na/ /las kyi bdag nyid can mi gsung / /nyi mas sa yi gzhi lta bur/ /'gro ba'i rang bzhin gsal bar mdzad/ /'jig rten las min 'bras mi spyod/ /rang gi nyon mongs kyis las bsags/ /dge dang mi dges 'dod mi 'dod/ /'bras skyed sa bon lta bu yin/ /chos kun yongs
su mkhyen pa dang / /nyes pa thams cad zad pa dang / /sems can kun la phan gyur pa/ /de dag thams cad de bzhin gshegs/ /zhes bya ba la sogs pa smos pa yin no/ /don 'di nyid rgya cher bstan pa'i phyir/ /gang la zhes bya ba la sogs pa smos pa yin te/ dpag tu med pa zhes
bya ba ni tshad med pa'o/ /thugs rje can zhes bya ba ni thugs rje chen po dang ldan pa ste/ de yang lha'i spyan rnam par dag pas 'jig rten ma lus pa la rgyun du rnam par gzigs par mdzad de/ de yang sangs rgyas kyi spyan gyis nyin dus gsum/ mtshan dus gsum du 'jig rten rnams la
gzigs par mdzad do zhes ji skad smos pa lta bu'o/ /de ltar thugs rje chen po dang ldan pas 'gro ba 'di dag sdug bsngal las gdon par mdzad cing / skyabs dang rten gyi dam pa yin pas de la skyabs su mchi zhing rten par byed do zhes bya ba'i don to/ /de ltar bstod pa de yongs su bsngo ba'i
phyir/ pad+ma zhes bya ba la sogs pa smos pa yin te/ sangs rgyas bcom ldan 'das de ni gzugs kyi yon tan phul du byung ba dang ldan pa'i phyir/ ut+pal sngon po kha bye zhing / 'dab ma rgyas pa ltar dkyus ring la mdzes pa'i spyan mnga' ba gang yin pa de la de skad ces bya ste/ gzugs
kyi sku'i dbang po'i mchog yin pa'i phyir/ spyan gyi mtshan nyid nye bar mtshon pa tsam du smos pa yin no/ /de 'ba' zhig tu ma zad kyi yon tan thams cad kyi gnas su gyur pa yang yin te/ ji ltar chu klung stong phrag du ma 'bab pa'i rten dang gnas ni rgya mtsho yin pa dang 'dra bar yon tan gyi bstod
pa'i chu klung brgya stong mang po 'byung ba'i gnas dang gzhi ni bcom ldan 'das yin la/ de lta bu'i bstod pa'i gnas su gyur pa de la tshul de ltar bstod cing bsngags pa brjod pa'i bstod pa'i tshig las/ bdag gis dge ba'i rtsa ba bskrun cing bskyed pa cung zad ci mchis pa'i dge ba'i rtsa

60a - 61a