa yang dag par rdzogs pa'i sangs rgyas mar me mdzad las gang blangs pa'i chos de gang yang ma mchis so/ /bcom ldan 'das kyis bka' stsal pa/ rab 'byor/ byang chub sems dpa' gang la la zhig 'di skad du/ bdag gis zhing bkod pa rnams bsgrub par bya'o/ /zhes zer na/ de ni/ mi bden par smra ba'o/ /de ci'i phyir zhe na/ rab 'byor/ zhing bkod pa rnams zhing bkod pa rnams zhes bya ba ni/ bkod pa de dag med par de bzhin gshegs pas gsungs pa'i phyir te/ des na/ zhing bkod pa rnams zhes bya'o/ /rab 'byor| de lta bas na/ byang chub sems dpa' sems dpa' chen pos 'di ltar mi gnas par sems bskyed par bya'o/ /ci la'ang mi gnas par sems bskyed par bya'o/ /gzugs la'ang mi gnas par sems bskyed par bya'o/ /sgra dang / dri dang / ro dang / reg bya dang / chos la'ang mi gnas par sems bskyed par bya'o/ /rab 'byor/ 'di lta ste/ dper na/ skyes bu zhig lus 'di lta bur gyur te/ 'di lta ste/ ri'i rgyal po ri rab tsam du gyur na/ rab 'byor/ 'di ji snyam du sems/ lus de che ba yin nam/ rab 'byor gyis gsol pa/ bcom ldan 'das| lus de che ba lags so/ /bde bar gshegs pa/ lus de che lags so/ /de ci'i slad du zhe na/ de bzhin gshegs pas de dngos po ma mchis par gsungs pa'i slad du ste| des na/ lus zhes bgyi'o/ /de dngos po ma mchis par de bzhin gshegs pas gsungs te/ des na/ lus che zhes bgyi'o/ /bcom ldan 'das kyis bka' stsal pa/ rab 'byor| 'di ji snyam du sems/ gang+gA'i klung gi bye ma ji snyed pa gang+gA'i klung yang de snyed kho nar gyur na/ de dag gi bye ma gang yin pa de dag mang ba yin nam/ rab 'byor gyis gsol pa/ bcom ldan 'das/ gang+gA'i klung de dag nyid kyang mang lags na/ de dag gi bye ma lta smos kyang mi 'tshal/ bcom ldan 'das kyis bka' stsal pa/ rab 'byor/ khyod mos par bya/ khyod kyis khong du chud par bya'o/ /gang+gA'i klung de dag gi bye ma ji snyed pa de snyed kyi 'jig rten gyi khams kyi skyes pa'am/ bud med gang la la zhig gis rin po che sna bdun gyis rab tu gang bar byas te de bzhin gshegs pa dgra bcom pa yang dag par rdzogs pa'i sangs rgyas rnams la sbyin pa byin na/ rab 'byor/ 'di ji snyam du sems/ skyes pa'am bud med de/ gzhi de las bsod nams mang du bskyed dam/ rab 'byor gyis gsol pa/ bcom ldan 'das/ mang lags so/ /bde bar gshegs pa/ mang lags te| skyes pa'am bud med de/ gzhi de las bsod nams mang du bskyed do/ /bcom ldan 'das kyis bka' stsal pa/ rab 'byor/ gang gis 'jig rten gyi khams de snyed rin po che sna bdun gyis rab tu gang bar byas te de bzhin gshegs pa dgra bcom pa yang dag par rdzogs pa'i sangs rgyas rnams la sbyin pa byin pa bas/ gang gis chos kyi rnam grangs 'di las tha na tshig bzhi pa'i tshigs su bcad pa tsam bzung nas gzhan dag la yang bshad de yang dag par rab tu bstan na/ de nyid de'i gzhi de las bsod nams ches mang du grangs med dpag tu med pa bskyed do/ /yang rab 'byor/ sa phyogs gang na chos kyi rnam grangs 'di las tha na tshig bzhi pa'i tshigs su bcad pa tsam 'don tam/ bton pa'i sa phyogs de/ lha dang / mi dang / lha ma yin du bcas pa'i 'jig rten gyi mchod rten du gyur pa yin na/ su zhig chos kyi rnam grangs 'di len pa dang / 'dzin pa dang / klog pa dang / kun chub par byed pa dang / tshul bzhin du yid la byed pa de/ ngo mtshar rab dang ldan par gyur pa lta ci smos/ sa phyogs de na ston pa yang bzhugs te/ bla ma'i gnas gzhan dag kyang gnas so/ /de skad ces bka' stsal pa dang / bcom ldan 'das la tshe dang ldan pa rab 'byor gyis 'di skad ces gsol to/ /bcom ldan 'das/ chos kyi rnam grangs 'di'i ming ci lags/ ji ltar gzung bar bgyi/ de skad ces gsol pa dang / bcom ldan 'das kyis tshe dang ldan pa rab 'byor la 'di skad ces bka' stsal to/ /rab 'byor/ chos kyi rnam grangs 'di shes rab kyi pha rol tu phyin pa zhes bya ste/ 'di de ltar zungs shig /de ci'i phyir zhe na/ rab 'byor/ de bzhin gshegs pas shes rab kyi pha rol tu phyin pa gang gsungs pa de nyid pha rol tu phyin pa med pa'i phyir te/ des na/ shes rab kyi pha rol tu phyin pa zhes bya'o/ /rab 'byor/ 'di ji snyam du sems/ de bzhin gshegs pas gang gsungs pa'i chos de gang yang yod dam/ rab 'byor gyis gsol pa/ bcom ldan 'das/ de bzhin gshegs pas gang gsungs pa'i chos de dag gang yang ma mchis so/ /bcom ldan 'das kyis bka' stsal pa/ rab 'byor/ 'di ji snyam du sems/ stong gsum gyi stong chen po'i 'jig rten gyi khams na sa'i rdul phra rab ji snyed yod pa de mang ba yin nam/ rab 'byor gyis gsol pa/ bcom ldan 'das/ sa'i rdul de mang lags so/ /bde bar gshegs pa/ mang lags so/ /de ci'i slad du zhe na/ bcom ldan 'das/ sa'i rdul gang lags pa de/ rdul ma mchis par de bzhin gshegs pas gsungs pa'i slad du ste/ des na/ sa'i rdul zhes bgyi'o/ /'jig rten gyi khams gang lags pa de khams ma mchis par de bzhin gshegs pas gsungs te/ des na/ 'jig rten gyi khams zhes bgyi'o/ /bcom ldan 'das kyis bka' stsal pa/ rab 'byor/ 'di ji snyam du sems/ skyes bu chen po'i mtshan sum cu rtsa gnyis po de dag gis de bzhin gshegs pa dgra bcom pa yang dag par rdzogs pa'i sangs rgyas su blta'am/ rab 'byor gyis gsol pa/ bcom ldan 'das/ de ni/ ma lags so/ /de ci'i slad du zhe na/ skyes bu chen po'i mtshan sum cu rtsa gnyis po gang dag de bzhin gshegs pas gsungs pa de dag mtshan ma mchis par de bzhin gshegs pas gsungs pa'i slad du ste/ des na/ de bzhin gshegs pa'i mtshan sum cu rtsa gnyis zhes bgyi'o/ /bcom ldan 'das kyis bka' stsal pa/ yang rab 'byor/ skyes pa'am bud med gang gis lus gang+gA'i klung gi bye ma snyed yongs su btang ba bas/ gang gis chos kyi rnam grangs 'di las tha na tshig bzhi pa'i tshigs su bcad pa tsam bzung ste gzhan dag la yang bstan na/ de gzhi de las bsod nams ches mang du grangs med dpag tu med pa bskyed do/ /de nas tshe dang ldan pa rab 'byor chos kyi shugs kyis mchi ma phyung ste| des mchi ma phyis nas bcom ldan 'das la 'di skad ces gsol to/ /'di ltar chos kyi rnam grangs 'di de bzhin gshegs pas gsungs pa ni/ bcom ldan 'das/ ngo mtshar lags so/ /bde bar gshegs pa/ ngo mtshar lags so/ /bcom ldan 'das/ bdag gi ye shes skyes tshun chad bdag gis chos kyi rnam grangs 'di sngon nam yang ma thos so/ /bcom ldan 'das/ mdo bshad pa 'di la gang dag yang dag par 'du shes bskyed par 'gyur ba'i sems can de dag ni/ ngo mtshar rab dang ldan par 'gyur lags so/ /de ci'i slad du zhe na| bcom ldan 'das/ yang dag par 'du shes pa gang lags pa de nyid 'du shes ma mchis pa'i slad du ste/ de bas na/ yang dag par 'du shes yang dag par 'du shes zhes de bzhin gshegs pas gsungs so/ /bcom ldan 'das/ bdag chos kyi rnam grangs 'di bshad pa la rtog cing mos pa ni/ bdag la mos pa ma lags kyi| bcom ldan 'das/ slad ma'i tshe slad ma'i dus lnga brgya tha ma la sems can gang dag chos kyi rnam grangs 'di len pa dang / 'dzin pa dang / klog pa dang / kun chub par bgyid pa de dag ni/ ngo mtshar rab dang ldan par 'gyur lags so/ /yang bcom ldan 'das/ de dag ni/ bdag tu 'du shes 'jug par mi 'gyur/ sems can du 'du shes pa dang / srog tu 'du shes pa dang / gang zag tu 'du shes 'jug par mi 'gyur lags so/ /de ci'i slad du zhe na/ bcom ldan 'das/ bdag tu 'du shes pa dang / sems can du 'du shes pa dang / srog tu 'du shes pa dang / gang zag tu 'du shes pa gang lags pa de dag nyid 'du shes ma mchis pa'i slad du'o/ /de ci'i slad du zhe na/ sangs rgyas bcom ldan 'das rnams ni/ 'du shes thams cad dang bral ba'i slad du'o/ /de skad ces gsol pa dang / bcom ldan 'das kyis tshe dang ldan pa rab 'byor la 'di skad ces bka' stsal to/ /rab 'byor| de de bzhin no/ /de de bzhin te/ mdo 'di bshad pa 'di la gang dag mi skrag mi dngang zhing dngang bar mi 'gyur ba'i sems can de dag ni/ ngo mtshar rab dang ldan par 'gyur ro/ /de ci'i phyir zhe na/ rab 'byor/ pha rol tu phyin pa dam pa 'di ni/ de bzhin gshegs pas gsungs te/ pha rol tu phyin pa dam pa gang dag de bzhin gshegs pas gsungs pa de| sangs rgyas bcom ldan 'das dpag tu med pa rnams kyis kyang gsungs pa'i phyir te/ des na/ pha rol tu phyin pa dam pa zhes bya'o/ /yang rab 'byor/ de bzhin gshegs pa'i bzod pa'i pha rol tu phyin pa gang yin pa de nyid pha rol tu phyin pa med do/ /de ci'i phyir zhe na/ rab 'byor/ gang gi tshe ka ling+ka'i rgyal pos nga'i yan lag dang / nying lag rnam par bcad par gyur pa de'i tshe nga la bdag tu 'du shes sam/ sems can du 'du shes sam/ srog tu 'du shes sam/ gang zag tu 'du shes kyang ma byung zhing / nga la 'du shes ci yang med la/ 'du shes med par gyur pa yang ma yin pa'i phyir ro/ /de ci'i phyir zhe na/ rab 'byor/ gal te de'i tshe bdag tu 'du shes byung na/ de'i tshe gnod sems kyi 'du shes kyang 'byung la/ sems can du 'du shes pa dang / srog tu 'du shes pa dang / gang zag tu 'du shes pa byung na/ de'i tshe gnod sems kyi 'du shes kyang 'byung ba'i phyir ro/ /rab 'byor/ ngas mngon par shes te| 'das pa'i dus na nga tshe rabs lnga brgyar bzod par smra ba zhes bya ba'i drang srong du gyur pa de na yang nga la bdag tu 'du shes ma byung / sems can du 'du shes pa dang / srog tu 'du shes pa dang / gang zag tu 'du shes pa ma byung ngo / /rab 'byor/ de lta bas na/ byang chub sems dpa' sems dpa' chen pos 'du shes thams cad rnam par spangs te bla na med pa yang dag par rdzogs pa'i byang chub tu sems bskyed par bya'o/ /gzugs la mi gnas par sems bskyed par bya'o/ /sgra dang / dri dang / ro dang / reg bya dang / chos la'ang mi gnas par sems bskyed par bya'o/ /chos med pa la'ang mi gnas par sems bskyed par bya'o/ /ci la'ang mi gnas par sems bskyed par bya'o/ /de ci'i phyir zhe na/ gnas pa gang yin pa de nyid mi gnas pa'i phyir te/ de bas na/ de bzhin gshegs pas 'di skad du/ byang chub sems dpas mi gnas par sbyin pa sbyin par bya'o/ / zhes gsungs so/ /yang rab 'byor/ byang chub sems dpas 'di ltar sems can thams cad kyi don gyi phyir sbyin pa yongs su gtang bar bya'o/ /sems can du 'du shes pa gang yin pa de nyid kyang 'du shes med pa ste/ de bzhin gshegs pas sems can thams cad ces gang gsungs pa de bdag nyid kyang med pa'o/ /de ci'i phyir zhe na/ rab 'byor/ de bzhin gshegs pa ni/ yang dag par gsung pa/ bden par gsung ba/ de bzhin nyid du gsung ba ste/ de bzhin gshegs pa ni/ ma nor ba de bzhin nyid gsung ba'i phyir ro/ / yang rab 'byor/ de bzhin gshegs pas chos gang mngon par rdzogs par sangs rgyas pa'am/ bstan pa de la ni/ bden pa yang med/ rdzun pa yang med do/ /rab 'byor/ 'di lta ste| dper na/ mig dang ldan pa'i mi zhig mun par zhugs na ci yang mi mthong ba de bzhin du gang dngos por lhung bas sbyin pa yongs su gtong ba'i byang chub sems dpar blta'o| |rab 'byor/ 'di lta ste/ dper na/ nam langs te nyi ma shar nas mig dang ldan pa'i mis gzugs rnam pa sna tshogs dag mthong ba de bzhin du gang dngos por ma lhung bas sbyin pa yongs su gtong ba'i byang chub sems dpar blta'o/ /yang rab 'byor/ rigs kyi bu'am/ rigs kyi bu mo gang dag chos kyi rnam grangs 'di len pa dang / 'dzin pa dang / klog pa dang / kun chub par byed pa dang / gzhan dag la yang rgya cher yang dag par rab tu ston pa de dag ni/ de bzhin gshegs pas mkhyen/ de dag ni/ de bzhin gshegs pas gzigs te/ sems can de dag thams cad ni/ bsod nams kyi phung po dpag tu med pa bskyed par 'gyur ro/ /yang rab 'byor/ skyes pa'am/ bud med gang zhig snga dro'i dus kyi tshe lus gang+gA'i klung gi bye ma snyed yongs su gtong la/ phyed kyi dus dang / phyi dro'i dus kyi tshe yang lus gang+gA'i klung gi bye ma snyed yongs su gtong ste/ rnam grangs 'di lta bur bskal pa bye ba khrag khrig 'bum phrag du mar lus yongs su gtong ba bas/ gang gis chos kyi rnam grangs 'di thos nas mi spong na/ de nyid gzhi de las bsod nams ches mang du grangs med dpag tu med pa bskyed na/ gang gis yi ger bris nas len pa dang / 'dzin pa dang / klog pa dang / kun chub par byed pa dang / gzhan dag la yang rgya cher yang dag par rab tu ston pa lta ci smos/ yang rab 'byor/ chos kyi rnam grangs 'di ni/ bsam gyis mi khyab cing mtshungs pa med de/ chos kyi rnam grangs 'di ni| theg pa mchog la yang dag par zhugs pa'i sems can rnams kyi don dang / theg pa phul du phyin pa la yang dag par zhugs pa'i sems can rnams kyi don gyi phyir de bzhin gshegs pas gsungs so/ /gang dag chos kyi rnam grangs 'di len pa dang / 'dzin pa dang / klog pa dang / kun chub par byed pa dang / gzhan dag la yang rgya cher yang dag par rab tu ston pa de dag ni/ de bzhin gshegs pas mkhyen/ de dag ni/ de bzhin gshegs pas gzigs te/ sems can de dag thams cad ni/ bsod nams kyi phung po dpag tu med pa dang ldan par 'gyur ro/ /bsod nams kyi phung po bsam gyis mi khyab pa dang / mtshungs pa med pa dang / gzhal du med pa dang / tshad med pa dang ldan par 'gyur te/ sems can de dag thams cad nga'i byang chub phrag pa la thogs par 'gyur ro/ /de ci'i phyir zhe na/ rab 'byor/ dman pa la mos pa rnams kyis chos kyi rnam grangs 'di mnyan par mi nus te/ bdag tu lta ba rnams kyis ma yin/ sems can du lta ba rnams kyis ma yin/ srog tu lta ba rnams kyis ma yin zhing / gang zag tu lta ba rnams kyis mnyan pa dang / blang ba dang / gzung ba dang / klog pa dang / kun chub par byed mi nus te/ de ni/ gnas med pa'i phyir ro/ /yang rab 'byor/ sa phyogs gang na mdo sde 'di ston pa'i sa phyogs de/ lha dang / mi dang / lha ma yin du bcas pa'i 'jig rten gyis mchod par 'os par 'gyur ro/ /sa phyogs de phyag bya bar 'os pa dang / bskor ba bya bar 'os par yang 'gyur ro/ /sa phyogs de ni/ mchod rten lta bur 'gyur ro/ /rab 'byor/ rigs kyi bu'am rigs kyi bu mo gang dag 'di lta bu'i mdo sde'i tshig 'di dag len pa dang / 'dzin pa dang / klog pa dang / kun chub par byed pa de dag ni/ mnar bar 'gyur/ shin tu mnar bar 'gyur ro/ /de ci'i phyir zhe na/ rab 'byor/ sems can de dag gis tshe rabs snga ma'i mi dge ba'i las ngan song du skye bar 'gyur ba gang dag byas pa dag tshe 'di nyid la mnar bas/ tshe rabs snga ma'i mi dge ba'i las de dag 'byang bar 'gyur te/ sangs rgyas kyi byang chub kyang 'thob par 'gyur ba'i phyir ro/ /rab 'byor/ ngas mngon par shes te/ 'das pa'i dus bskal pa grangs med pa'i yang ches grangs med pa na/ de bzhin gshegs pa dgra bcom pa yang dag par rdzogs pa'i sangs rgyas mar me mdzad kyi pha rol gyi yang ches pha rol na/ sangs rgyas bye ba khrag khrig 'bum phrag brgyad cu rtsa bzhi dag byung ba ngas mnyes par byas te/ mnyes par byas nas thugs ma phyung bar byas te/ rab 'byor/ sangs rgyas bcom ldan 'das de dag ngas mnyes par byas nas thugs byung bar ma byas pa gang yin pa dang / phyi ma'i dus lnga brgya tha mar gyur pa na/ mdo sde 'di len pa dang / 'dzin pa dang / klog pa dang / kun chub par byed pa gang yin pa las/ rab 'byor/ bsod nams kyi phung po 'di la bsod nams kyi phung po snga mas brgya'i char yang mi phod/ stong gi cha dang / 'bum gyi cha dang / grangs dang / cha dang / bgrang ba dang / dpe dang / zla dang / rgyur yang mi bzod do/ /rab 'byor/ gal te de'i tshe rigs kyi bu'am rigs kyi bu mo dag bsod nams kyi phung po ji snyed rab tu 'dzin par 'gyur ba'i rigs kyi bu'am rigs kyi bu mo de dag gi bsod nams kyi phung po ngas brjod na/ sems can rnams myo myo por 'gyur te/ sems 'khrugs par 'gyur ro/ /yang rab 'byor/ chos kyi rnam grangs 'di bsam gyis mi khyab ste/ 'di'i rnam par smin pa yang bsam gyis mi khyab pa nyid du rig par bya'o/ /de nas bcom ldan 'das la tshe dang ldan pa rab 'byor gyis 'di skad ces gsol to/ /bcom ldan 'das/ byang chub sems dpa'i theg pa la yang dag par zhugs pas ji ltar gnas par bgyi/ ji ltar bsgrub par bgyi/ ji ltar sems rab tu gzungs bar bgyi/ bcom ldan 'das kyis bka' stsal pa/ rab 'byor/ 'di la byang chub sems dpa'i theg pa la yang dag par zhugs pas 'di snyam du/ bdag gis sems can thams cad phung po lhag ma med pa'i mya ngan las 'das pa'i dbyings su yongs su mya ngan las bzla'o/ /de ltar sems can rnams yongs su mya ngan las bzlas kyang sems can gang yang yongs su mya ngan las bzlas par gyur pa med do/ /snyam du sems bskyed par bya'o/ /de ci'i phyir zhe na/ rab 'byor/ gal te byang chub sems dpa' sems can du 'du shes 'jug na/ byang chub sems dpa' zhes mi bya la/ gang zag gi bar du 'du shes 'jug na yang de byang chub sems dpa' zhes mi bya ba'i phyir ro/ /de ci'i phyir zhe na/ rab 'byor/ gang byang chub sems dpa'i theg pa la yang dag par zhugs pa zhes bya ba'i chos de gang yang med pa'i phyir ro/ /rab 'byor/ 'di ji snyam du sems/ de bzhin g shegs pas de bzhin gshegs pa mar me mdzad las gang bla na med pa yang dag par rdzogs pa'i byang chub mngon par rdzogs par sangs rgyas pa'i chos de gang yang yod dam/ de skad ces bka' stsal pa dang / bcom ldan 'das la tshe dang ldan pa rab 'byor gyis 'di skad ces gsol to/ /bcom ldan ' das| de bzhin gshegs pas de bzhin gshegs pa mar me mdzad las gang bla na med pa yang dag par rdzogs pa'i byang chub mngon par rdzogs par sangs rgyas pa'i chos de yang ma mchis so/ /de skad ces gsol pa dang / bcom ldan 'das kyis tshe dang ldan pa rab 'byor la 'di skad ces bka' stsal to/ /rab 'byor/ de de bzhin no/ /de de bzhin te/ de bzhin gshegs pas de bzhin gshegs pa mar me mdzad las gang bla na med pa yang dag par rdzogs pa'i byang chub mngon par rdzogs par sangs rgyas pa'i chos de gang yang med do/ /rab 'byor/ gal te de bzhin gshegs pas gang mngon par rdzogs par sangs rgyas pa'i chos de 'ga' zhig yod par gyur na/ de bzhin gshegs pa mar me mdzad kyis nga la bram ze'i khye'u/ khyod ma 'ongs pa'i dus na de bzhin gshegs pa dgra bcom pa yang dag par rdzogs pa'i sangs rgyas shAkya thub pa zhes bya bar 'gyur ro/ /zhes lung mi ston pa zhig na/ rab 'byor/ 'di ltar de bzhin gshegs pas gang bla na med pa yang dag par rdzogs pa'i byang chub mngon par rdzogs par sangs rgyas pa'i chos de gang yang med pas/ de'i phyir de bzhin gshegs pa mar me mdzad kyis ngal bram ze'i khye'u/ khyod ma 'ongs pa'i dus na de bzhin gshegs pa dgra bcom pa yang dag par rdzogs pa'i sangs rgyas shAkya thub pa zhes bya bar 'gyur ro/ /zhes lung bstan to/ /de ci'i phyir zhe na/ rab 'byor/ de bzhin gshegs pa zhes bya ba ni/ yang dag pa de bzhin nyid kyi tshig bla dwags yin pa'i phyir ro/ /rab 'byor/ gang la la zhig 'di skad du/ de bzhin gshegs pa dgra bcom pa yang dag par rdzogs pa'i sangs rgyas kyis bla na med pa yang dag par rdzogs pa'i byang chub mngon par rdzogs par sangs rgyas so/ /zhes zer na/ de log par smra ba yin no/ /de ci'i phyir zhe na/ rab 'byor/ de bzhin gshegs pas gang bla na med pa yang dag par rdzogs pa'i byang chub mngon par rdzogs par sangs rgyas pa'i chos de gang yang med pa'i phyir ro/ /rab 'byor/ de bzhin gshegs pas chos gang mngon par rdzogs par sangs rgyas pa de la bden pa yang med/ rdzun pa yang med de/ de bas na/ de bzhin gshegs pas chos thams cad sangs rgyas kyi chos so/ /zhes gsungs ngo / /rab 'byor/ chos thams cad ces bya ba ni/ de dag thams cad chos med pa yin te/ de bas na/ chos thams cad sangs rgyas kyi chos zhes bya'o/ /rab 'byor/ 'di lta ste/ dper na/ mi zhig lus dang ldan zhing lus chen por gyur pa bzhin no/ /tshe dang ldan pa rab 'byor gyis gsol pa| bcom ldan 'das/ de bzhin gshegs pas mi zhig lus dang ldan zhing lus chen po zhes gang gsungs pa de/ de bzhin gshegs pas lus ma mchis par gsungs te/ des na/ lus dang ldan zhing lus chen po zhes bgyi'o/ /bcom ldan 'das kyis bka' stsal pa/ rab 'byor/ de de bzhin te/ byang chub sems dpa' gang 'di skad du/ bdag gis sems can rnams yongs su mya ngan las bzla'o/ /zhes zer na/ de byang chub sems dpa' zhes mi bya'o/ /de ci'i phyir zhe na/ rab 'byor/ gang byang chub sems dpa' zhes bya ba'i chos de gang yang yod dam/ rab 'byor gyis gsol pa/ bcom ldan 'das/ de ni/ ma mchis lags so/ /bcom ldan 'das kyis bka' stsal pa/ rab 'byor/ de bas na/ de bzhin gshegs pas chos thams cad ni/ sems can med pa/ srog med pa/ gang zag med pa'o/ /zhes gsung ngo / /rab 'byor| byang chub sems dpa' gang zhig 'di skad du/ bdag gis zhing bkod pa rnams bsgrub bo/ /zhes zer na/ de yang de bzhin du brjod par bya'o/ /de ci'i phyir zhe na/ rab 'byor zhing bkod pa rnams zhing bkod pa rnams zhes bya ba de ni/ de dag bkod pa med par de bzhin gshegs pas gsungs pa'i phyir te/ des na zhing bkod pa rnams zhes bya'o/ /rab 'byor| byang chub sems dpa' gang zhig chos rnams ni/ bdag med pa'o/ /chos rnams ni/ bdag med pa'o/ /zhes mos pa de ni/ de bzhin gshegs pa dgra bcom pa yang dag par rdzogs pa'i sangs rgyas kyis byang chub sems dpa' byang chub sems dpa'o/ /zhes brjod do/ /rab 'byor/ 'di ji snyam du sems/ de bzhin gshegs pa la sha'i spyan mnga'am/ rab 'byor gyis gsol pa/ bcom ldan 'das/ de de lta lags te/ de bzhin gshegs pa la sha'i spyan mnga'o/ /bcom ldan 'das kyis bka' stsal pa/ rab 'byor/ 'di ji snyam du sems/ de bzhin gshegs pa la lha'i spyan mnga'am/ rab 'byor gyis gsol pa/ bcom ldan 'das/ de de lta lags te/ de bzhin gshegs pa la lha'i spyan mnga'o/ /bcom ldan 'das kyis bka' stsal pa/ rab 'byor/ 'di ji snyam du sems/ de bzhin gshegs pa la shes rab kyi spyan mnga'am/ rab 'byor/ gyis gsol pa/ bcom ldan 'das/ de de lta lags te/ de bzhin gshegs pa la shes rab kyi spyan mnga'o/ /bcom ldan 'das kyis bka' stsal pa/ rab 'byor/ 'di ji snyam du sems/ de bzhin gshegs pa la chos kyi spyan ma nga'am/ rab 'byor gyis gsol pa/ bcom ldan 'das/ de de lta lags te/ de bzhin gshegs pa la chos kyi spyan mnga'o/ /bcom ldan 'das kyis bka' stsal pa/ rab 'byor/ 'di ji snyam du sems/ de bzhin gshegs pa la sangs rgyas kyi spyan mnga'am/ rab 'byor gyis gsol pa/ bcom ldan 'das/ de de lta lags te/ de bzhin gshegs pa la sangs rgyas kyi spyan mnga'o/ /bcom ldan 'das kyis bka' stsal pa/ rab 'byor/ 'di ji snyam du sems/ gang+gA'i klung gi bye ma ji snyed pa gang+gA'i klung yang de snyed du gyur la/ de dag gi bye ma ji snyed pa de snyed kyi 'jig rten gyi khams su gyur na/ 'jig rten gyi khams de dag ci mang ba yin nam/ rab 'byor gyis gsol pa/ bcom ldan 'das/ de de lta lags te/ 'jig rten gyi khams de dag mang ba lags so/ /bcom ldan 'das kyis bka' stsal pa/ rab 'byor/ 'jig rten gyi khams de dag na sems can ji snyed yod pa de dag gi bsam pa tha dad pa'i sems kyi rgyun ngas rab tu shes so/ /de ci'i phyir zhe na/ rab 'byor/ sems kyi rgyun zhes bya ba ni/ de rgyun med par de bzhin gshegs pas gsungs pa'i phyir te/ des na| sems kyi rgyun zhes bya'o/ /de ci'i phyir zhe na/ rab 'byor/ 'das pa'i sems kyang dmigs su med/ ma 'ongs pa'i sems kyang dmigs su med/ da ltar byung ba'i sems kyang dmigs su med pa'i phyir ro/ /rab 'byor/ 'di ji snyam du sems/ gang gis stong gsum gyi stong chen po'i 'jig rten gyi khams 'di rin po che sna bdun gyis yongs su gang bar byas te sbyin pa byin na/ rigs kyi bu'am/ rigs kyi bu mo de/ gzhi de las bsod nams mang du bskyed dam/ rab 'byor gyis gsol pa/ bcom ldan 'das/ mang lags so/ /bde bar gshegs pa/ mang lags so/ /bcom ldan 'das kyis bka' stsal pa/ rab 'byor/ de de bzhin no/ /de de bzhin te/ rigs kyi bu'am| rigs kyi bu mo de/ gzhi de las bsod nams kyi phung po mang du bskyed do/ /rab 'byor/ gal te bsod nams kyi phung po bsod nams kyi phung por gyur na/ bsod nams kyi phung po bsod nams kyi phung po zhes de bzhin gshegs pas mi gsung ngo / /rab 'byor/ 'di ji snyam du sems/ gzugs kyi sku yongs su grub pas de bzhin gshegs par blta'am/ rab 'byor gyis gsol pa/ bcom ldan 'das/ de ni/ ma lags te/ gzugs kyi sku yongs su grub pas de bzhin gshegs par mi blta'o/ /de ci'i slad du zhe na/ bcom ldan 'das/ gzugs kyi sku yongs su grub pa/ gzugs kyi sku yongs su rdzogs pa zhes bgyi ba ni/ de yongs su grub pa ma mchis par de bzhin gshegs pas gsungs pa'i slad du ste/ des na/ gzugs kyi sku yongs su grub pa zhes bgyi'o/ /bcom ldan 'das kyis bka' stsal pa| rab 'byor/ 'di ji snyam du sems/ mtshan phun sum tshogs pas/ de bzhin gshegs par blta'am/ rab 'byor gyis gsol pa/ bcom ldan 'das/ de ni| ma lags te/ mtshan phun sum tshogs pas de bzhin gshegs par mi blta'o/ /de ci'i slad du zhe na/ de bzhin gshegs pas mtshan phun sum tshogs par gang gsungs pa de/ mtshan phun sum tshogs pa ma mchis par de bzhin gshegs pas gsungs pa'i slad du ste/ des na/ mtshan phun sum tshogs pa zhes bgyi'o/ / bcom ldan 'das kyis bka' stsal pa/ rab 'byor/ 'di ji snyam du sems/ de bzhin gshegs pa 'di snyam du/ ngas chos bstan to zhes dgongs so/ /snyam na/ rab 'byor/ de ltar mi blta ste/ de bzhin gshegs pas gang bstan pa'i chos de gang yang med do/ /rab 'byor/ su zhig 'di skad du/ de bzhin gshegs pas chos bstan to| |zhes zer na/ rab 'byor/ de ni/ med pa dang / log par zin pas nga la skur bar 'gyur ro/ /de ci'i phyir zhe na/ rab 'byor/ chos bstan pa zhes bya ba dmigs par 'gyur ba'i chos bstan pa chos bstan pa zhes bya ba de/ gang yang med pa'i phyir ro/ /de nas bcom ldan 'das la tshe dang ldan pa rab 'byor gyis 'di skad gsol to/ /bcom ldan 'das/ ma 'ongs pa'i dus na sems can gang dag 'di lta bu'i chos bstan pa 'di thos nas mngon par yid ches par 'gyur ba mchis sam/ bcom ldan 'das kyis bka' stsal pa| rab 'byor/ de dag ni/ sems can yang ma yin/ sems can med pa yang ma yin no/ /de ci'i phyir zhe na/ rab 'byor/ sems can rnams zhes bya ba ni/ de bzhin gshegs pas de dag sems can med par gsungs pa'i phyir te/ des na/ sems can rnams zhes bya'o/ /rab 'byor/ 'di ji snyam du sems/ de bzhin gshegs pas gang bla na med pa yang dag par rdzogs pa'i byang chub mngon par rdzogs par sangs rgyas pa'i chos de gang yang yod dam/ tshe dang ldan pa rab 'byor gyis gsol pa/ bcom ldan 'das/ de bzhin gshegs pas gang bla na med pa yang dag par rdzogs pa'i byang chub mngon par rdzogs par sangs rgyas pa'i chos de gang yang ma mchis lags so/ /bcom ldan 'das kyis bka' stsal pa/ rab 'byor/ de de bzhin no/ /de de bzhin te/ de chos cung zad kyang med cing mi dmigs te/ des na/ bla na med pa yang dag par rdzogs pa'i byang chub ces bya'o/ /yang rab 'byor/ chos de ni/ mnyam pa ste/ de la mi mnyam pa gang yang med pas des na/ bla na med pa yang dag par rdzogs pa'i byang chub ces bya'o/ /bla na med pa yang dag par rdzogs pa'i byang chub de ni/ bdag med pa dang / sems can med pa dang / srog med pa dang / gang zag med par mnyam pa ste/ dge ba'i chos thams cad kyis mngon par rdzogs par 'tshang rgya'o/ /rab 'byor/ dge ba'i chos rnams dge ba'i chos rnams zhes bya ba ni/ de dag de bzhin gshegs pas chos med pa nyid du gsungs te/ des na dge ba'i chos rnams zhes bya'o/ /yang rab 'byor/ rigs kyi bu'am/ rigs kyi bu mo gang la la zhig gis stong gsum gyi stong chen po'i 'jig rten gyi khams na ri'i rgyal po ri rab gang dag ji snyed yod pa de tsam gyi rin po che sna bdun gyi phung po mngon par bsdus te sbyin pa byin pa bas/ gang gis shes rab kyi pha rol tu phyin pa 'di las tha na tshig bzhi pa'i tshigs su bcad pa tsam bzung nas gzhan dag la yang bstan na/ rab 'byor/ bsod nams kyi phung po 'di la bsod nams kyi phung po snga ma des brgya'i char yang mi phod pa nas rgyu'i bar du yang nye bar mi bzod do/ /rab 'byor/ 'di ji snyam du sems/ de bzhin gshegs pa 'di snyam du/ ngas sems can rnams dkrol lo zhes dgongs so/ /snyam na/ rab 'byor/ de de ltar mi blta'o/ /de ci'i phyir zhe na/ rab 'byor/ de bzhin gshegs pas gang bkrol ba'i sems can de dag gang yang med pa'i phyir ro/ /rab 'byor/ gal te de bzhin gshegs pas sems can gang la la zhig bkrol bar gyur na/ de nyid de bzhin gshegs pa'i bdag tu 'dzin par 'gyur/ sems can du 'dzin pa dang / srog tu 'dzin pa dang / gang zag tu 'dzin par 'gyur ro/ /rab 'byor/ bdag tu 'dzin ces bya ba ni/ de 'dzin pa med par de bzhin gshegs pas gsungs na/ de yang byis pa so so'i skye bo rnams kyis bzung ngo / /rab 'byor/ byis pa so so'i skye bo rnams zhes bya ba ni/ de dag skye bo med pa nyid du de bzhin gshegs pas gsungs te| des na/ byis pa so so'i skye bo rnams zhes bya'o/ /rab 'byor/ 'di ji snyam du sems/ mtshan phun sum tshogs pas de bzhin gshegs par blta'am/ rab 'byor gyis gsol pa/ bcom ldan 'das/ de ni/ ma lags te/ mtshan phun sum tshogs pas de bzhin gshegs par mi blta'o/ /bcom ldan 'das kyis bka' stsal pa/ rab 'byor/ de de bzhin te/ mtshan phun sum tshogs pas de bzhin gshegs par mi blta'o/ /rab 'byor/ gal te mtshan phun sum tshogs pas de bzhin gshegs par blta bar gyur na/ 'khor los bsgyur ba'i rgyal po yang de bzhin gshegs par 'gyur te/ de bas na/ mtshan phun sum tshogs pas de bzhin gshegs par mi blta'o/ /de nas bcom ldan 'das la tshe dang ldan pa rab 'byor gyis 'di skad ces gsol to/ /bcom ldan 'das kyis gsungs pa'i don bdag gis 'tshal ba ltar na/ mtshan phun sum tshogs pas de bzhin gshegs par mi blta'o/ /de nas bcom ldan 'das kyis de'i tshe tshigs su bcad pa 'di dag bka' stsal to/ /gang dag nga la gzugs su mthong / /gang dag nga la sgrar shes pa/ /log par spong bas zhugs pa ste/ /skye bo de dag nga mi mthong / / sangs rgyas rnams ni chos nyid blta/ /'dren pa rnams ni chos kyi sku/ /chos nyid shes par bya min pas/ /de ni rnam par shes mi nus/ /rab 'byor/ 'di ji snyam du sems/ mtshan phun sum tshogs pas de bzhin gshegs pa dgra bcom pa yang dag par rdzogs pa'i sangs rgyas so/ /snyam du 'dzin na/ rab 'byor/ khyod kyis de ltar mi blta ste/ rab ' byor| mtshan phun sum tshogs pas de bzhin gshegs pa dgra bcom pa yang dag par rdzogs pa'i sangs rgyas kyis bla na med pa yang dag par rdzogs pa'i byang chub mngon par rdzogs par sangs rgyas pa med do/ /rab 'byor/ 'di snyam du/ byang chub sems dpa'i theg pa la yang dag par zhugs pa rnams kyis chos la la zhig rnam par bshig gam/ chad par btags pa snyam du 'dzin na/ rab 'byor/ de ltar mi blta ste/ byang chub sems dpa'i theg pa la yang dag par zhugs pa rnams kyis chos gang yang rnam par bshig pa'am/ chad par btags pa med do/ /yang rab 'byor/ rigs kyi bu'am/ rigs kyi bu mo gang gis 'jig rten gyi khams gang+gA'i bye ma snyed dag rin po che sna bdun gyis rab tu gang bar byas te sbyin par byin pa bas/ byang chub sems dpa' gang zhig chos rnams bdag med cing skye ba med pa la bzod pa thob na/ de nyid gzhi de las bsod nams kyi phung po ches mang du bskyed do/ /yang rab 'byor/ byang chub sems dpas bsod nams kyi phung po yongs su gzung bar mi bya'o/ /tshe dang ldan pa rab 'byor gyis gsol pa/ bcom ldan 'das/ byang chub sems dpas bsod nams kyi phung po yongs su gzung bar mi bgyi lags sam/ bcom ldan 'das kyis bka' stsal pa/ rab 'byor/ yongs su gzung mod kyi/ log par mi gzung ste/ des na/ yongs su gzung ba zhes bya'o/ /rab 'byor/ gang la la zhig 'di skad du/ de bzhin gshegs pa bzhud dam/ byon tam/ bzhengs sam/ bzhugs sam/ mnal bar mdzad do/ /zhes de skad zer na/ des na ngas bshad pa'i don mi shes so| |de ci'i phyir zhe na/ rab 'byor/ de bzhin gshegs pa zhes bya ba ni/ gar yang ma bzhud/ gang nas kyang ma byon pa'i phyir te/ des na/ de bzhin gshegs pa dgra bcom pa yang dag par rdzogs pa'i sangs rgyas zhes bya'o/ /yang rab 'byor/ rigs kyi bu'am/ rigs kyi bu mo gang gis stong gsum gyi stong chen po'i 'jig rten gyi khams na sa'i rdul rnams ji snyed yod pa de dag 'di lta ste/ dper na/ rdul phra rab kyi tshogs bzhin du phye mar byas na/ rab 'byor/ 'di ci snyam du sems/ rdul phra rab kyi tshogs de mang ba yin nam/ rab 'byor gyis gsol pa/ bcom ldan 'das/ de de ltar lags te/ rdul phra rab kyi tshogs de mang ba lags so/ /de ci'i slad du zhe na| bcom ldan 'das/ gal te tshogs shig mchis par gyur na/ bcom ldan 'das kyis rdul phra rab kyi tshogs zhes bka' mi stsol ba'i slad du'o/ /de ci'i slad du zhe na/ bcom ldan 'das kyis rdul phra rab kyi tshogs zhes gang gsungs pa de tshogs ma mchis par de bzhin gshegs pas gsungs pa'i slad du ste/ des na/ rdul phra rab kyi tshogs zhes bgyi'o| |de bzhin gshegs pas stong gsum gyi stong chen po'i 'jig rten gyi khams zhes gang gsungs pa de/ khams ma mchis par de bzhin gshegs pas gsungs te| des na/ stong gsum gyi stong chen po'i 'jig rten gyi khams zhes bgyi'o/ /de ci'i slad du zhe na/ bcom ldan 'das/ gal te khams shig mchis par gyur na/ de nyid ril por 'dzin par 'gyur ba'i slad du'o/ /de bzhin gshegs pas ril por 'dzin par gang gsungs pa de/ 'dzin pa ma mchis par de bzhin gshegs pas gsungs te/ des na| ril por 'dzin pa zhes bgyi'o/ /bcom ldan 'das kyis bka' stsal pa/ rab 'byor/ ril por 'dzin pa nyid ni/ tha snyad de/ chos de ni/ brjod du med pa yin na/ de yang byis pa so so'i skye bo rnams kyis bzung ngo / /rab 'byor/ gang la la zhig 'di skad du/ de bzhin gshegs pas bdag tu lta bar gsungs shing / de bzhin gshegs pas sems can du lta ba dang / srog tu lta ba dang / gang zag tu lta bar gsungs so/ /zhes zer na/ rab 'byor/ de yang yang dag par smra bas smra ba yin nam/ rab 'byor gyis gsol pa/ bcom ldan 'das/ de ni/ ma lags so/ /bde bar gshegs pa/ de ni/ ma lags so/ /de ci'i slad du zhe na/ bcom ldan 'das/ de bzhin gshegs pas bdag tu lta bar gang gsungs pa de/ lta ba ma mchis par de bzhin gshegs pas gsungs pa'i slad du sta/ des na/ bdag tu lta ba zhes bgyi'o| |bcom ldan 'das kyis bka' stsal pa/ rab 'byor/ byang chub sems dpa'i theg pa la yang dag par zhugs pa rnams kyis 'di ltar chos thams cad shes par bya| blta bar bya/ mos par bya ste/ ci nas chos su 'du shes pa la yang mi gnas pa de ltar mos par bya'o/ /de ci'i phyir zhe na/ rab 'byor/ chos su 'du shes chos su 'du shes zhes bya ba ni/ 'du shes med par de bzhin gshegs pas gsungs pa'i phyir te/ des na/ chos su 'du shes zhes bya'o/ /yang rab 'byor/ byang chub sems dpa' sems dpa' chen po gang gis 'jig rten gyi khams dpag tu med cing grangs med pa dag rin po che sna bdun gyis rab tu gang bar byas te sbyin pa byin pa bas/ rigs kyi bu'am/ rigs kyi bu mo gang gis shes rab kyi pha rol tu phyin pa 'di las tha na tshig bzhi pa'i tshigs su bcad pa tsam blangs nas 'dzin tam/ klog gam/ kun chub par byed dam/ gzhan dag la yang rgya cher yang dag par rab tu ston na/ de nyid gzhi de las bsod nams mang du grangs med dpag tu med pa bskyed do/ /ji ltar yang dag par rab tu ston ce na/ ji ltar yang dag par rab tu mi ston pa de bzhin du ste/ des na/ yang dag par rab tu ston pa zhes bya'o/ /skar ma rab rib mar me dang / /sgyu ma zil ba chu bur dang / /rmi lam glog dang sprin lta bu/ /'dus byas de ltar blta bar bya/ /bcom ldan 'das kyis de skad ces bka' stsal nas gnas brtan rab 'byor dang / byang chub sems dpa' de dag dang / 'khor bzhi po dge slong dang / dge slong ma dang / dge bsnyen dang / dge bsnyen ma de dag dang / lha dang / mi dang / lha ma yin dang / dri zar bcas pa'i 'jig rten yi rang ste bcom ldan 'das kyis gsungs pa la mngon par bstod do/ /'phags pa shes rab kyi pha rol tu phyin pa rdo rje gcod pa zhes bya ba theg pa chen po'i mdo rdzogs so//

CLOSE WINDOW