rgya gar skad du/ dz+nyA na rad na ma hA dz+wa la nA ma/ bod skad du/ ye shes rin po che 'bar ba zhes bya ba/ bcom ldan 'das dpal kun tu bzang po la phyag 'tshal lo/ / ye shes chen po'i klong du/ thams cad ma lus mi lus lus pa med par sangs rgyas so// de nas bde bar gshegs pa thams cad kyi ye shes kyi nyi ma phyogs bcur bdal bas/ thams cad sgrib med ye shes kyi rol ba shar ro// kun gzhi yangs pa'i klong/ sems nyid chos sku'i gdangs/ rig pa ye shes kyi zer/ gdul bya sgo lnga'i yul/ rigs drug pa sgo lnga'i gdangs/ sems can sgo lnga'i zer/ bde gshegs sems nyid kyi klong/ thugs rje ye shes kyi zer/ dngos med rang byung gi gzigs/ byas pa 'khor ba'i chos/ 'dzin pa mu stegs kyi chos/ bdag lta 'khrul ba'i chos/ 'bad rtsol 'khor ba'i chos/ brjod bya tha snyad kyi 'phrang/ lta sgom yid blo'i thog/ rtog pa bslu ba'i bdud/ sangs rgyas 'gal ba'i tshig sku gsum nor ba'i lam/ 'khor ba dag pa'i zhing/ sems can sangs rgyas kyi klong/ mun dkyil nyi ma'i mdangs/ snang ba stong pa'i ngang/ gsal ba shar bas bsgribs/ sems can 'gyur med du gyur/ sems can sangs rgyas 'khor ba 'khyam/ rtog pas chos sku bsgribs/ 'khor ba dag pa'i zhing ngo// ye shes rin po che rang 'bar ba las/ gnas lugs kyi le'u ste dang po'o//// de nas bde bar gshegs pas mtshan gyi rgyal po 'di brjod do// dang po gleng gzhis gnas lugs bstan// gnyis pas gleng slang yid ches bstan/ / gsum pas rgyud don gtan la dbab// mtshan bstan dbu zhabs mthar phyin brtag/ sang kr-i ta yi skad ni 'byung bar 'gyur// ta tha li zhes brjod pa yang/ chos rnams dngos med rang byung ngo/ / shangs me zhes brjod pa yang// kun gzhi 'khor 'das rgyal po 'byung// ga na ta zhes brjod pa yang/ sgrib med ye shes rab 'bar ro// bi'u ni zhes brjod pa yang// spros med gzi ldan rab 'bar ro/ / a ga ta zhes brjod pa yang// phyogs med sems nyid rang 'bar ro// dzu 'u rang zhes brjod pa yang// bdal ba chos nyid rang shar ro// gnyis pa phyag la lnga byung ste// ye 'byal chen po kun gzhi phyag/ gnyis med 'dres pa chos nyid phyag/ phyogs med rang shar sems nyid phyag/ 'gyur med zang thal ye shes phyag/ ma btsal lhun grub chos sku'i phyag/ thams cad chos nyid klong du 'byal// 'byed pa med pa'i gzugs kyis zin/ / gsum pa phun sum tshogs pa bstan// dus gsum 'gyur med dus kyi ngo bo yin// kun gzhi sems nyid rang bzhin ni// dngos med gdod nas rang byung ngo// sgrib med da ltar rang gsal lo/ / ma bcos tha ma rang grol lo// bdal ba chen po gnas kyi ngo bo nyid// sems nyid phyogs dang ris med pas// phyi nang gnyis dang bral ba'o// kun gzhi spros pa med pas yongs su dag/ mtha' dbus gnyis dang gdod nas bral/ / rig pa 'du 'bral med pa yangs dog gnyis dang bral// ye nas snying po rang byung 'bad rtsol gnyis dang bral// 'gyur med ye shes ston pa'i ngo bo yin/ / kun gzhi byang chub sems nyid ni// 'gyur med rang bzhin sna tshogs gsal// 'khor 'das gnyis su gsal ba dang// 'phel 'grib gnyis kyi gos pa med/ khams gsum 'khor bar 'khyams pa dang gos zhing brlag pa med/ / skyon gyis ma gos yon tan brgyan pa med// sangs rgyas dgongs pas ma thebs sems can klong la shar// tha dad dbyer med 'khor gyi ngo bo nyid// sems nyid dbyer med ye shes la// gsal 'grib med par shar ba ni// dbyer med ye shes 'khor nyid do// rig pa 'du 'bral med pa la// phyi nang phyogs med gdal ba ni// dngos med rang shar rigs lnga'i 'khor// sgo lnga spros med gsal ba la/ / snang ba dngos med shar ba ni// skal ldan thub 'khor drug nyid do// sems nyid ye shes snying po 'bar// 'khor 'das chos sku'i rgyan du shar// ye shes rol ba'i 'khor nyid do// bstan pa byang chub snying po ni/ / chos rnams thams cad sems nyid 'od du 'bar// stong pa'i klong nas rig pa'i 'od zer shar// sems nyid klong nas rig pa'i 'od zer 'phros// dbang po'i klong nas dngos med rol ba shar// kun tu bzang po phyogs med nyi mar bdal/ / thams cad ma bcos ye shes snying po 'bar// rgyu rkyen med pas ye shes dbyings su grol// dngos po med las 'khor 'das snying por shar// rnam par dag pas gos med sna tshogs gsal/ / kun tu bzang po chos kyi dbyings na 'phyo// thams cad ye shes chen por lhun gyis rdzogs// brjod las 'das pas sgra rnams sna tshogs sgrogs// phyin pa med par 'khor 'das thams cad khyab/ / bltas pa med pa 'gag med sna tshogs gsal// bcom ldan rdo rje thugs rje chen po'i ngang// rang sems stong pa'i ngang nyid las// thugs rje gsal ba'i 'od zer 'phro// ma sbyangs rnam dag grol ba yongs/ / ye shes rol pa'i rgyan du shar// ma bkod rang gsal mchog gi 'od// ye shes 'bar ba 'od po che// sgrib med rang gsal phyogs dang bral// ye shes 'od zer 'bar ba 'phro// spros med ye shes gsal ba'i lam/ / snying po 'gag med rang 'bar yang// spros med ye shes thugs rje'i zer// chos kyi klong chen 'bar ba che// 'byung gsal ye shes 'od zer 'phro// snang gsal 'bar ba'i 'od po che// byang chub sems nyid dngos dang bral/ / ye shes gsal ba'i gdangs dang bral// 'od gsal bkrag mdangs phyogs dang bral// rtsa lnga kha dog dbyibs dang bral// 'bru lnga 'bar ba'i 'od dang bral// rtsa bral stong sangs dngos dang bral/ / thams cad 'gyur med chos nyid bkrag/ ye shes rin po che 'bar ba las/ gleng gzhi bstan pa'i le'u ste gnyis pa'o//// bcom ldan rdo rje kun bzang gi/ gnyis pa gleng slang bstan pa yang/ / gnyis med rang gsal ye shes yab// kun gzhi phyogs med stong nyid yum// sna tshogs 'gyur med rig pa'i sras// phyogs med rang gsal thugs rje'i ngang// 'od gsal bkrag las byang chub sems/ / snying nyid ngang la chags bral mdangs// snang stong rtsa la rig pa shar// byang chub sems nyid 'khrul ba'i rgyu// sgrib med 'od gsal 'khrul ba'i rkyen// stong nyid ngang las ye shes 'bar/ / shes rab bkrag las rig pa shar// dang po 'od gsal las babs so// ye shes 'bar ba 'od po che// spros med rtsa lnga nang na yang// dngos med rig pa ye shes 'gyus// ye shes rig pa'i bkrag ni dngas ma lnga ru shar/ / ye shes rig pa'i dngas ma mchong gi ka bar 'bar// ye shes rig pa'i 'khor lo bdun bdun 'bar// ye shes rig pa'i dngas ma dbang po lnga ru shar// ye shes rig pa'i bcud sha khrag rus par smin/ / de rnams 'khrul ba'i rgyu nyid do// dngos med ye shes bde chen 'byin// ye shes rig pa rtsal shar bas// 'khor lo bdun nas thig le 'dzin// rdo rje'i lam nas bde bar 'bar// lha yi gshed du dri ma med/ / pad+ma'i dbyings nas bde bar 'bar// lha yi shed grogs chags dang bral// sha dang rus pa'i stobs bskyed byang chub sems// rtsa dang rlung rgyus bkrag rnams rak+ta'o// rdzogs nas sdug bsngal 'khor bar spyod/ / de rnams ji ltar bshad gyur kyang// dang po byang chub sems las byung// bar du rang gsal ye shes bkrag las shar// tha mar rang byung ye shes rig pas byas// sems nyid dngos po ma grub shes shing rtogs pas bya ru med/ / ma rig lus kyi rlung ste dngas ma lnga nas shar// gsal byed rtsa lnga nas shar nas sgo lnga gangs la spyod// sems nyid ye shes rlung ste ye shes rtsa lngar shar// sems nyid gdangs gsal shar ba ste/ / gsal dang 'grib dang phyogs ris med// las rlung rig pas sdug bsngal ci spyad kyang// ngo bo ye shes zer la 'phel 'grib gos pa med// thams cad ye shes rgyal ba chos kyi sku// ye shes rin po che 'bar ba las/ / 'khrul gzhi bstan pa'i le'u ste gsum pa'o//// de nas bde bar gshegs pa thams cad kyi// yongs su shes par bya ba dngos po rgyud kyi don// dang po chos rnams thams cad gtan la dbab/ / thub bdag ston pas phyi yi sgros thag bcad// sgra rnams stong sangs chen por sgrogs// dngos med ar sgrogs lha yi thub pa'o// skyon med sku mdog dkar po la// g.yas pa gcod pa'i spu gri oM du 'bar/ / g.yon pa stongs sangs pi wang a ru 'bar// spros pa med pas 'khor lo gtan la bzhugs// dga' ldan skyon med mi yi thub pa ni// thugs rje chags pas sku mdog dmar po 'bar/ / ro mchog bdud rtsir 'byung bas g.yas pa aM dmar can// gos med skyon bral g.yon pa bum pa can// chags med skyon dang bral bas pad+ma'i gdan la bzhugs// 'byed med rang byung byol song thub pa ni/ / 'gyur med sku mdog smug nag la// g.yas na ha ljang nyid na gnas// rig sna tshogs gos med sgron me bsnams// sra brtan rdo rje rgya gram gdan la bzhugs// 'phrul ldan rang snang yi dags thub pa ni/ / 'byung gsal sku mdog ser nag g.yas pa hU~M sngon bsnams// dri med rnam dag g.yon pa zhal zas bsnams// rang byung lhun grub rin chen gdan la bzhugs// zhi byed rang shar gos med sku mdog mthing nag g.yas pa rdo rje 'phyar/ / bde sdug rang grol g.yon pa me long 'phyar// 'gyur med pad+ma'i gdan la bzhugs// 'khor ba rnam dag sangs rgyas zhing// thams cad ye shes snang bar shar// rgyal ba rigs lnga nang gi dbang po gsal/ / ye shes gdang gsal rdo rje 'bar// rig pa'i lam byung sems dpa' nyid// chos sku 'od yin 'gyur ba med// ye shes gdangs yin rnam par snang// rig pa'i bkrag yin sna tshogs mdzad/ / chos sku'i gdangs yin spros pa med// ye shes 'od yin rin po che// rig pa'i yul yin 'byung ldan nyid// chos sku'i rtsal yin lhun gyis grub// ye shes bkrag yin snang ba yin// rig pa'i 'gros yin mtha' yas nyid/ / chos sku snang ba chags dang bral// ye shes snang ba don yod nyid// rig pa'i mdangs yin grub pa nyid// chos sku'i ngo bo sra brtan dpal// ma spangs dag pa'i sangs rgyas zhing// ye shes gdangs kyi gnyis med sangs rgyas pa/ / ye shes lngar gsal sku mdog mthing kha la// a dkar lab chung rdo rje sham bu can// g.yas pa'i me long g.yon pa a zhags 'phen// lhun grub rin chen gdan la bzhugs/ / stongs sangs ye shes sku nyid ni// gos med skyon bral sku mdog dkar po la// oM dmar lab chung 'khor lo sham bu can// g.yas pa dril bu g.yon pa a zhags 'phen// lhun grub rin chen gdan la bzhugs/ / stongs sangs ye shes sku nyid ni// gos med skyon bral sku mdog dkar po la// oM dmar lab chung 'khor lo sham bu can// g.yas pa dril bu g.yon pa a zhangs rkyong// lhun grub ye shes 'bar ba'i sku/ / yon tan rgyas pa sku mdog ser po la// hU~M sngon lab chung rin chen sham bu can// g.yas pa yid bzhin g.yon pa hU~M sngon can// chags med rnam dag ye shes skus// spros bral sku mdog dmar po la// oM ser lab chung pad+ma'i sham bu can/ / g.yas pa bum pa g.yon pa pad+ma 'phyar// sgrib med ye shes khyab brdal skus// nyes skyon rnam dag sku mdog ljang// a dkar lab chung rgya gram sham bu can/ / g.yas ral g.yon pa 'phrul zhags rkyong// ye shes sku lnga rang 'bar ba'o// de nas gnyis med bde gshegs kyis// dngos po med pas kun gyi dngos gzhir shar// 'gyur ba med pas kun gyi rten du gnas/ / gdod nas rang byung kun gyi ngo bor 'bar/ kha dog 'bar ba kha dog med pas kun gyi snang ba shar// phyogs rigs med pas kun gyi dbyings su gyur// spros pa med pas kun gyi bde bar shar// byas pa med pas ye rdzogs lhun gyis grub/ / bgrod pa med pa ye shes dbyings su phyin// dbang po lnga yi rang bzhin ni// dug lnga 'char bas rigs drug sgo// rig pa 'char bas ye shes la// sna tshogs 'byung bas ye shes yul/ / dngos med snang ba chos sku gsal// nga bdag 'byed pa 'bru lnga'i 'od// sna tshogs gsal ba 'od zer bkrag/ dug lnga 'byung ba dwangs ma lnga// skyid sdug 'byung ba rtsa bran bcu// skye shi 'byung ba rtsa lnga blangs/ / chos nyid 'byung lnga 'od gsal nyid// chos sku 'byung lnga ye shes la// ye shes 'byung lnga rtsa lnga nyid// rig pa 'byung lnga 'bru lnga 'bar// snang ba'i 'byung lnga sku lnga nyid// phung po 'byung lnga dwangs ma lnga// bde ba'i 'byung lnga lu ti 'od/ / sdug bsngal 'byung lnga phung po lnga// sgyu ma 'byung lnga phyi yi yul// lta ba'i 'byung lnga ye shes lnga// sgom pa 'byung ba'i sku lnga nyid// spyod pa'i 'byung lnga rigs lnga nyid// lam gyi 'byung lnga rigs 'dzin lnga/ / rtags kyi 'byung lnga phyag mtshan lnga// tshon gyi 'byung lnga gzhal lnga nyid// 'bras bu 'byung lnga lhun grub sku// ye shes rin po che rang 'bar ba las// chos thams cad brdar bstan pa'i le'u ste bzhi pa'o/ /// de nas de bzhin gshegs pa thams cad kyis ye shes thams cad rang shar ba 'di brjod do// chos thams cad mi 'gyur ba'i ye shes so// lta ba mi 'gyur ye shes zang thal lo// sgom pa mi 'gyur ma bcos kun gzhi'i klong/ / spyod pa mi 'gyur rig pa'i rang 'gros so// chos rnams ma byas rang byung la// sems nyid ma bcos kun gzhi dngos gzhir shar// rig pa ma byas dngos po med par 'byung// sgo lnga ma byas ye shes rang 'od 'bar/ / snang ba ma byas chos skur rang 'od 'bar// rtsa gnad ma byas bde gsal 'od du 'bar// phung po ma byas rig pa'i rang 'od 'bar// byang chub sems nyid rang grol te// thog mtha' med nas rang grol 'bar/ / dngos dang bral bas rang grol 'bar// snang ba yod tu grol// rig pa rang byung chen por grol// sems nyid rgyu rkyen med par grol// chos nyid stong par ye shes shar// rig pa stong pa sgo lngar shar/ / sems nyid 'gyur med ye shes rgyun mi 'chad// ye shes 'gyur med rig pa rgyun mi 'chad// rig pa 'gyur med snang ba rgyun mi 'chad// sems nyid mi gnang rang byung rig pa nyid/ / rig pa mi snang rang byung shes rab nyid// ma rig mi snang 'byung ba dug lnga nyid// ye shes snang bas spyad dang gsal bas gos pa med// rig pa sna tshogs spyad dang dngos po gos pa med// bde bar gshegs pas rang shar 'di brjod pas/ / mchog gi 'od gsal mtshon pa'i bri thabs ni// ras sam gro ga 'dom gang gru bzhi la// cha lngar bgos la lnga po lnga lnga bgo/ de yang lnga lngar phye bas brgya dang lnga bcu'o/ / tshon ni mthing kha dkar po ser le brgan// mthing gi mthing kha la sogs pa// tshon rnams rjes shing mdzes tshon gtang// ri mo pad+ma lnga ru bri// pad+ma thams cad nyis 'gyur bri// chos kyi dbyings kyi pho brang ngo/ / snying po chos nyid thig le brgya// 'od gsal dbyings kyi lte ba la// rang byung sems dpa'i sku nyid ni// sku mdog mthing kha rin chen lab chung can// rdo rje sham bur yan lag pad+mar 'bar// dbu rgyan snyan chen snyan chas 'khor lo 'bar/ / phyag g.yas rdo rje g.yon pa me long 'phyar// 'od gsal nang sgo bcu drug la// thub drug ye shes lnga rnams bri// de yi phyi ma'i 'od skor la// zhi khro gnyis kyi lha tshogs bri// de yi phyi ma'i 'od skor la/ / gcan gzan gdug pa'i gzugs brnyan bri// de yi phyi yi 'od skor la// 'od zer bye ba phrag brgya bri// sku rnams thams cad tshon gang ba// pad+ma'i gru chad dag la'o// sangs rgyas bcu drug ye shes mdangs gsal rtags/ / bzhi bcu rtsa gnyis chos nyid stong pa'i rtags// lnga bcu rtsa brgyad ye shes rang shar rtags// gcan gzan gdug pa chos nyid rtsal shar rtags// 'od zer rnams ni rig pa 'du 'phro'i rtags/ / de las rig pa ye shes 'od// ye shes rtsa lnga gnas lugs ni// sems dpa'i dbu yi steng na yang// 'od lnga drang la thar par bshad// a dkar rtsa gcig rtsa lnga nang na gsal// rtsa lnga rtse mo thig le lnga ru 'bar/ / thig le dbyings su ye shes 'bru lnga gsal// 'bru lnga'i 'od las gyen la rtsa bran bcu// rtsa bran nang na a dang hU~M gis gang// thig le 'od las dwangs ma lnga ru 'bar// dwangs ma'i g.yas na don snying lnga yi rtsa/ / don snying rtsa la skyed byed rtsa lngar shar// dwangs ma'i g.yon nas stobs kyi rtsa lngar shar// dwangs ma'i phyi ru a ba d+hu ti shar// d+hu ti'i rtsa la 'khor lo bdun// dwangs ma'i phyogs bzhi rtsa chen bzhi/ / don snying lnga yi rtsa ni rgyu// mchin pa'i rtsa la tsha ba skye// bzang drug ga pur gam phye gtang// gdon du srid pa'i ma mo bcos// rgya gar srid pa'i phyi mdos ni// sman gtor me mar stong stong dgod// phyi nang mchod pa rgyas par bya/ / ma mo bcu rnams gyer la gtang// 'bring du dbang phyug zor mdos ni// sman gtor me mar nyi shu brgyad// phyi nas mchod pa rgyas par bya// dpa' bo bcu rnams gyer la gtang/ / tha ma dpon g.yog gsum pa ni// sman gtor lugs bya gsum gsum dgod// phyi nang mchod pa rgyas par bya// lha mo bcu rnams gyer la gtang// glo ba'i rtsa ni stong la rgyal// dbugs kha rgod la ro stod brgyangs/ / bzang drug sprang rgod la sogs gtang// gdon du srid pa'i bdud bcos te// gtor ma nyi shu rtsa lnga gtang// dpa' bo bcu rnams gyer la gtang// snying gi rtsa ni drag la myur// mig rtsa drung la shes pa 'phyo/ / ro stod zer la yan lag gyong// lug sha chang dang me rtsa gdab// 'bras bu gsum gyi sman mar gtang// btsan dang rgyal po gdon bcos te// gtor ma mar me nyi shu lnga// dpa' bo bcu rnams gyer la gtang/ / mcher pa'i rtsa ni phra la grims// sa bdag skyes bu'i nad yin te// yan lag ske 'jing chu sor 'bab// chu gtor tshwa tshwa me mar gtang// dpa' bo bcu rnams gyer la gtang// rtsa ba lnga yi sman mar gtang/ / chu gtor dkar gtor stong stong ni// zla gsum bar chad med par gtang// lha mo bcu rnams gyer la gtang// dam rdzas dug sna dri chu la// sbyin sreg mchod pa rgyas par bya// mkhal ma'i rtsa ni stong la lhod/ / pho mchin 'khor zhing gsus pa dgangs// chang dang lug sha lo mar gtang// gdon du mtsho sman rgyal mo bcos// gtor ma chu gtor mar me btang// lha mo bcu rnams gyer la gtang// glo bur ro stod rgyangs pa dang/ kha nas ba bcol smra ba ni// gdon du srid pa'i dkor bdag bcos// lug sha chang dang bsku mnye bya// tshwa tshwa chu gtor mar me gtang// mdo dang snying po rgyun mi gcad// phyi nang mchod pa rgyas par bya/ / yang dag bsgrub pa'i zhal rnams dbye// ye shes rin po che 'bar ba las// chos rnams thams cad rang shugs kyis spyod pa bstan pa'i le'u ste lnga pa'o//// de nas bde bar gshegs pa yis// yi ge rang 'bar ba brjod do/ / lus rnams stongs bzhi'i lus/ khog pa stong pa a yis gang// spyi gtsug a ru na ra ra// gzhi ma mthing kha a yis gang// sprul sku bsgoms pa ji bzhin no// sdug bsngal bral te bde ba'i sku/ / gser gyi rdo rje 'bar ba la// hU~M sngon 'bar bas ra gseb gtams// yid bzhin nor bu 'bar ba las// oM dmar gdangs pa 'bar ba'o// ye shes pad+ma 'bar ba la// aM gar gdangs pa shin tu gsal/ / zhe sdang gti mug 'dod chags bral// ye shes rin po che 'bar ba las/ yi ge 'bar ba'i le'u ste drug pa'o//// de nas bde bar gshegs pa thams cad yang dag pa 'di brjod do// rang byung sems dpa' lta ba yin/ / byang chub sems kyi rang bzhin no// dngos po med pa kun gyi dngos// rang byung shar ba kun gyi gzhi// rgyu rkyen med pas kun gyi srog/ thog mtha' med pas kun gyi skyabs/ / mchog gi 'od gsal 'bar ba yang/ kha dog med par snang ba shar// dngos po med pas gsal bar shar// bris pa med pas kun gyis gdangs// rdzas su ma grub ye shes 'od// ye shes rtsa lnga rang bzhin dang/ / spros pa med pas stong pa dang// phyogs ris med pas gdangs la sangs// rang bzhin med pas dwangs la stong// byas pa med pas ye shes lam// dpa' bo 'bru lnga rang bzhin dang// dngos po med pas shes rab 'char/ / bris pa med pas sna tshogs 'char// rang bzhin med pas sna tshogs gsal// ye shes yin pas gos pa med// lta ba nam mkha' 'dra ste 'gyur ba med// sgom pa nyi zla 'dra ste gsal 'grib med/ / spyod pa ser bu 'dra ste ngos gzung med// sems nyid bar snang 'dra ste phyogs ris med// 'od gsal nyi ma 'dra ste gsal la gdang// rtsa lnga nyi zer 'dra ste 'phel 'grib med// 'bru lnga chu gzugs 'dra ste dngos po med/ / rig pa smig sgyu 'dra ste rang bzhin med// sgo lnga 'khor 'das rgyab gyes pas// dug lnga gsad pa'i thabs chen yang// nam mkha'i mthong nas zhe sdang sbrul nag 'khyug/ shes rab ye shes gdangs gsal mda' gzhu dgang/ / chos kyi dbyings su ye shes mde rtse gtad// gnyi med ye shes mda' ni 'gyur ni phyogs bcur 'phang bar bya// bar snang mkha' la gti mug phag rgod 'gyur// stong sangs ye shes chen po mda' gzhu'i bdag/ skye med dbyings su ye shes mde rtse bstad// gnyis med ye shes mda' ni 'gyur med brdeg/ yid bzhin sgrom bu'i nang na phrag dog spre'u rtse// dngos med rang byung chen po'i mda' gzhu dgang/ / rlung bsgoms nang du hU~M gi mde rtse gtad// bde ba ye shes rang byung mda' 'phang ngo// rgya mtsho'i gting nas 'dod chags ngang mo 'phur// chags med rang grol chen po'i mda' gzhu dgang/ / pad+ma dbyings kyi aM gi mde rtse gtad// ye shes mde rtse mda' ni rang grol 'phang// ri rab rtse la nga rgyal glang chen 'khun// spros med ye shes chen po'i mda' gzhu dgang// sra brtan rgya gram lte ba mde rtse gtod/ / stong pa chen po'i klong du mda' 'phang ngo// chos sku 'gyur med snang ba'i rgyan du shar// chos sku ye shes gting gsal 'gyur med cing// dus gsum sangs rgyas rnams kyis gtan la 'bebs pa med/ / las can rigs 'dzin rnams kyis don la mthong ba med// mkhas pa dge bshes rnams kyis nyams su myong ba med// khams gsum sems can rgyud la lhan ne lhag ge gnas// dper na nam mkha' stong pa kho rang las/ / dngos po kha dog dbyibs su grub pa med// sems nyid 'gyur med ye shes chen po la// rtogs shin mthong du kho rang rang las med// ye shes rin po che rang 'bar ba las/ gdams pa'i le'u ste bdun pa'o//// de nas bde bar gshegs pa thams cad kyis// sbyang med rnam par dag pas 'di brjod do// dang po phyi bshags rgyas par bya// de nas rten gyi dri ma bca'// phyi ru maN+Dal drug byas la/ / a nri su tri pri tu bri// gtor ma drug la byin brlabs la// ting 'dzin rigs drug lam nas drang// lha mo bcu yis dri ma 'khrud pas dbyung// dkyil 'khor rtsa ru gzhag la khro bo bcu yi bcos pa gtad/ / 'od gsal dkyil 'khor bri la mchod rdzas rgyas par dgram// steng nas 'od gsal dkyil 'khor dbub// bar du rtsa lnga 'dra 'bag bri// bum pa'i nang du rigs lnga bskyed// lha mo bcu rnams gyer la rigs drug lam nas drang/ / khyod ni zhe sdang las kyi dbang btsan gyis// dmyal ba'i nang du ma skyes sam// dmyal ba'i nang du skyes srid na// ye shes lha mo thugs rje dang// yi dam lha yi byin rlabs kyis// tsha grang sdug bsngal bral nas kyang/ / dmyal ba'i 'jig rten gnas stongs te// lha dang slob dpon spyan sngar khug/ ser snas yi dwags su skyes srid na// 'og ma yang 'gre'o// lha mo bkres skom/ yi dwags/ byol song las/ glen lkugs/ 'dod chags/ mi yi/ lha mo/ 'gyur ba/ mi yi/ phrag dogs dang/ lha min/ lha mo/ 'thab rtsod/ lha min/ nga rgyal/ lha yi/ yi dam/ ltung ba/ lha dang/ slob dpon/ ma mo bcu rnams gyer la gshed po dgram/ / dkyil 'khor bcu rnams gyer la sgrib pa bral// lha mo bcu rnams gyer la dkyil 'khor gzhug/ thub drug tshogs la rdzogs par bya// lha dbog sngags dang phyag rgya brtan// phyi nang mchod pa rgyas par bya/ / de nas bzlas pa'i dgongs pa ni// yi dam thugs kar 'od gsal bsgom// 'od 'phros tshe 'das lus la phog/ sgrib sbyangs ye shes a ru gyur// don ni stong gsal chen por blta/ / brtags pas 'gyur med chos kyi sku// de nas spar ba'i dgongs pa ni// dag pa sprul sku dam pa yang// snang ba thams cad 'od du lam// dngos po thams cad a ru grol// a ni ma skyes stong gsal grol/ / mdzad spyod lam du gyer ba yang// chos nyid stong pa'i gzhu brdungs la// ye shes gsal ba'i mda' stongs te// dbyer med thabs dang shes rab dgang// tshe 'das bag chags tshogs la brdeg/ bde ba chen po'i ngang du gsal/ / ye shes snying po stong gsal te// snang srid stong par phya la la// tshe 'das dngos med a nu grol// thams cad rang shar chen por gsal// gdangs gsal longs skur spar ba ni// snang ba thams cad rang sems ye shes gdangs/ / bar snang khams su ye shes 'ja' lnga shar// 'ja' lnga lam nas ye shes a thon nas// thams cad stong sangs chos nyid dngas ma shar// chos kyi dbyings su gzhu brdungs pa/ / ye shes gsal ba'i mda' stongs la// a dkar ye shes mde rtse blang// ye shes 'ja' lnga sbubs su 'bar// stong gsal chen por phya la la// ye shes snying po tshad du bskyal// snang srid ye shes 'od kyis gang/ / 'od zer thams cad a ru 'khrol// thams cad bde stong thig ler 'bar// 'gyur med chos skur spar ba yang// dngos po thams cad stong pa'i gdangs// snang ba thams cad ye shes bkrag/ gzung 'dzin thams cad ye shes zer// chags zhen thams cad chos nyid rtsal// nga bdag thams cad dbyer med dbyings// ting 'dzin 'phro 'du rig pa'i 'gros// thams cad ma bcos chos kyi sku/ / nam mkha'i dbyings su a 'od gsal 'phangs la// yaM dang karma rak+Sha phaT/ stong nyid ngang las ye shes thugs rje shar// me mar brgya rtsa gtang la me mar mchod pa bya// lha mo bcu rnams gyer la khrus nas dbyung/ / ma mo bcu rnams gyer la spar gsum dgongs pa bya// dpa' bo bcu rnams gyer la ye shes mda' 'phang ngo// sbyin sreg rgyas par byas la mtshan byang bsreg/ smon lam rgyas par btab la dkyil 'khor bsdu/ / ye shes rin po che rang 'bar ba las/ gnas kyi rim pa bstan pa'i le'u ste brgyad pa'o//// de nas de bzhin gshegs pa thams cad kyis ye shes kyi mchod pa rang 'bar 'di brjod do/ / dngos med gdangs gsal dkyil 'khor du// rang byung ye shes mchod rdzas bkram// klong yangs chen por byin gyis brlabs// lhun gyis grub par bzhes su gsol// rang byung 'bar ba'i dkyil 'khor du/ / thig le rang shar mchod rdzas bkram// sgrib med rang shar chen pos byin gyis brlabs// rang gsal chen por byin gyis bzhes su gsol// spros med rang shar dkyil 'khor du// skye med rang byung mchod rdzas bkram/ / 'byung gsal chen por byin gyis brlabs// stong gsal chen por bzhes su gsol// thig le klong chen dkyil 'khor du// bde ba'i ye shes mchod rdzas bkram// dbyer med chen por byin gyis brlabs/ / bde ba chen por bzhes su gsol// ye shes 'bar ba'i dkyil 'khor du// dag pa 'phrul gyi mchod rdzas bkram// gdangs gsal chen por byin gyis brlabs// gnyis su med par bzhes su gsol/ / rang shar 'od kyi dkyil 'khor du// gdangs gsal ye shes mchod rdzas bkram// rang snang chen por byin gyis brlabs// rang grol chen por bzhes su gsol// phyogs med pa yi dkyil 'khor du/ / rang sangs chen por mchod rdzas bkram// gdangs gsal chen por byin gyis brlabs// rang grol chen por bzhes su gsol// rang byung lhun grub dkyil 'khor du// dngos med rig pa'i mchod rdzas bkram/ / snang gsal chen por byin gyis brlabs// lhun gyis grub par bzhes su gsol// phyogs med rnam dag dkyil 'khor du// gos med ye shes mchod rdzas bkram// bdud rtsi chen por byin gyis brlabs/ / bde ba chen por bzhes su gsol// khyab brdal ye shes dkyil 'khor du// kun 'byung rig pa'i mchod rdzas bkram// spros pa med par byin gyis brlabs// dbyer med chen por bzhes su gsol/ / ye shes 'bar ba klong yangs che// bde ba'i ye shes 'od du 'phros// ye shes brdal bas mchog gi 'od// ye shes dkyil 'khor gter chen 'bebs// ye shes rin po che rang 'bar ba las/ ye shes kyi dkyil 'khor ranga'abar ba'i le'u ste dgu pa'o/ /// de nas bde bar gshegs pa thams cad kyis gnyis su med par shar ba 'di brjod do// dang por phyi gshegs rgyas par bya// dkar gtor gnyis dang dmar gtor gcig/ sngags dang phyag rgyas byin gyis brlabs// dmar gtor chos skyong tshogs la'o// chos skyong rig pa 'du 'phrod tshogs// dkar gtor bgegs rigs stong phrag la// nyon mongs stong phrag brgya pa'o/ / gcig ni mgon po rtsa gnyis la// rigs lnga bka' rtags bsgo ba 'di ni// gsal ba sku lnga 'od dang yin// dus gsum sangs rgyas gshegs shul yin// khams gsum sems can 'byung ba yin/ / mi 'gyur snying po rtags kyang yin// ye shes lnga yi rtsal kyang yin// rnam shes lnga yi 'od kyang yin// rig pa lnga yi lam yang yin// 'bru lnga 'bar ba'i 'od kyang yin// ye shes rtsal lnga gdangs kyang yin/ / mchog gi 'od gsal bkrag kyang yin// mi shigs thig le'i 'od kyang yin// lha mo bcu rnams gyer la gtang// ye shes lha mo bcu rnams kyang// gdangs gsal ye shes lha mo ni// ye shes gar byed phya la la/ / ral pa'i stabs byed khro lo lo// ye shes chen por bzhes su gsol// rang gsal lha mo 'od 'bar ma// yid bzhin 'bar ba 'phreng ba can// ye shes rol pa kra la la// phyogs ris med par bzhes su gsol/ / spros med lha mo 'od zer ma// bde ba'i ye shes 'phrul gyi gzhi// sgrib med ye shes 'od du 'phro// ye shes chen po bzhes su gsol// bde klong lha mo thig le ma// ye shes 'bar ba'i lcags kyu can/ / brdal ba ye shes klong yangs che// dngos med bdud rtsir bzhes su gsol// chos kyi lha mo sgrol ma rgyal// phyag na me tog 'phreng ba bsnams// rang gsal ye shes dag pa'i mgon// rang snang chen por bzhes su gsol/ / rang gsal lha mo 'od 'phro ma// g.yu yi gzhong pa phyag na bsnams// gsal 'tsher ye shes 'od du 'bar// rang gsal chen por bzhes su gsol// spros med lha mo rang sangs ma/ / phyag na gser gyi gzhong pa thogs// gsal 'tsher lhun grub yid bzhin 'bar// rang grol chen por bzhes su gsol// yid bzhin lha mo sna tshogs mdog/ phyag na rin chen gzhong pa thogs// ye shes mdog gsal kra la la/ / rang byung chen por bzhes su gsol// rnam dag lha mo 'od 'phro ma// phyag na ye shes bum pa bsnams// gos pa med par sa la la// phyogs med chen por bzhes su gsol// kun gsal lha mo 'od zer ma/ / phyag na dung gi gzhong pa bsnams// bde ba 'phul byed ye shes 'bar// khyab brdal chen por bzhes su gsol// ye shes lha mo 'bar ba che// thams cad rdzogs pas klong chen yangs/ / gnyis su med par sna tshogs 'byung// mched pa med par bzhes su gsol// ye shes rin po che rang 'bar ba las// ye shes mchod pa'i le'u ste bcu pa'o//// de nas de bzhin gshegs pa thams cad kyis ye shes kyi gdangs 'bar ba 'di brjod do/ / ye shes snying po 'gyur med sems kyi ngang// rang rig rang byung dngos med snang ba'i rgyan// rtsa dang thig le rang shar 'od// dbang po sgo lnga rang sangs chos nyid bkrag/ ye shes khro bo gdangs gsal 'bar// sku la ye shes klong yangs gsol// g.yas pa shes rab rdo rje 'phyar// 'du 'bral rtsad nas gcod mdzad pa// g.yon pa ye shes mda' gzhu 'gengs// ma rig rtsa ba gcod mdzad pa/ / ye shes khro chung phyogs bcur 'phro// dgra bgegs rtsa ba gcod mdzad pa// stong rig ye shes kra la la// ye shes khro bo 'bar ba rgyal// sku la ye shes kyi shar ba gsol// g.yas pa ye shes ral gri 'phyar/ / rnam rtog rtsad nas gcod mdzad pa// g.yon pa ye shes mda' gzhu 'gengs// skye shi rtsa ba gcod mdzad pa// chos nyid kyi khro chung phyogs bcur 'phro// dgra bgegs dbang du sdud mdzad pa/ / rang gsal chen mor me re re// ye shes khro bo 'bar ba 'phro// sku la ye shes ske tshe gsol// g.yas pa ye shes nyi ma 'phyar// dug gsum rtsa ba gcod mdzad ma// g.yon pa ye shes mda' gzhu 'gengs/ / 'pho 'gyur rtsa ba gcod mdzad pa// bde rgyas khro chung phyogs bcur 'phro// dgra bgegs srog la mA ra ya// rang shar chen por me re re// ye shes khro bo thig le 'bar// sku la chos nyid 'bar ba gsol/ / g.yas pa rang gsal zla ba 'phyar// spros pa'i rtsa ba gcod mdzad pa// g.yon pa ye shes mda' gzhu 'gengs// nyon mongs rtsa ba gcod mdzad ma// ye shes khro chung phyogs bcur 'phro// nyams pa dbang du sdud mdzad pa/ / snang gsal chen por kra la la// ye shes khro bo dpa' bo rgyal// sku la ye shes 'bar ba gsol// g.yas pa gcod pa'i spu gri 'phyar// dug lnga rtsa ba gcod mdzad pa// g.yon pa 'phrul gyi mda' gzhu 'gengs/ / bdag 'dzin rtsa ba gcod mdzad pa// 'od zer khro chung phyogs bcur 'phro// dgra bgegs tshogs la dug mda' brdeg/ bde ba chen por kra la la// ye shes khro bo 'bar ba'i 'od/ / sku la ye shes g.yu khrab gsol// g.yas pa ye shes rdo rje gsor// phyogs ris med par khra la la// g.yon pa yid bzhin mda' gzhu 'gengs// rang bzhin med par kra la la// rang snang khro chung phyogs bcur 'phro/ / dam nyams dgra la mA ra ya// gnyen po med par gsal la la// ye shes khro bo rang sangs rgyas// sku la ye shes 'khor lo gsol// g.yas pa shel gyi spu gri 'phyar// nga rgyal rtsa ba gcod mdzad pa/ / g.yon pa 'phrul gyi mda' gzhu 'gengs// rang sangs chen por kra la la// spros med khro chung phyogs bcur 'phro// dam nyams dgra la mA ra ya// rang grol chen por kra la la// ye shes khro bo rang byung rgyal/ / sku la yid bzhin sha ba gsol// gsal ba dril chen rgyal mtshan 'phyar// nyon mongs gdungapa sel mdzad pa// g.yon pa 'phrul gyi mda' gzhu 'gengs// zhe sdang rtsa ba gcod mdzad pa// yid bzhin khro chung phyogs bcur 'phro/ / dam nyams dgra la mA ra ya// 'dod pa'i yid bzhin char du 'bebs// ye shes khro bo bdud rtsi 'khyil// sku la rnam dag ske tshe gsol// g.yas pa ye shes pad+ma 'phyar// 'dod chags rtsa ba gcod mdzad pa/ / g.yon pa 'phrul gyi mda' gzhu 'gengs// zhe sdang rtsa ba gcod mdzad pa// rnam dag khro chung phyogs bcur 'phro// dam nyams dgra la mA ra ya// ye shes bdud rtsi si li li// ye shes khro bo snang ba'i dpal/ / sku la spros med ske tshe gsol// g.yas pa rdo rje rgya gram 'phyar// sdug bsngal rtsa ba gcod mdzad pa// g.yon pa 'phrul gyi mda' gzhu 'gengs// phyogs ris med par rtsa ba gcod mdzad pa/ / snang gsal khro chung phyogs bcur 'phro// dam nyams dgra la mA ra ya// khyab brdal chen por me re re// ye shes rin po che rang 'bar ba las/ ye shes gdangs kyi le'u ste bcu gcig pa'o//// de nas de bzhin gshegs pa thams cad kyi nyams bskyed byin rlabs bde ba 'di brjod do/ / yul gyi ming ni rgya gar yul// bsam yas rin chen 'bar ba'i dgon pa ru// yid bzhin 'bar ba rgya yis gdab// 'bru gzha' snang gsal 'bar ba'i dgon pa ru/ / dag pa ye shes 'bar ba'i rgya yis gdab// snod brtag sbyin pa'i thabs chen yang// blo chen yangs la ma sbyin cig/ phyogs med 'khyams pa'i skyon du 'gyur// rgya che zab la ma sbyin cig/ chos dbyings chen po'i skyon du 'gyur// rno la myur la ma sbyin cig/ the tshom za ba'i skyon du 'gyur// ti ri sogs la ma sbyin cig/ sgro skur can gyi skyon du 'gyur// mgyogs spyod can la ma sbyin cig/ khyad du gsad pa'i skyon du 'gyur// rtog pa can la ma sbyin cig/ ngo mi shes pa'i skyon du 'gyur// rgyud ngan rnams la ma sbyin cig/ rang rgyud sreg pa'i skyon du 'gyur// thos chung rnams la ma sbyin cig/ ye 'phangs za ba'i skyon du 'gyur// dad can rnams la ma sbyin cig/ dge sbyor gcog pa'i skyon du 'gyur// btsa' can rnams la ma sbyin cig/ chos la rmongs pa'i skyon du 'gyur// phyag rgya spros la gdangs gsal thugs la shar/ / nyi ma'i snying po sgrib med sems la shar// nam mkha'i snying po phyogs med thugs la shar// rgya mtsho'i chu gzugs thos med lus la shar// ye shes rin po che rang 'bar ba las/ 'bras bu chos kyi 'khor la'o// rdzogs so//// rgya gar skad du/ a ti tr-i kA ya pany+tsa dz+nya na tri ka karma tan+t+ra nA ma ma hA san+d+hi tri kA ya pany+tsa dz+nyA na s+yA r+tha su b+ha Shi ta sUr+Ya tsan+t+ra saM pu Ta nA da si ha sin+d+hi gI ti tan+t+ra nA ma/ bod skad du/ rdzogs pa chen po sku gsum ye shes lnga'i don bshad pa nyi zla kha sbyor seng ge sgra yi dgongs pa bshad pa'i rgyud ces bya ba/ bcom ldan 'das dpal rdo rje sems dpa' la phyag 'tshal lo// 'di skad rnam par bshad pa'i dus gcig na/ dus gsum gyi sangs rgyas thams cad 'dus pa'i dpal rdo rje sems dpas thams cad kyi ngo bor gyur pa bzhon nu dpa' bo stobs dang ldan pa des/ lcang lo can gyi pho brang ri bo gnam lcags 'bar rtse la/ ye shes kyi mkha' 'gro rnams dang/ las las grub pa'i mkha' 'gro dang/ 'jig rten gyi 'khor dang/ sprul pa'i 'khor byang chub sems dpa' rnams dang de'i tshe thabs cig tu bzhugs so// de nas gsang ba'i bdag pos 'di skad ces gsol to/ / kye kye bcom ldan 'das thugs rje'i bdag/ sems nyid ye shes 'khrul pa'i sgo// rtogs par 'dod pas ji ltar lta// zhes gsol to// rigs kyi bu nges par nyon cig/ ma bcos rang bzhin snying po'i don/ / phyogs su bltas pas mthong min te// rang la shar ba'i don nyid la// ji ltar nyi 'od nor bu ltar// ma bsags gdod nas lhun gyis rdzogs// rang byung gzhi yi gnas lugs ni// 'gro 'ong med par kun la khyab// gsang ba'i rdo rje nam mkha' che// tshig gi spyod yul ma yin te// 'di zhes brjod pa dka' ba'i don// gsang ba'i bdag pos nges par nyon// byang chub don 'di bstan par bya/ / zhes seng ge sgra yi dgongs pa nyi zla kha sbyor las/ gleng gzhi'i le'u ste dang po'o//// de nas 'khor mkha' 'gro dang gsang ba'i bdag por bcas pa la rang byung gzhi sku gsum don ston par rig nas/ gsang ba'i bdag pos gsol ba/ kye thugs rje thabs kyi bdag po chos sku khyab bdal nyi ma'i snying po lta bu bshad du gsol// zhes zhus so// ston pas bka' stsal ba/ go bar dka' ba'i rang byung lhun grub bde chen don/ / bgrod par dka' phyir dbang dang byin rlabs rgyud// phyi rabs rnams la 'di ltar bshad par bya// chos sku rin chen dgongs pa skye med thig le la// snang ba khyab bdal chen po gsal ba che/ / de don rtogs na btsal dang bgrod med do// lha gnas gsum du grags pa yi// ro langs bde ba thugs sras kyis// yang sprul skal ldan sras bdun la// rgyal thabs spyi blugs dbang bskur nas// byang sems lhun grub brda don sprad/ / rang rig 'gag med 'od gsal rang shar la// dkyil 'khor lnga yi ye shes 'phro// de ldan rgyal ba'i gral du gzhag/ rang rig 'od gsal phyogs med zlum po bum pa'i dbang/ / sku gsum rang shar rang gsal gsang ba'i dbang// bde chen don rtogs shes rab dbang// ngo bo blo 'das spyi blugs dbang// bgrod med ye shes lam du grol ba'i klong// de nyid rang byung rdzogs pa'i lam/ / rim par brda yis bstan par bya// chos sku gzhi yi gnas lugs ni// dgongs pa nam mkha'i mtha' dang bral// mtha' dang dbus med phyogs bral 'gyur ba med// gzhi snang khyab pa chos sku dag pa'i dbyings/ / rang byung rgyu rkyen med pa'i lhun grub pa// stong pa ye shes snying po bdag/ mtha' la mi gnas rdo rje'i sku// ye shes gsal ba rin chen gter// spros dang bral ba'i nam mkha' la// gzung 'dzin bral ba'i rig pa bdal/ / ngo bo rang bzhin thugs rje'i bdag/ ye shes nang gsal sku gsum 'od du gsal// rang bzhin lhun gyis grub pa'o// seng sgra nyi zla kha sbyor las/ chos sku gnas lugs bstan pa'i le'u ste gnyis pa'o/ /// gsang ba'i bdag pos yang zhus pa/ kye/ bcom ldan thugs rje thabs kyi bdag/ longs sku grol lugs ji ltar shar// ston pas bka' stsal ba/ chos sku'i rnam dag dbyer med kyang/ / ye shes sku nyid rang byung gsal// sangs rgyas sku lnga rang rig pa/ mtshan nyid so sor tshul 'dzin cing// shes rab stobs bcu ye shes sku// bzhi bcu rtsa gnyis mtshan 'chang ba// mkha' la nyi shar 'gro don mdzad/ / de nas bya bral dbyings su skyel// zhes seng ge sgra sgrogs pa nyi zla kha sbyor las/ longs skur grol ba'i le'u ste gsum pa'o//// kye kye bcom ldan thugs rje'i bdag/ thugs rje sprul sku'i snang ba ji ltar 'byung/ / sprul pa sku nyid thugs rjer ji ltar shar// bka' stsal pa/ ye shes lnga yi mtshan nyid las// 'byung ba'i dwangs ma 'od du gsal// de la snod du rtog pa brtas// snyigs ma 'byung ba zhes bya'o/ / mkha' la rlung brten de la chu brten nas// de la sa brten 'gro ba brten pa ni// ma rig srid pa'i sgo nga las byung ba// rkyen rnams tshogs nas 'gro drug las kyis 'khor// sna tshogs gzugs can yid las byung/ / 'khrul yang chos sku'i khyab bdal rang byung lhun grub pa// sku gsum 'od gsal ma 'dres rig pa rang rang shar// sprul sku'i zhing khams ma 'dres so sor gsal// sku gsum thugs rje 'gro ba don mdzad pa/ / dpal ldan sangs rgyas pad+ma skyes// sprul pa'i 'khor lo yi ge drug las shar// 'gro drug don du thub drug tha dad mdzes// rnam grol gsum la mkhas pa'i chos kyang ston/ / skye med don phyir chos nyid sna tshogs bstan// sangs rgyas sprul pas sems can kun don mdzad// sems can thams cad rnam grol byed// de nas thugs rje dbyings su sdud// rgya mtsho chu bran sdud pa'i tshul/ / zhes seng ge sgra yi dgongs pa nyi zla kha sbyor las/ sprul sku'i le'u ste bzhi pa'o//// kye/ bcom ldan thugs rje'i thabs kyi bdag/ sku gsum ye shes bshad du gsol/ bka' stsal pa/ ye ni shes pa gcig yin pa/ / mtshan ni rnam pa lnga ldan te// ngang las rang bzhin med pas gsal// chos dbyings ye shes lhun gyis grub// ngang las yon tan 'byung bas na// me long ye shes lhun gyis grub// shes rab gcod pas so sor rtogs/ / skye 'gag med pas mnyam nyid de// thogs pa med pas bya ba grub// stong pa'i ye shes rtsal snang ba// mtshan nyid 'dzin pa'i ye shes lnga// rig pa'i klong na rang shar gsal/ / dkar dang dmar dang ser dang ljang// mthing kha'i rnam par ye grub pa// snang la dngos med nam mkha' 'ja' tshon tshul// ye shes rig pa'i rang gdangs shar bar bshad// ces seng ge sgra yi dgongs pa nyi zla kha sbyor las/ / ye shes kyi le'u ste lnga pa'o//// kye kye bcom ldan thugs rje'i bdag/ sku gsum ye shes lnga ldan rang byung sku// bag chags sbubs na 'gro la ji ltar gnas// bka' stsal pa/ thugs rje rtsal gyi 'char lugs dang/ / srid pa bzhi la 'dzin lugs dang// sdud byed dngas ma chags pa'o// gso byed bcud kyi chags sa bzhi// dngos po gdos pa can du grub// sprul sku 'gro bar snang ba'o// de la ji ltar gnas she na/ / zla ba gdan la nyi ma dbu rgyan can// rin chen gur phub zur gsum re thag bzhi// tsit+ta dpal gyi be'u zhes su bya// de dbus rtog med sku gsum chos kyi sku// sgrib med ye shes lnga yis gzhal yas na/ / kun bzang rigs lnga sems dpa' yab yum bzhugs// thugs rje 'od kyis kun tu khyab pa'i ngang// rtags kyi sgron mar rig pa'i 'od gsal ba// ye shes rtsal ma rdzogs pas khyung phrug sgong rgya'i tshul/ / sku gsum the tshom med blos rang shar rig pa'i don la lta// dus bzhi mnyam sbyor dgongs pas ni// rang ngam rang bzhin bdag nyid chen por gzhag/ ces seng ge sgra sgrogs kyi dgongs pa ye shes nyi zla kha sbyor rgyud las/ bag chags sbubs la sku gsum ngo sprad le'u ste drug pa'o// kye kye bcom ldan thugs rje'i bdag/ sprul sku zhing khams 'gro drug nas// 'bras bu longs skur grol bar ji ltar bgyi/ / zhes pas bka' stsal pa/ srid pa 'gro drug las grol ba// bye brag skad cig gcig gis grol// grol las grol bas thar pa mthong// rnam grol lus ni rin chen sbubs// 'jug dang snang dang shes pas grol/ / phyi snang ba sgo lnga ngang du grol// rnam shes lnga nyid 'od lnga ngang du grol// 'od lnga rigs lnga yum lnga chos sku ngang du 'dus// ye shes sku de mtshon gyi gru gu bzhin// tsit+ta sgron mar zhugs nas chos nyid mkha' la shar/ / rtogs pas skal ldan longs sku ngo bor grol// thugs rje 'od zer 'gro don sprul sku 'gyed// ces seng ge sgra'i dgongs pa nyi zla kha sbyor las/ sems can sbubs nas longs sku 'od kyi sbubs su grol ba'i le'u ste bdun pa'o/ /// kye kye bcom ldan thugs rje'i bdag/ longs sku'i zhing khams sprul pa'i sku// sku gnyis chos sku'i klong du ji ltar grol// zhes pa bka' stsal pa/ dbyings las rig pa ye shes rang byung ba/ / ye shes rdzogs sku gsum sprul pa'i sku// chos sku longs sku rtsal snang ye shes rgyan// 'gro ba'i don mdzad gsal byed kun grol khyab// mi 'gyur ye shes rlung gis shes rab mkha' la bteg/ shes rab spyan gsum rang bzhin rnam par dag/ rang rig ye shes yin la bag chags lus kyi rtog pa med// seng ge sgra las/ ye shes dbyings su sprul pa sku dag pa'i le'u ste brgyad pa'o//// kye kye bcom ldan thugs rje'i bdag/ gzigs pa'i spyan gsum sgrib med ji ltar grol// zhus pa/ bka' stsal pa/ sbubs gsum yul du ji ltar// ma rtogs 'khrul ba'i snang ba ni// snyigs ma byung ba ngo bos stong/ / dwa ngas ma lnga nyid 'od gsal stong// rang la snang zhing rang bzhin med// rang snang rnam dag shes rab spyan gyi ngang du grol// bag chags sbubs na bzhi bcu rtsa 'od gsal ba// stong zhing bdag med bum pa'i mar me bzhin/ / 'od kyi sbubs su sgrib med spyan gsal ba// sgrib med 'od sbubs ye shes spyan du grol// thim shar gnas pa rig pa'i ngang la gsal// 'od gsal snang yang zang thal reg pa med/ / chos sku phyi nang mdun rgyab med pa rin chen sbubs// so sor rtog par chod yang dmigs med chos nyid ngang// gnas lugs chos kyi spyan gyi ngang du sgrib med grol// 'gyur med pa na ye shes stong rig gsal/ / gzung 'dzin gnyis med chos kyi mtha' las grol// seng ge sgra nyi zla kha sbyor las// spyan gsum sgrib med grol ba'i le'u ste dgu pa'o//// e ma ho/ snying po don gyi rgyud gsum pa// snod kyi 'jig rten dbyings su grol/ / sgo lnga dug lnga ye shes gdangs su grol// sems kyi gzung 'dzin spros bral ngang la grol// lus ngag yid gsum sku gsum ngo bor rdzogs// 'khor ba 'das pa grol ba'i sku chen sku gsung thugs/ / rang byung sku gsung ye shes rgyas par bshad du gsol// bka' stsal pa/ chos sku ngo bo kun tu bzang po de// dngos bcas ma yin kha dog tshogs 'od kyi sku// 'bar ba 'od 'phro snang du yod la reg tu med/ / rtag chad las 'das 'gyur med ye shes snying por gnas// de yi yon tan khyab pa phyogs dang ris med pa// zab dang thun mong ma yin thog ma rgyu rkyen med// chos sku mtshon bya dag dang rtog pa dang/ / dag pa glo bur dri ma rnam dag drongs// rang bzhin bral bas de nyid 'od gsal lo// de yi rtogs pa blo 'das rig pa la// smra bsam brjod med so sor rang rig rtogs// mtshan nyid 'dus byas ma yin 'khor 'das dbyer med pa/ / rtag chad las 'das yang dag don du nges// chos sku'i dbye ba bzhi snang chos sku dang// kun bzang ngo bo nyid kyi chos sku ni// chos nyid spyan gyis 'khor 'das zang thal gzigs/ / chos nyid don gyi gsung gi ni// skye med brjod dang bral ba'i don gyis ni// de nyid brjod du med pa'i chos bshad do// longs sku'i ngo bo rigs lnga 'od gsal ye shes lnga yi sku// thugs rje zer du 'phro ba'i bdag nyid/ / mtshon bya sku yi snang ba lnga shar ba// thugs nyid rdo rje lta bu'i dgongs pa ting 'dzin rtogs// mtshan nyid 'du byed rkyen gyis mi bskyod lhun gyis grub// yon tan sprul skur 'phro yang 'gyu byed mi mnga' ba/ / dbye ba bzhi po longs sku rtog med sku lnga dang// zhing khams longs sku 'gro la khyab pa'i sku// ye shes spyan gyis chos rnams mnyam nyid gzigs// dgongs pa 'da' ba'i gsung gis sku yi chos rnams 'jal bar ston/ / sprul sku'i ngo bo thugs rje ye shes las// mtshon bya sku gsung thugs kyi snang ba la// 'gro ba dad dang mos dang smin par byas// mtshon pa thugs rje thabs kyis rnam par mtshon// dbye ba bzhi gnas sprul sku thugs rje sprul pa'i sku/ / ye shes rang byung sprul pa'i sku shar ba'o// shes rab spyan gyis spyi dang rang gi mtshan nyid so sor gzigs// brjod pa tshig gi gsung gis 'gro la chos ston to/ / seng ge sgra dgongs pa nyi zla kha sbyor rgyud las/ sku gsum rang bzhin bstan pa'i le'u ste bcu pa'o//// kye/ bcom ldan thugs rje thabs kyi bdag/ sku gsum nges tshig gsung du gsol// bka' stsal ba/ chos sku'i ngo bo gnyis med shes rab bdal khyab la// longs sku mtshan nyid 'od gsal mi rtog ye shes so// sprul sku ngo bo thugs rje mi 'gag pa// chos sku nges tshig khyab dang rten byed la// longs sku zhi dang 'khor smin longs spyod do/ / sprul sku nges tshig thugs rje sna tshogs sprul// yun thung ma nges phyir na sprul zhes bya// dbye ba chos sku'i chos sku ni// mi 'gyur rig pa spros bral bdal khyab pa// chos kyi sku yi chos sku yang dag bshad/ / rig pa'i shes rab sku lnga mkhyen ma 'gags// chos sku'i longs skur rgyal ba kun gyis bshad// gdul bya sogs med sku lnga ngo bo nyid shar ba// chos sku'i sprul pa sku yi nges bshad yin// de la ngo bo rang bzhin thugs rje gsum zhes bya/ / khyab bdal gzhi yi chos skur de bshad do// longs sku chos sku rnam snang chen po sku gcig sku lngar shar// des na kun tu zhal zhes bshad pa yin// longs sku longs sku'i rigs lnga sangs rgyas la/ / longs sku'i sprul sku sems dpa' sems ma'o// de rnams mtshan nyid bye brag bshad pa ni// 'bras bu mngon du gsal ba'i dus zhes bya// sprul sku'i chos sku rdo rje sems dpa' la// sems dpa' sems ma longs skur bshad pa ni// zer gyi thugs rje sprul pa zhes su bya// de rnams thugs rje 'byung ba'i sku gsum zhes su bshad// rdo rje sems dpa' thugs las thub drug spros// thub drug sprul sku bye ba mched pa ni/ / 'gro ba 'dul ba'i sku gsum zhes su bshad// kye kye gsang bdag nges par bshad kyis zungs// nga ni rdo rje sems dpa' chos kyi sku// nga yi dbu yi thor tshugs dang// mdzod spu bu ga shangs kyi rlung sgrom nas/ / de rnams 'byung ba'i 'jam dpal dri med dang// seng ge sgra dang sems dpa' snying po la sogs pa// sprul pa'i longs sku yin par ngas bshad do// thub drug dga' rab rdo rje la sogs pa/ / sprul pa'i sprul pa yin zhes bya// seng ge sgra dgongs pa nyi zla kha sbyor las// sprul sku gsum gyi dbye ba'i le'u ste bcu gcig pa'o//// kye/ bcom ldan thugs rje thabs kyi bdag/ sku gsum rang bzhin gsung du gsol/ / bka' stsal pa/ sku gsum rang byung ngo bo ma byas pa// ma bcos ma bslad mi 'gyur ba// rang bzhin rnam dag 'dus ma byas// ye shes 'od gsal nam mkha' lta bu la// chos nyid rnam dag rdo rje lta bu'i sku/ / rig pa rang shar zang thal ye shes klong// rang bzhin gzhi gnas ye shes chen po la// mtshan nyid 'dzin pa'i ye shes rnam pa lnga// mi 'gag so sor ngang la 'od du gsal/ / de yi klong na snying po sku lnga phyag rgya 'gag med gsal// ngo bo chos sku gsung thugs rang bzhin longs spyod sku// thugs rje sprul sku thams cad 'byung ba bzhi ma 'gags// bzhi la gnas pa'i sku gsum ye shes zhes su bya/ / rgyu nyid dag pa chos sku 'bras bu gzugs sku gnyis// rang gsal rtsal du grub ste gzhi gnas sku gsum mo// seng ge sgra nyi zla kha sbyor las// sku gsum rang bzhin bzhi'i le'u ste bcu gnyis pa'o/ /// kye/ bcom ldan thugs rje thabs kyi bdag/ gzhi sku gsum sangs rgyas las/ 'bras bu bshad du gsol/ bka' stsal pa/ gzhi sku gsum ye sangs rgyas pa las// kun bzang rtogs pa'i sangs rgyas ni/ / gnyis las ma 'dres gcig las mi 'byed pas// ma 'dres rdzogs pa ye shes rang shar bas// bde chen dbyings su mngon par sangs yang rgyas// sangs rgyas ngo bo nges tshig dang// dbye ba mtshan nyid rnam grangs bstan/ / sangs rgyas ngo bo dri med ye shes la// nges tshig nyon mongs sdug bsngal dri dag ye shes rgyas// dbye ba lhun grub sangs rgyas rtogs pa mngon sangs rgyas// thugs kyi dgongs pas ye shes chos 'chad do/ / longs sku sprul pa'i sku la brda yis ston// sprul pa 'gro ba'i don phyir brda dang tshig gis ston// de yi phyir na sku gsum ston pa zhes su bya// rang rig rtogs pa'i shes rab kyis// log par rtogs pa'i bdud bcom ste/ / mkhyen pa'i ye shes stobs ldan pas// bzung 'dzin mtha' las 'das pa ni// bcom ldan 'das zhes bshad pa yin// mkhyen rtogs bdag gis dpal dang don ston gzhan gyi dpal/ / kun tu don byed kun tu bzang pos bya// 'gro ba'i mun sel sgron mas bya// rang byung ye shes skye 'gag med pas 'chi bdag bdud kyang bcom// rang byung ye shes mtshan ma med pas phung po'i bdud kyang bcom/ / rang byung ye shes gnyis su med pas nyon mongs bdud kyang bcom// sku gsum ye shes gzung 'dzin bral// bral bas lha yi bu yi bdud kyang bcom// longs sku 'ja' tshon sku lnga gdos bcas med pas phung po'i bdud kyang bcom/ / gzung 'dzin skyon bral nyon mongs bdud kyang bcom// ye shes lus la skye shi med pas 'chi bdag bcom// 'od gsal rang byung lha yi bu yi bdud kyang bcom// sku gsum ldan lugs bstan pa ni/ / chos sku yon tan sgo yangs pas// ye shes lnga dang sku gnyis ldan// longs sku mtshan dang dpe byad ldan// dgongs pa 'od gsal ye shes ldan// mngon par shes pa'i chos drug ldan// sprul sku thugs rje rdzu 'phrul ldan/ / sku gsum 'das lugs bstan pa ni// chos sku mtha' rnams kun las 'das// longs sku gzung 'dzin 'khor ba 'das// sprul sku shes rab thabs ldan pa// 'khor 'das gnyis kyi mtha' las 'das/ / sku gsum rgyas pa bstan pa ni// chos sku mtshan ma gnyis snang sangs// rang rig gsal ba gnyis med ye shes rgyas// longs sku 'khor ba'i chos can sangs// thams cad mkhyen pa'i che ba'i ye shes yon tan rgyas/ / sprul sku ma rig 'khor bar rang rgyud sangs// shes rab thabs dang thugs rje rgyas// sku gsum dri ma dag lugs ni// chos sku ngo bo dri ma dag/ longs sku reg bya dri ma rnam par dag/ sprul sku nyon mongs dri ma rnam par dag/ ces seng ge sgra dgongs pa nyi zla kha sbyor rgyud las/ 'bras bu sku gsum bshad pa dang gzhi 'bras khyad par le'u ste bcu gsum pa'o//// kye kye bcom ldan thugs rje thabs kyi bdag/ sku gsum tshom bu bzhugs lugs bshad du gsol/ bka' stsal pa/ chos sku gzhi snang chen po ni// chos nyid 'od gsal ye shes sku// de nyid phyi nang med par gsal// rig pa phyi nang med par khyab/ / bdal ba phyogs ris med par shar// gnyis med chos nyid rdo rje'i sku// rang gsal 'dzin med thugs rig pa// de la mkhyen pa ma 'gags pa// rang rig chos nyid ye shes gdangs shar ba/ / yum gyi rang bzhin shes rab ye shes spyan gyi bum pa lnga// snang ba dngos med nam mkha' 'ja' tshon bzhin// de yi nang na sku gcig sku lngar gsal// gsal la rtog med bum pa'i mar me 'dra// sku gsum nang gsal 'du 'bral med pa'i gnas/ / rig pa'i 'od gsal thugs nyid zang thal bas// sku gnyis yul du mi snang yon tan rtsal ma 'gags// 'du 'bral med pa'i sku gsum snying po la// sku gnyis mi 'gag yod pa'i med pa ste/ / chos sku mi 'gyur med pa'i yod pa ni// 'khar gzhong bcud dang me long gzugs brnyan bzhin// snang la rang bzhin med pas mtshan ma'i skyon dang bral// mi snang rang bzhin yod pa chad pa'i mtha' las 'das/ / chos nyid dag pa'i snang ba la// kun tu bzang po bzang mo'i ngang// rang la shes rab sku lnga snang// mtshan ma gdos bcas sku ma yin// ye shes rang snang chen po chos kyi sku// mtshan ma gzhan snang rtogs pa med/ / shes rab sku lnga bstan pa ni// rang shar rang gsal ngo bo la// thams cad 'char zhing snang ba'i phyir// kun bzang snang ba chen pos bya// rang la sku mi snang ba kun bzang yum gyi klong zhes bya/ / chos sku dngos med zang thal la// gzhan snang med pas gdos bcas 'das// rnam dag chos dbyings bkod pa yis// chos nyid sku gsum dbyer med klong// ye shes rang gdangs bum pa lnga/ / ma 'gags gsal ba myu gu gnas// chos dbyings dag pa rig pa'i sku// kha dog sna tshogs 'bar bar bzhugs// rtsal gyi 'od zer dag snang ba// mthing kha dkar ser dmar dang ljang/ / ma 'dres gsal ba'i ye shes rdzogs// de lnga nang na sku lnga lhun gyis grub// phyogs bzhi dbus dang lngar gnas pa ste// dbus ni kun snang ye shes la// bzhi po rnam snang kun tu zhal// kha dog sna tshogs 'bar ba'i sku/ / ye shes sgo lnga zang thal ma// snang du yod la reg tu med// rtag chad mtha' las 'das pa'i gzhi// sgrib med gdangs gsal spyan mnga' zhing// thogs med rang byung shugs kyi mdzes// skyon bral rnam dag ljags dang ldan/ / 'gag med rang dngas snyan gyis brgyan// spros med rang gsal ye shes sku// phyag ni mnyam gzhag zhi ba'i ngang// kha dog lnga yi bdag nyid 'dzin// gdan gsum ngang la yongs su rdzogs/ / thabs dang shes rab yab yum tshul// gdul bya rigs lnga sangs rgyas te// dag cing gsal ba'i me long la// byad kyi rnam pa gsal ba ltar// mtshan rdzogs rdo rje 'chang chen ni// mi bskyod rin chen 'byung ldan dang/ / snang ba mtha' yas don grub shar// rang rang phyag mtshan thugs las gab// dbyer med rdo rje skyil krung bzhugs// ye shes lnga yi sbubs na gsal// rang rang so so'i chos nyid la// lnga pa so so sbubs na gnas/ / re re la yang bzhi bzhis bskor// ye shes lnga rdzogs rtsal gyi mtshan nyid 'dzin// gnyis med yum lnga lus dang grib ma bzhin// rang byung rang snang rang gis mkhyen// rang snang rtse gcig 'byed pa med/ / seng ge sgra las/ chos sku bzhugs tshul bstan pa'i le'u ste bcu bzhi pa'o//// kye/ bcom ldan thugs rje thabs kyi bdag/ longs sku bzhugs tshul gsung du gsol// bka' stsal pa/ sku gcig sku lngar shar bas rnam par snang mdzad la/ / de las 'gyur ba med pas mi bskyod pa// yon tan phyogs med rang byung rin 'byung bya// dri mas ma gos thugs rje 'od dpag med// gang la thogs med grub pas 'phrin las grub pa'i sku/ / shes rab sku lnga'i rang bzhin ni// rig pa gcig gi ngo bo la// thams cad 'char bar snang bas rnam snang chen po bya// yon tan mi 'gag rin 'byung chen po bya// thugs rje stobs ldan 'od dpag med/ / shes bya thogs med don grub chen po bya// de don rang byung 'gyur med mi skyod che// 'gag med dbyer med rig pa shes rab thugs ldan no// yon tan kun brgyan rab tu ngang la gcod// rnam snang thugs kyi rang bzhin 'khor lo rtsibs brgyad do/ / sku lnga ye shes lnga ldan mi 'gyur mi phyed pas// ma bskyod thugs kyi rang bzhin rdo rje rtse lngar gnas// ngo bo mi 'gyur rang bzhin mi 'gag yon tan rang la 'byung/ / rin 'byung thugs kyi rang bzhin nor bu rin chen gnas// rang gi ngo bo dri med rnam dag pas// 'od dpag med pa'i thugs ni pad+mar gnas// thugs kyi rang bzhin dgongs pa mtha' bzhi 'das/ / tshad med ye shes 'phrin las bzhi rdzogs pas// don grub thugs kyi rang bzhin rdo rje rgya gram gnas// yum ni ye shes dbyings kyi cha// sku mdog phyag mtshan yab dang mthun// gnyis med ye shes 'od du gsal/ / ma bcos rang bzhin yongs khyab pas// yum gyur kun tu bzang mo bya// rang bzhin mi 'gyur 'gag med la// yum gyur sangs rgyas spyan zhes bya// yon tan don sdud mnyam sbyor bas// yum gyur mA ma ki zhes bya/ / yon tan kun smin 'od kyi gdangs ldan ma// yum gyur gos dkar mo yi don du bshad// rang bzhin skyon med mi ldog gnas su sgrol// rlung nyid dam tshig sgrol ma'i don du bshad// sku gsum kun tu 'od kyi sa la ye nyid snying por gnas/ / sa yi snying po zhes su bshad pa yin// sku gsum kun tu khyab pas sems dpa' kun bzang bya// sku de don rang la gzigs pas spyan ras gzigs// sku gsum phyag rgya skye 'jig med pa phyag na rdo rje don/ / sku gsum 'gro la snying rje khyab pa byams pa'i don// sku gsum rig stong dbyer med nam mkha'i snying pos don// sku gsum mkhyen par gsol ba 'jam dpal don/ / sku gsum ye nyid dag pas sgrib sel don// sku gsum ye shes skur snang gzugs nyid sems// sku gsum tshul khrims dri ldan ma le dri// sku gsum shes rab ro ldan nirti ro// sku gsum sgra ldan gI rti sgra/ rgya gar skad du/ bo d+hi tsi ta man tra nA ma/ bod skad du/ byang chub sems yid skyob pa zhes bya ba/ sprul pa'i gang zag 'gro ba'i mgon la btud de phyag 'tshal nas/ khye'u snang ba bsam gyis mi khyab kyis skyob pa'i yi ge zhus pa/ e ma ho/ 'gro ba'i gzung mdzin skyob mdzad pa// skyob pa'i bla med thun mong ma yin skyob mdzad skyob pa dam pa khyod// 'gro ba ma rig mun nag 'thibs shing rnam rtog rlung gis bskyod pa la/ / bu gcig pa la ma bzhin dgongs pa thugs rjes skyabs chen gnong/ gsang sngags don gyi ngo bo gang la bgyi/ / gzhi yi dngos po'i gnas lugs ji lta bu// de nyid rtogs thabs ji ltar rtogs par bya// rtogs nas nyams su blang na ji ltar blangs// blangs nas 'bras bu thob na ji ltar thob/ / 'bras bu khyad par 'phags na ji ltar spags// 'og ma rnams la skyon ni ci zhig mchis/ sems can sangs rgyas ngo bo gcig mi gcig/ gcig na 'khor 'das gnyis gsungs ji ltar lags/ / mi gcig 'brel ba med pa lags sam ci// sems can rnams la skyon ni ci zhig mchis// sangs rgyas rnams la yon tan ci zhig mnga'/ / sems can bya ba gang dang gang la bya// sangs rgyas bya ba gang dang gang la gdags// sangs rgyas sgrub na sgrub rdzas ci la bgyi// de yi bar chad bgegs chen ji ltar bsal/ / de yi lam gyi cha rkyen gang dang gang// yun ni ji srid gcig gis sgrub pa lags// gab pa bco brgyad dus 'dir dbyung du gsol// 'dod pa'i chu bo skems mdzad me chen ye shes dus 'dir dbyung du gsol/ / ma rig mun pa sel mdzad 'od chen dus 'dir dbyung du gsol// 'khor ba'i chu bo sgrol mdzad grub chen dus 'dir dbyung du gsol// rnam rtog rlung dmar zhi mdzad skyabs chen dus 'dir dbyung du gsol/ / gzungs 'dzin phur pa 'byin mdzad rkams pas dus 'dir dbyung du gsol// dug lnga 'joms mdzad thob pa dus 'dir dbyung du gsol// bdag 'dzin sgyu ma mkhan dug chen sel mdzad sman chen dus 'dir dbyung du gsol/ / sel mdzad sman chen dus 'dir dbyung du gsol// zhes pa la sogs pa'i tshig mang po dang// 'gro ba'i dpal mgon yon tan thams cad dbyung ba'i gnas/ / ma rig sel mdzad 'od chen snang ba thams cad dbyung ba'i gnas// mgon po khyed 'dra'i thugs rjes ma gzigs mi gzigs na// 'khor ba thar mtha' med pa'i sdug bsngal bzod brlags med pa dran gyur na/ / ldum bu brngas pa bzhin du mod la mi skam bzod pa thob pa'i sems can la// skyob dpal gcig gzhan ma mchis na// 'gro dpal thugs rje can gyis gzigs su gsol// zhes bstod tshig smre ba'i tshig mang po dang bcas nas skor ba byed cing/ / nyin mtshan du rin po che la sogs te gser dngul sku mi mngon par nub par phul bas/ e ma ho/ 'gro ba'i don la thugs rjes brtson pa'i byang chub sems dpa' khyod/ / dad dang brtson 'grus brtul zhugs drag pos 'gro ba'i don du gsol 'debs na// sangs rgyas dgongs pa nyag gcig bstan dka' ba// brgya la bstan kyang skal med ma mos na/ / 'jigs shing sngangs nas dmyal ba'i rgyur gyur yang// 'jam dpal bshes gnyen khyod langs bstan gyis// gzhan spel skal med dmyal bar gtang na ni// khyod kyang tshe 'dir rdo rje mkha' 'gros gnong/ / phyi mar rdo rje dmyal bar nam yang 'gro/ rab tu brtags la skal ldan re re la// gzhan du ma spel lus ngag yid gsum thud la nyon// dang po gsang sngags don gyi ngo bo ni// skyob pa'i don gyis gsang sngags don yin te/ / gzugs 'dzin gnyis las skyob pas gsang sngags yin// gnas skabs skyob pa gsang sngags ma yin no// ci ste gzung 'dzin 'khor ba'i mtshan nyid las// ma 'das skyob pa'i tha snyad gyin tsam/ / ji srid gzung 'dzin yod kyi bar du ni// rdo rje sems dpas skyob par ma gsungs so// gsang sngags gzung ba bral bas nyon mongs sgrib pa skyob// gsang sngags 'dzin pa bral bas shes bya'i sgrib pa skyob/ / gzung ba'i yul med chos kyi bdag med rtogs// 'dzin pa'i sems med gang zag bdag med rtogs// bsam pa'i yul med yid kyi g.yo ba bral// skyob pa bla na med par rdo rje sems dpas gsungs/ / de ni gsang sngags don gyi ngo bo'o// gsang sngags yin min gzung 'dzin yod med brtag/ drang don gsang sngags gzung 'dzin yod par gsungs// gzung 'dzin yod par bya byed yin par gsungs/ / bya byed yod pas 'dus byas yin par gsungs// nyan thos ngo bo dgra bcom mthar thug snang// de bzhin a nu'i theg pa man chod kyang// rang rang ngo la mthar thug 'bras bu snang mod kyang// bya byed 'bras bu 'dus byas yin par ni/ / rmongs pas ltas kyang the tshom za mi srid// de bas gsang sngags theg pa yang yin mod// de bas gsang sngags don gyi ngo bo de// slob dpon bka' gcog dam nyams lag tu shor ra re/ / 'gro rgyun chos skur 'thung zhing zan tshol khrel med lag tu shor ra re// 'dod pa ma phrel bar du sri zhu che zhing 'dod pa phral nas tshag mo yi// 'du shes bskyed de rgyab kyis phyogs pa'i lag tu shor ra re/ / slad kyis slob dpon mthong na mi dga' skye ba'i lag tu shor ra re// ngo dga' grags pa'i dbang gis snang 'tsho byed pa'i lag tu shor ra re// mdor na dkon mchog dbu 'phangs smod pa'i lag tu shor ra re/ / smras pa mi 'gyur ri rab lta bu la// chos skyong srung ma dpang por gzhag la sbyin// rdo rje mkha' 'gro dpang por gzhag la sbyin// blo ldan skal ba can dang 'phrad par shog/ ces gsang sngags don gyi ngo bo'i yi ge ste dang po'o/ /// gsang sngags ngo bo rang bzhin dbyings la phyag 'tshal lo// gsang sngags gnas lugs thig le nyag gcig ste// kun bral kun dngos ci spangs ci mi spangs/ / thig ni mi g.yo mi 'gyur ma nor spros dang bral// le ni kun dngos brdal khyab cir yang shar// nyag ni zab cing phra ste rtag par dka'// gcig ni ci dran ci smras yul sems bdag gi dbyings// kun bral bdag gi ngo bo phyogs dang bral/ / gcig tu zla bral do chad yin pa la// kun dngos de rang gzung 'dzin byung ba las// nyon mongs 'gro ba lnga dang 'byung chen lnga'o// ci spangs gcig las g.yos pa med pa'o/ / ci ma spangs pa de nyid cir yang 'byung// thig ni chos nyid nam mkha' nyid la bya// le ni sems nyid nam mkha' nyid la bya// nyag ni 'byung ba'i nam mkha' nyid la bya// gcig ni dbyer med gnas lugs gdod ma nas/ / gcig ste sus kyang ma byas byed pa med// kun bral phyogs rigs bdag gzhan rgyu 'bras spros dang bral// kun dngos ma rig cir yang shar// ci spangs rang rig rang rtogs thams cad rang du brlag/ ci ma spangs na snang srid ma bcos rang sar grol// gnas lugs chos nyid nam mkha' gcig pu la// gzung 'dzin rang byung nam mkha' gnyis byung bas// chos nyid nam mkha' ma mthong gnyis pos bsgribs/ / 'byung ba lnga dang 'gro ba rigs lnga po// gzung 'dzin nyon mongs lnga las sna tshogs snang// snang yang chos nyid rang byung g.yos pa med// dper na srid pa dang po chags pa yang// lte ba thig le'i cha shas med pa la/ / yan lag la sogs ma btsal rang nyid shar// sna tshogs gcig dang gcig gi mtshan nyid mi mthun te// lte ba'i thig le'i ngang la g.yos pa med// de bzhin chos nyid nam mkha' rang bzhin cir shar yang/ / chos nyid ngang la g.yos pa ci yang med// de bas dngos po'i gnas lugs gcig tu gnas pa la// gcig pu rang nyid cir yang shar ba ste// gcig gi kun gyi rnam pa 'dzin la gsungs// gcig pu 'khor 'das kun gyi dngos bzhi ste/ / ngo bo nyid ni rtogs dang ma rtogs kyi// byed pa med par rang nyid cir yang shar// dper na nam mkha'i ngo bo byad pa mi mnga' ste// rang gi ngo bo'i 'byung ba bzhir yang shar/ / 'byung ba bzhi yang sna tshogs bsam las 'das// 'das kyang nam mkha' ma g.yos byed pa med par shar// sems can bsam pa sangs rgyas dgongs pa yang// chos nyid gcig tu gzhan ni ci yang med/ / de bas gnas lugs gcig pa bsam mi khyab// de ni gsang sngags gnas lugs yin par go bar gyis// gzhan ni gnas lugs tha dad yin par 'dod// de ni gnas lugs gzung 'dzin can yin te/ / gtan la phebs kyang grol bar 'gyur mi srid// de ni sems can rnams kyi gnas lugs yin// gong gi gnas lugs kun gyi thun mong min// de bas kun la de ltar mi bstan te// lo bdun bar du mtshan nyid rtags la ni/ / skyo ba rdul tsam med na bstan par bya// rab kyi lus srog gtor na bstan par bya// blo che 'jigs pa med na bstan par bya// slob dpon snying ltar brtse na bstan par bya// ser sna nga rgyal med na bstan par bya/ / de las gzhan du khyod kyis bstan na ni// rgya mtshor dug g.yos sdig gi char mi phod// bka' yang ngas bstan tshul bzhin g.yeng ba med par spyod// slob dpon bka' gdams nyams pa byol song yin/ / nams kyang 'khor ba'i mtha' las thar pa med// ces gsungs so// zhes dngos po'i gnas lugs kyi yi ge ste gnyis pa'o//// rang sems chos sku che la phyag 'tshal lo// gnas lugs 'di yis 'di ltar rtogs par gyis/ / lung dang man ngag stobs kyis rang rig nges par 'char// gsang sngags don gyi tshad ma chen po 'di nyid kyis// da lta nyid du 'di ltar rtogs par gyis// phyi nang snang grags 'khor 'das snod bcud chos kun ni/ / ngo bo gcig ste gcig pu de ltar shar// su rtogs gcig par shes te thams cad bdag nyid do// bdag gi rnam pa dag na ye shes chen po yin// bdag gzhan gnyis su snang na mu stegs 'khrul pa yin/ / gcig yul gcig gis byas na gzung 'dzin rnam rtog yin// bdag med rnam dag ye shes ci phyir na// ye nas de ltar yin pas ye shes chen po yin// ma bsgribs thogs med cir gsal ye shes chen po yin/ / kun gyi bdag nyid 'dus ma byas pas ye shes chen po yin// thams cad gcig tu rtogs pas gcig pu bsam mi khyab// thams cad bdag tu rtogs pas nyon mongs skye yul med/ / bdag nyid bsam mi khyab pas nyon mongs skye mkhan med// nyon mongs ma gcad rang chod sangs rgyas dgongs pa ste// sku gsum ma bsgrub grub pas gsang sngags 'bras bu ste// lhun grub rdzogs chen yin par rdo rje sems dpas gsungs/ / thams cad gcig tu rtogs pas gcig pu des// rang gis rang la spyad par mi 'jug ste// rang nyid lhun grub bsgyur bas mi 'gyur te// rang gi ngo bo lhun grub gcig yin kyang/ / gcig tu rtogs pas chog mod cog ge zhog/ bcas bcos rtsis gdab mangs kyang rtsad mi chod// rgya la chod kyang lhun grub bsgyur du med// nam mkha' bsgyur bas 'gyur ba ma yin bzhin/ / bdag nyid chos nyid yin zhes thams cad rang rig shar// blo nyid dngos por gyur ces de la bya'o// sems dang chos sku 'dres te blo dngos phrad// sems de chos nyid ngang du 'gyur zhes bya// ci ste chos nyid ye nas dngos po'i gnas lugs gcig pa la/ / gzung 'dzin blo yis tha dad blo yi chos// lung dang man ngag stobs kyi thams cad gcig tu rtogs// blo dngos 'phros pas sems dang chos su 'dres/ / blo nyid dngos 'dres 'gyur zhes rdo rje sems dpas gsungs// tshogs gnyis rdzogs shing sgrib gnyis byang zhes bya// yul sems gnyis med sangs rgyas dgongs par gsungs// gnyis med rang gi ngo bo gcig pu de/ / 'byed pa med pas smag gi mun rum bzhin// smag gi mun rum 'di 'dra 'byed pa med// shes pa med pa'i shes pa de byung na// gnas pa med pa'i gnas lugs rtogs pa yin// mthong ba med pa'i lta ba de mthong na/ / ci yang ma spangs cis kyang gos pa med// rig pa'i yul med rig pa'i mkhan po med// yul sems gnyis med yid kyi g.yo ba bral// rig pa med pa'i rig pa shar ba la// yang dag don rtogs med par rtogs/ / de las gzhan du theg pa dman// bdag gzhan 'dus shes ma log par// bdag med rtogs pa yin smra zhing// bya byed 'du shes ma log par// sangs rgyas theg pa yin par smra/ / re dang dogs pa ma log par// nyon mongs lhag par 'dod pa dang// sku gsum bsgrubs nas grub 'dod cing// bdag gis gzhan la spyod cing rtog/ sangs rgyas theg par bgrang ba med// de ni sems can bsam pa ste/ / kha cig ci yang ma yin zer// blo yi yul du byas nas ni/ kha cig gnyis su med ces smra/ kha cig yod min med min smra/ kha cig bsam 'das mtha' yas smra/ kha cig 'du shes med smra zhing/ kha cig bsam pa'i yul min zer// la la kun yin gang yin smra// de lta de yi dus min te// nam zhig sbyangs nas 'byung shes smra// de la sogs pa mang smra yang// bdag gzhan 'du shes ma log par// sems can blo yi chos yin te/ / rang gis rang nyid ma rtogs par// gzhal bya'i yul la bdag gis ni// 'jal byed tshad mas gtan la 'bebs// yin min 'du shes nyon mongs bskyed// skyon yon gnyis kyi ye shes bskyed/ / 'khor ba'i mtha' las 'gro bar 'dod// de nyid 'khor ba'i rgyu yin mod// rang gi 'bras bu mi slu yang// yang dag 'bras bu de mi bgrang// ci ste bdag gzhan ma log par// bya byed yod pas 'dus byas chos/ / des na drang ba'i don du gsungs// rang byung ye shes gcig nyid kyang// rtog pa'i ye shes mi mnga' bas// tha dad 'du shes skye ba de// grub mthar bgrang ba ma yin pas// de bas blo ldan sems dpa' khyod/ / yang dag rtogs pas 'di mnos na// rang gi dam tshig thub par bsrungs// bdud kyi slu ba byung nga re// dam can chad pa byung nga re// sgribs te sgo ba ma g.yor cig/ ces gsungs so// gsang sngags tshad mas rtogs pa'i lta ba'i yi ge'i le'u ste gsum pa'o/ /// bka'i bu khyod kyang ni// da dung sa brgyad non yang log pa'i skyon yod pas// da yong nyen med tsam du ma rtogs ma sems par/ / shin du brtson 'grus bskyed de bstan par byos// mngon shis 'ong ba 'dra na shin tu bsgrims// rdzu 'phrul 'ong ba 'dra na shin tu bsgrims// skye ba 'dra mi 'dra na shin tu bsgrims// mkha' 'gro'i lung stong 'dra na shin tu bsgrims/ / bde ba 'bar ba 'dra na shin tu bsgrims// gter ma nor rnyed 'dra na shin tu bsgrims// de kun thams cad g.yeng rgyu bar chad yin/ kha cig de la khengs pa skyes nas ni// bdag la khyad 'phags gzhan ni dman par mthong/ / nga ni gdam ngag ma dran bdud kyi bslus sa re// bdud kyis bslus te gtan du 'khor bar 'khyams// bde ru re zhing las rnams sna tshogs spyod/ kha cig bzo dang rig pa sna tshogs byed/ kha cig mthu dang grags pa sna tshogs byed/ kha cig sman pa'i grub mtha' sna tshogs 'dzin// la la 'jig rten bu dang nor la 'chel// phal cher tshe dang longs spyod 'phel bar byed// nga yi gdams pa 'di dang bral ba na/ / nam yang thar pa ma yin no// bu khyod de 'dra'i sdug bsngal da dung byung nga re// de bas 'bad pas rtogs pa ma bral bar// skyes bu nad kyi gdungs pa ji bzhin du// rtog pa lhang nge rgyun du ma 'bral zhig/ rdo rje sems dpa'i ngo bo rang rig ngang la phyag 'tshal lo// rang sems kun bzang ngo bo chos nyid rtogs nas ni// blang du med pa'i nyams blang 'di ltar te// gcig tu rtogs nas blo dngos phrad tsam na/ / nyams su len pa su yin blangs pa gang// blo nyid dngos por gyur pas blang bya med// sems de chos nyid ngang du gyur tsam na// sgom mkhan gang gis bsgom pa gang zhig sgom// chos nyid ye khyab rtogs nas ma yengs pa/ / ye 'byam chos nyid dgongs pa yin par bshad// dper na mkha' la nyi ma shar ba yang// 'char ba'i yul gcig tshad ma'i blor gzhag nas// 'dir 'char 'dir ni mi 'char bar/ / 'char ba bdag tu dmigs pa ga la yod// chos nyid mkha' la rig pa'i nyi shar ba// chu la chu 'ur thim nas gnas pa las// 'di sgom 'di mi sgom par kun bzang ma gsungs so// sgom yul sgom mkhan bkag pa ma yin yang/ / blo dngos phrad pas chos nyid ngang du gsal// rtogs nas rang dbang med par sgom pa'i yul dang bral// 'di sgom 'di mi sgom par chos dang gang zag rtogs// skyon dang yon tan bral bas nyon mongs dug gsum log/ dug gsum ma gcad log pas sku gsum ma bsgrubs 'grub// de bas sgom du med pa sgom pa chen po'i mchog/ skyon yon bya byed re dogs med pas che// dgag sgrub yid kyi g.yo ba bral bas che/ / che ba lnga dang ldan pas nyon mongs lnga dang bral// lnga bral nyon mongs bya yi ming yang med// sku lnga lhun grub yon tan ma lus rdzogs// de bas sgom du med pa'i sgom pa che// de las gzhan du blo dngos ma phrad de/ / sems de chos nyid ngang du ma gyur par// sgom med skyon yon la sogs gong du smos bzhin smra// bdag gzhan 'du shes lhag pa'i mthu med par// tha mal tshig gi thad du nyon mongs rgyu/ / yul sems gnyis su med par ma rtogs par// ji skad smras kyang glang chen 'dam chu 'dra// grol bar 'dod pa de rang nyid kyi 'chi// 'dod pa med par 'dod pa der rang 'dod pa ste// nyon mongs thams cad de dus nyid du rdzogs/ / bdag gzhan 'du shes yod kyi bar du ni// ji ltar 'dod kyang 'ching ste mi 'dod na yang 'ching// skyon yon med par 'dod na de rang skyon yon yin/ nam yang 'khor ba'i mtha' las grol ba med/ / de bas yul sems gnyis med rtogs tsam na// nyams su ji ltar blangs kyang grol 'gyur zhes// rdo rje sems dpa' nges par gsungs pa yin// bdag gzhan 'du shes ngang gis dben pa na/ / snang srid rdo rje sems dpa'i dgongs pa yin// ye nas yin pa'i don de rab rtogs na// ji ltar rung rung skal ldan nyams su long// zhes gnang ba gnang ste// nyams su blang ba'i yi ge ste bzhi pa'o/ /// rnam dag ye shes ngang la phyag 'tshal lo// 'bras bus sangs rgyas 'dus ma byas yin te// chos nyid sems nyid ye nas 'dus ma byas// bsgrubs nas grub cing thob pa ma yin te// ye nas yin pa'i don de rab rtogs na/ / rtogs pas bstan pa de la 'bras bur gdags// rang 'byung ye shes ngang gis gnas pa la// rtogs pa'i ye shes rang bzhin shar ba yin// rtogs pa'i shugs kyis rlung du gnas pa la/ / stobs kyis bstan pa 'bras bu'i mchog tu bshad// ngo bo rang byung ye shes 'phel 'grib med// sangs rgyas gnas skabs gzhi ru dbye ba tsam// ci ste 'dus ma byas shing bdag gzhan dben// de bas thob tu med pa'i 'bras bu thob/ / dang po gnas su med pa'i lugs de la// gnyis pa rtags su med pa'i rtog pas rtogs// gsum pa blta ru med pa'i lta ba de// bzhi pa sgom du med pa'i sgom pas sgom// lnga pa thob tu med pa'i 'bras bu de/ / drug pa mkhyen du med pa'i mkhyen pa shar// rdo rje sems dpas 'bras bu mchog tu gsung// 'bras bu'i ngo bo ye nas yin pa la// rtogs pas thob ces rdo rje sems dpas gsungs/ / dper na ma he ra tshig bu bzhin no// the gu sbrul la sogs pa de bzhin no// ye nas gzung 'dzin dben zhing 'dus ma byas// yin pa ngang gis gzung 'dzin 'dus byas 'khrul// rang gi gzung 'dzin dag cing 'dus ma byas rig pas/ / spangs nas thob pa med de 'bras bu mchog tu gsungs// de yod sangs rgyas de med sems can med// de rtogs bstan nas yid kyi g.yo ba bral// tha dad 'du shes rdul tsam mi skye na/ / mthar thug 'bras bu thob tshul de ltar thob// dang po rtogs pa'i ye shes rang byung ste// nyi ma gcig la cha bcur gnas pa la// cha gcig ye shes cha dgu tha mal te// rim gyis ma spangs ma bsgrubs bcur 'gags bcur gnas pa/ / gsang sngags 'bras bu thob tshul de ltar thob// snang ba shar nas mun pa brlag pa bzhin// gnyis med rtogs nas gzung 'dzin log pa dang// lhun grub rtogs nas bya btsal log pa dang/ / gcig tu rtogs nas re dogs log pa dang// mnyam nyid rtogs nas dgag sgrub log pa dang// 'bras bu rtogs shes rdo rje sems dpas gsungs// de yang gzhan nas thob pa ci yang med/ / rang gi ngo bo ye nas de ltar gnas// gnas pa rtogs nas brtan pa thob pa la// mthar thug 'bras bu thob tshul de ltar shes par gyis// rang gis shes nas gzhan ni 'di lta ste// yang dag don 'di ston pa'i slob dpon de/ / lhan cig gnas na sri zhu smos ci dgos// yang na bzhugs pa'i yul phyogs dris nas kyang// phyogs der mchod cing phyag 'tshal bstod par byed// sngon du bzhugs pa'i grong ngam gnas khang la/ / skor ba la sogs phyag mchod dngos su byed// dran nam mthong na nad 'byang lus kyang yang// sngon gyi spyod lam dran na mos pa skye// nam yang 'bral ba'i bsam pa mi skye na// dgon par khrid la tshig re bstan/ / yun du bsrings la bags kyi bstan pa las// rdol chos ltug par zhu na bstan pa min// ngang gis snod dang sbyar la bstan par bya// zhes 'bras bu thob tshul gyi yi ge'i le'u ste lnga pa'o//// mnyam nyid ngang gi khro la phyag 'tshal lo/ / 'bras bu khyad par 'phags pa lnga yis 'phags// ma spangs mi gnas mi ltos rag ma lus// tha snyad kun dang bral ba'i 'bras bu de// rang byung lhun grub 'dus ma byas pas na/ / 'bras bu'i rgyal po khyad par 'phags te che// bya byed med de 'dus ma byas pas 'phags// re dogs med pas nyon mongs log pas 'phags// bdag gzhan med pas gzung 'dzin med pas 'phags// rgyu rkyen med pas gnyen pos mi 'jigs 'phags/ / blo dngos phrad pas gnyis med gsal te 'phags// chos nyid ye 'byam gnyis med gnad du chud// rang dbang rang gis thog ste gzhan mi gnas// che btsan 'gran zla med pa'i 'bras bu de/ / ye shes rtse mos thams cad 'jog ste 'phags// chos nyid ye 'byam gnyis med gnad// yid la ma bsam blo yis ma byas pas// rang dbang med pa'i 'bras bu rang byung che/ / gang na ma byung gang du ma phyin par// rang sar rang grol 'bras bu bde ba'i mchog/ yid kyi g.yo ba bral ba'i 'bras bu de// rdo rje sems dpas 'bras bu'i mchog tu gsungs// ji srid yid kyi g.yo ba ma bral bar/ / sangs rgyas 'dod pas sgrub pa'i gang zag de// 'khor ba'i mtha' las thar par ma gsungs so// des kyang rdzogs chen 'bras bu khyad par 'phags// yid kyi g.yo ba bral ba'i 'bras bu de/ / rdzogs pa chen po'i 'bras bu yin par bshad// yid kyi g.yo ba ma bral 'bras bu de// rdzogs pa chen po ma yin bskyed rim yin// bskyed rdzogs shan kyang de ru shes par gyis// re dogs ma zad 'bras bu bskyed rim yin/ / re dogs zad na 'bras bu rdzogs chen yin// gzung 'dzin ma zad 'bras bu bskyed rim yin// gzung 'dzin zad pa'i 'bras bu rdzogs chen yin// a nu man chad sems can blo yis chos/ / a ti rdzogs chen sangs rgyas dngos po'i chos// drang don nges don gnyis su shes par gyis// de bas 'bras bu rdzogs chen 'phags te che// rang 'byung ye shes ye nas gnas pa la// rtogs pa'i ye shes bstan pa rdzogs chen no/ / chos nyid dngos po'i gnas lugs rdzogs pa la// blo nyid dngos po 'gyur ba chen po yi// ye nas chos nyid gcig pas rdzogs pa la// gcig rtogs gzung 'dzin bral ba chen po'o/ / bya byed bral de lhun gyis grub pa de// rdzogs pa yin la chen po yin par shad// bya byed bsgrubs nas grub pa'i 'bras bu de// rdzogs pa yin yang chen po med pa gsungs// so so skye bo'i blo la gnas pa na/ / rdzogs pa ma yin chen po min par gsungs// dngos po'i gnas lugs ye nas gnas pa de// chen po yin yang rdzogs pa min par bshad// ci ste rtogs pa'i ye shes ma ldan pas// de ltar rang gi blo la go bar gyis/ / yang dag don gyi khyad par de tsam mo// rang gi shes rab rtsal gyis ma chod na// mang du smras pas slar yang tshig gis sgrib// nga yis khyod la bstan pa'i tshig bcad 'di// su la bstan kyang ma rtogs mi srid de/ / skal ldan brgya la 'ga' dang phrad par shog/ skal med brgya la phrad par 'dod na yang// mkha' 'gros bar chad sna tshogs bstan nas kyang// 'di dang skal med phrad par ma gyur cig/ rdzogs chen 'phags tshul gyi yi ge'i le'u ste drug pa'o/ /// lhun grub rdo rje'i sku la phyag 'tshal lo// a nu man chod skyon yang 'di lta ste// bdag gzhan gnyis kyi 'du shes ma bral ba// gzung 'dzin logs par 'dod pa shin tu dman pa ste/ / bya byed 'du shes sgoms nas sangs rgyas sgrub 'dod pa// skye bo phal pas ltas kyang rmongs par gsal// nyon mongs rtsa ba re dogs yin pa la// re dogs lam du khyer nas byang chub sgrub par 'dod/ / khong par dug zos lus la bde bar 'dod// 'dod kyang bde ba mi myong sdug bsngal myong bar 'gyur// re dogs ma zad bar du grol ba thob mi srid/ a nu dbyings dang ye shes sgor zhugs nas/ / gnyis med bde ba ji bzhin blo 'jog 'dod// de yang nyon mongs rdzogs chen mthong ba min// ma hA thabs dang shes rab sgor zhugs nas// bsnyen bsgrub bzhi yis sku lnga thob par 'dod// de yang nyon mongs rdzogs chen mthong ba min/ / yo ga cho ga dgu sgo nas// 'bras bu sangs rgyas thob par 'dod cing rtsol// u pa ya yi lta spyod ni// kri yar spyod cing yo ga sgrub// 'bras bu sku gsum ye shes sgrub/ / bya spyod pa yi kri ya ni// dag pa rnam gsum sgor zhugs nas// rigs gsum sangs rgyas grub par 'dod// mdo sde byang chub sems dpa'i theg pa ni// bden pa gnyis kyi sgor zhugs nas// kun tu 'od kyi sa thob 'dod pa'o/ / shes pa 'gegs pa'i rang rgyal ni// rten 'brel bcu gnyis sgor zhugs nas// yid bzhin bde ba mchog thob 'dod// sdug bsngal spong ba'i nyan thos ni// bden pa bzhi yi sgor zhugs nas/ / dgra bcom 'bras bu thob par 'dod// 'dod pa ma zad bar du ni// nyon mongs zad par mi 'gyur te// nyon mongs 'bras bu khams gsum yin// 'dus byas rten 'brel 'bras bu de// sangs rgyas theg par bgrang ba min/ / de las skyon du shes par gyis// skyon gyi rtsa ba re dogs yin// re dogs gzung 'dzin ma yin pa'i// skyon zhes bya bar rnyed pa ni// rdo rje sems dpas ma gsungs so// ji srid bya byed re dogs kyi/ 'du shes log par ma gyur par// 'bras bu sangs rgyas thob par ni// rmi lam na yang mthong ba min// de bas khyed kyis de ltar shes par gyis// shes nas nyon mongs dbang gis ma yengs par/ / rang gi rtogs pa ji bzhin rlung du gyis// skal med mos pa bzlog pa'i sdig pa ri bas lci// skal ldan bzlog pa'i rgya mtshor char mi phod// de bas gsang sngags gdam ngag tshod gzung shin tu dka'// de bas yun du bsrings la gang zag brtag/ rtogs nas brtson 'grus bskyed la gdam ngag bstan// cis 'og ma skyon gyi rtsa ba dag ma bral ba'i yi ge'i le'u ste bdun pa'o//// bcom ldan 'das rnam dag sems kyi dbyings la phyag 'tshal lo/ / sems can sangs rgyas ngo bo gcig pa yin// don ni chos nyid ngang du gcig pa yin// dpe ni nam mkha'i ngang du gcig pa yin// rtags ni sems nyid ngang du gcig pa yin/ / dang po rgyu med pas na gcig pa yin// bar du rkyen med pas na gcig pa yin// tha ma gnyen po med pas gcig pa yin// dper na nyi ma'i snying po gcig pa la// 'od kyi 'jig rten khams gsum gsal gyur yang/ / nyi ma'i ngang la tha dad g.yos pa med// de bzhin chos nyid ngo bo gcig pa yang// byed pa med pas cir yang ma 'gags gsal// gsal yang chos nyid g.yos shing tha dad med// dper na nam mkha' ngo bo gcig pa la/ / byed pa med par 'byung chen bzhir yang shar// shar yang nam mkha' g.yos shing tha dad med// de bzhin chos nyid gnas lugs gcig pa la// snang grags chos su ma 'gags gsal mod kyang/ / chos nyid g.yos shing tha dad ci yang med// dper na lus kyi ngo bo gcig pa la// byed pa med par yan lag sna tshogs shar// shar yang lus la g.yos shing tha dad med// ngo bo rdo rje sems dpas gcig par gsungs/ / byed pa med par rang nyid rang du shar// dper na rgya mtsho chen po'i tshul bzhin no// bu khyod gcig pa'i don la ma smos shig/ tha dad 'du shes zhugs pa bdud kyi las// de bas gcig pa'i don la nan tan gyis/ / 'das pa'i sangs rgyas gcig pa nyid du rgyal// da lta'i sangs rgyas gcig pa nyid la gnas// slad kyis gdung 'tshob gcig par lung yang ston// de bas gcig pa'i don 'dis rtogs par 'gyur/ / 'khor ba'i nyon mongs ma gcad ngang gis log/ bka'i bu khyod ma yengs shig/ da dung bdud kyi slu ba byung nga re// zhes 'khor 'das ngo bo gcig pa'i yi ge'i le'u ste brgyad pa'o/ /// e ma ho/ don nyid ma btsal rdzogs la phyag 'tshal lo// gcig pa'i don la 'khor 'das gnyis su gsungs// rang byung ye shes gcig tu gnas mod kyang// rtogs ma rtogs kyi 'khor 'das gnyis su gsungs/ / dper na sman gyi rgyal po ga pur gcig pa la// tsha grang rkyen gyis sman dug gnyis su gnas// de bzhin chos nyid tshogs dang bral ba la// byed pa med par 'khor 'das gnyis su shar// de yang rtogs ma rtogs kyi bye brag go/ 'khor 'das rtogs ma rtogs las med par gsungs// sangs rgyas bsgrubs pas grub par ma gsungs so// 'khor ba spangs pas spangs par ma gsungs so// dper na nyi ma'i dkyil 'khor snang ba yang/ / nyi ma'i ngo bo gcig las ma g.yos par// chu bur zhag gi mig gis mun snang gnyis// mun pa spangs nas snang ba bsgrub pa med// de bzhin rang sems rgyal po chos nyid de/ / rtogs nas sangs rgyas ma rtogs sems can no// rtogs na mi rtogs ma rtogs rnam rtog go/ dug lnga ye shes lnga yang rtogs ma rtogs// rtogs ma rtogs kyang byas pa ma yin te// rang gi ngo bo ngang gis de ltar ro/ / chos rnams thams cad ngang gis rang shar las// las so zer nas rgyu mtshan tshol ba na// blun rmongs de ni sangs rgyas theg chen min// nams kyang 'dus byas rkyen las de mi 'da'// khyod kyi 'khor 'das rang byung shes par bya/ / gnyis kyang gcig gi ngo bor shes par gyis// gcig las gnyis kyi rang bzhin shes par gyis// rtogs ma rtogs kyi 'khor 'das gnyis su gsungs// de las 'khor 'das gnyis kyi rgyu mtshan ni/ / rdo rje sems dpas rnyed par ma gsungs so// zhes 'khor 'das gnyis su gsungs tshul gyi yi ge'i le'u ste dgu pa'o//// bcom ldan 'das thams cad mkhyen pa'i ngang la phyag 'tshal lo/ / sangs rgyas sems can gcig cing tha yang dad// sangs rgyas gang yin sems can yin// sems can gang yin sangs rgyas yin// sangs rgyas sems can lhan cig mi gnas te// sangs rgyas yod na sems can med/ / sems can yod na sangs rgyas med// gcig pa chos nyid yin pa la// ma rtogs 'khor ba'i sems can te// rtogs pas sangs rgyas dgongs pa yin// gong gi ma rtogs pa de nyid/ / phyis nas rtogs pa de nyid yin// de las gzhan med de kho na'o// don gyi ngo bo 'pho 'gyur med// re zhig gnyis su bgrang ba tsam// de yang 'gro bas rtogs phyir ro// 'khor 'das lhan cig mi gnas te/ / ma rtogs pa yi dus tsam na// rtogs pa yod par smra ba min// re zhig shas che'i sgo nas smra// mun pa yod na snang ba med// snang ba yod na mun pa med// re zhig gcig tu bstan pa tsam// de yang rtogs par bya phyir ro/ / 'o na don gyi ngo bo de// bsam mi khyab tu gnas pa yin// snang bdo tsam na stong pa bdo// stong bdo tsam na snang ba bdo// sman bdo tsam na dug kyang bdo// dug bdo tsam na sman yang bdo// sems can bdo na sangs rgyas bdo/ / nyon mongs bdo na ye shes bdo// gcig dang tha dad yin pas na// gcig dang tha dad grol bar gsungs// de bas 'khor 'das 'brel zhing rgya ma chad// mtha' dngos mtha' bral kun dngos kun dang bral/ / de bas yang dag lta ba gza' gtad bral// sems can sangs rgyas ngo bo nyid kyi 'brel// ma rig rkyen gyis tha dad par yang gsungs// de 'dra'i don ni skyes chen su 'chang ba// dge sdig gnyis ka ched du mi byed de/ / byas kyang chos nyid ngang la g.yos pa ci yang med// mi g.yo mi 'gyur yul med dbang pos stong// rtogs pa'i dus su mngon sangs rgyas// thob bya'i 'dod chags ngang gis bral/ / de mthong thams cad chos sku bas// dogs shing bag cha'i zhe sdang ka nas dag/ bshugs kyis dgra zin 'du shes ldog par snang// thams cad ngo bo rang gi dbyings// 'du shes thams cad zad par 'byung/ / byas pa thams cad ngang gis ldog/ de 'dra'i drod dang ldan tsam na// bdud dang thun mongs dngos grub che// ci 'dra'i nus pa 'byung 'gyur yang// bdud de chos nyid ngang du bstim// bar de nan tan shin tu 'bad/ kha cig de la spros skyes nas// zag pa zad par mthong ba na// de yang blo chung 'khor ba'i rgyu// khyod kyis de ltar shes par gyis// shes 'khor 'das 'brel don gyis yi ge'i le'u ste bcu pa'o/ /// spros bral chos kyi sku la phyag 'tshal lo// sems can skyon gyi rtsa ba gcig pa la// bdag tu 'dzin pa dug lnga rang las byung// sems can zhes kyang 'dzin pas brtags pa yin// nyon mongs ji snyed thams cad 'byung ba'i gnas/ / bdag tu 'dzin pas thog ma med pa nas// da lta'i bar du sdug bsngal 'dam du mnar// da dung gzung 'dzin phur ba ma thongs par// thar bar rdo rje sems dpas ma gsungs so/ / chos nyid gcig tu zla dang bral ba la// nga dang gzhan du gzungs bas gtan tu 'khyams// ji srid bdag gzhan 'du shes yod kyi bar// dka' ba ci spyad rang nyid 'ching ba'i rgyu// grol bar 'dod pas slar la rang nyid 'ching/ / sbur pa bal du chud pa ji bzhin no// bdag gzhan gnyis kyi go ba ma skyes na// bdag gzhan yul dang sems la bya ba ste// de gnyis yod pas bya ba byed pa dang// re dang dogs dang ma legs dang/ / bzang dang ngan dang rgyu dang 'bras bu dang// mtho ris ngan song thams cad yod par gsungs// ji srid yul sems gnyis med ma rtogs par// bdag gzhan gnyis med zer ba'i dmus long bya ra mkhan/ / bdag dang gzhan gyi shes pa mi 'dre bar// yul sems gnyis med zer ba rmongs pa yod// skyon gyi rtsa ba gzung 'dzin gnyis dang 'grogs/ kha cig grub mtha' 'di skad zer ba yod// nga dang khyod ni ye nas so so ste/ / bdag gi sems nyid btsal bas ma rnyed pas// yul sems gnyis med zer ba'i rmongs pa yod/ kha cig chos nyid tsam du gcig pa la// chos nyid tha dad pa ru 'dod pa yod// yul sems gnyis med zer ba'i rmongs pa yod/ / kha cig sems nyid tsam du 'dod pa la// sems nyid tha dad yul sems gnyis med zer/ kha cig don dang ma 'byor par// yid spyod tshig tu gcig go zer ba yod// yod kyang skyon gyi rtsa ba gzung 'dzin gnyis dang 'grogs/ nyes pa'i byung khungs de dang ma bral bar/ 'khor ba'i mtha' las grol bar gsungs pa med/ de ltar skyon gyi rtsa ba shes par gyis// rnam grangs rgyal bas mkhyen par ma gsungs so/ / re zhig brgyad khri bzhi stong ngo// de yang byed par med par rang byung che ba'i mchog/ de ltar khyod kyi gdeng du chud par gyis// yang dang yang du nyes pa'i rtsa ba ltos// nyes pa'i rtsa ba de dang ma bral na/ / rdzu 'phrul mngon shes ldan yang grol ba nam yang med// ci ste shes bya shes byed yod pas na// skyon gyi rtsa ba de dang kri le 'grogs// khyod la nga yis bstan du yod pa yang// rtogs pa'i ye shes dum bur gnas pas so/ / thams cad chos nyid don la sdud pas chu// yang dga' 'bras bu smin par byed pas me// rang gi ngo bo bstan par byed pas sa// 'khor ba sangs rgyas sa ru bskyod pas rlung/ / rang rig chos nyid gsal bar byed pas mkha'// 'byung chen 'dus pa'i man ngag thabs chen 'di// snying dang 'dra bar chos la shor ra re// yun du brtags la brgya la 'ga' la sbyin// 'di yi snod ldan 'dzam bu gling na dkon/ / snod ma rnyed na mi bstan gter du sba'o// zhes sems can skyon gyi rtsa bar bstan pa'i le'u ste bcu gcig pa'o//// rnam dag ye shes sku la phyag 'tshal lo// sangs rgyas legs pa'i 'byung gnas kun gyi gzhi/ / bdag nyid gnyis med rtogs pa'i pa chos kyi sku// gzugs sku rnam gnyis la sogs yon tan sku// mar me 'od kyi tshul de logs na med// re zhig drang po'i don du bye brag bgrang ba tsam/ / bdag tu 'dzin pa'i shes pa logs pa yis// skye rga na 'chi'i chu bo rtsad nas bcad// chos su gzung ba'i yul de logs na med// nyon mongs dug lnga ma gcad rang nyid chad// sku gzhi ye shes lnga nyid lhun gyis grub/ / sangs rgyas che ba'i yon tan bsam mi khyab// sku yi dngos po ci yang mi mnga' bar// stong gsum ma lus dbang sdud zil gyis gnon// gsung gi dngos po ci yang mi mnga' bar// bstan pa ma lus rgyas par sgrog/ thugs kyi dngos po ci yang mi mnga' bar// thams cad rang gi ngo bo chos skur mkhyen// mkhyen pa med pa'i mkhyen pa chen po de// rdo rje sems dpas mkhyen pa'i mchog tu gsungs// rnam rtog mi mnga' cir yang sal le mkhyen/ / nga dang gzhan du bya byed la sogs pa'i// rnam rtog mi mnga' chos sku sal le mkhyen/ de ni nges don thams cad mkhyen pa yin// de ni thams cad mkhyen pa'i mchog tu gsungs/ / sku gsung thugs kyang gcig gi ngo bor bzhugs// sku gsum ngo bo nyid kyi sku la bzhugs// thams cad thig le'i ngo bor bzhugs pa la// g.yos pa mi mnga' sal le mkhyen// de las gzhan du thams cad mkhyen pa'i bdud/ / drang don a nu man chod thams cad mkhyen pa de// bdag gi gzhan mkhyen mkhyen bya mkhyen byed de// bdag med rtogs pa'i mkhyen pa med// de ni da dung 'dus byas gzung 'dzin yin/ / de ni nga yi yon tan ma yin no// nga yi yon tan gong du smos pa de// khyod kyi blo yis gting du go bar gyis// de don go bas re dogs chad par gyis// de lta bu yi yon tan chen po de// bsgrubs nas gzhan nas byung ba ma yin te/ / rang gi ngo bo ye nas de ltar gnas// ye nas gnas pa rtogs nas bstan pa la// mthar thug sangs rgyas de la byas pa yin// de ltar rang gis rtogs nas bstan pa la// phyi nang snod bcud nga yi yon tan no/ / nga yi yon tan phyogs su ma chad pas// yon tan mchog tu gyur par rgyal bas gsungs// yon tan phyogs chad sangs rgyas yon tan med// de ni sems can blo yi yon tan yin/ / chos nyid bsam gyis mi khyab pa'i// don de rtogs nas sangs rgyas bstan pa ni// sangs rgyas sku gsung thugs yin no// thams cad nga yi dngos gzhi'i sku// nga yi thams cad 'brel bas gsungs/ / nga yi ngo bo mi byed thugs// nga nyid dngos por gyur tsam na// sku gsung thugs su phye ba med// chos nyid don gyi ngo bo de// ma byas spros bral chos kyi sku// ma 'gags rang byung longs spyod sku// chos nyid gcig las ma g.yos par/ / mtshan ma sna tshogs sprul pa'i sku// sems can chos su 'dres pa ni// sku gsung ngo bo phye ba med// phye ba med pa'i yon tan de// yon tan mchog tu rgyal bas gsungs// blo ldan khyod kyis de ltar zung/ / skal med gzhan la bstan gyur kyang// nges shes mi skye the tshom za// zos na gzhan yang bzlog/ de bas de yang nyes pa ni// rgya mtshor dug gi dkrugs pa yi// bye ba'i char yang mi phod do// rdo rje'i dmyal lam lhun grub sku/ / gzhan gyis reg na phung 'gyur bas// btsan du gzhan du legs par btsal// zhes yon tan lhun gyis grub pa'i yi ge'i le'u ste bcu gnyis pa'o//// bcom ldan 'das bya bral ngang la phyag 'tshal lo/ / chos sku ye nas rnam pas dben pa la// bdag dang gzhan du 'dzin pas sems can de// pa'am can ni ldan pa'i sgra// bdag tu 'dzin pa'i sems shes te// gzhan du gzung bas can zhes bya/ / sems la sems su 'dzin pas na// sems shes 'dzin pa'i don gyis so// dol gzung pa'i yul byung bas// yul la can zhes btags pa'o// bdag dang gzhan yod ji bzhin du// bya byed yod pas rgyal bas gsungs byed pa'i ngos nas sems zhes bya/ / bya ba'i ngos nas can zhes bya// bdag yod bar du phan gnod yod// bdag cha'i ngos nas can zhes te// 'dogs byes ngos nas sems zhes te// ji srid bdag yod bar du na/ / gzhan med zer ba blun pa ste// tshur ka med pa'i phar ka ni// rmi lam na yang mthong ba med// bdag ni shes bya'i sgrib pa ste// yul ni nyon mongs sgrib pa yin// sgrib pa can zhes de la bshad/ / sems can zhes su bstan pa yin// nyan thos a nu man chod du// theg pa'i bye brag bsam yas kyang// sgrub nas grub pa'i 'bras bu de// bsgrub bya bsgrub byed yod pas na// de yang yul dang yul can mod/ / re dogs blang dor ma ldog pas// re yang sems can blo yis chos// gong gi chos las ma 'das pas// bya byed yod pa ji bzhin du// sems can yin par rdo rje sems dpas gsungs// gzung 'dzin med pa'i bya byed dam/ / bdag gzhan med pa'i gzungs 'dzin nam// bdag med rtogs pa'i re dogs ni// sngar yang ma thos mi thos so// ci phyir ma gsungs mi gsung zhing// gsung bar gyur pa ma yin te/ / de lta ba'i chos can ni// yod par 'os pa ma yin no// phan gnod med pa'i smad du ni// smra bar nus pa ma yin no// pha ma med pa'i bu de yang// smra bar rig pa ma yin no// bdag gzhan bcas pa'i sangs rgyas sam/ / bya byed yod pa'i sangs rgyas sam// re dogs yod pa'i sangs rgyas kyang// kun rdzob a nu man chod du// drang ba'i don du bstan pa tsam// nges par smra bar byed pa ni// rgyu mtshan gang dang gang gi phyir/ / gal te bsgrubs pas grub pa ni// sangs rgyas rdzas yod mi rtog go/ don dam bsgrub tu med na yang// khyod rang nyid dam gzhan zhig yin// khyod rang nyid na sgrub ci dgos// gzhan zhig yin na 'brel ma 'brel/ / 'brel na 'brel ba rnam gnyis rtag/ ma 'brel 'bad pa don med 'gyur// de bas sems can chos kyang gsungs// sems can bya ba de dang de la bya// mdor na bya byed re dogs gnyis la bya// a nu man chad sems can chos su ni/ / rdo rje sems dpas dus 'di nyid du gsungs/ de bas kun gyis thob na lnga pa 'di// khyod kyis gzhan la spel bar mi bya'o// spel na gang zag skal med kyis// kun bzang dgongs pa 'di la gshe gyur na/ / nam mkha' ji srid bar du ni// shi ba'i 'og tu dmyal bar 'gro// zhes gzung 'dzin sems can du bstan pa'i yi ge'i le'u ste bcu gsum pa'o//// bcom ldan 'das che btsan rgyal ba'i sku la phyag 'tshal lo/ / bdag med rnam gnyis rtogs pa'i sangs rgyas de// bya byed re dogs bral bas sangs rgyas yin// bdag gzhan 'dzin pa chos sku'i ngang du sangs// shes pa med pa'i shes pa bstan pas rgyas/ / gzhi ni bdag gzhan dben pas sangs// de bzhin rang gi rig pa rgyas par bshad// rang byung chos sku spros pa bral bas sangs// spros bral rtogs pas gdeng du gyur pas rgyas// rnam rtog bdag tu 'dzin pa sangs pas sangs/ / mi rtog ye shes gnyis ni gsal bas rgyas// gzung 'dzin bag chags ma lus kun sangs nas// ye shes mkha' la nyi ma shar bzhin rgyas// sangs rgyas zhes kyang de la btags pa yin/ / rig pa med pa'i rig pa shar tsam na// sgom du med pa'i sgom pa shugs kyis 'byung// thob tu med pa'i 'bras bu rang dbang med par thob// rang dbang med pa'i 'bras bu'i rgyal po de// rdo rje sems dpas sangs rgyas zhes su gsungs/ / yul sems 'khor ba'i sdug chen sangs pa yis// snang srid chos sku'i ngang du rang sangs rgyas// de las sangs rgyas zhes su sems dpas gsungs// bdag gzhan 'du shes chos nyid ngang du sangs/ / bdag med rtogs pas lhag med chos skur rgyas// bdag gzhan 'du shes ngang gis log pa na// yid kyi g.yo ba rang dbang med par ldog/ yid kyi g.yo ba bral ba bstan pa las/ / gzhan du sangs rgyas sems dpas ma gsungs so// de las gzhan pa'i sangs rgyas yod par ni// nges rgyud kun tu btsal yang rnyed mi srid// drang don sangs rgyas rnam grangs bsam mi khyab/ / de ni sems can mos pa bskyed phyir gsungs/ de ni 'dzam gling bye ba phrag brgyar yang// sprul pa bsam yas 'gro don mdzad par gsungs// sems can rang rang mos pa ji ltar bar// chos ston pa la sogs pa 'tshal bar ston/ / de ni drang don sangs rgyas yin par gsungs// zhes sangs rgyas gdags gzhi dang bcas pa'i yi ge'i le'u ste bcu bzhi pa'o//// rnam dag sems kyi dbyings la phyag 'tshal lo/ / yang dag sangs rgyas sgrub pa'i sgrub rdzas su// rdzas kyi rgyal por rang sems khyad par 'phags// rang sems rdzas kyi rgyal po 'di rtogs na// phyi nang snod bcud snang srid thams cad kun// ma lus rdzas su gyur pas sgrub rdzas che/ / blo nyid dngos por gyur pa'i rnal 'byor la// snang stong bde sdug rnam rtog ci skyes kyang// thams cad de yi rdzas de gud na med// rang byung ye shes ye nas gnas pa la// rtog pa'i ye shes rdzas dang ldan/ / rang la gnas pas sgrub pa yin// rang gi rang rdzas rang la che// bya ba med pa'i thabs dag dang// byed pa med pa'i shes rab gnyis// gnyis med ye shes rtogs gyur na// snang ba sku yi sgrub rdzas yin/ / sgra rnams gsung gi sgrub rdzas yin// dran rtog thugs kyi sgrub rdzas yin// ye nas lhun gyis gnas pa la// rtog pas nor ram rdzas dang ldan// de nyid ngang gnas sgrub pa'o// sgrub rdzas ldan zhes sems dpas gsungs/ / gal te sgrub rdzas de med na// rdzas rnams thams cad ci bsogs kyang// 'khor ba bsgrub pa'i rdzas su gsungs// sgrub rdzas bgrang bar rigs pa min// ye nas lhun grub spros dang bral/ / bsnyen pa yin te bsnyen pa'i mchog/ de rtogs nye ba'i bsnyen pa'o// ngang la gnas pa sgrub pa'o// mngon 'gyur sgrub pa chen por bshad// ye nas lhun grub spros bral de// sems dpas rdzas su gsungs pa yin/ / ma rtogs nor ram rdzas dang bral// rdzogs nas rdzas dang ldan zhes bya// rtogs pa'i rdzas mchog de rten na// rang gi ngo bo rdo rje'i sku// mngon du gyur na sgrub pa yin// rdzas mchog spyi bcings de ldan na/ / lha yang gzhan nas bod mi dgos// sngags dang phyag rgya bsgyur ba med// dka' thub sbyin sreg de nyid do// de nyid mchod pa khyad par 'phags// khyod kyi rdzas kyi rgyal po de bsten na// yun du rdzas mchog 'di dang ma 'bral cig/ gal te rdzas mchog 'di dag bral na ni// bskal par sdug bsngal 'khor bar 'khyams sa re// sgrub rdzas kyi yi ge'i le'u ste bco lnga pa'o//// bdag med spros bral ngang la phyag 'tshal lo/ / thig le spros bral ngang la gnas tsam na// bdag gzhan spros pa'i rnam rtog bgegs chen de// phar la bsal bas sol ba ma yin no// thams cad chos skur rang gi ngo bor gzhom/ / thams cad chos skur ngo bo gcig pa la// bdag gzhan bar chad bgegs ched de byung bas// bgegs chen de yi thams cad dbang gyur pas// thams cad bgegs su ma gyur gang yang med// de bas bdag gzhan 'dzin pa'i bgegs de bas/ / gzhan du bgegs ni nams kyang yod ma yin// de yod pa na bgegs rnams de las byung// bdag gzhan gnyis kyi bgegs chen de// rang las byung zhing rang gis bdud/ / bgegs de nges par 'joms 'dod na// thabs dang shes rab ldan byas la// gnyis med ye shes chen po yis// mnyam nyid ngang du lhan cig/ ngang de nyid la lhan ne gzhag/ gnyis med ngang dang ma bral na/ / bgegs de sdang bar nus ma yin// de bas gnyis med ma yengs par// blo ldan bag dang ldan par byos// bgegs la sogs pa'i phyogs rnams thams cad kun// nam yang 'byung bar sems dpas na gsungs so/ / bgegs zhes bya ba'i ming yang mi srid de// snang srid ye shes// ye shes ma yin pa ni gcig kyang med// thams cad kun tu bzang po'i ngang du gsal// khyod kyis de ltar khong du chud par gyis/ / gal te thabs dang shes rab ma ldan na// ye shes chen po'i gnyis med bral na ni// rnam rtog bdud kyi bar du bcad nas ni// 'khor ba'i btson ra'i nang du bcug nas ni// gzung 'dzin gnyis kyi lcags sgrog bcug nas ni/ / re dogs gnyis kyi tsher lcag las su 'bral// zas su 'dod chags zhe sdang gti mug byin// nad du skye rga na 'chis snying la 'khor// gzigs mor khams gsum snang ba sna tshogs bstan/ / las su sdug bsngal sna tshogs thar med byed// zo chu'i khyud mo bzhin du gcig nas gcig tu 'khor// gnyis med skyabs chen de dang ma phrad na// thar pa'i dus mtha' nam yang mi 'byung ngo// de bas thabs dang shes rab ldan par byos/ / par chad bgegs chen bdag gzhan gzung 'dzin de// gnyis med thabs dang shes rab me yi dbyings su bsreg/ blo ldan khyod kyis de ltar shes par gyis// de ltar shes nas bgegs dang bar chad brlag/ de las gzhan du bar chad sel 'dod pa// de nyid bgegs chen yin pas bgegs rnams thams cad 'byung// sems dpa' khyod kyis gnyis med ye shes sten// blo ldan khyod kyis bla ma rnam gnyis zung/ / dkon mchog gsum dang nam yang ma bral bar// yang dag mchod pa bla med mchod// rang gi dam tshig rtag tu srungs// grogs su rang gi brtson 'grub sten/ / gal te de las 'gal 'gyur te// rdo rje sems dpa'i dgongs pa 'di// khong khro sdug btsir ser sna che// rig pa rgyu dang thabs kyis 'tshol// rnyed na sri zhu rdul tsam med// tshig dang bsam pa cho rol smra/ / chos nyid don dang rtag tu 'gal// de 'dra'i sdig can lag tu btang na ni// dkon mchog gsum gyi dbu 'phangs smad// sangs rgyas bstan pa gnyan po bshig/ chos sgor zhugs nas dmyal ba bsgrubs/ / bdag gzhan gtan du brlag par byas// phung mkhan de dang ma sdongs shig/ khams gsum dmyal ba ma sgrub cig/ rdo rje'i ri mo ma bshig cig/ ces bar chad bgegs kyi mtshan nyid dam bsal thabs kyi yi ge'i le'u ste bcu drug pa'o/ /// bcom ldan 'das sna tshogs kun tu bzang la phyag 'tshal lo// bgrod du med pa'i lam gyi cha rkyen yang// bsam du med pa'i snang srid ngang gis rkyen// cha ni chos sku gcig pa la/ / rkyen ni 'khor 'das gnyis su snang// cha ni rang byung ye shes la// rkyen ni rtog pa'i ye shes shar// cha nyid rkyen la rkyen nyid cha// snang ba dang ni stong pa dang// bde ba dang ni sdug bsngal dang/ / mya ngan 'das dang 'khor ba dang// yod med gnyis dang gnyis med dang// mtha' rnams kun bzang dgongs pa'i rkyen// sprod dang spros bral ngang gi lam// gzugs kun nga rang nyid kyi gzugs// sgra kun nga rang nyid kyi sgra/ / dran rtog nga rang nyid kyi sems// nga rang nyid kyi rol pa la// spang blang nga rang rang nyid shar// bzang ngan nga yi lam gyi grogs// nga nyid ma yin gcig kyang med// thams cad lam du sems dpas gsungs/ / thams cad ye nas rang gi rgyan// mtshon phyir de skad bstan pa tsam// thams cad nga yi rkyen yin te// gcig ma tshang na don mi 'grub// thams cad sel med cha dang rkyen// gang yang rung ngo ci yang yin/ / thams cad chos skur rang gi rang// kun kyang mnyam nyid yin pa la// kha cig yang dag don rmongs pas// ye nas rdzogs pa'i cha rkyen la// sdod kyi rdzas dang cha rkyen sogs// gza' dang rgyu skar dus tshigs dang/ / gnas dang dus dang bdag la sogs// tshogs pas 'bras bu grub par 'dod// bsags nas tshogs pa'i rdzas de dang// bsgrubs nas grub pa'i 'bras bu de// sangs rgyas theg par bgrang ba min/ / dpar na lus nyid gcig pa la// yan lag la sogs cha rkyen yang// rang gi stobs kyis rang la rdzogs// de bzhin snang srid sel med par// chos nyid cha rkyen ngang gis rdzogs// khams gsum srid gsum dus gsum du/ / chos sku rang gi ngo bo las// yod pas sems dpas ma gsungs so// gang yang dran mthong de kho na'o// sman gyi rgyal po ma gi tas// gang la rigs pas sman du 'gyur/ / rtogs pa'i gang zag skal ldan gyis// snang srid ye shes 'od du 'bar// 'khor ba bya ba'i ming yang med// khams gsum nyon mongs gtan nas zad// rigs lnga'i sangs rgyas don dang phrad// sku gsum yon tan 'phrin las kyang/ / bsam las 'das te tha snyan tsam// rtogs pa tsam las gdags pa las// phyogs dang ris su chad pa ni// kun bzang yod par mi gsung ngo// de 'dra'i rtags dang ldan pa la/ / lam dang cha rkyen ldan par ni// rdo rje sems dpas gsungs pa yin// don dang ldan pa'i skyes bu ni// dkon mchog gsum yang ngang du grol// 'gro ba'i srog kyang ngang du gcod// dge sdig gnyis kyang ngang du snyoms/ / rig kun ngang du rlag par byed// rig pa'i rgyun yang ngang du gcod// 'khor 'das ngang yang ngang gis gcod// blo yi chos kun zad pa na// don dang ldan de cha rkyen tshang// khyod kyi de ldan shes par gyis/ / mdor na 'di yi cha rkyen du// ma gyur mi 'gyur mi srid de// skal ldan brgyal 'ga' yis rtogs// kun gyi thun mong ma yin pas// rgya mtsho'i gting gi pha bong bzhin// srid pa 'khrugs kyang khar mi dbyung/ / gal te 'dul ba'i dus mthong na// zla ba re zhing tshigs bcad re// rim gyis snod dang sbyar la bstan// de las gzhan du blo dman gyis// 'dod pa cung zad rang don du// spel na gnyis ka dmyal bar 'gro/ gal te brgya la thar gyur na// ru dra sde gsum dag tu skye// de nas 'phags pa'i thugs rjes bskul// sngon gyi dam tshig rjes su dran// sdod kyi gsang sngags don la 'jug/ gsang sngags bka' mgo log pa yis/ / nyon mongs dug gsum rang dgar spyad// bskal pa stong phrag bcu gnyis su// rdo rje dmyal ba'i sdug bsngal myong// de nas de las thar pa na// ma trang kha traM a kar sha// mgo bo brgya la lus gcig gam/ / lus po brgya la mgo gcig gam// mthu dang rdzun 'phrul bsam mi khyab// tshangs pa'i 'jig rten man chod du// kun la gnod cing 'tshe bar byed// de nas badzra he ru kas// shin tu gdug cing gtum pa las/ / zhi bas phan par mi 'gyur te// shes rab thabs kyi ngo bo yis// khro bor de bzhin gshegs kun mdzad// dus der sngon gyi dam tshig dran// 'khor dang bcas pa zhi bar 'gyur// rang bzhin chos nyid ma rtogs par/ / sgra phyir 'brangs pa'i nyes pa'o// de bas gong gi don la ltos// zhes lam gyi cha rkyen yi ge'i le'u ste bcu bdun pa'o//// bcom ldan 'das rdo rje sems dpa' la phyag 'tshal lo// ye nas lhun gyis grub pa'i 'bras bu las/ / yun dang grub tshul bstan par mi 'os kyang// rtogs pa bstan pa'i nus pa 'di ltar mod// thogs med dus su grub pa'i 'bras bu la// rtogs ldan ye shes gang zag gzhi ru gsungs/ / yang rab rab dang 'bring dang tha ma bzhis// yang rab phung po lhag ma mi lus de// gzung 'dzin dben pa'i rtogs pa brtan pa yis// bdag gzhan mnyam por ngang gis ngang gi ni/ / chos sku mnyam nyid ngang du ban bun la// bdag gzhan snang srid thams cad chos skur bun gyis bun// 'byung ba lnga la sogs pa lhag gis shar// yang rab 'bras bu de ltar de yis 'grub// rab kyis thun mong ma yin gnyis med de/ / rtogs nas ngang gis gzung 'dzin ngang du dul// le lo phra mo snang ba ma 'gyur yang// 'chi ba'i srid pas rang gis gros byas nas// sa chu me rlung rnam shes rab gsal dang// gnyis med ngang du rim gyis thim gyur nas/ / lhun grub nam mkha'i dgos pa lhag gis 'char// rang gi ngo bo 'gyur ba med pa yang// rab kyi 'bras bu tha snyad de la gdags// 'bring gi zla bral don tshad gcig tu rtogs na ni/ / tha dad 'khrul par nges pa skyes nas ni// 'khrul pa 'khrul par nges pa'i mthu stobs kyis// bar ma do la bar do'i shes pa 'byung// bar dor bar do'i shes pa byung tsam na// rang gi dgongs pa nam mkha' lta bu dran/ / dran nas de yi ngang la gnas pa las// gzung 'dzin byed pas skye ba len par ni// rdo rje sems dpas gsungs pa ma yin no// tha ma 'di yi don la zhugs nas ni// rtogs kyang bstan par bya ba bskal med de/ / 'jig rten 'di yi zang zing 'khrul pa la// slu byed dam pa yin par ma gzung ste// 'dod pa yod pas skye ba phyi ma len// mos pa'i stobs kyi mi lus blangs nas kyang// bla med theg mchog 'di dang phrad gyur nas/ / de la phung po ma lus sangs rgyas par// rdo rje sems dpa'i zhal nas gsungs gyur yang// khyod kyi de la re ba skye gyur na// mngon shes gzhan yang bar chad 'khor ba'i rgyu// de bas khyod kyi 'di ltar shes par gyis/ / theg pa'i rgyal po bya ba bral ba'i thabs// bka' yi yang snying bya bral shes rab 'di// thabs dang shes rab zung 'brel sangs rgyas thugs// rgyu 'bras 'das pa'i chos su sems dpas gsungs/ / bya ba bral ba'i chos su rdo rje sems dpas gsungs// skye ba phyis mi len pa'i chos// yin par kun bzang rdo rje sems dpas gsungs// de bas 'di la ma yengs phyi mar re thag chod/ / dka' khyod zhu bar dpa' bar blo dang ldan 'dra yang// g.yeng ba'i dbang gis don la mi gnas na// bar du skye rga na 'chi la sogs kyis// bstan du khyod ni gyur ta re// snod med 'ga' la khyod kyis bstan na ni/ / kun bzang rdo rje sems dpa'i bka' yang khyod kyis bslus// nga yi bka' las 'gal te 'das gyur na// snang ba 'di dag thams cad mer gyur nas// nam mkha' gnas kyi bar du khyod nyid sreg/ snang srid kun yang khyod kyi gshed mar 'gyur// chos skyong srung ma la sogs thams cad kyis// khyod la mi bzang pa yi chad pas gcod// thar pa'i dus med 'o dod chen po 'bod// de 'dra'i rnam smin sa la mi smin par/ / rang la smin te 'ong bar go bar gyis// khyod kyis nga yi bka' las ma 'das na// rang gi yi dam chos nyid mi gtong zhing// kun bzang rdo rje sems dpa'i dgongs pa 'di// snod ngan dam nyams kun la mi spel te/ / dad pa ri rab lta bur mi 'gyur zhing// brtson 'grus chu dang rlan bzhin mi 'bral zhing// bzod pa sa rdo chu bur thob pa la// ma bzhag nan tan byas la 'ga' tsam las// gzhan la ma spel rten gyi tshul du sbyin/ / khyod kyis nga yi bka' las ma 'das na// rdo rje mkha' 'gro la sogs phyi nang bsrungs mas kyang// lus dang grib ma bzhin du 'grogs la bar chad zhi bar mdzod// dkon mchog gsum gyi byin rlabs thugs rje char bzhin phob/ / bdag gi smon lam mthu yang ngan sngags bzhin// rno bas khyod nyid rdo rje sems dpar tshe 'dir gsungs// zhes yun ni ji srid kyis 'grub pa'i yi ge'i le'u ste bco brgyad pa'o/ /// de nas 'jam dpal bshes gnyen khye'u snang ba bsam gyis mi khyab pa de yid rab tu dngas te// pha hA su ka ho ni// oM mA e ma// rdo rje sems dpa'i sku mchog 'gro dpal thugs dkyil nas bdud rtsi chu rgyun byang sems bco brgyad 'bab/ / nyon mongs ko skam dag gi tha ba la// mi bangs skams med 'gro kun grol mnyam sems// byang sems gab pa zhus pa'i yi ge 'di// bdag gi blo ba'i dkyil du sa ma ya/ / bde gshegs byin rlabs ma lus dus 'dir bdag la 'dus// 'gro ba'i dug chen sel mdzad sman chen mgon po sems dpas gsungs// skal ldan 'gro ba grol bar the tshom med// kun tu bzang po'i zhal yang dus 'dir mthong/ / rdo rje sems dpa'i zhal yang dus 'dir mthong// rigs gsum mgon po'i zhal yang de ring mthong// bde gshegs thugs kyi nyi ma da ltar shar/ khams gsum 'khor pa'i mun pa da nang sangs/ / 'khor 'das gnyis kyi zam pa de ring tshugs// khams gsum dug gsum nang nas skyas chen 'debs// zag pa zad cing bya ba de ring byas// de ring 'khor ba'i gdos dang bral/ / rdo rje sems dpa'i thugs kyi thigs pa 'di// bdag gis dam pa nyid du gzung bar bya// mgon po khyod kyi bka' las bdag mi 'da'// rdo rje sems dpa'i bka' las bdag mi 'da'// mkha' 'gro dam can bka' las bdag mi 'da'/ / rdo rje sems dpa' khyod kyi bka' stsal tshul bzhin bgyi// thugs rje can gyi bka' bzhin bdag bgyid do// dkon mchog gsum gyi bka' mi slu// nyi zla sa la ltung ba srid du rung/ / sems dpa' khyod kyi bka' las 'da' mi srid// khyod kyi bka' drin yal bar bdag mi gtong// de bzhin gshegs pa'i dgongs pa'i yang snying 'di// dam nyams sdig can kun gyi lag tu bdag mi gtong/ / 'jig rten g.yeng ba'i lag tu bdag mi gtong// de bzhin gshegs pa kun gyi byin rlabs dang// mgon po sems dpa' khyod kyi byin rlabs kyis// bdag nyid 'khrul pa'i dbang du ma gyur cig/ mthu dang rdzu 'phrul dbang du ma gyur cig/ bar chod bdud kyi dbang du ma 'gro zhig/ srid pa'i 'tsho las 'gro ba 'don par shog/ rdzogs so//// rgya gar gyi mkhan po bi ma la mi tra dang// zhu chen gyi lo tsa ba dran pa'i ye shes kyis bsgyur cing zhus te gtan la phab nas/ / nyang ting 'dzin la gdams// des sba mo rgya le mtsho la gdams// des sba blo gros dbang phyug la gdams// des 'brom ye shes bla ma la gdams/ / des sras rgyal ba'i shes rab la gdams// des zhang dar ma ye shes la gdams// des shangs pa lce chung ba ye shes rgyal mtshan la gdams// des shud kye ston pa mi 'jigs la gdams/ / des sngon stog rgyal mtshan la gdams// des lce ston rdo rje gzungs la gdams so// snyan rgyud nges pa'i lde mig/ po ti se ru mthing shog can gyi rgyud rdzogs so//// m issing m issing m issing m issing m issing m issing m issing m issing m issing m issing m issing m issing m issing m issing m issing m issing m issing m issing m issing byang chub sems thigs pa nyi shu rtsa gnyis pa'i rgyud zhes bya ba bzhugs so/ @##// rgya gar skad du/ bo d+hi tsit+ta bi na ba ra tan+t+ra ma/ bod skad du/ byang chub sems thig pa nyi shu rtsa gnyis pa'i rgyud ces bya ba/ mkhyen ldan ston pa'i sku la phyag 'tshal lo/ / 'og min chos kyi dbying dag tu// mkhyen ldan kun tu bzang po yis// sems dpa' la sogs 'khor rnams la// byin gyi brlabs kyi bshad pa yis// byang sems phyi ma'i rgyud stan pa/ / nges pa gcig la bzhag phyir bstan// bstan pa'i don ni rnam pa gnyis su bshad// lta ba don gyi thigs pa nyag gcig la// man ngag don gyi thigs pa dbab par bstan/ / spyi yi thigs pa rnam pa gnyis su bshad// dgos kyi thigs pa nyi shu rtsa gnyis bstan// man ngag don gyi thigs pa nyag gcig ma// phyi nang gnyis med ye nas de bzhin nyid/ / kun gyi rang bzhin bla med zhi ba'i chos// sgrub med btsal med smon pa med pa'i sa// rnal 'byor lam mchog nyi shu rtsa gnyis don// gnyis med bde chen yongs kyi dag pa la/ / rnal 'byor lta spyod 'dzin sdom de bzhin gnas// de ltar gnas pa'i rnal 'byor dam pa ni// ye nas sangs rgyas yin te rgyal po che// rtog spyod rnam dag nyid de chos kyi dbyings/ / bstan pa'i lam 'di la ni gnas// sgro skur bcings grol spangs pa'i chos kyi dbyings// log rtog byis pa'i spyod pas ci zhig bslad// rgyu 'bras gnyis med sangs rgyas sems can med/ / kun gyi rang bzhin gzhi rtsa med pa la// 'khrul pas nor pa'i lam du btags pa yang// bstan pa'i lam chen 'di las gzhan med pas// mnyam par shes na sangs rgyas kun gyi rje/ / zhes gsungs so// byang sems thigs pa phyi ma'i rgyud las/ mnyam pa don gyi thigs pa ste thigs pa dang pa'o/ de nas yang ston pas/ 'khor rnams la gsungs pa/ mchog tu rmad byung phyi nang kun gyi ngang/ / ye nas rnam par dag pa'i spyod yul la// sangs rgyas ma rgyas med de skal can dbang// bdag gzhan brtags pas mu stegs 'khrul pa'i lam// byis pa slu phyir byis pa'i chos la 'dzud/ / phyin pa'i dus med rtogs pa'i mtha' yang med/ ston pa'i ston pa nor bu rin chen bzhin// dmigs pa med cing 'gyur ba mi byed pas// rang bzhin dmigs par re ba thams cad skong// bdag med gzhan nas mi 'gyur legs pa che/ / dran dang shes bzhin brda 'am snying rjes bstan/ bla med byang chub snying po grol ba'i lam// de lta bu yi chos sku thob pa med// chos sku med phyir thob bya'i yul yang med/ / sangs rgyas sems can chos skur btags pas nor// sangs rgyas gzhan nas thob byed nor pa'i lam// rang rig rdo rje sems nyid chos kyi sku// zhes gsungs so// byang sems thigs pa phyi ma'i rgyud las/ / rdo rje don gyi thigs pa ste// thigs pa gnyis pa'o//// de nas yang ston pas/ 'khor rnams la gsungs pa/ khyung chen nam mkhar ldings te 'gro ba bzhin// rdo rje sems ni ci la'ang thogs pa med/ / sangs rgyas bde pa'i spyod yul dag pa la// skye shi 'pho ba'i gnas med de bzhin nyid// rgya mtsho lta bur sems can ye gnas la// chos rnams sna tshogs ma lus 'byung ba'i rgyud// bshad pa'i tshig tu btags pa'i chos kun las/ / rnyed par mi 'gyur rang gi sems las med// 'khrul ba rnams kyi sgo tsam nyid du ni// tshig dang yi ger bstan te bshad pa yin// rang rig byang chub snying po chos kyi dbyings/ / chos dbyings gzhan nas mi rnyed de bzhin nyid// mkhas pa rnams kyis de bzhin shes par bya// zhes gsungs so// byang sems thigs pa phyi ma'i rgyud las/ rang bzhin lta ba'i thigs pa ste/ thigs pa gsum pa'o/ /// de nas yang ston pas/ 'khor rnams la gsungs pa/ mi gnas dmigs pa med pas mi rtog chos kyi lam// rtog sgom chos kyi sku ni khyad par don med pas// rang byung ye shes mi rtog kun tu ji bzhin gnas/ / bya bral yul la mi gnas gnyen pos bcos su med// lhag pa'i don med 'di yi rang bzhin las// sku ni rang byung bas na chos sku gzhan na med// mngon sum kun tu mi rtog yangs pa'i snying po la/ / rtag tu 'dug par 'dod pa'i sgom mkhan de// rnam dag lam der zhugs na mnyam pa'i rgyal po thob// gang la thob par mi rigs bshad pa kun dang bral// chos dang chos bzhin rtag tu 'dres pa'i dbyer med la/ / chos nyid don dam lhag pa'i gnas zhes bshad pa'ang med// byang chub lam de rtogs pas brtags pas thob pa med// byang chub lam chen tshig gi mtha' las 'das// 'di dang sangs rgyas 'dres pas thams cad mkhyen/ / mi byed bzhugs phyir bsam pa kun dang bral// de nyid de bzhin nyid du bzhugs pa yin// ces gsungs so// byang sems thigs pa phyi ma'i rgyud las// rtog med lam gyi thigs pa ste/ / thigs pa bzhi pa'o//// de nas yang ston pas/ 'khor rnams la gsungs pa/ lam med lam du zhugs na 'khrul pas nad che ste// btsal bar 'dod pas ri dwags smig sgyu snyegs pa 'dra// rnyed pa'i yul med btsal bas de mi 'byung/ / gang la'ang ma 'gags ye shes dbyings las 'das// sa bcur ltos pas gnas kyang bla med nyid la sgrib// de phyir dad pas brtson la bsgom par bya// mi btang rang bzhin dran pa shin tu bskyed/ / mi g.yo rang bzhin gnas pas sman chen ma byas na// mtho ris bgrod pa'i rgyud pas nyon mongs slar zin 'gyur// zhes gsungs so// byang sems thigs pa'i rgyud las/ mi g.yo sgom pa'i thigs pa ste/ thigs pa lnga pa'o//// de nas yang ston pas/ 'khor rnams la gsungs pa// lam med lam chen 'dod pas 'bras bu mi rnyed de// chus gdungs glang chen smig sgyu chu snyegs 'dra/ / bskal par bgrod yang rnyed par rab tu dka'// rgya chen rab zab theg chen rgya mtsho'i don// mi gnas mnyam pa chen po'i klong na gnas// mi rtog btang snyoms dang du rab bzhag pas// mi gzung mi zin sgom pa'i yul dang bral/ / rtog med btang snyoms dang du rab bzhag pa// de nyid yin te gzhan du ci yang med/ 'dzin pa'i bzung pa spangs ba sam bzun bzung// chos kyi sku ni ye nas mtshon du med/ / de phyir dbyings la bcos med de bzhin mod// sems dang chos sku dbyings su gcig pa'i phyir// don dang las yin sgoms pas gang du'ang grub// ces gsungs so// byang sems thigs pa phyi ma'i rgyud las/ / bzhag thabs don gyi thigs pa ste// thigs pa drug pa'o//// de nas yang ston pas// 'khor rnams la gsungs pa// snang srid ye rgyas btab nas gcig tu bzhugs// lhun rdzogs thabs mkhas 'khor ba'i lto ba can/ / khyung dang seng ge'i bu dang rgyal po'i bu// mngal nas gnyen po'i tshul du gzhan zil gnon// gnyen pos ma bor bsgrubs pa ye nas gnyen por gnas// mi gnas gnas med dmigs pa med pa'i lam/ / rgyu 'bras gnyis med mnyam pa'i rgyal po 'di// 'khor ba mya ngan 'das pa'i gnyen po yin// gnyen por ma bsgrubs ye nas gnyen por gnas// 'phur rkyen bya ni sgong chag mkha' la 'phyo// lus la mi ltos yi ges mtshon med pa'i/ / nye lam bde rdzogs bya bral lhun grub nyid// 'jug pa'i lam la mi ltos ye sangs rgyas pa yin// khyung chen gshog rgyas mkha' la mi chags ltar// theg pa kun rgyas bla med yangs pa'i sa/ / zhes gsungs so// byang sems thigs pa phyi ma'i rgyud las// gnyen po stobs kyi thigs pa ste// thigs pa bdun pa'o//// de nas yang ston pas// 'khor rnams gsungs pa// khyung phrug sgo nga'i nang nas lus rgyas ltar/ / skye med de bzhin nyid ni rang bzhin nyid// chos nyid thig le'i klong na de bzhin rgyas// byed bya byed ma'i chos nyid ma mthong bar// bla med bde ba'i chos sku thob mi srid// ces gsungs so/ / byang sems thigs pa phyi ma'i rgyud las// ye sangs rgyas pa'i thigs pa ste// thigs pa brgyad pa'o//// de nas yang ston pas/ 'khor rnams gsungs pa// kun 'dus kun klong kun gyi yid bzhin nor/ / mi dmigs mi skye mi 'gag snang ba med// sangs rgyas mi 'tshol sangs rgyas mi bsam na// thams cad rang rig ye nas bya byed bral// ye shes lhun grub sa nyid rtogs pas// gnas med de la mi gnas gnas dang bral/ / lam med lam du 'dod pa'i 'gro sa 'khrul// 'bras bu thob tu re ba 'jog pas don med mthong// yang dag mtha' snyag don dang gol// de bzhin dbyings su 'dod pas bde mi rnyed/ / 'dod pa'i yon tan spangs pas byang mi chub// 'khor ba rgyab phyogs mya ngan yong mi 'da'// sa dang pha rol phyin la zad mtha' med// snang srid phyag rgyas sgom pas sangs mi rgyas// zhes gsungs so/ / byang sems thigs pa phyi ma'i rgyud las// lhun gyis grub pa'i thigs pa ste thigs pa dgu pa'o//// de nas yang ston pas// 'khor rnams la gsungs pa// byang chub sems lung yang dag dam pa'i lung/ / lung rgyal 'di yis gtan la ma phab na// tshig 'chal mu cor smra bas don mi rnyed// gang la'ang mi gnas gnas nyid las kyang 'das// smig sgyu chu rum mthong bas chu mi rnyed// bden pa gnyis 'dzin yi ges don mi rnyed/ / 'phur rkyen bya'am rgyal po'i phrug gu ltar// gzhan nas mi rnyed ye nas de bzhin nyid// tshad mas mi shigs lung gi tshad ma yin// 'khrul pa'i tshad mas rtog pa'i lung la phab// byis pa slu ba'i chos la de yod las/ / bla med lam 'dir de mi dgos te tshad med lung// shes rab chung bas 'di spogs byed cing lam bgrod byed// 'di 'dod pa la 'di mi gnas te rtogs pa'i rlung// yang dag mi srid byang chub gting nas med/ / kun khyab ye sangs rgyas te sgo phugs med// ces gsungs so// byang sems thigs pa phyi ma'i rgyud las// brjod med don gyi thigs pa ste// thigs pa bcu pa'o//// de nas yang ston pas/ / 'khor rnams la gsungs pa// rdo rje 'gag pa med pa de kho na// mjug lta bsrung 'dzin phyir sogs la sogs shing// phyag rgya lha yi dkyil 'khor kun rdzogs pa// rang bzhin nyid kyis ye nas rdzogs pa la/ / btsal nas bsdus te rdzogs pa ma yin pas// lhun rdzogs tha snyad ma yin pa'i// gzugs sku ji ltar rdzogs par rang bzhin rdzogs// kun rdzogs snying po 'di ni nor bu'i tshul// 'di ma mthong gi rnal 'byor ni/ / rgya mtsho gang+gA'i 'gram du skom drir shi ba bzhin no// zhes gsungs so// byang sems thigs pa phyi ma'i rgyud las// ye rdzogs chen po'i thigs pa ste// thigs pa bcu gcig pa'o//// de nas yang ston pas/ / 'khor rnams gsungs pa// rnam par mi rtog ye shes snying po 'di// theg pa yongs kyi chos la sbas pa med// bgrod rtsol lam la sbyangs pas rnyed me 'gyur// mi len mi spong rdo rje spyod pa la// rnam pa kun tu rang bzhin gnas/ / chos rnams ro gcig bsgoms dang ma bsgoms gnyis su med// sems nyid ye nas chos nyid kho nar bas// rang byung ye shes nam mkha' lta bu'i yul// de nyid gzhan nas rtogs rnyed ga la 'gyur/ / rmi lam bde sdug sad nas ga la yod// rtog dang mi rtog shes rig ngang du mnyam// nam mkha' mtshan med sgom par ga la 'gyur// sems nyid ma skyes sgom pa'i tha snyad spangs// btang snyoms chen por ma bcos ngang bzhag pa/ / sgom pa'i rgyal po blo dman spyod yul min// ces gsungs so// byang sems thigs pa phyi ma'i rgyud las// spang blang med pa'i thigs pa ste// thigs pa bcu gnyis pa'o/ /// de nas yang ston pas// 'khor rnams la gsungs pa// dmigs pa'i gza' gtad zhi ba'i byang chub la// ye shes rig pas chos nyid bsgom mi bya// ting 'dzin ro la chags med thig ler dag/ / gar mkhan rol mo sna tshogs bsgyur ba yang// lus las ma bkod gzhan gyi yid sdug ltar// thabs kyi rgyal po lung gi snying po 'di// ngo bo nyid las ma g.yos kun gyi 'bras// sgrub pas 'grub pa'i 'bras bu kun yid tshim/ / zhes gsungs so// byang sems thigs pa phyi ma'i rgyud las// sgom du med pa'i thigs pa ste// thigs pa bcu gsum pa'o//// de nas yang ston pas// 'khor rnams la gsungs pa/ / sgrib pas gnon dang chos spongs lam gyi sgrib pa 'phra// rten cing 'brel ba 'di yin gting mi rnyed// chos nyid tshig gi tshogs yang dag par 'gyur// snying rje rgyun chad sems can ma mthong sems can med/ / thams cad mnyam nyid kun tu bzang po'i sku// gnyis med de bzhin nyid du cig pa'i chos nyid yin// rtog pa can gyi chos man gnyen pos bcos su med// ting 'dzin brtan pas sgom pa'i gzung yul bral/ / shes rab gsum gyis 'di sbyar ga la yod// ces gsungs so// byang sems thigs pa phyi ma'i rgyud las// tha dad med pa'i thigs pa ste// thigs pa bcu bzhi pa'o//// de nas yang ston pas// 'khor rnams la gsungs pa/ / thams cad mnyam pa'i dkyil 'khor kun gyi rang bzhin la// rang byung ye shes de la mthar phyin ni// so so ma yin gcig gi ngang ste rgyu 'bras rnam par dag// thugs rje zhing du byin gyis brlabs chen nyid du 'gyur ba las/ / thams cad sangs rgyas mchog tu ma gyur med// ces gsungs so// byang sems thigs pa phyi ma'i rgyud las// rnam par dag pa'i thigs pa ste// thigs pa bco lnga pa'o/ /// de nas yang ston pas// 'khor rnams la gsungs pa// ci yang mi dgos bsrung ba'i ye nas rnam par dag pa'i sman chen po// ji bzhin rang bzhin gnas pa'i sman chen ma byas na// 'khrul rtog lam la gnas pa'i thig dman rnams/ / dug gsum dug lnga'i nad kyis gso blags med// ye nas sa rdzogs lam gyi bgrod pa gdod nas dag/ chos sku gdod nas thob bya ci yang med// tshig gis mi phebs dbyings dang kha dog med/ / brtan cing rtag par dka' la brjod du rdul tsam med// mi dmigs mi gnas bsam pa kun dang bral ba yin// ces gsungs so// byang sems thigs pa phyi ma'i rgyud las// rnam par dag pa'i thigs pa ste/ / thigs pa bcu drug pa'o//// de nas yang ston pas// 'khor rnams gsungs pa// 'di zhes bstan pa'i don med gcig med du ma med// bdag dang gzhan du mi 'dzin chos mkhan rin chen mdzod/ / gcig pu lhun gyis grub pa'i sems nyid rdo rje'i sku// dkyil 'khor kun gyi bdag nyid gtso bo 'di// rlabs chen khams gsum kun gsang zhing du mi bskyod dag pa yin// dge sdig mthong ba'i chos lam gang spyod pa/ / chos lam des ni bla med bskal ba'i mthar yang rnyed par mi 'gyur bya rjes 'tshol 'dra yin// ces gsungs so// byang sems thigs pa phyi ma'i rgyud las// gnyis su med pa'i thigs pa ste/ / thigs pa bcu bdun pa'o//// de nas yang ston pas// 'khor rnams la gsungs pa// gang yang shes par mi 'gyur ci yang shes med la// rnam pa de bzhin ma yin de yi de ma yin// gzhan nas yod 'ongs ma yin ye nas de bzhin nyid/ / ye shes mi gnas gnas pa'i yul yang med// rtag dang mi rtag mtha' gnyis 'dzin pa'i lam// mtha' med mtha' la spyod pas dbus mi mthong// bsam gtan bsam gtan nyid la 'jug par yang/ / 'jug sgo lam sgo gzhan zad cig car 'jug// dbang po rtul po ma rabs rims kyis 'jug// dam pa rnams ni cig car de bzhin nyid du gnas pa yin// rims kyis gnas pa bsgrub pa chen por gsungs/ / zhes gsungs so// byang sems thigs pa phyi ma'i rgyud las// 'jug pa thabs kyi thigs pa ste// thigs pa bco brgyad pa'o//// de nas yang ston pas// 'khor rnams la gsungs pa/ / dug gi rigs shes pas ni dug mthong na// za bar mi byed de ni skrag bar byed// kha ru mi stong lhan cig gnas mi byed// ltas ngan spyod pa zhib pa'i theg dman rnams// sa bcu theg pa chen po'i lam spyod pa/ / rgyu 'bras theg pa mnyam nyid ma yin mchog gi lam// ye grol mnyam gnas sgros dang skur zhi ba'i// ye nas byar med 'di yi don mthong na// 'jug par mi nus 'di yis skrag 'gyur na// chud par mi byed lhan cig 'grogs mi byed/ / ces gsungs so// byang sems thigs pa phyi ma'i rgyud las// gsang ba don gyi thig ste// thigs pa bcu dgu pa'o//// de nas yang ston pas// 'khor rnams la gsungs pa/ / lta ba bzang ste ye khyab kun la brdal// spyod pa bzang ste glang chen chur zhugs bzhin// ci la'ang mi spyod de bzhin bde bar gnas// phyi dang nang med ye shes yangs pa'i rlung// gdod nas dag pas bdud rtsi de ltar gnas/ / rnam rtog 'khor ba rtsad bcad bde ba'i lam// rgyu 'bras ro gcig mnyam gnas mchog tu gsungs// zhes gsungs so// byang sems thigs pa phyi ma'i rgyud las// bde ba chen po'i thigs pa ste/ / thigs pa nyi shu pa'o//// de nas yang ston pas// 'khor rnams la gsungs pa// gang la mi gnas byang chub sems la gnas// rgyu dang rkyen las ma byung skye shi med// rang bzhin 'od gsal bdud rtsi chen po 'di/ / su yis rtogs pa dngos grub chen por gsungs// mchog gi dngos la mchog gyur gang gnas pas// rgyal mchog lhun gyis grub pa'i dngos grub pas// lha klu mthu chen rnams kyis 'phrog tu med/ / 'jig rten 'das dang 'jig rten 'di nyid kyis// dgos pa thams cad 'di las 'byung bar 'gyur// 'jig rten dngos grub la sogs ci ru rung// dngos grub gzhan nas bdud rtsi med par grags/ / byang sems thigs pa phyi ma'i rgyud las// dngos grub mchog tu bcas pa'i thigs pa ste thigs pa rtsa gcig pa'o//// ngo mtshar rmad byung e ma khyad par can// ston pa'i ston pa kun tu bzang po la/ / nyid dang 'dra ba'i 'khor la rgyud 'di bstan// sems can don du ma gsungs rdo rje sems dpa' gtso ru ston// e ma ho sangs rgyas lhun gyis grub pa yi// rigs 'dzin 'bras bu'i don la gnas pas kyang/ / ngo mtshar 'bras bu'i don 'di bstan par mi bya'o// nyid kyis nyid bshad re mdzes mchog/ yang dag nyid la nyid gsungs pa// yang dag nyid du snang ba mchog gi don// 'di 'chang klog dang kha ton sems dpa' yis/ / skal ldan nyag gcig rnal 'byor de la bstan// de bzhin rjes mthun ma rabs tha ma la// 'di la gang mos sems can la sogs pa// yang dag bshes gnyen kun la 'phags// a ti don 'di thugs kyi dkyil du thim/ / a ho sa ma ya so phag shi thabs// zhes gsungs so// thigs pa nyi shu rtsa gnyis pa'o//// bde bar gshegs pa'i thugs mngon du ston pa'o// des pa'i thig le/ rgya rgya rgya/ /// bcom ldan 'das dpal kun tu bzang po bde ba chen po la phyag 'tshal lo// ston pa thugs rje che mnga' bas// thugs kyi dkyil nas bcud phyung nas/ / byin gyis brlabs kyis bshad pa yis// rig pa thabs kyi brgyud pa 'di// lta ba khyung chen lding ba'i rgyud// 'khor rnams kun la bstan pa ni// khyung chen gshog drug rdzogs nas snang srid mkha' la lding/ / phyogs bcu sa phyogs gang la'ang nyam nga med// snang srid khyung chen gshog rdzogs mkha' la bde// gshog drug lus la rdzogs pas ltung ba'i nyam nga med// de bzhin man ngag snying po byang chub sems/ / thams cad rdzogs pas thig le chen po'i ngang// 'di la gcig med thig le chen po'i ngang// 'di la gcig med du ma med pa'i don// snying po nyid du gyur pas de bzhin nyid du bde// 'di la sangs rgyas sems can gnyis pa gdod nas med/ / lta ba gshog rdzogs mkha' la lding zhes pa'o// byang chub sems kyi man ngag khyung chen lding ba'i rgyud// rdo rje tshig gi yang dag don bstan pa/ khyung chen gshog rdzogs mkha' lding gang la nyam nga med/ / rdzogs pa'i rdzogs pa byang chub snying po nyid// thams cad rang bzhin nyid de gang la nyam nga med// ma bcos thig le gcig pas snang srid ye sangs rgyas// don gyi khyung chen chos kyi dbyings na lding/ / thig le ngang ste gang la nyam nga med// snangs srid phyi nang rang bzhin kun sangs rgyas// gdod nas ma bcos snying po de bzhin nyid// gdags pa'i tha snyad kun la gang yang spangs pa med/ / 'di zhes bstan pa'i don med ston pa cang mi gsung// lta ba khyung chen lding ste gang la nyam nga med// lta bas bltar med yid la 'di bzhag med// sgom du cang med gzung 'dzin yul mi gnas/ / ma bcos de bzhin nyid nas man ngag don gyi klong// gang la ngang gis gnas par rig pa rang la gsal pa'i zer// man ngag khyung chen lding ste gang la nyam nga med// snying po mchog tu gyur pa'i byang chub sems nyid ni/ / gdod nas rnam dag gang ltar 'char mi mdzad// mi spong mi len bkag dang ma bkag med// mnyam pa chen po mdzad spyod rnam par dag// spyod pa khyung chen lding ste gang la nyam nga med// gzhi rtsa thig le gcig pas gsal ba'i tha snyad med/ / dam tshig khyung chen lding ste gang la nyam nga med// ma btsal lhun grub rang bzhin ye sangs rgyas// rang byung ye shes thig le nyag gcig ma// gzhan nas btsal du med de ye nas snying po byang chub sems/ / thams cad 'di nyid 'di las gzhan min pas// 'phrin las khyung chen lding ste gang la nyam nga med// mi g.yo ma yengs gang la sems pa med// mi 'dzin mi rtog de bzhin nyid du gsal/ / rig pa rgyun chags gsal ba ngang gi gzer// gang du mi 'gyur de bzhin nyid du gnas// sgom pa khyung chen lding ste gang la nyam nga med// chos rnams ngo bo snying po byang chub sems// gting dpag gcad dka' nam mkha' rgya mtsho'i klong/ / yon tan kun 'byung yid bzhin nor bu'i tshul// snying po gcig ste chu zla'i nyi zer 'dra// kun kyang yongs brdal thugs rje chen po'i ngang// thugs rje byung chen lding ste gang la nyam nga med/ / snying po mchog tu gyur pa'i byang chub sems nyid ni// rgyu la rag ma lus pas rkyen gyis 'jig mtha' med// kun gyi rgyu nyid 'bras bu'i mchog gyur pas// tshogs gnyis ma bsags rang bzhin lhun gyis rdzogs/ / rgyu 'bras khyung chen lding ste gang la nyam nga med// nges pa'i khyung dgu lding pas snang srid ye sangs rgyas// 'khor ba rtsa ba bcad kyang mya ngan 'das pa med// sa lam sgo phugs med par khyab gdal thig le'i ngang/ / 'di zhes bstan du med pas yang dag rgyud kyi mchog// khyung chen lding ba man ngag don gyi rgyud// nges pa'i don ston kun grol thugs kyi gter// bag chags sgrib sel rnam dag chu bo'i rgyun/ / nyon mongs bdud 'dul bdud rtsi chen po'i bcud// rgyud dang ston par bcas la bstod phyag 'tshal// gang la sems gnyis med cing chags pa kun bral 'di// yang dag thugs kyi sras mchog khyod la gtad/ / nges par 'di bzung thugs la thugs kyi chongs// zhes bstod do// byang chub kyi sems man ngag khyung chen lding ba'i rgyud// sa ma ya so phag shi thams/ rdzogs so//// bcom ldan 'das dpal kun tu bzang po bde ba chen po la phyag 'tshal lo// ston pa thugs rje che mnga' bas// thugs kyi dkyil nas bcud phyung nas// byin gyis brlabs kyis bshad pa yi// rig pa thabs kyi brgyud pa yis/ / man ngag seng chen mchongs pa'i rgyud// 'khor rnams kun la bstan pa ni// seng ge rtsal rdzogs gang dkar rtse la mchong// phyogs bcu kun bde gang la thogs pa med// rtsal gsum lus la rdzogs pas de bzhin kun tu mchong/ / gang la thogs pa med pas de bzhin kun tu bde// de bzhin man ngag snying po byang chub sems// ye shes rtsal drug rdzogs pas gang la nyam nga med// thams cad thig le gcig pas de bzhin ngang la mchong/ / de la thogs pa med pas dor med kun tu bde// gang la thogs pa med pas man ngag seng chen mchong// zhes so// byang chub kyi sems man ngag seng chen mchongs pa'i rgyud/ / don rdeg tshig gi yang dag don bstan pas// seng ge rtsal rdzogs gang la thogs med ltar// man ngag don rdzogs byang chub snying po nyid// gang ltar mchong yang thogs med kun tu bde// gang la blo mi gnas pas thogs med sa la 'dug/ / man ngag seng chen mchongs te gang la thogs pa med// byang chub myu gu nyid la dran rtog rgyu ba med// dran bde shes pa'i snying po de don gyis// brdas mtshon dam pas ngang la ngang nyi bzhag/ / man ngag chen mchongs te gang la thogs pa med// ma yengs btang snyoms rab ldan shes pa'i mchog// gzung 'dzin gnyis bral snying po'i don la bzhag// ji ltar yang dag ma yin gang ltar mi 'jog pa/ / man ngag seng chen mchongs te gang la thogs pa med// gang la mi sems sems pa'i don dang bral// cir snang cir med 'di zhes bstan pa med// mi g.yo gang yang mi sems nyams kyi myong chags med/ / nam ngag seng chen mchongs te gang la thogs pa med// 'gyur med dbyings na thogs med ye shes mchongs// mi rtog mi 'dzin bsgom par bya ba'i yul dang bral// ji ltar yang 'jig pa med pa bde ba chen po'i ngang/ / man ngag seng chen mchongs te gang la thogs pa med// gang la chags med spyod med snang ba rang bzhin med// de bzhin blo gnas ma yengs rtog dang bral// ngang la ngang gnas bde ba'i ngang la gnas/ / man ngag seng chen mchongs te gang la thogs pa med// sems la sems lta gang la mthong med gsal// ma mthong mthong ba de don rnam par dag// rig pa rgyun gsal ngang la ngang gnas pas/ / man ngag seng chen mchongs te gang la thogs pa med// gsal la gsal lo rtog pa las 'das shing// gsal rtog med de ma yengs ngang gnas pa// rig pa lhun chags bde ba chen po'i mchog/ / man ngag seng chen mchongs te gang la thogs pa med// lta ba ltar med man ngag bzhag pa med// 'di zhes mthong med don nyid sgom du med// bde ba'i ngang la ngang gnas dgongs pa'i mchog// man ngag seng chen mchongs te gang la thogs pa med/ / seng chen dgu mchongs man ngag don gyi dbyig/ gdeng chen man ngag don ldan yang// thugs rab gsal ba'i dkyil 'khor 'dir bcangs na// skye ba 'di la 'bras bu mngon sangs rgyas/ / 'di gzung thugs kyi dkyil du gter du chongs// zhes bstan to// byang chub sems kyi man ngag seng chen mchongs pa'i rgyud// i thi/ rdzogs so//// bcom ldan 'das dpal kun tu bzang po bde ba chen po la phyag 'tshal lo// ston pa thugs rje che mnga' bas// thugs kyi dkyil nas bcud phyung nas// byin gyis brlabs kyis bshad pa yi// rig pa thabs kyi rgyud pa yi/ / man ngag ngang mo 'gros kyi rgyud// 'khor rnams kun la bstan pa ni// ngang mo'i 'gros rdzogs rin chen 'dam la 'gro// 'brel te ma chad 'grus med gnas su 'gro// gang du phyin kyang don grub kun tu bde/ / de bzhin man ngag snying po byang chub sems// dngos dang dngos med gang ltar cir yang snang// thams cad thig le gcig pas byang chub sems kyi ngang// phyogs su ma chad yongs su 'brel bar gnas/ / gang ltar gnas kyang de bzhin nyid du bde// man ngag ngang mo'i 'gros te 'brel bar thogs pa med par 'gro// byang sems man ngag ngang mo 'gros kyi rgyud// don rdeg tshig gis yang dag don bstan pa/ / ngang mo 'gros kyi 'brel bas phyin pa ltar// yang dag man ngag snying po byang chub 'di// phyogs su ma chad kun gyi rang bzhin ni// yongs su 'brel te snying po thig le gcig// ngang la ngang gnas man ngag ngang mo'i 'gros/ / snang srid ye sangs rgyas pas sems med pas// thig le gcig tu 'brel pas man ngag ngang mo'i 'gros// lta spyod gnyis med gdod nas rnam dag pas// thig le gcig tu gnas pas man ngag ngang mo'i 'gros/ / dbyings dang ye shes gnyis med rtags pa'i tha snyad med// ye nas gcig tu gnas pas man ngag ngang mo'i 'gros// thabs dang shes rab gnyis med 'brel bas shes pa'i dngos gzhi med/ / thig le gcig tu gnas pas man ngag ngang mo'i 'gros// rtsol sgrib gnyis med 'brel bas lta don rnam par dag/ thig le gcig tu gnas pas man ngang mo'i 'gros// bshad brjod gnyis med 'brel pas tha snyad kun dang bral/ / thig le gcig tu gnas pas man ngag ngang mo'i 'gros// gzung 'dzin gnyis med 'brel bas lta don rnam par dag// thig le gcig tu 'brel bas man ngag ngang mo'i 'gros/ / bsam sgom gnyis med 'brel bas lhun grub bde ba'i ngang// thig le gcig tu gnas pas man ngag ngang mo'i 'gros// ngangang mo 'gros dgu thig le gcig tu 'brel// phyogs su ma chad yongs su 'brel ba'i thig le gcig/ thams cad rdzogs bas dbyer med bde chen dang// kun tu bzang po yongs su khyab brdal bas// gcig dang du ma'i rnam grangs gdod nas dag/ gdags pa'i tha snyad kun bral thig le gcig/ sus kyang gdod nas ma bcos de bzhin nyid du gnas// gang la yang blo gnas shing ci la yang bsam pa yin// mi g.yo ngang la gsal zhing rgyun bzhag la// man ngag ngang mo'i 'gros te rig pa rang nyul shar/ / thugs rab sras mchog dam pa yang rab kyi// thugs mchog dam pa 'di gzung ngang gnas na// yun du mi thogs myur du mngon sangs rgyas// zhes bstan to// byang chub sems ngang mo 'gros kyi rgyud/ / sa ma ya so phag shi thams/ rdzogs so//// bcom ldan 'das dpal kun tu bzang po bde ba chen po la phyag 'tshal lo// ston pa thugs rje che mnga' bas/ / thugs kyi dkyil nas bcud phyung nas// byin gyis brlabs kyis bshad pa yis// rig pa thabs kyi rgyud pa yi// man ngag rig pa'i khu byug gsung gi rgyud// 'khor rnams kun la bstan pa yin// rig pa g.yu ri khu byug gsung snyan mkha' la sgrogs/ / gang ltar ci byed sgrags snyan dor bar byed// lhang lhang grags pas kun kyang spro ba skye// gang du mi skyal de bzhin nyid du spro// de bzhin man ngag snying po byang chub sems/ / gdod nas sangs rgyas nyid de rang bzhin kun la khyab// rang bzhin med pas dor med snying po'i ngang// brjod med rang bzhin med pas yang dag de bzhin don gyi gsung// ma bsgrags bsgrags pas kun spro dang ba skye/ / bsgrags pa'i tha snyad la yang dor ba med// rig pa khu byug gsung snyan mkha' la sgrogs// zhes pa'o// byang chub sems man ngag khu byug gsung gi rgyud// don rdeg tshig gis yang dag don bstan pa/ / khu byug gsung gis kun spro dang skye ltar// snying po'i don mchog byang chub sems kyi man ngag 'di// yod na yod par gsung snyan thig le gcig tu yod// yod pa'i khu byug gsung snyan mkha' la sgrogs/ / med na med pa'i gsung snyan dbyibs dang kha dog med// med pa'i khu byug gsung snyan mkha' la sgrogs// gnyis med khu byug gsung snyan mkha' la sgrogs// snying po don mchog byang chub sems kyi man ngag 'di/ / gang ltar brjod pa de la gsung snyan dor ba med// tshig gi khu byug gsung snyan mkha' la sgrogs// gang ltar bstan pa de bzhin de nyid pas// yi ge'i khu byug gsung snyan mkha' la sgrogs/ / gnyis med khu byug gsung sgrogs kun la snyan// snying po don mchog byang sems man ngag 'di// ye nas ji bzhin gnas pas thig le chen po'i ngang// thog ma'i khu byug gsung snyan mkha' la sgrogs// da lta nyid du gnas pa tha ma dus kyi ngang/ / tha ma'i khu byug gsung snyan mkha' la sgrogs// gnyis med khu byug gsung sgrogs kun la snyan// snying po'i don mchog byang sems man ngag 'di// rdo rje sku ru gnas pas dus gsum 'gyur ba med/ / rtag pa'i khu byug gsung snyan mkha' la sgrogs// 'khrul rtog rtsad nas bcad pas nyon mongs gnas su dag// chad pa'i khu byug gsung snyan mkha' la sgrogs// gnyis med khu byug gsung sgrogs kun la snyan/ / snying po don mchog byang sems man ngag 'di// kun gyi rgyu ste 'bras bu kun tu smin// skye ba'i khu byug gsung snyan mkha' la sgrogs// ma rtogs gab pas rang bzhin nyid kyis gab/ / gab pa'i khu byug gsung snyan mkha' la sgrogs// gnyis med khu byug gsung sgrogs kun la snyan// snying po'i don mchog byang sems man ngag 'di// dngos dang mtshan ma cir snang de bzhin nyid rtogs pas/ / rtogs pa'i khu byug gsung snyan mkha' la sgrogs// de bzhin ngang la de bzhin 'dzin pas na// 'dzin pa'i khu byug gsung snyan mkha' la sgrogs// gnyis med khu byug gsung sgrogs kun la snyan// snying po'i don mchog man ngag 'di/ / thig le gcig tu gyur pas du ma'i tha snyad spangs// spangs pa khu khyug gsung snyan mkha' la sgrogs// ngang gis ngang blangs dus gsum 'du 'bral med// len pa'i khu byug gsung snyan mkha' la sgrogs/ / gnyis med khu byug gsung sgrogs kun la snyan// snying po don mchog byang sems man ngag 'di// thig le gcig tu gyur pas bdag nyid chen po'i ngang// ngang dang rang bzhin gnyis med ye nas dag/ / bdag nyid khu byug gsung snyan mkha' la sgrogs// thams cad rang bzhin ye sangs rgyas pas gzhan// gzhan gyi khu byug gsug snyan mkha' la sgrogs// gnyis med khu byug gsung sgrogs kun la snyan/ / snying po don mchog byang sems sgom pa 'di// mtshan dang mtshan med ma bcos gdod nas dag/ rnam par dag pa thig le gcig gi ngang// mtshan ma'i khu byug gsung snyan mkha' la sgrogs/ / ngang dang ngang gis zhugs pas bde chen lhun la gnas// dmigs pa'i khu byug gsung snyan mkha' la sgrogs// gnyis med khu byug gsung dgus gang yang spang ba med// gang ltar ci sgrag de bzhin nyid du snyan/ / gang yang spangs pas snying po thig le nyid// de bzhin mi g.yo ngang la ngang gnas pas// man ngag sgom pa'i thabs te gang yang mi spong mi len ngang la gnas// ngang la ngang gis gnas pa'i skal can rnams/ / rig pa rang shar nus pa'i dus med pas// yun du mi thogs 'bras bu myur du thob// ces bstan pa'o// byang chub kyi sems man ngag rig pa'i khu byug gsung gi rgyud// sa ma ya so phag shi tham// rdzogs so/ /// bcom ldan 'das dpal kun tu bzang po bde ba chen po la phyag 'tshal lo// ston pa thugs rje che mnga' bas// thugs kyi dkyil nas bcud phyung nas/ / byin gyis brlabs kyis bshad pa yis// rig pa thabs kyi rgyud pa yin// man ngag gser gyi ru sbal bskum pa'i rgyud// 'khor rnams kun la bstan pa ni// gser gyi ru sbal rgya mtsho'i gting du bskum/ / rang la gsal kyang gzhan gyis mthong ba med// bdag gzhan gnyis su med pas bde ba'i bag la nyal// gang du mi g.yo de bzhin nyid du bde// de bzhin snying po byang chub sems// chos nyid dbyings nas sems nyid sku bzhugs pa/ / rang la rang gsal gzhan gyis mthong ba med// bdag dang gzhan med bde ba bag la gzims// gang du mi g.yo de bzhin nyid du gnas// gser gyi ru sbal rgya mtsho'i gting du bskum/ / zhes pa'o// byang sems man ngag gser gyi ru sbal bskums pa'i rgyud// don rdeg tshig gis yang dag don bstan pa// ru sbal rgya mtsho'i gting du bskum pa mthong ba dka' ba ltar// byang sems man ngag snying po'i don mchog 'di/ / thig le'i klong la thig le'i sku bzhugs pa// kun gyis mthong dka' de bzhin nyid du bde// gang du mi g.yo ngang la ngang gsal mthong// gsal ba rang shar nub pa'i dus mtha' med/ / bu yi blo bzhin gsal bas kun don grub// rang rig gsal ba'i ye shes chen po ste// gang la mi g.yo de bzhin nyid gnas pa// man ngag ru sbal bskums te kun gyis mthong bar dka'// rang rig gsal ba'i ye shes chen po de/ / ma yengs gsal ba'i ngang la ngang gnas pa// man ngag ru sbal bskums te kun gyis mthong bar dka'// rang rig gsal ba'i ye shes chen po de// mi rtog bde ba'i bag la rab gnas pa/ / man ngag ru sbal bskums te kun gyis mthong bar dka'// rang rig gsal ba'i ye shes chen po de// dran sems med pa'i ngang la ngang gnas pa// man ngag ru sbal bskums te kun gyis mthong bar dka'/ / rang rig gsal ba'i ye shes chen po de// gang la mi dmigs mi 'gyur rab gnas pa// man ngag ru sbal bskums te kun gyis mthong bar dka'// rang rig gsal ba'i ye shes chen po de/ / mi g.yo ma bcos bde ba'i ngang la gnas// man ngag ru sbal bskums te kun gyis mthong bar dka'// rang rig gsal ba'i ye shes chen po de// mnyam pa chen po'i ngang la ngang gnas pa// man ngag ru sbal bskums te kun gyis mthong bar dka'/ / rang rig gsal ba'i ye shes chen po de// mi g.yo btang snyoms ngang la rab gnas pa// man ngag ru sbal bskums te kun gyis mthong bar dka'// rang rig gsal ba'i ye shes chen po de/ / gang la yang blo mi gnas pa'i ngang la ngang gnas pa// man ngag ru sbal bskums te kun gyi mthong bar dka'// de bzhin man ngag bskums thabs dgus// byang chub sems kyi btsal thabs thig le gcig khar dbyung ma yin blo yi gting du'o/ / mnyam chen bde ba'i ngang la yun gnas pa// mngon sum bde ba'i rig pa myur du 'char// bsgrub med btsal med 'bras bu mngon sangs rgyas pa'o/ / 'di yang don la ma yengs na// gang la rnam rtog mi skye 'o// lta ba khyung chen ldings pa yin// kun bzhi byang chub sems la sel med na// dam tshig shel gong phyis pa yin// ci yang chags sdang ma skyes na/ / nang rtags phyi ru phyin pa yin// byang chub sems kyi don rtogs na// rang byung ye shes rnyed pa yin// blang dor gtsang sme mi lta na// spyod pa glang po chur zhugs yin// byang chub sems kyi spyi lung chen po rdzogs pa'i rgyud/ / byang chub sems lta ba'i man ngag gi bu lnga// lta ba don gyi bca' bzhi rdzogs so//// rgya rgya rgya/ #// dpal kun tu bzang po la phyag 'tshal lo// 'di skad bshad pa'i dus gcig na/ / rang byung ji bzhin bde chen po// zab mo rang rig bsam mi khyab// ma bcos gsang ba rdzogs pa'i bdag/ lhun grub ngang la bzhugs par gyur// sangs rgyas sems can thams cad dang/ / snang srid rjes lta mtha' yas pa// dus gsum 'byed med gcig pa'i phyir// thig le rdzogs par 'dus te gnas// de tshe sems dpa' rdo rje yis// rab tu gsal la mi g.yo bas// mi rtsol ji bzhin 'dun pa las/ / bsam gyis mi khyab dgongs par zhus// bde chen rig pa'i rgyal po nyid// ji bzhin ma bcos dgongs pa'i brdas// skal ldan don du gtan la phab// 'da' med bde chen dam la gnas// dang por rna rgyud gdams pa'i lung/ / rin chen gus pas nod par bya// rin chen 'od kyi bstan pa'am// rtsi bcud bung bas bzhibs pa ltar// ma lus snying po thugs chud nas// de nas so bzhag nyams pa med/ / don mthong rig pa cha sbyangs pas// snang gsum rdzogs chen rgyas btab la// thig le rdzogs par gnas par bya// rang sems nges ba'i don rtogs pas// nges par don la 'da' med pa'o/ / gdams pa'i rnam grangs ci bstan pa// kun gyi nges don ston pa yin// bla ma'i gdam ngag lung med cing// rna brgyud dgongs pa mi ldan pas// gang bstan log ba'i khams su 'gyur// de bas gdams ngag thob par bya/ / nges par thob par shes pa yis// de dag don las mi 'da' yang// rin chen gling la bgrod pa'am// mun pa 'od dang phrad pa ltar// gzhi gcig stobs kyis khyad par 'phags// du bzhi thog ma dang po nas/ / 'khrul bcad brtags pa rnam par bzlog// dbang po goms pa che chung gis// mi gnas pa dang cung zad gnas// yun rings dal bas 'bab chu 'dra// de la ye shes ma btsal na/ / bar chad med pa'i brtson 'grus kyis// 'bab chu lta bur gnas gyur na// rgya mtsho lta bur mi g.yo ba// mkha' gsal 'od kyis brdal ba ltar// dus 'tshams med par gnas par 'gyur// dus gcig 'jug pas rnal 'byor pas/ / man ngag nges pa'i lung thob nas// rgya mtsho 'od kyis phog pa'am// mkha' la nyi 'od 'bar ba ltar// de ma thag par lhun gyis grub// thag gu sbrul mthong sel ba ltar// nges pa thob pas dbugs chen phyin/ / ma btsal lhun bzhag rnal 'byor pas// thun dang mnyam gzhag rtsir med pas// dus gcig mi g.yo rnal 'byor thob// 'on kyang ma yengs gzhi gcig la// rnam pa'i bye brag cir 'gyur ba/ / ye shes srog gsum 'gyur ba med// mtshan ma chu dang rlabs bzhin nam// bcud dang snying po rnam pa'am// mkha' yi cho 'phrul ji lta bar// ma btsal rang bzhin g.yo mi 'gyur// gang dag thugs rje'i ngang yin pas/ / gang la dga' ba'i don ched du// ye shes mtshon sgor ma gyur pa// cung zad tsam yang yod ma yin// kun kyang ye shes nyid rtogs pas// lcags la thabs kyis mdzad pa ltar// man ngag thabs kyis pha rol phyin/ / gang yang g.yang sa lam du bde// bde sdug gang yang mi 'dor na// de dag len par ga la yin// dang po rang bzhin bstan pa ste// gnyis pa rig pas phrad pa yin// gsum pa gzungs dang ldan pa ste/ / bzhi pa gtang snyoms chen po yin// lnga pa 'bab chu lta bu ste// drug pa mkha' la nyi shar bzhin// mi 'da' 'byed pa med pa'o// bdun pa rin chen gling phyin te// brgyad pa rin chen lhun rdzogs sam/ / nyi ma'i 'od dang snying po ltar// bdag gzhan don kun rdzogs par gnas// rin chen gzhi la 'gyur med kyang// dbang po shes rab goms tshul gyis// rin chen sel dang bral ba ltar/ / goms pa'i shugs kyis grub pa yin// dang por mos dang ldan pa ste// gnyis par mi g.yo rtse gcig pa// gsum pa 'brel bas bar chad med// bzhi pa rang yang lhug pa yin// lnga pa gang yang 'brel med spyad/ / drug pa glang po dogs med nyid// srog ldan nyam nga re dogs med// bdun pa thams cad dag pa'i phyir// bya dang mi bya cung zad med// brgyad pa lhun rdzogs spyod pa ste// srog ldan ji bzhin rnal 'byor pas/ / thabs ldan rig stobs khyad par du// gang gyur ma yengs spyad par bya// mi 'gyur bral na rang bzhin btang// nges bral rtsol tha mal sems// ngos can mthar 'dzin log sred can// ched byas rtsol dang grub pa dang/ / zin chags blang dor dgag sgrub dang// zhen dang 'gog dang phyal ba dang// btang snyoms yod dang med pa dag/ mi dor rgyu med rang bzhin btang// thogs chags med pa'i ye shes kyis/ / phyogs bral ye shes chen pos rgyas// rig pa rdzogs pa gting dpag med// myong ba bde ba'i rang bzhin te// rtog spyod rgyu ba bral ba yis// bsam med dran med sal le ba// ting 'dzin shes rab rdzogs pa ste/ / lhag pa'i slab pa kun rdzogs pa'o// nam mkha' rdo rje 'gro 'dul thabs// ji snyed spyod pa mdor bsdus pa// dang po nas gzung mthar thug bar// khyab pas dgongs pas spyod pa yin// ji snyed rgyal ba thams cad kyi/ / sku gsung thugs kyi ngo bo ni// bde chen rig pa'i ye shes te// ma lus mkha' ltar khyab pa yin// 'di dag nges par thugs phrad du// nges par bstan gyis shes par gyis// de dag rtogs goms de phyin chad/ / bul po gter dang phrad pa ltar// bde bar gnas nas bcings par grol/ khyung phrug spubs dang bral ba'am// seng ge dong thag bkrol ba ltar// nyi 'od sprin dang bral ba ltar// phyin chad stobs dang ldan pa yin/ / 'dod pa'i dngos po gang mthong tshor// bde chen rdzogs pa'i ngo bor gnas// 'di dag ye shes rdzogs pa'i phyir// ma nyams rig pa'i ngang las spyod// shes rab ma lus gcig la rdzogs/ / gcig po rig pas ngos bzung na// theg pa'i rnam grangs ma lus pa// dus gcig rdzogs par rtogs gyur nas// ma yengs gzhag pas grol ba yin// 'dul ba'i dus na bsams pa bzhin// thugs rje 'gro 'ong med par bdal/ / dngos grub thogs med lhun rdzogs kyis// zhes bcom ldan 'das bde ba chen po rig pa'i rgyal po rdo rje sems dpas gsungs nas de bzhin nyid du gnas par gyur to// man ngag rig pa klong rdzogs kyi rgyud rdzogs so/ /// dge slong bai ro tsa na la// rdo rje sems dpa'i thugs kyi gter// mkhas pa'i gdams ngag brgyud pa 'di// rdo rje yang dag rtsal la sogs// skal ldan re las ma gtogs pa/ / gcig la mi snub gnyis la mi spel te// thugs kyi gter du bcang zhing sems la bslan//// rgya gar skad du// a ti yo ga d+harma ma hA tan tra/ / bod skad du// rdzogs pa chen po rnal 'byor chos nyid kyi rgyud// bcom ldan 'das dpal rdo rje 'chang chen po la phyag 'tshal lo// de nas yang de'i tshe bcom ldan 'das kyis// dpal rdo rje sems dpa' 'di skad ces bka' stsal to/ / bdag gzhan gdod nas med pa yi// lhun gyis rdzogs pa'i ngang nyid la// 'chi 'pho 'gyur ba'i chos med de// mi 'gyur brtan pa'i gser bzhin no// dge ba'i phyogs dang sdig pa sogs/ / tha dad tsam yang yod ma yin// rnal 'byor rnam par 'ching ba nyid// gnyis po 'di dag gdod nas med// gang gis de ltar ma rig pa'i// don med sgra phyir de 'brangs nas// dge ba'i phyogs spong sdig pa spyod/ / de nyid 'thoms pas dmyal bar 'gro// dkar bas dkar pa'i nyi ma med// gnag pa'i mun pa dag kyang med// 'khor ba med cing myang 'das med// rig pa med cing gnas pa med/ / bri ba med cing gang ba med// 'grib ba med cing 'phel ba med// su la'ang phan med gnod mi 'gyur// snang ba med cing 'gyur ba'ang med// shes rab med cing thabs kyang med// lam med byang chub yod ma yin/ / dran pa med cing yid byed med// dmigs pa med cing yul kyang med// med pa ma yin snying po'i don// skal ldan rnal 'byor pa nyid kyis// the tsom rmugs pa rab sol la// don rtogs gting du go ba nyid/ / gdeng du chos 'di su 'chang ba// thabs cad sgom sgrub dge ba'i chos// dkar po'i phyogs dang sdig tu mnyam// ci yang mi 'dzin shes pa nyid// gang ltar spyad kyang me tog skye// rnal 'byor rdzogs pa chen po chos nyid kyi rgyud rdzogs so/ /// slob dpon pad+mas sgra rang 'gyur du bsgyur ba'o/// rgya gar skad du// shrI he tan tra nA ma// bod skad du// dpal ldan dgyes pa'i rgyud ces bya ba/ / ngo mtshar tshe dang dgyes pa'i thugs// gnyis su med la phyag 'tshal lo// bstan pa ston pa 'khor gnas dus// bde ba thams cad 'byung ba'i gnas// ngo mtshar chen po'i tshig dgu la/ / dgyes pa'i thugs kyis thabs dgur bzhad// sangs rgyas sems can rgyu gcig par// ngo mtshar chen po rmad du byung ha ha// phyi nang snod bcud rang bzhin gcig pa ha ha// ye shes 'khrul ba gzhi la gcig pa ha ha/ / bde dang sdug bsngal ngo bo gcig pa ha ha// dge sdig las kyi 'bras bu gcig pa ha ha// gser dngul lugs kyi dkyil 'khor dang// sa rdo ri brag don la gcig pa ha ha// thub pa'i mdzad pa bcu gnyis dang/ / rdzogs chen rol pa las gcig pa ha ha// drug gi bstan pa'i log chos dang// rgyal ba'i bka' rgyud bdud rtsi gnyis// byang chub sems kyi ngang du gcig pa ha ha// dngos po gcig la snang tshul bcu dgur gsal/ / chos kyi dbyings su rang bzhin gcig pa yongs kyis mnyam// ngo mtshar che ha ha// ngo mtshar chen po'i tshig dgu la// dus gsum rgyal bas lan dgur bzhad// he he he// tshig tu 'dus la don du rgyas/ / rgya mtsho chu bo'i 'phro 'du bzhin// nam mkha' rdo rje a las byung// bde ba chen po'i mchog 'di la// mtshon du yod pa ma yin te// mtshon du med pa'i chos nyid ni// brjod du med pa'i bde chen yin/ / brjod du med pa'i bde chen la// brjod du med pa'i tshig brjod nas// brjod du med don gyi ngo bo ston// mtshon med brjod las 'das pa yi// byang chub sems kyi bde chen la// dgongs pa'i dbang gis rgyal ba rnams/ / nga dang bdag ces gsungs pa ni// de bzhin pa yi dbang gis ni// chos sgo brgyad khri bzhi stong gsungs// gsungs kyang gnas lugs gcig las med// bstan pa'i snying po bde chen mchog/ gnas lugs yin par shes par bya'o// byang sems bde ba chen po la// rgyal sras gang 'dod dbang phyug skal ldan gyis// nges par rtogs la thugs kyi dkyil du chongs// slad ma gzhan dang byis pa phyogs ris can gyi mi go bas/ / don la 'gred la tshig la 'phyar// gnad la ma thebs nyon mongs rags// man ngag med par rdzob rkyen che// de 'dra'i lag tu de bskur na// gdon sbyin lag na mtshon thogs dang/ / mon mo'i lag na dug spyod 'dra// rgyal khams me yis gtong ba yin// med thung med par 'di 'chang na// rgya mtshor gser sbra ma shor ba dang// ri gzar kha nas rbab shor 'dra// gyen du bzlog pa'i thabs med phyir/ / rgyal khams phung ba'i thabs yin pas// gdams pa rgya dang ldan par gyis// rang rig byang chub sems kyi 'khrul dgu la// dus gsum rgyal ba'i thugs kyis dgyes dgur rol// rnal 'byor don rtogs sems kyi dga' dgur spyod/ / rang na gu h+ya si d+hi kan// zhang drung dri med zla shar rgya// ku ma ra yis rgya bod grags// dz+nyA na bu yis gdeng ldan gyis// ngo mtshar che ba'i tshig dgu smras// dpal ldan dgyes pa'i rgyud rdzogs so/ /// rgya gar skad du// tra ta ke rA dza tan tra// bod skad du mngon shes rig pa'i rgyal po'i rgyud// he ru ka dpal 'jam pa'i dbyangs// gsang bdag che la phyag 'tshal nas// mngon shes rig pa'i gnas dgu 'di/ / dus gsum rgyal ba'i thugs gter bas// rdza shing snod la yongs mi bstan// u rgyan yul gyi thor cog can// brtse gdung lhun grub pa'i gnas// d+ha na ko sha'i gling gong du// gu lang gser gzo'i don du bshad/ / gzhi mo'i don la mkhas pa dang/ 1/ chos dang chos nyid 'byed dus dang/ 2/ chos nyid zla la len 'debs dang/ 3/ gyabs kyis chod pa'i lta ba dang/ 4/ klong du gyur pa'i sgom pa dang/ 5/ gdeng gis zin pa'i spyod pa dang/ 6/ brdar sha chod pa'i gol sgrib dang/ 7/ thabs kyis zin pa'i dam tshig dang/ 8/ rang la rnyed pa'i 'bras bu dgu/ 9/ mngon shes rig pa'i gnad yin pas// skal ldan las 'phro can gyi gter/ / gzhi mo'i don la mkhas pa ni// ma byung ma skyes sngon rol na// sems kyi ngo bo ji ltar gnas// mkha' dang 'ja' tshon tshul du gnas/ 1/ chos dang chos nyid 'byed dus ni/ / mkha' dang 'ja' tshon gcig pa la// gzha' tshon yul du bcas pas 'khrul// med las yod gzung rgyu nyid kyis// rmi lam tshul du sdug bsngal myong// rigs drug skye 'gul de las byung/ 2/ chos nyid zla la lan 'debs ni/ / gdod nas dag pa'i rang bzhin nam mkha' la// bskal pa stong du bsags pa'i mun nag thibs po yang// rig pa'i rgyal po ye shes nyi zer gyis// skad cig yud tsam cig gis dengs pa bzhin/ / gsal stong dus gcig rtogs pas bde ba shugs la 'byung// dper na dom phrug ma dang phrad pa bzhin/ 3/ gyabs kyis chod pa'i lta ba ni// snang srid 'khor 'das thams cad la// sems las ma gtogs chos med phyir/ / rang sems bde bar ngo shes pas// snang srid bde bar shar ba yin// gcad bya gcod byed gnyis med pas// mkha' la nyi ma shar ba 'dra/ 4/ klong du gyur pa'i sgom pa ni// yul rnams kun la 'jug byed pa/ / mtshan ma'i bye brag thams cad la// bde ba chen po'i ros khyab phyir// gser 'gyur rtsi yi snying po 'dra/ 5/ gdeng gis zin pa'i spyod pa ni// tshogs drug spyod yul thams cad la/ / me tog bung ba phrad pa bzhin// gang 'phrad bung bas sbrang rtsi rnyed// snang srid bde bar shar ba yin/ 6/ gdar sha chod pa'i gol sgrib ni// gcig la gnyis su snang ba'i phyir// grod pa phyi nang bzlog pa 'dra/ 7/ thabs kyis zin pa'i dam tshig ni// 'ching ba'i las rnams spyad pa yis// grol bar 'gyur ba'i thabs zhes bshad// dug la sngags kyis bsad pa 'dra/ 8/ rang la rnyed pa'i 'bras bu ni// thog ma med pa'i dus mtha' nas/ / rang la rang chas yod pa'i phyir// rang ngo shes shing rtogs pas chog/ rmi lam sad pa'i dus bzhin no/ 9/ mngon shes rig pa'i rgyal po'i rgyud// rig pa'i gnad dgu zhes bya ba rdzogs so/ /// rgya gar skad du// til si ta pe du di'u ra na tan tra nA ma// bod skad du// bskal ba dum bu 'bar ba sgron ma snang ba'i rgyud ces bya ba// dpal kun tu bzang po bde ba rang rig pa'i rgyal po chos las 'das pa'i sku la phyag 'tshal lo/ / 'di skad bdag gis thos pa'i dus gcig na// bcom ldan 'das ting nge 'dzin sgron ma 'bar ba zhes bya ba las bzhengs te// gsang ba'i bdag po rdo rje sems dpa' dang thabs cig pa'i byang chub sems dpa' rnams la sogs pa/ / lag na rdo rje dang// rdo rje 'dus pa dang// rdo rje kun du bzang po rnams la bka' stsal pa// rang bzhin gyis rnam par dag pa lhun gyis grub pa'i gnas 'di nyid na/ / bya sna tshogs skad snyan pa sna tshogs sgrog pa// nyams dga' ba'i phyogs 'dir rang bskal ba dum bu'i rgyud bshad par bya'o// zhes gsungs pa dang/ / gsang ba'i bdag po la sogs pa rnams shin tu yi rang ste// sus mo g.yas pa'i lha ngas la gtsugs te phyags 'tshal nas// legs so legs so bcom ldan 'das// bdag cag mkha' 'gro ma rnams dang/ / sa la gnas pa'i byang chub sems dpa' la// bdag cag grol bar bya ba'i phyir// bskal ba dum bu bshad par zhu// zhes zhus pas// ngas gsungs pa la ma skrag par// rab tu legs par yid la zung/ / zhes gsungs so// gleng gzhi'i le'u ste dang po'o//// de nas kun tu bzang po yis// gsang bdag rdo rje sems dpa' rnams// thog mtha' med pa'i lhun grub la// rgya chad phyogs lhung med pa'i dbyings/ / kun gyi mnyam nyid yin pa la// lhun grub 'gag med rlung chen gyis// srid pa 'phrul gyi me long mthong// snang srid gsal ba'i me long du// nga nyid mnyam bzhag phyag rgyas btab// rang grol rang shar gyi bdag po yin/ / phyogs lhung med pa'i shes rab dang// gnyis su med pa'i shes rab dang// bdag 'dzin med pa'i shes rab kyis// rang grol nyid kyi dgongs pa thob// ces gsungs so// bskal pa dum bu'i rgyud las/ / kun tu bzang po rang grol gyi le'u ste gnyis pa'o//// de nas yang thig le chos men gyi klong bya btsal dang bral ba'i ngang nas// rdo rje sems dpa' la sogs pa la bka' stsal pa/ / kye kye gsang ba'i bdag po nyon cig/ zhe sdang drag po'i las kyi 'bras bu ni// mtshams med lnga spyad mi dge bcu spyad pas// tsha grang brgyad gnyis nyi tshe nye 'khor te// las kyi 'bras bu dmyal ba'i kha brgyud las/ / dam tshig nyams pa'i rdo rje dmyal ba rnams// dmyal dpon chos kyi rgyal pos skyob bam ci// gal te mi skyob thub par ci la grags// skyob na dmyal ba'i 'bras bu tsha grang rdzun// me nyid chur grub khro chu zhun ma dang/ / chu nyid mer gyur grang ba'i chu rnams dang// rlung nyid brag gyur rdo rje rgya gram rnams// rang snang rkyen gyis bsgribs pas dmyal bar snang// rang snang dag pa'i rdo rje sems dpa' la/ / dmyal ba'i me chu zhing khams rnam dag yin// 'dzin pa rnam dag tsha grang gnas nas drang mi dgos// chos sku thug phrad skyes pas myong mthong rnam par dag/ des na de yi dmyal dpon thub pa yin// rang grol rang snang shar nas thub pa'i rgyal po yin// ces gsungs so// bskal pa dum bu'i rgyud las// dmyal ba'i gnas na thig le chos min du bstan pa'i le'u ste gsum pa'o//// yang thig le chos min gyi klong nas/ / gsang ba'i bdag po la bka' stsal pa// kye gsang bdag rdo rje sems dpa' nyon// 'dod chags drag po las kyis mtshams med spyad// ser snas bcings te mi dge bcu yang spyad// spyad pa'i 'bras bu yi dwags rnam gsum du/ / myong ba rgyu mthun 'bras bu so sor smin// phyi yi sgrib pa nang gi sgrib pa dang// gnyis ka'i sgrib pa rab tu gdungs pa la/ kha 'bar rgyal mos skyob bam ci// skyob na sgrib pas mnar ba ga la srid/ / mi skyob thub par gdags pa'i rgyu mtshan ci// snang ba rang sar dag na thub pa'i thugs rje rdzun// mos pas drang phyir thub pa tsam du btags// rang grol rang shar shes tsam na// yi dwags gnas na bde chen thig ler 'bar/ / 'bar ba'i rgyal po 'di la grol dang ma grol med// thig le chos min sku sgrib pa ye nas dag/ myong ba'i rgyu 'thun 'bras bu gdod nas rnam par dag/ rgya chad phyogs su ma lhung thig le chos men sku/ / rang byung gdod nas dag pas btsal ba'i blo las 'das// ngo bo rang sar grol bas sgrib pa ga la yod// gdod nas rang byung rdzun min rnam dag rdzun// ces gsungs so// bskal ba dum bu'i rgyud las/ / yi dags rang byung gdod nas dag pa'i le'u ste bzhi pa'o//// de nas yang thig le chos min gyi klong nas bka' stsal pa// gsang ba'i bdag pos legs par zung zhig gti mug mi rig dbang gi ni/ / las kyi 'bras bu byol song rigs bzhi 'khrul/ ngam 'grog gcong rong zab mo'i g.yang sa dag tu bzung ba yang// gti mug dbang gis de ltar mthong ba yin// glang mgo'i thugs rjes mi gtong ste// rang snang rnam dag ye shes 'od ldan pa'i/ / byol song tsam du ming du btags pa las// de nas byol song rgyud du 'grub pa med// thig le chos men ye shes zang thal yin// snang srid rang byung skye 'gag gdod nas dag/ nam mkha' bzhin du mtha' dbus grub pa med// rgya chad phyogs su ma lhung don gcig ma rtogs na// blo chung phyogs rtogs mkhan po de// dam par zhan nas bdud du song bar 'chi'o// zhes gsungs so/ / bskal ba dum bu 'bar ba'i rgyud las// byol song rang dag gi le'u ste lnga pa'o//// yang thig le chos men gyi klong nas bka' stsal pa// gsang ba'i bdag po nyon cig/ nga rgyal rang rgyud drag pos rgya byas nas/ / ma rig gling bzhir bcad kyin phye ba yang// bcom ldan thub pa'i sku yi thugs rje de// 'ga' tsam 'drongs sam thams cad yongs mi 'drongs// 'dren pa'i thub pas 'drongs su dus dang/ / gnas skabs 'ga'// dus la bab kyang rang grol ma shes na// gnas skabs tsam gyi 'bras bu sangs mi rgya// 'dren pa'i thar par 'bras bu 'khor bar 'khyams// rig pas bcun pa'i gdams pa'i zhal chems ni/ / rgyud pa mang du gdams te go ba dka'// snod ngan zhabs rdol la sogs la// rna bar 'ga' tsam blugs pa'i 'bras bu yis// phyi mar sprul sku thob nas sangs rgyas pa// thabs kyis spyod pas bstun gyin bkri bar bya/ / tshogs gnyis ma rdzogs sgrib gnyis ma sbyangs kyang// rdo rje lta bu'i ting 'dzin thob par 'gyur// rig pa skyang sgom snang ba stong mi bsgom// dngos po sgom pas 'dus byas zang ka ma/ / med pa mi sgom yid smon blo yi chos// rang rgyud dag tu mi 'chor ye shes bltas bas grol// gling bzhi mi rigs klong la thig ler bdal// re dogs gzung 'dzin mtshan ma med// rgya chad phyogs su ma lhung lhun grub 'gag med yin/ / yin par ngas ma shes pas rgyal po rkang 'khyams 'dra// 'dra ba ngos ma zin 'khor bar 'khyams// sprul sku thug phrad 'di la sgom du gdod nas med// ces gsungs so// bskal pa dum bu'i rgyud las/ / gling bzhi mi rigs ye grol du bstan pa'i le'u ste drug pa'o//// yang bka' stsal pa// gsang ba'i bdag po nyin cig/ khong khro drang thad drag po'i 'bras bu yis// lha ma yin dang dpag bsam ljon pa rnams/ / 'thab rtsod bzhir gyur 'pham rgyal sna tshogs kyang// thig le chos men klong nas bde la yangs// 'thab rtsod rang grol thig le ye shes gsal// til gyi gang bu bzhin du ye nas bar mtshams med/ / rig pa rang grol mtshan ma'i blo las 'das// ye shes khong gsal mtshan ma rang sar grol// thig le phyi nang med par ya mtshan che// srog gi se dar drag po'i spu gri 'bar ba de// tsan da log spyod can gyis bdag gsod gzhan sgro ltar/ / 'khor ba'i dras thag bcad nas gzhan bsgral te// mtshan ma rang sar sgrol bas gzhan yang bsgral// ces gsungs so// bskal ba dum bu'i rgyud las// lha ma yin ye nas rang grol ba'i le'u ste bdun pa'o/ /// yang bka' stsal pa// nyon cig gsang ba'i bdag po khyod// phrag dog drag po'i las kyi 'bras bu yis// lha yi gnas su 'bras bur 'khrul ba ni/ / 'dod khams gzugs khams gzugs med khams gsum mo// dbang po brgya byin thub pa'i sprul sku de// lha yi ltung ba ma 'drongs thugs rje rdzun// thams cad 'drongs par ngas ma mthong ste de bas ltung ba mang/ / de yi thugs rje bden na thams cad 'drongs// 'ga' tsam 'drongs pa 'dra ba mkhar che stegs par 'gyur// thams cad 'drongs thub pa'i thugs rje rdzun// thug rje dbri bkol ye nas med pa la/ / phyogs rtogs tsam du rang gis bzung ba yin// thig le chos men klong nas 'gro drug yangs kyang yangs// rang rgyud 'dzin pa tsam la srid gsum dog kyang dog/ thig le chen po'i rigs la ye nas yangs kyang yangs/ / blo chung sman pa rnams la sems 'dzin tsam yang dog/ rang grol rang shar shes na srid gsum gdod nas dag/ sems 'dzin phra mo rtsom pa ni// sangs rgyas thugs rje phyogs med dog/ 'dzin pa ma 'gags sangs rgyas thugs rje yin/ / rol pa ma 'gags sangs rgyas rgyan du shar// snang ba ma 'gags snang srid thig ler bdal// khyab gdal klong na ye shes yangs kyang yangs// rgya ma chad cing phyogs su ma lhung bas/ / sangs rgyas thugs rje dmyal ba'i tsher lhang nas// 'dod 'jo'i ba la dbye ba ye nas med// thun du bcug la sgom du ye nas med// 'dzin pa mi 'gegs thugs rje yin// thugs rje 'gegs na ye shes rgyud gcod dam/

CLOSE WINDOW