/ dris pa'i le'u ste gnyis pa'o//// de nas kun tu bzang pos brjod pa// dngos po chos sku'i rang 'od yin// dngos po logs na yod gyur na// rig drug so la tha dad med/ / byang chub sems kyi rtsal snang yin// rang 'od sgro lnga'i ngo la snang// skye med ye shes rtsal shar la// sems nyid dbugs la rlangs su 'gyus// las rlung rtsal snang tha dad la// sha khrag chos sku'i rang 'od yin/ / rang byung ye shes sgrib med la// snang ba sems kyi rtsal shar yin// sgo lnga'i ngo la tha dad kyang// sgo lnga ye shes rang 'od yin// ye shes 'od la tha dad med// byang chub sems la dngos po med// ye shes bkrag la las 'gyus/ / 'byung ba 'khor 'das tha dad kyang// sems nyid dbyings la dbye ba med// dngos med rig pa ye shes zer// ye shes zer la gnyis snang med// gnyis snang 'char ba rang 'od yin/ / chos nyid dbyings la 'du 'bral med// ye shes bkrag las zhen chags med// ye shes 'od la zhen chags kyang// thams cad ye shes rang 'od yin// stong nyid ye shes brdal khyab 'bar// ye shes rang 'od 'bar ba che/ / nam mkha'i sprin ltar dngos med par// tha dad med de chos kyi dbyings// ye shes snying po zang thal yin// ma rig ye shes 'od zer yin// tha dad med de ye shes rang// ye shes rgyal ba chos kyi sku/ / ye shes lnga yi rtsal shar yin// dug lnga ye shes rlangs chen yin// tha dad med de ye shes 'bar// ye shes snying po bgrod med la// sa lam snang ba rig pa'i bkrag/ bgrod 'jug med pa ye shes zer/ / dper na nam mkha'i bya lam 'dra// ma bcos ye shes snying po yin// sdug bsngal snang ba chos nyid klong// tha dad med de ye shes zer// dper na thag pa sprul mthong bzhin// ye shes 'bras bu chos kyi sku/ / spangs thob med pa chos kyi dbyings// tha dad med pa ye shes lngas// 'du 'bral med pa chos kyi klong// tha dad 'dod pa ye shes rtsal// dbye ba med pa kun gzhi'i klong// dang po byung yang chos sku'i rtsal las byung/ / da lta snang yang ye shes zung du snang// tha ma grol kyang chos kyi dbyings su grol// chos sku 'gyur med ye shes de// ye nas rang byung rang shar la// bshad pas go ba ma yin no// ye shes snang ba rang dwangs la/ / lan btab pa'i le'u ste gsum pa'o// de nas kun bzang mos gnyis su med pa 'di brjod do// kun gzhi stong pa'i ngang nyid la// dngos po sems nyid rtsal shar yin// dper na nam mkha' stong bzhin no/ / chos sku 'gyur ba med pa las// skye shi 'od gsal rlangs pa yin// dpe ni rgya mtsho'i rba rlabs 'dra// ye shes sgrib byed med pa la// snang ba rig pa'i rtsal shar yin// dpe ni me long gzugs brnyan 'dra/ / sems nyid spros pa med pa la// 'khor 'das 'char ba 'bru lnga'i rlangs// dpe ni rgya mtsho'i chu gzugs 'dra// rig pa dngos po med pa la// gnyis snang 'byung ba'i sgo lnga'i 'od// dpe ni chu dang 'khyag pa 'dra/ / chos nyid 'du 'bral med pa la// zhen chags 'byung ba ye shes bkrag/ dper bar snang la 'ja' shar ba dang 'dra// kun gzhi stong pa rang nyid la// bag chags 'byung ba rig pa'i zer// dpe rmi lam bu snang la dang 'dra/ / ye shes sgrib med zang thal la// ma rig 'byung ba rig pa'i 'od// dpe thag pa sprul du mtho ba 'dra// chos sku snying po 'gyur med la// dug lnga 'byung ba ye shes rtsal// dpe nam mkha'i sprin dang 'dra'o/ / chos sku'i thig le nyag gcig la// sa lam 'byung ba 'bru lnga'i bkrag/ dpe nam mkha'i bya lam dang 'dra// ye shes snying po rang 'byung la// sdug bsngal 'byung ba chos nyid bkrag/ dper na smig sgyu'i snang ba 'dra/ / chos sku 'gyur ba med pa la// 'bras bu 'byung ba rig pa'i rtsal// dpe nam mkha'i thog dang 'dra// zhes gsungs so// de nas ye shes de bzhin gshegs pa thams cad kyis gsungs pa/ / yangs so che'i chos chen po// rtogs so ye shes snying po'i sku// stong ngo byang chub sems kyi ngang// snang ngo ye shes rig pa'i gdangs// shar ro ye shes rig pa'i tshogs// gsal lo ye shes 'od gsal bkrag/ grol lo ye shes rtsa lnga'i lam// 'byung ngo las kyi rtsa bran bcu// rdo rje sems dpas brjod pa// dngos po gtan la ma phebs pa// 'gyur med rang 'byung kun gzhi'i klong// ye shes gtan la ma phebs pa/ / mchog gi 'od zer gsal sgrib byed med// sems nyid gtan la ma phebs pa// ye shes rtsa lnga dngas la sangs// rig pa gtan la ma phebs pa// rtsa bran bar snang rtsa ru shar// kun gzhi'i klong la yangs dog med/ / ye shes gdangs la phyi nang med// chos kyi sku la 'gyur ba med// rig pa'i mdangs la gsal 'grib med// sems nyid klong la 'du 'bral med// rang byung sku la rgyu rkyen med// chos sku'i bkrag la kha dog med/ / ye shes zer la spros pa med// chos sku'i rtsal la 'gag pa med// ye shes bkrag la sgrib byed med// rig pa'i rtsal la phyi nang med// sems nyid rtsal la tha dad med// chos sku'i 'gros la 'gyur ba med/ / ye shes 'gros la yangs dog med// rig pa'i 'gros la thog sdug med// kun gzhi'i 'gros la dbye gsal med// chos sku'i 'od las sna tshogs 'byung// ye shes 'od las sna tshogs gsal/ / sems nyid 'od las snang tshogs 'byed// rig pa'i 'od las tha dad byung// kun gzhi'i 'od las klong du 'khyil// ye shes rin chen rang 'bar ba las// theg pa chen po la bzla ba 'bras bu'i chos so/ / rdzogs so//// rgya gar skad du/ dz+nyA na dz+wa la b+ha mA la A hi b+ha A/ bod skad du/ ye shes bkod pa rang 'bar ba'o// bcom ldan 'das dpal kun tu bzang po la phyag 'tshal lo/ / 'di skad bshad pa'i dus gcig na/ thams cad tha dad med par brdal lo// phyogs med par shar ro// 'byed pa med par mnyam pa'i ngang nyid do// rang 'bar ba'i klong 'byed pa med pa'i ngang/ snang ba med pa'i khyab pa/ yang dag pa'i dbyings so// 'gyur ba med pa'i sku/ dngos po med pa'i thugs rje/ ye shes chen po'i gdangs/ rang byung chen po rgyun no// dngos po med pa'i snang ba/ bdag med pa'i rig pa/ phyogs med pa'i gsal ba/ byas pa med pa'i rang shar ro// 'jig rten pa dang 'jig rten 'das// bag chags phung por snang ba 'di// zag bcas lus te skye shing snang// dbugs kyi 'gyu ba chad pa la/ / skye shi zhes ni brjod pa yin// 'jig rten pa zhes brjod pa yin// lta ba chags pa sgom pa 'dod pa'o// spyod pa sdug bsngal nges med kyi// skye 'gag na 'chi'i chu bo las// mi rgal mi 'da' 'jig rten pa/ / dngos med 'khor 'khyams sna tshogs spyod// bag chags lus la nges pa med// mya ngan 'das zhes spyod pa yang// lta ba bdag med sgom pa dngos med la// dkar po spyad pa bdag gzhan don du spyod// skye rgas na 'chi'i chu bo bzhi las kyang/ / rgal zhing 'das na 'jig rten 'das pa'o// ting 'dzin khyad par nges pa med// sems kyi snying po kun gzhi khyab chen la// tha dad tshig gi sgo nas phye na gnyis// phyi rol mu stegs nang pa sangs rgyas pa/ / 'dus byas thams cad mi rtag sprin ltar ro// 'khor ba'i chos ni sdug bsngal tshe 'byung 'dra// dngos por snang ba stong ste chu gzugs par// gzung 'dzin chos la bdag med nyi zer 'dra/ / de ltar shes shing rtogs na nang pa sangs rgyas pa'o// ma rtogs rtag chad mtha' la zhen na phyi rol mu stegs pa'o// mu stegs chos la lta na grangs med kyang// bsdu na rtag chad de gnyis so/ / rtag par 'dod pa'i lta ba grangs med kyang// bsdu na bdag rtag dngos po'i chos su grub// skad cig gnyis par mi 'gyur don byed bdag nyid can// de la rdo rje sems dpas brjod pa yang// rig pa byang chub sems nyid klong yangs 'di/ / rgyu rkyen med pa'i ye shes 'od re gsal// dngos po med pa'i rig pa 'od zer 'phro// de la bdag tu lta ba'i gang zag e ma 'khrul// ces brjod do// mu stegs chad pa'i lta ba grangs med kyang/ / bsdus na tshe 'di snga phyi med pa'i blo bur ba// las la dge sdig med la chos la rgyu 'bras med// dper na la khar me shi thal ba rlung khyer bzhin// sangs rgyas 'dod na bskal bar tshogs bsags dgos/ / blo bur tshe la bskal ba'i tha snyad med// des na sangs rgyas chos dang brdzun du snang// de la rdo rje sems dpas brjod pa// tshe nyid sngun ma yin pa'i gtan tshigs yin// bu chung mdangs skyes nu ma 'thung ba de/ / sngun ma 'asngon du song ba'i bag chags yin// sngon dus song glo bur yongs gyur na// sa rdo rnams la shes pa skye bar rigs// shes pa phyi ma 'byung ba'i gtan tshigs ni// khams gsum sems can thams cad la/ / phyug stogs skyid sdug nges med spyod pa yis// phyi ma 'byung ba ngas pa'i gtan tshigs so// phyi ma mi 'byung skyid sdug spyod 'gyur na// nam mkha'i sprin yang skyid sdug yod par nges// ci phyir zhes ni spyod gyur na/ / nam mkha'i sprin yang blo bur 'byung ba yin zhes so// de nas kun tu bzang pos brjod pa// sems la dngos po med pas 'das pa'i sangs rgyas yin// rgyu rkyen med pa rang byung da lta'i sangs rgyas yin/ / gnyen po med pa rang byung ma byon sangs rgyas yin// snga phyi thog mtha' med pas brdal ba chos nyid klong// 'pho 'gyur 'jig 'bral med pas dus gsum sangs rgyas sku// blun rmongs spyod log khyed la rangs sangs thabs kyis chos/ / zhes brjod do// ye shes bkod pa rang 'bar ba las/ tha snyad rtsod pa'i le'u ste dang po'o// de nas de bzhin gshegs pas chos thams cad sgro 'dogs gcod pa 'dis gsungs so/ / ye nas snying po dbyer med la// theg pa thams cad gnyis su 'dus// sgro skur thams cad ye shes dbyings su grol// shes rab che ste chos nyid klong du 'byam// snying rje chos te phyogs ris med/ / de ltar shes shing rtogs na theg pa chen po yin// gang zag sems nyid stong par rtogs// chos kyi bdag nyid phyi rol stong par rtogs// de ltar shes shing rtogs na theg pa chen po'o// theg pa chung ngu nyan thos rang rgyal gnyis/ / 'phags pa nyan thos lta ba grangs med kyang// mthong spangs dang ni sgom spangs gnyis su 'dus// mthong spangs phyi ni snang ba 'di// rags pa med de phra rab rdul/ / 'byar dang ma 'byar bar mtshams med// sil bur gnas te ne sing tshul// sgom spangs 'dzin byed shes pa 'di// dngos po med par 'char ba 'di// 'dzin byed rig pa'i 'od zer 'di// gzung bya phra rags rdul cha la/ / 'brel bcas 'brel med 'dzin par 'dod// nyi ma dang ni nyi zer dang// skam pa dang ni sla nga 'o// yin ni snang dag rig pa'o// nyan thos spyad pa bstan pa yang// lus ni chos bdun sgo nas yang/ / sgyu ma'i zas rnams khad kyis bri// nyan thos sgom pa bstan pa yang// dbugs kyi rgyu ba nang du 'then// yid kyi rgyu ba rgyun bcad la// sna rtser hU~M la shes pa gtad// mi g.yo ba yi ting nge 'dzin// rang rgyal lta ba bstan pa yang/ / phyi rol gdul bya logs na med// rig pa'i nyi 'od snang ba'o// rig pa phyi mas sngon ma bzung// dper na nyi 'od nyi zer bzhin// tha dad 'dod pa ma yin no// sgom dang spyod pa sngar dang mthun/ / rdo rje sems dpas brjod pa// phyi rol sems kyi rtsal snang la// sgyu mar rtogs kyis rmongs pa khyod// gdul char 'dod pas 'khrul pa yin// gzung med 'dzin pas nor pa yin// don la med pas log pa yin/ / dper na smig sgyu bsnyeg pa 'dra// ye shes bkod pa rang 'bar ba las// gnyis su med par bstan pa'i le'u ste gnyis pa'o// de nas bde bar gshegs pas 'bras bu gnyis su med pa 'di brjod do/ / theg pa chen po dbyer med gnyis su bsdus// rgyu mtshan nyid kyi theg pa dang// 'bras bu rdo rje'i theg pa'o// the tshom thams cad chos kyi dbyings su grol// sems la sangs rgyas 'byung bar 'dod na rgyu yi theg pa yin/ / sems nyid 'gyur ba med par rtogs na 'bras bu'i theg pa'o// kun rdzob snang ba spang byar 'dod na mtshan nyid theg pa'o// don dam kun rdzob dbyer med rang shar 'bras bu'i theg pa'o/ / mtshan nyid theg pa dbu ma sems tsam bshad// sems tsam lta ba grangs med kyang// sems tsam rnam par bden pa dang// sems tsam rnam par rdzun pa dang// sgo lnga rtsal ba lta ba gsum// kha dog du ma cir snang kyang/ / shes pa cha med ngo bor yang// 'khor 'das thams cad byang chub sems su gsal// de yang rang rig gsal ba myong ba med// snang ba sna tshogs cir snang yang// rang rig rang gsal cha med ngo bor gcig/ sangs rgyas rdzu 'phrul cir snang yang// rang rig rang gsal brjod med ngo bor gcig/ kha dog dkar dmar cir gsal yang// ye shes 'bar ba'i rang 'od yin// rang rig rang gsal cha med dang/ / kun gzhi stong pa'i rtsal shar yin// rang rig lta ba'i rmongs pa khyod// rig par 'dod na sdug bsngal rgyu// gsal bar 'dod na ngan song ltung// cha med 'dod na 'khor bar 'khyam// rang rig rgyal po phyogs med grol/ / ces gsungs so// dbu ma'i lta ba grangs med kyang// tshe med tshe men ston men gsum// don dam 'dod pa spros pa'i mtha' brgyad bral// yod mtha' med mtha' snang mtha' stong mtha' dang/ / gnyis ka'i mtha' dang gnyis ka ma yin mtha'// gcig dang du ma'i mtha' dang bral// de ni bsgrub bya yongs gcod don dam 'dod pa'o// kun rdzob 'dod pa rnam gnyis log pa'i kun rdzob dpe brgyad do/ / sab mo ltar mthong smig sgyu chur mthong dang// thag pa sprul mthong tho yor mir mthong dang// nam mkha' skra 'dzag rmi lam longs spyod dang// rgya mtsho'i chu gzugs nam mkha'i 'ja' tshon rnams// med par snang bas log pa'i kun rdzob bo/ / yang dag kun rdzob gang yin pa'i// phyi rol 'byung chen lnga po 'di// rkyen las skyes la don byed nus// mthun par snang la brtags na dben// chos sku'i rtsal dang ye shes 'od kyi rkyen las skyes/ / sems can las kyi spyi mthun don byed nus// lha la bdud rtsi lha min go mtshon dang// mi la sa rdo byol song ngam grog dang// yi dwags rnag khrag dmyal ba me chur snang// de yang gcig snang ma yin tha dad par re snang/ / de yang chos sku'i rtsal la ye shes 'od// sems kyi bkrag shar rig pa'i yul yin pas// de nas thams cad brtags na dben pa'o// de yang dgag bya rnam gcod kun rdzob 'dod pa'o/ / rdo rje sems dpa' brjod pas// don dam kun rdzob dbyer med thams cad rang shar la// tha dad phyogs ris byed pa e ma rmongs pa 'khrul// thams cad chos dbyings 'gyur med brdal ba la/ / spros pa'i mtha' brgyad 'dod pa e ma rmongs pa gol// chos sku gting gsal ye shes klong yangs la// don dam kun rdzob dgag sgrub 'dod pa e ma rmongs pa mchog/ chos sku kun gzhi rmongs pa dngos med kun gzhir shar/ / khas mi len gyi lta ba e ma rmongs pa 'khrul// ces brjod do// ye shes bkod pa rang 'bar ba'i rgyud las// dbyer med par sun dbyung ba'i le'u ste gsum pa'o// de nas de bzhin gshegs pa thams cad kyis/ / rang shar ba 'di brjod do// skyon yon thams cad chos nyid klong du grol// 'bras bu rdo rje theg pa gnyis su bshad// phyi sa thub pa rgyud kyi theg pa dang// nang pa thabs kyi rgyud kyi theg pa'o/ / lta ba thams cad rang byung ye shes chen por gsal// sgom pa thams cad phyogs tshigs med pas spyan ras gzigs// snang ba dngos po med pas 'jam dpal nyid// rig pa 'du 'bral med pas phyag rdor nyid/ / don dam kun rdzob gnyis su med par brdal// gtsang dang 'jigs pa'i brtul zhugs drag par spyod// 'du 'bral med pa'i ting nge 'dzin rang grol shar// 'gro ba'i don la thugs rje'i sbyor ba brtson/ / u pa ya nyid bdag gzhan mtha' yas 'das// don dam rnam dag chos nyid spros dang bral// 'byed pa med pa'i ting 'dzin phyogs dang bral// kun dzob rigs bzhi rdo rje 'bar ba 'phro// snang ba spyan ras stong pa 'jam/ / dbyer med phyag rdor rang grol rnam snang nyid// bden pa gnyis med thams cad rang shar 'bar// bde ba'i rgyal po ye shes 'bar ba'i gtso// yo ga'i lta spyod 'gro nyid ni// rnam par dag pa'i chos nyid rdul dang bral/ / blta ru med pa'i ting 'dzin nyams dang ldan// spyad du med pa'i rtsol bas bde ba 'byin// kun rdzob sangs rgyas rdza mo rlags pa tsam// mi mngon dbyings nas gnyis su med par zhugs/ / 'gro ba'i don la thugs rje rgya ma chad// ris dang sku mdog phyag mtshan nges med sna tshogs snang// gnyis su med pa'i sbyor bas khams gsum 'khor ba 'dren// rdo rje sems dpa' brjod pas/ / ye nas snying po dbyer med bde ba chen po la// don dam kun rdzob bzang rtog lta ba rmongs pa 'khrul// ye shes chos dbyings chen pos brdal khyab 'bar ba la// gnyis su med pa'i thus rje skye bo rmongs pa gol/ / ye nas stong nyid klong chen 'byal pa la// gtsang dang lhar lta rmongs pa e ma 'khrul// ces brjod do// gsang ba bskyed rdzogs gsum gyi 'gro nyid do// skyon thams cad chos nyid klong du grol// grub mtha' thams cad bskyed rdzogs gsum du 'dus/ / re dogs thams cad ye shes klong du grol// gzhi ni sems nyid stong gsal la// snang ba lha dang lha mo'i dkyil 'khor chen por dag/ sems nyid rtsal snang thabs dang shes rab 'du 'bral med/ / snang ba lha'i dkyil 'khor la rang grol dbyings su dag pa dang// rig pa'i che 'phrul dbyings dbang dang ye shes 'gyur med bde bar lta// snang ba phyogs ris thams cad dang bral/ / snang bzhin mi gnas ngo bo nyid// rig pa rang snang thams cad 'gyur med klong chen brdal// dper na rgyal po rje dang 'bangs kyi tshul nyid do// ma hA yo ga bde chen ngang las grol// snang stong dbyer med byang chub sems la rdzogs/ / thabs ni snang ba zhi khro'i dkyil 'khor la// shes rab thams cad stong gsal sems su rdzogs// bde ba chen po thugs kyi dkyil du 'bar// shes rab chen pos rtogs tshod lha ru dag/ ting 'dzin rgyal pos stong gsal chen por dag/ u nu bde ba chen pos rang grol bas// snang ba thams cad dbyings kyi klaung du grol// gsal ba thams cad ye shes ngang du dag/ rig pa thams cad bde ba chen por shar/ / ting 'dzin thams cad rtsol sgrub med par dag/ spyod pa thams cad rang sangs chen por grol// lta ba thams cad rgya yan chen por 'byams// re dog thams cad chos nyid ngang du 'byam/ / skyon yon thams cad rang byung klong du dag/ zag med bde ba'i ngang du thams cad rdzogs// de la rdo rje sems dpas brjod pas// chos sku 'gyur med ye shes 'gyur med chen po la// snang stong 'dod pa e ma 'khrul/ / chos dbyings klong chen mu mtha' yas pa la// 'du 'bral med pa 'dod pa e ma bdag re gol// ye shes snying po gting gsal 'gyur med la// lta sgom sems nyid rtog pa e ma rmongs pa log/ ces brjod do// rdzogs chen a ti kun gyi dngos gzhir shar// dngos med rang byung nam mkha'i bya lam 'dra// gting gsal 'gyur med nam mkha'i gdangs dang 'dra// ma spros brdal khyab nam mkha'i mtha' dang 'dra/ / ma ltas ye gsal nam mkha'i dbyings dang 'dra// ma skyes ye rdzogs nam mkha'i klong dang 'dra// ye shes bkod pa rang 'bar ba las// gsang sngags bcud phyung ba'i le'u ste bzhi pa'o/ / de nas bde bar gshegs pas yang dag 'di brjod do// mi g.yo ba'i ting nge 'dzin dang// mi gnas pa'i ting nge 'dzin dang// mi 'da' ba'i ting nge 'dzin dang// mi bskyod pa'i ting nge 'dzin dang// mi srong ba'i ting nge 'dzin dang/ / mi mnyam pa'i ting nge 'dzin dang// mi dmigs pa'i ting nge 'dzin dang// mi byed pa'i ting nge 'dzin dang// mi 'gyur ba'i ting nge 'dzin no// snang ba chos sku'i rang 'od las/ / chags zhen thams cad rol pa chen por shar// dngos po thams cad chos sku'i rtsal snang la// 'dod pa thams cad byang chub chen por shar// dbang po lnga nyid ye shes lam chen la// shar ba thams cad rang grol chen por shar/ / rig pa thams cad rang byung ye shes la// sdug bsngal thams cad ye shes rol par shar// chos sku 'gyur ba med pa la// skye shi thams cad stong nyid ngang du 'jams// ye shes bkod pa'i rgyud 'bras bu'i chos rdzogs so/ /// rgya gar skad du/ pan tsa pi ta ga r+b+ha sU tra tan tra nA ma/ bod skad du/ mdo lnga snying po zhes bya ba'i rgyud/ bcom ldan 'das dpal kun tu bzang po bde ba chen po'i klong la phyag 'tshal lo/ ro langs bde bas tshigs su bcad pa'o// le'u bcu gnyis pa'o//// rdzogs so//// missing m issing m issing m issing m issing m issing m issing m issing m

CLOSE WINDOW