'dra zhes bya ba ni sku gsum char gyi dpe ste/ 'gro ba rnams kyis ji ltar sems kyis dpags shing bsams pa ltar yid la re ba yongs su rdzogs par byed pas na lha'i dpag bsam gyi shing chen po rnam pa bzhi po dang 'dra ba ste/ bsod nams dpag bsam shing khyod de ring gang las
byung / /zhes bstod pa gsungs pa lta bu'o/ /de yang sku de dag gsum char yang sngon gyi smon lam gyi sa bon dpag tu med pa 'dzin pa'i rang bzhin du gnas pas/ sngon ji ltar smon lam btab pa bzhin du da ltar gdul bya'i don 'bad pa med par 'byung ba yin la/ khyad par du
gzugs kyi sku ni mthu thogs pa med par byang chub sems dpa' dang / nyi tshe ba'i gang zag dang 'gro ba yongs su smin par byed pa la dngos su yang 'jug go/ /kha cig na re gzugs sku zhes bya ba ni spyir bstan pa yin la/ mdzes skur ldan zhes bya ba ni longs spyod rdzogs pa'i
sku'o /dpag bsam 'dra zhes bya ba ni sprul pa'i sku'o/ /sangs rgyas zhes bya ba ni sku gsum char gyi dbang du byas pa'o zhes zer ro/ /de lta bu'i sku gsum po de dag la lus zhing gi rdul snyed du mos par sprul te phyag 'tshal lo zhes bya ba ste/ tshig gi don snga ma ji lta ba bzhin no/ /chos
nyid rgyu mthun gsung rab bcu gnyis dang / /zhes bya ba ni bstan pa'i chos la bstod pa ste/ chos nyid ces bya ba la chos nyid bdag rnam pa gnyis kyis dben pa stong pa nyid de/ bdag med pa dang bdag dang bral ba'i mtshan nyid 'dzin pa rang bzhin gyis 'od gsal ba'i spyi'i mtshan nyid don
dam pa'i ngo bo'o/ /de'i rgyu mthun pa bstan pa'i chos bdag med par ston pa'i gsung rab ste/ 'dir mthun pa'i rgyu ni rgyu mthun pa ste bskyed par rung ba dang / thob par nus pa'o/ /de la skyed par rung ba ni rgyu des phyin ci ma log par yongs su grub pa'i ye shes skyed pa'o/ /thob par
nus pa ni ye shes de skyes pas mi 'gyur ba'i yongs su grub pa de bzhin nyid de thob par nus pa'o/ /de dag ni rab tu phul du byung ba'i gsung yin pas gsung rab ste/ phyi rol pa'i tshig la ni snga ma lta bu'i rung ba dang / nus pa med pas rab ma yin no/ /bcu gnyis ni mdo'i sde dang / dbyangs

107a - 108a