/// rgya gar skad du// badzra satwA kA sha bi pu la guh+ya gar+b+ha pra kr-it+yar+tha tan+t+ra/ bod skad du/ rdo rje sems dpa' nam mkha' che gsang ba'i snying po rnal ma don gyi rgyud/ dpal rdo rje sems dpa' la phyag 'tshal lo// 'di skad bdag gis bshad pa'i dus gcig na/ bcom ldan 'das rang bzhin rdzogs pa chen po// ye shes lhun gyis grub pa/ rang byung rig pa'i rgyal po// 'od gsal thig le bde ba chen po de/ rig pa 'pho 'gyur med pa'i gzhal yas khang na/ dus gsum gyi sangs rgyas dang/ khams gsum gyi sems can dang/ lam la rjes su lta ba rnams 'byed pa mi mnga' bar thabs cig tu bzhugs so// de nas de bzhin gshegs pa rig pa'i rgyal po la// rig pa'i rdo rjes 'di skad ces zhus so// e ma'o dgongs pa rnams kyi gsang/ / stong nyid zhi ba thugs rje'i ngang// snying po'i snying po don gyi mchog/ rdzogs chen don 'di legs par gsungs// zhes gsol to// de nas de bzhin gshegs pa rig pa'i rgyal po des// btsal du med pa thig le chen po'i don 'di gsungs pa/ rang byung gsang ba thig le'i ngang// chos kun 'dus pa lus pa med// 'grod med rtsol bral lhun gyis grub// sbyangs thob ma yin rdzogs pa'i klong// rig pa'i rgyal po kun gsal ba/ / 'dod pa'i don kun rdzogs pa'i bdag/ ye shes rgya mtsho rnam grol lam// theg pa kun rdzogs mkha' ltar yangs// rang rig legs pa'i snying po nyid// kun gyi rang bzhin chos kyi dbyings// sgro 'dogs skur 'debs kun gyis stongs/ / gcig ste rnam pa yongs kyis med// theg pa gcig la kun rdzogs pas// ye shes dri med rnam par dag/ rang byung thig le nyi ma shar// khyab pa chen po chos kyi sku// stong pa chen po rig pa'i rgya/ / ye nas dag pas 'da' ba med// ye shes gsang ba byang chub sems// nam mkha' chen po gcig pu nyid// thig le chen po ye bstan pas// spro bsdu med pa'i dbyings la gnas// sgro skur dmigs pa'i yul med pas/ / rang rig gsal ba dbus mtha' med// kun gyi rang bzhin gsang ba'i phyir// rtog dpyod 'dzin pa'i yul gyis stongs// ma yengs rig pa mnyam gnas pa// ting 'dzin 'khor lo bstan mi dgos/ / rang byung dgongs par kun rdzogs pas// ma btsal lhun grub rang las byung// phyag rgya chen po bdag gnas phyir// ma bsgoms 'da' ba med pa'i ngang// dngos bral rig pa'i phyag rgya 'di/ / ye shes snying por 'od 'bar ba// kun gyi snying por bdag gnas pas// 'di nyid rang bzhin gting dpag dka'// thig gcig snying po rdzogs pa la// chos kun rdzogs te ngo bor gnas// don kun yongs rdzogs thig le la/ / rang bzhin gnas pas rim pa med// snying po rig pa don gyi rgyud// de rgyud theg pa'i yang snying 'di// ye shes phyag rgya rdzogs pa'i mchog/ mi 'da' de nyid kho na'i don// 'du shes sbyor ba ma lus zad/ / rgyu med sems la rkyen bral bas// skye 'jig 'gyur ba ga la yod// ye nas zin pas bya ba med// lhun gyis rdzogs pas bsam pa med// rang la rdzogs pas bsgrub tu med/ / dmigs med don la bsgom du med// dus gcig rdzogs pas bgrod du med// ye shes rig pa'i phyag rgya la// rnam grol 'bras bu kun rdzogs ldan// gsang ba rang byung rig pa'i sgra// brjod pa ma yin don gyis shes/ / 'di ltar gcig tu gnas pa la// tha dad mthong ba 'khrul pa'i lam// snying po sems nyid rdzogs pa la// dran dang dbang po yid byed med// lus dang ngag sems rtsal gnas med// ci bder gnas pa dgag bsgrub med/ / ces gsungs so// snying po rnal ma don gyi rgyud las gleng gzhi'i le'u ste dang po'o//// de nas yang bcom ldan 'das de bzhin gshegs pa rtsol med rig pa'i rgyal pos/ lhun gyis grub pa'i ting nge 'dzin la snyoms par zhugs nas 'di skad ces gsungs so/ / ma btsal lhun grub ma bcos chos kyi dbyings// ma rtsol ma byas ye nas ji bzhin nyid// rang byung gsang ba'i dbyings 'di brjod bral te/ / mtshon dang brtags shing dpyad pa'i yul las 'das// dus gsum rnam dag rig pa dbyer med pas// rig pa dbyer med gcig tu lhun gyis rdzogs// ma bsags ma sbyangs ye sangs rgyas pa'i klong/ mtha' bral rig pa'i klong la bsam zhing brjod du med// ye nas kun rdzogs bdag nyid lhun rdzogs pa// sa la mi bgrod lam la mi sbyang zhing// ma rtogs ting 'dzin sbyang ba sgyu ma'i nad// ma btsal rang bzhin bzhag pas grub pa yin/ / ma yengs klong du zhugs na bsgom pa yin// rig pa gcig la rdzogs pas 'dus pa yin// rang bzhin 'da' ba med pas dam tshig yin// ma rtsol lhun gyis grub pa 'bras bu yin/ / gnyis med ngang la gnyis bzung thig le bsgribs// thig le gcig la gnyis 'dzin rtog pas bcings// bden pa gcig la nor ba'i lung gis brtags// bsam med gcig la log rtog drang bas bsam/ / rang byung don la rgyu dang rkyen du tshogs// bltar med don la log mthong stobs kyis bltas// bgrod med lam la rnam rtog zhen pas bgrod// gzung med mnyam nyid phyin ci log tu bzung// ma dag dag par bltas pas dag pa rnyog mar langs/ / rnam rtog phyag rgyas bcings pas ye shes phyag rgya bshig/ ma brjod ye shes gsung mchog brjod pas nyams// mtshan ma'i dkyil 'khor bsgoms pas ye shes dkyil 'khor spangs/ / btang snyoms stong nyid bsgoms pas bde mchog phyag rgya dral// mtshan ma tshig la zhen pas mtha' yi lta bar lhung// gang yang mi 'byed bde mchog dbyings la rol// snying po'i snying po rig pa'i ye shes nyid/ / don gyi don te kun don sems la thug/ rgyud kyi rgyud de kun 'brel rang bzhin rdzogs// bya bral rdzogs lung bde mchog phyag rgyas gdab// ye nas mi 'da' lhun gyis grub par gsal/ / rang byung gcig la bltas dgur rang snang ba// rnam pa lhun grub rol pa ngo mtshar che// rang bzhin gcig la yon tan kun tshang bas// ma btsal bzhag pas yon tan rang bzhin rdzogs// ma bsags lhun grub rang byung 'bras bu la/ / rag las ma yin gdod nas lhun rdzogs yin// sbyangs thob ma yin dag pa brda' phrad yin// dmigs bral 'di nyid mkha' ltar khyab par gnas// bsam med brjod bral chos dbyings sgra/ / brjod pas rig pa'i ye shes rnyed mi 'gyur// ma btsal rang bzhag bde chen rgyas thebs na// thams cad ye shes bde mchog phyag rgyar gsal// stong min mi stong ma yin dbu ma min/ / gang yin de yin bdag gzhan gang yang min// bsam pa kun zad sbyor ba'i 'du shes med// stong zhingarang gsal rang rig bde mchog dbyings// rgya gsum dbyings la thebs pas 'da' mi srid// sku gsum dbyings la brda' phrad 'bral du med/ / ma rnyogs dngas mar gsal bas sgrib pa med// ma yengs rang bzhin gsal bas sangs rgyas yin// yengs med 'khor los sgrib pa rnam par gcod// rnyog dang ma rnyog rtog pas ma rnyog ste/ / ma rnyog rnyog dus bzhi yis mi phye la// dus tshod nges 'dzin bde mchog gdams ngag bzhin// rnyog dang ma rnyog gnyis ka bsal gyur na// dam pa'i dgongs pa lhun gyis grub nges pas/ / rnyog ma bsal zhing dngas ma blang du med// sdig gsum bde bar gcig pas 'khor ba'i 'jigs pa med// lhun grub nyams su myong bas 'bras bu re dogs med// rig pa'i cho 'phrul nyid la rtsol bsgrub bya mi dgos/ / zhes gsungs so// snying po don gyi rgyud las/ ma btsal lhun gyis grub pa'i lung phog pa'i le'u ste gnyis pa'o//// de nas yang bcom ldan 'das rig pa'i rgyal po des/ thams cad gtan la phebs pa'i ting nge 'dzin la gnas pa 'di skad gsungs so/ / 'dus pa chen po'i rnal 'byor pa// rang sems rdzogs pas rang bzhin gsal// sgra dang tshad ma gtan tshigs kyis// brjod bral gtan la phebs pa med/ / ma bcos rig pa'i gtan tshigs kyis// ma brjod don gyi ngo bo mtshon// chu yi rang bzhin gsher ba ltar// rig pa nyams su shes par bya// ji bzhin rtogs pa'i nyams med na// tshig gi brda' tshig gang brjod kyang/ / brda' sgo rtog pa'i rjes su 'brangs// bden bral rnam rtog lcags kyis bsdams// rang byung rig pa'i thig le yis// ma khyab pa yi chos med pas// spro bsdu bral lo dbyings la rdzogs/ / bde chen rig pa rdo rje'i lung// ma bcos rang gsal dbyings su rdzogs// de la der gzhag der bzhag na// 'bad pa med pa lhun gyis grub// ma btsal lhun gyis grub pa'i phyir// dper na nyi ma'i 'od dang mtshungs/ / ma bcos sems kyi rang bzhin dang// ci bzhin rig pa'i gtan tshigs kyis// de nyid ma yin gzhan min te// gnyis med rig pa dus gcig rdzogs// kun rdzogs bde chen yangs dog med/ / rang sems lhun grub snying po ni// nyams myong rig pa dpe bzhin ltar// 'od gsal 'du shes rnam bral bas// rang gsal rig pa dbyings la rdzogs// brgyud pa thabs kyi 'phrul tshig gis// rang byung 'od gsal bde chen la/ / gnyis med don las mi g.yo yang// ma btsal lhun gyis grub pa'i mtshon// thams cad rtogs pa'i thabs yin pas// gang ltar bde ba'i don la 'dzud// mthun 'jug spyod pa rgya mtsho ni/ / 'dul ba'i thabs la bstan pa yin// rim pa'am dus gcig khyad par ni// rtogs pa'i khyad par che chung gis// dngos po gcig la dbye ba yin// gnyis med don du gsal bar gcig/ 'dul thabs theg pa bsam yas pa/ / rang byung theg pa'i snying por gcig/ rang byung rig pa mthun pa med// bstan pa rgya mtsho thugs la rdzogs// dngos de thabs kyis ma mtshon na// rang byung gcig gis khyab gnas kyang// rgyal po'i phrug gu 'khyams pa ltar/ / rang gi mtshan nyid ma rtogs so// 'di ltar rang bzhin gcig pa la// bsam pa'i stobs kyis so sor phye// don dang 'brel pa'i pra khrid kyis// brjod bral sems kyi phyag rgya rtogs/ / nges pa'i don la de ma thag/ skal ldan 'bad pa med par grol// bde mchog don las ma 'das pas// ma btsal mthar phyin sems kyi lam// rim pa med par dus gcig 'jug/ rig pa sems kyi rtsal rdzogs pas/ / ma btsal lhun grub phyogs ris med// gang la phyogs ris rtsol med pas// rang byung phyogs med rang gsal la// rgyu med rkyen med byang chub sems// ma bsags lhun rdzogs dus gcig rdzogs/ / rang byung 'od kyis khyab par gdal// thugs rje'i byin rlabs 'gro 'ong med// theg gcig sems nyid rdzogs lung la// ma lus dri med rnam dag la// ma lus bya zin lhun gyis grub// ma bcos ma btsal lhun gyis grub/ / 'jug stong mi gnas bsam pas stongs// ma zhi rang bzhag grol ba'i lung// gang bslad rnam rtog rtsol bas bcings// rgyu ba rig pa'i sems dang bral// ma btsal ma bsgrubs thabs kyi gnas/ / yengs pa med do ci dgar zhog/ mi spro mi bsdu yan du khye// ma bsgoms yal bar bzhag pas rtogs// mi bsam mi spyod yul ma tshol// rgyu'o chags bral byang chub sems// ma bcos snying po don gyi rgyud/ / gsal dang mi gsal dam pa dang// tha mal 'du shes rnam par bcad// ces gsungs so// snying po don gyi rgyud las/ lung gsum ma bcos pa gtan la phab pa'i le'u ste gsum pa'o/ /// de nas bcom ldan 'das rang byung rig pa'i rgyal po des/ rnam dag gsal ba'i ting nge 'dzin la snyoms par zhugs nas 'di skad ces gsungs so// rang bzhin mi gnas byang chub sems// log rtog sum brgya drug cu yis/ / med las yod pa'i tshul 'gyur bas// zhen pa'i 'jig rten theg pa gnas// bskyed pa med pa'i byang chub sems// 'jig pa med pa nam mkha' 'dra// gang la'ang mi brten rtog dpyod 'das/ / ma bcos rdzogs pa'i theg par gsungs// gtan la phebs pa'i lung bcu yis// rang bzhin gcig tu gsal bar ston// lung gsum 'dus pa'i snying po 'di// rtsa gsum kun 'dus gsang ba'i gter/ / rang byung sems nyid klong gdal bas// rnam par dbye ba'i chos med pas// rol pa'i yon tan khyad par gyis// klong dgu sems nyid bstan par 'chad// lta ba rang byung rdzogs pa'i lung// ma lus kun 'dus rnam par dag/ thig le gcig tu kun rdzogs pas// rang byung snying po gcig la rol// gsang ba'i thig le kun gyi dbyings// mu mtha' med par rang bzhin gnas// thams cad gsang ba rang byung sems/ / rang rig ma rig rnam par dag/ rtog 'phyugs rig pa'i 'du shes spangs// rig pa ting 'dzin gter gyi lung// re dogs med pa'i dbyings la rol// rang rig yul dbyings la mi gos// kun bzang stong nyid ma bcos pas/ / kun bzang thabs kyi khyad par kun// ma 'dres gsal bar rdzogs pa'i phyir// mkha' la gza' skar bkram pa 'dra// thig le gcig tu kun rdzogs pas// bya btsal med pa'i gdeng chen bcu/ / rang bzhin bcu la rtsol med pas// 'khor lo bsgyur rgyal sa 'dzin ltar// yang rab rgyal sras skal ldan la// thabs kyis bstan pas go ba yin// ma bcos thabs kyi gdeng gsum gyis// ye shes gsal bar mtshams sbyar na/ / kun kyang de nyid gsum 'dus pas// 'dis kyang brda don 'grol ba yin// thams cad sems nyid lta 'phrang bcad// rol pa'i khyad par cir dbye ba// ma rtogs log pa'i grong khyer ba/ / rang byung rdzogs pa'i yon tan te// rtsol bsgrub med pa'i thabs chen gyis// yengs pa med pa'i dgongs pa gtugs// rig gsum mtshon pa'i tshul sbyor bas// ma bcos rdzogs pa'i rang bzhin nyid/ / ji srid rtog pa rgyu yi bar// de sr-id bsam gyis mi khyab pa// bsam pa'i dbang du bstan pa yin// de dag legs par shes bya ba// rtsol med rang bzhin lhun grub pa// kun rdzogs ye khyab rmad du grags/ / ma bcos ma sbyangs dus gcig rdzogs// rnam pa'i rtsol ba blo la gang snang ba// ma bcos lhun gyis grub pa'i rang bzhin yin// su zhig rig pa 'phrul gyi lde mig gis// rang byung thabs kyi dkyil 'khor sgo phye nas/ / ma btsal rang byung lhun grub bde mchog mthong// dus gsum 'du 'bral med pa rig pa'i gter// ma bcos lhun gyis grub pas btsal du med// dmigs pa'i 'du shes chad pas yengs su med/ / rang byung gcig la rnam pa bgrang du med// gnyis med thig ler gnas pas bgrod du med// 'gro don sems su gsal bas byas pa zin// ma lus lhun gyis rdzogs pas 'bras mi bsgrub// ma skyes rnam par dag pas sgrib mi sbyang/ / ma byas rang bzhin rdzogs pas phrin las bral// 'di nyid rtogs pas kun 'grub kun rdzogs pas// rdzogs chen thig le gcig tu gnas par bshad// ces gsungs so// snying po don gyi rgyud las/ byang chub sems rtogs par bya ba'i thabs dang rtogs pa'i tshul bstan pa'i le'u ste bzhi pa'o//// de nas yang bcom ldan 'das rang byung rig pa'i rgyal po des/ bde ba chen po'i ting nge 'dzin la snyoms par zhugs nas 'di skad ces gsungs so/ / bde ba chen po ngang gis gsal ba'i thugs// gnyis med ngang la ma lus kun rdzogs pas// snying po'i snying po rang bzhin stong pa'i lam// bde chen nam mkha'i mtha' mnyam pa yi ro/ / snying po mchog ste don la rdzogs par gnas// ma skyes 'od gsal bde ba nyid rtogs na// bde mchog nam mkha'i khams su mi shong ngo// yangs so che'o thig le gcig gi ngang/ / snying po gcig la rtogs tshul mtha' yas pas// 'bras bu khyad par grangs las 'das par gsungs// ma skyes snying po sgro skur med pa'i dbyings// sangs rgyas sems can ma skyes snying por mthong// snying po ma mthong rdzogs pa'i sems nyid mthong/ / mthar thug med cing dbyings la bri ba med// rang byung bde chen don 'di khyad par 'phags// sgra brjod tshig la dga' bas don mi rtog/ snying po'i snying po bsam brjod cir mi dmigs/ / ma bsams bsam pa gnyis med gcig gi mtha'// mtha' dang dbus la mi gnas mngon rtogs bral// mi rtog mi bsam de bzhin nyid la gnas// bde chen rang rig cir yang mi rtog pa/ / rtsol bral rig pa'i dbyings la gnas// bde mchog gsang ba'i thig le nyid// nam mkha' khyab pa'i tshul du gnas// ma skyes snying po byang chub sems// 'du 'bral med pa'i ngang la bzhugs/ / rang byung byang chub snying po la// ma btsal ma bsgrubs rang bzhin bzhag/ gang dag ye shes ngang yin yang// bsam pa'i ngo la phyin ci log/ smig rgyu la ni chu blo bzhag/ don la bzhag blang med na yang/ / brtags pa'i 'du shes bsam mi khyab// byang chub sems kyi rang bzhin ni// kun dang rig pa dus mnyam pas// gang dag rig pa med par gnas// 'di dag 'di ltar bde mchog yin// ma bcos snying po mchog gi don/ / ma btsal rang byung mchog gi shes// rang 'bar btsal med rig pa'i sems// gsal ba'i mar me'i 'du shes med// rgyu ba med pa'i tshul gyis dbye// phyag rgya chen pos kun thebs pas/ / mtshan ma'i rtog pa g.yo mi 'gyur// rang bzhin 'khor lor ye brten pas// rig pa'i dkyil 'khor bskyed du med// ye shes 'bar ba'i bzhugs gnas la// rang byung sgrib med gsal bas brgyan// dus gsum rgyal ba'i rang bzhin pas/ / gnyis med ngang la don kun rdzogs// rang byung rig pa'i rgyal po la// dran 'byung rig pa'i 'du shes med// sngags dang phyag rgya mchod pa dang// dka' spyad cher byas ma lus pa/ / btsal med log pa'i ri bo 'dis// bdag nyid 'ching 'gyur ci zhig bya// bya ba ma lus kun btang la// ma byas ma btsal cir mi 'dzin// 'du shes med par rang bzhin zhog/ rang byung bder bzhag grol bar 'gyur/ / stong nyid ma bcos gsang ba'i klong// ma btsal rang bzhin bzhag pas go/ goms pa rig pa'i don la 'jug/ bde med btang snyoms tha mal sems// 'dod chags bde mchog ro dang ldan// ye shes 'od gsal bde chen po/ / ma lus sems nyid dri ma med// rang bzhin dag pa'i sems nyid la// ma btsal de bzhin cha snyoms na// rang byung bde mchog rgya yis btab// don la mi g.yo rig pa gsal/ / theg chen sems nyid rdzogs pa la// sa bgrod lam la ltos mi 'cha'// rtsol du med de lhun gyis grub// bsgrub tu med do ye sangs rgyas// zhes gsungs so// snying po don gyi rgyud las/ rang byung rdzogs pa'i le'u ste lnga pa'o/ /// de nas yang de bzhin gshegs pa rang byung rig pa'i rgyal pos/ nyid kyi rang bzhin kun tu gsal bar mdzad de/ 'di skad ces gsungs so// dus gsum rgyal ba kun gyi yang mes pa/ / rig pa'i rgyal po rang byung byang chub sems// lhun rdzogs bde chen sems nyid rdzogs pa nyid// dus gsum rgyal ba nga nyid rdzogs sangs rgyas// ma bcos byang chub sems la nga zhugs pas// ma mthong mi thar 'khor ba'i 'dam du zin/ / ma btsal lhun gyis grub par rang bzhag pa// skal ldan rgyal sras mi yi thugs su 'gyur/ zhes gsungs so// de nas byang chub sems dpa' rig pa'i rdo rjes zhus pa// kye dus gsum rgyal ba'i rang bzhin sku gsung thugs/ / rang byung rig pa'i rgyal po ston pa khyod// nyid kyi thugs gcig rang byung ye shes nyid// dgongs pa'i don 'di nyid kyis ji ltar rtogs// zhes so/ / rig pa'i rgyal po chen pos lan slar gsungs pa// kun gyi rang bzhin bde mchog phyag rgya 'di// ma lus dgongs pa'i ngang la kun 'dus pas// bsam zhing dpyad pa'i 'du shes mi gnas te// rang byung 'od kyis kun la khyab par gsal/ / kun gyi rang bzhin snying po kun 'dus pa// gsang ba chen po ma bcos sgro skur zhi// rang bzhin ma yin tshad ma kun dang bral// bdag nyid ma yin lhun rdzogs kun gyi snying po 'di/ / gang yang ma yin med pa'i snying po yod// ma byas rang bzhin rdzogs pa'i yon tan gyis// thugs rje rtsol med nyi ma'i 'od ltar 'char// rang byung gcig la theg pa kun rdzogs pas// tshig gcig rtogs pas don kun rdzogs pa'i bdag/ ma sbyangs mi gnas bde mchog ji bzhin gnas// ma btsal rang bzhin bzhag na bsam pa zad// yengs med thabs kyis gnas na bcings pa grol// mtha' dbus phyi nang med pa chos kyi dbyings/ / rang bzhin dag pa'i don la bsgom du med// ma yengs yal bar bzhag pas rang bzhin goms// rol pa'i phyag rgya gcig pas dgag tu med// nyon mongs ye shes rang gsal spang bsgrub med/ / lam la mi bgrod sa la mi sbyang zhing// lhun grub ye shes ngang las 'da' mi srid// mkha' mnyam rgyal po kun gyi re ba bskang// ma lus thig le gcig pas dbyings la rdzogs// mi skye mi 'gag mi rtsol de bzhin nyid/ / theg mchog snying po 'di la kun rdzogs pas// byas pa med par rang bzhin lhun gyis rdzogs// rtog dpyod 'das pa kun gyi yul la rol// brda' dang tha snyad rjes 'brang rig pa yis// ma bcos snying po byang chub sems mi rtogs/ / gang la zhen cing brtag pa de btang la// gnyis med gnyis 'dzin rtog pas ma 'ching zhig/ ma bsams rang bzhin bzhag pas sgrib pa 'byang// mun pa ye nas dag pas bsal mi dgos/ / lhun gyis grub pas gzhan la gsol mi 'debs// rang la rdzogs pas mi bsnyeg mi bgrod de// ma byas rang bzhin gnas pas 'di nyid rdzogs// bya ba mi dgos mi btsal mi bsgrub cing/ / dge sdig mi 'byed ye nas gos pa med// ma chags thabs kyi spyod pa kun sbyar nas// nyes med rgyal ba'i zhing khams rmad du byung// rang byung gsal ba'i snying po thams cad rdzogs// gang yang ma bkag 'gro ba 'dul mdzad pa'i/ / gang ltar yin pa'i rang bzhin de ltar gnas// 'od gsal rang byung sems la gnyis med pas// dpyad dang bsgom rtsol ma lus 'khrul pa yin// ma btsal lhun gyis grub pa'i mdzad spyod do/ / rang byung rdzogs pa'i snying po 'di rig na// sgrib dang mi sgrib cis ni yongs ma gsungs/ snying po don gyi rgyud las/ bde mchog phyag rgyar spyad pa'i le'u ste drug pa'o/ /// de nas yang bcom ldan 'das rig pa'i rgyal po des/ ma byas rang bzhin rdzogs pa zhes bya ba 'di gsungs so// sems nyid rang byung legs par nyid dbang sgyur// rang byung klong gdal kun la dbang thob pas/ / legs pa'i rgyal po lhun rdzogs bde chen dbang// bskur thob rag ma las pa dbang gi klong// rang sems rdzogs pa yongs rdzogs gsal 'gyur bas// phyag rgya'i dkyil 'khor dbang la rag ma las/ / ma brjod snying po'i ngang la kun rdzogs pas// sngags tshig bde ba'i dbang la ltos pa med// mtshan ma kun bral rang sems rdzogs pa la// rdzas dang ting 'dzin don la rtsol ba med/ / rgyal thabs spyi blugs tshangs pa'i dbang chen gyis// ma bskur rang bzhin rdzogs pa 'di rtogs pas// dbang mchog lhun grub bde la gnas par 'gyur// rig pa'i rgyal po kun la dbang bsgyur bas/ / rnam rtog mtshan ma'i dbang la rten mi 'cha'// dbang gi dbang mchog zab mo rdzogs pa'i dbang// rtog pas ma bskur lhun rdzogs ye sangs rgyas// 'dus byas ma yin skyai 'jig med pa'i dbang/ rim bgrod ma yin dus gcig rdzogs pa'i dbang/ / rtog pas bsgrub mi dgos te rang bzhin rdzogs// ye thob rang bzhin thig ler rdzogs pa'i don// brjod bral mtshon pas dga' ba'i ye shes yin// 'jig med rang bzhin gsal ba'i ye shes te/ / dmigs bral mtshan ma med pa'i shes rab yin// ma lus lhun grub mi 'da' phyag rgyas gdab// ma lhun gyis rdzogs pa'i dbang bzhi pa// rig pa rtsal gyi dbang la bder nos shig/ rig pa rtsal gyis thob dang gdams ngag dus kyis thob// skal med brgyud pas thob pa'i thabs nyid kyis// ci rigs rang byung ngang la thabs kyis bzhag/ rin chen 'phrul gyi me long sems la dgram/ / rna brgyud gdams ngag legs par snying la sgoms// rgya rtags gdab la yun du legs par bcang// zhes gsungs so// snying po don gyi rgyud las/ rig pa rtsal gyi dbang gi le'u ste bdun pa'o/ /// de nas bcom ldan 'das rtsol bral rig pa'i rgyal po des/ thabs chen bsgrub pa'i le'u 'di gsungs so// ye shes klung du zhugs pa'i rnal 'byor pas// bka' rtags phyag rgya ldan pa'i skye bo la/ / rang byung rig pa bde mchog sems kyi dal// rin chen lde mig mtshon pas sgo dbye bstan// bsrung bral rig pa'i dam tshig rig pa gsum// legs par phog la mi 'da' nan tan bya// rang bzhin lhun rdzogs bde mchog dbang kun bskur/ / rtogs pas lhun grub rdzogs pas bsrungs pa yin// de nas lung gsum rig pa'i gter sgo dbye// rtsol dang mi rtsol drang lung nges lung gis// rnam rtog sems nyid lung de rtogs par 'gyur/ / rang byung gsal ba'i don las ma yengs shar// spyod lam gang yang bde mchog nyid du gsal// lam la ma bgrod sa la mi sbyang ste// snying por rang byung rdzogs pa lhun gyis gnas/ / chos kun snying po byang chub sems gcig la// rnam grangs tha snyad dbye ba mi gnas te// de dag legs par rtogs pa'i thabs nyid phyir// rna brgyud gdams ngag don gyis legs par dgrol// rtsa ba gcig tu dril la mnyam par brtags/ / rnam par phye bas don nyid rtogs par bya// legs par rtogs pa'i don la gcig tu gnas// zhes gsungs so// snying po don gyi rgyud las/ thabs chen bsgrub pa'i le'u ste brgyad pa'o/ /// de nas yang bcom ldan 'das rang byung rig pa'i rgyal pos chos thams cad gnyis su med pa las/ 'da' ba med pa 'di gsungs so// dus gsum rgyal ba thams cad kyi// rang bzhin rig pa'i dam tshig gsum/ / rang byung rdzogs pa'i rang bzhin la// ye nas rdzogs te ngo bor gnas// rang byung rdzogs pa'i dam med na// mtshan ma'i dam tshig gol ba'i lam// mi 'da' rdzogs pa'i dam tshig gsum/ / yengs pa med par ci dgar zhog/ dus gsum rgyal bas gsungs pa'i sgo// 'gro 'dul dam tshig mtha' yas pa// rtogs pa'i don la gcig las med// 'di yang ma bcos rang bzhin lung// rang bzhin gsum dang thig ler gcig/ rgyas ma thebs pa'i chos med pas// sus kyang 'da' bar yod pa min// ma nor snying po'i dam tshig la// ma yengs gsal bar dran pa yis// gsal ba mthar phyin sems dkyil 'khor/ / bde mchog mnyam pa'i sems kyis bstan// kun 'byung rig pa'i dkyil 'khor nyid// yongs rdzogs mi 'gyur dam pa'i don// mi 'da' legs par bstan par bya// dus gsum mi 'gyur sems kyis bzung/ / dam tshig rdo rje brda yi lung// gdams pa'i tshig gis gsal bar shes// lhun rdzogs bde mchog dam tshig la// 'dar med don rtogs rang bzhin bzhugs// don dang rang bzhin mtshon pa nyid/ / ma bcos pa dang goms pa dang// mtshon pa'i sgra yi dam tshig gis// rang gi don la 'da' mi srid// dam pa rnams kyi snying po nyid// dgongs pa rang byung rig pa rdzogs// chu dang rgya mtsho'i rang bzhin ltar/ / dbyer med ye 'byams rmad du grags// dus gcig snying po rdzogs pa'i lung// rang byung gcig pas khyad par med// lhag ma med pas yongs su rdzogs// ma btsal lhun rdzogs dam tshig yin// ye shes phyag rgya'i rgyasabatab pas/ / rim med rang byung ye sangs rgyas// zhes gsungs so// snying po don gyi rgyud las/ 'dar med rig pa mchog gi le'u ste dgu pa'o//// de nas yang bcom ldan 'das de bzhin gshegs pa rig pa'i rgyal po des/ sbyang zhing bgrod du med pa'i don 'di gsungs so// byang chub sems kyi rang bzhin la// rgyu rkyen 'jug pa'i rim med pas// log par rtog pas btags dbang gis/ / bgrang med don la grangs su bgrang// bgrod med gcig la rtsol bar bgrod// rim med don la rim par bltas// snying po gcig la mthong tshul gyis// bgrod pa'i lam tshul bsam mi khyab/ / snying po gcig la cir bgrod kyang// bgrod bral rdzogs pa'i don mi rnyed// kun rdzogs gdal ba chos kyi dbyings// mu mtha' med par dus gcig rdzogs// bgrod med rig pa lhun rdzogs pa// lam lnga sa bcu rtog pa'i grangs/ / ma btsal rang bzhin lhun grub pas// rtsol ba'i theg pa log pa'i chos// dus gcig rdzogs pa rim par med// rang gsal 'od la rtag tu bzhugs// ting 'dzin rnam par bsgom du med/ / 'bras bu'i bdag tu lhun grub pas// sangs rgyas sems can dbye bas stongs// kun kyang rang byung snying po'i lam// ma bgrod dus gcig rdzogs pa'i gnas// mkha' la bgrod med kun khyab ltar// theg chen sems nyid rdzogs pa'i lam/ / ma khyab ma lus chos med pas// ma bgrod 'bras bu rang bzhin rdzogs// lam med rim med sems kyi lam// 'du shes med pas gsal ba'i yid// bsam dpyad med pas klung du 'jug/ rnam pa rang bzhin mtshan nyid gsum// sku gsum dus gcig rdzogs pa'i phyir// tshogs bsag sgrib sbyang bsgrub tu med// ye nas rdzogs chen byang chub sems// lhun gyis grub pa'i rang bzhin la/ / bya bral rig pa'i sems nyid 'jug/ rab tu mi g.yo ba yi yid// dri med rnam dag sems kyi lam// bgrod du med do ye sangs rgyas// zhes gsungs so// snying po don gyi rgyud las/ brjod med bder bzhag gi le'u ste bcu pa'o/ /// de nas yang bcom ldan 'das rang byung rig pa'i rgyal po des/ lhun grub rdo rje rig pa gsang ba'i don 'di gsungs so// chos kun byang chub sems su gcig/ sems nyid 'od gsal mnyam pa nyid/ / lhun gyis grub pa'i zhing khams la// ma yengs da ltar bzhag pas chog/ rang byung rdzogs pa'i don sprad pa// rig pa'i don la de ma thag/ ma bcos rang bzhin bzhag pas gnas/ / rang bzhag rig pa yengs med klung// goms pa dran pa nyid kyis gsal// rang rig mnyam pa'i snying po la// bcos pa med kyis ci dgar zhog/ rnyog bral dngas ma gsal ba'i blo// rgyu bas shes shing gsal bas mngon/ / dbyings su thim zhing 'od du 'bar// dngas snyigs ye shes snying po 'dres// thig le rang bzhin med par thim// rig pa ye shes gsal ba'i sems// ma btsal lhun gyis grub par gnas/ / sems kyis bsgrib par mi bya zhing// lus dang ngag kyang yal bar bzhag/ btang ngo bzhag go byang chub sems// dmigs dang bral bar rang bzhin gnas// dus gsum 'gyur ba med pa'i blo/ / rig pa gdeng gsum rnam par dag/ rdzogs pa'i ye shes klong du 'jug/ ji bzhin ma bcos gsang ba'i sems// 'du 'bral med pa dbyings la gsal// dran 'byung rig pa dbyings la rdzogs// zhen med snang ba rang gi sems/ / ci dgar bzhag pas g.yo ba med// rang rig ye shes bsam mi khyab// 'du shes med pa'i dbyings la 'jug/ blang dor med par kun rdzogs pa// mtshan 'dzin che chung yongs kyi med/ / dus gsum gcig tu bzhag pa'i blos// ma btsal sems kyi rang bzhin gnas// bde mchog mnyam pa'i sems kyis bltas// zhes gsungs so// snying po don gyi rgyud las/ rig pa bder bzhag gi le'u ste bcu gcig pa'o/ /// de nas rang byung rig pa'i rgyal po des theg pa'i rgyal po gdams pa 'di gsungs so// e ma'o sangs rgyas thams cad kyi// sku gsung thugs kyi snying po 'di// dad dang dam tshig mi ldan zhing/ / shes rab snying rje byang chub sems// dam pa'i yo byad lngas dbul zhing// thos pa chung zhing dregs pa dang// gus chung ser sna che ba dang// phyogs dang dam med yal ba dang// 'dod dang le lo phyogs 'dzin can/ / 'jig rten grags pa gtsor bzhag nas// yun gyi don srid spang ba dang// grags shing 'jig par byed pa la// rna brgyud gdams ngag ma thob par// gsang ba log par 'chad pa yi// ye shes rig pa'i gdeng med pa/ / 'jig rten log pa'i gang zag la// khe dang grags pa gtsor bzhag nas// nyams pa'i sems kyis 'phel 'gyur na// mthong yun 'di la brlag pa dang// de ma thag par lhung gyur nas/ / thar pa'i rigs dang bral ba yin// dad dang dam tshig ldan pa kun// skyon med yon tan ldan pa dang// theg chen don la goms pa dang// lus dang srog la mi blta zhing// chos dang bla ma bkur ba dang/ / rdo rje bla ma mnyes gyur na// rin chen bdun gyis bsten pa dang// rdzas la chags chung phongs pa med// theg pa chen po'i rigs su nges// 'di la gsang sgo dbye bar bya// 'phral du rin chen mi gtong zhing/ / dam pa bkur ba'i sems med na// dam pa rnams kyi dgra yin pas// 'di la gsang ba'i don gtad na// nyams pa rdo rje bla ma nyid// rdo rje dmyal ba kho nar 'gro// rjes su mthun pa'i dam bca' zung/ / zhes gsungs so// snying po don gyi rgyud las/ theg pa chen po'i rigs brtags pa'i le'u ste bcu gnyis pa'o//// rdo rje sems dpa' nam mkha' che snying po rnal ma don gyi rgyud rdzogs so/ /// rgya gar skad du/ bo d+hi tsit+ta b+hA ba na tan+t+ra/ bod skad du/ byang chub kyi sems sgom pa'i rgyud/ bcom ldan 'das dpal kun tu bzang po la phyag 'tshal lo// 'di skad bshad pa'i dus gcig na/

CLOSE WINDOW