sman 'di yin/ /'di ni lang tsho rnam 'khrul ba'i/ /rkang gnyis gzhon nu'i lcags kyo yin/ /mtsho bas zab pa'i 'khor ba las/ /sgrol ba'i rgal thabs 'di yin te/ /'di ni bzang 'gror 'gro ba yi/ /nges pa'i chu lon zam pa yin/ /'di ni
nyon mongs pham byed lam/ /rgyal po yi ni 'dren pa mchog /'di ni thar pa'i grong 'jug pa'i/ /them skas gzhi dang 'dra bar gnas/ /nga ni mya ngan 'das gyur na/ 'di ni khyed kyi ston pa'o zhes/ /rang byung nyid kyis gus bcas par/ /nan tan dge slong
tshogs mdun bstod/ /'dul 'di so sor thar pa de'i/ /rnam 'byed yin par dgongs pas na/ /thar 'dod rnams kyis gus byas te/ /'di ni nan tan mnyan par bya/ /'dul ba la bstod pa/ rdzogs s+ho// // bskal pa bye ba rnams su yang / /'dul
ba thos par 'gyur ba dang / /gzung dang 'dzin pa rnyed dka' ste/ /bsgrub pa 'ang shin tu rnyed par dka'/ /sangs rgyas rnams ni 'byung ba dang / /chos bstan pa yang bde ba yin/ /dge 'dun 'thun pa bde ba ste/ /'thun pa rnams kyi dka' thub bde/ /
'phags pa rnams ni mthong ba bde/ /dam pa dag dang 'grogs pa bde/ /byis pa rnams ni ma mthong na/ /rtag tu bde ba nyid du 'gyur/ /tshul khrims ldan pa mthong ba bde/ /mang du thos pa mthong ba bde/ /yang srid rnam par grol ba yi/ /
dgra bcom pa dag mthong ba bde/ /'jug ngogs bde ba'i chu klung bde/ /chos la goms pa'i skye bo bde/ /shes rab thob par gyur pa bde/ /nga 'o nga rgyal zad pa bde/ /des par byas shing dbang po thul ba dag /dgon pa zhi ba rnams
su rgas gyur dang / /mang du thos pa nags kyi nang dag tu/ /lang tsho yol ba rnams kyis gnas pa bde/ /shAkya seng ge de la ni/ /sor mo bcu yi thal sbyar te/ /'dul ba rab tu gdon par byas/ /gdul ba'i don du nga la nyon/ /thos nas drang srong chen
po yis/ /ji skad gsungs bzhin bsgrub bya zhing / /kha na ma tho phra rnams la/ /rtul cing byed pa nyid du gyis/ /rtag tu 'bad pas 'da' ba yi/ /sems rta kha glan dka' ba la/ /'thun pa gzer rnon brgya pa yi/ /srab ni 'dul ba 'di yin no/ /

22a - 23a