thi rgya/ ni rgya/ su rgyaH//// rgya gar skad du/ badzra kri yi u kra na bi tha ba ra pa ni da ra tsakra d+ha ra i ka ka la tan tra/ bod skad du/ rdo rje gtsug lag drag po ngan sngags dug chu nag po 'khor lo 'dzin pa gzer gyi rgyud/ bcom ldan 'das dpal kun tu bzang po la phyag 'tshal lo// de nas gsang ba'i bdag po yis// brda yis gtso la gsol ba btab/ / gtso bos brda don bka' stsal pa// brdab skul rdo rje stobs po che// bzhi gsum rnam pa bcu gnyis kyis// 'khor lo dug chu gzer brtan pa// gyen 'gro sngags rnams bzlog pa ste// thur 'gro'i sngags rnams rnal ma yin/ / rang thad rnam shes 'bru gcig ste// snel bzhi 'gro ba dkrug pa'i las// gnas pa rtsa yi 'khor lo ni// spyi bo dpral ba mgrin pa snying// lte ba gsang gnas drug tu brten// chos kyi dbyings kyi 'khor lo ni/ / dang po gcig la bzhi yi tshul// ye shes rol pa'i 'khor lo ni// dkyil 'khor rnam drug yan lag bcas// spu gri 'khor lo byin brlabs bzhi// sde brgyad snang ba drug yin te/ / dgra yi rgyud du lnga snang la// de la yan lag bzhi bzhi brtsi// che mchog rgyud du yan lag lnga// de la yan lag bzhi bzhi brtsi// rigs lnga yan lag bzhi ldan yin// dbang chen rgyud du lnga snang la// rigs lnga yan lag bzhi snang ba'o/ / phur pa'i rgyud du lnga snang la// rigs lnga yan lag bzhi snang ba'o// stobs chen rgyud du brgyad snang la// yan lag drug dbye lnga la bzhi// bya khyung rgyud du lnga snang la// yan lag bzhi ni brtsi bar bya/ / las bzhi bcu dang brgya rtsa gcig/ 'bum du sbyar ba rgyud du gces// rgyud drug man ngag spyir sbyar ba'o// de bsgrub 'khor lo yin par 'dod// yan lag bcu drug brtsi ba ni// sku bskyed pa ni zung bzhi par/ / de ltar bcu drug sngon po pa'o// nyi ma bzhi ru 'khor lo bskor// dang po tshe dang ye shes bsrung// gnyis pa 'khor dang longs spyod bsrung// gsum pas dbang dang chung srid srung// bzhi pas bkrag dang gzi mdangs bsrung/ / rgyas pa'i las dang bzhi sbyar bas// tshe dang ye shes 'khor longs spyod// dbang thang chung srid bkrag gzi mdangs// rgyas par byed ces brgya ru bstan// dang po tshe dang ye shes 'gugs/ / gnyis pas bla dang sprul pa 'gugs// gsum pas srog byed shes pa 'gugs// bzhi pas gzugs kyi phung po 'gugs// bsad pas las su bstan pa ni// gcig pas mgo 'khor gnyis yid 'khrug/ gsum pas khrag skyag bzhi pas sgrol// tshe dang longs spyod dbang thang dang// bkrag dang gzi mdangs dbang du byed// gnan pas tshe dang ye shes nas// gzugs kyi bar du bzhi gnon byed// bskrad pas yul dang khyim dang ni/ / sde dang mtshams las skrod par byed// bkug pas tshe nas gzugs sogs bzhi// dbye bas gsang sde brgyad dam bzhi// smyo 'bros che nas gzugs kyi bar// de las las rnams kun la sbyar/ / che mchog la sogs rgyud lnga yis// yan lag bcu drug brtsi ba ni// phyi drug nang bzhi gsang ba gsum// gsang chen gnyis la sbas gter gcig/ gang rung rdzogs nas 'khor lo bskor// rdo rje gtsug lag drag po ngan sngags dug chu nag po 'khor lo 'dzin pa gzer gyi rgyud las/ 'khor lo bzhi dang yan lag bcu drug gi gzer bstan pa'i le'u ste dang po'o//// gsang ba sngags bzhi bstan pa ni// rang bzhin grub pa'i phyi nang gsang/ / phyi nang snod bcud ye nas gnas// bstan pa gsung rab tshig gi tshogs// phyi nang sngags rgyud mdo gzungs sngags// btags pa tshig ni yi ge sngags// gsang sngags gzungs sngags snying po re/ / re re dag la bzhi bzhi sbyar// gsang sngags kyi ni gsang sngags dang// gsang sngags kyi ni rig sngags dang// gsang sngags gzungs sngags gsang sngags snying po ste// de bzhin sbyar bar rgyas par 'gyur/ / gsang sngags oM drangs mgo mnan pa// rig sngags na ma na mo ste// gzungs sngags tad+ya thas drang pa'o// nges par drangs zhes bstan pa yin// snying po nges med thabs shes rab/ / 'brel dang rkyang pas drang pa'o// 'dul byaid 'phrin las sngags ni gsum// bsgrub pa'i drag sngags dmod mo'i sngags// gdab pa'i drag sngags gsum du bshad// bsgrub pa oM drangs gdab pa e/ / dmod mo'i snying po lta bu ste// nges med drangs pa gsum gyi tshul// bsgrub pa'i bsgrub dang bsgrub dmod dang// bsgrub pa'i gdab pa gsum du 'gyur// dmod dang gdab pa rgyas par sbyar// de re phyi sogs sbyar bar bya/ / lnga tshan dgu yis drag sngags ni// 'jig rten dregs pa kun la brtsi// de la rgya gtsug swa gdags bya// rdo rje gtsug lag drag po ngan sngags dug chu nag po 'khor lo 'dzin pa gzer gyi rgyud las/ sngags bzhi yan lag dang bcas pa'i gzer gyi le'u ste gnyis pa'o//// ling ga chen po las bstan pa// phyi dang nang dang gsang ba dang// gsang chen ling kha rnam pa gcig khyad par ling kha thun mong gnyis/ khyad par rnam bzhi bstan pa ni// mig dang rna ba sna dang yid/ khyad par ling kha bstan pa yin// de dag dngos med mthu yis gsad// thun mong phyi yis nor bdun 'grub// nang gi rdzas gsang rten las 'grub/ / gsang ba nyi zla khu bas sbru// gsang chen las kyi 'grub pa'o// de la ting 'dzin 'phro 'du bya/ rdo rje gtsug lag drag po ngan sngags dug chu nag po 'khor lo 'dzin pa gzer gyi rgyud las/ ling kha bzhi'i gzer bstan pa'i le'u ste gsum pa'o/ /// phyag rgya chen po la bsten pa// rnam pa bzhi ru shes bya ste// 'byung ba nyon mongs shes pa dang// chos nyid rang sar grol ba'i sku// skye shi sems can kun la khyab/ / gnas dang bca' dang bsgrub pa'i rgya// dam tshig la sogs bzhi la sbyar// bzhi gsum lnga gsum drug dang gsum// bdun gsum sbyor ba las brtsi ba// rgyud don bzhi dang drug la sbyor/ rdo rje gtsug lag drag po ngan sngags dug chu nag po 'khor lo 'dzin pa'i rgyud las/ phyag rgya bzhi dang rgyud kyi yan lag drug bcu rtsa drug gi gzer bstan pa'i le'u ste bzhi pa'o//// dug gi gzer gyi rgyud chen 'di// snod ldan rma bya lta bus bzung/ / snod med rnams kyis gzung 'gyur na// sdug bsngal dug gzer myong bar 'gyur// tshe yi 'du byed myur du 'byung// de nas rab tu btags la bzung// rdo rje gtsug lag drag po ngan sngags dug chu nag po 'khor lo 'dzin pa'i gzer gyi rgyud las/ / rma bya snod kyis dug chu gzer gzung ba'i le'u ste lnga pa'o//// rdo rje gtsug lag drag po ngan sngags dug chu nag po 'khor lo 'dzin pa'i gzer gyi rgyud rdzogs so/ / thi rgya/ ni rgya/ su rgya//// rgya gar skad du// badzra kri yi u kra na mi man tra a ka ne pa ni i ka tsakra tan tra/ bod skad du/ rdo rje gtsug lag drag po ngan sngags me long rnam par bkod pa 'khor lo gzer gyi rgyud/

CLOSE WINDOW