/ rang byung ye shes mtshan nyid gsal// mi bsam gyi nar bzhag pa'o// bsam gyis mi khyab ye shes mthong// rang byung rdzogs pa'i lta ba ni// mtha' gsum bral lo ye sangs rgyas// rtsol bral dbu ma drang po'i lam/ / 'ching bral lta ba gza' gtad med// rin chen mtha' mnyam kun bzang 'dis// rang sems gnyis med rtogs par gyis// btang snyoms lta ba blang dor med/ khyung chen mkha' la ldings pa bzhin/ / spro bsdu gnyis med bdag gzhan bral// rang bzhin gnas pas de 'dod bral// spyod yul ma lus sems su shes// sna tshogs 'khor ba'i rang bzhin dang// ye nas rang bzhin gnyis su med// nyid la gzhan sems grub pa med/ / rig pa ci yang ma yin pa// 'dod pa'i bsam pa kun dang bral// shes pa mtha' bral song pa nyid// ye shes 'od gsal rang gnas pa// rol ba snang yang grub pa med// sgyu ma'i ye shes rtsal du 'phro/ / ma bcos sgyu ma lhun grub la// 'dzin pa'i sems dang ngos gzung med// ye shes rgyal po rnam par dag/ 'dzin pa'i sems bral rig par gsal// sems nyid nam mkha'i lta ba la// nam mkha' bsam du med pa bzhin/ / ye shes bsam du med pa yin// cir yang mi dgongs rang bzhag pa// dus gsum sangs rgyas lta ba'o// lta med rang bzhag lta ba ni// dus gsum gang yang ma yin te// 'gyur med dbyings kyi lta ba yin/ / 'dod pa bya ba gang yang med// ngo bo nyid la yang dogs med// sems nyid dri ma kar dag pa// 'gyur med rin chen gser bzhin no// 'dzin pa'i rlung gi g.yo gyur kyang// rig pa'i ngo bo 'gyur ba med/ / rgya mtsho snang ba chen po bzhin// phyi nang mi mnga' ye shes gsal// mtha' dbus mi mnga' phyogs dang bral// ye shes sems nyid lta ba la// rgyu dang rkyen gyis btsal ba med// rdo rje nyid 'dra 'jigs pa med/ / nyi ma rin chen 'bar ba ltar// rang gsal rnam par rtog dang bral// 'khor ba nyid na ye sangs rgyas// rang sems rig pa gang yang rung// bsam dang bral ba'i rig pa nyid// chos dang chos can gang yang med/ / ye shes nam mkha'i mtha' dang mnyam// rtag pa ma yin mi rtag med// shes pa 'gag pa'i 'dod pa men// bya byed mi rtsol rang bzhin dag/ dbu ma chen po drang po'i sems// phyogs kyi yul la 'jig pa med/ / sems nyid yul la gang 'jug na// 'dzin pa'i phyogs cha 'dod pa nyid// dbu ma'i sems dang mi ldan pa// bag chags 'dzin pa'i sems kyis dkrugs// bsam med rig pa brjod med 'di/ / tha snyad ming la mi gnas te// gdul bya dman pa'i sems dag la// tha snyad sgra yis 'khor lo bstan// snang srid snang ba sna tshogs pa// sku gsung thugs las ma g.yos te// dran rtogs ting 'dzin rig pa thugs/ / nam mkha' lta bur mi zad pa// bde chen rig pa sems kyi brgyan// rnam par rtog pa'i sgro 'dogs gcod// 'od gsal rig pa'i 'khor lo yin// lus can rnams kyi sgra rnams ni/ / sngags kyi gsungs du bsgrags pa yin// snang stong gnyis med rig pa gsung/ kha dog dbyibs su gang snang ba// sku mdog rgyan gyi 'khor lor zab// rdo rje lta bur dbyer med pas// sems kyi rang bzhin kun tu bzang/ / sku gsum rdzogs pa'i bde ba che// bsam med rang gzhan nyid kyis go/ rig pa mchog ldan kun tu bzang// bka' yi 'khor lo 'bum phrag yas// ting 'dzin mi rtog rang bzhin gsal// rang rig rdo rje 'gyur med lung/ / mtha' dang mnyam pa'i lung gis ni// thams cad ye shes ngo bor gsal// zhen pa'i sgro skur ma lus pa'i// ye shes rig pa'i 'khor los gcod// dran gsal rig par snang ba la/ / gang ldan gsal ba'i rigs pa mthong// rang rig rdzogs pa'i ye shes la// dngos su grub pa gang yang med// rtog pa'i mthu yis cir mthong yang// me long dngas ba'i bsnyen ma ltar// rdo rje gsang ba'i gdams pa yis/ / rig pa'i ye shes kun tu bzang// yi ge med pa'i don du mthong// rang gsal rjes su rang bzhag na// ye shes gsang ba rjes su dpags// rang rig 'brel ba nyid la gsal// ye gsal rig pa'i 'khor lo la/ / dad pa'i blo yis gang rtsol pa// rang 'dod theg pa'i khyad par ni// gsang ba'i don la ma lus ston// 'dod pa'i stobs kyis 'phangs nas rtsol// rang gsal 'khor lo'i don dang 'gal/ / 'dod rgyud gsal ba'i ye shes kyang/ rtsol ba nyid las 'da' ba med// rdzogs pa'i ye shes bde chen ni// rang bzhag rig pa'i 'khor lor dag/ rnam dag rang byung 'od gsal ba// blo bur dri ma ngang gis dag/ rnam par rtog pa'i sems nyid ni// rang bzhin ma yin rkyen gyis snang// rang bzhin ngo bo gang dag ni// blo bur rkyen la rag las min// rang gsal rig pa'i rang bzhin dang// 'khor ba rtogs pa'i rang bzhin gcig/ gang la'ang spangs bya ma yin te// gang gi rnam pa de gang yin// de bzhin 'gyur ba de bzhin te// sems ni ji bzhin mnyam pa nyid// sangs rgyas thugs kyi rnal 'byor ro// yang dag lam la yi ge med/ / snying po nyid du bdag 'jug pas// thob pa med cing spangs pa med// rig pa'i thugs la gsal bar snang// byang chub sems kyi ye shes ni// rnam shes dmigs pa'i yul las 'das/ / rig pa'i 'od gsal gzung 'dzin med// byang chub snying por bzhugs pa'i tshe// ngo bo nyid ni dmigs su med// ye shes kun bzang rnam par dag/ 'bar ba'i ting 'dzin ngo mtshar che// rang gsal rig pa cir mi dgongs/ / bde gshegs 'khor lo ngo bo ni// mi 'gyur 'joms pa'i rdo rje 'chang// kun 'byung rin chen lta bu 'di// skyon med pad+ma'i rang bzhin dag/ 'du byed las kyi rdo rje 'chang// 'dul mdzad ting 'dzin 'bum phrag yas/ / bsam bral ting 'dzin 'od gsal sems// thabs kyi sgrib pa ma lus yin// rtsa ba mi g.yo thig le byang chub sems// rang byung yongs rdzogs ston pa'i ngo bo nyid// rang rig rdzogs pa mchog gi sku/ / sna tshogs 'dren pa mchog gi sku// rang byung rig pa mchog gi bstan pa ni// brjod med kun la rang bzhin ston// rnam dag rin chen lta bur gsungs// mi g.yo thig le nyid du gsal// yi ge tha snyad kun dang bral/ / de nyid rang snang don du bshad// sna tshogs snang ba'i rang bzhin dag/ rang rig nges don nyid du bstan// rnam bshad rang byung bstan pa'i mchog/ rang snang gsal ba'i rang bzhin gyis// de 'khor bsam pa ji bzhin bstan/ / bstan pa'i yan lag 'bum phrag yas// rang byung dag pa shugs kyis 'byung// 'dod rtsol blo la drang ba dang// thugs kyi dgongs pa nges pa'i don// gdul bya rab 'bring don du bshad/ bcang bar bya/ 'dris par bya/ blta bar bya/ nyams su blang bar bya/ sbyang bar bya/ dam med la byin na rang gi nyams 'grib pas sba bar bya'o/ zhes bka' stsal pa dang/ rdo rje sems dpa' la sogs pa rnams rjes su yi rang bar gyur to/ / rgyud gzung ba'i le'u ste lnga pa'o//// rdzogs pa chen po bar do gsang ba'i rgyud ces bya ba rdzogs so//// gu ru shrI sing ha ba tas rdo rje yang dbang gter la dur khrod gsang lung du gnang ba'o/ /// rgya gar skad du/ bar do g+hu h+ye tan+t+ra nA ma/ bod skad du/ bar do gsang ba phyi ma'i rgyud ces bya ba/ dpal rdo rje sems dpa' phyag 'tshal lo// de nas bcom ldan dpal kun tu bzang po la/ rdo rje sems dpas gsol ba/ bcom ldan 'das rdo rje kun tu bzang// bar do la sogs gsungs pa yis// rnal 'byor pa nyid sangs rgyas pa'i// dus sa'i rim pa bshad du gsol/ / zhes zhus pas/ rgyal ba kun tu bzang pos bka' stsal pa/ rdo rje sems dpa' nyon cig/ spyir gang zag rnal 'byor pa nyid sangs rgya ba la dus rnam pa gsum ste/ tshe 'di la sangs rgya ba la lus sbyang ba gnad che pas/ lus sbyang ba la bcud len gyi gdams ngag bstan pa dang/ bar dor sangs rgya ba la bla ma'i gdams ngag dran pa gnad che bas 'pho ba'i gdams ngag bstan pa dang/ lan grangs brgyud nas sangs rgya ba la dam tshig dang ldan pa gal che bas/ dam tshig dang/ sdom pa dang/ bsam pa bzang po la gnas par bya'o// zhes bka' stsal pas/ rdo rje sems dpas yang gsol pa/ bcom ldan rdo rje 'chang chen nyid/ / bcud len gdams ngag bshad du gsol// zhes gsol bas/ bcom ldan 'das dpal kun tu bzang pos/ rdo rje sems dpa' la bka' stsal pa/ bcud len gdams ngag bsnyan pa ni/ / dngas ma lnga yi tshe sgrub ste// sa yi dngas ma sha yis gsos// rdo yi dngas ma rus pa'i gsos// shing gi dngas ma stobs kyi gsos// rtsi yi dngas ma bcud kyi gsos// me tog dngas ma bkrag gis gsos/ / dgun yang mi skam bdud rtsi bzhi// 'di dgu ldan par gsogs byas la// rigs lnga dag gi brgya yis gdab// oM badzra sa twa hUM/ bai ro tsa na oM/ rad na swa b+ha ba traM/ a mi de ba hri/ karma badzra a/ a yu pha la si d+hi b+h+ruM/ byang chub kyi sems spro bsdu bya/ 'di zos yon tan brjod mi lang// bcu thub pa yangs brgya tshe 'gyur// 'chi ba drug ni bslu bar byed// brgyad cu lon pa drug cu ltar// seng ge glang chen rma bya khyung/ / bkrag mdangs me tog pad+ma bzhin// sngags 'chang rigs 'dzin kun gyis rlobs// ma mo mkha' 'gros sdongs grogs byed// bdud rtsi 'di yon tan gyis// tshe la dbang ba'i rigs 'dzin 'grub/ / ces gsungs so// bcud len bstan pa'i le'u ste dang po'i skabs so//// de nas gzhan yang bka' stsal pa// 'pho ba'i rgyud dag rgyud lngar bstan// dran pas sangs rgya'i gdam ngag ni// rtsol med 'pho ba'i don bstan pa/ / 'gro ba rigs drug sems can la// ye shes re re'i cha yod de// 'gro ba mi la ye shes lnga// 'dus pa'i cha ni yod pas na// 'dzam gling las kyi sa pa yin// de la sangs rgyas bstan tshang bas/ / dran pa sangs rgya'i gdams ngag don// 'chi khar dran pas skyel ma'i tshul// dbugs chad ye shes 'byung ba ni/ bsu ma'i tshul du phrad pa yin// tha ma zhing khams 'pho ba la// dam tshig sdom pa dran par bya/ / de yi ngang la bsam pa ni// bzang po'i ngang du 'gro bar bya// zhes bka' stsal pa dang/ rdo rje sems dpa' la yang bos nas bka' stsal pa/ rdo rje sems dpa' rgyud 'di ni shin tu gsang ba'i rgyud ces bya ba yin te/ bar do gsang ba'i rgyud phyi ma zhes bya bar zung shig/ ces gsungs so// rgyud gzung ba'i le'u yi skabs te gnyis pa'o//// bar do gsang ba'i rgyud phyi ma zhes bya ba rdzogs so//// rgya gar skad du/ san ti ma hA bo d+hi tsi ta rad na u ba d+he sha gu h+ya nA ma tan+t+ra/ bod skad du/ rdzogs pa chen po byang chub kyi sems rin po che spungs pa gsang ba man ngag gi rgyud ces bya ba/ bcom ldan 'das dpal kun tu bzang po lhun grub bde ba chen po byang chub kyi sems la phyag 'tshal lo/ / 'di skad bshad pa'i dus gcig na/ 'og min gyi gnas chos kyi dbyings kyi pho brang/ yum gyi mkha' glong yangs pa'i gnas rgya yongs su ma chad par bdal ba na/ bcom ldan 'das dpal kun tu bzang po gsang ba mchog gi bdag po nyid/ rigs lnga'i sangs rgyas la sogs pa sangs rgyas dang sems can 'byed pa med pa'i 'khor gyis bskor te/ byang chub kyi sems rang byung gi ye shes kyi don la gnas shing/ dus gsum ji bzhin pa nyid du bzhugs so// de nas dpal rdo rje sems dpa' la sogs pa 'dus pa'i 'khor rnams dad pa'i sems kyis btud nas 'dzums pa'i mdangs phyung ste/ bcom ldan 'das kyi drung du ci yang mi smra bar 'khod par gyur to// de nas bcom ldan 'das dpal kun tu bzang po nyid kyis/ de dag 'khod par mkhyen nas bka' stsal pa/ kye sems dpa' chen po nyon cig/ khyed la sogs pa'i 'khor rnams kun// dad pa'i sems kyis rab btud cing// 'dzum pa'i mdangs kyis 'khod pa de// 'dod pa'i don ni dris gsol cig/ ces bka' stsal to// de nas dpal rdo rje sems dpas 'khor gyi nang nas langs te/ bcom ldan 'das la 'di skad bcas gsol to// kye kye bcom ldan 'das dpal kun tu bzang po/ gsang ba'i bdag po ye shes sku// chos nyid byang chub sems kyi don// bdag cag rnams la bshad du gsol// zhes zhus pas/ de nas bcom ldan 'das dpal kun tu bzang pos bka' stsal pa/ kye sems dpa' chen po khyed rnams legs par nyon cig/ chos nyid don gyi ngo bo de// tshig dang yi ge las 'das shing// brjod cing bstan du mi btub kyang// mthun pa'i tshig gis ma mtshon na// don gyi ngo bo rtogs mi 'gyur/ / de phyir chos rnams brdar bstan gyi// dper na me nyid 'dod pas kyang// me 'dod tshig tu ma brjod na// me dang phrad pa shin tu dka'// me 'dod tshig tu brjod pa ni// me dang phrad par 'gyur ba bzhin/ / de ltar chos nyid rtogs 'dod pas// rang bzhin med pa'i chos nyid la// rang bzhin med pas mtshon te bstan// brjod du med pa'i chos nyid la// brjod med tshig gis mtshon te bstan// ces gsungs so/ / rdzogs pa chen po byang chub kyi sems rin po che spungs pa man ngag gi rgyud las/ gleng gzhi dang gleng blang ba'i le'u ste dang po'o//// de nas dpal rdo rje sems dpas 'di skad ces gsol pa/ rgya gar skad du/ tsit+ta pa thi ka ma hA ko sha nA ma/ bod skad du/ sems phyogs chen po'i mdzod ces bya ba/ thog ma thugs rje chen po rin chen gsal ba'i sbubs na bzhugs tsam na/ sa bon ni smin la 'bras bu ni ma smin pa bzhugs te/ ngo bo rang bzhin thugs rje tsam gcig tu gnas te/ de nas thugs rje chen po de me tog gi sbubs su bzhugs pa'i dus su/ phyi sprul pa'i skur smin pa dang/ nang ye shes kyi dkyil 'khor du smin pa dang/ thugs shes rab yongs su rgyas pa gsum dus mtshungs pas/ thugs rje chen po de yi thugs ka nas/ ye shes kyi 'od zer spros te/ bar der mi mjed kyi 'jig rten gyi khams rang bzhin gyis chags so/ / de nas thugs rje chen pos lho phyogs bde ldan yid 'dres kyi tshal du byon nas/ nyid kyi mdzod bu'i bu ga nas ye shes kyi spyan phye ste/ de'i 'od zer las sangs rgyas dam pa'i dpal gzhi sgyu ma lta bu'i skur sprul nas/ byang chub sems dpa' ro langs bde ba la dam pa'i dpal gyis lung bzhi bstan te/ de dang po rin po che gsang ba'i sbubs chen po bstan/ de nas nang sgo chen po bzhi phye ste bstan/ de nas bar gyi sgo bzhi phye ste sgo brgyad gcig tu bsgrigs/ de nas phyi sgo zab mo klong nas phye ste thugs rjes sems can gyi don byas so// dam pa'i skyes bu bzhis smras pa/ e maho// gsang ba rmad du byung ba'i chos/ / brjod pa kun las rab tu 'das// brjod med de nyid sna tshogs pa'o// ngo bo 'gags med yongs su grags// zhes gsungs so// Ar+ya pa lo zhes brjod do// e ma'o// rdo rje phung po'i yan lag kyang/ / rdzogs pa'i sangs rgyas lnga ru grags// zhes gsungs so// e maho// rdul gcig steng na rdul snyed pas// phyag rgya'i dkyil 'khor gsal 'phro thim// de nyid dag pa'i rang bzhin pas// ngo mtshar bzhi bcu rtsa gnyis 'grub/ / a ho su kha e ma ho/ chos min ye shes rang byung bas// chos kun khong nas brda bar bya'o// kye ho kye ho/ A li kA li/ yan lag med pa'i rdo rje/ thabs che ba ngo mtshar to/ sangs rgyas nyid kyi skad zab mo'i klong nas zab mo'i tshig brjod pas/ / don dam 'gyur med snying po lhun gyis grub// chos 'byung spyi khog chen po'i don// byin gyis brlabs kyis bshad pa las// sangs rgyas nyid la yi ge med/ / dam pa'i skyes bu bdag phyag 'tshal// zhes sems dpas gsol to// ngo mtshar to// sgo brgyad bsgrigs pas sgo gcig nyid la gnang/ dbus chos 'byung chen po las thugs rje rang 'byung gi sgo bzhi phyir bstan te/ rig pa rang shar gyi dgongs pa me long dang snang ba ltar rang shar ro// thugs rje chos kyi sgo bzhi nang du bstan te/ mtshon byed tshig gi sgron me dang/ mtshon bya don gyi gzhi ma gnyis tha mi dad par tshigs ma sbyar te gzhag go/ de yang man ngag gi klong brtol ba ni// gnas lugs rnam pa drug gis dkyus kyi sa bcad nas/ sangs rgyas mnyam sbyor gyi dgongs pas don dang man ngag la sbyar zhing/ de nas dam pa'i skyes bu bzhis chos kyi mthar gtugs pa'o/ kha sbyor bar na bde gnas pa/ oM gyur sngags kyi sdong po la// yan lag med pa'i rdo rje bshad// ces sangs rgyas nyid kyi bka' 'o// chos sku rang byung 'od gsal bas/ / nyi ma'i snying po bzhin du gnas// sa bon zla ba rgyas 'dra ba// til 'bru zer gyi sbu thag tsam// mi gsal gsal ba'i bdag nyid can// thugs kyi yi ge 'bru gcig pu// chos rnams kun gyi rtsa ba ste/ / chos rnams kun gyis nga ma mthong// dper na mig gi sgron me la// ling tog sprin gyis bsgribs pa bzhin// nga yi sgrib shing chos yin no// ye shes lhun rdzogs chen po'i sku// gsal 'tsher lhun sdug gzi byin ldan/ / sna tshogs 'od zer 'phro ba yis// khams gsum pa yang yang dag sgrol// shes bya'i dbyings na 'od gsal ba// gser gyi yi ge 'bru gcig pu// gzhi rtsa med las yig 'brur gsal// me long nang gi gzugs snang 'dra/ / gzhi lhun grub kyi snying por rang byung// yon tan ye shes dkyil 'khor du rang shar// 'bras bu spyi spyod kyi ye shes su rang rdzogs so// rdo rje mgon po thugs kyi mchog/ rgyu gcig pa nyid sna tshogs te/ / kun 'byung rgyu yi ye shes yin// ma bcos rang byung dbyings nyid na// yig 'bru gcig gi yan lag las// thams cad rgyas par bstan pa ni// dam pa'i skyes bu dam pa bzhin// sangs rgyas kun gyi ngo bor shar/ / sku gsum rang lugs rnyog pa med// 'dzin med shes rab lcags kyu yis// nam mkha' las byung nam mkha' 'dzin// nam mkhas nam mkha' zin gyur na// nam mkha'i mkha' 'dra bde bar gnas/ / nga lus med pa'i sngon rol na// bdag gis bdag nyid chen po lta// bdag gis bdag nyid de mthong na// bdag med sku gsum shes rab mthong// shes rab rang bzhin gsum ldan pas// ltar med don la yang dag blta/ / kye sems dpa' chen po legs par nyon cig/ e ma'o// bde gshegs bcom ldan 'das// sangs rgyas kun gyi ye shes sku// rtogs par bka' ba snying po'i don// rab tu mi rtogs gnas med pa'o/ / zhes gsungs so// e maho// ye nas rnyog pa med pa'i sku// bsgoms pas mi zin chu zla 'dra// rtog pa med pa sgom pa'i mchog/ ces gsungs so// e ma'o// mi gnas ye shes dngos rtog mtha' dang bral/ / phyogs lhung med pa'i shes rab khong na gsal// sku gcig yig 'bru ma nyams so sor mkhyen// rang gi shes rab sna tshogs sprul pa'i sku// de ltar rtogs pa'i skyes bus thams cad mkhyen/ / mtshan mo'i yul bzung ci dgar bsgoms kyang 'grub// ces gsungs so// e ma'o// chos sku gcig las so sor don brjod kyang// rang rig rgyal po gdod nas che ste 'phags// ting 'dzin rtse gcig yid dam don brjod kyang/ / rtog pa med par rgyal ba mya ngan yongs mi 'da'// zhes gsungs nas/ dam pa'i skyes bu bzhi skye med kyi dbyings su gshegs so// sgo bzhi lde mig dang sbyar te bshad pa'o// sgo brgyad nang du sbyor ba ni/ / sangs rgyas kun gyi dgongs pa yin// sgo gcig phyir la bstan pa ni// ro langs bde ba bdag nyid kyis// rgyu 'bras gnyis kyi don gyi phyir// 'khor lo phyi nang gnyis su bskor/ / ces gsungs so// chos 'byung chen mo zhes kyang bya// gsang sngags kyi spyi khog chen mo chos thams cad kyi gung shing lta bu/ yan lag med pa'i rdo rjes bshad pa/ bcom ldan 'das bdag cag gis lung bstan pa 'dis bcom ldan 'das la mngon par bstod do/ / thig le gsang skor gyi mdzod kyi rtsa rgyud rdzogs so//// rgya gar skad du/ bud+d+ha sarba sa mi ti mang la A ta/ dz+nya na a lo ke ma hA tan tra nA ma/

CLOSE WINDOW