rgya gar skad du/ a r+ya ma hA gu h+ya pra swa ra nA ma sU tra/ bod skad du/ 'phags pa gsang sngags chen po bsam gyis mi khyab pa'i mdo zhes bya ba/ bcom ldan 'das ting nge 'dzin gyi rgyal po la phyag 'tshal lo// 'di skad bdag gis thos pa'i dus gcig na/ / ku sha'i 'du khang na// bcom ldan 'das bskyed pa seng ge lta bu'i ting nge 'dzin la snyoms par zhugs te/ 'khor rnams la 'di skad ces gsungs so// kye ma byang chub 'dod na sdig pa'i las rnams cher spyod de don blo la bzhag/ gang yang snying rjer mi gzung su yang snying mno de ni gang yang med/ ces te srog med srog bcad sdig tu 'gro na ye nas chad pa su la sdig snying rjes byang chub rlan du mi gter snying rjes su la gzung/ gang la 'dzin pa yod pa de la lhag pa'i bsam pa yod kyang sdig/ 'dzin rtog khang 'gram gting nas tshugs pa med pa byang chub bde ba'i shugs/ / rgyal ba mi mchod sangs rgyas mi 'grub par// thar pa'i lam mi 'dod pa de// khab len rdo la lcags 'du bzhin// tshogs gnyis bsags mi dgos par 'du// mchod rten lha khang la sogs 'dus byas dge rtsa mi bya mnyam snyoms bzhag/ byas la sogs pa'i las ni byas pa mi zin byas shing rtogs pa'i rgyu// yul dang dbang po gang rtsogs ched du mi bya de bzhin gzhag par bya// rdo rje mi 'chang sngags rdzas mi 'chang dben par 'dug mi bya/ / mchod gtor sbyin pa'i phyogs ni gang yang mi btang mi bsngo su la bsngo// cho ga la sogs 'khrul pa'i las rnams spyod mi bya// rdzogs pa chen po'i rang bzhin kun gyi snying po yin te 'di la ci yang med/ / phag tu 'dug la sgom pa mi bya mi bya rdo rje lta bu'i chos nyid de la bsgom du med// dper na ri rab rtse la nyi ma stong shar bas// ye shes thugs la nyi ma gcig shar dro// rdo rje lta bu'i ye shes ni/ / nam mkha' lta bur dngos po med// go la sgrib rtag chad mtshan ma'i yul la gnas// gnyen pos mi shigs rkyen gyis dbang sgyur min// dge dang sdig pa de yi spyod yul min// rab dbang thabs kyis rdzogs pas rtsal gsum lus la rdzogs/ / mtho dman klong du mnyam pas ye shes bdag med sku// sa lam mi bgrod ye shes mig gcig dri ma med// rtsol sgrub zil gnon bde 'byam ye shes sku// 'phags pa gsang sngags chen po bsam gyis mi khyab pa'i mdo las/ / bcom ldan 'das seng ge lta bu'i dgongs pa mthar phyin pa'i le'u ste dang po'o// bcom ldan 'das khyung chen gshog rdzogs zhes bya ba'i ting nge 'dzin la mnyam par gzhag nas/ chos thams cad nam mkha' dang mnyam par zlas te/ bka' stsal ba/ la bzla rdzogs pa chen po'i chos// ston min cig char 'jug pa'i kham po che// la rnams yebs kyis gcod pa'i 'chongs po che/ / snang srid gsal bar byed pa'i shes rab che// don dam bskal par mi gtong brtson 'grus che// stong pa'i mu la gnas pas bzod pa che// kun gzhi rtsad nas gcod pa'i ting 'dzin che// gang gi 'gran zla med pas zil gnon che/ / 'gro ba thabs kyis sgrol ba'i stobs po che// shes rab thabs kyi pha rol rlabs po che// che ba dgu ldan ston med lta ba ni// theg pa kun gyi nang na mchog tu bsngags// gnyis su med pa'i chos nyid byang chub sems/ / brjod las 'das pas kun tu bzang po'i sku// 'gyur ba med pa'i bde chen lhun gyis rdzogs// mtha' dbus med pa'i mkha' ltar kun la snyoms// rang byung dbyings la rig pa gsal shar ba/ / mtha' dbus med par kun la khyab pa la// 'jug dang mi 'jug gnyis su bcad pas gol// ye shes rgyal po'i tshig las 'das pa de// rang bzhin ma bcos lhun gyis rdzogs pa la/ / snang srid thad du khyod kyis mthong bas gol// srid gsum ma lus kun tu bzang po la// rig pa'i mdzad spyod mkha' ltar snoms pa yin// gsal dang mi gsal gnyis med mnyam pa la// gsal dang mi gsal khyod kyis shes pa gol/ / don dam bde chen 'gyur med byang chub sems// yang dag lhun rdzogs smra bsam yul las 'das// de nyid de bzhin ye nas gnas pa la// bskal par stong dang mi stong khyod kyis shes par gol/ / mi 'gyur rang byung dbyings la rig pa'i nyi ma shar// yang dag don de ji bzhin ye nas gsal// mi dmigs mkha' bzhin ye nas gsal// stong pa'i sgro skur bzod pa yod pas gos/ / chos nyid mi 'gyur rig pa ye shes la// gzung 'dzin yul las 'das pa'i bcom ldan 'das// mtha' dbus kun la khyab pa'i che ba'i bzhi// dus gsum mi 'gyur ba'i chos sku la// nga dang bdag tu khyod kyis bzung bas gol/ / rig pa 'gyur med bde chen byang chub 'di// nga dang bdag med kun la mnyam pa la// mtha' dang dbus med nam mkha'i klong na gnas// phyogs dang ris med kun tu bzang po'i sku/ / yid bzhin nor ltar rang bzhin gnas pa la// sa lam rgyud bgrod skye med rtsad nas bcad// ting 'dzin chen por rim pas sbyor bas gol// snang srid thams cad yang dag sangs rgyas la// 'gro ba'i stobs kyis bsgral du ye sangs rgyas/ / rang byung lhun rdzogs grub pa'i sangs rgyas la// snang srid stobs kyis bsgral bas mthong bas grol// a ti yo gas bde chen byang chub 'di// brjod las 'das pas yang dag bstan pa'i sku/ / ston chen la sogs stong pa'i rlung gnas pa// 'jug sgo lta spyod khyad par che ste 'phags// lta phugs sgrog pas bye brag med kyis kyang// so so'i bzhed gzhung rol pa'i rgyan gyis 'phags/ / mnyam pa chen po mnyam pa khyod las 'phags// nga ni byang cub snying por gnas pa'i tshe// byang chub chos la byang chub bsgrub med mi gnas so// de bzhin gshegs pa rnams kyi ye shes la// sems can dag gi chos med mi gnas pa/ / a ti yo ga bya btsal 'das pa la// bzang ngan che chung mi gnas so// lung las 'das pa'i chos nyid yin// sems las 'das pa'i sangs rgyas la// kun gzhi las 'das chos sku yin/ / lta ba rlabs kyis spyod pa'i dgongs pa'o// 'phags pa gsang sngags bsam gyis mi khyab pa'i mdo las// khyung chen gshog rdzogs kyi dgongs pa bstan pa'i le'u ste gnyis pa'o// bcom ldan 'das nam mkha' rnam par dag pas ting nge 'dzin la snyoms par zhugs nas/ bka' stsal pa/ rdo rje 'dus pa ye shes sku// tshig cig mtshon pas don chen gsung rnam par dag pas lam chen po// sangs rgyas nyid kyis yongs ma gsungs/ / bgrod med lam la rab gnas pa// ye shes lus can dri ma med// ma skyes gsang ba'i dkyil 'khor rdzogs// rnam dag lam la rab gnas pa// mgon po shes rab pha rol phyin/ / sangs rgyas nyid kyi dgongs pa 'di// kun gyis rig pa ma yin te// lha las rdzogs te 'gro ba rnams// byang chub sems dpa' mi rig ste// chos pa rnams kyi don mi rnyed// sangs rgyas lam la mi gnas te/ / lam la bgrod pa rtsol ba'i gnad// sangs rgyas nyid las 'bras bu med// 'bras bu bsgrub pa'i byang sems don mi rnyed// de phyin mgon po dri med ngas// thugs kyi dkyil 'khor rang byung ba// ye shes lhun rdzogs me long bzhin/ / sangs rgyas kun gyi ye shes sku// dri med rang byung 'od gsal bas// dus gsum gcig ste rtag par bzhugs// rang las byung ba'i ye shes lnga// gsang ba'i dkyil 'khor thugs kyi mchog/ mtshan nyid me chu sa rlung lnga// rang las byung ba'i chos nyid lnga// las la ma rmongs thabs kyi zhing// byed pa po nyid rdo rjes te// skye 'gag med pa'i ye shes yin// bye pa po nyid rang bzhin gyis// rnam par dag nas sangs rgyas pas/ / 'dus byas chos ni ye nas med// nga yi shes rab rang bzhin gyis// rnam par dag pa nga yis chos// thams cad rnam par mi rtog yin// de nas bcom ldan rdo rje 'chang// nam mkha' la ni sprin bzhin du/ / sna tshogs snang ba ye shes sku// spros dang bral ba'i chos nyid la// ye shes kun gyi rgyan snang ba// nam mkha'i sprin dang char gyi tshul// e ma bde gshegs bcom ldan 'das// sangs rgyas kun gyi ye shes sku/ / rtag par dka' ba snying po'i don// rab tu mi rtog gnas med pa'o// e ma gzung 'dzin rnams yangs pa// tshig dang yi ge'i spyod yul min// chos bdag med pa'i mnyam pa nyid// rang rig gzod nas ma skyes pa'o/ / e ma rang rig mnyam pa nyid kyi klong// ming du btags pa'i chos rnams kun// mnyam nyid rtogs las gzhan med do// e ma chos kun rang rig ye shes te// nges pa med de dngos rtogs bral/ / de nyid dag pa'i rang bzhin pas// mkhas pa ci dgar sgom pas 'grub// e ma chos kun snang ba kun// rang rig ngo bo brjod du med// de nyid rang rig ye shes ni// mkhas pas rtogs pas sgom par 'gyur/ / e ma chos kun stong pa'i bdag/ rang gi ngo bo brjod du med// brjod med de nyid sna tshogs pas// chos rnams kun la khyab par gnas// e ma ho/ mi gnas ye shes dngos po'i mtha' dang bral/ / sku dang ye shes rol pa'i mdzad spyod kun// nam mkha' dag par klong nas ci yang snang// zhes gsungs so// 'phags pa bsam gyis mi khyab pa'i mdo chen po las// nam mkha' rnam par dag pa'i dgongs pa bstan pa'i le'u ste gsum pa'o/ / bcom ldan 'das nyi zla kha sbyor gyi ting nge 'dzin la snyoms par bzhugs nas/ chos thams cad 'gag pa med pa'i de bzhin nyid du ngas bstan to// de nas bcom ldan 'das kyis de khon nyid kyi ting nge 'dzin la bzhengs te bka' stsal pa/ shes rab ldan pa mkha' la khyung chen bzhin// rang gi ngo bo brjod du med// mi gnas mya ngan 'das pa'o// rdzu 'phrul ldan pa rgya mtsho'i lto 'gro bzhin/ / gangs la nyi ma shar ba 'dra// me long man shel bzhin te snying po med// rgyal ba mya ngan 'das pa'i dgongs pa yin// byang chub sems dpa' mi dmigs byang chub sems mi dmigs/ / rang byung ye shes rab kyis grol ba ni// sprul gyi snying po bzhin te gzhan gyi spyod yul min// rang byung dbyings nas rig pa gsal shar ba// thabs dang shes rab gsal ba nyi zla kha sbyor// nam mkha'i sprin dang char gyi tshul/ / byas pa'i chos min me long ye nas gnas// thugs rje rtse gcig ye nas rnam par dag/ rus sbal mig gis nyi ma mi mthong ltar// chos rnams kun gyi de nyid mthong ba med// rtags kyi ye shes tshon gang ba/ / rtog pa'i klungs su su 'dris pa// ye shes dri ma med pa yin// lung du bstan pa bde gnas pa// gol sgrib pa dar sha chod pa yi// chos la blo ni mi gnas na// rtag chad tshig las 'das pa yin/ / ma byung ma skyes 'od kyi snying po la// bkod pa lha yi dkyil 'khor rtsal mi dgos// rang snang bzhin rnam par dag pa'i chos sku la// khrus dang gtsang sbra me tog byug mi 'tshal// mkha' la nyi ma'i dkyil 'khor gsal ba las/ / 'od dang snang ba gzhan nas btsal mi 'tshal// shes rab rig pa bzhi nas shar ba la// rna bas nyan cing tshig phyir 'brang mi 'tshal// nor bu rin chen rang la yod bzhin du// gzhan la brten nas btsal bas don mi rnyed/ / dri ma med pa'i chos sku la// bkrus pas mi 'dag nas mkha' 'dra// rkyen dang bral ba'i snying po la// byang chub snying po yongs kyis med// rdo rje sems dpa'i byang chub ni/ / rang gi rig pa chen po mkhyen// rang rig nyid ma'i snying po bzhin// dus gsum gcig ste bstan par zhugs// byang chub sems dpa' sems dpa' chen po snang la mi gnas pa rnams ni/ ye shes kyi sku dri ma med pa'o/ / bkod pa med par snang ba can/ sangs rgyas kyi sku dri ma med pa thabs shes rab zung du 'brel ba'o// ma bkod par mtha' dang dbus med/ phyogs dang ris med/ mtho dman dang yangs dog med par snang ba ni/ spros dang bral ba'i chos nyid klong yongs su dag pa'o// 'dod pa'i mtha' thams cad dang bral bas ni ting 'dzin gyis rtse gcig pa'i zas so// ye shes kyi sku dri ma med pa dang/ klong kun tu bzang po 'du 'bral med par brtag par bzhugs pa ni graugs/ khyad par can no// dgos pa'i 'du shes thams cad dang bral ba ni dgongs pa nyag gcig/ rdo rje'i tshig gcig gis thag chod nas dgongs pa la dor/ / don klong du dril bdag nyid chen po kho na nyid do// 'phags pa gsang sngags chen po bsam gyis mi khyab pa'i mdo las/ nyi zla kha sbyor gyi dgongs pa mtha' gtugs pa'i le'u ste bzhi pa'o/ / bcom ldan 'das rin po che lta bu'i ting nge 'dzin la snyoms par bzhugs nas/ rang byung gi ye shes la yon tan thams cad 'byung ba ni/ zad mad rin chen gter gyi dbyig/ skye med klong na 'od gsal ba/ / nam mkha'i mthongs nas nyi shar 'dra// dngos med gsal ba chu zla bzhin// bdag dang bdag nyid chen po'i thugs// snang la mi mngon 'ja' tshon 'dra// sku gsung thugs kyi rdo rje'i bdag/ tsu ta'i shing dang gel ba'i shing/ / lo ma me tog 'bras bur bcas// yon tan so so'i don byed pa// nad rnams kun gyi gsos su che// gnyen po gnyen po 'joms pa yis// nyon mongs lnga dang mtshams med lnga// de yis gnyen po de yis 'joms/ / de nyid rnam par grol ba'i lam// sangs rgyas thog mtha' bdag med pas// gzung 'dzin gnyis med mya ngan 'das// phyi nang snod bcud rang grol ba// gzhan la ltos 'gyur chos ma yin/ / glang chen 'dam du bying ba la// skyes bu rang gis bcings pa gnyis// gzhan gyis yang dgag la 'gyur// bde ba chen po bde la rtag spyod pa// rnam par snang mdzad rtag pa kun tu bzang// ji ltar brjod pa tha snyad rtsol ba'i gnad/ / chos kyi yang dag don de brjod nus kyang// chos kyi yang dag don la gnas mi nus// de phyir chos spyod sangs rgyas don la sgrib// chos kyi blo yis the tshom kun gsal bas// chos la mi gnas tha mal shes par bzhag/ tha mal shes pa blo yis bcos pa min// bde dang sdug bsngal blo la rtog pa med// mgon po dri med sku ni de bzhin no// rnam par dag pa'i sku bde ba chen po la ye shes kyi grogs byar med do/ / ka dag pa'i ye shes rang rang snang ba la bslad par bya ba'i chos med do// thabs kyi rgyal por stobs kyi rig pa shar bas che ba'i yon tan gzhan gyis dpag tu med do// shes rab zab mo chu bo gang+gA'i rgyun bzhin mi 'chad pas thugs rje la 'bri bkol med do/ / yang dag par rdzogs pa'i sangs rgyas la sgrib pa sbyang du med do// cis te ngan song gi mtha' las grol ba'o// yang dag par rdzogs pa'i sangs rgyas la lam med do/ / cis te bgrod par bya ba'i lam las 'das pa'o// yang dag par rdzogs pa'i sangs rgyas la tshogs bsag tu med do// cis te na dngos po'i mtshan ma gang la yang mi gnas pa'o/ / yang dag par rdzogs pa'i sangs rgyas la sgrib pa sbyang du med do// cis te nyi ma'i snying po la mun pa'i gnas med do// de'i phyir lhag mthong rig pa'i ye shes kyis// ma rig pa bdar sha bcad/ / chos spyi dang rang gi mtshan nyid kyis the tshom gyi bdar sha bcad// lam gyi ye shes kyis lam gyi bdar sha bcad// ces pa'o// 'phags pa gsang sngags bsam gyis mi khyab pa'i mdo las// yid bzhin nor bu rin po che'i dgongs pa mthar phyin pa'i le'u ste lnga pa'o/ / bcom ldan 'das rgya mtsho gdangs pa'i ting nge 'dzin la snyoms par bzhugs pa'i dus su/ chos thams cad thig le chen po'i klong du sangs rgyas te/ rgya mtsho la gza' skar bkra ba'i tshul du bshad de/ ji ltar rgya mtsho dwangs ba la// nyi zla gza' skar shar ba yang// rang gi ngo bo ma 'dres so sor gsal// de bzhin chos nyid rnam dag spros dang bral ba la/ / rig pa ye shes chos rnams kun gyi bdag/ skye med klong na ma 'dres so sor gsal// sku gsum rgyal ba'i dgongs pa mthar phyin pa// a ti'i klong nas rang bzhin rnam par dag/ a ti yo ga bde chen byang chub mchog/ ye shes lus la sprul pa'i skur bstan pa// rdo rje sems dpa' sangs rgyas kun gyi dngos// rig pa ye shes rang byung dbyings gsal te// skad cig gcig la bdag nyid sangs rgyas te// de phyir sangs rgyas chos la mi gnas so/ / chos ni sems can rnams kyi lta ba yin// mtshon pa'i byang chub chos yin kyang// rdzogs pa'i lta ba chos ma yin// thog ma'i mgon po dri med kyang// chos la brten pas ma yin te/ / mi bskyod dbyings nas rang byung ba'o// de phyir chos kyi sangs mi rgya// chos ni tshig phyir 'brang zhing don la g.yel// rang byung ye shes nyid ni tshig gi mtha' dang bral// de phyir yang dag don la tshig med yi ge med/ / sems can rnams ni thog ma'i chos la rab brten la// chos rnams kun gyi ma bcings ma bkrol ba'i// ye shes rgyal po tshig las 'das pa ste// smra ba'i khyu mchog gzhan gyi dring mi 'jog/ rang rig rgyal po tshig las 'das rtogs na/ / phyi nang snod bcud bdag nyid chen por ldog/ nga dri ma med pa ye shes kyi sku la// dge ba dang sdig pa gnyis med do// nga gdod nas snying po byang chub tu gnas pa la// 'bras bu thob pa dang ma thob pa gnyis med do/ / nga bstod pa chen po ye shes kyi snying po spyan du gnas pa la// bde ba dang sdug bsngal ba gnyis med do// nga rang rig pa'i ye shes chos nyid skye ba med pa'i dbyings na/ / dus gsum 'du 'bral med par bzhugs pa la// gnas dbyen pa dang mi dbyen pa gnyis su med// chos kyi sku bde ba chen po'i ngang nas// ye shes kyi rtsal ma 'dres pas so sor gsal bas ni/ / rgya mtsho la gza' skar shar ba lta bu'o// zhes ston pa bcom ldan 'das kyis gsungs nas mi snang bar gshegs so// 'phags pa gsang sngags chen po bsam gyis mi khyab par bstan pa'i mdo las// rgya mtsho la gza' skar shar ba'i le'u ste drug pa'o/ / byang chub kyi sems ting nge 'dzin drug pa zhes kyang bya// man ngag gi dgongs pa la bzla zhes kyang bya'o// 'phags pa gsang sngags chen po bsam gyis mi khyab pa zhes bya ba theg pa chen po'i mdo rdzogs so/ / rgya gar gyi mkhan po bi ma la mi tra dang// bod kyi lo ts+tsha ba gnyags dz+nyA na ku ma ras bsgyur cing zhus te gtan la phab/ slad kyis a tsar+ya bai ro tsa na dang/ snubs sangs rgyas ye shes kyis bsgyur te gtan la phab/ a+thi+-i// sangs rgyas 'dus pa man ngag gi rgyud ces bya ba/ Na m+to b+ha ri/ dpag bsam gyi ljon shing la/ g.yu yi bya khu byug sgra sgrog pa'i man ngag/ / dus gsum 'gyur med mnyam bzhag rje thob med par thob// kun tu bzang po nga yi rang bzhin yin// yod ni gcig las med pa las// brgyad khr-i bzhi stong nga yi spyod yul yin// nges par nga yi rang bzhin ni/ / sna tshogs nga yi byas pa ste// nga yi rang bzhin byed pa kun las rgyal// ces gsungs so// ye shes 'khor lo gangs ba'i rgyud las// bya ba btang ba'i le'u ste bcu gcig pa'o//// de nas rig pa'i rgyal pos/ / rdo rje sems dpa' la bka' stsal pa// rdzogs chen rang snang chos nyid ni// dgongs pa kun gyi mchog yin pas// gang 'dod rtsol ba sgrub tu med// 'dod pa'i rang bzhin grub 'dod pas/ / rdo la gser du grub pa'o// gser 'dod rdo la re ba med// zhen pa ma chod bde ba yang// zhen med ngo bor thongs pa med// 'dzin pa du ma rang grol na// yang dag rtsol bas sgrub tu med/ / rtsol med don la gnas pa ni// byang chub lag tu gtod pa yin// spong len med pa'i snang ba rang sol// dbus mtha' ma gzigs rnam par rtog dang bral// ye shes rnam dag lhun grub chen po la// re dogs med pas chos nyid rang la gsal/ / ye nas lhun grub sangs rgyas mngon gyur na// gang nas kun la sangs rgyas re ba med// sangs rgyas nyid kyis sangs rgyas nyid tshol ba// dper na ri dwags smig sgyu snyeg pa 'dra/ / des na sangs rgyas re dogs gzhan na med// dbye gsal blang dor med pa'i lung// chos nyid ye nas rnam dag la// 'khor ba'i rnam rtog blang dor yul sbangs nas// snang la zhen med gar bder sbyod pa'i mchog/ theg chen nam mkha'i dbyings na nyi ma shar// gdul bya gang zag rnams kyis don du snang// don dam ngang la 'dul dang mi 'dul med// rig pa'i rgyal po ye shes nyi zer ni// mtha' yas sems can thams cad la/ / snang gsal sgron ma rtogs par shog/ ye shais 'khor lo gsang ba'i rgyu las// rtsol bral thugs rje'i le'u ste bcu gnyis pa'o//// de nas rig pa'i rgyal pos// rdo rje sems dpa' la bka' stsal pa/ / rang snang rig pa'i ye shes la// ma rtogs bdud kyi spyod yul ni// stong pa byang chub lta ba'i bdud// had po bogs med sgom pa'i bdud// rtog med rang dga' spyod pa'i bdud/ / thug med 'dod pa 'bras bu'i bdud// phra mos chog shes thos pa'i bdud// 'du 'dzi longs spyod g.yeng ba'i bdud// grub mtha' log pa chos kyi bdud/ mi thub dam bca' dam tshig bdud// rim pa bsgrod pa dbang gi bdud/ / rtsol bas brin pa 'phrin las 'did// bar dor snang ba 'od kyi bdud// grags pa brgyad po dgra yi bdud// rnam rtogs 'phrin po nyid kyis bdud// kha shags don la bred pa'i bdud/ / mkhas pa mdo med shes rab bdud// rtog 'dzin zhes pa bag chags bdud// rang rig 'khrul par snang ba yi snang ba sna tshogs 'khrul pa'i bdud// thams cad bdud snang shes tsam na/ bdud las nges par grol ba yin/ / ma rtogs pa ni bdud yin te// rtogs na bdud kyi rtsi ru 'gyur// dug la sman du shes pa bzhin// de las gzhan du shes mi 'gyur// ye shes 'khor lo gsang ba'i rgyud las// bdud kyi le'u ste bcu gsum pa'o/ /// de nas rig pa'i rgyal bka' rtsal pa// lta ba bdag tu 'dzin pas gol// nga yis rang bzhin bcu po las// gol sa sgrib pa drug drug bcu// sum brgya drug cu phrag yas so// rdzogs pa chen po sa gcig pa/ / gang gis de rtogs de yi sras// lam ni rnam pa lnga dag kyang// sa bcu bgrod pas gol pa'i lam// gdod nas ma skyes snying po la// tha tshig ming du btags pas gol/ / rang bzhin lhun grub chen po la// 'phrin las rnam bzhi dod nas rdzogs/ bag chags rmi lam bsdu brid dang// rigs drug gzugs sgra'i bsdu brid dang// 'dod yon 'tsho ba'i bsdu brid dang// 'drin pa'i thabs dgu ngang la rdzogs/ / bag chag nying 'tshams sbyar ba dang// sems nyid nying 'tshams sbyar ba dang// phung po nying 'tshams sbyor ba gsum// nga yi rang bzhin rnams gsum yin// nga yi rang snang chen po rgyud/ / theg pa kun gyi la zlo ba// chos rnams mdangs skyel ba yi// ye shes 'khor lo gsang ba 'di// 'khor gyi nang na dam pa ste// rdo rje sems dpa' khyod pa gtad// khyod ni mi nu stobs dang ldan// nga las mi gzhan 'khor yin pas/ / thugs kyi dkyil du mnyam par zhog/ thugs rje'i gser ka phyogs bcur 'char// lan cig snyigs ma lnga dus na// nyi zla bzhin du dar bar shog/ nam mkha' khyab pa'i 'jig rten du/ / sgron ma bzhin du rgyas par shog/ 'khor ba ldongs pa'i mun pa rnams// ye shes 'od kyis gang bar shog/ rgyud drug 'khrul pa'i sems can rnams// sangs rgyas sa la grol bar shog/ ces gsungs so// ye shes 'khor lo gsang ba snying po don gyi rgyu las/ / rgyud kyi gtad rgya bstan pa'i le'u ste bcu bzhi pa'o//// ye shes 'khor lo gsang ba'i snying po don gyi rgyud ces bya ba// la zlo ba chen po man ngag gi rgyab rtan rdzogs so/ / sems phyogs kyi snyan brgyud -ithi/// / rgya gar skad du// tri kA ya bany+tsa dz+nyA na tan tra ma ny+dzu shrI dz+nyA na a laM sa ma ti nA ma// bod skad du// sku gsum ye shes lnga ldan gyi rgyu 'jam dpal ye shes rgyan gyi dgongs pa zhes bya ba/ / 'jam dpal ye shes kyi sku bde ba chen po lhun gyis grub pa la phyag 'tshal lo// 'di skad bdag gis thos pa'i dus gcig na// bcom ldan 'das thugs rjai chen po dang ldan pa de/ / lcang lo can gyi gnas ri bo chen po de na// rdo rje rnam 'byor ma lnga dang thams cig tu bzhugs so// de'i tshe sems dpa' chen po gsang ba'i bdag pos 'di skad ces gsol to// kye kye bcom ldan 'das thugs rje dang thabs su ldan pa/ / bdag cag rdo rje mkha' 'gro ma dang bcas pa la// sku gsum ye shes lnga'i don bshad du gsol// zhes zhus so// de nas bcom ldan 'das kyis bka' stsal pa// gsang ba'i bdag po nyon cig/ sku gsum ye shes lnga'i dgongs pa don phyin ci ma log pa 'di// mkha' 'gro ma lnga la bshad par bya'o// sku gsum ye shes lnga'i rgyud 'jam dpal ye shes rgyan gyi dgongs pa las// gleng gzhi'i le'u ste dang po'o/ /// de nas yang gsang ba'i bdag pos 'di skad ces gsol to// kye kye thugs rje chen po// chos sku rin po che lta bu bshad du gsol zhes zhus so// bcom ldan 'das kyis bka' stsal pa/ / rigs kyi bu go bar dka' ba'i tshig 'di yid la zung zhig/ d+harma kA ya rat+na ma la A// snang ba chen po gsal ba che// dag pa'i nam mkha' mtha' dang bral// sbros bral chos nyid 'gyur ba med/ / mtha' dang dbus med phyogs cha kun dang bral// rang snang chos dbyings dag pa'i zhing// dang po'i sangs rgyas rgyu med pas// sangs rgyas thog ma tha ma med// stong pa ye shes snying po can// mtha' la mi gnas rdo rje'i sku/ / ye shes mig gcig dri ma med// nor bu chen po rin chen rtog/ sbros dang bral ba'i chos nyid la// gzung 'dzin bral ba'i rig pa gsal// ngo bo rang bzhin thugs rje'i bdag/ ye nas sku gsum 'od du gsal/ / rang bzhin lhun gyis grub pa'o// zhes sku gsum ye shes lnga'i rgyud// 'jam dpal ye shes rgyan gyi dgongs pa las// chos sku'i gnas lugs bstan pa'i le'u ste gnyis pa'o/ /// de nas yang gsang ba'i bdag pos zhus pa// kye kye bcom ldan rdo rje 'chang// longs sku'i snang ba ji ltar shar// bdag cag rnams la bshad du gsol// zhes zhus so// bcom ldan 'das kyis bka' stsal pa/ / chos sku rnams dag dbyer med kyang// ye shes sku ste rang byung ba// sangs rgyas sku lnga'i bdag nyid can// mtshan nyid so so'i tshul 'dzin pa// shes rab stobs bcu ye shes sku// bzhi bcu rtsa gnyis mtshan 'chang ba/ / sku gcig kun tu khyab pa'i sku// 'byung ba'i thig le 'od du gsal// kha dog lnga yi bdag nyid can// rigs lnga'i sangs rgyas yum dang bcas// mtshan nyid 'dzin pa'i tshom bu lnga// chos nyid mkha' la 'od gsal ba/ / gsal 'tsher lhun sdug gzi brjid 'bar// gsal dang dro dang bsil ba dang// yang dang khyab pa'i bdag nyid can// rnam rtog mi mnga' cir yang sa le ma khyen// mngon shes drug ldan chos kyi sbyan/ / yi ge drug pa rdo rje'i sgra// sa yi snying po 'gro ba 'dzin// mkha' la nyi shar mun pa sel// bya btsal med pa'i ngang du skyel// sarba ta thA ga ta ku la pany+tsa maN+Dal la d+hA tu// zhes sku gsum ye shes lnga'i rgyud/ / 'jam dpal ye shes rgyan gyi dgongs pa las// longs sku'i grub tshul bstan pa'i le'u ste gsum pa'o// de nas gsang pa'i bdag pos zhus pa// kye kye bcom ldan thugs rje can// sbrul sku snang ba ji ltar grub/ / sbrul pa'i sku nyid ji ltar shar// bdag cag rnams la bshad du gsol// zhes zhus so// bcom ldan 'das kyis bka' stsal pa// ye shes lnga yi mtshan nyid las// 'byung ba'i dwangs ma 'od du sal/ / de yi snang ba snod du grub// snyigs ma'i 'byung ba zhes su grags// mkha' la rlung brten de la chu yi phung po'i brten// de las sa chen po 'di brten srid pa'i sgo nga grub// rkyen rnams tshogs nas las kyi 'khrul 'khor rab tu 'byung/ / sna tshogs gzugs can yid las skyes// sprul sku'i zhing khams so sor gsal// ma rigs 'khrul 'khor 'di la zang cing 'bri ba med// sangs rgyas 'gro ba'i tshul 'dzin pa/ / dpal ldan sangs rgyas pad+ma skyes// sprul pa'i 'khor lo sna tshogs 'chad// bsod nams tshogs dang ye shes lnga ldan drug/ 'dul ba'i phyag mtshan so sor tha dad snang// kun tu bzang po blo gros bzang/ / dngos po kun gyi rang bzhin 'dzin// rnam grol gsum la mkhas pa'o// skye med chos te sna tshogs ston// mgon po sems can kun gyi mchog/ sems can thams cad rab sgrol byed// rgya mtshor chu bran 'du ba bzhin/ / thams cad rang sar dbyer med thim// a hro ma yang d+ha du ma la a seng// zhes sku gsum ye shais snga'i rgyu 'jam dpal ye shes rgyan gyi dgongs pa las// sprul sku'i snang ba shar tshul bstan pa'i le'u ste bzhi pa'o/ /// de nas yang gsang ba'i bdag pos mkhyen bzhin du zhus pa// kye bcom ldan 'das thugs rje dang thabs su ldan pa// sku gsum snang ba bshad pa legs// ye shes lnga rnams bshad du gsol/ / ces zhus so// bcom ldan 'das kyis bka' stsal pa// ye yis shes pa gcig yin kyang// mtshan nyid rnam pa lnga dang ldan// nga la rang bzhin med pas na// chos dbyings ye shes lhun gyis grub// nga la yon tan mi 'gag bas/ / me long ye shes lhun gyis grub// nga la skye 'gag med bas na/ mnyam nyid ye shes lhun gyis grub// nga yi shes rab sbyod pas na// so sor rtogs pa'i ye shes yin// nga la thog pa med pas na/ / bya ba grub pa'i ye shes yin// stong pa ye shes rtsal snang ba// mtshan nyid 'dzin pa'i ye shes lnga// rig pa'i klaung nas 'od gsal pa// dkar dang dmar dang ser dang ljang// mthing kha rnam par ye nas grub/ / snang la dngos med me long bzugs brnyan 'dra// nam mkha' me long chu bo dang// spu gri so dang rlung bzhin no// sarba dz+nya pany+tsa ka la d+ha tu a// zhes sku gsum ye shes lnga'i rgyud// 'jam dpal ye shes rgyan gyi dgongs pa las/ / ye shes lnga'i 'dug tshul bstan pa'i le'u ste lnga pa'o//// de nas yang gsang ba'i bdag pos mkhyen bzhin du zhus pa// kye bcom ldan 'das kun tu bzang// sku gsum ye shes lnga yi bdag po de/ / bag chags sbubs ji ji ltar gnas// bdag cag rnams la legs par gsungs// zhes zhus so// de nas bcom ldan bdas kyis bka' stsal pa// gsang ba'i bdag pos zhus pa legs/ / thugs rje rtsal gyi 'char lugs dang// srid pa bzhi yi 'dzin lugs dang// sdung byed lus kyi 'chag lugs dang// gso byed bcud kyi 'chag lugs bzhis// dngos po gdos pa can 'di grub/ / sprul pa'i sku ru snang ru snang ba'o// de la ji ltar gnas she na// zla ba'i gdan la nyi ma'i dbu rgyan can// rin chen gur phub zur gsum re thag bzhi// rtog med rig pa chos kyi sku// ye shes lnga yi gzhal yas na/ / longs spyod rdzogs pa'i sku ru bzhugs// thugs rje 'od kyi kun tu khyab// rtags kyi sgron ma sbrul pa'i sku// mchog gi dang po sku gsum 'chang// rnam par rtog med lhun gyis grub// bsam gtan chen po'i ting 'dzin gnas/ / ye shes bzhi yis bdag gnyid can// khyung phrug sgo nga'i tshul du gnas// ma rig sgo lnga'i sbubs 'byed pa// ngo bo gnas dang lam dang sgo// skyon dang yon tan rnams kyis dbye// don gsum the tshom med pa'i blo sa/ / rang gi mtshan nyid nyams la sbyar// dus bzhi mnyam sbyor dgongs pa ni// ngang dang rang bzhin bdag nyid chen pa'i don la bzhag/ ces sku gsum ye shes lnga'i rgyud// 'jam dpal ye shes rgyan gyi dgongs pa las/ / bag chags sbubs bstan pa'i le'u ste drug pa'o// de nas yang gsang ba'i bdag po'i zhus pa// kye kye bcom ldan mkhyen gsal rig/ sprul pa'i sku yi zhing khams nas/ / longs sku'i zhing du ji ltar grol/ bdag rnams la gsung du gsol// zhes zhus so// de nas yang gsung pas srid pa'i sgom pa las rgal ba// skad cig thams cad bye brag phyed// grol ba thar pa rnam grol lus/ / 'jug dang snang dang shes rab grol// don gyi ngo la gnas pa dang// 'gag dang skye dang gnas dang shes// thugs rje 'byung dang rang sar gshegs// yul gyi mtshan ma rnam shes nyid las grol// shes pa lnga ni 'od zer lnga la 'du/ / 'od zer lnga po rig kyi sku la 'du// sku lnga ye shes lnga yi ngang du grol// ye shes lnga nyid mtshon gyi drug bu bzhin// bzhi po rim bzhi gcig gis skyod pa yis// gnas dang lam du byung ste sgo ru 'thon/ / de yi snang ba rim min cig car 'char// skye ba rim skye shes pa thad kar chod// longs sku 'od gsal thugs rje sprul sku 'byung// sku yi 'od dang gsung gi zer// rnam grol zhi ba zhi ba nyid// ces sku gsum ye shes lnga'i rgyud/ / 'jam dpal ye shes rgyan gy-i dgongs pa las// grol tshul bstan pa'i le'u ste bdun pa'o//// de nas yang zhus pa// kye kye bcom ldan 'das mtha' las 'das// longs sku'i zhing nas chos skur ji ltar grol/ / bdag cag rnams la bshad du gsol// bcom ldan 'das kyis bka' stsal pa// nam mkha' las byung rang byung ba// shes rab ye shes mi bo che// gzi brj-id phung po lta na sdug/ longs spyod rdzogs sku kun gyis rgyal// mya ngan 'das pa mya ngan 'das// legs par mya ngan 'das dang nye// bde sdug gsal nas mthar gyur ba// mi mngon mi snang gsal byed min/ / mi 'gyur kun 'gro khyab pa po// kye sems dpa' chen po// ye shes rlung gi shes rab mkha' la 'degs// snyigs ma lnga po dwangs ma'i ngang du grol dwangs ma lnga po rang rang ma la gnas// shes rab spyan gsum rnam par dag/ ma rmugs gsal ba'i rtogs mtha' bral// rang rig ye shes yin pa la// bag chags lus kyi rtog pa med// rdo rje zla ba dri med 'od// 'byed pa med pa'i shes rab gsal// rnam par dag pa bdag med chos/ / sdug bsngal gsum gyi sdug sngal zhi// yang dag mtha' la rnam par gnas// chos sku chos nyid dbyer med pa// ye shes sbyan ni longs skur gsal// srog med sku lnga sprul skur gnas// dbyer med shes rab ngang la gsal/ / ces sku gsum ye shes lnga'i rgyud// 'jal dpal ye shes rgyan gyi dgongs pa las// chos sku'i ngang du gzugs sku gnyis grol ba'i le'u ste brgyad pa'o//// gsang ba'i bdag pos yang zhus pa/ / bcom ldan mgon po 'du 'bral med// yul sbubs gzags can grol ba bzhi// gcig las gcig rdzogs bdag cag rnams la shod// ces zhus so// bcom ldan 'das kyis bka' stsal pa/ / ma rtogs 'khrul ba'i snang ba yin// rnyigs ma 'byung ba lnga yi ngo bos stong// dwangs ma lnga po 'od gsal pa// chos nyid snang ba de las med// rang las snang zhing rang bzhin med// rang snang rnam par dag pa yin/ / nyon mongs las grub gdos pa can// ma rtogs bag chags sbubs su bshad// de nyid stong zhing ye shes gsal// bzhi bcu rtsa gnyis lhun gyis grub// bum pa nang gi mar me bzhin// 'od kyis sbubs su nga yis bshad/ / byung yang rig pa rang las byung// thim yang rig pa'i ngang du thim// gnas kyang rig pa'i ngang du gnas// chos sku phyin nang mdun rgyab med// rin chen sbubs su nga yis bshad// so sor rtogs pa'i shes rab kyis/ / gcod pas shes rab sbyan zhes bya// phyi nang chos kyi don rtogs pa// chos kyi spyan na so sor gsal// de dag stong zhing ye shes gsal// 'gyur ba med pa'i ngang gnas// ye shes spyan du nga yis bshad/ / sems kyi rtogs pa chod pa ni// blo yis mtha' las grol ba yis// 'khrul pa'i snang ba ngo bos stong// ma grub mi gnas dag pas na// 'khor ba'i mtha' las grol ba yin// gzung 'dzin mi gnas gnyis med mya ngan 'das/ / chos kyi mtha' las grol ba yin// zhes sku gsum ye shes lnga'i rgyud// 'jam dpal ye shes rgyan gyi dgongs pa las// yul sbubs gzigs can grol ba bzhin nyid du bstan pa'i le'u ste dgu pa'o/ /// de nas mkha' 'gro ma zhe sdang rdo rje ma dang// nga rgyal rdo rje ma dang// 'dod chags rdo rje ma dang// phrag dog rdo rje ma dang// gti mug rdo rje ma dang lnga dgyes nas 'di skad ces brjod do/ / e ma ho bde gshegs bcom ldan 'das// snying po don gyi rgyud gsungs// snod kyi 'jig rten dbyings su grol// sems kyi rtogs pa chos skur grol// dug gsum sku gsum ngang du grol/ / dug lnga'i ngo bo ye shes lnga ru grol// bdag cag mkha' 'gro rnams kyang// mi gnas pa'i ye shes kyi ngang du mchi'o// e ma ho gsang ba rmad du byung ba'i chos// ma spangs ma sbyangs ma bsgyur bar// bde chen ngang la gnas pa ngo mtshar che/ / thabs mkhas thugs rje'i bdag po khyod la 'dud// ces brjod nas// mkha' 'gro ma mi rtogs pa'i ngang du gshegs so// ston pa rdo rje sems dpas bstan// zhu ba po phyag na rdo rje zhus/ / nyan pa po mkha' 'gro ma lngas mnyan// sbas pa po me ri 'bar ba'i kha la sbas so// de bzhin gshegs pa gser 'od dam pas// ro langs bde ba la lung bstan te mjug bsdus so// sku gsum ye shes lnga'i rgyud/

CLOSE WINDOW