/ 'khor ba'i kun gzhi rtsad nas bcad// 'od la rtsal snang zer thim pas// 'od la zer tha mi rangs zin// gzhi mo'i 'khrul pa rtsad nas bcad// shes pas mun pa bsal byas pas/ / 'khor ba'i rgyu ni rtsad nas gcod// rig pa gnas pa'i don rig pas// 'khrul rgyu ma rig rtsad nas bcad// dus gsum dbyer med gcig rtogs pas// 'khor ba'i dus ni rtsad nas bcad/ gang skyes dus su rang sa nyin/ / 'khrul ba'i dus ni rtsad nas bcad// g.yo 'gul med pa'i don rtogs pas// 'khrul pa'i rkyon ni rtsad nas bcad// nga bdag gzung 'dzin rang sangs pas/ 'khor ba'i ngo bo rtsad nas bcad/ / chos nyid ma bu ngo sprod pas// 'khrul ba'i ngo bo rtsad nas bcad// ngo bo rang bzhin thugs rje las// sku gsum rgyal ba'i zhing khams shar// khams gsum 'khor ba rtsad nas bcad// rig pa'i rtsa ba chod pas ni/ / kun tshol 'khrul ba rtsad nas bcad// yid rtsad 'gyu ba rtsad chod pas// gtan la 'bebs pa'i 'khrul rtsad bcad// sems kyi ming btags zhen chod pas// nges par 'jog pa'i yid 'khrul rtsad nas bcad/ / gcod pa'i 'bras bu 'khrul ba bcad// mya ngan 'das pa'i bdun gcod dang// 'khrul pa gcod pa'i bdun po yis// zung bdun ya ni bcu bzhi yis// rgyud pa rims kyis 'khrul pa dang// dngos po rkyen snang 'khrul pa dang/ / med pa blo bur 'khrul pa gsum// btags snang bzung zhen 'khrul pa gsum// 'khrul snang thams cad rtsad nas bcad// me long lta bu'i ye shes kyis// zhe sdang kun gyi rtsad chod pas/ / dmyal bar skye ba'i g.yang sa chod// mnyam pa nyid kyi ye shes kyis// nga rgyal rang bzhin rtsad chod pas// lha min skye ba'i g.yang sa chod// so sor rtogs pa'i ye shes kyis// 'dod chags ngo bo rtsad chod pas/ / lha ru skye ba'i g.yang sa chod// bya ba nan tan ye shes kyis// phrag dog ngo bo rtsad chod pas// mi ru skye ba'i g.yang sa chod// chos kyi dbyings kyi ye shes kyis// gti mug ma rig rtsad chod pas/ / byol song skye ba'i g.yang sa chod// chags med ye shes kun khyab kyis// ser sna'i ngo bo rtsad chod pas// yi dwags skye ba'i g.yag sa chod// de ltar ye shes rnam lnga yis// 'gro drug g.yang sa rtsad nas bcad/ / zhe sdang longs spyod rdzogs pa'i sku// dmyal ba'i tsha grang ming yang med// ser sna chen po byang chub sems// yi dags bkres skom ming yang med// gti mug chen po chos kyi sku// byol song glen lkug ming yang med/ / phrag dog chen po byang chub sems// mir skye ba yi sdug bsngal ming yang med// 'dod chags chen po sprul pa'i sku// lhar skye mi khom sdug bsngal ming yang med// nga rgyal chen po dbyer med sku// lha min 'thab rtsod sdug bsngal yang med/ / snang ba yid la ma byas gzugs khams lhar mi skye// stong pa yid la ma byas 'dod khams lhar mi skye// skye med yid la ma byas gzugs med lhar mi skye// yid kyi 'khrul rtsad chod pas g.yo med skye 'gag med/ / sems kyi 'dod zhen med pas bde ba'i mchog/ rig med gsal gdangs rtogs pas chos sku gcer mthong 'gyur// mthong ba de la ngos bzung med// med pa de ka mthong ba yin/ / gcad bya gcod byed gnyis med par// 'khrul snang 'khor ba thams cad rtsad nas bcad// ces gsungs so// rin po che bdud rtsi bcud thigs rig drug g.yang sa gcod pa'i rgyud las// 'khor ba rtsad nas gcod pa'i le'u ste lnga pa'o/ /// de nas rang gsal khye'u chung gis// sku gsum dbyer med ston pa la// 'bras bu thob lugs ji ltar lags// zhes gsol pa dang// ston pas 'khor la bka' stsal pa/ / brgyad khri bzhi stong theg pa de// de yi 'bras bu ngas ma bshad// spangs nas thob pa'i 'bras bu ngas ma bshad// bsgrubs nas grub pa'i 'bras bu ngas ma bshad// 'dod pas bsgrubs pa'i 'bras bu ngas ma bshad/ / re dogs 'bras bu ngas ma bshad// thog ma med pa'i dus mtha' nas// rang la rang nas yod pa yin// rang ngo shes shing rtogs pas mchog/ sku gsum rang la yod rtogs nas// 'du 'bral med na 'bras bu yin/ / bsam du med cing blo las 'das// skye med chos sku rang sems rtogs// skye ba med cing 'gag pa med// longs spyod rdzogs sku rang sems rtogs// dran med yid la bya ba med/ / thugs rje sprul sku rang sems rtogs// 'bras bu ngo bo sangs rgyas so// ma rig sangs pas ye shes rgyas// rnam rtogs sangs pas chos nyid rgyas// 'khrul pa sangs pas 'char sgo rgyas// sems can angs pas bud+d+ha rgyas/ / 'khor ba sangs pas myang 'das rgyas// 'pho 'gyur sangs pas 'gyur med rgyas// bya rtsal sangs pas byar med rgyas// re zhig sangs rgyas 'bras bu rtags// zhes gsungs so// rin po che bdud rtsi bcud thigs rigs drug g.yang sa gcod pa'i rgyud las/ / 'bras bu thob tshul bstan pa'i le'u ste drug pa'o//// de nas rang gsal khye'u chung gis// sku gsum dbyer med ston pa la// de ltar 'bras bu thob nas kyang/ / mi 'gyur gdeng gis ci ltar zin// ces gsol pa dang// ston pas 'khor la bka' stsal pa// 'gyur med skye med chos sku'i klong dkyil du// rtsal snang rig pa yid kyi bu thim pas/ / ma bu ngo phrad dbyer mi phyed// chos nyid ma dang phrad pas dbyer med gdeng gis zin// yeshes rang sa zin pas 'khrul med gdeng gis zin// rnam rtog rang sar grol bas rtog med gdeng gis zin// snying po klong nas shar bas 'gyur med gdeng gis zin/ / 'byung ba ma la zha bas skye med gdeng gis zin// chos sku blo las 'das pas dngos med gdeng gis zin// longs sku bsal du med pas 'gyur med gdeng gis zin/ / sprul sku yid la byar med gnyis med gdeng gis zin// chos rnams rang bzhin med pas stong pa'i gdeng gis zin// thams cad gnyis su med pas dbyer med gdeng gis zin// bya rtsal rtsol bsgrub 'das pas byar med gdeng gis zin/ / ces gsungs so// rin po che bdud rtsi bcud thig rigs drug g.yang sa gcod pa'i rgyud las// 'bras bu gdeng zin bstan pa'i le'u ste bdun pa'o//// de nas rang gsal khye'u chung gis/ / sku gsum dbyer med ston pa la// mtshan dang gtad rgya ji lta bu// zhes gsol pa dang// ston pas 'khor la bka' stsal pa// dgos 'dod ma lus 'byung ba'i phyir// rin chen bcud kyi rgyud yin no/ / sems nyid bdud rtsi bcud 'thigs pas// bdud rtsi bcud 'thigs rgyud yin no// khams gsum 'gro drug rtsad gcod phyir// g.yang sa gcod pa'i rgyud du zung// rigs drug g.yang sa gcod pa'i rgyud chen 'di/ / rang rgyud bzang zhing dad pa che// dam tshig gzhung bsrung rnam smin 'dzem// man ngag gsang tshig thub pa dang// rin la sogs 'dod pa'i yon// ma chags ser sna med pa dang// rin chen snod ldan de la bshad/ / ces gsungs so// rin chen bdud rtsi bcud thigs rigs drug g.yang sa gcod pa'i rgyud las// mtshan dang gtad rgya bstan pa'i le'u ste brgyad pa'o//// rin po che bdud rtsi thigs rigs drug g.yang sa bcod pa'i rgyud rdzogs so/ /// bka' rgya// zab rgya// gter rgya// sadzAmahwagudzraya// rgya gar gyi gu ru pad+ma sam b+ha la// bod kyi lo tsa ba ka ba dpal brtsegs kyis zhus shing bsgyur te gtan la phab pa'o/ / tshig la don med bod ban rnams// spel ba'i gnas med gter du spos// las can cig gis 'di rnyed par shog/ @##// rgya gar skad du// bod skad du// rin po che gser gyi nyims ma rig gti mug ka dag ye nas sangs rgyas rgyud// dam pa dang po'i sangs rgyas de kho na nyid kyi sangs rgyas la phyag 'tshal lo/ / 'di skad bdag gis dus rgyu'i tshig bral dus mtha' med pa nas// chos nyid gting 'tham yas pa nas// skye med don gyi ston pa yis// mu mtha' yongs grol bstan pa 'di// rang byung ngang dngas 'khor la bshad/ / dus gsum dbyer med rtsis las 'das// sdud po ni rang byung spros gcod do// zhes gsungs so// de nas skye med ston pa yis// rang byung ngang dngas 'khor rnams la// yongs rdzogs gong na med pa'i theg pa bshad/ / ces gsungs so// de nas rang byung ngang dngas kyis// skye med don gyi ston pa la// pus btsugs thal sbyar 'di skad zhus// kye// gong na med pa'i theg pa de// de don 'khor la bshad du gsol/ / chos nyid don gyi gnas lugs dang// rig pa rtsal gyi shar lugs dang// chos can mtshan ma gros lugs dang// dge ba ma spyad grol ba dang// sdig pa ma spangs dag pa dang// dug lnga ka nas dag pa dang/ / ma rig ka nas dag lugs dang// gti mug mun pa sangs lugs dang// nyon mongs bag chags sangs lugs dang// ye nas sangs rgyas yin pa dang// rigs drug skye ba rtsad bcad dang// sems can sangs rgyas yin lugs dang/ / de rtogs chos rnams shes pa dang// theg pa'i lta sgom med pa dang// ma bsgrubs pa ru grub pa dang// ma btsal rang las rnyed pa dang// ma bsgoms mthar ru phyin pa dang// ma bsrungs ka nas dag lugs dang/ / ma sbyangs sgrib rnams dag lugs dang// de rnams la 'da' chen po'i don// bdag cag rnams la bshad du gsol// ces zhus so// rin po che gser gyi nyi mas ma rig gti mug ka dag gi rgyud las/ / gleng gzhi'i le'u ste dang po'o//// de nas rang byung ngang dngas kyis// skye med don gyi ston pa la// gong na med pa'i theg pa de// de yi bshad lugs ji ltar lags// zhes zhus pa dang/ / ston pas 'khor la bka' stsal pa// yongs rdzogs gong na med pa'i theg pa bshad par bya// 'khor rnams ma yengs gus par nyon// e ho ngo mtshar rmad byung chos// kun rdzogs gong na med pa'i theg pa 'di/ / bya rtsal chos dang mi mthun te// yongs rdzogs chen po'i chos cig bshad// gong na med pa'i chos cig bshad// rgyu 'bras 'das pa'i chos cig bshad// rtsol bsgrub 'das pa'i chos cig bshad/ / bya rtsal 'das pa' chos cib bshad// ye sangs rgyas pa'i chos cig bshad// sgrib g.yogs med pa'i chos cig bshad// 'od gsal chen po'i chaus cig bshad// gsal ba zang thal chos cig bshad/ / rang snang rang grol chos cig bshad// dug lnga med pa'i chos cig bshad// nyon mongs gtan rlag chos cig bshad// 'gro drug sems can med pa'i chos cig bshad// ngan song gsum po med pa'i chos cig bshad/ / mtho ris 'gro sa med pa'i chos cig bshad// dge sdig med pa'i chos cig bshad// rnam rtog thog rdzis chos cig bshad// sdug bsngal gtad sangs chos cig bshad// 'khor ba gtan brlag chos cig bshad/ / theg med 'jug pa'i sgo med chos cig bshad// 'khrul ba spangs pas grub mtha' med pa'i chos cig bshad// nga bdag nyon mongs yo zad chos cig bshad// rig med 'gyu med sems las 'das pa'i chos cig bshad/ / snying po chig tshugs chos cig bshad// yang snying gsang ba'i bcud 'dus bshad// 'di shes kun shes chos cig bshad// 'di go chos rnams kun shes bshad// 'dir zhugs theg pa kun gyi sgo phyed chos cig bshad/ / 'di khrol theg pa kun gyi mkhyud khrob bshad// snying po bcud 'dus chos cig bshad// 'di yod kun 'chang chos cig bshad// 'di ltas kun mthong chos rnams kun gyi nyi zlar bshad/ bun+d+ha pra na ta n+t+ra nA ma/ bod skad du/ sangs rgyas ngo sprod pa'i rgyud/ bcom ldan 'das stong pa chen po/ ye shes kyi snying po ma 'gags par rang gsal ba la phyag 'tshal lo// 'di skad bdag gis bstan pa'i dus gcig na/ chos kyi dbyings kyi pho brang/ rang byung rig pa'i rgyal po 'khor ye shes rgya mtsho'i tshogs la/ zhing khams sum rtseg gi snang ba/ rag la rang chas su bstan pas/ chos zad pa'i ngang du thim mo/ / 'di skad bdag gis thos pa'i dus gcig na/ gsang ba rol ba'i dur khrod me 'od 'bar ba zhes bya ba/ gti mug gi nam mkha' la/ logs la nga rgyal gyi brag 'tsher ba/ rtsa bar 'dod chags kyi chu 'khrug pa/ bar na phrag dog gi rlung 'tshub pa/ gseb na zhe sdang gi me 'bar ba/ drag po'i gzhal yas khang de na/ bcom ldan 'das gzhon nu stobs ldan chen po la/ 'khor dpa' bo dang mkha' 'gro'i tshogs kyis bskor nas thabs gcig tu bzhugs so/ / de'i tshe gsang ba'i bdag pos 'di skad ces zhus so// kye kye ston pa thugs rje can/ sangs rgyas ye shes lus can gyis// rten dang lam dang gnad dang sgo dang/ rang gi ngo bo gsung du gsol/ zhes zhus ston pas bka' stsal pa// gsang ba'i bdag po khyod nyon cig/ bde bar gshegs pa'i ye shes lus can de/ rten pa rang gi lus kyi byang khog stod 'di la rten nas yod do/ / gnas pa ni snying gi nang na gnas so// lam ni snying gi nang nas mig tu rtsa dar dkar gyi skud pa 'dra ba tsam cig/ mnyen pa khrag dang chu ser med pa gcig gi sbrel nas yod do/ / de ni ye shes kyi lam yin no// sgo ni sngon du gyur pa dang/ lkog tu gyur pa gnyis so// mngon du gyur pa ni rang gi mig gnyis yin no// lkog tu gyur pa ni rna ba gnyis yin no// rang gi ngo bo dag pa chos kyi sku'i ngo bo stong par bzhugs so/ / stong pa ni zang thal du bzhugs so// ngo bo stong par bzhugs pa ni// rang gi ngo bo rig pa 'di nyid dngos po mtshan mar ma grub pa// ngo bo stong pa 'dug pa'i yin no// snying po gsal bar bzhugs pa ni/ / rig pa rang gi ngo bo ma 'gags par gsal ba ni sangs rgyas kyi dgongs pa yin no// ye shes zang thal du bzhugs pa ni/ sangs rgyas snying gi dkyil na sha khrag gi lus kyis gtums kyang ma thub par/ rang gi mig gi rnam par dag par mthong ba ma 'gags pa 'od du gsal ba yin no// 'di kho na ye shes zang thal gyi dgongs pa'o/ zhes bka' stsal to// yang zhus pa/ e ma ho/ ma rig mun sel sgron ma'i sku/ / sems kyi rten dang gnas dang sgo// lam dang rang gi ngo bo rnams// mngon par rim par gsung du gsol// zhes zhus pas// yang ma rig mun sel gyis bka' stsal pa// gsang ba'i bdag po yang nyon cig/ sems kyi rten ni rang rang gi lus po'i byang khog stod yin no// gnas ni glo ba'i nang na yod do// lam ni glo ba dang mgrin par rtsa gro sog gi spru gu tsam gyis sbrel nas yod do// de ni dbugs 'gyu ba'i sems kyi lam rtsa yin no/ / sgo ni 'dod ba'i sgo gsum ste/ sna bug gnyis dang kha gsum yin no/ 'dod pa'i shes pa de nas 'byung ngo// sems rang gi ngo bo rnam par rtog pa dang bcas pa// rnam rtog gi dbugs phyi nang du rgyu ba 'di rang yin no/ / rigs kyi bu sems las byung ba rnams ni 'khor ba'i rgyu yin no/ zhes bka' stsal to// de nas yang gsang ba'i bdag pos zhus pa/ e ma mgon po 'od dpag med/ / rang gi gzugs kyi phung po las// sems dang ye shes rnam par gnyis// da lta 'phrad tshul ji ltar 'phrad// tha ma gyes tshul ji ltar 'gyes// zhes zhus mgon por bka' stsal pa// gsang ba'i bdag po da ltar 'phrad tshul ni/ / rang gi snying gi dkyil na rig pa chos kyi sku'i ngo bo// stong pa 'dus ma byas par bzhugs so// rig pa rang gi ngo bo nyungs kar yang zhun lta bur bzhugs so// dbugs 'don pa'i sgo gsum 'char ro/ / rig pa 'od kyi gong bu tshon lnga'i gru gu bsdogs pa lta bur gnas so// rig pa chos kyi sku ye shes lnga'i mtshan nyid du bzhugs so// rigs kyi bu de'i tshe ye shes rang gi snying nang nas 'thon nas// lam rtsa dar dkar skud pa tsam gyi nang na yar song nas/ / sgo rang gi mig gnyis na phar 'thon no// de'i dus su sems dang ye shes rgyab gyes so// de'i tshe dus ma 'gyur bar snang ba 'gyur bar snang nas/ / sa rdo ri brag rtsi shing nags tshal thams cad sangs rgyas kyi zhing khams rnam par dag pa/ phra la dwangs pa/ gsal la 'tsher ba/ rang bzhin gyis bkrag nyam nga ba/ phyi'i rgya mtsho mthong ba bzhin/ 'jig rten gyi khams thams cad brdal nas 'ong bas/ de la ma 'jigs shig/ rig pa 'dzin pa sangs rgyas kyi zhing dag pa zhag lngar 'char ro// thog ma'i sangs rgyas 'od mi 'gyur ba rang gi rang gdang chos dbyings dag pa'i ngang du thim mo/ / dag pa'i snang bar shes pas sangs rgyas so// khams gsum gyi sems can gyis ye shes kyi snang ba yang nas yang du mthong kyang/ ngo ma shes pas na 'khor bar 'khyams so// gsang ba'i bdag po dbugs chad pa dang/ ye shes kyi snang ba shar dus mnyam mo// yul gyi blo rdol ba yin pas/ yul thams cad ye shes kyi snang bar shar nas 'ong ngo// chos nyid dag pa zhag lngar shar ba de rang gi rig pa'i gdangs sam rang 'od yin no/ / de ngo shes par gyis shig/ gsang ba'i bdag po mi dbul pos nor bu rin po che btsal kyang mi rnyed na dran pas lta ci smos/ rigs kyi bu rang dbugs chad pa dang sangs rgyas kyi zhing khams rnam par dag pa/ me long gi ngos la nyi ma shar ba lta bu dus gcig la 'char ro// de'i dus su 'od mthing ka mthong ba'i tshe na// 'di ka rag gi rig pa ngo bo stong pa chos kyi dbyings kyi ye shes su shes pas/ / rdo rje sems dpa' yab yum 'khor dang bcas pa 'grub par 'gyur ro// 'od ser po mthong ba'i tshe/ mnyam pa nyid kyi ye shes su shes pas/ rin chen 'byung ldan yab yum 'khor dang bcas pa 'grub par 'gyur ro/ / 'od dmar po mthong ba'i tshe/ so sor rtog pa'i ye shes su ngo shes pas/ snang ba mtha' yas yab yum 'khor dang bcas pa 'grub par 'gyur ro// 'od ljang khu mthong ba'i tshe/ bya ba grub pa'i ye shes su ngo shes pas/ don yod grub pa yab yum 'khor dang bcas pa 'grub par 'gyur ro// gsang ba'i bdag po dag snang shar bas// ye shes lngar shes shing// de dran pas sangs rgyas thob bo/ / 'brog dgon par 'khyams pa'i mis bza' btung mi bsam// zas dran pas yang dag par rdzogs pa'i sangs rgyas bla/ zhes dus gsum sangs rgyas kyis gsungs so// yang dag par rdzogs pa'i sangs rgyas ni 'dus ma byas yin la/ byas pa'i chos kyis 'grub na 'dus byas su 'gyur ro// bde gshegs ye shes lus can de// rang las byung zhing rang gis shes// rang ni de nyid du grol lo/ mthong byed kyis mthong nas shes byed kyi shes so/ / zhes gsungs so// de nas yang bcom ldan 'das kyis bka' stsal pa/ 'byung ba dang snyigs 'byed pa'i dus su// rang gi snying gi dkyil nas ye shes gnas steg pas/ / gdangs phyir nas rang gi rig pa ye shes lnga'i rang bzhin du yod pas/ rang gi snying nang nas chos kyi dbyings kyi ye shes mthing kha'i rang bzhin du gnas so// me long lta bu'i ye shes kha dog dkar por yod do/ / mnyam pa nyid kyi ye shes kha dog ser por gnas so// so sor rtogs pa'i ye shes kha dog dmar por gnas so// bya ba grub pa'i ye shes kha dog ljang khur gnas pa'o// de ltar rig pa ye shes lnga'i kha dog tu gnas pas/ rang gi snying nang na 'od kha dog lnga me re re yod do// sems ni glo ba'i nang na yod do// glo ba dwangs snying ni rtsa sog ma'i sbu gu tsam gyis sbrel nas yod do// sems glo ba'i nang nas 'thon te/ rtsa sog ma'i sbu gu tsam de'i nang na yar dbugs 'gyus pas// snying nang na yar sku gsum ye shes lnga bzhugs pa dang 'phrad do// rang gi snying gi dkyil du rig pa dbugs kyi rta dang 'phrad pas/ dbugs med pa'i 'gyu ba zhes bya'o/ / tha ma rgyab gyes pa'i tshul ni/ rang 'chi ba'i dus su sems glo ba'i nang nas 'thon te/ lam gro sog gi sbu gu tsam sna bug gnyis// kha dang gsum nas ha zer te dbugs par 'gyu'o// tha ma hu zer nas nang du 'dren no/ / gsang ba'i bdag po/ srid pa'i ri bo las rgal ba'i dus su/ srog rgyu ba'i rlung nang nas phyir 'dren la stobs che/ 'dus pa'i nam mkha' la phyir 'dren pa'i stobs che/ nang du 'dren pa'i rlung gis phyi'i nam mkha' nas tshur 'dus thugs rig pa'i ye shes la thim mo/ / phar 'phros te 'dus ma byas pa'i nam mkha' la thim pas/ rnam par rlung zhon gyi dgongs pa zhes bya ba'o// tha ma ha zer nas phar la song ste/ hu zer nas tshur ma 'dus pa'i tshe/ rang gi mdun gyi nam mkha' la ye shes kyi mthongs zhes bya ba/ 'od kha dog lnga bkra lam me snang ngo// de ngo shes pas lcags la gser 'gyur rtsibatang ba 'am/ mun khung du sgron me bteg pa ltar skad cig la yar gyi zang thal du grol lo// rigs kyi bu nang dbugs dang ma bral ba la/ rdo rje sems dpa'i sna thag kyang bya/ thugs rje rgyun gyi sna thag kyang bya ste/ rang gi mig nas mdun gyi nam mkha' la/ 'od kha dog lnga thag pa brkyang ba 'am// skas btsugs pa ltar snang ngo// de'i dus su shes pa rang gi mig la gtad/ mig thugs rje rgyun mi 'chad pa'i thag pa// 'od kha dog lnga la gtad pas/ yar gyi zang thal la grol lo// yang na thugs rje'i 'od kha dog lnga shar ba'i tshe/ ye shes lnga ldan gyi dkyil 'khor thob nas// dbugs ma chad pa la sangs rgya'o// gsang ba'i bdag po/ phyi nang gsang ba'i dbang rdzogs pa la ston cig ces bka' stsal to/ / ngo sprod pa'i rgyud las/ sems ye shes su bstan pa'i le'u/ a+thi+-i/// dpe'i ngo sprod pa la gsum ste/ shel dang nyi ma 'dra 'bag gsum/ shel te rdo rje sems dpa'i me long yin/ de'i phyir shel la mig bcug nas bltas pas/ sangs rgyas kyi rang lus 'od kyi phung po la/ 'od kha dog lnga phra la dwangs pa/ gsal la 'tsher ba/ rang bzhin gyis bkrag la nyam nga ba/ kha dog lnga tse re re/ mngon sum du 'char bas/ de dag ye shes kyi snang ba yin no// de bzhin du rang gi rig pa'i rang gdangs 'od kha dog lnga ldan du yod do// rang gi rig pa'i rang 'od ngo shes par byas la/ rang 'od la ma yengs par blta'o// de ni dag snang lta ba'i yang lta ba yin no// nyi ma la ngo sprod pa ni/ mig gi steng du ther ma skab la blta'o// de la 'od zer mtshon cha'i rtse mo 'phro ba bzhin du 'byung ste/ / de nyi ma phyed la bltas pas 'khrul snang dag snang du 'char ro// 'dra 'bag gam/ sku gzugs sam/ zhing khams nyi ma la bzhag nas shel la bltas pas/ longs sku kha mig rna ba can du 'char ro/ / de ji lta ba bzhin du bar do longs sku'i snang ba 'char tsa na/ rang snang du ngo shes par de nyid du grol 'gro'o// dpe'i ngo sprod kyis don la phab bo// don gyi ngo sprod kyis don la thag chod/ snang ba sna tshogs su 'char yang rang snang rang byung yin pas/ tha chod rang la gyis shig/ 'di phyi gnyis su med de/ blo 'das rtsol med du grol lo// lan cig dus kyi tha ma la/ skal ldan las 'phro can dang 'phrad nas 'di la longs spyod shog/ ces gsungs so// kha thaM//// @#/ rgya gar skad du/ sarba bud+d+ha tsit+ta ma hA gu h+ye tan+t+ra/ bod skad du// sangs rgyas thams cad kyi thugs gsang ba chen po'i rgyud/ / lha min grong khyer rang gis bsreg/ mi yi rgyal po grong sprang byed// seng ger skyes nas gzhan gyis zos// yi dwags zas kyis brnangs nas shi// dmyal ba rang gi srog gcod byed/ / ma ni chu ru 'gyur ba yi// mi rtag 'gyur ba'i chos can la// nges med log pa'i sdug bsngal 'byung// 'khrul snang bya spu rlung khyer 'dra// res 'ga' mtho la res 'ga' dma'// mnar med gnas na zhen yun ring/ / las zad tshe na 'dam nas thon// skam sar snyogs pa srid pa tsam// 'khor ba'i chu bo gting zhen che// sdug bsngal rba glong sna tshogs 'khrul// 'khrul rtog blo la 'dzad pa med// sangs rgyas thams cad kyi bstan pa gzhi'i rgyud mchog rin chen spungs pa las/ / 'dus byas mi rtag par bstan pa'i le'u ste bzhi pa'o//// skye med gzhi rtsa ma chod pas// 'gag med 'khor ba'i skye shi la// gcig nas gcig rgyud lu gu rgyud/ / rgyun chad med pa chu bo'i rgyun// sdug bsngal chu bo'i gnyer ma 'dra// phyi ma skyes pas snga ma 'gag/ skye shi gnyis la zad pa med// gcig nas 'pho zhing gcig tu skye// 'chi kha'i shes pas mtshams sbyar nas/ / phyi ma de yi snang bar skye// dge sdig gnyis kyi bzang ngan la// sngar gyi bag chags sbyangs stobs kyis// goms pa 'chi khar des mtshams sbyar// blo bur rkyen gyis gzhan 'gyur na// de dang de snang skye ba 'thud/ / bzang po'i las ni bzang po 'thud// ngan pa las ni ngan pa 'thud// gnas skabs rkyen gyi 'khrul pa byung// mtha' bzhug las kyi 'phrod 'thud de// 'dres pa las ni 'dres pa 'byung/ / gzhi ma dkar po gcig nyid la// tshon rtsis kha dog bsgyur ba bzhin// kun gzhi rnam shes snam bu la// rgyu rkyen gnyis kyis snang ba bsgyur// chu bo chu bran lu ma rnams// drag 'bab dal 'bab skong mor 'khyil/ / gang byas chu gzhun gcig pa bzhin// bde sdug btang snyoms gang snang yang// ma rig 'khrul pa'i rgyun du gcig/ bde chen ye shes ma rtogs na// sdug bsngal chu bo rgyun mi 'chad// 'di phyi bar dos mtshams sbyar nas/ / 'khor ba zo chu'i khyud mo bzhin// rgyun chad med par khor yug byed// nam zla dros pa'i dus kyi tshe// drod gsher gnyis kyi rkyen las su// sa bon byed mkhan med par skye// myu gu 'bras bu skye ba bzhin/ / sems can rigs mthun 'dzom pa'i tshe// las dang nyon mongs rgyu rkyen gyis// bar do'i khams rnams thams cad kun// byed po gzhan nas med pa ru// rang gzhan 'dzin pa'i rnam shes kyis// mi gzugs srid pa'i skye ba zhes/ / blo bur dbang po gsar pa la// snang ba der 'dzin skye ba zhes// ming du btags te 'khrul snang yin// a 'thas zhen pas sdug bsngal te// rgas nas na ba zhum zhing 'gyur// tshe dang drod dang srog 'gag pa/ / snga ma nub pas 'chi ba zhes// tha snyad btags te 'khrul pa dngos// skye 'gag gnyis kyi so mtshams de// bar do zhes pas nying mtshams sbyor// snga ma'i bag chags rmi lam ltar/ / zhen pa ma dag chags sdang 'khrul// phyi ma'i nyer len sgyu ma ltar// sred pa'i 'phen pas skye ba len// 'di phyi bar do khor yug ste// sa bon las ni myu gu dang// myu gu 'bras bu sa bon 'khor// rang 'byung rang rkyen rang 'khor yin/ / rang sems dge dang mi dge'i rgyus// rang rkyen 'chi khar zhe sdang skyed// bar dor de yi lam du zhugs// phyi ma dmyal ba'i skye ba len// mi ru skyes kyang rgyu mthun 'ong// de bzhin 'dod chags mir skye la/ / ser snas yi dwags gti mug gis// byol song gnas skye phrag dog gis// lha min gnas la mngon pa yi// nga rgyal lha yi skye ba len// skye shi gnyis kyi bar de ru// phal cher yun ni zhag bdun srid/ / ring ba bdun phrag bdun yin la// gzugs med lha dang mnar med myur// bag chags dbang po kun tshang ba'i// thogs med rlung 'dra'i shes pa de// lhar skye steng la mi la g.yas// lha min mgo bo g.yon du lta/ / dud 'gro yi dwags 'thur la lta// dmyal ba spyi tshugs snang bas ltung// rgyud lnga'i lam la re mos 'khor// rigs mthun rkyen tshangs skye ba len// rkyen ma tshang ba bar do ste// 'gag rkyen byung bas 'chi ba yin/ / gcig nas gcig tu 'gro ba yi// yul la 'khor ba ma yin te/ kha chus 'thums pa'i srin bu bzhin// rang gis rang nyid gtums nas su// rang sems ma rig 'khor ba yin// 'khor ba logs na rdul tsam med/ / dge bas la 'thud bde ba 'khor// sdug bsngal las 'thud sdug bsngal 'khor// las dang rgyu rkyen gang 'dzom 'khor// ma rig pa la rgyun du 'khor// 'khor ba zad na mya ngan 'das/ / sems rgyud gcig la gnyis mi 'ong// gnyis med ye shes ma rig pas// kun nas nyon mongs 'khor bas te// 'khor ba'i sdug bsngal rang 'khrul yin// sangs rgyas thams cad kyi bstan pa gzhi'i rgyud mchog rin chen spungs pa las/ / ma rig pa la 'khor ba'i sdug bsngal rgyun mi 'chad par bstan pa'i le'u ste lnga pa'o//// thog med dus nas bag chags kyis// kun tu rtog pa sna tshogs te// dkar ser dmar ljang mthing ba'i mdog/ lci yang smin sdud go 'byed pa'i// sa chu me rlung nam mkha' dang// rnam par shes pa'i khams dang drug/ phyi nang nang du snang ba dag/ byed po med par rang nyid la// yul drug dbang po'i rnam shes kyis/ / rtog dpyod dgag sgrub btang snyoms pa// phyi nang bar gsum so so ru// rtog pa bco brgyad mthong gyur nas// nyon mongs khams rnams thams cad byung// spangs sems zug rngu zhe sdang ste/ / de yi rgyu rkyen rang snang las// dmyal ba'i 'gro ba des bskyed nas// sdug bsngal las kyi rang gzugs 'byung// bsgrub sems zhen pa 'dod chags la// rgyu rkyen de yi las 'bras ni// 'du byed mi yi grong rnams skyed/ / sred zhen nyon mongs ser sna'i mthus// rang gzugs yi dwags 'gro kun 'byung// btang snyoms gzung 'dzin gti mug las// dud 'gro'i khams rnams de las byung// bdag gi ba la nges shes skyed/ / nga rgyal lha yi 'gro kun bskyed// gzhan du rtog pa'i phrag dog gis// lha min 'gro kun de las skyed// kye ma gnyis snang rtog pa 'di// de la chags shing sdug bsngal ba// zhe sdang btang snyoms ma rig pas/ / nga dang bdag gi sred zhen gyi// kun tu 'ching byed nyon mongs drug/ gnas su rang rgyud ma rig 'khor// kun 'byung kun rdzob sdug bsngal 'di// don dam rang bzhin nyid ma yin// rnam par dag pa bdag med chos/ / kun la khyab pa'i chos nyid de// gal te nyon mongs de ma yin// sems can 'khor bar ci la 'khyam// gal te rnam dag de ma yin// sangs rgyas rnams ni ci phyir grol// lhun grub 'gyur ba med rtogs na/ / rnam dag ye shes chos kyi dbyings// ma dag kun nas nyon mongs pa// lha rnams 'chi 'pho ltung ba dang// mi rnams skye rgas na 'chi spyod// lha min 'thab rtsod las la mnar// dud 'gro bkol spyad gsod gcod dang/ / yi dwags bkres skom 'jur 'gegs spyod// dmyal ba tsha grang sdug bsngal spyod// las kyi sdug bsngal bsam mi khyab// nyon mongs mtshon rtse gzings pa 'dra// sdug bsngal chu bos khyer ba 'dra/ / chags zhen 'dam du bying ba 'dra// 'khrul pa ri dwags rgyar chud 'dra// byed po gzhan med dbang med pa'o// bdag med rig pa col re chung// sangs rgyas thams cad kyi bstan pa gzhi'i rgyud mchog rin chen spungs pa las/ / kun nas nyon mongs pa'i le'u ste drug pa'o//// thog med dus nas bdag gzhan gyi// gzung 'dzin rkyen dbang 'du byed kyis// kun slong ngan pa'i las bsags pas/ / srog gcod pa yi ngo bo ni// mtshon dug sngags dang stobs sogs kyis// lus sems srog dbang phral ba yin// dbye na zhe sdang dgra gsod pa// 'dod chags longs spyod 'dod phyir gsod// gti mug don ma rtogs phyir gsod/ / pha ma bkur 'os gsang chen yin// mi dang mir 'os gsod pa 'bring// dud 'gro la sogs chung bo yin// byas zin byed dang byed 'gyur la// rang dang gzhan la byed du 'jug/ yi rang phul ba rnam pa gsum/ / 'bras bu mnyam pa nyid thob ste// rgyu mthun 'bras bu gsod la dga'// dbang gi 'bras bus gsod par skye// rnam smin 'bras bu srog lan dang// dmyal ba'i gnas su skye bar 'gyur/ / phan sems kyis ni sman byin dang// bsam pa med par mtshon shor ba// dbang med shugs kyis shi ba rnams// sdig tu mi 'gyur srog gcod yin// gzhan rnams rang gi srog dang mtshungs// ma byin len pa'i ngo bo ni/ / pha rol bdag tu gzung ba'i rdzas// mi dga' bzhin du blangs pa'o// dbye ba stobs kyis phrogs pa dang// rgyu yis dkris par spyad pa dang// 'jab bu ma tshong blangs pa'o// dge 'dun dkor rdzas chen po ste/ / sman pa rnams ni 'bring yin la// lhag pa'i rdzas bsogs chung ngu'o// gzhan dag tshul ni gong ltar ro// bdag med nor dang sa yi gter// sdig tu mi 'gyur ma byin len// gzhan dag rang gi rdzas dang 'dra/ / rgyu mthun 'bras bu rku snying 'dod// dbang gis choms rkun gnas su skye// rnam smin rang nor gzhan la 'chor// yi dwags bkres skom gnas su skye// 'dod pas log par g.yem pa ni// rang ngam gzhan gyi chung ma la/ / gnas ma yin par spyod pa'o// dbye ba rigs dang chos dang khrims// bsrung ba rim pa gsum yin no// dgra bcom dge slong sun phyung che// bdag pos bzung ba 'bring pos te// phal pa rnams ni chung ngu'o/ / gzhan srog 'don pa sdig mi 'gyur// gzhan rnams rang gi lus dang mtshungs// rgyu mthun 'bras bu 'dod log che// dbang gis mi gtsang gnas su skye// rnam smin bud med gzhan dbang 'gro/ / dud 'gro 'am ni dmyal bar skye// chang ni nyes pa kun gyi rgyu// myos pas lha gsod 'byung ba 'khrug/ tshe yi bar chad bsod nams 'bri// nyon mongs kun skyed ngan song lhung// rdzun gyi ngo bo bdag gzhan bslu/ / dbye ba zhor 'byung gnod pa'i rdzun// mi chos bla ma mgo bskor rdzun// mchod 'os bslus pa rdzun chen la// phal pa rnams la 'bring pos te// ma brtsal brjod pa chung ngu'o// gzhan la phan na sdig mi 'byung/ / de min smra ru mi rung ngo// phra ma mdza' mthun 'byed la ngag/ dbye ba ngo 'phro lkog tu 'phro// thabs kyis phra mas 'byed pa yin// dge 'dun dbyen byas chen po ste// gang zag dkrugs pa 'bring yin la/ / mi mthun lab brjod tha ma'o// bstan la gnod bzlogs dbyen yang rung// de min skad cig byar mi rung// rgyu mthun 'bras bus dbyen ma dga'// dbang gis grogs po mi rnyed cing// rnam smin mdza' ba kun dang 'bral/ / lha min gnas dang dmyal bar ltung// tshig rtsub zhe la 'debs pa yin// dbye ba gdong du rtsub pa dang// zhor gyis gtam dang bsre ba dang// phyogs rigs med par rtsub pa'o/ / sems skyed byang sems sman pa che// dge la blo ldog 'bring po ste// phal pa rnams ni chung ba'o// ma rungs bzlog pa sdig mi 'gyur// de min zur tsam smra thabs med// rgyu mthun 'bras bu tshig rtsub cing/ / dbang gis kun gyis mi snyan brjod// rnam smin rtag tu 'thab zla mang// dmyal ba'am ni yi dwags skye// 'khyal tshig bag med tshig yin te// dbye ba bden la gshe ba dang// bre mo'i gtam gyis zlo ba dang/ / gzhan gyi rjes su 'jug pa'o// dkon mchog skur 'debs chen po la// gzhan la smod pa 'bring po ste// don ma rtogs pa chung ngu'o// ngag 'khyal snang ba'i skabs med do// rgyu mthun 'bras bu ngag 'khyal smra/

CLOSE WINDOW