'khor ba dang pad+ma rA ga lta bu'i phur pa rnam par brtag pa zhes bya ba'i le'u ste lnga bcu rtsa gnyis pa rdzogs so//// rgya gar skad du/ badzra kI la sarba d+harma gu h+yA r+tha d+hA tu dz+nyA nA dwa ya tan+t+ra rA dza nA' ma/ bod skad du/ rdo rje phur pa'i chos thams cad kyi gsang ba'i don dbyings dang ye shes gnyis su med pa'i rgyud kyi rgyal po zhes bya ba/ bcom ldan 'das chos kyi sku la phyag 'tshal lo/ / 'di ltar sangs rgyas pa'i dus na/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas bde bar gshegs pa rgyal ba kun gyi gtso bo/ rigs thams cad kyi bdag nyid chos kyi dbyings ye shes kyi sku gnyis su med pa/ bde ba chen po mya ngan las 'das pa/ ma skyes yongs su grub pa'i sku/ skye ba med pa las/ 'gag pa med cing rol pa chen po'i sku/ snang la rang bzhin med pa'i tshul gyis/ 'og min chen po'i gnas/ gsang ba'i mchog dam pa/ mkha' dbyings rnam par dag pa'i gzhal yas khang/ dpag cing gzhal ba las 'das pa/ gnas kyi mchog/ mtha' dang dbus med pa'i chos kyi dbyings kyi pho brang/ dbyings dang ye shes gnyis su med pa'i khyad par las/ skye ba dang 'gag pa'i tshul gyis/ ye shes la ye shes rol pa dang/ chos nyid la chos nyid rol pa dang/ sku skye ba med pa dang/ gsung 'gag pa med pa dang/ thugs mi g.yo ba'i ting nge 'dzin gyi sgo 'bum phrag mang po dang/ stong pa nyid kyi ye shes dang gsal ba rtog pa med pa dang/ gnyis su med par mnyam pa nyid dang/ ma 'dres pa so sor rtog pa dang/ dmigs su med pa'i thugs rje dang/ stobs bcu dang/ pha rol tu phyin pa bcu dang/ tshad med pa bzhi dang/ rigs lnga dang/ stong pa nyid kyi sgo dang snang ba gnyis su med pa'i tshul gyis thabs cig tu bzhugs so/ / de'i tshe rig pa'i ye shes kyis/ chos kyi sku la bskul ba ni/ 'di lta ste/ ma skyes gdod nas dag pa chos kyi sku// ma nor ma bcos chos dbyings spros dang bral/ / brdal ba chen pos yongs la rang bzhin gnas// de nyid ma rtogs ma rig 'khor ba las// thabs mkhas thugs rje chen pos bstan du gsol// zhes pa'i tshul gyis zhus pas/ chos kyi sku las rang byung du gsungs pa/ e ma ye nas sangs rgyas ka dag rang bzhin kyang// 'on kyang ma rig rtog pa'i blo 'khrul pas// gzung 'dzin log rtog sdug bsngal 'khyams pa las// ye dag ye grol ye sangs rgyas pa'i don// ma rtog blo la brjod med don nyid bstan/ / zhes gsungs so// phur pa gsang ba don gyi rgyud las/ gleng gzhi'i le'u ste dang po'o//// de nas rig pa'i ye shes kyis/ chos kyi dbyings la bskul ba 'di lta ste/ / ye nas ma bcos lhun gyis grub pa'i ngang// 'jig rten khams kun ye nas dag pa'i gnas// bzang ngan gnyis med dus shes rtogs pa'o// sems nyid yid bzhin dgos 'dod sna tshogs 'byung// rnam shes sna tshogs ye shes rtogs pa'i 'khor/ / bdag nyid sangs rgyas snang la rang bzhin med// bsod nams ye shes tshogs kyang rdzogs par rol// kun tu bzang po'i mchod sprin sna tshogs rol// phyi nang gsang ba de nyid sems las byung/ / mi rtog ye shes rnam rtog bgegs rnams sel// chos kun rang bzhin rnam dag 'od gsal dang// chos rnams thams cad ye nas stong zhing dben// ngang ngam shugs kyis rang bzhin thugs rje 'byung/ / sems nyid skye med cho 'phrul yi ger shar// 'byung ba lnga ni chos nyid yum gyi mkha'// nyon mongs lnga dag ye shes lnga ldan zhing// srid pa gsum ston rdo rje phur pa'i lha// ye shes khro bo ngang dang shugs las grub/ / gnyis med tshul gyis ma gshegs srid par byon// bla med dbyings kyi ngang du ro gcig thim// chos nyid bde chen skye med brjod dang bral// thabs kyi spyod pas 'gro kun dbyings su sdud/ / ma brtags bzhin du ye nas lhun gyi grub// kun bzhi rnam shes 'og min gnas su sbyor// de tshe khams gsum 'khor ba'i gnas las bsgral/ de ltar don shes rig cing rtogs pa'i tshe// sku gsung thugs kyi sa la nges par phyin/ / phur pa gsang ba don rgyud las/ ye nas rang bzhin gnas pa'i le'u ste gnyis pa'o//// de nas rig pa ye shes kyis// chos kyi dbyings la bskul ba las// chos nyid ngang las rang sgrar shar ba'o/ / e ma ho/ rang bzhin skye ba med pa'i chos nyid la// tshig dang yi ger bstan med brjod dang bral/ skye med chos de sna tshogs ston par byed// brjod med de nyid rjod pa kun gyi mchog/ tshig kun gsal byed ye shes las byung ba// byin gyis rlabs kyis rab tu rtogs par byed// dngos po'i chos rnams ngo bo nyid kyis stong// stong pa ma yin sems kyi snang bar shar// de la rang bzhin med de chu zla bzhin/ / snang stong gnyis med lta ba rnam par dag/ rang bzhin 'od gsal nyon mongs ngang gi dag/ spros pa'i mtha' bral rnam pa yongs cir min// rig pa 'gag med sna tshogs rol pa che// gzung 'dzin rnam rtog sdug bsngal dbyings su shar/ / de la mtshan ma'i skyon gyis ma gos par// sgro skur bral ba'i ye shes chen po ste// lhun gyis grub pa'i bde chen kun spyod kyang// log rtog 'khrul pa'i dbang gis so sor shar/ / ma rig log rtog de nyid gnas su dag/ gnyis med chos sku mi rtog ye shes yin// rig 'dzin skal pa can gyis rtogs par 'gyur// de ni sangs rgyas kun dang dgongs pa mnyam// rgyun gyi khyad par gyis kyang 'phags pa yin/ / don dam phur pa'i rang bzhin byang chub sems// ngo bo chos sku skye med rnam par dag/ mtshan nyid gnyis med bde chen zug rngu zhi// nges tshig dag pa'i mgo phur kun las dpa'/ / dbye na don dam rnam grangs ma yin dang// dbyings dang ye shes chos nyid chos kyi sku// skye med bde chen ma skyes dmigs med bral// ye nyid ji bzhin zab pa yang dag don// lhun grub la sogs rnam grangs mtshon de bstan/ / zhes 'byung/ phur pa gsang ba'i don rgyud las/ de kho na nyid gtan la dbab pa'i le'u ste gsum pa'o//// de nas yang rig pa'i ye shes kyis/ chos kyis dbyings la bskul ba rang byung 'di skad do/ / thog mar shes rab gsum la blo sbyangs pas// spyi dang rang gi mtshan nyid dbab pa dang// blta ba'i sgro 'dogs bcad cing la bzlas te// ting 'dzin nyams kyi drod tshad shugs las 'byung/ / byang chub sems kyi don la 'dris par bya// mnyam pa nyid kyi don la blo bzhag ste// gzung 'dzin bag chags mtshan ma dag par bya// dngos po thams cad mi rtog zil gyis mnan/ / nyon mongs kun kyang dbang du bya zhing blang// bsgom du med pa'i don nyid rtogs par bya// yang na sangs rgyas dgongs pa rnal du dbab// mnyam nyid ngang la dus gsum rgyun du gnas// phyi rol yul gyi zhen pa bcad byas la/ / don dam skye med chos kyi dbyings su bsgom// chos nyid rig pa'i ye shes dag la ni// shes pa sangs stongs ji bzhin je gsal bsgom// rnam par mi rtog ye nas skye med las// skye ba'i cho 'phrul sna tshogs cir yang shar/ / cir yang ma yin cir snang chos kyi sku// stong nyid snang ba snang ba stong pa nyid// so so ma yin tha dad med par bslab// nyams blang tshe na lus ngag bcos su med// sems nyid nam mkha' 'dra ste rnam rtog bral/ / rtogs pa'i gdeng ldan chos nyid gtan la dbab// gdod nas ma skyes chos kyi dbyings su dag/ rig pa byang chub sems nyid rtogs nas kyang// rang bzhin ma skyes yongs su grub pa'i sku/ / snang la rang bzhin med pa 'ja' tshon 'dra// chu zla lta bu'i sangs rgyas 'od dang ldan// thugs kar dpal be'u yi ge 'bru dgu ni// gser la 'phra bkod bzhin du gsal bsgoms te// rdzogs pa'i rim pa gdams ngag tshul bzhin bsgom/ / rgod na skye med rmugs na chos nyid la// 'phro na bde chen bying na khro bo ste// ye shes lnga yi bsnyen pa'i ting nge 'dzin// 'dzab kyi dgongs pa chu bo'i rgyun bzhin no// chos nyid ngang las sngags kyi sgra dbyangs blang/ / sems 'dzin bsam gtan ting 'dzin ma yengs bsgom// dbyings kyi ngang las rang byung rang grags bsam// de tshe rnam rtog dgra chen thams cad kun// gzung 'dzin mtshan ma med pa'i dbyings su phur/ / gdeng ldan rnal 'byor nyes pas ma gos pas// snying rjes bsgral ba'i dam tshig bsad bcad pa// zhe sdang rang rgyud sems kyis ma yin te// byams dang snying rje ldan pa'i rnal 'byor pas/ / rtogs pa klong du gyur pas dbyings su sgrol// ting 'dzin drod tshad las su rung gyur na// nam yang nyes pa'i skyon gyis gos mi 'gyur// sgrol bar rang rgyud las kyi srin por skyes// rnam par smin pas dmyal khams bco brgyad du/ / bskal pa grangs med gsum du sdug bsngal myong// de bas rnal 'byor phal gyis byar mi rung// phur pa gsang ba don rgyud las/ ting nge 'dzin gyi le'u ste bzhi pa'o/ /// de nas bcom ldan 'das chos dbyings dam pa'i sku la rig ye shes kyis bskul ba/ rang byung ba ni 'di lta ste/ chos nyid mya ngan 'das pa phur pa'i don// rgyu 'bras gnyis las 'das pa'i byang chub sems/ / don dam chos nyid rang byung phur pa ni// phur ni chos dbyings pa ni mya ngan 'das// phur ni ye shes pa nyid byang chub sems// thugs rje chen po'i phur pa bla ma'i don// nam mkha'i mtshan nyid sems kyi mtshan nyid yin/ / rgyud kyi rgyal po lung gi bla med pa// man ngag nges pa'i ngo bo kun dang bral// don dam brjod med blta ru med pa yin// skye dang 'gag med gzung dang 'dzin pa med// gsal la 'grib med 'pho 'gyur med pa'i don/ / mtha' bral sgro skur 'khor 'das gnyis su med// snang stong dbyer med tha dad med pa'i don// theb shor med cing gsal la rnam rtog bral// chos kyi dbyings kyis gzung 'dzin gnyis la gdab/ / mya ngan 'das pas 'khor ba'i chos la gdab// ye shes chen pos mnyam pa nyid la gdab// byang chub sems kyis shes rab thabs la gdab// thugs rje'i phur pa 'gro drug kun la gdab/ / bla ma chen pos snod dang don la gdab// nam mkha'i mtshan nyid rnam par rtog la gdab// sems kyi sems nyid rtogs pa'i blo la'o// dbyings la btab pas don rnams rdzogs par byed// sems la btab pas rig pa'i ye shes shar/ / chos nyid mya ngan 'das pa'i dbyings su gdab// de lta'i don gyis theb pa gyur pa'i tshe// 'khor ba'i mtshan nyid mya ngan 'das par bzla// sdug bsngal de nyid chos nyid byang chub sems/ / rnam rtog las ni ye shes skye 'gyur zhing// dmyal ba'i gnas nyid 'og min bla med gnas// de tshe ma lus phur pa gdab ces bya// don dam nges par gyur pa lta ba yin// gsal ba rnam rtog bral ba bsgoms pa yin/ / bya bral tshogs gnyis rdzogs pa 'bras bu yin// zhen chags 'dzin pa med pa spyod pa yin// 'khor 'das gnyis su med na sbyor ba yin// thugs rje'i gzungs kyis 'dzin na sgrol ba yin/ / don gnyis lhangs kyis rtogs na theb pa yin// gang du mi rtog 'dzin pa dam tshig yin// theb shor med pa'i don rtogs man ngag yin// mngon du gyur na mngon sum dkyil 'khor yin// don gnyis nyams su lon na ting 'dzin yin/ / gnas su bstab pa mchod pa chen po yin// byar med lhun gyis grub pa phrin las yin// rig pa gdeng du gyur pa dbang mchog ste// des na thams cad ma lus phur pa'i don/ / phur ni skye med pa ni 'gag pa med// phur ni gzung med pa ni 'dzin med don// phur ni ye shes pa ni chos kyi dbyings// phur ni thabs chen rdo rje yab kyis mkha'// pa ni shes rab pha rol phyin ma yum gyi klong/ / chos nyid dbyer med phur pa'i don gnyis kyis// mnyam pa'i rgyal pos thams cad dbyings su bsgral// stong gsum 'jig rten khams kun bsgral ba'i zhing// bsgral bya sgrol byed chos nyid gnyis su med/ / de yi don ni rang byung phur pa'i don// zhes 'byung ngo// phur pa gsang ba don gyi rgyud las/ rang byung phur pa'i le'u ste lnga pa'o//// rdo rje phur pa gsang ba don gyi rgyud rdzogs so/ ///

CLOSE WINDOW