rgya gar skad du/ e ka dza ti ma hA yo gI shwa rI tan+t+ra/ bod skad du/ rnal 'byor dbang phyug chen mo ral gcig ma'i rgyud/ sangs rgyas dang byang chub sems dpa' thams cad la phyag 'tshal lo// 'di skad bdag gis thos pa dus gcig na/ bcom ldan 'das de bzhin gshegs pa thams cad rang bzhin gyi gnas/ yum gyi b+ha ga rnam par dag pa'i dbyings na bzhugs so// nyid las mi gzhan pa'i de bzhin gshegs pa dang/ mdzes pa'i ma mo chen po kau rI dang/ tsau rI dang/ pra mo dang/ be ta lI dang/ puk+ka sI dang/ g+hasma rI dang/ sma shi nI dang/ tsaN+Da lI la sogs pa dang/ gzhan yang seng ge'i mgo can dang/ de bzhin du stag dang/ wa dang/ spyang ki dang/ bya rgod dang/ kang ka'i mgo dang/ bya rog gi mgo dang/ 'ug pa'i mgo can la sogs pa'o/ gzhan yang lcags kyu can dang/ zhags pa dang/ lcags sgrog dang/ dril bu can la sogs pa dang ldan par gyur to/ / gzhan yang byang chub sems dpa' sems dpa' chen po gsang ba'i bdag po lag na rdo rje la sogs pa'i byang chub sems dpa' rnams dang thabs cig tu bzhugs so/ / de'i tshe de'i dus na 'di nyid ltar rang bzhin gyi dkyil 'khor gyi yab yum gyi b+ha ga rnam par dag pa ma mthong ba rnams ni// gnod sbyin dang/ gnod sbyin mo dang/ srin po dang srin po dang/ ma mo dang/ mkha' 'gro ma la sogs pa ni/ khrag 'thung ba dang rus pa la sogs pa 'cha' zhing/ srog 'phrog par byed pa dang/ rnam par 'tshe ste/ gzhan gyis ni 'dul ba'i dus la bab par ma gyur pa dang// de'i tshe de'i dus na gsang ba'i bdag po lag na rdo rjes/ bcom ldan 'das rdo rje he ru ka la 'di skad ces gsol to// bcom ldan 'das bdag la byin gyis brlab tu gsol// sems can gyis don du dbang bskur ba dang/ dkyil 'khor bstan pa dang/ sbyin bsreg dang/ dam tshig 'bog pa dang/ mchod pa bya ba dang/ mngon par byang chub bstan pa dang/ sems dpa' gsum gyi khyad par bstan pa dang/ bsod nams dang ye shes kyi tshogs bstan pa dang/ lta ba bstan pa dang/ spyod pa bstan pa dang/ gsang sngags bstan pa dang/ dngos grub thob pa'i tshul bstan pa dang/ las phra mo rnams bsgrub pa thob par mdzad du gsol/ de nas bcom ldan 'das kyis 'di skad ces gsungs so/ phyag na rdo rje dus la bab par shes na/ khyod sbyor ba gnyis dang ldan pa ru/ rgyud yongs su gzung ba'i sbyor ba dang/ dkyil 'khor rnam par 'dzin pa'i bdag po byos shig/ de nas gsang ba'i bdag pos tshul gnyis la snyoms par zhugs te/ gcig la ni de bzhin gshegs pa'i thad du thal mo sbyar srin mo'i tshul du sbyor dbang nod par gyur to// gnyis pas ni ston pa la rgyud kyi don dag par dri bar gyur to/ / de nas de bzhin gshegs pas nyi zla'i steng lha mo bcu drug bzhugs nas ha dang her gyur pa rnams yig 'bru rnam bzung ste spyi bor bzhag pa dang/ sku dang dbu dang phyag mtshan rnams rim par rdzogs te/ 'ug pa'i mgo la thug pa rnams gsang sngags 'dis byin gyis brlabs so// badzra kau rI tsau rI pra mo ha be ta lI puk+ka sI g+ha sma rI sma sha nI tsaN+Da lI/ sid+hi mu khI/ byA g+h+ra mu khI/ sr-i la mu khI/ shwa na mu khI/ gr-i D+ha mu khI/ kang+ka mu khI/ kA ka mu khI/ u lU ka mu khI/ a b+hi Shiny+tsa hUM/ zhes gsungs pa dang// dam tshig gi lha mo dbu cu bdun phyag sum bcu rtsa gnyis dang ldan par gyur to// gsang ba las gyur 'di nyid la/ / ye shes rnams kyis dbang bskur ba/ rdzogs pa'i tshul gyis phyag rgya che// byin brlab gnyis med thob par shog/ de nas phyag na rdo rjes gsol pa// bcom ldan 'das de'i dkyil 'khor bstan du gsol/ bcom ldan 'das kyis gsungs pa/ lte ba mu khyud dang bcas pa// rnam par dag pa dag nyid kyis// dkyil 'khor lha yang byin gyis brlab// ye shes 'bar ba'i 'khor lo bzhi// dkyil 'khor rnam par dag pa'i gnas/ / gzhal yas khang gi bar khyams ni// gru chad rtsibs mtshams bcas pa la// yul dang shes pa rnam par dag/ dkyil 'khor lha ni sgo bzhi'o/ 'di lta ste/ dkyil 'khor gyi lte ba dang/ 'khor lo dang/ bar khyams dang/ sgo khyud dang/ lcags ri dang/ rdo rje'i phreng ba dang/ me'i phreng ba dang/ dra ba dang/ dra ba phyed pa dang/ mtsho dang/ bya dang/ shing dang/ gcan gzan dang/ dur khrod la sogs pas phyi rol brgyan pa'i nang na/ ma mo dang/ mkha' 'gro dang/ srin po dang/ srin mo la sogs pa rnam par dag pa can ma yin pa/ dkyil 'khor gyi lhar mi rtogs pa rnams kyis bskor ba'o// de'i dbus na dpal ral pa gcig ma dbus kyi lhags rlung 'tshub ma'i nang na/ dre'u rkang gsum zhon pa/ mche ba rnam par gtsigs par gyur/ kham nag ral pa gcig tu dril ba re lde dang glang gi ko ba'i sham thabs byas pa/ sbrul gyi rna cha dang/ seng ges brgyan pa// lte ba'i steng du nyi ma dang/ spyi bo'i gtsug nas zla ba 'char la/ spyan gsum dang ldan pa/ lag pa g.yas pa rlung nag gi nang nas ral gri 'byin pa/ lag pa g.yon pa rin po che'i ne'u le 'dzin pa/ gzhan yang dur khrod gyi tshangs pa/ mi'i rgyu ma lugs kyis bkang ba zhal du gsol ba/ gzhan yang sgeg pa dang/ dpa' ba dang/ smyo ba dang/ rgod pa dang/ khro ba dang/ 'jigs su rung ba dang/ rmad du byung ba dang/ snying rje che ba dang/ zhi ba la sogs pa dang ldan par gyur to/ de ni 'di lta ste/ mthing nag zhal gcig phyag gnyis pa// ral gri ne le yang dag 'dzin// mthing nag kau rI dbyug pa khrag/ tsau rI 'brel ba mda' gzhu 'gengs// phra mo g.yas na chu srin 'phyar// be ta nag mo rdo rje 'phyar// puk+ka lag na rgyu zhags 'dren// g+hasma khrag chen 'thung zhing dkrug/ sma sha log rtog byi snying za/ / tsaN+Da 'khor ba'i mgo lus 'bral// seng ge stag gis phyag bsnol te// khwa yi phyag gis dgra snying ldag/ spyang ki'i mgo yis snying la 'brad// bya rgod spu gri b+han+d+ha 'dzin// kang+ka mgo yis zhing phrag gzar// bya rog mgo yis gri thod 'dzin/ / 'ug pa'i mgo yi lcags kyu khrag/ smos pa'i phyag na phyag mtshan can// gzhan ni btang snyoms mdzad pa dang// gnyis ka gang smos rdzogs pa'i phyag/ sku ni thams cad dbyings su gcig/ dkyil 'khor 'di yis las rnams byed// rnal 'byoradabang phyug chen po ral gcig ma'i rgyud las/ dbang bskur ba dang/ dkyil 'khor bstan pa'i le'u ste dang po'o//// de nas gsang ba'i bdag pos gsol pa/ bcom ldan 'das sbyin sreg gi las kyi sbyor ba ji lta bu grub pa bstan du gsol/ bcom ldan 'das kyis gsungs pa// gsang ba'i bdag po 'di lta ste// dkyil 'khor chen po'i shar lho'am/ / yang na byang shar nyid kyang rung// de bzhin lho dang nub tu yang// gzung 'dzin bdag po zhal bri ste// mdog ngan kham nag ral pa can// shel mig khro gnyer kha zur gsum// tsher ma can gyi shing dag la/ / dug shing brtsegs pas yam shing byas// gnod pa'i ming rus du ma rnams// re re'i sngon du gsang sngags ldan// bdag nyid 'dod lha'i nga rgyal gyis// rang bzhin gnas nas dgug dang gzhug/ gzhan yang byas te rten 'brel ni/ / glang chen klad pa mi dbang sha/ bya rog 'ug pa sha tshil dang/ sha khrag ro yi dur khrag sogs// sbyar nas btab pa'i sngags 'di yin// oM tsa pa la a shug me// sarba sha truM a mu kaM da ha da ha/ pa tsa pa tsa/ b+ha smiM ku ru ku ru hUM phaT/ me ni sngo nag dmar ba yin// ljang nag dud kha gtsug tu 'khyil// kham pa'i tshub ma lu byed 'dra// tshub ma tsha zhing tsha tsha 'phro// bab pa'i me lce lta bu ni// drag po'i sbyin bsreg lta bu yin/ / drag po phyi yi zhi gnas la// brten na gang gi sbyin bsreg 'grub// rnal 'byor dbang phyug chen mo ral pa gcig ma'i rgyud las/ sbyin bsreg gi le'u ste gnyis pa'o//// phyag na rdo rjes gsol pa/ bcom ldan 'das rnal 'byor chen mo ral gcig ma'i dam tshig ji lta bu lags/ bcom ldan 'das kyis gsungs pa/ gsang ba'i bdag po ral pa gcig pa'i dam tshig ni 'di lta ste/ bden pa la the tshom mi za ba dang/ chos nyid la the tshom mi za ba dang/ mngon par dga' ba dang/ srid pa la mngon par chags pa dang/ bla na med pa'i dkon mchog gsum la blang dor mi byed pa dang/ gsang sngags kyi sgra mi gcod pa dang/ gsang sngags kyi lta spyod dman pa la mi brjod pa dang/ dkon mchog gi skyabs na 'dug pa la byams pa dang/ gsang ba'i dam chos dang ma bral ba dang/ bla ma slob dpon kyi thugs 'dzin pa la gus pa dang/ dam tshig gis 'dres pa rnams la gsang ba'i mtshangs mi 'bru ba dang/ thun mong gi dngos grub kyis mi gdung pa dang/ gzhan dad pa'i tshogs mi gcog pa dang/ sdig pa can dang mdza' bar mi byed pa dang/ bud med thams cad dang/ sems can la lhag par 'dzin pa dang/ phyag na rdo rje la khyad par can gyi lhar mi byed pa dang/ phyag na rdo rje'i me'i mtshan 'dzin mi byed pa dang/ phyag na rdo rje'i tsaka li khams la 'debs pa dang/ sa ma non par lus ngag gi dge ba mi spang ba dang/ dam chos tshogs par mkha' 'gro 'bod pa dang/ lha dang de bzhin gshegs pa la bzang ngan du 'du shes med pa dang/ snying rje'i sems yod pa dang/ dam bcas pa'i dge ba yod pa dang/ 'di ltar dam tshig nyi shu rtsa drug ma yin pa dor te/ yang dag par blang ba dag blangs na/ dkon mchog gsum gyi phyag rgya dpal ral pa gcig ma mnyes nas/ dngos grub thams cad dus 'dir 'grub par 'gyur ro/ phyag na rdo rjes gsol pa/ bcom ldan 'das dam tshig nyi shu rtsa drug mnyam par byed pa'i gang zag de'i pho nya bdag gis bgyis te/ ji ltar bdag gis ma bgyis na/ bdag kyang mgo ardza ka yi dog pa bzhin du// tshal pa bdun du 'gas pa dang/ mnar med pa'i dmyal ba chen por rtag tu 'gyur te/ sangs rgyas thams cad bdag gis bslus pa lags so/ rnal 'byor dbang phyug chen mo ral pa gcig pa'i rgyud las/ dam tshig bstan pa'i le'u ste gsum pa'o//// de nas phyag na rdo rjes gsol pa// bcom ldan 'das rnal 'byor chen mo ral gcig ma la/ mchod pa dbul ba'i thabs dag bstan du gsol/ bcom ldan 'das kyis gsungs pa/ gsang ba'i bdag po 'di dag ni phyag na rdo rje nyid kyi khyad par te/ byang shar gyi ri rab kyi steng yongs 'du'i shing la gnas pa/ gnod sbyin mo dam can gyi tshul du gnas pa'i byang chub sems dpa' zhes bya ba 'khor mang po mthu che ba/ de rang bzhin gyi gnas nas bkug la bstim pa dang/ gnyis su med par bya ba ste mchod pa ni/ spyan drangs te mchod pa dang/ 'dir gshegs mchod pa dam pa bzhes// sku mdog sngo nag ral pa can// ral pa bsigs pas stong khams g.yo// sku yi rgyan te gnas kyi mchog/ thugs drangs khyab 'gro glog gi bang/ yud tsam bsam pas gnas su phyin// dbu yi gtsug nas zla gsal rgyas// ma rig mun pa sel ba'i rtags/ lte ba'i dkyil nas nyi shar bas// shes rab nyi mas sdug bsngal rgya mtsho skems/ / spyan ni skar chen shar ba 'dra// spyan rtsa dmar la sdang mig can/ phyag g.yas tshub ma bsnams pa ni/ rlung dmar nang nas ral gri 'byin// myur mgyogs rdzu 'phrul 'gro ba'i rtags/ / g.yon pa'i ne'u le bsnams pa ni/ mi mgo bcad nas sbed pa'i snod// yan lag bzhi ni bsgum pa'i tshul// ma gcig thugs dam zhal zas snod// ma la b+han+d+ha bcud yangs pa'i// 'khor yug bcas pa'i 'jig rten ni/ / gsol lo rol cig dgyes par mdzod// ma gcig thugs dam zhal zas 'di// bsad pa'i sha dang myos pa'i chang// btsos pa'i sha dang khu ba khrag/ bsregs pa'i gsur dang rlon pa'i sha/ glo snying nang rol mkhal mar bcas// rgyu ma rkang dang rus pa dang// dmar gyi ar+g+haM rgya mtsho bskyil// gsol lo rol lo dgyes par mdzod/ ru ru ro ru tsa ba la a shug me// sarba sha truM mAM sa tsit+ta go ro tsa na kha ri khA hi/ mi dbang 'bras bu smin pa'i sha chen dang/ shi ka'i mtshal tig dmar po dang/ shing lo rlung khyer sa la ma reg dang/ na chung gzhon pa'i byung tshad khrag/ mthun pa'i mchod pa bzhes par mdzod// de nas gtor ma btang bar 'dod na/ rtsa ba'i yi ge las skur bskyed nas// sku gsung thugs su byin gyis brlabs nas/ yaM las rlung dang/ raM las me dang/ a las thod pa'i nang du/ dam tshig gi rdzas kyis bkang nas/ de nyid kyis sbyangs te/ gnyis su med pa'i mchod pa rol pa chen po'i tshul gyis dbul bar bya'o/ me tog gi rnam pa dang/ shing thog gi rnam pa dang/ khur ba'i rnam pa dang/ la du'i rnam pa dang/ bdug pa'i rnam pa dang/ sha yi rnam grangs dang/ chen po'i rnam grangs dang/ khrag chen po'i rnam pa dang/ 'o ma dang zho yi rnam grangs dang/ de la sogs pa dag dus bzhi'i rgyun du brtson par bya'o// gdul bar bya ba gnod sbyin mo dam can mthu mo yang dag par byed cing/ / de'i 'khor yang shin du 'dul ba'i las byed pa dang/ rnal 'byor ma gcig pur grub pa yang mnyes par 'gyur ro/ de nas bsgrub pa'o// mchod pa dang gtor mas dngos grub ster bar byed do/ / rnal 'byor ma gcig pu grub pa'i rgyud las/ mchod pa dang gtor ma btang ba'i le'u ste bzhi pa'o//// de nas phyag na rdo rjes gsol pa/ bcom ldan 'das mngon par byang chub pa'i tshul gyis lha'i dkyil 'khor bskyed par bgyi ba ni gang lags/ bcom ldan 'das kyis gsungs pa/ thams cad chos nyid gnyis med stong// de bas stong pa'i byang chub ni// kun rdzob rnams kyi sngon du 'gro/ / gzugs skus 'gro don bya ba'i phyir// sems nyid zla ba ltar bskyed pa// gdan de gzhi las byang chub yin// gang dag gsung gi gdul bya'i phyir// sa bon rgyu ltar brtag pa ni// mngon par byang chub yi ge yin/ / dbang po rnon po gdug pa yi// thugs kyi yang dag de sbyor bas// so so'i phyag mtshan de las 'byung// lus ngag yid gsum gdul phyir na// sku gsung thugs su rdzogs pa'i phyag rgya ni/ / zhi gnas sgrub phyirapa bstan pa yin// de nas phyag na rdo rjes gsol pa// bcom ldan 'das sems dpa' gsum gyi tshul du bsgrub pa ni gang lags/ bcom ldan 'das kyis gsungs pa/ mngon par byang chub rnam lnga yis/ / gang gis sku gcig rdzogs pa ni// dam tshig nyid la sems dpa' yin// de grub gnas nas de 'dra ba// spyan drangs thugs kar zhugs pa ni// ye shes de la sems dpa' yin// de yi thugs kar ting 'dzin ni/ / sku gsung thugs kyi gdan steng du// sku gsung thugs kyi rgyal ba ni// gsung gi 'khor lo ting 'dzin sems// rnal 'byor dbang phyug chen mo ral gcig ma'i rgyud las/ brtag pa'i bskyed rim bstan pa'i le'u ste lnga pa'o/ /// de nas phyag na rdo rjes gsol pa/ bcom ldan 'das bsod nams med pas/ de lta bu'i dkyil 'khor mthong bar dka' ba lags na/ de dag gi don du bsod nams kyi tshogs bsag pa bstan du gsol/ bcom ldan 'das kyis gsungs pa/ gsang ba'i bdag po 'di lta ste// ting nge 'dzin gyi 'od zer las// 'phros nas dag pa gnyis byas bkug/ bsod nams kun gyi sna la 'gro/ / ting nge 'dzin la phyag 'tshal ba// 'di ni bsod nams dang po yin// ye shes 'khor lo de nyid la// ting 'dzin mchod pa yan lag gnyis// bdag gzhan sdig der bshags pa ni// bsod nams de ni gsum pa yin/ / gzhan gyi dge la phrag dog med// rjes su yi rang dge ba'o// dam tshig de rnams yang dag la// dge ba bskul ba bsod nams yin// mya ngan mi 'da' gsol ba ni// bskal pa bzang po'i smon lam yin/ / de dag dge ba gang byung yang// ma rig pa la bsngos pa ni// yan lag bdun pa rdzogs pa yin// bsod nams tshogs kyi yan lag ni// slob dpon bla ma dag la bslab// de bas theg pa chen por 'gyur/ / chos rnams thams cad sems pa yin// sems kyi byed pa med phyir thabs kyi rgya// phyag na rdo rjes gsol pa/ bcom ldan 'das/ bsod nams de bsags pas/ ye shes thob pa bstan du gsol/ bcom ldan 'das kyis gsungs pa// gsang ba'i bdag po 'di lta ste/ phyag 'tshal bas ye shes ni// me long lta bu thob par 'gyur// mchod pa'i bsod nams rgyu las na// 'bras bu mnyam nyid ye shes skyed/ / bshags pas stong nyid stong pa yi// stong nyid ye shes thob par 'gyur// rjes su yi rang bskul dang gsol// bya ba la yang nan tan gyi// ye shes thob par 'gyur ba yin// gsol ba btab pa'i khyad par gyis/ / chos kyi rgyal por bdag 'gyur nas// 'jig rten 'gro ba 'dul ba'i zhing// rnal 'byor dbang phyug chen po ral pa gcig pa'i rgyud las// bsod nams dang ye shes kyi bsgrub pa/ rgyu dang 'bras bu bstan pa'i le'u ste drug pa'o/ /// phyag na rdo rjes gsol pa/ bcom ldan 'das rgyud 'di'i theg pa la brten nas/ lta ba ni gang lags/ bcom ldan 'das kyis gsungs pa/ gsang ba'i bdag po 'di lta ste/ / phyi rol gyi yul ni 'byung ba dang// 'byung las gyur par mi blta ba dang/ dbyings rnam par dag par blta ba dang/ rang bzhin skye ba med pa la brten nas sgyu ma tsam du yang skye ba med par mi blta ba dang/ tshig tsam du yod kyang rtag pa ma yin par shes pa dang/ bdag nyid kyi phung po mi gtsang ba dang/ dman par mi blta ba dang/ bud med shes rab kyi rang bzhin du blta ba dang/ sems can rnams sems can du mi blta ba dang/ sems can rnams ma 'ongs pa'i sangs rgyas su blta ba dang/ theg pa 'og ma dang/ dman pa rnams la mi gshe ba dang/ theg pa 'og ma dang/ dman pa rnams la snying rje bar blta ba dang/ sangs rgyas rnams gzugs can du mi blta ba dang/ sgyu ma tsam du rang gi sems rtags kyi phyag rgyar blta ba dang/ gnyis su brtags pa rnams sems can ma zad kyi bar du/ sgyu ma tsam du yod par blta ba dang/ sems can gyi dug rnam par dag tsam nas/ tha snyad kyang mi gnas par blta ba ni/ thun mong gi lta ba'o// gsang ba'i bdag po 'di'i khyad par gyi blta ba ni/ dpal ral pa gcig pa rnams gnod sbyin mor mi blta ba dang/ dpal ral gcig ma gsang ba'i bdag po phyag na rdo rjes blta ba dang/ gsang ba'i bdag po las dpal ral pa gcig ma gud na yod par mi blta ba dang/ dpal ral pa gcig ma rang gi sems de ltar byin gyis brlab par blta ba dang/ dpal ral pa gcig ma'i gdul bya dpal ldan bong zhon ma gnod sbyin mor mi blta ba dang/ dpal ldan bong zhon ma sa brgyad pa'i byang chub sems dpar blta ba dang/ dpal ldan bong zhon ma'i 'khor dregs pa bsod nams can du blta ba dang/ dpal ldan ral pa gcig ma la brten nas de bzhin gshegs pa'i go 'phang thob par mi blta ba min pa dang/ dpal ral gcig ma la brten nas de bzhin gshegs pa'i go 'phang du blta ba dang/ dam rdzas med kyang dam tshig ma nyams la/ sngags dang ting 'dzin yod pas bdag gis grub pa thob par 'gyur bar mi blta ba dang/ ting nge 'dzin dang/ sngags dang dam tshig ma nyams kyang dam rdzas med na dpal ral gcig ma'i gdul bya/ byang shar gyi 'phags ma bong zhon gyi 'khor gdug pa can bsod nams las grub pa rnams bdag la mi dga' bas thun mong gi dngos grub myur du mi 'ong bar blta ba dang/ chod 'di lta bu snod rigs kyi mchog/ bram ze'i rigs yin par mi blta ba dang/ gsang ba'i bdag po ni sangs rgyas thams cad kyi mthu phun sum tshogs par blta ba dang/ mthus ni nyon mongs pa gsod par blta ba dang/ nyon mongs pa chung na ni thun mong gi mthus nam mkha' la 'gro ba dang/ chu la mi bying ba dang/ gzhan gyi sems shes pa dang/ rgan po las gzhon pa nus pa dang/ gzhon pa nyid mi 'gyur ba dang/ tshe ring ba dang/ mi la sogs pa'i sems can gsod par 'gyur ba dang/ mi la sogs pa'i sems can sos par 'gyur ba dang/ char pa dbab par nus pa dang/ char la sogs pa gcang bar nus pa dang/ gzhan yang skra dkar med pa dang/ gnyer ma yang nub ste snum pa dang/ shes pa rno ba dang/ gzhan gyis dbang byas pa'i rdzas mthong ba dang/ sems can mthu bo che rnams dang 'dril yang mnyam pa las lhag pa'i tshul ston par nus pa la sogs pa yang gang zag cig nyon mongs pa chung ba'i mthu'i shugs kyis song bar gyur te/ 'di ltar blta bar bya'o/ rnal 'byor chen mo ral pa gcig ma'i rgyud las/ thun mong dang khyad par gyi lta ba bstan pa ste le'u bdun pa'o//// de nas phyag na rdo rjes gsol pa/ bcom ldan 'das theg pa 'di'i rnal 'byor gyi spyod pa ni/ ji ltar spyad par bgyi/ bcom ldan 'das kyis gsungs pa/ gsang ba'i bdag po spyod pa ni 'di lta ste/ dam chos lnga la rdzas lnga yin nam thogs pa med par spyod pa dang/ 'jigs pa med pa dang/ dga' ba dang/ rgod pa dang/ rgod pa chen po dang/ sha lnga la longs spyod pa dang/ phyag la mkhas pa dang/ 'jigs pa'i stabs kyis stabs la mkhas pa dang/ dkyil 'khor gyi las la mkhas pa dang/ thabs dang shes rab kyi spyod pa la mkhas pa dang/ bro gar la mkhas pa dang/ 'du 'phro la mkhas pa dang/ glu la mkhas pa dang/ gar la mkhas pa dang/ mchod pa la goms pa ni thun mong gi spyod lam mo/ khyad par gyi spyod lam ni/ dur khrod na 'dug pa dang/ sha chen za ba dang/ bong bu la phyin phyogs zhon nus pa dang/ re ba gyon pa dang/ gcer bur byung ba dang/ sa ma ya yi sgra la mkhas pa dang/ mi dbang me mar du bltam te 'gro ba dang/ 'dug pa dang/ bskor ba dang zhing gi pags pa gyon pa dang/ rma bya'i rgyal mtshan dang ldan pa dang/ dung chen 'bud pa dang/ rus pa'i phreng ba 'dren pa dang/ dpal ral pa gcig ma dang/ 'phags ma bong zhon ma gnyis su med pas mchod pa la brtson pa dang/ khro bo'i ting nge 'dzin la mkhas pa'i 'khor 'dul la mkhas pa dang/ tshil chen gyi me dmar 'bul ba dang/ sha chen gyi lha bshos 'bul ba dang/ khrag chen po'i ar+g+ha 'bul ba dang/ bdud rtsi'i dri chab 'bul ba dang/ sha chen po'i bdug pa 'bul ba dang/ dbang po rnams kyi me tog 'bul ba dang/ zhi ba la zhi ba'i spyod lam shes pa dang/ rgyas pa la rgyas pa'i spyod lam shes pa dang/ dbang la dbang gi spyod lam shes pa dang/ 'dug pa'i spyod lam shes pa dang/ nyal ba'i spyod lam shes pa dang/ 'gro ba'i spyod lam shes pa dang/ ngal gso ba'i spyod lam shes pa dang/ gshang gci ba'i spyod lam shes pa dang/ btang ba'i spyod lam la sogs pa ni/ khyad par gyi spyod lam de thams cad lha'i rang bzhin du gyur pa dang/ sems dpa' gsum gyi tshul gyis bsgrub par bya'o/ rnal 'byor ma dbang phyug chen mo ral gcig pa'i rgyud las/ spyod lam bstan pa'i le'u ste brgyad pa'o//// bcom ldan 'das dngos grub thams cad 'byung ba mang po dang ldan pa'i de bzhin gshegs pas byin gyis brlabs pas/ sngags 'chang dang rig 'dzin rnams kyi skyabs dang rten du gyur la/ byang chub sems dpa' 'das pa'i lam du bsgrub/ bdud dang srin po la sogs pa sreg par byed pa/ rang gis sems zhi bar nus pa dang ldan par 'gyur la/ mthu thams cad 'byung ba'i gsang sngags kyi tshig rnams bstan du gsol/ bcom ldan 'das kyis gsungs pa/ gsang ba'i bdag po 'di ni zab pa/ rgya che ba/ 'jigs pa/ skrag pa/ mi sdug par blta ba'i mig 'brul bar byed pa/ mi gdung bar nyan par byed pa'i rna ba gcod par byed pa/ mi dga' bar byed pa'i sna subs par byed pa/ mi sdug par byed pa'i lus rengs par byed pa/ mi 'os pa brjod pa'i lce chad par byed pa// log par sems pa'i snying 'gas par byed pa// bar du gcod pa thams cad thag ring du bskyod pa// bsod nams gso bar byed pa/ smyon pa rnams dran pa rnyed par byed pa'i mthu chen po// nyon cig rab tu nyon cig yang dag par nyon cig/ shin tu yang dag par nyon cig/ oM ru ru ro ru tsa ba la a shug me hUM b+h+yo dza dzaH/ ye shes lnga dang yang dag ldan/ / kau rI la sogs brgyad dang ldan/ de yi stobs ni// sa brgyad phyag rgya dpal ldan yin// ma bdun a shug med dang ldan// dkyil 'khor sgo la yang dag tshang// dbang phyug nyi shu brgyad dang ldan// dang pos lha rnams spyan drangs te/ / gnyis pas bsgrub bya dgug pa yin// bco lnga sngags kyi phreng ba yin// ming chen dang po ye shes dang// mgo la yod pas mgo can yin// rnam par snang mdzad hUM dang ldan// ru ru srin mo'i tshul gyis 'joms/ / ru ru srin mo khyad par ni// tsa pa la zhes bsgrub bya'i ming// a shug me ni ma bdun dang// hUM ni dkyil 'khor bsdu phyir bsgo// b+h+yo zhes dbang mo las la bskul// de nas dza yis yang dag 'gugs/ / de nas dzaHyis bsgrub bya dgug/ bco lnga sngags kyi phreng ba ni// rgyal ba rnams kyis byin gyis brlabs/ 'dis ni zhi gnas thob par byed// de bzhin lhag mthong skye bar nus/ / 'dis ni bsod nams 'phel bar byed// de la ye shes rnams kyang tshang// 'di ni de bzhin rgyu zhes bya// gang zhig 'di la 'bras bu 'dod// de phyir de ni 'bras bu'o// me la brten na las kyang 'grub/ / phyag na rdo rjes gsol pa// bcom ldan 'das gsang sngags 'di bzlas pa'i thabs kyi sems dpa' gang lags/ bcom ldan 'das kyis gsungs pa/ bdag nyid dam tshig rdzogs pa'i sku// thabs dang shes rab ldan byas la/ / dbu yi grangs ni bcu bdun nas// yang na dbu gsum phyag drug gam// zhal gcig phyag gnyis rab tu shis// rang bzhin gnas nas dgug dang gzhug/ gnyis med 'dra yang spangs nas kyang/ / zla dkyil steng na kau rI ma// nyi ma'i steng na ral gri 'bar// mtha' ma sngags kyis bskor ba'o// bzhi 'bum bton na las rnams byed// khri phrag las ni dngos grub 'byung// bye ba dag gis tshad dang ldan/ / man ngag can gyi sa yang ston// mngon kyang sngon du ston dang lus ston 'gyur// gang zhig dung phyur rdzogs pa ni// phrin las rnam bzhi lhun grub ste// zab mo sbyor ba rdzogs nas kyang// rin chen zhing der song ba yin/ / rnal 'byor dbang phyug chen mo ral gcig ma'i rgyud las// gsang sngags dngos grub kun gyi 'khor lo bstan pa ste le'u dgu pa'o//// bcom ldan 'das ji ltar na sngags kyi tshul gyis dngos grub thob pa dang ni mi thob pa lags/ / bcom ldan 'das kyi gsungs pa// gsang ba'i bdag po dngos grub thob pa'i tshul ni/ 'di lta ste/ de bzhin gshegs pa'i bka'i khungs byung ba dang/ slob dpon man ngag can gyi gdams ngag nod pa dang/ dam tshig bsrung mtshams yal bar mi dor ba dang/ yid ches pa'i dad pa yod pa dang/ brtson 'grus che ba dang/ gtong phod pa dang/ zab mo'i lta ba shes pa dang/ rgya che ba'i spyod pa shes pa dang/ mthun pa'i dam rdzas sam chos dang mi 'bral ba dang/ sngon du 'gro ba'i cho ga rdzogs pa dang/ yid dam gyi lha mi spong ba dang/ snying rje'i sems yod pa dang/ spyod lam gyi ting nge 'dzin mi brjed pa dang/ dgon pa la brten pa dang/ sems pa dang/ gsang thub pa dang/ cho ga shes pa dang/ sems can gyi srog mi gcod pa dang/ 'dug pa la dga' ba dang/ 'jigs pa med pa dang/ sangs rgyas la che chung mi 'dzin pa la sogs pa dang ldan na/ nam yang dngos grub thob zin pa yin no/ de dag dang mi ldan na nam yang dngos grub thams cad mi thob bo// rnal 'byor dbang phyug chen mo ral gcig ma'i rgyud las/ dngos grub thob pa'i tshul bstan pa ste le'u bcu pa'o//// de nas phyag na rdo rjes/ dpal ral gcig ma'i phyag rgya nam gru ma la mngon par bstan pa/ nam gru khyod kyi mtshan nyid ni/ / cho 'brang bdag gis bshad par bya// nor bu'i rang bzhin khyod kyi lus// rgyab ni 'dzam bu'i chu bo'i gser// khyod kyi gdong ni dngul yin te// lto ba'i phyogs ni rdo rjer 'khregs// ming po mdzad dang mdzod gsungs gnyis/ / khyod kyi pha ni rlung zhes bya// khyod kyi ma ni kun sgrol ma// skal ldan shing rta khyod kyi lus// ba ra hi sti khyod kyi lus// lha yul dag tu grags pa yin// na moH/ badzra ni s+yA+ai/ dzi li dzi li/ bin+d+ha bin+d+ha/ muny+dza muny+dza/ hi b+ha la/ sha na swA hA/ de nas phyag na rdo rjes gsol pa/ gsang ba'i sngags 'di la brten nas las phra mo'i dngos grub thob pa'i thabs ci lags/ bcom ldan 'das kyis gsungs pa/ phyag na rdo rje 'di lta ste/ gsang sngags 'dis zhi ba'i las 'grub par 'don na/ maN+Dal dkar la zlum par bya ste/ me tog dkar po la sogs pas mchod cing/ lha yang dkar mo sprul pa'i pho nya/ zhi ba'i rgyan gyis brgyan par bsgom na/ las thams cad zhi bar 'gyur zhing/ zhi ba'i las phra mo 'grub par 'gyur ro// rgyas pa'i las 'grub par 'dod na/ maN+Dal ser po gru bzhi bya ba ste/ me tog ser po la sogs pas mchod cing/ lha yang ser mo chen mo mkha' la bzhad pa/ rgyas pa'i rgyan gyis brgyan par bsgom na// las thams cad rgyas par 'gyur zhing/ rgyas pa'i phrin las thams cad 'grub par 'gyur ro/ dbang gi las thams cad 'grub par 'dod na/ maN+Dal zla gam dmar por bya ste/ me tog dmar po la sogs pas mchod cing/ lha yang dmar po chen mo dbang chen gtum pa mo/ dbang gi rgyan gyis brgyan par bsgom na/ las thams cad dbang du 'gyur zhing/ dbang gi las phra mo 'grub par 'gyur ro/ drag po'i las phra mo 'grub par 'dod na/ maN+Dal nag po zur gsum pa'i 'og tu thod pa gsum dang ldan par 'gyur te/ me tog nag po la sogs pas mchod cing/ lha yang nag mo chen mo ral gcig ma drag po'i rgyan gyis brgyan par bsgom na/ las thams cad drag por 'gyur zhing/ drag po'i las phra mo 'grub par 'gyur ro/ de dag gi sngags kyi sham bu ni/ shAn+tiM ku ru/ puSh+tiM ku ru/ pa shaM ku ru/ mA ra ya/ zhes brjod pas gzhan gyi thun mong gi las su bya'o/ gzhan yang dgug par 'dod pas/ che ge mo A kar+sha ya hUM/ zhes bar du bcug ste/ dbang du 'gyur ba'i yan lag go/ bskrad par 'dod na rlung gi rnga mo dud kha'i steng du bsgrub bya bskyon nas/ che ge mo dza dza zhes brjod par bya'o/ gnan pa bya bar 'dod na/ rdo leb la ri rab kyi gzugs bris te/ 'og tu bsgrub bya'i ming rus gzugs dang ldan pa/ gser gyi sa gzhi steng na bzhag nas/ che ge mo yaM nan/ zhes bsgrub par bya'o/ sbyin bsreg bya bar 'dod na/ drag po'i rdzas la sngags dang mi byang re re ldan par bya ste/ mer por ba dang/ che ge mo mA ra ya khA hi/ zhes brjod par bya'o/ dbye bar 'dod na/ 'ug pa dang bya rog gi khrag gis bsgrub bya'i gzugs byas la/ sgro gnyis la sngags bzlas la/ mA ra ya mA ra ya phaT/ ces bya ba'i sngags kyi sham bu dang ldan par byas te/ sgro brdab pas nye ba mkhon cing myur du dbye bar 'gyur te/ yul gzhan du yang 'khyam par 'gyur ro/ smyo 'dul bar 'dod na/ gang gdon gyis zin pa'i skel/ sngags kyi mdud pas btags te bzung la sngags par mi gcod par sbyor ba 'di lta bu dang ldan par gtor na chen po yang du brtan par bya'o/ thog gcad par 'dod na/ yul gang tsam bsrung bar 'dod pa'i thad nas/ shing dang me tog blangs te/ yang dang yang du sbyin bsreg byas na/ sbyin bsreg gi rdzas gang nas 'dus pa rnams su ji srid du thog 'byung bar mi 'gyur ro// rnal 'byor dbang phyug chen mo ral gcig ma'i rgyud las/ las phra mo 'grub par bya ba'i le'u ste bcu gcig pa'o//// de nas phyag na rdo rjes gsol pa/ bcom ldan 'das lus ngag sems bden pa'i thabs dang/ rlung ni gang lags/ gsang ba'i bdag po 'di lta ste/ oM zhes bya ba 'jug pa'i rlung/ AHzhes bya ba gnas pa'i rlung/ hUM zhes bya ba 'byung ba'i rlung/ 'jug pa de ni gang du'o/ de nas gnas pa nang du gnas// de nas 'byung ba phyir yang 'byung// nang gi snying ga'i dkyil na yod/ / gnas pa de nyid nam mkha' rgyang/ yul 'phro ba ni phyi rol yin// oM zhes bya ba ser po ste// AHni dmar por bshad pa yin// hUM ni dkar por gyur pa'o// AHni nyon mongs gyur pa yin/ / de ni hUM gi mtshan mar gnas// oM ni de la tshang ba yin// ser po rnam par snang mdzad dang// dmar po snang ba mtha' yas ldan// dkar po mi bskyod yang dag yin// dmar po de 'dra shes rab ste/ / dkar po yang ni thabs kyi rgya// g.yas kyi rtsa ni la la nA// g.yon gyi gnas pa ra sa nA// a wa d+hu ti dbus na yod// snang mdzad bdag gi lus kyi rgya// snang ba mtha' yas ngag gi rgya// mi skyod de ni sems kyi rgya/ / sku gsung thugs kyi rgya yin pas// sgyu ma tsam du cir yang snang// gdon byas rnam rtog ma yin te// ye nas gnas pa shes bya yi// dbugs dang rtsa yi sbyor ba las// phra la zhi bar rnam sbyangs nas/ / rdzogs pa 'dod phyir bskyed pa ste// rnal 'byor cho ga gsum pa yin// rnal 'byor dbang phyug chen mo ral gcig ma'i rgyud las/ rdzogs pa'i rim pa bskyed pa'i le'u ste bcu gnyis pa'o//// de nas phyag na rdo rjes gsol pa/ / bcom ldan 'das dbang po rnon po rnams kyi don du rdzogs pa'i rim pa bstan du gsol// bcom ldan 'das kyi gsungs pa/ gsang ba'i bdag po 'di lta ste// gang zhig chos ni gang nas btsal/ / de la btsal ba rdul tsam med// ci phyir 'khrul pas gnyis su snang// don dam can la snang ba med// gang du rdzogs pa bskyed pa dang// bskyed pa la sogs bstan pa ni// dbang po rtul ba gdul phyir du/ / drang ba'i don gyi zhi gnas yin// 'od gsal snying ga'i dkyil 'khor ni// 'gyur ba med cing nyes pa spangs// d+har mo da la zhes grags pa// nam mkha'i de nyid rang la yod// 'di ltar khyab byed aHzhes bya/ / yi ge kha dog gzugs can min// ye shes yang dag bzhi la phra// zab mo gcig min du ma min// stong nyid mtshan med smon pa min// chos rnams tsam du snang ba yin// 'dir bsam 'di yin 'di la gnas/ / 'od gsal 'dir de nyid kho na'o// rnal 'byor dbang phyug chen mo ral gcig ma'i rgyud las/ rdzogs pa'i rim pa'i rnal 'byor dbang phyug chen mo'i rjes su rnal 'byor gyi spyod yul du ma gyur pa/ rdzogs pa chen po'i rnal 'byor gyi tshad bstan pa ste le'u bcu gsum pa'o//// e ka tsa ti ral gcig ma'i rgyud las rtsa ba'i rgyud chen mo rdzogs so// de nas phyag na rdo rjes gsol pa// bcom ldan 'das 'od gsal nyid ji ltar lags/ / snying rje zhes bya ba ji ltar lags// de yi dkyil 'khor ji ltar lags// mi 'gyur ba nyid ji ltar lags// nyes pa med pa ci yi phyir// d+har mo da ma ji ltar lags/ / nam mkha' zhes bgyi ji ltar lags// khyab med a yang ji ltar lags// yi ge med pa ci yi don// ye shes bgyi ba ci yi don lags// yang dag nyid kyang ji ltar lags// zhi bar ma gyur ji ltar lags/ / phra mo yang ni ji ltar lags// ji ltar zab mor gsungs pa lags// gcig dang du ma ji ltar lags// stong pa nyid ni ji ltar lags// mtshan ma med pa ji ltar lags// smon pa med pa ji ltar lags/ / chos rtag bgyi ba ji ltar lags// 'dir bsam 'di nyid gang gi lags// 'di yin gsung pa ji ltar lags// 'di na gnas pa gang dang gang// 'od gsal ba ni ji ltar lags// de nyid gsungs pa ji ltar lags/ / de kho na yang ji ltar lags// de nas bcom ldan 'das dpal rdo rje he ru kas gsang ba'i bdag po la 'di skad ces gsungs so// rtsol ba med pa'i yi ge ni// rang la snang bas 'od gsal yin/ / chos rnams brten pa'i dran pa ni// snying rje zhes bya yin par bshad// de yi dbus na rang bzhin stong pa ni// 'gro ba rnams kyis mi shes pa// ci yang med pa'i dkyil 'khor yin// de ni thog ma tha ma'i bar/ / mi 'gyur gnas pas 'gyur ba med// de la chos can rnam rtog gis// bslad ni nyes pa med pa ni// de nyid nyes pa med pa yin// chos can 'byung ba'i gnas yin pas// d+ha rmo da ya dbyings kyi don/ / de nyid ngo bo nam mkha' yin// brjod pa rnams la gnas pa yin// brjod med khyab byed a ni gzugs dang mdog/ yi ge rnams dang bral ba ni// don ni skye med stong pa yin// de ni ye nas gnas pa yi/ / don de shes pas ye shes yin// de phyir de shes shes pa la// yang dag pa zhes btags pa yin// yang dag de yi ngo bo ni// kun tu zhi bar gyur pa yin// don de brtag par dka' phyir dang// phra mo gyur pas phra ba yin/ / de phyir de la zab ces bya// sems kyi spyod yul yin phyir ro// sems la gcig dang du ma med// de yi phyir na grangs las 'das// gcig dang du ma spangs pa yis// gcig dang du ma rnams spangs pa/ / stong pa nyid ces de la bya// de la dngos po'i chos med pa// de phyir mtshan ma med pa yin// mtshan ma med pa de nyid la// smon pa mi dgos rang la yod// de phyir smon pa med pa yin// de ni gru gsum rang bzhin te/ / rnam par thar pa gsum pa yin// chos de mtshon pa'i rtags la ni// de phyir chos rtags phyag rgya yin// dus gsum d+harma de dbus la// 'dir bsam pas na bsam pa che// bsam pa med pa'i phyag rgya yin/ / de ltar bsam pa de nyid ni// spros dang bral bas de nyid yin// spros dang bral ba de la ni// gnas pa nam mkha'i mtshan nyid de// de bas 'od gsal zhes brjod de// 'gro ba kun gyi rang bzhin gnas/ / phyin ci log tu rnam brtag kyang// 'gro ba'i rang bzhin de las yin// de yi phyir na rgyal ba dang// 'khrul pa mnyam par de nyid gcig/ de la gang zhig mkhas ldan pa'i// so so rang rig ting 'dzin gyis/ / nam mkha'i dkyil ltar chos mthong ste// gnyis su med pa de kho na// rdzogs pa'i rdzogs pa mkhas pa'i rgya// rdzogs pa chen po dpal dang ldan// snying gi nam mkha' rang la yod// de nas phyag na rdo rjes gsol pa/ / bcom ldan 'das chos zab mo yang dag pa'i don// thun mong ma yin pa bdag la bstan pa ngo mtshar to// bdag gis kyang ma 'ongs pa na// thun mongs ma yin pa rnams la bstan par bgyi'o/ / bcom ldan 'das kyis gsungs pa// gsang ba'i bdag po/ chos chen po 'di 'dzam bu gling du skyes pa// mkha' 'gro ma'i phyag rgya yod pa// tshe la dbang ba'i rig 'dzin thob ste// bram ze mchog sred ces bya ma/ lhun gyis grub pa'i sa la 'gro ba/ de'i lag tu 'byung bar 'gyur te/ khyod kyis zung la chongs shig/ snod ma dag pa rnams kyi rgyud byang bar gyis shig/ rnal 'byor dbang phyug chen mo ral gcig ma'i rgyud las/ rdzogs pa'i rim pa phyi ma ste le'u bcu bzhi pa'o//// rdzogs so//

CLOSE WINDOW