rig pa'i bag chags dang chos kyi dbyings thog ma dang tha ma med pa'i ngo bo de yang ma rig pa'i bag chags su gyur pa ni gla rtsi la sogs pas bsgos pa bzhin te/ dngos po rnams kyi chos nyid ni de lta bu'o/ /de bas na bdag dang gzhan la phan pa phun sum tshogs pa'i gzhir
gyur pa yin no/ /gzhan yang dge ba'i bshes gnyen dang phrad cing lam bzang po rnyed pas ma rig pa'i bag chags glo bur ba ring du byas shing yongs su dag par gyur pa ni gser dang zangs kyi dri ma dang bral ba bzhin te/ 'di la yon tan dang nyes pa len cing spong ba yod pa yin no/ /de ci'i phyir zhe na/ /
yang dag pa'i don rtogs pa kho na tsam du zad de/ de'i phyir/ 'di la bsal bya ci yang med/ /gzhal bar bya ba gang yang med/ /yang dag nyid la yang dag lta / /yang dag mthong na rnam par grol/ /zhes gsungs pa gang 'di ltar rkyen dang ldan pa ni kun nas nyon mongs par thal bar 'gyur gyi
ma skyes pa skye bar ni ma mthong ngo / /skyes pa 'gag pa dag las kyang cung zad skye ba med de/ mya ngan las 'das pa ni mar me dang mtshungs so/ /gzhan yang khyad par du bya ba'i phyir/ dngos min dngos po med ma yin/ /zhes bya ba smos te/ dngos po ni gzugs su yod pa'o/ /de
med par gyur pa ni dngos po med pa ste/ gnyi ga las ldog par 'gyur bas na/ dngos min dngos po yod pa ma yin/ /zhes bya ba ste yod pa dang med pa dang dbus las 'das par gyur pa'o/ /de nyid kyis nam mkha' ltar ro gcig pa ste/ nam mkha' ltar zhes bya ba ni nam mkha' dang 'dra bar ro
gcig cing mnyam pa'i rang bzhin du gang gyur pa de ni nam mkha' ltar ro gcig ces bya'o/ /de nyid kyis na rtogs par dka' ba'i rang bzhin can te/ dngos po dang dngos po med pa gnyi ga dang gzhan las btsal ba dang bral ba nyid do/ /de bas na gos pa med pa ste/ 'dod chags la
sogs pa'i nyes pa'i dri ma dang bral ba nyid do/ /de nyid kyis na mi 'gyur ba ste rang gi ngo bo nyid la mi 'pho ba'o/ /zhi ba ni nyon mongs pa thams cad zhi bar gyur pa'o/ /mi mnyam pa ni mtshungs pa med pa'o/ /mnyam pa ni chos thams cad kyi gzhir mtshungs par gyur pa'o/ /khyab

71b - 72b