/ rtog ge spyod yul 'khrul las shes mi nus// bskyod dang mi bskyod rtog pa med pa ni// mtshan nyid nam mkha' las kyang 'das pa'o// ye nas lhun gyis grub pa'i thabs chen la/ / rgyu bcos rtog pas grub par mi 'gyur te// spyod pa'i sgo dang mtha' las 'das pa la// log rtog 'khrul pas bsrung du ga la yod// mtshan nyid med pa'i thig le chen po ni// sprul pa sgyu ma tsam du snang ba yang/ / chos nyid dbyings las dbye bsal mi 'jug pas// sgyu ma'i lam du rgyal bas yongs ma bsngags// mi gnas chos sku brjod las 'das pa ni// dbu ma tsam du'ang ye nas mi gnas pas// de bzhin bde ba'i ye shes mtha' klags kyang/ / snang dang brjod pa'i mtha' las 'das pa'o// byang chub sems nam mkha'i rgyal po rdzogs so//// rgya gar skad du/ many+dzu su kha/ bod skad du/ bde 'jam/ bcom ldan 'das rdo rje bde ba chen po la phyag 'tshal lo// bde 'jam dbyings phyug sdug bsngal b+ha ga la// dbyer med lhun rdzogs thig la dbying nyid che// bskyod pa mi mnga' ye nas rin po che// bya ba med par lhun rdzogs thig le che/ / thams cad ma bkag dbyer med bdag nyid che// skye med dbyings las thams cad 'gags shing// dus gsum 'du 'bral med pa'i gsal ba yang// don dam klong du gyur pas sems dpa' che/ / rgyu las bsgrub tu med pas ye nas gnas// btsal du med pas bod pa mngon sum dbyings// smon du med pas thams cad rang la rdzogs// tha snyad med pas rnal 'byor chen po'i bdag/ go 'phang med pas lta ba kun gyi dbyings/ / 'dul ba'i las rnams thams cad ci spyad kyang// rol pa nyid las mnyams shin tu bde// thig le nyid pas spang du med pa'i phyir// rtsa ba'i 'dod chags zhe sdang gti mug kyang/ / spang du med pas byang chub chen po'i lam// bsam du med pa'i ye shes gsal pa ni// rnam grangs med pas dbying nyid bdag po'i klong// gzugs rnams med pas byang chub snying po'i sku// rnam rtog zhi bas khyad par ye shes che/ / gdod nas ma bskyed pa ni dngos grub ste// 'chi ba med pas bdud rtsi'i dbyings// thig le ye nas gsal ba'i dam tshig la// tha tshig ming du btags pa med// ri rab rtse nas nyi ma stong shar bas/ / ye shes thugs kyi nyi ma gcig shar dro// rang la thams cad shar ba'i 'od zer ni// shar ba nyid na dus gsum nub pa med// mi gnas dmigs su med pas gsal ba ni// bsgom du med nyid bsgom du med pas bde/ / ye nas ma bsgoms ji bzhin gsal ba yang// bsgoms pas gzhan nas rgyal ba'i chos mi rnyed// rdo rje nyi ma dbyings nas shar ba yis// thams cad kun kyang de bzhin nyid du gsal/ / 'gyur ba med pas lta ba bal nag ste// cir yang 'gyur bas thugs rje bal dkar bzhin// brtags na thams cad bal nag nyid kyi dbyings// lhun gyi gnas pas lta ba'i go 'phang gcod/ / gdod nas dag pas srid pa'i pad+ma bzhin// 'gyur ba med pas thig le'i dbyings na bde// bya ba med pas thams cad kun la 'jam// dus gsum med pas thig le nyid du 'byam// ye nas snying po btsal du med pa la/ / btsal ba'i bsam pas don dam dbyings mi bskyod// dra ba nyid pas mu khyud phyogs bcur bde// thig le nyid pas thig phran dgu la bde// rtse rgyal rtogs na grub pa'i gnas chen bde/ / thig le ye nas bde ba'i rdo rje'i dbyings// thogs med yongs su sbyang pa'i b+ha ga la// dbyer med lhun rdzogs thig le dbyings nyid che// sku gsung thugs shar mu khyud dkyil 'khor bde// rnam par dag pas bde ba'i byang chub sku/ / 'gro pa'i lam chen mkha' dbyings dag pa la// thig le ye nas bde ba rdo rje'i dbyings// rdo rje nyi ma dus gsum 'du 'bral med// de bas thig le thams cad rdo rje'i dbyings/ / brdal pa nyid na dus gsum 'du 'bral med// byang chub sems ni ye nas gsal ba'i phyir// klong gi dkyil 'khor chen po bde 'jam rdzogs so//// rgya gar skad du/ sarba a ta/ bod skad du/ kun 'dus/ bcom ldan 'das bya bral bde ba'i ngang la phyag 'tshal lo// chos sku ye nas rnam par rab dben pa'i// rnam rtog bla dgas yul las 'das pa'i phyir/ / yod med stong pa'i mtha' ni dbyings su gcig/ dbyings nyid gcig la lta ba'i khyad par dgur snang ste// snang 'dod rtsol ba'i sems ni sdug bsngal nad// chos nyid dang gi gnas pa'i rang bzhin las/ / thugs rje chen po'i mkha' ltar khyab pa ni// thabs kyis rol pas 'dod dgur bsgyur ba'i dpal// chos rnams sna tshogs ji bzhin snang ba las// tha snyad thams cad byang chub mchog gi lam// snying po byang chub mchog tu nges pa las/ / gzung 'dzin bgrod pa'i yul ni ga la yod// tha snyad tsam du 'du shes bya mod kyi// dam du bcas pa'i yul yang rdul tsam med// dam du bcas pa'i yul med gsal ba na/ / dam du bcas kyang yul med nam mkha' 'dra// 'dod dgur sgyur ba'i snying rje thabs chen la// bsam dgu lhun gyis grub par byed pa yang// ye shes klong du shar ba'i rnal 'byor pas// sa mchog 'di ni ma bsgrubs lhun gyis grub/ / bag la nyal ba'i skyon rnams ma lus kun// ye shes 'od gsal rang la shar ba'i phyir// theg chen 'di ni mkha' la nyi shar bzhin// mtha' yi mun pa med par ye nas gsal// sgom pa'i yul la 'dzin pa'i gnas med pas/ / sgom bcas de dag 'dzin pa'i sdug bsngal yin// sgom pa'i gnas med rig ba rang dbang na// bsgoms kyang skyon med thams cad nam mkha'i klong/ / gang yang ma bkol kun gyi re ba klong// mnyam pa nyid kyi man ngag gter chen gyis// kun la khyab cing thams cad rang rdzogs// de la cha shas rim pas bza' ba med// ye nas bdud rtsi chen po yin pa la/ / gzhan nas btsal bas 'grub par mi 'gyur zhing// ma btsal lhun gyis grub pa'i dbyings 'gyur la// rnam pa kun tu che bas byang chub lam// thams cad dgongs spyod ye nas dag pa la// 'khrul dang ma 'khrul cis kyang nyams pa med/ / thams cad 'dus te cir yang mi snang bas// dus gsum rgyal ba'i dgongs pa de na gsal// byang chub kyi sems kun 'dus rdzogs so//// bcom ldan 'das rdo rje bskal pa'i bdag po la phyag 'tshal lo// srid bar bcas pa'i 'jigs rten dang// thugs rjer bcas pa'i pho brang kun// sprul pa'i 'khor lo 'od 'bar ba'ang// mngon sum sangs rgyas mkha' la shar/ / phyogs bcu'i 'jig rten mang po nas// spyan drangs la sogs rtsol ba'i gnad// bde ba gsal ba'i thig le las// sangs rgyas gzhan du mi rtsol lo// sems dang chos las sangs rgyas gzhan na med/ / mnyam nyid nam mkha' lta bu'i rang bzhin las// sna tshogs mtshan ma rdul du brlag ba'i phyir// phyag rgya'i tshogs kyang bskal pa'i me ltar 'bar// ye nas lhun gyis grub pa'i rang bzhin las/ / rtsol ba'i sdug bsngal rgya mtsho'i rlabs dang 'dra// chos so cog gi ngo bo nyid// ma btsal gzhag pas rdul du brlag/ thams cad bdag nyid rang gi lha// dkyil 'khor kun tu zhugs pa la// dus gsum mnyam sbyor 'byung 'jug med/ / ma btsal lhun gyis grub par 'gyur// phyi nang spyod yul ma lus pa// mnyam dag lhun gyis grub pa la// dus gsum mnyam par gzhag pa ni// bcing du med pa'i phyag rgya yin/ / mi phyed thig ler gcig pa la// dus gsum 'byung 'jug med pa ni// sangs rgyas kun dang mnyam pa'i phyir// bsrung du med pa'i dam tshig mchog/ khams gsum ngo bo rang rig dbyings// phyogs bcu rgya dang bral ba yi/ / bcos pa med pa'i 'khor lo la// ma bkod shar ba'i dkyil 'khor mchog/ thams cad mngon sum shar ba yang// byin rlabs mthu la mi ltos par// yid bzhin lhun gyis grub pa ni// bsngo dang bral bas mchod pa'i mchog/ rtog pa'i rgyal mtshan shar ba'i phyir// thams cad ngo bo bdag nyid sku// don la rim pas mi 'grub pas// thog pa med pa dbang gi mchog/ phyogs bcu'i 'jig rten rab 'byams na/ / g.yo zhing bskyod pa'i chos rnams kun// rang byung sbrul pa bsam yas kyis// bya byed med pa'i 'phrin las phul// mi dmigs byams pa chen po ste// mtha' yas thugs rje chen po yin/ / rab 'byams bde la dga' ba ste// stong nyid gsal ba btang snyoms so// gsang sngags chen po'i khyad par ni// rang rig rgyal ba'i thugs rje yis// bag chags rdul du rlog pa dang// mtshan ma zil gyis gnon pa ni/ / khyud chen mkha' la thogs med pas// steng 'og rim gyis mi bgros de// snang ba dus gcig gsal ba ni// skye 'gro 'dul ba'i gnyen po yin// seng ge'i skad la 'jigs med pa// gcan gzan rim gyis mi 'dul te/ / gzhan gyis rtsol pas mi chud pas// dud 'gro 'dul ba'i gnyen po yin// rang bzhin gsal ba'i byang chub sems// rgyu 'bras rim gyis mi bgrod de// bde chen mkha' la thogs med pas/ / rnam rtog sgrol ba'i gnyen po yin// byang chub sems mi 'gyur ba'i rdo rje thugs rje chen po'i 'od/ gnam spar 'debs rdzogs so//// bcom ldan 'das bde chen rdzogs pa'i klong la phyag 'tshal lo/ / byang chub sems ni kun tu bzang// bdag dang gzhan don gnas med pas/ lhun gyi rdzogs pa'i ngang nyid la// skye dang 'chi med 'gyur ba'i chos med do// dag pas bdud rtsi chen po yang// mi 'gyur gsal bas gser gzhin te/ / dge sdig so sor bcings pa yis// rnam grol thar pa bcings pa ha// gang gis de ltar ma rig ste// don med sgra phyir 'brangs pa yang// dge sdig gnyis ka'i phyogs 'dzin pas/ / dmigs med ldongs nas 'gro ba ha// dkar bas dkar ba'i nyi ma med// gnag pas gnag pa'i mun pa med// zhi bas gsal ba'i thig le la// lhag pa'i lha yang yod ma yin// mu med brdal bar gnas pa'i phyir/ / thams cad du ni gcig pu nyid// nam mkha' lta bu'i bdag nyid la// sems can med cing sangs rgyas med// rig pa med cing sangs rgyas med// bri ba med cing 'phel ba med// dus gsum thig le bde ba'i phyir/ / su la phan med gnod mi 'gyur// rnam par dag pa'i snying po la// mngon sum lhun gyi grub pa ha// mi snang 'gyur ba med pa ni// shes rab thabs las 'das pa'i phyir// lam dang byang chub dang med pa ste/ / med pa'i snying po shar ba ha// skal ldan gang zhig 'byung ba yi// don du gsungs pa'i dgongs spyod kyang// 'di don gdengs dang ldan pa yis// gang ltar spyad kya nga me tog skye// yang dag nges pa'i lung 'di yang/ / rang rig klong du khrol 'dod pas// sems kyi klong du brnag pa las// phal la spro bar mi bya'o// rdzogs pa'i spyi gcod ces bya ba rdzogs so//// bcom ldan 'das dpal kun tu bzang po la phyag 'tshal lo// khams gsum las 'das yid bzhin nor bu rin po che// bgrod med rnam par grol ba'i lam ston pa// gzhan nas btsal bar rnyed par mi 'gyur te/ / thig le chen po kun la khyab par gnas// rang byung ye shes ma bcos 'od gsal ba// bde chen btsal du med pas snying po'i don// snang mdzad nyid ni rtag par kun tu bzang// gnyis med bde ba'i ngang ste lhun gyis grub/ / g.yung drung chen po'i klong du shar ba yis// bde ba chen po'i longs spyod rdzogs pa yang// rtog dpyod mtshan ma kun las 'das pa'i phyir// drang srong chen po nyid kyi spyod yul yin/ / thams cad sku gsung thugs kyi dkyil 'khor la// shes te rtog pa'i klong du mnyam gzhag nas// grub pa'i khyad par mngon du shar ba'i tshe// khams gsum kun kyang bdag gi zhabs la 'dud// byang chub kyi sems khams gsum sgron ma rdzogs so/ /// rdo rje sems dpa' nam mkha' dang mnyam pa'i rgyud bzhugs so/ / rgyal ba kun gyi ngo bor gyur// 'das pa'i sangs rgyas de bzhin gshegs// rdul gyi zhing dang rab mnyam pa// rang byung rdzogs pa'i don thob nas// dgongs pa rnal du bzhag las byung// ma byon dpal ldan de bzhin gshegs/ / nam mkha'i mtha' dang rab mnyam pa// rdzogs chen lhun grub don rtogs nas// dgongs pa rnal du bzhag pas 'grub// sangs rgyas kun gyi dgongs pa ni// ji snyed chos rnams ma lus pa/ / snying po gcig tu kun 'dra pas// de nyid ma bcos dgongs pa ste// rtogs nas yan par bzhag las byung// ma skyes skye ba rang log pa// rmi lam sad pa'i spyod yul ltar// rtogs nas don 'dzin rnal 'byor pas/ / ma bcos bzhag pas bde bar grol// rdo rje sems dpar rang grub pa// dpag med ye shes las byung ba'i// sangs rgyas sna tshogs skur byung nas// mngon sum rang gi snying la thim/ / dpag med ye shes chu bo'i rgyun// spyod yul ma lus rgyun mi 'chad// rnal 'byor skal ldan grol 'dod pas// 'thungs pa tsam gyis rnam par grol// de bas srid pa'i rgya mtsho nyid// rnal 'byor thabs ldan skyes bu yis/ / rgyal ba'i bka' gsang snying po la// rtogs pas mi bskyod bder gnas so// ji srid nam mkha'i mthar thug pa'i// jisnyed snangagrags ma lus pa// ma lus snying po gcig tu gnas// de nyid rdo rje sems dpa' ste/ / ma lus dngos 'di thams cad kun// ma bcos rdzogs pa'i rnal 'byor la// ma lus rdo rje sems dpar ni// mngon sum gzugs kyi gnas par 'gyur// nam mkha'i mtha' dang mnyam sbyor ba'i/ / rdzogs chen don la gang gnas pas// dngos po gang dang gang snang yang// dgongs pa rnal du gzhag par bya'o// dpag med ye shes 'khor lo can// sangs rgyas kun gyi snying po nyid// nam mkha' lta bu dpag med pa/ / rang nyid de ltar gnas par bya// mtha' dbus phyogs rigs dang bral ba// ye shes rang byung bsam mi khyab// dgag bsgrub re dogs chad pa yi// bsgom du med pa'i tshul gyis gnas// rang bzhin 'bab chu ji bzhin du/ / ma bsgoms rang gzhag dgongs pa'i lung// ma lus rnal du bzhag pa ni// rang dgar gnas pa'i stobs las 'grub// dbang po gang dang gang snang ba// ye shes nam mkha'i 'od du gsal/ / nyi 'od nam mkha'i chu rlabs ltar// ma bcos rang grol nyid la thim// dpag med nam mkha'i rang bzhin la// shar med nyi ma'i 'od kyis gang// shar ba med cing nub pa med// nam mkha'i mthar thug bar du gnas/ / sangs rgyas kun gyi bde chen 'di// dgongs pas ma bcos rnal gzhag pa// rim par brgyud pa'i gsang ba'i gter// bskal par sbyangs pa'i rnal 'byor ram// dbang po chig chod gang rung la/ / klong dgu rgya mtsho bcud bsdus pa'i// dbang po yan bzhag gsang ba'i thabs// dgongs pa rnal bzhag grol ba'i lam// rnal 'byor thabs kyi gsang chen 'di// skal ldan gcig gi spyod yul te/ / dman pa rnams kyi spyo yul min// dgongs pa rnal bzhag ye shes yin// zhes gsungs so// nam mkha'i mtha' dang mnyam pa'i rgyud chen po las// dgongs pa rnal du gzhag pa'i le'u ste lnga bcu bdun pa'o/ /// de nas yang sems dpa' rdo rje dam pa de la/ 'dus pa chen po'i tshogs rnams kyis 'di skad ces gsol to// skyob pa sangs rgyas thams cad kyi// sku dang gsung dang thugs kyi rgyud// gsang ba kun gyi bdag nyid de/ / rgyud kyi don ni ji lta bu// rtsa ba zhes ni ji ltar lags// phyi ma zhes ni ji ltar lags// gsang ba zhes ni gang la bgyi// de yi brda ni ji ltar lags// de ni don ni bshad du gsol// zhes zhus so/ / de nas bcom ldan 'das gsang ba'i bdag po phyag na rdo rjes// 'khor gyi tshogs la 'di skad ces bka' stsal to// 'das dang da ltar ma byon pa'i// de bzhin gshegs pa thams cad kyi// sku dang gsung thugs rdo rje yi/ / ma bcos snying por ro gcig pa'i// ye shes rang byung skye med klong// rtag tu gnas pa gang yin rgyud// de yi ngo bo bstan pa'i phyir// byin rlabs ye shes rgya mtsho nyid// rgyal ba rgya mtsho rnams la brgyud/ / de dag gsang ba'i don nyid ni// skal ldan rgyal sras dpag med la// ting 'dzin rig pa mchog gi rgyud// de nas thugs rje byin rlabs kyis// dus gsum rgyal ba'i sku gsung thugs// tshig dang yi ger mngon sprul nas/ / rang rgyud dag pa'i skye bo la// 'khor ba snying por dgrol ba'i phyir// rna brgyud 'phrul tshig ngag gi rgyud// gang gi gang la gang brgyud pas// 'di ni rgyud ces bya bar brjod// chos rnams ma lus thams cad dang/ / bka' rgyud theg pa ma lus kyi// brjed bya don gyi snying po ni// ma lus rdzogs pa chen po nyid// ji snyed theg pa ma lus pa'i// thabs kyis bsgrubs pa'i 'bras bu ni// ji snyed sku gsung thugs snang ba/ / ma bcos chos sku'i ngo bor 'dus// ji snyed sangs rgyas sems can dang// bstan pa'i phung po ma lus dang// phyi nang snod bcud ma lus pa// rtsa ba rang sems rdo rje nyid// de nyid rdzogs chen thig le'i rgyud/ / klong dgu'i bstan pa rgya mtsho'i rgyud// ma lus 'phros pas rtsa ba ste// yan lag rtogs pa kun dang 'brel// gcig don rtogs pas kun don rtogs// dper na lus dang yan lag bzhin/ / 'dis ni rtsa ba'i rgyud ces bya// gang du ston pas gsungs pa'i don// 'khor la thog mar grags pa nyid// rtogs par dka' ba'i gsang ba la// rgyal tshab skyes bus phyis gsungs pa// de ni rgyud kyi phyi mar 'dod/ / snga ma rtogs par dka' ba'i don// phyis rtogs pas kyang phyi ma yin// 'khor gyi dngos po rgyal tshab la// 'dus pa'i 'khor tshogs phal pa yis// phyis nas zhus pas phyi ma yin// snga ma mya ngan 'das pa ste/ / phyi ma 'khor ba nyid du gsungs so// snga ma sbas pa'i rang bzhin la// phyi ma gsal bar byed pa'o// 'di ni phyi ma zhes su bshad// sangs rgyas kun gyi gsang chen ni// chos so cog gi snying po ste/ / kun gyi rtogs par dka' ba nas// gsang ba nyid du de gsungs so// dus gsum rgyal ba thams cad kyi// sku gsung thugs kyi rgyud chen ni// rdzogs chen bstan pa'i snying po ste// dman pa'i yul du ma gyur bas/ / dgu rum sbas pa'i don gsang ba'i// yang dag sangs rgyas rdo rje 'chang// sku gsung thugs kyi bde chen po// dpag med sangs rgyas byang chub sems// ma lus rdul snyed kun gyis kyang/ / dgongs spyod rtogs par ma gyur pas// gsang ba nyid du de brjod do// gang du ma bcos rdzogs chen po// thog ma mtha' ma dbus med pa// rdo rje nam mkha'i dkyil lta bu// brtag cing spyad pa las 'das pa/ / de mtshon brda don thams cad de// sangs rgyas byang chub sems dpa' dang// bstan pa'i theg pa thams cad dang// snang srid phyi nang snod bcud kun// rang byung rdzogs pa chen po'o// mtshon dpe brdar gyur ma yin med/ / bla ma dag ni bdag nyid dang// dran rtog rgyu ba kun kyang brda// brda la chags par gang gyur ba// de nyid rang gis gang bcings ba// brda nyid don du shes byas la// don nyid bya btsal med par grol/ / 'du shes med pa'i rang bzhin ni// ma yengs yan par gzhag pa yin// phyi brda snang ba sna tshogs te// nang brda rig pa gang skyes nyid// brda nyid ma bcos dbyings la thim// phyi nang ma btsal rang bzhin gzhag/ ces gsungs so// nam mkha'i mtha' dang mnyam pa'i rgyud chen po las// rgyud snga ma dang phyi ma bshad pa'i le'u ste lnga bcu nga brgyad pa'o//// de nas yang sems dpa' rdo rje dam pa la// 'dus pa'i 'khor tshogs kyis 'di skad ces gsol to/ / dus gsum rgyal ba thams cad kyi// sku gsung thugs kyi gsang ba'i gter// bde ba chen po mtha' dbus med// nam mkha'i mtha' dang mnyam pa'i rgyud// bde ba chen po gang gi don/ / thabs kyi khyad par ji lta bu// ji snyed rtag pa ji ltar rtag/ don la snga phyi yod mi yod// ma lus mgon po gtso bo ches// 'dus pa'i tshogs la nges par gsungs// zhes gsol to// de nas de bzhin gshegs pa gsang ba'i bdag pos zhus pa'i don mkhyen nas 'di skad ces bka' stsal to/ / gang gis g.yo ba'i don bstan nas// 'bar dang 'dzag pa'i rnam pa can// bde ba chen po thob par 'dod/ / bde ba zag bcas thob par 'gyur// gnas dang langs dang gcig tu sdud// 'dzin dang sprod dang spor ba dang// khyab dang yun rings gnas pa dang// 'dren dang pha rol 'jug pa nyid/ / g.yo ba rlung gi las su bshad// gang gis rgyu ba bcad pa las// brtags pa'i snang ba kun 'grub ste// bde ba'i ro yis lus gang nas// 'dar dang brgyal ba la sogs 'byung// dngos po gang rung snang ba la/ rig pa rtse gcig brtags pa'i tshe// dbang po rgyu ba rang log nas// bde ba chen po lus su smin// rnam smin yid dang ting 'dzin dang// ye shes lha mo mnyam sbyar nas// rang lus bde ba chen por smin/ / rim snang bde bas tshim par byed// ji ltar thabs la bstan pa yin// sbyor ba'i yan lag ma lus pa// dang po gzud cing sems sbyang phyir// cho ga'i rim pa bstan pa yin// bde ba chen po rgyu rkyen med/ / zag pa med pa 'dus ma byas// nam mkha' lta bur dpag med pa// 'di ni bde ba chen po nyid// rang byung ma bcos bde chen 'di// theg pa'i khyad par ji snyed pas// bskal pa brgya ni mchod gyur kyang/ / rang byung rdzogs pa mthong mi 'gyur// de bas tshad ldan slob dpon la// gzhung ldan ma nyams slob bu yis// sangs rgyas 'du shes nyer gzhag ste// ma rabs 'du shes kun spangs nas// lus dang longs spyod rin chen gyis/ / sangs rgyas thams cad mnyes phyir dbul// de nas a yi rang bzhin gyis// yi ge med pa'i shes pa nyid// kun la khyab pa'i rang bzhin can// btsal ba med par pha rol phyin// ma lus rtsad nas gcod pa'i phyir/ / spu gri lta bus rtogs par bya// rtogs pa'i rgyal po chen po las// dngos po ji snyed bstan pa yang// snga phyi med pa'i shes pa ste// rang byung thog babs nyid du gnas// thog ma mtha' ma med pa yi/ / dran rtog sgrib pa rgyu ba'i tshogs// thabs la brten pa'i ye shes kyis// ma lus dri med snang bar 'gyur// ma lus rang bzhin bde chen po// mkha' ltar dri med gsang ba'i thugs// rang snang snying po ma rtogs na/ / dpag med bstan pa ngal ba'i rgyu// so so bstan pa'i rgya mtsho'i rgyud// lung dang rig pa mngon rtogs dang// sna tshogs cho ga la brten pas// rang rang mthun snang 'bras bu 'grub// ma lus kun 'byung dri med kyi/ / rang snang 'bras bu thob mi 'gyur// snga phyi dus gsum dbyer med pa'i// rig pa nyid la kun rdzogs pas// sangs rgyas sems can dus mnyam ste// snga phyi khyad par bstan pa med/ / rgyal ba'i sku dang gsung thugs la// snga phyi khyad par mi gnas na// des gsungs bstan pa rgya mtsho'i don// snga phyi med pa'i dus mnyam yin// ma lus kun 'dus rig pa'i gter// gsang ba rgya mtsho bsam mi khyab/ / phyogs las 'das pas yul mi 'jug/ rtogs nas ci bder yan du khyer// ma bcos rig pa'i 'og min te// phyi nang rtog pa zla ba nyid// bsam gyis mi khyab rtogs pa'i dus// dran rtog skal ldan rgyal sras 'khor/ / rtogs pa'i rig par thams cad bsdus// bstan pas rtogs pa rtsa ba ste// ma yengs rlung 'jug phyi ma yin// zhes gsungs so// nam mkha'i mtha' dang mnyam pa'i rgyud chen po las/ / phyi rol gyi rgyud mi gnas te gcig tu bstan pa'i le'u ste lnga bcu nga dgu pa'o//// de nas yang sems dpa' rdo rje dam pa de la/ 'dus pa chen po'i tshogs kyis 'di skad ces gsol to// dus gsum rgyal ba thams cad kyi/ / gsang ba'i 'khor lo rig pa'i thugs// sgro 'dogs skur 'debs rnam par gcod// nam mkha'i mtha' dang mnyam sbyor ba'i// mtshan gyi rnam grags ji lta bu// mgon po dpa' bos bdag la gsungs/ / zhes gsol to// de bzhin gshegs pa gsang ba'i bdag po phyag na rdo rjes 'di skad ces bka' stsa to// 'dus pa'i tshogs chen po legs par nyon// ji snyed theg pa thams cad dang/ / bstan par grags pa thams cad kun// rang byung sems las snang bas na// rgyud 'di mtshan mar ma 'gyur med// ma lus kun 'dus byang chub sems// bstan pa'i yang rtse snying por bcud// nam mkha'i mtha' dang mnyam pa'i rgyud/ / ma bcos rig par gter gyi mdzod// yi ge med pa don gyi lung// kun bzang rig pa mchog gi rgyud// ma lus gnas pa'i gsang ba ni// ma bcos lhun rdzogs snying po'i rgyud// khu byug klong dgu bstan pa'i gter/ / ji snyed 'khor 'das ma lus dang// theg pa'i khyad par 'dir 'dus shing// glong dgu bam po nyi khri'i don// 'phro zhing 'dus pa'i rtsa ba'i rgyud// ma lus 'dus pa'i snying po ni/ / yan lag gang gis mi mtshon te// rtsa ba'i thabs 'dis mtshon pa'i phyir// 'di don rtogs pas kun rtogs pa'o// tha mal dbang po rim sgo nas// bcos ma'i theg pa'i dbang bskur nas// rim pas zil mnan nyams myong bskyed/ / ma lus ro gcig kun rgyas btab// theg pa kun gyi yang rtse ste// kun gyi yul du ma gyur phyir// 'das dang ma byon da ltar gyi// dgongs pa rtse gcig 'dir 'dus pas// don gyi snying po bcud ces bya/ / rang byung ye shes mtha' dbus med// kun 'byung dkyil 'khor rgya dang bral// thabs 'dis mtha' dbus med pa ste// rang snang lhun rdzogs snying por ston// rang byung rtogs pa'i byang chub sems/ / 'di la mtha' dang dbus med pas// nam mkha'i mtha' dang mnyam pa'i rgyud// snang srid bde chen snying po'i rgyan// ma lus kun 'dus rig pa'i gter// rang byung 'od gsal snying po la// dgag bsgrub re dogs 'jigs pa med/ / ma lus 'dus pa'i snying po 'di// mi mkhas brtags pa rang bzhin nyid// mkhas pas rang rgyud med par rtogs// ma bcos shes pa bsam mi khyab// gang rtogs dus ni thams cad du/ / gsang ba'i gter sgo phye ba yin// spyod lam ma chags pha rol phyin// che ba rang byung rgyun mi 'chad// rang byung sems nyid snying po 'di// stong nyid nam mkha'i klong du gnas// 'di la brda dang tha snyad dang/ / tshig dang yi ge la 'das pa// yi ge med pa'i rang bzhin te// yi ge brda la gang brten pas// snang srid yi ge med pa'i rgyud// stong nyid nam mkha'i dbyings lta bu// da lta nyid du snang bar byed/ / ma bcos thugs kyi me long 'di// ji ltar bltas kyang kun tu bzang// kun bzang rtogs pa'i dgongs spyod 'di// dman pa'i rigs can spyod yul min// rang byung 'gyur med kun bzang 'di/ / thabs chen gsal bas kun tu bzang// ma bcos rig pas kun la khyab// dus gsum rgyal ba kun gyi mchog/ rang byung byang chub sems nyid ni// nam mkha'i mtha' bzhin kun khyab kyang// thabs dang lhan cig mi gnas pas/ / rang gsang thabs kyis bcad pa yin// gang de thabs dang bral ba yis// ji ltar btsal kyang mi rnyed pa// gsang ba thabs kyi rim pa yis// mngon du bstan pa'i rgyud chen yin// rang byung lhun rdzogs snying po la/ / thabs kyis re dogs bcad nas ni// dgag bsgrub zhen rtsol kun bral yang// nyi 'od rgya mtsho rin chen ltar// ma btsal lhun gyis rdzogs pa'i don// nam mkha' lta bur bar chad med/ / rkyen dang sbyor la rag ma lus// rig pa nyams kyis rgyud ces bya// rgyal ba rnams kyi ngo bo nyid// bstan pa rgya mtsho sems kyi klong// brtags pa'i zhen pa gcod byed cing// gdul bya spro ba skyed par byed/ / ma bcos brtags pa'i sems nyid ni// phyogs ris blang dor mi mnga' ste// mtha' dbus med par 'di ston pas// lta ba mtha' dbus med pa'i rgyud// ma bcos 'od gsal don rtogs pas// mtha' bral nam mkha'i dkyil 'khor la/ / mtshon cha'i 'khor lo bskor ba ltar// re dogs bral ba'i spyod pa nyid// blang dor med pa spyod pa'i rgyud// snang srid ma bcos gzhal yas su// ma bcos sku gsung thugs kyi rgyan/ / sku gsum rtogs pa'i don ldan pas// ma lus dkyil 'khor chen po nyid// ma lus 'di yis ston pas na// dgod med dkyil 'khor rgyan gyi rgyud// skal ldan thugs kyi rgyal sras la// snang srid dbang gi ngo bo ru/ / skal ldan dbang phyug rgyal pos bstan// dbang thob rgyal sras phyir mi ldog/ dbang bskur thabs kyi rtsa ba'i phyir// spyi blugs dbang gi rgyud ces bya// skal ldan skyes bu rnal 'byor pa// dngos don snying po la 'jug tshe/ / ma bcos lhag pa'i dam tshig bzhi// phog pas ma bcos dam tshig rtogs// ma lus dam tshig 'dir 'dus shing// 'byung zhing spro ba'i snying po bas// 'da' med dam tshig rgyal po'i rgyud/ / ma bcos thugs kyi 'phrin las la// thabs kyi gsal te bar chad med// bya btsal zhen pa'i 'phrin las min// ma btsal rig pa'i 'phrin las nyid// rtogs shing ston par byed pas na// bya bral 'phrin las rgyud ces bya/ / rang byung rdzogs pa chen po la// ma bcos rdzogs pa'i rnal 'byor ni// sa dang lam la rim med de// rtogs pas sa rnams dus gcig mnan// mtha' med nam mkha' lta bu la// bgrod med lam mchog ston pa'i rgud/ / rang byung phyogs med nam mkha' la// ma bcos ye shes shar ba'i tshe// rkyen dang sgrib pa dran rtog rnams// rgya mtsho chu dang chu bur ltar// ma lus ye shes nyid du gsal// ma lus rang byung snying po la/ / sgrib med gsal bar ston pas na// rang byung ye shes gsal ba'i rgyud// tag sha ga yi rgyan bzhin du// ji snyed che ba'i yon tan rnams// phyogs med byin rlabs rang snang bas// lhun grub 'bras bu'i rgyud ces bya/ / bka' brgyud kun gyi rtsa ba ni// rang byung rdzogs chen sems kyi rgyud// de dag ji snyed bstan pa kun// thams cad 'di las 'phro zhing 'dus// zhes gsungs so// nam mkha'i mtha' dang mnyam pa'i rgyud chen po las/ / mtshan gyi rnam grangs bstan pa'i le'u ste drug cu pa'o//// de nas yang sems dpa' rdo rje la// 'dus pa'i tshogs kyis 'di skad ces gsol to// ma bcos rang byung ye shes nyid/ / ma lus kun gyi rang bzhin la// rim pa khyad par mi gnas kyang// dbang po rtsal gyi khyad par snang// dngos don rtogs dang ma rtogs pa'i// rim pa'i khyad par bdag la gsungs// zhes gsol to/ / de nas de bzhin gshegs pa gsang ba'i bdag pos 'di skad ces bka' stsal to// rang byung 'od gsal mtha' dbus med// thams cad ma bcos byang chub sems// dri med nam mkha'i klong brdal bas/ / rnam par dbye ba'i chos mi gnas// ma lus rang snang bstan pa ste// rig pa 'khor lor brda yis bsgrags// rang byung bstan pa thugs kyi bcud// rang bzhin khyad par 'od du 'bar// dper na nyi 'od rin chen bzhin/ / dbang po med pa'i yul min te// skal med rigs chad rnal 'byor pas// ji ltar btsal bar mi rnyed kyang// gang ltar bltas kyang mi mthong ngo// dmigs bral nam mkha'i yul las 'das/ / rang byung snying por cir mi gnas// rtogs dang ma rtogs mtha' yas kyang// snying po'i ngang la de dag med// ma lus thugs kyi bstan pa 'di// rang bzhin 'od gsal chen po nyid// ma bcos bde ba chen po'i klong/ / rang sems bde ba chen po'i klong// rang sems phyogs med nam mkha'i dbyings// mthar thug med pa'i ngo bor gnas// rgyal ba kun gyi don chen dbyings// mthar thug med pa'i ngo bor gnas/ / rgyal ba kun gyi don chen dbyings// ma bcos rin chen gter gyi klong// rin chen lhun grub snying po 'di// rin chen 'phrul gyi lde mig gis// tha mal zhen pa rnam par bzlog/ brtags pa'i 'du shes rnam par bkrol/ / rang snang rig pa'i 'khor lor bcug/ sgra bral bstan pa rgya mtsho gsungs// 'byed dang 'grol dang nges par 'byin// gsang ba'i lam la mngon du zhugs// re dogs gnyis 'dzin rnam par bcad/ / rgyu dang 'bras bu ka nas bzlog/ bcing grol med pa thar pa'i lam// phyogs med rgyas pa'i 'od snang ba// rang sems dkyil 'khor klong nas shar// rang byung thig le sems kyi ro// brda bral mnyam pa'i sems kyi myong/ / rig pa'i 'khor lor kun bskor bas// sgro dang skur ba rang bzhin chad// thams cad bde ba chen po'i dbyings// 'od gsal rgyu 'das rim 'jug med// dang por rtogs pa'i rang bzhin ni/ / rgya mtsho chu 'dzin lta bur gnas// rang gi mtshan nyid gsal rtogs pa// 'bru bcud nyams su myong ltar gnas// tha ma rin chen sbyangs pa ltar// rang byung yon tan lhun gyis grub// rang byung rtogs shing don thob na/ / 'khor ba ma btsal sangs rgyas sa// bde ba chen po'i don stor ba// mtshan ma sna tshogs lam du zhugs// bya bral lhun grub snying po la// rang rang zhen pa'i mdud pas bcings// rang las 'bras bu gzhan du btsal/ / ri dwags smig sgyu bsnyegs pa yis// 'dod pa'i don dang ga la phrad// gang zhig nam mkha'i mtha' 'tshol ba// mi rnyed blun po'i rang bzhin ltar// sangs rgyas btsal bsgrub thob 'dod pa/ / mi mkhas rang bzhin de bzhin no// gang zhig skal bas dman pa la// bdud rtsi sdug bsngal rangabazhin ltar// snod min rang bzhin rigs chad la// bslab cing sdug bsngal rgyu 'gyur ba// dam pa rnams kyis shes pa las/ / dman pa rnams kyis ga la shes// bcos pa'i thabs la rten nas ni// rnal ma'i lam la gzud par bya// nor bu rin chen 'od 'bar ba// kun gyi yul du mi 'gyur bas// dam pa gsang ba'i snying po 'di/ / su yi snying la 'od 'bar ba// skal ldan rnal 'byor dbang phyug ste// sku gsung thugs ni dbyings la skyong// skal med dman pa'i rnal 'byor la// brgyud pa'i thabs ni bsngags pa yin/ zhes gsungs so// nam mkha'i mtha' dang mnyam pa'i rgyud chen po las// gdam pa phog ba'i tshul bstan pa'i le'u ste drug cu gcig pa'o//// de nas yang sems dpa' rdo rje dam pa de la/ 'dus po chen po'i tshogs kyis 'di skad ces gsol to/ / dus gsum rgyal ba thams cad kyi// rang byung dgos pa'i bdag po khyod// gang zag blo yi khyad par ltar// bstan pa 'tsham par bstan dgos pas/ / slob dpon slob ma'i khyad par dag/ ma 'dres rim par bshad du gsol// zhes gsol to// de nas yang sems dpa' rdo rje dam pa des 'di skad ces bka' stsal to// dang po phyi yi bla ma yang// rim pa bzhin du brtag par bya/ / rang bzhin bzang dang g.yo sgyu med// drang zhing gsong bor gnas pa dang// thabs chen rigs bzang 'dul ba dang// ser sna chung zhing brtse sems che// 'di ni rang bzhin brtags pa yin/ / gzi brjid byin rlabs che ba dang// 'gro ba 'dul dang dam chos 'du// mang po 'du zhing bsgo ba nyan// 'di ni bsod nams brtags pa yin// gang du dam pa'i rigs gyur cing// dam par gyur pa'i tshad ldan pas/ / 'di dag dam pa'i rang bzhin te// dam pa'i rigs kyi dam par bya// 'di ni phyi yi bla ma yin// rang bzhin de dag mi ldan cing// dam pa'i thabs la mi mkhas pas// log pa'i lta spyod dbang gyur cing/ / lta spyod dman pa'i lcags kyis bsdams// bdag 'dzin log pa'i ngo bor zhen// cong rong lam sna sgo 'byed cing// log pa'i tshig dang thur ma yin// shes rab mig dang bral byed pas// bdag kyang bde bar nus min na/ / pha rol thar par ji ltar 'gyur// 'di dag rang bzhin brtag byas la// dam par 'dod pa'i gang zag gis// rmi lam du yang mi phrad na// dam par brten pa smos ci dgos// dam pa gsum gyi rim brgyud pa'i/ / thugs kyi gter chen rin po che// rang byung thugs kyi snang ba yis// bde chen snying po nyid 'bar ba// gsang ba'i thugs su tshud pa la// yul dang 'byung ba ma lus dang/ sgo gsum dran rtog ma lus pa/ / ji snyed snang grags ma lus kun// bde chen rang byung mngon ston pa'i// bla ma'i zhal du snang ba yin// ma lus rang byung byang chub sems// phyogs ris med pa'i klong brdal bas// chos nyid rang bzhag rkyen gyur las/ / gol sgril g.yang sa chod pa yin// snang ba sems su mthar phyin nas// sems nyid phyogs 'das bstan gyur pa// rang sems lhun grub rin po che// mchog gi bla ma bral ba med// ji srid rol pa rang snang ba/ / sku gsung thugs kyi phyag rgya ste// re dogs bcad pa'i yon tan phyir// che ba'i yon tan chen por gnas// bla ma gnyis dag bral gyur na// phyi yi bla ma rnam pa ste// mtshan ma brda yi rjes 'brangs nas/ / bde chen mchog gi lam bral lo// rdo rje slob ma'i rang bzhin yang// gus dang 'dul dang snying rje che// ser sna chags pa nga rgyal chung// 'di dag rang bzhin dam pa'i rtags// dad pas dus gsum mi 'bral zhing/ / dam pas dam par rang mthong na// rigs dang yo byad spyod lam dag/ dman par gyur kyang dam pa yin// dam pa ma yin slob ma la// dam par bzung zhing bstan pa dang// rna brgyud bdud rtsi gang ston pa/ / gnyis ka rdo rje'i khab tu ltung// dang por dad dang gang rtogs pa'i// sgo gsum bsam pa rtse gcig pa'i// snga ma'i dran rtog rgyun bcad pa'i// rig pa 'phen pa dang po nyid// gsal bar myong phyi slob ma ste/ / dngos po phyi nang ma lus pa// rdo rje 'dzin pa'i cha bzung nas// rang byung ye shes chu rgyun dag/ sems nyid de la 'jug par bstan// gang zhig brda don la chags pa'i// rig pa'i gang yin slob ma ste/ / rang sems brda don gang bral ba// de nyid de yi gang rtogs pa// bla mas byin gyis brlabs pa mchog/ de ltar brda don gro la gyur te/ re dogs 'du shes zad gyur te// bla mar slob ma nyid grub pas/ / ma lus slob dpon slob ma dang// gong 'og khyad par rim med de// rdo rje 'dzin pa nyid du 'grub// ces gsungs so// nam mkha'i mtha' dang mnyam pa'i rgyud chen po las/ gang zag khyad par bshad pa'i le'u ste drug cu gnyis pa'o/ /// de nas yang sems dpa' rdo rje dam pa la// 'dus pa chen po'i tshogs rig pa rang snang gi 'khor tshogs kyis 'di skad ces gsol to// dus gsum sangs rgyas thams cad kyi/ / sku gsung thugs kyi rang bzhin nyid// nam mkha'i mtha' dang mnyam pa'i rgyud// bstan dang bris dang bklag pa dang// gzung dang rtogs dang bsgom pa yis// yon tan nyid dam ma mos pa'i// yon tan skyon rnams bshad du gsol/ / zhes gsol to// de nas yang sems dpa' rdo rje dam pa des 'di skad ces bka' stsal to// sangs rgyas kun gyi rin chen gter// sku gsung thugs ni mngon phyung ba// nam mkha'i mtha' dang mnyam pa'i rgyud/ / 'das dang ma byon da ltar gyi// sku gsung thugs ni ro gcig pa'i// ma lus gcig tu bsdus pa'i rgyud// rna brgyud rin chen 'chang ba'i mis// skal ldan rgyal chen dam pa dang// ma nor nges bar bshad bstan pa/ / sangs rgyas dgongs pa nyid la sbyor// sangs rgyas bstan pa bshad pa yin// bstan cing bshad pas grol bar 'gyur// rin chen sna bdun la sogs la// rgyal ba kun gyi rang bzhin gyis/ / ma lus bsdus pa'i ngo bo nyid// sku gsung thugs nyid bris pa yin// de bas rgyal ba kun bris pa'i// che ba'i yon tan bsam mi khyab// nam mkha'i mtha' dang mnyam pa'i rgyud// rgyal ba kun gyi sku gsung thugs/ / rdul snyed rgyal ba ma lus pa'i// nges don ma bcos gsungs pa'i tshig/ brjod pa rgya mtsho kun gyi sgra// thos pas sgrib pa rnam 'joms shing// bklags pa nyid kyis mngon sangs rgyas// rgyal ba kun gyi gsang yin pas/ / bklags pa tsam gyis 'grub par 'gyur// sangs rgyas kun gyi rang bzhin 'di// bshad dang glegs gam don nyid ni// ma nor rig pa'i dkyil 'khor du// dran pas bzung ba'i don nyid ni/ / nam mkha'i mthar thug ji tsam par// de bas de ni lhag par 'gyur// rin chen rgyu dang dar ras dang// gro ga shing shun la sogs te/ gsang ba'i rgyud 'di rab bris te// rin chen khri la legs bzhag ste/ / gus pas mchod cing rab bzung nas// ji srid gnas par bsam pa yi// dga' ba'i bsam pas 'dzin byed na// sangs rgyas thams cad bzung ba yin// rnam grol bla na med pa'i lam/ / sangs rgyas kun gyi dgongs brgyud pa// ma bcos gsang ba'i don bcud 'di// gang gis rtogs pas sgro skur chad// nges pa rnyed pas dbugs 'byin phyir// 'khor ba rmi lam lta bur sangs// snying por nam mkha'i 'od ltar rgyas/ / dgongs pa rgya mtsho'i klong ltar brdal// 'bras bu rin chen 'od ltar 'grub// ma bcos snying po'i don rtogs nas// rang nyams tshad dang mthun sbyar te// bar chad med par gang bsgoms pas/ / sgom zhing bsgrub pa yod ma yin// ma yengs gnas pas sgom pa ni// kun bzang rdo rje sems dpa' ste// sangs rgyas kun gyi rang bzhin yin// ma bsgoms yengs pa med pa'i sems// ma gzhag rgyal ba'i dgongs pa'i klong/ / ma bcos 'od gsal brda bral sems// mtha' dbus 'dzin med dbu ma'i lam// sangs rgyas kun gyi ngo bo yin// rgyal ba kun gyi gsang ba'i gter// ma bcos snying po don gyi rgyud/ / rdo rje rig pa 'phrul gyi tshig/ rna brgyud thugs kyi rin chen 'di// rna brgyud 'phrul tshig mi ldan par// rang rtags log par zhen dbang gis// bstan cing bshad par gyur pa dang// spel ba'ang nges par lhung 'gyur na/ / log pa'i don la zhen dbang gis// phyogs kyi ri bos zil mnan nas// ma bcos gsang mdzod chen po la// skur 'debs gsang ba'i dam sri ste// ston cing smra ba'i gang zag dang// skur 'debs ma mos gang zag la/ / bar ma'i srid pa mi 'byung ste// rdo rje'i khab du ltung gyur te// dran pa tsam gyis skye bar 'gyur// de nas de yi tshe tshad ni// gang gis brjod par mi nus te// gal te thar par gyur pa na/ / gsang ba'i rna brgyud man ngag dang// bskal pa chen po brgyad khri'i bar// phrad cing mthong bar mi 'gyur te// gsang ba'i theg pas 'phongs par 'gyur// de phyir gsang ba'i bdud rtsi 'di// skal ldan rgyal sras rnal 'byor la/ / gsang ba'i thabs kyis gang brgyud la// reg pas nad rnams 'tsho bar 'gyur// skal med rnams la gang bstan yang// dgra bzhin spyod dang skur ba dang// skrag cing dngang par gyur pa'i phyi/ / skal med dman pa'i rnal 'byor la// ming tsam bstan par mi bya zhing// glegs bam nyid ni bstan pa min// gsang chen gsang ba'i bstan pa 'di// gu lang lung gi gser gzo ru// 'jigs bral 'o ma bzhes pa ltar/ / skal ldan 'ga' yi spyod yul la// rigs chad las kyi dman pa yi// skal med rnams kyi spyod yul min// rin chen 'bar ba'i khong seng du// rgya ni rim pa bdun gyis btab// rigs nges skal ldan gcig la gtad/ / srog dang bral ba'i kha bzhin bsdams// gnas ni brag dang chu la gzhag/ ces gsungs so// nam mkha'i mtha' dang mnyam pa'i rgyud chen po las// rgyud gzung ba'i le'u ste drug cu gsum pa'o/ /// de nas 'khor 'dus pa mang po'i tshogs kyis// bcom ldan 'das de bzhin gshegs pa rdo rje sems dpa' dang// bcom ldan 'das gsang ba'i bdag po phyag na rdo rje dang// gsang ba'i mdzod chen po la 'di skad ces mgrin gcig tu bstod do/ / e maho sangs rgyas thams cad kyi// rgya chen gdod nas skye ba med// nam mkha'i bdag po sna tshogs ston// sangs rgyas sku la phyag 'tshal 'dud/ / e maho sangs rgyas thams cad kyi// ma brjod snying po don gyi gsung// gsang ba rgya mtsho ston mdzad pa// rdo rje'i gsung la bdag cag 'dud// e maho sangs rgyas thams cad kyi// rang byung ye shes gsal ba'i thugs/ / ma bcos bde chen mkha' ltar gnas// bde chen thugs la phyag 'tshal 'dud// e maho sangs rgyas thams cad kyi// gsang ba'i gter 'dzin mchog gi bdag/ ma lus gdul dka' 'dul mdzad pa/ / gsang ba'i sku la phyag 'tshal 'dud// e maho sangs rgyas thams cad kyi// brda dang dgongs pa gsung mchog gis// ma bcos gsang ba'i don ston pa// gsang ba'i gsung la phyag 'tshal lo/ / e maho sangs rgyas thams cad kyi// rtog bral bde chen nam mkha'i thugs// phyogs med nam mkha' rgyas pa 'dra// sangs mchog thugs la phyag 'tshal 'dud// e maho sangs rgyas thams cad kyi/ / gsang mdzod bdud rtsi chen po'i klong// ma lus kun 'dus rig pa'i gter// ye shes rgya mtsho bsam mi khyab// sangs rgyas kun gyi gsang ba'i mdzod// chos rnams ma lus thams cad kyi// snang gsal rin chen 'od kyi rgyud/ / nam mkha'i mtha' dang mnyam sbyor ba'i// gsang ba'i mdzod la phyag 'tshal 'dud// ces bstod do// de nas phyogs bcu'i 'jig rten gyi khams rab 'byams nam mkha'i dbyings dang mnyam pa/ / 'jig rten gyi khams gang+gA'i klung gi bye ma snyed na bzhugs pa/ rdul phra mo dang mnyam pa'i sangs rgyas kun kyang gsung gcig tu legs so legs so zhes legs par 'byin par mdzad do// sangs rgyas dang 'khor rdul snyed du bcas pa dang sa'i de bzhin nyid du grol te dgyes par gyur to/ / nam mkha'i mtha' dang mnyam pa'i rgyud chen po las/ bstod cing yi rang ba'i le'u ste drug cu bzhi pa'o/ /// 'das pa dang/ ma byon pa dang/ da ltar phyogs bcu dus bzhi'i de bzhin gshegs pa'i dgongs pa chos thams cad nam mkha'i ngo bo/ nam mkha'i mtha' dang mnyam par sbyor ba zhes bya ba'i rgyud chen po rdzogs so/ /// rgya gar gyi mkhan po shrI sing ha dang/ dge slong bai ro tsa nas bsgyur cing gtan la phab pa'o//// bod skad du/ byang chub sems sgom pa yi ge med pa'i rgyud/ bcom ldan 'das dpal rdo rje 'dzin pa la phyag 'tshal lo// chos kyi dbyings gting dpag dka' ba'i don zab mo zhes bya ba'i ting nge 'dzin la snyoms par zhugs nas/ thams cad yi ge med pa'i rang bzhin du bde ba mchog gis gzigs te/ rang bzhin gzung du med pa'i don 'di bka' stsal to// rang bzhin rang gis rtogs gyur nas// dngas snyigs med pa'i zab mo nyid// dang ba nyid na zab mo yis/ / lung du sgom bsgrub kun dang bral// byang chub sems nyid ltar mi mthong// 'bad pas don nyid kun dang bral// bsgoms pas nyams rnyed mi 'gyur ro// de la bdud rnam bzhi 'byung ste// gzigs pa gzugs dang grags pa sgra/ / 'od kyi bdud dang bslu ba rnams// rang gi rgyud ni 'byung ba'o// ye shes phyin ci ma log pa// dang po bzlas dang brjod du med// sems kyi skad cig dang po la// chos so cog gi rtsa ba ste/ / bslab par bya zhing goms par bya// shin tu goms pa'i stobs ldan na// mtshan ma spyi dang rang gis spangs// theg pa kun dang khyad par 'jug/ rang ka ma la ga la gnas// ma bsgrubs thams cad lhun gyis rdzogs/ / rtog pa thams cad mi g.yo brtan// nges don snying po bla na med// byang chub sems sgom pa'i rgyud yi ge med pa las/ chos nyid kyi skabs//// ring pa'i rgyu nyid rnams spangs la// nye ba nyid du 'jug pa yi/ / bsam pa dag dang ldan pas ni// thams cad tshul bzung man ngag brtag/ thabs che thabs myur thabs gsang pas// mtshan ma'i don la rnam mi brtag/ dbyings nyid rig pa skad cig la// mthong ba thams cad blo yis bslad/ / ma mthong mthong phyir mthong ba ni// gong na med de de ltar min// mtshan ma'i bag chags rgyu ba chad// de yang mtshan ma'i mthar phyin no// mtshan nyid ye shes gsang ba ste// don dam blo yi spyod yul min/ / rtogs dang ma rtogs nyid kyi cha// zung du 'jug dang 'od gsal med// dbang dang dam tshig cha lag rdzogs// 'khor ba mya ngan 'das mthar phyin// yon tan kun gyi tshogs nyid de/ / dngos med cing yang snang ba'i sems// cig char 'jug pa'i rnal 'byor pas// stong pa nyid la blo gtad de// mthar phyin 'gag med bka' yang dag/ ye shes zab mo'i ngo bo yis// ma bsams ma sbyangs rab zhi ba'i/ / rnam rtog nyid kyang ye shes sku// bla med rdzogs chen brjod las 'das// rang byung rang zhi rang la gnas// mthong med rtsol ba las 'das pa// byang chub nam mkha'i rang bzhin no/ / byang chub kyi sems sgom pa yi ge med pa las/ rang bzhin nang gi skabs//// mthong ba med pa'i dbyings nyid la// ye shes zab mo'i skad cig mas// rang bzhin 'byung ba rab tu ste// de yi rtsol bral yang dag nyid/ / ye nas rang bzhin gnas pa yis// mnyam pa'i dbyings kyis kun la khyab// ye shes kyis kyang de bzhin no// dbyings la ye shes rab 'byor ba// de nyid sangs rgyas sa las 'das// shes rab thabs rdzogs rtog pas bskyed/ / de nyid sangs rgyas sa nyid do// stong dang mi stong tshig las 'das// bsam med dag par gnas pa ste// rgyu dang 'bras bu lhun grub pas// gnyen pos ma bcos rab tu zhi/ / rang bzhin zhi ba thabs chen po// bag chags rgyun nyid rang bzhin chad// bkag nas chad pa'i shin tu srog/ srog las sdug bsngal byung tshor te// mthong dang ltar ni med pa ste// ye nas rang byung dbyings de la/ / ye nas rang byung ye shes dpal// rang la rang byung ye shes de// rig pa'i bya ras sod par bya// rig pas ma sod ma tshor 'chor// bde ba nyams te bying ba yin// yang dag bde ba ma yin no// bde ba rnyed pas thams cad 'dus/ / byang chub sems sgom pa yi ge med pa'i rgyud las/ mthong bas ltar med pa'i skabs//// stong pa nyid las gzhan min pas// stong lta de ni thabs rgyal po// rgyal po mtho bo mi yi mchog/ de yis las rnams gzhan las btsal// gzhan rnams las rnams gang byas kyang// rgyal po min te phal pa la// rgyal las dmangs 'byung tha mar rgyal// ye nas rgyal po rgyal ba yang// zungs thub rgyal pos dmangs rnams kyang/ / 'bad rtsol med pa'i thabs kyis bcom// rgyal po dpa' bo thams cad 'joms// bcom pas rgyal 'khor shin tu bzang// bzang mi dmos pa'i rgyal po ste// kun las dpags pa yin par grags/ / dpa' bo de bsad slar 'tsho ba// de ni rgyal po rdzu 'phrul can// byang chub kyi sems yi ge med pa'i rgyud las/ ye shes zung mar bstan pa'i skabs//// gang gis dpag cing mtshon du med/ / de ni chos dbyings zad ma ste// gang gis ma bskyed rang 'byung ba// phyogs ris kun dang bral ba ste// yi ge med de dbyings kyi mchog/ gleng bral tshig la dbyings 'das pas// sna tshogs sogs pa'i spyod yul min/ / shin tu phra bas rnam brtags la// rtsing pos dpyad na phra ma dag/ sgra phyir 'brangs na grub mtha' nyams// rtsol ba 'ba' zhig 'ching ba'i rgyu// ma btsal ba na rtsom pa zhig/ de ni bcom ldan 'das zhes bya/ / mi dmigs dbyings kyi ngang nyid ni// cis kyang mi dmigs dngos snang ba// mkha' zhes pa nyid dbyings kyi don// byang chub kyi sems sgom pa yi ge med pa las/ dbyings kyi don bstan pa'i skabs/ /// chos dbyings dag pa'i mkha' klong la// rgyu med spangs pa'i ye shes dbab// ye shes nyid de chos skur dag/ de ltar sangs rgyas chos sku de// sangs rgyas kyis kyang gzigs su med// chos dbyings spros med spros bral la/ / ye shes lhun grub ma bskyed pas// de bzhin rang 'byung rig pa yin// yi ge med pa'i rgyud du grags// rmad du byung ba spros dang bral// spros med dbyings dang ye shes ni// nam mkha'i dbyings te ye shes so/ / nam mkha' la ni nam mkha' sgom// de las nyams pa'i 'khor lo yin// dig ma rmi lam lta bu la// 'di dang 'di zhes bstan du med// mkhas pa man ngag gsum dang ldan// byang chub kyi sems sgom pa yi ge med pa las/ dbyings dang ye shes gnyis su med par bstan pa'i skabs//// blun po rtog ge'i shes pa nyid// yod dag med pa'i chos la spyod// byang chub sems la ming med pas/ / dmigs na rtog dang 'khor ba nyid// rnam par rtog pa'i rgyu brtags na// rgyu yi rgyu de 'bras bu+i' mchog/ der shes rig pa'i ye shes nyid// dbyings dang ye shes brtags pa'i mthus// snying po bstan du med pa'o/ / shes pa thang sha ma chad par// kun bzang nga las mi g.yo bar// ye nas blang dor med pas na// sems nyid gang la'ang gtad mi bya// rtag chad bde ba'i rlung yin pas// chos dang bde kun grub pa med/ / rnam dag 'khor ba'i don med pas// rdzogs sangs rgyas pas chos rnams med// rtog pa can la sna tshogs snang// dbyings dang ye shes gnyis yod na// 'di ni ye shes dbyings ma yin// byang chub nyid la byang chub gnas/ / rgyun gnas bag chags brtas pa'i mthus// shes pa nang du rub pa yin// mthong ba med pa chos kyi sku// sems ni nam mkha' dang 'dra ste// gang du mi g.yo cir mi brtag/ g.yos na nyams te chags na 'khor/ / byang chub kyi sems sgom pa yi ge med pa las/ sgom pa'i skyon bstan pa'i skabs//// sems mi g.yo ba mnyam pa nyid// spyod yul thams cad las 'das pas// mtshon pa las ni mi mtshon pa/ / sgrub pa las 'das mi bsgrub pa// smra ru med pas mi bsgoms pa// de ni gnyis med nyams zhes bya// rnam shes yul la mi 'brang ba// byang chub chen po zhes bya ba// rang 'byung chen po zang thal ba/ / sems ni dmigs med mkha' dang 'dra// nam mkha' la ni nam mkha' rol// mkha' ru sgom pas mkhar mi smra// spyod yul gang la'ang mi spyad na// ye shes ye shes me bo che// mi g.yo ba ni de nyid do/ / yang dag phyin phyir g.yo ba med// mi gnas pa la'ang mi gnas te// gal te sems la gtad yod pas// sems kyis sems 'ching mi 'chor ro// snang ba med pas mi btsal gzhag/ byang chub kyi sems sgom pa yi ge med pa'i rgyud las/ zab mor bstan pa'i skabs//// rang byung snying po rang 'byung bas// byang chub sems la rgyu rkyen med// yul nyid sgyu mar shes pa de yang rtog/ smra med gleng bral de la sems gang med/ / blo med kun bral chos rnams 'dzin mi byed// ma g.yos mnyam pa sems kyi gtsor bstan no// gang du ma mthong dngos ma grub// dngos grub yang dag don ma yin// ci yi ngo bo cir mi brtags/ / bde gshegs ma lus lam rgan yin// bsgrub bya grub par bya ba'i chos// rtog pa'i dbang gis sna tshogs 'dzin// rdzogs sangs rgyas pas chos rnams med// 'du 'bral med pa chos kyi sku// mtshan ma mtshan ma med pa nyid/ / yul la rig pa'i gnas mi bca'// byang chub kyi sems sgom pa yi ge med pa'i rgyud las/ rang rig pa'i skabs//// de nas chos kyi dbyings gting dpag dka' ba'i ting nge 'dzin las bzhengs nas/ 'khor gyi bde bar gshegs pa rnams la rigs kyi bu dag ces bos nas byang chub sems sgom pa yi ge med pa'i rgyud 'di'i don mthong ngam// thos sam rtogs sam// 'di'i don dang ldan pa dang/ / thog rgyu dbab pa dang// phugs pa shin tu dka' ste/ spros pa dang bral ba bde bar gshegs pa rnams kyis gzigs par dka'o// de nas dpa' bo'i mchog la bde bar gshegs pa rnams kyis gsol ba/ byang chub kyi sems bsgom pa yi ge med pa'i rgyud du gsungs pa 'di gang ltar yang ma 'khums pa lags te/ shin tu brtags dka' ba'i don lags te/ de bzhin nyid kyi don ma bcos pa 'di bka' stsal pa la yi rang ste/ mngon par bka' stsal ba'i tshe na/ thams cad slar yang yi ge med pa'i rang bzhin du gyur/ byang chub kyi sems sgom pa yi ge med pa'i rgyud ces bya ba/ man ngag gi snying po don dam pa'i don dam pa las/ thams cad yi ge med par gyur pa'i skabs shin tu brtag dka' ba'i don rdzogs so//// rgya gar gyi mkhan po shrI sing+ha dang dz+nya na gar+b+ha zer ba 'dug bod kyi lo tsA ba dge slong bai ro tsa nas bsgyur ba'o/ /// rgya gar skad du/ badzra kha sa mU la a/ bod skad du/ rdo rje sems dpa' nam mkha' che rtsa ba'i rgyud skye ba med pa// bcom ldan 'das rdo rje sems dpa' nam mkha' che la phyag 'tshal lo// 'di skad bdag gis bshad pa'i dus gcig na/ / mtshan ma med pa'i gnas shin tu yid du 'ong ba'i 'jings/ bcom ldan 'das dpal bde ba chen po che ba'i che ba bla na med pa'i klong na bzhugs pa las/ bla na med pas 'dul bar gzigs nas/ mtshan ma'i gnas shin tu yid du 'ong bar sku bsrang ba la/ byang chub sems dpa' dga' rab rdo rje dang// rdo rje mdzes pa'i tshal dang/ shin tu brtan pa dang/ gnod spyin mo byang chub la sogs pas/ me tog man da ra ba khal brgya gtor te/ bcom ldan 'das snang ba med pa'i don bka' stsal du gsol zhes zhus pas/ bcom ldan 'das kyis zab mo snang ba med pa'i klong nas ting nge 'dzin las bzhengs te bka' stsal pa/ bla med theg pa bla na med// theg pa chen po gang zhon pa// 'khor ba dag las nges par 'byung// theg gzhan brten pa'i gnas yin pas// theg pa 'di la bsgom par rigs/ / theg chen 'di la su bsgom pa// rgyal ba sangs rgyas rnams dang mtshungs// theg chen byang chub sems yin pas// sangs rgyas byang chub su 'dod pa// byang chub sems kyi mtshan nyid do// sems ni sna tshogs zhes bya ste/ / rdo rje rgya mtsho rin po che// sna tshogs phyir na sems zhes bya// de phyir sems nyid sus mthong bas// mdo sde 'dul ba kun shes phyir// sems nyid shes pas nyon mongs dag/ 'on kyang sems nyid blta ba gces/ / sna tshogs rgyu ba 'khor ba'i chos// mi sems mi rgyu byang chub bo// gdod nas dag pas sbyang du med// gnyen por gnas pas nus mthu can// ye nas gnas pas rang bzhin med// lhun gyi rdzogs pas chub pa gnas/ / dam tshig theg kun srog gi mkhar// mkhar 'gram rtsa ba rnyed pa na// ma bsdus thams cad lhun gyi rdzogs// bla ma bkur ba'i gnas yin pas// srid zhu chungs na nyams pa'i gzhi/ / de phyir bla ma bkur bar rigs// srid zhu bkur byas sangs rgyas rnyed// 'on kyang bla ma bkur bar bya'o// mched grogs mi 'bral 'grogs pa'i rgyu// snga phyi gsum du 'grogs pas na// dus gsum rgyal ba rnyed pa'i phyir/ / gtan bral gyes pa byung nga re// de med sangs rgyas mngon sum mo// sems zhes bya ba sangs rgyas yin// de phyir sangs rgyas su 'dod dang// dngos grub thob par 'dod pa dang// byang chub shes par 'dod pa rnams/ / sems nyid lta ba don la mkhas// zhes bcom ldan 'das kyis bka' stsal to// de nas dga' rab rdo rje dang/ rdo rje shin tu mdzes pa la sogs pa rnams kyis me tog la sogs pa yang gtor nas zhus pa/ bcom ldan 'das shAkya thub pa bde ba'i dbang por bka' stsal pa/ mang po thams cad gcig tu shes par gyis shig ces bka' stsal bas/ 'khor rnams kyis zhus pa/ thub pa'i dbang po rnam grol thugs// bde mdzad slad na don mdzad lags// thugs dbang chen po ji ltar dgongs// zla gsal rnam grol thugs mnga' bas// bla med theg pa chen po'o// lta ba'i don rnams dbye bar gsol/ / zhes zhus pas/ bcom ldan 'das kyis rnam par grol ba zag pa med pa'i ting nge 'dzin la snyoms par zhugs nas/ rgyu 'bras mi 'byed bla med theg/ rgyu la mi bgrod 'bras bu'i sku// theg kun 'byin pa'i khungs pa ni/ / rdo rje bla med theg chen du// theg gnyis theg gsum theg dang bzhi// bla med theg par 'dus pa'i phyir// de phyir theg chen zhes bya'o// bskal pas bkrus kyang nam mkha' med mi 'gyur/ / srid par 'khyams kyang sems la skye shi med// byang chub sems la gsung zhing gdags su med// gzung 'dzin ma lus dbyings der rdzogs pas na// theg pa chen po zhes ni bya ba yin// zhes smras so/ / de nas yang bcom ldan 'das kyis mi 'byed pa 'byed pa med pa'i rgyal ba zhes bya ba'i ting nge 'dzin la snyoms par zhugs nas/ theg pa chen po'i lta ba nyi shu rtsa lnga phye ba/ rdzogs pa chen po'i lta ba lnga phye ba/ / a ti yo ga'i lnga la/ a ti yo ga zhes ba ni chos rnams kyi chos nyid byang chub kyi sems bde ba chen po rang gi rang bzhin du gnas pa/ a ti yo ga'o// thams cad kun 'dus bde chen klung// rgyu 'bras mi 'byed mnyam pa'i ngang/ / snod bcud thams cad bcos pa med// rang bzhin gnas pa A ti yin// a ti yo ga'i a ti yo ga ni/ rang bzhin gnas pa gong ma de smra bsam med pa'o// mchog tu gsang ba'i chos nyid 'di/ / rna dbang gzhan la thos mi 'gyur// de bzhin lce yi dbang pos kyang// de la brjod du rdul tsam med// a ti yo ga'i a nu yo ga ni// byang chub kyis sems ma bcos pa rang bzhin gyis gnas pa de'i ngang la mi gnas par/ dbyings las rig pa de bzhin du byung nas rang gi gnas pa de rtogs pa'o// spyod pa gnyis su med par spyod pa'o// rang bzhin pa la gnas mi nus// rig pas rang bzhin de mthong nas/ / mi 'jug spyod pa mnyam gnas shing// gnyis la 'dzin pas a nu'o// a ti yo ga'i ma hA yo ga ni/ snod bcud kyis bsdus pa'i chos nyid byang chub kyi sems skye 'gag gi mtha' las 'das pa/ mtha' dbus med pa/ mnyam pa'i ngang la gnas pa'o// 'dod chags zhe sdang rnam gsum yang// byang chub chen po'i lam las byung// kun spyod yon tan rnam lnga ni// chos nyid rig pa'i rgyan zhes gsungs so// a ti yo ga'i yo ga ni/ chos thams cad kyi chos nyid rig pas brtags pas gnyis su med par don dam par sbyor la/ kun rdzob du rig pa nyid cho gas lha dang lha mor sbyor ba'o// dbyings las de bzhin rig par shar/ / shar yang de gnyis gnyis su med// bskyed spyan drang ba'ang gnyis med sbyor// de las byung ba'ang de bzhin gnas// zhes lnga gsungs so//// a nu yo ga'i lta ba lnga phye ba/ a nu yo ga'i A ti yo ga ni/ 'khor ba dang mya ngan las 'das pa'i chos mtha' dang dbus med pa thams cad// kun gzhi byang chub kyi sems btsal du med pa'i klung// brjod du med pa'i 'jings/ bcos su med pas lam dang gnyen por sbyang du med pa/ rgyu la mi ltos pas rgyu 'bras gnyis su dbyer med pa/ snang srid ye nas sangs ma rgyas pa med pas/ 'khor ba dang mya ngan las 'das pa gnyis su med pa/ tshig dang yi ge'i tha snyad las 'das pas/ brjod par bya ba rdul tsam yang med do// btsal du med pas bde ba'i klung// bcos su med pas lam dang bral// 'bras bu yin pas rgyu 'bras med// mi skye mi 'gag cir mi dgongs// zhes pa'o/ / a nu yo ga'i a nu yo ga ni// kun nas snang ba'i thig le byang chub kyi sems rnam par dag pa'i mkha' b+ha ga rgya mtsho rnam par dag pa'i dbyings so// dbyings de las rig pa de nyid langs te/ dbyings de nyid mtshan ma med par rig pas rig cing/ rig pa nyid kyang stong pa mtshan ma med par rtogs te/ rig pa dang dbyings gnyis mtshan ma med pa gnyis su med par rtogs pa dang/ sha dang dam rdzas la sogs pa rnams kyang/ lha dang lha mo'i dkyil 'khor du dbyer med par rtogs pa ni a nu yo ga'o// kun bzang yangs pa chos kyi dbyings// dbyings las rig pa de bzhin langs// rig pa nyid kyang dbyings yin te/ / dbyings nyid kyang ni rig pa ste// rig pa dbyings gnyis dbyer med par// gnyis su med pa a nu yin// zhes pa'o// a nu yo ga nyid ni/ gong ma de nyid las langs ma langs med par ma bcos dbyer med par lta bas rtogs nas/ spyod pas sha rnam par lnga dang dam rdzas rnam pa lnga la sogs pa la yang spyad kyang skyon gyis mi gos par blta la/ dbang po dang dbang po'i spyod yul du gyur pa thams cad lha dang lha mo'i dkyil 'khor du gyur kyang skyon med la/ ma gyur par dbyings kyi ngo bor 'dug kyang skyon med pa lta bu zhig tu/ 'dam gyi phur bu ltar 'dril ba ni a nu yo ga dngos so// gdod nas byang chub snying po nyid/ / rnam dag lam chen 'jings yin te// kun spyod snying po'i snying bo lta// kun spyod snying po'i rang bzhin du// rtog pa de nyid a nu'o// zhes dngos bstan pa'o// a nu'i ma hA bstan pa/ gzod ma dang bral ba'i chos nyid spros pa dang bral bar rig pas rtogs te/ shes pa ni shes rab yin// gzhi ma dngos po med par rtogs pa de nyid thabs dam pa yin/ skad cig ma gcig la rig pas de bzhin du rtogs nas/ / 'khor ba dang mya ngan las 'das pa'i rang bzhin/ rig pa'i skad cig ma gcig la mnyam pa nyid gnyis su med par rtogs te/ thabs dang shes rab kyi ngang la gnas pa ni ma hA'o// ji bzhin rtogs pa phra ba min/ / rig pa'i cho 'phrul skad cig gis// 'khor dang mya ngan 'das pa'i chos// sku gsum gnyis su med par rtogs// a nu'i ma hA zhes bya'o// yo ga ni snang ba thams cad 'byung ba lnga'i byin gyis brlabs nas byung bar blta/ 'byung ba lnga rigs kyi yum lnga'i byin gyis brlabs las byung bar blta/ rigs kyi yum lnga chos kyi dbyings rnam par dag pa'i byin gyis brlabs las byung bar blta/ chos nyid dbyings rnam par dag pa yi ge a'i byin gyis brlabs las byung bar blta/ lha dang lha mo sems dpa' pho mo yang chos kyi dbyings kyi byin gyis brlabs las byung bar lta ste rims kyis lta la/ spyod pas lha dang lha mo'i sku gsung thugs bdag gi lus ngag yid gsum gnyis su med par sbyor bas yo ga'o/ yon tan kun dang stobs kyi rnams// rims kyis de bzhin lta byed cing// bskyed dang gnyis su spyan drangs rnams// dbyer med sbyar ba yo ga yin/ / ma hA yo ga'i a ti yo ga ni/ chos rnams kyi chos nyid kun gzhi byang chub kyi sems gzod ma nas ma byung ma skyes skye 'gag med par rig pas rtogs te/ rig pa nyid kyang skye 'gag gdod ma nas med par rtogs tsam na/ snod bcud skye 'gag med par ma gyur pa gang yang med par mnyam pa'i klung du gyur pa de nyid la gnas pa las gzhan la mi spyod pas spyod pa bla na med pa yin/ rtogs pa de nyid kyi ngang las mi 'da' bas dam tshig bla na med pa yin/ gong ma'i rtogs pa de nyid kyi ngang la lta ba las gzhan du mi lta bas lta ba bla na med pa yin/ gong ma de nyid kyi ngang la ma yengs par gnas pas sgom pa bla na med pa yin/ chos nyid ji bzhin ma bcos pa'i ngo bo rig pas brtags shing dpyad nas 'jug pas rtogs pa la mi 'gyur bar klung du gyur pa'o// ji bzhin bcos su med pa nyid// rig pas skye 'gag med par brtags/ / brtags pa klung gyur bde mchog las// blang dor med par kun mnyam pa// ma hA'i a ti yo gar gsal// ma hA yo ga'i a nu yo ga ni/ gong ma chos nyid skye 'gag med pa ma bcos pa rang bzhin med pa ste/ rig pa nyid de nyid las byung ste/ skye 'gag med par rtogs pa de nyid la blo gnas te 'gyur ba med par gnas mi nus par/ chos nyid cir yang snang tsam na rang bzhin med par yang byed/ spyod pas cir yang spyod pa ste/ rtogs pa la klung du ma 'gyur pa ma hA'i a nu'o// rig pas de bzhin chos nyid de// rang bzhin med par rtogs gyur kyang// de la klung du gnas ma nus/ rig pa'i ngo bo cir snang zhing/ / spyod pa brlabs chen cir yang spyod// rig par 'gyur phyir a nu'o// ma hA yo ga nyid ni/ chos rnams kyi chos nyid brjod pa med pa'i dbyings don dam par rang bzhin med par rig pas rtogs pa ni shes rab yin/ rang bzhin med pa de nyid rig par gyur te/ rang bzhin med par rtogs par byed pa thabs yin// thabs dang shes rab gnyis su med par rig pa dbyings la 'byor tsam na/ kun rdzob tu lha dang lha mor snang ba thams cad kyang rig pa rang snang la/ snang tsam na yang ngo bos stong ste/ snang la rang bzhin med pa nyid du gsal ba ni kun rdzob yin// kun rdzob dang don dam pa gnyis gnyis su med par lta bas lta zhing/ spyod pas kyang spyod pa gnyis su med par spyod pa'o// don dam kun rdzob gnyis med cing// don dam du ni dbyer med de// kun rdzob tu ni thams cad la// dag dang ma dag gnyis su ni// yo ga kri ya la sogs lta/ / ma hA yo ga'i theg pa ni// don dam du yang dbyer med cing// kun rdzob tu yang dbyer med de// dag dang ma dag gnyis med lta// rnal 'byor nang pa'i rang gzhung ngo// ma hA yo ga'i yo ga ni/ gong ma ltar gnas pa la don dam pa dang kun rdzob gnyis gnyis su med par lta bas kyang lta ba la/ spyod pas kyang gnyis su med par spyod pa la/ kun rdzob lha dang lha mor snang ba yang cho ga'i yan lag gis skur mi bskyed de/ rig pa skad cig ma la gsal la/ gsal tsam na yang rig pa'i ngo bo nyid snang ba'o// gnyis su med par gang snang ba// rig pa'i yul la snang ba ste// snang ba klung du 'gyur byed pa// ma hA'i ma ha yo ga yin/ / ma hA yo ga'i yo ga ni/ sngon du btang ba de rig pas rtogs kyang zhen cing spyod ma nus pa'o// yin yang spyod ma nus pa ni/ chu'i nang na spu gri gnas pa la mi chod kyang rkang pa 'jogs mi nus pa'o// don dam kun rdzob gnyis med pa/ / rig pas mthong yang 'jug ma nus// chos rnams ma lus thams cad la// dag dang ma dag gnyis su 'dod// yo ga'i A ti yo ga ni/ sngon du btang ba'i byin gyis brlabs kyi tha ma chos kyi dbyings mi dmigs par rtogs pa la klung du gyur pa ni/ yo ga'i a ti yo ga'o// chos dbyings yangs pa kun tu bzang// byin gyis brlabs kyi byin brlabs las// zab mo dbyings rtogs de nyid la/ / 'gyur med gnas ba a ti yin// yo ga mtshan ma lha'i rnal 'byor// yo ga'i yan lag dgus gsal ba ni// mtshan ma lhar snang ba'i rnal 'byor yin la/ de ltar gsal kyang mtshan ma med pa'i chos nyid kyi rnal 'byor du gyur pa ni yo ga dngos so/ / mtshan ma gnyis la gang 'jug pa/ shes 'jug yo ga'i lta spyod de// kun rdzob don dam gnyis la ni// lta zhing spyod pa yo ga yin// yo ga'i a nu yo ga ni/ thams cad rdo rje sems dpa' byang chub sems kyi rang bzhin du snod bcud gnyis ma gyur pa med par rtog pa'o// rig pa rdo rje sems dpa' yi// rang bzhin du ni gang gyur pa// rig pa byang chub sems gyur te/ / rdo rje sems dpa' rtogs pa ni// yo ga'i a nu yo ga yin// yo ga'i ma hA yo ga ni/ don dam pa dang kun rdzob ma rtogs par/ kun rdzob tu lha dang lha mor khams skye mched snang ba thams cad dang/ 'byung ba dang 'byung bas bsdus pa thams cad lha dang lha mor snang la/ snang ba de nyid la zhen cing don dam pa la mi spyod pa ste/ don dam kun rdzob gnyis ma rtogs// kun rdzob nyid la zhen nas ni// don dam nyid la blo mi gnas/ / rig pa lhar blta de zhen la// yo ga'i ma hA yo ga yin// yo ga'i yo ga cho ga'i yan lag dgus lha'i skur gsal te/ mtshan ma med pa ma rtogs te// mtshan ma nyid la zhen pa'o// mtshan ma nyid la blo gnas te/ / mtshan ma med pa spangs gyur nas// mtshan ma lha la zhen gyur te// yo ga'i yo ga zhes bya'o// a ti yo ga dngos ni zhal nas gsungs pa'i rdo rje sems dpa' nam mkha' che zhes pa nas dkyus mgo mjug yin te/ mgo 'jug gi don ji ltar ston na/ kun gzhi byang chub kyi sems brdal ba chen po mi zad pa'i glong/ ye nas brjod pa'i tha snyad dang bral ba/ rang byung gi bcom ldan 'das snying po'i snying po zab mo dmigs su med pa lta zhing dgongs su med pa/ brjod pa'i tha snyad dang bral ba rang byung gi dbyings de rdzogs pa chen po a ti yo ga'o// brjod du med pa'i snying po ni// dmigs pa med pas dgongs pa yin/ / spros dang bral ba'i rang bzhin te// dngos po med pas spros dang bral// a ti yo ga'i a nu yo ga ni/ mkha' dag pa'i zhing lhun gyis rdzogs pa'i ngo bo'o// zag pa med pa'i chos kyi dbyings so// kun gzhi kun tu bzang mo bya btsal bral ba'i 'jings/ lhun gyis rdzogs pa'i chos nyid snang ba med pa'i klong/ mtha' dang dbus med pa'i rgya mtsho thams cad kyi dbyings de ni/ snod bcud ma lus pa kun mtha' zab pa'o/ / gdod nas snying po byang chub pas// btsal ba'i bsam pas dbyings mi skyod// lhun gyis grub pas gdod nas che zhes pa'o// a ti yo ga'i a ti yo ga ni/ gong du bstan pa'i don de nyid kyang smrar med pa'o/ / brjod du med pa'i rgya mtsho'i 'jings// bsam du med pa b+ha ga'i glong// dmigs su med pa de bzhin nyid// bsam med brjod pa'i yul las 'das// a ti yo ga'i ma hA yo ga ni/ gzod ma dang bral ba chos kyi dbyings/ skye 'gag gi mtha' las 'das pa thams cad mnyam pa nyid gnyis su med par skad cig ma gcig la rig pas rtogs pa ni// a ti yo ga'i ma hA yo ga'o// shes rab thabs kyi bdag nyid ni/ / yon tan kun ldan thabs kyi bdag/ thams cad kun mnyam dmigs su med// rang bzhin nyid de mnyam pa'i gzhi// skad cig gcig gis shes pa'o// a ti yo ga'i yo ga ni/ khams gsum ma lus pa 'byung bas bsdus pa de bzhin gshegs pa'i skur gyur te bzhugs pa la/ mngon par byang chub rnam pa lnga dus gcig tu rdzogs te/ byang chub pa rnam pa lnga gsal bas/ rigs bzhi'i de bzhin gshegs pa dang 'grogs te/ ri rab rtse mor mngon par rdzogs par sangs rgyas te/ rnam par snang mdzad nye ba'i rgyur gyur pa ni/ a ti yo ga'i yo ga'o// sems can kun gyi sems gang ni// brtan pa'i phyir na dpa' zhes bya/ / thams cad de bzhin gshegs pa'i sku// mngon par byang chub lnga bsgoms nas// rims kyis ma yin dus gcig tu// skad cig gcig gis rigs kyi bu// de bzhin gshegs dang 'grogs nas ni// ri rab rtse mor mngon sangs rgyas/ / rnam par snang mdzad nye ba'i rgyu// a ti yo ga'i yo ga yin// lta ba nyi shu rtsa lnga phye ba'i le'u bstan pa'o//// de nas yang bcom ldan 'das kyis yid mi g.yo ba'i byang chub kyi snying po la bzhugs te/ thams cad ma lus pa byang chub par bya ba'i tshig gsungs pa/ rdzogs pa bde rlung mnyam pa'i dbyings// ye nas btsal du med pa la// rdol zhing sgrub pa 'khor ba yin// mi btsal rang bzhin gyi na pa/ / mi g.yo gsal ba'i ngang gzhag ste// mi g.yo mi 'gyur rdo rje'i sku// rdo rje che mchog bla na med// thams cad byang chub sems kyi ngang// smrar med tshig las 'das pa'o// tshig 'di shes par gyur pa la/ / byang chub sems ni dkon ma yin// byang chub sems de shes pa la// mgon po sangs rgyas nye 'gyur te// rgyal ba rnams dang dbyer med mtshungs// ma bcos lta ba kun bzang ngang// spyod pa de gnas 'du 'bral med/ / dam tshig mi 'da' rnam par dag/ sgom pa ma bcos ye nas gzhir bzhag/ bzhi po de la gang gnas pa// bcom ldan 'das de snying po nyid// ma bcos kun bzang ngang de ru// snod bcud gnyis kyis 'gro ba kun/ / sangs ma rgyas pa gang yang med// kun bzang ngang de mkha' ltar yangs// dmigs su med do sems nyid 'di// sna tshogs pa ste cir yang 'khrul// lta dang bral lo blang dor med// sgom dang bral te stong pa nyid/ / rang bzhin med do de bzhin nyid// btsal du med do sangs rgyas sku// gdod nas dag go mkha' ltar yangs// byang chub sems kyi rang bzhin 'di// sku gsung thugs te mnyam pa'i gzhi/ / dgongs su med pas dgongs pa'i mchog/ sems nyid dus gsum 'du 'bral med// bcom ldan 'das nyid zab mo dmigs su med pa'i ting nge 'dzin la snyoms par zhugs te/ lta ba zab mo gsung ba thams cad ma lus pa lta ba rgya mtsho dmigs su med pa'i klong yin pas/ snang ba ma lus pa thams cad snang ba/ med pa kun gzhi byang chub kyi sems ma bcos rang bzhin gyi 'od gsal ba yin te/ snod bcud ma lus par byang chub pas da gdod spyang du gang yang med pa'o// thams cad ma lus pa sangs rgyas pas bde bar gshegs pa'i lam chen po/ 'khor ba dang mya ngan las 'das pa'i chos thams cad da lam gyis sgrub tu med cing/ gnyen pos sbyang du med de khams gsum 'od gsal ba'o// lam la bgrod du med de nye lam bde bar rdzogs pa'o// rgyu la bgrod mi dgos par 'bras bur gnas pas/ snying po byang chub 'bras bu'i rang bzhin/ thams cad ma lus par lhun gyis rdzogs pas gang dang yang 'byed pa med pas mnyam pa'i rgyal po chos thams cad ye nas chos nyid zhi ba byang chub kyi sems ma bcos pa'i klong/ thig le byang chub mkha' ltar dag pa rang byung gi dbyings te/ gnyen po dang 'bras bu'i klaung du ye sangs rgyas pas/ 'khor ba'i ming yang med de khams gsum sangs rgyas/ rtog pa'i ri bo bcom ste log pa'i stobs bshig/ ma rig pa'i thabs bsal te nyon mongs pa'i skar khung phye/ zhi gnas dang lhag mthong ye dbyer med de'i ting nge 'dzin gyi snying po/ snang srid 'od gsal te bdud bzhi dbyings su dag/ ma lus byang chub sems te snang srid ye rgyas btab/ thams cad thig le spros pa dang bral ba'i 'jings su 'khor ba'i ka dag pas/ khams gsum ma lus par klong yangs te chos kyi dbyings rnam par dag ste/ mi skye mi 'gag pas/ thams cad rnam par dag pa'i dbyings su bsgral zin te ma lus par 'ub chub pas/ dngos po dang mtshan ma'i mtha' cir yang dmigs shing dgongs su med pa'o// snod bcud ma lus pa ma bcos pa'i dbyings su ka dag pas/ dbyings dang ye shes zhes bya ba'i tshig gi tha snyad dang bral te thams cad dmigs su med pa'o// byang chub ni brtan zhing mi 'gyur la rnam par dag pa blang dor dang bral ba chos kyis sku/ dbyings rnam par dag pa'i klong du bdud rnam pa bzhi ka dag ste dmigs su med par der sdug bsngal rang bzhin gnas pas nub ste ming yang med pas bde ba chen po'i klung zhes bya'o// byang chub kyi sems gdod ma nas rnam par dag pas byang chub kyi sems rang bzhin med pa'i ngang du thams cad lhun gyis rdzogs pas rang bzhin gyi gnas pa yin/ byang chub kyi sems ma bcos pa de 'gyur ba med par gnas pa de sra zhing mkhregs te dmigs su med pas rdo rje'o/ / rang bzhin med pa de'i ngang las dus gsum gyi sangs rgyas kun byung zhing/ ma bcos pa'i sems nyid rtogs pa las/ dus gsum gyi sangs rgyas kun byung bas yum kun tu bzang mo yin/ / rang bzhin gyi gnas pa'i byang chub kyi sems ma bcos pa de'i ngang las mi 'da' bas dam tshig yin/ de lta bu'i ngang la gnas pas sgom pa yang yin/ de lta bu'i ngang la gnas shing de'i don la dmigs shing lta bur byed pas lta ba yang yin/ rang bzhin gyis gnas pa'i byang chub kyi sems ma bcos pa de'i ngang du 'khor ba dang mya ngan las 'das pa dbyer med par lhun gyis rdzogs pas bsdud pa yang yin/ / de lta bu'i don de rtogs pa las thams cad ma lus pa kun 'byung bas sbyin pa'i pha rol tu phyin pa yang yin/ byang chub kyi sems ma bcos pa'i dbyings de las rig pa langs te ma bcos pa de shes pas shes pa thams cad kyis pha rol tu phyin pa yang yin/ de lta bu'i shes pa de la 'gyur ba med par gnas pas bsam par bya ba thams cad kyi pha rol tu phyin ba yang yin/ ma bcos pa'i dbyings byang chub kyi sems der shes shing bsam par bya ba las gzhan du mi g.yengs par gnas pas brtson 'grus kyis rol tu phyin pa yang yin/ / de lta bu las gzhan du mi 'da' bas tshul khrims kyi pha rol tu phyin pa yang yin/ / byang chub kyi sems ma bcos pa'i dbyings de lhun gyi rdzogs te de nyid kyi ngang la mi 'gyur bar gnas pa la ci yang bzod pas bzod pa'i pha rol tu phyin pa yang yin/ byang chub kyi sems gdod nas dag pa ma bcos pa'i dbyings der kun nub pas klong yang yin/ ma bcos pa'i dbyings de rang bzhin gyis rnam par dag cing 'od gsal bas chos kyi sku yang yin// byang chub kyi sems rang byung gi dbyings ma bcos pa'i chos nyid de 'ang ngang las gzhan du mi 'gyur bar rang bzhin gyis gnas pas/ nyon mongs pa lnga ming yang med de/ sdug bsngal chos nyid du gyur te gnas pas bde ba chen po'i klung yang yin/ byang chub kyi sems ma bcos pa'i thig le chen po rang byung gi dbyings de bzhin du byung zhing shar cing ma bcos pa'i chos nyid du rig pas rtogs te/ gnyis su med pa'i bde ba chen po yang yin// de lta bu rtogs pa las che ba'i yon tan kun 'byung bas yid bzhin gyi nor bu rin po che yang yin/ ma bcos pa'i byang chub kyi sems de'i ngang la dus gsum du mi 'gyur bar sems dpa' rdo rje sems dpa' yang yin/ gdod nas dag cing dmigs su med pa blang dor dang bral te/ gnyis su med pas khams gsum sangs rgyas ma lus byang chub/ rtog pa'i ri bo bcom/ bdud rnam pa bzhi kar bsad de rnam par dag pas chos kyi dbyings kyis rang bzhin chos sku btsal ba dang bral ba'i byang chub kyi sems de mtshon pa mya ngan 'das pa/ rang byung gi bcom ldan 'das don dam pa'i ngo bo ye nas yin pas/ snying po byang chub dgongs su med pa zhes kyang bya/ chos rnams kyis chos nyid byang chub kyi sems des gang la yang ma khyab ba med de khyab pas brdal ba chen po mi zad pa'i gter yin/ 'byung ba'ang mi 'byed par thams cad gcig gi ngo bor gnas pas mnyam pa'i gzhi po'ang yin/ tshig dang yi ge'i tha snyad las 'das pas dgongs su med de spyod pa'i mtha' dang bral ba yin/ ma bcos 'jings kun gzhi bya btsal dang bral ba don dam pa'i snying po chos kyi sku dpal bde ba chen po mi gnas pa'i mya ngan las 'das pa chen po de sgro skur gyi mtha' las 'das pas mi gnas pa'i ye shes chen po zhes pa'o/ khams gsum srid gsum dus gsum mnyam pa chen po'i ngo bo spros pa med pa'i thig le yin pas mi shong ba med pa'i klung zhes pa'o/ / spros pa med pa'i thig le yin// kun la snyoms na mnyam pa ste// dmigs su med na mtshan ma dag/ brjod du med pas gleng dang bral/ / bsam med yi ge med pas na// bsgom par bya ba med pa'o// de nas yang bcom ldan 'das 'du shes shin tu med pa'i bcom ldan 'das dpal bde ba chen pos thams cad kun la nges par snyoms pa zhes bya ba'i ting nge 'dzin la snyoms par zhugs nas/ bla ma'i nges tshig bstan pa/ rmongs la mi 'phya don la mkhas// tshig gis mtshon pa'i don la 'byor// skye med dbyings la shin tu bstan// nges par blon zhen klung gyur na/ / gzhan du nams kyang 'gyur ba min// bskyed dang rdzogs dang rdzogs chen po// rnam gsum don la nges gnas shing// theg pa gzhan gyis nges don shes// zab mo dmigs med don la mkhas/ / rdzogs pa chen po'i gting du 'byor// bla ma slob dpon chen po yin// slob ma nor bu rin po che// man ngag zab mo gting du 'chang// nges pa rnyaid nas phyir mi ldog/ mkhas par gyur kyang slob la brtson/ / shes pa che yang the tsom gcod// bla ma yan lag mgo ltar khur// man ngag mig gi 'bras ltar 'tsho// dam tshig zhing tshogs bzhin du bsrungs// lta ba zab mo mkha' ltar yangs// spyod pa glang chen rdzab chung bzhin/ / zhugs shing spyod pa skyo dub med// rgyud mnyen 'grogs na bde ba dang// rdzas rnams len la dga' zhing brtson// sgrub la mi 'jigs sbyor la 'grus// shes rab zab cing gtong la dga'/ / zang zing 'khor yul bu smad kyang// man ngag zab mo'i tshig gcig la// 'phangs pa med par 'bul ba nus// de slob nor bu rin po che// sbyin pa'i gnas dang bstan pa'i skabs// yon tan phun sum tshogs pa 'chang/ / shes rab zab cing theg chen 'byor// zang zing 'khor yul gtong la brtson// nges pa'i man ngag klung du zhen// rgya mtsho lta bu'i sems ldan zhing// bla ma tsit+ta'i dkyil du 'chang/ / bla mas spyod pa ci byas kyang// ngag nas mi snyan mi gleng zhing// 'gyur med nam mkha'i sems ldan te// bla ma dkon mchog gsum du mchod// bla ma rdo rje slob dpon gyis// 'dod ces smras na mig kyang ster/ / sprul la reg pa mi nus bzhin// man ngag zab mo 'chang bas kyang// sprul la 'dzem pa bzhin du btsal// theg chen 'chang la theg mchog bsgom// blo ldan shes rab che zhing gsal// gsang sngags rgyud 'dzin the tsom gcod/ / blun pa min la don la 'byor// gzhan la kha ni gang 'dren pa// theg pa che las gzhan mi 'gyur// byang chub sems dpa' zhes bya ba// man ngag zab mo gtad pa'i rigs// bla ma la spyo ba byas sam/ gsad par bsams sam/ gsang ba'i gsang ba tshig gcig ston pa la mi rung ba 'ba' zhig bsams na/ dmyal bar 'gro ba ston pa'i skabs/ nges pa ston pa'i slob dpon la// gsad par bsam zhing blo ldog ste/ / ngag nas mi snyan tshig smra zhing// bcol ba snar mi 'jog ste gzug/ smra bzhin mi byed yid ches dka'// 'thing slad byed cing khyad du gsod// sa ma ya ni phyogs par gtong// gnod pa smra zhing ngag mi nyan/ / mkhas pa min zhes smra byed cing// shes pa bdag dang sgrin par nus// gzhan dang bsdongs nas gsad par sems// ngu 'bod gnas su de skye ste// na rag las ni thar mi srid// 'jig rten 'di srog 'joms par nus/ / slob dpon bla mar gyur pas kyang// pha ma gnyis kyi ngag mi bcag/ yi dam sems kyi 'jings su gcad// man ngag sems la blta zhing spyod// spyod pa rgya mtsho klong ltar gnas// lta ba dus gsum kun bzang ngang/ / sgom pa bsgom du med par bsgom// chos nyid klong las ma nyams na// dam tshig gnyis brgya rtsa gcig rdzogs// theg pa ma lus lhun gyis grub/ khams gsum ma lus ye sangs rgyas/ / snod bcud ma lus gdod byang chub// mnyam pa'i snying por gyur pa la// rdo rje slob dpon zhes bya'o// slob dpon gyis slob ma gsod par bsams na/ ngan 'gror skye ba'i dmigs bstan pa'i skabs/ nges pa ces smra blor mi 'jogs// slob bu gsad par sems shing dga'// yon tan yod pa'i mi la smod// tshig la lta zhing don mi lta// pha rol po la dug btang nas// brgyal bar byas pa thig nag skye/ / srog 'joms pa yi gnyen por ni// gyur nas thig nag 'dra bar gyur// de yi ri thung bstan pa ni// sum cu rtsa gsum lo grangs brgya// man ngag zab mo'i slob dpon la// tshig gcig srog lus gang 'bul dang/ / yon tan bstod pa'i sgo smra zhing// skyon gyi rnam grangs gang 'gegs pa// rgyal ba'i rgyal bar de 'gro zhing// zang zing 'khor yul mang po ni// bla ma dag la khas blangs nas// gal te byin par ma gyur na/ / yang dag don las nyams pa de// dkon mchog gsum gyi dkor phrogs shing// brgya byin tshangs la sogs pas bslus// bsdus 'joms gnas su mi de skye// der skyes pa yi ring thung tshad// tshe yi lo ni brgya yin no/ / man ngag zab mo'i slob dpon gyis// slob bu nor bu rin chen la// gang zhig 'dod pa'i dgongs pa ste// 'dod ces pa ni 'bul bar bya// 'bul ba'i snying stobs gang med pa// 'chi ba'i mi des sangs rgyas slu/ / tshe srog zad par byed pa'i rgyu// dmyal ba'i nges ston ngas ma bstan// 'chi ba'i rgyu ni bstan pa'i skabs// bka' bzhin mi byed 'chi ba'i rgyu// pha ma gnyis kyi ngag gcog 'chi// spyod log sna tshogs byed na zad/ / byams pa'i blo 'khrug myur du 'chi// mna' smod kyis ni srog zad rgyu// man ngag zab mo ston pa yi// slob dpon bslus na tshe srog zad// zab mo gting du ma 'byor bar// tshig gi yon tan spel byed pa/ / srog zad tshe thung dmyal ba'i rgyu// nges don snying po bla na med// dmigs med klung du ma gyur na/ khams gsum ma lus sangs rgyas kun// mi des byang chub yongs mi 'thob// chos kyi rang bzhin yongs shes na/ tshig gi byang chub mkhas par 'gyur// mi bya ba'i skabs/ theg pa chung ngu bsgom mi bya// man ngag zab mo btsong mi bya// rdo rje slob dpon bka' mi bcag/ yang dag nyid las yang dag lta/ / rnam par grol ba'i lam la bslab// rang dbang med par gzhan mi 'gyur// the tsom yod bzhin rlom mi bya// yid ches med par don mi grub// mkhas par ma gyur gzhan mi slob// bla ma bas ni mkhas mi bya/ / dam tshig 'das pa'i dug mi btung// gzung 'dzin yod pas bsgom mi bya// blo rmongs pas ni shes mi gsal// mkhas par ma gyur gzhan mi bslab// the tsom yod bzhin nga mi rgyal// nges pa med par smra mi bya/ / rtog pa yod bzhin las mi bsgrub// snying rje yod na gsad mi bya// zab mo bstan pa'i mi dag btag/ blo rgya chungs pa'i mi rnams la// theg chen nam yang bstan mi bya// de yan chad du sing ga la'i bam po brgyad thal zin to/ / rgya gar gyi yul dbus 'gyur tshal gyi bam po gsum thal lo// o tra yul gyi bam po bcu gsum thal lo// rgya'i bam po gsum thal lo// des bam po rkang grangs rim pa bstan pa'o// de nas yang bcom ldan 'das dpal bde ba chen pos snying po'i ting nge 'dzin la snyoms par zhugs nas bka' stsal pa/ khams gsum ye nas sangs rgyas pas// snying rjes sems can bsgral mi dgos// gdod nas ma skyes mi 'gag pas/ / thar ba'i lam la bgrod du med// bzang ngan blang dor dbyer med pas// mnyam par bya ba'i gzhi po bral// thams cad lhun gyis rdzogs pas na// yon tan ci yang bsngags su med/ / bdud bzhi dbyings su der bsad cing// nyon mongs ma lus ka dag na// sangs rgyas btsal zhing bsgrub tu med// kun bzang chos kyi dbyings chen la// yon tan ma lus kun ldan pas/ / rgyal bas zhing rnams btsal du med/ khams gsum snod bcud byang chub pas// sa bgrod rgyu la ltos dang 'dra// rang byung ye shes btsal med pas// bde bar gshegs pa'i snying po yin// chos rnams ma lus lhun rdzogs pas/ khams gsum ma lus rgyal ba'i zhing// ye nas snying po byang chub pas// bsgom par bya ba rdul yang med// sems kyi kun bzang ma mthong na// tshig gi kun bzang rnyed mi 'gyur// snying po byang chub ma shes na/ / mkhas pas sangs rgyas yongs mi rnyed// dug gsum 'bar ba'i me yod na// me mar du mchong mi dgos// seng ge dkar mo'i 'o ma 'di// gser gyi skyogs su bzho ba las/ khams skyogs nang du bzhos gyur na/ khams skyogs 'gas shing 'o ma ba'o// de bzhin gsang sngags 'di 'chang bas// btsal thabs bcang thabs nyes gyur na// seng ge dkar mo'i 'o ma 'dra// med do sems las sangs rgyas med/ / 'od min gzhal yas nyid kyang sems// sems las kun tu bzang mo med// bsgrub par bya ba nyid kyang sems// su yi sems nyid mthong ba des// chos rnams ma lus thams cad shes// snying po dgongs su med pas na/ / chos rnams ma lus brjod dang bral// rang byung dbyings su ye dag pas// btsal ba'i bsam pas dbyings mi skyod// bgrod du med pa'i lam rdzogs pas// sa sbyongs bgrod pa ngal ba'i rgyu/ / yangs pa'i gzhi ste dmigs su med// rgyal ba'i zhing na btsal mi dgos/ khams gsum rgyal bar ma rtogs na// sangs rgyas btsal bas yongs mi rnyed// sems nyid rtog pa sangs rgyas yin// dpyad mtha' med na 'du shes zad/ / 'du shes zad pa bde ba'i mchog/ rdzogs so sems la chos nyid rdzogs// nges pa bltar med lta ba'i phul// btsal med las dang bral na bde// snang srid ma lus dbyer med pas/ / mnyam pa nyid de sgrub mi dgos// ye nas khams gsum sangs rgyas pas// rgyal ba sangs rgyas btsal du med// snod bcud ye nas byang chub pas// byang chub sems la lta ru med// dngos gzhi med pa'i sems nyid de/ / brjod du med pas brjod dang bral// skye 'gag med pas dbyings na bde// rang bzhin gnas pas bgrang du med// thams cad ma lus bder rdzogs pas// sdug bsngal ma bcos dbyings su zhi/ / sangs rgyas chos rnams rang bzhin med// chos de dngos po med pa yin// chos ni ye nas zhi ba ste/ khams gsum dmigs su med pa yin// thams cad stong pa nyid stong ste// ma lus dmigs su med pa yin/ / 'di rnams rtogs par gyur pa la// sangs rgyas chos rnams ma lus yod// de nas yang bcom ldan 'das kyis nges pa'i ting nge 'dzin la snyoms par zhugs nas/ rab tu nges pa'i ting nge 'dzin bstan pa'i skabs/ byang chub sems ni b+ha ga ste// ji bzhin pa zhes bya ba yin// ji bzhin pa de gdod nas dag/ ma lus pa ste thams cad sdud// kun 'dus mkha' dbyings rnam par dag/ snying po'i snying po byang chub pas/ / dgongs pa'i dgongs pa bstan pa'o// ma hA yo ga'i bdud bzhi ni// gzod nas dag par chos rnams ni// shes rab kyi ni shes 'gyur ba// thabs kyi mchog ste gnyis su med// shes rab thabs gnyis gnyis med pas/ / phung po'i bdud bzhi dbyings su dag/ lha dang gnyis su med par ni// thams cad ma lus kun sbyor bas// skyon gyi zug rngu mkha' bzhin gsal// nyon mongs bdud ni dbyings su dag khams gsum snod bcud lhar gsal te/ / lha yi dkyil 'khor kun yin phyir// lta yi bu bdud ltar gyur pas// lha yi bdud ni dbyings la zhi// thams cad gnyis su kun sbyor bas// skye med don la 'gag pa med/ / 'chi bdag bdud ni dbyings su dag/ phung po lnga ni rigs lnga ste// rgyal ba rigs lnga'i rang bzhin du// phung po gyur pas chos nyid gsal// phung po'i bdud ni dbyings su gsal// dug gsum sku gsung thugs su gsal/ / nyon mongs lnga ni b+ha gar gsal// sems las byung ba'i chos rnams nas// byang chub chen por bde rtogs pa// lha yi bu bdud dbyings su gsal// chos rnams ma lus mnyam pa'i ngang/ / gdod nas skye 'chi 'pho 'gyur med// rang byung zhi nas ye nas gsal// 'chi bdag bdud ni dbyings su dag/ a nu yo ga'i bdud bzhi bcom// rdo rje sems dpa' nam mkha' che// kun bzang yangs pa chos kyi dbyings/ / rnam dag lam chen kun sgrol phyir// mi skye mi 'gag cir mi dgongs// srid gsum skye 'gag med pas na// phung po'i bdud ni rnam par dag/ byams pas don nyid rnam sbyangs phyir// snying rje chen po cir mi mdzad/ / che ba'i che zab mo yis// yon tan cir yang bsngags pa med// ma lus mnyam pa'i bde mchog la// sdug bsngal thams cad kun gzhi ste// don rnams ji bzhin mi bskyod pas// bya ba med pas grol bas grol/ / rang byung ye shes btsal med pas// grol nas grol ba'i lam ston pas// lha yi bu yi bdud ni dag/ 'byung ba chen po bcom ldan 'das// chub par gnas pas bcom ldan 'das/ / 'gro ba kun la rang bzhin gnas// phyin ci log tu rnam brtags kyang// grol ba rang byung gzhan las med/ khams gsum snod bcud dbyings nas byung// de nas byung nas der gnas pas/ / nyon mongs bdud de bde ba'i mchog/ che ba'i ye shes rnyed dka' ba// shes rab thabs la brten pas 'grub// ming tsam gzhan la brten 'dra yang// mngon sum bde ba rang las 'byung// bde ba'i bde chen kun rdzogs pas/ / 'chi bdag bdud ni ye rgyas btab// da lta'i bde dang phyi ma'i bde// mngon sum pa dang rgyab nas 'byung// de yang rnam pa'i skyon yin pas// de la brten par mi bya'o// yon tan chen po'i bsam gtan ni/ / gsam gtan nyid pas bsam du med// ma bsams ma sbyangs chos nyid du// rnam rtog nyid las ye shes skye// phra ba'i sgo mor ming brtags shing// sems kyi bden pas lam 'tshol zhing/ / dgon pa'i rgyud du dben 'dzin te// brtags na rnam par rtog 'gyur bsgom// dge sdig gnyis ka rnam par sel// rgyu 'bras gnyis su ming 'dogs te// 'jig rten 'di las 'byung ngo zhes// blang dor brod pa mchod tu bskyed/ / mi gnas theg chen chos bsgoms shing// so sor rtogs pa'i shes rab kyis// chos rnams kun gyi don spyad pas// chos rnams ngo bo nyid kyis zhi// de la ming dang tshig kyang med// de la 'bri dang bsnan pa med/ / yi ge'i sems rgyu ba dang bral// smra bsam yul las rab 'das pas// mtha' gnyis rab tu rmongs 'gyur te// ci la'ang mi dmigs mi rtog ste// mi rtog pa la'ang mi gnas shing// sna tshogs 'di dag 'khrul par shes/ / 'khrul bar shes pa yang dag lam// dbu ma'i lam chen der rdzogs pas/ khams gsum mya ngan 'das par 'dod// don dam dmigs su med pa la// 'du shes rgyu ba'i sems med de/ / yi ge'i tshogs dang bral ba ni// dbu ma'i don dam lta ba yin// dbu ma'i don dam gang yin pa// rdzogs pa chen po'i kun rdzob yin// thams cad ma lus kun rdzogs pas// yon tan bsam gtan bsam du med/ / ma bsams ma sbyangs chos su gnas// mi rtog rtog las 'das pa na// rnam rtog nyid kyang ye shes sku// rgyu 'bras mi 'byed lhun grub pas// phra mo theg pra gdags dang bral// chos dbyings dben pa'i dgon rgyud du// 'du mched bcu gnyis gtod mnan pas// rnam rtog ma lus dbyings su zhi// gdod nas ma bcos mnyam klung pas// dge sdig rgyu 'bras gdags su med// 'jig rten snga phyi gnyis med cing/ / thams cad ma lus sangs rgyas pas// blang dor brod pa'i tshig las 'das// gdod nas rang bzhin med pa la// rig pa de bzhin dur btab pas// so sor rtag tu ci yang med/ / chos rnam rang bzhin zhi ba la// rjod par byed pa gol bas na/ khams gsum ma lus ye sangs rgyas// 'khor dang mya ngan 'das gnyis med// gdod nas bcom med mya ngan 'das// mi rtog ma bcos chos nyid la/ / dmigs shing sgom du rdul yang med// snang ba med pa'i chos nyid la// mi btsal gzhag na bsgom pa yin// ci la'ang mi rtog mi gnas te// mi rtog mi gnas 'khor ba yin// 'khor ba'i gcong rong dbu ma'i lam/ / brjod du med pa'i chos nyid kyi// theg chen bla na med pa 'di// rang bzhin med pas 'du 'bral med// lhun gyis grub pas lus pa med// ye sangs rgyas pas rtog las 'das// smrar med tshig las 'das pa'i phyir/ / yi ge'i sems rgyu ba dang bral// dpyad na mangs na rtog pa'i rgyu// dpyad mtha' med pa'i chos dbyings la// rig pa de bzhin klung gnas pa/ khams gsum ma lus thig le'i ngang/ / thig le chen po mnyam gnas te// bsam zhing bsgom du med pa yin// thig le spros pa med pa la// dpyad mtha' mangs pa rtog pa'i rgyu// dpyad mtha'i 'du shes gang spangs pas// de yis chos rnams kun rtogs te/ / rgyal ba sangs rgyas rnyed pa yin// bla med yang dag nges pa'i don// theg chen don la ma 'byor bar// shAkyar mgo zlum tshul bcos kyang// gyo mo sa la rgyu byas pas// 'phangs pa'i 'du shes rab bskyed kyang/ / tha mar sar ni 'gro ba ltar// gdong 'khrud spu gris skra bregs kyang// rtog pa'i klung la 'du mched de// rtog pa'i khrims de bsrung bas 'jig/ bla med rdzogs chen nye lam ring// bskal pa gsum du sa bgrod kyang/ / rdzogs pa chen po'i gting mi mthong// rgyal ba btsal bas rnyed mi srid// dpyad mtha' mangs pa'i rgyu las byung// rgyu la mi bgrod dpyad mtha' spang// mgo zlum shAkyar tshul gyis bcos/ / theg chen mthong ba theg pa de// 'bras bu mngon sangs rgyas pa yin// byang chub thob par 'dod pa rnams// de phyir bla med theg chen ltos// bla med theg chen sus mthong bas// dus gsum sangs rgyas ma lus rnyed/ / lung gi lung mchog rtsa ba'i rgyud// shAkya thub pa 'gro ba'i mgon// yon tan ma lus kun ldan pa'i// thub pa'i dbang pos gsungs pa yi// lung gi rtsa ba'i rgyud chen 'di// zhal nas gsungs pa'i theg pa ste/ / sangs rgyas byang chub gang 'dod pa// theg mchog bla med 'di la ltos// phyis kyi slob 'dod// slob ma dang ston par 'dod pa'i slob dpon gyis// sa pa'i byang chub sems dpa' yis// sprul rgyur ldan pa rnyed pa dang/ / ma bshad par ni don mi bstan// rtsa ba'i rgyud 'di sngon la sbyin// bshad de don 'di dgrol ba bstan// bstan bzhin mi byed pa yi mi// blo bur drag pos mod la 'chi// srog zad nas ni dmyal par ltung/ / ngas bstan pa yi gdams ngag 'di// lung 'di 'tsho bas sems la bcang// bstan pa 'di 'gal med la 'chi// lung rtsa ba'i rgyud rje'u'i don du bstan pa yin// rdzogs so/ /// u u u rak+shi ka i tu u Tu//// rgya gar skad du/ badzra sa twa/ kha se mahA rA dza puSh+ti tan+t+ra/ bod skad du// rdo rje sems dpa' nam mkha'i che rgyal po rgyas pa'i rgyud/ bcom ldan 'das dpal kun tu bzang po bde ba chen po la phyag 'tshal lo/

CLOSE WINDOW