snang ba ldog ste 'char ba dang/ rig pa chos nyid la kha nang du bltas pa'i dus na 'char ba dang/ shes pa phyin pa la 'char ba dang gsum mo// de'i skyon dang yon tan bstan pa ni/ stong pa nyid la lta nyes na/ shes rab chung rnams phung bar 'gyur// rgyal ba rnams kyi stong nyid ni/ lta kun nges par 'byin pa de/ me long nang gi gzugs brnyan bzhin/ rgyal ba rnams kyi ye shes sku// rgyu gnyis 'bras bu rang shar bas/ 'bras bu rgyu ru mi ldog pa'o// de yang gang zag stong pa nyid la lta ba dang/ de ni gso ru mi rung zhes bshad pas// ci stong pa nyid ni bslan dka'o// rtog pa ni gzhi la blo'o// 'o na sgom pa des rtogs par mi 'gyur ram zhe na/ rtogs par mi 'gyur ba'i don ni/ shes rab kyi sku reg bya min pas ni gzhi la sla ba'o// rang bzhin ma 'gags pas ni mtha' bzhi rtogs pa dang bral ba/ bsgoms pas de yang ma hA yo ga ltar ting nge 'dzin dang/ cho gas bskyed pa ni ma yin te/ rgyu dag pa'i dbyings nyid nas 'bras bu ye shes kyi dkyil 'khor rang snang ba'i dus na/ rnam pa thams cad mkhyen pa'i ye shes sems can la dgongs te rim gyis 'char ba dang/ thams cad mkhyen pa'i ye shes sangs rgyas nyag gcig gi snang ba ste/ chig chod du 'char ba dus mtshungs su 'byung bar 'gyur ro// de la man ngag gis yid ches par byed pa bzhi ste/ rigs 'dzin rnams brdas brgyud pa las/ gzhi klong du gyur pa'i man ngag dang/ rkyen gdeng du gyur pa'i man ngag dang/ thugs rjes nyams su blangs pa'i man ngag dang/ rjes 'jug 'da' dkar thugs kyi man ngag dang bzhi las/ ngang kun tu bzang po chos nyid kyi klong nas bsam pa gsum rtog med gnas pa'i dus na/ gzhi klong du gyur pa'i man ngag go/ sprul pa'i sku rdo rje sems dpa'i thugs kha nas/ sku gsum rang rdzogs su shar ba'i dus na/ rang gi shes bya la rang dbang sgyur bas/ rkyen gdeng du gyur pa'i man ngag go/ dga' rab rdo rjes sems dpa'i zhal mthong ba'i dus su/ 'chang med rdo rje'i lung bstan pa'i chos nyams su blangs pas/ bka' dang mthun pa'i don thugs su chud de/ dga' rab rdo rje'i nyams kyi man ngag go/ phyis rjes su 'jug pa'i byang chub sems dpa' rnams kyis tshul gong ma bzhin gnas par byas te/ bka' ji bzhin par spyad pas 'bras bu yang mngon du 'byin nus te/ bka' de las mi 'da' bas/ 'da' ka thugs kyi man ngag go/ bder gshegs rnams kyi dgongs pa mdor bsdus te bstan pa'o/ / zhes sems phyogs chen po nam mkha' mdzod kyi rgyud las/ sgom nyams drug pa'i le'u ste bcu pa'o// de nas gsang ba'i bdag po rdo rje snying po dang/ dga' rab rdo rjes mgrin gcig tu 'di skad ces dri'o/ / rgyu dag pa las 'bras bu rdzogs pa 'byung/ 'bras bu gnyis su med pa las/ thugs rjes 'od zer gyi sku smin pa 'byung ba'i chos/ lhun grub yongs su rdzogs pa'i lta ba la/ sgom zhing bsgrub tu med par ma spyad na de'i man ngag gang gis gzung/ rtogs pa'i don la sgom du med kyang/ gang zag gi rgyu la sgom sgrub nyams su blangs nas/ bde bar gshegs pa'i spyan rnam pa lnga rang gi rgyud la 'char nus na/ de ci'i rgyu/ de ci'i rkyen/ lus ma bor bar rin po che gsang ba'i sbubs su sangs rgyas na/ de'i gnad man ngag gang gis zin/ 'khrul pa'i snang ba ma spangs par/ skad cig ma la chos nyid snang ba rnam par dag na/ de'i man ngag gang gis ston/ zhes zhus pa las/ rgyal ba'i bka' dam pas gnad bzhi gsungs/ rang byung ye shes sku gsum ye shes lnga ldan mtshon nges par shes pa dang/ sgoms nyams drug gi man ngag dang/ rkyen nyams su blangs pas/ dus ma 'gyur bar snang ba 'gyur ba dang/ snang ba gzhi bzhag gi man ngag gis gnad gcad par bya'o// zhes sems phyogs chen po nam mkha' mdzod kyi rgyud las/ gnad bzhi rgyal ba bka'i le'u ste bcu gcig pa'o//// de nas ston pa rdo rje 'chang chen pos 'di skad gsungs so// yi ge dgu pa ma shes na/ gzhi stongs pa'i skyon du 'gyur ro// thugs kyi nyid khu ma shes na/ / gzhi'i mtshan nyid mi shes so// rtse mo drug pa ma shes na// dgongs pa gtan la mi phebs so// snang ba rang logs shes na/ tha dad kyi skyon du 'gyur ro// 'jug pa rang sa ma shes na/ grub mtha' slar log gi skyon du 'gyur ro// dus tshod rgyal sa ma shes na/ theg pa gzhan dang cha mi phyed do// mchongs sa lnga ldan ma shes na/ ye shes zang thal mi rtogs so// sgoms nyams drug pa ma shes na/ dgongs pa'i don 'chal bar 'gyur ro// gnad kyi bka' bzhin ma shes na/ gnad mi chod do// zhes gsungs nas/ 'khor rnams dgyes nas rjes su yi rangs te/ chos kyi dri ma med pa chen po'i ngang du thim mo/ / sems phyogs chen po nam mkha' mdzod kyi rgyud las/ don ma lus par bsdus nas bstan pa rjes su yi rang pa'i le'u ste bcu gnyis pa'o// sems phyogs chen po nam mkha' mdzod las/ chos nyid nam mkha' mdzod kyi rgyud ces bya ba rdzogs so/ /// rgya gar skad du/ a ti ma hA bo d+hI tsit+ta koSha d+harma/ mU la A kA sha dwata dz+nyA na a kA sha nA ma/ bod skad du/ rdzogs pa chen po byang chub kyi sems mdzod kyi chos/ rtsa ba nam mkha' gnyis pa las/ ye shes nam mkha' zhes bya ba/ bcom ldan 'das bdud kyi stobs rab tu 'joms pa la phyag 'tshal lo// 'di skad bdag gis thos pa'i dus gcig na/ 'og min gyi gnas mchog dam pa ru// rigs lnga bde gshegs sangs rgyas dang// ye shes mkha' 'gro rnam lnga dang// sprin gyi shugs can byang sems bdun// kun tu bzang pos lung bstan nas// lho phyogs yid 'dres tshal dag tu/ / gzhon nu rab tu dwang ba yis// lung bstan sems phyogs chen po'i mdzod// bskal pa dang po'i thog ma la// 'khor 'das sa bon tshul du gnas// de nas bar gyi bskal pa la/ / myu gu'i tshul du 'byung ba'i dus// bskal pa tha ma rgyab gyes pa// til gyi 'bru tsam dge ba'i las// ma bsags kun bzangs rang sar grol// til gyi 'bru tsam sdig pa'i las// ma byas 'gro drug khams gsum 'khor/ / dge sdig nang nas gang che ba// gzhi snang rtogs dang ma rtogs yin// mdzod chen gcig gi ngo bo bas// che ba lnga yi ka ba btsugs// thig le drug gi gdung ma bres// snang bcu bdun gyi phyam gyis phub/ / brgyad khri bzhi stong mig tshags byas// sku dang ye shes nor gyi dbyig/ phyag rgya bzhi yis rgyas btab ste// phyogs bzhi sgo mo gsal ba la// gzung 'dzin gnyis kyi sgo lcags bcug/ lde mig mtha' yi mon bus khyer/ / mdzod 'di gang gis mthong gyur pa// de tshe sangs rgyas nyag gcig rtogs// nor rdzas bzhi la longs spyad nas// dbul ba bral ba'i bdag po bzhin// yid la bsam pa yongs rdzogs nas// 'dod pa thams cad rab tu 'grub/ / de phyir skal ldan rnal 'byor gyi// dbang phyug chen po 'bad par bya// dbus na chos 'byung chen po'i mdzod// oM gyur sngags kyi sdong po can// e ma gsang ba rmad du byung/ / mi zad rgyan gyi 'khor lo sku// shar nas thig le chen po'i mdzod// mi rtog hU~M gi ngo bo nyid// e ma gsang ba rmad du byung chos// chos sku rang byung 'od gsal sku// lho na srid pa chos nyid mdzod// gsung mchog a yi rnam pa can/ / e ma gsang ba rmad byung chos// ye shes dbyings na 'od gsal sku// dbying na kun gzhi snying pa'i mdzod// ha ni 'phrin las kun gyi bdag/ e ma gsang ba rmad du byung chos// rdo rje mgon po thugs kyi mchog/ kun gzhi'i mdzod chen kha phye nas// g.yas na chos nyid rang byung rtsa// g.yon na yon tan dang 'byed rtsa// mdun na ye shes rang byung rtsa// rgyab na rang rgyud las kyi rtsa// dbus na rtsa brgyad 'dus par gnas/ / mi zad rgyan gyi 'khor lo'i sku// bde gshegs kun gyi sku gsung thugs// 'dod khams rigs drug sa bon dang// gzugs khams bsam gtan oM gyi sku// gzugs med skye mched yi ge a/ / ma lus sems can thams cad la// gnas pa rtsa yi dkyil 'khor dang// rten pa bdud rtsi thig le khams// grub pa sngags kyi ngo bo nyid// snying po rlungagi las rnams rdzogs// mngon sum sangs rgyas che ba ni/ / 'byung ba lnga po bcom ldan 'das// bdag nyid sangs rgyas che ba ni// rang lus 'byung ba bcom ldan 'das// chos dbyings sangs rgyas che ba ni// 'byung ba lnga nyid chos kyi dbyings// de yin sangs rgyas che ba ni/ / de min sangs rgyas gzhan na med// thams cad sangs rgyas che ba ni// 'khor 'das ma bcos sangs rgyas nyid// stong pa gsum gyi spros bral drug/ de ni chos nyid thig le nyid// ma 'gags kun shar spros med dag/ dbyings kyi thig ler rang gi gnas// dbyings nyid rnam par dag pa yis// thig le gzung 'dzin dri ma bral// ngang gis 'od gsal yongs ma bcos// ye shes chen po'i thig ler gnas/ / thams cad kun nas rang gnas pas// kun tu bzang po'i thig le yin// 'khor 'das btsal ba med pa ni// lhun gyis grub pa'i thig le yin// 'gro drug zhen pa'i snang ba drug/ mu stegs log pa'i snang ba dang/ / rgyu 'bras blo yi snang ba dgu/ dbyer med kun bzang snang bar gcig/ nyon mongs brgyad khri bzhi stong gi/ gnyen por de snyed chos rnams gsungs// dgu dang lnga dang bzhi dang gsum// mdor na sku gsum kho na yin/ / stong nyid me long mnyam pa nyid// so sor rtog pa bya ba grub// chos sku dngos med phyag rgya che// longs sku'i 'od 'bar dam tshig rgya// rang byung ye shes chos kyi rgya// thugs rje sprul sku las kyi rgya/ / theg pa ma lus thams cad kun// phyag rgya bzhi yis rgyas gdab bo// mun pa'i 'khor sgor snang ba ni// 'gro ba drug dang mu stegs gnyis// spyod pa'i 'dren sgor snang ba ni// sprul sku'i dam chos nyan rang sems/ / thabs kyi sbyor stor snang ba ni// kri ya u pa yo ga nyid// nges pa'i gsang sgor snang ba ni// bskyed dang rdzogs dang rdzogs pa che// sgo bzhi dag nas zhugs pa yis// mnyam pa'i spyi mdzod chen por 'gro/ / gzung ba yul gyi bang ba'i nang// 'dzin pa sems kyis gzer sgo yis// thams cad kun la khyab mod kyang// tha rams sgo lcags phyed par dka'// mtha' yi mun bu spyi 'dum gyis// ma bslabs shes pa'i rtsal 'chang ba/ / lha yi bi shwa kar ma ltar// bde gshegs byang chub sems dpa' dang// sprul pa'i rigs 'dzin ma lus pa'i// dgongs brda ngag gi lde mig khyer// bla ma mnyes par byas gyur na/ / lde mig btsal ba'i dus la bab// mdzod 'di mthong bar bya ba yang// dbus kyi lte ba mdzod chen las// mu khyud brda dgra nges pa gsum// gling bzhi srid pa rang byung nyid// khang khyim bco brgyad thugs rjes bskor/ / khang khyim bzhi yi rtsa ba can// grong khyer bzhi yi mu khyud mdzes// ma hA yo ga'i ngo sprad dang// a nu yo ga'i ngo sprad dang// a ti yo ga'i ngo sprad dang// gsang sgor dpe don rtags gsum gyis// ngo sprad thob pa'i rnal 'byor pas/ / chos sku thig le nyag gcig rtogs// lta ba gnas lugs ma nor ba// chos sku zang thal chen po yin// spyod pa ma bcos lhug pa nyid// shugs 'byung 'gag pa med par spyad/ / sgom pa dgongs pa ma nor ba// bying rgod med pa'i ngang la bzhag/ 'bras bu thog ma'i rang sa nyid// 'khrul pa gzhi yi thog tu sangs// lha la dpag bsam shing bu dang// gnod sbyin bum pa bzang po dang/ / klu la yid bzhin nor bu dang// snod 'dzin grub pa lag pa bzhin// rnam rtog bag chags sbubs 'di na// ma rig sgo nga'i sbubs phye bas// rig pa'i ye shes rnyed par 'gyur// rang bzhin par dor bden pa mthong/ / ting 'dzin bar dor brtan pa thob// chos nyid bar dor dran pa sad// srid pa'i bar dor ye shes sbubs// srid pa'i dra ba 'joms pa'o// sprul pas yid la bsam pa rdzogs// 'gro don ma lus rdzogs pa ni/ / sngar 'dris mi dang 'phrad bzhin 'gyur// ma ni kun khyab chen mo ste// bu ni rig pa gser bu nyid// sngon gyi bag chags goms dbang gis// dud 'gro'i bu ltar nu ma 'tshol// yang na rang bzhin srog zon byed/ / ma yi pang du bu 'gro ba// ma bu brda 'jal man ngag 'dis// rin chen gsang ba'i sbubs nang du// 'dod pa thams cad rab tu 'grub// thog ma'i rang sar sleb ces bya// sngon las 'phral rkyen brtson 'grus kyis/ / skal ldan rigs kyi bu mchog yin// 'jig rten bya ba btang byas la// thos bsam sgom pa sna tshogs kyis// thig le gsang skor bslab par gces// phyi rabs kun la gdams par bzhag/ ces sems phyogs chen po mdzod kyi rgyud/ ye shes nam mkha' las/ mdzod rtsa ba'i le'u ste dang po'o//// de nas bcom ldan 'das kyis brda nges pa'i ting nge 'dzin la bzhugs nas 'di gsungs so/ / 'di ltar sangs rgyas bcom ldan 'das// rdzogs pa'i sangs rgyas a las byung// a ni yig 'bru kun gyi mchog/ don chen yi ge dam pa yin// khong nas 'byung ba skye ba med// tshig tu brjod pa spangs pa ste/ / brjod pa kun gyi rgyu yi mchog/ tshig kun rab tu gsal bar byed// yi ge a yi sgra 'di ni// ji snyed chos kyi rtsa bar gsungs// ma rig sgo nga'i sbubs 'byed pa// srid pa'i drwa ba 'joms pa po/ / nyon mongs ma lus zhi byed pa// 'khor ba'i rgya mtsho pha rol phyin// sbubs zhes bya ba'i brda 'di yis// 'khor ba 'di las grol gyur nas// mya ngan 'das pa'i go 'phang thob// nges pa'i don du bshad pa ni/ / dang por rnam rtog bag chags sbubs// sku ni rnam pa gsum du gnas// ye shes bzhi ru gnas pa dang// shes rab spyan dang ldan pas na// ma dag 'khrul pa'i snang ba la// longs sku 'dra 'bag phyed sku yis/ / ma hA yo ga'i ngo sprod bya// bar dor lnga ldan rtogs par byed// sprul sku 'od khyim kha sbyor gyis// a nu yo ga'i ngo sprod bya// chos nyid bar dor rdzogs ldan rtogs// chos sku rin chen man shel gyis// a ti yo ga'i ngo sprod bya/ / rin chen sbubs su dgongs pa skyal// thig le gsang skor ngo sprod kyis// sku gsum 'du 'bral med pa'i don// nyi ma'i snying po dag la sprad// rdzogs ldan chen po'i dgongs pa chod// don gyi ngo sprod thag chod la/ / rtags kyi ngo sprod yid ches te// dpe yi ngo sprod ngo shes pas// blo yi the tshom chod pa ni// grol ba'i dgongs pa dam pa'o// bar du ye shes sgyu ma'i sbubs// sangs rgyas bzhi bcu rtsa gnyis sku/ / chos kyi spyan gyi 'khor 'das gzigs// dag pa 'jig rten snang ba 'dir// sprul pa'i skye gnas 'gro don mdzad// 'khor ba dag las grol ba yin// rgyu lus mngon du gyur pa yin// 'khor 'das mngon sum gzigs pa yin/ / chos sku rin chen gsang ba'i sbubs// ye shes mig gcig dri ma med// chos las grol bas dgongs pa ni// rgyun chad med par gnas pas na// bsam gtan bsam bya blo ldan mchog/ ting 'dzin lus can lus kyi mchog/ yang dag ye shes snang ba yin// phyi dang nang dang gsang ba dang// gsang chen ma lus bshad pa dang// rtsa bar gyur pa ma lus kun// bcu gnyis man ngag 'dus pa yis/ / brda sgra nges pa'i ja log tu// mu khyud brda sgra nges pa dang// ja log bshad pa'i gnad du bstan pa// zhes sems phyogs chen po mdzod kyi rgyud// ye shes nam mkha' las// gdams pa'i rgyud skor bzhi bstan pa'i le'u ste gnyis pa'o/ /// de nas bcom ldan 'das kyis thig le gsang skor gyi rtsa ba'i rgyud bzhi thig le gsang ba chen po'i mdzod nas phyung ngo// dang por slob ma dad ldan gyis/ / bla ma dam pa bsten par bya// srid pa'i dgon pa las rgal ba// ston pa gcig pu 'gro ba'i bla// 'jig rten phyogs bcur rab grags pa// chos kyi sbyin bdag chen po ste// byams pa'i go cha bgos pa ste/ / snying rje yi ni ya lad bgos// de nas bla ma dam pa ni// mtshan nyid ldan pa smos ci dgos// nam yang bla mar gyur pa la// dad gus mos pa bya ba yang// mchod 'os bsto 'os phyag gi gnas// rtag tu ri mor bya ba'i 'os/ / bkur 'os rjes par bya ba'i mchog/ phyag byar 'os pa bla ma'i bar// de nas bla ma dam pa la// dbang bskur zhu bar bya ba yang// rig pa rtsal gyi dbang bskur las// phyi yi dbang bskur bya ba ni/ / rdo rje rin chen dbang bskur dpal// rin chen kun bdag dbang phyug ste// 'jig rten dbang phyug kun gyi bdag/ rdo rje 'chang ba kun gyi rje// nang gi dbang bskur bya ba ni// sku gsung thugs la byin gyis brlabs/ / sangs rgyas kun gyi thugs che ba// sangs rgyas kun gyi thugs la gnas// sangs rgyas kun gyi sku che ba// sangs rgyas kun gyi gsung yang yin// gsang ba'i dbang bskur byas pa yis// don gyi thig le dkar dmar rtogs/ / rdo rje nyi ma snang ba che// rdo rje zla ba dri med 'od// chags bral la sogs chags pa med// kha dog sna tshogs 'bar ba'i 'od// dbang bskur ba yi 'bras bu yis// bdag kyang sangs rgyas rdzus skyes thog/ rdo rje skyil krung rdzogs sangs rgyas// sangs rgyas 'gro ba'i chos 'dzin pa// dpal ldan sangs rgyas pad+ma skyes// kun mkhyen ye shes mdzod 'dzin pa// de ltar mthar thug 'bras bu ni// thob nas theg chen gzhan don mdzad/ / 'khor ba'i sdug bsngal sel 'gyur ba// dper na sman pa ltar 'gyur ba// sman pa che mchog gtso bos te// zug rngu 'byin pa bla na med// sman rnams ma lus ljon pa'i shing/ / nad do cog gi dgra che ba// de ltar rtsa ba'i rgyud chen ni// khang khyim gcig gi nang du bshad// de nas 'gro don mdzad pa'i sku// 'jam dpal dgongs pa 'dus pa ni// gzugs sku ma lus 'dir 'dus pas/ / zhi khro rnam pa gnyis su gsungs// rin chen smug po'i gzhal yas na// zhi ba'i sangs rgyas bzhugs pa dang// klad pa dung khang gzhal yas na// khro bo'i sangs rgyas gnas pa dang// ye shes dbang bskur cod paN can/ / rdzogs pa'i sangs rgyas rgyan du thogs// sdug bsngal gsum gyi sdug bsngal zhi// gsum sel mtha' yas grol gsum thog/ 'jam dpal dgongs pa 'dus pa ni// khang khyim gcig gi nang du gsungs/ / de nas gdams ngag bsgom par bya// rang bzhin lhun grub chos sku las// longs spyod rdzogs sku rtsal du shar// gdul bya 'dul byed sprul pa'i sku// byed pa sems can kun don byed/ / phan 'dod sems can mnyes gshin pa// bzang ngan shes shing 'dus shes la// khyab bdag dam shes dam tshig ldan// dus shes sems can dbang po shes// rnam grol gsum la mkhas pa po// sku gsum ye shes lnga rtogs pas/ / rtogs pa mngon gyur chos skur gnas// nyams len 'jam dpal ye shes brgyan// khang khyim gcig gi nang du bshad// de nas mtshan don dgongs pa yis// 'jam dpal don yang rab bshad na/ / ye shes lus can 'jam dpal gyi// ming brjod pas ni don che ba// dag par byed cing sdig sel ba// mtshan ni yang dag brjod par bshad// zhi ba rdo rje 'dzin pa dang// khro bo'i dgongs pa 'dus pa ni/ / rdo rje zab mo 'dzin na dzig/ rdo rje blo gros don bzhin rig/ sa dang pha rol phyin pa yis// dgongs pa 'dus par gyur pas na// pha rol phyin pa kun rdzogs pa// sa rnams kun gyi rgyan dang ldan/ / dgongs pa phyi nang kun 'dus pas// 'jam dpal dgongs pa 'dus pa'i mtshan// chos kyi sku la longs skus brgyan// longs sku ye shes rnam lngas brgyan// ye shes thugs rje sprul skus brgyan// sku gsum ye shes lnga ldan cing/ / 'khrul tshul grol tshul bstan pa ni// 'jam dpal ye shes rgyan du bshad// mtshan gyi don rnams ston 'gyur zhing// rgyud kyi dgongs pa mtshan gyis rdzogs// mtshan don ston pas 'jam dpal ni/ / khang khyim gcig gi nang du bshad// ces sems phyogs chen po mdzod kyi rgyud/ ye shes nam mkha' las/ rtsa ba'i rgyud skor bzhi bstan pa ste le'u gsum pa'o//// de nas bcom ldan 'das kyi nang skor rtogs pa ye shes kyi 'khor lo 'di thugs kyi gsang mdzod chen po nas gsungs so/ / dpal ldan rdo rje sems dpa' yis// thig le mthar thug dgongs pa yis// gzhi bcas thugs rje'i lcags kyus bzung/ / ye shes gsang ba 'khor lo che// sangs rgyas mnyam sbyor dgongs par bcas// srid pa'i 'khor lo dang po yin// 'jam dpal dri med snying po yis// rgyud lung man ngag khog phub nas// gzhung du dril bar bya ba yang/ / sangs rgyas 'dus pa man ngag rgyud// rgyud rnams man ngag thugs kyi gter// srid pa'i 'khor lo bshad pa las// dri med snying po'i dgongs pa yin// sbubs gsum dgongs pas gzhi bzung nas/ / de bzhin gshegs pa'i chos lnga dang// byang chub sems dpa'i chos bdun dang// ting 'dzin lta bu'i srog shing drug/ spyan ras gzigs ni seng ge sgra// srid pa'i 'khor lo gsum pa yin/ / seng ge 'khyil ba'i dgongs pa las// phyi nang gsang ba sgrub pa ni// rtag bzhi bdud bzhi rgyas gdab bzhi// gangs la nyi ma shar ba dang// thog dang gzer dang khyung dang ni// skar mda' lta bu'i man ngag gis/ / phyag na rdo rje me lce'i 'phreng// srid pa'i 'khor lo bzhi pa yin// rigs gsum rigs khyab spyi dang bzhis// mu khyud grong khyer bzhi yis mdzes// zhes sems phyogs chen po mdzod kyi rgyud// ye shes nam mkha' las/ nang gi rgyud skor bzhi gtan la phab pa'i le'u ste bzhi pa'o//// de nas bcom ldan 'das dpag bsam gyi shing ljon shing rgyas pa'i ting nge 'dzin la bzhugs nas 'di gsungs so/ / dpag bsam yongs su sa brtol shing// rtsa ba rnam pa lngar zur pa// pad+ma 'khyil pa sku yi rgyud// chos dbyings ye shes bstan par byed// rdo rje rtse mo gsung gi rgyud// so sor rtogs pa'i ye shes gcod/ / rin chen dpung pa thugs kyi rgyud// me long lta bu ye shes gsal// bsod nams byams pa brtsegs pa ni// mnyam nyid ye shes yon tan rgyud// 'phrin las mkha' gsal nyi ma ni// bya ba grub pa'i ye shes yin/ / dpag bsam shing gi rtsa ba lnga// sdong po gcig tu dril nas gnas// lta ba'i ngo bo rang shar bas// ye shes bla ma chen po'i rgyud// lta ba'i gnad rnams yongs spyod pa// 'khor ba dong dkrugs chen po'i rgyud/ / chos nyid don la sgom du med// gang zag blo la sgom du yod// mnyam par gzhag pas bsam gtan bsgom// rjes kyi shes pa spyod par byed// rnal 'byor rab 'bring tha mas bcad// rma bya 'jing bsnol rgyud chen gnyis/ / 'bras bu sku dang 'od zer ni// mdzes pas lha mo 'od zer can// dpag bsam ljon shing chen po la// yal ga skyes nas lo 'dab rgyas// lta ba 'gyur ba med pa ni/ rgyal mtshan rtse mo lta bur gsal/ / bsgoms pas nyon mongs dri ma med// nor bu chu 'dangs lta bur gnas// sangs rgyas spyod pas tshe dbang bskur// dbang bskur bla ma rin po che// 'bras bu mngon par sangs rgyas rtags// sku gdung ring bsrel chen po'i rgyud/ / dpag bsam shing chen rgyas pa la// me tog rab tu gsal ba ni// gzhi rnams rab tu ldings pas na// mtshan nyid bzhi dang ldan par bya// mdzod dang lde mig nor rdzas spyod/ / zhal chems gsum par bzhag pa yin// dpe don rtags gsum ngo sprod pas// sku dang gsung dang thugs tig gsum// dgongs pa mya ngan chos skur 'da'// bdud rtsi yang zhun lta bur bzhugs/ / dpag bsam ljon shing chen po la// 'bras bu rab tu smin pa ltar// brgyud pa rigs 'dzin 'bras bu dang// mya ngan 'das pa gang zag 'bras// bco brgyad ches 'bras man ngag lung/ / bam po gsum pa'i lung chen gsungs// zhes sems phyogs chen po mdzod kyi rgyud// ye shes nam mkha' las phyis skor thugs rje chos kyi 'khor lo bstan pa'i le'u ste lnga pa'o//// de nas bcom ldan 'das kyis rgyud thams cad kyi mdud pa yongs su 'grol ba'i ting nge 'dzin la bzhugs nas 'di gsungs so/ / mkhas par gyur ba paN+Di tas// ngo bo nges tshig dbye ba yis// don bshad mdzes pa'i spyi don dgongs/ / de phyir thig le kun gsal bshad// rnal 'byor pa ni ku su lus// rang don nyams su len gyur pas// dgongs pa ma nor gsol ba ni// de phyir thig le kun 'dus bshad// rgyu don ma lus mngon par rtogs/ / dgongs pa'i don rnams cho ga ltar// las kyi bya ba tshang gyur pas// Atsa r+ya slob dpon bzhin// de phyir thig le kun rig rgyud// bya ba byed pa dag la'ang bshad// rnal 'byor pa ni sems nyid la/ / zhib mor lta zhing spyod 'gyur ba// dbang po tha mar gyur pa rnams// sgom gyi gnad dang thun tshod 'dzin// rim pas don la 'khrid byed cing// gdams pa'i gnad kyis ston byed pas// blo dman gang zag grol bya'i phyir/ / de phyir thig le kun spyod bshad// ces sems phyogs chen po mdzod kyi rgyud ye shes nam mkha' las/ bshad rgyud chen po bzhi'i mdzod bstan pa ste le'u drug pa'o//// de nas bcom ldan 'das kyis sgo rnams rab tu 'byed par byed pa 'di phyi rabs kyi rnal 'byor pa la lung rab tu gsal bar gsungs so/ / phyi yi lcags rin po la// zla gam gcig pa'i sgo gnas pa// tsaN+Da log spyod can gyis bsrungs/ / de yi lde mig bstan pa ni// don la khog dbugs stong thun dang// dkyus las spyad bsdus don dang// tshig gi 'bru 'joms lde mig gsum// sgo 'di phye nas bshad pa ni// gang zag bzhi yi don du dgongs/ / bshad pa'i rgyud rnams grol bar byed// khang khyim bco brgyad phyi sgo bdun// sgo ba sprin gyi shugs can bdun// de 'byed pa yi lde mig gsum// rgyud dang man ngag lung gsum gyis// phun sum tshogs pa rnams lnga dang/ / dgos don lnga dang mdo gcod bdun// rgyud lung man ngag gsal bar byed// gling bzhi srid pa rang byung la// tshad med bzhi yi sgo shar nas// dam pa dpal bzhi'i sgo srungs can// lde mig bzhi yis 'byed 'gyur ba/ / rigs gsum mgon po'i dgongs pa can// rigs khyab rdo rje sems dpa' yi// dgongs pa thig le mthar thug pa// rang byung srid pa'i 'khor lo 'byed// khang khyim bzhi yi rtsa ba la/ / bdag gzhan bgrod pa'i sgo gnyis na// phyag na rdo rje'i sgo ba bzhugs// ston pa gnyis kyi lde mig ni// phyi nang dag pa'i gang zag la// phyi yi ston pa shAkya thub// nang snang dag pa'i gang zag la/ / nang gi ston pa rdo rje 'chang// dus gsum sangs rgyas dgongs pa yis// 'jam dpal sgyu 'phrul dra ba yi// rtsa rgyud sdebs bzhi'i khong sdebs na// yang dag don la dril nas 'byed// mu khyud brda sgra nges pa dang/ / ja log gsum gyis brgyan pa la// sgo med sbas pa'i gter khyim de// shin tu gsang nas rna rgyud 'byed// dbus kyi lta ba mdzod chen la// mun pa'i 'khor sgo la sogs bzhi// theg pa bzhi yi lde mig gis/ / phye nas mdzod du 'jug pa yang// mkha' 'gro ma bzhi'i sgo srungs la// mnyes nas gter chen bstan pa ni// dang po shar du ngo sprod rgyud// sku gsum snang ba gsal bar ston// lho ru rin chen 'od gsal ba/ / dri med rnam par dag pa'i rgyud// nub tu lhun grub ji bzhin ma// rnam par dag pa'i rgyud chen mdzod// byang du dri med rnam dag pa// sangs rgyas dgongs pa 'dus pa'i rgyud// dbus na mdzad chen dgongs pa ni/ / dur khrod phung po 'bar ba'i rgyud// bye brag rgyud lnga'i mdzod chen rnams// spyir ni gcig shes kun grol ba// chos sku thig le nyag gcig la// gnas tshul sku gsung yon tan las// stong gsal bde yon mi 'gag de/ / ngo bo stong par gnas pa dang// rang bzhin gsal bar shar ba dang// rnam pa bde bar go ba dang// yon tan cir yang mi 'gag la// 'phrin las thogs pa med par 'char// 'byung ba lnga ru snang ba ni/ / ngo bo stong pa nam mkha' la// rang bzhin gsal ba sra ba'i sa// rnam pa bde bar 'bar ba'i me// yon tan mi 'gag 'byung ba chu// 'phrin las thogs pa med pa rlung// snod kyi 'jig rten zhes bya ba/ / sems can kun gyi gnas dang rten// spyod pa'i myu gu gyur pas na// gzung ba'i yul zhes bya ba yin// shes pas ma zin bdud snang ba// stong pas 'dus pa'i rtse shing snang// gsal bas nus pa lci ba dang/ / bde bas tsha zhing rno ba dang// mi 'gag pa las bsil ba dang// thogs pa med pas yang ba'o// ro yang rnam pa lngar snang ba// stong pas ro rnams 'dus pa dang// gsal bas sa ni mngar bar 'gyur/ / bde ba las ni tsha zhing skyur// mi 'gag pa ni lan tshwa'i ro// thogs med rlung ni bska ba'o// skye ba rnam pa bzhi gnas pa// ngo bo stong bas sgong skyes la// rang bzhin gsal bas mngal skyes te// bde dang mi 'gag drod gsher skyes/ / thogs pa med pas rdzus skyes yin// 'gro ba drug tu snang ba ni// stong pa lha dang lha ma yin// gsal ba mi yi skye gnas la// bde ba dug 'gro byol song yul// mi 'gag pa ni yi dwags gnas/ / thogs pa med pa dmyal ba nyid// rdzu 'phrul nang du snang ba ni// stong pa las ni 'dus pa'i nad// gsal bas bad kan lci ba dang// bde bas mkhris pa'i nad yin la// mi 'gag pa ni ldan pa ste/ / thogs pa med pa rlung gi nad// lha srin yi dwags snang ba yang// ngo bo stong pa gza' yi nad// rang bzhin gsal ba sa bdag klu// rnam pa bde bas ma mo'i rims// yon tan mi 'gag gnod sbyin 'gegs/ / 'phrin las thogs med rgyal 'gong btsan// snang srid lha srid ma lus rnams// rtsa ba 'di las srid par 'gyur// de las mthu lngar ldan pa ni// stong pa gti mug gtad yin la// gsal bas srogs mthu zhe sdang can/ / bde ba 'dod chags nor sgrub de// mi 'gag nga rgyal thog ser dang// thogs med phrag dog nang rgyas rnams// dug lnga dag las snang ba yang// rtsa ba 'di las byung bar zad// stong pa gti mug don la rmongs/ / gsal ba mnar sems zhe sdang nyid// bde bas 'dod cing chags pa la// mi 'gag mngon pa'i nga rgyal de// thogs pa med las phrag dog snang// ji snyed nyon mongs ma lus kun/ / thams cad 'di las snang bar 'gyur// rnal 'byor lam la gnas 'dod pas// 'gro drug sems can kun ldan pa'i// dug lnga rang shar rang grol du// lam du rtogs par byang ba yang// stong pas gti mug lam du bya/ / mchod pa chen po gti mug che// gti mug blo ste gti mug sel// byol song gnas las nges par grol// gsal bas zhe sdang lam du bya// mchod pa chen po zhe sdang che// nyon mongs kun gyi sgra che ba/ / dmyal ba'i sdug bsngal grol bar byed// de bas 'dod chags lam du bya// mchod pa chen po 'dod chags che// sems can thams cad dga' bar byed// mi yi gnas las nges par grol// mi 'gag nga rgyal lam du bya/ / de nyid khong khror 'gyur ba yin// mchod pa chen po chags pa che// chags pa thams cad sel bar byed// ser sna yi dwags gnas las grol// mchod pa chen po bde ba che// dga' ba che po mgu ba che/ / khong khro lha min yul las grol// thogs med phrag dog lam du bya// mchod pa chen po khro ba che// khro ba chen po dgra che ba// phrag dog lha yi gnas las grol// rigs lnga bde gshegs skur snang ba// stong pa rdo rje sems dpa'i sku/ / gsal ba rnam par snang mdzad nyid// bde ba snang ba mtha' yas la// mi 'gag pa ni rin chen 'byung// thogs med don yod grub pa nyid// rigs lnga'i sangs rgyas 'di dag rnams/ / sems nyid ngang du snang ba yin// yul chen lngar ni snang ba yang// stong pa nam mkha'i dbyings phyug ma// gsal ba sa ni sangs rgyas spyan// bde ba me ni gos dkar mo// mi 'gag chu ni mA ma ki/ thogs med rlung gi dam tshig sgrol/ / sems dpa' sems ma'i tshogs chen ni// sras kyi tshogs su snang ba yang// stong pa khro bo sgo bar snang// gsal ba sa yi snying po la// bde ba spyan ras gzigs dbang nyid/ / mi 'gag nam mkha'i snying po dang// thogs med phyag na rdo rje'o// stong pa gshin rje khros pa nyid// gsal ba lha mo sgeg mo la// bde ba pi wang glu len ma// mi 'gag pa ni 'phreng ba ma// thogs pa med pa gar mkhan nyid/ / stong pa khro bo stobs po che// gsal ba byams pa'i sku ru snang// mi 'gag sgrib pa rnam par sel// thogs pa med pa 'jam dpal nyid// stong pa khro mo stobs chen ma// gsal ba lha mo spos ma nyid/ / bde ba lha mo mar me ma// mi 'gag pa ni me tog ma// thogs pa med pa dri chab ma// stong pa rta mgrin chen po la// gsal ba rta mgrin yul yin te// bde ba bdud rtsi 'khyil ba la// mi 'gag pa ni yul du gnas/ / thogs pa med pa sgo ba'i las// stong pa lta dang lha min thub// gsal pa mi yi thub pa ste// bde ba yi dwags thub pa la// mi 'gag pa ni byol song thub// thogs med dmyal ba'i thub pa'o// stong pa kun tu bzang po la/ / gsal ba kun tu bzang mo ste// bde ba yab yum 'du 'bral med// mi 'gag dkyil 'khor lha tshogs rnams// thogs pa med par 'byin pa'o// stong pa rnam shes phung po la// gsal ba gzugs kyi phung po nyid/ / bde ba 'du shes phung po la// mi 'gag pa ni tshor ba ste// thogs pa med pa 'du byed do// stong pa lus kyi dbang po la// gsal ba mig gi dbang po nyid// bde ba lce yi dbang po nyid/ / mi 'gag pa ni sna yin la// thogs pa med pa rna ba'o// stong pa nyid la gsal ba 'tsher// bde ba mchin pa mi 'gag mkhal// thogs pa med pa glo ba'o// stong pa rang byung ye shes rtsa// gsal ba rtsa bzhi 'dus pa'i mdo/ / bde ba rang byud las kyi rtsa// mi 'gag rang byung chos nyid rtsa// thogs pa med pa yon tan rtsa// stong pa nam mkha'i dwangs snyigs 'byed// gsal bas yi dwangs ma'i rtsa// bde ba me yi dwangs ma la/ / mi 'gag chu yi dngas ma ste// thogs med rlung gi dwangs mar shar// stong pa srog 'dzin rlung yin la// gsol ba sa dang 'dres pa'i rlung// bde ba me dang drod mnyam la// mi 'gag chu dang 'grogs pa'i rlung/ / thogs med rlung gi rlung du bshad// stong pa lus la nam mkha'i rlung// gsal ba rna la sa yi rlung// bde ba mig la me yi rlung// mi 'gag lce la chu yi rlung// thogs med rna bar rlung gi rlung// stong pa nam mkha'i rtsa gsum nyid/ / nyi ma zla ba rA hu la// gsal ba sprul pa'i dkyil 'khor la// bde ba mgrin par longs spyod pas// mi 'gag snying bar chos 'khor nyid// thogs pa med pa bde chen kyi// gnasapa rtsa yi dkyil 'khor gyis/ / lus kun la ni khyab par gnas// stong pa byang chub sems yin la// gsal ba dri chen bdud rtsir gnas// bde ba pad+ma rak+ta nyid// mi 'gag sha chen dam rdzas la// thogs med dri chur gnas pa rnams/ / sangs rgyas rigs lnga'i dam rdzas de// khams kyi bdud rtsi chen po nyid// rnal 'byor 'dus pa kun rdzob gnas// stong pa mi yi sha ru bshad// gsal ba glang po'i sha yin la// bde ba ba glang sha yin te/ / mi 'gag pa ni rta yi sha// thogs med pa 'am khyi shar bshad// khams dgu 'dus pa'i dwangs ma ni// rnal 'byor ba yis nyams su blang// bdud rtsi gtor ma'i mchod pa ni// rigs 'dzin bka' bsrungs zhi khro mchod/ / de nas gdams ngag gdab par bya// stong pa hUM gi rang bzhin la// gsal ba yi ge oM yin te// bde ba a yi rnam pa la// mi 'gag pa ni swa ru gnas// thogs pa med pa yi ge hA/ / stong pa lha dang lha ma yin// a dkar su ser gnas pa yin// gsal ba byol song dud kha'i du// bde ba yi dwags tri dmar la// mi 'gag mi yi nri ljang ste// thogs med dmyal ba'i dri nag po// stong pas nyams ni sems la 'char/ / gsal bas gar ni lus la 'char// bde bas sngags ni ngag las 'char// mi 'gag mthong snang yul la 'char// thogs med bag chags rmi lam 'char// rnal 'byor nyams ni snang ba yin/ / thams cad ma lus 'khor 'das kyi// nyams snang 'di ru 'dus par bshad// stong pas thugs kyi mngon shes dang// las kyi mngon shes 'char ba yin// gsal bas lus kyi rdzu 'phrul 'char// bde bas spyan gyi mngon shes 'char/ / mi 'gag gnas kyi mngon shes dang// thogs med snyan gyi mngon shes dang// mngon par shes pa rnam drug gis// gdul bya'i yul du gzigs pa yin// stong pas chos kyi sku yin te/ / gsal bas longs spyod rdzogs pa'i sku// bde bas longs sku yul dang ldan// mi 'gag sprul pa'i sku ru snang// thogs pa med pas 'gro don mdzad// stong pas chos dbying ye shes la// gsal ba me long lta bu ste/ / bde bas so sor rtog pa la// mi 'gag pas na mnyam pa nyid// thogs med bya ba grub pa'o// stong pas rtag pa'i mtha' dang bral// gsal bas chad pa'i mtha' dang bral// bde bas rtag chad gnyis su med/ / mi 'gag med pa'i mtha' dang bral// thogs med yod pa'i mtha' dang bral// stong pa yul nyid snang stong dang// gsal ba sems nyid gsal stong dang// bde ba yul nyid bde stong dang// mi 'gag stong par mi gnas skye/ / thogs med snang ba ther zug med// stong pa yul las grol ba dang// gsal ba sems las grol ba dang// bde ba lus las grol ba ste// mi 'gag stong pa rkyang ba yin/ / thogs med snang ba a 'thas min// stong pa puMr rna nye bar zhi// gsal ba rdo rje khro gdong ma// bde ba ro zan shan ting nyid// mi 'gag gtsug gi rgyan cig ma// thogs med rlung gi gshog pa can/ / stong pa rdo rje mchu can gyis// thog dang 'dra ba'i man ngag yin// gsal ba 'dab chags rgyal po yi// khyung dang 'dra ba'i gdam ngag yin// bde ba tshangs ma dung mgrin ma// mi 'gyur gser gyi gdam ngag yin/ / mi 'gag par ni 'char ba yang// skar mda' lta bu'i gdam ngag yin// thogs pa med par 'byung ba ni// gangs la nyi ma shar ba yin// stong pa ngo sprad yul bzhir bden// ma hA yo ga'i ngo sprod dang/ / a nu yo ga'i ngo sprod dang// a ti yo ga'i ngo sprod dang// sku gsum dbyer med ngo sprod bzhis// bden bzhi tshul gyi rnam pa can// gsal ba ngo sprod brda bzhi ste// longs sku 'dra 'bag phyed skur sprad/ / sprul sku 'od khyim kha sbyor sprad// chos sku rin chen man shel sprad// 'du bral med pa nyi ma yi// snying po nyid la sprad par bya// brda dang dag gis bstan pa ni// shes rab brgyad po rtogs pa 'chang// bde ba sprad pa'i dgongs pa ni/ / sku gsum 'du 'bral med pa yis// bag chags sbubs kyi dgongs pa chod// longs skus lnga ldan dgongs pa chod// sprul skus rdzogs ldan dgongs pa chod// chos skus rdzogs ldan chen po chod/ / bden don rnam pa bcu gnyis ldan// mi 'gag pa la sprad pa'i skyon// sngar 'dris mi bzhin mi rtogs pas// skyon bzhi dag dang ldan pas na// de nyid rnam pa bcu drug rig/ thogs pa med pas mtha' bzhi bral/ / rtag mtha' dang ni chad mtha' dang// yod mtha' dang ni med mtha' dang// mtha' bzhi dag dang bral ba ni// rnam pa nyi shu byang chub pa// ngo sprod rtogs pa thob pa yin// ngo bos stong pa yi ge e/ / rang bzhin gsal bas yi ge baM// rnam pa bde ba yi ge ma// yon tan mi 'gag yi ge ya// 'phrin las thogs pa med pas khyab// stong pas e ni chos kyi dbyings// gsal bas baM ni ston par shar// bde bas ma ni 'khor dang ldan/ / ma 'gag ya ni bstan pa de// thogs pa med par yongs la spro// phun sum tshogs pas rgyud kun gsal// yi ge bzhi yi mthu las byung// stong pas e ni chos kyi dbyings// gzhi snang chen po'i gnas lugs yin/ / gsal bas baM ni rtsal du shar// rtogs dang ma rtogs 'khor 'das 'byung// sangs rgyas sems can rgyab gyes so// bde bas ma ni lam du bshad// lta ba sgom pa spyod pa yi/ / lam la bgrod med don gyis 'jug/ mi 'gag ya ni 'bras bu nyid// thogs med tshe gcig sangs rgyas thob// ces sems phyogs chen po mdzod kyi rgyud las// ye shes nam mkha'i le'u ste bdun pa'o/ /// de nas 'khor tshogs dpag med pas// ston pa la ni rab tu bstod// mdzod chen drug gi dgongs pa ni// mdzod dang brda sgra ngas rgyud bskor// rtsa rgyud gsang ba'i 'khor lo dang/ / thugs rje chos dang bshad rgyud rnams// gcig shes kun grol mdzod du thim// khyab bdag khyod la phyag 'tshal bstod// ces byas nas ston 'khor chos nyid du thim mo// sems phyogs chen po nam mkha' mdzod kyi rgyud/ ye shes nam mkha' las/ rjes su yi rang ba'i le'u ste brgyad pa'o// ye shes nam mkha' mdzod kyi rgyud rdzogs so// rgya gar gyi paN+Di ta bi ma la mi tra dang/ lo tsA ba gnyags dz+nya na ku mA ra dang/ ka cog gis bsgyur ba'o//// rgya gar skad du/ sa ma pA ta na ma/ bod skad du/ khregs gcod bdun pa zhes bya ba/ bcom ldan 'das mtha' bzhi rang grol ba'i mgon po rdzogs sangs rgyas pa'i bla ma la phyag 'tshal lo/ / de nas ston pa rdo rje 'chang// phyogs bcu 'jig rten rab 'byams su// zhal gyi dkyil 'khor gsal byas pas// ljags kyi dbang po'i rtse mo la/ / 'od zer brgya phrag du ma 'phros// 'od kyi zer las sangs rgyas ni// nyid dang 'dra ba'i gtso 'khor ni// stong phrag brjod kyis mi lang ba// du ma 'phros pas sems can gyis// don byas nyid kyi thugs kar 'dus/ / rang bzhin dgongs pa lcog gzhan las// tshig min don gyi dgongs pa 'phros// kye ma sems dpa' chen po nyon// snang ba rang gis rang bcad pas// khregs gcod rnams kyi dang por byung// byas pa med pa'i chos nyid la/ / byung ba med pa'i gnad mthong na// byas dang byung ba rang sa chod// 'khor ba zhen mtha' rang gnas pas// 'khrul pa bden pa rang gnas te// dus gsum rgyal ba'i dgongs pa rnyed/ / 'di la rang gnad mtha' yal te// nga yis chud rtsa'i ro brgyad rnyed// thog ma rang dang rang bzhin las// bdag nyid chen po'i lta stangs las// mthong ba med pa'i yul rnyed pa// bshad par bya ba'i chos rnams zad/ / thos bsam bsgom pa'i nyer len stongs// du ma 'dus pa'i tshang bshig pas// gcig par gnas pa'i ye shes mthong// de mthong tsam gyis 'khor ba'i las// ma byas gzhi la thams cad 'grub/ / 'dis ni byung ba'i bdag po zin// de la yon tan brgya phrag rnyed// de snyed chos la 'jig pa med// 'jig med lam du su zhugs pa// 'di la ldog pa yod mi srid// srid bral ming bzhi stongs pa'o/ / khyab bdag nam mtha' rnyed pa// dbyings su tshud pas phyi nang chod// sa chu me rlung 'byung ba yi// gzhi dang lam dang 'bras bu zad// lta dang sgom dang spyod pa bzhi// rang sar dag pas 'khor rgyun chod/ / bde sdug snyoms pa'i dga' bde yis// 'dod pa dag pas rang 'dod thob// de la gang gis brnyas pa med// 'di ni de la khyab byas pa'o// sems kyi byung ba'i sa med pas// bar do 'gro ba'i lam 'gag pa/ / tha ma rtogs tshogs 'bras bu stor// rnyed pa med pa'i dbyings su thim// de la btsal bas rnyed mi 'gyur// ma rnyed chos la brjod pa chad// des ni byang chub myu gu bcad// gcad bya'i yul dang shes byed mtha'/ / gnyis 'dzin bral ba'i ngang du chod// de yi 'brel pa zad pas stongs// stongs pa'i chos la bcad gzhi yas// yas pa 'di la sus dris pas// sangs rgyas 'bum phrag grangs med pa'i/ / zhal mthong 'di dang gnyis su med// byas med snang ba'i rtsal chod pas// de ni spyad bya'i rtogs pa 'gags// de ni mi 'gyur lam zin pas// sangs rgyas rnams kyis ma byas pa'o// yang nyon sems dpa' chen po khyod/ / de la nges pa ma thob na// phyi nang 'dus pa'i snang ba la// rang dbang byas la phyogs gnad bsgyur// 'di ltar byas pas spyod pa ni// seng ge bu bzhag lta bu la// phyogs dang 'dzin pa med par rgyu/ / 'di la las dang bag chags kyis// nyon mongs 'gyu ba'i rta chad nas// 'gro dang 'ong ba'i lam dang bral// bem po 'dub pa'i gzugs rnams la// blang bar bya ste bzhag par min// de la sems kyis ma yengs na/ / sems 'dus rtog pa khregs kyis chod// dran pa 'dus pa'i phung po gang// de nyid gang byung sar bzhag na// sdug bsngal 'dus pa'i phung po bzhig/ slar la bslang pa'i sa med pa// yang ni mig gis gzugs shes na/ / stong pa'i chos 'di sa longs spyod// de ltar 'dod yon brlabs bcad nas// rdzogs pas 'di las bshad du med// smra med bsam pa'i gzhi zad pas// dus gsum 'bral ba med pa yi/ / grogs 'di gzhan dang mnyam pa min// gong na med pa'i sgra dang dri// ro dang reg pa'i dngos po stor// rnyed pa'i mchog ste dgos 'dod phrad// 'di ni chos med sems zad pas// sems 'dus yid kyis spyod pa las/ / 'di ni cung zad tsam thal lo// rgyal bas 'pham pa'i lam gsal nas// byas nas byung ba dum bur chod// 'dis ni 'khor ba'i mtha' ma chod// de chod yul la phar spyod pas// sbyang bya sbyong ba'i gzhi med pas/ / theg pa rnams las dris pa med// 'di ni ring thung mdo 'dus te// sems kyi yul de btsal bas ni// sdug bsngal rnams kyi rtsa ba chod// khyab ma yin dus mtshungs pas// 'khrul gzhi dag pa'i me long mthong/ / de mthong sde snod chos rnams shes// lo rgyus chen po rmad byung bas// ma byas thos bsam gzhi la rdzogs// sgrib bral bde ba'i lus thob nas// 'jig pa brgyad las 'jigs med par/ / slar la gzhan gyi las rnams 'joms// 'di ltar spyad par 'bral med pa'i// mtha' la tshud na ldog pa med// spyod pas pha rol bde thob nas// sdug bsngal phyags mas 'debs pa'o/ / bskal bar bsags pa'i las kyi mtha'// 'dir spyad gzhan las ma ltos pas// rang gi shugs la rang sa zin// 'di la gang gis glags ma rnyed// sra ba'i gos gyon mtshon nus zad// 'khor dang 'das pa'i 'brel bcad pas/ / sngon gyi yul yang da ltar mthong// rdo rje 'dzin pa zhes bya ba// sngags kyi theg pa'i mthar thug pa'o// lam 'brel dus kyi gnas shes pas// 'di la spyad dang spyod pas stongs// rang bzhin mi gnas sos dal bas/ / nga bdag rnams kyi khog pa stongs// 'khor rkyen rgyu 'bras rtsa ba rul// 'di la lo 'dab skye mi srid// des na ngas ni nga rang mthong// sangs rgyas rnams kyis spyod pa ni// bya ba'i gzhi med byed med pas/ / 'di la 'das pa'i lam bral te// 'bras bu rnams kyi re gnas sa// stong min sems kyi goms spyad nas// ngo shes 'di la 'dod bral ba// nor med longs spyod chen po la// bya bral gnas pa'i snying po 'o/ / ltas pas dus gsum dus gcig gsang// lta ba'i yul mthong lta mkhan mthong// gdos bcas rang dag zag pa med// 'byung ba'i lus zad nyon mongs stong// de yis yul la bsam mi khyab/ / bsam mi khyab pas bsam med la// byas med byung med 'gro sa med// nga med gzhan med 'khrul pa med// mthong du yod pa'i gzhi la mthong// rgyun chad rkyen 'gag 'bras bu klag/ 'gro 'ong las kyi 'khrul 'phyug med/ / de don sems la rang bzhag pa'o// de ltar gsum shes gnyis med la// gzhi sogs grangs kyi mtha' med pas// gsum la 'khrul sa rang bzhag pas// 'gyur zhing 'phyug pa med par bsdams/ / 'khrul du med pas gcig shes la// gnyis su 'dzin pa mi srid pas// 'khrul zhes 'khrul pa'i steng bzhag pas// bya byed thams cad rgyun chad do// sems dpa' yis ni yang gsol pa// 'khor ba'i snying po de ltar na/ / rang bzhin ji ltar rnam par dag/ 'di nyid ston pas yang gsungs shig/ de nas rdo rje 'chang ba yis// rang bzhin gnas pa'i tshig 'di gsungs// gsang bdag sems dpa' yang nyon cig/ 'di ltar snang dang stong pa yis// bsdus pa'i chos rnams ji tsam pa// rang bzhin gyis ni rnam par dag/ 'bad rtsol dri ma las 'das pas// spyod bral sgom dag lta yul stongs// ma byas rang gis sar bzhag pas/ / de dag rang dag bzhag yas dag/ rgyu dag rkyen dag 'bras bu dag/ chos dag sems dag 'khrul pa dag/ dngos dag yul dag 'gyu 'brel dag/ dag nas sems kyi snang dag pas// de rang gcad par bya ba ma yin no/ / de ltar dag pa'i snang ba la// bems spyad kham du bslangs pa yis// sa chu me rlung dag par snang// dag pa'i lugs dang dag pa yis// dag pa'i yul dang dag pa'i dus/ / dag pa'i tshad dang dag la gnas// de ltar bems po'i lam du yang// su yi slob bar shes pa ni// bslangs pas long dang longs lugs dang// len pa'i dus dang longs pa'i tshad// bslangs pa'i 'bras bu skye dang skyes/ / nges par skyes pa rnams nas ni// phyi yi snang ba chos kyi skur// gnas pa mthong bar 'gyur bas na// mthong ba de la gang goms pa// sku gsum rgyal ba'i zhing khams mthong// 'di ni mthong ba'i lam la gnas/ / 'brel ba dag pa nges thob pas// dngos su spyod pa nyid las so// nang gi sems dang sems las byung// sems kyi snang ba gnyis dag la// rang sar bzhag dang rang grol dang// rang byung rang shar rang gis yul/ / rang gi rtse la rtsa ba bcad// rang gnas rang gis thob pa la// sems rgyan stongs dag med pa dang// 'gro 'ong 'byung 'jug shes pa yis// 'gyu ba yal ba'i bar phye dang// gzung dang btang dang glod pas shes/ / sbyor ba dang yang 'bral ba dang// stor dang bsdu ba'i gnas bstun nas// sems kyi me long gzugs brnyan 'dra// snang yul gzung bar med pa ni// ye nas de ltar gnas pa la// shar ba rnams kyi thog ma la/ / byung ba rnams kyis bar gsal bas// shes pa rnams kyi tha mar snang// de yang 'bras bu'i dus las ni// gnad la phab pas nges gzung bya'o// phyi nang bcud dang bar dkrugs dang// nang du gnad la bor ba dang/ / gang yul gang mthong gang gnas pa// gang gi mthong dang gang gi tshor// gang la shar dang gang thob dang// 'khrul pa rnams kyi tha ma la// 'khor ba'i thog ma shes pas gsal// snang byed bsdu dang rmugs pa dang/ / yul las dkar dang gnas su bzhag/ lam du bzhag dang gzhi la bskyal// bltas mthong med pas snang ba la// bsgyur dang bcad pa'i las rnams 'grub// zas dang gos dang 'gro ba'i rta/ / bcud du dr-il bas shes pas na// 'gyur gyur thob rnams las nyid dang// yang dag pa ni las kyi mtha'// khregs kyi gcad pas bya ba rdzogs// rang gi dpal dang gzhan gyi gegs// tshad ldan bla mas mkhyen pa la/ / legs par dris shig dad sems can// 'dis ni 'khor ba'i zad dus shes// bya ba rdzogs pa'i rnal 'byor pa// de nas gsang bdag sems dpa' che// ston pa nyid la yang zhus pa// kye kye ston pa rdo rje 'chang/ / rang bzhin dag pa de ltar na// snying po lam du ji ltar blang// 'di la bdag ni zhu ba bgyid// ston pas gsungs pa sems dpa' chen// yang ni 'di ltar ya mtshan can// snying po thams cad 'dus pa'i gnad/ / sangs rgyas gzhan gyis ma gsungs pa'i// don 'di ngas bstan khyod kyis nyon// spyi dang rang gi khyad par las// theg pa rnams kyi the tshom sa// 'di las byas byung med rtogs pa'i/ / sems las 'gyu ba yang zad na// sems kyi 'gyu sa gzhig pa dang// de yis rjes la gar song gnas// snying po 'dus pas sgros zad pa// tshig la gnas pa med pa ni// gnas pa'i dus na glod pa yis/ / rlung la mkhas pa kho na'o// dran pa 'gyus pa'i snying po ni// rang sor bzhag pa kho na'o// yul rnams bsdus pa'i snying po ni// thad kar bcad pa kho na'o// gnas lugs bsdus pa'i snying po ni// sems byung btsal ba kho na'o/ / grol lugs bsdus pa'i snying po ni// byas pa med pa kho na'o// shar lugs rnams kyi snying po ni// bltas pas mthong ba kho na'o// de ltar de ni 'bras bu'o// lam ni ched du byed pa dang/ / shugs las byung ba nyid dang ni// rang bzhin gnas pa nyid dag go/ ched la yang ni bya bas byas// lus dang ngag dang yid kyi yang// gnad dang de yi bya ba bla ma'i lung gis shes// lus ni 'dug dang langs pa'i khyad par las/ / bya ba dang ni byed pa'i las la brtson// ngag ni a li kA li mnyam sbyor bas// sgra dbyangs tshig gi 'brel gyi sbyar// yi ni 'phang dang dgug dang bsgrogs pas ni// so so'i dus dang sbyar bas rgyal ba'i dgongs pa 'grub/ / shugs 'byung lam ni bzhag pa tsam gyis 'grub// de la 'bad cing rtsol ba rlung sgo dgag/ rang bzhin gnas pa'i lam ni byung gyur te// g.yo dang 'gyur dang bsgyur ba'i las mtha' can/ / de la rang gi bya ba med pas legs bzhag pa'o// slong ba'i dus dang bslang bar bya ba'i gnad// 'gyur ba'i sems la mtshan med chos gsal ba// g.yo dang 'byal dang 'phrig pa'i dus kyis shes/ / 'di la rang bzhin bzhag dang byas pa'i gnad gnyis las// lam la byung dang gdeng du tshud pa la// rtogs pa'i lung dang de yi mtha' yis phye// gnyis su yod pas de yi mtha' gsal ba// bar dang dang po nyid las gsal phye ba/ / de yis lus dang yan lag so so'i dus// 'di ltar sbyar ro rnal 'byor sems dpa' che// rig pa gnas pas de la nyes spyod pa// lus la gnas dang yul dang 'gyu ba las// rab dang 'bring dang tha ma yi/ / 'jug pa'i rnal 'byor pas mthong na// gang la mthong ba tsam gyis 'khrul ba'i 'khor rgyun gcod// rang gi gnas pa mig gi byed pa can// mngon sum pa dang de yis 'gyur shes ni/ / goms pa'i shugs ni rang gis las so// yang ni rdzogs sangs rgyas pa la// gnas pa tsam gyis thig le'i dril lugs zhus// ston pas gsungs pa 'di la legs nyon cig/ chos nyid gnas pa tsam las rang byin brlab pa ni/ / 'khrul pa'i 'du byed khyad par gnas pa la// rgya yis gdab dang khungs su btsud pa yis// de ma yin las de yi snang shar ba// de la lus gnad sems gnas mtha' la gnas pas bdag/ 'khor dus 'brel dus rang gnas pas spyad// ming gi gnas pas 'di dang mnyam par sbyar// chos gnas de la gang zag gnas pas shes// gnas thabs gsum gyi gnas pa sbyar ba nyid/ / de yi gnas pa mgon pos gnas// 'di las 'gyur ba'i sa med kho na'o// gong ma'i zla mthong gsang bas che ba dang// dang po las kyi grangs kyis che ba dang// ye nas gnas pas rang bzhin che ba dang/ / snga ma las 'gyur don gyi che ba nyid// rang gis mthong dang gzhan la bslabs pa yis// gong ma'i bde nas 'og ma'i zla dang bral// thad ka dus kyis 'gyur la nges phye bas// rdzogs nas de yis don las chen por gsal/ / 'gyu dang yul la mi gnas chen po nyid// bde ba 'dod bral nam mkha'i yul gnas pa// 'di ni rdzogasapa chen po'i rnal 'byor du// spros dang zug rngu bral ba'i thig le la// 'di ni gcig tu gnas pas zla dang cha shes bral/ / gcig tu bsdoms pas du ma chod// 'di la ming gis mtha' rnams zad// 'di ni nyag las gcig tu dril// spros pa med pa'i bde chen gnas// rtsa yi gnas nas 'phra 'gyur 'khrig/ sgon ma las ni dngos su'o// yul la zla dang bcas pa nyid// mngon du gyur nas 'phel rnams rdzogs// 'di la zad pa'i las zad pas// 'gyu ba'i rlung de khrig pa thig/ khyab pa dngos po thig le'i yul/ / 'di las mangs dang nyungs pa dang// 'phel 'grib rnams kyis dang po la// bya ba bral ba'i mngon du ltos// 'di nas mched dang yas pa dang// 'byams dang rlung du gyur pa las// sangs rgyas kun gyi yul mthong ba'o/ / sgron ma stong las snang bar 'gyur// sems kyis bya ba las 'das nas// bde dang sdug bsngal gcig bral bas// nga dang rang bzhin 'od dang ni// kha dog so sor gsal ba las// rig pa'i dbyings dang 'brel bas na/ / 'di la rnam par phye ba yis// gzhi yis byed 'gyur mig dang 'brel// khungs ni bzhi la byung ba la// da lta sems can lus la gnas// lam ni 'khrig pa rtsa las yang// du ma brtsegs pa'i rang bzhin can/ / 'dis ni 'khor ba'i mun pa sel// dang po med las yod par snang// bar du 'ong dang thig le nyid// tha ma sku dang ye shes so// de las stong par gyur pa las// zad pa rnams kyis 'bras bu ste/ / 'khor ba'i thog mtha' des chod nas// rdzogs pa'i rtse mo mthar phyin pas// de las phyogs med thugs rjes 'gros// kun don ma lus rdzogs byas nas// rang gi sa la gsan pas stongs/ / cig car ba dang rim gyis so// rdo rje 'chang la yang zhus pa// rtse gcig pa las chos nyid lam// khregs kyis gcod pa ji ltar lags// thugs rje can la bdag nyid 'tshal// de nas ston pa rdo rje 'chang/ / nges pa'i 'bras bu lam zhugs phyir// rtse gcig 'dus pa'i dgongs pa gsungs// chos nyid rtse mo dal ba yis// 'khor ba 'dus pa'i rtog pa gcod// rang sems 'dus pa'i rtse mo yis/ / 'das pa'i mnyam pa'i don rnams gcod// rang gnas 'dus pa'i rtse mo yis// chos rnams zad par gcod par byed// sku mer rang dag rtse mo yis// bya byed 'bad rtsol thams cad gcod// rtse mo'i ngos la 'od 'phros pas/ / 'khor 'das gnyis ka dus gcig gsal// stong ba rtse mo gcig pa la// rtog dang mi rtog dus gcig mthong// gnas pa'i las mtha' rdzogs pa'o// lus la rtsa rnams 'dus pa yis/ / lus rdzogs gnas dang 'phel dang nyams// 'gyur dang 'jig dang 'pho bar byed// chos nyid ye shes 'phen pa dang// 'phar dang 'gug dang 'dzin pa dang// 'gril dang gong 'og sdebs rnams byed/ / ngag la sgra don 'dus pa yis// yin dang min dang yod dang med// mthong dang ma mthong shes ma shes// gnyis ltos rnams kyis byed pa can// sems la 'khor 'das gnyis 'dus pas// sangs rgyas sems can rgyu 'bras dang/ / chos dang chos min rim pa dang// bde dang sdug bsngal gzhi ma byed// de ltar 'dus pas rnam par gyes// 'di la bsam gyis mi khyab pa'o// gang la rtog pa'i mtha' shes na// de las chos nyid yul gnas pas/ / 'bral ba med pa'i don nyid las// chos dang gang zag mtha' che bas// 'phrul pa'i rtogs pa dus gcig 'gag/ lus kyi mi rtog dal rten pas// rtogs pa rnams kyi 'brel ba chod/ / ngag gi mi rtog smra gcad pas// brjod med don gyi gzhi ma rnyed// sems kyi mi rtog rang sa bzhag/ des ni rkyen rnams chos nyid 'gyur// gsum sdoms sku gsung thugs la gnas// de yi 'bras bu bde skangs pa'o/ / bsam pa 'phro dag 'dus pa dang// mched dang yas dang 'bar ba dang// rtog dang mi rtog 'du mched can// yul la 'jug dang gnas pa dang// de las 'phros dang mched pa yi// dran bsam rnams kyis gzhi ma byed/ / rang bzhin 'gyur dang glo bur bas// rkyen rnams du ma sogs par byed// de las bde sdug phung por 'gyur// 'khor ba'i sa bon 'bras bur ro// de nyid bstan par 'dod pa yis/ / tha mal so so'i las bzlog ste// lus dang ngag dang yid kyis gnad// gzhan la bzlog pa rnal 'byor bas// bya dang byed pa med pa las// rang bzhin dus na cog pu la// mtshan nyid bzhi dang ldan pas bya/ / gnyid la 'khor lo lta bu la// 'gro na nam mkha' lding gi lugs// 'dug na g.yas dang g.yon du'o// bye brag gzhan la mkhas pa yis// ji ltar rigs pa sbyar bas 'grub// ngag ni rang bzhin smra dang bral/ / nyal na yi ge 'phrel ba bzlas// 'gro na rlung gis yi ge brten// 'dug na a yi rnam pa la// bye brag gzhan la mkhas pa sbyar// yid ni rang bzhin thun mong la// gar song phyi lam rjes rnams gcod/ / nyal na tsit+tar 'jug par rmis// 'gro na rmi lam mkha' la spur// 'dug na thig le dra bar gzhug/ bye brag gzhan la mkhas pa yis// gang la mos pa man ngag gis// gnas rnams bsgyur ba rnal 'byor bas/ / de yis dngos gzhi 'brel sbyar ba// 'gyu ba'i yul dbyung dran pa gsad// bsam pa'i yul lha sems rgyun gtod// yul dang shes pa sbyar bas shes// 'phro las mched pa'i dus mtha' bcad/ / gang snang rang gis thog tu dbab// gcig gi 'brel pa gcig gcad na// de la nyams kyis shes pa skye// dag pa chen po gzhi nyid la// bde ba sum cu rtsa gnyis 'char// de las 'bar dang bde las shes/ / thob pas 'khor lo can la 'jug/ 'gro dang 'ong ba'i shugs rgyun 'gag/ de la sogs kyis rnams 'phel bas// phar dang gzhan gyis bya ba bde// log dang ma log spor gnas dang// ji ltar 'gyur ba grangs las shes/ / bsod nams las kyi bye brag rnams// ji ltar 'dod pa shes pa dang// 'chi 'pho skye ba'i grangs nyid kyang// 'phen dang sdud pa las shes nas// de yi rang bzhin rnal 'byor pa yis yang/ / yid gzhungs dran pa gsal po yis// rgyun du rtsis pas mngon par gsal// bsam gtan nyid kyi yon tan no// zhes bkod pa chen po a ti rdzogs pa'i rgyud las// khregs gcod las kyi mtha' gcod pa'i skabs/ / bskal pa dum bu'i rgyud las man ngag tu phyung ba khregs gcod bdun pa zhes bya ba rdzogs so//// dge'o//// ye shes 'khor lo gsang ba'i rgyud ces bya ba bzhugs/ rgya gar skad du/ badzra DA ki ni dud liM ma hA tan tra nA ma/ bod skad du/ rdo rje mkha' 'gro ma'i 'dre rgyud chen po zhes bya ba/ dpal kun tu bzang po la phyag 'tshal lo// 'di skad bdag gis thos pa'i dus gcig na/ bcom ldan kun tu bzang po dang// dpal ldan rdo rje sems dpa' yis// byin rlabs mkha' 'gror sku sprul te// mkha' 'gro'i tshogs la brda yis bshad// brda dang don rnams bstan pa'i dus/ / dur khrod 'bar ba'i gnas chen du// dpal ldan pad+ma'i sku cig skyes// mkha' 'gro ma rnams rab tu dgyes// he he bcom ldan longs sku'i gtso// bdag cag mkha' 'gro 'khor bcas la// thog ma med pa'i sngon rol na/ / de yi gnas lugs ji ltar lags// brda dang bcas pa gsung du gsol// ces zhus so// de nas ston pas bka' stsal pa// sngon byung gzhi yi dus nyid nas// grong khyer gsum gyi bdag po de/ / nor bu rin chen 'bar ba yi// nor bu kun gyi 'byung gnas de// kun gzhi skyed pa'i ma ru gnas// mdzes ma rlung gi rkang pa can// rkang pa med par 'gro yang srid// dgung mtha' sleb pa ngo mtshar che// zhes brda de gsungs so/ / don ni khams gsum spyi sa de// kun gzhi srid pa'i mdzod chen yin// sku gsum 'char ba'i gzhi yin te// rlung gis sku gsung 'grub par byed// myur mgyogs shes rab rlung gi gzhi/ / dngos med zang thal nam mkha' 'dra// 'khor ba thog ma'i gzhi ma de// rnam par rtog pa med pa la// rtog pa mi srid srid pa'i chos// rang shar rnam drug gzhi shar bas// thams cad rang shar ngo mtshar che/ / zhes gsungs so// 'dre rgyud chen po las/ phun sum tshogs pa lnga dang gzhi bstan pa'i le'u ste dang po'o//// de nas zla ba'i 'od zer gyis// bcom ldan rdo rje sems dpa' la// de la shar lugs ji ltar lags/ / ston pa nyid kyis gsung du gsol// ces zhus so// ston pas bka' stsal pa/ a ni yig 'bru kun gyi mes// ma ni yig 'bru kun gyi phyir// ha 'gyu rten med yi ge de// dbyings dang ye shes rtsal gsum gyi/ / spyi sa'i gzhi las grub pa yi// rlung gi rta po bzhi la shar// ston gsum rtsa ba 'dug gi mi// khams gsum srid pa gsum la dbang// myur mgyogs rlung gi rkang pa can// za 'og mdzes pa'i sga bstad nas/ / mthing gi mu tig srab mthur shar// 'khor lo 'bar ba'i glo rmed bcug/ srid pa gsum la rgyug pa'i rtags// zhes gsungs so// brda don bshad pa bstan pa ni// rlung lnga gzhi la ye nas grub/ / rlung gsum rtsa ba dug gsum po// khams gsum srid par byed pa'i gzhi// thogs pa med pa'i rlung po shar// 'od lnga rang snang gsal ba la// ma rig gzung 'dzin gnyis su shar// 'gro drug rtsa ba de yi rgyu/ / srid gsum rtse mo zhes kyang bya// khams gsum rtsa ba zhes kyang bya// 'gro drug mes phyi zhes kyang bya// kun gyi blon po zhes kyang bya// srid pa'i rgyal mo sde brgyad mo// tshom bu lnga yi rtsa ba yin// dkyil 'khor gsum gyi brda rtags shar/ / rang shar gsal ba'i me long yin// rgyu las rkyen shar nam mkha'i 'ja' ltar shar// ces gsungs so// swa ya kA ya d+harmA d+hA tu b+ha/ zhes brda'i don gsungs so// thig le 'dre rgyud chen po las/ gzhi las rang shar bstan pa'i le'u ste gnyis pa'o//// de nas zla ba'i 'od zer gyis// bcom lda rdo rje sems dpa' la// sku gsum shar lugs ji ltar lags// zhes zhus so// ston pas bka' stsal pa/ sngon 'byung chen po kun gyi mes// yang rtse gzhi la lhun gyis grub// nor bu rin chen gzhi nas 'phags// nor bu rnams kyi mes po yin// nor bu sna tshogs skyed pa'i ma// 'gag pa med pa'i nor bu 'chang/ / bcom ldan kun tu bzang po yis// thog ma gzhi mo'i don la mkhas// bar du rgyu rkyen gnyis la mkhas// tha mar rang shar rang grol mkhas// mkhas pa chen po bcom ldan 'das// swa yang ka ra'i don rtogs mkhas/ / chos sku gzhi nas rang la shar// sangs rgyas kun gyi yang mes po// chos sku thig le nyag gcig yin// d+harma kA ya ti la e ka'i don// byin rlabs ston pa rdo rje sems dpa' 'ang/ / longs spyod rdzogs sku kun gyi mes// sprul sku zla ba'i 'od zer khyed// 'gro ba'i don la zhu tshul ston// brda yi don rnams nga yis bshad// ces gsungs so// thig le 'dre rgyud chen po las/ sku gsung shar lugs bstan pa'i le'u ste gsum pa'o//// de nas zla ba'i 'od zer gyis// dpal ldan rdo rje sems dpa' la// 'gro drug srid pa ji ltar chags// phyi nang snod bcud ji ltar 'khrul// ces zhus pa/ ston pas bka' stsal pa// swa yang ka ra'i don ma rtogs// ha li nag mo lha mo lnga la bzhugs// rgyu rkyen 'dus pas 'gro drug 'khrul// dug lnga khong khro dag ni rgyu// rang snang 'od lnga rang gdangs rkyen/ / gnyis 'dzin ma 'gag 'bras bu yin// dug lnga shugs la shar ba yis// 'bras bu 'gro ba ris drug 'khyams// dug lnga 'byung ba lnga yi mes// rang snang rang la gsal ba 'byung lnga'i phyi mo yin// gling bzhi gling phran 'khrul pa yin pa ngo mtshar che/ / 'khrul pa'i 'bras bu phyi nang gnyis su shar// rang shar 'khrul pas 'khor ba yin// mi 'khor mi srid shar ba srid pas lan// phyi nang gnyis la ltos nas skal pa'o/ / skal pa rang shar rang gis skal ba yin// 'khrul pa'i 'bras bu las dang bag chags yin// bag chags rang shar rang grol ma rig ngo mtshar che// swa A ma b+ha ra ha/ zhes gsungs so// thig le 'dre rgyud chen po las/ phyi nang snod bcud rang shar gyi le'u ste bzhi pa'o//// de nas zla ba'i 'od zer gyis// lus kyi mes po ji ltar lags// skyed pa'i phyi mo ji ltar lags// zhes zhus pas/ ston pas bka' stsal pa/ gzhi yi rang shar 'byung ba de// rang gdangs 'byung ba 'od du shar// de 'khrul de shar ma rig 'byung ba lnga// de yis rkyen byas phyi 'byung lus la rgyas// 'byung ba ma rig 'dus pa'i lus 'khrul pa// lus kyi phyi mo 'byung ba rang gdangs yin/ / lus kyi mes po rlung chen rang shar yin// rlung dang rang dwangs 'dus pas sgra tshig sna tshogs smin// lung bstan lung ma bstan gyi sgra dang ni// ngo bo nyid sgra ru thams cad 'dus/ / rang shar sgra dang phrad pas gsung tshig mes po yin// rang gdangs sgra ni rlung gi rtsal las shar// rlung yang tsha glang rlung gis lus po skyed// ma rig rgan mo long ma mu lto ma// rten 'brel bcu gnyis lta bu'i tshul du grub/ / des na 'khor ba grub tshul brda dang sbyar// dper na nam mkha' 'byung ba kun gyi mes// 'od lnga 'byung ba lnga yi phyi mo las// rang gdangs 'od kyi dkyil 'khor nas// 'byung ba lnga yi rtsa ba smin/ / de yis brda bstan 'byung ba'i dpe// bar snang glog 'gyus snang srid gsal ba 'gyu ba'i dpe// dus mtshungs 'khrul ba thag pa sbrul lta bu// yon tan phyogs med 'char ba nor bu rin chen gling// 'khrul pas 'khrul pa rgyud pa zo chu brgyud ma 'dra/ / 'gro drug lus kyi bag chags smin pa ljon shing 'dra// 'khor ba rang shar nam mkha'i sprin gyi tshul// sa chu me rlung nam mkha'i rang gdangs yin// yid 'gyu ma rig gzhi nyid zer ltar shar/ / zer dang rang gdangs rol pas rang la shar// rol pas ma 'gags 'khor ba'i rtsa gcig pu// gcig bu ma rig 'khrul pa rang la snang// 'jig rten rten 'brel bcu gnyis phyi nang skyed/ / 'khor 'das gnyis kyi spyi sa ba// lhun grub rang snang rang shar phyogs med yin// lo ka karma e ka'o// zhes gsungs so// 'dre rgyud chen po las/ 'byung ba lus kyi don bstan pa'i le'u ste lnga pa'o/ /// de nas yang zla ba'i 'od zer can gyis/ ston pa rdo rje sems dpa' lags// 'dre yi 'khrul pa ji ltar lags// zhes zhus pas/ ston pas bka' stsal pa/ nyon cig rdo rje mkha' 'gro ma// phyi yi 'dre dang nang gi 'dre/ / gsang ba'i 'dre dang gsum du shar// phyi yi 'dre ru shar ba ni// rang gdangs 'byung ba dang po'i dus// chags sdang lnga yi tshogs lngar shar// sde brgyad 'byung ba lnga la shar// bdud dang rgyal po btsan dag dmu/ / gza' dang klu dang ma mo gnod sbyin dang// gshin rje 'dre tshogs rang gdangs shar// phyi yi 'dre de gzhi yi 'dre// brda yis zil gyis gnan par bya// nang gi 'dre ni rlung mkhris bad kan dang/ / 'dus pa nad bsdo pa'i 'dre ru shar// de yang dbang du bsdu ba'i brda dang rtags bstan pa yin// gsang ba'i 'dre ni rnam shes zhon// mig dang rna ba sna dang lce// yid dang rnam shes kun gzhi las/ / tshogs brgyad 'dre ru shar ba lam du bkyer// 'dre kun ngos 'dzin mo ma 'phrul gyi mi// yang gsang 'dre de kun gyi ma mthong bas// thams cad 'dre chos 'dre bsdums byed// 'dre la dbang bskur gtang rag gtong/ / 'dre la tshogs sogs mchod pa byed// 'dre yis mchod gnas byed cing rtag tu khur// 'dre yis 'dre bsreg 'tshig par ga la 'gyur// 'dre des dpon byas gnya' khung khur// 'dre de kun la gnod pas rab tu gnod che ste/ / 'dre ru rang shar 'dre de ngo mtshar che// rang gis rang srog gcod pas bdud// zhe sdang rgyal po me rlon mig gcig pa// 'dod chags kha yan btsan gyi 'dre// nga rgyal rang shar 'gyur med dmu/ / kun tu rgyu yid sleb pas gza'// yid du byung bas nyams chags pas klu// kun tu rgyu zhing rang la snang bas ma// thams cad 'dus pas gnod sbyin no// rang shar rang gis za bas gshin rje'o// sde brgyad gnya' gnon tshangs pa dung gi thor tshugs can/ / sde brgyad dpon po bdud rgyal nag po gnyis// thod rus 'bar ba rtsa brgyad gdan stengs na// dpag bsam shing gi me tog la// yal ga gnyis la 'jus pa yis/ / bdud rgyal nag po de na yod// de yi zhal ltos sman du rang la shar// shel sgong sum brtsegs dag gis gnas// rma bya mdongs kyi phug shed na// nyi zla gnyis kyi dkar khung byas// bde ba chen po gdan du bting/ / gzhon nu gtsug phud can zhes bya// de la bstod pa mi bya 'grogs pa gces// de yi ming ni 'od mi 'gyur// chos sku rang la shar ba ngo mtshar che// de yi sprul pa rang shar ba// shel gyi ga 'u sbub pa'i gnas/ / nyi zla gnyis ni gdan du bting// 'ja' tshon sna lngas sgo yang byas// gzhon nu bcu drug lon pa'i sku// de yi ming ni 'od srungs yin// longs sku rang la shar ba ngo mtshar che// de yi gsung gi sprul pa'i sku/ / 'od zer sna lnga'i gnas na bzhugs// rma bya gnyis ni gdan du bting// shel gyi rta pho sgo ba byas// lo brgyad lon pa'i khye'u chung sku// de yi ming ni mar me mdzad// sprul sku rang la shar ba ngo mtshar che/ / dbang du sdud na de ltar mdzod/ zil gyis gnon na de ltar gnon// lam du khyer na de ltar khyer// tshogs sogs gtang rag gtor ma dang// dbang dang sbyin sreg bya mi dgos// lha de logs nas ma byung 'dre de gzhan nas min/ / zhes gsungs so// 'dre rgyud chen po las/ lha 'dre ngos gzung ba'i le'u ste drug pa'o//// rdo rje mkha' 'gro mas zhus pa// kye kye rdo rje sems dpa' lags// longs sku rang shar ji ltar lags/ / zhes zhus pas/ ston pas bka' stsal pa/ nyon cig rdo rje mkha' 'gro ma// rang lus rgyal ba'i dkyil 'khor 'di// sgo lnga tshogs brgyad phung po lnga// ma hA da la'i ngo bor shar// rang la rang shar ngo mtshar che/ / rin chen zung brgyad rtse sor bzhi// si ra shel gyi maN+Dal na// dbus na rnam par snang mdzad bzhugs// phyogs bzhi'i sems dpa'i ngo bor shar// de yi snang ba rang gdangs las// sems dpa' sems ma thub pa drug/ longs sku rang la shar ba ngo mtshar che// rin chen rtsibs brgyad 'bar ba'i gnas// si ra bzhi yi dbus na ni// 'od mi 'gyur ba chos skur shar// 'od srungs longs spyod rdzogs skur shar/ / mar me mdzad ni sprul skur shar// 'du 'bral med pa'i sku gsum mo// rang la shar ba ngo mtshar che// ltad mo bsam sdug lha khang che// skyo grogs rig pa'i khye'u chung bzang// zas su bde chen rang shar bza'/ / rang shar za ba nyams re zab// zab mo mthar phyin tshad yin no// rang shar ngo shes nyams kyi gdeng// rang shar gdan shes gdams pa'i gdeng// tshad la phebs pa yid ches gdeng// tshad las 'das na sgrib pa yin/ / tshad ma zin pa sgrib pa yin// gol sgrib tshad shes shin tu dka'// ka ya ra ha sa ya/ zhes gsungs so// 'dre rgyud chen po las/ phyi nang dkyil 'khor sku gsum ngo sprad chen po'i le'u ste bdun pa'o/ /// de nas rdo rje mkha' 'gro mas zhus pa/ ston pa rdo rje sems dpa' lags// snang srid 'dre de zin gyi mnan pa dang// sku gsum rgyal ba'i dkyil 'khor la// bdag cag mkha' 'gro 'jug pa'i tshe/ / dbang gi gdams pa bdag la zhu// zhes zhus pas/ ston pas bka' stsal pa/ nyin cig rdo rje mkha' 'gro'i gtso// lha dbang lus la bskur ba dang// chos dbang sems la bskur ba dang/ / brtul zhugs rig pa'i byin rlabs dbang// nga yis khyod la dbang bskur ro// rig pa ye shes me tog la// rin chen sna lngas spros byas te// gus pa'i tshul gyis zhu bar gyis// sgo lnga rigs lnga'i dbang bskur 'di/ / 'di bskur rang lus byin gyis rlobs// tshogs brgyad rgyal ba'i dkyil 'khor 'dis// dbang bskur bde chen dngos grub thob// phung po lnga po rigs lnga yis// dbang bskur nges pa'i lha mchog thob/ / rang lus rgyal ba'i dkyil 'khor 'di// ma bskur thob pa'i dbang ma yin// bskur bas rang byung ngo mtshar che// byin rlabs nus pa bsam mi khyab// dbang bskur thun mong ma yin no// lha dbang lus la bskur ba yis/ / lus byin brlabs pa'i dbang bskur yin// ye shes sku yi dkyil 'khor 'di// rang la shar ba ngo mtshar che// lha ni thun mong ma yin rang shar lha// rang shar phung po lnga po la// lha dbang lus la bskur ba yis/ / skye rga na 'chi bzhi las grol// grol ba rang byung ngo mtshar che// skye ba med pas 'chi las grol// na ba med pas rgas las grol// rang grol rang shar dbang mchog 'di// go 'phang dbang gis bgrod phyir gsungs/ / 'dir 'jug lam gyi mchog tu bshad// ye shes lnga yis ye nas khyab// khyab par rang byung ye shes sku// ye shes sku yi dbang bskur 'di// ye shes lus las rang shar ba// rang byung dbang bskur ngo mtshar che/ / a bi She ka u b+han d+he sha/ zhes gsungs so// thig le 'dre rgyud chen po las/ lha dbang lus la bskur ba'i le'u ste brgyad pa'o//// de nas yang mkha' 'gro mas zhus pa/ kye/ ston pa rdo rje sems dpa' lags// chos dbang sems la bskur ba bstan par zhu// zhes zhus pas/ ston pas bka' stsal pa/ dbang dang man ngag bshad pa ni// snod ldan ngang tshul ldan la bshad// dbang dang man ngag ma thob par/ / de ni ngal ba don med yin// dbang dang man ngag 'dod pa'i mis// srog lus 'phangs pa med par gtong// de ni dbang gi snod du rung// dbang ma thob pas chos 'chad pa// de yi lce la zhing rmo'o/ / dbang ma thob par sgom par byed// de ni phag tshod yid smon mkhan// nga yis bshad kyis legs par nyon// sngon yul yangs pa can gyi gnas// dngul gyi me long rang gdangs gling// skyes pa bud med 'tshogs pa'i gnas/ / byad kyi lta ba'i gzhi ma byed// me long phyogs ris med pa la// rgad po rme ma rag sha gdong// byad bzhin spa la grub pas bltas// byad kyi rnam pa ma mthog bar/ / spu gri gang na 'dug pa de// de ga byad yin snyam nas 'dug/ rgan mo de yi rtsa shed na// khye'u chung mdzes pa kun ldan byung// me long bltas pas byad bzhin mthong// rgan mos bltas pas kho yi byad mthong bas/ / rgan mo'i byad la yid 'byung nas// kho yis byad la bltas pas su// rgan mo lto ma myong nas shi/ chos nyid me long g.ya' dag gsal// theg pa rim dgu rgan mo 'dra// rdzogs pa chen po khye'u chung 'dra// ma rig rgan mo long ma 'dra/ / dbang bskur khye'u chung mdzes ldan 'dra// lta ba rig pa rang rtsal dbang// nyan thos gang zag bdag med lta// rang rgyal chos kyi phyogs gcig lta// byang sems bden pa gnyis su lta/ / kre ya rje dang khol du lta// yo ga spun dang grogs por lta// mahA thabs dang shes rab lta// a nu dbyings dag ye shes lta// a ti yo ga phyogs med lta'o// zhes gsungs so// thig le 'dre rgyud chen po las/ lta ba stong rdzogs dbang gi le'u ste dgu pa'o//// de nas mkha' 'gro mas zhus pa/ kye kye ston pa rdo rje sems dpa' lags// sgom pa rig pa'i dbang zhu 'tshal// ces zhus pas/ ston pas bka' stsal pa/ nyon cig rdo rje mkha' 'gro ma// sgom pa'i mtshan nyid bstan pa ni// nyan thos gzung 'dzin bkag nas ni// tshogs drug bkag nas sgom pa yin// phung po mi gtsang rus thigs bsgom// rang sangs rgyas kyi sgom pa ni/ / rten 'brel bcu gnyis 'khor lo sgom// dbu ma dag gi sgom pa ni// sgyu ma'i dpe brgyad lta bu sgom// kri ya rigs gsum mgon po bsgom// yo ga sku lnga'i dkyil 'khor sgom// mahA rigs lnga'i lha ru sgom/ / a nu rig pa'i lhar sgom pa'o// a nu yo ga sgom las 'das// bla na med pa'i thig le 'di// rin po che ni khong nas 'char// sgom sgrub rang la rang shar grol// nyan thos bdag med kho na spyod// rang sangs rgyas ni gnyis ka spyod/ / dbu ma pha rol phyin bcu spyod// kri ya 'phrin las rnam bzhi spyod// yo ga 'phrin las rnam bzhi spyod// ma hA sbyor sgrol spyod pa byed// a nu ma hA'i spyod pa'o// A ti snang srid gzhi bzhengs spyod/ / gsang ba yang gter spyod pa ni// 'dzin rgod bying rgod med pa yi// rang grol ye shes 'od gsal spyod// nyan thos 'bras bu dgra bcom pa// rang sangs rgyas kyi 'bras bu ni// ne tso bse ru lta bu'o/ / dbu ma'i 'bras bu spros mtha' bral// kri ya'i 'bras bu snang mtha' yas// yo ga tshe yi rig 'dzin thob// ma hA phyag rgya chen por 'dod// a nu rnam snang sa chen 'dod// bla na med pa'i thig le 'di// rgyu 'bras dbyer med thig le'i don/ / tshe gcig dag gis thob pa'o// ma hA ka ru lo ka ti la dz+nyA na A/ zhes gsungs so// thig le 'dre rgyud chen po las/ grub mtha'i 'bras bus dbang bskur ba'i le'u ^dang/ theg pa'i sgo la 'chings pa'i le'u ste bcu pa'o//// de nas yang mkha' 'gro mas zhus pa/ rdo rje sems dpa' chen po lags// brtul zhugs dbang bskur gsung du gsol// ces zhus so// ston pas bka' stsal pa/ nyon cig rdo rje mkha' 'gro ma// gangs kyi rgyal po ti tse la// srog chags chen po bzhi gnas so// chu bo bzhi 'bab dbang gi brda// rgya mdud dbang gi dkyil 'khor na// shel gyi ga'u kha sbyar na/ / srog chags rnam bzhi dbang gi rtags// rtags dang don du 'brel ba yin// rin chen zur brgyad pho brang na// rig pa'i rgyal po zang thal gnas// brtul zhugs dbang gi don yin te// srog chags srog rtsa gcad pa gces/ / dbang rtags rang la yod kyis phyir ma tshol// brda don rnam gsum nyi ma'i snying po 'dra// don gsum rang la gnas pa ngo mtshar che// e ma rang shar ltad mo che// phyi nang gsang ba dbang gi brda/ / rang chas yin pas btsal du med// tshol na gser gyis gser tshol 'dra// tshol na shin tu rnyed par dka'// dbang rdzas dbang bskur thob lugs ni// nor bu rin chen gzhan gyi 'od 'phrog 'dra// rang la rang shar bas dbang gi rgyal po yin/ / rang gi thos pas dbang bskur rgyal po yin// dbang lnga shes rab rig pa ye shes dbang// lam du slongs na dbang lnga lhan cig skyes// de shes bar chad med pa'i brda ni bum nang mar me 'dra/ / dbang po rab kyi brda ni nyi shar dus tshod 'dra// 'bring dang tha ma'i brda bstan pa// nor bu rin chen skungs bcug 'dra// bar chad med na dbang gi rgyal po yin// rgyun mi 'chad pas dbang gi bskur thabs yin/ / a bi She ka na ma hUM/ zhes gsungs so// thig le 'dre rgyud chen po las/ dbang gi gdams pa bstan pa'i le'u las// bka' sgo dras thag gcad pa'i le'u ste bcu gcig pa'o// de nas yang rdo rje mkha' 'gro mas/ / kye kye bcom ldan gsang ba'i bdag/ bla mas thabs mang bstan pa ni// gang gi don du gsungs pa lags// nges pa'i don la gcig tu 'dus// sna tshogs bstan pa ji ltar lags/ / zhes zhus pas// rdo rje sems dpas bka' stsal pa// nyon cig rdo rje mkha' 'gro ma// ngas ni thams cad gcig tu bstan// slob dpon tshad mar ma go dang// slob mas tshad mar ma go na// de ni bka' bsgo lam la 'chings/ / gdams ngag tshad dang ma ldan par// slob dpon tshad mar khas len dang// rdo la gser chu bskus pa 'dra// slob mas tshad mar ma shes pa// rtsa ba rul pa'i lo ma 'dra// 'bras bu smin pa'i dus mi 'chi/ / lta ba stong pa'i rdzong la 'chings// lta ba nam mkha'i khungs tshol pa// 'bras bu skye mched mu bzhi las// nam mkha' mtha' yas skye mched gol// spyod pa cir snang thabs kyis 'chings/ / gzung 'dzin gnyis kyi thag ma chod// 'bras bu 'khrig spyod lta ru gol// sgom pa nyams myong rtags kyis 'chings// blo snang nyams myong 'gyur bas ye shes don mi phrad// ye shes bsgoms pas mi 'char rang snang ngo sprod gces/ / 'bras bu rnam spyod dus kyi 'chings// 'bras bu yul can dus la ltos pa ni// 'bras bu thob dus mi 'ong sar chud// rang grol rang shar shes na 'bras bu'i rgyal po yin// bka' bsgo lam rgyus med pa'i slob dpon gyis/ / rna bar shub shub slu bar byed// gdams pa tshad mar ma phyin pas// long bas long ba khrid pa 'dra// 'jug sgo theg pas 'chings pa ni// rims brgyad kun brtags 'jug pa'i sgo/ / tshul khrims sdom pa dam tshig la sogs kyis// rang rang grub mtha' 'chings nas phyogs ltos byed// nam mkha' gung du gcad pa'i phyogs ris can// de yi grub mthas 'chings pa gol// ces gsungs so/ / thig le 'dre rgyud chen po las/ 'ching ba drug gi gdams ngag bstan pa ste le'u ste bcu gnyis pa'o//// de nas mkha' 'gro mas zhus pa// ston pa rdo rje sems dpa' lags// 'chings pa'i dras thag gcad pa bstan par zhu/ / zhes zhus pas/ rdo rje sems dpas bka' stsal pa// nyon cig rdo rje mkha' 'gro ma// lta ba'i rkun bus khyer ba'i mi// dper na nam mkha' stong ba la// phyogs bcu gcad nas sgrub par byed/ / nam mkha' phyogs med rang shar la// phyogs ris gcad nas rkun bus khyer// stong pa nyid ni khas len pa// dngos po ma shong phyogs ltos byed// rdzogs chen khas len stong nyid can// dbu ma'i lta ba'i rkun bus khyer/ / rdzogs chen rol ba'i don ma rtogs// stong nyid phyi dus 'debs pa ni// 'bras bu'i dras thag ma chod pas// thig ler rang snang sgrib pa yis// 'bras bu rang grol dus mi 'chi// de na dras thag gcad pa ni/ / snang srid rang grol rang shar 'di// gol sgrib gnyis kyi don rtogs pas// dbu ma'i don rtogs rdzogs chen yin// phyogs med shar nas rang grol yin// ye shes rin chen 'bar ba 'di/ / khong nas shar bar 'bras bu'i dras thag chod// 'bras bu'i dras thag ma chod na// phyogs rtogs 'bras bu thob mi srid// ces gsungs so// thig le 'dre rgyud chen po las/ lta ba'i rkun bu ngos gzung ba dang dras thag gcad pa'i le'u ste bcu gsum pa'o/ /// de nas yang rdo rje mkha' 'gro mas zhus pa/ kye/ gsang bdag rdo rje sems dpa' lags// sgom pa'i rkun bu ji ltar lags// de yi dras thag ji ltar gcad/ / zhes zhus pas/ rdo rje sems dpas bka' stsal pa// nyon cig rdo rje mkha' 'gro ma// sgom pa'i nyams len bstan pa ni// rlung gi shas che rgod cing 'tshub// 'phro dang rgod pa'i rkun bu 'ong/ / rang bzhin shugs kyi rgod pa dang// ched du byas dang rten 'brel rdzas kyi rgod// nying gung mtshan gung bsgom par bya// rten 'brel rdzas dang dus tshod dang// stong nyid thun tshad dbye ba gces// bad kan shas che lci zhing bying/ / rang bzhin shugs kyis bying ba dang// ched du byas dang rten 'brel rdzas// nyin dgung mtshan gung bor byas la// srod dang tho rangs thun tshad dang// 'od gsal thun tshad khams dang sbyar/ / rten 'brel man ngag 'brel pa gces// mkhris pa shas che ba yang brtan// bsam gtan phyogs med 'phel ba'i yin// rdzas dang rte 'brel thun tshad ni// rab tu snyoms pas 'grub pa'o// khrag gi shas che shes rab che/ / bsam gtan gang yang 'phel 'gyur te// grang ba'i rdzas dang thun tshad gces// 'dus pa'i rang bzhin kun nas snyoms// stong nyid ye shes rang bzhin 'chang// rdzas dang thun tshad dbye bar bya/ / nga bdag zhi ba'i sgom pa yin// thig le khas len nyan thos gol// sgom pa'i rkun bu spyod kun yin// de yis dras thag gcad pa ni// ye shes blo las grol ba ni// phyi nang dbyer med zang thal la// sgom pa ni nad kyi rkun bus khyer/ / 'bras bu skye mched mu bzhir skye// 'bras bu'i rkun pa zhes su bshad// thig le ngo sprod zang thal 'di// gzhi lam 'bras bu dbyer med pas// nyag gcig sgom pa'i blo las grol// rten 'brel rdzas la rag ma lus/ / rang grol ye shes rang la shar// e ma rang snang chen po 'di// rtsol sgrub nad dang ma bral na// ji ltar sgom pas 'dus byas yin// thig le rang sgo ngo sprad pas// sgom mkhan sgom yul 'bras bu gsum/ / rang grol nyid du mkhyen pa'o// zhes gsungs so// thig le 'dre rgyud chen po las/ lta sgom spyod pa 'bras bu'i rkun bu bstan pa'i le'u ste bcu bzhi pa'o//// de nas rdo rje mkha' 'gro mas zhus pa/ gsang bdag rdo rje sems dpa' chen// dbus kyi ri rab gling bzhi gling phran brgyad// ri bdun mtsho bdun shing chen lnga// lcags ri nag po ji ltar 'khrul// zhes zhus pas/ rdo rje sems dpas bka' stsal pa/ / nyon cig rdo rje mkha' 'gro ma// gzhi dang lam dang 'bras bu gsum// gzhi la chos lnga ldan pa yin// lam du 'od lngar 'khrul pa yin// 'bras bu rin chen sna lngar 'khrul// phyogs bzhi dbus dang lnga ru 'khrul/ / kha dog ser po ri bdun 'khrul// dkar po rol mtsho bdun du 'khrul// dkar po shar sogs gling du 'khrul// mthing ka lcags ri nag por 'khrul// chos lnga shing chen lnga ru 'khrul/ / rang snang 'khrul pa shar ba la// phyogs dang gling du phye ba yin// des na rang gdangs 'khrul par shar// phyi yi snod kyi cha lugs so// 'od zer dkar po grang ba'i snod// 'od zer ljang khu nyi tshe'i snod/ / mthing ka rdo rje dmyal ba'i snod// 'gyur ba med pas rdo rje 'dra// mthing ka byol song snod du shar// ser po mi yi snod du shar// ljang khu lha dang lha ma yin// phyi snod kyi 'jig rten 'khrul pa yin/ / rang gdangs 'khrul pa ngo mtshar che// zhes gsungs so// thig le 'dre rgyud chen po las/ phyi snod kyi 'jig rten 'khrul pa'i le'u ste bco lnga pa'o//// de nas rdo rje mkha' 'gro mas// rdo rje sems dpa' ston pa'i mchog/ nang gi grub tshul bshad du gsol// ces zhus pas/ rdo rje sems dpas bka' stsal pa// nyon cig rdo rje mkha' 'gro ma// gzhi lam 'bras bu gsum du 'khrul pa'i don// gzhi ni chen po lnga ru gnas/ / phyi ltar lhun grub nang ltar chos nyid la// gsang ba kun gzhi spyi sa yin// lam du rang gdangs 'od du shar// 'bras bu phung po lnga ru shar// de ni rang gdangs nang gi yul du grub pa'i ri rab 'khrul/ / gling bzhi mthil bzhi gling phran rkang chen brgyad// ri bdun mtsho bdun tshogs bdun snang ba bdun// shing lnga sgo lnga lcags ri bags par 'khrul// de ni nang gi grub tshul yin// gsang ba'i grub tshul bstan pa ni/ / dbus kyi ri rab tsit+ta la// gling bzhi mthil bzhi gling brgyad thel brgyad don// ri bdun thel bdun mtsho bdun zur// shing lnga rtsa lnga lcags ri snying// rtsa nag chen po yin par bshad// yang gsang grub tshul bstan pa ni/ / rtsa yi rgyal po ri rab la// rtsa bzhi rtsa brgyad gling phran brgyad// chags sdang drug dang ngo bo ni// ri bdun yin par rag gdangs so// drug drug ngo bo bdun ni mtsho// gti mug 'byed med ma rig lcags/ / sgo lnga rtsa lnga shing du 'khrul ba'o// me long snang bzhi spyi sogs bzhi// phyi yi sgo lnga mngon du shar// nang gi sgo lnga snying la grub// gsang ba'i sgo lnga rtsa ru shar// yang gsang sgo ni 'gyur ba'i mig/ mdzod tshang g.yos cha rgan rgon bu rmad tshang// tshang bang mun khang zhes su bshad// yul dang srid pa kun gsal na// me long gcig la 'od byung bas// phyogs med 'od kyis khengs pa ngo mtshar che// zhes gsungs so/ / thig le 'dre rgyud chen po las// phyi nang gsang ba yang gsang grub tshul gyi le'u ste bcu drug pa'o//// de nas rdo rje mkha' 'gro mas// gsang ba'i bdag po la zhus pa// thog ma gling bzhi chags lugs las/ / phyi snod grub pa de ltar na// mi dang glang sogs go mtshon dang// nor gyi rnam pa ji ltar grub// ces zhus pas/ rdo rje sems dpas bka' stsal pa// nyon cig rdo rje mkha' 'gro ma// mi la rgyal po blon po dang/ / dmangs dang bram ze mi rigs lnga// rgyal po rin chen rgyal po rigs// blon po rin chen blon po'i rigs// thams cad 'phel byed btsun mo rin po che// glang po rin po che las byol song sogs/ / thams cad 'byung bas glang po rin po che// dmag dpon rin po che las grub pa ni// ma blas phub dang ma brdungs mtshon// ma rgyus khrab la sogs pa 'byung bas rin po che// rta mchog cang shes rin chen rta mchog grub/ / nor bu rin po che las nor gyi tshogs rnams grub// rdzas rnams kun gyi mchog tu bshad// bcud du grub pa rin chen sna bdun yin// 'khor lo rin po che las 'gro drug 'khrul pa'o/ / rarna lo ka karma bu d+ha spra sa ra da du/ zhes gsungs so// thig le 'dre rgyud chen po las/ bcud bstan pa'i le'u ste bcu bdun pa'o//// de nas rdo rje mkha' 'gro mas zhus pa// kye kye rdo rje sems dpa' lags/ / rnal 'byor bar chod 'byung pa la// de yi bzlog thabs ji ltar lags// 'chi ltas rnam pa du zhig mchis// zhes zhus pa// rdo rje sems dpas bka' stsal pa// 'chi ltas rnam pa gsum yin te// bar chad gdon dang 'dus pa nad/ / las kyi rnam smin gsum du bstan// nyon cig rdo rje mkha' 'gro ma// rnal 'byor bar chod bzlog pa dang// 'chi ba slu ba bstan par bya// de la dang po bstan pa ni// rnal 'byor 'dre ni rlung la 'jug ba spu'i bu ga'i khung bu nas/ / rlung yang de dang 'dra bar rgyu// bug pa dgu yi rlung dgu nas// rnam shes rlung yang dgu rgyug ste// rlung la 'dre zhon nad du 'gyur// dmar na btsan dang ma mo'i gdon/ / mthing na bdud dang nag mo'i gdon// ser na dmu dang bsen mo'i gdon// dkar na rgyal po dkar gdon// ljang na 'dre gdon sna tshogs so// steng rlung 'og rlung rang las grub// 'dre lnga rlung lnga rang las grub/ / bcos thabs so so'i sgo ru bstan// nud pan ni ka zhes gsungs so// tsan dan gyi nags tshal la me tog ha lo la sad byung ste// slar gso ba'i brda bstan pa'o// zhes gsungs so// thig le 'dre rgyud chen po las/ bar chod gdon ngos gzung ba bstan pa'i le'u ste bco brgyad pa'o//// de nas rdo rje mkha' 'gro mas zhus pa/ gsang ba'i bdag po chen po lags// 'dus pa'i nad kyis 'chi ba ji ltar lags/ / zhes zhus so// ston pas bka' stsal pa// nyon cig rdo rje mkha' 'gro ma// nad la bsam gyi mi khyab ste// nyon mongs brgyad khri bzhi stong dang// rtogs pa brgya dang brgyad cu la// de la nad rnams 'jug par byed/ / bsdus pas 'byung ba lnga yi nad// ser na mkhris pa dmar na tsha ba nad// mthing na bad kan dkar na rlung// ljang na 'dus pa'i nad yin te// 'byung ba lnga yi khams dang sbyar// rgyu dang rkyen las bcos thabs rdzas sbyor gces/ / so so rang re'i gnyen po sbyor bas bcos// 'dus pa nad kyis 'chi ba bslu ba yin// gangs dkar gyi rtse mo la// u dum wa ra'i sad bsrung ba'i man ngag/ brda dang don gyis bstan pa'o// zhes gsungs so// thig le 'dre rgyud chen po las// 'dus pa nad kyi 'chi ltas kyi le'u ste bcu dgu pa'o//// rdo rje mkha' 'gro mas zhus pa// kye/ bcom ldan rdo rje sems dpa' lags/ / las kyi rnam smin 'chi ba yi// bar do ngan 'gro 'khor bas na// de yi gdams ngag bstan du gsol// ces zhus pas/ rdo rje sems dpas bka' stsal pa// nyon cig rdo rje mkha' 'gro ma/ / bar do'i 'bras bu bzlog pa ni// rin po che'i za ma tog 'od 'bar ba de la/ thob shas byas pas nam sros mun rum du chud de 'gro bas/ bar do'i rin chen sna lnga'i me mar bteg pa'i brda// drod dang yi ge mdog gsum po/ / dkar po rkang mthil yi ge du// dmyal ba 'gro ba'i snga ltas yin// dmar po gsang ba'i yi ge bri// yi dwags 'gro ba'i snga ltas yin// mthing ka lte ba yi ge su// byol song 'gro ba'i snga ltas yin/ / ser po snying kha yi ge Ni// mi ru 'gro ba'i snga ltas yin// ljang nag mgrin pa'i yi ge a// mi ma yin gyi snga ltas yi// spyi bo ljang khu yi ge a// lha ru 'gro ba'i snga ltas so// dmyal ba tsha grang sdug bsngal dang/ / yi dwags bkres skom gyis gdungs pa// byol song glen lkugs chos byol nas// lha ma yin gyi rtsod 'gyur dang// lha yi gnas nas lhung bas na// mi yi rgyu rkyen bstan par bya// 'bras bu nges par thob par 'gyur/ / rgyu rkyen gdams bas 'chi ltas gdab// yul 'od zer can gyi ldum ra na/ gser gyi mchod rten skur bzhugs pa'i brda bstan pa'o// zhes gsungs so// thig le 'dre rgyud chen po las/ rnam smin bzlog pa'i le'u ste nyi shu pa'o/ /// de nas rdo rje mkha' 'gro mas zhus pa/ snang ba sgyur thabs med pa ji ltar lags// de yi brda don gsung du gsol// ces zhus so// ston pa rdo rje sems dpas bka' stsal pa/ nyon cig rdo rje mkha' 'gro ma/ sngon byung ba'i spos ri zhes bya ba na/ rin po che sna lnga'i 'od yod pa la/ cang shes kyi rta la zhon nas brgyugs pas/ myur mgyogs kyi rta kha ma thub nas mun pa smag gi brag phug tu chud do/ / bar do snang ba bsgyur thabs med pa ni// mtshams med lnga byas rdo rje slob dpon bsad// snang ba bzlog pa'i thabs med de// dper na ri bo'i rtse mo nas// 'od zer phyogs med 'char ba la/ / sus kyang khegs par gal 'gyur// mnar med rang snang rang la shar ba de// gzhan gyis bzlog tu rang byung ci la zlogs// 'chi ltas ma byung bar du ngo sprod byas gyur na// mnar med de yi snang ba chos min thig ler 'bar/ / 'bar ba'i rgyal po rin chen khong nas 'char// zhes gsungs so// skyes bu gyad pa gcod byed bya bas// btsun mo legs mo cig la mda' btsugs pas/ mdas btsun mo zang thal du song nas bsad do/ / de ngo mtshar che/ thig le 'dre rgyud chen po las/ snang ba bsgyur du mi btub pa dang rnam smin ngo sprod pas grol ba'i le'u ste nyer gcig pa'o//// de nas rdo rje mkha' 'gro mas zhus pa/ ston pa rdo rje sems dpa' lags// thun mong 'chi ltas de ltar lags// khyad par 'chi rtsis bstan du gsol// ces zhus pas/ ston pas bka' stsal pa/ nyon cig rdo rje mkha' 'gro ma// khyad par 'chi ltas bstan pa ni/ / yul khyab byed 'byung ba'i me long du// sprin sna tshogs snang ba'i gzugs can la// drang srong gi chad pa gsal ba ni// kun tu bzang po'i thugs kyi 'od// rdo rje sems dpa'i sku yi mdangs/ / dga' rab rdo rjes lung bstan te// sa dang nam mkha' gnyis la brtag/ mkha' la bag rdul med pas dus// dngul gyi gzhong pa lta bu yi// de yi nang na rang gdangs gsal// mdog skya rang gis grib ma brtag/ grib ma rnam pa gsum yin te// 'dus pa nad dang bar chad gdon// las kyi rnam par smin pa'o// de rnams go rim ji bzhin du// mtshan ma rtags kyi rang gdangs la// rang dang 'khor gyi rtags bstan te/ / nyin mo nub lta mtshan mo shar// zla ba nyi ma'i grib ma brtag/ de tshe maN+Dal ma byas na// cho 'phrul log par 'gyur// de nas gsol ba gdab par bya// de nas mchod pa rnam lnga dbul// maN+Dal pu tsa ma ha ho/ / zhes gsungs so// 'dre rgyud chen po las/ sngon du bya ba bstan pa ste nyer gnyis pa'o//// de nas mkha' 'gro mas zhus pa/ rdo rje sems dpa' ston pa kun gyi rje// grib ma'i mtshan ma bstan du gsol/ / ces zhus pas/ rdo rje sems dpas bka' stsal pa// grib ma'i mtshan nyid bstan pa ni// ljon shing phung po rgyas pa la// yal ga sdong po so so gyes// gyes pa slar la bsdu ba ni// rdo rje sems dpa'i me long bstan pa ni/ / dngul gyi mtsho mo gser gyi nya mo'i lus brtags pas// dga' rab rdo rje lung bstan pa// ro bltums 'dra na zla gcig na// rnal 'byor pa ni brlag par 'gyur// mgo mjug log na gnyis na 'chi/ / mgo bo chad na gsum na 'chi// gdugs sogs po ti mtshan ma brtags// slob dpon slob ma 'chi bar 'gyur// lag pa g.yas pa chad pa na// pha spun ma spun bzhi nas 'chi// lag pa g.yon pa chad gyur na/ / bu dang chung ma bzhi na 'chi// rkang pa g.yas pa chad gyur na// ma dang bu mo sring mo dag/ bzhi na 'chi bar 'gyur ba yin// rkang pa g.yon pa chad gyur na// pha spun mo dang ma spun mo// zla ba bzhin nas 'chi bar 'gyur/ / zhes gsungs so// thig le 'dre rgyud chen po las// rang gdangs brtags pa'i le'u ste nyer gsum pa'o//// rdo rje mkha' 'gro tshogs kyis su// bcom ldan rdo rje sems dpa' la/ / gdon dang nad dang rnam smin gsum// de yi rang gdangs bstan du gsol// ces zhus pas/ rdo rje sems dpas bka' stsal pa// nyon cig rdo rje mkha' 'gro ma// gdon gyi gdangs bstan pa ni/ / brda dang don du bstan par bya/ khyab brdal mthing gi me long du// 'od kha dog lnga rang gdangs su gsal lo// de la bltas na rang gi lus dngos su ston no// de la 'dre dag zhugs 'gyur na// 'dra 'bag dkar dmar sna lnga yis/ / rang srog rang gi gcod 'gyur bas// 'bag de ngo yis gzung bar bya// ngos zin de la mdos bsngos la// srog gi glud ni sbyin byas nas// 'bag de dngos su mkha' la 'gro// rdo rje mkha' 'gro'i 'bag bslus yin/ / me yi 'bag ni dmar po des// rang gdangs lus la khyab byas nas// mgo bo la sogs go rim bzhin// 'bag gi gdon de mthong ba na// rdo rje klu btsan smug mos ni// rang gi srog la bar chad byed/ / de bzhin phaspun la sogs brtags// nam mkha'i 'dra 'bag mthing ka dag/ mgo la sogs pa go rim bzhin// bdud dang nag mos srog la rku// de yang gong du shes par bya// 'chi bdag bdud de gsal bar bya/ / chu yi 'bag ni dkar po dag/ mgo bo la sogs lus la zhugs// go rims bzhin du rab tu brtag/ rgyal po dkar mo'i gdon du bstan// sa yi 'bag ni ser po dag/ lus la sogs pa'i gdon du bsal/ / de yis bar du gcod pa na// dmu dang ser mor shes par bya// rlung gi 'bag ni ljang khu dag/ mgo lus dag la zhugs pa gsal// de ni spyi bdud bar chod yin// sna tshogs 'dre ru shes par bya/ / bar chod gdon gyi bcos thabs dang// rten 'brel rdzas kyi bcos thabs gces// zhes gsungs so// thig le 'dre rgyud chen po las/ gdon ngos gzung ba'i le'u ste nyer bzhi pa'o/ /// rdo rje mkha' 'gro ma'i tshogs kyis// bcom ldan rdo rje sems dpa' la// las kyi rnam smin bstan du gsol// ces zhus pas/ rdo rje sems dpas bka' stsal pa// nyon cig rdo rje mkha' 'gro ma/ / rang dang don gyi ngo sprod bstan par bya// rang snang rnam dag me long la// btsun mo mdzes ma sna tshogs mdog/ de yis bstan pa'i dus gcig na// mo yi rang gis mdangs stor bas// sus kyang mi rnyed brlags par 'gyur/ / las kyi me long gsang ba nang// srid pa 'byung ba'i lus po gsal// rtag tu ltas na cho 'phrul mthong// ma ltas bar chad zlog mi 'gyur// des na brtag pa rab tu gces// lus kyi rang gdangs mi snang na/ / maN+Dal mchod pa phul la blta// des ni gsal bar ma nus na// lus kyi mtha' ni zad pa yin// tshe zad par ni shes par bya// ngo sprod dbang bskur bya bar shis// de ltar ma byas 'khor bar 'khyam/ / 'khrul 'khor rang grol rang snang yin// rang grol rang byung rang shar ba'i// gnad kyi dam pa shes par gyis// sngon mkha' gsal ba'i nang na bdud ha li ka ngo bzhin de// kho'i snang ba g.yu'i me long la gsal te/ dus dus dag tu lta ba la/ dus nam zhig na kho'i ngo bzhin de/ bdud srid pa'i ngo bzhin gyis khyer bas/ kho mya ngan gyis zin kyang phan med do// de la mya ngan gyis mi phan pa ngo mtshar che/ ma lha nud ti sha ha a/ zhes gsungs so// thig le 'dre rgyud chen po las/ las kyi rnam smin bstan pa'i le'u ste nyer lnga pa'o//// rdo rje mkha' 'gro la sogs kyis// bcom ldan rdo rje sems dpa' la/ / 'chi ba bslu ba gsung du gsol// zhes zhus pas/ rdo rje sems dpas bka' stsal pa// nyon cig rdo rje mkha' 'gro ma// zab mo brda yi ngo sprod bstan par bya// nyi zla gnyis la rtse nus na// 'chi ba bslu bar gdon mi za/ / drang srong chen po nye nag de// rang gi dngul dkar me long la// nang nub gnyis su blta ba la// kho yi byad la 'dre gdon zhugs// 'dre de bslu bar bya ba ni// lta ba'i stobs kyis bslu ba dang/ / spyod pa'i stobs kyis bslu ba dang// sgom pa'i stobs kyis bslu ba dang// rten 'brel rdzas kyis bslu ba 'o// mkha' 'gro ma yi tshogs rnams nyon// gangs dkar rtse yi seng ge la// rtsal gsum rdzogs pas sder chags zil gyis mnan/ / zin gnon stobs kyi 'dre de bslu// rin chen thig le rang 'bar la// bskyed rdzogs rnam gsum zil gyis mnan// zil gnon stobs kyis lta ba ni// rgyu rkyen med pas chos min yin/ / phyi nang med par thig le'i don// rang grol ye shes 'bras bu ste// gnyis med ye shes thig le la// gnyis snang gdon gyis 'dre de bslus// chos las ma byung 'bras bu yang// mi srid srid pa'i chos yin no/ / kun bzang slob dpon ma brten pa// mi srid srid pa'i sangs rgyas yin// dmyal ba'i gnas kyi sdug bsngal sogs// rang grol shes pas sangs rgyas pa// mi srid srid pa'i chos min yin// sdug bsngal sangs rgyas rang snang ba/ / mi srid srid pa'i ye shes yin// khyung chen gzan ma mi dgos pa// mi srid srid pa'i srog chags yin// zhes gsungs so// thig le 'dre rgyud chen po las/ lta ba'i bslu ba'i le'u ste nyer drug pa'o/ /// de nas rdo rje mkha' 'gro mas// rdo rje sems dpa' kun rig rje// spyod pa'i stobs kyis bslu ba gsung du gsol// ces zhus pas/ rdo rje sems dpas bka' stsal pa// nyon cig rdo rje mkha' 'gro ma/ / rma bya rgyal po gser 'od kyis// ma zos pa yi zas med pas// dug la kham gcig za ma myong// lan cig nags khrod gnas su phyin// dug gi rgyal po ha lo de// kha dog lnga dang ldan nas 'dug/ de la kham gcig zos pa dang// rma bya'i rgyal po gser du snang ba de// spu kha lnga dang ldan par 'gyur// rang skad kring kring sod ces bya// de nas rma bya'i rgyal mo yis// dug gi rgyal po de la zos/ / rang skad gdangs dang chas pa yis// rma bya rgan rgon gsos su gyur// dug gis 'tsho ba'i rma bya rnams// de yang mi srid srid pa'i chos// zhes gsungs so// theg pa'i rgyal po 'dre rgyud 'dis// grub mtha'i rgyal por rang shar bstan/ / spyod pa'i rgyal po dug lnga rang shar la// lam gyi rgyal po rang shar rang grol bstan// nyams kyi rgyal po snang srid thig ler brdal// 'dod chags zhe sdang rang rgyud grags su 'gyur/ / theg brgyad kun brtags rnams ni dug lnga spong// theg chen rgyal po 'di ni mnyams nyid grogs su 'gyur// zhes gsungs so// thig le 'dre rgyud chen po las/ spyod pa'i stobs kyis bslu ba'i le'u ste nyer bdun pa'o/ /// de nas rdo rje mkha' 'gro mas// bcom ldan rdo rje sems dpa' la// sgom pas bslu ba gsung du gsol// ces zhus so// rdo rje sems dpas bka' stsal pa// nyon cig rdo rje mkha' 'gro ma/ / drang srong dur khrod dag na gnas pa la// stag dang dom gyis mi sdug byas// drang srong snying rlung zhugs nas ni// de nas sman pa btsal ba las// sman pa'i rgyal po gzhon nu khugs// snying rlung can de'i sman du ni/ / sman chen lnga po gcig tu sbyar// drang srong de la gtang ba las// snying rlung zhi nas bde ba skyes// bde ba'i nyams kyis gzung ba ni// rgod drug rnyi la zin pa 'dra// sgom pa'i stobs kyis bslu ba ni/ / rig pa drang tshugs bde gsal de// zhe sdang gti mug bsgom par bya// rlung gis bde ba bskyed pa'i phyir// rlung gzung bde ba bsgom par bya// dug lnga rang gsal mi rtog sgom// ma rig rlung ni zhi gnas rlung la gnas/ / rlung zin pas ni bslus par 'gyur// phyi rlung glod la nang rlung bsdam// mkha' la gtad pas rtog pa zhi// zhi gnas bsgoms pas bslu bar 'gyur// zhes gsungs so// thig le 'dre rgyud chen po las/ / sgom pas bslu ba'i le'u ste nyer brgyad pa'o//// de nas rdo rje mkha' 'gro mas// bcom ldan rdo rje sems dpa' la// rten 'brel rdzas kyis bslu ba bstan par zhu// zhes zhus so// rdo rje sems dpas bka' stsal pa/ / nyon cig rdo rje mkha' 'gro ma// rten 'brel rdzas kyi bslu ba ni// mi rta khyi yi rus pa la// rang gi dri mas byugs nas ni// ngar glud khru gang tshad du bya// gang gi gos kyang de la bskon// sa phyogs rgya gram dag tu ni/ / khung bu brus te sba bar bya// mi de 'chi ba zlog par 'gyur// de yis rang gdangs ma gsal na// 'khor gsum yongs su dag pa bya// des kyang thub par ma gyur na/ / tshogs kyi 'khor los bslus par 'gyur// 'byung po'i gtor ma btang bas kyang// 'chi ba bslus par 'gyur pa yi// tsha tshwa 'bum du btab pas kyang// 'chi bas bslus par 'gyur ba yin// chu yi gtor ma 'bum btang na/ / des kyang bslus par 'gyur ba yin// de rnams dag gis ma bslus ni// las kyi rnam par smin pa yin// rnam smin rtags de gong du shes// zhes gsungs so// thig le 'dre rgyud chen po las/ 'chi ba sbyor bas bslu ba'i le'u ste nyer dgu pa'o//// de nas rdo rje mkha' 'gro mas// bcom ldan 'das rdo rje sems dpa' lags// 'pho ba'i gdams ngag gsung du gsol// ces zhus pas/ rdo rje sems dpas bka' stsal pa/ / nyon cig rdo rje mkha' 'gro ma// 'pho ba'i gdams ngag bstan pa ni// dbang po rab 'bring tha ma gsum// sku gsum rang lugs shes nas ni// rab ni skad cig gsum la 'pho/ / dbugs chad pa yi skad cig ma// rang snang shar ba'i skad cig ma// mngon du gyur ba'i skad cig ma// rang grol 'ub chud skad cig ma// dus bzhi mnyam par sbyar nas ni// rab kyis 'pho ba'i dus yin te/ / dus gsum gcig ste khyad par med// dus bzhi rang grol dgongs pa'i mchog/ skad cig rnam pa bzhi po de// mthun pa kri ya'i tshul tsam yin// rang shar rang grol 'du 'bral med// 'ub chub byang chub klong du gsal/ / thig ler brtsegs pa'i rtse mor phyin// sa rnams ma bgrod rang sar sleb// lam rings ma sbyangs rang sa non// 'du 'bral med pa'i ye shes shar// dbang po rab kyi 'pho ba yin// dbus kyi ri bo mchog rab de/ / rin chen sna lngar shar ba yis// mun pa bya ba yul na med// nyi zla zung gcig 'du 'bral med// ces gsungs so// thig le 'dre rgyud chen po las/ dbang po rab kyi 'pho ba'i le'u ste sum cu pa'o/ /// rdo rje mkha' 'gro mas zhus ba// bcom ldan rdo rje sems dpa' lags// 'bring po'i 'pho ba bstan du gsol// ces zhus pas/ rdo rje sems dpas bka' stsal pa// nyon cig rdo rje mkha' 'gro ma/ / rin chen gser gyi bum pa ni// zhugs mar 'bar ba rtag tu gsal// gser gyi bum pas zhun mar bsgribs// kha phye bltas na zhun mar gsal// nang gsal phyi mi gsal ba la// bum pa'i gzer bu chad pa dang/ / phyi rol 'od kyi snang bas khebs// brda yi rtags ni 'di lta ste// phyi lus bum pa'i nang shed na// rang rig thig le rtag tu gsal// rang lus bum pa'i rang snang bsgribasam// gdams ngag thebs pas mthong bar 'gyur/ / blo yi pad+ma kha phye nas// don gyi ye shes rtag tu gsal// thig le ye shes khong gsal yin// dbugs chad pa yi dus nyid na// bar dor rang gdangs 'od du gsal// 'od de longs sku 'gyu ba sprul pa'i sku/ / gnyis med rang shar shes pa chos kyi sku// sku gsum 'du 'bral med par 'bab// bar ma do ru sangs rgyas pas// 'pho ba zhes su bshad pa yin// zhes gsungs so// thig le 'dre rgyud chen po las/ dbang po 'bring po'i 'pho ba'i le'u ste sum cu so gcig pa'o//// de nas rdo rje mkha' 'gro mas// bcom ldan rdo rje sems dpa' la// tha ma'i 'pho ba bstan du gsol// ces zhus pas/ rdo rje sems dpas bka' stsal pa// tha ma'i 'pho ba bstan pa ni// drang srong gcig dang bram ze gnyis// kho yi yul na bde chen gling// de na nor bu rin chen yod// drang srong yul ni skyo med yin// de ru gnyis po tshogs pa las/ / bram zes drang srong rgad po la// nor bu rin chen gtam byas pas// drang srong nor bu'i mching bu la// yid byung kho la nga khrid byas// bram ze dag gi zhal na re// nga ni sna la 'gro ba yin/ / khyod ni phyogs nas 'od dgos zer// yid ches pa yi rtags dgos byas// nga yi yum gyi drang lam na// 'jig rten zam pa kun rgyu yod// de yi zam pa'i dkyil du ni// nor bu rin chen sbas la bzhag/ de mthong bas ni nga dang 'phrad/ / ces brda ru gsungs so// slob ma slob dpon rnam pa gnyis// sangs rgyas sa dang 'khor ba'i gnas// sangs rgyas yon tan 'khor ba'i skyon// dbyer med yin te ngo ma phrad// snga ma phyi ma gnyis su gzung/ / 'di dang bar do gnyis su bstan// bar do sems can thams cad 'grim// 'od lnga'i zam la thams cad 'byung// sku gsum ngo sprod shin tu gces// des shes pas ni mngon sangs rgyas/ / rig pa 'gyu bar ngo sprad pas// 'gyu ba'i rlung ni sprul sku yin// 'od kyi gdangs ni longs sku yin// dbyer med rang snang chos kyi sku// gzer gsum btab pas rang sar grol// rdo rje brtsegs pa'i rtse mor phyin/ / mu mtha' med cing khyab brdal lo// nor bu rin chen gling du sleb// zhe 'dod mdud pa de ru grol// ces gsungs so// thig le 'dre rgyud chen po las// dbang po tha ma'i le'u ste so gnyis pa'o/ /// de nas rdo rje mkha' 'gro ma// bcom ldan rdo rje sems dpa' la// ngo sprod ma byas ji ltar 'pho// zhes zhus pas/ rdo rje sems dpas bka' stsal pa// nyon cig rdo rje mkha' 'gro ma// 'od lus yid lus sha khrag lus/ / rang rang rgyu mthun las kyi 'pho// rgyu nyid rdo rje rkyen gyis 'pho// nyi ma stong bas gsal ba'i dkyil 'khor de// 'ug rtsogs mig la mun mthong 'dra// thag pa sbrul 'dzin rang gdangs so/ / rgad po gter stengs nyal te ltogs drir shi/ rgan mo grong kha 'grims kyang 'grangs ma myong// bu tshas stong khams 'phyos kyang ltad mo'i thag ma chod// rgod po rnyil zil pa ngo mtshar che// zhes gsungs so/ / thig le 'dre rgyud chen po las// ngo sprod ma byas pa 'khor bar khyams pa'i le'u ste so gsum pa'o//// de nas rdo rje mkha' 'gro mas// bcom ldan rdo rje sems dpa' la// de ltar 'gro ba'i gdams ngag de/ / srid pa lags sam ji ltar lags// zhes zhus pas/ rdo rje sems dpas bka' stsal pa// nyon cig rdo rje mkha' 'gro ma// rang gdangs mkha' la snang ba de// mi srid srid pa'i chos cig yin/ / rang 'dre dngos su ston pa de// mi srid pa yi srid pa yin// sdig ma byas par 'khor ba de// mi srid pa yi srid pa yin// dge ba ma byas mtho ris thob// mi srid pa yi srid pa yin// chos ma byas par sangs rgyas pa/ / mi srid pa yi srid pa yin// bskyed rim ma byas longs sku de// mi srid pa yi srid pa yi// slob dpon med pa'i ston pa de// mi srid pa yi srid pa yin// rtogs pas chog pa'i byin rgyud 'di// mi srid pa yi srid pa yin/ / sgom pa byas pas 'khor bar 'khyams// mi srid pa yi srid pa yin// rtogs pas grol ba'i ngo sprod la// dge sdig gnyis kyis phan gnod med// mi srid pa yi srid pa yin// sa yi me mar stong btang kyang/ / nyi ma dag la stong ma nus// rgya mtsho'i steng du dar chags kyang/ chu las 'das pa rdul tsam med// dug lnga'i sdong po rang rig kyang// rtogs pas dug lnga grogs su 'gyur// shing phung che na me phung che/ / gzung 'dzin che na rtogs pa sla// mi srid pa yi srid pa yin// khyung phrug mngal thon ma dang mnyam// mi srid pa yi srid pa yin// seng phrug mngal 'tshar ma dang mnyam// mi srid pa yi srid pa yin// zhes gsungs so/ / thig le 'dre rgyud chen po las// rtogs sgom khyad par gyi le'u ste so bzhi pa'o//// de nas rdo rje mkha' 'gro mas// bcom ldan rdo rje sems dpa' la// srid pa lus kyi chags lugs bstan du gsol/ / ces zhus pas/ rdo rje sems dpas bka' stsal pa// nyon cig rdo rje mkha' 'gro ma// sngon tshe dbus kyi ri bo mchog rab te// rgya mtsho chen po'i dbus su srid// dpag tshad brgyad khri bzhi stong yang/ / rgya mtsho chen po'i steng du byung// dpag tshad brgyad khri bzhi stong yang// 'og gi rgya mtsho'i gting du srid// srid pa rang snang zhes su bshad// kha dog lnga las grub pa'i ri// sra sra 'dra ste 'jig pa yin/ / las kyi rlung dang nyi ma yis// skad cig tsam la brlag par 'gyur// de ni brda yi bshad pa'o// don ni 'di ltar shes par gyis// 'gyu ba kun gzhi'i dbus nas 'khrul// kha dog lnga las grub pa'i lus/ / kun gzhi dag las gnas bcas nas// 'byung ba lnga las grub pa'i lus// pha dang ma yi thig le de// dang po mdzod spu'i bu gar chags// de las rtsa gnyis chags pa ni// rang snang me long gnyis su shar/ / de las rtsa gnyis gyes pa ni// kun gzhi'i dbus su grub pa yin// stod na rtsa phran brgyad khri bzhi stong gnas// chos kyi sgo mo brgyad khri bzhi stong brda// chos kyi sgo mo brgyad khri bzhi stong yang/ / rang las shar bar bstan pa yin// smad nas rtsa bran brgyad khri bzhi stong shar// nyon mongs brgyad khri bzhi stong yang// rang byung 'khor ba'i brda ru shar// stod smad gnyis su shar ba yang// 'khor 'das gnyis kyi brda ru bsnan/ / stong du sgo dgur shar ba yang// theg dgu rang la grub pa'i brda// rtsa yi 'then thag bcu gcig kyang// bcu gcig sa rnams bgrod du med pa'i brda// mgrin gnas rtsa chen bcu drug kyang/ / bcu drug sa rnams rang la rdzogs pa'i brda// kha sna gsum gyi rtsa ru 'dug pa ni// dbugs kyi rgyun srang gcig yin pas// theg dgu gsum 'dus ngo bo gcig/ rtsa gsum 'du 'bral med par 'khril/ / sku gsum spyan gsum 'du 'bral med pa'i brda// zhes gsungs so// thig le 'dre rgyud chen po las// lus kyi rdzogs lugs bstan pa'i le'u ste so lnga pa'o//// rdo rje mkha' 'gros gsol pa/ / rdo rje sems dpa' ston pa'i gtso// sku gsum rdzogs lugs bstan du gsol// ces zhus pas/ rdo rje sems dpas bka' stsal pa// nyon cig rdo rje mkha' 'gro ma// gangs ri brtsegs pa'i rtse mo na// srog chags rgyal po seng ge de/ / rtsal gsum lus la rdzogs par gnas// sder chags mang po'i 'khor gyis bskor// u dum 'bar ba zas su za// nyin mo mtshan mo ming ma thogs// ltogs 'khyags gnyis ni ma grub bo/ / um dum 'bar ba zas kyi cho ga/ gangs dkar brtsegs pa gnas kyi mchog/ seng ge dkar mo srog chags mchog/ ces brda bstan pa'o// spyi bo bde chen gzhal yas khang// klad pa gangs ri brtsegs pa'i steng/ / de yi dbus na chos min rgyal po'i thig le gnas// sku gsum rang grol bde chen rdzogs// gzugs sku gnyis kyi 'khor gyis bskor// rtsa 'dab sum cu rtsa bzhi la// thig le chos min khyab cing brdal/ / khyab brdal chen po'i 'khor lo yin// phyi nang med dpas chos min sku// gnyis med zang thal 'ub chub sku// snang zhing srid pa rnam dag pas// 'khor bar rang grol chos las min// bde ba chen po gnas kyi mchog/ ye shes zang thal bdud rtsi'i mchog/ thig le chos min 'bras bu'i mchog/ ces gsungs so// thig le 'dre rgyud chen po las// thig le chos min rang la rdzogs pa'i le'u ste so drug pa'o/ /// de nas rdo rje mkha' 'gro mas zhus pa// ston pa rdo rje sems dpa' lags// longs sku'i rdzogs lugs bstan du gsol// ces zhus pas/ rdo rje sems dpas bka' stsal pa/ / nyon cig rdo rje mkha' 'gro ma// dug gi dpon po ha la'i tshal// nam mkha'i 'ja' tshon gnas mchog na// rma bya rgyal po rab dga' gnas// spu kha lba dang rab tu ldan// ha la 'bar ba'i sngags btab za/ / srog chags rgyal po rma bya yi// zas kyi rgyal po bong nga yin// gnas kyi rgyal po ha la'i tshal// 'khor ni rma bya rnams kyis bskor// ces brda bstan pa'o// de yi don ni 'di lta ste// mgrin pa longs spyod 'khor lo na/ / dug lnga'i khang bzangs bya ba'i gnas// ston pa'i rgyal po rdo rje sems dpa' gnas// kha dog lnga yi bdag nyid can// dug lnga ye shes lnga dang ldan// longs sku'i rgyal po rang chas yin// lam gyi rgyal po dug lnga yin/ / gnas kyi rgyal po longs spyod 'khor lo yin// rtsa chen bcu drug sems dpa' sems ma yin// longs sku sgom pas yid smon 'dus byas yin// zhes gsungs so// thig le 'dre rgyud chen po las/ longs sku rdzogs lugs kyi le'u ste so bdun pa'o//// de nas rdo rje mkha' 'gro mas// bcom ldan rdo rje sems dpa' la// sprul sku'i rdzogs lugs bstan du gsol// ces zhus pas/ rdo rje sems dpas bka' stsal pa/ / legs par nyon cig mkha' 'gro ma// rgya mtsho chen po'i klong dkyil na// brag dang gangs kyi sa mtshams su// 'dab chags rgyal po khyung chen gnas// zas kyi rgyal po klu chen za/ / 'khor kyang klu za mang pos bskor// mtsho bran drug gi dbus shed na// srid pa drug gi mtsho dkyil na// khyung gi rgyal po de na bzhugs// ngo mtshar che ste mthong ba nyung// zhes gsungs so// de yi don ni 'di lta ste/ / kun gzhi srid pa'i mtsho mo la// snying ga rin chen zur brgyad na// 'khor ba mya ngan 'das sbyor ba// 'gag pa med pa'i shes rab shar// nyams myong rgyal po ye shes rlung// sprul sku thugs phrad thams cad gsal/ / thub pa drug gi gtso bo ste// kun gzhi phyogs med zang thal na// thig le zang thal rang gsal gnas// ye shes rlung gis 'thor bar 'gyur// rtsa brgyad thig le'i yon tan las// thig le ye shes brgyad gnas so/ / 'bras bu rang shar ngo mtshar che// zhes gsungs so// thig le 'dre rgyud chen po las/ sprul pa sku'i rdzogs lugs bstan pa'i le'u ste so brgyad pa'o//// de nas rdo rje mkha' 'gro mas/ / bcom ldan rdo rje sems dpa' la// sku gsum 'brel ba ji ltar lags// zhes zhus pas/ rdo rje sems dpas bka' stsal pa// nyon cig rdo rje mkha' 'gro ma// sngon yul yangs pa can zhes bya ba na// srid pa'i rgyal mo me long gdong zhes bya ba gser gyi nor bu rin po che rgyan sna tshogs 'phro ba cig yod de/ de la ming btags pas/ srid pa'i mun sel 'od 'bar ba zhes bya bar btags so// dus nam zhig na nyi ma nub pas/ nor bu la nyi ma stong shar bas/ mun pa smag rung grol lo// zhes brda bstan to// de yi don ni 'di lta ste// kun gzhi rin chen dpe dang 'dra// chos sku longs sku sprul sku gsum// nyi ma 'od dang zer bzhin gsal/ / 'du 'bral med pa'i byin rlabs brgyud// bde chen mdzod na snying po gnas// de yi zer la longs skur gnas te mgrin// de yi 'od las sprul sku snying// rtsa yi rgyal po rten gyi thag pas sbrel/ / rang chas sku gsum ngo sprod bstan pa yin// zhes gsungs so// thig le 'dre rgyud chen po las/ sprul sku rdzogs lugs bstan pa'i le'u ste so dgu pa'o//// de nas rdo rje mkha' 'gro mas/ / bcom ldan rdo rje sems dpa' la// de ltar ma rig ji ltar lags// zhes zhus pas/ rdo rje sems dpas bka' stsal pa// nyon cig rdo rje mkha' 'gro ma// sngon yul yangs pa'i dur khrod du// rgan mo long ma gcig la rta rlung gi gshog pa can bya ba cig yod pas/ sngar rgan mos zhon te 'ongs pas// rgan mos rta ma thub nas rgan mo phyi'i rgya mtshor bskyal lo// der rgan no sdug bsngal gyis zin no// zhes brda bstan pa'o/ / kun gzhi 'phrul gyi me long nas// ma rig pa yi 'dzin pa rgyas// srid gsum rlung gis rta pos bskyod// srid gsum rtsa ba de ru smin// rlung ngo ma shes 'khor ba smin// sdug bsngal chu bo gzhung dang 'dra/ / lte bug rtsa dang gsang ba'i rtsa// 'og sgo'i rtsa ni brgyad khri dang// bzhi stong dag tu srid pas na// nyon mongs brgyad khri bzhi stong smin// gsang ba'i bug pa gsum shar ba// ngan 'gro rnam gsum sgo ru shar/ / ces gsungs so// thig le 'dre rgyud chen po las/ ngan 'gro rang lus la ngo sprod pa'i le'u ste bzhi bcu pa'o//// rdo rje mkha' 'gro mas zhus pa// sgra yi gdams pa gsung du gsol// ces zhus pas/ / rdo rje sems dpas bka' stsal pa// nyon cig rdo rje mkha' 'gro ma// sgra yi don ni 'di lta ste// sngon yul gsal ldan zhes bya ba na// rgyal po gcig la rin po che'i 'phreng ba gcig yod pas/ de la ngo sprad na dgos dgu 'byung ngo/ / ka kha ga g+ha nga/ tsa tsha dza dz+ha nya/ ta tha da d+ha na/ Ta Tha Da D+ha Na/ pa pha ba b+ha ma/ ya ra la wa/ sha Sha sa ha/ k+Sha/ a ma Ta tha Da Na/ dz+ha bai hUM b+he/ de la sgra phyi ltar bshad pa dang/ nang ltar bshad pa dang/ gsang ba ltar bshad pa dang/ rang gi ngo bo ltar bshad pa'o// de yang sgra'i dbyings dang/ sgra'i sgrub byed dang/ sgra phan pha'i rkyen can dang// sgrub par byed pa'i tshad ma'o// zhes gsungs so/ / thig le 'dre rgyud chen po las// sgra 'dus pa'i le'u ste zhe gcig pa'o//// de nas rdo rje mkha' 'gro mas// gsang ba'i bdag po chen po la// sgra yi 'khor lo ji ltar lags// zhes zhus pas/ rdo rje sems dpas bka' stsal pa// nyon cig rdzo rje mkha' 'gro ma// ka ni sku gsung 'byung ba'i sgra// 'phrin las kun gyi bdag po bsgrub// sku gsum yin pa de sel// yi ge zhe gnyis dbyings su bshad/ / grogs ni 'dogs dang gong 'og btsan// sgrub byed sku gsum 'du 'bral med// mthun rkyen nyi ma'i snying po'o// a ni skye ba med pa sgrub// dbyings ni yi ge rtsa bzhi po// phan pa'i rkyen ni bzhi stong ngo/ / bsgrub bya rang gi so la bzhag/ gzhan sel skye ba can du bshad// ma ni mnyam nyid chen pos sgrub// mi mnyam pa yi sgra dag sel// grogs ni rang gi 'dogs las shes// dbyings ni yi ge'i 'khor lor shes/ / shas ni shes rab sgrub par byed// shes rab ma yin gzhan sel te// phan pa'i rkyen ni gong 'og ltos// dbyings ni gong du shes par bya// has ni thig le 'gag med sgrub// mi 'gag pa yi thig le sel/ / grogs dang dbyings ni gong du bstan// ces gsungs so// thig le 'dre rgyud chen po las/ gzhi'i yi ge'i 'khor lo bstan pa'i le'u ste zhe gnyis pa'o//// de nas rdo rje mkha' 'gro mas// gsang ba'i bdag po chen po la/ / sgra yi lhag ma gsung du gsol// ces zhus pas/ bka' stsal pa/ nyon cig rdo rje mkha' 'gro ma// ka kha la sogs pa thams cad kyang// dbyings ni rang rang tshom bu gcad// sgrub byed 'a mos 'bod pa yin/ / phan rkyen 'dogs kyis shes par gyis// gzhan sel gnod pa mi mthun pa// yi ge nyi shu rtsa lnga dang// kha yar yi ge drug po ni// dbyings kyi khyud nas ran tu 'brel// ces gsungs so/ / thig le 'dre rgyud chen po las// ka kha la sogs rkyang pa'i le'u ste zhe gsum pa'o//// de nas rdo rje mkha' 'gro mas// bcom ldan rdo rje sems dpa' la// 'dogs kyi sgra rnams gsung du gsol/ / ces zhus pas/ rdo rje sems dpas bka' stsal pa// nyon cig rdo rje mkha' 'gro ma// sha ta ma le ka ra/ ga yi sgra las grub pa ni// gi gu yin par shes par bya// ra dang na las sgrub pa ni// na ro yin par shes par bya/ / nga yi sgra las sgrub pa ni// 'greng bu yin pa shes par bya// zha yi sgra las phul ba ni// zhabs bskyed dag tu rab tu bstan// ya yi sgra las sgrub pa ni// ya tag dag tu shes par bya// ra yi sgra las sgrub pa ni/ / ra ta'i sgra zhes bshad pa yin// a yi mig gi sgra yis ni// yi ge'i mig tu byung ba yin// dpung pa brtsegs dang rkang pa bshad// lag pa ber ka ris sgrub// ces gsungs so// sngon gangs dkar gyi ltongs na srog chags mang po gnas so/ / srog chags dbyings su rab tu bshad// de nang sgrub pa'i srog chags ni// seng ge dkar mo zhes su grags// pha rkyen g.yu yi ral pa can/ / gzhan sel dbye las sogs pa'o// de ni sgra yi tshad ma'o// zhes gsungs so// thig le 'dre rgyud chen po las/ sgra'i le'u ste zhe bzhi pa'o//// de nas rdo rje mkha' 'gro mas// ston pa rdo rje sems dpa' la/ / log dang 'thug dang ring po dang// che dang thung ba'i yi ge dang// pho yig mo yig bshad du gsol// ces zhus pas/ rdo rje sems dpas bka' stsal pa// nyon cig rdo rje mkha' 'gro ma// Ta log rig pa rang grol lo/ / tha log thig le rang la shar// na log rtog pa rang sa zin// d+ha log dus gsum gcig tu rtogs// Na log mnyam nyid rang snang ngo// rang rang brtsegs pa 'thug po ste// thig le ye khyab rtsol med yin/ / gang la 'a brgyan ring po ste// ye shes rgyun chad med pa yin// gang la has brgyan chen po'i sgra// chos sku 'du 'bral med pa'o// hUM zhes bya ba thung ngu ste// chos min klong du 'dus pa'o// zhes gsungs so/ / thig le 'dre rgyud chen po las/ sgra rang so'i le'u ste zhe lnga pa'o//// de nas rdo rje mkha' 'gro mas// bcom ldan rdo rje sems dpa' la// de rnams sgrub byed sel ba rnams// go rim nges pa bstan du gsol/ / ces zhus pas/ rdo rje sems dpas bka' stsal pa// nyon cig rdo rje mkha' 'gro ma// 'dren dang 'brel gcod mkhyen pa'i sgra// stod kyi grogs su shes par gyis// sdud dang 'brel dang khyab ba'i sgra/ / smad kyi grogs su shes par gyis// sgrub byed dbyings dang phan rkyen dang// gnod pa can sel tshad ma'i sgra// rang rang grogs kyi skabs su sbyar// ces gsungs so// thig le 'dre rgyud chen po las/ 'dogs kyi sgra'i le'u ste zhe drug pa'o/ /// de nas rdo rje mkha' 'gro mas// ston pa rdo rje sems dpa' la// ye shes rgyal po rtog 'das pa'i// gnas lugs bdag la bshad du gsol// ces zhus pas/ rdo rje sems dpas bka' stsal pa/ / nyon cig rdo rje mkha' 'gro ma// rang byung ye shes chos min la// rang rig ye shes sa le gsal// lhag mthong rig pa'i ye shes kyis// snang srid stong gsum thig les khyab/ / 'brel khyab dwangs pa nam mkha'i dpe// chos las ma byung 'byung ba'i sems// rgyud las ma bsten ngo bo'i sku// lung dang ma 'brel kun khyab la// man ngag rtog ge'i tshad ma ci// mngon dang lkog gis don mi mthong/ / mngon sum 'khrul pa rang ga 'di// 'di nyid rang shar thig le yin// dkon gyur bar don 'di rang shar// sgom pas lkog gyur mun pa 'jil// mngon sum rang shar sgom mi dgos// tha snyad tshig gi sgra las grol/ / nyams myong phyogs rtogs tshad ma ci// nyams grol gyur na tshad ma'i don// dbyer med stong par dbu ma'i sgra// phyogs cha ma grub phyogs med la// de ni thig le ye brdal yin// rgya mtsho dar dang rlabs nang chu/ / sprin dang char pa mkha' snang nyid// dug lnga rgyud drug thig ler brdal// ma rig pa nyid ye shes gzhi// zhes gsungs so// thig le 'dre rgyud chen po las/ gnas lugs rang shar gyi le'u ste zhe bdun pa'o/ /// de nas rdo rje mkha' 'gro mas// rdo rje sems dpa' ston pa'i rgyal// de yi lam ni bstan par zhu// zhes zhus pas// rdo rje sems dpas bka' stsal pa// nyon cig rdo rje mkha' 'gro ma/ / ma rtog ma rigs ma rtogs pas// de yi rang shar lam gyi mchog/ thun tshad gzung dang sems sgom rnams// de ni lam gyi gol sa yin// rang grol lam gyi rgyal po la// 'jug rtsol byed pa lam sgrib yin/ / gong du thob 'dod sgrib pa gnyis// de nyid ma shes gol pa yin// gol dang sgrib pa rang shar la// rang grol rang shar lam chen po// rig pa'i gsang lam bzhi shes nas// de ni rang grol rang byung yin/ / thig le chos min rang la gnas// rang gnas rdo rje gsang ba'i lam// 'pho ba dus kyi gdams ngag yin// 'pho ba rang grol mya ngan 'das// gzhan las ma byung rang las shar// zhes gsungs so// rnam rtog dug lnga ye shes lnga ru sprod/ / rgyu rkyen dpe las 'das par ma shes na// dpe las 'das pas don gyi dpe de 'gog/ dpe zla med pas nyag gcig po// ma bcos phung po rdzogs chen sku lngar rdzogs// spyan lnga sku lnga ye shes lnga/ / a nu man chad dag las grol ba yi// rang sgo'i thig le'i ngo sprod rab tu gces// zhes gsungs so// thig le 'dre rgyud chen po las/ lam gyi le'u ste zhe brgyad pa'o//// de nas rdo rje mkha' 'gro mas/ / ston pa rdo rje sems dpa' la// 'bras bu'i don ni ji ltar lags// zhes zhus so// zhus pas ston pas bka' stsal pa// nyon cig rdo rje mkha' 'gro ma// spyi dang rang gi mtshan nyid gnyis// spyi ni lkog gyur mun pa 'jil/ / ci phyir phyi dus 'debs pa'i phyir// log rtog phyi dus 'debs pa dang// phyogs rtogs phyi dus 'debs pa gnyis// 'khor ba rnam pa bzhi yin te// rgyu ltar 'khor ba mu stegs dang/ / ma rtogs pa yi 'bras bu'o// mtshan nyid sde gsum dkar por 'khor// mtho ris thar pa'i lam yang gnas// rgyu ltar 'khor ba thog ma'i dus// 'bras bu ltar 'khor gsang sngags pa// longs sku'i 'bras bu thob pa yin/ / dag pa yang dag ma dag gsum// yang dag 'bras bu yang dag gsum// snga ma phyi ma da lta gsum// sgom mkhan bsgom bya sgom dus gsum// spyod mkhan spyad bya spyod dus gsum// thob mkhan thob bya thob dus gsum/ / gnas sa rtogs sa gol sa gsum// gzhi dang lam dang 'bras bu gsum// rang yin rang snang rang sgrol la// rang shar rang byung rang rig yin// dus gsum dbyer med chen po yin/ / bsre ba 'dres pa'i 'dres tshad gsum// rang sgo zang thal chos min gsum// ma rig gzung 'dzin chags sdang gsum// bag dang chags dang 'khor bar gsum// mtho ris ngan song rnam pa gsum/ / sangs rgyas sems can spyi sa gsum// chos dang sdig pa slob dpon gsum// de gsum gang snga 'brel ba gces// zang thal dbyer med chos min gsum// shes rab ye shes thig le gsum// rang byung rang gnas rang rig gsum/ / nyi ma 'od dang zer dang gsum// byin dang rlabs dang rgyud pa gsum// ston pa bstan pa 'khor dang gsum// gnas dang dus dang chos dang gsum// lung dang rgyud dang man ngag gsum/ / sdig pa bag chags las dbang gsum// dge ba las dbang 'bras bu gsum// sgom pa brtan pa las 'bras gsum// thog ma tha ma bar do gsum// sangs rgyas chos dang dge 'dun gsum// tshul khrims sbyin sogs mi lus gsum/ / mtshams med dmyal ba'i las 'bras kun// 'khrul pa'i don dang gnas lugs gces// 'khrul ba 'khrul gzhi dngos po'i don// thams cad 'di ru shes par gyis// rang gzhi rang 'khrul rang dngos gsum/ / gzhi dang lam dang 'bras bu gsum// thams cad rang shar yin gyis de ltar shes par gyis// zhes gsungs so// thig le 'dre rgyud chen po las/ gnas lugs 'khrul ba 'bras bu'i le'u ste zhe dgu pa'o/ /// de nas bcom ldan rdo rje sems dpa' yis// thun mong dngos grub bstan pa ni// rdo rje slob dpon smod pa dang// sangs rgyas bstan pa 'jig pa dang// rnal 'byor dam sri byed pa la/ / 'gal ba chan la dbab pa gsungs// de dag dgug par bya ba ni// rkang rjes sa dang ro ras la// rgya mtsho chu yis gzugs bris la// rlung gis khyer ba'i shing lo la// de la gong dang 'dra bar bris/ / nub nas byung ba'i rlung mar la// nyi ma nub tu nye ba la// lcags kyus khrid nas dgu yi nub// rang gi 'og tu bcug gyur na// de dag khugs par gdon mi za// de nas gsad par bya ba ni// de yi nang par bton nas ni/ / dug gi shing bu sna tshogs dang// phur bu lcags phur snying khar gzugs// gnas lnga dag tu btab la bzhag/ gu gul dud pas myos su gzhug/ yungs kar dug chus yang yang bran// de nas gzugs de thig btab la/ / nyi shar dus tshod mtshon gyis gtubs// pho mo'i mtshan ma thad kar gtub// des ni snying 'gas 'chi bar 'gyur// de nas mnan pa'i las bya ste// rnga la sbrul dang sbal pa g.yogs/ / rdo rje bya khyung thugs kar btags// rta mchog gtsug gi kha la'o// rang lus phyag na rdo rje'o// gong gi ling ga ming rus bcas// rnam snang dag dang bcas pa yis// ri lu brgya dang rtsa brgyad byas/ / chu mig re ru dor byas na// mnan gtad brgya dang rtsa brgyad yin// kha ral zhab mas rkang pa dkri// nyin mo nub nas mtshan mo 'dres// chu dang grib ma bstun par bya// de nas bskrad pa'i las bya na/ / rta dre'u gnyis kyi mtshul pa la// dgra yi ming rus gzugs su bri// nyi shu lnga la 'thab tu gzhug/ dug chus bran nas chu la ni// shar rlung dag dang bcas la bskur// des ni skrod par gdon mi za// dbye bar bya ba'i las dag ni/ / 'ug pa'i mgo dang bya rog mgo/ gnyis par ming rus gzugs byas la// dmar thag chad pa'i dus dag tu// thod pa gnyis po 'thab tu gzhug/ dgra bo dbye bar gdon mi za// bcing ba dag gis las bshad pa/ / gro ga'am yang na ro ras la// dgra yi ming rus gzugs su bri// lcags kyu'i phyag rgyas bsdams byas nas// zhags pa'i phyag rgyas sngon dmar bsdam// gu gul nag pos bdug par bya/ / nyin mtshan gung gi dus tshod la// rang gi rkang pas khrid nas ni// dong khung nang du bcug byas na// nges par 'gro mi shes par 'gyur// gal te skams pa'i las byas na// dug dang ske tshe lan tshwa dang// 'bru mar shing mar rab bsregs la/ / thod pa dum bu drug pa ru// dgra gzugs bcug la bzhag nas ni// dug gi tsher mas gzugs la dbug/ gong mas thod pa dgang bar bya// tsher ma'i me yis bskam byas la/ / dgra yi sgo 'am rgya ram mnan// nges par skams par 'gyur ba yin// zhes gsungs so// da ni brtul zhugs brtan par bya// pha dang khu bo mes po de// rab bstun myur du bsgral byas na// rdo rje sems dpa'i zhal yang mthong/ / ma dang sring mo bu mo de// 'dod chags rab tu sbyar byas na// snang ba mtha' yas dngos grub thob// tshangs pa chen po'i tshe tshad thub// rdo rje slob dpon dag la ni// brdzun tshig sna tshogs smras pa na/ / nges par skye med dngos grub thob// rdo rje slob dpon ma mched lcam// gsad gcad tshig tu brjod pa ni// don yod grub pa'i dngos grub thob// khyim tshes slob ma'i nor brkus na// rin chen 'byung ldan dngos grub thob/ / rig pa brtul zhugs chen po byas// thig le nyag gcig dngos grub thob// rang rig ye shes brtul zhugs byas// 'gro drug rang grol dngos grub thob// snang ba rgya yan brtul zhugs spyad/ / skye ba med pa'i dngos grub thob// rig par rang grol brtul zhugs spyod// 'chi med rdo rje'i dngos grub thob// chos nyid 'od gsal brtul zhugs spyad// skye ba med pa'i dngos grub thob// 'khor ba rang snang brtul zhugs spyad/ / thams cad mkhyen pa'i dngos grub thob// gzung 'dzin gnyis kyi brtul zhugs spyad// theg pa chen po'i dngos grub thob// tshes brgyad srog la 'ug mig blangs/ / mig la byugs na mi med mthong// 'ug pa'i mig dang srin bya dang// byi ba'i mig gsum bsres byas la// mngar gsum dag la ri lu bya// srod la zla gcig sran tsam mur// mun pa thams cad mthong bar 'gyur/ / sa g.yos byung ba'i dus su ni// rang gi 'doms nas sa blangs te// gnas lngar gtor bar byas 'gyur na// tshe ni 'dab tu 'gyur ba'o// nyi ma shi ba'i dus dag tu// skyobs su 'gro byas 'chi las thar/ / chos ston sbyin pas phyug por 'gyur// snying rje skyes na sems bskyed na// tshe ring mtho ris thob par 'gyur// zla ba shi na'ang de bzhin no// mdo bton pas ni dgra las grol// lce spyang mig dang 'ug pa dang/ / byi la pha wang ri bong dang// nub mo mthong ba'i mig dag la// mngar gsum dang sbyar ri lu byas// gnam stong dag nas bzung nas su// zla ba gcig tu zos 'gyur na// skye ba snga phyi dran pa dang// mun pa'i 'jigs las grol bar 'gyur/ / chu yi byi ba sngon mo blangs// a mu ka yi dri chu dron mo blugs// g.yag po ru ru'i rang bcug na// dri chu 'gags nas 'chi bar 'gyur// rta dang dre'u khyi'i 'bras bu dang// mdzo dang rtol gyi mkhris par sbyar/ / dgra la byin na skye brgyud chad// skye ba snga phyi dran pa'i mig/ nub mo so sor 'chi ba'i snying/ u rings thod pa'i mig phyung nas// sla nga byi rling nang du btso// de zos rims nad thams cad thub/ / mi yi tshil bu rta tshal dang// khyi tshil rtsi bo che dang sbyar// gla rtsi mu zi sbyar byugs na// 'brum bu'i gdon dang sa bdag thub// ces gsungs so// thig le 'dre rgyud chen po las/ thun mong khyad par sbyor ba'i le'u ste lnga bcu pa'o/ /// de nas rdo rje mkha' 'gro ma rnams kyis bskor ba lan mang du byas nas// rdo rje sems dpa' ston pa kun gyi rje// bdag cag mkha' 'gro'i gas rnams la// 'dre rgyud chen po bshad pa legs/ / sangs rgyas pa yi 'bras bu thob// bdag cag rab tu yi rang ngo// mgon po gsang ba'i bdag po khyod nyid kyis// 'gro ba rnams kyi don du gsungs pa yi// 'dre rgyud chen po bstan pa 'di/ / bdag gis legs par gzung bar bya// ston pa rdo rje sems dpa' yis// mkha' 'gro rnams la bka' stsal pa// yang gter bla na med pa'i chos// gsang ba bla na med pa mngon du gyur ba'i rgyud/ ngas khyod la bstan to/ / legs par bstan tau// rab tu legs par chongs shig/ legs par zung zhig/ bsgrub pa'i chos ma yin pa khong du chud par gyis shig/ ces gsungs nas/ mi mngon dbyings su gshegs so/ / thig le 'dre rgyud chen po las/ yongs su gtad pa'i le'u ste nga gcig pa'o//// yongs su gtad pa'i rdzogs so//// rgya rgya rgya/ thig le 'dre rgyud rin po che spungs pa zhes bya ba bla ma ngom bi was/ gu ru rnal 'byor pa ram rta 'dam la/ lho stag tshang ser ger brgyud/ des rnal 'byor pa la brgyud do// des sta ston brgyud do// a+thi+-i////

CLOSE WINDOW