/ // rgya gar skad du/ dun te mi le kar ma tsakra/ bod skad du// yi ge 'bru bshad las kyi 'khor lo/ dpal kun tu bzang po rtog pa mngon du gyur pa'i sangs rgyas la phyag 'tshal lo/ / 'das pa'i dus ma byon pa'i sngon rol na// gzhi lhun gyis grub pa rgya yongs su ma chad pa zhes bya ba// kun gyi gzhi sa chen po/ mi zad pa'i mdzod chen po/ sangs rgyas thams cad kyi 'byung gnas/ sems can thams cad kyi skye sgo/ longs sku 'byung ba'i dus sa/ rgyud lung thams cad bskyed pa'i ma/ bstan pa bskyed pa'i phye mo/ ston pa 'byung ba'i 'byung sa/ ma rmos pa'i lo tog/ ma bskyed pa'i 'bras bu/ / dus gsum gyi pha ma/ cang shes kyi rta pho/ rang byung gi mi pho/ stobs kyi glang po/ nor bu rin po che/ thams cad skyed pa'i btsun mo dam pa'i dpal/ de sprul nas spyod pa'i 'khor lo/ thams cad 'khor lo sgyur ba'i blon po/ / bde ba chen po'i 'byung gnas// 'gag pa med pa chen po de nas/ dang po'i sangs rgyas gzhi ma de ni yi ge a yin te/ rdzogs pa'i sangs rgyas a las byung// a ni yig 'bru kun gyi mchog/ don chen yi ge dam pa yin// snang ba dbyibs kyi a dang grag pa sgra yi a// mtshon pa tshig gi a dang bkod pa yi ge'i a// ye shes yang dag gzhi yi a// 'di ni yang dag gzhi yi a// a ni skye med nam mkha' dra/ / nam mkha'i ngang las a byung bas// as ni tshig 'bru thams cad bskyed// tshig gi a ni ma yin don gyi a// tshig tu brjod pa spangs pa ste// brjod pa kun gyi rgyu yi mchog/ tshig kun rab tu gsal bar byed/ / ces gsungs so// de la dang po thog ma med pa'i dus nyid na// a yi gzhi ru gnas pa yin// a shes sha yi gzhi ru gnas// ye nas yod pas nga ru gnas// sku gsung gzhi yin ka ru gnas/ / thams cad gcig pas ma ru gnas// thams cad ma 'gag ha ru gnas// yi ge drug pa gzhi la gnas// dbyings dang sgrubs byed gzhan sel dang// phan pa'i rkyen dang gzhi tshang na// yi ge'i ngo sprod 'bru bshad pas/ / rtsal dang las dang 'khor lo gsum// des na yi ge 'bru bshad las kyi 'khor lo yin// thog ma las kyi gzhi med na// las kyis 'khor bar mi 'gyur ro// thog ma las kyi gzhi med na// rang grol dgongs pa 'char mi srid/ / de nyid gzhi las ma grub na// 'khor ba rnam dag 'byung mi srid// de la 'khor ba'i yig 'bru bshad par bya// dang po bzhi lnga rgyu drug rkyen lnga las// bsags pa'i las ni ma yin te/ / rgyu bzhi yi las su 'khrul ba yin// rgyu drug rkyen lngas 'dus byas phung po grub// thog ma'i rgyu drug phung po la// yid lus 'od lus sha khrag lus// lus su 'ong bar rang bzhin lus kyis len// len pa lus su 'khrul ba yin/ / lus kyi 'bras bu de la tshe tshad lung bstan med// rgyu dang rkyen dang rig pa sems btsal gsum// de gsum ring thung che chung dus tshod mtshungs// yi ge 'bru bshad 'khor lo las// gzhi dang rgyu'i ngo bo bshad pa dang po'o/ /// de nas 'bras bu'i 'bru bshad bstan pa ni// 'bras bu bsdu na rnam pa gsum// 'gro drug longs sku chos sku gsum// 'gro drug dag la rnam pa gnyis// mtho ris ngan 'gro rnam pa gnyis/ / ngan 'gro dmyal khams bco brgyad bzhi// yi dwags rnam smin gnas dang rgyu ba drug/ byol song sprul pa rnam smin rang rgyud gsum// mtho ris mi la rnam pa bzhi// gling bzhi tshe tshad lus tshad bzhi/ / 'dzam bu gling na mi rigs lnga// tshe tshad lung du bstan dang lung ma bstan// lus kyang lung bstan lung ma bstan// 'bras bu lung bstan lung ma bstan// de yang 'khor ba rnam pa bzhi ru 'dus/ / rgyu dang dkar nag 'bras bu bzhi// zhes gsungs so// 'bru bshad las kyi 'khor lo las/ bsdus te bshad pa ste gnyis pa'o//// de yang dkar po ltar 'khor ba// lha dang mi dang lha ma yin/ / rnam pa gsum du bshad pa yin// lha la rnam pa gsum du bstan// gzugs khams gzugs med 'dod pa khams// de la gzugs med mu bzhi ni// nam mkha' mtha' yas skye mched ni// bsam gtan 'du shes kun spangs nas/ / chos rnams nam mkha' lta bur sgom// de shi nas ni 'od gsal shar// nam mkha' lta bu'i las 'phro sad// 'od gsal nam mkha' mtha' yas sgom// nam mkha' mtha' yas mnyam byed pas/ / tshe lo bskal ba nyi shu thub// nam mkha' mtha' yas zhes su brjod// de nas rnam shes mtha' yas skye mched ni// nam mkha' lta bu de yang rnam shes nam mkha'i mtha' mnyam sgaum// de shi 'od la las 'phro 'thud/ / tshe tshad bskal pa nyi khri yid lus yin// rnam shes mtha' yas zhes su bshad// ci yang med pa'i skye mched ni// rnam shes mtha' yas de yang brtags nas ci yang med par sgom// de shi 'od la las 'phro 'thud/ / tshe yi tshad ni brgyad khri thub// ci yang med pa'i skye mched ces su brjod// yod min med min skye mched ni// 'du shes yod pa yang ma yin// med pa'ang ma yin no snyam du sgom// de shi 'od la las 'phro 'thud/ / tshe yi tshad ni brgyad khri thub// yod min med min zhes su bshad// ting 'dzin de yi skyes tshad dang// mtha' bzhi dras mthas ma mchod pas// dkar po ltar du 'khor zhes brjod// de lhung dmyal bar song gyur yang/ / ting 'dzin de yi khyad par gyis// gyang la sran ma brims pa 'dra// de nas thar pa thob 'gyur bas// bsam gtan sgom pa shin tu gces// zhes gsungs so// yi ge 'bru bshad 'khor lo las/ skye mched mu bzhi bstan pa de gsum pa'o//// de nas 'dod khams gnas rig bcu bdun yang// 'bru bshad 'di las shes par bya// rnam par smin pa'i yid lus ni// chu bur can du skye ba'i las dag dang/ / de yi 'od gsal 'phro 'thud dang// de yi tshe tshad lus po tshad// chu bur rdol par skye ba'i las mtha' dang// de yi 'phro 'thud dus tshod dang// de yi tshe tshad lus tshad dang// a cu zer bar skye ba'i las dag dang/ / de yi 'phro 'thud las dag dang// de yi tshe tshad lus tshad dang// kyi hud zer bar skye ba'i las dag dang// de yi 'phro 'thud dus tshod dang// de yi tshe tshad lus tshad ngang// so thams skye ba'i las dag dang/ / de yi 'phro 'dud las dag dang// de yi tshe tshad lus tshad dang// ut+pal ltar gas pa yi las// de yi las kyi so mtshams 'thud// de yi tshe tshad lus tshad dang// pad+ma ltar gas skye ba'i las/ / de yi las 'phro dus tshod dang// de yi tshe tshad lus tshad dang// pad+ma ltar cher gas skye ba'i las dag dang// de yi 'phro 'dud dus tshod dang// de yi tshe tshad lus tshad rnams// 'bru bshad 'di la gsal bar bshad/ / ces gsungs so// grang ba dmyal ba'i skabs te bzhi pa'o//// de nas yang bka' rtsal pa/ yang sos skye ba'i las dag dang// de yi las kyi 'phro 'thu dang// tshe dang lus tshad bstan pa'o/ / thig nag skyes pa'i las dag dang// de yi bar do 'thud pa dang// de yi tshe dang lus bong dang// bsdus 'jom skye ba'i las dag dang// de yi bar do las 'phro 'thud// 'thud pa'i 'bras bu lus dang tshe tshad dang/ / ngu 'bod skyes pa'i las dag dang// de yi bar do 'phro 'thud dang// de yi 'bras bu tshe tshad lus tshad dang// ngu 'bod chen por skyed ba'i las dag dang// de yang bar do 'phro 'thud dang// de yi 'bras bu lus dang tshe yi tshad/ / tsha bar skye ba'i las dag dang// de yang bar do las 'phro 'thud pa dang// de yi 'bras bu lus dang tshe tshad dang// rab tu tsha bar skye ba'i las dag dang// de yi bar dor mdud pa dang/ / de yi 'bras bu lus dang tshe tshad dang// mnar med par ni skye ba'i las dag dang// de yi bar dor 'phro 'thud dang// de yi 'bras bu tshe tshad lus tshad brgyad// nyi tshe nye 'khor las kyi skye ba dang// de yi tshe tshad bar do'i sa mtshams dang/ / rdo rje dmyal bar skye ba'i las dag dang// bar do med par 'bras bu 'byung ba'i tshe lus dang// gsang ba'i 'bru bshad 'di nas gsal bar bshad// ces gsungs so// tsha ba dang nyi tshe nyi 'khor rdo rje dmyal ba'i skabs ste lnga pa'o/ /// de nas yang bka' stsal pa/ mi dag yid kyi gzugs la bgegs ris stong phrag brgyad cu ste// lha ma yin g.yul bzlog nang nas rgyas par bshad/ / rtsa ba sde brgyad 'dre lnga 'dre gcig nyon mongs sems// dngos po med pas gzugs dbyibs kha dog med// de phyir yid kyi lus zhes brjod pa yin// bgegs rigs stong phrag brgyad cu yang// rtsa ba bcu dang brgyad du 'dus/ / steng lha'i gdon dang 'og klu'i gdon// shar phyogs dri za la sogs bcu rnams yin// de yang lha srin sde brgyad yin// klu yang byang chub sems dang ldan// de yi las dang skye ba'i las 'phro dang/ / de yi 'bras bu sa mtshams phyi yi nad// mkha' la rgyu dang gnas pa'i yi dwags rnams// 'bru bshad 'khor lo 'di las shes par bya// zhes gsungs so// mkha' la rgyu ba dang gnas pa'i yi dwags kyi skabs te drug pa'o/ /// de nas yang dag bshad bya ba// rnam par smin pa'i yi dwags bshad bya ba// phyi yi sgrib ba can du skye ba yis// de yi las dang 'phro 'thud pas// 'bras bu tshe dang lus tshad do/ / nang du sgrib pa can du skye ba'i las dang ni// de yi 'phro 'thud dus tshod dang// de'i 'bras lus kyi tshe tshad dang// sbyi mthun dag tu skye ba'i las dag dang// de yi 'phro 'thud dus tshod dang// de yi 'bras bu lus dang tshe tshad bstan pa'o/ / sgo khyud dag tu skye ba'i las dang ni// de yi las 'phro 'thud pa'i dus dang ni// 'bras bu lus dang tshe tshad ni// 'bru bshad 'khor lo 'di las bshad pa yin// zhes gsungs so/ / rnam par smin ba'i yi dwags kyi skabs te bdun pa'o//// de nas yang dag bshad bya ba// 'od kyi lus la bsam gyis mi khyab ste// bsdus pa'i 'od lus rnam pa bzhi ru bshad par bya// rgyal ba longs sku 'od la bzhugs pa dang/ / byang chub sems dpa' 'od kyi lus la bzhugs pa dang// 'od gsal lha rnams 'od kyi lus la bzhugs pa dang// 'dre 'od kyi lus la bzhugs pa yin zhes bya// de la rgyal ba 'od kyi lus su bzhugs pa yin/ / las ni bskyed rdzogs zung du 'brel ba yin// 'phro ni bar dor 'thud pa yin// 'bras bu sku lnga ye shes lnga ru smin pa// bskyed pa'i 'bras bu sku ru grub// rdzogs pa'i 'bras bu ye shes yin/ / ting 'dzin gsum dang tshad med bzhi// de nas bsrung mtshams la sogs yan lag bdun// mya ngan mi 'da' gsol gdab sogs/ sgyu ma lta bur thabs kyi lam// don dam rtogs pa shes rab lam/ / de ltar 'bras bu bsgrubs pas ye shes rtse gnyis gcig/ rang lus mtshan dang dpe byad rdzogs// 'od zer phung po bye ba khrag khrig 'od du 'bar// zhing khams 'od du snang ba ni// longs sku sgyu ma nyid kyi sbubs/ spyan lnga chags pa med pa'i bdag khyab bdag ye shes lnga yi bdag/ sangs rgyas lnga bdag cod pan can// sku lnga ye shes lnga yi bdag/ ye shes sku ste rang byung ba// rang bzhin gyis ni mya ngan 'das/ / zhes gsungs so// 'bru bshad kyi 'khor lo las/ longs sku 'od kyi lus su grub pa ste skabs brgyad pa'o//// de nas yang dag bshad bya ba// byang chub sems dpa' 'od kyi lus su 'jug ba ni/ / rnal 'byor rnam gsum nyams su blangs pa yis// rab kyis longs sku dngos su grub pa yin// 'bring gis byang chub sems dpar grub pa'i las// 'bras bu phyag rgya chen po ma grub byang chub sems dpa' 'od kyi lus su grub/ / mtshan dang dpe byad rgyan cha lhun mdzes pa yin// bcu gcig kun tu 'od kyi sa las ni// longs sku sangs rgyas mtshan dang dpe byad ldan// de nas yang zhi ba mya ngan las 'das nas 'tshang rgya par 'gyur ro/ / shes bya'i sgrib pa phra mo ma chod nas// phyir bzlog pa yang yod do// de phyir 'bru bshad 'di las shes// zhes gsungs so// byang chub sems dpa' 'od kyi lus su 'jug pa'i skabs te dgu pa'o/ /// de nas yang dag bshad bya ba// gzugs khams lha la rnam pa bcu bdun te// gzugs kyi 'dod chags dang ni ma bral zhing// gzhal yas khang chags pa'o// de yang tshangs par skye ba'i las ni gang ltar spyad/ / de yis 'thud pa'i las 'phro gang du sbyor// de yi 'bras bu tshe tshad lus kyi tshad// tshangs rig skye ba'i las ni ji ltar spyad// de yi las 'phro ji ltar 'thud pa yin// de yi 'bras bu lus dang tshe tshad gang/ / tshangs pa mdun la 'don dgu 'o//// 'od chung skye ba'i las ni ji ltar bshad// de yi 'thud pa'i las 'phro ji lta bu// de yi 'bras bu lus kyi tshe tshad do// tshad med 'od du skye ba'i las ni ji ltar bshad/ / de yi las 'phro gang du snang// de yis lus dang tshe tshad ji ltar lags// 'od gsal skye ba'i las 'phro gang du 'grub// de yis 'thud pa'i 'bras bu tshe yi tshad// tshad med dge ba'i las ni gang du grub/ / de yi 'phro 'thud las 'phro ji ltar sbyor// de yi 'bras bu tshe tshad gang lta bu// dge rgyas skyes pa'i las ni gang las grub// de yi las 'phro ji ltar 'thud pa yin// de yi 'bras bu tshe tshad lus tshad gang lta bu/ / dge chung skye ba'i las ni gang las grub// las 'phro bar dor ji ltar 'thud pa dang// de yi tshe tshad lus tshad ji ltar yin// sprin med skye ba'i las ni ji ltar bshad// de yis bar dor 'thud pa'i las lta bu/ / de yi 'bras bu lus dang tshe tshad gang// bsod nams skye ba'i las ni ji ltar bshad// de yi bar dor 'thud pa'i las ni gang// 'thud pa'i 'bras bu lus dang tshe tshad gang// 'bras bu che ba'i lhar skye ba'i las ni gang/ / de spyad bar dor 'thud tshul ji lta bu// de yi 'bras bu tshe tshad lus tshad gang lta bu// bsam gtan gol sgrib 'du shes med// gtsang ma rigs kyi lha lnga blta bar bya// mi che ba'i lha ru skye ba'i las ni gang/ / de yi las 'phro bar dor ji ltar 'thud// 'thud pa'i 'bras bu'i lus dang tshe tshad dang// gzugs khams sdug bsngal gdung ba'i skyon med phyir// mi gdung ba'i lha ru skye ba'i las ni ji ltar spyad/ / de yi las 'phro 'thud pa'i dus tshod gang// de yi 'bras bu las dang tshe tshad gang// shin tu mthong du skye ba'i las ni ji ltar spyad// de yi bar dor 'thud pa ji ltar yin// 'thud pa'i 'bras bu lus dang tshe tshad gang/ / gya nom snang du skye ba'i las ni ji ltar spyad// de yi las 'phro bar dor ji ltar 'thud// de yis 'bras bu lus tshad tshe tshad gang du 'grub// 'og min lha ru skye ba'i las ni gang las grub// de yis las 'phro bar dor ji ltar sbyor/ / de yi 'bras bu lus dang tshe tshad gang lta bu// mi che ba zhes su grub pa'i mtshan nyid dang// mi gdung ba dang gya nom snang dang shin tu mthong ba dang// 'og min lha zhes rgyu mtshan ji lta bu/ / bdag gzhan 'od la gnas pas bde bar spyod// sku yi 'od gsal sgyu ma lta bu'i sku// ting nge 'dzin gyi rim pa'i khyad par gyis// de yis 'bras bu rim par grub pa'o// zhes gsungs so/ / 'brus bshad las kyi 'khor lo las// gzugs kyi lha bstan pa ste skabs bcu pa'o//// de nas yang dag bshad bya ba// 'dre 'od kyi lus su grub par bstan pa ni// 'dre yang 'od lus grub pa'i las/ / he ru ka dang 'phra men ma dang// 'od lus sgo ma mo sgom// rtag pa ther zug lha dang sngags dang phyag rgya dang// dam rdzas mchaud rdzas dgra dang bdag nyid brtag pa ru// de ltar sgom ba'i las dang 'bras bu tshe dang lus tshad rnams/ / ma nges srog zan skyes nas dmyal bar 'gyur// rig sngags gsang sngags gzugs sngags rnams// gol ba'i 'bras bu 'od lus ru dra sogs// bgegs rig stong phrag brgyad cur skye/ / de yi tshe 'phos dmyal bar 'gyur// zhes gsungs so// 'bru bshad las kyi 'khor lo las/ 'dre'i 'od lus kyi skabs te bcu gcig pa'o//// de nas yang bka' stsal pa/ sha khrag lus la rnam pa gnyis/ / mtho ris ngan song rnam pa gnyis// mi lus sha khrag mngal du skye ba dang// lha yi lus kyis mngal du 'jug pa dang// byol song mngal du 'jug pa'o// lus 'phags skyes ba'i las ni gang ltar spyad/ / de yi las 'phro ji ltar 'thud pa yin// 'thud ba'i 'bras bu'i lus tshad tshe tshad gang// lho yi 'dzam bu gling du skye ba'i las ni gang lta bu// de yi las 'phro bar dor 'thud pa gang// de yi 'bras bu lus tshad tshe tshad gang/ / nub kyi ba glang spyod du skye ba'i las ni gang lta bu// de ni bar dor 'thud pa'i 'bras bu ji ltar yin// de yi 'bras bu lus dang tshe tshad gang// byang gi sgra mi snyan du skye ba'i las ni ji lta bu/ / de yis bar dor 'bras bu ji ltar 'grub// las 'phro 'thud ba'i lus dang tshe tshad ji lta bu// rgyal chen rigs bzhir skye ba'i las ni ji lta bu// de yang bar dor 'phro 'thud ji lta bu// de yi 'bras bu lus tshad tshe tshad gang/ / sum cu rtsa gsum skye ba'i las kyi 'bras bu 'thob par spyod pa gang// drag po dgu dang nye dbang bcu// nyi ma'i bu dang dgu/ nor lha brgyad thag skar gyi bu bzangs ris kyi gsum ste/ / sum cu rtsa gnyis/ de yi las 'phro ji ltar 'thud pa yin// 'bras bu lus tshad tshe tshad gang du grub// 'thab bral skye ba'i las ni gang la grub// de yi nges tshig ji lta bu// de yi las 'phro ji ltar grub/ / de yi 'bras bu'i lus tshad tshe tshad gang// dga' ldan skye ba'i las ni gang dang gang las grub// de yi las 'phro gang du sbyor// de yi 'bras bu lus tshad tshe tshad gang// 'phrul dgar skye ba'i las ni gang las grub/ / de yi las 'phro 'thud pa'i lus dang tshe tshad gang// gzhan 'phrul dbang byed skye ba'i las ni gang las grub// de yis bar dor 'phro 'thud ji lta bu// de yi lus dang tshe tshad gang las grub/ / mtho ris ngan song gar skye ba// rig pa'i rgyal po rang dbang gang// gzhan 'phrul dbang che// rgyu rkyen dus 'dzom las la rag/ 'bras bu ci byung las la ltos// zhes gsungs so// 'bru bshad las kyi 'khor lo las/ mtho ris mi sha phrag gi lus// lha sha khrag gi lus te skabs bcu gnyis pa'o//// de nas yang dag bshad bya ba// byol song sha khrag skye ba 'di lta bu dang// rkang gnyis bya ru skye ba 'di la ji ltar lags/ / de yis bar do las 'phro ji ltar 'thud// de yi 'bras bu 'dab chags lus dang tshe tshad dang// 'dab chags lus la rnam pa gsum// 'dab chags chos sku rdo rje khyung// sprul pa byang chub sems dpa' ngan 'gro yin/ / rkang bzhir las kyis skye ba'i khyi phag ji ltar spyad// de yang bar dor las 'phro ji ltar 'thud// de yi 'bras bu tshe thung ba// khyad par rta dang g.yag khyi la sogs// de yi 'bras bu bsod nams lus tshad do/ / rkang mangs skye ba yang ni las ci lags// rta bla sdig pa sdom dang 'bu srin rnams// sdug bsngal che chung mi 'dra las 'phro ji ltar 'thud// de yi 'bras bu nar nar 'jong 'jong po// tshe tshad lus tshad ma nges gnas/ / rkang med sprul la sogs pa skye ba'i las ni gang// de yi 'bras bu lus tshad tshe tshad rnams// yi ge 'bru bshad las kyi 'khor lo la// sha khrag lus bstan pa'i skabs te bcu gsum pa'o/ /// de nas yang dag bshad bya ba// mtho ris ngan song gar 'gro ba// rang gis spyad pa'i lus la ltos// lus kyi las ni 'di lta ste// srog gcod ma byin len zhing 'dod log spyod// de yi las 'bras bstan par bya/ / srog gcod pa la rnam pa gsum// gti mug lung ma bstan gyi chad pa la// nyes byas de yi ltung ba med pa la// pham pa'i sdig dang lci ba yod pa yin// gti mug las kyis sems can shi// de yi sdig pa'i rnam smin ci/ / bar do'i 'od snang ngo ma shes// de ru pham ma'i las 'phro yis// 'bras bu mngal gyi 'bu srin skye// myur du 'byung zhing tshe thung ba// shig dang tshe thung lus su skye// khyi dang phag tu skye bar bshad/ / de nas yi dags dmyal khams brgyud// thar ba'i sa bon spangs pa yin// lung ma bstan gyi sdig pa lci// lung du bstan pas sdig pa 'jom// snying rjes sems can skyob pa yin// de la byams pa'i don gyis tshang/ / byams dang snying rje'i khyab pa na// 'bras bu mi lus gtsang ma thob// 'jam bu gling du skye bar 'gyur// de nas las kyi 'phro 'thud de// de yi 'bras bu'i dus tshod bstan// ces gsungs so/ / yi ge 'bru bshad las kyi 'khor lo las/ gti mug gi sgo nas srog gcod pa'i las 'bras bstan pa'i skabs te bcu bzhi pa'o//// de nas yang bka' stsal pa/ zhe sdang gi sgo nas srog gcod pa/ / de las rnam pa gsum du bstan// bskyed nas gsod par byed pa yin// bu dang tsha bo gnyen la sogs// de bskyed gsad pa'i las byas pas// gsod du 'jug dang bsad pa dang// gsod pa rnams la rje yi rang/ / de yis bar dor 'od las zhe sdang skyes// 'od 'gyur tsha ba'i dmyal bar skye// lus dang tshe tshad gong ltar ro// de nas yi dags gnas su skye// phyi nang sgrib pa can du skye// brgyud nas gsod par byed pa yang/ / gnyis ka nyi tshe nye 'khor skye// de nas phyi yi sgrib pa can du skye// dngos po snang thugs bsad pa ni// grang ba'i dmyal ba'i chu bur can// de 'phos phyi nang sgrib pa can du skye// zhes gsungs so// pha ma'am bla ma mched grogs la/ / gong ma gsum po ci bsad kyang// nges par rdo rje dmyal bar skye// zhes gsungs so// 'bru bshad las kyi 'khor lo las/ zhe sdang gi sgo nas srog bcad pa'i skabs te bco lnga pa'o/ /// de nas yangabaka' stsal pa/ 'dod chags sgo nas srog bcad pa// bskyed nas bcad pas phyi nang sgrib pa can du skye// brgyud nas bcad pas nang sgrib can du skye// dngos po sha khrag 'dod phyir bsad/ / phyi yi sgrib pa can du skye// de rnams spangs nas chos spyad na// byams dang snying rjer ldan pas na// mtho ris mi dang lha ru skye// de y-i las 'phro 'thud pas ni// tshe ring nad med bde dang ldan// de ltar sdom pa thub pa yis/ / nyes byas med pas pham par med// lci ba med pas ltung ba med// ces gsungs so// srog gcod pa dang// de'i 'bras bu dang/ de spangs pa'i las kyi 'bras bu bstan pa// 'bru bshad las kyi 'khor lo las/ skabs te bcu drug pa'o//// de nas yang bka' stsal pa/ ma byin par ni len pa la// rnam pa bzhi ru shes par bya// brgyud nas ma byin len pa yis// byol song khyi yi lus su skye/ / dngos pos ma byin blangs pa ni// pho rog stong thub bya ltogs skye// byin gyis brlabs nas ma byin blangs// 'ol ba bya gag ma yi lus 'drar skye// rkus te ma byin blangs gyur na// sems can byi ba'i lus dang lus srul po/ / skyugs pa za ba rnams su skye// yang na de dag thams cad ni// phyi sa za ba'i 'bu srin skye/ de tshe spangs pa'i 'bras bu ni// mtho ris lha dang mir skye nas// tshe ring bsod nams che ba dang/ / nor rnams gzhan dbang mi 'gyur zhing// dam pa'i chos dang phrad par 'gyur// zhes gsungs so// 'bru bshad las kyi 'khor lo las/ ma byin blangs pa'i skyon yon gyi skabs te bcu bdun ba'o/ /// de nas yang bka' stsal ba/ 'dod pa'i log par g.yem pa ni// rus gcig pa la spyad gyur na// byol song 'dab chags bya ru skye// ma la 'dod chags spyad gyur na// tsha ba'i dmyal ba dag tu 'grim/ / dge slong dge tshul la spyad na// ro myags 'dam du yang yang skye bar 'gyur// rgyal po'i bu mo spyad gyur na// zhe sdang sbrul gyi lus su skye// slob dpon jo mo spyad gyur na// tsha ba'i dmyal ba dag tu skye// tshe 'dir mi bde sna tshogs 'byung/ / phyi ma rdo rje dmyal bar skye// mched lcam khyo dang chung ma spyad// nges par yang sos lus su skye// 'di la tshe thung 'bras dang lhog pa 'byung// bla mas slob ma'i chung ma spyad// ro myags 'dam du skye bar 'gyur/ / sdom pa srun pas spyad byas na// phag gi lus su yang yang skye zhing brgyud// lha khang gnyan sar spyad byas na// ngan song gnas las thar mi srid/ kha'am lte ba 'phongs la spyad// yi dgas lto 'phye'i lus su skye/ / yang na bong bur skye bar 'gyur// 'dod chags spangs nas chos la gzhol// las 'bras mtho ris lha mir skye// thams cad kun gyi snying du sdug/ byas pa med par thams cad rtsi/ / dam pa'i chos dang 'byor par skye// zhes gsungs so// 'bru bshad las kyi 'khor lo las/ 'dod chags las 'bras kyi skabs te bco brgyad pa'o//// de nas yang bka' g+Nal pa/ phra ma byas pa rnam pa gsum/ / dngos por phra ma dbyen bcug la/ kha brgyad lus su skye bar 'gyur// de yang spangs pa'i 'bras bu ni// mi lus thob nas ngag btsun 'gyur// btsan phra bkog phra gzhog phra yang// de yi 'bras bu gong du 'byung/ / ngag 'khyal la yang rnam pa gnyis// dga' dang mi dga' gnyis su 'asngug/ de spangs 'bras bu mtho ris thob// tshigs 'asngal dal zhing kha gsag chung// tshul dang ldan pa'i chos par skye// ngag btsun spang ba ma byas na/ / dag dang gnyen du byol song la// ngag rtsub byas pa'i 'bras bu ni// rgur zhar rnam pa gsum ldan pa'i// yi dwags 'dre yi lus su skye// de sbangs mtho ris lha mir skye/ / tshig btsan sems can mi slu zhing// byams sems gnyis la gnas par skyes// myur du byang chub 'grub par 'gyur// zhes gsungs so// 'bru bshad las kyi 'khor lo las// ngag gi yan lag gi skabs te bcu dgu pa'o/ /// de nas yang bka' stsal ba/ de rnams rtsa ba bdun yin te// rdzun las de gsum 'phros pa yin// thams cad rdzun las 'phros pa yin// phan pa'i rdzun dang gnod ba'i rdzun/ / lung du bstan pa'i rdzun dang gsum// phan pa sems can skyob pas ni// 'bras bu mi lus mi 'jig skye// kun gyis skyel su byed pa'i mir skye ste// byang chub myur du 'grub par 'gyur/ / gnod pa'i rdzun tshig mang byas na// sems can dgra mang lus su skye// de nas byang chub ring bar 'gyur// lung ma bstan pa ngag 'khyal rdzun// chu srin mgo bo sum cu rtsa gnyis sam// yang na gtsang pa mgo gnyis skye/ / ltogs pa'i sdug bsngal gyis gdungs nas// ngan song gsum du 'khor bar 'gyur// de dag spangs nas byang sems ldan// mtho ris lha dang mir skyes nas// tshig bden don ldan byang chub thob/ / ces gsungs so// 'bru bshad las kyi 'khor lo las/ ngag gi sgrib pa dang de'i yon tan bstan pa'i skabs te nyi shu pa'o//// de nas yang bka' stsal ba/ yid kyi sgrib pa rnam pa gsum/ / gnod sems brnab sems log par lta ba gsum// gnod sems la yang rnam pa gsum// bdag la gnod pa mi dge bcu sbyod dang// gzhan la gnod pas de slob pa dang// gnyis ka la gnod zung du spyod/ / tshe rabs kun tu ngan song skye// spyang khu sha za khra sogs skye// de nas dmyal bar skye bar 'gyur// brnab sems zhes pa chags pa byung// bdag la chags dang gzhan chags gnyis ka la// chags te sbyin pa'i gegs byas nas/ / 'bras bu yi dwags skye bar 'gyur// gnod sems spangs pa'i 'bras bu ni// mtho ris lha dang mi lus skye// phan 'dogs dge ba'i sems ldan te// byang chub myur du 'grub par 'gyur/ / brnab sems spangs pa'i 'bras bu ni// mtho ris lha dang mir skye la// tshe rabs mang por nor dang 'bru// bsags mi dgos par 'byor par 'gyur// zhes gsungs so// 'bru bshad las kyi 'khor lo las/ / yan lag gi skabs te nyer gcig pa'o//// de nas yang bka' stsal pa/ rtsa ba log lta bshad par bya// log lta rnam pa bzhi ru bshad// rtag dang chad dang 'khor dang 'khor ba dang// rang gi lta ba gol ba rnams/ / log pa rang gi ngo bo 'khor ba'o// nges pa'i tshig ni ma grol ba// dbye ba rnam pa bzhi ru shes// mthun ma'i dpe ni thag sprul 'dra// dkon mchog gsum la rgyab kyis phyogs pas log pa mu stegs dang/ dge ba'i bshes gnyen byung ba la skur ba 'debs pa so so'i skye bo log pa spyod pa log pa dang/ rang gi dug lnga la rang rgyud du bltas nas/ 'chi ba mi dran cing dam pa'i chos la mi mnyes pa log pa dang/ / dam pa'i chos mnyan gyis shes na rang la bstod gzhan la smod pas log pa dang// de ltar log pa la ni gang zag log par khrid pa bdud kyi las zhes bya'o// de tsho spangs pa la 'bras bu 'tshang rgya la/ ma rgyas kyi bar du gang zag de don dang ldan zhing/ / sangs rgyas dkon mchog dran pa/ de bla mas bstan pas sngon la bla ma dran pa/ des bstan pa'i chos dran pa/ chos kyi spyod pa dran pas nyams blangs shes pa/ de yi skyon yon las 'bras bu dran pa/ de rnams mi dran pa'i rang dbang med pas 'chi ba dran pa'o// 'chi ba ma dran pas bla ma mi dran// 'khor ba rang rgyud du lta/ dkon mchog gsum ma dran pas/ dug lnga mi shi bar 'dod/ / rang rgyud par lta/ de mi dran na chos mi dran/ chos ma dran pas mi dge bcu spyod pas log/ dug lnga rang rgyud du lta/ de ma dran pas nyams su ma myong bas log/ sdug bsngal la longs spyod du lta/ de'i skyon yon las 'bras du ma dran pas log/ 'gro drug gi 'khrul pa 'ba' zhig la rang rgyud par lta/ de'i 'bras bu ni log par lta bas sems can dmyal bar 'gyur ro/ zhes gsungs so// log par lta ba la ngo sprod pa'i skabs te nyer gnyis pa'o/ /// yang bka' stsal pa/ de dag thams cad kyi rtsa ba ni ma dad pas lan/ ma dad pa ni yid ma ches pa dang chos mi 'dod pas lan no// ma dad pa ni ma mos pas lan/ ma mos pa 'khor 'am ma rig pas lan/ ma rig pa bla ma dam pa dang ma phrad pas lan/ bla ma dang phrad pa rkyen/ mos pa rgyu/ dad pa gus pa gnyis 'doms dgos/ de ltar 'doms nas gdams pa bstan no/ / des thebs so// thebs nas mi byed pa de cis len// de le los lan/ le lor 'gro ba de brtson 'grus med pas lan/ brtson 'grus mi byed pa de cis lan/ 'chi bas mi 'jigs pas lan/ nga rgyal dang g.yeng bas lan/ de snga ma'i ngan goms kyis lan/ de ni wa gsang ba yis lan no// kye rigs kyi bu/ 'khor ba 'di la blta ma shes// skye rga na 'chi 'dor ma shes// chu bo bzhi la gru ma tshugs// rang rig nyi ma 'dre ma shes/ / ma rig mun pa sel ma shes// thos pa mang po'i chos kyis rgyags// gang la spyad kyi sa zin med// man ngag mang bas nyams myong rgyags// gzung ba'i rtsa ba gcig kyang med// grub mtha' mangs pas lta ba rgyags/ / mtha' bzhi dras thag chod dus med// nyams myong mang pos zhen pa rgyags// zhen med rang grol gcig kyang med// lta ba kha rkyangs mangs pas dug lnga rgyags// 'gro drug rang grol gcig kyang med/ / tshig tshogs mang pos rig pa rgyags// skye med rang grol gtan la phebs pa med// dpe cha mang po lung rigs rgyags// mtha' bzhi rang grol gcig kyang med// e ma ho/ stong pa'i bdag pos stong bar bshad/ / 'das pa lnga po ma shes na// stong pa'i bdag po stong par 'gro// mtshan mas mtshan ma bshad pa yis// mtshan ma'i bdag po mtshan mas khyer// phyug po ltogs te 'chi ba ni/ khe yogs mang pos chog ngoms med/ / phyug po ltogs drir 'chi ba srid// mi ltogs dus gcig zos pas ltogs nas 'chi mi 'gyur// thos mang sgra tshad mang pos nam yang 'ching// grol ba thar par dka' bar 'chi/ / gdams bas lam sna zin pas grol ba thar pa thob// des ni 'bras bu rang grol thob// ces gsungs so// yi ge 'bru bshad las kyi 'khor lo las/ ma rig pa dang log lta gegs sel gyi skabs te nyer gsum pa'o/ /// yang bka' stsal pa/ sngon u rgyan gyi yul du bram ze nyi ma zhes bya ba gcig yod pa la// de la pha bram ze rgan po gcig yod pa la/ de u rgyan gyi dbus su rgyal po rig byed kyi 'khor gyis bzung bas/ gser mang pos bslus pas ma ster bar/ der bram ze de cis bslus pas ma phan nas/ bram ze de la grogs rig byed la mkhas pa gcig yod de/ ming kun dga' gsal zhes bya ba de la bzlas pas/ bu thabs yod zer te/ nags kyi dgon pa na bram ze rgan po de ka 'dra ba mgo dkar ba/ gdong ba dmar ba/ lus nag pa/ mig rno ba/ lag pa rtsub pa/ skad sna tshogs bsgyur ba/ lus mi cig yod pas/ de la 'bras chang blud la zung dang// spra de'i ming ni a co bde spungs zhes bya ba yin no byas nas/ de ltar byas te bslus pas ma 'dod pa de brjes pas/ 'di nga yi mes po yin pas brje dgos byas pas rung zer te/ der khong po ni a co brje yam byas/ bu rang shes zer ro// brjes pa'i rting la 'khyig go byas pas kyang bu rang shes zer ro// de nas ldur ma 'dod nas gsod do byas pas kyang bu rang shes zer ro/ / der brjes nas gcig ni bde ba dang ldan/ btson las thar te chos byas pas sangs rgyas so// spra la ldu ba med de ji skad byas kyang khyod rang shes zer te/ mtha' gzhug tu na na gsal bskyal te/ brag la gtad de thar pa'i dus med do/ / de bzhin du 'khor ba dang mya ngan las 'das yang mi 'da' yang bu rigs kyi bu tsha rnams shes so// zhes gsungs so// 'bru bshad las kyi 'khor lo las/ srid pa lto bzlog pa'i skabs te nyer bzhi pa'o/ /// de nas yang bka' stsal pa/ las 'bras spyi yin rnam pa 'di dag yin// bya ba dang ni spangs pa'i rigs// chags sdang zhe sdang gti mug gis// bskyed brgyud dngos su zad gyur na/ / nges par dmyal bar skye bar 'gyur// ma rtogs las kyi rkyen gyis shi// nges par byol song tshe thung 'gyur// 'dod chags skye brgyud dngos pos bsad// yi dwags 'jig rten nges par ste// mi dge bcu spangs tshul khrims yin/ / mi 'tshe ba yi lha mir skye// tshe yang ring zhing bde dang ldan// 'tshe bas phyi mar tshe thung 'gyur// mi dang 'byung po dud 'gros brdungs// mdze la sogs pa'i nad rnams 'byung// nor 'phrog pa yi dbul por 'gyur/ / mi 'phrog pa ni rdzas dang ldan// gang zhig zas dang nor sbyin pa// tshe ring mdangs ldan stobs ldan zhing// dpal dang ldan zhing nad med cing// rtag par bde dang ldan par 'gyur/ / gos byin pas ni longs spyod ldan// gos kyang rnam pa sna tshogs rnyed// mal stan byin pas bde ldan 'gyur// sa gzhi byin pas nor dang ldan// 'bru byin pas ni phun sum tshogs/ khrims btsun 'dod chags spangs pas skyes pa thob/ / chags che khrims srun bud med 'gyur// chang 'thung ba ni mi bsten pa// shes rab gsal zhing dran pa bsten// rmongs med bden par smra bar 'gyur/ khrims bsrungs khro ba'i sems ldan nas/ / lha ma yin gyi rig gnas su skye// de yang lha ma yin du skye ba'i las dag dang// de yi las 'phro 'thud pa dang// 'thud pa'i 'bras bu lus dang tshe tshad rnams// de dag bdag gis 'dir spyad do/ / lha ma yin du skye ba yang// rtag par g.yo dang sgyu byed cing// sdig pa dag ni ma byas la// 'thab la dga' zhing sbyin byed pa// de ni lha min dbang phyug 'gyur// lha ma yin gyi rgyal po rnams// de yi blon po 'khor dag rnams/ / 'thab pa dang ni 'thab la dga'// 'thab la mos dang bral ba dang// rtsod pa dang ni cher rtsod dang// 'od dang nye ba'i 'od dang ni// snang ba dang ni snang gsal dang// byin nas bde dang bsod nams skyes/ / bde ldan dang ni bzang skyong dang// 'dra ba can dang 'dra 'od dang// nyi ma lha dang nyi med 'od// shing chen lo ma 'bras bu dang// rked pa rtsa ba rnams la gnas// nang ni srog pa'i rtsa la gnas/ / de rnams lha ma yin gyi las 'bras yin// 'bru bshad las kyi 'khor lo las/ lha ma yin gyi skabs te nyer lnga pa'o//// de nas yang dag bshad bya ba// gang zhig chos la rtag tu mos// bla ma rnams kyi bka' bzhin byed/ / phan dang mi phan ston pa ste// de yi tshig btsun don dang ldan// 'dri ba brdzun du mi smra ba// de yi ngag la bden par 'dzin// 'bras bu rnams la rtag tu mos// byang sems ldan pas byang chub 'grub// ces gsungs so// 'dod chags can ni ngang pa dang// phug ron bong bu rnams su skye// rtsa rlung brten pa thabs kyis 'ching// mngal gyi 'bu srin lci srin skye/ kho ba rang rgyud sbrul du skye/ / nga rgyal rang rgyud seng ger skye// che ba'i nga rgyal khyi dang bong bur skye// ser sna phrag dog spre'ur skye// gti mug rmongs pa dom du skye// zhe sdang gdub rtsub stag tu skye/ khong khro ngar 'dzin spra ru skye// phrag dog ngar 'dzin gzig tu skye// gti mug mi snyan glang por skye// gti mug brdzun dga' ma her skye// gti mug zhe sdang spre'ur skye// gti mug sbyin pas rta ru skye// rang bzhin mi brtan bya khwar skye// gti mug srog la gcod byed pa// ba glang khyi sogs rkang bzhir skye/ / mi bsrun zhe sdang gti mug can// sdigs pa 'bu srin la sogs skye/ khro dang ser snas byi lar skye// 'dod chags sha la dga' ba ni// bya rgod spyang ki la sogs skye// tshul khrims bsrung yang gti mug che/ / byol song klu yi rigs su skye// zhes gsungs so// 'bru bshad kyi 'khor lo las/ skabs nyer drug pa'o//// de nas yang bka' rtsal pa/ chos la mi dge'i chog log spyod/ / yi dags lus srul po ru skye// bza' ba bgo ba 'phrog byed pa/ khong pa'i dri ma za bar skye// chags pa spyod pas ser snas bcings nas ni// yi dwags rgur zhar lba ba can du skyes// slong ba mi ster sbyin pa 'phrog/ skyugs pa za bar skye bar 'gyur// gang zhig bla ma'i chos byed la/ khro ste mi nyan mtshang 'bru smra// yi dwags khang par skye bar 'gyur// srog chags bsad nas sbyin pa 'gyed// srid po gdong dmar lus su skye/ / pha ma 'am bla ma gzhan la skyel bsu byed// sum cu rtsa gsum nye dbang skye// zhes gsungs so// 'bru bshad las kyi 'khor lo las/ skabs te nyer bdun pa'o//// de nas yang bka' stsal pa/ lus can g.yul du gsod byed pa// ral gri sen mo can du skye// gcig la gcig gcod skye bar 'gyur// mi rnams rku byas bsad pa na// lcags kyi ral gri sor bcu drug/ ngu zhing stobs kyis 'dzeg par 'gyur/ / gzhan gyi bud med phrogs byas na// lcags kyi khyi ni sre po yis// yang dang yang du 'dzin par 'gyur// phag dang spyang ki bsad gyur na// spu gri lam sogs 'gro bar 'gyur// gzhan gyi nor rnams brkus phrogs na/ / lcags kyi thu lum za bar skye// zangs kyang bkol ba 'thung bar 'gyur// chos pa rnams kyi stegs bshigs nas// spu gri 'bar bas gtams par 'gro// sor mos shig ni bcem gyur na// brag gnyis par du bstem par 'gyur/ / tshul khrims legs gnod mi srun pa// sha rus me mar mur du sreg/ chos kyi log tsho btsal byas na// 'bu dang srin bur yang yang skye// 'bru yi nang gi srog chags gsod// de ni lcags kyi gtun shing gis/ / yang dang yang du brdung bar 'gyur// sdug bsngal sa bon sdig pa'i las// cha dang chung ngu nas su spang// zhes rgyal bas gsungs so// de yi las 'bras kyi skabs te nyer brgyad pa'o/ /// de nas yang bka' stsal pa/ chos kyi las dang 'bras bu 'di bshad pas// bar do mi drin pa'i rang dbang med pas de dran pa la bla u0f84ma dgos pas/ bla ma sangs rgyas kun bas gnyan// chos shes bkra shis bkra shis 'byung/ / de la gdam ngag 'di bstan pas// thams cad mtshan ma rang grol 'gyur// 'gro drug las 'bras dran bas bla ma'i gdams pa yin// de yi mtshan ma rang grol bla ma'i ngo sprod yin/ / gzhi ni lhun gyis grub pas kun gyi gzhi ma yin// 'khrul ba mi 'gas gzhi yi 'phrin las yin// phyogs med mkhyen pas lam gyi gdams pa yin// 'bras bu rang grol chos las 'das pa 'bras bu gdam pa yin/ / ngo sprod rnam gsum ro snyoms lam gyi yid ches yin// chos med chos can grub mtha' phyogs med mkhyen pas lam gyi nges shes yin// 'gyu ba rang grol zang thal gyi 'brus bu yin/ / dug gsum sku gsum do sprad lam gyi dbang ba yin// 'gyu ba ye shes lngar shar lam gyi yon tan yin// gzung 'dzin gnyis la ngo sprod lam gyi dus tshod yin// 'gro drug spyi dang rang gi mtshan nyid shes pa drod tshad yin/ / ma rig bdar sha chod pas chos kyi sgro 'dogs chod// chos rnams rang grol ye shes gdeng dang ldan// grub mtha'i 'bras bu phyogs med mkhyen pas lam shes zhes su brjod// theg pa'i rang gzhung bsam pa'i khyad par yin/ / ye shes rang byung bsam dbang dngos dbang grol// ci ste las skyi dbang sgyur na// grol ba rang byung ga la snang// lta ba ye lta chen po'i gdeng med na// byas chos las kyi 'bras bu sangs rgyas dka'/ / ye sgom 'od gsal rtog med zang thal gdeng med na// nyams myong mang po skyes kyang byis pa'i 'drid ba 'dra// ye spyad tshogs drug kun grol gnad med na// tshigs spyod rigs spyod gsang spyod brtul zhugs spyod/ / spyi dang khyad par rang grol ma shes na// dug 'thungs ti sti 'dra ste spyod par 'gyur// ye grol chen po 'bras bu'i rnam dag gnad med na// thob 'dod ltogs 'dre 'dra ste thob pa'i dus ma mchos/ / 'dod pa gdungs te ltogs 'gong yin// ltogs 'gong rtsad nas ma chod na// phung 'dre las la zad pa med// phung byed srog rtsa gcod pa la// snang ba ro snyoms gdams pa'i mchog/ gal 'gegs gze ru bsam yas kyang/ / rtogs thob ngo sprod ro snyoms yin// 'bras bu phyi nang med pa la// dus la ltos pa 'khrul pa'i lam// yang dag rang sar grol ba la// lta ba'i gnad dang lta ba'i sa// lta ba'i dus dang ma mthong skyon/ / me mthong rang dbang med pa dang// mthong ba'i tshad dang nges shes dang// spang po dun rtogs drod rtags dang// 'bras bu yid ches gdeng med pa/ kha rkyangs don ma mthong bar bzhi la dgongs/ / skye med brjod med blo las 'das// yul du rtsad nas nyams su myong ba med/ kha gtam tshul 'chos mkhan po nyon re mongs// de nas nyams su len zer ba// skye med la sogs nyams su len pa ni/ / nyams myong blo yi blo las 'das par dka'// de phyir gnad kyi ngo sprod gdams pa dkon// dkon pas lta ba yul du shor// la la blo la brten par byed// la la mong zer skur pa 'debs// ngo sprod skur par 'gyur gyis gsang bar gyis/ / rtse gcig sgoms pas sangs rgyas shin tu dka'// sku gsum zhi la gnas pa'i dus// sgom sgrub lta ba la sogs pa su yis mthong// 'gyu ba sku gsum shar ba la// lta sgom la sogs byas pa su yis mthong/ / 'od dang 'byung lnga sku gsum shar ba la// lta sgom spyod pa byas pa su yis mtshon// sku gsum ngo sprod lam gyi rgyal po yin// zhes gsungs so// 'bru bshad las kyi 'khor lo las/ skabs te nyer dgu pa'o//// de nas yang dag bshad bya ba// dam tshig dam tshig ces bya ba// mdor bsdus rnam pa brgyad du bstan// rtsa ba yan lag rnam pa brgyad// rtsa ba sku gsung thugs kyi yin/ / yan lag mi spang mi don dang// spyad par bya dang shes par bya// grub par bya dang rnam pa lnga// sku yi dam tshig bla ma spun la gdung sems ldan// dam tshig dbang dang shes rab brgyud// man ngag lung 'begs slob dpon la/ / mngan dang dbya sems spang par bya// gdam ngag nod par bya ba'i phyir// rtag tu phyir 'breng be'u lta bu'o// gsung gi dam tshig ces bya ba// bzlas brjod grangs mang mi rdzogs pas/ / sgra che ma yin chung ba min// mgyogs pa ma yin bul ba min// drag pa ma yin zhan par min// yig 'bru yan lag ma nyams bzlas// yengs na bar chod 'byung bar 'gyur// chu bo'i rgyun ltar bzlas pa yin/ / thugs kyi dam tshig ces bya ba// spyi gsang bzhi dang bar gsang bzhi// gsang bar 'os dang gsang bar gnyer gtad pa'o// bum pa nang gi mar me ltar// lkog tu ston na 'chi ba ltar// rgyun du sangs na dngos grub 'byung/ / mi spang dug lnga sangs rgyas lnga// ye shes lnga yi ngo bo yin// spangs na don dang ldan par dka'// mi bor bdud rtsi rnam pa lnga// rang byung bdud rtsi rmad du byung// bor na rnal 'byor don dang 'gal/ / spyad par bya ba sbyor sgrol dang// ma byin len dang ngag rtsub srog gcod rnams// don dang rnal 'byor ba yis spyad// shes par bya ba 'byung ba lnga// ye shes lnga dang rigs lngar shes// shes pa srid gsum skye gnas med/ / grub par bya ba'i dam tshig ni// sangs rgyas lnga ru grub par bya// shes na mi sgrub don dang 'gal// rtsa ba'i dam tshig nyams gyur na// bskal pa chen po grangs med du// dmyal ba mi bzad ba ru ltung/ / rgya mtsho'i thigs pa bgrang bar nus// de yi rnam smin bgrang mi nus// shin tu mi bzad sdug bsngal te// srid gsum sems can gsad pa'i sa// bla ma'i bka' 'chag char mi phod// rdo rje spun la smad pa ni/ / nyams pa'i skyon la brjod mi lang// bskal pa gcig tu dmyal chen stong// tshe 'dir bsgrubs kyang dngos grub yal// gsung gi dam tshig nyams gyur na// bsgrubs kyang don rnams mi 'byung bas// yi dwags gnas su skye bar 'gyur/ / lkugs pa'i gnas su brgyud cing skye// thugs kyi dam tshig nyams gyur na// yi dwags khyi yi lus su skye// thong gshol lnga brgya 'bar ba yis// de yi lce la gshog par byed/ / dngos grub 'bras bu med par 'gyur// yi dam lha yis snying khrag 'thung// mi spong dam tshig nyams gyur na// dngos grub thams cad spangs par 'gyur// mi dor dam tshig nyams gyur na// dngos grub 'bras bu mi thob cing/ / yi dwags spre'u'i lus su skye// spyad pa'i dam tshig nyams gyur na// 'du shes med pa'i 'gog par ltung// shes pa'i dam tshig nyams gyur na// 'du shes med pa'i khrod du ltung// grub pa'i dam tshig nyams gyur na/ / bdud kyi 'jig rten gnas su skye// rtogs pa'i dam tshig nyams gyur na// ru dra'i lus skyes dmyal bar ltung// zhes gsungs so// 'bru bshad las kyi 'khor lo las/ dam tshig bstan pa'i skabs te sum cu pa'o/ /// de nas yang bka' stsal pa/ de yi nyams pa'i skongs thabs ni// sku yi dam tshig nyams gyur na// bla ma 'am rdo rje spun la bshags// de yis nyams pa skongs pa yin/ / phyis ni bskong bar mi 'gyur ro// gsung gi dam tshig nyams gyur na// bzlas pa 'bum tsho gsum du bskyal// bla ma las ni lung blangs so// des ni skong bar 'gyur ba yin// thugs kyi dam tshig nyams gyur na/ / sdig pa sbyang phyir sbyin sreg 'bum tsho gsum// de yis de yi nyams pa skong// zhes gsungs so// 'bru bshad las kyi 'khor lo las/ rtsa ba'i dam tshig nyams pa gso ba'i le'u ste skabs so gcig pa'o/ /// de nas yang bka' rtsal pa/ yan lag nyams pa bskang ba ni// ming spang dam tshig nyams gyur na// lta ba gdeng dang ldan byas na// de yis bskong bar 'gyur ba yin// ma rtogs 'khor ba'i gnas su 'khyams/ / mi 'dor dam tshig nyams gyur na// bdud rtsi bcud len sbyar byas pas// de yis bskongs par 'gyur ba yin// de ma byas na bdud dbang 'gyur// shes bya'i dam tshig nyams gyur na// sku lnga ye shes lnga nyid du/ / smra bcad lo mangs bsgrubs pas skong// de ltar ma byas dmyal khams brgyud// bsgrub par bya ba'i dam nyams na// srid gsum sku gsum ngo bor sgrub// ma bsgrubs yi dwags gnas su skye/ / spyad par bya ba nyams gyur na/ khams gsum sems can srog gcad la// ngo bo rang bzhin dngos po'i sbyor sgrol bya// de yis nyams pa bskongs par 'gyur// de ltar ma byas khams gsum 'khor// bla ma mnyes par byas pas ni/ / sku yi dam tshig nyams pa med// gdams ngag tshul bzhin spyad byas na// gsung gi dam tshig nyams pa med// dgongs pa mnyam pa'i don gnas na// thugs kyi dam tshig nyams pa med/ / 'dod yon lnga la longs spyad na// yan lag dam tshig nyams pa med// de ltar dam tshig ma nyams na// dmyal ba'i me lce 'phreng ba yang// rang snang sku gsum nyid du 'char// de las 'das sa yong mi srid/ / don rtogs dgongs pa'i ngo sprad na// sangs rgyas thugs rje dmyal ba'i snang ba yis// phan gnod gnyis su byung ba med// dge sdig las 'bras rang sar grol// grol pa rang byung gzhan las min/ / ces gsungs so// dam tshig mdo rgyas kyi skabs las/ gso ba'i skabs te so gnyis pa'o//// de nas yang bka' stsal pa// sngon 'das pa'i dus na// bram ze bde ba'i blo gros dang/ / slob dpon bzang po spyod pa yis// dgon pa bzung na bram ze la gdams ngag btab pas/ bram zes chos thob nas/ bla ma la rgyab kyis phyogs pas rtsa ba'i dam tshig nyams pas/ thar pa'i dus med zer ba de ya cha/ sngon 'das pa'i dus na/ slob dpon rig byed grags pa'i dpal dang// slob ma dge ba'i dpal gnyis yod pa la/ slob dpon gyi bka' bcag nas rtsa ba'i dam tshig nyams pa dang// slar dad pa skyes nas dbang zhus gsos pas sangs rgyas so/ / slob dpon la nyams grib phog nas 'khor bar 'khyams pa de ya cha/ slob dpon kun pa ris/ slob ma su ri si ti ka la yan lag dam tshig nyams pa phog ste de ma gsos pas/ yi dwags mkha' la rgyu ba'i sha zar skyes te/ de nas dmyal bar ltung ste bde ba'i skabs med zer ba de ya cha/ sngon slob dpon ka ma la shi la mu tra/ slob ma legs pa'i dpal gnyis yod pa las/ yan lag dam tshig nyams pa las gsos pas slob ma sangs rgyas/ slob dpon la nyams kyi grib ma phog nas spyan long zer ba de ya cha/ slob dpon chen po 'dzin na mi tra dang// de'i slob ma mu tra 'dzin mi tra bya ba gnyis yod pas/ slob dpon mya ngan 'das so// de nas slob ma dam tshig nyams pa las/ mdun gyi nam mkha' la bla ma spyan drangs nas/ mchod pa la sogs pa byas te gsos pas/ bla ma'i zhal nam 'kha' nas dngos su bstan nas/ gnyis ka sangs rgyas zer te de ya cha/ zhes zer gsungs so// 'bru bshad las skyi 'khor lo las/ dam tshig brda'i le'u ste so gsum pa'o//// yang bka' stsal pa/ gsang sngags bla na med pa byin brlabs 'di lta bu byung ste/ sngon ri rab ri'i rtse mor nga rgyal can gyi nye dbang la/ lha'i dbang pos yang dag pa'i don bstan pas/ steng gi lha'i gnas na lha'i dri ma med pa 'dod chags la dga' ba des/ rna bar sgra grags pa tsam gyis sangs rgyas zer te de ya cha/ sngon lha ma yin gyi dbang pos/ lha ma yin gyi rgyal blon rnams la yang dag pa'i don bstan pas/ lha ma yin gyi sde rtsod 'gyur rtsod pa'i 'phro la/ de kar sangs rgyas zer te de ya cha/ de nas seng ge rab tu brtan pa zhes bya bas/ byol song rnams la yang dag pa'i don bstan pas/ gti mug phag rgod gnyis mun pa la kha sbyar nas nyal ba'i rna bar thos nas/ gnas de nyid du sangs rgyas zer te de ya cha/ sngon mar me mdzad kyi bstan pa la/ shAkya 'od dang thub par sprul te/ me ru rtse'i sgo 'gram du 'byung po rnams la 'byung po bum snar sprul nas yang dag pa'i don bstan pas/ lha mo e ka dza Ti dang/ lha mo nag mo dang/ ma ru rtse dang/ bdud thod pa 'phreng ba dang// dkar po sbyin gcig sgra thos pas de kar sangs rgyas so// de ya cha/ sngon bcom ldan 'das kyis 'dzam bu'i gling bye ba phrag brgyar 'gro ba mi la chos bshad de/ / glang po che mche ba drug pa gnyis kyis gser gyi pha bong brtsegs pa'i steng na nyal bas thos pas/ gnas der sangs rgyas zer ba de ya cha/ sngon gyi yi dags kha la me 'bar mas yi dwags sde gsum la yang dag pa'i don bshad pas/ 'dod chags bya gnyis zangs kyi pha bong brtsegs pa la kha sprad pa'i rna bar grags pas gnas de ru sangs rgyas so/ / de ya cha/ sngon chos kyi rgyal pos dmyal ba sde bzhi la chos bshad pas/ zhe sdang sprul gnyis gangs dkar stongs na nyal ba'i rna bar grags pas/ gnas der dgongs pa shar nas sangs rgyas zer te de ya cha/ sngon slob dpon chen po dga' rab rdo rjes rigs ngan gyi yul du spyod pa la byon pas/ gti mug phag gcig la mda' brgyab pas shan pa ma ru rtse la dgongs pa shar nas skad cig ma la sangs rgyas so// de ya cha/ slob dpon des bya ba kun 'dul du sprul nas/ khyim bya rgan rgon gnyis bye'u phrug drug ste brgyad la mda' gcig brgyab ste btang pas/ dus gcig tu thums te song ba dang/ bya ba rgan po skye spungs te de kar sangs rgyas zer te de ya cha/ yang slob dpon des zhe sdang skyes pa'i tshul gyis// sdang mig tu bltas pas rgyal bos ma bzod de/ sna bug gnyis nas sbrul dkar nag gnyis kyi mgo bo byung ba dang// de spu gris ske bcad pas dus der rgyal po dmag mi nyi khri chig stong la sogs pa sangs rgyas pa de ya cha/ sngon yang khyim bdag bzang po khang pa las 'khub tu ma 'dod de/ 'gron po dang mi la snying rje mi byed par 'jug pa la/ slob dpon gyis khang pa la me stag gcig skyur bas/ khyim bdag dang khang pa thams cad dus gcig tu tshig nas/ rgyal khang 'od du 'bar zer te de ya cha/ sngon rgan rgon gnyis la bu tsha mang du yod kyang/ bu thon bu la nor yo phog pas bu tsha gzhan gyis nor 'phrog sa med nas btsal kyang bgrangs bar mi 'dug nas/ slob dpon gyis bu thon bu bsad pas pha ma shi gzhan rgyal nas/ de'i tshe rangs pa dus gcig sangs rgyas nas 'khor ba dong sprugs zer ba de ya cha/ sngon drang srong rgan po rlung gi rta skya'o srab med la zhon nas grong khyer thams cad sgo tshangs la 'ongs te/ de ci 'dug pa 'dod du 'ong ba/ sus kyang rgan po bsad pas ma sod pas/ slob dpon des rta skya'o de sgrog sum sbrel du bcug pas rgan po kun dga' gsal sku gsum brtsegs pa'i brtse mor song nas/ 'khor ba'i sgo ru 'jug thag chod zer te de ya cha/ zhes gsungs so// 'bru bshad las kyi 'khor lo las/ 'khor lo rgyun gcod brda'i skabs te so bzhi pa'o//// 'bru bshad las kyi 'khor lo 'di// gsang bar 'os kyis mi la ma bstan cig/ gsang bar gnyer snod snod med kun la gsang/ / phyi ru gsang ba'i las 'bras 'di nas bkral// nang du gsang ba'i bskyed rdzogs las 'bras 'di ru bstan// gsang ba'i gsang ba bla med las 'bras rang grol 'bras bu bstan/ / gsang ba dang ni phyi nang gsang ba gsum// gab pa la ni phyi nang gsang ba gsum// sbas pa la ni phyi nang gsang ba gsum// thig le la yang phyi nang gsang ba gsum/ de bzhin 'di ru thams cad 'dus pa yin/ / zhes gsungs so// 'bru bshad las kyi 'khor lo las/ 'khor ba rgyun gcod rgyun 'byung las gdams pa'i skabs te so lnga pa rdzogs so//// byang chub sems bde ba chen po la phyag 'tshal lo/

CLOSE WINDOW