rgya gar skad du/ sarba d+harma ma hA san d+hi b+ho d+hi tsat+ti saM sA ra mU la tshe da ma hA A kA sha sa man ta dz+nyA na pra b+ha tan tra/ bod skad du/ chos thams cad byang chub kyi sems rdzogs pa chen po 'khor ba rtsad nas gcod pa nam mkha' dang mnyam pa ye shes 'od kyi rgyud/ ye shes 'od kyi dam pa de la phyag 'tshal lo// 'di skad bshad pa'i dus na/ chos nyid kyi mkha'/ ye shes kyi klong/ 'og min rig pa'i gzhal yas na/ bcom ldan 'das mngon rdzogs rgyal po bzhugs so// rang bzhin gyi 'khor dang// rang bzhin lta ba'i 'khor dang/ rang bzhin gyis rtogs pa'i 'khor dang/ byang chub sems dpa'i 'khor rnams dang thabs cig go/ de'i tshe lha'i dbang po brgya byin gyi phyogs bcu'i sangs rgyas thams cad la/ lha de ba bzang skyong gi bu sems lhag can des 'di skad du bskul te// dus gsum sangs rgyas thams cad kyis// rgyu yi chos rnams mthar phyung nas/ / 'bras bu'i chos ni mi gsung ba// thugs rje chen pos yal lam ci// gdul bya skal ldan yod pa na// lhun grub zab mo gsung du gsol// zhes bskul ba dang/ lha'i bu des phyogs bcu'i sangs rgyas thams cad la zhus pa ni 'di ltar ro/ / shar phyogs mngon dga'i zhing khams su// sangs rgyas mi bskyod pa la zhus// skye ba med pa'i sems nyid la// skye ba 'ong ba ji ltar lags// bcom ldan 'das kyis bka' stsal pa/ / rang bzhin 'od gsal skye med la// 'khrul rtog blo yis kun klong skye// skyes tsam nyid ma ngo bos stong// de nyid skye med ye shes 'od// lho phyogs dpal ldan zhing khams der/ / sangs rgyas rin chen 'od la zhus// gzung 'dzin blo yi dra ba 'di// rtsa nas bcad na ji ltar bcad// bcom ldan 'das kyis bka' stsal pa// nam mkha' mtha' dang mnyam pa yis// gsang rdzogs 'od kyi rgyud rnams kyis/ khams gsum 'khor bar 'khrul pa yi// ma rig pa de rtsa nas bcad// nub phyogs bde ba'i zhing khams der// sangs rgyas 'od dpag med la zhus// rang bzhin bde ba chen po la// sdug bsngal 'ong ba ji ltar lags/ / bcom ldan 'das kyis bka' stsal pa// 'gro drug 'khor ba'i sdug bsngal 'di// phan pa'i dbang bcu nus pa'i lnga// zab mo'i dbang gsum rdzogs pa yis// sdug bsngal chos nyid dbyings su zhi/ / byang phyogs rnam dag zhing khams der// sangs rgyas don rnams grub la zhus// chos nyid 'gyur ba med pa la// rnam rtog rlung gi rlabs pa ci// bcom ldan 'das kyis bka' stsal pa/ / bems po'i rlung dang rig pa'i rlung// rlung gi gnad gsum shes pa yis// dbu mar rlung ni tshud pa dang// las rlung ye shes rlung du grol// byang shar bsam gtan brgyan pa der// sangs rgyas ting 'dzin rgyal la zhus/ / rtog med don gyi ye shes la// rnam rtog 'ong ba ji ltar lags// bcom ldan 'das kyis bka' stsal pa// seng ge glang chen 'thab pa de// wa sbe dag gi phra ma bcug/ sgam gnyis e la 'dus tsam na/ / phra ma mkhan de skyar la 'byin// shar phyogs byang chub yid 'ong der// sangs rgyas sgron ma 'byung la zhus// sems nyid rang bzhin 'od gsal la// ma rig mun pa ji ltar lags// bcom ldan 'das kyis bka' stsal pa/ / rang bzhin 'od gsal chen po la// log rtog mun pa bsgribs med kyang// sprad pa gsum gyi gdam ngag gis// sku gsum thig le gcig tu rdzogs// lho nub rdul dang bral ba der// sangs rgyas snang ba bkod la zhus/ / smra bsam brjod du med pa la// sna tshogs 'ong ba ji ltar lags// bcom ldan 'das kyis bka' stsal pa// sna tshogs snang ba'i chos rnams kun// dper na rmi lam lta bu ste// rmi lam bde sdug sna tshogs kyang/ / rmi lam sad dus rang bzhin med// nub byang dbang bsgyur zhing khams der// sangs rgyas gdugs mdzes dag la zhus// a ti tha snyad bral ba la// rtog ge smra ba ji ltar lags/ / bcom ldan 'das kyis bka' stsal pa// rdzings las spul gyi bya bzhin du// ji ltar bskor yang de ru 'bab// ji tsam pa yi tshig brjod kyang// a ti'i ngang du thams cad 'bab// 'og phyogs pad+ma brdal ba ru/ / sangs rgyas rgyal ba'i dbang por zhus// snying po blo las grol pa la// blo btags 'ong ba ji ltar lags// rnam rtog blo las 'khrul ba 'byung// byung tsam nyid na 'gro 'ong med// de don rtogs pa'i rnal 'byor ba/ / blo nyid chos nyid grol ba'o// steng phyogs mdangs dga'i zhing khams der// sangs rgyas dga' ba'i dpal la zhus// gnyis med gnyis su med pa la// gnyis 'dzin 'ong ba ji ltar lags/ / bcom ldan 'das kyis bka' rtsal pa// rgyu rkyen rkyen bzhis 'khrul ba yi// 'khor 'das sna tshogs snang ba 'di// gang shar de bzhin nyid shes na// bden pa dbyer med blo las 'das// dbus phyogs mtha' dbus med pa ru/ / sangs rgyas mngon rdzogs rgyal po la// sems lhag can gyis 'di ltar zhus// ngo bo rang bzhin thugs rje las// rtsa ba'i rgyud du gsang ba dang// la zlo'i rgyud du rdzogs pa la/ / man ngag rgyud du 'od 'di byung// 'di la zab mo'i chos su mchi// ston pas bdag la bshad du gsol// zhes zhus pa dang/ bcom ldan 'das kyis bka' stsal pa// zab mo 'od kyi rgyud 'di la// zab mo don gyi chos drug ste/ / gnas lugs dang ni mtshon pa'i dbang// lta sgom spyod 'bras zab mo drug/ ces gsungs pa dang// kye kye mngon rdzogs rgyal po lags// thugs rje thabs kyi rol ba las// ston pas rgyas par bshad du gsol/ / zhes yang zhus pa dang/ mngon rdzogs rgyal pos lan btab pa// ye shes gar yang rgya ma chad// phyogs su ma lhung ris med de// thams cad 'byung ba'i gzhir 'gyur ro// gdod nas ma skyes sems kyi dbang/ / srid pa gsum nas ye dbang bskur// gang gis de rtogs sems kyi dbang// gzhi nas dbang thob bskur mi dgos// cir yang ma yin byang chub sems// rtogs pas gzhan gyis bcos su med/ / rtsis gdab blo dang bral bas na// phyogs su ma ltung lta ba'i gdeng// ye shes rgyun la bar ma chad// 'di las gzhan du ma bkol bar// rig pa'i rgyal po kun gsal pas// dran pa thams cad ting 'dzin mchog/ bya btsal bral ba'i chos nyid du// blang dor med pa'i rig pa shar// thams cad skye med ye shes klong// 'di la spyad bya spyod byed bral// ye shes dri ma med pa la// re dogs blo las 'das pas na/ / 'khor ba'i gdar sha chod pa de// sangs rgyas lag tu gtod pa yin// zhes gsungs so// ye shes 'od kyi rgyud las/ gleng gzhi'i le'u ste dang po'o//// de nas sems lhag lha yi bus// gnas lugs ma bcos ris med zhus/ / mngon rdzogs rgyal pos bka' stsal pa// thams cad nga yis byas pa yin// nga las byung zhing nga ru thim// nga yi rang bzhin 'od gsal lo// 'chad pa po nga nyan pa nga// lta ba po nga sgom pa nga/ / spyod pa po nga grub pa nga// de bzhin dbang gi rang bzhin nga// rgyal ba kun gyi ngo bo la// sems can kun gyi rang gzhin te// 'dir bsam 'dir 'byung thams cad ngang// kun gsal sgrib pa med pa ste/ / ye shes dr-i med 'od du bshad// stong pa kun 'byung nam mkha'i bzhin// sems nyid yid bzhin rin po che// 'phel 'grib med pa'i gnas lugs ni// 'byung gnas rgya mtsho'i dbyings dang mnyam/ / stong zhing gar yang rgya ma chad// ye shes nam mkha'i mtha' dang mnyam// gsal la 'gag pa med pa yis// rig pa rang gsal sgron ma'i 'od// gzhan skyon sel ma zhugs pa ni// rin chen sa le gser gling phyin/ / ma nor ma bcos ji bzhin nyid// kun gzhi rang byung chen po la// ma rig ye shes tha dad med// 'khrul dang ma 'khrul sems su gcig/ byang chub sems kyi mtshan nyid ni// thog ma dang bral tha ma med/ / thogs med 'khor pa'i rang bzhin 'di// byang chub sems su ye nas dag/ sems nyid 'od gsal dri med la// blo bur gzugs brnyan sprin gyis bsgribs// ngo bo ma yin rkyen gyis snang// bsam pas btags pa sna tshogs pa/ / bag chags log pa'i rkyen gyis mthong rtog pa gzhi nas ma 'ong ste// rang byung mthong bas rtog pa zad// dper na snang bas mun sel bzhin// ris med nam mkha' lta bur gnas/ / rgyal ba'i thugs dang rang bzhin ldan// bsam gyis mi khyab dgongs pa'i don// phyogs ris mi mnga' kun la khyab// rang byung gnyug ma kun gyi gzhi// bzod nas rang byung 'gyur ba med// ma bcos kun khyab rig pa'i thugs/ khyab brdal 'ub chub kun la gnas// rang gnas ye shes gdod nas grub// dngos por mi mnga' rang byung sems// ye shes nam mkha'i 'od bzhin khyab// 'gro drug sems can thams cad la/ / rang gnas ye shes 'dod nas ldan// 'od gsal snying po ye shes 'di// rin chen gsung gi rtags la shes// sems nyid rnam dag lhun gyis grub// kun bzang rgyal ba'i rig pa bde/ / mtha' yas sems can thams cad la// rgyal ba'i ye shes rang chas ldan// bsam bral rang lugs cir mi dgongs// gdod nas nam mkha'i mtha' dang mnyam// yid la mi byed gza' gtad bral/ / 'khor ba mya ngan 'das pa yis// rnam rtog phra rags cir snang yang// rang bzhin ma bcos nyid du bde// ji ltar chu yis snang ba bzhin// rnam rtog phra rags ye shes nyid// rang bzhin gnyug ma dwangs pa ltar/ / 'khor ba nyid na gdod nas dag/ mtshan ma'i rnam pa ci byung yang// chu shing lta bur snying po med// ma rig 'thibs mun 'khor ba na// ye shes sgron ma'i 'od ltar gsal// rnam rtog mtshan ma ci byung yang/ / gnas lugs nyid las g.yos pa med// ces bka' stsal to// ye shes 'od kyi rgyud las/ gzhi gnas lugs kyi le'u ste gnyis pa'o//// de nas sems lhag lha yi bus// rdo rje zab par dbang bskur zhus/ / sngon rdzogs rgyal pos bka' stsal ba// gnas dang dkyil 'khor dpon dang 'theb// 'jug tshul dus dang yon bdun bshad// man ngag sdom du shes bar gyis// gzhi ye gnas dang rten pa'i gnas/ / thams cad rang rig sems nyid de// rgyu rkyen bral ba'i dngos gzhi ni// sangs rgyas sems can thams cad kyi// bzhugs gnas rang byung khyad par can// rte gnas ri bo de shan nam// rgya phug rdo rje gdan stengs sam/ / wA rA nA se'i gsil khang ngam// za ma tog gi rgyal mtshan nam// ma la ya yi rtse mo'am// gru 'dzin ka sha li phug go/ dkyil ni rang byung ye shes de// ma bcos dngos gzhi'i dkyil 'khor nyid/ / mkha' ltar rang rig ye shes gsal// sems kyi dkyil 'khor 'od gsal lo// tsit+ta rin chen dkyil 'khor ni// 'og min rig pa'i gzhal yas khang// zag pa med pa'i mtshan nyid de// dngas ma gsum gyi rtse mor sgom/ / ma nor don gyi slob dpon ni// rang sems bla ma kun gyi bdag/ brda don sprod pa'i slob dpon ni// shes rab mchog ldan ting 'dzin thob// dman pa blo spangs thams cad mkhyen/ / bstan pa'i bcud bsdus bde gshegs sras// slob ma rin chen sems la slob// rtog ldan blo yi khyad par gyis// ting 'dzin shes rab rtsal du rdzogs// snod ldan slob bu dad pa bstan// rigs rgyud dag pa bla ma khur/ / man ngag gter 'chang thugs kyi sras// dang po dngos gzhi dkyil 'khor bstan// kun rdzogs dkyil 'khor lus la dgod// 'phrul tshig gdams ngag rna bar gzhug/ sems lung 'bog pa'i gdams ngag sbyin/ / rgya brtags gdab pa'i cho ga bya// lus la bde mchog bde ba'i dbang// yon tan ldan pa'i bu mo de// thabs kyi bsnyen pa gsum rdzogs nas// bde chen phyag rgya mtshon pa'i rgyu// rin chen gter gyi gdam ngag sbyin/ / bde ba lag gi 'du byed kyis// dga' bde rigs kyi bde ba dbab// rgod ma kha dang rin chen rtsi// sbyar zhing rtsa gsum gyen du brlab// 'bar ba nyu gu dring zhing bzhib// zag med bde ba pad+mar rgyas/ / tsit+ta rgyas shing 'khor lor gang// thung gi a la cung zad phog/ lus 'dar mig mi 'dzams shing 'bar// 'khyil ba'i rtsibs brgyad bde chen po// rol bar bcos ma la rten nas/ / rnal ba'i don ni rtogs pa'o// ngag la rang grol rlung gi dbang// bems po'i rlung dang rig pa'i rlung// dang po gyen rgyu thur rgyu dang// srog 'dzin khyab byed me dang mnyam// rlung lnga d+hu tir rim gy-is gzung/ / rig pa'i rlung ni gnyis yin te// las kyi rlung gis thur du ltung// ye shes rlung gis gyen du 'dren// rlung gi 'them pas thams cad byed// bems po'i rlung la rten nas su// rig pa'i rlung ni zin gyur na/ / rtogs pa'i rlung chen don rtogs so// sems la rig pa dang grol dbang// rtogs med mthong ba'i lam dang phrad// sgom med don gyi gzer chen 'thebs// bgrod med go ba'i rdzings las bsgral/ / rna brgyud lung gi gter chen grol// re dogs med pa'i btsan sa thob// 'di de rdo rje lam mchog ste// skal ldan 'bad par med par grol// rgyal thabs sems kyi rin chen dbang// spyi lugs tshangs pa'i dbang zhes bya/ / dang po bcu bzhi zhag gi dus// nus pa'i tshogs bsag bar chad bsrung// mthar phyin thun mtshams bcu phrag bdun// bar do 'byongs shing mthar phyin 'gyur// de nas srog 'dzin bla ma la/ / lus dang bcas pa'i longs spyod 'bul// brda tsam dbang gis mtshon nas su// gnas lugs rtogs par the tsom med// ces gsungs so// ye shes 'od kyi rgyud las/ dbang gi le'u ste gsum pa'o/ /// de nas sems lhag lha yis ni// phyogs ris med pa'i lta ba zhus// mngon rdzogs rgyal pos bka' stsal pa// skye med nam mkha' rdo rje'i don// lta med rig pa gdod nas A// rang byung ye shes 'od gsal shar/ / ye shes rang gnas bde chen po// nyan thos gang zag bdag med mthong// rang rgyal chos kyis phyogs gcig rtogs// theg chen bdag med gnyis su 'dod// kri ya dag pa chos nyid lta// u pa gong 'og rjes su 'jug/ yo ga phung po byin gyis rlob// rtsal dang cho 'phrul rang snang gsum// bskyed rdzogs gsum gyi lta bar 'dod// lta ba'i rgyal po nam mkha' che// phyogs su ma ltung mthas ma reg/ rnam spyod dgag bya med pa la// yongs spyod bsgrub bya med par shar// gnyis snang dgag sgrub med pa la// mthong byed rtogs pa'i ye shes nyid// dngos po med pa'i rig pa'i gter// blang dor mi 'da' lta ru med/ / rang bzhin lta ba'i rgyal po yin// snying po blo 'das ye shes 'od// 'od gsal rig pa'i gdeng dang ldan// thams cad rtogs pa'i ngo bo nyid// ye shes snying po nyid du shar// rang byung rig pa 'od gsal la/ / snang ba rgya mtsho chen po bzhin// sgro skur spros pa ngang gis med// gsang sngags gter gyi mdzod 'dzin 'di// dngos po ji ltar snang ba kun// rtsi gdab med pa nyid du shar// thams cad ye shes chen po las/ / ye shes ma yin gang yang med// bde ba rang rig rnam rtog bral// rang gnas ye shes 'od gsal klong// rtogs pas the tshom rgyu ba bral// rang shar ye shes sgrib pa med/ theg brgyad gsal ba'i me long 'di/ / snying po don la gol sa med// mthar thug rtogs pa'i dus na mthong// mi rtog don 'jal goms shing rtogs// grub mtha' ngan pa gnas dus su// 'di yis don kun rig par gyis/ / 'di yis rang sems ma rig na// sgra dang tshad ma gang gis kyang// rig pa'i ye shes rnyed mi 'gyur// snying po ye shes rang bzhin 'od// skyon dang yon tan gnyis su med// rdzogs chen lta la dpang stod med/ / mtho dman med pa'i ye shes de// 'gro drug ji ltar snang ba yang// mya ngan 'das pa'i rang bzhin nyid// nam mkha' lta bur bdag med pa// stong pa ye shes snying po can// yod med thams cad byang chub sems/ / snang ba rang rig tha dad pa// don dang rtags la sogs pa rnams// rnam pa sna tshogs bag chags snang// yang dag ma yin 'khrul pa'i sems// ma bcos brda ba'i lta bar go/ rtogs pa'i gdeng gis chod par bya/ / dbang po'i ngo la shar bar bya// chos nyid byang chub sems su mthong// nyon mongs lnga yang ye shes lam// thams cad byang chub sems kyi zhing// sangs rgyas nyid las gzhan mi mnga'// rtogs ldan mchog gi ye shes so/ / e ma ma rtogs sems can kun// sna tshogs 'khrul ba snying re rje// shes pa skye lugs gsum yin te// so sor rtogs pa'i shes pa dang// tha snyad btags pa de bzhin te// zhen pa'i shes pa gsum yin no/ / rtog pa dang po chod pa yis// gnyis po dbyings su thim par 'gyur// kun gzhi'i rnam shes spyi khyab de// tshogs brgyad yul du smras pa yin// mthong ba sna tshogs rig pa'i nyams// snang srid brda ru shar ba gces/ / zhes gsungs so// ye shes 'od kyi rgyud las/ lta ba'i le'u ste bzhi ba'o//// de nas sems lhag lha yi bus// ting 'dzin sgom pa'i bsam gtan zhus// mngon rdzogs rgyal pos bka' stsal pa/ / 'gyur med sems dpa'i ting 'dzin ni// rig pa mtha' bral dkyil 'khor 'dir// zhen med tshul gyis 'jug na bde// dang po rang sems rgyun la brtag/ gnyis pa bla ma'i gdam ngag sbyin/ / gsum pa brda don ngo bo sprad// dkyil 'khor drug gi ye shes la// sgra yi mtha' la bzhag par bya// myong ba med pa'i rnam pa yin// tshor ba med pa'i reg bya'o// phyi rol tshul bzhin nges par 'gyur// tha ma dran bsam 'gyu pa bral/ / btsal med ye shes rig pa'i ngang// des na rang rig cog ge zhog/ bsam med rang dngas rig pa'i ngar// bde chen mi rtog 'gyu ba bral// yid la mi byed snang bdag/ rig pa ma 'gags ye shes gsal/ / ye shes rang snang rgyal pa'i thugs// 'khor ba'i rnam pa med sems de// btang bzhag rang bzhin bya ba bral// mi rtsol sgom med drang po'i lam// spro bsdu med pa'i dgongs par gnas/ / snang ba rgya mtsho chen po bzhin// bying rgod spros pa ngang gis dag/ ye gsal nam mkha'i rang bzhin las// rang gsal rig pa dri ma med// rang rig cir yang mi rtog pas// cir yang ma yin dmigs su med/ / sems las rnam rtog 'gyu ba bral// rig pa ye shes 'dzin pa zad// nyi ma'i dkyil ltar gsal 'grib med// rang shar dngos por grub pa med// shes pa rang lugs so ma nyid// kun bzangs rgyal ba'i dgongs pa'o/ / rang byung rdzogs sangs rgyas su gnas// rang gsal ye shes ngang la bzhugs// bcos med 'dzin bral spros pa med// sgom med rig pa rgyun mi 'chad// dmigs med ye shes 'od gsal ngang/ / skye med rin chen ting 'dzin gter// re zhi mtshon pa'i brda tsam du// gzhu ltar dgug cing mda' ltar sring// snyugs zhug pa yi brda yis su// 'byung 'jug mi mnga' rang bzhin dag/ mi bsam rang bzhin lhug par bzhag/ mi gnas tshul la 'dug pa dang// bzhag med mnyam par bzhag pa dang// sgaum med don la gyi na ba// chos nyid byang chub sems bzhag na// dngos 'dzin med pa'i rang shar ngang/ / rig pa dbyings la yan bzhag na// ci yang ma yin rang dang bzhag/ rtsol ba'i nad bral sgom pa yin// des na snying po dri ma med// rig pa rjen pa nyid du sgom// 'od gsal sems la gnas gyur na/ / rnam rtog mtshan ma rang bzhin zhi// bya ba thogs pa'i ye shes ni// bsam gtan nyal ba'i 'khor lo bde// ma lus byang chub chen po'i ngang// dgongs pa'i klong chen rdol ba 'di// sgom med don gyi ngo bo yin/ / sgom med don gyi snying po ni// rang bzhag so ma'i rig pas shes// chos nyid rig pa'i rang byung la// 'gyur med rig pa'i mtha' sangs pas// yid la mi byed snying po'i snang// sgom du med par snyoms zhugs la/ / bde ba chen po'i bsam gtan yin// spros med ye shes rang gsal 'di// gang yang bsam du med pa'i ngang// dran rig gsal ba'i ting 'dzin nyid// bsam gtan nyid na bsam du med/ / 'du shes mi 'jug lhug par bzhag/ sgom med bzhag pas lhag mthong bral// mi rtog gsal ba don gyis go/ mnyam bzhag rjes thob zung 'jug la// zhi gnas lhag mthong dbyer med do// 'od gsal sgom pa'i rnal 'byor pas/ / rtsa bdud tsit+ta dwangs ma'i dbus// dkar dmar kha sbyor 'od kyi sbubs// gzhi yi rlung la kun gzhi gnas// srog pa rtsa nas gzhungs pa'i bar// gser gyi ba thag brgyud pa la// lte ba rlung dbang 'khyil ba ru/ / dwangs ma gsum dang snyigs ma gsum// drug 'dus rtsa yi pho brang du// ye shes rlung la 'od gsal 'char// de la phyogs kyi 'od 'dus pas// phyogs bzhi mtshams dang bla 'og 'grub/ / ma nges gzha' tshon kha dog las// rigs kyi khyad par mngon par snang// nang gi breng thag chod tsam na// phyi yis stobs rnams 'chor ba yin// gsang ba'i khams lnga zhig pa dang// dbang po'i sgo lnga 'gag pa'o/ / rtsa yi dwangs ma zhig pa yis// lus zungs stan dang 'byar nas 'gro/ khrag gi dwangs ma yal ba ru// dbang po ldog bzhin nyams pa'o// drod kyi dwangs ma yal ba dang// lus kyi drod kun med nas 'gro/ / lus sems bral bas rig pa brgyal// brgyal ba sangs pas 'od lnga 'char// ma rtogs 'khrul pa'i snang ba dang// rtogs ldan ye shes snang ba ni// de ltar 'od la ngo sprad pas// sprad pa gsum gyi gdams ngag gis/ / dpe dang don dang rtags dang gsum// des na 'od gsal 'od kyis shes// 'od kyis 'od shes 'od kyi rgyud// mtha' yi mun pa ngang gis sangs// zhes gsungs so// ye shes 'od kyi rgyud las/ sgom pa'i le'u ste lnga pa'o//// de nas sems lhag lha yi bus// bya rtsal bral ba'i spyod pa zhus// mngon rdzogs rgyal pos bka' stsal ba/ yangs ba chen po spyod pa ni// yid ches bla ma dag la zhus/ / rin chen gdams ngag gter du 'char// lung gi dgongs ba'i don rtogs te// rig pa rang gsal gtan la 'bebs// nam mkha' rdo rje'i spyod pa'o// gang spyod dus na yul mi spyod// spyod bya bral pa'i dus na shes/ / lus ni bde la zag pa med// bcos ma'i gro gar phyag rgya med// dper na seng ge rtsal rdzogs bzhin// rnal 'byor spyod pa dpe dang bral// ngag gi snying po bzlas brjod med// ma bcos rlung gi spyod pa la/ / zhen pa'i ngag sogs bya btsal bral// rtogs pa'i rlung chen spyod pa'o// sems nyid gdod nas bya btsal bral// bya bral ngang la rnal mar rol// rnal 'byor nam mkha'i bya lam bzhin// yon tan nam mkha'i mtha' dang mnyam/ / ye shes spyod pa'i rang bzhin no// rgyal ba'i dam tshig ma bcos pa// bsrung du med la med par bsrung// sdom pa tshul khrims thams cad rdzogs// 'ching grol med pa'i phyag rgya la/ / 'gyur ba med pa'i rgya yis btab// mtha' dbus med pa'i dkyil 'khor la// ye shes 'phro 'du med par spyod// lta ba med pa'i lta ba la// lta ru med pa'i rtogs pa spyod// sgom du med pa'i dbyings nyid du/ / sgom du med pa'i bsam gtan spyod// blang dor med pa'i spyod pa la// nges par gzung na blang dor bsngalamed// ye dbang sems la bskur ba la// bskur du med pa'i brda tsam spyod// sgrub med sgrub bya bral ba 'di/ / sna tshogs spyod pa rgya mtsho yang// gang yang ma bkag kun tu bzang// snang bkag med pa'i klong chen du// bya btsal bral ba ngo mtshar che// dus gsum bde gshegs gang la yang// spyod pa 'di las yong mi mnga'/ / thams cad skye ba med par bsgral// las rnams rdzogs pa'i spyod pa'o// rang byung rig pa rtogs gyur yang// thugs rje tshogs kyi bsod nams ni// mthun 'jug 'grol 'dul thabs kyis su/ / sems can drang phyir rgyun mi 'chad// yin pa gsum gyis gags gsal te// gdeng chen gsum gyi dgongs pa'i gdeng// man ngag gsum gyi gzhi bzung la// tshad ma gsum gyi gdar sha gcad/ / gtan tshigs gsum gyi gtan la dbab// thug phrad gsum gyi ngo sprad la// shes pa gsum gyi gnad ni bkrol// zab mo gsum gyi 'phrang bsal la// lhun grub gsum gyis spyi bcing ngo// dgu ru sbas pa'i spyod pa de/ / klong chen dgu ru rdzogs pa'o// zhes gsungs so// ye shes 'od kyi rgyud las/ spyod pa'i le'u ste drug pa'o//// de nas sems lhag lha yi bus// mthar phyin sangs rgyas 'bras bu zhus/ / mngon rdzogs rgyal pos bka' stsal pa// ye shes gnyen po med pas che// rtogs pa'i 'bras bu rig pa'i gter// sems nyid grub pa'i 'bras bu ste// 'dod pa'i rtsol bas bsgrub mi byed// mkha' 'dra ye shes lhun gyis grub/ / sgrub med chos sku chen po la// ma bcos rang bzhin gzung 'dzin bral// kun bzang rgyal ba'i dgongs pa nyid// dbyings kyi 'bras bu bsam mi khyab// mi rtog 'bar ba'i dkyil 'khor na/ / che ba'i sku gsum mu mtha' med// rgyu med 'bras bu mthar thugs yin// 'byung 'jug mi mnga' rang bzhin gnas// de nyid grub pa'i thabs su ni// snying po rig pa nyi shar pas// mtha' yi mun pa ngang gis dag/ sku gsum lhun grub bde ba'i lam// rtsol ba'i 'bras bu mthar phyung nas// 'jig rten chos la de bzhin no// spang bya'i 'bras bu yin pas na/ khyod la dag pa'i ye shes gang// de ltar yin na rtag par 'gyur/ / don byed nus dang mi nus pa// rim dang cig char dag gis stong// 'dzin pa'i cha la gang gnas kyang// 'khor ba'i 'bras bu nyid du 'gyur// 'dzin med had po byang chad de// gnyis 'dzin shes pa yod pa'i phyir/ / rten cing 'brel par 'byung bas 'grub// des na rang byung rdzogs pa'i lam// rgyu la mi gnas rtsol ba med// 'bras bu mthar phyin rang rig nyid// rang gnas ye shes gdod nas grub// rang gsal dgongs ba'i thugs la reg/ kun bzang ye shes 'od shar bas// bsam bral ye shes rdzogs pa yin// ye shes ma bcos byang chub sems// mi 'gyur chos nyid dbyings kyi sa// mi 'gag ye shes rig pa'i gsung/ / dbyer med ye shes gzung 'dzin bral// 'gyur med chos sku sems rig na/ khams gsum sku gsung thugs su grub// sgrub med rang byung grub pa 'di// ma bsgrubs 'od gsal shugs kyis 'byung/ / thugs rje rang snang sprul ba'i sku// rang rig bde bas longs spyod rdzogs// mtshan dang dpe byad rang bzhin grub// thugs rje rang 'dod cir yang 'byung// thugs rje rang byung ye shes de/ / rtsol bral rang snang byin rlabs shar// phyogs ris med de kun la khyab// stong nyid ye shes kun sgrol mdzad// rang byung chen po'i bdag nyid sku// 'od gsal grub pas mthar phyin pa// 'gro don mdzad la rtog pa grol/ / 'od gsal dbyer med gcig gi ngang// ma rig med pas 'khor ba sangs// sems can skye ba'i rgyu ma mnga'// thams cad skye med dbyer med de// gdod nas dag go ngo nyid sku// bsam du med do sgom dang bral/ / snang ba ma bcos chos skur shar// rig pa ma sbyangs longs spyod rdzogs// thugs rje sprul ba'i sku ru byung// sku gsum dbyer med rdo rje'i sku// drang ba'i don la sems mi 'jug/ nges pa don gyi gzhung 'di la/ / rtogs pa snying gi dkyil du sad// thugs rje sems can kun phan du// rnam pa lhun grub sgyu mar ni// rol ba shar la ngos bzung med// rang bzhin mtshan nyid lhun grub la// gzung 'dzin btags pa ngang gis med/ / rang bzhin lhun grub chen po la// lhag ma med par yongs su rdzogs// zhes bka' stsal to// ye shes 'od kyi rgyud las/ grub pa'i le'u ste bdun pa'o//// de nas lha'i bu kun dga' snying pos/ yongs su rdzogs pa'i gdam ngag zhus// mngon rdzogs ston pas bka' stsal pa// gsang rdzogs 'od kyi rgyud gsum 'di// sku gsung thugs kyi rol pa las// dug gsum 'joms pa'i dpa' bo yin/ khams gsum 'dul ba'i gnyen po la// 'khor ba'i g.yang sa gcod pa'o// bka' yi bcud 'dus snying po 'di// rgyal ba rnams kyi dgongs pa ste// theg pa kun gyi yang rtse bo// thams cad ye shes chen por shar/ khyab brdal chen po rang la rdzogs// ye shes rol ba'i klong du chud// mkha' ltar khyab pas mtha' dbus med// ma bcos thig le mngon sangs rgyas// rang byung ye shes snying po'i don/ / bkod pa med par lhun gyis grub// rgyal ba'i dgongs pa sems kyi gter// ma lus 'dus pa'i thig ler che// bla ma'i brda yis rtogs par byos// dgra gnyen med par goms gyur na// 'di dang bar ma do la grol/ / grol nas grol ba'i brda yang ston// sprad pa gsum gyi dmas ngag gis// rdo rje sems dpa'i khang pa bstan// thig le khong du bsdams pas ni// zag med ye shes bde ba bstan// sku gsung thugs phrad nyams myong gis/ / nam mkha' rgya mtsho nor bu bstan// dmigs pa spo ba'i bsam gtan ni// shes pa grims pa brda yis bstan// tshor ba rjes med sgom pa ni// phyogs med log pa'i brda yis bstan/ / dus tshod gzhi cha'i rig pa ni// shes pa bzlog ba'i brda yis bstan// gti mug la ma khyer gdams ngag ni// btang snyoms chen po'i gdams ngag ni// mkha' 'gro rgyud kyi brda yis bstan/ / g.yo med bum chu'i gdam ngag ni// thig le dbus gnas lag brdas bstan// dran pa rgyun gyi gdams ngag ni// dgu gdams pa yi brda yis bstan// gti mug lam khyer gdams ngag ni// dran pa me long brda yis bstan/ / tshogs drug rang sar grol ba ni// sna tshogs ci rung brda yis bstan// dug lnga rang sar grol ba ni// dngul dkar me long brda yis bstan// bsteng sgo dag la brten pa ni// rlung dang 'khor lo brda yis bstan/ / 'od sgo dag la brten pa la// po la ka ko brda yis bstan// dkyil 'khor drug gi gdam ngag ni// spyod yul drug gi brda yis bstan// skyes pa skye med gdams ngag ni// phyag rgya bsgreng ba'i brda yin bstan/ / 'gag pa med pa'i gdams ngag ni// rdo rje gdan gyi brda yis bstan// gnyis su med pa'i gdams ngag ni// yi ge a yi brda yis bstan// mkha' ltar ye shes 'od kyi rgyud/ / sems nyid grub pa'i lam mchog 'di// dbyer med kun la ldan bzhin du// snang ba'i lam med 'khor bar 'khyams// sdug rtsol ba'i nad kyis gdungs// de la bstan pa'i sgron me 'dis// snang ba'i ye shes 'char bar shog/ mkha' ltar mnyam pa 'od kyi rgyud// ye shes 'od dang ldan par shog/ de skad ces bka' stsal pa dang/ lha'i dbang po 'khor dang bcas pa rnams dga' zhing mgu nas thal mo sbyar te/ bcom ldan 'das mngon rdzogs rgyal pos gsungs pa la mngon par bstod do// nam mkha' dang mnyam pa ye shes 'od kyi rgyud rdzogs so//// rgya gar skad du/ sarba d+harma san ta k+Sha pa rA na tan tra ma hA na ma/ gzigs par bya ba'i spyan du yang gyur pa'i rgyud 'di ni shin tu phan yon che ste/ rgyud 'di shes shing rtogs pa lta ci smos kyi/ tha na tshig 'bru 'ga' tsam yang yid la byed na yang/ de dus thams cad du dam tshig nyams par mi 'gyur zhing/ nyams na yang skongs bar 'gyur la/ skangs na yang skongs bar 'gyur nges la/ de ni 'jig rten gyi khams 'dir yang mthu dang/ rdzu 'phrul dang/ dngos grub la sogs pa gang gis kyang bskyad du med par 'gyur la/ 'jig rten pha rol tu yang kun tu bzang po'i dgongs pa dang skal ba mnyam par 'gyur ro// sems dpa' chen po rgyud 'di ming tsam 'dzin par byed na yang/ de ngan 'gror 'gro bar mi 'gyur/ lta ba phyin ci log tu mi 'gyur/ dam tshig nyams par mi 'gyur/ de bzhin gshegs pa'i don dang ldan zhing bde ba mchog dang ldan par 'gyur ro// sems dpa' chen po rgyud 'di 'dzin pa 'am/ 'chang ba 'am/ klog pa 'am/ yi ger 'dri ba 'am/ ming nyan par byed na/ de sangs rgyas dang byang chub sems dpa' thams cad kyis mchod cing bkur stir byed pa dang/ 'khor ma mo dang mkha' 'gro ma la sogs pa rnams kyang/ ci bsgo ba rnams bran bzhin snying nye bzhin nyan pa dang/ tshe dang 'byor ba'i longs spyod dang ldan pa dang/ 'jig rten phyi mar yang kun tu bzang po dang mnyam zhing dbyer med par 'gyur ro/ / sems dpa' chen po gang zag la la mnar med par ltung bar nges pa la yang// rgyud 'di thos par byas na/ bla na med pa'i don dang ldan par 'gyur ro// sems dpa' chen po gang zag la la dam nyams nas rdo rje dmyal bar ltung ba yang/ rgyud 'di yi tshig 'ga' rna bar thos na yang/ de'i dam tshig nyams pa de skongs nas/ rnal 'byor bde ba'i don dang ldan par 'gyur ro// sems dpa' chen po de lta bu'i rgyud 'di ni shin tu dkon zhing mi 'byung ba ste/ de ci'i phyir zhe na/ rgyud 'di phyogs bcu'i dus gsum gyis de bzhin gshegs pas kyang ma gsungs/ gsungs bar mi 'gyur/ ngas kyang ma bshad/ bshad par mi 'gyur/ sangs rgyas rnams kyang mi gsung bar 'gyur ba'i phyir yang dkon no// sems dpa' chen po rgyud 'di ni gang na yang mi bzhugs/ gang na yang mi ston/ ston par mi 'gyur/ bzhugs par mi 'gyur ba'i phyir dkon no/ sems dpa' chen po rgyud 'di ni gang zag gi blo la mi snang/ snang bar mi 'gyur ba'i phyir dkon no// de skad ces bka' stsal pa dang/ rdo rje sems dpas/ bcom ldan 'das la 'di skad ces gsol to/ / e maho ngo mtshar che'o// rgyud 'di tshig tu mi gnas pa de sems can skal ba chung ba lags sam zhes gsol pa dang/ bcom ldan 'das kyis bka' stsal ba/ sems dpa' chen po rgyud 'di ni tshig dang yi ger 'dri ba las 'das pas/ dus kyi tha ma la 'byung yang srid/ mi 'byung yang srid pas/ 'byung na gang zag gcig la 'byung la/ de gang dang yang ma bral ba'o// de la skur pa 'debs pa dag 'byung ba'i phyir yang dkon no/ / dam nyams shing ma rungs ba'i phyir dkon no// 'di dag ma thos shing mi shes pas/ phrag dogs dang/ skur pa dang/ nga rgyal dang/ smod pas kyang dkon no/ / rgyud 'di bshad cing bstan pa min pas kyang dkon no// 'di ni dad pa dang/ rang bzhin zab pa dang/ gron tshegs la mi lta ba dang/ snod dang ldan pa la byung bas kyang dkon no// rgyud 'di rnal 'byor grub pa gcig gi sems la 'byung bas kyang dkon no/ / sa ma ya bkod pa las/ rgyud kyi phan yon gyi le'u ste nyi shu rtsa gcig pa'o//// de nas rdo rje sems dpas 'di skad ces gsol to// dam tshig chen po gsang ba'i rgyud ji ltar btsal bar bgyi/ spyad legs pa'i yon tan dang/ ma legs pa'i skyon ji ltar byung/ kun gyi rgyal pos bka' stsal pa/ sems dpa' chen po gsang ba'i chos thams cad kyi dam tshig ni/ dper na rgyal po chen po'i bka' khrims gsang zhing dam par blon po rig pa can gyis btsal na/ thugs dgongs dang bsam dgongs thams cad mthar phyin te rgyal khams bde zhing skyid par 'gyur la/ de blon po da dar gyis rgyal khrims spyad ma legs na thams cad kyang phung nas sdug cing bsngal ba bzhin/ gsang ba 'di dag thams cad las 'phro dang skal bar ldan zhing snod du gyur pa'i rdo rje slob dpon dang/ slob mar bcas pas gsang ba'i don sba zhing spyad legs par bya dgos te/ gsang ba thams cad la gnyan zhing bkur ba lha dang klu'i spyi gtsug gi nor bu rin po che dang 'dra bar bya ba dang/ 'phangs shing brtse ba mig gi 'bras bu lta bur bya ba dang/ mi 'bral ba lus dang grib ma 'dra bar bya ba dang/ gsang zhing sba ba snying sgor 'byin pa dang 'dra bar bya ba dang/ nyams su blang ba mgo la me mched pa ltar bya ba dang/ spyod pa gzab pa tshul shis pa'i btsun mo ltar bya ba dang/ mi 'bral zhing srung ba srog rtsa dang snying rtsa 'dra bar bya ba dang/ sba zhig gsang ba pho mo'i mtshan ma dang 'dra bar bya ba dang/ nan tan dang gdams pa yun gyi gter bzhin du bya ba dang/ bka' las 'byung ba'i gdam ngag man ngag bzhin du mnyan par sems la bcangs na/ gsang sngags kyi rgyu gser dang 'dra ba dgos pa'i don yid la ji ltar 'dod par spyad du yod ba dang/ gsang ba'i 'bras bu zhing gshin pa'i lo tog bzhin du 'phel ba dang/ gsang ba'i nus mthu nor bu rin po che dang 'dra bar 'byung ba dang/ log pa'i phyogs mtha' dag gtar mtshan la rtse sbur reg pa 'dra bar 'gyur ba dang/ bar du gcod pa thams cad me'i phung po la sprang bu brlag pa 'dra bar 'gyur ba dang/ ngan song 'khor ba'i sdug bsngal thams cad mun rum du nyi ma shar ba dang 'dra bar 'gyur ba dang/ 'dzin rtog thams cad rdul phyis pa dang 'dra bar 'gyur ba dang/ phyin ci log thams cad kyang 'bras kyi glu ma yo legs pa 'dra bar 'gyur ba dang/ yid la bsgoms pa thams cad smon lam gyi rgyal po'i zhing khams bzhin du 'gyur bas/ gsang ba'i dam tshig spyad legs pa'i byin rlabs so// sa ma ya bkod pa las/ gsang ba'i dam tshig ma nor bar spyad pa'i yon tan gyi le'u ste nyi shu rtsa gnyis pa'o/ /// sems dpa' chen po dus tha ma la gsang ba'i dam tshig 'di dag 'cho zhing spel mi shes te/ sngon gyi rnal 'byor pa tshul dang ldan pas snod brtags shing ston la/ snod dang mi ldan pa la mi ston cing/ gsang ba'i sgrol na phyag rgya mu ti hos btab nas sbas pa rnams 'dod pas rgyal ba'i sngags pas/ au rgyan dang/ bal po dang/ kha che la sogs par gsang sngags kyi don zab mo 'tshong zhing spro bar byed do/ / gzhan yang bod la sogs pa gdol pa'i shas che ba rnams su yang gser phye la sogs pas 'dod pa'i dbang gis 'phros pas/ de dag la shas cher gsang thub cing spyad legs pa 'ga' tshul 'grub cing mthar phyin pa yang 'byung na/ phal du gsang pa med pa bka' lhod pa'i sngags pa phal 'jig rten pa'i grags pa 'dod pas snod mi 'dam par snang dgu thams cad la mang bar 'chad pa dang/ sgrogs shing 'tshong na tshul bzhin du mi spyod pa mang ba dang/ gsang ba 'chal bas de'i skyon ni/ gsang ba thams cad la mthu dang byin med par 'gyur ro// bka' bzhin mi byed pas mtho ris kyi 'bras bu thob pa nyung zhing/ ngan song 'grub pa mang bar 'gyur ro// snod dang dus dang mtshams med par sgrub thabs dang 'phrin las chol par spyad pa'i skyon ni/ spyas dang ya khar gyur pas/ chos la rtsod pa mang zhing ris mi mthun pa dang/ sdig pas phog pa'i dri mas mig gi dbang po la sogs pa nyams pa dang/ drag po'i las tshar ma chod pas// sku la bab cing srog brtod pa mang bar 'gyur ro// de bzhin du sgrol sbyor gyi las lta ba dang/ ting nge 'dzin gyis ma zin pa yang de bzhin no// dus tha ma'i slob dpon phrag dog can gyi grogs po yon tan can la thos kyis dogs pa dang/ slob ma bdag gi bka' las gzhan gegs la gnod pa byed pa byung na skyon ni 'khrug pa'i skabs dang/ mi mthun pa'i ris dang/ shes rab mi skye zhing tshogs gcog pa'i sgrib pa shin tu yang che'o// dus tha ma'i chad pa pos sgra dang grags pa 'dod pa'i phyir grangs mang bar khas 'ches/ nges pa'i don dang bstan tshigs mchod par 'phrin las kyi sdebs sbyor legs su re mang po dang don thog tu ma phebs pa'i btsan dpyad kyis shes pa med pa'i rang re'i rig pas 'grol zhing/ kha shing rgol tshig mang pos gsang ba'i don phrad rgyu la shes pas khas 'ches shing 'chad pa'i dus 'byung la/ nyan pa rnams kyang de la dad cing 'dun nas tshor ba skyes pa'i dus na/ de'i don ni gsang ba'i don 'di dag 'chad shing/ spyod pa thams cad bro glu dang 'dra bar gyur nas/ 'du byed kyi g.yengs pa skye zhing/ dngos grub dang/ sngags kyi nus mthu dang/ chos nyid kyi byin rlabs ye med par sgrung gtam bzlas pa dang 'dra bar gyur nas ci brjod kyang grub pa mi 'thob bo/ / dus phal du gsang sngags pa mi rten cing/ blo 'gyur ba chu'i chu bur dang 'dra ba rnams la/ rgyu'i theg pa la spyod pa'i gang zag phal gyis gsang sngags zhes bya ba ni bka' ma yin te/ 'di ltar 'gal te don med pas/ mdo dang tshad ma la don dang gtan tshigs yod pas 'di spyad ba'i rgyu zhes log par khrid pa la/ de bzhin du ngag nyan par byed pas rdo rje theg pa spangs nas rgyu'i theg pa spyod na/ skyon ni rdo rje theg pa'i dbu yogs dang/ gsang sngags gnyan po'i bka' chad 'byung rdo rje theg pa'i dbu yogs kyis de dag dmyal ba 'chi 'pho'i gnas su skyes nas/ bskal pa brgyar yang rdo rje theg pa'i spyod pa'i skal ba dang mi ldan pa dang/ gsang sngags gnyan pa'i bka' chad ni dus ma yin par 'chi ba dang/ mi nad dang phyugs nad kyi rnam pa 'byung ba dang/ gnas nas 'byin pa dang/ char dus su mi 'bab cing lo nyes dang mu ge'i rnam pas nyon mongs pa dang/ dgra mang zhing 'jig rten phyi mar yang dmyal ba khog 'joms kyi gnas su bskal pa brgyar skye bar 'gyur ro/ / gsang ba'i dam tshig nyams pas gcig 'og tu gcig mi chud pas/ spyod pa yang nyams pa'i rgyu ste/ mi mthun zhing khog gnag pas mi bde ba 'byung zhing byams pa'i 'bras bu med par 'gyur ro// sa ma ya bkod pa'i rgyud las/ gsang ba'i dam tshig spyad nyes pa'i skyon ni bstan pa'i le'u ste nyi shu rtsa gsum pa'o//// sems dpa' chen po gsang ba'i dam tshig rtsa ba ni/ gter du rtsa ba rin po che'i sgrom bu rtsa ba dang/ sems la rtsa ba yid la brnag pa dang/ 'khor lo rtsa ba snod dang ldan pa las ma gtogs pa kun gyi thun mong ma yin te/ de'i phyir 'di skad ces gsungs te/ gsang ba'i dam tshig chen po 'di// dam par spyad las ma gtogs pa/ snang dgu phal gyi thun mong min// blo zhen thos na skrag par 'gyur// rin po che dang gser gyi rgyun// 'khor los sgyur ba'i rgyal po las// mgo nag kun gyis mi thob cing// kla klo kun gyi thun mong min/ / de bzhin gsang ba'i gsang chen 'di// rnal 'byor ngang tshul bzang ba dang/ 'byor ba'i longs spyod ci smos kyi// lus dang srog la'ang ma chags pas// gang na dam pa 'di yod par// spu gri sor yang rgal ba dang/ / me mar mur gyi 'obs 'bogs na// de ni 'di yi gzhag pa'i snod// bka' las 'byung bzhin cig mi byed// gsang ba'i don nges g.yo sgyus 'tshol/ 'dod dang bkur sti chags pas 'chings/ / de 'dra tha zhal spyod yul min// long bas dro yang nyi mi mthong// blun po lung du ma bstan pas// ji ltar sbyad kyang bden mi mthong// 'das pas brlag cing 'bras bu med// sman pas sman ngo mi shes shing/ / nad kyis ngos nas ma zin par// nor bar btang bas dug tu 'gyur// phan par ma song sdig bzhin du// slob dpon snod la mi rtog cing// slob ma dam tshig mi 'dzin pa/ nyes 'gyur nyams pa brjod pa las 'das/ / gnyis ka 'phung byed brlag par 'gyur// de bas gsang chen dam pa 'di// chu srin dgu po'i kha nang 'du// nor bu rin chen 'chang ba bzhin// gzhan la bstan par bya ba min// don du gsang ba 'di 'tshol zhing/ / yid la brnags shing 'chang byed pa// dus gsum rgyal ba'i sras yin pas// sangs rgyas kun gyi gdung 'dzin no// gsang thub pa ni dngos grub yin// brjed pa med pa lha zhes bya// ma yengs yid kyi dgongs pa yin/ / don las mi 'da' dam zhes bya// kun tu bzang po'i dam pa la// mi 'bras lus dang grib ma bzhin// mi gtong ba ni chu srin ltar// phyag rgya bzlas brjod chu rgyun bzhin/ / bden par gnas shing drang por spyod// bstan pa bzhin du bka' nyan cing// nges ba'i don las mi 'da' ba// da ltar nyid nas sangs rgyas nyid// bsgrubs shing btsal kyang dpag tu med// ma btsal na yang skyon med de/ / gser bzhin ye nas dag pa la// de la bcos shing smon du med// sa ma ya bkod pa las/ gsang ba'i dam tshig rtsa ba'i le'u ste nyi shu rtsa bzhi pa'o//// sems dpa' chen po rdo rje slob dpon la bka' bcag dgongs pa ni/ bdud dang bar du gcod pa slob dpon gyi cha byad du byung na/ brdung zhing dgar ba byas kyang dam tshig las ma gtogs so// rdo rje slob dpon smyos pa dang/ chang dbang dang/ gdon dbang du byed pa yang bka' bcag pa mi 'gal ba dang/ slob dpon legs pa'i lam la dgongs shing dge ba'i gags byed pa dang/ sdig pa'i las la bskul ba dang/ rbod pa'i las byed na bka' bcag pa 'byung ngo/ / bka' bden pa mi ston cing/ mu stegs dang log pa'i phyogs ston par byed na yang spang bar bya'o// mched dang lcam dral yang dkar po'i phyogs la smod cing nag po'i phyogs la bstod pa dang/ dad pa can gyi tshogs gcog cing/ dge ba can gyi thugs dkrug pa dang/ bka' las 'gal zhing mched la 'khu na ngag gcag go/ dam tshig dang brtse gdung med cing/ sdig la mi 'dzem pa dang/ chos la mi dad cing dge ba la mi gus pa dang/ yo byad la bsog 'jog byed cing phud la khyer rngam che na spang ngo// gzungs dang/ de byi dang/ grogs kyang de bzhin no// de las gzhan du slob dpon gyi bka' mi gcag pa dang/ ci gsungs ba nyan pa dang/ mched lcam la sogs pa yang de bzhin no// bzang po'i las ni bden pa'i chos yin la/ sdig pa'i las dam la mi gnas pa min pas/ sangs rgyas thams cad kyi dam par dam gcig yin pas/ dam tshig yid la 'dzin pa ni sangs rgyas thams cad 'dzin pa yin pas/ gzhan gyi rtsol ba ci'ang ma byas kyang sangs rgyas pas ma nyams gtsor gzung zhing nyams pa spang bar kun tu bzang po ngas gsungs so/ / sa ma ya bkod pa las/ 'gal ba bcos shing spang ba'i le'u ste nyi shu rtsa lnga pa'o//// gzhan yang sems dpa' chen po dam tshig gi don mi len par gsang ba'i don spyod pa ni/ nam mkha' la khang bu brtsig pa dang/ rdo rje brag la sa bon 'debs pa 'dra ste/ ci byas kyang 'bras bu med cing tshi chad par 'gyur bas/ 'di skad ces gsungs te/ snga rab 'das pa'i sangs rgyas kyang// dam tshig 'di rtogs mngon sangs rgyas/ / da ltar byung ba'i sangs rgyas kyang// dam tshig 'di srungs mngon sangs rgyas// slad kyis 'byon pa'i sangs rgyas kyang// dam tshig 'di spyod de bzhin rgyas// dam pa'i don de sangs rgyas yin/ / gzhan du rnal 'byor ma tshol cig/ lta spyod sgrub thabs 'phrin las kyang// dam tshig yod na de dag nges// gal te dam tshig 'di med na// byas kyang phan med sdug bsngal che// spur bas srin bal lam drangs dang/ / glang chen rdzab tu chud pa bzhin// btsal kyang phan med ngal chad pas// dam med de yang de dang mtshungs// zang zing nor dang longs spyod la// 'byor bas che phra khas blangs nas/ / sangs rgyas rnams dang bla ma dang// de bzhin mched la sogs pa la// dang por dad pas khas blangs nas// dbul bar dam bcas 'das na ni// sangs rgyas sku bslus zhes bya ste// brdzun par lha mi yid ches pas/ / dngos grub 'bras bu ci btsal kyang// 'di dang phyi mar thob mi 'gyur// gal te sngon gyi las bsnyegs kyis// dus 'dir cung zad bder gyur kyang// phyi ma la ni 'grub mi 'gyur// ngan song dmyal ba'i gnas skyes nas/ / sdug bsngal nyam thag gyur pa la// mgon skyabs sus kyang nus mi 'gyur// rnal 'byor 'thab rtsod skyes pa la// gcig lan gcig gis byed pa ni// be'u sbrel g.yang du lhung ba bzhin/ / gnyis ka dmyal bar ltung bar 'gyur// gang zhig bsrings pa de rgyal bas// gnyis kas bsrings na rgyal bar nges// rtsod pas rgyal ba 'phel ma yin// gang gis pham blangs rgyal bar 'gyur// don med slob dpon slob ma mched/ / long bas long ba khrid pa bzhin// ngam grog g.yang sar kun lhung ltar// mi bde ngan song gsum du skye// de la dam pa 'di thos nas// ji ltar mun par sgron bteg bzhin// de ma thag tu gsal gyur nas/ / byang chub 'tshang rgya gdon mi za// dam tshig chen po'i lta ba la// lta spyod dma' ba'i 'gal 'jugs pa// bya 'phur rjes su khyi snyegs bzhin// rang nyid tshi chad sgrib par lhung// man ngag lung dang ldan pa la/ / don gyi bkur sti mi byed cing// thabs kyis smod cing don 'grub pa// nyes 'gyur nyams pa brjod mi lang// slob dpon nges pa can rnams kyis// gsang ba nges par dam phog pa// de ma thag tu grags shing ston/ / de yi mtshan nyid de dang mtshungs// slob dpon bka' ltar mi byed cing// slob ma bstan pa mi nyan pa// gsang ba don la ci bsgrubs kyang// sgrung dang 'dra ste phan med 'gyur// zhes ched du brjod do/ / dam tshig thams cad kyi rgyal po sa ma ya bkod pa'i rgyud las/ gsang don spyad nyes pa'i skyon bstan pa'i le'u ste nyi shu rtsa drug pa'o//// sems dpa' chen po dam tshig gsang ba'i don spyod shes pa'i yid bzhin gyi nor bu rin po che bas dkon zhing rin che ba de sgroms su bcug nas/ bkur ba dang mchod pa byas na/ ci 'dod pa'i dga' ba bskyed pa bzhin/ thabs la mkhas pa'i rnal 'byor chen pos 'di dag sems la bcangs shing spyad legs par byas na/ 'jig rten gyi khams 'dir dgos pa thams cad lhun gyis grub par 'gyur ba lta ci smos kyi/ 'jig rten phyi ma'i dngos grub thams cad kyang da ltar nyid du 'grub par 'gyur te/ rgyal ba thams cad kyi gdung 'tshob cing/ sangs rgyas thams cad kyi sras su gyur nas/ 'khor gyi ma mo dang/ mkha' 'gro ma dang/ dam bcas pa thams cad kyis ci bsgo ba thams cad nyan zhing zhabs spyi gtsug gis len te/ gsang ba thams cad byin dang ldan par 'gyur bas 'di skad ces gsungs so// rnal 'byor brtson pa rab ldan pas// phyogs bcu dus gsum sangs rgyas grangs/ / rdul gcig rdul snyed sangs rgyas kyi// mtshan nas brjod cing phyag 'tshal zhing// stong gsum stong gi 'jig rten khams// rin chen sel mas bkang nas kyang// nyin mtshan dus drug la sogs par/ / rgyal ba rnams la mchod pa bas// de bas dam tshig tshul shes pas// lha dang slob dpon mched lcam la// dad pa brtse gdung mi phyed pas// sman gyi mchod pa 'di phul tshe// mtha' yas sems can thams cad la/ / sha khrag 'phangs med btang ba bas// de bas lha slob mched lcam la// za ma re mchod cher bsngags so// de bzhin lus dang longs spyod dang// ci yod phul ba ci smos kyi// skabs kyi rtse gdung ma shor na/ / de yi yon tan brjod las 'das// de bzhin dam tshig che 'dod na// brtse gdung gus na che bar 'gyur// dad med ser snas chung 'gyur te// 'das skyon lha yang brlag par 'gyur// lus kyi dri ma bkrus pas dag/ sdig pa'i dri ma bshags pas 'byang// 'dzin rtog sdug bsngal bsgoms pas sel// dam nyams sgrib pa na ra kan// sems ni yi dam lha la dmigs// ci yid slob dpon nyid la phul/ / lhag mas phyed dang de phyed rnams// mched la mchod na bde sham 'bar// chags dang ser sna sdug bsngal nad// ma chags sbyor byed bdud rtsi sman// mi nyan tshod yod nyams pa'i rgyu// bka' dam don nyan dam tshig go/ 'dod pa'i longs spyod thams cad la// bdag la 'bul bar byed pa yang// slo?b dpon mched la phul cig go/ des ni mi nyams nyams kyang skongs// zang zing longs spyod dad pa'i tshogs/ / gzhan la 'bul bar byed pa la// bdag la phul gcig len byed na// bsrungs kyang nyams te skongs mi 'gyur// gsang ba nyams pa'i gang zag ni// klu yi gdug pa'i kha rlangs bzhin// gang du slebs par phung byed pas/ / mi bden de dag spang bar bya// gsang thub brten pa'i man ngag can// gter sbas thabs kyis phyung ba bzhin// gang dang phrad pa 'tshengs 'gyur bas// rin thang med par bslu bar 'os/ / gsang med slob dpon byed pa dang// snod med slob ma byed pa ni// 'o kham bzhin du gnyis ka 'phung// dus med srog zad dmyal bar ltung// gsang ba dam pa'i slob dpon dang// snod dang ldan pa'i slob ma ni/ / ji ltar gser dang rin chen bzhin// yon tan zad med phyi phyir 'phel// gzhung dang mthun par mi byed cing// bden pa sems la mi 'jog par// gang zhig gsang sngags spyod pa ni// sa bon brngos pa de bzhin no/ / zhes gsang ba dam pa gsungs so// sa ma ya bkod pa'i rgyud las/ gsang ba dam par bstan pa'i le'u ste nyi shu rtsa bdun pa'o//// sems dpa' chen po gzhan yang/ sngags kyi dam tshig ma nor bar bzlas/ ting nge 'dzin gyi dam tshig ma yengs par bsgom/ gsang ba'i dam tshig ma nyams par bsrung// 'phrin las kyi dam tshig ma chags par btsal/ gsang ba'i dam tshig ma brjed par bsrungs na/ gsang sngags yin no// dam tshig yin no// bdud rtsi yin no// sangs rgyas yin no// gsang bar byas na mnyan no// gnyan par byas na byin che'o// byin che bas gdon mi za ba'i sangs rgyas yin no/ / sems dpa' chen po sngags kyi dam tshig nor bar bzlas na/ rang bzhin 'grub ba'i mthu byin mi 'byung ngo// ting nge 'dzin gyi dam tshig 'du byed la yengs pa dang/ bying rmugs dang 'dres na/ rang rig gi ye shes chen po mi 'char ro/ / spyod pa'i dam tshig nyams na/ rdo rje dmyal ba ya nga ba'i gnas na lha bsod nams kyis rgyal ba'i tshe tshad pas kyang gsum gyis ring bar skye bar 'gyur ro// gsang ba'i dam tshig brjed de/ gsang chu tshags su 'dzags na/ dmyal ba bsdus 'joms dang lce la zhing rmod pa'i gnas su bskal pa dpag gis mi lang bar skye bar 'gyur ro// 'di dag nyams na bdud yin no// dug blud pa yin no// dmyal ba yin no/ / mu stegs 'chal pa sangs rgyas thams cad kyi bka' las 'gal bas/ dmyal ba dang ngan song gsum gyi gzhi ma yin no// sa ma ya bkod pa las/ dam tshig gi dngos gzhi bstan ba'i le'u ste nyi shu rtsa brgyad pa'o/ /// sems dpa' chen po chos thams cad dngos po dang rang bzhin med par shes na dam mi nyams so// de ci'i phyir zhe na/ 'dzin pa dang chags pa med pas mi nyams so// de bas kyang chos thams cad gnyis su med cing mnyam pa nyid du shes na dam tshig la nyams pa med do/ / de ci'i phyir zhe na/ rnam rtog gi phyogs ris ming yang med pas nyams pa'i dus med do// de bas kyang chos thams cad skye 'chi med cing 'pho 'gyur med par rtogs na dam tshig nyams na yang skongs so/ / de ci'i phyir zhe na/ chos kyi skur gyur pas skyon ming yang med par dag pa'o// de bas kyang chos thams cad byang chub kyi sems yin par rtogs na dam tshig bsrung du yang med do/ / de ci'i phyir zhe na/ ye nas sangs rgyas pa la 'khor ba'i rgyu btsal gyis mi rnyed pa'o// de'i don kyang rang gi sems la gsang zhing bcangs na/ dam tshig thams cad kyi rang bzhin du chos thams cad kyang sangs rgyas pa'o// de ci'i phyir zhe na/ gsang pa la nyen dang 'gal ba med/ thub pa sangs rgyas thams cad kyi dgongs pa mthar phyin pa'o/ / de lta bu'i don 'di kun tu bzang po'i thugs phyung ba yin kyang gcam bu dang/ 'phyar po dang/ gsang med cing snod dang mi ldan pa la spel nade nyid phung zhing brlag pa lta ci smos/ gzhan gar spros par phung zhing brlag par 'gyur te/ de ci'i phyir zhe na/ gcam bu la nges don zab mo byin na dang por ngom/ bar du 'di yin ces ston/ tha mar nan po che'i ngo mi zlog pas/ gsang chu tshags su 'phel ba ni/ skyon dang bcas pa shin tu yang che ste/ bkur gnas kyi rim pa shor/ gsang ba'i nges don 'khyams/ dam tshig gi gzhung lugs med/ 'bad pa'i 'bras bu stor te 'gro bas 'di ni nyams tshabs kyang che/ sdig kyang gzhan dang mi mnyam/ bskang tshad las kyang 'das pas/ bden pa'i don thams cad la 'bras bu med de/ 'bras bu zab mo thams cad 'jug tu spyang po dang nor bu chung gi lag tu spel te/ skyon can dang nor bu chung thams cad ngom zhing ston cing 'tshong/ gsang gsang don can rnams 'cha' zhing sgyid lug pa'i skyon ni kun tu bzang po ngas kyang brjod pa'i mtha' med de/ dam tshig chen po la gtogs so// 'phyar po la gsang ba'i don zab mo 'phel na/ 'phyar ba'i dbang gis rang gi sems la mi 'jog cing blo la 'dug pa'i yul med pas/ su snang ba la don 'di lta bu yod pa bzang ngam ngan// sangs rgyas kyi zhal nas gsungs pa lags sam ma lags zhes/ nyan thos dang theg pa dman pa'i rigs thams cad la ston pa dang/ gsang sbed mi shes pas gsang brkus pa dang/ gsang nyams pas gsang ba la rma 'dod cing yang ba dang/ 'phyas chen po 'dogs pa dang/ chos 'di dag ni sangs rgyas kyis ma gsungs nges te/ gang zag sgrun du re ba dang legs su re ba'i mi tshig yin te/ cung yang sgres grags pa dang/ kham che ba dang/ bde ba chen po'i don nye grags pas sangs rgyas kyi bka' min ces bya ba la sogs pa dpyas shing skur ba bsam gyis mi khyab pa 'debs/ la la tshol bar 'dod na yang thabs kyis dpyas shing don gyis tshol ba yang mang bas de dag lhag par yang nyams te/ sngags 'bras bu'i chos nyan thos dang theg pa dman pa lta ci smos kyi/ sngags yo ga phyi pa man chad bstan na yang ltung ba gol ba'i sgrib pa che la/ der yang ma zad nang pa rnam pa gsum dang/ sku gsum thugs la sogs pa'i sgrub pa'i sgo so so yang 'drer mi snang na/ 'phyar pos de rnams la bstan pa lta ci smos te/ shin tu yang nyams pa tshabs che ste/ de ci'i phyir zhe na/ rdzogs chen bla na med pa kun tu bzang po nyag gcig gi dgongs spyod 'di sa bcu'i byang chub sems dpas kyang dar gyi la ba tsam gyis bsgribs pas mi rtogs na/ theg pa 'og ma pa dang/ nyan thos la sogs pas smos kyang ci dgos te/ don gyi phyogs gcig tsam yang mi rtogs/ ma rtogs pas bka' la smod// smad pas bka' 'di la smad na bka' thams cad la smad pa bas/ 'di nyams te bskal pa brgyar mnar med pa'i dmyal bar skye zhing/ dmyal ba gzhan bskal pas 'jig kyang/ rdo rje dmyal ba cis kyang mi shigs pa'i gnas 'gyod pa dran par 'gyur te/ de'i sdig kyang brjod pa las 'das te/ bka' 'di dag gis don nan la bor ba dang/ yin min gyi stang bcad pa ma yin te/ bka' 'di sangs rgyas thams cad kyi thugs ye shes nyid kun tu bzang po rang byung ba yin pas/ 'di ni lhag par nyams shing ma rung par dam tshig chen po la gtogs so/ / gsang med pa ni mu stegs 'chal pa po ltar snang dgu dang/ grong dang/ grong du ston pa dang/ phyi nang gi dbang dang slob dpon gyi bka' rtags ci smos kyi/ ming tsam 'byin pa'i dbang yang ma thob par gzhan la 'byin par byin par byed pa ni/ nyams shing 'gal ba gong ma bas kyang che ba min re dam tshig chen po la gtogs so// snod ma yin pa ni ji ltar bstan kyang sems kyi don mi go bar slar skur ba 'debs pa bka' 'di las 'byung ba ltar tshig gcig kyang mi byed pa dang/ ci nyams byas shing gzhan la tshogs 'dre zhing sgrib pa skud par byed pa rnams la don 'di dag ston cing spro ba ni/ dpon dang g.yog med par gnyis ka'i dam tshig nyams te 'bras bu gtan brlag par dam tshig chen po la gtogs so// gal te dam tshig nyams par tshor nas 'gyod/ slan chad sdoms na mkhas pa bshags su btub la/ nyams par yid ches shing snod ma yin pa la spro ba ni bskang tshad las 'das so// dam tshig chen po thams cad kyi rgyal po sa ma ya bkod pa'i rgyud las/ kun tu bzang po thugs kyi gdams ngag gi le'u ste nyi shu rtsa dgu pa'o/ /// de'i phyir sems dpa' chen po dam tshig ces pa ni/ sangs rgyas thams cad kyi 'byung gnas/ lta ba thams cad kyi la bsdu ba/ sgrub pa thams cad kyi phul/ 'phrin las thams cad mthar phyin pa/ man ngag thams cad kyi nying khu/ dgongs pa thams cad lhun gyis grub pa/ dus gsum gyi sangs rgyas thams cad kyi snying/ rnal 'byor pa thams cad kyi srog/ phyi nang mkha' 'gro dbang phyug gi yang srog/ srog 'di las gang 'das na/ chos kyi sku yang 'jig par 'gyur na/ gzhan smos kyang ci dgos te/ na ra ga te ha ra han no// gang ma nyams shing ma 'das pa dpal gyi dpal lo/ / gang don du gnyer ba byang chub kyi sems bde ba chen por lhun gyis grub pa'o// gang dam tshig rgyab tu 'dor ba dus thams cad du 'bras bu gtan med cing yang gting chen po rtag pa'o// dam tshig chen po 'di ni sangs rgyas thams cad kyi thugs dam yin no/ / ma mo dang mkha' 'gro'i dam tshig yin no// rnal 'byor thams cad kyi dbyar dam yin no// sangs rgyas kyi dbu snyung ngam pa tshogs 'khor gyi bro/ rnal 'byor gyi mna'/ mtha' yas pa'i sems can gyi srog tu gsungs pas/ sangs rgyas kyi sangs rgyas dbang du bzhugs pas ye shes sems dpa'o// gshed ma'i gshed mar dpang du bzhugs pas/ badzra yak+Sha'o// srog gi yang srog dbang yin pas tsit+ta sa ma ya'o/ / dam tshig dam pa ma nyams na rtsol sgrub dang 'phrin las kyi sgo ci yang ma byas kyang/ 'di ltar snang ba'i chos thams cad kyang chos nyid ma skyes pa'i klong las dngos po mtshan mar rdul cha tsam yang mi 'da' bar 'gyur/ phung po dang/ khams dang/ skye mched dang/ rnam par shes pa thams cad lha'i dkyil 'khor la nga dang/ bdag dang/ phyogs dang/ ris su rdul tsam cog kyang mi 'da' bar 'gyur/ tsit+ta lha ye shes sems dpa' sku mtshon gang ba'i dkyil 'khor du skye 'chi dang 'pho 'gyur med par mi 'da' bar 'gyur/ srog dang rtsa dbugs badzra yak+Sha'i skur bar du gcod pa'i gnyen po cis kyang mi tshugs pa'i sangs rgyas las mi 'da' bar 'gyur/ rigs kyi gtso bo sems dpa' chen po nyon cig/ rdzogs chen a ti yo ga la// phyir rgol theg pa rim pa brgyad po'i dmag gis bskor srid na// 'bros pa'i rdzong la bzhi yod de/ / 'dod pa mi sgrub mi 'dod mi spong dang// 'gal ba mi sdud phyal bar mi gtong ba// de yang a ti 'bros pa'i mkhar// ma bkag ma zhes gzer bu chen po bzhi// de yang rdzogs tshan a ti 'bros pa'i mkhar/ / gzhi gcig gsal ba tha dad skye med pas// gtan tshigs chen po bzhi yi mkhar// de yang a ti 'bros pa'i mkhar// snang srid thig le chen por gcig/ de yang a ti 'bros pa'i mkhar// srung ba'i mi lus rig pa yin/ / lung rig khas len 'gro gleng yin// lung med smyon pa'i tshig 'dra ba// rigs chad pa la len mi gdab// kun gyi snying du sdug ma srid// dper na smad 'tshong bu bzhin no// brdeg pa'i mtshon cha gnyis yod do/ / gzhan gyi 'dod pa khas len na// rno la myur mgyogs mtshon cha brdeg/ grub mtha' ma longs lan mi gdab// phyag rgya bzhi yi ra bar gzhug/ gcig gam tha dad brtags pa yis// 'dod pa dri sde gzhan sun gdon/ khas len med na lan mi blan// stong pa'i klong la 'bros mtha' bskyon// nga rgyal smra na 'go sbre bya// rigs pa'i mda' nan che na 'brel ba bri// 'brel ba ma grub g.yang la bskyur// ces gsungs so/ / rin po che sgron ma 'bar ba'i rgyud las// a ti rang la gzhung bskyab cing gzhan sun gdon pa'i le'u ste zhe gsum pa'o//// de nas rigs kyi gtso bo sems dpa' chen pos zhus pa/ dam pa dang po'i sangs rgyas lags// phyi pa mu stegs theg pa dang// nang pa sangs rgyas theg pa gnyis// de yi khyad par ji ltar lags// thog mi ston pas bstan du gsol// thog ma'i ston pas gsungs pa/ / stong pas sdug bsngal bdag bzhir 'dod// ma rtogs pas na mu stegs yi// lta ba sum brgya drug cu'i grangs rnyed 'dod// bsdus pas drug cu rtsa gnyis te// de las bsdus pas nyi shu ste// de las bsdus pas rnam pa bzhi/ / de yang rnam pa gnyis su 'dus// rtag pa dang ni chad pa'o// chad pa'i lta ba rten chad dang// rgyu chad lam chad 'bras bu chad pa bzhir// lung dang rig pa gnyis kas bsgrub// rtag par 'dod pa'i lta ba ni/ / phyogs rtag dpe rtag rgyu rtag 'bras bu rtag pa bzhir// lung dang rig pa gnyis kas bsgrub// de yi lta ba phyogs btsal ba// sems can kun gyi snying dkyil na// rtag pa bzhi yi dngos po gcig/ rgyu rkyen gnyis kyi ma bskyed pas// lus kyi bong dang sbyar te gnas// lta ba de dag gsal bar ni// sde snod kun na gsal ba yod// ces gsungs so// rin po che sgron ma 'bar ba'i rgyud las/ 'jig rten pa'i lta ba bstan pa'i le'u ste zhe bzhi pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// sems nyid thig le nyag gcig la// theg pa dgu ru ci phyir gdags/ / brtags pa'i gtan tshigs ji ltar lags// thog ma'i ston pas bstan du gsol// thog ma'i ston pas gsungs pa/ rigs kyi gtso bo nyon cig/ gzhi mo 'od gsal chen po la// ma rig rkyen gyis gzung 'dzin skyes/ / sems kyi ngo bo tha dad shar// dbang po rab 'bring gsum du byung// dbang po rab kyi don du ni// nang gi bskyed rdzogs rnam gsum bstan// dbang po 'bring ni don du ni// phyi yi kri yog gsum du bstan/ / dbang po tha ma'i don du ni// mdo sde 'dul ba mngon pa gsum// sde snod kun gyi theg pa bstan// zhes gsungs so// rin po che sgron ma 'bar ba'i rgyud las/ theg pa dgu ru phye ba'i gtan tshigs bstan pa'i le'u ste zhe lnga pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// ston pa'i 'dul lugs rnam gsum la// drang don nges don gnyis su ci phyir gdags/ / theg pa che chung mtshan nyid de// bdag cag rnams la bstan du gsol// dam pa dang po'i sangs rgyas kyis gsungs pa// rigs kyi gtso bo sems dpa' chen po nyon cig/ 'jig rten pa yi gang zag la/ / mi chos lugs su drangs pa ni// lus ngag yid gsum gus par bstan// gang zag mtshan ma gtso bor 'dzin pa la// mtshan dang ldan pa'i skus drangs la// gang zag rang bzhin zhi ba la/ / chos nyid stong pa nam mkha' lta bur drangs// gang zag mi mthun so sor la// rgya mtsho tsam gyis chos nyid drangs// mu mtha' med par gsungs pa rnams// rgyu 'bras gnyis las ma gtogs pas// mi mthun bye brag phye ba med/ / theg chen rigs dang ldan pa la// chos nyid spros dang bral ba yi// 'bras bu'i don la yid ches bya// theg dman tha ma'i rigs can la// rgyu yi dus na nan tan bstan// yang gsungs pa/ snying rje shes rab ldan pa yis// gzhan don gtso ru len pa la// theg chen rigs su bstan pa yin// blo dman shes rab chung ba la// thabs chen yan lag brgyad po yis// mi ldan gang zag dman pa la/ / theg pa chung ngu'i rigs su bstan// yang gsungs pa/ rigs kyi gtso bo sems dpa' chen po nyon cig/ byis pa rnams la drang don bstan// rnon po rnams la nges don bstan// sems kyi gnas skabs na/ ci spyod ci bsgrub ci brtsams rgyu yin la/ dus nam zhig ma go na grub pa'i 'bras bu mi bslu bar 'bras bu yin/ 'jig rten phyi mar dus mi 'debs// nam mkha' stong pa khungs mi 'dren// sems can skal ba chung ba la snyad mi 'dogs/ cer mthong cer rtogs cer grol// rtogs thob dus gcig tu'o// zhes gsungs so// rin po che sgron ma 'bar ba'i rgyud las/ blo'i khyad par gyis drang don dang/ nges don dang/ rgyu 'bras su bstan pa'i le'u ste zhe drug pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// sems nyid thig le nyag gcig la// mdo sngag gnyis su phye ba yi/ / de yi dgongs pa ji ltar lags// bdag cag rnams la bstan du gsol// dam pa dang po'i sangs rgyas kyis gsungs pa/ rigs kyi gtso bo nyon cig/ mdo sngags gnyis kyi khyad par ni// de la mdo sde'i 'dod gzhung ni/ / don dam mdo ru bsdus pa lags// kun rdzob tu ni spangs pa yin// 'bras bu gsang sngags 'dod gzhung ni// sprul sku da lta thob pa yin// lha dang rnal 'byor yul du gcig/ tha mal shes pa zlog dang gsum/ / sa lam dus gcig sbyangs dang gcig/ 'byung bzhi sems su shes dang gnyis// bka' yi zhen pa bzlog dang gsum// rtogs pa rnams la rgyu med dang// rnal 'byor rnams la sgrub rgyu bral/ / 'bras bu lam du byed dang gsum// rtog tshogs lha ru bsgyur ba dang/ lha dang rnal 'byor gnyis med dang// de nyid don gsum yin dang gsum// nyon mongs dug lngas rgyu byas nas// mchog gi dngos grub bsgrubs pas na/ / rgyu yi khyad par bstan pa yin// lha dang dkyil 'khor lam bcas pas// lam gyi khyad par bstan pa yin// rang sems gdod nas dag pas na// rtogs tshad gzhan nas btsal du med/ / de las 'bras bu mchog grub pas// dus kyi khyad par phye ba yin// tshe gcig lhun grub sbyor ba yis// rang don nye bar sbyor ba yin// 'phrin las rnam bzhi rdzogs pas na// gzhan don mtha' ru phyin pa yin/ / sgra dang tshad mas gzhig tu med pa yin// don gyi khyad par bstan pa yin// mnyam gzhag rjes thob med pas na// ting 'dzin khyad par bstan pa yin// nyon mongs nyon mongs sgrol bas na/ / dgongs pa'i khyad par bstan pa yin// lus ngag yid gsum sku gsung thugs su sbyor bas na// tshogs kyi khyad par bsgrub pa yin// kha zas kyi rnal 'byor dang ldan pas na// longs spyod phun sum tshogs pa yin/ / yan lag sgul spyod gar du shes pas na// mdzad spyod khyad par bstan pa yin// 'dod chags la sogs dug lnga yis// dmigs pa'i sems ni zin pa yin// bsam gtan khyad par bstan pa yin// tshe gcig gis lhun gyis grub pa'i rigs 'dzin thob pas na/ / dbang po rab 'bring gi spyod yul du bstan pa yin pas// zhes gsungs so// rin po che sgron ma 'bar ba'i rgyud las/ mdo sngags su bstan pa'i le'u ste zhe bdun pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// theg pa dgu ru phye ba'i shes rgyud so so'i ngo bo la// 'jug sgo so sod yod dam me/ / thog ma'i ston pas bstan du gsol/ thog ma'i ston pas gsungs pa// thig le nyag gcig ma rtogs pa// shes rgyud so so'i ngo bo la/ 'jug sgo lta spyod mi mthun pas// nyan thos dag gi 'jug sgo ni/ / bden pa bzhi yi sgo nas 'jug/ sdug bsngal kun 'byung 'gog pa lam dang bzhi// nyan thos dag gi lta ba ni// phung po la sogs chos rnams la// mi rtag pa dang du mar mthong// gang zag la ni bdag med rtogs/ / nyan thos dag gi sgom pa ni// 'khor bar skyes pa'i rtsa ba kun// bdag tu 'dzin pa las byung ba// skyes bu lus gcig sha gang la// mi gtsang sum cu so drug la// bdag ces bya ba ma rnyed pas// shes pa tshom gyis song ba la/ / bsam pa dang bral gzhag pa'o// nyan thos dag gi spyod pa ni// sbyangs pa'i yon tan bcu gnyis te// 'tsho ba'i yon tan bcu gsum po/ nyan thos pa'i sa dag ni/ dgra bcom pa'i sa'o/ / yang gsungs pa/ rang rgyal dag gi 'jug sgo ni// rten 'brel bcu gnyis sgo nas 'jug/ rang rgyal dag gi lta ba ni// nyan thos las kyi khyad par ni// chos la bdag med phyogs gcig rtogs pa'o// rang rgyal dag gi sgom pa ni/ / dper na gnyid ni sad pa la// dbang po yul la ma 'phros shing// rang rgyal dag gi spyod pa ni// nyan thos pa dang mthun par spyod pa ni// nyan thos pa dang mthun par spyod/ / sa ni rang sangs rgyas kyi sa// zhes gsungs so// rin po che sgron ma 'bar ba'i rgyud las/ nyan thos rang rgyal ba'i lta sgom mdor bstan pa'i le'u ste zhe brgyad pa'o//// de nas rigs kyi gtso bos zhus pa/ thog ma'i ston pa lags/ mdo sde theg pa chen po yi// lta sgom mdo ru bsdus pa'i don// bdag cag rnams la bstan du gsol// thog ma'i ston pas gsungs pa/ rigs kyi gtso bo nyon cig/ mdo sde theg pa'i 'jug sgo ni/ / bden pa gnyis kyi sgo nas 'jug/ rnam rig sems tsam lta ba ni// kun brtags gzhan dbang yong grub gsum du 'dod// rnam rig sems tsam sgom pa ni// rang gi rig pa'i ngo bo ni/ / gsal la rtogs pa med pa yis// gzung 'dzin gnyis dang bral bar 'dod// rnam rig sems tsam spyod pa ni// pha rol drug tshad med bzhi la spyod// rnam rig sems tsam sa dag ni// bcu gcig kun tu 'od kyi sa ru 'dod/ / yang gsungs pa/ theg chen dbu ma'i lta ba ni rnam pa gsum yod de/ rnal 'byor pa yi dbu ma ni// kun rdzob tu ni sems snang 'dod// don dam rang bzhin med par 'dod// rnal 'byor pa yi sgom pa ni/ / rang bzhin med pa'i ngang la 'jog/ spyod pa pha rol phyin drug tshad med bzhi la spyod// mdo sde spyod pa'i dbu ma ni// rnal 'byor yod pa dag dang mthun// rab tu mi gnas dbu ma ni// yod pa'i mtha' la mi gnas pa/ / med pa'i mtha' la mi gnas te// gnyis ka la yang mi gnas pas// gnyis med pa yang mi gnas so// rab tu mi gnas lta ba yin// rab tu mi gnas sgom pa yin// 'dod med spyi yi chos nyid sgom/ / rab tu mi gnas spyod pa ni// mdo sde rnal 'byor nyid dang mthun// ces gsungs so// rin po che sgron ma 'bar ba'i rgyud las/ mdo sde theg pa'i lta sgom bsdus pa'i le'u ste zhe dgu pa'o/ /// de nas rigs kyi gtso bos zhus pa/ dam pa dang po'i sangs rgyas lags// phyi rgyud sde gsum theg pa'i lta sgom mdo ru bsdus pa'i don// bdag cag rnams la bstan du gsol// dam pa dang po'i sangs rgyas kyis gsungs pa/ rigs kyi gtso bo nyon cig/ rig sngags kri ya'i 'jug sgo ni// gza' dang skar ma dus tshod dang// mtshan ma bzang po brtags nas 'jug/ rig sngags kri ya'i lta ba ni// chos nyid rnam par dag pa'i sems/ / mtha' dbus bral ba'i chos nyid 'dod// rig sngags kri ya'i sgom pa ni// cho ya yan lag bcu gcig gis// bskyed nas rje bo'i tshul du 'dod// rig sngags kri ya'i spyod pa ni/ / khrus dang gtsang sbra dag la spyod// 'bras bu kri ya rdo rje 'dzin pa'i sa// yang gsungs pa/ u pa ya yi 'jug sgo ni// dag pa gsum gyi lam nas 'jug/ u pa ya yi sgom pa ni// rnam par mi rtog pa yi stong par sgom/ / gzhi dang ldan pa'i lha snang 'dod// u pa ya yi spyod pa ni// las su khrus dang mchod pa byed// u pa ya yi 'bras bu ni// lta spyod so so tha dad kyis// dper na rgan mo 'khar thogs 'dra/ / yo ga dag gi 'jug sgo ni// mtshan ma med pa'i sgo nas 'jug/ yo ga dag gi lta ba ni// chos nyid dag pa'i byin rlabs las// snangab lha dang lhag mor lta// rang dang 'dra ba'i grogs por 'dod// rnal 'byor yo ga'i sgom pa ni/ / mngon par byang chub lnga dang ni// cho 'phrul bzhi dang ldan par sgom// rnal 'byor yo ga'i spyod pa ni// ting 'dzin las su rung par spyod// 'bras bu sa yi rang bzhin ni// chos dbyings stug po bkod pa'i sa/ / zhes gsungs so// rin po che sgron ma 'bar ba'i rgyud las/ phyi rgyud sde gsum gyi lta sgom mdor bsdus pa'i le'u ste lnga bcu pa'o//// de nas rigs kyi gtso bo sems dpa' chen pos zhus pa/ kye thog ma'i ston pa lags/ bskyed rdzogs gnyis kyi lta sgom mdor bsdus pa// bdag cag rnams la bstan du gsol// thog ma'i ston pas gsungs pa/ rigs kyi gtso bo nyon cig/ rnal 'byor ma hA'i 'jug sgo ni/ / shes rab thabs dang ldan pa yi// gnyis su med pa'i sgo nas 'jug/ ma hA yo ga'i lta ba ni/ bden pa dbye ru med pa yi// bdag nyid chen po'i dkyil 'khor du// spyod yul kun dang bral bar lta/ / ma hA yo ga'i sgom pa ni// ting 'dzin gsum dang ldan pa ste// thabs dang shes rab zung 'brel bas// skye ba med pa'i sgom par bstan// ma hA yo ga'i spyod pa ni// ta na ga na dang/ dam rdzas bdud rtsi lnga la spyod/ / ma hA yo ga'i 'bras bu ni// rnal 'byor lus ngag yid gsum ni// sku gsum rdo rje 'chang gi sa// a nu yo ga'i 'jug sgo ni// dbyings dang ye shes sgo nas 'jug/ a nu yo ga'i lta ba ni// rang rig spros dang bral bas chos dbyings yin/ / dbyings nyid 'gag pa med pas ye shes shar// dbyings dang ye shes gnyis su med pas// byang chub chen po'i lta ba yin// a nu yo ga'i sgom pa ni// don rnams rtogs pas gnyis med sgom/ / don la rang bzhin mtshan ma med// rtags la dus gsum lha ru sgom// a nu yo ga'i spyod pa ni// zhi rgyas dbang dang mngon spyod bzhi// gzhan don yongs su rdzogs par byed// sa dang 'bras bu bstan pa ni/ / sku gsum ye shes bzhi rdzogs nas// kun bzang dbyer med sa dang ldan// zhes gsungs so// rin po che sgron ma 'bar ba'i rgyud las/ bskyed rdzogs gnyis kyis lta sgom mdor bstan pa'i le'u ste nga gcig pa'o/ /// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags/ rdzogs chen a ti yo ga'i lta sgom mdor bsdus pa'i don/ rigs can skal bar ldan pa la/ / thugs rje'i tshul gyis bstan du gsol// dam pa dang po'i sangs rgyas kyis gsungs pa/ rigs kyi gtso bo sems dpa' chen po nyon cig/ a ti yo ga'i 'jug sgo ni// rtsol ba dang bral ba'i shes rab kyis/ / nges pa'i gsang sgo btsal nas ni// lhun grub 'od gsal sgo nas 'jug/ a ti yo ga'i lta ba ni// mchog tu gsang ba'i don mchog ldan// bsam med kun tu 'char ba yin// kun bral ji ma spangs pa yin/ / rgya chad phyogs lhung med pa yin// bsam med brjod las 'das pa yin// re dogs sgro skur bral ba yin// lta ba med pa'i lta ba ni// de ni lta ba'i dam pa yin// a ti yo ga'i sgom pa ni/ / skyes bu yis ni gdeng chud nas// ma dmigs kun tu gsal ba yin// sems chos sku'i 'od gsal du bzhugs pa yin// sgra gsung gi zer la rol pa yin// thugs nam mkha'i klong na gnas pa yin// sku gsung thugs dbyer med pa rang 'od rang la shar ba yin/ / a ti yo ga'i spyod pa ni// gdeng gsum khong du chud pa yin// 'dzin chags bral bas spyod pa yin// blang dang dor dang rtsol dang sgrub// gang yang med pas spyod pa yin/ / mi spangs mi sgrub rtsol med pas// spyod pa'i gdeng chen bstan pa ni// a ti sa dang 'bras bu bstan pa ni// sa la sbyangs du med pa yin// lam la bgrod du med pa yin// ting 'dzin dmigs su med pa yin/ / 'bras bu lhun grub rang chas yin// ma bsgrubs sku gsung gzhi la grub// ma bsags tshogs rnams don gyis rdzogs// ma brgyud ye shes rang la gsal// ces gsungs so// rin po che sgron ma 'bar ba'i rgyud las/ / rdzogs pa a ti yo ga'i lta sgom mdo ru bsdus pa'i le'u ste nga gnyis pa'o//// de nas rigs kyi gtso bo sems dpa' chen pos zhus pa/ kye/ dam pa dang po'i sangs rgyas lags// rin chen dam pa'i sgron me bstan/ / de yi gtad rgya bstan du gsol// dam pa dang po'i sangs rgyas kyis gsungs pa// rigs kyi gtso bo sems dpa' chen po nyon cig/ rin chen sgron ma 'bar ba 'di// sems dpa' chen po khyod la gtad/ / sems dpa' chen po khyod nyid kyis// rigs can las dang ldan la gtod// de nas 'jam dpal bshes gnyen gyis// dkon mchog yi dam lha rnams la// rin chen sna bdun mchod pa phul/ / zhu ba zhus pas mnyes pa med// the tshom chod pas yid ches skyes// man ngag dam pa bcud ldan 'di// mnyes pa bdun dang mdud pa lnga// dgrol ba'i rigs can ma rnyed nas// rgya gar rdo rje gdan drung gter/ / rgya nag ri bo rtse lnga'i gter// kha che me ri 'bar ba'i gter// shar phyogs bya rgod spungs pa'i gter// bal po 'phags pa shing kun gter// au rgyan d+ha na ko sha'i gter// bod yul rgyal po bang so'i gter/ / de rnams pa yi gnas su ni// gter srung bcas la sba zhing gtad// ces gsungs so// rin po che sgron ma 'bar ba'i rgyud las/ rgyud kyi sba thabs dang gtad pa'i rgya bstan pa'i le'u ste nga gsum pa'o/ /// rin po che sgron ma 'bar ba'i rgyud rdzogs so//// rgya gar gyi mkhan po bi ma la mi tra dang/ zhu chen gyi lo tsa ba gnyags dz+nyA nas dbu tshal gser khang du rgyal po yon mchod kyi don du bsgyur cing gtan la phab pa'o/ /// rgya gar skad du/ rat+na pra tI paM tan tra nA ma/ bod skad du/ rin po che sgron ma zhes bya ba'i rgyud/ bcom ldan 'das gsang bdag bde ba chen po la phyag 'tshal lo/ / 'di skad bdag gis thos pa'i dus gcig na/ thog ma med pa'i dus nyid na ma byung ma skyes mnyam pa'i ngang/ chos dbyings mnyam pa'i gnas na/ snying po rang byung gi ston pa la rang bzhin gnas pa'i 'khor dang/ rang bzhin 'od kyi 'khor dang/ rang bzhin snang ba'i 'khor dang/ snang tshul rig pa'i bstan pa la bkod do// yang de'i tshe gsal ba phyi nang med pa'i gnas/ rig pa'i rgyal po'i ston pa la 'khor gnyis kyis bskor te/ rlung rnam pa gnyis 'gyu ba'i dus su mun snang rgyab gyes pa'i bstan pa la bkod do// de'i tshe de'i dus na chos kyi dbyings gnyis su med pa'i dus na/ bcom ldan 'das gsang bdag chen po la 'khor gsum gyis bskor nas bstan pa gsum gyi don la bkod do/ / de nas 'khor gyi nang nas sems dpa' rdo rje des/ ston pa'i spyan sngar 'dug nas rgyud zhu ba'i tshig 'di skad ces gsungs so/ / rgyu dang 'bras bu'i chos la la bzla ba'o// khyad par don gyi rang bzhin ji lta bu// zhes gsol ba dang/ ston pa gsang bdag chen po des// 'khor gyi nang nas sems dpa' rdo rje la// ma byung ma skyes sngon rol na/ / ming med shes med mnyam pa las// snang ba gsum gyi dkyil 'khor nas// bde gshegs gsum gyis skur snang nas// 'dod pa'i 'bras bu 'char ba'i don// khyad par don gyi rang bzhin 'di gsungs so/ / rgyud ces bya ba'i rnam grangs bstan pa ni// dngos po lnga dang ldan tshad brgyad// nges tshig dgongs gzhi dbye ba'i don// 'thun pa'i dpe yi don rnams bstan pa'o// ma g.yos mnyam pa'i rang bzhin ni/ / snying po nyid las ma g.yos pa med// ma rtogs rtogs pa'i tha snyad med// rgyu las ma byung rkyen dang bral// mi zad gter gyi mdzod chen po// yon tan 'byung ba'i rin po che// sangs rgyas sems can kun gyi gzhi/ / ming ma thogs kyi stong chen po// shugs nas byung nas rim brgyud pa// snang ba gsum gyi rang bzhin las// ston pa gsum gyi ngo bor shar// sku gsung thugs rje'i byin rlabs la// mos pa'i 'bras bu so sor snang/ / 'dod pa'i bsam pa'i re ba skong// yid gsum 'khor lo'i rim pa las// gsal ba'i rnam pa gcig tu shar// gsal ba'i 'od las kha dog lnga// med las yod bzung rgyu de la/ / rigs drug sems can de las byung// ston pa'i thugs rje'i byin rlabs kyis// mos pa tha dad drang ba'i phyir// thabs kyi bye brag bsam mi khyab// rgyu dang 'bras bu'i chos rnams ni// gdul bya drang ba'i thabs su bstan/ / dbang dang dam tshig sdom pa dang// lta spyod sgom pa 'bras bur bcas// snying po rtogs pa'i thabs su bstan// 'khrul pa'i ngo bo bkrol nas ni// chos nyid ma dang ngo sprad do// 'gyu ba med na sgom mi dgos/ / blo dang bral nas yang dag nyid// dran pa'i rnam pa mi skye zhing// ma bsgoms snying po 'char ba'i don// gang snang yul 'jug mi bya/ 'dzin dang bral ba'i ngo bo nyid// chags dang bral ba'i rang bzhin gnas/ / rang gnas snying po de bzhin nyid// rtsol sgrub 'dod pas rtogs mi 'gyur// shes med gsal ba'i ngo bo nyid// rnam rtog 'khrul pa rang bzhin zhi// yid gnyis the tshom kun dang bral// yi ge med pa'i gsung gis ni/ / gsang bdag chen po dgongs pa ston// 'khrul med snying po goms shing rtogs// stong nyid ye shes ngo sprad pas// rin chen rang snang gzhag par bya// theg pa mchog gi don 'dzin cing// rgyu med che ba'i don mchog go/ / snying po mtha' bral dkyil 'khor 'dir// zhe 'dod med par 'jug na bde// dang po gnas lugs gtan la dbab// gnyis pa 'khrul pa rtsad nas bcad// gsum pa ldog thabs nyams su blang/ / bzhi pa ma bu ngo sprad do// snying po nyid kyi ye shes de// sgra yi don la gzhag par bya// phyi rol yul la mi 'jug na// dran pa'i sems med 'gyu ba bral// stong pa'i ngang la sor gzhag pa// nam mkha' lta bur bcos pa med/ / snying po nyid la cog 'jog go// dbang po ngo la gang snang ba// dbye bsal med par shes par bya// rnam gsum ston pa ma lus pa'i// thugs las byung ba'i man ngag bcud// skal ldan rnal 'byor rtogs pa'i mchog/ rang snang ma bcos bde ba nyid// rang byung lhun grub ye shes klong// chos nyid rang gsal ngang la gnas// spros bral don gyi theg pa la// 'gyu med snying po nyid du gnas// ma bcos mnyam nyid ye shes klong/ / rnam rtog dran pa'i sems dang bral// 'khrul ba'i 'dzin pa sa bkrol la// snying po 'dod pa med par gzhag/ rnam rtog 'khrul ba'i dri ma bral// ci yang ma yin dngos gzhi med/ / rang lugs ye shes nyid la gnas// dus gsum sangs rgyas dgongs pa'o// tha mal shes pa 'di nyid la// 'gyu ba med na de nyid yin// dran pa'i sems la don mi gnas// lus ngag yid gsum rtsol dang bral/ / drang ba'i chos la sems mi skye// theg pa che la yid mi 'gyu// bla ma gang gi snying ltar gzung// mos pas rang gi bya ba btang// rin chen sgron ma'i ngo bo 'di// srog dang bral ba'i kha bzhin bsdam/ / zhes gsungs so// rin po che sgron ma'i rgyud las/ gleng gzhi bstan pa'i le'u ste dang po'o//// de nas sems dpa' rdo rje des// ston pa gsang bdag chen po la// dngos po ji ltar gnas pa'i don/ / de yi ngo bo ji ltar lags// zhes gsol pas/ ston pa gsang bdag chen po des// rang bzhin lhun grub don bstan pa// ma byung ma skyes sngon rol na// ming med mnyam pa chen po'i don// shes med rtogs med mdzod chen po/ / snying po nyid kyi rang bzhin la// ma rig ye shes gnyis mi mnga'// 'khrul dang ma 'khrul gang yang med// 'khrul rtog bag chags sna tshogs dang// ye shes rang snang ngo bo gnyis// rang byung nyid la dbye ba med/ / dngos po nyid la ngo bo bral// snying po nyid kyi rang bzhin la// thog ma med cing tha ma bral// blang dor med pa'i mnyam pa'o// dge mi dge yi sems dang bral// mtha' dbus mi mnga' phyogs ris med/ / ji bzhin nyid las ma g.yos kyang// 'od kyi rang bzhin gsal bar snang// thams cad rtsa ba byang chub sems// mi zad byung ba'i mdzod chen po// rang bzhin ma bcos lhun gyis grub// ngo bo ci yang ma yin las/ / mtshan nyid tha dad bsam mi khyab// dngos med stong pa'i sems nyid la// chos nyid chos can mi 'byed pas// gnyis med snying po bden pa'i don// bden brdzun 'khrul pa'i mtha' mi 'dzin/ / snying po'i don la zhe 'dod med// bsam med rin chen sgron ma 'di// ma bcos ma mdzad byang chub sems// thams cad rtsa ba byang chub sems// ngo bo ma grub nam mkha' bzhin// rgyu las ma byung snying po la/ / nam yang skye bar mi 'gyur ro// sangs rgyas sems can ngo bo gcig/ ngo bo med pa'i byang chub sems// snang dang stong pa'i mtha' mi gnas// rtag dang chad pa las grol ba// rigs drug sems kyi 'khrul pa dang/ / rgyal ba'i ye shes dgongs pa gnyis// byang chub sems kyi ngo bor mnyam// ma byung ma skyes bar do na// sems kyi ngo bo ji ltar gnas// mkha' dang 'ja' tshon tshul du gnas// ji bzhin ma bcos ma bslad pa/ / rang byung snying po kun gyi gzhi// ma bcos snying po kun gyi bdag/ rang gnas byang chub kun gyi gzhi// rtog 'khrul med pa'i ngang la gnas// ma phye mi phyed stong chen po// 'gro 'ong med pa'i gnas chen po/ / shes med rtog med 'gyu ba med// myong rig med pa'i dngos gzhi can// gang nas ma byung btsal mi bya// cir yang mi snang dmigs su med// dngos med snying po'i rang bzhin can// bya med chags med bde ba'i ngang/ / rkyen med 'gyur med sgrib pa med// rang lus rang gnas ma bcos sems// ji bzhin kun 'byung 'char ba'i sgo// snying po bya bral gter gyi mdzod// mi 'gyur rang bzhin bde ba che/ / zhes gsungs so// rin po che sgron ma las/ gnas lugs bstan pa'i le'u ste gnyis pa'o//// de nas sems dpa' rdo rje des// ston pa gsang bdag chen po la// gnas lugs rang bzhin de ltar gnas pa la/ / 'gro drug sems can ji ltar 'khrul// 'khrul pa'i ngo bo ji ltar lags// 'khrul pa'i lugs ni ji ltar 'khrul// gsang bdag chen pos/ sems dpa' rdo rje la gsol ba// gnas lugs rang bzhin mnyam pa las/ / ma rtogs ma shes shugs las 'khrul// med la yod 'dzin 'khrul pa las// stong pa'i ngang las 'gyu ba'i rlung// gzhi dang rkyen dang 'gal ba gsum// rang ngo ma shes ma rtogs pas// rgyu ba'i rlung las rig pa shar/ / yin min mnyam pa'i ngang du myong// sems yin mnyam pa'i 'dod pa skyes// 'dod pas gsal ba nyams su myong// gsal ba kha dog lnga ru snang// 'od kyi dngos po rkyen du snang/ / med la yod gzung de las su// rigs drug sems can dag tu 'khrul// snying po rang ngo ma shes pa// dmus long mdun na gzugs snang 'dra// med kyang log par snang ba ste// gangs la ser po 'dzin pa 'dra/ / kun gzhi rnam shes gzhi byas nas// tshogs bdun shes pa'i rtsal du snang// rang ngo ma shes ma rig pa// rgan mo long ma'i mig dang 'dra// nga dang bdag gi ngo bor myong// gzung 'dzin phyi nang gnyis su gzung/ / khams gsum sdug bsngal nyams su myong// shing gi phrin bzhin sdug bsngal myong// rang ngo ma shes sgrib pa byung// rang las gzhan tshol gol sa byung// las dang shes bya'i sgrib pa dang// don med tshig gis gol ba dang/ / rnam rtog lta bas gol ba dang// spang blang spyod pas gol ba dang// sgom chags nyams kyi gol sa yin// snying po de nyid rtogs mi 'gyur// rtsol ba'i chos la mthar phyung nas// 'jig rten rgyu 'bras blo yi chos/ / shugs yis spang bya yin pa'o// 'dod pa'i mtha' la zhen pa dang// snang ba yul gyis rkyen byas pas// yang dag don gyi ngo mi shes// gzung ba'i 'khrul pas log par mthong// 'gro drug sems can thams cad ni/ / dug gsum nad kyis gzer ba la// nad kyi rgyu rkyen ma shes na// yun ring 'khor ba'i gnas su sdug/ ces gsungs so// rin po che sgron ma las/ 'khrul pa bstan pa'i le'u ste gsum pa'o/ /// de nas sems dpa' rdo rje des// ston pa gsang bdag chen po la// 'khrul ba ldog thabs man ngag ni// dbang bskur byin rlabs 'bras bu ni// thabs kyi bye brag yan lag gang/ / zhes gsol ba dang/ ston pa gsang bdag chen po des// dbang bskur rang bzhin don bstan pa// dbang gi ngo bo dbye ba dang// bskur thabs byin rlabs 'bras bur bcas// ma skyes skye ba med pa'i dbang/ / mtshan ma'i dri ma med pa nyid// snying po mngon du bstan du med// ci yang ma yin dmigs su med// lha dbang lus la bskur ba dang// chos dbang sems la bskur lugs ni// lha dbang lus la bskur lugs ni/ / gnas lnga dag tu bum pa'i dbangabaskur ba// phung po lnga dang nyon mongs lnga// lha dang ye shes dag tu dbang bskur ro// rdzas dbang lce la bskur ba ni// gnas dang rdzas dang gsang bskur ba'o/ / thabs dang shes rab dbang bskur ni// gnyis su med par nyams kyis bskur ba'o// dbang bskur byin brlabs dri ma dag pa ni// lus ngag sems kyi dri ma dag/ 'bras bur bde bar gshegs pa'i gnas/ / chos dang sems la bskur ba ni// shes med snying po bum pa'i dbang// gtan du med pa'i gsang ba'i dbang// nyams su myong ba ye shes dbang// zhe 'dod bral ba brda'i dbang ngo// dbang bzhi bskur bas dri ma dag/ shes bya'i dri ma dag pa dang// blo yi dri ma dag pa dang// yid gnyis dri ma dag pa dang// phyi nang yongs su dag pa'o// stong pa'i ngang gsang bum pa'i dbang// gsal la brjod med gsang ba'i dbang/ / gsang ba nyams myong shes rab dang// nyams la ma zhen brda yi dbang// dbang bzhi bskur bas dri ma dag/ lhan cig skyes dang kun tu btags// smra brjod tshig dang zhen pa grol// bskur bas byin rlabs 'bras bu ni/

CLOSE WINDOW