rin po che snang ba'i 'od zer zhes bya ba/ slob dpon dga' rab rdo rjes mdzad pa rdzogs so/// rgya gar skad du/ sarba d+harmA ma hA san+ti b+ho d+hi tsit+ta saM sA ra mU la ts+tshe da na rat+na sa mAnya dzA tan+t+ra/ bod skad du// chos thams cad byang chub kyi sems rdzogs pa chen po 'khor ba rtsad nas gcod pa rin po che dang mnyam pa skye ba med pa'i rgyud/ bcom ldan 'das kun rig rgyal po la phyag 'tshal lo/ / 'di skad bdag gis thos pa'i dus gcig na/ bcom ldan 'das kun tu bzang po 'og min chos kyi dbyings kyi pho brang na// bcom ldan 'das rigs lnga'i sangs rgyas la sogs pa byang chub sems dpa' brgya stong du ma dang thabs cig tu bzhugs te/ de'i tshe sangs rgyas rdo rje sems dpas gnyis med mchog gi mchod pa phul nas phyogs gcig tu 'khod de zhus pa'o// e ma ho bcom ldan kun tu bzang/ / rang snang rig pa'i ye shes la// sna tshogs snang ba'i chos rnams kun// 'di yi mtshan nyid ci ltar lags// bcom ldan 'das kyis bka' stsal pa// rang rig blo yi snang ba las// snang tshul bcu bdun snang ba 'di/ / 'di yi mtshan nyid glo bur ba// rgyu rkyen dbang gis snang ba yin// dper na ga pur sman dug tshul// sems dpa' rdo rjes yang gsol pa// e ma bcom ldan kun rig lags/ / 'khor ba 'khrul pa'i snang ba 'di// rtsad nas gcad na ci ltar gcad// bcom ldan 'das kyis bka' stsal pa// khams gsum 'khor ba'i 'khrul snang 'di// rmad byung bde 'byams nam mkha' nyid/ / rje btsun rtse mo kun 'dus la// srog dang myu gu rin po che// bde ba spyi gcod sems kyi tig/ rin chen lta bu'i sgron ma yis// 'khor ba rtsad nas gcad par bya// de skad gsungs pa'i tshig rjes la/ / sems dpa' rdo rjes yang zhus pa// e ma bcom ldan bde gshegs yab// 'khor ba rtsad nas gcad pa'i phyir// rmad byung bcu gsum rin po che// yang dag rgyas par bshad du gsol// rin po che dang mnyam pa skye ba med pa'i rgyud las/ gleng gzhi'i le'u ste dang po'o//// de nas bcom ldan bka' stsal pa// nga ni rmad byung rin chen mdzod// skye med thams cad nga las byung// nga med pa yi sngon rol na/ / sangs rgyas sems can gnyis med de// gzugs nas thams cad mkhyen pa'i bar// thams cad nga las byung ba yin// 'jam dpal ye shes rdo rje'i sku// nyon mongs drug po rnam thar sgo// pad+ma dkar po dri ma med/ / 'di don rtog pa sems kyi dbang// yang dag grub pa thig ler gcig/ 'di ni rnal 'byor bde ba'i mchog/ gdod nas dri med bdud rtsi che// sdug bsngal nad kyi zug rngu 'jil// rmad byung rdo rjes zhe sdang 'joms/ / ye shes phur bus bdud bzhi bsgral// thams cad yum gyi b+ha ga'i klong// nga las 'byung zhing nga ru zhi// nga ni srid las skyob pa'i sngags// nga nyid las su rung pas na// 'jig rten gsum yang nga ru rdzogs/ / gtsug tor chen po rmad byung gtsug/ theg pa sna tshogs ston pa po// bden pa bzhi ni ston pa po// yan lag bcu gnyis srid rtsa bton// rnam rig sna tshogs gzugs don can// bden pa gnyis kyi tshul la gnas/ / gsum rig gtsang ma dag pa ste// de nyid rnam pa bzhi yi tshul// sangs rgyas sku lnga'i bdag nyid can// bcu drug phyed phyed thig le can// chos dbyings dam pa zad mi shes// rnam par rtog med lhun gyis grub/ / rmad byung rdo rje 'di rtogs na// rdo rje sems dpa' nyid kyang ni// rdo rje'i gdan la yang sangs rgya// ngo mtshar rmad byung kun gyi gtsug/ sku lnga ye shes thig le'i rdzong// rmad byung thugs rjes 'gro don rdzogs/ / rin po che dang mnyam pa skye ba med pa'i rgyud las/ byang chub kyi sems rmad du byung ba'i le'u ste gnyis pa'o//// de nas bcom ldan bka' stsal pa// gnyis su med las bde ba che/ / dbyings su thim pas kun la byams// 'bras bu med pas bde ba'i sku// ngang du grol bas bde ba'i klong// mi dmigs rdzogs chen 'khor ba sgrol// skye 'gag med pas gdod nas dag/ don la ma btsal dam pa bde/ / rdzaugs pa rdzogs phyir rang bzhin gnas// bde 'byams lta bu'i nam mkha' la// don dam nyid du spros dang bral// rang bzhin las ni gud na med// 'gyur ba med pas bde chen rdzogs// rmongs pa'i mun pa sel ba'i don/ / sangs rgyas 'byung bas bde 'byams yin// thig le bde khyab rdzogs chen po// thig le rang byung don dam klong// byang chub sems chen bde 'byams 'di// rig pa spros med rgyal por rdzogs/ / rig pa'i rgyal po bde chen po// mnyam pa'i ngang la thabs kyis rdzogs// rin po che dang mnyam pa skye ba med pa'i rgyud las/ bde 'byams yangs pa'i le'u ste gsum pa'o//// de nas bcom ldan bka' stsal pa/ / 'byung bzhi las rgyal nam mkha' bzhin// sangs rgyas kun rgyal snying po thugs// yongs pas rgyal ba'i blta chen ni// rdzogs pa'i don du bzhag pa yin// sems nyid nam mkha' chen po la/ / snying po 'khor ba las sgrol bas// nam mkha'i rgyal po yin par bya// rdzogs pa'i rdzaugs chen a ti ni// theg pa kun rdzogs nam mkha'i ngang// 'khor ba gcod pa'i rgyal po 'di// ma lus ye sangs rgyas par gsal/ / don la btsal med rgyal po yin// sems la dogs med kun gyi bla// rang byung gdod nas rnam par dag/ 'di rtogs mnyam pa'i rgyal po thob// dmigs dang bral bas bsgom pa yin// las las byung ba'i sems can de/ / dus la bab pa'i rnal 'byor pas// las nyid thugs rjer shes par bya// thugs rje chen po'i thabs kyis bsgral// ma btsal dbyings su thim pa yis// don dam spros bral nam mkha' de/ / gzhan las mi 'byung thabs kyis 'grub// thams cad dmigs med bde ba'i klung// srid gsum non pas dug gsum chod// dbang po yul las 'phros pa rnams// thams cad gcig gi ngang du gsal/ / thams cad ye brdal chen po la// spro bsdu byed pas 'ching ba'i rgyu// bla med byang chub yongs la khyab// srid pa'i gdar sha bcad pa yis// 'chi bdag bdud las rnam par thar// bdud bzhi bcom pas 'khor ba med/ / dngos nyid dag pa rang byung de// bde ba gzhan du mi 'tshol zhing// rig pa gsal la gsal 'debs te// logs nas 'byung ba'i rgyu med do// gzhi rtsa med pa'i nam mkha' ni// gdags dang bral bas spros med klong/ / skye shi med pa'i byang chub sems// nam mkha'i rgyal por ye nas snang// rgyu las ma byung 'bras bu dang// lung las ma byung man ngag ste// sems las ma byung chos nyid ni/ / mi nub nam mkha'i rgyal por smra// snang srid kun khyab ma lus gnas// sangs rgyas kun rgyal kun gy-i yab// mi nub gter 'dzin dus gsum khyab// ngang dngas rang bzhin lhun gyis rdzogs// srid gsum ma lus nam mkhar rdzogs/ / skye 'gro sems kyi sprul par rdzogs// ci ltar snang ba bde ba nyid/ rin po che dang mnyam pa skye ba med pa'i rgyud las/ nam mkha'i rgyal po'i le'u ste bzhi pa'o//// de nas bcom ldan bka' stsal pa/ / byang chub sems mchog rje btsan dam// nga yi thugs nas bton te bshad// skyon gyi sgor med gdod nas dag/ ma btsal bzhag na bsgom pa'i mchog/ 'gro kun gnas pa'i byang chub sems/ / mi 'gyur rje btsan chos kyi sku// ngang gnas mi nub rdo rje'o// snang dang mi snang gnyis med de// bde chen yongs rdzogs rje btsan sku// ya mtshan mkha' la rig pa'i thugs// smra bsam yul las shin tu 'das/ / dmigs med don rtogs chos kyi rje// snang ba'i yul la gang gnas kyang// rje btsan sku las g.yos pa med// yi ge 'bru la rtog pa rnams// rje btsan don las nyams te dman// phyi nang gnyis ka bde chen po/ / rje btsan dam pa byang chub sems// 'khor ba myang 'das gnyis med de// ji ltar bltas pas byang chub sems// ye sangs rgyas pas chos kyi sku// rin po che dang mnyam pa skye ba med pa'i rgyud las/ rje btsan dam pa'i le'u ste lnga pa'o//// de nas bcom ldan bka' stsal pa// nam mkha' 'byung ba kun gyi rtse// kun bzang chos rnams kun gy-i rtse// skye 'gag med pas 'khor ba kun gyi rtse// dran rtog med pas bsgom pa'i rtse/ / thams cad yongs las rgyal ba ni// rtse mo byung rgyal zhes bshad do// de nyid byang chub sems yin te// 'bras bu rang la rdzogs pa'i phyir// rtse mo byung rgyal ngang nyid smra// ma song gnas phyin lam gyi rtse/ / 'du 'bral med pa'i ngang nyid las// dus gsum mi 'bral sa ru gnas// bsrung mtshams kun las rgyal bas na// dam tshig kun gyi rtse mor bshad// blang dor med pa'i spyod pa ni// rgyal chen gang yang ma spangs rtse/ / mi 'gyur lhun grub blta ba ni// rig pa spros bral mnyam pa'i rgyal// gang yang 'byed pa med pas na// gdags pa'i tha snyad kun las 'das// don la dbyer med blta ba'i rtse// snang srid gsal ba'i byang chub sems/ / 'du 'bral med pas yongs su khyab// kun la gsal bas bkag pa med// snang srid ma 'gags ye shes rtse// rgyu 'bras gnyis med phye ba yis// tshogs mchog dam pa chen po ste/ / bsod nams dam pa'i gzhir 'gyur ro// dus gsum rgyal ba thams cad kun// mnyam pa'i dbyings su bkod pas ni// 'du 'bral med pa'i ngang la gnas// ma lus sangs rgyas sa ru brtags/ / rin po che dang mnyam pa skye ba med pa'i rgyud las/ rtse mo byung rgyal gyi le'u ste drug pa'o//// de nas bcom ldan bka' stsal pa// sna tshogs gcig tu 'dus pa'i ngang// 'byung ba bzhi nyid nam mkhar 'dus/ / nam mkha' dpe bstan byang chub sems// rig pa rang la rdzogs pas na// kun 'dus rgyal po rang smra'o// lta ba'i klong chen a ti las// theg pa so so'i don brjod nas// grub pa gcig tu nges par 'dus/ / yid la ma yengs brjod med bzhag/ ma lus sangs rgyas sems su 'dus// rtsa ba bral ba'i sems nyid de// sus kyang ma byas ye nas gnas// mi 'gyur lhun gyis grub pa yi// yang dag chos nyid dbyings kyi klong/ / rgyu la rag ma lus pa'i sems// bde chen 'du 'bral med pa'i lam// 'bras bu rang la rdzogs pas su// snang srid thams cad ye sangs rgyas// bdag dang bral bas 'khor ba chod// dpal ldan sku gsum rang byung bde/ / sangs rgyas ma lus dbyings su gcig/ skye med don la thabs kyi 'dus// ma spros ngang du grol pas na// thams cad thugs rje'i thabs kyis btul// gcig las med pa'i rin chen 'di/ / gzung 'dzin spangs pa'i mnyam pa'i rgyal// ye shes rol pas gcig tu gsal// snying rje med par gsod pa dang// blta ba med par za ba yis// 'gro drug ye nas sangs rgyas te// thams cad lhag ma med par bsgral/ / ci ltar snang ba kun tu khyab// ye nas gcig gi ngang du 'dus// byas na 'ching ba'i lam yin la// ma bsgrubs 'du 'bral med par bstan// ye nas yin pas bde chen de// gnas la chags pa med pas na/ / 'dus las ma byas snang ba ste// kun la khyab pas spro bsdu med// gang yang ma 'gags so sor gsal// ma lus 'dus pa'i rgyan du che// rag ma lus pa'i rgya mdud de// gzhan gyis bcos su med pa yis/ / sprul pa'i rgya mtsho thams cad kun// gzhi rtsa med pa'i ngang du bzhag/ sus kyang ma byas nyid la 'dus// rin po che dang mnyam pa skye ba med pa'i rgyud las/ kun 'dus rig pa'i le'u ste bdun pa'o/ /// de nas bcom ldan bka' stsal pa// ma bcos bde ba chen po'i don// 'di la skye shi med pas srog/ kun nas ma bsgribs byang chub sems// snang srid 'du 'bral med pas srog/ dus gsum ma bsgribs byang chub sems/ / 'pho 'gyur gnyis su med pa'i srog/ srog gi 'khor lo srid gsum bskor// 'byung lnga yum gyi b+ha ga'i klong// 'di ru snang srid rdzogs sangs rgyas// sangs rgyas nyid la skye shi med/ / skye 'gag med pas srog ces bya// 'gyur ba med pas a ti ru// 'gro rnams skye shi med par bsgral// de phyir 'chi med srog ces bya// skye shi med pas sems nyid srog/ srid gsum 'khor lo bskor bas na/ / srog gi 'khor lo zhes su grags// yul la nges pa med pas na// sems kyi re dogs rnam par med// 'dzin chags med pas 'ching ba med// skye med de la srog ces bya// dus gsum rdo rje 'dus ma byas/ / snang srid ye sangs rgyas pas srog/ 'phags pa'i don la dbye ba med// dus gsum 'gyur ba med pas na// gar yang 'pho ba med pas srog/ bsam du med pa'i chos nyid la// brjod du med pa'i rig pa bzhag/ chags med 'du 'bral med pas srog/ skye shi bral bas rang byung klong// ma yengs gsal bas srog gi don// kun la khyab pas byang chub don// 'gyur med lhun gyis grub pas na// smra bsam yul las 'das pa'o/ / gang la chags med byang chub lam// spros bral srog gi 'khor lo'o// rin po che dang mnyam pa skye ba med pa'i rgyud las/ srog gi 'khor lo'i le'u ste brgyad pa'o//// de nas bcom ldan bka' stsal pa/ / rgyu rkyen tshogs pa'i sdong bu las// myu gu don gyis 'byung ba ltar// ma bcos ngang la rang bzhin gnas// gnas pas dmigs med myu gu 'byung// spros med byang chub sems nyid las// rin chen sangs rgyas myu gu 'byung/ / rgyu la ltos pa med pa'i phyir// rkyen gyis gzhig tu med pa'o// skye 'gag med pa'i myu gu de// yul la dmigs pa med pas na// sems la 'pho 'gyur ga la yod// yul sems 'du 'bral med pas na/ / sbyor ba'i myu gu 'byung bar nges// de la 'gog med sgrol bar brtag/ dus gsum 'gyur med byang chub sems// ma bcos lhun grub ye sangs rgyas// bsrung med dam tshig chen po la// ye bsrungs gdeng chod myu gu 'byung/ / bsgom med dmigs pa chen po la// ma yengs mnyam pa chen por bzhag/ rtog med spros bral byang chub sems// gzung 'dzin med pa'i ngang nyid las// bla na med pa'i myu gu 'byung/ / rgyu la rag med byang chub sems// rkyen bral yon tan myu gu 'byung// 'byung lnga ye sangs rgyas pa la// snang srid lha dal myu gu 'byung// byang chub sems chen rgyal po 'di// thams cad ye sangs rgyas pa yis/ / rgyud drug gnas su rnam dag pas// btsal ba'i bsam pa bskyod pa med// lung la sgrib pa med pas na// zab mo don gyi myu gu 'dis// sems la dogs med kun gyi gzhi// dug gsum rtsad gcod byang chub sems/ / 'khor ba thams cad bsgral ba'o// rin po che dang mnyam pa skye ba med pa'i rgyud las/ byang chub sems myu gu'i le'u ste dgu pa'o//// de nas bcom ldan bka' stsal pa// khams gsum las 'das rin chen dag/ bgrod med rnam grol lam ston pa// gzhan nas rnyed par mi 'gyur te// thig le chen po kun khyab gnas// rang byung ma bcos ye nas gsal// rtsol bas btsal med snying po'i don/ / rnam snang rtag par kun tu bzang// gnyis med bde mchog lhun gyis grub// rtag chen bde la rtag spyod pa// bde chen longs spyod rdzogs pa ni// 'di shes rnal 'byor spyod yul te// drang srong chen po rnams kyi ni/ / spyod yul yin zhes nges par gsungs// rin po che dang mnyam pa skye ba med pa'i rgyud las/ yid bzhin nor bu'i le'u ste bcu pa'o//// de nas bcom ldan bka' stsal pa// bde ba chen po'i byang chub sems/ / 'gro ba'i don du phra bkod pas// ma skyes bde ba'i byang chub la// nyon mongs skyon gyis ma gos te// tshogs rnams ma bsags skye med klong// bde chen phra bkod lhun gyis rdzogs/ / nam mkha' bzhin du kun la khyab// sems la dmigs pa'i yul med pas// lta ba ting 'dzin gsang ba'i sngags// ngo bo nyid kyi phra bkod pas// dpal chen thugs rjes 'khor ba zung// gzhal yas khang chen de dag gis/ / ye shes rang la 'od gsal te// skye 'gag gnyis med me dang 'dra// dag pa'i sangs rgyas lan thob pas// don du sangs rgyas nyid la gnas// nam mkha' lta bur chags pa med// bde ba nyid du yang dag pa/ / phung po lnga nyid mngon sangs rgyas// byang chub sems chen bde ba'i klong// shin tu phra la rab sbyangs pas// bde chen don la bkod pa ste// yang dag don gyi bla ma yis// bde ba phra bkod thig le'i klong/ / rin po che dang mnyam pa skye ba med pa'i rgyud las/ bde ba phra bkod kyi le'u ste bcu gcig pa'o//// de nas bcom ldan bka' stsal pa// theg pa kun la khyab pa yis// spyi gcod rgyal po rdzogs pa'i mchog/ 'di la btsal du gdod nas med// gcan gzan yongs kyi khro bo ni// spyi gcod seng ge rgyal po ste// rtsal gsum rdzogs pa'i rgyal po ltar// rdzogs pa spyi gcod a ti ni// 'khor ba rtsad gcod gzung 'dzin 'das/ / wa spre'u seng ger bcos kyang ni// kun nas mi mnyam spyi gcod che// yo ga rnam gsum theg 'og rnams// ci ltar de ltar bltas dpyad kyang// rgyu las rtsol bar mi nus so/ / rdzogs pa spyi gcod a ti ni// nam mkha'i klong ltar yongs la khyab// rtsol zh-i+ing bsgrub pa'i yul med pas// bsgom par bya ba'i tshig dang bral// rin chen nor ltar dgos dgu 'byung// byang chub sems brdal yangs pa'i klong/ / rang sems mi nub rin chen gter// po zis 'phangs spyad span tshe kha// 'og mas ji bzhin don brjaud kyang// chos spyod bcu la zhen pa'i phyir// 'bras bu'i don la ring bar 'gyur/ / seng ge gcig pur gnas pa bzhin// rdzogs pa spyi gcod yin par smra// don la mi gnas bsrung mtshams bral// ne tsos smras kyang don med ltar// rang gzhung smra theg brgyad po yang// spyi gcod rdzogs chen ngang las 'gal/ / rin po che dang mnyam pa skye ba med pa'i rgyud las/ theg pa spyi gcod kyi le'u ste bcu gnyis pa'o//// de nas bcom ldan bka' stsal pa// ma bcos rang bzhin gsal bas na/ / 'gyur med lhun gyis grub pa'i tig/ chos nyid bde chen klong yangs brdal// rang byung 'gyur med spros bral tig/ byang chub sems chen kun tu bzang// dus gsum gcig tu gnas pas tig/ 'khor ba yang bsgral a ti la/ / snang srid kun sangs rgyas pa'i tig/ 'khor ba kun rgyal byang sems mchog/ dug gsum gnas tshol sku gsum tig/ dug lnga ma bsgribs mya ngan 'das// ye shes lnga ru gsal ba'i tig/ thugs la brtol ba bstan pa yis// byang chub sems mchog bde chen 'di// ma grol lung las ci bstan tig/ theg kun gcig gsal a ti la// chos rnams dbyer med skye med tig/ nyan thos mdo sde kri yA gsum/ / rgyu las 'bras bu tshol ba'i phyir// rtsol bral lung las gol bar bstan// yo ga rnam gsum rtsol bas spags// byis rtsed 'dra ste don las gol// dus gsum 'gyur med byang chub sems// sgrib pa kun med a ti ni/ / dus gsum rtsad gcod mnyam nyid tig/ rin po che dang mnyam pa skye ba med pa'i rgyud las/ skye med sems tig gi le'u ste bcu gsum pa'o//// de nas bcom ldan bka' stsal pa/ / khams gsum sgron ma rkyen dang bral// ma rig mun sel blas ma reg/ gzhan nas btsal bas rnyed mi 'gyur// thig le brdal ba'i rang byung bde// rig pa rang shar bcos su med// lhun grub btsal du gdod nas med/ / snying po'i snying po gnyis med mchog/ ye nas tha snyad kun dang bral// ji bzhin gsal la rtog med de// don dam spros med yang dag dbyings// btsal du med pas bsgom tshig 'das// ji bzhin klong du gyur pas na/ / rnam dag don la mkhas pa yin// gdod nas ma skyes brdal ba'i klong// don dam rtog pas chos kyi sku// longs spyod bde chen rgyal po'i sku// ye shes rol pa sprul pa'i sprul/ / thugs rje byang chub sems dpa'i lam// ma g.yos rtog med chos kyi lam// rang bzhin gnas pas bde ba'i klong/ khams gsum gsal byed sgron ma'i mchog/ bde chen rang byung thugs rjer gsal/ / rin chen sgron mas thugs rje rdzogs// rin po che dang mnyam pa skye ba med pa'i rgyud las// khams gsum sgron ma'i le'u ste bcu bzhi pa'o//// de nas bcom ldan bka' stsal pa// e ma rdo rje sems dpa' che/ / rmad byung bcu gsum skye med don// 'khor ba rtsad nas gcod pa'i chos// 'di ma shes pas ngal ba'i lam// 'di don rtogs kyi rnal 'byor pa// gang ltar spyad kyang bde chen klong/ / rdzogs chen a ti'i bstan pa ni// mi nub nub par mi 'gyur ro// don la 'gyur ba med pa'i phyir// yid bzhin nor bu'i rgyal mtshan rtse// rmad byung rin chen za ma tog/ don dam skye ba med pa'i rgyud/ / rigs lnga bde gshegs byang chub sems// rdo rje sems dpa' mchog gi lam// kun bzang thugs kyi bcud tig pa// sems dpa' rdo rje khyod la gtad// blo yi pad+ma kha phyes la// snying gi dkyil du bsgom par gyis/ / de nas rdo rje sems dpa' dang// rigs lnga'i sangs rgyas byang chub sems// mgon po'i tshogs dang bcas pa yis// ma skyes spros bral kun tu bzang// rin chen sgron mas gti mug sel/ / rmad byung rgyal ba kun gyi yab// rdo rje 'chang chen rigs lnga'i gtso// kun rig rgyal po thams cad mkhyen// mnyam pa'i rgyal por phyag 'tshal bstod// de bzhin nyid la rtag tu 'dud// ye shes rgyal por mngon par bstod/ / chos thams cad rin po che dang mnyam pa skye ba med pa'i rgyud/ bcom ldan 'das kun rig rgyal pos gsungs pa rdzogs so// rgya gar gyi mkhan po shrI sid+ha dang/ bod kyi lo tsA ba bai ro tsa nas bsgyur ro/ /// rgya gar skad du/ bo d+hi tsit+ta ma hA pa rA kra ma tan+t+ra/ bod skad du/ byang chub sems rtsal chen gyi rgyud/ dpal kun tu bzang po la phyag 'tshal lo// 'di skad bdag gis thos pa'i dus gcig na/

CLOSE WINDOW