rgya gar skad du//// bo d+hi tsit+ta de shi ka e ka sha ma hA ko sha tan+t+ra nA ma/ bod skad du/ byang chub sems phyogs chen po nam mkha' mdzod kyi rgyud ces bya ba/ dpal kun tu bzang po la phyag 'tshal lo// 'di skad bdag gis thos pa'i dus gcig na/ chos kyi dbyings kyi pho brang du/ rig pa chos kyi skus/ rang gi rtsal shes rab longs spyod rdzogs pa'i sku rigs lnga'i bde bar gshegs pa rnams la/ ting nge 'dzin gyis bshad pa med par bshad pa'o/ / de nas rigs lnga'i bde bar gshegs pa rnams kyi/ 'og min lcang lo can gyi pho brang du/ sangs rgyas gzhon nu mtshan rab tu shes pa la/ ting nge 'dzin gyis bshad pa med pa bshad pa'o/ de nas byang chub yid 'dres kyi tshul du/ sangs rgyas gdugs dam pa nyid kyi thugs las phyung ste ljags kyi rtse las spros nas/ rdzogs pa chen po nam mkha' mdzod kyi rgyud// chos nyid nam mkha' 'di gsung bar mdzad do/ / de yang bskal pa bzang pa'i byang chub sems dpa' 'od zer zhi bas/ bcom ldan 'das la gsol pa/ thugs ye shes kyi dkyil 'khor rang byung du 'od 'bar ba/ mkhyen pa'i shes rab phyir mi ldog pa drug dang ldan pa/ seng ge lta bu'i lta stangs can/ gzi byin khong nas 'char ba/ dpal bde ba chen po la phyag 'tshal lo// sku gsung rgyal ba'i dgongs pa mthar phyin pa// yon tan dpag med sku la phyag 'tshal 'dud/ / mtha' yas mu med chos kyi don brjod pa/ shes rab mthar phyin rang bzhin rnam par dag/ bde chen 'gyur med sku la phyag 'tshal 'dud// mnyam nyid mi g.yo 'gyur med chos kyi sku/ thugs rje'i 'od zer spyan gsum rnam par dag/ yon tan rgyas pa gser gyi mdog 'dra la// nyi ma stong gi 'od zer 'phro ba'i tshe// byang chub myu gu sprul pa grangs med 'phro// 'gro don mthar phyin khyod la phyag 'tshal bstod/ / rdo rje rtse mo nam mkha'i mtha' dang mnyam// rdo rje'i gdan ni zab cing gting dpag dka'// rdo rje'i sku ni sna tshogs cir yang ston// rdo rje'i gsung ni rnam pa cir yang sgrogs// rdo rje'i thugs ni 'gyur med mya ngan 'das/ / bdag 'dra dman pas bstod par mi 'os kyang// nyid kyi zhal mthong gsung thos thugs mkhyen pas// 'gro ba mtha' med drang ba'i don slad du// kun bzang rdzogs chen sku la phyag 'tshal 'dud/ / ces dam pa'i dbu'i gtsug tor du bzhag nas/ bskal pa bang po'i byang chub sems dpa' sems dpa' chen po 'od zer nye bar zhi bas/ yi dam gyi lha la phyag 'tshal te smre sngags drag tu bton nas yi dam gyi lha la phul bas/ badzra sa ma ya dzA zhes mdun gyi nam mkha' la 'od kyi sku snang ba zer dang bcas par byon nas lung bstan pa// lta ba gcod par byed pa 'di lung ston to// kye ho byang chub sems dpa' sems dpa' chen po khyod rang gi 'od zer nye bar zhi ba ni/ byang chub snying po 'bri gu ta chen po bag chags kyi sbubs su nye bar zhi bas/ 'bri gu ta'i sgrib shing du bag chags nyer len gyi phung po 'byung bas/ snang ba sgrib shing du 'char gyis/ khyod 'di nas lha'i yul yangs pa chen po'i grong khyer bde ba can dang pad mo can gyi gnas su song la/ sangs rgyas mi 'khrugs pa zhes bya ba bzhugs kyi// de la brkyang phyag phul la zhus shig/ yang dag par rdzogs pa'i sangs rgyas mi phyed pa'i lta ba lung ston par 'gyur ro// zhes lung bstan pas/ de nas byang chub sems dpa' sems dpa' chen po 'od zer nye bar zhi bas/ lha'i yul yangs pa chen po grong khyer bde ba can pad+mo bde ba can du phyin pa dang/ rang gi 'bri gu ta gyen du bgreng pa dang/ bag chags kyi phung po ye shes kyi dbang du gyur te/ de ma thag tu sangs rgyas mi 'khrugs pa'i zhal mthong ste/ brkyang phyag phul nas thal mo sbyar te gsol ba btab pa/ yi ge dgu ldan/ rtogs pa drug ldan/ rang sa bzhi ldan/ mchongs sa lnga ldan/ ye shes cig chod/ snang ba rang log/ 'jug pa rang sa/ dus tshod rgyal sa/ chos chen po yang gsang ba rmad du 'byung ba bstan du gsol zhes gsol to// badzra sa ma dzaHzhes lung bstan pa/ kye ma ho byang chub sems dpa' nyon cig/ lta ba'i rdzong la grub mtha'i gter sbos shig/ spyod pa rang byung gi rdzong la ye shes thug phrad kyi gter sbos shig/ gzhi'i thig le bzang po la// lta ba'i yi ge dgu pa gces so// lam gyi thig le bzang po la// bde gshegs kyi nying khug gces so/ / 'bras bu'i thig le bzang pa'i rtse mo la// sgom nyams drug pa'i man ngag gces so// smin par byed pa bzang po'i rgyan la// gsang ba'i dkyil 'khor gsum gyi bsdus don gces so// bzang po rgyan dang ldan pa la/ / rkang med mkha' la 'gro ba gces so// ye shes zang thal gyi dgongs pa la// lam la bar chad kyi sgrib pa med do// byang chub kyi snying po la skye shi med pas 'khrul ba'i bar do med do// sku gsum rang bzhin gyis rnam par dag pa la/ las dge sdig gis phan gnod med do// de nas byang chub sems dpa' 'od zer nye bar zhi bas/ sangs rgyas mi 'khrug pa la bstod pa phul te zhus pa/ e ma ho sangs rgyas bde chen sku/ / nyon mongs skyon gyis ma gos shes rab gsung// ma chags skyon gyis ma gos sku mdog dkar// theg pa kun gyi nang nas yangs che ba// glang chen gshibs pa'i gdan la skyil mo krung/ / thugs mchog rnam dag spros med thams cad mkhyen// dri med dag pa'i sku la phyag 'tshal bstod// ces zhus phyag phul nas/ byang chub sems dpa' 'od zer nye bar zhi bas/ lta ba'i rgyal po nam mkha'i mtha' dang mnyam pa 'di gsungs so/ / na mo bud+d+ha ya// na mo d+harmA ya/ na moHsaM g+hA yo/ zhes dkon mchog gsum la zhu phyag nas 'di dag zab tu gsungs so// thog ma'i rangs bstan pa'i phyir// lta ba'i yi ge dgu pa bshad/ / gzhi yi mtshan nyid bstan pa'i phyir// bde gshegs thugs kyi nying khu bshad// dgongs pa gtan la dbab pa'i phyir// bsam gtan rtse mo drug pa bshad// snang ba rang log 'byung ba'i phyir/ / 'byung ba lnga sbyor man ngag bshad// 'jug pa rang sar gnas pa'i phyir// 'jug pa bzhi sbyor man ngag bshad// dus tshod rgyal sa 'dzin pa'i phyir// rgyal po bka' yi brda chos bshad// ye shes zang thal yin pa'i phyir/ / mchongs pa lnga yi man ngag bshad// thams cad gtan la dbab pa'i phyir// sgom nyams drug pa'i man ngag bshad// kye kye byang chub sems dpa' rnams// zab mo'i don la 'jug pa ni 'di lta ste/ / dam tshig chal pa snying rje med 'gyur na// kun tu bzang pa'i tshig 'dra smra ba yang// 'khrul pa'i sems kyi log 'dres dbang du 'gyur// zhes gsungs so// sems phyogs chen po nam mkha' mdzod kyi rgyud/ / chos nyid nam mkha' las/ gleng gzhi'i byung tshul gyi le'u ste dang po'o//// de nas yang dag par rdzogs pa'i sangs rgyas kyi dgongs pa mtha' thug par gsungs pa 'di la don dgus bstan te// dgu gang zhe na/ tshig lnga/ rtogs pa lnga/ yon tan gsum/ sbyor sgrol gnyis/ man ngag cig/ dgongs pa gzhi gnyis/ lo zla ba drug/ yid ches pa'i gtan tshigs bzhi/ yongs su gdams pa dang dgus bstan no/ / dngos po gzhi'i tshad/ sku las 'das pa'i ye shes/ shes rab khyad par gyi tshad/ chos las 'das pa'i sangs rgyas/ ngo bo nyid kyi sku/ snang ba dag pa'i tshad/ 'byung ba las 'das pa'i rang mdangs gzhal yas khang dang bcas pa/ dgongs pa dag pa'i tshad/ tshig las 'das pa'i skur snang/ byed pa po'i mthar ma lhung ba'i tshad/ yid las 'das pa'i shes rab bo// gzhi mi 'gyur ba'i shes rab/ srog tu gyur ba'i rlung/ ye shes mkhyen pa mi 'gog pa'i phyir gyen du rgyu ba'i rlung/ thugs rjes rang byung du 'byung ba'i phyir/ mthur du rgyu ba'i rlung/ 'bras bu 'byin pa'i phyir me dang mnyam du gnas pa'i rlung/ rang byung stobs dang ldan pa'i phyir kun tu khyab byed kyi rlung dang lnga'o/ / sku gsum yon tan dang ldan pa gsum las/ sku'i gzugs brnyan ri mo dang lder gzo// mtshan ma gdul bya la snang bar bstan pa'o// gsung gi sgra snyan rgyud lung man ngag/ phyi nang gi sgro 'dogs gcod pa'o// thugs kyi byin brlabs sbyor ba dang sgrol ba'o// de'i man ngag srog yod de rgyu ba med pa/ sku yod la gzugs brnyan med pa/ thugs yod de dran rtog med pa'o/ / sbyor ba'i man ngag bstan pa'i snying po cig 'byung bar bstan te/ sku gsum ye shes lnga ldan gyi mtha' ye shes rang byung gi mar med skya cig pa/ bdag dang bdag nyid tha mi dad pa bzhugs pa/ rtogs sgom tha mi dad par bzhugs pa/ rgyu 'bras tha mi dad par bzhugs pa/ dus gsum tha mi dad par bzhugs pa'o// de'i phyir skye shi med pa'i srog 'dzin pa'i phyir/ mi 'gyur ba'i rdo rje'i sku blangs te// chos nyid rgya mtsho dang 'dra ba'i klong yangs par bsgral te stong/ rgyal ba'i sku ni gzugs can ma yin la 'gro 'ong med pa/ dus thams cad pa/ rtag par bzhugs pa'i ye shes so// sangs rgyas thugs rje yas babs pas/ snang ba sum brtsegs yas babs pas/ mas chags chags ltar snang ngo// de'i steng du sku dang ye shes sum brtseg bzhi bzhag tu bzhugs so// bzhengs so// bzhengs bzhugs mi mnga' 'o// lo zla ba drug la/ nga ni rig pa chos kyi sku/ snang med snang srid kun gyi bdag/ zab cing gting dpag dka' ba ste// chung che'i lto ba khyengs pa med// de phyir snang srid lto ru zos kyang nga ma 'grangs// rig pa'i snying po til 'bru'i cha dang mthun/ / de yi rang lus mtshon pa spu ris tsam// de yi rang gdangs nam mkha'i mtha' dang mnyam// de yi snyigs ma 'khrul pa'i 'byung ba lnga// shes rab zab mo rtogs pa'i skyes bu yis// dang pa'i lus las 'byung ba rang sar thim/ / 'byung ba khyur mid byas kyang yangs dog med// rig pa'i gdangs ni nam mkha'i mtha' dang mnyam// rig pa dngos med yin par chos shes na// rang gdangs rang lus yin par rang gis shes/ / de na nam mkha' gos su gon yang nga ma g.yogs// 'gyur med chos kyi sku ni thams cad 'byung ba'i gzhi// sa gzhi lta bu'i chos nyid tha dad med// rang byung rang grol btsal med rang la rdzogs/ / de bzhin 'gyur med chos sku rang rdzogs la// phyi nang snod bcud snang srid 'khor 'das kun// rang gi thugs rjes rang gi rtsal du shar// skad cig ma 'gags chos nyid gdan du snang// de phyir sa gzhi gdan du gtings yang nga shong tsam/ / rang rig rgyal po ma 'gags yongs su gsal// thabs kyi ye shes ma bsgribs kun la shar// shes rab 'gyur med rgya mtsho gting dang mnyam// thabs dang shes rab gnyis med sbyor ba las/ / thugs rje'i rol pa gang la cis 'dul ba// 'gro ba'i don du nyag gcig kun tu grags// chos pa rnams kyi tha dad mthong bas gol// de phyir nyi zla lag tu thogs kyang nga ma mthong/ / skye med nam mkha' lta bu'i mkha' klong nas// shes rab zab mo 'brug gi sgra ltar sgrogs// gangs dkar rtse la seng chen 'phyo ba ltar// nga ro drag po bar snang khams su sgrogs// skye med klong nas sgra chen rang byung bas/ / btsal med bgrod med thugs rjes dbyings su 'byin// theg dman blo chung 'khrug pa'i mun khung du// shes rab sgron ma bteg kyang rang gi bsgribs// shes rab blo chung theg pa mas bgrod rnams/ / rgod pho gshog chag nam 'phangs mi chod ltar// btsal med chos la rtsol ba'i nad kyis zin// 'brug gi sgra skad grags kyang ngas ma thos// yon tan bzhi la/ kye sems dpa' chen po nyon cig/ nga'i rig pa chos kyi sku ye shes kyi mar me skya cig pa ni/ / nam mkha' ltar khyab pa'i ye shes ma 'gags pa'o// sa gzhi ltar thams cad 'byung ba'i gzhi ma 'gags pa'o// nyi zla ltar thabs shes rab kyi sgo ma 'gags pa'o/ / chu bo gang+ga'i rgyun bzhin du thugs rje da bri bsgom mi mnga' 'o// de nas byang chub sems dpa' sems dpa' chen pos shes rab kyi dbugs phyin te/ dngos po ye shes sbyor ba'i ting nge 'dzin las bzhengs te/ / chos kyi sku'i ye shes lnga dang/ chos kyi dbyings kyi ye shes kyi 'byung ba lnga rang rang so so'i don byed kyang/ gcig tu ma 'byor na thugs nam mkha'i mtha' dang mnyam pa mi 'byung ngo// zhes don thugs su chud nas sbyor ba mdzad do/ / rigs kyi bu nyon cig/ chos thams cad la shes par bya ba'i yul ni yod la/ spyad par bya ba'i chos ni med do// de ci'i phyir zhe na/ gzhi don gyi kun gzhi la bag chags bzang po'i sa bon btab pas/ chos thams cad ma bcings pa ste/ shes rab kyi rtsal sbyang du yod pa'o// spyad par bya pa'i chos ni gang lang med de// rang shes rig gi rgyal po 'ba' zhig tu zad do// lta ba rgya ma chad pa'i rig pa dngos med kyi ye shes yin la/ / 'bras bu nye bar grub pa chos thams cad kyi shes rab kyi yul du zin pa yin no// de yang dam tshig gi gzung shor cing thugs rje'i rlan med na theg pa chen po'i ming med do/ / zhes dga' rab rdo rjes rdo rje chos la gdams pa'o//// sems phyogs chen po nam mkha' mdzod kyi rgyud las/ lta ba'i yi ge dgu pa'i le'u ste gnyis pa'o// de nas rdo rje 'chang chen pos gsungs pa/ / bde gshegs thugs kyi nying khu 'di// sangs rgyas snying por bzhag pa yin// rgyu la 'bras bu rdzogs pa ste// 'bras bu snying por 'dril ba// snying po lam du khyer ba// rtogs pa rgyud la smin pa// rka med mkha' la 'gro bar bya/ / bltar med sku la blta bar bya// grogs med gcig pur gnas par bya// 'di ni dgongs pa mdor bsdus yin// rang sa bzhi ldan bstan pa ni// 'das pa'i sangs rgyas bzhugs tshul ni/ / chos nyid rang snang sum brtsegs la// rang byung rig pa'i rgyal po nyid// dgongs pa rang snang don la bzhengs bzhugs so// de'i tshe rang snang rtogs pa'i 'khor rnams dang thabs cig tu bzhugs so/ / de'i tshe rang snang ba bsam bral gyi don la// so so go go'i gnas su ye shes kyi dkyil 'khor lnga la/ lha sum cu rtsa gnyis rdzogs par shes pa'i ngo bo gcig tu bzhugs so// de'i thugs rjes rang byung du bstan pa ni/ / sangs rgyas mnyam sbyor dgongs pa yin// de'i 'khrul rtog gcad pa ni// mya ngan 'das pa thog ma sangs rgyas kyi// gzhi dgongs pa rang gnas su 'byung bas/ da lta'i gang zag rtogs pa rgyud la smin na/ / tshig gi don mi 'byor ro// zhes byang chub sems dpa' sprin gyi shugs can gyis gsungs so// sems phyogs chen po nam mkha' mdzod kyi rgyud las/ bde gshegs thugs kyi nying khu rang sa bzhi ldan bstan pa ste le'u gsum pa'o/ /// de nas rdo rje 'chang chen pos/ bsam gtan rtse mo drug pa 'di gsungs so// sarba b+hi d+hu e kra b+hi b+hi/ chos thams cad kyi sgra dbyangs rnam pa gsum nas bcas te/ 'jig rten yongs su bstan pa rgyas pa'o/ / thog me sangs rgyas nyag gcig mngon du 'byung ba'i dus su/ thugs rje'i byin gyis brlabs kyis rang byung ba ni/ nam mkha' rnam par dag pa'i klong nas/ ha kra ma zhes pa'i sgra'o/ / bar snang rnam par dag pa nas ka la ping ka'i sgra brag cha'i tshul du babs te/ de 'gro ba rnam par dag pas sgra 'gyur gsum pa man ngag tu bsgyur ba/ rgyud gnyis su grags te/ de la ni ha kra ma'i rgyud ces yongs su grags so/ / de la rgyud gnyis las/ sgra'i don rna ba nas brgyud pa ni/ kun tu bzang po'i sgoms nyams drug pa gzung ste/ de bzhin gshegs pa'i bsam gtan rtse mo drug par bstan pa gzung ngo// de yang ji ltar gzung na 'dzin par byed pa'i sgra drug gi man ngag dang/ / gzung bar bya ba'i man ngag tshigs gsum gyis bzung ngo// badzra ma Ni ma a tri sha badzra sa ma Na/ zhes pa'i sgras gzung ste/ sangs rgyas nyag gcig gi dgongs pa la yar bskyal lo/ / de yang ji ltar bskyal zhe na/ sarba b+hi hu rba zhes pa'i sgra ni/ phyi nang snod bcud 'khor 'das rgyu 'bras kun la 'jug pa'i sgra la bya ste/ sgra khyab pa'i bdag nyid can no/ / baiDUr+Ya zhes pa'i sgra ni/ stong pa'i sgra/ grags pa'i sgra/ dbu ma'i sgra'o// e ka ni rig pa chos kyi sku'o// b+ha b+ha ni rgyu gnyis su bgrags pa'o// de la b+hi d+har+ya dgongs pa la sbyar na// a ni stong dang mi stong gi/ dbus dang mtha' gnyis yod ma yin// bar 'di dbu ma chen po ste// stong nyid ye shes chen po nyid// chos nyid mtha' gnyis ma spangs bar// chos sku rang byung stong pa nyid// mtha' bzhi las ni grol ba yin/ / rtsa ba'i don dang sbyar ba ni// ha kra ma ni bya zhes bya// rgyud pa gnyis su bstan pa yin// de nas rgyas par bshad pa ni// de kho na nyid yongs su rgyas par bshad pa yin// de ni gsang ba smad du byung ba'i yi ger bkod pa ste/ / bstan pa dar zhing rgyas par bzhag go/ badzra ma Ni a sh+ti sh+ta ma rtse ti sho ta NaM/ zhes pa'i sgra las drangs na/ rdo rje sems dpa'i byang chub kyi snying po/ dri med dag pa'i rig pa chen po/ bsam gtan rtse mo drug pa zhes byab/ bcom ldan 'das drug pa rdo rje 'chang gis gsungs pa/ skabs dang po byung tshul bstan pa'o// de nas yang dag dgongs pa'i mchog/ thabs mkhas dag gis bstan pa ni/ / skye 'gag med pa'i shes rig la// rdo rje rtse mo rnam par 'phro// yang dag mtha' la lhun gyis grub// bsam gtan drug pa'i rtse mo ni// yongs su rdzogs pa'i rtse mo cig/ 'gyur med rdo rje'i gdan la bzhag/ ces gsungs so// skabs gnyis pa chos kyi 'byung gnas bstan pa'o// badzra ma hA tse ti sho ha/ saM d+harma d+hA tu/ zhes pa'i sgra las drangs nas bsam gtan rtse mo drug pa zhes bya ste// rang las byung ba'i chos sku ni/ / sangs rgyas kun gyi rtse mo mchog/ rang las 'byung bas gzhan dbang med// bya btsal med pas rtse mo mchog/ yin tshul shes pas lta ba yin// 'gyur ba med pas rtse mo'i mchog/ gcig pur 'dug pas nyams blangs yin/ / btang bzhag med pas rtse mo mchog/ btang snyoms bzhag pas spyod pa yin// ye shes thug phrad rtse mo mchog/ phyir mi ldog pas 'bras bu yin// sku gsum rdzogs pa rtse mo mchog/ rdo rje 'chang gi thugs kyi mchog/ dgongs pa kun gyi rtse mo bshad// yongs su rdzogs pa'i skabs gsum pa'o// de nas byang chub sems dpa' rnams kyi don/ de yongs su rgyas par bshad nas/ rig pa chos kyi sku la tha dad du dbyer med kyang/ shes rig gang zag gi blo la go bar bya ba'i phyir gnyis su bstan te/ rig pa dang rig pa las byung ba'i ye shes gnyis te/ de yang gang zag gcig gi rgyud la sbyar te bstan na/ rig pa'i rten dang/ gnas dang/ mthun pa'i dpe dang gsum yin no// yang rig pa las byung ba'i ye shes kyi rten dang/ gnas dang/ mthun pa'i dpe dang gsum mo// de la rig pa ngo bo nyid kyi sku'i rten ni/ bag chags kyi kun gzhi'o/ / gnas tsit+ta rin po che'i gzhal yas khang ngo// dpe ni nya'i mig lta bu'o// ngo bo ni 'gyur ba med pa'o// rang bzhin ni shes bya la 'gag pa med pa'o// thugs ni ye shes sgyu ma lta bu'i sku'o/ / rig pa las ye shes kyi rten ni chos nyid kyi kun gzhi'o// gnas ni ri rab kyi khong seng na gnas so// mthun pa'i dpe ni 'ja' tshon lta bu'o// ngo bo ni snang la rang bzhin med pa'o// rang bzhin ni mi snang la rang bzhin yod pa'o/ / thugs rje ni ma 'dres la yongs su rdzogs pa'o// rig pa ngo bo nyid kyi sku dang// ye shes chos kyi sku gnyis// mar me dang 'od kyi tshul te// mthong bya dang mthong byed do/ / de'i 'bras bu yongs su smin pa ni// sku dag ye shes so// rig pa dang tha dad du grol ba'o// dngos po don gtan la dbab pa'i don bzhi bstan pa'o// nga ni gang zag gi rgyud las// 'bras bur smin par bya ste/ / chos nyid snang ba sum brtseg gi gdan la/ sku dang ye shes sum brtsegs su bzhugs pa ni/ lta ba dang grub mtha' tha mi dad par bzhugs so// dgongs pa ni ma bcas mnyam bzhag tu gnas par bya ste/ de yang phyi sgo bcad kyang rung ma gcad kyang rung ste/ gang ltar bde bar bya bcos med par bzhag go/ de ltar gnas pa'i dus na// rkang med mkha' la 'gro ba ni/ lta ba'i rgyab sha chod pa yin// bltar med sku la lta ba ni/ 'bras bu'i rgyab sha gcod pa yin// grogs med gcig pur gnas pa ni// sgom pa'i rgyab sha gcod pa yin// rtogs pa nyams su blangs pa'i skabs lnga bstan pa'o//// 'bras bu'i dus tshod shes pa ni/ / dus kyi sbyor ba nges pa ste// snang ba rang log byung ba'i tshe// 'byung ba lnga sbyor dran par gyis// 'jug pa rang sa byung ba'i tshe// 'jug pa bzhi sbyor dran par gyis// dus tshod rgyal sa byung ba'i tshe// ye shes chig chod dran par gyis/ / bsam gtan rtse mo drug pa rgyas par bstan pa'i skabs drug pa bstan pa'o// zhes sems phyogs chen po nam mkha' mdzod kyi rgyud las/ bsam gtan rtse mo drug pa'i le'u ste bzhi pa'o/ /// de nas bcom ldan 'das rdo rje 'chang chen pos/ las kyi mtha' zad pa'i tshe/ snang ba rang log tu bstan pa ni/ dang po sangs rgyas rgyu med pas// rang byung dbyings nas ye shes sku// rang snang mkha' la 'od gsal bas/ / ye shes snang ba sum brtsegs shar// ma rig rtag tu rtogs pa'i blos// snyigs ma'i 'byung ba lnga ru log/ rtogs pa'i ye shes skad cig gis// log rtog mkha' la sprin dengs bzhin/ / ye shes snang ba rang sar log/ rang byung rang snang rgyal ba'i sku// bzhi bzhag rang grol dgongs pa yin// snang ba rang log gi dgongs pa bstan pa'o// de nas bcom ldan 'das rdo rje 'chang chen pos 'di gsungs so/ / 'byung lnga sbyor bas man ngag gi/ rang snang 'od du shar ba yis// 'khor ba'i grong khyer bzlog pa yin// sku mchog rdo rjai 'od snang bas// ye shes lus la 'jug pa yin// chos kyi sku la gzugs med pas/ / dag pa'i ye shes rin chen sku// 'ja' tshon lta bu'i kha dog kyang// rin po che yi sbubs su thim// 'jug pa'i mtshan nyid rnam gnyis te// yul dang gnas la 'jug pa dang// sku dang ye shes 'jug pa dang/ / yul gnas 'jug pa'i mtshan nyid ni// 'byung ba lnga sbyor man ngag ste// btang snyoms chen po thabs mkhas pas// khams gsum dbang du bsdu ba'i phyir// bcud kyi 'jig rten thams cad rgyu/ / bdag nyid cig pa'i 'brel bar ldan// rgyu drug sku dang ye shes sbyor// snod kyi 'jig rten thams cad rkyen// de las byung ba'i 'brel bar ldan// 'khrul snang rgyal ba'i zhing khams sbyor// phyi nang 'byung ba rnam pa lnga/ / pha ni rlung yin thams cad byed// ma ni sa yin kun 'byung gnas// bu ni me yin smin par byed// bu mo chu yin sdud par byed// snying pa'i 'byung ba rnam pa lngas// mthun snang dag sna dag la sbyor/ / sku dang ye shes 'jug pa ni// dus ma 'gyur bar snang ma 'gyur// man ngag gtan tshigs rnam pa gsum// sna?ng ba yul gyi gtan tshigs brdas/ 'bras bu'i dkyil 'khor gtan la 'bebs// dgrags pa sgra yi gtan tshigs brtas/ seng ge nga ro lta bu yis/ lta ba ngan pa zil gyi gnon/ mtshon pa tshig gi gtan tshigs brdas// blo ngos gnyis su med par sbyor// zhes sems phyogs chen po nam mkha' mdzod kyi rgyud las/ snang ba rang log dang/ 'byung ba lnga sbyor dang/ sbyor ba'i man ngag bstan pa'i ste le'u lnga pa'o//// de nas 'byung ba rang sa'i man ngag 'di gsungs so// rgyu rkyen med pa'i ye shes la// mtshan ma'i dngos po tha dad 'byung/ / sku gcig drug tu 'byung ba'i phyir// yul drug rnam par spyod pa byung// phyi nang snod bcud thams cad kun// rgyu rkyen rang las byung ba'i phyir// 'jug pa'i mtshan nyid shes par bya'o/ / las la dge sdig med par shes// gnas la mtho dman med par shes// dus la snga phyi med par shes// chos nyid la ni bar do med// rig pa dag la skye shi med// ye shes skad cig ma med pas// lta ba dag gis thag bcad nas/ / dang po'i 'byung sar gnas bcas te// phyi nang snod bcud ma lus kun// ye shes chen po'i ngang du 'dus// rgyu rkyen bral ba'i chos skur gnas// thig le nyag gcig 'jug pa shes/ / zhes sems phyogs chen po nam mkha' mdzod kyi rgyud las// 'jug pa bzhi sbyor gyi man ngag gi le'u ste drug pa'o//// de nas bcom ldan 'das rdo rje 'chang chen pos// 'phags pa 'jam dpal 'phrul gyi gab tshe gsum bskor gyi man ngag bstan pa/ / pradz+nya pa ra mi ta/ dus tshod rgyal sa bstan pa ni// snang gsal sgron ma nub pa'i tshe// 'khor 'das dang snyigs 'byed pa'i dus// dpa' bos rang sa zin pa yin/ / chos nyid yangs pa'i bye thang la// lta ba mang po bang bskye bas// mnyam nyid khyab brdal zangs kyis thal// gsang ba'i mdzod gsum lde mig dang bcas pa 'di lta ste/ nam mkha'i mthongs khungs sgo phye nas/ / lta ba rin po che nam mkha'i mtha' dang mnyam pa'i mdzod bstan/ sa'i ras ma sgo phye nas/ rang byung dbang gi chu bo chen po bzhi'i mdzod bstan/ 'khrul gyi bang mdzod bzhi'i sgo phye nas/ sangs rgyas thams cad dang mnyam par sbyor ba'i mdzod bstan/ don gyi man ngag bzhir bstan te/ rgyal po'i pho brang gis rin po che'i rgyal sa bstan// rgyal po'i dkor mdzod gsum gyis rgyal ba'i bla nor bstan/ rgyal po'i bstan bka' chos bdun gyis yig tshang gser dang 'phra men bstan/ rgyal po'i brda chos bzhis rjes blon gyi mnga' ris bstan to// stong nyid nam mkha'i rdzongs/ nyi zla gnyis kyi skar khung bstod de/ rin po che'i gter sbas nas/ yon tan gyi sgo mo la rig pa 'phrul gyi sgo lcags bcu ste// re dogs med pa'i 'obs kyis skor te/ khye'u snang ba rigs byed kyi mkhar gyi rtse rje mdzad do// mgyogs kyi rta pho lngas mtha'i dgra btus te/ / dbang sgyur gyi blon po gnyis kyis gros kyi thag gcad de/ rgyal po rdzong la bzhugs so// skye med nam mkha'i mthongs su 'gyur med rig pa'i mdzod gsum sbas te/ lde mig mtha'i mon bus khyere nas/ blon po grong kha yas pas/ rigs kyi bu rin po che'i skas la 'dzegs la/ mtha'i mon bu tsho la sgo phye zhig/ skye med nam mkha'i sago phye bas/ pad+ma stong gi dkyil 'khor rang snang 'od dang bcas pa/ rin po che drwa ba'i mig tshags mthong bar 'gyur ro// sa'i ras ma'i sgo phye nas/ gser gyi me tog pad+ma 'dab ma stong dang ldan pa/ 'od zer bye ba 'bum dang ldan pa/ sprul pa bye ba khrag khrig sna tshogs du ma dang bcas pa/ zhing khams chen po lnga dang ldan par 'od gsal ba ni/ rnam dag stug po bkod pa'i zhing khams nas/ mtshon rdzogs rdo rje 'chang gi zhing khams su/ nyi ma stong gi 'od zer 'char ba ltar/ bltas pas mi skyo bar ngo mtshar gyur pa de kun bzang dbye ba med pa'i zhing khams su/ sprul pa bye ba 'bum dang ldan pa/ nyi zer gyi grangs lta bu la/ sku phra mo rdus phra rab las/ mtshan dang dpe byad rdzogs par gnas pa sha stag tu gyur te/ de bcu pa chos kyi sprin gyi zhing khams la snang bar 'gyur te/ de'i 'od zer re re'i rtse mo la sku phra mo yungs 'bru tsam la/ mtshan dang dpe byad rdzogs pa re re 'byung ste/ de rnams kyang zhing khams chen po gsum la snang bar 'gyur ro/ / de 'gro ba 'dul ba'i zhing khams drug la du mar snang ba'i dus na sprul pa'i skur gyur te/ thugs rjes sems can gyi don mdzad do// yang phra mo de rnams sems can la yang snang zhing 'byung ba de/ / dag snang log nas/ 'khrul snang 'char ba'i dus su/ sems can gyi gzugs reg 'byar du yong ba yang de las 'byung ngo// sa'i ras ma sgo phye nas rang byung gi chu bo bzhi'i mdzod bstan pa ni/ rig pa rtsal gyi dbang dang/ rgyal thabs spyi blugs kyi dbang dang/ ye shes rang rdzogs kyi dbang dang/ ye shes lhun grub kyi dbang dang bzhi ste/ rig pa rtsal gyi dbang ni mdzod gsum sgo phye'o/ / rgyal thabs spyi blugs kyi dbang ni/ gser gyi me tog bzhi yas shar nas/ zhing khams chen po gsum la spyod par dbang ngo// ye shes rang rdzogs dbang ni/ chos nyid kyi snang ba la sku gsum rang lugs su gnas par snang bar gnas pa'o/ / ye shes lhun grub kyis dbang ni/ 'bras bu phyir mi ldog par shes pa'o// 'phrul gyi yang mdzod bzhi'i sgo phye ba'i du su/ shes rab kyis chos la dbang byung ba ni/ 'phrul gyi yang mdzod bzhi/ de'i lde mig bzhi/ de la lta ba'i skyobs bzhi ste bcu gnyis bstan pa'o// de nas rgyal po'i bla nor bstan pa/ san rnga ba ro ha na/ man ho'i sgra las drangs nas/ sang skri ta'i skad de/ sdig pa med pa'i shes rab kyis/ snying rje med pa'i sems can bsad de/ srog med pa'i sku la sbyar nas/ gnas med pa'i klong du bskyal te/ ljon shing gi myu gu tsha ba med pa'i mes bsregs te/ dpag bsam gyi ljon shing gtan nas bskams so/ / sh+ta Tas ri sha o a/ dus tshod rgyal sa 'dzin pa'i phyir// rgyal po bka' yi brda chos bshad// rgyal po pho brang na bzhugs pa'i dus su/ rgyal po'i chos bzhi ste/ rgyal po gdan sa 'dzin na/ btsun mos gros kyi gzhi gzung zhig/ rgyal bus nang blon gyis shig/ blon pos phyi blon gyis shag/ dmangs longs spyod la zhugs shing// rgyal po btsun mo la snyoms par 'jug na/ rgyal bus sgo srungs shig/ blon po btson du zung zhig/ rgyal po'i mnga' ris la dgra rkun mi yong gis// phyi sgo sdoms la zhog cig/ dmangs bde ba la khod cig/ rgyal po dmangs la dbya sdud na/ btsun mo sa gzhi gzung zhig/ rgyal bus mtha' skyongs shig/ blon pos shags thob cig/ dmangs zhabs tog la chos shig/ blon po mthar spyugs shig/ rgyal po gnad sa 'kho na/ btsun mo gzhi la bzhugs shig/ rgyal bu'i g.yul bkyes shig/ dmangs rang shi thabs brlag la thong zhig/ de bas na rgyal pos rgyal sa zin to// blo bde'o// rgya nag po'i gab rtse/ mkhyen rab kyi bdag po 'phags pa 'jam dpal gyis/ thugs rin po che'i klong du bskor bas/ 'phrul gyi gab tshe gsum bskor gyi man ngag/ chos bzhi dang ldan par rgyas par bstan pa'o// zhes sems phyogs chen po nam mkha' mdzod kyi rgyud las/ rgyal po'i chos bzhi bstan pa ste le'u bdun pa'o/ /// de nas bcom ldan 'das rdo rje 'chang chen po// ye shes chig chod du bstan pa/ rgyu las 'bras bu rdzogs pa sku gsum ye shes lnga'i bdag nyid// sku gsum gyi snying por spyan gsum rdzogs te/ spyan gsum bag chags kyi bdag la rdzogs pa'i phyir// sangs rgyas kun gyi ye shes sku// mya ngan 'das med 'khor ba med// bdag med ye shes rdzogs pa'i sku// 'gro ba kun gyi snying por shar/ / sangs rgyas lam du khyer ba'i phyir// 'gro drug srang la mtho dam med// rang byung dga' ba'i dbyings na gsal// de yang chos thams cad kyi 'byung gnas// dgos pa'i mdor bsdus rnam pa bzhir 'byung ste/ / gang zhe na/ rgya chad phyogs lhung med pa'i lta ba/ lta ba thams cad kyi thugs rang byung// gsal ba bcos su med pa'i dgongs pa// chu bo rgyun gyi ting nge 'dzin rang byung/ rang byung byas pa med pa'i spyod pa/ bde ba chen pa'i nyams bag gis gnas pa rang byung// sku gsum phyir mi ldog pa'i 'bras bu/ nyi ma zer 'od dang btsas nas rang byung/ de ni lta ba'i tshul bzhi zhes bya'o// rkang med mkha' la 'gro bas snang ba rgya yis btab/ ma bgrod par phyin pa'i sa la 'dug go/ bltar med sku la bltas pas 'bras bu tshad dang ldan/ lta ba chos nyid stong pa dag/ grub mtha' sku gsum rang byung gi dgongs pa la 'dug go/ grogs med gcig pur gnas par snang ba grogs su 'char/ / snang ba thugs phrad la shes rab thugs phrad skyes// bag chags kyis gos pa med par 'dug go/ rtogs pa rgyud la smin pas mngal gyi man ngag go/ sgo bzhi rang las 'byung bas sgo gsum rgyud la skyes/ / snang ba ye shes kyis bag la zha ba'i man ngag go/ mthong snang rim gyisa'achar gyis gcig pur dal bar sdod// phung po sgribs shing yin gyi snang ba'i sgrib shing sol/ / dgongs pa rtse gcig pa'i man ngag go/ sangs rgyas kyi las la bgrod mi dgos kyis/ rje blon bral pas chog/ chu zla rkyen dang sprod la nam mkha' gud du chod/ sems dang ye shes phye nas snang bas chog/ kun tu 'od kyi sa la sbyangs mi dgos kyis// 'khrul snang 'gags pas chog/ 'bras bu grub mi dgos kyis/ sku gsum 'du 'bral med pa nam mkha' nyi ma lta bu'o// sgrib pa sbyang mi dgos kyis/ rgyu rkyen med pa'i ye shes la dri ma med de/ man shel dang snang ba'i tshul lo// sangs rgyas rang la 'byung gi gzhan du ma tshol cig/ chos la sangs rgyas med par bstan pa skra shad dang sol ba lta bu'o// de nas sangs rgyas gzhon nu mtshan rab tu shes pas yar gzigs pas sangs rgyas gzhon nu bum pa'i sku mthong/ mar gzigs pas 'gro drug gi sdug bsngal mthong// thad kar gzigs pas sems can gyi de bzhin gshegs pa'i sku gsung thugs mkhyen nas/ ye shes chig chod du gsung pa'o// zhes sems phyogs chen po nam mkha' mdzod kyi rgyud las/ ye shes chig chod du bstan pa ste le'u brgyad pa'o//// de nas mchongs pa lnga bshad pa ni/ / rdo rje sems dpa' 'gro drug me long la gzugs brnan shar ba bzhin mkhyen te/ las dge sdig las 'das pa 'di gsungs so// 'khor ba zhe la mnan pa'i phyir// mchongs pa lnga'i man ngag bshad do/ kun tu bzang po'i sku'i sprul pa bstan pa/ rin chen shel gyi mi bo cig/ dang po 'gag med klong nas yongs// bar du bgrod med lam la gnas// tha mar skye med ngang du 'gro// goms pa lnga yis pha rol phyin/ / rin chen shel gyi mi bo de// khyung chen gshog rdzogs rta ru zhon// rtsol ba med par dbyings su phyin// g.yon na glang chen 'gyur med 'dur// glang chen 'gyur med khri steng sa na// btsun mo rgyan bzang 'od du 'bar/ / shes rab dbyings na thabs ldan rdzogs// g.yas na seng lcam dkar mo mchong// seng lcam dkar mo'i gdan steng na// g.yu yi mi pho zur phud can// rkang med mkha' la stobs kyis 'gro/ / phyin pa med par dbyings su gcod// 'grod med lam du 'jug tsam na// rig pa'i ye shes gzhu bdungs nas// shes rab mda' lnga stong la rgyus// mda' gcig nam mkha'i mthongs su 'phen// nam mkha'i mtha' la thug pa med/ / pha ni thabs mchog dpag tu med// skye 'gag med pa'i ye shes yin// mda' gcig rgya mtsho'i gting du 'phen// zab cing gting dpag dka' ba'i dbyings// ma ni shes rab brjod las 'das/ / 'gyur ba med pa'i chos nyid yin// mda' gcig nyi zla'i bar du 'phen// nyi zla gnyis kyis brjid mnyam pas thabs dang shes rab zung du 'brel// mda' gcig 'gro drug yongs la 'phen/ / 'gro drug srang la btab tsam na// 'gro drug srang la mtho dman med// rang byung bde ba'i dbyings su bskul// mda' gcig 'jig rten khams su 'phen// ye shes snang bas rang log yin// bde gsal chen po'i sa la bkod/ / goms pa lnga yis pha rol phyin// 'khrul snang 'di la 'goms mchongs byed// dag pa'i snang ba yod pa'i phyir// sems can 'di la 'goms mchongs byed// sangs rgyas dam pa yod pa'i phyir/ / lha rnams kun la 'goms 'chongs byed// 'phags pa'i dang po yod pa'i phyir// byang chub sems la 'goms mchongs byed// lhun grub ye shes yod pa'i phyir// dam pa'i chos la 'goms mchongs byed/ / chos las 'das pa yod pa'i phyir// skad cig goms pa lnga rdzogs pas// yul ni rnam par dga' ba'i zhing// mkhar ni 'gyur ba med pa'i mkhar// grogs ni 'du 'bral med pa'i grogs// gdan ni pho 'gyur med pa'i gdan/ / gos ni dngas ma lnga yi gos// zas ni zag med ting 'dzin zas// sku ni shes rab 'gyur med sku// rdo rje rgya gram khri stengs nas// dpa' bo chen po bdag nyid sku// mtshan ma'i gzugs med gzugs kyi sku/ / ngo mtshar rmad byung rol pa'i thugs// smra bsam brjod med shes rab gsung/ rtogs pa'i ye shes skad cig rdzogs// zhes sems phyogs chen po nam mkha' mdzod kyi rgyud las/ mchongs pa lnga'i man ngag bstan pa'i le'u ste dgu pa'o//// de nas bcom ldan 'das rdo rje 'chang chen pos// sgom nyams drug pa'i man ngag 'di gsungs so// sa ma a ti bi tsa ra/ badzra na ma Ni bi hu ru ru/ stong pa chen po'i ye shes sku'i bdag nyid gsang ba yang khol du byung ba/ bdag dang bcas pa'i dpal rdo rje sems dpas/ thugs kyi man ngag zab mo bstan pa// dag pa chos kyi sku ni ma bsgribs yongs su gsal/ / shes rab rig pa'i sku ni zab cing gting dpag dka'// rang byung thugs rje'i sku ni mtshan dang dpe byad ldan// thugs rje 'od zer sku ni 'gro ba kun la snang// rgyu rig pa chos kyi sku/ 'bras bu sku dang ye she me long dang byad kyi tshul du/ rgyu chos kyi sku la shar bas rgyu 'bras bur smin no// de nas yang rgyu'i dus na 'bras bu lhun gyis rdzogs 'bras bu rgyu'i ngang du shar te/ rgyu dang 'bras bu tha mi dad pa zhes bya'o/ / de yang rang gi rgyud la sbyar na// chos nyid dga' ba'i sa nas rang shes rig gi rgyal po rdo rje kun tu bzang po/ ngang gi g.yo bar yongs kyis 'od gsal bar bzhugs pa ni/ rgyu rdo rje dbyings kyi dkyil 'khor ma btsal lhun gyis rdzogs/ / 'bras bu ye shes kyi dkyil 'khor ma bsgribs par yongs su gsal// thugs rje byed pa med pa'i shes rab kun la snyoms so// mi nub rgyal mtshan lta ba nam mkha'i rgyal bo/ rang rig rgyal po grub mtha'i gter du bzhag pa/ sems kyi gter du dgongs pa'i gnas bstan pa/ snying po'i yang snying rin po che gsang ba'i sbubs bstan pa/ 'bras bu rin po che lhun gyis grub par bstan pa/ de'i skyon dang yon tan bstan pa dang/ man ngag gis yid ches par bstan pa'o// dang po lta ba rang gi ngo bor bstan pa ni/ 'og min gyi gnas chos kyi dbyings kyi pho brang na/ rin po che gsang ba'i pho brang na/ rin po che gsang ba'i sbubs phyi nang med par gsal ba'i dang na/ rang shes rig gi rgyal po rdo rje kun tu bzang po/ ngang gis mi g.yo ba yong gi 'od gsal ba/ rgyu rdo rje dbyings kyi dkyil 'khor rang rdzogs// rgyu 'bras bur smin pa ye shes kyi dkyil 'khor rang shar/ thugs rje 'byed pa med pa'i shes rab rang byung ba ni/ rgyu rang byung gi ye shes zhes bya ba'o// sku gsum ye shes gsum brtsegs kyi dgongs pa yas babs pa/ chos nyid snang ba gsum gyi zhing khams mas chags pa'i phyir/ theg pa chen po snang srid gzhi bzhag dang/ gzhi bzhengs su bstan pa ni/ mi nub rgyal mtshan lta ba nam mkha' rgyal po zhes bya'o/ / 'gag pa med pa'i lta ba nyid nam mkha' dang nyi ma'i tshul du bzhugs so// grub mtha'i gter du bzhag pa ni/ rang gi rgyud la sbyar te bstan na lta ba rin po che'i gter// snying po ye shes sgron ma'i mchog/ bder gshegs rnams kyi ye shes sku/ rgyal ba rnams kyi gter du bzhag/ ces sems kyi gter du snying po ye shes kyi sku bzhag go/ de yang mnyam bzhag gi dus su/ 'bras bu ye shes kyi dkyil 'khor nyid/ rgyu rdo rje dbyings kyi dkyil 'khor la/ kha nang du bltas pa'i dus su/ mnyam pa nyid gnyis su med pa'i dgongs pa zhes bya ste/ ngang kun tu bzang po ma bcos par bzhag/ de'i dus su mig gi yul 'gyur bzlog pa'i man ngag gis bcos pas shes pa bstan par 'gyur ro/ / yang yid rtog pa'i rjes su 'brangs nas/ yid kyi yul 'gyur ba bcad pas/ rnam rtog rgyun gcod par byed do// yang rgyu rdo rje dbyings kyi dkyil 'khor nyid/ / 'bras bu ye shes kyi dkyil 'khor la kha phyir bltas pa'i dus su snang ba rgyas 'debs// mtshan ma zil gyis gnon te// thugs rje 'byed pa med pa'i shes rab kun la snyoms so// sgom pa'i gnas bstan pa ni/ 'dir mtshan ma'i gnas cig ston te/ rtogs pa dang ldan pa rnams so// rtsa ba rang gi rig pa 'gyur ba med pa'i ye shes de/ kun gzhi sems kyi brag phug tsit+ta'i gzhal yas khang du sgom par bstan pa'o/ / sgom pa'i dmigs pa bstan pa ni/ sgo nga dkar po kha nang du bstan pa'i dus na/ ye shes sems pa'i snying po'i dkar po dang bcas par bsgom pa ni/ sku gsung thugs phyag rgya'i dkyil 'khor bcas par sgom pa de ni sku rdo rje yin/ 'bras bu ye shes kyi dkyil 'khor nyid rgyu rdo rje dbyings kyi dkyil 'khor la kha nang du bstan pa'i dus na/ snying po byang chub kyi sku gsal ba rnam pa gsum dang ldan par bzhugs pa ni/ sangs rgyas thams cad dang mi phyed par bzhugs pa'i dgongs pa'o// yang rgyu rdo rje dbyings kyi dkyil 'khor nyid 'bras bu ye shes kyi dkyil 'khor la kha phyir bltas pa'i dus na/ thugs rje 'byed pa med pa'i shes rab kun la khyab de/ / nam mkha'i mthongs nas nyi ma'i snying po shar ba lta bu'o// de la thugs rje yon tan du 'byong bar bstan pa ni/ thugs rje 'byung ba'i sgo bzhi/ 'char sgo gsum nas 'char te/ thugs rje 'byung ba'i sgo bzhi ni/ snying po byang chub mchog gi sku la mnyam par bzhag pa'i tshe/ shes rab 'gag pa med par shar ba ni/ yon tan rin po che ma rdzogs pa'i rtsal rang snang ba ni/ sprul sku rin chen 'byung ldan gyi sku dang ye shes la snang ngo/ / yang dag par rdzogs pa'i sangs rgyas kyi zhing khams nas/ ma tha dmyal ba'i 'jig tshogs yan chad/ stong gsum gyi stong chen po 'jig rten gyi khams 'khor bu dang/ kun khyab dang/ spangs thon dang/ nye ring med par snang ba ni/ 'od dpag tu med pa'i zhing khams te/ snang ba mtha' yas kyi sku dang ye shes la snang ba'o// bgrod pa med par lhun gyis grub pa'i sa rnams non pa ni/ don grub chen po'i zhing khams te/ don yod grub pa'i sku dang ye shes la snang ba'o// rang shes rig gi rgyal po rdo rje kun tu bzang po/ dus gsum du pho 'gyur med par bzhugs pa la/ las kyis sgrib tu med/ thugs rjes skyab tu med/ bdud dang mu stegs kyis bar du bcad du med/ phya dang dbang phyug gis grogs byar med/ de ni mi bskyod pa'i zhing khams de/ rdo rje sems dpa'i sku dang ye shes la snang ba'o/ / thams cad 'byung ba'i gzhir rang byung ba ni/ snying po lnga dang dwangs ma lnga las thams cad 'byung ba'i phyir rang byung ba'o// thams cad smin par byed pa ni/ sku yod pa las ye shes 'char/ ye shes thugs rje che ba'i stobs kyis dgongs pa la mnyam par bzhag pa'i dus su/ nyams su myong ba'i shes rab khyad par can rang gi rgyud la skye bar 'gyur ro// de'i 'char sgo gsum la/ rgyu las 'bras bu kha nang du bltas pa'i dus na/ snang ba ldog ste 'char ba dang/ rig pa chos nyid la kha nang du bltas pa'i dus na 'char ba dang/ shes pa phyin pa la 'char ba dang gsum mo// de'i skyon dang yon tan bstan pa ni/ stong pa nyid la lta nyes na/ shes rab chung rnams phung bar 'gyur// rgyal ba rnams kyi stong nyid ni/ lta kun nges par 'byin pa de/ me long nang gi gzugs brnyan bzhin/ rgyal ba rnams kyi ye shes sku// rgyu gnyis 'bras bu rang shar bas/ 'bras bu rgyu ru mi ldog pa'o// de yang gang zag stong pa nyid la lta ba dang/ de ni gso ru mi rung zhes bshad pas// ci stong pa nyid ni bslan dka'o// rtog pa ni gzhi la blo'o// 'o na sgom pa des rtogs par mi 'gyur ram zhe na/ rtogs par mi 'gyur ba'i don ni/ shes rab kyi sku reg bya min pas ni gzhi la sla ba'o// rang bzhin ma 'gags pas ni mtha' bzhi rtogs pa dang bral ba/ bsgoms pas de yang ma hA yo ga ltar ting nge 'dzin dang/ cho gas bskyed pa ni ma yin te/ rgyu dag pa'i dbyings nyid nas 'bras bu ye shes kyi dkyil 'khor rang snang ba'i dus na/ rnam pa thams cad mkhyen pa'i ye shes sems can la dgongs te rim gyis 'char ba dang/ thams cad mkhyen pa'i ye shes sangs rgyas nyag gcig gi snang ba ste/ chig chod du 'char ba dus mtshungs su 'byung bar 'gyur ro// de la man ngag gis yid ches par byed pa bzhi ste/ rigs 'dzin rnams brdas brgyud pa las/ gzhi klong du gyur pa'i man ngag dang/ rkyen gdeng du gyur pa'i man ngag dang/ thugs rjes nyams su blangs pa'i man ngag dang/ rjes 'jug 'da' dkar thugs kyi man ngag dang bzhi las/ ngang kun tu bzang po chos nyid kyi klong nas bsam pa gsum rtog med gnas pa'i dus na/ gzhi klong du gyur pa'i man ngag go/ sprul pa'i sku rdo rje sems dpa'i thugs kha nas/ sku gsum rang rdzogs su shar ba'i dus na/ rang gi shes bya la rang dbang sgyur bas/ rkyen gdeng du gyur pa'i man ngag go/ dga' rab rdo rjes sems dpa'i zhal mthong ba'i dus su/ 'chang med rdo rje'i lung bstan pa'i chos nyams su blangs pas/ bka' dang mthun pa'i don thugs su chud de/ dga' rab rdo rje'i nyams kyi man ngag go/ phyis rjes su 'jug pa'i byang chub sems dpa' rnams kyis tshul gong ma bzhin gnas par byas te/ bka' ji bzhin par spyad pas 'bras bu yang mngon du 'byin nus te/ bka' de las mi 'da' bas/ 'da' ka thugs kyi man ngag go/ bder gshegs rnams kyi dgongs pa mdor bsdus te bstan pa'o/ / zhes sems phyogs chen po nam mkha' mdzod kyi rgyud las/ sgom nyams drug pa'i le'u ste bcu pa'o// de nas gsang ba'i bdag po rdo rje snying po dang/ dga' rab rdo rjes mgrin gcig tu 'di skad ces dri'o/ / rgyu dag pa las 'bras bu rdzogs pa 'byung/ 'bras bu gnyis su med pa las/ thugs rjes 'od zer gyi sku smin pa 'byung ba'i chos/ lhun grub yongs su rdzogs pa'i lta ba la/ sgom zhing bsgrub tu med par ma spyad na de'i man ngag gang gis gzung/ rtogs pa'i don la sgom du med kyang/ gang zag gi rgyu la sgom sgrub nyams su blangs nas/ bde bar gshegs pa'i spyan rnam pa lnga rang gi rgyud la 'char nus na/ de ci'i rgyu/ de ci'i rkyen/ lus ma bor bar rin po che gsang ba'i sbubs su sangs rgyas na/ de'i gnad man ngag gang gis zin/ 'khrul pa'i snang ba ma spangs par/ skad cig ma la chos nyid snang ba rnam par dag na/ de'i man ngag gang gis ston/ zhes zhus pa las/ rgyal ba'i bka' dam pas gnad bzhi gsungs/ rang byung ye shes sku gsum ye shes lnga ldan mtshon nges par shes pa dang/ sgoms nyams drug gi man ngag dang/ rkyen nyams su blangs pas/ dus ma 'gyur bar snang ba 'gyur ba dang/ snang ba gzhi bzhag gi man ngag gis gnad gcad par bya'o// zhes sems phyogs chen po nam mkha' mdzod kyi rgyud las/ gnad bzhi rgyal ba bka'i le'u ste bcu gcig pa'o//// de nas ston pa rdo rje 'chang chen pos 'di skad gsungs so// yi ge dgu pa ma shes na/ gzhi stongs pa'i skyon du 'gyur ro// thugs kyi nyid khu ma shes na/ / gzhi'i mtshan nyid mi shes so// rtse mo drug pa ma shes na// dgongs pa gtan la mi phebs so// snang ba rang logs shes na/ tha dad kyi skyon du 'gyur ro// 'jug pa rang sa ma shes na/ grub mtha' slar log gi skyon du 'gyur ro// dus tshod rgyal sa ma shes na/ theg pa gzhan dang cha mi phyed do// mchongs sa lnga ldan ma shes na/ ye shes zang thal mi rtogs so// sgoms nyams drug pa ma shes na/ dgongs pa'i don 'chal bar 'gyur ro// gnad kyi bka' bzhin ma shes na/ gnad mi chod do// zhes gsungs nas/ 'khor rnams dgyes nas rjes su yi rangs te/ chos kyi dri ma med pa chen po'i ngang du thim mo/ / sems phyogs chen po nam mkha' mdzod kyi rgyud las/ don ma lus par bsdus nas bstan pa rjes su yi rang pa'i le'u ste bcu gnyis pa'o// sems phyogs chen po nam mkha' mdzod las/ chos nyid nam mkha' mdzod kyi rgyud ces bya ba rdzogs so/ /// rgya gar skad du/ a ti ma hA bo d+hI tsit+ta koSha d+harma/ mU la A kA sha dwata dz+nyA na a kA sha nA ma/ bod skad du/ rdzogs pa chen po byang chub kyi sems mdzod kyi chos/ / tha dad na 'brel ba med de dbab tu mi 'dod par thal lo// 'brel pa yod zer na// bdag nyid gcig gam 'dri'o// bdag nyid gcig na// bdag rig pa gcig gam/ / rig pa bdag tu gcig/ bdag rig pa gcig na// gong skyon 'ong// de las byung ba'i 'brel ba yod zer na// rgya chad pa'i skyon 'ong ngo// de las byung na rig pa bdag las byung ngam// bdag las rig pa byung/ / byung ba'i skyon 'ong// sprul shugs nas byung ba'i 'brel pa dang 'dra ste// ldog tu mi 'dod pa'i skyon 'ong ste rgya chad par thal// mi shi ba'i lus la rig pa mi 'byung ba dang 'dra ste// phyis don byed mi nus pa'i skyon 'byung ngo/ / yang na bdag nyid las rig pa byung na byung pa'i nad kas// 'brel med du thal lo// rig pa las bdag byung na// shes rig rdzas su thal lo// rang gi shes par bya ba ni// thig le lhun grub chos can zhes dam bca'/ / ci'i phyir ma 'gags rag shar ba'i phyir// thig le rdzas yod du thal zer na// lhun grub rdzas yod ma spangs pa'i phyir// 'jig par thal zer na lhun grub 'jig ma bkag ces bya/ / khyod lhun grub min nam zhes 'dri// yin zer na 'dod thog/ min zer na mu stegs rtag chad du thal zhes 'gal lo// sgra'i 'khor lo las brgal ba dang po'o//// 'thad pa sgrub pas gtor zer nas/ / snang ba 'di rang mi shar du 'thad de// 'thad pas 'o na 'thad pas snang ba shar mang du 'byung bar thal// bya ba byed pa'i rig pas gtong zer na// 'khrul pa'i shes pa la thag bas sbrul gyi bya ba byas nas 'khrul te/ / rtan du sbrul gyi bya ba byed par thal// ltos pa'i rig pas gtong zer na// 'phang las ltos na mdung ring// mdung las ltos na mda' rgyang ring ste// nges pa med par thal lo// rgyud kyi gtan la 'bebs zer na/ / rgyud rang yin nam logs pa gcig dri'o// rang yin zer na gtan la dbab pa dang 'bebs pa mi rung ste/ ral gri ral gri rang gis so la chod pa thal lo// gnyis yin gong du 'brel rtag go/ de yang lung yang de 'gro'o// mtshon pa gnyis pa'o//// tshad mas gtan la 'bebs zer na/ tshad ma de rang yin nam min ces 'dri'o// rang yin zer na gtan la dbab tu mi btub skyon gtang ste/ / gser gyi ser po gtan la 'bebs pa dang// ser pos gser gtan la 'bebs pa dang ces 'byung ngo// tshad ma logs cig yin no zer na/ chos tshad ma dang// don tshad ma dang 'jal bya'i shes pa cig/ gzhal bya'i yul mang du smra na 'di skad bya'o// 'ub kyi bsdus nas yul la 'jal lam// shes pa la mjal// gnyis ka la 'jal ces 'dri// yul la 'jal na yul nyams su myong nas 'jal lam/ / ma myong nas 'jal// ma myong nas 'jal na mo gsham bu che chung// ri bong rwa rno rtul kyang shes par thal// shes so zer na dbang po'i mngon sum gyis gsal// ces skyon btang ngo// nams su myong nas 'jal na/ / chu bo'i ro myong yang// chu bo'i rol tshol ba dang 'dra ste thug med du thal lo// shes pa la 'jal na shes pa dngos po yod nas 'jal lam med kyang 'jal// dngos po yod zer na mngon sum gyis gsal/ / med nas 'jal na ri bong rwa la mtho tshad gzhal du btub par thal// yod rung med rung 'jal na// lung du ma bstan par thal lo// mtshon pa gsum pa'o//// de ltar sgros btags cham la phebs nas/ / rang gi mtshan nyid bstan par bya// rang snang du rang shar bas// yul las gzhal du med// rang byung ye shes shar bas// nang la gzhal du med// 'du 'bral med pas yul dang yul can du gzhal du med/ / thams cad ye nas rang sar grol bas 'brel ba rtsir med// shes rig gi yul las grol bas// rgyud lung rig pas gtan la dbab sa med// ces gsungs so// mtshan pa bzhi pa'o//// shes pa 'khrul te/ / rgyal ba rigs lnga 'od dkar dmar lnga rten pas 'khrul// bsgrubs pas gol te// rang sna chos sku la bde ba 'dod cing sgrub pas 'khrul// sgom pas rlag/ ye nas rang gsal sgoms bas rang gsal stong pas rlag/ yul can gyi gol te spang blang gi lan no// snang ba sgrib g.yogs kyi chod// snang ba rang gsal la 'byung ba ltar mthong bas chod// rang byung min te ye shes med// chos nyid yin te sku min// snying po yin te ye shes min/ / de ltar shes pa ni rang byung yin la ye shes yin// chos sku yin/ snying po yin/ thig le yin/ nyag gcig yin/ zhes gsungs so// 'da' he na'i 'du khang du// mkhas pa 'jam dpal bshes gnyen la thig le nyag gcig grub mtha' bstan/ / rtsol ba'i sgra'i 'khor lo 'di// chu srin pir gyi gre ba ru// ru sbal nag po 'i chud pa bzhin// bskal pa khrugs kyang khar ma dbyung// zhes gdams so/ / rmongs pas mi go dris lan khong du chud// sbyangs pa'i sgra dang song 'gyur 'byung ba dang// byung ba can dang sgra skyon rnams brgyud// man ngag khong du bcas te 'ga' tsam bris pa'o// mtshon cha'i 'khor lo dum bu bzhi pa rdzogs so/ /// rgya gar skad du/ ab+hi Shiny+tsa gu ru rat+na tan+t+ra/ bod skad du/ dbang bskur bla ma rin po che'i rgyud/ bcom ldan 'das dpal rdo rje sems dpal la phyag 'tshal lo/ / dbang bskur bla ma rin po che'i rgyud 'di la spyi don gsum gyis bstan te/ de la dang po rdo rje sems dpa'i tshe bsgrub bstan pa dang/ gnyis pa dbang rin po che bskur bar bstan pa dang/ gsum pa sangs rgyas kyi gdams pa bstan pa'o// de yang dang por tshe bstan te/ tshe bsgrub la yang gsum ste/ maN+Dal bri zhing rgyan dgong pa dang// rdzas dang yo byad sogs par bstan pa dang// ye shes lha'i sngags dang phyag rgya sa tshe dgu gcing ba stim par bstan pa'o/ /// dang po maN+Dal 'dom gang gru ba ni// de la shar du sor bzhi stod de lha'i pho brang bkod// oM AHhUM swA hA zhes cha ga cha ga gdab// phyi ma'i thig ni zhi ba'i dkyil 'khor bzhin/ / dbus su pho brang zlum po la rdo rje rgya gram gri bar bya// phyogs bzhi mtshams brgyad rin po che// de yi phyi rim pad+ma drug/ gru chad sgo byung ldan par bri// de nas d+hI/ sa dang yo byad bkod/ / dbus kyi pho brang zlum po la// gser gyi bum pa bzang po ru// dza gad chang gis gtam la bzhag/ a mri ta dang rin po che// gser gyi sku ya gtsug la bzhag/ de yi mgul pa dar gyis bcings/ / gzungs thag rna bzhi phyogs bzhir gdags// tsan dan shing gis kha brgyan la// dbus su rma bya'i rgyal mtshan gzugs// 'brang rgyas gru bzhi rgyas pa la// dbus kyi tshe ni zlum por bya// mar gyis legs par byugs byas la/ / rtse mor rnam par rgyal bar gzugs// 'du ba rnam bzhi'i na da sel lo// de ting rma bya'i rgyal mtshan gzugs/ 'byung po gdon bgegs zhi bar byed// de'i gting me long rgyal mtshan gdags/ / ye shes kun tu gsal ba'i rtags// de ni dbus kyi pho brang ngo// phyogs bzhi rin chena'akhor lo la// rin chen bum pa bzhi bkod de// bgegs bskrad byin brlabs byas nas ni// bum pa'i yo byad blugs par bya/ / kha rgyan mgul chings gong bzhin bya/ rang rang lha yi sngags kyis mtshan// de nas tshe yi snying po ni// 'bru bcud 'di dag rtag par bzlas// oM tshe ku ru dz+nyA na pany+tsa badzra sa twa hUM/ rtag par zlos na dngos grub 'byung/ / rdo rje sems dpa'i tshe dang ldan// oM tshe ku ru dz+nyA na pany+tsa rat+na mA le tre/ oM tshe ku ru dz+nyA na pany+tsa pad+ma d+ha ra d+h+ri/ oM tsha ku ru dz+nyA na pany+tsa sa man d+ha ra ha/ zhes lha mo so so'i bsnyen pa dbul lo// de nas sa ma ti bskul ba 'di skad do/ / hUM bcom ldan mgon po ye shes tshe dpag med// thugs rje yon tan sku mchog bsam mi khyab// sku mdog dkar la gangs ri 'tsher ba 'dra// rin chen rgyan dang do shal se mo do/ / yid bzhin rin chen dbu rgyan 'phreng ba bsnams// g.yas pa skyabs sbyin phyag rgya kun la snyoms// g.yon pa mchod sbyin phyag rgya bum pa bsnams// 'gro ba yongs kyi tshe la dbang sgyur zhing/ / rnal 'byor tshe yi dbang grub stsal// hUM badzra d+h+rig/ ces bdag rdo rje sems dpar gyur te/ shar phyogs rdo rje brtsegs pa'i zhing khams na// rdo rje mi bskyod yab yum rang byung ba// phyag na rin chen dngul gyi bum pa 'dzin/ / bdud rtsi'i chu rgyun rgyun gyi ting 'dzin gyis// sems can zhe sdang las kyi bag chags 'khyud// 'gro ba yongs kyi tshe dpal bskyed mdzad pa// 'gyur med tshe yi dngos grub stsal du gsol// lho phyogs rin chen brtsegs pa'i zhing khams nas/ / rin chen 'byung ldan yab yum rang byung ba// phyag na rdo rje bair+ya'i bum pa bsnams// bdud rtsi'i chu rgyun rgyun gyi ting 'dzin gyis// sems can nga rgyal las kyi bag chags 'khrud/ / 'gro ba yongs kyi tshe dpal bskyed mdzad pa// 'gyur med tshe yi dngos grub stsal du gsol// nub phyogs pad+ma brtsegs pa'i zhing khams na// snang ba mtha' yas yab yum rang byung ba// phyag na rin chen byi ru'i bum pa bsnams/ / bdud rtsi'i chu rgyun rgyun gyi ting 'dzin gyis// sems can 'dod chags las kyi bag chags 'khrud// 'gro ba yongs kyi tshe dpal bskyed mdzad pa// 'gyur med tshe yi dngos grub stsal du gsol/ / byang phyogs rgya gram brtsegs pa'i zhing khams na// don yod grub pa yab yum rang byung ba// in+d+ra nI le'i bum pa phyag na bsnams// bdud rtsi'i chu rgyun rgyun gyi ting 'dzin gyis// sems can phrag dog las kyi bag chags 'khrud/ / 'gro ba yongs kyi tshe dpal bskyed mdzad pa// 'gyur med tshe yi dngos grub stsal du gsol// ces brjod pas phyi snod kyi 'jig rten 'byung pa lngas bsdus pa thams cad bum pa chos kyi dbyings su bsdus/ nang bcud kyi 'jig rten 'gro ba rigs drug gi sems can thams cad rigs lnga sangs rgyas kyi sku skye shi med pa'i tsher bsdus te gnas so// de nas rigs drug gi sems can gyi tshe bum pa'i lha la bsdus pa de/ bdag gi phung po khams dang skye mched la bsdus te/ sems can gyi rig pa byang chub kyi sems dang/ bdag gi rig pa byang chub kyi sems gnyis su med par/ bdag gi tsit+ta rin po che gur phub pa'i nang bstims pa'i dus na/ 'gyur med rdo rje lta bu'i tshe zhes bya ba'o// 'gro drug byang chub sems de yang// bdag gis byang chub sems su gcig/ ces 'byung ste/ tshe dgug pa/ hUM bcom ldan mgon po ye shes tshe dpag med/ / thugs rje sku mchog yon tan bsam mi khyab// sku mchog dkar ser gser gyi ri bo 'dra// rin chen brgyan 'phreng do shal se mo do// yid bzhin rin chen dbu rgyan 'phreng bas brgyan/ / g.yas pa skyabs sbyin phyag rgya kun la snyoms// g.yon pa mchod sbyin phyag rgya bdud rtsi'i bum pa bsnams// 'gro ba yongs kyi tsha la dbang sgyur zhing// tshe zad tshe nyams mod la 'tsho bar mdzod/ / tshe dpag med kyi yum chen lots+tsa ni// tshe yi dbang po rgyud 'phel tshogs pa'i spyan// dkar mo mdog bzang 'gro ba'i tshe gso ma// phyag na rin chen shel gyi bum pa bsnams// 'jig rten rigs drug gnas nas tshe khug la/ / tshe zad tshe nyams mod la 'tsho bar mdzod// na mo b+ha ga wa te/ a pa ra mi ta/ A yu dz+nyA na/ san dar san dar/ su pa ri sho ra tsam ya/ ta thA ga tA ya/ tad ya thA/ oM ma hA sa ma ya/ be re be re swA hA/ tshe zad mod la gsos shing dar cing rgyas par gyur cig/ rdo rje sems dpa' la tshe bslang ba ni/ hUM bskal pa grangs med 'das pa'i sngon rol nas// tshe bsags pas/ skye shi las 'das rnal 'byor chen po'i mthu/ / rgyal bas rtogs dka' de nyid sku gsung thugs// bcom ldan tshe yi dngos grub 'dir stsol cig/ kun tu bzang po bzang mo'i sbyor ba yis// byang chub sems ni cir yang bsgyur du btub// sna tshogs cir yang bsgyur ba'i tshe 'phel ma/ / bcom ldan tshe yi dngos grub 'dir stsol cig/ khro bo khro mo'i thugs ka nas// lcags kyu dkar dang dmar gyi tshogs bkye nas// bde bar gshegs pa'i thugs kha man chad nas/ / mthu chen lha klu gnod sbyin gang yang rung// gshin rje dmar po lag nas tshe drongs shig/ bcom ldan 'das tshe yi dngos grub stsal du gsol// oM A yu dz+nyA na bruM ni dza/ oM badzra A yu She a/ A yu dz+nyA na bra ti ku ru tra/ oM badzra aM ku sha hUM/ sarba ta thA ga ta hri da ya/ badzra ad+hi tiSh+Tha twaM/ tshe la 'tshe ba'i bgegs bskrad pa dang/ dbang bskur ba/ byams dang ldan pa gsang ba rigs kyi yum// tshe la dbang bskur byin gyis rlob par mdzod/ / rta mgrin khro bo chen pos bgegs tshogs bskrad// mi 'gyur brtan par dbang bskur byin gyis rlobs// bud+d+ha lo ts+tsha na oM/ badzra lo ts+tsha hUM/ rat+na lo ts+tsha na traM/ pad+ma lo ts+tsha hri/ karma lo ts+tsha na a/ zhes dbang bskur ro// tshe stim pa/ dbang gi rgyal po rta mchog dpal// gsang ba yum bzhi'i mkha' dbyings nas// rigs kyi yum dang rol pa mdzad// rgyas 'debs mas ni rgyas btab nas// ji ltar rgyal po'i phyag rgya la/ / bran rnams 'da' bar mi byed ltar// bdag nyid gsang bas rgyas btab pas// su yang 'da' bar mi byed cig/ tshe 'dzin mas ni tshe zung zhig/ bdud dang gshin rje gang la yang// tshe dpal mi shor dam du zung/ / sbed byed mas ni tshe sbos shig/ sbed byed gzung ba'i tshe sbas nas// mthu chen gshin rje gang gis kyang// tshe la ye 'brog byed 'gyur med// spel byed mas ni tshe spel cig/ spel byed gsang bas tshe spel na/ / tshe dang gzi byin rgyas par spel// tshe'i bum pa bstan pa/ bcom ldan mgon po ye shes tshe dpag med// mkha' dbyings rnam dag yum kyi gzhal yas na// rdo rje ye shes dpal gyi g.yung drung sku/ / byang chub bde mchog rol pa thabs kyi gtso// gnyis med rol ba thugs kyi dkyil 'khor nas// byang chub sems rgyud ye shes thugs rje yis// skal ldan rnams la tshe yi dngos grub stsol// spros pas 'jig rten kun gyi bkrag dang ldan/ / mnan pas khams gsum yongs kyi mdangs dang ldan// bsdus pas srid pa gsum gyi dbang dang ldan// bcings pas 'bral med rdo rje lu gu rgyud// brtan pas mi 'gyur rdo rje lhun po 'dra/ / bdag ni skal ldan rdo rje bde chen te// khams gsum brjid mchog tshe yi dngos grub stsal du gsol// de nas tshe brtan zhing bkra shis par bya ba'i phyir/ rdo rje sems dpa'i tshe sgrub gzhung dang mthun par byas nas/ rnal 'byor tshe'i po ti thob par byed pa ni/ rdo rje sems dpa'i tshe bsgrub bstan pa'o/ zhes ye shes bla ma rin chen bstan pa'i rgyud dang po'o// rdo rje sems dpa'i tshe sgrub bstan pa'i le'u ste le lag dang po'o/ /// de nas byang chub sems dpa' sems dpa' chen pos dbang bskur ba'i thabs bstan cing bkru dang bstan dang rdzogs pa dang// mthar phyin pa yi gdams ngag go/ zhes 'byung ste/ slob ma snod dang ldan bya'i phyir// ye shes bdud rtsi chen po yis// phyi nang gsang ba'i khrus kyang zhes 'byung ste/ lus ngag yid gsum gyis khrus kyi cho ga byas te/ snod dag par byas nas/ gsang sngags kyi snod du rung bar byas la/ dbang bskur bar bya'o// de yang ye shes spyi blugs kyi dbang rdzogs par bya ba la/ longs spyod rdzogs pa'i sku lngas dbang bskur te/ shar gyi bum pa blangs te/ hUM/ shar phyogs chos dbyings dngul gyi bum pa ni/ / rdo rje mi bskyod yab yum sku bstan pa// byang chub sems dpa'i 'khor dang bcas// snying po don gyi bcud bsdus nas// spyi bo nas ni dbang bskur bas// zhe sdang 'khor ba'i rgyun bcad nas/ / me long lta bu'i ye shes kyis// dbang mchog des ni dbang bskur ro// badzra ka la sha a b+hi Shany+tsi hUM/ lho phyogs chos dbyings gser gyi bum pa na// rin chane 'byung ldan yab yum sku bstan pa// rin chen sems dpa' 'khor dang bcas/ / snying po don gyi bcud bsdus nas// spyi bo ni dbang bskur bas// nga rgyal 'khor ba'i rgyun bcad nas// mnyam pa nyid kyi ye shes kyis// dbang mchog des ni dbang bskur ro/ / rat+na ka la sha a b+hi Shany+tsi traM/ nub phyogs chos dbyings zangs kyi bum pa ni// snang ba mtha' yas yab yum sku bstan pa// pad+ma'i sems dpa'i 'khor dang bcas// snying po don gyi bcud bsdus nas// spyi bo nas ni dbang bskur bas/ / 'dod chags 'khor ba'i rgyun bcad nas// so sor rtog pa'i ye shes kyis// dbang mchog des ni dbang bskur ro// pad+ma ka la sha a b+hi Shany+tsi hri/ byang phyogs dbyings in+d+ra'i bum pa na/ / don yod grub pa yab yum sku bstan pa// las kyi sems dpa'i 'khor dang bcas// snying po don gyi bcud bsdus nas// spyi bo nas ni dbang bskur bas// phrag dog 'khor ba'i rgyun yang gcad/ / bya ba grub pa'i ye shes kyis// dbang mchog des ni dbang bskur ro// karma ka la sha a b+hi Shiny+tsa a/ dbus phyogs chos dbyings rnam dag zhing khams na// bcom ldan kun bzang yab yum sku bstan pa/ / tshom bu lnga yi 'khor dang bcas// snying po don gyi bcud bsdus nas// spyi bo nas ni dbang bskur bas// gti mug 'khor ba'i rgyun bcad nas// chos kyi dbyings kyi ye shes kyis// dbang mchog des ni dbang bskur ro/ / bud+d+ha ka la sha a b+hi Shany+tsi oM/ dering phan chad bu khyod ni// rgyal ba'i sras su dbang bskur bas// nyon mongs lnga dang mtshams med lnga// de nas rang byung dag pa'i sku// mi gnam mya ngan 'das pa yi/ / dbang bskur dam pa thob par shog/ ces longs spyod rdzogs pa'i sku lngas dbang bskur ba bstan pa'o// bar 'dir rin po che sna bdun gyi dbang dang/ bkra shis rdzas brgyad kyi dbang bskur ro// de nas rgyal rtags phyag rgya'i dbang bskur ba la gnyis te/ byang chub sems dpa' drug gi phyag mtshan gyis dbang bskur ba dang/ sangs rgyas kyi gdung brgyud 'dzin pa a tsar+ya mi bzhis 'dod pa'i yon tan lngas dbang bskur ba bstan pa'o/ / de la phyag mtshan gyis dbang bskur ba ni/ sngon sum cu rtsa gsum dga' ldan gyi gnas rnam par rgyal ba'i khang bzangs su/ lha'i dbang po brgya byin gyi btsun mo bzhin// sras nye dbang sum cu rtsa gnyis la/ shing gi rgyal po yongs 'du sa brtol 'bras bu smin pa'i dus su/ lha rdzas kyi me tog dang/ 'bras bu dang/ snying po dang/ sman dang/ rtsi thog dang/ 'bru bcud dang/ gdugs dang/ ba dan dang/ rgyal mtshan dang/ dung dang/ pi wang dang/ gling bu dang/ sil snyan dang/ glu dang/ gar dang/ rol mo dang/ rtse 'jos dbang bskur te/ lha'i rgyal srid thob par byas so// de bzhin du rigs kyi bu khyod la dbang bskur bas/ lha'i dbang po brgya byin lta bu'i dbang thob par 'gyur ro// de nas lha ma yin gyi gnas mi pham rgyal bas byin pa zhes bya bar/ lha ma yin gyi rgyal po thags bzangs rigs zhes bya bas/ shing gi rgyal po yongs 'dus brtol gyi me tog rgyas pa'i dus su/ dpal be sa 'dzin pa dang/ lag na be con dang/ khros pa'i rkan brdebs dang/ rno ba rdo rje mchu can no// de rnams ni dmag dpon du dbang bskur ro/ / phyi ma rnams ni dmag mir dbang bskur ro// 'khor gyi gyad chen po bzhi la sogs te/ dka' ba spyod pa'i skyes bu rnams la/ go mtshon dang/ sta re dang/ mchog gi ha ta dang/ lcags kyu zhags pa dang/ ber ka dang/ mda' gzhu la sogs te/ ma he'i sha dang/ stag dang/ dom dang/ dred dang/ lce spyang dang/ kang ka dang/ mi dang/ khyi dang/ rta la sogs pa'i sha dang/ khrag dang/ dbang pos dbang bskur te/ dmag dpon du dbang bskur ro// dmag byin po rnams ni gtor ma dang/ myos pa'i chang dang/ 'bru'i chang dang/ btsong dang/ la phug dang/ sgog skya yan yad kyi dbang bskur te/ dmag mir dbang bskur ro/ / de bzhin du rigs kyi bu khyod la dbang bskur bas/ 'jig rten dang 'jig rten las 'das pa thams cad dbang du 'dus par 'gyur ro// de nas lho'i 'dzam bu gling mi mjed kyi 'jig rten gyi khams dbus chen po rdo rje gdan du/ mi'i ston pa shakya seng ges shing gi rgyal po yongs su sa brtol gyi lo 'dab rgyas pa'i dus su/ 'khor sa bcu'i byang chub sems dpa' rnams dang/ 'phags pa nyan thos dgra bcom pa rnams la/ de bzhin gshegs pa lnga'i bum pa dang/ seg par dang bla gos dang/ sangs rgyas kyi sku gdung rin po ches dbang bskur ro// de bzhin du rigs kyi bu khyod la dbang bskur bas/ 'gro ba rnam par 'dren pa'i stobs dang ldan par 'gyur ro/ / de nas bdag ma yin pa'i 'jig rten gyi khams su/ byol song gi rgyal po a ba glang mgo can zhes bya bas/ byol song gi gtso bo lnga la sogs te/ gti mug gi bdag tu 'dzin pa rnams la/ shing gi rgyal po yongs su sa brtol dbugs 'byin pa dus su/ shes rab kyi po ti dang/ lha'i rol mo dang/ sgra snyan dang/ bden pa'i tshig gis dbang bskur ro// de bzhin du rigs kyi bu khyod la dbang bskur bas/ shes rab ma rmongs pa dang/ lha dang mi'i mdzad spyod thams cad la longs spyod par gyur to// de nas 'jig rten gyi khams tir ka zhes bya ba na/ yi dwags rgyal mo kha 'bar ma zhes bya bas/ shing gi rgyal po rgyud ba'i dus su/ 'khor gyi pre ta ka zhes bya gsum la/ rin po che sgrom bu dang/ 'dod pa'i yon tan lngas dbang bskur ro// de bzhin du rigs kyi bu khyod la dbang bskur bas/ 'jig rten gyi snying po byang chub la ma gnas kyi bar ru/ yi dwags kyi sdug bsngal las grol bar gyur to// de nas 'jig rten gi khams rme sha can zhes bya ba na/ gshin rje chos kyi rgyal pos/ 'khor gyi mgo brnyan chen po bzhi la/ dpag bsam gyi shing dang/ khrus kyi rdzing bu dang/ ye shes kyi mar me dang/ snyan pa'i tshig gis dbang bskur ro// de bzhin du rigs kyi bu khyod la dbang bskur bas/ dmyal khams bcu drug gi sdug bsngal/ bde ba chen po longs spyod du gyur to// de yan chad thub pa drug gi phyag mtshan gyis dbang bskur bar bstan pa'o//// de nas paN+Di tas dbang bskur ba ni/ gnam la rdo rje zam ma chad/ / sa la dkyil 'khor rigs ma yal// bar na gdams ngag zam ma chad// ces 'byung ste/ slob dpon dga' rab rdo rjes/ 'jam dpal bshes gnyen la sogs pa rim par dbang dang 'brel ba'i chos bstan pa'i tshe/ slob ma bkrag dang gzi mdangs bskyed cing/ lha'i longs spyod thob par bya ba'i phyir/ 'dod pa'i yon tan lngas dbang bskur te/ tshe dang/ gal phyi dang/ dza ga dang/ dzag ti dang/ bla god dang/ zla rgyas dang/ zla khrom dang/ zla tshes dang/ drag po dang/ kun tu rgyu la sogs te/ 'dod pa'i yon tan lngas dbang bskur ro// de bzhin du rigs kyi bu khyod la dbang bskur bas/ longs spyod phun sum tshogs pa la longs spyod par gyur cig/ ces ye shes bla ma chen po'i rgyud las/ dbang bskur bla ma rin po che'i rgyud phyung ste/ ye shes spyi blugs su dbang bskur bar bstan pa'i le'u ste gnyis pa'o//// de nas byang chub sems dpa' sems dpa' chen pos/ sangs rgyas mar me mdzad stong gi gtsug phud rin po che la phyag btsal nas/ byang chub sems dpa' sems dpa' chen po/ ma 'ongs pa'i sems can rnams la sangs rgyas kyi 'bras bu smin par bya ba'i thabs ni/ dbang dang 'brel pa'i chos 'phags na/ dbang gi 'bras bu mthar phyin pa'i bya btsal dag bral ba'i chos ji ltar lags/ bstan du gsol ces zhus te/ de nas sangs rgyas mar me mdzad stong gi gtsug phud dang rin po che tshad med pa bzhi'i ting nge 'dzin las bzhengs te/ zhal 'dzum pa mdzad nas/ ro langs bde ba lha'i bu nyon cig/ nga la phyogs bcu dus gsum gyi sangs rgyas thams cad kyi dbang rin po che rdzogs pa yin te/ dbang thams cad kyi snying po rig pa rtsal gyi dbang gis skad cig ma gsum la grol ba 'di la bskur thabs lnga ste/ ye shes kyi mar me dang/ rin po che gser gyi thur ma dang/ me long dang/ sangs rgyas kyi mtshan dang/ rdo rje dril bu dang lnga'o// de nas tshig 'di bsgrags te/ dkyil 'khor la bskor ba byas la/ sgo la dar gyi yol ba bres la/ bad+ha bri bar bya'o/ / kye ma hA su ka rigs kyi bu khyod yongs su mya ngan las 'das par 'dod dam bya'o// na mo bud+d+ha ya ho/ 'o na khyod sa gzhi 'o ma shi sa shi'o// rigs kyi bu d+ha hi kan/ d+ha hi kan ma lA ma lA/ mahA su kha ri sid+d+hi ho/ de bzhin rim pas bstan pa ni// man ngag thabs kyi rgyal po yin// de ni bden par bstan par bya'o// mar me lag tu bskur ba/ rigs kyi bu 'jig rten gyi khams su nga ma 'ongs pa'i tshe/ gyad yul shing sa la chen po'i snying po me tog pad+ma kha stong dang ldan pa'i sbubs nas 'than te/ sku yongs su rdzogs pa'i dus su/ rang gi snying po byang chub kyi sems gsal ba'i sgron mer shar te/ ngas mthong ma myong ba'i yul mthong ngo/ / rigs kyi bu de bzhin du ye shes kyi mar me gsal ba'i sgron ma 'dis dbang bskur bas/ ma rig pa'i ling tog bsal nas/ sangs rgyas kyi bden pa mthong bar 'gyur ro// rigs kyi bu rang rig pa'i ye shes la 'gyur ba med cing/ rnam rtog gis ma bslad pas/ yid gang du yang 'jug pa med do// rigs kyi bu de bzhin du rin po che gser gyi thur mas dbang bskur bas/ 'gyur ba med par rnol myur ba'i stobs dang ldan par gyur to/ / rigs kyi bu sangs rgyas kyi zhing yongs su dag pa'i yul du snang ba'i dus su/ gzung 'dzin gyi mtha' las 'das so// rigs kyi bu de bzhin du me long lta bu'i ye shes 'dis dbang bskur bas/ sangs rgyas kyi zhing yongs su dag ba snang bar gyur ro// rigs kyi bu rang byung gi ye shes la 'gag pa med par shar ba'i dus su/ sku gsum gyi snang ba mngon du gyur te/ ye shes kyi gzugs brnyan la thim pa'i dus su/ len ma myong ba'i lus blangs te byang chub kyi snying po la byang chub kyi snying por shar ro// rigs kyi bu de bzhin du 'od gsal ba 'dis dbang bskur bas/ snying po byang chub btsal dang bral ba'i sku thob par gyur to/ / rigs kyi bu rdo rje lta bu'i sku dus gsum du mi 'gyur bar bstan pa'i dus su/ spros pa'i mtha' las 'das te/ thugs rje 'byung ba'i sgo ma 'gags pas/ sprul pa'i sku gsung rig pa'i khu byug tu bsgrags so/ / de bzhin du rtags kyi rdo rje dang dril bus dbang bskur bas/ rigs kyi bu rdo rjes ni 'gyur ba med pa la/ dril bus ni thugs rje'i rtsal 'gag pa med pa'i dbang thob par gyur to/ / kye rigs kyi bu ma 'ongs pa'i sems can rgyud dag pa rnams la ngas bstan pa bzhin byos shig/ ces bka' bsgo nas/ dga' rab rdo rje de bzhin du mdzad pa ni/ gnam la rdo rje zam ma chad de lta ba mi 'gyur ba la bzhag/ sa la dkyil 'khor rigs ma yal te/ rtogs pa'i ye shes rang gsal/ bar na gdams ngag zam ma chad de/ dus gsum gyi sangs rgyas dgongs pa brgyad pa dang/ rigs 'dzin brdas brgyud pa dang/ gang zag rna bas brgyud pa/ rgyud man ngag tu dril nas gter du sbas so// sangs rgyas mar me mdzad stong gi gtsug phud rin po che/ rig pa rang shar gyi dgongs pa/ rig pa spyi blugs kyi dbang du bstan pa/ ye shes bla ma chen po'i rgyud las/ dbang bskur bla ma rin po che'i rgyud bstan pa'i le'u ste le'u'i lag gsum pa'o//// de nas byang chub sems dpa' sems dpa' chen pos yang zhus pa/ kye kye thugs rje chen po ma 'ongs pa'i sems can rnams la/ tshe dbang rin po che gdams pa'i dus su/ slob ma'i skyon yon bstan pa dang// dus dang gnas kyi skyon yon gang// rdo rje 'chang gis bstan du gsol/ / ces zhus te/ rdo rje 'dzin pa nyon cig/ slob ma'i skyon yon rnam gnyis te/ sbang bar bya ba'i slob ma bzhi// dang dung blang ba'i slob ma bzhi// blo dman shes rab chung ba dang// bud med lus ni dmad pa dang/ / gsang dbang med par rdzob pa la// rgyud kyi rgyal po don mi bshad// bshad kyang blo rgyud ma grol bas// de bas zhib tu bstan pa med// seng ge dkar mo'i 'o ma 'di// rin chen gser gyis 'dzin gyur gyi/ / snod ngan gzhan du blags pa na// snod 'jig 'o ma 'bo bar 'gyur// zhes gsungs so// dad ldan brtson 'grus che ba dang// bla ma la ni gus pa'o// blo brtan 'gyur med sgom sran che// rtag tu snying rje ldan gyur ba/ / de ni sgrub pa po ru bzhag/ sgrub pa brtson zhing dam tshig che// zhe gnag khong gdug brtan par smra// bstan pa bsrung ba'i snod du bzhag/ bud med mgo 'gar shes rab zab// dad pa brtan zhing theg chen mos/ / de ni snying rje'i slob mar bzhag/ kye rdo rje 'dzin pa nyon cig/ tshe dbang rin chen rdzogs phyed pa'i// dus kyi sbyor ba bstan pa ni// rnam pa bzhi ru shes bya ste// de yi mdo ni bsdu ba gces/ / ngas bstan khyod kyis yid la zung// dbyar dgun ston dpyid bcu gnyis la// dpyid zla gsum ni srin bal gyi phung po lta bu'o// dbyar zla gsum ni pad+ma lta bu'o// ston zla gsum ni rin po che lta bu'o/ / dgun zla gsum ni rdo rje lta bu'o// de yang shing gi rgyal po yongs su sa brtol dang sbyar na/ rtsa ba dang/ sdong po dang/ myu gu dang gsum/ lo 'dab dang/ me tog dang/ 'bras bu'o// de yang ston zla ra ba la rdzas bsags/ ston zla 'bring po la bsgrub pa bya/ ston zla tha chung gi nya la dbang bskur/ dgun zla ra ba'i nya la gdam ngag gi gzhug rdzogs par bya'o// de ni sbyor ba dang po'o// de yang thub pa drug ltar byas na/ tsan+d+ra bcu gnyis 'bring po la// brgyad la zhugs la rgyal par rdzogs// de ni sbyor ba 'bring po'o// de yang paN+Di ta'i bskur thabs ni// zla ba bcu gnyis gang yang rung// bcu gcig bco lnga'i bar gyis rdzogs/ / de ni sbyor ba tha ma yin// dus tshod tshes grangs bzang po la// bkra shis brjod cing dbang bskur na// tshe dang longs spyod rgyas 'gyur zhing// bu tsha rigs rgyud 'phel bar 'gyur// zhes dga' rab rdo rjes gsungs so/ / de nas byang chub sems dpa' chen pos zhus pa/ thugs rje chen po tshe dbang rin po che bskur ba'i dus su/ gnas pa'i yon tan bstan du gsol// ces zhus te/ rdo rje 'dzin pa nyon cig/ bkra mi shis pa'i dbang gnas dang/ ya ga bar chad kyi gnas dang de la rme sha can gyi grong khyer du gtugs pas/ zin pa'i grong khyer du/ lha 'dre drag po rgyu srang dang// bsod nams zad pa'i grong khyer dang/ / mgar ba lham mkhan yug sa mo// grong khyer chen po'i dbus dag tu// rnal 'byor pa yis don mi 'grub// ces gsungs so// ri gsum 'dus pa'i rtse mo dang// rtsi shing sman ljongs bya skad snyan/ / rgyab mtho mdun gzhol gzhog skyab pa// gzhan yang bkra shis nyams dga' yid 'thad dang// bsod nams grub pa'i dgon pa dang// grong zad mtha' dang nags tshal du// dam pa'i don de sgrub par gsungs/ / zhes ye shes bla ma chen po'i rgyud las/ dbang bskur bla ma rin po che'i rgyud// sangs rgyas mar me mdzad stong gi gtsug phud rin po ches mdzad pa las le'u bzhi pa'o//// A tsar+ya bi ma la mi tra dang/ bod kyi lo tsa ba ska cog zhang gsum gyis bsgyur cing zhus te gtan la phab pa'o//// rdzogs so//// tha ras rgya yis btab bo// sngon du 'gro ba'i bsten pa ste sta gon cho ga rdzogs pa'o// dang po la ni sgrub pa 'byung/ / ting 'dzin sngags dang 'phro 'du bya// gnyis pa tshe dbang bskur bar bya// gsum pa ye shes spyi blugs dang// bzhi pa sangs rgyas rab bdun dang/ lnga ba rig pa rtsal gyi dbang// rim pa bzhin du las la sbyar/ / rdzogs dang rgyud lung man ngag bshad// nga yis bstan pa'i tshe dbang 'di// ma bskur bar du bshad pa min// ces dga' rab rdo rjes 'jam dpal la gdams pa'o// zhes ye shes bla ma'i le'u lag rdzogs so/ /// a+thi+-i/ rgya gar skad du/ de wI ma ri ts+yai ta tan+t+ra/ bod skad du/ lha mo 'od zer can gyi rgyud/ bcom ldan 'das dpal rdo rje sems dpa' sku gsum ye shes lnga'i bdag nyid du snang ba/ byang chub sems kyi lha mo gsal ba'i sgron ma mar me mdzad gtsug gi rgyan gcig ma la phyag 'tshal lo// chos kyi sku mtshan ma'i yul las 'das kyang/ gzugs kyi sku mngon par snang bas/ sangs rgyas kyi bden pa mthong bar byed pa/ lha mo 'od zer can gyi rgyud 'di grol bar bya'o// rigs drug gi sems can la chos kyi sku rang bzhin gyi gsal ba lnga yod de/ de yang yang dag par rdzogs pa'i sangs rgyas la 'od dpag tu med par gnas so/ / byang chub sems dpa' rnams la dpag tu yod par gnas so// lha rnams la gzhal du yod par gnas so// mi rnams la mtshon du yod par gnas so// ngan song gsum las sems rang gsal ba tsam du gnas so/ / mdzod bu'i 'od zer ma 'gags mkhyen mnga' ba// mgon po spyan ras gzigs la phyag 'tshal lo// lha mo 'od zer can gyi rgyud 'di la le'u gsum gyis bstan te/ le'u dang po chos kyi sku la 'od zer 'byung bar bstan pa dang/ le'u gnyis pa 'od zer rnam par dag par bstan pa dang/ le'u gsum pa sems can thams cad la mtshon pa'i ye shes 'od rang chas su bstan pa dang/ gsum gyis bstan to// de nas rgyud dag pa'i rdo rje 'chang chen pos mdzod spu'i bu ga nas 'od zer lnga bkye bas 'jig rten gyi khams snang bar byas te/ 'od zer de'i byin gyis brlabs las/ sangs rgyas bde ldan mgon po spyan ras gzigs zhes bya ba/ sku mdog dkar po 'od zer gyi 'phreng bas skor ba/ phyag g.yas pa skyabs sbyin gyi phyag rgya dang ldan pa/ g.yon pa pus mo la rten pa/ pad+ma'i gdan la bzhugs pa gcig rang byung du mdun du lhag ste/ kye kye thugs rje chen po sems can gyi nyon mongs pa'i dug lnga gdul du gsol/ mdzod spu'i bu ga nas 'od zer rnam pa lnga 'phros nas 'jig rten gyi khams snang bar mdzad na/ bdag gis sems can gyi don du 'od zer lnga mi spro ba ci ste/ yang dag par rdzogs pa'i sangs rgyas la sku rnam par dag pa'i 'od lnga 'phros pa 'di ci'i rgyu ci'i rkyen/ chos kyi sku ni rang bzhin gyi stong na/ gzugs kyi sku ye shes sgyu ma'i lus su 'byung ba 'di ji lta bu lags/ zhes zhu ba zhus te/ de nas bcom ldan 'das ting nge 'dzin las bzhengs te/ zhal 'dzum pa mdzad nas ljags kyi pad+mo las 'od zer lnga spros te/ byang chub sems dpa' chen po khyod kyis dri ba gsum dris pa de legs so// yang dag par rdzogs pa'i sangs rgyas la sku rnam par dag pa ye shes sgyu ma lta bu'i sku 'byung ba ni/ ye shes lnga'i rtsal ma 'gags par 'char te/ de yang shes rab 'gag pa med pa stong pa/ ye shes kyi snying por gsal ba dang/ shes rab mi g.yo ba mnyam pa nyid du gnas pa dang/ shes rab rgyun mi 'chad pa bye brag tha dad du shes pa dang/ shes rab zag pa med pa lhun gyis grub pa dang/ shes rab 'gyur ba med pa rang bzhin rnam par dag pa dang lnga bya btsal med pa'i bdag/ sangs rgyas kun gyi rang lus yin/ / gcig pu rab tu che ba'i lha// nam mkha' nyi ma'i tshul du gnas// rdo rje lta bu'i ting 'dzin la// 'du 'bral med par rtag par bzhugs// zhes bka' stsal pas/ mgon po spyan ras gzigs nyid ye shes kyi snang bar gang rgyas te 'od zer lnga phyogs bcur khyab par shar to/ / zhes dri ba dris pa gsung pas mgon po spyan ras gzigs kyi bden pa mthong ngo// don thugs su chud do/ zhes lha mo 'od zer can gyi rgyud las/ chos kyi sku la 'od zer 'byung bar bstan pa'i le'u ste dang po'o//// de nas byang chub sems dpa' chen pos rdo rje 'dzin gyi mdun du bka' nod pa'i tshul du thal mo sbyar nas/ thugs rje chen po yang dag par rdzogs pa'i sangs rgyas kyi ngo bo dang/ rang bzhin ni dpag pa'i mtha' las 'das na/ thugs rje sprul pa'i sku 'od zer du snang ba'i tshul du bden nam/ 'on te snang tshul dpag pa las 'das/ dpag pa las 'das na thugs rje'i tshul du byung ba 'gag gam mi 'gag/ de bdag gis ma shes ma 'tshal to// ji ltar lags bcom ldan 'das kyis bstan du gsol/ ces dri ba dris so// de nas yang bcom ldan 'das mnyam pa'i ting nge 'dzin las bzhengs nas/ zhal 'dzum pa mdzad nas bri ku ta gyen du 'greng ste/ ljags kyi pad+mo las 'od zer lnga spros nas/ byang chub sems dpa' khyod nyon cig/ sngon byung gi dus na/ nga ma 'ongs pa'i sngon rol na thog ma'i sangs rgyas 'od mi 'gyur/ rang byung gi gzhal yas khang chen po dang 'du 'bral med par bzhugs pa/ snying po byang chub na bzhugs pa/ snying po byang chub na bzhugs pa'i sku/ 'od zer gyi phung por gzhi nas gnas te/ 'gog pa med kyang/ 'od zer gyi phung po de nyid rtag pa yang ma yin/ mi rtag pa yang ma yin/ ci ste 'od nyid chos kyi sku las 'byung ba'i phyir/ chos sku de nyid yang dag par yod pa yang ma yin/ med pa yang ma yin no// de bzhin du 'od zer gyi phung po de snang ba yang ma yin/ mi snang ba yang ma yin te/ snang ba dang mi snang ba'i mtha' las 'das pa'o// de ci'i phyir zhe na/ 'od zer de la rang bzhin med pas nam mkha'i mtha' dang mnyam la/ 'od de ma 'dres la yongs su rdzogs par gnas pas/ dper na nam mkha' dang ri mo'i tshul du gnas so// de'i phyir byang chub nyid snying po'i rang bzhin du 'od du gsal/ snying po rnam dag ye shes 'od gsal ces gsungs so// de yang thugs rje 'byung ba'i dus su sgo thams cad nas 'od zer lnga lnga 'byung ste/ sems can la bstan pa'i snying po re re 'byung ngo/ / kye sems dpa' chen po ngas sems can gyi don du sku gsum gyi thugs rje bsam gyis mi khyab par bstan kyang/ don brjod pa las 'das pa'i chos sangs rgyas med pa'i klong du la bzlas na/ bskyed rdzogs rnam pa gsum du 'du bral med par ma bstan na/ sangs rgyas kyang thugs rje 'byung ba'i sgo 'gags pas/ dper na u dum ba ra'i me tog gi tshul du bstan to// sku de ltar bstan kyang bsdu ba gcig tu ma bsdus na/ chos thams cad kyi mdo mi 'dus te/ de'i phyir rigs lnga 'byed par 'das/ sku lnga ngo bo nyid kyi skur 'das/ yum lnga mkha' 'gro klong rnam par dag par 'das/ ye shes lnga mi gnas pa'i ye shes chen por 'das/ phyi nang gi 'byung ba lnga nam mkha' chen por 'das/ 'od lnga rang byung gi 'od chen por 'das/ zer lnga thugs rje'i rtsal du 'das/ rgyud thams cad kun tu bzang po rtsa ba'i rgyud chen po yi ge med pa'i rgyud du 'das/ lung thams cad snying po byang chub sems su 'das/ man ngag thams cad bya btsal med par 'das/ de dag thams cad kyang chos yin te/ chos thams cad rnam par grol ba'i ye shes kyi klong du 'das/ sangs rgyas thams cad sangs rgyas med pa'i klong du 'das so// 'das zhes bya ba'i tshig de dag thams cad kyang/ chos kyi rgyan du spros pa yin te/ de tsam las kyang 'das na/ rigs kyi bu chos thams cad ni tshig gi bla dgas so// rigs kyi bu byang chub kyi snying po la snying po yod med kyi mtha' las 'das so// sku gsum du gnang bar bstan pa yang// dngos po med par rang bzhin gyi rtsal shes bya la ma rmongs pa'o/ / gang gis gang la dris pa de/ de yis de la de bstan pa// de yi rnam par grol ba'o// de thob de mthong de mi gnas// de grol de yi thams cad shes// de med par yang de'i 'byung ngo/ / zhes lha mo 'od zer can gyi rgyud las/ 'od zer rnam par dag par bstan pa'i le'u ste gnyis pa'o//// de nas byang chub sems dpa' sems dpa' chen pos yang dag par rdzogs pa'i sangs rgyas la/ sgyu ma lta bu'i sku dang thugs rje'i 'od zer 'byung ba lags na khams gsum gyi sems can la 'od zer ji ltar gnas/ snying po byang chub kyi sems su ni gcig na/ 'od zer med na thugs rje'i rgyun thag ma chad dam/ yod na ji ltar gnas bstan du gsol/ bshad du gsol/ zhes zhus te/ de nas yang bcom ldan 'das 'od zer gyi phung po lnga'i ting nge 'dzin las bzhengs te/ rigs kyi bu snying po byang chub kyi sku dri ma med pa'i ye shes so so ma yin tha mi dad pas/ 'gro ba yongs la khyab pa'i phyir/ de bzhin gshegs pa lal stobs dang mi 'jigs pa ji ltar gnas pa de bzhin du 'gro ba yongs la khyab ste/ dper na skyes bu'i byad rang la yod kyang me long ma bstan par rang gi bzhin mi mthong ba de bzhin du/ stobs dang mi 'jigs pa yod kyang seng ge'i bu ma'i mngal du btsas pa bzhin 'don ma nus te/ ye shes snang ba'i bag la zha bas/ thabs mkhas pas bstan par bya'o// khyod nyon cig/ byang chub sems dpa' dpag tu yod pa'i 'od zer lnga rang chas su gnas te/ shes bya'i sgrib pa shes rab kyi dpag tu yod do// lha rnams la gzhal du yod pa'i 'od lnga rang chas su gnas te/ de yang mos pa'i spyod pa'i bsod nams las grub pas mngon du snang ba'o// mi rnams la mtshon du yod pa'i 'od lnga rang chas su grub pas/ de yang shes rab zab mo bstan dka' ba/ / zag med kyi snying po byang chub sems// mtshon gang 'od kyi dkyil 'khor// snying po byang chub sems kyi sku// zab cing cha phra 'gag med rang bzhin gsal// zhes 'byung ste/ seng phrug ma dang bral nas 'phyo ba ltar/ / bdag dang bral bas ye shes dbyings na gsal// zhes gsungs so// ngan song gsum la rang byung gi ye shes yod kyang 'byin mi nus te/ shes pa rang gsal ba tsam mthun pa'i lam snang ste/ bsod nams kyi stobs chung bas bden pa la spyod ma nus so// kye sems dpa' chen po sangs rgyas thams cad la zag med kyi ye shes nam mkha' dang nyi ma'i tshul du gnas so// rtog pa'i mtha' shes rab rang bzhin med pas shes par bya'o/ / thugs rje'i bye brag chu bo gang+gA'i rgyun bzhin mi 'chad pa nyi ma'i zer lta bur shes par bya'o// sems can la khyab pa'i nyi ma'i 'od bzhin khyab pas bde ldan phun sum tshogs so/ / zhes sangs rgyas la 'od zer 'byung ba dang/ sems can la 'od zer 'byung ba bstan pa/ ston pa rdo rje sems dpas bstan/ zhu ba spyan ras gzigs kyis zhus/ sdud pa dga' rab rdo rjes bsdus so/ zhes lha mo 'od zer can gyi rgyud las/ sangs rgyas ye shes lus can du bstan pa'i le'u ste gsum pa'o//// rgya gar slob dpon bi ma la mi tra dang/ bod kyi lo tsA ba ska cog gsum gyis bsgyur cing zhus te gtan la phab pa/ lha mo 'od zer can gyi rgyud rdzogs so//// rgya gar skad du/ badzra DA ki ni dud liM ma hA tan tra nA ma/ bod skad du/ rdo rje mkha' 'gro ma'i 'dre rgyud chen po zhes bya ba/ dpal kun tu bzang po la phyag 'tshal lo// 'di skad bdag gis thos pa'i dus gcig na/ bcom ldan kun tu bzang po dang// dpal ldan rdo rje sems dpa' yis// byin rlabs mkha' 'gror sku sprul te// mkha' 'gro'i tshogs la brda yis bshad// brda dang don rnams bstan pa'i dus/ / dur khrod 'bar ba'i gnas chen du// dpal ldan pad+ma'i sku cig skyes// mkha' 'gro ma rnams rab tu dgyes// he he bcom ldan longs sku'i gtso// bdag cag mkha' 'gro 'khor bcas la// thog ma med pa'i sngon rol na/ / de yi gnas lugs ji ltar lags// brda dang bcas pa gsung du gsol// ces zhus so// de nas ston pas bka' stsal pa// sngon byung gzhi yi dus nyid nas// grong khyer gsum gyi bdag po de/ / nor bu rin chen 'bar ba yi// nor bu kun gyi 'byung gnas de// kun gzhi skyed pa'i ma ru gnas// mdzes ma rlung gi rkang pa can// rkang pa med par 'gro yang srid// dgung mtha' sleb pa ngo mtshar che// zhes brda de gsungs so/ / don ni khams gsum spyi sa de// kun gzhi srid pa'i mdzod chen yin// sku gsum 'char ba'i gzhi yin te// rlung gis sku gsung 'grub par byed// myur mgyogs shes rab rlung gi gzhi/ / dngos med zang thal nam mkha' 'dra// 'khor ba thog ma'i gzhi ma de// rnam par rtog pa med pa la// rtog pa mi srid srid pa'i chos// rang shar rnam drug gzhi shar bas// thams cad rang shar ngo mtshar che/ / zhes gsungs so// 'dre rgyud chen po las/ phun sum tshogs pa lnga dang gzhi bstan pa'i le'u ste dang po'o//// de nas zla ba'i 'od zer gyis// bcom ldan rdo rje sems dpa' la// de la shar lugs ji ltar lags/ / ston pa nyid kyis gsung du gsol// ces zhus so// ston pas bka' stsal pa/ a ni yig 'bru kun gyi mes// ma ni yig 'bru kun gyi phyir// ha 'gyu rten med yi ge de// dbyings dang ye shes rtsal gsum gyi/ / spyi sa'i gzhi las grub pa yi// rlung gi rta po bzhi la shar// ston gsum rtsa ba 'dug gi mi// khams gsum srid pa gsum la dbang// myur mgyogs rlung gi rkang pa can// za 'og mdzes pa'i sga bstad nas/ / mthing gi mu tig srab mthur shar// 'khor lo 'bar ba'i glo rmed bcug/ srid pa gsum la rgyug pa'i rtags// zhes gsungs so// brda don bshad pa bstan pa ni// rlung lnga gzhi la ye nas grub/ / rlung gsum rtsa ba dug gsum po// khams gsum srid par byed pa'i gzhi// thogs pa med pa'i rlung po shar// 'od lnga rang snang gsal ba la// ma rig gzung 'dzin gnyis su shar// 'gro drug rtsa ba de yi rgyu/ / srid gsum rtse mo zhes kyang bya// khams gsum rtsa ba zhes kyang bya// 'gro drug mes phyi zhes kyang bya// kun gyi blon po zhes kyang bya// srid pa'i rgyal mo sde brgyad mo// tshom bu lnga yi rtsa ba yin// dkyil 'khor gsum gyi brda rtags shar/ / rang shar gsal ba'i me long yin// rgyu las rkyen shar nam mkha'i 'ja' ltar shar// ces gsungs so// swa ya kA ya d+harmA d+hA tu b+ha/ zhes brda'i don gsungs so// thig le 'dre rgyud chen po las/ gzhi las rang shar bstan pa'i le'u ste gnyis pa'o//// de nas zla ba'i 'od zer gyis// bcom lda rdo rje sems dpa' la// sku gsum shar lugs ji ltar lags// zhes zhus so// ston pas bka' stsal pa/ sngon 'byung chen po kun gyi mes// yang rtse gzhi la lhun gyis grub// nor bu rin chen gzhi nas 'phags// nor bu rnams kyi mes po yin// nor bu sna tshogs skyed pa'i ma// 'gag pa med pa'i nor bu 'chang/ / bcom ldan kun tu bzang po yis// thog ma gzhi mo'i don la mkhas// bar du rgyu rkyen gnyis la mkhas// tha mar rang shar rang grol mkhas// mkhas pa chen po bcom ldan 'das// swa yang ka ra'i don rtogs mkhas/ / chos sku gzhi nas rang la shar// sangs rgyas kun gyi yang mes po// chos sku thig le nyag gcig yin// d+harma kA ya ti la e ka'i don// byin rlabs ston pa rdo rje sems dpa' 'ang/ / longs spyod rdzogs sku kun gyi mes// sprul sku zla ba'i 'od zer khyed// 'gro ba'i don la zhu tshul ston// brda yi don rnams nga yis bshad// ces gsungs so// thig le 'dre rgyud chen po las/ sku gsung shar lugs bstan pa'i le'u ste gsum pa'o//// de nas zla ba'i 'od zer gyis// dpal ldan rdo rje sems dpa' la// 'gro drug srid pa ji ltar chags// phyi nang snod bcud ji ltar 'khrul// ces zhus pa/ ston pas bka' stsal pa// swa yang ka ra'i don ma rtogs// ha li nag mo lha mo lnga la bzhugs// rgyu rkyen 'dus pas 'gro drug 'khrul// dug lnga khong khro dag ni rgyu// rang snang 'od lnga rang gdangs rkyen/ / gnyis 'dzin ma 'gag 'bras bu yin// dug lnga shugs la shar ba yis// 'bras bu 'gro ba ris drug 'khyams// dug lnga 'byung ba lnga yi mes// rang snang rang la gsal ba 'byung lnga'i phyi mo yin// gling bzhi gling phran 'khrul pa yin pa ngo mtshar che/ / 'khrul pa'i 'bras bu phyi nang gnyis su shar// rang shar 'khrul pas 'khor ba yin// mi 'khor mi srid shar ba srid pas lan// phyi nang gnyis la ltos nas skal pa'o/

CLOSE WINDOW