བོད་ཡིག

e-texts based on the ACIP/ALL Input

@##/ /rgya gar skad du/ AR+ya brah+ma pa ri pr-its+tshA nA ma ma hA yA na sU tra/ bod skad du/ 'phags pa tshangs pas zhus pa zhes bya ba theg pa chen po'i mdo/ sangs rgyas dang / byang chub sems dpa' thams cad la phyag 'tshal lo/ /'di skad bdag gis thos pa dus gcig na/ bcom ldan 'das grong khyer yangs pa na tshal chen po'i khang pa brtsegs pa'i gnas na dge slong khri nyis stong gi dge 'dun chen po dang / byang chub sems dpa' sems dpa' chen po rab tu mang po dang thabs gcig tu bzhugs te/ de nas bcom ldan 'das mi nyal tsam gyi nam gyi gung thun la skyil mo krung bcas nas dran pa mngon du bzhag ste/ rtog pa dang bcas pa/ dpyod pa dang bcas pa'i ting nge 'dzin las skyes pa'i dga' ba dang / bde ba can bsam gtan dang po la snyoms par zhugs so/ /bcom ldan 'das de las bzhengs nas rtog pa med pa/ dpyod pa med pa'i ting nge 'dzin las skyes pa'i dga' ba dang / bde ba can bsam gtan gnyis pa la snyoms par zhugs so/ /bcom ldan 'das de las bzhengs nas dga' ba'i 'dod chags dang bral ba/ btang snyoms pa dran pa dang ldan pa/ bde par gnas pa bsam gtan gsum pa la snyoms par zhugs so/ / bcom ldan 'das de las bzhengs nas bde ba'ang spangs te/ snga nas sdug bsngal yang spangs shing yid bde ba dang / yid mi bde ba'ang nub pas phyir sdug bsngal yang med/ bde ba'ang med pa/ btang snyoms dang dran pa yongs su dag pa/ bsam gtan bzhi pa la snyoms par zhugs so/ /de nas bcom ldan 'das bsam gtan bzhi pa las bzhengs nas bsam gtan gsum pa la zhugs so/ /bsam gtan gsum pa las bzhengs nas bsam gtan gnyis pa la zhugs so/ /bsam gtan gnyis pa las bzhengs nas bsam gtan dang po la zhugs so/ /bsam gtan dang po las bzhengs nas gdul bya ji lta ba bzhin du sems can la gzugs kyi lus kun tu ston pa zhes bya ba'i ting nge 'dzin la snyams par zhugs so/ /bcom ldan 'das gdul bya ji lta ba bzhin du sems can l a gzugs kyi lus kun tu ston pa'i ting nge 'dzin de la snyoms par zhugs ma thag tu de nas skad cig de la bcom ldan 'das shin tu lham me lham ne lhang nger bzhugs te/ mi mjed kyi bdag po tshangs pa tshangs pa'i gnas na 'dug bzhin du bcom ldan 'das shin tu lham me lhan ne lhang nge ba dang / skyes bu chen po'i mtshan sum cu rtsa gnyis kyis legs par brgyan pa mthong ngo / /mthong nas kyang tshangs pa'i 'jig rten nas mi snang bar gyur nas thams cad dang ldan pa'i tshal chen po 'od kyis snang bar byed te bcom ldan 'das kyis spyan sngar ha cang yang mi ring bzhig tu 'dug go/ de nas mi mjed kyi bdag po tshangs pas 'di snyam du bsams te/ sangs rgyas bcom ldan 'das rnams ni bsnyen par dka' ba rnam par shes pa dka' ba yin na/ bcom ldan 'das ting nge 'dzin la snyoms par zhugs pa la bdag gis lud pa bsal ba'i sgra'am/ smra ba tsam gyis bzhengs par gsol ba ni bdag gi cha ma yin gyi/ bdag gis tshigs su bcad pa dag gis bcom ldan 'das bzhengs par gsol gor ma chag snyam ste/ de nas mi mjed kyi bdag po tshangs pas bla gos phrag pa gcig tu gzar nas 'dug bzhin du bcom ldan 'das ga la pa der logs su thal mo sbyar ba btud de mgo btud nas/ bcom ldan 'das la tshigs su bcad pa dag gis bzhengs par gsol to/ /ma gos dri ma ma mchis rnam par dag / lha dang mi mchog rnams dang dri za dang / /klu dang / lha min rnams kyis legs mchod pa/ /sems can sman slad mgon po khyod la mchod/ /dper na ri ni rab tu mi g.yos dang / /ji ltar rgya mtsho gting ni mi dpogs ltar/ /bdud rnams thams cad kyis kyang mi g.yos la/ /thub pa skyes bu mchog ni bsam gtan mdzad/ /zang zing mi mnga' mtshan ma mi mnga' zhing / /tha dad mi mnga' brtan pa mi mnga' la/ /gnas mi mnga' zhing snang ba mi mnga' ba'i/ /thub pa skyes bu dam pa bsam gtan mdzad/ /rtog ge rnams kyi yul ni ma lags shing / /byis pa rnams kyi spyod yul ma lags pa/ /sems dang sems las byung bas rab 'das pa/ /bsam gtan pha rol gshegs pa bsam gtan mdzad/ /mgon po seng ge bzhin du gsung yang sgrog/ thub pa 'brug bzhin sgrog pa rab tu mdzad/ /dpa' bo zla ba bzhin du rab tu mdzes// sems can dkon mchog khyod la phyag 'tshal lo/ /de nas bcom ldan 'das kyis mi mjed kyi bdag po tshangs pas bskul ba'i tshigs su bcad pa 'di dag gis bskul bar thugs su chud nas ji ltar skyil mo krung bcas pa de nyid kyi ting nge 'dzin de las bzhengs so/ /bzhengs nas bcom ldan 'das kyis mi mjed kyi bdag po tshangs pa la spran pa'i phyir mgur bsal ba'i sgra mdzad pa dang / mi mjed kyi bdag po tshangs pas bcom ldan 'das ting nge 'dzin de las bzhengs te/ ji ltar skyil mo krung bcas pa de nyid kyis bzhugs pa mthong ngo / /mthong nas kyang bcom ldan 'das ga ba ba der song ste phyin nas/ bcom ldan 'das la lan gsum bskor ba byas te/ bcom ldan 'das kyi zhabs la mgo bos phyag btsal nas phyogs gcig tu 'dug go/ phyogs gcig tu 'dug nas mi mjed kyi bdag po tshangs pas bcom ldan 'das la 'di skad ces gsol to/ /gal te zhus nas zhu ba lung bstan pa'i slad du/ bcom ldan 'das kyis bdag la skabs dbye bar gnang na de bzhin gshegs pa dgra bcom pa yang dag par rdzogs pa'i sangs rgyas la bdag phyogs 'ga' zhig zhu lags so/ /de skad ces gsol pa dang / bcom ldan 'das kyis mi mjed kyi bdag po tshangs pa la 'di skad ces bka' stsal to/ /tshangs pa/ zhu ba lung bstan pa'i phyir de bzhin gshegs pas rtag tu khyod la skabs phye yi/ tshangs pa/ khyod ci dang ci 'dod pa de bzhin gshegs pa la zhus shig dang / zhus pa de dang de nyid kyi lung bstan pas ngas khyod kyi sems rangs par bya'o/ /de nas bcom ldan 'das kyis skabs phye bas mi mjed kyi bdag po tshangs pas bcom ldan 'das la 'di skad ces gsol to/ / bcom ldan 'das/ byang chub sems dpa' sems dpa' chen po dag chos du dang ldan na mya ngan du bla na med pa yang dag par rdzogs pa'i byang chub mngon par rdzogs par 'tshang rgya ba lags/ de skad ces gsol pa dang / bcom ldan 'das kyis mi mjed kyi bdag po tshangs pa la 'di skad ces bka' stsal to/ /tshangs pa/ byang chub sems dpa' sems dpa' chen po dag chos gcig dang ldan na myur du bla na med pa yang dag par rdzogs pa'i byang chub mngon par rdzogs par 'tshang rgya'o/ /chos gcig gang zhe na/ 'di lta ste/ lus kyi rjes su song ba'i dran pa'o/ /tshangs pa/ byang chub sems dpa' lus kyi rjes su song ba'i dran pa ci lta bu yin zhe na/ tshangs pa/ 'di la byang chub sems dpa' ni 'gro'o snyam pa'i dran pa dang ldan pa yin zhing yang dag par ji lta ba bzhin du rab tu shes so/ /ldog go snyam du dran pa dang ldan pa yin zhing yang dag par ji lta ba bzhin du rab tu shes so/ /nyal lo snyam pa dang / ldang ngo snyam pa dang / 'chag go snyam pa dang / 'dug go snyam du dran pa dang ldan pa yin zhing yang dag par ji lta ba bzhin du rab tu shes so/ /de gcig pu dben par 'dug ste nang du yang dag bzhag nas 'khrug pa med pa'i yid kyi lus 'di nyid la/ 'di lta ste/ kye ma lus 'di ni mi brtan pa/ mi rtag pa/ rang bzhin gyis nyam chung ba/ snying po med pa/ ther zug ma yin pa/ rnam par 'thor ba'i chos can/ rnam par 'jig pa'i chos can/ rten cing 'brel bar 'byung ba/ sgyu ma dang 'dra ba/ zil pa'i thig pa dang 'dra ba/ g.yo ba/ mi gnas pa/ mi gtsang ba/ rnag gi dri ma can/ rlung dang / nyi mas mthar thug ba| mthar 'drul ba/ mthar rdul du 'gyur ba/ ngan skyugs kyi mthar thug pa/ nad mang ba/ gnod pa can/ 'go ba'i nad mang ba/ na ba/ 'jig pa'i ngang can/ rus pa bsogs pa/ dri nga ba/ 'dzag pa can bsgrims te rim gro byed dgos pa yin par yang dag pa'i dran pas yang dag par ji lta ba bzhin du so sor rtog go/ de de ltar yang dag pa'i dran pas lus kyi skyon rnams yang dag par ji lta ba bzhin du rab tu shes pas lus la chags pa dang / lus la kun tu 'dod chags dang / lus la bdag gi nyid yin pa mi bskyed do/ /de lus la mi lta bas srog chags pa dang / srog la kun tu 'dod chags dang / srog la bdag gi nyid yin pa mi bskyed do/ /de lus dang srog la mi lta bar chos gos ngan ngon dang / kha zas ngan ngon dang / mal cha dang / stan ngan ngon dang / na ba'i gsos sman dang / yo byad ngan ngon tsam dag gis chog par 'dzin pa yin no/ /de tshangs pa mtshungs par spyod pa rnams kyi bya ba gang dag yin pa don dang ldan pa rnams sam/ dge ba dang ldan pa rnams kyang de dag la stong bar byed de/ yongs su mi skyo zhing yongs su yid 'chad pa med la yongs su skyo ba'i sems mi bskyed do/ /de mkhan po dang slob dpon gyi gan du 'gro na dran pa dang ldan zhing 'di snyam du sems te/ mkhan po dag ni bsnyen par dka' ba/ slob dpon dag ni bsnyen par dka' ba ste/ bdag der song ba na sdig pa mi dge ba kun tu spyod pa 'ga' zhig gis bdag la glengs shing dran par byas na mi rung ngo snyam nas de rgyu dang / rkyen de dang / gzhi des bslab pa rnams la gus pa byed par 'gyur te/ brtun par byed pa dang / legs par bya ba byed pa dang / zhi ba rnal du byed pa dang / shin tu yongs su mthar thug par byed pa can du 'gyur ro/ /de la bslab pa rnams la gus pa byed pa nyid dang / brtun par byed pa nyid dang / legs par bya ba byed pa nyid dang / zhi ba rnal du byed pa nyid dang / shin tu yongs su mthar thug par byed pa nyid kyis mkhan po dang / slob dpon gyi gan du 'gro ba na bag tsha ba med pa dang / bag 'khum pa med par 'gro zhing 'jigs pa dang / lhan cig tu byung ba'i rgol pa'ang mi ston ste/ de ci'i phyir zhe na/ gus pa dang bcas shing zhes dang bcas pa yin la/ rigs kyi bag ma bzhin du 'dzem pa dang ldan pa'i phyir ro/ / de la 'dzem pa dang ldan pas lus kyi skyon dang / lus kyi nyes par spyod pa gang dag yin pa de dag thams cad kyis thams cad du yongs su spong ngo / /tshangs pa/ byang chub sems dpa' lus kyi skyon dang / lus kyi nyes par spyod pa de dag gang zhe na/ tshangs pa/ srog gcod pa ni byang chub sems dpa'i lus kyi skyon dang / lus kyi nyes par spyod pa yin no/ /tshangs pa/ ma byin pa len pa dang / mi tshangs par spyod pa ni byang chub sems dpa'i lus kyi skyon dang / lus kyi nyes par spyod pa yin no/ /tshangs pa/ byang chub sems dpa' ci ltar na srog gcod pa spong ba yin zhe na/ tshangs pa/ 'di la byang chub sems dpa' ni 'dod chags kyi dbang gis srog chags kyi srog gcod par mi byed/ zhe sdang gi dbang dang / gti mug gi dbang gis srog chags kyi srog gcod par mi byed do/ /de sems can gzhan dag dang / gang zag gzhan rnams la bdag tsam du 'du shes par byed cing sdug pa tsam du 'du shes par byed de/ bdag nyid kyi sems can gzhan dag dang / gang zag gzhan rnams kyi srog gcod par mi byed do/ /gzhan dag kyang srog gcod du mi 'jug go/ gzhan dag srog gcod pa la yang dag par rjes su yi rang bar mi byed do/ /bdag gis kyang mi gcod do/ /gzhan dag kyang gcod mi 'jug go/ gzhan dag gcod pa la'ang rjes su yi rang bar mi byed do/ /bdag kyang mi rdeg go/ gzhan dag kyang rdeg du mi 'jug go/ gzhan dag rdeg par byed pa la'ang rjes su yid rang bar mi byed do/ /ji ltar na ma byin pa len pa spong ba yin zhe na/ tshangs pa| 'di la byang chub sems dpa' ni sems can rnams kyi 'tsho ba'i yo byad gang dag yin pa/ 'di lta ste/ gser dang / nor bu dang / mu tig dang / bai DUR+ya dang / dung dang / man shel dang / byu ru dang / sa le sbram dang / dngul la sogs pa dang / gos dang / rgyan gyi rnam pa dag dang / nor dang / 'bru dang / mdzod dang / bde ba'i rnam pa de dag la chags pa mi skyed/ de dag la rnam par rtog par mi byed cing rku 'phrog mi byed do/ /rku 'phrog byed du mi 'jug go/ rku 'phrog byed pa rnams la rjes su yi rang par mi byed do/ /de grong na yod pa'am/ dgon pa na yod pa ma byin zhing ma gnang ba rtswa'i 'dab ma tsam yang len par mi byed do/ /ji ltar na mi tshangs par spyod pa spong ba yin zhe na/ tshangs pa| 'di la byang chub sems dpa' dbang po rnams kyi sgo legs par bsrung shing gnas pa yin/ legs par bsdam pa yin/ mthun pa'i gnas su rgyu ba yin/ shin tu bsrung ba'i dran pa dang ldan pa yin/ rtag tu bsrung ba'i dran pa dang ldan yin/ de dran pas yi kun tu srung ba yin/ lus dang / ngag shin tu bsdams pa yin no/ /mthun pa'i gnas su rgyu la dran pa dang ldan pa yin zhing 'di snyam du'ang sems bskyed do/ /mi zhig gis bye ma zhing mo shin tu bsregs pa lag pa gnyis kyi snyim pas blangs te mig bkang ba ni sla'i/ chags pa'i sems kyis yul gyi bzang mo la lta ba ni lta ma yin no/ /de ci'i phyir zhe na/ bdag yul gyi bzang po la bltas pas yun rung por phung zhing bcom la ma rung bar gyur pa'i phyir ro snyam mo/ /de de ltar lus la lus kyi rjes su lta zhing bza' ba dang / btung ba dang / gnas dang / mal cha dang / stan rnams la dran pa legs par gnas pa yin te/ de dag la spyod pa na ro myang bar mi byed cing chags pa'i sems med pa yin no/ /gal te de yongs su spyod pa na bde ba skye ba lta na des de la 'di ltar nye bar brtag par bya ste/ bde bar snang ba 'di ni bzlog pa'i sgo nas sdug bsngal yin te/ khams gsum pa 'di na 'dus byas kyi dngos po bde ba gang yang med do/ /de ci'i phyir zhe na/ 'dus byas mi rtag pa'i phyir ro/ /mkhas pa'i rang bzhin can dag dngos po mi rtag pa rnams la bde ba'i 'du shes ji ltar skyed snyam du brtag par bya'o/ /tshangs pa/ gal te byang chub sems dpa' yongs su spyod pa na sdug bsngal kho na skye ba'i bde ba ni ma yin te/ sdug bsngal des kyang yongs su gnod cing nyon mongs na des de la sems 'di ltar nye bar gzhag par bya ste/ lus 'di ni bsgrims te yongs su bskyang dgos pa/ gsug gis bsgrub dgos pa ste/ 'di ni sdug bsngal rtsom pas gzung bar mi nus kyi/ bde ba rtsom pas gzung bar bya ba yin te/ bdag gi lus brtan zhing 'tsho ba'i 'dis dge ba'i chos rnams bsgrub par bya'o/ /dper na/ rnyed pa 'dod pa'i tshong pa khur khal rnams stong bran byed/ bcos legs byed pa ni khur khal rnams brgyan pa'i phyir ma yin/ bde bar bya ba'i phyir ma yin gyi/ gzhan du na ji tsam du khal bkal ba bskur ba'i phyir ro| |de bzhin du byang chub sems dpa' kha zas za ba'ang lus brgyan pa'i phyir zas za ba ma yin/ lus bde ba bya ba'i phyir ma yin te/ gzhan du na ji tsam lus dang 'brel pa'i dge ba'i phyogs bsgral ba'i phyir ro snyam du sems nye bar gzhag par bya'o/ /tshangs pa/ gal te byang chub sems dpa' de bzhin gshegs pas gsungs pa'i gnyen pos sems shes par byed mi nus na/ des 'di snyam du bsam par bya ste/ sems zhes bya ba 'dis ni mthar phyin par dka' ba/ mi mthun pa 'dzin pa| 'khor ba la mngon du phyogs pa/ dge ba'i phyogs la mi phyogs pa/ yul la mngon du phyogs pa/ bden pa la mi phyogs pa/ bde ba la mngon du phyogs pa/ sdug bsngal la mi phyogs pa/ smra ba la dga' ba la mngon du phyogs pa/ de kho na la rnam par lta ba la mi phyogs pa/ mi gtsang ba la mngon du phyogs pa/ gtsang ba la mi phyogs pa/ gdul dka' ba/ gzung dka' ba/ gnas med pa/ rten med pa/ gsog/ gsob/ skad cig pa/ rgyu dang / rkyen tshogs pa las byung ba yin na/ mkhas pa'i rang bzhin can su zhig 'di lta bu'i rang bzhin can gyi sems kyi dbang du 'gro zhing rjes su 'jug snyam du bsam mo/ /de de ltar sems dran pa nye bar gnas pas sems gdul ba'i phyir nan tan byed do/ /de ser sna'i sems gdul ba'i phyir sbyin pa sbyin par byed de/ tha na kham gcig tsam mam/ rgya shug tsam mam/ mon sran gre'u tsam mam/ til 'bru tsam yang rung / de'ang thams cad la sbyin par byed kyi/ sdug pa rnams la ma yin/ 'dres pa rnams la ma yin no/ /de la 'chal ba'i tshul khrims kyi sems gdul ba'i phyir tshul khrims bsrung ste/ lus dang / ngag dang / yid kyi skyon med par byed pa yin/ 'dren mar mi byed pa yin/ nag nog can du mi byed pa yin te/ tshul khrims des bdag la bstod par mi byed/ gzhan la smod par mi byed do/ /de gnod sems kyi sems 'dul ba'i phyir bzod pa sgom ste/ de grong ngam/ grong rdal du zhugs pa na gshe'ang ci mi snyam par byed do/ /brgyab kyang rung / rdeg kyang rung / sdigs kyang rung / rnam par 'joms kyang rung / smod kyang rung ste ci mi snyam par byed do/ /kye ma dge sbyong 'di ni mgo reg ngan pa'o/ /kye ma dge sbyong 'di ni mgo reg mi sdug pa ngan pa'o zhes 'jig rten gyis dpyas kyang ci mi snyam par byed do/ /yang dag par ma yin pas skur kyang bzod par byed cing dang du len la/ las bdag gir bya ba nyid la rton te/ bzod pa des kyang bdag la bstod par mi byed/ gzhan la smod par mi byed do/ /le lo'i sems gdul ba'i phyir dang / byang chub kyi phyogs pa'i chos ma thob pa rnams thob par bya ba'i phyir dang / thob pa rnams 'phel bar bya ba'i phyir dang / 'phel ba rnams yongs su smin par bya ba'i phyir dang / yongs su smin pa rnams yang dag par gzung bar bya ba'i phyir dang / yang dag par gzung ba rnams rnam par dbye ba'i phyir brtson 'grus rtsom mo/ /de sems can gyi ched rnams dang / sems can gyi bya ba rnams la yongs su mi skyo zhing yongs su yi mi chad de/ yongs su skyo ba'i sems mi skyed do/ /de gdol pa la phan gdags kyang rung / rgyal po la phan gdags kyang rung / shin tu lam ring por yang 'gro ste/ tha dad pa mi dmigs shing rgyun mi gcod pa yin no/ /gal te byang chub sems dpa' sdug bsngal zhing bkren pa'i sems can gyi dngos po thams cad ngan pa zhig gis gtams sam/ 'byor cing nor che ba gang yang rung ba zhig gis dngos po bzang po mchog gya nom pa zhig bstabs kyang de la byang chub sems dpa' snying brtse ba'i sems bzhag la gus par bstod cing / yang dag par gzengs bstod la/ yang dag par 'dzin du gzhug cing dngos po ngan pa de blang bar bya'o/ /de ci'i phyir zhe na/ 'di lta ste/ sdug bsngal ba'i spyod pa 'di ni sbyin pa bya dka' ba yin pa'i phyir ro/ /de rnam par g.yeng ba'i sems gdul ba'i phyir bsam gtan la bsam gtan par byed do/ /ji ltar bsam gtan byed ce na/ tshangs pa/ 'di la byang chub sems dpa' ni thog ma kho nas lus legs par bsdams pa yin no/ /lus dben par gnas pa yin no/ /lus kyi 'du 'dzi rnams kyang yongs su spong ngo / /lus la lhag par chags pa'ang 'dor ro| |lus lci ba'am/ yang ba'ang shes so/ /lus dang mthun pa dang / lus 'tsho ba dang / lus kyi stobs kyang rab tu shes so/ /ngag legs par bsdams pa yin te/ smra ba nyung zhing brjod pa nyung ngo / /don smra ba yin zhing rigs pa smra ba yin te/ bre mo'i gtam la dga' ba yongs su spong ba yin no/ /de yid legs par bsdams pa yin te/ mi dge ba'i rnam par rtog pa thams cad yongs su spangs so/ /de de ltar gnas gsum yongs su dag pas sngon po dang / ser po dang / dmar po dang / dkar po'i gzugs rnams mi snang bar bya ba'i phyir nan tan byed de/ de dag la mtshan mar mi 'dzin/ mngon rtags su mi 'dzin to/ /rgyan dang / gos kyi rnams sna tshogs dag la'ang mtshan mar mi 'dzin cing mngon rtags su mi 'dzin pa yin no/ /gzugs dang / sgra dang / dri dang / ro dang / reg pa sna tshogs pa dag la'ang mtshan mar mi 'dzin cing mngon rtogs su mi 'dzin pa yin no/ /skyes pa dang / bud med dang / khye'u dang / bu mo rnams la'ang mtshan mar mi 'dzin cing mngon rtags su mi 'dzin pa yin no/ /de gcig pu dben par 'dug nas nang du yang dag par 'jog cing sems gnas par bya ba'i phyir nan tan byed de/ mi sdug pa la dmigs pa'am/ byams pa la dmigs pa 'am/ snying rje la dmigs pa'am/ yid 'byung bar 'gyur ba gang yang rung bas ji ltar lus khengs par mi 'gyur ba de ltar dmigs par byed de/ dbugs rdub pa dang / 'byung ba mi 'gag go/ rgyun rnams kyang mi 'chad do/ /rlung 'khrug par mi 'gyur ro/ /sems log par rnam par g.yeng bar mi 'gyur ro/ /de 'chag gam/ nyal lam/ 'greng ngam/ 'dug kyang dmigs pa de nyid kyis 'dug go/ de nyid la sems gtong ngo / /tshangs pa/ gang gi tshe byang chub sems dpa' dmigs pa la sems brtan par gyur pa de'i tshe sems la sems mnyam par 'jog ste/ sems kyis sems kyang mi dmigs so/ /gang gis mnyam par 'jog pa de'ang mi dmigs so/ /gang gi phyir mnyam par 'jog pa de'ang mi dmigs so/ /de 'di snyam du sems te/ kye ma byis pa so so'i skye bo 'di dag ni gsog gi chos rnams dang / gsob kyi chos rnams la mngon par zhen to snyam du sems te/ 'di ni byang chub sems dpa'i lhag mthong zhes bya'o/ /de ltar rnam par mthong bas nyon mongs pa rnams kun tu mi 'byung zhing mi 'jug pa de ni byang chub sems dpa'i zhi gnas zhes bya'o/ /tshangs pa/ gzhan yang byang chub sems dpa' gcig bu dben par 'dug ste/ nang du yang dag bzhag nas ming dang / yi ge ji ltar thos pa rnams nges pa'i tshig gi gdags pas yang dag par 'jog cing yi ge de dag la nye bar rtogs te/ de de ltar nye bar rtogs pa na yi ge rnams gsog dang / gsob tu mthong ngo / /de yi ge rnam pa gsog dang / gsob tu mthong nas ming rnams kyang gsog dang / gsob du mthong ngo / /gang la ming de 'dogs pa de'ang gsog dang / gsob tu mthong ngo / /de la gzugs dang / gang snang ba de dang / de'ang gsog dang / gsob tu mthong ngo / /de gsog dang / gsob tu mthong bas yang dag par ji lta ba bzhin du yongs su shes par 'gyur ro/ /yang dag par ji lta ba bzhin yongs su shes pas de la 'dus byas rmi lam dang 'dra bar snang ngo / /de la byang chub sems dpa' so sor brtags nas sems can la lta bas snying rje chen po'i sems nye bar bzhag nas gnas so/ /de 'chal ba'i shes rab kyi sems gdul ba'i phyir shes rab sgom par byed do/ /ji ltar sgom pa byed ce na/ de kun rdzob kyi tshul du bshad pa'am/ don dam pa'i tshul du bshad pa'i mdo sde gang dag yin pa de dag brjod pa gsal zhing zur phyin pa dag gis ma nor bar 'dzin to/ /ma nor bas chos ston pa las bzung nas kyang / ma nor ba'i bsam pas sems par byed do/ /sgom pa'i rnal 'byor la'ang brtson par byed do/ /de ye shes kyi stobs dang / shes rab kyi bye brag gis sems can mi dmigs/ srog mi dmigs/ gso ba mi dmigs/ skyes bu mi dmigs/ gang zag mi dmigs/ shed las skyes mi dmigs/ shed bu mi dmigs te/ thams cad kyi thams cad du chad par lta bar yang mi ltung ngo / /btags pa'i tha snyad rnams la'ang legs par bslab pa yin no/ /de zin pa'i sa'i khams dang / ma zin pa'i sa'i khams la yang dag pa'i shes rab kyis tshul gcig tu so sor rtog go/ zin pa'i chu'i khams dang / me'i khams dang / rlung gi khams dang / ma zin pa la'ang yang dag pa'i shes rab kyis tshul gcig tu so sor rtog ste/ de gnyis ka'ang gsog nyid dang / gso ba nyid du mthong zhing / bems po nyid dang / snying po med pa nyid dang / stong pa nyid du mthong ngo // des de ltar mthong bas ji ltar phyi rol gyi khams rnams la mngon par chags pa med pa de ltar nang gi rnams la yang ngo / /mig gi rnam par shes pa dang / gzugs rnams la'ang yang dag pa'i shes rab kyis tshul gcig tu so sor rtog go/ rna ba'i rnam par shes pa dang / sgra rnams dang / sna'i rnam par shes pa dang / dri rnams dang / lce'i rnam par shes pa dang ro rnams dang / lus kyi rnam par shes pa dang / reg bya rnams la'ang yang dag pa'i shes rab kyis tshul gcig tu so sor rtog go/ de'i sa'i khams la ni sra ba nyid du'ang rab tu shes la gsher ba nyid dang / tsha ba nyid dang / khong stong nyid du'ang rab tu shes so/ /chu'i khams la gsher ba nyid du'ang rab tu shes la sra ba nyid dang / tsha ba nyid dang / khong stong nyid du'ang rab tu shes so/ /me'i khams la tsha ba nyid du'ang rab tu shes la sra ba nyid dang / gsher ba nyid dang / khong stong nyid du'ang rab tu shes so/ /rlung gi khams la g.yo ba nyid du'ang rab tu shes la yang zhing g.yo ba nyid du'ang rab tu shes so/ /de nam mkha'i khams la khong stong du'ang rab tu shes la thams cad du song ba nyid du'ang rab tu shes so/ /rnam par shes pa'i khams la sgyu ma lta bu nyid du'ang rab tu shes la phyin ci log nyid du'ang rab tu shes/ phyin ci ma log pa nyid du'ang rab tu shes so/ /de mig gi rnam par shes pa la stong pa nyid dang / gzugs la mi rtag pa nyid du'ang rab tu shes so/ /rna ba'i rnam par shes pa la stong pa nyid dang / sgra la mi rtag pa nyid dang / sna'i rnam par shes pa la stong pa nyid dang / dri la mi rtag pa nyid dang / lce'i rnam par shes pa la stong pa nyid dang / ro la mi rtag pa nyid dang / lus kyi rnam par shes pa la stong pa nyid dang / reg bya la mi rtag pa nyid du'ang rab tu shes so/ /de de ltar shes rab la mkhas pas shin tu rtogs pa'i shes rab dang ldan zhing shes rab rno ba dang ldan te/ mi dge ba'i chos rnams kyang rab tu shes/ dge ba'i chos rnams kyang rab tu shes/ nyan thos yang dag par 'grub par byed pa'i chos rnams kyang rab tu shes/ rang sangs rgyas yang dag par 'grub par byed pa'i chos rnams dang / byang chub sems dpa' yang dag par 'grub par byed pa'i chos rnams dang / sangs rgyas nyid yang dag par 'grub par byed pa'i chos rnams kyang rab tu shes so/ /de mi dge ba'i chos rnams kyis rnam par smin pa chung du dang / 'bring dang / chen po sems can dmyal ba rnams dang / dud 'gro rnams dang / yi dwags rnams su skye ba'ang rab tu shes so/ /der skyes pa rnams kyi tshor ba chung du dang / 'bring dang / chen po'ang rab tu shes so/ /dge ba'i chos rnams kyi rnam par smin pa chung du dang / 'bring dang / chen po lha rnams kyi nang du'am/ mi rnams kyi nang du smin pa'ang rab tu shes so/ /der skyes pa rnams kyi 'bras bu chung du dang / 'bring dang / chen po'ang rab tu shes so/ /nyan thos yang dag par 'grub par byed pa'i chos rnams kyi rgyun tu zhugs pa'i 'bras bu mngon du bya ba dang / lan gcig phyir 'ong ba'i 'bras bu mngon du bya ba dang / phyir mi 'ong ba'i 'bras bu mngon du bya ba dang / dgra bcom pa nyid kyi 'bras bu mngon du bya ba'i rnam pa'ang rab tu shes so/ /shes rab kyi rnam par grol ba nyid dang / gnyis ka'i cha las rnam par grol ba'ang rab tu shes so/ /rang sangs rgyas yang dag par 'grub par byed pa'i chos rnams kyis yang dag par 'grub pa'ang rab tu shes so/ /'bras bu dang / zhi ba nyid kyang rab tu shes so/ /byang chub sems dpa' yang dag par 'grub par byed pa'i chos rnams kyi tshogs kyi lam yang rab tu shes so/ /ye shes kyi lam yang rab tu shes so/ /shes nas kyang tshogs kyi lam dang / ye shes kyi lam la brtson par byed do/ /sangs rgyas nyid yang dag par 'grub par byed pa'i chos rnams kyi rdzu 'phrul che ba nyid kyang rab tu shes so/ /mthu che ba nyid dang / dam pa nyid dang / rab mchog nyid dang / phul du byung ba nyid dang / che ba nyid dang / nyan thos dang / rang sangs rgyas dang / byang chub sems dpa' thams cad dang / thun mong pa'ang ma yin na/ gzhan sems can thams cad lta smos kyang ci dgos pa'i thun mong ma yin pa nyid kyang rab tu shes so/ /de de ltar chos rnams la chos kyi rjes su lta zhing dran pa legs par nye bar gnas pa sdig pa'i chos thams cad dang ni bral/ dge ba'i chos ni yang dag par thob/ lus kyi gnod pa ni med/ rnam par shes pas 'phangs pa ni med/ sems kyis 'phags pa ni med la chos rnams kyi rgyu'i tshogs dang / 'bras bu yang dag par ji lta ba bzhin du rab tu shes pas/ dper na/ rgya mtsho'i rlabs bzhin du dge ba'i chos rnams kyis rnam par 'phel te| ji ltar rgya mtsho'i rlabs 'bri zhing yang 'byung ba ltar/ byang chub sems dpa' ni chos rnams las de lta ma yin no/ /de dper na/ zla ba yar gyi ngo'i zla ba'i dkyil 'khor dang 'dra bar dge ba'i chos rnams kyis mngon par 'phel te/ ji ltar mar gyi ngo la zla ba'i dkyil 'khor 'bri ba'i chos can yin pa ltar/ byang chub sems dpa' ni chos rnams las de lta ma yin no/ /dper na/ dbyar gyi dus kyi phu chu brub pa ltar dge ba'i chos rnams kyis mngon par 'phel te ji ltar phu chu brub pa dbyar gyi dus zad na 'bri ba'i chos can yin pa ltar/ byang chub sems dpa' ni chos rnams las de lta ma yin no/ /tshangs pa/ de ltar bslab pa'i byang chub sems dpa' ni myur du bla na med pa yang dag par rdzogs pa'i byang chub mngon par rdzogs par 'tshang rgya'o/ /de'i tshe bcom ldan 'das kyis tshigs su bcad pa 'di dag bka' stsal to/ /lus kyi skyon rnams rab shes na/ /lus yod skyon rnams mi ston to/ /lus la dran pa legs gnas na/ /skyon med zhi ba'i gnas 'thob bo/ /lus kyi skyon rnams mi shes na/ /lus la yod pa'i skyon mi rtogs/ /lus la dran pa mi gnas na/ /sdug bsngal bzod dka' gnas thob bo/ /sems kyi skyon rnams rab shes na/ /sems yod skyon rnams mi ston to/ /sems la dran pa legs gnas na/ /skyon med zhi ba'i gnas 'thob bo/ /sems kyi skyon rnams mi shes na/ /sems la yod pa'i skyon mi rtogs/ /sems la dran pa mi gnas na/ /sdug bsngal bzod dka' gnas 'thob bo| |dge ba'i chos rnams sten byed cing / /mi dge chos rnams mi sten pa/ /chos rnams la ni mkhas pa'i mi/ /skyon med zhi ba'i gnas 'thob bo/ /dge ba'i chos rnams mi sten cing / /mi dge chos rnams sten byed pa/ /chos rnams la ni mi mkhas mi/ /sdug bsngal bzod dka' gnas 'thob bo/ /de nas mi mjed kyi bdag po tshangs pas lha'i me tog man+dA ra ba dag mngon par sprul te bcom ldan 'das la mngon par gtor to/ /mngon par gtor nas kyang bcom ldan 'das kyis bka' stsal pa la mngon par dga' zhing rjes su yi rangs nas/ bcom ldan 'das la lan gsum bskor ba byas te bcom ldan 'das kyi thad nas song ngo / /de nas bcom ldan 'das kyis nam nangs par mkhyen nas dge slong gi dge 'dun gyi gung la gdan bshams pa la bzhugs so/ /bzhugs nas bcom ldan 'das kyis dge slong rnams la bka' stsal pa/ dge slong dag/ mdang 'dir mi nyal tsam gyi nam gyi gung thun la nga gcig pu dben par 'dug ste nang du yang dag bzhag na mi mjed kyi bdag po tshangs pas thams cad dang ldan pa'i tshal chen po 'od kyis snang bar byas nas ngag la ba der 'ongs te phyin nas nga la mngon par bstod de/ lan gsum bskor ba byas nas phyogs gcig tu 'dug go/ phyogs gcig tu 'dug nas mi mjed kyi bdag po tshangs pas nga la 'di skad ces gsol to/ /gal te zhus nas zhu ba lung bstan pa'i slad du bcom ldan 'das kyis bdag la skabs dbye bar gnang na/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas la bdag phyogs 'ga' zhig zhu lags so/ /dge slong dag/ de skad ces gsol pa dang / ngas mi mjed kyi bdag po tshangs pa la 'di skad ces bka' stsal to/ /tshangs pa/ zhu ba lung bstan pa'i phyir de bzhin gshegs pas rtag tu khyod la skabs phye yi/ tshangs pa/ khyod ci dang / ci 'dod pa zhus shig dang / zhus pa de dang / de nyid kyi lung bstan pas ngas khyod kyi sems rangs par bya'o/ /de nas ngas skabs phye bas mi mjed kyi bdag po tshangs pas nga la 'di skad ces gsol to/ /bcom ldan 'das/ byang chub sems dpa' sems dpa' chen po dag chos du dang ldan na/ myur du bla na med pa yang dag par rdzogs ba'i byang chub mngon par rdzogs par 'tshang rgya lags/ dge slong dag /de skad ces gsol pa dang / ngas mi mjed kyi bdag po tshangs pa la 'di skad ces bka' stsal to/ /tshangs pa/ byang chub sems dpa' sems dpa' chen po dag chos gcig dang ldan na myur du bla na med pa yang dag par rdzogs pa'i byang chub mngon par rdzogs par 'tshang rgya'o/ /chos gcig gang zhe na/ 'di lta ste/ lus kyi rjes su song ba'i dran pa'o/ /dge slong dag/ ngas mi mjed kyi bdag po tshangs pa de la lus kyi rjes su song ba dran pa'i rgyu dang / las dang / 'bras bu'ang bstan to/ /de nas bcom ldan 'das la tshe dang ldan pa kun dga' bos 'di skad ces gsol to/ /legs so/ /legs so/ /bcom ldan 'das kyis mi mjed kyi bdag po tshangs pa la gang bstan pa de skye bo mang po la sman pa dang / skye bo mang po la bde ba dang / lha dang / mi rnams kyi don dang / sman pa dang / bde bar bgyi ba'i slad du bshad du gsol/ dge slong sar pa rnams dang / chos 'dul ba 'di la rab tu byung nas ring por ma lags shing mchis nas ring po ma lags pa rnams dang / theg pa chen po la yang dag par zhugs pa'i skyes bu dam pa 'di dag gis thos na dga' ba dang / dad pa thob par 'gyur/ bslab pa de la'ang sbyor par brtson par gnas par 'gyur lags so/ /de nas bcom ldan 'das kyis mi mjed kyi bdag po tshangs pa la gang bshad pa de dge slong de dag la'ang bshad do/ /de nas bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das/ legs par bka' stsal to/ /bde bar gshegs pa/ legs par bka' stsal to/ /mi mjed kyi bdag po tshangs pas mdo sde 'di lta bu dag yongs su zhu ba'i slad du bcom ldan 'das kyi thad du mchis nas zhus pa'ang legs par smras pa lags so/ /bcom ldan 'das/ mi mjed kyi bdag po tshangs pas gal te dge ba'i rtsa ba gzhan ma mchis na'ang zhu ba zhus pa'i mod la skyes pa'i dge ba'i rtsa ba 'di kho nas myur du bla na med pa yang dag par rdzogs pa'i byang chub mngon par rdzogs par 'tshang rgya lags so/ /de ci'i slad du zhe na/ bcom ldan 'das/ dge ba'i rtsa ba de'i mtha' dang / mu ni nyan thos dang / rang sangs rgyas thams cad kyis rtogs par rngo mi thogs pa'i slad du'o/ /de ci'i slad du zhe na/ bcom ldan 'das/ 'di ltar mi mjed kyi bdag po tshangs pas zhu ba 'di/ sems can thams cad kyi spyi'i don du zhus pa'i slad du'o/ /bcom ldan 'das kyis bka' stsal ba/ kun dga' bo/ de de bzhin te/ de de bzhin no/ /de nas bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das/ chos kyi rnam grangs 'di'i ming ci lags/ 'di ji ltar gzung bar bgyi/ bcom ldan 'das kyis bka' stsal pa/ kun dga' bo/ de'i phyir khyod kyis 'di tshangs bas zhus pa zhes bya bar zungs shig /dran pa nye bar gzhag pa'i tshul bstan pa zhes bya bar yang zungs shig / bag yod pa'i tshul bstan pa zhes bya bar yang zungs shig /bcom ldan 'das kyis de skad ces bka' stsal nas/ tshe dang ldan pa kun dga' bo dang / dge slong de dag dang / byang chub sems dpa' de dag dang / thams cad dang ldan pa'i 'khor de dag dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ /'phags pa tshangs pas zhus pa zhes bya ba theg pa chen po'i mdo rdzogs so|| ||rgya gar gyi mkhan po dzi na mi tra dang / zhus chen gyi lo tsA ba ban+de ye shes sdes bsgyur cing zhus te gtan la phab pa// //rgya gar skad du/ AR+ya brah+ma dat+ta pa ri pr-i ts+tshA nA ma ma hA yA na sU tra/

CLOSE WINDOW