/ ngo bo kun bcud bsdus nas bshad// tshig don mgo lus thams cad kyang// gang zag rnams kyis go bya'i phyir// rang bzhin de yi stun bu ltar// le tshig 'bru rnams bcos nas bshad/ / rgyud dang gdams pa'i khrid rnams kyang// ma nor rim bzhin bstan pa ni// mu tig tsar bskyus lta bu yi// dbye ba sngon du bsdebs te bshad// gzhan gyi bsgom pa tshar gcad phyir// rang gis sgrub mtha' rnam par bskyangs/ / seng ge ngar skad lta bu yis// log lta sun rnams phyung nas bshad// e ma/ ye shes sku mchog thugs rje can// 'di nyid mthong ba tsam gyis ni// nyon mongs rnams med don mthong zhing/ / ma bsgoms par yang mthong grol lo// chos nyid gsung mchog zab mo'i don// 'di nyid thos pa tsam gyis ni// ye shes 'gag med don rtogs shing// ma bsgoms par yang thos grol lo// rig pa'i thugs mchog 'dus ma byas/ / 'di nyid btags pa tsam gyis ni// rang sems 'khrul med don rtogs shing// ma bsgoms par yang btags grol lo// dgongs pa don mthong bde ba che// 'di la reg pa tsam gyis ni/ / bde chen zag med don rtogs shing// ma bsgoms par yang reg grol lo// 'dod pa'i yon tan rang grol ba// 'di nyid tshor ba tsam gyis ni// tshig gi rol pa'i don rtogs nas// sgom mi dgos te tshor grol lo/ / thugs rje 'phrin las shugs 'byung ba// 'di nyid myong pa tsam gyis ni// blo dang bral ba'i don rtogs nas// sgom mi dgos te myong grol lo// rgyud 'di'i man ngag gab pa rnams// sprul pa rigs 'dzin zhal nas 'byung/ / cha rkyen dgos pa tshang bar ni// phyi rabs skal ldan 'khor la ston// ma tshang kha skong theg pa rnams// bstan pa gzhan nas legs bsdus te// chos rnams dgongs don gcig pa'i phyir/ / rgyud rgyal 'di yi grogs su bsdebs// bstan pa la ni zhugs pa des// phyi nang gsang ba rtsa lag gis// rang gzhan don du dam tshig ni// mi nyams rang gi zlog bzhin srungs// nga yi sprul pa phyag drug pa/ / rgyud 'di khyod la yongs su gtad// sangs rgyas bstan pa khyod kyis bzung// phyi rabs rnal 'byor stong grogs kyis// gsang ba ye shes khros pa'i sku// lha mo tsit+ta dug mthur ma// rgyud 'di khyod la yongs su gtad/ / sangs rgyas bstan pa khyod kyis skyongs// bka' gnyan las byed me spu gri// 'jig rten dregs pa mang por bcas// rgyud 'di khyod la yongs su gtad// sangs rgyas bstan pa khyod kyis srungs// badzra sa ma ya/ hUM hri/ ha ha ha ha/ he he/ a a/ zhes bka' stsal nas// 'khor ba sgrol bar mdzad do// dgongs don 'gro ba kun grol gyi rgyud las// 'dus don yongs su gtad pa'i le'u ste bdun pa'o//// rgyud 'di gang du gnas pa de nyid bde ba can ltar gnas so/ / rgyud 'di kha ton du byed pa la sogs pa'i chos spyod la 'jug pa de ni// kun bzang snang ba mtha' yas ltar gnas so// rgyud 'di mthong ba dang/ thos pa dang/ dran pa dang/ reg pa dang/ rlung dang/ rdul gyis phog pa rnams kyang ngan song du mi ltung zhing// mtshams med pa lnga byas pa'i 'gro ba yang/ 'di thos nas ngan song las skyob par ma gyur na/ bdag pad+ma 'byung gnas kyi mtshams med pa lnga byas pa yin no// bstan pa thams cad kyi dgongs don 'gro ba kun grol gyi rgyud ces bya ba rdzogs so//// skal ldan dad brtson shes rab blo ldan snying rje can dang 'phrad par shog/ gter rgya/ sbas rgya/ zab rgya/ gnyan rgya/ g+huh+ya/ moMs mah+ya/ bdag 'dra mkha' chen bzang yis yi ger bris pa'o// r+ya na ma Ta/ d+hanam/ o rgyan dri med lhun grub kyis rtswa ri sprul 'khor gyi shar sgo/ rdo rje sgom phug ces bya ba nas gdan drangs so// lcags pho sprel lo spre'u zla la/ tsa gongs chos kyi pho brang du bris pa'o//// rtsa ca thakag+ha cAb+hahra/ dgongs pa rang grol gyi skad du/ oMhu lhu lI/ bod skad du/ thig le yang zab 'bras bu ye grol chen po'i rgyud/ bla ma rang rig don gyi lha la phyag 'tshal lo// chos sku ka dag don rig cing/ / longs sku lhun grub ngang du shar// sprul sku thos pa'i dus gcig na// chos sku'i gnas su longs sku'i gtso// sprul pa'i 'khor la ngo bo bstan// 'di dang phrad tshad 'khor ba sgrol// 'di yi rgyud 'dzin sangs rgyas sras/ / 'gro ba 'dren pa'i bla ma yin/ rgad+hagabra th+yar/ 'di ni rang 'byung thig le'i mdangs// gnyo 'khor gnyis su med pa'i phyir// ma brjod 'dra'i tshul du shar// dgongs pa gnyis med ngang du grol/ / oM/ snang ba thams cad sems kyi rtsal/ a/ sems nyid gzhi med thig le stong/ hUM/ stong pa zag med bde ba che/ oM hU: bde chen blo 'das kun tu bzang// rtags dang tshig dang d+ha pa yi// dbang don go na thob pa yin/ / ma ma ku ling sa man ta// rta/ thAka/ bla ma sku gsum rig pa'i sku// rdo rje sems dpa' bdag gi sku// tsit+ta dung khang zhi khro'i tshogs// ye yin gsal gdab don la blta// rtsa gnas rgyal ba'i lha tshogs rnams/ / thig le 'od kyi sku ru bzhugs// rlung gi zhags pas gzugs byas nas// shes rab ldan pa'i bde ba bskyed// oMhU/ h+ya t+ya/ lta ba mtha' bral yangs pa'i klong// sgom pa 'dzin bral thig le'i dbyings/ / spyod pa chags bral chos nyid grol// 'bras bu blo bral sku gsum rdzogs// gzhi la byung gnas 'gro gsum bral// ma bcos sems nyid chos kyi sku// lam ni rtog tshogs shar grol te/ / mtha' bral thig le longs spyod rdzogs// 'bras bu bar do sangs rgyas te// sangs rgyas sprul pa dpag med 'gyed// dbyings sgron ma dang ye shes mun pa rig pa lu gu rgyud gsum// gnyis med ngang du lhun rdzogs 'gyur/ / rang byung nyag gcig ye shes don// rang shar lhug pa gza' gtad bral// de yi mtha' 'dzin grol gyur na// 'khor 'das chos rnams thams cad kyang/ rang 'byung rig pa'i rtsal du shar// rta t+ya/ rgyud 'di bcangs nas bdud bzhi thul// sangs rgyas kun gyi sras gcig yin// til la stong gsal las kun byed// kun tu bzang po'i sa bon// thams cad 'di las 'byung zhing grol// rgyud 'di rin chen lnga yis bris/ / mthong thos bcangs pas sangs rgyas te// sku gsum rtags kyi 'gro ba 'dul// rgyud 'di mkha' 'gro rnams la gtad// dam tshig bya ra rgyun du gyis/ sa ma yA/ 'bras bu ye grol gyi rgyud rdzogs so/ /// cam+tarA/ rkya/ rgya gar skad du/ thacablam+latA/ bod skad du/ lung bstan rjes su gnang ba'i rgyud ces bya ba/ dpal ye shes snying po bde ba chen po la phyag 'tshal lo// 'di skad bdag gis thos pa'i dus gcig na/ 'og min thug po bkod pa'i zhing khams/ dkar/ ser/ dmar/ ljang/ mthing kha'i gzhal yas/ 'od lnga'i dal/ snang la ragrub pa na/ bcom ldan 'das dpal bde ba chen po la/ 'khor rigs lnga'i sangs rgyas dang/ rigs gsum gyi bo d+hi sa twa dang/ ma dang TA ki ma'i 'khor gyis bskor nas bzhugs so// gleng gzhi'i le'u ste dang po'o//// adamata/ de nas phyogs bcu'i sangs rgyas dang byang chub sems dpa' thams cad kyi 'od zer/ dpal bde ba chen po'i thugs khar 'dus par gyur te/ dpal bde ba chen po 'dzum pa dang bcas pa'i thugs kha nas yi ge hri dmar po khru gang ba cig mdun gyi nam mkha' la thon par gyur to/ / de nas rigs bzhi'i sangs rgyas kyi thugs kha nas/ oM dkar po dang/ A dmar po dang/ hUM mthing kha dang/ traM ser po thon par gyur te hri la brgyan par gyur to// rigs gsum gyi bo d+hi sa twa dang/ phyogs bcu'i sangs rgyas thams cad kyi thugs kha nas 'od zer dpag tu med pa byung nas/ hri de la thim par gyur to// de nas hri de skar mda' 'phangs pa bzhin du sprul sku'i zhing o rgyan yul gyi nub byang mtshams dri med ko sha'i mtsho la thog babs pa ltar song ba gzigs so/ / de nas 'jig rten gyi khams 'od du 'bar te 'od zer phyogs bcur 'phros so// lung bstan rjes su gnang ba'i rgyud las/ gleng bslangs pa'i le'u ste gnyis pa'o//// gat+ya cata/ de nas pad+ma 'phreng 'dzin gyis// dpal chen po la 'di skad zhus// kye kye dpal chen 'od dpag med// yi ge 'od kyis rab brgyan pa// d+ha na ko sha'i mtsho la babs/ / 'jig rten khams kyang 'od du 'bar// 'di yi mtshan nyid ji lta bu// mos pa'i 'khor la gsung du gsol// de nas dpal chen 'di skad gsung// nyon cig dri med pad 'phreng 'dzin/ / bdag gi thugs kha nas byung ba'i// hri dmar 'od zer 'dus pa 'di// ko sha'i mtsho la babs pa 'di// dus gsum sangs rgyas thams cad kyi// sku gsung thugs kyi sras gcig pu// snyigs ma'i 'gro ba 'dren pa'i dpal/ / pad+ma ge sar snying po la// 'das grongs mi mnga' rdo rje'i sku// 'gro ba 'dren pa'i lcags kyu mchog/ sdug bsngal nad sel sman gyi rgyal// pad+ma 'byung gnas zhes bya ba/ khye chung lo brgyad tshul du 'byung/ / mtha' yas bdag dang gnyis su med// dus gsum sangs rgyas thams cad kyi// sku gsum thugs kyi sprul pa yin// 'gro rnams sgrol ba'i gru chen yin// ma rig sel ba'i sgron me mchog/ thar pa'i gnas skyel rin chen skas/ / snyigs ma'i skyabs chen 'khor lo sgyur// pad+ma 'byung gnas zhes byar grags// nor bu'i nang nas yid bzhin ltar// mtha' yas pad+ma'i rgyal po 'byon// sman tshogs nang nas rnam rgyal ltar/ / mtha' yas pad+ma'i rgyal po 'byon// me tog tshon gyi u dum ltar// mtha' yas pad+ma'i rgyal po 'byon// skar tshogs nang nas nyi zla ltar// mtha' yas pad+ma'i rgyal po 'byon// 'di ni 'gro ba kun gyi yab/ / ces gsungs so// lung bstan rjes su gnang ba'i rgyud las// 'byon tshul gyi le'u ste gsum pa'o//// kagabaD+ya/ de nas pad+ma 'phreng 'dzin gyis// mtha' yas nyid la yang zhus pa// de lta bu yi sprul sku des/ / 'gro ba'i don ni ji ltar mdzad// bstan pa gang gi phyogs su 'byung// zhes zhus pas/ bde ba chen pos bka' stsal pa// nyon cig dri med pad 'phreng 'dzin// dus gsum sangs rgyas thams cad kyi/ / sprul pa pad+ma'i rgyal po 'di/ khams gsum kun tu 'gro ba 'dren/ khyad par rgya gar yul du bzhugs// kun 'jug sna tshogs mthar phyin mdzad// mtshan bdun du ni grags pa yi// rgya gar bal po 'gro ba'i don/ / nyi zla lta bu khyab par mdzad// de nas bod yul dbus su 'byon/ khri srong lde btsan bsam pa grub// chos kyi bstan pa'i nyi ma shar// dregs pa ma lus bran du 'khol// rdo rje gro lod ces su grags// mtsho rgyal zhes byas bka' rnams sdud/ / bstan mjug gter gyis rgyas mdzad cing// gter kha bsam las 'das pa sbed// de nas lho nub mtshams su ni// gdug pa srin gyi kha gnon mdzod// srin po rag sha thod 'phreng zhes/ / 'jigs su rung ba'i cha lugs kyis// srin po rnams la dam chos ston// de yi bka' yi sdud pa po// srin po'i bu mo mthing 'bar 'od// g.yu yi zur phud rus rgyan gsol// mtsho rgyal skye ba phyi ma ste/ / bka' rnams kun gyi bsdu ba mdzad// yum chen DA ki lngas bskor nas// sprel lo zla ba'i tshes bcu la// bod khams rgya gar bal yul dang// u rgyan mkha' spyod la sogs pa// gling bzhi kun tu 'byon pa yin/ / kun la byin rlobs bar chad srung// tshes bcu kun la sprul pa 'gyed// de dus mchod sgrub su mdzad pa// zhal mjal chos ston dngos grub ster// 'di ni 'gro ba kun gyi pha// phyi rabs 'gro ba'i lha skal yin/ / chos sku snang ba mtha' yas la// longs sku thugs rje chen po yin// sprul sku pad+ma 'byung gnas so// zhi ba thugs rje chen po la/ khro bo rta mgrin rgyal po'o// sku ni mi bskyod rdo rje la// gsung ni snang ba mtha' yas te/ / thugs ni rnam par snang mdzad yin// yon tan rin chen 'byung ldan yin// 'phrin las don yod grub pa'o// 'di la mos pas su bsgrubs pa// dus gsum rgyal ba kun 'grub 'gyur// yid tsam snang ba chags pas kyang/ / mtho rigs bde ba thob par 'gyur// 'di la mos pa thams cad kyang// pad+ma'i sprul pa dngos yin no// 'di sgrub pa yi skyes bu rnams// mtha' yas bdag dang dbye ba med// ces gsungs so/ / lung bstan rjes su gnang ba'i rgyud las/ lung bstan pa'i le'u ste bzhi pa'o//// tharang : de nas pad+ma 'phreng 'dzin gyis// mtha' yas nyid la yang zhus pa// de lta bu yi sprul pa de// ma 'ongs sgrub pa ji ltar bgyi/ / bde ba chen pos bka' stsal pa// nyon cig dri med pad 'phreng 'dzin// ma 'ongs skal ldan skyes bu yis// tshe gcig sangs rgyas thob 'dod na// dus gsum sangs rgyas thams cad kyi// sku gsung thugs kyi sprul pa ni/ / pad+ma rgyal po sgrub 'dod na// byang chub mchog tu sems bskyed la// yid dang mthun pa'i gnas su bsgrub// dus gsum sangs rgyas thams cad kyis// sku bsgrub oM la 'dus pas skyed/ / sku mdog dkar po zur brgyad nang// 'dab bzhi rigs drug sa bon ni// ma rig 'khrul pas skyed phyir gnas// rang rig chos kyi sku yin phyir// rgyal sa 'dzin pa'i lhun grub gnas// ma rig rgyud sbyangs ngag rtsal bskyed/ / snying po 'bru lnga 'dzab tu bzlas/ oM hUMtraM hri a/ dus gsum sangs rgyas thams cad kyi// sku dang gnyis med sangs rgya'o// dus gsum sangs rgyas thams cad kyi// gsung bsgrub a la 'dus pas skyed/ / spro bsdu gong 'dra a nyid bzlas// dus gsum sangs rgyas thams cad kyi// gsung dang gnyis med sangs rgya'o// dus gsum sangs rgyas thams cad kyi// thugs bsgrub hUM la 'dus pas skyed/ / spro bsdu gong 'dra hUM nyid bzlas// dus gsum sangs rgyas thams cad kyi// thugs dang gnyis med sangs rgya'o// 'phrin las las tshogs bzhi dang sbyar// yid bzhin nor bu'i rgyud mchog 'di/ / thugs rje chen pos khyod la gtad// der 'khor thams cad rjes su yi rangs te/ dpal chen pos gsungs pa la mngon par bstod do// lung bstan rjes su gnang ba'i rgyud las/ bsgrub pa dang gtad pa'i le'u ste lnga pa'o/ /// rdzogs so// sa ma yA/ rgya rgya rgya/ der longs sku thugs rje chen pos bka' bsdu ba mdzad nas// sprul sku pad+ma 'byung gnas la shar ri bo ta la'i rtse mor gnang ngo// bdag 'dra pad+mas rgyud 'di la bsten nas/ sku gsung thugs kyi sgrub thabs la tshogs dang bcas pa mdzad de/ mtsho rgyal la gdams te/ ma 'ongs don du sa'i gter du sbas// las can snying gi bu dang phrad par shog/ 'di ni kun gyi thun mong ma yin pas/ / gzhan la ma bshad snying gi dkyil du sbos//// thacaTaTAm/ rgya gar skad du/ b+hu d+ha badzra sa swa sa ma ti na ma ti na ma tan tra/ bod skad du/ sangs rgyas rdo rje sems dpa'i dgongs pa tshig gsum pa'i rgyud/ bcom ldan 'das mgon po 'od 'gyur ba med pa la phyag 'tshal lo/ / 'di skad bdag gis thos pa'i dus gcig na/ ye shes kyi snang ba 'gag pa med pa/ 'od kyi dkyil 'khor chen po'i klong na/ rang snang rtogs pa'i rgyal ba rigs lnga dang/ snang ba 'od kyi phung po chen po la 'du 'bral med par bzhugs so/ / 'di skad bdag gis thos pa'i dus gcig na/ sangs rgyas mi bskyod pa'i zhing khams mngon par dga' ba'i tshal na/ rgyal ba rdo rje sems dpa' la/ rdo rje rigs kyi 'khor bye ba khrag khrig mtha' yas pas bskor nas/ rang rig pa'i ye shes ye nas rang bzhin gyi 'od kyi phung po chen po/ 'od gsal ba'i ngang la bzhugs so// de'i tshe gsang ba'i bdag po rdo rje 'dzin pa chen po des/ sangs rgyas 'od mi 'khrugs pa chen po la 'di skad ces gsol to// kye kye sangs rgyas thams cad kyi mes po/ rgyal ba 'od mi 'gyur ba chen po lags// ma rig 'khor ba'i sems can la/ / sangs rgyas dgongs pa gsung du gsol// zhes zhus so// de nas bde bar gshegs pa thams cad kyi mes po/ sangs rgyas 'od mi 'gyur ba chen po// phyi nang med par 'od kyi phung por bzhugs pa des/ 'di skad ces bka' stsal to// kye ma gsang ba'i bdag po khyod nyon cig/ rang shes rig gi ngo bo sang nge ba 'di dngos po dang kha dog ci'i ngo bor yang ma grub par/ stong sang de 'dug pa 'di sangs rgyas kun tu bzang mo yin no/ / rang rig pa shes rig gi ngo bo 'di stong bsngo tsam na gsal ba stong pa phyang chad du ma song bar/ rang gi shes rig ma 'gags bar wa la la gsal ba 'di ka dpal kun tu bzang po yin no/ / rang gi rig pa dngos po cir yang ma grub pa'i stong pa dang/ rang gi rig pa wal le gsal ba 'di dbyer mi phyed par 'dug pas/ sangs rgyas chos kyi sku yin no// rang gi rig pa gsal stong dbyer med/ 'od kyi phung po chen por bzhugs pa 'di la/ skye shi med pas sangs rgyas 'od mi 'gyur ba yin no// de ngo shes pas chog go/ zhes bka' stsal to// de nas yang gsang ba'i bdag pos 'di skad ces zhus so/ / e ma ho/ bde bar gshegs pa mgon po 'od dpag med// sangs rgyas btsal du med pa gsum po gsung du gsol// ces zhus so// de nas yang 'gro ba'i mgon po 'od dpag med chen pos/ 'di skad ces bka' stsal to/ / kye gsang ba'i bdag po khyod ma yengs par nyon cig/ rang gi shes rig wal le dug pa 'di sangs rgyas yin pas// sangs rgyas gzhan nas btsal du med// rang gi rig pa wal le khyug ge ba 'di rgyun du gsal bas/ sangs rgyas chos kyi sku la bsgom bsgrub byar med do// rang gi rig pa chos kyi sku la skye shi med pas/ las dang las kyi rnam par smin pas gos pa med do// zhes bka' stsal to// de nas yang gsang ba'i bdag pos 'di skad ces zhus so/ / kye kye sangs rgyas 'od mi 'gyur ba 'od kyi phung po chen po/ sangs rgyas 'od kyi phung po chen po'i 'char lugs bstan du gsol/ ces zhus so// de nas rnam par grol ba'i sangs rgyas 'od kyi phung po chen pos/ 'di skad ces bka' stsal to// kye gsang ba'i bdag po/ rang gi rig pa'i rang 'od ngo ma shes pa rnams ni/ las dang bag chags su bcas te 'khrul lo/ / rang gi 'od 'di ngo shes sam ma shes kyang rung// sems can thams cad 'khrul pa'i snang ba 'gags pa dang/ dag pa'i snang bzhag lngar 'char ro// de ngo shes na rang snang dag pa'i snang ba la gnyis su med par thim nas sangs rgya'o/ / de ni gdams ngag can gnad ngo shes pas sangs rgyas pa yin no// sems can thams cad la dag pa'i snang ba yang dang yang du shar yang/ de ngo ma shes pas 'khor bar 'khyams so/ / 'di sangs rgyas rdo rje sems dpa'i gsang lam yin no// de ngo shes pas chog go/ don de ngo shes bar gyis shig/ ces bka' stsal to// sangs rgyas thams cad kyi dgongs pa tshig nyung ba zhes bya ba'i rgyud las/ sangs rgyas rdo rje sems dpa'i gsang lam bstan pa'i le'u ste dang po'o//// de nas gsang ba'i bdag pos 'di skad ces zhus so// kye kye bde bar gshegs pa 'od kyi phung po chen po lags/ bar do rnam pa gsum po gsung du gsol/ ces zhus so// de nas yang sangs rgyas 'od mi 'gyur bas bka' stsal pa/ kye gsang ba'i bdag po/ da lta dang/ 'chi kha dang/ bar do dang gsum las/ da lta'i gdams ngag skyel ma dang 'dra'o/ / 'chi ka'i rig pa 'gron bu dang 'dra'o// bar do'i snang ba bsun ma dang 'dra'o// de yang da lta'i gdams ngag dpe don rtags gsum gyis yid ches par gyis shig/ dpe ni shel dang nyi ma 'dra 'bag rnam pa gsum mo/ / don da ltar gyi dus nas sku gsum 'du 'bral med par bzhugs pa 'di yin no// rtags gsum las chos sku'i rtags da ltar gyi rig pa rang gi ngo bo ma 'gags par sang nge gsal ba 'di sangs rgyas chos kyi sku yin no/ / longs sku'i rtags da lta'i lus kha mig dang bcas pa yin no// lus kyi nang na rang gi rig pa ma 'gags par gsal ba 'di nyid sangs rgyas longs spyod rdzogs pa'i sku shes rab kyi kha mig can yin no/ / sprul sku'i rtags da ltar rang gi mig nas 'od kyi phung po 'char ba 'di yin no// de yang rang gi mig rdo rje sems dpa'i me long la bcug nas ma yengs par bltas pas/ chu bur gyi mig gis chos nyid dag pa'i snang ba ma thub par/ sangs rgyas kyi zhing 'phra la dngas pa/ gsal la 'tsher ba/ rang bzhin bkrag la nyam nga bar me re re 'char ba 'di/ sprul pa'i sku 'od kyi kha mig can yin no/ / rang gi snying gi nang dwangs ma lnga'i dbus na/ ye shes lnga'i 'od kha dog lngar gnas pa ni sprul pa'i sku'o// 'od lnga'i dbus na sku lnga gnas pa ni longs spyod rdzogs pa'i sku'o/ / sku dang 'od gnyis su mi rtogs pa'i dmigs pa ni chos kyi sku'o// chos kyi sku ji ltar nyams su blang ba ni nam mkha' gsum sprugs kyi gdams ngag go/ de yang phyi'i nam mkha' bar snang stong pa 'di'o/ / nang gi nam mkha' mig dang snying gnyis 'brel ba'i rtsa sbugs stong seng nge ba 'di'o// gsang ba'i nam mkha' ni tsit+ta rin po che'i 'phyong gur phub pa'i gzhal yas khang ni gnang ngo// de yang rig pa mig la gtad/ mig bar snang la gtad pas/ ye shes lhug par 'char ro// longs sku'i nyams len ni/ srid pa'i me long gi nang du rgyal ba rigs lnga'i gzugs brnyan 'char du bcug la lta'o// sprul sku'i nyams len ni sgra 'od zer gsum nyams su blangs te/ sgra ni rna ba bkag la lta'o// 'od ni sgron ma dang man shel la lta'o// zer ni nyi ma'i snying po la lta'o// de dag gis da lta'i gdams ngag bstan pa'o// 'chi ka'i rig pa 'gron bu lta bu la gsum ste/ phyi 'byung ba bstib pa/ nang gi 'byung ba bstibs pa dang/ gsang ba'i 'byung ba rdzogs pa'o// de yang snyigs ma'i phung po lus las dwangs ma ye shes kyi 'od lnga/ chos nyid nam mkha' la thim mo/ / bar dor sangs rgyas kyi zhing khams rnam par dag pa zhag lngar 'char ro// de nyid ngo shes pas rang snang dag pa'i snang ba la gnyis su med par thim nas sangs rgya'o// bar do gsum ni chos nyid bar do/ / srid par bar do// las kyi bar do'o// chos nyid bar do ni zhag lnga dag pa'i snang ba 'char te/ bsun ma gsum yod do// de yang 'od dang sgra dang zer gsum mo// 'od ni bde bar gshegs pa'i 'od mchog gi 'od gsal lo/ / de yang 'od 'phra la dngas pa/ gsal la 'tsher ba/ rang bzhin gyi bkrag la nyam nga bas/ 'jig rten gyi khams thams cad khengs pa ni/ nam zla sos ka'i thang la smig sgyu 'gyu ba bzhin me re re 'ong ngo/ / de la ma 'jigs shig/ 'od kyi nang thams cad nas chos nyid rang sgra 'brug stong ldir ba tsam/ sgra grags la che ba 'u ru ru 'ong ngo// de la ma sdangs shig/ 'od las zer mtshon cha'i char 'bab pa 'dra ba/ mtshon cha sna tshogs su zing zing bas snang ba thams cad khengs nas 'ong ngo// de la ma skrag cig de dag ni mchog gi 'od gsal te/ ma 'jigs ma sdangs ma skrag cig/ de bas na da ltar nyams su len pa gal che'o/ / srid pa'i bar do ni da lta'i nyam len 'di zhen na sgra 'od zer gsum la 'jigs sdangs skrag pa snyam byed pas/ rang snang la the tsom zos te rang ngo ma shes pas/ 'od de las rigs drug gi snang ba shar te/ lha dang lha ma yin gyi 'od ljang khu/ mi'i 'od ser po/ byol song gi 'od nag po/ yi dwags kyi 'od dmar po/ dmyal ba'i 'od dkar po lngar 'char ro// bar du bla ma yi dam mkha' 'gro gsum gyi snang ba 'char ro/ / de la gong gi 'od gsal gyi snang ba la 'jigs shing/ 'og gi rigs drug gi snang ba la mi 'jigs par thun mong gi 'od ngo ma shes pas/ 'gro ba rigs drug gi snang ba la rig pa 'jug tu 'gro bas/ de bzhin gshegs pa'i 'od ngo shes par bya'o// rang 'od ngo shes pas bar do der bla ma yi dam mkha' 'gro gsum gyis lung ston te/ rigs kyi bu khyod bde bar gshegs pa'i rang gi 'od la ma 'jigs ma sdangs ma skrag cig/ rang gi snang ba yin no zhes lung ston no// bla mas lung ston pa ni/ bla ma'i man ngag dran pa dang bla ma la mos gus che ba la 'ong ngo// yi dam gyi lhas lung ston pa ni phyi nang gsang ba'i dbang rdzogs pa dang yi dam gyi lha gsal zhing rtag tu dran pa la 'ong ngo/ / mkha' 'gros lung ston pa ni gsang sngags kyi dam tshig ma nyams pa la bya'o// lung bstan pas mchog gi 'od gsal de rang gi 'od du shes nas sangs mi rgya mi srid pas/ srid pa'i bar do zhes bya'o// lung ston pa med na thun mong gi lam la shes pa zhugs nas/ skad cig ma dang po la sangs rgyas kyi 'od nub nas 'gro/ skad cig ma gnyis par rdzogs ldan gyi snang ba nub nas 'gro/ skad cig ma gsum pa la de nas rdzogs ldan mun pa nag po'i rgyal khams nyin mo'i snang ba med par char rlung 'thibs pa lta bu'i nang nas shin tu sdug go/ dper na nyi ma nub nas sa sros pa dang 'dra'o// der zhag bdun 'khyam mo// de nas zhag bdun pa la sangs nas/ lhan cig skyes pa'i lha dang 'dre gnyis kyis/ gshin rje chos kyi rgyal po'i drung du khrid nas las dge sdig gang mang 'dren pas ma 'cham nas/ der gshin rjes las kyi me long la ltar bcug pas/ mngon sum du mthong ste stobs gang che ba'i dbang gis mtho ris dang ngan song du 'phen no// de'i phyir las kyi bar do zhes bya ste/ las kyis ma gos pa gal che'o// de ltar gdams pa'i gnad shes pa rnams skad cig ma gsum la sangs rgya nges la/ mi shes pa rnams 'khor bar 'khyams pas/ gdams pa'i gnad shes shing goms par bya ba rab tu gces so/ / sangs rgyas thams cad kyi dgongs pa tshig nyung ba zhes bya ba'i rgyud las/ rdo rje sems dpa'i zhal chems gsum pa'i le'u ste gnyis pa'o//// bcom ldan 'das kyis de skad ces bka' stsal pa dang/ gsang ba'i bdag po la sogs pa'i 'khor thams cad rab tu dga' zhing yi rangs te rol mo'i sprin gyis gtibs shing/ bcom ldan 'das kyis gsungs pa la mngon par bstod do/ / sangs rgyas thams cad kyi dgongs pa tshig nyung ngu zhes bya ba'i rgyud kyi rgyal po ches gsang ba rdzogs so//// dpal o rgyan gyi slob dpon chen po pad+ma 'byung gnas kyis khra mo brag la gter du btsal ba'o/ / bdag 'dra pad+ma las 'brel btsal gyis snang bar byas pa yin no/// mad+ga laM/// de bzhin gshegs pa thams cad kyi 'khor lo nam mkha'i mdzod kyi rgyu/ / yang 'dir 'phrul thob pa bsgrub ste/ shugs pa phrag pa rgyas shug lo 'bras dkar po'i 'dab ma dang btsos la/ de tshos pa dang thang ru byung ste/ btang nas/ de legs par bskus te/ 'das ma tsho bskams pa dang/ shug 'bras kyi snying po skang pa ston pa bskams te/ khre 'bras dang/ rgya sran dang/ a ru ra dang sbyar la/ de'i phye ma pho su re ka ra'i phye ma dang ti la mar sbyar ba'i pho tshoms re/ nyin gcig la lan gsum za'o// 'phur yang thub/ zas kyang bza' mi dgos/ tshe ring bar 'gyur ro// sngags 'di bzlas so// na mo b+ha ga ba ga te/ si ti a yu ga dzA na a yu b+hin du/ a yu ma la tsa ya rba ya rba la/ a yu ra ga sa ma ya hUM/ srin po dza la ya rag shan sha bsgral ba'i snying zhes bzlas so// 'di na mar sems mngon shes bsgrub pa bstan te/ sngon gnod sbyin bsgral ba'i snying yin te/ phyag na rdo rjes bsgral nas/ tsit+ta skyur ba snying zho sha yin no// snying zho sha dang/ sngon klu'i rgyal po bya khyung kha ru nas khyer nas shi ba'i snying yin te/ na ga ge sar dang/ bya rgod kyi snying/ ne tsho'i snying dang/ mchog chen po lnga rnams kyi snying dang sbyar nas bsgrubs te zos na/ srid pa gsum gyi lha srin gyi skyes gnas dang/ dus gsum gyi skye gnas dran par 'gyur ro// sngags 'di bzlas shing bsgrub bo// hUM tsit+ta sid+d+hi bo d+hi swAhA/ dz+nyA na kA ya ba tu badzra si ti hUM/ zhes bzlas so// 'di na mar lce'i mngon par shes pa bsgrub ste/ me long kri khril lce'i ra zhes bya ste/ se ba'i me tog dang/ stang pal has zhes bya ste/ la phug gi me tog gnyis dang/ mchog chen po dang/ ne le'i lce dang/ klad pa go ro tsa na dang sbyar te bsgrubs na/ sngags 'di btab ste zos na/ ro sna tshogs kyi bro ba myong ba dang/ lce bde ba dang/ tshig lha srin gyis go bar 'gyur ro// hUM dzi ha bya gnya' ni ta hUM/ zhes bsnyen pa bzlas so// 'di na mar ma gnya' ba nyi shu gcig dang/ a ru ra nyi shu rtsa gcig dang/ de las btsos te/ a ru ra sul bu rangs pa dang/ btsos pa'i khu ba a ru ra dang sbyar la btung/ sngags la/ byar su sha ta su ya hUM si swa ti/ rigs 'dzin thob/ phos 'thungs na bu khye'u bskyed/ bsnyen pa bzlas so// yang 'dir 'phrul thob pa dreg pa sta bsgrub ste/ zla ba gzas zin pa'i nub mo phur pa'i mngon shes bsgrub par bya ste/ 'o lnga nas phur pa la 'tshal ba'i rdzas bsag sa la bskams la/ dkyil 'khor dbang dang zhi rgyas gang yang rung ba bzhengs la/ phur pa'i cho ga legs par byas la/ zla ba gzas zin pa sor chud chud du/ phur bu lag tu 'dril zhing snying po 'di bzlas so// A+oM i i ma me mi mi/ kI li kI lA ya sa hUM/ badzra kI li kI lA ya si ti hUM/ kI li kI lA ya dz+nya na hUM/ zhes snying po bzlas pa dang/ ki la ya de dros nas tsha 'ur 'ur song ba dang/ phur bu 'od gsal/ phur bu bsgrub pa yin pas/ bdud dang/ srin po dang/ dgra bgegs dang/ log 'dren gang la btab kyang thebs par 'ong bas 'di ltar sgrubs shig/ dgra bo rtsa ba bdun brgyud tshun chad kyi gshed mar 'gyur ro// 'di na mar zor 'phang ba dang/ dgra bo gsad pa'i thabs bstan te/ zor gyi rdzas ldan la tshang bar bsham ste/ zla ba gzas zin pa'i nub mo zor 'phangs pa'i skyogs kyi chu khal/ nas nag dang/ nyungs nag dang/ zor gyi skyogs kha rtsid pa nag pos bkab la/ skyogs kha bcad pa'i steng du yungs nag gi rgyal po blug ba'i snying po ni/ oM aM im ma ma na/ ga la khris sna sha ku la phaT phaT/ ces 'bum bzlas/ zla ba nag zlor chud pa dang snying po dang bsnyen pa byas nas/ zor skyogs sam/ yungs nag gi tshe dang/ nas dang/ mda' gzhu 'gul lam/ mda' 'am sgra byung/ 'phangs nas grub pa'i bdud srin gang la 'phangs pa'i zor dang/ yang bstan du brlag pa'i bu tsha bdun brgyud yan chad kyi gnyen por 'gyur ro// 'di nas mar snga nas bshams la cong gzi dang/ lcong gzi'i chu phul gang dang/ 'o ma bre gang gi nang du/ a ru ra nyi shu rtsa gcig blug pa'i chu dang/ cong zhi dang/ a ru ra gnyis dang/ a ru ra sul bu rangs pa dang/ 'o ma bde skye ru gyur pa dang/ cong gzi gsal/ shul ma blag pas skya song ba dang/ nyi ma'i gung la til mar dang bur mar dang bza' 'o// spyi bu khye'u skye'o// lo brgya thub/ sngags ni/ ir ma ta si ti/ be la li tshar chur na tsan d+ha lo swA hA/ 'jig rten 'das pa'i mdo las/ chos thams cad kyi mdo la bzlas pa'i grub pa'i mngon shes bstan par bya ste/ chos kyi mdo nyi ma'i dmar thag chad nas/ nam sros pa dang bas chos kyis la la 'gying/ sangs rgyas lam bslab dgos te/ rgyud re la gsang ba'i don re 'byung na/ de yang spyir mkhas pas gsungs/ bka' las 'byung ste mi 'gal legs/ bka' 'di ni bcom ldan 'das kyis bka' stsal to// spyi nyid blon pos kyang 'di ltar 'dug pas/ rab tu dkon la legs pas don byos la/ slob ma snying dang 'dra ba la yang ston cing spyir ngan song du ltung bar byed pa ni mi dge ba bcu dang/ nyon mongs pa lnga dang/ mtshams med pa lnga byas nas/ sems rgyud ma sbyangs pas ngan song du 'khrid do// mtho ris su 'khrid pa ni dge ba bcu dang/ tshad med pa bzhi dang/ chos spyod bcus sna drangs nas byang chub kyi sems rdo rje ni bsgoms pas 'don pa dang 'dra bar gar dmigs par phyin no/ / de'i phyir na sems la skye shi med pas sems gtso/ spyir sems ni rlung yin te/ gar phyin par phyin cing 'gro na/ ngal te zhe sdang gi dbang gis dmyal bar 'gro dgos na/ dmyal ba'i sgo bcod/ bcad pa'i sngags la/ sarba na ra gu du ma tha ma gi he ha byi ri ku/ zhes sgo bcad do// dmyal ba'i rgyal bo/ gshin rje chos kyi rgyal po a ba glang mgo can kha T+wAM kha thogs pa phyir bskrad par bya'o/ / 'dod chags kyi dbang gis yi dags su 'gro srid do// srid na/ sarba pre ta ma ge ste ha bya ra 'o ku/ zhes pas yi dwags kha 'bar ma sgrom bu thogs pa phyir bskrad do// gti mug gi dbang gis byol song du 'gro srid na/ sngags 'dis byol song gi sgo bcad do// sarba ti ta ma ki he he ri bi sku/ zhes pas byol song gi rgyal po glang po che sa srungs kyi bu phyir bskrad do// nga rgyal gyi dbang gis mtha' 'khob kyi gnas su skyes srid na/ sngags 'dis sgo bcad do/ sarba sra ni ma ke he ha bya ri bi sku/ zhes pas mi'i sgo bcad do// phrag dog gi dbang gis lha ma yin gyi gnas su skyes srid pas/ der skyes pa sngags 'dis sgo bcad do/ / sarba bi ga tra ya ste ba ma ke he ri ri ba ku/ zhes sgo bcad do// lha ma yin thags bzangs rigs mtshon cha thogs pa slar log go/ gal te drod gsher las skyes bar 'gro srid pas/ sngags 'dis sgo bcad do/ / sarba rtsa ma de he b+h+ya ti ti ku/ zhes sgo bcad do// dbyar gyi rgyal mo chu thog ma phyir bskrad do// gal te dmyal ba nas gyes nas mnar med par 'gro srid na/ sngags la/ tshe ra yam kye ho ha bi ku/ zhes bcad do// srid pa'i rgyal mo mda' thogs pa phyir bskrad do// sgo nga la skyes par 'gro srid pas/ sngags ni/ a nya ma ga he ha ra byi kus sgo bcad do// nam mkha' lding gi rgyal po gser mig ni stod mi la smad spyang kir 'dug pa phyir bskrad do/ / de nas lha'i sgo dbye ba ste/ sngags la/ a dang ma ma e ke ya phaT/ ces lha'i sgo dbye'o// tshangs pas lag nas drangs te/ de yan chad ting nge 'dzin gyi zas skom dang longs spyod lus sems ye shes las 'gyur pa la/ rigs sems dpa' sems ma'o// rgyud 'jig rten 'das pa'i mdo las/ ye shes kyi ma mo'i pho nya ni/ shar gyi phyogs nas 'gugs byed ma// mthing kha mchog rnams gsang ba'i yum/ / kai ri nag mo dbyug to 'phyar// bdud bgegs 'dul ba'i las mdzod cig/ lho yi phyogs nas 'gugs pa ni// gser gyi 'od 'phro mda' gzhu 'gengs// tse'u thabs kyi mda' gzhu 'phel/ / lho yi dgra bgegs dgug tu gsol// nub kyi phyogs nas 'gugs ma ni// chu srin rgyal mtshan 'phyar ba mo// pra mo dmar mo 'jigs pa'i gzugs// byang gi phyogs nas 'gugs byed ma/ nag mo ral pa thod pa 'gengs/ / pe ta nag mo rdo rje 'phyar// byang nas dgra bgeg dgug tu gsol// shar lho phyogs nas 'gugs pa ni// bskal ba'i me 'bar rgyu 'phreng 'dzin// spu ka dmar ser 'jigs pa'i gzugs/ / shar lho mtshams nas dgug tu gsol// lho nub mtshams nas 'gugs byed ma// ljang nag chen mo me 'bar ma// dkar mo rdo rje thod khrag 'thung// lho nub mtshams nas dgug tu gsol/ / nub byang mtshams nas 'gugs byed ma// btsun mo zhe sdang spu gri'i so// sma sha mthing nag 'jigs pa'i gzugs// nub byang mtshams nas dgug tu gsol// byang shar mtshams nas 'gugs pa ni/ / kha T+wAM mtshon gyi char 'bebs ma/ tsan da ser skya char 'bebs ma// tsan d+ha has kya 'jigs pa'i gzugs/ byang shar mtshams nas dgug tu gsol// dza dza ang gu sha dza/ dpal chen thugs kyi pho nya ste/ / shar gyi phyogs nas 'gugs pa ni// badzra mu ste 'jigs pa'i gzugs// 'bar ma rdo rje sku 'bar ma// dkar mo lag na rdo rje 'phyar// shar gyi phyogs nas dgug tu gsol// shar lho mtshams nas 'gugs byed ma/ / mun ste a na 'jigs pa'i gzugs// 'bar ma me khyer glog 'phreng 'dzin// mur ti drag mo 'jigs pa'i gzugs/ ser mo lag me tog bsnams// shar lho mtshams nas dgug tu gsol// lho yi phyogs nas 'gugs pa ni/ / mu ti ya ma 'jigs pa'i gzugs// 'bar ma gshin rje skar ma stong// sdon mo 'od kyi mda' 'phen ma// lho yi phyogs nas dgug tu gsol// lho nub mtshams nas 'gugs pa ni/ / mug ti drag sha 'jigs pa'i gzugs// 'bar ma srin mo ral gri 'dzin// lho nub mtshams nas dgug tu gsol// nub kyi phyogs nas 'gugs pa ni// mi ting nA ga 'jigs pa'i gzugs// 'bar ma klu mo lce 'bebs ma/ / dmar mo lag na thod 'bebs ma// nub kyi phyogs nas dgug tu gsol// nub byang mtshams nas 'gugs pa ni// mun pa yang ni 'jigs pa'i gzugs// 'bar ma rlung bdag ba dan 'phyar/ / byang nub mtshams nas dgug tu gsol// byang gi phyogs nas 'gugs byed ni// mun ti ba ba 'jigs pa'i gzugs// 'bar ma gnod sbyin khyung thogs ma// ljang nag lag na khra thogs ma// byang gi phyog nas dgug tu gsol/ / byang shar mtshams nas 'gugs pa ni// mun ting ru dra 'jigs pa'i gzugs// 'bar ma 'jigs byed ban glang sna// mthing kha lag na mdung thung 'phen// byang shar mtshams nas dgug tu gsol/ / steng gi phyogs nas 'gugs pa ni// mur sti su rgya 'jigs pa'i gzugs// ser mo lag na nyi zla thogs// stang gi phyogs nas dgug tu gsol// 'og gi phyogs nas 'gugs pa ni// mu sti bab 'jigs pa'i gzugs/ / 'bar ma phag gdong sa bdag mo// nag mo lag na bum pa 'dzin// 'og gi phyogs nas dgug tu gsol// 'jig rten 'das pa'i rgyu las/ ye shes kyi ma mo dang 'bar ba'i pho nyas dgra bgegs 'gugs pa'i le'u ste dgu pa'o/ /// 'jig rten 'das pa'i mdo las/ he ru ka la phyag 'tshal lo// de nas bcom ldan 'das zhes bya ba'i don la/ dang po bcom ldan 'das zhes bya ba ni bdud bzhi bcom ste/ sbyor ba ye shes kyis zin pas lha'i bu'i bdud bcom pa dang/ phung po lnga rigs lngar bsgoms pas phung po'i bdud bcom/ ting nge 'dzin thang lhod med par bsgroms pas las dang nyon mongs pa'i bdud bcom/ sgrol ba snying rjes zin pas 'chi bdag gi bdud bcom la/ rnam pa gcig tu 'dul ba tsham rngam gyi rigs bzhi he ru ka dang/ khro bo rnams dang/ lha chen po'i zhabs 'og tu bcug cing/ sgal tshig bcom pas kyang bcom la/ yang rnam pa gcig tu 'jig rten gsum na mthu che la dbang btsan pas kyang/ bdud dang/ srin po dang/ tshangs pa dang/ brgya byin dang/ lha dang/ klu dang/ de rnams bcom pas kyang bcom/ ldan pa ni thabs dang shes rab kyis 'khor ye shes las las grub pa dang/ las grub dang lngan pas kyang ldan no// 'das pa ni 'khor ba dang mya ngan las 'das pas kyang 'das so/ / theg pa dgu'i 'og ma kun la 'das pas kyang 'das pa/ 'jig rten las 'das pa'i he ru ka'i gal po yin pas kyang 'das so// dpal he ru ka zhes pa la/ bdag dang gzhan gnyis ka'i dpal zhes kyang bya na/ 'dis thugs rje chen pos bdud dang srin po 'dul bas kyang kun gyi dpa' yin la/ ma mo dang mkha' 'gro kun gyi dpal yin pas kyang dpal yin no// pad+ma zhes pa ni/ pad+ma 'dam nas skyes kyang 'dam gyis ma gos pa dang/ shes rab kyi rang bzhin sbyor sgrol gyi chos spyod kyang bag chags dang skyon gyis ma gos so// he ru ka zhes pa ni/ 'jig rten dang 'jig rten las 'das pa'i lha srin bdud dang bgegs kun las kyang rab tu 'phags te/ gzhan gyis mi tshugs shing mthu che la dbang btsan pas lta ba dang spyod pa'i don/ a ti yo ga'i don bya btsal dang bral zhing 'das pas/ khro bo kun gyi thog ma yin pas kyang he ru ka'o/ / dpal chen po he ru ka de 'og min gyi gnas lcang lo can gyi pho brang du/ rin po che ye shes las grub pa'i gzhal yas khang tshad dpag tu med pa yum gyi mkha' pad+ma 'dab ma stong dang ldan pa ste/ rdo rje bla re mig mangs ris su bres pa/ 'og rdo rje'i gzhal yas su bkram pa/ de'i 'og kyang 'dod chags khrag gi rgya mtsho/ zhe sdang rus pa'i phung po/ gti mug sha'i ri rab kyi steng na/ rin po che'i khri rkang brgyad pa la/ khri rkang gi bar re re na sprin med pa'i nyi ma bdun bdun brtsegs mar shar ba/ khri rkang de'i bar gser gyi seng ge spyan gsum gsum bdun bzhi nyi shu rtsa brgyad ye shes las grub pa'i tshul du kha phyogs bzhi tshams brgyad du gzigs pa/ de'i bar bar khri rkang gi gseb seng ge gnas pas/ kun tu bzang po la 'khor ba btsal gyis ma rnyed pas/ dbye ba med pa'i sa la mnyam pa nyid kyi klong du gnas pas rgyu 'bras kyi chos dang/ las sdug bsngal dang/ sku dang ye shes kyi chos thams cad la sems kyi dbang bskur bas/ rig pa'i rgyal po rang dbang rdzogs pas/ 'di ltar gnas pa'i rnal 'byor pas dbang bskur yang mi 'gal/ ma bskur kyang dbang thams cad rdzogs pas/ gser sa dbung la kha blangs mi dgos/ blangs kyang mi 'gal ba dang 'dra'o// de'i phyir 'di skad ces gsungs so// yod cing rdzas su snang na yang/ / snang zhing srid pa'i ye shes brgyan// med cing chad par snang na yang// khams gsum thams cad stong pa'i dbyings// yod med gnyis las 'das na yang// don gyi mchog ni bcom pas kyang/ gser gyi mdog gzi 'phags rdo rje'i sing ha ma/ phyogs bzhi mtshams brgyad dpung 'joms/ rtags zhes bya/ pad+ma rtsa la brgyad pa'o// khri rkang de rnams la yang pad+ma he ru klu las grub pa yin pas sbrul nag chen mo'i gdan byas nas bzhugs so/ / phyogs bzhi mtshams brgyad nas/ shar dri za/ lho gshin rje/ nub klu/ byang gnod sbyin/ me lha dang/ srin po dang/ rlung lha dang/ dbang ldan de rnams zhabs 'og tu gdan byas nas bzhugs so/ / de nas 'khor der he ru ka'i sprul pa dang/ yum chen mo kro d+hI shwa ri la sogs pa yum gyi tshogs/ ye shes dang las las grub pa'i mkha' 'gro ma dang/ khro bo dang/ khro mo dang/ pho nya dang/ dbang phyug ma la sogs tshogs nas/ bcom ldan 'das dpal chen po la bskor ba byas nas brkyang phyag 'tshal nas/ phyogs gcig tu bkod 'khod de 'di skad brjod do// e ma ye nas gsang ba'i chos// sangs rgyas bde chen nyid la rdzogs/ / ma rig mun sel he ru ka// dpal mchog khyod la phyag 'tshal lo// zhes bstod de phyag 'tshal lo// de nas 'khor ba/ dpal chen po badzra he ru ka yis bka' bstsal pa/ kye bcom ldan 'das pad+ma he ru ka/ tan tra 'jig rten 'das pa'i rgyud 'di bka' stsal du gsol/ ces zhus pas/ bcom ldan 'das thugs rje che la thabs mkhas pa des thugs yang dag pa'i ye shes byams pa'i ting nge 'dzin la snyoms par zhugs nas/ dang po de bzhin nyid kyi ting nge 'dzin bsgom pa la yang rnam pa gsum ste/ bsgom pa'i dgos ched dang/ thabs dang/ 'bras bu dang gsum mo// sgom pa'i dgos ched ni/ sems can gyi gzung 'dzin gyi dbang gis/ dngos po dang mtshan ma la mngon par zhen pa'i dbang gis 'khor ba yin pas/ de'i gnyen por rnam par mi rtog pa bsgom par bya'o// bsgoms pa'i thabs ni/ 'khor ba dang mya ngan las 'das pa thams cad rang gi sems las gud na med/ / gzung 'dzin dang bral ba ni mya ngan las 'das par snang la/ gzung 'dzin dang ma bral ba ni 'khor ba dang mya ngan du 'dug pa'i gzhi'o/ / shes pa rnam pa gsum gyis snod rnam pa gsum gyi kha phye ste/ rnam par mi rtog pas rgyud sbyangs te/ skad cig ma rang bzhin med par dmigs te/ snga ma ni 'das/ phyi ma ni ma byung/ da ltar ni mi gnas pas/ chos kyi sku las mi zhen par yang rig par byas pas/ rang bzhin med par gzung 'dzin gnyis kas stong ste/ gleng gzhi dang khungs kyis stong ste/ stong pa yang med/ mi stong pa yang med/ dbu mar yang mi dmigs te/ rnam par rtog pa'i gnyen po mi rtog pa'i sems yi ge a dang sbyar nas/ bdag gzugs brnyan yi ge a ci la yang mi dmigs/ mi sems par bsgom pa ni dgos ched do// bsgom pa'i thabs ni/ lus srang phyag rgya byas nas zhes pas/ bdag gi yi ge a de ltar bsgom zhing med pa kho na 'o// bsgoms pa'i 'bras bu ni/ bdag rgyu sems can gyi dus na de ltar bsgoms pas/ 'bras bu 'phags pa'i gnas skabs su sku ni chos sku thob la/ ye shes stong pa nyid kyi ye shes dang chos kyi dbyings kyi ye shes thob/ bsgoms pa'i 'bras bu'o// de yang ting nge 'dzin gyi 'byung ba 'di skad gsungs so// rnam par mi rtog ye shes skye med cing/ / gzung 'dzin rtog pa'i mtha' nyams ma chags dbyings// thams cad spros bral mnyam nyid ji bzhin dbyings// rnam rtog spros bral yul las 'das// oM sarba ta thA ga ta ma hA shU n+ya ta dz+nyA na sa mA d+hi swa b+hA ba At+ma kou0f85haM/ zhes snying po brjod pas/ ta thA ga ta ni de bzhin gshegs pa'o// ma hA ni chen mo/ shU n+ya ta ni stong pa'o// dz+nyA na ni ye shes so// sa mA d+hi ni ting nge 'dzin no// swa b+hA wA a t+ma kou0f85haM ni bdag kho na byin gyis rlobs shig pa'o/ / de bzhin nyid kyi ting nge 'dzin bstan pa'o// de ltar bsgoms pas kun tu snang gi ting nge 'dzin bsgom pa la yang rnam pa gsum ste/ bsgom pa'i dgos ched ni/ rtog pa 'byung ba dang/ chos 'phrul 'byungab bstan pa dang/ sgyu ma'i ting nge 'dzin bkod pa dag go/ don dam par ni bdag gi rnam par shes pa'i yi ge a snang ba las kyang/ chos sku las mi zhen par snang la/ kun rdzob tu 'dus byas kyi snang ba la dgongs te/ gnyen por chos stong pa snang ste/ de go 'byed par snang ba'o// bsgom pa'i thabs ni/ gzugs 'dzin dang bral bar shes la/ bdag gi sems nam mkha'i dkyil na yi ge a gza' skur ma pa wa sangs shar ba lta bu kun tu snang bas na kun tu snang ngo/ / bsgoms pa'i 'bras bu ni/ rgyu sems can gyi dus na de ltar bsgoms pas 'bras bu 'phags pa'i dus na sku ni longs spyod rdzogs pa'i sku thob la/ ye shes las so sor rtog pa'i ye shes dang mnyam pa nyid kyi thob bo// de yang 'byung ba 'di skad do// ma ltar byams pa'i snying rjes kun la khyab// mkha' ltar go 'byed cho 'phrul 'byung bar bstan/ / kun la khyab pa'i ye shes gsal ba las// rin chen gter ltar che ba'i khyad par bstan// hUM s+pha ra na phaT/ saM ha ra hUM/ sarba tsan+Da ni t-i/ d+harma d+hA tu/ sa mA na d+hi swa b+ha ba At+ma kou0f85haM/ zhes kun tu snang gi tir nge 'dzin nam langs pa'i kha dog dang 'dra bar bsgoms te/ de yan chad rang rgyud thabs kyi bsgom pa'o// de ni gnyen po rim par bsgom pa ni/ rgyu'i ting nge 'dzin bsgom pa'i dgos ched ni/ bsod nams dang ye shes kyi tshogs so// bsgom pa'i thabs ni/ bdag gi rnam par shes pa'i gzugs brnyan byang chub kyi sems ni/ 'jig rten pa dang 'jig rten las 'das pa'i dam pa'i chos thams cad la dbang bskur bas/ hUM dmar po gcig tu gyur pa las/ ye shes bskyed pa gcig gsal bar bsgoms te/ phyogs bcur 'phros pas/ 'phags pa'i thugs dam bskul/ 'gro ba'i rgyud sbyangs/ bdud btul/ bgegs bcom/ slar 'dus pa las/ hUM de las phyag mtshan rdo rjer gyur/ rdo rje sku phyag rgya chen po dpal rdo rje sems dpa'/ de yang sprul pa'i badzra he ru kar gyur/ da ci dang la rdo rje sems dpa'i cha lugs su zhugs tsam na/ mtshan bzang po sum cu rtsa gnyis dang/ dpe byad bzang po brgyad cur bzhugs pa las/ badzra he ru kar gyur pa ni/ dur khrod kyi rgya nad gus brgyan par bzhugs pa las/ de las kyang dpa' chen po pad+ma he ru kar gyur te bsgom pa ni/ dbu dgu phyag bco brgyad/ zhabs brgyad par sprul pa las/ rdo rje'i gshog pa bzhis kyang bteg pa/ rta mgo lngas kyang mtshon pa gcig kyang gsal bar bsgom mo// rgyu'i ting nge 'dzin bsgoms pa'i 'bras bu ni sprul pa'i sku thob ste/ yang sprul dang sprul pa'i he ru ka thob la/ 'khor yang sprul pa mang pos bskor ba'o// ye shes las rang rig pa'i ye shes dang bya ba grub pa'i ye shes thob bo/ / de yang dbang po'i rim pa bsgoms pas/ byung ba stab pa ni 'di skad do// yi ge hUM ni sems kyi rang bzhin te// chags pa'i skyon bral pad+ma rA ga'i mdog/ pad+ma 'dam las skyes kyang 'dam mi gos/ / sangs rgyas che ba'i khyad par bstan pa'i phyir// rgya mtsho rlabs ltar zhi khro'i dkyil 'khor 'byung// ha thun sa ma ti s+pha ra na phaT/ saM ha ra na hUM/ zhes slar bsdus pa'o// de ltar ting nge 'dzin rnam pa gsum po bshad cing bka' stsal nas/ 'khor der 'dus pa rnams la phyag btsal mchod pa phul lo//// 'jig rten 'das pa'i mdo las bam po gsum pa'o//// de nas 'jig rten 'das pa zhes bka' stsal pa ni/ 'jig rten dang 'jig rten las 'das pas/ chos drag shul dang/ sprul pa dang/ pho nya dang/ bsgrub pa dang/ cho ga la sogs pa drag shul mang ba 'byung bas 'jig rten las 'das pa'o/ / de yang sgras drangs na lo ga dang ra su dras bya'o// de nas dpal chen po lhun gyis grub par bya ba'i gtso bo yis/ rgyal ba'i dkyil 'khor bzhugs gnas rdzogs par bya'o// bskyed par bya'o// bsgom zhing bskyed pa 'di skad do/ / gzhal yas khyad par yin zhing pho brang ni// rin chen mchog byin dbang gi yul du bstan// kun tu rol pas ca ri yang rol pa'i dbyings// thams cad chos dbyings yum gyi dkyil 'khor du/ / dngos rnams thams cad nam mkha' mnyam pa'i yum chen kun tu bzang// cir yang skye med thabs kyi phyag rgya che// zhes pa dang/ rdo rje gzhal yas khang nam mkha'i cha dang mnyam// rkang pa yid bzhin rin chen mchog las grub/ / sprin med nyi ma bdun brtsegs gsal ba'i rgyan/ 'gyur med 'jigs pas seng ge'i khri la bzhugs// mgo po dpa' bo sangs rgyas chos kyi sku// mi g.yo brtan pas rdo rje lhun po 'dra/ / zhes pas gzhal yas khang ye shes gsal bas grub/ rdo rje rtsig pas gtams te/ rdo rje steng bla re rgya gram mig mangs ris su bris pa/ 'og rdo rje'i gcal du bkram ba/ nyi zla thod sprul gyis brgyan pa/ mdog dmar po/ dbyibs zla gam/ me ri smug nag 'bar ba'i nang na bzhugs par bsam mo// oM d+harma d+hA tu ka ba na da sarba ba at+ma kou0f85haM/ snying po brjod pas/ yang hUM phyogs bcur 'phros/ slar 'dus pa las/ khri rkang rin chen 'bar ba'i skur bstan pa// rigs bzhi khrag 'thung sku la ma bdun snyoms par 'khril// rang na ra ti tri/ zhes brjod pas/ rkang pa bzhi rtsig tu gyur to// khri rkang de bzhi ni he ru ka khrag 'thung chen po bzhi'irang bzhin mngon du gyur ba'o/ / 'jig rten 'od kyi rgyal po nyi ma'i dkyil 'khor na// stong gsum mun nag sel ba'i ma ma ki/ ma sUr+Ya maN+Dal hUM/ zhes brjod pas nyi ma'i dkyil 'khor du gyur te/ sprin med pa nyi ma bdun shar ba ni gsang ba'i yum bdun gyi rtags so/ / yang hUM de 'phros/ slar 'dus pa las 'di skad do// dbang phyug mar 'dus shing sing nga tsam la// mthu rtsal chags pas che ba'i dbang ldan ma/ / oM pang tsam pa la bi ma la si ti hUM/ zhes pas gser gyi seng ge spyan gsum pa nyi shu rtsa brgyad/ khri 'phangs bzhi la ma 'dres pa brgyad du snang ba'i phyogs bzhi na/ mtshams bzhi nas te nyi shu rtsa brgyad khyi tshugs su kha phyogs bzhir bltas/ mjug ma dbus su bstan nas gnasas pa 'di rnams ni dbang phyug ma rnams kyi rtags so// 'jug skor rgyal la ni gtso bo la mnyes pa 'bul ba'i rtags so// sing nga tsam pa la ni gser gyi seng ge yin la/ ba la ma byi mo yin la/ si ti ni dngos grub 'bul ba'o// yang hUM de phyogs bcur 'phros/ slar 'dus pas 'di skad do// 'dam gyi skyon bral pad+ma kha brgyad pa/ / rigs mchog gzi ldan gsang ba yum gyi dbyings// oM pad+ma rak+ta ma hA rak+ta hri/ zhes brjod pas pad+ma le brgan kha brgyad par gyur/ pad+ma ni sangs rgyas rigs mchog brgya'i rang bzhin/ yul gyi mkha' dbyings rnam par dag pa yin la/ rak+ta mtshal chen mo chags pa'i rtags so// yang de 'phros 'dus pa las 'di skad brjod do// rigs gnyis dbyer med gcig tu bsgoms pa las/ grangs med rgyal ba'i sku la 'phros pa yi/ / dbu gsum phyag drug 'bar ba'i thugs ka ru// rdo rje phra mo pad+ma'i thugs kar 'phro// sarba ta thA ga ta badzra/ sarba ta thA ga ta ta tha a hUM/ zhes brjod pas/ bcom ldan 'das dpal rdo rje sems dpa' dbu gsum phyag drug pa/ g.yas dkar/ g.yon dmar/ dbus mthing kha/ phyag drug ye shes drug gi phyag rgya/ rdo rje/ 'khor lo/ rin po che/ pad+ma/ ral gri/ dril bu bsnams/ de'i thugs kar ye shes sems dpa' mtshon gang pa rdo rje phra mo bsgoms pa dang/ de'i sgal tshigs nas brgyud shangs nas brgyud de 'di skad do// khro bo'i rgyal po 'jigs byed hUM sgra can// hUM gis srid gsum ma lus dbang du sdud// hUM gis nyon mongs dug lnga gsum ka 'joms mdzad pa/ / hUM gis thams cad 'joms shing thams cad rdzogs// hUM gis ngan song gnas nas stong par byed// hUM gis bla med byang chub gnas su sgrol// hUM gis dus gsum rgyal thams cad bskyed/ / hUM gis pad+ma ma hA shrIH he ru ka/ mahA tsaN+Da sarba duSh+tan+ta ka ha na da ha pa tsa hUM phaT/ pad+ma kro ti shwa ri de ba ti tams na dza la ni hUM phaT/ ces brjod pas// hUM dang pos 'jig rten gyi khams khengs/ hUM gnyis pas ye shes kyi me spar/ hUM gsum pas bag chags kyis sgrib pa sbyangs/ hUM bzhi pas de dag kun gyi sems hUM du gyur/ hUM lngas de dag kun slar 'dus/ hUM drug pas de dag kun pad+ma he ru kar 'gyur/ sku che la yan lag rags pa dang/ sku mdog dmar thag chad pa dang/ dbu lnga rigs lnga dbu la rta mgo dang 'dra ba/ dbu bzhi rigs bzhi dbu dgu/ phyag bco brgyad 'phra men bcu drug par bsam mo/ / zhabs brgyad khro bo brgyad/ gshog pa bzhi 'phrin las bzhir bsam ste/ de la dbu dgu ye shes lnga'i dbu rgyan gyi mnga' gsol te 'di skad do// phyogs bzhir 'bar ba'i sku bstan pas// dbu dgu 'bar ba'i dbu rgyan ldan/ / spyi mthun lnga lnga sku yi rgyan du che// tsakra oM bruM/ tsakra hUM bruM/ tsakra swa bruM/ tsakra hri bruM/ zhes brjod pas tsakra la 'khor lo// bruM las gzhal yas khang du gyur pa las/ yig 'bru lnga las rgyal ba'i sku las so so'i yum dang ldan par gyur to/ / de nas rta mgos dbang bskur zhing mnga' gsol ba 'di skad do// dbang gi rta gdong 'phrin las mgyogs pa ni// rnam shes myur mgyogs glog gi rgyan du bstan/ / oM shriHbadzra sa twa sa ta ma mu sa ku ka yo ga'i shwa ri/ ha ya g+h+ri ba/ zhes brjod pas dbu lnga'i spyi bor rta mgo ljang khu re byung bar gyur/ dbu gzhan pa rigs bzhi dbu rgyan re re byung ba'o// de nas thod 'phreng gis mnga' gsol ba'o/ / dung chen khong seng sgyu ma'i thod 'phreng ni// dbang po dbyer med shes rab rtogs pa'i rgyan du bstan// rangan ra tri kro d+hi shwa ri dza la sra dz+wa la/ mu ti ka sa la/ ma ku ta ma/ mu ti ra ta ka la/ he he kha T+wAM kha badzra tri shu la ko'u ra/ hUM hUM he ma he ma ru tra ma ma hA sra b+ha ba hUM phags ma hA/ zhes pas thod pa tshar gsum gyi dbu rgyan dang/ mgur chu dang/ dpung rgyan/ phyag gdub/ zhabs gdub brgyan par gyur/ de nas rdo rje gshog pa bskyed pa 'di skad do// yid bzhin rin chen 'byung ba'i gshog pa can// re ba skong byed dpag bsam ljon shing 'dra// 'phrin las rnam bzhi re skong rtogs pa'i rgyan// oM sum+b+ha ni gr-i h+na gr-i h+na pa ya A na ya ho/ b+ha ga bA na bi d+yA rA dza hUM phaT/ ma badzra sa ka a bi ra tsa/ ka ma ku ru shan ti swA hA/ zhes brjod pas/ rdo rje rgyu rin po che las byas pa/ grub pa ye shes las grub pa/ sgro'i khung sbrul nag gi mgo thams cad rdo rje'i thu'i 'phran yan chad bltams pa/ 'jig rten 'gyed pa'i gzhis 'degs pa/ de ni zhi rgyas dbang dang mngon spyod kyi las bzhis sems can kun la ma ltar byams par 'gyur ro// de nas pad+ma he ru ka klu las grub pas sbrul nag 'jigs byed rgyan du che/ / dug lnga ma spangs dbang gi thabs su rtogs// klu chen gdul ba dbang gi thabs su bstan// na kar tsa ha he ru lu lu hUM/ zhes brjod pas sbrul nag gi chun pos dbu rgyan dang/ mgur chu dang/ phyag gdub/ dpung rgyan/ do shal dang/ zhabs gdub byas par bsam mo// de nas zhabs kyi rgyan chas kyi mnga' gsol ba 'di skad do// dpa' bo rab brjid ting nge 'dzin snon pa'i stabs/ / rno sdug zlog byed rgya bye lcags kyi chas// shes rab ting 'dzin bcas pa'i chas// dbang gi bse khrab 'bar ba brjid pa'i chas// dpal brjid mnyen lcug sbrul nag 'khyim ba'i chas/ / dmar zas dbang phyug zangs kyi mche ba can// gzi mdangs chu skyes chu gri sprul cing rol// gcan gzan rgyal po stag 'dul zhabs la gsol// phyogs bzhi mtshams brgyad khro rgyal 'dul ba'i stabs/ / zhes brjod pas/ shi hi ra tsi tri a gar pa ya/ hri pad+mad ban ta ma/ dzim pa na ka ra byi ni he me tri ra na/ ting ling rba ram pa yaMswAhA/ zhes pas zhabs brgyad sems ma brgyad du gyur/ lA s+ya/ mA le/ gI rti/ nirti/ badzra d+hU pe/ puSh+pe/ A lo ke/ gan+d+he hUM/ zhes pas chas brgyad sems dpa' brgyad du gyur pas/ oM badzra sa ma ti sha ra hUM/ zhes brjod pas ting 'dzin brgyad du gyur/ de nas khro bo dag gdan du 'ding ba 'di skad do/ / tshad med che ba'i khyad par bstan pa'i phyir// nga rgyal mthu mnyam bdun dpung rang bshig nas// 'jig rten skyod pa'i gdan ni che ba yi// stobs ldan dbang phyug che ba mnan// kro ti na ta ni hAM/ ka ra bi dza ya/ ni la tan tra/ ya man ta ka/ Ar+ya a tsa la/ ha ya g+h+ri ba/ a pA ra tsit+ta/ a mr-i ta kun Da li/ trai lo kya bi dza ya/ mahA ba la/ a ka ni tsa ya/ ya ma hi ti/ bu run yaM ba bye/ ba tu tra/ swur+ya zan+d+ra a ti b+ha/ sum pa ram pa nan/ zhes brjod pas khro bcu snod sgo bcad pa bzhin mnan par bsam/ khro bo bcu'i gdan du yang phyogs skyong bcu mnan te/ zhabs snying khar bol man chad nub nas/ sgal tshigs 'joms snyings 'byin te/ de'i byin rlabs kyis phyogs skyong bcu sgra 'byin skad ngan 'don te/ khro bo'i zhabs 'og tu bzhag pa bzhin no// de nas lag pa g.yon pa'i mdzub mo bsgrengs la 'di skad do// khro mdzub phyag rgya 'di bcings pas/ / khro bo'i dkyil 'khor thams cad kyis// bdud ni mar la sdig ces bya// bdud dang mu stegs dbang du sdud// phyogs skyong bcu rnams dbang du sdud// ces brjod pas/ in dra dang/ ag ni dang/ ya man dang/ ti ta rag sha dang/ ba ru na dang/ ya ma dang/ ru tra dang/ sUr+ya dang/ tsan dra dang/ a ti b+ha rnams dang/ tshangs pa dang/ brgya byin man chad/ skyes bu zhags pas btab pa bzhin du dbang du 'dus par gyur to/ / de nas mtshon cha lnga'i char dbab pa 'di skad do// dpal chen rdo rje thog thog ser ltar 'bebs// hUM dang phaT sgras srid gsum 'khor ba 'jigs// sprul pa'i khro bo mang pos sprin ltar 'khrigs/ / rdo rje khrag 'thung khrag gi ser ba 'bebs// rdo rje mtshon chas gnam lcags thog pa la// gsang sngags log pa'i chos rnams thams cad 'joms// 'jig rten 'di dang pha rol gnyis kar yang/ / sdig pas sel cing nyon mongs gzhan rmongs med pa'o// bi ta lcags kyus bzung nas ye shes lnga byang chub sems su rtags byin pa dang/ ye shes gnyis su med pa dang// yi ge hri'i byin brlabs/ 'phags pa mchod/ 'gro ba'i don byas/ rigs lnga'i sku bskyed/ hUM gi gzhal yas khang sgo bcad/ phyir ldog pa rdo rje rgya gram gyi sgo bcad do// sems mda' rtse la blangs la 'og min du kun tu bzang po'i gnas su 'phangs la btang ngo/ / yum lnga bdud rtsi'i bum pa nas byang chub sems su dbang bskur/ rigs lngas ni byin gyis brlabs/ sems dpa' dang sems ma'i mchod pa byed/ ma mo mkha' 'gros ni dngos grub kyi stong 'debs/ khro bo dang khro mos ni bar chad kyi bgegs 'jil zhing mtshams gcod/ 'phra men dang po nyas ni mngag gzhug dang las bsgrub/ tshangs pa dang brgya byin la sogs pa dbang phyug tshogs ni las byed do/ / de nas dug gsum gyi mchod pa yang/ 'dod chags khrag gi rgya mtsho la// 'khor bcas ma lus gshegs su gsol// oM pad+ma shriH he ru ka/ ma nA tsan dra swa b+hA ba duSh+ta na/ ta ka pa tsa hUM phaT/ oM tsakra hUM bruM/ tsakra sa bruM/ tsakra hri bruM/ tsakra hra bruM/ zhes brjod pas mtshon cha shangs kyi rlung sgo nas mtshon cha'i phab ste/ lus kyi rtog pa sbyangs/ khams gsum bshig gril te/ sems ye shes su bskyed do/ / de nas 'dud kha gcig 'di skad brjod do// chos nyid stong pa byang chub sems su rol// ye shes lnga ldan byang sems thugs su rol// gsang chen yab yum byang chub sems la rol// sems dpa' ye shes rigs lnga'i sems la rol/ / badzra satwa rA dza/ bud+d+ha sa twa rA dza/ rat+na sa twa ra dza/ pad+ma sa twa rA dza/ karma sa twa rag ta dz+wa la ma hA kha raM kha'i/ zhes rus pa'i phung po 'khor bcas ma lus bzhes su gsol/ ma hA keng ni rA dza la kha raM kha'i/ gti mug sha yi phung po la// 'khor bcas ma lus gshegs su gsol// ma hA rag ta dz+wa la kha raM khA hi/ de nas nam mkha'i mkha' 'gro ma la bstabs te/ rngam pa glog gi dkyil 'khor la/ rdo rje rdzu 'phrul rnam par 'phrul// dpa' bo rdo rje khro bo'i 'jigs bcas pas// rigs sngags don la yang dag sbyar// khrag gi rgya mtsho rba klong khyil li li// rus pa'i phung po khrol lo lo// rdo rje zhing chen dri ngad pungs se pungs/ / ban+d+ha ma mo'i tshogs ni rdza ltar spungs// mthong thos rnga ma pa mkha' 'gro'i tshogs dang rol// kha kha lo ye pA sha ba ga a la la ho/ zhes brjod pas mkha' 'gro zhing la rol par gyur/ lhag ma 'dab kyi ri rab tsam/ dpal pad+ma ha ya g+h+ri bas bsdus/ byang chub sems su bsgyur/ yan lag nying lag bsrungs pas/ hri badzra pad+ma hUM/ ha he phaT b+ho ru lu ru lu hring hring/ ha ya gri ba hu lu hu lu hUM Ta/ e a ra li hri hring/ bsnyen pa'i snying po 'bum bzlas so// cho ga yang zla ba gzas zin pa'i nub mo bya'o// de la gzhal yas khang rnam pa gsum ste/ yangs pa dang/ rgya che ba dang/ dbyings ye shes kyi khyad par can dang gsum mo/ / de la yang yangs pa ni mtha' dbus med par las bya'o// 'dod chen ni ye shes lhun gyis grub/ dbyings dang ye shes kyi khyad par can ni/ gzhug pa dang/ pad+ma gsang ba la yab yum 'bral ba med pa'o/ / de la mdog dmar ba med pa ni yum gyi mkha' rnam par dag pa'i tshul lo// pad+ma 'dab ma brgyad pa ni pad+ma le brgan/ yum 'dod ma'i dbyings te/ pad+ma 'dam gyis ma gos la/ yum gyi mkha' la yang bag chags kyi skyon gyis ma gos pa'i tshul lo/ / dbyibs zla gam ni dbang gi rgyal po'i gzhugs gnas yin pa'o// nam mkha'i tshad pa med pa ni nam mkha' stong pa las 'phags pa'i sprul pa 'byung ba'i rang bzhin stong zhing bdag med pa'o/ / stengs rdo rje'i bla re mig mangs ris su bris pa ni/ dpal rdo rje sems dpa'i byin brlabs rdo rje dbyings kyi pho brang gi rtags te/ de ltar sra zhing mkhregs pa rdo rje'i gur te/ de'i bar rin po che gnya' na zlum po ni/ sems can re 'dod yid bzhin du skong ba'o// rin po che khri rkang bzhi pa brgyan du snang ba ni/ khri rkang bzhi he ru ka'i rang bzhin la/ rta krid chen po bzhi'i rtags so// khri rkang gi rgyu rin po che las byas pa ni/ rin po che sems can 'dod pa dang/ srog gi mi zin pa yang yin la/ ye shes gsal ba'i rtags so// bar de nas sprin med pa'i nyi ma bdun bdun 'char ba ni/ 'jig rten na 'od gsal ba'i nyi ma yin la/ nyi ma ni sangs rgyas kyi sku yang yin la/ 'od gsal ba yin la/ ye shes kyi rang bzhin ma nor bar gsal ba yang nyi ma yin la/ gsang ba'i yum du byin gyis brlabs pas/ dkyil 'khor du bzhugs so// gza' dang skar ma la sogs pa mdun khung byas pa ni/ 'od gsal zhing ye shes kyi rtags so// bar bar na dri za dang/ gshin rje dang/ rlung lha dang/ gnod sbyin dang/ me lha dang/ srin po dang/ rlung bdag dang/ dbang ldan rnams gnas pa ni/ che ba'i rtags 'jig rten dbang mdzad pas/ de'i steng na khro bo gnas pas 'jig rten las 'das pa'i brtan no// bar na gser mdog rtsal 'phar sing ngam/ phyogs bzhi mtshams brgyad bdud dpung 'dul zhing 'joms par mdzad ces pa ni gser gyi seng ge spyan gsum pa lhan cig pa ni dbang phyug ma nyi shu rtsa brgyad kyi rang bzhin la/ spyan gsum ni ye shes bye brag tu yang bstan te/ khyi pho tshugs su kha phyir bltas pa ni/ dang po nas rang rang gis las khas blangs pas las byed pa'i tshul lo// mjug gor nang du bltas pa ni/ gtso bo la mnyes pa 'bul ba'i tshul lo/ / de la rtsal brgyad ni/ chos nyid kyi rtsal ni thams cad gshig pa ni yin/ ye shes kyi rtsal ni ci la yang thogs pa med/ rdo rje'i rtsal ni phyogs med par byams pa/ ting nge 'dzin gyi rtsal ni rtogs shing goms pa'o/ / yon tan gyi rtsal ni ci la yang thogs pa med pa'o// dbang gi rtsal pad+ma he ru kas dbang du sdud pa/ 'phrin las kyi rtsal ni 'phrin las rnam bzhis 'gro ba sems can gyi don ji bzhin mdzad pa'o/ / dngos grub kyi rtsal ni mngon shes lnga rdzogs pa las/ mthu dang/ rdzu 'phrul dang/ ci la yang thogs pa med pa'o// dbang phyug nyi shu rtsa brgyad po des mdzad pa bstan pa'o// gdan de kun la yang phyi snod kyi che yin no/ / gser mdog seng ge'i gnad ni dbang phyug ma yin la// nyi zla 'od kyi gdan ni gsang ba'i yum du bstan// dri ma med pa'i gtan ni gsang ba'i yum mo ru bstan/ dri ma med pa'i stan ni yum gyi mkha' dbyings la/ ta krid brgyad po'i gdan ni 'jig rtenalas 'das pa'o// dbang gi rtsal ni 'jig rten dbang du mdzad pas/ thabs kyis che zhing phyogs skyong ba na/ 'jig rten 'das pa dbang du sdud par mdzad/ thabs kyi che ba ni khro bo bcu gdan du byas pa'o// bla na med pa dbang du mdzad pa thabs kyi che ba ni/ ma hA de ba la sogs pa gdan du byas pa dang/ rigs lnga dbus rdzogs pa dbang gi rtsal lo/ / 'jig rten 'das pa'i mdo las/ dpal pad+ma he ru kas lha chen po gdan du byas pa dang/ pad+ma gnas kyi le'u ste bcu pa'o//// tan tra chen po 'jig rten 'das pa'i mdo las/ da rigs gcig tu bsgrub pa bstan par bya ste/ dang po hUM las phyag mtshan rdo rjer gyur/ de las dpal rdo rje sems dpa' mtshan dang dpe byad dang ldan pa/ rgyan thams cad rdzogs pa gcig tu gyur/ de las dpal chen po pad+ma he ru kar gyur pa'i thugs kar ye shes sems dpa' bsgoms pas/ / yon tan ye shes lhar shar te// sangs rgyas 'phr-in las byed po'o// skye med sems nyid don dam lta// de yi ngang la sku rdzogs pa// sangs rgyas sku lnga'i bdag nyid can// ye shes sku nyid rdo rje che/ / sku gsung thugs kyi bdag nyid che// sku mchog gshin rje gshed nag go/ gsung ni gsod byed rngam pa'o// de bzhin rdo rje 'jigs byed thugs// sku rnams 'dus pa'i ngo bo 'o// sku la dbang mdzad pad+ma'i sku/ / chags med pad+ma ra ga'i mdog/ rgyal ba'i gsung mchog 'bar ba'i sku// mi 'gyur rdo rje khro bo'i sku// lag na rdo rje mthing nag 'bar// bde gshegs thugs kyi ngo bo nyid// yon tan lhun grub rin po che/ / ye shes mkha' lding 'bar ba khyung// rdo rje gshogs pa gdengs pa'o// thogs med las mchog he ru ka/ badzra ku ma ra yi sku// bde gshegs 'phrin las ngo bo nyid// ma bcos mi 'gyur chags pa med/ / kun 'byung bya ba byed pa yi// rigs kyi bdag po kun 'dus pa// sku lnga lhun gyi grub pa'o// sprul pa gyad gnon kun 'dus pa/ khyung gnyis kha nas lce 'bab cing// seng ge kha nas rdo rje 'phros/ stag gi kha nas ral gri 'bar/ / sbrul gdug kha nas me 'bar zhing// 'ug pa'i kha nas lcags kyu 'phro// lce sbyang kha nas phur bu ste// dred ma'i kha nas bdung zhags 'phen// de yi gsang sngags brjod pa ni// yi ge rgyal ba'i gsung yin te/ / ngag du brjod pa skur ru gyur// yi ge rgyal pa'i thugs yin te// 'khor los la nye ba'o// e a kro te ka ya man ta ka/ kri sna ka la ru pa/ hri te ya ma ye/ hri badza kro d+ha ha ya gri ba/ pad+ma ta kri da ra ka tsan+Da/ badzra pa ni tsan+da ma hA ro Sha na/ ka li kri ta/ badzra ki li ki la ya/ bde gshegs khro bo thams cad kyi// yang snying 'dus pa de nyid do// de bzhin gshegs pa thams cad kyi// dgongs pa 'dus pa'i rgyud las/ skabs bcu bzhi pa'o//// de nas chos thams cad ye nas lhun gyis grub par mdzad de brjod pa/ e yaM raM baM laM/ 'byung lnga ye shes lhun grub pa'i// ye shes sku ste nyon mongs 'joms// 'byung ba las kyi dkyil 'khor te/ / ye shes lnga yi rang bzhin can// thams cad skyed pas yum nyid klong// rten du gyur pa sku dang gnas// sna tshogs kun 'byung nyon mongs 'joms// rnam rtog gcod pas 'khor lo ste// gur ram ra ba spyil ba'i tshul/ / cis kyang mi chod mi shigs pa'o// a i u e oM ri li aM/ ka kha ga g+ha nga/ ya ra la wa// sgra dang dbyangs kyi yi ge ste// thabs dang shes rab rang bzhin gyis// yid bzhin rin chen 'phreng ba ltar/ / ma lus 'dod pa'i don bsgrub pa// bde bar gshegs pa'i ngo bo nyid// du ru ye/ seng nga ye// 'bras bu dgu nam mkha'i thog 'dra bas// lus ngag yid kyi dbang po 'joms// tig sna dza la u ne u ne hUM dza dza/ spu gri 'dod pa'i so yin te// mtshon cha med dpung lta bu yi// stobs kyi drag sngags dril ba'o// a mu ka myar rbad/ trig nan myor rbad// u nan shag rbad/ spur nan ril rbad/ gnas bzhi gcod pa'i spu gri ste// rgyal ba kun gyi byin rlabs rnams// bsdus nas 'gal ba tshar gcod pa'o// gcod pa'i spu grir bzhag pa'o// e hUr thums dza// breng shag raM yaM rbad e// kun gyi spu gri mtha' sdud de/ / thogs me med par gcod pa'o// a ya ma du ru tsa sha na/ 'jig rten dregs pa thams cad kyi// srog gi ngo bo sgrol ba'i 'bru// sde brgyad srog gi rnam shes so// ces gsungs so// de bzhin gshegs pa thams cad kyi dgongs pa 'dus pa'i rgyud las/ skabs bco lnga pa'o//// de nas sangs rgyas thams cad kyi 'phrin las ye shes chen po'i rol pa brjod pa/ stobs bcu pha rol gnon pa po// 'khor lo rgyal po re mig bcu/ / brgya phrag bcu gcig kha mig can// bde gshegs khro bo 'dus pa yi// drag po sngags kyi grong khyer yin// gsang sngags rgyal po brgya dang bcu/ srog dang snying po ldan par bya// thebs dang spu gri ldan pas na/ / gang yang rung ste chan la 'bebs/ bka' yi 'khor lo sngags 'khrul na// spu gris rang la gcod par byed// mtha' nas dbus su sdud pa'i tshul// gsang sngags 'phreng ba'i dkyus 'di nyid/ / mthar 'gyed bzlog pa lha gnod do// gtub cing dral ba dkrug pa ste// ma nor bzlas pas gang yang 'grub// bka' gsang 'khor lo'i las yin pas// bsrung dang bzlog dang gshigs pa dang/ / gsad dang stobs mnan rang gshed dbab// dbye dang dral ba la sogs byed// gsang sngags bka' yi 'khor lo 'di// bde gshegs rgyal bas mi theg na// bdud dang mu stegs la sogs pa'i/ / 'jig rten gzhan dag smos ci dgos// des na 'jig rten dregs pa can// thams cad 'khor lo'i dbang du bskor// ces gsungs so// de bzhin gshegs pa thams cad kyi dgongs pa 'dus pa'i rgyu las/ skabs bcu drug pa'o//// de nas sangs rgyas thams cad kyi dgongs pa rdzogs par brjod pa/ thams cad ye nas sangs rgyas pas/ rgyu rkyen rtsol pas ma yin te// nam mkha' bzhin du gnas pa la/ / de las mi 'gyur sangs rgyas yin// ye nas yin pa'i don 'di na// bstan pas ye nas yin par shes// de dag rtogs pas drod 'byung ba// don dang rtags kyi 'bras bu 'brang// gang zag 'khrul pa mtha' dag ni/ / yin nges don la mi phyogs par// g.yeng ba 'du 'dzi'i chos la mos// byis pa bla na med las 'dral// byas kyang zin pa'i dus med pas// de bas rnal 'byor rdzogs pa che// kun bzang rgyal ba'i bka' 'di ni/ / mos pa'i dad pa'i 'di tshol na// yid la bsams pa thams cad kun// kun tu bzang po nyid du 'gyur// thog ma nyid nas nges pa'i don// ye shes nyi ma rang la 'char// rang rig ye shes nang nas 'byung/ / ji ltar byas kyang bde ba che// ma btsal ma bsgrubs ma bsgoms kyang// nges pa'i don nyid ma grub med// ye nas mkha' ltar mnyam par gnas// brtson zhing bsgrubs kyang skyon med de/ / nges par 'di ltar yid ches na/ ma btsal na yang 'grub par 'gyur// bdag nyid sangs rgyas yin shes na// rgyud lung 'di la su gnas pa// 'grub 'gyur 'di la the tshom med// chos nyid don bstan sems mi 'gyur/ / yin par yid ches skyo dub med// nges par shes pas btsal mi dgos// nan tan btar bas gdod nas dag/ byang chub sems la lhan ne ba// bsgom du med de 'gyur ba med// btsal du med de spang du med/ / de la bgrod du ka nas med/ sangs rgyas bstan pa'i bka' rnams kun// don du ma gyur gcig kyang med// de bas ma nor nges pa'i bka'// sangs rgyas 'dus pa'i rgyud 'di ni// 'di ni gzhan la bstan pa bas/ / snod med rnams la bshad pa na// ltung ba'i nyes pa brjod mi lang// de bas bde gshegs dgongs pa'i don// sems kyi gting du rang rgyas gdab// ces bcom ldan 'das chos thams cad kyi rang bzhin brjod pa med pa nyid du brjod de/ / skye 'gag gnyis su med par gyur tau// de bzhin gshegs pa thams cad kyi dgongs pa 'dus pa'i rgyud las/ skabs bcu bdun pa'o/ /// bde gshegs rgyal ba'i dgongs don khro bo 'dus pa'i yang snying rdzogs so//// bcom ldan 'das dpal kun tu bzang po he ru ka la phyag 'tshal lo// de nas bcom ldan 'das dpal kun tu bzang po/ thams cad 'dus pa kun tu bzang po'i sangs rgyas su ma gyur pa med pa yi/ thams cad du khyab brdal ba'i 'khor tshogs thams cad la 'di lta ste/ chos thams cad ye nas sangs rgyas pa med pa'i sangs rgyas dang/ chos thams cad gnyis su med cing tha mi dad pas/ thams cad du so so ma yin pa tha mi dad pa'i sangs rgyas la sogs pa thams cad kun tu bzang po'i sangs rgyas su gyur pas/ nyid la nyid gsung du med pa'i bka' 'dus par gsungs pa ni 'di lta ste/ chos thams cad brjod du med cing brjod pa las 'das pa/ 'das pa'i sangs rgyas thams cad ni chos nyid ma skyes pa'i rang bzhin du 'dus so/ / chos thams cad bsam du med cing bsam pa las 'das pas/ da ltar gyi sangs rgyas thams cad ni byang chub kyi sems bde ba chen por 'dus so// chos thams cad ni ji lta bur 'gyur ba med cing 'pho 'gyur las 'das pas/ ma byon pa'i sangs rgyas thams cad ni yid rang byung gi ye shes btsal ba med par 'dus so// des na dus gsum gyi sangs rgyas thams cad kyang spros pa med pa'i thig le mi 'gyur ba'i g.yung drung du 'dus so/ / de nas bcom ldan 'das dpal kun tu bzang po he ru kas nyid la/ ched du brjod pa/ de la sangs rgyas zhes bya ba'i rang bzhin ni/ ji ltar mtshan ma'i dngos po thams cad la/ / ye nas 'di 'dra zhes bya ba grub cing rtag pa med pa las chos thams cad chos nyid du sangs rgyas pas/ de stong zhing chad pa'i mtha' ma yin la/ go zhing rtogs pa'i shes rab nang nas rtogs pas/ thams cad chos nyid bde ba chen po'i klong du sangs rgyas pa'i rang bzhin yin pas/ skye 'gro ming dang gzugs kyi bsdus pa thams cad ye nas phyogs dang/ ris dang/ gzugs dang/ kha dog tu grub cing brtag pa gang yang med pas/ thams cad ye shes chen po'i rang bzhin du sangs rgyas shing/ tshig dang yi ge las 'das pa'i rigs pa rang dbang du gyur pas/ chos thams cad chos kyi sku 'pho 'gyur med pa'i rang bzhin yin pa dang/ de ltar phyi nang snod bcud du grags shing/ bstan pa thams cad ye nas gnyis su med pa'i byang chub sems yin la/ sems dang sems kyi rnam pa yang ye nas kun tu bzang po'i rang bzhin du sangs rgyas pa de la/ ye sus kyang ma byas/ ye sus kyang ma bcos/ don gyi nges pa phyin ci log tu cis kyang mi 'gyur ba'i nam mkha'i rnam pa bzhin du ye nas gnas pa de/ sangs rgyas zhes bya'i rang bzhin yin par gsungs so/ / de las sangs rgyas kyi mtshan nyid ni// dper na nam mkha' la blun pos bgo bsha' byed pa dang 'dra ste/ gnas skabs la lar sems kyi mtshan nyid so sor 'dzin na/ sangs rgyas kyi mtshan yang so sor snang ngo/ / gnas skabs la lar sems kyi mtshan nyid tha dad med na/ sangs rgyas kyi mtshan la yang tha dad med par bstan no// de'i phyir na sangs rgyas kyi mtshan nyid ji lta bur 'dul ba'i don las mtshan du btags so/ / sangs rgyas kyi sku yi cha lugs dang/ yab dang yum dang/ btsun mo dang/ sras dang/ zhing khams dang/ pho brang dang/ 'khor dang/ gnas dang/ ris su bstan pa ni/ sangs rgyas la sku yi cha lugs dang yul la sogs pa ris su phye ba med kyang/ sems can la sde tshan dang/ yul dang/ gnas su 'dzin pa dang/ de 'dul ba'i thabs su bsten pa la sems kyi rnam pa phye ba med na/ sangs rgyas la yang ris su phye ba med do/ / sangs rgyas kyi sku tshe'i tshad mi mnga' bar bstan pa yang/ sangs rgyas dang sems can la tshe yi tshad dam// skye 'chi dang// 'pho 'gyur med do// log par 'dzin pa'i sems 'pho 'gyur dang/ le lo dang/ yeng bar 'dzin pa la bstan pa'i phyir ro// sangs rgyas kyi sku gsung thugs phyag rgya chen po dkyil 'khor dang/ grangs dang rnam pa 'byung ba mang po sems kyi rang bzhin las byung ba dang/ 'byung ba las gyur pa'i phung po dang/ khams dang/ skye mched dang/ rdul snyed 'dzin pa'i bag chags mtshan ma dang bcas pa de/ mi gnas pa'i mya ngan las 'das par yod ces pa la/ sangs rgyas kyi sku gsung thugs phyag rgya chen po'i dkyil 'khor du snang ba las gzhan ma yin no// de'i phyir na sems la mu med pa'i phyir/ sangs rgyas kyi mtshan ma yang mu med par bstan/ yul gyi rnam pa rdul dang rdul phran 'dzin pa la/ sangs rgyas kyang rdul gcig gi steng na rdul snyed la sogs par bstan no// tshig dang yi ge 'dzin cing brir yod na/ sangs rgyas kyi mtshan yang tshig dang yi ger brir yod par bstan/ tshig dang yi ger brir med na/ sangs rgyas kyi gsung yang tshig dang yi ger gdags su med par bstan no// de lta bu rdul snyed cig gi steng du rdul snyed kyi sangs rgyas thams cad kyang sprul pa'i sku 'bum dang/ khri dang/ stong du 'dus/ de yang dus gsum gyi sangs rgyas rim par 'dus/ de yang rigs lngar 'dus/ de'ang sku gsung thugs kyi sangs rgyas su 'dus/ nam mkha'i gang nas gar khyab pa thams cad du lus sems gnyis su 'dus so/ / de stong gsum du 'dus de khams gsum du 'dus/ de yang dus gsum du 'dus so// de yang lus ngag yid gsum du 'dus so// de yang rtsa ba byang chub sems su 'dus ste/ byang chub kyi sems su mu mtha' dang bral ba'o/ / de la sangs rgyas kyi mdzad pa'i don ni/ rang gi sems kyi mtshan nyid la rgyu dang 'bras bu 'dzin pa'i phyir/ gnas skabs la lar sangs rgyas kyi mdzad pa sems can thams cad dang 'thun par spyod pa yang yod/ gnas skabs la lar sangs rgyas kyi mdzad pa sngags dang/ phyag rgya dang ting 'dzin du mdzad pa yang yod/ de dag na sems kyi mtshan nyid so sor 'dzin pa'i don yin la/ yang dag par kun tu bzang por byang chub sems kyi mdzad pa ni/ sangs rgyas thams cad sku ci mdzad pa ni/ chos kyi sku dus gsum du 'pho 'gyur med par mdzad/ gsung ci mdzad pa ma bcos pa nyid du mdzad/ thugs ci mdzad pa ma bslad pa'i ye shes su mdzad/ de yang thams cad byang chub sems kyi rang bzhin du sangs rgyas par mdzad pa sangs rgyas kyi mdzad pas/ sangs rgyas kyi mdzad pa de yin te/ sems can ye nas sangs rgyas par mdzad/ 'khor ba ye nas mya ngan las 'das par mdzad/ sdug bsngal byang chub kyi sems bla na med par mdzad/ nyon mongs pa thams cad yang dag pa'i lam du mdzad pa de yang 'phral du rgyu dang rkyen gyis bcos pa ma yin te/ nyi ma'i snying po la mun pa ngang gis mi gnas pa dang 'dra bar/ kun tu bzang po ye nas sangs rgyas pa'i rang bzhin la/ 'khor ba btsal bas kyang mi rnyed do/ / rtsi ma ki ta'i sman gyis thams cad bdud rtsi'i rang bzhin can la dug btsal yang mi rnyed do// sangs rgyas kyi mdzad pa thams cad sems kyi rang bzhin du mkhyen pa'i klong la/ sems kyi byin rlabs las ma gtogs pa/ ngan song sdug bsngal btsal yang mi rnyed pas/ sangs rgyas kyi mdzad pa lhun gyis grub pa'o// de la ye nas grub zin pa ni/ lhun gyis grub pa'i chos bshad du med pa la/ ye nas grub zin pas btsal du med de/ de la yang sems kyi chos thams cad phyi yang ma yin/ nang yang ma yin/ phyi nang gnyis ka yang ma yin/ rgyu yang ma yin/ yod med gnyis ka ma yin pa de dag la sogs pa thams cad ni/ yin pa thams cad yin no/ / chos thams cad kyang yin no// chos thams cad dngos po dang mtshan ma'i rdzas su dngos po gang yang ma grub cing/ dmigs pa'i yul las 'das pas gang yang ma yin pa dang/ gang yang ma yin pa de yang stong pa nyid gting chad pa ci yang med pa ma yin te/ yon tan gyi btsal gyi dgongs pa'i don rang bzhin du 'byung la/ ting nge 'dzin gyi byin rlabs kyis ji ltar dmigs pa bzhin du snang ba de ni/ gang yang ma yin pa yang ma yin la/ gnyis ka yin pa yang ma yin no// des ni ris su 'dzin pa dogs pa'i phyir gnyis ma yin zhes bya ste/ de la gnyis ka ma yin zhes bya ba ni/ chos nyid la ris dang/ byang chub la phyogs su 'dzin par dogs pa'i phyir gnyis zhes bya ste/ rgyu dang 'bras bu med de/ gdod ma nas bde ba chen po'i rang bzhin las 'gyur ba med do// gnyis ka yang ma yin zhes bya ste/ rtag pa dang/ dngos po dang/ yod par 'dzin pa'i chos thams cad ni grub cing rtag pa med de/ 'pho zhing 'gyur ba'o// chos thams cad ye nas rang bzhin med par byang chub kyang sems bde ba chen por grub la/ dus gsum du 'gyur ba med par shes pa ni/ chos sku 'gyur ba med pa de ni gnyis ka yang ma yin pa zhes bya'o// gnyis ka ma yin pa sangs rgyas pa'i don bsdus pas/ ye shes grub zin pa zhes bya'o// de la btsal mi dgos pa'i 'bras bu ni/ dper na 'jig rten na klu'i rgyal po'i nor bu la 'dod pa'i 'bras bu btsal mi dgos par 'gyur ba'ang yod/ de ni bsod nams bsags pa las 'byung pa yin pas/ de rtag cing 'gyur ba med la/ 'di ni de lta ba'i dgongs pa can ma yin te/ 'di btsal mi dgos pa ni/ dper na gangs ri'i klong na nag po btsal yang mi rnyed la/ dkar po btsal yang mi dgos pa bzhin du/ rang bzhin med pa'i chos nyid la chos rnams ji lta bu yang btsal du med la/ kun tu bzang po'i sems kyi rang bzhin la/ gzhan dang gzhan du 'bras bu btsal mi dgos te/ btsal yang tshi chad pa'i nad du 'gyur/ sems nyid ye nas sangs rgyas pa med na/ btsal yang grub par mi 'gyur te mching bu ji ltar byi dor byas gyur kyang nor bu rin po cher mi 'gyur la/ sol ba la byi dor byas kyang dkar por mi 'gyur ba bzhin/ ye nas sems nyid sangs rgyas pa ni/ dper na gser dang 'dra ste btsal mi dgos/ btsal yang 'gal ba med de/ sems dang/ chos dang/ nam mkha' ji lta bu'i rang bzhin du ma grub cing/ 'di 'dra zhes pa phyogs su btsal yang mi rnyed pa/ sems kyi chos nyid btsal mi dgos par byang chub kyi sems kyi 'bras bu rang byung gi ye shes shar ba yin no// chos thams cad rang bzhin gnyis su med par gnas pa'i don shes pas/ btsal mi dgos pa'i 'bras bu yin/ de yang rang gi byang chub kyi sems su nga dang/ bdag dang/ phyogs dang ris mes par yongs la khyab/ bzang ngan dang spong len med par lhun gyis grub/ de'i don la mi 'pho/ mi 'gyur/ mi dmigs par bde brdal bas/ btsal mi dgos pa'i 'bras bu yin/ kun tu bzang po'i bka' bden nges pa 'di rtog pa the tshom med par yid ches pa chos nyid kyi klong yin/ de yi don la ma yengs pa bsgom pa'i don yin/ de la btsal mi dgos par 'bras bu rang la 'char ro// sems nyid chos nyid ye nas sangs rgyas pas/ bde ba chen po'i 'bras bu btsal mi dgos par/ byang chub sems kyi 'bras bu rang la 'char ro/ / dper na dus dang nam zla la ring thung med pas/ mi bde zhing sdug bsngal ba la ring bar snang la/ bde zhing skyid pa la thung bar snang ngo// de bzhin du thams cad chos nyid du shes na 'gyur ba med do/ / phyi ci log tu shes na sdug bsngal la grangs dang tshad med do// sdug bsngal 'ba' zhig la bltas pas smin pa ni/ nyin mtshan gyi yun la yang bskal pa tsam du nyams su myong ngo// sangs rgyas kyis bskal pa dang mtshan la yang dbyer med par mkhyen tau/ / de yang rang gi byang chub kyi sems yin/ bskal pa dang yud tsam pas/ dus gsum thog ma dang tha ma yang med pas/ ye nas kun tu bzang po'i bde ba chen po'i don la 'gyur ba med pa'o/ / de bzhin du dngos po stong pa la rang bzhin snang ba'i chos thams cad byang chub kyi sems yin par shes/ btsal mi dgos pa'i 'bras bu yin no// de la sangs rgyas kyi sku yi rnam pa 'dus pa ni/ sangs rgyas kyi sku zhes bya ba gzhan ma yin te/ mtha' dang/ dbus dang/ phyogs dang/ ris su phye ba'i chos thams cad/ gzugs dang rdzas su 'dzin na sku yod de/ ji ltar snang ba'i chos thams cad gzugs dang rdzas su grub pa med na/ sangs rgyas kyi sku yang gzugs dang rdzas su grub pa med do// de ci'i phyir zhe na/ dper na lus yod na grib ma snang ba bzhin/ rdzas su yod par 'dzin na de 'dul ba'i don du sangs rgyas kyi sku yang snang ste/ ji ltar snang ba thams cad la mtha' thug pa med cing 'byam klas te/ 'gyur ba med pas sangs rgyas kyi sku'o// de lta bu la yang yul gyi rnam pa kun la sogs pa gang 'jig rten gyi khams thams cad du rdul gyi bye brag gi grangs las 'das pa yod par 'dzin pa'i don du/ sangs rgyas kyi zhing khams bgrang ba las 'das pa bstan pa/ sku la tshe tshad kyang med par rang byung ba'i sangs rgyas rdzogs pa las 'das pa'i zhing brjod du med pa ni/ sangs rgyas kyi longs spyod rdzogs pa'i sku'o// de lta bu'i zhing khams 'gro ba tha dad par/ las dang sdug bsngal mi 'dra ba mang po phyogs bzhi mtshams brgyad steng 'og yan man phan tshun gnas pa la ni ji ltar 'dus pa ltar snang zhing don mdzad pa ltar snang ba ni/ sangs rgyas kyi sprul pa'i sku'o// nam mkha' la mtha' thug med pa 'byung ba bzhi dang/ skye 'gro thams cad kyi gzhi'i/ de bzhin du thams cad du khyab brdal ba chos kyi sku ste/ sku gnyis 'byung ba'i rtsa ba'o// rgyu 'bras kyi chos 'khor ba dang mya ngan las 'das par 'dzin pa byang chub sems dpa' dang lha'i dkyil 'khaur du longs spyod rdzogs pa'i sku'o/ / de snod du gyur pa ni yul sems dngos por 'dzin pa 'gro ba rigs drug go/ de ji ltar 'dul ba'i don mdzad pa sprul pa'i sku'o// de las mtshan ma tha dad pa ni/ sangs rgyas kyi sku bsam gyis mi khyab pa yang/ sangs rgyas sku gsum du 'dus so// sku gsum yang chos kyi skur 'dus so// chos kyi sku yang ye nas skye shi dang 'pho 'gyur med pa'i byang chub kyi sems su 'dus so/ / byang chub kyi sems kyang yid rang byung gi ye shes btsal du med par 'dus so// de'i don yang rgyud 'dir 'dus so// de yang bya btsal med pa'i skur blta'o// de la sangs rgyas kyi gsung gi rnam pa 'dus pa ni/ sangs rgyas kyi gsung ji ltar snang ba'i chos thams cad tshig dang yi ger ma 'dus pa med pas/ sangs rgyas kyi gsung gcig la gsung yan lag bsam gyis mi khyab pa yang tshig dang yi ger 'dus la/ yi ge yang yig 'bru bzhi bcu rtsa gnyis su 'dus pa dang/ de yang dbyangs yig bcu drug tu 'dus/ de yang yi ge dpa' bo 'bru lngar 'dus de yang yi ge 'bru gsum du 'dus/ de yang yi ge hUM du 'dus/ hUM yang rang gi byang chub kyi sems su 'dus so/ / sangs rgyas kyi gsung yang yi ge med par 'dus so// de'i don yang brjod du med pa'i gsung du 'dus so// de'i don yang gsung mi mnga' bar la bzlo'o// de yang sangs rgyas thams cad kyi thugs 'dus pa ni/ sangs rgyas kyi thugs ni sems can gyi yid yin pas/ sems can gyi yid ni ye nas rig pa'i rgyal po yin pas/ dag pa'i zhing la sangs rgyas dang sems can du 'dod pa nor te/ dper na sman thams cad 'dus pa'i ro dang/ sman tsan dan rda ri'i ro dang mthun pa la khyad med do// de bzhin du sangs rgyas kyi thugs sems can gyi sems kyi chos nyid la khyad med do/ / de ci'i phyir zhe na/ de ni ye nas gnyis su med pa/ rang gi byang chub kyi sems su lhun gyis grub zin pa'o// de bzhin du sangs rgyas thams cad kyang sku gsung thugs su 'dus/ de yang lus ngag yid gsum nyid ye nas btsal mi dgos par lhun gyis grub pa yin/ de yang thams cad du rang gi byang chub kyi sems las gzhan ma yin/ gzhan dngos po dang rtog pa ci snang yang/ de nyid rtogs pa'i ye shes su rol pa ni/ dper na klu yi rgyal po dug can sa yi 'og rgya mtsho nas du ma yod pa'i dus na/ dug gi kha rlangs yod pa'i sa stengs su dug sna tshogs skye'o// de rnams rma byas mthong nas zas dang/ sman dang/ rtsir shes nas zos pas/ kha dog gsal nas med do// dri mas kyang dug sel lo// de bzhin du gzung 'dzin rtog tu spyod pa'i sdug bsngal dang/ dngos po chos thams cad rang gi byang chub kyi sems su rtogs pas/ de nyid bde ba chen po'i byang chub las gzhan ma yin par rtogs pas/ slar byang chub kyi bskul ma ye shes chen po'i mdzad spyod du rol pas/ dngos po'i chos su btsal yang mi rnyed/ sdug bsngal ming yang med par shes pas/ sangs rgyas kyi thugs la dag pa yin/ thugs yang dag pa ni thams cad du ji ltar 'dod par sangs rgyas par spyod pa ni/ dper na rgya mtsho'i nang na klu yi rgyal po'i nor bu rin po che dang// nor bu mang po byin rlabs so/ / so na yod pa de'i thad ka'i steng na/ gser gyi bye ma dang/ rin po che'i rdo rje dang/ rgyan rin po che sil skye'o// de bzhin du rang gi rig pa byang chub kyi sems ye nas grub zin pa'i don 'don/ las ma yengs na/ de ltar ma rtogs pa'i yan man dang khor yug tu yang byang chub sems rtog pa'i don 'char ro// de ci'i phyir zhe na/ nyi ma dang mun pa bzhin no// de lta bas na rang gi byang chub kyi sems la mtha' dang/ dbus dang/ phyogs dang/ ris med cing/ cir yang mi rtog cis kyang mi 'gyur ba ni/ dper na nam mkha' dang 'dra'o// byang chub kyi sems ye nas sangs rgyas pa la btsal dgos pa na dper na gser dang 'dra'o/ / byang chub kyi sems don ma nor bar 'di ltar shes na ci 'dod par dbang bsgyur ba ni/ dper na yid bzhin gyi nor bu rin po che dang 'dra'o// de ci'i phyir zhe na/ sangs rgyas thams cad kyi thugs 'dus pa ni/ byang chub kyi sems bde ba chen po// skye 'chi 'pho 'gyur med pa'i klong du ye nas yid ches pa/ thams cad mkhyen pa'i thugs don de la yid ches pas/ rnam par mi rtog pa'i thugs de la skye shi dang 'pho 'gyur med par shes pas/ thugs byang chub kyi sems zhes bya'o// de la sangs rgyas thams cad kyi lta ba 'dir 'dus pa ni/ sangs rgyas thams cad kyis ji ltar yin pa'i don thog tu phab ste/ nges par yin par thag bcad pa la lta ba zhes bya'o/ / sems kyi rang bzhin cir yang mi snang zhing// cir yang mi 'gyur bar bcas pa la lta ba zhes bya'o// sems kyi rang bzhin la bzang ngan dang/ che chung dang/ rgyu 'bras dang/ gtsang sme med cing/ mtha' dbus dang phyogs ris med par bcad pa lta ba zhes bya'o// sems kyi rang bzhin la ye thog ma dang tha ma med cing/ kun nas zlum pa'i thig le chen po'i klong du bcad pa lta ba zhes bya'o/ / dper na nam mkha' mtshan mar 'dzin pa bzhin/ sems gzung 'dzin du rtogs pa cis kyang mi 'gyur ba'o// nam mkha' cis kyang mi zin pa bzhin/ sems la skyon gyi sdug bsngal cis kyang mi zin pa dang/ mi 'gyur ba dang/ mi 'pho ba dang/ rang bzhin dang/ phyogs ris med par bcad pa la lta ba'o// sems dang/ chos dang/ nam mkha' chos thams cad gnyis su med par lta ba'i don du 'dus so/ / sems dang nam mkha' dang yang gnyis su med pa'i bde ba chen po lta ba'o// de ni nam mkha' ltar yangs pas mi 'gyur ba'o// de nas sangs rgyas thams cad kyi dam tshig dang spyod pa 'dus pa ni/ dam pa sangs rgyas yin pa la/ de yi zhal nas gsungs pa'i tshig yin pas sangs rgyas kyi zhal nas gsungs pa'i tshig las 'du byed dang nyon mongs pa rtsa brgyad du 'gyur ba'i phyir/ dam tshig 'bum ste las stong rtsa brgyad du 'dus so/ / de nyon mongs pa'i nang mthun pa brgyad khri bzhi stong yod pa'i phyir/ dam tshig gi rtsa ba brgyad khri bzhi stong du 'dus so// de bsdus pas lta ba la mu med pa'i phyir dam tshig la mu med do// 'du byed dang nyon mongs pa med pa'i phyir shes na/ dam tshig kyang bsrung du med/ rang gi sems nyid du ma rtogs na gol ba'i nyen che bas/ 'og tu dam tshig 'dus so// zhes gsus so// ma rtogs pa gol pa'i g.yeng ba 'bum yod pas/ dam tshig la mu med pa sa ya 'bum sder 'dus so// 'du byed dang nyon mongs pa'i rtsa stong rtsa bdud du 'gyur ba'i phyir/ dam tshig 'bum sde lam stong rtsa brgyad du 'dus so// de nyon mongs pa'i nang mthun pa brgyad khri bzhi stong yod pa'i phyir na/ dam tshig rtsa ba brgyad khri bzhi stong du 'dus so// de bsdus pa'i lta log gsum brgya drug cu yod pa'i phyir/ dam tshig sum brgya drug cur 'dus so// de rtsa ba brgya rtsa brgyad du 'dus so/ / de yang dug gsum/ dug lnga dang/ rtog pa lnga dang/ phung po lnga dang/ rtsol ba lngar 'dus pas nyi shu rtsa lngar 'dus so// de yang bco lnga las skyed du med pa'i phyir/ dam tshig bco lngar 'dus so// de thams cad kyi rtsa ba lus ngag yid gsum du 'dus pas rtsa ba'i dam tshig gsum du 'dus so// de yang yid du 'dus pas gsang ba'i dam tshig 'da' ba med par gsungs so/ / de la 'da' ba med pa yin no// thams cad du rang gi sems las gzhan du phyogs ris dang 'dus so// de las 'da' ba med pa zhes bya ba ni/ thams cad chos nyid las chos can du 'da' ba med pa yin no/ / thams cad du rang gi sems las gzhan du phyogs ris dang 'da' ba med pa yin/ ye nas kun tu bzang po bde ba chen po las/ sangs rgyas dang sems can du 'da' dbang med pa yin no// de yi dam tshig las 'das na sangs rgyas ma yin no/ / dus thams cad du chos nyid byang chub sems las ma 'das na/ dngos po'i chos nang gi ngan 'dzoms shing rdul du rlog pas/ de las 'das na grub pa thob pa'i lha yang brlag par 'gyur/ zhes gsungs so// de bsdus pas bsrung du med pa'i dam tshig ces bya ste/ de la bsrung du med pa zhes bya ba ni/ kun tu bzang po byang chub sems las ma rtogs pa/ 'khor ba dang mya ngan las 'das pa lta ci smos kyi/ 'dzin rtog ni rdul tsam yang med par 'gyur bas/ thams cad mnyam pa chen po'i klong ngo// de la 'phrin las bya btsal med par 'dus pa ni/ bya btsal med ces bya ba ni/ ye nas grub pa la bya zhing btsal mi dgos pa ste/ dpe gser dang 'dra ste/ rig pa byang chub kyi sems kyi chos nyid/ ye nas kun tu bzang po bde ba chen po men na/ de btsal bas mi 'grub ste/ des na bde ba chen po kun tu bzang po yin no/ / btsal yang sangs rgyas la/ ma btsal yang sangs rgyas pas dper na 'dzam bu chu bo'i gser dang 'dra pas/ 'phrin las bya btsal med pa zhes bya ste/ lto 'grangs na kha zas kyi gtam yi gar mi 'ong ba bzhin dang 'dra bar rtsol skyon du gyur pas 'phrin las bya btsal med pa yin no/ / de ltar 'phrin las bya btsal med pas spong len med par 'dzin pa ni thams cad kun tu bzang po la/ bzang ngan dang che chung yod med rtag chad dam phyi nang gi rnam pa btsal bas mi rnyed pa ngang gis shes/ 'phrin las bya btsal med pa spong len med pa'o// 'khor ba nyid mya ngan las 'das pa yin par rig pa nang nas shar/ nyon mongs pa rang sdug bsngal thar pa chen po'i lam du ting nge 'dzin gyis longs spyod mdzad/ phyin ci log tu bde ba chen po mi 'gyur ba'i gter btsugs pas/ dngos po thams cad bskal pa'i me bzhin bsregs pas/ sgrib pa thams cad thal tshor rlung gi gtor/ las dang nyon mongs pa thams cad bar snang gi na bun bzhin sangs rgyas pas/ sems kyi rang bzhin ci yang ma yin pa'i dbyings la brdal/ ye shes kyi rang bzhin rig pa spyi khyab tu shar/ gnyis su med pa'i don mtha' dbus phyogs ris med par klong du gyur pas/ dus gsum gyi sangs rgyas chos kyi sku 'gyur ba med pa'i rnal du/ sku gsum lhun gyis grub pas mi nub pa'i rgyal mtshan/ mi 'gyur ba'i gter bcug pas/ sangs rgyas dang sems can mnyam pa chen po'i klong du 'da' ba med par dam bcas/ ji ltar snang ba kun tu bzang po'i mdzad spyod dang 'phrin las su dus dang rkyen med par mnga' thang skyes/ sdug bsngal dang rnam par rtog pa thams cad ye nas mthar phyin pas/ sangs rgyas thams cad kyi sems kyi 'phrin las/ ma nor ba 'gyur ba med pas dgyes/ yab kun tu bzang po thams cad byang chub kyi sems kyi sras su gyur pas/ thugs mya ngan chos nyid du sangs/ dngos po ma skyes pa'i chos nyid du sems mi g.yo ba'i ting nge 'dzin ni gsal ba'i rig pa rang byung gi ye shes btsal mi dgos pa'i 'bras bu sangs rgyas pas/ ngan song dang 'khor ba chos btsal yang mi rnyed pas/ sangs rgyas kyi 'phrin las ma nor ba ma yin no// de la gnyis su med pa'i spyod pa ste/ chos nyid spyod pa gang yin pa rang gi sems yin te/ de ci'i phyir zhe na/ dper na sngon po gang yin pa baiDUr+Ya la/ baiDUr+Ya gang yin pa kha dog sngon por snang ba dang 'dra bar/ chos nyid gang yin pa rang bzhin med pa'i byang chub sems yin pas/ rang bzhin med pa gang yin pa byang chub kyi sems kyi chos nyid yin pa yang 'phral du byas shing btsal ba ma yin/ des na de ltar gnyis su med cing bcos ma ma yin/ sems nyid spyod pa yin pa dang ji ltar snang ba'i chos thams cad mtha' la mi gnas pa/ dbus la mi dmigs te/ dus gsum du 'dus ma byas par sangs rgyas pa de la/ gnyis su med pa bde ba chen por longs spyod pa yin pas/ rgyu 'bras dang phyi nang gi chos la ji ltar yod kyang rtag cing dngos su 'dzin pa med la/ med cing chad par stong zhing grol ba med pas/ sems kyi chos nyid ci la yang 'ching grol med par longs spyod pa/ thams cad sems nyid chos nyid kyi spyod pa yin pa de ni/ dper na 'khor los sgyur ba'i rgyal po yongs su chos skyong ba dang/ 'dam rdzab dang/ ngan skyugs dang/ khyi lud kyi nang na 'dug pa dang/ rin po che'i khang pa na 'dug pa la/ bsod nams dang/ longs spyod dang/ 'dul ba'i zhing la khyad med de/ slar 'di 'dam rdzab dang ngan skyugs kyi nang na 'dug pa/ rin po che'i khang pa na 'dugs pas kyang longs spyod rgyas shing che bar snang ste/ rgyal po'i rgyu dang gsog ma yin/ rgyal po gang la yang ma chags pa'i sbyin pa yin pa dang 'dra bar/ rang gi byang chub sems ni ngan song gi 'khor ba'i chos dang/ rnam par byang ba mya ngan las 'das pa'i la ji ltar spyad kyang/ de la che chung dang phyogs ris su phye ba med de/ slar 'khor ba nyid mya ngan las 'das pa'i rtsa ba/ sangs rgyas thams cad kyi rje btsan/ kun tu bzang po btsal ba med pa/ rang byung gi bcom ldan 'das su ye nas 'ub kyi chub par longs spyod pa de/ de 'phral du yid kyis smon te/ sems kyi mos pa dang bcos pa ma yin/ de ni ye nas rang gis sems ye nas rang bzhin med pa'i chos nyid du longs spyod pa la/ ye shes chen po'i chos su ye shes chen po'i spyan gyis mi gzigs shing/ phyogs ris dang bzang ngan du kun tu bzang pos kyang mi rnyed/ skye 'chi dang 'pho 'gyur du phyogs bcu'i sangs rgyas kyis kyang mi mkhyen sems kyi spyod pa lta ba nam mkha' 'dra ba la/ sems kyi dam tshig 'da' ba med pa yin/ brtan pas gzhi 'dra bas/ sems kyi spyod pa gnyis su med par longs spyod pa chu klung chen po bzhin du/ dus dang nyin mtshan du 'gyur ldog med par spyod pa/ sangs rgyas kyi mdzad spyod ma nor ba'o// chos nyid byang chub sems la bzang ngan med pas/ gtsang sme byang chub sems la med pa/ bzang ngan med par spyod pa dang/ chos nyid byang chub sems la phyogs ris med pas/ spong len med par sgrol ba la sogs pa yang/ byang chub sems kyi spyod pa spyad pa'i ngo bo med pa yin no// de la spyad pa'i ngo bo med pa ni/ thams cad sems kyi ngo bo la 'di 'dra zhes bya bar grub pa med pas ji ltar spyod kyang spyod pa'i ngo bo med pa yin no// de ni dper na nam mkha' la 'dus byas kyi chos ji ltar spyod kyang spyod pa'i ngo bo med de/ de'i skyon gyis gos pa med do// de bzhin du byang chub sems kyi spyod pa ni/ rgya mtsho dngas pa'i nang na nyi zla gza' skar gyi gzugs brnyan ji ltar spyod kyang de la dngos po dang mtshan ma med de/ chos nyid rgya mtsho dang 'dra ba'i don zab mo thugs su chud pa yang de bzhin no/ / de la ma nor ba zhes pa ni/ ye nas yin nges pa'i don 'di ma bcos par shes pas na ma nor ba'o// thams cad la byang chub kyi sems kyi spyod pa yin par ma shes na/ rgyu 'bras kyi rtsol bas sangs rgyas kyi rtsol bar rtsol spyad kyang slar 'khor ba'i rgyu tshi chad pa'i sdug bsngal yin te/ de ci'i phyir zhe na/ des sems kyi don ye nas yin par mi shes pas/ rmongs pa nam mkha' snyeg pa dang 'dra ba yin no// chos nyid byang chub sems kyi rang bzhin nas rin po che man shel bzhin du rnam par dag pa de bzhin du/ gdos pa can ma yin pa/ nam mkha'i dbyings ltar spros pa thams cad dang bral ba/ de yang ye nas de ltar yangs shing rgya chad pa yang ma yin par// ting nge 'dzin gyi 'od zer nyi ma'i dkyil 'khor ltar gsal la mi bsgrib par rang byung ba'o/ / de yang 'jig rten mtshan ma'i chos can lta bu ma yin te/ blta ru ni yod/ gzung du med/ snang ni snang/ dngos por ni ma grub ste/ gzha' tshon chu zla lta bu'i dpe mtshon/ yid ting nge 'dzin ji ltar 'dod pa bzhin 'byung ba nor bu dang 'dra bar/ don bstan pas ye nas rang bzhin med pa kun gzhi'i sems kyi rgyud thams cad la gnyis su med pa'i sems kyi longs spyod/ 'dod pa thams cad ma btsal bar lhun gyis grub pa/ sems kyi 'bras bu las rang 'char ba yin pas/ de'i phyir sems kyi chos nyid byang chub sems rtogs na/ rtogs pa'i ting nge 'dzin dang/ ye shes rol pa'i 'phrin las sna tshogs su zad pa med par 'char pa'o/ / de ltar de bzhin gshegs pa thams cad dgongs pa 'dus pa'i rgyud 'dis thos pa dang chos thams cad ji lta ba'i rnam par yang dag gis ma shes snyam du sems na/ rgyud 'di thos pa'i drin yin par rig par bya'o/ / de nas yang 'di snyam du/ sangs rgyas thams cad thugs ye shes gnyis su med pa'i ngang du gcig pa la/ phyogs dang ris med pa drod yin pa rigs par bya'o// de nas don de la dngos po cir snang yang rang bzhin med par yid ches/ dus dang rgyun ji ltar 'gyur yang thog ma nas mtha' ma g.yos pa'i klong du chos nyid la 'thil du phebs pa'i drod yin par rig par bya'o// de ltar rnal du phebs pa dang/ thams cad kyi rnam pa 'di la yod ces pas sems med ce 'am/ rtog ce 'am/ mi rtog ces pa'i rnam pa ci yang med par thams cad du mi g.yo ba'i ngang las/ mi 'gyur ba'i rig pas zin pas/ 'jig rten ming yang med pa'i bde ba chen por gyur pas/ yod med rtag chad kyi chos las 'das te/ lham me/ lhan ne/ lhang nge 'gyur ba snyam byed pa ni/ sems las su rung pa'i drod yin par rig par bya'o// de lta bu'i don las ma yengs pa de las/ bdag gi rnam par rtog pa 'phrul gyi me long la gsal ba ltar/ rtag pa ming yang med/ gzhan gyi rnam par rtog pa mtshon gyis mi 'jom pa ltar cis kyang mi 'gyur/ mi g.yo ba'i klong du gyur pa ni/ sems las su rung ba'i don la drod rtags kyi blo phebs pa yin no// de ltar drod rtags kyi phebs pa'i kun tu bzang pos sangs rgyas la ni/ sangs rgyas dang sems can dbyer med par lta ci smos kyis/ tshig dang yi ge med pa'i sangs rgyas zhes bya ste/ dngos po dang/ gzung 'dzin dang/ rnam par rtog pas thams cad sems kyi chos nyid du ye nas sangs rgyas pas/ de nyid byang chub kyi sems bde ba chen po mi 'gyur ba'i g.yung drung du dus dang gnas skabs med par sangs rgyas pas/ sangs rgyas zhes bya ba don las btags so// zhes ston pa bcom ldan 'das kyis gsungs so// de bzhin gshegs pa thams cad kyi dgongs pa 'dus pa'i rgyud rdzogs so/ /// de bzhin gshegs pa thams cad kyi dgongs pa sbyi dril gyi rgyud ces bya ba/ b+ha ra ha'i brag phug tu bal yul gyi rgyal po nor 'dzin zhabs dang/ rdo rje yang dbang gter gyis bsgyur cing zhus nas gtan la phab pa'o/ sa ma ya kha thaM//// rgya gar skad du/ ta thA ga tA sarba ma hri da ti tan+ta nA ma/ bod skad du/ de bzhin gshegs pa thams cad 'dus pa'i rgyud ces bya ba/ bcom ldan 'das khro bo'i rgyal po la phyag 'tshal lo// 'di skad bdag gis thos pa'i dus gcig na/ bcom ldan 'das chos thams cad lhun gyis grub pa'i rang bzhin/ yongs su bkod pa'i snying po/ mkha' dbyings rnam par dag pa'i klong rgya yaungs su ma chad pa/ rang bzhin lhun gyis grub pa'i gzhal yas khang na/ rdo rje snying po drags pa 'joms pa nyid/ dus gsum gcig pa'i sangs rgyas dang/ / bruM a nu ma hA pra ban ta// bod skad du// gnas lung chen po bstan pa// sangs rgyas bcom ldan 'das zhi khro 'bar ba'i tshogs la phyag 'tshal lo// dpal kun tu bzang po la phyag 'tshal lo/ / 'di skad bstan pa'i dus gcig na/ bcom ldan 'das yid kun tu bzang pos/ thams cad du 'og min pa'i steng phyogs na/ sems can thams cad 'khor ba dang/ ngan song las sgrol ba'i ting nge 'dzin la snyoms par zhugs te/ sku dang/ gsung dang/ thugs cad du 'og zer gyi dra ba phyogs bcur bkye ste/ sems can thams cadakyi lus ngag yid gsum la khyab pas de dag thams cad kyi ma rig pa dang/ ma rtogs pa dang/ ma ldan pa'i rtogs pa thams cad mun sros pa'i nam mkha' la ye shes kyi nyi ma shar ba bzhin/ thog ma med pa'i dus nas/ rtog pa'i bag chags brtas pa'i sems can/ nga bdag dang bdag tu phyogs ris su rtogs pa'i dbang gis khams gsum du 'khor zhing/ nyon mongs pa'i rgyur gyur pa rnams la/ thabs mkhas pa'i thugs rje chen pos/ sems can thams cad 'khor ba'i chos dngos po can las/ mya ngan las 'das pa'i chos can las/ mya ngan las 'das pa'i chos dngos po med pa snang la rang bzhin med pa'i sku dang/ gsal la mi rtog pa'i ye shes ye nas gnyis su med pa'i dbyings su bsgral ba'i thugs ye shes kyi rang gnas yin parabyin gyis brlabs so/ / de yang 'phral du brlabs pa ma yin te/ dper na me long g.yas gos pa phyis pa bzhis/ chos thams cad ye dang po nas/ byang chub sems bde ba chen po'i snying po/ ye nas ma bcos pa'i rang bzhin yang dag par thams cad du/ sangs rgyas par rgyas bar rtag pa'i nges don dang/ gsang sngags che ba'i rkyen gyis byin gyis brlabs khyad par du kun tu bzang por grub par mdzad do/ de ci'i phyir zhe na/ snang srid thams cad chos nyid kyi gnas yin la/ rang rig pa'i ye shes ni chos nyid kyi ston pa yin pa la/ skye 'gro thams cad ni chos nyid bde ba chen por bsgral ba ni/ 'khor ba chos nyid yin la/ rnam rtog thams cad ye shes la/ sdug bsngal thams cad byang chub yin pa'i phyir ro/ de ltar bu'i theg pa 'di/ dper na shong yangs che chung gis nam mkha' yangs pa kun la shongs pa dang 'ad bar/ theg pa thams cad las gong du 'phags pa 'am/ theg pa thams cad las khyad par du 'phags pas/ kun gyi gzhi yin pa'i phyir/ 'di'i nang du ma 'dus pa gang yang med pas/ theg pa thams cad 'di'i 'khor du 'dus pas/ theg pa gang dang yang mi 'gal bar bya ba'i phyir/ dang po rnal 'byor gyi gnas gzhung dang mthun zhing tshul dang ldan pa btsal ba dang/ de yang sems ma skyes pa'i dbyings ye nas rnam par dag pa shes na/ gnas btsal kyang mi dgos/ rnyed cing yod na yang mi 'gal ba dang/ de lta bu'i gnas su las dang bya ba gzhung nas byung ba kun bya'o// de yang kun gzhi'i kun tu bzang po bzang ngan spong len med par rtogs na/ las dang bya ba byas kyang mi 'gal// ma byas kyang ni dgos so// de ltar las dang bya ba gzhung nas 'byung ba bzhin byas pa'i sar gnas gsang ba'i dkyil 'khor zhi khro 'bar ba'i gzugs brnyan bri ba yang go rim ma nor bar bri zhing/ bzhengs su gsol lo// de yang phyogs thams cad ni dkyil 'khor/ 'byor pa thams cad ni lha rgyud/ snang ba thams cad ni rang gnas/ rtog pa thams cad ye nas sangs rgyas pa yin par yid ches shing mthar phyin na dkyil 'khor bya ba yang mi dgos la/ byas kyang mi 'gal lo// de ltar gzhung las byung ba'i dkyil 'khor bris pa der mtshams bcad par byas te/ ting nge 'dzin gyis phyogs bcu khro bo'i dkyil 'khor mang po yid la bkram nas/ phyi nang snod bcud thams cad kyi 'jig rten gyi khams ril dug gsum gyi dbang gis snang ba'i skye 'gro dang/ rdo shing sa brag la sogs pa'i zung du thams cad kyang/ ye nas sangs rgyas pa'i khro bo chen po'i rang bzhin can yin la/ 'di dag blta bas kyang thugs su chud par blta la/ ril khro bo'i rang bzhin du bsgoms la/ rnam par shes pa'i tshogs brgyad kyang/ khro bo chen po'i sku rags par bsgoms shing gsal bas/ mnyam pa nyid kyi gnas la nga dang bdag tu blta ba'i rtog pa 'jom pa dang/ sems skye shi med pa las/ rnam par rtog pas skyes shing snang ba'i bag chags thams cad spyod ngo// 'di las khro chen zhal gsum phyag drug par gyur pas/ smad lcags phur zur gsum gyis nyi ma dang zla ba'i dkyil 'khor gyi dbus su/ phyogs mtshams steng 'og gi phyogs dang dregs pa can pho mo bsnol mar mnan te/ btab pas 'jig rten na gnod pa'i bar chad dang/ mi mthun pa'i bgegs kyi phyogs zil gyis mnan par bya'o/ / de yang phyi thams cad ni ye nas sems nyid kun tu bzang mo'i mkha' 'og min chos kyi dbyings kyi pho brang/ ye phyi mo nas sangs rgyas pa'i bzhugs gnas yin par rtogs pa mthar phyin la/ nang thams cad kun tu bzang po'i bde ba chen po/ / bzang ngan spong len gyi dpung gnyen med cing/ yod med rtag chad kyi mtha' las 'das/ rgyu rkyen las ma ltos pa ye nas sangs rgyas pa/ gnyen po dang thabs kyis ma bcun par yon tan gyi 'bras bu lhun gyis grub par/ dngos por mi snang bar rtogs par gsal zhing rig pa rang shar ba/ chad pa ma yin par mtshan ma med cing/ gnyen po gang gis kyang mi zin par/ nor bu rin po che ltar 'dod pa bsgyur du btub pas/ don gyi nges tshig las rtags kyi 'bras bu rang la rang shar bas/ dper na 'dzam bu gser gling du phyin pa ltar gyur na/ mtshams bcad kyang a ti la mi dgos/ ma bcad kyang mi 'gal lo// de ci'i phyin zhe na/ don rtogs pas mi dgos// khog shong yangs che bas gang yang rtogs pa med do// de yang mtshams bcad pa 'di ltar bcad do// hUM// rang bzhin dag pa'i ngo bo la/ / sems can sangs rgyas gnyis med kyang// ma rtogs pa dang log par rtogs// phyogs rtogs yang dag nyid ma rtogs// sgrib pas sa 'phangs dma' ba dang// sems kyis rtog pas 'ching ba dang/ / gzhi stong ci la'ang bar chad byed// sems kyi de nyid ma rtogs pas// ji ltar bshad kyang mi go bas// 'di ru 'dug pa'i skal med pas// sa phyogs gzhan du 'gro bar gyis// lung chen 'di las khyed ma 'da'/ / gsang ba 'di las khyed 'das na// de bzhin gshegs pa thams cad kyis// zhal nas gsungs pa'i chos kun la// bka' bcag pas kyang 'di nyams thu// ma 'da' rang rang gnas su dengs// sa ma ya ka pa tsa ra rag sha hUM phaT/ / byang chub sems kyi klong bdal bas// kun tu bzang po'i rang bzhin la// sangs rgyas med cing sems can med// lha yang med cing 'dre yang med// 'khor ba med cing myang 'das med/ / ngan song med cing mtho ris med// rdzogs khyab rang byung ye shes la// dus gsum sangs rgyas dgrar langs kyang// 'di la gzung cing bsad du med// bcom ldan 'das kyis bka' stsal to/ / zhes bya ste// de lta bu'i mtshams kyis gnas kyis// dkyil 'khor 'dir gnas stod par bya ste// yi ge rnam pa gsum gyis sgrib pa sbyang nas// lung gi 'phro 'du rnam pa gsum gyis// thugs rje sprul pa'i gnas su sgrib pa sbyangs nas/ / rtog med chos kyi dbyings la bzhugs gnas bcas nas// rtog 'joms khro rgyal matams kyi dbang 'di yang bskur ro// ji ltar snang ba thams cad kyi// lha dang lha mo'i dkyil 'khor yin/ / khro rgyal mtshams kyi dkyil 'khor du// che ge rtog 'joms dbang bskur ro// 'di zhes bya ba rgyal ba'i sras// 'khor ba ngan song lta bas bsal// rnam par rtog pa dgongs pas bcom/ / rang rig ye shes lung gis bstan// rnam par mi rtog chos nyid gnas// sngar 'das sangs rgyas bzhugs pa bzhin// rnal 'byor rdo rje che ge nyid// rgyal ba kun gyis bsngags pa mdzad// sngon gyi de bzhin dbang gnas mchog/ ces gnas rim cig bstod// dbang rim cig bskur nas// 'dis kyang 'khor pa sa 'das nas sangs mi rgyas pa'i dbang med do// zhes kun tu bzang pos gsungs so// de yan chad khro rgyal mtshams kyi dkyil 'khor cig rdzogs so/ /// de bzhin du ye nas gnas sangs rgyas pa'i gnas su// de ltar rtogs pa'i sangs rgyas kyis dgongs pas// mtshams bcad pa'i phyin ci log gis bslad pa'i gzung 'dzin gyi rtog pa rnams ni/ 'khor ba'i bgegs chen po yin la// 'di dag kyang bdag gi rtogs pa'i ye shes kyis sbyong zhing/ de dag thams cad rang gi sems snying po byang chub kyi rang bzhin yin par rtogs nas/ rdul phra rab tsam yang dngos grub kyi bar chad byed pa dang/ mi mthun pa'i bgegs ming yang med par byas nas// 'di ni theg pa gang yang mi 'bral bar bya ba'i phyir/ dkyil 'khor brgyad pa tshul bzhin du byas te/ sems can lakhor ba'i rgya mtsho sgyu mar snang ba thams cad/ gdod mtha' nas dkyil 'khor tshul bzhin gnas pa las/ phyin ci log gis bslad pa rnams 'bar ba'i 'khor lo rtsi bas brgyad kyi 'od zir gyis sbyong zhing/ rnam par shes pa tshogs brgyad kyang/ khro bo brgyad du byin gyis brlabs nas/ tshe 'phos pa dang sems can thams cad khro bo'i sku gsung thugs/ phyag rgya chen po'i dkyil 'khor du bsdus te/ thugs rje che ba'i sems can sgrol ba'i 'phrin las mngon sum du mdzad do// de yang dkyil 'khor zhes bya ba yang/ bka' yang dag pa'i dkyil 'khor ni/ khams gsum 'khor ba'i chos ji srid rdzas su snang ba thams cad brtags dben/ dmigs na don byed ma nus pa gang yang med pa ni/ gzugs brnyan gyi dkyil 'khor yin la/ de thams cad kun gzhi byang chub kyi sems su 'dus pas/ kun gzhi byang chub kyi sems la/ chos thams cad nas thams cad sangs rgyas pas/ sgom du yang med cing// yengs su yang med pa nyid ting nge 'dzin gyi dkyil 'khor yin la// de yang kun tu bzang po ye phyi mo nas sangs rgyas pa la/ btsal ba med par sangs rgyas pa dang/ sems can gnyis su med par lhun gyis grub pa ni/ rang bzhin gyi dkyil 'khor zhes bya ba la/ de gsum yang tshig gi rnam grangs tsam las ris su ma gsungs shing/ byang chub sems bde ba chen por mnyam zhing dbyer med rtogs na/ gzugs brnyan gyi dkyil 'khor bri yang mi dgos la/ thams cad shong yangs che ba las bris kyang mi 'gal lo// de la yang 'di skad gsungs so/ / rgyal ba'i dkyil 'khor rab 'byams ma lus kun// dbyings las ma g.yos sku dang phyag rgyar gsal// gsal tsam nyid na yod med tshig las 'das// snang srid thams cad rgyal ba'i dkyil 'khor las/ / yid kyis sa bcad sems kyi lha bkod nam// sems can thams cad sangs rgyas sa la bkod// 'du 'dzin mang po bus ba'i las 'dra bas// rang sems gdod nas dag pas nam mkha' bzhin/ / mtha' dbus phyogs ris med par yongs la khyab// gzung 'dzin rtog pas mtha' gnyis bral ba la// skye 'gag med pa'i thig le chen por 'dug// 'od bzhin mtha' dbus med par rgyal bas gsungs/ / bdag med skye shi med pa'i klong bdal gyis// 'du 'bral med pa'i gsang ba'i dkyil 'khor du/ phyogs ris med pa'i thigs rje chen po yis/ 'khor ba spyis phung dmyal ba dong sprug go/ oM gu h+ya sa ra oM// dz+nyA na sa ra o// bo d+hi tsit+ta a/ zhes bya ba 'di rtogs shing brjod pas/ skye 'gro mtha' dag pa rnams kyang/ sangs rgyas kyi sa la gnas par gyur na/ gang la bya ba de lta ci smos/ de ni thams cad byin gyis rlob pa zhes bya ste/ bka'i 'khor lo'i dkyil 'khor gnyis pa rdzogs so//// de ltar gzugs brnyan gyi dkyil 'khor bris pa der/ gang la don bya ba dang/ bdag dang sems can thams cad kun tu bzang po'i gnas su phyin cing snod du rung bar byin gyis brlabs nas/ gzung 'dzin rtag chad kyi dngos po khro bo yab yum gyi thabs dang shes rab kyi ting nge 'dzin gyis bsgral dgos te/ oM badzra tsakra ya s+t+waM/ zhes brjod pas/ gser gyi 'khor lo rtsibs brgyad kyi dbus su/ dpal chen po yab yum gnyis/ shar gyi rtsibs la pra dz+nyAn ta krid/ shar lho'i rtsibs la nI la dan Da/ lho'i rtsibs la ya mAn ta krid/ lho nub mtshams la Ar+ya a tsa la/ nub kyi rtsibs la ha ya gri ba/ nub byang mtshams su Ta ki rA dza/ byang gi rtsi bas la a mr-i ta kun+Ta li/ byang shar mtshams su ma hA ba la/ 'og gi phyogs su 'khor lo sgyur ba de/ ka ma la/ steng gi phyogs su hUM ka ra/ 'di rnams khro mo ki ri ma brgyad dang gnyis su med par bzhugs so// yab yum de dag gnyis su med par 'khril ba las/ steng gi hUM ka ras thabs 'phros/ 'og gi ma las ni shes rab ston/ de la 'khor gyi mkha' 'gro dang/ sprul pa dang/ mngag gzhug rim gyis/ gang don bya ba de dang/ mtha' yas pa'i sems can thams cad gcig tu bsdus nas/ dngos po la rtag par lta ba'i gzugs dpung gi gdos bsgral/ rnam par shes pa'i yi ge nri las/ hUM du gyur nas yab yum gyi thugs khar thim nas/ mkha' la rten te ma 'ongs pa'i don du/ rigs nges pa'i sras su cha la reg par 'phrin las mdzad pa'o/ / de ltar ting nge 'dzin las gsal bar bya ba ni/ sa bcu mthar phyin pa'i gnas zhes bya'o// de yang khams gsum thams cad ni stong pa chos nyid kyi zhing yin la// srid gsum thams cad ni thabs mkhas pa'i ye shes yin la sngug bsngal dang nyon mongs pa thams cad gnyis su med pa'i longs spyod du gyur pas/ dper na nyi ma'i dkyil 'khor la/ mun pa btsal gyis mi rnyed pa bzhin/ sangs rgyas kyi dgongs spyod bdal bas/ 'khor ba'i rgyu btsal gyis mi rnyed par gyur nas// sgral bya yang mi dgos la/ sgral ba byas kyang dgos pa med do de'i phyir na 'di skad ces gsungs so// kun tu bzang po'i ngang nyid las/ / sangs rgyas sems can gnyis med pas// srid gsum zos kyang nga ma 'grangs// khams gsum 'thugs kyang nga ma ngoms// stong gsum thams cad sgral ba'i zhing// ma skyes phyir na btub ba'i rdzas/ / rang bzhin mod pas bsgral ba'i rgyu// sems nyid yangs pa'i mkha' klong du// stong gsum ma lus ston pas ni// 'bum gyi char yang mi phod do// nam mkha' gar khyab chos kyis khyab// chos kyis gar khyab sems kyis khyab/ / phyi nang gnyis ka sems su bsgral// sems ni ye nas mya ngan 'das// skye shi gnyis kyi rgyud las rgal// yod med gnyis kyi mtha' las 'das// cir yang snang la gzung du med/ / med pa ma yin snying po 'byung// 'di zhes bya ba bcom ldan 'das// gcig pur rab tu che ba'i lha// blo ldan gang zhig skal che ba// 'di ni bsgral ba'i lung zhes grags// hi ti bsham// yongs la dbang sgyur dbang gi mchog/ gang la ma chags 'dod dgur sgyur// gnyis su med pa'i pho brang du// spong len medapa'i dbang bskur ro// zhes gnas par cig bstod/ dbang lan cig bskur bas/ sems can gyi ming yang med par gyur to/ / gang gi don bya ba lta ci smos so// 'di ni dkyil 'khor drug las/ rgyud drug bsgral ba'i dkyil 'khor dang// dkyil 'akor gsum pa rdzogs so// de ltar gzugs brnyan gyi dkyil 'khor chen po bris pa de las zhal bsgyur te zhi ba'i lha bung+d+ha bzhi bcu rtsa gnyis kyi dkyil 'khor gzhung dang 'thun par 'khor lo bris pa 'am/ yang na pad ma bris kyang rung/ sgo dang sgo khyud la sogs pa rdzogs par bris pa der/ rgyan rnams bkram// dbus su bum pa yum kun tu bzang mor byin gyis brlabs/ rgyan thams cad kyis brgyan pa der ni yangs shing rgya che ba/ 'jig rten gyi ltos thams cad rgyas shing khyab pas/ yum gyi mkha' dbyings rnam par dag par/ thams cad sangs rgyas par bsgom mo// de yang dper na srog gi sbubs thams cad rtsas gang ba 'am/ til gyi gang bu 'bras bu dang mar gyis gang ba bzhin/ thams cad du khyab ste khab rtse gang yang gzugs pa'i sa med par phyi nang snod bcud thams cad ye shes bum pa bdud rtsi chu/ byang chub sems kyi sangs rgyas par snums par mdzad pa bsgom pa ni/ kun tu bzang mo rgyan du bzhag pa de/ sems can thams cad dang gang don mdzad pa de la/ thams cad kyis legs par sbyin par mdzad pa'o// de yang chos nyid ma skyes pa skye ba med pa/ kun tu bzang po'i mkha' klaung rnam par dag ba'i dbyings su/ phyi nang snod bcud kyis bsdus pa'i chos thams cad/ byang chub kyi sems bde ba chen por sangs rgyas pa der// skye shi med pa'i g.yung drung du rtogs na// bum pa bsham yang mi 'tshal/ / 'di ltar klong du gyur nas bshams kyang mi 'gal lo// de'i phyir na 'di skad ces gsungs te/ bum pa zlum bo'i pho brang du// snod bcud ma lus dbang du bsdus// thig le chen po rgyas btab pas/ / sems can thams cad sangs rgyas yin// zhes bka' stsal to// de la gzugs brnyan gyi dkyil 'khor gyi lha bung+d+ha bzhi bcu rtsa gnyis gnyis su med pa'i sbyor ba mdzad pa'i byang chub kyi sems/ bdud rtsi bum bar gyur nas bdud rtsi byang chub kyi sems des/ thams cad lha'i dkyil 'khor lags pas/ lha la lha thim/ chos nyid la chos nyid rol pas mchod pa dang/ gang don ba de yang gnyis su med par sbyor zhing/ byang chub kyi sems kyi rang bzhin du ma 'ongs pa'i sangs rgyas su 'byung bas/ rang rig bzhin du sgom mo// de yang dbang po yul dus la sbyor ba ni/ chos nyid dang 'du 'bral med par ye shes dbyings las sbyor ba ni/ chos sku 'gyur ba med par rtogs na sbyor ba yang mi dgos so// sbyor ba dngos su byas kyang mi 'gal lo// der rgyan bkram nas/ ting nge 'dzin gyi dkyil 'khor bsgom pa ni/ yi ge bruM gser btso ma'i mdog 'dra ba la/ rin po che sna tshogs kyi gzhal yas khang rgya khyon dpag tu med pa cig/ gtsug tor 'khor lo sgyur bar skyed do// de'i nang tsakra las 'khor lo// baM las pad ma 'dab ma stong dang ldan par gnas so/ / dbus su badzra d+h+rig yab yum/ shar du dzi ni dzig yab yum/ lhor rat+na d+h+rig yab yum/ nub tu a ro lig yab yum/ byang du pra dz+nyA d+h+rig/ sgyu 'phrul dang mthun/ de dag kyang thabs dang shes rab gnyis su med par rdzogs shing/ gzhan yang sems dpa' dang/ sems ma dang/ khro bo dang/ khro mo sgo srungs su bstan pa'i dkyil 'khor/ de'i 'og phyogs su yang khro bo'i dkyil 'khor drug cu rtsa drug kyang thabs dang shes rab gnyis su med/ drug kyang zhi ba'i lha rnams dbu rgyan du bsnams nas/ de rnams kyang thabs dang shes rab tu sbyor ba'i ting nge 'dzin la zhugs so// de lta bu'i zhing khro bo'i lha'i dkyil 'khor gyi lha rnams kyis/ sems can ma rig pa'i dbang gis 'khor bar gyur pa rnams chos nyid kyi gnas su sangs rgyas kyi sa la 'jog pa mdzad do// de lta bu'i sangs rgyas de yang gzhan gud na yod pa ma yin te/ rang gi snying po byang chub kyi rang bzhin yin pa la/ phyin ci log gis bslad pa rnams/ sangs rgyas su grub par semasacan gzhan gcig na yod par re ba gzhag nas/ 'dzin chags su rtogs pas gol ba yin/ sangs rgyas kyi rgyu ni slob dpon dang lung gis bkrol nas/ rang byung dag par 'gyur ba'i ye shes lhu mi gnyis par go ba'i dus na/ ye shes rang gnas kyi lhun gyis grub rdzogs pa'o// de yang lta bas chos thams cad snang na ni/ sku gsung thugs phyag rgya chen po'i dkyil 'khor du snang la/ mi snang na yod med rtag chad 'khor ba ngan song du mi snang bar rtogs/ dkyil 'khor gyi thams cad rang gis rdzogs par bsgoms pas sangs rgyas la/ ma bsgoms kyang sangs rgyas so// de yang 'di skad ces gsungs te/ mu tig dkar po dri med dang// tsan dan smug po rma med gnyis// byang chub sems kyi thig le gsum// rtogs pa'i klong du su 'dris pa/ / mi zhes bya ba sangs rgyas yin// sangs rgyas gzhan du ma tshol cig/ btsam kyang rgyal bas mi rnyed do// rtogs med mnyam nyid chos kyi sku// gzung du med pa 'ja' tshon 'dra// gsang ba'i dkyil 'khor zhes bya ba/ / rdzogs pa chen po'i man ngag gis// byang chub sems las ma yengs na// thams cad dkyil 'khor 'di la rdzogs// dper na mun las snang 'byung bzhin// dkyil 'khor nges don 'di bsgoms pas/ / rgyu drug sems can thams cad kun// sangs ma rgyas pa cig kyang med// ces bka' stsal to// 'di ltar rtog pa dang ldan zhing tshig tu brjod na/ rgyud drug gi sgo yang gtan chod par gyur na/ gang don bya ba lta ci smos/ ting nge 'dzin gyi dkyil 'khor gsal ba de la/ gang zag shes rab chung ba rnams the tsom mi za bar bya ba'i phyir spyan drang zhing phya btsal ba la sogs pa'i gzhung gzhan dang mthun par bya'o/ / de nas lha rnams byin dbab pa dang/ gzi byin bskyed pa dang/ gsal gdab pa dang/ dbang bskur ba la sogs pa yang bya'o// de yang phyi 'byung ba lnga la sogs pa'i ji ltar snang ba'i chos 'di dag thams cad/ yong gi de bzhin gshegs pa lnga'i rang bzhin pas/ thugs rje chen pos sems can gyi don la mi phyed par ril rdzogs pa chen po'i rang bzhin du mi 'gyur bar don mdzad de/ de yang dus thams cad du rang gi byang chub kyi sems de ltar yin pas/ 'di ltar sus blo la gsal bar rtogs pa'i dus na/ bdag don gzhan don thams cad phun sum tshogs pa'o// de ltar cho ga'i rim pa tshang bar gyur nas/ ma nor bar lha rnams bsnyen cing bsgrub par bya ste/ gzhung gzhan dang mthun par bya'o// de yang sems can thams cad kyi sems/ ye dang po nas sangs rgyas pa med na/ bsnyen cing bsgrubs kyang mi 'grub na// ye thog ma nas sangs rgyas pa ma nor ba yin pas/ sems can thams cad ye thog ma nas 'khor ba las grol bathar pa yin par rtogs te/ gdod ma nas bsnyen cing bsgrub pa'o// yang thig le chen po byang chub kyi sems las ma g.yos ma bral na/ 'khor ba ming yang med nas bsnyen pa'i mchog go/ de yang mnyam pa nyid kyi rang bzhin las ma gyur pa med pa ni bsgrub pa'i phul lo// de lta bu'i lta ba'i klong du bdag dang don bya ba de mtha' yas pa'i sems can thams cad ye nas kun tu bzang po bzang ngan spong len med par sangs rgyas par rtogs pas/ bsnyen cing bsgrub pa'i gnas yang dag pa yin no// de yang 'di skad ces gsungs te/ 'khor ba'i chos nyid yin shes shing// sems can ye nas sangs rgyas pas// ting 'dzin dkyil 'khor rang bzhin ma bsgoms gsal// sangs rgyas ma bsgoms gcig kyang med// nam mkha' bzhin du skus khyab pas/ / spyan drangs slar gshegs gang yang med// bdag nyid bdag la mchod la mchod shes pas// rgyal ba mchog ni gzhan na med// tsit+ta thugs kyi dkyil 'khor du// rang byung ye shes klong bdal bas/ / ji ltar snang ba kun tu bzang// bsnyen cing ma bsgrubs gang yang med// sangs rgyas sems can gnyis med pas// rgyal ba rgya mtsho'i thugs ngan sangs// ngan song 'khor ba'i mig yang med// lha yi lha de ye shes sems/ / oM shri sa man ta b+ha dra// bud+ha s+pha na o/ zhes bstsal pas// gang don bya ba dang sems can thams cad chos kyi dbyings su sangs rgyas par gyur cig/ sbyor ba'i dkyil 'khor dang/ rdo rje dbyings kyi dkyil 'khor bzhi pa rdzogs so/ /// de la thugs rje'i dkyil 'khor ni// phyi'i spang skor dang/ dkon mchog gsum la mchod pa dang/ tshangs pa dang dbang po la sogs pa phyogs skyong ba dang/ rgyal chen rigs bzhi dang/ 'jig rten na ci yod pa ma lus par rgyal ba'i dkyil 'khor du/ so so'i gzhal yas khang dang// gnas chen po ltar dag cing bde bar phyi'i dkyil 'khor bshams pa'i dbus su/ bdag gi thugs ka nas rdo rje bton te// gtor sbyin chen po btang bas// phyi'i sbyin pa rnam gsum gyis/ 'gro ba rigs drug dang/ skye ba rnam bzhis bsdus pa las/ kun tu bzang mo'i rgyan la bkod nas/ mi gnyis lhun gyis bsdus nas/ byang chub mchog gi sbyin pas tshim par bya ba dang/ tshe rabs kyi lan chags kyi gdon bgegs rnams// chod pa dang dam gsal nas bka' mi 'da' bar bya ba ni/ lung 'di khong yangs pas thams cad du shong shing yangs pa dang/ thugs rje sbyin pa'i dkyil 'khor lnga pa rdzogs so//// de ltar dkyil 'khor rnams bsnyen cing bsgrubs nas/ gang la don bya ba de dang sems can thams cad kyi don bya ba'i phyir/ rgyud chen po'i gzhung ltar/ nyon mongs pa'i rgyud 'gro ba rigs drug gi sems can gyi srog gi sa bon a nr-i su tri pre du lnga las/ yi ge dpa' bo 'bru lnga'i thugs rje'i ye shes kyi 'phro 'du yis/ rigs lnga so so'i lam rgyud lnga'i sgo bkag nas/ rgyal ba rigs lnga'i gnas su 'dus nas/ hUM mdzad gnas kyi 'phrin las rdzogs par mdzad do// de yang thabs dang shes rab kyi tshul du rol pa las 'di skad bskul lo/ / ngan song gsum gyi phung po la// yi ge 'bru lnga'i gnas bkod nas// rgyud lnga 'khor ba'i rgyun lam bcad// rgyal ba'i sras su thams cad bskyed// sa yi 'og tu mda' 'phangs pas/ / gnam gyi lha bran thamad cad 'chi// pha rol phyin bcu shes rab dbyings ma'i gzhu// cang shes 'phrul gyi ting 'dzin mda' dang gzhu// dam tshig ldan pa'i mchog ma rin chen gter// gsung gi ka la ping ka'i rgyud 'brengs shing/ / mtha' gnyis bral ba'i ye shes snyug ma la// yid bzhin nang du sgron ma'i mkha' 'gros gzhag/ tshul bzhin thugs las 'byung ba'i spar gsum ma// nga dang bdag dang lta ba'i ngan song bcom/ / rgyud drug nyon mongs 'khor ba'i gnas bsgral te// byang chub snying dril yig 'brur byin brlabs nas// sku la sim zhing rgyal ba'i sras su bskyed// ye shes mchog gi sa la gnas thob nas// gsang ba'i thugs rje'i gnas la gzung bar bya'o/ / zhes brjod nas ting nge 'dzin gyis gsal gdab pa dang/ phyag rgyas dbang bskur ba dang/ sngags kyis byin gyis brlabs par bya'o// de yang lung ltar na yig 'brus don bya mi dgos na thugs yang dag pa'i ye shes/ ye shes chen po lnga 'am drug dang ldan pas/ thugs rje'i bdud rtsi'i char gyis 'gro ba rigs drug gi re ba yid bzhin du skongs/ de la yang sems bo d+hi tsit+ta'i lha ye shes mchog sems dpa'i gnas su/ thugs ye shes kyi thig la zlum por gsal ba dang/ tsit+ta rin po che dmar por gur phub pa 'dra ba'i gzhal yas khang gi nang du nyi zla'i dkyil 'khor du gsal bar gyur pa'i dbus su/ bdag gi sems dang/ gang don bya ba dang/ mtha' yas ba'i sems can thams cad kyi dran byed kyi sems/ ye shes sems dpa'i 'od mtshon gang ba cig tu lhan ner gsal bar bsgoms pa'i dus na/ chos thams cad smra bsam gyi yul las 'das nas/ don gyi snying po ye shes mchog gi dkyil 'khor ye shes sems dpa'i skur gsal te/ 'od mtshon gang ba la sogs pa rgyan gyi lung chen po las gsal bar smos pa bzhin du bsgom mo/ / de yang bka' yang dag pa'i gzhung gis din gsal bar ma 'dres pa/ snang ba dngos po med pa la/ gsal la rang bzhin med par bsgoms pas/ 'khor ba'i chos yod med rtag chad du snang ba 'di thams cad ye nas mya ngan las 'das par 'dres pa mchog gi yon tan du 'gyur ro/ / de yang thabs chen po'i nang nas shar ba'i ye shes kyis/ thams cad du bdag tu sangs rgyas par rtogs pa'i dus na/ gzhan du dbye zhing gsal bar bya ba'i don gzhan na med do// tsit+ta sems la thams cad gnas pa yin par bsgom mo// de yang 'di skad ces gsungs so// lha zhes gzhan du bstan pa yang/ tshig gi tha snyad tsam du zad/ sems kyi lung la gnyis med pas/ rtog pa'i don la gcig tu bstan/ tsit+ta'i dkyil du gnas byas pas/ stong gsum thams cad rin chen gzhal yas khang/ yid kyi dkyil 'khor du lha bkod pas/ skye 'gro ma lus rgyal ba'i sras/ byang chub sems su dbyer med pas// ji ltar snang ba kun tu bzang// kun gzhi ye nas sems su mnyam// phyi nang snod chos kyi sku/ / 'di las gzhan pa'i sangs rgyas ni// gzhan du bu cig ma tshol cig/ ces bka' bstsal to// de yang thugs rje chen po'i rgyud nyid phyi'i yul gnas par bya ste/ tsit+ta lnga'i rtsa ba thams cad 'du 'bral med pa'i rnam par shes pa'i tshogs bsam yas par bsdus pa'i b+ha ga 'dus pa'i spyi bor gtsug tu gzhal yas khang mtshon gang ba cig bsgom/ nang du bde bar gshegs pa'i rigs so so'i yab yum/ gtso gzungs dang ldan par bsgoms/ yum gyi mkha' la gang don bya ba dang/ mtha' yas pa'i sems can thams cad lngar 'dus te/ gnyis su med pa'i byang chub kyi sems dgyes pa'i ro bstar bar bya'o// de yang don chos nyid du gsal bar byin gyis brlabs yun ring por bya'o/ / de nas yang ston pa'i chos nyid du gnas bsdus pa'o// de nas las su rung nas gsal zhing 'dris par gyur pa dang// gnyis su med par byin gyis brlabs pas/ sprul pa phra men ma/ sgrol bar byed pa'i tshogs mang po/ yab yum gyi 'od zer dang 'phros 'dus nas/ stong gsum gyi stong chen po'i'ajig rten gyi khams gnas pa thams cad/ ngan song gsum na gnas pa thams cad ma lus par bsgral bas/ ye shes chen po'i thig le la sbyor zhing sdud do// de yang 'di skad ces gsungs so// tsit+ta la ni lhan ne bos/ bder gshegs rigs rnams so sor gsal/ thabs dang shes rab gnyis med pa'o/ / byang chub sems kyi 'od zer 'phro/ gnyis med rol pa'i byin rlabs pas/ gru gsum las ni bsgral bar bya/ ngan song gsum po kun bsrungs nas/ thig le dbyings las dgod par bya/ zhes bka' stsal to// de las 'od zer gyi 'phros 'dus dbang du bsdus pa de las/ bdag nyid khro bo hUM mdzad dam bla na med pa'i he ru kar bsgoms pa'i thugs ka nas/ thabs kyi rgyal po thugs yang dag pa'i ye shes kyis/ ngan song gsum 'jig par byed pa'i yig 'bru rnams bskyed/ yig 'bru thugs ye shes kyi rtse mos don du bya ba dang/ sems can thams cad kyi sems kun bsdus nas/ nyi ma zla ba'i dkyil 'khor gyi steng du bzhag nas/ gser zhun ma bzhin du 'dril zhing 'tsher ba/ dag cing gsal ba gcig yid la bsam la/ byang chub sems kyi sems mngon du dran par bya'o// gzhal yas khang gi dkyil 'khor gyi lha thams cad kyi thugs ka nas kyang dang po gsung yig 'bru 'phros/ gnyis pa las thugs phyag mtshan 'phros/ gsum pa las sku phyag rgya 'phros pa las/ gang don bya ba dang/ sems can ril gyis phung po dang/ khams dang/ rnam par shes pa thams cad la khyab pas/ bskal pa gdod mtha' med pa'i nyon mongs pa dang/ shes bya'i sgrib pa dang/ yod med rtag chad dang/ gzung 'dzin dang/ phyogs su lta ba'i rnam par rtog pa thams cad/ dper na bya sgro me yis bcom pa bzhin du thul gyis sregs nas/ rnam par shes pa'i chos mgar ba'i zhi ga kong bu na gser chu dngul chu bzhus pa bzhin/ kar lhang nge lhang nge gnas pa la/ a las zla ba'i dkyil 'khor du gyur pa'i steng du bzhag/ 'og yaM las rlung gi dkyil 'khor gyis bteg nas yab yum sbyor ba'i thugs kar phaT kyis 'phangs/ sku'i dbyib tu u0f84thim nas gsang ba gnyis gnas kyi mkha' la byang chub kyi sems babs pa las/ bo d+hi tsit+ta badzra sa tA zhes brjod pas/ rigs nges pas rgyal ba'i sras su gyur to// de yang lung chen po'i gzhung gis/ me long gi dkyil 'khor dang/ sems kyi dkyil 'khor dang/ thugs kyi dkyil 'khor gsum du rgyud lnga'i gnas bcas/ ji ltar snang ba thams cad thugs ye shes kyi snying po nyid du bsdus nas/ ye nas sangs rgyas pa'i ngo bo yin pas/ rigs kyi khyad par ni yab yum sbyor ba mdzad pa'i mtshams su zhes gsungs so/ / de la yum gyi mkha' gsang pad ma ni// ye nas dus gsum gyi rgyal ba thams cad kyi 'byung gnas yin la/ khams gsum gyi sems can thams cad kyi gnas bskyed pa'i rang bzhin yang yin pas/ ye nas chos nyid gsang ba'i rang bzhin la/ ye nas gsal ba'i skyon gyis ma gos te/ pad ma 'dam nas skyes na yang skyon dang bral ba bzhin du/ chos nyid la skyon mi mnga' ste/ rigs lnga'i rgyal po dang rgyal mo gsal ba'i dkyil 'khor du/ ngan song 'khor ba 'dren cing sku gsung thugs kyis byin gyis brlabs pa'o// del tshig bshad kyis 'di skad do/ / oM// sngon gyi thugs dam chen mo ni// sems can 'byam klas ma lus kun// rgyal ba'i zhing du 'byor pa na// phyag rgya chen por bdag sbyor cig/ gser zhun bzhin du gsal ba las// sngags dang phyag rgyas byin rlabs pas/ / gsung gi byin rlabs 'od kyi 'bru// yab yum gnas su btegs nas kyang// sbyor ba'i lhums su phaT kyis 'phang// thugs kar thim nas sku yi dbyings// rdo rje'i lam nas yum gyi mkha'/ / gnyis med dbyings su gnas spar nas// lha rnams so so'i snying po smras// 'di las byin gyis brlab tu gsol// zhes bskur bas bde bar gshegs pa thams cad gnyis su med pa'i thugs rje chen pos/ stong gsum gyi stong chen po 'jig rten gyi khams ma lus pa thams cad ril rnams kun/ dper na til gyi gang bu 'bras bus gang la/ 'bras bu mar gyis khyab pa bzhin du/ nam mkha' gar khyab pa chos kyi dbyings kyis khyab la/ / chos nyid kyis gar khyab pa byang chub kyi sems bde ba chen por sangs rgyas pas khyab cing/ thig le chen por bsnams pas/ de'i don la gzhan du mi stongs pa'i rang byung gi ye shes/ kun tu sangs rgyas pa las yengs pa med pa'i rtse gcig pa'i byang chub kyi sems de kho na nyid kyi dbang bskur nas/ yab yum ril kyang gnyis su med par gyur nas/ rgyal ba'i sras su bya ba dang/ de la phyogs bcu dus gsum gyi sangs rgyas thams cad kyis kyang byin gyis brlabs shing/ bsngags pa mdzad nas/ de la dbang bskur bar bya ba'i phyir/ rigs lnga yab yum dang/ dus gsum gyi bde bar gshegs pa thams cad dang/ 'khor sems dpa' dang sems ma/ khro bo dang khro mo/ ril gnyis su med pa'i byang chub kyi sems gcig tu gyur nas/ rnal 'byor gyi dbang phyug chen po/ sangs rgyas kun gyi thugs rdo rje 'phro 'du gsal ba las/ gang don bya ba dang mtha' yas pa'i sems can thams cad kyi sems ye shes chen po'i rang bzhin du/ sku gsung thugs rdo rje byin gyis brlab par bya ba ni/ dus gsum gyi bde bar gshegs pa thams cad gcig tu gyur pa'i spyi gtsug nas/ oM dkar po 'phros pas don bya ba'i gnas kyi sems yab yum gyi mkha' la gser zhun ma bzhin du 'khod pa la/ zhal nas a dmar po 'phros pas/ yang de bzhin du thon/ thugs ka nas hUM mthing ka 'phros pas/ yang de bzhin du 'phros pas/ de bzhin dbyings dang ye shes gnyis su med pa'i chos kyi skur gyur te/ oM sarba ta thA ga ta kA ya bAg tsit+ta badzra sA b+hA pa Ad ma kou0f85haM/ / zhes brjod pas sku gsung thugs rdo rjer gyur te/ rgyal ba thams cad kyi thugs kyi sras rab dam par gyur nas/ bdag don mtha' phyin nas/ gzhan don lhun gyis grub par bya ba'i phyir/ ma 'ongs pa'i sems can gyi don yid du 'ong bar mdzad par mnga' gsol nas/ rnal 'byor gyi sdaung grogs su zhal gyis 'ches par bsgom mo// de yang 'di skad ces brjod do// don rnams bya 'os gang yin pa/ gnyis med dbyings nas b+ha gar thim/ yum gyi mkha' la gnas pa la/ bo d+hi tsi t+tas dbang bskur nas/ yi ge 'bru gsum byin brlabs pas/ rigs nges rgyal pa'i sras zhes bya'o// phyin chad 'gro ba'i don bya ba'i phyir/ ngas bskul ba'i sa la gzhag par bya'o// zhes gsungs so// de nas rdzogs pa chen po'i rnal 'byor gyis/ 'khor ba dang mya ngan las 'das pa'i chos thams cad thams cad ye gdod ma nas sangs rgyas pa la/ rgyu rkyen la rag ma lus la/ de nyid btsal ba med par lhun gyis grub pas/ 'bras bu la rten mi 'tshal te/ 'khor ba chos nyid du dag/ sdug bsngal byang chub tu gyur/ nyon mongs lam du shar bas/ 'di ltar gyur pa'i skyes bu'i lam rgyud lnga thugs rdo rje chen pos gzung yang mi dgos/ de ltar rtogs na thugs rjes gzung yang mi 'gal/ ci'i phyir zhe na/ theg pa chen po bya btsal dang bral zhing kun shong la/ gang dang yang mi 'gal bar bya ba'i phyir/ byang chub kyi sems bde ba chen po kun tu bzang po ye nas sangs rgyas la/ dpe gser dang 'dra ste/ 'gyur ba med pa yin la/ gnas nas gnas su bstod kyang mi 'gal/ ma bstod kyang mi 'gal/ ma bstod kyang don gyis tshang bas/ sems can thams cad kyang kun gzhi byang chub kyi sems dpe nam mkha'/ don chos nyid/ rtags bde ba chen po skye shi 'khor ba'i rgyun thams cad/ chos nyid dbyings su 'pho 'gyur med pas/ sangs rgyas dang sems can thams cad thig le chen po'i rang bzhin du 'ub chub pas/ gnyis su med pa'i ngang du gyur/ rtag chang rtog pa'i mtha' las 'das/ dpe gser gling du phyin pa ltar/ kun tu bzangapo la 'khor ba btsal gyis mi rnyed pas/ dbye ba med pa'i sa la mnyam pa nyid kyi gling du gnas pas/ rgyu 'bras kyi chos dang/ las dang/ sdug bsngal dang/ sku dang ye shes kyi chos thams cad la sems kyi dbang bsgyur bas/ rig pa'i rgyal po rang dbang rdzogs pas/ 'di ltar gnas pa'i rnal 'byor pas dbang bskur yang mi 'gal/ ma bskur kyang dbang thams cad rdzogs pas/ dper na dbyung la khas blangs mi dgos/ blang nas kyang mi 'gal ba dang 'dra'o// de'i phyir 'di skad ces gsungs so// yod cing rdzas su snang na yang// snang zhing srid pa'i ye shes rgyan/ / med cing chad par snang na yang// khams gsum thams cad stong pa'i dbyings// yod med gnyis las 'das na yang// don gyi mchog ni dbu ma yin// tshig dang yi ge thams cad kyang// sngags kyi rang bzhin chos kyi dbyings/ / dran rtogs thams cad ye shes la// sems kyi dkyil 'khor nang nas gsal// sems can thams cad sangs rgyas pas// rgyal ba'i sras po ye nas bsngags// gti mug nyid kyang chos kyi sku/ / ma rig nyid kyang yang dag lam// yang dag ma spangs thar pa'i lam// gang yang ma spangs thar pa'i gnas// bde ba gzhan du rag mi lus// byang chub sems kyi 'od gsal gyis// 'khor ba'i mun nag gnas nas gsal/ / rdzogs pa chen po'i don ston pa// ngan song sdug bsngal ming yang med// theg pa chen po'i klong bdal bas// sems can thams cad sangs rgyas yin// rtog pa 'dod dgur dbang sgyur bas/ / rgyal dang spyi blugs rang dbang thob// kun tu bzang po'i rang bzhin las// dus gsum 'pho 'gyur med pa'i phyir// yin pa'i don la yengs med pas// dbyer med sa las phyir mi ldog/ ma bcos ma g.yos bde bar gnas// dus gsum sangs rgyas 'phrin las phrid// lung 'di tshig tsam thos pas kyang// de dbang sems kyi gnas rnyed 'gyur// zhes gsungs pa dang/ tshig 'di yos pa dang grags pa tsam gyis/ kun tu bzang po'i bde ba chen pos ye nas sangs rgyas pa'i gnas/ lhun gyis grub pa nyid thob par gyur to// gang don bya lta ci smos so// des ni dbang gi dkyil 'khor chen po drug las/ gnas chen po'i rtsa rgyud rdzogs so// / bdag dang khro bo gnyis med par// yang nas yang du bsgom par bya// sku rnams gsal bar gyur pa dang// zhing chen 'og tu gzhug par bya// dkyil 'khor ma lus der bkod nas/ khro bo khro mo 'khor du bsgom// mngag pa'i pho nya phyogs bcur gtang// 'jig rten mi rnams dbang bsdus te// nr-i yi tshogs rnams kun bkug nas// zhing la yang nas yang du 'jug/ ting 'dzin che bas zla gcig ste/ / 'bring gi zla ba gnyis dang gsum// tha mas zla ba lnga ru ni// rtse gcig rtse gsum rtse lnga pas// 'du 'phro yang nas yang byas pas// snar dang ser dang mdog snum 'byung// de nas ting 'dzin bdud rtsi yis/ / lan grangs 'bum phrag mang por bzlas// bzlas pa'i tshul ni rnam gsum dang// rdo rje sngags zlos rtse gsum pa// de yi bar nas bzlas pa 'byung// 'od zer lnga dang ldan par bya// zhing de ltem ltem por gyur dang/ / bdud rtsi lnga yis bsku bar bya// de nas yi ge 'bru lnga dgod// yan lag lnga la yul lnga ste// dbang po lnga la sems dpa' dang// sems ma 'khril ba'i tshul gnas bya// rdo rje'i ting nge 'dzin gyis ni/ / gsal zhing 'tsher bar bsgoms nas ni// sngags kyi 'byung 'jug zhing la gzud// de nas zhing de 'gul gyur nas// shin tu zhags pas bsdam par bya// yan lag rnams kyang gzhum par bya// phyogs bzhi dag tu thod pa bstan/ / de nas nub tu thod pa bstan// ha ya gri ba'i skur bsgom zhing// sngags ni 'bum phrag mang du bzlas// phyogs bcur spro zhing zhing la bstim// de nas zhing de drag 'gul na// rdo rje ting 'dzin de yis ni/ / brtan pa nyid du bsgom par bya// de nas spar spar byed pa dang// a N+ri pri du tri gang yin// hri nri ar bsgyur ting 'dzin gyis// rdo rje drag tu brdeg cing dbab// thod pa'i kha nas hri byung nas/ / rdo rje ting 'dzin so yis bcad// rdo rje'i sngags zlos khong du bstim// gnyis su med par bsgom par bya// de nas zhing de langs pa dang// rdo rje byin nas dbang yang bskur// bdud rtsi'i chu yang blud par bya/ / las rnams thams cad byed du gzhug/ de ltar bsgrubs pa'i rigs mchog gis// thal ba thams cad sos par 'gyur// sgrub pa'i sa ni dur khrod dang// ri brag gnyan po bgegs gnas dang// gnas khrod gnyan po tshor ma can/ / gnod sbyin srin po 'byung po'i gnas// de dag tu ni bsgrub par bya// dgu dang bcu gnyis bcu gsum dang// bcu drug man chad bsgrub par bya// phyi nang mchod pa'i yo byad rnams/ / lam lnga'i zhing dang sman rnams bcang// 'bru rnams sna tshogs bcang bar bya// rtag tu tshogs kyis mchod par bya// rtag pa dag tu ma ldan na// nyin gsum mtshan gsum bar mi bcad/ kha zas rnams kyang thob par bza'/ / btung ba dag kyang de bzhin te// mar me rtag tu gtang bar bya// rgyu ni nr-i yi mar las byas// yan lag bsku ba'ang de bzhin no// sdong po pad+ma'i rgyu las bya// snod ni dung chen srubs med pa/ / lung po yod dang med kyang rung// de byi pu tra ma byung ba// mdog ni ban glang can la yod// rdo rje sgrub pa bar gcod phyir// rtag tu mtshams ni gcad par bya// nr-i yi rkang pa g.yas g.yon nas/ / sbom po ma yin phra ba nyid// de la kI la ya byas la// phur pa'i sngags dang khro sngags dang// lan 'bum du ni bzlas nas ni// lag pa g.yas g.yon thal sor la// khro bo bcu dang khro mo bcu// 'od 'bar gzugs kyi sku ru bsgom/ / de nas gnyis med sbyor tshul du// sgrub pa rdo rje bsgom par bya// sgrub pa dngos las ma gtogs pa// phyogs bcu rnams su mtshams yang gcad// dngos grub ma thob bar du ni/ / bsgom dang bzlas dang phyag rgya gsum// bag yod mgo la me 'bar bzhin// bar mtshams med par bsgrub par bya// de ltar sgrub pa'i rigs mchog gis// lha ma srin rnams bran bzhin 'khol// 'jig rten dbang phyur dbang du sdud/ / rdo rje rigs mchog 'khor rkyen rnams// yid bzhin du ni 'byung bar 'gyur// rdzu 'phrul chen po de dag ni// lus sdud nas ni mngon du phyung// de ma yin par shin tu gsang// rgyud kyi rgyal po sgyu 'phrul dra ba las/ ro langs sgrub pa'i le'u ste nyi shu lnga pa'o//// de nas de bzhin gshegs pa rgyud kyi rgyal po sgyu 'phrul drwa ba las ting nge 'dzin gyis rim par sbyong zhing/ dngos grub myur du len pa'i thabs dra ba las 'di skad ces gsungs so/ / dkyil 'khor bsam yas dngos grub pa// mi dmigs dbyings las don 'byin te// ma bcos ji bzhin ngang bzhag dang// lhun gyis grub pa'i dkyil 'khor 'byung/ / mi dmigs thugs kyi dkyil 'khor las// ting nge 'dzin gyi dbang sgyur nas// ye shes sprul pa sna tshogs 'grub// spyod yul thams cad maN+Dal// ye shes dkyil 'khor thar byed skyong/ / longs spyod sku dang sangs rgyas zhing// de ltar 'dod pa smon na 'grub// yangs shing rgya che lhun grub ni// phyi nang snod bcud ye nas dag/ dag rtogs nyid kyang dbyings nyid de// 'di ni rdo rje mnyam yin no/ / dngos grub myur du 'grub 'dod na// shin tu phra zhing zab par bsgom// bdag dang bdag gi gzhan rnams ni// shin tu mi dmigs dbyings su bsgom// ting nge 'dzin de goms pa dang// thams cad sgyu ma mig yor dang/ / sprul pa'i tshul du shes bar bya// de bzhin yang nas yang goms nas// de nas phra ba'i ting 'dzin bsgom// phyi nang snod bcud hUM du bsdu// gang sgrub yi ge so so ste// spyir ni gang bsgom kun tu 'dra/ / rdo rje sems dpa' nyid du 'du// yan lag lnga dang rnam shes nyid// yi ge hUM du shin tu bsdu// nr-i yi mig gis bltar yod bar// yang nas yang du 'dis pa dang// 'od zer mang po spro bar bya/ / phyogs bcu dus bzhi gang ba dang// slar yang hUM la bstim par bya// hUM nyid mi dmigs dbyings su thim// thim gyur dbyings nas a dkar 'bar// shin tu 'tsher bar gsal bsgoms la// thams cad a ru gyur par bsgom/ / de bzhin nyid du 'dris gyur nas// a las ma'i dkyil 'khor spro// a ma gsal bar 'byor gyur nas// nyi zla gang bar sgril mar bsgom// hri gsal pad+ma chags med bsgom// rin chen 'bar ba'i gzhal med khang/ / nyi zla gdan dang bcas par bsgom// thams cad 'dus shing 'phro bar bsgom// de dkyil yi ge hUM gnas pa// mthing kha 'tsher la gsal ba yi// 'od zer 'phro ba rnam par bsgom/ / 'od 'phros dbyings su slar bsdus nas// shin tu rdo rje 'phro bar bsgom// rdo rje 'od 'phros gsal 'bar nas// dbyings su yang ni bstim par bya// de nyid sems dpa'i skur gyur nas// shin tu phra zhing 'dus par bsgom/ / de bzhin gnyis med gsal gyur nas// sku gcig rdo rje dril 'bar bsgom// de bzhin nyid du gyur pa dang// dbu gsum phyag drug nyid du bsgom// gzhan yang khro 'dul sna tshogs bsgom/ / blo yi shes rab che chung las// rim pa bzhin du bsgom par bya// yang na gcig char bsgom par bya// nyi zla gza' skar dus gcig tu// chu dkyil dngas par gsal ba bzhin// de ltar goms rtogs rigs mchog des/ / ji ltar dbang sgyur bzhin du 'grub// mkha' lta 'phyo dang rigs 'dzin gnas// chu rgyun zlog dang rlung mi 'gul// ri brag la sogs thogs med 'dzul// chu la mi 'bying mes mi 'tshig/ dug dang mtshon gyis 'jigs mi 'gyur/ / mi snang ba dang mang por sprul// gzhan yang ji ltar 'dod pa bzhin// lha srin rnams la dbang sgyur dang// tshe dang dus la bsring bstung dang// stong gsum nyungs 'brur shong ba dang/ / yungs 'brus stong gsum khengs pa dang// ji ltar dmigs pa bzhin du 'grub// sbrul dang gcan gzan gdug pa rnams// khyi bzhin phyi nas 'brang bar 'gyur// bdud dang gdug pa la sogs pas/ / tshugs par mi 'gyur bran bzhin 'gyur// lus ma spangs par rigs 'dzin sa// ye shes bsod nams longs spyod kyis// yi ge 'khor lo tshogs mchog brnyes// thugs rje sprul pa'i byin brlabs kyis/ / so sor thar pa'i lam yang ston// 'gro ba ma lus don yang byed// las rnams thams cad kun byas na// skye shi med pa'i g.yung drung thob// mtshan dang dpe byad kun gyis brgyan// bsod nams ye shes tshogs chen ldan/ / mthar phyin bya ba med pa 'grub// sgrub med spangs med chos kyi dbyings// 'ong med 'gro med de bzhin nyid// 'di ltar bsgrubs te bsgoms byas na// 'bras bu mngon du ma gyur kyang/ / tshe rabs skye ba thams cad du// las ngan kun tu skye mi 'gyur// theg pa dman par yongs mi 'gyur// rdo rje'i rigs mchog 'dzin par 'gyur// zhes rdo rje gsang ba'i tshig tu'o// shin tu gsang ba dngos grub myur du thob par bya ba'i le'u ste nyer drug pa'o/ /// de nas de bzhin gshegs pa rgyud kyi rgyal po sgyu 'phrul dra ba las// sku'i dkyil 'khor mngon du phyung ste 'di skad ces gsungs so// de bzhin nyid kyi dbyings ldan te/ / rgyu dang dra bar 'brel gyur nas// rgyu mchog rdo rje 'od snang ba// mthun pa'i ye shes rang snang ba'o// rgyu drug 'khor ba'i lus snang ba// rnam rtog mthun pa'i las snang ngo// de bzhin sku mchog dri bral dang/ / bde gshegs sku lngar mdor bsdus te// bcom ldan 'das dang byang chub gzugs// bla med gzugs dang rdo rje'i sku// de la sogs te sku bsam yas// phyogs bcu kun tu dus bzhir ni// thabs kyis 'gro 'dul skur ston te/ / byang chub sems ni rdo rje'i sku// chags med zhing du sku ston pa// dbyings las ma g.yos bzhin du snang// sku snang de bzhin nyid kyi dbyings// rnam dag sku ston ma yin te// log 'gro rtog pa thams cad la/ / so sor 'dul ba'i skur yang ston// de tshe skye shi med pa'i sku// las dang ma chags pad+ma'i sku// thar dang ma thar sna tshogs kyang// sna tshogs snang la gnas pa med// snang dang mi snang gnyis ka min/ / de ltar rtogs pa'i rigs mchog ni// rdo rje zhes ni gdags pa yin// ji snyed sku ston bsam yas pa// thams cad ma lus rdo rjer bsdus// 'khor lo zhes kyang brjod pa yis// de la sogs te sku bsam yas/ / byang chub thugs kyi dkyil 'khor nas// sku ni sna tshogs thams cad kyang// gzha' tshon chu zlar 'drar shes na// dbyings nyid la ni dbyings snang zad// thugs nyid gsung gi dkyil 'khor snang/ / gsung nyid sku yi dkyil 'khor te// dbyer med de bzhin yong gis so// dkyil 'khor bzang po sgrub 'dod las// rtag tu dus gnas thams cad du// bdag dang bdag gi dbyer med par// ye nas dkyil 'khor yin par rtag/ 'di ni dngos grub mchog yin par// kun tu rgyal gyis de skad bshad// sgyu 'phrul dra ba las// sku'i dkyil 'khor mngon du phyung ba zhes bya ba'i le'u ste nyer bdun pa'o//// de nas de bzhin gshegs pa rgyud kyi rgyal po sgyu 'phrul dra ba las/ sngags 'chang rnams don yod par bya ba'i phyir/ dam tshig sum brgya'i rtsa ba mdor bsdus nas/ sngags 'chang rnams kyi don ched du/ ched du brjod pa 'di ched du brjod do/ / phyogs bcu'i 'jig rten rdul phran snyed// rtog 'dul gnyen po bsam mi khyab// 'dul ba sdom pa bsam yas dang// rdo rje theg mchog mang po kun// nyid las g.yos shing spros med kyang/ / rang rig 'phrul pa'i rtog pa yis// lta ba mtho dman bsam mi khyab// de 'dul don phyir bsam par bstan// yang dag nyid dang log rtog nyid// ngo bo nyid kyis gnas gyur na// de la bcos shing bsgyur du med/ / ye nas ngo bo yod yin na// nyon mongs spang zhing byang sgrub med// thams cad ma lus ro gcig 'gyur// kun rdzob chu zla ltar yin pas// cir yang 'gyur zhing cir yang 'grub// rnal 'byor de nyid rtogs pa yis/ / don dam skye 'gag med pa ste// kun rdzob sgyu ma cir yang 'grub// gnas ngan dus na log rtog nyid// gzung 'dzin bral ba nyid rtogs na// bdag med ye shes rang rig nyid/ / snying rje thabs mkhas ting 'dzin gyis// ji ltar dmigs pa bzhin du 'grub// so so'i rang bzhin nges she na// yang dag lam gyis bcos su med// de bas yang dag blo chen gyis// thams cad dngos po med par bshad/ / dper na dug gi rigs shes pas// dug gis mi tshugs thabs yod ltar// ha la ha la'i dug rnams kyang// bsgrubs na ra sa ya na'i sman// bdud rtsir 'gyur la tshe ring 'grub// nyon mongs rang dang spyir bstan pa/ / mtshan nyid ma nor don rtogs na// rnam par byang ba'i lam du 'gyur// sku gsung thugs kyi dngos grub kyang// gang na'ang med de de nyid yin// nang gi chen po lnga nyid kyang// rang dang spyi yi don brtags na/ / mtshan nyid med pas rnam par dag/ so so'i rtsal rnams 'dzin gyur pas// thabs chen du ni rnam par 'phro// mtshan rnams rang bzhin mi gnas pas// shes rab dbyings su rnam par sbyong/ / gti mug ces ni brjod pa yang// ma rig ming gi rnam grangs te// gnyis med don gcig yin par bshad// rang gi mtshan nyid spyod pa ni// chos dang bdag dang dngos po rnams// ngo bo yod la sogs brtag pa/ / rtog pa sgyu ma'i klung gyur te// log rtog spros pa'i rgyun yin la// thams cad chos dbyings ro gcig ste// bzod pa'i chos nyid dmigs can yin// spyi yi mtshan nyid brjod pa ni// mi rtag sdug bsngal stong bdag med/ / ma rig pa ni spang du med// rig pa yang dag sgrub tu med// thams cad dbyings su ro gcig thim// sgyu ma'i dngos por rtog pa ni// sgyu mar rtog nyid mi dmigs pas// mi dmigs de nyid sna tshogs snang/ / skye pa nyid na chos nyid gcig/ dbyings nyid mi dmigs de bzhin nyid// de nyid chos sku'i phyag rgya che// mi dmigs sgyu ma'i dngos po la// rtog pa'i yul gyis dngos nyid kyang// chos nyid mi dmigs ye nas dag/ sgyu ma mi dmigs dbyer med phyir// yod med gnyis ka dbyer med pas// ting nge 'dzin gyis dbang sgyur na// thugs kyi phyag rgya chen po yin// chos nyid dmigs su med pa ste/ / mi dmigs bzhin du sgyu mar spro// gdul bya'i bya ba bsam mi khyab// gsung gi phyag rgya chen po'o// de ltar gti mug spang du med// rnam par snang mdzad rgya chen yin// zhe sdang rang dang spyir bstan pa// kun nas mnar sems rtogs pa yi/ / sgyu ma'i dngos po thams cad la// 'jug par mos pa'i rang bzhin can// spyi yi mtshan nyid brjod pa ni// mi rtag sdug bsngal stong bdag med// zhe sdang snying rje spang bsgrub med/ / chos kyi dbyings su ro gcig phyir// sgyu ma'i rang bzhin mnar sems pa// dngos po thams cad 'jig rtogs na// sgyu mar snang ba thams cad kyang// chos ky-i dbyings las mi gzhan te// mi dmigs pa nyid sgyu mar skye/ / chos rnams kun gyi rang bzhin ni// bdag dang srog dang sems can dang// gang zag gso ba'i rang bzhin med// snang ba thams cad bdag med de// mnar sems chos kyi dbyings su gcig/ thams cad mi dmigs de bzhin nyid// kun dang dbyer med chos sku yis// kun la rtag pa'i phyag rgya yin// mi dmigs de ltar snang pa la// phyin ci log gi blo bslad pas// rtog pa'i yul la mnar sems te/ / chos nyid sgyu ma mi dmigs shing// myang 'das 'khor bar dbyer med phyir// don dam kun rdzob ro gcig ste// ting nge 'dzin gyis dbang bsgyur na// thugs kyi phyag rgya chen po yin// mi dmigs sgyu ma'i chos nyid las/ / gdul bya'i zhing ni bsam yas sprul// 'dul thabs las kyang bsam mi khyab// gsung gi phyag rgya chen po'o// zhe sdang spyi yi mtshan nyid ni// yang dag nyid kyis rab brtags na// rnam par byang ba'i mtshan nyid de/ / gnyis med zhe sdang spang du med// nga rgyal mtshan nyid bshad pa ni/ khong nas 'gying zhing sems khengs pa// pha rol zil gyis gnon par byed// spyi yi mtshan nyid bshad pa ni// mi rtag sdug bsngal stong bdag med/ / nga rgyal spangs nas zhi bsgrub med// chos kyi dbyings su ro gcig pas// kun rdzob sgyu mar khong 'gying nyid// de bzhin nyid las mi gzhan te// chos nyid mi dmigs med pa las/ / dregs pas khong khengs 'gying bar skyes// skyes 'gying nyid na dmigs med de// skye 'gag med pa'i dbyings su gcig/ 'gying ba'i rang bzhin ngang gis dag/ 'gying dang mi 'gying dbyer med phyir// chos sku'i phyag rgya chen po yin/ / mi dmigs 'gag pa med pa nyid// log rtog sgyu ma 'gying bar skyes// 'gying bas yul gzhan gnon pa nyid// chos kyi dbyings las mi gzhan te// sgyu ma chos nyid dbyer med phyir/ / don dam kun rdzob gnyis ka gcig/ ting nge 'dzin gyis dbang sgyur na// thugs kyi phyag rgya chen po yin// mi dmigs sgyu mar 'gying ba ni// nga rgyal gdul bya bsam mi khyab// gsung gi phyag rgya chen po yin/ / nga rgyal spyi yi mtshan nyid ni// rnam par byang ba'i mtshan nyid de// zhi sgrub nga rgyal spang du med// 'dod chags rang gi mtshan nyid ni// sred pa kun la zhen pa ste// spyi yi mtshan nyid bshad pa ni/ / mi rtag sdug bsngal stong bdag med// chags spangs ma chags sgrub tu med// chos kyi dbyings su ro gcig phyir// kun rdzob sgyu ma'i rang bzhin du// 'dod cing chags pa sgyu mar srid// mi dmigs pa la mi gzhan phyir/ / mi dmigs de nyid sgyu mar skyes// chos rnams bdag las mi gzhan te// spyod pa sgyu mar ro gcig phyir// chos nyid chos can dmigs su med// rgyal ba kun dang dbyer med phyir// chos sku'i phyag rgya chen po yin/ / mi dmigs sgyu mar 'dod sred cing// chos nyid de la chags rtog pa// yul dang 'dod chags rang nyid kyang// skye med chos nyid mi dmigs te// sgyu ma mi dmigs dbyer med phyir// bden gnyis dbyer med ro gcig pas/ / ting nge 'dzin gyi dbang sgyur na// thugs kyi phyag rgya chen po yin// mi dmigs dbyings nyid spros med las// 'dod chags sgyu mar spros pa ni// gdul bya'i bya ba bsam mi khyab/ / gsung gi phyag rgya chen po yin// 'dod chags mtshan nyid rtogs pa ni// rnam par byang pa ma yin phyir// chags dang ma chags gnyis med par// 'dod chags mtshan nyid spang du med// phrag dog kun gyi mtshan nyid ni/ / gzhan gyi phun sum tshogs pa la// sems dog rtog pa sgyu ma gzhan// thabs kyi sbyor ba'i rang bzhin can// phrag dog spyi yi mtshan nyid ni// mi rtag sdug bsngal stong bdag med// dog pa spangs shing yangs sgrub med/ / chos nyid du ni ro gcig phyir// kun rdzob sgyu ma'i mtshan nyid ni// gzhan gyi phun sum tshogs pa la// phrag dog pa yi sgyu ma nyid// mi dmigs pa las mi gzhan te// mi dmigs pa nyid sgyu mar skyes/ / phun sum tshogs par sbyor ba yi// thabs kyi sgyu ma'i chos nyid de// rgyal ba kun dang dbyer med pas// chos sku'i phyag rgya chen po yin// gang yang yangs dog mi dmigs las// sgyu mar gzhan gyi phun tshogs la/ / phrag dog rtog par 'dzin pa dang// rtog pa'i phrag dog mi dmigs te// sgyu ma mi dmigs dbyer med phyir// bden pa gnyis kar ro gcig pa// ting nge 'dzin gyis dbang sgyur na// thugs kyi phyag rgya chen po yin/ / mi dmigs gzhan gyi phun tshogs la// phrag dog rnam rtog spros pa ni// gdul bya'i bya ba bsam mi khyab// gsung gi phyag rgya chen po'o// phrag dog mtshan nyid rtogs pa ni// rnam par byang ba'i mtshan nyid de/ / dog pa spang med yang sgrub med// sems can rnam pa mang po kun// nang gi chen po lnga bstan pa// rang spyi'i mtshan nyid spyad par bya// thabs dang shes rab ma rtogs pas// ma grol khams gsum 'khor ba yin/ / de ltar nges par ci mngon na// sngags kyis yongs su zin pa'i nad// kun la gnod par byed mi nus// thabs dang shes rab rtogs pa yi// dug gsum sdug bsngal gnod mi 'gyur/ / thabs la mkhas pas ma zin na// lam gyi dge spyad stegs bcas kyang// mtho rigs lha dang mi ru skye// skye shi med pa'i sa mi thob// thabs mkhas snying rjes zin pa ni// mtshams med sems can ma lus kun/ / byang chub snying rje bsad na yang// bsod nams dpag tu med pa 'thob// ma bsad bsad pa'i sems med na// phyogs can sems can yal por te// snying rje med de sdig yod 'gyur// 'dod chags zhe sdang gti mug dang/ / nga rgyal phrag dog chen po dag/ gang phyir byang chub sems de ni// rdo rje de bzhin gshegs par gsal// nyon mongs pa nyid de bzhin gshegs// ngo bo yin par yang dag gsung/ / chos kun rang bzhin dag pa'i phyir// 'khor ba yongs su dag par 'gyur// thabs dang shes rab ldan pa la// nyon mongs thams cad byang chub rgyu// 'khor ba'i rang bzhin bdag med pas// de phyir de bzhin gshegs bsam yas/ / thabs dang shes rab ldan gyur pas// phyin ci log nyid byang chub lam// 'khor ba'i rang bzhin mi dmigs phyir// mya ngan 'das pa yod ma yin// gsang sngags bla na med pa ni/ / thabs kyis ji ltar zin bzhin 'grub// bsam gyis mi khyab nges pa med// don dam cir yang ma grub la// sgyu ma'i sprul pa bsam mi khyab// theg chen dag gis zin pa ni// nyon mongs lam yang rnam par grol/ / thabs chen dag gis ma zin na// dge ba spyad kyang grol mi 'gyur// rnal 'byor don dam ldan pa yis// nyon mongs 'ching ba'i chos spyad kyang// rnam par grol bar 'gyur ba yin// 'khor ba dang ni mya ngan 'das/ / gnyis ka yod pa ma yin pas// 'khor ba stong par shes pa ni// de ni mya ngan 'das pa'i mtha'// nyon mongs phyin ci log rnam dag/ thabs la mkhas pas zin gyur kyang// grol la thar par mi 'gyur na/ / byang chub sems dpa' rnams kyis ni// 'dul ba'i dbang gis bya byed kun// sngon dang smad 'tshong byed pa'ang lhung// byang chub sems dpa'i spyod tshul bzang// phal la med pas mi rung na// sngags mchog shin tu zab pa yi/ / skye bo kun gyis dpya bar 'byung// de nas dges pa chen po des// bdud rtsi dang du blang bar gsungs// mnyam dang mi mnyam dbyer med na// sku gsung rdo rje'i dbang thob 'gyur/ / grub pa'i rdzas su de phyir gsungs// mnyam pa'i don nyid ma rtogs na// byol song la la mnyen zhing dul// zhi dul chos dang ldan gyur yang// drang srong gtsang ma 'phags mthun dang// ji srid 'dod pa spong byed pa/ / de dag grol bar ngas ma bshad// chos rnams yongs kyis dag pa nyid// rnam bzhi'i tshul gyis don rtogs mngon// rgyu rnams rab tu dag pa dang// 'bras bu yongs su dag 'gyur te/ / don dam dmigs med rang bzhin dag/ kun rdzob sgyu mar ye nas dag/ rgyu yi mtshan nyid dag pa ni// phyi rol chen po lnga rnams te// sems nyid gzung 'dzin nyid snang ba// gzung ba'i yul nyid 'byung ba che/ / rgyu nyid rang gi sems yin pas// 'byung ba chen po rgyu nas dag/ 'bras bu yongs su dag pa ni// sems can kun gyi rus pa ste// rdo rje byang chub sems yin la// sha ni pad+ma'i rak+ta yin// dri chen dri chu gur kum chu/ / so so'i lus la gnas pa dag/ don dam dmigs med dag pa ni// phyi nang chos rnams thams cad kyang// gang gi ngo bo'ang ma yin te// skye 'gag med par ye nas dag/ kun rdzob ye nas dag pa ni/ / sgyu ma'i rang bzhin thams cad snang// chu zla'i tshul du mi dmigs gnas// mi dmigs pa nyid sna tshogs snang// de bzhin gshegs par ye nas mnyam// de bas gtsang sme med par spyod// sems can rtog pa bzlog phyir sman/ / gtso ru dang du blang bar bya// de bas sems can phyin ci log/ chos rnams dag par ma shes pas// thabs dang shes rab ma rtogs te/ kha cig ji srid 'tsho bar zos// byol song ma lus rtswa mchog za/ / lha dang drang srong gtsang ma za// zos kyang ma grub don ma rtogs// rnal 'byor thabs ldan rnams kyis ni// rang bzhin yong gis dag pa yis// mnyam pa'i dbyings su yang dag rtogs// thabs dang shes rab 'brel ba yis/ / the tshom med par 'grub par 'gyur// dngos dang dngos med rtogs pa'ang mtshan// gtsang dang mi gtsang rtogs pa'ang mtshan// mtshan ma gnyis kyang rnam spangs te// mkhyen pas dbus la'ang gnas mi 'gyur/ / sgrub pa'i rdzas yang dag gsungs// byang chub sems dang sha chen dang// dri chen dri chu rak+ta dag/ bsgrub pa pos ni rtag tu bza'// dngos grub ya mtshan chen po 'grub// tshe la dbang dang rig pa 'dzin/ / mkha' la 'phyo dang thogs med 'grub// mthar ni skye med rdo rje'i sa// gzhan yang ji ltar dmigs pa bzhin// 'grub 'gyur 'di la the tshom med// gsang ba'i snying po'i don nyid kyis// yi dam mi spang brtag bsgom zhing/ / yi dam lha yi mtshan nyid ni// de bzhin gshegs pa thams cad kyi// lha spangs dge spyad don med 'gyur// lha ni mi spang don nyid ni// lhun grub ye shes sems dpa' nyid// 'khor dang bcas pa thams cad kyi/ / sku gsung thugs kyi bdag po ste// phyag rgya chen po'i sku rdzogs na// dkon mchog gsum po mchod pa yin// bdag nyid lha dang mnyam sbyar na// yon tan chung yang 'grub par 'gyur/ / ye nas mnyam gnyis sbyor bas su// lha nyid du ni rtag tu bsgom// bde gshegs kun dang mnyam sbyor pas// dkyil 'khor kun dang mnyam par 'byung// bde gshegs kun dang mnyam pa'i phyir/ / sku gsum ye shes lnga rdzogs 'grub// rdo rje slob dpon smad mi bya// byang chub ston pa'i 'dren pa po// long ba'i dmigs bu 'dren dang 'dra// nyon mongs sdug bsngal mtsho skems yin// slob dpon de la smod pa ni/ / dper na mun khang sgron bsad na// mthong ba'i don mi rtogs pa bzhin// sdug bsngal nyam thag yun rings su// bskal pa mang por myong par mngon// de bas gus pas rtag tu gyis// yul la dbang ba'i rgyal po pas/ / shin tu gtso bar blang bar bya// drin chags skyed pa'i pha ma bas// shin tu lhag pa'i ri mo bya// rdo rje mched dang lcam dral ni// bla med byang chub 'gro ba'i spun// chos nyid dam tshig smon lam mthus/ / byang chub rigs 'dzin sar nges pas// de la ldog cing 'khu ba ni// rang la rang gis mtshon btab nas// rang srog tshe rabs lnga brgya'i bar// rang gis gcod cing phung bar 'gyur// tshe 'dir mi bde sna tshogs pa/ / mi 'dod bzhin du 'byung bar 'gyur// 'jig rten pha rol dag tu yang// ngan song gsum dang mi khom pa'i// sdug bsngal kha rgyud myong bar 'gyur// yun rings rtag tu mi thar pa'i// shin tu nyam thag myong bar 'gyur/ / grub pa gcig bzhin lhan cig spyad// gnyis med spyod dang rjes spyod spun// bde gshegs dkyil 'khor bla med yin// shes rab gsal bas rtag tu gdung// yang dag nyid kyis de skad gsungs/ / gsang ba'i gzhan la mi bsgrag cing// sku gsung thugs kyi dam tshig rnams// rnal 'byor rnam pa rnam gnyis kyis// thabs dang shes rab 'brel rtogs na// mnyam pa'i spyod pas la dor ro/ / phal dang mi 'dra yang dag rtogs// ma rtogs pa yi phyogs rnams dang// skye bo kun la rtag tu gsang// gsang phyir brda dag sna tshogs gsungs// thabs la mkhas pas byas pa yi// gsang sngags skyon yod ma yin te/ / thugs rje chen po thabs mkhas pas// snod ma yin dang blo rtul rnams// las 'phro ngan pa'i don phyir gsang// brgya la gang zhig gsang don 'di// las 'phro ngan la bsgrags gyur na// dper na gtsub shing me gtsubs na/ / gtsub shing nyid kyang 'tshig par snang// gzhan yang 'tshig par 'gyur ba bzhin// chos don bzang po me dang 'dra// skal ba chung zhing shes rab dman// blo ngan rgyu 'bras rmongs pa'i mis/ / mnyam pa nyid la mi gnas pas// ngan song gsum du 'phang bar 'gyur// gsang thos ma rtogs sdug bsngal myong// gsang ba 'phel bar byed pa yang// smra byed lce la zhing rmo zhing// sdug bsngal chen po myong bar 'gyur/ / des na sems can don phyir gsang// rlung phyogs tsam du'ang brjod mi bya// sngags dang phyag rgya rgyun mi gcad// sngags zhes rab tu bsgrags pa yang// don dam kun rdzob dbyer med pa'i/ / mnyam pa'i dkyil 'khor chen po ru// sku gsung thugs kyi yi ge A+oM// de la sogs pa bzhi bcu gnyis// phyag rgya chen po'i mtshan nyid ni// phyogs bcu dus bzhir gshegs pa yi// sku gsung thugs dang ye shes lnga/ / bdag dang dbyer med phyag rgya che// gsal la brtson pa'i yon tan ldan// yid bzhin ma chags dbang sgyur te// goms shing brtan par bya ba yin// de bas bar chad brtson med na// dper na sa bon tshig pa las/ / 'bras bu 'dod pa 'dra ba ste// bsgrub pa'i 'bras bu med par 'gyur// mi khom 'khor bar gnas 'gyur te// rnal 'byor chen po la zhugs pas// phyi nang chos rnams thams cad la/ / dmigs med gcig dang du ma bral// mtha' dbus gang yang ma yin pa'i// ngo bo nyid med mtshan nyid med// mnyam pa chen po'i phyag rgya yis// phyogs bcu dus bzhi thams cad dang// 'jig rten 'das dang 'jig rten pa'i/ / yon tan skyon rnams skye 'gag med// gang gi ngo bor ma grub mnyam// kun rdzob chos nyid dbyer med pa'i// mi dmigs gang gi ngo bo'ang min// chu zla'i tshul du sna tshogs pas// snang zhing bya ba byed nus pas/ / phyag rgya chen po'i phyogs bcu dang// dus bzhi khams gsum thams cad dang// 'jig rten pa dang 'jig rten 'das// yon tan skyon rnams thams cad kyang// sgyu mar mnyam par ye nas gnas/ / sngags 'chang gsal por rtogs byas nas// bdag nyid chos nyid skye 'gag med// ngang las ma g.yos par gnas na// phyag rgya chen po thams cad kyang// rdzogs par phyogs bcu dus gsum gyis// de bzhin gshegs pa'i sku gsung thugs/ / thams cad dbyer med ye mnyam la// ma 'dres rgya yongs ma chad pa'i// gzhal yas khang dang nyi zla yi// dkyil 'khor bsam yas lhun grub ni// sku gsung thugs ni bsam mi khyab/ / mnyam pa'i dbyings chen rdzogs par bsgom// de ltar dam tshig 'di gsungs te// de la gnas na 'grub par 'gyur// yan lag ma nyams sngags bzlas shing// 'dod pa kun la longs spyod bya/ / lus dang ngag sems brtan gyur na// byang chub rab 'byams thob par 'gyur// dam tshig chen po las 'das na// nyen ni shin tu che bar gsungs// sangs rgyas byang chub sems dpa' dang// sngags kyi spyod pa don grub pa/ / rmongs pa gal te 'das byas nas// de yi srog kyang der zad 'gyur// dam tshig bsrung dang sngags bzlas dang// phyag rgya rgyun mi bcad pa bzhi// brtson 'grus che zhing brtan pas zung/ / rnal 'byor brtson 'grus chung gyur na// mi 'grub nyen yang che bar gsungs// ji ltar ral gri rnon po la// legs par bzung ba ma byas na// nges par lag pa chod pa ltar// de bzhin nan tan med pa yi/ / gsang ba'i sngags ni bzlas pas kyang// yan lag sku ni ma gsal na// 'chi ba'am 'bras bu med par 'gyur// rnal 'byor dam pa rnams kyis ni// don ldan ma nyams dag byas shing// brtson 'grus cher bskyed myur bar 'grub/ / sngags bsgom ma nyams phyag rgyar gsal// cho ga yo byad gtsor ma gsungs// 'tshogs na yang ni nyes pa med// ma 'tshogs na yang 'grub par 'gyur// bdag nyid rang gi lhar sbyor bas/ / dngos grub thams cad 'grub par 'gyur// cho ga lhag gam ma tshang yang// 'grub par 'gyur te nyes skyon med// ces gsang ba'i tshig tu'o// dam tshig sum brgya pa rtsa ba bco lnga pa mdor bshad pa'i le'u ste nyi shu brgyad pa'o/ /// de nas de bzhin gshegs pa rgyud kyi rgyal pos/ dam tshig bco lnga pa'i mdo 'di ltar yang bshad de/ thams cad mkhyen pa'i ye shes kyis// thams cad mnyam pa'i ngang nyid du/ / dbyings su ro gcig de bsdus te// don du mi 'gyur yong ma gsungs// yon tan mchog gi 'dod pa ni// snang srid ma lus thams cad kun// mnyam pa'i zhing du sbyor bas na// chags pa med pa'i tshul du spyod/ / 'di ni rnams dag legs pa'i lam// byang chub mchog tu 'gro ba'i gnas// bde mchog mi zad rin chen gter// cis kyang mi tshugs rdo rje'i sku// nyon mongs sdug bsngal 'dod chags ni// lus dang zas kyis bsgribs 'gyur te/ / yi dwags sdug bsngal gnas su 'gro// skom dang bkres pa'i nyon mongs 'gyur// rnag khrag ngan skyugs rtag mthong yang// de la spyod pa'i dbang yang med// rtsub shing gdug bas bsrung bar 'gyur/ / thugs rje chen po'i zhe sdang gis// 'khor ba'i lam lnga sgo bcad cing// bde gshegs lam du 'dzud par byed// yang dag don dang ldan par 'gyur// thugs rje'i tshul gyis khro ston pa/ / shin tu mnyam pa'i ngang du 'jog/ rdo rje sems dpa' zhi ba'i sa// yang dag mchog gi bde ba 'grub// ye shes gsal ba'i gti mug ni// bdag dang bdag gis dbyer med de// rang bzhin med pa'i dbyings la rol/ / thams cad brjod du med pa'i ngang// kun tu khyab pa'i sku mnga' ba// shin tu 'od gsal rnam dag lam// byang chub sems dpa'i sgrib pa sbyong// sems can nyon mongs dug sel 'gyur/ / thams cad zhing sbyong nga rgyal ni// yon tan skyed pa'i mdzod yin te// nga med bdag med mi dmigs la// su zhig de la nga rgyal med// dpung bzhi'i tshogs kyis mi thub pa'i// shin tu rgyal ba'i khyu mchog 'grub/ / lha srin bdud sde tshar gcad pa'i// dpa' bor 'gro ba'i ting 'dzin thob// phrag dog yangs pa'i don sbyor ba// nga dang bdag med don rtogs na// dog dang yangs pa gnyis ka med/ / bde mchog dkyil 'khor yangs pa 'grub// phrag dog dngos po mi shes bzhin// nga dang bdag tu 'dzin gyur na// lha ma yin gyi gnas su skye// de nas yi dwags dag tu 'gro// gal te yul sa rnyed gyur na/ / shin tu mi bde dog par 'gyur// gzhan yang longs spyod thams cad la// dbang byar med cing gzhan dbang 'gyur// mdor na nyon mongs sdug bsngal 'grub// phrag dog yang dag rtogs pa ni// nga dang bdag tu 'dzin pa dang/ / phyin ci log la phrag dog ste// thams cad gnyis su med par sbyor// bde ba mchog kyang 'grub par 'gyur// gnyis med don yang rtogs par 'gyur// nga med bdag med dbyings su thim/ / lhun grub don mchog 'grub par 'gyur// yi dam lha ni rtag bsgoms na// rgyu 'bras lhun gyis grub pa yi// bdag gis kun la dbang sgyur te// rigs 'dzin gnas su skye bar 'gyur// rdo rje slob dpon smad mi bya/ / yon tan rin chen gter chen po// thams cad ma lus ston pa ste// nyon mongs ma lus rtsa gcod pa// bla med 'bras bu thob par byed// lus la dbang ba'i rgyal po bas// shin tu lhag pa'i bkur bsti bya/ / drin chags bskyed pa'i pha ma bas// shin tu gdung zhing brtse bar bya// sngags dang phyag rgya rgyun mi gcad// phyag rgya chen por rtag tu bzhag/ sngags ni rtag tu brjod par bya// nyin yang lan gsum mtshan lan gsum/ / mkhas pa dag gis rgyun du bya// bar ma chad bar bsgrims te gnas// gsang ba'i man ngag spel mi bya// rdo rje'i lce yi tshul yod kyang// theg pa dman dang ma 'dres pa// skye bo phal la smra mi bya/ / rdo rje mched dang lcam dral la// mngan sems spya sems smad pa dag/ rji phyogs tsam du'ang smra mi bya// shin tu gdung zhing brtse bar bya// bdud rtsi sman rnams rtag tu spyad// bla med 'gro ba'i gsos yin pas/ / gtsang sme med par bza' bar bya// yid bzhin bdud rtsi dbang byed 'gyur// 'dod chags zhe sdang gti mug dang// nga rgyal phrag dog chen po ni// sangs rgyas lnga po de yin pas// mi spang rtag tu bsgrub par bya/ / dam tshig dam tshig ces bya ba// gud na yod pa ma yin te// rang gi lta ba dam tshig yin// mi gtong phyir yang dam zhes bya// gzungs su gyur pas dam zhes bya// rdo rje dam pa slob dpon des// rdo rje ma nor lam ston pas/ / de la yang ni tshig ces bya// yang na de bzhin bka' bcag pas// mi khom gnas su 'tshig par 'gyur// dam tshig ces ni de la brjod// rdo rje rigs kyis bsgrub bya ba// sbyor dang sgrol bas mthar phyin 'gyur/ / sbyor ba nyid na sgrol ba yin// sgrol ba nyid na sbyor ba yin// rang bzhin gyis ni sbyor grol dang// ting nge 'dzin gyi sbyor sgrol dang// dbang po yul du sbyor sgrol dang// thabs chen dag gi sbyor sgrol dang/ / mngon du phyung ba'i sbyor sgrol lo// yang na sbyor sgrol bdag la rdzogs// shes rab dbyings dang bdag tu sbyor// thabs chen sprul pa bsam mi khyab// dbyings dang dbyings su thams cad sgrol/ / rol pa'i 'phrin las bsam mi khyab// thugs rje'i sprul pa cir yang ston// sbyor sgrol 'phrin las bdag la rdzogs// byang chub sems sprul phyogs bcur 'phro// ngan song gnas rnams stongs par byed/ / rigs 'dzin bde ldan thob par byed// bla med zhing rnams dag par byed// sku gsung lhun grub phyogs bcur 'dul// rdo rje zhes ni mtshan bsgrags te// theg dman rnams kyang rdo rjer dgod// zad mi shes kyi gter du'ang 'gyur/ / rdo rje rigs pa 'dzin gyi sku// thams cad dbyer med mnyam pa'i sku// thams cad mkhyen pa'i ye shes mchog/ thugs rje'i sprul pa dpag med kyi// 'gro drug dus gnas ma lus mkhyen/ / 'gro ba nyid ni nyid kyi sku// nyon mongs byang chub lam du mkhyen// 'khor ba nyid na bde gnas so// chos kyi dbyings dang sems can mtha'// dbyer med yang dag nyid du'o// spong ba rdo rje zhes bya ba'i dam tshig ni/ zhe sdang rdo rje thugs rje'i ngang// dmyal ba'i gnas rnams tshar gcod pa// brgyad brgyad bcu drug zhing du sbyor// tsha ba rnams la bsil ba'i sman// grang ba rnams la dro ba'i sman// bsil dro 'jam rtsub cha snyoms la/ / thugs rje'i byin brlabs de ltar ston// byin brlabs ya mtshan rmad po che// chags pa'i ye shes bya ba'i dam tshig ni// chags pa med pa'i tshul gyis ni// 'dod pa kun la longs spyod bya// ji ltar bde ba'i ro myong bzhin/ / myong tshor nyid na rang bzhin med// chags pa med pa'i ye shes kyis// yi dags gnas rnams tshar gcod cing// lus dang gnas kyis bsgribs pa yi// nyon mongs gnyis ka med par byed/ / gti mug ces pa'i dam tshig ni// nga dang bdag med dbyer med pa'i// shes rab chen po'i 'od gsal gyis// dran smra med pa'i sdug bsngal gsol// rmongs med sgrib pa dag par byas// ye shes gsal ba'i thugs rje yis/ / bya byed med par nyon mongs sgrol// byol song gnas ni stongs byed cing// thugs rje'i sgron ma de ltar ston// phrag dog chen po zhes bya ba'i dam tshig ni/ yengs pa chen po'i ye shes med de yang dag nyid/ / rang byung chen po'i ye shes kyis// thams cad sangs rgyas zhing du sbyor// ma bcos ma byas ngang gis gsal// ye nas 'od gsal sangs rgyas zhing// nyid kyi dkyil 'khor zhes bya ba'i dam tshig ni/ rang rig nyid la gnas pa yis// sus kyang ma byas rang rig ste// thams cad de bzhin nyid du sbyar// gnyis med dbyings kyi ngang du thim// rang byung ye shes dkyil 'khor gyis// ma lus de bzhin nyid du sdud/ / sdud dang mi sdud gnyis ka ni// yang dag kho na nyid du'o// bde ba'i ngang nyid ces bya ba'i dam tshig ni/ thams cad ma lus rnam par dag/ nyid kyi dbyings las mi gzhan phyir// bde dang mi bde gang yang med/ / thams cad dbyings su ro gcig ste// ji bzhin nyid kyi ngang btsan pa// yang dag nyid kyis de skad bshad// bshad dang nyan dang gnyis ka min// de bzhin nyid du yang dag 'du/ / dus bzhi rgyal mchog ces bya ba'i dam tshig ni/ gong na med pa'i ye shes mchog/ thas cad kun la dbang sgyur te// thams cad mnyam pa nyid du sbyor// 'das dang ma 'das thams cad dang// 'byung dang 'byung bar ma nges pa'i/

CLOSE WINDOW