/ lus la sha ri ram 'byung sangs rgyas kun dang dgongs pa mnyam// gang yang dbyer med mnyam pa'i ngang la gnas pa de// dus gsum sangs rgyas ma lus dgrar langs kyang/ / nam mkha' nyid la nam mkha' snang bar zad// byang chub kyi sems bsgom pa'i rgyud las/ nyams su blang ba'i skabs bcu gcig pa'o//// de nas bcom ldan 'das la/ gsang ba'i bdag po phyag na rdo rjes/ bcom ldan 'das dpa' po thod rgal gyi ting nge 'dzin ji ltar lags/ zhes gsol pas/ bcom ldan 'das kyis bka' stsal pa/ sems ni kun gyi gzhi ste thod rgal kun gyi snying po de nyid do// 'khor ba nyid ni rnam par rtog pa nyid de rtog pa nyid las 'khor ba med pa yin/ / rnam rtog zad ba mya ngan 'das pa'i rang bzhin pas na thams cad sems// mi mthun phyogs bral bdag las ci 'byung gzhan zhig gdod nas med/ / de la gab 'gog snyoms 'jug mkhas pa rnams kyi ye nas gter// don dam ma nor thabs kyi lung 'di dam pa'i mchog chen yin// ci zhig 'di la dpyad nas gang la dmigs shing brtag tu yod/ / de 'dra dus gsum dus ma byas pa ye sangs rgyas pa'i snying po nyid// 'di las gzhan nas sangs rgyas 'thob re 'khrul pa'i lam// 'di la phyin ci log bzhis bslad du 'di la ye nas med cing tshad mas gzhig tu med/ / 'khrul pas 'di bor 'dud rtsi rnyed na dug tu 'khrul pa gang yang tsha// 'di kun rten cing 'brel 'byung tshul te skye dang 'gag par 'gyur zhes pa// tshig pa'i sa bon bzhin du med las med pa mi 'byung rgyu 'bras med/ / gang la'ang brtag par bya ba yod pa min te mi brtag pa'ang min// la lar ma brtags pa las rgyal ba 'byung zhing brtag pa 'khrul// la lar brtags pa dag las rgyal ba 'byung zhing ma brtags 'khrul/ / de phyir dngos por zhen cing rgyu dang 'bras bur rtogs pa'i sems nyid ni// rgyu dang rkyen du snang ste de gnyis med phyir skye dang 'jig pa med// skye 'jig med phyir bdag gzhan med de 'chi 'pho med phyir rtag chad med/ / de bas stsal mi dgos pa'i yang dag lam 'di 'bad rtsol med pas dpyad// dpyad pa rtogs pa'i rgyun de ci la'ang brtag par mi bya rang bzhin bzhag/ des na 'khrul 'khor med cing mya ngan 'das pa med pa nyid du mngon/ / gnas kyi skad cig nam yang mi 'bral de tshe mnyam 'gyur de med med// snying po mchog gi lam 'di gzhi dang rtsa ba med de gzhi rtsa gzhi yi mchog/ 'di la bstod dang skur dang bsngags par bya mi dgos te bsam du med/ / yang dag don gyi snying po theg pa mchog gi klong chen 'di// btsal ba med par las rnams rdzogs pas bsod nams sku// yongs la khyab pas khyab bdal chen po nam mkha'i klong/ / kun 'byung snying po theg pa'i mchog ste yid bzhin nor bu yin// yang dag ma yin rtogs pa bskyed phyir bag chags yod pa ma yin dang// 'gro dang 'ong ba btsal ba dmigs su kun 'byung 'di la ga na yod/ / ye shes klong yangs 'khyil ba'i dkyil 'khor de nyid snying po nyid// spyod yul med phyir kun gzhi med cing rnam rig de yang med pa yin// yang dag don dam med phyir bsod nams tshogs chen bsag mi dgos/ / shes rab mchog gi yul nyid dam pa'i dbyings chen nyid// 'di zhes dpags tu med pas yul la dmigs su med// phyogs rnams med phyir dmigs dag gnas med rnam shes rig pa ji ltar skye/ / mnyam dang mi mnyam kun mnyam gzhung mnyam ye mnyam pa// mnyam pa chen por yum gyi mkha' nyid rnam par dag pa'i klong chen yin// lta ba'i lta ba dam pa'i klong chen 'di lta ba ni 'khyil ba ste/ / 'di la drang srong phyogs par byed pa don la brtags pa yin// kun gyi rang bzhin zhi ba 'di la cis kyang bsgrub tu med pa yin// 'di la phyogs par byed pa drang srong mchog chen gang zhig pa// sngon gyi shes rab mchog ldan mkhas pa rnams kyis 'di la bsngags/ / de phyir skal ldan rnams kyis 'di la rab tu dad par byos// de la sgrib pa gsal du med de mtshungs par gang yang spyod// mtshungs par spyod pa pa la gang yang dbyer med snying po ldan/ / ye shes snying po drang srong stobs ldan mchog gi lam la mkhas pa rnams kyis las bslabs pa// yon tan mchog tu khyad par bsngags shing don 'dod pa la rab tu bstan/ / sangs rgyas rnams ni chags pa chen po chos kyi dbyings la zhen la gnas// de phyir chos dbyings stong pa gzhi rtsa med pa'i rmad 'di bor// sngon gyi mig mkhan rgyal ba'i ling thog sel bas dmig rdul bsal/ / mig rib dag nas snad srid gsal mthong chags shing zhen pa rnams rigs bzhin// yangs shing rgya che blo gsal myur du mthong thos ji bzhin nyid// chos kyi snying po mchog gi mchog tu gyur pa ye shes snying po nyid/ / brtag par dka' zhing brtan par dka' la brjod pa'i tha snyad rnams dang bral// mchog gi mchog 'di kun gyi snying po yin te khyad par lam// tshig gis mi phebs gzhan dang byis pa kun gyi spyod yul ma yin yang/ / bag chags rtas shing sad par byed pa'i rkyen yang rnam pa sna tshogs te// rkyen 'gag bag chags 'ga' zhig smin nas ma yi rgyud kyi lus snang la// rkyen gzhan dag gis bag chags gzhan sad byas tshe 'gyur ba'i mthu mthong nas/ / dbang phyug la sogs byed de lam de ma zhi grol mi 'gyur// rnal 'byor lam bslad the tshom rgyu'ang rgyun 'di phra ba ma rtogs skyes// 'di las grol bar bya ba'i lam gyi zhe phugs gang nas btsal du yod de ye nas med/ / rmongs shing gti mug blo 'chal ba ni yangs pa'i lam la rtog/ phra ba'i sgo mor ming btags mod 'byung sgo la 'jug/ de phyir bla med byang chub lam 'di sangs rgyas kun gyi rje btsan yin/ / 'di las khyad par gyur pa'i lam 'di bzhag tu 'tshol ba 'khrul pa yin// 'di ni kun gzhi yin te sangs rgyas nyid kyang yin pas so// chos dang dge 'dun dkon mchog gsum med de yod rtogs pa'i mtshan/ / ming gis mtshon du 'di la rnam grangs med de lhun grub pa// sbyangs shing bsgrub tu med de lhun grub rgyal ba'i lam mchog nyid// bsam zhing bsgom du med de bya lam rjes med klung/ / mnyan zhing bslab tu med de mchog gi mchog nyid yin// byang chub kyi sems bsgom pa'i rgyud las/ 'jig med thod rgal gyi skabs te bcu gnyis pa'o//// bcom ldan 'das pad+mo'i ting nge 'dzin sangs rgyas kyi sku lags sam/ zhes zhus pas/ bcom ldan 'das kyis bka' stsal pa/ bdag tu brtags pas sgribs te 'phags pa'i rigs dang bral// gzung dang 'dzin pa ltung ba'i rgyud de yod pa'i snying po med/ / chos su brtags pas sdug bsngal sna tshogs 'byung zhing ngan por srid par 'gyur// rnam shes de yang 'du byed rgyun las mtshan ma tha dad 'dzin pas na// mchog gi snying po ye shes klung yangs rgyal po de ni 'dzin pas zin mi srid/ / de phyir lung 'di 'dzin pa med pas gzhi yi lung 'di zan// de ltar drang srong rnams kyis bsam med lung la de bzhin gnas par bya'o// de bzhin de ltar 'di la gnas pa de yis ta la'i mgo bo chod/ / snga phyi rgyal ba 'byung ba dag ni 'di la gnas par 'byung// 'du byed de yang 'di zhes 'du bar byed pas rtogs pa ste// rtog pas rtogs na rlung la zad pa'i dus med lam dang bral/ / de phyir lam 'di kun gyi lam ste 'du mched gang na yod de med// med pa de nyid kun lam yum gyi mkha' ste blang dor med pa yin// de nas bcom ldan 'das la/ gsang ba'i bdag po phyag na rdo rjes bsgom par bya ba'i don bshad du gsol/ zhes zhus pa las/ bcom ldan 'das kyis bka' stsal pa/ mtha' rnams med phyir dbus med dbus la'ang 'phags par mi byed do// gang la'ang gnas par mi byed pa la bdag blo de bzhin bzhag na bsgoms/ / chos kyi dbyings la mtha' dbus med pas ming gis mtshon du med// mtshon du med pa'i don de de bzhin nyid de bdag dang gzhan med bsgoms// gang la'ang dmigs par bya ba'i yul nyid yod na ye nas sangs rgyas btsal du med/ / btsal du med pa'i don de rang gi sems te de bzhin gnas pa bsgoms// gang la'ang 'jig rten dbang phyug par mo kun yang mi spong 'drar mnyam gnas/ / kun dang dbyer med 'drar mnyam gnas pa bsgoms// de nyid sangs rgyas kun gyi lam mchog mchog gi mchog 'di ni// 'dzin rtogs dmigs bral gang la'ang rten pa mi byed pa nyid bsgoms/ / chos la 'khrul par mthong ba de ni 'khrul pa yin par rab rtogs na/ drug gi bstan pa bdud kyi las kyang ngan du mi 'dor mi rtog go/ de phyir rgyal bas chos tshul 'di mthong don 'di 'jal bar bsgoms/ / gang yang dang du blangs la ci zhig bor du yod par shes pa lam gyi mchog/ mi skye mi 'gag cir mi dgongs pa thams cad shes na bsgoms// gang la'ang mi rtog ci la'ang dmigs su med pa dbang phyug la sogs kun la med/ / rgyal la sogs pa rnams ni khyad par don 'di nyid las gzhan du mi 'gyur spyod// de ltar spyod pa de las gzhan du ma yengs de bzhin/ gnas pa bsgoms// sems can kun bsad mo chag kun sbyar gtsang sme med par kun bza' rgyal ba'i las/ / bdud dang srin po la sogs rnams sems bza' phyor spyod pa de ltar min// gang yang gnas med gnas la spyod chags gnas pa sgom pa gol/ / de ni sgom chags nad kyis z-in te 'dod khams rim par skye// shes rab thabs kyi spyod la'ang mi gnas phyir na bdud kyi 'dra bar spyod// de phyir gang la'ang chags med gnas pa de la bsam gtan ma lus rdzogs/ / shes rab kyis ni pad+ma 'khor lo rdo rje mi bsam mi mnyam med par bsam// bsam pa'i yul las 'das pa'i snang ba med pa'i chos nyid la// mi dmigs mi stsal gyi nar de bzhin gnas pa bsgoms/ / blo mkhan blo la don rnams snang bas blong la don 'di bzhag/ rang gi shes pa dam par byas shing kun las rgyal de de bsnyems na// chags dang zhe sdang skyes nas gti mug yin te don mi mthong// lta ba'i mchog ni cir yang dmigs su med par lta ba lta ba yin/ / spyod pa'i mchog ni thar lam gang yang 'gog pa med par spyad kyang spyad du med pa spyod// gang la'ang tha snyad mi gnas gnas la'ang gnas med gnas/ / snang med dbu ma'i lam med byang chub sems zhes bder gshegs gsungs// ji ltar snang ba thams cad snang med dbyings su rdzogs te rdzogs// byang chub kyi sems bsgom pa'i rgyud las/ nges pa'i don mdzub tshugs su bsgoms pa'i skabs bcu gsum pa'o/ /// de nas gsang ba'i bdag po phyag na rdo rjes/ bcom ldan 'das la 'di skad ces gsol to// bcom ldan 'das tshad ma zhes bya ba gang lags/ zhes gsol pas/ bcom ldan 'das kyis bka' stsal pa/ g.yo dang mi g.yo'i tha snyad mi gnas gnas la'ang gnas pa med// kun gyi tshad ma byang chub bde ba'i klung chen tshad mar 'brel ba gang yin pa/ / bsad pa'i nyes med sbyar kyang gal med ci spyad skyon gyis bsgor med pa de tshad ma yin// nyon mongs ta la'i mgo bcad sa bon mes bsregs myu gu 'byung ba med pa tshad// snang ba thams cad 'khrul ba rnam rtog log 'khrul yin par blo yis rtogs na tshad/ / de yi don las nyams su blangs te de ltar de bzhin gnas pa de nyid bsgom pa tshad ma yin// de ltar blo yi steng du lhangs kyis go nas don de mthong ba sangs rgyas tshad ma mthong/ / thams cad kun tu ji ltar snang zhing ji ltar gnas kyang rang gi sems nyid las// gzhan min de la yod rgyu rdul tsam med par rtogs pa dam pa'i dam pa yin te tshad// tshad ma de las gzhan zhig gud na ci 'ang dmigs su med par shes pa shes pa'i tshad/ / gzugs dang mtshan ma smon par 'dzin pa rab tu spangs nas su// rnam thar gsum po bsgom pa bdud kyi las te gzugs nyid stong pa'o/ / stong pa'i stong pa nyid de stong pa'ang gdags pa med// de nyid tshad ma yin pas tshad ma'i las 'di khyad par tshad mar bzhag/ don 'di tshad ma'i steng du nyams su blangs la don nyid mchog gi steng du mkhas pas de bzhin zhog/ byang chub kyi sems bsgoms pa'i rgyud las/ drang srong gi rig tshad ma'i steng du gzhag pa'i skabs bcu bzhi pa'o//// de nas bcom ldan 'das la/ gsang ba'i bdag po phyag na rdo rjes drang srong rnams rgyu ci las grub pa dris pas/ bcom ldan 'das kyis bka' stsal pa/ 'khor gsum spong zhing mya ngan 'das lam bsgoms kyang bdun nyid de// bsgom zhes pa yi yul dang gnas dang sa dang don la gang zhig dmigs shing rtogs pa gdod nas med/ / de nyid rang bzhin ma zhi rang bzhin btsal spangs gar mi gnas// de lta'i don 'di lus ngag yid gsum ma 'phos de bzhin gnas las byung// sprul pa sangs rgyas sku mthong 'phags pa'i rigs dang 'brel kyang mi chags shing/ / dza la gar ba srin po la sogs dbugs can dmyal mthong yang// zhe sdang mi skye de yi rang bzhin de ltar yin par shes shing rtogs las byung/ / ting 'dzin ro la mi chags gang yang mi 'dzem blang dor med las byung// 'phags pa kun gyi yul dang gnas kyang 'das sogs lam nyid gzhan na med// lam dang sa la mi sbyong ci la dpyad kyang rang bzhin nyid las nyams pa rdul tsam med pa de bzhin gshegs/ / sangs rgyas sems can dbyer med 'khor 'das mi 'byed gang yang dbyer med na// rgyal sras yab yum ngang ngam shugs kyis de yi ngang las 'char/ / chags sdang gnas las ma 'phags dang po'i sa las ldang mi byed pa de las byung// chad ma gang yin blo yi steng du lhangs kyis go nas de las gzhan du ma yin te// ro nye gzong gdabs bzhin du brtan par byed pa de las drang srong ma lus 'byung/ / de phyir drang srong tshul du drang srong lam 'di mkhas pas blo la bzhag/ ldang dang mi ldang ched du mi spong mi sel ston pa drug gis bstan pa'ang snying por bsam/ / gang yang mi sgom gnas gsum mi g.yo rten 'cha' mi byed pa nyid drang srong lam// 'di las sangs rgyas pa la'ang lam med rgyal ba kun gyi bde lam shul po che// byang chub kyi sems bsgom pa'i rgyud las/ drang srong rnams kyi grub pa'i rgyu bstan pa'i skabs bco lnga pa'o//// de nas bcom ldan 'das la/ gsang ba'i bdag po phyag na rdo rjes/ bcom ldan 'das shin tu zab pa'i don ji ltar lags/ zhes gsol pas/ bcom ldan 'das kyis bka' stsal pa/ 'phags pa kun gyi yul dang gnas kyang 'das sogs lam nyid gzhan na med// kun gyis dmigs par bya phyir mchog gi snying po 'dis kyang kun la khyab/ / mchog tu gsang ba'i chos nyid zab mo gang yang snang med 'di// ci la'ang mi snang gang la'ang mi dmigs de bzhin nyid kyi ngang// gsang ba'i dbang phyug de bzhin dbyings nyid dbang bsgyur thugs rje'i ngang/ / 'di la bla med myur ba'i go 'phang mchog chen gang brnyes pa// sems kyi ngang las gzhan min gang yang rgyal ba gzhan na lhag par med// srin bu me khyer nam mkha'i 'od du 'bar yang glog dang mtshungs pa yin/ / theg gzhan khyad par rab tu bsngags kyang theg mchog 'dir mi mtshungs// don gyi ngo bo gzhan min yang dag thar lam 'di ni rnam par mi rtog nyid las 'khrungs// bsam 'das brjod med rgyal ba'i sems de ye shes thugs rje'i ngang/ / 'di la bla med dmyur ba'i go 'phang mchog chen gang brnyes pa// mi bsgom ci 'ang 'di la gang na bsgom du yod de bzung ba'i yul dang bral/ dmigs shing bsam du med pas rna ba nyan cing lce yis brjod du med/ / yul dgon sems dgon gnas dgon lus dgon 'brel bas bzung// lung mchog rgyal po nor bu rin chen lta bu'i kun gzhi 'di// 'di zhes dmigs su rdul tsam med phyir mchog gi snying po nyid/ / kun snyoms gsal ba'i thig le gsal ba'i sgron ma kun 'byung 'dzin pa'i sku// rnam thar sgo gsum 'byung ba'i klong chen 'di ni mchog gi sku// spyod yul sman pa'i rgyal po lta bu'i nad gso mdzad pa'i mkhan/ / theg pa'i mtshan nyid shin tu zab pa'i khyad par 'gyur ba'i lam chen 'di nyid ni// theg ba kun gyi nad gso mdzad pa'i sman pa'i mchog chen po// kun snyoms kun 'byung thig le 'bar ba'i sku mchog zab mo 'di/ / gang yang dmigs su med par yan lag gnas// 'di las khyad par zab pa'i sangs rgyas byang chub gang nas btsal du yod// shin tu 'du shes gang yang snyoms 'jug 'di ni kun gyi rmad byung yin/ khyad par mchog tu gyur cing kun tu rab tu bsngags pa rdzogs mchog yin// rdzogs mchog bya bral yangs pa'i snying po 'di ni bsgom du med pa yin// gang yang 'di las snying po byang chub gzhan nas rnyed par 'dod pa gdod nas gol ba yin/ / rdzogs so rdzogs so rdzogs pa 'di la thams cad ma lus rdzogs// 'di la shin tu zab pa'i chos ni gang yang med// byang chub kyi sems bsgom pa'i rgyud las/ man ngag shin tu zab par bstan pa'i skabs bcu drug pa'o//// de nas bcom ldan 'das rab tu nges pa rnyed de gnas pa la/ gsang ba'i bdag po phyag na rdo rjes 'di skad ces gsol to/ / bcom ldan 'das gang du 'gro zhing ci zhig spang du yod ces/ bcom ldan 'das la zhus pas/ bcom ldan 'das kyis bka' stsal pa/ dmigs med dag pa'i mkha' dbyings klong yangs rab tu 'khyil ba las/ ya mtshan 'khrul gyi shes rab 'od 'bar de ni kun la gsal// mchog tu rmad byung ngo mtshar khyad par yul 'di kun gyi rmad chen yin// rang sems rnam dag kun gyi yul te kun gyi 'gro khung yin// mi dmigs dbyings las dmigs med rig pa rang zhir 'gro ru gzhug/ kun snyoms sems la kun 'byung rig pa khungs pa'i steng du btang// yum gyi mkha' dbyings khyab par gdal ba'i klong du sems kyi phur pa thebs par btab la bzhag/ 'gul ba'i tshe na dam por bcings shing 'byung du gzhug par yong mi bya// yong zhig 'byung na mkha' dbyings klong gi khung pa'i mtshan nyid brtag par bya// mtshan nyid brtags te mtshan nyid mthong nas khung pa'i gting yang dkrug/ legs par 'khrugs nas slar la steng nas kha ru dbyang bar mi bya gting khar 'dug/ gting de mthong nas rgyal ba sangs rgyas rnams kyang bdud las rgyal/ / rgyal ba'ang de las sangs rgyas gang du'ang mi 'gro de kho na nyid na 'dug/ drang srong rnal 'byor rnams kyi 'gro sa de yin gyis// de ltar yum gyi mkha' dbyings dag pa'i gting mthong nas// 'jig rten 'di na yod pa thams cad ci zhig spang du yod de kun tu bzang po'i ngang/ / thams cad 'di ltar shes na bsgom pa'i mchog chen khyad par yin// 'di las rgyal ba rnams la bsgom du rdul tsam med// byang chub kyi sems bsgom pa'i rgyud las/ gang du'ang 'gror med cing ci'ang spang du med pa'i skabs bcu bdun pa'o//// de nas bcom ldan 'das la/ gsang ba'i bdag po phyag na rdo rje// bcom ldan 'das rgyud kyi mtshan nyid dang/ sems kyi mtshan nyid ji ltar lags/ zhes gsol pas/ bcom ldan 'das kyis bka' stsal pa/ byang chub sems ni rgyud kyi rang bzhin yin te sems kyi mtshan nyid ni// thams cad kun la mnyam gnas de nyid ngang las g.yos pa med par rgyun du gnas pa rgyud/ / de ltar gnas pa de nyid kha dog dbyibs kyis mtshon du med de rang bzhin gnas pa sems// gang gi'ang mtshan nyid de ltar shes pa de las shes rgyu med pa shes rab yin/ shes pa'i don las mi 'gyur 'da' bar dka' ba de las 'da' bar mi byed sdom pa rdzogs// gang yang mnyam snyoms de bzhin de las 'da' mi byed pa bsam gtan mchog/ yon tan lhun rdzogs rang gi sems las ma gtogs chos gzhan med// chos 'di phyi rol yul dang nang gi sems su mi 'byed kun bzang ngang// pha rol tshul rol gang yang spong mi byed de mnyam par gnas par bya/ / sa yi rim par mi gnas ting 'dzin ri mo mi mnyes lha yi skur mi bsgom// drang srong dgon dben mi gzung dbang po yan par gzhag par bya// yul dang dbang por mi 'byed spyod lam lhun par gzhag par bya/ / 'di la yul dang dbang por ye nas dbyer med 'byed pa 'khrul// rnam thar gsum dang gzungs kyi sgo yis ye nas mtshon du med// lha klu mthu chen rnams dang drang srong gis kyang 'di mi mthong/ / 'di la sus kyang gzhig pa'i thabs med sangs rgyas rnams kyi thugs// 'di la su yis dgongs nas dmigs pa ci zhig bsgom// nyam thag phyi rol pas ni ma rtogs pa'i// rgyal ba'i bden pa ston pas khyad par bstan pa 'di nyid ni/ / ci yang mi bsam cir yang mi dmigs 'di nyid bsam pa las/ mchod rten lha khang la sogs 'dus byas dge rtsa btang snyoms bzhag/ byas la sogs ba'i las ni zin par mi 'gyur byas shing rtogs pa'i rgyun/ / lus dang yul dang dbang po ngag sogs de yang mi dbye de bzhin gzhag par bya// yul nyid ye nas sangs rgyas kun tu bzang mo'i mkha' dang dbyings// dbang po gdod nas rnam par dag ste dkyil 'khor mchog gi mchog/ dka' thub brtul zhugs mi dgos pa la ci zhig sbyang du yod// sa nyid rnam rtog rlung ste rma 'bu spu dang sgo nga 'dra ste mtshungs// rtogs pas byang chub rnyed na phyi rol mu stegs pas/ / rtogs pa'i 'du mched shes pa'i dkyil bcug nas// byed pa po byas thar pa'i lam du rtse gcig rtog pas byang chub myur 'os na// skyes bu glen pa gad+gA'i 'gram du skam drir zhi ba ji bzhin byang chub med/ / mi gnas byang chub klong du kun 'dus sny-ing po rnams gsal te// gang la'ang mi dgongs ci'ang ye nas rnam par rol pa'i ngang las ma g.yos na// sangs rgyas 'phags pa'i gong na de bzhin snying po yin pa'o/ / de la sangs rgyas chos dbyings 'phags pa su yis gang nas btsal// phyogs bcu'i rgyal ba gang nas gtams gyur kyang// sangs rgyas kun gzhi byang chub sems las med par sangs rgyas gsung/ / sangs rgyas nyid kyang dang po'i rgyud med rang sems dag pa gang yin de kho na'o// bung ba me tog gzhibs kyang ma rnyed sprang rtsi'i snying po ltar// sems nyid ji ltar dag kyang mi stong sprul pa'i snying po 'byung bar 'gyur/ / de phyir thams cad ye sangs rgyas pa'i 'jings der rig pa bsam pas mnan// mnan pa'ang mi dmigs dbang po'i 'byung ba brtag/ phyi nang snod bcud kun 'byung gnas pa ye nas ci'ang med pa yin/ / ci yang med pa'i ngang las car yang bsam mi bya bar bzhag khams gsum yod sgrol rgyud drug gnam phyag btab nas ye sangs rgyas pa yin// rgyal ba sangs rgyas 'di las yod pa min te 'di dang so so min/ / gzhi rtsa med pa'i chos nyid byang chub sems// zab cing phra bas dpag pa'i yul las 'das// yangs shing khyab pas nam mkha'i mtha' dang mnyam/ / sbom zhing rags pas snang srid dbang du bsdus// de 'dra'i chos sku bla med byang chub sems// ma byung ma skyes 'od kyi snying po can// 'gro ba yongs kyi dpal mgon byang chub sems// sgra dang tha snyad tshig gi spyod yul med/ / dpag med bsam 'das mi gnas mya ngan 'das// don gyi snying po bla med byang chub sems// smra bsam brjod med rig pas pha rol phyir// mi skye mi 'gag rang rig byang chub sems/ / mi gnas bdag med ye nas rnam par dag/ ma bcos lhun grub bde chen snying po mchog/ sbyir yang snang ba bde chen longs spyod sku// rang byung ye shes sprul sku byang chub sems// bdag med spros bral don dam lhun gyis rdzogs/ / nyag gcig ma 'gags snying po byang chub sems// ma skyes dbyings nas rang byung kun la khyab// mkha' ltar dngos med zhi ba gcig tu grags// nyi ma'i snying po dngos med mya ngan 'das/ / rang byung 'gag med skar tshogs grangs mang yang// bdag nyid chen po mi 'gyur bdag nyid sku// thugs rje thabs mkhas nas mkha'i sprin gyi tshul// phan gnod yod med snying po byang chub la// las dang thugs rje nam mkha'i sprin gyi tshul/ / zhe gtsang med pa chos nyid byang chub sems// rig pa'i rtsal chen ma 'gags rang rig yongs la khyab// rdo rje sems dpa'i thugs rje 'od po che// nyi ma thog tu chu sprin ga bur bzhin/ / rdo rje sems dpa'i zhal chems nyag gcig ma// dga' rab rdo rje mkhas pa'i skye mchog gis// las 'phro skal bar ldan pa'i thugs brgyud nas// bsnan phri med pa'i rin chen gter 'di chongs/ / snod ngan bu dang rgyud ngan slob ma la// chu srin gre ba bzhin du dam du sdoms// zhes bka' stsal to// de nas byang chub sems dpa' sems dpa' chen pos/ rgyud dag pa'i rdo rje sems dpa' la zhu ba drug zhus pa/ kye thugs rje chen po khams gsum gyi sems can thams cad ni nad pa lta bu'o// dug lta bu'o// mun pa lta bu'o// sbyor rtsi lta bu'o// tsher ma lta bu'o// ro myags lta bu'o/ zhes zhus pas/ rdo rje 'dzin pa nyon cig/ ngas sdaum pa tshig gsum nges bstan gyis// legs par yid la zungs shig/ 'khor ba'i rgya mtsho thag rings rnam par dag pa'i zhing du bsgral ba dang/ 'khor ba'i 'dam rdzab la rdo rje rdzong bca' ba dang/ sdug bsngal gyi bye brag nor bu rin po cher sgyur ba dang gsum la/ rigs kyi bu phyi snod kyi 'jig rten thams cad 'byung ba lngas bsdus pa/ sngon byung gi dus na sangs rgyas kyi zhing yongs su dag pa/ ma byas par snang la/ bde zhing yangs pa/ zug rngu med pa/ rgya yongs su ma chad pa/ tshig dang dbang po'i sbyod yul med pa/ brjod bya thams cad las 'das pa/ 'das zhes bya ba yang ming gi rnam grangs te/ ming tsam la yang mi gnas pa'o// des ni 'khor ba rgya mtsho mtha' rings ba rnam par dag pa'i zhing du bsgral ba'o// khams gsum sems can sdug bsngal gyi grur tshud/ ma rig pa'i rgyar 'thums nas sdug bsngal bar gnas kyang/ snying po byang chub kyi sems rang byung rang 'od gsal ba'i/ rgyu rkyen med par ka dag pas/ rdo rje lta bu'i ye shes la gnas su rung gi/ gdos pa can shes rab kyi snying po med pa ni ma yin no/ / rgyud drug gi sems can thams cad rdo rje snying po'i sku dri ma med par gnas pas yongs la khyab/ gzhan dbang du gyur pa/ zad cing dri bas rgya ma chad/ thabs kyi rgyal po stobs kyi rig pa shar bas/ 'khor ba nyid rang byung gi ye shes su ka dag/ sdug bsngal gyi 'dam rdzab nyid bde ba chen por rang dag pas/ 'khor ba'i 'dam rdzab la rdo rje'i rdzong bcas pa'o// rigs kyi bu nyon cig/ sems can thams cad la lus gsum du shes pa'o/ / ye shes kyi lus sdug bsngal gyi mtha' las grol ba'o// bag chags smin pa'i lus sha khrag gi gdos pa can/ gnyis 'brel gyi lus sems bde sdug gnyis 'dzin/ gzhi shes pa chos kyi sku la/ bag chags kyi nad med kyang/ rnam rtog sems kyi lus bag chags nad du langs pas/ gso byed sman pa'i rgyal pos gso byed sman gyis gso zhes 'byung ste/ ma rig pa 'khor ba'i nad/ rig pa mya ngan 'das pas gso/ sdug bsngal 'dam rdzab lta bu'i nad/ bde ba chen po zag pa med pa'i ye shes kyis gso/ gti mug mun pa lta bu'i nad/ shes rab mar me rlung gi ma bskyod pa lta bus gso/ bag chags sbyar rtsi lta bu'i nad/ rang bzhin med pa man shel lta bus gso/ rtog pa'i rtsing zhib zug rngu tsher ma lta bu'i nad/ mnyam pa nyid mi g.yo ba rgya mtsho lta bu'i sman gyis gso/ de ni sdug bsngal gyi bye brag rin po cher bsgyur ba zhes bya'o/ / zhes byang chub kyi sems rma bya mjing bsnol gyi rgyud dag las/ gzhi chos kyi sku'i rang bzhin bstan pa'i le'u ste dang po'o//// de nas byang chub sems dpa' sems dpa' chen pos yang zhusapa/ kye ma bcom ldan rdo rje 'chang// zag med lam la rab gnas pa'i// de bzhin gshegs pa'i bsam gtan gyis// blo dngos gnyis med sbyor ba ni// sangs rgyas nyid kyi dgongs pa ste// thabs la mkhas pas bstan du gsol/ / zhes zhus te/ rdo rje 'dzin pa khyod nyon cig/ dri ba dris pa de legs so// de bzhin gshegs pa'i dgongs pa dpag tu med kyang/ sems can gyi blo'i bye brag dang sbyar nas/ chos ji bzhin ma la blo de bzhin ma gnas pa'i ched du/ mar me'i sdong bu bsnan pa'i tshul du/ ma bcos ji bzhin gnas na de bzhin nyag gcig ces bya'o// de yang lung las/ bstan bya ston byed gnyis yod na/ / bsgom bya sgom byed ci phyir min// ces 'byung ste/ byang chub kyi snying po la/ byang chub kyi snying po bstan te/ snying po bstan par bya ba'i don du/ dus rtag tu snying po la gnas par bya'o// rtogs pa'i don shes bya ba ma 'gags kyang/ bka' lung gi phyi mor rang rgyud la mi gsal gyi bar du/ shes bya la gsal gdab cing ting nge 'dzin la gnas par bya'o// byang chub snying po 'gyur med chos kyi sku// gzhan nas ma btsal sems nyid mngon sangs rgyas/ / rang la gnas pa'i don de sems kyi sems la ltos// ma byung ma skyes rang byung chos kyi sku// mi g.yo mi 'gyur mnyam pa chen por zhog/ gsal la rtog med mi 'gyur chos kyi sku/ / ma bcos bde ba chen po'i ngang du gzhag/ sku gsum lhun grub bkod pa rgyan gyi sku// bde chen 'du 'bral med pa'i ngang la gzhag/ thig le nyag gcig rang bzhin spros dang bral// sna tshogs shar kyang nyag gcig nyid du bsgom/ / nam mkha'i mthong nas gsal ba'i nyi shar bzhin// skye med dbyings nas rang byung 'od gsal ba// thugs rje sprul pa'i 'od zer 'phro bar bsgom// snang srid rnam par dag pa pad+mo'i dkyil 'khor nas/ / bskyed rdzogs rnam gsum ma btsal lhun gyis rdzogs// bsod nams ye shes tshogs chen dag pa'i sku// kun tu bzang po'i mdzad spyod rtogs pa'i sgom// sgrib gnyis ma sbyangs tshogs gnyis lhun gyis rdzogs/ / man shel lta bur dri med gdod nas dag/ rnam rtog skyon bral ye shes lhun gyis grub// rang byung rdo rje snying po yin par bsgom// ma bcos chos sku kun gzhi byang chub sems// sa la ma bgrod lam la mi gnas kyang/ / rtog pa gdeng du ma gyur bar du bsgom// sangs rgyas nyag gcig chos la mi gnas kyang// 'khrul rtog spang phyir chos nyid ngang du bsgom// dug snga ye shes lnga ru sangs rgyas kyang// rnam grol zag med lnga ru gsal bar bsgom/ / 'byungs lnga lha mo lnga ru sangs rgyas kyang// mdzes pa'i lha mo sprul sku gsal bar bsgom// snang srid rnam dag brjod pa las 'das kyang// zhing khams rnam dag chos sku'i ngang du bsgom/ / byang chub sems dpa' skye shi mi mnga' yang// 'du 'bral med pa rgyun gyi theg pa bsgom// 'dod do snod bcud dngos po rnam dag kyang// ci la ma chags mi rtog ting 'dzin bsgom// 'khor dang longs spyod skar tshogs brgyan mang yang/ / ci la ma chags rang bzhin rnam dag bsgom// sgyu ma'i phung po'i ye shes gnas yin kyang// ma chags mi gnas btang snyoms chen por bsgom// kun gzhi rnam she sku la mi 'khor bas/ / rang byung ye shes bdag med mya ngan 'das// rtag chad tshig las 'das par sun phyung nas// mthon dman glong du khod snyoms te// mnyam pa chen po mnyam las 'das par bsgom/ / brjos pa'i tha snyad tshig las 'das par rab rtogs na// rnam dag byang chub dbyings kyi bsgom pa yin// ces byang chub kyi sems rma bya mjing bsnol gyi rgyud las/ gzhi lam dang bcas pa'i le'u ste gnyis pa'o/ /// de nas byang chub sems dpa' sems dpa' chen pos zhus pa/ ston pa thugs rje mnga' bas/ 'gro ba'i mgon po bde bar gshegs// gzhi lam 'bras bu gnyis med pa'i// lam gyi 'bras bu bshad du gsol/ / zhes zhus pas/ rigs kyi bu nyon cig/ dri ba dris pa de legs so// yang dag par rdzogs pa'i sangs rgyas kyi gdams pa rin po che ni/ brjod pa thog tu mi phebs shing bstan par dka' na yang/ ngas re zhig mtshon pa'i tshig 'ga' tsam smra yis/ sems la dbang thob gang zhe na/ zhes 'byung ste/ legs par yid la zung zhig/ rigs kyi bu 'bras bu bla na med pa gud nas mi 'byung ngo// gzhi lam gnyis su med pa'i dus na/ de bzhin gshegs pa'i bsam gtan zhes bya ste/ lhag mthong dang zhi gnas gnyis su med nas rang byung gi ye shes mar me rlung gis mi bskyod pa lta bur/ shes bya nyams su myong na/ gzhi lam 'bras bu mthar phyin/ sangs rgyas nyag gcig ma zhes bya ste/ ye shes dbyings nas gsal na 'bras bu nyag gcig ma// dbyings nyid rig par shar na 'bras bu nyag gcig ma// gzugs sku 'od du shar na 'bras bu nyag gcig ma/ / bde chen zag pa med na 'bras bu nyag gcig ma// snang srid dbang du bsdus na 'bras bu nyag gcig ma// ting 'dzin ro la ma chags 'bras bu nyag gcig ma// 'khor ba rang bzhin med na 'bras bu nyag gcig ma/ / mtshan ma zil gyis non na 'bras bu bde ba che// zhes pa'i don no// rgyu chos kyi sku la 'bras bu gzugs sku gnyis 'byung ba yang/ thig le'i rtsal la ma 'gags pa yin te/ de yang rgyu 'bras dbyer med pa nyid rtsal du shes pa'i dus su/ 'bras bu sku gsung thugs mthar phyin pa'i/ sku gsum ye shes rang byung du shar nas/ ye shes gzugs skur snang la/ gzugs nyid rang bzhin rnam par dag ste/ mtshan ma las 'das na 'bras bu ye shes su grub bo// ngo bo nyid kyi snang ba snang tshod du grags tshod me long g.ya' dag pa ltar bstan kyang/ don dam pa spros pa dang bral ba rang bzhin rnam par dag pa/ 'bras bu mi gnas pa'i ye shes chen po zhes bya'o// mtshan ma dang bral ba tshan kyi sku/ bya ba thams cad dang bral ba 'bras bu bla na med pa zhes bya'o// phyir mi ldog pa'i lung nges pa bka' lung gi phyi mo las/ ye ji bzhin pa'i rdo rje 'chang chen po/ rgyud dag pa'i rdo rje 'chang la snang ba'i dus na/ rgyu 'bras dbyer mi phyed ba'i rang byung gi bcom ldan 'das zhes bya ste/ rgyud dag pa'i dbyings nyid nas/ 'bras bu ye shes kyi dkyil 'khor rang snang gi dus na/ rgyu 'bras kyi chos thams cad mi phyed pas/ sangs rgyas mar me mdzad stong gi gtsug phud rin po che zhes bya bar grags te/ 'bras bu mthar phyin pa'o// rang gi shes bya mthar phyin pa'i dus na/ bdud dang mu stegs kyi glags mi rnyed la/ phya dang dbang phyug gi grogs byar med/ rgyal mtshan gyi rtse mo ltar nub pa med cing/ nor bu rin po che ltar zad mi shes la/ shes bya rang gi ngo bo la shes bya rang gi dbang bskur ba'i dus na/ 'phags pa gtsug tor dri ma med pa zhes grags so// byang chub kyi sems la byang chub kyi sems dus su/ rgya mtsho chen por chu bran 'du ba'i tshul te/ chos nyid skye ba med pa'i glong du chos can mtshan mar snang ba'i dus thams cad rang bzhin gyis rnam par dag pas/ byang chub sems dpa' kun tu bzang po zhes grags so// chos thams cad la dbye ba med cing bzang ngan du mi lta/ bdag dang gzhan du mi rtogs pa'i dus na/ nam mkha' dang nyi ma'i tshul te/ byang chub sems dpa' byams pa kun nas gzigs zhes grags so// chos thams cad gang yang mi len/ gang yang mi 'dor/ gang gis kyang mi sgrib/ gang gis kyang sgrol mi nus/ gang la yang mi rten/ gang du yang ma gol/ rang bzhin rnam par dag pas rtag pa'i mtha' med/ shes bya ngo bo la ma bsgribs yongs su gsal bas/ chad pa'i mtha' med pa/ 'phags pa nam mkha'i snying po zhes grags so// zhes byang chub sems dpa' rma bya mjing bsnol gyi rgyud las/ gzhi lam 'bras bu rnam pa gsum mthar phyin par bstan pa'i le'u ste gsum pa'o/ /// de nas byang chub semasadapa' sems dpa' chen pos yang zhus pa/ 'jam dpal gzhon nu dpa' bo mchog/ gzhi lam 'bras bu mthar phyin pas// nyon mongs 'khor ba'i rgyun yang gcod// dag pa'i zhing du yang dag bsgral/ / rnam rtog zil gyis mnan phyir ro// spyod pa'i tshul khrims bshad du gsol// zhes zhus te/ rdo rje sems dpa' 'ang bdag la nyon// spyod pa rnam pa gsum du rtag/ glang po lam du zhugs pa'i spyod pa dang/ smyon pa snying stor pa dran pa med pa'i spyod pa dang/ de'i grogs tri la/ 'dam gyi pad+ma'i me tog dang/ bya thib tshang du zhugs pa dang/ bu gcig pa'i ma lta bu ste/ da ni rnal 'byor chen po'i spyod pa yin/ dpa' brtul stag gi spyod pa dang/ brtul zhugs phag gi spyod pa dang/ sems med bung ba'i spyod pa dang/ dbang sdud mu stegs kyi spyod pa dang/ bde ba thun 'jug gi spyod pa dang/ de ni rnal 'byor 'bring gi spyod pa'o/ / dman pa phyag dar khrod kyi spyod pa dang/ mtshon pa nyams myong gi spyod pa dang/ 'dod pa bya ba'i spyod pa dang/ bcom ldan 'das kyis bka' stsal pa/ lta ba glong du gyur pa'i spyod pa ni/ tha mal gyi spyod pa'o// zhes thugs kyi rgyud nas kyang bshad do// chos nyid glong du gyur pa'i spyod pa ni/ ci la yang ma zhen ma chags pa'o// nyams myong rgyud la skyes pa'i spyod pa ni/ srab la sbyar ro/ / brtul zhugs kyi spyod pa'i spyod pa ni/ bya ri skegs lta bu ste ma nges pa'o zhes gsungs so// byang chub sems dpa'i spyod pa'i mtha' ni ma bcos pa'o// rang bzhin rnam par dag pa'i dus na/ spyi la yang ma zhen pa'i spyod pa rnam par dag pa'o/ / bde ba chen po yul du shar ba'i dus su/ zug rngu'i mtha' rang bzhin gyis 'gog/ khyad par na rgyu la skyes pa'i dus na/ snying rje chen po lhag par can gyi spyod pa skye bar 'gyur ro/ / 'dod pa med par 'gro ba rigs drug gi gnas yul du snang ba'i dus su/ chos thams cad ci la yang ma chags pa'i spyod pa skye bar 'gyur ro// sangs rgyas kyi zhing yongs su dag pa la yul du snang ba'i dus su/ thun mong gi dngos po 'gags nas ngo tsha ba dang bag tsha ba'i 'du shes med de/ tshig nam mkha' la khungs ston to// spyan nam mkha' la gzigs te/ mdzub mo nam mkha' la stod pa'i spyod pa 'char ro// chos kyi sku sprul pa'i nyams su btar ba'i dus su/ lus grang dro dang na tsha med cing gcer bu'i spyod pa rang byung shar te/ nam mkha'i ri mo khungs 'don pa'o// zag pa med pa'i ting nge 'dzin gyis ro nyams su myong ba'i dus su/ zas kyi 'du shes chung zhing grogs la mi chags par/ ri dwags rma sam ltar gcig pu ri sul 'grim pa'i spyod pa 'char ro// sems ye shes kyi dbang du 'dus shing snang ba chos nyid kyi dbang du 'dus pa'i du 'dus pa'i dus na/ nam mkha' la 'gro ba dang/ chu la mi nub par 'gro ba dang/ gzhan gyis mi snang ba'i rtsal la spyod par 'gyur ro// rig pa'i dbyings la shar ba'i dus su// yul gzhan dag gi snang ba 'char bar 'gyur ro/ / sems las su rung ba'i dus su/ gzhan gyi sems shes shing dngos po thams cad las brdzun du smra bar 'gyur ro// chos nyid pa stong nyid las su rung ba'i dus na/ phyi'i 'byung ba dang/ mi ma yin pa'i sgra thams cad sel bar 'gyur ro/ / spyod pa rnam par dag pa de rnams ni/ rgyud dag pa'i rdo rje sems dpa' snang ste/ lus ma bor bar mngon par rdzogs par sangs rgyas so//// na mo bud+d+ha yA/ tad+ya thA/ d+harmasaM g+ha ri/ many+dzu shri/ a pra bra/ b+ha ga ba ti/ su ka a/ de nas byang chub sems dpa' sems dpa' chen po dga' mgu yi rangs te/ bcom ldan 'das la thal mo snying khar sbyar nas/ yan lag lnga sa la gtsugs te/ kye kye legs so dpal ldan mgon po che// zhal nas byung na dga' ba de// zhal nas gsungs pa'i nga nyid don gyi mchog/ bdag blo mun pa kha 'byed pas// snang gsal thugs rje 'od kyi me/ / sems can kun gyi skyabs mdzad pas// mgon po dri med ye shes sku// 'gro ba'i don du sku sprul nas// rang byung sangs rgyas rnam par gzigs// byams mgon thugs rjes skyabs mdzad pa// sangs rgyas log par dad sel la/ / gus pa'i tshul gyis skyabs su mchi// zhes brjod nas bstod do// byang chub sems dpa' rma bya mjing bsnol gyi rgyud las/ spyod pa rtog pa'i le'u ste bzhi pa'o//// de nas byang chub sems dpa' sems dpa' chen pos yang dri ba dris pas/ 'jam dpal gzhon nur gyur pa thugs rje can// zhu ba zhus pa legs gsung pa// 'gro mgon rdo rje sems dpas mdzad// sangs rgyas thugs kyi dpal be'u dang/ / sangs rgyas dbu yi gtsug tor dang// sangs rgyas zhal gyi ljags bzang nas// 'od zer 'byung ba bstan du gsol// ces dri ba dris so// rdo rje 'dzin pa khyod nyon cig/ khyod kyi dri ba dris pa de legs so/ / phyogs bcu dus gsum gyi sangs rgyas thams cad la/ thugs rje 'byung ba ni brjod kyi mi lang/ bsam gyis mi khyab/ ngas ma 'ongs pa'i sems can la mdo tsam zhig bstan gyis/ khyod nyon cig/ thugs rje'i bye brag mang gis kyang rtsal ma 'gags pa yin te/ dper na nam mkha' sprin dang char gyi tshul 'byung ste/ thugs rin po che'i dpa' be'u'i nas/ sangs rgyas byams pa mi nyams mgon po zhes bya ba byung nas/ rang bzhin rnam par dag pa'i chos bstan to// dbu'i gtsug tor nas 'jam dpal dri med snying po zhes bya ba byung nas/ sku gdung ring bsrel gyi chos bstan te/ zhal gyi ljags las/ sangs rgyas bye ba rnam par gzigs zhes bya ba byung nas/ rgyu 'bras kyi chos ma lus par bstan to// sangs rgyas stong gi yon tan ni// sangs rgyas gcig pu nyid la 'dus// gcig pu rab tu snang ba'i chos// 'gro ba kun la rang bzhin gnas/ / zhes byung ste/ phyogs bcu dus gsum gyi sangs rgyas thams cad kyi yon tan bsam gyis mi khyab pa gcig byung ste/ de dag kyang sangs rgyas 'od dpag med chen po rtsal snang ngo// sangs rgyas 'od dpag med nyid 'gro ba yongs kyi snying por shar nas/ / 'gro ba sems can thams cad la// snying po rnam dag ye shes rdzogs// zhes gsungs/ sangs rgyas kun gyi gtsug phud lnga// rgyal mtshan rtse mo bzhin du gnas/ / sangs rgyas kun gyi che ba lnga// nam mkha' bzhin du khyab par gnas// rdo rje snying po bla na med// rin chen gtsug phud dri ma med// nges pa'i skyon rtog sel bar byed// pad+ma'i snying po 'od 'bar ba/ / mtha' la mi gnas phyag rgya che// mgon po dri ma med pa'i sku// yon tan kun gyi snying po shar// thabs mkhas thugs rje stobs kyi bdag/ bdud bzhi 'dul mdzad dpa' bo mchog/ dag pa'i zhing du yang dag sgrol/ / thugs rje'i chu bo rgyun mi 'chad// shes rab gru yis sgrol mdzad pa// sprin chen glog gi 'phreng ba can// rgyun gyi thugs rje'i rdo rje bdag/ snying po bdag med ya ma brla// snying po rjes 'brangs spyod pa'i mtshon/ / nam mkha'i nyi mi'i tshul bzhin du// rang byung spros med mkha' la gdengs// rgyud dag pa yi dbyings nyid nas// 'bras bu ye shes dkyil 'khor rang snang ba'i dus su/ snod bcud thams cad chos nyid du brdal ba/ / mi byed pa'i lta ba nam mkha' dang mnyam pas re dogs kyi 'phro gcad/ zag pa med pa'i ye shes rang snang bas/ bdag dang gzhan gyi don mthar phyin/ shes rab kyi stobs ma 'gags pas/ bdud dang srin po zil gyis mnan/ kye rdo rje 'dzin pa nyon cig thabs la mkhas pa'i byang chub sems dpa' ni/ sems can gyi pha ma yin gyis/ de yang dri ma med pa'i don gyis gnas par bya'o/ / rtogs pa'i don la rtse gcig tu ma yengs par gnas pas/ byang chub sems dpa'i bsam gtan zhes bya'o// 'jam dpal dri med snying po ngas/ sems can rnams kyi phyir/ gsang ba'i rgyud gsum yang gsang thugs kyi rgyud/ / thugs nas phyung nas gdams par bzhag/ sangs rgyas lag tu gtad pa'i phyir// sangs rgyas gtsug phud rnam par rgyal ba zhes bya ba/ thugs las nor bu dri ma med pa'i rgyud mdzad do/ / 'bras bu bla na yod pa dang/ bla na med pa'i theg pa shan dbye ba'i phyir/ ljags kyi pad+mo las/ sangs rgyas bye ba rnam par gzigs zhes bya ba byung nas/ byang chub kyi sems rma bya mjing bsnol mdzad do/ / sangs rgyas sprul pa'i sku ye shes kyi lus su gnas pa'i phyir/ mdzod spu'i bu ga nas 'od zer lnga 'phros nas sangs rgyas bde ldan mgon po spyan ras gzigs zhes bya ba byung nas/ lha mo 'od zer gyi rgyud mdzad do/ / las dge sdig la mtho dman med par la bzla ba'i phyir/ shangs kyi rlung sgrom nas mthu stobs kyi bdag po dpal phyag na rdo rje phyung ste/ bya btsal med par ye shes bla ma'i rgyud phyung ste/ chos las 'das pa'i sku yongs su rdzogs par bstan to/ / zhes byang chub sems rma bya mjing bsnol gyi rgyud/ rdzogs pa chen po 'bras bu bla na med pa'i theg pa las le'u lnga pa'o//// byang chub kyi sems rma bya mjing bsnol zhes bya ba'i rgyud/ 'jam dpal snying pos/ byang chub sems dpa' ro langs bde ba la gdams pa rdzogs so//// byang chub kyi sems rma bya mjing bsnol bsgom na/ ngan song gsum gyi gzhi gsog go/ byang chub kyi sems dkar dmar rnams gnyis rang rgyud du go na/ sems can gyi gzugs su smin no// rgyud kyi rgyal po ting nge 'dzin mchog gi rgyud las/ ta na dang ga na'i rtog pa bshad pa'i le'u ste bcu gcig pa'o/ /// de skad ces yid byed pa po kun tu bzang pos/ ci yang ma gsungs par bka' stsal pas/ rdo rje sems dpa' la sogs pa rigs lnga'i sangs rgyas yab yum dang/ zhi khro'i lha brgya rtsa brgyad kyi dkyil 'khor gyis/ rgyud kyi rgyal po ting nge 'dzin mchog gi rgyud kyi don rtogs so// rgyud kyi rgyal po ting nge 'dzin mchog gi rgyud las/ 'bras bu nges par bskor ba rdzogs so a+thi+-i//// / mtshan mo'i bag chags gos pa med// mtha' yi chos rnams rtsi gdab med// gang mthong yul la zhen mi 'byung// gang la nyam nga med pa'i don// 'dod zhen gza' gtad yul dang bral/ / 'khrul bas mi sgrib bde ba'i mchog/ 'dod pa'i yon tan 'byung ba'i gzhi// ma bcos 'bras bu lhun gyis grub// snang ba gsum gyi dkyil 'khor nas// sku gsum 'bras bu shugs kyis shar/ / gdul bya gsum la dgongs nas su// zhing khams ma lus bde bar spyod// don ldan 'bras bu bde bar 'char// zhes gsungs so// rin po che snang byed las/ spyod 'bras bstan pa'i le'u ste bcu drug pa'o/ /// sdud pa sems dpa' rdo rje des// ston pa gsang bdag chen po la// mtshan gyi rnam grangs gtad rgya ji lta bu// ston pa gsang bdag chen po des// sdud pa sems dpa' rdo rje la// dgos don ma lus kun 'byung ba'i/ / rin chen lta bu'i rgyud yin no// 'char sgo gnyis su snang ba'i phyir// snang byed chen po'i rgyud kyang yin// theg pa thams cad 'byung ba'i phyir// rin chen gter gyi mdzod chen yin// rang bzhin rgyun du gnas pa'i rgyud/ / rtsal gyi rang bzhin khyad par don// gdung 'tsho rgyud kyi don 'dzin gyis// ngang ring rgyud bzang dad pa che// dam tshig gzhung srung rnam smin mdzem// ser sna chung la gtong phod che// rin chen snod dang ldan dag la/ / rgyud kyi rgyal po gtad cing gdams// man ngag gsang tshig thub pa dang// 'khrul ba rtsad gcod skyes bu la// rgyud kyi rgyal po bshad cing gdams// rin chen la sogs 'dod pa'i yon/ / ma chags ser sna med la gdams// ces gsungs so// rin po che snang byed kyi rgyud las/ mtshan dang gtad rgya bstan pa'i le'u ste bcu bdun pa'o//// rin po che snang byed ces bya ba'i rgyud rdzogs so/ /// slob dpon bi ma la mi tra dang/ lo tsa ba gnyags dz+nyA na ku mA ras sgyur zhing gtan la phab pa'o// khri srong lde btsan byang chub sems dpa'i rigs// ting 'dzin bzang po snod dang skal bar ldan/ / 'khrul rtsad chod nas ldog pa'i thabs dang ldan// lta ba rtogs nas sgro 'dogs chod pa'i tshe// snyan brgyud gdams pa skal ldan dag la brgyud// rtsa rgyud bshad rgyud ma bu la sogs rnams// snang dang mi snang bdag med dbyings su sba/ / skal ldan las 'phro can gyis rnyed par smon lam gdab// ces gdams so// nam zhig skal ldan gang zag gis// snyan brgyud bshad rgyud 'dzom par shog/u0f35a+thi+-i/ dngos grub dam pa sems la chongs/ /// rgya gar skad du/ rat+na tri hri tan tra/ bod skad du/ rin po che snang byed kyi rgyud/ dpal rdo rje sems dpa' la phyag 'tshal lo// 'di skad bdag gis bshad pa'i dus nyid na// 'khor gyi ro langs skyes bu dang/ / yang dag nyid la dgongs pa'i dus// rang snang gsal ba'i pho brang du// theg pa dgu yi 'khrul pa shar// zhes gsungs so// rat+na tring hri tan+t+ra las/ gleng gzhi'i le'u ste dang po'o//// theg pa dgu yi 'khrul pa 'di/ / mgon po sems dpa'i bshad du gsol// mgon po sems dpas bka' stsal ba// gzhi yi 'dug tshugs pad+ma 'dra// dper na pad+ma'i me tog de// nyi ma'i zer de gar 'gro bar// pad+ma'i kha yang lta bar 'gyur/ / pad+ma nyid la lta phyogs med// de bzhin chos nyid rang snang de// rang gi snang ba 'khrul pa las// de bzhin nyid la 'khrul sa med// dper na lce spyang mig la mun snang med pa las// dur bya'i mig la nyin mo mun par snang/ / de bzhin thig le nyag gcig la// stong 'tsher bzhin ni lhun grub pa// rgyan dang rol pa phyogs med snang// de las 'khrul pa rim dgu dang// mu stegs rtag chad 'gro drug dang/ / sku gsum lta sgo 'bras bu dang// rang 'byung rnam mkhyen thig le dang// thams cad mkhyen pa'i ye shes so// zhes gsungs so// rat+na tring hri tan tra las/ byang chub sems dpa'i zhus lan gyi le'u ste gnyis pa'o/ /// de nas bo d+hi sa twa yis// rdo rje sems dpa' la/ nyan thos 'khrul pa bstan du gsol// ces zhus pas/ rdo rje sems dpas bka' stsal pa// nyan thos 'khrul pa'i gzhi ma ni// 'jug sgo 'khrul te bden gzhi'i sgo nas 'jug/ che ba'i ye shes ngo ma shes te 'khrul// thig le nyag gcig zang thal rang chas la// rtsal mi 'gags pa'i yon tan la// nyis brgya lnga bcu bsrungs pas 'khrul// thig le zang thal lta rgyu med pa la/ / gang zag bdag med 'dod pas 'khrul// ye shes zang thal gnyis snang med pa la// dge bcu'i sgo nas bdag don spyod pas 'khrul// thig le dgag sgrub med pa'i zang thal la// 'gog pa lam gyi sgo nas bsgrubs pas 'khrul/ / thig le phyi nang med pa yin pa la// skyes bu zung bzhi gang zag ya brgyad thob par 'dod pas 'khrul// ces gsungs so// rat+na tring hri tan tra las/ nyan thos 'khrul pa'i le'u ste gsum pa'o/ /// de nas bo d+hi sa twa la/ badzra sa twas bka' stsal pa// rang sangs rgyas kyi theg pa'i 'khrul ba ni// 'jug sgo 'khrul te rten 'brel sgo nas 'jug/ rtsal gyi yon tan ngo ma shes pas 'khrul// ye shes lus la dri ma med pa la/ / tshul khrims nyis brgya lnga bcu bsrungs pas 'khrul// ye shes dri med rtogs yul med pa la// gang zag bdag dang chos la phyogs gcig rtogs par 'dod pas 'khrul// ye shes yul dang yul can gnyis med la/ / rdzu 'phrul ya ma zung du 'gro don mdzad pas 'khrul// ye shes zang thal snga phyi med pa la// sngon nas goms pa'i spyod gzos byas pas 'khrul// lhun grub chen po'i snang ba la/ / bse ru lta bur 'dod pas 'khrul// ces gsungs so// rat+na tring hri tan tra las/ rang sangs rgyas kyi 'khrul pa'i le'u ste bzhi pa'o//// de nas bo d+hi sa twa la/ badzra sa twas bka' stsal pa/ / byang chub sems dpa'i theg pa'i 'khrul pa yang// thig le lhun grub phyogs med la// kun rdzob don dam sgo nas 'jug pas 'khrul/ thig le snangab phyogs med shar ba la// sdom pa nyi shu bsrungs pas 'khrul/ / thig le lhun grub gnyis su med pa la// chos dang gang zag gnyis la bdag med 'dod pas 'khrul// thig le nyag cig rnam dag lam med la// tshogs lam mthong lam 'dod pas 'khrul// thig le lhun grub gnyis su med pa la/ / tshad med bzhi dang bsdu ba'i dngos po bzhis 'gro don mdzad pas 'khrul// thig le lhun grub zam ma chad pa la// pha rol phyin bcu'i sgo nas sgrub pa 'khrul// thig le lhun grub ye nas yin pa la/ / sa bcu bgrod dang bcu gcig 'dod pas 'khrul// ces gsungs so// rat+na tring hri tan tra las/ byang chub sems dpa' 'khrul pa'i le'u ste lnga pa'o//// de nas bo d+hi sa twa la/ badzra sa twas bka' stsal pa/ kri ya'i theg pa 'khrul ba bstan pa ni// thig le ye dag nyag gcig la// dag pa rnam gsum sgo nas 'jug pa 'khrul// thig le bar mtshams med pa la// rtsa ba yan lag dam tshig bsrungs pa 'khrul/ / lhun grub skye 'gag med pa la// dam tshig sems dpa' ye shes sems dpa' rje dang khol du 'dzin pa 'khrul// thig le dri med chen po la// khrus dang gtsang sbra spyod pas 'khrul// thig le 'gyur med gsang ba la/ / bsgyur nas sgrub thabs byin rlabs re ba 'khrul// thig le sku gsum rang snang la// grub pa'i 'bras bu rigs gsum 'dod pas 'khrul// ces gsungs so// rat+na tring hri tan tra las/ kri ya 'khrul pa'i le'u ste drug pa'o/ /// de nas bo d+hi sa twa la/ badzra sa twas bka' stsal pa// yo ga'i 'khrul pa bstan pa ni// thig le zhen pa med pa la// dag pa gsum du 'jug pas 'khrul// thig le dri med zang thal la/ / rtsa ba yan lag dam tshig bsrungs pas 'khrul// thig le 'gyur med lhun grub la// bsgyur nas sgrub pa'i thabs la re bas 'khrul// thig le'i snang ba rang snang la// kun rdzob don dam gnyis su 'dod pas 'khrul/ / thig le rang snang ye grub chen po la// dpon dang g.yog tu 'dzin pas 'khrul// ces gsungs so// rat+na tring hri tan tra las/ yo ga'i 'khrul pa bstan pa'i le'u ste bdun pa'o//// de nas bo d+hi sa twa la/ / badzra sa twas bka' stsal pa// ma hA yo ga'i 'khrul so bstan pa ni// chos nyid rang grol chen po la// ting 'dzin rnam gsum sgo nas 'jug pas 'khrul// gnyis su med pa'i chos nyid la// rtsa ba yan lag sgo nas dam tshig bsrungs pas 'khrul/ / chos nyid skyel bsu med pa la// kun rdzob tsam lha dang lha mor blta bas 'khrul// chos nyid bar do med pa la// ta na ga na spyod pas 'khrul// chos nyid nyi ma zla bas ma bskyed pa/ / thabs dang shes rab sgo nas bsgrubs pas 'khrul// chos nyid dbyer med chen po la// sangs rgyas sa gsum thob par 'dod pa 'khrul// ces gsungs so// rat+na tring hri tan tra las// ma hA yo ga'i 'khrul so bstan pa'i le'u ste brgyad pa'o/ /// de nas yang bo d+hi sa twa la/ badzra sa twas bka' stsal ba/ a nu yo ga'i 'khrul so bstan pa ni// 'dug tshugs 'gyur ba med pa la// yongs su rdzogs par 'jug pas 'khrul/ / 'dug tshugs bsrung bya med pa la// mi 'da' bas dam tshig bsrungs pas 'khrul// 'dug tshugs dbye ba med pa la// dbyings dang ye shes gnyis su med par lta bas 'khrul// 'dug tshugs gnyis snang med pa la/ / ye shes dbyings la spyod pas 'khrul// 'dug tshugs bsgrub bya min pa la// phung po lha dang lha mo bsgrubs pas 'khrul// 'dug tshugs rang sa zin pa la// yi ge 'khor lor 'dod pa 'khrul/ / ces gsungs so// rat+na tring hri tan tra las/ a nu 'khrul pa'i le'u ste dgu pa'o//// de nas yang bo d+hi sa twa la// badzra sa twas bka' stsal pa// rdzogs pa chen po'i 'khrul so bstan pa ni// thig le nyag gcig ye grol la/ / bla med ting 'dzin sgo nas 'jug pas 'khrul// thig le rang snang lhun grub la// med dang phyal ba gcig tu lhun gyis grub pa bsrungs pas 'khrul// thig le gnyis 'dzin med pa la/ / snang srid chos skur lta bas 'khrul// thig le thogs med zang thal la// lta sgom spyod par tshol bas 'khrul// thig le'i snang ba ma 'gags pa// bya btsal bral bar 'dod pas 'khrul// thig le ye grub chen po la/ / chos sku 'bras bur 'dod pas 'khrul// ces gsungs so// rat+na tring hri tan tra las/ rdzogs chen 'khrul pa'i le'u ste bcu pa'o//// de nas yang bo d+hi sa twa la/ badzra sa twas bka' stsal pa// mu stegs rtag chad 'khrul pa bstan pa ni/ / chos nyid 'gyur ba med pa la// sngar shi phyis 'chi rtag par 'dod pas 'khrul// chos nyid rang bzhin zang thal la// sngar shi phyis 'chi stongs par 'dod pas 'khrul/ / ces gsungs so// rat+na tring hri tan tra las/ mu stegs rtag chad 'khrul so'i le'u ste bcu gcig pa'o//// de nas yang bo d+hi sa twa la// badzra sa twas bka' stsal pa// 'gro drug 'khrul so bstan pa ni/ / lhun grub phyogs med chen po de// che ba'i ye shes lnga yin te// bya ba nan tan 'khrul te phrag dogs rgyu// gzhi ni gnyis med snang bar gzung bas rkyen// chags pa'i las kyis lha ru 'khrul/ / 'bras bu khams gsum nyid du grub// che ba'i bya ba nan tan 'khrul te khong khro rgyu// gzhi ni snang ba'i rol pa 'thab ste rkyen// de la chags te lha min 'khrul// 'bras bu 'thab rtsod nyid du grub// mnyam nyid 'khrul te nga rgyal rgyu/ / gzhi ni gling gzhi rgyal po rkyen// chags pa'i las kyis mi ru 'khrul// 'bras bu gling bzhi'i mi ru grub// stong nyid 'khrul te gti mug rgyu// gzhi ni ma shes ngam grog rkyen// chags pa las kyis byol song 'khrul/ / 'bras bu rigs gzhi nyid du grub// kun rtog 'khrul te 'dod chags rgyu// gzhi ni 'khrul te rang snang rkyen// chags pa'i las kyis yid btags 'khrul// 'bras bu rigs gsum nyid du grub/ / me long ye shes 'khrul te zhe sdang rgyu// gzhi nyid 'khrul te rang snang rkyen// chags pa'i las kyis dmyal bar 'khrul// 'bras bu dmyal khams bcu dgu grub// ces gsungs so// rat+na tring hri tan tra las/ 'gro drug 'khrul pa'i le'u ste bcu gnyis pa'o// de nas yang bo d+hi sa twa la/ badzra sa twas bka' stsal pa// sku gsum sku lnga ye shes lnga// lta bsgom pa spyod pa 'bras bur 'dod pas 'khrul// thig le gdos pa'i chos min par/ / gong ma rnams ni gdos chos yin te 'khrul// thig le nyag gcig zang thal la// sku gsum sku lnga 'dod pas 'khrul// thig le sgom dang spyod pa dang// lta ba 'bras bu ma bskyed pa// de ltar 'dod pas 'khrul pa'i rgyu/ / sangs rgyas sems can gnyis med par// sangs rgyas 'dod pas 'khrul pa'i rgyu// zhes gsungs so// rat+na tring hri tan tra las/ snang ba rtsa dgu'i 'khrul so bstan pa'i le'u ste bcu gsum pa'o/ / de nas bo d+hi sa twa la/ badzra sa twas bka' stsal pa// 'khrul pa med pa 'di bstan no// thig le zang thal chen po dang// rang chas yin pas 'jug sgo min// thig le nyag gcig khyab gdal de/ / bsrung bar bya ba yul min no// thig le gnyis med rang 'bar la// rtogs par bya bar lta ba med// thig le nyag gcig rang gsal bas// bsgrub par bya ba'i chos min no// thig le 'du 'bral med pa'i don/ / grub par bya ba'i 'bras bu min// gnyis snang 'dug na nyag gcig min// gsum du 'dod pa 'khrul pa'i rgyu// zang thal chen po ye shes gsal// 'bar ba chen po'i thig le'o// zhes gsungs so// rat+na tring hre tan tra las/ 'khrul med nyag gcig bstan pa'i le'u ste bcu bzhi pa'o//// de nas bo d+hi sa twa yis/ rgyud 'di'i mtshan nyid bdag la gsungs// de nas badzra sa twa yis// bo d+hi sa twa la rgyud 'di ni rin po che snang byed ces bya bar zungs shig/ ces gsungs so// de nas b+ho d+hi sa twa rjes su yi rang ba'i le'u ste bco lnga pa'o//// rdzogs so//// rgya gar skad du// bo d+hi sa twa u ba de sha rad dI bi dz+wa la tan tra/ bod skad du/ byang chub sems kyi man ngag/ rin po che sgron ma 'bar ba'i rgyud// bcom ldan 'das dpal kun tu bzang po la phyag 'tshal lo// 'og min gyi gnas chos nyid pho brang yangs pa'i klong chen gdal ba'i gnas na/ gsang bdag chen po dam pa dang po'i sangs rgyas de dus gsum ji bzhin gdal khyab chen po'i ngo bor bzhugs so// de'i 'khor nam mkha' gang ba'i bder gshegs dang/ bar snang gang ba'i mkha' 'gro dang/ sa gzhi gang ba'i skye 'gro la sogs pa til gyi gang bu ltar khengs/ nang nas rigs kyi gtso bo rdo rje sems dpa' 'khor gyi nang nas bzhengs nas/ bcom ldan 'das kyi spyan sngar cang mi smra bar 'khod do// dam pa dang po'i sangs rgyas par mkhyen nas/ rigs kyi gtso bo sems dpa' chen po khyed la sogs pa'i 'khor rnams dga' ba'i sems kyi mdangs phyung/ dang po'i sems kyis lus btud nas cang mi smra bar mnyam gzhag gi tshul gyis 'khod de/ 'dod pa ci dgos gsol cig ces gsungs so// de nas rigs kyi gtso bo sems dpa' chen pos zhus pa/ kye/ dam pa dang sangs rgyas lags/ / 'das dang ma byon da lta yi// bstan pa ston pa 'khor gnas dus// bdag cag rnams la bstan du gsol// dam pa dang po'i sangs rgyas kyis gsungs pa/ sngon byung thog ma'i bstan pa ni/ / snang srid kun tu 'gag med yin// de yi rjes 'jug bstan pa ni// rgyud dang lung dang man ngag yin// de yi gdung 'tsho bstan pa ni// rin chen sgron ma 'di nyid yin// sngon byung thog ma'i ston pa ni/ / rang byung sgrib pa med pa yin// de yi rjes 'jug bstan pa ni// ston pa kun tu bzang po yin// de yi gdung 'tsho bstan pa ni// las can sprul skur byung ba ni// sngon byung thog ma'i 'khor bstan pa// mi 'gag mi sgrib gnyis med yin/ / de yi rjes 'jug 'khor bstan pa// sems dpa' rdo rje khyod nyid yin// de yi rjes 'jug de yi gdung 'tsho 'khor// las can skal bar ldan pa yin// sngon byung thog ma'i gnas bstan pa/ / ye shes sgrib med gzhal yas yin// de yi rjes 'jug gnas bstan pa// kun bzang lha yi pho brang yin// de yi gdung 'tsho gnas bstan pa// dar mo dar ya'i chos 'byung nas// gru gsum e las thams cad 'byung/ / b+ha ga gzhal yas khang du gsungs// sngon byung thog ma'i dus bstan pa// dus gsum dbye ba med pa yin// thams cad dus chen gcig tu bstan// de yi rjes 'jug dus bstan pa/ / sangs rgyas sems can thams cad dang// 'khrul pa bzang ngan 'byung dus yin// de tshe gdung 'tsho dus bstan pa// shas rgyud gcig gi ngo bo la// rnam grol ye shes shar ba yin// sngon byung med na thog ma med/ / rjes 'jug med na tha ma med// gdung 'tsho med na dar yang 'chad// gsungs so// rin po che sgron ma 'bar ba'i rgyud las/ gleng gzhi dang gleng slang ba'i le'u ste dang po'o//// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// ma byung ma skyes sngon rol gyi// chos nyid spyi yi gnas tshul de// bdag cag rnams la bstan du gsol// dam pa dang po'i sangs rgyas kyis gsungs pa/ rigs kyi gtso bo khyod nyon cig/ chos nyid spyi yi gnas tshul de// yin lugs ci yang ma yin te// kha dog dbyibs dang grangs ma yin// pho mo ma ning gzugs ma yin// ji ltar nam mkha'i dkyil dang 'dra/ / gnas lugs spyi khyab gnas pa de// ya mtha' rgyal ba'i dkyil 'khor nas// ma mtha' lcags chen rab tu 'bar ba yis// dbye zhing bskol ba ma yin te// ji ltar til dang mar bzhin no/ / de yi rtogs pa'i rtogs lugs ni// yon tan phyogs re so sor rtogs// bsam brjod bral bas stong par rtogs// ma rtogs log rtogs phyogs rtogs dpe// ji ltar long ba du ma yis// glang chen gtan la 'bebs pa bzhin/ / de nyid gtan la 'bebs tshul ni// snang srid 'khor 'das thams cad du// khyab gdal chen po'i ngo bo ste// ji ltar mkha' la nyi shar 'dra// zhes gsungs so// rin po che sgron ma 'bar ba'i rgyud las/ chos nyid spyi'i gnas tshul dang gnas lugs/ de nyid gtan la 'bebs tshul bstan pa'i le'u ste gnyis pa'o//// de nas rigs kyi gtso bo sems dpa' chen po des 'khor gyi nang nas bzhengs nas zhus pa/ kye/ dam pa dang po'i sangs rgyas lags// chos nyid rang gi ngo bo yi// de yi yon tan ji ltar lags// bdag cag rnams la bstan du gsol// dam pa dang po'i sangs rgyas kyis gsungs pa/ / rigs kyi gtso bo sems dpa' chen po nyon cig/ chos nyid rang gi ngo bo de// kun bral nyag gcig ci ma spangs pa yin// mtha' ma spangs par grol ba yin// snang ba ma 'gags rang bzhin gnyis su med pa yin/ / snang la ma 'dres yongs su rdzogs pa yin/ nyam nga med pa lta ba'i gdeng yin/ dmigs 'dzin med pa ting nge 'dzin gyi gdeng yin/ blang dor med pa spyod pa'i gdeng yin// spangs thob med pa 'bras bu'i gdeng yin/ / rgyud thams cad kyi rgyal po yin// lung thams cad kyi spyi 'grel yin/ man ngag thams cad kyi nges don yin/ dgongs pa thams cad kyi zhe phug yin/ theg pa kun gyi yang rtse yin/ bstan pa thams cad kyi snying po yin/ theg pa thams cad kyi 'byung gnas yin/ 'bras bu thams cad kyi mthar thug yin/ dus gsum sangs rgyas kyi yab/ byang chub sems dpa' skyed pa'i yum/ rigs pa 'dzin pa'i nyi ma/ chos thams cad kyi mes po yin/ bka'i yang snying yin/ don thams cad kyi 'jug sdud yin/ ma rig pa thams cad kyi mun sel yin/ log par lta ba kun gyi gnyen po yin/ / gsang sngags ma lus pa kun gyi bka' sgo yin/ che ba bas kyang shin tu che ba yin/ gsang ba bas kyang shin tu gsang ba'o// rin po che sgron ma 'bar ba'i rgyud las/ chos nyid rang gi ngo bos rang gi yon tan bstan pa'i le'u ste gsum pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// chos nyid rang gi ngo bo la// log rtog mtshan ma mnga' mi mnga'/ / rgyun dang dum bur gnas mi gnas// rnam pa'i grangs su bgrang mi bgrang// gnyis snang shes pa 'jug mi 'jug/ spros pa'i mtha' ru song ma song// dbye zhing bskol bar yod dam med// bdag cag 'khor tshogs thams cad la/ / tshangs pa'i gsung ltar bsgrags su gsol// dam pa dang pos gsungs pa/ rigs kyi gtso bo sems dpa' chen po nyon cig/ chos nyid rang gi ngo bo la/ log rtog mtshan ma mi mnga' ste/ / ji ltar nam mkha'i mtshan nyid la// lho sprin rlung gis gtor ba la// nyi ma'i snying po shar ba bzhin// gsal zhing dag pa'i ngo bor bzhugs// chos nyid rang gi ngo bo de// rgyun dang dum bur mi gnas te/ / ji ltar chu bo chen po bzhin// dus gsum rgyun chad med par gnas// chos nyid rang gi ngo bo de// rnam pa'i grangs las 'das pa ste// rnam dag nam mkha'i dkyil bzhin gnas// chos nyid rang gi ngo bo la/ / gnyis snang shes pa ma zhugs te// gnyis med rgya mtsho'i rdzing dang 'dra// chos nyid rang gi ngo bo la// spros pa'i mtha' dang ye bral te// spros bral chen po'i ngo bor bzhugs// chos nyid rang gi ngo bo la// dbye zhing bkol ba ma mchis te/ / ji ltar rin chen gser gling bzhin// zhes gsungs so// rin po che sgron ma 'bar ba'i rgyud las// 'khor 'das gnyis kyis so mtshams su gdeng chen tho btsugs pa'i le'u ste bzhi pa'o/ /// de nas rigs kyi gtso bo sems dpa' chen pos zhus pa/ chos nyid rang gi ngo bo la/ nyi ma'i 'od zer bdal ba bzhin// rig pa phyi nang med par phebs// nang du bdag rig dngos med shes// phyi ru gzhan rig dngos med shes/ / yul sems rigs su mi 'dzin pas// yul snang rnam pa gang yang med// shes pa tshur 'jug rnam pa med// de la rtogs tshad bzhi yod de// blo phyogs med du shar bas spang ba med cing sgrub pa med/ / blang ba med cing dor ba med// btang ba med cing bzhag pa med// shes rgyud gcig gi ngo bo la// de rtogs tshad ni ci lags zhus pas/ dam pa dang po'i sangs rgyas kyis gsungs pa/ rigs kyi khro bo sems dpa' chen po nyon cig/ chos nyid rang gi ngo bo la/ rig pa spyi blugs sbyi na mar chu blugs pa bzhin// nyams kyi rten mi 'tshol te tshul khrims sdom pa lha mi sgom/ ngo bo ye bral chen po las/ myong bya myong byed gnyis med pas// mtshan ma'i rtog 'dzin ma grub pas// dper na lce'i ro mchog myong ba med pa bzhin no// zhes gsungs so// rin po che sgron ma 'bar ba'i rgyud las/ chos nyid rang gi ngo bo de shes rgyud gcig gi ngo bo la rtogs pa'i tshad bstan pa'i le'u ste lnga pa'o/

CLOSE WINDOW