gnubs sangs rgyas ye shes kyi zhus gtugs so/// rgya gar skad du/ yo gAu0f85 d+h+yAt+ma ka ga Na ma hA tan+t+ra/ bod skad du/ rnal 'byor nang gi tshogs rgyud chen po/ dpal rdo rje sems dpa' la phyag 'tshal lo// 'di skad bdag gis thos pa'i dus gcig na/ 'og min chos kyi dbyings kyi pho brang/ yum gyi b+ha ga mkha' dbyings rnam par dag pa na/ bcom ldan 'das rdo rje sems dpa' dang/ rigs lnga'i sangs rgyas dang/ gsang ba'i yum dang/ 'khor sems dpa' dang sems ma dang/ khro bo dang khro mo dang/ mkha' 'gro ma dang sprul pa 'khor dang bcas pa dang thabs cig tu bzhugs pa'i tshe/ bcom ldan 'das dpal rdo rje sems dpa'i dbu'i gtsug tor drang po las/ 'od zer bsam gyis mi khyab pa 'phros pas/ nam mkha'i dbyings gang nas gang du khyab ste 'jig rten gyi khams thams cad khyab pas/ lha dang lha mo'i dkyil 'khor bsam gyis mi khyab pa/ phyag na yang rnal 'byor tshogs kyi mchod pa bsam gyis mi khyab pa thogs pas/ rgyal ba'i dkyil 'khor rab 'byams bsam gyis mi khyab pa thams cad la/ mchod pa'i rnam pa thabs dang shes rab kyi tshul du mchod/ dgyes pa chen po'i gzi mdangs kyis tshims par mdzad/ bde bar gshegs pa rnams kyi sku gsung thugs la phog pas/ thugs dam chen po'i rgyud bskul te/ sku la phog pas/ mdzad pa'i phrin las dang ma 'gal bar thugs dam bskul/ gsung la phog pas/ bden pa'i chos nyid las ma g.yos par thugs dam bskul/ thugs la phog pas/ mnyam pa'i sems ma g.yos par thugs dam bskul/ dbang gi mchog zhus/ lha dbang lus la brtsegs pa dang/ spyi dang 'dod dgur bsgyur ba dang/ mos dbang sems dang 'dres pa dang/ gsang dbang lhun gyis grub pa dang/ dbang bzhi mnos/ dngos grub kyi mchog zhus/ sku'i dngos grub phyag rgya chen por rang gnang ba dang/ gsung gi dngos grub chos nyid ma skyes par rang snang ba dang/ thugs kyi dngos grub sems ye nas sangs rgyas su mnos/ skye 'gro ming dang gzugs kyis bsdus pa thams cad la khyab pas/ sems can gyi don byas te/ long bas gzugs mthong ba la sogs pa'i don byas/ 'khor ba'i skyon bsal te/ dngos por blta ba'i rdos pa bshigs/ log pa'i skyon bcom/ ma rig pa'i mun pa bsal/ sdug bsngal gyi rgyu bshigs/ 'khor ba'i 'dam nas drangs/ byang chub kyi shul bsrangs/ dngos grub kyi stod du rung bar mdzad/ rigs nges pa'i sras su mdzad/ 'od zer de dag slar rdo rje sems dpa'i sku la 'dus/ rdo rje sems dpa'i sku nyid shin tu lhan ne ba// lhan ne ba yang ma yin pa/ shin tu sang nge ba/ sang nge ba yang ma yin pa/ ci lta bur yang snang la/ ci lta bur yang ma yin/ thams cad du gsal ba/ ma bsgrubs pa nyi ma'i 'od dang 'dra ba/ de lta bu'i rdos pa can yang ma yin pa/ thams cad du blta bas mi ngoms pa la/ brtags kyis kyang mi langs pa'i sku gcig kyang gcig/ bsam gyis kyang mi khyab/ mthar thug pa yang med/ dbus su brtags pa yang med/ dngos po yang ma yin/ stong pa yang ma yin/ yod par yang mi snang/ med par yang ma song/ btud nas nye bar med/ bkyed nas ring ba med pas thams cad du lhun gyis grub pa la/ 'di zhes bstan du med pa la/ ci lta bur yang dmigs su med pa/ gang yang ma tshang ba med pas sku gsal ba las/ rdo rje sems dpa'i chos kyi skur gyur to// de nas rdo rje sems dpas ljags kyi pad+ma las/ yig 'bru bzhi bcu rtsa gnyis kha dog rnam pa sna tshogs pa'i 'od zer bsam gyis mi khyab pa 'phros pas/ stong gsum gyi stong chen po lta bu'i grangs ma yin/ ji ltar nam mkha' nas gang du khyab pa thams cad gzugs dang sgra la sogs pas bsdus la/ de thams cad tshig gi bsdus/ tshig thams cad yi ges bsdus/ yi ge thams cad sangs rgyas kyi rang bzhin du lung bstan/ phyogs bcu dus gsum gyi sangs rgyas thams cad kyi ljags dang gsung la phog pas/ gang na sangs rgyas bcom ldan 'das gsung gi sgo nas chos kyi 'khor lo bskor bar bzhed pa rnams bskul ba'i sa la bzhengs te bzhugs pa rnams la/ gsung gi sgo nas thugs dam gyi rgyud bskul te/ dgyes pa chen po chos nyid kyi mchod pa phul nas/ chos thams cad tshig dang yi ge'i sgo nas/ sangs rgyas pa'i don thugs ye shes kyi klong rum nas dgongs nas mgur gsang ba'i bum par phyung nas/ ljags kyi dbang po mchog la bkram nas 'gro ba sems can la chos kyi 'khor lo bskor bar bskul/ gang nas sangs rgyas bcom ldan 'das chos kyi 'khor lo bskor te/ 'gro ba mi rtag par bstan pa'i slad du/ thabs kyis mya ngan las 'das pa'i tshul bstan par bzhed pa rnams la yang phog pas/ dgyes pa chen po'i mchod pa phul/ thugs dam chen po'i rgyud bskul nas/ thabs kyis mya ngan las mi 'da' zhing/ 'jig rten du yun ring du bzhugs par gsol ba gdab/ stug pos brgyan pa'i sangs rgyas rnams la phog pas/ yig 'bru gzugs kyi mchod pas mtshan dang dpe byad du ldan pa'i sgo nas bdag dang gnyis su med par thugs dam bskul/ yig 'bru tshig gi mchod pas gsung dbyangs bsam gyis mi khyab pa dang ldan pa'i sgo nas tshig gi don gsal nas chos nyid ma skyes par thugs dam bskul/ yig 'bru don gyi mchod pas thams cad mkhyen pa'i ye shes dang ldan pa'i sgo nas don gyis rtogs par byas la sangs rgyas par byas te/ 'khor ba'i rgyu btsal gyis mi rnyed cing/ thams cad byang chub snying po can du lhun gyis grub par dbang bskur te/ slar 'dus te rdo rje sems dpa'i thugs kar 'dus pa las/ rdo rje sems dpa'i thugs gcig tu mi snang ba/ gnyis su ma phye/ grangs su ma brjod/ ris su mi snang ba/ brjod du med cing brjod pa'i mtha' las 'das pa/ smra ba yang med pa/ ma gsungs pa med pa/ thugs nam mkha' dang 'dra ba la/ rtogs pa 'od zer bzhin gdal ba las/ snang ba thams cad ni lha'i dkyil 'khor/ brjod pa thams cad ni chos nyid kyi brjod pa/ grags pa thams cad ni skye ba med pa'i klong/ ri bo rim pa e yin thams cad ni thabs dang shes rab kyi rang bzhin/ dgongs pa thams cad ni ma skyes pa'i klong du lhun gyis grub pas/ byang chub sems dpa' mtha' yas pa thams cad/ rdo rje sems dpa'i chos kyi skur lhun gyis grub pas/ byang chub sems dpa' rnams ngo mtshar du gyur nas/ bcom ldan 'das rdo rje sems dpa' la/ mgrin gcig tu 'di skad ces gsol to/ / e ma a la la/ bcom ldan 'das 'di ci'i rgyu/ ci'i rkyen/ ci las byung ba lags/ thugs rje che dang ldan pas lung bstan du gsol// bde bar gshegs pas lung bstan du gsol// rdo rje sems dpas bka' stsal pa/ 'di ni rnal 'byor gyi tshogs kyi rgyud do// rnal 'byor gyi tshogs kyi rgyud ni de bzhin gshegs pa rnams kyi rkyen no// rdo rje sems dpa' yang rnal 'byor gyi tshogs kyis mchod pa phul bas sangs rgyas pas/ de dag thams cad ni tshogs kyi mchod pa phul ba las byung ba'o// byang chub sems dpa' rnams kyis gsol pa/ tshogs zhes bgyi ba nges tshig ci lags/ tshogs kyi dkyil 'khor ji ltar bskyed/ tshogs kyi slob dpon ji lta bu la bgyi/ tshogs kyi rgyal tshab dang gar dang ging ci lta bu la bgyi/ yum ji lta bu la bgyi/ tshogs kyi yo byad ci 'tshal/ mchod pa ji ltar 'bul/ grangs su 'tshal/ tshogs kyi 'bras bu ci thob pa lags/ yun ci tsam gyis 'grub/ phul ba'i yon tan dang/ ma phul ba'i skyon ci mchis/ bcom ldan 'das kyis lung bstan du gsol// bde bar gshegs pas lung bstan du gsol/ / bcom ldan 'das kyis bka' stsal pa/ khyed la sogs pa rnams mos shing thos par 'dod na/ yid la zung la rna ba'i dbang pos nyon cigarnal 'byor gyi tshogs rgyud chen po 'di/ dus gsum gyi sangs rgyas rnams kyis kyang gsungs la ngas kyang bshad do/ de la tshogs zhes bya ba'i nges tshig ni/ don dang mthun pa la bka' dang mi 'gal zhing gzhung bzhin bsgrub pa la tshogs pa la tshogs zhes bya ste/ nyan thos dang rang sangs rgyas dang dgra bcom pa'i ming yang med pa/ shin tu rnal 'byor dbang phyug chen po/ gsang sngags rdo rje theg pa la mos shing gzhol ba dang/ 'di dag bshad cing bstan pa'i snod du gyur pa yang/ rtsa ba dang yan lag gi dam tshig la gnas shing ma nyams par bsrung ba dang/ ras gcod dang gzu lums ma yin par/ phyi nang gi dbang rnams lung bzhin du nod pa dang/ rgyud dang phyi nang gi don la mos shing mkhas pa'o/ / de ma gtogs pa de rnams dang mi ldan pa 'jungs pa dang/ 'chings pa ma grol ba dang/ dgongs pa gnad du ma phebs pa rnams ni ma gtogs so// de la tshogs kyi dkyil 'khor bskyed pa 'di skad do/ / chos rnams stong pa'i rang bzhin las/ ngo bo nyid kyis kun tu dag/ lta ba'i chos nyid tshig tsam ma yin par rtogs pa dang/ spyod pas de dang mi 'gal bar spyod pa dang/ phrin las kyis bab col du mi byed cing/ gong 'og rin po che 'phreng ba brgyus pa ltar ma nor ba dang/ bsgom zhing bsgrub pa la bzhad gad dang gnyid dbang du mi gtong zhing/ dad dang brtson 'grus kyis mgo la me shor ba dang 'dra bar 'bad pa dang/ rnal 'byor gyi don gang la yang shong yangs su che ba dang/ rtog pa dang 'khu 'phrigs med cing/ 'khu ldog dang ya ga dang mtshang tshig la sogs pas mi smod cing/ rnal 'byor gyis mchod pa'i rgyu 'dod pa'i yon tan lnga la sogs pa gang yang ma tshang ba med cing/ zungs su yang bzung bas thams cad tshang zhing tshogs pa la tshogs zhes bya ba las/ ma tshang zhing ma tshogs pa dang/ mi mthun pa tshogs pa la tshogs zhes bya ba'i nges tshig med do/ / de la tshogs kyi slob dpon ni kun gyis bya ba ma yin gyis/ lta ba gnyis su med pa'i byang chub kyi sems rtogs pa/ spyod pa gsang ba'i bka' dang mi 'gal zhing/ thabs la mkhas pas snod ma yin pa dang/ mu stegs dang log pa'i phyogs rnams kyis ma tshor ma 'phrigs pa'i thabs la mkhas par spyod pa dang/ dbang rim pas brtsegs te/ rigs pa'i rgyal po rab 'byams kyi dbang thob nas/ dbang rgyud dang/ dbang rdzas dang/ dbang rtags dang/ dbang bsgrub dang/ dbang bsnyen/ dbang bskur ba la mkhas pa dang/ dam tshig gzhi dang 'dra bar shong yangs dang/ theg pa che zhing snying la 'chang ste bsrung ba dang/ phrin las kyi sngags dang phyag rgya dang ting nge 'dzin dang/ ma nor ba'i tshul dgu ste/ dgongs pa'i lha tshul dang/ gar ye shes kyi tshul dang/ phyag rgya sku'i tshul dang/ sngags gsung gi tshul dang/ snying po thugs kyi tshul/ mchod pa yon tan gyi tshul/ glu phrin las kyi tshul/ skyil krung zhi ba'i tshul/ stangs stabs khro bo'i tshul te/ tshig tu 'brel pa dang/ gong 'og ma 'chol ba dang/ dgongs pa'i dkyil 'khor chen por rdzogs pas 'dzin pa'o// de la tshogs kyi rgyal tshab ni/ dper na rgyal po'i bka' bsgo blon pos gsungs pa dang 'dra'o// dgongs spyod kyi don tha mi dad pa de nyid dang mtshungs pa las/ gzhan 'dren pa'i thabs la mkhas pa dang/ slob dpon gyi sku bsnyel ba dang/ thun spo ba dang/ snyoms pa la sogs pa la bar mi gcod cing 'grub par bya ba dang/ slob dpon gyi zhal tshab tu chos bstan pa la mkhas pa'o/ / tshogs kyi gar ma ni/ phrin las rnam bzhi la sogs pa dang/ mchod pa dang brda'i don mtha' dag la mkhas pa las ma gtogs pa/ khe shong dang blos 'debs dang/ mos pa tsam du bya ba ma yin no/ / tshegs kyi ging ni/ rang gi dgos ched mi lan rnal 'byor gyi spyi chas la brtson pa dang/ zhing bcur gyur pa la thugs rjes sgrol nges pa dang/ dgongs pa dang las rgyud du ldan pa las ma gtogs pa/ sgrol ba btsan thabs dang/ rang gang la dga' ba la mngon spyod dang/ drag shul gyi las brtsams pa ma yin no// tshogs kyi yum ni/ gtso bo'i dgongs pa bzhin du byed nus pa dang/ gzhung dgu dang ldan te/ tshul shes pa/ ya sha che ba/ nog thub pa/ gsang sgo dam pa/ dam la gnas pa/ dad pas mos pa/ rtog pa chung ba/ mtshan gyis brgyan pa/ sems bzang ba dang dgur ldan pa las ma gtogs pa/ 'dod mos dang/ gnyan btsan dang/ smon 'drid dang/ mtshan ngan dang/ gsang ba 'dzag pa ni ma yin pa'o// de la tshogs kyi yo byad ni/ sangs rgyas rnams la ta sbrebs pa dang/ skyems pa dang/ bser ba dang bsnyun mi mnga' chags pa mi mnga' ba lags kyang/ dper na rgyal po chen po la dkor dang longs spyod kyis mi brel mi phongs pa la yang 'bangs la sogs pas dkor dang longs spyod phul na 'phral gyi phan pa dang yun gyi bde ba dang/ bdag gi yid la dad pa rtsol ba dang 'dra bar sangs rgyas rnams la bzhed pa mi mnga' na yang/ phyi rabs kyi rnal 'byor pas tshogs kyis mchod pas 'byor pa bsags/ dkon pa btsal/ mos pa dang dad pas phul na/ 'di dang pha rol gnyis ka'i phan pa dang bde ba stsol bar mdzad cing/ chos nyid kyi dga' bde chen po da lta nyid du 'grub par stsol bar mdzad pas/ de'i phyir 'dod pa'i yon tan lnga po gzhung bzhin du bsham par bya ste/ gzugs la yang gsum ste/ rgyan dang dbyibs dang snod do// rgyan la yang rnam pa gsum ste/ bkod pa lha'i rgyan dang/ mdzes pa lus kyi rgyan dang/ gzhal yas sprul pa'i rgyan no/ / dbyibs la yang rnam pa gsum ste/ lha'i zhal zas kyi dbyibs dang/ mi'i zhal zas kyi dbyibs dang/ 'byung ba rang skyes kyi dbyibs so// snod la yang rnam pa gsum ste/ bza' ba'i snod dang/ bca' ba'i snod dang/ btung ba'i snod dang/ dri la yang rnam pa gsum ste/ dbang po tshim byed kyi dri dang/ mdog gsal rgyas pa sman gyi dri dang/ bcud gsal yid 'ong zhal zas kyi dri'o// ro la yang rnam pa gsum ste/ rang bzhin gyis brlabs pa lan tshwa dang/ shing tog la sogs pa kha ba dang/ mngar ba dang/ skyur ba dang/ tsha ba dang/ rtsub pa dang/ bskal ba la sogs pa phyi'i 'byung ba rang skyes pa'i ro dang/ 'gro ba rnams kyis btsal ba'i/ phab dang/ ru ma dang/ mnan pa dang/ 'dus pa dang/ byibs dang/ bya na btsos pa dang/ sbyar ba dang/ bsregs pa dang/ bsings pa la sogs pa'i ro dang/ sngags dang ting nge 'dzin gyis byin gyis brlabs pa'i ro dang/ chung ngu las chen po/ nyung ngu las mang po/ mi zhim pa las zhim po/ lha'i ro mchog brgyad dang ldan pa'i ro'o// sgra la yang rnam pa gsum ste/ shes pas zin pa'i sgra glu dbyangs la sogs pa snyan cing yid du 'ong ba'i sgra sna tshogs dang/ shes pas ma zin pa'i sgra 'byung ba rang rgyud kyi grags pa'i sgra dang/ rtsol ba dang bcas pa'i sgra skyes bu'i lag pa dang rkan dang/ dbugs dang 'doms pa'i sgra'o// reg la yang rnam pa gsum ste/ dro 'jam gos kyi reg pa dang/ dga' 'jam dgyes pa yum gyi reg pa dang/ rgyan gyis sgeg pa yum gyi rin po che'i chas kyis brgyan pa'i reg pa'o/ / de lta bu 'dod pa'i yon tan thams cad ni/ tshogs kyi yo byad yin no// tshogs kyi yo byad mi 'dod pa'i yon tan rnam pa lnga'o// de dag tshang zhing tshogs na yang legs/ bar 'dir tshig chad song/ de ci'i phyir zhe na/ ma g.yos pa thams cad tshogs kyi dkyil 'khor chen po yin no// sangs rgyas nyid kyis mchod pa'i rgyan du byin gyis brlabs pa'o// de bas kyang thams cad du ting nge 'dzin la gnas shing gnyis su med pa las/ rtogs pa smra bsam yul las 'das/ bsgom pa dmigs su med pa'o// A+oM ma hA shUn+ya tA dz+nyA na badzra swa b+hA wa At+ma kou0f85haM/ dbyings gcig rang bzhin mi gnyis kyang// ma rigs rmongs la bstan pa'i phyir// khyab pa'i snying rje yongs kyis 'byung/ / de tshe rje ba med par bsgom// A+oM d+harma d+hA tu swa b+hA wa At+ma kou0f85haM// mtha' dbus med pa'i byang chub sems// chos rnams kun gyi rtsa ba yin// sems ni yi ge'i rang bzhin rgyu// yi ge mchog tu bsgom par bya'o/ / hUM badzra tsit+ta hUM/ e yaM maM laM baM bi shwa bi shud+he// mkha' dbyings nam mkha'i klong yangs su// 'byung ba rlung gi sgra bcas te// bdud rtsi'i chu bskyil mA ma ki/ gser gyis sa gzhi ri rab mdzes/ / khadog lngar bcas rin chen lngar// b+h+rUM las rin chen gzhal yas khang// tA la'i bskyed shing tsong tsong sbrel// yid bzhin rin chen gra na gsal// lda ldi 'ja' tshon sprin rum yang// mu tig chun po sna tshogs bres/ / nyi zla thabs dang shes rab kyis// 'khod cing gsal ba'i byin rlabs kyi// ma rig mun sel ye shes sgron// gser gyi dril bu g.yer kha las// theg pa'i bye brag sna tshogs sgrogs/ / phyi nang med pa'i bzhugs gnas der// yangs dog med pa'i dkyil 'khor bskyed// A+oM dz+nyA na tsakra maN+Dal hUM// dkyil 'khor bzhi bcu rtsa gnyis ni// ma bskyed rdzogs pa'i tshul gyis su// rang rgyud gzhan dang mthun par bskyed/ / sems dpa' sum cu rtsa gnyis kyang// ma bskyed rdzogs pa'i tshul gyis bskyed// badzra satwa hUM/ badzra rA dza dza/ badzra rA ga ho/ badzra sA d+hu d+hu/ badzra rat+na traM/ badzra sUr+Ya r+Ya/ badzra ke tu b+h+r-i/ badzra ha sa ha/ badzra d+harma hrIH/ badzra tsakra d+h+ri/ badzra tik+Sh+Na d+hIH/ badzra b+hA Sha b+hA/ badzra karmA kaM/ badzra rak+Sha raM/ badzra yak+Sha k+ShaM/ badzra san+d+hi ba/ hUM hUM hUM hUM/ trAM trAM trAM trAM/ hrI hrI hrI hrI/ a a a a/ sku bskyed gsal btab dbang bskur nas/ / spyan 'dren cho ga gzhung bzhin bya// mchod pa la sogs mchod byas nas// de nyid la ni gnas bsgyur te/ he ru dgu dang yum chen dgu/ gau ri brgyad dang phra men brgyad// spor ma brgyad dang sgo ma bzhi/ / dbang phyug nyi shu rtsa brgyad dang// mkha' 'gro sum cu rtsa gnyis dang// pho nya sum brgya drug cu dang// ma mo bdun dang sring mo bzhi// rdo rje'i ging chen bco brgyad rnams// ma bskyed rdzogs pa'i tshul gyis su/ / dpal 'bar khro bo'i rgyud bzhin bskyed// sku bskyed gsal btab dbang bskur nas// spyan drang mchod pa gzhung bzhin 'bul// de dag 'dir bshad mangs pa'i phyir// gzhan dang mthun par rgyal bas gsungs/ / tshogs rgyud chen po las/ dkyil 'khor bskyed pa'i le'u ste dang po'o//// de nas tshogs kyi mchod pa la yang/ don rnam pa gsum ste/ tshogs byin gyis brlab pa dang// tshogs drang ba dang/ tshogs kyi mchod pa 'bul ba'o// de la tshogs byin gyis brlab pa ni/ de bzhin gshegs pa thams cad la 'khor rnam pa gnyis te/ bsam pa mya ngan las 'das shing/ dgongs pa chos nyid dang ldan pa'i 'khor dang/ 'jig rten dbang du sdud pa'i 'khor ro// de la dgongs pa chos nyid dang ldan pa'i 'khor ni/ chos mnyam pa nyid la bzhugs nas/ thugs rje dbri bkol mi mdzad pa'i don gyis/ sems can thams cad kyi don la mgon dang/ skyabs dang dpung gnyen mdzad cing zhugs pas/ dmigs pa yod na bzhes su gnang ba/ byin gyis brlabs shing/ dngos grub stsol bar mdzad pas/ byin gyis brlab mi dgos so/ / 'jig rten dbang du bsdus pa'i 'khor ni/ chos mnyam pa la bzhugs nas/ thams cad la bya ra dang tshul rtog ste/ dam tshig bsrungs ma bsrung blta/ dam tshig srung ba la stongs grogs bying/ dam tshig mi bsrung zhing nyams pa la chad pas gcod/ mnar med par ltung bar byed/ rnal 'byor gyi mchod pa la phud nyams ma nyams dang/ gtsang sbra byed mi byed blta/ phud ma nyams shing gtsang sbra byed na/ ci 'dod pa'i dngos grub dang/ gang bcol ba'i las byed/ phud nyams la gtsang sbra ma byas na/ dngos grub kyi bar chad byed/ las bcol pa log par bsgrub/ rnal 'byor byin gyis brlabs ma brlabs dang/ dgongs pa dag ma dag blta/ byin gyis brlabs la dgongs pa dag na/ bsgo ba nyan pa dang/ lus dang grib ma bzhin 'khor ba dang/ 'khor dang rigs bsrung ba dang/ dbang dang mthu ster ba dang/ gtor ma spyi bo la mngon du khyer te/ bran snying nye ba bzhin las byed cing/ 'khu ldog med la/ rnal 'byor pa'i dgongs pa ma dag pas/ byin gyis ma brlabs na/ bar chod kyi gegs byed/ cho 'phrul ston/ mthu dbang 'phrog 'khu ldog cha/ mi bde ba'i don dang/ sdug bsngal dang/ srog gi bar chad dang/ 'khor dang sde la gnod pas/ byin gyis brlab dgos te/ dang po tshogs kyi zhal zas la phud ma nyams shing bsags te/ gtsang sbra dang ldan par bsags la/ dri chab la chos nyid rnam par dag pa'i sngags dang/ phyag rgyas byin gyis brlabs pas bsangs la/ de nas khro mo dbang phyug ma'i sngags kyis byin gyis brlabs pa ni/ chu gtsang ma'i nang du tsan+dan dmar po brdar te/ de la yi ge hUM dmar po gcig tu bsgom/ de nas ma hA kro d+hI shwa rI zhes brjod pas/ khro mo dbang phyug ma sku mdog dmar mo tshon gang ba zhig tu gyur pa'i thugs kar yi ge A+oM bkod la srin mtheb kyi bar du yig 'bru bzung ste/ A+oM ma hA kro d+hI shwa rI hUM hrIHThA/ A+oM sarba dra byaM sho d+ha ya hUM/ zhes brgya rtsa brgyad bzlas pas/ khro mo dbang phyug ma 'od du zhu nas/ tshogs kyi longs spyod thams cad mkha' dbyings rnam par dag par byin gyis brlabs te/ de nas tshogs kyi longs spyod la/ yi ge hUM mthing ga gcig bkod la/ de 'phro zhing 'dus pa las/ A+oM rat+na b+ha ga la khaM zhes brjod la/ lag pa thal mo sbyar te gtugs la/ tshogs kyi mchod pa thams cad rgya che ba nam mkha' dang mnyam pa/ lhun sdug pa ri rab dang mnyam pa/ grangs mang ba sa'i skye 'khrungs dang mnyam pa/ gting zabs pa rgya mtsho dang mnyam pa mtshungs par byin gyis brlasab so/ / de nas tshogs kyi zhal zas la/ hUM dang mUM las rdo rje sems dpa' yab yum du gyur/ yab yum gnyis su med pa'i mkha' las/ zhi khro'i dkyil 'khor bsam gyis mi khyab par 'phros pas/ 'jig rten gyi rnam rtog thams cad bsreg spyad du byas/ rgyal ba'i dkyil 'khor rab 'byams bsam gyis mi khyab pa la/ dgyes pa chen po'i mchod pa lha la lha thim pa'i tshul gyis phul/ mnyes pa chen pos chos nyid dag pa'i rgyud bskul nas/ rgyal ba'i byin rlabs dang/ dpal gyi pham phab kyis khams gsum gyi sems can dang/ phyogs bcu'i 'jig rten gyi khams na/ rdo rje slob dpon dang mched dang lcam dral/ gsang sngags yo ga rnam gsum gyi sgor zhugs shing/ rnal 'byor gyi bka' gzhung bzhin mdzad pa thams cad la/ 'dod pa'i longs spyod rnam lnga chos nyid kyi rgyan du mchod pa phul/ thams cad mnyes shing tshim pa dang// 'grangs shing ngoms par byas/ g.yar dam nyams pa sor chud nas/ lus ngag yid gsum gyi sgrib pa sbyangs/ ma mo dang mkha' 'gro thams cad la khyab pas/ dam rdzas gang la dad pas mchod/ rang rang gi dam tshig bsrung/ dpal gyi bka' dang dam las mi 'da' bar byas/ rnal 'byor gyi las dang gnyer gtad mthar phyin par dam tshig mnos te/ rnal 'byor gyi dgongs pa mthar phyin par byin gyis brlab bo/ / tshogs rgyud chen po las/ byin gyis brlab pa'i le'u ste gnyis pa'o//// de nas tshogs kyi mchod pa drang ba 'di skad do// rnga sgra cang te'u pi wang dang/ gling bu dang ni karko ta/ / g+haN+De cha lang sna tshogs dang// glu dang le'u dang tshig dang bcas/ snyan pa'i glu dbyangs sna tshogs kyi// snyan gyi mchod pa bzhes su gsol// rgyal ba'i thugs dam mnyes gyur cig/ gar dang phyag rgya stangs stabs dang/ / gzugs dang dbyibs dang rdzas dang brten// sdug dang mdzes dang yid 'ong zhing// kha dog gsal ba sna tshogs kyi// spyan gyi mchod pa bzhes su gsol// rgyal ba rgya mtsho'i thugs dam bskang/ / dri dang spos dang bdug pa dang// bsreg dang btsos dang sbyar ba dang// rlangs pa dud pa sna tshogs kyi// shangs kyi mchod pa bzhes su gsol// dkyil 'khor thugs dam bskang gyur cig/ bza' dang bca' dang btung ba dang/ / bshos dang zhal zas sna tshogs dang// kha dang mngar dang skyur ba dang// tsha dang rtsub dang lan tshwa'i ro// ljags kyi mchod pa bzhes su gsol// sras bcas 'khor gyi thugs dam bskang/ / lha dang mi yi na bza' dang// gos dang rgyan dang lhab lhub dang// rin chen dbu rgyan cod pan dang// dpung rgyan do shal se mo do// dar dpyangs pa ti sham bu dang// snyan cha mgur chu bla med 'di// sku yi mchod pa bzhes su gsol/ / dga' ldan lha yi longs spyod dang// 'byor ldan mi yi longs spyod dang// dgongs ldan 'phrul gyi longs spyod rnams// dkyil 'khor chen pos bzhes su gsol// 'phags pa'i thugs dam bskang gyur cig/ 'bru tshig don dang man ngag dang// gsal dang go 'byed snying po'i rgyu// dbang po tshims byed rgyal ba'i bka'// phyag rgya chen po'i gsung ldan pa'i// chos kyi mchod pa bzhes su gsol/ / ma lus thugs dam bskang gyur cig/ ces drang ngo// tshogs rgyu chen po las/ tshogs drang ba'i le'u ste gsum pa'o//// de nas tshogs kyi mchod pa yang rnam pa gsum ste/ phyi gzugs kyi mchod pa dang/ nang sgrol ba'i mchod pa dang/ gsang ba thabs dang shes rab byang chub sems kyis mchod pa'o// de la phyi gzugs kyi mchod pa la yang rnam pa bcu drug ste/ rnam par mi rtog pa don gyi mchod pa dang/ ting nge 'dzin gyi mchod pa dang/ gar gyi mchod pa dang/ phyag rgya'i mchod pa dang/ sems dpa' bcu drug gi mchod pa dang/ sems ma bcu drug gi mchod pa dang/ 'dod pa'i yon tan rnam pa lnga'i mchod pa dang/ kun tu bzang po'i mchod pa dang/ bde ba chen po'i mchod pa dang/ 'dus byas rdzas kyi mchod pa dang/ bla na med pa'i mchod pa dang/ rnam par grol ba'i mchod pa dang/ 'khor gsum yongs su dag pa'i mchod pa dang/ gnyis su med pa'i mchod pa dang/ mnyam par bzhag pa'i mchod pa dang/ lhun gyis grub pa'i mchod pa'o// de la rnam par mi rtog pa don gyis mchod pa 'di skad do// chos nyid stong pa'i rang bzhin la/ / rnam rtog mtshan mar mi gnas shing// dbu ma la yang mi gnas shing// mi rtog mi g.yo skyon bsal te// gzung 'dzin gnyis ka las 'das pa'i// mi rtog mchod pa bzhes su gsol/ A+oM d+harma d+hA tu pU dza swA hA zhes dgongs pa bzung ngo/ / de nas ting nge 'dzin gyi mchod pa 'di skad do// phyogs bcu stong gsum bsam mi khyab// rab 'byams dpag tu med pa na// phyi nang snod bcud ma lus kun// thabs dang shes rab rang bzhin las/ / phyag rgya chen po'i dkyil 'khor te// rtogs dang ldan pas gsal bsgoms nas// dbyer med ngo bo nyid mnyam phyir// dmigs pa'i ting 'dzin mchod par bzhes// A+oM sa mA d+hi tsa tu pU dza swA hA/ zhes dgongs pas brlab bo// de nas gar gyis mchod pa 'di skad do// A+oM gar gyi rgyu dang gar gyi khungs// gar gyi gar thabs drangs dang bcas// gar gyi gleng gzhi yon tan gyis// gar gyi mchod pa dbul bar bya/ / A+oM dang po dam tshig gar lags te// nam mkha' kun kyang gar gyis khengs// gar mkhan tshul du sangs rgyas shing// gsang chen bde ba'i mchog ston pa// ngo mtshar che la phyag 'tshal lo/ / g.yas kyi se gol ta la ho// g.yon gyi se gol bsham pa brgya// ta la k+Sham rgya rtse bsdams pa// 'das pa'i sangs rgyas kun 'dus na// phyi nang gzhan lta smos ci 'tshal// sprin phung bzhin du 'khor 'dus nas/ / gzugs dang sgra dang dri dang ro// lo tsA na la sogs pa lngas// dus gsum rgyal ba'i thugs dam bskangs gyur nas// rnal 'byor bcol ba'i phrin las grub par mdzod// A+oM ma hA shUn+ya ta yo ga bra ba ne/ ak+Sha mu sa swa pra ba sA+e/ su ka ra su ka tan zhes gar gyi mchod pa phul nas/ gar 'byung ba'i rgyu ni/ g.yon pas khu tshur bcang pa las 'byung ngo// gar gyi gar drang thabs ni/ sgrub thabs sku gsung thugs su 'dus so/ / gar gyi yon tan ni/ gar bsgyur nas phyag rgya bcang ba'i tshe// sku lha'i phyag rgyar gsal bar byas nas/ der yang grol bar 'gyur ro// de nas phyag rgya'i mchod pa 'di skad do// phyag rgya bzhugs tshul las/ sku yi phyag rgya 'da' ba med// mi 'gyur phyag rgya'i mchod pa las/ rgyal ba mnyes te dngos grub stsol// sems dpa'i skyil mo mnyam gzhag nas// g.yon pa'i lag brkyang rkang steng na/ / g.yas pa de steng mnyam gzhag pa// kun bzang nyid kyi phyag rgya yin// lag pa thal sbyar sor bsnol nas// gung mo rtse sprad mthe'u chung bsgreng// mthe bong gnyis kyang de bzhin bsgreng// rdo rje rigs kyi phyag rgya yin/ / sor mo bzhi po rgyab bsnol te// gcig la gcig 'khyud lu gu rgyud// mthe bong gnyis kyang mthil du sbyar// de bzhin rigs kyi phyag rgya yin// thal mo khong stong sbyar ba las// mthe bong glor bzhag mdzub sbyar can/ / gung mo sor drug 'od ltar bkram// rin chen rigs kyi phyag rgya yin// lag pa thal mo de nyid las// sor mo rtse sprad dgu byas nas// pad+ma kha 'bus tshul du byas// pad+ma rigs kyi phyag rgya yin/ / lag pa thal mo de nyid las// srin lag gnyis ni nang du bkug/ bzhi po rtse sprad phyogs bzhir bgrad// las kyi rigs kyi phyag rgya yin// phyag rgya de nyid bcangs pa las// bzhi po rtse sprad gyen bsgrengs nas/ / dam du brtsums te bsgrengs pa ni// rigs kyi yum lnga'i phyag rgya yin// thal mo gnyis ni mnyam sbyar nas// sor mo gzhan rnams rgyab tu bsnol// zur can myu gu'i yi tshul/ sa yi snying po'i phyag rgya yin/ / g.yas pa'i mthe bong mthe'u chung mnan// sor mo gsum phyar ral gri'i tshul// g.yon pa shubs ltar byas pa ni// nam mkha'i snying po'i phyag rgya yin// lag pa thal mo sbyar nas kyang// sor mo spel te yid tsam bsnol/ / pad+ma kha rgyas tshul du byas// spyan ras gzigs dbang phyag rgya yin// g.yas g.yon sor bsnol gung mo bsgrengs// mdzub mo rdo rje'i rwa ltar bkug/ mthe bong gnyis ni glor bzhag pa// phyag na rdo rje'i phyag rgya yin/ / g.yas pa skyabs kyi phyag rgya las// g.yon pa mthe bong mdzub mo sprad/ snye ma 'dzin pa ltar byas pa// sems dpa' kun bzang phyag rgya yin// g.yas pa lag mthil lte bar brkyang// g.yon pa brla la se gol tshul/ / po ti 'dzin pa ltar byas pa// sgrib pa rnam sel phyag rgya yin// lag pa g.yas pa mchog sbyin tshul// g.yon pa brkyangs te sa gnon gyis// klu shing 'dzin pa ltar byas pa// byams pa mchog gi phyag rgya yin/ / lag pa g.yas g.yon rting sbyar nas// sor mo phyir bkyed rtse mo dgug/ ut+pal tshul du byas pa ni// 'jam dpal gzhon nu'i phyag rgya yin// lag pa khu tshur dkur brten nas/ / 'gying ba'i tshul du gnas pa la// 'dzum zhing sgeg pas g.yas su 'dud// la se sgeg mo'i phyag rgya yin// lag pa g.yas g.yon mtheb mdzub sprad// g.yon pas phreng ba 'dzin pa la// g.yas pas smin mtshams 'dren pa ni/ / ma le phreng ba 'dren pa'i phyag rgya yin// g.yon pa rin chen pi wang la// sor mos de'u gnon pa las// g.yas pa rdeb pa ltar byas pa// dbyangs mkhan ma yi phyag rgya yin// g.yon pa'i thal mo bkan pa la/ / g.yas pa steng du lto bsnol te// 'khril ba'i tshul gyis phyag rgya ni// gar mkhan skyong ma'i phyag rgya yin// lag pa g.yon pa'i gru mo nas// g.yas pas 'degs pa ltar byas la// g.yon pa spos phor tshul du bya/ / d+hU pe tshim byed phyag rgya yin// lag pa g.yas g.yon thal mo sbyar// snyims pa yid tsam bkan pa las// 'thor ba'i thabs su spyod pa ni// puSh+pe me tog 'thor ba'i phyag rgya'o// lag pa g.yas g.yon snyims pa las/ / mthe chung gnyis ni dkyil nas bsgrengs// gshibs te gyen du bsgrengs pa ni// zhun mar A lo'i phyag rgya yin// lag pa g.yon pa skyaur ba las// g.yas pa'i mtheb srin phyag rgya yis/ / gtor thabs tshul du byas pa ni// gan d+he dri yi phyag rgya yin// lag pa khu tshur bcangs nas ni// nr-i mgo phyag rgya chen po las// btegs pa'i tshul du phyar ba ni// gshin rje gshed kyi phyag rgya yin// g.yon pas sdigs pa'i mdzub mo las/ / g.yas pa rdo rje be con gyis// brdeg pa'i thabs su 'debs pa ni// dpal ldan chen po'i phyag rgya yin// rta mgrin dpal ni rta yi rgya// yang na g.yon pa thod khrag las// g.yas pa sbrul zhag sdom pa ni/ / ha ya grI wa'i phyag rgya yin// lag pa g.yas g.yon bsnol ba las// rdo rje rgya gram tshul du bya// 'gying ba'i thabs su brjid pa ni// bdud rtsi 'khyil ba'i phyag rgya yin// mdzub mo lcags kyu ltar byas pa/ / mi pham ma yi phyag rgya yin// zhags pa bsdog pa ltar byas pa// khro gnyer ma yi phyag rgya yin// 'khyud pa lcags sgrog ltar byas pa// ro langs ma yi phyag rgya yin// dril bu 'khrol ba ltar byas pas/ / ral gri ma yi phyag rgya yin// pi wang rdebs pa ltar byas pas// lha yi thub pa'i phyag rgya yin// go cha bgo ba ltar byas pas/ lha min thub pa'i phyag rgya yin// gseg par 'dzin pa ltar byas pa// mi mgon thub pa'i phyag rgya yin/ / po ti chos 'chad phyag rgya ni// byol song thub pa'i phyag rgya yin// rin chen sgrom bu kha 'byed ni// yi dwags thub pa'i phyag rgya yin// me 'bar chu blug lag gnyis ni// dmyal ba'i thub pa'i phyag rgya yin/ / phyag rgya mchod pa sna tshogs kyis// dkyil 'khor thugs dam bskang gyur cig/ rgyal sras mchod pas mnyes gyur nas// mthar phyin dngos grub stsal du gsol// A+oM mu dra tse ri bU dza swA hA/ zhes ma nor bar 'bul/ de nas sems dpa' bcu drug gi mchod pa 'di skad do// rdo rje sems dpa' bde ba che// rdo rje rgyal po dga' ba che// rdo rje chags pa 'debs pa che// rdo rje legs pa bla na med/ / rdo rje rin chen dri ma med// rdo rje nyi ma gsal ba che// rdo rje rgyal mtshan dga' ba che// rdo rje bzhed pa thabs chen po// rdo rje chos mchog gsung ba che// rdo rje 'khor lo yid bzhin bskor// rdo rje rnon po thogs pa med/ / rdo rje smra ba gsung ba che// rdo rje las rab 'dul mkhas pa// rdo rje gnod sbyin gdung ba sems// rdo rje go cha dpa' bo ste// rdo rje khu tshur legs pa che// sems dpa' chen po mchod pa yi// phyag rgya chen pos mnyes gyur te/ / ma lus dgyes te thugs dam bskang// rtsa ba'i sngags brjod sems dpa' gzhan yang mchod do// de nas sems ma bcu drug gi mchod pa 'di skad do/ sems ma bcu drug gi sngags rnams dpyad dgod/ / A+oM su ra to badzra ma nod pa bAd+ha/ A+oM su ra to badzra ki li ki li hUM/ A+oM su ra to badzra smed ta hrIHA+oM su ra to badzra g+har b+he hUM/ bde ba za byed yab yum phyag rgyar gsal// bde ba rmongs byed gnyis su med par spyod/ / bde ba rgyas 'debs dkyil 'khor phrin las rdzogs// bde ba tshe 'phel skye shi med pa'i ngang// A+oM he ma hA su ra to b+ha ma sa ni tra thA/ tra thA/ ma hA su ta ha se ha hA/ A+oM ma hA su ta ta badzra gI ti te te/ A+oM ma hA su ra ta badzra nirti phe pa phe pa/ rdo rje sgeg mo byang chub sems kyi ngang// rin chen dpal phreng gzungs dang ting nge 'dzin// pad+ma dbyangs mkhan gsung rab rgya mtsho sgrogs// las kyi gar mkhan phrin las rgya mtshos sgrol/ / A+oM su ra to badzra ma du ga re gum gum/ A+oM su ra to badzra ma ke tang tang/ A+oM su ra to badzra sha ra ta a A/ A+oM su ra to badzra shri gan te ho ho/ rdo rje bdug pa ma ni byang chub sems nyid 'dod pa'i dang/ rdo rje me tog ma ni dkyil 'khor gsal bar 'thor// rdo rje mar me mas ni dkyil 'khor gsal bar mthong// rdo rje dri chab mas ni byang chub sems kyi thig le spro// A+oM su ra to badzra ma hA rU pe b+hi sha ru pe dza dza/ A+oM su ra to badzra shap+ta su ki hUM/ A+oM su ra to badzra gan+de ho ho/ A+oM su ra to badzra spar+she/ thugs rje'i lcags kyus thugs kyi rgyud bskul zhing// byams pa'i zhags pas gnas nas spyan drangs la// dga' ba'i pho nya lcags sgrog gnas spyod nas/ / bde gshegs rtogs bral mas ni dgyes pa bskyed// zhes ting nge 'dzin dang mthun par sbyar ro// de nas 'dod pa'i yon tan rnam pa lnga yis mchod pa 'di skad do// gzugs kyi lha mo'i mchod pa ni/ gzugs mdzes gsal ba'i me long bsnams// mdzes pa'i gzugs kyi mchod pa 'bul// spyan gyi mnyes pas dgyes gyur cig/ sgra yi lha mo'i mchod pa ni/ phyag gnyis dbyangs snyan pi wang bsnams/ / snyan pa'i rol mo'i mchod pa 'bul// snyan gyi mchod pas mnyes gyur cig/ dri yi lha mo'i mchod pa ni// phyag na tshims byed spos phor bsnams// dri mchog sna tshogs mchod pa 'bul// shangs kyi dgyes pas mnyes gyur cig/ ro yi lha mo'i mchod pa ni// ro mchog zhal zas sna tshogs bsnams// bdud rtsi ro mchog sna tshogs kyis// ljags la phog pas mnyes gyur cig/ reg gi lha mo'i mchod pa ni// na bza' pany+tsA li ka bsnams/ / dro 'jam tsha bsil reg bde ba'i// sku la gsol bas mnyes gyur cig/ zhes sngags dang phyag rgya dang ldan pas kyang mchod do// de nas kun tu bzang po'i mchod pa ni/ bde bar gshegs so bcom ldan 'das/ / rgyal ba rgya mtsho'i ye shes kyis// srid pa rgya mtsho mtha' yas kun// kun bzang mchod sprin mchog tu rol// A+oM shrI sa man+ta b+ha dra sarba ta thA ga tA b+h+yo bi shwa mu ke b+h+yaHsarba tat+khaM ung+ga te s+pha ra Na i maM ga ga na khaM swA hA/ zhes lta ba yangs par bya'o// de nas bde ba chen po'i mchod pa 'di skad do// bde ba chen po dag la gang gnas pa/ rtag pa chen po longs spyod rdzogs pa'i sku// khams gsum las 'das byang chub rol pa che/ / ston pas btsal kyang rnyed par ga la 'gyur// thig le chen po ye nas gnas pa la// ye shes snying po 'di las gzhan med do// 'khor ba mya ngan skye shi med pa'i dbyings// bde ba chen po'i ngang la rnam par rol/ / A+oM ci la bde bas ci la rol// bde mchog de dang mi mnyam bde// srid pa shin tu dag bya'i phyir// mi srid dbyings su mnyam sbyar nas// bcom ldan rdo rje sems dpa' dang/ / dkyil 'khor rgyal sras bcas pa la// dam tshig mchod pa 'di 'bul na// nam mkha'i rdo rje stsal du gsol// sarba ta thA ga tA ar+g+haM ma hA su kha pu dzi te ho// de nas 'dus byas kyi mchod pa 'di skad do/ / rin chen sna tshogs rgyan las grub pa yi// rgyal mtshan 'phan gdugs bla re lhab lhub dang// bdug spos dri zhim me tog sil ma bkram// bdud rtsi'i gri dang snang gsal sgron mar bcas// lha dang mi yi rol mo sna tshogs dang/ / glu gar te'u dang tshigs su bcad pas bstod// bza' btung bdud rtsi'i ro mchog rnam mang dang// rgyal srid rin chen sna bdun la sogs rdzas// mtshan mchog btsun mo yid du 'ong ba yang/ / gos dang rgyan dang rin chen rgyan gyis mdzes// thabs ldan rol pa'i tshul gyis bzhes su gsol// bsod nams tshogs kyi dngos grub stsal du gsol// de nas bla na med pa'i mchod pa 'bul ba ni// bla med mchog gi mchod pa dam pa sbyar ba 'di/ / ye shes lnga yi 'od zer rnam par 'phro// 'dod pa lnga yi longs spyod mkho dgur ldan// nam mkha'i mtha' klas gter chen 'byung gyur cig/ phung po bla med rgyal ba ye shes lnga/ / 'byung ba bla med gsang ba'i yum chen lnga// rnam shes yul dus sems dpa' sems ma la// mchod pa bla med dus dang rgyan du 'bul// dmyal tshogs me ltar 'bar ba zhi bar mdzod/ / de nas rnam par grol ba'i mchod pa 'di skad do// phung po khams dang skye mched dang// phyi nang snod bcud ma lus kun// sangs rgyas zhing yin rnam grol ba'i// 'dzin med chags dang bral ba yis/ / 'khor ba'i chos las kun sgrol ba// mya ngan 'das pa'i dkyil 'khor bkod// rtog bral bag chags med pa la// 'di zhes mtshon pa med pa yis// shes rab shin tu rnam par grol/ blo chen po dang ldan pa'i bdag/ byang chub nyid de rnam grol ba'i// thabs ldan grol ba'i mchod pa 'bul// gnyis med don gyi tshangs pa stsol/ de nas 'khor gsum yongs su dag pa'i mchod pa 'bul ba ni 'di skad do// ma chags pa yang chags pa med/ / chags pa la yang ma chags med// bdag med rtogs pa mya ngan 'das// 'dzin med dbyings la ye shes rol// rgyal srid dang ni rang gi lus// 'phags pa rnams la 'bul gyis bzhes/ / bu dang chung ma bu mo dang// nor dang dbyig dang sbas pa'i gter// bla ma rnams la 'bul lags kyis/ tshig chad// rta mchog rgyan gyis brgyan pa dang// dud 'gro glang chen ne sha dang// 'dab chags la sogs thams cad kyang/ / 'khor bcas rab 'byams bzhes su gsol// sdug bsngal la yang sdug bsngal med// 'khor ba la yang 'khor ba med// ma lus bzhes te dgyes mdzod la// 'khor ba'i khri mun stongs par mdzod/ de nas gnyis su med pa'i mchod pa 'bul ba 'di skad do// rang bzhin dkyil 'khor spyan drangs nas// gzugs brnyan dkyil 'khor gsal bris te// ting 'dzin dkyil 'khor gsal bsgoms nas/ / bde bar gshegs la mchod pa 'bul pa rnams// gnyis med dbyings kyi sbyor ba las// dam tshig thugs dam brtser dgongs te// gnyis su med par mchod pa 'bul// 'khor ba dang ni mya ngan 'das/ / gnyis su 'phags pa cang mi gsung// dbyer med rang bzhin gcig pa'i phyir// gnyis med mchod pa bzhes su gsol// nyon mongs la sogs dug lnga rnams// thabs mkhas rgyal ba'i dkyil 'khor de/ / thabs dang shes rab rol pa las// gnyis med mchod pa bzhes su gsol// mi mnyam 'khor ba'i sdug bsngal bsal du gsol// de nas mnyam par bzhag pa'i mchod pa 'bul ba 'di skad do// mnyam nyid mi g.yo mnyam nyid sangs rgyas pa'i/ / nga rtog mtshan ma'i spyod yul ngang gis med// gzung 'dzin mtshan ma kun las 'das pa yi// mnyam pa chen po'i mchod pa rnam par rol// log rtog sgyu mar rol pa'i sems can dang/ / ye shes sgyu mar snang ba'i sangs rgyas kyis// ye shes log rtog khyad par bsam yas kyang// sgyu ma yin pas rang bzhin yongs kyis mnyam// mnyam pa chen po'i mchod pa bzhes su gsol/ / rnam par rtog med dus gsum rgyal ba'i sku// lnga yi nyon mongs dug lnga rang thad kyang// don rtogs gsal ba'i skyes bur gnyis su med// mnyam pa chen po'i mchod pa bzhes su gsol// rig dang ma rig sgyu ma'i khyad par las/ / lhun gyis grub pa'i ngang la btsal med pas// gnyis med don gyi ngang du gcig pa'i phyir// mnyam par bzhag pa'i mchod pa bzhes su gsol// de nas lhun gyis grub pa'i mchod pa 'bul ba 'di skad do/ / phung po lha yi dkyil 'khor du// phyag rgya chen por lhun gyis grub// lha dang lha mo'i dkyil 'khor du// thams cad ma lus lhun gyis grub// bro gar 'du 'phro la sogs pa// 'dzul lam mkha' la 'gro ba sogs/ / gar yang thogs pa med pa yi// mkha' 'gro chen por lhun gyis grub// sgra ru grags pa ji snyed dang// tshig dang yi ge thams cad pa// gsung gi phyag rgyar lhun gyis grub// bza' btung longs spyod thams cad kun/ / sku dang bdud rtsir thams cad grub// chos nyid lhan ne lhang nger gsal// bde chen rgyal por lhun gyis grub// lhun grub mthar phyin mchod pa bzhes// grub pa'i 'bras bu rdzogs par mdzod/ / tshogs rgyud chen po las/ phyi gzugs kyi mchod pa'i le'u ste bzhi pa'o//// de nas bsgral ba'i mchod pa la yang rnam pa lnga ste/ dang po bsgral ba'i rgyu dang/ de'i dgongs pa dang/ de'i phrin las dang/ thugs dam bskul ba dang/ zhal du bstab pa'o// de la dang po bsgral ba'i rgyu la yang don rnam pa lnga ste/ gang bsgral ba dang/ gang gis bsgral ba dang/ don ched ci'i phyir bsgral ba dang/ ma bsgral ba'i skyon no/ de la gang bsgral na zhing bcur gyur pa 'di bsgral te/ dkon mchog gsum gyi sku dgrar gyur pa dang/ ngan pa'i ngang tshul can la sogs pa bcu po de bsgral lo// de gang gis bsgral na/ thabs la mkhas pa'i skyes bu chen pos lha'i dkyil 'khor dang gnyis su med pas bsgral lo/ / gang du bsgral na 'og min chos kyi dbyings kyi pho brang yum gyi mkha' klong du bsgral lo// dgos ched ci'i phyir bsgral na/ de mnar med par ltung nges pas/ de mtho ris su 'god pa'i phyir/ thugs rje chen pos bsgral lo// de ma bsgral ba'i skyon ni/ rdo rje theg pa'i bka' bcag cing/ rnal 'byor gyi chos spyod nub nas/ rgyal khams yongs su phung bar 'gyur ba'i skyon yod do/ / de bsgral ba'i dgos pa ni/ bdag nyid phyag rgya chen po'i dkyil 'khor du gsal bar byas la/ dkyil 'khor chen por drangs te/ 'khor ba zhe gcod pa'i rgya gad byas la/ dang po yi ge raM dang yaM dang khaM gyis bsreg sbyangs tshul bzhin byas la/ dang po mtshon cha rnam pa lnga'i char phab ste/ tsakra A+oM zhes brjod nas/ rdo rje'i 'khor lo spyi bo'i gtsug tu brgyab pa'i/ gti mug gnas su dag par bcom/ tsakra hUM zhes brjod nas/ rdo rje snying gar brgyab pas/ zhe sdang gnas su dag par bcom/ tsakra swA b+h+rUM zhes brjod nas/ rin po che lte bar brgyab pas nga rgyal gnas su dag par bcom/ tsakra AM zhes brjod nas/ pad+ma lce la brgyab pas 'dod chags gnas su dag par bcom/ tsakra hA zhes brjod nas/ ral gri rkang pa'i mthil du brgyab pas/ phrag dog gnas su dag par bcom/ rnam par shes pa'i sems yi ge hUM du bsgyur/ zla ba'i dkyil 'khor gyi steng du bzhag/ 'og tu yaM las rlung gi dkyil 'khor gyis btegs/ yab yum sbyor ba'i mtshams su 'phangs/ sgal tshigs gsang ba'i phyag rgya bzhi ldan bsgom byas nas/ / khyod ni rgyal ba'i sras su 'gyur// sems can khyod kyi gsang ba na// yi ge ti gcig gnas pa ni// dmyal ba'i btso bsreg gnas yin te// btso bsreg gnas su khyod mi gtang/ / ti yi steng du ha gcig bsgom// ti las hA ljang 'od ldan pas// cho ga rnam gsum 'phro 'du las// don yod grub pa rgyal ba'i sku// phyag rgya lnga dang ldan par bsgom// rgyal ba'i sras su skye bar 'gyur/ / bcom ldan 'das kyi zhal nas gsungs// 'dis kyang sbyor ba'i las mdzod cig/ gzhan yang phrin las rnam bzhi dang// brtul zhugs chen po mchog rnams kyis// spor dang spar ba'i las mdzod cig/ de nas thugs dam rgyud bskul ba 'di skad do// rdo rje khro rgyal dpal chen he ru ka/ dran rtog khro tshul zhe sdang mi mnga' yang// gtum khro gdug pa ma lus 'dul ba'i phyir// thugs rje chen pos sgrol ba'i phrin las mdzod/ / 'bar ba'i dkyil 'khor kun la mchod pa ni// sgeg mo rin chen phreng thogs dbyangs dang gar// spos kyi dri mchog me tog mar me dri// hUM mdzad hUM la hUM ste bzhes su gsol// bcom ldan dpal chen badzra he ru la/ / bsgral ba'i zhing bcu'i rnam shes mchod pa 'bul// rdo rje rigs kyi thugs dam bskang gyur nas// thugs kyi dngos grub stsal du gsol// bcom ldan dpal chen bud+d+ha he ru la// bsgral ba'i gzugs kyi phung po mchod pa 'bul/ / de bzhin rigs kyi thugs dam bskang gyur nas// sku yi dngos grub stsal du gsol// bcom ldan dpal chen rat+na he ru la// bsgral ba'i tshor ba'i phung po mchod pa 'bul/ / rin chen rigs kyi thugs dam bskang gyur nas// yon tan dngos grub dus 'dir stsal du gsol// bcom ldan dpal chen pad+ma he ru la// bsgral ba'i 'du shes phung po mchod pa 'bul/ / pad+ma rigs kyi thugs dam bskang gyur nas// gsung gi dngos grub stsal du gsol// bcom ldan dpal chen pad+ma he ru la// bsgral ba'i 'du byed phung po mchod pa 'bul// las kyi rigs kyi thugs dam bskang gyur nas/ / phrin las dngos grub dus 'dir stsal du gsol// yum chen kro d+hI shwa rI la// bsgral ba'i bkrag dang mdangs kyi mchod pa 'bul// rdo rje dbyings phyug thugs dam bskang gyur nas// mkha' la dbyings phyug dngos grub stsal du gsol/ / yum chen bud+d+ha kro d+hI shwa rI la// bsgral ba'i sha dang rus pa'i mchod pa 'bul// bud+d+ha yum chen thugs dam bskang gyur nas// yum chen kro d+hI'i dngos grub stsal du gsol/ / yum chen rat+na kro d+hI shwa rI la// bsgral ba'i khrag dang chu yi mchod pa 'bul// rat+na kro d+hI'i thugs dam bskang gyur nas// rin chen dbyings phyug dngos grub stsal du gsol// yum chen pad+ma kro d+hI shwa rI la/ / bsgral ba'i drod dang me yi mchod pa 'bul// pad+ma yum chen thugs dam bskang gyur nas// pad+ma dbyings phyug dngos grub stsal du gsol// yum chen karma kro d+hI shwa rI la// bsgral ba'i dbugs dang rlung gis mchod pa 'bul/ / karma kro d+hI'i thugs dam bskang gyur nas// las kyi dbyings phyug dngos grub stsal du gsol// kau ri la sogs khro mo brgyad rnams la// bsgral ba'i rnam shes brgyad kyi mchod pa 'bul// khro mo brgyad kyi thugs dam bskangs gyur nas/ / stong pa brgyad kyi dngos grub stsal du gsol// seng ha la sogs phra men brgyad rnams la// bsgral ba'i dur khrod brgyad kyi mchod pa 'bul// mgo brnyan brgyad kyi thugs dam bskang gyur nas/ / grub pa'i gnas brgyad dngos grub stsal du gsol// rta gdong la sogs sgo ma bzhi rnams la/ bsgral ba'i yan lag bzhi yi mchod pa 'bul// sgo ma bzhi yi thugs dam bskang gyur nas/ / phrin las bzhi yi dngos grub stsal du gsol// dbang phyug khrag 'thung nyi shu brgyad rnams la// bsgral ba'i bsgral ba'i sgal tshigs nyer brgyad mchod pa 'bul// dbang phyug nyi shu brgyad kyi thugs dam bskang/ / bcol ba'i 'bras bu mchis pa'i dngos grub stsal du gsol// ma bdun sring bzhi gsang ba'i yum chen la// bsgral ba'i glo snying pho mchin nang rol dang// mkhris pa mkhal ma la sogs 'bul/ / thugs dam gnyen bskang dngos grub stsal du gsol// pho nya sum brgya drug cu la// bsgral ba'i rus pa sum brgya drug cu rnams// pho nya'i tshogs rnams mchod 'bul thugs dam bskang// pho nya rkang mgyogs dngos grub stsal du gsol/ / rdo rje ging chen ka ta ra ging mchog bco brgyad la// bsgral ba'i rtsib ma bco brgyad mchod pa 'bul// ging chen thugs dam bskang ste dngos grub stsol// de nas zhal du bstabs pa 'di skad do/ / bstab po kha raM zhal phyes shing// 'bar ba chen po zhal phyes shig/ rnam rtog ma lus zhal du bstab// dbu dang phyag mang zhal phyes shig/ dgra bgegs ma lus zhal du bstab/ / zhing gsol chas brgyad zhal phyes shig/ bar du gcod pa zhal du bstab// sha za khrag 'thung zhal phyes shig/ bsgral ba'i zhing bzhi zhal du bstab// rngam byed ma lus zhal phyes shig/ bdud dang srin po bar gcod byed pa dang/ / rdo rje slob dpon sku dgra rnams// ma lus bzhes te rol par mdzod// 'byung po'i khrag ni chang bas zhim// 'dod chags mchod pa bla na med// 'dod chags mchod pa bzhes su gsol/ / gsung gi dngos grub stsal du gsol// 'byung po'i rus pa mar bas zhim// zhe sdang mchod pa bla na med// zhe sdang mchod pa 'di bzhes la// thugs kyi dngos grub stsal du gsol// 'byung po'i sha ni zan bas zhim/ / gti mug mchod pa bla na med// gti mug mchod pa 'di bzhes la// sku yi dngos grub stsal du gsol// ma hA rak+ta ma hA mAM sa ma hA kiM ni ri ti kha raM khA hi/ tshogs rgyud chen po rdzogs so// de nas gsang ba thabs dang shes rab byang chub sems kyi mchod pa la yang don rnam pa lnga ste/ / gzungs ma byin gyis brlab pa dang// gnyis su med par sbyor ba dang// gsang ba'i mkha' la sems can thams cad dbang bskur te gnas spar ba dang/ dkyil 'khor gyi lha la byang chub sems kyi mchod pa 'bul ba dang/ byang chub sems rdo rje'i lce yis dngos grub blang ba dang lnga'o// de la dang po gzungs ma byin gyis brlabs pa ni/ gzungs ma nyid yum shes rab kyi pha rol du phyin pa'i rang bzhin du/ dus gsum bde bar gshegs pa'i bzhugs gnas gzhal yas khang du byin gyis brlabs la/ gsang ba'i mkha' la dkyil 'khor gyi lha tshang bar gsal bar bsgom pa dang/ gnas lngar yi ge dpa' bo 'bru lnga las/ rigs lngar gyur pa dang/ gsang ba'i yum bzhi'i bskor bar byin gyis brlab pa'o// de nas gnyis su med par sbyor ba ni/ dang po spyan gyis brda zhig mdzad de/ 'di skad bskul lo// mtshan mchog brgyan pa'i yum mchog shes rab spyan/ shes rab don gyi brgyan pa'i thugs dam bskul/ mi dmigs snying rje thams cad yongs la snyoms/ thabs dang shes rab tshul khrims kyis/ sa ma ya s+t+wam zhes bskul ba dang/ yum gyis yab la 'di skad ces bskul lo// thabs la mkhas pa'i 'gro ba 'dren pa'i gtso// 'khor ba ma spangs gnas su dag pa la/ 'phags pa rnams la dgyes pa'i thugs dam bskul/ bde ba chen po'i mchod pa rgyan du gzhes/ sa ma ya hUM zhes bskul bas/ yab kyi phyag rgya chen po bzhis mnyam par sbyar/ hUM las gsang ba'i rdo rje rtse lnga par bsgom/ rdo rje'i rwa lnga la rigs lnga'i snying po 'god/ yum gyi mkha' pad+ma 'dab ma brgyad la yum gyi snying po 'god/ pra be sha phaT kyi sgo phyes/ su ra to s+t+waM gyis bskul bas/ de bzhin gshegs pa thams cad dgyes pa gcig tu bltas te/ mnyes pa chen po'i thugs dam bskang/ don dbyings dang ye shes/ rtags thabs dang shes rab gnyis su med par lhun gyis grub bo// de nas gsang ba'i mkha' la sems can thams cad gnas spar te dbang bskur ba ni/ nam mkhas gang nas gang du khyab par chos kyi dbyings kyis kyang gang nas gang du khyab par/ yum gyi mkha' klong rnam par dag pas khyab pas/ snod kyi 'jig rten thams cad yab yum gyi mkha' dbyings rnam par dag pa gzhal yas khang du gyur pa'i nang na/ / mtha' yas pa'i sems can thams cad kyi sems me mar rlung gis ma bskyod pa ltar gnas pa la/ kun gzhi a'i rang bzhin dang/ yid hUM gi rang bzhin du bsdu/ yum gyi mkha' la gnas pa de/ yab yum 'od bsnol mar gtibs pas/ a dang hUM dang byang chub sems gsum du 'dres pa las/ thams cad rdo rje sems dpa' kun tu bzang po'i sras su gyur te/ sems can thams cad rgyal ba'i sras su bzhengs/ dkyil 'khor gyi lha rnams kyis kyang/ rdo rje ming gi dbang bskur te/ sangs rgyas kyi gdung 'dzin cing byang chub sems kyi dbang byin te bzhag go/ de nas dkyil 'khor gyi lha rnams la byang chub sems kyi mchod pa 'bul ba ni/ me long yu ba can gyi nang du bzhag la/ srin mtheb kyis phyag rgyas gtso bo dang 'khor yan la mchod pa phul bas/ dgyes pa chen po'i bdud rtsis mnyes nas/ dngos grub stsol zhing byin gyis brlabs par mdzad pa'o// de nas byang chub kyi sems las rdo rje tshe'i dngos grub blang ba ni/ dkyil 'khor lha thams cad yab yum gnyis su med par sbyor ba mdzad pa'i byang chub kyi sems kun+da dkar tsa rar zag pas bdag gi byang chub kyi sems dang 'dres te/ lce la blang nas tsit+ta la thim pas ye shes sems dpa'i sku tshon gang bar gyur te/ skye shi med pa'i g.yung drung du gyur to// tshogs rgyud chen po las/ tshogs kyi mchod pa phul ba'i le'u ste lnga pa'o//// de nas tshogs kyi mchod pa'i grangs ni/ rab kyis nyin lan gsum mtshan lan gsum du dbul bar bya'o/ / 'bring gis dus bzhir dbul bar bya'o// thams mas kyang nyin lan re mtshan lan re dbul bar bya'o// de ci'i phyir zhe na spyad thang re zhig grol thang re dang/ smin pa'i mchog re re 'grub par gsungs so/ / de la tshogs kyi mchod pa'i 'bras bu ni/ rgyu mtshan nyid kyi theg pa ltar/ dka' ba da ltar spyad nas 'bras bu phyis 'ong du re ba ma yin te/ tshogs kyi 'bras bu ni yi ge 'khor lo tshogs chen gyi sa la sa bcu rim gyis bgrod mi dgos te/ da lta nyid nas rigs lnga'i sangs rgyas dang mnyam par sangs rgyas par 'gyur ro// de'i phyir sangs rgyas rnams kyis kyang 'di skad gsol to/ / tshogs kyi mchod pa'i 'bras bu ni// phung po mi gnas mya ngan 'das// rig 'dzin sa la bde bar gnas// phyogs bcu'i sangs rgyas kun mnyes te// byin gyi rlabs kyis dbang bskur nas/ / dngos grub dam par stsol bar mdzad// chos kyi sku dang gnyis su med// ces sangs rgyas rnams kyis gsungs so// de la tshogs kyi mchod pa 'dis// yun ci tsam gyis 'grub ce na// rab kyis zla ba gcig nas 'grub/ / 'bring gi lo gcig dag nas 'grub// tha ma lo gsum tshun chad du// tshogs kyi mchod pa 'bul byas na// rdo rje sems dpa' nyid du 'gyur// sangs rgyas byang chub thag mi ring// zhes gsungs so/ / tshogs phul ba'i yon tan ni/ 'jig rten gyi khams 'dir yang rgyal ba sras dang bcas pa'i zhal mthong bar 'gyur ba dang/ ma mo dang mkha' 'gro thams cad sprin phung bzhin du gtibs te/ ci bsgo ba'i bka' nyan cing/ dngos grub kyi stongs dang grogs byed pas mthu dbang phun sum tshogs pa sbyin te/ thams cad du bde skyid phun sum tshogs pa dang ldan pa dang/ longs spyod thams cad 'phel ba dang 'khor thams cad 'du zhing/ nad dang duHkha mi 'byung zhing 'jig rten gyi lha ma srin thams cad kyang mnyes shing byin che bar mthong ba dang/ de la gar gyi spyi gtsug ltar len pa dang/ sems can thams cad kyis kyang mig gi 'bru ltar mthong ngo/ / yid du 'ongs shing dga' bar 'gyur ba dang/ 'jig rten phyi mar rig 'dzin thams cad kyis mdun bsu ste/ lcang lo can gyi gnas su phyin par 'gyur ro// tshogs ma phul ba'i skyon ni/ bsgrubs kyang don med cing bde bar gshegs pa rnams kyang zhal 'dzum par mi mdzad cing/ bsod nams dang skal ba'i skal ba chung ste dmyal ba dang yid dwags dang byol song gi gnas su skye bar 'gyur ro/ / tshogs rgyud chen po las/ tshogs phul ba'i phan yon dang ma phul ba'i skyon bstan pa'i le'u ste drug pa'o//// rnal 'byor gyi tshogs rgyud chen po rdzogs so//

CLOSE WINDOW