rgya gar skad du/ bud+d+ha sarba pu tra e ka/ g+hu h+yA pu ri sa ma tan+t+ra nA ma/ bod skad du/ sangs rgyas thams cad kyi sras gcig po/ gsang ba gcod pa sa bon gyi rgyud ces bya ba/ dran pa kun gyi thog ma yi// dngos mdzad sangs rgyas thog ma la// dang po nyid du phyag 'tshal lo// 'di skad bdag la sogs pa yi// sangs rgyas bye ba dung phyur gyi// dgongs pa nyid dang grangs med par/ / thugs kyi snying po ji lta bar// gsung zhing bstan pa'i dus gcig na// mya ngan 'das pa'i thog mar ni// 'di ni nyag gcig rnal ma yi// don gyi sa bon rnams su ni// nges pa'i snying po nyid du yang/ / gsungs so bstan to bshad pa yin// bstan pa'i gsung ni rgya mtsho kun// la la gnas skabs yul don du// la la ma 'ongs 'jug don yin// la la 'dul don tha dad nyid// snying gi snying po tshig 'ga' las/ / kun gyis grub pa ma yin no// bstan pa 'phel byed sa bon du// 'di kun bzhag cing byin brlabs las// rang byung nyid du thugs las rdol// de phyir sangs rgyas thams cad kyi// thugs kyi sras ni gcig par yang/ / rang byung chen po'i 'phel dang bcas// 'byung ba'i sgra dang bral bar byung// 'di ni bstan pa gang byung du// 'od dang bcas te 'byung ba yin// gang la bab par gyur pa'i mi// bstan pa kun gyi bdag por 'gyur/ / 'di la ldem por bstan pa med// sus kyang bshad cing nyan med par// rang byung dgongs pa klong rdol du// nyi ma sprin las thon pa bzhin// sus kyang ma bsgribs rang byung ngo// 'di la 'byung bzhi'i gnod med pas/ / nam mkha' dag la 'bar bar snang// sangs rgyas 'bras bu sus thob par// 'di nyid de la snang ba yin// 'di ma mthong ba'i sangs rgyas ni// gcig kyang 'byung ba snga phyir med// de phyir bstan pa rnams kyi btsas/ / sangs rgyas kun gyi sras gcig po// myang 'das 'thob pa'i sna thag yin// dgongs pa rang thog 'bebs pa yi// gnad kyi tshig tu 'di nyid byung// 'jig rten khams ni gang du yang/ / sangs rgyas nyid ni sus thob pa// de tshe 'di ni lan gsum du// nam mkha' dag la 'phar ba dang// rang 'od lnga po 'di las 'byung// 'di 'dzin rnal 'byor skal che bas// lan gsum 'di yi tshig kun kyang/ / lhag dang chad pa med par ni// rdo rje'i lce yis sus brjod pa// 'di yang de dang mnyam par yang// 'gyur ba 'di la the tshom med// de phyir bstan pa'i rgyud rnams kun// thams cad dus gcig bsgoms shes kyang/ / 'di mi snang bar grol ba med// 'di ni sa bon rang 'phel bas// bstan pa'i bdag po gang sangs rgyas// 'di nyid sa bon med par ni// bstan pa'i gsung ni tshig tsam yang// lce yi dbang pos brjod mi nus/ / de tshig 'di la ma brten par// rdul cha tsam yang 'byung ba min// bstan pa gcig gi snyigs ma la// byin rlabs tshig ni 'di kun kyang// gang la snang ba'i mi des kyang// ma mthong rgyud dang bstan bcos ni/ / lce yi dbang pos brjod par nus// sems can kun gyi bsam pa dang// sangs rgyas kun gyi dgongs pa dang// ci ltar mthun pa'i chos kun ni// 'di yis ston par nus pa yin/ / sangs rgyas kun gyi thugs dang gcig/ rdo rje 'dzin pa'i dgongs pa dang// dbyer mi phyed par 'dis 'gyur ro// de phyir bstan pa'i me ro yin// rang byung tshig gi rgyal po 'di// so so'i sems can skye gzugs la/ / so so'i brda skad ji lta bar// 'di nyid de ltar snang ba yin// de phyir rang byung yi ger ni// thog ma bab kyis grub nas byung// rang byung bcom ldan 'das la yang// 'di ltar rdzogs pa'i lugs su snang/ / chos kyi sde snod nyid du ni// 'di tshig ye nas rang shar bas// thog ma dran pa'i gzhir gyur te// dran pa thams cad ma stongs par// tshig 'di kun kyang snang ba yin// dran zad tshig 'di zad par ni// rdo rje zhes ni tshig 'di kun/ / 'byung ba'i rkyen dang bral bas na// rdo rje kun 'byung gsang sngags yin// thabs lam du mas mtshon pa'i phyir// rang thabs bsgom pa 'di las byung// snying po rang 'dul bstan pa'i bcud/ / gzhi nyid kyi ni bab yin no// chos kun mnyam pa'i nan tan tshig/ rang gnad du ni 'di kun shar// 'di la nus pa gcig nyid med// bsgom dang bsgrub pa'i rtsa bar yang// 'di sngags 'khrul pa'i tshig ma yin/ / ma 'khrul sngon thog nyid kyi gzhi// 'di las 'phros pa spros pa'i rgyud// rgyu las 'bras bu rang byung bzhin// 'di nyid las ni tshig kun kyang// dran bsam bral ba'i ngang nyid las// byas pa med par byung ba yin/ / 'od zer 'dzin pa'i skyes bu la// 'di ni snang bar 'gyur ba'o// de las 'phel nas grangs 'ga' 'byung// gsang ba'i bden pa gcig pa nyid// grangs med rdo rje 'chang rnams kyi// thugs rdol nyag gcig dgongs don gcig/ 'dzin med yangs pa'i rtod phur yin// thod brgal theg bab kun gyi gnad// rang sa 'byed pa'i lde mig mchog/ 'di ni bde ba'i sa bon 'dzin// sangs rgyas rnams kyi shes rab yin/ / mkha' mnyam dag pa'i gnad gzer 'dis// bstan pa kun gyi rtsa ba 'dzin// 'di yi grangs sna bzung bas ni// lha min g.yul rnams rang log tu// 'di tshig bzung ba tsam gyis 'gyur/ khams gsum g.yul kun 'dis bzlog go/ rigs drug rnams kyi 'bros khung 'geg/ mya ngan 'das pa'i grong khyer du// 'jug par byed pa'i 'khor lo yin// srid pas bcings pa rnams la ni/ 'di yis grol bar byed pa'o/ / dam pa'i snying po gdung rgyud du// rang bzhin du ni bab las byung// 'dis ni bla ma'i sku mi spang// snying la nyi ma'i 'od brdal bas// phyogs bcur khyab pa'i mun pa ni// 'di yis rang sangs nyid du 'gro/ / lhag par gnas pa'i ye shes ni// 'di yis mchog tu ston par byed// dkon pa'i mchog rnams skyed pa'i yum// sems dal bsam gtan ngang gis 'grub// chos sku'i snang ba dus gcig tu/ / ston par byed pa'i sgron ma'o// phyin ci log las yang dag tu// dag par byed pa'i chu rgyun yin// theg pa kun gyi mthar thug tu// skyel par byed pa'i shing rta'o// thos bsam bsgom pa'i rgyang shing du// 'jug par byed pa'i dngos po yin/ / sde snod thams cad 'dzin pa yi// mnyen lcug ldan pa'i lcags kyu'o// rnal 'byor dag pa'i dkyil 'khor te// lam du 'jug pa'i sa mkhan yin// mngal rnams khung sgo 'geg par byed/ / thar pa'i skas ni rang 'dzug yin// rnam dag 'od kyi mthongs 'byed pa// chos rnams kyi re gnas pa// bdud dang mu stegs mgo non yin// shes rab rmugs pa'i gsal 'debs so// smon 'jug kun gyi srog shing yin/ / lha dang sngags kyi mdo mdud do// dkyil 'khor rnams kyi bskyed shing ngo// lta bsgom log pa'i dag byed khrus// man ngag snying po rdzogs pa'i sa// rdo rje theg pa'i grangs rdzogs nas// 'di ni thig le nyag gcig go/ 'gro rnams lam la 'dzud pa'o// theg pa'i rgyal po yongs rdzogs kyi// yon tan byung tshul rang byung ngo// le'u dang po'o//// e ma ho/ gsang mdzod rang bzhin tshig 'di yang/ / rang byung ye dag chen por ni// spel tshig gsang ba 'di ltar snang// ye thog dang po'i sangs rgyas ni// dang po mngon 'phags dran pa mgon// phyag rgya rang dran 'khor lo ni// gzhi las 'phags pa'i khyad par tshig/ spyi phud sngon gyi thog mar gyur// 'di dus khrag khrig bdun cu yi// phyag rgya 'di ni dam pa'o// snying pos brgyan pa'i bskal pa la// sde snod dang po'i sangs rgyas mgon// mnga' mdzad phyag rgya 'khor lo la/ / 'khor ni 'dzin pa bye ba lnga'i// phyag rgya 'di ni dam pa'o// spyi mes dang po pha rol mgon// dkyil 'khor snying po rab spros pas// bskal pa gser gyi yi ge la// sa ya drug gi phyag rgyar bzung// sngon thog dang po 'phags pa mgon/ / phyag rgya dang po nyid snang bas// bskal pa 'od zer 'gyed pa la// bdun 'bum gyi ni 'bras bu'o// 'jig rten dra ba mgon po yi// spros bral phyag rgya 'di spros te// bskal pa me tog mdzes pa la/ / bstan pa'i 'bras bu phyal yas las// phyag rgya 'di ni dam pa'o// snying po stong gi spyi phud mgon// snying po dam pa'i 'khor lo las// bskal pa rtsod pa'i snying po la// grangs med bzhi yi snying po'o/ 'od ldan dang po sems can mgon// spros med snying po rang sgra las// bskal pa snang ba'i sgron ma la// ban bun stong gi phyag rgyar bzung// mdzes pa'i dang po 'gro ba'i mgon// yang dag snying po rnam spros te/ / bskal pa rags pa'i yan lag la// nyar nyer brgya yi grangs kyis ni// phyag rgya 'di ni dam pa'o// thugs brtse'i snying po nyan thos mgon// phyag rgya yang dag lam spros te// bskal pa dung gi sgra dag la/ / grang phreng bcu yi dam par ro// mi pham zang ma sgra bral mgon// yang dag nges pa'i rgyud las ni// bskal pa dra ba'i 'od zer las// dung phyur bdun gyi lam rgyal bzung// snying po sems rnal bdud rtsi mgon/ / nges pa'i sa bon rab bsgrags pas// bskal pa tshangs pa'i dbyangs can la// 'bur rdul bdun gyi nges par bzung// rang bzhin drag po ldeng gdeng yang 'dzin mgon// phyag rgya 'khor lo gdan spros te/ / bskal pa smra ba'i gzhi dag la// phyal phyol dgu yis dam par bzung// gsang ba'i phyag rgya lha min mgon// yang gsang 'khor lo rnam spros te// bskal pa'i bum pa reg ldan la// yal yol drug cu'i snying po'o/ / rim pa lnga pa gtsug phud mgon// bla med snying po yang spros pas// bskal pa yang gsal rab 'byams la/ khrag khrig bye ba dgu brgya yi// bla na med pa'i gsang ba'o// 'jig rten thog ma shes rab mgon/ / bde chen snying po yang spros te// bskal pa bkod pa chen po la// 'bum phrag drug cu rtsa bzhi yi// lha yi lhar ni 'di nyid do// 'chang ba rnams kyi thog ma mgon// nges pa'i 'bras bu 'di spros te// bskal pa rin chen spungs pa la/ / sa ya dgu bcu'i mgon po yi// rgyas par bsngags te dam par ro// yang rjes 'byung ba me 'od mgon// dngos por bsgyur ba'i phyag rgya ni// snying po nyid du spros pa las// bskal pa rab tu g.yo med la/ / rab mtha' bcu yi mgon po yi// snying po snying gi dngas mar ro// chags med rdul bral dri med mgon// gsang chen nges pa nyid du ste// bskal pa g.yo sgyu bral ba la// bye ba dgu khri'i grangs mgon gyi/ / 'du ba'i phyag rgya nyid du'o// dran pa dri med bsam gtan mgon// dri med nges pa'i gsang tshig spros// bskal pa mthar ldan seng+ge la// nyal nyil sum cu'i rgyal ba yis// 'di ni bden tshig dam par ro/ / dam pa'i skyes bu chos kyi mgon// sangs rgyas shes rab sa bon spros// bskal pa gdung ba sel ba la// sang seng dgu khri'i gdung 'phel bas// dam pa'i phyag ni yang dam du'o// spyi phud stong gi ye thog mgon/ / sngags kyi rtsa ba 'di sngags pas// bskal pa dung gi snying po la/ kha g.yel stong gi gdung 'phel bas// gsang chen dam par rab bzung ba'o// sangs rgyas dra ba mgon po yi// phyag rgya nyid du gdung bzung bas/ / bskal pa bye ba'i snying po la// nyag thag dgu khri'i gdung 'dzin pas// 'di nyid snying po'i don du'o// yang dag gsang ba pad+ma mgon// snying gi snying po dkyil bzung byas// bskal pa yongs su brtse ba la/ / dang ding stong gi yang 'phel bas// 'di ni snying po yang dag spros// sems can snying brtse me tog mgon// dran gzhi dang po rab bzung bas// bskal pa yod par rab mchog la// rdul med dgu yi gsang 'dzin pas/ / gsang chen stong gi dam par ro// bskal pa dra ba nyi 'od mgon// dam pa'i snying por nges babs pas// bskal pa glang po yongs rdzogs la// rang rdul nyid kyi rjes 'dzin pas/ / stong nyid gsal ba'i mig tu spros// yongs rdzogs 'khor lo rigs kyi mgon// sems kyi dngos po dam par bzung// bskal pa bla na med pa la// khrag khrig drug cu'i yang 'phel bas// gsang chen 'khor lo nyid du'o/ / dri med dag pa chos kyi mgon// yang gsang nges pa'i lung 'di spros// bskal pa gcod pa rang grol la// nyal nyil nyid kyi 'phel gdung gi/ rim pas mngon par rab spros pa'o// yang gsang dang po thog ma mgon/ / rdo rje yang dag gsal thub pas// bskal pa khyung chen gshog rdzogs la// 'bum phrag lnga yi gdung 'phel bas// phyag rgya rang rdzogs nyid du'o// snang mdzad dang po mar me mgon/ / bla med rdo rje snying po spros// bskal pa mda' yi yongs bzung la// rnga yab gsum gyi gdung 'phel bas// rigs ldan rnams kyi phyag tu bzung// yid shes dang po gnas gsum mgon// snying thig rtsa ba'i dngas mar spros/ / bskal pa reg pa'i stobs can la// kha g.yel drug gi gdung 'phel bas// gong 'phel phyag rgya dam par spros// dpa' bo 'jigs sangs dngas pa'i mgon// dri ma med pa'i snying du babs/ / bskal pa dran bsam bral ba la// yal yol stong gi gdung 'phel las// 'di kun skyon dang bral bar ro// drag po chags bral bde ba'i mgon// chags med rang rig phyag rgyar spros// bskal pa mya ngan bral ba la/ / dung phyur gsum gyi gdung 'phel bas// med pa rnams kyi dang por ro// chos sku dngos dag dri med mgon// dam pa gsung gi snying por spros// bskal pa zil gyis gnon pa la/ sa ya nyid kyi gdung 'phel bas/ / 'di kun yang dag nyid du'o// yang sangs rgyas pa sgyu ma mgon// tshig bral bde ba'i snying po spros// bskal pa chos kyi 'khor lo la// bye ba dgu yi gdung 'phel bas// nges pa'i lam gyi thog mar ro/ / stong pa nyid ni dge ldan mgon// gsang ba'i yang gsang chen por spros// bskal pa pad+ma brtsegs pa la// kha g.yel lnga yi gdung 'phel bas// snang ba rnams kyi thog mar ro// skyes bu byed pa 'od zer mgon/ / 'bras bu rdzogs pa'i rim par spros// bskal pa dang ba'i dbyangs can la// rdul mtha' bzhi yi gdung 'phel bas// 'di kun mngon par rang 'thad do// shes rab mi rnyed sgyu 'phrul mgon/ / sems nyid thog ma'i dkyil 'khor spros// bskal pa lha yi phyag sor la// nyal nyil bdun gyi gdung 'phel bas// snying po rang dag gnad du'o// bde ba dam pa dngos grub mgon/ / gsang chen snying po dam par spros// bskal pa yan lag med pa la// sang seng drug gi gdung 'phel bas// 'di kun yang dag dam par ro// dngos po yang dag stong pa'i mgon// skyob pa dam pa'i phyag rgya spros/ / bskal pa grangs mtha' log pa la// stong phrag dgu yi gdung 'dzin pas// rdzogs pa'i sangs rgyas nyid du'o// chos kyi grags pa gnyis med mgon// yang gsang rang byung tshig 'di spros// bskal pa yongs su grol byed la/ / nyal nyil gsum gyi gdung 'phel bas// mnyam pa rang gnas nyid du'o// ye nas gsang ba dri med mgon// byin rlabs rang byung yi ge spros// bskal pa seng+ge rtsal sprugs la// khrag khrig bdun gyi gdung 'phel bas/ / 'di kun dam pa'i thugs dkyil du'o// mi pham dang po sangs rgyas mgon// gsang ba thugs kyi bu gcig par// bskal pa dga' bas myos pa la// dung phyur phyed dang dgu gdung gi/ 'di nyid dmigs med rang dam mo// dran spangs mngon 'phags rang bzhin mgon// 'byung ba'i sgra dang bral bar spros// bskal pa 'du ba chen po la// kha g.yel lnga yi gdung 'phel bas// 'di tshig rang byung gsal bar ro/ / bar ma'i dang po skye med mgon// 'di ni phyag rgya rang stobs te// bskal pa khu byug rang byung la// thar ther gsum gyi rtags shar bas// 'di tshig rab tu bsngags pa'o// 'jig rten grangs bskal ut+pal mgon/ / gsang chen rab rgyas phyag rgya spros// bskal pa rab tu mthong ba la// 'bum phrag dgu yi gdung 'phel bas// 'di kun snying gi dkyil du pheb// 'das pa'i dang po dra ba mgon// snying po gsang ba yang dag spros/ / bskal pa bud med rang 'dul la// phyal phyol dgu yi rgyal ba yi// 'di tshig rang rig dam par ro// gnyis 'das dang po zhing khams mgon// rdo rje chen po'i gsang tshig spros/ / bskal pa rang sgra zad pa la// sa ya gnyis kyi gdung 'phel bas// 'di tshig gzigs dang rab mkhyen bzung// drug mtha' thog ma gnyis pa mgon// 'dul tshig snying po bla ma spros// bskal pa dge ldan chen po la/ / 'bum phrag lnga yi gdung 'phel bas// snying po rnams kyi yang snying du// mdzad pa bzhi thog thod rgal mgon// bla na med pa'i nges lung spros// bskal pa seng bram ze yang ge bsgyings pa la// khri phrag dgu yi gdung 'phel bas/ / 'di kun gsal ba'i tshig tu'o// mtha' bral yongs rdzogs skyon bral mgon// bral gsang tshig 'di phyag rgya spros// bskal pa skyed par byed pa la// stong phrag dgu yi gdung 'phel bas/ / med tshig rdzogs par yang dag bzung// ye rdzogs dang po sgyu ma mgon// yang gsang 'bar ba 'od zer spros// bskal pa rab tu 'phags pa la// khrag khrig gnyis kyi gdung 'phel bas// 'di ni nges pa'i gsang chen po/ / dri ma dngos bral bde ba'i mgon// 'di nyid lam rgyal dam par spros// bskal pa g.yang sa chen po la// khri phrag bdun gyi gdung 'phel bas// 'di tshig rim pa dang por spros// 'dus pa rnams kyi thog ma mgon/ / nges pa'i gsang chen rab bsngags te// bskal pa gser 'od dam pa la// yang 'phel dgu khri'i mgon po yis// 'di kun gsang chen snying du bab// yang 'byed stong gi dang po mgon/ / gsang ba'i snying po yang gsang spros// bskal pa le lo ye dag la// ther zug dgu yi gdung 'phel bas// 'di yang snying thig gsang bar phab// gsang ba kun gyi sngon thog mgon// phyag rgya snying gi dkyil du spros/ / bskal pa dri med bzang snying yang po la// nyar nyer lnga dgu yang yi gdung 'phel bas// 'di tshig bla med snying la phab// ston pa'i dang po nam mkha' mgon// yang bsdus rang byung tshig 'di spros/ / bskal pa mthar chags chen po la// nyal nyil drug gi gdung 'phel bas// 'di nyid bsam gtan 'khor lo bzung// stong pa'i yang mdzad dam pa mgon// 'di kun g.yo med rang byung tshig/ rdzogs pa dngos dag bskal pa la/ / 'bum phrag dgu yi yang gdung gis// 'di kun nges pa'i 'bras bur spros// dang po gsang 'dzin dngos grub mgon// 'di yang mdzad chen dag par spros// bskal pa grangs brdal gsang chen la/ / kha g.yel gsum gyi gdung 'phel bas// 'di kun yang dag lam nyer bzung// dri med rang zad 'byung bral mgon// dkyil 'khor kun dag rtsa ba spros// bskal pa mo mtshan rgyun gcod la/ / thar ther brgya yi gdung 'phel bas// gsang ba'i yang zhun theg par bzung// mos chen rnams kyi dang po mgon// snying po mig dag phyag rgya spros// bskal pa 'khor ba'i mun sel la// 'bum phrag lnga yi yang gdung gis/ / 'di nyid spros te dam du'o// sems rig kun gyi spyi phud mgon// nga med sngon du phyag rgya spros// bskal pa snga mo mo stong ldan la// bye ba dgu yi gdung 'phel bas// nges shes kun gyi thog mar bzung/ / bslab gnas kun gyi dang thog mgon// phyag rgya mig ldan stong du spros// bskal pa sgyu ma snang mdzad la// yal yol gsum gyi yang gdung gis// 'di tshig gong ma'i gong mas bzung// rim pa sngon gyi skyed byed mgon/ / bab byung med snang phyag rgya spros// bskal pa snying rje kun 'dus la// sang seng lnga yi gdung 'phel bas// snying po gsang ba chen por bzung// 'jigs pa kun bral seng ge mgon/ / sangs rgyas sras ni gcig pa spros// bskal pa bzang po rab gang la// stong phrag bdun gyi gdung 'phel bas// 'byung ba'i rang sgra bral bar bzung// rdzogs pa'i yang thog tha ma mgon// don dgongs nyag gcig rnal du bzung/ / bskal pa rtsod ldan chen po la// brgya phrag dgu yi gdung 'phel bas// 'di tshig gcod dang bral bar bzung// dran pa zad pa ye shes mgon// snying po rang tshig gcig par go/ bskal pa rtsod dang ldan pa la// bcu phrag dgu yi gdung 'dzin pas// nges pa'i phyag rgya dam par bzung// de ltar brjod kyis mi langs pa'i// sangs rgyas rnams kyi byin rlabs las// rang byung chen po'i yi ger ni/ / gnas pa'i ka dag chen po yi// bab las 'di kun rang byung shar// byin brlabs rim pa 'di kun kyang// thog ma bab las rang bstan no// le'u gnyis pa'o//// e ma/ rang byung chen po'i tshig las kyang/ / 'di ltar khyad par byung tshig ni// bab las byung zhing shar ba las// rang gsal chos rnams rang byung tshig/ phyis ni 'di ltar yang dag go/ rgyud dang de yi rang 'grel lo// lha sngags la sogs phyag rgya bcu/ / de las 'di tshig phrag g.yas su// snang ba yin no don la sems// snang mdzad don kun rang rdzogs te// tshig kun bdag por rang byung bas// dgongs pa nyid ni dang po las// tshig rtsom mkhas pa 'di las ni/ / grangs las 'das rnams 'byung ba yin// bdag 'dzin bdag med sngon thog las// mthar 'dzin 'dod pa dgag pa'i phyir// mngon sum rjes su dpag pa yis// gtan tshigs cha 'dzin tshig kun 'byung/ / yid dpyod blo zhen dgag pa'i phyir// kun rdzob don dam grangs phye sogs// tshig ni 'di kun byin rlabs las// 'di ltar rtsom pa'i dpa' bo mkhas// sems ni mthar zhen blo dgag phyir// phung po grangs dang khams sogs dang/ / bstod dang yod med chos dang ni// chos min ci ltar brtsi ba yi// tshig kun 'di la rab brtson thob// 'jig rten mthun 'jug drang ba'i phyir// sgra dang rig pa du ma yang// 'di yi rang byung tshig las shar/ / phyir 'gyur theg pa'i rang grangs kyis// dbang po'i 'jug sgo gsal ba'i phyir// rim pa'i 'jug srel bcu gcig ni// 'di yi yon tan bab las snang// rang 'od ci ltar yod pa'i tshig/ 'di las spros so nye bar bsdus// grags dang ma grags tshig bcud ni// 'di las yang gsang chen por yang// gyur te snang ba gyur pa yin// lha mis ci ltar 'dod pa'i tshig/ sgo drug thob 'dod rang bkod tshig/ sngags lung sems dpa'i lung rab snang// 'di las gsang chen gnad du grags// de bzhin skye 'jig bstan chos dang// yod dang med smra bde grangs spros// mtha' gnyis rab 'byed yod snang phyir/ / dran sems nyid kyi sde grangs ni// 'di kun las byung sems kyi lung// 'jug pa chen po'i shing rta yang// snang ba'i mdzad 'phros kha lo ni// 'di tshig dam pa'i 'khor lo'o// grags pa'i sngags dang de spel tshig/ ram pa mdo sde rang grags tshig/ bkod pa rnams kyi thog mar ni// 'di las 'phros so phan sems ldan// lung rgyas theg pa kun dngos so// gzhi rtsa rtsal gyi nan tan tshig/ 'di kun rgyan gyi rgyal po las/ / kha lo bsgyur ba'i dpa' bo yin// byed pa'i las rgyas dkyil 'khor 'jug/ dpe med pa yi sgra yi zer// grangs mtha' 'geg byed seng phrug go/ bcos pa'i yang cha de 'phel bzung/ / dpa' bar 'gro ba'i las rgyas so// mtho dman snyoms pa'i dge 'bras lung// dpe bral rnams kyi dang po'o// de ltar spros tshig du ma yi// 'khor lo 'dzin pa'i sprul pa'o// mkha' gsal mkha' dag klong chen gyi/ / spros pa rnams kyi yang spros las// skye sgo rab tu spangs pa yi// bla med 'dren pa'i dang por byung// bde bas bde ba 'byed pa yi// rigs mthun kun gyi gsang chen yin// rigs la gnas shing rigs 'byed pa'i/ / gtso bo gtso bos blangs pa'o// ka dang rtogs dang rab tu dgongs// rim par rgyas dang de rjes ni// 'di las rab tu 'phel ba yin// rab tu rtogs phyir dkyil 'khor gyi// dam pa rnams ni 'di las sprul/ / thams cad las kyi mtha' rgyas kyang// 'di las rab tu yang 'phel lo// 'di tshig byin rlabs brgyud pa yang// rab tu 'phel phyir 'byung ba'o// le'u gsum pa'o//// e ma ho/ 'di ltar yang gsang don nyid la/ / 'jug par 'dod pa'i skal ba rab// sngon du lus ngag yid rnams kyi// mngon par zhen pa bzlog pa'i phyir// sngon du spyod pa brtsam par bya// lus ni rgyug dang nyal ba dang/ / langs dang yan lag bskyod pa dang// bskor ba dang ni phyag bya dang// yan lag bskor dang mgo bsgril dang// ji ltar dran pa'i las rnams dang// gar dang phyag rgya bsgyur ba dang// ji ltar dmigs pa'i las rnams bya/ / 'di ltar su yis byas pa'i mi// lus kyi mngon zhen rang bcad nas// lus kun ru shan phyed par ni// 'di yis 'gyur ro sprul pa'i sku// de 'das ngag gi spyod pa brtsam// sngags dang kha ton chos kyi sgra/ / yod dang med dang snang ba dang// yid dpyod tshig ni sna tshogs brjod// byol song sna tshogs brda skad dang// skad kyi rnam pa sna tshogs pa// 'di ltar su yis byas pa'i mi// ngag gi mngon zhen rang chod nas/ / 'khor 'das ru shan 'dis phyed do// de 'das nyid kyi 'og tu yang// sems kyi spyod pa brtsam par bya// dga' dang mi dga' bde sdug dang// rtag dang mi rtag la sogs pa// blta bsgom spyod pa'i bsam pa dang/ / chos dang chos min la sogs dang// 'dod chags zhe sdang gti mug dang// dge dang mi dge la sogs pa'i// bsam spyod rnam pa sna tshogs bya// 'di ltar su yis byas pa'i mi/ / sems kyi mngon zhen rang chod nas// 'khor 'das ru shan phyed pa'o// de ltar sngon du 'gro byas nas// mngon sum don la blta ba'i phyir// lus dang ngag yid rab tu gcun// lus ni seng+ge lta bu dang// drang srong dang ni glang chen tshul/ / 'di la g.yo bar ma byas na// sangs rgyas sum stong nyid dang yang// skal ba dag ni mnyam pa yin// ngag ni ji ltar lkugs pa bzhin// su dang brda tsam nyid mi bya// 'di ltar su yis byas pa'i mi/ / sems kyi 'phro 'du rang chod do// 'di ltar lus ngag sus gcun pa// chos kyi dbyings kyi snang ba la// 'di yis goms par 'gyur ba yin// de ltar lus la sogs pa yi// gnad kun rab tu gzir ba yis/ rig pa nyid dang mngon sum du// bla ma'i lung las shes pa yin// dbyings dang rig pa'i lta stangs ni// sgrib byed bral ba'i nam mkhar blta// dbyings kyi nang du lu gu rgyud// rnam par bzhag cing 'bral mi bya/ / 'di ltar su yis mthong ba'i mi// thog ma'i kun tu bzang po dang// skal ba nyid ni mnyam pa'o// de nas thig le mthong ba yin// de gtad snang ba gong 'phel bas// rang ngo mthong las 'di ltar ro/ / yar mtshams las ni sor bzhi las// bral ba'i skyes bu skal bzang pa// 'khor bar 'jug pa ga la srid// gru chad rnam par gang snang ba// sprul pa'i yon tan 'di yis 'grub// mthong ba'i yul tsam gang snang ba/ / tshom bu la ni de bzhin no// phyir snang 'gag pa gang yin pa// skad cig ma ni bcu drug la// 'di yang de ltar 'gyur ba'o// ma smin la sogs thig le dang// de bzhin sku la thug gi bar// drug dang bcu dang lnga gsum la/ / gdon mi za ste longs skur ro// nang lus zad pa'i sar phyin tshe// sor mo la sogs de bzhin snang// 'di gtad 'byung ba rang dengs so// skye dang 'jug pa'i khyad par gyis// chos kun zad pa'i rang sa la/ / ci yang 'dzin pa med par ni// gnas pa yin no sprul pa'i sku// 'di ni 'jug pa'i shugs kyis dbang// skye ba'i rang dbang sus thob pa// de yang de la gtad nas ni// yang dus 'di ltar byas pa na/ / snang ba'i rang sgra sil skad de// sngon du log ste 'khrul par snang// 'dis ni sems can don kun byed// rig pa mnyam par gcig pa'i phyir// stong phrag gsum rnams sems can gyi// 'pho ba chen po 'dis 'grub bau/ / de bzhin rim dang cig car gyis// lus ni 'di yis 'grub pa yin// de kun lus zad tshad las grol// 'di kun 'bras bu nges pa'o// lam mchog dkyil 'khor chen po 'grub/ / 'di ltar thabs las yang dag byung// sangs rgyas 'grub par 'dod pa'i mis// 'di thabs ldan na de bzhin no// gzhan spyod snyems byed nyid yin pas// dngos po mthong ba ma yin na// de phyir 'di kun dkon pa'i tshig/ rtag tu rin chen gter 'di ltos// 'di ltar zad pa la spyod na// 'dis ni sangs rgyas stong phrag gsum// 'di yis legs par zhal mthong yin// 'di tshig gsang ba nyid las byung/ / skyes bu rnams kyis 'di ltar bya// gsang chen yang gsang dam pa'o// le'u bzhi pa'o//// e ma ho/ 'di ltar 'dod 'byung skyes bu gang// thabs kyi yan lag 'di lta bu// rnam pa sna tshogs nyid la ni/ / 'di ltar de yi sngon du sbyangs// sems kyi rim pa ci sbyangs pa// 'dis ni mi rtag sems la 'byor// ji ltar sgra yi rnal 'byor pas// sa chu me rlung 'byung ba bzhi'i// sgra don rnams la goms pa yis/ / rigs drug rnams kyi rang skad kyi// mngon shes 'char ba 'dis 'grub bo// zhag rim dus ni rnam drug gi// 'di yi skad kun rang dus shes// 'dres pa med par sus shes pa// ma 'ongs da ltar 'dus pa yi/ / sems rgyud ji ltar shes par 'gyur// gzhan gyi don byed sprul pa pos// 'di la sngon du ma sbyangs na// sprul pa'i sa bon 'jog par ni// nus pa nyid ni mi 'thob bo// des na 'byung ba'i sgra la bslab// bya byed zhen pa bzlog pa'i phyir/ / lag ni bya byed sna tshogs bya// de bzhin 'dus byas rnam pa ni// dbang po'i mngon zhen bzlog pa ste// yul rnams goms pa'i gnad kyis sbyangs// 'di ltar gnyid dang rmi lam gyi/ / dus bzhi 'byung ba'i gnad kyis dbye// tshad ni gnad la phebs pas bzung// thig le phyi nang bslab bya'i phyir// gang zag rnam pa gnyis don bya// bcos ma 'dus byas bsgom pa yis// dang po sems g.yeng zhen pa dgag/ 'bras bu cig char ma yin pas// snang ba rim gyis goms par bya// mig sman la sogs sgo lnga yi// sman gyi rim pa sbyar bar bya// 'di kun gsang ba'i thabs yin no// lam gyi rtags ni lus las ni/ / mngon par phyi rol snang gyur pa'i// sman nyid kyang ni de bzhin no// 'di kun 'jig rten drang don du// skal pa can gyi spyod yul lo// 'di yi thabs ni sna tshogs par// gzhan gyi 'dod yon mtha' dgag phyir/ / rab tu gsang bar byung ba'o// le'u lnga pa'o/// khams la bslab pa'i thabs yod pas// dran rdzogs phyag rgya'i ngang du sbyor// dbang po'i zhen pa bzlog pa'i phyir// karmA rag+sha g+hi haM ti// phung po'i zhen pa bzlog pa'i phyir/ / b+he ga ra na so gad gling// yul kun zhen pa bzlog pa'i phyir// bu kA ri la b+hi d+hu tri// sems kyi dngos po spur ba'i phyir// raM ba ka la sa mi khye// byung tshor gnas su gcad pa'i phyir/ / ma tang phar pher ras rmis te// 'dus 'tshogs snang ba ngos gzung phyir// kha Ta re ka sa rmig rlung// rig pa btson rar gzhug pa'i phyir// a ke ra na b+he tsag sha/ 'khrul pa'i rang rgyud khungs gcad phyir/ / ya ri mu Da sa g+hu li// rigs drug rim gyis bsgral ba'i phyir// ya sing ra rlung pa la ya// 'khor ba dong nas 'don pa'i phyir// mA ma ko ling sa ma ta// chos can thur du gzhug pa'i phyir// g+ha ring yaM pa ri maM ti/ / rol pa'i byung khungs spur ba'i phyir// bu ga sid+d+ha pha g+ha la// zhen pa'i phreng thag gcad pa'i phyir// ra mi sa pI khe ta ba// lug rgyud ar la gtad pa'i phyir// be khu ma la pa taM ki/ lha yi phyag rgya blta ba'i phyir/ / sa ma nyi wa d+he ra ya// lta bsgom log pa dag bya'i phyir// badzra sa twa tre to mA+e// sa lam dus gcig gcad pa'i phyir// g+he ba su g+har rna mA yA+e// yid dpyod lta ba khungs gcad phyir// d+harmA pa te sa g+hu lI// sku gsum lam du bslang ba'i phyir/ / rasma sa ma kha rgad tshe// snang ba dngos su blang ba'i phyir// ru pa sa mi mi ta laM// sgra yi zhen pa mtha' gcad phyir// nga tig pa yang ka la sa// bsam gtan chen po'i sa non phyir/ / ga tsha pa la sa i taM// phrin las mtha' ru dbyung ba'i phyir// karma e ka a nu sa// sangs rgyas mngon zhen bzlog pa'i phyir// sang kri ma ma karma ta// sangs rgyas rnams kyi gnas btsal phyir// nga la khe pa ki li sa:/ 'di kun rang byung tshig tu'o// le'u drug pa'o//// e ma ho/ bcom pa dang ni ldan pa dang// 'das pa yang dag lam yin no// 'di tshig lam min gdams pa yin// bstan cing bshad med brjod ma yin/ / gdams pa ma yin byin rlabs yin// bris shing bkod med rang byung yin// gnas dang dus med sngon thog yin// chos min snying po thugs gsang yin// sus kyang nyan med ngang shar yin// thos pa med cing rang bsgrags yin/ / byas pas 'di kun ma yin tshig/ 'di yod 'gro ba sangs rgyas yin// pha rol mthong ba'i gsang chen las// sems yod ma yin sprul pa yin// 'khor ba'i spyi mdud dgrol ba'o/ / shes bya ma yin lam sna thag/ stong pa ma yin mngon sum yul// yod med ma yin thabs gsang ba// lha med 'di la sngags yod min// pha rol phyin pa drug gi gzhi// bsnyen gnas la sogs 'di tshul lo/ / de bzhin du yang bye brag smra// don dam kun rdzob gzugs kyis so// gzugs kyi rtsa ba 'di nyid rang// lha'i rnal 'byor 'di sngags yin// lung chen rnams kyi dam pa 'di// chos rnams ro gcig 'dres pa'i rten/ / sku gsung thugs kyi dbye ba yis// bla med 'khor lo bskor ba'i gnas// dbang po rnams kyi dmigs gtad yin// shes rab rnams kyis rtogs pa'i gnas// sku gsum lam du slong ba'i rten/ / thig le mngon du 'byin pa'i mig/ thar pa'i skas kun slong bar byed// lam du 'jug pa'i sa mkhan yin// skal ldan 'dzin pa'i lcags kyur snang// chos sku rang 'jog gnas lugs yin// sangs rgyas kun gyis phyag byed gnas/ / yul snang gcod pa'i ral grir snang// grol ba rnams ni 'di nyid la// rnam par brten nas grol ba'o// le'u drug pa'o//// sangs rgyas thams cad kyi sras gcig po/ bstan pa thams cad kyi btsas su rang byung ba/ rang byung yi ge chen por bskal pa kun gyi thog mar rang byung ba/ byin rlabs las rang bkod pa/ sprul sku'i sa bon 'phel bar byed pa/ rab tu dkon pa'i tshig rdzogs so/ /// sa ma ya/ g+huh+ya/ a+thi+-i/ rgya rgya rgya/ sbas rgya/ gtad rgya/ gter rgya/ kha tham/ d+ha thim/ sprul sku sangs rgyas gling pas pu ri phug mo che nas gdan drangs pa'o//

CLOSE WINDOW