/// i thi/ g+huh+ya/ kha tham rdzogs so// rdzogs pa rang 'byung gi rgyud ma bu bcu gnyis pa rdzogs so//// rgya gar skad du/ a nak+Sha ra ma hA tan+ta nA ma rat+na d+hA dza ra dza san+ta ti driSh+ti ga ga na sa ma ma ma hA tan+t+ra/ bod skad du/ yi ge med pa'i rgyud chen po zhes bya ba/ rin po che rgyal mtshan gyi rgyud/ rgyal po'i gdung rgyud/ lta ba nam mkha' dang mnyam pa'i rgyud chen po'o// AHbcom ldan 'das sku'i snang ba rgya cher ston pa nyid la phyag 'tshal lo// 'di skad bdag gis bstan pa'i dus gcig na// rgyud thams cad bshad du med do/ / mtshan ma med pa'i klong du 'das shing bshad du med do// lung thams cad bstan du med do// ma bcos pa'i klong du 'das shing rtsol bsgrub med pa'o// man ngag thams cad mtshon du med pa'o// ma bslad pa'i klong du 'das shing/ bsgrub tu med pa'o// e ma ho// nyon cig snang ba dam pa'i 'khor rnams// snang ba thabs kyi 'khor la gnas lugs kyi rig pa ma 'gags par gsal lo// de skad ces rig pa'i gnas nas sngar ma gsungs so/ / da lta nyid du mi gsung ngo// phyis gsung bar mi 'gyur ro// oM 'di skad bdag gis thos pa'i dus gcig na// chos nyid rang snang gi nam mkha' la/ stobs kyi rig pa ma 'gags par shar ba'i tshe/ / ston pa nyid snang ba med pa'i skus brgyan pa'i klong na bzhugs te/ de'i tshe 'khor ni mi snang ba'i snang ba chen po dang thabs cig tu bzhugs so// de nas de yi tshe yid rtog pa dang bcas pas 'di skad ces gsol to/ / kye ma rig pa'i rgyal po nyid// sangs rgyas rnams kyi lta ba'i don gang lags// dgongs pa'i don ji lta bu lags// lung bstan du gsol// thabs bstan du gsol/ / zhes zhu ba nyid rab tu zhus so// de nas yang snang ba med pa'i klong nas/ ston pa med pa'i rig pas bka' stsal pa// kye ma kye ma med bzhin du// snang ba'i 'khor rnams rab tu nyon cig/ nga rang byung ye shes kyi lta ba la bcad pa'i yul med do/ / sngar 'das pa med do// phyir 'byung ba med do/ da ltar snang ba gang yang med do// las med do// bag chags med do// ma rig pa med do// sems med do// yid med do/ / shes rab med do// 'khor ba med do// mya ngan las 'das pa med do// rig pa nyid kyang yod pa ma yin no// ye shes kyi snang ba gang yang med do// de thams cad 'dzin pa med pa las byung ngo// kye ma nga rang byung gi ye shes la srog med pas/ / dge sdig gi mtha' las 'das pa'o// a ho// nga rang byung gi ye shes la bya byed med pas/ phyi yul dang nang sems las 'das pa'o// e ma ho// nga rang byung gi ye shes gzhi las ma g.yos pas/ / snang ba'i rtog pa chod pa'o// a a/ nga rang byung gi ye shes la 'du 'bral med pas// sku mngon par snang ba nyid do// ha ha// nga rang byung gi ye shes la gzigs snang gi mtha' dang bral bas yul kun las 'das pa nyid do/ / e hA// nga rang byung gi ye shes la rtsis med pas gzung 'dzin las 'das pa nyid do// a A+e// nga rang byung gi ye shes la phyi nang gnyis dang bral bas skyon dang yon tan las 'das pa'o/ / e A/ nga rang byung gi ye shes la 'khrul pa ka nas dag pas/ yin min gyi mtha' las 'das pa'o// ha he/ nga rang byung gi ye shes la chos med pas thabs las 'das pa nyid do// e ha/ nga rang byung gi ye shes la 'gyu byed med pas shes rab las 'das pa'o// e ma ho// nga la stong pa dang snang ba ma spangs par rdzogs pa'o// nga nyid la gnas lugs dang snang thabs gnyis ma spangs par rdzogs pa'o/ / nga nyid la yul sems gnyis ma spangs par rdzogs pa'o// nga nyid la srog dang gcod pa gnyis ma spangs par rdzogs pa'o// nga nyid la sdig pa dang rnam smin gnyis ma spangs par rdzogs pa'o// nga nyid la bdag dang bdag gir 'dzin pa gnyis ma spangs par rdzogs pa'o/ / nga nyid la rtog pa dang dngos po gnyis ma spangs par rdzogs pa'o// nga nyid la mthong ba dang spyod byed gnyis ma spangs par rdzogs pa'o/ / nga nyid la shes pa dang 'dzin byed gnyis ma spangs par rdzogs pa'o// nga nyid la byed pa dang 'dzin byed gnyis ma spangs bar rdzogs pa'o// kye ma nga la skye dang 'chi ba med pas// 'gags pa'i chos nyid yongs su rdzogs/ / nga la phyi dang nang med pas// gsal ba'i chos rnams yongs su rdzogs// nga la stong dang dngos med pas// snang ba'i chos ni yongs su rdzogs// nga la dmigs pa'i yul med pas/ / mthong ba'i chos ni yongs su rdzogs// nga la lus dang sems med pas// rang snang chos ni yongs su rdzogs// nga la bdag dang gzhan med pas// rig pa'i chos lnga yongs su rdzogs// nga la byed pa'i rgyu med pas/ / bsam gtan chen po yongs su rdzogs// nga la phyin pa'i yul med pas// rang snang yul ni yongs su rdzogs// nga la phyogs dang ris med pas// gsang ba'i ye shes yongs su rdzogs// nga la snang ba 'gag med pas/ / dbyings kyi chos gsum yongs su rdzogs// nga la gcig dang gnyis med pas// thig le'i chos rnams yongs su rdzogs// nga la mun dang snang med pas// mngon par snang ba'i chos rnams rdzogs/ / nga la bdag rtog gnyis med pas// stong pa'i chos ni yongs su rdzogs// nga la dri ma gnyis med pas// gsal ba'i cha lnga yongs su rdzogs// nga la sku lnga rang snang bas// zhing khams thams cad yongs su rdzogs/ / nga la spro zhing bsdu med pas// yi ge'i don rnams yongs su rdzogs// nga ni 'gran ba'i zla med kun las rgyal ba yin// nga ni bcos pa'i tshig med kun las 'phags pa yin// nga la mthong ba'i yul med kun la khyab pa yin/ / nga la gnas pa'i sa med kun la brten pa yin// nga ni stong pa'i sems med kun las mtshon pa yin// nga ni dran pa'i yid med kun la 'jug pa yin// nga ni re ba nyid med kun la yangs pa yin/ / nga ni g.yang sa med cing kun la 'phro ba yin// nga ni 'khrul pa'i yul med snang ba chen po yin// nga ni spyod pa'i rgyu med kun la spyod pa yin// nga ni phyin pa'i gnas med kun las pha rol phyin/ / nga ni bya byed gnyis med snang ba so so pa'o// thams cad 'byung zhing 'khrul snang nga yi sems// thams cad gnas pas 'khrul snang nga yi thugs// thams cad snang bas 'khrul snang nga yi sku// thams cad grags pas 'khrul snang nga yi gsung/ / mthong ba ma 'gags nga yi gzugs ltar snang// thos pa ma 'gags nga yi sgra ltar grags// snom byed ma 'gags nga yi dri ltar tshor// myong byed ma 'gags nga yi ro ltar bda'/ / tshor byed ma 'gags nga yi yid ltar mgyogs// gsang ba'i nyon mongs nga yi cho 'phrul te// sangs rgyas sems can nga yi dur sa yin/ kun byed nga ni snang ba rang gsal cha// snang ba med pa thog ma'i dus kyi tshe/ / gcod byed mgyogs pa'i yid drug ma 'gags pas// dran byed ma 'gags tshogs drug lhug par shar// thogs pa med pa'i rlung lnga bskyod pa yis// pho brang ma bkod snang ba rgya yis btab// ye nas dag pa'i sku lnga 'du 'bral med/ / thabs la zhen med snang ba lhug par 'char// chags pa med pas sku lnga phyi nang med// yangs chen dag pa'i sku lnga rang mnga' bas// stong pa nyid kyi snang ba rang shar bas/ / phyin pa med pa'i gnas su pha rol phyin// stong pa chen po'i spyod yul rang gsal bas// rtog pa med pa'i sangs rgyas nyag gcig mthong// byas pa ma yin 'khor ba'i gdos thag bcad// sangs rgyas pas kyang sku gcig gcig gis brgyan/ / ye shes las ni khyad par chen pos 'phags// kye ma/ bsad bcad las la dga' na snang ba chen po gsal// sems can thams cad bsgral na rang snang ma dang phrad// rgyu 'bras rtsad nas bcad na rgyu drug rtsal gsum 'byongs/ / dge ba'i rgyun thag bcad na lu gu rgyud dang nye// phyi nang bya ba btang na snang ba rgya yis theb// sems 'dzin lta sgom med na chos sku dngos po yin// lta ba'i rtsal gsum 'byongs na snang ba sku yi klong/ / bya byed g.yeng ba med na chos nyid bde ba'i sa// gcig pur dal bar 'dug na rtsal gsum lus la 'byung// thad ka grogs su shes na cog bzhag gcig gi ngang/ / de dang rgyun du gnas na de la ci zhig bya// snang ba chen po kun la yang dag gnas// gsang ba sngags kyi dngos po de nyid do// zhes yi ge med pa'i rgyud gsang ba nyid las/ rjes su gleng gzhi'i le'u ste dang po'o/ //// de nas rig pa'i rang bzhin gang yang ma 'gags par gsal ba'i dgongs pa la snyoms par bzhugs so// de nas med bzhin du snang ba'i bdag pos 'di skad ces zhus so/ / kye ma rig pa'i sku rnam par dag pa chen pos/ yang dag par rdzogs pa'i sangs rgyas kyi rig pa'i dgongs pa'i bzhags chen po gsung du gsol/ zhes zhus so// de nas gnas lugs kyi rig pas/ snang ba thabs kyi 'khor la bka' stsal pa/ kye ma/ snang rgyud med kyang snang ba'i 'khor rnams nyon cig ngs sgrib phyogs kyis ma bsgribs pa'i snang ba nyid bstan gyis/ shin tu snang ba'i don la ma yengs bar nyon cig rtsa ba'i dgongs pa chen po ni/ grangs ni bzhi yis gtan la phebs par 'gyur ro// de yang 'di lta ste/ rig pa ye shes su ma nor bar bstan pa/ mi 'gyur ba rtsa ba'i lung chen po/ yangs pa chos nyid kyi snang ba chen po/ dgongs pa chos nyid kyi stobs chen po/ lta ba rang byung gi 'gros chen po/ mi 'gyur ba'i gzer yig chen po/ brtags par dka' ba'i 'phyongs chen po/ blta bar dka' ba'i me long chen po/ bgrod par dka' ba'i lam chen po/ gnas bar dka' ba'i yul chen po/ phyin par dka' ba'i sa chen po/ med bzhin du snang ba'i snang ba chen po/ gting med pa'i dpag par dka' ba chen po/ khyab pa med pa'i ye gdangs chen po/ shes pa chen po la gcod byed chen po/ yul rig gnyis su med pa'i dgongs pa chen po/ bems po med pa'i snang ba chen po/ mi 'gyur ba'i ye shes gsal ba chen po/ phra ba la bzung bar dka' ba chen po/ che ba la mthong ba med pa chen po/ zlum la dbyibs med pa chen po/ 'khyug pa la dbugs med pa chen po/ gsal ba la mdog gnag pa chen po/ med pa la gnyen po chen po/ snang ba la brtags dka' ba chen po/ stong pa la snang ba chen po/ gcig pa la rgya ma chad pa chen po/ gnyis ltar snang ba la yongs su rdzogs pa chen po/ mdzes pa la rgyan med pa chen po/ gang ba la stong pa chen po/ smin pa la ma rdzogs pa chen po/ sku ltar snang ba la 'gro 'ong med pa chen po/ e ma ho// shin tu gsang ba'i dgongs pa chen pos/ rang rig 'dug tshul gyi de bzhin nyid la gnas par bya ste/ thig le nyag gcig ye shes kyi gnas lugs chen po ni/ gang gi phyogs su bltas pas grub pa med pa nyid do// de yang rigs kyi bu grong khyer chen po las 'das te/ nags kyi klong chen po'i dgon par gnas par gyis shig phyi nang gi bya ba dang bral bar byas te/ lta ba'i 'khyer so chen po bzhi po 'di dang ma bral na// sangs rgyas kyi bden pa dang ma bral bar bar do med par skad cig ma la 'tshang rgya'o// thugs rje'i sgo ma 'gags par sprul pa chen po phyogs bcur mdzad do/ / de yang 'di ltar shes par bya'o// ri bo cog bzhag gi lta ba dang/ rgya mtsho cog bzhag gi dgongs pa dang/ rig pa cog bzhag gi man ngag bstan pa dang/ snang ba cer bzhag gi thabs bstan pa'o/ / e ma ho// sangs rgyas chen po'i mdzad spyod ni// cog bzhag bzhi las g.yo ba med// sangs rgyas nyid kyi mdzad pa ni// de las med pa rang gis bstan/ a aHri bo cog bzhag lta ba gsang ba nyid/ / the tshom yod pa ma yin 'gyur ba ngang gis med// de yang nam mkha' nyid kyi ngang la rnam par gsal// don gyi ngo bo de nyid la// byas pa ma yin byed mkhan ga la yod// bcos pa ma yin bcos pa'i bdag po med/ / lta ba ma yin lta byed chos dang bral// mthong ba ma yin mthong byed rnam par gsal// snang byed ma yin snang ba'i phyogs dang bral// bri ba ma yin thogs med phyogs bcur khyab// rtsol ba ma yin rtsol bsgrub chos dang bral/ / gcig pu ma yin du ma'i chos dang bral// phyi nang med pas phyi nang med par gsal// blta bya ma yin rtag chad gnyis las 'das/ de la blta ba med pas de la blta ru med/ / lta ba'i don las mi 'da' lta ba ngang gis med// de yod ma yin de yi ngang du gnas par bya// e A+eH/ rgya mtsho cog bzhag dag gi dgongs pa ni// snang ba ma yin snang bar byed pa min// stong pa ma yin stong par yod ma yin/ / gsal ba ma yin gsal ba chen po'i yul// bying ba ma yin rgod pa ngang gis med// ma g.yos mi g.yo g.yo bar mi 'gyur te// ma spyod mi spyod spyod pa kun las 'das/ / byas par ma byung bzhag thabs chen po ltos// spro bsdu ma byed cog bzhag gcig gi ngang// gnas pa ma yin de las 'das pa med// gsang ba'i ye shes rgya mtsho lta bu la// ye shes lhun 'byams ma bskyod dbyings su zhog/ gting dpag dka' ba'i rgya mtsho chen po nas// nub pa med pa'i rgyal mtshan rtse la ltos// stong pa'i sems med ma bcos chen po'i sku// byas pa med pas byed pa kun las rgyal// ye nas ma bcos rang byung cog bzhag nyid/ / snang ba ma bsgyur blo yis ma bcos pa// chos nyid mkha' la gnas na dgongs pa nyid du bstan// chos sku ye shes bsam pa kun spang ste// 'gyu byed med na bsgom pa'i dgongs pa yin/ / dmigs pa'i phyogs dag mi 'dzin na// rgya mtsho'i gting du gza' skar shar ba bzhin// 'dzin med gsal cha ma 'gags pas// dgongs pa'i 'dug tshul de bzhin no// A+oM A+oM A+oM/ rig pa cog bzhag man ngag nyid/ / 'di ni gsang ba'i thug sa yin// mig ni rab tu mnan bya ste// de dang 'du 'bral med par brtag/ mig zur gnyis la dbyings 'byung bas// 'od ni phra la 'khril ba 'byung// de las ngo bo lu gu rgyud ltar 'byung/ / phra dang 'khyug dang 'gyu ba'o// mig ni nam mkha'i khams su blta// sangs rgyas sku yi thig ler 'char// de nyid goms pa'i drod rnyed nas// rig pa'i sku ni lu gu rgyud// sku dang bcas pa snang ba'o/ / snang ba gcig chod dgongs pa ni// rig pa nyid ni bzhag sa btsal// gsang ba'i gsang ba chen po ste// snang ba stobs kyi pha rol sgrol// chags pas ma bcings rang snang ngo// de la gsang sngags nyid kyi sku/ / lu gu rgyud du rab tu gsal// lnga lnga zung gis kun la khyab// sna tshogs par yang 'char bar bshad// rig pa'i snang ba thabs mkhas bras// gsang sngags lam ni sna tshogs pas// sangs rgyas sku ni sna tshogs pa'o/ / 'khrul rtog blo ni bsam mi khyab// dmigs pa'i yul nyid rnam dag pas// mtshan ma'i chos ni brjod las 'das// snang ba'i rkyen lnga 'od du gsal// phra rags rim pa gnyis med de// rig pa'i ye shes sku yi klong du thim/ / 'gag med 'od lnga yul snang nyid// gzugs sku'i bsam bcas nyid du bstan// nga nyid rig pa rang snang bas// rig pa'i ye shes khyab gdal bas// snang ba chen po gsal ba rab tu che/ / gsal ba'i rig pa nga yi sku ltar snang// blo yi bye brag brjod 'das shing// chos kyi sku la bsam pa med// ye shes sku gcig kun tu gsal bar ston// gsang ba'i ye shes rang yin pas// chags med gsung gi dkyil 'khor che/ / cog bzhag nyid du thams cad chub// gsal ba'i ye shes nga yi klong// rig pa'i gsal cha phyogs bcur 'phro// gcig brjod du ma med par rig/ chos nyid ye nas stong par gnas/ / cog bzhag o yi dgongs pa nyid// lta ba de ltar gnas pa'o// u u// snang ba cer bzhag thabs chen ni// snang ba chen po kun gyi gzhi ma yin// 'byung ba lnga yi sangs rgyas pha ltar snang/ / chen po lnga nyid ma yin snang bar gsal// ma yengs ngang du 'dzin med chen por zhog/ gsang sngags chen po'i ye shes chen po lnga// chen po lnga yis ma bskyod dbyings su zhog/ rdo rje sems dpa'i rig pa cog bzhag ni/ / chos kyi sku ni snang ba thams cad bstan// ye shes dag pa'i snang ba cir snang bas// gsang ba'i bzhag thabs cer bzhag thabs kyi ngang// sku yi snang ba 'byung lnga ma spangs pas// spang ba ma yin ngang gi don la zhog/ chos nyid klong yangs cer snang chen por brtags// rdzogs pa chen por bsgom rgyu ma dmigs te// lta ba'i 'du sa chen mo dbyings kyi sgron ma yin// bsgom pa'i bskyal sa lu gu rgyud du bstan/ / spyod pa'i spyod sa chen po de dang ma bral na// rnam gsum ngo bo nyid de yin par gsungs// sangs rgyas dgongs pa byar med chen po'i klong// de las ma 'das chos nyid bsgrub tu med// de dang ma bral gsang sngags lta ba'o/ / zhes yi ge med pa'i rgyud gsang ba chen po las/ dgongs pa bca' gzhi'i le'u ste gnyis pa'o// u0f7fbrkyamat+ya/// de nas rig pa mi 'gyur ba'i klong/ chos nyid kyis brgyan pa'i pho brang nas/ rig pa 'gyur ba med pa'i ye shes kyi/ 'od kyi sku chen pos 'di skad ces smras so// e ma ho// rang bzhin gyi snang ba rnam par dag pa chen po'i yul 'di ni/ gsal la 'tsher ba sku'i pho brang mi 'gyur bar gnas pa'o/ / 'khrul ba gdul bya'i snang ba 'di ni/ rig pa mtha' yas pas/ 'dzad pa med pa'i thugs rje sna tshogs par 'byung ba'o// chos nyid yangs pa'i snang ba ni gsal la dngas pa/ ye shes med pa'i gcig las du mar 'char ba'o/ / gsang ba'i yul snang ba'i snang ba chen po ste/ sku yi snang ba chen po sna tshogs pa nyid de/ gsung 'gag pa med par don byed nus pa'o// sangs rgyas kyi sku'i 'od bsam gyis mi khyab pa ste/ thig le'i 'du 'phro zer ltar rab tu 'bar ro// gsang sngags chen po'i mdzad pa ma lus pa lus pa med cing/ so sor 'phro ba ste/ ye nas bzhag thabs bzhi dang 'du 'bral med pa'o// e ma ho/ / gsang sngags nyid la gsang sngags nyid gnas pas// ye shes nyid las ye shes chen por 'gyur// chos nyid ma las dkyil dang 'khor du snang// skye ba med pa'i mngon sum sangs rgyas kyis// yul med rnam par dag pa'i snang ba mthong/ / sku dang ye shes rang chas ngang gis med// stong pa nyid las ye shes thugs 'od 'bar// mun pa ma yin snang ba chen po'o// de nas mi snang ba'i snang ba chen pos/ rig pa'i sku lu gu rgyud du snang ba nyid la 'di skad ces gsol to// kye gsang ba'i rig pa 'od dang bcas pa/ bdag cag rnams la gsal ba'i snang ba bstan du gsol/ zhes zhus so// de nas rig pa mkha' khyab kyi yul chen po nas/ 'di skad ces gsungs so// kye ma/ snang ba'i 'khor rnams rab tu nyon cig ng yang dag pa'i rig pa nyid la 'khrul pa med de/ de gang zhe na/ rig pa lu gu rgyud kyi sku nyid/ sngar 'khrul ma myong/ da lta 'khrul ba med/ phyis 'khrul ba mi srid do// de'i phyir na ma mkhrul ba'i sangs rgyas so// dbyings rnam par dag pa'i sgron ma nyid kyang sngar ma byas/ da lta mi byed/ phyis byed par mi 'gyur ro// de'i phyir na ma byas pa'i chos zhes bya'o/ / ma bcos pa'i mchog chen po// ma bslad pa'i gzhi chen po/ ma bsgyur ba'i snang ba chen po// chen po gsum gyi bdag nyid dang ldan pa ni/ ma 'khrul ba'i sangs rgyas ma byas pa'i chos bstan pa zhes bya'o/ / rig pa rdo rje lu gu rgyud kyi sku de nyid ni/ sngar 'khor ba na gnas ma myong/ da lta 'khor ba na gnas mi srid/ phyis 'khor ba na gnas pa ma yin no// dbyings rnam par dag pa'i sgron ma de nyid ni/ sngar sems can nyid dang bral ma myong/ da lta sems dang bral mi srid/ phyis 'bral bar mi 'gyur ro// de'i phyir na snang ba med pa las/ snang ba shar ba'o// rig pa rdo rje lu gu rgyud kyi sku de nyid/ sngar sangs rgyas ma myong/ da lta sangs rgyas mi srid/ phyis 'tshang rgya bar mi 'gyur ro// dbyings rnam par dag pa'i sgron ma de nyid/ sngar sems can la gnas ma myong/ da lta gnas mi srid/ phyis gnas par mi 'gyur ro/ / de'i phyir na lung bstan du med pa la/ man ngag mtshon du yod pa zhes bya'o// e ma ho// sangs rgyas dang sems can gnyis ni/ sngar rgyab gyes ma myong/ da lta gyes mi srid/ phyis gyes par mi 'gyur ro/ / de'i phyir na lung la 'khrul pa med pa la/ man ngag la 'khrul pa byung ngo zhes bya'o// sems can thams cad 'khor ba na gnas kyang/ 'khor ba nyid sngar mthong ma myong/ da lta mi mthong ngo// phyis mthong bar mi 'gyur ro/ / de'i phyir na chos nyid la rtog pa yod kyang/ gang zag la rtog pa med pa zhes bya'o// yang dag par rdzogs pa'i sangs rgyas rdo rje'i sku nyid/ sngar ma rtogs/ da mi rtogaphyis rtag par mi 'gyur ro/ / de'i phyir na sangs rgyas la rtog pa med kyang/ snang tshul la rtog pa zhes bya'o// sangs rgyas dang sems can la dus chen po med par bstan pa'o// rig pa'i gnas lugs de nyid la/ 'khrul pa med kyang/ snang thabs la 'khrul pa ltar snang ba'o// de'i phyir na sangs rgyas dang sems can gnyis gcig las ma g.yos pa zhes bya'o// e ma ho// dgongs gcig mkha' klong gnyis su med// gsang sngags rdo rje sems dpa' rig pa'i sku/ / rtag pa ma yin chad pa yongs kyis med// stong pa ma yin gsal ba ngang gis med// rgyu mthun ma yin snang ba rang sar dag/ byung tshul ma yin byung tshul yongs su rdzogs// bskyed tshul ma yin snang tshul gnyis su snang/ / chos nyid ming dang yang dag nyid du bral// dag pa'i nam mkha' ngos bzung kun las 'das// a yi snang ba skye med ngos gzung med// gnyis med dag pa'i ye shes mkha' la gsal/ / bya byed ma 'gags dmigs pa yongs kyis med// rang bzhin med pas me long gzugs brnyan 'dra// ma 'gags 'gag med kun gyi snying por gnas// gsang ba'i gnas lugs de bzhin no// kye kye/ sku yi snang ba ma 'gags pas// gsung gi rol pa cir yang ston// thugs kyi mdzad pa ci yang mdzad// rig pa'i bya byed ma 'gags pas// sems kyi rtog pa sna tshogs pa'o// zhes yi ge med pa'i rgyud chen po las/ ma 'khrul pa'i rig pa nyid la/ ma byas pa'i chos bstan pa'i le'u ste gsum pa'o//// ta/ maTakaH// de nas yang rgyud byas pa med pa'i rig pas/ lung byed pa med pa'i kun tu bzang mo la bka' stsal pa/ de'i tshe thabs 'gag pa med pa'i snang ba'i rna bas nyan pa/ kye kye/ snang rgyud dmigs pa dang bral ba'i ye shes chen po dang ldan pa/ rdo rje lu gu rgyud kyi sku ni grangs med pa'i snang ba chen po ste/ sku dang/ thig le dang/ thig le'i phyed sku dang/ ye shes dang/ ye shes kyi gzugs sku dang/ 'od dang 'od kyi 'phro 'du dang/ dbugs med pa'i 'gyu ba dang/ sems med pa'i sna tshogs dang/ srog med pa'i sku dang bcas pa'o/ / dbyings kyi sgron ma dag pa 'di lta ste/ khyab pa med pa'i rang gdangs dang bcas pa/ yul med pa'i gsal cha dang bcas pa/ ma byas pa'i ra ba dang bcas pa/ ma bris pa'i mu khyud dang bcas pa/ ma bcad pa'i yul dang bcas pa/ ma bkod pa'i snang ba dang bcas pa'o// de yang dbyings dang rig pa 'du 'bral med par gnas te/ ma dmigs pa'i yul snang ba chen po ste/ dri ma'i phyogs med pa las/ de'i ngo bo rgyu sangs pa/ rkyen dag pa/ yul ma 'gags pa/ rang grol ba/ rang gi ngo bo dang bcas pa/ yul drug las 'das pa/ chen po lnga dbyings su dag pa/ mi 'jig pa/ rkyen med pa las/ rkyen gyis grol ba/ bltar med pa la ngo mtshar che ba/ phyogs med pa la lta byed ma 'gags pa'o// kye ma/ snang ba la sku bsam gyis mi khyab pa 'byung ngo// du ma'i tha snyad spangs pa med pa'i klong du chub pa'o// sangs rgyas kyi sku rab tu mang bar 'phro zhing tshugs pa med pa'o/ / ngo bo las ma g.yos bzhin du sna tshogs ston pa'o// 'khor ba las ma 'das par mya ngan las 'das pa'o// chos kyi sku'i snang ba las ma g.yos pa'o// kun tu snang zhing zil gyis mi gnon pa nyid do/ / rig pa'i sku ni gsal cha snyoms pa chen po yin te/ rdo rje sku'i snang ba rgya che ba mthong bar 'gyur te/ nga ni byed pa nyid las rab tu 'das pa'o// zhes yi ge med pa'i rgyud gsang ba chen po las/ don dam pa snang ba'i le'u ste bzhi pa'o////// de nas yang yul med pa'i klong dag pa las/ snang ba'i phung po bsam gyis mi khyab pa dang bcas te/ thabs kyi rig pa/ stobs kyi shes rab la bka' stsal pa/ mi mnyam pa'i mkha' klong dag pas rab tu nyan no// kye kye/ snang ba 'di'i mtshon tshul la/ yi ge med cing tshig thams cad las 'das pa'o// brjod pa thams cad ngang gis med pa ste/ sna tshogs pa'i mtshon pa ngang gis med pa/ yul med pa/ sems med pa/ yi ge med pa/ yi ge med pa'i phyir/ rgyud med pa/ lung med pa/ man ngag thams cad med pa/ tshig thams cad dang bral ba'o/ / brjod pa thams cad kyis stong pa'o// e ma ho// chos sku snang ba'i ka med pas// nga la yi ge yod ma yin// nga la skye ba nyid med pas// yi ge a ni ye nas med// nga la 'gag pa'i gnas med pas/ / yi ge oM ni ngang gis med// nga la 'du 'bral gnyis med pas// yi ge hU~M ni shin tu zad// sku yi snang ba sna tshogs pas// yi ge'i ming ni ngang gis stong// gsang sngags mtshan nyid rang gsal bas// yi ge'i dngos po ga la yod/ / sangs rgyas nyag gcig rang snang bas// mtshan ma'i yi ge gang yang med// rig pa nyid la rgyu med pas// bskyed pa'i yi ge ga la yod// ye shes sku lnga rang rdzogs pas// rdzogs pa'i a yang yod ma yin/ / thig le nyag gcig kun chub pas// spros pa'i yi ge'i ming yang med// snang ba ma 'dres yongs rdzogs pas// bsdu ba'i yi ge med par gsung// rig pa'i sku la dngos med pas// yi ge 'bru gsum yod ma yin/ / 'od lngas brgyan pa'i rig pa la// kha dog nyid du med pas na// yi ge'i kha dog yod pa min// zlum 'khyil lu gu rgyud nyid la// dby-ibs su snang ba med pa'i phyir// yi ge'i dbyibs su 'dod pa min/ / rig pa dngos dang dngos med pas// yi ge bdag 'dod yod pa min// rig pa'i sku la gnyis med phyir// yi ge'i gzung 'dzin ga la yod// rig pa gcig dang gnyis med pas// yi ge'i sa lam nga mi 'dod/ / rig pa'i snang ba rang rdzogs pas// yi ge'i tshogs gnyis ngas mi 'dod// rang rig dpe mtshon dngos med pas// yi ge'i dpe yis nga mi mthong// rig pa'i sku la dri med pas// yi ge'i dri mas nga mi bsgrib/ / rang rig dge dang sdig med pas// yi ge'i dge sdig gnyis las 'das pa'o// e ma ho// yi ge med pa'i chos nyid dag pa la// yi ge'i sgyu rtsal gnyis su btags pa yod ma yin// yi ge'i rgyu ni sna tshogs rab ston pas/ / yi ge nyid la don med yi ge'i don gang med// nga yi rig pa chos la ma brten pas// yi ge'i don gyis nga yi sku mi mthong// thog ma'i rang byung ye shes nyid// rgyu rkyen gnyis la ma ltos par/ / yi ge rgyu rkyen nga mi bsgrub// ye nas sku gsum rang rdzogs pas// yi ge'i tshogs la nga mi ltos// rgyud dang lung dang man ngag kyang// yi ge'i tshogs la brten pas na// rgyud dang lung gis nga la bsgrib/ / thog ma'i mgon po dri med nyid// 'gran zla med par sangs rgyas pas// yi ge'i don la nga mi gnas// rang byung rig pa'i rgyal po nyid// sgro 'dogs tshig la ma brten pas// tshig dang yi ge nga yi dug/ dang po byung sa chen po la// tshig gis byang chub mi rnyed pas// yi ge'i mtshan nyid nga la med// bar du grol sa chen po la// re dang dogs pa gnyis med pas// yi ge'i spang len gang yang med// rig pa'i rnam pa grangs mang bas/ / bzhi bcu rtsa gnyis yi ge yang// don dam nyid la yod ma yin// sku lnga 'od kyi dkyil 'khor nang// btags pa'i yi ge gcig kyang med// nga yi snang ba dag pa las// gsal 'gyur yi ge ngang gis med/ / gsang ba'i rig pa lhun rdzogs la// yi ge'i ming ni gcig kyang med// gsang sngags a ti'i snang ba la// mtshan ma'i yi ge yod ma yin// a ti rang rdzogs chen po la// 'khrul pa'i yi ge med pa'o/ / zhes yi ge med pa'-i rgyud gsang ba chen po las/ rdzogs chen tshig gis gol bar bstan pa'i le'u ste lnga pa'o//// de nas yang snang ba chen po rang bzhin gsal ba'i snang ba las/ / chos nyid 'du 'bral med pa'i rig par bzhengs te/ snang ba'i rgyan kun tu bzang mo la bka' stsal pa/ kye/ brda' dang yi ge dang tha snyad thams cad rab tu spangs te/ rang gi sku'i snang ba la rab tu ltos shig phyi'i longs spyod thams cad la ma chags par/ grogs med pa'i nags khrod dag tu/ de nyid la gnas par gyis shig stong pa phyogs med pa'i snang ba de nyid la ltos shig shin tu gzung bar dka' ba dag gi gzhi gzung bar 'dod na/ rig pa rdo rje lu gu rgyud kyi sku zung zhig skye shi med pa'i dbyings gcig tu 'dril bar 'dod na/ dbyings rnam par dag pa'i sgron ma de nyid la ltos shig grogs med par gcig pur 'dug par 'dod na/ snang ba cer bzhag gi dgongs pa dang ma bral bar gyis shig baltar med pa'i sku la lta bar 'dod na/ gcig pu thig le'i gnas su ri bo cog bzhag gi man ngag la mtha' bsdus shig rkang pa med par mkha' la 'gro bar 'dod na/ rig pa cog bzhag gi man ngag la rtsal sbyong zhig phyi nang med par zang thal bar 'dod na/ rgya mtsho cog bzhag gi dgongs pa la rtag tu gnas par gyis shig zang thal gcig rdzogs kyi dgongs pa thob par 'dod na/ cog bzhag bzhi'i don nyid las ma 'da' zhig 'akhrul snang zhing khams su 'char bar 'dod na/ sgron ma'i dbyings rig gnyis dang ma bral bar gyis shig de ni skye ba med pa'i thabs mchog tu gsungs so/ / e ma ho/ dngos po med pa'i snang ba ngo mtshar che ba ste/ rags pa'i 'byung ba lngas bsgribs te/ lung med pa la snang ma nus so// rig pa rang snang gi snang ba de ni/ lhun brjid de/ phra ba'i nyon mongs pas bsgribs te rtag ma thub pa'o// chos nyid ma bkod pa'i snang ba gsal dngas te/ sna tshogs du ma'i spyod pas bsgribs nas mngon sum du med pa'o// de yang rig pa'i ngo bo bzung bar dka' yang/ ye shes kyi rtsal dal bas 'grub/ rig pa'i dbyings mi 'gyur yang/ rig pa'i rkyen stobs zad pas 'grub/ rig pa'i rang bzhin kun la khyab kyang/ chos kyi sku'i gdams ngag la thug go/ zhes yi ge med pa'i rgyud gsang ba chen po las/ rdzogs chen zhal chems su bstan ba'i le'u ste drug pa'o//// gnas lugs kyi rig pas snang thabs kyi 'khor la smras pa/ gsang ba yi ge med pa'i rgyud chen po/ rin po che rgyal mtshan gyi rgyud/ rgyal po'i gdung rgyud/ blta ba nam mkha' dang mnyam pa'i rgyud chen po rdzogs so//// sa ma ya/ rgya rgya rgya/ 'grel ba pad+ma kha 'byed bya ba dang/ / bshad pa'i mig 'byed bya ba yod// yi ge med pa nyid la ma bu lnga//// rgya gar skad du/ sarba ta thA ga ta sa mA d+hi pa ru b+hA ShA/ dz+nyA na sa mu dA ya su tra/ ma hA yA na guh+yA nu t+ta ra tan+t+ra/

CLOSE WINDOW