/ e ma don la ye nas chags sdang med// chags sdang thams cad 'khrul ba'i blo// de bas chags sdang yod kyi bar// 'khor 'das gnyis su shes par gyis// zhes chags sdang gcod pa'i gsang thigs bstan pa ste bcu bdun pa'o/ /// bcom ldan 'das lhun grub bya bral ngang la phyag 'tshal lo// 'jam dpal bshes gnyen gyis rang gi 'dod pa zad pa'i tshig don du brjod pa// des 'tshal des 'tshal des 'tshal lo/ / ji srid bdag dang 'dzin pa yod kyi bar du na// thams cad 'ching ba'i dngos por bdag gis so// ji srid bdag gzhan gnyis su med pa na// bya bral lhun rdzogs chos sku nam mkha' bzhin/ / rang byung ye ses spros bral yin par go/ chos kyi sku la bdag gzhan med pa la// ma rig pa bdag dang gzhan du 'khrul par go/ bdag gzhan med pas 'khor ba zad par go/ de rang nyid la sangs rgyas gsung bar nges/ / de las gzhan pa'i sangs rgyas med par nges// lta sgom 'bras bu la sogs thams cad kyang// de rang yin ni gzhan ni min par rig/ de las gzhan pa thams cad grol bar nges/ / bya ba bral bas lhun gyis grub par nges// gzhan gyis rtogs mnyam bdag ni mi bgyid do// de ma rtogs na grol ba med par nges// de bas bya bral rdzogs chen che bar nges// yang dag don la rtogs 'bras sgrib par go/ sangs rgyas sems can gnyis su med pa la// sangs rgyas ming du btags pa yis// mi mkhas pa dag bcing bar nges// sangs rgyas med par bstan na yang// mi mkhas pa dag bkrag par nges/ / sangs rgyas sems can gnyis med la// bdag ni the tshom ma mchis so// bdag med the tshom su yi yin// yul med the tsom gang la za// de bas som nyi ma mchis so// bdag med chags dang rmongs pa 'dod/ / de ltar su 'dod bdag dang bcas// de lta bas na sangs rgyas dgongs pa yin// dug gi bum pa 'o ma'i kha// khro chu'i lus la btsan dug sems// rgyun can dmyal ba'i rgyu can la/ nam yang sprel ba bdag mi bgyid/ / ma rig rkyen gyis dbang song nas// gal te 'gal bar bstan gyur na// bdag 'jam dpal bshes gnyen gyis lus yang dum bur gyur cig/ mgo yang tshal ba stong du khos shig/ zas su khro chu skom du me mar du song zhig/ ces rang dam rang gis bcas te// chags sdang zad pa'i gsang thigs bstan pa ste bco brgyad pa'o// rdzogs so// #// rgya gar skad du//// bo d+hi tsit+ta de shi ka e ka sha ma hA ko sha tan+t+ra nA ma/ bod skad du/ byang chub sems phyogs chen po nam mkha' mdzod kyi rgyud ces bya ba/ dpal kun tu bzang po la phyag 'tshal lo// 'di skad bdag gis thos pa'i dus gcig na/ chos kyi dbyings kyi pho brang du/ rig pa chos kyi skus/ rang gi rtsal shes rab longs spyod rdzogs pa'i sku rigs lnga'i bde bar gshegs pa rnams la/ ting nge 'dzin gyis bshad pa med par bshad pa'o/ / de nas rigs lnga'i bde bar gshegs pa rnams kyi/ 'og min lcang lo can gyi pho brang du/ sangs rgyas gzhon nu mtshan rab tu shes pa la/ ting nge 'dzin gyis bshad pa med pa bshad pa'o/ de nas byang chub yid 'dres kyi tshul du/ sangs rgyas gdugs dam pa nyid kyi thugs las phyung ste ljags kyi rtse las spros nas/ rdzogs pa chen po nam mkha' mdzod kyi rgyud// chos nyid nam mkha' 'di gsung bar mdzad do/ / de yang bskal pa bzang pa'i byang chub sems dpa' 'od zer zhi bas/ bcom ldan 'das la gsol pa/ thugs ye shes kyi dkyil 'khor rang byung du 'od 'bar ba/ mkhyen pa'i shes rab phyir mi ldog pa drug dang ldan pa/ seng ge lta bu'i lta stangs can/ gzi byin khong nas 'char ba/ dpal bde ba chen po la phyag 'tshal lo// sku gsung rgyal ba'i dgongs pa mthar phyin pa// yon tan dpag med sku la phyag 'tshal 'dud/ / mtha' yas mu med chos kyi don brjod pa/ shes rab mthar phyin rang bzhin rnam par dag/ bde chen 'gyur med sku la phyag 'tshal 'dud// mnyam nyid mi g.yo 'gyur med chos kyi sku/ thugs rje'i 'od zer spyan gsum rnam par dag/ yon tan rgyas pa gser gyi mdog 'dra la// nyi ma stong gi 'od zer 'phro ba'i tshe// byang chub myu gu sprul pa grangs med 'phro// 'gro don mthar phyin khyod la phyag 'tshal bstod/ / rdo rje rtse mo nam mkha'i mtha' dang mnyam// rdo rje'i gdan ni zab cing gting dpag dka'// rdo rje'i sku ni sna tshogs cir yang ston// rdo rje'i gsung ni rnam pa cir yang sgrogs// rdo rje'i thugs ni 'gyur med mya ngan 'das/ / bdag 'dra dman pas bstod par mi 'os kyang// nyid kyi zhal mthong gsung thos thugs mkhyen pas// 'gro ba mtha' med drang ba'i don slad du// kun bzang rdzogs chen sku la phyag 'tshal 'dud/ / ces dam pa'i dbu'i gtsug tor du bzhag nas/ bskal pa bang po'i byang chub sems dpa' sems dpa' chen po 'od zer nye bar zhi bas/ yi dam gyi lha la phyag 'tshal te smre sngags drag tu bton nas yi dam gyi lha la phul bas/ badzra sa ma ya dzA zhes mdun gyi nam mkha' la 'od kyi sku snang ba zer dang bcas par byon nas lung bstan pa// lta ba gcod par byed pa 'di lung ston to// kye ho byang chub sems dpa' sems dpa' chen po khyod rang gi 'od zer nye bar zhi ba ni/ byang chub snying po 'bri gu ta chen po bag chags kyi sbubs su nye bar zhi bas/ 'bri gu ta'i sgrib shing du bag chags nyer len gyi phung po 'byung bas/ snang ba sgrib shing du 'char gyis/ khyod 'di nas lha'i yul yangs pa chen po'i grong khyer bde ba can dang pad mo can gyi gnas su song la/ sangs rgyas mi 'khrugs pa zhes bya ba bzhugs kyi// de la brkyang phyag phul la zhus shig/ yang dag par rdzogs pa'i sangs rgyas mi phyed pa'i lta ba lung ston par 'gyur ro// zhes lung bstan pas/ de nas byang chub sems dpa' sems dpa' chen po 'od zer nye bar zhi bas/ lha'i yul yangs pa chen po grong khyer bde ba can pad+mo bde ba can du phyin pa dang/ rang gi 'bri gu ta gyen du bgreng pa dang/ bag chags kyi phung po ye shes kyi dbang du gyur te/ de ma thag tu sangs rgyas mi 'khrugs pa'i zhal mthong ste/ brkyang phyag phul nas thal mo sbyar te gsol ba btab pa/ yi ge dgu ldan/ rtogs pa drug ldan/ rang sa bzhi ldan/ mchongs sa lnga ldan/ ye shes cig chod/ snang ba rang log/ 'jug pa rang sa/ dus tshod rgyal sa/ chos chen po yang gsang ba rmad du 'byung ba bstan du gsol zhes gsol to// badzra sa ma dzaHzhes lung bstan pa/ kye ma ho byang chub sems dpa' nyon cig/ lta ba'i rdzong la grub mtha'i gter sbos shig/ spyod pa rang byung gi rdzong la ye shes thug phrad kyi gter sbos shig/ gzhi'i thig le bzang po la// lta ba'i yi ge dgu pa gces so// lam gyi thig le bzang po la// bde gshegs kyi nying khug gces so/ / 'bras bu'i thig le bzang pa'i rtse mo la// sgom nyams drug pa'i man ngag gces so// smin par byed pa bzang po'i rgyan la// gsang ba'i dkyil 'khor gsum gyi bsdus don gces so// bzang po rgyan dang ldan pa la/ / rkang med mkha' la 'gro ba gces so// ye shes zang thal gyi dgongs pa la// lam la bar chad kyi sgrib pa med do// byang chub kyi snying po la skye shi med pas 'khrul ba'i bar do med do// sku gsum rang bzhin gyis rnam par dag pa la/ las dge sdig gis phan gnod med do// de nas byang chub sems dpa' 'od zer nye bar zhi bas/ sangs rgyas mi 'khrug pa la bstod pa phul te zhus pa/ e ma ho sangs rgyas bde chen sku/ / nyon mongs skyon gyis ma gos shes rab gsung// ma chags skyon gyis ma gos sku mdog dkar// theg pa kun gyi nang nas yangs che ba// glang chen gshibs pa'i gdan la skyil mo krung/ nyams kyi gdams ngag lhug pa rin po che sgron me zhes bya ba a ti spyi rgyud de rdzogs so//// rgya gar skad du/ be hU te tsakra tan+t+ra/ bod skad du/ rtsod pa'i 'khor lo'i rgyud/ bcom ldan 'das ro langs bde ba la phyag 'tshal lo// rin po che rtsod pa sgra'i 'khor lo/ 'jam dpal bshes gnyen la bshad pa// gnas ni byang chub shing drung du/ / ston pa dga' rab rdo rje yis// 'khor ni paN+Di ta nyis brgya la// dus ni rtsod pa sgra yi dus// bstan pa d+ha he na'i 'du khang du// rtsod pa'i 'khor lo 'di bstan to// rtsod pa'i gzhi la gnyis su 'dus// gzhi yi don la rtsod pa dang/ / lam gyi chos la rtsod pa'o// rdzogs pa chen po'i rtsod pa 'di gzhi chos nyid thig le nyag gcig tu dam bca'// gtan tshigs ci yi phyir zhe na// gnyis snang med pa'i phyir zhes bya// gnyis su snang ba'i skyon gtong la/ / khyod rang la gnyis su snang ngam// nga yi grub mtha' la skyon gtong// nga la skyon gtong na// rig pas gtong ngam// tshad ma'i gzhal byas gtong// rig pas gtong na// chos nyid kyi rig pas gtong ngam/ / 'thad pa sgub pa'i rig pas gtong ngam// bya ba byed pa'i rig pas gtong ngam// ltos pa'i rig pas gtong// chos nyid kyi rig pas gtong zer na// chos dang chos nyid rig pa gsum du 'dod dam/ / gcig tu 'dod dam// zhes phar 'bri'i// rig pa'i rgyab gnon phar la bya'o// gsum du 'dod na// rig pa las chos byung ngam// chos las rig pa byung// nyid las rig pa dang chos byung// de gsum khyod rang yin nam logs pa yin/ / zhes 'dri ste/ gang yang khas mi len na// gong du ma bcas// swA hA/ chos las rig pa byung zer na rgya chad ba dang// yul las rig pa byung ba'i skyon// 'gal lo nyid las rig pa byung zer na/ / rgya chad pa'i skyon btang ngo// ci ste zer na/ nyid kyi go ba 'dri'o// nyid la rgyu rkyen yod nas byung ngam med na byung 'dri'o// rgyu rkyen yod na nyid ma yin pa'i skyon 'byung ngo// rgyu rkyen med na med nas 'byung na/ / nam mkha' la me gtong bar 'byung bar thal lo// ci ste gzhi med pa las 'byung ba'i phyir ro// de bas kyang 'di lta phar 'dri'o// rig pa khyod gnyis gcig nas gtan la 'bebs sam/ / mi gcig kyang gtan la 'bebs// gcig zer na rig pas rig pa gtan la 'bebs// 'bebs na thug med du thal lo// rig pas rang gtan la 'bebs na 'brel med du thal lo// gcig la 'bebs mkhan med par thal lo/ / tha dad na 'brel ba med de dbab tu mi 'dod par thal lo// 'brel pa yod zer na// bdag nyid gcig gam 'dri'o// bdag nyid gcig na// bdag rig pa gcig gam/ / rig pa bdag tu gcig/ bdag rig pa gcig na// gong skyon 'ong// de las byung ba'i 'brel ba yod zer na// rgya chad pa'i skyon 'ong ngo// de las byung na rig pa bdag las byung ngam// bdag las rig pa byung/ / byung ba'i skyon 'ong// sprul shugs nas byung ba'i 'brel pa dang 'dra ste// ldog tu mi 'dod pa'i skyon 'ong ste rgya chad par thal// mi shi ba'i lus la rig pa mi 'byung ba dang 'dra ste// phyis don byed mi nus pa'i skyon 'byung ngo/ / yang na bdag nyid las rig pa byung na byung pa'i nad kas// 'brel med du thal lo// rig pa las bdag byung na// shes rig rdzas su thal lo// rang gi shes par bya ba ni// thig le lhun grub chos can zhes dam bca'/ / ci'i phyir ma 'gags rag shar ba'i phyir// thig le rdzas yod du thal zer na// lhun grub rdzas yod ma spangs pa'i phyir// 'jig par thal zer na lhun grub 'jig ma bkag ces bya/ / khyod lhun grub min nam zhes 'dri// yin zer na 'dod thog/ min zer na mu stegs rtag chad du thal zhes 'gal lo// sgra'i 'khor lo las brgal ba dang po'o//// 'thad pa sgrub pas gtor zer nas/ / snang ba 'di rang mi shar du 'thad de// 'thad pas 'o na 'thad pas snang ba shar mang du 'byung bar thal// bya ba byed pa'i rig pas gtong zer na// 'khrul pa'i shes pa la thag bas sbrul gyi bya ba byas nas 'khrul te/ / rtan du sbrul gyi bya ba byed par thal// ltos pa'i rig pas gtong zer na// 'phang las ltos na mdung ring// mdung las ltos na mda' rgyang ring ste// nges pa med par thal lo// rgyud kyi gtan la 'bebs zer na/ / rgyud rang yin nam logs pa gcig dri'o// rang yin zer na gtan la dbab pa dang 'bebs pa mi rung ste/ ral gri ral gri rang gis so la chod pa thal lo// gnyis yin gong du 'brel rtag go/ de yang lung yang de 'gro'o// mtshon pa gnyis pa'o//// tshad mas gtan la 'bebs zer na/ tshad ma de rang yin nam min ces 'dri'o// rang yin zer na gtan la dbab tu mi btub skyon gtang ste/ / gser gyi ser po gtan la 'bebs pa dang// ser pos gser gtan la 'bebs pa dang ces 'byung ngo// tshad ma logs cig yin no zer na/ chos tshad ma dang// don tshad ma dang 'jal bya'i shes pa cig/ gzhal bya'i yul mang du smra na 'di skad bya'o// 'ub kyi bsdus nas yul la 'jal lam// shes pa la mjal// gnyis ka la 'jal ces 'dri// yul la 'jal na yul nyams su myong nas 'jal lam/ / ma myong nas 'jal// ma myong nas 'jal na mo gsham bu che chung// ri bong rwa rno rtul kyang shes par thal// shes so zer na dbang po'i mngon sum gyis gsal// ces skyon btang ngo// nams su myong nas 'jal na/ / chu bo'i ro myong yang// chu bo'i rol tshol ba dang 'dra ste thug med du thal lo// shes pa la 'jal na shes pa dngos po yod nas 'jal lam med kyang 'jal// dngos po yod zer na mngon sum gyis gsal/ / med nas 'jal na ri bong rwa la mtho tshad gzhal du btub par thal// yod rung med rung 'jal na// lung du ma bstan par thal lo// mtshon pa gsum pa'o//// de ltar sgros btags cham la phebs nas/ / rang gi mtshan nyid bstan par bya// rang snang du rang shar bas// yul las gzhal du med// rang byung ye shes shar bas// nang la gzhal du med// 'du 'bral med pas yul dang yul can du gzhal du med/ / thams cad ye nas rang sar grol bas 'brel ba rtsir med// shes rig gi yul las grol bas// rgyud lung rig pas gtan la dbab sa med// ces gsungs so// mtshan pa bzhi pa'o//// shes pa 'khrul te/ / rgyal ba rigs lnga 'od dkar dmar lnga rten pas 'khrul// bsgrubs pas gol te// rang sna chos sku la bde ba 'dod cing sgrub pas 'khrul// sgom pas rlag/ ye nas rang gsal sgoms bas rang gsal stong pas rlag/ yul can gyi gol te spang blang gi lan no// snang ba sgrib g.yogs kyi chod// snang ba rang gsal la 'byung ba ltar mthong bas chod// rang byung min te ye shes med// chos nyid yin te sku min// snying po yin te ye shes min/ / de ltar shes pa ni rang byung yin la ye shes yin// chos sku yin/ snying po yin/ thig le yin/ nyag gcig yin/ zhes gsungs so// 'da' he na'i 'du khang du// mkhas pa 'jam dpal bshes gnyen la thig le nyag gcig grub mtha' bstan/ / rtsol ba'i sgra'i 'khor lo 'di// chu srin pir gyi gre ba ru// ru sbal nag po 'i chud pa bzhin// bskal pa khrugs kyang khar ma dbyung// zhes gdams so/ / rmongs pas mi go dris lan khong du chud// sbyangs pa'i sgra dang song 'gyur 'byung ba dang// byung ba can dang sgra skyon rnams brgyud// man ngag khong du bcas te 'ga' tsam bris pa'o// mtshon cha'i 'khor lo dum bu bzhi pa rdzogs so/ /// rgya gar skad du/ ab+hi Shiny+tsa gu ru rat+na tan+t+ra/ bod skad du/ dbang bskur bla ma rin po che'i rgyud/ bcom ldan 'das dpal rdo rje sems dpal la phyag 'tshal lo/

CLOSE WINDOW