rgya gar skad du/ ma hA san+ti dr-iSh+ti dz+nyA na nim+na pUr+NU tan+t+ra nA ma/ bod skad du/ rdzogs pa chen po lta ba ye shes gting rdzogs kyi rgyud ces bya ba/ bcom ldan 'das dpal kun rig chos kyi rje la phyag 'tshal lo/ / 'di skad go zhing rtogs pa'i dus gcig na/ bcom ldan 'das dpal kun rig rgyal po de/ rang byung sems la ngo bo nyid kyi sku// de nyid chos sku ston pa kun tu bzang// 'on min bde chen gnas mchog chos kyi dbyings/ / phyi nang med par mdzes shing 'od gsal ba'i// yid bzhin rgyan kyis sbras shing blta na sdug/ yangs dog med pa'i gzhal yas khang na bzhugs// gsung ba mi mnga' chos nyid rang bzhin ni/ / rang gi sems nyid brjod du med pa'i don// ye nas ma bcos rang gi ngo bo nyid// skye med thugs la rang bzhin don gyis gsang// ma rig ye shes gdod nas med pa'i dus// snga phyi'i sems la 'pho 'gyur med pa'i tshe/ / ngo mtshar rmad byung chos nyid rgyal po de// ma btsal sems las byung bas ngo bo nyid kyi sku// der 'dus nyid las mi gzhan rigs lnga'i 'khor// rig pas 'dus pa sa bcu'i sems dpa'i 'khor/ / sprul pa chos skyong mkha' 'gro dang nyan 'khor// ting nge 'dzin la 'dus nas yid kyis 'khor// de'i tshe 'khor rnams zhi gnas gyi bsam gtan la zhen pa'i rtog pa gsal bar gzigs nas/ 'di skad ces rdo rje sems dpas gsol to/ / bsgom med gnas lugs don ni gang la bya// snod bcud skal ldan gang gis gzung bar bgyi// ston pa kun rig rgyal pos bshad du gsol// de skad gsol ba'i tshig gsan thugs kyis ni/ / 'dus pa'i tshogs la kun rig ston pas bka' stsal pa// bsgom med lta ba'i gnas lugs ngas bshad du// sangs rgyas kun kyang sngangs shing skrag pa'i phyir// gnod sbyin srin po yi dwags grul bum tshogs/ / 'jig rten lha mi rnams kyang sngangs 'gyur bas// rgyud 'di la ni 'gal sems sdig can rnams// dmyal bar nges 'gro gtan du snying re rje// dper na rgya mtsho ma lus kun brgal yang/ / yid bzhin nor bu rnyed par dka' ba bzhin// snod ldan slob ma dad ldan shin tu dkon// de phyir shin tu gsang ba'i gter du bzhag/ rdzogs pa chen po lta ba ye shes gting rdzogs kyi rgyud las/ don gyi gsang bar gsungs pa'i gleng gzhi'i le'u ste dang po'o/ /// de skad ces bka' stsal pas 'khor gyis don go nas/ gdung ba bton nas yid kyis don gsol pa// ma rig las kyi sdug bsngal 'khyams pa'i sems/ / rnam rtog dra ba gang gis gcod pa'i thabs// thugs rje chen pos mi 'dzin yi re chad// sgrib pa'i mun pas 'thibs pa snying re rje// 'gro drug sdug bsngal mi grol yi re mug/ rang sems sa 'khor dag la sa mkhan mdzod/ / sems can las la thugs rje yi chad kyang// snying rjes 'gro don thugs dam mi mdzad dam// sems can lha mi rnams ni shes pa rtsing// dbang po yul la yengs pa'i sems 'dzin gyis/ / 'tsho ba dkon zhing tshe thung nad mang bas// thar lam mi thob skye shi 'chi la rtag/ de phyir lus ngag 'dus byas chos spyod kyang// long med mtha' ring bsgrub par dka' ba'i phyir// snying po man ngag rtogs par bya ba'i phyir/ / bsgom du med pa'i chos nyid thugs rjes gsungs/ rdzogs pa chen po lta ba ye shes gting rdzogs kyi rgyud las/ gdung ba bton pa'i le'u ste gnyis pa'o//// de nas 'dus pa'i tshogs kyi nang nas rdo rje sems dpa' la thugs kyis gzigs nas nges par bka' stsal pa/ / bsgom du med la mi 'bral gdams ngag rgyun// rdo rje sems dpas thugs nas brgyud pa yis// nga yis byin gyis brlabs pa'i mkhas pa la/ / rang sems rtogs 'dod slob ma las can gyis// dad pas shin tu rang nyid dul byas pas// lus dang longs spyod srog la mi blta bar// sring mo bu mo la sogs rab brgyan te// rta dang glang po nor gyi dbyig rnams kyang/ / ser sna med pas bla ma dag la dbul// de yang 'dus pa'i sems dpa' rdo rje nyon// chos phyir brtson 'grus che la dam tshig ldan// blo brtan shes rab zab cing don gsang thub/ / tshul shis ngang bzang rnams kyi don gyi gter// de dag yon tan brgya ldan slob ma la// rab tu gsang ste don nyid ston pa yi// bla ma mkhas pa mtha' bcu rdzogs pa la// mnyen zhing dal la thugs rje rab ldan zhing/ / srid par chos rnams zhus kyang zad med pa'i// dam pa'i mdzod kyi gter ldan ston la mkhas// dper na seng ges 'jigs pa rtsad gcod bzhin// blo dngos gcig par ston la gus pas zhus/ / de nas 'dus pa'i sems dpa' rdo rje nyon// yang dag don gyi lta ba gsang ba 'di// gang zag phyin ci log dang blta dman pa// thos pa chung la blo rtul shes rab med// nor phangs kha ral la sogs snod med la/ / 'di bstan gnyis ka bsreg phyir rab tu gsang// de skad gsungs ma thag tu yid dga' nas// 'khor rnams snod kyi don dang ldan par ni// khas blangs rang dam bcas nas yid bsdus te// mgrin gcig lhags nas 'khod gyur to/ / rdzogs pa chen po lta ba ye shes gting rdzogs kyi rgyud las/ snod bcud bstan pa'i le'u ste gsum pa'o//// de nas bcom ldan kun rig rgyal po yis// ched du brjod pa'i don 'di bka' stsal to/ / 'gro drug sems can med pa'i gong rol du// sangs rgyas med pas ye shes ming yang med// kun bzang nyid kyang glo bur sangs rgyas te// ma bcos gdod nas mi rtog blos bsgoms pas/ / sangs rgyas nyid kyang gdeng med gol ba'i lam// 'og ma'i phra mo'i rnal 'byor smos ci dgos// de skad gsungs pa'i don gsungs ma thag tu/ 'khor rnams sems 'drog ste yid ma rangs te sems kyi don la the tshom du gyur nas/ ting nge 'dzin la yid byung bar gyur to// rdzogs pa chen po lta ba ye shes gting rdzogs kyi rgyud las/ ched du brjod pa'i le'u ste bzhi pa'o//// de nas sems dpa' rdo rjes 'khor rnams kyi bsam pa thugs su chud nas sems rtog bsal ba'i phyir don 'di zhus so/ / don gyi sangs rgyas ye shes gang las byung// don las 'pho 'gyur med pa'i blta ba gang// snang la 'pho 'gyur sna tshogs ci las byung/ / ma bsgoms skye bor mi gol thabs ci lags// blo dngos gcig pur rtogs pa'i tshad ni gang// de skad yid kyis gsol ba'i don gsan nas// ston pa kun rig rgyal po chos rje yis/ / thugs kyi dkyil 'khor rin chen sgo phye nas// sangs rgyas dpal gyi mgur nas bka' stsal pa// 'khor 'das gzhi ni ngo bo nyid kyi sku// don gyi sangs rgyas rang sems don rtogs na// kun tu bzang po rang byung bcom ldan 'das/ / ye shes rab tu che mchog chos kyi sku// mi skye mi 'gag nam mkha'i ngang bzhin no// 'khrul rtog nyid kyang ye shes bde ba'i klong// dper na khyung chen gshog rdzogs mkha' la lding ba ni/ / chu klung ri rab gyen thur nyam mi nga// bar snang nam mkha'i khams kun lam du bde// gang du dmigs pa'i sa phyogs phyin par byed// de bzhin ye nas sems sbyangs rnal 'byor thugs// sangs rgyas snying por rtogs pa'i skal ldan rnams/ / chos sku mngon du grub pa'i gdams ngag can// sems rtog ye shes yon tan de las byung// rdzogs pa chen po'i lta ba ye shes gting rdzogs kyi rgyud las/ sangs rgyas kyi ye shes 'byung bar bstan pa'i le'u ste lnga pa'o/ /// de nas ston pa kun rig rgyal po des de skad ces gsang ba'i don gsungs pa dang 'khor rnams kyi rtog pa sangs nas gus pa'i bsam pa mthun par gyur cing yid dga' nas/ bcom ldan 'das kun rig rgyal po la bstod pa// ded dpon sangs rgyas kun bzang chos kyi sku// 'khor ba dong sprugs ye shes klong ston pa// rang rig rgyal po byang chub ye shes sku/ / 'khor ba'i ming med sangs rgyas lam ston pa// gzugs med chos kyi sku la yid kyis bstod// de skad bstod pa'i don gsan yid kyis ni// kun rig rgyal po ston pa chos rje yis// 'dus pa'i 'khor gyi tshogs la bka' stsal pa/ / de nyid gdeng du go gyur rnal 'byor pas// mi bsgom ched du mi blta rang yin te// sngon gyi sangs rgyas bcom ldan 'das rnams kyis// ma bsgoms dbang po rang yan btang las byung/ / skye bo mu stegs phyi nang 'brel chod phyir// gol sa dag tu mi 'gyur don nyid yin// de ltar shin tu rtogs pa'i rnal 'byor pas// skye ba 'di las mi len sangs rgyas nyid// don la the tshom mi za sangs rgyas chos nyid de/ / rang byung rgyal po byang chub sems nyid kyang// ma btsal rang la yod pas bsgrub mi dgos// rdzogs pa chen po lta ba ye shes gting rdzogs kyi rgyud las/ 'khor rnams kyi rtog pa'i gdung ba bsal ba'i le'u ste drug pa'o/ /// de nas 'dus pa'i 'khor la phan gdags pa'i phyir kun rig rgyal pos bka' stsal pa// sangs rgyas rgyal po chos kyi sku mchog kyang// 'khor 'das reg pa med par sems la rdzogs/ / don la 'gyur ba med pas blta ba'i lam// yul la mi ltos rang sems chos kyi sku// nam mkha' bzhin du ye shes mtha' mnyam pas// gzhi la 'gyur med rang rig byang chub sems/ / skyon gyis ma gos sems kyi dran pa la// 'pho 'gyur med pas chos nyid brdal ba'i sku// mi skye mi 'gag lta ba rang byung la// bsgoms pas mi rnyed rang sems 'gyur med don// ma bsgoms 'bral med da lta nga yi sems/ / bskal par 'khyams kyang sems la skye shi med// shi med nor mchog rig pa lta ba'i mchog/ don la ma bsgoms ye shes mthar phyin lam// sangs rgyas re ba med pas ltung mi srid// gdod mas 'gyur med byang chub chen po yin/ / rdzogs pa chen po lta ba ye shes gting rdzogs kyi rgyud las/ don la 'pho 'gyur med par bstan pa'i le'u ste bdun pa'o//// de nas kun rig chos rjes don gsungs pa/ / dad pas 'dus pa'i 'khor rnams yid kyis nyon// 'khor 'das rang bzhin gcig tu ma nges pas// dbang po yul rnams ji ltar bltas par bden// don la mi bden gzung 'dzin mthu brtas pas// ji ltar goms pa brtas pas der snang phyir/ / dngos po blos brtags pas na yod min te// yod na sems can kun la mthun snang rigs// gdod nas rang 'khrul bsgribs pa'i lus nyid kyis// 'gro drug mthong rtog so so sna tshogs pa/ / de phyir sems can rang sems so sor snang// ngo bo nyid kyi sku la 'gyur ba med pa'i phyir// blo yis brtags pas gcig yul gcig min pas// rang sems ma 'khrul snang ba the tshom med/ / des na gzhan yul rnams ni gdod nas med// 'khrul pa'i rtog sems 'gro ba so so'i sems// gcig na dge sdig rnam smin 'bras bu yang// sems can ma spyad kun gyis myong bar rigs// las kyi rnam smin thun mong mi 'gyur phyir/ / bag chags brtas pa'i 'khrul pa'i sdug bsngal yin/ rdzogs pa chen po lta ba ye shes gting rdzogs kyi rgyud las/ snang ba 'pho 'gyur sna tshogs don las mi 'gal bar bstan pa'i le'u ste brgyad pa'o/ /// de nas kun rig ston pa snang mdzad kyis// 'dus pa'i dad ldan 'khor la bka' stsal pa// ma bsgoms dbang po rang yan bzhag gyur kyang// phyi rol yul gyi tha snyad grags pa la/ / 'khrul pa yin par shes phyir zhen pa med// chos brgyad rang sar grol bas mnyam pa'i phyir// skye bo nyid kyang ma spangs chos kyi sku// dper na a shu ka nyid bdud rtsir shes pa ltar// de bzhin skye bo rang sems 'di nyid ni/ / bla ma'i don bstan tha mal byang chub sems// bdag nyid snying po ye shes don nyid yin// de yang 'dus pa'i sems dpa' rdo rje nyid// nyid kyi don ma rtogs pas so so'i skye bo ste/ / de nyid lung dang man ngag don rtogs kyis// rang sems rtogs pas skye bo med pa'i phyir// ma bsgoms gol sa med par mkhas pas gsungs// ngo bo nyid la rtag chad med pa'i phyir// sems der rang gsal don zin mi brjod pas/ / phyal pa lung ma bstan du gol sa med// dper na gser 'gyur rtsis gang thebs pa rnams// thams cad gser las gzhan du mi 'gyur bzhin// de bzhin mu stegs skye bo'i sems nyid kyang/ / man ngag gser rtsis thebs pa'i sems// mu stegs rnams kyang ye shes bde ba'i ngang// yul la mi zhen phyin na bsgom du med// rdzogs sangs rgyas zhes bya ba'i don nyid kyis// sna tshogs zhen las grol phyir bsgom mi dgos/ rdzogs pa chen po'i lta ba ye shes gting rdzogs kyi rgyud las/ ma bsgoms kyang skye bo dang mu stegs kyi gol sa med par bstan pa'i le'u ste dgu pa'o//// de nas 'dus pa'i snying po 'khor rnams la kun rig ston pa chos rjes bka' stsal pa/ / sems can ma 'khrul sangs rgyas med pa'i gong// ngo bo nyid kyi sku la rang byung sems// de nyid ye nas gnas lugs yin pa'i phyir// de rtogs chos sku mya ngan 'das pa'i chos/ / kun tu bzang po rang byung ye shes thugs// rang sems rang gis rig pas chos kyi rje// rang sems rang 'khrul 'gro drug sems can te// kun gzhi'i gzhi cha chos sku ye shes la/ / gsum ldan 'khor ba'i sgrib pa'i lus nyid yin// dus tshod bla ma'i gdams ngag don bstan pa// gzhi cha chos sku rang byung de nyid dang// dang po'i sems nyid ngo bo nyid kyi sku// snga phyis ma bslad chos skur gcig pa'i phyir/ / blo dngos gcig pa'i don la bsgom mi dgos// de yang 'dus pa'i 'khor rnams yid kyis nyon// sangs rgyas ye shes thugs dang sems can sems// 'brel med so sor snang ba ma yin te/ / btsal med rang sems chos skur gcig pa'i phyir// blo dngos gcig par sems nyid yid ches yin// 'khor ba'i lus 'di sdug bsngal sgrib g.yogs dang// sangs rgyas sku dang ye shes bde ba de// 'khor 'das gnyis ka rtsa ba gcig pa'i phyir/ / lhun gyis grub pa dag tu blo dngos gcig/ 'khor ba'i mngal nyid rnal 'byor thugs nyid kyang// ngo bo nyid las ma 'das don yin phyir// tha mal 'di nyid yin rtogs chos sku la/ / blang dor med pas blo dngos ngo bo gcig/ dper na chu nyid chang du rkyen gyis 'gyur// de bzhin bar do'i rang sems 'di nyid la// bla ma'i rkyen gyis rtogs pas bsgom mi dgos/ / mi bsgom phyir na gol med blo dngos gcig/ de yang 'dus pa'i 'khor rnams yid kyis nyon// ye shes rtogs nas mnyam pa'i don nyid la// rgyun du ma brjed rig pa gsal theb na// bag chags nyon mongs rtog pa'i skyon gyis kyang/ / de la rdul tsam mi bsgrib ye shes gsal// dper na skyes bu sngags kyi gdeng ldan pas// dug ma bsal bas dug nyid sman du 'gyur ba bzhin// snga phyir ma song chos sku ye shes ni/ / snga phyir ma spangs glo bur rang stong phyir// blo dngos dbyer med rtogs pa'i tshad yin no// rdzogs pa chen po lta ba ye shes gting rdzogs kyi rgyud las/ blo dngos gcig par bstan pa'i le'u ste bcu pa'o/ /// de nas sems dpa' rdo rje snying po yis// dad pas 'dus pa'i 'khor la phan gdags phyir// bden pa'i don gyis 'di skad yid kyis gsol// rang sems snying po don rtogs lta ba la// ma bsgoms 'bral med don ni ji ltar 'grub/ / ye shes don ni mtshon du ji ltar med// spyod pa 'ching grol med pa'i don ni gang// sa la sbyang du med pa'i don ni ci// rtogs nas dam tshig bsrung nyams ji ltar med/ / bsgoms na gol sa'i skyon ni ji ltar lags// la bzla'i don gyi ye shes gang la bgyi// de skad gsol ba'i yid kyi don gsan nas// kun rig ston pa chos rjes bka' stsal pa// rang sems snying po'i don rtogs chos sku las/ / bsgom bya'i ye shes chos sku gud na med// snga phyi sems kyi ye shes mtha' bral ba// ma nor sgom pa po yang ga la yod// de la sgom mkhan sems la dngos med na// mi gnas mi rtog 'jog pa rnal 'byor min/ / sems dpa' rdo rje snying po da nyon cig/ a ti rdzogs chen chos sku bden gnyis bral// ngo bo nyid kyi rang shar ye shes ni// yod med dbus kyi ye shes mtha' gsum bral// yul la spang sdud gnyis po gdod nas med/ / dper na nam mkha' rang du shes pa bzhin// ji bzhin ma nor rang sems rtogs pa yis// lus ngag ma skyes rtog pa'i gzhi med pas// skyil krung drang 'dug smra bcad kha na med/ / de bzhin sems dang rtag chad spros bral bas// rtog spang mi rtog sgom pa'i khar mi 'ong// ye shes lta ba'i shugs las byung bas na// rnal 'byor dmigs pa'i shes pas mi bsgom ste// rtogs pas rang sems ma skyes ye shes phyir/ / rnal 'byor ched du bsgom pa bstan mi dgos// sems dpa' 'dus pa'i snying po da nyon cig/ yul gyi snang ba spyod yul ma grub phyir// nam mkha' lta bur ye shes rang gsal bas/ / rang sems chos sku ngang gis de rtogs pas// rnal 'byor ci yang yid la mi bsgom na// yang dag lta ba'i don dang mthun par 'grub// sems dpa' rdo rje snying po da nyon cig/ rdzogs chen gol sa gcad phyir bsgom med de/ / ye shes bsgom med dag tu rab rtogs na// bsgoms kyang skyon med chos dbyings nam mkha' 'dra// bsgom med de ni kun gyi re ba skongs// kun la khyab cing ma rdzogs med mod kyi/ / kun kyis gdams ngag ma 'phrod rtogs par dka'/ rdzogs pa chen po lta ba ye shes gting rdzogs kyi rgyud las/ ma bsgoms 'bral ba med pa'i le'u ste bcu gcig pa'o//// de nas kun rig rgyal po chos rjes bka' stsal pa/ / 'dus pa'i tshogs rnams yid kyis da nyon cig/ rang sems ngo bo nyid kyi chos sku ni// dbang po mngon sum mi gnas kun la khyab// chos sku tshig tu 'di zhes bstan par ni// rdo rje sems dpas kyang ni mtshon du med/ / de yang rdo rje sems dpa' yid kyis nyon// 'khor 'das tshig las 'das pa'i ye shes te// dbyibs dang kha dog dbang po'i spyod yul du// sangs rgyas nyid kyis bstan cing mtshon du med/ / mtshon cing bstan par dka' ba'i rang sems de// yod med kun las 'das pas byang chub sems// dngos med yid la dran pa'i ye shes ni// kun bzang nyid kyis ma gzigs blta ba'i mchog/ gzung 'dzin mthu brtas rnam smin lus 'di la// dbang po'i yul rnams ming du rjod byed de// don la phan pa rdul tsam mtshon mi nus// dper na bum pa nang gi nam mkha' la// dngos med brjod med nam mkha' chen po min/ / de bzhin tshe gcig mi rtog don bsgoms kyang// ye shes rang shar chen po'i blta ba min// bum chag nam mkha' chen por thim pa bzhin// lus bral rang sems ngo bo nyid kyi sku// de nyid rig pas gsal btab bde ba'i klong/ / de tsam nyid na kun tu bzang pos kyang// ngo bo nyid kyi sku la mtshon du med/ rdzogs pa chen po lta ba ye shes gting rdzogs kyi rgyud las/ ye shes kyi don la mtshon du med par bstan pa'i le'u ste bcu gnyis pa'o/ /// de nas dad pas 'dus pa'i 'khor rnams la// kun rig ston pa chos rjes bka' stsal pa// sangs rgyas rnams kyi dgongs pa ji lta bu// rang gi mtshan nyid ma bcos de bzhin nyid/ / chos sku skye med rtogs nas 'gro don du// ji ltar snang ba'i gzugs can sprul pa'i sku// mdzad pa bcu gnyis 'gro don mthar phyin pa// thugs rje sprul pas 'gro ba kun 'dul yang/ / ye shes blo ldan rlom sems rdul tsam med// bdag dang gzhan du rtog pa med pa'i phyir// ye nas gnyis med gcig ni chos kyi sku// mthun 'jug 'tshams pa'i spyod pa rgya mtsho ni// thugs rje chen pos 'gro don rdzogs par mdzad/ / rang byung ye shes dbyings las ma g.yos kyang// 'gro ba'i dpal mgon kun tu bzang po ni// bdag dang gzhan don blang dor med pa'i phyir// spyod pa rgya mtsho sna tshogs ci bder spyod/ / pad+ma skye ba'i rgyu ni 'dam yin te// pad+ma la ni 'dam gyis gos pa med// chos nyid blang dor med par rtogs gyur na// ye shes rtog med nyams pa rdul tsam med// thun mtshams mi bsgom rgyun gyi rnal 'byor la/ / 'ching grol spyod pa med phyir gol ba med// rdzogs pa chen po lta ba ye shes gting rdzogs kyi rgyud las/ spyod pa 'ching grol med par bstan pa'i le'u ste bcu gsum pa'o//// de nas kun rig ston pa chos rjes bka' stsal pa/ / 'dus pa'i 'khor rnams yid kyis da nyon cig/ sa med chos sku rdzogs chen ye shes la// gang yang mi 'gro sa mchog spyi bcings pa// bgrod med sems nyid ye shes mchog gi lam/ / ye shes chos sku mthar phyin chos nyid sa// sems dpa' rdo rje snying po da nyon cig/ sa ni dang po 'khor bar mi ldog par// snying po byang chub mchog ni yin zhes na// bza' zhing bgrod pa'i yul ni ga la yod/ / byar med rdzogs pa'i ngang du rab rtogs na// lam la bza' zhing sa sbyang yul las 'das// bgrod med snying po lam gyi don ston pa// gzhan nas btsal bas rnyed par mi 'gyur te// ye shes chen po'i kun tu khyab gnas pas/ / rang byung ye nas rang rig 'od gsal bas// sa lam btsal du med pa snying po'i don// rnam par snang mdzad che mchog kun tu bzang// de yang sems dpa' rdo rje snying po nyon/ / dper na rgyal po gzhan du mi 'gro bzhin// rang sems yul la mi bskyod don la gnas// de tsam nyid na chos sku bde ba'i klong// lam la ma bgrod chos nyid ye shes sku// sa dang lam la bgrod na byang chub gegs/ / rdzogs pa chen po lta ba ye shes gting rdzogs kyi rgyud las/ sa la sbyang du med pa'i le'u ste bcu bzhi pa'o//// de nas dad pas 'dus pa'i 'khor rnams la// kun rig ston pa chos rjes bka' stsal pa/ / dam tshig bsrung nyams med pa'i ye shes ni// 'og ma bzhin du dam du ma bcas pas// nyams pa med phyir ye bsrungs chen po yin// gdeng ldan blta ba'i dam tshig rgyun du dran// ched du ma yin ngang gis don gsal bas/ / ye bsrungs chen po'i dam tshig lta ba yin// ye nas 'dus pa'i 'khor rnams yid kyis nyon// theg pa'i khyad par ji snyed grags pa dang// tshul khrims sdom dang phyi nang dam tshig kyang/ / 'gro ba gdul bya ji ltar 'dod la bstan// tha snyad tsam du gdul bya zhes brjod kyang// dam du bca' bar bya ba rdul tsam med// dam bca' med pa'i don gyi ngang rtogs na// dam du bcas kyang skyon med nam mkha' 'dra/ / 'dus pa'i snying po rdo rje sems dpa' nyon// chos sku mi g.yo thugs kyi dam tshig ste// blang dor med par spyod pa dam tshig chen po yin// rang sems mi spang ye shes chen por gnas/ / dus gsum don dam ma bral nyams pa med// rdzogs pa chen po lta ba ye shes gting rdzogs kyi rgyud las/ dam tshig bsrung nyams med par bstan pa'i le'u ste bco lnga pa'o//// de nas 'dus pa'i 'khor la bka' stsal pa/ / bsgoms na gol sar gyur pa 'khrul pa'i phyir// rang gi sems nyid ma rtogs rtsol ba ste// phyi yi yul gyi rtsol bas sems bsdus nas// 'og ma'i lta ba 'dod lugs rnam bzhi la/ / gnyis med snang stong khas mi len pa rnams// so sor rtog pa'i rig pas gzhal byas nas// gsal ba stong pa'i mnyam gzhag don bsgoms pas// drug la sgom pa'i gang zag la// bying rgod mtha' dag shes bzhin bya ra byed/ / de nyid blta ba ma shes gti mug ste// gsal la mi rtog bsgom dang 'dod chags bsgom pa rnams// bde la mi rtog zhen pa'i nga rgyal can// 'khor ba med dang ltung du dogs pa'i zhe sdang gis/ / mi dmigs don la gza' gtad byas nas bsgom// rtsol bas bsgoms kyang yul la 'gyur med phyir// mi rtog 'dod phyir mngon par don dang bral// rtog pa bzang ngan ci skyes sems nyid du// dgag rgyu med pa tsam du blos bzung nas/ / gsal bde mi dmigs ched du bsgoms pas nor// yul la gtan tshigs gzhig pas smos ci dgos// de yang 'dus pa'i snying po yid kyis nyon// grib ma gzugs su bsgyur ba ji bzhin du/ / lha dang rtsa ba'i thig le thabs bsgoms rnams// mtshan ma yul la dmigs phyir sgom pa pos// de nyid sems su blos byas phyir na gol// rkyen ma thub phyir gnas lugs chos sku min// de phyir bsgoms na 'khor ba'i nad chen yin/ rdzogs pa chen po lta ba ye shes gting rdzogs kyi rgyud las/ bsgoms na gol sar bstan pa'i le'u ste bcu drug pa'o//// de nas yang kun rig ston pa kun bzang gis/ / 'dus pa'i 'khor la bka' stsal pa// dga' dang gus pa'i sems kyis rtse gcig nyon// la bzla' ba yi ye shes don chen ni// kun gzhi gzhi cha mkha' la nyi shar bzhin// thams cad kun 'dus ye shes rang snang gsal/ / ye nas btsal med 'bras bu mngon sangs rgyas// rgyal ba kun gyi yang mes chen po ste// gol med gdod nas dag pa chos kyi sku// rang byung 'gag pa med pas ye shes klong// lam lnga ma bgrod ye shes sa yi mchog/ cir yang dmigs su med pas rang sems ye shes sku// gzhan la smon du med pas rang la rdzogs// chos sku 'di zhes gzhan nas mi rnyed pas// rtogs par 'dod na rang gi sems la tshol/ / sems la don rnyed rtogs pa'i rnal 'byor pa// 'khrul pa med phyir sems can 'khor ba med// rang sems rtogs pa'i don las ma gtogs pa// bde zhing skyid pa'i sangs rgyas logs na med/ / de phyir rgyu la mi rtog 'bras bu med// med la rtsol ba rgya mtsho'i chu bor nas// smig rgyu ri dwags chur mthong bsnyeg pa bzhin// bsgom med don nyid bor nas sus bsgom pa// byang chub med par rang gi sdug bsngal bsnon/ / de yang sems dpa' rdo rje yid kyis nyon// ye shes de nyid rtogs pa'i rnal 'byor pa// ye shes bcud nyid chos kyi gter du smin// nam mkha'i go yangs 'byung ba'i lam du bde// rtogs pa'i go yangs sangs rgyas lam du bde/ / sems nyid go yangs bsgom med lam du bde// dus gsum 'gyur med rang rig lta ba'i dbyings// 'dod dgu rang la yon tan tshang ba'i phyir// rgyu 'bras rang la rag ma lus pas zab/ / dper na ma dros mtsho dkyil me 'bar ba// nam mkha'i dkyil nas babs pa'i chu yis ni// bskal par de la gnod pa mi nus bzhin// rang sems chos nyid rang byung ye shes la// 'khor bar 'khyams kyang sgrib pas gos pa med/ / rin chen me 'od nam mkha' 'thon pa'i tshe// rgya mtsho nyid kyang bdud rtsir gyur pa bzhin// rang gis byang chub sems nyid rtogs tsam na// dug lnga nyid kyang ye shes chen por 'char/ rdzogs pa'i chen po lta ba ye shes gting rdzogs kyi rgyud las/ ye shes kyi don la bzla' ba'i le'u ste bcu bdun pa'o//// de nas gsang ba'i bdag po rdo rje sems dpa' yis// 'dus pa'i tshogs la nges don phan gdags phyir/ / ston pa kun rig sems kyi rgyal po la// bden pa'i yid kyis 'di skad gsol// dug lnga ma spangs rang grol ji ltar byung// che ba'i yon tan mi 'byung gang gis bsgribs/ / tshogs ma bsags pa'i gzugs sku gang las 'byung// gong 'og the tshom gegs ni gang ltar gcad// the tshom chod pa'i nyams myong rtags ni gang// mnyam pa'i rgyal pos thugs kyis bstan du gsol/ / de skad gsol ba'i don gsan thugs kyis bka' stsal pa// dug lnga ma spangs rang grol ye shes ni// rin chen 'od kyis mun pa med pa ltar// 'khor ba thog ma rtsad chod don gyi phyir// ngo bo nyid kyi sku ni rang rtogs pas/ / gdod nas ma rig dag pas gti mug bral// de yang 'dus pa'i rdo rje sems dpa' nyon// ma rig med phyir zhe sdang yul mi dmigs// de phyir rang sems snying po chos sku la// snga phyi zhen pa'i dbang gis zhe sdang na/ / kha dog yul la mnar sems byed pa'i phyir// ba mo la ni nyi ma shar ba bzhin// phyi 'brel bcad pa'i man ngag dran par bya// de yang dad ldan 'khor rnams yid kyis nyon/ / 'dod chags skye ba'i yul ni sgo lnga 'byung ba'i sems// phyi rol zang zing nor la brkam chags nas// bung bas me tog gzhibs nas mi zhen ltar// chags pa nyid nas zhen med rang gi sems// sems la byed pa med phyir sems nyid don du shes/ / sems can pho mo las kyi chags pa yang// rang sems chos nyid rtogs pa'i rnal 'byor pas// mi sdug gnyen po bsgom pa mi dgos par// yul la pho mo yod phyir chags pa spyod gyur kyang/ / sems la pho mo med pas nyes pa med// de nyid dus nas rig pas gsal thebs pas// dus gsum pho mor sbyar kyang nyams pa med// de yang 'dus pa'i dad ldan yid kyis nyon// nga rgyal chen po rang sems rtogs par 'char/ / de phyir khams kyi rab tu byed pa yin// gnyen po mi dgos rang grol byang chub sems// dper na sgyu ma mkhan gyi sprul pa yang// sems can yin zhes mkhas pas sgro mi 'dogs/ / de bzhin blo dngos gcig par rtogs pa yis// bsgom du yod sogs par ni nga rgyal med// 'dus pa'i snying po 'khor rnams da nyon cig/ blta ba nam mkha' lta bur 'phang chod rnal 'byor pas/ / mtho la phrag dog mnyam la smad gyur kyang// mi len mi sdang mnyam pa chen po ste// ma ki ta yis thams cad sman du 'gyur ba bzhin// don dran ma nor man ngag gdeng gis 'phangs// bla ma'i bka' nod ye shes rnal 'byor la/ / dug lnga ma spangs rang grol ye shes thugs/ rdzogs pa chen po blta ba ye shes gting rdzogs kyi rgyud las/ nyon mongs ma spangs rang grol du bstan pa'i le'u ste bco brgyad pa'o/ /// de nas yang 'dus pa'i 'khor la bka' stsal pa// sangs rgyas yon tan mtshan dang dpe byad de// stobs dang mi 'jigs chos ni bco brgyad dang// dus ni da lta 'byung ba lus kyis bsgribs/ / dper na khyung chen sgo nga'i nang na gshog rgyas kyang// sgo nga ma chag 'phur mi nus pa bzhin// rang sems chos skur rtogs pa'i rnal 'byor kyang// lus 'dir che ba'i yon tan mi 'byung phyir// thun mong sman gyi sbyor ba'i thabs kyis ni/ / rtsi sbyor sman dang ril bu bcud len gyis// rang lus 'di nyid gsos gyur lus rgyas tshe// dug dang mtshon sogs mi tshugs grub gyur nas// mkha' la bya bzhin 'phur ba byung nas ni/ / sems kyi mngon shes rmi lam mngon gyur te// lus 'di yul yin phyir na sems min pas// gnas skabs 'brel pa yod phyir rtags byung yang// sha khrag lus 'di ma bor bar du ni// sangs rgyas che ba'i yon tan 'byung mi srid/ / de yang sems dpa' rdo rje nyon// rang don grub pa thob pa rnams kyang ni// thabs kyis sbyor ba yin phyir lus kyis bsgribs// dper na me yod du ba 'byung ba bzhin/ / rang sems ma bcos de dag gsal gyur na// che ba'i yon tan ma lus shugs kyis byung// sangs rgyas nyid kyang rtswa mchog grong khyer du// rang lus 'bor phyir sems can smos ci dgos// de phyir bcom ldan 'das kyang rdo rje'i gdan thog tu/ / yang sangs rgyas pas mtshan dang dpe byad ldan// che ba'i yon tan ma lus lhun gyis rdzogs// rdzogs pa chen po lta ba ye shes gting rdzogs kyi rgyud las/ dus 'dir sangs rgyas kyi yon tan mi 'byung bar bstan pa'i le'u ste bcu dgu pa'o/ /// de nas yang 'dus pa'i 'khor la bka' stsal pa// rang sems ngo bo nyid du gsal gyur na// ye shes tshogs chen rdzogs pas chos kyi sku/ / dper na rgya mtsho rnyog med dngas gyur na// nam mkha'i gzugs brnyan 'byung ba mi 'gag bzhin// chos nyid ngang las longs spyod rig pa'i rgyun// de yi sprul pa sna tshogs sprul pa'i sku// de yang sems dpa' rdo rje yid kyis nyon/ / chu nyid tshags kyis btsags kyang gzugs brnyan med// med bzhin sems kyi ngo bo nyid la ni// kun bzang sangs rgyas nyid kyis gzugs btsal kyang// 'dod pas lus las sangs rgyas rnyed mi srid/ / bsod nams tshogs kyis gzugs sku 'byung ba med// rim dgu ston pa sangs rgyas gzugs kyi sku// mos pa so sor 'dul phyir snang mod kyang// brgyud nas chos sku rtogs pa'i thabs su bstan/ / smon lam dbang gis 'gro ba'i don byed pa// 'og ma'i blos bzhag sangs rgyas chos sku min// de phyir rang sems ma rtogs dge ba yis// rgyu med 'bras bu mi 'byung dpe bzhin du/ / bskal pa stong du tshogs ni bsags byas kyang// 'bras bu gzugs sku'i sangs rgyas 'byung mi 'gyur// de yang 'dus pa'i dad ldan 'khor rnams nyon// gser sbrul mig gis 'dod pa'i yon tan lnga// dus gcig nyams myong dpe bzhin rnal 'byor pas/ / ngo bo nyid kyi sku rtogs chos kyi sku// de la rig pas longs spyod rdzogs pa'i sku// sna tshogs nyid na gsal thabs sprul pa'i sku// las med rtog par dka' phyir gsang ba'i sku/ / blo dngos gcig phyir mngon par byang chub ste// de rnams gcig gi yon tan lnga 'byung bas// sangs rgyas 'gro don btsal mi dgos pa'i phyir// sems can rnams la rang sems chos kyi sku/ / rdzogs pa chen po ye shes gting rdzogs kyi rgyud las/ chos sku rtogs na gzugs sku 'byung bar bstan pa'i le'u ste nyi shu pa'o//// de nas kun rig ston pas 'dus pa'i 'khor rnams la// the tshom gegs ni bsal thabs bka' stsal pa/ / 'khor 'das spyi yi mtshan nyid sems yin te// rtogs na kun kyang yin phyir ma rtogs min// a ti theg chen snying po rdzogs pa'i phyir// yod med gang nges rtag chad skyon yin phyir/ / ma nges rgyu 'bras log pa'i kha rje kha// sangs rgyas 'bras bu ma thob snying rje'i gnas// de yang 'dus pa'i 'khor tshogs yid kyis nyon// 'jig rten pa dang 'das pa'i chos rnams kun/ / gnyis ka'i gzhi ni ngo bo chos skur nges// yul gyi snang ba ma nges sna tshogs pa// blang dor med phyir chos rnams lhun gyis grub// 'dus pa'i snying po'i gtso bos don gsol pa// yul nyid sems las sems nyid yul yin na/ / yul nyid yin phyir yul la sdug bsngal rigs// sems nyid yul na rang rig bems por thal// spang sdud mi shes zhen pa skye ba'i blo// de phyir rdzogs chen chos sku bla med gang// de yang 'khor gyi snying po yid kyis nyon/ / yul nyid spang sdud zhen pa rnams kyi skyon// blang dor med cing gnyen pos btsal mi dgos// de tsam nyid na bsam gtan mchog gi lam// de la gnyen po med phyir bla med chos kyi sku/ / de yang 'dus pa'i 'khor rnams da nyon cig/ bsgom du yod med sgro skur mthar lhung phyir// bsgom pa'i zhi gnas mtha' la zhen pa ste// ma rtogs bsgom med don gyi gdeng dang bral// de phyir mtha' yi blta ba nor ba'i lam/ / de yang dad ldan 'khor rnams yid kyis nyon// a ti man ngag chos sku'i snying po ni// bsgoms kyang 'gal med rang sems nam mkha' 'dra// ma bsgoms pas kyang chos sku rtogs bral med/ / byang chub lam du sems nyid rtogs pa che// sems dpa' rdo rjes yid kyi don zhus pa// sangs rgyas sems can gcig gam tha dad lam// tha dad 'brel med thugs rjes phan mi nus// gcig na 'gro drug sems can ci phyir byung/ / kun rig ston pas bka' stsal yid kyis nyon// de gnyis so sor snang ba ma yin te// rtogs na ngo bo gcig phyir thugs rje 'byung// rang sems ma rig rnam rtog sdug bsngal yin/ / don la dbyer med sems nyid lhun gyis grub// 'dus pa'i tshogs kyis sems don yid kyis zhus// sangs rgyas sems can rgyu 'bras yin gyur na// sangs rgyas las byung rnam gsum don med 'gyur/ / sems can las byung tshogs gnyis dus mi rtog/ kun rig ston pas 'khor la bka' stsal pa// sangs rgyas sems can rgyu 'bras ro gcig phyir// ltos pas gcig la gcig byung ma yin te// gnyis ka'i ngo bo rang sems chos skur gcig/ sangs rgyas sems can skyon yon rnam gnyis kyis// chos nyid 'khrul pa gang yang gzhi bzhag nas// gnyis ka ltar yang rtsod na mi 'gal phyir// ma rig ye shes gang rung phyogs gzung na/ / kun kyang yin la thams cad min pa'i phyir// rgyu yod dang ni rgyu med gang 'khrul pa// gzhir bzhag ma nor shin tu gces par gsungs// sems dpa' rdo rjes 'khor gyi don zhus pa/ / rang la yod pa mkhas pas 'di skad ston// ye nas yod na man ngag bstan mi dgos// med na ri bong rwa bzhin rgyu mi dmigs// kun rig ston pas 'khor la bka' stsal pa// ye nas rang la yod pa'i chos sku ni/ / bla mas mtshon nas rang sems don bstan pas// ma rig rnam rtog chos skur shes pa las// logs na btsal nas bstan pa ma yin no// dad ldan 'khor gyis don chen yid kyis zhus// bla ma'i man ngag yul la mi rtog pa/ / tsam du nyams myong zhi gnas skyon yin phyir// rtogs na rang rgyud yin phyir man ngag min// ma dran 'du shes med pa nyid du thal// de yang sems dpa' rdo rje snying po nyon// yul la mi rtog de nyid bsam gtan te/ / rtog dang mi dran gnyis ka'i gzhi nyid ni// thog mtha' chod pas chos nyid byang chub sems// de yang rang byung ye shes don rtogs na// yul nyid mi rtog mi bsgom don la gnas/ / de yang man ngag gis bcos don dang 'gal// ma bcos man ngag bka' la dgos med 'gyur// de yang 'dus pa'i 'khor tshogs yid kyis nyon// bla ma mkhas pa'i man ngag don zab mos// kun gzhi gzhi cha chos sku'i ngo bo nyid/ / bcos su med la rang sems nam mkha' 'dra// sgo lnga yul nyid 'khrul phyir 'brel pa chod// yid la blta ba bstan pas nyon mongs grol// de phyir bka' don shin tu gces par gsungs/ rdzogs pa chen po blta ba ye shes gting rdzogs kyi rgyal po'i rgyud las/ the tshom gyi gegs bsal ba'i le'u ste nyi shu rtsa gcig pa'o//// de nas 'dus pa'i tshogs la bka' stsal pa// blo dngos gzhi la gnyis med rab rtogs na/ / ming gi tha snyad rnam grangs 'dzin med phyir// yul la mi zhen ma rig rang sar grol// btsal med bsam gtan nyams su myong ba'i rtags// phan gnod ji lta bu dang phrad gyur nas/ / byams sdang gnyis kyi sems ni skyes pa'i tshe// mnyam nyid rig pas gsal thebs rnal 'byor de// blo dngos gnyis med nyams su myong ba'i rtags// de yang sems dpa' rdo rje da nyon cig/ kun tu bzang po 'od dang bcas nas ni/ / dbang por mngon sum byon nas chos bstan kyang// bzang po yin pa'i sems kyis dang rgyu dang// gshin rje'i 'jigs pa byung yang nyam mi nga// gnyis pa 'khrul par rtogs phyir spang len med/ / lta ba gdeng ldan nyams myong yin pa'i rtags// theg pa'i bye brag chos rnams ci gsungs kyang// don la bzang ngan med rtogs phyir na sgro skur bral// chos la bzod pa thob pa'i nyams myong rtags/ / lus ngag yid gsum sdug bde ci byung yang// skyon yon mi blta rang sems 'khrul pa'i phyir// snga phyi med par lta ba'i gdeng ldan na// chos nyid rang gsal nyams su myong pa'i rtags/ / lus dang mi mthun pa yi nad dang bgegs// byung yang bag chags dang ni nyon mongs pa// rtog pa brtas pa nyid las ma gtogs pa// zhen pa med phyir chos sku dad pa yis// mi gtong dran par byed pa'i rnal 'byor pa/ / dngos grub rtsol med dgongs pa nyams myong rtags// de yang 'dus pa'i snying po da nyon cig/ byang chub sems la snga phyi med pa'i phyir// 'jig rten mthon dmar gar skyes lus nyid kyang/ / skye 'gag med pa'i sems la sems gnas na// 'du 'bral med pa'i dgongs pa nyams myong rtags// rtags chen de ldan rnal 'byor rnams kyis ni// ci spyod thams cad ye shes sangs rgyas thugs// mi yi lus la sgrib g.yogs 'di nyid la/ / lha mi rnams kyis phyag 'tshal mchod par 'gyur/ rdzogs pa chen po blta ba ye shes gting rdzogs rgyal po'i rgyud las/ rtags bstan pa'i le'u ste nyi shu rtsa gnyis pa'o/ /// de nas sems dpa' rdo rje snying po yis// dad ldan 'khor la phan gdags phyir// mnyam pa'i rgyal po kun bzang la// yid kyi dran pas 'di skad don gsol pa/ blta ba nyams pa'i rnal 'byor skyon ni gang/ / de la skong thabs ji ltar bstan par bgyi// bskangs pa'i 'bras bu ji ltar 'byung// 'khor 'das sa mtshams bag chags gang gis gzung// de yi gdams ngag rnal 'byor gang la gtad/ / mnyam pa'i ye shes rgyal pos lung bstan gsol// de skad zhus pa'i don gsan nyid kyis bka' stsal pa// don med nga rgyal dregs pas mkhas 'dod pas// rang gi blta bas ya rabs mtho bzhed nas/ / tshig la mnyam sbyor mkhas pa'i zla med kyang// dam tshig phyal por byang chub sems spangs nas// log 'dren khong gsog bden tshig ci smras kyang// 'khrul pa'i sems nyid log 'dren dbang du 'gyur/ / gnam lcags mkha' las 'dam du bying ba bzhin// dmyal bar nges 'gro gtan du snying re rje// de yang 'dus pa'i rdo rje sems dpa' nyon// gsang sngags gsang ba'i lta ba'i sgor zhugs nas// yang dag rang sems don la ma 'dud par/ / mi chos zang zing lus ngag las byed pas// ri bos srog chags 'og tu mnan pa ltar// mi shes rang gi nga rgyal bsnyem byed pa// nam yang sangs rgyas byang chub thob mi srid/ / de yang sems dpa'i snying po da nyon cig/ rgya mtsho'i dbyings kyi pha bong dkyil skams ltar// theg pa 'og ma'i sde snod chos mnyan kyang// yang dag don gyi lta ba'i gdeng med par// tshig tsam lung las chos kyi khungs phyung nas/ / byar med chos la nga rgyal blo brtan nas// lus ngag rtsing chos phad hral spyod byed pas// rang sems bkag kyang 'khor bar mi skyobs te// sdug bsngal ya nga'i 'bras bu the tshom med/ / blta ba nyams pa'i skyon du bshad pa'i phyir// shin tu rnal 'byor don nyid rtogs pa gces/ rdzogs pa chen po lta ba ye shes gting rdzogs rgyal po'i rgyud las/ rnal 'byor pa'i blta ba nyams pa'i skyon bstan pa'i le'u ste nyi shu rtsa gsum pa'o/ /// de nas yang kun rig rnam par snang mdzad kyis// rnal 'byor blta ba nyams na skong ba'i thabs// 'dus pa'i tshogs la ched du bka' stsal pa// rang gi byang chub sems nyid ma rtogs na/ / ma hA'i yo ga'i chos kyi tshogs mchod phyir// skong bshags phrin las gzhung du byas gyur kyang// rnal 'byor lta ba nyams pa bskang mi 'gyur// de yang sems dpa' rdo rje yid kyis nyon/ / bla ma brgyud pa'i gdams ngag don ldan la// rang sems dpang du btsugs nas don zhus nas// rgyun du mi gtong lta ba dran byas nas// snying po mchog gi sangs rgyas chos kyi sku// bde chen thugs la gsal ba'i dam tshig ste/ / yan lag dam tshig nyams kyang bsgrib mi nus// rgyun du mi gtong ting 'dzin don bstan na// mtshams med la sogs byas kyang chos kyi sku// 'gyod pa drag po yid byas blta ba ni// mi brjed gzungs su don la gus pa'i chos/ / sems la gsal bas rnam rtog ming yang med// skyabs dang mgon du lta ba mchog tu gsungs/ rdzogs pa chen po lta ba ye shes gting rdzogs rgyal po'i rgyud las/ rnal 'byor pa blta ba nyams na skong ba'i thabs bstan pa'i le'u ste nyi shu rtsa bzhi pa'o/ /// de nas 'dus pa'i snying po 'khor rnams la// kun bzang ston pa chos rjes bka' stsal pa// lta ba nyams pa bskangs pa'i 'bras bu ni/ / rang sems sangs rgyas ye shes snying po 'byung// rtogs pa tsam gyis sangs rgyas sa la gnas// 'bras bu gzhan du btsal mi dgos pas mchog/ rang byung gdod nas dag pa'i ngo bo nyid/ / chos sku 'gyur ba med pa rang sems don// 'bras bu dus la mi ltos da lta nyid// ye shes dbang thob sangs rgyas kun dang mnyam// rnam smin lus 'di bral bas kun bzang thugs// byang chub chos nyid rang byung mthar phyin pas/ / mi tshe 'di yis byang chub mchog thob nas// rgyu la mi ltos 'bras bu ye shes tshogs// da lta nyid du sems 'di kun tu bzang// lus 'di bral bas sangs rgyas chos kyi sku// skye ba mi len 'bras bu btsal mi dgos/ / dngos po lus med snying po byang chub sems// sprin med nam mkhar gza' skar 'char ba bzhin// rang sems rtogs pas 'gro don btsal mi dgos/ rdzogs pa chen po lta ba ye shes gting rdzogs rgyal po'i rgyud las/ blta ba nyams pa bskangs pa'i 'bras bu bstan pa'i le'u ste nyi shu rtsa lnga pa'o//// de nas kun rig rgyal pos 'khor rnams la// 'khor 'das sa mtshams bka' stsal pa/ / thog mar 'khrul pa'i gzhi gnas bag chags de// gnyid dang 'dod chags 'jigs dang rtogs pa rnams// sngar gyi mngal gyi sgrib g.yogs bag chags brtas// sems dpa' rdo rje 'dus pa'i snying po nyon/ / skye bo rang sems ma rtogs bar do nas// dper na sprin dang ling tog chu bur mig/ rdzas rnams mi mthong bsgribs pa'i mun pa bzhin// ma rig dbang gis bsgribs pa'i bag chags kyis/ / rang la yod pa'i chos sku don chen bsgribs// de tshe sngon gyi rdzas rnams rjes dran nas// gos dang gnyen 'dun dran pa byung nas kyang// nga nyid nges par shi'am gar 'gro ba'i// sgrib g.yogs lus kyi chu bur dmigs pa'i phyir/ / dper na mig phyung bzhin du bag chags blos// dug lnga las la kun spyod yid dran 'gyur// shes rab lta ba'i mig med gti mug blos// mi shes byed pa med phyir 'dus byas kyi// dge ba lus ngag yid kyis ci spyad kyang/ / phan pa rdul tsam mi nus don med 'khyams// de tshe gzugs bral yid kyi dbang po ni// kun tshang thogs med 'gro ba'i phyir na 'khrul// dper na 'dab chags mkha' la 'gro yang ni/ / 'dod pa'i dbang gis sa khung rnyi yis 'dzin// de bzhin gzung 'dzin dbang gis lus su 'jug/ de tshe gcig gis tha dad gang len pa// char sogs sdug bsngal nyid gyur skyabs tshol bas// gzhal yas rtswa yi spyil skyibs nang dag tu/ / rang dbang med par shugs kyis chud pa snyam// pho mo 'du 'phrod rkyen gyis mngal du 'jug/ rnam bzhi gang rung las kyis skye ba'i phyir// mthon dman las la 'dam pa'i dbang med pa/ / de yang 'dus pa'i 'khor rnams da nyon cig/ mtha' mi'i rnal 'byor blta ba rtogs pa yi// gdams ngag skal med bsam gtan zhi gnas kyis// ye shes bag chags mnyam nyid ting 'dzin gyis/ / rdzogs pa tha ma nyams su myong ba'i phyir// 'dod chags lha mi gar skyes rang dbang yod// rtogs pa 'bring gi rnal 'byor blta ba ni// dran pa ma yengs tsam du don gsal na// rnam rtog chags pa de nyid zil gyis gnon/ / dper na mi gang rtsal ldan de shugs kyis// rtsal med non bzhin rjes su gsal bas na// dper na khyung sgong nang nas bya bton bzhin// rnam smin lus dang bral nas don dran te// gtsang ma ris kyi lhar ni skyes nas kyang/ / mngon par 'bras bu sangs rgyas ye shes 'byung// de yang sems dpa' rdo rje snying po nyon// rtogs pa rab kyi blo dngos gcig pa'i phyir// lta ba'i rgyun la yengs pa mi 'byung phyir/ / lus kyi sgrib g.yogs bral ba'i skad cig la// 'bras bu sangs rgyas rgyal po chos kyi sku// dpe med kun bzang ye shes thugs kyi thugs// nam mkha'i mthongs su nyi shar mun pa med// de bzhin rnal 'byor lus bral sems nyid la/ / ma rig med par chos nyid gsal ba'i phyir// sangs rgyas ye shes thugs la 'char nub med// rdzogs pa chen po lta ba ye shes gting rdzogs kyi rgyud las/ 'khor 'das gnyis kyis mtshams bstan pa'i le'u ste nyi shu rtsa drug pa'o/ /// de nas yang kun rig rgyal pos don bstan pa// theg pa'i rgyal po chos nyid lhun rdzogs 'di// skal dang ldan pa'i 'khor rnams khyed kyis kyang/ / rgyud 'di yid la gnas shing bcang bar gyis// de yang 'dus pa'i rdo rje snying po nyon// spyod pa tshul 'chos byed cing slob dpon smod// nor 'phangs chos 'dod thabs kyis 'drid pa la// ye shes gting rdzogs rgyud chen lta ba ni/ / snod ngan rnams la nam yang bstan par ma gsungs so// bka' bzhin ma byas don gyi snying po chos// 'jig rten nor phyir don ston rnal 'byor la// sangs rgyas dkon mchog bka' chad 'byung nges phyir/ / 'jig rten mkha' 'gro dam can smos ci dgos// gnod sbyin srin pos srog bcad mnar med ltung// da yang 'khor gyi sems dpa' yid kyis nyon// bstan pa 'jig pa'i dus 'dir chos rnams kyi/ / snying po rdzogs chen don 'di 'byung 'gyur bas// snod ldan rnal 'byor 'ga' la gtad pa las// dad med snang dgu rnams kyi spyod yul min// 'khor rnams kun kyang nges par de ltar zhog/ lan cig rnal 'byor khas 'che chos pa kun// don med tshig mkhas nyams su len pa med// 'dus byas chos spangs don la mi 'dud par// bsod nams 'dod phyir grong du chos 'chad 'byung// de yang rdo rje sems dpa' snying po nyon/ / rnal 'byor gang zhig snod ldan chos// gzhung bzhin don las mi 'da' dad pa can// dka' dgu bsdos nas man ngag rgyud 'di tshol// de tshe rnal 'byor las can don gyi phyir// sba bskyil mi bya rgyud 'di bstan par gyis/ / gal te snod ldan ma phrad dus nye na// chos skyong yod pa'i gtsug lag khang chen nam// dregs pa'i lha chen gnas pa'i brag dkyil du// sa phyogs brtags la dad ldan phyi rabs la/ / phan phyir smon lam btab la sba ste bzhag/ rdzogs pa chen po blta ba ye shes gting rdzogs kyi rgyud las/ 'khor la rgyud gtad pa'i le'u ste nyi shu rtsa bdun pa'o//// rdzogs pa chen po lta ba ye shes gting rdzogs kyi rgyud 'di o rgyan gyi yul bye ma g.yung drung nas/ sing g+ha la'i slob dpon d+harma gar+b+has o rgyan gyi slob dpon ma hA bod+hi la bshad/ de nas A tsar+Ya dran pa'i ye shes la bshad/ des bod yul du bsnams nas byon pa'i chos gser gyi dril shing can rdzogs so/ /// rgya gar skad du// badzra satwA kA sha bi pu la guh+ya gar+b+ha pra kr-it+yar+tha tan+t+ra/ bod skad du/ rdo rje sems dpa' nam mkha' che gsang ba'i snying po rnal ma don gyi rgyud/

CLOSE WINDOW