/ thugs rje 'gag med rgyun chad med// nga rgyal brag chen med pas na// sangs rgyas che ba su yis mtshon// phrag dogs rlung chen med pa na// thugs rje mkhyen pa'i ye shes dang// lhag mthong ye shes 'char ba med/ / des na dug lnga bdud ma yin// sems nyid rang byung ye shes kyi// yon tan chen po 'char ba yin// gzugs la sogs pa lnga med na// sangs rgyas chad pa'i skyon du 'gyur// gzugs ni snang mdzad chos kyi sku/ / tshor ba rin 'byung longs spyod sku// 'du byed don grub sprul ba'i sku// rnam shes mi bskyod rdo rje'i sku// 'du shes mtha' yas ngo bo'i sku// des na phung po'i bdud ma yin// ye nas sems nyid sku lnga grol/ / byang chub sems kyi rang bzhin ni// snang ba ma 'gags rang byung la// zhen pa ma bcos ye shes te// thams cad ma bcos de kho na// thams cad gnyis med bde chen la// des na lha bdud sems su grol/ / byang chub sems kyi rang bzhin la// pha zhes bya ba'i rgyu yang med// ma zhes bya ba'i rkyen yang med// rgyu rkyen med pas skye ba med// skye pa med pa'i sems nyid la// dus gsum sangs rgyas dgrar langs kyang/ / de la zin cing sod pa med// des na sems nyid skye shi bral// zhes gsungs so// byang chub kyi sems shes bya mtha' gcod las/ bdud bzhi rang grol ba'i le'u ste bcu gnyis pa'o//// de nas yang sems dpa' rdo rjes zhus pa/ kye/ ston pa byang sems kun tu bzang po lags// a ti bya bral klong chen dgongs pa yi// 'gro drug g.yang sa sems su ji ltar grol// gsang ba'i dgra gsum sems su ji ltar grol/ / de nas ston pa kun tu bzang po yis// sems dpa' rdo rje mchog la bka' stsal pa// a ti bya bral klong chen dgongs pa ni// bya byed theg pa gzhan la bltos ma yin// a ti cig car grol ba'i mchongs po che/ / thams cad yebs kyis chod pa'i rlabs po che// snang srid gsal bar byed pa'i 'od po che// don dang bral pa med pas brtson 'grus che// mnyam pa'i ngang la gnas pa'i rnga bo che// skye med ngang la gnas pa'i bsam gtan che/ / 'gran zla gang yang med pa'i rdzogs pa che// 'gro drug sems su grol ba'i stobs po che// shes rab pha rol phyin pa'i don po che// che ba dgu dang ldan pa'i a ti 'di/ / theg pa dgu yi nang nas mchog tu bsngags// gnyis su med pa'i chos nyid byang chub sems// 'gyur ba med pa'i bde chen lhun gyis grub// mtha' dang dbus med mkha' ltar kun la khyab// rang byung dbyings nas rig pa 'di shar bas/ / 'gro drug ma lus kun tu bzang po'i ngang// sems nyid kun bzang med pas 'gro drug med// sems dpa' rdo rje chen po yang nyon cig/ rang bzhin lhun grub bdag nyid mngon sangs rgyas/ / de phyir sangs rgyas chos la mi brten te// chos ni sems can rnams kyi lta ba yin// lam pas mtshon pas byang chub ma yin kyang// thog ma nyid nas mgon po dri med nyid// de nyid chos la brten pa ma yin te/ / ye nas mi bskyed dbyings su// rang byung ba'o// de phyir byis pa'i chos kyis 'tshang mi rgya// chos ni tshig phyir 'brang zhing tshig mtha' yas// rang byung ye shes nyid ni tshig mtha' bral// de phyir de nyid don la yi ge med/ / ye shes rgyal po tshig las 'das pa ste// smra ba'i khyu mchog gzhan gyis dring mi 'jog/ rang rig rgyal po tshig las 'das rtogs na// phyi nang snod bcud bdag nyid chen por ldan// rang rig ye shes skye med dbyings nyid nas/ / dus gsum 'du 'bral med par bzhugs pa la// gnas la dben dang mi dben gnyis su med// chos sku bde ba chen po'i ngang nyid nas// ye shes ma 'gags so sor gsal ba ni/ / rgya mtshor gza' skar shar ba lta bu'o// don la gnyis med gnyug mar lhun gyis grub// gnyug ma nyid la dus gsum rtog bral bas// des na gsang ba'i dgra gsum sems su grol// sems dpa' rdo rje chen po da yang nyon/ / bzhi ni lhun grub phyogs med la// phyogs med shar nas zang thal yin// gza' gtad med pas lta ba yin// dper na bya rgyal khyud chen ltar// rtsol ba med par mkha' la rlom/ / 'bar ba med par dgung mtha' yas// 'og ma'i g.yang la ya mi nga// ri klungs thams cad khobs 'og chud// chos dbyings yangs pa'i klong du sleg/ ye shes phyogs med zang thal te/ / rnam rtog ma sbyangs rang sar grol// 'khor ba'i snang ba rang sar dag/ ye nas phyi dang nang med pas// thig le yangs pa'i klong chen de// rang rig thugs kyi nyi ma shar// khyab brdal ye shes ye nas brdal/ / phyi nang gsang gsum mnyam par gnas// nyag gcig rtogs med rtog mtha' bral// bar do med par chig gcod de// rnam par shes pa chos dbyings 'das// zhes gsungs so// byang chub kyi sems shes bya mtha' gcod las/ / 'gro drug dang rtog gsum rang grol gyi le'u ste bcu gsum pa'o//// de nas yang sems dpa' rdo rjes zhus/ kye/ ston pa byang sems kun tu bzang// mdo lung chen po 'di nyid kyi/ / mdo yi grangs ni du ru nges// de la spros pa'i grangs ni du// de yi dmigs gzung gang ltar lags// rang bzhin chen po bcur gsungs pa// de la grangs ni du ru nges// de yis dmigs gzung gang ltar lags/ / zhes zhus pas/ de nas byang sems kun bzang gis// sems dpa' mchog la bka' stsal pa// nyon cig sems dpa' rdo rje che// mdo lung chen po bcu ru 'dus// bye brag lnga bcu rtsa lngar bshad/ / gcig mdo byang chub sems kyi mdo// chos kun byang chub sems su 'dus// nga gnyis bcu gcig bcu par bstan// gnyis mdo rnam par grang ba'i mdo// 'khor 'das gnyis su ma 'gags pa/ / bdun pa'i nang du de don bstan// gsum mdo phun sum tshogs pa'i mdo// ston pa bstan pa 'dus pa'i 'khor// bco lnga'i bstod la sogs par bstan// bzhi mdo bye brag 'byed pa'i mdo// rnal 'byor rnam bzhi'i bye brag ni/ / brgyad pa'i nang du de nyid bstan// lnga mdo che ba lnga yi mdo// khyad par 'phags pa'i che lnga ni// bco lnga pa yis smad nas bstan// drug mdo gol sgrib bstan pa'i mdo// yang na drug gi gol sgrib ste/ / dgu pa'i nang du de nyid bstan// bdun mdo gtan la 'bebs pa'i mdo// 'khor 'das gtan la phab pa ni// nga bzhi pa yin nga du bstan// brgyad mdo nges par bstan pa'i mdo// rang bzhin brgyad pa nges bstan brgyad/ / so lnga so dgu de dag bstan// dgu mdo theg pa yas phubs mdo// sems nyid rdzogs pa gtan la dbab// bcu pa'i nang du de don bstan// bcu mdo yongs su rdzogs pa'i mdo/ / rang bzhin bcu yi don nyid de// dgu'am phal nas bstan gyis kyang// lnga bcur kun tu shes par bya// brjod bya mang du phal bstan kyang// don gyi gtso bo lnga bcur bshad// sems dpa' rdo rje da yang nyon/ / rang bzhin bcu yi bye brag ni// mdo lung lnga bcu'i nang du ni// lnga bcu dag tu dmigs bzung ba// dang po dang ni bcu pa ru// dam tshig 'phrin las gtso bor bstan// gnyis pa dang ni bcu gcig par/ / dbang dang sa la sbyang med bstan// gsum pa dang ni nyi shu par// lam la bgrod du med par bstan// bco lnga pa dang rtsa lnga par// lta ba bsgom med ye shes bstan// rtsa gcig pa dang drug pa ru/ / 'brel ba gnyis med lhun grub bstan// mngon du byung ba'i mdo lung bcu// mngon par sangs rgyas che bar bshad// bzhi pa dang ni so gsum par// 'phrin las ye shes sgrib med bstan// bcu gsum pa dang bcu gnyis par/ / lta ba dam tshig bsrung med bstan// lnga pa dang ni so gnyis par// lhun grub lam bgrod med par bstan// so drug pa dang so bzhi par// lung chen sa sbyang med par bstan// rtsa dgu pa dang bcu bdun par/ / dkyil 'khor 'bras bu gnyis med bstan// ma nor nges pa'i mdo lung bcu// chos dbyings sangs rgyas che bar bshad// zhe gcig pa dang bcu bzhi pa// sa sbyang dam tshig bsrung med bstan/ / so brgyad pa dang dgu pa ru// ye shes dang ni lta ba bstan// so lnga pa dang bcu dgu par// lam bgrod med dang phra ba bstan// bco brgyad pa dang brgyad pa ru// 'phrin las gnyis med 'brel pa bstan/ / bzhi bcu pa dang nga gnyis par// lung chen thog 'bebs lhun grub bstan// rgyu 'bras 'das pa'i mdo lung bcu// bdag nyid sangs rgyas che bar bshad// rtsa gnyis pa dang sum cu par// lta ba'i ye shes sgrib med bstan/ / rtsa bzhi pa dang rtsa brgyad par// sa sbyang med dang rang byung bstan// so bdun pa dang so gcig par// 'phrin las btsal med gnyis med bstan// rtsa gsum ba dang rtsa drug par// dam tshig bsrung med phra ba bstan/ / zhe bzhi pa dang nga drug par// lam bgrod med dang lhun grub bstan// bya bral rdzogs pa'i mdo lung bcu// de yin sangs rgyas che bar bshad// zhe brgyad pa dang so dgu par// 'brel pa gnyis med lung chen bstan/ / zhe lnga pa dang so bdun par// lta ba dang ni phra ba bstan// zhe drug pa dang zhe bdun par// dam tshig dang ni 'phrin las bstan// zhe dgu pa dang nga gcig par// sa sbyang med lung lam med bstan/ / lnga bcu pa dang nga gsum par// ye shes sgrib med lhun grub bstan// gtan la phab pa'i mdo lung bcu// sangs rgyas med pa'i che bar bshad// ces gsungs so// byang chub kyi sems shes bya mtha' gcod kyi rgyud las/ / mdo lung lnga bcu bstan ba'i le'u ste bcu bzhi pa'o//// sems dpa' rdo rjes yang zhus pa/ kye/ ston pa byang sems kun tu bzang// mdo lung chen po 'di nyid la// rgyud kyi dngos po mi 'tshal lam/ / de yi dngos po ji ltar lags// zhes zhus pas/ de nas byang sems kun bzang gis/ sems dpa' rdo rje la bka' stsal pa/ nyon cig sems dpa' rdo rje che// lta spyod dkyil 'khor dbang dam tshig/ 'phrin sgrub ting 'dzin mchod sngags kyis// rgyud kyi dngos po gtan la dbab// rdzogs pa chen po bden gnyis las// rtog pa gsum la mi gnas shing// de nyid ma nor don mthong yin/ / mtha' bral ye shes phyogs cha bral// spyod pa rnam pa bzhi yin te// rtsis gdab med pa smyon pa 'dra// 'dzin chags med pa rlung dang 'dra// nyam nga med pa seng ge 'dra// mtshan ma rang grol sprin dang 'dra/ / rang rig mtha' dbus med pa'i dkyil// rang byung ma 'gags shar bas grol// rang rig rang gsal dkyil 'khor la// de nas dkyil 'khor bskyed du med// rang byung ye shes rang shar bas// rig pa'i rgyal po rang dbang thob/ / rang sems bla ma ngo mtshar che// mtshan ma dbang la rag ma lus// ye stong ye bral stong pa nyid// rtsis gdab med pas phyal pa la// bla ma grub pas gcig pu nyid// bsrung mtshams gnyis med lhun gyis grub/ / rgyal ba'i zhal nas gsungs pa'i 'phrin// de la thos bsam byed pa las// zug rngu zhi la rang rig rgyas// mtshan ma dbang 'dus nga bdag chod// sems nyid ye sangs rgyas pas bsnyen/ / bla mas bstan pas nye ba snyen yin// de nyid ngang gnas bsgrub pa'i mchog/ re dogs chod pas sgrub chen po// skye pa med pas ye nas ting// 'gag pa med pas nge zhes bya// skye 'gag gnyis med ting nge 'dzin/ / de nas lam la bgrod mi dgos// sa lam mtho dman med pas na// bla na med pa'i mchod pa yin// gnas lugs ngang la rab gnas pas// rgyal ba sras bcas mnyes pa'i mchog/ gnyis med bde chen gsang sngags don/ / de nyid rtogs pa rig sngags yin// rtogs pa'i rang gnas gzungs sngags la// brjod med brjod bral ye shes mchog/ sngags dang phyag rgya tshul gcig dang// mi g.yo ba ni sku yi rgya/ / mi bskyod pa ni ye shes te// mi zhen pas na bdag med cing// thams cad mnyam nyid bde ba che// 'dren dang 'dren bcas rgyud kyi dngos// zhes gsungs so// shes bya mtha' gcod kyi rgyud las// rgyud kyi dngos po bstan pa'i le'u ste bco lnga pa'o/ /// de nas sems dpa' rdo rjes yang zhus pa/ kye/ ston pa bya nga sems kun tu bzang// mdo lung chen po 'di nyid la// 'dren thabs rnam pa du zhig mchis/ / 'dren pa mchog gis bshad du gsol// zhes zhus pas/ kun bzang 'dren gyis bka' stsal pa// nyon cig sems dpa' rdo rje che// ma 'ongs skal ldan don gyi phyir// 'dren pa'i thabs ni rnam pa bcu/ / spyi don bsdus dang rnam par dbye// rang rkyen gnyer dang rang bzhin lta// ldem dgongs brgyad dang 'brel bar sbyor// gtar kha gags sel bsnol mtshams 'phen sdud dang// mtshon pa dpe dang tshad ma bka' gzhung ngo/ / de la spyi don sdud pa ni// seng ge'i mchongs pa ji bzhin du// chos nyid khog don bstan pa ni// bcu gsum rtsa gcig pa ru bstan// de la rnam par 'byed pa ni// pya g+h+ya'i mchongs pa ji bzhin du/ / gzhung 'di'i don rnams thabs su bcad// lnga bcu bzhi pa'i nang du bstan// rang rkyen gnyer gyi bshad pa ni// ru sbal snur 'gros ji bzhin du// 'bru stong mi gzhag gzer bus gdab// bzhi pa lta bur kun la sbyar/ / de la rang bzhin lta ba ni// khyud chen nam mkhar lding ba bzhin// chos kun spyi rgya rlabs kyis gcod// bzhi bcu la sogs kun nas gsal// de la ldem dgongs brgyad bstan pa// sna phyug brag la 'gro 'dzeg ltar/ / mi 'tsham 'tsham par bstan pa ni// so gsum la sogs phal du bstan// de la 'brel bar sbyor ba ni// ngang mo'i dal 'gros ji bzhin du// don gyis 'brel du bstan pa ni// so gnyis pa la sogs par bstan/ / de la gtar kha gags sel ni// glag mo gzan gyi chos nyid ltar// gol bsgrib brdar sha gcod pa ni// so gsum nyid dang dgu pa la// sogs pa phal du bstan pa ni/ de la bsnol 'tshams 'phen bsdus ni/ / mi 'jigs phrug gu rtsal sbyong ltar// gong 'og 'khrug rnams don sdeb pa// lnga bcu bzhi pa ji bzhin no// de la mtshon dpe bstan pa ni// me long dag la bzhin gsal bzhin// chos nyid mtshon par byed pa'i dpe/ / so brgyad pa la sogs par bstan// de la tshad ma bka' gzhung ni// dus kyi 'brug char ji bzhin du// chos kun gtan la phab pa ste// lnga pa la sogs phal nas bstan// 'dren pa'i thabs bcu 'di dag ni/ / rgyal ba kun gyi dgongs pa yin// bstan pa kun gyi me long yin// 'di mi shes par chos bshad ni// dmus long mkha' la mthos 'jal 'dra// mdo lung chen po 'di nyid kyang/ / 'dren pa'i thabs bcur 'dres pa'i yin// zhes gsungs so// byang chub kyi sems shes bya mtha' gcod 'dren pa'i thabs bcur bstan pa'i le'u ste bcu drug pa'o//// de nas yang sems dpa' rdo rjes zhus pa/ / kye/ ston pa byang sems kun tu bzang// sems nyid rdzogs pa chen po ru// theg dgu'i dbye ba ji ltar rdzogs// theg dgu sems su ji ltar rdzogs// zhes zhus pas/ de nas ston pa kun bzang gis/ / sems dpa' che la bka' stsal pa// nyon cig sems dpa' rdo rje che// sems las byung ba'i chos nyid la// bden pa bzhi ru 'byung bas na// sems nyid nyan thos dag tu bstan// sems las byung ba'i chos nyid las/ / rten 'brel bcu gnyis byung bas na// sems nyid rang rgyal dag tu bshad// sems las byung ba'i chos nyid la// bden pa gnyis su byung bas na// sems nyid theg pa chen por bshad/ / sems las byung ba'i chos nyid la// dag pa rnam gsum byung bas na// sems nyid kri ya'i theg par bshad// sems las byung ba'i chos nyid la// de nyid bzhi ru byung bas na// sems nyid u ru ya ru bshad/ / sems las byung ba'i chos nyid la// mngon par byang chub lnga byung bas// sems nyid yo ga dag tu bshad// sems las byung ba'i chos nyid las// thabs dang shes rab gnyis med pas// sems nyid ma hA yo gar bshad/ / sems las byung ba'i chos nyid las// dbyings dang ye shes gnyis med pas// sems nyid a nu yo gar bshad// sems las byung ba'i chos nyid las// rig stong gnyis su med pa la/ / sems nyid a ti yo gar bshad// theg pa dgu ni yas phub ste// sems nyid rdzogs pas gtan la phab// theg pa rim dgu byang chub sems// rang byung ye shes rol par shar// shar bzhin chos nyid byang chub sems/ / nges par theg pa gcig las med// sems nyid rdzogs pa'i theg pa'o// da yang sems dpa' chen po nyon// dbang rnams kun gyi mtshan nyid dang// gzugs snang sku yi dkyil 'khor nyid// ye nas kun bzang sems nyid sku/ / bum pa'i dbang mchog logs na med// sgra grags gsung gi dkyil 'khor nyid// ye nas sems dpa' kun bzang gsung// gsang ba'i dbang mchog logs na med// dran rig thugs kyi dkyil 'khor nyid/ / ye nas sems nyid kun bzang thugs// thugs kyi dbang mchog logs na med// spro ba'i mtshan ma thams cad kun// ye shes skye med 'od gsal nyid// bzhi pa'i dbang mchog logs na med/ / rig pa'i rgyal po nga dbang med// ye nas dbang gi ngo bor chub// bskur ba'i dbang la rag ma lus// lta ba gza' gtad bral ba la// dbang la rag na gza' gtad yin// sgom pa dmigs gtad bral ba la/ / dbang la rag na dmigs gtad yin// spyod pa shugs byung rang grol la// dbang la rag na 'dzin chags yin// dam tshig bsrung mtshams bral ba la// dbang la rag na rtsis gdab yin/ / 'bras bu lhun grub chen po la// ye nas skye med 'od gsal bas// dbang la rag na mtshan bcas yin// zhes gsungs so// shes bya mtha' gcod kyi rgyud las// theg pa dgu dbang bzhi rang la rdzogs ba'i le'u ste bcu bdun pa'o/ /// de nas sems dpa' rdo rjes yang zhus pa// e ma ho// ston pa byang sems kun tu bzang// sems nyid rdzogs pa chen po ru// pha rol phyin bcu lam lnga dang// sngags kyi cho ga ji ltar rdzogs/ / de nas ston pa kun bzang gis// sems dpa' che la bka' stsal ba// nyon cig sems dpa' rdo rje che// byang chub sems kyi rang bzhin las// bying dang rgod pa gnyis med pas/ / zhi gnas bde ba logs na med// rang byung ye shes rang gsal bas// sems nyid lhag mthong logs na med// sems nyid chos nyid brdal khyab pas// sems la sbyin pa logs na med// sems nyid ma skyes gzung 'dzin bral/ / sems las tshul khrims logs na med// byang chub sems su kun shong pas// sems las bzod pa logs na med// sems nyid brdal bar 'ub chub pas// sems las brtson 'grus logs na med/ / byang chub sems la g.yos med pas// sems las bsam gtan logs na med// byang chub sems las 'khrul med bas// sems las shes rab logs na med// snang ba gang yang mi 'gog pas/ / sems las thabs nyid logs na med// sems las gzhan du smon med pas// sems las smon lam logs na med// snang grags sems su rang grol bas// sems las stobs nyid logs na med/ / ma btsal ye shes lhun grub pas// sems las ye shes logs na med// des na pha rol phyin bcu sems// da yang sems dpa' rdo rje nyon// tshogs kun mi sog ye rdzogs pas// sems las tshogs lam logs na med/ / sems nyid chos nyid rang bzhin bas// sems mas las sbyor lam logs na med// chos nyid mngon du rang shar bas// sems las mthong lam logs na med// de nyid rang la rang gnas pas/ / sems las sgom lam logs na med// de nyid rdzogs pa spyir khyab pas// sems las thar lam logs na med// des na lam lnga byang chub sems// da yang sems dpa' rdo rje nyon// 'gro drug ye nas sangs rgyas pas/ / sems las bskyed pa logs na med// mi rtog ye shes bgegs bsal bas// sems las 'tshams gcad logs na med// sems nyid byin chen rang bzhin logs na med// thams cad bdud rtsi'i rang bzhin las/ / sems las byin brlabs logs na med// chos kun sems nyid rnams dag pas// sems las rnam rtog logs na med// snying rje chen po'i cir mi mdzad// sems las tshad med logs na med/ / sku gsung thugs dang rang ldan pas// ting 'dzin rnam gsum logs na med// sems nyid 'byung lnga bcom ldan 'das// sems las dbang chen logs na med// yangs pa chos dbyings sems nyid gnas/ / sems las gzhal yas logs na med// rang rig rang gsal ye nas lha// sems las lha bskyed logs na med// rang byung ye shes lung thog phebs// de la dbang bskur logs na med// sangs rgyas sems can gnyis med pas/ / spyan drang bstim pa logs na med// sems nyid ye nas 'gyur med pas// brtan par bzhugs pa logs na med// ye nas bde chen gnyis med la// phyag dang mchod sogs logs na med/ / sgul bskyod thams cad phyag rgya bas// phyag rgya'i mchod pa logs na med// mi gsung mnyam gzhag sngags tshig pas// sgom dang bzlas brjod logs na med// bya ba med pas las rnams te/ / sems las 'phrin las logs na med// mi gzung ye shes chen po la// gtor ma gtang ba logs na med// sna tshogs snod bcud gnyis med pas// sems las lhag bstan logs na med/ / thig le gcig tu kun 'dus pas// dkyil 'khor bsdu ba logs na med// ye shes lhun grub go ldan pas// skal ldan lus bsrungs logs na med// yon tan thams cad lhun grub pas// smon lam gdab pa logs na med/ / sku gsum rang la lhun grub pas// mthar phyin 'bras bu logs na med// ces gsungs so// byang chub kyi sems shes bya mtha' gcod las// pha rol phyin bcu lam lnga sngags kyi cho ga rang la lhun gyis grub pa'i le'u ste bco brgyad pa'o/ /// de nas sems dpa' rdo rjes yang zhus pa/ kye/ ston pa kun tu bzang// khyim dang sdig pa mthu khongs nas// mngon par sangs rgyas ji ltar lags/ / sku lnga sku gsum bye brag gang// de nas ston pa kun bzang gis// sems dpa'i 'khor la bka' stsal pa// sems dpa' rdo rje legs par nyon// nga nyid rtog pas la bzla na// 'dod chags zhe sdang gti mug kyang/ / spang du med de byang chub lam// ye nas rang byung ye shes yin// lus la pho mo yod gyur phyir// byang chub sems la pho mo med// chags pa spyad pas bde ba'i mchog/ gsol 'debs snying po chos sku nyid/ / de tshe bde ba'i chos nyid brgyan// 'ching bar mi 'gyur grol bar nges// byang chub sems la skye shi med// dkar po'i phyogs dang sdig la sogs// byang chub sems la gnyis su med// zhing bcu dbyings su bsgral gyur na/ / de tshe bsgral ba'i chos nyid brgyan// 'khor ba chos nyid ngang du brlag sems nyid ye nas 'od gsal phyir// ngo mtshar rmad du byung rol pa mthu// bya bral nam mkha' ji bzhin te// mi dmigs gti mug chos kyi sku/ / gnyis su med pas shes rab gsal// de ltar rtogs pas ye shes nyid// 'bras bu gzhan nas btsal mi dgos// gdod nas rang byung ngo bo nyid// 'bras bu la yang mi ltos par// sems dang bral bas kun bzang thugs/ / lus dang bral bas kun bzang sku// ngag dang bral bas kun bzang gsung// thugs ni skye med chos sku'i thugs// sku ni longs spyod rdzogs pa'i sku// gsung ni sangs rgyas sprul pa'i gsung/ / da yang sems dpa' rdo rje nyon// sku gsum sku lnga'i bye brag ni// sku gsum don la so sor dbye// chos sku la yang rnam pa gsum// ma ni skye med dpag tu med// chos kyi sku yi chos sku nyid/ / rigs lnga drug pa dpa' bo rnams// chos kyi sku yi longs spyod sku// sems dpa' sems ma'i sprul tshogs rnams// chos kyi sku yi sprul pa'i sku// longs spyod rdzogs la'ang gsum du nges// rdo rje chen po rdo rje dbyings/ / longs spyod rdzogs pa'i chos kyi sku// rigs lnga rigs gsum la sogs pa// longs spyod rdzogs pa'i longs spyod sku// sems dpa' la sogs sprul 'khor rnams// longs spyod rdzogs pa'i sprul pa'i sku/ / sprul sku la yang gsum du nges// smra bsam brjod med shes rab don// sprul pa sku yi chos kyi sku// rnam dag sku lnga gzugs bzang ba// sprul pa sku yi longs spyod sku// sras dang mdzad pa sna tshogs rnams/ / sprul pa sku yi sprul pa'i sku// sku gsum snang tshul dgur bstan kyang// byang chub sems pa ma lus 'bral med// de ni dbyer med rdo rje'i sku// de lta bu yi sku nyid la// zag med bde chen mngon byad sku/ / nges par sku ni gcig las med// gcig ni byang chub chos kyi sku// zhes gsungs so// byang chub kyi sems shes bya mtha' gcod las// dug gsum gyi grol tshul dang sku gsum sku lnga bstan pa'i le'u ste bcu dgu pa'o/ /// de nas sems dpa' rdo rjes yang zhus pa// e ma ho// ston pa byang sems kun tu bzang// rang byung ye shes don ni gang// man ngag gces pa'i don ni gang// de nas ston pa kun bzang gis/ / 'khor rnams kun la bka' stsal pa// nyon cig sems dpa' rdo rje che// dang po rgyu las ma byung rang// pha zhes bya ba'i rgyu yang med// bar du rkyen las ma byung rang// ma zhes bya ba'i rkyen yang med// tha ma gnyen pos mi 'jig rang/ / yul gzhan 'gyur ba'i gnyen po med// 'gag pa med pas rang nyid byung// sgrib pa med pas rang nyid byung// ngo bo sna tshogs snang bas byung// ye ni nas gnas pa yin// ye nas 'gyur ba med pa yin/ / ye nas dngos med dngos ma grub// ye ni des na brjod ma grub// ye ni rang byung shugs las 'char// rig pa rang gsal rang du shes// rig pa ma 'gags gsal bar shes// rig pa bde chen gnyis med shes/ / rig pa ma bcos gnyug mar shes// rig pa rang grol mnyam nyid grol// da yang sems dpa' rdo rje nyon// rang byung ye shes rgyal po 'di// mi 'gyur 'gyur med ye nas gnas// ma 'gags shes pa'i phyir na rig/ rig pa don la mi 'gyur wal// ngo bo don las ma yengs gsal// skye med thugs su chud pas si// de yi don las mi yengs pa// gang gis rtogs na kun tu bzang// rtog par gyur pa gang yin pa/ / de ni man ngag kun gyi mchog/ ma rtogs rtsol ba'i tshi chad yin// des na rtogs pa gtso bor bshad// sems dpa' rdo rje da yang nyon// man ngag ces su bya ba yang// man ni snying bo'i byang chub sku/ / ngag ni rig pa sa le ba// man ni s+t+rong rig ye shes sku/ ngag ni brjod pa'i sgra las 'das/ man ni thugs kyi sgron me phye// ngag ni mgul gyi bum par 'dril// man ni rigs pa sa le ba/ // man ngag ni ljags la bkram pa'o// man na ring rig chos kyi sku// ngag ni mgur nas byung ba'o// man ni rang rig rgyal po yin// ngag ni rang byung ye shes gsal// tshegs chung bas na man ngag yin// go sla bas na man ngag yin/ / bya btsal bral bas na man ngag yin// yon tan lhun grub man ngag yin// sems dpa' rdo rje rab tu nyon la zung// snod ldan kun la de bzhin ston// rab tu gsungs so// byang chub kyi sems shes bya mtha' gcod kyi rgyud las/ rang byung ye shes dang man ngag bstan pa'i le'u ste nyi shu pa'o//// de nas yang sems dpa' rdo rje nan tan zhus pa// e ma ho/ byang sems kun tu bzang/ / sngar du bshad pa'i rang bzhin bcu po dang// shes bya bslab pa'i mtha' bcur gsung pa nyid// tha dad lags sam don khrigs ji ltar lags// byang sems kun tu bzang pos bshad du gsol// byang sems kun tu bzang pos bka' stsal pa/ / sems dpa' rdo rje de nyid rab tu nyon// de ltar bshad pa'i rang bzhin bcu po nyid// shes bya bslab pa'i mtha' bcu nyid du 'dus// bslab pa'i mtha' bcu'i don khrigs ji ltar nges/ / rang byung ye shes ye nas rang shar bas// dbang bskur mchog nyid ye nas bskur du med// dam tshig ye nas gnyis 'dzin bral bas na// dam tshig mchog nyid ye nas bsrung du med// lta ba ye nas gza' gtad bral bas na/ / lta ba'i mchog nyid ye nas blta ru med// phra bas ye nas dmigs gtad bral bas na// bsgom pa'i mchog nyid ye nas lhar mi bskyed// spyod pa ye nas blang dor bral bas na/ / spyod pa'i mchog nyid ye nas spyad du med// lam la ye nas bgrod du med pas na// mkhas la ye nas gnas lugs dgongs pa ni// sa la ye nas bgrang du med pa'i phyir// thos pa'i mchog nyid ye nas brjod dang bral/ / ye shes ye nas sgrib pa med pas na// sgo bsdur mchog nyid ye nas theg gcig sems// 'phrin las ye nas btsal du med pas na// man ngag mchog nyid ye nas bya bral klong// lhun grub ye nas bya btsal bral bas na/ / mdo bsdus mchog nyid ye nas thig le gcig/ rang bzhin bcu ni bslab pa'i mtha' bcu nyid// sems nyid rdzogs pas de ltar gtan la phab// bslab pa'i mtha' bcu bcu phrag bcu bstan pa/ / lhun grub bcu dang gnyis 'dzin bral bas bcu// gza' gtad bral ba bcu dang ngang la gnas pa bcu// blang dor med pa bcu dang don la mkhas pa bcu'o// brjod bral bcu dang theg gcig byang sems bcu/ / bya bral bcu dang thig le nyid 'dus bcu// rig pa'-i rgyal po rang dbang bcu ru lhun gyis grub// dam tshig rgyal po 'dzin med lhun gyis grub// lta ba gza' gtad med par lhun gyis grub/ / sgom pa dmigs gtad med par lhun gyis grub// spyod pa blang dor med par lhun gyis grub// mkhas pa gnas lugs nyid du lhun gyis grub// thos pa brjod bral nyid du lhun gyis grub// sgo bsdur theg gcig sems nyid lhun gyis grub/ / man ngag bya bral klong du lhun gyis grub// mdo bsdus thig le nyid du lhun gyis grub// dbang po rgyal bo rang dbang lhun grub yin// rig pa'i rgyal po rang dbang nyid mi 'da'/ / dam tshig rgyal po 'dzin med nyid mi 'da'// lta ba gza' gtad bral ba nyid mi 'da'// sgom pa dmigs gtad bral ba nyid mi 'da'// spyod pa blang dor bral ba nyid mi 'da'// mkhas pa'i gnas lugs dgos pa nyid mi 'da'/ / thos pa brjod bral dgongs pa nyid mi 'da'// sgo bsdur theg pa'i sems nyid don mi 'da'// man ngag bya bral klong chen nyid mi 'da'// mdo bsdu thig le nyag gcig nyid mi 'da'/ / dam tshig rgyal po 'dzin pa bral pa yin// rig pa'i rgyal po rang dbang gza' gtad bral// dam tshig rgyal po 'dzin med gza' gtad bral// lta ba lta ru med pas gza' gtad bral// sgom pa dmigs gtad med pas gza' gtad bral/ / spyod pa blang dor med pas gza' gtad bral// mkhas pa gnas lugs dgongs pas gza' gtad bral// thos pa brjod bral dgongs pas gza' gtad bral/ / sgo bsdur theg gcig sems nyid gza' gtad bral// man ngag bya bral nyid bas gza' gtad bral// mdo bsdus thig le nyid pas gza' gtad bral// lta ba'i rgyal po gza' gtad bral bas ni// rig pa'i rgyal po rang dbang ngang la gnas/ / dam tshig rgyal po 'dzin med ngang la gnas// lta ba gza' gtad bral ba'i ngang la gnas// bsgom pa dmigs gtad bral ba'i ngang la gnas// spyod pa blang dor bral ba'i ngang la gnas/ / mkhas pa'i gnas lugs dgongs pa'i ngang la gnas// thos pa brjod bral nyid kyi ngang la gnas// sgo bsdur theg gcig sems nyid ngang la gnas// man ngag bya bral klong chen ngang la gnas/ / mdo bsdu thig le nyid kyi ngang la gnas// sgom pa rgyal po dmigs gtad med pa yin// rig pa'i rgyal po rang dbang blang dor bral// dam tshig rgyal po 'dzin med blang dor med// lta ba gza' gtad bral bas blang dor med/ / sgom pa dmigs gtad bral ba'i blang dor med// spyod pa gzang ngan med pas blang dor med// mkhas pa gnas lugs nyid las blang dor med// thos pa brjod bral nyid la blang dor med/ / sgo bsdur theg gcig sems nyid blang dor med// thos pa brjod bral nyid la blang dor med// man ngag bya bral nyid la blang dor med// mdor bsdus thig le nyid la blang dor med// spyod ba'i rgyal po blang dor med pa yin/ / rig pa'i rgyal po rang dbang don la mkhas// dam tshig rgyal po 'dzin med don la mkhas// lta ba gza' gtad bral bas don la mkhas// sgom pa dmigs gtad bral ba'i don la mkhas/ / spyod pa blang dor med pa'i don la mkhas// mkhas pa gnas lugs dgongs pa'i don la mkhas// thos pa brjod dang bral ba'i don la mkhas// sgo bsdur theg gcig sems nyid don la mkhas/ / man ngag bya bra klong chen don la mkhas// mdor bsdus thig le nyag gcig don la mkhas// mkhas pa'i rgyal po gnas lugs dgongs pa yin// rig pa'i rgyal po rang dbang brjod pa bral// dam tshig rgyal po 'dzin med brjod dang bral/ / lta ba gza' gtad bral bas brjod dang bral// sgom pa dmigs gtad bral bas brjod dang bral// spyod pa blang dor med pas brjod dang bral// mkhas pa gnas lugs nyid pas brjod dang bral/ / thos pa brjod du med pas brjod dang bral// sgo bsdur theg gcig sems nyid brjod dang bral// man ngag bya bral klong chen brjod dang bral// mdo bsdu thig le nyid la brjod dang bral/ / thos pa'i rgyal po brjod dang bral ba yin// rig pa'i rgyal po rang dbang theg gcig sems// dam tshig rgyal po 'dzin med theg gcig sems// lta ba gza' gtad bral ba'i theg gcig sems// sgom pa dmigs gtad bral ba'i theg gcig sems/ / spyod pa blang dor med pa'i theg gcig sems// mkhas pa gnas lugs nyid pas theg gcig sems// thos pa brjod dang bral bas theg gcig sems// sgo bsdur byang sems nyid pas theg gcig sems/ / man ngag bya bral klong chen theg gcig sems// mdor bsdu thig le nyid bas theg gcig sems// sgo bsdur rgyal po de nyid theg gcig sems// rig pa'i rgyal po rang dbang bya bral klong/ / dam tshig rgyal po 'dzin med bya bral klong// lta ba gza' gtad bral bas bya bral klong// bsgom pa dmigs gtad bral ba'i bya bral klong// spyod pa blang dor med pas bya bral klong/ / mkhas pa gnas lugs nyid pas bya bral klong// thos pa brjod dang bral bas bya bral klong// sgo bsdur theg gcig sems nyid bya bral klong// man ngag bya btsal bral bas bya bral klong// mdor bsdu thig le nyid pas bya bral klong/ / man ngag rgyal po bya bral klong chen yin// rig ba'i rgyal po rang dbang thig le nyid// dam tshig rgyal po 'dzin med thig le nyid// lta ba gza' gtad med pas thig le nyid/ / sgom pa dmigs gtad med pas thig le nyid// spyod pa blang dor med pas thig le nyid// mkhas pa gnas lugs nyid pas thig le nyid// thos pa brjod dang bral bas thig le nyid// sgo bsdur theg gcig sems nyid thig le nyid/ / man ngag bya bral klong chen thig le nyid// mdor bsdus 'ub bsdus thig le nyid du 'dus// mdor bsdus rgyal po thig le nyag gcig yin// de ltar btsal du med pa'i rang bzhin bcu/ / gang zhig de las rtsol bar byed pas rko// bye chung lco gas nam mkha'i mtha' btsal kyang// mtha' mi rnyed cing rang nyid dub pa ltar// de bzhin bya byed phal gyi lam btsal kyang// lam mi rnyed cing tshi chad nad kyis 'dzin/ / des na bslab pa'i mtha' bcu rtsol ba ma byed cing// rtsol ba de ni tshi chad 'dzin ba'i nad// de nyid ma rtogs ji snyed kha rgyud kyang// bya bral lhun rdzogs nyid lam mi rnyed do/ / zhes gsungs so// byang chub sems shes bya mtha' gcod las// bslab pa'i mtha' bcu bstan pa'i le'u ste nyi shu gcig pa'o//// de nas sems dpa' rdo rjes yang zhus pa/ kye ho ston pa byang sems kun tu bzang/ / bsod nams chos spyod bcu rnams ji ltar rdzogs// de yi don la ji ltar gnas par bgyi/ dmigs su med pa de nyid rab dbye na/ bltas re mthong ba med na mthong ba yin// sems nyid rang bzhin mthong ba 'dra ba yin/ / sems nyid rang bzhin dmigs su med pa la// byang sems kun tu bzang pos bkal stsal pa// sems dpa' rdo rje da yang legs par nyon// byang chub sems nyid shes bya bstan pa ni/ / sems kyi rang bzhin dmigs su med pa la// de rig de nyid klong du gyur pa ni// de bas de nyid gnyis par mi 'gyur te// gnyis med klong du gyur pa mchod pa yin// sems kyi rang bzhin dmigs su med pa las/ kha dog dbyibs med tshon las 'das pa ste// gdod nas ma byung ma skyes de nyid las// sna tshogs 'dod dgu 'byung bas sbyin pa yin// sems kyi rang bzhin dmigs su med pa las// gsung gi klong nas rigs nyid shar ba de/ / sna tshogs sems nyid shes pa nyan pa yin// sems kyi rang bzhin dmigs su med pa la// sems nyid dmigs su med de snying po'i mchog/ thig le chen po yongs kyis mkha' klong de/ / de bzhin 'gyur med gnas pa klog pa yin// sems kyi rang bzhin dmigs su med pa la// 'khor ba'i mun nyid gdod nas ye sangs rgyas// gdod nas gnyis med sems nyid lhun gyis grub// rig pa de bzhin gnas pa 'dzin pa yin/ / sems kyi rang bzhin dmigs pa med pa la// dus gsum dus med brjod dang bral ba yin// brjod dang bral ba'i don ni de nyid la// dmigs cing gang gis bzlos pa 'don pa yin/ / sems kyi rang bzhin dmigs su med pa yin// mtshon par byed pa'i tshig ni ston byed cing// dmigs su med pa dmigs su bya ba'i don// mya ngan 'das pa smra bar bshad pa yin/ / sems kyi rang bzhin dmigs su med pa la// dmigs pa'i dngos po gang yang mi sems shing// dmigs par bya ba'i chos ni rdul tsam med// dmigs pa dngos po gang yang mi sems te// dmigs byed don la sems pa sems dpa' yin/ / sems kyi rang bzhin dmigs su med pa la// sems de ye sangs rgyas par thag chod do// mi skye mi 'gags dmigs su med pa la// dmigs med dmigs su med pa sgom pa yin/ / sngar 'das rgyal ba sras dang bcas pa dang// da ltar phyi ma'i rgyal ba sras bcas rnams// chos spyod 'di bcu rtogs pas 'grub pa'i phyir// bcu po 'di ni rgyal ba kun gyi yum// zhes gsungs so/ / byang chub kyi sems shes bya mtha' gcod las// chos spyod bcu bstan pa'i le'u ste nyi shu rtsa gnyis pa'o//// de nas sems dpa' rdo rjes yang gsol pa// ston pa'i ston pa byang sems kun tu bzang/ / gang la mi rten lta med lta mchog la// de nyid ma btsal bzhag pa'i sgom pa de// byang sems kun tu bzang po nyid kyis rab tu shod// byang sems kun tu bzang pos bka' stsal pa// kun gyi rang bzhin ye nas phyi mo nyid/ / dpe las 'das pas mtshon pa'i don dang bral// tshig las 'das pas brjod pa'i ngag dang bral// sgra las 'das pas thos pa'i yul dang bral// rgyu dang bral bas thob pa'i 'bras bu med/ / rang bzhin med pas bcos pa'i mtha' dang bral/ kha dog med pas dmigs pa'i yul dang bral// ci yang min pas phyogs ris yongs dang bral// btsal du med pas lta ba gza' gtad bral// cir yang mi dgongs cir yang mi g.yo dang/ / cir yang mi bsam cir yang spyad mi bya// gang la'ang ma 'dres sgom du ming yang med// ci yang mi mthong cir yang ltar med de// de lta bu yi ngang la gang gnas pa// tha snyad tsam du sgom zhes de la bya/ / rig pa cir yang 'du shes med na sgom// ji bzhi rang bzhin gzhag na sgom pa yin// bya bral ngang du gnas na sgom pa yin// gsal ba dmigs su med na sgom pa yin// ji lta bur yang ma mthong sgom pa yin/ / ma bcos mnyam par gzhag na sgom pa yin// sgom du med pa'i don la ma yengs na// sgom du med pa'i sgom pa mchog nyid yin// zhes gsungs so// byang chub kyi sems shes bya mtha' gcod las/ / lta sgom bye brag khyad bar bstan pa'i le'u ste rtsa gsum pa'o//// de nas sems dpa' rdo rjes yang zhus pa// ston pa'i ston pa byang sems kun tu bzang// dus gsum rgyal ba'i rang bzhin chos kyi dbyings/ / spang blang med pa mnyam pa nyid kyi ngang// rang rig kun tu bzang po nyid la 'dus// chos rnams shes bya bslab pa'i mtha' bcur 'dus// de lta bu yi bya bral rgyud chen 'di/ / snod kyi rim pa gang la gdams shing gtad// kun bzang mchog gis bka' stsal pa// nyon cig sems dpa' rdo rje che// phyi ma dus kyi snod med rnams// bla ma'i sku smod mos pa chung// mched la mi gdung gzhogs kyis smod/ / rdzas la shin tu chags sems che// dad chung nyam len g.yel ba dang// shes nas mi bsrung dam me dang// tshig tu zhib la don la rtsing// le lo che la spyod lam rtsing// dregs pa che la rang bzhin gong/ / gzu lum ras chod byed pa la// de lta bu la 'di bstan na// srid gsum sems can bsad dang mtshungs// rgya la 'bang bya khas len zhing// yul dang bud med 'bul byas kyang/ de la bsran par ma gsungs so/ / gal te de la bstan gyur na// nyi tshe ba yi dmyal bar skye// de bas rta shi'i kha bzhin sdoms// sems dpa' rdo rje legs par nyon// a ti bya bral rgyud rnams kun// shes bya bslab pa'i mtha' bcur 'dus/ / snod la gdams shing gtad pa ni// bla ma lha ltar mchod cing gus// mched la gdung zhing shin tu byams// rdzas la zhen chags chung ba dang// dam tshig mig ltar 'tsho ba dang// shes bzhin nyams su len pa dang/ / 'khor ba 'dam ltar shes pa dang// bka' yi don la dam par blta// shes rab che la gtad pa thub// dad pa che la ser sna chung// dka' ba sdos nas dang du len// shes bzhin che la bag dang ldan/ / lus srog mi lta chos la mos// grong khyer med cing dman cha 'dzin// de lta bu yi slob ma la// a ti bya bral rgyud 'di bstan// sems dpa' rdo rje yid la zhog/ sems la gab na shin tu mchog/ ces gsungs nas sems dpa' rdo rje la rgyud gdams shing gtad do/ / byang chub kyi sems shes bya mtha' gcod kyi rgyud las/ gdams shing gtad pa'i le'u ste rtsa bzhi pa'o//// byang chub kyi sems shes bya mtha' gcod kyi rgyud ces bya ba rdzogs so/ /// rgya gar skad du/ tsa ra sha ar thA/ bod skad du/ rje btsan dam pa/ bcom ldan 'das dpal kun tu bzang po la phyag 'tshal lo// shin tu rnal 'byor lha yi lha/ / rnal 'byor las kyang rnal 'byor mchog/ 'phags pa las kyang 'phags pa ni// rdo rje rgyal ba kun gyi mes// rje btsan dam pa kun tu bzang// rdo rje 'chang rgyal 'jigs pa'i skyabs// nyams pa'i chad pa byung ba la/ / mgon btsun de las gzhan med do// der gzhol ba ni mchod pa'i sprin// kun tu gnas pas sgrub thabs so// ngang yis mi ldog dngos grub pas// don kun phyag rgya rdzogs pa yin/ / bde chen lhun gyis rdzogs pa yang// 'di dag kun gyi bla ma ste// mngon sum sangs rgyas yin pa na// 'dra bar dang ba'i mchog bskyed do// nges pa'i lung ston dpa' bo yis// lung chen de dag la bstan nas/ / mkhas pas lung bzhin rgyud pa yis// snum pa'i dam tshig bskang ba yin// thugs rje thabs dang ldan pa yis// phan par bzhed pa'i skye bo la// cha shas tshang bar mdor bsdus nas// 'jug pa tsam zhig skabs 'dir dbye'o/ / lung dang man ngag gi don yi ge nyung yang don rgya chen bsdus te/ ma lus 'grel cing theg pa mtha' dag gi don bkod pa/ byang chub kyi sems bsam gtan nges pa'i rgyal po/ rje btsan dam pa rdzogs so/ /// bcom ldan 'das dpal bde ba chen po'i snying po la phyag 'tshal lo// byang chub sems ni nges pa las// yang dag snying po gsal ba ni// thams cad ma lus gdal ba dang/ / kun nas yongs su zlum pa ni// phyi dang nang gi chos rnams kun// rgyu 'bras khyad par brdal ba yang// bya byed yul las 'das pa yi// yang dag gi snying po bde ba'i klong// bdag gzhan phyogs las 'das pa'i phyir/ / bstan cing thos pa'i yul med de// tha snyad med pa'i byang chub sems// snying po yang dag thig le ho// snang dang srid dang chos rnams kun// yang dag bcos su med pa ni// dus gsum rtog pa med pa'i phyir/ / kun bzang thig le bde ba'i phyir// ma skyes dag pas bde ba'i dbyings// ma 'gags gsal ba'i bdag nyid klong// 'du 'bral med pa'i thig le'i klong// nges pas gzhan du mi rtsol ba'o/ / mi 'du ye nas dag pa la/ mi 'bral mngon du gsal ba ni// thams cad khyab pas brdal ba yang// mi g.yo nges pa'i thig le dbyings// don dam bden pa'i thig le ni// dngos po phyogs las 'das pa'i phyir/ / gzung du med pa'i byang chub la// lhag par gnas par mi byed do// mi rtog rtog las 'das pa la// mi 'gyur gsal bar gnas pa ni// ma bcos ji bzhin bde ba ste// kun bzang thig le chen po'i dbyings/ / dus gsum srid gsum sgo gsum po// rnam shes rtsa ba gsum po yang// sku gsum rang dbang lhun grub pas// mngon sum thig le bde ba'i dbyings/ kha dog dbyibs la mi gnas shis// 'byung 'jug thabs la gnas pa ni/ / las dang dus kyis mi bcos te// yang dag thig le bde ba'i klong// thams cad ngang gis dag pa la// yid kyi rnam shes 'od 'bar ba// dus gsum phyi nang med pa'i phyir// rang byung bde ba'i thig le yin/ / sangs rgyas kun gyi rgyal po yin// de nyid yin par nges pa'i phyir// snying po nges pa'i thig le las// gzhan du rgyal bas chos mi btsal// 'di las gzhan pa'i chos med pas/ / smon bar bya ba'i yul med de// gang zhig blo la gsal ba ni// kun tu bzang po'i 'bras bu'i dod// dran pa'i gzhi dang brtags pa'i lha// ma lus 'di na rdzogs pa la// gang gis bcos su med pa ni/ / byang chub chen por nges pas tig/ las dang sdug bsngal mang po yis// bde ba'i don las nyams pa la// snying po'i don las 'od byung ste// mngon sum thig le bde bas che// bgrod du med pa'i thig le ni/ / yang dag nges pa'i lam du bde// dmigs su med pa'i snying po ni// ji bzhin gsal bas thig le che// gza' gtad phyogs las 'das pa ni// bsgom du med pa'i byang chub sems// mngon sum thig le bde ba la/ / bsgoms pas rnyed par ga la 'gyur// ma rig dug gsum rmongs pa yis// rgyu 'bras phyogs las 'das pa yang// yang dag lta bar bral ba ni// phyal bar gzhag pa ma yin zhing// bkag ste zhi bas nus pa dang/ / gzhig ste stong pas spong ba dang// stong pa'i yul la 'dzin pa yis// bsam gtan chad pa'i mi gnas te// dag pas dag pa btsal ba'i phyir// lha la lha yi dmigs pa yang// 'gyur ba med pa'i thig le la/ / gza' gtad du phyogs su mi gnas pa'o// 'bras bus 'bras bu rnyed 'dod pas// shes rab thabs su rol pa yang// 'gyur ba med pa'i thig la// rtsol sgrub phyogs su mi gnas pa'o// nam mkha' nam mkha' mthong 'dod pas/ / dbyings dang ye shes rol pa yang// gsal pa'i thig le'i ngo bo nyid// tha snyad phyogs su mi gnas pas// kun tu bzang mo'i mkha' dbyings las// kun bzang rol pa'i byed pa pos/ / sangs rgyas dkyil 'khor ma lus pa// bya ba med par gsal ba po// ma skyes chos nyid thig le ni// ma 'gags dbyings kyi thig ler bde// mngon par dag pa'i thig le ni// gsal bas ye shes thig ler bde/ / rol pa kun bzang thig le ni// mi rtsol lhun gyis grub pas bde// thig le drug gi mkha' klong na// thig le dgu yi 'od gsal zhing// thig phran sum cu rtsa drug gis// thams cad gsal bar bkra ba yang/ / dus gsum 'gyur ba med pa'i dbyings// man ngag rgyal po dgongs pa ste// mngon sum sangs rgyas che ba'i gzer// bdag nyid che bas btab pa'o// chos nyid gzhan na med pa'i gzer/ / byang chub sems kyis btab ba'o// dus gsum 'bad rtsol med pa'i gzer// lhun gyis grub pas btab pa'o// che ba lnga yi mdzod brtol nas// sbas pa gsum gyi gter rnyed nas// mngon sum rang dbang thob pa yis/ / thams cad zil gyis gnon pa yang// gzer bu nyi shu rtsa lnga ste// mi 'gyur mngon du shar ba yang// kun la khyab cing thams cad snum// ngo bo nyid ni dbyer med kyang// 'khrul pa rnams la mi snang bas/ / yang gsang thugs kyi gter chen 'di// phal la spro bar ma gsungs so// byang chub kyi sems mi 'gyur ba'i thig le tig rdzogs so////@#/ / bcom ldan 'das dpal kun tu bzang po la phyag 'tshal lo/ / nam mkha'i rgyal po ye shes chos kyi sku// sems nyid chos su 'gyur bas bde ba ste// chos nyid bsam du med pas nam mkha' che// nam mkha' bsam du med pas rgyal ba'i bdag/ bsam du med pa'i nam mkha' de nyid las// mi dmigs rgyal ba'i dgongs pa rang la shar// nam mkha' mtshan nyid kun las 'das pa ni// nam mkha' la yang nam mkha' brjod du med// nam mkha' de nyid bsgom du med pa ni/ / mi brjod bsam du med pa bsgom pa ste// brjod dang bsam pa kun las 'das pa ni// dus gsum rgyal ba'i dgongs pa de nyid yin// nam mkha' lus med nam mkha' sems dang bral/ / mnyam dang mi mnyam nam mkhar brjod las 'das// nam mkha' med pas nam mkha' khyab pa'ang med// de nyid mtshan ma 'di zhes mi nus so// tshig med kun khyab brjod pa'i sgra dang bral// dge sdig dbus mtha' snying po ga la yod/ / yul dang dbang po'i spyod yul med pa la// rgyu 'bras sgyu ma'i spyod pas rang rig 'khrul// tshig med tshig phyir 'brang ba'i don med pas// gang dag sgyu ma'i 'gro don spyod pa yang/ / cha shas rim par rtogs pa skyed pa ni// 'og nas gong du rtsol ba g.yang sa che// tshig bral de la rtag dang chad med pas// ting 'dzin che ba'i lung ste nges pa'i don// ma skyes mi 'gag ye nas mnyam pa la/ / mtshon du med pa'i thig le rgyal ba'i thugs// de la mtshon phyir rgyal bas gang gsungs pa// mtshon cing rtogs par byed pa de nyid kyang// tshad mar gzung zhing rtogs pa skye mod kyang// de bas mtshon med sems ni rgyud kha 'khor/ / ting 'dzin bde ba'i rol chags pa yang// yod med rgyu la mi ltos chos nyid ni// zhi ba'i gnas la mya ngan mi 'da' zhing// spyod yul snang ba 'gegs pa g.yang sa che// rang sems ma bcos ye nas chos nyid la/ / ting 'dzin sgyu ma'i sbyong ba rtsol ba'i gnad// rang byung ye shes dbang la mi brten pas// re zhing dogs pa'i mtshan ma rnam par zhi// nam mkha'i mtha' ltar kun la khyab pa na// byang chub lta ba'i yon tan de nyid de/ / mthong thos phyogs las 'das pa'i nam mkha' ni// zhi ba'i gnas la rtag chad ye nas med// kun la khyab pas rtag pa'i ngo bor bral// gcig pas dbyer med tha snyad chad pa med/ / skye 'jig med phyir rtag mtha' ye nas med// sku gsum thugs las 'das bas che ba'i mchog/ tha tshigs yul las 'das pas nyams pa med// sngags dang phyag rgya bral bas 'gyur ba med/ / sgo phugs yangs dog med pas rgya chen nang pa nyid// phyi nang kun las 'das pas gsang ba'i snying po nyid// bde dang sdug bsngal med pas mnyam pa'i snying po nyid// 'byung 'jug 'jigs pa med pas yangs nas klong/ / 'du 'bras dus las 'das pas yangs dog sbyin pa'i gzungs// sems nyid chos kyi dbyings pas thams cad nam mkha'i sku// rnam rtog grangs las 'das pas ye shes chen po'i zhal/ / gdod nas zhi bas 'od gsal lhun gyis grub pa la// snying po byang chub don la cis kyang bcos su med// 'gyur med chags pa'i yul las 'das pa la// sangs rgyas ye shes ngo bor mtshon du med/ / 'byung 'jug med pas dbang po yul las 'das// mtshan ma 'jil ba'i sku ni mi gnas ye nas dag/ bza' ba'i yul med btsal ba'i dbang pos stong// thams cad ro gcig dbyer med bde ba'i dbyings/ / dus gsum mnyam pa nyid la 'byung 'jug med// mi len 'dzin dang ye nas bral ba la// kun gyi bdag nyid dus gsum dbyings mi g.yo// kun nas phyogs cha med par gnas pa ni// dus gsum bdag nyid rdo rje sems dpa' che/ / lta ba 'di med spyod pa sgyu mas bcings// phyin ci log dang ma log byang chub ste// rnam rtog gnyis kyi mtha' las 'das pa ni// bsam dang bral ba'i byang chub sems chen po/ / nam mkha' lta bu'i byang chub sems nyid ni// yod med dbu mar mi dmigs brjod du med// nam mkha' tsam du'ang brjod du med pa la// tshig dang nam mkha' su yis tshig tu brjod// sems dang tshig las 'das pa'i sbyor ba ni/ / mngon sum mi gnas ye nas stong pas dben// ye shes de nyid kun tu gsal ba na// thams cad rnam par dag par gcig pa'i phyir// las dang mtshan nyid so sor ma nges pas/ / gcig dang du ma'i mtha' las 'das pa'o// chos kyi dbyings nyid yul las 'das mod kyang// 'dzin pa med pa'i mtshan nyid kun la bkra// gzugs kyi mtshan nyid ye nas mthong ba gang// rtog pa'i mtshan nyid med na dmigs pa gang/ / gzha' tshon sgyu mas 'phags pa'i sku bskyed de// bsti gnas sgyu mas re ba'i rtsol ba yang// rnam dag lam chen lhun gyis grub pa la// bsod nams med kyang 'grub ces rgyal bas gsungs/ / chos kyi dbyings ni mi bskyod gnas che ba// kun la khyab pas sgra med tshig las 'das// sprul pa mang po rgya mtsho'i tshogs chen gyis// bya med don las rdul tsam bskyod mi nus// zhi la phra ste mngon du rnyed pa dka' 'o/ / sdug bsngal bde ba chen por gnas// zhes gsungs so// nam mkha'i mtha' dang mnyam pa'i rgyud chen po las/ shes bya thabs kyis gtan la phab pas nam mkhar thim pa'i le'u ste sum cu lnga pa'o/ /// de nas yang sems dpa' rdo rje la/ rang snang rig pa'i 'khor gyis 'di skad ces gsol to// rgyal ba kun gyis gsang ba'i bdag/ byang chub snying po ji bzhin gsal// tshig la dbang sgyur gsang ba'i mdzod/ / mgon po khyod la gsol ba ni// gnyis med gcig ni ji ltar ltar// mtshan ma'i tha snyad ji ltar bral// rig pa'i gdeng zhes gang la bgyi// legs par bdag la bshad du gsol// zhes gsol to/ / de nas sems dpa' rdo rje dam pa des 'di skad ces bka' stsal to// 'dus pa'i tshogs chen da nyon cig/ byang chub snying po'i rang bzhin du// mi mthun gnyen po'i chos med de// rang la rang snang de khyad med/ / rang snang rig pa'i 'khor lo la// ma lus rdzogs pa'i ngo bo bas// rnam pa'i khyad par ci yang snang// gnyis med rig pa gcig tu gnas// rang bzhin gnyis med nyid du bshad// thams cad rang byung snying po nyid/ / rol pa ma 'dres lhun grub pa// ji bzhin don du dbyer med kyang// thabs dang brgyud pa'i man ngag gis// snod dang ldan pa'i skyes bu la// mngon sum rig pa'i tshad mas bstan// phyogs ris med pa'i ngo bor gsal/ / snying po rig pa'i klong du gsal// rtogs pa gnyis su med pa yin// ji snyed chos rnams thams cad kun// re dogs chad par rang gsal bas// dran rtogs snang grags ma lus pa/ / ting 'dzin yan lag rgya mtshor gsal// mkha' la rol pa rgyan snang ltar// re dogs phyogs ris yongs kyi med// goms pa gnyis su med pa yin// ma lus rdzogs pa'i snying po nyid// chos kun ngo bor rang shar bas/ / ma lus ye shes klong brdal bas// thams cad mthar phyin ye shes nyid// dngos po thig ler gsal ba la// 'phro 'du phyogs ris med pas te// ye shes rgya mtsho mthar thug med/ / gdod nas thig le'i ngo bo la// ji snyed thams cad kun 'dus pas// phyi nang rgyu 'bras gzung 'dzin dang// zin chags rtsol sgrub la sogs pa'i// sna grangs pa yi chos rnams kun// ngo bo rtogs dang goms pa dang/ / mthar phyin gnyis med rang bzhin no// ji snyed rang rang tha mal pa'i// phyi nang ji snyed gnas pa ni// skye mched drug ste lha mor brtag/ dngos po gcig la gang rdzogs pa// tha mal zhen pa bzlog phyir te/ / dkyil 'khor drug po'i rang bzhin gyis// rang sems ma skyes ngang du bstan// de nyid bde ba chen po ste// rang rgyud rgyu 'bras ltos pa dang// phyi nang mtshan ma'i yul las 'das// mnyam pa'i don gyi snying po la/ / re dogs mtshan ma'i yul las 'das// dus ngan las kyi snyigs ma la// tshig gi gdeng la zhen pa dang// mtshan ma'i don la rtog pa dang// 'dod pa lnga la mtshan ma yis// bsgyur te bde bar zhen pa yis/ / ma bcos snying ma'i don bor nas// mtshan ma'i dga' bde gtsor gzung nas// rdo la gser du zhen pa ltar// rang rtags log pa'i rnal 'byor gyis// bskal ba nam mkha'i mtha' gtugs par/ / bsgoms kyang 'bras bu mi 'byung ste// bde ba chen po 'don dang bral// thog ma med pa'i zhen pa dag/ thun mong thun mong ma yin pa'i// ji nang ji snyed gnas pa rnams// gnas skabs yul la gcig tu rdzogs/ / rtags pas yul shes kun bral ba'i// stong nyid 'od gsal mngon du mthong// de las byung ba'i rol pa ni// rgya mtsho chu yi ri mo ltar// skad cig tsam gyis gsal gyur te// thams cad re dogs med par shes/ / ma bcos don gyi gdeng yin te// skal ldan rnams kyis shes par bya// ji snyed sangs rgyas thams cad kyis// sku gsung thugs kyi bdud rtsi'i rgyun// rgyal ba rgya mtsho rtogs pa'i don// thugs rje byin rlabs dgongs pa yis/ / rgyal sras gsang ba'i rnal 'byor la// thabs dang rig pa'i mngon sum mam// rna brgyud 'brel bas mngon ston pa// rgyud pa thabs kyi gdeng du bshad// ma bcos don gyi gdeng med par/ / rang rang zhen pa'i rtogs spyod kyis// rang lta ya rabs mthor ston nas// 'dod lnga'i chos la bab chol spyod// kun kyang log pa'i don bltas nas// rdo rje'i khab tu ltung bar 'gyur// zhes gsungs so/ / nam mkha'i mtha' dang mnyam pa'i rgyud chen po las// rig pa rang gsal don gyis bshad pa'i le'u ste sum cu drug pa'o//// de nas yang sems dpa' rdo rje la// rang snang rig pa'i 'khor gyis 'di skad ces gsol to/ / kye ma'o sangs rgyas thams cad kyi// rang snang byin rlabs ya mtshan che// sna tshogs gnyis med gnas pa la// 'khrul rtog sna tshogs rkyen gyis bslad// gang phyir bsgribs dang 'khrul pa ste/ / de dag thabs dang rnal 'byor gang// khyad par ji ltar rtogs pa yis// ma bcos don la ji ltar 'jug/ 'di dag legs par bshad du gsol// zhes gsol to// de nas sems dpa' rdo rje dam pa des 'di skad ces bka' stsal to/ / 'dus pa'i tshogs chen da nyon cig/ chos rnams kun gyi rang bzhin nyid// ma lus kun 'dus snying po ste// gcig nyid kun gyi rang bzhin pas// lhag ma med par yongs su rdzogs/ / de yang rang rkyen bzlog sa dang// rna brgyud bdud rtsi don bral bas// phyogs 'dzin log pa'i 'du shes kyis// ma bcos snying po bsgrubs shing 'khrul// lta spyod log pa'i nga rgyal gyis// bskal pa bye ba brgya phrag tu/ / long bas lam du zhugs pa ltar// 'dod pa'i don dang 'phrad mi 'gyur// ma bcos rtogs pa'i don med na// thun mong rtog spyod bsam gtan dang// lha dang bde ba'i ting 'dzin gyis// ma bcos rtogs par mi 'gyur te/ / 'khor bar nyid du ltung bar 'gyur// ji ltar chu rlabs 'khrig pa dag/ rkyen gyis gang ltar shar ba nyid// sna tshogs chu yi rang bzhin ltar// bcos ma'i don kyang de bzhin no// 'jig rten log pa la sogs pa'i/ / theg pa sna tshogs bsam gtan dag/ rang rang tshul gyis goms byas te// rig pa phyogs ris med par bstan// 'dis ni nam mkha'i mtha' thug pa// rdo rje 'od gsal nyid du 'gyur/ / mi rtag phyi nang thams cad dang// sdug bsngal na ba'i rgyun la sogs// phyi nang bdag med stong pa'i sems// so so'i cha shas dmigs bral bas// 'jig rten zhen pa dus gcig zlog/ dman pas mi gtsang rnal 'byor dang/ / srog dang rlung gis brtag pa dang// bdag nyid dmigs pa bsgoms pa yis// rim pas 'gog pa'i dka' thub yis// 'phags pa'i lam la sbyor ba byed// yid brtan 'dzin pa bzlog pa dang/ / zhen pa spang phyir bstan pa nyid// srid pa'i 'khor lo thog mtha' med// de nyid rten cing 'brel 'byung ste// 'khor lo rim gsum snying po med// 'byung dang rtog dang ma rig 'gog/ 'gog pa'i stong pa mngon du byed/ / rkyen gyis phyi nang rtogs goms nas// zag pa zad pas cho 'phrul 'grub// phyi nang ma lus thams cad kun// kun rdzogs nus pa'i khyad par nyid// cha shas bral ba'i nam mkha' ste/ / phyi nang bar du mngon brtags pas// nam mkha'i rnal 'byor grub pa yis// lta spyod goms pa'i lam gyis tshol/ kha cig rig pa'i rang bzhin nyid// rang snang mi snang 'du shes med// blo yi sbyor ba zad pa yi/ / dag pa'i nyams myong snying por 'dod/ kha cig sgyu ma brag cha ltar// sgo gsum goms pa'i rang bzhin gyis// ma lus kun kyang de bzhin te// 'bras bu ye shes sgyu mar gsal// bden dang brdzun pa'i mtha' chod nas/ / rig pa spros bral mi gnas pa// gang yang mi gnas pa yi don// ma skyes stong pa'i rang bzhin no// tha mal sgo gsum bsgyur ba'i phyir// rigs gsum dkyil 'khor sku gsung thugs// tha mal 'joms byed rdo rje ste/ / bdag dang gzhan phan de bzhin gshegs// dpal ldan skyon bral pad+ma'i mchog/ ma lus rigs gsum goms pa yis// rang 'dod 'bras bu mthar phyin thob// gang du gnyis ka'i mthar 'dzin pa/ / de kho na nyid gzhi dag gis// snang srid goms pa'i dbang thob ste// sku dang gsung thugs bzlas brjod kyis// gtsang ma'i rigs 'dzin gral thob nas// rdo rje 'dzin pa'i ltung ba dang// rtsol ba'i chu bos g.yengs pa yi/ / re dogs 'dzin pa dag mi 'gyur// zhes gsungs so// nam mkha'i mtha' dang mnyam pa'i rgyud chen po las/ bcos ma'i dbang bshad pa'i le'u ste sum cu bdun pa'o//// de nas yang sems dpa' rdo rje dam pa la/ / rang snang rig pa'i 'khor tshogs kyis 'di skad ces gsol to// dus gsum rgyal ba thams cad kyi// rang byung phun sum tshogs pa'i bdag/ rang gsal rol pa kun la gsal/ / bstan pa ma lus 'byung ba'i gzhi// mgon po khyod la gsol ba ni// phun sum tshogs pa gang las byung// ngo bo dgos pa ci las gyur// de nyid rtogs pa ji lta bu// skyes bu chen pos bshad du gsol/ / de nas sems dpa' rdo rjes 'di skad ces bka' stsal to// rang byung ye shes byang chub sems// ji snyed phun sum tshogs pa dang// sku dang gsung thugs zhing khams dang// che ba'i mdzad pa ma lus pa/ / kun rdzogs yid bzhin nor bu ste// 'phel 'grib med pa'i rin chen dbyig/ bstan pa'i theg pa ma lus pa// ma lus 'char gzhi snying po nyid// rang byung snying po stong pa'i lung// rtsa ba bral ba'i yan lag ltar/ / ma lus kun gyi ngo bo yin// lung dang rig pa'i tshad ma yis// kun gyi snying po 'di rtogs na// phun sum tshogs pa ma lus pa// rig pa gcig tu gtan la phebs// gzhi rtsa med pa'i snying po nyid// ma bcos rol pa bde ba nyid/ / rang nyid thugs rje ngo bo nyid// sku gsum phun sum tshogs pa ste// ngo bo rang byung ye shes nyid// 'dod pa'i don snang dngos po med// gnas dang ston pa 'khor dang dus/ / sdud dang bstan pa rang bzhin nyid// sku gsum so sor dbye ba ste// de dag che chung khyad par gyis// rang rang so sor phye ba yis// theg pa'i rim par snang ba ni// der yang phun sum tshogs pa ste// nam mkha'i dbyings kyi mtha' klas par/ / phun sum tshogs pa gang ba ste// rang byung snying po thog mtha' med// sangs rgyas kun gyi rang bzhin nyid// thog ma tha ma'i dus med par// gdul bya spro ba bskyed pa'i phyir/ / phun sum tshogs pa nyid du gnas// gdul bya las kyi khyad par gyis// rim pa dag tu gang snang yang// nam mkha'i rgyan ltar gnas pa yin// 'di dag dbang po'i khyad par ltar// rang byung byin gyis brlabs shugs dang/ / dbang po rab 'bring khyad par dang// gdul bya'i nus pa ma stobs thabs dang// rang byung rol pa'i rang snang ba// phye ba'i khyad par bstan phyir yin// phyogs bcu nam mkha'i mtha' klas pa'i/ / gdul bya'i bsam pa bskang ba dang// rang byung che ba bstan pa'i phyir// rgyal ba'i zhing khams thams cad du// ma 'dres mdzes pa'i me tog ltar// rang byung che ba'i yon tan snang// rang byung rig pa'i rgyal po nyid/ / gang la gang snang de dag nyid// gdul bya'i thabs ni mtha' yas par// 'gro ba dman pa'i ched du bstan// de dag ma lus snying po nyid// nam mkha'i mtha' dang mnyam pa yi// rol pa snying por bstan pa'i mchog/ sangs rgyas kun gyi sku gsung thugs// bstan pa 'di nyid zhugs pa yi// 'di dag rdo rje 'dzin pa yis// phyogs bcu nam mkha'i 'jig rten khams// rdul snyed grangs la 'das pa nyid// sangs rgyas nyid du mngon snang nas/ / skal ldan snying la 'jug par mdzad// de tshe 'khor ni ji snyed pa// kun kyang rang gi yid la 'jug/ 'das dang da ltar ma byon pa'i// snying po bsam mi khyab pa'i dus// mngon du bstan pa tshad mas rtogs/ / re dogs spyod pa chad pa'i dus// thog ma tha ma med pa'i gnas// dngos dang dngos med kun spangs pa'i// rang byung snying po gsang ba'i don// rig pa phyogs bral rtogs pa'i gnas// don gyi dbus chen mtha' dbus med/ / ma bcos gnas su rtogs pas phyir// skal ldan rnal 'byor rtogs pa yis// theg pa'i khyad par ji snyed pa// shes rab chen po skad cig la// chos rnams ro gcig bsdus pa'i bdag/ dbang po nus stobs ldan pa la// ji snyed dran rtogs rgyu ba kun// zag med snying po'i bstan pa ste// nam mkha'i mtha' dang mnyam pa'i rgyud// rang byung rtogs pa'i snying po nyid// sangs rgyas kun gyi gsang ba'i lung/ / 'phrul tshig rdo rje lu gu brgyud// gsang ba'i rig pa'i kha sbyor te// phyi lta nang lta sems su sbyor// rtsa ba'i phun sum tshogs par bshad// ces gsungs so// nam mkha'i mtha' dang mnyam pa'i rgyud chen po las/ phun sum tshogs pa rtsa ba gcig tu bshad pa'i le'u ste sum cu brgyad pa'o//// de nas yang sems dpa' rdo rje dam pa la/ rang snang rol ba'i 'khor tshogs kyis 'di skad ces gsol to/ / sku gsung thugs kyi bdag nyid khyod// rang byung snying po'i don la 'dus// rang snang 'od kyi snang ba'i mchog/ mgon po khyod la gsol ba ni// rang gsal sku gsung thugs gang zhig/ de nyid gang gis gsal bar bgyi/ / khyad par rim par ji ltar 'gyur// zhes gsol to// de nas sems dpa' rdo rjes 'di skad ces bka' stsal to// ma lus rang snang 'khor lo bas// rang snang snying po 'pho 'gyur med/ / gnas pa'i sgro skur ma lus pa// rig pa gcig gi don du gnas// ma lus kun rdzogs snying po 'di// gnas dang rtogs dang mthar phyin pa'i// sku gsung thugs kyi rtsa ba yin// ji snyed snang grangs thams cad kyi/ / dbyibs dang kha dog che chung dang// ma lus ji ltar gnas pa dang// 'jig rten 'das dang ma 'das pa// phyogs dang ris la sogs pa ni// byang chub snying po'i sku ru shar// byang chub sems kyi sku nyid ni/ / rig pa phyogs ris med pa'i sku// thams cad 'dus pa'i 'khor lo ste// rig pa'i dkyil 'khor mtha' dbus med// rang bzhin sku yi mtshan nyid do// byang chub sems kyi gsung nyid ni// snying po 'od kyi rang bzhin ltar/ / ma lus gsung gi rang bzhin du// phyi nang ma lus thams cad shar// zin dang ma zin la sogs pa'i// brjod cing grags pa'i chos rnams ni// rang shar gsung gi mtshan nyid do// ji snyed myong tshor shes pa dang/ / dran rtogs rgyu ba ma lus pa// ma skyes rdo rje a yi ngang// ma lus rig pa 'khor lo'i thugs// gnyis bral rig pa bsam yas la// rang bzhin bsam pa cir mi rtog/ rang byung zhen pa yul las 'das/ / rang du ston pa mtha' yas pas// mthar thug med pa'i gdul bya la// theg pa ji snyed bstan pa yis// rang byung 'khor lo ma rtogs pas// sku gsung thugs kyi snying po nyid// sgro skur med par mthong ba med/ / skal ldan 'jig rten chos bral zhing// dman pa'i blo yang 'dzin sems log/ 'gro ba'i rig pa gang dag la// sngon du cho ga ji bzhin du// sangs rgyas ma lus kun 'dus pa'i// rdo rje 'dzin pa chen po yis/ / ma lus rig pa'i sku gsung thugs// de yi byin rlabs thabs kyis bstan// 'di dag ji ltar rtogs pa ltar// bstan pa'i yan lag kun dang 'brel// phyi rol ltas pas rtogs pa'i tshe// rig pa rang snang 'khor lor grol/ / gcong rong ye shes chen por brdal// sgo gsum sku gsung thugs su sbar// re dang dogs pa kun chad de// ma lus nam mkha'i dkyil 'khor ltar// phyogs 'dzin rgyu ba'i yid las 'das/ / ma lus sku gsung rdo rje nyid// gar yang ma phyin rtogs pas smin// 'bras bu rang 'bar bde chen 'grub// skal ldan rdo rje lus 'di la// snying po rang byung 'od kyi mchog/ phyogs las 'das pa'i rin po che/ / tshig gcig don kun rdzogs pa'i bdag/ rdo rje tshig gi sgron ma yis// dgu rum sbas pas don gsal nas// ma bgrod sa rnams dus gcig mnan// mtha' dbus med pa'i nam mkha' la// phyogs 'dzin bral ba'i blo yis lta/ / blang dor bral ba'i sgo gsum nyid// 'dzin pa log pa'i tshul gyis 'jug/ snang srid ma bcos bde ba'i sa// rtogs pa nyid kyi pha rol phyin// dka' bas spyad pa'i mngon gyur pa'i/ / sku gsung thugs kyi rdul snyed dang// dka' thub sdom par rab bsdams shing// bsnyen bsgrub rtsol ba las byung ba'i// sku gsung thugs kyi rdul snyed kun// nam mkha'i dbyings kyi mtha' don rtogs nas/ / skad cig tsam gyis grol bar 'gyur// rna brgyan gsang ba'i 'phral tshig 'di// gsang ba'i rigs can 'ga' zhig la// phyin ci log dang dman pa la// mngon du snang bar mi 'gyur ro// de dag gsang ba'i theg pa 'di/ / rna brgyud gdams pa nub pa dang// lta spyod log pa'i gdeng ldan dang// mtshan ma sgra la zhen pa dang// skal bar ldan dang mi ldan pa'i// 'dus pa mang po bstan pa dang// bla ma rang rtog zhen pa yis/ / nga nyams zhen pas bshad pa dang// rnam par dkar ba'i lam bor nas// nyon mongs zhen pa'i las byed dang// thun mong theg pa la smad pas// nyon mongs zhen pas rtsod pa'i mthus// bstan pa'i snying po nub par 'gyur/ / de nas 'dzam gling dbus su dar// skal ldan 'brel ba 'ang 'byung bar 'gyur// de nas lho phyogs rgyud du rgyas// nub kyi phyogs su'ang rgyas par 'gyur// byang gi phyogs dang shar phyogs su/ / ma bcos rdzogs pa'i theg pa 'dis// snang ba'i sgron ma byed par 'gyur// der yang skal ldan dam pa rnams// rnam grol sa la 'gro bar 'gyur// rna brgyud gter la ma chad pa dang// lta spyod log pa'i nga rgyal can/ / mtshan ma tshig la zhen pa rnams// rdo rje'i khab tu ltung bar 'gyur// rang byung byang chub snying po 'di// ma lus snying la gnas pa ste// dus gsum 'gyur ba med pa'i sems// ma bcos sems la 'gyur ba med/ / de bzhin lung bstan ldan pa yis// skal ldan rgyal sras slob ma la// thabs kyis ma bcos don bstan nas// 'khor ba rang grol don rtogs na// dus la 'gyur ba yod ma yin// snga phyi med pa'i da lta nyid/ / ma bcos rtogs pas pha rol phyin// tha ma'i dus na 'byung bar 'gyur// zhes gsungs so// nam mkha'i mtha' dang mnyam pa'i rgyud chen po las// lung bshad pa'i le'u ste zhe brgyad pa'o/ /// de nas yang sems dpa' rdo rje dam pa de la/ 'dus pa chen po'i tshogs kyis 'di skad ces gsol to// dus gsum rgyal ba thams cad kyi// bstan pa kun gyi rang bzhin khyod// ma lus kun gyi 'byung gnas gter/ / mgon po khyod la gsol ba ni// rang byung thugs su gcig ce na// klong dgur dbye ba ji ltar lags// klong zhes ci phyir bya ba lags// gang gi skabs su ji ltar 'char// de dag dgos pa ji lta bu/ / mgon po khyod kyis bdag la gsungs// zhes gsungs to// de nas sems dpa' rdo rjes// 'dus pa'i tshogs la 'di skad ces bka' stsal to// ji snyed chos rnams thams cad kun// ci ste tha dad yongs kyis med/ / rang byung rdzogs pa'i theg pa la// ma 'dus pa yi chos mi gnas// rangabazhin snang ba'i chos rnams dang// phyi nang dran rig thams cad dang// bstan pa'i bye brag ma lus pa// ji snyed khyad par bstan pa kun/ / rgya mtsho dang ni rlabs bzhin te// rig pa rang snang ma yin pa// gzhan pa nyid ni yod ma yin// rang byung theg pa'i snying po 'di// bstan pa kun gyi bdag nyid pas// rang byung bstan pa kun gyi bdag/ theg pa kun gyi rtsa ba yin// ma bcos snying po rdzogs pa la// tha dad rnam pa mi snang bas// rnam par dbye ba'i chos med kyang// rol pa'i snying po dgu ru shar// lta ba phyogs ris med pa'i klaung// spyod pa blang dor med par spyod/ / mtha' dbus med pa'i snying po len// rang byung thabs kyis rtogs pa'i dbang// rang byung don la 'das pa med// bya btsal kun bral 'phrin las rdzogs// ma lus dran bsam ting 'dzin klaung/ / ye shes ma bsgribs phyogs ris med// 'bras bu lhun rdzogs bya btsal med// rol ba'i bye brag dgur shar yang// byang chub sems la dbye ba med// ji ltar snar ba'i chos rnams kun// rang byung rdzogs pa'i ngo bo ste/ / phyi nang spyod yul dran rtog dang// bde sdug mtho dman ma lus kun// rgyu rkyen ngo bo tha dad med// chu yis 'khor lo bskor ba ltar// chu rlabs ri mo cir yang snang// ngo bo gcig tu gnas pa ltar/ / ji ltar snang grangs dran rtog kun// rang byung stong pa'i klong du brdal// ma lus byang chub lung du bsdus// rang bzhin gnas dang rtogs pa dang// mthar phyin spyod yul thams cad la// phyogs ris med dang sel med pas/ / de phyir 'di la klong zhes brjod// gzhan du lta bas mi gnas te// tha dad pa dang dgag sgrub dang// gnyis 'dzin rgyu 'bras la sogs pa// phyogs ris sel dang ldan phyir ro/ / gang phyir theg pa'i snying po nyid// thabs chen gsang ba'i rig pa yis// dgu rum sbas pa'i don gsal na// phyogs ris med pa'i klaung du brdal// rang byung theg pa'i snying po nyid// dngos dbang gcig las mi gnas kyang/ / gang zag blo yi bye brag gis// gzhi lam 'bras bur rnam par snang// rang bzhin gnas po'i klong dgu dang// ma bcos rtogs pa'i glong dgu dang// thugs rje rol pa'i klong dgu nyid/ / skabs kyis khyad par so sor snang// ma bcos rol ba rang snang dang// zhen rtag rtogs pa rang snang gnyis// bye brag ma phyed gti mug blo// dngos nyid gtan la ma phebs par// nga rgyal dregs pa'i gdeng tshig gis/ / 'dod lnga bab chol spyad pa log/ de yi dus kyi gang zag rnams// sbrel ma g.yang du 'gril ba bzhin// bla ma ngan pa'i rjes 'brangs nas// rdo rje'i khab tu ltung gyur nas// byang chub sesam kyi rigs dang bral/ / ma bcos rdzogs pa'i ngo bo nyid// brda tshig zhen brjod kun bral yang// mtshan ma brda tshig zhen pa rnams// brjod pas don la dgod pa dang// theg pa kun gyi don rnams ni// 'di la rdzogs par bstan pa dang/ / ma 'dres khyab par bstan pa'i phyir// klong dgu'i khyad par bstan pa yin// de dag gang ltar snang gyur kyang// rang byung snying po de shar phyir// rgya mtsho chu bo 'du 'phro ltar// ma lus sems su 'dus pa yin/ / don gcig ma lus kun rdzogs pas// klong dgu thugs kyi yang snying 'di// rdo rje 'phrul gyi tshig gis bstan// ma bcos rig pa nyams kyis go/ bstan pa'i bye brag ji snyed pa// snying po don du kun 'dus pas/ / dngos don rtogs pa'i skad cig la// bstan pa ma lus dus gcig rtogs// snying po ro dang rnam pa ltar// gang ltar snang yang gcig tu myong// tha dad med de ngo bo gcig/ rang bzhin nam mkha'i mtha' ltar khyab/ / thugs rje bstan pa skar ltar bkram// ting 'dzin rgya mtsho rlung ltar zab// spyod pa phyogs bral kun tu spyod// gang yang klaung dgur ma 'dus med// ces gsungs so// nam mkha'i mtha' dang mnyam pa'i rgyud chen po las/ / klong dgu'i dbye ba bshad pa'i le'u ste zhe dgu pa'o//// de nas yang sems dpa' rdo rje dam pa la// 'dus pa chen po'i tshogs kyis 'di skad ces gsol to/ / sangs rgyas kun gyi rang bzhin khyod// ma lus sku gsung thugs la rdzogs// mi phyed rdo rje'i ngo bor gcig/ mgon po khyod la gsol ba ni// klong dgu'i bstan pa ji snyed pa// gnas pa'i ngo bo ji ltar gcig/ rtogs pa'i thabs ni ji ltar gcig/ rig pa'i nyams ni ji lta bu// 'bras bu khyad par ji ltar gcig/ gcig tu bstan pa'i dgos pa gang// bdag cag rnams la bshad du gsol// zhes gsol to/ / de nas sems dpa' chen po gsang ba'i bdag pos 'di skas ces bka' stsal to// kye 'dus pa'i tshogs 'di lta ste// ma lus sems kyi rang bzhin las// rgyu 'bras lam dang 'bras bu dang/ / gzhi dang lam dang 'bras bu dang// sangs rgyas sems can la sogs pa// ma lus 'dus pa'i ngo bo nyid// phyi nang snod bcud ma lus pa// nam mkha'i ngang du 'dus pa ltar// snang stong rig pa'i chos rnams kun/ / rang byung rgyal por gdod nas gcig/ thog mtha' med pa'i rang bzhin ni// chos rnams kun gyi rang bzhin te// nam mkha'i mtha' dang mnyam sbyor bas// rdo rje snying po'i ngo bor gnas// nam mkha' rang bzhin dwangs pa la/ / ji snyed pa yi chos snang ba// rim pa ma 'dres gnas gyur kyang// de yi ngo bor gcig pa ltar// ma lus chos rnams mtha' yas pa// sems nyid ma skyes ngo bor gcig/ ma bcos gnas pa'i rang bzhin la/ / gang zhig rjes su spyad pa'i chos// sgra dang tshad ma gtan tshigs dang// bcos ma'i sbyor ba mtha' yas pa// brgyud pa'i sgo nas bstan pa kun// bskal pa gang+gA'i bye snyed du// bsgrubs shing btsal bas mi rnyed pa'i/ / rtog pa'i rnal 'byor la sogs pa'i// thabs la mi gnas bltos mi byed// gang gis bshad pa de dag kun// sangs rgyas mngon sum byin rlabs kyis// gzhan la ma bstan ma brgyud par/ / spyi blugs tshangs pa'i dbang gis bstan// ma lus thabs chen gcig tu bstan// skal ldan las kyis phrad pa la// dgongs pa byin rlabs tshul gyis bstan// rig pa'i nyams la chags pa na/ / sems dang nyams kyis gsal bar shes// mos ldan phrad par dka' ba la// rnam brgyud 'phrul tshig sgo nas bstan// skal med las kyis bsgribs pa la// thabs kyi khyad par gang bstan yang// thams cad la ni me long ltar/ / bltas kyang gzugs brnyan mi snang ngo// thabs kyi khyad par ci bstan pa// go zhing rtogs pa gcig las med// rgya mtsho chu bo ji bzhin no// dngos don thabs kyis gang rtogs nas/ / rig pa dang po'i gdeng ldan pa// phyi nang spyod yul ma lus la// rig dang dran pas gang gsal ba// rin chen gling la phyin pa'am// 'bru bcud nyams su myong ba'am// 'khrul pa gsal ba'i shes pa ltar/ / rig pa gcig tu nyams myong ba// re dogs rnam par bcad pa'i sems// phyogs bral ye shes chen por rgyas// ma bcos so mar nyag gcig pas// dus gsum 'byed pa'i chos med de// snga phyi med pa'i ngo bor gcig/ rtogs pa'i ye shes yengs pa med// chu bo'i rlabs sam kha dog gam// chu bo chu bur ji bzhin du// zhag dang zla ba nas bzung nas// bskal pa bye ba mtha' klas par// rgya mtsho rlan gyi ngo bo ltar/ / ma sgoms ngo bo nyid du gnas// lta spyod ting 'dzin ro gcig pas// nam mkha' lta bur dpag med cing// stong chen rnam pa kun ldan pa// byin rlabs nus mthu'i gzhir gyur pa// dus gsum sangs rgyas kun gyi dngos/ / chos sku 'bras bu kun gyi gnas// rang byung snying po ma yin pa'i// dngos po gang yang med pas na// de nyid mngon du bstan pa dang// rgyu 'bras gnyis 'dzin la zhen pa'i/ / dngos 'dzin de nyid dgrol ba dang// skal ldan rigs can gang zag rnams// ma bcos sa la gzhag pa'i phyir// klong dgu'i rtsa ba gcig tu bstan// de nyid nam mkha'i rang bzhin ltar// dngos dang dngos med rnam par spangs/ / thig le chen po kun rdzogs pas// 'dus 'phro thig le klong du gsol// zhes gsungs so// nam mkha'i mtha' dang mnyam pa'i rgyud chen po las// klong dgu'i rtsa ba gcig tu bshad pa'i le'u ste lnga bcu pa'o/ /// de nas sems dpa' rdo rje dam pa la// 'dus pa chen po'i 'khor rang snang sprul pa'i tshogs kyis 'di skad ces gsol to// dus gsum rgyal ba'i rang bzhin khyod// sangs rgyas kun gyi bstan pa'i gter/ / rin chen klong dgu sems kyi bdag/ mgon po khyod la gsol ba ni// ma bcos rdo rje snying po'i rgyud// brjod pa tshig gi lde mig gis// ma bcos snying por ji ltar rtogs/ / bshad pa'i tshul ni bdag la gsungs// zhes gsol to// de nas sems dpa' rdo rje dam pa des 'di skad ces bka' stsal to// dus gsum rgyal ba thams cad kyi// sku gsung thugs ni gsang ba'i gter/ / nam mkha' mtha' dang mnyam pa'i rgyud// rdo rje snying po gsang ba'i lung// rang byung snying po dbyer med na// ma lus ston pa shes bya'i phyir// ma bcos gzhi dang dam pa'i lam// lhun gyis grub pa'i lam du bstan/ / ma bcos rdo rje snying po'i rgyud// nam mkha'i mtha' dang mnyam sbyor ba'i// sangs rgyas sems can dbyer med pa// lhan cig gnas pa'i nus pa dang// gdod nas lhun gyis rdzogs par gnas// rin chen lam gyi goms bya ba/ / srog chags phyogs med bgrod pa ltar// log pa'i lta spyod cir snang yang// nyam nga log pa'i 'du shes med// brjod pa tshig lam la brten nas// don dam rtogs pa 'byung bar 'gyur/ / dang por brda don sprad pa dang// gnyis pa don la phrad pa yin// gsum pa don dang bral ba yin// bzhi pa ma bcos lung du 'jug/ dang po gtan la 'bebs pa'i dus// gnyis pa gtan la phebs pa'i dus/ / gsum pa nges pa rnyed pa'i dus// bzhi pa gdeng du gyur pa'o// pra khrid sgra yi man ngag dang// nges pa gdeng gi man ngag dang// rig pa thal phyung man ngag dang// ye shes klong gi rim par bstan// ye shes rgya mtsho bsam bral ba/ / yengs dang ma yengs 'du shes med// re dogs spangs pa'i bsam pa nyid// nam mkha'i mtha' dang mnyam par 'jug/ dang por mos pa tshogs spyod de// gnyis pa nam mkha' rdo rje nyid/ / gsum pa 'gro 'dul thabs su 'dod// sdug bsngal rtsol sgrub bcas pa yi// bsam gyis mi khyab dus su bstan// bde ba chen pos nyams su blang// dang por mos pas 'jug pa ste/ / gnyis pa rtog pa'i tshul gyis 'jug/ gsum pa gdeng du gyur pa'o// dang por rig can gang zag de// gnyis pa rtogs pa'i gang zag yin// gsum pa mthar phyin gang zag go/ dang po rang rgyud 'du shes can/ / gnyis pa dran snang glo bur ba// gsum pa ma bcos nyid du gsal// dang por mi mkhas shes pa ste// gnyis pa mkhas pa'i 'du shes yin// gsum pa ma bcos nyid du bstan// dang por dge ba dang du blang/ / gnyis pa gnyis ka mi len te// gsum pa dge sdig gnyis ka spyod// dang por rtse gcig dgongs pa ste// gnyis pa rtogs pa 'i dgongs pa yin// gsum pa phyogs ris med pa bstan// ma lus dran rtogs ting 'dzin mchog/ snang ba ma lus rig pa'i nyams// ma bgrod rig pa klong gi sa// dus gcig sangs rgyas sa la bkod// ma btsal lhun gyis grub pa nyid// rgyu rkyen brtsol ba las 'das pa// rang byung 'od dang rin chen ltar/ / gzan las byung dang bsgrubs pa dang// btsal dang bgrod pa'i 'bras bu min// rgya mtsho chu dang rba rlabs ltar// sna tshogs snang yang gzhan byung min// rang byung lhun rdzogs 'bras bu la/ / bdag gzhan don kun rdzogs par gnas// ngo bo gcig las ma g.yos kyang// rol pa gzhan don 'bum phrag yas// gang ltar mthun pa'i bsam pa ltar// mdzad pa'i byin rlabs 'od ltar 'phro// ma bcos rdzogs chen bstan pa 'di/ / rna brgyud tshad ma'i don bral zhing// ma bcos don gyi gdeng med na// lung dang sgra dang yid spyod kyis// rgya mtsho 'jings kyi pha bong ltar// rang snang rtogs pa'i nyams med par/ / gzhan don mdzad pa'i skyes bu des// pha rol ji ltar thar bar 'gyur// gnyis ka sbrel ma g.yang 'gril ltar// 'khor ba'i mtha' mar lhung gyur nas// re dogs gnas las thar pa med// ces gsungs so/ / nam mkha'i mtha' dang mnyam pa'i rgyud chen po las// don rnam grangs kyis gtan la pab pa'i le'u ste nga gcig pa'o//// de nas sems dpa' rdo rje dam pa la/ 'dus pa chen po rig pa rang snang gi 'khor tshogs kyis 'di skad ces gsol to/ / dus gsum rgyal ba thams cad kyi// sku gsung thugs kyi dgongs pa che// nam mkha'i mtha' dang mnyam pa'i rgyud// rtsa ba'i snying po las gsungs pa// man ngag dgu rum sbas pa'i gter/ / thabs chen gang gis gsal bar bgyi// legs par bdag la bshad du gsol// zhes gsol to// de nas yang de bzhin gshegs pa thams cad kyi gsang ba'i bdag po lag na rdo rjes 'di skad ces gsungs so/ / sangs rgyas kun gyi gsang ba'i gter// rig pa'i 'khor lo yu ba can// rtogs pa ye shes 'khor lo'i mdzod// don gyi snying po gsung gi bcud// kun brjod ye shes 'khor lo can/ / rang bzhin brtags dang ltos pa yi// ma rig mun pas bsgribs pa rnams// gsang ba'i rgyud 'di la brten nas// da lta nyid du dngas par byed// bskal pa stong phrag grangs med par// thabs kyi rtsol ba'i rnam grangs kyis/ / ji ltar btsal yang mi rnyed de// rang byung snying po rtogs par dka'// e maho rab tu rtogs par dka'// e maho rang bzhin rnyog pa med// e maho ma bcos bde chen po// e maho thig le rang byung sems/ / rdo rje snying po rmad byung ba// nam mkha'i mtha' dang mnyam pa'i rgyud// man ngag mngon du phyung ba ni// gang du rtsa ba snying po'i phyir// dang po dag ni bstan pa yin// de nyid rgyas par ston pa'i phyir/ / bcu pa gsal bar bkod pa yin// de dag tshogs pa'i dgos pa yang// byin rlabs ting 'dzin rig pa yis// rig pa rang 'char bstan mdzad pas// gnyis pa nyid ni bshad pa yin// brgyud pa'i gsang nyid bstan pa'i phyir/ / bzhi pa de ltar bkod pa yin// de dag skal ldan la bstan phyir// nyi shu drug pa bkod pa yin// 'di dag gzhi nyid bstan pa yin// skal ldan rigs can rnal 'byor pa/ / gsang ba'i don la gang gnas pa// legs nyes 'bras bu lung bstan phyir// nyi shu pa nyid bstan pa yin/ de nyid dkyil 'khor 'jug pa'i phyir// bcu gsum pa nyid bstan pa yin// dam tshig chen po dpog pa'i phyir/ / bco lnga pa nyid bstan pa yin// de dag nyid la dbang bskur zhing// bcu bzhi pa nyid bstan pa yin// skal ldan dbang thob gang zag gis// rna brgyud gdams pa thob dgos pas// bdun pa legs par bkod pa ste/ / lam gyi ngo bo bstan pa yin// bdag don rtogs pa mthar byin kyang// rdzogs pa tshig gi yan lag gis// bshad bya mdzod dgu'i bstan pa dag/ gang zag de la bstan pa'i phyir// lnga pa dag ni bshad pa yin/ / sems nyid mdzod dgu gter gyi bdag klong dgur phye ste bstan pa'i phyir// nyi shu gcig pa bkod pa yin// klong dgu'i bam po nyi khri yi// brjod pa'i lde mig bstan pa'i phyir/ / gsum pa nyid ni bkod pa yin// de dag nges pa'i gsal rtogs pas// drug pa nyid ni bkod pa yin// gdams ngag med pa'i gang zag la// gang gis gang la bsgribs pa'i phyir// dgu pa legs par bkod pa yin/ / de nyid ma bcos bstan rtogs pas// brgyad pa legs par bstan pa yin// de nyid dbang po'i khyad par gyis// ji ltar 'tsham par bstan pa'i phyir// nyi shu lnga pa bstan pa yin/ / de yis yid ches nges pa'i phyir// nyi shu gsum pa bstan pa yin// nges pa rnyed pas klong dgu pa'o// rig pa gcig tu rtogs pa'i phyir// nyi shu gnyis pa bstan pa yin// rig pa skye med nyams myong pas/ / bcu gcig pa nyid bstan pa yin// de nyid bar chad med bsgom pa// bcu drug pa nyid gsal bar bstan// gdeng du gyur pa'i rnal 'byor pas// sgo gsum spyod pa bstan pa'i phyir// bcu gnyis pa nyid bstan pa yin/ / lta spyod ting 'dzin 'brel goms pas// bya med 'phrin las lhun grub pas// bcu bdun pa nyid bstan pa yin// de ltar rtogs goms rnal 'byor la// sa dang lam la rim med pas// bco brgyad pa nyid bstan pa yin/ / 'di dag yan lag bshad pa yin// de ltar sa lam mthar phyin pas// ye shes lnga rdzogs lhun rdzogs pas// bcu dgu pa nyid bstan pa yin// de nyid lhun grub 'bras bu brjod/ / de ltar rdzogs pa chen po nyid// mtshan gyi don nyid shes bya'i phyir// nyi shu bzhi pa gsal bar bstan// de dag mi nub bstan bya'i phyir// nyi shu bdun pa bstan pa yin// rang byung rdzogs pa'i bdud rtsi 'di/ / rna brgyud 'phrul tshig mi ldan par// rang brtags log pa'i 'du shes kyis// yid spyod rdzogs su gang 'jug pa// bla ma slob mar bcas pa rnams// bdud rtsi dug tu gyur pa ltar// lta spyod log pa'i nga rgyal gyis/ / rdo rje'i khab tu ltung gyur nas// byang chub sems kyi rigs dang bral// zhes gsungs so// nam mkha'i mtha' dang mnyam pa'i rgyud chen po las// rdo rje snying po'i rgyud man ngag gis gtan la phab pa'i le'u ste nga gnyis pa'o/ /// de nas yang sems dpa' rdo rje dam pa la// 'dus pa chen po'i tshogs rnams kyis mgrin gcig tu 'di skad ces gsol to// dus gsum rgyal ba thams cad kyi// snying po rang byung rgyal po la/ / skye shi re dogs mi gnas kyang// thugs rje'i mnga' bdag khyod kyis ni// 'chi bdag ye shes la bzlas te// 'gro bar re dogs gcod par mdzod// ces zhus so// de nas de bzhin gshegs pa thams cad kyi gsang ba'i bdag po des 'di skad ces bka' stsal to/ / rang byung rig pa'i rgyal po nyid// ma lus kun gyi rang bzhin yang// de nyid kun bzang rig pa ste// thog ma mtha' ma dngos med pas/ / de nyid bde ba chen po la// dran rtog bde sdug cir snang yang// ma bcos bdud rtsi'i thig ler brtag/ rang byung bdud rtsi'i pho brang nas// gsang ba'i thig le 'du zhing 'phro// rtsa ba ma skyes a las byung/ / rtse mo phyogs med nam mkha'i klong// ngo bo thig le mi g.yo ba// brtags pas stong pa'i ngang du thim// gnas pa dang ni rgyu ba dang// thim par rang byung bde chen gsal// ma lus bdud rtsi thig le yis/ / 'chi ba'i re dogs gcad pa yin// bdud rtsi rgyu ba'i rig pa nyid// gang la brten pa'i ye shes te// phyi nang phyogs ris kha dog dbyibs// bar ma'i rig pa brtags pa las// nam mkha'i dkyil 'khor mngon du snang/ / dang po'i dkyil 'khor phyogs med la// gsang ba'i dbang pos bltas pa ltar// dang por mig dang phrad par bya// de nas mthong ba'i don la brtag/ rig pa gdeng gi don thob nas/ / ma lus kun kyang de bzhin te// phyogs med nam mkha'i rang bzhin la// skyes bus ral gri btab pa'am// dad pa'i rang bzhin 'bigs pa ltar// blun po rtog pas bcings 'gyur gyi// de nyid mthong ba'i rnal 'byor la/ / 'pho ba'i re dogs gcad pa yin// gang du de dag brtan gyur na// rig pa rgyu ba gnyis med pa// smig sgyu rlung dang 'dres pa ltar// de nyid rig pa'i stobs kyis bsgom// de ltar gsal brtan 'jigs bral na/ / snga phyi skye gnas 'jigs pa med// nam mkha' bsgribs med dngas pa la// gsal ba 'char nub med pa ltar// rang bzhin ma skyes phyogs med la// rig pa 'char nub med par brdal// nam zhig bslu bar 'dod pa na/ / rgyu ba rig pa'i thig le nyid// gnas pa a yi ngang la bstim// rlung sems nam mkha'i nyams myong gis// bsdus te nam mkha'i glong la thim// dang po rgyu ba'i thig le ste// gnyis pa rig pa'i thig le ste/ / gsum pa gnyis med thig le nyid// ma 'phos bar du nges par bya// gang du dman pa'i rnal 'byor la// 'chi bdag dbang po bzlog pa'i phyir// bsam gtan gsum gyi rnal 'byor gyi/ / 'chi ba'i re dogs rnam par gcad// thig le bsdu ba'i ngo bo ni// ji snyed bya ba'i spyod pa ni// bdag nyid spyi yi tshul du sdud// de nyid gnas pa 'byung bzhi rlung// 'di dag dus ni gsum yin la// mngon du nges shes mi skye la/ / bla mas byin gyis ma brlabs na// thug phrad lam la rmongs pa dang// 'chi med bdud rtsi don mi rtogs// dus gsum rig pas nges mthong la// rkyen dang ldan pa'i rnal 'byor pas// bar chad ma lus bsal byas te/ / snyan pa'i rol mor bcas pa yis// don dang ldan pa'i sgra gsum gyis// thun tshad nyams dang mnyam sbyar nas// dran dal gsum gyi sgra yis bstan// tha ma nyin zhag bdun gyis te/ / re dogs chad pa nyams myong gis// bar ma srid pa'i chos med par// skye ba len pa'i sdug bsngal bral// 'khor ba'i re dogs rnam par chad// sdug bsngal zad nas bde klong 'khyil// zhes gsungs so/ / nam mkha'i mtha' dang mnyam pa'i rgyud chen po las// srog ye shes kyi bdud rtsi nam mkhar thim pa'i le'u steng gsum pa'o//// de nas yang sems dpa' rdo rje dam pa la/ 'dus pa chen po'i tshogs kyis 'di skad ces gsol to/ / dus gsum rgyal ba thams cad kyi// rig pa gsung gi 'khor lo bdag/ brgyud pa gsum gyi gsang ba 'chang// mgon po khyod la gsol ba ni// ma lus sems su rang gnas kyang/ / rang rkyen log pa'i stobs kyis dkrugs// ma bcos rdzogs pa'i don ma mthong// ma lus sems nyid skye med du// khyed kyis byin gyis brlab par mdzod// ces gsol to// de nas gsang ba'i bdag po phyag na rdo rjes 'di skad ces bka' bstsal to/ / rang byung ye shes kun gyi bdag/ sangs rgyas kun gyi snying po ste// ma lus 'gro ba thams cad la// gnas pa gsum gyis gnas gyur kyang// rgyal po'i phru dgu 'khyams pa ltar/ / rang gi mtshan nyid ma rtogs so// ma lus sems kyi rang bzhin te// rgyu ba bral ba mngon sum nyid// zag pa med pa'i dwangs ma ste// ma lus snying por gcig pa yin// gang du log stobs drag po yis/ / med las dngos por rags par snang// gang du mthong ba'i stobs log pas// rang byung snying po'i 'od la bsgribs// thabs dang bral ba'i rnal 'byor pas// ji ltar bltas kyang don mi mthong/ / 'phrul tshig brda yis gtan la dbab// gsang ba'i don gyi rtogs pas blta// ma bcos yan par bzhag pas bsgom// re dogs med pa'i tshul gyis spyad// stong nyid nam mkha'i rdo rje la// rig pas ma bcos bltas pa'i tshe/ / ma lus nam mkha' chen po nyid// de nyid dngos por snang ba mthong// ma bcos snang ba'i rang bzhin la// rtse gcig dran pas bltas pa'i tshe// gang bltas stong nyid rang bzhin te// de dag ji bzhin yin par mthong/ / snang srid ji snyed ma lus pa// sems nyid thig le'i rang bzhin la// rtogs par 'dod pa'irnal 'byor pas// dngos po rang snang ma rtogs par// sgra dang tshad ma gtan tshigs dang/ / bcos ma'i thabs ni sna tshogs pas// btsal bas dngos po'i don mi rnyed// dngos 'dzin phyogs kyi 'du shes kyi// phyogs bral nam mkha'i rang bzhin la// mtha' dbus med par btsal bsgrubs kyang/ / snang srid nam mkha'i mtha' tshol 'dra// gang zhig ma bcos rtogs 'dod pas// ma lus ji snyed snang ba kun// rnal 'byor gcig gis rig pa ste// 'dres pa phye la ngo bor bstan// snang 'gyur pa yi gnas skabs kyis/ / snang ba sems su the tshoms med// tha mal snang ba bstan reg can// spyod pa dang ni re dogs dang// shes pa 'dul bas nyams myong yin// gang du rdo rje bla ma yis// rna brgyud tshig gsum man ngag gis/ / tshig dang bral ba mngon du bstan// srog gi thig le rgyu ba yis// rgyu ba med pa'i don du bstan// snang srid mtshan ma'i dngos po yis// mtshan med rig pa mngon du bstan// de ltar rig pa'i nyams myong yang/ / dus gsum nyid kyis shes pa yin// rna brgyud lung gi bdud rtsi yis// ma lus sems su mngon rtogs te// de nyid dngos po yod min pa// rgyu ba chad pa'i dus kyis gsal// rna bas mnyan pas rig pa thos/ / de dang de der bcas pa nyid// ma skyes stong pa'i klong du mthong// dus gsum gcig la kun rdzogs pas// snga phyi med pa'i ngo bo ste// rig pa mngon sum nyams kyis gsal// de nyid dus gsum ngo bor gnas/ / re dogs bcad pa'i rnal 'byor la// ma bsgoms sems la yengs pa med// 'phra med rtogs pa'i rnal 'byor la// dus gsum gcig tu brtag pa'am// 'phen pa dang pos mtshams sbyar te/ / chu bo lta bur ma yengs bsgom// mi brtan yal ba'i gang zag gis// mthong nas rig pa'i nyams myong la// ri gzar drag po'i 'bab chu ltar// rtse gcig gnas pa'i man ngag gis// ji snyed nyams myong ngo bor sdud/ / rigs ngan log pa'i slob dpon ni// rgyal ba'i bka' brgyud mi shes shing// rna brgyud bdud rtsi bral ba dang// spyi blugs dbang don ma thob par// nga rgyal dregs pa'i 'du shes kyis// rdzogs chen don la gang spyod pa/ / dmus long lam sna 'dren pa ltar// bskal pa nam mkha' zad pa'i bar// bdag nyid bder yang mi nus na// gzhan dag grol par ji ltar 'gyur// de bas log pa'i bla ma ni// phrad pas log pa'i lam ston cing/ / 'grogs pas 'khor ba'i mtshan ma 'phel// dbang dang man ngag byin pa'i mthus// sdug bsngal brkam chags drag po skye// dran pas yid skyo'i 'du shes 'byung// 'di lta bu yi slob dpon ni/ / rmi lam du yang mi bsam na// longs spyod dbul zhing bkur ba dang// mngon du phrad pa smos ci dgos// zhes gsungs so// nam mkha'i mtha' dang mnyam pa'i rgyud chen po las// rna brgyud tshig gsum gyi le'u ste nga bzhi pa'o/ /// de nas yang sems dpa' rdo rje dam pa la 'dus pa chen po'i tshogs kyis 'di skad ces gsol to// dus gsum rgyal ba thams cad kyi// rdo rje rig pa snying po'i ngang/ / bsgrub cing 'bad rtsol bral ba nyid// sangs rgyas kun gyi snying po che// ma lus kun 'dus rig pa'i gter// mgon po khyod la gsol ba ni// rdo rje'i don ni ji ltar lags// snying po zhes pa'i don ci zhig/ gtan la dbab tshul ji lta bu// phebs na gnas tshul don ci zhig/ ma 'ongs skal ldan don gyi phyir// bdag cag rnams la legs par gsungs// zhes gsol to// de nas gsang ba'i bdag po phyag na rdo rjes 'di skad ces bka' stsal to/ / dus gsum sangs rgyas thams cad kyi// dgongs pa'i rig pa skye ba med// gdod nas rang byung snying po ste// mi phyed rdo rje zhes su bshad// ma bcos rang byung ye shes ni/ / mtshon pa rdo rje gsum las byung// chos nyid ma bcos rdo rje ni// grub nas 'jig pa'i dus med do// skye med rigs ldan rdo rje ni// rdo rjes rgyas thebs bla yis// snang srid rig pa rdo rje ru// mtshon pa rdo rjes gtan la phab/ / rang byung rig pa'i rdo rje ni// rgyu rkyen bral bas skye ba med// gnyen po bral bas 'jig pa med// bsam bral rig pa cir mi dgongs// gnyis med ye shes rdo rje ni// stong nyid nam mkha'i don rtogs pas/ / snang srid bde chen rdo rje nyid// ma bcos ro gcig khyad par med// rdo rje rang byung snying po can// ma lus kun 'dus gnyis su med// bde chen klong gi 'od brdal bas// phyogs ris med par khyab par gnas/ / rang byung rdzogs pa'i snying po na// ma lus 'dus pa'i snying po ste// thig le phyogs med nam mkha'i klong// phyogs med bde ba chen por gnas// mi phyed pa dang 'joms pa dang// gnyen po med dang mi 'jig dang/ / rtag pa chen po nyid kyi phyir// rdo rje zhes ni brjod pa yin// ma lus chos rnams thams cad kun// 'du zhing 'byung ba'i snying po ste// dngos rnams kun gyi de nyid don// ma lus 'byung ba'i snying po yin/ / ma lus 'dus pa'i ngo bo ni// rig pa skye med snying po ste// re dogs gsal ba'i yul 'das pa// sangs rgyas sems can mnyam du gnas// ma bcos rig pa ye shes ni// sgro skur 'das pa'i snying po ste/ / ma lus kun 'dus snying po can// tha dad gzhan pa'i rnam pa med// ma lus rang byung snying po nyid// dman pa rnams kyi yul min pas// dus gsum sangs rgyas ma lus la// re dogs bcad pa'i bstan pa nyid/ / dgongs pas phyogs ris med par bstan// skad cig tsam gyis rdzogs sangs rgyas// re dogs bcad pas lhun gyis grub// rig pa longs spyod rdzogs pa des// sa bcu'i dbang phyug rnal 'byor la/ / dgongs pa chos nyid bde chen bshad// ting 'dzin rig pa'i gdeng gis go/ ma bgrod sangs rgyas sa la gnas// dus gcig sangs rgyas sa la bzhag/ ston pa sprul pa'i sku yis ni// mngon du bstan pa'i skal med la/ / brjod pa'i tshig gi lde mig gis// ma bcos don la brgyud de bstan// rang byung byang chub snying po'i lus// phyogs med nyi ma'i snying po ltar// gsal nas bar chad med pa'i la// mngon du sku gsum bstan pa ltar/ / ma 'ongs skal ldan rnal 'byor la// brgyud pa gsum gyis shes par bya// skal ldan dbang po'i khyad par gyis// dgongs pas byin gyis brlabs pa dang// ma rig mnyam nyid sems la snang/ / rna brgyud gsang ba'i 'phul tshig gis// rna lam ma bcos don la sbyar// ma nor dam pa'i rigs can la// ma bcos dgongs pa gtan la phab// gsang don thabs kyis nges rtogs nas/ / rig pa nyams kyi goms tshad kyis// ma lus dran rig nyams su 'bar// ma bcos btang bzung med pa'i sems// rin chen gling la bgrod pa'am// rgya mtsho'i snying por gnas pa ltar// sna tshogs zhen pa rang log nas/ / rig pa'i nyams ni gcig tu gsal// zhes gsungs so// nam mkha'i mtha' dang mnyam pa'i rgyud chen po las// rdo rje snying po gtan la phab pa'i le'u ste lnga bcu nga lnga pa'o//// de nas yang sems dpa' rdo rje dam pa la/ / 'dus pa'i tshogs kyis 'di skad ces gsol to// dus gsum rgyal ba thams cad kyis// ye shes rang bzhin khyod yin pas// sangs rgyas kun gyis mdzad par shar// rgyud kun 'dus pa'i rtsa ba zhes/ / rgyal ba rnams kyi gsungs pa'i don// mgon pos bdag cag rnams la gsungs// zhes gsol to// de nas sems dpa' rdo rje dam pas 'di skad ces bka' stsal to// e maho sangs rgyas thams cad kyis/ / rang byung thig le mtshon pa'i thabs// bka' rgyud ma lus thams cad kyi// dam pa'i snying po dri ma med// e maho ye shes mchog gi don// e maho shin tu rtogs par dka'// e maho rgyal ba kun gyi lam/ / e maho mchog tu mya ngan 'das// 'di ni sangs rgyas thams cad kyi// ye shes snying po dri ma med// rdo rje nam mkha'i dkyil lta bu// dam pa rnams kyis dgongs pa nyid// rdo rje sems dpa' nam mkha' che/ / dus gsum 'gyur med rang gi dbyings// rang byung phyogs ris yul med pas// mi skye mi 'gag cir mi dgongs// phyi nang spyod yul thams cad kun// rang thig le'i dar du bsdu// de nyid phyogs med rang snang bas/ / sangs rgyas sems can re dogs med// sna tshogs sku gsung thugs su bsdus// de nyid rig pa skye med de// rang byung snying po klong thob pas// phyogs 'dzin rnam rtog zil gyis mnan/ / ji snyed phung po lnga bdag nyid// de nyid gzung 'dzin bdag nyid de// dag dang ma dag gcig tu 'dres// bsgom du med pa'i thig ler gsal// mi dmigs yul med thig le nyid// sgro skur 'das pa'i don rtogs nas/ / yod med re dogs chad pa'i lam// phyogs med rang byung kun la 'jug/ ma rtogs 'khor ba'i rtsa ba ni// rang sems tsit+ta'i dkyil 'khor lnga// pad+ma skyon bral yon tan ltar// ma lus rmad byung sangs rgyas sa/ / 'khor 'das ma lus kun gyi rtsa// rang sems ma bcos snying po ste// brtags pas nam mkha' las 'das pa// mtshon cing brtag pa'i yul las 'das// rtsa ba med pa'i rig pa nyid// chos rnams kun gyi rtse mo ste/ / thabs kyis rtogs na byung rgyal nyid// ma lus re dogs bcad pa yin// ma lus bdag nyid yin rtogs nas// bdag nyid rtogs pas pha rol phyin// bde bas bde rtogs bde chen rtogs/ / dam tshig bde rtogs bde ba'i mchog/ srog ni nam mkha'i rdo rje ste// 'khor lo bskor ba ma lus gcod// phyi nang snod bcud thams cad kun// mnyam pa chen po'i ngang du bskor// ma lus chos rnams thams cad kyi/ / ngo bo sems su gcig pas na// gsang ba'i thabs chen gcig bstan pas// ma lus kun rtogs rgyal po'o// ma bcos rig pa'i thig le la// bde ba chen po'i thig le brtag/ bcos pa med pa'i thig le bde/ / ji snyed snga phyi chos rnams ni// yul dang shes pa gnyis 'dus te// de nyid ma bcos thig ler 'dus// de nyid rtogs pas ro gcig go/ ma lus bdag nyid kun rdzogs pas// dag dang ma dag tshig mtha' 'das/ / bdag nyid chu ltar gzhan med pas// ma bcos rnal du gnas pa nyid// ji snyed tha snyad ma lus pa'i// rig pa kun kyang tha snyad spyad// re dogs 'jigs pa kun bral ba// ma lus kun gyi rtogs bya nyid/ / ma bcos rig pa'i don nyid ni// rna brgyud 'phrul gyis rim par bstan// rdo rje gser gyi zhen ba krol nas// tha ma ma bcos ngo bor bstan// khams gsum yid bzhin nor bu ste// stong la yon tan kun 'byung ba/ / nam mkha'i nor bus dbang bskur nas// rgyal ba kun gyi dbang po yin// ma lus rdzogs pa'i thig le ste// snying po'i dam las ma 'das na// dmangs kyi chad pas mi 'jigs ltar/ / mtshan ma'i skyon gyis mi 'jigs so// ma lus kun byed byang chub sems// rgya mtsho nyi ltar 'jigs med pas// re dogs spangs pa'i spyod pa nyid// 'chi med bdud rtsi rgyal po ste// 'di ni rgyal ba thams cad kyi/ / rgyud do cog gi rtsa ba ste// rdo rje 'dus pa'i snying po yin// zhes gsungs so// nam mkha'i mtha' dang mnyam pa'i rgyud chen po las// rgyal ba kun gyi dgongs pa'i rtsa ba 'dus pa'i lung gi le'u ste nga drug pa'o/ /// de nas de bzhin gshegs pa gsang ba'i bdag po chen po de dgongs pa rnal du bzhag pa'i don 'di gsungs so// skal ldan rig pa'i rgyal sras kyis// ma lus bya ba kun byas nas// dam pa'i bla ma brten byas te/ / rna brgyud bdud rtsi 'thungs pa yis// 'khor ba'i re dogs kun bcad nas// phyi nang 'jug pa'i yul med pas// ma bcos byang chub sems kyi klong// snying po shar med nub pa med// thog ma tha ma med pa'i sems/ / ma lus thig le'i klong brdal bas// bcos pa med kyi ci bder zhog/ phyogs bcu'i rgyal ba thams cad kyi// snying po rang byung don rtogs nas// dgongs pa rnal du bzhag pa yis/ / // rgya gar skad du/ bo d+hi tsi d+ha ma hA san d+hi dz+nya na gu h+ya shi tan tra pra ka sa ko d+hi sa ma d+ha nA ma/ bod skad du/ byang chub kyi sems rdzogs pa chen po ye shes gsang ba bshad pa'i rgyud gsal ba mtha' dang mnyam pa zhes bya ba/ dpal rdo rje sems dpa' la phyag 'tshal lo// 'di skad bshad pa'i dus na/ ston pa bstan pa gnas 'khor dus// ngo mtshar chen po a la la// ston pa kun rig rgyal po yis// 'og min rig pa'i gzhal yas su/ / bstan pa a ti yo ga 'di// gnas lugs stong pa kun 'byung 'khor// 'dzin pa sdug bsngal 'khor ba'i 'khor// ye shes rnam dag grol ba'i 'khor// gnas lugs 'khor lugs grol lugs gsum/ / dus gsum rtogs pa'i dus gcig na// yid dang chos ni kun tu bzang// 'byung ba lnga ni lha mor shar// phung po lnga ni rdzogs sangs rgyas// rnam shes tshogs brgyad sems dpar grol// yul brgyad sems mar rtogs pas su/ / kun rdzob ye shes sgyu ma la// 'jig rten brtan g.yo la sogs pa// snang ba nyid na ngo bos stong// stong dang mi stong mtha' ma reg/ de kun chos sku chen po yin// rnal 'byor rnam pa bzhi dag dang/ / dus gsum sangs rgyas thams cad yang// nga yi rang bzhin rtogs pa la// nga 'byed pa mi mnga' ba'i thugs rje thabs cig tu bzhugs so// de'i tshe de'i dus na lha'i dbang po brgya byin gyis shin tu gdung ba'i thugs rje chen pos phyogs bcu'i sangs rgyas thams cad la 'di skad ces bskul to/ / e ma ho/ gsung gi mnga' bdag thams cad kyis// rtsol ba'i theg pa mthar ston nas/ / rtsol bral theg pa mi gsung ba// thugs rje chen po yal lam ci// skal ldan gdul bya mchis pa la// bya bral bdud rtsi lta bu yi// skye med ye shes gsang ba'i rgyud// nam mkha' lta bu bshad du gsol/ / zhes zhus pa dang// de nas phyogs bcu'i sangs rgyas thams cad dgongs pa 'dus nas mgrin gcig tu// rdo rje sems dpa' la 'di skad ces bka' stsal to// dus gsum sangs rgyas thams cad kyi/ / thugs rje'i rang bzhin khyod yin pas// sangs rgyas kun gyi mdzad par shar// mdzad pa'i 'phrin las khyod kyis mdzod// gsung gi mnga' bdag thams cad kyi// ye shes rang bzhin khyod yin pas// thams cad byang chub sems su gsal/ / ye shes gsang ba khyod kyis shod// bde gshegs ma lus thams cad kyi// sku yi ngo bo dang ldan pas// rmad byung rol ba'i sku ru shar// sku yi sprul pa khyod kyis khye// dus gsum mnga' bdag thams cad kyi/ / yon tan 'dus pa khyod yin pas// rmad byung rol ba'i byin brlabs shar// yon tan thams cad khyod las byung// skye med nam mkha' lta bu'i thugs// tshig gcig don kun rdzogs pa'i bdag/ rig chen 'phrul gyi snying po'i sgo// skal ldan rnams la bstan du gsol// zhes gsungs pa dang// skye med rdo rje sems dpa' de rang bzhin 'dus ma byas pa'i rdo rje lta bu'i ting nge 'dzin las bzhengs te/ e ma ngo mtshar rmad byung gtsug/ rin chen 'phrul gyi thabs ldan pas// gang 'dod 'thun pa'i sgo de nas// rtsol med dbyig dang phrad par bgyi// byang chub sems kyi dngos po la// brjod pa'i tha snyad kun bral yang/ / ma rtogs blo la tshig sgo nas// gsung gi sgron ma gsal bar bgyi// zhes gsungs so// de nas sangs rgyas rdo rje sems dpa' des/ rin chen thugs kyi dpal be'u nas/ phyag na rdo rje thugs kha nas phyung ste/ ye shes rang 'bar ba'i rdo rje 'khor ba gcod pa de lag tu gtad nas 'di skad ces gsungs so// gnyis med ye shes gsang ba'i don// byar med mi rtsol ye shes che// dbu ma chen po'i drang po'i lam/ / 'dus pa'i tshogs la bstan par bgyi// zhes gsungs so// de nas phyag na rdo rje sems dpa' la 'di skad ces zhus so// chos rnams kun gyi mthar thug pa// rdo rje sems dpa' nam mkha' che/ / nam mkha' rtog pa skye med cing// rtog pa de nyid nam mkha' 'dra// mi gang nam mkha' bsngo ba la// rang don chen po nam mkhas 'byung// thugs rje nam mkha' kun la khyab// nges don chos kyi rgyal po 'di/ / tshig gi spyod yul ma yin pas// bdag gis sgrol bar shin tu dka'// ma rtogs pa la tshigs sgo nas// mtshon nas rtogs par bya ba'i phyir// gdul bya skal ldan yod pa la// ci rigs par ni rnam par sgrol/ / zhes gsungs pa dang// de'i tshe lha de ba bzang skyong gi bu lha'i bu kun dga' snying po zhes bya ba/ khye'u snang ba bsam gyis mi khyab pa zhes kyang bya// lha bu sems lhag can zhes bya ba des/ gsang ba'i rdo rje la zhus pa/ e ma ho/ stobs po che la drag shul che// rig sngags gsang sngags dge ba po// gdul dka' ma lus 'dul mdzad pa// sems dpa' rdo rje phyag 'tshal bstod// ye shes zhes ni gang la bgyi/ / gsang ba zhes ni ji ltar gsang// rgyud ces bgyi bar bshad du gsol// zhes zhus pa dang// bcom ldan 'das kyis bka' stsal pa// gdod nas ma skye snying po a// rang byung ye shes rang gi sems/ / ye shes chen po gang 'dod pa// rang gi sems la btsal bar gyis// 'di ni kun la bdal khyab kyang// rang gsang thabs kyi mchod pas na// ye shes gsang ba sbas pa ni// gsang ba zhes ni de la bya/ / rgyud ces bya ba bzhi ru bshad// gzhi yi rgyud dang lam gyi rgyud// 'bras bu'i rgyud dang 'dus pa'i rgyud// 'di ru ma 'dus gang yang med// gzhi ni nyi ma'i snying po la// lam ni nam mkha' lta bur bde/ / 'bras bu yid bzhin nor bu la// 'dus pa rgya mtsho lta bu'o// zhes bka' stsal to// de nas gsang ba'i bdag po des// sum cu rtsa gsum lha gnas su// a mo li ka khri stengs der// gser gyi mchod rten bang rim bzhi/ / srog zhing rdo rje rtse dgu'i steng// nang bar 'od kyi zhags pa yis// sems dag can de spyan drangs te// 'khor lo 'bar ba'i steng du gzhag/ gser gyi 'khor lo rtsibs stong pa// rin chen 'bar ba'i gdugs phub ste/ / gsang sngags bdag por byin gyi brlabs// rgyal thabs sbyi blugs dbang bskur te// 'da' ba med pa'i gdams ngag phog/ rna brgyud rdo rje zam pa bstan// dus mtha'i skad cig de nyid la/ / klong dgu bam po nyi khri des// rin chen 'bar ba'i ched du gsungs// lha yi dbang po'i drin gyi su// lha gnas gsum du 'di ltar grags// kun bzang thugs kyi byin brlabs kyis// rgyal ba dgongs pa brgyud pa ni/ / byin gyis brlabs kyis bshad pa de// 'og min lha yi gnas su gsungs// zhal gyi pad+ma 'dzum pa las// rigs 'dzin rigs pas brgyud pa ni// rang gi ngo bo bshad pa de// dga' ldan lha yi gnas su gsungs/ / ljags kyi 'od zer phyogs bcur 'phros// gang zag snyan khung brgyud pa ni// sdeb sbyor tshig gi bshad pa de// sum cu rtsa gsum gnas su gsungs// de nas 'dzam gling ji ltar babs// yang sprul rgyal sras thugs kyi bu/ / u rgyan thor cog can gyi bu// rtse drug rin chen rgang de ru// rgyal po d+har ma a sho yi// bu mo bde gshegs byang chub mas// d+ha na ko sha li phug tu// brag phug gser gyi yu ba can/ / da he na'i 'du khang du// jo mo dang g.yog mor bcas nas phyin// tshe gcig sangs rgyas bsgrubs pa dang// pha med sras gcig sku bltams te// skyes ma thag tu chos shes te// sprul pa'i sku ru e ma ho/ / dpon g.yog thams cad dga' ba yis// dga' rab rdo rjer mtshan gsol lo// 'dzam gling 'jing dang rgyal 'theb bya// rgyal sras gsang ba'i snod ldan la// rna brgyud lung gis gter chen bkrol// brda don sprod pa'i gdams ngag btab/ / rgyal thabs spyi blugs dbang bskur te// snod ldan sangs rgyas sa la bkod// ces gsungs so// gsal ba mtha' dang mnyam pa las/ gleng gzhi'i le'u ste dang po'o/ /// de nas sems dag lha yi bus// bcom ldan 'das la 'di skad gsol// e ma gsang bdag rdo rje 'dzin// kun gzhi nyi ma'i snying po la// 'khrul pa'i dri ma yod dam med// nam mkha' lta bu'i lam de la/ / zag bcas bde ba 'char mi 'char// 'bras bu rin chen lta bu la// thugs rje 'byung ngam mi 'byung lags// 'dus pa rgya mtsho lta bu la// rnyog ma bdog gam mi bdog lags// zhes zhus pa dang/ bcom ldan 'das kyis bka' stsal pa// dus gsum gsal 'grib mi mnga' yang// chu bur dang ni zhig gi mig/ rkyen gnyis gsal 'grib gnyis su 'byung// bsam du med pa'i chos nyid du// bsam du med pa'i blo gzhag pas/ / sgyu ma'i bde ba 'byung bar 'dod// mkha' bsal nam mkha' lta bu'o// dper na rin chen man shel la/ kha dog phyogs ris med mod kyang// 'og gdan dkar dmar rkyen gyis su/ / thugs rje sprul par 'char ba'o// rgya mtsho chu bo 'phro 'du bzhin// rba rlabs med pa'i mnyam nyid mtsho// rnyog ma med pa'i bdud rtsi chu/ khams gsum 'khor ba'i dri ma khrus// zhes bka' stsal to// gsal ba mtha' dang mnyam pa las/ rgyud bzhi mdor bstan pa'i le'u ste gnyis pa'o//// de nas sems dag lha'i bus/ bcom ldan 'das la 'di skad ces zhus so// 'dus pa rtsa ba'i rgyud de ru// kun gzhi rtsad nas bcad pa dang/ / shes bya'i 'bras thag chod pa yis// rig pa rang sar grol ba de// ston pas bdag la bshad du gsol// sems dag can gyis zhus pa dang// bcom ldan 'das kyis bka' stsal pa// nam mkha' lta bu'i rgyud de ru/ / gdod nas ma skyes snying po a// gzhi la skye ba med par bshad// 'gro ba kun la rang bzhin gnas// de nyid kun la khyab par bshad// ma rig las dang rlung gis 'khor// de ma rtogs pas mkhor bar bshad/ / rtogs na rdzogs sangs rgyas su nges// de rtogs sangs rgyas yin par bshad// 'di des kun gzhi rtsa bcad de// 'di ni shes bya dras thag gcad/ khyung chen nam 'phangs gcod pa bzhin/ / lta bas phyi rgya rlabs kyis bcad// rig pa las su rung ba yis// ting nge 'dzin la 'byung 'jug med// thams cad de bzhin nyid shes pas// gnyis med rdzong nas yangs ba'i rgya// brdal khyab chen po'i sa non pas/ / kun tu bzang po bde chen sa// tha mar rig pa grol ba ni// lha yi bu khyod 'di lta ste// snang ba sems su grol ba ni// thams cad rang rig byang chub sems// sems de stong par grol ba ni/ / nam mkha' bzhin du spros dang bral// stong pa gnyis med grol pa ni// sna tshogs rang bzhin mi gnyis che// de la mtshon du med pa ni// thig ler rdzogs pas mtshon du med// rgyud kun gcig gis gcig bshad pa/ / gong 'og sdebs te 'di ltar bshad// skye med lta ba stong pa gsum// dus gsum gcig ste khyad par med// rang bzhin rnam par dag pa'i phyir// kun khyab sgom pa gnyis med gsum// dus gsum gcig ste khyad par med/ / mtshan nyid gnyis su med pa'i phyir// 'khrul spyod byang chub sems dang gsum// dus gsum gcig ste khyad par med// rol ba 'gag pa med pa'i phyir// blo rtog 'bras bu thig le gsum/ / dus gsum gcig ste khyad par med// blo rtog chos nyid grol ba'i phyir// de ltar gtan tshigs bzhi po la// gtan tshigs re la gtan tshigs gsum// ngang dang rang bzhin bdag nyid des// gtan tshigs gsum gyis gtan la dbab/ / ma byas ma bcos lhun gyi grub// ces bka' stsal to// gsal ba mtha' dang mnyam pa las// bdud rtsi u0f35tshig gsum gyi le'u ste gsum pa'o//// de nas sems dag lha yi bus/ / bcom ldan 'das la 'di skad gsol// mnyam nyid rgya mtsho lta bu ru// le tse bcu gsum rdo rje rtse// zab mo bcu gsum rmad du byung// lnga tshoms lnga la bsdus rgyas lnga// 'gro drug 'khor ba'i g.yang sa bcad/ / bzhi skor bzhi la gtan tshigs bzhi// bdud rtsi lta bu bzhi dang sbyar// zhes pa dang/ bdud rtsi dri med brgyad ldan mtsho// mkha' la nyi shar 'od zer lnga// dbus na nam mkha' gzhi yi mthongs// gting na rin chen bcu gsum gter/ / de tshigs bdag la bshad du gsol// zhes zhus pa dang// bcom ldan 'das kyis bka' stsal pa// dper na sum cu rtsa gsum ma// rdo rje gdan gyi sa ris bzhin// mnyam pa'i sa la gru bzhir bri/ / thig bzhi btab pas le tse dgu// blo bur bzhi yis 'byed pa yi// le tse bcu gsum gri bar bya// phyogs bzhir rdo rje rtse gsum pa// 'gyur ba med pa'i brda yin no// zab mo bcu gsum rmad byung ba/ / rde'u bcu gsum dgod par bya// dbus su rde'u mthing kha dang// phyogs bzhir dmar po dgod par bya// mtshams bzhir ljang khu dgod pa'o// blo 'bur bzhi la sngon po las// dbus la phyogs bzhis bskor ba ni/ / kun gzhi ris med lnga tshoms so// shar la phyogs bzhis bskor ba ni// lta ba rdzong gi lnga tshoms so// lho la phyogs bzhis bskor ba ni// sgom pa 'phrang gi lnga tshoms so// nub la phyogs bzhis bskor ba ni/ / spyod pa klang gi lnga tshoms so// byang la phyogs bzhis bskor ba ni// 'bras bu gdeng gi lnga tshoms so// bsdus pa khu byug tshig drug la// rgyas pa sgom pa'i don drug ste// rnam rgyal brtsal chen brtsal thabs drug/ yogs rgyas khung chen che ba drug/ shin tu rdzogs par rgyas par ni// nam mkha'i che yis thig le drug/ drug tshan lnga yis bshad pa yis// 'gro drug 'khor ba'i g.yang sa cad/ / dbus la phyogs bzhis bskor ba ni// kun gzhi rtsa nas gcad pa'i phyir// gzhi yi chos bzhir bshad par bya// dbus la mtshams bzhis bskor ba ni// shes bya'i dras thag gcad pa'i phyir// lam gyi chos bzhin bshad par bya/ / dbus la 'bur bzhis bskor ba ni// rig pa rang sar grol ba'i phyir// 'bras bu'i chos bzhir bshad par bya// rang bzhin rol pa mtshan nyid dang// blo grol de ltar gtan tshigs bzhis/ / go rims sbyar te bshad par bya// dper na rgya mtsho lta bu yi// 'dus pa le'u brgyad ldan pas// mkha' la nyi shar 'od zer lnga// bsdus rgyas lnga ru bshad par bya// dbus na nam mkha'i bzhi yi mthongs/ / bdud rtsi lta bu bzhi dang sbyor// gting na zab mo bcu gsum gter// rmad byung bde 'jam nam mkha' nyid// rje brtsan rtse mo kun 'dus la// srog dang myu gu rin po che// spyi bcings 'phra bkod sems kyi tig khams gsum sgron ma sems kyi gter/ / shin tu rgyas par bshad pa ni// rgyud kun rang rang nang du bshad// 'dir ni bsdus te bshad pa la// ye shes gsang ba bshad pa'i rgyud// de phyir don 'brel gsal byed pas/ / rgyud kyi phyi ma yin par bshad// ces gsungs so// gsal ba mtha' dang mnyam pa las/ bsdus te bshad pa'i le'u ste bzhi pa'o//// de nas sems lhag lha yi bus// gsang ba'i bdag po bcom ldan 'das/ / gsang sngags gtso la 'di skad zhus// de gang gsang ba bshad du gsol// zhes zhus pa dang/ bcom ldan 'das kyis bka' stsal pa// ston pa gsum dang rim pa brgyad// phyin ci log gsum 'gro drug la/ / ye shes gsang ba nyid du bstan// zhes gsungs pa dang// yang ni lha yi bu yis zhus// bstan pa gsum po gang la bgyi// rim pa brgyad la ji ltar gsang// phyin ci log gsum ci ru 'gyur/ / 'gro drug 'khor ba ji ltar lags// zhes zhus pa dang// smras pa/ mdo sde yan lag bcu gnyis dang// 'dul ba'i lung ni sde bzhi la// mngon pa gong 'og ston pa yis// ji tsam pa yi tshig brjod kyang/ / bya med rtsol bral ma bstan pas// ye shes gsang ba sbas te gab// chos sku gdod nas dag pa la// btags pa'i gzung 'dzin ngang gis med// des na chos nyid gsang ba yin// longs spyod rigs pa dag pa la/ / phyi nang med par sems nyid gsang// des na ye shes gsang ba'o// sprul pa sna tshogs cir yang ston// dper na dug sprul rtses pa 'dra// ma bcos lhun grub chen po la// nges pa med pas gsang bar bshad/ / yang smras pa/ nyan thos mdo sde bye brag gnyis// gzugs ye shes gsang ba la// gzugs su phra rab rdul du mthong// sems la rdul med phyin ci log/ rdul la rtsod pa e ma 'khrul// de phyir ye shes gsang ba yin/ / de bzhin cha 'thun rang rgyal ni// chos ni rnam pa bco lnga la// gzhan la bdag med cig ma rtogs// rten 'brel chos la nges brtags pas// rgyu med chos kyi don ma mthong// bse ru'i sa la ye shes gsang/ / theg chen bde ba gnyis su 'dod// kun rdzob sgyu ma'i dpe bzhin te// don dam gtan tshigs rigs pas tshol// lam lnga sa bcu rim gyis bgrod// de yang bsti gnas drang ba'i don/ / bgrod med bgrod pas ye shes gsang// yang smras pa/ bya rgyud kyi kri ya ni// mtho 'jam dma' rtsub rigs gsum 'dod// dag pa gsum gyi sgor zhugs nas// dam tshig ye shes rje 'bangs lta// togs pas rdo rje 'dzin pa'i sa/ / nges pa thob kyang bcos pas gsang// gnyis ka rgyud kyi u pa la// lta spyod gong 'og rjes su 'breng// nges pa med pas khye ber 'dra// ye shes dam tshig dpon g.yog tshul// mtshan ma'i dngos po chu zla ltar/ / rigs bzhi zhen pas ye shes gsang// rnal 'byor rgyud kyi yo ga ni// mngon byang lnga yi sgor zhugs nas// don dam skye 'gag med pa la// byin gyis brlabs nas lha ru lta// bdag dang lha ni grogs po'i tshul/ / stug po bkod pa'i sa 'dod pas// ma bcos rnal ma'i sa ma rtogs// des na ye shes gsang ba yin// yang smras pa/ bskyed pa ma hA yo ga ni// ting 'dzin gsum po gtsor byas nas/ / thabs dang shes rab sgor zhugs te// shes rab gzungs ma mdzes ldan la// thabs chen ye shes mngon sum du// bde ba zag med gzung ba yin// pad+ma spyan gyi sa skye bo// de yang rnam pa'i skyon yin pas/ / de la brten par mi bya gsang// rdzogs pa a nu yo ga yang// grangs mdog ma nges sku gsungs thugs// dper na chu la nya ldang tshul// ma bskyed rdzogs pa'i tshul du sgom// dbyings dang ye shes dbyer med blta/ / yi ge 'khor lo tshogs chen blta// rang 'dod 'bras bu thob mod kyang// mthar thug 'bras bu des mi nus// des na e ma ye shes gsang// brtsal ba'i bsam pas dbyings mi bskyod/ / des na de sgrib skyon can yin// de bas de lung de nyid la// de nas de nyid grub pa med// bya bral rdzogs pa chen po la// rim brgyad bgrod pas rtsol bral slad// des na ye shes gsang ba'o/ / zhes gsungs so// gsang ba mtha' dang mnyam pa las/ gang la gsang ba'i le'u ste lnga pa'o//// de nas sems dag lha yi bus// bcom ldan 'das phyag na rdo rje la// zhen drug 'khor bar 'khyams pa yi/ / ma rig 'khrul pa ji ltar lags// zhes zhus pa dang/ bcom ldan 'das kyis bka' stsal pa// byang chub sems kyi rang bzhin ni// gdod nas ma skyes 'od gsal de// 'khor 'das ma lus kun la khyab/ / chos rnams kun gyi ngo bor shar// sangs rgyas sku dang ye shes thugs// sems can lus ngag yid la khyab// thams cad dbyer med byang chub sems// de ltar dag pa'i don rig na// dper na kun bzangs seng phrug bzhin/ / shes rab can gyis rtogs 'gyur te// ma rtogs mun pa'i mtsho la spyod// rtogs na sku gsung thugs yin te// rang byung lnga ru snang ba las// rang byung nyid du ma rig pas// zhen pa lnga ru phyin ci log/ 'bras bu khams gsum sems can byung// 'khor ba thog mtha' med pa nas// rgyu rkyen rtog pa'i rkyen bzhis 'khrul// lhan cig skyes pa'i ma rig pas// kun nas slong ba'i sa bon byas// las dang nyon mongs rkyen byas nas/ / kun rtags ma rigs pa yis 'khrul// grib ma gzugs kyi dbe bzhin du// skyod byed las kyi lung gi rlubs// zhes sdang dmyal ba'i tsha grang 'khor// nyon mongs zhes sdang rnam smin gyis/ / dmyal ba'i gnas su skyes srid na// zhes sdang ye shes nyid du shes// zhe sdang ma spangs gnas su dag/ de ltar ma shes ye shes gsang// ser sna bkres skom yi dwags 'khor// ser sna las kyi rnam smin gyis/ / yi dwags gnas su skyes srid na// ser sna ye shes nyid du shes// ser sna ma spangs gnas su dag/ de don ma rig ye shes gsang// gti mug glen lkug byol song 'khor// gti mug las kyi rnam smin gyis/ / dud 'gro'i gnas su skye srid na// gti mug ye shes nyid du shes// gti mug ma spangs gnas su dag/ de nyid ma rig ye shes gsang// phrag dog 'gyur ba mi ru 'khor// phrag dog las kyi rnam smin gyis/ / mi yi gnas su skyes srid na// phrag dog ye shes nyid du shes// phrag dog ma spangs gnas su dag/ de don ma spangs ye shes gsang// nga rgyal 'thab rtsod lha min 'khor// nga rgyal las kyi rnam smin gyis/ / lha min gnas su skyes srid na// nga rgyal ye shes chen por shes// nga rgyal ma spangs gnas su dag/ de nyid ma rig ye shes gsang// 'dod chags ltung ba lha ru 'khor// 'dod chags las kyi rnam smin gyis/ / ltung ba'i sdug bsngal myong tsa na// ltung ba ye shes chen por shar// 'dod chags ma spangs gnas su dag/ de nyid ma rtog ye shes gsang// 'khor ba shing rta'i 'phang lo 'dra// lha mi gtsang ma'i lus thob kyang/ / ma rtogs bar du 'khor bar 'khyam// thog mtha' med kyang rtogs na yod// ces gsungs so// gsang ba mtha' dang mnyam pa las/ zhen drug la gsang ba'i le'u ste drug pa'o/ /// de nas sems dag lha'i bus// gsang ba'i bdag po la 'd-i ltar zhus// log pa gsum la gsang ba'i don// ston pas 'tshams par bshad du gsol// bcom ldan gsang bas bka' stsal pa/ / rtag pa chad pa rgyang 'phen gsum// lam log phyal ba log pa'i lam// 'jig rten 'di yi btsan phyug las// phyi ma phyal bar 'jog pa'i phyir// mu stegs lta log bsam mi khyab// dbye na sum brgya drug cu ste/ / de yang bsdu na drug cu gnyis// shin tu bsdus pas rtag chad gnyis// shar byung log pa dag dang gsum// nga med nga dang bdag tu bzung// de phyir mu stegs 'khrul pa'i lam// des na ye shes gsang ba yin/ / tshangs pa dbang phyug khyab 'jug gsum// mu stegs lta ngan lha yin te// de la srog gi mchod pa dbul// me la rten dang dbyug gu gsum// phya 'am dbang phyug mchod legs na// mtho ris su yang de yis gtong/ / phya 'am dbang phyug mchod nyes na// ngan song du yang de yis sgyur// des na rig byed bzhi yis su// lam log thar pa thob par 'dod// des na ye shes gsang ba yin// bdag ces byang ba'i rtag pa des/ / mthe bong nyung 'bru tshul tu 'dod// rang bzhin rtag par 'dod pa ni// sran zlum tsher ma rno sogs pa// 'di la byed pa su zhig yod// rang bzhin rgyu de rtag par 'dod// rtag par lta ba thams cad la/ / rim dang cig car gnod pa'i phyir// des na ye shes gsang ba yin// mur thug chad par blta ba ni// 'byung ba 'dus ba'i snang ba las// rang sar zad nas cang med 'dod// ma shi tshe la skyid par spyod/ / shi na 'u yi sbyod yul min// lus kyang thal ba bzhin song na// slar 'tsho ba dag ga la srid// dper na spyang ku'i rjes dang mtshungs// des na log pa'i lam yin pas// de la rten par mi bya'o// chad pa gnyis 'dzin shes par 'dod/ / rten cing 'brel par 'byung ba'i phyir// dngos med rtag pa rig pa'i rgyun// rlung la rten gyin rgyun mi 'chad// des na ye shes gsang ba yin// e ma sems can snying re rje/ / bdag tu 'dzin pas gzhi la lta// ye shes phyi nang med pa la// phyogs ris bye bas phyogs char ltung// bdag med bdag tu ltas pas 'khrul// bdag 'dzin med pa'i ye shes ni// phyi nang zang thal chen po la/ / phyogs su ltas pas grub pa med// des na ye shes gsang ba yin// rtag na ye shes chen por rtag/ chad na 'khor ba rtsad nas chad// bying na chos kyi dbyings su bying// rgod na ye shes rol par rgod/ / ces bka' stsal to// gsal ba mtha' dang mnyam pa las/ log pa gsum la gsang ba'i le'u ste bdun pa'o//// de nas sems lhag lha yi bus// gsang ba'i bdag la 'di skad gsol// ye shes gsang ba thugs kyi mdzod/ / kun la gsang ba ji ltar rtogs// zhes zhus pa dang/ gsang ba'i bdag pos bka' stsal pa// ye shes gsang ba'i rang bzhin la// sgra dang tha snyad kun 'das kyang// snod ldan rtogs par 'dod pa yis/ / gtan tshigs tshad ma gsum gyis ni// de rgyud rtogs pa'i rol par bshad// bya bral lung dang rig pa'i nyams// bla ma dam pa'i gdams ngag gsum// ye shes gsang ba rtogs pa'i mchog/ mkha' gsal byang chub sems kyi lung// snang srid sems su gtan la 'bebs// ye shes gsang ba'i ngo bo ston// bdag nyid gsang ba'i dkyil 'khor 'char// lung gsum snang bas ston pa'i bka'/ / yin pas nga yi bka' dang 'thun// thams cad sems su 'dus pas na// sems ma yin pa'i chos mi snang// ji ltar snang ba'i chos rnams ni// sems la snang phyir sems yin te// thams cad rang rig byang chub sems/ / de ni lung gi tshad ma'o// de phyir sems lung chen po yin// thams cad sems su gtan la dbab// des na thams cad sems yin te// 'dzin ba'i shes pa yod pa'i phyir// tshor ba nyams su myong ba'o/ / rig pas nyams su myong tsam na// yid ches rig pa'i gtan tshigs so// rnam gsum lung gi ngo bo ni// sems nyid rig pa'i chos yin no// ngo gcig snang tshul tha dad yang// tha dad mthong ba brtags pa ste/ / bag chags logs pas skyugs tsam na// sems kyang log par snang ba ste// dung la ser por mthong bzhin du// dung la ser por ma grub par// mi gser rkyen gyis log par snang// dung la ser po yod na ta/ / ma 'khrul shes pas mthong bar thal// de bzhin zhenartog 'khrul ba yis// brtags pa sna tshogs dag tu mthong// dper na phug ron ske lta bu// dang po mtshan ma'i rang rig ste// gnyis pa med pa'i rang rig yin/ / gsum pa gnyis ka med pa de// mtshan gzhi med pa'i mtshan gnyis ni// mi srid me med tsha ba bzhin// shes pa skye lugs gsum yin te// rtog pa dang po chos pa yis// gnyis pa rang bzhin dbyings su thim/ / mthong ba sna tshogs rig pa'i nyams// bla ma'i zhal las shes par bya// de phyir ye shes gsang ba yin// gsang sngags skyon yod ma yin te// blo ngan shes rab chung ba la/ / thugs rje chen po thabs kyis gsang// zhes gsungs so// gsal ba mtha' dang mnyam pa las/ tshad ma gsum gyi le'u ste brgyad pa'o//// de nas sems lhag lha yi bus// rdo rje zam par dbang bskur zhus/ / gsang ba'i bdag por bka' stsal pa// gnas dang dkyil 'khor dpon dang g.yog/ 'jug tshul dus dang yon bdun bshad// gzhi yi gnas dang rten pa'i gnas// thams cad rang rig sems nyid de/ / rgyu rkyen bral ba'i dngos bzhi ni// sangs rgyas sems can thams cad kyi// bzhugs gnas rmad byung khyad par can// rten gnas ri bo de shan nam// za ma tog gi rgyal mtshan nam// rgya phug rdo rje gdan stengs sam/ / wA rA NA si'i bsil khang ngam// gru 'dzin ko sha li phrag go/ dkyil 'khor rang byung ye shes te// ma bcos dngos gzhi'i dkyil 'khor nyid// thams cad rang rig ye shes gsal// mkha' ltar khyab pa'i bde chen no/ / tsit+ta rin chen dkyil 'khor ni// 'og min rig pa'i gzhal yas khang// zag pa zad pa'i mtshan nyid de// dngas ma gsum gyi rtse mor sgom// brda don sprod pa'i slob dpon ni// rang rgyud ma bcos dag pa la/ / don dang 'dres pa'i sgra tshig gis// ye shes rig pa'i ngo bo ston// ma nor nges pa'i slob dpon ni// rang sems bla ma kun gyi bdag/ thams cad rang rig rgyal po la// gdod nas skye med bya btsal bral/ / slob ma rang rig sems la slob// rtogs ldan blo yi khyad par gyis// ting 'dzin shes rab rtsal du rdzogs// gsang sngags mdzod kyi gter 'dzin no// snod ldan slob bu dad pa brtan// rigs brgyud dag pas bla ma khur/ / man ngag gter 'chad gdams ngag sbyin// mang yang gsum las 'da' mi bya// ye shes gsang ba thugs kyi bcud// bka' yi bcud bsdus a ti ni// snod ldan rgyal 'theb cig la gzhag/ dbang dang snod brtag cho ga dang// gsol ba btab nas gnang ba sbyin// sngaun du 'gro ba'i rim pa'o// dang po dngos gzhi'i dkyil 'khor bstan// kun rdzob dkyil 'khor lus la 'bog/ sprul tshig gdams ngag rna bar gzhug/ sems lung 'bogs pa'i gdams ngag bstan// rgyas rtags gdab pa'i cho ga bya// lus la bde mchog bde ba'i dbang// yon tan ldan pa'i bu mo de// thabs kyis bsnyen pa gsum rdzogs nas/ / bde chen rdzogs pa phyag rgya'i rgyu// rin chen gter gyi gdams ngag sbyin// thabs kyi gar stabs bskyod pa yis// gnyis med sbyor ba 'phul pa yin// dga' bar gyur pas dam tshig de// mthong bar gyur pas dngos grub po/ / rol pa'i cho 'phrul la brten nas// rnal ma'i don ni rtogs par bshad// ngag la rang grol rlung gi dbang// bem po'i rlung dang rig pa'i dbang// dang po gyen rgyu thur rgyu dang/ / srog 'dzin khyab byed me dang mnyam// 'byung ba rlung lnga rim gyis gzung// rig pa'i rlung ni gnyis yin te// las kyi rlung gis thur du ltung// ye shes rlung gis gyen la 'dren// rlung gi 'phen pas thams cad byed/ / bems po'i rlung la brten nas su// rig pa'i rlung ni zin gyur na// rtogs pa'i rlung chen don rtogs de// ye shes rlung ni zin pa yis// ye shes gsang ba'i don dang phrad// rol par rig pa rtsal gyi rlung/ / rnal ma'i don dang phrad par bshad// sems la ye shes spyi blugs dbang// rtogs med mthong ba'i lam dang phrad// sgom med don gyi gzer chen gdab// bgrod med rtog pa'i 'jing dang bral/ / rna brgyud lung gi gter chen sgrol// re dogs med pa'i btsun sa thob// 'di de rdo rje lam mchog ste// skal ldan 'bad pa med par grol// rgyal thabs kyi sems rin chen dbang// spyi blugs tshangs pa'i dbang zhes bya/ / rgyud dang lung dang man ngag gsum// gcig la gcig rten gcig gi ngang// rtsal dang cho 'phrul rang snang gsum// rol pas ye shes gsung bar mtshon// dang po bcu bzhi zhag gi dus// nus pa'i tshogs bsog bar chod bsrung/ / mthar phyin thun mtshams bcu phrag bdun// bar do 'byongs shing mthar phyin 'gyur// de nas srog 'dzin bla ma la// lus dang bcas pa'i longs spyod dbul// brda tsam dbang gis mtshon nas su/ / gnas lugs rtogs par the tshom med// ces gsungs so// gsal ba mtha' dang mnyam pa las/ dbang gi le'u ste dgu pa'o//// de nas sems dag lha yi bus// bcom ldan 'das phyag na rdo rje la/ / shes skyob don dang ldan pa yis// sngags gsum bdag gis 'di skad zhus// 'dus pa'i 'khor tshogs mang po la// dam tshig gsang sngags srog yin pas// gsang ba'i dam tshig bshad du gsol/ / bcom ldan 'das kyis bka' stsal pa// lhun grub ye shes gsang ba la// rtsol bas bcos pa'i dam tshig med// dam tshig dam tshig ces bya ba// gud na yod pa ma yin te// rang sems dag na dam tshig yin/ / dag pa'i klong na bsrung mtshams med// rtogs pas lta ba'i yul las 'das// gsal ba bsam gtan spros dang bral// yul las 'das pas spyad du med// lhun gyis gnas pas sgrub tu med// ma yengs dran pas rang sar grol/ / sngags dang phyag rgya rnam par dag/ stong nyid ngang la mchog bshad med// 'khor 'das khyab gdab chen po la// 'phrin las rnam bzhi gdod nas rdzogs// rdzogs pa chen po dam tshig ni/ / rtsol ba'i nad kyis bsrung du med// ye bsrung gdeng gi mchod pa la// bsrung bya srung byed gnang bkag med// re zhig brda tsam rol pa la// rig pa gsal ba'i dam tshig ni// rtog ldan 'khor ba sgrol ba'i gru/ / rdo rje nyid ma lta bur gsal// des na gsal ba mtha' dang mnyam// med pa phyal ba gcig pu dang// lhun gyis grub pa'i dam tshig go/ rang rig ye shes gsang ba la// gzung 'dzin mtshan ma'i chos med pas/ / brjod du med pa'i sems nyid kyis// bsrung du med pa'i ngang du bsdam// bsdam bya sdom byed bral bas bde// gnyis med rig pa'i dam tshig la// 'da' med srog gi gnas gyur na/ / ma bcos rgyal ba'i dam tshig yin// nam mkha' lta bur khyab pa la// mtha' dang dbus med ma bcos pas// 'di yin 'di man phyogs dang bral// phyogs bral skyes bu chen po des// phyogs gcig spang zhing sgrub tu med/ / gtad med 'dzin bral chen po la// phyogs mtshams nges pa'i chos ma yin// sangs rgyas sems cad thams cad la// ma bcos sems kyi rig pa gcig/ rgyu yis ma bskyed ye nas grub// rkyen gyis ma sbyangs gdod nas dag/ rang bzhin rig pa 'od gsal la// ma lus dgongs pa thams cad 'dus// dus gsum bde gshegs thams cad la// rang bzhin dgongs pa gcig las med// rang snang mi 'gyur chos nyid la/ / rang gzhag rig pa mi 'da' na// sems nyid gcig pu'i dam tshig go/ dus gsum sangs rgyas thams cad la// dam tshig 'di las yong mi 'da'// de la dam tshig phyi dang nang// rang bzhin phung po khams bzhin gnas/ / dus gsum 'di dang mi 'bral na// dam tshig ming du btags pa med// rang byung 'od gsal rnam par dag/ lus dag rtsol ba'i nad med pas// ting 'dzin rig pa rtsal gyi dbang/ / mtshon pa'i tha snyad bral ba'o// re zhig kun bzang rol pa ru// gyi nar lhun grub dam tshig la// ye shes gsang ba bya btsal bral// 'bad rtsol dam tshig zhi nas dag/ sel med rin chen gling bzhin du/ / rnam dag ye shes rang byung la// skyon gyi dri ma gdod nas dag/ gzhi rtsa med pa'i sems nyid du// brtags pa'i 'dzin rtog rnam par dag/ lhun grub 'od gsal brdal pa la// rnam rtog btags pa'i sems grub na/ / mu stegs sangs rgyas ci la rtsod/ sangs rgyas sems can ci la btags// rtog pa mngon sum grub pa yi// gcig pur 'dzin pa'i log rtog la// 'khrul pa'i tha ram shin tu dam// rin chen 'phrul gyi lde mig gis/ / tha mal zhen pa ji ltar bzlog/ med de med pa'i snying po can// chad pa mtha' med ma yin no// yod de rdzas su grub pa med// phyal ba btang snyoms rnyog pa med// ril por 'dzin pa'i gcig tu med/ / thig le chen po spros dang bral// mu stegs lhun grub ma yin te// lhun grub 'dod pa kun dang bral// rgya chad phyogs lhung med pas bde// zhes gsungs so// gsal ba mtha' dang mnyam pa las/ dam tshig gi le'u ste bcu pa'o//// de nas sems dag lha yi bus// gsang ba'i bdag po bcom ldan 'das// bcom ldan thugs kyi bang mdzod nas// ye shes gsang ba rtogs pa'i phyir// ye shes mdzod chen bshad du gsol/ / zhes zhus pa dang// gsang ba'i bdag po bcom ldan 'das// rdo rje 'chang gis bka' stsal pa// gdod nas ma skyes snying po a// sgro skur lta ba kun dang bral// thams cad gcig gi rang bzhin la/ / spangs 'gegs byis pas slad pa med// dbyer med ye shes lnga ldan la// sbyong bgrod gnyis lta rang sar grol// skye 'gag gnyis su med pa la// bsgyur dang spyod lnga rnam par dag/ rnam dag lam chen kun grol phyir// mi skye mi 'gag cir mi dgongs// go ba'i yul na bde ba che// 'di ni rnam dag 'jig rten yin// des na lung ldan bla ma yis// rgyal sras slob ma skal ldan la// spyi blugs dbang la gnas byas te/ / rna brgyud gdams ngag nod par bya// bgrod med lam la gnas byas na// sbyangs med sa yi yon tan 'phel// pra khrid sems kyi don bstan pas// sems nyid rin chen snying po la/ / skur ba'i cha gnyis mi rtog ste// brda don sprod pa'i gdams ngag spyin// sprad pa gsum gyi gdams ngag gis// dmar khrid ngo sprad bstan pa dang// sgom khrid thun gyis thun du drang// byang sa gnas sa thim sa gsum/ / bar do'i gdams ngag shes par bya// gnad kyi gdams ngag ma shes na/ kha lta mang pos don mi rtogs// sgra dang tshad ma gang gis kyang// rig pa'i ye shes rnyed mi 'gyur// rtogs pa'i lta ba rig pa'i gter/ / mtshan ma ma spangs rang sar grol// 'khor ba ma bkag gnas su dag/ 'khrul pa ma bsal rtsa nas chod// dug lnga ma bsgyur chos nyid klong// rtsol sgrub med bar ye sangs rgyas// yin pa'i don la yin par shes/ / lta ba 'di la gang gnas pa// sangs ma rgyas pa gcig kyang med// shar tshad rang shar chen po la// phyogs su ma lhung 'od gsal che// 'ching grol med pas lta ba yin// zhes gsungs so/ / gsal ba mtha' dang mnyam pa las/ ye shes mdzod kyi le'u ste bcu gcig pa'o//// de nas sems lhag lha yi bus// gsang ba'i bdag po rdo rje can// bcom ldan 'das la 'di skad gsol// ye shes gsang ba thugs kyi bcud/ / ting 'dzin sgom pa'i bsam gtan zhu// zhes gsol pa dang/ gsang ba'i mnga' bdag bcom ldan 'das// gsang ba'i bdag pos bka' stsal pa// dang po rang sems rgyun la lta/ / gnyis pa bla ma'i gdams ngag sbyin// gsum pa brda don ngo bo sprad// de nas lung ldan rgyal po la// rgyal 'theb blo dang ldan pa yis/ khrid gsum sems kyi don bstan pa/ / sems nyid ye shes gsang ba la// bskur dang ma bskur gnyis med kyang// brda don spyod pa'i gdams ngag zhus// mi rtog ye shes bzhi cha gcig/ sems can kun gyi rgyud la gnas// gsum tsam 'khor ba'i rang bzhin yin/ / dus tshod bla ma'i zhal las shes// lha yi bu khyod 'di ltar ste// de phyir brda don sprad par bya// dang po zhi gnas dus su ni// gnas pa yi ni ting nge 'dzin// gnyis pa lhag mthong dus su ni/ / mi g.yo ba yi ting nge 'dzin// gsum pa mnyam gzhag dus su ni// mnyam pa nyid kyi ting nge 'dzin// bzhi pa rjes thob dus su ni// ye shes chen po lhun gyis grub// de yang zhi gnas sgom pa la// dran pa shes bzhin rtsi yis gzung/ / dper na glang chen lcags kyu bzhin// ma yengs dran pas rang sar grol// de ltar lhag mthong sgom pa la// shes bya chos nyid bum par gzhug/ gser bum til gyi sgron me bzhin// 'gyur med rig pa nang na gsal/ / de bzhin mnyam par 'jog pa la// dbang po mi dgag rang sar gzhag/ gser gling brda ba'i klong chen bzhin// gang ltas mnyam nyid brdal ba'i klong// tha ma rjes thob dus su ni/ / thams cad rang grol chen por shar// dug sprul 'bar ba'i mdud pa bzhin// rtsol sgrub med par rang sar grol// de ltar dus bzhin bsgoms pa yis// rnal 'byor nam mkha'i bya lam la// ma goms ngal dub thun ches pas/ / bying rmugs rab tu 'thibs pa dang// lci zhing 'thams la don mi gsal// sgro lnga yul la 'phro ba dang// yid 'khrul dran rtogs bag chags ldang// rnam rtog kun bur 'dzag pa rnams// bying rgod skyon du gtang mi bya/ / bying na gsang la 'thor na bsdu// bying ba'i skyon rnams bcos pa ni// sa mtho ser bu bsil ba'i sar/ khrus byas lus bcag rgyang mig blta// glu blang gar bya rgyang mig blta// 'thams na bshig gin rig pa dbyer/ / rgod pa rnams kyi bsdu ba yang// gtad dang gzung dang rang sar grol// rang byung rang zhi nam mkha'i dpe// lta ba dran pas bcos pa'o// de ltar zla drug sgom pa dang// g.yo dang goms dang thobs dang brtan/ / gsal ba nam mkha' lta bu 'byung// nam mkha' dngas pa'i zla ba bzhin// kun tu snyoms la rtog sgrib med/ kha skom zas dang bral byas kyang// mdangs dang dbang po gting na gsal/ / bzod thob chos brgyad spong len med// 'dod yon lnga las rnam par grol// nyon mongs zhen 'dzin rtog pa zad// lus yang shing bal dbugs mi tshor// grub pa'i drod dang rtags rnams ma bcos pa 'char/ / mngon shes la sogs mtshan ma thob// mkha' 'gro'i lung bstan la sogs 'byung// de dag dga' brod mi bya zhing// med kyang ji mi snyam pa'i nyams// rtog pa'i mtshan ma ci skyes kyang/ / de nyid chos nyid yin shes na// dug la sman du shes pa bzhin// chos nyid gzhan nas btsal ci dgos// rnam rtog gnyen por mi rtog sgom// de ka rtog pa chen po yin// bzang rtog ngan rtog las grol bas/ / rdzogs chen rtogs pa'i rnal 'byor bde// zhes gsungs so// gsal ba mtha' dang mnyam pa las/ ye shes gsal ba'i le'u ste bcu gnyis pa'o//// de nas kun dga' snying pos zhus// ye shes 'bar ba spyod pa'i glong/ / ston pa thugs kyi dpal be'u nas// gsang ba'i bdag pos bshad du gsol// bcom ldan 'das kyis bka' stsal pa// nyon cig sems lhag lha yi bu// ye shes gsang ba thugs kyi mdzod/ / 'byed par byed pa'i lde mig ni// ye shes 'bar ba'i spyod pa yin// sems nyid don gyi ye shes la// spyad par bya ba'i gnas dang bral// bya bral ngang las rnam par rol// mi brtsal ma spyod zhes de bya/ / lus ngag yid gsum spyod pa ni// lus kyi phyag rgya rtsol ba med// tha mal chen po de bzhin nyid// bag yangs spyod pa lhug par bde// 'gro 'chag nyal dang 'dug pa rnams// ci spyod don las ma g.yos shing/ / don dam bde ba'i rtsis zin na// spyod pa zhes ni de la bya// ngag gi snying po bzlas brjod med// ma bcos gsung gi spyod pa la// dper na bing ka'i skad bzhin du// 'gag med grag stong skye med gsung/ / gang ltar byas kyang bde bar spyod// 'ching grol med ba'i spyod pa'o// sems ni 'phro 'du'i las mi byed// rang gsal klong la ye gnas pas// dran bsam rgyu ba gang yang med// spros med nam mkha'i lta bur bde/ / rang gsal ye shes chen por shar// skye med blo las 'das par spyod// blo 'das dgongs pa khong chud na// nam mkha' rdo rje'i spyod pa'o// phyi nang gsang ba kho na nyid// phyi rtog nang du bsdu ba dang/ / nang rtog gsang bar bstim pa dang// gsang rtog kho na nyid du grol// grol nas grol ba'i lam yang ston// snying po klong nas grol ba la// mngon sum rjes dpag log par spyod// rtog ge'i spyod yul ma yin no/ / seng ge glang chen 'thab pa de// wa spre dag gis skyo ma bcug/ sgam gnyis e la 'thun tsam na// phra ma mkhan de skyar la 'byung// zhes gsungs so// gsal ba mtha' dang mnyam pa las/ ye shes 'bar ba'i le'u ste bcu gsum pa'o/ /// de nas lha'i bu des/ gsang ba'i bdag la 'di skad gsol// sangs rgyas kun gyi mthar thug pa// ye shes sa cig bshad du gsol// bcom ldan 'das kyis bka' stsal pa/ / gdod nas ma skyes don gyi sa// thob sgrub kun gyi yul las 'das// re dogs blo las rnam par grol// go ba'i yul na bgrod du med// ma bcos ye shes bla ma'i sa// sbyangs pa ma yin ye nas grub/ / rang byung rnam dag kun tu bzang// dbyer med bde ba chen po'i sku// sku dang mdo sde bla med sa// nyan thos dgra bcom pa yi sa// rang rgyal yid zhin bde ba'i sa// kun tu 'od dang rdo rje 'dzin// stug po bkod pa pad+ma can/ / tshogs chen yi ge 'khor lo dang// kun bzangs dbye ba med pa'i sa// sa rnams sems la bgrang ba yang// ye shes gsang ba cig la smras// rdzogs pa chen po sa gcig pa// gang gis de rtogs de yi sa/ / rtogs pas yon tan drug tu shar// bkra gsal gzugs kyi dkyil 'khor la// 'od gsal rang byung ngo mtshar che// brjod bral sgra yi dkyil 'khor la// grag stong rig pa'i 'od gsal shar/ / rang bzhin sna tshogs dri dag la// ye shes gsal ba'i rang byung sems// mu kha ro yi dkyil 'khor la// bdud rtsi thigs pa lce la zhog/ gsal ba'i reg bya'i bde ba la// gangs ri rtse nas bsnyil bar bya/ / kun 'dus chos kyi dkyil 'khor la// rgyal po btson du gzung bar bya// de ltar tshogs drug grol ba yis// shing rta'i gzer mgo gcad par bya// zhes bka' stsal to// gsal ba mtha' dang mnyam pa las/ ye shes sa gcig gi le'u ste bcu bzhi pa'o//// de nas sprul pa lha yi bus// gsang bdag rdo rje 'dzin pa la// mthar phyin sku gsum bshad du gsol// zhes zhus pa dang/ gsang ba'i bdag pos bka' stsal pa/ / snang ba ma bcos chos kyi sku// rig pa ma sbyangs longs spyod rdzogs// thugs rje sprul ba'i sku ru shar// chos skus nam mkha'i khams kun khyab// zhing khams snang srid thams cad dang// dus gsum sangs rgyas thams cad dang/ khams gsum sems can thams cad kun// chos sku ma bcos 'khor du 'dus// chos sku dngos med ye shes nyid// blo las grol te bsam du med// brjod pa'i tha snyad kun dang bral/ / mi 'gyur rdo rje nam mkha' 'dra// longs spyod rang rig ye shes te// gzugs kyi sku ru shar ba ni// mtshan dang dpe byad sbras pa la// snang la rang bzhin med pa'i lus// me long nang gi gzugs brnyan bzhin/ / ye shes sgyu mar snang ba'o// longs spyod rdzogs pa'i zhing khams ni// 'dod pa'i longs spyod thams cad la// spyod kyang ma chags longs spyod yin// de bzhin me tog rgyan pa'o// 'khor ni byang chub sems dpa'i 'khor/ / tshigs dang yi ger mi brjod kyang// brda yis chos rnams 'jal bar ston// ting 'dzin rig pa'i gdeng gis go/ thugs rjes ye shes sprul pa'i sku// gdul bya gang dang gang 'dul la/ / de dang de yi sku sprul pa// thub drug ngo bo shAkya thub// zhing khams stong gsum mi mjed la// gdul bya 'gro ba drug 'dul te// 'khor ni rang snang rnam bzhi la// bstan pa sde snod gsum du 'chad/ / ces gsungs so// gsal ba mtha' dang mnyam pa las/ sku gsum bstan pa'i le'u ste bco lnga pa'o//// de nas sems lhag lha yi bus// gsang bdag che la 'di skad gsol// bcom ldan thugs kyi dkyil 'khor nas/ / ye shes rol pa bshad du gsol// gsang ba'i bdag pos bka' stsal pa// ye shes gsang ba snying po'i don// kun 'das ye shes dag pa'i 'od// thugs rje ye shes phyogs med shar/ / ye shes me long g.ya' dag la// ma bcos gzugs brnyan rang shar bas// gsal 'grib med par zang thal ni// me long lta bu'i ye shes so// snang srid byang chub sems su gsal// rang sar mnyam pas phyogs bcur brdal/ / 'gro 'ong med pas dbyings su thim// mnyam pa nyid kyi ye shes so// rang gsal rig pa'i ye shes thugs// ma 'dres yongs rdzogs kun tu bzang// so sor mi rtog ye shes nyid// ma 'dres gsal ba'i ye shes so/ / mi 'da' phyag rgya chen po la// rang byung mdzad pa cir yang 'char// gdul bya'i bya ba kun sgrub pas// bya ba sgrub pa'i ye shes so// ma bcos dbyings kyi chos nyid ni// 'dzin rtog rig pa'i chos med pas/ / sems kyi dkyil 'khor 'od gsal te// stong pa nyid kyi ye shes so// rang gsal shes pa ma bcos pas// don de shes pas ye shes yin// chos nyid kar dag 'od gsal sems/ / don de rtog na ye shes yin// ma 'gags rang rig 'gyur med sems// rang byung ye shes lhun gyis grub// de don rtogs pa'i rnal 'byor ba// ye shes chen po'i klong na 'phyo// thig le drug 'dus nyag gcig la/ / che ba lnga dang 'dod nas ldan// 'di don shes na ye shes yin// rtogs pa'i klong chen rab 'byam ni// klong chen dgu yi klong na 'phyo// 'di ru ma 'dus gang yang med// kun byed kun bzang brtson pa'i sku/ / skabs sbyor yi ge tshul cig klong// 'od gsal me long rgya mtsho klong// klong dgu 'das pa'i rgya mtsho yis// ma rtogs pa la tshig sgo nas// ye shes gsang bar bshad pa yin// zhes bka' stsal to/ / gsal ba mtha' dang mnyam pa las/ ye shes kyi le'u ste bcu drug pa'o//// de nas sems dag lta yi bus// gsang ba'i bdag po bcom ldan la// lung bstan rdo rjer bshad du gsol// gsang ba'i bdag pos bka' stsal pa/ / nyon cig kun dga' snying po khyod// legs par nyon la yid la zung// ye shes gsang ba dam pa 'di// 'das pa'i dus na sngon byung ba// sangs rgyas mngon rdzogs rgyal pa yis/ / thugs kyi rgyal sras bdun la gtad// de dag rig par mthar phyin nas// de bzhin rtsol bral chos la bkod// rdo rje 'dzin pa'i sde dpon gyis// sems nyid rig pa'i theg pa rtogs// lha gnas gsum du grags 'gyur nas/ / yang sprul rgyal sras khyod kyis su// 'dzam gling dbus su rgyas par gyis// rgyal 'theb gsang ba'i snod ldan la// rna brgyud rig pa gsang ba'i rgyud// thugs rjes sprul pa'i sgo nas ston/ / gsang 'dzin rig pa'i snod ldan rnams// ma bcos gsang ba'i don go nas// rnam grol 'bras bu thob par 'gyur// mnyam pa'i don la mnyam gzhag na// de ma thag tu rig pa 'char// gsang ba'i snod ldan rigs 'dzin bzhin/ / dus tshigs phyir mar 'byung bar 'gyur// bstan pa bcud kyi mdzod 'dzin cing// rigs 'dzin sa la gnas pa'o// rdzogs chen a ti'i bstan pa 'di// bsnubs kyang nub par mi 'gyur te/ / don la 'gyur ba med pa'i phyir// nam mkha' bzhin du 'jigs 'dral med// gdod nas chos nyid spros dang bral// gzhan gyi nub par mi 'gyur te// rna brgyud 'phrul tshig mi ldan par// sgra bzhin spyad nas smu ba dang/ / lta spyod log pa'i nga rgyal can// ma bcos rang snang rol pa dang// rnam rtog zhen pa'i btags pa dag/ bye brag ma byed rmongs pa'i blos// bab col bsres nas log par smra// rgya mtshor lhun gyi pha bong bzhin/ / rdo rje'i khab tu ha ra han// des na thos bsam sgom gsum gyis// gtan la phob la nyams su long// zhes bka' stsal to// gsal ba mtha' dang mnyam pa las/ lung bstan rdo rje'i le'u ste bcu bdun pa'o/ /// de nas sems lhag lha yi bus// brda dang mtshan gyi bshad pa de// bcom ldan 'das la yang zhus pa// gsang ba'i bdag pos yang dag bshad// a ni skye ba med pa la/ / ti ni 'gag pa med pa'i brda// yo ga rdzogs chen chos kyi rtsi// shin tu rnal 'byor lha yi lha// lha yi bu khyod 'di lta ste// dgra gnyen med par goms gyur na// 'di dang bar ma do la grol// grol nas grol ba'i lam yang ston/ / sprad pa gsum gyi gdam ngag gis// rdo rje sems dpa'i khang pa bstan// thig le khong du gdams pa ni// zag med ye shes bde bar bstan// sku gsung thugs phrad nyams myong gis// nam mkha' rgya mtsho nor bu bstan/ / dmigs pa spo ba'i bsam gtan gyis// shes pa drims pa'i brda ru bstan// tshor ba rjes med sgom pa ni// phyogs med log pa'i brda yis bstan// dus tshod bzhi cha'i rig pa ni/ / shes pa blog pa'i brda yis bstan// btang snyoms chen po'i gdams ngag ni// mkha' 'gro rgyud kyi brda yis bstan// g.yo med bum chu'i gdams ngag ni// thig le dbus gnas lag brdas bstan// dran pa rgyun chags gdams ngag ni/ / dgu bsdams pa yis gdams pas bstan// gti mug lam khyer gdams ngag ni// dran pa me long brda yis bstan// tshogs drug rang sar grol ba ni// sna tshogs ci rung brda yis bstan/ / dug lnga rang sar grol ba ni// dngul dkar me long brda yis bstan// steng sgo dag la brten pa ni// rlung dang 'khor lo brda yis bstan// 'og sgo dag la brten pa ni// bo la ka ko la yis bstan/ / dkyil 'khor drug gi gdams ngag ni// spyod yul drug gi brda yis bstan// skye sa pa skye med gdams ngag ni// phyag rgya bsgreng ba'i brda yis bstan// gag med rol ba'i gdams ngag ni// rdo rje gdan gyi brda yis bstan/ / gnyis su med pa'i gdams ngag ni// yi ge a yi brda yis bstan// brda sprad brda ni bung ba dang// brda bral klong du gzhag par bya/ kun dga' snying po 'di ltar te// mtshan don ming de brgyad du gzungs/ / ma bcos lhun grub zam mo'i phyir// ma bcos ye shes gsang ba'i rgyud// nyon mongs zhen pa'i 'phreng thag gcod// de phyir ye shes rdzogs pa'i rgyud// kun tu bzang po rig pa'i thugs/ / ye shes 'od kyi rgyud ces bya// kun 'dus mnyam pa chen po yis// rgya mtsho ltar mnyam rnyog med rgyud// chos rnams gsal ba'i ye shes sgron// nyi zla lta bur dri med rgyud// 'di la mtha' dbus med pas na/ / nam mkha' mtha' dang mnyam pa'i rgyud// bde chen mdzes pa'i rgyan byed pas// skye med rin chen lta bu'i rgyud// gsang ba kun 'dus rig pa'i gter// gsal ba'i rgyud 'di phyi mar bshad// e ma ye shes bsang ba 'di/ / theg pa kun gyi yang rtse dang// dgongs pa kun gyi zhe phugs yin// lung rnams kun gyi rgyal po la// gsung rab kun gyi nges don no// rgyud kun ma lus don 'brel te// bstan pa yongs kyi snying po yin/ / chos rnams kun gyi mthar thug go/ gu lang lung gi gser gzo ru// seng ge 'o ma blugs pa bzhin// bka' yi bcud bsdus gsang ba 'di// snod ldan ngang tshul bzang la gtad// lha yi bu yi sems la zhog/ thugs rjes 'od zer phyogs bcur spros// snod min dam tshig mi ldan pa// grib bzhin 'khor yang gsang bar bya// chu srin pir gyi gre ba bzhin// ye shes gsang ba bstan mi bya// ye shes gsang ba zab mo'i rgyud/ / gsang bar bkrol ba'i don 'brel 'di// de ba bzang skyong bu la gtad// gnas ni brag dang chu la gzhag/ ces gsungs so// gsal ba mtha' dang mnyam pa las/ brda dang mtshan gyi sgo nas bstan pa ste bco brgyad pa'o/ /// gsang ba gsal ba mtha' dang mnyam pa'i rgyud ces bya ba/ bcom ldan 'das phyag na rdo rjes gsungs pa rdzogs so////

CLOSE WINDOW