sdug bsngal tha mar byed par 'gyur/ / phan tshun tshul khrims bsrung ba dang / /bstan pa 'phel bar bya ba'i phyir/ /so sor thar pa 'di bton pas/ /dge 'dun gyis ni gso sbyong byas/ /gang gi phyir ni mdo bton dang / /gang phyir gso sbyong byas gyur pa/ /
tshul khrims de ni bsrung bya ste/ /g.yag rnga'i rtse mo ji bzhin no/ / so sor thar pa bton pa yi/ /bsod nams grub pa gang yod pa/ /des ni 'jig rten ma lus pa/ /thub dbang go 'phang thob par shog / so sor thar pa'i mdo rdzogs s+ho// //
dbang phyug dam pa'i mnga' bdag dpal lha btsan po'i bka' lung gis 'phags pa gzhi thams cad yod par smra ba'i 'dul ba 'dzin pa/ slob dpon dzi na mi tra dang / zhu chen gyi lo tsa ba ban de cog ro klu'i rgyal mtshan gyis bsgyur cing zhus te gtan
la phab pa'o// //@##/ / rgya gar skad du/ bi na ya bi b+hang ga / bod skad du/ 'dul ba rnam par 'byed pa/ bam po dang po/ dkon mchog gsum la phyag 'tshal lo/ /dul ba rgyal po rje yi rigs su 'khrungs/ /slob ma 'dul mdzad nyes pa
rab thul ba/ /sangs rgyas 'dul ba'i gtso la phyag 'tshal te/ /'dul ba'i bsngags pa cung zad brjod par bya/ /pha rol ma mthong gting rtogs ma gyur cing / /glags pa'i mun gnag slob dpon tshogs rnams kyi/ /dbye bas tha dad
'dul ba rgya mtsho la/ /yon tan kun bstod rtsol blo bdag la med/ /ji ltar 'di na shing rtsa gtso bo ste/ /rnam par 'phel dang kun 'dzin gnyis kyi gzhi/ /de bzhin dam chos tshogs rnams kun gyi yang / /rgyu dang rtsa ba 'dul ba yin par
gsungs/ /ji ltar sa ni skye rgu rnams kyi gzhi/ /de las 'bru rnams skye bar 'gyur ba ltar/ /de bzhin 'dul ba'ang sdom brtson rnams kyi gzhi/ /de bzhin de las bsod nams rnams kyang skye/ /tshul khrims yon tan rnams kyi gnas su
dgongs/ /de yi gnas ni 'dul ba yin par gsungs/ /'di la gnas par gyur na mthar phyin 'gyur/ /'di la mi gnas mthar phyin ga las 'gyur/ /ji ltar chu lon mi phyed sra ba yis/ /chu klung che yang zlog par 'gyur ba ltar/ /de bzhin 'dul ba 'phags pa

21a - 22a