legs par spyan dbye gzigs/ /lus med mda' yis gzir ba'i skye bo bdag cag skyob pas kyang ni bsrung bar mi mdzad na/ /thugs rje ldan pa phyin ci log gyur khyod las mchog tu ma rung skyes bu gzhan ma mchis/ /phrag dog ldan pa bdud kyi bud med de skad smra yang rgyal
ba skyob pa byang chub gyur/ /gzhan yang 'dod dbang gis ni kun du gzhu bkang bdud gzhan lag pa myur pa pa Ta ha sgra 'jebs dang ldan/ /dpang po smin ma bskyod dang nyer g.yo lta bur sgeg dang 'dzum dang rol pa med rnams kyis/ /thub dbang skyob pa byang chub ma brnyes par
du bsam gtan las ni bskyod ma nus pa mthong gyur nas/ /ngo mtshar gyur pas pa spu langs pa'i lus kyis grub pa rnams dang yan lag mchog rnams 'dud/ /ral pa 'khrugs shing lce rnams g.yogs la kun du bltams pas gang gi thugs rnams 'khrul par ma gyur cing / /rab
gsal 'dod lha'i bdud rnams rtse mo mchog dag lag thogs glang po rta rnams gdong ldan seng ge dang / /stag gi gdong rnams rtswa bzhin grangs med gyur pa 'khor ba yis ni gang zhig bsnyengs bar ma gyur pa/ /de ni kun la gnong pa'i nam pa 'dres pa med par skyob pa sangs rgyas thub
dbang 'jig rten mgon/ /bdud btul ba la bstod pa/ rab dga'i lha'i zhal snga nas mdzad pa rdzogs so// @##/ /rgya gar skad du/ d+harma d+hA tu sta baM / bod skad du/ chos kyi dbyings su bstod pa/ 'phags pa 'jam dpal gzhon nur gyur pa la phyag 'tshal
lo/ /gang zhig kun du ma shes na/ /srid pa gsum du rnam 'khor ba/ /sems can kun la nges gnas pa'i/ /chos kyi dbyings la phyag 'tshal 'dud / /gang zhig 'khor ba'i rgyur gyur pa/ /de nyid sbyang ba byas pa las/ /dag pa de nyid mya ngan 'das/ /chos kyi sku yang de nyid do/ /
ji ltar 'o ma dang 'dres pas/ /mar gyi snying po mi snang ba/ /de bzhin nyon mongs dang 'dres pas/ /chos kyi dbyings kyang mi mthong ngo / /ji ltar 'o ma rnam sbyangs pas/ /mar gyi snying po dri med 'gyur/ /de bzhin nyon mongs rnam sbyangs pas/ /chos dbyings shin tu dri med 'gyur/ /

63a - 64a