/ sum brtsegs 'dul la phyag 'tshal bstod// ces rjes su yi rang ba dang/ ngo mtshar che nas bstod do// dpal nag po chen po sa g.yo ba'i rgyud ces bya ba rdzogs so// tham than gaM thun:kha tham//// de nas nag po chen po ni/ / 'dod lha dbang phyug dpa' bo yis// 'dod khams zil gyis gnon pa'i rtags// rnam par bltas te rang sngags smras// nga yi yid la byung ba yi// gsang sngags 'di dag nyan par byas/ / gzung bas dngos grub 'di la yod// thams cad 'grub phyir bshad par bya// oM ma hA kA la gu na hri d+ha hUM/ yi ge bcu pa'i sngags kyi mchog/ gtso bo'i rgyu 'am bdag po'i phyir// ye shes 'dus pa'i byin brlabs las/ / sngags kyi rgyal po ming can yin// de phyir nga ni chen po'i ming// gnyen pos bsnyengs pa med phyir gnas// de ni nga yi yon tan te// de dag snying pos smras pa yang// snying gi dbus na rang srog yos/ / rin chen dpung rgyan lta bu yi// rgyud kyi sngags ni yi ge bcu// 'phags pa rin po che dpung rgyan gyi rgyud las/ gsang sngags bsten pa'i le'u ste dang po'o//// de nas mgon po dpa' bos// rang gi phyag rgya rnams gsungs pa/ / gang dag ma 'ongs rnal 'byor pa// las dang mthun pa gang dag gis// nga yi phyag rgya thob 'dod pa// sa bon rgyu las lhar bskyed de// yongs su rdzogs pa'i tshul gyis ni/ / dpa' bo nag po'i nga rgyal gyis// gzugs ni yongs su 'dzin pa ni// rang gi rnam smin spangs pa ste// 'du byed phyag rgya mang po yis// sna la 'gro yi 'du shes te// de ni bzhi yi phyag rgya yin// phyag rgya gnyis pa bstan bya ste/ / gang gis ting 'dzin rab brtan cing// lus ltar ngag kyang shes bya ste// rang gi rig pa 'dzin pa ni// de yi sngags bsam de ltar brjod// blang dor med par de nyid 'dzin// gcig pu de la mnyam sbyor bstan/ / 'jig rten pa yi tshig spangs te// dam pa gzhan yang len med cing// gsang sngags de nyid rtse gcig pa// gzhan du mi 'da' brtan sbyor ba// ngag gi 'du byed mang po yis// phyag rgya'i sngon du 'di 'gro ste/ / ngag gi bzhir bshad phyag rgya yin// de bzhin gsum pa 'di ltar bshad// gang gis lhar bsgom lung dang ni// ngag kyang de ltar shes byas nas// yid kyang 'di ltar brtan por 'gyur/ / nyid kyi lha nyid 'drar ma yin// mngon du gyur pa'i nga rgyal bya// gang dag gzhan ni bsam ma yin// gcig pu dpa' bas 'dir bstan byed// bag chags grong khyer mang po la// sems kyi 'khor lo rnam par gcad/ / sems las byung dang 'du byed bral// rang gi zhi gnas de nyid la// rtse gcig sems pa'i dran pa can// sems kyi phyag rgya brtan mang po'i// dang po 'gro phyir gzhi zhes bshad// lus ngag yid gsum phyag rgya ni/ / sbyor ba thun mong shes byas nas// lag gi 'du byed bstan par bya// sngon gyi tshul gyi 'di bya ste// lag g.yas mtheb mos mthe'u chung mnan// thod pa bzang po ltar bya ste// de yi mdung rtse gsum po ni/ / sor mo gsum phyar phral nas bgrad// g.yas pa thad du cung zad stod// g.yon pa ban d+ha rab 'dzin cing// sor mo lnga skongs ban d+ha'i tshul// mthe'u chung nu 'jing g.yon la sbyar// 'jing pa g.yon gyi phyogs su bkal/ / dkar nag mig kyang glog ltar 'gyu// man 'khal brkyang nas lce yang 'dril// mche ba gtsigs pa'i gnyer ma can// oM hUM A yi dbugs 'dren rngug/ kha T+wAM phyag rgya 'dzin pa yi// nga rgyal stabs kyi 'du byed yin/ / 'di ltar 'dod lha'i nga rgyal gyis// beng gi phyag rgya bstan pa ni// g.yas dang g.yon gyi mtheb mo dang// de bzhin srin lag gong mo yis// 'dzin pa'i tshul du bya ba dang// yang na beng chen nyid kyang gzung/ / g.yas pa g.yas kyi nu ma'i rtsa// g.yon pa snyen gyi thad du phyar// lha yi dmag dpon byed pa'i tshe// lha min 'dul ba'i phyag rgya ste// mthing nag 'jol ber yang dag bsnams/ / gtor ma bskyal dang dgye ba dang/ khrag thun la sogs 'phen pa'i tshe// sna 'dren thabs kyi phyag rgya yin// gri gug thod pa'i phyag rgya ni// dgra rnams gsod tshe gzung bya ste// g.yas pa khur tshur bcas nas kyang/ / gri gug g.yon du so lta ba// dpal dang ldan pa 'dzin pa yi// phyag rgya nu ma g.yas pa'i steng// thod pa khrag dang ldan pa yis// mkhal ma g.yon pa'i steng du bzhag/ sngon ltar sor mo sbyar ba ni/ / gri gug thod pa'i phyag rgya ni// gang zhig dgra bo gnod pa de'i// sha ni til tsam gri yis gcod// de bzhin khrag rnams thod par bsags// khrag kyang btung ba'i bsam gtan bya// bsgrub bya gsad pa'i dus su 'o/ / 'phags pa rin po che dpung rgyan gyi rgyud las/ phyag rgya drug pa bstan pa'i le'u ste gnyis pa'o//// de yi ting 'dzin bstan pa ni// hUM gi rnam pa 'di nyid las// gyur pa'i sku ni rnam par 'jigs/ / yang dag dpa' bo phyag rgya che// kha dog nag po char sprin 'dra// zhal gcig pa la phyag gnyis pa// stag lpags la sogs bsnams pa dang// thal ba'i mtshan mas byugs nas ni// gri gug thod pa phyag na 'dzin/ / mche ba zla tshes lta bur mdzes// mig gsum pa la khraM nag sra// khro gnyer bsdus pa'i gzi brjid can// mgo bo'i 'phreng bas do shal bya// gsum po 'phyang ba'i yan lag ni// thams cad thung la sbom pa yi/ / mchu dang so la khrag kyang 'dzag/ mi ro skra yi skud pas dkris// ro yi steng na 'gying bag can// btsan dkyil dag tu 'dug pa'o// dur khrod mkha' 'gro mang pos bskor// yi dags mang po yang dag 'dus/ / rang sems gyur pa lhun grub sku// rang bzhin gnas nas yang dag gnas// gnyis su med pa'i phyag rgya bstan// ma g.yos zhi gnas legs par bde// bzlas dang bsgom pa de kho na// yi ge bcu pa brjod pa yi/ / sku ni dus gsum kun tu bsgom// sngags kyang yang dag brjod par mkhas// de bzhin phyag rgya gtan sbyor zhing// sgo gsum dag pas dngos grub 'grub// dngos su grub nas bdag dang gzhan/ / thams cad las rnams 'grub par 'dod// ting nge 'dzin ni rab tu dpa'// de bzhin brtan pas bde bar bsgom// thams cad dngos grub 'byung ba'o// 'phags pa rin po che dpung rgyan gyi rgyud las/ / ting nge 'dzin bstan pa'i le'u ste gsum pa'o//// gsang sngags rgyud kyi dam tshig ni// mdor bsdus nas ni bstan par bya// 'jig rten skyes pa thams cad la// brnyas pa nyid du mi byed pa// rdo rje thabs kyi dam tshig yin/ / las las byung ba'i 'jig rten ni// bud med brnyas par mi byed pa// rdo rje shes rab dam tshig yin// las kyi rigs dang yum gyi rigs// 'di ltar shes nas ma nyams na// rdo rje sku yi dam tshig ldan/ / phan dang gnod pa'i bsam pa yis// sems kyi sems can dga' bar skyong// yi chad sun bar mi byed pas// rdo rje thugs kyi dam tshig yin// rdzun dang phra ma tshig rtsub dang/ / nam yang smra bar mi byed dang// snyan par smra bar byed pa ni// rdo rje ngag gi dam tshig yin// dri chen dri chu byang chub sems// maM sa rak+ta rgyal ba lngas// mnyam nyid rtogs phyir dam tshig ste// blang dor spang bar mi bya ste/ / 'di ni rtog pa'i dam tshig yin// dam du bcas te 'dod lha la// mchod dang gtor ma rab tu brtson// gsang ba bsrung ba'i dam tshig ste// dam tshig kun gyi rtsa ba yin// 'phags pa rin po che dpung rgyan gyi rgyud las/ / dam tshig bstan pa'i le'u ste bzhi pa'o//// de nas gsang sngags sgrub 'dod pas// bzlas pa'i thabs kyang bstan par bya// dang por gsang sngags gang 'dzin pa// dkon mchog gsum dang yi dam can/ / slob dpon bla ma'i drung du ni// dam tshig sdom pa sngon du bya// yi ge mang nyung bzlas pa gang// dang por cung zad brjod pa yin// de nas ldabs te gdon par bya// de nas kyang ni cher byang nas/ / ldabs te brjod pa kho nar bya// de bzhin ldabs te zhabs su ni// de yi bdag nyid kho na ste// khams mi bde dang ma snyoms med// bar chod dag dang med pa'i tshul// de ltar bzlas pas de sgoms na/ / las gzhan 'jug par mi 'dod de// bzlas pa'i tshul kyang 'di ltar bzlas// thams cad myur min bul ba spangs// yi ge drag zhan rnam par phyed// yan lag sgra dang bcas pa tshang// A li kA li'i nang du chud/ / sems dpa' gsum gyi tshul brjod pas// drag tu gzhan gyis mi thos par// bdag nyid kyis kyang lhag mi thos// mgo ni rma bya bzhin bkug ste// sems ni sa ltar brtan byas la// ngag ni thos med rdo rje bzlas/ / 'di ni bzlas pa kun gyi gzhi// thogs med bzlas pa 'di yis ni// yi ge bzhi pa'i dngos grub thob// 'phags pa rin po che dpung rgyan gyi rgyud las/ bzlas pa'i thabs bstan pa'i le'u ste lnga pa'o/ /// nag po chen po'i dum bu dang po rdzogs so//// dkyil 'khor bstan par bya ba ni// mthing nag gru gsum khru gang yin// srid du yang ni mtho do pa// sor mo brgyad 'phags rim pa gsum// rdo rje dang ni thod pa dang/ / de bzhin khrag gi rgya mtsho ste// steng na gri gug yod pa'o// hUM ni gri gug lte ba la// gnas pa gzhi de nag po ste// sna tshogs rdo rje de dbus yin// phyogs dang mtshams rnams dur khrod dag/ mdzes par byas nas bkod pa'i steng// sngon du bstan pa de nyid yin// sa ni dur khrod dag nas blangs// shi ba'i khrag gis rnam brdzis la// dpa' ba'i sems kyis dkyil 'khor brtsig/ dmar po khrag dang nag po ni/ / dur khrod sol ba yang dag ste// gri gug kyang ni thal ba'i mdog/ 'phags pa rin po che dpung rgyan gyi rgyud las// dkyil 'khor bstan pa'i le'u ste drug pa'o//// de nas gtor ma gtang ba ni/ / gtor ma'i rgyu dang de sbyang dang// sngags dang phyag rgya'i khyad par gyis// bdag nyid byin gyis brlabs nas ni// kun tu gtong dang gtong ba tshe// gtong ba med pa'i bsam gtan bya/ / dang po hUM las gyur pa ni// cho 'phrul rdzogs las skur bskyed de// rdo rje dril bu 'dzin pa dang// dbu la sangs rgyas lnga ldan zhing// sems dpa'i skyil mo bgying ba'i lha// brtags nas bskyed pa'i 'og tu yang/ / rgyal ba rnams kyi sku gsung thugs// oM dkar AHdmar hUM mthing nag/ spyi bo lce dang snying kha dag/ yang dag byin brlabs sku gsung thugs// rnam par ldan pa'i bdag po yin// de yi gtor ma bskyed pa ni/ / ye shes sems dpa'i thugs kha yaM dmar po raM// dkar po a dag snang ba yin// pad+ma ban d+ha snod kyi dbying// nya dang chang dang 'bras chen dang// me tog dang ni bdug pa dang// la d+hu la phug sbrang rtsi dang/ / sha lnga bdud rtsi lnga yis ni// nag po chen po mchod par bya// rlung gis zla gam ba dan las// yaM gis sa bon spros te bskul// 'bud pa'i stobs kyis me sbar te// pad+ma u0f84ban d+ha dros pa las// nang gi dam rdzas zhu ba yis/ / bdud rtsi sbyang phyir rdo rjes bkrus// rtog par bya phyir a yis brtag/ 'dod pa 'phel phyir oM gyis byed// bzlas pa'i rim pa gtor ma'i sngags// oM ma hA kA la ya/ sha sa na a pa ra ha ri e shang/ sa pas tsi ma ka lo yang/ i dam ma 'dus sha truM ta pa ha pa b+hi laM dA dA/ mi [(]radan[)] na tra ya/ a pa ra ka ri naM/ ya ti pra ti dz+nyA rma/ ra si ta tha i daM ma ma du sta sha hUM/ ta ba 'bar la mi dang kha kha khA hi khA hi/ mA ra mA ra g+h+ri na g+h+ri na/ ban d+ha ban d+ha/ da ha da ha/ pa tsa pa tsa/ da ni me ga na hUM phaT/ 'di dag gtor ma chen po ste// ci phyir dang po'i 'od zer gyis// sems can thams cad bskul sbyangs te// 'od zer dag la thim pa'o/ / de nas bdag nyid chen po yi// rdo rje'i lce la btar ba dang// bza' btung la sogs kun kyang yin// kun tu gtong bar 'dod pa ni// sngags ni 'di dag rnams dang ldan// bzlas nas kun gyis thos par 'gyur/ / oM a ra li ho dzA hUM baM ho/ badzra DA ki da ya/ yo ki ni shri sa ma stoM/ tri sha ho/ oM kha kha khA hi khA hi/ a kha ro mu khaM sarba d+harma/ ar+ya nud pan na twad ta oM A:hUM/ dmigs pa sgo dang khyab pa spyi/ / thams cad sngags ni rab ldan yang// rang gi 'khor la 'dis btang bya// oM in+d+ra ya ma/ dza la/ yak+Sha/ b+hu ta ba h+ni/ ba yu/ nA ga tsan+t+ra/ sur+ya/ ma ta baM ba ta la pa ta le/ a ta sa ma pa/ swA hA/ i daM ba bun dza/ dzig d+hu pa/ puSh+pa/ d+hi pa/ gan+d+he ba ra swA hA/ 'di ni kun tu gtong ba ste// ci phyir de ni kun tu gtong// mchod dang gtor ma kun tshang bas// kha yod pa dang gdong pa yod// mdor na chos can thams cad dang/ / sangs rgyas dang ni sems can kun// bdag nyid thugs kha'i sa bon las// 'phros pa dang pos rnam par sbyangs// gnyis pas 'dir 'dus thams cad 'ongs// 'od zer gsum pas rdzogs pa yi/ / sangs rgyas rnams su gyur pa'i lces// rdo rje spu gus bdud rtsi drang// bsod nams ye shes tshang ba 'di// dge ba'i zhing mchod kun kyang tshim// de phyir kun tu gtong ba yin// gtor ma'i lta ba 'dod rnams la/ / gtor ma'i lta ba bstan pa ni// gtong ba med pa'i gtor ma ste// ci phyir 'di nyid gtong ba med// de ni lta ba shes phyir ro// gang phyir ban d+ha snod kyi dbyibs// yum ni 'jig rten phyi yi snod/ / khyab pa nam mkha'i rgya dang 'dra// bcud ni gtor ma ye shes dag/ bdud rtsi'i ro mchog byang chub sems// skye ba med pa'i ngo bo ni// bdud rtsi dkar por gyur pa yin// sems can sangs rgyas kun yin pas/ / de phyir gzhan la mchod byed su// de la blang dor med bzhin du// bya dang byed pa rtog pa gang// mi g.yo ba yi dngos po ni// thams cad pad+ma ban d+ha ste// g.yo ba rnams kyi ngo bo ni// thams cad bdud rtsi byang chub sems/ / gnyis su med phyir rnam par dag/ snod ni chos dbyings rnam par dag/ bcud ni ye shes rnam par dag/ de phyir dbyings dang ye shes ni// chos sku bde ba chen po la// so sor 'byed pa'i rmongs pa rnams/ / lta ba med pas 'khyams par 'gyur// gang zhig gtor ma'i lta ba yod// de yis gtong ba chen po dang// kun tu gtong ba brjod na yang// mkhas pa de ni don rnams thob// de la phyag rgya ston par bya/ / lag gnyis thal sbyar phyir bkyed la// mtheb mo gcig tu bkras pa dang// mdzub mo 'khyud pa 'thur du bkug/ gung rtse sprad mthe' chung sbreng// srin lag gnyis ni nang du dgug/ de phyir gtor ma'i thad du bcas/ / ma hA mu tra'i las byed do// dam tshig bdud rtsi sbyang ba dang// ye shes bdud rtsi dgug pa ni// gtor ma mkhan gyi cho ga yin// thams cad gtor mas dngos grub 'thob// 'phags pa rin po che dpung rgyan gyi rgyud las/ gtor ma'i chog bstan pa ste le'u bdun pa'o//// de nas drag po'i man ngag ni// mkhas pa la ni sbyin bsreg bstan// bla ma la ni gus par bya// bsgrub bya'i rnam smin 'bum du phyin/ / gru gsum bang rim nang stong can// me yi sa bon nang du 'ong// dbus su bsgrub bya de bzhin sngags// 'gro ba la ni gzugs dang sngags// yi ge bcu pa mtha' yas tshang// klad pa'i nang du 'jug pa'i rlung/ / dpral bar shes rab ye shes te// brten pa la ni dag pa yod// thabs kyi ri la thabs kyi sgo// shes rab kyi ni ri la yang// mtha' lnga'i drung nas blang bar bya// srid pa dbu ma rin 'byung gi/ ming ni yang dag 'brel ba yin// ming thob dbang po pho dang mo// snying po'i ming dang yang dag ldan// rlung gi dkyil 'khor gnyis pa yang// bzhi pa'i sgo yis mdzes pa'o// srid pa 'dzin pa byed pa yi/ / chags sdang dbus na kun gyi gzhi// rang bzhin 'gyur med thig le gnas// 'bum phrag kun kyang 'di 'dra'o// 'od zer rgya ma 'am rkyen gang yin// spu dang tsher ma og shol can// ci rigs sbyar bas de sbar bya'o/ / de yi 'bras bu de nyid kyi// me tog mchod pa yang dag yin// de dang rnam smin re rer ldan// phyi nag nad ser zla ba 'dra// las bzhi'i mtshan nyid yod pa can// zur gsum gnam lcags rtse mo 'dra/ / bye'u yi mchu 'dra nag mo dang// gzugs kyi tha chungs nag mo dang// rgyu dang 'bras bu mi 'dra ba'i// sa bon nag po gzhan yang shis// de 'dra'i nang gi nga rgyal can// lce yi sdug bsngal skyed byed pa// de ni rgyud dang 'bras bu 'dra/ / thams cad yang dag mchod pa yin// khyad par gsang sngags 'di dang ldan// oM ma hA kA la ya/ sarba sha truM ru ba da ha da ha/ pa tsa pa tsa/ di na me ke na hUM phaT/ yi ge bcu pa sngon 'gro zhing/ / bsreg pa'i dus su bsreg pa'i sngags// re re la yang re rer ldan// sngags ni mang la ling ga nyung// ling ga mang la sngags ni nyung// thams cad nyes par bshad pa ste// 'di ni nges par mi rung ngo// re re la yang re rer ldan/ / de nyid dam tshig yin par bshad// de bas sbyin sreg grub par 'gyur// grangs ni tha ma 'bum du bshad// 'bring ni bye ba sa ya rab// dpa' bos yang dag sgrub par byos// me pra rtags kyi mtshan nyid ni/ / gzugs dang kha dog sgra dang dri// dud pa tsha tsha ma thod dman gyi// rtags ni rab tu bshad par bya// gzugs ni glang po 'dra ba yi// khro bo dbu skra dang yang mtshungs// beng gi gzugs 'dra gru bzhi pa/ / 'phra la ring ba phyag mtshan gcad// gru gsum hoM khung dang yang 'dra// mi yi gzugs dang 'dra ba 'byung// mgo bo'i mtshan ma chad pa yin// sngo skya ser nag dmar na lam// ljang nag dud kha stag zil mdog/ char sprin mdog 'dra hral hral po// sprin med nam mkha'i snying po 'dra// ljang ser dmar skya 'khyug la 'khyil// nub kyi dmar thag chad bzhin snang// smug nag dmar la gsal ba'i mdog/ shog sgra snyan dang sa 'brug skad/ / 'khor lo bskor ba lta bu'i sgra// rtag sgra tsheg tsheg smra ba dang// sba yi sgra 'dra wab kyang 'dra// brdebs pa'i sgra dang dkrol ba'i sgra// bud pa dang ni nga ro ste// ngu ba dang ni rgod pa dang// 'bod pa dang ni 'khun pa'i skad/ / 'jug dang gnas dang 'byung ba'i rlung// sgra rnams gang yang 'grub pa'i tshig/ sgog pa sregs pa lta bu dang// ldong ros tshig 'dra nre yi dri// 'byung po tshig pa yin par bshad/ / mi sha bsregs dang gzhob kyi dri// bdug la dri rtsub nga ba babs// dgra bo gsod pa'i dri dang ldan// a ka ru dang du ru ka/ tsan dan dang ni spos kyi dri// lha rnams byon pa'i dri dang ldan// dud pas mi gsal 'khyil ba dang/ / 'tshubs la thibs pas drang ba che// drag po'i mtshan ma tshang ba yi// tsha tsha 'phro ba zhabs su mang// bsgrub bya'i phyogs su rnam par 'thor// me stag che ba yang dag shis// gyen du mchong ba 'dra ba dang/ / me stag kha phru btab pa 'dra// mtho la drag pa'i khyal bar ni// gnam du 'bar ba gyen du 'gro// 'thur du ltung zhing gyen du 'khyil// thab khung nang du thim nas ni// yang ni gnam du 'thor bar 'bar/ / 'di ni me yi rtags bdun pa// mkhas pas bla ma la bris te// brtson pas yang dag yang sbyor ba// de yi lus rnams de yis byon// me yi phyogs na me lha 'dug/ me ni 'jig rten khyad par bya// lha ni dbus su spyan drangs te/ / las rnams byed pa bdag gis kyang// 'phags pa rin po che dpung rgyan gyi rgyud las/ drag po sbyin sreg bstan pa ste le'u brgyad pa'o//// de nas dang po'i tsha ba'i nad// bsregs te gsad par bya ba yin/ / gro ma chu 'gram phung ba'i sa// bsgrub bya'i gzugs ni khru gang pa// tsha ba'i 'bru dang 'dra// tsha 'bras smin pa gnyer ma can// tsha ba bskyed pa shing gi rigs// 'bras bu dmar po skye ba'i rtse/ / yun la thung ba gnyer ba'i rtse// 'bras bu skyural khur ser rtse// yun can seng ge'i mche ba 'dra// zur gsum zug du'i 'bras bu nyid// gzhan yang 'di 'dra mang bshad de// rnam smin nang du dgang bar bya/ / de yi rnam smin reg bya la// yungs mar dang bsres bskus pa la// de yi shing gi me sbar nas// ha cang mi drag dal bas bsro// dros par gyur na dmar ba'o// de yi 'bras bu tsha bas mchi// gal te de yis ma byung na/ / sngon gyi sbyor bas brtsam par bya// 'phags pa'i rin po che dpung rgyan gyi rgyud las/ bsgrub bya'i gzugs bsro ba'i thabs tsha ba nad kyis gsad pa ste le'u dgu pa'o//// rnal 'byor drag po'i spyod pa ni/ / mtshan byed dag na sra bshig ste// gcer bu thal bas byugs pa ni// kha T+wAM grol ba gar thabs yin// rnam snang mdzad kyis byugs pa dang// mtshan ma gyen du bsgreng ba yis// don yod grub pa gar thabs byed/ / bskor dang bskor ba chen po yi// phyag rgya ro yi steng du byed// ha ha zhes ni lce yang 'byin// rin chen 'byung ldan yang dag za// rdo rje sems dpa' mchod par 'bul// snang ba mtha' yas de bzhin te// rta mchog rus pa'i steng na 'dug/ ma mo'i tshogs rnams sdud par byed// dur rnams su yang 'gro bar byed// 'phags pa rin po che dpung rgyan gyi rgyud las/ nag po chen po'i spyod pa bstan pa'i le'u ste bcu pa'o/ /// de nas mgon po nag po nyid// rab tu khros te sngags 'di brjod// yab yum rnam par gyur pas 'jigs// oM badzra yak+Sha de ba ma hA kA la kro d+ha hUM dzA dzA dzA/ bcu drug gsang sngags 'di nyid ni/ / thams cad 'dzin par gyur pa la// tshogs bdag chen po'i sngags rnams bstan// oM badzra yak+Sha de ba/ ma hA yak+Sha ma/ be ti la dzA dzA dzA/ sngags ni bcu bdun gang 'dzin pa// pe ta li dang yang dag ldan/ / g.yon du 'khril ba yum gyi tshul// rang sems rdzogs pa'i lha yi sku// rnam par bzlas pas 'grub pa yin// 'phags pa rin po che dpung rgyan gyi rgyud las/ yab yum gyi gsang sngags bstan pa'i le'u ste bcu gcig pa'o/ /// de nas gzhan yang sgrub pa ni// gnam lcags phur pa ru sbal gyi// rma bya'i g.yon khrag bskus pa gzas zin tshe// mgo la btab na gnam lcags 'bab// rtag tu phyis ni phung ba'i mchog/ dud 'gro sna yi pho nya ni// bsgrub bya'i sgra gzugs bris pa la// sbrul gyi steng du phung bar 'gyur// mgul pa brdeg pa de nyid la// ma hA b+h+yo zhes ldan pa sgrub// gang gi zhing la btab na srin// 'bu la sogs pas za bar byed/ / 'thab byed gnyen pa'i sbyor ba ni// gnyis ka la yang de bzhin te// mig la sgrub bya mchu la bsngags// dri ma can gyi mtshan mo la// gzhan ni de bzhin nyi ma la'o// thams cad phung bar 'thab pa'i mchog/ tshul khrims can gyi mgo gcad la// zla ba phyed pa'i mtshan mo ni// sngags su 'dug pa'i bskul tshig can// shes gyi gzugs brnyan byas nas rmi// dran byed brjed ngas snying la ni/ / gshegs pa'i nang du sgrub bya gzhug/ le brgan lce 'dra'i khar bcug ste// bzlas pa thebs na zor 'phangs smyo// ci cu'i nang du sgrub bya can// thabs la mkhas par khar bcug ste// gsang sngags rdzogs na nges par 'chi/ / tshad pa'i rnam smin snying la ni// bsgrub sngags bskul ba'i tshig dang ldan// phyogs su bltas na myur du 'ong// lha mo klu yang de yis bod// rin chen 'bar ba de bris rdul// sngags dang bskul tshig yang dag ldan/ / 'dod na nor rnams myur du 'ong// dud kha rlung gi rkang pa la// steng du yang las de steng ming// bskul tshig ldan na srod par 'gyur// ma yi khang pa'i nang du ni// gsod byed ma yi dbang po lnga/ / de yi dbus na klu yi phyugs// de yi nang na bskul tshig gis// lo tog 'joms pa'i chu glang yin// rnam par blun pe lce ni ni// bsgrub bya'i ming ldan za byed kha// mi shel blangs te mnan pa lkugs// 'ug pa bya rog sha ba khyi/ / byi ba byi la sre mong sbrul// rtsal ni mang bsdus de de yin// tsher mas me shel bzlog pa ni// de ni myur du rengs pa yis// byol song khyim nas longs spyod blang// rgya mtsho'i 'gram nas gser blangs te/ / rgyal po bcugs pa'i gzugs byas te// chu dkar gtsang ma la sogs mchod// bskul tshig ldan pa'i sngon du bsnyen// ldan na char yang yang dag 'bab// 'bras kyi phub ma bsregs nas na/ / zhi ba'i sems kyi bskul tshig ldan// thams cad gnod pa zhi bar 'gyur// mngal na 'jug pa'i 'byung po la// 'dod khams bdag po'i mtshan ma ni// rdzas la de 'dra'i gzugs byas te/ / lung pa sa de yul bya// nang du bcug pa'i bskul tshig gis// mngal gyi nang nas dros par 'gyur// brang gi mtshon cha can de la// mid pa skad kyi ma ning snying// bzhag ste bskul na nam yang gnon// chu ni snyim pa du ma bsnams/ / blangs te yang dang yang gtor na// bskul tshig ldan pas me yang mchi// mun pa'i nang na gter gyi sa// de yi gzugs la de 'dra bri// byu ru sdong po zhon pa de// sngags dang ting 'dzin rab ldan bskul/ / myur du gzhan gyi bran du 'gro// sgrib med 'pho ba'i skad cig ma// rus pa bsrungs can thal ba la// rdo stengs brdal ba'i de ming bri// rlung gis gnan na nor dang bral// gshog pa smug nag bdud kyi sde/ / snying lpags med pa'i snying la za// de yi khar ni de bcug ste// shel gyi 'od zer nub na 'chi// drod gsher gnyis las khang pa 'dra// gzhon nu'i khang pa thal ba la// bskul tshig sbyar na gzhon nu 'chi/ / de ni mo sham 'dra ba yin// dre'u khye'u gzugs ldan pa// ri bong bu ni rwa can zhon// ru spal spu las byas pa yis// gos ni yang dag lus la dkri// nam mkha'i me tog 'thor byed pas// bud med 'khor lo sgyur rgyal bskyon/ / bya rog 'ug pa phaT tshun tshe// 'di ni mi 'da' brtan pa'i rgya// 'phags pa rin po che dpung rgyan gyi rgyud thun mong gi dngos grub las/ phra mo'i sbyor ba brten pa'i le'u ste bcu gnyis pa'o/ /// sems can rnams ni drang phyir du// rgyal bas chos nyid ston mi mdzad// ci'i phyir de ni skrag pa'i phyir// thabs kyi lam du 'dud pa yin// thabs kyi cho 'phrul gang la yang// bstan na zhi gnas thob par 'gyur/ / de yis lhag mthong rnyed pa yis// de phyir thabs kyi cho 'phrul ni// snying rje yod phyir rgya chen yin// rgya chen cho 'phrul thams cad la// thams cad rmad pa ma yin pas// 'jug par bya ba kho nar zad/ / 'di ni rgyal ba'i byin brlabs pa'i// thun mong dngos grub sgo nas kyang// 'jug pa'i rten 'brel bstan pa yin// dam pas dam chos ston pa'i tshul// gzugs kyi sgo nas ston pa dang// dgra yi sgo nas 'dren pa dang/ / dri dang ro dang reg pa rnams// ji ltar bas 'dul ba yin// gang dag phung po lnga dang ni// dbyibs dang kha dog rdul gyis kyang// mos pa dma' ba 'dul ba yin// sku mdog phyag mtshan gdan khri dang/ / bzhugs tshul la sogs bstan pa yang// mu stegs can rnams 'dul phyir ro// gdug pa'i chas mas ra bas bsnams te// sgro skur btab na 'dren pa yin// kha cig rang lus phung po la/ / dam pa'i rigs rnams phye ste ston// de bzhin so so'i lus nyid las// rtsa yi drang ba gang yin pas// de yi sgo nas 'dren par mdzad// gzhan yang dbul dang yi ge dang// tshig dang ming la sogs pas 'dren/ / 'od gsal spros bral brjod pa med// kun gyi sna la 'di ston pa// drang ba'i phyir na thabs kyi mchog/ 'di ni 'od gsal rang la yod// thog ma med nas gnas pa ste// blun po rnams kyi rtogs pas bsgribs/ / byang chub dri med gang thob pa// thob par bya ba rdul tsam med// thams cad sems ni mngon sangs rgya// lus ni nam kyang sangs mi rgya// gal te sems nyid sangs rgya na// de phyir lus na yod na mod/ / de la zhen pa gang zhig yin// thams cad mi rtag sgyu ma// snang yang sgyu ma rtag mi bzod// ma rtogs nyams dga' sgyu ma'i tshul// mi snang na yang sgyu ma zhig/ blo bur 'ongs kyang blo bur med// chu yi chu bur dang yang 'dra/ / chu zla'i dkyil 'khor lta bu ni// gsal la rnyog pa med pa yin// bden pa gnyis kyi tshul la ni// rgyal ba lta bar mi mdzad do// sems can rnams kyi lta ba ni// 'di ltar shes pa mngon sangs rgyas/ / kha cig brtags pa'i dngos po las// rang sems bskyed pa lha sgom pa// brtags pa dor ba dgongs pa yod// byis pa shes nas mi 'dor na// nam kyang srin po'i skye ba blangs// rdzogs gsal ldan pa cher gnas ba/ / sku rdzogs spangs kyang nam kyang 'chad// rgyal ba'i rgyud kyi gtsug lag ni// dam tshig dang ni lta ba dang// sgrub pa tshang nas rgyud kyi don// 'phags pa rin po che dpung rgyan gyi rgyud las/ lta ba bstan pa'o/ / nag po chen po'i dum bu gnyis pa'o//// de nas bar snang gi lha rnams kyis nag po chen po la bstod pa/ tshangs pa'i sgra skad snyan pa'i bar snang la// mtshan nyid mthun pa'i bstod pa me tog shar/ / de dpon nag po chen po dge ba yis// sa gzhi mdzes par bya ba'i phyir bstod pa// mi 'jigs seng ge nyon mongs mtsho las rgyal// thub med dpa' yi lha min g.yul las rgyal// thub med dpa' bo bdud dpung g.yul las rgyal/ / ma rig 'khrul pa kun nas rnam par rgyal// dus gsum bde bar gshegs pa bstod sngags khyod// gnod pa 'dul ba'i des pa'i tshul ston khyed// skye 'gro phal chen kun gyi skyabs gyur khyod/ / thugs rje'i dbang gis 'gro ba'i don mdzad khyod// dge slong dgra bcom rnams dang tshul khrims mnyam// drang srong rigs 'dzin rnams dang dka' thub mnyam// lha dbang brgya byin rnams dang longs spyod mnyam/ / khro bo stobs chen rnams dang spyod pa mnyam// yun rings dka' bas 'gro ba'i don brtson 'phags// smon lam phun sum tshogs pas 'grub pa 'phags// 'dod khams bzhin du zhing khams skyong bas 'phags/ / rtag tu dmigs med chos la mi g.yo 'phags// sgron ma mun sel yid bzhin 'bar ba'i bdag/ gco bo tsam tsom med pa gsang sngags bdag/ rgyal srid 'byung ba chen po tshogs kyi bdag/ dbang bskur bskal pa bzang po srid gsum bdag/ gang tshe gcig gis 'dul bar shes pa po// ci dang ci 'dul sprul pa shes pa po// ci rigs gang dag bshad pa shes pa po// shes pa yongs shes ji bzhin shes pa po/ / dbang phyug chen po mthong na dga' ba'i gnas// spyod yul rgya mtsho sangs rgyas bstan pa'i gnas// des pa lha rigs phal tshogs 'byung ba'i gnas// 'jigs med 'byung ba mthong na dam tshig gnas/ / 'dren mchog bsgyings pa srid pa ltar ltung ba 'dzin// 'phong pa mi bzad srog kyang gang zhig 'dzin// rgyal po yul 'khor bcas pa'i sbyor ba 'dzin// dbang phyug 'gying ba mchod pa don du 'dzin/ / bstod pa 'os pa nyes pa sel bar byed// 'dam rdzab skems pa 'khrul ba zhi bar byed// mig rtsa dmar po srin po rmugs par byed// mdog nag tshogs kyis nag po bkra shis byed// mtshan dang dpe byad bzang po rgyan dang bcas/ / spros pa yon tan mang po rgyan dang chas// sprul pa rnam pa mang po tshogs dang bcas// cis 'dul thabs kyis mtshon chas kun dang chas// dus dang sbyin pa lo bas mthu stobs kyi rab/ / khyab 'jug brtsan po mthu stobs grub pa'i rab// gzi brjid 'bar ba bshes gnyen can gyi rab// bzhin 'dzum byang chub mchog gi lam ston rab// snying rjes 'khor ba mi stong thabs mkhas mchog/ blo ldan skyon gyis mi gos ye shes mchog/ rtogs nas dad pas khyab par 'byung ba'i mchog/ nad rnams sel bar byed pa sman gyi mchog/ mtha' yas gsang sngags bzhir gyur nag po che// legs ldan nag po chen po grags pa che/ / lag na rtse gsum log 'dren spa bkong che// kha dog so gtsigs glang chen pags gyon che// tshogs chen yang dag rdzogs pas sangs rgyas yin// dam tshig rgyas shis cir yang bstan pa yin/ / khro zhing 'khor bzhi gnod pa med stobs yin// sgrib spangs dge 'dun legs par mchod pa yin// dkon mchog gtsug lag khang ni skyong bar mdzad// dge 'dun 'khor kun legs par 'phel bar mdzad/ / gzhon nu gzhon de kun gyis rgyas par mdzod// log 'dren dgra bgegs ma lus 'dul bar mdzad// sems can kun la phan gdags snying la bsams// dad pas mchog bskyed dga' ba 'di mthong na// sdang ba'i dgra bgegs bsgral ba'i mgon dang bcas/ / nad bral mthong na dga' ba'i rnam drug khyod// bsod nams dpal gyi rgyan pas rab mdzes te// tshogs bdag byin gyis grub na gnod pa sel/ / 'di dang pha rol gnyis kar phun sum tshogs// 'dod pa gzhan yang 'di las byung ba yin// de bzhin 'dod pa thams cad 'di la grub lag tu// sman stong blta na sdug pa dug 'jil 'dra// pha rol phyin bcu spyod la phyag 'tshal lo/ / sgrib pa rnam gnyis spangs la phyag 'tshal lo// ston pas lung bstan thob la phyag 'tshal lo// bdag med gnyis la phyag 'tshal lo// bskal pa grangs med 'das pa'i sngon rol tu/ / mtha' yas mngon par rdzogs par sangs rgyas kyang// thugs rje'i dbang gis 'gro ba'i don mdzad pa'i// mgon po spyan ras gzigs la phyag 'tshal lo// rje mgon po dpal btsan sbyin la goms pas nam mkha'i mdzod la rol/ / tshul khrims phun sum tshogs pas gnas gtsang mda' 'phang mtho// bzod pa phun sum tshogs pas mdangs gsal bkrag re gsal// brtson 'grus phun sum tshogs pas stobs bcu rtsal dang ldan/ / bsam gtan phun sum tshogs pas mdangs gsal rdo rje gnan mi 'gul// shes rab phun sum tshogs pas rigs lnga'i spyan dang ldan// 'jig rten thabs kyi 'dul bas phyag rgya tsan dan bzang/ / dge chos stobs su gyur pas spyi gtsug rdungs la 'phags// smon lam dbang du gyur pas 'jig rten kun la mnga'// ye shes lhun gyis grub pa'i 'od zer phyogs bcur 'gyed// pha rol phyin bcu spyod pas sa bcu'i gtso bo mdzad/ / sa bcu gtso bo lags pas chos kyi cod pan mdzes// mgon po spyan ras gzigs te thugs rje'i mnga' bdag can// nag po lha mchog khyod la bstod de gus phyag 'tshal/ / khyod la bstod pas bdag gi bsod nams dge tshogs 'phel ba dang// bdag gi bsam pa grub par thugs rjes mdzad du gsol// ma 'ongs pa na lung bstan pa// de bzhin gshegs pa thal dbang po/ / zhes bya bar ni 'gyur ba'i tshe// 'dren pa'i zhabs drung skyes nas kyang// chos kyi bdud rtsi 'thung bar shog/ 'phags pa rin po che dpung rgyan gyi rgyud las// bar snang gi lha rnams kyis bstod pa'o// nag po chen po'i rgyud dpal yon tan 'khor lo mkha' 'gro ma'i bdag po'i tshogs thams cad kyi bdag po las dum bu gsum pa'o/ / 'phags pa rin po che dpung rgyan gyi rgyud ces bya ba rdzogs so////

CLOSE WINDOW