bcom ldan 'das dpal kun tu bzang po la phyag 'tshal lo// rgyud gsum nges par bshad pa/ de nas de'i tshe de'i dus na chos nyid kyi mkha' dbyings nyid kyi klong/ sems nyid kyi gnas der byang chub kyi sems kun byed rgyal po nyid chos thams cad skye ba med pa'i ngang la dgongs nas/ chos nyid mnyam pa nyid kyi ngang la ci'ang mi gsung bar bzhugs so/ / de'i tshe sems dpa' rdo rje nyid kyang chos thams cad skye ba med pa la dgongs nas cang mi gsung bar bzhugs so// de nas rigs lnga'i 'khor la sogs pa phyogs bcu nas lhags shing 'dus pa rnams kyis/ sems dpa' rdo rje la 'di skad ces bskul lo// yang dag par bskul lo// nges par bskul lo// e ma ho sems dpa' rdo rje che// bdag cag rnams la phan gdags phyir/ / sngar gsungs rtsa ba'i rgyud nyid la// gong 'og 'khrugs su bstan pa ste// shes bya sgro 'dogs ji ltar gcad// phyi rgyud gnyis su gsungs pa la/ / shes bya'i sgro 'dogs rim pa gang// shes bya'i sgro 'dogs thams cad kun// zhu ba'i dus la rab tu bab// nges par zhu ba'i dus la bab// ces rnam par bskul lo/ / de nas sems dpa' rdo rje des// dga' ba'i mdangs ni rab tu phyung// rang gi stan las rab langs nas// ston ba'i mdun du rab zhus pa// e ma byang sems kun tu bzang/ / khyod kyi mdun du bdag 'khod pa// bdag la 'tshal ba'i don cig mchis// bdag 'tshal khyod kyis bshad du gsol// zhes zhus pas/ ston pa byang sems kun bzang nyid/ / chos nyid ngang la cang mi gsung// de nas sems dpa' rdo rje yis// nan tan nyid du rab zhus pa// kye/ ston pa'i ston pa byang sems kun tu bzang// rgyud gsum nges pa sngar du gsungs pa la// shes bya 'khrugs ba'i mtha' ni ji ltar gcad/ / phyi rgyud gnyis su rang bzhin bcur bstan pa// shes bya go rim dgongs pa ji ltar lags// shes bya sgro 'dogs mtha' ni ji ltar gcad// nges par bdag cag 'khor la bstan du gsol/ / de nas ston pa kun bzang gis// nges pa nyid du rab gsungs pa// kye ma sems dpa' chen po legs par nyon cig/ shin tu legs par nyon cig dang/ ngas de dag yongs su bshad par bya'o/ / zhes gsung bar zhal gyis bzhes so// byang chub kyi sems shes bya mtha' gcod kyi rgyud las/ gleng gzhi gleng slang gi le'u ste dang po'o//// de nas byang chub kyi sems kun tu bzang pos// rtsa rgyud 'khrugs ba'i dgongs pa 'di gsungs so/ / kye sems dpa' rdo rje chen po rab tu nyon cig/ rgyud de dkrugs pa'i dgongs pa 'di ltar yin// ra gcod gzu lums can gyi gang zag la// rgyud dkrugs lung bcus man ngag gab nas bstan/ / rdzogs chen skal ldan rang bzhin lhun grub la// bsnol mtshams 'phen sdud don gyi khrigs su bstan// dang po chos nyid mthong bar bya ba'i phyir// sngon du phyung ba'i mdo lung bcu bstan pa/ / dang po rgyud 'di 'byung ba'i rgyu bstan phyir// gleng gzhi sngon du phyung ba dang por bstan// de nyid gsal ba rgyas pa bstan bya'i phyir// phun sum tshogs pa bkod pa bcu par bstan/ / de las chos nyid mngon du phyung ba'i phyir// chos nyid mngon du phyung ba gnyis par bstan// chos kyi nyid rtsa ba kun byed sems 'dus pas// sems nyid kho na 'dus pa bcu gcig pa// de nyid chos kun gzhi ma yin pa'i phyir/ / thams cad 'byung khungs gsum pa dag tu bstan// de kun kun byed nyid las byung ba'i phyir// kun byed las byung nyi shu pa yis bstan// de gnyis phun sum tshogs pa gsum byung bas/ / sku gsum phun tshogs bco lnga pa yis bstan// de nyid sems nyid ston par 'dus pa ni// rang sems ston pa rtsa lnga pa yis bstan// rang sems ston pa gnyis med bshad pa'i phyir// gtan tshigs bshad pa nyer gcig pa yis bstan/ / de yi rtsa ba sems su gcig rig pas// rtsa ba sems su gcig pa drug pa bstan// chos nyid mngon phyung snang ba rang sar grol// bcu drug pa yis mngon phyung dgongs pa bstan/ / ma nor nges pa'i mdo lung bcu bstan pa// chos nyid de nyid kun byed nges rtogs phyir// mtshan bshad nges bar bstan pa bzhi pas bstan// de nyid rgyud dang mngos sum thabs rtogs pas// lung gnyis nges par bstan pa so gsum pa/ / lung de nges par rtogs par bya ba'i phyir// sems nyid nges par bshad pa bcu gsum pa// bshad pa'i de nyid yid ches bya ba'i phyir// lung khungs nges par bstan pa bcu gnyis pa/ / de yi don nyid gtan la nges 'bebs pa// don 'grel nges par bstan pa lnga pa bstan// don 'grel gtan phab nges pa'i gdeng rnyed pas// tshig gzhi nges par bstan pa so gnyis pa// nges rnyed sku gsung thugs su 'dus pa'i phyir/ / sku gsung thugs su 'dus pa so drug pa// sku gsum dgongs pa gcig tu brdal ba'i phyir// dgongs pa 'dus pa nges par bstan pa so bzhi pa// dgongs 'dus don la ma btsal rang gzhag phyir/ / dgongs pa nges par bzhag pa nyer dgu pa// nges par bzhag pa'i don las mi 'da' bas// sku gsum nges 'chang nges bstan bcu bdun pa// nges par bstan pas yid ches dgongs pa dag/ lnga bcu rtsa lnga pa yis bstan pa yin// rgyu 'bra sa log pa'i zhen pa bzlog pa'i phyir// rgyu 'bras 'das ba'i mdo lung bcu bstan pa// nges par rang byung rig par kun gcig pas// ngo bo gcig pa rgyu 'bras 'das pa zhe gcig pa/ / ngo bo gcig pa rang byung rdzogs pa rtogs dka' bas// skal med mi rtogs gsang ba bcu bzhi pa// ma rtogs de nyid lta spyod gol sgrib pas// lta spyod gol sgrib bstan pa so brgyad pa// de nyid sems nyid la 'das rgyu 'bras 'das/ / gol sgrib skyon sel dgu pa dag gis bstan// gol sgrib skyon med rdzogs chen nges rtogs phyir// rgyu 'bras 'das pa'i rdzogs chen so lnga pa// rgyu 'bras 'das rtogs ma btsal lhun grub pas/ / ma btsal lhun grub bstan pa lnga bcu pa// btsal med btsal bas grub par mi 'gyur bas// btsal bas mi 'grub bstan pa bco brgyad pa// btsal med chos nyid yongs la bkod pa'i phyir/ / chos nyid yongs la bkod pa brgyad pas bstan// chos nyid byang chub sems su bstan pa'i phyir// sems kyi rang bzhin bstan pa bzhi bcu pa// sems nyid ma btsal lhun grub rgyu 'bras 'das/ / ma g.yos 'dod med bstan pa nga gnyis pa// rgyu 'bras 'das pa rtsol sgrub bya mi dgos// bdun pa nyid du dgos pa bstan pa yin// byar med rdzogs pa'i mdo lung bcu bstan pa// sems kyi rang bzhin mi gnas yul med pas/ / byar med rdzogs pas bstan pa nyer gnyis pa// de nyid ma 'dres yongs rdzogs kun khyab pas// mi nub rgyal mtshan rdzogs pa sum cu pa// de nyid ye shes phyag rgya 'gyur med pas/ / byar med rdzogs pa'i phyag rgya rtsa bzhi pa// de nyid btsal bas 'bras bu mi rnyed pas// byar med btsal bas mi rnyed nyer brgyad pa// btsal med byang chub sems su rnam dag pas// byar med rnam dag dbyings rdzogs nyer bdun pa/ / rnam dag dbyings las rtsol bas nad med pas// byar med rdo rje tshig drug so gcig pa// rtsol med ji bzhin mkha' ltar gnas pa'i phyir// byar med mkha' yi dgos pa rtsa gsum pa/ / nam mkha'i dgongs pa sgom pa kun las 'das// byar med rdzogs pas sgom med rtsa drug la// sgom med sgom pas thob par mi 'gyur bas// byar med skal med don med zhe bzhi pa// rdzogs chen skal ldan 'bras bur rang gnas pa/ / byar med bsgrags pas rdzogs pa nga drug pa// ma byas rang bzhin rdzogs par bstan pa'i phyir// zhe gsum pa yis byar med dgongs pa bstan// gtan la phab pa'i mdo lung bcu bstan pa/ / chos kun gzhi ma gtan la dbab pa'i phyir// gzhi ma kun byed gtan phab zhe brgyad pa// de nyid dus gsum rgyal ba'i snying po bas// rgyal ba'i snying po gtan dbab so bdun pa// rgyal ba'i snying po bsam brjod yul las 'das/ / lta ba sgom med gtan dbab zhe lnga pa// bltar med sgom bral nyid ni ma spangs pas// sgom du med par bstan pa so bdun pa// sgom med bde chen dbyings las mi 'da' bas/ / dam tshig bsrung med gtan dbab zhe drug pa// mi 'da' chos nyid ma btsal lhun grub pas// 'phrin las btsal med gtan dbab zhe bdun pa// btsal med nyid la cig car 'jug pas na// sa la sbyang med gtan dbab zhe dgu pa/ / ma sbyangs 'od gsal ye shes lam rdzogs pas// lam la bgrod med gtan dbab nga gcig pa// de phyir rgyu rkyen ma skyes rang byung bas// rang byung ye shes gtan dbab lnga bcu pa/ / ye shes ma btsal lhun grub rang gnas pas// rang bzhin ma g.yos gtan dbab nga gsum pa// gtan la 'bebs na ma bcos bcos med pas// zhe gnyis pas ni gtan dbab dgongs pa bstan/ / lnga bcu rtsa lnga'i dgongs pa mdor bsdus phyir// lnga bcu bzhi pas rtsa rgyud bzhi bsdus bstan// rtsa rgyud 'khor la gtad cing gdams pa'i phyir// lnga bcu bdun pas gtad cing gdams pa bstan// ces gsungs so/ / byang chub kyi sems shes bya mtha' gcod kyi rgyud las// rtsa rgyud dkrugs pa'i dgongs pa bstan pa'i le'u ste gnyis pa'o//// de nas byang chub kyi sems kun byed rgyal pos rang bzhin bcu'i rim pa 'di gsungs so/ / thos pa'i rgyud ni bsams pas rtogs bya'i phyir// rtogs 'byung gleng gzhi bstan pa nga brgyad pa// dang po lta sgom rlabs chos phyir// lta sgom med bar bstan pa dgu/ bsgom med don la bsrung mtshams rtsis gdab bral/ / des na dam tshig bsrung med drug cu pa// bsrung bya med pas 'phrin las bya btsal bral// de nas 'phrin las btsal med re gcig pa// 'phrin las btsal med chos nyid gzung 'dzin bral/ / des na dkyil 'khor bskyed de re gnyis pa// dkyil 'khor rtsol bral lung chen thog 'bebs pas// des na sku dbang rtsol bral re gsum pa// bskur dbang rtsol bral rjes kyang lam bral bas/ / des na lam la bgrod med re bzhi pa// lam bgrod med pas sa lam sbyang du med// des na lam la sbyang du med pa re lnga pa// sa sbyang mes pas gnyis med blang dor bral// des na gnyis med spyod pa re drug pa/ / blang dor gnyis med ye shes sgrib pa med// des na ye shes sgrib med re bdun pa// ye shes btsal med lhun grub rang gnas pas// des na lhun grub btsal med re brgyad pa// de ltar rtogs par bya ba bsgrubs pa'i phyir/ / rtog pa rab tu bsgrags pa re dgu pa// de ltar rtogs pa'i ngang las ma yengs pas// ngang bsgom rtog pa'i gleng gzhi bdun cu pa// blta med ngang la bsgom med ngang gnas pas// des na bsgom med ngang gnas don gcig pa/ / bsgom med ngang la dam tshig bsrung med pas// dam tshig bsrung med ngang gnas don gnyis pa// bsrung med de la 'phrin las btsal med pas// 'phrin las btsal med ngang gnas don gsum pa/ / 'phrin las btsal med dkyil 'khor bskyed mi dgos// dkyil 'khor bskyed med ngang gnas don bzhi pa// dkyil 'khor rtsol bral dbang la bskur mi dgos// dbang la bskur med ngang gnas don lnga pa/ / bskur dbang rtsol bral rjes kyang lam bgrod med// lam la bgrod med ngang gnas don bzhi pa// lam bgrod med pas sa la sbyang du med// sa la sbyang med ngang gnas don bdun pa/ / sa sbyang med pas spyod pa blang dor med// blang dor gnyis med ngang gnas don brgyad pa// blang dor gnyis med ye shes sgrib med pas// ye shes sgrib med ngang gnas don dgu pa// ye shes btsal med lhun grub rang gnas pas/ / lhun grub btsal med ngang gnas brgyad cu pa'o// rgyud kyi skabs sbyar don 'khrigs bstan pa'i phyir// de yi lde mig brgyad cu gcig pas bstan// ngo mtshar skyes nas bstod pa bstan pa'i phyir/ / don gyi bstod pa brgyad cu gnyis pas bstan// de la snod bcud bye brag bstan pa'i phyir// gdams ngag snod la gzhag pa gya gsum pa// mtshan gyi che ba bstan cing gtad pa'i phyir/ / 'khor la rgyud gtad brgyad cu bzhi pas bstan// sems dpa' rdo rje chen po khyod nyon cig/ de dag dang ni de ltar shes par gyis// thos pas sgro 'dogs chod bas shes bya gzhi// bsams pas nges shes skyes pas shes bya lam/ / sgom pa rang gnas rang sar grol bas 'bras// ye nas lhun grub rnal 'byor bzhi tu gnas// de nyid gsal byas rnal 'byor rkyen du snang// khyad par sngon grol rnal 'byor 'bras bu nyid/ / ma 'dres yongs su rdzogs pa gnyis med kyis// thams cad ma lus rab tu grol bar byed// gzhan yang sems dpa' chen po rab nyon cig/ yon tan bcu dang ldan pa'i dam pa la// snod skyon bzhi rnams spang ba'i snod ldan gyis/ / rgyud don bslab pa'i mtha' bcur shes par gyis// zhes gsungs so// byang chub kyi sems shes bya mtha' gcod pa las// rang bzhin bcu'i rim pa bstan pa'i le'u ste gsum pa'o/ /// de nas yang sems dpa' rdo rjes rab tu zhus pa/ kye/ ston pa'i ston pa kun tu bzang po lags// dam pa snod kyi bye brag ji ltar lags// rgyud don brlabs pa'i mtha' bcu ji ltar bsdu// byang chub sems dpa' kun bzang khyod kyis rab tu shod/ / de nas byang chub sems dpa' kun bzang gis// 'dus pa'i tshogs rnams kun la bka' stsal pa// zhus pa'i don rnams legs bar bshad kyis nyon/ / dngos grub kun gyi bdag po dam pa ni// dbang rdzogs nus thob theg chen don la mkhas// nges pa'i don rtogs thugs rje che ba dang// 'gro ba'i don brtson don mkhas tshul shis dang// rdzas la sred chung yang dag don la dga'/ / de dag bcud dang ldan pa bla ma yin// snod ldan skyon bzhi rab tu spangs pa ni// bcud len yangs dang brtan dang dag pa dang// kha bub gzhogs ral zhabs rdol dug can spangs/ / snod chen bzhir ldan slob ma'i gang zag des// sngon la nges le'i gdams ngag zhu ba'i tshe// gsang ste dben pa'i gnas su mchod sogs dgram// de yis de la rgyal ba'i 'du shes bskyed/ / yid 'thad ces pa phul te gus phyag 'tshal// rdzogs chen dkyil 'khor chen por 'jug pa dang// lta sgom spyod pa bslab pa'i mtha' bcu rnams// thabs chen gcig gis thams cad 'grub par zhu// de yis de la rgyal ba'i sras dgongs nas/ / ljags kyi sbubs nas rgyud pa'i gdams pa 'di// rgyud lung man ngag nges don 'brel par bstan// zhes gsungs so// byang chub kyi sems shes bya mtha' gcod pa las/ / gdams pa zhus ba'i rim pa bstan pa'i le'u ste bzhi ba'o//// de nas byang chub kyi sems kun tu bzang pos// dang po dbang gi rim pa nges par gsungs pa// ye nas lhun rdzogs kun khyab dkyil 'khor du/ / thob med dbang bskur phyir mi dbye ba ni// ye nas dkar po ma mthong dmus long la// dkar po ji snyed brjod kyang shes mi rung// lhun rdzogs dkyil 'khor ma mthong bu de la// ye shes ma bskyed brjod pas shes mi rung/ / mig phyed dkar po brjod pas shes pa ltar// de la rgyal ba'i ye shes spyan dbye ba// shes rab ye shes spyan chen mi rtog pa// ye nas de bzhin ma mthong phyogs su 'dre// shes mtshan bzhin te 'dres dang de las med/ / 'dres pa sal le mi rtog mnyam par zhog/ mtha' dbus kun khyab lhun rdzogs dkyil 'khor der// rnam thar bzhi dang ye shes lnga sogs 'dus// kun gzhi ma bcos de la mi g.yo gsal/ / dus gsum rgyal ba rnams kyi chos sku yin// de shes rgyal ba rnams kyi ye shes yin// de ru thams cad gcig shes bcug pa yis// byang chub sems des chos skur dbang bskur bas// de don shes pa'i rig pa rang dbang bskur/ / bum dbang gsang dbang ye shes skye ba dang// kun gyi man ngag de nyid dbang bzhi rdzogs// rnam rtog sdug bsngal rang grol dbugs dbyung ste// kun gyi rgyal po chos skur lung bstan to/ / 'di la sgrib pa kun med rang sar dag/ tshogs kun ldan pas ma bsags sa non dag/ sa rnams mi bgrod sa rnams zil gyis non// rgyu dang 'bras med lhun grub 'bras bu mchog/ 'og ma gzhug phyir bstan gyis rdzogs chen la/ / dbang rim thob dang ma thob tha snyad med// med dang phyal pa gcig pu lhun gyis grub// lta ba gza' gtad bral bas blta ru med// spyod pa blang dor bral bas spyad du med/ / dam tshig gnyis 'dzin bral bas bsrung du med// ting 'dzin dmigs med had de phyal leb// theg dgur phye la thig la gcig tu bsdu// rig pa'i rgyal po rang dbang lhun gyis grub// gcig shes kun mkhas mkhas pa lhun gyis grub/ / brjod med brjod bral thos pa lhun gyis grub// byar med bya bral man ngag lhun gyis grub// mi len mi bsrung 'dzin med dam tshig mchog/ ma 'das mi 'jig 'das na gzhung rnams 'jig/ ces gsungs so// byang chub kyi sems shes bya mtha' gcod las// dbang dang dam tshig bstan pa'i le'u ste lnga pa'o//// de nas byang chub kyi sems ston pa kun tu bzang pos/ / lta sgom spyod pa'i rim pa 'di gsungs so// sems dpa' rdo rje chen po legs par nyon// 'khor ba'i nyer len rnam rtog ma rig yin// mya ngan 'das pa dbyings dang ye shes nyid// don du mi gnyis kun mkhyen thugs chud pa/ / de las byung ba'i snang ba rang dag 'dod// ma rig tha mal chags sdang spyad pas 'khor// mnyam pa'i don rig blang dor med pas bral// 'khor ba dor ba'i thabs ni de thob pas// de yi bka' dang bla ma'i zhal las byung/ / 'khor ba myang ngan 'das dang dge sdig kun// thams cad rmi lam sgyu 'dra rang bzhin med// smig sgyu sgra yis smig sgyu tsam yang med// thams cad 'khrul 'dod de min yang dag yin/ / 'khrul gzhi med par 'khrul pa 'byor mi srid// mdor na yang dag med pas de mi 'byung// de phyir med las med 'byung ngo mtshar che// de nyid med las thob med gnas pa med// de nyid yin pas dor med kun dang ldan/ / gang la mi rtog bltar med lta ba'i mchog/ lta ba de ltar shes na thams cad chud mi za// thams cad bdag nyid gsal ba mi rtog pa// de nyid zin pas rtsol ba'i nad spangs te// de la ma btsal gzhag na sgom pa'i mchog/ de ni kun gzhi ma bcos 'gyur med gsal// glang chen 'dam bying rta rgod rgyug 'dra na// gzhan ltar de rjes mi gcad pa la gzhag/ glang chen che na sgo dbye phur la gzhag/ rta rgod cher rgyug sgo dgag phur la brtod/ / de yi ngang la thun mtshams gnas pa dang// goms shing sgo dbye phur ba gtang bar bya// de yi ngang la thun mtshams mi gnas na// glang chen rta yis rkyen nas bcol cing gnas/ / dbye dgag rkyen dang phur rnams bcos pa'i tshe// thig le byang chub sems las nyams mi bya// ched du mi spang ngang la gzhag pas bral// spangs dang nyes med byang chub sems kyi ngang// bcos cing spang zla nges lta 'dzin phur can/ / rkyen du goms par gar brgyugs skyon med par// rdzogs chen rtogs cing goms pa'i rnal 'byor pas// gang ltar spyad kyang mi nyams thig le'i ngang// rdzogs chen goms shing rtogs pa'i sgom pa yin/ / chos rnams ji snyed brjod pa thams cad kun// kun gzhi brdal ba chen po'i ngang// chos kun ma bcos byang chub sems gyur pas// ci spyad ma bcos byang chub sems su gcig/ kun gzhi ma bcos ngang la de spyod pas/ / chos rnams kun la ma spyad gang yang med// gang la mi gnas mi rtog mi spyod pa// spyod med a ti yo ga'i spyod pa yin// zhes gsungs so// byang chub kyi sems shes bya mtha' gcod las/ lta sgom spyod pa gsum bstan pa'i le'u ste drug pa'o//// de nas byang chub kyi sems ston pa kun tu bzang pos/ mkhas shing rgyud dgrol sgor bsdu ba'i 'di gsungs so// sems dpa' rdo rje chen po legs par nyon cig/ chos rnams thams cad mtshan nyid ji ltar bstan// chos rnams kun rdzob don dam mtshan nyid de// kun rdzob mtshan ma'i chos la rnam pa gsum// 'khor ba'i chos dang mya ngan 'das pa'i chos/ / mya ngan 'das pa chen po'i chos dang gsum// mya ngan 'das pa'i chos la bzhi// gnyis po gegs te gnyis po chos dang ldan// 'das chen 'khor ba gnyis po re re 'gegs// don dam chos de kun dang bral/ / shes bya thabs kyi mtshan nyid 'di ltar bstan// rang ngo shes bya'i mchog shes shes rab ste// kun cha rdzun par 'dren pa thabs zhes bya// de re la'ang thabs dang shes rab gnyis// lta ba rang re'i shes bya chog shes pa/ / de ni shes rab kyi shes rab yin// spyod pas de don nyams len shes rab thabs// lta bas theg pa rang re'i don shes pa// de ni thabs kyi shes rab yin par bshad// de bzhin rjes su spyod pa thabs kyis thabs/ / de phyir theg ba'i 'jug sgo thams cad kun// thabs dang shes rab lta spyod 'brel nas 'grub// theg pa so so'i dri ma 'di ltar bkru// dkar nag brjes te nag po dor bar byed/ / nag po mi spang nag po dbang du byed// dkar nag kun yong 'bras bu 'phral la sbyor// rnyog chu ma dgul khad kyis 'dag pa 'dra// de rnams mi 'bral dri ma khad kyis dag/ de rnams rnam dag mi spang thabs kyis cig car bral/ / nor bu chu dngas rnyog chur bcug dang 'dra// theg pa chen po'i tshogs rnams 'di ltar bsag/ ji snyed chos kun bsod nams ye shes gnyis// shes rab ye shes mchog rtogs ye shes nyid/ / bsod nams tshogs gsog theg pa gsum// de nyid du ma bsags pas tshogs zhes bya// 'bras la tshogs gsog gsang sngags theg pa bzhi// bsod nams tshogs dang ye shes 'brel par 'dod/ / 'bras gnas ye shes gcig sogs theg pa gcig/ tshogs kun mi sog ye rdzogs tshogs kyi mchog/ theg pa so so'i sa rnams 'di ltar non// mos spyod sa sbyar dang po'i sa dang sbyor// bcu ba'i tha ma rdo rje lta bu'i sa/ / thams cad dag par byed pa'i des mthar phyin// gang la mi sbyor tha snyad sa dang bral// rgyal ba'i cho 'phrul thugs rje 'di ltar 'byung// tshogs mchog tsam na zag med sa bon bral// 'bad med 'byung ba chu yi dkyil 'khor 'dra/ chos sku dri med me long lta bu las// gdul bya snang la snang tshul byad bzhin 'char// snang med sa bon bral ba'i byin rlabs las// snang ba kun 'byung yid bzhin nor bu 'dra/ / theg ba'i bye brag so sor gang gsungs pa// lta spyod 'di lta bu yi sgo nas btags// thabs dang shes rab 'brel btags theg pa gsum// thabs chen dag la btags pa theg pa bzhi// shes rab gcig pos btags pa'i theg pa gcig/ thabs dang shes rab 'brel pas des chog theg/ theg mchog dam pa 'di ni shes gyur na// rtsol byas theg pa gzhan la rag ma lus// nges don gcig bu 'di don shes gyur na/ / thos pa mang bo'i mchog dgrol ba'i mchog/ des na thos pas sgro 'dogs chod par byas// 'di don mi brtson thos pa mi sogs pa// ma rig rnam rtog bral ba'i bdud mi grol// 'di don mi rdzogs las lam mi 'dzem pa/ / 'di don mi 'grub phyi mar ngan song lhung// rdzogs chen ji tsam cig gis rdzogs bstan pa// 'dir zhugs sgo kun zhugs rdzogs 'gyur ba de// kun gzhi mnyam pa'i ngang la gnas tsa na/ / 'khor 'das kun dang gnyis med de la rdzogs// 'phags pa'i bden bzhi nyan thos lam la rdzogs// rten 'brel don yang rang rgyal lam la rdzogs// byang chub sems dpa'i sems bskyed de la rdzogs/ / pha rol phyin bcu lam lnga de la rdzogs// gcig la gnas pa'i bgrod pa sa rnams rdzogs// dkyil 'khor kun zhugs rig pa'i dbang chen rdzogs// lha yi dkyil 'khor spyan drangs bstim pa de la rdzogs/ / 'phags pa mnyes byed mchod pa la sogs rdzogs// khrims dang sdom pa dam tshig de la rdzogs// nyes pa bshags pa'i 'gyod tshangs de la rdzogs// legs par smin pa'i smon lam de la rdzogs/ / nyan thos rang rgyal byang sems 'bras bu rdzogs// rgyal ba'i sku lnga thob dka' de la rdzogs// thams cad mkhyen pa'i ye shes de la rdzogs// 'bras bu spyod phyir rgyu yod med kyang rung// de phyir chos kun rdzogs pas rdzogs chen yin/ / 'og ma gzhug par bya phyir rdzogs chen gces// rdzogs dang ma rdzogs tha snyad tsam yang med// ces gsungs so// byang chub kyi sems shes bya mtha' gcod las// mkhas shing rgyud dgrol ba dang sgo bsdus ba'i le'u ste bdun pa'o/ /// de nas byang sems kun bzang gis// don man ngag gis bsgrub cing mdo don bsdus pa 'di gsungs so// kye sems dpa' rdo rje legs par nyon cig/ chos nyid goms shing rtogs pa'i rtags bstan pa// zhen pa chung zhing gang la'ang 'dzin pa med// ma nor don gyi kun gzhi 'gyur med gsal// rtags chen de yod rtags gzhan khar ma lus// mngon shes rdzu 'phrul stobs dang lung ston pa/ / 'byung ste de la nges med gzhan gyi bya// mnyam ba'i tshul gyis gol sgrib 'di ltar spang// gar yang mi 'gro 'dug pa mi bzhin du// mi lta mi sgom mi spyod mi srung bas/ / a ti spros med ngang la gnas tsa na// 'og min lta sogs gnas lugs gol mi 'gyur// mnyam pa'i tshul gyis bdud rnams 'di ltar 'dul// khyim bdag dpa' bos bsrungs ba'i bud med ltar/ / mnyam pa'i gter la yid ches ma bral na// bdud bzhi bar chad sprul pa ji snyed pa// klan ka mi tshol btsal yang thugs pa med// ci phyir rdzogs chen spong len med bstan pa// thams cad dag par gnas ba'i spong len med/ / rdzogs chen ma spangs bral ba'i thabs bstan pa// thig le gcig la rdzogs pas sgrubs pa med// btsal na 'khrul cing ma btsal gzhag na don// mi sgrub mi spong thabs kyis rdzogs shing bral/ / rang bzhin med shes 'bras bu 'byin mi nus// mi rtsol thabs kyis zin pas ngang gis bral// a ti mi sgrub rdzogs pa'i thabs bstan pa// rang bzhin med par shes pas mi 'grub cing// thabs kyis gcig la gnas pas 'grub par 'gyur/ / dper na rnga ma'i snying po gzung dang 'dra// de phyir rdzogs chen bya btsal med pa nyid// pa na se yi 'bras bu smin pa las// sman bar bya phyir rtsol ba mi byed ltar/ / man ngag de ltar shes na don kun 'grub// bstabs pa'i mtha' bcu thig le nyag gcig ste// thig ni chos kun gtso ste de bzhin nyid// de nyid ma nor nges pas le zhes brjod// thig le 'bras bu'i sgra yis thams cad sdud/ / 'dus pa'i don rnams gcig pa'i thig le nyid// thig le gcig tsam mi 'dzin grub pa'i mtha'// sems dpa' rdo rje da yang tu nyon// bslab pa'i mtha' bcu byang chub sems nyid de/ / byang chub sems las bslab pa'i mtha' bcur shar// de yang sems la ldog tshul bzhi ru bstan// byang sems gnas lugs ye grub chen po'i klong// de la grub tu med pas nam mkha' 'dra// bya btsal bral bas gzhan la rag ma lus/ / shar lugs nyi zla'i 'od ltar dgag tu med// ye shes mthong gsal theg pa'i shan phye nas// gol sa shugs la chod bas g.yang sa dbyings su chod// yin lugs dmigs med chos nyid klong brdal nas/ / go bzlog dngos yin lta ba la bzla ste// ye yin chig stong lta ba'i yul las 'das// byang chub sems kyi grol lugs rgyun chad med// rgyun chad med pas dus gsum mnyam nyid klong/ / thams cad ye sangs rgyas pas skye shi brlag/ sems dang rdo rje da yang rab tu nyon// byang chub sems kyi gnas lugs gnyis su med// lta ba phyogs chen klong chen yin par bshad// byang chub sems kyi shar lugs cir yang shar/ / spyod pa nges med klong chen yin bar bshad// byang chub sems kyi yin lugs cir yang yin// sgom pa klong chen dmigs med yin bar bshad// byang chub sems kyi grol lugs nyid du grol/ / 'bras bu mnyam nyid klong chen yin par bshad// des na sems nyid kun gyi bdag nyid do// zhes gsungs so// byang chub kyi sems shes bya mtha' gcod las// man ngag bstan pa'i mdo don bsdus ba'i le'u ste brgyad pa'o/ /// de nas rdo rje sems dpa' yis// kun tu bka' la yang zhus pa// ston pa'i ston pa kun tu bzang// 'khor 'das thams cad thig le gcig/ thig le nyid du grol lags sam/ / kun bzang ston pas bka' stsal ba// sems dpa' rdo rje rab tu nyon// thig le nyag gcig de nyid kyis// 'gro ba kun la rang bzhin gnas// gnas kyang de nyid don ma rtogs// gnas dang ma shes bar do la/ / thig le ngo yi sprad pa ni// dwa phrug ma dang phrad pa 'dra// de nyid ngang la ting nge 'dzin// gnas dang mi gsal bar do la// mi gsal gsal bar byed pa ni// sgeg mo me long lta ba bzhin// gnas dang rjes kyi shes pa ni/ / rjes dang rmi lam bar do la// bag chags dag gis mtshams sbyar ba// chu yi rgyun bzhin rgyun du gnas// gal te phung po 'dor ba na// skye shi gnyis kyi bar do la// nyams myong dag gis 'phro 'thud bas/ / rkong chad pa la wa 'dzugs 'dra// de nas srid pa bar ma do// stobs kyi rta zhon bde la gnas// rig pa'i rgyal po rang sa zin// yang rab don du de lta min// sems dpa' rdo rje da yang nyon/ / de don gsal bar bstan par ni// rang bzhin gnas pa'i bar do la// gtan tshigs chen po rnam bzhi yi// phyi nang kun gyi sgrog 'dogs chod// gnas lugs dgongs pa gtan la dbab// ting nge 'dzin gyi bar do ru/ / gnas lugs 'od gsal ngang la gzhag/ rang rig rgyal po 'od gsal 'di// sgoms pas rnyed pa ma yin te// ma sgoms pas kyang rnyed mi 'gyur// bsgom dang mi sgom tshig las 'das// bsgom du rdul tsam med pa la/ / yongs su skad cig med bsams na// rang rig rgyal po 'od gsal 'di// gnyid log rmi lam bar do la// goms pa'i ngang la gnyid log ste// phyi yi sgo lnga mi gsal yang// nang gi rig pa rang gsal te/ / bum pa'i nang gi mar me bzhin// ngo bo'i don las g.yos ba med// 'od gsal don du bzhugs zhes bya// gal te sna tshogs rmi na yang// rkyen rtog ngan pas bar mi gcad// gdams ngag dran pas rig pa gsal/ / rmi lam sgyu lus zhes kyang bya// de las ma g.yos brtan pa thob// des na skye shi bar ma dor// gnyen po med pas 'jig pa med// 'gyur med skye shi bral ba'o// de nas srid pa bar ma dor/ / gong ma'i don las ma g.yos pas// dper na me bdun chu gcig gis// snang ba 'di rnams bshig gyur kyang// nam mkha' g.yos pa med bzhin du// 'byung ba las grub lus bshig kyang/ / rig pa'i rgyal po sems nyid la// de la g.yos pa ci yang med// dper na nam mkha' nyi zla shar ba bzhin// rang rig rang shar mngon du gyur// zhes gsungs so// byang chub kyi sems shes bya mtha' gcod las/ / bar do lnga bstan ba'i le'u ste dgu pa'o//// de nas sems dpa' rdo rjes yang zhus pa// kye/ ston pa'i ston pa byang sems kun tu bzang// gtan tshigs bzhi yi bye brag ji ltar lags// de nas byang sems kun bzang gis/ / de nyid legs ldan sems dpa' rdo rje nyon// gtan tshigs don la rnam pa bzhi// rang bzhin skye med gtan tshigs kyis// chos kun skye ba med par bstan// rol pa 'gag med gtan tshigs kyis/ / chos kun 'gag pa med par bstan// mtshan nyid gnyis med gtan tshigs kyis// chos kun gnyis su med par bstan// ngo bo rang grol gtan tshigs kyis// bya btsal med par rang sar grol/ / de yang rdo rje sems dpa' nyon// de yang bye brag bzhi ru bstan// phyi nang sgro 'dogs bcad pa na// gtan tshigs dag ni bzhi po la// gzhan sel don gnyer gnyis gnyis bstan// rang gi don la 'jal ba na/ / sems nyid don la 'jal tshul bzhi// sems nyid gnad du phab pa'o// tshig re don re mtshon tsa na// re re'i phyogs las 'thas pa yis// gtan tshigs bzhi po gcig gis ngang// gtan tshigs bzhi po gcig gis ngang/ / don ni mtha' dag mtshon tsa na// thun mong ma yin gtan tshigs bzhi// gcig la bzhi rdzogs dag tu bstan// des na bye brag rnam bzhir bstan// rdo rje sems dpa' da yang nyon// de la ma 'dres yongs rdzogs ni/ / de yang de bzhin bye brag bzhi// ma 'dres pa yi lta ba ni// 'khor ba dang ni 'das pa'i chos// ma 'dres yongs su rdzogs pa'i mdangs// rdzogs pa chen po'i man ngag ni// chu yi gnyer ma lta bur bshad/ / yongs su rdzogs pa'i lta ba ni// ji ltar snang ba'i chos rnams kun// ye nas skye med stong pa'i ngang// rdzogs pa chen po'i man ngag ni// nyi shar rgyal po lta bur bshad// ma 'dres yongs su rdzogs pa yi/ / dbyer med pa yi lta ba ni// snang ba dang ni stong pa'i chos// ye nas dbyer med rang grol nyid// rdzogs pa chen po'i man ngag ni// chu zla gser gling lta bur bshad// ma 'dres yongs su rdzogs pa yis/ / thams cad rab tu grol bar byed// rgyan gyi cho 'phrul rnam bkod pa// kun tu bzang po'i rol ba'o// rang bzhin kun tu bzang mo'i ngang// dngos med byang chub sems kyi dbyings// zung 'jug sems kyi mtshan nyid do/ / thams cad rang grol ye shes che// rgyu rkyen 'bras bur mi byed pas// bdag nyid chen po'i sangs rgyas sku// zhes gsungs so// byang chub kyi sems shes bya mtha' gcod las/ / gtan tshigs bzhi bstan pa'i le'u ste bcu pa'o//// de nas sems dpa' rdo rje chen po la bka' stsal pa/ de yang sems dpa' rdo rje rab tu nyon// shes bya phyogs su mthas par 'dzin pa la// shes bya bzlog thub go bzlog ni/ / don bskor bcu yis gtan la phab ste bstan/ kha dang bcu yi zhen skyo bzlog pha dang// gzhi 'dzin drug gis gzhi nyid gzung ba dang// sde skor bskor gyi lta ba gtan la dbab/ / bzhi tsho bzhi yis lta ba thag gcad la// dgos pa lnga yis gzer chen gdab pa dang/ gnad ka drug gi the tshom spros pa gcad// rtogs pa'i gdeng drug gdams gsum la bzla ba// ngo sprod gsum las nges tshul bdun brgyas gdab/ / gzhan mos bskyed pa'i chos bzhin rgyan yang gdags// brjod bya bzhi la tshig gi klong du bskyal// spyi don dang po kha bstan bcu bstan pa// slob pa lobs pa bzhi dag slob ma dag/ blo dngos gnyis 'dod rtogs pas chog par bshad// a ti zab dang gang zag du ma yin// dkar po mjug rings nag po mjug mthung dang// zhe 'dod bcas dang thams cad chos nyid 'dod// bzhi 'dzin du ni gzhi 'dzin rigs pa dang/ / ma khegs ye shes mi slod chos nyid dang// 'gyur med rang so rkyen gyi dbang mi 'gyur// rtogs na ye shes rang grol chen po yin// spyi don gsum pa sde skor bdun bstan pa/ / rang gzhan bzhi zhes ngo bo lhun gyis grub// dam bcas nges med gtan tshigs go bzlog gces// dus gsum mtshan nyid gnas kyi gdams ngag dang// rgyu zad rkyen zad gdams ngag tshig gcig gces/ / spyi don bzhi pa bzhi tsho bzhi bstan pa// chings bzhi tshul bzhi chos bzhi ro snyoms bzhi// khams gsum rang grol rang grol chen po'i chings/ sangs rgyas med pas dge la mi ltos chings// skad rigs du ma gzhi nyid mi 'gyur chings/ / khams gsum srog bcad bag chags mi sgribs chings// snang tshul tha dad yin tshul nges pa med// grol tshul so so'i gnas tshul dbyings gcig po// gnas pa bzhi che 'byung ba rgyu che'o/ / khyab pa thugs rje grol ba dgongs pa che// bzhi tsho tha ma ro snyoms bzhi bstan pa// sems nyid sangs rgyas nyid bas mchod pa med// spangs thob gnyis med sa lam bgrod pa med// sems las sku med snying po bsgrangs sa med/ / gnyis 'dzin de rnams gnyis med ro snyoms gces// spyi don lnga pa dgos pa'i gzer lnga ni// rang byung chen po lta ba'i gzer chen la// 'gyur ba med pa'i dgos pa de la yod// tshogs drug lhug pa gdams ngag gzer chen la/ / bsgom mi dgos pa'i dgos pa de la yod// snang srid bzhi bzhes rang grol gzer chen la// bsgrub mi dgos pa'i dgos pa de la yod// 'gyu ba chod pa gnad kyi gzer chen la/ / rang sa zin pa'i dgos pa de la yod// brtsis gdab bral ba dam tshig gzer chen la// bsrung mtshams med pa'i dgos pa de la yod// spyi don drug pa gnad dka' drug bstan pa/ / yar la sangs mi rgya ba'i gnad dka' dang// bar du snang la mi ltos mar mi skye// rig pa gcig la ye shes du ma 'phro// sangs rgyas mi mang sems can nyung mi 'gro// spyi don bdun pa sde bdun gdams ngag gsum/ / 'phags pa thugs rje mi re zla mi dgos// bag chags dbang du mi 'gyur rig mi bcud// 'gro drug g.yang sa chod pas bdud bzhi choms// des ni gsang ba'i dgra gsum chod pa'o// mthu khongs dang ni khyim khongs sdig khongs gsum/ / thams cad sems nyid rang grol sangs rgyas so// brgyad pa ngo sprod gsum las sangs tshul bdun// dang po lta ba stong pa 'byung ba chos nyid dang// rig pa rang grol nyid du ngo sprad do/ / stong pa gsal sangs 'byung ba chos nyid sangs// rig pa rang grol nyid du sangs pa dang// rang bzhin bzhi sangs bag chags rgyu sangs dang// 'gyu ba dang sangs rnam rtog ngo bo sangs// dgu pa gzhan mos bskyed pa'i chos bzhi ni/ / chos nyid bsam du med la longs spyod dang// 'dus byas dge ba'i rtsa ba rgyun mi gcod// skye shi gnyis su med pa'i don rtogs dang// sems can sbom phra kun la srog mi gcod/ / bzang ngan gnyis su med pa'i don rtogs dang// bla ma dkon mchog gsum la sri zhu bskyed// bdag gzhan gnyis su med pa'i don rtogs kyang// sems can kun la g.yo sgyu zol khram spongs// spyi don bcu pa brjod bya du ma rnams/ / brjod bya mang dang tshig gcig klong du bskyal// skye med ngang la lhun gyis grub pa'i dbyangs// byar med klong la 'dzin med rig pa nyid// phyogs med shar te spyod yul rig pa nyid/ / lta ba thod rgal lhun grub chen po'o// sems dpa' rdo rje chen po de yang nyon// gza' gtad med pa'i lta ba la// de nyid du yang lta ba med// snang ba med pa'i chos nyid la// ma btsal bzhag na bsgom pa yin/ / ngo bo nyid ni dmigs su med// ji srid cir snang spyod pa kun// bdag nyid chen po'i mdzad spyod pas// de la spyod dang mi spyod med// da yang sems dpa' rdo rje nyon// 'gro don ma lus rgyun du rdzogs/ / ma sbyangs sgrib pa ka nas dag/ ma bsags tshags chen ye nas rdzogs// ma bsgral khams gsum gnas su stobs// ma phul mchod pa gnas su thim// ma blangs dngos grub rang la shar// ma bskur rig pa rang dbang thob/ / ma bltas lta ba kun tu gsal// ma bsgoms ting 'dzin yengs pa med// ma 'gags spyod pa shugs la shar// ma bcom rtog pa'i rgyu 'grul bral// ma sbyangs dus gsum 'du 'bral med/ / ma bsrungs dam tshig nyams pa med// ma bsgrubs 'bras bu bdag nyid che// ma gzung thugs rje kun la snyoms// des nas bya zin bya mi dgos// de ltar sus rtogs byas mi 'gal// zhes gsungs so/ / byang chub kyi sems shes bya mtha' gcod las// shes bya go bzlog pa dang la bzla ba'i le'u ste bcu gcig pa'o//// de nas sems dpa' rdo rjes yang zhus pa/ kye/ ston pa byang sems kun tu bzang/ / rdzogs chen bya bral klong chen la// bdud bzhi'i 'jigs pa ji ltar lags// bdud bzhi rtogs na ji ltar lags// kun bzang ston pas bka' stsal pa// sems dpa' rdo rje rab tu nyon// bdud kyi rtsa ba nyon mongs bdud/ / de la phung po'i bdud du byung// de las lha bdud gzung dang 'dzin// de las skye shi 'chi bdag bdud// bdud rnams rang sems shes na// bdud kyi nyams len sems la phan// de yang sems dpa' rdo rje nyon/ / gti mug mun pa med pas na// chos sku mkha' khyab don mi rnyed// de bas gti mug chos sku nyid// zhe sdang ngo bo med pa la// chos sku'i mkhyen tshad su yis rtogs// 'dod chags chu bo med pas na/ / thugs rje 'gag med rgyun chad med// nga rgyal brag chen med pas na// sangs rgyas che ba su yis mtshon// phrag dogs rlung chen med pa na// thugs rje mkhyen pa'i ye shes dang// lhag mthong ye shes 'char ba med/ / des na dug lnga bdud ma yin// sems nyid rang byung ye shes kyi// yon tan chen po 'char ba yin// gzugs la sogs pa lnga med na// sangs rgyas chad pa'i skyon du 'gyur// gzugs ni snang mdzad chos kyi sku/ / tshor ba rin 'byung longs spyod sku// 'du byed don grub sprul ba'i sku// rnam shes mi bskyod rdo rje'i sku// 'du shes mtha' yas ngo bo'i sku// des na phung po'i bdud ma yin// ye nas sems nyid sku lnga grol/ / byang chub sems kyi rang bzhin ni// snang ba ma 'gags rang byung la// zhen pa ma bcos ye shes te// thams cad ma bcos de kho na// thams cad gnyis med bde chen la// des na lha bdud sems su grol/ / byang chub sems kyi rang bzhin la// pha zhes bya ba'i rgyu yang med// ma zhes bya ba'i rkyen yang med// rgyu rkyen med pas skye ba med// skye pa med pa'i sems nyid la// dus gsum sangs rgyas dgrar langs kyang/ / de la zin cing sod pa med// des na sems nyid skye shi bral// zhes gsungs so// byang chub kyi sems shes bya mtha' gcod las/ bdud bzhi rang grol ba'i le'u ste bcu gnyis pa'o//// de nas yang sems dpa' rdo rjes zhus pa/ kye/ ston pa byang sems kun tu bzang po lags// a ti bya bral klong chen dgongs pa yi// 'gro drug g.yang sa sems su ji ltar grol// gsang ba'i dgra gsum sems su ji ltar grol/ / de nas ston pa kun tu bzang po yis// sems dpa' rdo rje mchog la bka' stsal pa// a ti bya bral klong chen dgongs pa ni// bya byed theg pa gzhan la bltos ma yin// a ti cig car grol ba'i mchongs po che/ / thams cad yebs kyis chod pa'i rlabs po che// snang srid gsal bar byed pa'i 'od po che// don dang bral pa med pas brtson 'grus che// mnyam pa'i ngang la gnas pa'i rnga bo che// skye med ngang la gnas pa'i bsam gtan che/ / 'gran zla gang yang med pa'i rdzogs pa che// 'gro drug sems su grol ba'i stobs po che// shes rab pha rol phyin pa'i don po che// che ba dgu dang ldan pa'i a ti 'di/ / theg pa dgu yi nang nas mchog tu bsngags// gnyis su med pa'i chos nyid byang chub sems// 'gyur ba med pa'i bde chen lhun gyis grub// mtha' dang dbus med mkha' ltar kun la khyab// rang byung dbyings nas rig pa 'di shar bas/ / 'gro drug ma lus kun tu bzang po'i ngang// sems nyid kun bzang med pas 'gro drug med// sems dpa' rdo rje chen po yang nyon cig/ rang bzhin lhun grub bdag nyid mngon sangs rgyas/ / de phyir sangs rgyas chos la mi brten te// chos ni sems can rnams kyi lta ba yin// lam pas mtshon pas byang chub ma yin kyang// thog ma nyid nas mgon po dri med nyid// de nyid chos la brten pa ma yin te/ / ye nas mi bskyed dbyings su// rang byung ba'o// de phyir byis pa'i chos kyis 'tshang mi rgya// chos ni tshig phyir 'brang zhing tshig mtha' yas// rang byung ye shes nyid ni tshig mtha' bral// de phyir de nyid don la yi ge med/ / ye shes rgyal po tshig las 'das pa ste// smra ba'i khyu mchog gzhan gyis dring mi 'jog/ rang rig rgyal po tshig las 'das rtogs na// phyi nang snod bcud bdag nyid chen por ldan// rang rig ye shes skye med dbyings nyid nas/ / dus gsum 'du 'bral med par bzhugs pa la// gnas la dben dang mi dben gnyis su med// chos sku bde ba chen po'i ngang nyid nas// ye shes ma 'gags so sor gsal ba ni/ / rgya mtshor gza' skar shar ba lta bu'o// don la gnyis med gnyug mar lhun gyis grub// gnyug ma nyid la dus gsum rtog bral bas// des na gsang ba'i dgra gsum sems su grol// sems dpa' rdo rje chen po da yang nyon/ / bzhi ni lhun grub phyogs med la// phyogs med shar nas zang thal yin// gza' gtad med pas lta ba yin// dper na bya rgyal khyud chen ltar// rtsol ba med par mkha' la rlom/ / 'bar ba med par dgung mtha' yas// 'og ma'i g.yang la ya mi nga// ri klungs thams cad khobs 'og chud// chos dbyings yangs pa'i klong du sleg/ ye shes phyogs med zang thal te/ / rnam rtog ma sbyangs rang sar grol// 'khor ba'i snang ba rang sar dag/ ye nas phyi dang nang med pas// thig le yangs pa'i klong chen de// rang rig thugs kyi nyi ma shar// khyab brdal ye shes ye nas brdal/ / phyi nang gsang gsum mnyam par gnas// nyag gcig rtogs med rtog mtha' bral// bar do med par chig gcod de// rnam par shes pa chos dbyings 'das// zhes gsungs so// byang chub kyi sems shes bya mtha' gcod las/ / 'gro drug dang rtog gsum rang grol gyi le'u ste bcu gsum pa'o//// de nas yang sems dpa' rdo rjes zhus/ kye/ ston pa byang sems kun tu bzang// mdo lung chen po 'di nyid kyi/ / mdo yi grangs ni du ru nges// de la spros pa'i grangs ni du// de yi dmigs gzung gang ltar lags// rang bzhin chen po bcur gsungs pa// de la grangs ni du ru nges// de yis dmigs gzung gang ltar lags/ / zhes zhus pas/ de nas byang sems kun bzang gis// sems dpa' mchog la bka' stsal pa// nyon cig sems dpa' rdo rje che// mdo lung chen po bcu ru 'dus// bye brag lnga bcu rtsa lngar bshad/ / gcig mdo byang chub sems kyi mdo// chos kun byang chub sems su 'dus// nga gnyis bcu gcig bcu par bstan// gnyis mdo rnam par grang ba'i mdo// 'khor 'das gnyis su ma 'gags pa/ / bdun pa'i nang du de don bstan// gsum mdo phun sum tshogs pa'i mdo// ston pa bstan pa 'dus pa'i 'khor// bco lnga'i bstod la sogs par bstan// bzhi mdo bye brag 'byed pa'i mdo// rnal 'byor rnam bzhi'i bye brag ni/ / brgyad pa'i nang du de nyid bstan// lnga mdo che ba lnga yi mdo// khyad par 'phags pa'i che lnga ni// bco lnga pa yis smad nas bstan// drug mdo gol sgrib bstan pa'i mdo// yang na drug gi gol sgrib ste/ / dgu pa'i nang du de nyid bstan// bdun mdo gtan la 'bebs pa'i mdo// 'khor 'das gtan la phab pa ni// nga bzhi pa yin nga du bstan// brgyad mdo nges par bstan pa'i mdo// rang bzhin brgyad pa nges bstan brgyad/ / so lnga so dgu de dag bstan// dgu mdo theg pa yas phubs mdo// sems nyid rdzogs pa gtan la dbab// bcu pa'i nang du de don bstan// bcu mdo yongs su rdzogs pa'i mdo/ / rang bzhin bcu yi don nyid de// dgu'am phal nas bstan gyis kyang// lnga bcur kun tu shes par bya// brjod bya mang du phal bstan kyang// don gyi gtso bo lnga bcur bshad// sems dpa' rdo rje da yang nyon/ / rang bzhin bcu yi bye brag ni// mdo lung lnga bcu'i nang du ni// lnga bcu dag tu dmigs bzung ba// dang po dang ni bcu pa ru// dam tshig 'phrin las gtso bor bstan// gnyis pa dang ni bcu gcig par/ / dbang dang sa la sbyang med bstan// gsum pa dang ni nyi shu par// lam la bgrod du med par bstan// bco lnga pa dang rtsa lnga par// lta ba bsgom med ye shes bstan// rtsa gcig pa dang drug pa ru/ / 'brel ba gnyis med lhun grub bstan// mngon du byung ba'i mdo lung bcu// mngon par sangs rgyas che bar bshad// bzhi pa dang ni so gsum par// 'phrin las ye shes sgrib med bstan// bcu gsum pa dang bcu gnyis par/ / lta ba dam tshig bsrung med bstan// lnga pa dang ni so gnyis par// lhun grub lam bgrod med par bstan// so drug pa dang so bzhi par// lung chen sa sbyang med par bstan// rtsa dgu pa dang bcu bdun par/ / dkyil 'khor 'bras bu gnyis med bstan// ma nor nges pa'i mdo lung bcu// chos dbyings sangs rgyas che bar bshad// zhe gcig pa dang bcu bzhi pa// sa sbyang dam tshig bsrung med bstan/ / so brgyad pa dang dgu pa ru// ye shes dang ni lta ba bstan// so lnga pa dang bcu dgu par// lam bgrod med dang phra ba bstan// bco brgyad pa dang brgyad pa ru// 'phrin las gnyis med 'brel pa bstan/ / bzhi bcu pa dang nga gnyis par// lung chen thog 'bebs lhun grub bstan// rgyu 'bras 'das pa'i mdo lung bcu// bdag nyid sangs rgyas che bar bshad// rtsa gnyis pa dang sum cu par// lta ba'i ye shes sgrib med bstan/ / rtsa bzhi pa dang rtsa brgyad par// sa sbyang med dang rang byung bstan// so bdun pa dang so gcig par// 'phrin las btsal med gnyis med bstan// rtsa gsum ba dang rtsa drug par// dam tshig bsrung med phra ba bstan/ / zhe bzhi pa dang nga drug par// lam bgrod med dang lhun grub bstan// bya bral rdzogs pa'i mdo lung bcu// de yin sangs rgyas che bar bshad// zhe brgyad pa dang so dgu par// 'brel pa gnyis med lung chen bstan/ / zhe lnga pa dang so bdun par// lta ba dang ni phra ba bstan// zhe drug pa dang zhe bdun par// dam tshig dang ni 'phrin las bstan// zhe dgu pa dang nga gcig par// sa sbyang med lung lam med bstan/ / lnga bcu pa dang nga gsum par// ye shes sgrib med lhun grub bstan// gtan la phab pa'i mdo lung bcu// sangs rgyas med pa'i che bar bshad// ces gsungs so// byang chub kyi sems shes bya mtha' gcod kyi rgyud las/ / mdo lung lnga bcu bstan ba'i le'u ste bcu bzhi pa'o//// sems dpa' rdo rjes yang zhus pa/ kye/ ston pa byang sems kun tu bzang// mdo lung chen po 'di nyid la// rgyud kyi dngos po mi 'tshal lam/ / de yi dngos po ji ltar lags// zhes zhus pas/ de nas byang sems kun bzang gis/ sems dpa' rdo rje la bka' stsal pa/ nyon cig sems dpa' rdo rje che// lta spyod dkyil 'khor dbang dam tshig/ 'phrin sgrub ting 'dzin mchod sngags kyis// rgyud kyi dngos po gtan la dbab// rdzogs pa chen po bden gnyis las// rtog pa gsum la mi gnas shing// de nyid ma nor don mthong yin/ / mtha' bral ye shes phyogs cha bral// spyod pa rnam pa bzhi yin te// rtsis gdab med pa smyon pa 'dra// 'dzin chags med pa rlung dang 'dra// nyam nga med pa seng ge 'dra// mtshan ma rang grol sprin dang 'dra/ / rang rig mtha' dbus med pa'i dkyil// rang byung ma 'gags shar bas grol// rang rig rang gsal dkyil 'khor la// de nas dkyil 'khor bskyed du med// rang byung ye shes rang shar bas// rig pa'i rgyal po rang dbang thob/ / rang sems bla ma ngo mtshar che// mtshan ma dbang la rag ma lus// ye stong ye bral stong pa nyid// rtsis gdab med pas phyal pa la// bla ma grub pas gcig pu nyid// bsrung mtshams gnyis med lhun gyis grub/ / rgyal ba'i zhal nas gsungs pa'i 'phrin// de la thos bsam byed pa las// zug rngu zhi la rang rig rgyas// mtshan ma dbang 'dus nga bdag chod// sems nyid ye sangs rgyas pas bsnyen/ / bla mas bstan pas nye ba snyen yin// de nyid ngang gnas bsgrub pa'i mchog/ re dogs chod pas sgrub chen po// skye pa med pas ye nas ting// 'gag pa med pas nge zhes bya// skye 'gag gnyis med ting nge 'dzin/ / de nas lam la bgrod mi dgos// sa lam mtho dman med pas na// bla na med pa'i mchod pa yin// gnas lugs ngang la rab gnas pas// rgyal ba sras bcas mnyes pa'i mchog/ gnyis med bde chen gsang sngags don/ / de nyid rtogs pa rig sngags yin// rtogs pa'i rang gnas gzungs sngags la// brjod med brjod bral ye shes mchog/ sngags dang phyag rgya tshul gcig dang// mi g.yo ba ni sku yi rgya/ / mi bskyod pa ni ye shes te// mi zhen pas na bdag med cing// thams cad mnyam nyid bde ba che// 'dren dang 'dren bcas rgyud kyi dngos// zhes gsungs so// shes bya mtha' gcod kyi rgyud las// rgyud kyi dngos po bstan pa'i le'u ste bco lnga pa'o/ /// de nas sems dpa' rdo rjes yang zhus pa/ kye/ ston pa bya nga sems kun tu bzang// mdo lung chen po 'di nyid la// 'dren thabs rnam pa du zhig mchis/ / 'dren pa mchog gis bshad du gsol// zhes zhus pas/ kun bzang 'dren gyis bka' stsal pa// nyon cig sems dpa' rdo rje che// ma 'ongs skal ldan don gyi phyir// 'dren pa'i thabs ni rnam pa bcu/ / spyi don bsdus dang rnam par dbye// rang rkyen gnyer dang rang bzhin lta// ldem dgongs brgyad dang 'brel bar sbyor// gtar kha gags sel bsnol mtshams 'phen sdud dang// mtshon pa dpe dang tshad ma bka' gzhung ngo/ / de la spyi don sdud pa ni// seng ge'i mchongs pa ji bzhin du// chos nyid khog don bstan pa ni// bcu gsum rtsa gcig pa ru bstan// de la rnam par 'byed pa ni// pya g+h+ya'i mchongs pa ji bzhin du/ / gzhung 'di'i don rnams thabs su bcad// lnga bcu bzhi pa'i nang du bstan// rang rkyen gnyer gyi bshad pa ni// ru sbal snur 'gros ji bzhin du// 'bru stong mi gzhag gzer bus gdab// bzhi pa lta bur kun la sbyar/ / de la rang bzhin lta ba ni// khyud chen nam mkhar lding ba bzhin// chos kun spyi rgya rlabs kyis gcod// bzhi bcu la sogs kun nas gsal// de la ldem dgongs brgyad bstan pa// sna phyug brag la 'gro 'dzeg ltar/ / mi 'tsham 'tsham par bstan pa ni// so gsum la sogs phal du bstan// de la 'brel bar sbyor ba ni// ngang mo'i dal 'gros ji bzhin du// don gyis 'brel du bstan pa ni// so gnyis pa la sogs par bstan/ / de la gtar kha gags sel ni// glag mo gzan gyi chos nyid ltar// gol bsgrib brdar sha gcod pa ni// so gsum nyid dang dgu pa la// sogs pa phal du bstan pa ni/ de la bsnol 'tshams 'phen bsdus ni/ / mi 'jigs phrug gu rtsal sbyong ltar// gong 'og 'khrug rnams don sdeb pa// lnga bcu bzhi pa ji bzhin no// de la mtshon dpe bstan pa ni// me long dag la bzhin gsal bzhin// chos nyid mtshon par byed pa'i dpe/ / so brgyad pa la sogs par bstan// de la tshad ma bka' gzhung ni// dus kyi 'brug char ji bzhin du// chos kun gtan la phab pa ste// lnga pa la sogs phal nas bstan// 'dren pa'i thabs bcu 'di dag ni/ / rgyal ba kun gyi dgongs pa yin// bstan pa kun gyi me long yin// 'di mi shes par chos bshad ni// dmus long mkha' la mthos 'jal 'dra// mdo lung chen po 'di nyid kyang/ / 'dren pa'i thabs bcur 'dres pa'i yin// zhes gsungs so// byang chub kyi sems shes bya mtha' gcod 'dren pa'i thabs bcur bstan pa'i le'u ste bcu drug pa'o//// de nas yang sems dpa' rdo rjes zhus pa/ / kye/ ston pa byang sems kun tu bzang// sems nyid rdzogs pa chen po ru// theg dgu'i dbye ba ji ltar rdzogs// theg dgu sems su ji ltar rdzogs// zhes zhus pas/ de nas ston pa kun bzang gis/ / sems dpa' che la bka' stsal pa// nyon cig sems dpa' rdo rje che// sems las byung ba'i chos nyid la// bden pa bzhi ru 'byung bas na// sems nyid nyan thos dag tu bstan// sems las byung ba'i chos nyid las/ / rten 'brel bcu gnyis byung bas na// sems nyid rang rgyal dag tu bshad// sems las byung ba'i chos nyid la// bden pa gnyis su byung bas na// sems nyid theg pa chen por bshad/ / sems las byung ba'i chos nyid la// dag pa rnam gsum byung bas na// sems nyid kri ya'i theg par bshad// sems las byung ba'i chos nyid la// de nyid bzhi ru byung bas na// sems nyid u ru ya ru bshad/ / sems las byung ba'i chos nyid la// mngon par byang chub lnga byung bas// sems nyid yo ga dag tu bshad// sems las byung ba'i chos nyid las// thabs dang shes rab gnyis med pas// sems nyid ma hA yo gar bshad/ / sems las byung ba'i chos nyid las// dbyings dang ye shes gnyis med pas// sems nyid a nu yo gar bshad// sems las byung ba'i chos nyid las// rig stong gnyis su med pa la/ / sems nyid a ti yo gar bshad// theg pa dgu ni yas phub ste// sems nyid rdzogs pas gtan la phab// theg pa rim dgu byang chub sems// rang byung ye shes rol par shar// shar bzhin chos nyid byang chub sems/ / nges par theg pa gcig las med// sems nyid rdzogs pa'i theg pa'o// da yang sems dpa' chen po nyon// dbang rnams kun gyi mtshan nyid dang// gzugs snang sku yi dkyil 'khor nyid// ye nas kun bzang sems nyid sku/ / bum pa'i dbang mchog logs na med// sgra grags gsung gi dkyil 'khor nyid// ye nas sems dpa' kun bzang gsung// gsang ba'i dbang mchog logs na med// dran rig thugs kyi dkyil 'khor nyid/ / ye nas sems nyid kun bzang thugs// thugs kyi dbang mchog logs na med// spro ba'i mtshan ma thams cad kun// ye shes skye med 'od gsal nyid// bzhi pa'i dbang mchog logs na med/ / rig pa'i rgyal po nga dbang med// ye nas dbang gi ngo bor chub// bskur ba'i dbang la rag ma lus// lta ba gza' gtad bral ba la// dbang la rag na gza' gtad yin// sgom pa dmigs gtad bral ba la/ / dbang la rag na dmigs gtad yin// spyod pa shugs byung rang grol la// dbang la rag na 'dzin chags yin// dam tshig bsrung mtshams bral ba la// dbang la rag na rtsis gdab yin/ / 'bras bu lhun grub chen po la// ye nas skye med 'od gsal bas// dbang la rag na mtshan bcas yin// zhes gsungs so// shes bya mtha' gcod kyi rgyud las// theg pa dgu dbang bzhi rang la rdzogs ba'i le'u ste bcu bdun pa'o/ /// de nas sems dpa' rdo rjes yang zhus pa// e ma ho// ston pa byang sems kun tu bzang// sems nyid rdzogs pa chen po ru// pha rol phyin bcu lam lnga dang// sngags kyi cho ga ji ltar rdzogs/ / de nas ston pa kun bzang gis// sems dpa' che la bka' stsal ba// nyon cig sems dpa' rdo rje che// byang chub sems kyi rang bzhin las// bying dang rgod pa gnyis med pas/ / zhi gnas bde ba logs na med// rang byung ye shes rang gsal bas// sems nyid lhag mthong logs na med// sems nyid chos nyid brdal khyab pas// sems la sbyin pa logs na med// sems nyid ma skyes gzung 'dzin bral/ / sems las tshul khrims logs na med// byang chub sems su kun shong pas// sems las bzod pa logs na med// sems nyid brdal bar 'ub chub pas// sems las brtson 'grus logs na med/ / byang chub sems la g.yos med pas// sems las bsam gtan logs na med// byang chub sems las 'khrul med bas// sems las shes rab logs na med// snang ba gang yang mi 'gog pas/ / sems las thabs nyid logs na med// sems las gzhan du smon med pas// sems las smon lam logs na med// snang grags sems su rang grol bas// sems las stobs nyid logs na med/ / ma btsal ye shes lhun grub pas// sems las ye shes logs na med// des na pha rol phyin bcu sems// da yang sems dpa' rdo rje nyon// tshogs kun mi sog ye rdzogs pas// sems las tshogs lam logs na med/ / sems nyid chos nyid rang bzhin bas// sems mas las sbyor lam logs na med// chos nyid mngon du rang shar bas// sems las mthong lam logs na med// de nyid rang la rang gnas pas/ / sems las sgom lam logs na med// de nyid rdzogs pa spyir khyab pas// sems las thar lam logs na med// des na lam lnga byang chub sems// da yang sems dpa' rdo rje nyon// 'gro drug ye nas sangs rgyas pas/ / sems las bskyed pa logs na med// mi rtog ye shes bgegs bsal bas// sems las 'tshams gcad logs na med// sems nyid byin chen rang bzhin logs na med// thams cad bdud rtsi'i rang bzhin las/ / sems las byin brlabs logs na med// chos kun sems nyid rnams dag pas// sems las rnam rtog logs na med// snying rje chen po'i cir mi mdzad// sems las tshad med logs na med/ / sku gsung thugs dang rang ldan pas// ting 'dzin rnam gsum logs na med// sems nyid 'byung lnga bcom ldan 'das// sems las dbang chen logs na med// yangs pa chos dbyings sems nyid gnas/ / sems las gzhal yas logs na med// rang rig rang gsal ye nas lha// sems las lha bskyed logs na med// rang byung ye shes lung thog phebs// de la dbang bskur logs na med// sangs rgyas sems can gnyis med pas/ / spyan drang bstim pa logs na med// sems nyid ye nas 'gyur med pas// brtan par bzhugs pa logs na med// ye nas bde chen gnyis med la// phyag dang mchod sogs logs na med/ / sgul bskyod thams cad phyag rgya bas// phyag rgya'i mchod pa logs na med// mi gsung mnyam gzhag sngags tshig pas// sgom dang bzlas brjod logs na med// bya ba med pas las rnams te/ / sems las 'phrin las logs na med// mi gzung ye shes chen po la// gtor ma gtang ba logs na med// sna tshogs snod bcud gnyis med pas// sems las lhag bstan logs na med/ / thig le gcig tu kun 'dus pas// dkyil 'khor bsdu ba logs na med// ye shes lhun grub go ldan pas// skal ldan lus bsrungs logs na med// yon tan thams cad lhun grub pas// smon lam gdab pa logs na med/ / sku gsum rang la lhun grub pas// mthar phyin 'bras bu logs na med// ces gsungs so// byang chub kyi sems shes bya mtha' gcod las// pha rol phyin bcu lam lnga sngags kyi cho ga rang la lhun gyis grub pa'i le'u ste bco brgyad pa'o/ /// de nas sems dpa' rdo rjes yang zhus pa/ kye/ ston pa kun tu bzang// khyim dang sdig pa mthu khongs nas// mngon par sangs rgyas ji ltar lags/ / sku lnga sku gsum bye brag gang// de nas ston pa kun bzang gis// sems dpa'i 'khor la bka' stsal pa// sems dpa' rdo rje legs par nyon// nga nyid rtog pas la bzla na// 'dod chags zhe sdang gti mug kyang/ / spang du med de byang chub lam// ye nas rang byung ye shes yin// lus la pho mo yod gyur phyir// byang chub sems la pho mo med// chags pa spyad pas bde ba'i mchog/ gsol 'debs snying po chos sku nyid/ / de tshe bde ba'i chos nyid brgyan// 'ching bar mi 'gyur grol bar nges// byang chub sems la skye shi med// dkar po'i phyogs dang sdig la sogs// byang chub sems la gnyis su med// zhing bcu dbyings su bsgral gyur na/ / de tshe bsgral ba'i chos nyid brgyan// 'khor ba chos nyid ngang du brlag sems nyid ye nas 'od gsal phyir// ngo mtshar rmad du byung rol pa mthu// bya bral nam mkha' ji bzhin te// mi dmigs gti mug chos kyi sku/ / gnyis su med pas shes rab gsal// de ltar rtogs pas ye shes nyid// 'bras bu gzhan nas btsal mi dgos// gdod nas rang byung ngo bo nyid// 'bras bu la yang mi ltos par// sems dang bral bas kun bzang thugs/ / lus dang bral bas kun bzang sku// ngag dang bral bas kun bzang gsung// thugs ni skye med chos sku'i thugs// sku ni longs spyod rdzogs pa'i sku// gsung ni sangs rgyas sprul pa'i gsung/ / da yang sems dpa' rdo rje nyon// sku gsum sku lnga'i bye brag ni// sku gsum don la so sor dbye// chos sku la yang rnam pa gsum// ma ni skye med dpag tu med// chos kyi sku yi chos sku nyid/ / rigs lnga drug pa dpa' bo rnams// chos kyi sku yi longs spyod sku// sems dpa' sems ma'i sprul tshogs rnams// chos kyi sku yi sprul pa'i sku// longs spyod rdzogs la'ang gsum du nges// rdo rje chen po rdo rje dbyings/ / longs spyod rdzogs pa'i chos kyi sku// rigs lnga rigs gsum la sogs pa// longs spyod rdzogs pa'i longs spyod sku// sems dpa' la sogs sprul 'khor rnams// longs spyod rdzogs pa'i sprul pa'i sku/ / sprul sku la yang gsum du nges// smra bsam brjod med shes rab don// sprul pa sku yi chos kyi sku// rnam dag sku lnga gzugs bzang ba// sprul pa sku yi longs spyod sku// sras dang mdzad pa sna tshogs rnams/ / sprul pa sku yi sprul pa'i sku// sku gsum snang tshul dgur bstan kyang// byang chub sems pa ma lus 'bral med// de ni dbyer med rdo rje'i sku// de lta bu yi sku nyid la// zag med bde chen mngon byad sku/ / nges par sku ni gcig las med// gcig ni byang chub chos kyi sku// zhes gsungs so// byang chub kyi sems shes bya mtha' gcod las// dug gsum gyi grol tshul dang sku gsum sku lnga bstan pa'i le'u ste bcu dgu pa'o/ /// de nas sems dpa' rdo rjes yang zhus pa// e ma ho// ston pa byang sems kun tu bzang// rang byung ye shes don ni gang// man ngag gces pa'i don ni gang// de nas ston pa kun bzang gis/ / 'khor rnams kun la bka' stsal pa// nyon cig sems dpa' rdo rje che// dang po rgyu las ma byung rang// pha zhes bya ba'i rgyu yang med// bar du rkyen las ma byung rang// ma zhes bya ba'i rkyen yang med// tha ma gnyen pos mi 'jig rang/ / yul gzhan 'gyur ba'i gnyen po med// 'gag pa med pas rang nyid byung// sgrib pa med pas rang nyid byung// ngo bo sna tshogs snang bas byung// ye ni nas gnas pa yin// ye nas 'gyur ba med pa yin/ / ye nas dngos med dngos ma grub// ye ni des na brjod ma grub// ye ni rang byung shugs las 'char// rig pa rang gsal rang du shes// rig pa ma 'gags gsal bar shes// rig pa bde chen gnyis med shes/ / rig pa ma bcos gnyug mar shes// rig pa rang grol mnyam nyid grol// da yang sems dpa' rdo rje nyon// rang byung ye shes rgyal po 'di// mi 'gyur 'gyur med ye nas gnas// ma 'gags shes pa'i phyir na rig/ rig pa don la mi 'gyur wal// ngo bo don las ma yengs gsal// skye med thugs su chud pas si// de yi don las mi yengs pa// gang gis rtogs na kun tu bzang// rtog par gyur pa gang yin pa/ / de ni man ngag kun gyi mchog/ ma rtogs rtsol ba'i tshi chad yin// des na rtogs pa gtso bor bshad// sems dpa' rdo rje da yang nyon// man ngag ces su bya ba yang// man ni snying bo'i byang chub sku/ / ngag ni rig pa sa le ba// man ni s+t+rong rig ye shes sku/ ngag ni brjod pa'i sgra las 'das/ man ni thugs kyi sgron me phye// ngag ni mgul gyi bum par 'dril// man ni rigs pa sa le ba/ // man ngag ni ljags la bkram pa'o// man na ring rig chos kyi sku// ngag ni mgur nas byung ba'o// man ni rang rig rgyal po yin// ngag ni rang byung ye shes gsal// tshegs chung bas na man ngag yin// go sla bas na man ngag yin/ / bya btsal bral bas na man ngag yin// yon tan lhun grub man ngag yin// sems dpa' rdo rje rab tu nyon la zung// snod ldan kun la de bzhin ston// rab tu gsungs so// byang chub kyi sems shes bya mtha' gcod kyi rgyud las/ rang byung ye shes dang man ngag bstan pa'i le'u ste nyi shu pa'o//// de nas yang sems dpa' rdo rje nan tan zhus pa// e ma ho/ byang sems kun tu bzang/ / sngar du bshad pa'i rang bzhin bcu po dang// shes bya bslab pa'i mtha' bcur gsung pa nyid// tha dad lags sam don khrigs ji ltar lags// byang sems kun tu bzang pos bshad du gsol// byang sems kun tu bzang pos bka' stsal pa/ / sems dpa' rdo rje de nyid rab tu nyon// de ltar bshad pa'i rang bzhin bcu po nyid// shes bya bslab pa'i mtha' bcu nyid du 'dus// bslab pa'i mtha' bcu'i don khrigs ji ltar nges/ / rang byung ye shes ye nas rang shar bas// dbang bskur mchog nyid ye nas bskur du med// dam tshig ye nas gnyis 'dzin bral bas na// dam tshig mchog nyid ye nas bsrung du med// lta ba ye nas gza' gtad bral bas na/ / lta ba'i mchog nyid ye nas blta ru med// phra bas ye nas dmigs gtad bral bas na// bsgom pa'i mchog nyid ye nas lhar mi bskyed// spyod pa ye nas blang dor bral bas na/ / spyod pa'i mchog nyid ye nas spyad du med// lam la ye nas bgrod du med pas na// mkhas la ye nas gnas lugs dgongs pa ni// sa la ye nas bgrang du med pa'i phyir// thos pa'i mchog nyid ye nas brjod dang bral/ / ye shes ye nas sgrib pa med pas na// sgo bsdur mchog nyid ye nas theg gcig sems// 'phrin las ye nas btsal du med pas na// man ngag mchog nyid ye nas bya bral klong// lhun grub ye nas bya btsal bral bas na/ / mdo bsdus mchog nyid ye nas thig le gcig/ rang bzhin bcu ni bslab pa'i mtha' bcu nyid// sems nyid rdzogs pas de ltar gtan la phab// bslab pa'i mtha' bcu bcu phrag bcu bstan pa/ / lhun grub bcu dang gnyis 'dzin bral bas bcu// gza' gtad bral ba bcu dang ngang la gnas pa bcu// blang dor med pa bcu dang don la mkhas pa bcu'o// brjod bral bcu dang theg gcig byang sems bcu/ / bya bral bcu dang thig le nyid 'dus bcu// rig pa'-i rgyal po rang dbang bcu ru lhun gyis grub// dam tshig rgyal po 'dzin med lhun gyis grub// lta ba gza' gtad med par lhun gyis grub/ / sgom pa dmigs gtad med par lhun gyis grub// spyod pa blang dor med par lhun gyis grub// mkhas pa gnas lugs nyid du lhun gyis grub// thos pa brjod bral nyid du lhun gyis grub// sgo bsdur theg gcig sems nyid lhun gyis grub/ / man ngag bya bral klong du lhun gyis grub// mdo bsdus thig le nyid du lhun gyis grub// dbang po rgyal bo rang dbang lhun grub yin// rig pa'i rgyal po rang dbang nyid mi 'da'/ / dam tshig rgyal po 'dzin med nyid mi 'da'// lta ba gza' gtad bral ba nyid mi 'da'// sgom pa dmigs gtad bral ba nyid mi 'da'// spyod pa blang dor bral ba nyid mi 'da'// mkhas pa'i gnas lugs dgos pa nyid mi 'da'/ / thos pa brjod bral dgongs pa nyid mi 'da'// sgo bsdur theg pa'i sems nyid don mi 'da'// man ngag bya bral klong chen nyid mi 'da'// mdo bsdu thig le nyag gcig nyid mi 'da'/ / dam tshig rgyal po 'dzin pa bral pa yin// rig pa'i rgyal po rang dbang gza' gtad bral// dam tshig rgyal po 'dzin med gza' gtad bral// lta ba lta ru med pas gza' gtad bral// sgom pa dmigs gtad med pas gza' gtad bral/ / spyod pa blang dor med pas gza' gtad bral// mkhas pa gnas lugs dgongs pas gza' gtad bral// thos pa brjod bral dgongs pas gza' gtad bral/ / sgo bsdur theg gcig sems nyid gza' gtad bral// man ngag bya bral nyid bas gza' gtad bral// mdo bsdus thig le nyid pas gza' gtad bral// lta ba'i rgyal po gza' gtad bral bas ni// rig pa'i rgyal po rang dbang ngang la gnas/ / dam tshig rgyal po 'dzin med ngang la gnas// lta ba gza' gtad bral ba'i ngang la gnas// bsgom pa dmigs gtad bral ba'i ngang la gnas// spyod pa blang dor bral ba'i ngang la gnas/ / mkhas pa'i gnas lugs dgongs pa'i ngang la gnas// thos pa brjod bral nyid kyi ngang la gnas// sgo bsdur theg gcig sems nyid ngang la gnas// man ngag bya bral klong chen ngang la gnas/ / mdo bsdu thig le nyid kyi ngang la gnas// sgom pa rgyal po dmigs gtad med pa yin// rig pa'i rgyal po rang dbang blang dor bral// dam tshig rgyal po 'dzin med blang dor med// lta ba gza' gtad bral bas blang dor med/ / sgom pa dmigs gtad bral ba'i blang dor med// spyod pa gzang ngan med pas blang dor med// mkhas pa gnas lugs nyid las blang dor med// thos pa brjod bral nyid la blang dor med/ / sgo bsdur theg gcig sems nyid blang dor med// thos pa brjod bral nyid la blang dor med// man ngag bya bral nyid la blang dor med// mdor bsdus thig le nyid la blang dor med// spyod ba'i rgyal po blang dor med pa yin/ / rig pa'i rgyal po rang dbang don la mkhas// dam tshig rgyal po 'dzin med don la mkhas// lta ba gza' gtad bral bas don la mkhas// sgom pa dmigs gtad bral ba'i don la mkhas/ / spyod pa blang dor med pa'i don la mkhas// mkhas pa gnas lugs dgongs pa'i don la mkhas// thos pa brjod dang bral ba'i don la mkhas// sgo bsdur theg gcig sems nyid don la mkhas/ / man ngag bya bra klong chen don la mkhas// mdor bsdus thig le nyag gcig don la mkhas// mkhas pa'i rgyal po gnas lugs dgongs pa yin// rig pa'i rgyal po rang dbang brjod pa bral// dam tshig rgyal po 'dzin med brjod dang bral/ / lta ba gza' gtad bral bas brjod dang bral// sgom pa dmigs gtad bral bas brjod dang bral// spyod pa blang dor med pas brjod dang bral// mkhas pa gnas lugs nyid pas brjod dang bral/ / thos pa brjod du med pas brjod dang bral// sgo bsdur theg gcig sems nyid brjod dang bral// man ngag bya bral klong chen brjod dang bral// mdo bsdu thig le nyid la brjod dang bral/ / thos pa'i rgyal po brjod dang bral ba yin// rig pa'i rgyal po rang dbang theg gcig sems// dam tshig rgyal po 'dzin med theg gcig sems// lta ba gza' gtad bral ba'i theg gcig sems// sgom pa dmigs gtad bral ba'i theg gcig sems/ / spyod pa blang dor med pa'i theg gcig sems// mkhas pa gnas lugs nyid pas theg gcig sems// thos pa brjod dang bral bas theg gcig sems// sgo bsdur byang sems nyid pas theg gcig sems/ / man ngag bya bral klong chen theg gcig sems// mdor bsdu thig le nyid bas theg gcig sems// sgo bsdur rgyal po de nyid theg gcig sems// rig pa'i rgyal po rang dbang bya bral klong/ / dam tshig rgyal po 'dzin med bya bral klong// lta ba gza' gtad bral bas bya bral klong// bsgom pa dmigs gtad bral ba'i bya bral klong// spyod pa blang dor med pas bya bral klong/ / mkhas pa gnas lugs nyid pas bya bral klong// thos pa brjod dang bral bas bya bral klong// sgo bsdur theg gcig sems nyid bya bral klong// man ngag bya btsal bral bas bya bral klong// mdor bsdu thig le nyid pas bya bral klong/ / man ngag rgyal po bya bral klong chen yin// rig ba'i rgyal po rang dbang thig le nyid// dam tshig rgyal po 'dzin med thig le nyid// lta ba gza' gtad med pas thig le nyid/ / sgom pa dmigs gtad med pas thig le nyid// spyod pa blang dor med pas thig le nyid// mkhas pa gnas lugs nyid pas thig le nyid// thos pa brjod dang bral bas thig le nyid// sgo bsdur theg gcig sems nyid thig le nyid/ / man ngag bya bral klong chen thig le nyid// mdor bsdus 'ub bsdus thig le nyid du 'dus// mdor bsdus rgyal po thig le nyag gcig yin// de ltar btsal du med pa'i rang bzhin bcu/ / gang zhig de las rtsol bar byed pas rko// bye chung lco gas nam mkha'i mtha' btsal kyang// mtha' mi rnyed cing rang nyid dub pa ltar// de bzhin bya byed phal gyi lam btsal kyang// lam mi rnyed cing tshi chad nad kyis 'dzin/ / des na bslab pa'i mtha' bcu rtsol ba ma byed cing// rtsol ba de ni tshi chad 'dzin ba'i nad// de nyid ma rtogs ji snyed kha rgyud kyang// bya bral lhun rdzogs nyid lam mi rnyed do/ / zhes gsungs so// byang chub sems shes bya mtha' gcod las// bslab pa'i mtha' bcu bstan pa'i le'u ste nyi shu gcig pa'o//// de nas sems dpa' rdo rjes yang zhus pa/ kye ho ston pa byang sems kun tu bzang/ / bsod nams chos spyod bcu rnams ji ltar rdzogs// de yi don la ji ltar gnas par bgyi/ dmigs su med pa de nyid rab dbye na/ bltas re mthong ba med na mthong ba yin// sems nyid rang bzhin mthong ba 'dra ba yin/ / sems nyid rang bzhin dmigs su med pa la// byang sems kun tu bzang pos bkal stsal pa// sems dpa' rdo rje da yang legs par nyon// byang chub sems nyid shes bya bstan pa ni/ / sems kyi rang bzhin dmigs su med pa la// de rig de nyid klong du gyur pa ni// de bas de nyid gnyis par mi 'gyur te// gnyis med klong du gyur pa mchod pa yin// sems kyi rang bzhin dmigs su med pa las/ kha dog dbyibs med tshon las 'das pa ste// gdod nas ma byung ma skyes de nyid las// sna tshogs 'dod dgu 'byung bas sbyin pa yin// sems kyi rang bzhin dmigs su med pa las// gsung gi klong nas rigs nyid shar ba de/ / sna tshogs sems nyid shes pa nyan pa yin// sems kyi rang bzhin dmigs su med pa la// sems nyid dmigs su med de snying po'i mchog/ thig le chen po yongs kyis mkha' klong de/ / de bzhin 'gyur med gnas pa klog pa yin// sems kyi rang bzhin dmigs su med pa la// 'khor ba'i mun nyid gdod nas ye sangs rgyas// gdod nas gnyis med sems nyid lhun gyis grub// rig pa de bzhin gnas pa 'dzin pa yin/ / sems kyi rang bzhin dmigs pa med pa la// dus gsum dus med brjod dang bral ba yin// brjod dang bral ba'i don ni de nyid la// dmigs cing gang gis bzlos pa 'don pa yin/ / sems kyi rang bzhin dmigs su med pa yin// mtshon par byed pa'i tshig ni ston byed cing// dmigs su med pa dmigs su bya ba'i don// mya ngan 'das pa smra bar bshad pa yin/ / sems kyi rang bzhin dmigs su med pa la// dmigs pa'i dngos po gang yang mi sems shing// dmigs par bya ba'i chos ni rdul tsam med// dmigs pa dngos po gang yang mi sems te// dmigs byed don la sems pa sems dpa' yin/ / sems kyi rang bzhin dmigs su med pa la// sems de ye sangs rgyas par thag chod do// mi skye mi 'gags dmigs su med pa la// dmigs med dmigs su med pa sgom pa yin/ / sngar 'das rgyal ba sras dang bcas pa dang// da ltar phyi ma'i rgyal ba sras bcas rnams// chos spyod 'di bcu rtogs pas 'grub pa'i phyir// bcu po 'di ni rgyal ba kun gyi yum// zhes gsungs so/ / byang chub kyi sems shes bya mtha' gcod las// chos spyod bcu bstan pa'i le'u ste nyi shu rtsa gnyis pa'o//// de nas sems dpa' rdo rjes yang gsol pa// ston pa'i ston pa byang sems kun tu bzang/ / gang la mi rten lta med lta mchog la// de nyid ma btsal bzhag pa'i sgom pa de// byang sems kun tu bzang po nyid kyis rab tu shod// byang sems kun tu bzang pos bka' stsal pa// kun gyi rang bzhin ye nas phyi mo nyid/ / dpe las 'das pas mtshon pa'i don dang bral// tshig las 'das pas brjod pa'i ngag dang bral// sgra las 'das pas thos pa'i yul dang bral// rgyu dang bral bas thob pa'i 'bras bu med/ / rang bzhin med pas bcos pa'i mtha' dang bral/ kha dog med pas dmigs pa'i yul dang bral// ci yang min pas phyogs ris yongs dang bral// btsal du med pas lta ba gza' gtad bral// cir yang mi dgongs cir yang mi g.yo dang/ / cir yang mi bsam cir yang spyad mi bya// gang la'ang ma 'dres sgom du ming yang med// ci yang mi mthong cir yang ltar med de// de lta bu yi ngang la gang gnas pa// tha snyad tsam du sgom zhes de la bya/ / rig pa cir yang 'du shes med na sgom// ji bzhi rang bzhin gzhag na sgom pa yin// bya bral ngang du gnas na sgom pa yin// gsal ba dmigs su med na sgom pa yin// ji lta bur yang ma mthong sgom pa yin/ / ma bcos mnyam par gzhag na sgom pa yin// sgom du med pa'i don la ma yengs na// sgom du med pa'i sgom pa mchog nyid yin// zhes gsungs so// byang chub kyi sems shes bya mtha' gcod las/ / lta sgom bye brag khyad bar bstan pa'i le'u ste rtsa gsum pa'o//// de nas sems dpa' rdo rjes yang zhus pa// ston pa'i ston pa byang sems kun tu bzang// dus gsum rgyal ba'i rang bzhin chos kyi dbyings/ / spang blang med pa mnyam pa nyid kyi ngang// rang rig kun tu bzang po nyid la 'dus// chos rnams shes bya bslab pa'i mtha' bcur 'dus// de lta bu yi bya bral rgyud chen 'di/ / snod kyi rim pa gang la gdams shing gtad// kun bzang mchog gis bka' stsal pa// nyon cig sems dpa' rdo rje che// phyi ma dus kyi snod med rnams// bla ma'i sku smod mos pa chung// mched la mi gdung gzhogs kyis smod/ / rdzas la shin tu chags sems che// dad chung nyam len g.yel ba dang// shes nas mi bsrung dam me dang// tshig tu zhib la don la rtsing// le lo che la spyod lam rtsing// dregs pa che la rang bzhin gong/ / gzu lum ras chod byed pa la// de lta bu la 'di bstan na// srid gsum sems can bsad dang mtshungs// rgya la 'bang bya khas len zhing// yul dang bud med 'bul byas kyang/ de la bsran par ma gsungs so/ / gal te de la bstan gyur na// nyi tshe ba yi dmyal bar skye// de bas rta shi'i kha bzhin sdoms// sems dpa' rdo rje legs par nyon// a ti bya bral rgyud rnams kun// shes bya bslab pa'i mtha' bcur 'dus/ / snod la gdams shing gtad pa ni// bla ma lha ltar mchod cing gus// mched la gdung zhing shin tu byams// rdzas la zhen chags chung ba dang// dam tshig mig ltar 'tsho ba dang// shes bzhin nyams su len pa dang/ / 'khor ba 'dam ltar shes pa dang// bka' yi don la dam par blta// shes rab che la gtad pa thub// dad pa che la ser sna chung// dka' ba sdos nas dang du len// shes bzhin che la bag dang ldan/ / lus srog mi lta chos la mos// grong khyer med cing dman cha 'dzin// de lta bu yi slob ma la// a ti bya bral rgyud 'di bstan// sems dpa' rdo rje yid la zhog/ sems la gab na shin tu mchog/ ces gsungs nas sems dpa' rdo rje la rgyud gdams shing gtad do/ / byang chub kyi sems shes bya mtha' gcod kyi rgyud las/ gdams shing gtad pa'i le'u ste rtsa bzhi pa'o//// byang chub kyi sems shes bya mtha' gcod kyi rgyud ces bya ba rdzogs so/ /// rgya gar skad du/ tsa ra sha ar thA/ bod skad du/ rje btsan dam pa/ bcom ldan 'das dpal kun tu bzang po la phyag 'tshal lo// shin tu rnal 'byor lha yi lha/ rje sems dpa' nam mkha' mtha' dang mnyam pa'i rgyud le'u nyer bdun yan chad sde dge dang 'dra/ nyer brgyad man chad sde dge'i rgyud 'bum du mi bzhugs pa mtshams brag rgyud 'bum nas kha bskangs ba/ de nas de bzhin gshegs pa thams cad kyi rang bzhin gcig dang du ma las 'das pa'i bdag nyid/ snying po rang byung rig pa'i sku/ dpal rdo rje sems dpa' de kho na nyid la dgongs te ci yang mi gsung bar bzhugs so/ / de nas de'i tshe 'khor mang po de ltar gyur pa mthong zhing rig nas/ sems dpa' rdo rje la 'di skad ces gsol ba btab bo/ / dus gsum sangs rgyas thams cad kyi// gsang ba'i 'khor lo gter gyi bdag/ rang byung rig pa mchog gi sku// rmad byung rol pa'i bdag po khyod// rgyal ba'i thugs dang dbyer med phyir/ / gang du'ang rig par dka' ba yi// gsang ba'i don ni gsol ba 'debs// e maho shin tu rtogs par dka'// e maho rnyog pa bral ba'i don// e maho kun gyi yum yin pa/ / e maho dri med rgyud 'di gsungs// rdo rje zhes pa ji lta bu// sems dpa' zhes pa gang gi don// nam mkha' zhes pa ji ltar brjod// de yi mtha' mnyam ji lta bu/ / rgyud ces ji ltar brjod par bya// bdag cag rnams la bshad du gsol// zhes zhus so// de nas sems dpa' rdo rjes/ rol ba rang snang gi 'khor la 'di skad ces bka' stsal to/ / rdo rje zhes su bstan pa ni// rang bzhin rtog dang mthar phyin pa'i// thugs kyi rig pa bstan pa nyid// rang byung rig pa'i snying po nyid// thams cad 'dus pa'i rdo rje ste// mi phyed rkyen dang bral ba'i phyir/ / rang byung rdo rje snying por gnas// 'di ni gnas pa gsum yin te// rkyen dang bral bas mi snang ngo// lhun grub rang byung mi phyed pa// bstan pa thugs kyi rdo rje ste// dgu rum sbas pa thugs kyi gter/ / ma lus rdo rje byin rlabs pas// ye shes snang ba phyogs ris med// mtha' bral nam mkha'i snying po ltar// gsal ba dri ma'i rnyog pa med// skyes bu'i thugs kyi dkyil 'khor nyid// rgyal ba kun gyi thugs nyid ni/ / thog ma tha ma med pa yi// rang byung 'du 'bral med pa nyid// phyogs bcu mtha' dbus bral ba yi// nam mkha' yangs pa'i dkyil 'khor ltar// gnang bkag med pa'i rang bzhin nyid/ / mthar phyin ye shes rdo rje nyid// ma bcos pa dang rtog pa dang// phyogs bral mnyam pa'i snying po ste// sangs rgyas dang ni sems can dang// phyi nang snod bcud ma lus pa// rang byung snying por gcig pa yi/ / rang byung ye shes ma bcos pa'i// 'gro ba'i rgyud la gnas pa ste// gnas pa don gyi gzhi zhes bstan// lhun grub gsum du gnas pa nyid// kun dang 'brel ba'i thabs chen po// rna brgyud dgongs pas byin rlabs nas/ / thugs kyi dkyil 'khor mngon bstan nas// shes bya'i chos rnams thams cad kun// ma bcos shes bya nyid du gsal// gang du phyogs ris med pa yi// rang byung rig pa'i snying po nyid// rang bzhin mtshan nyid rol pa ste/ / phyogs med nam mkha'i rang bzhin ltar// kun 'dus me long gsal bar bstan// rig pa'i dong rtse gsal ba nyid// phyogs med nyi ma'i snying po ltar// rang byung rdzogs pa'i ma bcos pa/ / gnas nyid rtogs te mthar phyin pa'o// 'di nyid nam mkha' gsum nyid de// snang srid dang ni kun brtags dang// ma bcos pa zhes bstan pa nyid// snang ba dang ni srid pa dang// ji snyed ma lus thams cad ni/ / rang byung rig pa mkhar snang ste// rgyu rkyen 'das pa'i rang byung nyid// khyab cing mtshon pa'i yul las 'das// rang rang zhen pas gang brtags pa'i// blo dang rgyu rkyen las byung ba// bsam dang rgyu ba'i sbyor ba can/ / rang gi blo yis spyad brtags pa// 'di dag kun brtags nam mkhar bshad// rang bzhin khyab pa'i yul las 'das// rang byung rtogs pas tshad dang bral// gang dang gang gis ma bcos pa/ / rgyu ba'i yul dang bral ba ste// dran rig nam mkha' blta bya ste// ma bcos gsal ba'i dbang po la// rig pa'i dong tshe rtogs par gnas// mkha' ltar dri med ma bcos pa// rtogs pas mi gzung yid du khyer/ / dus gsum ma bcos gnyug ma'i don// shes nas ma bcos snying po'i don// rig pa tshad bral 'od du 'bar// ma bcos rig pa snying po'i sems// sgo gsum bcos pa'i bar ma lus// rang bzhin rtogs pa ye shes nyid/ / mtha' dbus phyogs ris med pa'i don// ma lus don gyi snying po 'di// sangs rgyas sems can gnyis med pa'i// gdod nas snying por 'khyil ba'i dbyings// bya bsam brtag pa'i yul las 'das/ / mtha' bral dbu ma chen po la// dgag dang bsgrub pa'i chos med pas// ma lus snying por gsal rtogs pas// don lam rin chen dpe bzhi ltar// phyogs ris med cing rgya mnyam pas// nam mkha'i mtha' dang mnyam pa'o/ / gdod nas mtha' bral chen po la// dgongs pa'i lung gis mtshams sbyar nas// mtha' bral nam mkha'i dkyil 'khor ltar// mtha' dbus med pa'i de bzhin nyid// rang byung ye shes thog mtha' med/ / re dogs spangs pas rgyu ba zad// ma lus ma 'gags ye shes ni// phyogs ris med par shar ba'o// 'di la mtha' dbus med pa dang// phyogs ris med par bsam 'das pas// nam mkha'i mtha' dang mnyam pa ste/ / bsam med nam mkha'i klong chen po// rgyud ces bya ba rgyun du grags// ma bral snying po bde ba'i klong// rang bzhin ye shes mnyam nyid la// bar chad med pa'i rnal 'byor de/ / sku gsung dgongs pa mtha' bral nyid// nam mkha' lta bur rtag tu gnas// 'di la thams cad lhun grub pas// snang srid rdzogs pa chen po'i rgyud// de la rgyud kyi snying po'o// zhes gsungs so// nam mkha'i mtha' dang mnyam pa'i rgyud chen po las/ / rgyud kyi mtshan pa'i le'u ste nyi shu brgyad pa'o//// de nas yang rang snang rol ba'i 'khor tshogs kyis// sems dpa' rdo rje la 'di skad ces gsol to/ / kye ma'o sems dpa' rdo rje khyod// sangs rgyas kun gyi rang bzhin te// sku gsung thugs ni bsam mi khyab// mgon po khyod la gsol ba ni// sgro skur med par ji ltar lags// bshad pa nyid kyang ji lta bu/ / dus ni ji ltar gcig pa lags// 'og min gnas kyang ji lta bu// rang bzhin dang ni lta ba dang// mngon du gyur pa ji lta bu// gleng gzhi zhes pa ji ltar lags// rgyal ba so sor snang ba de// tha dad pa ni ma yin nam/ / thun mong rgyud dang khyad par ci// rang byung snying po lhun grub la// sgro dang skur pa kun bral ba// ma bcos rin chen 'khor lo'i thugs// 'od gsal snying po 'gyur ba med// sgro 'dogs skur 'debs mtshan ma'i lam/ / gsang ba'i thabs kyis bcad nas ni// gzhi gzhag rang lugs ma bcos par// snying po rig pa mngon du bstan// ji ltar chu la chu gzhag ltar// bde bar gnas pas pha rol phyin// snying po gcig tu kun rdzogs pas/ / sgro 'dogs skur 'debs gdod nas med// gang gis gang la gang dus su// gang bshad pa nyid de bzhin te// ma lus pa yi de bzhin nyid// snying po rang byung rdzogs pa'i bdag/ ma lus 'chang bdag snying po ste/ / lhun rdzogs rgyal ba kun gyi ngang// sna tshogs rang snang rig pa'i 'khor// rol pa 'bum phrag mtha' las 'das// rang byung rig pa kun 'char la// tha dad ston 'khor khyad par med/ / bsam gyis mi khyab pa yi dus// snga phyi med pa'i dus gcig ste// dus gcig rtogs pas dus kun rtogs// dus dang rtog pa gcig tu bstan// rang byung 'od gsal 'khor lo'i thugs// sgro skur dag pa'i bde chen po/ / mkha' ltar bsam pa'i yul las 'das// rgyu 'bras lhun rdzogs snying po la// bstan pa ma lus kun 'dus pas// dus gcig dgongs pa mkha' ltar bshad/ ston pa gnas 'khor dus bstan pa/ / rang byung rol pa mchog nyid las// ro dang rnam pa ji bzhin pas// khyad par med de snying por rdzogs// ji snyed pa yi chos rnams kun// rin chen 'od la kun rdzogs pas// gdod nas skye 'gag gnas pa med/ / snying po rdzogs pa gcig ste gnas// gdod nas gcig pa'i rang bzhin la// dus gsum gcig par mngon bstan pas// phyogs bcu mtha' dbus chos thams cad// dus gcig phyogs ris med par rtogs/ / gang du zhen pas brtag pa yi// bgrangs dang bsgom dang brtag pa dag/ rang rang brtags pas snang ba ste// de dag dus gcig sbyor zad de// re dogs chad pa'i snying po nyid// ma bgrod rtogs pas phyin pa'i gnas/ / rig pa'i gnas su rtogs pas phyin// ma lus rig pa'i 'og min gnas// sangs rgyas kun gyi pho brang nyid// thig le steng 'og phyogs cha med// 'og min gnas zhes brjod pa yin/ / rang byung snying po kun gyi rgyu// rgyu lnga 'bras bu gsum la sogs// phyogs bcu nam mkha'i mthar thug pa// 'di la 'dus pa'i 'khor du bshad// ma lus snying por dag pa la// dngos dang blo yi khyad par gyis/ / rang rang phyogs kyis gang bltas pa// 'di la 'das pas 'khor du bshad// ji ltar gnas pa'i don de nyid// rtogs nas 'bras bu lhun grub pa// ji snyed sangs rgyas thams cad kyang// 'di las 'byung bas ston pa'o/ / don dang tshig gi gleng gzhi ni// ji snyed sangs rgyas thams cad dang// bka' rgyud ma lus thams cad kyi// gleng brjod kun gyi gzhi yin pas// ma bcos don gyi gleng gzhi yin// bka' rgyud brjod bya thams cad kyi/ / 'byung ba'i rgyu dang gzhi nyid ni// phun sum tshogs pa'i bdag nyid de// gleng brjod 'byung phyir gleng gzhi nyid// rang byung snying po 'od gsal ba// rin chen bsam pa lhun grub rdzogs/ / gleng brjod ma lus kun 'char bas// gleng gzhi kun gyi ngo bor bshad// sangs rgyas kun gyi rang bzhin te// ma lus 'dus pa'i snying po bas// zhing khams mdzad pa ye shes dag/ gdul bya'i bsam pa'i tha dad pas/ / rin chen bzhi dang yon tan ltar// so so'i khyad par gang snang ba// tha dad snang ba yod ma yin// ma bcos snying po nyid la rdzogs// rang byung rol pa rang snang la// rgyu 'bras zhen pa mi gnas pas/ / rang snang phun sum tshogs par bshad// snying po 'od ltar rdzogs pa yin// rgyu 'bras zhen pa'i tha dad dag/ rang bzhin bsam pa phyin ci log/ de dag gang ltar ci snang ba// khyad par rig pa rang snang yin/ / zhes gsungs so// nam mkha'i mtha' dang mnyam pa'i rgyud chen po las gleng gzhi bshad pa'i le'u ste nyi shu dgu pa'o//// de nas yang rang snang rol ba'i 'khor tshogs kyis/ sems dpa' rdo rje la 'di skad ces gsol to/ / dus gsum rgyal ba thams cad kyi// sku gsung thugs kyi gter gyi dbyig/ rig pa'i bstan pa rdzogs pa'i bdag/ ma bcos rol par shar ba nyid// gzhi nyid ci phyir bshad pa ste/ / 'jug pa'i lam tshul ji lta bu// 'bras bu'i tshul ni ji ltar gnas// bdag cag rnams la legs par gsungs// zhes zhus so// de nas sems dpa' rdo rjes 'di skad ces bka' stsal to// 'dus pa'i tshogs chen da nyon cig/ gnas dang rtogs par bstan pa nyid// ma bcos sems kyi rang bzhin ni// rig pa 'od gsal stong pa nyid// sangs rgyas sems can gnyis med de// ma rig ye shes tha dad med/ / rang byung rig pa'i snying po nyid// 'od gsal lhun rdzogs rin chen la// rang snang rol pa'i 'od 'char ba// phyogs med 'dod pa kun gzhi ste// ma bcos gnyug ma'i rang bzhin ni// rig pa'i 'od gsal stong pa nyid/ / phyogs ris bral ba'i snying po ste// dbye zhing tha dad chos dang bral// mtha' bral nam mkha' rang bzhin ltar// rang byung rig pa mu mtha' med// nam mkha'i mtha' dang mnyam sbyor ba/ / sangs rgyas sems can kun gyi gnas// nam mkha' lta bur kun la khyab// ma lus kun gyi snying po ste// gsang ba'i rang bzhin mtha' dbus med// rang byung dri med snying po ltar// gzhi gzhag rang lugs gsal ba'i 'od/ / phyogs cha med par gsal bar 'phro// ma lus don gyi snying po la// brda dang tha snyad byin rlabs kyis// ma lus rig pa'i snying por bstim// de nyid stong pa'i snying po ste// rang byung bde ba'i byin rlabs can/ / bde ba chen po'i snying po 'di// spyi gtsug gsal ba'i yon tan ltar// ma btsal yon tan lhun rdzogs kyang// thabs dang rna brgyud gter chad pas// rang la rdzogs kyang mthong ba med// gnas pa don gyi gzhi rdzogs kyang/ / rig pa'i tshad ma ma skyes shing// rtogs pa don gyi gzhi med na// 'khor ba'i lam ltar thar mi 'gyur// rang byung gsal ba'i snying po 'di// ma lus khyab par gnas gyur pa// rna brgyud dgongs pas byin rlabs shing/ / rig pa'i tshad mas don mthong na// lung dang rig pa la sogs pa// brda dang tha snyad rnams mi dgos// rang gi mtshan nyid ma rtogs na// spyi yi mtshan nyid la zhen pa// nyams dang bral ba'i rna brgyud ltar/ / re dogs chad par ga la 'gyur// dri med snying po'i don rtogs nas// lhun grub phyogs ris med par gsal// ma bcos rang gzhag mthar phyin pa// rtogs pa don gyi gzhi zhes bshad/ / ma lus 'byung zhing 'du ba'i phyir// gzhi nyid legs par bshad pa yin// lam gyi rang bzhin bstan pa ni// don dang tshig gis phye ba ste// bstan bya don gyi snying po nyid// rang byung mi 'gyur tshad ma ste/ / tshad ma kun gyi snying po nyid// ngo bo la sogs brgyad kyi don// ma bcos rang byung snying po ni// rang bzhin gcig tu gnas pa ste// rnam pa cis kyang ngos gzung med// mtshan nyid ye shes gsal ba ste// ngo bo mi 'gyur de bzhin nyid/ / skye dang bltos pa'i rgyu med pas// ma skyes 'jig pa ga la yod// rin chen yon tan ji bzhin du// yongs rdzogs gsal byed tshul gyis gnas// skyes pa'i rkyen dang bgrod pa dang/ / smin dang grub dang 'jig pa dang// rtags dang tha dad rkyen bral bas// rgyu rkyen rdo rje nyid la rdzogs// rgya mtsho 'du ba'i snying po ltar// bsdu dang gnas dang 'byung ba dang// rdzogs pa'i don nyid gang yin pa/ / de nyid nges pa'i tshig tu bshad// gzhi dang lam dang 'bras bu dang// gnas skabs so so gang yin pa// mtshon pa dpe yi tshul yin pas// gang ltar sbyar ba de dag nyid// rang byung snying po'i mtshan nyid ni/ / ci yang yin no rnam kun bcas// spong len dgag bsgrub la sogs pa'i// phyogs mtshams nges pa'i chos ma yin// rang byung snying po tshad bral yang// dag pa'i tshad dang gsal ba'i tshad// rol pa phra ba khyab pa'i tshad/ / tshad med pa nyid tshad yin no// thabs chen bya bral mkha' khyab sems// thabs dang gzhi dang 'bras bu ste// rig pa rtogs pa ye shes nyid// bya bral rdzogs pa'i lung yin no// don lam mtshon pa'i nyams myong ste/ / rnyog dang 'byed dang dwangs pa ste// dus gsum nyid du bstan pa yin// tshogs dang nam mkha' rdo rje dang// 'gro 'dul thabs su bshad pa nyid// 'byed dang grol dang 'byin pa nyid/ / mos dang rtogs dang gdeng du gyur// brjod dang rtogs dang goms pa nyid// brjod dang rig pa chos nyid sgra// brda dang grol dang gar gzhag pa// de nyid bde ba chen po'i sems// rang rig rnyog pa bral ba'i sems/ / mtha' dbus re dogs zhen pa med// gang ltar gang yang 'gro 'ong med// ma bgrod rtogs pas dus gcig sa// phyogs ris med par rtogs pa'i sems// ma bcos don la 'jug pas lam/ / tshig lam rkyen gyis ma mtshon na// dgu rum sbas pa'i don mi gsal// brda dang dgongs pa'i gtan tshigs la// rna brgyud don dang 'brel ba'i tshig/ ma lus nges pa'i don du mtshon// de dag tshig lam don yin no/ / bgrod dang bskyed dang smin pa'i chos// btsal dang bsgrubs pa'i 'bras bu min// skye dang 'jig pa'i 'bras bu yin// thob bya gzhan ldan 'bras bu smin// rang byung lhun rdzogs 'bras bu ni// rang nyid rol pa mtha' yas las/ / nyid las gzhan pa'i thob bya med// rin chen yongs rdzogs yon tan ltar// rang snang che ba rgyun mi 'chad// ces gsungs so// nam mkha'i mtha' dang mnyam pa'i rgyud chen po las/ / rang byung ye shes rang shar bshad pa'i le'u ste sum cu pa'o//// de nas yang rig pa rang snang rol pa'i 'khor tshogs kyis// sems dpa' rdo rje la 'di skad ces gsol to// sangs rgyas kun gyi snying po che/ / 'khor lo dgongs pa klong brdal ji ltar lags// man ngag zhal chems ji ltar sprugs// sel med klong dgu ji ltar lags// rang byung rol pa rang shar ba// mkha' la gza' skar ji ltar bkram/ / mkha' khyab sems lung spyi don lnga// de dag ji ltar brjod pa yin// phun sum tshogs pa ji ltar bshad// bdag cag rnams la bshad du gsol// zhes gsol to// de nas bcom ldan 'das sems dpa' rdo rjes 'di skad ces bka' stsal to/ / 'dus pa'i tshogs chen da nyon cig/ ji ltar snang ba'i chos rnams dang// rig pa dran rtog sna tshogs dang// rgyal ba kun gyi dgongs pa nyid// tha dad med pa'i byang chub sems/ / ma lus chos rnams rang bzhin ni// ma bcos byang chub sems las shar// ma lus chos kun snying po ste// phyogs ris med pa nam mkha'i klong// rang bzhin klong brdal phyogs ris med/ / ma bcos don gyi snying po la// ji bzhin rig pa'i tshad ma yin// ma lus chu dang chu bur dang// rgya mtsho'i rba rlabs ri mo ltar// ji ltar snang yang rang la thug/ sna tshogs byung yang nyid du grol// phyogs su med par gang rtogs pa/ / rtogs pa klong brdal phyogs ris med// rtogs pa bar chad med pa yis// phyogs med nam mkha'i rang bzhin la// phyogs kyi rten dang g.yogs med ltar// sna tshogs bye brag cha shas dang/ / dus gsum ltos pa bral ba'i yid// chu klung lta bur gcig tu gsal// ma lus 'dus pa'i snying po bas// gcig nyid kun gyi rang bzhin pas// dgongs pa klong brdal bshad pa'o// thabs chen ma bcos gsang ba'i don/ / gang zag blo yi khyad par nyid// 'phrul tshogs sgra yis gang brtags nas// bya ba sngon du bya ba kun// rim pa cho ga kun byas nas// mos dang blo yi rim pa bzhin// bcos ma'i rnal ma'i 'byor ba nyid/ / rna brgyud gsang ba'i gdams pa bzhin// gnas pa rtog nas bstan phyir sbyin// ma hA de ba'i gdams pa bzhin// rigs las rtogs bzhin du min// ji snyed brda don dgrol ba kun// 'khor ba rang sar grol ba'i phyir/ / gang du'ang bstan yang de nyid yin// man ngag zhal chems sprugs pa ste// klong dgu bstan pa spyi yi lung// bstan pa klong pa dgu'i ngo bo ni// lta ba phyogs ris med pa'i klong// spyod pa snang bkag med pa'i rgyan/ / ma bkod rol pa'i dkyil 'khor nyid// bkur thob med pa rdzogs pa'i klong// bsrung bral rig pa'i dam tshig nyid// bya btsal bral ba'i 'phrin las klong// sbyang bgrod med pa'i sa dang lam/ / sgrib pa med pa'i ye shes la// lhun grub 'bras bu rang bzhin gsal// rdzogs chen bstan pa ma lus pa'i// bka' rgyud spyi yi lde mig ste// de nyid byang chub sems su 'dus// ji snyed gang dang gang gsal ba/ / de dag 'di ru rdzogs par bstan// 'di ni rin chen klong dgus te// rdzogs chen bka' brgyud thams cad kyi// bsdus pa'i don du bstan pa yin// gzhan yang ma bcos snying po nyid// ma lus rdzogs pa'i rin po che/ / stong nyid snying por kun 'dus la// rnam pa'i rang bzhin bsam mi khyab// gzhi dang lam dang 'bras bu dang// sku dang gsung thugs rin po che// dkyil 'khor thig le che ba rnams// ji snyed rnam grangs spros pa rnams/ / brjod dang bstan pa'i rnam grangs kun// ma 'dres yongs rdzogs snying po ste// stong nyid ma bcos snying po las// rig pa sna tshogs rang shar ba// stong nyid nam mkha'i klong chen las/ / mkha' la gza' skar bkram pa bzhin// rdzogs chen bka' rgyud ma lus pa// bstan pa chad pa'i yan lag yin// bstan pa sems nyid rin po che// ma lus 'byung ba'i rgyu nyid ni// ma bcos sems nyid rang bzhin dang/ / rig pa sems kyi ngo bo dang// thugs rje brdal ba'i ngo bo nyid// ma bcos sems kyi rang bzhin ni// skye med chos sku'i mtshan nyid ni// ngo bo mtshan nyid lhun grub ba/ / gnyis med longs spyod rdzogs pa'i sku// thugs rje rnam pa lhun grub pa// sprul sku phyogs ris med par sar// de nyid rgyu dang 'brel ba dang// 'bras bu rim pa ma yin par// de dag 'chad pa'i ston pa dang/ / rmad byung pho brang gnas nyid dang// rim par 'dus pa'i 'khor tshogs dang// bstan pa bshad pa'i dus dang ni// ma nor sdud par 'dzin pa dang// bstan pa'i khyad par 'tsham pa bzhin// rang byung phun sum tshogs pa ste/ / rnam pa bco brgyad bstan pa nyid// rig pa rang snang rol pa yin// de dag phun sum tshogs pas bshad// lung gi spyi nyid yin pa'i phyir// spyi don lnga yis bshad pa ni// lo rgyus don dang rtsa ba dang/ / yo ga'i don dang dgos ched dang// tshig gi don dang bstan pa'o// ston pa chos sku'i rang bzhin nyid// dus gsum rgyal ba'i dgongs pa'i rgyud// nyid la nyid snang don de nyid// byin gyis brlabs kyis bshad pa yin/ / dgongs pas bshad pa'i don da la// ting 'dzin rig pa'i gdeng gi go/ rang bzhag ma bcos don gyi tshig/ rang gi ngo bos bshad pa'o// dman pa skal zhan gang zag la// rna brgyud gsang ba'i 'phrul tshig gis/ / 'grel brjod brda yi tshig gis bstan// brjod pa'i tshig gis bshad pa yin// ji snyed chos rnams thams cad kun// ma lus 'dus pa'i snying po nyid// gcig nyid kun gyi rang bzhin te/ / lhag ma med par yongs su rdzogs// rgya mtsho 'dus pa'i snying po ltar// theg pa'i khyad par thams cad kun// 'di las 'byung zhing 'dir 'dus pas// sems nyid rdzogs pa'i theg pa yin// ma bcos sems kyi rang bzhin la/ / brda dang tha snyad kun 'das kyang// de nyid nges par rtogs bya'i phyir// rdzogs chen bstan pa bkod pa yin// de dag tshig gi lde mig gis// rin chen mdzod kyi sgo phye la// ma nor don de bstan pa'i phyir/ / tshig gi don ni bkod pa yin// ma nor don gyi snying po nyid// rna brgyud 'phrul gyi lde mig 'di// ma lus kun gyi gsang ba ste// dgu rum sbas pa'i gter yin pas// skal ngan las kyi bsgribs pa la/ / ma nor sems kyi gter bstan pas// sbrel ma g.yang du 'gril ba bzhin// lhung nas thar pa'i rigs dang bral// zhes gsungs so// nam mkha'i mtha' dang mnyam pa'i rgyud chen po las/ bshad pa lde mig gi le'u ste so gcig pa'o//// de nas yang sems dpa' rdo rje dam pa la// 'dus pa'i tshogs kyis 'di skad ces gsol to// dus gsum rgyal ba thams cad kyis// gsang ba'i 'khor lo rig pa'i gter/ / ma lus rang snang 'khor lor sgrogs// mgon po khyod la gsol ba ni// ngo bo nyid ni ji ltar lags// de dag rkyen du ji ltar 'gyur// mtshon pa'i thabs su gang zhig 'gyur/ / lam gyi ngo bo ji lta bu// dpe yis mtshon par ji ltar rung// bdag cag rnams la bshad du gsol// zhes gsol to// de nas sems dpa' rdo rjes 'di skad ces bka' stsal to// 'dus pa'i tshogs ni da nyon cig/ byang chub sems dpa'i ngo bo ni// ma lus 'dus pa'i snying po ste// ro gcig rnam pa brjod las 'das// ma 'phros nyi zla'i dkyil 'khor ltar// sna tshogs rang gi don la rdzogs// sgro 'dogs skur 'debs gdod nas stong/ / ma lus rdo rje'i snying po ste// de nyid lhun grub gsum yi ngang// ma bcos sku gsum lhun gyis grub// rin chen 'bar ba'i gling bzhin du// mthong dang ma mthong 'gyur med ltar/ / gsang ba'i rang bzhin 'gyur ba med// blo dang rgyu rkyen byed pa po// gdod nas med pas lhunagyis grub// ma lus rig pa snying po'i gsung// thams cad sgral ba nyid kyi sgra// ma lus chos kun rang bzhin ni/ / rang bzhin gnas pa'i ngo bor rdzogs// gang du rkyen bshad pa nyid ni// phyi dang nang gi mthar phyin rkyen// yon tan kun ldan bla ma nyid// gsal bar byed pa'i rkyen yin te// de dag bral ba'i gang zag ni/ / rna brgyud bral ba'i gter bzhin no// rang gnas gnyug ma'i rkyen med na// gter khyim stong par zhugs par ltar// nam mkha'i mtha' thug bar du ni// thar pa'i snying po don dang bral// gang la gang gi thabs bstan pas/ / snang srid zhi ltar snang ba kun// gsal ba'i me long nyid 'gyur te// gang la bltas kyang de nyid mthong// thabs dang ldan pa'i rnal 'byor la// snang srid sgron mar rang 'char te// brda dang bral ba'i rnal 'byor la/ / ye shes 'char nub med par gnas// rang rkyen rang la grol ba ni// chu yi gnyer ma lta bu ste// ma lus snang yang ro gcig pas// dbang po'i khyad par ji bzhin du// gsal byed thabs dang mi ldan na/ / 'du ba 'khrugs pa'i skyes bu ltar// bdag nyid sdug bsngal thar mi 'gyur// brgyud dang mngon sum khyad par gyis// bcom ma'i rnal ma'i sgo nas bstan// 'phen pa dang po'i dus na rtogs/ / 'phen pa gsum yang shes par bya// bya ba btang ba'i du nyid dang// rdzogs pa thugs phrad pa nyid dang// dbang po thugs phrad 'bar ba dang// rmad byung sku gsum las rdzogs pa// mngon du gsal ba'i thabs chen yin/ / theg pa'i khyad par las byung ba'i// bcos mas mtshon pa gang yang rung// ma rtogs bcos pa'i thabs bstan la// rtogs pas rol pa rang snang nyid// ji snyed bcos ma'ang gsum nyid de/ / rtogs pas rtog pa bcos pa dang// ye shes sgyu mas bcos pa dang// bde chen sgyu mas bcos pa'o// thabs sbyor bcos ma'i sgo dag ni// lnga gnyis gsum gyis tshul bstan pa// phyi nang gnas pa'i mar me ni/ / bstan nas khyab pa'i rnal 'byor te// yul sems bral ba'i de bzhin nyid// rang la nyams dang rjes mthun pa'i// dngos po gang la gsal skye ba// dmigs pa spong ba'i man ngag ste// rang byung stong pa'i klong du grol/ / spyod lam gang la gang rig pa// phyi nang 'dres pa'i rnal 'byor te// ma bcos so mar gang gzhag pa// mi g.yo brtan pa'i rnal 'byor gnas// rang byung snyan pa'i ma brjod sgra// rang la mnyan pas rang gis thos/ / dus gsum rig pa brtan gyur nas// tha ma snying po'i ngang du grol// dang po phyogs ris med pa la// dbang po bsgrims pas gang bltas pa// ma mthong rdo rje snying po nyid// 'du 'phro med pa'i dbyings la gnas/ / rnam par g.yeng ba'i gang zag la// rig pa bsgrims pa'i man ngag bstan// rtse gcig goms par brtan gyur na// rang byung glod pas grol bar 'gyur// nyams kyi rig pa gar skyes pa/ / myong dang snang dang 'dres pa dang// rig pa rdzogs pa mi g.yo ba// mi 'da' phyag rgya'i man ngag yin// dang po skyes nas nyams su myong// goms pas de nyid rtogs zhen log/ ma btsal lhug pa'i ngang du gnas/ / bde ba chen po bag chad med// rgyu ba nang du bcad pa yis// rtogs spyod med pa ye shes nyid// gom pas phyi nang med pa yi// rang byung bde ba gsal bar 'gyur// dbang po thog med man ngag gi/ rten nam brten med btsal med pa'i/ / dbang po phyogs med gsal bar gnas// ma bsam bzhag pas grol bar 'gyur/// btsal bral zin dang ma zin par// rang byung rig pa shes pa ni// dus tshod 'dzin pa'i man ngag ste/ de nyid ma yengs gsal bar gnas// mi g.yo chu yi rang bzhin la// dbang po dal bar yan gzhag pas// lteng chu lta bu'i man ngag ste// ma btsal rig pa dbyings las grol// thig le shum las brten pa gnyis/ / phyi nang rten dang bral ba yis// ma lus shes shing brda phrad nas// 'bab chu'am mar me ji bzhin no// ma bcos rig pa don gyi lam// ma lus ro gcig snying po ltar// ma lus ting 'dzin 'bum phrag yas/ / dran rtog ma lus gcig tu 'khyil// ma lus bde chen snying po bas// dbang po yan gzhag ye shes gsal// thig le chen por kun 'dus pas// mi bgrod mi sbyong rtogs pas phyin/ / rtogs pas ma bcos sangs rgyas sa// lam gyi dpe bdun yan lag gis// de ltar phyogs ris med pa dang// ting 'dzin ma bsgoms gsal ba dang// de dag yon tan lhun rdzogs dang// de dag brtan pa'i gdeng nyid dang/ / rtogs pas ma bgrod phyin pa dang// thams cad ma 'dres yongs rdzogs pas// mtha' bral gcig tu gnas pa ste// bdun gyi lam nyid dpe nyid bstan pa yin// zhes gsungs so/ / nam mkha'i mtha' dang mnyam pa'i rgyud chen po las// rin chen gzung zhing brten pa'i le'u ste so gnyis pa'o//// de nas yang sems dpa' rdo rje la// rang snang rol pa'i tshogs kyis 'di skad ces gsol to/ / rang byung nyi ma 'od kyi bdag/ rang byung lhun rdzogs rin po che// thabs mkhas thugs rje bsam mi khyab// mgon po khyod la gsol ba ni// thig le zlum po ji ltar lags// nyon mongs lam zhes ji ltar rigs/ / mdzod dgu zhes ni ji ltar bgyi// bdag la legs par bstan du gsol// zhes gsol to// 'dus pa'i tshogs chen da nyon cig/ thig le ma 'phros zlum po'i don// de nyid gsum du bstan pa ste/ / ma bcos khyab pa'i thig le dang// mtshan ma brda yi thig le dang// rtog pa don gyi thig le nyid// snying po ngang la khyad par med// gdod nas snying po rang bzhin gcig/ ma bcos thig le rdzogs pa nyid/ / rig pa khong stong nang na gnas// ji snyed chos rnams ma lus pa// de las byung zhing der 'dus pas// phyogs ris med par brdal ba nyid// bzlums dang cha shas med pa dang// khong stong pa dang kun brdal dang/ / 'phro zhing 'dus pas thig le ste// nam mkha' rgyas pa'i mtha' bzhin du// ma lus khyab pa chen por gnas// ma lus gnas pa'i snying po'i don// sgro skur 'das pa'i tshad ma ni// sangs rgyas kun gyi thugs nyid pas/ / dgu rum sbas pa'i don de nyid// mtshan ma rdo yi thig le yis// thams cad rang byung snying por mtshon// rat+na maN+Dal zlum po la// dang po khong chos nyid de// rtsa ba med pa'i snying por bstan/ / de las 'od du gang 'phros pa// dkyil 'khor 'dod pa lnga rnams dang// chags sdang sna tshogs gang ldan pa// tha ma med pa'i thog mar ldog/ rtsa ba dang bral rtse mo nyid// rang gi ngo bo de bzhin te// snying po'i don las dbye ba med/ / snang srid thig le der chud pas// thig le chen por rgyas btab pa'o// mtshon pa brda yi thig le ste// rig pa'i tshad ma'ang snying po 'di// bskal pa'i srid pa 'khrugs gyur kyang/ / dman par rigs min gang zag la// rna brgyud gsang ba bstan byas na// bar mtshams med pa'i mgyogs 'gro ltar// na rag rdo rje gnas su lhung// skal ldan las kyis 'phrad pa la/ / thabs dang gsang ba'i don shugs kyis// gsal ba'i 'od dang rin chen ltar// snang srid bde ba chen por sbar// re dogs gnyis kyi yul las 'das// bgrod rtsol rgyu 'bras lam dang bral// rtogs pa'i thig le kun chub pas/ / snying po don la gru zur ba dang// phyogs mtshams rigs bcad yul las 'das// ji snyed dran rig myong tshor chos// rang byung rang grol rang zhi ba// rgya mtsho chen po chu bur ltar// ma btsal rang byung pha rol phyin/ / sangs rgyas sems can gnyis med pas// 'dod sems bgrod rtsol med par gnas// 'di na snying po'i lam yin pas// btsal ba med par don kun rdzogs// kun gyis spangs ba'i chags sdang lnga/ / bcings shing sdug bsngal ngan 'gro'i lam// reg pas sdug bsngal skye ba'i dgu// thun mong kun la grags pa nyid// rna brgyud bar chad med pa yi// rin chen thugs kyi bdud rtsi yis// skal ldan gang la des phog na/ / rin chen 'bar ba'i gling mthong ltar// phyin chad nyon mongs gang byung ba// ma bcos snying po'i ngang du mthong// ma lus snying po stong nyid la// dang po de las byung ba dang// de ltar de la gnas pa dang/ / tha ma de nyid rang grol ba// nyon mongs snying po lam du gsungs// gang du ma bcos snying po'i don// 'dod pa 'byung dag don rdzogs shing// zad pa med pas gter mdzod de// gdul bya grangs la dga' ba la/ / che ba'i yon tan dgur bstan te// klong dgus rtogs pa'i yul du bstan// che ba'i yon tan bsam yas pas// mdzod kyis grangs la mthar thug med// rig pa'i snying po gcig tu 'khyil/ / zhes gsungs so// nam mkha'i mtha' dang mnyam pa'i rgyud chen po las/ mdzod dgu rin chen gter bshad pa'i le'u ste so gsum pa'o//// de nas yang sems dpa' rdo rje dam pa la/ rang snang rig pa'i 'khor tshogs kyis 'di skad ces gsol to/ / rol pa'i 'khor lo gsum gyi bdag/ 'dod pa'i don 'byung phyogs ris med// rmad byung sku gsung thugs kyi mchog/ mgon po khyod la gsol ba ni// rin chen dbyig ni ji ltar lags/ / gdod nas snying por gcig pa la// bla ma man ngag ci zhig la// de yi brtag pa dgos ched ci// snying po rang bzhin dpe bral la// dpe yis mtshon du ji ltar lags// re dogs med pa'i rang bzhin la/ / skal med ltung ba ji ltar lags// bdag cag rnams la bshad du gsol// zhes gsol to// de nas sems dpa' rdo rjes 'di skad ces gsungs so// 'dus pa chen po da nyon cig/ rang byung sems nyid rin po che// rgyu rkyen 'das pa'i snying po la// ma lus yon tan lhun grub pas// rang sems rin chen dbyig cig brjod// rin chen gzi 'phrog khog seng ltar// skal dang mos pa'i khyad par gyis/ / sna tshogs bar med shugs kyis 'grub// rig pa rang snang yon tan no// rigs drug ma lus thams cad la// ro yi tshul du khyab gnas kyang// ma rtogs rnam pa'i rjes 'brangs ltar/ / gnas pa gsum gyi rang bzhin la// skal med 'phrul tshig mi ldan pas// sdug bsngal 'khor ba'i ngo bor smin// de nyid snying por bstan pa'i phyir// rna brgyud yon tan kun ldan pa'i// bla ma slob dpon dam pa brten/ / dam pa'i rang bzhin mi ldan zhing// bskal pa 'khrugs par don byas kyang// long bas rigs ngan grol ba'i phyir// rgyal sar gzhag bzhin mi 'grub pas// bla ma dman dang dam pa nyid// ma nor brtag pa shin tu gces/ / dam pa ma yin gang brten pas// ldongs pas lam sna drangs pa ltar// ltung zhing thar pa'i rigs dang bral// rang byung snying po thams cad don// phyogs dang ris kyi mi mtshon yang/ / dman pa'i tshig gis drangs pa'i phyir// mtshon pa dpe yi tshul gyis bstan// byang chub sems kyi rang bzhin ni// phyogs ris med par rang snang bas// ma bcos rtogs pa'i rnal 'byor la// re dogs 'jigs pa mi gnas kyang/ / ma rtogs 'khrul ba'i gang zag la// zhen pa'i bsgribs g.yogs rags pa yis// chu dang nor bu 'phrad pa'am// 'bras dang thag pas 'khrul pa ltar// ma grub don la zhen pa yis/ / log par spyod pa ltung bar 'gyur// zhes gsungs so// nam mkha'i mtha' dang mnyam pa'i rgyud chen po las// rig pa mtshon pa'i dpe don bshad pa'i le'u ste sum cu bzhi pa'o//// de nas sems dpa' rdo rje la/ rang snang rol ba'i 'khor tshogs kyis 'di skad ces gsol to// rgyal ba kun gyi gter 'dzin pas// gsang ba'i 'khor lo 'bar ba'i sku// byams mgon lhun grub bya btsal med// mgon po khyod la gsol ba ni/ / bla ma nyid la dmigs pa ci// thabs de gang gis rtogs par 'gyur// gsol gdab gnang ba'i dus tshod ci// mi ldan skyon yon gang las 'byung// mgon pos bdag la bshad du gsol/ / zhes gsol to// de nas de bzhin gshegs pa thams cad kyi rang bzhin gyi byin gyis brlabs kyis/ sems dpa' rdo rjes 'di skad ces bka' stsal to// 'dus pa'i tshogs chen da nyon cig/ dus gsum rgyal ba thams cad kyi/ / dgongs pa'i gter 'chang rdo rje 'dzin// ma lus don du gnyer gzigs pa// 'dod pa'i don kun rdzogs pa'i bdag/ yon tan kun ldan bla ma la// rtag tu yid kyis dmigs pa dag/ las dang nyon mongs lta ba dang// shes bya'i sgrib pa ji snyed pa// bla ma rin chen gnang ba des// gzigs pas mun pa sel ba dang// mgyogs pas snang bas rgyas par khebs// bskal pa'i mtha' ma rab sbyangs shing/ / pha ma bu dang bran dang spun// nor bu sa gzhi gru yi sems// 'bab chu dge slong rgya che'i don// sngon du bya ba kun byas shing// lus dang srog dang chung ma dang// rin chen bdun gyis mnyes byas la/ / snying po man ngag 'jug pa'i tshe// sbyang ba'i cho ga rgya cher bya// dang por sgo brgyad ldan pa'i khri// mdzes shing 'jam pa'i steng bzhugs la// maN+Dal rin chen bdun las byas// rin chen sil ma'i me tog can/ / dgu 'am bdun nam lnga phul nas// tshogs kyi rdo rje mkha' 'gro'i tshogs// mnyes nas rin chen sbubs bcas te// lus sems gus pas me tog dag/ phul te gsol ba gdab par bya// bla ma sangs rgyas de yis kyang/ / zhen chags tha mal sems spangs nas// snying rje'i bsam pas gnang ba sbyin// phul te gsol ba gdab par bya// bla ma sangs rgyas de yis kyang// zhen chags tha mal sems spangs nas/ / snying rje'i bsam pas gnang ba sbyin// dam tshig dbang bskur cho ga spyad// de nas tha mal zhen pa bzlog/ rang rang zhen pa bsal ba'i phyir// rna brgyud sbubs kyi byin gyis brlabs// dang por chu gzar thig pa yis/ / 'jig rten rtag pa'i zhen pa bzlog/ nyams myong gnad dang mi gtsang bas// zhen chags can gyi 'du shes bzlog/ snying po med pa'i man ngag gis// snang ba bzlog pa'i cho ga bya// de ltar lta ba'i shes rab dag/ stong pa'i klong du dbugs phyung ste// bdag gzhan 'du shes kun bral ba'i// spros pa kun bral bsam gtan bya// tha mal zhen pa bcad pa yi// rang snang phyag rgyas gang ba yin// rang sems chu yi lbu ba ltar/ / ye shes phyag rgyas gdab par bya// rin chen sbyangs pa'i cho ga ltar// gdod nas rang snang phyag rgya nyid// gling bzhi rgyal po dmigs sprad ltar// gzhan las ma yin rang snang nyid// rin chen 'bar ba'i khong seng du/ / pad+ma'i snying po kha sbyor bzhi// thig le k+ShuM dang baM gyis brgyan// thabs kyis lam gsum rkyen bcas pas// nyi mas bcud la phog pa ltar// thig le bcud kyis gang byas pas// thig le'i rtags ni 'byung bar 'gyur/ / rang brgyud ye shes snang bar bsnubs// de nyid bde ba chen por smin// de nyid mtha' bral chen por bstan// phyi dang nang dang sems nyid kyis// 'phen pa dang ni sdud pa dang/ / gnas dang bstan dang sbyang ba dang// brtag dang bgrang dang nam mkhar 'phang// rgyu ba rlung gi man ngag gis// mchog dang dman pa la sogs pa'i// nus pa bstan pas nges 'grub ste// 'brel dang bar chad bsal ba dang/ / mthar phyin mchau ga rgyas par bya// gang la gang gis 'dul ba yi// gang de de nyid bstan pa'i phyir// gang du shes rab 'di 'ong ba// sangs rgyas kun gyi gzhal yas khang/ / thabs kyis dga' mgur blo bsgyur te// bsnyen pa nus ldan tshad rdzogs nas// a nyid rgyas par zla rgyas bzhin// de nas pa nyid rgyas pa ni// de nyid ra yi rkyen yin pas// tha mal zhen pa sa yis gsal/ / dza hUM baM ho'i sbyor ba yis// 'phen dang sdud pa'i rtags 'byung ste// snang ba rim nas rim bsdus te// 'phen pa zad pa'i skabs nyid dam// sdud pa hUM gas mngon par shes/ khyab pa'i a yis gang ba dang/ / ma lus snang ba bsgyur snang na// kha dog 'gyur dang mi bstan nas// rten med a la gnas par bya// ma lus bde chen mi rtog pa// mi gnas stong pa'i mya ngan 'das// de nas ma bcos stobs kyis 'jug/ phyogs ris med pa'i mngon shes brten// rgyu ba dwangs pa'i cho ga bya// shes pa nam mkha'i dbyings su bsre// rnyog pa bral ba'i rgyun gyis 'jug/ thams cad ma bcos snying po la// 'khor dang mya ngan 'das med do/ / thig le chen po'i rang bzhin yang// thabs dang bral ba'i rgyal po ltar// rna brgyud man ngag bral ba'i mthus// ma rtogs zhen pas ltung ba dang// de nyid rtogs pas pha rol phyin// co rong ye shes snying por mthong/ / sdug bsngal bde ba chen por gnas// zhes gsungs so// nam mkha'i mtha' dang mnyam pa'i rgyud chen po las/ shes bya thabs kyis gtan la phab pas nam mkhar thim pa'i le'u ste sum cu lnga pa'o/ /// de nas yang sems dpa' rdo rje la/ rang snang rig pa'i 'khor gyis 'di skad ces gsol to// rgyal ba kun gyis gsang ba'i bdag/ byang chub snying po ji bzhin gsal// tshig la dbang sgyur gsang ba'i mdzod/ / mgon po khyod la gsol ba ni// gnyis med gcig ni ji ltar ltar// mtshan ma'i tha snyad ji ltar bral// rig pa'i gdeng zhes gang la bgyi// legs par bdag la bshad du gsol// zhes gsol to/ / de nas sems dpa' rdo rje dam pa des 'di skad ces bka' stsal to// 'dus pa'i tshogs chen da nyon cig/ byang chub snying po'i rang bzhin du// mi mthun gnyen po'i chos med de// rang la rang snang de khyad med/ / rang snang rig pa'i 'khor lo la// ma lus rdzogs pa'i ngo bo bas// rnam pa'i khyad par ci yang snang// gnyis med rig pa gcig tu gnas// rang bzhin gnyis med nyid du bshad// thams cad rang byung snying po nyid/ / rol pa ma 'dres lhun grub pa// ji bzhin don du dbyer med kyang// thabs dang brgyud pa'i man ngag gis// snod dang ldan pa'i skyes bu la// mngon sum rig pa'i tshad mas bstan// phyogs ris med pa'i ngo bor gsal/ / snying po rig pa'i klong du gsal// rtogs pa gnyis su med pa yin// ji snyed chos rnams thams cad kun// re dogs chad par rang gsal bas// dran rtogs snang grags ma lus pa/ / ting 'dzin yan lag rgya mtshor gsal// mkha' la rol pa rgyan snang ltar// re dogs phyogs ris yongs kyi med// goms pa gnyis su med pa yin// ma lus rdzogs pa'i snying po nyid// chos kun ngo bor rang shar bas/ / ma lus ye shes klong brdal bas// thams cad mthar phyin ye shes nyid// dngos po thig ler gsal ba la// 'phro 'du phyogs ris med pas te// ye shes rgya mtsho mthar thug med/ / gdod nas thig le'i ngo bo la// ji snyed thams cad kun 'dus pas// phyi nang rgyu 'bras gzung 'dzin dang// zin chags rtsol sgrub la sogs pa'i// sna grangs pa yi chos rnams kun// ngo bo rtogs dang goms pa dang/ / mthar phyin gnyis med rang bzhin no// ji snyed rang rang tha mal pa'i// phyi nang ji snyed gnas pa ni// skye mched drug ste lha mor brtag/ dngos po gcig la gang rdzogs pa// tha mal zhen pa bzlog phyir te/ / dkyil 'khor drug po'i rang bzhin gyis// rang sems ma skyes ngang du bstan// de nyid bde ba chen po ste// rang rgyud rgyu 'bras ltos pa dang// phyi nang mtshan ma'i yul las 'das// mnyam pa'i don gyi snying po la/ / re dogs mtshan ma'i yul las 'das// dus ngan las kyi snyigs ma la// tshig gi gdeng la zhen pa dang// mtshan ma'i don la rtog pa dang// 'dod pa lnga la mtshan ma yis// bsgyur te bde bar zhen pa yis/ / ma bcos snying ma'i don bor nas// mtshan ma'i dga' bde gtsor gzung nas// rdo la gser du zhen pa ltar// rang rtags log pa'i rnal 'byor gyis// bskal ba nam mkha'i mtha' gtugs par/ / bsgoms kyang 'bras bu mi 'byung ste// bde ba chen po 'don dang bral// thog ma med pa'i zhen pa dag/ thun mong thun mong ma yin pa'i// ji nang ji snyed gnas pa rnams// gnas skabs yul la gcig tu rdzogs/ / rtags pas yul shes kun bral ba'i// stong nyid 'od gsal mngon du mthong// de las byung ba'i rol pa ni// rgya mtsho chu yi ri mo ltar// skad cig tsam gyis gsal gyur te// thams cad re dogs med par shes/ / ma bcos don gyi gdeng yin te// skal ldan rnams kyis shes par bya// ji snyed sangs rgyas thams cad kyis// sku gsung thugs kyi bdud rtsi'i rgyun// rgyal ba rgya mtsho rtogs pa'i don// thugs rje byin rlabs dgongs pa yis/ / rgyal sras gsang ba'i rnal 'byor la// thabs dang rig pa'i mngon sum mam// rna brgyud 'brel bas mngon ston pa// rgyud pa thabs kyi gdeng du bshad// ma bcos don gyi gdeng med par/ / rang rang zhen pa'i rtogs spyod kyis// rang lta ya rabs mthor ston nas// 'dod lnga'i chos la bab chol spyod// kun kyang log pa'i don bltas nas// rdo rje'i khab tu ltung bar 'gyur// zhes gsungs so/ / nam mkha'i mtha' dang mnyam pa'i rgyud chen po las// rig pa rang gsal don gyis bshad pa'i le'u ste sum cu drug pa'o//// de nas yang sems dpa' rdo rje la// rang snang rig pa'i 'khor gyis 'di skad ces gsol to/ / kye ma'o sangs rgyas thams cad kyi// rang snang byin rlabs ya mtshan che// sna tshogs gnyis med gnas pa la// 'khrul rtog sna tshogs rkyen gyis bslad// gang phyir bsgribs dang 'khrul pa ste/ / de dag thabs dang rnal 'byor gang// khyad par ji ltar rtogs pa yis// ma bcos don la ji ltar 'jug/ 'di dag legs par bshad du gsol// zhes gsol to// de nas sems dpa' rdo rje dam pa des 'di skad ces bka' stsal to/ / 'dus pa'i tshogs chen da nyon cig/ chos rnams kun gyi rang bzhin nyid// ma lus kun 'dus snying po ste// gcig nyid kun gyi rang bzhin pas// lhag ma med par yongs su rdzogs/ / de yang rang rkyen bzlog sa dang// rna brgyud bdud rtsi don bral bas// phyogs 'dzin log pa'i 'du shes kyis// ma bcos snying po bsgrubs shing 'khrul// lta spyod log pa'i nga rgyal gyis// bskal pa bye ba brgya phrag tu/ / long bas lam du zhugs pa ltar// 'dod pa'i don dang 'phrad mi 'gyur// ma bcos rtogs pa'i don med na// thun mong rtog spyod bsam gtan dang// lha dang bde ba'i ting 'dzin gyis// ma bcos rtogs par mi 'gyur te/ / 'khor bar nyid du ltung bar 'gyur// ji ltar chu rlabs 'khrig pa dag/ rkyen gyis gang ltar shar ba nyid// sna tshogs chu yi rang bzhin ltar// bcos ma'i don kyang de bzhin no// 'jig rten log pa la sogs pa'i/ / theg pa sna tshogs bsam gtan dag/ rang rang tshul gyis goms byas te// rig pa phyogs ris med par bstan// 'dis ni nam mkha'i mtha' thug pa// rdo rje 'od gsal nyid du 'gyur/ / mi rtag phyi nang thams cad dang// sdug bsngal na ba'i rgyun la sogs// phyi nang bdag med stong pa'i sems// so so'i cha shas dmigs bral bas// 'jig rten zhen pa dus gcig zlog/ dman pas mi gtsang rnal 'byor dang/ / srog dang rlung gis brtag pa dang// bdag nyid dmigs pa bsgoms pa yis// rim pas 'gog pa'i dka' thub yis// 'phags pa'i lam la sbyor ba byed// yid brtan 'dzin pa bzlog pa dang/ / zhen pa spang phyir bstan pa nyid// srid pa'i 'khor lo thog mtha' med// de nyid rten cing 'brel 'byung ste// 'khor lo rim gsum snying po med// 'byung dang rtog dang ma rig 'gog/ 'gog pa'i stong pa mngon du byed/ / rkyen gyis phyi nang rtogs goms nas// zag pa zad pas cho 'phrul 'grub// phyi nang ma lus thams cad kun// kun rdzogs nus pa'i khyad par nyid// cha shas bral ba'i nam mkha' ste/ / phyi nang bar du mngon brtags pas// nam mkha'i rnal 'byor grub pa yis// lta spyod goms pa'i lam gyis tshol/ kha cig rig pa'i rang bzhin nyid// rang snang mi snang 'du shes med// blo yi sbyor ba zad pa yi/ / dag pa'i nyams myong snying por 'dod/ kha cig sgyu ma brag cha ltar// sgo gsum goms pa'i rang bzhin gyis// ma lus kun kyang de bzhin te// 'bras bu ye shes sgyu mar gsal// bden dang brdzun pa'i mtha' chod nas/ / rig pa spros bral mi gnas pa// gang yang mi gnas pa yi don// ma skyes stong pa'i rang bzhin no// tha mal sgo gsum bsgyur ba'i phyir// rigs gsum dkyil 'khor sku gsung thugs// tha mal 'joms byed rdo rje ste/ / bdag dang gzhan phan de bzhin gshegs// dpal ldan skyon bral pad+ma'i mchog/ ma lus rigs gsum goms pa yis// rang 'dod 'bras bu mthar phyin thob// gang du gnyis ka'i mthar 'dzin pa/ / de kho na nyid gzhi dag gis// snang srid goms pa'i dbang thob ste// sku dang gsung thugs bzlas brjod kyis// gtsang ma'i rigs 'dzin gral thob nas// rdo rje 'dzin pa'i ltung ba dang// rtsol ba'i chu bos g.yengs pa yi/ / re dogs 'dzin pa dag mi 'gyur// zhes gsungs so// nam mkha'i mtha' dang mnyam pa'i rgyud chen po las/ bcos ma'i dbang bshad pa'i le'u ste sum cu bdun pa'o//// de nas yang sems dpa' rdo rje dam pa la/ / rang snang rig pa'i 'khor tshogs kyis 'di skad ces gsol to// dus gsum rgyal ba thams cad kyi// rang byung phun sum tshogs pa'i bdag/ rang gsal rol pa kun la gsal/ / bstan pa ma lus 'byung ba'i gzhi// mgon po khyod la gsol ba ni// phun sum tshogs pa gang las byung// ngo bo dgos pa ci las gyur// de nyid rtogs pa ji lta bu// skyes bu chen pos bshad du gsol/ / de nas sems dpa' rdo rjes 'di skad ces bka' stsal to// rang byung ye shes byang chub sems// ji snyed phun sum tshogs pa dang// sku dang gsung thugs zhing khams dang// che ba'i mdzad pa ma lus pa/ / kun rdzogs yid bzhin nor bu ste// 'phel 'grib med pa'i rin chen dbyig/ bstan pa'i theg pa ma lus pa// ma lus 'char gzhi snying po nyid// rang byung snying po stong pa'i lung// rtsa ba bral ba'i yan lag ltar/ / ma lus kun gyi ngo bo yin// lung dang rig pa'i tshad ma yis// kun gyi snying po 'di rtogs na// phun sum tshogs pa ma lus pa// rig pa gcig tu gtan la phebs// gzhi rtsa med pa'i snying po nyid// ma bcos rol pa bde ba nyid/ / rang nyid thugs rje ngo bo nyid// sku gsum phun sum tshogs pa ste// ngo bo rang byung ye shes nyid// 'dod pa'i don snang dngos po med// gnas dang ston pa 'khor dang dus/ / sdud dang bstan pa rang bzhin nyid// sku gsum so sor dbye ba ste// de dag che chung khyad par gyis// rang rang so sor phye ba yis// theg pa'i rim par snang ba ni// der yang phun sum tshogs pa ste// nam mkha'i dbyings kyi mtha' klas par/ / phun sum tshogs pa gang ba ste// rang byung snying po thog mtha' med// sangs rgyas kun gyi rang bzhin nyid// thog ma tha ma'i dus med par// gdul bya spro ba bskyed pa'i phyir/ / phun sum tshogs pa nyid du gnas// gdul bya las kyi khyad par gyis// rim pa dag tu gang snang yang// nam mkha'i rgyan ltar gnas pa yin// 'di dag dbang po'i khyad par ltar// rang byung byin gyis brlabs shugs dang/ / dbang po rab 'bring khyad par dang// gdul bya'i nus pa ma stobs thabs dang// rang byung rol pa'i rang snang ba// phye ba'i khyad par bstan phyir yin// phyogs bcu nam mkha'i mtha' klas pa'i/ / gdul bya'i bsam pa bskang ba dang// rang byung che ba bstan pa'i phyir// rgyal ba'i zhing khams thams cad du// ma 'dres mdzes pa'i me tog ltar// rang byung che ba'i yon tan snang// rang byung rig pa'i rgyal po nyid/ / gang la gang snang de dag nyid// gdul bya'i thabs ni mtha' yas par// 'gro ba dman pa'i ched du bstan// de dag ma lus snying po nyid// nam mkha'i mtha' dang mnyam pa yi// rol pa snying por bstan pa'i mchog/ sangs rgyas kun gyi sku gsung thugs// bstan pa 'di nyid zhugs pa yi// 'di dag rdo rje 'dzin pa yis// phyogs bcu nam mkha'i 'jig rten khams// rdul snyed grangs la 'das pa nyid// sangs rgyas nyid du mngon snang nas/ / skal ldan snying la 'jug par mdzad// de tshe 'khor ni ji snyed pa// kun kyang rang gi yid la 'jug/ 'das dang da ltar ma byon pa'i// snying po bsam mi khyab pa'i dus// mngon du bstan pa tshad mas rtogs/ / re dogs spyod pa chad pa'i dus// thog ma tha ma med pa'i gnas// dngos dang dngos med kun spangs pa'i// rang byung snying po gsang ba'i don// rig pa phyogs bral rtogs pa'i gnas// don gyi dbus chen mtha' dbus med/ / ma bcos gnas su rtogs pas phyir// skal ldan rnal 'byor rtogs pa yis// theg pa'i khyad par ji snyed pa// shes rab chen po skad cig la// chos rnams ro gcig bsdus pa'i bdag/ dbang po nus stobs ldan pa la// ji snyed dran rtogs rgyu ba kun// zag med snying po'i bstan pa ste// nam mkha'i mtha' dang mnyam pa'i rgyud// rang byung rtogs pa'i snying po nyid// sangs rgyas kun gyi gsang ba'i lung/ / 'phrul tshig rdo rje lu gu brgyud// gsang ba'i rig pa'i kha sbyor te// phyi lta nang lta sems su sbyor// rtsa ba'i phun sum tshogs par bshad// ces gsungs so// nam mkha'i mtha' dang mnyam pa'i rgyud chen po las/ phun sum tshogs pa rtsa ba gcig tu bshad pa'i le'u ste sum cu brgyad pa'o//// de nas yang sems dpa' rdo rje dam pa la/ rang snang rol ba'i 'khor tshogs kyis 'di skad ces gsol to/ / sku gsung thugs kyi bdag nyid khyod// rang byung snying po'i don la 'dus// rang snang 'od kyi snang ba'i mchog/ mgon po khyod la gsol ba ni// rang gsal sku gsung thugs gang zhig/ de nyid gang gis gsal bar bgyi/ / khyad par rim par ji ltar 'gyur// zhes gsol to// de nas sems dpa' rdo rjes 'di skad ces bka' stsal to// ma lus rang snang 'khor lo bas// rang snang snying po 'pho 'gyur med/ / gnas pa'i sgro skur ma lus pa// rig pa gcig gi don du gnas// ma lus kun rdzogs snying po 'di// gnas dang rtogs dang mthar phyin pa'i// sku gsung thugs kyi rtsa ba yin// ji snyed snang grangs thams cad kyi/ / dbyibs dang kha dog che chung dang// ma lus ji ltar gnas pa dang// 'jig rten 'das dang ma 'das pa// phyogs dang ris la sogs pa ni// byang chub snying po'i sku ru shar// byang chub sems kyi sku nyid ni/ / rig pa phyogs ris med pa'i sku// thams cad 'dus pa'i 'khor lo ste// rig pa'i dkyil 'khor mtha' dbus med// rang bzhin sku yi mtshan nyid do// byang chub sems kyi gsung nyid ni// snying po 'od kyi rang bzhin ltar/ / ma lus gsung gi rang bzhin du// phyi nang ma lus thams cad shar// zin dang ma zin la sogs pa'i// brjod cing grags pa'i chos rnams ni// rang shar gsung gi mtshan nyid do// ji snyed myong tshor shes pa dang/ / dran rtogs rgyu ba ma lus pa// ma skyes rdo rje a yi ngang// ma lus rig pa 'khor lo'i thugs// gnyis bral rig pa bsam yas la// rang bzhin bsam pa cir mi rtog/ rang byung zhen pa yul las 'das/ / rang du ston pa mtha' yas pas// mthar thug med pa'i gdul bya la// theg pa ji snyed bstan pa yis// rang byung 'khor lo ma rtogs pas// sku gsung thugs kyi snying po nyid// sgro skur med par mthong ba med/ / skal ldan 'jig rten chos bral zhing// dman pa'i blo yang 'dzin sems log/ 'gro ba'i rig pa gang dag la// sngon du cho ga ji bzhin du// sangs rgyas ma lus kun 'dus pa'i// rdo rje 'dzin pa chen po yis/ / ma lus rig pa'i sku gsung thugs// de yi byin rlabs thabs kyis bstan// 'di dag ji ltar rtogs pa ltar// bstan pa'i yan lag kun dang 'brel// phyi rol ltas pas rtogs pa'i tshe// rig pa rang snang 'khor lor grol/ / gcong rong ye shes chen por brdal// sgo gsum sku gsung thugs su sbar// re dang dogs pa kun chad de// ma lus nam mkha'i dkyil 'khor ltar// phyogs 'dzin rgyu ba'i yid las 'das/ / ma lus sku gsung rdo rje nyid// gar yang ma phyin rtogs pas smin// 'bras bu rang 'bar bde chen 'grub// skal ldan rdo rje lus 'di la// snying po rang byung 'od kyi mchog/ phyogs las 'das pa'i rin po che/ / tshig gcig don kun rdzogs pa'i bdag/ rdo rje tshig gi sgron ma yis// dgu rum sbas pas don gsal nas// ma bgrod sa rnams dus gcig mnan// mtha' dbus med pa'i nam mkha' la// phyogs 'dzin bral ba'i blo yis lta/ / blang dor bral ba'i sgo gsum nyid// 'dzin pa log pa'i tshul gyis 'jug/ snang srid ma bcos bde ba'i sa// rtogs pa nyid kyi pha rol phyin// dka' bas spyad pa'i mngon gyur pa'i/ / sku gsung thugs kyi rdul snyed dang// dka' thub sdom par rab bsdams shing// bsnyen bsgrub rtsol ba las byung ba'i// sku gsung thugs kyi rdul snyed kun// nam mkha'i dbyings kyi mtha' don rtogs nas/ / skad cig tsam gyis grol bar 'gyur// rna brgyan gsang ba'i 'phral tshig 'di// gsang ba'i rigs can 'ga' zhig la// phyin ci log dang dman pa la// mngon du snang bar mi 'gyur ro// de dag gsang ba'i theg pa 'di/ / rna brgyud gdams pa nub pa dang// lta spyod log pa'i gdeng ldan dang// mtshan ma sgra la zhen pa dang// skal bar ldan dang mi ldan pa'i// 'dus pa mang po bstan pa dang// bla ma rang rtog zhen pa yis/ / nga nyams zhen pas bshad pa dang// rnam par dkar ba'i lam bor nas// nyon mongs zhen pa'i las byed dang// thun mong theg pa la smad pas// nyon mongs zhen pas rtsod pa'i mthus// bstan pa'i snying po nub par 'gyur/ / de nas 'dzam gling dbus su dar// skal ldan 'brel ba 'ang 'byung bar 'gyur// de nas lho phyogs rgyud du rgyas// nub kyi phyogs su'ang rgyas par 'gyur// byang gi phyogs dang shar phyogs su/ / ma bcos rdzogs pa'i theg pa 'dis// snang ba'i sgron ma byed par 'gyur// der yang skal ldan dam pa rnams// rnam grol sa la 'gro bar 'gyur// rna brgyud gter la ma chad pa dang// lta spyod log pa'i nga rgyal can/ / mtshan ma tshig la zhen pa rnams// rdo rje'i khab tu ltung bar 'gyur// rang byung byang chub snying po 'di// ma lus snying la gnas pa ste// dus gsum 'gyur ba med pa'i sems// ma bcos sems la 'gyur ba med/ / de bzhin lung bstan ldan pa yis// skal ldan rgyal sras slob ma la// thabs kyis ma bcos don bstan nas// 'khor ba rang grol don rtogs na// dus la 'gyur ba yod ma yin// snga phyi med pa'i da lta nyid/ / ma bcos rtogs pas pha rol phyin// tha ma'i dus na 'byung bar 'gyur// zhes gsungs so// nam mkha'i mtha' dang mnyam pa'i rgyud chen po las// lung bshad pa'i le'u ste zhe brgyad pa'o/ /// de nas yang sems dpa' rdo rje dam pa de la/ 'dus pa chen po'i tshogs kyis 'di skad ces gsol to// dus gsum rgyal ba thams cad kyi// bstan pa kun gyi rang bzhin khyod// ma lus kun gyi 'byung gnas gter/ / mgon po khyod la gsol ba ni// rang byung thugs su gcig ce na// klong dgur dbye ba ji ltar lags// klong zhes ci phyir bya ba lags// gang gi skabs su ji ltar 'char// de dag dgos pa ji lta bu/ / mgon po khyod kyis bdag la gsungs// zhes gsungs to// de nas sems dpa' rdo rjes// 'dus pa'i tshogs la 'di skad ces bka' stsal to// ji snyed chos rnams thams cad kun// ci ste tha dad yongs kyis med/ / rang byung rdzogs pa'i theg pa la// ma 'dus pa yi chos mi gnas// rangabazhin snang ba'i chos rnams dang// phyi nang dran rig thams cad dang// bstan pa'i bye brag ma lus pa// ji snyed khyad par bstan pa kun/ / rgya mtsho dang ni rlabs bzhin te// rig pa rang snang ma yin pa// gzhan pa nyid ni yod ma yin// rang byung theg pa'i snying po 'di// bstan pa kun gyi bdag nyid pas// rang byung bstan pa kun gyi bdag/ theg pa kun gyi rtsa ba yin// ma bcos snying po rdzogs pa la// tha dad rnam pa mi snang bas// rnam par dbye ba'i chos med kyang// rol pa'i snying po dgu ru shar// lta ba phyogs ris med pa'i klaung// spyod pa blang dor med par spyod/ / mtha' dbus med pa'i snying po len// rang byung thabs kyis rtogs pa'i dbang// rang byung don la 'das pa med// bya btsal kun bral 'phrin las rdzogs// ma lus dran bsam ting 'dzin klaung/ / ye shes ma bsgribs phyogs ris med// 'bras bu lhun rdzogs bya btsal med// rol ba'i bye brag dgur shar yang// byang chub sems la dbye ba med// ji ltar snar ba'i chos rnams kun// rang byung rdzogs pa'i ngo bo ste/ / phyi nang spyod yul dran rtog dang// bde sdug mtho dman ma lus kun// rgyu rkyen ngo bo tha dad med// chu yis 'khor lo bskor ba ltar// chu rlabs ri mo cir yang snang// ngo bo gcig tu gnas pa ltar/ / ji ltar snang grangs dran rtog kun// rang byung stong pa'i klong du brdal// ma lus byang chub lung du bsdus// rang bzhin gnas dang rtogs pa dang// mthar phyin spyod yul thams cad la// phyogs ris med dang sel med pas/ / de phyir 'di la klong zhes brjod// gzhan du lta bas mi gnas te// tha dad pa dang dgag sgrub dang// gnyis 'dzin rgyu 'bras la sogs pa// phyogs ris sel dang ldan phyir ro/ / gang phyir theg pa'i snying po nyid// thabs chen gsang ba'i rig pa yis// dgu rum sbas pa'i don gsal na// phyogs ris med pa'i klaung du brdal// rang byung theg pa'i snying po nyid// dngos dbang gcig las mi gnas kyang/ / gang zag blo yi bye brag gis// gzhi lam 'bras bur rnam par snang// rang bzhin gnas po'i klong dgu dang// ma bcos rtogs pa'i glong dgu dang// thugs rje rol pa'i klong dgu nyid/ / skabs kyis khyad par so sor snang// ma bcos rol ba rang snang dang// zhen rtag rtogs pa rang snang gnyis// bye brag ma phyed gti mug blo// dngos nyid gtan la ma phebs par// nga rgyal dregs pa'i gdeng tshig gis/ / 'dod lnga bab chol spyad pa log/ de yi dus kyi gang zag rnams// sbrel ma g.yang du 'gril ba bzhin// bla ma ngan pa'i rjes 'brangs nas// rdo rje'i khab tu ltung gyur nas// byang chub sesam kyi rigs dang bral/ / ma bcos rdzogs pa'i ngo bo nyid// brda tshig zhen brjod kun bral yang// mtshan ma brda tshig zhen pa rnams// brjod pas don la dgod pa dang// theg pa kun gyi don rnams ni// 'di la rdzogs par bstan pa dang/ / ma 'dres khyab par bstan pa'i phyir// klong dgu'i khyad par bstan pa yin// de dag gang ltar snang gyur kyang// rang byung snying po de shar phyir// rgya mtsho chu bo 'du 'phro ltar// ma lus sems su 'dus pa yin/ / don gcig ma lus kun rdzogs pas// klong dgu thugs kyi yang snying 'di// rdo rje 'phrul gyi tshig gis bstan// ma bcos rig pa nyams kyis go/ bstan pa'i bye brag ji snyed pa// snying po don du kun 'dus pas/ / dngos don rtogs pa'i skad cig la// bstan pa ma lus dus gcig rtogs// snying po ro dang rnam pa ltar// gang ltar snang yang gcig tu myong// tha dad med de ngo bo gcig/ rang bzhin nam mkha'i mtha' ltar khyab/ / thugs rje bstan pa skar ltar bkram// ting 'dzin rgya mtsho rlung ltar zab// spyod pa phyogs bral kun tu spyod// gang yang klaung dgur ma 'dus med// ces gsungs so// nam mkha'i mtha' dang mnyam pa'i rgyud chen po las/ / klong dgu'i dbye ba bshad pa'i le'u ste zhe dgu pa'o//// de nas yang sems dpa' rdo rje dam pa la// 'dus pa chen po'i tshogs kyis 'di skad ces gsol to/ / sangs rgyas kun gyi rang bzhin khyod// ma lus sku gsung thugs la rdzogs// mi phyed rdo rje'i ngo bor gcig/ mgon po khyod la gsol ba ni// klong dgu'i bstan pa ji snyed pa// gnas pa'i ngo bo ji ltar gcig/ rtogs pa'i thabs ni ji ltar gcig/ rig pa'i nyams ni ji lta bu// 'bras bu khyad par ji ltar gcig/ gcig tu bstan pa'i dgos pa gang// bdag cag rnams la bshad du gsol// zhes gsol to/ / de nas sems dpa' chen po gsang ba'i bdag pos 'di skas ces bka' stsal to// kye 'dus pa'i tshogs 'di lta ste// ma lus sems kyi rang bzhin las// rgyu 'bras lam dang 'bras bu dang/ / gzhi dang lam dang 'bras bu dang// sangs rgyas sems can la sogs pa// ma lus 'dus pa'i ngo bo nyid// phyi nang snod bcud ma lus pa// nam mkha'i ngang du 'dus pa ltar// snang stong rig pa'i chos rnams kun/ / rang byung rgyal por gdod nas gcig/ thog mtha' med pa'i rang bzhin ni// chos rnams kun gyi rang bzhin te// nam mkha'i mtha' dang mnyam sbyor bas// rdo rje snying po'i ngo bor gnas// nam mkha' rang bzhin dwangs pa la/ / ji snyed pa yi chos snang ba// rim pa ma 'dres gnas gyur kyang// de yi ngo bor gcig pa ltar// ma lus chos rnams mtha' yas pa// sems nyid ma skyes ngo bor gcig/ ma bcos gnas pa'i rang bzhin la/ / gang zhig rjes su spyad pa'i chos// sgra dang tshad ma gtan tshigs dang// bcos ma'i sbyor ba mtha' yas pa// brgyud pa'i sgo nas bstan pa kun// bskal pa gang+gA'i bye snyed du// bsgrubs shing btsal bas mi rnyed pa'i/ / rtog pa'i rnal 'byor la sogs pa'i// thabs la mi gnas bltos mi byed// gang gis bshad pa de dag kun// sangs rgyas mngon sum byin rlabs kyis// gzhan la ma bstan ma brgyud par/ / spyi blugs tshangs pa'i dbang gis bstan// ma lus thabs chen gcig tu bstan// skal ldan las kyis phrad pa la// dgongs pa byin rlabs tshul gyis bstan// rig pa'i nyams la chags pa na/ / sems dang nyams kyis gsal bar shes// mos ldan phrad par dka' ba la// rnam brgyud 'phrul tshig sgo nas bstan// skal med las kyis bsgribs pa la// thabs kyi khyad par gang bstan yang// thams cad la ni me long ltar/ / bltas kyang gzugs brnyan mi snang ngo// thabs kyi khyad par ci bstan pa// go zhing rtogs pa gcig las med// rgya mtsho chu bo ji bzhin no// dngos don thabs kyis gang rtogs nas/ / rig pa dang po'i gdeng ldan pa// phyi nang spyod yul ma lus la// rig dang dran pas gang gsal ba// rin chen gling la phyin pa'am// 'bru bcud nyams su myong ba'am// 'khrul pa gsal ba'i shes pa ltar/ / rig pa gcig tu nyams myong ba// re dogs rnam par bcad pa'i sems// phyogs bral ye shes chen por rgyas// ma bcos so mar nyag gcig pas// dus gsum 'byed pa'i chos med de// snga phyi med pa'i ngo bor gcig/ rtogs pa'i ye shes yengs pa med// chu bo'i rlabs sam kha dog gam// chu bo chu bur ji bzhin du// zhag dang zla ba nas bzung nas// bskal pa bye ba mtha' klas par// rgya mtsho rlan gyi ngo bo ltar/ / ma sgoms ngo bo nyid du gnas// lta spyod ting 'dzin ro gcig pas// nam mkha' lta bur dpag med cing// stong chen rnam pa kun ldan pa// byin rlabs nus mthu'i gzhir gyur pa// dus gsum sangs rgyas kun gyi dngos/ / chos sku 'bras bu kun gyi gnas// rang byung snying po ma yin pa'i// dngos po gang yang med pas na// de nyid mngon du bstan pa dang// rgyu 'bras gnyis 'dzin la zhen pa'i/ / dngos 'dzin de nyid dgrol ba dang// skal ldan rigs can gang zag rnams// ma bcos sa la gzhag pa'i phyir// klong dgu'i rtsa ba gcig tu bstan// de nyid nam mkha'i rang bzhin ltar// dngos dang dngos med rnam par spangs/ / thig le chen po kun rdzogs pas// 'dus 'phro thig le klong du gsol// zhes gsungs so// nam mkha'i mtha' dang mnyam pa'i rgyud chen po las// klong dgu'i rtsa ba gcig tu bshad pa'i le'u ste lnga bcu pa'o/ /// de nas sems dpa' rdo rje dam pa la// 'dus pa chen po'i 'khor rang snang sprul pa'i tshogs kyis 'di skad ces gsol to// dus gsum rgyal ba'i rang bzhin khyod// sangs rgyas kun gyi bstan pa'i gter/ / rin chen klong dgu sems kyi bdag/ mgon po khyod la gsol ba ni// ma bcos rdo rje snying po'i rgyud// brjod pa tshig gi lde mig gis// ma bcos snying por ji ltar rtogs/ / bshad pa'i tshul ni bdag la gsungs// zhes gsol to// de nas sems dpa' rdo rje dam pa des 'di skad ces bka' stsal to// dus gsum rgyal ba thams cad kyi// sku gsung thugs ni gsang ba'i gter/ / nam mkha' mtha' dang mnyam pa'i rgyud// rdo rje snying po gsang ba'i lung// rang byung snying po dbyer med na// ma lus ston pa shes bya'i phyir// ma bcos gzhi dang dam pa'i lam// lhun gyis grub pa'i lam du bstan/ / ma bcos rdo rje snying po'i rgyud// nam mkha'i mtha' dang mnyam sbyor ba'i// sangs rgyas sems can dbyer med pa// lhan cig gnas pa'i nus pa dang// gdod nas lhun gyis rdzogs par gnas// rin chen lam gyi goms bya ba/ / srog chags phyogs med bgrod pa ltar// log pa'i lta spyod cir snang yang// nyam nga log pa'i 'du shes med// brjod pa tshig lam la brten nas// don dam rtogs pa 'byung bar 'gyur/ / dang por brda don sprad pa dang// gnyis pa don la phrad pa yin// gsum pa don dang bral ba yin// bzhi pa ma bcos lung du 'jug/ dang po gtan la 'bebs pa'i dus// gnyis pa gtan la phebs pa'i dus/ / gsum pa nges pa rnyed pa'i dus// bzhi pa gdeng du gyur pa'o// pra khrid sgra yi man ngag dang// nges pa gdeng gi man ngag dang// rig pa thal phyung man ngag dang// ye shes klong gi rim par bstan// ye shes rgya mtsho bsam bral ba/ / yengs dang ma yengs 'du shes med// re dogs spangs pa'i bsam pa nyid// nam mkha'i mtha' dang mnyam par 'jug/ dang por mos pa tshogs spyod de// gnyis pa nam mkha' rdo rje nyid/ / gsum pa 'gro 'dul thabs su 'dod// sdug bsngal rtsol sgrub bcas pa yi// bsam gyis mi khyab dus su bstan// bde ba chen pos nyams su blang// dang por mos pas 'jug pa ste/ / gnyis pa rtog pa'i tshul gyis 'jug/ gsum pa gdeng du gyur pa'o// dang por rig can gang zag de// gnyis pa rtogs pa'i gang zag yin// gsum pa mthar phyin gang zag go/ dang po rang rgyud 'du shes can/ / gnyis pa dran snang glo bur ba// gsum pa ma bcos nyid du gsal// dang por mi mkhas shes pa ste// gnyis pa mkhas pa'i 'du shes yin// gsum pa ma bcos nyid du bstan// dang por dge ba dang du blang/ / gnyis pa gnyis ka mi len te// gsum pa dge sdig gnyis ka spyod// dang por rtse gcig dgongs pa ste// gnyis pa rtogs pa 'i dgongs pa yin// gsum pa phyogs ris med pa bstan// ma lus dran rtogs ting 'dzin mchog/ snang ba ma lus rig pa'i nyams// ma bgrod rig pa klong gi sa// dus gcig sangs rgyas sa la bkod// ma btsal lhun gyis grub pa nyid// rgyu rkyen brtsol ba las 'das pa// rang byung 'od dang rin chen ltar/ / gzan las byung dang bsgrubs pa dang// btsal dang bgrod pa'i 'bras bu min// rgya mtsho chu dang rba rlabs ltar// sna tshogs snang yang gzhan byung min// rang byung lhun rdzogs 'bras bu la/ / bdag gzhan don kun rdzogs par gnas// ngo bo gcig las ma g.yos kyang// rol pa gzhan don 'bum phrag yas// gang ltar mthun pa'i bsam pa ltar// mdzad pa'i byin rlabs 'od ltar 'phro// ma bcos rdzogs chen bstan pa 'di/ / rna brgyud tshad ma'i don bral zhing// ma bcos don gyi gdeng med na// lung dang sgra dang yid spyod kyis// rgya mtsho 'jings kyi pha bong ltar// rang snang rtogs pa'i nyams med par/ / gzhan don mdzad pa'i skyes bu des// pha rol ji ltar thar bar 'gyur// gnyis ka sbrel ma g.yang 'gril ltar// 'khor ba'i mtha' mar lhung gyur nas// re dogs gnas las thar pa med// ces gsungs so/ / nam mkha'i mtha' dang mnyam pa'i rgyud chen po las// don rnam grangs kyis gtan la pab pa'i le'u ste nga gcig pa'o//// de nas sems dpa' rdo rje dam pa la/ 'dus pa chen po rig pa rang snang gi 'khor tshogs kyis 'di skad ces gsol to/ / dus gsum rgyal ba thams cad kyi// sku gsung thugs kyi dgongs pa che// nam mkha'i mtha' dang mnyam pa'i rgyud// rtsa ba'i snying po las gsungs pa// man ngag dgu rum sbas pa'i gter/ / thabs chen gang gis gsal bar bgyi// legs par bdag la bshad du gsol// zhes gsol to// de nas yang de bzhin gshegs pa thams cad kyi gsang ba'i bdag po lag na rdo rjes 'di skad ces gsungs so/ / sangs rgyas kun gyi gsang ba'i gter// rig pa'i 'khor lo yu ba can// rtogs pa ye shes 'khor lo'i mdzod// don gyi snying po gsung gi bcud// kun brjod ye shes 'khor lo can/ / rang bzhin brtags dang ltos pa yi// ma rig mun pas bsgribs pa rnams// gsang ba'i rgyud 'di la brten nas// da lta nyid du dngas par byed// bskal pa stong phrag grangs med par// thabs kyi rtsol ba'i rnam grangs kyis/ / ji ltar btsal yang mi rnyed de// rang byung snying po rtogs par dka'// e maho rab tu rtogs par dka'// e maho rang bzhin rnyog pa med// e maho ma bcos bde chen po// e maho thig le rang byung sems/ / rdo rje snying po rmad byung ba// nam mkha'i mtha' dang mnyam pa'i rgyud// man ngag mngon du phyung ba ni// gang du rtsa ba snying po'i phyir// dang po dag ni bstan pa yin// de nyid rgyas par ston pa'i phyir/ / bcu pa gsal bar bkod pa yin// de dag tshogs pa'i dgos pa yang// byin rlabs ting 'dzin rig pa yis// rig pa rang 'char bstan mdzad pas// gnyis pa nyid ni bshad pa yin// brgyud pa'i gsang nyid bstan pa'i phyir/ / bzhi pa de ltar bkod pa yin// de dag skal ldan la bstan phyir// nyi shu drug pa bkod pa yin// 'di dag gzhi nyid bstan pa yin// skal ldan rigs can rnal 'byor pa/ / gsang ba'i don la gang gnas pa// legs nyes 'bras bu lung bstan phyir// nyi shu pa nyid bstan pa yin/ de nyid dkyil 'khor 'jug pa'i phyir// bcu gsum pa nyid bstan pa yin// dam tshig chen po dpog pa'i phyir/ / bco lnga pa nyid bstan pa yin// de dag nyid la dbang bskur zhing// bcu bzhi pa nyid bstan pa yin// skal ldan dbang thob gang zag gis// rna brgyud gdams pa thob dgos pas// bdun pa legs par bkod pa ste/ / lam gyi ngo bo bstan pa yin// bdag don rtogs pa mthar byin kyang// rdzogs pa tshig gi yan lag gis// bshad bya mdzod dgu'i bstan pa dag/ gang zag de la bstan pa'i phyir// lnga pa dag ni bshad pa yin/ / sems nyid mdzod dgu gter gyi bdag klong dgur phye ste bstan pa'i phyir// nyi shu gcig pa bkod pa yin// klong dgu'i bam po nyi khri yi// brjod pa'i lde mig bstan pa'i phyir/ / gsum pa nyid ni bkod pa yin// de dag nges pa'i gsal rtogs pas// drug pa nyid ni bkod pa yin// gdams ngag med pa'i gang zag la// gang gis gang la bsgribs pa'i phyir// dgu pa legs par bkod pa yin/ / de nyid ma bcos bstan rtogs pas// brgyad pa legs par bstan pa yin// de nyid dbang po'i khyad par gyis// ji ltar 'tsham par bstan pa'i phyir// nyi shu lnga pa bstan pa yin/ / de yis yid ches nges pa'i phyir// nyi shu gsum pa bstan pa yin// nges pa rnyed pas klong dgu pa'o// rig pa gcig tu rtogs pa'i phyir// nyi shu gnyis pa bstan pa yin// rig pa skye med nyams myong pas/ / bcu gcig pa nyid bstan pa yin// de nyid bar chad med bsgom pa// bcu drug pa nyid gsal bar bstan// gdeng du gyur pa'i rnal 'byor pas// sgo gsum spyod pa bstan pa'i phyir// bcu gnyis pa nyid bstan pa yin/ / lta spyod ting 'dzin 'brel goms pas// bya med 'phrin las lhun grub pas// bcu bdun pa nyid bstan pa yin// de ltar rtogs goms rnal 'byor la// sa dang lam la rim med pas// bco brgyad pa nyid bstan pa yin/ / 'di dag yan lag bshad pa yin// de ltar sa lam mthar phyin pas// ye shes lnga rdzogs lhun rdzogs pas// bcu dgu pa nyid bstan pa yin// de nyid lhun grub 'bras bu brjod/ / de ltar rdzogs pa chen po nyid// mtshan gyi don nyid shes bya'i phyir// nyi shu bzhi pa gsal bar bstan// de dag mi nub bstan bya'i phyir// nyi shu bdun pa bstan pa yin// rang byung rdzogs pa'i bdud rtsi 'di/ / rna brgyud 'phrul tshig mi ldan par// rang brtags log pa'i 'du shes kyis// yid spyod rdzogs su gang 'jug pa// bla ma slob mar bcas pa rnams// bdud rtsi dug tu gyur pa ltar// lta spyod log pa'i nga rgyal gyis/ / rdo rje'i khab tu ltung gyur nas// byang chub sems kyi rigs dang bral// zhes gsungs so// nam mkha'i mtha' dang mnyam pa'i rgyud chen po las// rdo rje snying po'i rgyud man ngag gis gtan la phab pa'i le'u ste nga gnyis pa'o/ /// de nas yang sems dpa' rdo rje dam pa la// 'dus pa chen po'i tshogs rnams kyis mgrin gcig tu 'di skad ces gsol to// dus gsum rgyal ba thams cad kyi// snying po rang byung rgyal po la/ / skye shi re dogs mi gnas kyang// thugs rje'i mnga' bdag khyod kyis ni// 'chi bdag ye shes la bzlas te// 'gro bar re dogs gcod par mdzod// ces zhus so// de nas de bzhin gshegs pa thams cad kyi gsang ba'i bdag po des 'di skad ces bka' stsal to/ / rang byung rig pa'i rgyal po nyid// ma lus kun gyi rang bzhin yang// de nyid kun bzang rig pa ste// thog ma mtha' ma dngos med pas/ / de nyid bde ba chen po la// dran rtog bde sdug cir snang yang// ma bcos bdud rtsi'i thig ler brtag/ rang byung bdud rtsi'i pho brang nas// gsang ba'i thig le 'du zhing 'phro// rtsa ba ma skyes a las byung/ / rtse mo phyogs med nam mkha'i klong// ngo bo thig le mi g.yo ba// brtags pas stong pa'i ngang du thim// gnas pa dang ni rgyu ba dang// thim par rang byung bde chen gsal// ma lus bdud rtsi thig le yis/ / 'chi ba'i re dogs gcad pa yin// bdud rtsi rgyu ba'i rig pa nyid// gang la brten pa'i ye shes te// phyi nang phyogs ris kha dog dbyibs// bar ma'i rig pa brtags pa las// nam mkha'i dkyil 'khor mngon du snang/ / dang po'i dkyil 'khor phyogs med la// gsang ba'i dbang pos bltas pa ltar// dang por mig dang phrad par bya// de nas mthong ba'i don la brtag/ rig pa gdeng gi don thob nas/ / ma lus kun kyang de bzhin te// phyogs med nam mkha'i rang bzhin la// skyes bus ral gri btab pa'am// dad pa'i rang bzhin 'bigs pa ltar// blun po rtog pas bcings 'gyur gyi// de nyid mthong ba'i rnal 'byor la/ / 'pho ba'i re dogs gcad pa yin// gang du de dag brtan gyur na// rig pa rgyu ba gnyis med pa// smig sgyu rlung dang 'dres pa ltar// de nyid rig pa'i stobs kyis bsgom// de ltar gsal brtan 'jigs bral na/ / snga phyi skye gnas 'jigs pa med// nam mkha' bsgribs med dngas pa la// gsal ba 'char nub med pa ltar// rang bzhin ma skyes phyogs med la// rig pa 'char nub med par brdal// nam zhig bslu bar 'dod pa na/ / rgyu ba rig pa'i thig le nyid// gnas pa a yi ngang la bstim// rlung sems nam mkha'i nyams myong gis// bsdus te nam mkha'i glong la thim// dang po rgyu ba'i thig le ste// gnyis pa rig pa'i thig le ste/ / gsum pa gnyis med thig le nyid// ma 'phos bar du nges par bya// gang du dman pa'i rnal 'byor la// 'chi bdag dbang po bzlog pa'i phyir// bsam gtan gsum gyi rnal 'byor gyi/ / 'chi ba'i re dogs rnam par gcad// thig le bsdu ba'i ngo bo ni// ji snyed bya ba'i spyod pa ni// bdag nyid spyi yi tshul du sdud// de nyid gnas pa 'byung bzhi rlung// 'di dag dus ni gsum yin la// mngon du nges shes mi skye la/ / bla mas byin gyis ma brlabs na// thug phrad lam la rmongs pa dang// 'chi med bdud rtsi don mi rtogs// dus gsum rig pas nges mthong la// rkyen dang ldan pa'i rnal 'byor pas// bar chad ma lus bsal byas te/ / snyan pa'i rol mor bcas pa yis// don dang ldan pa'i sgra gsum gyis// thun tshad nyams dang mnyam sbyar nas// dran dal gsum gyi sgra yis bstan// tha ma nyin zhag bdun gyis te/ / re dogs chad pa nyams myong gis// bar ma srid pa'i chos med par// skye ba len pa'i sdug bsngal bral// 'khor ba'i re dogs rnam par chad// sdug bsngal zad nas bde klong 'khyil// zhes gsungs so/ / nam mkha'i mtha' dang mnyam pa'i rgyud chen po las// srog ye shes kyi bdud rtsi nam mkhar thim pa'i le'u steng gsum pa'o//// de nas yang sems dpa' rdo rje dam pa la/ 'dus pa chen po'i tshogs kyis 'di skad ces gsol to/ / dus gsum rgyal ba thams cad kyi// rig pa gsung gi 'khor lo bdag/ brgyud pa gsum gyi gsang ba 'chang// mgon po khyod la gsol ba ni// ma lus sems su rang gnas kyang/ / rang rkyen log pa'i stobs kyis dkrugs// ma bcos rdzogs pa'i don ma mthong// ma lus sems nyid skye med du// khyed kyis byin gyis brlab par mdzod// ces gsol to// de nas gsang ba'i bdag po phyag na rdo rjes 'di skad ces bka' bstsal to/ / rang byung ye shes kun gyi bdag/ sangs rgyas kun gyi snying po ste// ma lus 'gro ba thams cad la// gnas pa gsum gyis gnas gyur kyang// rgyal po'i phru dgu 'khyams pa ltar/ / rang gi mtshan nyid ma rtogs so// ma lus sems kyi rang bzhin te// rgyu ba bral ba mngon sum nyid// zag pa med pa'i dwangs ma ste// ma lus snying por gcig pa yin// gang du log stobs drag po yis/ / med las dngos por rags par snang// gang du mthong ba'i stobs log pas// rang byung snying po'i 'od la bsgribs// thabs dang bral ba'i rnal 'byor pas// ji ltar bltas kyang don mi mthong/ / 'phrul tshig brda yis gtan la dbab// gsang ba'i don gyi rtogs pas blta// ma bcos yan par bzhag pas bsgom// re dogs med pa'i tshul gyis spyad// stong nyid nam mkha'i rdo rje la// rig pas ma bcos bltas pa'i tshe/ / ma lus nam mkha' chen po nyid// de nyid dngos por snang ba mthong// ma bcos snang ba'i rang bzhin la// rtse gcig dran pas bltas pa'i tshe// gang bltas stong nyid rang bzhin te// de dag ji bzhin yin par mthong/ / snang srid ji snyed ma lus pa// sems nyid thig le'i rang bzhin la// rtogs par 'dod pa'irnal 'byor pas// dngos po rang snang ma rtogs par// sgra dang tshad ma gtan tshigs dang/ / bcos ma'i thabs ni sna tshogs pas// btsal bas dngos po'i don mi rnyed// dngos 'dzin phyogs kyi 'du shes kyi// phyogs bral nam mkha'i rang bzhin la// mtha' dbus med par btsal bsgrubs kyang/ / snang srid nam mkha'i mtha' tshol 'dra// gang zhig ma bcos rtogs 'dod pas// ma lus ji snyed snang ba kun// rnal 'byor gcig gis rig pa ste// 'dres pa phye la ngo bor bstan// snang 'gyur pa yi gnas skabs kyis/ rgya gar skad du/ san+ti ma hA dz+nyA na gu h+ya tan+t+ra/ bod skad du/ rdzogs pa chen po ye shes gsang ba'i rgyud/ bcom ldan 'das kun rig rnam par snang mdzad la phyag 'tshal lo/ / 'di skad bstan pa'i dus gcig na/ 'og min gyi gnas chos nyid ma bcos pa'i dbyings/ kun tu ma bsgribs pa'i gnas chen po na// bcom ldan 'das chos thams cad kyi snying po/ ye shes gsang ba'i rgyal po sku mi bskyod pa'i ngo bor bzhugs te/ de'i tshe ston pa'i mdun na dpal rdo rje sems dpa' bzhugs so// gzhan yang 'khor 'dus pa mang po dang dbye ba mi mnga' bar thabs cig go/ de nas rdo rje sems dpa' stan las langs te/ 'khor 'dus pa thams cad la phan gdags pa dang/ blo the tsom gsal ba'i don du 'di skad ces gsol to/ / kye gsang ba'i bdag po chos thams cad kyi ngo bor bzhugs pas/ 'khor 'dus pa rnams la rdzogs pa chen po'i don man ngag bzhi 'dus pa de bshad du gsol/ de skad ces gsol pa dang/ bcom ldan 'das ye shes gsang ba'i rgyal po des/ chos kyi dbyings las bzhengs te// 'di skad ces bka' stsal to// kye sems dpa' chen po nyon cig/ e ma ho/ e ma ho/ e ma ho/ ngo mtshar rmad du byung ba'i lta ba chen po'i chos ye nas sangs rgyas pa'i don bstan gyis/ rdo rje sems dpa' nyon cig/ 'di lta ste/ 'khor dang mya ngan 'das pa'i chos// byang chub sems kyi ngo bo yin// byang chub sems su gsal ba yang// sems la skad cig gnyis med de// thams cad rang byung ye shes yin/ / ye shes sems kyi ngo bo las// gzhan du g.yo ba ci yang med// ma rig rtog tshogs ming med pas// de la dmigs shing btad du med// ye shes rang shar lta ba'i mchog/ dper na mkha' la nyi shar 'dra/ / don gyi chos nyid dag pa la// rtsol ba'i rang bzhin bral bas na// rang rig yul dang bral bas na// dmigs pa med pa gsal ba'i phyir// chos kyi dbyings las gzhan med do// de lta bu yi ye shes la/ / gol sa sgrib pa ye nas med// de yang ji ltar med ce na// ye shes sgron ma rang la shar ba la// ma rig mun pas bsgribs pa ye nas gsal// ye shes chen pos 'khor ba dbyings nas thon// rtogs pa'i lta bas ye nas thag chod pas/ / bdag 'dzin zhen chags gnas su dag par bcom// bde gshegs dgongs pa'i phug kyang de ru btib// mkha' glong bde ba'i gnas chen po// thams cad byang chub sems su gcig/ kun yin dpe ni nam mkha' 'dra// phyi nang snod bcud thams cad kun// byang chub sems kyis byas pa'i phyir// chos kyi dbyings su ye sangs rgyas// de la dgag cing bsgrub tu med// sems nyid cir yang snang ba la/ / cir yang dmigs su ye nas med// de lta bu yi ye shes la// thams cad gnyis med ye sangs rgyas// de yang ji ltar yin zhe na// theg pa mtho dman thams cad kun// kun 'byung ye shes shar ba la/ / bzang ngan che chung gnyis su med// rang byung ye shes chos nyid la// 'khor 'das gnyis su med par bstan// yul dang sems nyid gnyis su med// thams cad ye nas sangs rgyas pas/ / bya btsal mtha' las de ltar rgyal// de ltar ye shes chen po la// kun 'byung ye shes nyid du dag/ lhun grub mu mtha' med pa'i mchog/ kun yin ci yang ma yin pa'o// de ni klong yangs bde ba'i mchog khams gsum thams cad dag pa'i dpal/ / sems kyi zhing khams 'jam klas pas// thig le nyag gcig lta ba'i mchog/ kun tu bzang po kun bzang bas// nam mkha'i rang bzhin dag pa'i klong// de las gzhan pa'i chos med do/ / zhes gsungs pas/ 'khor rnams skrags dngangs te/ rdo rje sems dpa' nyid kyang rgyal bar gyur to// rdzogs pa chen po ye shes gsang ba'i rgyud las/ ye nas sangs rgyas par bstan pa'i le'u ste dang po'o/ /// rdo rje sems dpas/ ye shes gsang ba'i rgyal po la 'di skad ces gsol to// lta ba ye nas sangs rgyas pa'i don de thabs gang gis rtogs bya zhes gsol pa dang/ ye shes gsang ba'i rgyal pos 'di skad ces gaka' stsal to/ / kye sems dpa'i tshogs chen pau nyon cig/ 'di lta ste/ che ba'i ye shes gsang ba 'di// shes rab thabs la brten pas grub// de yang ji ltar 'grub ce na/ / chos thams cad ngang dang rang bzhin bdag nyid gsum du 'dus/ ma byung ma skyes chos nyid de// thams cad kun la khyab par gnas// kun la khyab kyang dngos po med// de ni ma skyes chos nyid ngang// de ltar rtogs pa'i rigs mchog la/ / kun kyang ma skyes chos kyi dbyings// de la ngang zhes bya bar bshad// sems nyid skye ba med pa las// ma btsal cho 'phrul cir yang 'char// snang ba gnyis kyi ngo bor shar// de yang ji ltar shar zhe na/ / ye shes rtogs pa'i khyad par las// sku dang ye shes ma btsal shar// ma rtogs 'khor ba'i gnas su shar// kun bzangs rol pa yin par zad// ma skyes ma 'gags gnyis med de// ma skyes pa nyid rol pa'i ngang/ / skye ba'i cho 'phrul rang bzhin can// de gnyis dbyer med mnyam pa ltar// de yi ngang du thams cad 'dus// rang bzhin chos nyid gtan tshigs yin// 'di la gzhal bya gzhal byed med/ / de ltar med rtogs gnas tshigs yin// ces gsungs so// rdzogs pa chen po ye shes gsang ba'i rgyud las/ ye shes gsang ba'i don gtan la phab pa'i le'u ste gnyis pa'o//// de nas rdo rje sems dpas gsol ba/ de ltar rtogs pa la yon tan ci mchis/ bstan du gsol/ de nas ye shes gsang ba'i rgyal pos bka' stsal pa/ kye sems dpa' chen po nyon cig/ byang chub sems rtogs yon tan khyad par 'phags/ / rtogs pa rang la ma shar sngon rol du// sangs rgyas zhes bya ba'i ming ye nas med// de ni sbyan mchog shes rab can// ma bcos chos nyid rtogs pa'-i rnal 'byor pa// skye ba gzhan du mi len par/ / sangs rgyas rigs chen 'di yis 'dzin par 'gyur// snang srid rang byung ye shes de yis rtogs pa la// ye shes chen po de las 'char bar 'gyur// phyi nang chos kyi dbyings su rtogs pa la/ / thig le chen po de las 'byung bar 'gyur// che chung ye nas dbyer med ngang rtogs pas// mnyam nyid chos sku de yis rtogs par byed// yang dog gnyis su med par rtogs pa la// kun tu bzang po'i klong na rang rig 'phyo/ / bzang ngan gnyis su med par rtogs pa la// dgag bsgrub med pa'i bde chen ye shes 'grub// bya btsal mi dgos rang byung rang las byung// bde dang sdug bsngal gnyis su med rtogs pas/ / bde ba chen po'i longs spyod de las 'byung// byang chub sems rtogs bsod nams khri phrag yas// nam mkha'i dbyings su shong bar rab tu dka'// zhes gsungs so// rdzogs pa chen po ye shes gsang ba'i rgyud las/ lta ba'i ngo bo dang rtogs pa'i yon tan bstan pa'i le'u ste gsum pa'o//// de nas rdo rje sems dpas/ ye shes gsang ba'i rgyal po la 'di skad ces gsol to// kye bcom ldan 'das ye shes gsang ba'i rgyal po/ don de phyi rabs bdag gis nyams su blangs na ji ltar blang bar bgyi/ zhes gsol pa dang/ bcom ldan 'das kyis 'di skad ces bka' stsal to// rdo rje sems dpa' nyon cig/ don man ngag tu bshad do/ / don ni nyams su blang 'dod pas// dben pa chen po'i sa phyogs su// phyi nang 'brel thag bcad nas ni// rang lus bde ba'i ngo bo la// chos bdun 'byung ba cha bsnyams te// dang po sems nyid tha mal pa'i/ / shes pa tsam du gzhag par bya// ma bcos ma bsgyur chos nyid rnal ma la// dngos po mthong thos mi spangs de bzhin nyid du gzhag/ sems kyi rtog pa ma skyes tsam du gzung// dran pa'i thag pa dam pos btags la gzhag/ de la mi rtog ye shes skye bar 'gyur// de yi sems ni spros gyur na// 'phro ba de nyid la ni sems gtad de// drag tu brtson 'grus brtsam par bya'o// de yi sems ni mi 'phro na/ / de la ma yengs drag tu bsgom// tshad ni rang gi khams dang sbyar// spyir ni mi ring tsam du sgom// mi bde sems ni 'phros gyur na// yang na langs te bcag par bya// yang na nam mkha'i dbyings su 'phangs/ / yang na chos kyi dbyings su sba// de yi sems ni mi 'phro na// dang po mi rtog ye shes bskyed// de yi dus na rtog pa med// mtshan mas zil gyis de ru mnan// de la ngo bo 'di ltar 'byung// sna tshogs snang la zhen pa med/ / ma bcos chos nyid g.yos ba med// phyi nang snod bcud chos kyi dbyings// dgag sgrub med pa'i ye shes gsal// gsal tsam nyid na chos kyi sku// rnam rtog phra rags ci byung yang/ / de nyid rang byung nyid du lta// 'byung dang 'dus dang de bzhin nyid// nam mkha'i ngang du sprin sangs 'dra// rnam rtog mi bskyed ye shes brjod du med// de ltar rtogs pa'i rnal 'byor pas// phyi yi yul dang 'byung ba snyoms/ / nang du dbugs kyi 'gro 'ong bral// ma bcos rnal ma'i don la phebs// bde ba'i ye shes brjod par dka'// phyi nang zhen chags rab tu chung// dug lnga bags kyis bcad pa dang// 'dod pa lnga dang mnyam pa nyid/ / ci la'ang chags pa med pas len// thams cad mnyam nyid chos kyi dbyings// bde sdug med pas shin tu bde// gzhan yang 'di lta bu ru 'byung// bco brgyad bdud kyi cho 'phrul dang/ / lung ston bkur sti byed pa dang// skor ba byed cing sngags pa brjod// rtog pa bzang ngan ci skyes kyang// rang bzhin nyid kyi rtags su bshad// ces gsungs so// rdzogs pa chen po ye shes gsang ba'i rgyud las/ las dang po la bstan pa'i le'u ste bzhi pa'o//// de nas bcom ldan 'das ye shes gsang ba'i rgyal po la/ rdo rje sems dpas 'di skad ces gsol to// ye shes chos skur bstan pa dang// 'gro drug g.yang sa bcad pa'i don bstan du gsol/ de skad gsol ba'i tshig gsan nas// ye shes rdzogs pas bka' stsal pa// nyon cig rdo rje sems dpa' gtso// chos kyi sku zhes bya ba ni// dge dang sdig pa'i bag chags dang/ / nyon mongs phyis 'byung shes pa dang// yul gyi rjes 'brangs shes pa rtog pa yis// chos sku slad pas 'khor ba yin// de dag gsum du ma gyur pa'i// rang gi ngo bo chos kyi sku// 'dzin pa'i rtog bral ye shes lnga/ / de rtogs rgyal ba kun dang mnyam// 'gro nyal 'dug 'dod chos kyi dbyings// de la gnas pas chos nyid rtogs// zhes gsungs so// 'gro drug g.yang sa gcad pa ni// gnyis su med dang rgyu 'thun dang/ / gnyen po stobs kyis bcad pa'o// yi dwags bkres skom sdug bsngal yang// rdo rje sems dpa'i ngo bo nyid// sems kyi sprul pa shar ba la// bkres dang skom pas ci zhig gdung// dmyal ba'i tsha grang sdug bsngal yang/ / ye shes gsang ba'i rgyal po nyid// de la dmyal ba'i sdug bsngal med// des na dmyal ba chos kyi sku// byol song blun rmongs gnas pa yang// rang rig ye shes sgron ma che// de la sgrib pa mi mnga' yang/ / ma rig pa nyid ye shes gsal// mi bde ba dang sdug bsngal ba// bde dang sdug bsngal rgyu 'thun pas// ye shes gsang ba nga yis bshad// lha min 'thab rtsod sdug bsngal yang// rang byung ye shes chos kyi sku/ / zhi ba chen po ye shes la// phrag dog sdug bsngal ngang gis stong// lha yi ltung ba'i sdug bsngal yang// ltung sa chos sku kun bzang gnas// kun bzang ngang la ltung sa med// sbyir bstan nyon mongs lnga nyid kyang/ / ye shes rol bar yang dag shar// de la nyon mongs sdug bsngal med// nyon mongs lnga nyid byang chub mchog/ sdug bsngal bde chen longs spyod yin// 'gro ba rigs drug ye sangs rgyas/ / zhes gsungs so// rdzogs pa chen po ye shes gsang ba'i rgyud las/ chos sku bstan pa dang/ 'gro drug g.yang sa bcad pa bstan pa'i le'u ste lnga pa'o//// de nas ye shes gsang ba'i rgyal pos 'di skad ces gsungs so/ / nyon cig sems dpa' rdo rje che// rtogs pa'i rlung chen bstan pa ni// rnam rtog mtshan ma thams cad kun// ye shes chen por rab gsal ba'i// rdzogs pa chen po'i rnal 'byor pas/ / thams cad byang chub sems su gsal// de las gzhan du g.yel ba med// rnam rtog mtshan ma ci byung yang// rtog pa rang gi mtshan nyid ni// rang byung ye shes yang dag shar// rnam rtog ye shes dngos yin par/ / ye shes gsang ba'i rgyal pos bshad// de ltar rtogs pa'i rnal 'byor pas// dngos po sna tshogs chos kyi sku// sbyang dgag sgrub tu de la med// me la shing bsnan dpe bzhin du// rtogs pa sna tshogs ye shes gsal/ / mtshan ma rang grol chos kyi sku// yul gyi mtshan ma thams cad kun// rang byung ye shes rang snang ba// rang gi mtshan nyid ye shes yin// de ltar rtogs pa'i dbang phyug de// mtshan mar snang yang ye shes sku/ / rang rig cir yang gsal ba las// gzhan du mi 'gyur ye shes dang// des na mtshan ma gnas su dag/ de la mtshan ma spang du med// nam mkha'i ngang du sprin 'dus 'dra// rang byung ye shes rtog pa'i rlung/ / de la 'byung 'jug ngang gis med// 'khor dang mya ngan 'das pa'i chos// rang byung ye shes ngo bo yin// thams cad rang byung ye shes gsal// de las gzhan du mi g.yo bas// thams cad ye shes sku ru snang/ / de ltar rtogs pa'i rang dbang can// 'byung dang 'jug pa de la med// 'di ltar rnam pa thams cad du// chos nyid ngang la gnas pa la// dang por blta ba de la med// btsal ba'i bsam pas chos kyis dbyings mi bskyod/ / ye shes klong du shar ba'i ting 'dzin la// rtsol ba med par yang dag bshad// dper na gser gling phyin pa ltar// chos rnams sems su gsal ba la// klong na mi 'dug gang yang med/ / dngos por snang ba thams cad kun// byang chub sems su rab gsal na// dran pa med par ye shes gsal// byed spyod med par ye shes pas// ye nas rdzogs pas tshogs kyi lung// dngos po'i chos rnams ma lus kun/ / byang chub sems kyi ngang na gnas// de las ye shes gnyis su med// de yi dbyings la thams cad gnas// yul du sgom pa ci yang med// dngos po rang gi sems snang bas/ / snang ba'i yul na dran pa med// rnam rtog ma spangs chos kyi sku// rtogs pa'i ye shes rang snang bas// de la yul zhen gnyis med pa'o// 'du shes skyes pas ye shes ngang// yul med sems kyi klong na 'phyo/ / de ltar ma rtogs 'di la sgrib// ces gsungs so// rdzogs pa chen po ye shes gsang ba'i rgyud las// ting 'dzin gyi rlung chen po rang la shar bar bstan pa'i le'u ste drug pa'o//// de nas ye shes gsang ba'i rgyal pos byang chub sems sgom pa'i yon tan 'di dag bka' stsal to/ / kye sems dpa' chen po nyon cig/ byang chub sems 'di sgom pa'i yon tan ni// sku gsum btsal ba med par rang las 'byung/ / rnam dag byang chub sems kyi ngang tshul sgom pa'i yon tan ni// blo ldan byang chub sems 'di mngon du gyur pas na// sku gsum mchog tu gyur bas chos kyi sku zhes de la bya// shes byed dam pa shes rab spyan gyi mchog dang ldan/ / rdo rje rtse mo mi rtog ye shes de yis thob// phyi nang dkyil 'khor kun tu de bzhin thob// dam tshig ma lus de yis srung bar 'gyur// tshul khrims sdom pa mi rtog ngang du bsrungs/ / 'jig rten gsum gyi sbyin gnas dam pa de la bsngags// bdud kyi sde rnams de la zil gyis gnon// dam tshig de phyir byang chub sems kyi bsod nams dpag par rab tu dka'// rtog pa'i rlung du srid pa mi zhes bya ba sangs rgyas yin/ / rdo rje sems dpa' gud na med// sems las ma yengs sgoms pa'i rlung// de ltar rtogs pa'i rnal 'byor pas// sangs rgyas nyid du rang gnas pa'o// lus 'di gang zag mir snang yang/ / dgongs pa gsang ba nga dang mnyam// lha klu gnod sbyin srin po yang// bden pa'i bka' la yongs mi 'da'// de yis mi 'dul gang yang med// de lta bu yi rnal 'byor pas// 'khor ba'i rtsa ba de yis bcad/ / phyin chad 'khor bar de mi ldog/ de dbang chen po de la rdzogs// zhes gsungs so// rdzogs pa chen po ye shes gsang ba'i rgyud las/ sgom pa'i yon tan bstan pa'i le'u ste bdun pa'o/ /// de nas rdo rje sems dpa' yis// ye shes gsang ba'i rgyal po la// spyod pa blang dor med par bstan du gsol// ces gsol pa dang/ 'di skad du bka' stsal to// sems dpa' rdo rje snying po khyod nyon cig/ spyod pa blang dor med par nges bshad do// chos nyid byang chub sems kyi rang bzhin 'di// chags dang ma chags bde dang sdug bsngal kun// gcig ste de la phyogs rigs med par spyod// de bzhin gang spyod bde ba chen po'i ngang/ / brtags shing mtshan mar spyod pa thams cad kun// spyod pa'i dus na bdag gzhan med par spyod// de lta bu yi spyod pa la// nyes par spyod kyang dpal du che// dge dang mi dge la sogs kun/ / ma chags gnyis med thabs kyis spyod// da ltar spyad kyang yon tan snang// 'dod spyod yon tan lnga po dang// shes rab thabs la sogs pa kun// spyad kyang skyon med rtogs pa gsal/ / skyon dang yon tan brtags pa kun// 'ching grol yon tan zhes chags med par spyod// dge ba'i chos dang mi dge bcu// dge ba lhag par rten du med// mi dge ba la spang du med// mnyam pa nyid kyi don rtogs na/ / thams cad kun la thob pa med par spyod// sman gyi rgyal po ma ti kas// gang la reg pa sman du 'gyur// rdzogs pa chen po'i don bstan na// nyon mongs lnga dang mtshams med lnga// srog gcod mi byin len pa dang/ / mi tshangs spyod dang thams cad kun// ci la spyod kyang nyes med rdzogs// kun la blang dor med par spyod// rang dbang klong du gyur bar spyod// gong gi don de ma rtogs par// don med sgra phyir 'brengs na ni/ / nyon mongs lnga sogs spyod pa kun// spyan dngos dmyal ba'i gnas su ltung// des na nyams dang sbyar la spyad// ces gsungs so// rdzogs pa chen po ye shes gsang ba'i rgyud las// spyod pa blang dor med par bstan pa'i le'u ste brgyad pa'o/ /// de nas rdo rje sems dpa' yis// ye shes gsang ba'i rgyal po la// blang dor med pa'i 'bras bu bstan du gsol// ye shes gsang bas bka' stsal pa/ / nyon cig dpal ldan rdo rje sems// blang dor med pa'i 'bras bu ni// ngo bo thob tshul mdzad spyod do// ngo bo rang byung chos kyi sku// rang bzhin spros dang bral ba la// g.yos pa med pa'i ye shes shar// gnyis su med pa'i thabs chen po/ / kun dang thun mong ma yin pa'i// chos sku 'dzin pa med pa nga yis bshad// bya btsal med par lhun gyis grub// rgyud nyid ma btsal 'bras bur gnas// thams cad dbyer med gdod nas dag/ sgrub pa med par 'bras bur shar// rgyu dang rkyen las mi ltos par// dus gsum 'dus ma byas pa'i ngang// mtha' dbus phyogs rigs kun bral ba'i// chos nyid ma skyes klong shar bdal// de bzhin nyid kyis gar khyab par/ / rang rig ye shes chen por rol// dngos med spros bral byang chub sems// chos nyid ma bcos de bzhin nyid// rig pa de bzhin nyid du son// dbyer med gnyis su med pa ni// chos kyi sku yi sangs rgyas so/ / de la dus gsum 'pho 'gyur med// skye shi med pa'i g.yung drung skur// ye nas chos skur gnas pa la// sangs rgyas gzhan nas btsal du med// phyogs bcu'i 'jig rten khams rnams kun/ / byang chub sems nyid rtogs pa la// 'bras bu gzhan las ma tshol cig/ ces gsungs so// rdzogs pa chen po ye shes gsang ba'i rgyud las/ 'bras bu chos skur bstan pa'i le'u ste dgu pa'o/ /// de nas ye shes gsang ba'i rgyal pos thob tshul 'di skad gsungs so// nyon cig rdo rje sems dpa' che// bag chags ngan pa'i ro bsad nas// grong khyer ngan pa dgag pa dang// nyid gsum gcig tu rtogs pa yis/ / 'khor ba'i gnas nas ma btsal thar// dge dang sdig pa'i bag chags dang// nyon mongs sdig pa'i bag chags dang// gti mug mun pa 'thibs po yis// rnal 'byor chen po thabs mkhas pas/ / rtogs pa gsum las grol ba yis// thig le chos nyid rtogs pa yin// bag chags ngan pa'i ro yang bsad// des kyang cis te 'khor bar 'gyur// snang ba'i sems dang mun pa'i sems// gcig tu 'gyur bar mkhas pas brtag/ de gnyis gcig tu gyur bas na// 'di dang phyi ma de yi tshul// rang dbang sgyur pa'i rnal 'byor pas// grong khyer ngan par de mi 'gro// dus bzhi mnyam pa nyid du brtag/ rang rig gsal ba'i byang chub sems/ / yul med gsal bas mar me 'dra// mi g.yo mi 'gyur chos kyi dbyings// mtha' dbus med pas nam mkha' 'dra// gsal la mi g.yo nam mkha' gnyis med pas// gnyis su med pa'i nam mkha' mtha' las 'das/ / chos kyi chos nyid dag tu gsungs// rang byung gsal ba chos kyi sku// de yang ji ltar thob ce na// rtogs pa'i dus nyid 'bras bu thob// rgyu 'bras 'phel 'grib med mod kyang/ / 'di dang bar ma lan grangs gzhan// thob kyi skal bar yongs mi 'gyur// 'di la thob pa chos kyi sku// bar ma thob pa chos kyi sku// de yang ji ltar thob ce na// rnal 'byor chen po'i dbang phyug de// rtog pa'i dra ba lus grol ba/ / 'byung lnga dang po rgyus bskyed nas// mas yar rim pas 'gags na ni// rang byung gsal ba'i chos sku de// bar ma do ni mngon du 'byung// lnga pa rtogs goms mthu yod pas// skad cig ma lus 'gag pa med/ / rig pa'i ye shes dbang sgyur bas// lam lnga rim pas sbyang du med// sa bcu rim pas bgrod pa med// de nyid rdzogs pas sbyir chibs pas// thob par ye shes gsang bas gsungs// de la rgyu nyid 'bras bu la/ / phyi nang thob pa de la med// de ltar rtogs pa'i rnal 'byor pa// 'di sgor zhugs pa mthar ma phyin// mngon du 'bras bu mi snang yang// phyi mar lha gnas gsum du bskyed// yang na 'khor los sgyur ba'i tshul/ / ngan pa'i lus su yongs mi skye// chos nyid gzungs kyi 'brel pa yis// gnyen bshes dam pa dag dang 'phrad// de yis lung bstan rang sems rtogs// skye ba de las mi 'gyang bar/ / rdo rje sems dpa' nyid du 'gyur// zhes gsungs so// ye shes gsang ba'i rgyud las/ 'bras bu thob tshul bstan pa'i le'u ste bcu pa'o//// de nas ye shes gsang ba'i rgyal po des/ rdo rje sems dpa' la mdzad pa dam pa 'di bka' stsal to// chos kyi sku yi byin brlabs las// sku gsum khyad par cir snang yang// byang chub sems las gzhan ma yin// gnyis su med pa'i chos nyid longs spyod cing/ / 'dod spyod gang yang ma spangs ye shes longs spyod rgyan// thams cad che ba'i rol ba rang la shar// longs spyod rdzogs pa'i sku zhes de la bya// sa bcu'i byang chub sems dpa' rnams la snang/ / de yang de yi ye shes rol pa yin// thugs rje chen po'i sprul pas kun tu khyab// sems can rnams la bstan pa'i char pa 'bebs// chos kyi bdud rtsis 'gro ba bde la bkod// gnyis med byang chub sems kyi sprul pa yis/ / 'jig rten yongs la ma khyab gcig kyang med// thugs rje sprul pas gdul bya kun 'dul yang// sgyu ma'i bro ldan rlom sems ci yang med// de yang nga yi sprul par bshad pa yin// don dam thugs kyi sprul ba rang la shar/ / thugs rje thugs kyi sprul pa'i sku zhes gsung bas bshad// skye 'gro phyi nang gzugs rnams thams cad kun// ye shes gsang ba'i sku mchog nyid du rdzogs// sgra skad rab 'bring tha ma thams cad kun/ / ye shes gsang ba nga yi gsung du bshad// sems rtogs phra rags ma lus ji snyed pa// ye shes gsang ba nga yi thugs su de las med// sku gsung thugs kyi 'khor lo rgyun du bskor/ / gsang ba'i mdzad spyod de las med// cir snang ye shes gsang ba la// gzhan nas thob pa ci yang med// ces gsungs so// ye shes gsang ba'i rgyud las// mthar phyin pa mdzad pa bstan pa'i le'u ste bcu gcig pa'o/ /// de nas yang dpal rdo rje sems dpas/ ye shes gsang ba'i rgyal po la 'di skad ces gsol to// kye ye shes gsang ba'i rgyal po// don de'i the tsom gyi gags gsal ba'i thabs bstan du gsol/ ye shes gsang ba'i rgyal pos bka' stsal pa/ sems dpa' chen po khyod nyon cig/ don de nges par ngas bshad do// 'khor ba'i chos dang 'das pa'i chos// ye nas gnyis su med ces gsungs pas/ rdo rje sems dpas gsol ba/ 'khor 'das gnyis su ma mchis na// gnyis su byung ba don dang gol// yang na 'khor ba 'das par 'gyur// yang na 'das pa 'khor bar 'gyur// de yi skyon ni gang gis gsal/ / ye shes gsang bas bka' stsal pa// dngos po gnyis su bstan pa ni// stobs dang ma 'dres khyad par las// snang ba gnyis su bstan pa las// yang dag don la gnyis su med// gnyis med ye shes cir snang yang/ / rang byung ye shes de las gzhan pa'i chos med do// rdo rje sems dpas yang gsol pa// sangs rgyas thugs dang sems can sems// gcig gam tha dad ji ltar lags// gcig na skyon gsum 'byung bar 'gyur/ / mi gcig na ni skyon gsum 'byung// ye shes gsang bas bka' stsal pa// sangs rgyas thugs dang sems can sems// ngo bo chos kyi sku ru gcig/ gcig las las dang thugs rje 'brel/ / de la skyon gnyis ye nas dag/ snang tshul tha dad cir snang yang// de ltar snang bas skyon gsum dag/ yin snang sems kyi khyad par las// rtogs pa rnams la ye shes sku// ma rtogs pa la 'khor ba'i gnas/ / snang ba gnyis su yang dag bshad// rdo rje sems dpas yang gsol ba// ngo bo chos sku gcig bzhin du// sems can ma rtogs ci las 'byung// rgyu rkyen dag pas byung lags sam// ye shes gsang bas bka' stsal pa/ / 'khor ba'i rgyu ni ma rig pa// rkyen ni las dang nyon mongs lnga// 'bras bu bcu gcig dag tu snang// rgyu rkyen dag las 'khor ba snang// des ni ma rig skyon dang bral// rdo rje sems dpas yang gsol pa/ / 'khor ba'i rgyu ni ma rig pa// ma rigs rgyu ni gang las byung// de yi gtan tshigs ji ltar lags// ye shes gsang bas bka' stsal pa// 'khor ba'i rgyu ni ma rig pa// ma rig rgyu ni byang chub sems/ / ye shes gsang ba nga yis bshad// rdo rje sems dpas yang gsol ba// byang chub sems shes bya ba ni// dus gsum rgyal ba'i dgongs pa yin// de yis ma rig bskyed lags na// thams cad mkhyen pa'i sangs rgyas kyang/ / ma rig mun pa'i nang na gnas// thams cad mkhyen pa ci ste 'gyur// ye shes gsang bas bka' stsal pa// nga yi chos nyid byang chub sems// thams cad kun gyi bdag nyid yin// ma skyes pa nyid cir yang snang/ / ma rtogs pa la mun pa'i dbyings// rtogs pa rnams la thams cad mkhyen// gnyis su chos nyid rigs pas 'grub// rdo rje sems dpas yang gsol pa// chos nyid byang chub sems 'di la/ / nges dang ma nges ji ltar lags// nges na skyon gcig ma nges gnyis// de yi gtan tshigs bstan du gsol// ye shes gsang bas bka' stsal pa// nga yi rang byung ye shes la// mi gnas pa ni ci yang med/ / ngo bo rang byung ye shes su// de yi ngang du thams cad 'dus// des na skyon gnyis ngo bos dag/ ma rig ye shes cho 'phrul ni// ci yang med las cir yang snang// des na rtag par gang la 'gyur// rim par skye ba ye shes yin/ / de la skyon gyis gos pa med// rdo rje sems dpas yang gsol pa// kun mkhyen lta ba'i ngo bo khyod// lhun grub lags sam dag pa lags// lhun grub lags na skyon gcig 'byung// dag pa lags na mtha' ru 'gyur/ / de yi gtan tshigs ji ltar lags// ye shes gsang bas bka' stsal pa// blta ba'i ngo bo lhun grub byang chub sems// rtog pa thams cad byang chub sems// de la 'khrul rtog ngang gis ma grub pas/ / rgyal ba'i byang chub dgongs ba de la 'khrul rtog med// thugs kyi cho 'phrul thams cad ye nas med// dag pa'i phyogs gcig ma yin cir yang snang// cir snang ye shes gsang ba'i rol ba la/ / thams cad lhun grub ye shes la// dag pa'i mtha' ru ltang ba de la med// ces gsungs pas/ rdo rje sems dpa' la sogs pa'i 'khor rnams thams cad yi rang nas mngon par dga' 'o// ye shes gsang ba'i rgyud las/ lta ba'i the tsom bsal ba'i le'u ste bcu gnyis pa'o//// de nas rdo sems dpas gsol pa/ rdzogs pa chen po ye shes gsang ba la// sgom par gsung ba mi 'gal lam// sgom du med par gsung ba'ang mi 'gal lam/ / de yi gtan tshigs ji ltar lags// ye shes gsang bas bka' stsal pa// nyon cig rdo rje sems dpa' che// nga yis byas pa'i chos nyid de// sgom du yod med mtha' las 'das/ / ci yang mi sgom ci yang med// sgom du yod med sgro skur gnas su ltung// chos nyid gtan la phebs dus su// bsgoms kyang skyon med cir yang snang// rtog pa'i klong du gyur pas na// de la sgom du ci yang med/ / sgom du med pa'i chos rnams la// tha snyad sgra 'das klong na 'phyo// rtogs pa'i klong chen rang shar te// ye rlung mnyam pa'i dgongs pas 'grub// sgom pa'i gnas med dag tu rab rtogs na/ / bsgoms kyang skyon yon dbyings nyid nam mkha' 'dra// ched du bsgoms pas gzhan nas thob pa med// de ltar rtogs pa'i ngang la gnas gyur kyang// skye bo lta bu'i phyal pa nam yang med// des na sgom du med pas skyon las grol/ / ces gsungs pa'o// ye shes gsang ba'i rgyud las// sgom pa'i skyon bsal ba'i le'u ste bcu gsum pa'o//// de nas rdo rje sems dpas yang gsol ba/ spyod pa blang dor med pa'i gags bsal ba 'di gsungs so/ / kye ye shes gsang ba'i rgyal po lags// chags sdang bde sdug gcig bstan pa// chags pa 'khor ba'i rtsa ba dang// bde ba thar pa'i rtsa ba gnyis// gcig tu bstan pa mi 'gal lam/ / gal te gcig na skyon gnyis 'byung// ye shes gsang bas bka' stsal pa// nyon cig rdo rje sems dpa'i gtso// chags pa bde ba'i chos gnyis po// byang chub sems su gcig rtogs na// ji ltar spyad kyang ye shes yin/ / de la rgyu 'bras gnyis su med// rdo rje sems dpas yang gsol pa// 'dod yon lnga po thams cad dang// shes rab thabs la sogs spyad pas// 'og ma'i spyod par mi 'gyur ram/ / ye shes gsang bas bka' stsal pa// 'og gi spyod pa de dag kun// byang chub sems su rab rtogs na// gang la'ang blang dor med pas na// 'og ma'i spyod par de mi ltung// rdo rje sems dpas yang gsol pa/ / mtshams med lnga yis spyod pa yis// sems can dmyal bar skye lags na// de dag spyod pa mi 'gal lam// ye shes gsang bas bka' stsal pa// gong gi spyod pa de dag kun// mtshams med lnga nyid byang chub sems/ / byang chub sems la ltung sa med// ta la'i rtsa ba bcad pa 'dra// rnam smin mi sogs tshogs chen rdzogs// des ni kun la spyad par bya// lha khang mchod rten bzlas brjod dge ba rnams/ / rtogs pa'i klong du mnyam snyoms gzhag bar bya// rdo rje sems dpas yang gsol pa// de ltung sa med par bstan na// ltung ba gsungs pa mi 'gal lam// ye shes gsang bas bka' stsal pa// rang rig rtogs pa'i skal pa dang ldan rnams la/ / ngan song rnam gnyis bde ba chen po'i dbyings// de ltar rtogs pas spyad kyang ltung mi 'gyur// rang rig ye shes rtogs pa ma shar na// rgyal ba'i zhing yang ngan song gnas su snang/ / des ni kun la khyab par yong ma gsung// mnyam nyid chos kyi sku ni ma rtogs pas// des ni kun la mi spyad sdig mdzem bsod nams khri phrag yas// zhes gsungs so// ye shes gsang ba'i rgyud las/ spyod pa'i gags bsal ba'i le'u ste bcu bzhi pa'o//// rdo rje sems dpas 'bras bu'i dogs pa bsal ba 'di zhus so// kyi ye shes gsang ba'i rgyal po// thun mong ma yin chos sku de// spros dang bral bar gsungs pa de/ / thun mong dag dang ci mi 'dra// de yi gtan tshigs ji ltar lags// ye shes gsang bas bka' stsal pa// nga yi ngo bo chos sku de// spros pa'i mtha' rnams dang bral te// spros pa'i mtha' dang yang dag ldan/ / gzugs bral chos kyi sku de la// gzugs rnams thams cad yongs su rdzogs// thun mong sbros dang bral ba de nyid ni// spros pa'i mtha' ru ci ste 'gro// med la gnas pa'i rang bzhin can/ / ye shes sgyu ma yang dag chad// smon lam mthu stobs gdul bya'i las// sku gnyis byung ba'i don gnyis rdzogs// byin brlabs yon tan ngo bos 'phags// 'dir ni sku gsum gcig gi ngang// de gnyis khyad par cir mi 'dod/ rdo rje sems dpas yang gsol pa// 'gro ba sems can thams cad la// chos nyid khyab pas bdal ba'i sku// de nyid rtogs pa 'bras bu ni// 'bras bu thob tshul gsum gsungs ba/ / 'di yi gzhung dang mi 'gal lam// de yi gtan tshigs ji ltar lags// ye shes gsang bas bka' stsal ba// kun khyab chos kyi ngo bo nyid// rtog pa'i dus nyid rang la shar// de nyid chos sku chen po bas/ / phyi nas thob pa de la med// rgyu dang 'bras bu de la med// rgyu 'bras ro gcig kun gyi rje// bar ma do yi sangs rgyas kyang// de nyid yin te khyad par med// yang dag rdzogs pa'i sangs rgyas kyi/ / che ba'i yon tan stobs ldan rnams// rnam rtog 'byung ba'i lus grol nas// de nas ma btsal 'byung bar nges// rdo rje sems dpas yang gsol pa// chos sku khyad par med pa la// che ba'i yon tan thams cad kun/ / da ltar mi 'byung skyon ci lags// de yi gtan tshigs bstan du gsol// ye shes gsang bas bka' stsal pa// nga yi chos nyid 'bras bu la// rang bzhin chos sku gcig yin kyang// rgyu rkyen ngan pa'i rang lus des/ / sgribs nas yon tan ston mi nus// bum ba'i nang gi mar me 'dra// dgongs pa gsang ba nga dang mnyam// rdo rje sems dpas yang gsol pa// bar ma do yi sangs rgyas la// yon tan 'byung bar 'dod pa de/ / 'og ma'i lugs su mi 'gyur ram// de yi gtan tshigs ji ltar lags// ye shes gsang bas bka' stsal pa// nga yi chos nyid 'bras bu la// 'di dang bar ma do gnyis kyi/ khyad par dbye ba de la med/ / 'di dang phyi ma gnyis kyi ru// thob pa chos kyi sku nyid yin// 'og ma rgyu 'bras 'dod pa dang// bar ma thob pa'ang rigs 'dzin sa// des kyang rim par bkod nas kyang// tha ma 'khor lo sa la bsgyur/ / de nyid khyad par cir mi 'dod// rdo rje sems dpas yang gsol ba// chos kyi sku yi byin brlabs la// sku gsum 'byung bar 'dod pa de// 'di yi gzhung dang mi 'gal lam// de yi gtan tshigs ji ltar lags/ / ye shes gsang bas bka' stsal pa// nga yi chos sku chen po de// rol pa'i khyad par cir snang yang// gdul bya rnams la sku gsum tshul// ma btsal chos nyid shar ba la// zhes pa 'dod pa de la med/ / 'khor ba'i gnas su'ang de ltar shar// phyogs med ba yi ye shes yin// de las ma grub ci yang med// snang ba nga yi sku ru shar// grags pa nga yi gsung du shar// dran rtog nga yi thugs su shar// nga yi sku gsungs thugs nyid du/ / sangs ma rgyas pa gcig kyang med// ces gsungs pas/ rdo rje sems dpa' la sogs pa'i 'khor thams cad mngon par dga' 'o// ye shes gsang ba'i rgyud las/ 'bras bu the tshom bsal ba'i le'u ste bco lnga pa'o/ /// de nas rdo rje sems dpa' la sogs pa'i 'khor 'dus pa thams cad kyis/ bcom ldan 'das ye shes gsang ba'i mdun du bltas te/ 'di skad ces bstod do// ye shes gsang ba'i sku ni ri bo brtsegs pa 'dra/ / thams cad zil gnon yon tan rgyas pa'i sku// thub pa khyu mchog 'jig rten sgron me mdzad// 'jig rten sgron me de la phyag 'tshal 'dud// 'jig rten sgra sgrogs ston pa'i gsung 'byin pa/ / ston pa smra ba'i seng ge ye shes sku// smra mchog yang dag don rnams ston mdzad pa'i// yang dag don ston de la phyag 'tshal 'dud// zhi dang ma zhi thams cad kun tu yang dag gsal/ / dmigs med don dam rgya mtsho 'dra ba'i thugs// thams cad mnyam pa'i thugs la phyag 'tshal 'dud// yon tan thams cad ma 'dres yongs su rdzogs// gti mug mun pa sel ba sgron ma'i mchog/ bka' bzang rmad du byung ba kun gyi mdzod// ston pa ye shes can la phyag 'tshal bstod// zhi ba'i gsungs sgrogs seng ge lta bu'i gsung// pha rol mu stegs thams cad 'joms mdzad cing// ye shes mtshon gyis srid pa'i btson ra 'joms/ / 'gro ba'i sdug bsngal sel mdzad de la phyag 'tshal bstod// de'i tshe 'khor 'dus pa thams cad ye shes gsang ba'i sku la thim par gyur to// ye shes gsang ba'i rgyud chen po las/ 'khor thams cad mngon par dga' nas bstod pa'i le'u ste bcu drug pa'o//// de nas bcom ldan 'das ye shes gsang ba'i rgyal pos/ kun dang thun mong ma yin pa'i ye shes gsang ba'i rgyud chen po 'di mi nub ci dar bar bya ba'i phyir/ bstan pa gtad pa 'di gsungs so// nga yis gsungs pa'i rgyud rgyal 'di// chos rnams kun gyi me long yin// bstan pa thams cad 'di las byung// dus gsum bde gshegs rnams kyi shul/ / go 'phang gcod pa'i lam chen yin// ma rig sel ba'i lam chen yin// rgyud kyi rgyal po lung gi bla// man ngag nges pa'i rtsa ba yin// rgyud kyi rgyal po gsang ba 'di// rdo rje sems dpa' khyod la gtad/ / sems dpa' rdo rje khyod kyis kyang// ston pa smra ba'i seng ge gyis// 'dus ba'i 'khor du lung ston cig/ 'dus pa'i 'khor tshogs rnams kyis kyang// zhe sdang can dang log sred can/ / theg pa dman pa dag la ni/ kha mkhas gzhog ngoms ser snas bcings// nyon mongs rgyud la rten byed dang// bla ma dag la ma gus dang// dpon bas mkhas par smra ba dang/ kha gsang bka' rkun dam nyams dang/ / mkhas la smod cing rang che 'byin// de la gsang ba'i rgyu rgyal 'di// nam yang bstan par ma gsungs so// gal te gsang ba 'di bstan na// dus gsum rgyal ba'i thugs dkrugs te// ye shes gsang ba'i zhabs nas drangs/ / 'phags pa thams cad thugs khros te// de yi lus sems sgrol bar nges// mkha' 'gro chos skyong bsrungs ma'i tshogs// de yi lus la za tshogs bkram// tshe yi dus byed byas nas ni/ / de ma thag tu skad cig la// rdo rje dmyal ba'i bstan pa byed// de yi sdig pa char mi phod// de bas snod dang ldan pa yi// dpon la gus dang dad pa che// brtson 'grus drag dang shes rab rno// theg pa che la mos pa dang/ / rdo rje mched la gdung sems che// snying rje chen po'i rlan dang ldan// ci yang ma chags dga' ba yis// bla ma sgo gsum mnyes byed pa'i// las dang skal bar ldan pa yis// rnal 'byor chen po khyod la gtod/ / gsang ba'i rgyud rgyal chen po 'di// gcig dang gnyis las ma gtogs pa// gsum la spel na dmyal bar ltung// gdeng ldan 'ga' yi gter du bcang// snang dgu rnams kyi spyod yul min/ / ces gsungs so// kun tu bzang po dgongs pa'i phugs yang dag pa'i don man ngag tu gsungs pa/ rdzogs pa chen po ye shes gsang ba'i rgyud kyi rgyal po las/ sdud pa bram ze la man ngag khong thon du bstan pa'i le'u ste bcu bdun pa'o/ /// rgya gar dga' rab rdo rjes/ bram ze bde mchog la/ bde ldan gyi yang thog tu rin po che gser gyi glegs bam la bai DUr+Ya zhun mas bris pa'i bla dpe gnang ste/ gdung rabs lngar bla dpe las mi bzhugs so// rdzogs pa chen po ye shes gsang ba'i rgyud rdzogs so//// bu la gtad do pha yi btsas// snod med rnams la shor ra re// rdzogs pa chen po'i klong dgu bam po 'bum sde las 'di las zab pa mi bzhugs so/ / rdo rje mkha' 'gros srungs shig/ sa ma ya/ rgya gar gyi mkhan po sha ri sing ha pra ba ta dang/ bod kyi lo tsa ba A tsar+ya bai ro tsa nas bsgyur cing gtan la phab pa'o/ / // rgya gar skad du/ bo d+hi tsi d+ha ma hA san d+hi dz+nya na gu h+ya shi tan tra pra ka sa ko d+hi sa ma d+ha nA ma/ bod skad du/ byang chub kyi sems rdzogs pa chen po ye shes gsang ba bshad pa'i rgyud gsal ba mtha' dang mnyam pa zhes bya ba/ dpal rdo rje sems dpa' la phyag 'tshal lo// 'di skad bshad pa'i dus na/ ston pa bstan pa gnas 'khor dus// ngo mtshar chen po a la la// ston pa kun rig rgyal po yis// 'og min rig pa'i gzhal yas su/ / bstan pa a ti yo ga 'di// gnas lugs stong pa kun 'byung 'khor// 'dzin pa sdug bsngal 'khor ba'i 'khor// ye shes rnam dag grol ba'i 'khor// gnas lugs 'khor lugs grol lugs gsum/ / dus gsum rtogs pa'i dus gcig na// yid dang chos ni kun tu bzang// 'byung ba lnga ni lha mor shar// phung po lnga ni rdzogs sangs rgyas// rnam shes tshogs brgyad sems dpar grol// yul brgyad sems mar rtogs pas su/ / kun rdzob ye shes sgyu ma la// 'jig rten brtan g.yo la sogs pa// snang ba nyid na ngo bos stong// stong dang mi stong mtha' ma reg/ de kun chos sku chen po yin// rnal 'byor rnam pa bzhi dag dang/ / dus gsum sangs rgyas thams cad yang// nga yi rang bzhin rtogs pa la// nga 'byed pa mi mnga' ba'i thugs rje thabs cig tu bzhugs so// de'i tshe de'i dus na lha'i dbang po brgya byin gyis shin tu gdung ba'i thugs rje chen pos phyogs bcu'i sangs rgyas thams cad la 'di skad ces bskul to/ / e ma ho/ gsung gi mnga' bdag thams cad kyis// rtsol ba'i theg pa mthar ston nas/ / rtsol bral theg pa mi gsung ba// thugs rje chen po yal lam ci// skal ldan gdul bya mchis pa la// bya bral bdud rtsi lta bu yi// skye med ye shes gsang ba'i rgyud// nam mkha' lta bu bshad du gsol/ / zhes zhus pa dang// de nas phyogs bcu'i sangs rgyas thams cad dgongs pa 'dus nas mgrin gcig tu// rdo rje sems dpa' la 'di skad ces bka' stsal to// dus gsum sangs rgyas thams cad kyi/ / thugs rje'i rang bzhin khyod yin pas// sangs rgyas kun gyi mdzad par shar// mdzad pa'i 'phrin las khyod kyis mdzod// gsung gi mnga' bdag thams cad kyi// ye shes rang bzhin khyod yin pas// thams cad byang chub sems su gsal/ / ye shes gsang ba khyod kyis shod// bde gshegs ma lus thams cad kyi// sku yi ngo bo dang ldan pas// rmad byung rol ba'i sku ru shar// sku yi sprul pa khyod kyis khye// dus gsum mnga' bdag thams cad kyi/ / yon tan 'dus pa khyod yin pas// rmad byung rol ba'i byin brlabs shar// yon tan thams cad khyod las byung// skye med nam mkha' lta bu'i thugs// tshig gcig don kun rdzogs pa'i bdag/ rig chen 'phrul gyi snying po'i sgo// skal ldan rnams la bstan du gsol// zhes gsungs pa dang// skye med rdo rje sems dpa' de rang bzhin 'dus ma byas pa'i rdo rje lta bu'i ting nge 'dzin las bzhengs te/ e ma ngo mtshar rmad byung gtsug/ rin chen 'phrul gyi thabs ldan pas// gang 'dod 'thun pa'i sgo de nas// rtsol med dbyig dang phrad par bgyi// byang chub sems kyi dngos po la// brjod pa'i tha snyad kun bral yang/ / ma rtogs blo la tshig sgo nas// gsung gi sgron ma gsal bar bgyi// zhes gsungs so// de nas sangs rgyas rdo rje sems dpa' des/ rin chen thugs kyi dpal be'u nas/ phyag na rdo rje thugs kha nas phyung ste/ ye shes rang 'bar ba'i rdo rje 'khor ba gcod pa de lag tu gtad nas 'di skad ces gsungs so// gnyis med ye shes gsang ba'i don// byar med mi rtsol ye shes che// dbu ma chen po'i drang po'i lam/ / 'dus pa'i tshogs la bstan par bgyi// zhes gsungs so// de nas phyag na rdo rje sems dpa' la 'di skad ces zhus so// chos rnams kun gyi mthar thug pa// rdo rje sems dpa' nam mkha' che/ / nam mkha' rtog pa skye med cing// rtog pa de nyid nam mkha' 'dra// mi gang nam mkha' bsngo ba la// rang don chen po nam mkhas 'byung// thugs rje nam mkha' kun la khyab// nges don chos kyi rgyal po 'di/ / tshig gi spyod yul ma yin pas// bdag gis sgrol bar shin tu dka'// ma rtogs pa la tshigs sgo nas// mtshon nas rtogs par bya ba'i phyir// gdul bya skal ldan yod pa la// ci rigs par ni rnam par sgrol/ / zhes gsungs pa dang// de'i tshe lha de ba bzang skyong gi bu lha'i bu kun dga' snying po zhes bya ba/ khye'u snang ba bsam gyis mi khyab pa zhes kyang bya// lha bu sems lhag can zhes bya ba des/ gsang ba'i rdo rje la zhus pa/ e ma ho/ stobs po che la drag shul che// rig sngags gsang sngags dge ba po// gdul dka' ma lus 'dul mdzad pa// sems dpa' rdo rje phyag 'tshal bstod// ye shes zhes ni gang la bgyi/ / gsang ba zhes ni ji ltar gsang// rgyud ces bgyi bar bshad du gsol// zhes zhus pa dang// bcom ldan 'das kyis bka' stsal pa// gdod nas ma skye snying po a// rang byung ye shes rang gi sems/ / ye shes chen po gang 'dod pa// rang gi sems la btsal bar gyis// 'di ni kun la bdal khyab kyang// rang gsang thabs kyi mchod pas na// ye shes gsang ba sbas pa ni// gsang ba zhes ni de la bya/ / rgyud ces bya ba bzhi ru bshad// gzhi yi rgyud dang lam gyi rgyud// 'bras bu'i rgyud dang 'dus pa'i rgyud// 'di ru ma 'dus gang yang med// gzhi ni nyi ma'i snying po la// lam ni nam mkha' lta bur bde/ / 'bras bu yid bzhin nor bu la// 'dus pa rgya mtsho lta bu'o// zhes bka' stsal to// de nas gsang ba'i bdag po des// sum cu rtsa gsum lha gnas su// a mo li ka khri stengs der// gser gyi mchod rten bang rim bzhi/ / srog zhing rdo rje rtse dgu'i steng// nang bar 'od kyi zhags pa yis// sems dag can de spyan drangs te// 'khor lo 'bar ba'i steng du gzhag/ gser gyi 'khor lo rtsibs stong pa// rin chen 'bar ba'i gdugs phub ste/ / gsang sngags bdag por byin gyi brlabs// rgyal thabs sbyi blugs dbang bskur te// 'da' ba med pa'i gdams ngag phog/ rna brgyud rdo rje zam pa bstan// dus mtha'i skad cig de nyid la/ / klong dgu bam po nyi khri des// rin chen 'bar ba'i ched du gsungs// lha yi dbang po'i drin gyi su// lha gnas gsum du 'di ltar grags// kun bzang thugs kyi byin brlabs kyis// rgyal ba dgongs pa brgyud pa ni/ / byin gyis brlabs kyis bshad pa de// 'og min lha yi gnas su gsungs// zhal gyi pad+ma 'dzum pa las// rigs 'dzin rigs pas brgyud pa ni// rang gi ngo bo bshad pa de// dga' ldan lha yi gnas su gsungs/ / ljags kyi 'od zer phyogs bcur 'phros// gang zag snyan khung brgyud pa ni// sdeb sbyor tshig gi bshad pa de// sum cu rtsa gsum gnas su gsungs// de nas 'dzam gling ji ltar babs// yang sprul rgyal sras thugs kyi bu/ / u rgyan thor cog can gyi bu// rtse drug rin chen rgang de ru// rgyal po d+har ma a sho yi// bu mo bde gshegs byang chub mas// d+ha na ko sha li phug tu// brag phug gser gyi yu ba can/ / da he na'i 'du khang du// jo mo dang g.yog mor bcas nas phyin// tshe gcig sangs rgyas bsgrubs pa dang// pha med sras gcig sku bltams te// skyes ma thag tu chos shes te// sprul pa'i sku ru e ma ho/ / dpon g.yog thams cad dga' ba yis// dga' rab rdo rjer mtshan gsol lo// 'dzam gling 'jing dang rgyal 'theb bya// rgyal sras gsang ba'i snod ldan la// rna brgyud lung gis gter chen bkrol// brda don sprod pa'i gdams ngag btab/ / rgyal thabs spyi blugs dbang bskur te// snod ldan sangs rgyas sa la bkod// ces gsungs so// gsal ba mtha' dang mnyam pa las/ gleng gzhi'i le'u ste dang po'o/ /// de nas sems dag lha yi bus// bcom ldan 'das la 'di skad gsol// e ma gsang bdag rdo rje 'dzin// kun gzhi nyi ma'i snying po la// 'khrul pa'i dri ma yod dam med// nam mkha' lta bu'i lam de la/ / zag bcas bde ba 'char mi 'char// 'bras bu rin chen lta bu la// thugs rje 'byung ngam mi 'byung lags// 'dus pa rgya mtsho lta bu la// rnyog ma bdog gam mi bdog lags// zhes zhus pa dang/ bcom ldan 'das kyis bka' stsal pa// dus gsum gsal 'grib mi mnga' yang// chu bur dang ni zhig gi mig/ rkyen gnyis gsal 'grib gnyis su 'byung// bsam du med pa'i chos nyid du// bsam du med pa'i blo gzhag pas/ / sgyu ma'i bde ba 'byung bar 'dod// mkha' bsal nam mkha' lta bu'o// dper na rin chen man shel la/ kha dog phyogs ris med mod kyang// 'og gdan dkar dmar rkyen gyis su/ / thugs rje sprul par 'char ba'o// rgya mtsho chu bo 'phro 'du bzhin// rba rlabs med pa'i mnyam nyid mtsho// rnyog ma med pa'i bdud rtsi chu/ khams gsum 'khor ba'i dri ma khrus// zhes bka' stsal to// gsal ba mtha' dang mnyam pa las/ rgyud bzhi mdor bstan pa'i le'u ste gnyis pa'o//// de nas sems dag lha'i bus/ bcom ldan 'das la 'di skad ces zhus so// 'dus pa rtsa ba'i rgyud de ru// kun gzhi rtsad nas bcad pa dang/ / shes bya'i 'bras thag chod pa yis// rig pa rang sar grol ba de// ston pas bdag la bshad du gsol// sems dag can gyis zhus pa dang// bcom ldan 'das kyis bka' stsal pa// nam mkha' lta bu'i rgyud de ru/ / gdod nas ma skyes snying po a// gzhi la skye ba med par bshad// 'gro ba kun la rang bzhin gnas// de nyid kun la khyab par bshad// ma rig las dang rlung gis 'khor// de ma rtogs pas mkhor bar bshad/ / rtogs na rdzogs sangs rgyas su nges// de rtogs sangs rgyas yin par bshad// 'di des kun gzhi rtsa bcad de// 'di ni shes bya dras thag gcad/ khyung chen nam 'phangs gcod pa bzhin/ / lta bas phyi rgya rlabs kyis bcad// rig pa las su rung ba yis// ting nge 'dzin la 'byung 'jug med// thams cad de bzhin nyid shes pas// gnyis med rdzong nas yangs ba'i rgya// brdal khyab chen po'i sa non pas/ / kun tu bzang po bde chen sa// tha mar rig pa grol ba ni// lha yi bu khyod 'di lta ste// snang ba sems su grol ba ni// thams cad rang rig byang chub sems// sems de stong par grol ba ni/ / nam mkha' bzhin du spros dang bral// stong pa gnyis med grol pa ni// sna tshogs rang bzhin mi gnyis che// de la mtshon du med pa ni// thig ler rdzogs pas mtshon du med// rgyud kun gcig gis gcig bshad pa/ / gong 'og sdebs te 'di ltar bshad// skye med lta ba stong pa gsum// dus gsum gcig ste khyad par med// rang bzhin rnam par dag pa'i phyir// kun khyab sgom pa gnyis med gsum// dus gsum gcig ste khyad par med/ / mtshan nyid gnyis su med pa'i phyir// 'khrul spyod byang chub sems dang gsum// dus gsum gcig ste khyad par med// rol ba 'gag pa med pa'i phyir// blo rtog 'bras bu thig le gsum/ / dus gsum gcig ste khyad par med// blo rtog chos nyid grol ba'i phyir// de ltar gtan tshigs bzhi po la// gtan tshigs re la gtan tshigs gsum// ngang dang rang bzhin bdag nyid des// gtan tshigs gsum gyis gtan la dbab/ / ma byas ma bcos lhun gyi grub// ces bka' stsal to// gsal ba mtha' dang mnyam pa las// bdud rtsi u0f35tshig gsum gyi le'u ste gsum pa'o//// de nas sems dag lha yi bus/ / bcom ldan 'das la 'di skad gsol// mnyam nyid rgya mtsho lta bu ru// le tse bcu gsum rdo rje rtse// zab mo bcu gsum rmad du byung// lnga tshoms lnga la bsdus rgyas lnga// 'gro drug 'khor ba'i g.yang sa bcad/ / bzhi skor bzhi la gtan tshigs bzhi// bdud rtsi lta bu bzhi dang sbyar// zhes pa dang/ bdud rtsi dri med brgyad ldan mtsho// mkha' la nyi shar 'od zer lnga// dbus na nam mkha' gzhi yi mthongs// gting na rin chen bcu gsum gter/ / de tshigs bdag la bshad du gsol// zhes zhus pa dang// bcom ldan 'das kyis bka' stsal pa// dper na sum cu rtsa gsum ma// rdo rje gdan gyi sa ris bzhin// mnyam pa'i sa la gru bzhir bri/ / thig bzhi btab pas le tse dgu// blo bur bzhi yis 'byed pa yi// le tse bcu gsum gri bar bya// phyogs bzhir rdo rje rtse gsum pa// 'gyur ba med pa'i brda yin no// zab mo bcu gsum rmad byung ba/ / rde'u bcu gsum dgod par bya// dbus su rde'u mthing kha dang// phyogs bzhir dmar po dgod par bya// mtshams bzhir ljang khu dgod pa'o// blo 'bur bzhi la sngon po las// dbus la phyogs bzhis bskor ba ni/ / kun gzhi ris med lnga tshoms so// shar la phyogs bzhis bskor ba ni// lta ba rdzong gi lnga tshoms so// lho la phyogs bzhis bskor ba ni// sgom pa 'phrang gi lnga tshoms so// nub la phyogs bzhis bskor ba ni/ / spyod pa klang gi lnga tshoms so// byang la phyogs bzhis bskor ba ni// 'bras bu gdeng gi lnga tshoms so// bsdus pa khu byug tshig drug la// rgyas pa sgom pa'i don drug ste// rnam rgyal brtsal chen brtsal thabs drug/ yogs rgyas khung chen che ba drug/ shin tu rdzogs par rgyas par ni// nam mkha'i che yis thig le drug/ drug tshan lnga yis bshad pa yis// 'gro drug 'khor ba'i g.yang sa cad/ / dbus la phyogs bzhis bskor ba ni// kun gzhi rtsa nas gcad pa'i phyir// gzhi yi chos bzhir bshad par bya// dbus la mtshams bzhis bskor ba ni// shes bya'i dras thag gcad pa'i phyir// lam gyi chos bzhin bshad par bya/ / dbus la 'bur bzhis bskor ba ni// rig pa rang sar grol ba'i phyir// 'bras bu'i chos bzhir bshad par bya// rang bzhin rol pa mtshan nyid dang// blo grol de ltar gtan tshigs bzhis/ / go rims sbyar te bshad par bya// dper na rgya mtsho lta bu yi// 'dus pa le'u brgyad ldan pas// mkha' la nyi shar 'od zer lnga// bsdus rgyas lnga ru bshad par bya// dbus na nam mkha'i bzhi yi mthongs/ / bdud rtsi lta bu bzhi dang sbyor// gting na zab mo bcu gsum gter// rmad byung bde 'jam nam mkha' nyid// rje brtsan rtse mo kun 'dus la// srog dang myu gu rin po che// spyi bcings 'phra bkod sems kyi tig khams gsum sgron ma sems kyi gter/ / shin tu rgyas par bshad pa ni// rgyud kun rang rang nang du bshad// 'dir ni bsdus te bshad pa la// ye shes gsang ba bshad pa'i rgyud// de phyir don 'brel gsal byed pas/ / rgyud kyi phyi ma yin par bshad// ces gsungs so// gsal ba mtha' dang mnyam pa las/ bsdus te bshad pa'i le'u ste bzhi pa'o//// de nas sems lhag lha yi bus// gsang ba'i bdag po bcom ldan 'das/ / gsang sngags gtso la 'di skad zhus// de gang gsang ba bshad du gsol// zhes zhus pa dang/ bcom ldan 'das kyis bka' stsal pa// ston pa gsum dang rim pa brgyad// phyin ci log gsum 'gro drug la/ / ye shes gsang ba nyid du bstan// zhes gsungs pa dang// yang ni lha yi bu yis zhus// bstan pa gsum po gang la bgyi// rim pa brgyad la ji ltar gsang// phyin ci log gsum ci ru 'gyur/ / 'gro drug 'khor ba ji ltar lags// zhes zhus pa dang// smras pa/ mdo sde yan lag bcu gnyis dang// 'dul ba'i lung ni sde bzhi la// mngon pa gong 'og ston pa yis// ji tsam pa yi tshig brjod kyang/ / bya med rtsol bral ma bstan pas// ye shes gsang ba sbas te gab// chos sku gdod nas dag pa la// btags pa'i gzung 'dzin ngang gis med// des na chos nyid gsang ba yin// longs spyod rigs pa dag pa la/ / phyi nang med par sems nyid gsang// des na ye shes gsang ba'o// sprul pa sna tshogs cir yang ston// dper na dug sprul rtses pa 'dra// ma bcos lhun grub chen po la// nges pa med pas gsang bar bshad/ / yang smras pa/ nyan thos mdo sde bye brag gnyis// gzugs ye shes gsang ba la// gzugs su phra rab rdul du mthong// sems la rdul med phyin ci log/ rdul la rtsod pa e ma 'khrul// de phyir ye shes gsang ba yin/ / de bzhin cha 'thun rang rgyal ni// chos ni rnam pa bco lnga la// gzhan la bdag med cig ma rtogs// rten 'brel chos la nges brtags pas// rgyu med chos kyi don ma mthong// bse ru'i sa la ye shes gsang/ / theg chen bde ba gnyis su 'dod// kun rdzob sgyu ma'i dpe bzhin te// don dam gtan tshigs rigs pas tshol// lam lnga sa bcu rim gyis bgrod// de yang bsti gnas drang ba'i don/ / bgrod med bgrod pas ye shes gsang// yang smras pa/ bya rgyud kyi kri ya ni// mtho 'jam dma' rtsub rigs gsum 'dod// dag pa gsum gyi sgor zhugs nas// dam tshig ye shes rje 'bangs lta// togs pas rdo rje 'dzin pa'i sa/ / nges pa thob kyang bcos pas gsang// gnyis ka rgyud kyi u pa la// lta spyod gong 'og rjes su 'breng// nges pa med pas khye ber 'dra// ye shes dam tshig dpon g.yog tshul// mtshan ma'i dngos po chu zla ltar/ / rigs bzhi zhen pas ye shes gsang// rnal 'byor rgyud kyi yo ga ni// mngon byang lnga yi sgor zhugs nas// don dam skye 'gag med pa la// byin gyis brlabs nas lha ru lta// bdag dang lha ni grogs po'i tshul/ / stug po bkod pa'i sa 'dod pas// ma bcos rnal ma'i sa ma rtogs// des na ye shes gsang ba yin// yang smras pa/ bskyed pa ma hA yo ga ni// ting 'dzin gsum po gtsor byas nas/ / thabs dang shes rab sgor zhugs te// shes rab gzungs ma mdzes ldan la// thabs chen ye shes mngon sum du// bde ba zag med gzung ba yin// pad+ma spyan gyi sa skye bo// de yang rnam pa'i skyon yin pas/ / de la brten par mi bya gsang// rdzogs pa a nu yo ga yang// grangs mdog ma nges sku gsungs thugs// dper na chu la nya ldang tshul// ma bskyed rdzogs pa'i tshul du sgom// dbyings dang ye shes dbyer med blta/ / yi ge 'khor lo tshogs chen blta// rang 'dod 'bras bu thob mod kyang// mthar thug 'bras bu des mi nus// des na e ma ye shes gsang// brtsal ba'i bsam pas dbyings mi bskyod/ / des na de sgrib skyon can yin// de bas de lung de nyid la// de nas de nyid grub pa med// bya bral rdzogs pa chen po la// rim brgyad bgrod pas rtsol bral slad// des na ye shes gsang ba'o/ / zhes gsungs so// gsang ba mtha' dang mnyam pa las/ gang la gsang ba'i le'u ste lnga pa'o//// de nas sems dag lha yi bus// bcom ldan 'das phyag na rdo rje la// zhen drug 'khor bar 'khyams pa yi/ / ma rig 'khrul pa ji ltar lags// zhes zhus pa dang/ bcom ldan 'das kyis bka' stsal pa// byang chub sems kyi rang bzhin ni// gdod nas ma skyes 'od gsal de// 'khor 'das ma lus kun la khyab/ / chos rnams kun gyi ngo bor shar// sangs rgyas sku dang ye shes thugs// sems can lus ngag yid la khyab// thams cad dbyer med byang chub sems// de ltar dag pa'i don rig na// dper na kun bzangs seng phrug bzhin/ / shes rab can gyis rtogs 'gyur te// ma rtogs mun pa'i mtsho la spyod// rtogs na sku gsung thugs yin te// rang byung lnga ru snang ba las// rang byung nyid du ma rig pas// zhen pa lnga ru phyin ci log/ 'bras bu khams gsum sems can byung// 'khor ba thog mtha' med pa nas// rgyu rkyen rtog pa'i rkyen bzhis 'khrul// lhan cig skyes pa'i ma rig pas// kun nas slong ba'i sa bon byas// las dang nyon mongs rkyen byas nas/ / kun rtags ma rigs pa yis 'khrul// grib ma gzugs kyi dbe bzhin du// skyod byed las kyi lung gi rlubs// zhes sdang dmyal ba'i tsha grang 'khor// nyon mongs zhes sdang rnam smin gyis/ / dmyal ba'i gnas su skyes srid na// zhes sdang ye shes nyid du shes// zhe sdang ma spangs gnas su dag/ de ltar ma shes ye shes gsang// ser sna bkres skom yi dwags 'khor// ser sna las kyi rnam smin gyis/ / yi dwags gnas su skyes srid na// ser sna ye shes nyid du shes// ser sna ma spangs gnas su dag/ de don ma rig ye shes gsang// gti mug glen lkug byol song 'khor// gti mug las kyi rnam smin gyis/ / dud 'gro'i gnas su skye srid na// gti mug ye shes nyid du shes// gti mug ma spangs gnas su dag/ de nyid ma rig ye shes gsang// phrag dog 'gyur ba mi ru 'khor// phrag dog las kyi rnam smin gyis/ / mi yi gnas su skyes srid na// phrag dog ye shes nyid du shes// phrag dog ma spangs gnas su dag/ de don ma spangs ye shes gsang// nga rgyal 'thab rtsod lha min 'khor// nga rgyal las kyi rnam smin gyis/ / lha min gnas su skyes srid na// nga rgyal ye shes chen por shes// nga rgyal ma spangs gnas su dag/ de nyid ma rig ye shes gsang// 'dod chags ltung ba lha ru 'khor// 'dod chags las kyi rnam smin gyis/ / ltung ba'i sdug bsngal myong tsa na// ltung ba ye shes chen por shar// 'dod chags ma spangs gnas su dag/ de nyid ma rtog ye shes gsang// 'khor ba shing rta'i 'phang lo 'dra// lha mi gtsang ma'i lus thob kyang/ / ma rtogs bar du 'khor bar 'khyam// thog mtha' med kyang rtogs na yod// ces gsungs so// gsang ba mtha' dang mnyam pa las/ zhen drug la gsang ba'i le'u ste drug pa'o/ /// de nas sems dag lha'i bus// gsang ba'i bdag po la 'd-i ltar zhus// log pa gsum la gsang ba'i don// ston pas 'tshams par bshad du gsol// bcom ldan gsang bas bka' stsal pa/ / rtag pa chad pa rgyang 'phen gsum// lam log phyal ba log pa'i lam// 'jig rten 'di yi btsan phyug las// phyi ma phyal bar 'jog pa'i phyir// mu stegs lta log bsam mi khyab// dbye na sum brgya drug cu ste/ / de yang bsdu na drug cu gnyis// shin tu bsdus pas rtag chad gnyis// shar byung log pa dag dang gsum// nga med nga dang bdag tu bzung// de phyir mu stegs 'khrul pa'i lam// des na ye shes gsang ba yin/ / tshangs pa dbang phyug khyab 'jug gsum// mu stegs lta ngan lha yin te// de la srog gi mchod pa dbul// me la rten dang dbyug gu gsum// phya 'am dbang phyug mchod legs na// mtho ris su yang de yis gtong/ / phya 'am dbang phyug mchod nyes na// ngan song du yang de yis sgyur// des na rig byed bzhi yis su// lam log thar pa thob par 'dod// des na ye shes gsang ba yin// bdag ces byang ba'i rtag pa des/ / mthe bong nyung 'bru tshul tu 'dod// rang bzhin rtag par 'dod pa ni// sran zlum tsher ma rno sogs pa// 'di la byed pa su zhig yod// rang bzhin rgyu de rtag par 'dod// rtag par lta ba thams cad la/ / rim dang cig car gnod pa'i phyir// des na ye shes gsang ba yin// mur thug chad par blta ba ni// 'byung ba 'dus ba'i snang ba las// rang sar zad nas cang med 'dod// ma shi tshe la skyid par spyod/ / shi na 'u yi sbyod yul min// lus kyang thal ba bzhin song na// slar 'tsho ba dag ga la srid// dper na spyang ku'i rjes dang mtshungs// des na log pa'i lam yin pas// de la rten par mi bya'o// chad pa gnyis 'dzin shes par 'dod/ / rten cing 'brel par 'byung ba'i phyir// dngos med rtag pa rig pa'i rgyun// rlung la rten gyin rgyun mi 'chad// des na ye shes gsang ba yin// e ma sems can snying re rje/ / bdag tu 'dzin pas gzhi la lta// ye shes phyi nang med pa la// phyogs ris bye bas phyogs char ltung// bdag med bdag tu ltas pas 'khrul// bdag 'dzin med pa'i ye shes ni// phyi nang zang thal chen po la/ / phyogs su ltas pas grub pa med// des na ye shes gsang ba yin// rtag na ye shes chen por rtag/ chad na 'khor ba rtsad nas chad// bying na chos kyi dbyings su bying// rgod na ye shes rol par rgod/ / ces bka' stsal to// gsal ba mtha' dang mnyam pa las/ log pa gsum la gsang ba'i le'u ste bdun pa'o//// de nas sems lhag lha yi bus// gsang ba'i bdag la 'di skad gsol// ye shes gsang ba thugs kyi mdzod/ / kun la gsang ba ji ltar rtogs// zhes zhus pa dang/ gsang ba'i bdag pos bka' stsal pa// ye shes gsang ba'i rang bzhin la// sgra dang tha snyad kun 'das kyang// snod ldan rtogs par 'dod pa yis/ / gtan tshigs tshad ma gsum gyis ni// de rgyud rtogs pa'i rol par bshad// bya bral lung dang rig pa'i nyams// bla ma dam pa'i gdams ngag gsum// ye shes gsang ba rtogs pa'i mchog/ mkha' gsal byang chub sems kyi lung// snang srid sems su gtan la 'bebs// ye shes gsang ba'i ngo bo ston// bdag nyid gsang ba'i dkyil 'khor 'char// lung gsum snang bas ston pa'i bka'/ / yin pas nga yi bka' dang 'thun// thams cad sems su 'dus pas na// sems ma yin pa'i chos mi snang// ji ltar snang ba'i chos rnams ni// sems la snang phyir sems yin te// thams cad rang rig byang chub sems/ / de ni lung gi tshad ma'o// de phyir sems lung chen po yin// thams cad sems su gtan la dbab// des na thams cad sems yin te// 'dzin ba'i shes pa yod pa'i phyir// tshor ba nyams su myong ba'o/ / rig pas nyams su myong tsam na// yid ches rig pa'i gtan tshigs so// rnam gsum lung gi ngo bo ni// sems nyid rig pa'i chos yin no// ngo gcig snang tshul tha dad yang// tha dad mthong ba brtags pa ste/ / bag chags logs pas skyugs tsam na// sems kyang log par snang ba ste// dung la ser por mthong bzhin du// dung la ser por ma grub par// mi gser rkyen gyis log par snang// dung la ser po yod na ta/ / ma 'khrul shes pas mthong bar thal// de bzhin zhenartog 'khrul ba yis// brtags pa sna tshogs dag tu mthong// dper na phug ron ske lta bu// dang po mtshan ma'i rang rig ste// gnyis pa med pa'i rang rig yin/ / gsum pa gnyis ka med pa de// mtshan gzhi med pa'i mtshan gnyis ni// mi srid me med tsha ba bzhin// shes pa skye lugs gsum yin te// rtog pa dang po chos pa yis// gnyis pa rang bzhin dbyings su thim/ / mthong ba sna tshogs rig pa'i nyams// bla ma'i zhal las shes par bya// de phyir ye shes gsang ba yin// gsang sngags skyon yod ma yin te// blo ngan shes rab chung ba la/ / thugs rje chen po thabs kyis gsang// zhes gsungs so// gsal ba mtha' dang mnyam pa las/ tshad ma gsum gyi le'u ste brgyad pa'o//// de nas sems lhag lha yi bus// rdo rje zam par dbang bskur zhus/ / gsang ba'i bdag por bka' stsal pa// gnas dang dkyil 'khor dpon dang g.yog/ 'jug tshul dus dang yon bdun bshad// gzhi yi gnas dang rten pa'i gnas// thams cad rang rig sems nyid de/ / rgyu rkyen bral ba'i dngos bzhi ni// sangs rgyas sems can thams cad kyi// bzhugs gnas rmad byung khyad par can// rten gnas ri bo de shan nam// za ma tog gi rgyal mtshan nam// rgya phug rdo rje gdan stengs sam/ / wA rA NA si'i bsil khang ngam// gru 'dzin ko sha li phrag go/ dkyil 'khor rang byung ye shes te// ma bcos dngos gzhi'i dkyil 'khor nyid// thams cad rang rig ye shes gsal// mkha' ltar khyab pa'i bde chen no/ / tsit+ta rin chen dkyil 'khor ni// 'og min rig pa'i gzhal yas khang// zag pa zad pa'i mtshan nyid de// dngas ma gsum gyi rtse mor sgom// brda don sprod pa'i slob dpon ni// rang rgyud ma bcos dag pa la/ / don dang 'dres pa'i sgra tshig gis// ye shes rig pa'i ngo bo ston// ma nor nges pa'i slob dpon ni// rang sems bla ma kun gyi bdag/ thams cad rang rig rgyal po la// gdod nas skye med bya btsal bral/ / slob ma rang rig sems la slob// rtogs ldan blo yi khyad par gyis// ting 'dzin shes rab rtsal du rdzogs// gsang sngags mdzod kyi gter 'dzin no// snod ldan slob bu dad pa brtan// rigs brgyud dag pas bla ma khur/ / man ngag gter 'chad gdams ngag sbyin// mang yang gsum las 'da' mi bya// ye shes gsang ba thugs kyi bcud// bka' yi bcud bsdus a ti ni// snod ldan rgyal 'theb cig la gzhag/ dbang dang snod brtag cho ga dang// gsol ba btab nas gnang ba sbyin// sngaun du 'gro ba'i rim pa'o// dang po dngos gzhi'i dkyil 'khor bstan// kun rdzob dkyil 'khor lus la 'bog/ sprul tshig gdams ngag rna bar gzhug/ sems lung 'bogs pa'i gdams ngag bstan// rgyas rtags gdab pa'i cho ga bya// lus la bde mchog bde ba'i dbang// yon tan ldan pa'i bu mo de// thabs kyis bsnyen pa gsum rdzogs nas/ / bde chen rdzogs pa phyag rgya'i rgyu// rin chen gter gyi gdams ngag sbyin// thabs kyi gar stabs bskyod pa yis// gnyis med sbyor ba 'phul pa yin// dga' bar gyur pas dam tshig de// mthong bar gyur pas dngos grub po/ / rol pa'i cho 'phrul la brten nas// rnal ma'i don ni rtogs par bshad// ngag la rang grol rlung gi dbang// bem po'i rlung dang rig pa'i dbang// dang po gyen rgyu thur rgyu dang/ / srog 'dzin khyab byed me dang mnyam// 'byung ba rlung lnga rim gyis gzung// rig pa'i rlung ni gnyis yin te// las kyi rlung gis thur du ltung// ye shes rlung gis gyen la 'dren// rlung gi 'phen pas thams cad byed/ / bems po'i rlung la brten nas su// rig pa'i rlung ni zin gyur na// rtogs pa'i rlung chen don rtogs de// ye shes rlung ni zin pa yis// ye shes gsang ba'i don dang phrad// rol par rig pa rtsal gyi rlung/ / rnal ma'i don dang phrad par bshad// sems la ye shes spyi blugs dbang// rtogs med mthong ba'i lam dang phrad// sgom med don gyi gzer chen gdab// bgrod med rtog pa'i 'jing dang bral/ / rna brgyud lung gi gter chen sgrol// re dogs med pa'i btsun sa thob// 'di de rdo rje lam mchog ste// skal ldan 'bad pa med par grol// rgyal thabs kyi sems rin chen dbang// spyi blugs tshangs pa'i dbang zhes bya/ / rgyud dang lung dang man ngag gsum// gcig la gcig rten gcig gi ngang// rtsal dang cho 'phrul rang snang gsum// rol pas ye shes gsung bar mtshon// dang po bcu bzhi zhag gi dus// nus pa'i tshogs bsog bar chod bsrung/ / mthar phyin thun mtshams bcu phrag bdun// bar do 'byongs shing mthar phyin 'gyur// de nas srog 'dzin bla ma la// lus dang bcas pa'i longs spyod dbul// brda tsam dbang gis mtshon nas su/ / gnas lugs rtogs par the tshom med// ces gsungs so// gsal ba mtha' dang mnyam pa las/ dbang gi le'u ste dgu pa'o//// de nas sems dag lha yi bus// bcom ldan 'das phyag na rdo rje la/ / shes skyob don dang ldan pa yis// sngags gsum bdag gis 'di skad zhus// 'dus pa'i 'khor tshogs mang po la// dam tshig gsang sngags srog yin pas// gsang ba'i dam tshig bshad du gsol/ / bcom ldan 'das kyis bka' stsal pa// lhun grub ye shes gsang ba la// rtsol bas bcos pa'i dam tshig med// dam tshig dam tshig ces bya ba// gud na yod pa ma yin te// rang sems dag na dam tshig yin/ / dag pa'i klong na bsrung mtshams med// rtogs pas lta ba'i yul las 'das// gsal ba bsam gtan spros dang bral// yul las 'das pas spyad du med// lhun gyis gnas pas sgrub tu med// ma yengs dran pas rang sar grol/ / sngags dang phyag rgya rnam par dag/ stong nyid ngang la mchog bshad med// 'khor 'das khyab gdab chen po la// 'phrin las rnam bzhi gdod nas rdzogs// rdzogs pa chen po dam tshig ni/ / rtsol ba'i nad kyis bsrung du med// ye bsrung gdeng gi mchod pa la// bsrung bya srung byed gnang bkag med// re zhig brda tsam rol pa la// rig pa gsal ba'i dam tshig ni// rtog ldan 'khor ba sgrol ba'i gru/ / rdo rje nyid ma lta bur gsal// des na gsal ba mtha' dang mnyam// med pa phyal ba gcig pu dang// lhun gyis grub pa'i dam tshig go/ rang rig ye shes gsang ba la// gzung 'dzin mtshan ma'i chos med pas/ / brjod du med pa'i sems nyid kyis// bsrung du med pa'i ngang du bsdam// bsdam bya sdom byed bral bas bde// gnyis med rig pa'i dam tshig la// 'da' med srog gi gnas gyur na/ / ma bcos rgyal ba'i dam tshig yin// nam mkha' lta bur khyab pa la// mtha' dang dbus med ma bcos pas// 'di yin 'di man phyogs dang bral// phyogs bral skyes bu chen po des// phyogs gcig spang zhing sgrub tu med/ / gtad med 'dzin bral chen po la// phyogs mtshams nges pa'i chos ma yin// sangs rgyas sems cad thams cad la// ma bcos sems kyi rig pa gcig/ rgyu yis ma bskyed ye nas grub// rkyen gyis ma sbyangs gdod nas dag/ rang bzhin rig pa 'od gsal la// ma lus dgongs pa thams cad 'dus// dus gsum bde gshegs thams cad la// rang bzhin dgongs pa gcig las med// rang snang mi 'gyur chos nyid la/ / rang gzhag rig pa mi 'da' na// sems nyid gcig pu'i dam tshig go/ dus gsum sangs rgyas thams cad la// dam tshig 'di las yong mi 'da'// de la dam tshig phyi dang nang// rang bzhin phung po khams bzhin gnas/ / dus gsum 'di dang mi 'bral na// dam tshig ming du btags pa med// rang byung 'od gsal rnam par dag/ lus dag rtsol ba'i nad med pas// ting 'dzin rig pa rtsal gyi dbang/ / mtshon pa'i tha snyad bral ba'o// re zhig kun bzang rol pa ru// gyi nar lhun grub dam tshig la// ye shes gsang ba bya btsal bral// 'bad rtsol dam tshig zhi nas dag/ sel med rin chen gling bzhin du/ / rnam dag ye shes rang byung la// skyon gyi dri ma gdod nas dag/ gzhi rtsa med pa'i sems nyid du// brtags pa'i 'dzin rtog rnam par dag/ lhun grub 'od gsal brdal pa la// rnam rtog btags pa'i sems grub na/ / mu stegs sangs rgyas ci la rtsod/ sangs rgyas sems can ci la btags// rtog pa mngon sum grub pa yi// gcig pur 'dzin pa'i log rtog la// 'khrul pa'i tha ram shin tu dam// rin chen 'phrul gyi lde mig gis/ / tha mal zhen pa ji ltar bzlog/ med de med pa'i snying po can// chad pa mtha' med ma yin no// yod de rdzas su grub pa med// phyal ba btang snyoms rnyog pa med// ril por 'dzin pa'i gcig tu med/ / thig le chen po spros dang bral// mu stegs lhun grub ma yin te// lhun grub 'dod pa kun dang bral// rgya chad phyogs lhung med pas bde// zhes gsungs so// gsal ba mtha' dang mnyam pa las/ dam tshig gi le'u ste bcu pa'o//// de nas sems dag lha yi bus// gsang ba'i bdag po bcom ldan 'das// bcom ldan thugs kyi bang mdzod nas// ye shes gsang ba rtogs pa'i phyir// ye shes mdzod chen bshad du gsol/ / zhes zhus pa dang// gsang ba'i bdag po bcom ldan 'das// rdo rje 'chang gis bka' stsal pa// gdod nas ma skyes snying po a// sgro skur lta ba kun dang bral// thams cad gcig gi rang bzhin la/ / spangs 'gegs byis pas slad pa med// dbyer med ye shes lnga ldan la// sbyong bgrod gnyis lta rang sar grol// skye 'gag gnyis su med pa la// bsgyur dang spyod lnga rnam par dag/ rnam dag lam chen kun grol phyir// mi skye mi 'gag cir mi dgongs// go ba'i yul na bde ba che// 'di ni rnam dag 'jig rten yin// des na lung ldan bla ma yis// rgyal sras slob ma skal ldan la// spyi blugs dbang la gnas byas te/ / rna brgyud gdams ngag nod par bya// bgrod med lam la gnas byas na// sbyangs med sa yi yon tan 'phel// pra khrid sems kyi don bstan pas// sems nyid rin chen snying po la/ / skur ba'i cha gnyis mi rtog ste// brda don sprod pa'i gdams ngag spyin// sprad pa gsum gyi gdams ngag gis// dmar khrid ngo sprad bstan pa dang// sgom khrid thun gyis thun du drang// byang sa gnas sa thim sa gsum/ / bar do'i gdams ngag shes par bya// gnad kyi gdams ngag ma shes na/ kha lta mang pos don mi rtogs// sgra dang tshad ma gang gis kyang// rig pa'i ye shes rnyed mi 'gyur// rtogs pa'i lta ba rig pa'i gter/ / mtshan ma ma spangs rang sar grol// 'khor ba ma bkag gnas su dag/ 'khrul pa ma bsal rtsa nas chod// dug lnga ma bsgyur chos nyid klong// rtsol sgrub med bar ye sangs rgyas// yin pa'i don la yin par shes/ / lta ba 'di la gang gnas pa// sangs ma rgyas pa gcig kyang med// shar tshad rang shar chen po la// phyogs su ma lhung 'od gsal che// 'ching grol med pas lta ba yin// zhes gsungs so/ / gsal ba mtha' dang mnyam pa las/ ye shes mdzod kyi le'u ste bcu gcig pa'o//// de nas sems lhag lha yi bus// gsang ba'i bdag po rdo rje can// bcom ldan 'das la 'di skad gsol// ye shes gsang ba thugs kyi bcud/ / ting 'dzin sgom pa'i bsam gtan zhu// zhes gsol pa dang/ gsang ba'i mnga' bdag bcom ldan 'das// gsang ba'i bdag pos bka' stsal pa// dang po rang sems rgyun la lta/ / gnyis pa bla ma'i gdams ngag sbyin// gsum pa brda don ngo bo sprad// de nas lung ldan rgyal po la// rgyal 'theb blo dang ldan pa yis/ khrid gsum sems kyi don bstan pa/ / sems nyid ye shes gsang ba la// bskur dang ma bskur gnyis med kyang// brda don spyod pa'i gdams ngag zhus// mi rtog ye shes bzhi cha gcig/ sems can kun gyi rgyud la gnas// gsum tsam 'khor ba'i rang bzhin yin/ / dus tshod bla ma'i zhal las shes// lha yi bu khyod 'di ltar ste// de phyir brda don sprad par bya// dang po zhi gnas dus su ni// gnas pa yi ni ting nge 'dzin// gnyis pa lhag mthong dus su ni/ / mi g.yo ba yi ting nge 'dzin// gsum pa mnyam gzhag dus su ni// mnyam pa nyid kyi ting nge 'dzin// bzhi pa rjes thob dus su ni// ye shes chen po lhun gyis grub// de yang zhi gnas sgom pa la// dran pa shes bzhin rtsi yis gzung/ / dper na glang chen lcags kyu bzhin// ma yengs dran pas rang sar grol// de ltar lhag mthong sgom pa la// shes bya chos nyid bum par gzhug/ gser bum til gyi sgron me bzhin// 'gyur med rig pa nang na gsal/ / de bzhin mnyam par 'jog pa la// dbang po mi dgag rang sar gzhag/ gser gling brda ba'i klong chen bzhin// gang ltas mnyam nyid brdal ba'i klong// tha ma rjes thob dus su ni/ / thams cad rang grol chen por shar// dug sprul 'bar ba'i mdud pa bzhin// rtsol sgrub med par rang sar grol// de ltar dus bzhin bsgoms pa yis// rnal 'byor nam mkha'i bya lam la// ma goms ngal dub thun ches pas/ / bying rmugs rab tu 'thibs pa dang// lci zhing 'thams la don mi gsal// sgro lnga yul la 'phro ba dang// yid 'khrul dran rtogs bag chags ldang// rnam rtog kun bur 'dzag pa rnams// bying rgod skyon du gtang mi bya/ / bying na gsang la 'thor na bsdu// bying ba'i skyon rnams bcos pa ni// sa mtho ser bu bsil ba'i sar/ khrus byas lus bcag rgyang mig blta// glu blang gar bya rgyang mig blta// 'thams na bshig gin rig pa dbyer/ / rgod pa rnams kyi bsdu ba yang// gtad dang gzung dang rang sar grol// rang byung rang zhi nam mkha'i dpe// lta ba dran pas bcos pa'o// de ltar zla drug sgom pa dang// g.yo dang goms dang thobs dang brtan/ / gsal ba nam mkha' lta bu 'byung// nam mkha' dngas pa'i zla ba bzhin// kun tu snyoms la rtog sgrib med/ kha skom zas dang bral byas kyang// mdangs dang dbang po gting na gsal/ / bzod thob chos brgyad spong len med// 'dod yon lnga las rnam par grol// nyon mongs zhen 'dzin rtog pa zad// lus yang shing bal dbugs mi tshor// grub pa'i drod dang rtags rnams ma bcos pa 'char/ / mngon shes la sogs mtshan ma thob// mkha' 'gro'i lung bstan la sogs 'byung// de dag dga' brod mi bya zhing// med kyang ji mi snyam pa'i nyams// rtog pa'i mtshan ma ci skyes kyang/ / de nyid chos nyid yin shes na// dug la sman du shes pa bzhin// chos nyid gzhan nas btsal ci dgos// rnam rtog gnyen por mi rtog sgom// de ka rtog pa chen po yin// bzang rtog ngan rtog las grol bas/ / rdzogs chen rtogs pa'i rnal 'byor bde// zhes gsungs so// gsal ba mtha' dang mnyam pa las/ ye shes gsal ba'i le'u ste bcu gnyis pa'o//// de nas kun dga' snying pos zhus// ye shes 'bar ba spyod pa'i glong/ / ston pa thugs kyi dpal be'u nas// gsang ba'i bdag pos bshad du gsol// bcom ldan 'das kyis bka' stsal pa// nyon cig sems lhag lha yi bu// ye shes gsang ba thugs kyi mdzod/ / 'byed par byed pa'i lde mig ni// ye shes 'bar ba'i spyod pa yin// sems nyid don gyi ye shes la// spyad par bya ba'i gnas dang bral// bya bral ngang las rnam par rol// mi brtsal ma spyod zhes de bya/ / lus ngag yid gsum spyod pa ni// lus kyi phyag rgya rtsol ba med// tha mal chen po de bzhin nyid// bag yangs spyod pa lhug par bde// 'gro 'chag nyal dang 'dug pa rnams// ci spyod don las ma g.yos shing/ / don dam bde ba'i rtsis zin na// spyod pa zhes ni de la bya// ngag gi snying po bzlas brjod med// ma bcos gsung gi spyod pa la// dper na bing ka'i skad bzhin du// 'gag med grag stong skye med gsung/ / gang ltar byas kyang bde bar spyod// 'ching grol med ba'i spyod pa'o// sems ni 'phro 'du'i las mi byed// rang gsal klong la ye gnas pas// dran bsam rgyu ba gang yang med// spros med nam mkha'i lta bur bde/ / rang gsal ye shes chen por shar// skye med blo las 'das par spyod// blo 'das dgongs pa khong chud na// nam mkha' rdo rje'i spyod pa'o// phyi nang gsang ba kho na nyid// phyi rtog nang du bsdu ba dang/ / nang rtog gsang bar bstim pa dang// gsang rtog kho na nyid du grol// grol nas grol ba'i lam yang ston// snying po klong nas grol ba la// mngon sum rjes dpag log par spyod// rtog ge'i spyod yul ma yin no/ / seng ge glang chen 'thab pa de// wa spre dag gis skyo ma bcug/ sgam gnyis e la 'thun tsam na// phra ma mkhan de skyar la 'byung// zhes gsungs so// gsal ba mtha' dang mnyam pa las/ ye shes 'bar ba'i le'u ste bcu gsum pa'o/

CLOSE WINDOW