rgya gar skad du/ sarba d+harmA ma hA san+ti bo d+hi tsit+ta saM sA ra mU lats+tshe da na sa mu dra sa mA bi la tan+t+ra/ bod skad du/ chos thams cad rdzogs pa chen po byang chub kyi sems 'khor ba rtsad nas gcod pa rgya mtsho dang mnyam pa rnyog pa med pa'i rgyud/ bcom ldan 'das kun rig rgyal po la phyag 'tshal lo// 'di skad ston pa gnas 'khor dus// sangs rgyas rin chen za ma tog/ rnyog med rgya mtsho lta bu'i klong// 'khor ba'i rgya mtsho rtsad nas bcad/ / kun bzang thugs kyi byin rlabs kyis// zhal gyi pad+mo 'dzum pa las// ljags kyi 'od zer phyogs bcur 'phros// 'jig rten khams nyid drug tu g.yos// de nas sems dpa' rdo rje yis/ / bcom ldan 'das la 'di skad gsol// 'das pa kun gyi sngon rol na// phyogs bcu'i sangs rgyas kun gyi yab// bde ba thams cad 'byung ba'i gnas// rdo rje 'chang la phyag 'tshal bstod// kun gzhi rtsad nas gcad pa dang/ / shes bya'i gras thag chod pa yis// rig pa rang sar grol ba ni// ston pas bdag la bshad du gsol// bcom ldan 'das kyis bka' stsal pa// kun gzhi phyogs ris med pa'i a/ / mtshon pa'i tshig tu gtan tshigs bzhi// thams cad 'byung ba rgya mtsho'i klong// shes bya sna tshogs snang ba yi// ma rig 'khor ba'i rgya mtsho 'di// lta bsgom spyod 'bras rnam pa bzhis// gtan la phab ste rtsad nas bcad/ / dngos med rtag pa rig pa'i rgyun// rlung gis bskyod pas cir yang 'char// 'di yi rang bzhin rtogs gyur na// chos nyid rgya mtsho nyid du grol// sems dpa' rdo rjes yang zhus pa// ling tshe bcu gsum rdo rje'i rtse/ / zab mo bcu gsum rmad du byung// lnga tshom lnga la bsdus rgyas lnga// 'gro drug 'khor ba'i g.yang sa gcad// bzhi skor gsum la gtan tshigs bzhi// bdud rtsi lta bu bzhi dang sbyar// rgyas par bdag la bshad du gsol/ / rgya mtsho dang mnyam pa rnyog pa med pa'i rgyud las/ gleng gzhi'i le'u ste dang po'o//// de nas bcom ldan bka' stsal pa// sna tshogs cha shas de bzhin bzang// zin pas lhun gyis bzhag pa yin/ / chos dang sems ni bstan du med// chos dang sems ni mi bsgom mo// rnam par rtog pa chos kyi dbyings// de la de ltar nyid las su// thugs rje sems can bsgom don ni// byang chub rtog pa'i rnam dag yin/ / phyi nang rnam dag sangs rgyas lam// bsgrub med byar med chos dbyings la// log rtog gnyis med 'khrul pa yang// gong bstan mnyam par shes pas rje// nga bdag byis pa'i rnam rtog gis/ / chos nyid ma gyur rtog pas zin// de bas slob dpon mkhas pa blu// mi gnas spros med bde chen 'byung// zin pas bdud rtsi bzang po yin// che chung gsungs pa 'byung 'gyur gnas// 'dod pas brod pa mi skye shing/ / khyung bzhin spro bsdu dgos pa med// rgya mtsho chos rnams yon tan mnyam// byang chub ting 'dzin rgya mtsho 'byung// rgya mtsho mi rtog kun tu skye// rgyu rkyen skur pa sgo tsam du/ / mkhas pa 'gro ba'i lam zhes bya// 'dod spyod gang du shan pa sogs// kho na yongs rdzaugs bde ba che// yang ni de ltar chos yin te// chos kyis chos btsal nam mkha' 'tshol// ltos pa me 'dra rnyed dka'o// snying po yongs kyi byang chub gnas/ / rdo rje kun bzang rnam dag phyir// mi skye byams pas snying rje che// yon tan don rnams bya ba med// rang byung grol nas lam yang ston// 'byung ba 'gro ba phyin cis kyang// rang byung ye shes grub yang 'byung/ / cho 'phrul yon tan ji bzhin de// snang ba ming btsal btsal na med// chos nyid rna dbang lce brjod med// 'gro kun de la gnas pa la// las so ci ste rang byung bral// ma skyes gdod nas btsal mi bskyod/ / yon tan bsam gtan ma bsams skye// phra zhing bsgom zhing sems zhes bskyed// lam 'dra zhes gsungs gti mug kyang// byang chub kun spyod chos nyid rgyan// nam mkha' rtog pa'i mi chags 'byung/ / rtog med bzung bas kun tu a// de ni sa dang 'jig rten sangs// 'di btsal yul med nam mkha' bzhin// tshangs lam mthun min bgrod pa med// de ltar de bstan de bas che// sngon gyi de bzhin de ltar rang/ / de la kun bltas grub pa med// bde 'byung de yang mi bya'o// dus gsum gdod nas chos skur bde// srid ming 'khor sgyu bsti gnas yin// rnam spyod 'byung mi smin pas bzhin// ci ste nam mkha' mi skye chos/ / phyi nang zab mo srid pa de// de la rang bzhin dus gsum med// g.yo bskyed len dor mnyam nyid do// gang du kun 'khor bdag las 'byung// 'di mnyam 'di gnas a de bzhin// snang de byang chub chu zla bzhin/ / ma bsgoms dkyil 'khor yi ge med// rnam grangs gang ltar me tog skye// mtshan ma mi 'gyur gnas pa bzang// mi phyed rol par gnas mnyam zhing// ma yin gnas pas ye shes rang// mi 'gyur mi gnas bstan du med/ / rmad byung bya bral cir yang 'byung// 'di 'gro 'khrul pa sman pas tshol// go ba nyid ni de la phyogs// ma nges rigs kyi de bzhin 'byung// 'das dang ma 'ongs tha snyad de// skye 'gag de nyid mnyam pas gcig/ tshogs kyi rang bzhin lhun gyis dag/ 'du byed lhag pa yud kyis bltas// mthong ba de ni yud tsam yin// dam tshig sbyor ba gtor ma las// bgegs bsal sngags tshig mchod dang gtor/ / thams cad rtog med chen por 'gyur// nyid la sgrib par rtogs na med// rgya mtsho dang mnyam pa rnyog pa med pa'i rgyud las/ lhun gyis grub pa'i le'u ste gnyis pa'o//// de nas bcom ldan bka' stsal pa/ / gdod nas ma skyes sgro skur bral// spang 'geg spyod pa rang sar grol// bsgyur dang spyod lnga rnam par dag/ 'di ni 'gro kun byang chub sems// rnam dag nam mkha' bzhin du gsal// skye 'gag yod med mtha' las 'das/ / dngos bral rig gsal phyogs ma lhung// spang blang btang snyoms mngon gyur med// brjod bral ma bcos lhun gyis grub// don dam bde chen mtha' las 'das// dus gsum yang dag a ti ni/ / 'du 'bral rtog med lhun gyis grub// mi 'gyur ba yi blta ba la// g.yos pa med pa'i rtsi yis bzung// g.yos pa med pa'i ting 'dzin la// ma 'gags pa yi rtsi yis bzung// ma 'gags pa yi spyod pa la/ / lhun gyis grub pa'i rtsi yis bzung// don gyi rtsi bzhi gang gnas pa// blta ba'i don la gnas pa yin// des na srid gsum rnam par dag/ 'byung ba dug lnga 'dod yon lnga// thams cad mi 'gyur blta bar sangs/ / blta ba mi zad nor bu bzhin// lhun grub kun rdzogs nam mkha' che// thig le brjod bral mtshon du med// gnyis su med pa'i snying po a// ma bkag ma spangs rang sar grol/ / ma bsal ma bsgyur rtsol bsgrub med// yin pa'i don la yin par shes// zab mo'i mdzod bzhin don rnams 'byung// snying po kun khyab sus rtogs pa// rgyal sras bzhin du dbul ba sangs// mkha' klong kun bzang ye shes 'od/ / rdo rje sems dpa' dag pa'i klong// bsrung mtshams rim par bkod pa med// lta ba bsam gtan spros dang bral// spyad du med pas bsgrub tu med// rang grol sngags dang phyag rgya dag/ mchod bshags phrin las gdod nas rdzogs// lam lnga pha rol phyin bcu rdzogs// 'gro ba mu stegs rim dgu rdzogs// snang srid 'khor 'das thams cad rdzogs// dad dang rang bzhin bdag nyid gsum/ / dbyings dang klong dang rdzogs chen no// gzhi dang lam dang 'bras bu gsum// ma skyes ma 'gags lhun gyis grub// lhun grub ma nor dag pa'i rdzong// phyogs med rang grol dong sprugs dbyings/ / gsal khyab gnyis med bde chen klong// sku gsum lhun grub snying po a// rgya mtsho dang mnyam pa rnyog pa med pa'i rgyud las/ lta ba'i le'u ste gsum pa'o//// de nas bcom ldan bka' stsal pa/ / gdod nas gsal bas bying rgod bral// bsgaum bya chos nyid gud na med// 'di ni don dam bde chen ngang// ma bcos ma yengs rang sar grol// dran pa rang grol don dam dbyings// so ma lhug pa gyi na tsam/ / ming tsam bsgom zhes de la bya// dran 'dzin ma skyes spros bral ngang// mnyam nyid mkha' 'dra rnyog pa med// lhun grub rtog pas bya btsal bral// dang po zhi gnas dus su ni// dran pa shes bzhin rtsi yis bzung/ / dper na glang chen lcags kyu bzhin// ma yengs dran pas rang sar grol// gnyis pa mnyam gzhag dus su ni// shes bya chos nyid bum par gzhug/ gser bum til gyi sgron ma bzhin/ / 'gyur med rig pa nang na gsal// gsum pa rjes thob dus su ni// dbang po mi 'gag rang yan bzhag/ gser gling brdal ba'i klung chen bzhin// gang bltas rdzogs pa chen po'i klong// tha ma lhag mthong dus su ni/ / mtshan ma rang grol blos ma reg/ dug sbrul 'bar ba'i mdud pa bzhin// rtsol bsgrub med par rang sar grol// de ltar dus bzhi bsgom pa la// bying ba brgyad dang rgod pa lnga// bying rgod skyon du gtang mi bya/ / bying la gseng la rgod na bsdu// de ltar zla ba drug bsgoms na// g.yo dang goms pa thob dang brtan// gsal ba nam mkha' lta bu 'byung// nam mkha' dngas pa'i zla ba bzhin// kun la snyoms la rtog sgrib med/ / kha skom zas dang bral byas kyang// mdangs dang dbang po gting nas gsal// bzod thob chos brgyad spang len med// 'dod yon lngalas rnam par grol// nyon mongs zhen 'dzin rtog pa zad/ / lus ni shing bal lta bur yang// dbugs ni 'byung 'jug med pa'i nyams// grub pa'i rtags rnams 'char ba dang// mngon shes la sogs mtshan ma mthong// mkha' 'gros lung bstan la sogs 'byung/ / de la dga' brod mi bya zhing// med kyang ji mi snyams pa'i nyams// gnyis med gsal khyab khyung chen rgyas// kun gzhi skye med snying po la// bsgom dang mi bsgom rtog las 'das// rtog 'das don gyi ye shes la/ / bsgom bya chos nyid gud na med// bsgom pa ming du btags pas nor// ci phyir brjod pa kun dang bral// rnam rtog gnyen por mi rtog bsgom// de ka rtog pa chen po yin// rtog pa'i mtshan ma ci skyes kyang/ / de nyid chos nyid yin shes na// dug la sman du shes pa bzhin// chos nyid gzhan nas btsal mi dgos// gsal la rtog med ting 'dzin la// bsgom bya sgom byed gnyis med ngang// rtag chad gzung 'dzin kun rdzob don/ / blang dor dbyings dang ye shes rdzogs// 'gyur ba ma yin drang por gsal// lhun gyis gnas pas bde ba che// rang byung ye shes rgyu rkyen bral// rang gi mthu yi rtogs pa las// chos nyid gzhan nas mi 'byung ngo/ / tshig tu gzhan la brten 'dra yang// dngos su bde chen rang la shar// rgya mtsho dang mnyam pa rnyog pa med pa'i rgyud las// sgom pa'i le'u ste bzhi pa'o//// de nas bcom ldan bka' stsal pa/ / gdod nas blang dor kun dang bral// skye med don dam chos nyid klong// spyod pa'i dam pa kho na'o// 'gro 'chag nyal dang 'dug pa rnams// ci spyod don las ma g.yos shing// don dam bde ba'i rtsis zin na/ / spyod pa zhes ni de la bya// phyi nang gsang ba kho na nyid// phyi rtog nang du bsdu ba dang// nang rtog gsang bar bstim pa ste// gsang rtog kho na nyid du grol// lus ngag yid gsum spyod pa ni/ / lus ni 'byung lnga 'dus pa'i lus// sku lnga ye shes rol pa yis// rtog med brtul zhugs rgyan du rol// 'jigs pa med pa'i seng ge bzhin// 'bar ba chen po sprul pa'i sku// ngag ni sngags dang sgra dbyangs sgra/ / 'jig rten 'khyal tshig sna tshogs kyang// dper na bI Na'i skad bzhin du// 'gag med grag stong rol par snang// snang ba rang rig gnyis med rdzogs// sems ni ye nas rnam par dag/ nyon mongs lnga yi skyon dang bral/ / e ma rang la gnas bzhin du// spyad pas thob 'dod e ma 'khrul// spyod byed bral ba'i rgya mtsho ni// dran rtog med pa'i ye shes la// thob par bya ba'i sangs rgyas dang// spang bar bya ba'i sems can gnyis/ / byang chub sems su ro gcig pas// lam pas bcos su ga la yod// ci phyir dgag bsgrub med pa la// rtsal sprugs re dogs yul las 'das// mtho ris 'dren pa'i dge ba dang// 'khor bar ltung ba'i sdig pa gnyis/ / chos kyi dbyings su yongs mnyam pas// rdzogs chen ris med chos chen po// thod rgal blo yi bdud rtsi 'di// skal med rmongs pa'i bdud du 'gyur// dper na dug gi rang bzhin la/ / rma bya dag la rgyan gyis mdzes// gzhan rnams la ni dug gis 'jigs// thams cad rdzogs pa'i bde chen po// skye 'gag med par lhun gyis grub// khyab gdal ma bcos ye sangs rgyas// spros bral gnyis med kho na'o/ / don 'di nges par rtogs na ni// rgyal ba rnams dang mnyam pa yin// sems nyid don gyi ye shes la// spyad par bya ba'i gnas dang bral// bya bral ngang la rnam par rol// ming tsam spyod ces de la bya/ / 'da' ka ma yi spyod pa ni// cir snang byang chub sems su spyod// sems nyid chos kyi sku ru bya// sku nyid spyad bya spyod byed bral// bya bral ngang la gang gnas pa// skye med don gyi rnal 'byor ro// rgya mtsho dang mnyam pa rnyog pa med pa'i rgyud las/ spyod pa'i le'u ste lnga pa'o//// de nas bcom ldan bka' stsal pa// gdod nas ma skyes thob bsgrub 'das// re dogs blo las rnam par grol// skye med brjod med kho na nyid/ / mtha' bral gnyis med don dam klong// dgag bya bsgrub bya rnam par dag/ ma skyes bya bral chos nyid klong// cir yang mi dmigs khyab gdal la// bgrod du med par lhun gyis grub/ skye med gnyis med spros dang bral/ / sku lnga ye shes lnga yi ngang// rtog bral dmigs med khyab gdal klong// spros med byang chub snying po'i dbyings// 'bras bu blta bsgom spyod pa bstan// rang snang gnyug ma lam las grol// khyab gdal 'ub chub sa chen non/ / rgyal po btson du bzung ba dang// bdud rtsi'i thigs pa lce la bzhag/ gangs ri rtse nas bsnyil ba ste// shing rta'i gzer mgo gcad par bya// rtog med mnyam nyid chos kyi sku/ / cir yang ma 'gags sprul pa'i sku// gnyis su med pas rdzogs pa'i sku// sku gsum rdzogs pas thig le gcig/ bsam 'das brjod med rang sar grol// kun bzang dbyer med skye med sa/ / thob bsgrub med par thams cad rdzogs// snang srid byang chub sems su rdzogs// 'khor 'das chos kyi dbyings su rdzogs// sku gsum thig le gcig tu rdzogs// lhag ma med par yongs su rdzogs// mi 'gyur mnyam nyid dpe dang bral/ / dpe bral ye shes mtshon du med// ci phyir bsam brjod dmigs pa med// dmigs med blo 'das rang sar grol// mi skye mi 'gag lhun gyis grub// go ba'i yul na bgrod du med/ / bgrod du med pas sa lam rdzogs// gnyis med rdzogs pas mtha' bral rdzong// dmigs med ma skyes de nyid ngang// 'gag med A li kA lir rol// byar med ma btsal lhun gyis grub// smra bsam brjod med tshig las 'das/ / dngos su mi snang kun la khyab// khyab gdal ma bcos ye sangs rgyas// rang bzhin 'od gsal rnam par dag/ dgag bsgrub med pa'i ye shes ni// rgyu yis ma bskyed rkyen dang bral/ / stong gsal dbyer med ye shes can// skye 'gag med par rnam par dag/ khyab gdal gnyis med ye gdal klong// kun rdzogs bla med theg kun gtso// sa rnams kun gyi ngo bo'o// khyab gdal yangs pa nam mkha'i klong/ / rgya mtsho bde chen kun rdzogs grol// nyi ma dus gsum de bzhin nyid// nor bu 'od 'byung 'gran zla med// skye med rtog med lhun gyis grub// 'gyur med rang gsal rnam par dag/ mtha' bral rang grol mtshon du med/ / de nyid shes kyis rtogs na grol// rgyal sras bzhin du re dogs med// rgya mtsho dang mnyam pa rnyog pa med pa'i rgyud las/ 'bras bu'i le'u ste drug pa'o//// de nas bcom ldan bka' stsal pa/ / nga ni skye med mngon sangs rgyas// gzugs gnas thams cad nga las byung// 'jam dpal pad+ma yang dag rtsi// phur bu yum sngags 'jig rten rdzogs// rmad byung theg chen sna tshogs bstan/ / bden bzhi yang dag rnam rig don// bden gnyis gsum rig de nyid bzhi// sku lnga thig le chosadabyings shes// lhun grub rmad byung nyid sangs rgyas// ngo mtshar sku lnga ye shes rdzogs// gnyis med dbyings su 'bras bu'i klong/ / ma bskyed don la rdzogs pa bde// don dam rang bzhin 'gyur ba med// rmongs pa sangs rgyas thig le'i klong// byang chub rig pa bde chen rdzogs// 'byung bzhi sangs rgyas yongs rdzogs sems/ / snying po nam mkha' rdzogs pa'i theg/ 'khor ba ma lus don la sems// rang byung 'di rtogs dmigs dang bral// sems can rnal 'byor thugs rjes bsgral// ma btsal don dam grub pa'i klong/ / srid gsum dbang po thams cad gsal// thams cad ye brdal spro bsdu 'chings// bla med srid pa'i 'chi bdag med// dngos bde rig pa logs na med// gzhi rtsa bral bas skye med snang// rgyud lung sems ni mi nub smra/ / snang srid thams cad mi nub dang// srid gsum skye 'gro bde ba nyid// rje btsan ngas bshad skyon med mchog/ 'gro kun mi 'gyur ngang gnas mdzad// bde chen ya mtshan smra bsam 'das/ / dmigs med snang ba g.yos pa med// rtog pa nyams te bde chen sems// 'khor ba ji ltar chos kyi sku// nam mkha' kun bskyed dran med ni// rtse mo de nyid 'bras bu smra// ma song 'bral med dus gsum bsrung/ / dam tshig spyod pa ma spangs 'grub// rig pa gang yang bdag don snang// 'du 'bral kun la snang srid rgyu// tshogs mchod bsod nams dus gsum mnyam// 'du 'bral med pa'i sa ru brtags/ / sna tshogs 'byung ba nam mkhar rig/ kun 'dus blta ba'i theg brgyad 'dus// yid la ma lus rtsa bral gnas// mi 'gyur yang dag rgyu la bde// 'bras bu snang srid 'khor ba chod// dpal ldan sangs rgyas skye med grol/ / thams cad gcig pa'i ye shes rje// blta ba 'gro drug thams cad khyab// ye nas byas nas ma bsgrubs te// gnas la ma byas kun la gsal// ma lus rag lus gzhan bcos med/ / sprul pa'i rgya mtsho ngang du 'dus// ma bcos 'di la kun nas srog/ dus gsum 'pho 'gyur srog gi klong// 'di ru sangs rgyas skye 'gag med// 'gro rnams 'chi med skyai shi srid// srog gi yul la sems kyi 'dzin/ / skye med dus gsum snang srid 'phags// dus gsum gar yang bsam du med// brjod du med pa'i chags med klong// ma yengs kun la 'gyur med 'grub// smra bsam chags med spros bral srog/ rgyu rkyen myu gu ma bcos gnas/ / spros med rin chen rgyu la gnas/ rkyen gyis skye 'gag dmigs med sems// yul sems sbyor ba de la sems// ma spros bsrung bsgom de la med// ma yengs rtog med gzung 'dzin med/ / bla med byang chub rkyen bral 'byung// snang srid thams cad byang chub rgyu// skye med sgrib med zab mo de// dug gsum rtsad gcod 'khor ba sgrol// rin chen lam ston mi 'gyur gnas// ye gsal snying po kun bzang grub/ / rtag chen bde la longs spyod rdzogs// 'di shes drang srong spyod yul gsungs// bde ba 'gro ba'i byang chub ste// klong rdzogs khyab pas sngags pas zung// gzhal yas ye shes skye 'gag dang// don du nam mkha' bde sangs rgyas/ / byang chub shin tu bde chen klong// theg pa spyi gcod 'di la ni// rtsal gsum rdzogs pa'i g.yang sa gcod// bcos kyang mi mnyam yo ga gsum// ci ltar spyad kyang rgyu la rtsol/ / a ti yongs la rtsol bsgrub bral// rin chen byang chub rang sems so// 'og mas chos spyod 'bras bu ring// seng rdzogs don la ne cog kyang tso 'gal/ ma bcos 'gyur med chos nyid tig/ byang chub dus gsum a ti snang/ / 'khor ba dus gsum ma bsgribs 'das// ye shes lnga ru gsal ba'i thugs// byang chub ma gol theg kun chos// gsum rgyu rtsol bral lung las grol// yo ga rnam gsum byis rtsed 'dra/ / 'gyur med a ti'i nyi ma de// khams gsum mun sel rang byung shar// lhun grub snying po ye nas gsal// don dam btsal du ji bzhin klong// rnam dag klong rtog chos kyi sku// longs sku ye shes sprul pas sprul/ / thugs rje ma g.yos rang bzhin mkhas// bde chen sgron mes thugs rje rdzogs// rgya mtsho dang mnyam pa rnyog pa med pa'i rgyud las// chos nyid 'gyur ba med pa'i le'u ste bdun pa'o//// de nas bcom ldan 'di skad gsungs/ / e ma ho sangs rgyas thams cad kyi// chos kyi dbyings ni yi ge med// rang bzhin 'di gsal yongs su dag/ nam mkha'i dbyings bzhin dri ma med// bdud rtsi dri med brgyad ldan mtsho/ / mkha' la nyi shar 'od zer lnga// dbus na nam mkha' bzhi yi mthongs// steng na rin chen bcu gsum ste// bde gshegs mi mchod rang sems mchod// rang sems sangs rgyas yin pa las// sangs rgyas gzhan du mi btsal te/ / rig pa rang grol bya btsal bral// rang snang 'khor ba'i rgya mtsho 'di// dper na rmi lam lta bu ste// rmi lam bde sdug sna tshogs kyang// gnyid sad dus na chos kyi sku// tshangs pa khyab 'jug la sogs bsgom/ / log pa'i lam du zhugs pa'o// nam mkha' lta bur sems 'gags pa// nyi tshe ba yi stong par ltung// mi gtsang keng rus la sogs bsgom// phyi yi sgrib pa can dang mtshungs// 'gog pa'i snyoms 'jug sgom byed pa/ / skye mched bzhi las thar lam med// phung po gtan tshigs gzhi gnas bsgom/ de ka rtog par shes par gyis// lha dang dkyil 'khor zhal phyag bsgom// med par sgro yis btags pa yin/ / rtsa lung thig ler bde ba 'dzin// ro myags mngal gyi srin bur mtshungs// skad cig snang srid lha ru gsal// 'di ni rtsol ba'i nang du 'gyur// zhi gnas 'thib po'i sgom byed pa// ma he glang dang khyad par med/ / gsal ba phyi nang med par sems// rnam rig pas kyang shin tu gsog/ kun yin gang ma yin sogs pa// a tir khas 'chis mu stegs chos// rdzaugs chen ris med bya btsal bral// rgya chad phyogs lhung med pa'i phyir/ / re zhig rdzogs chen rol par mtshon// sems dpa' rdo rje khyod la gtad// sems dpa' chen po 'di lta ste// slob dpon snying bton gdams ngag thob// mtshams med gsum gyis rdzogs sangs rgyas/ / pha ma bsad pas 'bras bu steng// lha bas dmyal ba shin tu che// snang ba thams cad rdzun lam khyer// ci spyod mo gsham bu bzhin spyod// 'khor ba'i chos la chags pa spyad/ / bya lam khams su gcig pu sdod// 'gro drug ma gtogs sems can gnyis// sprul sku dmyal ba'i gnas su 'gro// gang gA'i chu dang sin+d+hu'i mtsho// khyod kyis rtag tu bsres la 'thung// yum gyi b+ha ga rtag tu ltos/ / btsun mo des kyang me long ston// ldem por dgongs pa ma go bar// sgra bzhin spyad na log pa'i lam// rdo rje sems dpa' dpa' bo che// 'das pa'i dus na sngon byung dang// dus gsum 'byung ba'i sangs rgyas rnams/ / ting 'dzin rgya mtsho 'di las 'byung// rba rlabs med pa'i mnyam nyid mtsho// rnyog pa med pa'i dri med chu// gdod nas dag pa'i bdud rtsi 'dis// khams gsum 'khor ba'i dri ma 'khrud// de nas rdo rje sems dpa' yis/ / ched du brjod pa 'di brjod do// kun rig thugs kyi dpal be'u nas// zab mo bdud rtsi lta bu'i chos// chos nyid byin gyis brlabs pa yis// rnyog med rgya mtsho'i klong ston pa/ / mnyam nyid rgya mtsho lta bu yi// kun tu bzang la mngon bstod do// chos thams cad rgya mtsho'i mtha' dang mnyam pa rnyog pa med pa'i rgyud/ bcom ldan 'das kun rig rgyal pos gsungs pa rdzogs so// rgya gar gyi mkhan po shrI sid+ha dang/ bod kyi lo tsA ba bai ro tsa nas bsgyur ba'o//// / rgya gar skad du// sarba d+harmA ma hA san+ti bo d+hi tsit+ta saM sA ra mU lats+tshe da na sUr+ya tsan+d+ra sa mA ma la tan+t+ra/ bod skad du/

CLOSE WINDOW